ཕམ་པར་འགྱུར་བ་གསུམ་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

འདུལ་བ་རྣམ་པར་འབྱེད་པ། བམ་པོ་བརྒྱད་པ། ཕམ་པར་འགྱུར་བ་གསུམ་པའི་སྤྱི་སྡོམ་ལ། བྲན་པ་དང་ནི་བདག་ཉིད་དང་། །དུག་དང་རོ་ལངས་བསྲོ་ཁང་ངོ་། །སྡོམ་ལ། བྲན་པ་དང་ནི་སྐྱོང་བ་དང་། །མཆུ་ཅན་དང་ནི་ཤི་རི་ཀ། ལྷུང་བཟེད་དང་ནི་ཆོས་གོས་དང་། །མངལ་ན་གནས་དང་ཚོང་དཔོན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་

---

^{[མ་དཔེ་གཟིགས་ན་འདིར་གནོན།]}

བཞུགས་སོ། །མཉན་ཡོད་ན་དགེ་སློང་བྲན་པ་དང་སྐྱོང་བ་ཞེས་བྱ་བ་ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས་སྨོས་འདྲིན་མཐུན་པར་བརྗོད་པ་གཉིས་ཤིག་འཁོད་དོ། །ཇི་ཙམ་དུས་གཞན་ཞིག་ན་སྐྱོང་བ་ན་བར་གྱུར་ནས་དེའི་ནད་གཡོག་བྲན་པ་བྱེད་པ་ན། སྐྱོང་བས་མཚན་མོ་སྒྲ་བསྒྲག་པར་བརྩམས་པ་དང་། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཁོ་བོ་བཀྲེས་སོ། །སྐོམ་མོ། བྲན་པས་སྨྲས་པ། ཚེ་དང་ལྡན་པ་སྐྱོང་བ་རབ་ཏུ་བྱུང་བའི་སེམས་ཉེ་བར་གཞག་པར་གྱིས་ཤིག །གལ་ཏེ་ད་ལྟར་སྨན་ཡོད་དུ་ཟིན་ཀྱང་རེ་ཞིག་བྱིན་ལེན་སྟོབས་པ་ཡང་མེད་ན། ཁྱོད་ལ་སྨན་ལྟ་སྨོས་ཀྱང་ཅི་དགོས་ཏེ་མེད་དོ། །སྐྱོང་བ་དེ་སོ་སོར་རྟོག་པ་མི་མངའ་བ་ཡིན་པས་དེ་ཁོ་བོ་སྐོམ་མོ། །བཀྲེས་སོ། །ཞེས་སྒྲ་སྒྲོགས་བཞིན་པ་ལས་ནམ་ནངས་པ་དང་། བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁོ་བོས་སྨན་པ་ལ་དྲིས་ཏེ་འོང་གི་བར་དུ་ཁྱོད་ཀྱིས་རེ་ཞིག་སོ་ཤིང་འོར་ཅིག །བྲན་པས་སྨན་པའི་གན་དུ་སོང་ཏེ་སྨྲས་པ། བཞིན་བཟང་གཞོན་ནུ་ཞིག་ན་ན་དེ་ལ་འཕྲོད་པའི་སྨན་སྟོན་ཅིག །སྨན་པས་སྨྲས་པ། འཕགས་པ་དགེ་སློང་དེའི་སྨན་ནི་འདི་དང་འདི་ལྟ་བུ་ལགས་སོ། །བྲན་པ་སྨན་པའི་གན་དུ་ཇི་སྲིད་སོང་བ་དེའི་ཚེ་ན། ཚེ་དང་ལྡན་པ་སྐྱོང་བ་ཁྲི་ལས་ལངས་ཏེ། ཤམ་ཐབས་གྱོན་ནས་འདག་རྫས་དང་རི་ལ་བ་སྤྱི་བླུགས་དང་སོ་ཤིང་ཐོགས་ཏེ་བང་རིམ་དུ་བྱུང་ནས། སོ་ཤིང་དོར་པར་བརྩམས་པ་དང་། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མཚན་མོ་ཏེ་བོར་སྒྲ་སྒྲོགས་པར་བྱེད། སྐྱོང་བས་སྨྲས་པ། ཚེ་དང་ལྡན་པ་དག་ཁོ་བོ་ཏེ་བོར་སྐོམ་པ་དང་། བཀྲེས་པར་གྱུར་ཏོ། །དེ་ནས་དགེ་སློང་ཞིག་གིས་སྨྲས་པ། ཚེ་དང་ལྡན་པ་སྐྱོང་བ་ཁོ་བོ་ལ་ཆུའི་ཐུག་པ་ཡོད་ན་ཅི་མི་འཐུང་ངམ། སྐྱོང་བས་སྨྲས་པ། མ་ནོངས་ཀྱིས་བཏུང་ངོ་ཞེས་དེས་དེ་འཐུངས་སོ། །དགེ་སློང་གཞན་དག་གིས་སྨྲས་པ། ཁོ་བོ་ཅག་ལ་འོ་ཐུག་དང་། ཞོ་ཐུག་དང་། འཁུར་བ་དང་། ཤ་དང་། སྤྱན་གཟིགས་དག་ཡོད་ན་

---

^{[མ་དཔེ་གཟིགས་ན་འདིར་གནོན།]}

ཅི་མི་ཟའམ། སྐྱོང་བས་དགེ་སློང་དེ་དག་ལས་ཚངས་པ་མཚུངས་པར་སྤྱོད་པ་རྗེས་སུ་བསྲུང་བ་དང་བརྐམ་ཆགས་ཉིད་ཀྱིས་ཅུང་ཟད་ཅུང་ཟད་ལོངས་སྤྱོད་པ་དང་། ཧ་ཅང་ཟས་དྲགས་ནས་དེ་གློས་ཕབ་སྟེ་ཉལ་ལོ། །བྲན་པ་ཡང་སྨན་པ་ལ་དྲིས་ནས་མྱུར་བ་མྱུར་བར་འོངས་ཏེ་དེ་ནས་སྨན་པས། ཇི་སྐད་བསྟན་པའི་སྨན་སྦྱར་ཏེ་སྨྲས་པ། ཚེ་དང་ལྡན་པ་སྐྱོང་བ་ལོངས་ལ་སོ་ཤིང་འོར་ཅིག །སྐྱོང་བས་སྨྲས་པ། བོར་ཟིན་ཏོ། །བྲན་པས་སྨྲས་པ། མ་ཉེས་སོ་ཞེས་དེས་དཀྱིལ་འཁོར་བྱུགས་ཤིང་སྣོད་དང་ཁ་གཟར་བྱི་དོར་བྱས་ཏེ། ལོངས་ལ་ཟོ་ཞིག་ཅེས་སྨྲས་པ་དང་། སྐྱོང་བས་དེ་རྗེས་སུ་བསྲུང་བས་ལངས་སོ། །བྲན་པས་སྨན་བྱིན་ལེན་བྱེད་དུ་བཅུག་སྟེ་ཕུལ་བ་དང་། སྐྱོང་བས་ཁ་གཟར་དོའམ་གསུམ་བཀང་སྟེ་ཟོས་ནས། གློས་ཕབ་སྟེ་ཉལ་ལོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་མི་ཟ། སྐྱོང་བས་སྨྲས་པ། ཁོ་བོ་མི་འདོད་དོ། །བྲན་པས་སྨྲས་པ། ཁྱོད་ཀྱིས་མཚན་ཐོག་ཐག་ཏུ་ཁོ་བོ་བཀྲེས་སོ། །སྐོམ་མོ་ཞེས་ཁོ་བོ་ལ་མཐོ་བཙམས་ན། ད་ནི་ཁྱོད་མི་འདོད་དོ་ཞེས་ཟེར་ན། ད་ཁྱོད་དུས་ལ་བབ་བོ། །དགེ་སློང་རྣམས་ཀྱིས་བྲན་པ་ལ་སྨྲས་པ། ཚེ་དང་ལྡན་པ་བྲན་པ་འདི་ལ་བག་བྱོས་ཤིག །འདིས་ཁོ་བོ་ཅག་ལས་ཆུའི་ཐུག་པ་དང་། འོ་ཐུག་དང་ཞོ་ཐུག་དག་འཐུངས་ཤིང་། འཁུར་བ་དང་། ཤ་དང་སྤྱན་གཟིགས་དག་ཟོས་སོ། །བྲན་པས་སྨྲས་པ། ཚེ་དང་ལྡན་པ་སྐྱོང་བ་ཁྱོད་ཀྱིས་དེ་ལྟ་བྱས་པ་བདེན་ནམ། སྐྱོང་བ་ཉེས་པ་དང་བཅས་པས་ཡིད་བསྒྱངས་ཏེ་སྨྲས་པ། བྱས་སོ། །བྲན་པས་སྨྲས་པ། ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་ནོ། །སྐྱོང་བ་ངོ་ཚ་ནས། བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་བྱེད་པས་བདག་

---

^{[མ་དཔེ་གཟིགས་ན་འདིར་གནོན།]}

གིས་དུག་ཟོས་པ་ནི་བླའི། དེ་ལྟར་མི་མཐུན་པ་བྱེད་པ་ནི་མ་ཡིན་པས། བདག་གིས་དུག་ཟའོ་སྙམ་དུ་བསམས་ནས། དེ་ལངས་ཏེ་སྣོད་དུ་བརྟགས་པར་བརྩམས་པ་དང་། དེས་པར་བུར་སྣོད་ན་དུག་གི་དུམ་བུ་མཐོང་ནས། དེས་དེ་ཟོས་པ་དང་། དེ་དུག་གིས་ཡོངས་སུ་འཁྲུགས་པར་གྱུར་པའི་སེམས་ཀྱིས་འཆི་བར་བརྩམས་ཏེ། ཁ་ཆུ་འཛག །མིག་འགྱུར། བཞིན་བསྒྱུར་ཞིང་འདི་སྐད་ཅེས་བྲན་པ་ཁོ་བོ་ཤིའོ། །ཁོ་བོ་ཤིའོ་ཞེས་ཀྱང་ཟེར་རོ། །བྲན་པས་ཐོས་ནས། དེ་བརྟན་ཅིང་མྱུར་བ་མྱུར་བར་སྨྲས་པ། ཚེ་དང་ལྡན་པ་སྐྱོང་བ་ཅིའི་ཕྱིར་དེ་སྐད་དུ་ཅོ་འདོན་པར་བྱེད། སྐྱོང་བས་སྨྲས་པ། ཁྱོད་ན་རེ། ཚེ་དང་ལྡན་པ་སྐྱོང་བ་ཁོ་བོ་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་ཁྱོད་ཀྱི་ནད་གཡོག་བྱེད་ན། ཁྱོད་དེ་ལྟར་མི་མཐུན་པ་བྱེད་པས་ཁྱོད་ཀྱིས་དུག་ཟོས་པར་གྱུར་པ་ནི་བླའི། ཁྱོད་ཀྱིས་དེ་ལྟར་མི་མཐུན་པ་ཟོས་པ་ནི་མ་ཡིན་ནོ་ཞེས་ཟེར་བས། བདག་ལ་བདག་གི་ཚངས་པ་མཚུངས་པར་སྤྱོད་པ་ཟེར་བ་བཟང་སྟེ། འདི་ལྷུང་བཟེད་ཟད་ཟད། ཆོས་གོས་དེངས་དེངས། དགེ་བའི་ཕྱོགས་ཉམས་ཉམས་སུ་བདག་གི་ནད་གཡོག་བྱེད་ན། བདག་དེ་ལྟར་མི་མཐུན་པ་བྱེད་པས་བདག་གིས་དུག་ཟོས་པར་གྱུར་པ་ནི་བླའི། དེ་ལྟར་མི་མཐུན་པ་ཟོས་པ་ནི་མ་ཡིན་པས། བདག་གིས་དུག་ཟའོ་སྙམ་པའི་བློ་སྐྱེས་ནས། བདག་གི་སྣོད་དུ་བརྟག་པར་བརྩམས་པ་དང་། བར་བུར་སྣོད་ན་དུག་གི་དུམ་བུ་མཐོང་ནས་བདག་གིས་དེ་ཟོས་སོ། །བྲན་པས་ཡི་ཆད་པའི་བཞིན་གྱིས་སྨྲས་པ། ཚེ་དང་ལྡན་པ་ཁྱོད་ཀྱིས་མ་ལེགས་པ་བྱས་སོ་ཞེས་སྨྲས་ཏེ། སྨན་པའི་དྲུང་དུ་སོང་བ་དང་། དུག་དེ་རྣོན་པོ་ཞིག་ཡིན་པས་གཟུང་བར་མ་ནུས་ཏེ་དེ་དུས་ལ་བབ་བོ། །བྲན་པས་སྨན་པ་ཁྲིད་དེ་འོངས་པ་ན། དེ་དུས་ལ་བབ་པ་མཐོང་ནས། བྲན་པ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས། དེས་སྐབས་དེ་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་

---

^{[མ་དཔེ་གཟིགས་ན་འདིར་གནོན།]}

གིས་ནད་པ་ལ་གང་ཐོས་ན་ནད་པ་འཆི་བའི་ཕྱིར་རྩོལ་བར་བྱེད་པ་དེ་ལྟ་བུའི་གཏམ་ཉེ་བར་བརྗོད་པས་ཉེ་བར་བརྗོད་པར་མི་བྱའོ། །དགེ་སློང་གིས་ནད་པ་ལ་གང་ཐོས་ན། ནད་པ་འཆི་བའི་ཕྱིར་རྩོལ་བར་འགྱུར་བ་དེ་ལྟ་བུའི་གཏམ་ཉེ་བར་བརྗོད་པ་ཉེ་བར་རྗོད་པར་བྱེད་ན། འགལ་ཚབས་ཅན་དུ་འགྱུར་རོ། །འདི་ནི་རེ་ཞིག་བྱུང་བ་ཡིན་གྱི། སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བ་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་མཆུ་ཅན་དང་ཤི་རི་ཀ་ཞེས་བྱ་བ། གཏམ་འདྲེས་པ། ཕེབས་པར་སྨྲ་བ་འགྲོགས་བཤེས་སྨོས་འདྲིན་མཚུངས་པར་བརྗོད་པ་གཉིས་ཤིག་འཁོད་དོ། །མཆུ་ཅན་ནི་རྔོན་པ་ལས་རབ་ཏུ་བྱུང་བ་ཡིན་ལ། ཤི་རི་ཀ་ནི་ཁྱིམ་བདག་ལས་རབ་ཏུ་བྱུང་བ་ཡིན་ནོ། །ཇི་ཙམ་དུས་གཞན་ཞིག་ན་མཆུ་ཅན་གྱི་ཚ་བོ་གཉིས་ཤིག་ཕ་མ་དང་བྲལ་བས་དེ་དང་དེར་འཁྱམ་པ་ན། རྒྱལ་བྱེད་ཀྱི་ཚལ་དུ་ཕྱིན་ཏེ་སྒོ་ན་སྡོད་དོ། །མཆུ་ཅན་ཕྱིར་བྱུང་བ་དང་། དེས་དེ་གཉིས་བཞིན་གཟུགས་ལས་ངོ་ཤེས་ནས། དེས་དེ་གཉིས་ལ་སྨྲས་པ། ཁྱེད་གཉིས་ཀྱི་ཕ་མ་དག་གར་དོང་། དེ་གཉིས་ཀྱིས་སྨྲས་པ། དུས་ལ་བབ་བོ། །དེ་ཉེ་དུ་ལ་མཉེས་གཤིན་པས་ཐོས་ནས། མཆི་མ་དང་བཅས་པའི་སྐད་ཀྱིས་འདུག་པ་དང་། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་མཆུ་ཅན། ཁྱེའུ་འདི་གཉིས་སུའི། མཆུ་ཅན་གྱིས་སྨྲས་པ། བདག་གི་ཚ་བོ་གཉིས་ཡིན་ནོ། །དགེ་སློང་རྣམས་ཀྱིས་སྨྲས་པ། ཅིའི་ཕྱིར་འདི་གཉིས་སྡུད་པར་མི་བྱེད། མཆུ་ཅན་གྱིས་སྨྲས་པ། བདག་ཀྱང་རེ་ཞིག་དཀའ་བས་བསོད་སྙོམས་སྒྲུབ་པར་བྱེད་ན། འདི་གཉིས་ཅི་ཞིག་གིས་བསྡུ་བར་བྱ། དགེ་སློང་དག་གིས་སྨྲས་པ། འདི་གཉིས་འདོད་ན་དགེ་སློང་རྣམས་ལ་འཇབ་མ་དང་མེ་ཏོག་དང་འབྲས་བུ་དང་སོ་ཤིང་དག་འབུལ་དུ་ཆུག་ཅིག་དང་། དགེ་སློང་དག་གིས་ཀྱང་འདི་གཉིས་ལ་ལྷུང་བཟེད་ཀྱི་ལྷག་མ་སྦྱིན་

---

^{[མ་དཔེ་གཟིགས་ན་འདིར་གནོན།]}

པར་འགྱུར་རོ། །མཆུ་ཅན་གྱིས་དེ་གཉིས་བླངས་ནས། དེ་གཉིས་ཀྱང་གྲིམས་པ་ལེ་ལོ་མེད་པ་སྒྲུབ་ཕོད་པ་ཡིན་པས་དགེ་སློང་རྣམས་ལ་འདབ་མ་དང་མེ་ཏོག་དང་འབྲས་བུ་དང་། སོ་ཤིང་དག་འབུལ་བར་བྱེད་ནས། དགེ་སློང་རྣམས་ཀྱིས་ཀྱང་དེ་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་བྱེད་དོ། །དེ་གཉིས་གོས་དང་ཟས་བཟང་པོ་དུས་ཡུན་མི་རིང་བས་པགས་པ་དང་ཤ་དང་ཁྲག་རྟས་ཤིང་དེ་གཉིས་སྟོབས་དང་སྙེམས་པ་དང་ལྡན་པར་གྱུར་ཏོ། །དེ་གཉིས་དུས་གཞན་ཞིག་ན་རྒྱལ་བྱེད་ཀྱི་ཚལ་གྱི་སྒོ་ན་རྩེ་ཞིང་འཁོད་པ་དང་། དེ་གཉིས་ཀྱི་ཉེ་དུ་དག་ལག་ན་མདའ་གཞུ་ཐོགས་ཤིང་རྒྱལ་བྱེད་ཀྱི་ཚལ་གྱི་སྒོ་ནས། རི་དྭགས་ཤོར་དུ་འདོང་བ་དེ་དག་གིས་དེ་གཉིས་མཐོང་ནས་དེ་དག་གིས་སྨྲས་པ། ཁྱེའུ་གཉིས། ཁྱེད་གཉིས་ག་ལས་འདིར་འོངས། ཁྱེའུ་གཉིས་ཀྱིས་སྨྲས་པ། ཤཱཀྱའི་སྲས་ཀྱི་དགེ་སྦྱོང་གི་ནང་འདི་ན་བདག་ཅག་གཉིས་ཀྱི་ཞང་པོ་རབ་ཏུ་བྱུང་བ་དེའི་གནས་ན་འཁོད་དོ། །དེ་དག་གིས་སྨྲས་པ། ཁྱེད་གཉིས་ཀྱི་ཞང་པོ་དེ་ཡང་རེ་ཞིག་ཤཱཀྱའི་སྲས་ཀྱི་དགེ་སྦྱོང་ལས་མེད་པའི་ངང་ཚུལ་ཅན་རྣམས་ཀྱི་ནང་དུ་རབ་ཏུ་བྱུང་བ་ཡིན་ན། ཅི་ཁྱེད་གཉིས་ཀྱང་ལས་མེད་པའི་ངང་ཚུལ་ཅན་དུ་བྱེད་དམ། ཚུར་ཤོག །ཕའི་ལས་རྗེས་སུ་སྒྲུབས་ཤིག །དེ་གཉིས་ཀྱིས་སྨྲས་པ། ཁོ་བོ་ཅག་གཉིས་ལ་ཞང་པོས་ཕན་བཏགས་པས་ཇེ་དེ་ལ་དྲི་བར་བྱའོ། །ཞེས་དེ་གཉིས་ཚེ་དང་ལྡན་པ་མཆུ་ཅན་ག་ལ་བ་དེར་དོང་སྟེ་ཕྱིན་ནས། ཚེ་དང་ལྡན་པ་མཆུ་ཅན་ལ་འདི་སྐད་ཅེས་སྨྲས་སོ། །ཞང་པོ་བདག་ཅག་གཉིས་ཕའི་ལས་རྗེས་སུ་སྒྲུབ་ཏུ་མཆིའོ། །མཆུ་ཅན་གྱིས་སྨྲས་པ། ཁོ་བོས་ཁྱེད་གཉིས་དད་པས་སྦྱིན་པར་བྱས་པས་བསྐྱེད་བསྐྱེད་ན། ད་ཅིའི་ཕྱིར་ཉེས་པར་སྤྱོད་པའི་ལས་འདི་ལྟ་བུ་བྱེད། དེ་གཉིས་ཀྱིས་སྨྲས་པ། ཞང་པོ་བདག་ཅག་གཉིས་མགོ་ལ་གསེར་གྱི་ཕྲེང་བས་བཅིངས་པ་ནི་ངོ་ཚའི། ཕའི་ལས་རྗེས་སུ་སྒྲུབ་པས་ནི་དེ་ལྟ་མ་ལགས་ཀྱིས་མཆིའོ་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་དོང་ནས། དེ་གཉིས་རི་དྭགས་གསོད་ཅིང་འཚོ་བར་བྱེད་དོ། །ཇི་ཙམ་དུས་གཞན་ཞིག་ན་ཤི་རི་ཀ་ན་བར་གྱུར་ནས་མཆུ་

---

^{[མ་དཔེ་གཟིགས་ན་འདིར་གནོན།]}

ཅན་དེའི་ནད་གཡོག་བྱེད་པ་ན་ཤི་རི་ཀ་སྡུག་བསྔལ་གྱི་ཚོར་བ་དག་གིས་ཉེན་ནས། བདག་རེ་ཞིག་ཚུལ་ཁྲིམས་དང་ལྡན་པས། བདག་ཡུལ་གཞན་དུ་སོང་ན་ལོ་ལེགས་ཤིང་། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་བས་རྣམ་པ་ཐམས་ཅད་དུ་བདག་ཉིད་གསད་པར་བྱའོ་སྙམ་དུ་སེམས་སོ། །ཡང་བདག་ཉིད་གསོད་པར་བྱེད་པ་ནི། སྡུག་བསྔལ་བ་ཡིན་གྱིས་གསོད་པར་བྱེད་པ་ཞིག་བཙལ་ལོ་སྙམ་དུ་སེམས་ཤིང་། དེ་བདག་གི་སྲོག་གཅོད་བར་བྱེད་པ་སུ་ཡོད་སྙམ་དུ་དཔྱོད་པ་ལ་ཞུགས་པ་དང་། དེ་ལ་མཆུ་ཅན་གྱི་ཚ་བོ་གཉིས་དྲག་ཤུལ་ཅན་ལག་པ་དམར་པ། བསྣུན་པ་དང་རབ་ཏུ་བསྣུན་པ་ལ་ཞུགས་པ། གཞན་གྱི་སྲོག་འཕྲོག་པ་གཞན་གྱི་སྲོག་གཅོད་དུ་འཇུད་པ། གཞན་གྱི་སྲོག་གཅོད་པས་འཚོ་བར་བྱེད་པ་ཡིན་པས་དེ་གཉིས་ཀྱི་བདག་གསོད་པར་ནུས་ཀྱི། གཞན་སུས་ཀྱང་མི་ནུས་སོ་སྙམ་པའི་བློ་སྐྱེས་ཤིང་རིག་ནས། ཚེ་དང་ལྡན་པ་མཆུ་ཅན་ལ་སྨྲས་པ། ཚེ་དང་ལྡན་པ་མཆུ་ཅན་ཁྱོད་ཀྱི་ཚ་བོ་དེ་གཉིས་མི་སྣང་ན་གར་དོང་། མཆུ་ཅན་གྱིས་སྨྲས་པ། ཁྱོད་དེ་གཉིས་ཀྱི་མིང་མ་འཛིན་ཅིག །དེ་གཉིས་ནི་འདི་ལྟ་བུའི་སྡིག་པ་བྱེད་པ་ཡིན་ཏེ། དེ་གཉིས་ཁོ་བོས་དད་པས་སྦྱིན་པར་བྱ་བས་བསྐྱེད་བསྐྱེད་ན་དེ་གཉིས་ད་ཉེས་པར་སྤྱོད་པའི་ལས་བྱ་བ་ལ་ཞུགས་ཤིང་ཕའི་ལས་རྗེས་སུ་སྒྲུབ་པར་བྱེད་དེ། གཞན་གྱི་སྲོག་འཕྲོག་པར་བྱེད། གཞན་གྱི་སྲོག་གཅོད་པས་འཚོ་བར་བྱེད་དོ། །ཤི་རི་ཀས་སྨྲས་པ། དེ་གཉིས་ལ་ཀུན་ནས་མནར་སེམས་མ་སྐྱེད་ཅིག །དེ་ནི་འདུ་འཛིའི་རིགས་པ་ཡིན་ཏེ། གང་གི་ཚེ་དེ་གཉིས་རྒྱལ་བྱེད་ཀྱི་ཚལ་ན་འཁོད་པ་དེའི་ཚེ་ན། དེ་གཉིས་ཀྱིས་གྲོག་སྤུར་ཕྲ་མོའི་སྲོག་ཀྱང་མ་བཅད་དོ། །དེ་གཉིས་དེ་ལྟ་བུ་དག་དང་ལྷན་ཅིག་གནས་པས་དེ་ལྟ་བུའི་ཉེས་པར་སྤྱོད་པ་དག་བྱེད་ན། དེ་གཉིས་དེ་དག་དང་ཤིན་ཏུ་དབྲལ་བར་བྱ་ཞིང་འདི་ལྟར་གང་གི་ཚེ་ཁྱོད་ག་ཤེད་དུ་འགྲོ་བ་དེའི་ཚེ་ན་ཁོ་བོ་སྲུང་བར་བྱེད་པ་འགའ་ཡང་མེད་པས་གལ་ཏེ་དེ་གཉིས་སྣང་ན་

---

^{[མ་དཔེ་གཟིགས་ན་འདིར་གནོན།]}

ཁོ་བོའི་གན་དུ་ཐོང་ལ་དེ་གཉིས་ཁོ་བོ་སྲུང་དུ་ཆུག་ཅིག །ཇི་ཙམ་ན་མཆུ་ཅན་བསོད་སྙོམས་ལ་ཞུགས་པ་ན། དེའི་ཚ་བོ་དེ་གཉིས་ཚོང་འདུས་ན་ཤ་འཚོང་ཞིང་འདུག་པ་དེས་མཐོང་ནས། དེ་གཉིས་ལངས་ཏེ་དེའི་རྐང་པ་གཉིས་ལ་གཏུགས་པ་དང་། དེས་སྨྲས་པ། ཁྱེའུ་གཉིས་ཁོ་བོ་ཁྱེད་གཉིས་ཀྱི་ཅིར་འོངས། ཞང་པོར་མཆིའོ། །ཤི་རི་ཀ་ཅིར་འོང་། དེ་ཡང་ཞང་པོར་མཆིའོ། །དེ་དུས་དེ་སྲིད་དུ་ན་ན་ཁྱེད་གཉིས་དེ་ལ་ལྟར་མ་དོང་ངམ། ཞང་པོ་བདག་ཅག་གིས་མ་འཚལ་ཏོ། །ད་དེང་ཞིག །བདག་ཅག་གཉིས་ཀྱིས་བགྱི་བ་ཅི་མཆིས། དེ་ཅི་ཟེར་བ་དེ་བཞིན་དུ་གྱིས་ཤིག །དེ་གཉིས་ཚེ་དང་ལྡན་པ་ཤི་རི་ཀ་ག་ལ་བ་དེར་སོང་སྟེ་ཕྱིན་ནས། དེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤི་རི་ཀས་སྨྲས་པ། ཁྱེའུ་གཉིས་མཆུ་ཅན་ཁྱེད་གཉིས་ཀྱི་ཅིར་འོང་། ཞང་པོར་མཆིའོ། །ཁོ་བོ་ཅིར་འོང་། ཞང་པོར་མཆིའོ། །ཁོ་བོ་དུས་དེ་སྲིད་དུ་ན་ན་ཁྱེད་གཉིས་ཀྱིས་ཁོ་བོ་ལན་འགའ་ཡང་མ་བལྟས་སོ། །ཞང་པོ་བདག་ཅག་གཉིས་ཀྱིས་མ་འཚལ་ཏེ། བདག་ཅག་གཉིས་ཀྱིས་ད་གཟོད་ཐོས་ནས། དེའི་སླད་དུ་བདག་ཅག་གཉིས་མཆིས་སོ། །ཚ་བོ་གཉིས་ཁྱེད་གཉིས་ཁོ་བོ་ལྷ་རྣམས་ཀྱི་ནང་དུ་སྐྱེ་བར་འདོད་དམ། ཞང་པོ་བདག་ཅག་གཉིས་གཞན་ཡང་ལྷ་རྣམས་ཀྱི་ནང་དུ་སྐྱེ་བར་འཚལ་ན། ཞང་པོ་ལྟ་སྨོས་ཀྱང་ཅི་འཚལ། ཚ་བོ་གཉིས་གལ་ཏེ་དེ་ལྟ་ན་ཁོ་བོ་ཡུལ་གཞན་དུ་སོང་ན་ལོ་ལེགས་ཤིང་། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་ན་བདག་ལ་རྩོམ་པར་བྱེད་པ་སྡུག་བསྔལ་བ་ཡིན་གྱིས་ཁྱེད་གཉིས་ཀྱི་ཁོ་བོ་སོད་ཅིག །ཞང་པོ་གལ་ཏེ་གཞན་འགའ་ཞིག་གིས་ཁྱོད་དགྲོངས་པར་བགྱིད་ན་ཡང་བདག་ཅག་གཉིས་ཀྱིས་དེ་དགུམ་པར་བགྱི་ན། བདག་ཅག་གཉིས་ཀྱིས་ཞང་པོ་དགྲོངས་པ་ལྟ་སྨོས་ཀྱང་ཅི་འཚལ། མཆུ་ཅན་གྱིས་ཁྱེད་གཉིས་ལ་ཇི་སྐད་བསྒོ། ཞང་པོ་ཅི་གསུང་བ་དེ་བཞིན་གྱིས་ཤིག་ཅེས་སོ། །ཚ་བོ་གཉིས་གལ་ཏེ་དེ་ལྟ་ན་ཁོ་བོ་འདི་སྐད་ཟེར་ཏེ།

---

^{[མ་དཔེ་གཟིགས་ན་འདིར་གནོན།]}

ཁོ་བོ་སྡུག་བསྔལ་གྱི་ཚོར་བས་ཉེན་གྱིས་ཁོ་བོ་སོད་ཅིག །དེ་གཉིས་ཀྱིས་འདི་དང་ཞང་པོ་སྔར་བགྲོས་པར་གྱུར་གོར་མ་ཆག་སྟེ། དེས་ན་ཞང་པོས་བདག་ཅག་གཉིས་འདིའི་གན་དུ་བཏང་ངོ་སྙམ་དུ་བསམས་ནས། དེ་གཉིས་ལས་གཅིག་ཆེས་དྲག་ཤུལ་ཅན་ཡིན་པས་མཚོན་རྣོན་པོས་དེའི་མགོ་བཅད་ནས་དེའི་འོག་ཏུ་རས་ཀྱིས་གཡོགས་ཏེ་འཁོད་དོ། །མཆུ་ཅན་ཡང་སྤྱོད་ཡུལ་ནས་ཕྱིར་འོངས་ཏེ་དེས་དེ་རས་ཀྱིས་གཡོགས་པ་མཐོང་ནས་དེས་སྨྲས་པ། ཚ་བོ་གཉིས་ཁྱེད་གཉིས་འཁོད་བཞིན་དུ་ཡང་འདི་ཉལ་ལམ། ཞང་པོ་འདི་ལྟར་ནམ་ཡང་ལྡང་པར་མི་འགྱུར་བ་དེ་ལྟར་ཉལ་ལོ། །མཆུ་ཅན་གྱིས་འདི་གཉིས་སྔོན་མ་བྱུང་བའི་ཚིག་སྨྲ་ན་དྲིའོ་སྙམ་དུ་བསམས་ནས། དེས་དེ་གཉིས་ལ་དྲིས་པ་དང་། དེ་གཉིས་ཀྱིས་སྐབས་དེ་རྒྱས་པར་མཆུ་ཅན་ལ་བརྗོད་དོ། །མཆུ་ཅན་ཡིད་མི་བདེ་བ་སྐྱེས། ནས་རས་དེ་བཤུས་པ་དང་། དེ་མཐོང་ནས་དེ་བདག་གིས་མཚོ་ཐོགས་པ་གཉེར་བར་མ་གྱུར་ཏམ་སྙམ་དུ་འགྱོད་པ་ཡང་སྐྱེས། བཤེས་པ་དང་བྲལ་བས་འགྱོད་པས་གདུངས་པའི་སེམས་ཀྱིས་ཡིད་མི་བདེ་བར་གྱུར་ནས། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ནད་པའི་ནད་གཡོག་མི་མཁས་པ་བཞག་སྟེ་འགྲོ་བར་མི་བྱའོ། །གལ་ཏེ་འགྲོ་དགོས་པའི་རྐྱེན་དེ་ལྟ་བུ་ཞིག་བྱུང་ན་ནད་གཡོག་མི་མཁས་པ་ལ་གལ་ཏེ་འདི་མེར་མཆོད་དམ། དུག་ཟའམ། མཚོན་འབྱིན་ཏམ། བདག་ཉིད་གཡང་སར་མཆོང་ངམ། ཐག་པས་འཆིང་ངམ། གཞན་ཡང་མི་འཕྲོད་པ་ཟ་བར་བྱེད་ན་བཟློག་པར་བྱའོ་ཞེས་བསྒོ་སྟེ་འགྲོ་བར་བྱའོ། །དགེ་སློང་གིས་ནད་གཡོག་མི་མཁས་པ་ལ་མ་བསྒོ་བར་དེ་བཞིན་དུ་འགྲོ་ན་འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་བསླབ་པའི་གཞི་འཆའ་བར་ནི་མི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་ལྷུང་བཟེད་ལ་བཙའ་ཞུགས་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་ལྷུང་བཟེད་འདི་བཙའ་ཞུགས་ན། ཅིའི་ཕྱིར་མི་སྲེག །དེས་སྨྲས་པ། འདི་ལ་རྫ་བོ་དང་། ལྕི་བ་དང་། ཏི་གྱི་ཚིགས་མ་དང་། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི། ལྷུང་བཟེད་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་ལྷུང་བཟེད་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན། དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ། ན་ཚབས་ཆེ་བ་ཡུན་མི་རིང་བར་དུས་བྱེད་པར་འགྱུར་བ་དེའི་ལྷུང་བཟེད་གསལ་བ་ཟླུམ་པ་ལོངས་སྤྱད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་ལྷུང་བཟེད་ཀྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དགེ་སློང་དེ་ངོ་ཚ་བར་གྱུར་ནས། ཅང་མི་སྨྲ་བར་འདུག་གོ་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་ལྷུང་བཟེད་ཀྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་ལྷུང་བཟེད་ཀྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན། འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་ལྷུང་བཟེད་མིག་བཞིན་དུ་ཡོངས་སུ་བཅང་བར་བྱ་སྟེ། གླན་པར་འོས་པ་ནི་གླན་པར་བྱ། བསྲེག་པར་འོས་པ་ནི་བསྲེག་པར་བྱའོ། །དགེ་སློང་གིས་ལྷུང་བཟེད་གླན་པར་འོས་པ་གློན་པར་མི་བྱེད་དམ། བསྲེག་པར་འོས་པ་སྲེག་པར་མི་བྱེད་ན། འགལ་ཚབས་ཅན་དུ་འགྱུར་རོ། །འདི་

---

^{[མ་དཔེ་གཟིགས་ན་འདིར་གནོན།]}

ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་དགེ་སློང་ཞིག་འདུག་པ་དེའི་སྣམ་སྦྱར་རྙིངས་ཤིང་དྲི་མས་གོས་ལ་རྡོལ་བར་གྱུར་ནས། དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཁྱོད་ཀྱི་སྣམ་སྦྱར་འདི་རྙིངས་ཤིང་དྲི་མས་གོས་ལ་རྡོལ་བར་གྱུར་ན། ཅིའི་ཕྱིར་འདི་མི་འཁྲུ་མི་འཚེམ། ཁ་བསྒྱུར་བར་མི་བྱེད། དེས་སྨྲས་པ། འདི་ལ་ཟངས་དང་། ཆུ་དང་། ཤིང་དང་། སྐུད་པ་དང་། ཚོན་དང་། ཡོ་བྱད་གཞན་ཡང་མང་དུ་དགོས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཅི། སྣམ་སྦྱར་མེད་པས་འགྲུབ་པར་འགྱུར་རམ། དེས་སྨྲས་པ། ཁོ་བོ་སྣམ་སྦྱར་མེད་པས་འགྲུབ་པར་མི་འགྱུར་ཏེ། འདི་ལྟར་ཁང་ཁྱིམ་ཆེ་གེ་མོ་ཞིག་ན་དགེ་སློང་ཞིག་ནད་ཀྱིས་བཏབ་ཅིང་སྡུག་བསྔལ་བ་ནད་ཚབས་ཆེ་བ་ཡུན་མི་རིང་བར་དུས་བྱེད་པར་འགྱུར་བ་དེའི་སྣམ་སྦྱར་ཉིས་རིམ་དམར་སེར་ཚོན་སར་པས་ཁ་བསྒྱུར་བ་ལོངས་སྤྱོད་པར་བཟོད་པ་དེ་བླང་བར་བྱའོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་སྣམ་སྦྱར་གྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་འདི་ལྟ་བུ་བསྐྱེད་དུ་རུང་ངམ། དེ་ངོ་ཚ་བར་གྱུར་ནས་ཅང་མི་སྨྲ་བར་འདུག་གོ་།སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྣམ་སྦྱར་གྱི་ཕྱིར་གདོལ་བ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་བསྐྱེད་པར་མི་བྱའོ། །དགེ་སློང་གིས་སྣམ་སྦྱར་གྱི་ཕྱིར་གདོལ་པ་དང་འདྲ་བར་དྲག་ཤུལ་གྱི་སེམས་དེ་ལྟ་བུ་སྐྱེད་པར་བྱེད་ན། འགལ་ཚབས་ཅན་དུ་འགྱུར་རོ། །གཞན་ཡང་དགེ་སློང་གིས་སྣམ་སྦྱར་པགས་པ་བཞིན་དུ་ཡོངས་སུ་བཅང་བར་བྱ་སྟེ། བཀྲུ་བར་འོས་པ་ནི་བཀྲུ་བར་བྱ། བཙེམ་པར་འོས་པ་ནི་བཙེམ་པར་བྱ། ཁ་བསྒྱུར་བར་འོས་པ་ནི་

---

^{[མ་དཔེ་གཟིགས་ན་འདིར་གནོན།]}

ཁ་བསྒྱུར་བར་བྱའོ། །དགེ་སློང་གིས་སྣམ་སྦྱར་བཀྲུ་བར་འོས་པ་འཁྲུ་བར་མི་བྱེད་དམ། བཙེམ་པར་འོས་པ་འཚེམ་པར་མི་བྱེད་དམ། ཁ་བསྒྱུར་བར་འོས་པ་ཁ་བསྒྱུར་བར་མི་བྱེད་ན། འགལ་ཚབས་ཅན་དུ་འགྱུར་རོ། །འདི་ཡང་བྱུང་བ་ཡིན་གྱི་རེ་ཞིག་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་སྟོབས་སྡེ་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་པ་དེས། རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན། སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ། བཙས་པ་ལས་ཁྱེའུ་གཟུགས་བཟང་བ་བལྟ་ན་སྡུག་པ་མཛེས་པ་ཞིག་བྱུང་ངོ་། །ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་པ་ན། ཉེ་དུ་རྣམས་ཀྱིས་སྨྲས་པ། གང་གི་ཕྱིར་ཁྱེའུ་འདི་ཁྱིམ་བདག་སྟོབས་སྡེའི་བུ་ཡིན་པ་དེའི་ཕྱིར། ཁྱེའུ་སྡེ་པ་ཞེས་བྱའོ་ཞེས་དེའི་མིང་སྡེ་པ་ཞེས་བྱ་བར་བཏགས་སོ། །ཁྱིམ་བདག་སྟོབས་སྡེ་དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་ཞིག་བཙས་ནས་དེའི་མིང་ནི་ཉེ་སྡེ་ཞེས་བྱ་བར་བཏགས་སོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེའི་ཆུང་མ་དུས་ལ་བབ་ནས་དེ་དེ་དག་གིས་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་བརྒྱན་ཏེ་དུར་ཁྲོད་དུ་བསྐྱལ་ནས། བསྲེགས་ཏེ་མྱ་ངན་བསངས་བ་བྱས་ཏེ་འཁོད་དོ། །ཁྱིམ་བདག་སྟོབས་སྡེས་དེའི་ཤིད་དག་བྱས་ནས། གལ་ཏེ་བདག་གིས་ཆུང་མ་གཞན་ཞིག་བླངས་པར་གྱུར་ན། ཁྱེའུ་གཉིས་སྡུག་བསྔལ་བར་འགྱུར་གྱིས། བདག་གིས་སྡེ་པའི་ཕྱི་མ་དབུབ་པར་བྱའོ་སྙམ་དུ་

