སྐུ་གསུང་ཐུགས་ཀྱི་རྟེན་བཞེངས་དང་ཕྱག་མཆོད་སྐོར་བའི་ཕན་ཡོན།
སུགཏཀཱཡབཱཀྩིཏྟསྱནིཤྲཡཿ སྠིཏཱཙབནྡཔཱུཛཔྲདཀྵཤཾསནིརྡེཤཿ ཀརྨཎཾཙུནྡཔཀྚཡདེབསྱདྷེརིནཱམབིཛཧཱར།
བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་པ་དང་ཕྱག་མཆོད་སྐོར་བའི་ཕན་ཡོན་བསྟན་པ་རྣམ་དཀར་ལས་ལ་སྐུལ་བྱེད་དཀར་ཆག་ལྷའི་རྔ་ཆེན་ཞེས་བྱ་བ་བཞུགས་སོ། །
སུགཏཀཱཡ་ཝཱཀྩིཏསྱནིཤྲཡཿ སྠིཏཙནམྲཿ པཱུཛཔྲདཀྵཤཾསནིརྡེཤཿ
བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་པ་དང་ཕྱག་མཆོད་སྐོར་བའི་ཕན་ཡོན་བསྟན་པ།
ཀུཤཀརྨཎཾཙུནྡཔཀྚཡདེབསྱབྷེརིནཱམ། ནམོགུརུབྷེཊྚརཀེབྷྱཿ
རྣམ་དཀར་ལས་ལ་སྐུལ་བྱེད་དཀར་ཆག་ལྷའི་རྔ་ཆེན་ཞེས་བྱ་བ། རྗེ་བཙུན་བླ་མ་རྣམས་ལ་ཕྱག་འཚལ་ལོ། །
ཀུན་བཟང་སྒྲིབ་མེད་སེམས་ཀྱི་རྡོ་རྗེའི་བདག །བདེ་ཆེན་མཚན་དཔེའི་ལང་ཚོར་ཡོངས་སྨིན་ལས། །མཐའ་ཡས་འགྲོ་ལ་ཕན་བདེའི་དཔྱིད་འཇོ་བའི། །འབྱུང་གནས་བདེ་གཤེགས་ཆོས་ཀྱི་སྐུ་ལ་འདུད། །སྐལ་བཟང་ལྷ་ལམ་ཡངས་པའི་མེ་ལོང་ངོས། །ཐུགས་བསྐྱེད་ཚོན་གྱིས་ལེགས་བྲིས་དྲུག་ཕྲག་ཟུང༌། །མཛད་བཟང་གར་གྱི་རི་མོ་ཡོངས་སྨིན་པ། །སྟོན་པ་མཉམ་མེད་གང་དེ་གཙུག་གིས་མཆོད། །དེ་ཡི་བསྟན་པ་འགྲོ་གསུམ་དག་བྱེད་རྒྱུན། །གྲོལ་ལམ་ཡན་ལག་བརྒྱད་ལྡན་ལྷ་ཡི་ཆབ། །བཤད་སྒྲུབ་རླབས་ཕྲེང་བརྒྱ་ཡི་འཇོ་སྒེག་གིས། །རྩེན་བཞིན་ཡིད་ཀྱི་རོལ་མཚོའི་ཀློང་དུ་སིམ། །བསླབ་གསུམ་རིམ་གཉིས་ཡལ་གའི་ཕྱོགས་རྫོགས་ཤིང༌། །བགེགས་འཇོམས་གྲུབ་པ་མཆོག་སྦྱིན་ཡོངས་འདུའི་ཕྲེང༌། །ཐེག་གསུམ་འཕགས་ཚོགས་མཁའ་འགྲོ་ཆོས་སྲུང་གི །ཟོལ་བརྟེན་དགེ་འདུན་འདུས་པས་རྟག་ཏུ་སྐྱོངས། །དཀོན་མཆོག་གསུམ་ཆར་བསྡུས་པ་སྐྱབས་ཀྱི་ཕུལ། །སྲིད་པའི་འཇིགས་འཕྲོག་འདྲེན་པ་ཟླ་མེད་པ། །ཐུབ་དབང་གཉིས་པ་ཆོས་ཀྱི་རྒྱལ་པོ་དེས། །བྱང་ཆུབ་བར་དུ་དགྱེས་བཞིན་རྗེས་སུ་ཟུངས། །བྱིན་རླབས་འོད་བརྒྱའི་དཔལ་མངའ་དེ་ཡི་མཐུས། །བདག་བློ་འདབ་བརྒྱའི་ཕྲེང་བ་བཞད་པ་ལས། །གཙུག་ལག་ལུགས་བརྒྱའི་ངོ་མཚར་སྙིང་པོ་འདི། །སྐལ་བཟང་ལྷ་བརྒྱའི་དགའ་ཚལ་རྒྱན་དུ་འཁྲུངས། །རྣམ་འདྲེན་ཐུབ་པ་
རྣམས་ནི་ཆོས་ཀྱི་སྐུ། །ཞི་བ་འདུ་མ་བྱས་པས་རབ་ཏུ་ཕྱེ། །འོན་ཀྱང་སྟོབས་སོགས་བསྟན་དུ་རུང་བ་ཡི། །རྣམ་པར་འཕྲུལ་འདི་བསོད་ནམས་འཇུག་ངོགས་ཡིན། །སྒོ་གསུམ་ལེགས་བྱས་སྲོལ་དུ་བཙུད་པའི་རྒྱུན། །རྟག་གུས་སྦྱོར་བའི་བརྟན་པ་མ་སྙིགས་པས། །བསོད་ནམས་ཕུང་པོ་རྣམ་འགྱུར་དང་བཅས་བཞིན། །གྲུབ་འདི་བྱེད་པོའི་རི་མོ་ཡོངས་སུ་སྨིན། །སྔོན་རབས་བཟང་པོའི་དུས་སུ་དགེ་བའི་སར། །རླབས་ཆེན་བསོད་ནམས་སྣང་བ་ཅི་ཡང་སྲིད། །དེ་དང་རྗེས་མཐུན་ཤས་ཀྱི་ལྷག་མ་འདི། །ཆེར་སྙིགས་ཡུལ་དུས་མཚམས་ལས་བརྒལ་བ་བཞིན། །མདོ་སྨད་རྒྱལ་ཁབ་ཡངས་པའི་བསོད་ནམས་ཟོང༌། །ལེགས་སྨོན་བྱེད་པོས་བསྒྱུར་བ་དཔལ་གྱི་ནོར། །འགྲོ་བ་བྱིན་རླབས་སྣང་བའི་བགོ་སྐལ་གྱིས། །མི་ཕམ་མཆོད་སྡོང་ནམ་མཁའི་ནོར་བུ་བཞིན། །བརྙན་པའི་ལོངས་སྤྱོད་འཛམ་བུ་པྲིཀྵའི་འབྲས། །ཞིང་མཆོག་མ་དྲོས་ཀློང་དུ་སོན་པ་ཡི། །བསོད་ནམས་གསེར་གྱི་གར་བུར་གྲུབ་པ་འདི། །མཐོང་ཚེ་སེར་སྣའི་སྤར་མོ་ངང་གིས་ལྷོད། །དབང་མེད་ཁྲིམས་ཀྱིས་བསྡུས་པའི་དཔྱ་ཁྲལ་དང༌། །བུན་སྐྱེད་བསྔོས་བསྒྱུར་ལ་སོགས་ཁྲམ་པའི་ཟས། །མ་ཡིན་སྡིག་དང་མ་འདྲེས་རྒྱུ་སྦྱོར་གྱིས། །བྱ་བ་ལས་ཀྱི་འཁོར་ལོ་ཆེ་འདི་བསྒྲུབས། །དད་ལྡན་དད་པའི་སྦྱིན་རྫས་ཡིན་མོད་ཀྱང༌། །ཆུད་གཟན་མ་གྱུར་
རྒྱལ་བའི་བཀའ་བཞིན་དུ། །བསོད་ནམས་མི་ཟད་གཏེར་དུ་བསྒྲུབས་པ་ཡིས། །རང་གཞིན་གཉིས་ཀར་སྨན་ཡོན་བགྱིས་སོ་སྙམ། །སེན་མོའི་དཀར་དམར་ཤས་ཀྱི་དད་ཟས་འདི། །གཉེན་འཁོར་དགའ་འདུའི་ཚོགས་ནས་ལོངས་སྤྱོད་པ། །འཕྲལ་སྣང་སྐྱིད་ཀྱང་ཕྱི་མའི་གཡང་ས་ཆེར། །མཛོ་སྦྲེལ་བཞིན་དུ་ལྷུང་བ་ཡ་རེ་ང༌། །དེ་སླད་དངོས་འཛིན་ལྕགས་ཀྱི་དྲ་བའི་སྦུབས། །དུམ་བུར་བཤིག་པ་མཐོན་པོའི་འུད་ཀྱིས་ཅི། །འོན་ཀྱང་འདི་སྣང་དྲེས་མའི་ཐག་པ་ཡིས། །མ་བཅིངས་ཕྱི་མར་ཕན་པའི་དོན་དུ་བསམ། །རླབས་ཆེན་བྱང་ཆུབ་སེམས་ཀྱིས་ཁ་བསྒྱུར་བ། །སྲས་བཅས་རྒྱལ་བའི་ཐུགས་རྗེ་བསྐུལ་ལ་རག །འོན་ཏེ་རང་ཡང་ངལ་བསོ་ཐུབ་བསྟན་ལྗོན། །ཕན་བདེའི་གྲིབ་བསིལ་ཡུན་དུ་གནས་པར་སྨོན། །སྡེ་དགོན་ཕྱོགས་རིས་ཙམ་གྱི་བསྟན་པ་དང༌། །ཞྭ་ཡི་ཁ་དོག་ཙམ་གྱི་གྲུབ་པའི་མཐའ། །མིང་དང་གྱོན་པ་ཙམ་གྱི་སྐྱ་སེར་ལ། །སྙིང་པོ་མ་མཆིས་རི་མོའི་སྟག་གཡག་བཞིན། །དེས་ན་ཐུབ་པ་ཆོས་ཀྱི་གངས་རི་ལས། །ཚད་མེད་འཕགས་བོད་རིམ་པར་བབས་པའི་རྒྱུན། །མདོ་སྔགས་ཟུང་འཇུག་ཆོས་ཀྱི་ཉིང་ཁུ་འདི། །ལེགས་བྱས་གཤོང་བུར་འཁྱིལ་ན་ཅི་མ་རུང༌། །མཆོག་ཏུ་མོས་དགེ་ཕུན་ཚོགས་བློ་གྲོས་ཀྱི། །རྣམ་དཔྱོད་དཔུང་པའི་ཀ་བ་ལ་བརྟེན་ནས། །རྒྱུ་འབྲས་ཆོས་ཀྱི་ཕུང་པོ་མཆོད་སྡོང་དུ། །བསྒྲུབས་པའི་ངོ་མཚར་བཅོས་མ་མིན་འདི་སྤྲོ། །ཕྱོགས་ཕྱོགས་འདབ་སྟོང་བཞད་པའི་པད་ཚལ་ལས། །ལེགས་ལེགས་གེ་ས་ར་ཡི་བཅུད་བསྡུས་པ། །མངར་མངར་སྦྲང་རྩིའི་དོག་པ་རྒྱ་ཆེན་འདི། །ཡང་ཡང་མྱོང་བའི་དགའ་སྟོན་དུས་ལ་བབས། །ལུས་ཅན་ཀུན་ལ་ཕན་པ་
ག་བུར་དུ། །འཛག་པའི་ཟླ་བ་གསར་བ་འོངས་སོ་ཀྱེ། །དད་བརྩོན་འདབ་མ་གྲོལ་བའི་ཀུ་མུ་ད། །ཕྱག་མཆོག་གེ་སར་ལྡེམ་པའི་གར་བྱོས་ཤིག །ཅེས་བྱ་བ་ནི་གླེང་བསླང་བའི་སྐབས་ཏེ། དེ་ནས་གཉིས་པ་རྟེན་བཞེངས་པའི་ལོ་རྒྱུས། གསུམ་པ་རྟེན་ཇི་ལྟར་བཞུགས་པའི་མཚན་བྱང༌། བཞི་པ་རྟེན་བཞེངས་པའི་ཕན་ཡོན། ལྔ་པ་རྟེན་ལ་ཕྱག་མཆོད་བྱས་པའི་ཕན་ཡོན། དྲུག་པ་སྐོར་བའི་ཕན་ཡོན་སྐོར་བ་བྱེད་ཚུལ་དང་བཅས་པ། བདུན་པ་བསྔོ་སྨོན་གྱིས་རྒྱས་གདབ་པ་སྟེ་དོན་ཚན་བདུན་གྱི་སྒོ་ནས་བཤད་པར་བྱའོ། །དེ་ལ་གཉིས་པ་རྟེན་བཞེངས་པའི་ལོ་རྒྱུས་ནི། སྤྱིར་སྐུ་གསུང་ཐུགས་ཀྱི་རྟེན་བྱུང་ཚུལ་ལ། སྟོན་པ་ཞལ་བཞུགས་པའི་ཚེ་ལྷ་ཆེན་པོ་རྣམས་ཀྱིས་ཇོ་ཤཱཀ་སོགས་ཐུབ་པའི་སྐུ་ཆེ་ཆུང་དུ་མ་བཞེངས་པ་ལྟ་བུ་འབུར་སྐུ་དང༌། འོད་ཟེར་མ་དང་ཆུ་ལེན་མར་གྲགས་པ་སོགས་བྲིས་སྐུ་བྱུང་ཚུལ་མང་དུ་ཡོད་ལ། གསུང་རྟེན་ལྷའི་དབང་པོས་གསེར་གྱི་གླེགས་བུ་ལ་བཻ་ཌཱུརྻ་ཞུན་མས་ཤེར་མདོ་བྲིས་པ་དང༌། ཀླུ་རྣམས་ཀྱིས་གསུང་རབ་མཐའ་ཡས་པའི་གླེགས་བམ་བྲིས་ཏེ་ཀླུ་ཡུལ་དུ་སྤྱན་དྲངས་པའི་ལོ་རྒྱུས་མང་ངོ༌། །མཆོད་རྟེན་ནི་དེ་ལས་ཀྱང་སྔོན་དུ་བྱུང་སྟེ་སྐུ་བལྟམས་པ་དང༌། གཙུག་ཕུད་བྲེག་པ་སོགས་ཀྱི་ཚེ་དེ་དག་ཏུ་མཆོད་རྟེན་བརྩིགས་པར་འདུལ་བ་ལུང་ལས་གསུངས། དེར་མ་ཟད་སངས་རྒྱས་ཀྱི་བསྟན་པ་གང་དུ་དར་བ་དེར་སྐུ་གསུང་ཐུགས་ཀྱི་རྟེན་ཡང་ངེས་ཅན་དུ་འབྱུང་སྟེ། སྔོན་སངས་རྒྱས་འཁོར་བ་འཇིག་གི་སྐུ་གདུང་ལ་རྒྱལ་པོ་མཛེས་པས་མཆོད་རྟེན་བཞེངས་པར་ལས་བརྒྱ་པ་ལས་གསུངས་པ་དང༌། སངས་རྒྱས་འོད་སྲུང་གི་དུས་སྐུ་གསུང་
