དྲི་མ་མེད་པ་འོད་ཀྱིས་ཞུས་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། བི་མ་ལ་པྲ་བྷ་པ་རི་པྲཱིཙྪཱ། བོད་སྐད་དུ། དྲི་མ་མེད་པའི་འོད་ཀྱིས་ཞུས་པ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །གང་གི་ཚེ་སངས་རྒྱས་བཅོམ་ལྡན་འདས་ཀྱིས་ཟླ་བའི་སྙིང་པོ་ཞེས་བྱ་བའི་མདོ་བཤད་པའི་ཚེ་འཛམ་བུའི་གླིང་གི་ཡུལ་ཐམས་ཅད་སྲུང་མ་རྣམས་ཀྱི་ལག་ཏུ་སོ་སོར་གཏད་པ་ན། བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལ་བཞུགས་ནས་ལྷ་ཐམས་ཅད་བསྡུ་བའི་ཕྱིར་འོད་ཟེར་བཏང་ངོ་། །དེ་ནས་བཅོམ་ལྡན་འདས་ཀྱིས་དགོངས་པ་བསྐྱེད་མ་ཐག་ཏུ་ལྷའི་རྒྱལ་པོ་ཐམས་ཅད་འཁོར་དང་བཅས་པ་བཅོམ་ལྡན་འདས་ཀྱི་སྤྱན་སྔར་འདུག་གོ །དེའི་ཚེ་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། གནོད་སྦྱིན་གྱི་དབང་པོ་ཀུན་ཏུ་རྒྱལ་ལ་བོས་ཏེ་བཀའ་སྩལ་པ། རྒྱལ་པོ་ཆེན་པོ་དག་ངའི་བཀའ་ཆོས་དང་ལྡན་པ་བཞིན་གྱིས་ལ་རིམ་གྲོ་བྱོས་ཤིག །ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་ན། ལི་ཡུལ་ཞེས་བྱ་བ་ཞིག་འབྱུང་བར་འགྱུར་ཏེ། དེ་ཡོངས་སུ་བསྐྱང་བའི་ཕྱིར་ངས་ཁྱེད་ཀྱི་ལག་ཏུ་གཏད་དོ། །རྒྱལ་པོ་རྣམ་ཐོས་བུ་ཁྱོད་དང་། །རྫུ་འཕྲུལ་ཆེན་པོ་ཀུན་ཏུ་རྒྱལ། །ཀླུ་ཡི་རྒྱལ་པོ་མ་དྲོས་དང་། །བློ་རབ་བརྟན་པའི་ལྷ་ཡི་བུ། །ང་ཡི་ཚིག་ནི་མཉན་པར་གྱིས། །ཡུལ་འདི་རྒྱལ་བའི་དབང་པོ་ཡིས། །འདུལ་བ་ཡིན་གྱི་གཞན་གྱིས་མིན། །གང་དག་ངས་ནི་མ་བཏུལ་བའི། །སེམས་ཅན་དེ་དག་ལི་ཡུལ་འཁོར། །སངས་རྒྱས་ལུང་བསྟན་གྲོང་ཁྱེར་དུ། །སོ་སོར་སྐྱེ་བ་ལེན་པར་འགྱུར། །ང་ཡི་སངས་རྒྱས་བྱང་ཆུབ་ཕྱིར། །སྡུག་བསྔལ་ཆེན་པོ་མྱོང་བ་དང་། །སྨོན་ལམ་ཆེན་པོ་རབ་མང་བ། །བཏབ་པར་གྱུར་པ་གང་ཡིན་པའི། །བསོད་ནམས་ཀྱི་ནི་ཚོགས་དེ་ཡིས། །ཡུལ་འདི་ང་ཡི་ཕྱག་མཚན་གྱུར། །ཞི་བར་མྱ་ངན་ང་འདས་ན། །ཁྱེད་རྣམས་ལ་ནི་གཏད་པར་བྱ། །གང་ཚེ་ང་ཡི་བྱམས་པའི་ས། །ལི་ཡུལ་འདི་ནི་བྱུང་བ་ན། །འགུ་མ་ཏི་ར་གནས་མཛེས་དེར། །ཆོས་ཀྱི་རྒྱལ་པོའི་མཆོད་རྟེན་དུ། །བསྐལ་པ་བཟང་པོའི་སངས་རྒྱས་རྣམས། །དེ་ཚེ་འདིར་ནི་འདུལ་བར་འགྱུར། །ཡུལ་འདི་ཡོངས་སུ་བསྐྱང་བའི་ཕྱིར། །ང་ཡིས་ཁྱེད་ལ་

---

^{[མ་དཔེ་གཟིགས་ན་འདིར་གནོན།]}

བྱིན་པ་ཡིན། །དེ་ནས་རྒྱལ་པོ་རྣམ་ཐོས་བུས། །བཅོམ་ལྡན་འདས་ལ་གསོལ་པ་ནི། །འདྲེན་པ་སངས་རྒྱས་རྣམས་ཀྱི་བཀའ། །གཅིག་ཏུ་རུང་བ་མ་ལགས་ཏེ། །མཆོག་རབ་རྒྱལ་བས་བཀའ་སྩལ་པ། །ལས་འདི་ཤིན་ཏུ་དཀའ་བ་ལགས། །སྟོན་པ་བཅོམ་ལྡན་བཞུགས་བཞིན་དུ། །ཡུལ་དང་ལྗོངས་རྣམས་འཁྲུག་པ་མཆིས། །ཁྱོད་ཀྱིས་དམ་ཆོས་བཤད་ན་ཡང་། །ཡོངས་སུ་བསྲུང་བར་དཀོན་ལགས་ན། །སྟོན་པ་མྱ་ངན་འདས་པའི་ཚེ། །ལྷ་ཡིས་བོར་བའི་ཡུལ་དག་ཏུ། །ལྷ་ལ་སོགས་པ་སྲུང་བ་རྣམས། །བཀའ་བཞིན་མི་ཉན་ཇི་ཞིག་སྨོས། །བདག་ཅག་རྣམས་ལ་ཐུགས་རྗེས་མཛོད། །གང་ཞིག་ཐོས་ན་ལྷ་རྣམས་ཀུན། །ཁྱོད་ཀྱི་བཀའ་བཞིན་བགྱིད་འགྱུར་བ། །དེ་འདྲའི་ཆོས་ནི་བཤད་པར་གསོལ། །སངས་རྒྱས་དཔའ་བོ་རྣམས་ཀྱི་བཀའ། །དེ་ནི་ས་སྟེང་གཅོག་ཏུ་མེད། །སྐྱེ་བོ་གང་དུ་མ་བྱུང་བའི། །ལས་ནི་ཤིན་ཏུ་དཀའ་ལགས་ན། །བཅོམ་ལྡན་དེར་ནི་བདག་ཅག་གིས། །ཇི་ལྟར་ཡོངས་སུ་བསྲུང་བར་བགྱི། །སངས་རྒྱས་རྣམས་ནི་དུས་གསུམ་གཟིགས། །ཀུན་མཁྱེན་ཡེ་ཤེས་སྤྱན་དང་ལྡན། །རྒྱལ་བ་སྐྱེས་མཆོག་དེ་ཡི་ཕྱིར། །ལས་འདི་བདག་ཅག་མཆིས་ཀྱིས་འཚལ། །དེ་ཕྱིར་གཏད་པ་མནོད་པར་བགྱི། །རྒྱལ་བས་སྔར་ནི་བཀའ་སྩལ་པའི། །ལས་ནི་ཇི་ལྟར་བགྱིད་འགྱུར་བ། །དེ་ལྟར་བྱིན་གྱིས་བརླབ་པར་གསོལ། །རྒྱལ་བས་ལུང་བསྟན་གྲོང་ཁྱེར་དུ། །རྒྱལ་བས་སྔོན་ནི་ལུང་བསྟན་པའི། །བྱང་ཆུབ་སེམས་དཔའ་རྣམས་དང་ནི། །གཟུགས་བཟང་སྡོམ་པ་འཛིན་པ་ཡི། །དགེ་སློང་བརྒྱ་ཕྲག་གསུམ་དག་དང་། །དགེ་སློང་མ་ནི་ཉིས་བརྒྱ་འབྱུང་། །སྡིག་པའི་ལས་རྣམས་གང་དག་གིས། །སྔོན་ནི་སྨོན་ལམ་བཏབ་གྱུར་ཅིང་། །སྡིག་བྱེད་ཕྱོགས་ནི་ལྔ་བརྒྱ་པོ། །དེ་དག་རྣམས་ཀྱང་འབྱུང་འགྱུར་ཏེ། །དགེ་བྱེད་ལ་ནི་བགེགས་བྱའི་ཕྱིར། །ཡུལ་འདི་དག་ཏུ་སྐྱེ་བར་འགྱུར། །དགེ་བྱེད་མཛའ་བོ་དེ་དག་ཀྱང་། །ལི་ཡུལ་དག་ཏུ་སྐྱེ་བ་ལེན། །རྒྱལ་བས་ལུང་བསྟན་ཡུལ་དག་ཏུ། །ལེགས་པ་རྣམས་ནི་བྱེད་པར་འགྱུར། །ཇི་ལྟར་ཡུལ་འདིར་བདག་ཅག་རྣམས། །ལེགས་པར་འགྱུར་དང་

---

^{[མ་དཔེ་གཟིགས་ན་འདིར་གནོན།]}

བདག་ཅག་གིས། །ཅི་ནས་གཟུང་བའི་ཐབས་འཚལ་བར། །བཅོམ་ལྡན་བདག་ཅག་དམ་པ་གསོལ། །དེ་ལ་བཅོམ་ལྡན་གསུངས་པ་ནི། །དམ་པའི་མཆོག་ནི་སྦྱིན་པར་བྱས། །གནོད་སྦྱིན་དབང་པོ་དུས་ཀུན་ཏུ། །ཡུལ་ནི་ཡོངས་སུ་བསྲུང་བའི་ཕྱིར། །བྱང་ཆུབ་སེམས་དཔའི་གནས་བཟང་འདི། །ང་ཡི་ཚིག་གིས་གཟུང་བར་གྱིས། །ཡུལ་དེ་འབྱུང་བར་འགྱུར་བ་ནི། །ལྷ་ཡི་སྐྱེད་མོས་ཚལ་མཆོག་བཞིན། །དགེ་འདུན་ཀུན་དགའ་ར་བས་རྒྱས། །དྲི་གཙང་ཁང་གིས་མཛེས་པར་བྱས། །དེར་ནི་དགོན་པའི་གནས་རྣམས་ཀྱང་། །བདེ་བ་ཅན་དང་འདྲ་བར་འགྱུར། །དགེ་སློང་དགེ་སློང་མ་ཡིས་གང་། །དེ་དག་ཐེག་པ་མཆོག་ཀྱང་སྟོན། །བྱང་ཆུབ་སེམས་དཔའི་གནས་བཟང་དེར། །མི་རྣམས་སྐྱེས་པ་གང་ཡིན་པ། །དགེ་བ་ཡི་ནི་ལས་བྱེད་ཅིང་། །བྱང་ཆུབ་ཕྱིར་ནི་སྔོ་བར་བྱེད། །ཅི་སྲིད་ཐུབ་པའི་དབང་པོ་ཡིས། །བསྟན་པ་ཡུལ་དེར་གནས་པ་དང་། །མཆོད་པར་བྱེད་པ་དེ་སྲིད་དུ། །ཡུལ་དག་ཀྱང་ནི་གནས་པར་འགྱུར། །བསྟན་པ་དག་ལ་མ་མཆོད་ན། །སྲུང་མ་རྣམས་ནི་འཁྲུག་པར་འགྱུར། །ཡུལ་ཡང་ཡལ་བར་འདོར་བ་དང་། །འཁྲུག་པའི་སེམས་ཀྱིས་འགྲོ་བར་འགྱུར། །སྲུང་མ་དག་ནི་སོང་བ་དང་། །ཡུལ་འདི་ལྷ་ཡིས་བོར་བ་དེར། །ནད་དང་མུ་གེས་ཉེན་པ་དང་། །རྒྱལ་པོ་དག་ཀྱང་ཚེ་ཐུང་འགྱུར། །སྲུང་མ་ཀུན་ཏུ་ཁྲོས་པ་ཡིས། །དཔུང་རྣམས་ཀྱང་ནི་མེད་པར་བྱེད། །རྒྱལ་བ་དམ་པ་མཆོག་གིས་ལྷ་རྣམས་ལ་དེ་སྐད་ཅེས་བཀའ་སྩལ་ནས། དེའི་འོག་ཏུ་བཅོམ་ལྡན་འདས་དཔལ་འོད་ཟེར་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྨིན་མཚམས་ཀྱི་གསེབ་ནས་དེ་བཞིན་གཤེགས་པའི་རྣམ་པ་ཞེས་བྱ་བའི་འོད་ཟེར་རྣམས་བྱུང་ངོ་། །འོད་ཟེར་དེ་དག་ལས་ཀྱང་འོད་ཟེར་ཚད་མེད་གྲངས་མེད་པ་བྱུང་བར་གྱུར་ཏེ། སངས་རྒྱས་ཀྱི་ཞིང་ཐམས་ཅད་དུ་སོང་ནས་སངས་རྒྱས་ཀྱི་ཞིང་གང་དང་གང་ན་སངས་རྒྱས་བཅོམ་ལྡན་འདས་བཞུགས་པ་དེར་ཚིག་ཏུ་བརྗོད་པ་འདི་སྐད་ཅེས་འབྱུང་སྟེ། ལྷའི་ལྷ་སངས་རྒྱས་བཅོམ་ལྡན་འདས་ཤཱཀྱ་ཐུབ་པས་གནོད་པ་ཉུང་ངམ། བསྐྱོད་པ་ཡང་དམ་ཞེས་བྱ་བའི་

---

^{[མ་དཔེ་གཟིགས་ན་འདིར་གནོན།]}

བར་དུ་འདྲིའོ། །འདི་སྐད་ཅེས་ཀྱང་སྨྲས་ཏེ། སངས་རྒྱས་ཉིད་ཀྱི་ཕྱིར་ངས་བསྐལ་པ་མང་པོར་དཀའ་བ་བྱས་སོ། །དམ་པའི་ཆོས་བསྡུ་བའི་ཕྱིར་ལུས་གྲངས་མེད་པ་ཡོངས་སུ་བཏང་བ་བྱས་ཏེ། སྦྱིན་པ་མང་པོ་བྱིན་ནོ། །སྡུག་བསྔལ་ཤིན་ཏུ་མང་པོ་བྱང་ཆུབ་སེམས་དཔའ་གཞན་དག་གིས་མ་མྱོང་བ་དག་ཉམས་སུ་མྱོང་སྟེ། དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྗེས་སུ་ཐོབ་པར་གྱུར་ཏོ། །ད་ནི་ང་ཡོངས་སུ་མྱ་ངན་འདའ་བའི་དུས་དང་སྐབས་སུ་བབ་ནས། འཛམ་བུའི་གླིང་ཐམས་ཅད་ཀྱི་ཡུལ་རྣམས་ཡོངས་སུ་བསྐྱང་བའི་ཕྱིར་སྲུང་མ་རྣམས་ཀྱི་ལག་ཏུ་བྱིན་ནོ། །ལྷ་རྣམས་མྱ་ངན་ང་འདས་ནས། །ལོ་བརྒྱ་ལོན་པ་དེ་ཡི་ཚེ། །མིང་ནི་ལི་ཡུལ་ཞེས་བྱ་བ། །རབ་ཏུ་འབྱོར་པ་འབྱུང་བར་འགྱུར། །བསྐལ་པ་བཟང་པོའི་སངས་རྒྱས་དང་། །བྱང་ཆུབ་སེམས་དཔའ་སྐྱོབ་རྣམས་ཀྱི། །འདུལ་བའི་ཕྱིར་ནི་ཆད་ཀྱུ་སྟེ། །རྟོག་གེ་པ་དང་བྲལ་བ་ཡིན། །བསྐལ་པ་བཟང་པོའི་རྒྱལ་སྲས་རྣམས། །ལི་ཡུལ་འཁོར་གྱི་གྲོང་ཁྱེར་དེར། །སྐྱེ་བ་དག་ཀྱང་ལེན་འགྱུར་ཞིང་། །མིག་དང་འདྲ་བར་སྣང་བར་འགྱུར། །སེམས་ཅན་རྣམས་ནི་སྨིན་བྱ་དང་། །ཆོས་ཀྱང་མཉན་པར་བྱ་བའི་ཕྱིར། །བྱང་ཆུབ་སྤྱོད་པ་བཟང་པོ་དག །དེ་ཚེ་དེ་ཀུན་སྤྱོད་པར་འགྱུར། །སངས་རྒྱས་རྣམས་ཀྱིས་བདག་ལ་དགོངས། །ཉི་མའི་སྙིང་པོ་མདོ་སྡེ་ཆེ། །མདོ་སྡེ་མཆོག་ནི་བཤད་པ་ན། །སྙིང་རྗེས་ནོན་པའི་སེམས་ཀྱིས་སུ། །ཡུལ་དེར་བསྲུང་བར་བྱ་བའི་ཕྱིར། །གཟུངས་སྔགས་རྣམས་དང་འོད་ཟེར་དག །ཇི་ལྟར་སྔོན་ནི་སྐུར་བ་བཞིན། །སངས་རྒྱས་ཞིང་ནི་ཐམས་ཅད་ནས། །ཡུལ་འཁོར་འདིར་ནི་སྐྱེས་ཀྱི་རྣམས། །རྒྱལ་མཆོག་རྣམས་ཀྱིས་སྐུར་བར་མཛོད། །བསྟན་པ་བསྲུང་བར་བྱ་བའི་ཕྱིར། །བདག་ལ་དགྱེས་པས་སྐུར་བར་མཛོད། །སྐྱོབ་པ་ཤཱཀྱ་སེང་གེ་ཡིས། །འོད་ཟེར་དེ་དག་བཏང་བ་ན། །སངས་རྒྱས་ཞིང་རྣམས་སོང་ནས་ནི། །དེ་ཉིད་དུ་ནི་སླར་ཡང་འོངས། །དེ་ནས་དེ་མ་ཐག་ཏུ་སངས་རྒྱས་ཀྱི་ཞིང་ཐམས་ཅད་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས། བཅོམ་ལྡན་འདས་ཤཱཀྱ་ཐུབ་པ་ལི་ཡུལ་ཡོངས་སུ་བསྐྱང་བར་བཞེད་པའི་

---

^{[མ་དཔེ་གཟིགས་ན་འདིར་གནོན།]}

བསྟན་པ་ཡུན་རིང་དུ་གནས་པར་བྱ་བའི་ཕྱིར་སྐྱེས་སུ་འོད་ཟེར་དག་ཀྱང་བཏང་། གཟུངས་སྔགས་དག་ཀྱང་བསྐུར་ཏེ། འདི་སྐད་ཅེས་ཀྱང་གསུངས་སོ། །སངས་རྒྱས་བཅོམ་ལྡན་འདས་གང་དག་གིས་འོད་ཟེར་དག་ཀྱང་གཏོང་། གཟུངས་སྔགས་དག་ཀྱང་བྱང་ཆུབ་སེམས་དཔའ་རྣམས་ཀྱི་ལག་ཏུ་བསྐུར་བ་དེ་དག་གི་མཚན་ནི་འདི་ཞེས་བྱ། བྱང་ཆུབ་སེམས་དཔའ་དེ་དག་གི་མིང་ཡང་འདི་ཞེས་བྱའོ། །དེ་བཞིན་གཤེགས་པ་མུ་སྟེགས་ཐམས་ཅད་འཛུད་པ་ལ་དཔའ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཚིག་གསང་བ་ལ་ཕྱག་འཚལ་ལོ། །གཟུངས་སྔགས་ནི་འདི་ཡིན་ཏེ། ཏདྱ་ཐཱ། བ་ར་བ་ར། ཀཱ་ཤ་ཨ་ར། ཙཀྲ་ཀོ་ཥེ། གུ་ཧྱ་ཀ་བཱ་རེ་སྭཱ་ཧཱ། གཟུངས་སྔགས་འདིས་ལི་ཡུལ་གྱི་ལྷ་དང་མི་རྣམས་ལ་ལྷ་རྣམས་དམ་པ་སྦྱིན་པར་འགྱུར་རོ། །དེ་བཞིན་གཤེགས་པ་དགའ་བའི་ཆོས་ལ་དཔའ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་ཀྱི་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། བ་ར་ཏྲི་ཀ་བུ་ལི། ཤ་སི་རི་པ་ཧཱ་རེ་བཱ་རེ་སྭཱ་ཧཱ། གཟུངས་སྔགས་འདིས་ནི་ཚེ་རབས་དྲན་པར་འགྱུར་རོ། །དེ་བཞིན་གཤེགས་པ་ཆོས་ལ་ཞུགས་པ་ཤིན་ཏུ་འཕགས་པའི་ཏོག་གི་གསུང་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇིག་རྟེན་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་རང་གི་ཡིད་ལ་གསལ་བའི་ཚིག་ལ་ཕྱག་འཚལ་ལོ། །དེ་བཞིན་གཤེགས་པ་མངོན་པར་འཕགས་པའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་ནམ་མཁའི་ཚིག་ལ་ཕྱག་འཚལ་ལོ། །ཏདྱ་ཐཱ། ཧྭཱ་ཀྱ་ར་ཏེ། ཧོ་ཧོ་ཧོ་ཧོ། ཕཱ་རུ་ར་ར། ཨ་བི་བ་ར། མ་བི་བ་ར། ཎ་རུ་ཧེ་སྭཱ་ཧཱ། གཟུངས་སྔགས་འདི་སུ་འཛིན་པ་ནི་ངན་སོང་ངན་འགྲོར་འགྲོ་བར་མི་འགྱུར་ལ། སེམས་ཅན་རྣམས་ཀྱི་འགྲོ་བ་སྔོན་གྱི་ཚེ་རབས་སུ་ཇི་ལྟ་བུར་གྱུར་པ་དང་། ཚེ་རབས་ཕྱི་མ་ལ་ཅིར་འགྱུར་བ་ཡང་ཤེས་པར་འགྱུར་རོ། །དེ་བཞིན་གཤེགས་པ་བུ་སྡུག་རྒྱལ་བའི་ཆོས་འཕེལ་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་ལྷ་དང་མིའི་ཆོས་ཀྱི་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། དྷ་ར་སྠི་ཏ། ཏ་ཐ་ཏཱ་བཛྲི་བི་ས་རེ་ཏ་ཐ་ཏཱ་སྭཱ་ཧཱ། གཟུངས་སྔགས་

---

^{[མ་དཔེ་གཟིགས་ན་འདིར་གནོན།]}

འདིས་ནི་གཟུངས་ཐོབ་པར་གྱུར་ཏོ། །དེ་བཞིན་གཤེགས་པ་མི་འཁྲུགས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་དྲི་མ་མེད་པའི་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། ཨ་བ་ཧི། སརྦ་ཏ་ཐཱ་ག་ཏ་བྷཱུ་ཏ་ཀོ་ཊི་བྷ་ཏི་བྷ་ཏི། པ་ཌི་ར་ཌི་སྭཱ་ཧཱ། གཟུངས་སྔགས་འདིས་ནི་དེ་བཞིན་གཤེགས་པའི་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཐོབ་པར་གྱུར་ཏོ། །དེ་བཞིན་གཤེགས་པ་རྔ་སྒྲའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་དཔལ་རྒྱན་ལ་ཕྱག་འཚལ་ལོ། །ཏདྱ་ཐཱ། ཏ་ཐ་ཏཱ་པུ་ཌེ་དྲ་བ་ནེ། སརྦི་ས་ར་ཌྲི། གུ་ཧྱ་མན་ཏྲ་ཏ་ཐ་ཏཱ་དྷ་ན་སྭཱ་ཧཱ། གཟུངས་སྔགས་འདིས་ནི་བྱང་ཆུབ་སེམས་དཔའ་དཀའ་བ་ཆེན་པོ་མཛད་པར་འགྱུར་ཞིང་། སེམས་ཅན་རྣམས་ཀྱང་སྡུག་བསྔལ་དང་ནད་རྣམས་ལས་ཡོངས་སུ་ཐར་བར་འགྱུར་རོ། །དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་སྣང་གསལ་ལ་ཕྱག་འཚལ་ལོ། །ཏདྱ་ཐཱ། རད་དཱ་ག་ཏེ། བ་གྲི་བ་ཏི་ཏ་ཌི་བྷ་ཏི་ཙ་སྭཱ་ཧཱ། གཟུངས་སྔགས་འདིས་ནི་བྱང་ཆུབ་སེམས་དཔའ་སངས་རྒྱས་ཀྱི་ཞིང་རྣམས་ཡོངས་སུ་སྦྱོང་བར་བྱེད་དེ། སུ་འདི་འཛིན་པའི་ལུས་དང་། སེམས་ཀྱི་སྡུག་བསྔལ་རྣམས་ཟད་པར་འགྱུར་རོ། །དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །ཏདྱ་ཐཱ། བྷི་ན་རེ་རི་བི། ས་མ་ས་ཙ་ག་བ། དརྴ་ན་ར། ས་མན་ཏ་དརྴ་ར་ནི་སྭཱ་ཧཱ། གཟུངས་སྔགས་འདིས་ནི་བྱང་ཆུབ་སེམས་དཔས་བྱ་བ་ཐམས་ཅད་ཤེས་པར་གྱུར་ཏོ། །འདིས་ནི་དེ་བཞིན་གཤེགས་པ་ཤཱཀྱ་ཐུབ་པས་ཀྱང་རྒྱུ་ཆེན་པོ་རྣམས་མཛད་དོ། །སངས་རྒྱས་བཅོམ་ལྡན་འདས་འདི་དག་གིས་གཟུངས་སྔགས་འདི་དག་ཡུལ་ཀུན་དུ་བསྲུང་བའི་ཕྱིར། བཅོམ་ལྡན་འདས་ཤཱཀྱ་ཐུབ་པ་ལ་སྐྱེས་སུ་བསྐུར་རོ། །དེའི་ཚེ་སངས་རྒྱས་བཅོམ་ལྡན་འདས་དཔའ་བར་འགྲོ་བའི་ཏིང་ངེ་འཛིན་ལ་སྙོམས་པར་ཞུགས་ནས་དང་པོ་ཐུགས་བསྐྱེད་པ་ནས། བྱང་ཆུབ་ཀྱི་སྙིང་པོའི་མཐར་ཐུག་པའི་བར་གྱི་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། ཆོས་ལ་གུས་པར་

---

^{[མ་དཔེ་གཟིགས་ན་འདིར་གནོན།]}

ཡང་དག་པར་རྗེས་སུ་དགོངས་སོ། །དེ་ནས་རང་གི་དོན་དང་ལྷ་ལ་སོགས་པའི་དོན་གྱི་ཕྱིར་དེ་དག་ལ་ཡུལ་གཏམས་ཤིང་གཏད་དོ། །ཚངས་པ་ལ་སོགས་པའི་ལྷ་རྣམས་དང་། ལྷ་ཐམས་ཅད་ཀྱི་གཟུངས་སྔགས་འདི་ཡང་བརྗོད་པར་བྱའོ། །ན་མོ་བྲཤྤུ་ནེ། ན་མཿ སརྦ་དེ་བཱ་ནཱ་ན། ཏདྱ་ཐཱ། བྲ་ཤྤུ་ན་ཨིན་དྲེ། དེ་བ་ཏཱ་པྲ་ཏི་ཏེ། ཨ་ཤྭ་སྠཱ་ནེ། བ་ར་ཨིན་དྲེ། སྭ་པ་ར་པ་རི། ཧ་ར མ་བ་ཨིན་དྲེ། སན་ཏ་ཐཱ་སྨ་ར་བ་ར་ཧ་རེ། ཨ་མ་བྷ་ཀུམྦྷ་ཀ་ཝླ་ཤྲཱི། ཨཱ་ལང་ཀཱ་ར། སརྦ་དེ་བ། གྲཱ་མ་སྭཱ་ཧཱ། གཟུངས་སྔགས་འདིས་ལྷ་དང་། མི་རྣམས་རྒྱལ་བ་ཐོབ་པར་འགྱུར་ཞིང་། དགྲས་ཀྱང་དེ་ལ་གནོད་པར་མི་བྱེད་ལ། དབང་ཕྱུག་ཐམས་ཅད་ཀྱི་བདག་པོར་འགྱུར་རོ། །ལི་ཡུལ་དུ་གང་ལ་ལ་རྒྱལ་པོར་འགྱུར་བ་དེ་འདི་སྙམ་དུ། ལི་ཡུལ་འདི་ནི་སྐྱེ་བོ་དང་། མི་དང་། མི་མང་པོས་གང་ཞིང་ནོར་དང་། འབྲུ་མང་པོ་རྒྱས་པ་ཡིན་ཏེ། ཡུལ་ཐམས་ཅད་ཀྱི་མཆོག་དམ་པ་ཡིན་པས། གཞན་གྱི་དམག་ཚོགས་འོང་བར་མི་ནུས་སོ་སྙམ་དུ་སེམས་པར་འགྱུར་རོ། །དེའི་ཚེ་རྒྱལ་པོ་དེས་དགོན་པ་དང་། དགེ་འདུན་གྱི་ཀུན་དགའ་ར་བ་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་དུ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། ཡུལ་གྱི་མི་ཐམས་ཅད་སྔར་བཤད་པའི་གཟུངས་ཀྱི་གསང་སྔགས་ཀྱི་ཚིག་རྣམས་ཀློག་ཏུ་གཞུག་པར་བྱའོ། །འཛིན་དུ་གཞུག་པ་དང་། ཀུན་ཆུབ་པར་བྱེད་དུ་གཞུག་གོ །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་དང་། ཡུལ་ན་གནས་པའི་མི་དེ་དག་ལ་ཡང་ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་རྣམས་དང་། ཁ་ཟས་དང་། བཏུང་བ་སྣ་ཚོགས་དང་། མཆོད་པའི་ལས་སྣ་ཚོགས་དང་། ཡོ་བྱད་ཐམས་ཅད་ཀྱིས་རིམ་གྲོར་བྱའོ། །བཙུན་པར་བྱའོ། །བསྟི་སྟང་དུ་བྱའོ། །མཆོད་པར་བྱའོ། །དེ་ལྟར་བྱས་ན་ལི་ཡུལ་དེ་གནོད་པ་ཐམས་ཅད་མེད་པ་དང་། ཕྱིར་རྒོལ་བའི་རྒྱལ་པོ་ཐམས་ཅད་ཀྱི་དཔུང་གིས་རྒྱལ་པོ་དེའི་ལི་ཡུལ་གཞིག་པར་མི་ནུས་སོ། །དེ་ནས་ཡང་

---

^{[མ་དཔེ་གཟིགས་ན་འདིར་གནོན།]}

ཕྱོགས་བཅུའི་སངས་རྒྱས་ཀྱི་ཞིང་དག་ནས། སངས་རྒྱས་བཅོམ་ལྡན་འདས་རྣམས་ཀྱིས་རང་རང་གི་མཚན་དང་། འོད་ཟེར་དང་། གཟུངས་ཀྱི་གསང་སྔགས་ཀྱི་ཚིག་རྣམས་བསྐུར་རོ། །བརྒྱ་བྱིན་དང་། ཚངས་པ་ལ་སོགས་པ་ལྷའི་རྒྱལ་པོ་སུམ་ཅུ་རྩ་གཉིས་པོ་དེ་དག་དང་། འཇིག་རྟེན་སྐྱོང་བ་བཞི་དང་། ལྷའི་བུ་ཀུན་དུ་རྒྱལ་བ་ལ་སོགས་པ། གནོད་སྦྱིན་གྱི་སྡེའི་བདག་པོ་ཆེན་པོ་ཉི་ཤུ་རྩ་བརྒྱད་དང་། བྱང་ཆུབ་སེམས་དཔའ་དྲི་མ་མེད་པའི་འོད་དེ་དང་། གོ་མ་ས་ལ་གན་དྷའི་མཆོད་རྟེན་མཆོད་པའི་བྱང་ཆུབ་སེམས་དཔའ་ཉི་ཁྲི་པོ་དེ་དག་དང་། ཀླུའི་རྒྱལ་པོ་གདོན་ལ་སྙེམས་པ་ལ་སོགས་པ་ཁྲི་བརྒྱད་སྟོང་པོ་གང་ཡིན་པ་དེ་དག་གི་ལག་ཏུ་བཅོམ་ལྡན་འདས་ཤཱཀྱ་ཐུབ་པས། བསྐལ་པ་བཟང་པོའི་བྱང་ཆུབ་སེམས་དཔའ་ཐམས་ཅད་ཀྱི་གནས། བསྐལ་པ་བཟང་པོའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཕྱག་མཚན་དུ་གྱུར་པ་ལི་ཡུལ་དང་ཐུབ་པ་དྲང་སྲོང་ཆེན་པོའི་གནས་སུ་གྱུར་པ་གོ་མ་ས་ལ་གན་དྷའི་མཆོད་རྟེན་དེ་དང་། དགེ་སློང་དང་། དགེ་སློང་མའི་དགེ་འདུན་དེ་དག་ལ་བསྲུང་བ་དང་། ཡོངས་སུ་བསྐྱང་བ་དང་། འཚེ་བ་མེད་པར་བྱ་བ་དང་། འབྱེ་བར་མི་འགྱུར་བ་དང་། སངས་རྒྱས་ཀྱི་བསྟན་པ་ལི་ཡུལ་ན་གནས་པ་དེ་ཡུན་རིང་དུ་གནས་པར་བྱ་བའི་ཕྱིར་གཏད་དོ། །སངས་རྒྱས་ཀྱི་མཚན་འདི་དག་དང་། འོད་ཟེར་འདི་དག་དང་། གཟུངས་ཀྱི་གསང་སྔགས་ཀྱི་ཚིག་འདི་དག་སྙིང་རྗེས་ནོན་པའི་ཐུགས་དང་ལྡན་པ་དང་། གསོལ་བ་ཆེན་པོ་བཏབ་པས་སྐྱེས་སུ་བསྐུར་ནས། དེ་བཞིན་དུ་སངས་རྒྱས་བཅོམ་ལྡན་འདས་དེ་དག་གི་བཀའ་མཉན་ཏེ། བརྒྱ་བྱིན་དང་། ཚངས་པ་ལ་སོགས་པ་ལྷའི་རྒྱལ་པོ་སུམ་ཅུ་རྩ་གཉིས་པོ་དེ་དག་དང་། འཇིག་རྟེན་སྐྱོང་བ་དེ་དག་དང་། གནོད་སྦྱིན་གྱི་སྡེའི་བདག་པོ་དེ་དག་དང་། ཀླུའི་རྒྱལ་པོ་དེ་དག་དང་། དྲི་མ་མེད་པའི་འོད་ལ་སོགས་པ་བྱང་ཆུབ་སེམས་དཔའ་དེ་དག་དང་། འཁོར་དེ་དག་ཐམས་ཅད་ཀྱིས་ཐལ་མོ་སྦྱར་ཏེ། ལི་ཡུལ་དེ་དང་། ཐུབ་པའི་དྲང་སྲོང་ཆེན་པོའི་གནས་གོ་མ་ས་ལ་གན་དྷའི་མཆོད་རྟེན་དེ་དང་། སངས་རྒྱས་ཀྱི་བསྟན་པ་དེ་དག་བསྲུང་བའི་ཕྱིར་མནོས་སོ། །སངས་རྒྱས་ཀྱི་མཚན་དེ་དག་དང་། འོད་ཟེར་དེ་དག་

---

^{[མ་དཔེ་གཟིགས་ན་འདིར་གནོན།]}

དང་། གཟུངས་ཀྱི་གསང་སྔགས་ཀྱི་ཚིག་དེ་དག་ཀྱང་ཡུལ་བསྲུང་བའི་ཕྱིར་མནོས་སོ། །འོད་ཟེར་དེ་དག་ཀྱང་བྱང་ཆུབ་སེམས་དཔའ་དྲི་མ་མེད་པའི་འོད་ཀྱི་ལུས་ལ་གནས་པར་གྱུར་ཏོ། །དེ་བཞིན་གཤེགས་པ་ཚུལ་ཁྲིམས་ལ་རབ་ཏུ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་ཞི་བས་རོལ་པ་ལ་ཕྱག་འཚལ་ལོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཞི་བའི་བླ་མ་ལ་ཕྱག་འཚལ་ལོ། །དེ་བཞིན་གཤེགས་པ་ནམ་མཁའ་ལ་རབ་ཏུ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་མཚོན་ཆ་རབ་ཏུ་འཇིལ་བ་ལ་ཕྱག་འཚལ་ལོ། །དེ་བཞིན་གཤེགས་པ་སྤྱན་བརྒྱ་པ་ལ་ཕྱག་འཚལ་ལོ། །དེ་བཞིན་གཤེགས་པ་འོད་ཟེར་བཟང་པོ་ལ་ཕྱག་འཚལ་ལོ། །དེ་བཞིན་གཤེགས་པ་དབང་པོའི་རྣམ་པ་ལ་ཕྱག་འཚལ་ལོ། །དེ་བཞིན་གཤེགས་པ་ཉི་མའི་རྣམ་པ་ལ་ཕྱག་འཚལ་ལོ། །དབང་པོའི་རྒྱལ་མཚན་ཞེས་བྱ་བའི་འོད་ཟེར་དང་། བདུད་རྩིའི་ལོ་མ་ཞེས་བྱ་བའི་འོད་ཟེར་དང་། ཞི་བར་འགྱུར་བ་ཞེས་བྱ་བའི་འོད་ཟེར་དང་། ལོ་མ་དང་བྲལ་བ་ཞེས་བྱ་བའི་འོད་ཟེར་དང་། ཀ་ཞེས་བྱ་བའི་འོད་ཟེར་དང་། མེ་ཞེས་བྱ་བའི་འོད་ཟེར་དང་། གནས་པ་ཞེས་བྱ་བའི་འོད་ཟེར་དང་། མི་གཡོ་བ་ཞེས་བྱ་བའི་འོད་ཟེར་དང་། གཡོ་བ་དང་མི་གཡོ་བ་ཞེས་བྱ་བའི་འོད་ཟེར་དང་། ཐོགས་མེད་སྦྱིན་ཞེས་བྱ་བའི་འོད་ཟེར་དང་། ཡིད་དང་འཐད་པ་ཞེས་བྱ་བའི་འོད་ཟེར་དང་། བར་ཆད་མེད་པ་ཞེས་བྱ་བའི་འོད་ཟེར་དང་། རིམས་མེད་རྒྱལ་མཚན་བྱེ་བ་ཞེས་བྱ་བའི་འོད་ཟེར་དང་། འཁྲུགས་མེད་གནས་ཞེས་བྱ་བའི་འོད་ཟེར་དང་། ཏོག་གི་བློ་གྲོས་ཞེས་བྱ་བའི་འོད་ཟེར་དང་། གྲོང་ཁྱེར་དུ་འབབ་པ་ཞེས་བྱ་བའི་འོད་ཟེར་དང་། འཁོར་ལོ་སྣང་བ་ཞེས་བྱ་བའི་འོད་ཟེར་དང་། དཔའ་བོའི་ཏོག་ཅེས་བྱ་བའི་འོད་ཟེར་དང་། རྡོ་རྗེའི་རྣམ་པ་ཞེས་བྱ་བའི་འོད་ཟེར་དང་། བསོད་ནམས་ཀྱི་ཏོག་ཅེས་བྱ་བའི་འོད་ཟེར་དང་། བསམ་གཏན་གྱི་ཏོག་ཅེས་བྱ་བའི་འོད་ཟེར་དང་། མེ་ལྕེ་དང་ལྡན་པ་ཞེས་བྱ་བའི་འོད་ཟེར་དང་། ཀུན་ཏུ་སྣང་བ་ཞེས་བྱ་བའི་འོད་ཟེར་དང་། བྱང་ཆུབ་ཀྱི་ཡན་ལག་ཅེས་བྱ་བའི་

---

^{[མ་དཔེ་གཟིགས་ན་འདིར་གནོན།]}

འོད་ཟེར་དང་། ཞི་གནས་ཀྱི་འོད་ཅེས་བྱ་བའི་འོད་ཟེར་དང་། མཐའ་ཡས་པ་ཞེས་བྱ་བའི་འོད་ཟེར་དང་། ནོར་བུ་སྣང་བ་ཞེས་བྱ་བའི་འོད་ཟེར་དང་། དཔའ་བོའི་རིན་ཆེན་ཞེས་བྱ་བའི་འོད་ཟེར་དང་། ཟླ་བ་སྣང་བ་ཞེས་བྱ་བའི་འོད་ཟེར་དང་། ཉི་མ་སྣང་བ་ཞེས་བྱ་བའི་འོད་ཟེར་དང་། ཡེ་ཤེས་འགྲོ་བ་ཞེས་བྱ་བའི་འོད་ཟེར་དང་། སྣང་བའི་རིན་པོ་ཆེ་ཞེས་བྱ་བའི་འོད་ཟེར་དང་། དབང་པོའི་རྒྱལ་མཚན་ཞེས་བྱ་བའི་འོད་ཟེར་དང་། འཇིག་རྟེན་སྣང་བ་ཞེས་བྱ་བའི་འོད་ཟེར་དང་། སྙིང་རྗེའི་རྣམ་པ་ཞེས་བྱ་བའི་འོད་ཟེར་དང་། རྒྱལ་བ་དམ་པ་ཞེས་བྱ་བའི་འོད་ཟེར་དང་། ཤེས་རབ་ཀྱི་སྣང་བ་ཞེས་བྱ་བའི་འོད་ཟེར་དང་། མེ་ཞེས་བྱ་བའི་འོད་ཟེར་དང་། འཇིག་རྟེན་གྱི་སྒྲོན་མ་ཞེས་བྱ་བའི་འོད་ཟེར་དང་། རབ་རིབ་ཀྱི་རྣམ་པ་རབ་ཏུ་ཞི་བར་བྱེད་པ་ཞེས་བྱ་བའི་འོད་ཟེར་དང་། རྒྱལ་བ་མཆོག་ཅེས་བྱ་བའི་འོད་ཟེར་དང་། འཇིག་རྟེན་གྱི་རྣམ་པ་ཞེས་བྱ་བའི་འོད་ཟེར་དང་། འོད་ཆེན་པོ་ཞེས་བྱ་བའི་འོད་ཟེར་དང་། ཀོ་ཀ་ར་ཞེས་བྱ་བའི་འོད་ཟེར་དང་། ཨའི་ཚུལ་དུ་བྱེད་པ་ཞེས་བྱ་བའི་འོད་ཟེར་དང་། ཛད་ཚ་ར་ཡ་ཞེས་བྱ་བའི་འོད་ཟེར་དང་། དཔའ་བོ་བྱེད་པའི་དཔའ་བོའི་རྒྱལ་མཚན་ཞེས་བྱ་བའི་འོད་ཟེར་དང་། འོད་ཆེན་པོ་ཞེས་བྱ་བའི་འོད་ཟེར་དང་། འོད་མཐའ་ཡས་པ་ཞེས་བྱ་བའི་འོད་ཟེར་དང་། མི་བསྐྱོད་པ་ཞེས་བྱ་བའི་འོད་ཟེར་དང་། རྒྱལ་མཚན་བློ་གྲོས་ཞེས་བྱ་བའི་འོད་ཟེར་དང་། འབད་པ་མཐོ་བ་ཞེས་བྱ་བའི་འོད་ཟེར་དང་། བདེན་པ་ཅན་ཞེས་བྱ་བའི་འོད་ཟེར་དང་། མགུ་བར་བྱེད་པ་ཞེས་བྱ་བའི་འོད་ཟེར་དང་། རབ་སྒྲོགས་ཞེས་བྱ་བའི་འོད་ཟེར་དང་། འོད་བྱེད་པ་ཞེས་བྱ་བའི་འོད་ཟེར་དང་། རྡོ་རྗེ་བློ་གྲོས་ཞེས་བྱ་བའི་འོད་ཟེར་དང་། སྟོང་པའི་རྣམ་པ་ཞེས་བྱ་བའི་འོད་ཟེར་དང་། འཛིན་པ་ཞེས་བྱ་བའི་འོད་ཟེར་དང་། དཔའ་བའི་རྒྱལ་མོ་ཞེས་བྱ་བའི་འོད་ཟེར་དང་། གཡོ་བ་ཞེས་བྱ་བའི་འོད་ཟེར་དང་། མཐོ་རིས་སུ་འགྲོ་བ་ཞེས་བྱ་བའི་འོད་ཟེར་དང་། ཞི་བའི་རྣམ་པ་ཞེས་བྱ་བའི་འོད་ཟེར་དང་། ཞི་བའི་ཏོག་ཅེས་བྱ་བའི་འོད་ཟེར་དང་། བསམ་གཏན་གྱི་རྒྱལ་མཚན་ཞེས་བྱ་བའི་འོད་ཟེར་དང་། དགའ་བའི་ཏོག་ཅེས་བྱ་བའི་འོད་ཟེར་དང་། འདམ་བུ་ལྟ་བུའི་འོད་ཅེས་བྱ་བའི་འོད་ཟེར་

---

^{[མ་དཔེ་གཟིགས་ན་འདིར་གནོན།]}

དང་། མིག་སྣང་བ་ཞེས་བྱ་བའི་འོད་ཟེར་དང་། ཀླུ་འབྱུང་བ་ཞེས་བྱ་བའི་འོད་ཟེར་དང་། ཀླུང་གི་འོད་ཅེས་བྱ་བའི་འོད་ཟེར་དང་། སྐྱེས་བུའི་རྣམ་པ་ཞེས་བྱ་བའི་འོད་ཟེར་དང་། འབར་བ་ཅན་ཞེས་བྱ་བའི་འོད་ཟེར་དང་། མེ་ཞེས་བྱ་བའི་འོད་ཟེར་དང་། པད་མའི་འོད་ཅེས་བྱ་བའི་འོད་ཟེར་དང་། དབང་པོའི་རྣམ་པ་ཞེས་བྱ་བའི་འོད་ཟེར་དང་། འདྲི་བའི་ཚུལ་ཞེས་བྱ་བའི་འོད་ཟེར་དང་། བསྐྱོད་པ་ཞེས་བྱ་བའི་འོད་ཟེར་དང་། དབང་པོ་ལ་གནས་པ་ཞེས་བྱ་བའི་འོད་ཟེར་དང་། འཁྲུག་པ་ཞེས་བྱ་བའི་འོད་ཟེར་དང་། སའི་རྒྱལ་མཚན་སྟོན་པ་ཞེས་བྱ་བའི་འོད་ཟེར་དང་། བདེན་པའི་ཏོག་ཅེས་བྱ་བའི་འོད་ཟེར་དང་། སྣང་བར་བྱེད་པ་ཞེས་བྱ་བའི་འོད་ཟེར་དང་། དངར་བའི་རྣམ་པ་ཞེས་བྱ་བའི་འོད་ཟེར་དང་། དབང་པོ་ལ་བརྟེན་པ་ཞེས་བྱ་བའི་འོད་ཟེར་དང་། ཡིད་ལ་འགྲོ་བ་ཞེས་བྱ་བའི་འོད་ཟེར་དང་། རབ་ཏུ་འགྲོ་མཛེས་ཞེས་བྱ་བའི་འོད་ཟེར་དང་། འཕྲལ་བའི་རྣམ་པ་ཞེས་བྱ་བའི་འོད་ཟེར་དང་། ལེགས་འབར་ཞེས་བྱ་བའི་འོད་ཟེར་དང་། འདྲི་བར་བྱེད་པ་ཞེས་བྱ་བའི་འོད་ཟེར་དང་། ཉི་མ་འཁོར་བ་ཞེས་བྱ་བའི་འོད་ཟེར་དང་། ཉེ་བར་གནས་པ་ཞེས་བྱ་བའི་འོད་ཟེར་དང་། ཡེ་ཤེས་ཀྱི་ཆུ་ཞེས་བྱ་བའི་འོད་ཟེར་དང་། རྒྱལ་བའི་བློ་གྲོས་ཞེས་བྱ་བའི་འོད་ཟེར་དང་། རྣམ་པར་བསྒྱིངས་པ་ཞེས་བྱ་བའི་འོད་ཟེར་དང་། བདེན་པ་སྣང་བ་ཞེས་བྱ་བའི་འོད་ཟེར་དང་། སངས་རྒྱས་ཀྱི་རྣམ་པ་ཞེས་བྱ་བའི་འོད་ཟེར་དང་། གཙུག་ཏོར་ཞེས་བྱ་བའི་འོད་ཟེར་དང་། རྡོ་རྗེ་རྒྱལ་མཚན་ཞེས་བྱ་བའི་འོད་ཟེར་དང་། རྡོ་རྗེ་ལ་གནས་པ་ཞེས་བྱ་བའི་འོད་ཟེར་དང་། བསོད་ནམས་ཀྱི་རྒྱལ་མཚན་ཞེས་བྱ་བའི་འོད་ཟེར་དང་། ལྕེའི་ཏོག་ཅེས་བྱ་བའི་འོད་ཟེར་དང་། ཡིད་དང་བར་བྱེད་པ་ཞེས་བྱ་བའི་འོད་ཟེར་དང་། འདི་དག་ནི་སངས་རྒྱས་ཀྱི་འོད་ཟེར་ཡིན་ནོ། །ཏདྱ་ཐཱ། ལོ་ཀ་ཧཱ་ར། ཤུད་དྷཱ་ཀ་རུ་སྠི་ཏི་པུ་ཥྱ་བ། ཀ་རུ་ལེ་སྭཱ་ཧཱ། སྡིག་པ་གཅོད་པར་བྱེད་པ་ཞེས་བྱའོ། །ཏདྱ་ཐཱ། ཤུད་དྷ་མ་ཏི། ཨད་ཙམ་བྷེ་བུ་ལོ་ཙ་རེ། ཨ་ཀྲ་མ་ཏེ། ཙུ་ར་ཀ་རེ་པུ་སྭཱ་ཧཱ། དགའ་བྱེད་སྙིང་རྗེ་ཞེས་བྱའོ། །ཏདྱ་ཐཱ། ཨིན་དྲ། ཨིན་དྲི། བ་དྲེ། བ་དེ་བི་ཕུ་རེ་སྭཱ་ཧཱ། རྡོ་རྗེ་བློ་གྲོས་ཞེས་

---

^{[མ་དཔེ་གཟིགས་ན་འདིར་གནོན།]}

བྱའོ། །ཏདྱ་ཐཱ། ཋ་ཀེ་བ་ཀེ། ཛཱ་ཛམ་བྷེ། བྷྲ་མ་ཛྭ་རེ་སྭཱ་ཧཱ། པད་མ་འདུལ་ཞེས་བྱའོ། །ཏདྱ་ཐཱ། ཤུ་ར། ར་རེ་བེ་ཨ་ལོ་ཀེ། ཀོ་ཤ་གཱ་རེ་སྭཱ་ཧཱ། བྱེ་བར་བྱེད་པ་ཞེས་བྱའོ། །ཏདྱ་ཐཱ། ཙ་ལེ་བི་ཏ་ཐཱ། ཨ་ནྱོ་ནྱ། པྲཛྙཱ་ཀཱ་རེ་སྭཱ་ཧཱ། སྦྱོར་བ་མེད་པ་ཞེས་བྱའོ། །ཏདྱ་ཐཱ། ཛི་ཛི་རེ། ཧཱ་རཱ་ཧཱ་ལེ། ལེ་ལེ་པྲཛྙཱ་ཀཱ་རེ་སྭཱ་ཧཱ། འགོག་པ་མེད་པ་ཞེས་བྱའོ། །ཏདྱ་ཐཱ། བཛྲེ་ཤྲཱི་ཀ་རེ། ས་ར་ས་ར། ཨ་ཛྙཱ་མཱ་ཛྙེ། ན་རི་རེ་ཀཱི། ན་རི། སང་ངི་ཛྙཱ་ཀཱ་རེ་ཕུ་སྭཱ་ཧཱ། གཞན་གྱིས་མི་ཚུགས་པ་ཞེས་བྱའོ། །ཏདྱ་ཐཱ། ཨ་པུ་རཱི་བི་བ་རེ། ས་ད་རེ། མ་ཁ་ཀ་རེ་སྭཱ་ཧཱ། བདེན་པ་ལ་གནས་པ་ཞེས་བྱའོ། །ཏདྱ་ཐཱ། ཛྱོ་ཏི་ཛྱོ་ཏི། བཛྲེ་ཨ། ཨ་ཀྵ་མན་ཏྲ་བེ། པྲ་ག་ཨཱ་བེ། བཛྲི་མཱ་བ། ཀ་ཀ་སུ་རེ་སྭཱ་ཧཱ། གཟུངས་སྔགས་ཀྱི་དབང་ཕྱུག་གི་རྒྱལ་མོ་ཞེས་བྱ་སྟེ། གཟུངས་སྔགས་འདི་ནི་ཕ་རོལ་གྱི་དམག་ཚོགས་ཞི་བར་བྱེད་པ་དང་། དགེ་བའི་ཚོགས་ཡོངས་སུ་རྫོགས་པར་བྱེད་པའོ། །ཏདྱ་ཐཱ། དི་ཤཱ་ཀ་རེ། སྠ་ཀཱ་རཻ། ཨིན་དྲ་བ་ཏེ། བ་པྲཱ་ཏཽ་ས་པྲཱ་ཨུ་སྠཱ་ཏེ་སྭཱ་ཧཱ། གཟུངས་སྔགས་འདི་ནི་མུ་གེ་མེད་པར་བྱེད་པ་དང་། དབུལ་བ་མེད་པར་བྱེད་པའོ། །དམ་པ་གང་འདོད་པ་ཐམས་ཅད་ཀྱང་ཐོབ་པར་འགྱུར་ཏེ། ཞག་ཉི་ཤུ་རྩ་གཅིག་གི་བར་དུ་ཉིན་ལན་བཞི་མཚན་ལན་བཞི་སྟེ། དུས་བརྒྱད་དུ་ལན་ཉི་ཤུ་རྩ་རེ་རེ་བཟླས་བརྗོད་བྱས་ན་གཏེར་རམ། ཡང་ནོར་གང་སའི་འོག་ཏུ་སྦས་པ་གཞན་ཐོབ་པར་འགྱུར་རོ། །ཏདྱ་ཐཱ། ཧེ་མོ་ཧེ་ཛམ་བྷཱ་ཡ། མ་ཤ་མན་ཏྲ་ཀཱ། ད་མ་ཀཱ་རེ་ལ་བྷཱ་ཀཱ་རེ། བི་ཀཱ་རེ་ས་དི་ཛྙཱ་ཀཱ་རེ། ད་ཀ་དི་ཨ་དྷཱ་ཀ ། པྲ་ཤ་མ་ན་ཕུ་ཨ་ཀ་ན་པྲ་མ་ནེ་ཕུ་སྭཱ་ཧཱ། ནད་ཐམས་ཅད་ཞི་བར་བྱེད་པ་དང་། བུད་མེད་དུ་སྐྱེ་བ་ལས་ཐར་བར་བྱེད་པ་དང་། བུད་མེད་རྣམས་ཀྱི་བུད་མེད་ཀྱི་ནད་རབ་ཏུ་ཞི་བར་བྱེད་པ་སྟེ། བརྟུལ་ཞུགས་བྱ་མི་དགོས་པར། ཇི་ལྟར་འདོད་པ་དེ་བཞིན་དུ། དུས་གསུམ་དུ་བཟླས་བརྗོད་བྱའོ། །བུད་མེད་གང་ལ་ལ་མོ་མཚན་གྱི་ནད་ཡོད་པ་དེ་ལ་ནི་ཉིན་གཅིག་བཞིན་དུ་ལན་བདུན་བདུན་དུ་བཟླས་བརྗོད་བྱའོ། །ཏདྱ་ཐཱ། ཀ་ཀ །ཀོ་ཤ་ཕུ་མ་མ། ར་ར་ར་ར། སྟ་རེ་ཕུ། ས་ཀ་རེ་ཕུ་སྭཱ་ཧཱ། གཟུངས་སྔགས་འདི་ནི་གནོད་པ་བྱུང་བ་དང་། སྡུག་བསྔལ་ཐམས་ཅད་མེད་པར་བྱེད་པར་བཤད་དེ། བརྟུལ་