---

^{[མ་དཔེ་གཟིགས་ན་འདིར་གནོན།]}

བསམས་ནས། དེས་དེའི་ཁྱིམ་ཕུབ་བོ། །ཇི་ཙམ་དུས་གཞན་ཞིག་ན་ཁྱིམ་བདག་སྟོབས་སྡེ་ན་བར་གྱུར་ནས། དེ་ལ་རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་ཅིང་ཉམ་དམས་ནས། དེས་སྡེ་པ་དང་ཉེ་སྡེ་གཉིས་ལ་སྙིང་བཞོས་ནས། བསགས་བ་ཀུན་གྱི་མཐའ་འཛད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་པ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེ་ཁྱེའུ་གཉིས་ཀྱིས་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས། བསྲེགས་ཏེ་དེའི་འོག་ཏུ་མྱ་ངན་བསངས་པ་བྱས་ནས་ཤིད་དག་བྱས་ཏེ་འཁོད་དོ། །སྡེ་པས་བསམས་པ། གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བ་བྱེད་ན། ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱང་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན་ཉེ་དུ་རྣམས་ཀྱིས་ཁྲེལ་བར་འགྱུར་བས་བདག་ཟོང་ཐོགས་ཏེ་ཡུལ་གཞན་དུ་འགྲོའོ་སྙམ་དུ་རིག་ནས། ཉེ་སྡེ་ལ་སྨྲས་པ། ནུ་བོ་གང་གི་ཚེ་བདག་ཅག་ཕ་གསོན་པ་དེའི་ཚེ་ན་ནི་གཞན་གྱིས་སྲོག་གསོ་བར་བྱེད་ན་ད་ནི་དེའི་དུས་ལ་བབ་པས་ཁྱིམ་གྱི་བྱ་བ་སྦྱང་བར་བྱ་དགོས་ཏེ། གལ་ཏེ་ཁྱིམ་གྱི་བྱ་བ་དམས་པ་ཡལ་བར་བོར་ན། ཉེ་དུ་རྣམས་ཀྱིས་ཁྲེལ་བར་འགྱུར་གྱིས། ཁྱོད་ནི་འདི་ཉིད་ན་ཁྱིམ་གྱི་བྱ་བ་གྱིས་ཤིག །ཁོ་བོ་ནི་ཟོང་ཐོགས་ཏེ་ཡུལ་གཞན་དུ་འགྲོའོ། །ཉེ་སྡེས་སྨྲས་པ། དེ་ལྟར་མཛོད་ཅིག །སྡེ་བ་ཟོང་མང་པོ་ཐོགས་ཏེ། ཡུལ་གཞན་དུ་སོང་བ་དང་། དེས་དེར་ཁེ་སྤོགས་མང་པོ་གྲུབ་ནས། སྡེ་པས་ནུ་བོ་ཉེ་སྡེ་ལ་ནུ་བོ་ཁོ་བོས་ཁེ་སྤོགས་མང་པོ་གྲུབ་སྟེ། རིང་པོར་མི་ཐོགས་པར་འོང་གིས་བརྟན་པ་དང་། སྤུངས་དང་། སྤྲོ་བ་ཆེན་པོར་གྱིས་ཤིག་ཅེས་སྤྲིང་ཡིག་བསྐུར་རོ། །ཡང་སྡེ་པས་

---

^{[མ་དཔེ་གཟིགས་ན་འདིར་གནོན།]}

ཕྱིར་ཞིང་ཡང་ཁེ་སྔོགས་མང་པོ་གྲུབ་ནས་དེས་ཕྱིས་ཀྱང་དེ་ཁོ་ན་བཞིན་དུ་སྤྲིང་ཡིག་བསྐུར་རོ། །ཡང་སྡེ་པས་ཕྱི་ཕྱིར་ཞིང་ཡང་ཁེ་སྤོགས་མང་པོ་གྲུབ་ནས། དེས་ཡང་དེ་ཁོ་ན་བཞིན་དུ་སྤྲིང་ཡིག་བསྐུར་ཏེ་སྡེ་པ་དེ་དེ་བཞིན་དུ་དུས་དང་མཐུན་ པའི་དུས་སུ་སྤྲིང་ཡིག་སྐུར་བར་བྱེད་དོ། །ཆོས་ཉིད་ཀྱིས་ན། གང་ཕྱིར་རྙེད་པ་དེ་ཕྱིར་ཆགས། །རྙེད་ལས་ཆགས་པ་སྐྱེ་བར་འགྱུར། །ཆགས་པས་ཟིལ་ནོན་མི་ཡིས་ནི། །བྱ་དང་བྱ་མིན་རྟོགས་མི་འགྱུར། །ཞེས་བྱ་བ་ཡིན་པས་སྡེ་པ་ཤིན་ཏུ་ཐག་རིང་པོར་སོང་ནས། ཕྱིན་ཆད་སྤྲིང་ཡིག་སྐུར་བར་མི་བྱེད་དོ། །དེ་ནས་སྡེ་པའི་ཆུང་མ་གོས་དང་ཟས་བཟང་བས་ཉོན་མོངས་པ་དག་གིས་གནོད་པར་གྱུར་ནས། དེས་ཉེ་སྡེ་ལ་མཚན་མ་སྟོན་པར་བྱེད་པ་དང་། ཉེ་སྡེས་དབང་པོ་རྣམས་ཕྱིར་བསླན་ཏེ་འདུག །སྡེ་པའི་ཆུང་མ་དེ་ངོ་ཚ་མེད་པར་གྱུར་ནས། ཡང་སྨྲས་པ། ཉེ་སྡེ་ཚུར་སྤྱོན། འདི་དང་འདི་ལྟ་བུ་བགྱིའོ། །ཉེ་སྡེས་རྣ་བ་བཀབ་སྟེ་སྨྲས་པ། ཁྱོད་ཁོ་བོའི་མ་དང་འདྲས་ཕྱིན་ཆད་དེ་སྐད་མ་ཟེར་ཅིག །བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས། སྡེ་པའི་ཆུང་མ་དེ་ཉེ་དུའི་ཁྱིམ་དུ་སོང་ནས། གོས་དྲི་མ་ཅན་དག་བགོས་ཏེ་ཁྲི་ཞིག་པ་ལ་འདུག་ཅིང་འདུག་གོ། དེ་ལ་མ་དང་ནང་མི་དག་གིས་སྨྲས་པ། ཁྱོད་ཅིའི་ཕྱིར་འདི་ལྟར་འདུག །སྡེ་པའི་ཆུང་མས་སྨྲས་པ། ཅི་བུད་མེད་ཀྱི་ཡུལ་ལ་གང་གནོད་པ་དེ་མི་ཤེས་སམ། ཁོ་མོ་ཉོན་མོངས་པ་དག་གིས་ཤིན་ཏུ་གནོད་པར་གྱུར་ཏོ། །དེ་དག་གིས་སྨྲས་པ་ཁྱོད་ཀྱི་སྐུད་པོ་ཉེ་སྡེ་གཟུགས་བཟང་བ་བལྟ་ན་སྡུག་པ་མཛེས་པ་ཡིན་ན་ཅིའི་ཕྱིར་དེ་ལ་འཆོལ་བར་མི་བྱེད། སྡེ་པའི་ཆུང་མས་སྨྲས་པ། བདག་གིས་དེ་ལ་བཅོལ་ན་མ་གྲུབ་བོ། །དེ་དག་གིས་སྨྲས་པ། བུད་མེད་གཞན་གང་དག་ཁྱིམ་ཐབ་དག་ཆེས་ཡུན་རིང་ནས་དོང་སྟེ། དུས་སུ་མ་འཁོར་བ་དེ་དག་ཆེས་དཀའ་བ་བྱེད་པ་ཡིན་ནོ། །སྡེ་པའི་ཆུང་མས་སྨྲས་པ། དེ་དག་ལ་ནི་ཁྱིམ་ཐབ་དག་གིས་དུས་དང་མཐུན་པའི་དུས་སུ་གཏམ་རྨེད་པར་བྱེད་དེ། ཁོ་མོ་ལ་ཡང་གང་གི་ཚེ་ཁྱིམ་ཐབ་གསོན་པར་གྱུར་པ་དེའི་ཚེ་ན་ནི་དུས་དང་མཐུན་པའི་དུས་སུ་སྤྲིང་ཡིག་བསྐུར་བར་ཡང་གྱུར་ན། ད་སྐུར་

---

^{[མ་དཔེ་གཟིགས་ན་འདིར་གནོན།]}

བར་མི་བྱེད་པས་དུས་ལ་བབ་གོར་མ་ཆག་གོ་།དེ་དག་གིས་སྡེ་པའི་ཆུང་མ་དེ་ལ་ཐབས་དུ་མ་དག་གིས་ཡིད་བཞོས་ཀྱང་ཁྲི་ལས་ལྡང་བར་མི་བྱེད་ཅིང་དེས་སྨྲས་པ། གལ་ཏེ་ཁོ་མོ་གཞན་ལ་མི་སྦྱིན་ན། ཁོ་མོས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱའོ། །དེ་ནས་སྡེ་པའི་ཆུང་མའི་ཕ་མ་དང་ཉེ་དུ་དང་རྩ་ལག་གི་ཚོགས་དག་གིས་གྲོས་བྱ་བར་བརྩམས་ཏེ། འདི་དེ་ལྟར་ཟློག་ཏུ་མ་བཏུབ་པས་ངེས་པར་རིགས་གཉི་ག་ལ་མི་སྙན་པ་འབྱུང་བར་བྱེད་ཀྱིས། ཉེ་སྡེ་མགྲོན་དུ་བོས་ཏེ། ཟན་བྱིན་ལ་དེ་ལ་འདི་སྦྱིན་པར་བྱ་བ་ནི་འདིར་དུས་ལ་བབ་པ་ཡིན་ནོ་ཞེས་གྲོས་བྱས་ནས། དེ་དག་གིས་ཉེ་སྡེ་མགྲོན་དུ་བོས་ཏེ། ཟན་བྱིན་ནས་སྨྲས་པ། ཉེ་སྡེ་ཁྱོད་ཀྱི་ཕུ་བོའི་ཆུང་མ་འདི་ཉོན་མོངས་པ་ཀུན་ཏུ་སྦྱོད་པས་ཤིན་ཏུ་གཡེན་སྤྱོ་བར་གྱུར་པས་ངེས་པར་རིགས་གཉི་ག་ལ་མི་སྙན་པ་འབྱིན་པར་བྱེད་ན། གལ་ཏེ་ཁྱོད་འདི་དང་ལྷན་ཅིག་ཏུ་སྤྱོད་པར་བྱེད་ན། དེ་ལྟ་ན་ལེགས། གལ་ཏེ་མི་བྱེད་ན་བདག་ཅག་གིས་འདི་གཞན་ལ་སྦྱིན་པར་བྱའོ། །ཉེ་སྡེས་བསམས་པ། འདི་བདག་ཅག་གིས་བྱིས་པ་ནས་བསྐྱེད་པ་ཡིན་པས། གལ་ཏེ་གཞན་དུ་འགྲོ་བར་འགྱུར་ཞིང་རིགས་གཉི་ག་ལ་མི་སྙན་པ་འབྱིན་པར་འགྱུར་ན། མ་ལགས་ཀྱིས་བདག་གིས་འདི་བདག་གིར་བྱའོ་སྙམ་དུ་རིག་ནས། དེས་དང་དུ་བླངས་པར་ཁས་བླངས་སོ། །དེ་ནས་ཉེ་སྡེས་སྡེ་པའི་ཆུང་མ་རང་གི་ཁྱིམ་དུ་ཁྲིད་ནས་དེ་དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་ལ་མངལ་ན་གནས་པའི་མཚན་མ་དག་བྱུང་བར་གྱུར་ནས། དེ་ལ་ན་ཟླ་དག་གིས་སྨྲས་པ། འདི་ག་ལས་འོངས། སྡེ་པའི་ཆུང་མས་སྨྲས་པ། ཁོ་མོ་ཚུལ་ཁྲིམས་དང་ལྡན་པ་ཁོ་ན་ཡིན་གྱིས་ཁྱེ་ཅག་རྫུན་གྱི་སྐུར་བས་ཁོ་མོ་ལ་ཀུན་ཏུ་མ་སྤྱོད་ཅིག །དེའི་གྲོགས་མོ་ཆེས་མཛའ་བ་ཞིག་ཡོད་པ་དེས་སྨྲས་པ། ཅིའི་ཕྱིར་གསང་བར་བྱེད། འདི་གདོན་མི་ཟ་བར་གྲགས་པར་འགྱུར་གྱིས་སྨྲོས་ཤིག །སྡེ་པའི་ཆུང་མས་སྨྲས་པ། ཉེ་སྡེ་ལས་སོ། །ལེགས་ཏེ་ཁྱིམ་ཐབ་ལས་སམ། སྐུད་པོ་ལས་ཀྱང་རུང་

---

^{[མ་དཔེ་གཟིགས་ན་འདིར་གནོན།]}

འདི་ལ་ཉེས་པ་འགའ་ཡང་མེད་དོ། །སྡེ་པའི་ཆུང་མ་དེ་སེམས་ཅན་དང་ལྡན་པར་གྱུར་པ་ན། སྡེ་པས་ཉེ་སྡེ་ལ་ནུ་བོ་བརྟན་པ་དང་སྤུངས་དང་སྤྲོ་བ་ཆེར་གྱིས་ཤིག །ཁོ་བོ་ཡང་ཡི་གེའི་རྗེས་བཞིན་ཁོ་ནར་འོང་ངོ་ཞེས་སྤྲིང་ཡིག་བསྐུར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ་བསམས་པ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར་གྱུར་ཏེ། འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་འཁོན་ཐ་ཆད་ཡིན་པས། བདག་ལ་གནོད་པ་བྱེད་པར་གྱུར་པ་གང་ཡིན་པ་དེ་ལྟ་བུའི་གནས་ཡོད་ཀྱིས་བྲོས་ཏེ་འགྲོའོ་སྙམ་མོ། །ཡང་བསམས་པ། ཡུལ་ཡོངས་སུ་གཏོང་བར་བྱེད་པ་ནི་སྡུག་བསྔལ་བ་ཡིན་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གིས། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་གཞོན་ནུའི་ཡོངས་སུ་སྤང་བ་ཐོབ་པས་དེ་དག་གི་ནང་དུ་རབ་ཏུ་བྱུང་ན་དེས་དེར་ཅི་ཞིག་བྱ་བར་འགྱུར་སྙམ་ནས། ཉེ་སྡེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་ཞིག་གི་གན་དུ་ཕྱིན་ནས་སྨྲས་པ། འཕགས་པ་དག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟང་ལེགས་ཏེ་ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་ཕྱུང་ཞིག །དགེ་སློང་དེ་ཉེ་སྡེ་རབ་ཏུ་ཕྱུང་། རྫོགས་པར་བསྙེན་པར་བྱས་ནས་། དེའི་འོག་ཏུ་ཉི་མ་གཉིས་སམ་གསུམ་ཀུན་ཏུ་སྤྱོད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟང་རི་དྭགས་ཀྱིས་རི་དྭགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་རྒྱུས་ལ་འཚོ་བར་གྱིས་ཤིག །ཉེ་སྡེ་མཁན་པོས་དེ་སྐད་བསྒོ་ནས་མཁན་པོ་བཀའ་བཞིན་འཚལ་ཞེས་སྨྲས་ཏེ། སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་སྤྱོད་ཡུལ་ལ་མི་མཁས་པས་གྲོང་རིམས་ཀྱིས་རང་གི་ཁྱིམ་དུ་ཞུགས་པ་དང་། སྡེ་པའི་ཆུང་མས་ཉེ་སྡེ་མཐོང་ནས་དེས་བྲང་བརྡུངས་ཏེ་སྨྲས་པ། ཉེ་སྡེ་ཅིའི་སླད་དུ་ཁྱོད་ཀྱིས་ཁོ་མོ་སྤངས་

---

^{[མ་དཔེ་གཟིགས་ན་འདིར་གནོན།]}

ཏེ་རབ་ཏུ་བྱུང་། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཅིའི་སླད་དུ་ཁྱོད་ཀྱིས་ཁོ་མོ་སྤངས་ཏེ་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་ལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། བདག་གིས་ཉེས་པར་སྤྱོད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། འཁོན་རྣམས་ཀྱི་ནང་ན་འདི་ལྟ་སྟེ་བུད་མེད་ཀྱི་འཁོན་ཐ་ཆད་ཡིན་པས། བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྡེ་པའི་ཆུང་མས་སྨྲས་པ། ཁྱོད་ཀྱིས་ནི་རེ་ཞིག་བདག་ཉིད་ཐར་བར་བགྱིས་ན། ཁོ་མོས་ཇི་ལྟར་བསྒྲུབ་པར་བགྱི། ཉེ་སྡེས་སྨྲས་པ། དེ་ནི་ཁྱོད་ཉིད་ཀྱིས་ཉོན་མོངས་པའི་དབང་གིས་རྣམ་པར་བསམས་པ་ཡིན་གྱི་ཁོ་བོ་ནི་མི་འདོད་བཞིན་བྱེད་དུ་བཅུག་པ་ཡིན་པས་ཁྱོད་ཉིད་ཤེས་སོ་ཞེས་སྨྲས་ཏེ་སོང་ངོ་། །ཉེ་སྡེའི་ཆུང་བོ་གྲོགས་སྔོན་སྨན་པ་སྤོས་འཚོང་གི་ཁྱེའུ་ཞིག་ཡོད་པ་དེ། སྡེ་པའི་ཆུང་མའི་ཁྱིམ་དུ་སོང་སྟེ། ཉེ་སྡེ་གར་སོང་ཞེས་དྲིས་པ་དང་། སྡེ་པའི་ཆུང་མས་སྨྲས་པ། ཉེ་སྡེས་ལམ་ལམ་པོར་བྱས་ཏེ་རབ་ཏུ་བྱུང་། གང་དུ་ཤཱཀྱ་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །གལ་ཏེ་ཡིད་མི་ཆེས་ན་རྒྱལ་བྱེད་ཀྱི་ཚལ་དུ་སོང་ལ་ལྟོས་ཤིག །དེ་རྒྱལ་བྱེད་ཀྱི་ཚལ་དུ་སོང་བ་ན་རབ་ཏུ་བྱུང་བ་ཐམས་ཅད་ཆ་ལུགས་འདྲ་བས་དེ་གང་ཡིན་མི་ཤེས་ནས། དེས་དགེ་སློང་ཞིག་ལ་དྲིས་པ། འཕགས་པ་མཉན་ཡོད་པའི་ཁྱིམ་བདག་གི་བུ་ཉེ་སྡེ་ཞེས་བགྱི་བ་འདིར་རབ་ཏུ་བྱུང་ན་ག་ལ་མཆིས། དགེ་སློང་དེས་བསྟན་ནས། སྤོས་འཚོང་གི་ཁྱེའུ་དེ་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན། ཁོ་བོ་ལ་ཡང་མ་དྲིས་པར་རབ་ཏུ་བྱུང་། ཉེ་སྡེས་སྨྲས་པ། ཁྱོད་ཀྱང་དེ་སྐད་ཅེས་ཁྱོད་ཀྱིས་ཅི་ཞིག་རྗེས་སུ་བསྒྲུབས་ན། ཁོ་བོ་ལ་ཡང་མ་དྲིས་པར་རབ་ཏུ་བྱུང་ཞེས་ཟེར་རམ། གང་གི་ཚེ་བདག་ཕུ་བོ་དེ་ལ་སྤྲིན་བཞིན་དུ་བལྟ་བར་འདོད་པ་དེའི་ཚེ་ན་ནི་དེ་མ་འོངས་ལ། ད་བདག་གིས་ཉེས་པར་སྤྱད་པ་འདི་ལྟ་བུ་བྱས་ན་དེ་འོང་བར་འགྱུར་ཏེ། འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་འཁོན་

---

^{[མ་དཔེ་གཟིགས་ན་འདིར་གནོན།]}

ཐ་ཆད་ཡིན་པས། བདག་ལ་གནོད་པར་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་དོ། །སྤོས་འཚོང་གི་ཁྱེའུས་སྨྲས་པ། ཁོ་བོ་ཅག་སྤོས་འཚོང་གི་ཁྱེའུ་དག་ནི་སྨན་པའི་ཕྱེད་ཡིན་པས་ཁོ་བོས་རེ་ཞིག་མངལ་ན་གནས་པ་རླུགས་པར་བྱ་བ་དེ་ལྟ་བུ་དག་བྱིན་པར་གྱུར་ན། དེས་མངལ་ན་གནས་པ་དེ་དུམ་བུ་དུམ་བུར་ཞིག་པར་འགྱུར་བ་ཞིག་ན་ཁྱོད་ཀྱིས་ཁོ་བོ་ལ་ཅིའི་ཕྱིར་མ་སྨྲས། འདི་ལྟར་ད་ཡང་སྦྱིན་པར་བྱའོ། །ཉེ་སྡེས་དང་དུ་བླངས་སོ། །དེ་ནས་སྤོས་འཚོང་གི་ཁྱེའུ་དེས་རྫས་རྣོན་པོ་དག་ཕྱེ་མར་བྱས་ཏེ་བུ་མོ་ཞིག་གི་ལག་ཏུ་བྱིན་ནས་སྨྲས་པ། ཁྱོད་སོང་ལ་སྡེ་པའི་ཁྱིམ་དུ་སོང་སྟེ། སྡེ་པའི་ཆུང་མ་ལ་ཉེ་སྡེ་ན་རེ་ཕྱེ་མ་འདི་ཆུ་དྲོན་མོ་དང་སྦྱོར་ལ་འཐུང་ཞིག་དང་། ཁྱོད་སོས་པར་འགྱུར་ཞེས་ཟེར་རོ་ཞེས་གྱིས་ཤིག །བུ་མོ་དེས་ཇོ་བོ་བཀའ་བཞིན་འཚལ་ཞེས་སྤོས་འཚོང་གི་ཁྱེའུ་ལས་མཉན་ནས། སྡེ་པའི་ཁྱིམ་ག་ལ་བ་དེར་སོང་སྟེ་ཕྱིན་ནས། སྡེ་པའི་ཆུང་མ་ལ་སྨྲས་པ། ཉེ་སྡེའི་ཞལ་ནས་ཕྱེ་མ་འདི་ཆུང་དྲོན་མོ་དང་སྦྱོར་ལ་འཐུང་ཞིག་དང་། ཁྱོད་སོས་པར་འགྱུར་ཞེས་གསུང་ངོ་། །སྡེ་པའི་ཆུང་མ་དེས་ཕྱེ་མ་དེ་ཆུ་དྲོན་པོ་དང་སྦྱར་ཏེ་འཐུངས་པ་དང་། དེ་ནས་དེའི་མངལ་ན་གནས་པ་དེ་དུམ་བུ་དུམ་བུར་ཞིག་པར་གྱུར་ཅིང་མངལ་ན་གནས་པའི་མཚན་མ་དག་ཀྱང་མེད་པར་གྱུར་ཏོ། །ཡང་ན་ཟླ་དག་གིས་མཐོང་ནས་དེ་དག་གིས་སྨྲས་པ། ཁྱོད་ཀྱི་མངལ་ན་གནས་པ་དེ་གར་སོང་། སྡེ་པའི་ཆུང་མས་སྨྲས་པ། ཁོ་མོས་དང་པོ་ཉིད་ནས་ཁོ་མོ་ཚུལ་ཁྲིམས་དང་ལྡན་པ་ཉིད་ཡིན་གྱིས་ཁྱེད་ཅག་རྫུན་གྱི་སྐུར་བས་ཁོ་མོ་ལ་ཀུན་ཏུ་མ་སྤྱོད་ཅིག་ཅེས་མ་སྨྲས་སམ། དེའི་གྲོགས་མོ་ཆེས་མཛའ་བ་དེ་དེའི་གན་དུ་སོང་སྟེ་སྨྲས་པ། ཁྱོད་ཀྱིས་སྔར་འདི་སྐད་ཅེས་ཉེ་སྡེ་ལས་སོ་ཞེས་ཁོ་མོ་ལ་སྨྲས་པའི་མངལ་ན་གནས་པ་དེ་ད་གར་སོང་། སྡེ་པའི་ཆུང་མས་སྨྲས་པ། གང་ཁོ་ན་ལས་འོངས་པ་དེ་ཁོ་ནར་སོང་ངོ་། །ཇི་ལྟར་གྱུར། ཉེ་སྡེས་ཕྱེ་མ་རྣོན་པོ་དེ་ལྟ་བུ་བྱིན་པས་དེས་ན་མངལ་ན་གནས་པ་དེ་དུམ་བུ་དུམ་བུར་ཞིག་པ་འགྱུར་ཏོ། །དེ་ཤཱཀྱའི་

---

^{[མ་དཔེ་གཟིགས་ན་འདིར་གནོན།]}

སྲས་ཀྱི་དགེ་སྦྱོང་རྣམས་བྱེད། ཕར་ཁ་གཏོང་བར་བྱེད། ཁ་ཟེར་བར་བྱེད་དོ། །ཉེ་སྡེས་འདི་ལྟར་མངལ་ན་གནས་པ་ཡང་རླུགས་པར་བྱེད་དོ་ཞེས་སྨོད་པར་བྱེད། ཕྱར་ཁ་གཏོང་བར་བྱེད། ཁ་ཟེར་བར་བྱེད་དོ། །ཉེ་སྡེས་སྡིག་པའི་ལས་འདི་དང་འདི་ལྟ་བུ་བྱས་སོ་ཞེས་བྱ་བའི་སྒྲ་དེ་ཡང་མཉན་ཡོད་ཀུན་ཏུ་གྲགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་རྨས་པ། ཉེ་སྡེ་ཁྱོད་ཀྱིས་སྡིག་པའི་ལས་དེ་ལྟ་བུ་དེ་བྱས་པ་བདེན་ནམ། བཙུན་པ་མ་བགྱིས་ཏེ། འདི་ལྟར་བདག་གིས་རྗེས་སུ་ཡི་རང་བར་ནི་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཉེ་སྡེ་ལ་ནི་ལྟུང་བ་མེད་དོ། །ཡང་དགེ་སློང་གིས་གནས་དེ་ལྟ་བུ་ལ་རྗེས་སུ་ཡི་རང་བར་མི་བྱའོ། །དགེ་སློང་གནས་དེ་ལྟ་བུ་ལ་རྗེས་སུ་ཡི་རང་བར་བྱེད་ན། འགལ་ཚབས་ཅན་དུ་འགྱུར་རོ། །དེའི་བར་སྐབས་སུ་སྡེ་པ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་ཕྱིན་ཏོ། །འཇིག་རྟེན་ནི་འབྱོར་པ་འདོད་ལ་རྒུད་པ་དང་མི་མཐུན་པ་ཡིན་པས། ཁ་ཅིག་གིས་མྱུར་བ་མྱུར་བར་དོང་སྟེ། སྡེ་པའི་ཆུང་མ་ལ་སྨྲས་པ། ཁྱོད་ཀྱི་ཁྱིམ་ཐབ་དོན་ལེགས་པར་གྲུབ་སྟེ་མཉན་ཡོད་དང་ཉེ་བར་འོངས་ཀྱིས་སྤྲོ་བ་སྐྱེད་ཅིག །བུད་མེད་ཀྱི་ཡུལ་ནི་མ་བསླབས་པར་མཁས་པ་ཡིན་པས་སྡེ་པའི་ཆུང་མ་དེ་ཡི་ཆད་པའི་སེམས་ཀྱིས་གོས་དྲི་མ་ཅན་དག་བགོས་ཏེ། ཁྲི་ཞིག་པ་ལ་འདུག་ཅིང་འདུག་གོ་། ཇི་ཙམ་ན་སྡེ་པ་མཉན་ཡོད་དུ་ཞུགས་ནས་ཟོང་མཛོད་དུ་མཁོས་སུ་ཕབ་སྟེ། རང་གི་ཁྱིམ་དུ་འོངས་པ་དང་། ཁྱིམ་མ་བྱུགས། བྱི་དོར་མ་བྱས། གསལ་བ་མེད་པ་མཐོང་ནས། དེས་བུ་མོ་མོ་མངག་གཞུག་མ་ལ་དྲིས་པ། ཁྱིམ་བདག་གི་ཆུང་མ་གར་སོང་། བུ་མོས་སྨྲས་པ། རྗེའི་སྲས་སྤྱོད་ལམ་བཅད་དེ་ཁྲི་ཞིག་པ་ལ་མཆིས་ཤིང་མཆིས་སོ། །དེ་ནས་སྡེ་པ་ཡི་མི་བདེ་བ་སྐྱེས་ཏེ། ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཁོ་བོ་འོངས་པས་མི་བདེ་བའམ།

---

^{[མ་དཔེ་གཟིགས་ན་འདིར་གནོན།]}

རྗེའི་སྲས་བདག་ཁྱོད་བྱོན་པས་མི་བདེ་བ་མ་མཆིས་ཏེ། འདི་ལྟར་རྗེའི་སྲས་ཀྱིས་སྲུང་མ་གང་ལགས་པ་དེ་དག་ཉིད་རྐུན་མ་དག་ལགས་སོ། །ཅི་ཞིག་བྱས། བཀག་བཞིན་དུ་ཉེ་སྡེས་ནན་གྱིས་ཁོ་མོ་བདག་གིར་བགྱིས་སོ། །བཟང་མོ་དེ་ནི་དེས་ཁྱོད་ཟིལ་གྱིས་མནན་པ་མ་ཡིན་གྱི་ཁོ་བོ་ཟིལ་གྱིས་མནན་པ་ཡིན་གྱིས། ལོངས་ཤིག །ཁོ་བོས་དེ་ལ་མཚམས་གཅད་པར་བྱའོ། །བཟང་མོ་ཉེ་སྡེ་ག་ལ་འདུག །རྗེའི་སྲས་ཁྱོད་བྱོན་པ་ཐོས་ནས་རབ་ཏུ་བྱུང་ངོ་། །གང་དུ་རྒྱལ་བྱེད་ཀྱི་ཚལ་དུ་ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ནང་དུའོ། །བཟང་མོ་ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ། །འཇིག་རྟེན་ནི་མཛའ་བཤེས་དང་དགྲ་བོ་དང་བར་མ་ཡིན་པས། ཁ་ཅིག་ཉེ་སྡེའི་དྲུང་དུ་སོང་སྟེ་སྨྲས་པ། ཉེ་སྡེ་ཁྱེད་ཀྱི་ཕུ་བོ་འོངས་སོ། །ཉེ་སྡེས་སྨྲས་པ། ཇི་སྐད་ཟེར། དེ་དག་གིས་སྨྲས་པ། ཅི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ། དེ་ལ་མཚམས་ཆེན་པོ་གཅད་པར་བྱའོ་ཞེས་ཟེར་རོ། །ཉེ་སྡེས་ཐོས་ནས་ཉམ་ང་བར་གྱུར་ཏེ། བསམས་པ། བདག་འཇིགས་པ་དག་གིས་རབ་ཏུ་བྱུང་བ་དེ། འདིར་ཡང་འབྱུང་བར་མི་འགྱུར་རམ། འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་བྱིན་མོད་ཀྱི་འོན་ཀྱང་བདག་ཉེས་པ་དང་བཅས་པ་ཡིན་པས། གལ་ཏེ་ན་བདག་ལ་འདིར་ཡང་གནོད་པ་བྱེད་པར་འགྱུར་བའི་གནས་ཡོད་ཀྱིས་བྲོས་ཏེ་འགྲོའོ་སྙམ་ནས། དེས་མཁན་པོ་ལ་མཁན་པོ་བདག་འཇིགས་པ་གང་གིས་རབ་ཏུ་བྱུང་བ་དེ། འདིར་ཡང་རྗེས་སུ་འབྲེལ་བར་གྱུར་ཏོ་ཞེས་བྱུང་བའི་མཐའ་དེ་རྒྱས་པར་བརྗོད་དོ། །མཁན་པོས་སྨྲས་པ། བུ་ཅི་ཉེས། མཁན་པོ་བདག་གི་ཕུ་བོ་དེ་མཆིས་ནས་ཏེ་པོར་མཆིད་འབོ་ཞིང་། ཇི་དེ་འཇིགས་པ་མེད་པའི་གྲོང་ཁྱེར་ཡིན་ནམ། ཁོ་བོ་དེར་ཡང་སོང་ལ་དེ་ལ་མཚམས་ཆེན་པོ་གཅད་པར་བྱའོ་ཞེས་མཆིའོ། །འདི་ལྟར་བདག་ཅག་རྒྱལ་པོས་གཞོན་ནུའི་ཡོངས་སུ་སྤང་བ་སྩལ་མོད་ཀྱི་འོན་ཀྱང་བདག་ནོངས་པ་དང་བཅས་པ་ལགས་པས། གལ་ཏེ་ན་འདིར་ཡང་བདག་ལ་གནོད་

---

^{[མ་དཔེ་གཟིགས་ན་འདིར་གནོན།]}

པ་བགྱིད་པར་འགྱུར་བའི་གནས་མཆིས་ཀྱིས། བྲོས་ཏེ་མཆིའོ། །བུ་གང་དུ་འགྲོ། མཁན་པོ་རྒྱལ་པོའི་ཁབ་ཏུའོ། །བུ་དེ་ན་ཁོ་བོ་མཛའ་བཤེས་དགེ་སློང་ཞིག་འདུག་གི་།དེ་ལ་སྤྲིང་ཡིག་བསྐུར་གྱིས། དེའི་དྲུང་ན་འདུག་ཅིག་དང་། དེ་ཁྱོད་ལ་བྱམས་པས་རྗེས་སུ་སྐྱོང་བར་འགྱུར་རོ། །མཁན་པོ་ལེགས་སོ། །དེས་དགེ་སློང་དེ་ལ་སྔར་བྲོ་རྨ་བ་དྲིས་ཏེ། བདག་གི་ལྷན་ཅིག་གནས་པ་བདག་གིས་ཁྱོད་ཀྱི་གན་དུ་གཏང་སྟེ་འོང་གིས། དེའི་སླད་དུ་ཇི་ལྟར་འདི་ནི་མངོན་པར་དགའ་བ་བཞིན་དུ་བྱམས་པས་རྗེས་སུ་སྐྱོངས་ཤིག་ཅེས་སྤྲིང་ཡིག་བྲིས་ནས། ཉེ་སྡེས་སྤྲིང་ཡིག་དེ་མནོས་ཏེ་བག་ཚ་བས་ཡིད་མི་བདེ་ཞིང་ཕྱོགས་སུ་རྣམ་པར་ལྟ་བ་བཞིན་དུ་རྒྱལ་པོའི་ཁབ་ཏུ་འཕགས་ཏེ་མཐར་གྱིས་རྒྱལ་པོའི་ཁབ་ཏུ་སོང་ནས། ཐོས་པ་བརྒྱུད་པས་དགེ་སློང་དེའི་གན་དུ་ཕྱིན་ནས་རྐང་པ་གཉིས་ལ་མགོ་བོས་ཕྱག་འཚལ་ཏེ། སྤྲིང་ཡིག་ཕུལ་ནས་མཐའ་གཅིག་ཏུ་འདུག་གོ། །དེ་ནས་དགེ་སློང་དེས་སྤྲིང་ཡིག་བཀླགས་ཏེ་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་ཁྱོད་དེའི་ཉེ་གནས་ཡིན་པ་དེ་བཞིན་དུ། ཁོ་བོའི་ཡང་ཡིན་གྱིས་བསླབ་པ་ལ་གུས་པར་གྱིས་ཤིག་དང་། ཁོ་བོས་ཁྱོད་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ཀྱིས་མི་བྲེལ་བར་བྱའོ། །གཞན་ཡང་དགེ་སློང་གི་ལས་ནི་གཉིས་ཏེ། བསམ་གཏན་དང་ཀློག་པ་ཡིན་ན། ཁྱོད་བསམ་གཏན་དང་ཀློག་པ་གང་འདོད། བསམ་གཏན་འཚལ་ལོ། །བུ་ལེགས་སོ། །དེས་དེ་ལ་གདམས་ངག་བྱིན་ནས་ཉེ་སྡེ་བསིལ་བ་ཚལ་གྱི་དུར་ཁྲོད་དུ་སོང་སྟེ། བརྩོན་པ་དང་འབད་པ་དང་། བརྩལ་བས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་མངོན་པར་

---

^{[མ་དཔེ་གཟིགས་ན་འདིར་གནོན།]}

ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེའི་བར་སྐབས་སུ་སྡེ་པ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། རབ་ཏུ་བྱུང་ངོ་། །དེ་ག་ལ་མཆིས། རྒྱལ་པོའི་ཁབ་ཏུ་སོང་ངོ་། །དེ་ཁྱེད་ཀྱི་ཅིར་འོང་ནུ་བོར་མཆིའོ། །སྡེ་པས་དགེ་སློང་དེ་དག་གི་རྐང་པ་ལ་ཕྱག་འཚལ་ཏེ་སོང་ནས་བསམས་པ། རྒྱལ་པོའི་ཁབ་ཀྱང་འཇིགས་པ་མེད་པའི་གྲོང་ཁྱེར་མ་ཡིན་གྱིས་བདག་དེར་ཡང་སོང་ལ། དེ་ལ་མཚམས་ཆེན་པོ་གཅད་པར་བྱའོ་སྙམ་ནས། དེ་ལམ་བརྒྱགས་མང་པོ་དང་ཀར་ཤ་པ་ཎ་དག་ཁྱེར་ཏེ་རྒྱལ་པོའི་ཁབ་ཏུ་སོང་ངོ་། །དེ་འོད་མའི་ཚལ་དུ་སོང་ནས་དགེ་སློང་རྣམས་ལ་དྲིས་པ། འཕགས་པ་དག་འདི་ན་མཉན་ཡོད་པའི་ཁྱིམ་བདག་གི་བུ་རབ་ཏུ་བྱུང་བ་ཞིག་མཆིས་སམ། འདིར་འོངས་སོ། །དེ་ཁྱོད་ཀྱི་ཅིར་འོང་། ནུ་བོར་མཆིའོ། །དེ་ག་ལ་མཆིས། བསིལ་བ་ཚལ་གྱི་དུར་ཁྲོད་ནའོ། །སྡེ་པ་དེ་བསིལ་བ་ཚལ་གྱི་དུར་ཁྲོད་དུ་སོང་བ་དང་། དེས་ཉེ་སྡེ་བྱིས་པའི་གནས་སྐབས་ན་མཐོང་བ་ཆེན་པོར་གྱུར་པས། མཁས་པ་དང་རྣམ་པར་གནོན་པ་ལས་ངོ་མ་ཤེས་མོད་ཀྱི་ཏེ་པོར་བརྟགས་པ་དང་བཞིན་གཟུགས་ལས་ངོ་ཤེས་པར་གྱུར་ནས། དེས་བསམས་པ། གལ་ཏེ་འདིས་བདག་ངོ་ཤེས་པར་གྱུར་ན། ངེས་པར་འདིས་བདག་གསོད་པར་བྱེད་པས་དེའི་ཐབས་སྦྱར་བར་བྱའོ་སྙམ་ནས། དེ་མཐའ་གཅིག་ཏུ་སོང་སྟེ་ཕྱོགས་སུ་རྣམ་པར་བལྟ་ཞིང་འདུག་གོ་།ཇི་ཙམ་ན་ལམ་དེར་རྔོན་པ་ལག་ན་མདའ་གཞུ་ཐོགས་པ་ཞིག་རི་དྭགས་བཤོར་བའི་ཕྱིར་འོངས་པ་དང་། སྡེ་པ་དེའི་གན་དུ་སོང་སྟེ་སྨྲས་པ། ཀྱེ་གྲོགས་པོ་ཁྱོད་ལག་ན་མདའ་གཞུ་ཐོགས་ཏེ་གར་འགྲོ་།དེས་སྨྲས་པ། གྲོགས་པོ་རི་དྭགས་ཤོར་དུའོ། །དེ་ལས་ཁྱོད་ཀྱི་རྙེད་པ་ཇི་ཙམ་