ཐུགས་རྟེན་དུ་མ་རྒྱལ་པོ་ཀྲི་ཀྲི་སོགས་ཀྱིས་བཞེངས་ཤིང་རབ་ཏུ་གནས་པའི་ལོ་རྒྱུས་ཤིན་ཏུ་མང་ངོ༌། །འདིར་སྐབས་སུ་བབས་པ་མཆོད་རྟེན་ནི། ཆོས་ལོངས་སྤྲུལ་གསུམ་གྱི་རྟེན་དུ་ཕྱེ་བས་ཆོས་སྐུའི་རྟེན་དང༌། སྐུ་གསུང་ཐུགས་གསུམ་དུ་ཕྱེ་བས་ཐུགས་རྟེན་ཡིན་ཏེ། ནག་པོ་སྤྱོད་པས། ཆོས་ཀྱི་སྐུ་ཡི་བདག་ཉིད་ཅན། །མཆོག་གི་ཡོན་ཏན་གཟུགས་ཅན་གྱི། །མཆོད་རྟེན་རིན་ཆེན། ཞེས་དང༌། མདོ་རྩའི་ཊཱི་ཀ་ལས། མཆོད་རྟེན་ནི་ཆོས་ཀྱི་སྐུ་ཡིན་པའི་ཕྱིར་རོ། །ཞེས་དང༌། ལུང་ཞུ་བའི་འགྲེལ་པ་ལས། མཆོད་རྟེན་གྱི་གནས་ནི་ཆོས་ཀྱི་སྐུ་སྟེ་དེ་བཞིན་གཤེགས་པའི་ཆོས་ཀྱི་སྐུའི་བདག་ཉིད་དྲན་པ་ཉེ་བར་བཞག་པ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་དང༌། མཁྱེན་པ་དང༌། སྟོབས་དང༌། ཐུགས་རྗེ་ཆེན་པོ་ལ་སོགས་པའི་ཡོན་ཏན་རྣམས་ཀྱི་གཟུགས་བརྙན་ཉིད་དུ་བསླབ་པ་ཡིན་པའི་ཕྱིར་རོ། །ཞེས་ཐུགས་ཟག་པ་མེད་པ་ཡེ་ཤེས་ཆོས་ཀྱི་སྐུའི་མཚོན་བྱེད་དུ་གསལ་བར་གསུངས་སོ། །སངས་རྒྱས་སོགས་ཀྱིས་ཆོས་སྐུའི་རྟེན་ཡིན་པས་སྐུའི་རྟེན་དུ་འཇོག་དགོས་ཚུལ་དང༌། བློས་བསླང་དེ་གསུམ་དུ་ཕྱེ་བའི་ཐུགས་ཀྱི་རྟེན་དུ་བཤད་པ་རྒྱབ་འགལ་ཁོ་ན་སྟེ། རང་དོན་ཆོས་སྐུ་གཞན་དོན་གཟུགས་སྐུར་བྱས་ཤིང༌། གཞན་དོན་གཟུགས་སྐུ་བཞུགས་གནས་དང་བཅས་པ་རང་དོན་ཆོས་སྐུར་བྱས་པའི་ཕྱིར་རོ། །དེས་ན་རྒྱུད་བླ་མ་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དོ། །ཞེས་གསུངས་པ་ལྟར། ཀུན་རྫོབ་པའི་སྐུ་ལོངས་སྤྲུལ་གཉིས་སོགས་གཞན་དོན་ཕུན་ཚོགས་ཉི་མའི་འོད་ཟེར་འཕྲོ་བ་ལ། དེའི་གཞིར་གྱུར་པ་ཉི་མའི་དཀྱིལ་
འཁོར་ལྟ་བུ་ནི་རང་དོན་ཕུན་ཚོགས་དོན་དམ་ཆོས་ཀྱི་སྐུ་ཡིན་པས་དེ་ཉིད་གཙོ་བོར་གྱུར་པ་ལ་དགོངས་ནས་མདོ་རྒྱུད་རྣམས་སུ་རྟེན་བཞེངས་པའི་ཕན་ཡོན་གསུངས་པའི་སྐབས་སུ་ཤས་ཆེར་མཆོད་རྟེན་ལ་སྦྱར་ནས་གསུངས་སོ། །དེ་ལྟ་བུའི་མཆོད་རྟེན་གྱི་དབྱེ་བ་ཡང༌། ཀུན་གཟིགས་ལྔ་པའི་གཟུངས་གཞུག་འཁྲུལ་སྤོང་ལས། རང་བཞིན་ལྷུན་གྲུབ་ཀྱི་མཆོད་རྟེན། བླ་ན་མེད་པའི་མཆོད་རྟེན། བྱིན་གྱིས་བརླབས་པའི་མཆོད་རྟེན། དངོས་གྲུབ་འབྱུང་བའི་མཆོད་རྟེན། ཐེག་པ་སོ་སོའི་མཆོད་རྟེན་དང་ལྔར་གསུངས་པའི་དང་པོ་ནི། དུས་ཀྱི་འཁོར་ལོའི་རྒྱུད་ལས། དེ་ལྟར་ཅེས་པར་འཇིག་རྟེན་ཁམས་ནི་མཐའ་དག་རྒྱལ་བའི་སྐུ་སྟེ་འཁོར་ལོ་མཆོད་རྟེན་རང་བཞིན་ནོ། །ཞེས་དང༌། དྲི་མེད་འོད་ལས། ལྷུན་པོ་དང་འཇིག་རྟེན་གྱི་ཁམས་ནི་མཐའ་དག་རྒྱལ་བའི་སྐུ་སྟེ་མཆོད་རྟེན་གྱི་དངོས་པོ། ཞེས་སོགས་ཀྱིས་སྣོད་བཅུད་གཉིས་ཀར་སྦྱར་བ་ལ་བརྟེན་པ་ཡིན་ཅིང༌། འདི་སྐོར་དགོངས་འདུས་སོགས་སྔ་འགྱུར་ལ་ཤིན་ཏུ་མང་ངོ༌། །གཉིས་པ་ནི། ཐིག་ལེ་དབང་གི་རྒྱུད་ལས། ཤར་དུ་བྱམས་པ་རྡོ་རྗེ་བརྩེགས། །ལྷོ་རུ་སྙིང་རྗེ་རིན་ཆེན་བརྩེགས། །ནུབ་ཏུ་དགའ་བ་པདྨ་བརྩེགས། །བྱང་དུ་བཏང་སྙོམས་རྒྱ་གྲམ་བརྩེགས། །ཞེས་ཚད་མེད་བཞིས་རིགས་བཞི་གྲུབ་ཚུལ་དང་སྦྱར་ནས་བཤད་པ་ལ་བརྟེན་པའོ། །གསུམ་པ་ནི། འཁོར་ལོ་འབྱུང་བའི་རྒྱུད་ལས། བྱིན་རླབས་སྐུ་གདུང་ཆ་བརྒྱད་གླིང་བཞིར་སྣང༌། །ཞེས་སོགས་ཀྱིས་བྱིན་ལྡན་སྙོམས་གཏེར་སོགས་བརྒྱད་གླིང་བཞི་སོ་སོར་བཞུགས་པར་བཤད་པའི་རྗེས་སུ་འབྲང་བར་སྣང་ཡང༌། ལུང་ཕྲན་ཚེགས་ལས། དེའི་ཚེ་འཛམ་བུའི་གླིང་དུ་སྐུ་གདུང་གི་མཆོད་རྟེན་བརྒྱད་
དང༌། བུམ་པའི་མཆོད་རྟེན་དང་དགུ་གསོལ་བའི་མཆོད་རྟེན་དང་བཅུར་གྱུར་ཏོ། །ཞེས་བརྒྱད་ཀ་འཛམ་གླིང་དུ་བཞུགས་པར་གསུངས་ལ། དང་པོ་དེ་ལྟར་ཡིན་ཀྱང་ཕྱིས་སྒྲ་སྒྲོག་པའི་སྐལ་བ་ཀླུས་ཁྱེར་ཏེ་ཆ་བདུན་འཛམ་གླིང་དུ་བཞུགས་པར་ཡང་གསུངས་སོ། །བཞི་པ་ནི། སྔོན་ཧེ་རུ་ཀས་དྲག་པོ་བཏུལ་བའི་ཚེ། ཡུལ་བརྒྱད་ཀྱི་དུར་ཁྲོད་དུ་ཀྱཻ་རྡོར་ལྷ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་བྱུང་བར་བདུད་རྩི་ཆེན་པོ་མཆོག་གི་རྒྱུད་བམ་པོ་སོ་བཞི་པ་ལས་བཤད་པ་ལ་བརྟེན་པ་སྟེ། འདི་ལ་ཀུན་མཁྱེན་འཇམ་དབྱངས་བཞད་པས་འཁྲུལ་སྤོང་གི་སྙིང་པོ་བསྡུས་པར། ཡུལ་བརྒྱད་ཀྱི་དུར་ཁྲོད་དུ་མཆོད་རྟེན་བརྒྱད་ཅེས་གསང་སྔགས་ཀྱི་ཐེག་པ་གཞན་ལ་འབྱུང་ལ། ཡོངས་གྲགས་ལ་སངས་རྒྱས་ཀྱིས་མཛད་པ་ཁྱད་པར་ཅན་རེ་མཛད་པའི་ཚེ་མཆོད་རྟེན་རེ་བཞེངས་པའི་མཆོད་རྟེན་བརྒྱད་ཅེས་གསུངས་སོ། །རྒྱུད་དེར། དུར་ཁྲོད་ཆེན་པོ་བལ་ཡུལ་ཡིན། །མ་མོ་ཆེན་མོ་བུཀ་སི། །མཆོད་རྟེན་ཁ་ཤོ་བྱ་རུང་གནས། །ཞེས་སོགས་ཀྱིས་རྣམ་པ་གཞན་དུ་བཤད་པས་ད་ལྟ་ཡོངས་གྲགས་ཀྱི་ལོ་རྒྱུས་དང་མི་མཐུན་ནོ། །ལྔ་པ་ནི། འདུལ་བའི་སྡེ་སྣོད་དང་མདོ་མྱང་འདས་སོགས་ལས་ཉན་རང་བྱང་སེམས་སངས་རྒྱས་རྣམས་དང༌། འཁོར་ལོས་བསྒྱུར་བ་ཚུན་ཆད་ཀྱི་མཆོད་རྟེན་བྱེད་ཚུལ་ཐ་དད་པར་གསུངས་པ་ལ་བརྟེན་པ་སྟེ། དེ་ཡང་མདོ་རྩ་བ་ལས། མཆོད་རྟེན་ནི་རྣམ་པ་གཉིས་ཏེ། གཙང་ཁང་ཅན་ཉིད་དང༌། ཀ་བ་ལྟ་བུ་ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ། །གལ་ཏེ་དགེ་བ་ཡིན་ནའོ། །སངས་རྒྱས་རྣམས་ཀྱི་ནི་རྣམ་པ་ཐམས་ཅད་དོ། །རྣམ་པ་ནི་བང་རིམ་བཞི་དང༌། འདབ་མ་དང༌། བུམ་པ་དང༌།