---

^{[མ་དཔེ་གཟིགས་ན་འདིར་གནོན།]}

ཞུགས་བྱ་མི་དགོས་སོ། །སངས་རྒྱས་བཅོམ་ལྡན་འདས་གང་དག་གི་མཚན་སྔར་སྨོས་པ་དང་། གང་དག་གིས་གཟུངས་སྔགས་བཤད་པ་དེ་དག་ནི། བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན། གྲོགས་སུ་གྱུར་པ་ཤ་སྟག་གོ །སངས་རྒྱས་དེ་དག་གི་མི་མཇེད་ཀྱི་འཇིག་རྟེན་གྱི་ཁམས་དང་། བཅོམ་ལྡན་འདས་ཤཱཀྱ་ཐུབ་པའི་ཕྱག་མཚན་ལི་ཡུལ་འདིར། སྐྱེ་བོ་མང་པོ་ལ་ཕན་པའི་ཕྱིར། བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱི་སྐྱེ་བ་བླངས་ཏེ། སྔར་སྨོས་པའི་སངས་རྒྱས་བཅོམ་ལྡན་འདས་དེ་དང་དེ་དག་གིས་བཅོམ་ལྡན་འདས་ཤཱཀྱ་ཐུབ་པའི་ལི་ཡུལ་ཡུན་རིང་དུ་གནས་པར་བྱ་བའི་ཕྱིར། གཟུངས་སྔགས་དེ་དག་དང་། སངས་རྒྱས་ཀྱི་འོད་ཟེར་དེ་དག་དང་། སངས་རྒྱས་ཀྱི་མཚན་དེ་དག་སྐྱེས་སུ་བསྐུར་ཏེ། སངས་རྒྱས་ཀྱི་སྲས་རྣམས་ཀྱིས་ཞུས་ནས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ལི་ཡུལ་ཡོངས་སུ་བསྐྱང་བ་དང་། བསྟན་པ་ཡུན་རིང་དུ་གནས་པར་བྱ་བའི་ཕྱིར། སངས་རྒྱས་བཅོམ་ལྡན་འདས་རྣམས་ལས་སྐྱེས་དེ་དག་བླངས་ནས་འདིར་ཁྱེར་ཏེ་འོངས་སོ། །སངས་རྒྱས་ཀྱི་ཞིང་སྣ་ཚོགས་ན་གནས་པའི་བྱང་ཆུབ་སེམས་དཔའ་མང་པོ་དག་ཀྱང་སངས་རྒྱས་ཀྱིས་ལུང་བསྟན་པའི་ཡུལ་འདི་ཅི་ནས་འཇིག་པར་མི་འགྱུར་བ་དང་། བསྟན་པ་ཡང་ཡུན་རིང་དུ་གནས་པར་བྱ་བའི་ཕྱིར། འདིར་ལྷགས་ནས་སྐྱེ་བ་བླངས་སོ། །གང་གི་ཚེ་ཡུལ་དེར་གནོད་པ་བྱུང་ན་དེའི་ཚེ་སངས་རྒྱས་ཀྱི་མཚན་དེ་དག་དང་། གཟུངས་སྔགས་དེ་དག་དང་། འོད་ཟེར་སྔར་བཤད་པ་དེ་དག་བྲིས་ཏེ་གྲོང་ཁྱེར་གྱི་སྒོ་རྣམས་སུ་བཙུགས་ལ། དམག་གི་རུ་མཚོན་ལ་ཡང་བྲིས་ཏེ་བཞག་ནས། མི་རྣམས་ཀྱང་ཀློག་ཏུ་བཅུག་ཅིང་འཆང་དུ་བཅུག་ན་ཕ་རོལ་གྱི་དམག་ཚོགས་ཀྱིས་འཇིགས་པ་དང་། མུ་གེས་འཇིགས་པ་དང་། ལས་འབྱང་བར་བྱ་བ་དང་། དགེ་བའི་ཕྱོགས་ཡོངས་སུ་རྫོགས་པར་བྱ་བ་དང་། སེམས་ཅན་རྣམས་ཀྱིས་ཇི་ལྟ་བུར་བསམས་པ་བཞིན་དུ་ཕན་འདོགས་པར་འགྱུར་རོ། །སེམས་ཅན་ནད་པ་རྣམས་ལ་ཡང་སྐྱབས་བྱེད་པར་འགྱུར་རོ། །གང་ལ་སྡིག་པའི་ལས་

---

^{[མ་དཔེ་གཟིགས་ན་འདིར་གནོན།]}

ཤིན་ཏུ་ལྕི་བ་དག་ཡོད་ན་ཡང་། དེས་ཞག་ཉི་ཤུ་རྩ་གཅིག་གི་བར་དུ་སངས་རྒྱས་ཀྱི་མཚན་དང་། གཟུངས་སྔགས་དང་། འོད་ཟེར་རྣམས་བཟླས་བརྗོད་བྱ་ཞིང་། ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་དྲན་པར་བྱའོ། །གང་ན་སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་བཞུགས་པ་དེའི་སྤྱན་སྔར་དུས་གསུམ་དུ་བཟླས་བརྗོད་བྱས་ན་དགེ་བའི་ཕྱོགས་ལས་གང་འདོད་པ་དེ་མྱུར་དུ་ཡོངས་སུ་རྫོགས་པར་འགྱུར་ཏེ། འོད་ཟེར་དེ་དག་ཀྱང་དེའི་སྟེང་དུ་གནས་པར་འགྱུར་རོ། །ཕ་རོལ་གྱི་དམག་ཚོགས་འོང་ན་ཡང་བཟླས་བརྗོད་བྱའོ། །ཡང་ན་ཞག་བདུན་གྱི་བར་དུ་བཀླག་པར་བྱའོ། །སུ་ཡང་རུང་སྟེ་གནོད་པ་བྱུང་བའམ། ནད་པའམ། ཇི་ལྟ་བུར་འདོད་པ་ལས་བཟླས་བརྗོད་བྱ་བའམ། ཡང་ན་བཀླག་པར་བྱའོ། །ཅི་སྟེ་ཀློག་མི་ནུས་ན་དེའི་ཚེ་སྐུད་པ་ལ་ལན་བདུན་བཟླས་བརྗོད་བྱ་སྟེ། མདུད་པ་བྱས་ནས་བཏགས་ན་གནོད་པ་ཐམས་ཅད་ལས་ཐར་བར་འགྱུར་རོ། །གྲོང་ཁྱེར་གང་གི་སྒོ་དག་ཏུ་སངས་རྒྱས་ཀྱི་མཚན་དང་། གཟུངས་སྔགས་དང་། འོད་ཟེར་རྣམས་བྲིས་ཏེ་བཞག་ན་གྲོང་ཁྱེར་དེ་གཞན་གྱི་དམག་ཚོགས་ཀྱིས་གཞོམ་པར་མི་ནུས་སོ། །རྟག་ཏུ་བཟླས་བརྗོད་བྱེད་པ་ལ་ནི་ཤ་སྤང་མི་དགོས་སོ། །དངོས་པོ་གཞན་ཡང་སྤང་མི་དགོས་སོ། །དེ་ནས་རིགས་ཀྱི་བུ་གང་དག་སངས་རྒྱས་ཀྱི་རྗེས་སུ་རབ་ཏུ་བྱུང་བ་དེ་དག་ཤིན་ཏུ་དགོངས་ཤིང་བག་ཚ་བར་གྱུར་པ་དེ་དག་ལ། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་སྨྲས་སོ། །བུ་དག་བག་ཚ་བར་མ་བྱེད་ཅིག །ཁྱོད་ཀྱི་དོན་གྱི་ཕྱིར་དགེ་འདུན་གྱི་ཀུན་དགའ་ར་བ་མང་པོ་དང་། ཆོས་ཀྱི་རྒྱལ་པོས་བྱས་པའི་དྲི་གཙང་ཁང་ལ་སོགས་པ་སྐུ་གདུང་དང་ལྡན་པའི་མཆོད་རྟེན་ཡུལ་དེར་འབྱུང་བར་འགྱུར་ཏེ། ཇི་སྲིད་དུ་ཡུལ་དེ་ན་སངས་རྒྱས་བཅོམ་ལྡན་འདས་ཀྱི་བསྟན་པ་གནས་ཀྱི་བར་དུ་ཡུལ་དེ་མ་ལུས་པར་གཞིག་ནུས་པའི་རྒྱལ་པོ་འབྱུང་བར་མི་འགྱུར་རོ། །འདི་ལྟ་སྟེ། དངར་ལྡན་ཞེས་བྱ་བ་ཡིད་དུ་འོང་བ་དང་། ཕག་གིས་མཚོན་པའི་གྲོང་ཁྱེར་དང་། གྲོང་ཁྱེར་རྙིང་པ་དེ་དག་གསུམ་ཡང་ཇི་སྲིད་དུ་སངས་རྒྱས་ཀྱི་བསྟན་པ་གནས་ཤིང་། དགེ་འདུན་ཐམས་ཅད་ལ་མཆོད་པ་དང་།

---

^{[མ་དཔེ་གཟིགས་ན་འདིར་གནོན།]}

སངས་རྒྱས་ཀྱི་མཆོད་རྟེན་ཀ་པི་ལ་ན་ཡོད་ཀྱི་བར་དུ་དེ་དག་འཇིག་པར་མི་འགྱུར་རོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་རྒྱལ་བའི་སྲས་ཐམས་ཅད་ལ་བོས་ཏེ་བསྒོ་བ། ཀྱེ་གྲོགས་པོ་དག་བྱང་ཆུབ་སེམས་དཔའ་རྣམས་དང་། ལྷ་ལ་སོགས་པ་ཡུལ་དེ་ཡོངས་སུ་སྐྱོང་བ་གང་ཡིན་པ་དེ་དག་གིས་ཆོས་དང་མི་ལྡན་པའི་རྒྱལ་པོས་ཡུལ་དེ་གཞིག་པ་ན་ཡལ་བར་མ་དོར་ཅིག །ལ་ལ་ཞིག་གིས་སངས་རྒྱས་ཀྱི་བཀའ་མ་མཉན་ཏེ། འཇིག་པའི་ཚེ་ཡུལ་བཏང་བར་གྱུར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བསྐལ་པ་མང་པོར་བར་ཆད་དུ་འགྱུར་རོ། །དེ་ནས་གཟུངས་སྔགས་འདི་བཤད་དོ། །ཏདྱ་ཐཱ། ཀཱ་ལེ། ཨ་ཀཱ་ལེ། ནི་མེ་བྷ་པྲ་བེ་ཤཱ། ཨཱ་ཀཱ་ལི་ཀྲ་མེ། ཨ་ནི་མེ། ཨ་བྲ་བེ་ཤཱ། པ་རེ་ས་མེ་པ་རི་ས་མི་ཏི། ས་ས་སེ། ཨ་ས་ས་སེ། ས་ཀུ་ཏེ། བ་རུ་རེ། པ་རུ་རེ། ཨ་ག་མེ། ཨ་ས་མ་མོ་ཏེ། སིད་དྷེ་སིད་དྷཱ་ཡ། ན་མོ་བཻ་རོ་ཙ་ནཱ་ཡ་སྭཱ་ཧཱ། ཕ་ཌ་ཌེ་ཎེ་སྦ་ཏེ། ཨཱ་སཱ་ཏེ། སུ་མན་ནེ། ས་རུ་སྟེ། སིད་དྷེ། སིད་དྷཱ་ཡ་སྭཱ་ཧཱ། དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ལི་ཡུལ་གྱི་རྒྱལ་པོར་གྱུར་པ་ལ་དྲིས་ནས། འདི་ནི་ཁྱེད་ཀྱི་སྐྱེས་ཡིན་ནོ། །ཇི་ལྟར་ཁྱོད་ཀྱིས་བྱས་པ་དང་། ཁྱོད་ཀྱིས་དཀོན་མཆོག་གསུམ་གྱི་ཕྱིར་ལུས་དང་སྲོག་བཏང་བར་བྱས་པ་གང་ཡིན་པ་དེ་ནི་སངས་རྒྱས་ཀྱི་སྲས་རྣམས་ཀྱི་ལས་དེ་ལྟ་བུ་ཡིན་ཏེ། ཁྱོད་ཀྱིས་ལེགས་པར་བྱས་པ་ཡིན་ནོ། །གང་གི་ཚེ་ཡུལ་དུ་དགྲ་ཆེན་པོའི་འཇིགས་པ་བྱུང་བར་གྱུར་ན་དེའི་ཚེ་མདོ་སྡེ་འདི་བཀླག་པར་བྱའོ། །བཅང་བར་བྱའོ། །མཆོད་པར་བྱའོ། །འོན་ཏེ་འཇིགས་པ་ཐམས་ཅད་ཞི་བར་འགྱུར་ཏེ། ས་ཧ་པ་ཏི་ཡང་གྲོགས་བྱེད་པར་འགྱུར་རོ། །ཡུལ་བསྲུང་བའི་ཕྱིར་མདོ་འདི་ཆོ་ག་བཞིན་དུ་བྲིས་ཏེ་རྒྱལ་པོའི་ཕོ་བྲང་དུ་བཅང་བར་བྱའོ། །རྒྱལ་པོའི་ཕོ་བྲང་གི་ཕྱི་རོལ་དང་། གྲོང་ཁྱེར་གྱི་སྒོ་རྣམས་སུ་ཡང་དེ་བཞིན་དུ་བྲིས་ཏེ་གཞག་པར་བྱའོ། །ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་དང་། ཁྱིམ་བདག་རྣམས་ཀྱི་ཁྱིམ་དུ་ཡང་གཞག་པར་བྱའོ། །གང་གི་ཚེ་མང་དུ་བཀླགས་སམ། བསླབས་སམ།

---

^{[མ་དཔེ་གཟིགས་ན་འདིར་གནོན།]}

བཅངས་ན་དེའི་ཚེ་ཡུལ་དེར་ཡམས་ཀྱི་ནད་དང་། གནོད་པ་རྣམས་ལས་ཐར་བར་འགྱུར་རོ། །བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་དེ་སྐད་ཅེས་སྨྲས་ནས། བར་སྣང་ལ་གནས་པའི་ལྷ་རྣམས་ཀྱིས་ལྷའི་མེ་ཏོག་གི་ཆར་ནི་ཕབ། ལྷའི་སིལ་སྙན་རྣམས་ནི་དཀྲོལ། ལྷའི་རྔ་བོ་ཆེ་རྣམས་ནི་བརྡུངས་ཏེ། བྱང་ཆུབ་སེམས་དཔའ་དང་། ལྷ་དང་། ཀླུའི་རྒྱལ་པོ་ཐམས་ཅད་ཀྱིས་ཚིག་འདི་སྐད་ཅེས་བརྗོད་དོ། །གང་གི་ཚེ་ཡུལ་དེར་གཟུངས་སྔགས་དེ་དག་དང་། འོད་ཟེར་དེ་དག་དང་། སངས་རྒྱས་ཀྱི་མཚན་དེ་དག་འོང་བར་གྱུར་པ་དེའི་ཚེ་བདག་ཅག་ཀྱང་ཇི་ལྟར་སྔོན་བཅོམ་ལྡན་འདས་ཤཱཀྱ་ཐུབ་པའི་ཐད་དུ་འོངས་པ་བཞིན་དུ་ཕྱི་བཞིན་འོང་བར་བྱའོ། །རྒྱལ་པོ་དེ་ལ་ཡང་ཡུལ་བསྲུང་བའི་ཕྱིར་བདག་ཅག་གིས་གཟུངས་སྔགས་སྦྱིན་པར་བྱ་སྟེ། དམ་པ་ཅི་སློང་བ་དེ་བཞིན་དུ་སྦྱིན་པར་བྱའོ། །དེ་ནས་བྱང་ཆུབ་སེམས་དཔའ་ཞིག་བུད་མེད་ཀྱི་གཟུགས་ཀྱིས་འཇིག་རྟེན་གྱི་ཁམས་རྣམ་པར་སྣང་མཛད་ཀྱི་འོད་ཟེར་གྱིས་སོ་སོར་བརྒྱན་པ་ཞེས་བྱ་བ་ན་འདུག་པས། དེ་བཞིན་གཤེགས་པ་པད་མའི་འདབ་མ་དྲི་མ་མེད་པའི་རྒྱུ་སྐར་གྱི་རྒྱལ་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པའི་མངོན་སུམ་དུ་སྨོན་ལམ་བཏབ་སྟེ། ཅི་ནས་ཀྱང་བདག་མི་མཇེད་ཀྱི་འཇིག་རྟེན་གྱི་ཁམས་བཅོམ་ལྡན་འདས་ཤཱཀྱ་ཐུབ་པའི་སངས་རྒྱས་ཀྱི་ཞིང་དུ་མཆིས་ལ། དེར་བཅོམ་ལྡན་འདས་དེ་ལས་དམ་པའི་ཆོས་པད་མ་དཀར་པོ་ཞེས་བགྱི་བའི་ཆོས་ཀྱི་རྣམ་གྲངས་ཐོས་པར་གྱུར་ཅིག །དེར་བདག་གིས་སེམས་ཅན་ཐམས་ཅད་ལ་ཕན་པ་དང་། བདེ་བ་དང་། ནད་ལས་ཐར་བར་བགྱིད་པར་གྱུར་ཅིག །ཅེས་དེ་སྐད་དུ་སྨོན་ལམ་བཏབ་ནས། བྱང་ཆུབ་སེམས་དཔའ་དེ་སངས་རྒྱས་ཀྱི་ཞིང་དེ་ནས་ཤི་འཕོས་ནས། མི་མཇེད་ཀྱི་འཇིག་རྟེན་གྱི་ཁམས་སུ་རྒྱལ་པོ་མ་སྐྱེས་དགྲའི་ཕོ་བྲང་དུ་བཙུན་མོ་དམ་པའི་བུ་མོར་སྐྱེས་ཏེ་དྲི་མ་མེད་པའི་འོད་ཅེས་བྱ་བར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲའི་བུ་མོར་གྱུར་པ་དྲི་མ་མེད་པའི་འོད་ཅེས་བྱ་བ་དེ་ཉིད་འཁོར་དེའི་ནང་ན་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་ལགས་པ་ན་ལི་

---

^{[མ་དཔེ་གཟིགས་ན་འདིར་གནོན།]}

ཡུལ་ཡོངས་སུ་བསྐྱང་བའི་སླད་དུ་བདག་གིས་ཀྱང་བཀས་གཏད་པ་མནོད་པར་འཚལ་ལོ། །སངས་རྒྱས་བཅོམ་ལྡན་འདས་ཀྱིས་སྔར་གསུངས་པའི་འོད་ཟེར་བཏང་བ་རྣམས་གང་གི་ཚེ། བདག་གི་སྟེང་དུ་གནས་པར་འགྱུར་བ་ན། གཟུངས་གང་གིས་གཟུངས་ཐམས་ཅད་རྟོགས་པར་འགྱུར་བའི་གཟུངས་དེ་ཡང་བདག་གིས་བུད་མེད་ཀྱི་གཟུགས་ཀྱིས་ཐོབ་པར་གྱུར་ཅིག །གང་གི་ཚེ་ལི་ཡུལ་དུ་འཇིགས་པ་ཆེན་པོ་བྱུང་བར་གྱུར་པ་ན། དེའི་ཚེ་ཡུལ་ཡོངས་སུ་བསྲུང་བ་དང་། བསྟན་པ་ཡང་ཡུན་རིང་དུ་གནས་པར་བགྱི་བའི་སླད་དུ། བདག་ལ་སངས་རྒྱས་བཅོམ་ལྡན་འདས་རྣམས་ཀྱིས་དགོངས་པར་གྱུར་ཅིག །ཐབས་ཀྱང་སྟོན་པར་གྱུར་ཅིག །ལྷ་རྣམས་ཀྱང་དམ་པ་སྩོལ་བར་གྱུར་ཅིག །དེ་བཞིན་དུ་བདག་དེར་མིའི་བུད་མེད་གཞན་འདྲ་བར་བུད་མེད་དེ་ཐ་མལ་པའི་གཟུགས་སུ་སྣང་བར་གྱུར་ཅིག །སངས་རྒྱས་ཀྱི་འོད་ཟེར་དེ་དག་གི་སྟེང་དུ་གནས་པ་ཡང་ཐོབ་པར་གྱུར་ཅིག །སེམས་ཅན་གནོད་པས་ཉེན་པ་རྣམས་དང་། ནད་ཀྱིས་ཐེབས་པ་རྣམས་དང་། སྡུག་བསྔལ་བར་གྱུར་པ་དེ་དག་སྡུག་བསྔལ་ཐམས་ཅད་ལས་ཐར་བར་བགྱི་བའི་སླད་དུ་གཟུངས་སྔགས་དེ་དག་ཀྱང་ཐོབ་པར་གྱུར་ཅིག །གང་གི་ཚེ་རྒྱལ་པོ་ཆེན་པོ་དེ་དག་ཕན་ཚུན་འཐབ་པ་དང་། གང་གི་ཚེ་གདོང་དམར་གྱིས་ལི་ཡུལ་གྱི་ཡུལ་འཁོར་ཁྱེར་བ་ན་ཡང་དེར་བདག་བུད་མེད་ཀྱི་སྐྱེ་བ་ལེན་པར་གྱུར་ཅིག །སངས་རྒྱས་བཅོམ་ལྡན་འདས་རྣམས་ཀྱིས་ཐེག་པ་ཆེན་པོའི་མདོ་སྡེ་དམ་པའི་ཆོས་པད་མ་དཀར་པོ་གསུངས་པ་གང་ལགས་པ་དེ་ཡང་བདག་འཛིན་པར་གྱུར་ཅིག །མདོ་སྡེ་འདི་ལས་གཟུངས་སྔགས་འབྱུང་བ་རྣམས་ཀྱང་རྟོགས་པར་གྱུར་ཅིག །སེམས་ཅན་འདུལ་བའི་སླད་དུ་སྒྲ་ཐམས་ཅད་ལ་རྟོགས་པའི་ཏིང་ངེ་འཛིན་ཡང་རྟོགས་པར་གྱུར་ཅིག །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཀྱིས་སེམས་ཅན་ཐམས་ཅད་ལ་ཕན་འདོགས་པར་གྱུར་ཅིག །ལི་ཡུལ་གྱི་སྲུང་མ་གང་ལགས་པའི་ལྷ་རྣམས་ལ་ཡང་ཆོས་ཀྱི་སྦྱིན་པ་དང་། མཆོད་པའི་ལས་བགྱིད་པར་གྱུར་ཅིག །ཐེག་པ་ཆེན་པོའི་མདོ་སྡེ་དམ་པའི་

---

^{[མ་དཔེ་གཟིགས་ན་འདིར་གནོན།]}

ཆོས་པད་མ་དཀར་པོ་འདི་དང་། ལྷ་གང་དག་གིས་མདོ་སྡེ་འདི་བསྟན་ཅིང་མནོས་པ་དེ་དག་ཀྱང་བདག་གི་དབང་དུ་གྱུར་ཅིག །དེ་ནས་སྲུང་མ་རྣམ་ཐོས་ཀྱི་བུ་དང་། སྲིན་མོ་ལམ་བཀོན་ཏི་སྲིན་མོ་ཐམས་ཅད་དང་། གྲོགས་མོ་དང་བཅས་པ་དང་། འཕྲོག་མ་བུ་དང་འཁོར་དུ་བཅས་པ་དེ་དག་གིས་བཅོམ་ལྡན་འདས་དང་། ལྷ་མོ་དྲི་མ་མེད་པའི་འོད་ཀྱི་ཚིག་ཐོས་ནས། སྟན་ལས་ལངས་ཏེ་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །གང་གི་ཚེ་ལྷ་མོ་འདི་ལི་ཡུལ་དུ་སྐྱེ་བ་ལེན་པར་འགྱུར་བ་དེའི་ཚེ་བདག་ཅག་ཀྱང་གྲོགས་བགྱིད་པའི་སླད་དུ་སྲུང་མ་བགྱིད་ཅིང་ཐེག་པ་ཆེན་པོའི་མདོ་སྡེ་དམ་པའི་ཆོས་པད་མ་དཀར་པོ་དང་། ལི་ཡུལ་གྱི་ཡུལ་འཁོར་སངས་རྒྱས་བཅོམ་ལྡན་འདས་ཀྱིས་གཏད་པ་ཁྱོད་ཀྱིས་མནོས་སོ་ཞེས་དྲན་པར་བགྱིའོ། །དེའི་ཚེ་ལྷའི་རྒྱལ་པོ་སུམ་ཅུ་རྩ་གཉིས་ཀྱིས་ལྷ་མོ་དེའི་དམ་བཅས་པ་འདི་ཐོས་ནས་འདི་སྐད་ཅེས་གསོལ་ཏོ། །གང་གི་ཚེ་ལྷ་མོ་འདི་ལི་ཡུལ་བསྲུང་བའི་སླད་དུ་སྐྱེ་བ་ལེན་པར་འགྱུར་བ་དེའི་ཚེ་བདག་ཅག་འཁོར་དང་བཅས་པས་ཀྱང་ཡུལ་བསྲུངས་པ་དང་། བསམས་པ་བཞིན་དུ་འབྱོར་བར་བགྱི་བའི་སླད་དུ་གྲོགས་བགྱིའོ། །དེའི་ཚེ་ལྷ་མོ་དྲི་མ་མེད་པའི་འོད་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་དམ་པ་གསོལ་ཞིང། བཅོམ་ལྡན་འདས་ཀྱི་སྤྱན་སྔར་སྨོན་ལམ་བཏབ་པ། བཅོམ་ལྡན་འདས་བདག་སེམས་ཅན་ཐམས་ཅད་ལ་བུ་གཅིག་པ་བཞིན་དུ་སེམས་པར་གྱུར་ཅིག །བརྩོན་འགྲུས་གང་ཅི་རྩོམ་པ་དེ་ཐམས་ཅད་གྲུབ་པར་གྱུར་ཅིག །ལུས་བརྟན་པ་དང་། སེམས་བརྟན་པ་དང་། སེམས་ཅན་གྱི་དོན་བགྱིད་པ་དང་། བསམ་པ་ཡོངས་སུ་རྫོགས་པར་བགྱིད་པ་དང་། ཡུལ་གྱི་སླད་དུ་སེམས་མངོན་པར་བརྩོན་པར་གྱུར་ཅིག །དམ་པའི་ཆོས་པད་མ་དཀར་པོའི་མདོ་སྡེས་སེམས་ཅན་རྣམས་ལ་ཕན་འདོགས་པ་དང་། ཏིང་ངེ་འཛིན་ཡང་ཐོབ་པར་གྱུར་ཅིག་ཅེས་སྨྲས་སོ། །ལྷ་མོས་བཅོམ་ལྡན་འདས་ཀྱི་སྤྱན་སྔར་དེ་སྐད་ཅེས་སྨྲས་པ། དེའི་ཚེ་བཅོམ་ལྡན་འདས་དང་། ལྷ་

---

^{[མ་དཔེ་གཟིགས་ན་འདིར་གནོན།]}

མོ་དྲི་མ་མེད་པའི་འོད་ཀྱི་སྟེང་དུ་ལྷའི་མེ་ཏོག་གི་ཆར་བབ་བོ། །དེའི་ཚེ་ལྷ་མོ་དྲི་མེད་འོད། །བྱང་ཆུབ་སེམས་དཔའི་གནས་མཛེས་པ། །ལི་ཡུལ་དུ་ནི་སྐྱེས་ཤིག་ཅེས། །རྒྱལ་བའི་སྤྱན་སྔར་སྨོན་ལམ་བཏབ། །སྐྱོབ་པ་ཤཱཀྱ་སེང་གེ་ཡི། །བསྟན་པ་ཇི་སྲིད་གནས་པའི་བར། །དེ་སྲིད་བར་དུ་བདག་ཀྱང་དེར། །རྟག་ཏུ་སྐྱེ་བ་འཛིན་གྱུར་ཅིག །རྒྱལ་བའི་སྤྱན་སྔར་གང་གི་ཚེ། །ལྷ་མོས་སྨོན་ལམ་བཏབ་པ་ན། །སངས་རྒྱས་ཞིང་བཞུགས་རྒྱལ་རྣམས་ཀྱིས། །དེ་ཚེ་ལེགས་ཞེས་བྱ་བ་བྱིན། །ལྷ་མོ་ཡུལ་གྱི་སྲུང་མ་ལ། །རྒྱལ་བ་རྣམས་ཀྱིས་ལེགས་བྱིན་པ། །རྣམ་ཐོས་བུ་དང་གནོད་སྦྱིན་དབང་། །ཀུན་ཏུ་རྒྱལ་གྱིས་དེ་བཞིན་ཐོས། །དེ་ཚེ་རྣམ་ཐོས་བུ་ལ་སོགས། །ལྷ་རྣམས་གང་དག་དེར་འདུས་པས། །བཅོམ་ལྡན་འདས་ལ་ཚིག་གིས་གསོལ། །ལི་ཡུལ་ཡོངས་སུ་བསྲུང་བའི་ཕྱིར། །ལྷ་རབ་དམ་པ་འཐུན་གྱུར་པ། །བདག་ཅག་གིས་ནི་ཡུལ་ཡང་བཟུང་། །གང་ཚེ་གསེར་གྱི་རིགས་དག་དང་། །སྐར་རྡོའི་ཡུལ་ནི་མཛེས་གྱུར་པ། །ལི་ནི་དབང་བར་གྱུར་པ་ན། །གསེར་གྱི་དཔྱ་ནི་འཇལ་བར་འགྱུར། །དེ་ཚེ་ལྷ་མོས་གསོལ་པ་ནི། །སྐར་རྡོ་དང་ནི་གསེར་གྱི་རིགས། །ལྷ་རྣམས་ཀྱིས་ནི་བསྲུང་བའི་ཕྱིར། །རྒྱལ་བ་སྐྱེས་མཆོག་སྩོལ་བར་མཛོད། །ས་འདིར་སྔོན་གྱི་ཚེ་རབས་སུ། །གང་ཚེ་བདག་ནི་དགེ་བསྙེན་མ། །མིང་ནི་ཧུ་ཤར་གྱུར་པ་ན། །ཡུལ་འདི་གཉིས་ནི་བདག་གི་ལགས། །དེ་ཡི་འཁོར་དུ་རྒྱལ་བྱུང་བ། །ཨུ་རྒྱན་བདག་པོ་དབང་ཕྱུག་གོ །རྒྱལ་པོ་སྟན་ལས་ལངས་ནས་ཀྱང་། །པུས་མོ་གཉིས་ནི་ས་ལ་བཙུགས། །བཅོམ་ལྡན་འདས་ལ་གསོལ་བ་ནི། །གང་གི་ཚེ་ན་ལི་ཡུལ་ཞེས། །བྱ་བ་དེ་ནི་འབྱུང་འགྱུར་ཞིང་། །ཡོངས་སུ་རྒྱས་ཤིང་སྐྱེ་བོ་གང་། །དེ་ཚེ་སྐར་རྡོའི་ཡུལ་དག་ཏུ། །སྟོབས་ཆེན་རྒྱལ་པོར་བདག་གྱུར་ནས། །དེར་ནི་ལི་ཡི་བདག་པོ་དང་། །རྟག་ཏུ་གཉེན་ནི་བགྱིད་པ་དང་། །བདག་གི་ཡུལ་དེ་བསྲུང་བའི་ཕྱིར། །བདག་ཉིད་ཀྱང་ནི་དབུལ་བར་བགྱི། །དེ་ཡི་ཚེ་ནི་དྲི་མེད་འོད། །ལྷ་མོས་སྨོན་ལམ་འདི་སྐད་བཏབ། །གང་ཚེ་ཡུལ་གྱི་དང་པོ་འདིར། །སུམ་པ་མང་པོ་འོང་བ་དང་། །

---

^{[མ་དཔེ་གཟིགས་ན་འདིར་གནོན།]}

གང་ཚེ་ཡུལ་འདིར་རྒྱ་དང་ནི། །འ་ཞ་དང་ནི་སུམ་པ་རྣམས། །འཕགས་སྐྱེས་པོ་ཡི་དམག་བཞིན་དུ། །ཡུལ་དེར་འོང་བར་གྱུར་པ་ན། །དེ་ཚེ་ཡུལ་འདིར་སྐྱེ་བོའི་ཕྱིར། །བདག་གིས་སྐྱེ་བ་བླང་བར་བགྱི། །བདག་གིས་སྐྱེ་བ་དེར་བླངས་པས། །སུམ་པ་ལ་སོགས་ལྡོག་གྱུར་ཅིག །ལི་ཡུལ་ན་ནི་གནས་རྣམས་ཀྱིས། །སྔོན་ནི་གང་དུ་ལས་བགྱིས་པ། །དེར་ནི་བདག་ཀྱང་དགའ་བཞིན་དུ། །བདག་གིས་སུ་ནི་ལས་རྣམས་བགྱིས། །དེར་ནི་སྔོན་གྱི་རྒྱལ་པོ་གང་། །བློན་པོ་ཁྱིམ་བདག་ཡུལ་མི་དང་། །བདག་ལ་སྡུག་པར་གྱུར་པ་དང་། །དེ་དག་དང་ནི་བྲལ་བར་འགྱུར། །དེ་ཚེ་བདག་ནི་གཅིག་པུ་སྡུག །མི་གཙང་ཏིང་འཛིན་ཐོབ་གྱུར་ནས། །དེར་ནི་སྐྱོ་བར་གྱུར་པ་ན། །སྔོན་གྱི་སྨོན་ལམ་དྲན་གྱུར་ཅིག །དེ་ཚེ་དེ་ཡི་འཁོར་དུ་ནི། །ཀ་སྤ་ར་ཡི་བདག་པོ་རྒྱལ། །དེས་ནི་ལྷ་མོ་དྲི་མེད་འོད། །སྨྲས་པ་ཐོས་པར་གྱུར་ནས་ཀྱང་། །རྒྱལ་པོ་སྟན་ལས་ལངས་ནས་ནི། །འདི་སྐད་ཀྱི་ནི་ཚིག་ཀྱང་སྨྲས། །བདག་ནི་ཚེ་རབས་སྔ་མར་ནི། །མི་བཟད་ལས་བྱས་གང་ཡིན་པས། །ཤཱཀྱ་རྣམས་ནི་བརླག་པའི་ཕྱིར། །བདག་ནི་རྒྱལ་པོ་འཕགས་སྐྱེས་དང་། །མཛེས་པའི་ཡུལ་དུ་ལྷན་ཅིག་དོང་། །ལས་འདི་རྣམ་སྨིན་མི་བཟད་པ། །ཚེ་འདི་ལ་ནི་མི་མྱོང་བར། །བདག་ནི་འདི་སྐད་སྨོན་ལམ་འདེབས། །གང་གི་ཚེ་ན་སུམ་པ་དང་། འ་ཞ་དག་དེར་དོང་བ་དང་། བདག་གིས་སྔོན་ཤཱཀྱའི་ཡུལ་དུ་འཕགས་སྐྱེས་པོའི་གཡུལ་ངོར་ལས་བྱས་པ་གང་ཡིན་པ་དེ། གང་གི་ཚེ་ལྷ་མོ་འདི་སྐྱོ་བ་ཆེན་པོར་གྱུར་པ་ན། དེའི་ཚེ་བདག་འདིའི་ཕར་གྱུར་ལ། བདག་གི་ཕྱིར་འདི་སྐྱོ་བར་གྱུར་ཅིང་། དང་པོར་གཟུངས་ཐོབ་པ་བཞིན་དུ། དེས་བདག་ཀྱང་སྡུག་བསྔལ་ཐམས་ཅད་ལས་གྲོལ་བར་གྱུར་ཅིག་ཅེས་བྱས་སོ། །རྒྱལ་པོ་དེའི་བཙུན་མོ་དམ་པ་འཁོར་དེ་ཉིད་ཀྱི་ནང་ན་འདུག་པ་དེས་སྨོན་ལམ་བཏབ་པ་དེའི་ཚེ་བདག་ཀྱང་ལྷ་མོ་དྲི་མ་མེད་པའི་འོད་ཀྱི་མར་གྱུར་ལ། བདག་གིས་འཕགས་སྐྱེས་པོའི་དམག་སླར་ལྡོག་ལ་སྡིག་པའི་ལས་ཆེན་པོ་འདི་ལྟ་བུ་བྱས་ཏེ་ཅི་བྱ་ཞེས་གྱོད་བཏབ་པའི་དགེ་བའི་སེམས་བསྐྱེད་པ་གང་ཡིན་པ་དེས་ན་ལི་ཡུལ་དེར་བདག་འཆི་

---

^{[མ་དཔེ་གཟིགས་ན་འདིར་གནོན།]}

བའི་དུས་ལ་མ་བབ་ཀྱི་བར་དུ། བདག་གིས་ལི་ཡུལ་དེ་ཉིད་དུ་མི་རྟག་པ་ཉིད་མཐོང་ནས། གང་གི་ཚེ་ཡུལ་དེར་འ་ཞ་དང་སུམ་པ་འོང་བ་དེའི་ཚེ་བདག་འཆི་བའི་དུས་བྱས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་གྱུར་ཅིག་ཅེས་བྱས་སོ། །ལྷ་མོ་དྲི་མ་མེད་པའི་འོད་དེའི་མིང་པོ་རྒྱལ་པོ་མ་སྐྱེས་དགྲའི་བུ་གང་ཡིན་པ་དེ་ཡང་ཤིན་ཏུ་ང་རྒྱལ་ཆེ་ཞིང་རྒྱགས་པས་གཡུལ་འགྱེད་པ་བལྟ་བའི་ཕྱིར་ཤཱཀྱའི་གཡུལ་དེར་རྒྱལ་པོ་འཕགས་སྐྱེས་པོའི་དམག་གི་ཟླ་ལ་འོངས་ནས། དེས་ཀྱང་གཡུལ་དེར་མི་བསད་པ་ལ་སོགས་པའི་སྡིག་བྱས་ཏེ། གང་གི་ཚེ་དེར་སེམས་ཅན་མང་པོ་ཤི་བ་མཐོང་བ་དེའི་ཚེ། དེས་སངས་རྒྱས་མཐོང་ནས་འགྱོད་པ་ཆེན་པོ་དང་སྐྱོ་བར་གྱུར་ཅིང་། དེའི་ཚེ་དེས་ལྷ་མོ་དྲི་མ་མེད་པའི་འོད་ལ་སྨྲས་པ། ང་ནི་ཁྱོད་ཀྱི་མིང་པོ་ཤིན་ཏུ་སྡུག་པ་ཡིན་པས་ངས་དམག་དེའི་ནང་དུ་སྡིག་པའི་ལས་བྱས་པ་ཁྱོད་ཀྱིས་ཐོས་ནས་རྗེས་སུ་ཡིད་རངས་པར་གྱུར་ཏེ། ཁྱོད་ཀྱི་ཡིད་ཀྱིས་མི་དགེ་བ་ཐོབ་པར་གྱུར་པ་གང་ཡིན་པའི་ལས་ཀྱི་རྣམ་པར་སྨིན་པ་དེས་ན་ཁྱོད་ཀྱི་ཡུལ་དུ་སུམ་པའི་དམག་འོང་བར་གྱུར་ཏེ། དེའི་ཚེ་ད་ལྟར་ཇི་ལྟ་བ་བཞིན་དུ་དེར་ང་ཁྱོད་ཀྱི་སྡུག་པའི་མིང་པོར་གྱུར་ལ། ཁྱོད་ཀྱིས་གཅིག་པུ་ལུང་མེད་པར་མི་གཙང་བའི་ཏིང་ངེ་འཛིན་ཐོབ་པར་འགྱུར་བ་དང་། ཁྱོད་ཀྱིས་ཐོག་མ་ཁོ་ནར་གཟུངས་ཐོབ་པར་འགྱུར་བཞིན་དུ། དེའི་ཚེ་ང་ཡང་ཁྱོད་ཀྱི་མཐུས་སེམས་ཅན་དམྱལ་བ་དང་། དུད་འགྲོའི་སྡུག་བསྔལ་རྣམས་ལས་ཐར་བར་གྱུར་ནས་གནོད་སྦྱིན་གྱི་དབང་པོ་རྣམ་ཐོས་ཀྱི་བུའི་གཡོག་བྱེད་པའི་གནོད་སྦྱིན་ཨཱ་ཛུ་ལ་ཞེས་བྱ་བར་གྱུར་ལ་དེས་རྟག་ཏུ་ཁྱོད་བསྲུང་ཞིང་ངས་རྣམ་ཐོས་ཀྱི་བུ་ལ་སོགས་པ་དེ་དག་དང་། གནོད་སྦྱིན་གཞན་དེ་དག་དང་། ལྷའི་ཕོ་བྲང་སུམ་ཅུ་རྩ་གཉིས་དག་ཏུ་ལྷའི་རྒྱལ་པོ་དེ་དག་ལ་དྲན་པར་བསྐུལ་ཏེ། གང་གི་ཚེ་ཁྱོད་ལ་དགོངས་པ་དེའི་ཚེ་འོངས་ནས་ཅི་འདོད་པ་སྒྲུབ་པར་གྱུར་ཅིག་ཅེས་སྨྲས་སོ། །དེར་ལྷ་མོ་དེ་ཉིད་ཀྱི་ནུ་མོ་ཐ་ཆུངས་རྒྱལ་པོ་མ་སྐྱེས་དགྲའི་བུ་མོར་གྱུར་པ་དེས་སྨོན་ལམ་བཏབ་པ། བདག་གི་མིང་པོ་འཕགས་སྐྱེས་པོའི་དམག་གི་ཟླ་ལ་སྡིག་པའི་ལས་བྱས་པ་བདག་གིས་ཐོས་ནས་

---

^{[མ་དཔེ་གཟིགས་ན་འདིར་གནོན།]}

དགའ་བར་གྱུར་པའི་ལས་དེས་ན་དེར་ཡང་ཁྱོད་ཀྱི་ནུ་མོར་གྱུར་ལ་གང་གི་ཚེ་ལས་དེའི་རྣམ་པར་སྨིན་པས་བདག་མྱ་ངན་གྱིས་འཆི་བའི་དུས་བྱེད་པར་འགྱུར་བ་དེའི་ཚེ་ཁྱོད་དེ་ལྟ་བུར་སྐྱོ་བར་གྱུར་པས་ན། བདག་གིས་དགེ་བའི་བཤེས་གཉེན་རྙེད་ནས་ཆོས་གང་གིས་འབྲས་བུ་དང་པོ་ཐོབ་སྟེ། སྡུག་བསྔལ་མཐར་བྱེད་པར་འགྱུར་བ་དེ་ལྟ་བུའི་ཆོས་ཐོས་ནས་དེའི་ཚེ་སྔོན་དང་ཕྱི་མའི་ལས་རྣམས་དྲན་པར་གྱུར་ཅིག་ཅེས་བྱས་སོ། །དེར་ལྷ་མོ་དེའི་མིང་པོ་ཐ་ཆུངས་སུ་གྱུར་ཅིང་། དགེ་བསྙེན་མ་ཧུ་ཤ་ཞེས་བྱ་བར་གྱུར་པ་ཕྱིན་ཅད་དེའི་མིང་པོར་གྱུར་པ་དེའི་སྔོན་གྱི་ལས་ཀྱིས་སེམས་ཅན་རྣམས་སྐྲག་པར་བྱེད་པ་དེས་སྲིང་མོ་བཅོམ་ལྡན་འདས་ཀྱི་སྤྱན་སྔར་སྨོན་ལམ་འདེབས་པ་ཡང་མཐོང་ལ། བཅོམ་ལྡན་འདས་ཀྱི་སྤྱན་སྔར་སྨོན་ལམ་བཏབ་ནས་ལི་ཡུལ་གྱི་ཡུལ་འཁོར་ཡོངས་སུ་བསྐྱང་བའི་ཕྱིར་མནོས་པ་ཡང་མཐོང་ངོ་། །དེ་ནས་ལྷ་མོ་དྲི་མ་མེད་པའི་འོད་ཀྱི་མིང་པོ་ཐ་ཆུངས་རྒྱལ་པོ་མ་སྐྱེས་དགྲའི་བུས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྐད་ཅེས་གསོལ་ཏོ། །སྔོན་བདག་གིས་སངས་རྒྱས་བཅོམ་ལྡན་འདས་མང་པོ་ལ་བསྙེན་བཀུར་བྱས་ཏེ། དུས་ཐམས་ཅད་དུ་སྐྱེས་པར་གྱུར་ནས་རྒྱལ་སྲིད་ཀྱི་བགྱི་བ་མང་པོ་ཡང་བགྱིས་སོ། །བདག་གི་སྲིང་མོ་འདི་ཡང་བུད་མེད་ཀྱི་གཟུགས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པ་ལགས་ཏེ། འདིས་ལི་ཡུལ་ཡོངས་སུ་བསྐྱང་བའི་སླད་དུ་སུག་པར་བླངས་པ་དེ་ནི་ལས་ཆེན་པོ་མཆིས་ཀྱི་འཚལ་བ་ལགས་ཏེ། བུད་མེད་ཀྱི་བསམ་པ་ནི་སངས་རྒྱས་བཅོམ་ལྡན་འདས་ཉིད་ཀྱིས་མཁྱེན་པར་བས་སོ། །བཅོམ་ལྡན་འདས་ཅི་ནས་ཀྱང་བདག་གི་སྟེང་དུ་འོད་ཟེར་བཏང་བ་དེ་ལྟ་བུར་བདག་ལ་བྱིན་གྱིས་བརླབ་པར་གསོལ། ཅི་ནས་ཀྱང་ཡུལ་བསྲུང་བའི་སླད་དུ་གྲོགས་བགྱིད་པར་འགྱུར་བ་དང་། བདག་གི་རིགས་ཀྱིས་ཡུན་རིང་པོར་ལི་ཡུལ་དུ་ཡུལ་འཛིན་པར་འགྱུར་བ་དེ་ལྟ་བུའི་གཟུངས་ཀྱང་སྩལ་བར་གསོལ། སྐྱེ་བ་བླངས་ཏེ་འབྲས་བུ་ཐོབ་ནས་གུམ་པའི་འོག་ཏུ་ཡང་ལྷ་རྣམས་ཀྱི་ནང་དུ་སྐྱེ་བར་གྱུར་ཅིག །གང་གི་ཚེ་ལི་ཡུལ་དུ་སུམ་པའམ། གདོང་དམར་རྣམས་འོང་བར་འགྱུར་བ་དེའི་ཚེ་བདག་སྐར་

---

^{[མ་དཔེ་གཟིགས་ན་འདིར་གནོན།]}

རྡོའི་ཡུལ་གྱི་རྒྱལ་པོར་གྱུར་ཏེ། ལྷ་མོ་དྲི་མ་མེད་པའི་འོད་དེའི་མིང་པོར་གྱུར། ལི་ཡུལ་དར་བར་བགྱི་བའི་སླད་དུ་བདག་དེའི་གྲོགས་བགྱིད་པར་གྱུར་ཅིག་ཅེས་བྱས་སོ། །གང་གི་ཚེ་གཞོན་ནུ་དེས་དེ་སྐད་ཅེས་གསོལ་ནས། སྨོན་ལམ་ཡང་བཏབ་དེའི་ཚེ་བཅོམ་ལྡན་འདས་བདུད་ལས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ལྷ་རྣམས་ཀྱིས་ཀྱང་ལྷའི་མེ་ཏོག་གི་ཆར་ཕབ་སྟེ། ལྷའི་སིལ་སྙན་རྣམས་དཀྲོལ་ལོ། །བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་བཀའ་སྩལ་པ། ངས་ཐོག་མ་སེམས་བསྐྱེད་པ་ནས་བྱང་ཆུབ་ཀྱི་སྙིང་པོ་ལ་འདུག་གི་བར་དུ་བསོད་ནམས་དང་། དགེ་བའི་རྩ་བ་བསགས་པ་དེ་དག་དང་། དེ་བཞིན་གཤེགས་པ་མང་པོ་གཞན་དག་ཇི་ལྟ་བ་བཞིན་དུ་སངས་རྒྱས་ཀྱི་ཕྲིན་ལས་མང་པོ་མཛད་མཛད་པའི་བསོད་ནམས་ཀྱི་ཕུང་པོ་ཆེན་པོ་དེ་དག་དང་། ཆོ་འཕྲུལ་དེ་དག་ངས་གཅིག་ཏུ་བསྡུས་ཏེ་གཅིག་ཏུ་བརྟུལ་བས་མ་འོངས་པའི་དུས་སུ་ལྷ་མོ་དྲི་མ་མེད་པའི་འོད་འདིས་ཡོངས་སུ་བསྐྱང་བའི་ཕྱིར་ལག་ཏུ་བླངས་པའི་ལི་ཡུལ་གྱི་ཡུལ་འཁོར་རབ་ཏུ་གནས་པར་བྱའོ། །དེ་ནས་བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལས་མི་སྣང་བར་གྱུར་ཏེ། ཕྱོགས་གང་དུ་ལི་ཡུལ་དང་། ཐུབ་པའི་དྲང་སྲོང་ཆེན་པོའི་གནས་གོ་མ་ས་ལ་གན་དྷའི་མཆོད་རྟེན་འབྱུང་བར་འགྱུར་བའི་ཕྱོགས་དེར་བཞུགས་སོ། །བཅོམ་ལྡན་འདས་དེར་བཞུགས་བཞིན་དུ་དཔལ་ཐམས་ཅད་ཀྱིས་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཡེ་ཤེས་སྒྲོན་མ་ཞེས་བྱ་བའི་འོད་ཟེར་བཏང་ངོ་། །བྱ་རྒོད་ཀྱི་ཕུང་པོའི་རི་ལ་གནས་པའི་འཁོར་དེ་དག་ཐམས་ཅད་ཀྱིས་ཀྱང་གནས་གཅིག་ན་འཁོད་བཞིན་དུ་བཅོམ་ལྡན་འདས་གང་དུ་ལི་ཡུལ་འབྱུང་བར་འགྱུར་བའི་ཕྱོགས་དེ་ན་སྐྱིལ་མོ་ཀྲུང་བཅས་ཏེ་བཞུགས་པར་མཐོང་ངོ་། །ཐུབ་པའི་དྲང་སྲོང་ཆེན་པོའི་གནས་རི་གླང་རུ་ཞེས་བྱ་བ་དེ་ལ་གནས་པའི་བྱང་ཆུབ་སེམས་དཔའ་སྔོན་བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན་གྲོགས་སུ་གྱུར་པ་གང་ཡིན་པ་དེ་དག་གིས་ཀྱང་འོད་ཟེར་དེ་དག་བཏང་སྟེ། བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ཉིད་ནི་གང་དུ་གོ་མ་ས་ལ་གན་དྷའི་མཆོད་རྟེན་གྱི་ཆོས་ཀྱི་འཁོར་ལོ་འབྱུང་བར་འགྱུར་བ་དེའི་བར་སྣང་ལ་བཞུགས་སོ། །བྱང་ཆུབ་སེམས་དཔའ་རྣམས་ནི་གང་དང་གང་དག་ཏུ་དགེ་འདུན་གྱི་ཀུན་དགའ་ར་བ་དང་། དགོན་པའི་གནས་དང་། དྲི་གཙང་ཁང་དང་། མཆོད་རྟེན་ཆེན་པོ་རྣམས་འབྱུང་བར་འགྱུར་བའི་ཆུའི་ནང་གི་པད་མའི་སྟེང་དེ་དང་དེ་དག་ལ་འཁོད་དོ། །དེ་ནས་དེར་སངས་རྒྱས་བཅོམ་ལྡན་འདས་ཀྱིས་གཟུངས་སྔགས་གང་གིས་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཐམས་ཅད་ཐུགས་སུ་ཆུད་པར་འགྱུར་བའི་གཟུངས་སྔགས་ཆོས་ཀྱི་སྤྱི་བོ་ཞེས་བྱ་བ་འདི་བཤད་དོ། །ཏདྱ་ཐཱ། བ་བ་ར། པྲ་ཏྱ་བ་བ་ར། པྲཛྙཱ་བ་བ་ར། བུད་དྷ་བ་བ་ར། སད་དྷརྨ་བ་བ་ར། ཤུ་རཱ་བ་བ་ར། སརྦ་དྷརྨ་སྐན་དྷ་བ་བ་ར། བཛྲ་པཱ་ཎི་བ་བ་ར། ཏིཥྛ་ཏ་བ་བ་ར་སྭཱ་ཧཱ། གང་གི་ཚེ་སངས་རྒྱས་བཅོམ་ལྡན་འདས་ཀྱིས་གཟུངས་སྔགས་འདི་བཤད་པ་དེའི་ཚེ་བྱ་རྒོད་ཀྱི་ཕུང་པོའི་རི་ལ་གནས་པའི་འཁོར་ཐམས་ཅད་ཀྱིས་ཐོས་སོ། །རི་གླང་རུའི་ཟོམ་ན་བཅོམ་ལྡན་འདས་བྱང་ཆུབ་སེམས་དཔའ་ཐམས་ཅད་ཀྱི་ཚོགས་དང་ཐབས་ཅིག་ཏུ་བཞུགས་པ་ཡང་མཐོང་ངོ་། །དེ་ནས་བཅོམ་ལྡན་འདས་ཀྱིས་ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་ལ་བཀའ་སྩལ་པ། ཁྱོད་ཀྱིས་གཟུངས་སྔགས་འདིས་ངའི་ལས་གྱིས་ལ། ལི་ཡུལ་གྱི་ཡུལ་འཁོར་ཁྱོད་ལ་གཏད་པས། ཡོངས་སུ་བསྲུང་བར་གྱིས་ཤིག །དེའི་ཚེ་ལྷ་མོ་དྲི་མ་མེད་པའི་འོད་དང་། བྱང་ཆུབ་སེམས་དཔའ་རྡོ་རྗེ་སྡེས་འདི་སྐད་ཅེས་གསོལ་ཏོ། །བཅོམ་ལྡན་འདས་ལི་ཡུལ་གཏད་པ་འདི་བདག་ཅག་གིས་མནོད་པར་འཚལ་ལོ།། །།དྲི་མ་མེད་པའི་འོད་ཀྱིས་ཞུས་པ། བམ་པོ་གཉིས་པ། དེའི་ཚེ་བཅོམ་ལྡན་འདས་ཀྱིས་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེའི་དོན་གྱི་ཕྱིར་གཟུངས་སྔགས་གཞན་བཤད་པ། ཏདྱ་ཐཱ། ནིརྫི་ཏེ། བརྫི་ཏེ། བརྫི་ཏེ། བྷ་ཋི་ཏེ་དྷརྨ་སྐན་དྷ་ཨ་བ་ར་ཛི་ཏེ། ཨིན་དྲ་བརྫི་ཏེ། ཕུ་སྭཱ་ཧཱ། དེའི་ཚེ་སངས་རྒྱས་བཅོམ་ལྡན་འདས་རིན་ཆེན་སྙིང་པོ་ལ་སོགས་པ་གང་དག་ལ་ལྷ་མོ་དྲི་མ་མེད་པའི་འོད་ཀྱི་སྔོན་སངས་རྒྱས་ཉིད་དུ་ཐོག་མ་སེམས་

---

^{[མ་དཔེ་གཟིགས་ན་འདིར་གནོན།]}

བསྐྱེད་པ་དེ་དག་ཀྱང་དེར་གཤེགས་སོ། །གཞོན་ནུ་རྡོ་རྗེ་སྡེས་ཀྱང་ཡོན་ཕུལ་ལོ། །སངས་རྒྱས་བཅོམ་ལྡན་འདས་དེ་བཞིན་གཤེགས་པ་ཀུན་ཏུ་གཟིགས་པ་དེ་ལས་སྔོན་སངས་རྒྱས་ཉིད་དུ་ལུང་བསྟན་པ་ཐོབ་པོ། །དྲི་མ་མེད་པའི་འོད་ཀྱིས་སངས་རྒྱས་ཀྱི་ཞིང་འོད་ཀྱི་རྒྱལ་པོ་ཞེས་བྱ་བ་དེར་བྱང་ཆུབ་ཐོབ་པར་གྱུར་ཏེ། དེ་བཞིན་གཤེགས་པ་ཟླ་བའི་རྒྱལ་མཚན་ཤིན་ཏུ་འཕགས་པའི་འོད་ཟེར་གྱི་འོད་ཀྱི་རྒྱལ་པོ་ཞེས་བྱ་བར་འགྱུར་རོ། །གནས་པ་ཞེས་བྱ་བའི་བསྐལ་པ་ལ་འཇིག་རྟེན་གྱི་ཁམས་བུད་མེད་དུ་གྲགས་པ་ཞེས་བྱ་བར། དེ་བཞིན་གཤེགས་པ་ཆོས་ཀྱི་སྒྲ་སྒྲོགས་ཕྱག་ན་རིན་ཆེན་མཛོད་བསྣམས་ཞེས་བྱ་བར་འགྱུར་རོ། །གང་གི་ཚེ་ལྷ་མོ་དེ་ལ་དེ་ལྟར་སངས་རྒྱས་བཅོམ་ལྡན་འདས་ཀྱིས་ལུང་བསྟན་པ་དེའི་ཚེ། དེ་ལུང་བསྟན་པའི་ཕྱིར་སངས་རྒྱས་བཅོམ་ལྡན་འདས་ཀྱིས་འོད་ཟེར་བཏང་སྟེ། གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་ལུང་བསྟན་པ་དེ་ཐོབ་པ་དེའི་ཚེ་དེར་བྱང་ཆུབ་སེམས་དཔའ་སེམས་ཀྱི་ཚིག་ཅེས་བྱ་བར་གྱུར་ཏེ། དེ་ཕྱིན་ཅད་སངས་རྒྱས་ཀྱི་ཞིང་ཐམས་ཅད་ན་གནས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ལུང་བསྟན་ཏོ། །བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ཀྱིས་ཀྱང་བྱང་ཆུབ་གང་ལ་ཁྱོད་གནས་པ་དེ་ནི་ཤིན་ཏུ་དཀོན་པ་ཡིན་ནོ་ཞེས་སྨྲས་སོ། །སངས་རྒྱས་བཅོམ་ལྡན་འདས་གང་དག་སྔོན་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་ཐད་དུ་འོད་ཟེར་གཏོང་བའི་སངས་རྒྱས་བཅོམ་ལྡན་འདས་དེ་དག་གིས་ཀྱང་གསུང་གཅིག་ཏུ་འཐུན་པར་གཟུངས་སྔགས་བཤད་པ། ཏདྱ་ཐཱ། ཏཱ་ཐཱ་ཏཱ། ལོ་ཀཱ་གྲ། ཏ་ཐཱ་ག་ཏ། ཀ་བ་པ་བི། ཀ་ར་ཛི། བྷུ་ཏ་ཀོ་ཊི། བི་བི་དྲ་དྲ་ཁ་ཤ་ར། སས་སས་སས་སས། བྷ་དྷ་པྲ་བྷ། བ་པ་ད་ཀ་ར་ན་ས། བ་ར་ན་བ་བ་བ་བ། ཨ་ས་ཙ་རུ་ན་ན། ཙ་པ་བ་ར་ཎན། ཀ་ཀ་ཀོ་ཊ་རཱ་ཛཱ་ན། བྱ་ཀ་ར་ཎ་ས་བྷ་དྲ། ཀ་ར་ཎ་སྭཱ་ཧཱ། གཟུངས་སྔགས་འདི་ནི་ལུང་སྟོན་པ་ཞེས་བྱ་སྟེ། གཟུངས་སྔགས་འདིས་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དེ། མཚན་ལན་