---

^{[མ་དཔེ་གཟིགས་ན་འདིར་གནོན།]}

འགྲུབ། གྲོགས་པོ་ལན་འགའ་ནི་འགྲུབ། ལན་འགའ་ནི་མི་འགྲུབ་བོ། །གང་གི་ཚེ་འགྲུབ་པ་དེའི་ཚེ་ན་མང་ཉུང་ཇི་ཙམ། གྲོགས་པོ་ཀར་ཤ་པ་ཎི་ལྔ་བརྒྱ་ཙམ་མོ། །སྡེ་པས་སྨྲས་པ། གྲོགས་པོ་གལ་ཏེ་དེ་ལྟ་ན་རབ་ཏུ་བྱུང་བ་འདི་སོད་ཅིག་དང་། ཁོ་བོས་ཁྱོད་ལ་ཀར་ཤ་པ་ཎ་ལྔ་བརྒྱ་བྱིན་ནོ། །རྔོན་པ་དེ་འདོད་པས་དྲངས་པའི་ཡིད་དང་ལྡན་པས་དེས་སྡེ་པ་ལས་ཀར་ཤ་པ་ཎ་ལྔ་བརྒྱ་བླངས་ནས། དེའི་འོག་ཏུ་བསམས་པ། རབ་ཏུ་བྱུང་བ་འདི་དག་ནི་རྒྱལ་པོ་གཟུགས་ཅན་སྙིང་པོས་གཞོན་ནུའི་ཡོངས་སུ་སྤང་བ་བྱིན་པ་ཡིན་ལ། བདག་ནི་ཕྱོགས་འདིར་རྟག་ཏུ་རྒྱུ་བ་ཡིན་པས། གལ་ཏེ་བདག་གིས་རབ་ཏུ་བྱུང་བ་འདི་བསད་པར་གྱུར་ན། བདག་ཀྱང་བུ་དང་རྩ་ལག་དང་ཕྱུགས་དང་བཅས་ཏེ་ངེས་པར་བཙོན་རར་བཅུག་ཅིང་གསོད་པར་འགྱུར་རོ། །འདི་ལྟར་ཁྱིམ་བདག་འདི་ནི་ན་ལེ་ཤམ་དཀར་པོ་འབྱུང་བ་དང་འདྲ་བར་འདི་ག་ལས་འོངས་པ་སུས་ཀྱང་མི་ཤེས་པ་ཡིན་གྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། རྔོན་པ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བར་རྣ་དྲུང་དུ་ཐུག་པར་བཀང་སྟེ་སྡེ་པའི་གནད་དུ་བསྣུན་ཏོ། །སྡེ་པ་དེ་སྡུག་བསྔལ་གྱི་ཚོར་བ་དག་གིས་ཉེན་པས་བདག་བསད་པར་གྱུར་པ་གང་ཡིན་པ་དེ་ཐམས་ཅད་ངེས་པར་རབ་ཏུ་བྱུང་བ་འདིས་རྔོན་པ་འདི་དང་ལྷན་ཅིག་བརྡ་བྱས་པ་ཡིན་གྱི་གང་དུ་འདི་གསོད་པར་འགྱུར་བ་དེར་སྐྱེ་བ་བླང་ངོ་སྙམ་དུ་སེམས་དག་གསོ་བར་བྱེད་ཅིང་། དེས་སྨོན་ལམ་ལོག་པར་བཏབ་ནས། ཉེ་སྡེའི་གནས་ཁང་གི་སྒོ་གླེགས་འདྲུད་པའི་འོག་ཏུ་སྦྲུལ་དུག་མྱུར་དུ་ཁྱབ་པར་བྱེད་པ་ཞིག་ཏུ་སྐྱེས་སོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་། མཐོང་བ་མི་འཇུག་པས། ཉེ་སྡེས་སྒོ་ལེགས་ཕྱེ་བས་སྦྲུལ་དུག་མྱུར་དུ་ཁྱབ་པར་བྱེད་པ་དེ་ཤི་བར་གྱུར་ཏོ། །དེ་ནས་སྒོ་གླེགས་འདྲུད་པའི་སྟེང་དུ་སྐྱེས་ནས་དེར་ཡང་ཤི་བར་གྱུར་ཏོ། །དེ་ནས་ཁྲིའི་རྐང་རྟེན་གཅིག་གི་འོག་ཏུ་སྐྱེས་ནས་དེར་ཡང་ཤི་བར་གྱུར་ཏོ། །དེ་བཞིན་དུ་ལན་གཉིས་ལན་གསུམ་ལན་བཞིར་འོག་ཏུ་སྐྱེ་ནས་དེར་ཡང་ཤི་བར་གྱུར་

---

^{[མ་དཔེ་གཟིགས་ན་འདིར་གནོན།]}

ཏོ། །ཇི་ལྟ་ཇི་ལྟར་འཆི་བར་འགྱུར་བ་དེ་ལྟ་དེ་ལྟར་དུག་ཤིན་དུ་རྣོ་བ་དང་། ལུས་ཤིན་ཏུ་ཕྲ་བས་ཉིང་མཚམས་སྦྱོར་བ་ལེན་པ་བྱེད་དོ། །ཇི་ཙམ་དུས་གཞན་ཞིག་ན་དེ་སྟེང་གི་སྤང་ལེབ་ཀྱི་བར་དུ་སྐྱེས་ནས། ཚེ་དང་ལྡན་པ་ཉེ་སྡེ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་ལ་ཞུགས་པའི་ལུས་ལ་ལྟུང་བར་གྱུར་ཏོ། །དེ་ནས་ཚེ་དང་ལྡན་པ་ཉེ་སྡེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ་རྣོ་བ་དུག་དྲག་པ། འདི་ལྟ་སྟེ་དཔེར་ན་མིག་སྨན་གྱི་ཐུར་མ་ལྟར་ཕྲ་བ་ལྟུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐཎ་ཀོར་ནས་བཟུང་ལ། འདི་ཉིད་དུ་འདི་ལྟ་སྟེ་དཔེར་ན་སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཞིག །དེའི་ཚེ་ན་ཚེ་དང་ལྡན་པ་ཤཱ་རིའི་བུ། ཚེ་དང་ལྡན་པ་ཉེ་སྡེ་དང་ཧ་ཅང་མི་རིང་བའི་ཤིང་དྲུང་ཞིག་ན་རྟེན་ཅིང་ཉིན་མོ་གནས་པའི་ཕྱིར་འདུག་གོ་།ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ཚིག་བརྗོད་པ་རྣམ་པ་དེ་ལྟ་བུ་དེ་ཐོས་སོ། །ཐོས་ནས་ཀྱང་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །བདག་གིས་ཚེ་དང་ལྡན་པ་ཉེ་སྡེ་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པ་མ་མཐོང་ན། འོན་ཀྱང་ཚེ་དང་ལྡན་པ་ཉེ་སྡེ་འདི་སྐད་ཅེས། ཚེ་དང་ལྡན་པ་དག་ཁོ་བོའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པ། འདི་ལྟ་སྟེ་དཔེར་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་གིས། ཀྱེ་ཚེ་དང་ལྡན་པ་དག་ལུས་ཀྱི་ཐན་ཀོར་ནས་བཟུང་ལ། འདི་ཉིད་དུ་འདི་ལྟ་སྟེ་དཔེར་ན། སྦུན་པའི་ཆང་བུ་ལྟར་ཞིགས་པར་མི་འགྱུར་བར་གཙུག་ལག་ཁང་གི་ཕྱི་རོལ་དུ་ཕྱུང་ཞིག་ཅེས་ཟེར་རོ། །ཚེ་དང་ལྡན་པ་ཤཱ་རིའི་བུ་གང་ལ་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་རྣ་དང་ལྕེ་དང་ལུས་དང་ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང་། དྲི་དང་། རོ་དང་། རེག་བྱ་དང་། ཆོས་བདག་ཡིན་

---

^{[མ་དཔེ་གཟིགས་ན་འདིར་གནོན།]}

ནོ། །ཆོས་བདག་གི་ཡིན་ནོ། །སའི་ཁམས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ་།ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ་ཞེས་བྱ་བ་ཡོད་པ་དེ་ལ་ནི། བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་འགྱུར་གྱིས། ཚེ་དང་ལྡན་པ་ཤཱ་རིའི་བུ་ཁོ་བོ་ལ་ནི་འདི་ལྟར་མིག་བདག་ཡིན་ནོ། །མིག་བདག་གི་ཡིན་ནོ། །རྣ་བ་དང་སྣ་དང་ལྕེ་དང་ལུས་དང་ཡིད་བདག་ཡིན་ནོ། །ཡིད་བདག་གི་ཡིན་ནོ། །གཟུགས་བདག་ཡིན་ནོ། །གཟུགས་བདག་གི་ཡིན་ནོ། །སྒྲ་དང་དྲི་དང་རོ་དང་རེག་བྱ་དང་ཆོས་བདག་ཡིན་ནོ། །ཆོས་བདག་གི་ཡིན་ནོ། །སའི་ཁས་བདག་ཡིན་ནོ། །སའི་ཁམས་བདག་གི་ཡིན་ནོ། །ཆུའི་ཁམས་དང་མེའི་ཁམས་དང་རླུང་གི་ཁམས་དང་ནམ་མཁའི་ཁམས་དང་རྣམ་པར་ཤེས་པའི་ཁམས་བདག་ཡིན་ནོ། །རྣམ་པར་ཤེས་པའི་ཁམས་བདག་གི་ཡིན་ནོ། །གཟུགས་ཀྱི་ཕུང་པོ་བདག་ཡིན་ནོ། །གཟུགས་ཀྱི་ཕུང་པོ་བདག་གི་ཡིན་ནོ། །ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བདག་ཡིན་ནོ། །རྣམ་པར་ཤེས་པའི་ཕུང་པོ་བདག་གི་ཡིན་ནོ་ཞེས་བྱ་བ་མེད་པས། ཁོ་བོའི་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པ་ག་ལ་འགྱུར། ཚེ་དང་ལྡན་པ་ཉེ་སྡེ་ཡུན་རིང་པོ་ནས་བདག་ཏུ་འཛིན་པ་དང་། བདག་གིར་འཛིན་པ་དང་། ངའི་སྙམ་པའི་ང་རྒྱལ་དང་། མངོན་པར་ཞེན་པ་དང་། བག་ལ་ཉལ་བ་དག་སྤངས་ཤིང་ཡོངས་སུ་ཤེས་ལ་ཏཱ་ལའི་

---

^{[མ་དཔེ་གཟིགས་ན་འདིར་གནོན།]}

མགོ་བཞིན་དུ་དྲུངས་ནས་བཅད་ཅིང་གཞི་མི་སྣང་ལ་ཕྱིས་ཀྱང་མི་སྐྱེ་བའི་ཆོས་ཅན་དུ་གྱུར་པས། ཁྱོད་ལ་བཞིན་གཞན་དུ་གྱུར་པའམ། དབང་པོ་རྣམས་སྣ་ཚོགས་སུ་གྱུར་པར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུ་དགེ་སློང་རབ་ཏུ་མང་པོ་དག་དང་བཅས་པས། ཆེ་དང་ལྡན་པ་ཉེ་སྡེའི་ལུས་ཀྱི་ཐན་ཀོར་ནས་བཟུང་སྟེ། གཙུག་ལག་ཁང་གི་ཕྱི་རོལ་དུ་བསྐྱལ་ནས། ཚེ་དང་ལྡན་པ་ཉེ་སྡེའི་ལུས་འདི་ལྟ་སྟེ། དཔེར་ན་སྤུན་པའི་ཆང་བུ་ལྟར་རྣམ་པར་བརྒྱར་ཞིགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་སྨྲས་པ། ཚངས་སྤྱོད་ལེགས་པར་སྤྱད་པ་དང་། ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །ནད་དང་བྲལ་བ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །ཚེ་ཟད་དགའ་བར་འགྱུར་བ་སྟེ། །དུག་སྣོད་སྤངས་པ་ཇི་བཞིན་ནོ། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །འབར་བའི་ཁྱིམ་ནས་ཐར་བ་ལྟར། །འཆི་བའི་མཐར་ནི་མྱ་ངན་མེད། །ཚངས་སྤྱོད་ལེགས་པར་སྤྱད་པ་དང་། །ལམ་ཉིད་ལེགས་པར་བསྒོམས་པ་ནི། །གང་ཚེ་འཇིག་རྟེན་ཤེས་རབ་ཀྱིས། །རྩྭ་དང་ཤིང་འདྲར་མཐོང་གྱུར་པ། །དེ་ཚེ་ཉིང་མཚམས་སྦྱོར་མེད་ལས། །གཞན་པ་འདོད་པར་མི་བྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཉེ་སྡེའི་ལུས་ལ་ལུས་ཀྱི་མཆོད་པ་བྱས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ་།མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་ཉེ་སྡེའི་ལུས་ལ་སྦྲུལ་དུག་མྱུར་དུ་ཁྱབ་པར་བགྱིད་པ། འབར་བ། རྣོ་བ། དུག་དྲག་པ་འདི་ལྟ་སྟེ་དཔེར་བགྱི་ན། མིག་སྨན་གྱི་ཐུར་མ་ལྟར་ཕྲ་བ་ལྷུང་ནས། དེའི་ལུས་འདི་ལྟ་སྟེ་དཔེར་བགྱི་ན། སྦུན་པའི་ཆང་བུ་ལྟར་ཞིགས་པར་གྱུར་ཏོ། །ཤཱ་རིའི་བུ་ཚེ་དང་ལྡན་པ་ཉེ་སྡེ་ལ་གལ་ཏེ་དེའི་

---

^{[མ་དཔེ་གཟིགས་ན་འདིར་གནོན།]}

ཚེ་ཚིགས་སུ་བཅད་པ་འདི་དག་དང་། གསང་སྔགས་ཀྱི་ཚིག་འདི་དག་སྣང་བར་གྱུར་ན། དེའི་ལུས་ལ་སྦྲུལ་དུག་མྱུར་དུ་ཁྱབ་པར་བྱེད་པ། འབར་བ། རྣོ་བ། དུག་དྲག་པས་ཚུགས་པར་མི་འགྱུར་ཞིང་། དེའི་ལུས་འདི་ལྟ་སྟེ་དཔེར་ན་སྤུན་པའི་ཆང་བུ་ལྟར་ཞིགས་པར་ཡང་མི་འགྱུར་རོ། །བཙུན་པ་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིག་དེ་དག་གང་ལགས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། ང་ནི་ཡུལ་འཁོར་སྲུང་ལ་བྱམས། །ས་སྲུང་བུ་ལ་བྱམས་པ་སྟེ། །ལ་བ་དང་ནི་མགྱོགས་མཆོག་དང་། །གཅོད་ལྡན་བུ་ལ་ང་བྱམས་སོ། །གོའུ་ཏ་མ་ནི་ནག་པོ་དང་། །མིག་མི་བཟང་ལ་ང་བྱམས་ཏེ། །ཀླུ་གང་དགའ་བོ་ཉེ་དགའ་བོ། །དེ་གཉིས་ལ་ནི་ང་རྟག་བྱམས། །རྐང་མེད་རྣམས་ལ་ད་བྱམས་ཏེ། །རྐང་གཉིས་རྣམས་ལའང་ང་བྱམས་སོ། །རྐང་བཞི་རྣམས་ལ་ང་བྱམས་ཏེ། །རྐང་མང་རྣམས་ལའང་ང་བྱམས་སོ། །གང་དག་རྒྱ་མཚོར་རྟེན་པ་ཡི། །ཀླུ་རྣམས་ཀུན་ལ་ང་བྱམས་སོ། །སེམས་ཅན་གང་དག་མགུལ་གནས་པའི། །སེམས་ཅན་ཀུན་ལ་ང་བྱམས་སོ། །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་ཀུན་དང་མ་འདྲིས་ཤོག །ཐམས་ཅད་བདེ་བ་ཉིད་གྱུར་ཅིང་། །ཐམས་ཅད་ནད་ནི་མེད་གྱུར་ཅིག །ཀུན་གྱི་བཟང་པོ་མཐོང་གྱུར་ཅིང་། །གང་ལའང་སྡིག་པར་མ་གྱུར་ཅིག །སྦྲུལ་གྱིས་གང་བའི་བྱ་སྐྱིབས་སུ། །རྟག་ཏུ་བདག་གི་གནས་གྱུར་ཀྱང་། །དུག་མྱུར་ཁྱབ་དང་དུག་དྲག་པོས། །བདག་གི་སྲོག་ལ་གནོད་མི་འགྱུར། །བདག་གི་བདེན་ཚིག་གང་གིས་ནི། །སྟོན་པ་འཇིག་རྟེན་བླ་ན་མེད། །བདག་གི་བདེན་ཚིག་དེ་ཡིས་ནི། །བདག་གིས་ལུས་ལ་དུག་མ་འཇུག །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །སངས་རྒྱས་ཆོས་ནི་དུག་མི་

---

^{[མ་དཔེ་གཟིགས་ན་འདིར་གནོན།]}

མངའ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་བདེན་པས་དུག་བཅོམ་མོ། །དུག་དང་དྲག་པོའི་དུག་བཅོམ་སྟེ། །བསྲུང་བས་ཡོངས་སུ་བསྲུང་བ་བྱས། །སངས་རྒྱས་ཐམས་ཅད་དུག་བཅོམ་པས། །བྲང་འགྲོ་ཁྱོད་ཀྱི་དུག་བཅོམ་མོ། །དེ་ལ་གསང་སྔགས་ཀྱི་ཚིག་རྣམས་འདི་དག་ཡིན་ཏེ། ཏཱདྱ་ཐཱ། ཨོཾ་ཏུ་མ་པི་ལེ། ཏུམ་པི་ལེ། ཏུམ་པེ། པྲ་ཏུམ་པེ། ནད་ཏེ། སུ་ན་ཊ་ཊེ། ཀེ་པ་ཊ་ཊེ། མུ་ན་ཡེ། ས་མ་ཡེ། དན་ཏེ། དན་ཏི་ལེ། ནི་ལེ། ནི་ལ་ཀེ་ཤེ། བཱ་ལེ། བཱ་ལ་ཀོ་པེ། ཨོ་ལེ། ནྱང་གོ་ལེ་སྭཱ་ཧཱ། ཤཱ་རིའི་བུ་གལ་ཏེ་དེའི་ཚེ་རིགས་ཀྱི་བུ་ཉེ་སྡེ་ལ་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིག་དེ་དག་སྣང་བར་གྱུར་ན། དེའི་ལུས་ལ་དུག་མྱུར་དུ་ཁྱབ་པར་བྱེད་པས་ཚུགས་པར་མི་འགྱུར་ཞིང་དེའི་ལུས་ལ་འདི་ལྟ་སྟེ་དཔེར་ན། སྦུན་པའི་ཆང་བུ་ལྟར་རྣམ་པ་བརྒྱར་ཞིགས་པར་ཡང་མི་འགྱུར་རོ། །བཙུན་པ་དེའི་ཚེ་ན་ཚེ་དང་ལྡན་པ་ཉེ་སྡེས་ཚིགས་སུ་བཅད་པ་དེ་དག་དང་། གསང་སྔགས་ཀྱི་ཚིགས་དེ་དག་སྔོན་མ་ཐོས་པས་དེ་ལ་ད་ལྟར་བཅོམ་ལྡན་འདས་ལ་ཇི་ལྟར་བ་བཞིན་དུ་སྣང་བར་ག་ལ་འགྱུར། དེ་ནས་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་། རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་དགུ་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་སྡེས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས། ལས་ཅི་ཞིག་བགྱིས་ན། དེས་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་

---

^{[མ་དཔེ་གཟིགས་ན་འདིར་གནོན།]}

ཞིག་བགྱིས་ན་དེས་དགྲ་བཅོམ་པ་ཉིད་ཐོབ་ཀྱང་དུག་གིས་གཟིར་བའི་སྙུན་གྱིས་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ཉེ་སྡེ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཉེ་སྡེ་ཉིད་ཀྱི་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་པ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན། སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཅི་ཙམ་ན་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དྭགས་དང་བྱ་མང་པོ་དག་གི་རྟེན་དུ་གྱུར་པ། མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དྭགས་དང་བྱ་མང་པོ་དག་དྲུངས་དབྱུང་བའི་ཕྱིར་དང་། ཉམས་པར་བྱ་བའི་ཕྱིར་དང་། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང་། རྙི་དང་རྙོང་མང་པོ་དག་འཇུག་པར་བྱེད་དོ། །དེའི་རྔོན་སྤྱད་དང་རྙི་དང་རྙིང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན། རི་བྲགས་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས། དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་

---

^{[མ་དཔེ་གཟིགས་ན་འདིར་གནོན།]}

ཐོགས་ཏེ། རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་བརྒྱུས་ནས། བསམས་པ། ལྷའི་གནས་འདི་ཉིན་མོ་རྒྱུན་ལུགས་མང་བ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞིག་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲགས་ནས་བྱུང་སྟེ། འདི་ནི་ཞི་བའོ་འདི་ནི་ཞི་བའོ་ཞེས་མཚེའུ་དེ་ག་ལ་བ་དེར་སོང་སྟེ་ཕྱིན་ནས། ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་བ་གཉིས་པ་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས་ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ། ལག་པ་གཉིས་བསྙལ་ནས་ཁ་བཀྲུས་ཏེ། ལྷུང་བཟེད་དང་ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ། ཤིང་དྲུང་ཞིག་ཏུ་བརྟེན་ནས། བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར། སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་། དེའི་ཉིན་མོ་མིའི་དྲིས་རི་དྭགས་གཅིག་ཀྱང་མ་ཟིན་ཏོ། །དེ་ནས་རྔོན་པ་དེ་ནང་པར་སྔར་ལངས་ཏེ། མཚེའུ་དེ་ག་ལ་བ་དེར་སོང་ནས། དེས་རྔོན་སྤྱད་དང་། རྙི་དང་རྙིང་དེ་དག་བྱུལ་བར་བརྩམས་པ་དང་། རི་དྭགས་གཅིག་ཀྱང་མ་མཐོང་ནས། དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང་། རྙི་དང་རྙིང་འདི་དག་དོན་ཡོད་པ་ཡིན་ན། གང་གི་ཕྱིར་དེང་རི་དྭགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐན་ཀོར་བྱུལ་བར་བརྩམས་པ་དང་། མིའི་རྗེས་མཐོང་ནས། དེ་རྗེས་དེའི་ཕྱི་བཞིན་དུ་སོང་བ་དང་། རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས། གལ་ཏེ་བདག་གིས་འདིའི་སྲོག་གཅད་པར་མ་བྱས་ན། འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས། རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་དེས། མདའ་དུག་ཅན་གྱིས་གཞུ་རྔའི་དབྱིབས་འདྲ་བ་རྣ་དྲུང་དུ་ཐུག་པར་བཀང་སྟེ། རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་། ཉམས་པར་གྱུར་ན་མི་

---

^{[མ་དཔེ་གཟིགས་ན་འདིར་གནོན།]}

རུང་གིས་འདི་ལག་ནས་དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས། འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ། རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར། སྟེང་གི་ནམ་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ་རྨ་ལྷན་གྱི་གླན་ནས་སྨྲས་པ། འཕགས་པ་སྡུག་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པ་ཀླན་པར་མཛད་ན། དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས། དེའི་ཕྱིར་ད་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས། ཕུང་པོ་ལྷག་མ་མེད་པའི་ཕྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྔོན་བདེ་ནོར་དང་ལྡན་པ་ཡིན་པས་།དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་གཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ། རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་བརྩིག་ཏུ་བཅུག་སྟེ། གདུགས་དང་རྒྱལ་མཚན་དང་། བ་དན་དག་བསྒྲེང་ཞིང་། དྲི་དང་ཕྲེང་བ་རྒྱུ་བ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་ནས། རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་ཡང་དག་པར་གྱུར་

---

^{[མ་དཔེ་གཟིགས་ན་འདིར་གནོན།]}

པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར། མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས། བདག་ཕྱུག་པ་ནོར་མང་བ། ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ། བལྟ་ན་སྡུག་པ། མཛེས་པར་སྐྱེ་ཞིང་། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་དེའི་ཚེ་དེའི་དུས་ཀྱིས་རྔོན་པ་གང་ཡིན་པ་དེ་ནི་ཉེ་སྡེ་འདི་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱི་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས། ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་དུག་གིས་དུས་ལ་བབ་སྟེ། ད་ལྟར་གྱི་བར་དུ་ཡང་དག་བཅོམ་པ་ཐོབ་ཀྱང་། དེ་དུག་གིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་གཟུགས་བཟང་བ་ལྟ་ན་སྡུག་པ་མཛེས་པར་སྐྱེས་ཤིང་། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བྱས་ཤིང་། འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་པ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་པ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །འདི་ཡང་རེ་ཞིག་བྱུང་བ་ཡིན་གྱི། སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་

---

^{[མ་དཔེ་གཟིགས་ན་འདིར་གནོན།]}

ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོང་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེ་ལ་བུ་བཙས་ནས། དེ་བཙས་པའི་རིམ་གྱིས་རིགས་དང་མཐུན་པའི་མིང་བཏགས་ཏེ། དེ་བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །ཇི་ཙམ་ན་ཚོང་དཔོན་དེའི་ཆུང་མདུས་ལ་བབ་ནས། དེས་ཆུང་མ་གཞན་ཞིག་བླངས་ཏེ། ཚོང་དཔོན་དེས་ཆུང་མ་དེ་ལ་སྨྲས་པ་བཟང་ངོ་། །གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱི་མི་མཐུན་པར་སྐྱེས་པས་ནི་མི་ནུས་པས། ཁྱེའུ་འདི་ཁྱོད་ཀྱི་བུ་ཡིན་གྱིས། ཁྱོད་ཀྱིས་འདི་ལ་མཁོ་བ་བསྟབ་པར་བྱའོ། །ཇི་ཙམ་དུས་གཞན་ཞིག་ན་ཆུང་མ་གཉིས་པ་དེ་ལ་ཡང་སེམས་ཅན་ཞུགས་པར་གྱུར་ནས། དེས་བསམས་པ། བདག་ལ་ཡང་བུ་ཡོད་པར་གྱུར་པས་ཁྱེའུ་འདི་དེའི་ཟླ་བོར་འགྱུར་གྱིས་འདི་བསྟོད་པར་མི་བྱའོ་སྙམ་ནས། དེས་ཁྱེའུ་དེ་ཟས་ངན་པ་དང་། གོས་ངན་པ་བསྲེལ་དུ་འཇུག་ཅིང་ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེ་ཕའི་གན་དུ་སོང་སྟེ་སྨྲས་པ། ཡབ་བདག་ལ་མ་ཡར་མོ་འདིས་ཟས་ངན་པ་དང་། གོས་ངན་པ་བསྲེལ་དུ་སྩོལ་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་དོ། །ཚོང་དཔོན་དེས་སྨྲས་པ། བུ་ཅི་ནས་ཀྱང་ཕྱིན་ཆད་དེ་ལྟར་མི་བྱེད་པར་བཟློག་པར་བྱའོ། །ཚོང་དཔོན་དེས་ཆུང་མ་ལ་སྨྲས་པ། བཟང་མོ་ཁོ་བོས་ཁྱོད་ལ་དང་པོ་ཉིད་ནས་གཞན་ལས་སྐྱེས་པས་ནི་བྱ་བ་བྱེད་པར་ནུས་ཀྱིས། མི་མཐུན་པར་སྐྱེས་པས་ནི་མི་ནུས་པས་ཁྱེའུ་འདི་ཁྱོད་ཀྱི་བུ་ཡིན་གྱིས་ཁྱོད་ཀྱིས་འདི་ལ་མཁོ་བ་བསྟབ་པར་བྱའོ་ཞེས་མ་སྨྲས་སམ། ཅིའི་ཕྱིར་ཁྱོད་ཀྱིས་འདི་ལ་ཟས་ངན་པ་དང་། གོས་ངན་པ་བསྲེལ་དུ་འཇུད་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད། ཆུང་མས་སྨྲས་པ། རྗེའི་སྲས་བདག་གིས་འདི་བསླབ་པར་བགྱི་སྟེ། འདི་ནི་ཚོང་དཔོན་གྱི་བུ་ལགས་པས། གལ་ཏེ་མ་བསླབས་ན་རྗེའི་སྲས་ཉིད་ལ་ཡང་

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་དག་ངེས་པར་སྨོད་པར་འགྱུར་རོ། །ཚོང་དཔོན་གྱིས་སྨྲས་པ། ཁྱོད་འདི་སློབ་པར་མ་བསྐོས་ཀྱིས། ཕྱིན་ཆད་འདི་ཟས་ངན་པ་དང་གོས་ངན་པ་བསྲེལ་དུ་མི་གཞུག་ཅིང་། ཁུ་ཚུར་དང་ཐལ་ལྕག་གིས་ཡང་དང་ཡང་དུ་མ་རྡེགས་ཤིག །ཆུང་མ་དེ་ཚོང་དཔོན་དེའི་ཤིན་ཏུ་གནང་ཆེན་ཡིན་པས། ཆུང་མ་དེས་ཁྱེའུ་དེ་ཕྱིར་ཞིང་ཤས་ཆེར་གོས་ངན་པ་དང་། ཟས་ངན་པ་བསྲེལ་དུ་འཇུད་ཅིང་། ཁུ་ཚུར་དང་ཐལ་ལྕག་གིས་ཀྱང་ཡང་དང་ཡང་དུ་རྡེག་པར་བྱེད་དོ། །ཁྱེའུ་དེས་བསམས་པ། བདག་གི་ཕས་མ་ཡར་མོ་འདི་དྲག་ཏུ་མ་བཟློག་པས། དེས་ན་མ་ཡར་མོ་འདི་བདག་ལ་ཕྱིར་ཞིང་ཤས་ཆེར་ཟས་ངན་པ་དང་། གོས་ངན་པ་བསྲེལ་དུ་འཇུད་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བྱེད་ཀྱིས་བདག་རབ་ཏུ་འབྱུང་དུ་འགྲོའོ་སྙམ་ནས། ཁྱེའུ་དེས་ཕ་ལ་ཡབ་ཁྱོད་ཀྱིས་བདག་གི་མ་ཡར་མོ་འདི་བཟློག་ཀྱང་འདིས་སླར་ཞིང་ཤས་ཆེར་བདག་ཟས་ངན་པ་དང་གོས་ངན་པ་བསྲེལ་དུ་དུ་སྩལ་ཅིང་། ཁུ་ཚུར་དང་ཐལ་ལྕག་དག་གིས་ཀྱང་ཡང་དང་ཡང་དུ་རྡེག་པར་བགྱིད་ཀྱིས་བདག་རབ་ཏུ་འབྱུང་དུ་མཆིའོ་ཞེས་ཅི་ནས་ཅིར་བརྒྱུད་དེ་གསོལ་བ་བྱས་སོ། །ཚོང་དཔོན་དེ་ཆུང་མ་དེ་ལ་ཧ་ཅད་བྱམས་ཤིང་དེའི་སེམས་སྲུང་བས། དེ་དྲག་ཏུ་བཟློག་པར་མ་ནུས་ནས། དེས་སྨྲས་པ། བུ་ཁྱིམ་བདག་གི་ཆུང་མ་འདི་གཏུམ་པ་བརྟུན་ངས་པ་དྲག་ཤུལ་ཆེ་བ་ཡིན་གྱིས་སོང་ལ་རབ་ཏུ་བྱུང་ཞིག་དང་ཁྱོད་གསོན་པ་མཐོང་བར་ཡང་འགྱུར་གྱི། གལ་ཏེ་ན་ཁྱོད་ལ་གནོད་པ་བྱེད་པར་འགྱུར་བའི་གནས་ཀྱང་ཡོད་དོ། །ཁྱེའུ་དེ་ཕས་གནང་ནས་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་དྲུང་དུ་སོང་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། བཞིན་བཟང་ཁྱོད་ཀྱིས་སེམས་བསྐྱེད་པ་ལེགས་ཏེ། ལོངས་སྤྱོད་དག་ནི་འགྱུར་བ་ཡིན་གྱིས་རབ་ཏུ་བྱུང་ཞིག །དགེ་སློང་དེས་ཁྱེའུ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟང་དགེ་སློང་གི་ལས་ནི་གཉིས་ཏེ། བསམ་གཏན་དང་། ཀློག་པ་ཡིན་ནོ། །ཁོ་བོ་ནི་བསམ་གཏན་པ་ཡིན་ན། ཁྱོད་བསམ་གཏན་དང་། ཀློག་

---

^{[མ་དཔེ་གཟིགས་ན་འདིར་གནོན།]}

པ་གང་བྱེད་དེས་སྨྲས་པ། མཁན་པོ་ཀློག་པའོ། །བུ་ལེགས་ཀྱིས་ཁྱོད་ཀྱིས་སྡེ་སྣོད་གསུམ་པོ་དག་བཀླག་པར་བྱའོ། །དེས་བསམས་པ། གཞུང་མ་ལ་མཁན་པོ་རྗེས་སུ་བསྲུང་དགོས་པས་འདི་ན་བདག་ལ་ཀློག་ཏུ་འཇུད་པ་མེད་ཀྱིས། ཡུལ་གཞན་དུ་འགྲོའོ་སྙམ་ནས་དེ་ཡུལ་གཞན་དུ་སོང་ངོ་། །དེས་དེར་སྡེ་སྣོད་གསུམ་པོ་དག་བཀླགས་ཤིང་སྡེ་སྣོད་གསུམ་དང་ལྡན་པ་ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེས་བསམས་པ། བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་སྙོད་པར་བྱེད་པ། གསོ་བར་བྱེད་པ། སྐྱེད་པར་བྱེད་པ། ནུ་མ་སྣུན་པར་བྱེད་པ། འཛམ་བུའི་གླིང་སྣ་ཚོགས་སྟོན་པར་བྱེད་པ་གཉིས་ནི་དཀའ་བ་བྱེད་པ་དག་ཡིན་ཏེ། བུས་ཕྲག་པ་གཅིག་གིས་ནི་ཕ། ཅིག་ཤོས་ཀྱིས་ནི་མ་ལོ་བརྒྱ་ཐམ་པར་ཡོངས་སུ་པང་བ་བྱས་སམ། ས་ཆེན་པོ་འདིར་ནོར་བུ་དང་། མུ་ཏིག་དང་། བཻཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། དངུལ་དང་། ས་ལེ་སྦྲམ་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་དང་། དེ་ལྟ་བུའི་དབང་ཕྱུག་གི་བདག་པོ་ལ་བཀོད་པར་གྱུར་པ་གང་ཡིན་པ་དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང་། ཉེ་བར་བྱས་པར་མི་འགྱུར་གྱི། དེ་ཕ་མ་མ་དད་པ་གཉིས་དད་པ་ཕུན་སུམ་ཚོགས་པ། ཡང་དག་པར་འཛིན་དུ་བཇུད་འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད། ཚུལ་ཁྲིམས་འཆལ་པ་གཉིས་ཚུལ་ཁྲིམས་ཕུན་སུམ་ཚོགས་པ་དང་། སེར་སྣ་ཅན་གཉིས་གཏོང་བ་ཕུན་སུམ་ཚོགས་པ་དང་། ཤེས་རབ་འཆལ་བ་གཉིས་ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཇུད། འདུལ་བར་བྱེད། འཛུད་པར་བྱེད། རབ་ཏུ་འགོད་པར་བྱེད་ན། དེ་ཙམ་གྱིས་ནི་བུས་ཕ་མ་གཉིས་ལ་བྱས་པ་དང་། ཉེ་བར་བྱས་པར་འགྱུར་རོ་ཞེས་གསུངས་པས་བདག་གི་ཕ་དེ་ཡང་མ་དད་པ་ཡིན་གྱིས་བདག་སོང་ལ་དེ་ལ་ཆོས་བསྟན་པར་བྱའོ་སྙམ་ནས་དེ་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་ག་ལ་བ་དེར་རྒྱུ་ཞིང་སོང་བ་ན་མཐར་གྱིས་མཉན་ཡོད་

---

^{[མ་དཔེ་གཟིགས་ན་འདིར་གནོན།]}

དུ་ཕྱིན་ནས། དེ་མཉན་ཡོད་དུ་འཇུག་པ་ཉིད་ན་རྒྱལ་བྱེད་ཀྱི་ཚལ་དུ་སོང་ངོ་། །མཉན་ཡོད་ཀུན་ཏུ་ཚོང་དཔོན་ཆེ་གེ་མོའི་བུ་ཞིག་ལྗོངས་ནས་སྡེ་སྣོད་གསུམ་བཀླགས་ཏེ་རྒྱལ་བྱེད་ཀྱི་ཚལ་དུ་འོངས་སོ་ཞེས་བྱ་བའི་སྒྲས་ཁྱབ་པར་གྱུར་པ་དེ་ཚོང་དཔོན་དེས་ཐོས་ནས་བདག་གི་བུ་སྡེ་སྣོད་གསུམ་བཀླགས་ཏེ་ལྗོངས་ནས་རྒྱལ་བྱེད་ཀྱི་ཚལ་དུ་འོངས་ཀྱིས། དེ་ཡང་དག་པར་རབ་ཏུ་དགའ་བར་བྱེད་དུ་འགྲོའོ་སྙམ་ནས། ཚོང་དཔོན་དེ་རྒྱལ་བྱེད་ཀྱི་ཚལ་དུ་སོང་བ་དང་། དེས་བུ་དེ་མཐོང་ནས་སྨྲས་པ། བུ་ཁྱོད་ཀྱིས་ཁོ་བོ་སྤངས་ཏེ་རབ་ཏུ་བྱུང་མོད་ཀྱི། ཁྱོད་དགེ་སློང་དུ་རེད་ཅིང་མང་དུ་ཐོས་པར་གྱུར་པ་ལེགས་ཏེ་བདག་ཀྱང་ཡོངས་སུ་དགའོ་ཞེས་སྨྲས་ནས་དེའི་མདུན་དུ་འདུག་གོ་།དགེ་སློང་དེས་ཚོང་དཔོན་དེ་ལ་གང་གིས་ཚོང་དཔོན་དེ་དད་པ་སྐྱེས་པས་སྐྱབས་སུ་འགྲོ་བ་དང་། བསླབ་པའི་གཞི་དག་གཟུང་བར་གྱུར་པ་དེ་འདྲ་བའི་ཆོས་བསྟན་པར་བྱས་སོ། །ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ། ཕྱི་དེ་ཉིན་པར་ཟན་ལ་མགྲོན་དུ་བོས་པ་དང་། བུ་དེས་ཀྱང་ཅང་མི་སྨྲ་བས་དང་དུ་བླངས་སོ། །དེ་ནས་ཚོང་དཔོན་དེས་བུའི་རྐང་པ་གཉིས་ལ་ཕྱག་འཚལ་ཏེ་སོང་པ་དང་། དེ་ལ་ལམ་ཁར་བློ་སྐྱེས་པ། བདག་གིས་བུ་དེ་མ་བགྲོས་པར་གྱ་ཚོམ་དུ་མགྲོན་དུ་བོས་ན། བདག་གི་ཆུང་མ་དེ་ཡང་གཏུམ་པ་བརྟུན་ངས་པ་དྲག་ཤུལ་ཆེ་བ་ཡིན་པས་བུ་དེ་ལ་བསྙེན་བཀུར་བྱེད་པར་མི་འགྱུར་ན། དེ་ལ་ཇི་ལྟར་བསྒྲུབ་པར་བྱ་སྙམ་མོ། །ཡང་བསམས་པ། ད་ནི་དེ་མགྲོན་དུ་བོས་ཟིན་པས་ཅི་བྱར་ཡང་མེད་ཀྱིས། བདག་གིས་གང་གིས་ཆུང་མ་དེ་འཁྲུགས་པར་མི་འགྱུར་བར་རྣམ་པ་ཐམས་ཅད་དུ་དགའ་བ་དང་སྙན་པའི་ཚིག་དག་གིས་ཐབས་བཤམས་པར་བྱའོ་སྙམ་ནས། དེ་ཁྱིམ་དུ་སོང་སྟེ་ཆུང་མ་ལ་སྨྲས་པ། བཟང་མོ་འཁྱམས་པ་དང་། ཤི་བ་དང་། རབ་ཏུ་བྱུང་བ་ཞེས་བྱ་བ་དག་དོན་གཅིག་གམ། འོན་ཏེ་ཐ་དད་དུ་བྱ་བ་ཅུང་ཟད་ཡོད། ཆུང་མས་སྨྲས་པ། རྗེའི་སྲས་ཐ་དད་དུ་བགྱི་བ་ཅུང་ཟད་ཀྱང་མ་མཆིས་སོ། །ཚོང་དཔོན་གྱིས་སྨྲས་པ། བཟང་མོ་གཞན་དག་ན་རེ། ཁྱོད་ཀྱི་བུ་ཡར་པོ་དེ་དགེ་སློང་བཟང་པོར་རེད་དེ་ལྗོངས་ནས་སྡེ་སྣོད་གསུམ་བཀླགས་ནས་རྒྱལ་བྱེད་ཀྱི་ཚལ་དུ་འོངས་ཏེ། སྡེ་སྣོད་གསུམ་དང་ལྡན་པ་འབའ་