པུ་ཤུ་དང༌། སྲོག་ཤིང་དང༌། གདུགས་བཅུ་གསུམ་དང་ཆར་ཁེབས་དག་གོ །རང་སངས་རྒྱས་རྣམས་ཀྱི་ནི་ཆར་ཁེབས་མེད་པའོ། །ཉན་ཐོས་རྣམས་ཀྱི་འབྲས་བུའི་ཚད་ཀྱིས་དེའི་གདུགས་གཅིག་ལྷག་པའོ། །སོ་སོ་སྐྱེ་བོ་རྣམས་ཀྱི་ནི་བྱི་བོའོ། །ཞེས་ཐེག་པ་གསུམ་གྱི་གང་ཟག་ལ་མཆོད་རྟེན་བྱ་ཚུལ་སོ་སོར་གསུངས་པས། ཉན་ཐོས་ཀྱི་མཆོད་རྟེན་ནི་སྟག་ལོས་ཆོས་གོས་བཞི་བལྟབ་བྱས་པའི་སྟེང་དུ་ལྷུང་བཟེད་ཁ་སྦུབས་པ་ལ་འཁར་གསིལ་བཙུག་པ་ལྟ་བུ་ཞེས་ཟེར་ཡང༌། ཉན་ཐོས་སོ་སྐྱེས་བྱི་བོ་དང༌། རྒྱུན་ཞུགས་ལ་ཆོས་འཁོར་རམ་འདུལ་བའི་བརྡ་ཆད་ལྟར་གདུགས་གཉིས་ལས་མི་འབྱུང་བས་འཁར་གསིལ་བཙུག་པའི་འདྲ་ཆོས་སྦྱར་དུ་མེད་དོ། །འབྲས་བུ་བཞི་ལ་གདུགས་གཉིས་གསུམ་བཞི་ལྔ་བྱེད་པར་ཉིད་ཀྱི་རྣམ་བཤད་དང་རྒྱ་ཆེར་འགྲེལ་དུ་དྲངས་པའི་ལུང་ལས་གསུངས་ལ། ཕྲན་ཚེགས་དང་མ་མོར་དགྲ་བཅོམ་ལ་གདུགས་བཞི་བྱ་བ་སོགས་སུ་གསུངས་པ་ཁུངས་མི་འདྲ་བས། མདོ་རྩའི་དགོངས་པ་སྔ་མ་གཙོ་བོར་བྱས་པའོ། །བསེ་རུ་ལྟ་བུའི་དགྲ་བཅོམ་ལ་ཆར་ཁེབས་མེད་ཅིང༌། སངས་རྒྱས་ཀྱི་དེ་ལ་ཐམས་ཅད་ཚང་བར་ཡོད་དོ། །སློབ་དཔོན་ཀླུ་སྒྲུབ་ཀྱིས་ལྷུང་བཟེད་ཁ་སྦུབས་པ་ལྟ་བུའི་མཆོད་རྟེན། ཁང་བུ་བརྩེགས་པའི་མཆོད་རྟེན། རྒྱལ་མཚན་བསྒྲེང་བ་ལྟ་བུའི་མཆོད་རྟེན་གསུམ་གསུངས་པ་སྟག་ལོས་ཐེག་ཆེན་ཁོ་ན་ལ་སྦྱར་ཡང༌། མདོ་རྩའི་གཙང་ཁང་ཅན་དང་འདིའི་ཁང་བུ་བརྩེགས་པ་འདྲ་ཞིང་ཤཱ་རིའི་བུ་ལ་དེ་ལྟ་བུ་བྱས་པར་གླེང་གཞིའི་སྐབས་སུ་འབྱུང་བས་དེ་གསུམ་མཆོད་རྟེན་སྤྱིའི་དབྱེ་བར་བྱས་ན་ལེགས་ཏེ། ད་ལྟ་
རྒྱ་གར་ནས་བྱུང་བ་ཁང་པ་རིམ་པ་མང་པོ་བརྩེགས་པའི་རྣམ་པ་ཟུར་བཞིའམ་བརྒྱད་འདུག་པར་ཡོངས་གྲགས་གནྡོ་ལའི་བཀོད་པ་ཞེས་ཟེར་བ་དང༌། དེ་མཐུན་རྒྱ་ནག་ཕྱོགས་སུ་མཆོད་རྟེན་ཞེས་ཟེར་ཡང༌། བོད་ལ་གྲགས་ཚོད་འདི་དང་ཕྱོགས་ཙམ་ཡང་མི་མཐུན་པའི་ཁང་པ་ཐོག་མང་དུ་བརྩེགས་པ་ཞིག་ཡོད་པ་འདི་རྣམས་ཀྱང་དེ་གསུམ་གྱི་གྲངས་ཡིན་པར་སྐྱབས་མགོན་རྡོ་རྗེ་འཆང་ཆེན་པོས་གསུངས་སོ། །མདོ་མྱང་འདས་ལས་སངས་རྒྱས་ལ་བང་རིམ་བཅུ་གསུམ་འཕང་ལོ་དང་བཅས་པ། རང་སངས་རྒྱས་ལ་བང་རིམ་བཅུ་གཉིས་སོགས་སུ་གསུངས་ལ། ཀྲི་ཡ་ས་མུཉྩར། བཅུ་གསུམ་ནི་རྫོགས་པའི་སངས་རྒྱས་དང་རྡོ་རྗེ་འཛིན་པ་རྣམས་ཀྱིའོ། །དགུ་དང་བདུན་ནི་ཉན་ཐོས་དང་རང་སངས་རྒྱས་ཀྱིའོ། །ཞེས་སྔ་མ་རྣམས་དང་མི་འདྲ་བར་བཤད་དོ། །དེ་དག་ལས་སངས་རྒྱས་ཀྱི་མཆོད་རྟེན་ལ་ནང་གསེས་ཀྱི་དབྱེ་བ་མང་ཡང་གཙོ་བོ་མཆོད་རྟེན་བརྒྱད་དུ་འདུ་ལ། དེའི་ཐོག་མ་སྐུ་བལྟམས་པའི་ཚེ་གཏེར་ལྔ་བརྒྱ་སོགས་བཀྲ་ཤིས་པའི་སྒོ་མང་དུ་ཕྱེ་བས་བཀྲ་ཤིས་སྒོ་མང་ནས་འདྲེན་པར་བཞེད་པ་མང་ཡང༌། རང་ལུགས་བལྟམས་མ་ཐག་ཕྱོགས་སོ་སོར་གོམ་པ་བདུན་བདུན་བོར་བ་ལས་པདྨ་སྐྱེས་པ་དང༌། པདྨ་འདམ་ལས་སྐྱེས་ཀྱང་འདམ་གྱིས་མ་གོས་པས་འཁོར་བར་སྐྱེས་ཀྱང་སྐྱོན་གྱིས་མ་གོས་པའི་མཚོན་བྱེད་པདྨ་སྤུངས་པ་དང་པོ་དང༌། གཉིས་པ་སྐུ་བཞི་མངོན་པར་བྱང་ཆུབ་པའི་མཆོད་རྟེན། གསུམ་པ་ཆོས་འཁོར་བསྐོར་བའི་ཚེ་བདེན་བཞི་རྣམ་ཐར་བརྒྱད་སོགས་མཚོན་བྱེད་སྒོ་བཅུ་དྲུག་ནས་བརྒྱ་རྩ་བརྒྱད་སོགས་ཡོད་པ་བཀྲ་ཤིས་སྒོ་མང༌། བཞི་པ་མུ་སྟེགས་སྟོན་པ་དྲུག་སོགས་བཏུལ་ཏེ་གཞན་ལས་ཁྱད་པར་དུ་འཕགས་
པས་གློ་འབུར་ཅན་གྱི་ཆོ་འཕྲུལ་མཆོད་རྟེན། ལྔ་པ་གཞན་དོན་དུ་འབྱོན་པ་མཚོན་བྱེད་ཐེམ་སྐས་ཅན་གྱི་ལྷ་བབས་མཆོད་རྟེན། དྲུག་པ་དགེ་འདུན་གྱི་དབྱེན་བཟླུམས་པའི་ཚེ་དེའི་རྒྱུ་དུག་གསུམ་ལྟ་བ་དང་བཞི་བཅད་དེ་རྣམ་ཐར་བརྒྱད་ལ་གནས་པ་མཚོན་བྱེད་བང་རིམ་གྱི་གྲུ་བཞི་བཅད་དེ་ཟུར་བརྒྱད་དུ་ཡོད་པར་དབྱེན་བཟླུམས་མཆོད་རྟེན། བདུན་པ་སྐུ་ཚེ་ཟླ་བ་གསུམ་དུ་བྱིན་གྱིས་བརླབས་པའི་ཚེ་བང་རིམ་ཟླུམ་པོ་གསུམ་པ་འཆི་བདག་ལས་རྣམ་པར་རྒྱལ་བའི་མཆོད་རྟེན། བརྒྱད་པ་འཁོར་བའི་སྤྲོས་པ་དང་བྲལ་བ་མཚོན་བྱེད་བང་རིམ་མེད་པའི་མྱང་འདས་མཆོད་རྟེན་རྣམས་སོ། །དབྱེ་བ་འདི་རྣམས་དགེ་བའི་རྩ་བ་ཡོངས་སུ་འཛིན་པའི་མདོ་འོག་ཏུ་འབྱུང་བ་དང༌། ལི་ཡུལ་ལུང་བསྟན་པ། ཀླུ་སྒྲུབ་ཀྱིས་མཆོད་རྟེན་བརྒྱད་ལ་བསྟོད་པ། དྲི་མེད་འགྲེལ་པ་རྣམས་སུ་འབྱུང་ལ། འོན་ཀྱང་དྲི་མེད་འགྲེལ་པར་སྐུ་གདུང་ཆ་བརྒྱད་དུ་བགོས་པའི་མཆོད་རྟེན་བརྒྱད་ཟས་གཙང་དང་གསལ་རྒྱལ་སོགས་ཀྱིས་སྦྱིན་བདག་བྱས་ནས་བཞེངས་པར་བཤད་པ་ཁས་བླངས་མི་རུང་སྟེ། དུས་ཚོད་མི་འགྲིག་པས་དེ་ནི་སྤྱིར་བཏང་གི་ཤཱཀ་ཐུབ་མཆོད་རྟེན་བརྒྱད་དང༌། སྐུ་གདུང་གི་མཆོད་རྟེན་བརྒྱད་འདྲེས་པའི་ཡིག་སྐྱོན་ཞིག་བྱུང་བར་མངོན། དེ་ལྟར་སངས་རྒྱས་ཞལ་བཞུགས་དུས་མཛད་པ་ཁྱད་པར་ཅན་རེ་བསྟན་པའི་སར་དད་ལྡན་རྣམས་ཀྱིས་དེ་རྗེས་སུ་དྲན་པའི་མཚོན་བྱེད་མཆོད་རྟེན་རེ་བཞེངས་ཏེ་དུས་སྟོན་བཙུགས། མྱ་ངན་ལས་འདས་པའི་རྗེས་སུ་ཡང་སོ་སོའི་གདུང་སྐལ་ལ་མཆོད་རྟེན་དཔག་ཏུ་མེད་པ་བཞེངས་ཏེ་བསོད་ནམས་ཟད་མི་ཤེས་པའི་གཏེར་གྱི་སྒོ་བརྒྱ་ཕྱེ། དེ་རྗེས་རྒྱལ་བ་ཉིད་ཀྱིས་ལུང་
བསྟན་པ་བཞིན་ཆོས་རྒྱལ་མྱ་ངན་མེད་ཀྱིས་མཆོད་རྟེན་བྱེ་བ་བཞེངས་ཏེ་ས་སྟེང་མཛེས་པར་བྱས། མགོན་པོ་ཀླུ་སྒྲུབ་ཀྱིས་ཀྱང་རྡོ་རྗེ་གདན་དུ་མཆོད་རྟེན་དུ་མ་བཞེངས་པ་སོགས་རྒྱ་གར་ན་དར་ཤོས་ཤིན་ཏུ་ཆེ་ལ། བོད་གངས་ཅན་འདིར་ཡང་ཆོས་རྒྱལ་གྱི་དུས་བསམ་ཡས་དང་ལྷ་སར་མཆོད་རྟེན་འགའ་ཞིག་བཞེངས། ཕྱིས་སུ་ཆོས་རྒྱལ་ཀུན་བཟང་པས་རྒྱལ་རྩེར་མཆོད་རྟེན་ཆེན་མོ་དང༌། ཇོ་ནང་པས་རྟག་བརྟན་དུ་སྐུ་འབུམ་ཆེན་མོ། ཐོན་མིའི་གདུང་རབས་བཅུ་གསུམ་པ་རྒྱལ་ཆེན་གླིང་པའི་ཞལ་ངོ་ཡར་རྒྱབ་དཔོན་པོ་བསོད་ནམས་རྣམ་རྒྱལ་དང་ལྷ་རྗེ་བསོད་ནམས་རྒྱ་མཚོ་གཉིས་ཀྱིས་བྱམས་པ་གླིང་དུ་མཆོད་རྟེན་ཁྱད་དུ་འཕགས་པ་བཞེངས་པ་རྣམས་ཡུལ་དུས་གཉིས་ཀ་བཟང་ཞིང་ཁོང་རྣམས་སྡེ་འབངས་དང་ཆོས་སྲིད་ཀྱི་འབྱོར་བ་ཤིན་ཏུ་ཆེ་བས་དེའི་ལག་རྗེས་ལྟ་བུ་ག་ལ་ཡོང་། འོན་ཀྱང་རང་འབྱོར་དང་བསྟུན་པའི་རྟེན་བཞེངས་བྱས་ཚུལ་གྱི་ལོ་རྒྱུས་ཅུང་ཟད་བརྗོད་ན། བདག་རང་ལོ་བདུན་པའི་སྟེང་དུ་གདན་ས་འདིར་འོངས། སྐྱབས་མགོན་ཐམས་ཅད་གཟིགས་པ་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོའི་ཞབས་དྲུང་ནས་བསྟན་པའི་སྒོར་བཙུད་ཅིང་དེ་ནས་བཟུང་སྟེ་ཆོས་ཀྱི་བཀའ་དྲིན་བསམ་གྱིས་མི་ཁྱབ་པར་མནོས། དེ་སྐབས་སྐྱབས་མགོན་མཆོག་ནས་རྗེས་ཚང་སྨྱུང་གནས་པར་དགོན་འདི་ནང་དུ་མཆོད་རྟེན་ཆེན་པོ་ཞིག་བྱུང་ན་ལེགས་འདུག་པས་ཁྱོད་ཀྱིས་ཨེ་ཐུབ་ཅེས་གསུང་ཚུལ་ཁོང་གི་ངག་ནས་ཡང་ཡང་ཐོས་པས། བླ་མའི་བཀའ་དྲིན་བསབ་བྱེད་འདི་འདྲ་རེ་བྱེད་རྒྱུ་བྱུང་ན་སྙམ་པའི་འདུན་པ་ཡང་ཡང་སྐྱེས། རང་ལོ་བཅུ་བདུན་པ་ལ་དབུས་སུ་སོང་སྟེ།