---

^{[མ་དཔེ་གཟིགས་ན་འདིར་གནོན།]}

གསུམ་ཉིན་ལན་གསུམ་དུ་བཟླས་བརྗོད་བྱས་ན་ཕྱིར་མི་ལྡོག་པར་གྱུར་ཏེ། སངས་རྒྱས་ཀྱི་བྱང་ཆུབ་ཏུ་ལུང་བསྟན་པ་ཡང་ཐོབ་པར་འགྱུར་རོ། །གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་སངས་རྒྱས་ཉིད་དུ་ལུང་བསྟན་པ་ཐོབ་པ། དེའི་ཚེ་དེས་བཟོད་པ་ཆེན་པོ་ཐོབ་པར་གྱུར་ཏེ། དེའི་ཚེ་དེས་སྨོན་ལམ་བཏབ་པ། ཇི་སྲིད་དུ་ལི་ཡུལ་དུ་འཇིགས་པ་ཆེན་པོ་འབྱུང་བར་འགྱུར་བ་དེ་སྲིད་དུ་བདག་བུད་མེད་ཀྱི་གཟུགས་སུ་སྣང་བར་གྱུར་ཏེ། སྨོན་ལམ་བཏབ་པ་དེས་ན་དེའི་ཚེ་བདག་སྐར་རྡོའི་རྒྱལ་པོའི་བུ་མོར་སྐྱེ་བ་ལེན་པར་གྱུར་ཅིག་ཅེས་བྱས་སོ། །དེ་བཞིན་གཤེགས་པ་ཟླ་བའི་རྒྱལ་མཚན་ཤིན་ཏུ་འཕགས་པའི་འོད་ཟེར་གྱི་འོད་ཀྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་ཀྱི་སྒྲ་སྒྲོགས་ཕྱག་ན་རིན་ཆེན་མཛོད་བསྣམས་ལ་ཕྱག་འཚལ་ལོ། །ཞེས་སངས་རྒྱས་ཀྱི་མཚན་འདི་གཉིས་སུ་བརྗོད་པ་ནི་བུད་མེད་དུ་སྐྱེ་བ་ལས་ཐར་བར་འགྱུར་ཏེ། འཇིག་རྟེན་གྱི་ཁམས་དེར་སྐྱེ་བར་འགྱུར་རོ། །ཚེ་དང་ལྡན་པའི་དམ་པ་ཇི་ལྟ་བུ་འདོད་པ་དེ་བཞིན་དུ་འགྲུབ་པར་འགྱུར་རོ། །སེམས་ཅན་དམྱལ་བར་སྐྱེ་བའི་ལས་རྣམས་ཀྱང་བཤགས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །སདྱཱ་ཐེ་དན། ད་ད་ད་ད། པྲཛྙཱ་ཀེ་ས། པྲཛྙཱ་ཀེ་རེ། པ་ར་པྲཛྙཱ། པྲ་ཏ་ཧ་ཏ་སྭཱ་ཧཱ། གཟུངས་སྔགས་འདི་ནི་བྱང་ཆུབ་ཀྱི་ཡན་ལག་གི་མེ་ཏོག་ཅེས་བྱ་སྟེ། ཆོས་ཇི་ལྟ་བུ་འདོད་པ་དེ་ལྟ་བུ་འཐོབ་པར་འགྱུར་རོ། །བདུད་ཀྱི་རིས་ཀྱི་ལྷ་རྣམས་ཀྱིས་ཀྱང་སངས་རྒྱས་སུ་བསྒྲུབ་པ་ལ་བར་ཆད་བྱེད་མི་ནུས་ཤིང་གླགས་རྙེད་པར་མི་འགྱུར་རོ། །དྲན་པ་དང་ཡང་ལྡན་པར་འགྱུར་རོ། །སེམས་ཀྱང་ཕྱིན་ཅི་ལོག་ཏུ་མི་འགྱུར་རོ། །གང་གི་ཚེ་སངས་རྒྱས་བཅོམ་ལྡན་འདས་ཀྱིས་གཟུངས་སྔགས་འདི་བཤད་པ་དེའི་ཚེ་ལྷ་མོ་དྲི་མ་མེད་པའི་འོད་ཀྱིས་སྨོན་ལམ་བཏབ་པ། བདག་གིས་དེར་སྐྱེ་བ་བླངས་ཏེ་སྐར་རྡོའི་རྒྱལ་པོའི་བུ་མོར་གྱུར་ནས་གསེར་གྱི་ཡུལ་གང་དུ་བདག་གི་ཕ་མ་གུམ་པའི་སྡུག་བསྔལ་གྱིས་བདག་སྐྱོ་བར་གྱུར་པ་དེར་བདག་འགྲོ་བར་གྱུར་ཅིག་ཅེས་བྱས་སོ། །དེའི་ཚེ་འཁོར་དེའི་ནང་ན་

---

^{[མ་དཔེ་གཟིགས་ན་འདིར་གནོན།]}

རྒྱལ་པོ་མ་སྐྱེས་དགྲའི་གྲོང་ཁྱེར་སྐྱོང་བའི་རིགས་ཀྱི་བུ་གཞན་ཞིག་འདུག་པ་དེས་འདི་སྐད་ཅེས་སྨྲས་སོ། །བདག་ཁྱེད་ཀྱི་ཁྱིམ་ཐབ་ཏུ་གྱུར་ལ། བདག་གི་ཁྱིམ་ན་ཁྱོད་བུད་མེད་ཀྱི་ལུས་ཀྱིས་ལས་དེ་དག་བྱེད་ཅིང་བདག་གིས་ཀྱང་དེར་བར་ཆད་བྱེད་པར་མི་འགྱུར་བ་དང་། ཁྱོད་ཀྱི་ཡུལ་གྱི་ཕྱིར་དང་། སངས་རྒྱས་ཉིད་བསྒྲུབ་པའི་བར་གྱི་ལས་ཅི་བྱེད་པ་དེ་དག་ཐམས་ཅད་བདག་གི་ཁྱིམ་དུ་བྱེད་ཅིང་དཀའ་བའི་ལས་དེ་དག་ཐམས་ཅད་ཀྱང་དྲན་པར་གྱུར་ཅིག་ཅེས་བྱས་སོ། །དེ་ན་གྲོང་ཁྱེར་སྐྱོང་བ་དེའི་བུར་གྱུར་པ་ཞིག་ཡོད་པ་དེས་སྨྲས་པ། གང་གི་ཚེ་སྔོན་ཁྱོད་དགེ་བསྙེན་མ་ཧུ་ཤ་ཞེས་བྱ་བར་གྱུར་པ་དེའི་ཚེ་བདག་ཁྱོད་ཀྱི་བུར་གྱུར་ཅིག་ཅེས་བདག་གིས་སྨོན་ལམ་བཏབ་ནས། དེ་ཕྱིན་ཅད་ཚེ་རབས་ཐམས་ཅད་དུ་ཁྱོད་ནི་བདག་གི་མར་གྱུར་ལ། བདག་ནི་ཁྱོད་ཀྱི་བུར་གྱུར་ཏོ། །གང་གི་ཚེ་ཁྱོད་གསེར་གྱི་ཡུལ་དུ་སྨོན་ལམ་ཆེན་པོའི་དབང་གིས་ལས་བྱེད་པར་འགྱུར་བ་དང་། གང་གི་ཚེ་ཡུལ་དེར་གནོད་པ་ཆེན་པོ་བྱུང་བ་དེའི་ཚེ་ཡང་ཅི་ནས་ཀྱང་བདག་དེར་སེམས་ཅན་ཐམས་ཅད་གནོད་པ་ལས་ཐར་བར་བྱ་བའི་ཕྱིར་གྲོགས་སུ་འགྱུར་བ་དང་། ཡུལ་དེ་ན་རྒྱལ་པོ་མེད་པར་ཡང་བདག་གིས་ཆོས་བཞིན་དུ་སྐྱོང་བ་དང་། བདག་གཞན་གྱིས་བཀོལ་བར་མི་འགྱུར་བ་དང་། སངས་རྒྱས་ཉིད་དུ་འགྱུར་གྱི་བར་དུ་བདག་ཁྱོད་ཀྱི་བུར་འགྱུར་ཞིང་། ཁྱོད་ཀྱང་བདག་གི་མར་གྱུར་ཅིག་ཅེས་བྱས་སོ། །དེའི་ཚེ་འཁོར་དེའི་ནང་ན་ལྷ་མོ་དྲི་མ་མེད་པའི་འོད་དེའི་ཕྱི་བཞིན་དུ་འབྲང་བའི་རིགས་དང་ལྡན་པའི་བུད་མེད་ཅིག་འདུག་པ་ང་རྒྱལ་གྱིས་ཤིན་ཏུ་ཁེངས་ཤིང་རྒྱགས་ལ། འདོད་ཆགས་ཀྱི་སེམས་དང་ཤིན་ཏུ་ལྡན་པ་དེས་སྨོན་ལམ་བཏབ་པ། བདག་ཀྱང་ཁྱོད་ཀྱི་ནུ་མོར་གྱུར་ཏེ། གཞོན་ནུའི་ཚེ་བདག་གིས་སྐྱེས་བུ་མང་པོ་དག་དང་འདོད་པའི་འདོད་ཆགས་ཀྱི་ཕྱིར་བགད་པ་དང་། རྩས་པ་གང་ཡིན་པའི་བདག་གི་ལས་དེ་དག་ཐམས་ཅད་བྱང་བར་གྱུར་ཅིག་ཅེས་བྱས་སོ། །འཁོར་དེའི་ནང་ན་སྐྱེས་པ་གཞན་ཞིག་སངས་རྒྱས་བཅོམ་ལྡན་འདས་ཀྱི་སྤྱན་སྔར་འདུག་པ་དེས་རིགས་དང་ལྡན་པའི་བུད་མེད་དེ་ལ་སྨྲས་པ། གང་ཁྱོད་ཀྱིས་ངའི་ཕྱིར་གསང་བའི་དོན་གྱི་དམ་བཅས་

---

^{[མ་དཔེ་གཟིགས་ན་འདིར་གནོན།]}

པ་དེ་ནི་ངས་མི་གཏོང་ཞེས་བྱས་ནས། དེའི་ཚེ་མི་དེས་སྨོན་ལམ་བཏབ་པ། གང་གི་ཚེ་མ་འོངས་པ་ན་རིགས་དང་ལྡན་པའི་བུད་མེད་འདི་ལྷ་མོ་དྲི་མ་མེད་པའི་འོད་དང་ལྷན་ཅིག་ཏུ་ལི་ཡུལ་ན་གནས་ཤིང་ལས་ཆེན་པོ་བྱེད་པར་འགྱུར་བ་དེའི་ཚེ་བདག་གིས་ལས་འདི་གཤེགས་ཏེ་འཁོར་བ་ནས་འབྱུང་བ་འཐོབ་པར་གྱུར་ཅིག་ཅེས་བྱས་སོ། །དེའི་ཚེ་ལྷ་མོ་དྲི་མ་མེད་པའི་མིང་པོ་བྱང་ཆུབ་སེམས་དཔའ་རྡོ་རྗེ་སྡེས་བཅོམ་ལྡན་འདས་ཀྱི་སྤྱན་སྔར་པུས་མོའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གསེར་གྱི་རིགས་སུ་ཆོས་དང་ལྡན་པའི་རྒྱལ་པོར་གྱུར་ཏེ། ཡུལ་རྟས་པར་བགྱི་བའི་སླད་དུ་ལྷ་མོ་དྲི་མ་མེད་པའི་འོད་ཀྱི་གྲོགས་སུ་གྱུར་ལ། ལི་ཡུལ་གྱི་ཡུལ་འཁོར་རྟས་པར་བགྱི་བའི་སླད་དུ་གསེར་གྱི་ཡུལ་གང་དུ་དགེ་བསྙེན་མ་ཧུ་ཤ་ཞེས་བྱ་བ་གནས་པར་གྱུར་པ་དེར་ནོར་སའི་འོག་ཏུ་བཞག་པ་དང་། མི་ཤི་བ་རྣམས་ཀྱི་དུར་ཁྲོད་ན་ཡོད་པ་གང་ཡིན་པ་དང་། དགེ་བསྙེན་མ་ཧུ་ཤའི་ནོར་དུ་གྱུར་པ་གང་ཡིན་པ་དེ་དག་ཐམས་ཅད་བདག་གིས་བཙལ་ཏེ། གསེར་ལ་སོགས་པ་ནོར་མང་པོ་རྣམས་སྩལ་བར་བགྱིའོ། །ལྷ་མོ་དྲི་མ་མེད་པའི་འོད་འདི་ཡང་སངས་རྒྱས་བཅོམ་ལྡན་འདས་ཀྱི་སྤྱན་སྔར་ལི་ཡུལ་གྱི་སླད་དུ་ནོར་རྣམས་དབུལ་བར་བགྱིད་དོ། །གང་གི་ཚེ་ཡུལ་དེར་གནོད་པ་འབྱུང་བ་དེའི་ཚེ་ཡང་ལྷའམ། ཀླུའམ། གནོད་སྦྱིན་ནམ། འབྱུང་པོ་གང་སུ་དག་ནོར་དེ་ལ་བགེགས་བྱེད་པར་མི་འགྱུར་རོ། །ཡུལ་དེའི་སྲུང་མར་གྱུར་པ་གང་ཡིན་པ་དེ་དག་ཐམས་ཅད་ཀྱང་ཅི་ནས་ནོར་དེ་རྙེད་པར་འགྱུར་བར་རང་ཉིད་གྲོགས་བྱེད་པར་འགྱུར་རོ། །སྔོན་གྱི་གསེར་གྱི་རི་གང་དུ་དགེ་བསྙེན་མ་ཧུ་ཤ་བྱུང་བར་གྱུར་པ་དེར་བུད་མེད་གཞན་ཞིག་བྱུང་སྟེ། དེས་སྦྱིན་པ་མང་པོ་བྱིན་ལ་ཚུལ་ཁྲིམས་ནི་དེས་མ་བསྲུངས་ཏེ། དེས་འདི་སྐད་དུ་བདག་གིས་སྦྱིན་པ་དག་བྱིན་པའི་བསོད་ནམས་བསགས་པ་གང་ཡིན་པ་དེས་ན་བདག་གསེར་གྱི་རིགས་ཀྱི་རྒྱལ་པོའི་བཙུན་མོ་དམ་པར་གྱུར་ལ། ཅི་ནས་ཀྱང་ལི་ཡུལ་དེ་རྟས་པར་བྱ་བའི་ཕྱིར་ནོར་སྦྱིན་པར་བྱེད་པ་དེ་ལྟ་བུར་བདག་གྲོགས་སུ་གྱུར་ཅིག་ཅེས་བྱས་སོ། །དེའི་

---

^{[མ་དཔེ་གཟིགས་ན་འདིར་གནོན།]}

ཚེ་ལྷ་མོ་དྲི་མ་མེད་པའི་འོད་ཀྱི་མིང་པོ་གཞོན་ནུ་རྡོ་རྗེ་སྡེས་འདི་སྐད་ཅེས་གསོལ་ཏོ། །གང་གི་ཚེ་དམག་གི་དཔུང་ཆེན་པོ་དེ་དག་ཕན་ཚུན་འགྱེད་པར་འགྱུར་བ་དེའི་ཚེ་བདག་སྐར་རྡོའི་རྒྱལ་པོར་གྱུར་ནས། གང་གི་ཚེ་གདོང་དམར་དག་དམག་འདྲེན་པ་དེའི་ཚེ། བདག་གི་གསེར་གྱི་རིགས་ཀྱི་རྒྱལ་པོ་ལས་ནོར་བླངས་ཏེ། ལི་ཡུལ་རྟས་པར་བགྱི་བའི་སླད་དུ་ཆོས་བཞིན་དུ་སྩོལ་བར་གྱུར་ཅིག་ཅེས་བྱས་སོ། །དེའི་ཚེ་ན་རིགས་དང་ལྡན་པའི་བུད་མེད་གཞན་ཞིག་ལྷ་མོ་དེའི་གྲོགས་མོར་གྱུར་པ་ས་དང་པོ་ཐོབ་པ་གང་ཡིན་པ་དེའི་འཁོར་དེར་འདུས་པར་གྱུར་ཏེ་འདུག་པ་དེས་སྨོན་ལམ་བཏབ་པ། བདག་ལི་ཡུལ་དུ་ཚེ་རབས་བདུན་གྱི་བར་དུ་རྒྱལ་པོའི་བཙུན་མོ་དམ་པར་གྱུར་ཅིག་གང་གི་ཚེ་དམག་གི་དཔུང་ཆེན་པོ་གང་ཡིན་པ་དེ་དག་ལི་ཡུལ་དུ་གཡུལ་འགྱེད་པའི་དུས་ལ་བབ་པ་དེའི་ཚེ་ནི་བདག་རྒྱ་ཡུལ་དུ་སྐྱེ་བ་ལེན་པར་གྱུར་ཅིག །གང་གི་ཚེ་གཞོན་ནུ་རྡོ་རྗེ་སྡེ་འདི་ལིའི་རྒྱལ་པོར་གྱུར་པ་དེའི་ཚེ་ནི་བདག་དེའི་བཙུན་མོ་དམ་པར་གྱུར་ནས། བདག་ཅག་གཉིས་ཀས་ལི་ཡུལ་སླར་རྟས་པར་བགྱི་བ་དང་། དགེ་འདུན་གྱི་ཀུན་དགའ་ར་བ་རྣམས་དང་། དགོན་པའི་གནས་རྣམས་དང་། མཆོད་རྟེན་ཆེན་པོ་དང་། དྲི་གཙང་ཁང་དང་། གདོང་དམར་རྣམས་ཀྱིས་བསྲེགས་པ་གང་ཡིན་པ་དེ་དག་ཀྱང་བདག་ཅག་གཉིས་ཀྱིས་སླར་གསར་དུ་བགྱིད་པར་གྱུར་ཅིག་ཅེས་བྱས་སོ། །གང་གི་ཚེ་དེ་དག་གིས་འཁོར་གྱི་ནང་དུ་སྨོན་ལམ་བཏབ་པ་དེའི་ཚེ་བཅོམ་ལྡན་འདས་རྡོ་རྗེ་རྒྱལ་མཚན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྒྱལ་པོ་ཆེན་པོ་རྣམ་ཐོས་ཀྱི་བུ་དང་། གནོད་སྦྱིན་ཀུན་ཏུ་རྒྱལ་དང་། ཀླུའི་རྒྱལ་པོ་མ་དྲོས་པ་དང་། ལྷའི་བུ་བློ་གྲོས་རབ་ཏུ་བརྟན་པ་དང་། ལྷ་མོ་འཕྲོག་མ་བུ་དང་བཅས་པ་དང་། ལྷ་མོ་དྲི་མ་མེད་པའི་འོད་རྣམས་ཀྱང་དེའི་ཚེ་སངས་རྒྱས་ཡིད་ལ་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔར་པུས་མོའི་ལྷ་ང་ས་ལ་བཙུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་མ་འོངས་པའི་དུས་སུ་ལི་ཡུལ་དེ་བསྲུང་བའི་སླད་དུ་

---

^{[མ་དཔེ་གཟིགས་ན་འདིར་གནོན།]}

མནོད་པར་འཚལ་ཏེ། ཇི་ལྟར་བཅོམ་ལྡན་འདས་ཀྱིས་བཀའ་སྩལ་པ་དེ་བཞིན་དུ་སུག་ལས་ཐམས་ཅད་འཚལ་ལོ། །དེ་ནས་འཁོར་དེར་འདུས་པ་གང་ཡིན་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་སྟེང་གི་ནམ་མཁའ་ལ་མེ་ཏོག་གི་ཆར་ཕབ་ནས་རོལ་མོའི་སྒྲ་རྣམ་པ་སྣ་ཚོགས་ཇི་ལྟ་བུས་སངས་རྒྱས་བཅོམ་ལྡན་འདས་ལ་མཆོད་པར་འོས་པ་རྣམས་ཀྱང་བསྒྲགས་སོ། །དེའི་ཚེ་འཁོར་དེའི་ནང་ན་རྣམ་ཐོས་ཀྱི་བུ་དང་། ཀུན་ཏུ་རྒྱལ་ལ་སོགས་པ་གང་དག་གི་ལག་ཏུ་ཡུལ་དེ་བསྲུང་བའི་ཕྱིར་གཏད་པ་དེ་དག་ལ་འདི་སྐད་ཅེས་བཀའ་སྩལ་ཏོ། །ཡུལ་བསྲུང་བའི་ཕྱིར་ཁྱེད་ཀྱི་ལག་ཏུ་ཡང་དང་ཡང་དུ་གཏད་དོ། །གང་གི་ཚེ་གདོང་དམར་དག་གིས་ཡུལ་བཟུང་སྟེ། དགེ་འདུན་གྱི་ཀུན་དགའ་ར་བ་དང་། དྲི་གཙང་ཁང་དང་། མཆོད་རྟེན་ཆེན་པོ་རྣམས་འཇིག་པར་བྱེད་ཅིང་སྲེག་པར་བྱེད་དེ། དེ་དག་གིས་ཅི་ནས་ཀྱང་ངའི་བསྟན་པ་གཞིག་པར་བྱ་བའི་ཕྱིར་སྨོན་ལམ་ལོག་པར་བཏབ་པས་རིང་པོ་མི་ཐོགས་པར་དེར་དམག་སྡེ་གཉིས་པོ་དེ་དག་ཕན་ཚུན་འགྱེད་པར་འགྱུར་བ་དེའི་ཚེ་ལྷ་མོ་དྲི་མ་མེད་པའི་འོད་ཀྱི་མིང་པོ་གཞོན་ནུ་རྡོ་རྗེ་སྡེ་ཉིད་གསེར་གྱི་རིགས་ཀྱི་ཡུལ་དེར་སོང་ནས། གསེར་གྱི་རིགས་ཀྱི་རྒྱལ་པོ་ལ་འདི་སྐད་ཅེས་སྨྲས་ཏེ། དྲི་མ་མེད་པའི་འོད་ཀྱིས་ཞུས་པའི་མདོ་བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ་ཡོད་དེ། ལི་ཡུལ་ནས་འོངས་པ་འདི་ནི་སངས་རྒྱས་བཅོམ་ལྡན་འདས་དང་ལྷ་རྣམས་ཀྱིས་གསུངས་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་དང་། ལྷ་རྣམས་ཀྱི་བཀའ་ནི་གཅོག་ཏུ་རུང་བ་མ་ཡིན་ནོ། །གདོང་དམར་གྱིས་ལི་ཡུལ་གྱི་ཡུལ་འཁོར་ཁྱེར་བའི་དུས་ལ་ནི་ད་བབ་སྟེ་རྒྱ་ནི་གསེར་གྱི་རིགས་ཀྱི་ཡུལ་དུ་འོང་བར་འདོད་དོ། །གང་གི་ཚེ་ཕན་ཚུན་གཡུལ་འགྱེད་པར་བྱེད་པ་དེ་ནི་འཇིགས་པ་ཆེན་པོ་ཡིན་ཏེ། གང་གི་ཚེ་གདོང་དམར་རྣམས་སྐྲག་པར་གྱུར་པ་དེའི་ཚེ་གསེར་གྱི་རིགས་ཀྱི་ཡུལ་དུ་འགྲོ་བར་ཆས་སོ། །དེ་ལ་བཅོམ་ལྡན་འདས་ཀྱིས་བསྟན་པ་ནི་འདི་

---

^{[མ་དཔེ་གཟིགས་ན་འདིར་གནོན།]}

ཡིན་ཏེ། གང་གི་ཚེ་གསེར་གྱི་རིགས་ཀྱི་ཡུལ་གདོང་དམར་མི་གཏོང་ལ། རྒྱང་ལ་གནོད་པ་བྱེད་དུ་མི་འོང་བ་དེའི་ཚེ་གསེར་གྱི་རིགས་ཀྱི་ཡུལ་དུ་མདོ་འདི་ཕྲིན་ཡིག་ཏུ་ཁྱེར་ལ། གསེར་གྱི་རིགས་ཀྱི་རྒྱལ་པོ་ལ་འདི་སྐད་དུ་འདི་ནི་སངས་རྒྱས་བཅོམ་ལྡན་འདས་དང་། ལྷ་རྣམས་ཀྱིས་བཀའ་སྩལ་པ་ཡིན་ཏེ། ལྷ་དང་མི་རྣམས་ཀྱིས་འགལ་བར་བྱར་མི་རུང་བ་ཡིན་གྱིས། བདག་གིས་ལི་ཡུལ་གྱི་གླུད་སྦྱིན་པ་དང་སྐར་རྡོའི་དོན་གྱི་ཕྱིར་ང་ལ་ནོར་མང་པོ་བྱིན་ཅིག་ཅེས་སྨྲོས་ལ། གང་གི་ཚེ་ནོར་ཐོབ་པར་གྱུར་པ་དེའི་ཚེ་ཐོག་མར་ལི་ཡུལ་དུ་ནོར་རྫོངས་ལ་གདོང་དམར་ལ་སྐུར་ཅིག་ལི་ཡུལ་པ་རྣམས་ལ་ཡང་དེར་སྦྱིན་པར་བྱ་སྟེ། གང་གི་ཚེ་ལི་ཡུལ་དུ་སྐྱེས་བསྐུར་བ་ན། དེར་ཐོག་མར་སྐར་རྡོར་ཡང་བསྐུར་བར་བྱས་ནས། མིའི་ཡུལ་ཆོས་བཞིན་དུ་བྱའོ། །དེའི་ཚེ་འདི་སྐད་དུ་ང་ནི་གདོང་དམར་རྣམས་ཀྱི་བྲན་མི་བྱེད་དེ། ངས་ལི་ཡུལ་གཟུང་གིས་ང་ལ་ནོར་བྱིན་ཅིག་དང་། དེ་དག་གིས་དམག་གི་དཔུང་ཆེན་པོ་ཡང་དེར་འོང་བར་མི་ནུས་སོ་ཞེས་སྨྲོས་ཤིག །གང་གི་ཚེ་དེའི་དམག་ལི་ཡུལ་དུ་འོང་ན་དེར་མ་འོངས་ཤིག་དང་ཡུལ་དེ་ཅི་རི་བའི་རིན་ངས་སྦྱིན་ནོ། །ཅི་སྟེ་ཡུལ་བླུ་བའི་ཕྱིར། ཕྲིན་ཡིག་འདི་བཞིན་དུ་བྱེད་པར་འགྱུར་ན་བདག་ཅག་གིས་ལི་ཡུལ་ཐམས་ཅད་བསྡུས་ཏེ་འདུམ་པར་བྱའོ་ཞེས་བྱས་ན་རྫི་བར་མི་ནུས་ཏེ་འདི་ལ་ཐེ་ཙོམ་མི་བྱའོ། །གང་གི་ཚེ་སངས་རྒྱས་བཅོམ་ལྡན་འདས་ཀྱིས་ལྷ་མོ་དྲི་མ་མེད་པའི་འོད་དང་། བྱང་ཆུབ་སེམས་དཔའ་རྡོ་རྗེ་སྡེ་ལ་དེ་སྐད་ཅེས་བསྟན་ནས། སངས་རྒྱས་བཅོམ་ལྡན་འདས་རྣམས་འོད་ཟེར་རྣམས་གཏོང་ཞིང་བྱང་ཆུབ་སེམས་དཔའ་རྣམས་གཏོང་བ་གང་ཡིན་པ་དེ་དག་དང་། ལྷ་ལ་སོགས་པ་འཁོར་དེར་འདུས་པ་གང་ཡིན་པ་དེ་དག་གིས་འདི་སྐད་ཅེས་གསུངས་སོ། །བདག་ཅག་གིས་ཀྱང་ལྷ་མོ་དྲི་མ་མེད་པའི་འོད་དེ་ལ་གང་གི་ཚེ་ཡུལ་དེར་གནོད་པ་བྱུང་བར་འགྱུར་བ་དེའི་ཚེ་དྲན་པར་འགྱུར་བའི་གཟུངས་སྔགས་དང་གཟུངས་སྔགས་གང་ཡིད་ལ་བྱས་ན་གཟུངས་སྔགས་ཆེན་པོ་གཞན་རྣམས་རྟོགས་པར་འགྱུར་བ་དེ་སྦྱིན་པར་བྱའོ། །འོན་ཀྱང་སངས་རྒྱས་ཡིད་ལ་བྱེད་པ་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏེ། དེ་ལ་

---

^{[མ་དཔེ་གཟིགས་ན་འདིར་གནོན།]}

གནས་པས་སངས་རྒྱས་ཀྱི་ཞིང་ཐམས་ཅད་ན་སངས་རྒྱས་བཅོམ་ལྡན་འདས་རྣམས་བཞུགས་པ་རྣམས་མཐོང་ཞིང་དེ་དག་གིས་ཆོས་བཤད་པ་ཡང་ཐོས་པར་འགྱུར་ལ། ལྷ་རྣམས་ཀྱང་དམ་པ་སྦྱིན་པར་འགྱུར་རོ། །དེ་ནས་སངས་རྒྱས་བཅོམ་ལྡན་འདས་སྔོན་འོད་ཟེར་གཏོང་བ་གང་ཡིན་པ་དེ་དག་ཐམས་ཅད་ཀྱིས་ལྷ་མོ་དྲི་མ་མེད་པའི་འོད་ལ་ལེགས་སོ་ཞེས་བྱ་བ་བྱིན་ཏེ། འདི་སྐད་ཅེས་གསུངས་སོ། །ཁྱོད་ཀྱིས་ཡོངས་སུ་བསྐྱང་བའི་ཕྱིར། །ལི་ཡུལ་མནོས་པ་གང་ཡིན་པ། །རྒྱལ་མཆོག་གིས་ནི་བཀའ་སྩལ་བཞིན། །ཤེས་རབ་ཆེན་པོས་དེ་བཞིན་བྱོས། །ས་སྟེང་གཞན་གྱིས་མི་ཚུགས་པའི། །གསང་སྔགས་ཀྱང་ནི་སྦྱིན་པར་བྱ། །གང་གི་ཚེ་ན་ལི་ཡུལ་དེར། །གནོད་འབྱུང་དུས་ལ་བབ་པ་ན། །དེ་ཚེ་ངེད་ཀྱིས་དགོངས་པར་བྱ། །དེ་འདྲའི་ཤེས་རབ་དག་ཀྱང་སྦྱིན། །དེ་ཚེ་ཚངས་པ་ལ་སོགས་ལྷ། །ས་སྟེང་དབང་ཕྱུག་སུམ་ཅུ་གཉིས། །མགྲིན་གཅིག་འཐུན་པར་སྨྲས་པ་ནི། །ཀླུ་རྣམས་དང་ནི་གནོད་སྦྱིན་དང་། །དེ་བཞིན་འབྱུང་པོ་ལྷ་མ་ཡིན། །མི་མ་ཡིན་དང་མི་རྣམས་ཀྱིས། །འཚེ་བར་མི་འགྱུར་གང་ཡིན་པའི། །གཟུངས་སྔགས་ངེད་ཀྱིས་སྦྱིན་པར་བྱ། །ཏདྱ་ཐཱ། ཨིན་དྲ་དད་ཏ་ཏྲི་ཤུ་ལ་ཧ་ཤ་སརྦ་པཱ་ཤ་བྷན་དྷ་ནེ། ནི་ཙིན་དཱ་ནེ། དྲ་དྲ་དྲ་དྲ། ཛ་ཛ་ཛ་ཛ། བུད་ཏཱི་ར། ནི་ཙིན་ན་དེ། ཏཱ་ལ་ཧི་ལི། ཨ་ཤྭ་སྠཱ་ནེ། ན་ནི་ནེ་ནི། པུ་པུ་པུ་པུ། ཨིན་དྲ་ཡུ་གི་ན། བི་ཤ་བི་ཤ་བི་ཤ་བི་ཤ་སྭཱ་ཧཱ། འདི་ནི་རྟ་གནས་ཞེས་བྱ་བའི་གཟུངས་སྔགས་ཡིན་ཏེ། གཟུངས་སྔགས་འདིས་ནི་རངས་བྱེད་ཀྱི་སྲིན་པོ་རྣམས་ཐུབ་ལ། སྲིད་སྒྲུབ་ཀྱིས་ཀྱང་སྒྲ་མི་སྙན་པ་རྣམས་ཐུབ་པར་གྱུར་ཏོ། །དེ་ནས་ཚངས་པ་ལ་སོགས་པ་ལྷ་རྣམས་དང་། འཁོར་དེ་དག་ཐམས་ཅད་ཀྱིས་འདི་སྐད་ཅེས་སྨྲས་སོ། །རིག་སྔགས་འདི་རྒྱལ་མཚན་གྱི་རྩེ་མོ་ལ་བཏགས་སམ། རྟའི་མགོ་ལ་བཏགས་སམ། རང་གི་མགུལ་དུ་བཏགས་ཀྱང་རུང་སྟེ། གང་དང་གང་དུ་གཡུལ་འགྱེད་དུ་འགྲོ་བ་དེ་གཞན་གྱིས་མི་ཐུབ་པར་འགྱུར་ཞིང་ཐམས་ཅད་དུ་རྒྱལ་བར་འགྱུར་ཏེ། ལྷ་ལ་བྱ་བ་བཞིན་དུ་གཙང་མས་བཅང་བར་བྱའོ། །ལི་ཡུལ་གྱི་བདག་པོ་རྒྱལ་པོ་དེས་ཀྱང་རས་ལ་འདུས་པ་ཆེན་པོའི་རི་མོ་བྲིས་

---

^{[མ་དཔེ་གཟིགས་ན་འདིར་གནོན།]}

ཏེ། རྒྱལ་པོའི་ཕོ་བྲང་གཙང་མར་བྱས་ཏེ། ཐམས་ཅད་དུ་གདུགས་དང་རྒྱལ་མཚན་དང་བ་དན་གྱིས་བརྒྱན་ནས་བདུག་པ་སྣ་ཚོགས་ཀྱི་སྣོད་ཀྱིས་བདུགས་ཏེ། མེ་ཏོག་སྣ་ཚོགས་བཀྲམ་ཞིང་མེ་ཏོག་གི་ཕྲེང་བ་སྣ་ཚོགས་ཀྱིས་མཛེས་པར་བྱས་ལ། དེར་གཡོག་གི་བྱ་བ་བྱེད་པ་གང་ཡིན་པ་དེ་དག་གིས་ཀྱང་ཇི་ལྟར་རྒྱལ་པོ་བཙུན་མོའི་འཁོར་དང་བཅས་པ་རྣམས་སྤངས་པ་བཞིན་དུ་སྤང་བར་བྱ་ཞིང་གཙང་མས་གོས་དང་། ཟས་དང་སྐོམ་གཙང་མར་བྱས་ཏེ། འདུས་པ་ཆེན་པོའི་རི་མོའི་གཟུགས་རྒྱལ་པོའི་གདན་ལ་བཞུགས་ནས་དེའི་མདུན་དུ་ས་གཞི་སྐྱོང་ནུལ་གྱིས་ལེགས་པར་བྱུགས་པ་ལ་དཀྱིལ་འཁོར་བྱའོ། །བདག་ཉིད་ཀྱང་ཁྲུས་ལེགས་པར་བྱས་ཤིང་གོས་གཙང་མ་བགོས་ལ། གཡོག་དེ་རྣམས་ཀྱང་དེ་བཞིན་དུ་བྱེད་དུ་གཞུག་གོ །གང་གི་ཚེ་ས་གཞི་དག་པར་བྱེད་པ་དེའི་ཚེ། ཐོག་མར་བའི་རྣམ་ལྔས་རྒྱལ་པོའི་ཕོ་བྲང་ཐམས་ཅད་ཆག་ཆག་གདབ་བོ། །ཡང་ན་སྤོས་ཐམས་ཅད་ཀྱི་ཆུས་གདབ་བོ། །དེ་ནས་དཀྱིལ་འཁོར་ཁྲུ་བཅུ་དྲུག་པ་གྲུ་བཞི་ལྷམ་པར་བྱས་ལ། དེར་ཁ་ཟས་རོ་སུམ་བརྒྱ་པ་དང་། འབྲུ་མར་དྲི་ཞིམ་པོས་བསྒོས་པའི་མར་མེ་སུམ་བརྒྱ་དྲུག་ཅུ་དང་། གདུགས་སྟོང་ཉིས་བརྒྱ་སུམ་ཅུ་དང་། བ་དན་སྟོང་ཉིས་བརྒྱ་སུམ་ཅུ་དང་། བུམ་པ་སུམ་ཅུ་རྩ་གཉིས་དང་། བུམ་པ་ཆེན་པོ་བཞི་དང་། རྔ་བོ་ཆེ་བཞི་གཞག་པར་བྱའོ། །གཟུངས་སྔགས་འདི་ཡང་དཀྱིལ་འཁོར་དེའི་དབུས་སུ་གཞག་པར་བྱའོ། །སིལ་སྙན་མང་པོ་དཀྲོལ་ཞིང་རོལ་མོའི་སྒྲ་མང་པོ་ཡང་བསྒྲག་པར་བྱའོ། །དེ་ནས་སྒྲུབ་པ་པོས་ཚངས་པ་ལ་སོགས་པ་ལྷ་རྣམས་ལ་བསྟོད་པ་གདོན་ཅིང་གཟུངས་སྔགས་འདི་ཡང་བཟླས་བརྗོད་བྱ་སྟེ། སྒྲུབ་པ་པོ་ངས་སྒྲུབ་པའི་ཟླ་གང་ལྷ་ཐམས་ཅད་ཀྱི་བསྟོད་པ་སྣ་ཚོགས་ཤེས་པ་གཞག་པར་བྱའོ། །ལས་འདི་ཞག་བདུན་གྱི་བར་དུ་བྱས་ནས་མཇུག་བརྟུལ་ཏེ་ཞག་བདུན་པའི་ཉིན་པར་ཁྲུས་བྱའོ། །ལས་འདི་ནི་ཇི་ལྟར་སྔར་སྨོས་པ་དེ་བཞིན་དུ་ཚེས་ལྔ་ལ་བྱའོ། །སྒྲུབ་པ་པོ་ཉིད་ཀྱང་དཀྱིལ་འཁོར་གྱི་དྲུང་དུ་འདུག་པར་བྱའོ། །མེའི་ཐབ་ཁུང་ནི་གཉིས་ཏེ། གཅིག་ནི་སྒྲུབ་པ་པོའི་

---

^{[མ་དཔེ་གཟིགས་ན་འདིར་གནོན།]}

ཕྱིར་བྱའོ། །གཅིག་ནི་སྒྲུབ་པའི་ཟླ་བའི་ཕྱིར་བྱས་ལ། དེར་ལས་ཀྱིས་སྦྱིན་སྲེག་ལན་བརྒྱ་རྩ་བརྒྱད་བྱའོ། །རྟ་གནས་ཀྱི་གཟུངས་སྔགས་ཀྱང་ལན་བརྒྱ་རྩ་བརྒྱད་བཟླས་བརྗོད་བྱའོ། །རྩྭ་དཱུར་བའི་སྦྱིན་སྲེག་ཀྱང་ལན་བརྒྱ་རྩ་བརྒྱད་བྱའོ། །གུར་གུམ་གྱི་ཆུས་དཀྱིལ་འཁོར་གསེར་གྱི་ཁ་དོག་བཞིན་དུ་གྱུར་གྱི་བར་དུ་ཆག་ཆག་མང་དུ་གདབ་པར་བྱའོ། །སྦྱིན་སྲེག་གི་མར་ནི་དྲི་ཞིམ་པོས་བསྒོས་པས་སྦྱིན་སྲེག་བྱའོ། །དཀྱིལ་འཁོར་སྐྱོང་ནུལ་གྱིས་མཛེས་པར་བྱུགས་ལ། གང་གི་ཚེ་བཟླས་བརྗོད་རྩོམ་པ་ན་རྔ་བོ་ཆེ་རྡུང་ཞིང་རོལ་མོའི་སྒྲ་རྣམས་བསྒྲགས་ཏེ། དཀོན་མཆོག་གསུམ་ལ་མཆོད་པ་བྱས་ལ་ཐོག་མ་ཚེས་ལྔའི་ཉི་མ་ནུབ་ཀའི་དུས་སྐབས་སུ་ལས་འདི་བརྩམ་ཞིང་གསང་སྔགས་བཟླས་བརྗོད་བྱའོ། །ཡང་ན་ཚེས་དྲུག་གམ་བདུན་ལ་བརྩམ་པར་བྱའོ། །ནང་པར་གྱི་དུས་སྐབས་སུ་ཐོག་མར་མེ་ལྷ་སྤྱན་དྲངས་ལ། ཇི་ལྟར་སྔར་བསྟན་པ་བཞིན་དུ་རྩྭ་དཱུར་བའི་སྦྱིན་སྲེག་བྱའོ། །རོའི་ཁ་ཟས་དེ་དག་ཀྱང་ཕྱིར་ཕྱུང་ལ་གསར་པ་གཞན་གཞག་པར་བྱ་སྟེ། ཞག་གསུམ་མམ། ཞག་བདུན་གྱི་བར་དུ་སྦྱིན་སྲེག་ཟིན་པའི་རྗེས་ལ་རོའི་ཁ་ཟས་དེ་གསར་པ་རྣམས་གཞག་པར་བྱའོ། །དཀྱིལ་འཁོར་དེའི་དབུས་སུ་སངས་རྒྱས་ཀྱི་སྐུ་གཟུགས་དང་། དམ་པའི་ཆོས་དང་། སྐུ་གདུང་ཡང་གཞག་པར་བྱའོ། །དཀྱིལ་འཁོར་དེར་གདུགས་བཅུ་དང་། རྒྱལ་མཚན་བཅུ་དང་། བ་དན་བཅུ་དང་། རྔ་བོ་ཆེ་བཅུ་དང་། དྲིལ་བུ་བཅུ་དང་། མེ་ཏོག་གི་ཕྲེང་བ་སུམ་བརྒྱ་དྲུག་ཅུ་དང་། མར་མེ་སུམ་བརྒྱ་དྲུག་ཅུ་རྣམས་གཞག་པར་བྱའོ། །ལས་དེ་ལྟར་བྱས་པའི་རྗེས་ལ་དཀྱིལ་འཁོར་དེ་ཉིད་དུ་ཚེས་བརྒྱད་ལ་བརྩམས་ཏེ། ཚེས་བཅྭ་ལྔའི་བར་དུ་འཕགས་པ་སྤྱན་རས་གཟིགས་དབང་ཕྱུག་གི་ཆོ་ག་རྒྱས་པར་བརྩམ་ཞིང་བཟླས་བརྗོད་བྱའོ། །གང་གི་ཚེ་རྟ་གནས་ཀྱི་གཟུངས་སྔགས་ཀྱི་ལས་དེ་དག་གིས་ལས་ཆེན་པོ་རྩོམ་མམ། ཡང་ན་གཡུལ་ཆེན་པོའི་ནང་དུ་འགྲོ་བར་འདོད་དམ། ཡང་ན་རྒྱལ་པོ་ཆེན་པོའི་དབང་ཕྱུག་གི་བདག་པོ་ཐོབ་པར་འདོད་ན་རྟ་གནས་ཀྱི་གཟུངས་སྔགས་འདི་ཇི་ལྟར་འདི་ལས་ཆོ་ག་རྒྱས་པ་སྔར་སྨོས་པ་དེ་བཞིན་དུ་བཟླས་བརྗོད་བྱས་

---

^{[མ་དཔེ་གཟིགས་ན་འདིར་གནོན།]}

ནས། དེའི་ཚེ་ལྷ་རྣམས་དམ་པ་དང་། དབང་བསྐུར་བ་སྦྱིན་པར་བྱེད་དོ། །གང་གི་ཚེ་འཕགས་པ་སྤྱན་རས་གཟིགས་དབང་ཕྱུག་གི་ཆོ་ག་རྒྱས་པས་བཟླས་བརྗོད་བྱ་བར་རྩོམ་པ་ན་དཀྱིལ་འཁོར་དེ་ཉིད་དུ་སྔ་མའི་ལུགས་བཞིན་དུ་བྱས་ན། དེའི་ཚེ་སངས་རྒྱས་བཅོམ་ལྡན་འདས་སྔོན་འོད་ཟེར་བཏང་ཞིང་གཟུངས་སྔགས་བསྐུར་བ་གང་ཡིན་པ་དེ་དག་གི་ཐུགས་ལས་སྐྱེས་པས་སྐུ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། ལྷ་མང་པོ་དང་ཐབས་ཅིག་ཏུ་དེར་གཤེགས་ནས་དམ་པ་ཡང་སྩོལ་བར་མཛད་དེ་ལས་འདི་ནི་ཇི་ལྟར་འདོད་པ་དེ་བཞིན་དུ་འགྲུབ་པ་ཡིན་ནོ། །གཟུངས་སྔགས་འདིའི་ལས་འདི་དག་ཆོ་ག་རྒྱས་པ་འདིའི་ལས་རྣམས་ནི་གང་གི་ཚེ་ལས་ཆེན་པོ་རྩོམ་མམ། ཡང་ན་དགྲ་མཐོང་ནས་གཡུལ་དུ་འགྲོ་བ་དེའི་ཚེ་བཟླས་བརྗོད་བྱས་ཏེ། ཡ་ལ་ད་ལ་བཟླས་བརྗོད་བྱས་ན་བདག་ཉིད་བསྲུང་བར་འགྱུར་རོ། །དགྲ་སྟ་ལ་བཟླས་བརྗོད་བྱས་སམ། གཞུ་ལ་བཟླས་བརྗོད་བྱས་སམ། མདའ་ལ་བཟླས་བརྗོད་བྱས་ཏེ། དཀྱིལ་འཁོར་དེར་གུར་གུམ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ནས་དམག་མི་ཐམས་ཅད་དང་། རྟ་ཐམས་ཅད་ཀྱི་དཔྲལ་བར་ཐིག་ལེ་བྱས་ལ་གྲོང་ཁྱེར་གྱི་སྒོ་རྣམས་སམ། རྒྱལ་པོའི་ཕོ་བྲང་ངམ། རྒྱལ་པོའི་ཁབ་ཀྱི་སྒོ་རྣམས་སུ་གུར་གུམ་དེས་བསྐུས་ན་ཐམས་ཅད་དུ་རྒྱལ་བར་འགྱུར་ཏེ། འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །དེ་ནས་ཡང་ལྷ་རྣམས་ཀྱིས་གཟུངས་སྔགས་གཞན་བྱིན་ཏེ། ན་མོ་བྲཤྤུ་མ་ནེ། ན་མ་སརྦ་དེ་བ་ནཱན། ཏདྱ་ཐཱ། བྲཤྤུ་མ་ན། ཨིན་དྲི་དེ་བ་ནཱན། པྲ་ཏི་J04,V055,P1A ཏེ། ཨ་ཤྭསྠཱ་ནེ། བ་ར་ཨི་ས་ཏ་བ་ཕ་སྨ་བ། ཧ་རེ། ཨཱ་མ་བྷ་ཀུ་པ་ག་ག་ཀྲི་ཤྲཱི་བཾ་ཀ་ར། སརྦ་དེ་བ་གྲཱ་བཱ་སྭཱ་ཧཱ། འདི་ནི་ཆོལ་བའི་གཟུངས་སྔགས་ཡིན་ཏེ། ཇི་ལྟར་འདོད་པ་བཞིན་དུ་དཀྱིལ་འཁོར་དེར་བཟླས་བརྗོད་བྱའོ། །གུར་གུམ་ལ་ལན་བདུན་བཟླས་བརྗོད་བྱས་ན་རྟ་གནས་ཀྱི་གཟུངས་སྔགས་ཀྱི་སྐབས་སུ་སྔར་བཤད་པའི་ལས་དེ་དག་ཐམས་ཅད་ཀྱང་བྱེད་པར་འགྱུར་ཏེ། ལན་བདུན་བཟླས་

---

^{[མ་དཔེ་གཟིགས་ན་འདིར་གནོན།]}

བརྗོད་བྱེད་པའི་མཆོད་པའི་ཆོ་ག་ནི་སྔར་བཤད་པ་ཡིན་ནོ། །གང་གི་ཚེ་དམག་གི་ནང་དུ་འགྲོ་བ་ན་དེའི་ཚེ་གསང་སྔགས་འདི་དང་། རྟ་གནས་ཀྱི་གསང་སྔགས་ལན་བདུན་བདུན་བཟླས་བརྗོད་བྱས་ན་སྔར་བཤད་པའི་འོད་ཟེར་དང་། གཟུངས་སྔགས་རྣམས་དང་བཅས་པར་དམག་དཔོན་གྱི་རྒྱལ་མཚན་གྱི་རྩེ་མོ་ལ་གདགས་ཤིང་ལུས་ལ་ཡང་བཅང་བར་བྱའོ། །གང་གི་ཚེ་རྟ་གནས་ཀྱི་རིག་སྔགས་ཀྱི་བཟླས་བརྗོད་རྩོམ་པ་དེའི་ཚེ། ཞག་བདུན་གྱི་བར་དུ་ལྷའི་གནས་སུ་འགྲོ་བ་བཞིན་དུ་གཙང་སྦྲ་བྱས་ཏེ། སྤོང་བ་རྣམས་འདི་ལྟར་བྱའོ། །ཚེས་བཅུ་གསུམ་ལ་རྩོམ་ན་ནི་ཀུན་སྤང་བར་བྱའོ། །ཚེས་བཅུ་བཞི་ལ་རྩོམ་ན་ནི་ཤ་བཟའ་བར་མི་བྱའོ། །ཚེས་བཅྭ་ལྔ་ལ་རྩོམ་ན་ནི་འབྲས་ཆན་འོ་མ་དང་སྦྱར་བ་འམ། འབྲས་ཀྱི་འོ་ཐུག་གམ། འབྲས་ཆན་དང་མར་བཟའ་བར་བྱ་སྟེ། ཆུ་བཏུང་བར་མི་བྱའོ། །དེ་ནས་ཡང་སངས་རྒྱས་བཅོམ་ལྡན་འདས་ཀྱིས་གཟུངས་སྔགས་འདི་བྱིན་ནོ། །ན་མ་ཤྲཱི་སུ་བཋྛུཏ་ཏ་མ་པྲ་བ་བྷ་ས་སྱ། ཏ་ཐཱ་ག་ཏ་སྱ། ཏདྱ་ཐཱ། བུད་བ་དྷརྨེ། ཨ་སང་ག་པྲ་ཏི། བ་སེ། བོ་དྷི་བོ་དྷི། དྲ་བེ་ཤྲཱི་ས་རེ་ས་རེ། བི་སརྦེ་དུཿ ཁ་ཤྲཱི་བཾ་ཀ་ར་སརྦ་དུར་པྲ་བྷ་སེ་བ་ར་ཁྲི་ཏི་ཏི་སྭཱ་ཧཱ། གཟུངས་སྔགས་འདི་གང་དུ་རྟ་གནས་ཀྱི་རིག་སྔགས་བཟླས་བརྗོད་བྱེད་པ་དེར་བརྗོད་པར་བྱ་སྟེ། དངོས་གྲུབ་གང་འདོད་པ་དང་། ལས་གཞན་གང་བྱེད་ཀྱང་རུང་། ཡང་ན་གཏེར་འདོད་ན་ཡང་གཟུངས་སྔགས་འདི་ལན་སུམ་ཅུ་རྩ་གསུམ་བཟླས་བརྗོད་བྱའོ། །དེ་ནས་འཇིག་རྟེན་སྐྱོང་བ་བཞི་ལ་སོགས་པ། རྒྱལ་ཆེན་བཞིའི་རིས་ཀྱི་ལྷ་ཐམས་ཅད་ཀྱིས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །J04,V055,P1B གནོད་སྦྱིན་ནམ། འབྱུང་པོ་ཇི་སྙེད་མཆིས་པ་དེ་དག་བཟློག་པའི་སླད་དུ་བདག་ཅག་གིས་གཟུངས་སྔགས་འདི་བཤད་པར་འཚལ་ཏེ། འབྱུང་པོ་དང་། རིམས་དང་ནད་ཐམས་ཅད་ཞི་བར་བགྱིད་པ་དང་། གཞན་ཡང་སྐྱེས་པའམ། བྱིས་པ་རྣམས་ཀྱི་ནད་གང་ཅི་ཡང་རུང་བ་དག་ལ་ལན་གསུམ་བསྲུང་བར་བགྱིའོ། །ཡང་ན་མདུད་པ་གསུམ་བགྱིས་ཏེ་བཏགས་ན་འབྱུང་པོས་བཏང་བའི་ནད་རྣམས་ཞི་བར་འགྱུར་རོ། །གང་གི་བུ་བཙས་ནས་མི་འཚོ་བ་དེས་ནི་བདག་ཉིད་ཀྱིས་བསྒྲུབ་

---

^{[མ་དཔེ་གཟིགས་ན་འདིར་གནོན།]}

པར་བྱ་སྟེ། བུ་རྣམས་ཀྱང་བསྲུང་བར་བྱའོ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཀྱང་གྲུབ་པ་སྩལ་བར་གསོལ། །དེའི་ཚེ་སངས་རྒྱས་བཅོམ་ལྡན་འདས་རྡོ་རྗེ་རྒྱལ་མཚན་གྱིས། གཟུངས་སྔགས་འདི་གསུངས་སོ། །ཏདྱ་ཐཱ། བད་ཀུ་དྲི། བ་ཛ་ལ་ཕུ་སྭཱ་ཧཱ། གཟུངས་སྔགས་འདི་བཅོམ་ལྡན་འདས་ཤཱཀྱ་ཐུབ་པ་དང་། རྡོ་རྗེ་རྒྱལ་མཚན་གྱིས་རྒྱལ་ཆེན་བཞིའི་རིས་ཀྱི་ལྷ་རྣམས་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འགྲུབ་པར་བྱ་བའི་ཕྱིར་གསུངས་ཏེ། གང་གི་སྣ་ནས་ཁྲག་འབྱུང་བ་དང་། གང་གི་ལུས་ལ་རྨ་བྱུང་བ་དང་། ཡང་ན་གཞི་གཞན་ལས་གྱུར་ཏེ། བུད་མེད་རྣམས་ཀྱི་ལུས་ལས་ཁྲག་འཛག་ཅིང་འབྱུང་བ་ལ་སྐུད་པ་དམར་པོ་ལ་སྔགས་ལ་སྤྱི་བོར་གདགས་པར་བྱས་ཏེ། རྨ་ལ་ནི་བྱུག་པར་ཡང་བྱའོ། །ཇི་སྟེ་རིམས་སམ། འབྱུང་པོས་བཏང་བའི་ནད་དམ། སྐྲངས་པར་གྱུར་ན་དེ་ལ་སྐུད་པ་ལ་སྔགས་ནས་མདུད་པ་བཅུ་བྱས་ཏེ་མགུལ་དུ་གདགས་སོ། །གང་ལ་འཁྲུ་བའམ། མཁྲིས་པ་ལས་གྱུར་པའི་འཁྲུ་བ་ཡོད་པ་དེ་ལ་ནི་སྐུད་པ་སེར་པོ་ལ་མདུད་པ་བཅུ་བྱས་ཏེ་རྐེད་པ་ལ་གདགས་སོ། །དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་གཟུངས་སྔགས་འདི་བཤད་དོ། །ན་མོ་རད་ན་ཏྲ་ཡཱ་ཡ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། ཏདྱ་ཐཱ། ས་རེ་ས་རེ། བི་ས་རེ་བི་ས་རེ་བི་ཤ་ན་ཤ་ནི་ཡེ་སྭཱ་ཧཱ། འབྱུང་པོས་བཏང་བའི་ནད་ཐམས་ཅད་དང་རིམས་ནད་ཐམས་ཅད་རབ་ཏུ་ཞི་བར་བྱེད་པ་སྟེ། གང་གི་ཚེ་ནད་པ་ཤི་ལ་ཐུག་པར་གྱུར་ཏེ། མདངས་ཕྲོག་པས་སྲོག་J04,V055,P2A གི་ཕྱེད་འཕྲོགས་པ་དེ་ལ་གཟུངས་སྔགས་འདི་བརྗོད་པར་བྱའོ། །ཏདྱ་ཐཱ། བོ་དྷ་བོ་དྷ། ཨཱ་བ་ལ་ཀི་ཏེ་ཤྭ་ར། ར་པྲ་བྷ་སེ་བྷུ་ཏ་ཛམ་བྷེ། ཕུ་ཕུ་ཕུ་ཕུ། ཀ་རུ་ལེ་ཕུ་སྭཱ་ཧཱ། གཟུངས་སྔགས་འདི་རིམས་ནད་ཐམས་ཅད་དང་། འབྱུང་པོའི་གདོན་ཐམས་ཅད་ཞི་བར་བྱ་བ་ལ་ལན་གསུམ་བརྗོད་ལ་སྐུད་པ་ལ་མདུད་པ་གསུམ་བོར་ཏེ་གདགས་སོ། །བཟླས་བརྗོད་ནི་ཟན་ཟོས་པའི་འོག་ཏུ་བྱའོ། །གཟུངས་