---

^{[མ་དཔེ་གཟིགས་ན་འདིར་གནོན།]}

ཞིག་ཏུ་ཡང་མ་ཟད་ཀྱི། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དུ་ཡང་གྱུར་ཅེས་ཟེར་རོ། །ཆུང་མས་སྨྲས་པ། རྗེའི་སྲས་གལ་ཏེ་དེ་ལྟ་ན་ཅིའི་སླད་དུ་འཚལ་མ་ལ་གཡར་མི་དྲང་། བཟང་མོ་མགྲོན་དུ་བོས་ཀྱིས་ཟས་སྟ་གོན་གྱིས་ཤིག །ཆུང་མ་དེ་དེ་ལ་ཞེ་སྡང་གི་ཀུན་ནས་དཀྲིས་པ་དང་བྲལ་ནས་དེས་ཟས་བསིལ་བའི་རོ་དང་ལྡན་པ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། ཟས་དྲོ་བའི་རོ་དང་ལྡན་པ་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་ནས། བཙུན་པ་གདུགས་ཚོད་གཡར་གོང་འཚལ་ལགས་ན་དེའི་དུས་ལགས་པར་དགོངས་སུ་གསོལ་ཞེས་གཡར་འདྲེན་པའི་མི་བཏང་ངོ་། །དགེ་སློང་དེ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ནས་ཕའི་ཁྱིམ་ག་ལ་བ་དེར་སོང་སྟེ། ཕྱིན་ནས་སྟན་བཤམས་པ་ཉིད་ལ་འདུག་གོ་།དེ་ནས་ཚོང་དཔོན་དེ་ཆུང་མ་དང་བཅས་པས་རང་གི་ལག་ནས་ཟས་བསོད་བས་དགེ་སློང་དེ་ཆིམ་པར་བྱས་ཤིང་རང་གི་ལག་ནས་བསྟབས་སོ། །ཚིམ་པར་བྱས་ཤིང་བསྟབས་ཏེ་ཟོས་ཟིན་པར་རིག་ནས། ལག་པ་བསྙལ་ཅིང་ལྷུང་བཟེད་བཞག་པ་ན་རྐང་པ་ལ་ཕྱག་འཚལ་ཏེ། ཆོས་མཉན་པའི་ཕྱིར་མདུན་དུ་འདུག་གོ་།དེས་མ་ཡར་མོ་དེ་ལ་ཡང་གང་ཐོས་ནས་དེས་ཀྱང་སྐྱབས་སུ་འགྲོ་བ་དང་བསླབ་པའི་གཞི་དག་གཟུང་བར་གྱུར་པའི་རྣམ་པ་དེ་ལྟར་ཆོས་བསྟན་པར་བྱས་སོ། །དེས་ཁྱིམ་དེ་ཇི་ལྟར་དགེ་སློང་རྣམས་དང་། དགེ་སློང་མ་རྣམས་ཀྱིས་ཁྲོན་པ་ལྟ་བུར་གྱུར་པ་དེ་ལྟར་བཏུལ་ནས། དེ་དག་སྦྱིན་པ་དང་བྱ་བར་སེམས་པ་གང་ཡིན་པ་ཅི་ཡང་རུང་སྟེ། དེ་ཐམས་ཅད་དགེ་སློང་རྣམས་དང་དགེ་སློང་མ་རྣམས་ལ་སེམས་སོ། །ཇི་ཙམ་དུས་གཞན་ཞིག་ན་ཚོང་དཔོན་དེའི་འབྱུང་བ་ཆེན་པོ་མ་སྙོམས་པས་ན་བར་གྱུར་ནས། དེའི་བུས་བདག་གི་ཕན་པར་གྱུར་ཏོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་སོང་ལ་ཕ་དེ་ལ་མཆོག་ཏུ་དགའ་བར་འགྱུར་བའི་ཆོས་བསྟན་པར་བྱའོ་སྙམ་ནས། དགེ་སློང་དེ་དེའི་དྲུང་དུ་དུས་དང་མཐུན་པའི་དུས་སུ་སོང་ནས་འདི་སྐད་ཅེས། ཡབ་ཁྱོད་ཀྱིས་མི་བགྱིས་པར་མི་བགྱི་སྟེ། འདི་ལྟར་ཁྱོད་

---

^{[མ་དཔེ་གཟིགས་ན་འདིར་གནོན།]}

ཀྱིས་དགེ་བའི་བཤེས་གཉེན་བདག་ལ་བརྟེན་ནས་སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས། ཁྱོད་ཡུལ་གཞན་དུ་སོང་ན་ལོ་ལེགས་ཤིང་། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ནས་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཆོས་སྟོན་པར་བྱེད་དོ། །ཚོང་དཔོན་གྱིས་སྨྲས་པ། བུ་དེ་དེ་བཞིན་ནོ། །དེ་དེ་བཞིན་ཏེ། བདག་གིས་དགེ་བའི་བཤེས་གཉེན་ཁྱོད་ལ་བརྟེན་ནས། སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིག་བསླབ་པའི་གཞི་དག་བླངས། སྦྱིན་པ་དག་བྱིན། བསོད་ནམས་དག་བྱས་པས། བདག་ཡུལ་གཞན་དུ་སོང་ན་ལོ་ལེགས་ཤིང་། མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཚོང་དཔོན་དེའི་བུ་དེས། ཕ་ལ་དེ་ལྟར་ཆོས་བསྟན་ནས་སོང་ངོ་། །ཚོང་དཔོན་དེ་ལ་བློ་སྐྱེས་པ་བདག་གི་བུ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིག་པ་དང་གྲོལ་བའི་སྤོབས་པ་ཅན་དེ་གཞན་དུ་སྨྲ་བར་མི་འགྱུར་བས་བདག་སྡུག་བསྔལ་གྱི་ཚོར་བས་ཉེན་པ་ནི་ཐུན་མོང་མ་ཡིན་པས་བདག་གིས་བདག་ཉིད་གསད་པར་བྱའོ་སྙམ་མོ། །ཡང་བསམས་པ། བདག་ཉིད་ལ་རྩོམ་པར་བྱེད་པ་ནི་སྡུག་བསྔལ་བ་ཡིན་ན། དེའི་ཕྱིར་བདག་སྲོག་དང་བྲལ་བར་བྱེད་ནུས་པ་སུ་ཡོད་སྙམ་ནས། དེ་ལ་བྲན་མོ་མངག་གཞུག་མ་སྐྱོང་མ་ཞེས་བྱ་བ་སྦོམ་མོ་གླེན་མ་དམན་པ་ཞིག་ཡོད་ནས། ཚོང་དཔོན་དེས་བསམས་པ། སྐྱོང་མ་འདི་ནི་སྦོམ་མོ་གླེན་མ་དམན་པ་ཡིན་པས་འདིས་བདག་སྲོག་དང་བྲལ་བར་བྱེད་ནུས་ཀྱིས། གཞན་གྱིས་ནི་མི་ནུས་སྙམ་མོ། །ཚོང་དཔོན་དེའི་ཁྱིམ་དང་ཧ་ཅང་ཐག་མི་རིང་བ་ཞིག་ན། ཁྱིམ་བདག་ཅིག་གི་བུས་བག་མ་བླངས་པ་དེར། ཚོང་དཔོན་དེའི་ཆུང་མ་བྲན་མོ་མངག་གཞུག་མ་སྐྱོང་མ་དང་བཅས་ཤིང་མགྲོན་དུ་བོས་ཏེ་སོང་ངོ་། །བག་མ་བླངས་པ་དང་། སྟོན་མོ་ཟིན་ནས། ཚོང་དཔོན་གྱི་ཆུང་མས་སྐྱོང་མ་ལ་

---

^{[མ་དཔེ་གཟིགས་ན་འདིར་གནོན།]}

སྨྲས་པ། སྐྱོང་མ་ཁྱོད་སོང་ལ་ཚོང་དཔོན་གཉིད་ལོག་པར་མི་འགྱུར་བར་སྲུང་ཤིག །ཁོ་མོ་ཡང་ཕྱི་བཞིན་འོང་ངོ་། །སྐྱོང་མས་ཇོ་མོའི་ཚིག་མཉན་ཏེ། ཁྱིམ་དུ་སོང་ནས་ཚོང་དཔོན་གྱི་དྲུང་དུ་ཕྱིན་པ་དང་། ཚོང་དཔོན་གྱིས་སྨྲས་པ། སྐྱོང་མ་ཁྱོད་ག་ལས་འདིར་འོངས། སྐྱོང་མས་སྨྲས་པ། རྗེའི་སྲས་ཁྱིམ་བདག་ཆེ་གེ་མོའི་བུས་བག་མ་བླངས་པ་དེ་བདག་གིས་བལྟས་ཏེ་འཚལ་མ་འཚལ་ནས་མཆིས་སོ། །སྐྱོང་མ་བག་མ་ལེན་པ་བཟང་ངམ། རྗེའི་སྲས་བཟང་ངོ་། །གལ་ཏེ་ངས་ཁྱོད་དེ་ལྟར་བག་མར་གཏང་བར་བྱ་ན་ཁྱོད་དགའམ། རྗེའི་སྲས་དགའོ། །གལ་ཏེ་དེ་ན་ཁོ་བོ་ཅི་ཟེར་བ་དེ་བཞིན་དུ་བྱེད་ན། ཁོ་བོ་ཁྱོད་དགའ་བར་འགྱུར་བ་ཤེས་སོ། །སྐྱོང་མས་སྨྲས་པ། རྗེའི་སྲས་དེ་བཞིན་དུ་བགྱིའོ། །སྐྱོང་མ་གལ་ཏེ་དེ་ལྟ་ན་ཁོ་བོའི་ལྟོར་མི་མ་ཡིན་པ་ཞིག་ཞུགས་ཀྱིས་དེ་སོད་ཅིག །རྗེའི་སྲས་གོ་རིམས་ཇི་ལྟར་བགྱི། སྐྱོང་མ་དང་པོར་ངའི་རྐང་པ་གཉིས་ཚིར་ཅིག །དེའི་འོག་ཏུ་བྱིན་པ་གཉིས། དེའི་འོག་ཏུ་པུས་མོ་གཉིས། དེའི་འོག་ཏུ་བརླ་གཉིས། དེའི་འོག་ཏུ་རྐེད་པ། དེའི་འོག་ཏུ་ལྟོ་བ། དེའི་འོག་ཏུ་བྲང་། དེའི་འོག་ཏུ་གྲེ་བར་ཚིར་ལ་གལ་ཏེ་ཁོ་བོ་མགུལ་ན་མ་བཏང་ཞིག །སྐྱོང་མ་གླེན་མ་དེས་དེ་བཞིན་དུ་བྱས་ཏེ་དེས་དམ་དུ་བཙིར་བ་དང་། ཚོང་དཔོན་གྱིས་བསམས་པ། ཀྱེ་མའོ་བདག་སྐྱོང་མ་འདིས་བཏང་ཡང་ཅི་མ་རུང་སྙམ་ན། སྐྱོང་མས་དེ་བས་ཀྱང་ཆེས་དམ་དུ་བཙིར་ཏོ། །ལྷས་ཚིགས་སུ་བཅད་པ་སྨྲས་པ། བློ་ངན་གྱིས་ནི་གང་འཛིན་པ། །རུས་སྦལ་གྱིས་ནི་གང་འཛིན་བཞིན། །སྐྱོང་མས་ཟིན་པར་གྱུར་པས་ན། །ཁྱོད་ནི་འཚོ་བར་མ་མཐོང་ངོ་། །ཚོང་དཔོན་དེ་དུས་ལ་བབ་ནས། །སྐྱོང་མས་རས་ཀྱིས་གཡོགས་ཏེ་བཞག་གོ། དེ་ནས་ཚོང་དཔོན་གྱི་ཆུང་མ་ཕྱི་བཞིན་འོངས་ནས་དེ་སྨྲས་པ། སྐྱོང་མ་ཁྱོད་འདུག་བཞིན་དུ་ཚོང་དཔོན་ཉལ་དུ་བཅུག་གམ་ཞེས་ཚོང་དཔོན་གྱི་ཆུང་མ་དེས་ཚོང་དཔོན་བསླང་བར་བརྩམས་པ་དང་། སྐྱོང་མས་སྨྲས་པ། ངན་བུས་འདིའི་ལྟོ་ན་དགྲ་བོ་མཆིས་པ་ཕྱུང་བས། དེས་ན་འདི་ཉལ་བར་གྱུར་གྱིས་འདི་མ་བསླངས་ཤིག །ཚོང་དཔོན་གྱི་ཆུང་མས་བསམས་པ།

---

^{[མ་དཔེ་གཟིགས་ན་འདིར་གནོན།]}

འདིའི་དགྲ་བོ་ཅི་འདྲ་བ་ཞིག་ཡིན་པ་དེ་བལྟའོ་སྙམ་ནས། དེས་བརྟག་པར་བརྩམས་པ་དང་། དུས་ལ་བབ་པ་མཐོང་ངོ་། །ཚོང་དཔོན་གྱི་ཆུང་མ་དེ་ལ་བློ་སྐྱེས་པ། འདི་ནི་སྐྱོང་མའི་སྤོབས་པ་མ་ཡིན་གྱི་འདི་ནི་བུ་ཟན་མོའི་བུ་སྡེ་སྣོད་གསུམ་དང་ལྡན་པ་དེའི་སྤོབས་པ་ཡིན་ཏེ། དེས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས། ད་ནི་འདིའི་ལུས་ཀྱང་ཞིག །ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག །ཁོ་མོ་དང་ལྷན་ཅིག་དགའ་མགུར་སྤྱོད་ཅིག །ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག །ཅེས་ཆུང་མ་སྡུག་བསྔལ་གྱི་ཚོར་བས་ཉེན་པ་ངེས་ཚིག་ཏུ་བརྗོད་ནས། དེའི་འོག་ཏུ་གོས་སྔོན་པོ་དང་སེར་པོ་དང་དམར་པོ་དང་དཀར་པོ་དག་གིས་ཁྱོགས་བརྒྱན་ནས་མཉན་ཡོད་ཀྱི་ཕྱི་རོལ་གྱི་དུར་ཁྲོད་དུ་བསྲེགས་ཏེ། དེ་ནས་མྱ་ངན་བསངས་པ་བྱས་ཏེ་འདུག་གོ་།ཆུང་མ་དེ་བར་བར་དུ་ཡང་དེ་སྐད་ཤ་སྟག་ཟེར་བས་དགེ་སློང་སྡེ་སྣོད་གསུམ་པ་དེས་བདག་གི་ཕ་དུས་ལ་བབ་པར་ཐོས་ནས། དེས་བསམས་པ། འདི་ནི་འདུས་བྱས་རྣམས་ཀྱི་ཆོས་ཉིད་ཡིན་མོད་ཀྱི་འོན་ཀྱང་མ་ཡར་མོ་དེའི་མྱ་ངན་བསང་བ་བྱར་འགྲོའོ་སྙམ་ནས། དེ་སོང་བ་དང་། མ་ཡར་མོ་དེས་ཐག་རིང་པོ་ཁོ་ན་ནས་དགེ་སློང་དེ་མཐོང་ངོ་། །མཐོང་ནས་ཀྱང་ཡང་བུ་ཟན་མོའི་བུ་སྡེ་སྣོད་གསུམ་དང་ལྡན་པས་སྡེ་སྣོད་གསུམ་བཀླགས་ན་ཆོས་གཞན་འགའ་ཡང་བསྟན་པ་མ་བྱས་པར་ཡབ་ཁྱོད་ཀྱིས་མི་དགྱེས་པར་མི་བགྱི་སྟེ། ཁྱོད་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བསྟན་པས་ད་ནི་འདིའི་ལུས་ཀྱང་ཞིག །ལྷ་རྣམས་ཀྱི་ནང་དུ་ཡང་སྐྱེས་ཟིན་གྱིས་ཁྱོད་ཚུར་ཤོག་ཁོ་མོ་དང་ལྷན་ཅིག་དགའ་མགུར་སྤྱོད་ཅིག །ཁྱིམ་གྱི་བྱ་བ་ཡང་རྗེས་སུ་སྒྲུབས་ཤིག་ཅེས་སྨྲ་བར་བརྩམས་པ་དང་།

---

^{[མ་དཔེ་གཟིགས་ན་འདིར་གནོན།]}

དགེ་སློང་དེ་ཉམ་ང་ནས་དེ་ཉིད་ནས་ཕྱིར་ལོག་གོ་།དེ་བདག་གིས་འཆིར་བཅུག་པར་མ་གྱུར་ཏམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དོ། །ཡང་དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་བསྟན་པར་མི་བྱའོ། །དགེ་སློང་གིས་ནད་པ་ལ་གང་ཐོས་ན་ནད་པ་འཆི་བར་སེམས་པ་དེ་འདྲ་བའི་ཆོས་སྟོན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ཡང་རེ་ཞིག་བྱུང་བ་ཡིན་གྱིས་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །སངས་རྒྱས་བཅོམ་ལྡན་འདས་སྤོང་བྱེད་དག་ན་ཆུ་ཀླུང་ཡིད་འོང་ལྡན་གྱི་འགྲམ་ན་སྒྲོན་ཤིང་གི་ཚལ་གསེབ་ན་བཞུགས་སོ། །ད་ན་བཅོམ་ལྡན་འདས་དགེ་སློང་གི་དགེ་འདུན་ལ། དགེ་སློང་དག་མི་སྡུག་པ་སྒོམས་ཤིག །མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་སྒོམ་པའི་བསྔགས་པ་བརྗོད་པར་ཡང་མཛད་དོ། །བཅོམ་ལྡན་འདས་ཀྱིས་དགེ་སློང་དག་མི་སྡུག་བ་སྒོམས་ཤིག །མི་སྡུག་པ་བསྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་གསུངས་པས་དེའི་ཚེ་ན་དགེ་སློང་དག་མི་སྡུག་པ་སྒོམ་པར་བྱེད་དེ། དེ་དག་མི་སྡུག་པ་སྒོམ་པར་བྱེད་པ་དེའི་ཚེ། རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བྱེད་པ་ན་མཚོན་ཡང་འབྱིན་པར་བྱེད། དུག་ཀྱང་ཟ་བར་བྱེད། ཐག་པས་འཆིང་བར་བྱེད་འཆི་བར་བྱེད། གཡང་སར་ཡང་མཆོང་བར་བྱེད་ཅིང་འདི་ལྟར་དགེ་སློང་གིས་ཀྱང་དགེ་སློང་ལ་རྩོལ་བར་བྱེད་དོ། །དེ་ནས་དགེ་སློང་གཞན་ཞིག་རང་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བྱེད་པ་ན་རི་དྭགས་ཟློག་དགེ་སྦྱོང་སྦེད་ག་ལ་བ་དེར་སོང་སྟེ་ཕྱིན་ནས་རི་དྭགས་ཟློག་དགེ་སྦྱོང་སྦེད་ལ་

---

^{[མ་དཔེ་གཟིགས་ན་འདིར་གནོན།]}

འདི་སྐད་ཅེས་སྨྲས་སོ། །བཞིན་བཟང་ཚུར་ཤོག །ཁོ་བོ་སྲོག་དང་ཕྲོལ་ཅིག་དང་། ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་ཁྱེར་ཏེ་ཆུ་ཀླུང་ཡིད་འོང་ལྡན་ག་ལ་བ་དེར་སོང་ནས་ཕྱིན་པ་དང་། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་འདུག་སྟེ་རལ་གྲི་ཁྲག་གིས་གོས་པ་འཁྲུ་བར་བྱེད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་འདུག་ནས། རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང་། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ། །དེ་ལྟར་དེ་ལ་རི་དྭགས་ཟློག་དགེ་སྦྱོང་སྦེད་འདི་སྙམ་དུ་འདི་ལྟར་བདག་དགེ་སྦྱོང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་པར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད་བདག་ལ་བསོད་ནམས་མང་དུ་སྐྱེ་ཞིང་། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དྭགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་ཁྱེར་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང་། ལམ་གོལ་བར་རྗེས་སུ་རྒྱུ་བ་ན། དགེ་སློང་དེ་དང་དེ་དག་མཐོང་ནས་འདི་སྐད་ཅེས་སྨྲས་སོ། །དགེ་སྦྱོང་ཚུལ་ཁྲིམས་དང་

---

^{[མ་དཔེ་གཟིགས་ན་འདིར་གནོན།]}

ལྡན་པ་ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་དགྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན། དེས་ན་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་སྨོད་པ་ན་གནས་ནས་ཕྱིར་ཕྱུང་སྟེ་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་སྨྲས་སོ། །བཞིན་བཟང་བདག་མ་རྒལ་བ་ཡིན་གྱིས་སྒྲོལ་ཅིག །བདག་མ་གྲོལ་བ་ཡིན་གྱིས་ཁྲོལ་ཅིག །བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཞིག །བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལས་ཟློས་ཤིག །དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་བྲལ་བར་བྱས་ཏེ་དེ་བཞིན་དུ་གཉིས་དང་གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བྱས་སོ། །དེའི་ཚེ་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་ཚེས་བཅོ་ལྔའི་གསོ་སྦྱོང་ལ་དགེ་སློང་གི་དགེ་འདུན་གྱི་གུང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་རྣམ་པར་གཟིགས་ཏེ། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་དུས་གཅིག་ན་བཅོམ་ལྡན་འདས་དགེ་སློང་གི་དགེ་འདུན་ལ་དགེ་སློང་དག་མི་སྡུག་པ་སྒོམས་ཤིག །མི་སྡུག་པ་སྟེན་ཅིང་གོམས་པར་བྱས། ལན་མང་དུ་བྱས་ན་འབྲས་བུ་ཆེན་པོ་དང་ཕན་ཡོན་ཆེན་པོར་འགྱུར་རོ་ཞེས་མི་སྡུག་པ་སྟོན་པར་མཛད་ཅིང་མི་སྡུག་པ་སྒོམ་པའི་བསྔགས་པ་བརྗོད་པར་ཡང་མཛད་དོ། །དེའི་ཚེ་ན་དགེ་སློང་དག་མི་སྡུག་པ་སྒོམ་པར་བགྱིད་དེ། དེ་དག་མི་སྡུག་པ་སྒོམ་པར་བགྱིད་པའི་ཚེ་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པར་བགྱིད་པ་ན་མཚོན་ཡང་འབྱིན་པར་བགྱིད། དུག་ཀྱང་འཚལ་བར་བགྱིད། ཐག་པས་འཆིང་བས་ཀྱང་འགུམ་པར་བགྱིད། གཡང་སར་ཡང་མཆོང་བར་བགྱིད་ཅིང་། དགེ་སློང་གིས་ཀྱང་དགེ་སློང་ལ་རྩོལ་བར་བགྱིད་དོ། །དེ་ནས་དགེ་སློང་གཞན་ཞིག་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་

---

^{[མ་དཔེ་གཟིགས་ན་འདིར་གནོན།]}

པར་བགྱིད་པ་ན་རི་དྭགས་ཟློག་དགེ་སྦྱོང་སྦེད་ག་ལ་བ་དེར་མཆིས་ཏེ་ཕྱིན་ནས། རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས། བཞིན་བཟང་ཚུར་ཤོག །ཁོ་བོ་སྲོག་དང་ཕྲོལ་ཅིག་དང་། ཁོ་བོའི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་རོ་ཞེས་མཆིའོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱིས་དགེ་སློང་དེ་སྲོག་དང་ཕྲལ་ནས་རལ་གྲི་ཁྲག་གིས་གོས་པ་འཚལ་ཏེ། ཆུ་ཀླུང་ཡིད་འོང་ལྡན་ག་ལ་བ་དེར་མཆིས་ནས་ཕྱིན་པ་དང་། ཆུ་ཀླུང་ཡིད་འོང་ལྡན་གྱི་འགྲམ་དུ་ཙོག་ཙོག་པོར་མཆིས་ཏེ། རལ་གྲི་ཁྲག་གིས་གོས་པ་འཁྲུ་བར་བགྱིད་དོ། །དེ་ནས་བདུད་ཀྱི་རིས་ཀྱི་ལྷ་ཞིག་ཆུ་ཀླུང་ཡིད་འོང་ལྡན་གྱི་རྒྱུན་མ་ཕྱེ་བར་མཆིས་ནས་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས་བཞིན་བཟང་ལེགས་སོ་ལེགས་སོ། །འདི་ལྟར་ཁྱོད་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་བ་ནི་ཁྱོད་ལ་བསོད་ནམས་མང་དུ་སྐྱེ་བར་འགྱུར་ཞིང་། དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་ཁྱོད་ཀྱིར་འགྱུར་བ་འདི་ཡང་ཁྱོད་ཀྱི་རྙེད་པ་ལྷག་པ་ཡིན་ནོ་ཞེས་མཆི་ནས། དེ་ལྟར་དེ་ལ་རི་དྭགས་ཟློག་དགེ་སྦྱོང་སྦེད་འདི་སྙམ་དུ། ད་ལྟར་བདག་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དག་མ་རྒལ་བ་རྒལ་བར་བྱེད། མ་གྲོལ་བ་གྲོལ་བར་བྱེད། དབུགས་མ་ཕྱིན་པ་དབུགས་འབྱིན་པར་བྱེད། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱེད་པ་ནི་བདེན་མོད། བདག་ལ་བསོད་ནམས་མང་དུ་སྐྱེ་ཞིང་དེ་དག་གི་ལྷུང་བཟེད་དང་ཆོས་གོས་གང་ཡིན་པ་དེ་བདག་གིར་འགྱུར་བ་འདི་ཡང་བདག་གི་རྙེད་པ་ལྷག་པ་ཡིན་ནོ་སྙམ་དུ་རྒྱ་ཆེར་སྡིག་

---

^{[མ་དཔེ་གཟིགས་ན་འདིར་གནོན།]}

པ་ཅན་གྱི་ལྟ་བའི་རྣམ་པ་ཐོབ་པར་གྱུར་ཏོ། །དེ་ནས་རི་དྭགས་ཟློག་དགེ་སྦྱོང་སྦེད་རལ་གྲི་རྣོན་པོ་མཆན་ཁུང་གིས་འཚལ་ཏེ། ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ། ཁང་ཁྱིམ་ནས་ཁང་ཁྱིམ་དུ། འཆག་ས་ནས་འཆག་སར་དང་། ཤུལ་གོལ་བ་རྗེས་སུ་རྒྱུ་བ་ན། དགེ་སྦྱོང་དེ་དང་དེ་དག་མཐོང་ནས་འདི་སྐད་ཅེས་དགེ་སྦྱོང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ། མ་རྒལ་བ་རྒལ་བར་བྱ་བ། མ་གྲོལ་བ་གྲོལ་བར་བྱ་བ། དབུགས་མ་ཕྱིན་པ་དབུགས་དབྱུང་བར་བྱ་བ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བ་གང་ཡིན་ཞེས་མཆིའོ། །དེ་ནས་དགེ་སློང་ཞིག་རྣག་གི་ལུས་འདིས་སྒྱིད་ལུག་པ་དང་། མུས་བྱུང་བ་དང་། ཐེ་ཚོམ་ཟ་བ་དང་། སྨོད་པ་ན་གནས་ནས་སླར་བྱུང་སྟེ་རི་དྭགས་ཟློག་དགེ་སྦྱོང་སྦེད་ལ་འདི་སྐད་ཅེས། བཞིན་བཟང་བདག་མ་རྒལ་བ་ཡིན་གྱིས་སྒྲོལ་ཅིག །བདག་མ་གྲོལ་བ་ཡིན་གྱིས་ཁྲོལ་ཅིག །བདག་དབུགས་མ་ཕྱིན་པ་ཡིན་གྱིས་དབུགས་ཕྱུང་ཞིག །བདག་ཡོངས་སུ་མྱ་ངན་ལས་མ་འདས་པ་ཡིན་གྱིས་ཡོངས་སུ་མྱ་ངན་ལ་ཟློས་ཤིག་ཅེས་མཆིའོ། །དེ་ནས་རི་དྭགས་ཟློག་དགེ་སྦྱོང་སྦེད་ཀྱི་དགེ་སློང་དེ་སྲོག་དང་བྲལ་བར་བགྱིས་ཏེ། དེ་བཞིན་དུ་གཉིས་དང་གསུམ་ནས་དགེ་སློང་དྲུག་ཅུའི་བར་དག་སྲོག་དང་བྲལ་བར་བགྱིས་པས། བཙུན་པ་གང་གིས་ད་ལྟར་དགེ་སློང་དག་ཉུང་ངུར་གྱུར། ཉམས་པར་གྱུར། རྔ་རྡོར་གྱུར་ཅིང་དགེ་སློང་གི་དགེ་འདུན་སྲབས་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དགེ་སློང་ཡང་དགེ་སློང་ལ་རྩོལ་བ་བྱེད་དམ། བཙུན་པ་རྩོལ་བར་བགྱིད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ་ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་སྨད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་བསླབ་པའི་གཞི་བཅའ་བར་བྱ་སྟེ། འདི་ལྟ་སྟེ་དགེ་འདུན་བསྡུ་བའི་ཕྱིར་དང་། དགེ་འདུན་ལེགས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་བཀུར་བའི་གང་ཟག་རྣམས་ཚར་གཅད་པར་བྱ་བའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་མངོན་པར་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་བསྡམ་པར་བྱ་བའི་ཕྱིར་དང་། ཚེ་རབས་ཕྱི་མའི་རྣམས་བཟློག་པར་བྱ་བའི་ཕྱིར་དང་། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་ཡངས་པར་གྱུར་པ་ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་མིའམ་མིར་ཆགས་པ་ལ་བསམས་བཞིན་དུ་རང་གི་ལག་བདར་ཏེ་སྲོག་བཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས་ཀྱེ་མི་ཁྱེད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེའང་རྩོམ་པ་དེས་དུས་བྱས་ན་དགེ་སློང་དེའང་ཕམ་པར་གྱུར་པ་ཡིན་གྱིས་གནས་པར་མི་བྱའོ། །ཡང་དགེ་སློང་གང་ཞེས་བྱ་བ་ནི། དགེ་སློང་རྣམ་པ་བཞི་པོ་མིང་གི་དགེ་སློང་དང་། ཁས་འཆེ་བའི་དགེ་སློང་དང་། སློང་བའི་ཕྱིར་དགེ་སློང་དང་། ཉོན་མོངས་པ་བཅོམ་པའི་ཕྱིར་དགེ་སློང་ལས། མིང་གི་དགེ་སློང་གང་ཞེ་ན། གང་གི་མིང་དང་མིང་དུ་བརྗོད་པ་དང་། ཚིག་གཉིས་པ་དང་། ཚིག་བླ་དྭགས་དང་། འདུ་ཤེས་དང་། བོད་པ་དང་། གདགས་པ་དང་ཐ་སྙད་དགེ་སློང་ཞེའམ། དགེ་སློང་གི་རིགས་ཤེའམ་དགེ་སློང་དང་འདྲ་བར་གྱུར་པ་ཞེས་བྱ་བ་དེ་ནི་མིང་གི་དགེ་སློང་

---

^{[མ་དཔེ་གཟིགས་ན་འདིར་གནོན།]}

ཞེས་བྱའོ། །ཁས་འཆེ་བའི་དགེ་སློང་གང་ཞེ་ན། གང་དགེ་སློང་མ་ཡིན་བཞིན་དུ་བདག་ཉིད་དགེ་སློང་ངོ་ཞེས་ཁས་འཆེ་བར་བྱེད་པ་དང་། རྐུ་ཐབས་སུ་གནས་ཤིང་དགེ་སློང་དུ་དམ་འཆའ་བར་བྱེད་པ་དེ་ནི་ཁས་འཆེ་བའི་དགེ་སློང་ཞེས་བྱའོ། །སློང་བའི་ཕྱིར་དགེ་སློང་གང་ཞེ་ན། གང་ཆོས་དང་ལྡན་པས་སློང་མོ་སྤྱོད་པས་འཚོ་བར་བྱེད་པ་དེ་ནི་སློང་བའི་ཕྱིར་དགེ་སློང་ཞེས་བྱའོ། །ཉོན་མོངས་པ་བཅོམ་པའི་ཕྱིར་དགེ་སློང་གང་ཞེ་ན། གང་གི་ཟག་པ་ཀུན་ནས་ཉོན་མོངས་པར་བྱེད་པ་ཡང་སྲིད་པར་བྱེད་པར་རིམས་ནད་དང་བཅས་པ་རྣམ་པར་སྨིན་པ་སྡུག་བསྔལ་བ་ཕྱི་མ་ལ་སྐྱེ་བ་དང་། རྒ་བ་དང་། འཆི་བར་འགྱུར་བ་གང་དག་ཡིན་པ་དེ་དག་སྤངས་པ་དང་། ཡོངས་སུ་ཤེས་པ་དང་། རྩ་བ་ནས་བཅད་པ་དང་། ཤིང་ཏཱ་ལའི་མགོ་བཞིན་དུ་གཞི་མི་སྣང་བ་དང་། ཕྱི་མ་ལ་མི་སྐྱེ་བའི་ཆོས་ཅན་དུ་གྱུར་པ་དེ་ནི་ཉོན་མོངས་པ་བཅོམ་པའི་ཕྱིར་དགེ་སློང་ཞེས་བྱའོ། །དོན་འདིར་ནི་གསོལ་བ་དང་གཞིའི་ལས་མི་གཡོ་བ་བཞག་པར་མི་འོས་པས་བསྙེན་པར་རྫོགས་པ་གང་ཡི་པ་དེ་དགེ་སློང་དུ་དགོངས་ཏེ། དེས་ན་ཡང་དགེ་སློང་གང་ཞེས་གསུངས་སོ། །མི་འམ་ཞེས་བྱ་བ་ནི། གང་གིས་མའི་ལྟོར་དབང་པོ་དྲུག་པོ་འདི་ལྟ་སྟེ། མིག་གི་དབང་པོ་དང་། རྣ་བའི་དབང་པོ་དང་། སྣའི་དབང་པོ་དང་། ལྕེའི་དབང་པོ་དང་། ལུས་ཀྱི་དབང་པོ་དང་། ཡིད་ཀྱི་དབང་པོ་ཐོབ་པར་གྱུར་པའོ། །མིར་ཆགས་པ་ལ་ཞེས་བྱ་བ་ནི། གང་གིས་མའི་ལྟོར་དབང་པོ་གསུམ་པོ་འདི་ལྟ་སྟེ། ལུས་ཀྱི་དབང་པོ་དང་། ཚོར་བའི་དབང་པོ་དང་། ཡིད་ཀྱི་དབང་པོ་ཐོབ་པར་གྱུར་པ་ལའོ། །བསམས་བཞིན་དུ་ཞེས་བྱ་བ་ནི་རྣམ་པར་བརྟགས་པ་ནས་སོ། །རང་གི་ལག་དར་ཏེ་ཞེས་བྱ་བ་ནི་ལག་པས་ལག་དར་ཏེའོ། །སྲོག་བཅད་དམ་ཞེས་བྱ་བ་ནི་དེའི་སྲོག་བཅད་པར་གྱུར་ནའོ། །དེ་ལ་མཚོན་བྱིན་ནམ་ཞེས་བྱ་བ་ནི། རལ་གྲིའམ་སྤུ་གྲིའམ་ཆུ་གྲིའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི། སྐྱེས་པའམ། བུད་མེད་དམ། མ་ནིང་ངོ་། །དེ་འཆིར་བཅུག་གམ་ཞེས་བྱ་བ་ནི། འཆིར་གཞུག་པ་ནི་རྣམ་པ་གསུམ་སྟེ། ཚུལ་ཁྲིམས་འཆལ་བ་

---

^{[མ་དཔེ་གཟིགས་ན་འདིར་གནོན།]}

དང་། ཚུལ་ཁྲིམས་དང་ལྡན་པ་དང་། ནད་པའོ། །ཚུལ་ཁྲིམས་འཆལ་བ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་འཆལ་བ་ལ་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན། དེ་འདི་སྙམ་དུ་སེམས་ཏེ། ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས། དེ་དེའི་དྲུང་དུ་སོང་སྟེ་འདི་སྐད་ཅེས། ཚེ་དང་ལྡན་པ་ནི་ཚུལ་ཁྲིམས་འཆལ་བ་སྡིག་པའི་ཆོས་ཅན་ལུས་ཀྱིས་ཉེས་པར་སྤྱད་པ་དང་ལྡན་པ་ངག་དང་ཡིད་ཀྱིས་ཉེས་པར་སྤྱད་པ་དང་ལྡན་པ་ཡིན་པས། ཚེ་དང་ལྡན་པ་ཇི་སྲིད་ཡུན་རིང་དུ་འཚོ་བར་འགྱུར་བ་དེ་སྲིད་དུ་བསོད་ནམས་མ་ཡིན་པ་མང་དུ་འཕེལ་བར་འགྱུར་ཞིང་། བསོད་ནམས་མ་ཡིན་པ་མང་དུ་འཕེལ་ན་ཡུན་རིང་དུ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པའོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ། ཚེ་དང་ལྡན་པ་ཚུར་ཤོག་ཁྱོད་ཀྱིས་བདག་ཉིད་ཐོང་ཞིག །བདག་ཉིད་སོད་ཅིག །བདག་ཉིད་སྲོག་དང་བྲལ་བར་བྱེད་དུ་ཆུག་ཅིག་ཅེས་སྨྲས་ན། གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པ་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུག་ན་དགེ་སློང་དེ་ཕམ་པར་འགྱུར་རོ། །གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟར་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང་གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ཚུལ་ཁྲིམས་འཆལ་བ་དེའི་གན་དུ་སོང་སྟེ། འདི་སྐད་ཅེས་

---

^{[མ་དཔེ་གཟིགས་ན་འདིར་གནོན།]}

ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ་བྱིས་པ་བླུན་པ། མི་གསལ་བ། མི་མཁས་པ་དག་གིས་ཏེ་བོར་གྱ་ཚོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པས་དགེ་བའི་བཤེས་གཉེན་འགའ་ཞིག་མགུ་བར་བྱས་ན། དེས་ལུས་ཀྱི་ཀུན་དུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ། ལུས་ཀྱི་ཀུན་དུ་སྤྱོད་པ་ཡོངས་སུ་དག་པ་ཉིད་ལ་འཇོག་པ་དང་ངག་དང་ཡིད་ཀྱི་ཀུན་དུ་སྤྱོད་པ་ཡོངས་སུ་མ་དག་པ་ཉིད་འདི་ལས་བསླང་སྟེ་ངག་དང་ཡིད་ཀྱི་ཀུན་དུ་སྤྱོད་པ་ཡོངས་སུ་དག་པ་ཉིད་ལ་འཇོག་པར་གྱུར་ན། དེ་ལྟར་ན་ཚེ་དང་ལྡན་པ་ལུས་ཀྱི་ཀུན་དུ་སྤྱོད་པ་ཡོངས་སུ་དག་པ་དང་ངག་དང་ཡིད་ཀྱི་ཀུན་དུ་སྤྱོད་པ་ཡོངས་སུ་དག་པ་ཡིན་པས་ལུས་ཞིག་ན་ཡང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། གལ་ཏེ་ཚུལ་ཁྲིམས་འཆལ་བ་དེ་དགེ་སློང་དེ་ལ་འདི་སྐད་ཅེས་ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ། དགེ་སློང་དེས་འདི་སྐད་ཅེས། ཚེ་དང་ལྡན་པ་ཁྱོད་བདག་ཉིད་མ་གཏོང་ཞིག །བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུག་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་འཆལ་བ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུག་ཀྱང་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་འཆལ་བ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི་འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། རེ་ཞིག་ཚུལ་ཁྲིམས་འཆལ་བ་ལ་ནི་དེ་ལྟར་རོ། །ཚུལ་ཁྲིམས་དང་ལྡན་པ་ལ་ཇི་ལྟར་ཞེ་ན། འདི་ལྟར་དགེ་སློང་ཚུལ་ཁྲིམས་དང་ལྡན་པ་ལྷུང་བཟེད་དམ། ཆོས་གོས་སམ། དྲ་བའམ།

---

^{[མ་དཔེ་གཟིགས་ན་འདིར་གནོན།]}

ཕོར་བུའམ། སྐ་རགས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན། དེ་འདི་སྙམ་དུ་སེམས་ཏེ་ཇི་སྲིད་དུ་ཚེ་དང་ལྡན་པ་འདི་གསོན་པ་དེ་སྲིད་དུ་བདག་གིས་ཐོབ་པར་མི་འགྱུར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས་དེ་དེའི་དྲུང་དུ་སོང་སྟེ། འདི་སྐད་ཅེས་ཚེ་དང་ལྡན་པ་ནི་ཚུལ་ཁྲིམས་དང་ལྡན་པ་དགེ་བའི་ཆོས་ཅན་ལྷུག་པར་གཏོང་བ། ལག་རྐྱོང་བ། རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས། ཚེ་དང་ལྡན་པ་ཡུལ་གཞན་དུ་སོང་ན་ལོ་ལེགས་ཤིང་མཐོ་རིས་ནི་དར་གྱིས་ཆོད་པ་ཙམ། ཐར་པ་ནི་ཡོལ་བས་བསྒྲིབས་པ་ཙམ་སྟེ། ལུས་ཞིག་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སྨྲས་པ་ན། ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས། ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ་ཚེ་དང་ལྡན་པ་ཚུར་ཤོག །ཁྱོད་ཀྱིས་བདག་ཉིད་ཐོང་ཞིག །བདག་ཉིད་སོག་ཅིག །བདག་ཉིད་སྲོག་དང་བྲལ་བར་བྱེད་དུ་ཆུག་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་དང་ལྡན་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ། བདག་ཉིད་སྲོག་དང་བྲལ་བར་བྱེད་དུ་འཇུད་ན། དགེ་སློང་དེ་ཕམ་པར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང་། གལ་ཏེ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས་འགྱོད་པར་གྱུར་ཅིང་དེ་ཚུལ་ཁྲིམས་དང་ལྡན་པ་དེའི་གན་དུ་སོང་སྟེ་འདི་སྐད་ཅེས། ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ་བྱིས་པ་བླུན་པ་མི་གསལ་བ་མི་མཁས་པ་དག་གིས་ཏེ་པོར་གྱ་ཚོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པ་ནི་ཚུལ་