སྒོ་མང་ཆོས་གྲྭ་ལོ་བརྒྱད་འགྲིམ་པའི་རིང་སློབ་གཉེར་ཁོ་ནའི་འདུན་པར་གཅིག་དྲིལ་གྱིས་གཞན་མའི་བྱ་བྱེད་ཐམས་ཅད་རྒྱང་བསྐྱུར་བྱས་ཏེ་ལོ་ཉེར་ལྔའི་ཐོག་སྤྲུལ་བའི་དམ་བཅའ་མ་ཡིན་པར་གྲྭ་སྐོར་ཚུལ་བཞིན་བགྱིས། དེའི་ཚེ་རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོས་བོང་བ་གསེར་གཟིགས་ཀྱི་ཚུལ་དུ་སྙན་བརྒྱུད་མན་ངག་གང་དགོས་སྩོལ་བའི་ཞལ་བཞེས་སོགས་བཀའ་དྲིན་ཤིན་ཏུ་ཆེ་བར་ཡོད་པ་ལོ་ཤས་སྡོད་འདུན་ཡོད་ཀྱང༌། སྐྱབས་མགོན་རྡོ་རྗེ་འཆང་དབུས་ཕེབས་ཕྱི་མའི་སྐབས་ཡིན་པས་དགོངས་པ་མ་ཁྲོལ་བར་རང་ཡུལ་ལྡོག་དགོས་བྱུང༌། ཐོས་དོན་ཉམས་ལེན་ཞིག་ཨེ་ཡོང་གི་རེ་བས་ལོ་ཤས་འབད་ཁུལ་བྱས་ཀྱང་དགེ་སྦྱོར་རེའི་མགོ་བརྩམས་པ་ན་འདུ་ཕུང་མི་བདེ་བ་ཁོ་ན་གཅིག་རྗེས་གཅིག་ནོན་ལྟ་བུར་བྱུང་སྟེ་དེ་ཀའི་བསམ་སྦྱོར་ཐམས་ཅད་ཐན་པའི་དུས་ཀྱི་སྤྲིན་བཞིན་དངོས་མེད་དུ་གྱུར། རང་ལོ་ཉེར་དགུ་པ་ལ་སྐྱབས་མགོན་མཆོག་ནས་མཁན་ཆེན་ངག་དབང་གྲགས་པའི་གདན་ས་ད་ཚང་དགོན་པའི་འཛིན་སྐྱོང་བྱེད་དགོས་ཀྱི་བཀའ་ནན་ཕེབས་ཏེ་དེར་ཕྱིན། ད་གཟོད་དགེ་སྦྱོར་རྣམ་དག་ཅིག་མི་འོང་བར་འགྲོ་འདུག་སོགས་བྱེད་དགོས་པ་ལ་གཞན་དོན་དུ་མིང་བཏགས་ནས་དཀོར་ཟས་སྡུག་བསོག་བྱས་ཀྱང་མཐར་ཆུད་ཟོས་ལས་མེད་པས་རང་གཞན་གཉིས་ཀ་བསླུ་བར་འདུག །དེས་ན་དཀོན་མཆོག་གི་ཞིང་སར་འགྲོ་ངེས་དང་ལྷག་པར་སྔོན་དུས་ཀྱི་ཀུན་སློང་བཞིན་རྟེན་བཞེངས་ཤིག་ཨེ་ཐུབ་སྙམ་པ་ཤར། འོན་ཀྱང་རང་ལོ་སུམ་ཅུར་སླེབ་པ་ལྕགས་ཕག་ལོའི་དགུན་ཐོག་སྐྱབས་མགོན་རྡོ་རྗེ་འཆང་དག་པའི་ཞིང་དུ་དགོངས་པ་གཏད་པར་
བརྟེན་བྱི་བའི་ལོ་ནས་བཟུང་དགོན་པའི་ཆོས་སྲིད་ཐམས་ཅད་ཀྱི་ཁུར་རང་དབང་མེད་པར་ཐོག་ཏུ་ལྷུང་བས། འཆད་ཉན་སྒྲིག་ལམ་གཏོང་སྒོ་སོགས་ཀྱི་སེམས་ཁུར་ལ་བརྟེན་ནས་རྟེན་བཞེངས་སོགས་ཡིད་ཀྱིས་བོར། ལྷག་པར་རང་ལོ་སོ་ལྔ་ནས་རྐྱེན་འགའ་ཞིག་ལ་བརྟེན་དགོན་ལུང་བྱམས་པ་གླིང་གི་ཁྲི་ཡང་འཛིན་དགོས་བྱུང་སྟེ་ལོ་གསུམ་གྱི་རིང་གདན་ས་གཉིས་ཀ་ཟུང་འབྲེལ་དུ་བསྐྱངས། སོ་བདུན་པ་ལ་སྐྱབས་མགོན་མཆོག་གི་སྤྲུལ་བའི་སྐུ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱ་མཚོ་གདན་སར་བཀོད། ཕྱོགས་མཐའ་ཆོད་པ་དཀའ་ཡང་དགོན་པའི་ནང་འདིའི་གྲྭ་འཚོགས་འཆད་ཉན་སྒྲིག་ལམ་སོགས་ཟུར་ཅུང་ཟད་ཀྱང་མ་ཉམས་པར་ཕྱག་ཏུ་སྤྲོད་རྒྱུ་བྱུང་བའི་དགའ་སྤྲོའི་ཐོག་ནས་ཁྲིའི་དགོངས་པ་ཞུས། ཁྲིའི་སྐབས་དེར་ཡང་རིགས་གྲྭ་སྔ་ཕྱི་ཀུན་ལ་སྲང་ཁྲིར་ཉེ་བའི་ཚོད་སོང་ཡང་དེའི་ཞར་ལ་འཆམ་ཆེན་སྐབས་བཀྲམ་རྒྱུའི་ཆོས་རྒྱལ་གྱི་གོས་ཐང་ཆེན་མོ། བླ་མ་ཁྲི་པས་བསྟེན་རྒྱུར་གནས་ཆུང་གི་གསེར་སྐུ། བྱམས་མདུན་དུ་དངུལ་གྱི་མཎྜལ་ཚོམ་བུ་བདུན་མ་དངུལ་སྲང་ལྔ་བརྒྱ་ལས་གྲུབ་པ་རང་མིང་སྤེལ་བའི་སྨོན་ཚིག་འབུར་དོད་ཅན། སྲང་ཉིས་བརྒྱ་སྐོར་གྱི་ཀ་འཕན་གསེར་མགོ་མ་བཞི། ཀ་བར་དགུ་ཁེབས་པའི་གོས་ཀྱི་བླ་བྲེ་རྣམས་དང༌། སྔ་སོར་དབུས་ནས་འོངས་སྐབས་གསེར་གྱི་རྒྱལ་མཚན་ཆ་སོགས་གང་དགོས་ཀྱི་འཇོག་པ་ཕྲན་ཚེགས་ལན་མང་ཙམ་བྱས་རུང༌། ད་དུང་ཡིད་ཚིམ་པ་ཞིག་མ་བྱུང་བར་ད་ནི་བདག་ཅག་རྣམས་ཀྱི་མེ་ཏོག་ཕོག་པའི་ལྷ་སྐལ་ལྟ་བུ་སྐྱབས་མགོན་རྡོ་རྗེ་འཆང་སྐུ་འཕྲེང་རིམ་བྱོན་ཡིན་པས་འཁྲུངས་རབས་ལྷ་ཁང་ཞིག་བྱས་ན་སྙམ་ཡང༌། འདི་ནས་
བཟོ་བོ་སོགས་མི་འགྲིག་སྟབས་བསྟན་པའི་སྦྱིན་བདག་ཆེན་པོ་ཐོ་ཡོན་རབ་རྒྱས་ལ་སྐུ་བརྙན་བཞེངས་རྒྱུའི་སྦྱིན་བདག་བསྐུལ། འདི་ནས་དགེ་རྩ་མཐའ་དག་ཆུད་མི་ཟ་བའི་ཕྱིར་སྨོན་ལམ་གྱི་དུས་མཆོད་གཏོང་རྒྱུའི་གྲ་བསྒྲིགས་ཏེ། རང་ལོ་བཞི་བཅུ་པ་ལྕགས་བྱའི་ལོ་སྲང་བདུན་སྟོང་བརྒལ་བའི་ཟོང་གིས་ཆོ་འཕྲུལ་དུས་མཆོད་ཉིན་ལྟར་གྱི་ཕོགས་སོགས་ལྷ་མཆོད་མི་མཆོད་རྒྱ་ཆེར་བྱས། དེའི་སྟེང་དུ་སྲང་ཉིས་སྟོང་ལྷག་ལས་བསྒྲུབས་པའི་འཁྲུངས་རབས་ཀྱི་སྐུ་ཡང་ཆ་ཚང་བར་འབྱོར་བ་ལ་གཟུངས་གཞུག །མཆོད་ཁྲི། ཀ་འཕན། བླ་བྲེ། མཆོད་ཏིང་སོགས་གང་དགོས་ཐམས་ཅད་གསར་དུ་བསྒྲིགས་ཏེ་འཁྲུངས་རབས་ལྷ་ཁང་བྱས། དང་པོར་རྟེན་བཞག་དེ་ཀས་འཐུས་པ་དང༌། རྒྱུ་ནོར་གང་ཡོད་སྨོན་ལམ་གྱི་ཁོངས་སུ་འགྲོ་བ་བྱེད་རྩིས་ཡིན་ཀྱང༌། དཀོན་མཆོག་གི་ཐུགས་རྗེས་མཐུན་རྐྱེན་འཛོམས་ཆེ་བ་ལྟ་བུས་ད་དུང་དད་རྫས་ཀྱི་དངོས་པོ་ལྷག་ལུས་དགའ་རབ་འདུག་པ་དང༌། མཚམས་དེར་གཡེང་བའི་འཕྲོ་བཙན་ཆོད་བྱེད་རྒྱུ་ཡང་རྐྱེན་དུ་མ་ཞིག་གིས་གྲ་མི་འགྲིག་པར་འདུག་ལ། ཆུང་ངུའི་དུས་ནས་རང་གིས་ཡང་ཡང་ཡིད་ལ་བླངས་པའི་དམ་བཅའ་ལྟ་བུ་ཡིན་སྟབས། མཆོད་རྟེན་མཐོང་གྲོལ་ཆེན་མོ་འདི་ཉིད་བཞེངས་པའི་སྦྱོར་བ་བརྩམས། ཆོས་འཁོར་དང་སྒོ་ཁྱིམ་སོགས་བཞེངས་རྒྱུར་འདི་ནས་སྲང་སྟོང་ཕྲག་ལྷག་ཙམ་དང༌། སྦྱིན་བདག་སྐུལ་བྱེད་སྣམ་ཕྲུག་བྱིན་རྟེན་སོགས་ཕོན་མི་ཆུང་བ་བཅས་མི་སྣ་མཚོ་བདུན་དུ་མངགས། རང་ལོ་ཞེ་གཅིག་ལ་སླེབ་པ་རྔ་ཆེན་ཞེས་པ་ཆུ་ཕོ་ཁྱིའི་ལོ་ས་ག་ཟླ་བའི་ཡར་ཚེས་བཟང་པོར་ལས་མགོ་བཙུགས་ཏེ་ལོ་
གསུམ་གྱི་རིང་ཟླ་བ་བདུན་རེ་ཙམ་ལ་ལས་མི་ཉུང་སྐབས་དགུ་བཅུ་སྐོར་དང༌། མང་སྐབས་བརྒྱ་དང་བཞི་བཅུ་སྐོར་གྱིས་བར་མ་ཆད་པར་བྱས་པ་ཐམས་ཅད་ཀྱིས་གཡོ་ཟོལ་མེད་པར་ཧུར་སྐྱེད་འབད་པ་དང་བླང་གིས་ལས་འགྲོ་ཆེ་ཞིང༌། དེའི་རིང་མི་གཅིག་ལ་ཡང་ན་ཚ་སོགས་ཀྱིས་ལས་ཀ་འཆག་དགོས་པ་ཞིག་མ་བྱུང་བ་དཀོན་མཆོག་གི་ཐུགས་རྗེར་སྣང༌། དངུལ་འདི་ནས་ཁྱེར་བའི་སྟེང་དུ་སུ་ཉིད་ཀྱི་གྲྭ་རྒྱུན་བགྲེས་གཞོན་ཐམས་ཅད་ནས་ལྷག་བསམ་དག་པས་ཞལ་འདེབས་གང་ལེགས་བྱས་པས་གཞི་གཟུང་། ནེས་མན། ཨུ་ཅུ་མུ་ཆིན། ཨ་བ་ག །ཧ་ལ་ཧ་སོགས་ནས་ཀྱང་གྲོགས་ལྡན་བྱེད་མཁན་ཁ་ཤས་བྱུང་བ་བཅས་ཀྱི་སྟེང་ནས་ཆོས་འཁོར་ཟ་ར་ཚགས་ཉི་ཟླ་ཏོག་བཅས་ཀྱི་དཔངས་གཞུ་འདོམ་ལྔ་ལྷག་པ་དང༌། སྒོ་ཁྱིམ་ཐོག་ཚད་ལྷག་པ། སྐུ་བརྙན་མི་ཚད་ལོང་མ་ལོང་དང་། དབུ་རྒྱན་ཆེ་ཆུང་ཁ་ཤས་གཉྫིར་དང་། མཐའ་འཁོར་དུ་འཇུག་རྒྱུའི་རྣམ་བཅུ་དབང་ལྡན་ཆ་དུ་མ། འཁོར་ལོ་དང་རི་དྭགས་ཕོ་མོ་སོགས་ཕལ་ཆེར་ཆ་ཚང་བར་གྲུབ་སྟེ། ལམ་སྐབས་སོགས་སུ་འགལ་རྐྱེན་གྱི་རིགས་ཅུང་ཟད་ཀྱང་མེད་པར་ནམ་དགོས་པའི་དུས་ཐོག་ཏུ་འབྱོར། རྒྱ་བོད་ཀྱི་ཡུལ་ཐ་དད་ནས་བཟོས་ཀྱང་སླར་བསྒྲིགས་པའི་ཚེ་མི་གཅིག་གིས་ཐིག་བཏབ་པ་བཞིན་ཆད་ལྷག་དང་ཆེ་ཆུང་འཛོལ་སྐྱོན་མེད་པར་འགྲིགས་པ་སྐྱབས་མགོན་ཐུགས་རྗེ་ཅན་གྱི་བྱིན་བརླབ་ཏུ་ངེས་པ་རྙེད། དེ་ལྟར་རྒྱ་ནག་ནས་གདན་དྲངས་པ་རྣམས་ཀྱི་རྒྱུ་སོང་དང༌། འདི་ནས་བཟོ་བོའི་ཡོན་གྱི་ནང་དུ་སོང་བ། གསེར་ཚོན་དང་འཁོར་ཤོག་སོགས་ཀྱི་རིན། དངུལ་གྱི་མཆོད་ཆ་གསར་བཟོས་སོགས་ཀུན་བསྡོམས་པར་དངུལ་རྐྱང་སྲང་སྟོང་ཕྲག་གསུམ་