---

^{[མ་དཔེ་གཟིགས་ན་འདིར་གནོན།]}

འདི་ནི་སངས་རྒྱས་ཐམས་ཅད་དང་སྤྱན་རས་གཟིགས་དབང་ཕྱུག་གིས་གསུངས་སོ། །ན་མོ་ཨ་སྟི་ཀ་རཱ་ཛ་ཀ་རི་བུད་དྷ་སྱ། ཏ་ཐཱ་ག་ཏ་སྱ། ཏདྱ་ཐཱ་ཨང་ག་རེ། མང་ག་རེ་ཕུ་བ་ཙ་ག་རེ། ཕུ་བཛྲ། ཕུ་བུད་དྷ་རཱ་ཛེ་ཕུ་ཧྱ་རེ་ཏེ་ཕུ་དྲི་པ་རེ་ཕུ་སྭཱ་ཧཱ། དུག་གི་གསང་སྔགས་ཡིན་ཏེ། གང་གིས་དུག་འཐུངས་སམ། ཕོལ་མིག་བྱུང་ངམ། རྨ་རེད་པ་ལ་ཁ་ཟས་སམ། ཡང་ན་ཆུའམ། སྨན་ནམ། ས་ལ་ལན་བདུན་བཟླས་བརྗོད་བྱས་ན་ཐམས་ཅད་ཞི་བར་འགྱུར་རོ། །དེའི་ཚེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་གཟུངས་སྔགས་བཤད་དེ། སྔར་གང་གི་ཡོན་ཏན་གསུངས་པ་དེ་དག་གི་མཚན་མས་བཤད་པའི་གཟུངས་སྔགས་བདག་ཅག་གིས་སྩལ་བར་བགྱིའོ། །ཏདྱ་ཐཱ། ཤཱ་ན་ཏ་མུ་ཁི་བི་མུ་ཁི་བི་མ་ལེ། བི་མུ་ཁེ། ཌ་ཌྷ་ཁ་མུ་ལ་སྭཱ་ཧཱ། གཟུངས་སྔགས་འདི་ནི་འབྱུང་པོའི་རིམས་ཐམས་ཅད་དང་། ནད་བཞིའི་རིམས་རྣམས་དང་། ནད་འགོ་བ་ཞི་བར་བགྱིད་པ་སྟེ། གཟུངས་སྔགས་འདི་ནི་འབྱུང་པོ་རྣམས་ཀྱིས་འགལ་བར་བགྱིར་མི་རུང་བ་ལགས་སོ། །གང་གི་ཚེ་རྟ་གནས་ཀྱི་རིག་སྔགས་བཟླས་བརྗོད་བགྱིད་པ་ན་ཐོག་མར་གསང་སྔགས་འདི་དག་གིས་སྐུད་པ་གདགས་པར་བགྱིའོ། །དཀྱིལ་འཁོར་གྱི་ནང་དུ་མཆི་བའི་ཚེ་ཡང་དེར་མཚམས་འཛིན་པ་འདི་དག་བཞག་པར་བགྱི་སྟེ། གཟུངས་སྔགས་རེ་རེ་ཡང་ལན་གསུམ་གསུམ་བརྗོད་ལ་མདུད་པ་གསུམ་བོར་ཏེ། སངས་རྒྱས་ཀྱི་སྤྱན་སྔར་བདུག་པ་ཐམས་ཅད་ཀྱིས་བདུག་པར་བྱའོ། །དཀྱིལ་འཁོར་གྱི་མདུན་དེར་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་རི་མོའི་གཟུགས་བྲིས་པ་བཞག་ལ་དུ་རུ་ཀའམ། ཨ་ག་རུ་ནག་པོའི་བདུག་པ་བསྲེག་J04,V055,P2B པར་བགྱིའོ། །ལྷ་རྣམས་ལ་ནི་སྲ་རྩི་པོག་དང་། གུ་གུལ་གྱི་བདུག་པ་བསྲེག་པར་བྱ་སྟེ། དེའི་ཚེ་འདི་སྐད་སྨོན་ལམ་གདབ་པར་བགྱིའོ། །ཇི་ལྟར་བདག་སངས་རྒྱས་བཅོམ་ལྡན་འདས་རྣམས་ཀྱིས་ཡུལ་གྱི་ཡུལ་འཁོར་བསྲུང་བའི་ཕྱིར་ལས་སུ་བཀའ་སྩལ་པ་དང་། ཇི་ལྟར་ལྷ་རྣམས་ཀྱིས་བདག་གི་གྲོགས་སུ་བགྱིའོ་ཞེས་དམ་བཅས་པ་དང་། སངས་རྒྱས་རྣམས་ཀྱིས་བཀའ་

---

^{[མ་དཔེ་གཟིགས་ན་འདིར་གནོན།]}

སྩལ་པ་དང་། ལྷ་རྣམས་ཀྱིས་དམ་བཅས་པ་བཞིན་དུ་བདག་གི་ལས་འདི་དེ་བཞིན་དུ་དེས་གྲུབ་ཅིང་མཐར་ཕྱིན་པར་གྱུར་ཅིག་ཅེས་བགྱིའོ། །དེའི་ཚེ་སངས་རྒྱས་བཅོམ་ལྡན་འདས་ཐམས་ཅད་དང་། བྱང་ཆུབ་སེམས་དཔའ་ལག་ན་རྡོ་རྗེས་དེ་བཞིན་གཤེགས་པ་རྣམས་ཀྱི་མཚན་འདི་དག་བཤད་དོ། །དེ་བཞིན་གཤེགས་པ་གསེར་མཆོག་ལ་ཕྱག་འཚལ་ལོ། །དེ་བཞིན་གཤེགས་པ་ཀུན་ཏུ་གཟིགས་པ་ལ་ཕྱག་འཚལ་ལོ། །དེ་བཞིན་གཤེགས་པ་དྲི་མ་མེད་པར་སྣང་བ་ལ་ཕྱག་འཚལ་ལོ། །དེ་བཞིན་གཤེགས་པ་དགོངས་པ་ཐམས་ཅད་ཡོངས་སུ་རྫོགས་པ་ལ་ཕྱག་འཚལ་ལོ། །དེ་བཞིན་གཤེགས་པ་རབ་ཏུ་འཇིགས་ཤིང་བག་ཚ་བ་དང་བྲལ་བ་དྲང་སྲོང་ཆེན་པོར་གྲགས་པ་ལ་ཕྱག་འཚལ་ལོ། །ཏདྱ་ཐཱ། ཀ་ར་བ་ར། ཨི་རི་བ་ར། ས་སུ་ར་མ་མ་ར། བ་བ་ར། བུད་དྷ་ཨ་དྷི་ཏེ། དྷརྨ་ཨ་དྷི་ཏེ། སང་ག་ཨ་དྷི་ཏེ། བྲཤྤུ་ཨ་དྷི་ཏེ། ཤ་ཀྲ་ཨ་དྷི་ཏེ། བཛྲ་པཱ་ཎི་གུ་ཧྱ་ག་ཨ་དྷི་ཏེ། བིད་ཏྱཱ་དྷི་ཏེ། སརྦ་དེ་པ་ཨ་དྷི་ཏེ་སྭཱ་ཧཱ། གཟུངས་སྔགས་འདི་ནི་ལག་ན་རྡོ་རྗེའི་གསང་བའི་ཡེ་ཤེས་ཆེན་པོའི་མདོ་ལས་གསུངས་ཏེ། ནད་ཐམས་ཅད་དང་། འཇིགས་པ་ཐམས་ཅད་རབ་ཏུ་ཞི་བར་བྱེད་པ་ཡིན་ནོ། །དེ་བཞིན་གཤེགས་པ་གནོད་པ་ཐམས་ཅད་གཅོད་པ་ལ་ཕྱག་འཚལ་ལོ། །དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །ཏདྱ་ཐཱ། བཛྲ་ཀ་ར། ད་ར་མ་ར། ས་ར་བ་ཏ་ཪྱ། ཨ་ཥ་ཥ། བི་བི་སུ་ཁ་ཀ་རཱ་སྭཱ་ཧཱ། གཟུངས་སྔགས་འདི་ནི་དབང་བསྐུར་བའི་ཕྱིར་སངས་རྒྱས་བཅོམ་ལྡན་འདས་ཀྱིས་གསུངས་སོ། །སྱཱདྱ་ཐེ་དན། དེ་བ་ཙ་ར་པ་ད་མཱ་ར། མཎ་ཌ་ལ་ས་མཱ་སེ་དེ་བ་ནཱ་ནཱ། བུད་དྷ་དེ་བ་ནཱ་ནཱ། པུཎྱཱ་ཀ་ར། སརྦ་པརྵ་ཀཪྱ། པྲཛྙཱ་ནཱ་ནཱ། ཨཱ་ཧ་ར་མི་ཀ་ར་སིད་དྷ་ན་སྭཱ་ཧཱ། དབང་བསྐུར་བའི་ཕྱིར་འཁོར་ཐམས་ཅད་ཀྱིས་སྨྲས་སོ། །ཏདྱ་ཐཱ། ཚད་ཙ་ར་ཙ་ར་ཙ་ར། ཀ་ར་ཧུ་རུ་ར། ཀྵེ་ཧོ་ར་ར། ད་ད་ད་ད། ཀ་རཀྵ་སྭཱ་ཧཱ། ཇི་ལྟར་བདུད་ཀྱི་དཔུང་གིས་སངས་རྒྱས་བཅོམ་ལྡན་འདས་རྡོ་རྗེའི་གདན་ལས་བསྐྱོད་མ་ནུས་པ་དེ་བཞིན་དུ་གསང་སྔགས་འདིས་གཞོན་ནུ་

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་སྡེ་ཉིད་ཀྱིས་དམ་བཅས་པ་ལས་སུས་ཀྱང་བསྐྱོད་པའམ། བཟློག་པར་མི་ནུས་སོ། །དེ་ནས་འཁོར་དེའི་ནང་ནས། དམོད་པས་ཕོག་པའི་ལྷ་མོ་དང་བུད་མེད་འཁོད་པ་གང་ཡིན་པ་དེ་དག་ཐམས་ཅད་ཀྱིས་ལྷ་མོ་དྲི་མ་མེད་པའི་འོད་ལ་འདི་སྐད་ཅེས་སྨྲས་སོ། །ཁྱོད་ཀྱིས་བུད་མེད་དུ་སྐྱེ་བ་ལས་ཐར་བར་འགྱུར་བའི་གཟུངས་སྔགས་བཅོམ་ལྡན་འདས་ལས་མནོས་ལ། བདག་ཅག་ལ་བྱིན་ཅིག་དང་། བདག་ཅག་གིས་ཁྱོད་ལས་གཟུངས་སྔགས་གཟུང་བར་བྱའོ། །དེ་ནས་དེའི་ཚེ་ལྷ་མོ་དྲི་མ་མེད་པའི་འོད་ཀྱིས། སངས་རྒྱས་བཅོམ་ལྡན་འདས་ལ་གཟུངས་སྔགས་གསོལ་ནས་བྱིན་ནོ། །ཏདྱ་ཐཱ། ཛ་ལོ་ཀ་མན་ཏ་པ། སརྦ་བྷུ་ཡ་སྲ་ཀ་ར་སྭཱ་ཧཱ། གཟུངས་སྔགས་འདི་ཅི་སུས་བརྗོད་པ་ནི་བུད་མེད་དུ་སྐྱེ་བ་ལས་ཐར་བར་འགྱུར་རོ། །ཏདྱ་ཐཱ། སརྦ་བྷུ་དྷ་ནཱན། སརྦ་དེ་ག་མ་ར། གན་པ་ཤ་ར་ར་སྭཱ་ཧཱ། སངས་རྒྱས་ཐམས་ཅད་དང་། ལྷ་ཐམས་ཅད་ཀྱིས་གཟུངས་སྔགས་འདི་བཤད་དེ། འདིས་ནི་བར་ཆད་བྱེད་པར་མི་ནུས་སོ། །དེའི་ཚེ་ལྷ་མོ་དྲི་མ་མེད་པའི་འོད་ཀྱིས་སངས་རྒྱས་བཅོམ་ལྡན་འདས་རྣམས་དང་ལྷ་རྣམས་ལ་འདི་སྐད་ཅེས་གསོལ་ཏོ། །གཟུངས་སྔགས་གང་གིས་ཤེས་རབ་འཐོབ་པར་འགྱུར་བ་དང་གང་གིས་སངས་རྒྱས་བཅོམ་ལྡན་འདས་རྣམས་ཀྱིས་བཀའ་སྩལ་པ། དེ་བཞིན་དུ་སུག་ལས་དེ་དག་བགྱིད་ནུས་པར་འགྱུར་བ་དང་། བདག་ཅག་ལ་བར་ཆད་བགྱིད་མི་ནུས་པ་དང་། བདག་གི་བར་ཆད་བགྱི་བར་སྨོན་ལམ་འདེབས་པ་དེ་དག་གིས་ཀྱང་བདག་ལ་གཙེ་བར་མི་ནུས་པ་དང་། བདག་གིས་རིམ་གྱིས་སངས་རྒྱས་ཀྱི་ཕྲིན་ལས་བགྱིད་པར་འགྱུར་བ་དང་། སེམས་ཅན་ཐམས་ཅད་ཀྱི་ཆོས་དང་ལྡན་པའི་བསམ་པ་ཡོངས་སུ་རྫོགས་པར་བགྱིད་པར་འགྱུར་བའི་གཟུངས་སྔགས་དེ་བདག་ལ་སྩལ་དུ་གསོལ། དེའི་ཚེ་སངས་རྒྱས་བཅོམ་ལྡན་འདས་རྣམས་དང་། ལྷ་རྣམས་ཀྱིས་འདི་སྐད་ཅེས་གསུངས་སོ། །སུས་ཀྱང་སེམས་འཁྲུག་པར་བྱེད་མི་ནུས་པར་ངེད་ཀྱིས་གྲོགས་བྱའོ། །དེ་བཞིན་གཤེགས་པ་ཆོས་མངོན་པའི་དབང་ཕྱུག་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་

---

^{[མ་དཔེ་གཟིགས་ན་འདིར་གནོན།]}

འཚལ་ལོ། །དགེ་འདུན་ལ་ཕྱག་འཚལ་ལོ། །དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །ཏདྱ་ཐཱ། ཨ་བྷི་ཥེ་ཀྱ། བིད་ད་བྷི། ཨ་ར་བིཪྱ་ཛ་བ་ར། ཀུ་མ་ས་སརྦ་ཨ་བ་པྲཱི་ཡ་ད་སྭཱ་ཧཱ། གཟུངས་སྔགས་འདི་སངས་རྒྱས་ཐམས་ཅད་ཀྱིས་དྲི་མ་མེད་པའི་འོད་ཀྱི་ཕྱིར་གསུངས་སོ། །ཏདྱ་ཐཱ། བྲ་ཤྤུ་ཤ་ཀྲ་ཙ་ས་བ་ཧི། པུ་ར་མྲ་ག་ག་མ་ན། ཀུ་ས་མ་ན་ཛ་ནཱ་དཱ་ནུ། པ་ར་མ་ཛི་ན་ན་ཛྭ་ར་ཛ་ར་ནི། ཛི་ན་པི་བ་ན་ཀ་ར། ཀ་ད་ར་སྭཱ་ཧཱ། གཟུངས་སྔགས་འདི་སངས་རྒྱས་བཅོམ་ལྡན་འདས་རྣམས་ཀྱིས་དྲི་མ་མེད་པའི་འོད་ལ་སྣང་བ་རྣམས་ཀྱིས་ཅི་ནས་ཀྱང་སྡིག་པའི་ལས་བྱེད་མི་ནུས་པར་བྱ་བའི་ཕྱིར་གསུངས་ཏེ། སྐུད་པ་ལ་མདུད་པ་བདུན་བོར་ལ་མགུལ་དུ་བཏགས་ན་བར་ཆད་བྱེད་པའམ། ཕམ་པར་བྱེད་མི་ནུས་སོ། །ཏདྱ་ཐཱ། ཧ་དེ་བྷཱི་ཧཱ་ཏེ། ཡ་ཀུ་ན་མ་སྭཱ་ཧཱ། འཕགས་པ་སྤྱན་རས་གཟིགས་དབང་ཕྱུག་གིས་ལྷ་མོ་དྲི་མ་མེད་པའི་འོད་ཀྱི་སྡིག་པ་བསལ་བའི་ཕྱིར་བཤད་དེ། བསྲུང་བའི་ཕྱིར་སྐུད་པ་ལ་མདུད་པ་བདུན་བོར་ནས་མགུལ་དུ་བཏགས་ཏེ་ཟན་ཟོས་པའི་འོག་ཏུ་བརྗོད་པར་བྱའོ། །དེའི་ཚེ་ལྷ་མོ་དྲི་མ་མེད་པའི་འོད་ཀྱིས་འདི་སྐད་ཅེས་གསོལ་ཏོ། །གཟུངས་གང་གིས་མིག་ནད་ཞི་བར་འགྱུར་བ་དེ་ཡང་བདག་ལ་སྩལ་དུ་གསོལ། དེ་བཞིན་གཤེགས་པ་མིག་རྣམ་པར་སྦྱོང་བ་ལ་ཕྱག་འཚལ་ལོ། །དེ་བཞིན་གཤེགས་པ་མིག་གི་རབ་རིབ་ཀྱི་མུན་པ་ཞི་བར་མཛད་པ་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་ཀྱི་སྤྱན་ལ་གནས་པ་ལ་ཕྱག་འཚལ་ལོ། །ཏདྱ་ཐཱ། ཏ་ཏ་ཙཀྵུ་ར་མ་ལ་བ། མ་བྷི་ས་ར་མ་མ་ཙཀྵུཿ ཤྲོད་ཏྲ། པྲ་བྷ་ཀ་ས་ཀར་སྭཱ་ཧཱ། གཟུངས་སྔགས་འདི་སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་ལན་བརྒྱ་རྩ་བརྒྱད་བཟླས་བརྗོད་བྱས་ནས་ཉིན་གཅིག་བཞིན་དུ་ཆུ་ལ་ལན་བདུན་བཟླས་བརྗོད་བྱས་ཏེ་མིག་ལ་ཕྱི་བར་བྱའོ། །མིག་སྨན་ལ་ལན་ལྔ་བཟླས་བརྗོད་བྱས་ཏེ་བྱུག་པར་བྱའོ། །ན་མོ་བཛྲ་དྷ་ར་སྱ། ཏ་ཐཱ་ག་ཏ་སྱ། ཏདྱ་ཐཱ། ཨིན་ཊི་ནི་བི་ཊི་ནི། ནི་ག་ར་ཨ་ག་རེ། བ་ཁ་རེ་ཕུ། ཀ་ཁ་ཁཱ་རེ་ཕུ་སྭཱ་ཧཱ། གཟུངས་སྔགས་འདི་ནི་འཇིགས་པ་ཐམས་ཅད་བསལ་བ་དང་། གྲོང་

---

^{[མ་དཔེ་གཟིགས་ན་འདིར་གནོན།]}

ཁྱེར་བསྲུང་བའི་ཕྱིར་བྱ་བ་ཡིན་ནོ། །སངས་རྒྱས་བཅོམ་ལྡན་འདས་ཀྱིས་ལྷ་མོ་དྲི་མ་མེད་པའི་འོད་དང་། བྱང་ཆུབ་སེམས་དཔའ་རྡོ་རྗེ་སྡེ་ལ་དེ་སྐད་ཅེས་བཀའ་སྩལ་ནས། དེའི་ཚེ་རྒྱལ་པོ་མ་སྐྱེས་དགྲའི་བུ་གཞོན་ནུ་རྡོ་རྗེ་སྡེ་གང་གི་ཚེ་བཙས་པ་དེའི་ཚེ་བདག་གི་བུས་ཕྱིས་རྒྱལ་སྲིད་ཀྱི་དབང་ཕྱུག་ཅི་ནས་ཀྱང་ཐོབ་པར་བྱ་བའི་ཕྱིར་དེའི་ནུ་བོ་རྒྱལ་པོའི་བུ་གཞོན་ནུ་རྒྱལ་པོ་མ་སྐྱེས་དགྲའི་ནུ་བོའི་མཐེ་བོང་བུ་ཕོས་གཅོད་དུ་བཅུག་པའི་རྒྱལ་པོའི་བུ་གཞོན་ནུ་འཁོར་དེའི་ནང་ན་འདུག་པ་དེས་སྨོན་ལམ་འདི་སྐད་ཅེས་བཏབ་བོ། །གང་གི་ཚེ་གཞོན་ནུ་རྡོ་རྗེ་སྡེ་སྐར་རྡོའི་རྒྱལ་སྲིད་འཛིན་པར་འགྱུར་བ་དེའི་ཚེ་བདག་ལི་ཡུལ་གྱི་རྒྱལ་པོར་གྱུར་ཏེ། གཡུལ་གཉིས་ཀ་གཟུང་བའི་ཕྱིར་བདག་དེའི་གྲོགས་སུ་གྱུར་ལ། དེ་ཕྱིན་ཆད་གཅིག་ལ་གཅིག་དགྲ་བྱེད་པ་མེད་པར་གྱུར་ཅིག་ཅེས་བྱས་སོ། །དེའི་ཚེ་བྲམ་ཟེ་ཀཽཎྜི་ནྱས་སློབ་མ་བྲམ་ཟེའི་བུ་ཞིག་ཡོད་པ་ལས་དེས་བྲམ་ཟེའི་སངས་རྒྱས་ལ་མ་དད་པ་གཞན་ཞིག་གི་སློབ་མར་བྱིན་ནས། བྲམ་ཟེ་དེ་ཡང་རབ་ཏུ་བྱུང་བ་མ་ཡིན་ཏེ། འཁོར་དེའི་ནང་ན་འདུག་པ་དེས་སངས་རྒྱས་བཅོམ་ལྡན་འདས་དཔའ་བར་འགྲོ་བའི་ཏིང་ངེ་འཛིན་ལ་སྙོམས་པར་ཞུགས་པ་མཐོང་ངོ་། །དེ་ནས་སྨོན་ལམ་བཏབ་པ། བདག་དཔའ་བར་འགྲོ་བའི་ཏིང་ངེ་འཛིན་ངེས་པ་ཁོ་ནར་བསླབས་ཏེ། རྟོགས་པར་བྱས་ལ་ལྷ་མོ་དྲི་མ་མེད་པའི་འོད་དེ་ལ་རྟ་གནས་ཀྱི་གཟུངས་སྔགས་དེ་གྲུབ་པར་བྱ་བའི་ཕྱིར། གཟུངས་སྔགས་སྦྱིན་པར་གྱུར་ཅིག་ཅེས་བྱས་སོ། །གང་གིས་སངས་རྒྱས་བཅོམ་ལྡན་འདས་རྣམས་བདུད་ཀྱི་དཔུང་ལས་རྒྱལ་བར་འགྱུར་བའི་གཟུངས་སྔགས་འདིས་གཞོན་ནུ་རྡོ་རྗེ་སྡེ་རྒྱལ་སྲིད་ཀྱི་བྱ་བ་ཆོས་བཞིན་དུ་ཡོངས་སུ་རྫོགས་པར་བྱེད་པར་འགྱུར་རོ། །དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ། །དེ་བཞིན་གཤེགས་པ་རིགས་མཆོག་ཀུན་ཏུ་དཔལ་ལ་ཕྱག་འཚལ་ལོ། །ཏདྱ་ཐཱ། སརྦ་ཀར་ཎི། སརྦ་མ་ར་ཧ་ར་ཎེ། ཛ་ལི་ཛ་ཙ་ལི། མ་ར་བ་ར་ས་པ་བ་ར་སྭཱ་ཧཱ། བདུད་ཀྱིས་མི་ཐུབ་པའི་གཟུངས་སྔགས་འདི་ཟན་ཟོས་པའི་འོག་ཏུ་ལན་བདུན་བརྗོད་པར་བྱ་སྟེ། ཇི་ལྟར་སངས་རྒྱས་བཅོམ་ལྡན་འདས་རྣམས་

---

^{[མ་དཔེ་གཟིགས་ན་འདིར་གནོན།]}

ཀྱིས་བདུད་བཅོམ་པ་དེ་བཞིན་དུ་གཞོན་ནུ་རྡོ་རྗེ་སྡེ་རྒྱལ་བར་འགྱུར་ཞིང་མཚམས་ཀྱང་གཅོད་པར་འགྱུར་རོ། །རྟ་གནས་ཀྱི་རིག་སྔགས་ཇི་ལྟ་བ་དེ་བཞིན་དུ་ལས་ཐམས་ཅད་བྱེད་པར་འགྱུར་རོ། །གུར་གུམ་ལ་སྔགས་ཏེ་ཐིག་ལེ་བྱས་སམ་སྐུད་པ་ལ་མདུད་པ་བདུན་བོར་ཏེ། དཀྱིལ་འཁོར་གྱི་སྟེང་དུ་བཞག་ལ། ནམ་དམག་གི་ནང་དུ་འགྲོ་བ་དེའི་ཚེ་ལུས་ལ་བཏགས་ཏེ་བཅངས་ན་རྒྱལ་བ་འཐོབ་པར་འགྱུར་ཏེ། གཟུངས་སྔགས་སྔ་མ་རྣམས་ཇི་ལྟ་བ་དེ་བཞིན་དུ་བཟླས་བརྗོད་བྱའོ། །གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་རྟ་གནས་ཞེས་བྱ་བའི་གཟུངས་སྔགས་གསུངས་པ་དེའི་ཚེ། བཅོམ་ལྡན་འདས་ཀྱིས་ལྷ་རྣམས་དང་འཁོར་དེ་དག་ཐམས་ཅད་ལ་བཀའ་སྩལ་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ། འདིར་འདུས་པ་གང་ཡིན་པ་ཁྱེད་ཀྱིས་ཇི་ལྟར་ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་ལ་རྟ་གནས་ཞེས་བྱ་བའི་གཟུངས་སྔགས་བྱིན་པ་བཞིན་དུ་ངས་ཀྱང་ཁྱེད་ལ་གསང་སྔགས་སྦྱིན་པར་བྱ་སྟེ། གང་གིས་དགྲ་ཐམས་ཅད་དང་བར་འགྱུར་བ་དང་། གང་གིས་བདག་ཉིད་ཤིན་ཏུ་བྱིན་དང་ལྡན་ཞིང་གཟི་བརྗིད་དང་རབ་ཏུ་ལྡན་པར་འགྱུར་བ་དང་། གཞལ་མེད་ཁང་དང་། ཁྱིམ་གྱི་ནང་ན་གནས་པ་གང་ཡིན་པ་དག་ལ་བདེ་ལེགས་སུ་འགྱུར་བ་དང་། འཐབ་པ་དང་། གཡུལ་འགྱེད་པ་གང་ཡིན་པ་རྣམས་མེད་པར་འགྱུར་བའི་གཟུངས་སྔགས་འདི་ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་དང་། ལི་ཡུལ་གྱི་དོན་གྱི་ཕྱིར་འཁོར་བཞི་པོ་ཁྱེད་རྣམས་ལ་སྦྱིན་པར་བྱ་སྟེ། ཅི་ནས་ཀྱང་གཟུངས་སྔགས་འདིས་ཁྱེད་བྱིན་དང་ལྡན་པ་དང་། གཟི་བརྗིད་དང་ལྡན་པར་འགྱུར་བ་དང་། དེ་བཞིན་དུ་གཞོན་ནུ་རྡོ་རྗེ་སྡེ་གནོད་པ་ཐམས་ཅད་ལས་ཐར་བར་བྱའོ། །དེ་ནས་དེའི་ཚེ་སའི་དབང་ཕྱུག་སུམ་ཅུ་རྩ་གཉིས་པོ་དེ་དག་དང་། འཇིག་རྟེན་སྐྱོང་བ་བཞི་དང་། གནོད་སྦྱིན་གྱི་དབང་པོ་ཀུན་ཏུ་རྒྱལ་དང་། ཀླུའི་རྒྱལ་པོ་མ་དྲོས་པ་དང་། འཕྲོག་མ་བུ་དང་འཁོར་དུ་བཅས་པ་དང་།

---

^{[མ་དཔེ་གཟིགས་ན་འདིར་གནོན།]}

ལི་ཡུལ་གྱི་སྲུང་མ་གང་ཡིན་པ་དེ་དག་ཐམས་ཅད་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ལི་ཡུལ་སུག་པར་བླང་བར་འཚལ་ཏེ། གང་གི་ཚེ་དྲི་མ་མེད་པའི་འོད་དང་། རྡོ་རྗེ་སྡེ་དེར་སྐྱེ་བ་ལེན་པར་འགྱུར་བ་དང་། གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་དེ་གཉིས་ཀྱི་སྟེང་དུ་འོད་ཟེར་གཏོང་ཞིང་དམ་པ་སྩོལ་བར་མཛད་པ་ན། དེར་བདག་ཅག་མཆི་ཞིང་དམ་པ་ཡང་སྩལ་བར་འཚལ་ན། བཅོམ་ལྡན་འདས་བདག་ཅག་ལ་གཟུངས་སྔགས་བཤད་དུ་གསོལ། བདག་ཅག་གིས་གཟུང་བར་འཚལ་ལོ། །དེའི་ཚེ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་དང་། སངས་རྒྱས་བཅོམ་ལྡན་འདས་འོད་ཟེར་གཏོང་བ་གང་ཡིན་པ་དེ་དག་དང་། དེ་བཞིན་གཤེགས་པ་ཚིག་གི་བརྗོད་པ་གཏོང་བ་གང་ཡིན་པ་དེ་དག་གིས་གཟུངས་སྔགས་འདི་གསུངས་ཏེ། དེ་བཞིན་གཤེགས་པ་སྤོང་བའི་རྒྱལ་སྲིད་ལ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་ཤིན་ཏུ་འཕགས་པ་སངས་རྒྱས་ཀྱི་རྒྱལ་སྲིད་ལ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་སེང་གེའི་ཆོས་ཀྱི་རྒྱལ་སྲིད་ལ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་བྱང་ཆུབ་ཀྱི་ཡན་ལག་གི་མེ་ཏོག་མཉམ་པ་ཉིད་ཀྱི་རྒྱལ་སྲིད་ལ་གནས་པ་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་སྣང་བྱེད་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་སྣང་བྱེད་སྙིང་རྗེའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་སྣང་བྱེད་འོད་ཀྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་སྣང་བྱེད་ཡོན་ཏན་བསྔགས་པ་དཔལ་གྱིས་བརྒྱན་པའི་འོད་ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། བ་ར་ཨིན་དྲེ། བ་ར་ཨ་པ་ར། ཨིན་དྲེ་ར་ནུ་མ་བྷེ། ཨཱ་ཀཱ་ཤ་ཀ་བ་ཀེ། ཨིན་དྲེ། སྟ་སྐ་བ་ཀ་ར་ཊ། བ་ད་ཀྲ་བ་བྷེ། ཥ་པ་སུ་ར། པྲ་ཏེ། ཏ་ཐ་ཐ་ཏན་དུ་རུ་ཨི་དྲ་དུ་སྭཱ་ཧཱ། གཟུངས་སྔགས་འདི་ནི་རྣམ་པར་སྣང་བྱེད་ཅེས་བྱ་སྟེ། གཟུངས་སྔགས་འདིས་མི་དང་མི་མ་ཡིན་པ་ཐམས་ཅད་ཀྱི་སྙིང་དུ་སྡུག་པར་འགྱུར་ཏེ། གཟི་བརྗིད་དང་ལྡན་པར་འགྱུར་རོ། །སེམས་ཅན་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་ངག་མཉན་པར་འགྱུར་ཞིང་བསྒོ་བ་མི་གཅོག་པར་འགྱུར་རོ། །མར་ཡང་འདིས་བཙོ་བར་བྱ་སྟེ་སྲ་རྩི་པོག་དང་། ཙན་དན་སྣ་གསུམ་དང་། ཛ་མ་ཀ་དང་། ཕ་བོང་གི་དྲེག་པ་དང་། འབུ་སུག་ཧང་དང་། ཀར་ཀོ་ཏ་དང་། ཤུག་པ་དང་། སུག་སྨེལ་དང་། པི་པི་ལིང་དང་། རྨ་ཤིང་དང་། ཨ་བ་ཡག་དང་། པུ་ཤེལ་ཙེ་དང་། སྣ་མ་དཀར་པོའི་མེ་ཏོག་རྣམས་ལས་སྨན་གཞན་རྣམས་བསྡོམས་པའི་ཚད་ཇི་ཙམ་ཡོད་པ་སྣ་མ་དཀར་པོའི་མེ་ཏོག་ཀྱང་དེ་ཙམ་དུ་བྱས་ཏེ། དེ་རྣམས་མར་དང་། ཆུའི་ནང་དུ་བཙོས་ལ། གཟུངས་སྔགས་འདི་དང་དཀྱིལ་འཁོར་འདིར་སྔར་བཤད་པའི་རྟ་གནས་ཀྱི་རིག་སྔགས་ཀྱིས་བཏབ་པར་བྱའོ། །དེ་ལྟར་བྱས་ན་ལེགས་པར་སྒྲུབ་པ་ཡིན་ཏེ། གང་གི་ཚེ་དེ་ཚོས་པར་གྱུར་པ་ན་ལན་སུམ་ཅུ་རྩ་གསུམ་བཟླས་བརྗོད་བྱས་ཏེ་འཐུངས་ན། ནད་ཀྱིས་འཇིགས་པ་ཐམས་ཅད་ལས་ཐར་བར་འགྱུར་ཏེ་དེའི་ཚེ་ལྷ་རྣམས་ལ་བསྟོད་པ་བརྗོད་པར་བྱའོ། །རྣམ་པར་སྣང་བྱེད་ཅེས་བྱ་བའི་མར་འདི་དང་། རྣམ་པར་སྣང་བྱེད་ཅེས་བྱ་བའི་གཟུངས་སྔགས་འདི་ནི་ལྷ་དང་མི་རྣམས་དགའ་བར་བྱེད་པ་ཡིན་ནོ། །གང་གི་ཚེ་གཟུངས་སྔགས་འདི་བརྗོད་པ་དེའི་ཚེ་ལྷ་རྣམས་ཀྱི་དགའ་བའི་སྐྱེད་མོས་ཚལ་ཤིན་ཏུ་མཛེས་པར་གྱུར་ཏེ། སེམས་དང་ཞིང་དགའ་བར་གྱུར་ནས་དེའི་ཚེ་ལྷ་དེ་དག་གིས་སངས་རྒྱས་ཀྱི་བཀའ་དྲན་པར་གྱུར་ཏེ། ལྷ་མོ་དྲི་མ་མེད་པའི་འོད་གང་ན་འདུག་པ་དེར་ལྷགས་ནས་དེ་དག་གིས་འདི་སྐད་དུ་གང་གི་ཚེ་ཁྱོད་ཀྱིས་རྣམ་པར་སྣང་བྱེད་ཀྱི་གཟུངས་སྔགས་བརྗོད་པ་དེའི་ཚེ་ཁོ་བོ་ཅག་གི་དགའ་བའི་སྐྱེད་མོས་ཚལ་ཤིན་ཏུ་མཛེས་པར་འགྱུར་ཏེ། ཤིན་ཏུ་ལྷག་པར་བརྩེགས་ཀྱིས་གང་བདག་ཅག་གིས་གཞོན་ནུ་རྡོ་རྗེ་སྡེའི་ཕྱིར་སྔོན་བཅོམ་ལྡན་འདས་ལ་གསོལ་པ་བཞིན་དུ་ཁྱོད་ཅི་འདོད་པའི་དམ་པ་ཐམས་ཅད་ཁྱོད་ལ་སྦྱིན་ནོ་ཞེས་ཟེར་རོ། །གང་གི་ཚེ་གཞོན་ནུ་རྡོ་རྗེ་སྡེ་དང་ལྷ་མོ་དྲི་མ་མེད་པའི་འོད་ཀྱིས་བཅོམ་ལྡན་འདས་དང་ལྷ་རྣམས་ཀྱི་ཚིག་དེ་དག་ཐོས་པ་དེའི་ཚེ་པུས་མོའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ཀྱིས་བདག་ཅག་ལ་གང་བཀའ་སྩལ་པའི་སུག་ལས་འདི་ནི་ཤིན་ཏུ་ཆེ་བ་ལགས་ཏེ། ཅི་ནས་བཅོམ་ལྡན་འདས་དང་ལྷ་རྣམས་ཀྱིས་གྲོགས་མཛད་ན། ལི་ཡུལ་གྱི་ཡུལ་འཁོར་བདག་ཅག་གིས་སུག་པར་བླང་བར་འཚལ་ལོ། །དེའི་ཚེ་དྲི་མ་མེད་པའི་འོད་ཀྱིས་སྨྲས་པ། གང་གི་ཚེ་ཡུལ་དེ་བསྲུང་བའི་དུས་ལ་བབ་པ་དེའི་ཚེ་སངས་རྒྱས་བཅོམ་ལྡན་འདས་ཉིད་ཀྱིས་བདག་གི་སྟེང་དུ་འོད་ཟེར་གཏོང་བར་གྱུར་ཅིག །ཅི་ནས་ཀྱང་བདག་གི་གཟུངས་རྟོགས་པར་འགྱུར་བའི་བཟོད་པ་དེ་ཡང་ཐོབ་པར་གྱུར་ཅིག །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་དང་། སངས་རྒྱས་བཅོམ་ལྡན་འདས་སྔོན་འོད་ཟེར་གཏོང་བ་གང་ཡིན་པ་དང་། འོད་ཟེར་དག་ལས་ཚིག་རྣམས་གསུངས་པ་གང་ཡིན་པ་དེ་དག་གིས་འདི་སྐད་ཅེས་བཀའ་སྩལ་ཏོ། །དྲི་མ་མེད་པའི་འོད་ལེགས་སོ། །ལེགས་སོ་གང་གི་དུས་ལ་བབ་ན། དེའི་ཚེ་ཁྱོད་འདི་ལྟ་བུར་མྱ་ངན་བྱེད་ཅིང་སྐྱོ་བར་གྱུར་པ་ཡོད་དེ། གང་གི་ཚེ་སྔོན་གྱི་དགེ་བྱེད་དང་། སྡིག་བྱེད་ཀྱི་གྲོགས་པོ་གང་ཡིན་པ་དེ་དག་གཡུལ་འགྱེད་པར་ཆ་བ་དེའི་ཚེ་ཁྱོད་ཀྱི་མིང་པོ་གཞོན་ནུ་རྡོ་རྗེ་སྡེ་འབྱུང་བར་འགྱུར་ལ་གཡུལ་དེའི་ནང་དུ་གཏོགས་པར་འགྱུར་ཏེ། དེའི་ཚེ་ཁྱོད་མྱ་ངན་བྱེད་ཅིང་སྐྱོ་བར་གྱུར་པ་དེས་ན་འདི་སྙམ་དུ་བདག་ནི་ཤི་ཡང་སླའོ་སྙམ་དུ་སེམས་པར་གྱུར་ཏེ། དེའི་ཚེ་ཁྱོད་གནས་གཅིག་ཏུ་འདུག་ནས་དེ་བཞིན་གཤེགས་པ་འོད་དཔག་མེད་ཀྱི་གཟུངས་སྔགས་བདུད་རྩི་རྔ་དབྱངས་ཞེས་བྱ་བ་བརྗོད་ཅིང་། དེར་བཅོམ་ལྡན་འདས་ལ་གསོལ་བ་འདེབས་ཏེ། འདི་སྐད་དུ་ཡིད་ལ་བསམ་པ་སྣ་གསུམ་ལས་གཅིག་མ་གྲུབ་གྱི་བར་དུ་བདག་མྱ་ངན་གྱི་ཁང་བུ་ནས་མི་འབྱུང་སྟེ། ཡང་ན་ནི་མིང་པོ་དང་ཕྲད་པར་གྱུར་ཅིག །ཡང་ན་ནི་བདག་འཆི་བར་གྱུར་ཅིག །ཡང་ན་ནི་འཁོར་བ་ལས་མཐར་བྱེད་པར་གྱུར་ཅིག །ཅེས་ཟེར་བར་འགྱུར་རོ། །དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འདི་སྐད་ཅེས་བཀའ་སྩལ་ཏོ། །ཁྱོད་ཀྱི་མྱ་ངན་གྱི་ཁང་བུ་དེར་གང་གིས་གཟུངས་སྔགས་རྟོགས་པར་འགྱུར་བའི་བཟོད་པ་ཐོབ་པར་འགྱུར་ཏེ། དེའི་ཚེ་སངས་རྒྱས་བཅོམ་ལྡན་འདས་དེ་དག་གིས་ཁྱོད་ཀྱི་སྟེང་དུ་འོད་ཟེར་གཏོང་

---

^{[མ་དཔེ་གཟིགས་ན་འདིར་གནོན།]}

བར་འགྱུར་ཏེ། ལྷའི་རོལ་མོའི་སྒྲ་ཡང་ཐོས་པར་འགྱུར་རོ། །ལྷའི་འཁོར་གྱི་སྒྲ་ཡང་ཐོས་པར་འགྱུར་རོ། །ལྷའི་རྔ་སྒྲ་ཡང་ཐོས་པར་འགྱུར་ཏེ། དེའི་ཚེ་སངས་རྒྱས་བཅོམ་ལྡན་འདས་རྣམས་དང་། ལྷ་རྣམས་ཀྱིས་ལེགས་སོ་ཞེས་བྱ་བ་སྦྱིན་པར་འགྱུར་རོ། །ཕྱིར་མི་ལྡོག་པའི་འཁོར་ལོའི་གཟུངས་སྔགས་ཀྱང་རྟོགས་པར་འགྱུར་ཏེ། དེ་ནས་གང་གིས་ཁྱོད་སེམས་ཅན་རྣམས་ལ་ཕན་འདོགས་པར་འགྱུར་བའི་གཟུངས་དེ་དག་ཀྱང་ཐོབ་པར་འགྱུར་རོ།། །།དྲི་མ་མེད་པའི་འོད་ཀྱིས་ཞུས་པ། བམ་པོ་གསུམ་པ། སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སྡུག་པའི་ནུ་བོ་དུས་འདི་དྲན་པར་གྱིས་ཤིག །གང་གི་ཚེ་སངས་རྒྱས་བཅོམ་ལྡན་འདས་རིན་ཆེན་སྙིང་པོ་གྲོང་ཁྱེར་གྱི་ནང་དུ་གཤེགས་པ་དེའི་ཚེ། འུ་བུ་ཅག་གཉིས་ཀྱིས་ལུང་བསྟན་པ་ཐོས་ནས་དེ་ན་འདུས་ཏེ། ཁྱོད་ཀྱིས་སྨོན་ལམ་ཆེན་པོ་བཏབ་པ། བདག་སེམས་ཅན་འཇིགས་ཤིང་སྐྲག་པ་ཇི་སྙེད་ཡོད་པ་དེ་དག་ཐམས་ཅད་ཐར་བར་བྱེད་པར་གྱུར་ཅིག་ཅེས་བྱས་ཀྱི། ཁྱོད་ཀྱིས་ངའི་ལི་ཡུལ་དང་། ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་སྐྱོངས་ཤིག་ཅེས་ལག་ཏུ་གཏད་ནས། དེ་ནས་དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དང་། འཇམ་དཔལ་གཞོན་ནུ་དང་། ནམ་མཁའི་སྙིང་པོ་དང་། མཐུ་ཆེན་པོ་ཐོབ་པ་དང་། སྨན་གྱི་རྒྱལ་པོ་དང་། རབ་ཏུ་སྦྱིན་པ་ལ་དཔའ་བ་དང་། སའི་སྙིང་པོ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། སྔོན་མཛའ་བོ་དང་། སྤུན་དུ་གྱུར་པ་གང་ཡིན་པ་དང་། གང་དག་བདག་ཅག་གྲོགས་པོར་འགྱུར་བ་དབང་ཕྱུག་གི་ལྷ་དང་། ལྗོན་ཤིང་གི་དབང་ཕྱུག་རྒྱལ་པོ་དང་། སྙིང་རྗེ་ཐ་སྐར་དབང་ཕྱུག་དང་། གཅོད་པའི་དབང་ཕྱུག་དང་། དྲིའི་དབང་ཕྱུག་དང་། ཚོགས་ཀྱི་དབང་ཕྱུག་དང་། འཇིག་རྟེན་དབང་ཕྱུག་དང་། འོད་ཀྱི་དབང་ཕྱུག་དང་། སྐྱེ་བའི་དབང་ཕྱུག་དང་། ཐམས་ཅད་ཀྱི་ལྷ་དང་། འདི་དག་ནི་བྱང་ཆུབ་སེམས་དཔའ་

---

^{[མ་དཔེ་གཟིགས་ན་འདིར་གནོན།]}

འཕགས་པ་སྤྱན་རས་གཟིགས་དབང་ཕྱུག་གི་གྲོགས་ཡིན་ཏེ། བྱང་ཆུབ་སེམས་དཔའ་དེ་དག་ཐམས་ཅད་ཀྱི་ལག་ཏུ་སངས་རྒྱས་བཅོམ་ལྡན་འདས་ཀྱིས་ལི་ཡུལ་སྲུང་བ་བཞིན་དུ་གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་ལ་གཏད་དེ། དེ་ནས་བྱང་ཆུབ་སེམས་དཔའ་འཇམ་དཔལ་གྱིས་འདི་སྐད་ཅེས་གསོལ་ཏོ། །བདག་ནི་སངས་རྒྱས་བཅོམ་ལྡན་འདས་སྔོན་བྱུང་བ་གང་ལགས་པ་རྣམས་དང་། ཕྱིས་འབྱུང་བ་དེ་དག་གིས་སངས་རྒྱས་ཀྱི་བྱང་ཆུབ་ཐོབ་པར་བགྱི་བའི་སླད་དུ་གྲོགས་སུ་གྱུར་པ་ལགས་ཏེ། ཆོས་ཀྱང་མཉན། བདག་གིས་ཀྱང་ལི་ཡུལ་ཡོངས་སུ་བསྲུང་བའི་སླད་དུ་མནོད་པར་འཚལ་ཏེ། དེར་སྐྱེ་བ་བླངས་ནས་རིང་བསྲེལ་བགོ་བར་བགྱིའོ། །ལྷ་མོ་འདི་ལ་ཡང་གཟུངས་སྔགས་གང་གིས་ཚེ་རབས་དྲན་པར་འགྱུར་བ་དང་། སངས་རྒྱས་བཅོམ་ལྡན་འདས་ལས་ཆོས་ཅི་ཐོས་པ་དེ་དག་ཐམས་ཅད་དྲན་པར་འགྱུར་བའི་གཟུངས་སྔགས་སྩལ་བར་བགྱིའོ། །དེ་བཞིན་གཤེགས་པ་སྣང་བ་ལ་ཕྱག་འཚལ་ལོ། །བྱང་ཆུབ་སེམས་དཔའ་གླང་པོ་ཆེ་བྱེད་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་འཇམ་དཔལ་གཞོན་ནུ་ལ་ཕྱག་འཚལ་ལོ། །ཏདྱ་ཐཱ། བུ་ས་དྷ་རེ། བྷ་ཤ་ད་ཙེ། བཱ་ཛ་ར་སྭཱ་ཧཱ། འདི་ཉིན་ལན་གསུམ་མཚན་ལན་གསུམ་བཟླས་བརྗོད་བྱས་ན་ཚེ་རབས་དྲན་པར་འགྱུར་ཏེ། སྔོན་ཆོས་ཅི་ཐོས་པ་དེ་ཐམས་ཅད་དྲན་པར་འགྱུར་རོ། །དེ་ནས་ཡང་བྱང་ཆུབ་སེམས་དཔའ་འཇམ་དཔལ་གྱིས་གཟུངས་སྔགས་འདི་བཤད་དོ། །ཏདྱ་ཐཱ། པྲ་ཏྱུད་ན་རུ་ནེ། པྲ་ཏྱུད་ས་རཱ་ཀཱ་ར་ན་རིཀྵ་ནི་སྭཱ་ཧཱ། གང་གི་ཚེ་རྣལ་འབྱོར་སྤྱོད་པ་ལ་ཕྱོགས་གཅིག་ཏུ་འདུག་པ་དེའི་ཚེ་བཟླས་བརྗོད་བྱས་ན་རྣམ་པར་རྟོག་པ་རྣམས་ཀྱང་བྱང་བར་འགྱུར་ལ་དགེ་བའི་ཕྱོགས་རྣམས་འཕེལ་བར་འགྱུར་རོ། །གང་གི་ཚེ་རྟ་གནས་ཀྱི་རིག་སྔགས་ཀྱིས་ལས་བྱེད་པ་དེའི་ཚེ་ཡང་ལན་གསུམ་བཟླས་བརྗོད་བྱའོ། །དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས་འདི་སྐད་ཅེས་གསོལ་ཏོ། །གང་གི་ཚེ་ལྷ་མོ་འདིས་ཐོག་མར་གཟུངས་སྔགས་རྟོགས་པར་འགྱུར་བ་དེའི་ཚེ། བདག་གིས་གྲོགས་བགྱིས་ཏེ། ཅི་ནས་ཡང་དག་པ་ཇི་ལྟ་བ་བཞིན་དུ་རྟོགས་པ་

---

^{[མ་དཔེ་གཟིགས་ན་འདིར་གནོན།]}

དང་། གང་གི་སེམས་ཅན་ཐམས་ཅད་ཀྱི་ལས་བགྱིད་པ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ལས་གློང་འཁྱིལ་པ་ཞེས་བྱ་བའི་གཟུངས་སྔགས་ཐོབ་ནས་རྟོགས་པར་འགྱུར་བ་དང་། གང་གི་ཚེ་གཟུངས་སྔགས་རྟོགས་ནས་སེམས་ཅན་ཐམས་ཅད་ལ་སྦྱིན་པར་བྱ་བ་དང་། ཅི་ནས་གཞོན་ནུ་རྡོ་རྗེ་སྡེ་ལ་སངས་རྒྱས་ཀྱི་བཀའ་དྲན་པར་བགྱིད་པ་དང་། གཟུངས་སྔགས་འདི་དག་གིས་ཆོས་དྲན་པར་བྱ་སྟེ། སངས་རྒྱས་བཅོམ་ལྡན་འདས་རྣམས་ཀྱིས་ད་ལྟར་ཅི་གསུང་བའི་སངས་རྒྱས་ཀྱི་གསུང་དེ་དག་ཐམས་ཅད་དྲན་པར་འགྱུར་བ་དང་། དེར་འདོད་ཆགས་ཟད་པར་འགྱུར་བར་བགྱིས་སོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་བོས་ཏེ་འདི་སྐད་ཅེས་བཀའ་སྩལ་ཏོ། །སྡུག་པའི་ནུ་བོ་དུས་འདི་དྲན་པར་གྱིས་ཤིག །གང་གི་ཚེ་བཅོམ་ལྡན་འདས་རིན་ཆེན་སྙིང་པོ་གྲོང་ཁྱེར་དུ་གཤེགས་པའི་ཚེ་གྲོང་ཁྱེར་གྱི་སྒོ་དྲུང་དེ་ན་བུད་མེད་ལོང་མ་ཐེང་མོ་མཛེ་ནད་ཀྱིས་ཤིན་ཏུ་གཟིར་བ་ཞིག་འདུག་སྟེ། དེ་ནས་བུད་མེད་ལོང་མ་ལོང་དམིགས་བྱེད་པའི་ཁྱེའུ་ཞིག་ཀྱང་འདུག་སྟེ། གང་གི་ཚེ་བཅོམ་ལྡན་འདས་རིན་ཆེན་སྙིང་པོ་གྲོང་ཁྱེར་དུ་གཤེགས་པར་ཆས་པ་དེའི་ཚེ་སེམས་ཅན་རྣམས་བཅོམ་ལྡན་འདས་ལ་མཆོད་པ་བགྱི་བའི་ཕྱིར་མྱུར་ཞིག་ཏུ་ཡན་མན་དུ་རྒྱུག་པས་བུད་མེད་དེ་ཤིན་ཏུ་འཇིགས་ཤིང་སྐྲག་ནས་འདི་སྙམ་དུ་ཅི་གྲོང་ཁྱེར་འདིར་དམག་གི་དཔུང་ཆེན་པོ་འོངས་སམ། ཡང་ན་རི་དགས་དང་། གླང་པོ་ཆེ་དང་། སེང་གེ་དང་། སྟག་ལ་སོགས་པ་མང་པོ་ཞིག་རབ་ཏུ་རྒྱུག་པ་ཞིག་འོངས་སྙམ་དུ་སེམས་ཏེ། དེའི་ཚེ་སྨྲས་པ། སྙིང་རྗེའི་བདག་ཉིད་ཅན་སུ་ལ་ལ་ཞིག་མཆིས་པ་བདག་ལ་སྨོས་ཏེ། བདག་ནི་རབ་ཏུ་འཇིགས་ཏེ། དམག་གི་དཔུང་གིས་གསོད་དུ་འོངས་སམ། ཡང་ན་གཅན་གཟན་དག་བདག་ལ་བརྫིས་སུ་འོངས་སོ་ཞེས་བྱས་སོ། །དེའི་ཚེ་ན་སྤྱན་རས་གཟིགས་དབང་ཕྱུག་ཁྱོད་བྲམ་ཟེ་རྒད་པོ་ཞིག་ཏུ་གྱུར་ཏེ། ཁྱོད་ཀྱིས་བུད་མེད་ནད་པ་དེ་ལ་འདི་སྐད་དུ་ཁྱོད་མ་འཇིགས་ཤིག །གྲོང་ཁྱེར་འདི་ན་དམག་གི་དཔུང་གིས་འཇིགས་པའམ། གཅན་གཟན་མང་པོའི་འཇིགས་