---

^{[མ་དཔེ་གཟིགས་ན་འདིར་གནོན།]}

ཁྲིམས་དང་ལྡན་པ། དགེ་བའི་ཆོས་ཅན། ལྷུག་པར་གཏོང་བ། ལག་རྐྱོང་བ། རྣམ་པར་གཏོང་བ་ལ་དགའ་བ། མཆོད་སྦྱིན་རྒྱུན་དུ་བྱེད་པ། གཏོང་བ་ཕུན་སུམ་ཚོགས་པ། སྦྱིན་པ་ལ་འགེད་པར་དགའ་བ་ཡིན་པས། ཚེ་དང་ལྡན་པ་ཇི་སྲིད་དུ་ཡུན་རིང་དུ་འཚོ་བར་འགྱུར་བ་དེ་སྲིད་དུ་བསོད་ནམས་མང་དུ་འཕེལ་བར་འགྱུར་ཞིང་བསོད་ནམས་མང་དུ་འཕེལ་ན་ཡུན་རིང་དུ་མཐོ་རིས་དག་ཏུ་དགའ་བར་འགྱུར་རོ་ཞེས་སྨྲས་པ་ན། གལ་ཏེ་ཚུལ་ཁྲིམས་དང་ལྡན་པ་དེ་དགེ་སློང་དེ་ལ་འདི་སྐད་ཅེས། ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ། དགེ་སློང་དེས་འདི་སྐད་ཅེས། ཚེ་དང་ལྡན་པ་ཁྱོད་བདག་ཉིད་མ་གཏོང་ཞིག །བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུག་ཅིག་ཅེས་སྨྲས་ནས། གལ་ཏེ་ཚུལ་ཁྲིམས་དང་ལྡན་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ཀྱང་། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་ཚུལ་ཁྲིམས་དང་ལྡན་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང་གལ་ཏེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ཚུལ་ཁྲིམས་དང་ལྡན་པ་ལ་ནི་དེ་ལྟར་རོ། །ནད་པ་ལ་ཇི་ལྟར་ཞེ་ན། འདི་ལྟར་དགེ་སློང་ནད་པ་ལ་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་[I]་འཚོ་བའི་ཡོ་བྱད་གང་ཡང་རུང་བ་ཅུང་ཞིག་རག་ལུས་པ་ན། དེ་འདི་སྙམ་དུ་སེམས་ཏེ། ཚེ་དང་ལྡན་པ་ནི་ན་བ་སྡུག་བསྔལ་བ་ནད་ཚབས་ཆེ་བ་འདི་སྲིད་དུ་གསོན་པ་དེ་སྲིད་དུ་བདག་ལ་མི་སྟེར་གྱིས། བདག་དེའི་དྲུང་དུ་སོང་ལ་འཆིར་གཞུག་གོ་སྙམ་ནས། དེ་དེའི་དྲུང་དུ་སོང་སྟེ་འདི་སྐད་ཅེས་ཚེ་དང་ལྡན་པ་ནི་ན་བ་སྡུག་བསྔལ་བ་ནད་ཚབས་ཆེ་བ་ཡིན་པས་ཚེ་དང་ལྡན་པ་ཇི་སྲིད་དུ་ཡུན་རིང་དུ་འཚོ་བ་དེ་སྲིད་དུ་ཚོར་བ་སྡུག་བསྔལ་བ། མི་བཟད་པ།

---

^{[མ་དཔེ་གཟིགས་ན་འདིར་གནོན།]}

རྩུབ་པ། ཚ་བ་ཡིད་དུ་མི་འོང་བ་དག་ཉམས་སུ་མྱོང་བར་འགྱུར་རོ་ཞེས་སྨྲས་པ་ན། ནད་པ་དེ་དགེ་སློང་དེ་ལ་འདི་སྐད་ཅེས། ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ། ཚེ་དང་ལྡན་པ་ཚུར་ཤོག །ཁྱོད་ཀྱིས་བདག་ཉིད་ཐོང་ཞིག །བདག་ཉིད་སོད་ཅིག །བདག་ཉིད་སྲོག་དང་བྲལ་བར་བྱེད་དུ་ཆུག་ཅིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་བྱེད་དམ། བདག་ཉིད་གསོད་པར་བྱེད་དམ་བདག་ཉིད་སྲོག་དང་བྲལ་བར་བྱེད་དུ་འཇུག་ན། དགེ་སློང་དེ་ཕམ་པར་འགྱུར་རོ། །གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་མི་གཏོང་ངོ་། །ཁོ་བོ་བདག་ཉིད་མི་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་མི་འཇུད་དོ་ཞེས་ཟེར་ཞིང་། གལ་ཏེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ན། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་དེ་དེ་སྐད་སྨྲས་ནས། འགྱོད་པར་གྱུར་ཅིང་དེ་ནད་པ་དེའི་གན་དུ་སོང་སྟེ་འདི་སྐད་ཅེས། ཚེ་དང་ལྡན་པ་ཤེས་པར་གྱིས་ཤིག །འདི་ལྟ་སྟེ། བྱིས་པ་བླུན་པ་མི་གསལ་བ། མི་མཁས་པ་བདག་གིས་ཏེ་བོར་གྱ་ཚོམ་དང་། བྱུང་རྒྱལ་གྱིས་སོ་སོར་མ་བརྟགས་པར་ཚིག་སྨྲས་ཏེ། འདི་ལྟར་ཚེ་དང་ལྡན་པ་དགེ་བའི་བཤེས་གཉེན་འགའ་ཞིག་མགུ་བར་བྱས་ན། དེས་ཁྱོད་ལ་སྨན་མཐུན་པ་དང་། འཕྲོད་པ་དག་དང་། ཟས་སོ་སོར་བསྟེན་པར་བྱ་བ་དག་དང་། ནད་གཡོག་ཚུལ་དང་མཐུན་པ་དག་གིས་བསྙེན་བཀུར་བྱེད་པར་འགྱུར་ཏེ། དེ་ལྟར་ན་ཚེ་དང་ལྡན་པ་ཡུན་མི་རིང་བ་ཁོ་ནར་བདེ་བ་དང་། ནད་མེད་པ་དང་། སྟོབས་དང་ལྡན་པ་དང་། གང་དུ་དགའ་བར་འགྲོ་བར་འགྱུར་རོ་ཞེས་སྨྲས་པ་ན། གལ་ཏེ་ནད་པ་དེ་དགེ་སློང་དེ་ལ་འདི་སྐད་ཅེས། ཚེ་དང་ལྡན་པ་འོ་ན་ཁོ་བོས་ཇི་ལྟར་བྱ་ཞེས་ཟེར་བའི་ཚེ། དགེ་སློང་དེས་འདི་སྐད་ཅེས། ཚེ་དང་ལྡན་པ་ཁྱོད་བདག་ཉིད་མ་གཏོང་ཞིག །བདག་ཉིད་མ་གསོད་ཅིག །བདག་ཉིད་སྲོག་དང་བྲལ་བར་བྱེད་དུ་མ་འཇུད་ཅིག་ཅེས་སྨྲས་ནས། གལ་ཏེ་ནད་པ་དེ་བདག་ཉིད་གཏོང་བར་མི་བྱེད། བདག་ཉིད་གསོད་པར་མི་བྱེད། བདག་ཉིད་སྲོག་དང་བྲལ་བར་བྱེད་དུ་མི་འཇུད་ཀྱང་། དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

གལ་ཏེ་ནད་པ་དེ་འདི་སྙམ་དུ་དེ་ལྟ་ཡིན་ནོ་སྙམ་མོད་ཀྱི། འོན་ཀྱང་འདི་སྐད་ཅེས་ཁོ་བོ་བདག་ཉིད་གཏོང་ངོ་། །ཁོ་བོ་བདག་ཉིད་གསོད་དོ། །ཁོ་བོ་བདག་ཉིད་སྲོག་དང་བྲལ་བར་བྱེད་དུ་འཇུད་དོ་ཞེས་ཟེར་ཞིང་། གལ་ཏེ་བདག་ཉིད་གཏོང་བར་བྱེད། བདག་ཉིད་གསོད་པར་བྱེད། བདག་ཉིད་སྲོག་དང་བྲལ་བར་བྱེད་དུ་འཇུད་ན་དགེ་སློང་དེ་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། ནད་པ་ལ་ནི་དེ་ལྟར་རོ། །དེས་ན་འཆིར་བཅུག་གམ་ཞེས་གསུངས་སོ། །དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ་ཞེས་བྱ་བ་ནི། འཆི་བར་མངོན་པར་དགའ་བའི་མདུན་དུ་འཆི་བའི་བསྔགས་པ་བརྗོད་པའོ། །དེ་ལ་འདི་སྐད་ཅེས། ཀྱེ་མི་ཁྱོད་ཅེས་བྱ་བ་ནི། བོད་པའི་ཚིག་བླ་དྭགས་ཡིན་ནོ། །འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་བྱ་བ་དེ་དག་ནི་སྨད་པའི་ཚིག་ཡིན་ནོ་ཟེར་ཞིང་ཞེས་བྱ་བ་ནི་བརྗོད་པར་བྱེད་ཅིང་ངོ་། །སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་ཞེས་བྱ་བ་ནི་། སེམས་ཀྱི་མངོན་པར་འདོད་པ་དང་། སེམས་ཀྱི་རྣམ་པར་རྟོག་པ་དག་གིས་སོ། །རྣམ་གྲངས་དུ་མས་ཞེས་བྱ་བ་ནི། རྣམ་པ་མང་པོས་སོ། །དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ་ཞེས་སྨོས་པ་ནི། འཆི་བར་མངོན་པར་དགའ་བའི་མདུན་དུ་རྣམ་གྲངས་དུ་མས་འཆི་བའི་བསྔགས་པ་བརྗོད་པ་བཟློག་པའི་ཕྱིར་རོ། །དེ་ཡང་རྩོམ་པ་དེས་དུས་བྱས་ན་ཞེས་བྱ་བ་ནི། དེ་ཉིད་ཀྱིས་ཡིན་གྱི་གཞན་གྱིས་མ་ཡིན་ནའོ། །དགེ་སློང་ཞེས་བྱ་བ་ནི། གང་ལ་དགེ་སློང་གི་དངོས་པོ་ཡོད་པ་གང་ཡིན་པའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་གང་ཡིན་པའོ། །བསྙེན་པར་རྫོགས་པ་གང་ཞེ་ན། གསོལ་བ་དང་བཞིའི་ལས་ཀྱི་བྱ་བ་བྱེད་པ་ཉིད་དང་རྟོག་པ་ཉིད་དང་། ཡང་དག་པར་རྟོག་པ་ཉིད་དང་། མཐར་ཕྱིན་པར་བྱད་པ་ཉིད་དང་། ཡང་དག་པར་མཐར་ཕྱིན་པར་བྱེད་པ་ཉིད་གང་ཡིན་པ་དང་། གང་ཟག་དེ་ཁས་ལེན་པ་དང་། མངོན་པར་ཁས་ལེན་པ་དང་། ཕྱིར་མི་ལྡོག་པ་དང་། ངག་དང་ཚིག་དང་ཐ་སྙད་དང་སྐད་དང་། རྗོད་པ་དང་། ངེས་པའི་ཚིག་དང་། ཚིག་གི་ལམ་དང་། ཚིག་གི་སྒྲ་དང་། ངག་གི་ལས་དང་། ངག་གི་རྣམ་པར་རིག་བྱེད་གང་ཡིན་པའོ། །དེ་ཞེས་བྱ་བ་ནི་ཉེ་བར་བསྟན་

---

^{[མ་དཔེ་གཟིགས་ན་འདིར་གནོན།]}

པ་དང་། ཀུན་ཏུ་བསྟན་པའི་ཚིག་བླ་དྭགས་དེའོ། །ཕམ་པར་གྱུར་པ་ཡིན་གྱིས་ཞེས་བྱ་བ་ནི། དེ་མཐར་གྱུར་པ་དང་། ལྟུང་བ་དང་། དམན་པ་དང་། མཇུག་ན་འདུག་པ་དང་། ཐ་ཆད་དང་། ཡིད་དང་མི་མཐུན་པ་ཡིན་པའོ། །ཡང་གང་གིས་ལྟུང་བ་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། །དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན། ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་། ཡངས་པར་འགྱུར་དུ་མི་རུང་བ་དེ་བཞིན་དུ་དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སྦྱོང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ། ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་བས། དེས་ན་ཕམ་པར་གྱུར་པ་ཡིན་གྱིས་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི། དགེ་སློང་རྣམས་ཀྱིས་དེ་དང་། གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་ལ་གནས་པར་མི་བྱའོ། །གང་ཟག་བཅུ་གཉིས་པོ་དག་ཏུ་བསྐོ་བར་མི་བྱ་བ་སྟེ། དེས་ན་གནས་པར་མི་བྱའོ་ཞེས་གསུངས་སོ།། །།འདུལ་བ་རྣམ་པར་འབྱེད་པ། བམ་པོ་བཅུ་པ། དེ་ལ་ལྟུང་བ་ཇི་ལྟར་འགྱུར་ཞེ་ན། སྡོམ་ལ། བདག་ཉིད་ཀྱིས་ནི་ཟིན་པ་དང་། །ཕྱི་རོལ་ཏུ་ནི་འཕངས་པ་དང་། །གཉི་ག་དང་ནི་ལྡན་པ་ཡི། །སྡེ་ཚན་ཡང་དག་བསྡུས་པ་ཡིན། །ཇི་ལྟར་བདག་ཉིད་ཀྱིས་ཟིན་པས་ཤེ་ན། དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་རུ་དུས་བྱེད་པར་གྱུར་ཅིག་སྙམ་པས་སོར་མོ་གཅིག་གིས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན། དགེ་སློང་དེ་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་། དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ། དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །སོར་མོ་གཅིག་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སོར་མོ་གཉིས་ཀྱིས་སམ། གསུམ་གྱིས་སམ། བཞིས་སམ། ལྔས་སམ། ཁུ་ཚུར་གྱིས་སམ། གྲུ་མོས་སམ། ཕྲག་པས་སམ། མགོ་བོས་སམ། གློས་སམ། རྐེད་པས་སམ། བརླས་སམ། པུས་མོས་སམ། རྗེ་ངར་གྱིས་སམ། ལོང་བུས་སམ། རྐང་མཐིལ་གྱིས་སམ། ཐ་ན་རྐང་པའི་མཐེ་བོང་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ལ། དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་བདག་ཉིད་ཀྱིས་ཟིན་པས་སོ། །ཇི་ལྟར་ཕྱིར་རོལ་དུ་འཕངས་པས་ཤེ་ན། དགེ་སློང་གིས་སྐྱེས་པ་དང་། བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མདས་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་

---

^{[མ་དཔེ་གཟིགས་ན་འདིར་གནོན།]}

ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མདས་ཇི་ལྟ་བ་དེ་བཞིན་དུ་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ལྕགས་མདས་སམ། མདའ་ཕྱེད་ལྕགས་ལས་བྱས་པས་སམ། ཏེའུ་ཀ་མས་སམ། མདེའུ་བེའུ་སོ་ལྟ་བུས་སམ། མདེའུ་ཟུར་བཞི་མས་སམ། མདེའུ་ཀ་ར་བི་རའི་ལོ་མ་ལྟ་བུས་སམ། མདེའུ་བྱིའུ་སྙིང་མས་སམ། འཁོར་ལོས་སམ། རྡོ་རྗེ་རྩེ་གཅིག་པས་སམ། མདའ་བོ་ཆེས་སམ། མཚོན་རྩེ་གཅིག་པས་སམ། ཐ་ན་རྒྱ་ཤུག་གི་འབྲས་བུས་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་བོར་འགྱུར་ཏེ། དེ་ལྟར་ཕྱི་རོལ་དུ་འཕངས་པས་སོ། །ཇི་ལྟར་གཉི་ག་དང་ལྡན་པས་ཤེ་ན། དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་རལ་གྲིས་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་དུས་བྱེད་པར་གྱུར་ཅིག་སྙམ་པས། ཤང་ལང་གིས་སམ། རལ་གྲི་སོ་གཅིག་པས་སམ། རལ་གྲི་སོ་གཉིས་པས་སམ། མདུང་གིས་སམ། མདུང་ཐུང་གིས་སམ། འཕང་མདུང་གིས་སམ། ཀྱོ་བ་ཁ་བྲག་གིས་སམ། ཚ་ལྕགས་ཀྱིས་སམ། ཐ་ན་རྩྭ་མདས་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་

---

^{[མ་དཔེ་གཟིགས་ན་འདིར་གནོན།]}

ཏེ། དེ་ལྟར་ཕྱི་རོལ་དུ་འཕངས་པས་སོ། །ཇི་ལྟར་གཉི་ག་དང་ལྡན་པས་ཤེས་ཞེ་ན། དགེ་སློང་གིས་སྐྱེས་པ་དང་། བུད་མེད་དང་། མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་རལ་གྲིས་སྣུན་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ། དེས་དེའི་འོག་ཏུ་ན་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །རལ་གྲིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཤང་ལང་གིས་སམ། རལ་གྲི་སོ་གཅིག་པས་སམ། རལ་གྲི་སོ་གཉིས་པས་སམ། མདུང་གིས་སམ། མདུང་ཐུང་གིས་སམ། འཕང་མདུང་གིས་སམ། ཀྱོ་བ་ཁ་བྲག་གིས་སམ། ཚ་ལྕགས་ཀྱིས་སམ། ཐ་ན་རྩྭ་མདས་སྣུན་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་ཏེ། དེ་ལྟར་གཉི་ག་དང་ལྡན་པས་སོ།། །།སྡོམ་ལ། དུག་དང་ཕྱེ་མའི་སྦྱོར་བ་དང་། ས་དང་ཤིང་ལ་འཆིང་བ་དང་། །མྱོས་པར་བྱེད་དང་བྲང་འདེབས་དང་། འཁྲུལ་འཁོར་དང་ནི་རྔོན་སྤྱད་དོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། འདི་ལྟ་སྟེ་བཅའ་བར་རམ། བཟའ་བར་རམ། བལྡག་པར་རམ། བཞིབ་པར་རམ། བཏུང་བར་དུག་གི་སྦྱོར་བ་བྱེད་ཅིང་དེ་ཡང་རྩོམ་པ་དེས་དུས་བྱེད་ན། དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་རྩོམ་པ་འདིས་འདི་དུས་བྱེད་པར་འགྱུར་ཅིག་སྙམ་པས། འདི་ལྟ་སྟེ་དྲིལ་ཕྱིར་རམ། ཁྲུས་སུའམ།

---

^{[མ་དཔེ་གཟིགས་ན་འདིར་གནོན།]}

མཉེ་བར་རམ། ཕྲེང་བ་དང་། དྲི་དང་། བྱུག་པར་རམ། བདུག་སྤོས་སུ་དུག་གི་ཕྱེ་མའི་སྦྱོར་བ་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་། དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཆིང་བ་ནི་གཉིས་ཏེ། ས་ལ་འཆིང་བ་དང་། ཤིང་ལ་འཆིང་བའོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་གི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས། སའི་འཆིང་བར་འཇོག་པར་བྱེད་ཅིང་ལོང་བུ་མན་ཆད་འཇུད་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་གི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་། སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཆད་དམ། བརླ་མན་ཆད་དམ། རྐང་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཇུག་པར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་

---

^{[མ་དཔེ་གཟིགས་ན་འདིར་གནོན།]}

མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་གི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པས་ཉམ་ཆུང་བའི་དཀྲིས་པས་དུས་བྱེད་པར་གྱུར་ཅིག་སྙམ་པས་ཤིང་ལ་འཆིང་བར་བྱེད། འཇོག་པར་བྱེད་ཅིང་། ཀ་བའམ་ཕུར་བ་བརྟན་པོ་ལ་འབྲེད་རློན་གྱིས་ལོང་བུ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ལོང་བུ་མན་ཆད་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་བྱིན་པ་མན་ཆད་དམ། བརླ་མན་ཆད་དམ། རྐེད་པ་མན་ཆད་དམ། བྲང་མན་ཆད་དམ། མགྲིན་པ་མན་ཆད་འཆིང་བར་བྱེད་ལ། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ།

---

^{[མ་དཔེ་གཟིགས་ན་འདིར་གནོན།]}

མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། རླུང་དང་ཉི་མ་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་ཆང་གིས་མྱོས་པར་བྱེད་དུ་འཇུད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཆང་གིས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། རྒྱལ་པོའམ། བློན་པོའམ། ཆོམ་རྐུན་པ་དག་གིས་སམ། གཡོན་ཅན་དག་གིས་སམ། ཐོང་མི་པ་དག་གིས་སམ། དགྲ་བོ་དག་གིས་སམ། ཕས་ཀྱི་དགྲ་དག་གིས་དུས་བྱེད་པར་གྱུར་ཅིག་སྙམ་པས་བཅོས་པའི་ཆང་གིས་སམ། འབྲུའི་ཆང་གིས་སམ། བཅོས་པའི་ཆང་གིས་སམ། རྩ་བའི་བཏུང་བས་སམ། སྡོང་བུའི་བཏུང་བས་སམ། འདབ་མའི་བཏུང་བས་སམ། མེ་ཏོག་གི་བཏུང་བས་སམ། འབྲས་བུའི་བཏུང་བས་མྱོས་པར་བྱེད་དུ་འཇུད་དམ། གསང་སྔགས་དག་གམ། སྨན་དག་གམ། རིག་སྔགས་དག་གིས་སེམས་འཁྲུགས་པར་བྱེད་དམ། གཉིད་ལོག་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས། འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། བྲང་དུ་འདེབས་པ་སྦྱོར་བར་བྱེད་ཅིང་། སྐྱེས་པའམ། བུད་མེད་དམ། མ་ནིང་ཆེ་གེ་མོ་ཞིག་འོང་བར་འགྱུར་བ་དེའི་ལག་པའམ། རྐང་པའམ། གདོང་ངམ། ཡན་ལག་དང་ཉིང་ལག་གང་ཡང་རུང་བ་གཅོད་པར་གྱུར་ཅིག་སྙམ་

---

^{[མ་དཔེ་གཟིགས་ན་འདིར་གནོན།]}

པའམ་ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་པར་གྱུར་ཅིག་སྙམ་པས་དེ་ལ་ཡང་རལ་གྲིའམ། སྤུ་གྲིའམ། ཆུ་གྲི་འདོགས་པར་བྱེད་ཅིང་། གལ་ཏེ་དེས་དེའི་ལག་པའམ། རྐང་པའམ། གདོང་ངམ། ཡན་ལག་དང་ཉིང་ལག་གང་ཡང་རུང་བ་གཅོད་པར་བྱེད་དམ། ཐམས་ཅད་ཀྱི་ཐམས་ཅད་དུ་སྲོག་དང་བྲལ་བར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །འཁྲུལ་འཁོར་དང་རྔོན་སྤྱད་ལ་ཡང་དེ་བཞིན་དུ་བརྗོད་པར་བྱའོ། །སྡོམ་ལ། རོ་ལངས་དང་ནི་རོ་ལངས་ཕྱེད། །དཀུ་མཉེད་པ་དང་སྲོག་འགོག་དང་། གཡངས་ཆུ་དང་མེ་དང་ནི། །མངགས་པ་དང་ནི་གྲང་དྲོའོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་ཟླ་བ་མར་གྱི་ངོའི་ཚེས་བཅུ་བཞི་ལ་དུར་ཁྲོད་དུ་སོང་སྟེ། ཤི་བའི་རོ་ཐ་ན་སྲོག་ཆགས་གྲོག་བུར་ཕྲ་མོས་ཀྱང་མ་སྨས་མ་ཉམས་པ་ཚོལ་བར་བྱེད་ཅིང་རྙེད་ནས་ས་དཀར་གྱིས་དྲིལ་ཕྱི་བྱེད་ཅིང་། ས་དཀར་གྱིས་དྲིལ་ཕྱི་བྱས་ནས་སྤོས་ཆུས་འཁྲུ་བར་བྱེད་ལ། སྤོས་ཆུས་བཀྲུས་ནས་རས་སར་པ་སྐོན་པར་བྱེད་ཅིང་། དེའི་རྐང་པ་གཉིས་ཀྱང་སྐུད་པར་བྱེད། གསང་སྔགས་ཀྱང་རྗོད་པར་བྱེད་པ་ན། དེ་ལངས་པར་གྱུར་ཏེ་བྱ་སྨྱངས་བྱེད་པའི་ཚེ། དེས་དེ་འཁོར་ལོ་གཉིས་དང་ལྡན་པའི་ཤིང་རྟ་ལ་འཇོག་པར་བྱེད་ཅིང་། དེའི་མགུལ་དུ་དྲིལ་བུ་གཉིས་ཀྱང་འདོགས་པར་བྱེད། ལག་པར་རལ་གྲི་སོ་གཉིས་པ་ཡང་སྦྱིན་པར་བྱེད་པ་ན། དེ་ལངས་ཏེ་བླག་བླག་ཟེར་ཞིང་འདི་སྐད་ཅེས་ངས་གང་བཏང་བར་བྱ། ངས་གང་གསད་པར་བྱ། ངས་གང་སྲོག་དང་བྲལ་བར་བྱ་ཞེས་ཟེར་བའི་ཚེ། དགེ་སློང་དེས་རོ་ལངས་ད་ལ་འདི་སྐད་ཅེས་ཁྱོད་ཀྱིས་སྐྱེས་པ་དང་བུད་མེད་དང་མ་ནིང་ཆེ་གེ་མོ་ཞིག་ཤེས་སམ། ཞེས་སྨྲས་པ་ན། ཤེས་སོ་ཞེས་ཟེར་བའི་ཚེ། དེ་ཐོང་ཞིག །དེ་སོད་ཅིག །དེ་སྲོག་དང་བྲལ་བར་གྱིས་ཤིག་ཅེས་སྨྲས་ནས། གལ་ཏེ་རོ་ལངས་དེས་དེ་གཏོང་བར་བྱེད་དམ།

---

^{[མ་དཔེ་གཟིགས་ན་འདིར་གནོན།]}

གསོད་པར་བྱེད་དམ། སྲོག་དང་བྲལ་བར་བྱེད་ན། དགེ་སློང་ཕམ་པར་འགྱུར་རོ། །གལ་ཏེ་དེ་ན་སྲུང་བར་བྱེད་པ་འདི་ལྟ་བུ་འདི་ལྟ་སྟེ་སྒོར་ནགས་ཀྱི་ཕྲེང་བ་བཏགས་པའམ། བུམ་པ་གང་བ་བཞག་པའམ། བ་དང་བེའུ་འདྲ་བ་བཏགས་པའམ། ལུག་བཏགས་པའམ། མཆིག་མཆིག་གུ་དང་བཅས་པ་བཞག་པའམ། སྒོར་འཁོར་གཏན་བསྙལ་བའམ། མེ་ཚུགས་སྦར་བའམ། རྒྱལ་བ་བཞུགས་པའམ། རྒྱལ་བས་བཀའ་སྩལ་པའམ། འཁོར་ལོས་སྒྱུར་བའམ། འཁོར་ལོས་སྒྱུར་བའི་མའི་མངལ་དུ་འཁོར་ལོས་སྒྱུར་བ་ཞུགས་པའམ། བྱང་ཆུབ་སེམས་དཔའ་མ། བྱང་ཆུབ་སེམས་དཔའི་མའི་མངལ་དུ་བྱང་ཆུབ་སེམས་དཔའ་ཞུགས་པ་འདུག་པའམ། སོ་སོར་ཐར་པའི་མདོ་མ་བཏོན་བར་འདོན་པར་བྱེད་པའམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པའམ། མདོ་སྡེའི་སྡེ་ཚན་བཞི་པོ་གང་རུང་བ་མ་བཏོན་པ་འདོན་པར་བྱེད་པའམ། བཏོན་པ་རྒྱ་ཆེར་དབྱངས་ཀྱིས་ཁ་ཏོན་བྱེད་པའམ། མདོ་ཆེན་པོ་ཆེ་བ་འདི་ལྟ་སྟེ། ཆུང་ངུ་སྟོང་པ་ཉིད་དང་། ཆེན་པོ་སྟོང་པ་ཉིད་དང་། ལྔ་གསུམ་པ་དང་། སྒྱུ་མའི་དྲ་བ་དང་། གཟུགས་ཅན་སྙིང་པོས་བསུ་བ་དང་། རྒྱལ་མཚན་དམ་པ་དང་། ཀུན་ཏུ་རྒྱུ་བ་དང་། ཀུན་ཏུ་མི་རྒྱུ་བ་དང་། མཐུན་པའི་མདོ་དང་། འདུས་པ་ཆེན་པོའི་མདོ་དེ་དག་མ་བཏོན་པ་འདོན་པར་བྱེད་པ་དང་། བཏོན་པ་དག་རྒྱ་ཆེར་དབྱངས་ཀྱིས་ཁ་ཏོན་བྱེད་པ་བཞག་པར་གྱུར་ན། གཏང་ཉེས་པ་ཡིན་པས་རོ་ལངས་ཀྱིས་དགེ་སློང་བདག་ཉིད་གསོད་པར་སེམས་པ་གྱུར་པས། གལ་ཏེ་རོ་ལངས་ཀྱིས་དགེ་སློང་གསོད་པར་བྱེད་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་དགེ་སློང་གིས་རོ་ལངས་གསོད་པར་བྱེད་ན་དགེ་སློང་ལ་ཉེས་པ་སྦོམ་པོ་གཉིས་སུ་འགྱུར་ཏེ། གཅིག་ནི་རོ་ལངས་བསད་པ་ལས་སོ། །གཉིས་པ་ནི་སྦྱོར་བ་སྔ་མ་དེ་ཉིད་ལས་སོ། །རོ་ལངས་ལ་ཇི་ལྟ་བ་བཞིན་དུ་རོ་ལངས་ཕྱེད་ལ་ཡང་དེ་བཞིན་ཏེ། རོ་ལངས་དང་རོ་ལངས་ཕྱེད་ལ་བྱེ་བྲག་ནི་འདི་ཡོད་དེ། འཁོར་ལོ་གཅིག་དང་ལྡན་པའི་ཤིང་རྟ་ལ་འཇོག་པ་དང་། མགུལ་དུ་དྲིལ་བུ་གཅིག་འདོགས་པ་དང་། ལག་པར་རལ་གྲི་སོ་

---

^{[མ་དཔེ་གཟིགས་ན་འདིར་གནོན།]}

གཅིག་པ་སྦྱིན་པ་ནི་རོ་ལངས་ཕྱེད་ཅེས་བྱའོ། །ལྟུང་བ་རྣམ་པར་གཞག་པ་ནི་ཐམས་ཅད་སྔ་མ་བཞིན་དུ་བརྗོད་པར་བྱའོ། །དགེ་སློང་གིས་བུད་མེད་གསད་པའི་སེམས་ཀྱིས་བུད་མེད་གསད་པར་བྱའི་མངལ་ན་གནས་པ་ནི་མི་བྱའོ་སྙམ་པས་སྦྲུམ་མའི་དཀུ་མཉེད་པར་བྱེད་ཅིང་། གལ་ཏེ་བུད་མེད་ཤི་བར་གྱུར་ལ་མངལ་ན་གནས་པ་མ་ཤི་ན། དགེ་སློང་ཕམ་པར་འགྱུར་རོ། །གལ་ཏེ་མངལ་ན་གནས་པ་ཤི་བར་གྱུར་ལ། བུད་མེད་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་འགྱུར་རོ། །གཉི་ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་མངལ་ན་གནས་པ་གསད་པའི་སེམས་ཀྱིས་མངལ་ན་གནས་པ་གསད་པར་བྱའི་བུད་མེད་ནི་མི་བྱའོ་སྙམ་པས་བུད་མེད་ཀྱི་དཀུ་མཉེད་པར་བྱེད་ཅིང་། གལ་ཏེ་མངལ་ན་གནས་པ་ཤི་བར་གྱུར་ལ། བུད་མེད་མ་ཤི་ན་དགེ་སློང་ཕམ་པར་འགྱུར་རོ། །གལ་ཏེ་བུད་མེད་ཤི་བར་གྱུར་ལ། མངལ་ན་གནས་པ་མ་ཤི་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཉི་ག་ཤི་བར་གྱུར་ན་དགེ་སློང་ཕམ་པར་འགྱུར་རོ། །གཉི་ག་ཤི་བར་མ་གྱུར་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། དཀྱིལ་འཁོར་ཉུག་པར་བྱེད། མེ་སྦར་བར་བྱེད། ཡམ་སྲེག་ཤིང་འཇུག་པར་བྱེད། གསང་སྔགས་རྗོད་པར་བྱེད་ཅིང་། ཡམ་སྲེག་ཤིང་འདི་དག་ཀྱང་ཚིག་པར་གྱུར་ཅིག །སྐྱེས་པའམ་བུད་མེད་དམ་མ་ནིང་ཆེ་གོ་མོ་ཞིག་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་ཡམ་སྲེག་ཤིང་དེ་དག་ཚིག་པ་ན་སྐྱེས་པའམ་བུད་མེད་དམ་མ་ནིང་དེའི་སྲོག་ཉེ་བར་འགགས་པར་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་ཡམ་སྲེག་ཤིང་དེ་ཚིག་པར་གྱུར་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན། དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་། བུད་མེད་དང་མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད། ཏིལ་བྲེའུ་ཆུང་གང་ངམ། ཡུངས་ཀར་བྲེའུ་ཆུང་གང་གཏུན་དུ་བླུགས་ཏེ་གཏུན་བུའི་རྩེ་མོས་རྡུང་བར་བྱེད། གསང་སྔགས་རྗོད་པར་བྱེད་ཅིང་། འབྲུ་འདི་དག་ཀྱང་འདྲེས་པར་གྱུར་པ་ན་སྐྱེས་པའམ་བུད་མེད་དམ་མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས་གལ་ཏེ་འབྲུ་དེ་དག་འདྲེ་བ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཉེ་བར་འགགས་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་འབྲུ་དེ་དག་འདྲེས་པར་གྱུར་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་ཁྲི་ལས་ལྡང་བར་བྱེད། ཤམ་ཐབས་གྱོན་པར་བྱེད། འགྲོ་བར་བྱེད་དམ། འོ་མ་བྲེའུ་ཆུང་གང་ངམ། ཞོ་བྲེའུ་ཆུང་གང་སྣོད་དུ་བླུགས་ཏེ་སོར་མོས་འཁྲུག་པར་བྱེད། གསང་སྔགས་རྗོད་པར་བྱེད་ཅིང་། འདི་ཡང་ཁྲག་ཏུ་གྱུར་ཅིག །སྐྱེས་པ་དང་བུད་མེད་མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་དེ་ཁྲག་ཏུ་གྱུར་པ་ན་སྐྱེས་པའམ་བུད་མེད་དམ་མ་ནིང་དེའི་སྲོག་ཉེ་བར་འགགས་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་ཁྲག་ཏུ་གྱུར་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན། དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་ཚོན་སྣ་ལྔའི་སྐུད་པས་སྣམ་སྦྱར་ལ་འཚེམ་པར་བྱེད། གསང་སྔགས་རྗོད་པར་བྱེད་ཅིང་། སྣམ་སྦྱར་འདི་ཡང་བཙེམས་པར་གྱུར་ཅིག །སྐྱེས་པའམ་བུད་མེད་དམ་མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་སྣམ་སྦྱར་དེ་འཚེམ་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགག་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་

---

^{[མ་དཔེ་གཟིགས་ན་འདིར་གནོན།]}

ཏེ་སྣམ་སྦྱར་དེ་བཙེམས་པར་གྱུར་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན། དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་ས་ལ་རི་མོ་བདུན་འདྲེན་པར་བྱེད། གསང་སྔགས་རྗོད་པར་བྱེད་ཅིང་། རི་མོ་འདི་དག་ཀྱང་བྱིད་པར་གྱུར་ཅིག །སྐྱེས་པའམ་བུད་མེད་དམ་མ་ནིང་ཆེ་གེ་མོ་ཞིག་གི་སྲོག་ཀྱང་ཉེ་བར་འགག་པར་གྱུར་ཅིག་སྙམ་པ་ལས། གལ་ཏེ་རི་མོ་དེ་དག་འབྱིད་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགག་པར་མ་གྱུར་ན། དགེ་སློང་ལ་ཉེས་པ་སྦོམ་པོར་འགྱུར་རོ། །གལ་ཏེ་རི་མོ་དེ་དག་བྱིད་པར་གྱུར་པ་ན། སྐྱེས་པའམ་བུད་མེད་དམ་མ་ནིང་དེའི་སྲོག་ཀྱང་ཉེ་བར་འགགས་པར་གྱུར་ན་དགེ་སློང་ཕམ་པར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་གཡང་ས་ནས་གཡང་དུ་གཏོང་བར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན། དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །གཡང་ས་ནས་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཁང་བཟང་ནས་སམ། ར་བ་ལས་སམ། གླང་པོ་ཆེའི་གཤུལ་ནས་སམ། རྟའི་རྒྱབ་ནས་སམ། ཁྱོགས་སྤྱིལ་ལས་སམ། ཁྲི་ལས་སམ། ཁྲིའུ་ལས་སམ། ཕྲག་པ་ནས་སམ། གློ་ནས་སམ། རྐེད་པ་ནས་སམ། བརླ་ནས་སམ། བྱིན་པ་ནས་སམ། ཐ་ན་ལོང་བུ་ནས་ས་ལ་ལྟུང་བར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་

---

^{[མ་དཔེ་གཟིགས་ན་འདིར་གནོན།]}

མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཆུར་འཇུད་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ། དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཆུར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་ཤར་ཕྱོགས་ཀྱི་རྒྱ་མཚོ་ཆེན་པོར་རམ། ལྷོ་ཕྱོགས་ཀྱི་རྒྱ་མཚོ་ཆེན་པོར་རམ། ནུབ་ཕྱོགས་ཀྱི་རྒྱ་མཚོ་ཆེན་པོར་རམ། བྱང་ཕྱོགས་ཀྱི་རྒྱ་མཚོ་ཆེན་པོར་རམ། མཚོར་རམ། ལྟེད་ཀར་རམ། ལྗན་ལྗིན་དུ་འཇུད་དམ། ཐ་ན་དེའི་ཁར་སྙིམ་པའི་ཆུ་ལྡུགས་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་མེར་འཇུད་པར་བྱེད་ཅིང་དེ་ཡང་རྩོམ་པ་དེས་དུས་བྱེད་ན། དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །མེར་ཇི་ལྟ་བ་དེ་བཞིན་དུ་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། གྲོང་ཁྱེར་སྲེག་པའམ། གྲོང་སྲེག་པའམ། ཡུལ་སྲེག་པའམ། རྒྱལ་ཐབས་སམ། ད་ནུར་དུ་འཇུད་དམ། ཐ་ན་དེའི་ཁར་མགལ་བ་ཙམ་འཇུད་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་