དང་ཉིས་བརྒྱ་སྐོར། གཞན་མ་ལྷ་བྲིས་པ། འབག་བཟོ། གསེར་མགར། ལྕགས་མགར་ལྕགས་སྐུད་སླ་མཁན། གོས་བཟོ་བ། རྡོ་རྩིག་པ། གྱང་རྡུང༌། རྡོ་འཁུར། གྱོ་བཟོ། གྲས་རྡོ་བཟོ་མི། ཤིང་བཟོ་སོགས་ཀྱི་དཔོན་གཡོག་ཐམས་ཅད་ལ་རྒྱུན་གྱི་ལྟོ་ཆས། གླ་ཕོགས་གང་གཟབ། འཛུག་སྒང་གྲོལ་གསུམ་གྱི་སྟོན་མོ། གོ་བབས་དང་བསྟུན་པའི་སྟེར་སྦྱིན་སོགས་གང་ཐད་ནས་ཁྲལ་ཆོས་ལྟ་བུ་མ་ཡིན་པར། རྒྱུ་སོང་གི་འབྲས་བུ་ལ་བསམ་སྟེ་ཡིད་ཚིམ་ངེས་བྱས་པས། ལོ་སྔ་ཕྱིར་རྟ་ནོར་གོས་ཕྲུག །ཟམ་རས། ཁ་བཏགས། གྱོན་པ། དོང་ཙེ། ཇ་མར་ནས་རྩམ་ཕྱེ་འབྲས་སོགས་གང་སོང་ཐོ་རགས་རིམ་ཙམ་འདུག་པ་དང༌། སྟེང་འོག་གི་ལྷ་ཁང་ཀུན་ཏུ་མཆོད་ཆ་ཡོངས་རྫོགས་གསར་བསྒྲིགས། ཀ་བར་བཞི་བཅུ་སྐོར་ཕལ་ཆེར་ཁེབས་པའི་གོས་ཀྱི་བླ་བྲེ་ནང་ཤ་དང་བཅས་པ། འཁོར་ལོ་དང་གཟུངས་གཞུག་གི་སྐོར། རྒྱ་ནག་ཏུ་འགྲོ་ཆས་དང་སྦྱིན་བདག་ཀུན་ལ་མཚམས་རྟེན། མེ་མདའ་སུམ་ཅུ་སྐོར་སོགས་ལྕགས་ཁལ་བརྒྱ་ལྷག། །གོ་སའི་ཁང་པ་ཁ་ཤས་དང་ཤིང་ཆ་སོགས་ཀྱི་རིན། འཕྲལ་གྱི་ཆ་རྐྱེན་གང་དགོས་རྣམས་སུ་སོང་བ་ལམ་ཙམ་བསྡོམས་པར། རིན་གོང་དངུལ་སྲང་སྟོང་ཕྲག་ལྔ་དང་བདུན་ཅུའི་སྐོར་ཐོབ། ཤིང་བྱི་ཟླ་བ་དགུ་པའི་ནང་དུ་ལས་མཇུག་གྲུབ་སྟེ། ལྷ་བབས་ཀྱི་དུས་ཆེན་ལ་རང་ཉིད་དང་རྡོ་རྗེ་སློབ་དཔོན་འགའ་བཅས་ཀྱིས་རབ་གནས་མདོར་བསྡུས་ཙམ་བྱས། ཤིང་གླང་ཟླ་བ་དང་པོ་ཆོ་འཕྲུལ་གྱི་དུས་ཆེན་དང་བསྟུན་ཏེ། སྐྱབས་མགོན་ཐམས་ཅད་གཟིགས་པ་ཆེན་པོའི་
མཆོག་སྤྲུལ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱ་མཚོའི་ཞལ་སྔ་ནས་ཀྱིས་དབུ་མཛད། ཁྲི་ཆེན་དཔལ་ལྡན་གྲགས་པའི་སྤྲུལ་བའི་སྐུ། སྡེ་ཁྲི་སྤྲུལ་བའི་སྐུ། སྒོ་མང་མཁན་ཟུར་བློ་བཟང་ཆོས་དར། སྒོ་མང་མཁན་པོ་སངས་རྒྱས་རྡོ་རྗེའི་སྤྲུལ་སྐུ་སོགས་ཆོག་གྲྭ་པ་དང་བཅས་པས་ཉིན་གཉིས་ཀྱི་རིང་བཀྲ་ཤིས་སྙེ་མའི་སྟེང་ནས་སྤྱན་དབྱེའི་ཆོ་ག་རྒྱས་པར་མཛད་དེ་བྱིན་རླབས་ཀྱི་གཏེར་ཆེན་པོར་བསྒྲུབས། ༸གོང་ས་རིན་པོ་ཆེར་དངོས་འབུལ་སྤུས་གཙང་དང༌། བླ་མ་རྣམས་ལ་ཚན་གྲངས། གཞན་ཐམས་ཅད་ལ་འགྱེད་སོགས་འཚེམ་མེད་དུ་བྱས། ཚོགས་པ་སུམ་སྟོང་དུ་ཉེ་བར་ཇ་བར་ཁག་རེ་དང་བསོད་བཏགས་རེ་ཕུལ་ཞིང་བསྟན་འབར་མ་སོགས་གསུངས་ནས་མེ་ཏོག་གི་ཆར་ཕབ། རབ་གནས་སྐོར་གྱི་འགྲོ་སྒོ་བསྡོམས་པར་སྲང་སྟོང་དང་བརྒྱད་བརྒྱ་ཉི་ཤུའི་རྩིས་སོང་བ་བཅས། སྔ་ཕྱི་ཐམས་ཅད་ཁྱོན་དྲིལ་ན་དངུལ་སྲང་ཁྲི་ཕྲག་གཅིག་དང་དགུ་བཅུའི་སྐོར་སོང༌། སྤྱིར་ཁམས་སོག་གི་མིས་རང་བཞིན་གྱིས་རྩིས་ཞིབ་ཆ་མི་འོང་འདུག་པས། གསེར་ཁང་ཆེན་མོའི་བྱམས་ཆེན་ཐོག་ཚད་བཞི་པ་གཙུག་ལག་ཁང་འགྲན་ཟླ་མེད་པ་དང་བཅས་པ། བཟོ་བོ་ཡང་དབུས་ནས་བླངས་པས་གླ་ཕོགས་ཐམས་ཅད་གང་འདོད་ལྟ་བུར་བྱས་སྟབས་འགྲོ་སྒོ་བསམ་གྱིས་མི་ཁྱབ་ཀྱང༌། ཐོ་ནང་དུ་སུམ་ཁྲི་ལྔ་སྟོང་གི་ཚོད་ལས་མ་ཐེབས་འདུག་ཅིང༌། ལྷ་སའི་དཀྱིལ་འཁོར་རྟིང་གི་བྱམས་སྐུ་ཐོག་ཚད་གཉིས་པ་དེར་གཙང་ཁང་སོགས་ཟུར་དུ་བཟོ་མི་དགོས་པའི་སྐུ་རྐྱང་ལ་ཡང་སུམ་ཁྲི་སུམ་སྟོང་ཙམ་སོང་ཚུལ་དཀར་ཆག་ཏུ་འདུག་པ་ལྟར་ན་བོད་པའི་ཞིབ་རྩིས་དེ་འདྲ་བྱས་ཚེ་གསེར་ཁང་ལྟ་བུར་སྲང་འབུམ་ཕྲག་བརྒལ་བ་འགྲོ་ཞིང༌།
རྟེན་བཞེངས་འདི་ལ་ཡང་དེ་ཆ་ལྔར་བྱས་པའི་གཅིག་ཙམ་མ་མཐའ་འགྲོ་བའི་ཚོད་དུ་སྣང་མོད་ཀྱང༌། མཐོ་འཛིན་བྱས་པ་དགོས་པ་མི་འདུག་པས་གནས་སྐབས་ཐོ་ནང་དུ་གང་ཐེབས་ཕྱོགས་བསྒྲིགས་བྱས་པ་ཡིན་ནོ། །དེ་ཡང་བྱང་ཆུབ་ཀྱི་སེམས་རྣམ་པ་གཉིས་ཀྱི་རྩིས་ཟིན་པ་སོགས་བདག་ལྟ་བུ་ལ་དཀའ་མོད་ཀྱང༌། བསམ་པའི་ཁྱད་པར་སྤྱིར་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་དར་ཞིང་རྒྱས་པ་དང༌། ཁྱད་པར་བསྟན་པ་བྱང་ནས་བྱང་དུ་དར་བར་ལུང་བསྟན་པ་ཆོས་སྡེ་འདི་ཉིད་ཡིན་པར་ཀློང་རྡོལ་བླ་མ་རིན་པོ་ཆེ་སོགས་ཚད་མའི་སྐྱེས་བུ་དུ་མས་གསུངས་པས། དགོན་སྡེ་འདིར་མདོ་སྔགས་བཤད་སྒྲུབ་ཀྱི་བསྟན་པ་དར་ཞིང་རྒྱས་པ་དང༌། རང་ཉིད་ཀྱང་ཚེ་རབས་ཀུན་ཏུ་བསྟན་པའི་སྙིང་པོ་མཆོག་ལ་ཐོས་བསམ་སྒོམ་པས་ཚུལ་བཞིན་དུ་འཇུག་ཅིང༌། ཁྱད་པར་རང་ཉིད་ཀྱིས་ཐོག་དྲངས་རང་ལ་འབྲེལ་ཐོགས་ཀྱི་འགྲོ་བ་མི་དང་མི་མིན་ཐམས་ཅད་མ་འོངས་པ་ན་རྗེ་བཙུན་བྱམས་པ་མགོན་པོའི་འཁོར་གྱི་ཐོག་མར་གྱུར་ཏེ་ཡང་དག་པའི་ལམ་གྱིས་བཙན་ས་ཟིན་པའི་ཕྱིར་དུ་དམིགས་ཏེ་བཞེངས་པར་བླ་མ་ཡི་དམ་ཆོས་སྲུང་རྣམས་ཀྱང་ཐུགས་བརྩེ་བས་ཉེ་བར་དགོངས་ཏེ་རྗེས་སུ་བཟུང་བའི་འབྲས་རྟགས་སུ་བྱ་བའི་ཐོག་མཐའ་བར་གསུམ་ཐམས་ཅད་ལ་འགལ་རྐྱེན་གྱི་ཆ་ཕྲ་མོ་ཙམ་ཡང་མེད་པར། ཡིད་ཀྱིས་སྨོན་པ་བཞིན་དུ་འགྲོ་བ་མ་ལུས་པའི་བསོད་ནམས་ཀྱི་ཞིང་ས་དམ་པར་ལྷུན་གྱིས་གྲུབ་སྟེ། རྒྱལ་པོ་ཁྲི་སྲོང་ལྡེ་བཙན་གྱིས། ཞིང་མོར་བསགས་པ་ལས་ནི་ནོར་འབྱུང་ཞིང༌། །ཉིན་མཚན་བསམ་པ་ལས་ནི་བློ་
འབྱུང་སྟེ། །ཡ་རབས་མཛངས་པ་ལས་ནི་ཕྱག་རིས་འབྱུང༌། །རྒྱལ་པོ་ཁྲི་སོང་ལྡེ་བཙན་ང་རེ་དགའ། །ཞེས་སོགས་དང༌། ང་ཡི་དབུ་རྩེ་རིགས་གསུམ་འདི། །རིན་ཆེན་སྣ་ལས་གྲུབ་པ་སྟེ། །རྩིག་པ་མི་འདྲ་སྐྱེས་པ་འདྲ། །ང་ཡི་ལྷ་ཁང་ངོ་མཚར་ཆེ། །མཐོང་བ་ཙམ་གྱིས་ཉམས་རེ་དགའ། །དེ་ཕྱིར་བསམ་གྱིན་བློ་རེ་བདེ། །ཞེས་སོགས་དགའ་གླུ་བཅུ་གསུམ་དང༌། གཞན་ཡང་རྒྱལ་པོ་འཁོར་བཅས་ཀྱི་སེང་གེ་འགྱང་རྩེན། གཡུ་མཚོ་འཁྱིལ་བ། དབྱངས་རིང་ཁུག་པ། སྐྱིད་པའི་གླུ་རིང༌། དྲང་ཤིང་དཀར་པོ། སྟག་རི་དགུ་བརྩེགས་སོགས་དགའ་སྐྱིད་ཀྱི་གླུ་གར་མང་དུ་བྱས་པ་ལྟར། རང་འཁོས་ཀྱི་ལེགས་ཚོགས་ཤིན་ཏུ་ཆེ་བར་བྱུང་ངོ༌། །རྟེན་བཞེངས་གྲུབ་པའི་ལོ་དེར་ཟི་ལིང་ཨཾ་བྷན་ཡཱུས་ཏ་ཞིན། མཚོ་སྔོན་པོའི་ས་སྐོར་ལ་འགྲོ་བའི་ཞོར་གྱིས་དགོན་པར་འོངས་ནས་མཆོད་རྟེན་ལ་མཇལ་ཏེ་ཡ་མཚན་ཆེ་བར་བྱེད་ཅིང་དེ་ནས་ཕྱིར་ཟི་ལིང་དུ་ལྡོག་པའི་ལམ་ཁར་གྲེ་ཙི་ཞིག་འབྱོར་བར། མདོ་སྨད་དུ་དགོན་པ་དང་ལྷ་ཁང་སོགས་ཅི་འདྲ་ཡོད་བཀའ་འདྲི་གནང་བ་དུས་འགྲིག་པའི་སྟབས་ཀྱིས་ཨཾ་བྷན་ནས་དགོན་སོ་སོའི་གནས་ཚུལ་དང༌། ལྷག་པར་འཇམ་དབྱངས་ཧཱུ་ཐོག་ཐུའི་དགོན་དུ་གོང་མ་ཆེན་པོའི་ཞབས་བརྟན་ལ་མཆོད་རྟེན་ཁྱད་འཕགས་ཤིག་བཞེངས་འདུག་ཚུལ་ཞུས་པས། ཡང་བསྐྱར་རྒྱ་དཔངས་སོགས་ཀྱི་ཚད་དང་ནང་དུ་ལྷ་ཁང་ཅི་འདྲ་ཡོད་བཀའ་འདྲི་ཕེབས་ཤིང༌། དེ་ནས་མ་འགྱང་བར་གོང་མ་རང་གི་ཕྱག་གིས་བྲིས་པའི་ཙི་བེན་ཚེ་རིང་གནམ་གྱི་ཤེ་མོང་གི་བཀའ་རྟགས་ཕྱག་རྒྱའི་རེ་ཁ་ཅན་སྕལ་བ་ནི་ཆོས་ཀྱི་དབང་དུ་བྱས་ན། ལྗོངས་འདིར་བསྟན་པ་ནམ་གནས་