---

^{[མ་དཔེ་གཟིགས་ན་འདིར་གནོན།]}

པའམ། གཞན་ཅི་ཡང་མེད་ཀྱི་བཅོམ་ལྡན་འདས་རིན་པོ་ཆེ་སྙིང་པོ་གྲོང་ཁྱེར་དུ་གཤེགས་པ་དེ་ལ་མཆོད་པ་བྱ་བའི་ཕྱིར་སྐྱེ་བོ་མང་པོ་དག་ཕན་ཚུན་དུ་རབ་ཏུ་རྒྱུག་པ་ཡིན་ནོ་ཞེས་སྨྲས་སོ། །དེ་ནས་བུད་མེད་དེས་བུ་ཁྱེའུ་དེ་ལ་སྨྲས་པ། བུ་ངའི་ལག་ནས་དྲོངས་ལ་མདུན་དུ་སོང་སྟེ་གང་ན་བཅོམ་ལྡན་འདས་བཞུགས་པ་དེར་ཁྲིད་ཅིག་ཅེས་བྱས་སོ། །བྱིས་པ་དེ་ཡང་སངས་རྒྱས་ཀྱི་འོད་ཟེར་གྱི་མཐུས་མ་དང་ལྷན་ཅིག་ཏུ་གྲོང་ཁྱེར་གྱི་སྒོ་དེར་ཕྱིན་ཏོ། །གང་གི་ཚེ་བཅོམ་ལྡན་འདས་གྲོང་ཁྱེར་དུ་གཤེགས་པའི་ཚེ་དེ་ན་སེམས་ཅན་ནད་པ་དང་། ལོང་བ་དང་། འོན་པ་དང་། ཐེང་པོ་དང་། སྒུར་པོ་དང་། སྨྱོན་པ་ལ་སོགས་པ་འདུག་པ་དེ་དག་ཐམས་ཅད་སོས་པར་གྱུར་ཏོ། །གང་གི་ཚེ་བུད་མེད་དེ་གང་དུ་བྲམ་ཟེ་ཆེན་པོ་རྒྱ་མཚོའི་རྡུལ་ཞེས་བྱ་བས་སྨོན་ལམ་བཏབ་པ་དང་། གང་དུ་བྱང་ཆུབ་སེམས་དཔའ་མང་པོ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པ་དེར་ཕྱིན་པ་དེའི་ཚེ་བུད་མེད་དེ་ཡང་སོས་པར་གྱུར་ཏེ། དེར་སངས་རྒྱས་ཉིད་དུ་སྨོན་ལམ་བཏབ་པ་གང་གི་ཚེ་བྲམ་ཟེ་རྒྱ་མཚོའི་རྡུལ་འདི་འཚང་རྒྱ་བར་འགྱུར་བ་དེའི་ཚེ་བདག་དེའི་བསྟན་པ་ལ་གནས་ཏེ། གང་གིས་བདག་སྐྱེས་པའི་ཕུང་པོ་བླངས་ཏེ། སངས་རྒྱས་བསྟན་པའི་ཕྱིར་ཁྲིད་པའི་བྲམ་ཟེ་དེ་ཇི་ལྟར་ལུང་བསྟན་པ་བཞིན། བདག་གིས་ཀྱང་དེར་སངས་རྒྱས་ཉིད་དུ་ལུང་བསྟན་པ་ཐོབ་པར་གྱུར་ཅིག་ཅེས་བྱས་ནས། བུད་མེད་དེ་ལ་སངས་རྒྱས་ལེགས་པར་སྟོན་པའི་བྲམ་ཟེ་གང་ཡིན་དེས། འདི་སྐད་དུ་བདག་སེམས་ཅན་འཇིགས་ཤིང་སྐྲག་པ་ཇི་སྙེད་ཡོད་པ་དེ་དག་ཐམས་ཅད་ཀྱི་སྐྱབས་སུ་གྱུར་ཅིག་ཅེས་སྨོན་ལམ་བཏབ་པ་དེའི་ཚེ་བུད་མེད་དེས་ཀྱང་འདི་སྐད་དུ་ཁྱོད་སེམས་ཅན་འཇིགས་ཤིང་སྐྲག་པ་ཇི་སྙེད་ཡོད་པ་གང་དག་གི་སྐྱབས་སུ་གྱུར་པ་དེའི་ཚེ་ང་དྲན་པར་གྱིས་ཤིག །འོན་ཏང་བདག་གིས་ཀྱང་གྲོགས་བགྱིའོ་ཞེས་སྨྲས་ནས། དེའི་ཚེ་བུད་མེད་ཀྱིས་དེར་སངས་རྒྱས་ཉིད་དུ་སྨོན་ལམ་བཏབ་བོ། །གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་སངས་རྒྱས་བཅོམ་ལྡན་འདས་ལས་སྔོན་སྐྱེས་པའི་རྒྱུད་ཐོས་པ་དེའི་ཚེ་སྨོན་ལམ་ཆེན་པོ་བཏབ་ནས་འདི་སྐད་ཅེས་སྨྲས་

---

^{[མ་དཔེ་གཟིགས་ན་འདིར་གནོན།]}

སོ། །དེ་ལྟར་བྱང་ཆུབ་སེམས་དཔའ་དེ་དག་ཐམས་ཅད་སངས་རྒྱས་པར་གྱུར་ལ། བདག་ནི་ད་དུང་དུ་བུད་མེད་ཀྱི་གཟུགས་སུ་སྣང་བ་ནི་བདག་ཤིན་ཏུ་ངོ་ཚ་མོད་ཀྱི། འོན་ཀྱང་བཅོམ་ལྡན་འདས་ཀྱིས་ལས་ཆེན་པོ་ཇི་སྐད་དུ་བཀའ་སྩལ་པ་ནི་གཞན་དུ་མི་འགྱུར་ཏེ། བདག་གིས་བུད་མེད་དུ་སྐྱེ་བ་མ་བླངས་ན། བཅོམ་ལྡན་འདས་ཀྱིས་བཀའ་སྩལ་པའི་ལས་དེ་དག་ཀྱང་ཇི་ལྟར་བྱེད་པར་འགྱུར། དེ་བས་ན་འདོད་ཆགས་དང་། ཞེ་སྡང་དང་། གཏི་མུག་དང་ལྡན་པའི་བུད་མེད་གཞན་དག་ཇི་ལྟ་བ་བཞིན་དུ་དེར་བདག་བུད་མེད་ཀྱི་གཟུགས་སུ་སྣང་བར་བྱས་ལ། གང་གི་ཚེ་བདག་གི་སངས་རྒྱས་ཀྱི་ཕྲིན་ལས་ཐམས་ཅད་དང་། སྨོན་ལམ་རྣམས་དྲན་པར་འགྱུར་བ་དེའི་དུས་ལ་བབ་པ་ན་གཞོན་ནུ་འདི་དང་ལྷན་ཅིག་ཏུ་ལི་ཡུལ་དུ་སྐྱེ་བ་བླངས་ཏེ། བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་གྱུར་ཅིག །གང་གི་ཚེ་ལི་ཡུལ་དུ་གནོད་པ་བྱུང་བར་གྱུར་པ་ན་དེར་བདག་ཅག་སྒྲོལ་བ་པོར་གྱུར་ཅིག །དེ་ནས་ཐམས་ཅད་མི་མཇེད་ཀྱི་འཇིག་རྟེན་གྱི་ཁམས་འདིར་འོངས་ནས་ལྷ་དང་མིའི་ནང་དུ་བུད་མེད་ཀྱི་སྐྱེ་བ་ལེན་པ་ན་བདག་གང་དུ་སོང་ཡང་རུང་སྟེ། ཐམས་ཅད་དུ་ཚེ་རབས་དྲན་པར་གྱུར་ཅིག །གང་གི་ཚེ་སངས་རྒྱས་ཀྱིས་བཀའ་སྩལ་པ་འདི་བྱས་ཏེ། འཆི་བའི་དུས་བྱས་ནས་ཀྱང་གང་ན་བུད་མེད་ཀྱི་མིང་ཡང་མེད་པའི་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་གྱུར་ཅིག །དེར་ཡང་རིང་པོ་མི་ཐོགས་པར་ཕྱིར་འདིར་འོངས་ནས་འགྲོ་བ་ལྔར་གཏོགས་པའི་སེམས་ཅན་སྡུག་བསྔལ་བ་རྣམས་ཡོངས་སུ་གྲོལ་བར་བྱེད་པར་གྱུར་ཅིག །གང་གི་ཚེ་བྱམས་པ་འདིར་གཤེགས་པའི་ཚེ་ཡང་བྱང་ཆུབ་སེམས་དཔའ་ནམ་མཁའི་ཚིག་ཇི་ལྟ་བ་བཞིན་དུ་ཚུལ་བཞིན་དུ་བལྟ་བའི་ཕྱིར་འགྲོ་བར་གྱུར་ཅིག །ཚེ་རབས་ཐམས་ཅད་དུ་སེམས་ཅན་ཇི་སྙེད་ཀྱིས་བདག་དང་ལྷན་ཅིག་ཏུ་བསོད་ནམས་བགྱིས་པའམ། བགྱིད་པར་འགྱུར་བའམ། ཡང་ན་མཐོང་བའམ། མིང་ཐོས་ཀྱང་རུང་སྟེ། དེ་དག་ཐམས་ཅད་བདག་གིས་ཡོངས་སུ་གྲོལ་བར་བྱེད་པར་གྱུར་ཅིག །ཅེས་སྨོན་ལམ་བཏབ་བོ། །གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་དེ་སྐད་སྨྲས་པ་

---

^{[མ་དཔེ་གཟིགས་ན་འདིར་གནོན།]}

དེའི་ཚེ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སྔོན་གྱི་ཚེ་བྲམ་ཟེ་རྒྱ་མཚོའི་རྡུལ་ཞེས་བྱ་བར་གྱུར་པ་གང་ཡིན་པ་དེ་ནི། བཅོམ་ལྡན་འདས་ཤཱཀྱ་ཐུབ་པ་ང་ཡིན་ནོ། །གང་གིས་བུད་མེད་དེ་སངས་རྒྱས་བཅོམ་ལྡན་འདས་བསྟན་པའི་བྲམ་ཟེ་རྒད་པོར་གྱུར་པ་གང་ཡིན་པ་དེ་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་འདི་ཡིན་ནོ། །བུད་མེད་ནད་པར་གྱུར་པ་གང་ཡིན་པ་དེ་ནི་རྒྱལ་པོ་མ་སྐྱེས་དགྲའི་བུ་མོ་ལྷ་མོ་དྲི་མ་མེད་པའི་འོད་འདི་ཡིན་ནོ། །དེའི་བུ་ཁྱེའུར་གྱུར་པ་གང་ཡིན་པ་དེ་ནི་གཞོན་ནུ་རྡོ་རྗེ་སྡེ་འདི་ཡིན་ནོ། །ཕྱིས་འབྱུང་བ་གང་ཡིན་པ་དེ་དག་ཀྱང་བཤད་པར་བྱ་སྟེ། སྐར་རྡོ་རྣམས་དང་། གསེར་གྱི་རིགས་ཀྱི་ནང་ན་ནི། ཐོག་མ་ཁོ་ནར་དགེ་བསྙེན་མ་ཧུ་ཤ་ལས་ཟུག་སྟེ། མིའི་རྒྱུད་ཆགས་པར་གྱུར་ནས། དགེ་བསྙེན་མ་ཧུ་ཤ་གསེར་གྱི་རིགས་ཀྱི་ཡུལ་དེ་ན་གནས་པར་གྱུར་ཏོ། །དགེ་བསྙེན་མ་ཧུ་ཤ་དེ་ནི་ལྷའི་རིགས་ཡིན་ཏེ། ལྷ་རྣམས་ཀྱི་ནང་ནས་ལྷ་མོ་ཞིག་ལ་སྐྱོན་བྱུང་བར་གྱུར་ནས། དེ་ཆད་པས་གཅད་དེ་གསེར་གྱི་རི་ལ་བཏང་ངོ་། །དམོད་པ་ཡང་བོར་ཏེ། ཁྱོད་དེར་མི་ལ་ཟ་བའི་སྲིན་མོར་གྱུར་ཅིག་ཅེས་བྱས་སོ། །དེ་ནས་དེས་ཚོང་པ་མང་པོ་གསེར་འདོད་པའི་ཕྱིར་གསེར་གྱི་རིགས་ཀྱི་རི་དེར་སོང་བ་གང་ཡིན་པ་རྣམས་ལ་བསྟན་ཏེ། སྲིན་མོ་དེས་ཚོང་པ་དེ་དག་དང་ལྷན་ཅིག་ཏུ་འདོད་པའི་བདེ་བ་ཉམས་སུ་མྱོང་ངོ་། །གང་གི་ཚེ་དུས་གཞན་ཞིག་ན་འགྲོན་པོ་གཞན་དག་དེར་ལྷགས་པར་གྱུར་པ་ན་སྔར་འོངས་པ་གང་དག་དང་ལྷན་ཅིག་ཏུ་འདོད་པའི་བདེ་བ་ཉམས་སུ་མྱོང་བར་གྱུར་པ་དེ་དག་ནི་ཟོས་སོ། །ལྷས་དམོད་པ་བོར་བའི་སྲིན་མོ་དེ་ཡང་སྲིན་མོ་གཞན་གང་དག་དང་འགྲོན་དུ་འགྲོན་པ་དེ་དག་དང་འདོད་པའི་བདེ་བ་ཉམས་སུ་མྱོང་བ་ལྔ་བརྒྱ་པོ་དག་དང་གྲོགས་མོར་གྱུར་ཏོ། །དེ་ན་བྱང་ཆུབ་སེམས་དཔའ་འོག་པག་ཅན་ཞེས་བྱ་བ་ཞིག་དེད་དཔོན་དུ་གྱུར་ཏོ། །གང་གི་ཚེ་ལྷ་རྣམས་ཀྱིས་དེ་ཉེས་པ་ལས་ཚངས་པར་བྱེད་པ་དེའི་དུས་ལ་བབ་པ་ན། དེའི་ཚེ་དེ་ལས་བུ་མོ་ཞིག་བཙས་ཏེ་ཧུ་ཤ་ཞེས་བྱ་བར་མིང་བཏགས་སོ། །ཧུ་ཤ་དེ་ཡང་སྔོན་དེ་བཞིན་གཤེགས་པ་པད་མའི་འདབ་མ་དྲི་

---

^{[མ་དཔེ་གཟིགས་ན་འདིར་གནོན།]}

མ་མེད་པའི་རྒྱུ་སྐར་གྱི་རྒྱལ་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པའི་སངས་རྒྱས་ཀྱི་ཞིང་ན་གནས་པ་ལས་འདི་སྐད་དུ་སྔོན་ལྷ་ལས་གྱུར་པའི་སྲིན་མོ་འདི་ནི་ཚེ་རབས་མང་པོར་བདག་གི་མར་གྱུར་པ་ཡིན་ན། ད་ལྟར་བྱང་ཆུབ་སེམས་དཔའ་འོག་པག་ཅན་བཟའ་བར་ཆས་ཀྱིས། བདག་འདིའི་བུ་མོར་གྱུར་ལ་དེའི་སྡིག་པའི་ལས་དགག་པར་བྱའོ། །ཞེས་སྙིང་རྗེ་རྗེ་སྐད་དུ་ཟློས་པར་བྱེད་དོ། །དེའི་ཚེ་འགྲོན་པ་གཞན་དག་དེར་ལྷགས་སོ། །དེ་ནས་འོག་པག་ཅན་འཁོར་དང་བཅས་པའི་སྒོ་རྣམས་བཅད་ནས། བཟའ་བར་ཆས་སོ། །གསར་དུ་ལྷགས་པ་རྣམས་དང་ནི་འདུས་སོ། །དེ་ནས་འོག་པག་ཅན་དེ་དང་། སྲིན་མོར་འདུས་པར་གྱུར་པ་ཧུ་ཤ་ཞེས་བྱ་བ་བུ་མོ་ཆུང་ངུ་དེས་ཕ་འོག་པག་ཅན་ལ་འདི་སྐད་དུ་ཕ་ཇོ་བོ་ཅི་ནས་བདག་ཅག་སྲིན་མོ་འདི་དག་གིས་མ་ཟོས་པར་བྲོས་ཏེ་བཞུད་དོ་ཞེས་སྨྲས་སོ། །དེའི་ཚེ་འོག་པག་ཅན་དེ་རང་གི་བུ་མོ་དེས་ཐར་བར་བྱས་སོ། །འོག་པག་ཅན་གྱིས་ཀྱང་འགྲོན་པོ་ལྔ་བརྒྱ་པོ་ཐམས་ཅད་ཐར་བར་བྱས་ཏེ་ཀུན་ཏུ་ལྷན་ཅིག་ཏུ་བྲོས་སོ། །དེའི་ཚེ་སྲིན་མོ་དེ་དེར་སོང་ནས་འོག་པག་ཅན་དེ་མ་རྙེད་ནས། དེར་གསར་དུ་ལྷགས་པའི་འགྲོན་པ་གང་ཡིན་པ་དེ་དག་བོར་ཏེ། འོག་པག་ཅན་ལ་སོགས་པ་འགྲོན་པ་རྣམས་ཚོལ་བའི་ཕྱིར་རྒྱུག་གོ །དེ་སྔོན་ལྷའི་འཇིག་རྟེན་ན་གནས་པའི་ཚེ་ཕྱི་ལ་ཕྱིན་པས་དེའི་ཕྱིར་ཆད་པས་བཅད་དེ། ལྷ་རྣམས་ཀྱིས་རྣ་བ་བཅད་ནས་གསེར་གྱི་རིགས་ཀྱི་རི་ལ་བཞག་སྟེ། དེ་ལ་ལྷ་རྣམས་ཀྱིས་འདི་སྐད་དུ་དམོད་པ་བོར་ཏེ། གང་གིས་ཁྱོད་ལ་འདི་སྐད་དུ་ཁྱོད་ཀྱི་རྣ་བ་སུས་བཅད་ཅེས་ཐེ་ཚོམ་འདྲི་བར་འགྱུར་རོ། །དེས་ཁྱོད་དམོད་པ་ལས་ཐར་བར་གྱུར་ཏེ། ཕྱིར་ལྷའི་འཇིག་རྟེན་ན་སོང་ནས་སྔོན་བཞིན་དུ་ལྷར་འགྱུར་རོ་ཞེས་བྱས་སོ། །དེ་ནས་དེའི་ཚེ་ལྷའི་འཇིག་རྟེན་དུ་ཕྱིར་འགྲོ་བའི་དུས་ལ་བབ་སྟེ། དེ་འགྲོན་པོ་མང་པོ་དག་ཚོལ་བའི་ཕྱིར་རྒྱུག་པ་ན། ཞབ་མ་རིང་པོ་བགོས་པ་བསྙིལ་ནས། དེ་སྔོན་རི་དགས་ཀྱི་སྤུ་ལས་གོས་བྱས་པ་གང་ཡིན་པ་གྱོན་ཏེ། སྐྲ་སྤྱི་བོར་བཅིངས་ནས། གང་གི་ཚེ་ཚོང་པ་བྲོས་པ་དེ་དག་གི་ཕྱི་བཞིན་དུ་འོངས་པ་དེའི་ཚེ། དེད་

---

^{[མ་དཔེ་གཟིགས་ན་འདིར་གནོན།]}

དཔོན་འོག་པག་ཅན་དེ་དང་། ཚོང་པ་ལྔ་བརྒྱ་པོ་དེ་དག་བཟུང་ནས་ཞབ་མའི་ནང་དུ་བྲུབས་ཏེ་ཕྲག་པ་ལ་བཀལ་ལོ། །དེའི་ཚེ་འོག་པག་ཅན་གྱིས་བགད་པ་དང་། སྲིན་མོ་དེས་དྲིས་པ། མིའི་བུ་ཁྱོད་ཅིའི་ཕྱིར་དགོད། ཇི་སྟེ་དྲང་པོར་མ་སྨྲས་ན་ཁྱོད་ཀྱི་ཁྲག་ས་ལ་ཕོ་སྟེ་བཏང་ངོ་། །དེ་ནས་དེད་དཔོན་འོག་པག་ཅན་གྱིས་དེ་ལ་འདི་སྐད་དུ་འདི་ལྟར་མཐུ་ཆེ་བ་ཁྱོད་ཀྱི་རྣ་བ་མི་སུས་ཇི་ལྟར་བཅད་ཅེས་སྨྲས་པ་ན། དེའི་ཚེ་དེས་འགྲོན་པ་དེ་དག་བཏང་ནས་བར་སྣང་ལ་གནས་ཏེ། འདི་སྐད་དུ་ཡུལ་འདིའི་མིང་ནི་རྣ་བའི་ཕྱིར་གསེར་གྱི་རིགས་ཞེས་བྱ་བར་འགྱུར་རོ། །ཞེས་སྨྲས་ནས། རྣ་བ་སྔ་མ་ཁོ་ན་བཞིན་དུ་བྱུང་བར་གྱུར་ཏེ། ལྷའི་འཇིག་རྟེན་དུ་སོང་ནས་ཕྱིར་ལྷར་གྱུར་ཏོ། །དེད་དཔོན་འོག་པག་ཅན་དེ་ཡང་འགྲོན་པ་དེ་དག་དང་ལྷན་ཅིག་ཏུ་ཕྱིར་གསེར་གྱི་རིགས་ཀྱི་རི་ལ་ལོག་སྟེ་དེ་ན་བུ་མོ་དེ་གསོ་ཞིང་འདུག་གོ །སྲིན་མོ་དེ་དག་ཐམས་ཅད་ཀྱང་སྦྲུམ་པར་གྱུར་ཏེ། དེ་དག་གི་ནང་ན་གང་དང་ལྷན་ཅིག་ཏུ་འདོད་པའི་དགའ་བ་ཉམས་སུ་མྱོང་ནས་དེའི་འོག་ཏུ་སེམས་ཅན་དེ་ཉིད་མི་གསོད་པ་ནི་འགའ་ཡང་མེད་དོ། །དེ་ནས་སྲིན་མོ་དེ་དག་ཐམས་ཅད་ངོ་ཚ་བར་གྱུར་ནས་བུ་དེ་རྣམས་གསོས་ཏེ། ཧུ་ཤ་ཡང་ལྷ་བཞིན་དུ་མཆོད་པའི་གནས་སུ་བྱས་སོ། །དེར་དེ་དག་གི་བུ་གཞོན་ནུ་ཐོག་མར་བཙས་པ་དེ་ནི་ཧུ་ཤའི་ཁྱིམ་ཐབ་ཏུ་གྱུར་ཏེ། དེ་ཕྱིན་ཅད་གསེར་གྱི་རིགས་ཀྱི་མིའི་རྒྱུད་བྱུང་བར་གྱུར་ཏོ། །འགྲོན་པོ་དེ་དག་གི་བུ་བྱུང་ངོ་ཅོག་དང་ལྷན་ཅིག་ཏུ་འདོད་པའི་དགའ་བ་བྱས་ཀྱང་དེ་དག་ཐམས་ཅད་མགུ་བར་བྱེད་མ་ནུས་ཏེ། དེ་ལྟར་དེས་དེའི་ཚེ་འདོད་པའི་བདེ་བ་དམ་བཅས་པ་ལས་ཐམས་ཅད་མགུ་བར་བྱེད་མ་ནུས་པས་དེའི་ལས་ཀྱིས་རྟག་ཏུ་བུད་མེད་དུ་སྐྱེ་བར་གྱུར་ཏོ། །ཧུ་ཤ་ལས་བུ་ཅིག་བྱུང་ནས་དགེ་བསྙེན་མ་ཧུ་ཤར་གྱུར་ཏེ། ཧུ་ཤ་དེའི་བུར་གྱུར་པ་གང་ཡིན་པ་དེ་དེར་རྒྱལ་པོར་གྱུར་ཏེ། དེ་ཕྱིན་ཅད་མིའི་རྒྱུད་ཆགས་པར་གྱུར་ནས། དགེ་བསྙེན་མ་ཧུ་ཤ་གསེར་གྱི་རིགས་ཀྱི་རི་དེ་ལ་ལྷའི་གཞལ་མེད་ཁང་གི་ནང་ན་གནས་ཤིང་ལྷ་དང་མི་རྣམས་དང་། སྲིན་མོ་རྣམས་ལ་ཆོས་སྟོན་ཏོ། །གང་གི་ཚེ་ཧུ་ཤ་འཆི་བའི་དུས་བྱེད་པ་ན་སྲིན་མོ་ལྔ་བརྒྱ་པོ་གང་ཡིན་པ་དེ་དག་དང་། ལྷ་དང་སྲིན་པོ་

---

^{[མ་དཔེ་གཟིགས་ན་འདིར་གནོན།]}

དེ་ལས་ཆོས་ཐོས་པ་གང་ཡིན་པ་དེ་དག་ད་ལྟར་གསེར་གྱི་རིགས་ཀྱི་ཡུལ་གྱི་སྲུང་མར་གྱུར་ཏོ། །དེའི་ཚེ་ན་དགེ་བསྙེན་མ་ཧུ་ཤར་གྱུར་པ་གང་ཡིན་པ་དེ་ནི་ད་ལྟར་དྲི་མ་མེད་པའི་འོད་འདི་ཡིན་ནོ། །ཨུ་རྒྱན་གྱི་རྒྱལ་པོར་གྱུར་པ་གང་ཡིན་པ་དེ་ནི་ལི་ཡུལ་གྱི་རྒྱལ་པོ་ཐོག་མར་བྱུང་བ་དང་། གཉེན་བྱེད་ཅིང་བདག་ཉིད་དང་། ཡུལ་འབུལ་བར་བྱེད་པ་གང་ཡིན་པའི་སྐར་རྡོའི་རྒྱལ་པོར་གྱུར་པ་འདི་ཡིན་ནོ། །ཀ་སྤ་རའི་རྒྱལ་པོར་འགྱུར་བ་གང་གིས་བཅོམ་ལྡན་འདས་ཀྱི་སྤྱན་སྔར་བདག་ནི་ཕར་གྱུར་ཅིག་ཅེས་སྨྲས་པ་གང་ཡིན་པ་དེ་ནི་སྐར་རྡོའི་རྒྱལ་པོ་དབང་ཕྱུག་གོ་ཆ་ཞེས་བྱ་བ་དྲི་མ་མེད་པའི་འོད་ཀྱི་ཕར་འགྱུར་རོ། །ཀ་སྤ་རའི་རྒྱལ་པོའི་བཙུན་མོར་གྱུར་པས་འདི་སྐད་དུ་བདག་ནི་མར་གྱུར་ཅིག་ཅེས་སྨྲས་པ་གང་ཡིན་པ་འདི་ནི་རྒྱལ་པོ་དབང་ཕྱུག་གོ་ཆ་དེའི་བཙུན་མོ་དམ་པར་འགྱུར་རོ། །ལྷ་མོ་དེའི་མིང་པོར་གྱུར་པ་གང་གིས་བདག་ནི་སྡུག་པའི་མིང་པོར་གྱུར་ཏེ། གང་གི་ཕྱིར་སྐྱོ་བ་ཆེན་པོ་ཐོབ་ནས་སྐྱོ་བ་དེ་ལ་མི་གཙང་བའི་ཏིང་ངེ་འཛིན་ཐོབ་པར་གྱུར་ཅིག་ཅེས་སྨོན་ལམ་འདེབས་པ་གང་ཡིན་པ་འདི་ནི་མིང་པོར་འགྱུར་རོ། །ནུ་མོ་ཐ་ཆུངས་སུ་གྱུར་པ་གང་གིས་འདི་སྐད་དུ་གང་གི་ཚེ། བདག་མྱ་ངན་གྱིས་འཆི་བར་འགྱུར་བ་དེའི་ཚེ་ཁྱོད་དགེ་བའི་བཤེས་གཉེན་དགེ་སློང་གི་ཐད་དུ་སོང་ནས་དེར་འཁོར་བ་ལས་གྲོལ་བར་གྱུར་ཅིག་ཅེས་སྨོན་ལམ་འདེབས་པ་གང་ཡིན་པ་འདི་ནི་ནུ་མོ་ཐ་ཆུངས་སུ་འགྱུར་རོ། །རྡོ་རྗེ་སྡེའི་ནུ་བོ་ཐ་ཆུངས་གང་གི་ལི་ཡུལ་གྱི་ཕྱིར་དེ་དང་ལྷན་ཅིག་ཏུ་སྨོན་ལམ་བཏབ་པ་གང་ཡིན་པ་འདི་ནི་མིང་པོར་གྱུར་ཏེ། སྐར་རྡོའི་རྒྱལ་པོར་འགྱུར་རོ། །རྒྱལ་པོ་མ་སྐྱེས་དགྲའི་གྲོང་ཁྱེར་སྐྱོང་བ་གང་ཡིན་པ་འདི་ནི་གསེར་གྱི་རིགས་ཀྱི་རྒྱལ་པོར་འགྱུར་རོ། །བུད་མེད་གང་གིས་སྦྱིན་པ་ནི་བྱིན་ལ་ཚུལ་ཁྲིམས་ནི་མ་བསྲུངས་པ་གང་ཡིན་པ་འདི་ནི་རྒྱལ་པོ་དེའི་བཙུན་མོར་འགྱུར་རོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་ལྷ་རྣམས་ལ་བཀའ་སྩལ་པ། གང་གི་ཚེ་ལྷ་མོ་འདི་ལི་ཡུལ་དུ་དང་པོར་སྐྱེ་བའི་དུས་ལ་བབ་པ་ན་བྱང་ཆུབ་སེམས་དཔའ་བྱམས་པ་དགའ་ལྡན་ན་གནས་པ་ལྷ་དང་བཅས་པས་བསྐུལ་

---

^{[མ་དཔེ་གཟིགས་ན་འདིར་གནོན།]}

ཏེ། སྔོན་རྡོ་རྗེ་སྡེ་ལས་གྱུར་པའི་ལྷ་གང་ཡིན་པ་དེ་དང་། སྔོན་དྲི་མ་མེད་པའི་འོད་ལས་གྱུར་པའི་ལྷ་མོ་གང་ཡིན་པ་དེ་དང་། གྲོགས་མོར་གྱུར་པས་ཐོབ་པ་གང་དང་ལྷན་ཅིག་ཏུ་སྨོན་ལམ་བཏབ་པར་གྱུར་པ་གང་ཡིན་པ་དེ་ལ་ལྷ་དེ་དག་གིས་བསྐུལ་ཏེ། ལྷའི་སྐྱེ་བ་བོར་ལ་མིའི་སྐྱེ་བ་ལོང་ཤིག་ཅེས་ཐམས་ཅད་ལ་དྲན་པར་བྱེད་དོ། །རྒྱལ་པོ་མ་སྐྱེས་དགྲའི་གྲོང་ཁྱེར་སྐྱོང་བར་གྱུར་པ་གང་ཡིན་པ་དེ་དང་། གྲོང་ཁྱེར་སྐྱོང་བ་དེའི་བུར་གྱུར་པ་ལ་ཡང་ལྷའི་འཇིག་རྟེན་ནས་ལྷ་རྣམས་ཀྱིས་སྐུལ་བར་བྱེད་དོ། །ཕ་དང་མར་གྱུར་པ་གང་ཡིན་པ་དང་ལྷན་ཅིག་ཏུ་སྨོན་ལམ་འདེབས་འདེབས་པ་གང་ཡིན་པ་རྣམས་ལ་ཡང་དེའི་ཚེ་ལྷ་རྣམས་ཀྱིས་བསྐུལ་ཏེ། སངས་རྒྱས་ཀྱིས་བཀའ་སྩལ་པ་གང་ཡིན་པ་དང་། སྨོན་ལམ་བཏབ་པ་གང་ཡིན་པ་རྣམས་ཀྱི་དུས་ནི་ད་བབ་ཀྱིས། J04,V055,P1A ལི་ཡུལ་དུ་སྐྱེ་བ་ལོང་ཤིག་ཅེས་དྲན་པར་བྱེད་དོ། །དེ་ལ་བྱང་ཆུབ་སེམས་དཔའ་རྡོ་རྗེ་སྡེ་ཞེས་བྱ་བའི་ལྷ་གང་ཡིན་པ་དེ་ནི་ལི་ཡུལ་གྱི་རྒྱལ་པོར་འགྱུར་རོ། །ས་ཐོབ་པའི་རིགས་ཀྱི་བུད་མེད་གང་ཡིན་པ་དེ་ནི་ཚེ་རབས་ལྔའི་བར་དུ་ལི་ཡུལ་གྱི་རྒྱལ་མོར་འགྱུར་རོ། །ལི་ཡུལ་དུ་ནི་ཚེ་རབས་དྲུག་ཏུ་སྐྱེ་བ་ལེན་ཏེ། རྒྱལ་པོ་བྱང་ཆུབ་སེམས་དཔའི་བཙུན་མོར་འགྱུར་རོ། །གང་གི་ཚེ་འཕགས་སྐྱེས་པོའི་ཕྱོགས་བྱས་པའི་ལས་དེའི་དུས་ལ་བབ་པ་ན་དེའི་རྒྱུད་དུ་གྱུར་པ་ཇི་སྙེད་པ་རྣམས་སུམ་པར་འགྱུར་རོ། །གང་གི་ཚེ་ལི་ཡུལ་དུ་ཐོག་མར་སུམ་པ་འོངས་པ་དེའི་ཚེ་ལྷ་མོ་འདི་ལྷའི་ནང་ནས་ཤི་འཕོས་ནས་སྐར་རྡོའི་རྒྱལ་པོའི་བུ་མོར་འགྱུར་རོ། །གང་གི་ཚེ་འ་ཞ་དང་སུམ་པ་འོང་བའི་དུས་ལ་བབ་པ་དེའི་ཚེ་ལྷ་མོ་དྲི་མ་མེད་པའི་འོད་འདིས་རྒྱལ་པོ་མ་སྐྱེས་དགྲའི་གྲོང་ཁྱེར་སྐྱོང་བ་ཁྱིམ་ཐབ་ཏུ་གྱུར་པ་འདི་ཁྲིད་ནས་གསེར་གྱི་ཡུལ་དུ་ཁྲིད་དེ་འོང་བར་འགྱུར་རོ། །དེའི་ཚེ་དེར་དམག་གི་དཔུང་དེ་དག་འོངས་ནས་དེའི་ཕ་སྐར་རྡོའི་རྒྱལ་པོ་དེ་དང་། མིང་པོ་རབ་གཉིས་གཡུལ་དེར་འཆི་བར་གྱུར་ཏེ། དེའི་ཚེ་དྲི་མ་མེད་པའི་འོད་མྱ་ངན་གྱིས་གཟིར་ནས་མྱ་ངན་གྱི་ཁང་བུར་ཞུགས་ཏེ། གཞན་ལ་དྲི་མི་དགོས་པར་མི་གཙང་བའི་ཏིང་ངེ་འཛིན་ཐོབ་པར་འགྱུར་རོ། །གང་གི་ཚེ་གདོང་དམར་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱིས་ལི་ཡུལ་བྲན་དུ་འགྱུར་བའི་དུས་ལ་བབ་པ་ན། རྒྱལ་པོ་རྣམ་པར་རྒྱལ་བའི་རྩལ་དེ་གཡུལ་དེར་གསོད་པར་འགྱུར་རོ། །དེའི་བུ་རྒྱལ་པོ་རྣམ་པར་རྒྱལ་བའི་གྲགས་པ་ཞེས་བྱ་བ་ཞིག་འབྱུང་བར་འགྱུར་རོ། །སྐར་རྡོའི་རྒྱལ་པོ་དབང་ཕྱུག་གོ་ཆ་ཞེས་བྱ་བ་ནི་བུ་དང་བཅས་ཏེ། ལིའི་རྒྱལ་པོ་དང་ལྷན་ཅིག་ཏུ་གཡུལ་གྱི་ནང་དུ་འཆི་བར་འགྱུར་རོ། །ད་ལྟར་གྱི་རྡོ་རྗེ་སྡེ་འདི་ནི་དེའི་བུ་རྣམ་པར་རྒྱལ་བའི་གོ་ཆ་ཞེས་བྱ་བར་འགྱུར་ཏེ། སྐར་རྡོའི་རྒྱལ་པོར་འགྱུར་རོ། །དེས་ཀྱང་ལོ་གཅིག་རྒྱལ་སྲིད་ཐོབ་པར་འགྱུར་ཏེ། དེ་ལ་རྣམ་པར་རྒྱལ་བའི་གྲགས་པ་ནི་ལི་ཡུལ་དུ་འབྱུང་ངོ་། །རྣམ་པར་རྒྱལ་བའི་གོ་ཆ་ནི་སྐར་རྡོར་འབྱུང་ངོ་། །གང་གི་ཚེ་དྲི་མ་མེད་པའི་འོད་ལ་སངས་རྒྱས་བཅོམ་ལྡན་འདས་རྣམས་ཀྱིས་འོད་ཟེར་བཏང་སྟེ། བཟོད་པ་ཐོབ་པར་འགྱུར་བ་དེའི་དུས་ལ་བབ་པ་དེའི་ཚེ་དགེ་བྱེད་ཀྱི་ཕྱོགས་དང་སྡིག་བྱེད་ཀྱི་ཕྱོགས་དེ་དག་ཀྱང་སོ་སོར་སྡེར་J04,V055,P1B འཆའ་བར་འགྱུར་རོ། །དེའི་ཚེ་དགེ་བྱེད་དང་། སྡིག་བྱེད་གཉིས་ཀྱི་ཕ་སྔོན་ཆོམ་རྐུན་པ་ལྔ་བརྒྱ་སྤྱུག་པར་བྱེད་པ་གང་ཡིན་པ་དེ་རྒྱལ་པོར་འགྱུར་ཏེ། བློན་པོ་ཆེན་པོ་ནི་གཉིས་འབྱུང་བར་འགྱུར་རོ། །རྒྱལ་པོའི་བུ་རྣམ་པར་རྒྱལ་བའི་གྲགས་པ་ཞེས་བྱ་བ་ནི་ལི་ཡུལ་གྱི་རྒྱལ་པོར་འགྱུར་རོ། །རྣམ་པར་རྒྱལ་བའི་གོ་ཆ་ཞེས་བྱ་བ་ནི་སྐར་རྡོའི་རྒྱལ་པོར་འགྱུར་རོ། །གཞོན་ནུ་དེ་གཉིས་ལས་དགེ་བྱེད་ནི་བློན་པོ་ཆེན་པོ་གཙོ་བོ་ཤོས་ཀྱིས་གསོས་སོ། །ཅིག་ཤོས་ནི་སྡིག་བྱེད་ཀྱིས་གསོས་སོ། །གང་གི་ཚེ་དགེ་བྱེད་བཙས་པ་དེའི་ཚེ་ཚོང་པ་ལྔ་བརྒྱ་འོངས་ཏེ། ལི་ཡུལ་དུ་སྐྱེས་ནས་ཡུལ་དེ་ན་དགེ་བ་བྱེད་དོ། །གང་གི་ཚེ་སྡིག་བྱེད་བཙས་པ་ན་ཆོམ་རྐུན་ལྔ་བརྒྱ་སྤྱུགས་པ་དེ་དག་ལི་ཡུལ་དུ་སྐྱེས་ཏེ་སྡིག་པ་བྱེད་དོ། །གང་གི་ཚེ་གཞོན་ནུ་སྡིག་བྱེད་བཙས་པ་ན་ཆོམ་པོ་ལྔ་བརྒྱ་པོ་དེ་དག་རྒྱལ་པོའི་ཕའི་ཐད་དུ་བཏང་ངོ་། །དེ་ནས་དེའི་ཚེ་གཞན་དག་ཅིག་ལ་བྱ་བ་གང་ཡིན་པ་འདི་ཁྱོད་ཀྱིས་བྱོས་ཤིག་ཅེས་བསྒོ་ནས་བློན་པོ་ཆེན་པོ་དེའི་གཙོ་བོ་དེའི་ལག་པ་བཅད་དོ། །ཅིག་ཤོས་ནི་བསད་དོ། །དེ་ཡང་སྔོན་གང་གི་ཚེ་སྡིག་བྱེད་ཀྱིས་དགེ་བྱེད་ཀྱི་མིག་ཕྱུང་

---

^{[མ་དཔེ་གཟིགས་ན་འདིར་གནོན།]}

བ་དེའི་ཚེ་བློན་པོ་ཆེན་པོ་དེ་དག་ཕན་ཚུན་ཁོན་བྱུང་ནས་དེ་ཕྱིན་ཅད་ཚེ་རབས་ཐམས་ཅད་དུ་གཅིག་གི་དགྲར་གཅིག་གྱུར་ཏོ། །དེ་ལ་བློན་པོ་ཆེན་པོ་གཙོ་བོ་ནི་སྐར་རྡོའི་རྒྱལ་པོར་འགྱུར་རོ། །ཅིག་ཤོས་ནི་ལི་ཡུལ་གྱི་རྒྱལ་པོར་འགྱུར་རོ། །དེ་གཉིས་ཀྱང་ཕྱིས་ཕན་ཚུན་འཐབ་པར་འགྱུར་རོ། །སྡིག་བྱེད་ཀྱི་ཕྱོགས་སྔོན་དགེ་བྱེད་ཀྱི་མིག་འབྱིན་པ་གང་ཡིན་པ་དེ་དག་གིས་ལིའི་རྒྱལ་པོ་གསོད་པར་འགྱུར་ཏེ། གང་གི་ཚེ་གདོང་དམར་རྣམས་ལི་ཡུལ་འཛིན་པར་འགྱུར་བའི་དུས་ལ་བབ་པ་དེའི་ཚེ་དེ་གཉིས་ཕན་ཚུན་འཐབ་པར་འགྱུར་རོ། །དེའི་ཚེ་ལྷ་མོ་དྲི་མ་མེད་པའི་འོད་ཀྱི་མིང་པོ་ད་ལྟར་རྡོ་རྗེ་སྡེ་ཞེས་བྱ་བ་འདི་སྐར་རྡོའི་རྒྱལ་པོ་རྣམ་པར་རྒྱལ་བའི་གོ་ཆ་ཞེས་བྱ་བར་འགྱུར་ཏེ། མིང་པོ་དེའི་ཕྱིར་མྱ་ངན་གྱིས་གཟིར་བར་འགྱུར་རོ། །གང་གི་ཚེ་སངས་རྒྱས་ཀྱི་འོད་ཟེར་དེའི་སྟེང་དུ་གནས་པར་འགྱུར་བའི་དུས་ལ་བབ་པ་ན་དེས་སྐར་རྡོའི་རྒྱལ་པོ་ཕམ་པར་འགྱུར་རོ། །ཅི་སྟེ་བསོད་ནམས་དང་མི་ལྡན་ན་ནི་དྲི་གཙང་ཁང་དང་དགེ་འདུན་གྱི་ཀུན་དགའ་ར་བ་གཞིག་པར་བྱའོ་ཞེས་J04,V055,P2A སངས་རྒྱས་བཅོམ་ལྡན་འདས་ལ་སྨོན་ལམ་འདེབས་འདེབས་པ་གང་ཡིན་པ་དེ་རྣམས་ཀྱང་དེ་དག་གིས་གྲོགས་བྱེད་པར་མི་འགྱུར་རོ། །གང་གི་ཚེ་གདོང་དམར་དག་གིས་གྲོགས་བྱེད་ཅིང་ལི་ཡུལ་འཛིན་པར་འགྱུར་ལ། དགེ་འདུན་གྱི་ཀུན་དགའ་ར་བ་དང་དྲི་གཙང་ཁང་རྣམས་འཇིག་པར་བྱེད་པ་དེའི་ཚེ་སྐར་རྡོའི་རྒྱལ་པོ་འཕམ་པར་འགྱུར་རོ། །གང་གི་ཚེ་རིང་པོར་མི་ཐོགས་པར་གདོང་དམར་རྣམས་འོང་བའི་དུས་ལ་བབ་པ་དེའི་ཚེ་དྲི་མ་མེད་པའི་འོད་ཤིན་ཏུ་མྱ་ངན་སྐྱེ་བར་འགྱུར་ཏེ། དེའི་ཚེ་སངས་རྒྱས་བཅོམ་ལྡན་འདས་དེ་དག་དང་། ལི་ཡུལ་གྱི་སྲུང་མའི་ལྷ་གང་ཡིན་པ་དེ་དག་གིས་དགོངས་པར་འགྱུར་རོ། །དེ་ན་དྲི་མ་མེད་པའི་འོད་གཅིག་པུ་མྱ་ངན་གྱི་ཁང་བུའི་ནང་ན་འདུག་ཅིང་སངས་རྒྱས་རྣམས་ལ་གསོལ་བ་འདེབས་སོ། །བདུད་རྩི་རྔ་སྒྲ་ཞེས་བྱ་བའི་གཟུངས་སྔགས་ཀྱང་བརྗོད་ནས། དེ་བཞིན་གཤེགས་པ་འོད་དཔག་མེད་ལ་གསོལ་བ་འདེབས་ཏེ། འདི་སྐད་དུ་ཡང་ན་ནི་མིང་པོ་དང་མཇལ་བར་གྱུར་ཅིག །ཡང་ན་ནི་འགུམ་པར་གྱུར་ཅིག་

---

^{[མ་དཔེ་གཟིགས་ན་འདིར་གནོན།]}

ཡང་ན་ནི་འཁོར་བ་ལས་མཐར་ཕྱིན་པར་གྱུར་ཅིག་ཅེས་ཟེར་རོ། །དེ་ནས་ནང་པར་གྱི་དུས་སུ་སངས་རྒྱས་བཅོམ་ལྡན་འདས་དེ་དག་གིས་དེའི་སྟེང་དུ་འོད་ཟེར་བཏང་སྟེ། གཟུངས་སྔགས་དང་། བཟོད་པ་ཡང་ཐོབ་པར་འགྱུར་རོ། །དེའི་ཚེ་སངས་རྒྱས་རྣམས་དང་། ལྷ་རྣམས་ཀྱིས་ལེགས་སོ་ཞེས་བྱ་བ་བྱིན་ཏེ། ལྷའི་བུ་རྣམས་དྲིལ་བུའི་སྒྲ་སྒྲོགས་ཤིང་རྔ་བོ་ཆེ་དང་། རོལ་མོའི་སྒྲ་རྣམས་སྒྲོགས་ཏེ། འདི་སྐད་དུ་ཕྱིར་མི་ལྡོག་པའི་བྱང་ཆུབ་སེམས་དཔའ་ལས་ཆེན་པོ་བྱས་སོ་ཞེས་ཟེར་རོ། །དེའི་ཚེ་འདི་སྙམ་དུ་ཕ་མ་ལ་དྲིན་དུ་གཟོ་བར་བྱས་པས་ན་བདག་ལ་མཆོད་པ་བྱེད་དོ་སྙམ་དུ་བདག་ཉིད་ཀྱིས་ཤེས་ནས་ལས་དང་པོར་བྱེད་པར་འགྱུར་ཏེ། སྔོན་གང་གི་ཚེ་དགེ་བྱེད་ཀྱིས་ཡིད་བཞིན་གྱི་ནོར་བུ་རིན་པོ་ཆེ་ལས་རིན་པོ་ཆེའི་ཆར་ཕབ་པ་ན། བློན་པོ་ཆེན་པོ་དང་། དགེ་བྱེད་ཀྱི་ཕྱིར་ཐོག་མ་སྨོན་ལམ་བཏབ་པ་དེའི་ཚེ་གཞན་དག་ཅིག་གིས་འདི་སྐད་དུ་གང་གི་ཚེ་བདག་ཅག་སྨོན་ལམ་བཏབ་པ་དེ་དག་ཐམས་ཅད་ལས་ལྡོག་པར་མ་གྱུར་ན། ཕྱིས་ཅི་ནས་བསྟན་པ་ཅུང་ཟད་ཀྱང་འཇིག་པར་མི་འགྱུར་བར་གྲོགས་བགྱིའོ། །གཞོན་ནུ་རྣམ་པར་རྒྱལ་བའི་གོ་ཆ་ཞེས་བྱ་བ་སྐར་རྡོའི་J04,V055,P2B རྒྱལ་པོར་འགྱུར་བ་དེས་ཀྱང་གྲོགས་བྱེད་པར་འགྱུར་རོ། །སྡིག་བྱེད་ཀྱི་ཕྱོགས་གང་དག་གི་བློན་པོ་ཆེན་པོ་དང་། དགེ་བྱེད་ཀྱི་ཕྱིར་སྨོན་ལམ་བཏབ་པ་ཡང་ཕྱིས་ལྡོག་པར་འགྱུར་རོ། །གང་གི་ཚེ་བཅོམ་ལྡན་འདས་ཀྱིས་ཚིག་དེ་སྐད་ཅེས་བཀའ་སྩལ་པ་དེའི་ཚེ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བདག་གིས་ཀྱང་དེའི་ཚེ་བསྐུལ་བར་བགྱིའོ། །དེ་དག་ཐམས་ཅད་ལ་བདག་གིས་ཆོས་ཀྱང་བཤད་པར་བྱ་སྟེ། ཅི་ནས་ཐམས་ཅད་འཛིན་པར་འགྱུར་ཞིང་། གཞན་དག་ལ་ཡང་འཆད་པར་འགྱུར་བ་དེ་ལྟར་བགྱིའོ། །བདག་གི་སྲིང་མོ་འདི་ཡང་བདག་དང་ལྷན་ཅིག་ཏུ་བྱང་ཆུབ་ཀྱི་སྤྱད་པ་ལྷན་ཅིག་ཏུ་སྤྱོད་སྤྱོད་པ་ལགས་སོ། །དེ་ནས་དེའི་ཚེ་ལྷ་ཐམས་ཅད་ལངས་ཏེ་འདི་སྐད་དུ་བདག་ཅག་ཀྱང་དེར་མཆི་བར་འཚལ་ལོ་ཞེས་གསོལ་ཏོ། །དེའི་ཚེ་སངས་རྒྱས་བཅོམ་ལྡན་འདས་ཀྱི་སྟེང་དུ་ལྷའི་མེ་ཏོག་གི་ཆར་བབ་བོ། །ལྷའི་སིལ་སྙན་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱང་དཀྲོལ་ལོ། །དེ་ནས་སངས་རྒྱས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སངས་རྒྱས་བཅོམ་ལྡན་འདས་དེ་དག་གིས་དེའི་སྟེང་དུ་འོད་ཟེར་རྣམས་བཏང་སྟེ། འོད་ཟེར་དེ་དག་ལས་དགོངས་པའི་དོན་ཇི་ལྟ་བ་བཞིན་དུ་ཚིག་བརྗོད་པ་རྣམས་བྱུང་སྟེ། ཅི་ནས་གཟུངས་སྔགས་ཀྱི་ཚིག་ཐོབ་པར་འགྱུར་བ་དང་། གང་གི་ཚེ་མིང་པོ་རྣམ་པར་རྒྱལ་བའི་གོ་ཆ་གཡུལ་ལས་ཕམ་པ་དེའི་དོན་གྱི་ཕྱིར་གཟུངས་སྔགས་ཐོབ་པར་འགྱུར་བ་དང་། གཟུངས་སྔགས་དེ་དག་ཐོབ་པས་གཞན་རྣམས་ཀྱང་ཐོབ་པར་འགྱུར་བ་དང་། གང་གིས་བཅོམ་ལྡན་འདས་ཀྱིས་ལི་ཡུལ་གྱི་དོན་དུ་བཀའ་སྩལ་པའི་ལས་དེ་དག་བྱེད་པར་འགྱུར་བའི་ཕྱིར་མྱ་ངན་གྱི་ཁང་བུ་གང་ན་ཞུམ་ཞིང་འདུག་པ་དེར་སངས་རྒྱས་བཅོམ་ལྡན་འདས་དེ་དག་ལས་གཟུངས་སྔགས་ཐོབ་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་གནས་པའི་བློའི་རྒྱལ་པོ་གནོད་པ་ཞི་བར་མཛད་པ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤེས་པའི་བློ་ཅན་རབ་རིབ་ཀྱི་མུན་པ་རབ་ཏུ་ཞི་བར་མཛད་པ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གླང་པོ་ཆེའི་J04,V055,P3A བདག་པོ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་ལྟར་གཅོད་པ་ལ་ཕྱག་འཚལ་ལོ། །དེ་བཞིན་གཤེགས་པ་ལྷའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་མུ་སྟེགས་ཐམས་ཅད་ལས་ཤིན་ཏུ་འཕགས་པའི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཏིང་ངེ་འཛིན་གྱི་མཆོག་ལ་ཕྱག་འཚལ་ལོ། །དེ་བཞིན་གཤེགས་པ་མཚན་གྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་སྣང་བས་སྣང་བར་མཛད་པ་ལ་ཕྱག་འཚལ་ལོ། །དེ་བཞིན་གཤེགས་པ་མུ་སྟེགས་ཐམས་ཅད་ཀྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་སྦྱིན་བྱེད་ཀྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་རྡོ་རྗེ་ལྟར་འགྲོ་བ་ཡོན་ཏན་གྱི་དབང་ཕྱུག་རྒྱལ་མོ་ལ་

---

^{[མ་དཔེ་གཟིགས་ན་འདིར་གནོན།]}

ཕྱག་འཚལ་ལོ། །དེ་བཞིན་གཤེགས་པ་ཡེ་ཤེས་ལ་འཇུག་པ་ལ་ཕྱག་འཚལ་ལོ། །དེ་བཞིན་གཤེགས་པ་ཏ་ལ་ལྟར་རབ་ཏུ་བརྟན་པ་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་དེ་དག་གི་མཚན་རྣམས་འཛིན་པ་གང་ཡིན་པ་དེ་ནི་སྡུག་བསྔལ་ལས་ཡོངས་སུ་ཐར་བར་འགྱུར་རོ། །སྔོན་བྱས་པའི་སྡིག་པ་རྣམས་ཀྱང་བཤགས་པར་འགྱུར་རོ། །ཚེ་འདི་ལ་ཡང་ཕྱུག་པོར་འགྱུར་རོ། །མུ་གེའི་ནང་དུ་སྐྱེ་བར་མི་འགྱུར་རོ། །གནོད་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །ཏདྱ་ཐཱ། ཏཱ་རྐེ། ཏཱ་རྐེ་རྐེ། ཏེ་རྐཱ་ཙ་ཀྲེ། ཏ་རྐཱ་ཏི་ཏེ་སྭཱ་ཧཱ། གཟུངས་སྔགས་འདི་ནི་ཕྱིར་མི་ལྡོག་པའི་འཁོར་ལོ་ཞེས་བྱ་སྟེ། སུ་འདི་བརྗོད་པ་ནི་ཕྱིར་མི་ལྡོག་པར་འགྱུར་རོ། །བསྒྲུབ་པའི་ཐབས་ནི་འདི་ཡིན་ཏེ། ཁ་ཟས་མི་ཟ་བར་གཡེང་བ་མེད་པའི་སེམས་ཀྱིས་འཆག་བཞིན་དུ་ཉིན་མཚན་དུ་བཟླས་བརྗོད་བྱས་ན་རྣམ་པར་རྟོག་པ་འབྱང་བར་འགྱུར་ཞིང་དྲན་པ་དང་ལྡན་པར་འགྱུར་ཏེ། བསླབ་པའི་གཞི་འཛིན་པས་བཟླས་བརྗོད་བྱའོ། །ཏདྱ་ཐཱ། ཨོ་ཧ་ནི། ཨོ་ཧ་ནི། མོ་ཧ་ནི། ཧུ་ཧྲུ་རེ། ཧུ་ཧུ་རེ། ནུ་བ་ཏེ། ཛམ་བྷ་ནི། སྟམ་བྷ་ནི་སྭཱ་ཧཱ། གཟུངས་སྔགས་འདིས་ནི་སྐྱེ་བ་མེད་པའི་བཟོད་པ་ཐོབ་པར་འགྱུར་ཏེ། ཞག་གསུམ་གྱི་བར་དུ་བསླབ་པ་འཛིན་པས་གཡེང་བ་མེད་པའི་སེམས་ཀྱིས་འཆག་བཞིན་དུ་བཟླས་བརྗོད་བྱས་ན་ཚེ་འདི་ལ་མ་གྲུབ་ན་ཡང་ཚེ་ཕྱི་མ་ལ་ངེས་པར་འགྲུབ་པར་འགྱུར་རོ། །ཏདྱ་ཐཱ། ཙ་རེ་ཙ་རེ། ཡཀྵེ་ཡཀྵེ། ཡཀྵ་ཡཀྵ། ནུད་དྷི་ཏེ། ཀཱ་ལ་པ། ཨ་ཏི་ཏེ། བུད་དྷ་ཨ་དྷི་ཏེ་ས་ཏྭ། ཨ་དྷི་ཏེ་སྭཱ་ཧཱ། གཟུངས་J04,V055,P3B སྔགས་འདིས་ནི་སྡིག་པ་ཐམས་ཅད་བཤགས་པར་འགྱུར་ཏེ། ཟླ་བ་བདུན་གྱི་བར་དུ་ཉིན་ལན་གསུམ་མཚན་ལན་གསུམ་བཟླས་བརྗོད་བྱའོ། །ཏདྱ་ཐཱ། མཻ་ཏྲེ། མཻ་ཏྲི། རག་ཏྲཻ། མུག་ཏྲེ། ཀྵ་ཡེ་ཀྵ་ཡེ། མུ་བ་ཏེ། མཻ་ཏྲེ། བུད་དྷ་ཨ་དྷི་ཏེ་སྭཱ་ཧཱ། གཟུངས་སྔགས་འདིས་ནི་འཐུན་པའི་བཟོད་པ་ཐོབ་པར་འགྱུར་རོ། །བསྒྲུབ་པའི་ཐབས་ནི་འདི་ཡིན་ཏེ། ནང་གསུམ་བཟླས་བརྗོད་བྱས་ན། ལན་ཅིག་ཀྱང་སྟོང་སྟོང་བྱའོ། །རྟག་