---

^{[མ་དཔེ་གཟིགས་ན་འདིར་གནོན།]}

གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་སམ། སེང་གེ་དག་གམ། སྟག་དག་གམ། གུང་དག་གམ། མཚའ་དག་གམ། སྤྱང་ཀི་དག་གིས་ཟོས་པར་གྱུར་པས་སམ། ཉི་མ་དང་རླུང་དག་གིས་ཡོངས་སུ་སྐམ་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་པས་སམ། བཀྲེས་པ་དང་། སྐོམ་པའི་ཉམ་ཆུང་བས་དཀྲིས་པས་དུས་བྱེད་པར་གྱུར་ཅིག་སྙམ་པས་འཇིགས་པ་དང་བཅས་པའི་ཕྱོགས་སུ་མངག་པ་ཉིད་དུ་གཏོང་བར་བྱེད་ཅིང་དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན་དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས། དུས་གྲང་བ་མཆོག་ཏུ་གྲང་བ་གང་དག་ཡིན་པ་དེ་དག་གི་ཚེས་བརྒྱད་ཀྱི་བར་གང་དག་ཏུ་འོད་མ་འགས་པའི་རླུང་དག་ལྡང་བ་དེ་དག་ཏུ་ཉིན་མོ་སྟེང་གཡོགས་པར་འཛིན་དུ་བཅུག་ནས་མཚན་མོ་བླ་གབ་མེད་པར་འཛིན་ཅིང་། དེའི་སྟེང་དུ་སོག་མའི་ཆག་ཆག་འདེབས་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ། །དགེ་སློང་གིས་སྐྱེས་པ་དང་བུད་མེད་དང་མ་ནིང་ལ་གསད་པའི་སེམས་ཀྱིས་འདི་ལྟར་རྩོམ་པ་འདིས་འདི་དུས་བྱེད་པར་གྱུར་ཅིག་སྙམ་པས་དུས་ཚ་བ་མཆོག་ཏུ་ཚ་བ་གང་དག་ཡིན་པ་དེ་དག་གིས་སོས་ཀའི་གུང་གི་ཚབ་ལ་བབ་པ་གང་དག་ཏུ་སྲོག་ཆགས་ཕྲ་མོ་སྐྱེ་བ་དེ་དག་ཏུ་ཉིན་མོ་བླ་གབ་མེད་པར་འཛིན་ཏུ་བཅུག་ནས། མཚན་མོ་སྟེང་གཡོགས་པར་འཛིན་ཅིང་དེའི་ལུས་ལ་གསག་གམ། རེ་ལྡེས་ཀྱང་འཁྲི་བར་བྱེད། དུ་བ་རྡུབ་པས་ཀྱང་འདུག་པར་བྱེད་ཅིང་། དེ་ཡང་རྩོམ་པ་དེས་དུས་བྱེད་ན་དགེ་སློང་ཕམ་པར་འགྱུར་རོ། །དེས་དེའི་ཚེ་མ་

---

^{[མ་དཔེ་གཟིགས་ན་འདིར་གནོན།]}

ཡིན་ཡང་དེས་དེའི་འོག་ཏུ་ན་དགེ་སློང་ཕམ་པར་འགྱུར་རོ། །དེས་དེའི་ཚེ་ཡང་མ་ཡིན་ལ་དེས་དེའི་འོག་ཏུ་ཡང་མ་ཡིན་ན། དགེ་སློང་ལ་སྦྱོར་བ་སྔ་མ་དེ་ཉིད་ཀྱིས་ཉེས་པ་སྦོམ་པོར་འགྱུར་རོ།། །།སྡོམ་ལ། བསྲོ་ཁང་དང་ནི་མེ་ཁང་དང་། །འཆར་ཀ་དང་ནི་གཉིས་པོ་དང་། །སྐྱོང་མ་དང་ནི་བཅུ་བདུན་སྡེ། །རི་བྲགས་པ་དང་རྒན་ཞུགས་སོ། །སངས་རྒྱས་བཅོམ་ལྡན་འདས་འབྲོག་གནས་ན། འབྲོག་གི་གནས་མཆོག་ན་བཞུགས་སོ། །དེ་ན་དགེ་སློང་བསོད་སྙོམས་པ་ཞིག་ཁྱིམ་བདག་གཅིག་གི་སྡུམ་པར་དུས་དང་མཐུན་པའི་དུས་སུ་འགྲོ་ཞིང་ཆོས་ཀྱང་སྟོན་པར་བྱེད་དོ། །ཇི་ཙམ་ན་དགེ་སློང་དེས་ཁྱིམ་བདག་དེ་སྐྱབས་སུ་འགྲོ་བ་དང་བསླབ་པའི་གཞི་དག་ལ་རབ་ཏུ་བཞག་གོ་།དེ་ནས་ཡང་དགེ་སློང་དེ་ཉེ་བར་སོང་ནས་ཁྱིམ་བདག་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གིས་བསྔགས་པ་རྒྱ་ཆེར་བརྗོད་པ་དང་། ཁྱིམ་བདག་དེས་སྨྲས་པ། འཕགས་པ་བདག་གིས་ཀྱང་དགེ་འདུན་ལ་རྫས་ལས་བྱུང་བའི་བསོད་ནམས་བྱ་བའི་གཞི་འགའ་ཞིག་བགྱིད་དུ་སྩལ་ཏོ། །བསོད་སྙོམས་པས་སྨྲས་པ། ཁྱིམ་བདག་ལེགས་ཀྱིས་བྱེད་དུ་ཆུག་ཅིག །འཕགས་པ་ཅི་ཞིག་བགྱིད་དུ་སྩལ། ཁྱིམ་བདག་དགེ་འདུན་ལ་བསྲོ་ཁང་གི་ཁང་པ་མེད་ཀྱིས་དེ་བྱེད་དུ་ཆུག་ཅིག །འཕགས་པ་བདག་ལ་ཀར་ཤ་པ་ན་དག་ནི་མཆིས་མོད་ཀྱི། འོན་ཀྱང་བསོད་ནམས་ཀྱི་གྲོགས་བགྱིད་པ་མ་མཆིས་སོ། །ཁྱིམ་བདག་ཁོ་བོ་ཁྱེད་ཀྱི་བསོད་ནམས་ཀྱི་གྲོགས་ཡིན་ནོ། །འཕགས་པ་ལེགས་སོ། །ཁྱིམ་བདག་དེས་བསོད་སྙོམས་པ་དེ་ལ་ཀར་ཤ་པ་ཎ་དག་ཕུལ་ནས་བསོད་སྙོམས་པ་དེ་དགེ་འདུན་གྱི་བསྲོ་ཁང་གི་ཁང་པ་བྱེད་དུ་འཇུད་པ་ལ་ཞུགས་སོ། །ཇི་ཙམ་དུས་གཞན་ཞིག་ན་འབྲོག་གནས་སུ་དུས་སྟོན་བྱུང་ནས། གླ་མི་དག་མ་འོངས་པ་དང་། བསོད་སྙོམས་པས་དེ་དག་བོས་ཏེ་སྨྲས་པ། བཞིན་བཟང་དག་དེང་ཁྱེད་ཅག་ཅིའི་ཕྱིར་མ་འོངས། དེ་དག་གིས་སྨྲས་པ། འཕགས་པ་དེང་འཇིག་རྟེན་གྱི་དུས་སྟོན་ལགས་པས། དེའི་སླད་དུ་བདག་ཅག་མ་མཆིས་སོ། །བསོད་སྙོམས་

---

^{[མ་དཔེ་གཟིགས་ན་འདིར་གནོན།]}

པས་སྨྲས་པ། བཞིན་བཟང་དག་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་དུས་སྟོན་ཡོད་ན། ཁྱེད་ཅག་མཁར་ལན་གྱི་འབྲས་བུས་འཚོ་བ་དག་ལ་དུས་སྟོན་ཅི་འདྲ་བ་དག་ཅིག་ཡོད། ཚུར་ཤེག་ལ་ལས་གྱིས་ཤིག་དང་། དེའི་ཕྱིར་གླ་ཉིས་གྱུར་དུ་སྦྱིན་ནོ། །དེ་དག་གིས་སྨྲས་པ། འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ལ་ནི་རྟག་པ་ཁོ་ནར་དུས་སྟོན་མཆིས་ཀྱི་བདག་ཅག་ནི་མཁར་ལན་གྱི་འབྲས་བུས་འཚོ་བ་ལགས་པས་དེ་ཉིད་ཀྱིས་ན་བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས། གལ་ཏེ་གླ་སུམ་གྱུར་དུ་སྩལ་དུ་ལགས་ཀྱང་བདག་དེང་ནི་ལས་མི་བགྱིད་དོ་ཞེས་དེ་དག་མ་བཏུབ་སྟེ་དོང་ནས། བསོད་སྙོམས་པ་ཡང་སྙིང་ལས་ཆུང་ངུར་འདུག་གོ་།ཁྱིམ་བདག་གིས་བསམས་པ། བདག་གིས་སྦྱིན་པར་བྱ་བའི་ཆོས་དེ་ལ་ཇི་ཙམ་ནི་བྱས། ཇི་ཙམ་ནི་མ་བྱས་པ་དེ་ལྟར་འགྲོའོ་སྙམ་ནས་དེ་ནང་པར་སྔར་ལངས་ཏེ་སོང་བ་དང་འགའ་ཡང་ལས་མི་བྱེད་པ་མཐོང་ན། དེ་བསོད་སྙོམས་པའི་དྲུང་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་གླ་མི་དག་དེང་ལས་མི་བགྱིད་དམ། ཁྱིམ་བདག་མི་བྱེད་དོ། །ཅིའི་སླད་དུ། དེ་དག་ན་རེ། དེང་འཇིག་རྟེན་གྱི་དུས་སྟོན་ཡིན་པས་བདག་ཅག་ལས་མི་བྱེད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་དེ་དག་ནི་མཁར་ལན་གྱི་འབྲས་བུས་འཚོ་བ་ལགས་པས། འཕགས་པས་དེ་དག་ལ་གླ་མ་སྩལ་པས། དེས་ན་མ་བཏུབ་གོར་མ་བཀུམ། བསོད་སྙོམས་པས་སྨྲས་པ། ཁྱིམ་བདག་ཁོ་བོས་གླ་ཉིས་གྱུར་བྱིན་ཡང་མ་གྲུབ་སྟེ། དེ་དག་ན་རེ། འཕགས་པ་གང་དག་བསོད་ནམས་ཀྱི་འབྲས་བུས་འཚོ་བ་དེ་དག་ནི་རྟག་པ་ཁོ་ནར་དུས་སྟོན་མཆིས་ཀྱི། བདག་ཅག་ནི་མཁར་ལན་གྱི་འབྲས་བུས་འཚོ་བ་ལགས་པས། དེ་ཉིད་ཀྱིས་ན་བདག་ཅག་ལ་བརྒྱ་ལ་བརྒྱ་ལམ་ན་དུས་སྟོན་འབྱུང་བས། གལ་ཏེ་གླ་སུམ་གྱུར་དུ་སྩལ་ཏུ་ལགས་ཀྱང་བདག་ཅག་དེང་ནི་ལས་མི་བགྱིད་དོ་ཞེས་ཟེར་རོ། །ཁྱིམ་བདག་གིས་སྨྲས་པ། འཕགས་པ་བདག་ནི་བདག་གི་སླད་དུ་ཡང་བགྱིད་དུ་མ་རྩོལ་ལ། ཉེ་དུ་རྣམས་ཀྱི་སླད་དུ་ཡང་བགྱིད་

---

^{[མ་དཔེ་གཟིགས་ན་འདིར་གནོན།]}

དུ་མི་རྩོལ་གྱི་འདི་ལྟར་འཕགས་པ་རྣམས་ཀྱི་སླད་དུ་བགྱིད་དུ་རྩོལ་བ་ལགས་པས། ཀྱེ་མ་འཕགས་པ་རྣམས་ཀྱིས་ཀྱང་བརྒྱ་ལ་བརྒྱ་ལམ་དུ་མཁར་ལན་གྱི་སྟོངས་མོ་མཛོད་ཅིག །བསོད་སྙོམས་པས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ། །བཅོམ་ལྡན་འདས་ཀྱིས་གཞི་མ་ཟིན་པ་ལ་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་དག་གིས་མཁར་ལན་གྱི་སྟོངས་མོ་བྱ་བར་བརྩམས་ནས། དེ་དག་ཕན་ཚུན་སོ་ཕག་འཕེན་པར་བྱེད་དོ། །ཇི་ཙམ་ན་དགེ་སློང་ཞིག་གིས་དགེ་སློང་ལ་སོ་ཕག་འཕངས་པ་དང་། ལག་པ་ནས་ཤོར་ཏེ་དགེ་སློང་གི་མགོ་ལ་ཕོག་ནས་དེ་དུས་ལ་བབ་བོ། །དགེ་སློང་དེ་དག་འགྱོད་པ་སྐྱེས་ཤིང་དེ་དག་ཡིད་མི་བདེ་ནས། འདི་སྐད་ཅེས་ཚེ་དང་ལྡན་པ་དག་བསོད་སྙོམས་པ་ལས་མེད་པས། ལས་ཕྱུང་ནས་བདག་ཅག་ཚངས་པ་མཚུངས་པར་སྤྱོད་པ་ཡིད་དུ་འོང་བ་དང་བྲལ་བར་གྱུར་ཅིང་བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པར་གྱུར་ཏོ་ཞེས་ཟེར་བའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དོ། །ཡང་དགེ་སློང་རྣམས་ཀྱིས་སོ་ཕག་འཕང་བར་མི་བྱ་བར་འདི་ལྟར་ལག་པས་ལག་པར་བརྒྱུད་བར་བྱའོ། །གལ་ཏེ་བྱེ་བའམ། གས་པ་ཡིན་ན་གོ་བར་བྱ་སྟེ་བརྒྱུད་པར་བྱའོ། །གོ་བར་མ་བྱས་པར་བརྒྱུད་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་རྣམས་ཉི་མ་རངས་པར་ལས་བྱེད་ནས་བྲམ་ཟེ་དང་ཁྱིམ་བདག་དག་ཅིའི་ཕྱིར་དགེ་སློང་འདི་དག་ཉི་མ་རངས་པར་གླ་མི་བཞིན་དུ་ལས་བྱེད་ཅེས་འཕྱ་བར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉི་མ་

---

^{[མ་དཔེ་གཟིགས་ན་འདིར་གནོན།]}

རངས་པར་ལས་མི་བྱ་བར་འདི་ལྟར་ལན་ཅིག་བྱའོ། །དགེ་སློང་དག་སོ་ག་ཕྱི་དྲོ་ལས་བྱེད་ལ། དགུན་ནི་སྔ་དྲོ་ལས་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། སོ་ག་ནི་སྔ་དྲོ་ལས་བྱ་བ་ལ། དགུན་ནི་ཕྱི་དྲོ་ལས་བྱའོ། །དེ་དག་དུས་རྟིང་ལ་ཐུག་པ་ན་གཏོང་ཞིང་འཇིམ་རྫབ་ཀྱིས་གོས་པའི་ལུས་ཀྱིས་དེ་བཞིན་རིངས་པ་རིངས་པར་བསོད་སྙོམས་ལ་འཇུག་པ་ན་མ་དད་པ་དག་འཕགས་པ་དག་ཁྱེད་ཅག་གིས་གླ་མི་དག་ཀྱང་ཕམ་པར་བྱས་ཏེ། དེ་དག་ཀྱང་ཟས་ཀྱི་དུས་ཡོངས་སུ་སྤོང་བར་བྱེད་ན་ཁྱེད་ཅག་ཟས་ཀྱི་དུས་ཀྱང་སྤོང་བར་མི་བྱེད་དོ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། བསོད་སྙོམས་པ་གང་དག་ཡིན་པ་དེ་དག་གིས་ནི་སྟ་གོན་བྱས་ནས། གྲོང་དུ་བསོད་སྙོམས་ལ་འཇུག་ཁོམ་པ་དང་། གང་དག་དགེ་འདུན་གྱི་རྙེད་པ་དབང་བ་དེ་དག་གིས་ནི་སྟ་གོན་བྱས་ནས། དགེ་འདུན་གྱི་དབུས་སུ་འཇུན་ཁོམ་པ་དེ་ལྟར་དུས་ཤེས་པར་བྱས་ཏེ་གཏང་བར་བྱའོ། །བཅོམ་ལྡན་འདས་ཀྱིས་སྟ་གོན་བྱས་ནས་གྲོང་དུ་བསོད་སྙོམས་ལ་འཇུག་པར་བྱ་ཞིང་དགེ་འདུན་གྱི་དབུས་སུ་ཡང་འཇུག་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ཙམ་གྱིས་ན་སྟ་གོན་བྱས་པར་བརྗོད་པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ཙམ་གྱིས་ལག་པ་གཉིས་དང་། རྐང་པ་གཉིས་བཀྲུས་པ་དང་། ལྷུང་བཟེད་བཀྲུས་པར་གྱུར་པ་དེ་ཙམ་གྱིས་ན་སྟ་གོན་བྱས་པར་བརྗོད་པར་བྱའོ། །གཞན་ཡང་ངས་དགེ་སློང་མཁར་ལན་བྱེད་པ་དག་གིས་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་མཁར་ལན་བྱེད་པས་དུས་ཇི་ལྟ་བ་བཞིན་དུ་སྔ་དྲོ་ནི་ཁྱེའུ་སུས་དག་སྦྱོར་དུ་གཞུག་པར་བྱའོ། །ཕྱི་དྲོ་ནི་སྐོམ་དང་ལག་པ་དང་རྐང་པའི་བསྐུ་མཉེ་རྒྱུ་དག་སྦྱོར་དུ་གཞུག་པར་བྱའོ། །དགེ་སློང་མཁར་ལན་བྱེད་པས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །འབྲོག་གནས་སུ་བསོད་སྙོམས་པས་བསྲོ་ཁང་བྱེད་དུ་བཅུག་པ་ཇི་ལྟ་བ་བཞིན་དུ་མེ་ཁང་གི་གླེང་གཞི་ཡང་དེ་ཁོ་ན་བཞིན་དུ་

---

^{[མ་དཔེ་གཟིགས་ན་འདིར་གནོན།]}

རྒྱས་པར་བརྗོད་པར་བྱའོ། །བྱེ་བྲག་ནི་འདི་ཡོད་དེ། བཅོམ་ལྡན་འདས་ཀྱིས་གཞི་མ་ཟིན་པ་ལ་མཁར་ལན་གྱི་སྟོངས་མོ་བྱའོ་ཞེས་བཀའ་སྩལ་ནས། དགེ་སློང་དག་མེ་ཁང་གི་ལས་བྱེད་ཅིང་ཕ་མ་དག་ཕར་སྦེད་ཚུར་སྦེད་པ་ན་དེ་དག་གི་འོག་ན་ཤིང་མཁན་ཞིག་ཞལ་ཏ་བྱེད་དེ། ཇི་ཙམ་ན་ཕྱམ་དག་སྦེད་པ་ན། དགེ་སློང་གི་ལག་ནས་ཕྱམ་ཤོར་བས་ཤིང་མཁན་གྱི་མགོར་ཕོག་ནས་དེ་དུས་ལ་བབ་པ་དང་། དགེ་སློང་དེ་དག་ཚེ་དང་ལྡན་པ་དག་བསོད་སྙོམས་པ་ལས་མེད་པ་ལས་བྱུང་བས། བདག་ཅག་ལ་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ལ་ནི་ལྟུང་བ་མེད་དེ། ཡང་དགེ་སློང་དག་གིས་མི་བཟོད་པའི་ཁུར་གདེག་པར་མི་བྱའོ། །རྐྱེན་དེ་ལྟ་བུ་ཞིག་བྱུང་ན་མདོར་ཁྱིམ་པ་དག་འཛིན་དུ་གཞུག་པར་བྱ་ཞིང་གདེག་པ་དང་། གཞག་པ་དག་ཀྱང་བརྗོད་པར་བྱ་སྟེ། མཉམ་དུ་གདེག་པ་དང་མཉམ་དུ་གཞག་པར་བྱའོ། །དགེ་སློང་དག་མི་བཟོད་པའི་ཁུར་འདེགས་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་དག་གིས་མི་བཟོད་པའི་ཁུར་གདེག་པར་མི་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ཙམ་ནི་བཟོད་པ་ཡིན། ཇི་ཙམ་ནི་མི་བཟོད་པ་ཡིན་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་གཅིག་གི་ཁུར་གང་ཡིན་པ་དེ་དག་དགེ་སློང་གཉིས་ཀྱིས་གདེག་པར་བྱའོ། །སངས་རྒྱས་བཅོམ་ལྡན་འདས་མཉམ་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་འཆར་ཀས་གཏུམ་མོ་བཏུལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཀོད་པ་དེའི་ཚེ། དེས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ནས། ཡོ་བྱད་ཐམས་ཅད་ཀྱིས་བསྟབས་པ་དང་། ཚེ་དང་ལྡན་པ་འཆར་ཀས་དང་དུ་མ་བླངས་ཏེ་སྨྲས་པ། སྲིང་མོ་བཅོམ་ལྡན་འདས་ཀྱི་བསྟན་པ་ནི་གཞན་ལ་ཕན་པས་རྗེས་སུ་འཛིན་པར་ཞུགས་པ་ཡིན་པས། ཁོ་བོས་ཀྱང་གཞན་ལ་

---

^{[མ་དཔེ་གཟིགས་ན་འདིར་གནོན།]}

ཕན་པར་བྱེད་དགོས་སོ། །གཏུམ་མོས་སྨྲས་པ། འཕགས་པ་གལ་ཏེ་དེ་ལྟ་ལགས་ཏེ་དང་དུ་མི་བཞེས་ན། བདག་གིས་འཕགས་པའི་སླད་དུ་དྲང་སྲོང་གི་གདན་བཤམ་པར་བགྱིས། ཁྱོད་ཀྱིས་བསོད་སྙོམས་བརྒྱུས་ནས། དྲང་སྲོང་གི་གདན་ལ་ལོངས་སྤྱད་དེ་གཤེགས་པར་རིགས་སོ། །ཚེ་དང་ལྡན་པ་འཆར་ཀས་སྨྲས་པ། སྲིང་མོ་དེ་བཞིན་བྱའོ་ཞེས་ཚེ་དང་ལྡན་པ་འཆར་ཀ་ཉི་མ་རེ་རེ་ཞིང་བསོད་སྙོམས་བརྒྱུས་ནས། གཏུམ་མོའི་ཁྱིམ་དུ་དྲང་སྲོང་གི། སྟན་ལ་ལོངས་སྤྱད་དེ་འགྲོའོ། །ཇི་ཙམ་དུས་གཞན་ཞིག་ན་ཚེ་དང་ལྡན་པ་འཆར་ཀ་ལ་ལྗོངས་སུ་བྱ་བ་ཞིག་བྱུང་ནས། ཚེ་དང་ལྡན་པ་འཆར་ཀས་བསམས་པ། བདག་ཇེ་སོང་ལ་སྲིང་མོ་བལྟ་བར་བྱའོ་སྙམ་ནས། ཚེ་དང་ལྡན་པ་འཆར་ཀ་གཏུམ་མོའི་གན་དུ་སོང་སྟེ་སྨྲས་པ། སྲིང་མོ་ཁོ་བོ་ལྗོངས་རྒྱུར་འགྲོའི། །ཁྱོད་ཀྱིས་ཆོས་ཀྱི་ལུས་ལ་བག་གྱིས་ཤིག །གཏུམ་མོས་སྨྲས་པ། འཕགས་པ་མྱུར་དུ་སླར་གཤེགས་པའི་རིགས་ཏེ། དེར་བཞུགས་པར་མི་མཛད་ཅིང་། དེར་དགྱེས་པ་མི་བསྐྱེད་དུ་གསོལ། ཚེ་དང་ལྡན་པ་འཆར་ཀས་གཏུམ་མོ་བལྟས་ཏེ། ལྗོངས་རྒྱུར་འཕགས་པ་དང་། ཚེ་དང་ལྡན་པ་ཀུན་དགའ་བོས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག །ཚེ་དང་ལྡན་པ་འཆར་ཀས་ཐོས་ནས་བསམས་པ། སངས་རྒྱས་ཀྱི་རྒྱུ་བ་ལ་ནི་ཕན་ཡོན་བཅོ་བརྒྱད་ཡོད་དེ། རྒྱལ་པོའི་འཇིགས་པ་མེད་པ་དང་། ཆོམ་རྐུན་གྱི་འཇིགས་པ་མེད་པ་དང་། མེའི་འཇིགས་པ་མེད་པ་དང་། མིའི་འཇིགས་པ་མེད་པ་དང་། མི་མ་ཡིན་པའི་འཇིགས་པ་མེད་པ་དང་། ཀླུའི་འཇིགས་པ་མེད་པ་དང་། གདུག་པའི་འཇིགས་པ་མེད་པ་དང་། སེང་གེའི་འཇིགས་པ་མེད་པ་དང་། སྟག་གི་འཇིགས་པ་མེད་པ་དང་། གུང་གི་འཇིགས་པ་མེད་པ་དང་། ཕ་རོལ་གྱི་དམག་ཚོགས་ཀྱི་འཇིགས་པ་མེད་པ་དང་། སྤྱང་ཀིའི་འཇིགས་པ་མེད་པ་དང་། ཤོ་གམ་གྱི་འཇིགས་པ་མེད་པ་དང་། ལ་གཅན་གྱི་འཇིགས་པ་མེད་པ་དང་། གྲུ་བཙས་ཀྱི་འཇིགས་པ་མེད་པ་དང་། དུས་དང་དུས་སུ་ལྷའི་གཟུགས་དག་མཐོང་ཞིང་ལྷའི་སྒྲ་དག་

---

^{[མ་དཔེ་གཟིགས་ན་འདིར་གནོན།]}

ཐོས་ལ་ཀུན་ཤེས་པ་བརྡ་སྤྲོད་པ་དག་ཐོས་པ་དང་། ཆོས་ཀྱི་ལོངས་སྤྱོད་དང་། ཟང་ཟིང་གི་ལོངས་སྤྱོད་ཡོད་པ་དང་། སངས་རྒྱས་ཀྱི་རྒྱུ་བ་ལ་གནོད་པ་ཉུང་བ་ཡིན་གྱིས། བདག་ཀྱང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོའི། ཕྱིར་ལྡོག་པར་བྱའོ་སྙམ་ནས་ཚེ་དང་ལྡན་པ་འཆར་ཀ་ཕྱིར་ལོག་གོ་།དེའི་བར་སྐབས་སུ་གཏུམ་མོའི་དུ་བུ་མོ་ཞིག་ལ་ཁྱེའུ་ཞིག་བཙས་ནས། གཏུམ་མོས་ཁྱེའུ་དེའི་མ་ལ་སྨྲས་པ། བུ་མོ་ཁྱེའུ་འདི་ཁྲུས་གྱིས་ལ་གོས་དཀར་པོས་དཀྲིས་ཏེ། དྲང་སྲོང་གི་སྟན་འདི་ལ་སྙལ་ཅིག་དང་། ཡུན་རིང་དུ་འཚོ་བར་འགྱུར་ཞིང་། ཆེ་རིང་དུ་སྐྱོང་བར་འགྱུར་རོ། །བུ་མོ་དེས་ཁྱེའུ་དེ་ཁྲུས་བྱས་ཏེ་གོས་དཀར་པོས་དཀྲིས་ནས། དྲང་སྲོང་དེའི་སྟན་དེ་ལ་རྟག་ཏུ་བསྙལ་ལོ། །ཚེ་དང་ལྡན་པ་འཆར་ཀ་ཡང་ཉི་མ་གཞན་ཞིག་ན་བསོད་སྙོམས་ལ་ཞུགས་ནས། གཏུམ་མོའི་ཁྱིམ་ག་ལ་བ་དེར་སོང་ངོ་། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས། ཚེ་དང་ལྡན་པ་འཆར་ཀ་དེ་བཞིན་དུ་དྲང་སྲོང་གི་སྟན་དེ་ལ་འདུག་པ་དང་། བུད་མེད་ཀྱི་ཡུལ་དེ་བརྟད་པ་དང་བཅས་ཤིང་། འཕགས་པ་ཁྱེའུ། འཕགས་པ་ཁྱེའུ་ཞེས་ཟེར་ནས། ཚེ་དང་ལྡན་པ་འཆར་ཀ་མྱུར་དུ་ལངས་ཏེ་བལྟས་ན། ཁྱེའུ་དུས་ལ་བབ་པ་མཐོང་ངོ་། །ཁྱིམ་མི་དག་གིས་ཆོ་ངེས་གདབ་པར་བརྩམས་པ་དང་། ཚེ་དང་ལྡན་པ་འཆར་ཀས་སྨྲས་པ། སྲིང་མོ་མ་ངུ་ཞིག །སེམས་ཅན་འདིས་ཚེ་ཐུང་བར་འགྱུར་བའི་ལས་བྱས་ཏེ། བཅོམ་ལྡན་འདས་ཀྱིས་ཀྱང་འདུ་བྱེད་ཐམས་ཅད་ནི་མི་རྟག་གོ་ཞེས་གསུངས་སོ། །དེ་ལྟ་མོད་ཀྱི་འདི་ལ་ཁོ་བོས་ངུད་མོས་གདབ་པར་བྱ་བ་ཡིན་ཏེ། འདི་ལྟར་ཁོ་བོས་དགྲ་བཅོམ་པ་ཉིད་ཐོབ་ཀྱང་ཁོ་བོ་ལ་བརྟེན་ཏེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་འགྱུར་རོ། །དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་འཆར་ཀ་ལ་ནི་ལྟུང་བ་མེད་དེ། ཡང་དགེ་སློང་གིས་ཁྱིམ་གཞན་དུ་སྟན་ལ་མ་བརྟགས་པར་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ། །སངས་རྒྱས་

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཕན་ཚུན་གཏམ་འདྲེས་པ། ཕེབས་པར་སྨྲ་བ། འགྲོགས་བཤེས། སྨོས་འདྲིན་གཉིས་ཤིག་འཁོད་དོ། །ཇི་ཙམ་དུས་གཞན་ན་དེ་གཉིས་ནོར་ཟད་པ་དང་། ལོངས་སྤྱོད་ཟད་པར་གྱུར་ནས། དེ་གཉིས་ཀྱིས་གྲོས་བྱ་བར་བརྩམས་པ། བདག་ཅག་གཉིས་འདི་ཉིད་དུ་མ་ཐོས་པ་དང་དམས་པར་གྱུར་པས་རྣམ་པ་འདི་ལྟ་བུའི་འཚོ་བ་ཟ་ཞིང་ལོངས་སྤྱོད་པས་ཅི་བྱ། རབ་ཏུ་འབྱུང་དུ་འདོང་ངོ་ཞེས་དེ་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་ན་གཅིག་ན་བར་གྱུར་ནས། ཅིག་ཤོས་དེའི་ནད་གཡོག་བྱེད་དོ། །ནད་པ་དེ་ཉམས་དམས་ཤིང་སོས་པར་མ་གྱུར་ནས། ནད་གཡོག་དེས་ནད་པ་ལ་སྨྲས་པ། ཚེ་དང་ལྡན་པ་ཁྱོད་ལ་སྔོན་ཁྱིམ་བའི་ཚེ་ན་ལན་འགའ་ནད་འདི་ལྟ་བུ་བྱུང་ངམ། སྔོན་ཡང་བྱུང་ངོ་། །འོ་ན་ཅི་ཞིག་གིས་ཞི་བར་གྱུར། ལན་ཚྭའི་སྨན་རྩབས་ཀྱིས་སོ། །འོ་ན་དེ་ཅིའི་ཕྱིར་ལན་ཚྭའི་སྨན་རྩབས་མི་འཐུང་ཞེས་ནད་གཡོག་དེས་ལན་ཚྭའི་སྨན་རྩབས་བསླངས་ཏེ་ནད་པ་ལ་བླུད་པ་དང་། ནད་པ་དེ་དུས་ཀྱི་ཆོས་དང་ལྡན་པར་གྱུར་ནས། དགེ་སློང་དེ་བདག་གིས་འདི་ལ་སྨན་པ་ཡིན་པ་བྱིན་པར་མ་གྱུར་ཏ་མ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣ་ས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་གིས་སྨན་པ་ལ་མ་དྲིས་པར་རང་གི་བློས་ནད་པ་ལ་སྨན་སྦྱིན་པར་མི་བྱའོ། །གལ་ཏེ་སྨན་པ་མེད་ན་སྨན་པ་རབ་ཏུ་བྱུང་བ་ལ་དྲི་བར་བྱའོ། །སྨན་པ་རབ་ཏུ་བྱུང་བ་མེད་ན་སྨན་པས་བཀོལ་བ་ལ་དྲི་བར་བྱའོ། །སྨན་པས་བཀོལ་བ་མེད་ན་ནད་ཀྱིས་ཐེབས་པ་ལ་དྲི་བར་བྱའོ། །ནད་ཀྱིས་ཐེབས་པ་མེད་ན་དགེ་སློང་རྒན་པ་རྒན་པ་དག་ལ་དྲི་བར་བྱའོ། ། དགེ་སློང་གིས་སྨན་པ་ལ་མ་དྲིས་སམ། ཇི་སྐད་བསྟན་པའི་རིམ་བ་བཞིན་མ་བྱས་པར་རང་གི་བློས་ནད་པ་ལ་སྨན་སྦྱིན་ན་འགལ་ཚབས་ཅན་དུ་འགྱུར་རོ། །དགེ་སློང་

---

^{[མ་དཔེ་གཟིགས་ན་འདིར་གནོན།]}

རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་སློང་དེ་ལ་སྨན་གང་ལགས་པ་དེ་ཉིད་སྨན་མ་ལགས་པ་ཉིད་དུ་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་སྔོན་ཁྱིམ་པའི་ཚེ་ན་རླུང་དང་བད་ཀན་ཅན་དུ་གྱུར་ལ། ད་ལྟར་ནི་རླུང་དང་མཁྲིས་པ་ཅན་དུ་གྱུར་པས། དེས་ན་དེ་ལ་སྨན་གང་ཡིན་པ་དེ་ཉིད་སྨན་མ་ཡིན་པ་ཉིད་དུ་གྱུར་ཏོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་། མ་ག་དྷར་བྱུང་བའི་བྲམ་ཟེ་དང་ཁྱིམ་བདག་བརྒྱ་སྟོང་ཕྲག་དུ་མ་དང་ལྷན་ཅིག་བདེན་པ་དག་ལ་བཀོད་པ་དེའི་ཚེ་ན། མ་ག་དྷར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས། རྒྱལ་པོའི་ཁབ་ཏུ་འདི་སྐད་ཅེས་རྒྱལ་པོའི་ཁབ་ཏུ་འཁོད་པ་དང་། ཕོ་བྲང་འཁོར་བ་དང་། ཡུལ་ཐ་དད་པ་ནས་ལྷགས་པའི་ཚོང་བའི་ཚོགས་ཤེས་ལྡན་དག་ཉོན་ཅིག །ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེ་ངས་ཡུལ་མེད་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བ་དེའི་ཚེ་ན། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀྱང་མཉན་ཡོད་དུ་འདི་སྐད་ཅེས་མཉན་ཡོད་ན་འཁོད་པ་དང་། ཕོ་བྲང་འཁོར་བ་དང་། ཡུལ་ཐ་དད་པ་ནས་ལྷགས་པའི་ཚོང་པའི་ཚོགས་ཤེས་ལྡན་དག་ཉོན་ཅིག །ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེས་ངས་གསད་པའི་གྱོད་ལ་བསྐྲིན་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་སོ། །དེའི་བར་སྐབས་ན་ཆོམ་རྐུན་པ་གང་དག་ཡུལ་མ་ག་དྷ་ན་གནས་པ་དག་དང་ཆོམ་རྐུན་པ་གང་དག་ཡུལ་གོ་ས་ལ་ན་གནས་

---

^{[མ་དཔེ་གཟིགས་ན་འདིར་གནོན།]}

པ་དེ་དག་ས་མཚམས་ཀྱི་བར་དུ་དོང་སྟེ་འཁོད་དོ། ཐམས་ཅད་དུ་ཆོམ་རྐུན་པ་གང་དག་ཡུལ་མ་ག་དྷ་ན་གནས་པ་དག་དང་། ཆོམ་རྐུན་པ་གང་དག་ཡུལ་ཀོ་ས་ལ་ན་གནས་པ་དེ་དག་ས་མཚམས་ཀྱི་བར་དུ་དོང་སྟེ། འཁོད་ཅིང་དོན་མཐུན་འཇོམས་པར་བྱེད་དོ་ཞེས་བྱ་བའི་སྒྲ་དེ་ལྟ་བུས་ཀྱང་ཁྱབ་པར་གྱུར་ཏོ། །དེ་ཐོས་ནས་ཡུལ་མ་ག་དྷ་ནས་དོན་མཐུན་བསེལ་བ་དང་བཅས་པས། ཡུལ་ཀོ་ས་ལར་འགྲོ་བར་བརྩམས་ཤིང་། ཡུལ་ཀོ་ས་ལ་ནས་ཀྱང་དོན་མཐུན་བསེལ་བ་དང་བཅས་པས་ཡུལ་མ་ག་དྷར་འགྲོ་བར་བརྩམས་སོ། །ཇི་ཙམ་དུས་གཞན་ཞིག་ན་ཡུལ་མ་ག་དྷ་ནས་དོན་མཐུན་བསེལ་བ་དང་བཅས་པ་ཡུལ་ཀོ་ས་ལར་འཕགས་ནས་དེ་གང་གི་ཚེ་ས་མཚམས་ཀྱི་བར་ལས་འདས་ཏེ་ཡུལ་ཀོ་ས་ལར་ཞུགས་པ་དེའི་ཚེ་ན། དེད་དཔོན་གྱིས་སྨྲས་པ། ཤེས་ལྡན་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་ནི་གཏུམ་པ། བརྟུན་དས་པ། དྲག་ཤུལ་ཆེ་བ། དཔའ་བ། རྩལ་ཆེ་བ་ཞེས་གྲགས་པས། གལ་ཏེ་དོན་མཐུན་ཆོམ་རྐུན་པས་བཅོམ་པར་གྱུར་ན་ཡང་། དེས་བདག་ཅག་ལ་རྐུན་རྫས་སྦྱིན་པར་ནུས་ཀྱིས་བསེལ་བ་ཕྱིར་ཐོང་ཞིག །དོན་མཐུན་དག་གིས་སྨྲས་པ། དེད་དཔོན་གལ་ཏེ་དེ་ལྟ་ན་དེ་ལྟར་བགྱིའོ་ཞེས་དེ་དག་གིས་བསེལ་བ་ཕྱིར་བཏང་ངོ་། །ཆེམ་རྐུན་པ་དག་གིས་བྱ་མ་རྟ་བཞག་སྟེ་འཁོད་པ་དང་། བྱ་མ་རྟ་དག་གིས་བསེལ་བ་ཕྱིར་བཏང་བ་དེ་མཐོང་ནས་དེ་དག་གིས་སྨྲས་པ། ཤེས་ལྡན་དག་བསེལ་བ་ཕྱིར་ལོག་གིས་དོན་མཐུན་གཞོམ་པར་བྱས་འདོང་ངོ་ཞེས་དེ་དག་གིས་དོན་མཐུན་སཱ་ལའི་དགོན་པར་ཞུགས་པ་བཅོམ་མོ། །དེ་ན་ཚོང་པ་ཁ་ཅིག་ནི་བསད། ཁ་ཅིག་ནི་བྱེར་རོ། །དེ་ན་གང་དག་བྱེར་བ་དེ་དག་མགོ་ས་རྡུལ་གྱིས་བཀང་སྟེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་དོང་ནས་སྨྲས་པ། ལྷ་བདག་ཅག་ཚོང་པ་རྣམས་ཁྱོད་ཀྱི་ཡུལ་དུ་ཚོང་པར་མི་རུང་བར་རྣམ་པར་བཀོད་དོ། །ཅི་ཞིག་བྱས། ལྷ་བདག་ཅག་ཆོམ་རྐུན་པ་དག་གིས་བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། གཞོན་ནུ་སོང་ལ་ཆོམ་རྐུན་པ་དག་དང་། རྐུན་རྫས་དག་མྱུར་དུ་ཁུག་ཅིག །དམག་དཔོན་འཕགས་སྐྱེས་པོས་ལྷ་བཀའ་