བར་དུ་གོང་མའི་གདན་སར་ཡང་འཇམ་དབྱངས་ཀྱི་སྤྲུལ་བ་རིམ་ཅན་འབྱོན་པར་གསུངས་པས་བྱིན་རླབས་ཀྱི་ཚན་ཁ་ཤིན་ཏུ་ཆེ། འཇིག་རྟེན་གྱི་ལུགས་དང་བསྟུན་ཚེ། སྟོབས་ཀྱི་འཁོར་ལོས་བསྒྱུར་བ་ཆེན་པོའི་བདག་རྐྱེན་འདི་འདྲ་གང་བྱུང་གིས་འབད་རྩོལ་ཅི་ཙམ་བྱས་ཀྱང་འོང་དཀའ་བ་ཞིག་རྩོལ་བ་ཕྲ་མོ་ཙམ་ཡང་མ་བྱས་པར་གནམ་བབས་ཀྱི་ཚུལ་དུ་བྱུང་བ་ཡ་མཚན་ཆེ་ཞིང༌། ཡི་གེ་རྣམས་ཀྱི་དོན་བོད་སྐད་དུ་བསྒྱུར་ན། དཀོན་མཆོག་ཐུགས་རྗེའི་འོད་ཀྱིས་འཛམ་གླིང་ཀུན་ཁྱབ། ཅེས་པ་ལྟ་བུ་ཞིག་ཏུ་སྣང་བས་རྟེན་འབྲེལ་གྱི་ཆེ་བ་ཡང་རྨད་དུ་བྱུང་བར་སྣང་ངོ༌། །ཞེས་བྱ་བ་ནི་གཉིས་པ་རྟེན་བཞེངས་པའི་ལོ་རྒྱུས་ཀྱི་སྐབས་སོ། །༈ གསུམ་པ་རྟེན་ཇི་ལྟར་བཞུགས་པའི་མཚན་བྱང་ནི། ཕྱི་རྟེན་དང་ནང་བཞུགས་ཀྱི་སྐོར་གཉིས་ལས། དང་པོ་ནི། ཤོད་ཀྱི་མདུན་ངོས་སུ་རིགས་ལྔའི་ལྷ་ཁང་ཀ་རིང་གཉིས་མ། སྟེང་ཕྱོགས་སུ་སྐྱབས་མགོན་རྡོ་རྗེ་འཆང་གི་འདྲ་སྐུ་གསེར་ཟངས་ལས་གྲུབ་པ་དང་། དབུས་སུ་སེང་གེའི་ཁྲི་ལ་རྣམ་སྣང་། ཤར་དུ་གླང་ཆེན་གྱི་ཁྲི་ལ་མི་བསྐྱོད་པ། ལྷོར་རྟ་མཆོག་གི་ཁྲི་ལ་རིན་འབྱུང༌། ནུབ་ཏུ་རྨ་བྱའི་ཁྲི་ལ་འོད་དཔག་མེད། བྱང་དུ་མཁའ་ལྡིང་གི་ཁྲི་ལ་དོན་གྲུབ་རྣམས་སྐུ་ཚད་བྱིས་པ་ལོ་བཅུ་གསུམ་པའི་ཚོད་ཙམ། རྣམ་སྣང་གི་གཡས་གཡོན་དུ་རྒྱ་ནག་ལི་མའི་བྱམས་པ་ཁྲུ་ཚད་དང་དེ་མཚུངས་འཇམ་དབྱངས་ཀྱི་སྐུ་གཉིས་ཁྲི་རྒྱབ་ཡོལ་དང་བཅས་པ། གསུང་རབ་པོ་ཏི་བརྒྱད་བརྒྱ་སྐོར། ལྡེབས་རིས་ལ་ཚེ་དཔག་མེད། དོན་ཡོད་ཞགས་པ། སྒྲོལ་མ་དཀར་ལྗང༌། རྟ་མགྲིན་དམར་ཆུང་
དང་ཕྱག་རྡོར། མགོན་ཆོས་ལྷ་མོ་རྣམ་སྲས་གནས་ཆུང་སོགས་དང༌། རྒྱལ་ཆེན་བཞི། གཡས་ཀུན་གཟིགས་ལྷ་ཁང་དུ། འཇམ་དབྱངས་ཀུན་གཟིགས་ཀྱི་སྣང་བརྙན་ཁྲི་རྒྱབ་ཡོལ་དང་བཅས་པར་ཐོག་ཚད་གཉིས་པ། གནས་ཆེན་དུ་མའི་ས་སྣ་དང་བྱིན་རྟེན་ཕོན་ཆེ་བ་སྨན་འདམ་སོགས་ཀྱི་རྒྱུ་ལས་གྲུབ་ཅིང་གསེར་ཟངས་ཀྱི་དབུ་རྒྱན་དང་རིན་པོ་ཆེ་འགངས་ཆེ་བ་དུ་མའི་ཕྲ་རྒྱན་སོགས་རྒྱུ་བཟོ་ཤིན་ཏུ་ལེགས་ཤིང་བྱིན་རླབས་ཀྱི་གཟི་འོད་འབར་བ། གཡས་གཡོན་དུ་གསེར་ཟངས་ལས་གྲུབ་པའི་རྒྱལ་བ་སེང་གེའི་ང་རོ་དང་བྱམས་མགོན་གྱི་སྐུ་མི་ཚད་ཙམ་པ་ཁྲི་རྒྱབ་ཡོལ་ཅན་གཉིས། གཙོ་བོའི་རྒྱབ་ཡོལ་གྱི་རྩེར་ཙན་དན་ལས་གྲུབ་པའི་རྗེའི་སྐུ་ཁྲུ་གང་བ། གཡས་གཡོན་གྱི་ནམ་མཁར་སྤྲིན་ལ་བཞུགས་པའི་སྤྱན་རས་གཟིགས་དང་ཕྱག་རྡོར་གྱི་སྨན་སྐུ་ཁྲུ་ཚད་རེ། གཡས་གཡོན་གྱི་གྲར་གསུང་རབ་པོ་ཏི་བརྒྱད་བརྒྱ་ཉི་ཤུ་སྐོར། ལྡེབ་བྲིས་ལ། རྗེ་བླ་མ། རྒྱལ་ཚབ། མཁས་གྲུབ། རྟོགས་ལྡན་འཇམ་དཔལ་རྒྱ་མཚོ། འདུལ་འཛིན། འཇམ་དབྱངས་ཆོས་རྗེ། བྱམས་ཆེན་ཆོས་རྗེ། རྗེ་ཤེས་རབ་སེང་གེ །དགེ་འདུན་གྲུབ། ཚ་ཁོ་ངག་དབང་གྲགས་པ། པཎ་ཆེན་བསོད་གྲགས། རྒྱལ་བ་དབེན་ས་པ། པཎ་ཆེན་ཆོས་རྒྱན། ༸རྒྱལ་དབང་ལྔ་པ། རྒྱུད་ཆེན་དཀོན་མཆོག་ཡར་འཕེལ། གྲུབ་ཆེན་སྐལ་ལྡན་རྒྱ་མཚོ། ཀུན་མཁྱེན་འཇམ་དབྱངས་བཞད་པ། ཁྲི་ཆེན་དགེ་འདུན་ཕུན་ཚོགས། ཁྱ་དགེ་བློ་གྲོས་རྒྱ་མཚོ། ལྕང་སྐྱ་རོལ་པའི་རྡོ་རྗེ། སྐྱབས་མགོན་རྡོ་རྗེ་འཆང༌། ཐུའུ་བཀྭན་རིན་པོ་ཆེ་སོགས་གསེར་མདོག་ཅོད་པན་འཆང་བའི་བསྟན་པ་
འདི་ལ་བཀའ་དྲིན་ལྷག་པར་ཆེ་བའི་བླ་མ་རགས་བསྡུས་དང༌། སྟེང་གི་ཆ་ལ་ཐང་གའི་རྣམ་པར་འཇམ་དབྱངས་དང་རྡོ་རྗེ་འཇིགས་བྱེད། ཤིང་རྟ་ཆེན་པོ་གཉིས་རྣམས་བཞུགས། ཕུགས་ཀྱི་གསུང་རབ་ལྷ་ཁང་དུ། པོ་ཏི་བཞི་རེ་ཙམ་ལྷན་དུ་པོ་ཏི་རེ་རེ་བྱས་ཏེ་རྒྱལ་བའི་བཀའ་འགྱུར་རོ་ཅོག་ཚར་དུ་མ་སོགས་ཀ་བར་གསུམ་གྱི་རིམ་པའི་ཐོག་སོ་གཉིས་ཁྲིགས་ཀྱིས་ཁེངས་པར་བརྩེགས་པ་ལ་དཀྱུས་མའི་ཚད་ཀྱི་པོ་ཏི་བཞི་སྟོང་ལྷག་པ་བཞུགས་ཤིང༌། གཡས་གཡོན་གྱི་གྲྭར་པོ་ཏི་བརྒྱད་བརྒྱ་མ་ལོང་ཙམ། ལྡེབས་རིས་ལ་སྟོན་པ་ཐུབ་པའི་དབང་པོ་མཆོག་ཟུང་བཅས་དང༌། གནས་བརྟན་ཆེན་པོ་བཅུ་དྲུག །ཧ་ཤང་དང་དགེ་བསྙེན་དྷརྨ། གཏད་རབས་བདུན། ཆོས་འཕགས་དང་རྟག་ངུས་ཤེར་ཕྱིན་འཆད་པའི་བཀོད་པ་བཅས་བཞུགས། གཡོན་གྱི་ཀུན་རིག་ལྷ་ཁང་དུ། ཀུན་དགའ་ར་བ་ཐོག་ཚད་གཉིས་པར་གཙོ་སྐུ་མི་ཚད་དང༌། གཞན་མའི་རྩ་ལྷ་སོ་དྲུག །རྣམ་སྣང་མངོན་བྱང༌། རྡོར་དབྱིངས། སེང་གེའི་སྒྲ། ཛམ་ལྷ་རྣམས་ཁྲུ་རེ། ཐམས་ཅད་གསེར་ལྗིབ་ཐུམ་ཁྲི་རྒྱབ་ཡོལ་དང་བཅས་པ། དེ་དག་གི་སྟེང་གི་བང་རིམ་ལ། ཁྲུ་ཚད་མའི་ཐུབ་དབང་། འོད་དཔག་མེད། བྱམས་པ། སྒྲོལ་མ་སོགས་གསེར་ལྗིབ་ཐུམ་དང༌། བིརྦ་པ། ཕ་དམ་པ། རྗེ་བཙུན་མི་ལ། ཕག་མོ་གྲུ་པ། བུ་སྟོན། པཎ་ཆེན་ཆོས་རྒྱན། ཀུན་གཟིགས་ལྔ་པ། རྗེ་འཇམ་དབྱངས་བཞད་པ། ཡོངས་འཛིན་ཡེ་ཤེས་རྒྱལ་མཚན། ལྕང་སྐྱ་རོལ་པའི་རྡོ་རྗེ་སོགས་ཀྱི་སྨན་སྐུ་ཁྲུ་ཚད་གསེར་ཚོན་གྱིས་
མཛེས་པ་ཤིན་ཏུ་བྱོན་ལེགས། དངུལ་གྱི་གདུང་རྟེན་གཉིས་དང༌། གཞན་མཆོད་རྟེན་ཆེ་བ་བརྒྱད། སྨན་སྐུ་བྱིན་ཅན་གསར་རྙིང་ཉི་ཤུ་སྐོར་སོགས་དང༌། འགྲམ་གཉིས་ལ་གསུང་རབ་པོ་ཏི་བདུན་བརྒྱ་བརྒྱད་ཅུ་ཙམ། ལྡེབས་རིས་ལ་ཇོ་བོ་རྗེ། ཁུ་རྔོག་འབྲོམ་གསུམ། ནག་ཚོ། ལྷ་བླ་མ། ཁུ་དབོན་རྣམས་དང༌། སྟེང་ཕྱོགས་སུ་རྒྱལ་པོ་ཨིནྡྲ་བོ་དྷི། ཟླ་བ་བཟང་པོ། ལ་ལཱི་ཏ། ལཱུ་ནག་དྲིལ་གསུམ། གཡས་གཡོན་དུ་མཁན་སློབ་ཆོས་གསུམ། བླ་ཆེན་དགོངས་པ་རབ་གསལ། པུ་ཏོ་པ། མར་པ། ལབ་སྒྲོན། བུ་མོ་བསོད་ནམས་རྒྱན། འཇམ་མགོན་ས་པཎ། བུ་སྟོན། ཕྱ་པ་ཆོས་སེང༌། ཀརྨ་རོལ་པའི་རྡོ་རྗེ་སོགས་རིས་མེད་ཀྱི་སྐྱེས་ཆེན་དམ་པ་བསྟན་པའི་རྩ་ལག་བཀའ་དྲིན་ཅན་རྣམས་ཀྱི་སྐུ་བཅས་བཞུགས། བར་ཐོག་གི་ཕྱོགས་བཞིར་ཞལ་རས་ལྷ་ཁང་ལྕགས་ཁྲ་བཅས་དང༌། དབུས་མི་བསྐྱོད་པ། ཤར་རྣམ་སྣང༌། ལྷོ་རིན་འབྱུང༌། ནུབ་འོད་དཔག་མེད། བྱང་དོན་གྲུབ་ཀྱི་ལྷ་ཁང་དུ་སོ་སོའི་སྐུ་བརྒྱ་སྐོར་རེ་ཕྱོགས་མདོག་ཏུ་བྱས་པ་ལ་དེ་དང་ཆ་འགྲིག་པའི་བཞུགས་གནས་གྲྭ་མིག་དང་བཅས་པ། ཐོག་སོ་གསུམ་པའི་ཁོར་ཡུག་ཏུ་བསྐལ་བཟང་སངས་རྒྱས་སྟོང་གི་སྨན་སྐུ་མཐོ་གང་རེ་ཅན་གསེར་ལྗིབ་ཐུམ། བཞུགས་གནས་གྲྭ་མིག་མཆོད་ཤོམ་དང་བཅས་པ་ཆ་འགྲིག །བུམ་པའི་ནང་བདེ་བ་ཅན་གྱི་ཞིང་བཀོད་དུ་བྱས་པའི་ཕུར་གསེར་ཟངས་ལས་གྲུབ་པའི་འོད་དཔག་མེད་ཀྱི་སྐུ་ཁྲུ་ལྔ་པ། རྨ་བྱས་བཏེག་པའི་ཁྲི་རྒྱབ་ཡོལ་དང་བཅས་པ། མདུན་དུ་སྲས་ཀྱི་ཐུ་བོ་གཉིས་ཀྱི་གསེར་སྐུ་པད་སྡོང་ལ་བཞུགས་པ། གཡས་གཡོན་དུ་ཁང་བཟང་གི་བཀོད་པ་རིམ་བརྩེགས་ཀྱི་