---

^{[མ་དཔེ་གཟིགས་ན་འདིར་གནོན།]}

ཏུ་གཉིད་མི་ལོག་པ་དང་། ཁྲུས་བྱ་བ་དང་། གཙང་བ་དང་། གོས་གཙང་མ་གྱོན་པས་ཟན་ཟོས་པའི་འོག་ཏུ་སྐུ་གདུང་དང་ལྡན་པའི་མཆོད་རྟེན་དང་། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་གཡེང་བ་མེད་པའི་སེམས་ཀྱིས་བཟླས་བརྗོད་བྱས་ཏེ། དུ་རུ་ཀའི་བདུག་པས་བསྲེགས་ན་ནད་ཆེན་པོ་རྣམས་ཞི་བར་འགྱུར་རོ། །གསང་སྔགས་དེ་དག་གིས་མར་ལ་ལན་སྟོང་བཟླས་བརྗོད་བྱས་ཏེ། ནད་པ་ལ་བླུད་པ་དང་། ལུས་ལ་བསྐུ་བར་བྱའོ། །འདི་ལས་སྨན་གྲགས་པ་ཇི་ལྟ་བུ་ཡང་རུང་བ་དེ་དག་ལ་ནད་པས་ནང་གསུམ་དུ་ཉིན་གཅིག་བཞིན་དུ་ལན་སྟོང་སྟོང་བཟླས་བརྗོད་བྱ་སྟེ། སྲ་རྩི་པོག་སྲེག་ཅིང་། དྲི་ཆུ་དང་། དྲི་ཞིམ་པོས་བསྒོས་པའི་འབྲུ་མར་གྱི་མར་མེ་དང་། རོ་སྣ་གཅིག་དབུལ་བར་བྱའོ། །གང་གི་ཚེ་ཆོ་ག་འདི་བཞིན་དུ་བཟླས་བརྗོད་བྱས་ན། ནད་ཚབས་ཆེན་པོ་རྣམས་ཀྱང་མེད་པར་འགྱུར་ཏེ། ཏདྱ་ཐཱ། ཤུད་དྷེ་བུད་དྷེ། ཨཱ་ར་ཛེ། ཨ་ར་ཛ། ཨ་ནུ་བ་དེ། སང་ཀ་ལ་པེ་མཻ་ཏྲེ་བུད་དྷ་ཨ་དྷི་ཏེ་སྭཱ་ཧཱ། ནང་བདུན་གྱི་བར་དུ་ཉིན་གཅིག་བཞིན་དུ་ལན་སྟོང་སྟོང་བཟླས་བརྗོད་བྱས་ཏེ། སེམས་ཞི་བར་བྱས་ན་འཐུན་པའི་བཟོད་པ་འཐོབ་པར་འགྱུར་ཏེ། བསླབ་པ་འཛིན་པས་བཟླས་བརྗོད་བྱའོ། །ཏདྱ་ཐཱ། ས་ས་ས་ས། མི་མི་མི་མི། གི་ར་ཨ་དྷི་ཏེ། ཛམ་བྷ་ཀོ་ཏི། ཨ་པ་ར་ཛི་ཏེ། ཀལ་པ་བ་ཏི། ཛམ་བྷ་ཀོ་ཊི། ཀ་ཀཱ་མི་ལེ། བན་ཛི་ནི་བི་ཏི་ནི། ས་ན་ས་ར། ཀི་ཊི་བཛྲ་ལེ། པ་ལཱ་ཏཻ། མ་མུ་ཤེས་ཀ་ལཱ་བཻ། ནཽ་ཛ་རེ། ཨ་ཡིཥྠ་ཀ་ཀ་ལེ་སྭཱ་ཧཱ། གཟུངས་སྔགས་འདི་ནི་མི་གནས་ཞེས་བྱ་སྟེ། འདིས་ས་ཐོབ་པར་འགྱུར་རོ། །བསྒྲུབ་པའི་ཐབས་ནི་འདི་ཡིན་ཏེ། གཙང་ཞིང་ཁྲུས་བྱས་པ་དང་། གོས་སར་པ་གྱོན་ཅིང་བསླབ་པ་འཛིན་པས། སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་བཟླས་བརྗོད་བྱས་ན་རྒྱལ་པོའི་འཇིགས་པ་དང་། འཇིགས་པ་གཞན་ཐམས་ཅད་ལས་ཐར་བར་འགྱུར་ཏེ། ཁ་ཟས་མི་ཟ་བར་ལན་སྟོང་བཟླས་བརྗོད་བྱའོ། །དེ་ལ་དྲི་ནི་འདི་ཡིན་ཏེ། ཨ་ག་རུ་དང་། འབུག་སུག་ཧང་དང་། ག་བུར་དང་། ཤུག་པ་དང་། ཙན་དན་རྣམས་སོ། །བདུག་པ་ཡང་འདི་དག་

---

^{[མ་དཔེ་གཟིགས་ན་འདིར་གནོན།]}

ལས་སྦྱར་བར་བྱ་སྟེ། དེར་བདུག་པར་བྱའོ། །མར་མེ་ཡང་དེ་དག་གི་ཕྱེ་མ་དང་སྦྱར་ཏེ་སྦར་རོ། །ཡང་ན་དེ་དག་གི་དྲིས་ཀྱང་བསྙེན་བཀུར་བྱ་ཞིང་ཆུ་དང་སྦྱར་ཏེ། དེས་གཏོར་བར་བྱའོ། །རོ་སྣ་གཅིག་ཀྱང་དེར་གཞག་པར་བྱ་སྟེ། དེས་བསྒོས་པའི་ཆུ་ལ་བཟླས་བརྗོད་བྱས་པས་སྟེང་དུ་གཏོར་བར་བྱའོ། །གང་གིས་ཆོ་ག་འདི་བཞིན་དུ་བྱས་ན་ཉེས་པ་སྣ་ཚོགས་ལས་གྲོལ་བར་འགྱུར་ཞིང་འཇིགས་པ་ཐམས་ཅད་ལས་ཐར་བར་འགྱུར་ཏེ། འཇིགས་པ་དེ་ལས་ཐར་བར་མ་གྱུར་གྱི་བར་དུ་སྔ་དྲོ་ཞིང་ལན་སུམ་ཅུ་གསུམ་གསུམ་བཟླས་བརྗོད་བྱའོ། །ཆོ་ག་འདི་བཞིན་དུ་བཟླས་བརྗོད་བྱས་པ་གང་ཡིན་པ་དེ་ནི་འཇིགས་པའམ། གནོད་པ་གང་ལས་ཀྱང་གྲོལ་བར་མི་འགྱུར་བ་མེད་དོ། །ཅི་སྟེ་བསྒྲུབས་ན་ལས་གང་བརྩམས་ཀྱང་རུང་སྟེ་མི་འགྲུབ་པ་མེད་དོ། །གང་ཞིག་སྒྲུབ་པའམ། ཡང་ན་སྐུད་པ་འདོགས་སམ། ཡང་ན་བྲིས་ཏེ་འཆང་ན་གནོད་པ་ཐམས་ཅད་ལས་ཐར་བར་འགྱུར་ཏེ། མི་བསོད་ནམས་དང་ལྡན་པ་ཞིག་ནི་ཚེ་འདི་ཉིད་ལ་འཐོབ་པར་འགྱུར་རོ། །ཇི་སྟེ་དེས་ཐོབ་པར་མ་གྱུར་ན་ཡང་ཚེ་ཕྱི་མ་ལ་གདོན་མི་ཟ་བར་འཐོབ་པར་འགྱུར་རོ། །ཏདྱ་ཐཱ། ག་བི་ལི། ཀ་པི་ལ། བིན་ཊེ། བྷཱུ་ན་ཛ་ར་སྟུ། མི་ལ་ཏ་ལ་མི་ལ་ཏ་ལ། ཨད་དྭ་རེ་སྭཱ་ཧཱ། གཟུངས་སྔགས་འདི་བཟླས་བརྗོད་བྱེད་པ་གང་ཡིན་པ་དེས་ནི་སེམས་ཅན་ཐམས་ཅད་ལ་བྱམས་པར་བྱའོ། །བསྒྲུབ་པའི་ཐབས་ནི་འདི་ཡིན་ཏེ། ཁྲུས་ལེགས་པར་བྱས་ཤིང་གོས་གཙང་མ་བགོས་པ་ཁ་ཟས་མི་བཟའ་བར། སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་ལན་སུམ་སྟོང་བཟླས་བརྗོད་བྱའོ། །དེའི་བདུག་པ་ནི་འདི་ཡིན་ཏེ། འབུག་སུག་ཧང་དང་། ག་བུར་དང་། དུ་རུ་ཀ་དང་། ཀཱ་ལ་ནུ་ས་རི་དང་། ཤའི་ལེ་ཡ་ཀ་རྣམས་ཀྱིས་བདུགས་ཏེ། གང་གིས་ཆོ་ག་འདི་བཞིན་དུ་བཟླས་བརྗོད་བྱས་པ་ལ་ནི་ཁྲོ་ཞིང་སྡང་བ་ཐམས་ཅད་དང་བར་འགྱུར་རོ། །ཙན་དན་དང་། གུར་གུམ་དང་། ཤིང་མངར་དང་། ཀར་ཀོ་ཏི་དང་། ཤུག་པ་དང་། སྨན་འདི་རྣམས་བསོགས་པ་ལ་གཟུངས་སྔགས་འདི་ལན་སུམ་སྟོང་བཟླས་བརྗོད་བྱས་ཏེ།

---

^{[མ་དཔེ་གཟིགས་ན་འདིར་གནོན།]}

ལུས་ལ་བཏགས་ན་དེ་ལ་བྱད་སྟེམས་ཀྱིས་ཚུགས་པར་མི་ནུས་ལ། བྱས་ཟིན་པ་ཡང་འཇིག་པར་འགྱུར་ཏེ། བྱམས་པའི་སེམས་དང་ལྡན་པ་དང་། བསླབ་པ་འཛིན་པས་བཟླས་བརྗོད་བྱའོ། །ཏདྱ་ཐཱ། ར་རེ་ར་རཱ་ཕུ། ཕ་ན་ཎེ་ལེ་བི་ལི་ཕ་བ་ཀཱ་རཱ་མུག་ཏེ་མུན་དྷ་རེ་སྭཱ་ཧཱ། གཟུངས་སྔགས་འདི་ནི་ཏིང་ངེ་འཛིན་ཡོངས་སུ་རྫོགས་པར་བྱེད་པ་སྟེ། མཛོད་ཇི་ལྟ་བུ་དང་ཏིང་ངེ་འཛིན་གྱི་རྣམ་པ་ཇི་ལྟ་བུ་འདོད་པ་དེ་ལྟ་བུ་འཐོབ་པར་འགྱུར་ཏེ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ། །བསྒྲུབ་པའི་ཐབས་ནི་འདི་ཡིན་ཏེ། གཙང་བ་དང་། ཁྲུས་བྱས་པ་དང་། གོས་གཙང་མ་གྱོན་པ་དང་། བསླབ་པ་འཛིན་པས་སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་བཟླས་བརྗོད་བྱ་སྟེ། ཕྱོགས་བཅུའི་སངས་རྒྱས་རྣམས་ཀྱི་མཚན་ཕྱོགས་རེ་རེར་ལན་སུམ་ཅུ་རྩ་གསུམ་གསུམ་བརྗོད་པར་བྱའོ། །ཕྱོགས་རེ་རེར་གཟུངས་སྔགས་ལན་བརྒྱ་རྩ་བརྒྱད་བཟླས་བརྗོད་བྱའོ། །འདི་ལ་བདུག་པ་ནི་འབུག་སུག་ཧང་དང་། ག་བུར་དང་། ཀ་ལ་ནུ་ས་རི་དང་། ཤའི་ལེ་ཡ་ག་དང་། དུ་རུ་ཀ་རྣམས་བསྲེག་པར་བྱ་ཞིང་དེ་དག་གིས་བསྒོས་པའི་མར་མེ་སྦར་བར་བྱའོ། །སྨན་དེ་དག་དང་སྦྱར་བའི་ཆུ་བཞག་སྟེ། རོ་སྣ་གཅིག་ཀྱང་བཞག་ནས་ཡིད་ལ་གང་འདོད་པ་དེ་སངས་རྒྱས་རྣམས་ལ་གསོལ་ན་ཇི་ལྟར་འདོད་པ་དེ་བཞིན་དུ་འགྱུར་རོ། །ཏདྱ་ཐཱ། ཏི་ལི་ག་ཛེ་ཤྭ་ར་ཤཱ་ར། ཨཱ་ཏི་བ་ཏི་ཥྭ་བ་ཏཱ་རཱ་ཀེ་ལེ་ཥི་བ་ཏ་གུ་ལེ་སྭཱ་ཧཱ། གཟུངས་སྔགས་འདིས་ལྷའི་མིག་འཐོབ་པར་འགྱུར་རོ། །མིག་ནད་ཀྱང་མེད་པར་འགྱུར་རོ། །བསྒྲུབ་པའི་ཐབས་ནི་འདི་ཡིན་ཏེ། གོས་གཙང་མ་བགོས་ལ་སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་ལན་བརྒྱ་རྩ་བརྒྱད་བཟླས་བརྗོད་བྱས་ནས། མིག་སྨན་འདི་ཡང་སྦྱོར་བར་བྱ་སྟེ། གུར་གུམ་དང་། ཀ་ར་དཀར་པོ་སྦྲང་རྩི་དང་སྦྱར་ཏེ་མིག་ཏུ་བསྐུས་ན་མིག་མ་རུང་བར་མི་འགྱུར་རོ། །མིག་ནད་ཐམས་ཅད་ཀྱང་མེད་པར་འགྱུར་རོ། །བདུག་པ་ནི་སྦྱར་བ་བསྲེག་གོ །མིག་སྨན་དེ་ལ་ནི་ལན་བརྒྱ་རྩ་བརྒྱད་བཟླས་བརྗོད་བྱའོ། །ཉིན་གཅིག་བཞིན་དུ་ཆུ་ལ་ལན་བདུན་

---

^{[མ་དཔེ་གཟིགས་ན་འདིར་གནོན།]}

བཟླས་བརྗོད་བྱས་ཏེ་མིག་བཀྲུ་བར་བྱའོ། །ཏདྱ་ཐཱ། བ་རད་ཙེ། བི་རད་ཙེ། ཀུ་ཐ་ལེ། མིག་ཏྲེ་ལེ། ཨཻ་ལཻ་མཻ་ལཻ། ཊད་གཱ་ཊད་གུ་ལེ་སྭཱ་ཧཱ། གཟུངས་སྔགས་འདི་ནི་སངས་རྒྱས་རྗེས་སུ་དྲན་པར་བྱ་བ་ཡིན་ནོ། །བསྒྲུབ་པའི་ཐབས་ནི་འདི་ཡིན་ཏེ། བསླབ་པ་འཛིན་པ་དང་། གཙང་མས་སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་ལན་དགུ་བརྒྱ་བཟླས་བརྗོད་བྱས་ཏེ། བདུག་པ་སྦྱར་བ་སྲེག་ཅིང་དྲི་ཞིམ་པོས་བསྒོས་པའི་འབྲུ་མར་གྱི་མར་མེ་དང་། པོག་ཕོར་དང་། དྲི་ཞིམ་པོས་བསྒོས་པའི་ཆུ་དང་། རོ་སྣ་གཅིག་གཞག་པར་བྱ་སྟེ། མར་ལ་བཟླས་བརྗོད་བྱས་ནས་མགོ་བོ་དང་ཁར་བསྐུས་ན་མགོ་བོའི་ནད་ཐམས་ཅད་ལས་ཐར་བར་འགྱུར་རོ། །འཐུངས་ན་དྲན་པ་སྐྱེ་བར་འགྱུར་རོ། །ཆོས་སློབ་པར་འདོད་པས་མར་དེ་འཐུངས་ན་དབང་པོ་རྣོན་པོར་འགྱུར་རོ། །གཟུངས་སྔགས་གང་བསྒྲུབས་ཀྱང་རུང་སྟེ། འདི་ལས་སྨོས་པ་བཞིན་དུ་ཡོངས་སུ་རྫོགས་པར་བཟླས་བརྗོད་བྱས་ཏེ། གཟུངས་སྔགས་ཐམས་ཅད་དང་། སངས་རྒྱས་ཀྱི་མཚན་རྣམས་ཕྱོགས་བཅུའི་ཕྱོགས་རེ་རེར་ལན་སུམ་ཅུ་རྩ་གསུམ་གསུམ་བརྗོད་པར་བྱའོ། །གང་གི་ཚེ་གཟུངས་སྔགས་བརྗོད་པ་ན་ཉིན་ལན་གསུམ་མཚན་ལན་གསུམ་དུ་ཕྱོགས་བཅུར་ཚེ་དཔག་མེད་ཀྱི་སྙིང་པོའི་གཟུངས་སྔགས་བརྗོད་པར་བྱའོ། །སངས་རྒྱས་བཅོམ་ལྡན་འདས་དེ་དག་གི་མཚན་ཕྱོགས་རེ་རེར་བརྗོད་པར་བྱའོ། །སངས་རྒྱས་ཐམས་ཅད་ཀྱི་སྙིང་པོ་ཞེས་བྱ་བའི་གཟུངས་སྔགས་འདི་དག་ནི་ཡིད་བཞིན་གྱི་ནོར་བུ་རིན་པོ་ཆེ་ཇི་ལྟར་ཆོས་དང་ལྡན་པའི་དམ་པ་ཇི་ལྟ་བུར་འདོད་པ་བཞིན་དུ་ཐམས་ཅད་ཐོབ་པར་བྱེད་པ་དེ་བཞིན་དུ་སུས་བརྗོད་པ་དེས། སངས་རྒྱས་ཉིད་ཀྱང་འཐོབ་པར་འགྱུར་ལ་སྡུག་བསྔལ་ཐམས་ཅད་ལས་ཐར་བར་འགྱུར་རོ། །དེས་འདི་སྐད་དུ་བདག་གིས་གང་གི་ཚེ་སངས་རྒྱས་ཀྱི་བྱང་ཆུབ་ཐོབ་ནས་དགྲོལ་བར་བྱའོ་ཞེས་བྱས་སོ། །དེའི་ཚེ་ལྷ་མོ་དྲི་མ་མེད་པའི་འོད་ཀྱིས་འདི་སྐད་དུ་ཇི་ལྟར་བདག་གིས་གཟུངས་སྔགས་འདི་དག་གིས་མིང་པོ་ཐར་བར་བྱས་པ་དེ་བཞིན་དུ་སེམས་ཅན་ཐམས་ཅད་ཀྱང་གཟུངས་སྔགས་འདི་དག་གིས་ཡོངས་སུ་ཐར་བར་བྱེད་པར་

---

^{[མ་དཔེ་གཟིགས་ན་འདིར་གནོན།]}

ཤོག་ཤིག་ཅེས་བྱས་སོ། །ནམ་ཞིག་ན་སུམ་པ་རྣམས་དེར་འོང་བ་དང་། གདོང་དམར་གྱིས་ཡུལ་འཛིན་པར་འགྱུར་བའི་དུས་འོང་བར་འགྱུར་ཏེ། དེ་ཡང་ལས་འདི་ལྟ་བུ་ལས་འགྱུར་རོ། །གང་གི་ཚེ་གཞོན་ནུ་སྡིག་ཅན་བྱུང་བ་ན་མི་རྒོད་བྱུང་བ་དེ་དག་རྒྱལ་པོའི་ཐད་དུ་བཏང་སྟེ། བློན་པོ་ཆེན་པོ་གཙོ་བོའི་ཁྱིམ་དུ་སོང་ནས་ནོར་རྣམས་ཁྱེར་རོ། །དེ་ནས་དེའི་མཛོད་སྒོ་ན་དེའི་ཆུང་མ་བུད་མེད་ཅིག་ཉལ་བ་དེ་དག་སང་ཤོར་གྱིས་དོགས་པའི་ཕྱིར་ཁྲིད་དེ་བསད་དོ། །དེ་ནས་མི་རྒོད་དེ་དག་བཟུང་ནས་བློན་པོ་དེ་དག་གི་ལག་ཏུ་བྱིན་ཏོ། །མི་རྒོད་དེ་དག་གི་བུ་དང་ཆུང་མ་དང་ནོར་རྣམས་ཀྱང་བློན་པོ་ཆེན་པོ་དེ་དག་གི་མདུན་དུ་བཞག་གོ །དེ་ནས་བློན་པོ་ཆེན་པོ་གཙོ་བོ་དེ་ཁོང་དགེ་བ་ཞིག་སྟེ། བདག་གི་ནོར་ཉི་ཚེའི་ངོ་བླངས་སོ། །དེ་ནས་བློན་པོ་ཆེན་པོ་གཙོ་བོ་དེའི་སྲིང་མོ་མཚན་མོ་མི་ཉལ་བར་འཆག་ས་ན་འཆགས་པས་དེར་མི་རྒོད་འོངས་པ་ཚོར་ནས། རྒྱལ་པོའི་གན་དུ་ཁྲིད་པ་ཡང་དེས་མཐོང་ངོ་། །དེ་ནས་དེ་དག་བུ་དང་ཆུང་མ་རྣམས་ནི་བློན་པོ་ཆེན་པོ་ཅིག་ཤོས་ཀྱིས་ཁྱེར་རོ། །ནོར་རྣམས་ནི་རྒྱལ་པོའི་དཀོར་དུ་བསྡུས་ནས། བློན་པོ་ཆེན་པོ་ཅིག་ཤོས་ཀྱིས་བུ་དང་ཆུང་མ་ཁྱེར་བ་དེ་ཡང་རྒྱལ་པོས་མ་རྨས་སོ། །དེ་ནས་བློན་པོ་ཆེན་པོ་ཤོས་ཀྱིས་ནུ་བོ་དང་བུ་ལ་མི་རྒོད་གཙོ་བོའི་ཆུང་མ་བྱིན་ནས་ཆེན་པོ་ཅིག་གིས་དེའི་བུ་དང་ཆུང་མ་རྣམས་ཀྱང་མི་རྒོད་དེ་དག་གིས་མཚན་མོ་བརྐུས་ཏེ་རང་གི་བུ་དང་ཆུང་མ་ནི་ཕྱིར་མ་ཐོབ་བོ། །དེ་ནས་དེའི་ཚེ་དེ་དག་གིས་སྨོན་ལམ་བཏབ་པ་གང་གི་ཚེ་ཁྱོད་ཀྱིས་མིའི་ལུས་ཐོབ་པར་འགྱུར་བ་དེའི་ཚེ་ངེད་ཀྱིས་ཁྱེད་ཀྱི་ཆུང་མ་འཕྲོག་པར་གྱུར་ཅིག་ཅེས་བྱས་སོ། །མི་རྒོད་ཀྱི་གཙོ་བོ་གང་གིས་མཛོད་ཀྱི་སྒོ་ནས་བུད་མེད་ཁྲིད་དེ་སོང་བ་ངེས་པ་དེས་སྨོན་ལམ་བཏབ་པ་བདག་བློན་པོ་ཁྱེད་ཀྱི་འཁོར་དུ་སྐྱེས་ཏེ། གང་གི་ཚེ་ཁྱོད་ལས་བྱེད་པ་དེའི་ཚེ། ངས་ཁྱོད་ཀྱི་སེམས་དཀྲུག་ཅིང་གཏམ་ངན་ཆེན་པོ་སྒྲོགས་པར་གྱུར་ཅིག་ཅེས་བྱས་སོ། །དེ་ནས་རིགས་དང་ལྡན་པའི་བུད་མེད་གང་གིས་མི་རྒོད་འོང་བ་ཚོར་བ་དེ་ལ་དྲིས་པ་ངས་ཚོར་རོ། །ཞེས་ཁྱོད་ཀྱིས་བྱ་སྟེ་ཅི་བྱ་ཞེས་དེས་སྨྲས་པ་རྫུན་དུ་སྨྲ་བར་གྱུར་གྱིས་དོགས་པ་དང་། དེའི་སྡིག་བདག་གི་ལུས་ཀྱིས་མྱོང་

---

^{[མ་དཔེ་གཟིགས་ན་འདིར་གནོན།]}

བར་འགྱུར་དུ་དོགས་པའི་ཕྱིར་རོ་ཞེས་བྱས་སོ། །དེས་ན་མི་རྒོད་ཀྱི་གཙོ་བོ་དེས་སྨོན་ལམ་འདི་སྐད་ཅེས་བཏབ་སྟེ། དུས་ཐམས་ཅད་དུ་བདག་བློན་པོ་ཆེན་པོ་འདིའི་མཛའ་བོའི་ཚུལ་དུ་འདུག་ཅིང་དགྲ་བྱེད་པར་གྱུར་ཅིག་ཅེས་བྱས་སོ། །དེ་ལ་བློན་པོ་ཆེན་པོ་གཙོ་བོ་དེ་ནི་སྐར་རྡོའི་རྒྱལ་པོར་འགྱུར་རོ། །ཅིག་ཤོས་ནི་ལི་ཡུལ་གྱི་རྒྱལ་པོར་འགྱུར་རོ། །བློན་པོ་ཆེན་པོ་ཅིག་ཤོས་ཀྱི་ནུ་བོ་ནི་ཤད་ཀུ་ལ་ཞེས་བྱ་བར་འགྱུར་རོ། །བུར་གྱུར་པ་དེ་ནི་བསོད་ནམས་འཕེལ་ཞེས་བྱ་བར་འགྱུར་རོ། །མི་རྒོད་ཀྱི་གཙོ་བོར་གྱུར་པ་དེ་ནི་ས་པི་ཏེ་ཀུ་ལ་ཞེས་བྱ་བར་འགྱུར་རོ། །བློན་པོ་ཆེན་པོ་དེའི་ཆུང་མ་གསོད་གསོད་པའི་མི་དེ་གཉིས་ལས་གཅིག་ནི་ཨ་ཀུ་ན་ཞེས་བྱ་བར་འགྱུར་རོ། །གཅིག་ནི་ཏུ་པ་ལ་ཞེས་བྱ་བར་འགྱུར་རོ། །དེའི་ཆུང་མ་སྨོན་ལམ་འདེབས་པ་གཉིས་ལས་གཅིག་ནི་མྱ་ངན་དང་བྲལ་བ་ཞེས་བྱ་བར་འགྱུར་རོ། །གཅིག་ནི་རབ་སྡུག་ཅེས་བྱ་བར་འགྱུར་རོ། །བློན་པོ་ཆེན་པོ་དེའི་ཆུང་མ་མཛོད་ཀྱི་སྒོ་ན་ཉལ་ཉལ་བ་དེ་ནི་པིད་ཀུ་ལའི་ཆུང་མ་ལས་སྐར་རྡོའི་རྒྱལ་པོས་ཁྱེར་བ་ཡིན་ནོ། །མི་རྒོད་རྣམས་ཀྱི་མར་གྱུར་པ་དེ་ནི་མི་རྒོད་འཛིན་པ་རྣམས་ཀྱི་མར་གྱུར་ཏེ། དེ་ཡང་དེའི་གྲོགས་སུ་འགྱུར་རོ། །རྒྱལ་པོ་གསོད་པ་དེས་ནི་སྨོན་ལམ་འདི་སྐད་ཅེས་བཏབ་སྟེ། ཅི་ནས་བདག་བག་མར་བཏང་ནས་ཁྱོད་ལ་གསོད་པར་གྱུར་ཅིག་ཅེས་བྱས་སོ། །དེའི་ཕྱིར་ན་ལིའི་རྒྱལ་པོས་མྱ་ངན་མེད་པའི་ཨ་ཀུ་ན་ལ་བྱིན་ནོ། །སྐར་རྡོའི་རྒྱལ་པོས་ཀྱང་པིད་ཀུ་ལའི་ཆུང་མ་ཁྱེར་བར་གྱུར་ཏེ། དེ་ཕྱིན་ཅད་གཅིག་ལ་གཅིག་དགྲར་འགྱུར་རོ། །དགེ་བྱེད་ཀྱི་ཕྱོགས་གང་ཡིན་པ་དེ་དག་ནི་ལི་ཡུལ་ན་དགེ་བ་བྱེད་པར་འགྱུར་རོ། །མི་རྒོད་དུ་གྱུར་པ་དེ་དག་ནི་ལི་ཡུལ་དུ་སྡིག་བྱེད་པར་འགྱུར་རོ། །ཆུང་མ་འཕྲོག་པར་བྱེད་པའི་མི་རྒོད་དེ་དག་གིས་ཀྱང་བློན་པོ་ཆེན་པོ་དེ་ལ་འདི་སྐད་ཅེས་སྨྲས་ཏེ་སྨོན་ལམ་བཏབ་བོ། །ཁྱོད་ཀྱིས་ཆོས་བཞིན་དུ་བྱས་ཏེ་ཡུས་ཡོད་བཞིན་དུ་བཏང་ནས་རང་གི་ནོར་ཉི་ཚེའི་ངོ་བླངས་པས་ན་ཁྱོད་དགེ་བ་ཅི་རྩོམ་ཡང་རུང་སྟེ། དེར་བདག་ཅག་ཁྱོད་ཀྱི་གྲོགས་སུ་གྱུར་ཅིག་ཅེས་བྱས་སོ། །སྔོན་དུ་པ་ལ་ལིའི་རྒྱལ་པོའི་མིར་གྱུར་

---

^{[མ་དཔེ་གཟིགས་ན་འདིར་གནོན།]}

པའི་ཚེ་སྨོན་ལམ་བཏབ་པས་ན་སྐར་རྡོའི་རྒྱལ་པོའི་གྲོགས་སུ་གྱུར་ཏེ། ནམ་དེའི་དུས་ལ་བབ་པ་ན་སྐར་རྡོའི་རྒྱལ་པོ་པིད་ཀུ་ལའི་ཆུང་མ་ཁྱེར་བར་འགྱུར་ཏེ། དེའི་ཚེ་པིད་ཀུ་ལས་གཏམ་ངན་ཆེན་པོ་བསྒྲགས་ནས་མི་དེའི་བསམས་པ་ལས་ན་ལུས་འདི་ཅི་ཞིག་བྱ་སྙམ་ནས་དེའི་ཚེ་སྐྱོ་བ་ཆེན་པོ་སྐྱེ་བར་འགྱུར་རོ། །དེའི་ཚེ་སྔོན་གྱི་དགེ་བའི་རྩ་བ་དྲན་པར་འགྱུར་ཏེ། འདི་ནི་བུད་མེད་དུ་སྐྱེ་བའི་ཐ་མ་ཡིན་ཏེ། སངས་རྒྱས་ཀྱི་བཀའ་འདི་དྲན་པར་བྱའོ་སྙམ་མོ། །དེ་ནས་ནམ་འཚོའི་བར་དུ་དགེ་བསྙེན་མའི་བསླབ་པའི་གཞི་འཛིན་པར་འགྱུར་ཏེ། དེའི་ཚེ་ཀུན་ཏུ་དགའ་བ་ཞེས་བྱ་བའི་གཟུངས་སྔགས་བརྗོད་ནས། དེར་གང་གིས་ཚེ་རབས་དྲན་པར་གྱུར་པའི་ཏིང་ངེ་འཛིན་དང་བཟོད་པ་འཐོབ་པར་འགྱུར་རོ། །དེ་ནས་རིང་པོ་མི་ཐོགས་པར་ཡུལ་དེར་གདོང་དམར་རྣམས་འཛིན་པར་འགྱུར་ཏེ། དེ་དག་ཐོག་མ་ལི་ཡུལ་དུ་འགྲོ་འདོད་པ་དེའི་ཚེ་སངས་རྒྱས་བཅོམ་ལྡན་འདས་དེ་དག་དང་། ལི་ཡུལ་གྱི་སྲུང་མའི་ལྷ་དེ་དག་དང་། རྒྱལ་པོ་ཆེན་པོ་བཞི་དང་། གནོད་སྦྱིན་ཀུན་ཏུ་རྒྱལ་དང་། འཕྲོག་མའི་བུ་དང་བཅས་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་རྣམས་ཀ་པི་ལ་ནའི་མཆོད་རྟེན་དུ་ཐམས་ཅད་འོང་བར་འགྱུར་ཏེ། དེར་བཅོམ་ལྡན་འདས་ཀྱི་སྤྱན་སྔར་གཟུངས་སྔགས་བཤད་དོ། །དེའི་ཚེ་དེར་མཆོད་རྟེན་དེ་ཉིད་ལས་འདི་ལྟར་བྱང་ཕྱོགས་པ་ལ་སོགས་པའི་དམག་འོང་བར་འགྱུར་ཏེ། ཤིན་ཏུ་མི་བཟད་པ་ཡིན་ནོ་ཞེས་སྒྲ་རང་འབྱུང་བར་འགྱུར་རོ། །དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། ལྷ་རྣམས་དང་། འཕྲོག་མ་བུ་དང་བཅས་པ་དེ་དག་ཐམས་ཅད་མྱ་ངན་གྱི་གོ་བགོས་ནས། དེར་འོངས་ཏེ་འདི་སྐད་དུ་གདོང་དམར་རྣམས་ཀྱི་དམག་འོངས་ཏེ། དྲི་གཙང་ཁང་དང་། མཆོད་རྟེན་དང་། དགེ་འདུན་གྱི་ཀུན་དགའ་ར་བ་རྣམས་ཀྱང་འཇིག་པར་བྱེད་ཀྱིས་ཅི་ནས་ཡུལ་ཀུན་འཇིག་པར་མི་འགྱུར་བར་གྲོགས་གྱིས་ཤིག་ཅེས་ཟེར་རོ། །དེ་ནས་དེའི་ཚེ་ན་དྲི་མ་མེད་པའི་འོད་ཀྱིས་འདི་སྐད་ཅེས་སྨྲས་སོ། །བདག་གིས་བགྱི་བ་གང་ལགས་པ་དེ་བཀའ་སྩོལ་ཅིག་དང་། ཡུལ་གྱི་ཕྱིར་ཅི་སྟེ་

---

^{[མ་དཔེ་གཟིགས་ན་འདིར་གནོན།]}

བདག་གི་སྲོག་ཡལ་དུ་ཟིན་ཀྱང་དེ་ལ་ཆགས་པ་མེད་དོ། །དེ་ནས་ལྷ་རྣམས་ཀྱིས་འདི་སྐད་ཅེས་སྨྲས་སོ། །འདི་ལ་ཐབས་ཅིག་ཁོ་ན་ཞིག་ཡོད་དེ། ཅི་ནས་ཡུལ་གྱི་མི་ཐམས་ཅད་ཀྱིས་ཐེག་པ་ཆེན་པོའི་མདོ་དམ་པའི་ཆོས་པད་མ་དཀར་པོའི་མདོ་ཉི་ཤུ་རྩ་གཅིག་བྲིས་ལ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཀྱི་སྲུང་མའི་ལྷ་དེ་དག་དང་། མདོ་དེ་ལས་མིང་སྨོས་པའི་སྲིན་པོ་དང་སྲིན་མོ་གང་ཡིན་པ་དེ་དག་ལ་ཆོས་སྦྱིན་པར་བྱ་བའི་ཕྱིར་ཨ་ཤྭ་དམ་པའི་མཆོད་རྟེན་ཆེན་པོ་བཀླག་པར་བྱ་སྟེ། རོ་དང་ལྡན་པའི་ཟས་རྣམས་ཀྱང་གཞག་པར་བྱའོ། །མར་མེ་དེ་དག་ཀྱང་སྦྱར་བར་བྱའོ། །དེ་ནས་དྲི་མ་མེད་པའི་འོད་ཀྱིས་འདི་སྐད་ཅེས་སྨྲས་སོ། །བདག་གིས་ཡུལ་གྱི་ཕྱིར་ཐམས་ཅད་ལ་འདྲིར་གཞུག་པ་དང་། ཀློག་ཏུ་གཞུག་པར་བསྒོ་བའི་མཐུ་དེ་ལྟ་བུ་བདག་ལ་མེད་ཀྱིས། ཡུལ་གྱི་ཕྱིར་བདག་ཉིད་ཀྱིས་ཀློག་ཅིང་རོ་དང་ལྡན་པའི་ཟས་རྣམས་ཀྱང་གཞག་གོ །མར་མེ་དེ་དག་ཀྱང་སྦྱར་རོ། །གང་གི་ཚེ་དྲི་མ་མེད་པའི་འོད་ཀྱིས་དམ་པའི་ཆོས་པད་མ་དཀར་པོ་ཀློག་པ་དང་། རོ་དང་ལྡན་པའི་ཟས་རྣམས་གཞག་པར་རྩོམ་པ་དེའི་ཚེ་གདོང་དམར་དེ་དག་ལོ་དང་པོ་ལ་ལི་ཡུལ་དུ་འགྲོ་བར་རྩོམ་པར་འགྱུར་རོ། །དེ་ནས་ལོ་གསུམ་པའི་ཚེ་འགྲོ་ནུས་པར་འགྱུར་རོ། །དེའི་ཚེ་སྡིག་བྱེད་ཀྱི་གྲོགས་པོར་གྱུར་པའི་མི་རྒོད་ལྔ་བརྒྱ་པོ་གང་ཡིན་པ་དེ་དག་ཀྱང་དེའི་ཚེ་མི་རྒོད་ཀྱིས་འཛིན་པར་འགྱུར་རོ། །དེའི་ཚེ་དྲི་མ་མེད་པའི་འོད་གཡེངས་པར་འགྱུར་ཏེ། དམ་པའི་ཆོས་པད་མ་དཀར་པོ་དག་ཀྱང་ཀློག་པར་མི་བྱེད། རོ་དང་ལྡན་པའི་ཟས་རྣམས་ཀྱང་འགྲེམས་པར་མི་བྱེད་དོ། །དེ་ནས་གདོང་དམར་རྣམས་རང་གི་ཡུལ་ནས་འཕགས་ཏེ་སྟོན་ཟླ་ར་བ་ལ་ལི་ཡུལ་དུ་འགྲོ་བར་ཆས་སོ། །དེའི་ཚེ་ལིའི་རྒྱལ་པོ་སྲིན་མོ་དྲི་མ་མེད་པའི་འོད་ལ་མི་དགའོ། །དུ་པ་ལ་དང་ཨ་ཀུ་ན་གཉིས་ཀྱང་དེའི་ཚེ་གཡེངས་པར་འགྱུར་ཏེ། ཀློག་པར་མི་བྱེད། རོ་དང་ལྡན་པའི་ཟས་རྣམས་ཀྱང་འགྲེམས་པར་མི་བྱེད། མར་མེ་ཡང་སྦྱར་བར་མི་བྱེད་དོ། །དེ་ནས་ལྷ་རྣམས་ཙར་མིན་དྷའི་ཡུལ་དུ་གཡུལ་འགྱེད་དེ་ཕམ་པར་འགྱུར་

---

^{[མ་དཔེ་གཟིགས་ན་འདིར་གནོན།]}

རོ། །དེའི་ཚེ་དྲི་མ་མེད་པའི་འོད་ཀྱིས་དགག་དབྱེའི་ཚེས་བཅུ་བཞི་ལ་གཟུངས་སྔགས་བརྗོད་ནས་དེར་ལྷ་རྣམས་ཀྱིས་ཡིད་དུ་མི་འོང་བའི་ཚིག་སྨྲས་པ། ཁྱོད་ཀྱིས་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་བདག་གིས་ཉིན་གཅིག་བཞིན་དུ་ཆོ་ག་བཞིན་བཀླག་པར་བྱའོ་ཞེས་གང་སྨྲས་པ་དེ་ཁྱོད་ཀྱིས་མ་བཀླགས་པའི་ཕྱིར་ཁོ་བོ་ཅག་ཕམ་པར་གྱུར་པས་སུམ་པ་རྣམས་འདིར་འོང་བར་འགྱུར་རོ་ཞེས་ཟེར་རོ།། །།དྲི་མ་མེད་པའི་འོད་ཀྱིས་ཞུས་པ། བམ་པོ་བཞི་པ་སྟེ་ཐ་མ། དེ་ནས་དེའི་ཚེ་ལྷ་མོ་དྲི་མ་མེད་པའི་འོད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔོན་བྱུང་བ་གང་ལགས་པ་དང་། སླད་ཀྱིས་ཇི་ལྟར་འགྱུར་བ་དང་། ཅི་ནས་བདག་གིས་ཇི་ལྟར་དྲན་པར་འགྱུར་བ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །མ་འོངས་པའི་དུས་ན་ཡུལ་འདིར་འདི་ལྟ་བུ་འབྱུང་བར་འགྱུར་ཏེ། དེ་ལ་འདི་སྐད་ཅེས་བྱའོ། །ལི་ཡུལ་གྱི་རྒྱལ་སྲིད་སུམ་པས་འཛིན་པར་འགྱུར་ཏེ། དེ་ན་ཡང་གང་གི་ཚེ་རྒྱལ་པོ་འཕགས་སྐྱེས་པོས་ཤཱཀྱའི་ཡུལ་དུ་དམག་དྲངས་པ་དེའི་ཚེ་ཤཱཀྱའི་ཡུལ་གྱི་མི་རྒྱལ་པོའི་འཁོར་དུ་གྱུར་པ་ཞིག་ཤཱཀྱ་དག་གི་ཟླ་ལ་གཡུལ་བཀྱེ་ནས། དེའི་ཕྱི་བཞིན་དུ་མི་གཞན་ཞིག་བྱུང་བ་དེས་དེར་འདི་སྐད་དུ་ཁྱོད་ཀྱིས་ཤཱཀྱ་ཐམས་ཅད་ལ་བསླབ་པ་འཛིན་དུ་བཅུག་ནས། དེ་དག་གི་ཡུལ་དུ་དགྲ་བྱུང་ན་ཡང་འཐབ་མོ་མ་བྱས་པས་ན་མ་འོངས་པའི་དུས་སུ་གང་དུ་ཁྱོད་ཀྱི་སྐུ་གདུང་དང་བསྟན་པ་བྱུང་བ་དེར་ངས་དགེ་འདུན་གྱི་ཀུན་དགའ་ར་བ་རྣམས་དང་། མཆོད་རྟེན་ཆེན་པོ་རྣམས་ཅི་ནས་ཀྱང་གཞིག་པར་བྱའོ་ཞེས་སྨོན་ལམ་བཏབ་བོ། །དེ་ནས་བཅོམ་ལྡན་འདས་ཀྱིས་སྤྱན་རས་གཟིགས་དབང་ཕྱུག་ལ་བོས་ཏེ་བཀའ་སྩལ་པ། ནུ་སྡུག་གང་གི་ཚེ་བཅོམ་ལྡན་འདས་རིན་ཆེན་སྙིང་པོ་གྲོང་ཁྱེར་དུ་གཤེགས་པ་དེའི་ཚེ། དེར་འུ་བུ་ཅག་གཉིས་ཀྱིས་ལྷན་ཅིག་ཏུ་སངས་རྒྱས་སུ་ལུང་བསྟན་པ་ཐོབ་པ་དྲན་པར་གྱིས་ཤིག །དེ་ནས་ཡང་བཅོམ་ལྡན་འདས་ཀྱིས་སྤྱན་རས་གཟིགས་དབང་ཕྱུག་ལ་བཀའ་སྩལ་པ། ནུ་སྡུག་ལི་ཡུལ་དེར་དེ་ལྟ་བུའི་དུས་ལ་བབ་པ་ན་ཇི་ལྟར་ཡང་ཡུལ་དེ་ཅུང་ཟད་ཀྱང་འཇིག་

---

^{[མ་དཔེ་གཟིགས་ན་འདིར་གནོན།]}

པར་མི་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ནོར་བུ་བཟང་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་ངས་དགོངས་ཏེ། ཨུ་རྒྱན་གྱི་ཡུལ་དེར་ལུང་ཇི་ལྟར་བསྒོ་བ་དེ་བཞིན་དུ་འདི་ཡང་ཟུང་ཤིག །དེ་ནས་གང་གི་ཚེ་བཅོམ་ལྡན་འདས་ཀྱིས་ལི་ཡུལ་དུ་སུམ་པ་འོངས་པ་དེ་ལྟར་ཐུགས་སུ་ཆུད་པ་དེའི་ཚེ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །ནུ་སྡུག་ཁྱོད་ཀྱིས་ལི་ཡུལ་འདི་ལྟ་བུར་འགྱུར་བའི་དུས་ལ་བབ་པ་དེའི་ཚེ་སྐབས་ཕྱེ་ཤིག །དེ་ནས་དེའི་ཚེ་སྤྱན་རས་གཟིགས་དབང་ཕྱུག་གི་ཆ་ལུགས་ཀྱི་གཟུགས་བྱས་ནས་དགེ་སློང་ཞིག་ལ་བྱིན་ཏེ། དེས་ལི་ཡུལ་དེར་ཁྱེར་ཏེ་འོང་བར་འགྱུར་རོ། །དེའི་ཚེ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ལི་ཡུལ་དང་དམག་གི་དཔུང་འཛིན་པའི་ལྷ་གང་ཡིན་པ་དེ་དག་ལ་སྐུལ་བར་བྱེད་དོ། །དགེ་སློང་དེ་ཡང་ཕྱིས་གསེར་གྱི་ཡུལ་དུ་སྐྱེ་བར་འགྱུར་ཏེ། བསོད་ནམས་ལ་དགའ་བ་ཞེས་བྱ་བར་འགྱུར་རོ། །གང་གི་ཚེ་ཤི་འཕོ་བར་འགྱུར་བ་དེའི་ཚེ་ཡང་སངས་རྒྱས་ཀྱི་ཞིང་ཡོངས་སུ་དག་པར་འགྲོ་བར་འགྱུར་རོ། །གང་གི་ཚེ་སུམ་པ་འོང་བར་འགྱུར་བ་དེའི་ཚེ་དགུན་ཟླ་ཐ་ཆུངས་ཚེས་བཅྭ་ལྔ་ཉའི་ནམ་ཕྱེད་ན་དེ་དག་གིས་དྲི་མ་མེད་པའི་འོད་དེ་ལ་བོས་ཏེ་འདི་ལྟ་སྟེ། ཀྱེ་རབ་ངེས་ལི་ཡུལ་དུ་དམག་འོངས་སོ། །རྒྱལ་པོ་ཡང་ཕྱིར་བྱུང་སྟེ། ཡུལ་ཡང་ཤིན་ཏུ་མི་བཟད་པའི་དུས་ལ་བབ་བོ་ཞེས་ཟེར་རོ། །གནོད་སྦྱིན་སེར་སྐྱས་ཀྱང་འདི་སྐད་དུ་ཁྱོད་དང་ལྷན་ཅིག་ཏུ་ལི་ཡུལ་བསྲུང་བའི་ཕྱིར་ལག་ཏུ་མནོས་པའི་ལྷ་དང་། གནོད་སྦྱིན་གང་ཇི་སྙེད་ཡོད་པ་དེ་དག་ལ་ཅི་ནས་གསེར་གྱི་ཡུལ་སྲུང་བ་དང་། ཅི་ནས་སུམ་པ་དག་གིས་བཤིག་པར་མི་འགྱུར་བ་དེ་ལྟ་བུར་བསྒོ་ཤིག་ཅེས་ཟེར་རོ། །དེ་དག་ཀྱང་འདི་སྐད་དུ་བདག་ཅག་གིས་ཡིད་བཞིན་གྱི་ནོར་བུ་རིན་པོ་ཆེ་གང་གིས་ཁྱོད་ལས་བྱེད་ནུས་པར་འགྱུར་བ་དང་། ཅི་ནས་སུམ་པ་རྣམས་ཕྱིར་ལྡོག་པར་འགྱུར་བ་དང་། རྒྱལ་པོ་ཡང་ཕྱིར་རང་གི་ཡུལ་དུ་འོང་བར་འགྱུར་བ་དེ་ལྟ་བུ་སྦྱིན་པར་བྱའོ་ཞེས་ཟེར་རོ། །དེའི་ཚེ་ཅི་ནས་སངས་རྒྱས་དེ་

---

^{[མ་དཔེ་གཟིགས་ན་འདིར་གནོན།]}

དག་གི་ཆོས་བཤད་པ་ཐམས་ཅད་དེར་ཡོངས་སུ་ཤེས་པར་འགྱུར་བའི་གཟུངས་སྔགས་དེ་ཡང་བྱིན་ནོ། །ཏདྱ་ཐཱ། ཨུ་ཀ་སེ་མུ་ཀ་སེ། ཨུ་ཀུ་རུ་མུ་ཀུ་ཕུ་རུ་སྭཱ་ཧཱ། ཏདྱ་ཐཱ། ནི་ཛི་ཏེ་བིརྫི་ཏེ། བྷ་ཤི་ཏེ། དྷརྨ་སྐན་དྷ། ཨ་པ་ར་ཛི་ཏེ། ཨིན་དྲ་བརྫི་ཏེ་ཕུཿསྭཱ་ཧཱ། འདི་སྐད་དུ་གཟུངས་སྔགས་འདི་དག་ཟླ་བ་གཅིག་གི་བར་དུ་ཕྱེམ་རེད་ཀྱི་དུས་སུ་ལན་བརྒྱ་རྩ་བརྒྱད་བརྒྱད་རྗོད་ཅིག་དང་ཇི་ལྟར་འགྱུར་བ་བདག་གིས་ཁྱོད་ལ་བསྟན་པར་བྱ་སྟེ། གཟུངས་སྔགས་དེ་དག་བསྟན་པར་བྱའོ་ཞེས་ཀྱང་ཟེར་རོ། །གང་གི་ཚེ་རབ་ངེས་ཀྱིས་ཟླ་བ་གཅིག་གི་བར་དུ་གཟུངས་སྔགས་བརྗོད་ནས་དེའི་དཔྱིད་ཟླ་ར་བ་ཚེས་བཅུ་བཞི་ལ་ལྷ་རྣམས་ཀྱིས་བརྗོད་དུ་བཅུག་པའི་གཟུངས་སྔགས་གང་ཡིན་པ་དེ་བརྗོད་ན་དེའི་ཚེ་བསམ་གཏན་གྱི་མདུན་ཁང་གི་སྟེང་ཁང་དུ་དེ་བཞིན་གཤེགས་པ་ཤཱཀྱ་ཐུབ་པ་དང་། དེ་བཞིན་གཤེགས་པ་མི་འཁྲུགས་པ་དང་། དེ་བཞིན་གཤེགས་པ་རིན་པོ་ཆེའི་ཏོག་དང་། དེ་བཞིན་གཤེགས་པ་འོད་དཔག་མེད་དང་། དེ་བཞིན་གཤེགས་པ་རྔ་སྒྲ་དང་། སངས་རྒྱས་བཅོམ་ལྡན་འདས་ཇི་སྙེད་དེར་འདུས་པར་འགྱུར་བའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཐབས་ཅིག་ཏུ་ཆོས་བགྲོ་བ་མཛད་མཛད་པ་དེར་སངས་རྒྱས་བཅོམ་ལྡན་འདས་ཆོས་ཀྱི་འབྱུང་གནས་ཞེས་བྱ་བ་གང་གཱའི་ཀླུང་གི་བྱེ་མ་སྙེད་གཤེགས་སོ། །ལྷའི་རྒྱལ་པོ་སུམ་ཅུ་རྩ་གཉིས་ཀྱང་དེར་འོངས་ཏེ། དྲི་མ་མེད་པའི་འོད་ལས་རབ་ངེས་ཞེས་བྱ་བར་འགྱུར་བ་དེའི་ཐད་དུ་ཚེས་བཅུ་བཞིའི་ཉིན་པར་འོང་བར་འགྱུར་ཏེ། བ་ལང་པ་སུམ་པ་རྣམས་དཔྱིད་ཟླ་ཐ་ཆུངས་ལ་ངེས་པར་ཕྱིར་ལྡོག་པར་འགྱུར་རོ། །དེའི་ཚེ་གཟུངས་སྔགས་གང་གིས་སུམ་པ་རྣམས་ཕྱིར་ལྡོག་པར་འགྱུར་བ་དང་། མུ་གེ་ཡང་འབྱུང་བར་མི་འགྱུར་བ་དང་། དེ་བཞིན་གཤེགས་པ་ཆོས་ཀྱི་འབྱུང་གནས་ཞེས་བྱ་བ་དེ་དག་གཤེགས་པར་འགྱུར་བའི་གཟུངས་སྔགས་དེ་དག་ཀྱང་བྱིན་ནོ། །དེ་བཞིན་གཤེགས་པ་ཆོས་འཛིན་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་དཔའ་བའི་རིགས་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་སྣང་ལ་ཕྱག་འཚལ་ལོ། །དེ་བཞིན་

---

^{[མ་དཔེ་གཟིགས་ན་འདིར་གནོན།]}

གཤེགས་པ་ཆོས་དགྱེས་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་གནས་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་ཀྱི་ཏོག་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་ཀྱི་གཟི་བརྗིད་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་དབང་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་བརྟན་ལ་ཕྱག་འཚལ་ལོ། །དེ་བཞིན་གཤེགས་པ་ཆོས་བརྩེགས་ལ་ཕྱག་འཚལ་ལོ། །ཏདྱ་ཐཱ། བུ་བུ་བུ་བུ། དྷརྨ་ཨ་དྷི་ཏེ་ཕུཿ། ཨ་ཨ་ཨ་ཨ། ད་ཀུ་ལ་ཨ་དྷི་ཏེ། བན་ཛ་རཻ་ཕུག་ཙ་རཻ་ཕུཿ། བི་བི་བི་བི་ཕུཿ། ས་ས་ས་ས་ཕུཿ། ཀཽ་ཀཽ་ཀཽ་ཀཽ་ཕུཿ། ཧཱ་ཧཱ་ཧཱ་ཧཱ་ཕུཿསྭཱ་ཧཱ། གཟུངས་སྔགས་འདི་ནི་ས་འཛིན་པ་ཞེས་བྱ་སྟེ་བབ་ཅོལ་ལ་ཞུགས་པའི་སེམས་ཅན་གང་ཡིན་པ་དེས་ལན་བརྒྱ་རྩ་བརྒྱད་བཟླས་བརྗོད་བྱས་ན་དེ་ལས་ཐར་བར་འགྱུར་རོ། །གང་གི་ཚེ་དམག་བྱུང་བ་དེའི་ཚེ་ཡང་བཟླས་བརྗོད་བྱའོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་གཞོན་ནུ་རྡོ་རྗེ་སྡེ་དང་། ལྷ་མོ་རབ་ངེས་ཞེས་བྱ་བར་འགྱུར་བ་གང་ཡིན་པ་དེའི་དོན་གྱི་ཕྱིར་དེར་ཚེས་བཅུ་བཞིའི་ཉིན་པར་སྐར་རྡོའི་རྒྱལ་པོ་རྣམ་པར་རྒྱལ་བའི་གོ་ཆ་ལ་དམ་པ་སྩོལ་བར་མཛད་དོ། །གང་གི་ཚེ་དེར་རྒྱ་དང་སུམ་པ་འོང་བར་འགྱུར་བ་དེའི་ཚེ་དེ་ལི་ཡུལ་དུ་རྒྱལ་སྲིད་འཛིན་པར་འགྱུར་ཏེ། ཡུལ་གྱི་ཕྱིར་གླུད་འཇལ་བར་འགྱུར་རོ། །དྲི་གཙང་ཁང་དང་། དགེ་འདུན་གྱི་ཀུན་དགའ་ར་བ་དང་། མཆོད་རྟེན་རྣམས་གདོང་དམར་དག་གིས་བསྲེགས་པ་ཡང་ཕྱིར་འཆོས་པར་བྱེད་དོ། །ལོ་དུ་མར་ཡུལ་བདེ་བ་དང་། ལོ་ལེགས་པ་དང་། ཡིད་དུ་འོང་བར་གནས་པར་འགྱུར་ཏེ། དེའི་ཚེ་གཟུངས་འདི་ཡང་སྩོལ་བར་མཛད་དོ། །ན་མོ་དྷརྨ་ཙིན་ཏ་ཀུ་ལ་སྱ། ཏ་ཐཱ་ག་ཏ་སྱ། ཏདྱ་ཐཱ། ཙ་ཙ་ཙ་ཙ། ཨཱ་ཨཱང་ཨཱ། རུ་ཙ་ན་གན་དྷེ། པ་རུ་ར་གན་དྷེ། རོ་དྷ་ནཱ་དྷི་ཏེ་ཀུ་ལ་ཨ་དྷི་ཏེ་སྭཱ་ཧཱ། གཏེར་རྙེད་པར་འདོད་པའམ། ཡང་ན་ནོར་མང་པོ་རྙེད་པར་འདོད་ན་ཁ་ཟས་མི་ཟ་བར་གཟུངས་སྔགས་འདི་ལ་ལན་བརྒྱ་རྩ་བརྒྱད་བཟླས་བརྗོད་བྱའོ། །བསྒྲུབ་པའི་ཐབས་ནི་འདི་ཡིན་ཏེ། ཞག་བདུན་གྱི་བར་དུ་བསླབ་པ་བཟུང་ལ་ཤ་མི་བཟའ་བར་འོ་ཐུག་གམ་འབྲས་ཅན་བཟའ་བར་བྱའོ། །ཞག་བདུན་