---

^{[མ་དཔེ་གཟིགས་ན་འདིར་གནོན།]}

བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས། དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། མྱུར་བ་མྱུར་བར་སཱ་ལའི་དགོན་པར་སོང་ངོ་། །དེའི་བར་སྐབས་ན་ཆོམ་རྐུན་པ་དག་སཱ་ལའི་དགོན་པ་ཤིན་ཏུ་སྟུག་པོའི་ནང་ན་ཞུགས་ནས། བག་ཕབ་སྟེ་རྐུན་རྫས་བགོད་པར་བྱེད་དོ། །འཕགས་སྐྱེས་པོས་ཀྱང་དེ་དག་གི་སྟེང་དུ་བརྫིས་ནས། དེ་ན་ཆོམ་རྐུན་པ་ཁ་ཅིག་ནི་བསད། ཁ་ཅིག་ནི་བྱེར། ཆོམ་རྐུན་པ་དྲུག་ཅུ་ནི་གསོན་པོར་བཟུང་ངོ་། །དེ་ནས་གཡུལ་ལས་རྣམ་པར་རྒྱལ་ཞིང་ཆོམ་རྐུན་པ་དང་རྐུན་རྫས་ཁྱེར་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་དྲུང་དུ་སོང་ནས། རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཆོམ་རྐུན་པ་ནི་འདི་དག་ལགས། རྐུན་རྫས་ནི་འདི་དག་ལགས་སོ། །རྒྱལ་པོས་ཆོམ་རྐུན་པ་དག་ལ་སྨྲས་པ། ཤེས་ལྡན་དག་ངས་འདི་སྐད་ཅེས་ངའི་ཡུལ་དུ་གང་གིས་ཀྱང་ཆོམ་རྐུན་མི་བྱའོ། །གང་ངའི་ཡུལ་དུ་ཆོམ་རྐུན་བྱེད་པ་དེ་ངས་གསད་པའི་གྱོད་ལ་བསྐྲིན་པར་བྱའོ། །བཅོམ་པ་རྣམས་ཀྱི་རྐུན་རྫས་ནི་ངའི་མཛོད་དང་བང་བ་ནས་སྦྱིན་ནོ་ཞེས་དྲིལ་གྱི་སྒྲ་བསྒྲགས་པ་བྱས་པ་དེ་ཁྱོད་ཀྱིས་མ་ཐོས་སམ། ལྷ་ཐོས་སོ། །འོ་ན་ཁྱེད་ཀྱིས་ཅིའི་ཕྱིར་ཚོང་པ་འདི་དག་བཅོམ། ལྷ་བདག་ཅག་འཚོ་བ་མ་མཆིས་སོ། །གལ་ཏེ་དེ་ལྟ་ན་ཡང་ཅིའི་ཕྱིར་གཞན་གསད་པར་གྱུར། ལྷ་འཇིགས་པ་བསྟན་པའི་སླད་དུའོ། །ངས་ཀྱང་ཁྱེད་ལ་སྔོན་སུས་ཀྱང་མ་བསྟན་པ་དེ་ལྟ་བུའི་འཇིགས་པ་བསྟན་པར་བྱའོ། །རྒྱལ་པོ་དེ་གཏུམ་པས་དེས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་ཆོམ་རྐུན་པ་འདི་དག་གསད་སར་ཁྲིད་ལ་ལག་པ་དང་རྐང་པ་ཆོད་ཅིག །ཚོང་བ་འདི་དག་གི་ཅི་ཕྲོགས་པ་ངའི་བང་མཛོད་ནས་བྱིན་ཅིག །བློན་པོ་དེ་དག་གིས་ཆོམ་རྐུན་པ་དེ་དག་ངུར་ཁྲོད་དུ་ཁྲིད་དེ་ལག་པ་དང་། རྐང་པ་བཅད་ནས། ཚོང་པ་རྣམས་ལ་རྐུན་རྫས་རྒྱལ་པོའི་བང་བ་དང་མཛོད་ནས་བྱིན་ནོ། །བཅོམ་ལྡན་འདས་ཀྱིས་དགེ་སློང་དག་བདག་གི་རྒུད་པ་དང་གཞན་གྱི་རྒུད་པ་ལ་ཡང་དང་ཡང་དུ་

---

^{[མ་དཔེ་གཟིགས་ན་འདིར་གནོན།]}

སོ་སོར་རྟོགས་ཤིག །བདག་གི་འབྱོར་པ་དང་གཞན་གྱི་འབྱོར་པ་ལ་ཡང་དང་ཡང་དུ་སོ་སོར་རྟོགས་ཤིག །དེ་ཅིའི་ཕྱིར་ཞེ་ན། དགེ་སློང་དག་བདག་དང་གཞན་གྱི་རྒུད་པ་ལ་ནི་ཡིད་འབྱུང་བའི་གནས་ཡིན་ལ། བདག་དང་གཞན་གྱི་འབྱོར་པ་ཡང་ཡིད་འབྱུང་བའི་གནས་ཡིན་པའི་ཕྱིར་རོ་ཞེས་བཀའ་སྩལ་ནས། དགེ་སློང་དག་ལངས་ཤིང་ལངས་ཤིང་ངུར་ཁྲོད་རྒྱུར་འགྲོ་བར་བརྩམས་སོ། །དགེ་སློང་མ་དག་ཀྱང་ལངས་ཤིང་ལངས་ཤིང་དུར་ཁྲོད་རྒྱུར་འགྲོ་བར་བརྩམས་སོ། །དེའི་ཚེ་ན་རབ་ཏུ་མང་པོ་དག་དུར་ཁྲོད་རྒྱུར་དོང་ཞིང་དེ་དང་དེ་དག་གིས་ཆོམ་རྐུན་པ་དག་ལ་ངེས་པར་བརྟག་པར་བརྩམས་སོ། །མི་གཞན་ཞིག་ཀྱང་དེ་དག་ཉིད་ལ་རྟོག་ཅིང་འདུག་པ་དེས་སྨྲས་པ། གལ་ཏེ་དོན་འདོད་པ་འགའ་ཞིག་གིས་འདི་དག་ལ་ལན་ཚའི་སྨན་རྩབས་བླུད་པར་གྱུར་ན། དེས་ན་འདི་དག་འདི་ནས་ཤི་འཕོས་ན། མ་གཞོན་ནུ་དག་གི་ནུ་ཞོ་འཐུང་བར་འགྱུར་རོ། །དགེ་སློང་མ་དེ་དག་གི་ནང་ན། དགེ་སློང་མ་སྐྱོང་མ་ཞེས་བྱ་བ་སྦོམ་མོ། གླེན་མ་མི་གསལ་བ་ཞིག་འདུག་པ་དེས་དེ་ཐོས་ནས་དེས་བསམས་པ། གལ་ཏེ་བདག་བསོད་ནམས་ཀྱི་ཕུང་པོ་དེ་ལྟ་བུ་ལས་ཡོངས་སུ་ཉམས་པར་གྱུར་ན། བདག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས། ཅི་ཞིག་རྙེད་ཀྱིས་བདག་སོང་ལ་ལན་ཚྭའི་སྨན་རྩབས་བསླངས་ཏེ་འདི་དག་ལ་བླུད་པར་བྱའོ་སྙམ་ནས། དགེ་སློང་མ་སྐྱོང་མ་དེ་དགེ་སློང་མ་རྣམས་ཀྱི་ནང་ནས་ཕྱིར་བྱུང་སྟེ། གནས་སུ་སོང་ནས་དེ་ནས་ལན་ཚའི་སྨན་རྩབས་ཀྱི་ཕྲུ་བ་དང་། ཁ་ཕོར་དྲུག་ཅུ་བླངས་ཏེ། ཆོམ་རྐུན་པ་དག་གི་དྲུང་དུ་སོང་བ་དང་། ཆོམ་རྐུན་པ་དེ་དག་སྡུག་བསྔལ་གྱི་ཚོར་བ་དག་གིས་ཉེན་ཅིང་སྲོག་ལ་མི་ལྟོས་པ། སྐོམ་པས་གདུངས་པ་དག་གིས་བསམས་པ། ཀྱེ་མ་འཕགས་མ་འདིས་བདག་ཅག་སྐོམ་གྱིས་གདུངས་པ་རྣམས་ལ་བུམ་པ་དེ་ནས་སྐོམ་བླུད་ན་ཅི་མ་རུང་སྙམ་མོ། །སྐྱོང་མས་བསོད་ནམས་ཀྱི་འདུ་ཤེས་ཀྱིས་རེ་རེ་ལ་ཁམ་ཕོར་བྱིན་ཏེ་ལན་ཚྭའི་སྨན་རྩབས་བྲིམས་པ་དང་། གང་གིས་འཐུངས་པ་དེ་དུས་ལ་བབ་སྟེ། དེ་བཞིན་དུ་ཐམས་ཅད་དུས་ལ་བབ་བོ། །སྐྱོང་མ་ཆོམ་རྐུན་པ་དེ་དག་ལ་ལན་ཚྭའི་སྨན་རྩབས་འབྲིམ་པར་བྱེད་པ་ན་ནམ་སྲོས་པར་གྱུར་ནས་དགེ་སློང་

---

^{[མ་དཔེ་གཟིགས་ན་འདིར་གནོན།]}

མའི་དབྱར་ཁང་སྒོ་བཅད་པ་ན། སྐྱོང་མ་འོངས་ནས་དེས་དལ་བུས་ཁད་ཀྱིས་ཁད་ཀྱིས་སྒོ་གཏན་བརྡུངས་པ་དང་། དགེ་སློང་མ་རྣམས་ཀྱིས་སྨྲས་པ། སྒོ་གཏན་རྡུང་བར་བྱེད་པ་འདི་སུ། སྐྱོང་མས་སྨྲས་པ། བདག་སྐྱོང་མའོ། །ཁྱོད་ནམ་སྲོས་ནས་ག་ལས་འོངས། ཕུ་ནུ་མོ་དག་རྗེས་སུ་ཡི་རང་བར་གྱིས་ཤིག །རྗེས་སུ་ཡི་རང་བར་གྱིས་ཤིག །ཅི་ཁྱེད་ཀྱིས་དགྲ་བཅོམ་པ་ཉིད་མངོན་སུམ་དུ་བྱས་སམ། འོན་ཏེ་ཕྱིར་མི་འོང་བའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། རྒྱུན་དུ་ཞུགས་པའི་འབྲས་བུ་མངོན་དུ་བྱས་སམ། འོན་ཏེ་དགེ་འདུན་གྱི་གཙུག་ལག་ཁང་བྱེད་དུ་བཅུག །ཕུ་ནུ་མོ་དག །མ་ཡིན་ནོ། །འོན་ན་འབྲས་ཆན་ནམ། སྐྱོ་མའམ། ཐུག་པའི་བཏུང་བའམ། རས་ཡུག་ཆེན་སྦྱོར་དུ་བཅུག་གམ། སྐྱོང་མས་སྨྲས་པ། ཕུ་ནུ་མོ་དག་ཅི་ཁྱེད་ཅག་ལ་འབྲས་ཆན་དང་། སྐྱོ་མ་དང་། ཐུག་པའི་བཏུང་བ་དང་། རས་ཡུག་ཆེན་སྦྱོར་དུ་གཞུག་པ་བཙལ་བ་ལས། ལས་གཞན་མེད་དམ། འོ་ན་གཞན་ཅི་བྱས། ཁྱེད་ཅག་གིས་ཆོམ་རྐུན་པ་དྲུག་ཅུ་པོ་ལག་པ་དང་། རྐང་པ་བཅད་པ་དེ་དག་མཐོང་ངམ། མཐོང་ངོ་། །བདག་གིས་ལན་ཚྭའི་སྨན་རྩབས་བསླངས་ཏེ་དེ་དག་འཐུང་དུ་བཅུག་ནས་འཐུངས་པ་དང་། དེ་དག་དུས་ལ་བབ་པས་མ་གཞོན་ནུ་དག་གི་ནུ་ཞོ་འཐུང་དུ་བཅུག་གོ་།སྐལ་ཆད་མ་ཁྱོད་ལྟོ་ཕམ་པར་འགྱུར་བ་དག་གིས་བཀང་ལ། ངེད་ཅག་རྗེས་སུ་ཡི་རང་བར་བྱེད་དུ་འཇུད་དམ། དེ་བདག་ལ་ཡང་དག་པར་ཕམ་པར་འགྱུར་བའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་ནས། དེས་སྐབས་དེ་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་དེ་ལ་འདུ་ཤེས་ཀྱང་ཡོད། སེམས་པ་ཡང་ཡོད་པས་ཕམ་པར་གྱུར་ཏོ། །དེ་ལྟ་བས་ན། དགེ་སློང་ངམ་དགེ་སློང་མས་ནད་པ་ལ་ཅི་ནས་ཀྱང་ནད་པ་དུས་བྱེད་པར་གྱུར་

---

^{[མ་དཔེ་གཟིགས་ན་འདིར་གནོན།]}

ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་མི་བྱ་བར་འདི་ལྟར་ཅི་ནས་ཀྱང་ནད་སོས་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱའོ། །དགེ་སློང་གིས་ནད་པ་ལ་ཅི་ནས་ཀྱང་ནད་པ་དུས་བྱེད་པར་གྱུར་ཅིག་སྙམ་པ་དེ་ལྟ་བུའི་སེམས་ཀྱིས་སྨན་སྦྱིན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མོའུ་འགལ་གྱི་བུ་ཆེན་པོས་ཉེ་བར་འཁོར་ལ་སོགས་པ་སྐྱེས་ཕྲན་གཞོན་ནུ་བཅུ་བདུན་སྡེའི་ཚོགས་དག་རབ་ཏུ་ཕྱུང་རྫོགས་པར་བསྙེན་པར་བྱས་པ་དེའི་ཚེ་ན། བཅུ་བདུན་སྡེ་དག་གལ་ཏེ་གཅིག་ལ་ལས་སུ་བསྐོ་བ་བབ་ན་ཡང་དེ་དག་ཐམས་ཅད་བསྡོངས་ཏེ་བྱེད་དོ། །ཇི་ཙམ་དུས་གཞན་ཞིག་ན་གཙུག་ལག་ཁང་དེར་མཚན་ཐོགས་ཐག་ཏུ་ཆོས་མཉན་པ་བྱུང་ནས་དེར་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །ཕྱི་དེ་ཉིན་པར་དགེ་འདུན་གྱི་བསྲོ་གང་བྱུང་ནས་དེར་ཡང་དེ་དག་ཐམས་ཅད་ཀྱིས་བསྡོངས་ཏེ་ཏྲོན་བྱས་སོ། །དེའི་ཕྱི་དེ་ཉིན་པར་བཅུ་བདུན་སྡེ་ལས་གཅིག་ལ་དགེ་སྐོས་བབ་ནས་དེའི་ཉིན་མོ་ཡང་ཐམས་ཅད་ཀྱིས་གཙུག་ལག་ཁང་བརྒྱན་ཏེ་འཁོད་དོ། །དེ་ན་དགེ་སྐོས་ཏྲོན་བྱེད་པའི་ཚེ་བཅུ་བདུན་སྡེ་ལས་གཅིག་ལ་བློ་བྱུང་བ་བདག་ནི་ཆད་ཀྱིས་ཉལ་ལོ། །མི་བཅུ་དྲུག་གིས་ཅིའི་ཕྱིར་ཏྲོན་མི་ནུས་སྙམ་མོ། །དེ་བཞིན་དུ་རེ་རེ་ལ་ཡང་བློ་དེ་ལྟ་བུ་བྱུང་ནས་གཞན་བཅུ་དྲུག་པོ་ཐམས་ཅད་སོ་སོར་ཉལ་དུ་དོང་ངོ་། །དགེ་སྐོས་དེ་འབའ་ཞིག་གཅིག་པུས་མཚན་ཐོག་ཐག་ལས་བྱས་ཏེ། མཚན་མོ་ནམ་ནངས་པ་དང་། མར་མེའི་ཀོང་བུ་དག་བསྡུས། སྒོ་དག་ཕྱེ། གཙུག་ལག་ཁང་ཆག་ཆག་བཏབ། བྱུག་པ་བྱས་ཏེ། དུས་ཤེས་པར་བྱས་ནས་སྟན་བཤམས་ཤིང་མཆོད་རྟེན་གྱི་འཁོར་སར་བདུག་སྤོས་བྲིམས་ཏེ། གཙུག་ལག་ཁང་གི་སྟེང་དུ་འགྲེང་ནས་གཎྜཱི་བརྡུང་བར་བརྩམས་སོ། །དེ་ནས་བཅུ་དྲུག་པོ་དེ་དག་གཎྜཱིའི་སྒྲས་སད་ནས། རང་རང་གི་གནས་ཁང་དག་ནས་ལྷུང་བཟེད་ཐོགས་ཏེ་བྱུང་བ་དང་། དེ་དག་གིས་དགེ་སྐོས་དེ་གཅིག་པུ་ཕར་རྒྱུགས་ཚུར་རྒྱུག་ཅིང་འདུག་པ་མཐོང་ནས། དེ་དག་གིས་ཕན་ཚུན་སྨྲས་པ། ཚེ་དང་ལྡན་པ་དག་འདི་གཅིག་པུ་ཕར་རྒྱུག་ཚུར་རྒྱུག་ཅིང་འདུག་ན། ཡུ་བུ་ཅག་ལས་སུས་ཀྱང་འདིའི་གྲོགས་མ་བྱས་སམ། གཅིག་གིས་སྨྲས་པ། ཁོ་བོ་ལ་བློ་བྱུང་བ་བདག་ནི་ཆད་ཀྱི་ཉལ་ལོ། །མི་བཅུ་དྲུག་གིས་ཅིའི་

---

^{[མ་དཔེ་གཟིགས་ན་འདིར་གནོན།]}

ཕྱིར་ཏྲོན་མི་ནུས་སྙམ་མོ། །དེ་བཞིན་དུ་གཞན་ཡང་དེ་སྐད་ཟེར། གཞན་དག་ཀྱང་ཟེར་ཏེ། ཐམས་ཅད་ཀྱིས་དེ་སྐད་སྨྲས་སོ། །དེ་ནས་བཅུ་དྲུག་པོ་དག་གིས་སྨྲས་པ། ཚེ་དང་ལྡན་པ་དག་འདི་བདག་ཅག་གི་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ན། བདག་ཅག་གིས་འདིའི་གྲོགས་མ་བྱས་པ་ནི་ཡུ་བུ་ཅག་གིས་མ་ལེགས་པ་བྱས་ཏེ། འདི་བདག་ཅག་ལ་གཤེ་བར་འགྱུར་གྱིས། ཟན་ཟོས་མ་ཐག་ཏུ་བཟོད་པ་གསོལ་བར་བྱའོ་ཞེས་དེ་དག་གིས་ཟན་ཟོས་ནས་བཟོད་པ་གསོལ་བར་བརྩམས་ཏེ། གཞོན་པ་རྣམས་ཀྱིས་ནི་དེའི་རྐང་པ་གཉིས་ལ་གཏུགས། རྒན་པ་རྣམས་ཀྱིས་ནི་མགུལ་ནས་འཁྱུད་དེ་ཚེ་དང་ལྡན་པ་བཟོད་པར་གསོལ་ཞེས་བྱས་ནས་དེ་ཅང་མི་སྨྲ་བ་ཉིད་དུ་འདུག་གོ་།དེ་དང་ཆེས་བཤེས་པ་གཅིག་ཡོད་པ་དེས་ག་ག་ཚིལ་བྱས་པ་དང་། དེས་དགོད་པར་བརྩམས་ཏེ་བཟོད་དོ་ཞེས་ཀྱང་ཟེར་རོ། །དེ་དག་གིས་བསམས་པ། དེ་ནི་ཐབས་ལེགས་པ་ཡིན་ནོ་སྙམ་ནས། གཞན་གྱིས་ཀྱང་ག་ག་ཚིལ་བྱས་ཤིང་དེ་བཞིན་དུ་ཐམས་ཅད་ཀྱི་བར་གྱིས་ག་ག་ཚིལ་བྱས་པ་དང་། དེ་རླུང་གྱེན་དུ་འཆུགས་ཏེ་དུས་ལ་བབ་བོ། །དེ་དག་བརྟད་ཅིང་མྱ་ངན་བྱ་བར་བརྩམས་པ་དང་། དགེ་སློང་རྣམས་གྱིས་སྨྲས་པ། ཀྱེ་བཅུ་བདུན་སྡེ་དག་ཅིའི་ཕྱིར་བརྟད་ཅིང་མྱ་ངན་བྱེད། དེ་དག་གིས་སྨྲས་པ། བདག་ཅག་སྔོན་ནི་བཅུ་བདུན་སྡེར་གྱུར་ན། ད་ནི་བཅུ་དྲུག་སྡེར་གྱུར་ཏེ། ཚངས་པ་མཚུངས་པར་སྤྱོད་པ་ཡིད་དུ་འོང་པ་དང་བྲལ་ཞིང་ཕམ་པར་གྱུར་པའི་ལྟུང་བ་བྱུང་ངོ་། །དགེ་སློང་དེ་དག་གིས་མ་ལེགས་སོ་ཞེས་སྨྲས་ཏེ་དོང་ངོ་། །བཅུ་དྲུག་པོ་དེ་དག་ཀྱང་མཐའ་ཅིག་ཏུ་དོང་སྟེ། སེམས་ཁོང་དུ་ཆུད་ཅིང་འཁོད་པ། དགེ་སློང་གཞན་དག་གིས་མཐོང་ནས། དགེ་སློང་དེ་དག་གིས་སྦྱོར་བར་བརྩམས་ཏེ། ཚེ་དང་ལྡན་པ་བཅུ་བདུན་སྡེ་འདི་དག་ནི་སོག་མའི་མེ་བཞིན་དུ་སྐད་ཅིག་གིས་འབར་ཞིང་སྐད་ཅིག་གིས་ཤི་བར་འགྱུར་ཏེ། ཡུད་ཙམ་ཞིག་གིས་རྒོད་བག་བྱེད་ཅིང་ཡུད་ཙམ་ཞིག་གིས་སེམས་ཁོང་དུ་ཆུད་ཅིང་འཁོད་དོ་ཞེས་ཟེར་རོ། །དེ་དག་མྱ་ངན་གྱི་མེས་ཡིད་གདུངས་པས། ཡོངས་སུ་སྤྱོད་ཀྱང་ཅང་མི་སྨྲ་བར་འཁོད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་

---

^{[མ་དཔེ་གཟིགས་ན་འདིར་གནོན།]}

བཀའ་སྩལ་པ། དགེ་སློང་དག་དགེ་སློང་དེ་རྣམས་ལ་ནི་ལྟུང་བ་མེད་དེ། ཡང་དགེ་སློང་གིས་ག་ག་ཚིལ་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ།། །།འདུལ་བ་རྣམ་པར་འབྱེད་པ། བམ་པོ་བཅུ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ནས་ཧ་ཅང་མི་རིང་བ་ན་རི་བྲགས་ཤིག་ཡོད་པ་དེ་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་སྟེ། དེ་ཡང་དད་པ་ཅན་བཟང་བ་དགེ་བའི་བསམས་པ་ཅན་ཡིན་པས། དེས་དགེ་འདུན་ལ་བསྡོས་ཏེ། གཙུག་ལག་ཁང་རྟ་བབས་མཐོན་པོ་དང་། སྐར་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་འཕྲོག་པ། མཐོ་རིས་ཀྱི་ཐེམ་སྐས་སུ་གྱུར་པ་ཞིག་བྱེད་དུ་བཅུག་གོ་།གཙུག་ལག་ཁང་དེར་དགེ་སློང་དྲུག་ཅུས་དབྱར་གནས་པ་དག་བྱས་ཏེ་དོང་ནས་ཁྱིམ་བདག་དེས་དེར་མ་བྱིན་པར་ལེན་པ་དག་གི་ཁྲིའམ་ཁྲིའུ་དག་མི་རྐུས་པར་གྱིས་ཤིག་ཅེས་སྲུང་མའི་མི་བཞག་གོ་།ཇི་ཙམ་དུས་གཞན་ཞིག་ན་དགེ་སློང་གཞན་དྲུག་ཅུ་ལྗོངས་རྒྱུ་ཞིང་འགྲོ་བ་ན་རི་བྲགས་དེར་ཕྱིན་ནས། བསྟི་གནས་རྙན་པར་བྱེད་པ་ན་མི་ཞིག་གིས་སྨྲས་པ། འཕགས་པ་དག་ཁྱེད་ཅག་ཅིའི་སླད་དུ་གཙུག་ལག་ཁང་དུ་མི་གནས། བཞིན་བཟང་གཙུག་ལག་ཁང་ག་ལ་ཡོད། འཕགས་པ་དག་དགོན་པ་འདི་ནའོ། །དགེ་སློང་དེ་དག་དེར་དོང་བ་དང་། སྲུང་མའི་མིས་མཐོང་ནས། དེས་འོངས་པ་ལེགས་སོ་ཞེས་བྱ་བའི་ཚིག་གིས་བསྙེན་བཀུར་བྱས་ཏེ། གནས་ཁང་དག་བསྐོས་ནས་ཁྲི་དང་ཁྲིའུ་དང་སྟན་ནང་ཚངས་ཅན་དང་། ལ་བ་ལ་སོགས་པ་དག་ཕུལ་ཏེ། སྦྱངས་ཙགས་གཡར་ནས་སྨྲས་པ། འཕགས་པ་དག་རེ་ཞིག་ཆབ་བཙག་པར་མཛོད་ཅིག་དང་། དེའི་བར་དུ་བདག་གིས་ཁྱིམ་བདག་ལ་བརྗོད་པར་བགྱིའོ་ཞེས་མི་དེ་ཁྱིམ་བདག་གི་དྲུང་དུ་སོང་སྟེ། སྨྲས་པ། ཁྱིམ་བདག་དགྱེས་པ་སྐྱེད་ཅིག །ཁྱོད་ཀྱི་གཙུག་ལག་ཁང་དུ་དགེ་སློང་གློ་བུར་དུ་ལྷགས་པ་དྲུག་ཅུ་མཆིས་སོ། །ཁྱིམ་བདག་གུས་པར་བསྒྲིམ་པ་དང་བཅས་

---

^{[མ་དཔེ་གཟིགས་ན་འདིར་གནོན།]}

པས་ནང་མི་དག་ལ་སྨྲས་པ། ཤེས་ལྡན་དག་ཁོ་བོའི་གཙུག་ལག་ཁང་དུ་དགེ་སློང་གི་དགེ་འདུན་བྱོན་པ་དེ་དག་ལེགས་པར་སྦྱར་བའི་བཏུང་བས་ཚིམ་པར་བྱས། བུ་རམ་དང་ཧྭགས་དང་ལི་ཁར་དང་དགུན་དང་བལ་བུ་སེའུ་ལོང་ཞིག་ཅེས་ཁྱིམ་བདག་ལེགས་པར་སྦྱར་བའི་བཏུང་བ་སྦྱར་ནས་གཙུག་ལག་ཁང་དུ་སོང་བ་དང་། དགེ་སློང་དག་ཀྱང་ཆུ་བཙགས་ཏེ་རང་རང་གི་སྤྱོད་ལམ་གྱིས་འཁོད་དོ། །ཁྱིམ་བདག་དེས་དགེ་སློང་དེ་དག་ཐག་རིང་པོ་ཁོ་ན་ནས་མཐོང་སྟེ། དེས་གཙུག་ལག་ཁང་དེ་མཚོ་པདྨས་གང་བ་བཞིན་དུ་མཐོང་ནས། རྒྱ་ཆེར་དད་པའི་ཤུགས་ཀྱིས་བསྒྱུར་བའི་རྒྱུད་ཀྱིས་ཚིགས་སུ་བཅད་པ་སྨྲས་པ། གྲོང་ངམ་ཡང་ན་དགོན་པའང་རུང་། །གཤོང་ངམ་ཡང་ན་ཐང་ཡང་རུང་། །གང་ན་འོས་པ་གནས་པ་ཡི། །ས་གཞི་དེ་ནི་དགའ་བྱེད་ཡིན། །དེ་ནས་ལེགས་པར་སྦྱར་བའི་བཏུང་བ་སྟ་གོན་བྱས་ཏེ། རང་གི་ལག་ནས་དགེ་སློང་གི་དགེ་འདུན་དེ་ཚིམ་པར་བྱས་ནས། རང་ཉིད་ཀྱིས་པོག་པོར་ཐོགས་ཏེ། དགེ་སློང་གི་དགེ་འདུན་དང་ལྷན་ཅིག་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་ཞུགས་ཏེ་རྒན་པའི་མཐའ་ལོགས་སུ་འདུག་གོ་།དགེ་འདུན་གྱི་གནས་བརྟན་གྱིས་ཡོན་བཤད་ནས། །ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ། སང་བདག་གི་སྡུམ་པར་འཕགས་པའི་དགེ་འདུན་གྱིས་གདུགས་ཚོད་གསོལ་བར་ཅི་གནང་ཞེས་སྨྲས་པ་དང་། དགེ་སློང་རྣམས་ཀྱིས་ཀྱང་དང་དུ་བླངས་ནས། ཁྱིམ་བདག་དེས་རྐང་པ་གཉིས་ལ་ཕྱག་འཚལ་ཏེ་སོང་ངོ་། །ཁྱིམ་བདག་དེས་ཕྱི་དེ་ཉིན་པར་ཟས་བསོད་པས་དགེ་སློང་དག་ཚིམ་པར་བྱས་ཤིང་དུས་མ་ཡིན་པར་ཡང་བཏུང་བ་བླུད་ནས། དགེ་སློང་རྣམས་ཀྱིས་ཀྱང་ཆོས་སྟོན་ཏོ། །ཕྱིས་ཀྱང་དེ་ཁོ་ན་བཞིན་དུ་དགེ་འདུན་གྱི་གནས་བརྟན་གྱིས་ཡོན་བཤད་པ་དང་། ཁྱིམ་བདག་དེ་རྒན་པའི་མཐའ་ལོགས་སུ་འདུག་སྟེ་སྨྲས་པ། འཕགས་པ་དག་བདག་གིས་གཙུག་ལག་ཁང་འདི་བདག་ཉིད་ཀྱི་སླད་དུ་ཡང་བགྱིད་དུ་མ་སྩལ། ཉེ་དུ་རྣམས་ཀྱི་སླད་དུ་ཡང་བགྱིད་དུ་མ་སྩལ་ཀྱི། འདི་ལྟར་འཕགས་པ་རྣམས་ཀྱི་སླད་དུ་བགྱིད་དུ་སྩལ་པ་ལགས་ཀྱིས་འདི་ཉིད་དུ་དབྱར་གནས་པར་

---

^{[མ་དཔེ་གཟིགས་ན་འདིར་གནོན།]}

ཞལ་གྱིས་བཞེས་ཤིག་དང་། བདག་གིས་འཕགས་པ་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དགེ་སློང་རྣམས་ཀྱིས་སྨྲས་པ། ཁྱིམ་བདག་གཉན་ཡོད་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང་། དུས་དང་དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་སུམ་དུ་བྱས། ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་དག་ཀྱང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད། བཙུན་མོ་ཕྲེང་ལྡན་མ་དང་རྒྱལ་རིགས་དབྱར་ཚུལ་མ་དང་། བླ་མཁྱེན་དྲང་སྲོང་བྱིན་དང་། རྙིང་པ་དང་། དགེ་བསྙེན་མ་ས་ག་དང་། རི་དྭགས་འཛིན་གྱི་མ་དང་། གཞན་ཡང་དད་པ་ཅན་མང་དུ་ཡོད་པས། དེར་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་ཆེན་པོ་ཡང་འགྲུབ་པས་བདག་ཅག་དེ་ཉིད་དུ་འདོང་ངོ་། །འཕགས་པ་དག་ཆོས་ཀྱི་ལོངས་སྤྱོད་ནི་འཕགས་པ་བདག་ཉིད་ལ་རག་ལས་པ་ལགས་ཀྱི། ཟང་ཟིང་གི་ལོངས་སྤྱོད་ནི་བདག་ལ་རག་ལས་པ་ལགས་པས་དགྱེས་པ་སྐྱེད་ཅིག་དང་། ཅུང་ཟད་ཀྱང་ཉམས་པར་མི་འགྱུར་རོ། །དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་དད་པ་ཅན་གྱི་དད་པ་སྤེལ་བར་བྱ་ཞིང་སྦྱིན་བདག་ལ་རྗེས་སུ་སྙིང་བརྩེ་བར་བྱའོ་ཞེས་གསུངས་པས། འདི་ཉིད་དུ་འཁོད་པར་བྱའོ་ཞེས་དེ་དག་དེར་འཁོད་ནས། བློ་བརྟན་པས་གཙུག་ལག་ཁང་དེའི་ཕྱི་ནང་བཅས་པར་སོ་སོར་བརྟག་པར་བརྩམས་པ་དང་། གཙུག་ལག་ཁང་དེ་མེ་ཏོག་ཕུན་སུམ་ཚོགས་པ་དང་། འབྲས་བུ་ཕུན་སུམ་ཚོགས་པ་ཤིན་ཏུ་དགའ་བ་མཐོང་ནས། དགེ་འདུན་གྱི་གནས་བརྟན་གྱིས་སྨྲས་པ། ཚེ་དང་ལྡན་པ་དག་གཙུག་ལག་ཁང་འདི་མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ་ཤིན་ཏུ་དགའ་བ་ཡིན་པས། གལ་ཏེ་བདག་ཅག་གིས་འདིར་དབྱར་སྔ་མ་གནས་པར་ཁས་བླངས་ན་མེ་ཏོག་དང་འབྲས་བུ་ཐམས་ཅད་ཡོངས་སུ་ལོངས་སྤྱད་པར་མི་འགྱུར་གྱིས། བདག་ཅག་གིས་ངེས་པར་དབྱར་ཕྱི་མ་གནས་པར་ཁས་བླང་བར་བྱའོ་ཞེས་དེ་དག་གིས་དེར་དབྱར་ཕྱི་མ་གནས་པར་ཁས་བླངས་སོ། །ཁྱིམ་བདག་དེ་ལ་གཙུག་ལག་ཁང་དེ་གཅིག་པུ་འབའ་

---

^{[མ་དཔེ་གཟིགས་ན་འདིར་གནོན།]}

ཞིག་ཡོད་པས་དེ་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་དོ། །རི་བྲགས་དེ་ན་ཡང་གཙུག་ལག་ཁང་གཞན་མེད་པས་རི་བྲགས་པ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་དོ། །རི་བྲགས་དེའི་ཉེ་འཁོར་ན་ཡང་གཙུག་ལག་ཁང་གཞན་མེད་པས། རི་བྲགས་ཀྱི་ཉེ་འཁོར་བ་དེ་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་དག་ཐམས་ཅད་གཙུག་ལག་ཁང་དེ་ཉིད་དུ་སྦྱིན་ཞིང་བྱེད་པས། དེར་དབྱར་གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ་། །སྟོན་ཟླ་ཐ་ཆུང་གི་གཡོན་ཅན་དག་གི་ཀུན་ཏུ་སྤྱོད་པ་ནི། དགག་དབྱེ་བྱས་མ་ཐག་ཏུ་འདུས་ཏེ་བདག་ཅག་གིས་ལས་ཅི་ཞིག་བྱས་ན། དེས་བརྩལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་འདི་སྙམ་དུ་སེམས་ཏེ། ཤཱཀྱའི་སྲས་ཀྱི་དགེ་སྦྱོང་འདི་དག་གཞོམ་པར་བྱའོ་སྙམ་མོ། །གཞན་དག་གིས་སྨྲས་པ། དེ་དག་ནི་སྒོ་འཕར་བརྒྱ་སྙེད་བཟླ་བ་བྱས་ཀྱང་ལྟོ་ཁེངས་པ་འགྲུབ་པར་དཀའ་བས་དེ་དག་ལ་ཅི་ཡང་མེད་ན། བདག་ཅག་ཅིའི་ཕྱིར་ཡུལ་དེ་སྲིད་དུ་བསྡད་པར་བྱ། དེ་ན་དགེ་སློང་གི་རྒྱུས་ཤེས་པ་གཅིག་འདུག་པས་སྨྲས་པ། ཁྱེད་ཅི་ཤེས། དེ་དག་ལ་མང་དུ་ཡོད་དོ། །ཇི་ལྟར་རེ་ཞིག་གཙུག་ལག་ཁང་འདི་གང་གི་ཡིན་པ་ཁྱིམ་བདག་དེ་ནི་དད་ཅན་བཟང་བ་དགེ་བའི་བསམ་པ་ཅན་ཡིན་ལ། ཁྱིམ་བདག་དེ་ལ་ཡང་གཙུག་ལག་ཁང་འདི་གཅིག་པུ་འབའ་ཞིག་ཡོད་པས། དེ་སྦྱིན་པ་དང་། བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདི་ན་ཡང་གཙུག་ལག་ཁང་གཞན་མེད་པས་རི་བྲགས་པ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་དོ། །རི་བྲགས་འདིའི་ཉེ་འཁོར་ན་ཡང་གཙུག་ལག་ཁང་གཞན་མེད་པས། རི་བྲགས་ཀྱི་ཉེ་འཁོར་བ་འདི་དག་ཀྱང་སྦྱིན་པ་དང་བྱ་བར་སེམས་པ་གང་ཡིན་པ་དེ་ཐམས་ཅད་གཙུག་ལག་ཁང་འདི་ཉིད་དུ་སྦྱིན་ཞིང་བྱེད་པས་འདིར་དབྱར་

---

^{[མ་དཔེ་གཟིགས་ན་འདིར་གནོན།]}

གནས་པར་ཁས་བླངས་པའི་དགེ་སློང་རྣམས་ལ་རྙེད་པ་མང་པོ་བྱུང་ངོ་། །གལ་ཏེ་ཡིད་མི་ཆེས་ན་སོང་ལ་ལྟོས་ཤིག་དང་རང་ཉིད་ཀྱི་མངོན་སུམ་དུ་འགྱུར་རོ། །གལ་ཏེ་དེ་ལྟ་ན་ཁྱོད་ཉིད་ཇེ་སོང་ལ་མངོན་སུམ་དུ་གྱིས་ཤིག་དང་། ཁོ་བོ་ཅག་ཕྱིས་འོང་ངོ་། །དེས་སྨྲས་པ། ལེགས་ཀྱིས་དེ་བཞིན་གྱིས་ཤིག་དང་། ཁོ་བོ་འགྲོའོ་ཞེས་དེས་གོས་ཚགས་བཅོས་ཏེ། འཕགས་ཤིང་དེ་ནས་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ཏེ། གཙུག་ལག་ཁང་དེར་ཞུགས་སོ། །ཇི་ཙམ་ན་སྒོ་ཁང་ན་རྒན་ཞུགས་ཤིག་འདུག་ནས་གཡོན་ཅན་དེ་དེའི་རྐང་པ་ལ་ཕྱག་འཚལ་ཏེ་དྲི་བར་བརྩམས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། བཞིན་བཟང་ཁྱིམ་བདག་ཆེ་གེ་མོ་ཞིག་གི་ཡིན་ནོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟང་གཙུག་ལག་ཁང་ནི་ཇི་ལྟ་བུ་ཡིན། ཕོངས་པ་ནི་ཇི་ལྟ་བུ་ཡིན། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་སོ། །གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟང་འོ་ན་འདི་ནི་གཙུག་ལག་ཁང་ཡིན་གྱི། ཕོངས་པ་མ་ཡིན་ཏེ། འདི་ན་ཡོ་བྱད་ཕུན་སུམ་ཚོགས་པ་ཡོད་ཀྱི། འདི་ན་ཡོ་བྱད་མེད་པ་མ་ཡིན་ནོ། །འཕགས་པ་ཟས་ཟ་བ་ནི་འགའ་ཡང་ས་རྡུལ་མི་ཟ་ལ། གོས་དག་གྱོན་པ་ནི་འགའ་ཡང་ཤིང་ཤུན་དག་མི་གྱོན་པས་ཁྱེད་ཅག་ལ་གོས་ཅུང་ཟད་མཆིས་སམ། རྒན་ཞུགས་དེ་དྲང་བའི་རང་བཞིན་ཅན་ཡིན་པས། དེས་གཡོན་ཅན་དེའི་ལག་ནས་བཟུང་སྟེ་གནས་ཁང་དུ་བཅུག་ནས་སྨྲས་པ། བཞིན་བཟང་གོས་ཀྱི་གདང་གོས་དག་གིས་ཕུར་ཤོག་ཅིང་འདུག་པ་ལ་ལྟོས། འཕགས་པ་ཅི་འདི་ཁྱོད་ཀྱི་ལགས་སམ། འོན་ཏེ་དགེ་འདུན་གྱི་ལགས། བཞིན་བཟང་འདི་ཁོ་བོ་གང་ཟག་གི་ཡིན་ནོ། །འཕགས་པ་འོ་ན་ཁྱོད་ནི་གོར་མ་བཀུམ་པར་དགེ་འདུན་གྱི་གནས་བརྟན་ནམ་ཆོས་སྒྲོག་པ་ཞིག་ལགས་སོ། །བཞིན་བཟང་ཁོ་བོ་ནི་དགེ་འདུན་གྱི་གནས་བརྟན་ཡང་མ་ཡིན་ལ་ཆོས་སྒྲོག་པ་ཡང་མ་ཡིན་ཏེ། འདི་ལྟར་ཁོ་བོ་ནི་དགེ་འདུན་གསར་བུ་དགེ་ཚུལ་ཞིག་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