དབུས་སུ་འོད་དཔག་མེད་ཁྲུ་ཚད་རེ་རེ། སྟེང་དུ་རྒྱ་བོད་ཀྱི་ལི་མའི་འོད་དཔག་མེད་དང་སྤྱན་རས་གཟིགས་ཀྱི་སྐུ་བཅུ་སྐོར། འགྲམ་སོ་སོར་གསེར་ཟངས་ལས་གྲུབ་པའི་སྐུ་ཁྲུ་ཚད་མ་ཁ་ཤས། ལྡེབས་རིས་ལ་བདེ་བ་ཅན་གྱི་ཞིང་གི་སྣོད་བཅུད་ཀྱི་འབྱོར་བ་ཕུན་སུམ་ཚོགས་པའི་བཀོད་པ་ངོ་མཚར་བ་བཅས་བཞུགས་སོ། །སེང་ཁྲིའི་ཕྱི་རོལ་གྱི་གཡབ་ཁོར་ཡུག་ཏུ་ཀ་བར་རེ་ལ་འཁོར་ལོ་བཞི་རེ་བཞག་པས་འཁོར་ལོ་ཆེ་བ་བརྒྱ་དང་བརྒྱད། སྒོ་ཁང་གི་འགྲམ་དང་ནང་དུ་ཡང་འཁོར་ལོ་ཁ་ཤས། ལྡེབས་རིས་མདུན་ངོས་སུ་ལྟུང་བཤགས་ཀྱི་ལྷ་ཚོགས་དང་སྨན་བླ་མཆེད་བརྒྱད་བཞུགས་ཤིང༌། ཕྱོགས་གཞན་གསུམ་ལ་འཁོར་ལོ་རེ་རེའི་སྟེང་དུ་ཡི་དམ་གྱི་ལྷ་རེ་འབབ་པ་བྱས་ཏེ། རྡོར་ཕྲེང་མི་ཏྲ་བརྒྱ་རྒྱམ་སོགས་ཀྱི་རྒྱུད་སྡེ་བཞིའི་ལྷ་གཙོ་རགས་བསྡུས་ཙམ་བཞུགས་པ། གཡས་ཀྱི་གྲུ་ནས་བརྩམས་ཏེ་རིགས་ལྔ་ཡབ་ཡུམ། གསང་འདུས་མི་བསྐྱོད་པ། འཇམ་རྡོར། འཇིག་རྟེན་དབང་ཕྱུག།།བདེ་མཆོག་རིགས་བཞི། དམར་ནག་འཇིགས་གསུམ་གདོང་དྲུག།།དུས་འཁོར། དུས་འཁོར་ལྷན་སྐྱེས། ཀྱཻ་རྡོར་ཐོད་པ་ཅན། ཀྱཻ་རྡོར་མཚོན་ཆ་ཅན། ཕག་མོ་དོན་གྲུབ། ཕག་དཀར། ཀུ་རུ་ཀུལླེ། མཧཱ་མ་ཡ། སངས་རྒྱས་ཐོད་པ། རྣལ་འབྱོར་ནམ་མཁའ། སྤྱན་རས་གཟིགས་རྒྱལ་བ་རྒྱ་མཚོ། འཁོར་ཆེན་སོགས་བླ་མེད་དང༌། ནུབ་ཀྱི་གྲུ་ནས་རྣལ་འབྱོར་རྒྱུད་རྣམ་སྣང༌། རྡོར་དབྱིངས། གཙུག་དགུ །ཆོས་དབྱིངས་གསུང་དབང༌། བྱ་སྤྱོད་ལ་རྣམ་སྣང་མངོན་བྱང༌། མི་རུ་ཤི་ཥ། ཚེ་དཔག་མེད་དཀར་
པོ། ཐོགས་མེད་ཀྱིས་ཞལ་གཟིགས་པའི་བྱམས་པ། བརྟན་པའི་འཁོར་ལོ། འཇམ་དབྱངས། སེང་གེའི་སྒྲ། ཨ་ར་པ་ཙ་ན། འཇམ་དཔལ་ནག་པོ། དོན་ཞགས། ནམ་མཁའ་རྒྱལ་པོ། ཧ་རི་ཧ་རི་ལ་ཞོན། སེམས་ཉིད་ངལ་གསོ། ས་སྙིང༌། སྒྲིབ་སེལ། ཀུན་བཟང༌། ནམ་སྙིང༌། བདུད་རྩི་ཐིགས་པ། ཕྱག་རྡོར་མདོ་ལུགས། རྣམ་འཇོམས། ཁྱུང་གཤམ་ཅན། རྒྱུད་ཕྱི་མའི་རྟ་མགྲིན། ཤྭ་ན་བཞི་སྐོར། ལྕགས་རལ། མི་གཡོ་བ། སྟོབས་པོ་ཆེ། བགེགས་མཐར་བྱེད། བདུད་རྩི་འཁྱིལ་བ། ནཱ་ག་རཀྴ། ངན་སོང་ལས་སྒྲོལ་བའི་སྒྲོལ་མ། ནོར་སྦྱིན་སྒྲོལ་མ། འཆི་བ་བསླུ་བའི་སྒྲོལ་མ། སྣ་ཚོགས་ཡུམ། ཤེར་ཕྱིན་མ། འོད་ཟེར་ཅན་མ། ལོ་གྱོན་མ་སེར་ལྗང་གཉིས། རྣམ་རྒྱལ་མ། གདུགས་དཀར། སོར་འབྲང༌། སྤྱན་མ། དབྱངས་ཅན་མ་དཀར་དམར་གཉིས། ནོར་རྒྱུན་མ། དུག་སེལ་མ། ཙུནྡ། འཆི་མེད་རྡོ་རྗེ་ལྷ་མོ། རལ་གཅིག་མ། གཟའ་ཡུམ། སེང་གདོང་མ། ཛམ་དཀར། ཛམ་དམར། རྣམ་སྲས་ཚེ་འཕེལ་རྣམས་བཞུགས། སྟེང་འོག་གི་མཐོངས་སྐོར་རིམ་པ་གསུམ་ལ་རྒྱང་རིང་པོ་ནས་མཐོང་བར་མ་ཎི་ཆེ་བ་ཁོར་ཡག་ཏུ་བརྐོས། སྒོ་ཁང་གོང་འོག་སོགས་ཀྱི་གདུང་ལ་གཟུངས་སྔགས་དུ་མ་ལཉྩ་དང་བོད་ཡིག་གིས་བྲིས་པ་སོགས་ཕྱི་ནང་ཐམས་ཅད་མཐོང་ཐོས་དྲན་རེག་དོན་ལྡན་དུ་བྱེད་པའི་སྐུ་གསུང་ཐུགས་རྟེན་གྱིས་གོ་མཚམས་མེད་པར་གཏམས་སོ། །སྒོ་ཁང་གི་ཐོག་སོར་རང་གི་ངག་རྩོམ་འགའ་ཞིག་དང༌། གཞན་ཡང་ཉེར་མཁོའི་པར་མང་ཙམ་བཞུགས། ནང་བཞུགས་ཀྱི་རིམ་པ་ཡང༌། འཕགས་པ་འོད་ཟེར་དྲི་མེད་རྣམ་དག་འོད་ཀྱི་གཟུངས་
ལས། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཆེན་པོ་ཁྱོད་སོང་ལ། གྲོང་ཁྱེར་སེར་སྐྱའི་ལས་ཀྱི་སུམ་མདོ་ན་མཆོད་རྟེན་རིང་བསྲེལ་ཅན་རྙིང་པ་རལ་པ་ཞིག་ཡོད་པ་དེ་སླར་བརྩིགས་ཏེ་མཆོད་རྟེན་གྱི་རྩེ་མོར་སྲོག་ཤིང་བཙུགས་ལ། གསང་སྔགས་ཡི་གེར་བྲིས་པ་དེའི་ནང་དུ་བཅུག་སྟེ་མཆོད་པ་བྱས་ནས་གསང་སྔགས་ལན་བདུན་བཏོན་ན། ཁྱོད་ཀྱི་ཚེའང་ཕྱིར་ནུར་ཏེ་འཕེལ་བར་འགྱུར་ལ། འཆི་བའི་དུས་བྱས་ཀྱང་བདེ་འགྲོ་མཐོ་རིས་ཀྱི་གནས་ལོངས་སྤྱོད་ཆེ་བ་རྣམས་སུ་སྐྱེས་ཏེ་བསྐལ་པ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་ཀྱང་ཕྱིར་འཕེལ་ཞིང་རྒྱས་པར་འགྱུར། དེ་ནས་ཀྱང་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་ཏེ་བསྐལ་པ་བརྒྱ་སྟོང་དུ་མར་བདེ་བ་ཆེན་པོ་མྱོང་བར་འགྱུར་རོ། །དེ་ནས་ཀྱང་ཤི་འཕོས་ཏེ་རྒྱལ་ཆེན་རིགས་བཞིའི་ལྷ་རྣམས་ཀྱི་གནས་སུ་སྐྱེ་བར་འགྱུར་ཏེ། དེ་ཡང་བསྐལ་པ་ཆེན་པོ་སྟོང་ཕྲག་བརྒྱའི་བར་དུ་བདེ་བའི་ལོངས་སྤྱོད་མི་ཟད་པ་མྱོང་བར་འགྱུར། ཚེ་རབས་གང་དུ་སྐྱེས་པའི་གནས་ཀུན་ཏུའང་ཡིད་གཞུང་ཞིང་ཚེའི་བར་ཆད་མེད་པ་དང༌། ལས་ཀྱི་སྒྲིབ་པ་ཐམས་ཅད་ཟད་ནས་དུས་ནམ་དུ་ཡང་སེམས་ཅན་དམྱལ་བར་ལྷུང་བར་མི་འགྱུར་རོ། །རྟག་ཏུ་ཡང་དག་པར་རྫོགས་པའི་སངས་རྒྱས་འབྱུང་བ་རྣམས་དང་འཕྲད་ཅིང༌། རྗེས་སུ་དགོངས་པར་མཛད་དོ། །ཞེས་རིང་བསྲེལ་གྱི་སྙིང་པོ་ཅན་དུ་བྱས་ན་ཕན་ཡོན་བསམ་གྱིས་མི་ཁྱབ་པར་གསུངས་པས། རིང་བསྲེལ་ཡང་གང་ལ་བྱེད་ན། རྒྱུད་སྡེ་སྤྱི་རྣམ་ལས། བྱང་ཆུབ་རྒྱན་འབུམ་ད་ལྟ་བོད་
ན་ཚང་བ་མི་བཞུགས། སྔོན་གྱི་མཁས་པ་དག་གིས་དེ་དྲངས་པར་དེ་བཞིན་གཤེགས་པའི་ཆོས་སྐུའི་རིང་བསྲེལ། སྐུ་གདུང་གི་རིང་བསྲེལ། སྐུ་བལ་གྱི་རིང་བསྲེལ་རྣམས་མཆོད་རྟེན་དུ་གཞུག་པར་གསུངས་ཏེ། ཆོས་སྐུའི་རིང་བསྲེལ་ནི་གཟུངས་རྣམས་སོ། །སྐུ་གདུང་གི་རིང་བསྲེལ་ནི་སྐུ་གདུང་ལས་བྱུང་བའི་རིང་བསྲེལ་ཡུངས་འབྲུ་ཙམ་མོ། །སྐུ་བལ་གྱི་རིང་བསྲེལ་ནི་སྐུ་གཟུགས་ཏེ། དེ་དག་རིམ་པ་ལྟར་མཆོག་དང༌། འབྲིང་དང༌། ཐ་མར་གསུངས་སོ། །ཞེས་རིང་བསྲེལ་གསུམ་དུ་བསྡུས་ཤིང༌། ཕྱི་མ་སྐུ་བརྙན་སོགས་ལ་གསུངས་པ་ཤིན་ཏུ་གནད་ཆེ་སྟེ། བཀའ་ཆེམས་བཀའ་འཁོལ་མར། ཅི་སྟེ་སངས་རྒྱས་བྱིན་རླབས་དེ། །སོ་སོ་སྐྱེ་བོས་ཤེས་མི་འགྱུར། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང༌། །མཐའ་འཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང༌། །མུ་སྟེགས་བྱོལ་སོང་སོགས་མི་མཐོང༌། །དེ་ཕྱིར་སྐུ་གཟུགས་སྤྲུལ་བ་ཡིན། །ཞེས་གསུངས་པ་བཞིན་སངས་རྒྱས་ཀྱི་བསྟན་པ་དར་སར་ལྷ་བཟོ་མཁས་པ་འབྱུང་ལ། མུ་སྟེགས་དར་ཚེ་ལྷ་བཟོ་ངན་པ་དང༌། ཀླ་ཀློ་དར་ཚེ་ལྷ་བཟོ་གཏན་ནུབ་པར་བཤད་པ་བཞིན་འདི་དག་སངས་རྒྱས་ཀྱི་སྐུ་དངོས་ཀྱི་དོད་ལྟ་བུར་སྤྲུལ་བའི་རིང་བསྲེལ་དུ་བཞག་པ། ཐུགས་བདེ་སྟོང་ཡེ་ཤེས་ཀྱི་དོད་གཟུངས་ལ་དེའི་རིང་བསྲེལ་དུ་བཞག་པ་དང་གོ་དོན་འདྲའོ། །འོན་ཀྱང་ད་ལྟ་གྲགས་ཆེ་བ་རིང་བསྲེལ་བཞིར་བྱས་ཏེ། ཆོས་སྐུའི་རིང་བསྲེལ་སྔར་ལྟར་དང༌། ཡུངས་འབྲུ་ལྟ་བུ་ཡོངས་གྲགས་ཀྱི་རིང་བསྲེལ། སྐུ་གདུང་གི་རིང་བསྲེལ་གདུང་རུས་སོགས་དང༌། སྐུ་བལ་གྱི་རིང་བསྲེལ་དབུ་སྐྲ་ན་བཟའ་སོགས་ལ་གསུངས་པ་དང་བསྟུན་ཏེ་འགོད་པ་ལ།