---

^{[མ་དཔེ་གཟིགས་ན་འདིར་གནོན།]}

པའི་ཉིན་པར་ནི་ཁ་ཟས་མི་བཟའ་བར་ནང་པར་ཁྲུས་བྱས་ལ་གཟུངས་སྔགས་འདི་ཡང་བཟླས་བརྗོད་བྱས་ཏེ། རིའི་རྩེ་མོར་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་ལན་སྟོང་བཟླས་བརྗོད་བྱའོ། །པད་མ་སྟོང་གི་སྟེང་དུ་གསེར་གྱི་པད་མ་བདུན་བཞག་སྟེ། བྱང་ཆུབ་སེམས་དཔའི་མདུན་དུ་གུར་གུམ་གྱིས་དཀྱིལ་འཁོར་བྱས་ལ་རོ་དང་ལྡན་པའི་ཟས་སྣ་བརྒྱད་གུར་གུམ་གྱིས་བསྒོས་པ་དང་། གུར་གུམ་གྱི་ཆུས་བཀང་བའི་སྣོད་བཞི་བཞག་སྟེ། དེར་སྦྱིན་སྲེག་འདི་ཡང་བྱ་སྟེ། ཨ་ག་རུ་ནག་པོ་དང་། ཙན་དན་དཀར་པོ་དང་། ཙན་དན་དམར་པོ་དང་། ཙན་དན་སེར་པོ་རྣམས་ཀྱི་ཡམ་སྲེག་ཤིང་དང་། འབྲས་མ་དྲུས་པ་དང་། ཤ་རི་བ་རྣམས་བསྲེག་པར་བྱའོ། །ཆོ་ག་ནི་འདི་ལྟར་བྱ་སྟེ། དཀྱིལ་འཁོར་དུས་སུ་རྔ་ཡབ་སྟོང་ལ་ལན་རེ་བཟླས་བརྗོད་བྱ་སྟེ་སྦྱིན་སྲེག་བྱའོ། །ཨ་ག་རུ་དང་། རྒྱ་སྤོས་དང་། ཀ་ལི་ཡ་ཀ་དང་། ག་བུར་དང་། ཤི་ལི་ཡ་ཀ་དང་། གུར་གུམ་དང་། དུ་རུ་ཀ་རྣམས་ཀྱི་བདུག་པས་ཀྱང་དེར་བདུག་པར་བྱའོ། །དེའི་ཚེ་གཟུངས་སྔགས་འདི་ཡང་ཇི་ལྟར་རྟ་གནས་ཀྱི་རིག་སྔགས་བཤད་པའི་ཆོ་ག་རྒྱས་པ་བཞིན་དུ་བཟླས་བརྗོད་བྱའོ། །གནས་དེར་རི་ཡང་འདྲི་བར་བྱའོ། །ཡང་ན་རིའི་སྟེང་དུ་བཟླས་བརྗོད་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །དེའི་ཚེ་ཁྱོད་ཀྱིས་རབ་ངེས་དེ་ལ་དྲན་པར་གྱིས་ལ་ཆོ་ག་རྒྱས་པར་འདི་ཡང་ཤོད་ཅིག་དང་། སངས་རྒྱས་ཀྱི་བཀའ་བཞིན་དུ་བྱེད་པ་གང་ཡིན་པའི་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། དབང་ཕྱུག་གི་ལྷ་དང་། ལྗོན་པའི་དབང་ཕྱུག་རྒྱལ་པོ་དང་། སྙིང་རྗེའི་དབང་ཕྱུག་དང་། སྤོང་བའི་འོད་ཀྱི་དབང་ཕྱུག་དང་། དྲི་ཟའི་དབང་ཕྱུག་དང་། ཚོགས་ཀྱི་དབང་ཕྱུག་དང་། འཇིག་རྟེན་དབང་ཕྱུག་དང་། འོད་ཀྱི་དབང་ཕྱུག་དང་། རིགས་ཀྱི་དབང་ཕྱུག་དང་། ཆོས་ཀྱི་དབང་ཕྱུག་དང་། བྱང་ཆུབ་སེམས་དཔའ་དེ་དག་དེར་འོང་བར་འགྱུར་རོ། །གསང་སྔགས་འདི་ཡང་བཤད་དེ། རབ་ངེས་གསང་སྔགས་འདི་རྗོད་ཅིག་ཅེས་ཟེར་རོ། །སངས་རྒྱས་ལ་ཕྱག་

---

^{[མ་དཔེ་གཟིགས་ན་འདིར་གནོན།]}

འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སྔོན་གྱི་ཚེ་ན་བསམ་པ་ཡི། །གསང་སྔགས་རབ་ཏུ་བཤད་པ་འདི། །སེམས་ཅན་རྣམས་ལ་སྙིང་བརྩེའི་ཕྱིར། །ཆོ་ག་འདི་ནི་བཤད་པར་བྱ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །བཅིངས་པ་ཐམས་ཅད་ཚར་གཅོད་པར་མཛད་པ་ལ་ཕྱག་འཚལ་ལོ། །འཇིགས་པ་ཐམས་ཅད་རབ་ཏུ་ཞི་བར་མཛད་པ་ལ་ཕྱག་འཚལ་ལོ། །སེམས་ཅན་ཐམས་ཅད་ལ་བྱམས་པར་སེམས་པ་ལ་ཕྱག་འཚལ་ལོ། །སེམས་ཅན་ཐམས་ཅད་བདེ་བྱེད་པའི། །རིག་སྔགས་འདི་ནི་རབ་ཏུ་བཤད། །ཏདྱ་ཐཱ། ཙ་ར་ཙ་ར་ཎི། ས་ར་ས་ར་ཏེ། ས་ར་བི་ས་ར། བྷུད་དྷ་བུད་དྷ། བོ་དྷ་ཡ་བོ་དྷ་ཡ། སརྦ་སད་ཏྭ་ཧི་ཏ། ཨ་ནུ་ཀམ་བཱི། བོ་དྷ་ཡ་བོ་དྷ་ཡ། མི་ཏེ་ཨཱ་བ་ལོ་ཀི་ཏེ་ཤྭ་རཱ་ཡ། སྨ་ར་སྨ་ར་ས་མ་ཡ་ན། སརྦ་ས་ཏྭཱ་ནཱ་ན། མཻ་ཏྲེ་ཙི་ཏཱ་ནཱ་ན། ཡས་སརྦ་ས་ཏྭ་ནན། མོར་ཤ་ར། ཀི་རི་ཀི་རི་ཀི་རི་ཀི། ཀི་རི་ཀི་རི་ཀི་རི་ཀི། ཀི་རི་ཀི་རི། ཏུ་རུ་ཏུ་རུ་ཏུ་རུ་ཏུ་རུ། བོ་དྷི་མ་བོ་དྷ་ཡཱ་མཻ་ཏྲེ། ཧུ་རུ་ཧུ་རུ། མུ་རུ་མུ་རུ། ཤཱི་གྷན་ཨཱ་གཙྪ། ཨཱ་གཙྪ། སརྦ་ས་ཏྭ་ཧི་ཏ། རུ་ཀ་མ་བཱི་སརྦ་སད་དྷེ་ཥུ་མ་ཧཱ་ཀ་རུ་ཎི་ཀ །དར་ཤ་ཡུ་རུ་པན། སཱ་དྷ་ཡ་སཱ་དྷ་ཡ། བི་དྷྱན་དེ་ཧི། དེ་ཧི་མེ་བ་ར་ན། དྷ་ནན། གྷ་ནན་གྷ་ནན། སུ་རུ་མི། སུ་རུ་མི། མ་ཧཱ་སུ་རུ་མེ་སྭཱ་ཧཱ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། སིད་དྷྱན་ཏུ་མན་ཏྲ་པ་ད་སྭཱ་ཧཱ། ན་མོ་རཏྣ་ཏྲ་ཡཱ་ཡ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། ཏདྱ་ཐཱ། དྷུ་རུ་དྷུ་རུ། ཨི་སི་ལི་མི་ལི་ནི། ཧུ་ཧུ་མ་མ་ལི་ནི། དུ་དུ་བེ་ན་མ་ན་མཱ་སྭཱ་ཧཱ། ན་མོ་རཏྣ་ཏྲ་ཡཱ་ཡ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། ཏདྱ་ཐཱ། མུག་ཏེ་བི་མུག་ཏེ། ཙྪེ་ད་ནི། ཙྪེ་ད་ནི། བིད་ཙྪེ་ད་ནི། བིད་ཙྪེ་ད་ནི། ནིར་མ་ལེ། མང་ག་ལྱཱེ། སུ་མུ་ཁི་བེ་མུ་ཁཻ། འཇིགས་པ་ཐམས་ཅད་ལས་

---

^{[མ་དཔེ་གཟིགས་ན་འདིར་གནོན།]}

རྣམ་པར་ཐར་བར་བྱེད་པ། གནོད་པ་ཐམས་ཅད་ལས་རྣམ་པར་ཐར་བར་བྱེད་པ་ནི་རྒྱལ་པོའི་འཇིགས་པ་དང་། ཆོམ་རྐུན་གྱི་འཇིགས་པ་དང་། འཆི་བའི་འཇིགས་པ་དང་། མི་མཛའ་བའི་འཇིགས་པ་དང་། དུག་གི་འཇིགས་པ་དང་། མཚོན་གྱི་འཇིགས་པ་དང་། མེའི་འཇིགས་པ་དང་། ཆུའི་འཇིགས་པ་དང་། ཕ་རོལ་གྱི་དམག་ཚོགས་ཀྱི་འཇིགས་པ་དང་། དམག་གི་ནང་ན་འདུག་པ་དང་། ཆོམ་རྐུན་གྱི་ནང་ན་འདུག་པ་དང་། སེང་གེའི་ནང་ན་འདུག་པ་དང་། སྟག་གི་ནང་ན་འདུག་པ་དང་། དོམ་གྱི་ནང་ན་འདུག་པ་དང་། གཟིག་གི་ནང་ན་འདུག་པ་དང་། གཅན་གཟན་ཁྲོ་བོའི་ནང་ན་འདུག་པ་དང་། སྦྲུལ་ནག་པོའི་ནང་ན་འདུག་པ་དང་། ལྕགས་སྒྲོག་ཏུ་བཅུག་པ་དང་། ཤིང་སྒྲོག་ཏུ་བཅུག་པ་དང་། ཀོ་དྲར་བཅུག་པ་དང་། སྦྲུལ་པོ་ཆེའི་ནང་ན་འདུག་པ་དང་། གླང་པོ་ཆེའི་ནང་ན་འདུག་པ་དང་། རྒྱ་མཚོའི་ནང་ན་འདུག་པ་དང་། དུས་ཀྱི་ཞགས་པས་ཟིན་པ་དང་། སྡུག་བསྔལ་ཐམས་ཅད་ལས་ཐར་བར་འགྱུར་ཞིང་གནོད་པ་ཐམས་ཅད་ལས་ཐར་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་བདག་ལ་བསྲུང་དུ་གསོལ་བསྲུང་དུ་གསོལ། ཧ་ཏེ་བི་ཧ་ཏེ། ཧ་རེ་བི་ཧ་རེ། སརྦ་བི་དྷ་ན་ས་ཡ་པྲ་ཏྱཱརཐ་ཀམ་མོ་ཀྵ་ཎི་བཱིཪྱ་ཎི་སྭཱ་ཧཱ། དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་དང་ལྡན་པ་སེམས་ཅན་ཐམས་ཅད་ལ་སྙིང་བརྩེ་བ་ལ་ཕྱག་འཚལ་ལོ། །སེམས་ཅན་ཐམས་ཅད་ལ་བྱམས་པར་སེམས་པ་ལ་ཕྱག་འཚལ་ལོ། །སེམས་ཅན་ཐམས་ཅད་སྡུག་བསྔལ་ལས་རབ་ཏུ་ཐར་བར་མཛད་པ་ལ་ཕྱག་འཚལ་ལོ། །བཅིངས་པ་ཐམས་ཅད་གཅོད་པར་མཛད་པ་ལ་ཕྱག་འཚལ་ལོ། །འཇིགས་པ་ཐམས་ཅད་རབ་ཏུ་ཞི་བར་མཛད་པ་ལ་ཕྱག་འཚལ་ལོ། །དེ་ལ་ཕྱག་འཚལ་ནས་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ལས་དང་དོན་ཐམས་ཅད་སྒྲུབ་པ། ནད་ཐམས་ཅད་ལས་རྣམ་པར་ཐར་བར་བྱེད་པ་འདི་བརྗོད་པར་བྱའོ། །ཏདྱ་ཐཱ། སུ་རུ་སུ་རུ་སུ་རུ། ཏུ་རུ་ཏུ་རུ། ཧི་ལི་མི་ལི། སི་ལི་སི་ལི། དི་སི་ལི། ཛཱ་ལེ་ཛཱ་ལེ་ནཻ། ཨུ་ཁཻ་མུ་ཁེ། པུཀྐ་སི་གཽ་རི་

---

^{[མ་དཔེ་གཟིགས་ན་འདིར་གནོན།]}

གན་དྷ་རི། ཌོམྦི་ནི་མ་ཏང་གི་པུག་ཀ་སེ། དྷུ་རེ་དྷུ་རེ་དྷུ་རེ་དྷུ་རེ། དྷརྨེ་དྷ་རྨེ། དྷརྨི་ནེ། ཤཱན་ཏེ་ཤཱན་ཏ་ནི་མཱ་སེ་མུག་ཏེ། བི་མུག་ཏཻ། ཛ་ཡེ་བི་ཛ་ཡེ། ཧི་ལི་ཧི་ལི་མི་ཧ་ལི་མ་ཧཱ་ལི་མེ། ཧི་ལི་མི་ལི། སུ་པ་ནེ་སུ་མ་ནཻ། སུ་ར་སེ། ཨ་བྲི་ཏ་སཱ་དྷ་ནི། ན་དྷེ་ན་དྷེ་མུ་ཁཻ། ཙན་དྲི་ཙན་དྲི་མུ་ཁེ། པད་མེ་པད་མ་མུ་ཁེ། ཤུད་དྷ་ཀན་ཋེ། སཱུཪྱ་པྲ་བྷེ་སཱུཪྱ་ར་ས་ཏྲི་ཤི་བྲམ་བྲཤྤུ་སྭཱ་རེ་ཨིན་དྲི། ཨན་དྲ་ཀྲ་མཻ། བྷ་ཡ་ཨ་ར་ཛེ། ཨ་མྲཱི་ཏ་མ་ཧཱ་པྲ་བྷེ་དུན་ཏུ་བྷི་སྭཱ་རེ་མ་དྷུ་ར་སྭཱ་རེ། སརྦ་ས་ཏྭ། ཨ་ནུ་ཀམ་པ་ཡ། སཱ་དྷ་ཡ་སཱ་དྷ་ཡ། བུད་དྷ་མ་ནུ་སྨ་རཱ་ཧཱི། དྷརྨ་མ་ནུ་སྨ་རཱ་ཧཱི། སང་ག་མ་ནུ་སྨ་རཱ་ཧཱི། བུད་དྷྱ་བུད་དྷྱ། ཧྲཱི་ད་ཡ་མ་ནུ་སྨ་ར། བོ་དྷ་ཡ་བོ་དྷ་ཡ། བོ་དྷི་ས་ཏྭ། མེ་ཀརྨ་སཱ་དྷ་ཡ། བ་ར་ས་ཏྭཱ་ཡ་སྭཱ་ཧཱ། ཀཱ་རུ་ཎི་ཀཱ་ཡ་སྭཱ་ཧཱ། ཀརྨ་མེ་སཱ་དྷཱ་ཡ་སྭཱ་ཧཱ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། སིད་དྷྱན་ཏུ་མན་ཏྲ་པ་དཻཿསྭཱ་ཧཱ། གང་གི་ཚེ་འདི་དག་ལན་བརྒྱ་རྩ་བརྒྱད་བཟླས་བརྗོད་བྱས་ན། པད་མའི་སྦྱིན་སྲེག་བྱས་པར་འགྱུར་ཏེ། དེའི་ཚེ་གསང་སྔགས་འདི་དག་བཟླས་བརྗོད་བྱའོ། །ན་མོ་རད་ན་ཏྲ་ཡཱ་ཡ། ན་མོ་ཨཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། ཏདྱ་ཐཱ། ཁི་རི་ཁི་རི། ཙི་རི་ཙི་རི། སུ་རུ་སུ་རུ། གཙྪ་གཙྪ། ཡ་ཐཱ་སུ་ཁ་ན། ཨཱ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ། ལན་གསུམ་བརྗོད་པར་བྱའོ། །J04,V055,P1A མེ་ཏོག་དང་། བདུག་པ་ལ་ཡང་ལན་གསུམ་བཟླས་བརྗོད་བྱ་སྟེ། ཨ་ག་རུའི་བདུག་པ་བསྲེགས་ལ་འཕགས་པ་སྤྱན་རས་གཟིགས་དབང་ཕྱུག་ལ་སླར་གཏང་བར་བྱའོ། །འདིའི་ཆོ་གར་བྱ་བ་ཐམས་ཅད་ནི་སྔར་བཤད་པའི་ཆོ་ག་རྒྱས་པའི་ནང་དུ་འདུས་སོ། །རྟ་གནས་ཀྱི་རིག་སྔགས་ཀྱི་དཀྱིལ་འཁོར་ལས་བཟླས་བརྗོད་ཇི་ལྟར་བྱ་བ་བཞིན་དུ་འཕགས་པ་སྤྱན་རས་གཟིགས་དབང་ཕྱུག་གི་ཆོ་ག་འདི་ཡང་དེ་བཞིན་དུ་བཟླས་བརྗོད་བྱ་སྟེ། ཆོ་ག་དེ་ཉིད་དང་འདྲའོ། །དེའི་ཚེ་གཟུངས་སྔགས་འདི་ཡང་གསེར་གྱི་པད་མའི་ཆོ་ག་མཆོད་པའི་སྐབས་སུ་བཤད་པ་དེ་བཞིན་དུ་བརྗོད་པར་བྱའོ། །དེའི་ཚེ་མདོ་འདི་ཡང་གསེར་གྱི་རིགས་ཀྱི་ཡུལ་དུ་བསྐུར་བར་བྱའོ། །དེའི་ཚེ་སངས་རྒྱས་བཅོམ་ལྡན་འདས་དེ་དག་གིས་འདི་སྐད་

---

^{[མ་དཔེ་གཟིགས་ན་འདིར་གནོན།]}

ཅེས་གསུངས་སོ། །བཅོམ་ལྡན་འདས་ཤཱཀྱ་ཐུབ་པའི་ཕྱག་མཚན་ལིའི་ཡུལ་འཁོར་དེར་མི་ཇི་སྙེད་སྐྱེ་བར་འགྱུར་བ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་པ་དང་། ཕྱིར་མི་ལྡོག་པ་ཤ་སྟག་སྟེ། དེར་རྒན་པོ་དང་། བྱིས་པ་རྣམས་ཀྱིས་བསོད་ནམས་ཇི་སྙེད་བྱེད་པ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དོ། །དེ་ལ་ལིའི་ཡུལ་འཁོར་དེ་ཅིའི་ཕྱིར་ཡང་དང་ཡང་དུ་གཞིག་པར་འདོད་ལ། གཞིག་ནུས་པར་ཡང་མི་འགྱུར། ཞེས་ཐེ་ཙོམ་འབྱུང་སྟེ། དེ་ནས་སངས་རྒྱས་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་བྱང་ཆུབ་སེམས་དཔའ་ལྔ་བརྒྱ་སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་དུ་རྟག་ཏུ་ཡུལ་དེར་སྐྱེ་བ་ལེན་པར་འགྱུར་ཏེ། སུམ་བརྒྱ་ནི་དགེ་སློང་དང་དགེ་སློང་མའི་ཚུལ་དུ་གནས་སོ། །ཉིས་བརྒྱ་ནི་དགེ་བསྙེན་དང་། དགེ་བསྙེན་མ་དང་། རྒྱལ་པོའི་འཁོར་དང་། སྐྱེས་པ་དང་། བུད་མེད་དང་། རྒན་པོ་དང་། བྱིས་པའི་ཚུལ་དུ་གནས་ཏེ་བྱང་ཆུབ་སེམས་དཔའ་དེ་དག་ལི་ཡུལ་འཁོར་དེར་སེམས་ཅན་ལ་ཕན་པ་དང་། བསྟན་པ་ཡོངས་སུ་བསྲུང་བའི་ཕྱིར་ལི་ཡུལ་དུ་གནས་སོ། །གང་གིས་བཅོམ་ལྡན་འདས་ལ་ཐེག་པ་ཆེན་པོའི་མདོ་སྡེ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ཞུ་བར་བྱེད་པའི་J04,V055,P1B གནས་བརྟན་རབ་འབྱོར་འདི་ནི་དགེ་སློང་བརྩོན་འགྲུས་ལས་བྱུང་བ་དེ་ཡིན་པར་རིག་པར་བྱའོ། །དེའི་ཚེ་ཅིའི་ཕྱིར་ལི་ཡུལ་དེ་འཇིག་པར་མི་འགྱུར་ཞེ་ན། དེ་བཞིན་གཤེགས་པ་ཤཱཀྱ་ཐུབ་པ་དང་། དེ་བཞིན་གཤེགས་པ་ཆོས་ཀྱི་འབྱུང་གནས་དེ་དག་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཅི་ནས་དེར་བདག་ཅག་སུམ་པ་རྣམས་ཀྱིས་མཆོད་རྟེན་དང་། དྲི་གཙང་ཁང་དང་། དགེ་འདུན་གྱི་ཀུན་དགའ་ར་བ་རྣམས་འཇིག་པར་མི་འགྱུར་བར་ཡུལ་དེ་བྱིན་གྱིས་བརླབས་པའི་ཕྱིར་རོ། །དེ་བཞིན་གཤེགས་པ་ཤཱཀྱ་ཐུབ་པས་ཀ་པི་ལ་ནའི་མཆོད་རྟེན་ལ་བཞུགས་པའི་དེ་བཞིན་གཤེགས་པ་དྲི་མ་མེད་པའི་དཔལ་ཙན་དན་གྱི་སྙིང་པོ་དང་ཐབས་ཅིག་ཏུ་སངས་རྒྱས་ཀྱི་ཕྲིན་ལས་མཛད་དོ་ཞེས་དེ་ལྟར་

---

^{[མ་དཔེ་གཟིགས་ན་འདིར་གནོན།]}

མཁྱེན་ཏོ། །དེའི་ཚེ་གྲོང་ཁྱེར་དེར་མིར་གྱུར་པ་དགེ་སློང་དང་། རྒྱལ་པོའི་འཁོར་དང་། གཞན་ཡང་སྐྱེ་བོ་མང་པོ་འབྱུང་བ་དེ་དག་སུམ་པ་རྣམས་ཀྱིས་སངས་རྒྱས་ཀྱི་མཆོད་རྟེན་དང་། དགེ་འདུན་གྱི་ཀུན་དགའ་ར་བ་རྣམས་གཞིག་ཏུ་འོང་ངོ་སྙམ་སྟེ་ཤིན་ཏུ་ཡིད་མི་བདེ་བར་འགྱུར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་ཀ་པི་ལ་ནའི་མཆོད་རྟེན་དེའི་སྲུང་མའི་མིར་འགྱུར་བ་གང་ཡིན་པ་དེ་དག་འདི་སྙམ་དུ་བདག་ཅག་གིས་སངས་རྒྱས་བཅོམ་ལྡན་འདས་གྲོང་ཁྱེར་དུ་གཤེགས་པར་བྱའོ་སྙམ་དུ་སེམས་ཀྱི་རྟོག་པ་སྐྱེས་པར་མཛད་དོ། །གང་གི་ཚེ་སངས་རྒྱས་བཅོམ་ལྡན་འདས་གྲོང་ཁྱེར་གྱི་ནང་དུ་བཞུགས་པ་དེའི་ཚེ་ཀ་པི་ལ་ནའི་མཆོད་རྟེན་དུ་སངས་རྒྱས་བཅོམ་ལྡན་འདས་ཆོས་ཀྱི་འབྱུང་གནས་རྣམས་གཤེགས་པར་འགྱུར་ཏེ། ལྷ་རྣམས་ཀྱི་མྱ་ངན་བསལ་བའི་ཕྱིར་འདུ་བར་མཛད་དོ། །དེའི་ཚེ་དེའི་ནུབ་མོ་དྲི་མ་མེད་པའི་འོད་ལས་རབ་ངེས་ཞེས་བྱ་བར་གྱུར་པ་དེས་ལྷ་རྣམས་ངུ་བའི་སྒྲ་ཐོས་སོ། །ངུ་བའི་སྒྲ་ཐོས་ནས་གྲོང་ཁྱེར་འདིར་སྡིག་ཅན་གྱི་མི་འོང་གྲང་སྙམ་ནས་འཇིགས་ཤིང་སྐྲག་པར་གྱུར་ཏེ་གཟུངས་སྔགས་བརྗོད་དོ། །དེ་ནས་བཅོམ་ལྡན་འདས་རྣམས་ཀྱིས་འདི་སྐད་ཅེས་གསུངས་སོ། །སངས་རྒྱས་བཅོམ་ལྡན་འདས་ཆོས་བཞིན་དུ་གྲོང་ཁྱེར་དུ་གཤེགས་སུ་གསོལ་ཅིག །དེ་ནས་བཅོམ་ལྡན་འདས་མངོན་སུམ་དུ་བཞུགས་པ་ཇི་ལྟ་བ་བཞིན་དུ་གྲོང་ཁྱེར་གྱི་སྒོ་ནས་གཤེགས་སུ་གསོལ་བར་བྱེད་དོ། །གང་གི་ཚེ་སངས་རྒྱས་བཅོམ་ལྡན་འདས་གྲོང་ཁྱེར་དུ་གཤེགས་པར་J04,V055,P2A གྱུར་པ་དེ་ན་སངས་རྒྱས་བཅོམ་ལྡན་འདས་གང་དག་གིས་འོད་ཟེར་བཏང་བ་དང་། དེ་དག་ལས་ཚིག་དེ་དག་འབྱུང་བ་དེ་དག་གིས་རབ་ངེས་དེ་ལ་ཁྱོད་མ་འོངས་པའི་དུས་ན་འཇིག་རྟེན་གྱི་ཁམས་བུད་མེད་དུ་གྲགས་པ་ཞེས་བྱ་བར་སངས་རྒྱས་བཅོམ་ལྡན་འདས་ཆོས་རྣམ་པར་སྒྲོགས་པ་ཕྱག་ན་རིན་ཆེན་མཛོད་བསྣམས་ཞེས་བྱ་བར་འགྱུར་རོ་ཞེས་ལུང་བསྟན་པ་ཐོབ་པར་འགྱུར་རོ། །དེའི་ཚེ་རབ་ངེས་ཞེས་བྱ་བར་གྱུར་པ་དང་། ཀ་པི་ལ་ནའི་མཆོད་རྟེན་གྱི་དྲུང་དུ་སངས་རྒྱས་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་འོད་ཟེར་གཏོང་བ་དེ་དག་གསེར་གྱི་ཡུལ་གྱི་དགེ་སློང་གི་དགེ་འདུན་རྣམས་དང་ཐབས་ཅིག་ཏུ་འོང་བར་འགྱུར་ཏེ། ཅི་ནས་སུམ་པ་རྣམས་ཀྱི་བྲན་བྱེད་པ་དེ་ལས་ཐར་བར་བྱ་བའི་ཕྱིར་དེ་སྔོན་གྱི་མ་བྱིན་པ་ལེན་པ་ལས་གྲོལ་བར་མཛད་དོ། །དེ་ནས་གཏམ་དེ་གྲགས་པར་གྱུར་ནས་སུམ་པ་རྣམས་ཕྱིར་ལྡོག་པར་འགྱུར་རོ། །དེ་ནས་དེའི་ཚེ་དེར་རབ་ངེས་དེས་ཕྱིར་འཁོར་དུ་འགྱུར་བ་གང་ཡིན་པའི་སེམས་ཅན་ཕལ་པོ་ཆེ་རྣམས་འདུལ་བར་འགྱུར་རོ། །དེ་ནས་སངས་རྒྱས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཁྱེད་རྣམས་མ་འོངས་པ་ན་ཅིའི་ཕྱིར་བ་བདག་སུམ་པས་ངའི་ཡུལ་དུ་དྲི་གཙང་ཁང་དང་། དགེ་འདུན་གྱི་ཀུན་དགའ་ར་བ་རྣམས་བཤིག་པར་འགྱུར་སྙམ་དུ་ཐེ་ཙོམ་ཟ་བར་གྱུར་ཏམ། ཡང་ན་སུམ་པ་འདི་དག་ལ་ཅིའི་ཕྱིར་བ་བདག་ཅེས་བྱ་ཞེ་ན། འདས་པའི་དུས་ན་རྒྱལ་པོ་ཚངས་པས་བྱིན་ཞེས་བྱ་བ་ཞིག་བྱུང་སྟེ། དེའི་ཡུལ་དུ་ཀུན་ཏུ་རྒྱུ་བྱང་ཆུབ་ཅེས་བྱ་བ་ཞིག་བྱུང་སྟེ། རྒྱལ་པོ་ཚངས་བྱིན་དེས་ཡུལ་ནས་བསྐྲད་ནས་རྒྱལ་པོ་གཞན་ཞིག་གི་ཡུལ་དུ་ཕྱིན་ཏེ། བདག་འདིར་ཕན་ཚུན་དུ་རྩ་བ་དང་འབྲས་བུ་བཟའོ་སྙམ་སྟེ། དེར་ལོ་མའི་སྤྱིལ་པོ་ཞིག་བྱས་ནས་འདུག་གོ །དེ་ནས་བུད་མེད་གཞན་ཞིག་ཇོ་བོའི་བ་འཚོ་ཞིང་འདུག་པ་དེས་ཀུན་ཏུ་རྒྱུ་དེ་མཐོང་ནས་སེམས་དད་པ་ཐོབ་སྟེ། ཉིན་གཅིག་བཞིན་དུ་བདག་གི་ཁ་ཟས་ལ་ལོངས་སྤྱོད་ཅིག་ཅེས་ཁ་ཟས་ལ་མགྲོན་དུ་གཉེར་ཏོ། །བ་དེ་དག་བུད་མེད་དེ་ཉིད་དབང་བ་མ་ཡིན་ཏེ། ཇོ་བོའི་ཡིན་པས་ན་ཀུན་ཏུ་རྒྱུ་ལ་ཁ་ཟས་བྱིན་པ་གང་ཡིན་པ་དེ་ནི་དེར་སྦྱར་བར་གྱུར་ཏོ། །བདག་མི་དབང་བའི་འོ་མ་ཀུན་ཏུ་རྒྱུ་ལ་བྱིན་པ་གང་ཡིན་པ་དེ་ནི་མ་བྱིན་པར་བླངས་པར་གྱུར་ཏོ། །དེ་ནས་བ་ལང་J04,V055,P2B དེ་དག་གི་བདག་པོར་གྱུར་པའི་མི་གང་ཡིན་པ་དེས་ནི་ཤཱཀྱའི་ཡུལ་དུ་སྐྱེ་བ་བླངས་ཏེ། དེས་འདི་སྐད་དུ་མ་འོངས་པའི་དུས་ན་བཅོམ་ལྡན་འདས་ཁྱོད་ཀྱི་བསྟན་པ་བདག་གིས་གཞིག་པར་གྱུར་ཅིག་ཅེས་སྨོན་ལམ་བཏབ་སྟེ། དེ་ཡང་གཞན་ཡིན་པར་མི་བལྟའི་སུམ་པའི་རྒྱལ་པོ་གང་ལི་ཡུལ་འཇིག་པར་བྱེད་པ་དེ་ཡིན་ནོ། །ཀུན་ཏུ་རྒྱུར་གྱུར་པ་གང་ཡིན་པ་དེ་ནི་བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ཤཱཀྱ་ཐུབ་པ་ང་ཡིན་ནོ། །བུད་མེད་གང་གིས་ཀུན་ཏུ་རྒྱུ་ལ་འོ་མ་བྱིན་པ་དེ་ནི་རིགས་དང་ལྡན་པའི་བུད་མེད་གང་གིས་སངས་རྒྱས་དཀའ་བ་སྤྱོད་པ་སྤྱད་ནས། བཞེངས་པ་ལ་ཐོག་མར་ཞལ་ཟས་འབུལ་བ་འདི་ཡིན་ནོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ངའི་ཡུལ་དེར་སུམ་པ་དང་གདོང་དམར་དག་འོང་བ་དེའི་རྒྱུ་ནི་འདི་ཡིན་ཏེ། རྒྱལ་པོ་གཟུགས་ཅན་སྙིང་པོ་ཞེས་བྱ་བ་ཞིག་བྱུང་སྟེ། དེའི་ཚེ་རྒྱལ་པོ་དེའི་ཡུལ་ན་བུད་མེད་གཞན་ཞིག་ལ་བུ་ཞིག་ཡོད་པ་དེ་ཞིང་རྨོ་བའི་ཕྱིར་ཕྱི་རོལ་ཏུ་བྱུང་ངོ་། །དེར་མི་གཞན་ཞིག་གིས་ཀྱང་དེའི་འདབ་ཏུ་ཞིང་རྨོས་སོ། །དེ་ནས་བུད་མེད་དེའི་བུ་དེས། མི་དེའི་རྐྱལ་པ་དང་། ཤིང་གཞོང་དང་། ཕྱེ་དང་། ཟོང་དག་ཅིག་བརྐུས་ཏེ། ཕྱེ་དང་། ཟོང་དེ་ལ་སོགས་པ་བརྐུས་པའི་ཕྱིར། བ་བདག་སུམ་པ་དང་གདོང་དམར་རྣམས་ལི་ཡུལ་དུ་འོང་བར་འགྱུར་རོ། །བུད་མེད་དེའི་བུ་གང་གིས་ཕྱེ་དང་། རྐྱལ་པ་དང་། ཤིང་གཞོང་དང་། ཟོང་ཁྱེར་བ་དེ་ནི་ལིའི་རྒྱལ་པོར་འགྱུར་རོ། །མི་གང་གིས་རྐྱལ་པ་ལ་སོགས་པ་རྫས་ཕྲོགས་པ་དེ་ནི་དེའི་ཚེ་གདོང་དམར་གྱི་རྒྱལ་པོར་འགྱུར་རོ། །བདེ་དག་ནི་དེའི་ཚེ་དམག་མིར་འགྱུར་རོ། །མི་དེའི་མར་གྱུར་པའི་བུད་མེད་དེ་ནི་དེའི་ཚེ་ལི་ཡུལ་གྱི་རྒྱལ་པོའི་མར་འགྱུར་རོ། །མ་བྱིན་པར་ལེན་པ་བྱེད་བྱེད་པའི་མི་དེའི་མས་ནི་ཕྱེ་དེ་བླངས་ཏེ། སངས་རྒྱས་ཀྱི་ཉན་ཐོས་ཀྱི་དགེ་སློང་གྲོང་ཁྱེར་མཛེས་ཞེས་བྱ་བ་ལ་བསོད་སྙོམས་སུ་ཕུལ་ཏེ། དགེ་བའི་རྩ་བ་དེས་ན་ཡང་མིར་སྐྱེ་བ་ཐོབ་པར་འགྱུར་རོ། །མི་དེ་ནི་མ་ལ་ཕྱེ་བྱིན་པ་དང་། མས་ཀྱང་དགེ་སློང་གྲོང་ཁྱེར་མཛེས་ལ་ཕུལ་བ་དེའི་བསོད་ནམས་བསགས་པས་མ་འོངས་པའི་དུས་ན་ལི་ཡུལ་དུ་དཔའ་སྦེད་ཅེས་བྱ་བར་འགྱུར་ཏེ། རྒྱུ་དེས་ན་རྣམ་པར་རྒྱལ་བའི་གོ་ཆ་J04,V055,P3A ཞེས་བྱ་བར་ཡང་གྱུར་ནས་རྒྱལ་སྲིད་ཐོབ་པར་གྱུར་ཏེ། སྐར་རྡོའི་གཡུལ་འགྱེད་པར་འགྱུར་རོ། །ཕྱེ་སྦྱིན་པར་བྱེད་པ་དེ་ནི་རྒྱུ་དེས་ན་མིར་སྐྱེ་བ་ཐོབ་པར་འགྱུར་ཏེ། མི་དེས་ལམ་གྱི་འགྲམ་ན་འབྲས་རྨོས་སོ། །དེར་མི་གང་དག་གིས་འབྲས་ཅན་ཆུད་གཟན་

---

^{[མ་དཔེ་གཟིགས་ན་འདིར་གནོན།]}

པར་བྱས་པ་དེ་དག་ནི་དེའི་ཚེ་དགེ་སློང་དུ་འགྱུར་ཏེ། དེས་ན་དེ་དག་གིས་དགེ་འདུན་གྱི་ནོར་ཡུལ་གྱི་གླུད་དུ་འཇལ་བར་འགྱུར་རོ། །དེར་བྱ་སྣ་ཚོགས་ཀྱིས་འབྲས་ཟོས་པ་གང་ཡིན་པ་དེ་དག་ནི་དེའི་ཚེ་ལིའི་རྒྱལ་པོའི་བྲན་དུ་འགྱུར་རོ། །དེའི་ཚེ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །འདི་ལྟར་ལི་ཡུལ་དུ་མི་རྒོད་མང་པོ་འབྱུང་བར་འགྱུར་ཏེ། དེ་དག་གིས་ནི་གང་གི་ཚེ་གཞོན་ནུ་དགེ་བྱེད་སྐྱེས་པ་དེ་ལ་ཕན་འདོགས་པར་འགྱུར་རོ། །གང་གི་ཚེ་སྡིག་བྱེད་སྐྱེས་པ་ན་དེ་ལ་གནོད་པ་བྱེད་པར་འགྱུར་ཏེ། དེའི་ཚེ་མི་རྒོད་ལྔ་བརྒྱ་པོ་དེ་དག་རྒྱལ་པོ་ཡབ་ཀྱི་ཐད་དུ་གཏོང་བར་འགྱུར་རོ། །མི་རྒོད་དེ་དག་ཀྱང་ལི་ཡུལ་དེར་སྐྱེ་བ་ལེན་པར་འགྱུར་ཏེ། དགེ་འདུན་གྱི་ནོར་དང་། མཆོད་རྟེན་གྱི་ནོར་ཆུད་གཟོན་པར་བྱེད་དོ། །མི་རྒོད་དེ་དག་ཀྱང་སྔོན་མ་བྱིན་པར་ལེན་པ་བྱེད་བྱེད་པའི་ཕྱིར་ཡན་ལག་བཅད་ནས་བསད་པ་དེས་ན་དེ་དག་གིས་ཀྱང་ལིའི་རྒྱལ་པོ་རྣམ་པར་རྒྱལ་བའི་གྲགས་པ་གསོད་པར་འགྱུར་རོ། །མ་འོངས་པའི་དུས་སུ་མི་རྒོད་དེ་དག་འཁོར་བ་ལས་གྲོལ་བར་བྱེད་པའི་དགེ་སློང་ཟླ་བ་དག་པ་ཞེས་བྱ་བ་ཞིག་ཀྱང་འབྱུང་བར་འགྱུར་ཏེ། དེ་ཡང་བྱང་ཆུབ་སེམས་དཔའ་འཇམ་དཔལ་སྔོན་གྱི་སངས་རྒྱས་རྣམས་ཀྱི་ཡབ་ཀྱི་བྱ་བ་བྱེད་བྱེད་པ་འདི་ཡིན་ཏེ། དེ་བཞིན་དུ་བྱང་ཆུབ་སེམས་དཔའ་འཇམ་དཔལ་འདི་ནི་མ་འོངས་པའི་དུས་ན་སངས་རྒྱས་བཅོམ་ལྡན་འདས་རྣམས་འབྱུང་བར་འགྱུར་བའི་བསྐལ་པ་བཟང་པོའི་སངས་རྒྱས་དེ་དག་གི་སྐུ་གདུང་ཡང་འཛིན་པར་འགྱུར་རོ། །གང་གི་ཚེ་J04,V055,P3B སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེའི་ཚེ་ཡང་བྱང་ཆུབ་སེམས་དཔའ་འཇམ་དཔལ་བྲམ་ཟེ་དྲོ་ན་ས་གོ་ཏྲ་ཞེས་བྱ་བ་ཆོས་དང་ལྡན་པ་ཞིག་ཏུ་འགྱུར་རོ། །གང་གི་ཚེ་རྒྱལ་པོ་རྣམས་ཕན་ཚུན་དུ་གཡུལ་འགྱེད་པར་ཆས་པ་དེའི་ཚེ་བྲམ་ཟེ་དྲོ་ན་ས་གོ་ཏྲས་བུམ་པ་བཟང་པོ་བླངས་ནས་སྐུ་གདུང་བགེད་པར་བྱེད་དོ། །གང་གི་ཚེ་ལི་ཡུལ་དུ་བྱང་ཆུབ་སེམས་དཔའ་ཕལ་པོ་ཆེ་མ་བྱུང་བ་དང་། མཆོད་རྟེན་ཕལ་པོ་ཆེ་དང་། སངས་རྒྱས་ཀྱི་སྐུ་གཟུགས་དང་། དགེ་འདུན་གྱི་ཀུན་དགའ་ར་བ་མཛེས་པ་དག་མ་བྱུང་བ་དེའི་ཚེ་

---

^{[མ་དཔེ་གཟིགས་ན་འདིར་གནོན།]}

བྱང་ཆུབ་སེམས་དཔའ་འཇམ་དཔལ་གྲོང་ཁྱེར་དུ་འབྱུང་བར་འགྱུར་ཏེ། རིགས་དང་ལྡན་པའི་བུད་མེད་དུ་འགྱུར་རོ། །བྱང་ཆུབ་སེམས་དཔའ་འཇམ་དཔལ་གྱི་སྤྱོད་པ་ཇི་ལྟ་བུ་ཞེ་ན། ཐམས་ཅད་དུ་འདོད་དགུར་སྒྱུར་བའི་གཟུགས་ཅན་ཡིན་ཏེ། བྱང་ཆུབ་སེམས་དཔའི་རང་བཞིན་ཇི་ལྟ་བ་བཞིན་དུ་ཡང་སྣང་། རྒྱལ་པོ་ཇི་ལྟ་བ་བཞིན་དུ་ཡང་སྣང་། རྒྱལ་མོ་ཇི་ལྟ་བ་དང་། དགེ་སྦྱོང་དང་། བྲམ་ཟེའི་གཟུགས་ཇི་ལྟ་བ་དང་། འདོད་པའི་ཁམས་སུ་གཏོགས་པའི་སེམས་ཅན་རྣམས་ཀྱི་བར་དུ་ཐམས་ཅད་དུ་འཇུག་པར་འགྱུར་ཏེ། རོལ་མོ་མཁན་རོལ་མོའི་གནས་ལ་མཁས་པ་གཟུགས་རྣམ་པ་སྣ་ཚོགས་ཐམས་ཅད་སྟོན་པ་བཞིན་ནོ། །ཆགས་པའི་སེམས་དང་ལྡན་པའི་སེམས་ཅན་གྱི་ཐད་དུ་ཡང་ཤིན་ཏུ་ལྷག་པར་སྟོན་ཏོ། །ཅིའི་ཕྱིར་བྱང་ཆུབ་སེམས་དཔའ་འཇམ་དཔལ་བུད་མེད་ཀྱི་གཟུགས་སུ་སྟོན་ཅེ་ན། གང་གི་ཕྱིར་བུད་མེད་ལྷག་པར་འདོད་པའི་འདོད་ཆགས་ལ་ཆགས་པའི་སེམས་དང་ལྡན་པ་ནི་ཤིན་ཏུ་གླེན་ཞིང་ཤིན་ཏུ་སེར་སྣ་ཆེ་བས་ན་དེའི་ཕྱིར་བྱང་ཆུབ་སེམས་དཔའ་འཇམ་དཔལ་ལྷག་པར་བུད་མེད་དུ་སྟོན་ཏོ། །བུད་མེད་བྱང་ཆུབ་ཀྱི་སྤྱད་པ་སྤྱོད་པ་དག་ཀྱང་ཡོད་པས་ན་དེའི་ཕྱིར་ཡང་བྱང་ཆུབ་སེམས་དཔའ་འཇམ་དཔལ་དེ་ལྟ་བུར་བྱེད་དོ། །བུད་མེད་དུ་སྐྱེས་ནས་སྙིང་རྗེ་ཆེན་པོ་ཐོབ་པར་འགྱུར་བའི་དུས་ཀྱང་ཡོད་དོ། །བུད་མེད་རྣམས་ཀྱང་འཛེམ་པར་འགྱུར་བ་དང་། འཁོར་བའི་སྐྱོན་རྟོགས་པར་འགྱུར་བ་དང་། སྐྱེས་པ་གཞན་སྤོང་བར་འགྱུར་བ་དག་ཀྱང་ཡོད་དོ། །གང་གི་ཚེ་བ་བདག་སུམ་པ་དེར་འོངས་ཏེ། མཆོད་རྟེན་ཆེན་པོ་རྣམས་དང་། དྲི་གཙང་ཁང་མང་པོ་དང་། དགེ་འདུན་གྱི་ཀུན་དགའ་ར་བ་བཟང་པོ་རྣམས་བསྲེག་པར་འགྱུར་བར་ལྷ་མོ་དྲི་མ་མེད་པའི་འོད་ཀྱིས་རྟོགས་པ་དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ལྷ་མོ་དེ་ལ་འདི་སྐད་ཅེས་སྨྲས་ཏེ། སྲིང་མོ་སྡུག་པ་གང་གི་ཚེ་བཅོམ་ལྡན་འདས་J04,V055,P3Ab རིན་ཆེན་སྙིང་པོ་གྲོང་ཁྱེར་དུ་གཤེགས་པ་དེ་ན་ང་ཁྱོད་ཀྱི་དགེ་བའི་བཤེས་གཉེན་དུ་གྱུར་ཏེ། དེར་འུ་བུ་ཅག་གཉིས་ཀྱིས་བྱང་ཆུབ་ཀྱི་ཕྱིར་དང་། སེམས་

---

^{[མ་དཔེ་གཟིགས་ན་འདིར་གནོན།]}

ཅན་འཇིགས་ཤིང་སྐྲག་པ་ཇི་སྙེད་ཡོད་པ་དེ་དག་ཐམས་ཅད་བདག་གིས་ཡོངས་སུ་བསྐྱབ་པར་བྱའོ་ཞེས་སྨོན་ལམ་བཏབ་པའི་དུས་དེ་དྲན་པར་གྱིས་ཤིག །སྲིང་མོ་སྡུག་པ་ཇི་ལྟར་དྲི་མ་མེད་པའི་འོད་ཅེས་བྱ་བར་གྱུར་པ་དེའི་ཚེ། རྡོ་རྗེ་སྡེ་དང་གཉིས་ཀྱིས་བཅོམ་ལྡན་འདས་ཀྱི་བཀའ་མནོས་པ་དྲན་པར་གྱིས་ཤིག །གཟུངས་སྔགས་དེ་དག་དང་། སངས་རྒྱས་ཀྱི་མཚན་དེ་དག་དང་། འོད་ཟེར་གང་དག་ཁྱོད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་འདིར་མཐོང་བ་དེ་དག་ངས་རྒྱས་པར་བཤད་ཀྱིས། ཁྱོད་ཀྱིས་ཟུང་ལ་བྲིས་ཏེ། དེ་མིང་པོའི་ཐད་དུ་ཁྱེར་ཅིག །མི་མཇེད་ཀྱི་འཇིག་རྟེན་གྱི་ཁམས་སུ་སངས་རྒྱས་དེ་དག་གིས་འོད་ཟེར་བཏང་བ་ཡང་། ལི་ཡུལ་འདི་བཅོམ་ལྡན་འདས་ཤཱཀྱ་ཐུབ་པའི་ཕྱག་མཚན་ཡིན་ལ་བསྐལ་པ་བཟང་པོའི་བྱང་ཆུབ་སེམས་དཔའ་དེ་དག་སེམས་ཅན་རྣམས་ལ་ཕན་པའི་ཕྱིར་དེར་སྐྱེ་བ་ལེན་པར་འགྱུར་བའི་ཕྱིར་རོ། །ཆོས་ཀྱི་རྒྱལ་པོའི་མཆོད་རྟེན་དེ་དག་ལ་སངས་རྒྱས་བཅོམ་ལྡན་འདས་ཕལ་པོ་ཆེ་དེ་དག་གི་སྐུ་གདུང་མང་པོ་གནས་པ་དེ་དག་ལྷ་མོ་དེའི་ལག་ཏུ་འོང་བར་འགྱུར་ཏེ། མཆོད་པའི་ཕྱིར་སེམས་ཅན་དེ་དག་ལ་བགེད་པར་བྱེད་དོ། །ཡུལ་དེར་ལྷ་མོ་དེ་སྙིང་རྗེ་སྐྱེ་བར་འགྱུར་ཏེ། ཅི་ནས་མཆོད་པའི་གནས་སུ་འགྱུར་བར་བྱེད་དོ། །དེ་ནས་གྲོང་ཁྱེར་གྱི་ནང་དུ་ཁང་པ་ཤིན་ཏུ་མཛེས་པར་བྱ་སྟེ། གྲོང་ཁྱེར་དེ་ན་མི་ཇི་སྙེད་གནས་པ་དེ་དག་དེར་ཅི་ནས་བསོད་ནམས་བྱེད་པར་འགྱུར་ཞིང་འཛིན་པ་དང་། མཆོད་པ་དང་། རྩེ་བར་བྱེད་པར་འགྱུར་བ་དང་། ཅི་ནས་སྤྱོད་པ་དེ་ལ་འཇུག་པར་འགྱུར་བར་བྱའོ། །ཅིའི་ཕྱིར་སངས་རྒྱས་བཅོམ་ལྡན་འདས་རྣམས་ཀྱིས་ལི་ཡུལ་གྱི་ཕྱིར་ཆོས་ཡང་དག་པར་བགྲོ་བ་མཛད་ཅེ་ན། ལི་ཡུལ་བཅོམ་ལྡན་འདས་ཤཱཀྱ་ཐུབ་པའི་ཕྱག་མཚན་ཡིན་པ་དང་། བསྐལ་པ་བཟང་པོའི་སངས་རྒྱས་བཅོམ་ལྡན་འདས་ཇི་སྙེད་པ་དེ་དག་ཐམས་ཅད་ཀྱི་ཕྱག་མཚན་ཡིན་པ་དང་། རི་གླང་མགོ་དང་། གོ་མ་ས་ལ་གན་དྷའི་མཆོད་རྟེན་དུ་བསྐལ་པ་བཟང་པོའི་སངས་རྒྱས་ཐམས་J04,V055,P3Bb ཅད་འདུ་བར་འགྱུར་བ་དང་། ལི་ཡུལ་བྱང་ཆུབ་སེམས་དཔའི་གནས་སུ་འགྱུར་བའི་ཕྱིར་

---

^{[མ་དཔེ་གཟིགས་ན་འདིར་གནོན།]}

རོ། །དེ་ནས་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་བཀའ་སྩལ་པ། གང་གི་ཚེ་གདོང་དམར་དང་རྒྱ་འཐབ་པའི་དུས་ལ་བབ་པ་དེའི་ཚེ་ནུ་བོ་ཁྱོད་ཀྱིས་བྱ་བའི་དུས་ལ་བབ་བོ། །རབ་ངེས་ཀྱང་སེམས་ཅན་ལ་ཕན་པའི་ཕྱིར་ཤེས་བཞིན་དུ་ཡང་སྐྱེ་བ་ལེན་པར་འགྱུར་རོ། །སངས་རྒྱས་བཅོམ་ལྡན་འདས་དེ་དག་གིས་འདིར་འོད་ཟེར་བཏང་ནས། བཅོམ་ལྡན་འདས་ཤཱཀྱ་ཐུབ་པ་ལ་སྐྱེས་བསྐུར་ཏེ། སྐྱེས་དེ་དག་ཀྱང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདིར་ཁྱེར་ཏེ་འོངས་ནས། སེམས་ཅན་འཇིགས་ཤིང་སྐྲག་པ་རྣམས་ཀྱི་དོན་གྱི་ཕྱིར་སྙིང་རྗེས་སངས་རྒྱས་ཀྱི་ཞིང་རྣམས་ཀྱང་བྱུང་ངོ་། །གཟུངས་སྔགས་དེ་དག་དང་འོད་ཟེར་དེ་དག་ཀྱང་ལི་ཡུལ་གྱི་དོན་དུ་སངས་རྒྱས་ཀྱིས་བཞེས་ནས་དེ་དག་གི་གྲོགས་སུ་འགྱུར་རོ། །བྱང་ཆུབ་སེམས་དཔའ་དག་ཀྱང་ཅི་ནས་ལི་ཡུལ་དེ་འཇིག་པར་མི་འགྱུར་བར་བྱ་བའི་ཕྱིར་སངས་རྒྱས་ཀྱི་ཞིང་སྣ་ཚོགས་ནས་ཤི་འཕོས་ནས་དེར་སྐྱེ་བ་ལེན་པར་འགྱུར་རོ། །གང་གི་ཚེ་ལི་ཡུལ་དུ་གནོད་པ་བྱུང་ན་དེའི་ཚེ་སངས་རྒྱས་དེ་དག་གི་མཚན་དང་། གཟུངས་སྔགས་དེ་དག་དང་། འོད་ཟེར་གྱི་མིང་དེ་དག་བྲིས་ཏེ། གྲོང་ཁྱེར་གྱི་སྒོ་རྣམས་སུ་བཞག་ལ། དམག་གི་ནང་དུ་ཡང་བྲིས་ཏེ། རྒྱལ་མཚན་ལ་གདགས་སོ། །ཡང་ན་མིང་དེ་དག་འཛིན་དུ་གཞུག་ཅིང་བཀླག་པ་དང་བཅང་བར་བྱའོ། །ཕ་རོལ་གྱི་དམག་ཚོགས་དང་། མུ་གེ་རབ་ཏུ་ཞི་བར་བྱ་བ་དང་། དགེ་བའི་ཕྱོགས་འཕེལ་བར་བྱ་བ་དང་། སྡིག་པ་འབྱང་བར་བྱ་བ་དང་། ནད་ལས་ཐར་བར་བྱ་བ་རྣམས་ལ་ཡང་ཕན་པར་བྱེད་པ་ཡིན་ནོ། །གང་ལ་སྡིག་པ་ལྕི་བ་ཡོད་ན་དེས་ཞག་ཉི་ཤུ་རྩ་གཅིག་གི་བར་དུ་ཕྱོགས་བཅུའི་སངས་རྒྱས་རྣམས་ལ་རིམ་གྲོ་བྱས་ཏེ། སྐུ་གདུང་དང་ལྡན་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་དུས་གསུམ་དུ་བཟླས་བརྗོད་བྱས་ན་དགེ་བའི་ཕྱོགས་ལས་གང་འདོད་པ་མྱུར་དུ་ཐོབ་པར་འགྱུར་ཏེ། འོད་ཟེར་དེ་དག་ཀྱང་དེའི་སྟེང་དུ་གནས་པར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ། །ཕ་རོལ་གྱི་དམག་ཚོགས་J04,V055,P4A འོང་བ་ལ་ཡང་བཟླས་བརྗོད་བྱའོ། །ཡང་ན་ཉིན་གཅིག་བཞིན་དུ་ལན་བདུན་བདུན་བཀླག་པར་བྱའོ། །གང་སྡུག་བསྔལ་བར་གྱུར་པའམ། ནད་པའམ། ཡང་ན་ཇི་ལྟ་བུར་འདོད་ཀྱང་རུང་སྟེ་བཟླས་བརྗོད་བྱའོ། །ཡང་ན་བཀླག་པར་བྱའོ། །ཅི་སྟེ་མི་ཀློག་ན་ཡང་སྐུད་པ་ལ་མདུད་པ་བདུན་བོར་ཏེ་ལན་བདུན་བདུན་བཟླས་བརྗོད་བྱས་ནས་བཏགས་ན་སྡུག་བསྔལ་ལས་ཐར་བར་འགྱུར་རོ། །གྲོང་ཁྱེར་གང་གི་སྒོ་ལ་བཏགས་ན་གྲོང་ཁྱེར་དེར་དགྲ་འོང་མི་ནུས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །གང་གི་ཚེ་གདོང་དམར་དང་རྒྱ་འཐབ་པའི་དུས་ལ་བབ་པ་དེའི་ཚེ་གཞོན་ནུ་རྡོ་རྗེ་སྡེ་བཅོམ་ལྡན་འདས་ཀྱིས་ལས་སུ་བསྐོས་པ་དེ་རྣམ་པར་རྒྱལ་བའི་གོ་ཆ་ཞེས་བྱ་བར་གྱུར་པ་ན་ཕྲིན་ཡིག་འདི་གསེར་གྱི་རིགས་ཀྱི་ཡུལ་དུ་ཁྱེར་ལ་ཕྲིན་ཡིག་འདི་གསེར་གྱི་རིགས་ཀྱི་རྒྱལ་པོ་ལ་བསྟན་པར་བྱ་སྟེ། མི་མང་པོའི་མིག་སྔར་ནི་བསྟན་པར་མི་བྱའོ། །ཡུལ་དེའི་གླུད་ཀྱང་ཁྱེར་ལ་ཁ་ཅིག་ནི་དེར་བསྐུར་བར་བྱའོ། །ཁ་ཅིག་ནི་སྐར་རྡོར་གཞག་པར་བྱའོ། །གང་གི་ཚེ་སངས་རྒྱས་བཅོམ་ལྡན་འདས་ཀྱིས་འདི་སྐད་དུ་སྔོན་བྱུང་བ་ནི་འདི་ལྟ་བུའོ། །མ་འོངས་པའི་དུས་ན་ནི་འདི་ལྟར་འགྱུར་རོ་ཞེས་བཀའ་སྩལ་པ། དེའི་ཚེ་བཅོམ་ལྡན་འདས་རྡོ་རྗེའི་དཀྱིལ་འཁོར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཟླ་བའི་ཏོག་ཅེས་བྱ་བའི་ཏིང་ངེ་འཛིན་དང་། དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་དང་། མི་གཡོ་བ་ཞེས་བྱ་བའི་ཏིང་ངེ་འཛིན་དང་། རྣམ་པ་ཐམས་ཅད་མེད་པ་ཞེས་བྱ་བའི་ཏིང་ངེ་འཛིན་དང་། དགའ་བའི་དབང་བསྐུར་བ་ཞེས་བྱ་བའི་ཏིང་ངེ་འཛིན་དང་། ཐམས་ཅད་ཀྱི་རྒྱན་ཅེས་བྱ་བའི་ཏིང་ངེ་འཛིན་དང་། དཔའ་བའི་རྒྱལ་མཚན་ཞེས་བྱ་བའི་ཏིང་ངེ་འཛིན་དང་། འོད་ཆེན་པོ་ཞེས་བྱ་བའི་ཏིང་ངེ་འཛིན་དང་། དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་དང་། ཏིང་ངེ་འཛིན་བཅུ་པོ་འདི་དག་ལ་སངས་རྒྱས་བཅོམ་ལྡན་འདས་སྙོམས་པར་ཞུགས་ནས་སྨིན་མཚམས་ཀྱི་གསེབ་ནས་སྣང་བ་ཆེན་པོ་ཞེས་བྱ་བའི་འོད་ཟེར་