འཕགས་པ་དེ་ནི་མཇལ་ན་འདི་ན་དགེ་འདུན་གྱི་གནས་མལ་ཅུང་ཟད་མཆིས་སམ། བཞིན་བཟང་མང་དུ་ཡོད་དེ། རེ་ཞིག་ཁོ་བོའི་བྱུག་རིས་སུ་ཡང་དངོས་པོ་བདུན་པོ་དག་འཐོབ་བོ། །འཕགས་པ་དེ་ཡང་མཇལ་གྱིས་འདི་ཞུའོ། །གཙུག་ལག་ཁང་འདི་ན་གང་ལ་ལ་འཚལ་མ་བགྱིད་པ་དེ་ཅི་རྫ་མཁན་གྱི་སྣོད་དུ་འཚོད་དམ། འོན་ཏེ་ཟངས་མའི་སྣོད་དུ་འཚོད། བཞིན་བཟང་ཁྱོད་ཀྱིས་གནས་ཁང་འདི་དག་མཐོང་ངམ། འཕགས་པ་མཐོང་ངོ་། །བཞིན་བཟང་གནས་ཁང་འདི་ཟངས་མའི་སྣོད་ཀྱིས་གང་ཞིང་འདུག་གོ་།གཡོན་ཅན་དེས་བསམས་པ་ལེགས་པར་བྲིད་ཟིན་གྱིས་ད་ནི་འགྲོའོ་སྙམ་ནས་གཡོན་ཅན་དེས་སྨྲས་པ། འཕགས་པ་ཁྱོད་ཀྱི་དགེ་བའི་ཕྱོགས་ཡོངས་སུ་ཉམས་པ་ནི་བདག་གི་དོན་ཡོངས་སུ་ཉམས་པ་ལགས་པས་བདག་སླད་ཀྱིས་ཀྱང་མཆིའི་ད་ནི་མཆིའོ། །བཞིན་བཟང་དེ་བཞིན་གྱིས་ཤིག །གཡོན་ཅན་དེས་རྒན་ཞུགས་དེའི་རྐང་པ་ལ་ཕྱག་འཚལ་ཏེ་སོང་ནས། གཡོན་ཅན་དེ་ཆོམ་རྐུན་པ་དེ་དག་གི་དྲུང་དུ་སོང་སྟེ་སྨྲས་པ། པད་མའི་མིག་ཅན་དག་རྫས་ཐམས་ཅད་ཀྱིས་གང་བའི་གྲུ་བོ་ཆེ་སྐམས་ལ་འདུག་གིས་ཕྲོགས་ཤིག་ཕྲོགས་ཤིག །དེ་ནས་གཅིག་གིས་སྨྲས་པ། དེ་ན་འཁོད་པའི་རབ་ཏུ་བྱུང་བ་དྲུག་ཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ཞེས་གྲགས་པས། དེ་བཞིན་དུ་གཞོམ་པར་མི་ནུས་ཀྱིས། གང་གིས་ཚེ་དེ་དག་མཚན་མོ་ཆོས་ཉན་པ་དེའི་ཚེ་གཞོམ་མོ། །གཞན་དག་གིས་སྨྲས་པ། ཉི་མ་གང་ལ་དེ་དག་གི་ཆོས་ཉན་པ་འབྱུང་བར་འགྱུར། དེས་སྨྲས་པ། ཚེས་བརྒྱད་དང་བཅུ་བཞི་ལ་འབྱུང་སྟེ། དེ་ལ་ཚེས་བརྒྱད་ནི་ཐལ་ཟིན་པས། ཚེས་བཅུ་བཞི་ལ་འབྱུང་བར་འགྱུར་རོ། །དེ་དག་སོར་མོ་དག་གིས་ཉི་མ་བགྲང་ཞིང་འཁོད་འཁོད་ནས། ཇི་ཙམ་ན་ཚེས་བཅུ་བཞི་ལ་བབ་སྟེ། དགེ་འདུན་གྱི་གནས་བརྟན་གྱིས་སོ་སོར་ཐར་པའི་མདོ་བཏོན་ཏེ། དགེ་འདུན་གྱི་གསོ་སྦྱོང་བྱས་ནས། ཆོས་སྒྲོག་པ་སེང་གེའི་ཁྲི་ལ་འཛེགས་ཏེ་འདི་སྐད་ཅེས། མི་མཆོག་འདུལ་བ་ཁ་ལོ་སྒྱུར་མཛད་པ། །ཀུན་སྦྱོར་འཆིང་བ་གཅོད་པ་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པའི་བཀའ་བཞིན་བྱེད་ལ་

---

^{[མ་དཔེ་གཟིགས་ན་འདིར་གནོན།]}

གསུངས། །ཞེས་སྨྲ་བར་བརྩམས་པ་དང་། གཡོན་ཅན་དེ་དག་གིས་སྒོ་བརྡུངས་སོ། །དགེ་སློང་དེ་དག་གིས་ཚོར་ནས་སྨྲས་པ། ཤེས་ལྡན་དག་ཁྱེད་ཅག་སུ་ཡིན། འཕགས་པ་དག་བདག་ཅག་རིགས་ཀྱི་བུ་དག་གོ། དགེ་སློང་རྣམས་ཀྱིས་བསམས་པ། རི་བྲགས་ནས་སྐྱེ་བོའི་ཚོགས་དག་ཆོས་ཉན་དུ་ལྷགས་གོར་མ་ཆག་གིས་སྒོ་དབྱེའོ་སྙམ་ནས། དེ་དག་གིས་སྒོ་ཕྱེ་བ་དང་དེ་དག་ཞུགས་སོ། །ཇི་ཙམ་ན་གཞོམ་པར་བརྩམ་པ་དང་། དགེ་སློང་རྣམས་ཀྱིས་སྨྲས་པ། ཤེས་ལྡན་དག་ཁྱེད་ཅག་ན་རེ། བདག་ཅག་རིགས་ཀྱི་བུ་དག་གོ་ཞེས་ཟེར་ན། ད་ངེད་ཅག་འཇོམས་པར་བྱེད་དམ། དེ་དག་གིས་སྨྲས་པ། འཕགས་པ་དག་བཅག་ཅག་ལ་མིང་གཉིས་ཏེ། སླད་རོལ་དུ་ནི་རིགས་ཀྱི་བུ་དག་ཅེས་བགྱི་ལ། ནང་དུ་ནི་ཆོམ་རྐུན་པ་དག་ཅེས་བགྱིའོ། །ཁྱེད་ཅག་མིང་འདོགས་པར་བྱེད་པ་ནི་ཉམས་སོ། །གཡོན་ཅན་དེ་དག་གིས་དགེ་སློང་དག་བཅོམ་སྟེ་དོང་ནས། དགེ་སློང་བཅོམ་པ་དེ་དག་གིས་གྲེས་བྱས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ་ཞེས་གསུངས་པས་རེ་ཞིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་ཉིད་དུ་དོང་ན་དེར་བདག་ཅག་རེ་རེ་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་ཞེས་གྲོས་བྱས་སོ། །ཇི་ལྟར་འདོང་བར་བྱ། མཚན་མོ་འགེབས་པས་འདོང་ཞིང་ཉིན་མོ་ཐིབས་པོར་ཞུགས་ཏེ་འགྲོ་བར་བྱའོ་ཞེས་དེ་དག་གིས་ཁྱིམ་བདག་ལ་ཡང་མ་བལྟས་པར་དོང་ངོ་། །ཇི་ཙམ་ན་མཐར་གྱིས་མཉན་ཡོད་དུ་ཕྱིན་པ་དང་། དགེ་སློང་དག་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པར་གནས་པ་དེ་དག་གིས་དགེ་སློང་དེ་དག་སྒྲེན་མོར་སྒོའི་གམ་ཡོ་ན་རྒྱུ་བ་མཐོང་ནས་སྨྲས་པ། གཅེར་བུ་སྒྲེ་བྱི་དག་ཁྱེད་ཅག་འདིར་ཅི་འདོད། འདི་ཁྱེད་ཀྱི་གཙུག་ལག་ཁང་མ་ཡིན་ལ་འདུག་གནས་ཀྱང་མ་ཡིན་ནོ། །དེ་དག་གིས་སྨྲས་པ་ཚེ་དང་ལྡན་པ་དག་བདག་

---

^{[མ་དཔེ་གཟིགས་ན་འདིར་གནོན།]}

ཅག་གཅེར་བུ་དག་མ་ཡིན་ནོ། །འོ་ན་ཁྱེད་སུ་ཡིན། དགེ་སློང་དག་གོ། །འདི་ལྟ་བུ་དག་དགེ་སློང་ཡིན་ནམ། གང་དག་རྐུན་པོ་དག་གིས་བཅོམ་པ་དེ་དག་ཇི་ལྟ་བུ་ཡིན། ཁྱེད་ཅག་མིང་ཅི། སངས་རྒྱས་འཚོའོ། །ཆོས་འཚོའོ། །དགེ་འདུན་འཚོའོ། །ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ་ཞེས་དེ་དག་གིས་སྒོ་ཕྱེ་ནས་དགེ་སློང་དེ་དག་འཇུག་ཏུ་བཅུག་སྟེ། དེ་དག་ལ་ལ་ལས་ནི་ཆོས་གོས་བྱིན། ལ་ལས་ནི་ཤམ་ཐགས་བྱིན། ལ་ལས་ནི་རྡུལ་ཟན་བྱིན། ལ་ལས་ནི་ལྷུང་བཟེད་བྱིན། ལ་ལས་ནི་ཆུ་ཚགས་བྱིན་ཏེ། བགོ་བཤའ་ཇི་ལྟ་བ་བཞིན་དུ་ཐམས་ཅད་བགོ་བཤའ་བྱས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མི་ཤེས་པ་ལ་གཙུག་ལག་ཁང་གི་སྒོ་གྱ་ཚོམ་དུ་དབྱེ་བར་མི་བྱ་སྟེ། གལ་ཏེ་འགའ་ཞིག་མཚན་མོ་སྒོ་འདོད་ན། དེའི་མིང་དང་རུས་དྲི་བར་བྱ་ཞིང་གལ་ཏེ་ངོ་ཤེས་ན་སྒོ་དབྱེ་བར་བྱ་ཞིང་། ངོ་མི་ཤེས་ན་སྒོ་དབྱེ་བར་མི་བྱའོ། །གཞན་ཡང་ཆོས་མཉན་པ་ལ་བབ་པའི་ཚེ། དགེ་སློང་མེལ་ཚེ་བ་གཞག་པར་བྱ་ཞིང་། གལ་ཏེ་ཆོམ་རྐུན་འོངས་ན་གཎྜཱི་འོན་ཅིག །གཎྜཱི་ཐེའུ་འོན་ཅིག །དུས་ཀྱི་འཁོར་ལོ་འོན་ཅིག །སྣམ་སྦྱར་དང་། བདུན་པ་དང་། ལྔ་པ་དང་། གཏུར་བུ་དང་། རྒྱ་ཅང་དང་། ཤུར་བུ་དང་། ལྕག་པོ་དེ་དང་། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱའོ། །གཞན་ཡང་ངས་དགེ་སློང་དགེ་འདུན་གྱི་གནས་བརྟན་གྱི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་དགེ་འདུན་གྱི་གནས་བརྟན་གྱིས་ཆོས་མཉན་པ་ལ་བབ་པའི་ཚེ། དགེ་སྐོས་ལ་ཚེ་དང་ལྡན་པ་ཁྱོད་ཀྱིས་གཙུག་ལག་ཁང་གི་སྒོ་བཅད་དམ། སོ་སོར་བརྟགས་སམ། ཆོས་སྨྲ་བ་ལ་གསོལ་བ་བཏབ་བམ། བཤང་བ་དང་གཅི་བའི་སྐྱབས་བྱི་དོར་བྱས་སམ་ཞེས་དྲི་བར་བྱའོ། །དགེ་སློང་དགེ་འདུན་གྱི་གནས་བརྟན་གྱིས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་ཆོམ་རྐུན་པས་བཅོམ་པའི་དགེ་སློང་དེ་དག་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁོ་བོ་ཅག་

---

^{[མ་དཔེ་གཟིགས་ན་འདིར་གནོན།]}

གིས་ཁྱེད་ཅག་ལ་བགོ་བཤའ་ཇི་ལྟ་བ་བཞིན་དུ་བགོ་བཤའ་བྱས་མོད་ཀྱི་འོན་ཀྱང་ད་དུང་ཁྱེད་ཅག་ཆོས་གོས་དག་གིས་བྲེལ་གྱིས་ཁྱེད་ཅག་ཁྱིམ་བདག་གང་གི་གཙུག་ལག་ཁང་དུ་བཅོམ་པར་གྱུར་པའི་ཁྱིམ་བདག་དེ་ནི་དད་པ་ཅན་བཟང་བ་དགེ་བའི་བསམ་པ་ཅན་ཡིན་པས་དེ་ཉིད་ཀྱི་གཙུག་ལག་ཁང་དུ་དེང་ཞིག་དང་། དེ་ཉིད་ཀྱིས་ཁྱེད་ལ་ཆོས་གོས་དག་གིས་མི་བྲེལ་བར་བྱེད་པར་འགྱུར་རོ། །དགེ་སློང་དེ་དག་མཐའ་གཅིག་ཏུ་དོང་སྟེ། ཕན་ཚུན་གྲོས་བྱ་བར་བརྩམས་པ། ཚེ་དང་ལྡན་པ་དག་ཚངས་པར་མཚུངས་པར་སྤྱོད་པ་འདི་དག་ཟེར་བ་ནི་བཟང་སྟེ། བདག་ཅག་གིས་ཁྱིམ་བདག་ལ་མ་བལྟས་པར་འོངས་པས་ཡང་ཕྱིར་དེ་ཉིད་དུ་དོང་ན་དེས་བདག་ཅག་ལ་ཆོས་གོས་དག་གིས་བགོ་བཤའ་བྱེད་པར་འགྱུར་བའི་གནས་ཀྱང་ཡོད་དོ་ཞེས་དེ་དག་ཡང་ཕྱིར་དེར་དོང་ངོ་། །དེ་ནས་ཁྱིམ་བདག་དེས་མཐོང་ནས་སྨྲས་པ། འཕགས་པ་དག་ཅིའི་སླད་དུ་ཁྱེད་ཀྱིས་བདག་ལ་མ་གཟིགས་པར་བཞུད། དགེ་སློང་དེ་དག་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་ལྷག་མ་དང་བཅས་པར་བཞོ་བར་བྱའོ། །ཞེས་གསུངས་པས། དེས་ན་བདག་ཅག་ལ་བློ་བྱུང་བ་རེ་ཞིག་ཁྱིམ་བདག་འདི་ཕྱོགས་བཞིའི་དགེ་སློང་གི་དགེ་འདུན་ལ་སྦྱིན་དུ་བཅུག་སྟེ་ཡང་ཅི་བྱ། བདག་ཅག་ལ་སྦྱིན་དུ་བཅུག་སྟེ་ཡང་ཅི་བྱས། བདག་ཅག་མཉན་ཡོད་དུ་དོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་དག་གིས་ཆོས་གོས་དག་གིས་མི་ཕོངས་པར་བྱེད་པར་འགྱུར་རོ་སྙམ་ནས། དེའི་ཕྱིར་བདག་ཅག་མཉན་ཡོད་དུ་དོང་ངོ་། །ཁྱིམ་བདག་གིས་སྨྲས་པ། འཕགས་པ་དག་གལ་ཏེ་བདག་གི་གཙུག་ལག་ཁང་བཅོམ་པས། ཅི་ཁྱིམ་ན་བདག་དབང་བའི་རྫས་དག་ཀྱང་བཅོམ་སྙམ་མམ། འཕགས་པ་དག་ཁྱེད་ཅག་གང་གི་སླད་དུ་བྱོན་པ་ནི་ལེགས་སོ་ཞེས་ཁྱིམ་བདག་དེས་ཡང་རྒྱ་ཆེར་གུས་པ་དང་བཅས་པས་མཁོས་སུ་ཕབ་སྟེ་དགེ་སློང་རེ་རེ་ལ་ཡང་ཡོ་བྱད་བཅུ་གསུམ་བཅུ་གསུམ་ཕུལ་ལོ། །ཆོམ་རྐུན་པ་དེ་དག་ཡང་ཕྱིར་འོངས་ཏེ་གཙུག་ལག་ཁང་གི་སྒོ་རྡུང་བར་བྱེད་པ་དང་། དགེ་སློང་རྣམས་ཀྱིས་ཚོར་ནས་དེ་དག་གིས་སྨྲས་པ། ཚེ་དང་ལྡན་པ་དག་

---

^{[མ་དཔེ་གཟིགས་ན་འདིར་གནོན།]}

གཡོན་ཅན་དེ་དག་ཉིད་ལྷགས་ཀྱིས་ཚམ་ངམ་གྱིས་ཤིག་ཅེས། གཎྜཱི་འོན་ཅིག །གཎྜཱིའི་ཐེའུ་དང་། དུས་ཀྱི་འཁོར་ལོ་དང་། སྣམ་སྦྱར་དང་། བདུན་པ་དང་། ལྔ་པ་དང་། གཏུར་བུ་དང་། རྒྱ་ཅང་དང་། ཤུར་བུ་དང་། ལྕག་པོད་དང་། ཤུར་བུ་ཕྲེའུ་འོན་ཅིག་ཅེས་ཚམ་ངམ་བྱ་བར་བརྩམས་པ་དང་། གཡོན་ཅན་དེ་དག་སྐྲག་སྟེ་འབྱེར་བར་བརྩམས་པ་ན། ལྷས་ཚིགས་སུ་བཅད་པ་སྨྲས་པ། ལེགས་གསུངས་རྐང་གཉིས་གཙོ་བོ་ཐུབ་པ་ཡིས། །ཉན་ཐོས་རྣམས་ཀྱི་ཚམ་ངམ་གང་བསྟན་པ། །ཚམ་ངམ་རབ་བརྩོན་པ་དག་མཆོག་ཡིན་གྱི། །གཡོན་ཅན་གཡུལ་ལ་སྡར་བ་གོ་གྱོན་པ། །ལྔ་བརྒྱ་དག་ནི་དེ་ལྟ་མ་ཡིན་ནོ། །གཡོན་ཅན་དེ་དག་ལ་དགེ་སློང་གི་རྒྱུས་ཤེས་པ་དེས་སྨྲས་པ། ཤེས་ལྡན་དག་ཁྱེད་ཅག་ཅིའི་ཕྱིར་འབྱེར་བར་བྱེད། །དེ་དག་གིས་སྨྲས་པ། ཁྱོད་ཉིད་ན་རེ། འདི་ན་འཁོད་པའི་རབ་ཏུ་བྱུང་བ་དྲུག་བཅུ་པོ་དག་ནི་འཕོང་གི་སློབ་དཔོན་ཤ་སྟག་ཡིན་ནོ་ཞེས་ཟེར་བས། ཇི་ལྟར་མི་འབྲོས་སུ་རུང་། གཞན་ཡང་བདག་ཅག་གིས་གཎྜཱི་ཞེས་བྱ་བ་ལ་སོགས་པའི་མཚོན་དེ་ལྟ་བུ་དག་གི་མིང་ནི་སྔོན་ལན་འགའ་ཡང་མ་ཐོས་སོ། །དེས་སྨྲས་པ། དེ་དག་ནི་མཚོན་མ་ཡིན་ནོ། །འོ་ན་དེ་དག་ཅི་ཡིན། རེ་ཞིག་གཎྜཱི་ཞེས་བྱ་བ་ནི། དེ་དག་གི་བརྡུང་བའོ། །གཎྜཱིའི་ཐེའུ་ཞེས་བྱ་བ་ནི་གང་གིས་རྡུང་བར་བྱེད་པའོ། །དུས་ཀྱི་འཁོར་ལོ་ཞེས་བྱ་བ་ནི་དུས་ཡོངས་སུ་གཅོད་པར་བྱེད་པའོ། །སྣམ་སྦྱར་དང་། བདུན་པ་དང་། ལྔ་པ་ཞེས་བྱ་བ་དེ་དག་ནི་ཆོས་གོས་དག་གི་མིང་ངོ་། །གཏུར་བུ་ཞེས་བྱ་བ་ནི་གང་དུ་དེ་དག་གཞུག་པའོ། །རྒྱ་ཅང་དང་། ཤུར་བུ་དང་། ལྕག་པོད་དང་། ཤུར་བུ་ཕྲེའུ་ཞེས་བྱ་བ་དེ་དག་གི་སྐ་རགས་ཀྱི་མིང་ཡིན་གྱི། ཁྱེད་ཅག་མ་སྡར་བར་ཡང་ཕྱིར་འདོང་ལ་གཞོམ་པར་བྱའོ་ཞེས་སྨྲས་ནས། དེ་དག་ཡང་ཕྱིར་ལོག་སྟེ། ཆོམ་རྐུན་པའི་དམག་དཔོན་གྱིས་ཡ་གད་གཙུགས་ཏེ་འཛེག་པར་བརྩམས་པ་དང་། དེ་ན་རྒན་ཞུགས་ཤིག་མེལ་ཚེ་བར་བཞག་པ་དེས་ཆོམ་རྐུན་པའི་དམག་དཔོན་འཛེག་པ་མཐོང་ནས། རྒན་ཞུགས་དེས་བསམས་པ། གཡོན་ཅན་འདི་དག་ནི་གང་དག་གིས་བདག་ཅག་ལྷུང་བཟེད་དང་ཆོས་གོས་ཕྲོགས་ཏེ་སྒྲེན་མོར་བཞག་པ་དག་ཡིན་གྱིས། གལ་ཏེ་འདི་དག་ལ་བཏང་སྙོམས་བྱས་ན། ཡང་འདི་དག་གིས་བདག་ཅག་གི་ལྷུང་བཟེད་

---

^{[མ་དཔེ་གཟིགས་ན་འདིར་གནོན།]}

དང་ཆོས་གོས་ཕྲོགས་ཏེ་སྒྲེན་མོར་བཞག་པར་འགྱུར་བས་འདི་དག་བསྡིགས་པར་བྱའོ་སྙམ་ནས། རྒན་ཞུགས་དེས་དལ་བུས་ཁད་ཀྱིས་ཁད་ཀྱིས་སོང་སྟེ། ཆོམ་རྐུན་པའི་དམག་དཔོན་དེའི་མགོར་གཎྜཱི་འཕངས་པ་དང་། དེའི་གླད་པ་ཞོམ་ནས། དེ་བསྣུན་པ་དྲག་པོས་ཕོག་པས་སྡུག་བསྔལ་གྱི་ཚོར་བ་དག་གིས་ཉེན་ནས་ཚེགས་ཆེན་པོས་བབས་ཏེ། ཅུང་ཞིག་ཏུ་སོང་བ་དང་། དུས་ལ་བབ་བོ། །རྒན་ཞུགས་དེས་ཆོམ་རྐུན་པ་ཆོམ་རྐུན་པ་ཞེས་ཀུ་ཙོའི་སྒྲ་ཕྱུང་བ་དང་། དགེ་སློང་རྣམས་ཀྱིས་ཆོས་ཉན་པ་བཅད་དེ། ཁང་སྟེང་དུ་འཛེགས་ནས། སྨྲས་པ། ཆོམ་རྐུན་པ་དེ་དག་གར་དོང་། རྒན་ཞུགས་ཀྱིས་སྨྲས་པ། ཕྱོགས་འདིར་ཡ་གད་བཙུགས་ཏེ། འཛེགས་པ་ན་ཁོ་བོས་བསྡིགས་ནས་བྱེར་རོ། །དགེ་སློང་རྣམས་ཀྱིས་སྨྲས་པ། གལ་ཏེ་བྱེར་ན་ལེགས་སོ་ཞེས་དེ་དག་བབས་ཏེ། ཇི་ཙམ་ན་མཚན་མོ་ནམ་ནངས་པ་དང་། གཙུག་ལག་ཁང་གི་ཉེ་འཁོར་སོ་སོར་བརྟགས་པར་བརྩམས་ཏེ། ཆོམ་རྐུན་པ་དེ་དག་འཛེགས་པར་གྱུར་པའི་ཕྱོགས་དེ་གང་ཡིན་ཞེས་དེ་དག་གིས་སོ་སོར་བརྟགས་པ་ན་ཁྲག་མཐོང་ངོ་། །དེ་དག་ཁྲག་རྗེས་སུ་དོང་བ་དང་། ཆོམ་རྐུན་པའི་དམག་དཔོན་བསད་པ་མཐོང་ངོ་། །མཐོང་ནས་ཀྱང་བསླབ་པ་འཁྲུགས་པའི་འཇིགས་པས་སྐྲག་སྟེ་སྨྲ་བར་བརྩམས་པ། ཚེ་དང་ལྡན་པ་དག་བདག་ཅག་སྔོན་མ་བཅོམ་གྱིས་བདག་ཅག་གང་གིས་ཕམ་པར་གྱུར་པའི་ལྟུང་བ་བྱུང་བས་ད་ནི་བཅོམ་པར་གྱུར་ཏོ་ཞེས་དེ་དག་འགྱོད་པ་སྐྱེས་པའི་སྐབས་དེ་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཅག་ལ་ནི་ལྟུང་བ་མེད་དེ། ཡང་དགེ་སློང་གིས་ཅི་ནས་ཀྱང་འདི་ལ་བསྣུན་པས་བསྣུན་པར་བྱའོ་སྙམ་པ་དེ་ལྟ་བུའི་སེམས་ཀྱིས་འཕང་བར་མི་བྱ་བར་འདི་ལྟར་གློའམ། རྒྱབ་ལོགས་སུ་འཕང་བར་བྱ་ཞིང་བསྡིགས་པ་བསྐྱེད་པའི་ཕྱིར་ཚམ་ངམ་བྱའོ། །དགེ་སློང་གིས་ཅི་ནས་ཀྱང་བསྣུན་པས་བསྣུན་པར་བྱའོ་སྙམ་པ་དེ་ལྟ་བུའི་སེམས་ཀྱིས་འཕེན་པར་བྱེད་ན་འགལ་ཚབས་ཅན་དུ་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་གཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་དུས་གཞན་ཞིག་ན་ཁྱིམ་བདག་དེ་ཉེ་དུ་ཟད་པར་གྱུར་ཅིང་ནོར་དང་ལོངས་སྤྱོད་ཀྱང་ཟད་པར་གྱུར། དེའི་ཆུང་མ་ཡང་དུས་ལ་བབ་ནས་དེས་བུ་ལ་སྨྲས་པ། བུ་ཁོ་བོས་ནི་རྒས་པའི་གནས་སྐབས་སུ་ནོར་སྒྲུབ་ཏུ་འགྲོ་མི་ནུས་ཀྱིས་རབ་ཏུ་འབྱུང་དུ་འགྲོའོ། །བུས་སྨྲས་པ་ཡབ་གལ་ཏེ་དེ་ལྟ་ན་བདག་ཀྱང་རབ་ཏུ་འབྱུང་ངོ་། །བུ་ལེགས་སོ་ཞེས་དེས་ཁྱེའུ་དེ་ཁྲིད་དེ་རྒྱལ་བྱེད་ཀྱི་ཚལ་དུ་སོང་ནས། དགེ་སློང་གི་དྲུང་དུ་སོང་སྟེ། རྐང་པ་གཉིས་ལ་ཕྱག་འཚལ་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དགེ་སློང་དེས་སྨྲས་པ། ཅི་ཁྱེའུ་འདི་ཡང་རབ་ཏུ་འབྱུང་ངམ། འཕགས་པ་རབ་ཏུ་འབྱུང་ངོ་། །དགེ་སློང་དེ་ཁྱེའུ་དེ་འདོད་པས་དེ་བུ་དང་བཅས་ཏེ་རབ་ཏུ་བྱུང་ངོ་། །ཆོས་ཉིད་ཀྱིས་ན་རྒན་པའི་མཐའ་ནས་རྙེད་པ་འཐོབ་ལ་གཞོན་པའི་མཐའ་ནས་ལས་སུ་བསྐོ་བ་ཡིན་པས། རྒན་ཞུགས་ཀྱི་བུ་རྟག་ཏུ་ལས་སུ་སྐོ་བར་བྱེད་ནས། དེས་ཕ་ལ་སྨྲས་པ། ཡབ་བདག་ཅག་གཉིས་གང་ཅུང་ཟད་ཟིལ་གྱིས་ནོན་པ་དེ་ཐམས་ཅད་ཐོས་པ་ཉུང་བ་ལས་གྱུར་པ་ལགས་ཀྱིས་བཞེངས་ཤིག་དང་། སྐོལ་ཅག་གཉིས་ཡུལ་གཞན་དུ་བཞུད་ལ་ཐོས་པ་གཟུང་བར་བགྱིའོ། །རྒན་ཞུགས་ཀྱིས་སྨྲས་པ། བུ་ལེགས་ཀྱིས་འདོང་ངོ་ཞེས་དེ་གཉིས་ཡུལ་གཞན་དུ་དོང་ངོ་། །འོན་ཀྱང་གཞོན་པའི་མཐའ་ཉིད་ནས་ལས་སུ་བསྐོ་བས། དེ་གཉིས་སོན་མ་ཐག་ཁོ་ནར་ལས་སུ་བསྐོ་བར་བསྐོས་པ་དང་། བུས་རྒན་ཞུགས་ལ་སྨྲས་པ། ཡབ་མཉན་ཡོད་ན་ལས་སུ་བསྐོ་བ་མཆིས་སུ་ལགས་ཀྱང་། དེ་ན་བཅོམ་ལྡན་འདས་ཆོས་ཀྱི་རྗེ་མངོན་སུམ་དུ་བཞུགས་ཤིང་དུས་དང་

---

^{[མ་དཔེ་གཟིགས་ན་འདིར་གནོན།]}

དུས་སུ་དགེ་སློང་ཆེ་གེ་མོ་ཞིག་གིས་ནི་དགྲ་བཅོམ་པ་ཉིད་མངོན་དུ་བྱས་སོ། །ཆེ་གེ་མོ་ཞིག་གིས་ནི་མི་སྡུག་པའི་བར་གྲུབ་བོ་ཞེས་ཤེས་པ་བརྡ་སྤྲོད་པ་ཡང་ཐོས་པར་འགྱུར། རྒྱལ་པོ་ཡང་བསྟན་པ་ལ་ཤིན་ཏུ་དད་ཅིང་། བཙུན་མོ་ཕྲེང་ལྡན་མ་དང་། རྒྱལ་རིགས་དབྱར་ཚུལ་མ་དང་། བླ་མཁྱེན་དྲང་སྲོང་བྱིན་དང་། རྙིང་པ་དང་། དགེ་བསྙེན་མ་ས་ག་དང་། རི་དྭགས་འཛིན་གྱི་མ་དང་། གཞན་ཡང་དད་པ་ཅན་མང་དུ་མཆིས་པས་དེ་ན་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་ཆེན་པོ་ཡང་མཆིས་ཀྱིས་དེར་བཞུད་དོ། །ཞེས་སྨྲས་ནས། དེ་གཉིས་ཅི་དགར་ལྗོངས་སུ་འཁོད་ནས་མཉན་ཡོད་ག་ལ་བ་དེར་རྒྱུ་ཞིང་དོང་བ་ན། མཐར་གྱིས་རྒྱུ་ཞིང་འདོང་བའི་ཚེ། མཉན་ཡོད་དུ་ཕྱིར་ཕྱིན་ཏོ། །ཇི་ཙམ་ན་རྒྱལ་བྱེད་ཀྱི་ཚལ་དང་ཉེ་བར་ཕྱིན་པ་ན་གཎྜཱི་ཡང་བརྡུངས་ནས་བུས་སྨྲས་པ། ཡང་གཙུག་ལག་ཁང་དུ་གཎྜཱི་བརྡུངས་ཀྱིས་མྱུར་བ་མྱུར་བར་བཞུད་དོ། །རྒན་ཞུགས་དེས། རྒས་པར་གྱུར་ཕས་ཤིན་ཏུ་ངལ་ཞིང་འགྲོ་མི་ནུས་པས་དེ་དལ་བུས་འགྲོ་བ་ན། བུས་དེའི་གཉའ་བ་ནས་བཟུང་སྟེ་ཕུལ་བ་དང་། རྒན་ཞུགས་དེས་མྱུར་བ་མྱུར་བར་འགྲོ་བར་བརྩམས་སོ། །བུས་བསམས་པ། ཐབས་འདི་ནི་བཟང་པོ་ཞིག་ཡིན་གྱིས་ཡང་དབུལ་བར་བྱའོ་སྙམ་ནས། བུས་དེས་རྒན་ཞུགས་དེ་ཡང་དེ་བཞིན་དུ་ཕུལ་བ་དང་། རྒན་ཞུགས་དེ་ས་ལ་ཁ་བུབ་ཏུ་འགྱེལ་ནས་དེའི་ཁ་ཕང་ལོས་གློགས་པའི་སས་གང་སྟེ་དུས་ལ་བབ་བོ། །བུ་དེས་དུད་མོས་བཏབ་སྟེ་རྒན་ཞུགས་ཀྱི་རོ་དེ་ལམ་གྱི་མཐའ་གཅིག་ཏུ་བོར་རོ། །དེ་ནས་བུ་དེས་ལྷུང་བཟེད་དང་ཆོས་གོས་ཁྱེར་ཏེ། རྒྱལ་བྱེད་ཀྱི་ཚལ་དུ་སོང་བ་དང་། དགེ་སློང་རྣམས་ཀྱིས་དེ་མཐོང་ནས་སྨྲས་པ། རྒན་ཞུགས་ཀྱི་བུ་འོངས་པ་ལེགས་སོ། །འོངས་པ་ལེགས་སོ། །ཁྱོད་ཀྱི་རྒན་ཞུགས་དེ་ག་ལ་འདུག་ཅེས་དྲིས་པ་དང་། གསར་བུ་དེས་དུ་བར་བརྩམས་སོ། །དགེ་སློང་རྣམས་ཀྱིས་སྨྲས་པ། བུ་ཅིའི་ཕྱིར་ངུ་བར་བྱེད། གསར་བུ་དེས་སྨྲས་པ། བདག་གི་རྒན་ཞུགས་དེ་དུས་ལ་བབ་བོ། །དགེ་སློང་དེ་དག་གིས་སྨྲས་པ། བུ་འདུ་བྱེད་ཐམས་ཅད་ཀྱི་ཆོས་དེ་ལྟ་བུ་ཡིན་ལ། ཁྱོད་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་ཡིན་པས་མྱ་ངན་མ་བྱེད་ཅིག །

---

^{[མ་དཔེ་གཟིགས་ན་འདིར་གནོན།]}

གསར་བུས་སྨྲས་པ། དེ་བདག་གིས་བསད་དོ། །དགེ་སློང་དེ་དག་གིས་སྨྲས་པ། བུ་འོན་ཁྱོད་ཀྱིས་མཚམས་མེད་པའི་ལས་གང་ཡིན་པ་ཡང་བྱས་ལ། ཕམ་པར་འགྱུར་བའི་ལྟུང་བ་གང་ཡིན་པ་ཡང་བྱུང་བས་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་འགྱུར་བས་ད་ངུ་བའི་རིགས་སོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དེ་ལ་ནི་ལྟུང་བ་མེད་དེ། ཡང་དགེ་སློང་ལམ་དུ་ཞུགས་པས་དགེ་སློང་ལམ་གྱིས་དུབ་པ་དབུལ་བར་མི་བྱའོ། །ངས་དགེ་སློང་ལམ་དུ་ཞུགས་པའི་ཀུན་ཏུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ལམ་དུ་ཞུགས་པས་དགེ་སློང་ལམ་གྱིས་དུབ་པ་ངལ་སོར་གཞུག་པར་བྱ། ཆོས་གོས་གསུམ་དང་། ལྷུང་བཟེད་དང་། ཆུ་ཚགས་དང་། ལྷུང་བཟེད་ཀྱི་སྣོད་དང་། བར་བུར་སྣོད་ཀྱི་རྫས་བླང་བར་བྱའོ། །དུས་ཤེས་པར་བྱ་སྟེ། གལ་ཏེ་འགྲོ་ནུས་ན་དེ་ལྟ་ན་ལེགས། གལ་ཏེ་འགྲོ་མི་ནུས་ན་ཆེས་སྔར་སོང་སྟེ། ལྷུང་བཟེད་བཀྲུ་བར་བྱ། གོས་གཞག་པར་བྱ། སྣོད་དག་བྱིན་ལེན་བྱེད་དུ་བཅུག་ནས་སོ་སོར་བརྟག་པར་བྱའོ། །གལ་ཏེ་འོང་མི་ནུས་ན་ཟས་མནོས་ཏེ་བསུ་བར་བྱའོ། །དུས་མ་ཡིན་ན་སྐོམ་གྱིས་བསུ་བར་བྱའོ། །དགེ་སློང་ལམ་དུ་ཞུགས་པས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒན་ཞུགས་ཀྱི་བུ་འདིས་ཕ་སྲོག་དང་བྲལ་ཡང་མཚམས་མ་མཆིས་པའི་ཁ་ན་མ་ཐོ་བས་ཀྱང་མ་རེག་ལ། ཕམ་པར་འགྱུར་བའི་ལྟུང་བ་ཡང་མ་བྱུང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་ཏུ་མ་ཟད་དེ། འདི་ལྟར་འདས་པའི་དུས་ན་ཡང་འདིས་ཕ་སྲོག་དང་ཕྲལ་ཡང་། མཚམས་མེད་པའི་ཁ་ན་མ་ཐོ་བས་མ་རེག་སྟེ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། རི་བྲགས་ཤིག་ན་བཙོ་བླག་མཁན་ཞིག་

---

^{[མ་དཔེ་གཟིགས་ན་འདིར་གནོན།]}

འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་བྱུང་ནས། དེ་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་དུས་གཞན་ཞིག་ན་རི་བྲགས་དེར་དུས་སྟོན་བྱུང་ནས། དེ་ལ་གོས་བཀྲུ་བཤལ་བྱ་བ་མང་པོ་དག་བྱུང་བ་དང་། དེས་བུ་ལ་སྨྲས་པ། བུ་གོས་མང་པོ་དག་བཀྲུ་བཤལ་བྱ་དགོས་པས་ཁོ་བོ་ཁྱིམ་དུ་སོང་སྟེ་ཟན་ཟ་མི་ནུས་ཀྱི་ཚུར་ཤོག་གོས་དག་ཁྱེར་ཏེ་འདོད་ངོ་། །ཕྱིར་སོང་ལ་ཟས་ཁྱེར་ཏེ་ཤོག་ཅིག །དེ་བུ་དང་ལྷན་ཅིག་གོས་དག་ཁྱེར་ཏེ་སོང་ངོ་། །བུ་ཕྱིར་སོང་སྟེ་ཟན་ཁྱེར་ཏེ་འོངས་ནས། དེས་ཟན་ཟོས་ཏེ་སྨྲས་པ། བུ་ཁོ་བོ་ངལ་གྱིས་ཉལ་ལོ། །ཁྱོད་རེ་ཞིག་གོས་དག་བཀྲུ་བཤལ་གྱིས་ཤིག །བུས་སྨྲས་པ་དེ་ལྟར་བགྱིའོ། །བཙོ་བླག་མཁན་དེ་ཕྱོགས་གཅིག་ཏུ་གློས་ཕབ་སྟེ་གཉིད་ལོག་གོ་།དེ་སྤྱི་ཅེར་ཞིག་ཡིན་པས་དེའི་མགོ་ལ་སྦྲང་བུ་ཆགས་སོ། །ཇི་ཙམ་ན་བཙོ་བླག་མཁན་གྱི་བུ་དེས་གོས་དག་བཀྲུ་བཤལ་བྱས་ནས་ཕའི་གན་དུ་སོང་བ་དང་། ཕའི་མགོ་ལ་སྦྲང་བུ་ཆགས་པ་མཐོང་ནས་དེས་བསྐྲད་པར་བརྩམས་པ་དང་། སྦྲང་བུ་ཁྲག་གིས་མྱོས་པ་འཕུར་དུ་མ་བཏུབ་ནས། བུ་དེ་མི་བཟོད་པ་སྐྱེས་ཏེ་བསམས་པ། སྦྲང་བུ་འདིས་བདག་གི་ཕ་གསོན་བཞིན་དུ་ཁྲག་འཐུང་བར་བྱེད་ཀྱིས་གསད་པར་བྱའོ་སྙམ་ནས་བུ་དེས་དེ་ལ་སྤང་ལེབ་ཀྱིས་བསྣུན་པ་དང་། །སྦྲང་བུ་དེ་ནི་བྲོས་ཏེ་སོང་གིས་ཕའི་ཀླད་པ་ཞོམ་ནས་དེ་དུས་ལ་བབ་པ་དང་། ལྷས་ཚིགས་སུ་བཅད་པ་སྨྲས་པ། དགྲ་བོ་བློ་གྲོས་ལྡན་པ་མཆོག་ཡིན་ཏེ། །མཛའ་བཤེས་བློ་གྲོས་བྲལ་བ་དེ་ལྟ་མིན། །བློ་གྲོས་ཆུང་ངུས་སྦྲང་བུ་གསད་སྙམ་ནས། །ཐོ་བས་ཕ་ཡི་ཀླད་པ་བཅོམ་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་བཙོ་བླག་མཁན་གང་ཡིན་པ་དེ་ནི་རྒན་ཞུགས་འདི་ཉིད་ཡིན་ནོ། །དེའི་ཚེ་དེའི་དུས་ན་བཙོ་བླག་མཁན་གྱི་བུ་གང་ཡིན་པ་དེ་ནི་རྒན་ཞུགས་ཀྱི་བུ་འདི་ཉིད་ཡིན་ཏེ། འདིས་དེའི་ཚེ་ཡང་ཕ་སྲོག་དང་ཕྲལ་ཡང་མཚམས་མེད་པའི་ཁ་ན་ཐོ་བས་མ་རེག་ལ། འདིས་ད་ལྟར་ཡང་ཕ་སྲོག་དང་ཕྲལ་ཡང་མཚམས་མེད་པའི་

---

^{[མ་དཔེ་གཟིགས་ན་འདིར་གནོན།]}

ཁ་ན་མ་ཐོ་བས་ཀྱང་མ་རེག་ལ། ཕམ་པར་འགྱུར་བའི་ལྟུང་བ་ཡང་མ་བྱུང་ངོ་། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཕམ་པར་འགྱུར་པ་གསུམ་པ་རྫོགས་སོ།། །།