---

^{[མ་དཔེ་གཟིགས་ན་འདིར་གནོན།]}

བྱུང་ངོ་། །འོད་ཟེར་དེ་ལས་ཀྱང་འོད་ཟེར་བཅུ་བྱུང་ནས་སངས་རྒྱས་ཀྱི་ཞིང་ཐམས་ཅད་དུ་སོང་ངོ་། །J04,V055,P4B སོང་ནས་ཀྱང་སངས་རྒྱས་ཀྱི་ཞིང་གྲངས་མེད་པར་འཕྲོས་སོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་ཇི་སྙེད་ཡོད་པའི་ཞིང་དེ་དག་ཐམས་ཅད་དུ་ཇི་ལྟར་ལི་ཡུལ་དུ་རྡོ་རྗེ་གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་ཀྱི་ཕྱིར་སྔར་བཤད་པ་བཞིན་དུ་ཚིག་ཏུ་བརྗོད་པ་དེ་དག་བྱུང་ངོ་། །དེ་ནས་དེའི་ཚེ་སངས་རྒྱས་བཅོམ་ལྡན་འདས་དེ་དག་དང་། བཅོམ་ལྡན་འདས་ཤཱཀྱ་ཐུབ་པས་དགོངས་པ་འཐུན་པར་རྡོ་རྗེའི་དཀྱིལ་འཁོར་ཞེས་བྱ་བའི་གཟུངས་སྔགས་འདི་གསུངས་སོ། །ཏདྱ་ཐཱ། བོ་དྷི་བོ་དྷི། སརྦ་ཨ་ལང་ཀཱ་ར། བ་ར་ག་ཏ། དྷརྨ་ཙ་ཀྲ། བ་ར་ག་ཏ། མ་ར་སཻ་ནྱ་པ་ར་ག་ཏ། ཨ་བི་ཥ་ཡ་པ་ར་གཱ་ཏཱ། ཨ་བི་དྱཱ་པྲཏྱཱ་ཡ། སང་སྐ་ར་པྲ་ཏྱཱ་ཡ། ནཱ་མ་རུ་པ་པྲ་ཏྱཱ་ཡ། བྷ་བ་པྲ་ཏྱཱ་ཡ། ནི་རུད་དྷ་པྲ་ཏྱཱ་ཡ། ཏ་ཐཱ་ག་ཏ། མ་ར་ཎ་ཧ་ར། བུད་དྷྱ་སད་ཏྱེ་ན། ནཱ་ག་སད་ཏྱེ་ན། ཨ་སུ་ར་སད་ཏྱེ་ན། སརྦ་བ་ར་སད་ཏྱེ་ན། རྡོ་རྗེའི་དཀྱིལ་འཁོར་ཞེས་བྱ་བའི་གཟུངས་སྔགས་འདི་ནི་སངས་རྒྱས་ཐམས་ཅད་ཀྱིས་གསུངས་ཏེ། གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་ཐོས་པ་དེའི་མོད་ལ་རྡོ་རྗེའི་དཀྱིལ་འཁོར་གྱི་གཟུངས་སྔགས་རྟོགས་པར་འགྱུར་རོ། །གང་གི་ཚེ་ལི་ཡུལ་གྱི་དོན་གྱི་ཕྱིར་སངས་རྒྱས་རྣམས་ཀྱིས་ཆོས་འདི་གསུངས་པ་དེའི་ཚེ། ལྷ་མོ་དྲི་མ་མེད་པའི་འོད་ཀྱིས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བདག་ནི་སངས་རྒྱས་བཅོམ་ལྡན་འདས་ཉིད་ཀྱིས་མཁྱེན་པ་ལགས་ཏེ། བདག་སངས་རྒྱས་ཀྱི་ཞིང་ཡོངས་སུ་དག་པ། རྣམ་པར་སྣང་མཛད་ཀྱི་འོད་ཟེར་གྱིས་སོ་སོར་བརྒྱན་པའི་འཇིག་རྟེན་གྱི་ཁམས་སངས་རྒྱས་བཅོམ་ལྡན་འདས་པད་མའི་འདབ་མ་དྲི་མ་མེད་པའི་རྒྱུ་སྐར་གྱི་རྒྱལ་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པའི་སངས་རྒྱས་ཀྱི་ཞིང་ནས། མི་མཇེད་ཀྱི་འཇིག་རྟེན་གྱི་ཁམས་འདིར་མའི་དོན་བགྱི་བ་དང་། དམ་པའི་ཆོས་པད་མ་དཀར་པོ་དོན་དུ་གཉེར་བ་དང་། དེ་བཞིན་གཤེགས་པ་ཤཱཀྱ་ཐུབ་པའི་དྲུང་དུ་སྨོན་ལམ་གདབ་པའི་སླད་དུ་

---

^{[མ་དཔེ་གཟིགས་ན་འདིར་གནོན།]}

མཆིས་ཏེ། དགེ་བསྙེན་མ་ཧུ་ཤ་ཞེས་བྱ་བར་གྱུར་ནས་བྲམ་ཟེ་རྒྱ་མཚོའི་རྡུལ་དང་མཇལ་བ་སླན་ཆད་ལུང་བསྟན་པ་ཐོབ་སྟེ། དེའི་ཚེ་དེར་སྨོན་ལམ་བཏབ་པས། གང་དུ་ཁྱོད་སངས་རྒྱས་སུ་འགྱུར་བའི་འཇིག་རྟེན་གྱི་ཁམས་དེར་བདག་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག་ཅེས་བགྱིས་ནས། འཇིག་རྟེན་གྱི་ཁམས་རྣམ་པར་སྣང་མཛད་ཀྱི་འོད་ཟེར་གྱིས་སོ་སོར་བརྒྱན་པ་ཞེས་བགྱི་བ་དེ་བཞིན་གཤེགས་པ་པད་མའི་འདབ་མ་དྲི་མ་མེད་པ་རྒྱུ་སྐར་གྱི་རྒྱལ་པོ་མངོན་པར་ཤེས་པའི་མེ་ཏོག་ཀུན་ཏུ་རྒྱས་པའི་སངས་རྒྱས་ཀྱི་ཞིང་དེ་ནས། མི་མཇེད་ཀྱི་འཇིག་རྟེན་གྱི་ཁམས་འདིར་བཅོམ་ལྡན་འདས་ཤཱཀྱ་ཐུབ་པའི་ཐད་དུ་མཆིས་ནས། བཅོམ་ལྡན་འདས་ཀྱིས་བཀའ་སྩལ་པ། མི་མཇེད་ཀྱི་འཇིག་རྟེན་གྱི་ཁམས་ཀྱི་མི་རྣམས་ནི་ཆགས་ཤིང་ཞེན་ལ་སྡང་ཞིང་ང་རྒྱལ་གྱིས་ཁེངས་པ་དང་འགྱིང་བ་སྟེ། དེ་དག་གི་དོན་དུ་བྱང་ཆུབ་སེམས་དཔའ་རྣམས་ཕན་ཚུན་ལས་ཆེན་པོ་ཉམས་སུ་ལེན་པར་བྱེད་དེ། དེ་དག་གི་སྡིག་པ་རྣམས་ཚེ་རབས་ཀུན་ཏུ་སེལ་བར་བྱེད་དོ། །ཞེས་གསུངས་སོ། །དེའི་ཚེ་བདག་གིས་སྨོན་ལམ་བཏབ་པ་ཇི་ལྟ་བུའི་ཚུལ་དང་ཐབས་ཀྱིས་དེར་གཞན་དག་མཆི་བ་དེ་བཞིན་དུ་བདག་ཀྱང་མཆི་བར་གྱུར་ཅིག་ཅེས་བགྱིས་ནས། དེའི་ཚེ་ཚེ་རབས་སྔ་མ་ལ་བདག་གི་མར་གྱུར་པ་དེའི་དོན་བགྱི་བ་དང་། ཅི་ནས་ངན་སོང་དུ་མི་མཆི་བར་བགྱི་བའི་སླད་དུ་སྐྱེ་བ་བླངས་སོ། །སྔོན་གྱི་མི་མཇེད་ཀྱི་འཇིག་རྟེན་གྱི་ཁམས་སུ་དགེ་བསྙེན་མ་ཧུ་ཤ་ཞེས་བྱ་བར་གྱུར་པ་དང་། གཞོན་ནུ་ནོར་བཟངས་ཀྱིས་རྣམ་པར་ཐར་པ་བདག་ལ་དྲིས་པ་སླན་ཆད་བདག་གིས་མིའི་ནང་དུ་མིའི་སྐྱེ་བ་བླངས་ཏེ། བདག་གིས་སེམས་ཅན་དག་དང་འདོད་ཆགས་སྤྱད་ནས་མི་གཞན་གྱིས་བདག་ལ་ཁོ་མོ་ཡང་གླེན་མར་མཐོང་ངོ་། །སེམས་ཅན་རྣམས་ཡོངས་སུ་གྲོལ་བའི་སླད་དུ་བུད་མེད་ཀྱི་ནང་དུ་མི་བཟད་པའི་སྐྱེ་བ་མང་པོ་དག་བླངས་ཏེ། རྒྱལ་མོ་དང་། རྒྱལ་པོའི་བུ་མོ་དང་། བུད་མེད་ཕལ་དང་། སྨད་འཚོང་མ་དང་། སྡུག་ཕོངས་པ་དང་། བུད་མེད་དབུལ་མོ་དག་ཏུ་གྱུར་ཏེ། བུད་མེད་དུ་སྐྱེས་པ་རྣམས་ཀྱི་དོན་བགྱིད་པ་དང་། བུད་མེད་རྣམས་ཡོངས་སུ་གྲོལ་བར་བགྱིད་དོ། །རང་གི་ལས་ཀྱི་དབང་གིས་ཇི་ལྟར་

---

^{[མ་དཔེ་གཟིགས་ན་འདིར་གནོན།]}

འདོད་པའི་འདོད་ཆགས་སྤྱད་ཀྱང་སེམས་ཅན་དེ་དག་མགུ་བར་མ་ནུས་ཏེ། ཚེ་རབས་དུ་མར་མི་མཇེད་ཀྱི་འཇིག་རྟེན་གྱི་ཁམས་འདིར་སེམས་ཅན་གྱི་དོན་གྱི་སླད་དུ་སྡུག་བསྔལ་མང་པོ་ཉམས་སུ་མྱོང་སྟེ། བུད་མེད་དུ་སྐྱེ་བས་ཤིན་ཏུ་སྐྱོ་བར་གྱུར་ན་འོན་ཀྱང་བཅོམ་ལྡན་འདས་ཀྱིས་སུག་ལས་ཆེན་པོར་བཀའ་སྩལ་ཏེ། ཚེ་རབས་གྲངས་མ་མཆིས་པར་བདག་གིས་སྡུག་བསྔལ་བཟོད་པར་བགྱི་འཚལ་ཏེ། བཅོམ་ལྡན་འདས་ཤཱཀྱ་ཐུབ་པ་མཉེས་པར་བགྱི་བ་དང་། སངས་རྒྱས་ཉིད་བསྒྲུབ་པའི་སླད་དུ་བདག་གིས་སྨོན་ལམ་ཆེན་པོ་བཏབ་པ། སེམས་ཅན་ཐམས་ཅད་ལ་ཕན་པའི་སླད་དུ་ཚེ་རབས་གཞན་དག་ཏུ་བདག་ལ་སྡུག་བསྔལ་འབྱུང་བར་འགྱུར་བ་ཐམས་ཅད་བདག་གིས་བཟོད་པར་བགྱིའོ། །ཡུལ་དེ་སྲུངས་ཤིག་ཅེས་བཅོམ་ལྡན་འདས་ཀྱིས་བདག་ལ་བཀའ་སྩལ་པ་གང་ལགས་པ་དེ་ན་ད་དུང་མི་ཡང་མ་མཆིས། ཡུལ་ཡང་མ་བྱུང་མོད་ཀྱི་སངས་རྒྱས་བཅོམ་ལྡན་འདས་དེ་དག་དང་འཁོར་དེར་འདུས་པ་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་། མི་དང་མི་མ་ཡིན་པ་ཐམས་ཅད་ལས་དམ་པ་བླང་བར་བགྱིའོ། །ཇི་སྲིད་དུ་བདག་ཚེ་རབས་དེ་དག་ཏུ་སྐྱེ་བ་ན་བདག་ལ་འདོད་ཆགས་དང་། ཞེ་སྡང་གི་གཞིར་མཐོང་ན་ཡང་བདག་ལ་སྡིག་པར་མ་གྱུར་ཅིག །ཅི་རིགས་པར་སྐྱེ་བའི་དུས་འཚལ་བར་གྱུར་ལ་འདི་ལྟ་བུ་ཡོངས་སུ་འཛིན་པར་གྱུར་ཅིག །གང་གི་ཚེ་ལི་ཡུལ་ཐོག་མ་འབྱུང་བའི་དུས་ལ་བབ་པ་ན། དེའི་ཚེ་ཡུལ་བགྱིད་པའི་སླད་དུ་དེར་བདག་ཐོག་མར་རྒྱལ་པོར་གྱུར་ཅིག །ལི་ཡུལ་དུ་ནམ་རྒྱལ་པོ་དེ་དག་གི་མིང་ཆགས་ཤིང་རྒྱལ་རབས་ཐོག་མར་བྱུང་བ་ན་ཚེ་རབས་བདུན་དུ་རྒྱལ་པོ་བྱེད་པར་གྱུར་ཅིག །གྲོང་ཁྱེར་དངར་ལྡན་ཞེས་བགྱི་བ་ཡང་བགྱིའོ། །བལ་པོ་སེའུ་ཚལ་དུ་ནི་སངས་རྒྱས་ཀྱི་མཆོད་རྟེན་ཆེན་པོ་བགྱིའོ། །ཡུལ་རྟ་འཇུག་ཏུ་ནི་ཆོས་དང་ལྡན་པའི་རྒྱལ་པོའི་མཆོད་རྟེན་བགྱིའོ། །འགུམ་ཏི་རར་ནི་དགེ་འདུན་གྱི་ཀུན་དགའ་ར་བ་ཆེན་པོ་བགྱིའོ། །རྩ་རྨ་བ་ནར་ཡང་དགེ་འདུན་གྱི་ཀུན་དགའ་ར་

---

^{[མ་དཔེ་གཟིགས་ན་འདིར་གནོན།]}

བ་ཆེན་པོ་བགྱིའོ། །པ་ཡ་དི་ཀར་ནི་དྲི་གཙང་ཁང་ཆེན་པོ་དང་། མཆོད་རྟེན་ཆེན་པོ་བགྱི་སྟེ། ཇི་སྲིད་དུ་བདག་རྒྱལ་སྲིད་ལ་གནས་པ་དེ་སྲིད་དུ་ལས་ཆེན་པོ་དག་བགྱིའོ། །གང་གི་ཚེ་རྒྱལ་པོ་ཤི་འཕོས་པར་གྱུར་པ་ན་ཡང་བྱང་ཆུབ་སེམས་དཔའ་བྱམས་པ་གང་ན་བཞུགས་པའི་ལྷའི་ནང་དུ་སྐྱེ་བར་འགྱུར་ཏེ། བདག་དེ་ན་མཆི་བའི་ཏིང་ངེ་འཛིན་རྣམས་དྲན་པར་གྱུར་ཅིག །དེ་ནས་སླར་ཡང་ལི་ཡུལ་འདིར་སྐྱེ་བ་ལེན་ཅིང་ཇི་ལྟར་བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་བུད་མེད་ཀྱི་གཟུགས་སུ་གྱུར་ཏེ། ཡང་སྐར་རྡོའི་རྒྱལ་པོའི་བུ་མོ་རབ་ངེས་ཞེས་བྱ་བར་གྱུར་ནས། སངས་རྒྱས་བཅོམ་ལྡན་འདས་རྣམས་ཀྱིས་གཟུངས་སྔགས་ཇི་སྙེད་གསུངས་པ་དང་བདག་གིས་རྟོགས་པ་གང་ལགས་པའི་གཟུངས་སྔགས་དེ་དག་ཐམས་ཅད་དེའི་ཚེ་བདག་གིས་དྲན་པར་གྱུར་ཅིག །མདོ་སྡེ་འདི་ཡང་ཤིན་ཏུ་དྲན་པར་གྱུར་ཏེ། ཅི་ནས་ཐམས་ཅད་རྒྱས་པར་གྱུར་ཅིག །གང་གི་ཚེ་དམག་སྡེ་གཉིས་འཐབ་པར་འགྱུར་བ་དང་། ལི་ཡུལ་གྱི་དོན་གྱི་ཕྱིར་ལས་སུ་བྱ་བ་ཡོད་པར་གྱུར་པ་དང་། གང་གི་ཚེ་གཞོན་ནུ་རྡོ་རྗེ་སྡེ་སྐར་རྡོའི་རྒྱལ་པོ་རྣམ་པར་རྒྱལ་བའི་གོ་ཆ་ཞེས་བྱ་བར་གྱུར་ནས་ལི་ཡུལ་གྱི་ཕྱིར་གླུད་འཇལ་བའི་དུས་ལ་བབ་པ་དེའི་ཚེ་བདག་རབ་ངེས་ཞེས་བྱ་བར་གྱུར་པས་སངས་རྒྱས་བཅོམ་ལྡན་འདས་དེ་དག་ཐམས་ཅད་དང་། འཁོར་དེའི་ནང་དུ་ཇི་སྙེད་འདུས་པར་གྱུར་པའི་ལྷ་དེ་དག་ཐམས་ཅད་གྲོགས་སུ་གྱུར་ཏེ། མདོ་འདི་དང་། གཟུངས་སྔགས་རྣམས་བཤད་པའི་གཟུངས་སྔགས་དེ་དག་ཐམས་ཅད་དང་། ཏིང་ངེ་འཛིན་ཐམས་ཅད་བདག་གིས་ཚེ་རབས་ཐམས་ཅད་དུ་དྲན་པར་གྱུར་ཅིག་ཅེས་བྱས་སོ། །གང་གི་ཚེ་ལྷ་མོ་དྲི་མ་མེད་པའི་འོད་ཀྱིས་ཚིག་དེ་སྐད་ཅེས་སྨྲས་པ་དེའི་ཚེ། དེས་ཏིང་ངེ་འཛིན་རྣམས་ཐོབ་སྟེ། ཅི་ནས་མདོ་འདི་ལ་སུས་ཀྱང་གནོད་པ་བྱེད་མི་ནུས་པར་གྱུར་པའི་ཏིང་ངེ་འཛིན་ཐེག་པ་ཆེན་པོའི་མདོ་དམ་པའི་ཆོས་པད་མ་དཀར་པོའི་ཀློང་འཁྱིལ་བ་ཞེས་བྱ་བ་ཐོབ་སྟེ། དེའི་ཚེ་སངས་རྒྱས་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ་འདི་སྐད་ཅེས་བཀའ་སྩལ་ཏོ། །གང་གི་ཚེ་ཁྱོད་ལས་རྩོམ་པ་དེའི་ཚེ་འོད་ཟེར་དེ་དག་སྟེང་དུ་གནས་པར་གྱུར་ཏེ།

---

^{[མ་དཔེ་གཟིགས་ན་འདིར་གནོན།]}

དེའི་ཚེ་གང་གིས་མདོ་འདི་དྲན་པར་འགྱུར་ཞིང་ཤིན་ཏུ་ཉམས་སུ་ལེན་པར་འགྱུར་བའི་ཏིང་ངེ་འཛིན་སངས་རྒྱས་ཡིད་ལ་བྱེད་པ་ཞེས་བྱ་བ་རྟོགས་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱིས་རྡོ་རྗེའི་དཀྱིལ་འཁོར་ཞེས་བྱ་བའི་གཟུངས་སྔགས་གསུངས་པ་དེའི་རང་བཞིན་གང་གིས་གཟུངས་སྔགས་རྟོགས་པར་འགྱུར་བ་དང་། ཏིང་ངེ་འཛིན་སྦྱོང་བ་དང་། སྔོན་སངས་རྒྱས་བཅོམ་ལྡན་འདས་རྣམས་ལས་ཆོས་ཐོས་པ་དེ་དག་ཐམས་ཅད་ཀྱང་དྲན་པར་བྱེད་དོ། །ལྷ་མོ་དྲི་མ་མེད་པའི་འོད་དེས་ཀྱང་བྱང་ཆུབ་སེམས་དཔའ་དག་གིས་ཏིང་ངེ་འཛིན་དང་། གཟུངས་སྔགས་ཇི་ལྟར་རྟོགས་པ་དེ་དེ་བཞིན་དུ་རྟོགས་པར་བྱེད་དོ། །རྣམ་པར་རྒྱལ་བའི་གོ་ཆ་ཞེས་བྱ་བས་ཀྱང་རྒྱལ་སྲིད་ཐོབ་པར་འགྱུར་ཏེ། གཞན་གྱིས་བར་ཆད་བྱེད་མི་ནུས་སོ། །དེ་དག་གི་ལས་ནི་ལན་བདུན་བཟླས་བརྗོད་བྱས་ལ་རྟ་གནས་ཀྱི་རིག་སྔགས་གང་གིས་སྡིག་པ་རྣམས་འབྱང་བར་འགྱུར་བར་ཡང་བརྗོད་པར་བྱ་སྟེ། ཉིན་ལན་གསུམ་མཚན་ལན་གསུམ་བརྗོད་ན་ལོ་བདུན་གྱིས་རྡོ་རྗེའི་དཀྱིལ་འཁོར་གྱི་གཟུངས་སྔགས་རྟོགས་པར་འགྱུར་རོ། །སངས་རྒྱས་བཅོམ་ལྡན་འདས་ཀྱིས་རྡོ་རྗེའི་དཀྱིལ་འཁོར་གྱི་གཟུངས་སྔགས་འདི་བཤད་པ་དེའི་ཚེ་བཅོམ་ལྡན་འདས་ཀྱི་སྟེང་དུ་ལྷ་རྣམས་ཀྱིས་ལྷའི་མེ་ཏོག་གི་ཆར་ཕབ་སྟེ། ལྷའི་རོལ་མོའི་སྒྲ་བསྒྲགས་ནས་འདི་སྐད་ཅེས་སྨྲས་སོ། །བདག་ཅག་གིས་ཀྱང་སྔོན་སངས་རྒྱས་བཅོམ་ལྡན་འདས་རྣམས་ལས་ཐོས་པའི་གཟུངས་སྔགས་རྣམས་སྩལ་བར་བགྱིའོ། །ན་མཿསརྦ་ཨ་ཏྱུད་གཏ། བཛྲ་མཎ་ཌ་ལོད་ཏ་མ་སྱ། ཏ་ཐཱ་ག་ཏ་སྱ། ཀ་ན་ཀཱ་བྷ། སད་ཏྱ་སྱ། བོ་དྷི་ས་ཏྭ་སྱ། ཏདྱ་ཐཱ། བུད་དྷ་སད་ཏྱེ་ན། ད་ས་བི་རི། དེ་ན་ཧ་ཡ་རི། ཀུ་རྩི་རུ་པྲ་ཏི་པ་ད་རི་པ་བྷ་བ་ཏུ། ཙི་ཏུ་མ་ཏུ་ག་ལ་ར་ཡ་ཀ་ད་མ་པ་ཏུ། ས་པ་ཛ་མ་ས་ར་ཏ་སྭཱ་ཧཱ། གཟུངས་སྔགས་འདི་ནི་ལྷ་རྣམས་ཆད་པས་གཅོད་པའི་གཟུངས་སྔགས་ཞེས་བྱ་སྟེ། ལན་བརྒྱ་རྩ་བརྒྱད་བཟླས་བརྗོད་བྱས་ལ་རྩྭ་དཱུར་བ་བརྒྱ་རྩ་བརྒྱད་སྦྱིན་སྲེག་བྱས་ན་གང་ཅི་བྱེད་ཀྱང་རུང་སྟེ་ལྷ་རྣམས་ཀྱིས་གཞིགས་པར་མི་ནུས་སོ། །དཀྱིལ་འཁོར་ཟླུམ་པོར་བྱས་ཏེ། ལན་བརྒྱ་རྩ་བརྒྱད་བཟླས་བརྗོད་བྱས་ལ་མདུད་པ་བརྒྱ་རྩ་བརྒྱད་བོར་ནས་གང་དུ་བརྗོད་པ་དེར་འབྱུང་པོས་གནོད་པ་བྱེད་མི་ནུས་སོ། །བྱད་སྟེམས་

---

^{[མ་དཔེ་གཟིགས་ན་འདིར་གནོན།]}

བྱེད་པར་ཡང་མི་ནུས་སོ། །དེ་ནས་དེའི་ཚེ་འཁོར་དེ་དག་ཐམས་ཅད་ཀྱིས་གཟུངས་སྔགས་འདི་བཤད་དོ། །ཏདྱ་ཐཱ། སརྦ་དེ་བ་ནན། སརྦ་བརྵ་ནན། ནིརྫི་ཏ་བརྫི་ཏེ། སྐན་དྷ་ན་ཙ་བན། ནད་ཏ་མ་ན་པ་ན་ག་ས་ར། ད་ད་ཙ་ཙ་པ་པ། ཙ་ད་མི་མ། བྷསྠི་མེ། དན་ཌ་ཀ་ར་ན་ཧ་ར། ས་བ་ར། དེ་བ་མ་ར་སྭཱ་ཧཱ། ས་བ་པ་བརྵ་ཀ་ར་ན་སྭཱ་ཧཱ། འཁོར་ཐམས་ཅད་ཀྱིས་བཤད་པའི་གཟུངས་སྔགས་འདི་ལན་བརྒྱ་རྩ་བརྒྱད་བཟླས་བརྗོད་བྱ་སྟེ། མདུད་པ་བརྒྱ་རྩ་བརྒྱད་བྱས་ནས་སྐུད་པ་དེ་བསྲེགས་ན་ཁྱིམ་དེར་བྱད་སྟེམས་ཀྱིས་མི་ཚུགས་ལ་འབྱུང་པོའི་ནད་རྣམས་ཀྱང་མེད་པར་འགྱུར་རོ། །ཏདྱ་ཐཱ། རཱ་ཏི་ཐཱ་ཀ་ར། དེ་བ་བ་ཕུ་ཛི་ཛི་རི་ཀུ་ཛིད་ཏི་ཕུ་སྭཱ་ཧཱ། གཟུངས་སྔགས་འདི་ལྐོག་མ་ན་བ་ལ་ལན་བདུན་བཟླས་བརྗོད་བྱས་ནས་གཡག་རྔ་ལ་མདུད་པ་བདུན་བོར་ཏེ། གདགས་པར་བྱའོ། །ཏདྱ་ཐཱ། སརྦ་བུད་དྷ་ད་མ་བ་ཥ་ཀ་ར་བ་བ་ར་ཙ་ཙ་ར་ས་ས་ར་སྭཱ་ཧཱ། གཟུངས་སྔགས་འདི་ལུས་ལ་ནད་བྱུང་བ་ཐམས་ཅད་ལ་ལན་བདུན་བཟླས་བརྗོད་བྱས་ནས་སྐུད་པ་ལ་མདུད་པ་བདུན་བོར་ཏེ་གདགས་སོ། །དེ་ནས་དེའི་ཚེ་འཁོར་དེ་དག་ཐམས་ཅད་ཀྱིས་པུས་མོའི་ལྷ་ང་ས་ལ་བཙུགས་ཏེ། འདི་སྐད་ཅེས་གསོལ་ཏོ། །གང་གི་ཚེ་གཞོན་ནུ་རྡོ་རྗེ་སྡེ་ཡུལ་སྐར་རྡོ་ནས་ལི་ཡུལ་དུ་མཆི་བ་དེའི་ཚེ་གཟུངས་སྔགས་གང་གིས་ཤུལ་དུ་དཔའ་བོའི་ལས་བགྱིད་པར་འགྱུར་བའི་གཟུངས་སྔགས་བདག་ཅག་གིས་སྩལ་བར་འཚལ་ལོ། །ཏདྱ་ཐཱ། དེ་བུ་བུ་དེ་དེ་བི་བི་ས་ས། བ་བ་ར་ཏི་ཀ་ར་སྭཱ་ཧཱ། ཏདྱ་ཐཱ། ཤ་ར་ཀ་ར་བཱ། ཛྲད་ཚེ་བ་ར། ཤད་ཏྲ་ཏྲ། ན་ཛི་སྭཱ་ཧཱ། གཟུངས་སྔགས་འདི་འགྲོན་དུ་འགྲོ་བ་རྣམས་ཀྱིས་ལན་བདུན་བཟླས་བརྗོད་བྱས་ཏེ། ཁྲུས་བྱས་ལ་ལག་པར་བླུགས་ནས་ལན་བདུན་བཟླས་བརྗོད་བྱས་ཏེ། ཕྱོགས་བཞིར་འཐོར་རམ། བདག་ཉིད་ཀྱིས་འཐུངས་ན་དེ་ལ་དགྲས་གནོད་པ་བྱེད་པར་མི་ནུས་ཏེ། དཔའ་བོའི་ལས་ཀྱང་བྱེད་པར་འགྱུར་རོ། །དེ་ནས་དེ་བཞིན་གཤེགས་པ་རྡོ་རྗེ་རྒྱལ་མཚན་གྱིས་འདི་སྐད་ཅེས་བཀའ་སྩལ་ཏེ། དེ་བཞིན་དུ་རྣམ་ཐོས་ཀྱི་བུ་དང་། དབང་ཕྱུག་ཆེན་པོ་དང་། ཀུན་ཏུ་རྒྱལ་བ་དང་། འཕྲོག་མ་བུ་དང་བཅས་པ་རྣམས་ཀྱིས་ཀྱང་འདི་སྐད་ཅེས་སྨྲས་སོ། །བདག་ཅག་གིས་ཀྱང་གཞོན་ནུ་རྡོ་རྗེ་སྡེ་དེ་ལ་ཅི་ནས་དགྲ་རྣམས་ཀྱིས་གནོད་པ་བྱེད་མི་ནུས་པར་གཟུངས་སྔགས་འདི་དག་སྦྱིན་ནོ། །ན་མོ་བཛྲ་དྷྭ་ཛ་སྱ། ཏ་ཐཱ་ག་ཏ་སྱ། ཏདྱ་ཐཱ། བཛྲ་

---

^{[མ་དཔེ་གཟིགས་ན་འདིར་གནོན།]}

བི་བི་བི་བི་མ་མ་ས་ཀ །སུ་མ་ཏེ། ཨད་དྷ་རེ། ཨད་ཛྭ་ལེ། བཱ་ད་ནི་སྭཱ་ཧཱ། ན་མོ་མ་ཧེ་ཤྭ་ར་སྱ། ན་མོ་བཻ་ཤྲ་མ་ཎ་སྱ། ན་མཿསན་ཙ་ཡ་སྱ། ན་མོ་ཧ་རི་ཏ་ཡེ་བ་སུ་པུ་ཏྲ། བ་རི་བཱ་རཱ་ཡ། ཏདྱ་ཐཱ། ས་ས་ས་ས། ཧཱ་ཧཱ་ཧཱ་ཧཱ། པྲི་ཡ་པྲི་ཡ་པྲི་ཡ་པྲི་ཡ། པུད་ཏྲ་པུད་ཏྲ་པུད་ཏྲ་པུད་ཏྲ། བར་དད་ཏ་ཀ་ར། ཙྪན་དྷ་མུ་ལེ་བིད་ཏྭེ་ཤ་ན་ཀཱ་རཱ་སྭཱ་ཧཱ། དབང་ཕྱུག་ཆེན་པོ་དང་། རྣམ་ཐོས་ཀྱི་བུ་དང་། ཀུན་ཏུ་རྒྱལ་བ་དང་། འཕྲོག་མ་བུ་དང་བཅས་པ་རྣམས་ཀྱིས་གཟུངས་སྔགས་འདི་བཤད་པ་ནས་འདི་སྐད་ཅེས་གསོལ་ཏོ། །ཇི་ལྟར་བཅོམ་ལྡན་འདས་ཀྱིས་བདག་ཅག་སུག་ལས་ཆེན་པོར་བསྐོས་པའི་གཟུངས་སྔགས་གཞན་གྱིས་མི་ཚུགས་པ་དེ་དག་བདག་ཅག་གིས་བཤད་པར་འཚལ་ལོ། །ལྷ་མོ་དྲི་མ་མེད་པའི་འོད་དེ་དང་། གཞོན་ནུ་རྡོ་རྗེ་སྡེ་སྐར་རྡོའི་རྒྱལ་པོ་རྣམ་པར་རྒྱལ་བའི་གོ་ཆར་འགྱུར་བ་གང་ལགས་པ་དེས་ཆད་པས་གཅད་པར་བགྱི་བ་དེ་ཡང་བདག་ཅག་གིས་བཤད་པར་བགྱིའོ། །གང་གི་ཚེ་དགྲའམ་སུ་ཡང་རུང་བ་དག་སྡིག་པའི་ལས་རྩོམ་པ་ན་གཟུངས་སྔགས་བཤད་པ་འདི་གཉིས་ལན་བདུན་བཟླས་བརྗོད་བྱ་སྟེ། སྐུད་པ་སྔོན་པོ་ལ་མདུད་པ་བདུན་བོར་ནས་བསྲེགས་ལ་མི་དེའི་མིང་ནས་བརྗོད་ན་གནོད་པ་བྱེད་མི་ནུས་སོ། །བདག་ཅག་གིས་ཡིད་དམ་དང་པོར་བཅས་པ་བཞིན་དུ་སྟེ་གཞོན་ནུ་རྡོ་རྗེ་སྡེ་དང་ལྷ་མོ་དྲི་མ་མེད་པའི་འོད་ཀྱི་བསམ་པ་ཡོངས་སུ་རྫོགས་པར་མ་བགྱིས་ན་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་སྐུ་བསླུས་པར་གྱུར་ཅིག་ཅེས་བྱས་སོ། །དེ་ནས་འཁོར་དེར་ཇི་སྙེད་འདུས་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་རྣམས་ཀྱིས་ཇི་ལྟར་དམ་བཅས་པ་བཞིན་དུ་བདག་ཅག་ཐམས་ཅད་ཀྱིས་ཀྱང་དམ་བཅས་ཏེ། དེ་ལྟར་མ་བགྱིས་ན་བདག་ཅག་གིས་དུས་གསུམ་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱི་སྐུ་བསླུས་པར་གྱུར་ཅིག །བདག་ཅག་ཐམས་ཅད་ཀྱིས་རྣམ་པར་རྒྱལ་བའི་གོ་ཆ་ཅི་ནས་ཀྱང་ལི་ཡུལ་གྱི་རྒྱལ་པོར་འགྱུར་བར་ཐམས་ཅད་སེམས་འཐུན་པས་ལྷན་

---

^{[མ་དཔེ་གཟིགས་ན་འདིར་གནོན།]}

ཅིག་ཏུ་དབང་བསྐུར་བར་བགྱིའོ། །གང་གི་ཚེ་གདོང་དམར་དང་རྒྱ་འཐབ་པར་འགྱུར་བ་དེའི་ཚེ། ཅི་ནས་ལི་ཡུལ་འཇིག་པར་མི་འགྱུར་བ་དང་། གང་གི་ཚེ་ཡུལ་གཞན་ནས་ལི་ཡུལ་དུ་རབ་ཏུ་བྱུང་བ་རྣམས་འོངས་པ་ན་དེར་ཅི་ནས་རིམ་གྲོ་མེད་པར་མི་འགྱུར་བ་དང་། ཡུལ་གཞན་ནས་དེར་སེམས་ཅན་བྲོས་པ་དེ་དག་དེར་གནས་འཐོབ་པར་འགྱུར་ཞིང་གདོང་དམར་གྱིས་བསྲེགས་པ་གང་ཡིན་པའི་མཆོད་རྟེན་ཆེན་པོ་དེ་དག་དང་། དགེ་འདུན་གྱི་ཀུན་དགའ་ར་བ་དེ་དག་འཆོས་པའི་གྲོགས་བྱེད་པར་འགྱུར་བར་བྱ་བའི་ཕྱིར་ལི་ཡུལ་གྱི་གླུད་འཇལ་བ་དང་། རྒྱ་དང་ཕན་ཚུན་དུ་བག་མ་གཏོང་བ་དང་ལེན་པར་བྱེད་དོ། །དེ་ནས་སངས་རྒྱས་བཅོམ་ལྡན་འདས་ཀྱིས་དེའི་ཚེ་ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་གཉིས་ལ་ལི་ཡུལ་གཏད་ནས། དེའི་ཚེ་སངས་རྒྱས་བཅོམ་ལྡན་འདས་ཀྱིས་གཞོན་ནུ་རྡོ་རྗེ་སྡེ་ལ་འདི་སྐད་ཅེས་བཀའ་སྩལ་ཏོ། །ཁྱོད་ལི་ཡུལ་གྱི་རྒྱལ་པོ་བྱེད་པ་དང་། ལྷ་མོ་དྲི་མ་མེད་པའི་འོད་ཀྱིས་གྲོགས་བྱེད་པར་འགྱུར་གྱིས། མདོ་འདི་ལས་ཇི་སྐད་བཤད་པ་བཞིན་དུ་ཁྱོད་ཀྱིས་ཐམས་ཅད་གྱིས་ཤིག །གང་གི་ཚེ་ཁྱོད་གསེར་གྱི་རིགས་ཀྱི་ཡུལ་དུ་ཕྱིར་ལོག་པ་དེའི་ཚེ་རྒྱའི་དམག་ལི་ཡུལ་དུ་འོངས་སོ་ཞེས་དེ་སྐད་ཐོས་པ་དང་། ཐེ་ཚོམ་མ་བྱེད་པར་ལི་ཡུལ་དུ་སོང་ལ་དེར་ཕོ་ཉ་བཏང་ན་དེར་འོང་བར་མི་འགྱུར་ཏེ། ལི་ཡུལ་དང་གུ་ཟན་གྱི་ཡུལ་དུ་འགྲོ་བར་འགྱུར་རོ། །དེ་ལ་ཕྲིན་ཡིག་ནི་ང་དང་གཉེན་དུ་བྱོས་ལ་ཡུལ་ང་ལ་བྱིན་ཅིག་ཅེས་སྤྲིངས་ཤིག །དེ་ནས་དེའི་ཚེ་ཁྱོད་ནི་ལི་ཡུལ་གྱི་རྒྱལ་པོར་འགྱུར་རོ། །དབང་པོའི་གོ་ཆ་ནི་སྐར་རྡོའི་རྒྱལ་པོ་བྱེད་པར་འགྱུར་ཏེ། དེ་ཡང་ཁྱོད་ཅི་ནས་ལི་ཡུལ་གྱི་རྒྱལ་པོར་འགྱུར་བའི་གྲོགས་བྱེད་པར་འགྱུར་རོ། །སྐར་རྡོའི་ཡུལ་དུ་གནོད་པ་འབྱུང་བ་དེའི་ཚེ་ཁྱོད་ཀྱིས་ཇི་ནས་ཀྱང་གནོད་པ་བྱེད་དུ་མ་གཞུག་ཅིག །དབང་པོའི་གོ་ཆ་དང་ཡང་ཐོག་མར་དུམ་པར་གྱིས་ཤིག །ལས་འདི་དག་བྱེད་པའི་གྲོགས་སུ་འགྱུར་རོ། །སྐར་རྡོ་བ་ཇི་སྙེད་ཡོད་པ་ཐམས་ཅད་ཀྱང་གྲོགས་བྱེད་པར་འགྱུར་རོ། །ཨ་ཀུ་ན་ཞེས་བྱ་བ་དཔའ་བོ་ཞིག་ཡོད་དེ། དེ་སྔོན་ཡེ་ཤེས་གྲགས་པ་ཞེས་བྱ་བར་གྱུར་པ་ན་དེས་དར་མ་ཏི་ར་ཞེས་བྱ་བའི་གཙུག་ལག་ཁང་བྱས་སོ། །དེ་བས་ན་ཁྱོད་ཀྱིས་ཨ་ཀུན་ཚོལ་

---

^{[མ་དཔེ་གཟིགས་ན་འདིར་གནོན།]}

ཤིག་དང་ཡུལ་གཟུང་བའི་ཕྱིར་གྲོགས་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། དེ་དང་ཁྱོད་སྔོན་སྨོན་ལམ་ལྷན་ཅིག་ཏུ་བཏབ་པའི་ཕྱིར་ཏེ། ཨ་ཀུན་ཞེས་བྱ་བའི་མི་དེ་ནི་སྔོན་རྒྱལ་པོར་གྱུར་ཏེ། མི་རྒོད་རྣམས་ཀྱིས་ཆུང་མ་བརྐུས་ཏེ། ཕྱིར་མ་རྙེད་པ་ཡིན་ནོ། །ཁྱོད་ནི་རྒྱལ་པོའི་བློན་པོ་ཆེན་པོ་ཡིན་ཏེ། དགའ་བྱེད་ཀྱི་ཕར་གྱུར་པ་ཡིན་ནོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་གཞོན་ནུ་རྡོ་རྗེ་སྡེ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་རྡོ་རྗེ་སྡེ་ཁྱོད་ནི་ལི་ཡུལ་འཁོར་དུ་རྣམ་པར་རྒྱལ་བའི་གོ་ཆ་ཞེས་བྱ་བའི་རྒྱལ་པོར་གྱུར་ཏེ། ལོ་སུམ་ཅུའི་བར་དུ་རྒྱལ་སྲིད་འཛིན་པར་འགྱུར་ལ། དགེ་བསྙེན་དུ་གྱུར་ནས་ལི་ཡུལ་གྱི་ཕྱིར་ལུས་ཡོངས་སུ་གཏོང་བའི་འབྲས་བུ་འཐོབ་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷ་མོ་དྲི་མ་མེད་པའི་འོད་ལ་འདི་སྐད་ཅེས་བཀའ་སྩལ་ཏོ། །ཁྱོད་ལི་ཡུལ་དུ་རབ་ངེས་ཞེས་བྱ་བར་གྱུར་པའི་ཚེ་མདོ་འདི་ཟུང་ཤིག །འདི་ལ་འཇུག་པར་གྱིས་ཤིག །རྒྱས་པར་གྱིས་ཤིག །སྐར་རྡོའི་ཡུལ་དུ་ཡང་མིང་པོ་ལ་སྐུར་ཅིག་དང་། ཁྱོད་ཀྱི་སྟེང་དུ་འོད་ཟེར་རྣམས་གནས་པར་འགྱུར་རོ། །གང་གི་ཚེ་ཁྱོད་ཀྱིས་གཟུངས་སྔགས་རྣམས་རྟོགས་པར་གྱུར་པ་དེའི་ཚེ་ཁྱེད་ལ་སངས་རྒྱས་བཅོམ་ལྡན་འདས་ཉིད་གསུང་བར་འགྱུར་ཞིང་ལྷ་རྣམས་ཀྱང་ཇི་ནས་ཁྱོད་ཀྱི་ལས་བྱེད་ནུས་པར་འགྱུར་བ་དེ་ལྟ་བུ་རྒྱས་པར་སྨྲ་བར་འགྱུར་རོ། །དེ་ནས་དེའི་ཚེ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །ནུ་སྡུག་ཇི་ལྟར་བཅོམ་ལྡན་འདས་རིན་ཆེན་སྙིང་པོ་གྲོང་ཁྱེར་དུ་གཤེགས་པའི་ཚེ་འུ་བུ་ཅག་གཉིས་སངས་རྒྱས་ཉིད་དུ་ལུང་བསྟན་པ་ཐོབ་ནས། དེར་དེ་སྐད་དུ་ཕྱོགས་བཅུ་ན་སེམས་ཅན་འཇིགས་ཤིང་སྐྲག་པ་ཇི་སྙེད་ཡོད་པ་དེ་དག་ཐམས་ཅད་བདག་གིས་སྐྱབས་བྱེད་པར་གྱུར་ཅིག །དེ་སྐད་ཅེས་སྨོན་ལམ་བཏབ་པའི་དུས་ལ་དེ་དྲན་པར་གྱིས་ལ། ད་ངའི་ལི་ཡུལ་འདི་དང་། ལྷ་མོ་དྲི་མ་མེད་པའི་འོད་དང་། གཞོན་ནུ་རྡོ་རྗེ་སྡེ་ལ་གཏད་པ་འདི་ཁྱོད་ཀྱིས་ལོང་ཤིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དང་། འཇམ་དཔལ་དང་། ནམ་མཁའི་སྙིང་པོ་དང་། མཐུ་ཆེན་ཐོབ་དང་། སྨན་གྱི་

---

^{[མ་དཔེ་གཟིགས་ན་འདིར་གནོན།]}

རྒྱལ་པོ་དང་། རབ་སྦྱིན་དཔའ་བོ་དང་། སའི་སྙིང་པོ་དང་། བྱམས་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །སྔོན་འདིའི་ཕུ་བོ་དང་། གྲོགས་སུ་གྱུར་པ་དང་། རྟག་ཏུ་འགྲོགས་འགྲོགས་པ་ནི་འདི་དག་ཡིན་ཏེ། སྣ་ཚོགས་ཀྱི་ལྷ་དང་། དབང་ཕྱུག་གི་ལྷ་དང་། ལྗོན་ཤིང་གི་དབང་ཕྱུག་གི་རྒྱལ་པོ་དང་། སྙིང་རྗེའི་དབང་ཕྱུག་དང་། གཟུངས་ཀྱི་དབང་ཕྱུག་དང་། སྤོང་བའི་དབང་ཕྱུག་དང་། འོད་ཀྱི་དབང་ཕྱུག་དང་། དྲིའི་དབང་ཕྱུག་དང་། ཚོགས་ཀྱི་དབང་ཕྱུག་དང་། འཇིག་རྟེན་གྱི་དབང་ཕྱུག་དང་། འོད་གསལ་དང་། རིགས་ཀྱི་དབང་ཕྱུག་རྣམས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ལ་བོས་ཏེ་བཀའ་སྩལ་ཏོ། །རིགས་ཀྱི་བུ་དག་ཁྱེད་ངའི་ཐེག་པ་ཆེན་པོའི་མདོ་འདི་དང་། གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་ཡོངས་སུ་ཟུང་ཤིག །དེ་ནས་གསང་བའི་བདག་པོ་ལག་ན་རྡོ་རྗེ་ལ་བོས་ཏེ་འདི་སྐད་ཅེས་བཀའ་སྩལ་ཏོ། །ཁྱོད་རྟག་ཏུ་ངའི་ཕྱི་བཞིན་དུ་འབྲང་བ་ཡིན་གྱིས་མདོ་འདི་དང་། གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་ཁྱོད་ལ་གཏད་དོ། །གནོད་སྦྱིན་དབང་པོ་རྣམ་ཐོས་ཀྱི་བུ་དང་། གནོད་སྦྱིན་ཀུན་ཏུ་རྒྱལ་དང་། ལྷའི་བུ་བློ་གྲོས་བརྟན་པ་དང་། ཀླུའི་རྒྱལ་པོ་མ་དྲོས་པ་དང་། འཕྲོག་མ་བུ་དང་བཅས་པ་དང་། ལྷའི་ཕོ་བྲང་སུམ་ཅུ་རྩ་གཉིས་ཀྱི་ལྷའི་རྒྱལ་པོ་རྣམས་དང་། འཁོར་དེར་འདུས་པ་ཐམས་ཅད་དང་། སངས་རྒྱས་བཅོམ་ལྡན་འདས་འོད་ཟེར་གཏོང་བ་དེ་དག་དང་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་དེ་དག་ཐམས་ཅད་ལ་མདོ་འདི་དང་། ལི་ཡུལ་དང་། གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་གཏད་དེ། ཡོངས་སུ་གཏད་པའི་དམ་པས་ཡོངས་སུ་གཏད་དོ། །དེ་ནས་ཡང་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །ངས་ཇི་སྐད་བཤད་པ་དང་། ཁྱོད་ཀྱིས་ཇི་ལྟར་དམ་བཅས་པ་བཞིན་དུ་གྲོགས་ཀྱིས་ལ་ངས་དགོངས་པ་ཀུན་ཐམས་ཅད་ནས་ཐམས་ཅད་དུ་མཐར་ཕྱིན་པར་གྱིས་ལ། ཅི་ནས་ལོག་པར་མ་འགྱུར་བ་དེ་ལྟར་གྱིས་ཤིག །ངས་བསྐལ་པ་མང་པོར་འཁོར་བ་ན་དཀའ་ལས་ཤིན་ཏུ་མང་པོ་དང་ལྡན་པ་དག་བྱས་པ་ལྟ་བུ་ནི་བྱང་

---

^{[མ་དཔེ་གཟིགས་ན་འདིར་གནོན།]}

ཆུབ་སེམས་དཔའ་གཞན་དག་གིས་ཀྱང་མ་བྱས་སོ། །ངའི་ཡུལ་འཁོར་དེར་སེམས་ཅན་ངས་ཡོངས་སུ་སྨིན་པར་མ་བྱས་པ་དེ་གང་ཡིན་པ་དེ་དག་ཕྱིས་ལི་ཡུལ་འཁོར་དུ་གནས་པར་གྱུར་ཏེ། ངའི་ཆོས་ཀྱིས་ཡོངས་སུ་གྲོལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བསྐལ་པ་བཟང་པོའི་བྱང་ཆུབ་སེམས་དཔའ་རྣམས་ལ་བོས་ཏེ་འདི་སྐད་ཅེས་བཀའ་སྩལ་ཏོ། །ཁྱེད་ཐམས་ཅད་ལ་མདོ་འདི་དང་། ལི་ཡུལ་དང་གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་གཏད་དོ། །གང་གི་ཚེ་སངས་རྒྱས་བཅོམ་ལྡན་འདས་ཀྱིས་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། ལྷ་ཐམས་ཅད་དང་། འཁོར་ཐམས་ཅད་ལ་མདོ་འདི་དང་། ལི་ཡུལ་དང་གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་གཏད་པ་དེའི་ཚེ་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་སྟེང་དུ་ལྷའི་མེ་ཏོག་གི་ཆར་ཕབ་བོ། །ལྷ་རྣམས་ཀྱིས་ལྷའི་རོལ་མོའི་སྒྲ་བསྒྲགས་སོ། །ལྷའི་རྒྱན་གྱི་ཆར་ཡང་ཕབ་བོ། །དེ་བཞིན་དུ་འཁོར་དེ་དག་ཐམས་ཅད་ཀྱིས་ཀྱང་བཅོམ་ལྡན་འདས་ལ་ཇི་ལྟར་འོས་པའི་མཆོད་པས་བཅོམ་ལྡན་འདས་ལ་མཆོད་པར་བྱས་སོ། །སངས་རྒྱས་བཅོམ་ལྡན་འདས་དེ་དག་གིས་ཀྱང་མི་མཇེད་ཀྱི་འཇིག་རྟེན་གྱི་ཁམས་འདིར་འོད་ཟེར་ཤིན་ཏུ་མང་པོ་བཏང་ངོ་། །མི་མཇེད་ཀྱི་འཇིག་རྟེན་གྱི་ཁམས་འདི་ན་གནས་པའི་སེམས་ཅན་རྣམས་ཀྱིས་ཀྱང་སངས་རྒྱས་བཅོམ་ལྡན་འདས་དེ་དག་འཁོར་གྱི་དཀྱིལ་འཁོར་དང་བཅས་པ་མཐོང་ངོ་། །དེ་ན་གནས་པ་རྣམས་ཀྱིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་འཁོར་གྱི་དཀྱིལ་འཁོར་དང་བཅས་པ་དང་། མི་མཇེད་ཀྱི་འཇིག་རྟེན་གྱི་ཁམས་མཐོང་སྟེ། འཁོར་ཐམས་ཅད་དང་། ལྷ་དང་མི་རྣམས་གཅིག་གིས་གཅིག་མཐོང་བར་གྱུར་ཏོ། །དེ་ནས་དེའི་ཚེ་དགེ་སློང་ཀུན་དགའ་བོ་སྟན་ལས་ལངས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་ཞུས་པ། བཅོམ་ལྡན་འདས་མ་འོངས་པའི་དུས་ན་སུ་ལ་ལ་མདོ་འདི་ཀློག་པ་དང་། སེམས་པ་དང་། ཉན་པ་དང་། ཀུན་ཆུབ་པར་བགྱིད་པ་དང་། འདྲི་བ་དང་། འདྲིར་འཇུག་པ་དེའི་བསོད་ནམས་ཀྱི་ཕུང་པོ་ཇི་ཙམ་དུ་འཕེལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་ཀྱི་ཞིང་བརྒྱད་ཁྲི་བཞི་སྟོང་གི་ནང་ན་སྐྱེ་བོ་ཇི་སྙེད་གནས་པ་རྣམས་ལ་སྦྱིན་པ་བྱིན་པ་བས་ནི། སུ་མདོ་འདི་འཆང་བའམ།

---

^{[མ་དཔེ་གཟིགས་ན་འདིར་གནོན།]}

ཁ་ཏོན་དུ་བྱེད་པའམ། ཀློག་པ་དེའི་བསོད་ནམས་ཀྱི་ཕུང་པོ་ཆེས་མང་བར་འགྱུར་རོ། །མདོར་ན་ཇི་ལྟར་འབྲས་བུ་གསུམ་པ་རྟོགས་པ་དེའི་བསོད་ནམས་ཀྱི་ཕུང་པོ་ཇི་སྙེད་འཕེལ་བར་འགྱུར་རོ། །ཞེས་ང་སྨྲའོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་། འཁོར་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། །བདག་ཅག་འཁོར་འདིར་འདུས་པ་ཇི་སྙེད་མཆིས་པ་རྣམས་གང་དུ་མདོ་འདི་བརྗོད་པ་དེར་མ་མཆིས་སམ། གཞོན་ནུ་རྡོ་རྗེ་སྡེ་དང་། ལྷ་མོ་དྲི་མ་མེད་པའི་འོད་ལ་གཟུངས་སྔགས་མ་སྩལ་ཏམ། དམ་བཅས་པ་འདི་བསྐྱུད་པར་གྱུར་ན། བདག་ཅག་གིས་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྐུ་བསླུས་པར་གྱུར་ཅིག །མཚམས་མ་མཆིས་པའི་ལས་བགྱིས་པའི་སྡིག་པ་ཇི་ཙམ་མཆིས་པ་བདག་ཅག་གིས་བགྱིས་པར་གྱུར་ཅིག །དེ་ནས་འོད་ཟེར་དེ་དག་ལས། ཚིག་ཏུ་བརྗོད་པ་འདི་སྐད་ཅེས་བྱུང་སྟེ། གང་ན་མདོ་འདི་བརྗོད་པ་དེར་བདག་ཅག་འོང་ངོ་ཞེས་སྒྲ་སྒྲོགས་པར་འགྱུར་རོ། །དེ་ནས་ཀུན་དགའ་བོ་དང་། འཁོར་དེ་དག་ཐམས་ཅད་ཀྱིས་ཞུས་པ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཅི་ལྟར་གཟུང་བར་བགྱི། བཀའ་སྩལ་པ། མདོ་འདིའི་མིང་ནི་ཆོས་ཀྱི་སྤྱི་བོ་ཞེས་ཀྱང་བྱ། སངས་རྒྱས་ཐམས་ཅད་ཀྱི་ཆོས་ཀྱི་སྙིང་པོ་ཞེས་ཀྱང་བྱ། དྲི་མ་མེད་པའི་འོད་ཀྱིས་ཞུས་པ་ཞེས་ཀྱང་བྱའོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་འདི་སྐད་ཅེས་བཀའ་སྩལ་ཏོ། །ངས་ཆོས་གང་བཤད་པ་དེ་དག་ཐམས་ཅད་ནི་མདོ་འདི་ཉིད་ཀྱི་ནང་དུ་འདུས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་དེ་དག་དང་། ཚེ་དང་ལྡན་པ་ཀུན་དགའ་བོ་དང་། འཁོར་དེ་དག་ཐམས་ཅད་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།ཐེག་པ་ཆེན་པོའི་མདོ་དྲི་མ་མེད་པའི་འོད་ཀྱིས་ཞུས་པ་ཞེས་བྱ་བ་རྫོགས་སྷོ།། །།