སྟེང་འོག་གི་སྐུ་བརྙན་ཀུན་གྱི་ནང་དུ་བཞུགས་པ་བསྡོམས་པར་གཟུངས་གཞུག་རྒྱས་བསྡུས་ཆ་ཚང་བ་སུམ་བརྒྱ་དང་བདུན་ཅུ་སྐོར། ཟུར་དུ་གཟུངས་སྔགས་འབུམ་ཕྲག་དུ་མ། གདུགས་དཀར་སོགས་ཀྱི་འཁོར་ལོ་སྣ་ཚོགས། མདོ་ཕྲན་ཆེ་ཆུང་བཞི་བཅུ། ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོའི་རྒྱུན་གྱི་གཟིགས་དཔེ་ལམ་རིམ་ཆེན་མོ། སྨོན་ལམ་ཆོས་སྤྱོད་བརྒྱ་ལྷག་བཞུགས་ལ། སྤྱིར་ཕྱི་རྟེན་དུ་བཀོད་པའི་གསུང་རབ་རྣམས་ཀྱང་མཆོད་རྟེན་གྱི་ནང་བཞུགས་སུ་གཏོགས་པའི་རྒྱལ་བའི་བཀའ་འགྱུར་རོ་ཅོག་ཆ་ཚང་གཉིས། ཅུང་ཟད་མ་ཚང་བ་ཁ་ཤས། གསེར་འབུམ་གསུམ། དངུལ་འབུམ་བདུན་ཅུ་སྐོར་གྱིས་གཙོས་པའི་འབུམ་ཆ་ཚང་བརྒྱ་དང་གྱ་ལྔ། གསེར་གྱི་བརྒྱད་སྟོང་པ་བཅུ་བདུན་སོགས་བརྒྱད་སྟོང་པ་ཚར་ཉིས་བརྒྱ་དང་ལྔ། དཀོན་བརྩེགས་སུམ་ཅུ་སྐོར་དང༌། ཕལ་ཆེན་བཞི་བཅུར་ཉེ་བ། བསྐལ་བཟང་བརྒྱ་དང་བཞི་བཅུ་ཞེ་བརྒྱད། ཐར་མདོ་ཉིས་བརྒྱ་སུམ་ཅུ་སྐོར། རྡོར་གཅོད་སྟོང་དང་དགུ་བརྒྱ་ལྷག །གཞན་ཡང་མདོ་རྒྱུད་སྣ་ཚོགས་ཀྱི་པོཏ་སྟོང་ཕྲག་དུ་མ་སོགས་ཁྱོན་བསྡོམས་པར་གསུང་རབ་པོ་ཏི་ཁྲི་ཕྲག་ཙམ་བཞུགས་པ་དང༌། འཁོར་ལོའི་ནང་དུ་ཡིག་དྲུག་བྱེ་ཆེན་བདུན་ཙམ་དང༌། ཀཾ་ཀ་ནི། ཡིག་བརྒྱ་སོགས་གཟུངས་སྔགས་འབུམ་ཕྲག་དུ་མ་བཞུགས་པ་ཐམས་ཅད་ཀྱང་ནང་རྟེན་ཆོས་སྐུའི་རིང་བསྲེལ་གྱི་ཁོངས་སུ་གཏོགས་སོ། །ཡུངས་འབྲུ་ལྟ་བུའི་རིང་བསྲེལ་ཡང༌། སངས་རྒྱས་འོད་སྲུང་གི་འཕེལ་གདུང་སྤྲུལ་བའི་དགེ་སློང་ཨ་ཀར་མ་ཏིས་གདན་དྲངས་པའི་ནང་ཚན་དཔལ་སྡེ་བ་ནས་བརྒྱུད་དེ་གཞུང་སར་
བཞུགས་པ་དེ་ལས་འཕེལ་བའི་རིང་བསྲེལ་གཅིག། །བདག་ཅག་གི་སྟོན་པའི་འཕེལ་གདུང་མ་སྐྱེས་དགྲའི་སྐལ་བ་གཏེར་དུ་སྦས་པ་མྱ་ངན་མེད་ཀྱིས་བཏོན་པའི་ནང་ཚན་བྱ་སྒོང་ཙམ་ཞིག་རྒྱ་ནག་ཏུ་ཕེབས་པ། དེས་འགྲོ་མགོན་འཕགས་པར་ཕུལ་ཞིང༌། ཕྱིས་རྒྱལ་རྩེ་དང་བསམ་རྩེ་སོགས་བརྒྱུད་དེ་གཞུང་སར་བཞུགས་པ་ལས་འཕེལ་བ་རྡོག་ཆེ་བ་གཅིག་དང་ཆུང་བ་ལྔ། ཇོ་བོ་རྗེའི་འཕེལ་གདུང་གཅིག། །དགའ་ལྡན་གསེར་གདུང་ཆེན་མོ་ནས་བབས་པའི་འཕེལ་གདུང་གཅིག། །མཚན་བྱང་མི་གསལ་བ་རྟེན་རྙིང་ཁྲོད་ཀྱི་འཕེལ་གདུང་ཆེ་ཆུང་གསུམ་རྣམས་བཞུགས། གཞན་ཡང་ཤཱ་རིའི་བུའི་ཚེམས་ལས་གྲུབ་པའི་རིལ་བུ། གྲུབ་ཆེན་ནག་པོ་སྤྱོད་པའི་རུས་རྒྱན། དཔལ་ནཱ་རོ་པའི་རྒྱན་དྲུག །མ་ཅིག་གྲུབ་པའི་རྒྱལ་མོའི་ཚེམས་ཀྱི་རིལ་བུ། ཁ་ཆེ་པཎ་ཆེན་གྱི་སྣམ་སྦྱར། སྲོང་བཙན་སྒམ་པོའི་ཞབས་ལྷམ། རྗེ་བཙུན་མི་ལའི་སྒོམ་ཐག །ཕག་མོ་གྲུ་པའི་དབུ་ཞྭ་དང་གཟིམས་ཕྱིང། རྗེ་བཙུན་གྲགས་པའི་ཕྱག་ཏིང༌། ས་པཎ་གྱི་ཞུན་ཐིགས་ལས་ཕེབས་པའི་འཇམ་དབྱངས། འགྲོ་མགོན་འཕགས་པའི་སྤྱན་ར། ལྷོ་བྲག་གྲུབ་ཆེན་གྱི་ཚེམས་ལས་གྲུབ་པའི་རིལ་བུ། ཆོས་རྗེ་དོན་གྲུབ་རིན་པོ་ཆེའི་ཕྱག་ཌམ། རྗེ་བདག་ཉིད་ཆེན་པོའི་ན་བཟའ་དང་དབུ་ལོ་ཚེམས་ལས་གྲུབ་པའི་རིལ་བུ། མཁས་གྲུབ་རྗེ་དང་བྱམས་ཆེན་ཆོས་རྗེའི་ཚེམས་ཀྱི་དུམ་བུ། པཎ་ཆེན་དགེ་འདུན་གྲུབ་ཀྱི་ཞུན་ཐིགས། མཁས་གྲུབ་ནོར་བཟང་རྒྱ་མཚོའི་ཕྱག་རྗེས། འཇམ་དབྱངས་ལེགས་པ་ཆོས་འབྱོར་གྱི་སྣམ་སྦྱར། རྒྱལ་བ་དགེ་འདུན་རྒྱ་མཚོའི་ཚེམས་ཀྱི་ཆ་ཤས། རྒྱལ་བ་བསོད་ནམས་རྒྱ་མཚོའི་སྐུ་རགས། པཎ་ཆེན་བློ་བཟང་ཆོས་རྒྱན་གྱི་ཚེམས་ཀྱི་དུམ་བུ། རྒྱལ་བ་ཡོན་ཏན་རྒྱ་མཚོའི་
ན་བཟའ་དང་དབུ་ལོ། ༸རྒྱལ་དབང་ལྔ་པའི་ན་བཟའ་དང་དབུ་སྐྲ་རྣམས་ཆ་ཚང་བ་མིན་ཡང་དུམ་བུ་རེའམ་རིལ་བུར་བསྒྲིལ་བ་འཁྲུལ་མེད་ཁོ་ན་ཡིན་པས་བྱམས་ཆེན་མཐོང་བ་དོན་ལྡན་གྱི་གཟུངས་གཞུག་སྐབས་ཡང་ཆ་ཤས་རེ་ཕུལ་ཡོད། ད་ལྟ་འདི་འདྲའི་རྟེན་འཛོམས་ཆེ་བ་ལག་ཏུ་མི་འོང་ཡང༌། སྔར་ཁྲི་ཆེན་དགེ་འདུན་ཕུན་ཚོགས་པས་དགའ་ལྡན་གསེར་གདུང་ཆེན་མོ་བཞེངས་སྐབས་དང༌། ཕྱིས་གཞུང་སའི་ཆོས་སྲིད་ཀྱི་འཛིན་སྐྱོང་གནང་སྐབས་ཕྱག་ཏུ་བྱུང་བ་ས་གསུམ་ན་རྙེད་པར་དཀའ་བའི་རྟེན་ཁྱད་འཕགས་ཁོ་ན་ཡིན་ནོ། །གསར་དུ་འབྱོར་པ་ཡང་འཕེལ་གདུང་བཞི། ཇོ་བོ་རྗེའི་ཕྱག་ཚྭ་གཉིས། སྨྲི་ཏིའི་ཕྱག་ཚྭ་གཅིག །རྗེ་རིན་པོ་ཆེའི་ཕྱག་ཕྲེང་རྡོག་གཅིག །རྗེའི་ཕྱག་ཚྭ་འོད་དཔག་མེད་ཀྱི་སྐུ་བཞི་དང་འཇིགས་བྱེད་ཀྱི་སྐུ་གཅིག །རྗེའི་སྐུ་འོད་ཟེར་མ་གཅིག ། འཇམ་དབྱངས་ཆོས་རྗེའི་ཕྱག་ཚྭ་གཉིས། རྒྱལ་བ་བསྐལ་བཟང་རྒྱ་མཚོའི་ཞབས་ཆག་བུབས། དེའི་པུར་ཚྭ། ཕྱག་རྗེས། པཎ་ཆེན་དཔལ་ལྡན་ཡེ་ཤེས་ཀྱི་ན་བཟའ། ཕྱག་ཚྭ་ཁ་ཤས། ཕྱག་ནས། རྒྱལ་བ་འཇམ་དཔལ་རྒྱ་མཚོའི་ན་བཟའ། ཀུན་མཁྱེན་འཇམ་དབྱངས་བཞད་པའི་ན་བཟའ། དབུ་ལོ། གདུང་རས། པུར་ཚྭ། གྲུབ་ཆེན་སྐལ་ལྡན་རྒྱ་མཚོའི་དོལ་བུ། སྐུ་གཟན་ཞེང། རྗེ་བཙུན་ཡེ་ཤེས་རྒྱལ་མཚན་གྱི་ན་བཟའ། དབུ་སྐྲ། འཁར་གསིལ་གྱི་ཤིང༌། དམ་རྫས་རིལ་བུ། གདུང་རས། ལྕང་སྐྱ་རོལ་པའི་རྡོ་རྗེའི་ན་བཟའ། སྐྱབས་མགོན་རྡོ་རྗེ་འཆང་ཆེན་པོའི་དབུ་ལོ་བུབས། ཕྱག་ཕྲེང༌། སྐུ་གཟན་ཕྱེད། སྐུ་ལྕུག་ཤངས་མཚལ། གདུང་རས། པུར་ཚྭ། ཕྱག་ནས། ཀློང་རྡོལ་
བླ་མ་རིན་པོ་ཆེའི་གདུང་རས། ཐུའུ་བཀྭན་རིན་པོ་ཆེ་བློ་བཟང་ཆོས་ཀྱི་ཉི་མའི་གདུང་རུས། གྲུབ་དབང་བློ་བཟང་དོན་གྲུབ་པའི་དབུ་སྐྲ། གཙང་དབུས་ཀྱི་རྟེན་བསྡུས། སྐྱེ་བདུན། བདུད་རྩི། གཙང་ཆབ། རིན་ཆེན་སོགས་རིལ་བུ་སྣེ་མང༌། ལྷ་སའི་ཇོ་བོའི་ཞལ་གསེར་དང་ཕྱག་པར། དགའ་ལྡན་ཆོས་རྒྱལ་གྱི་ན་བཟའ། དགའ་ལྡན་གྱི་འཇིགས་བྱེད་པར་མ། འཇམ་དབྱངས་ཀྱི་སྐུ་སྟོང་དང་དྲུག་བརྒྱ། དོན་ཞགས་བརྒྱ་དང་ལྔ་བཅུ། མི་ལའི་སྐུ་སུམ་བརྒྱ་སོགས་བླ་མ་ཡི་དམ་སངས་རྒྱས་བྱང་སེམས་ཉན་རང་ཆོས་སྲུང་སོགས་ཀྱི་སྐུ་བརྙན་པར་མ་དང་བྲིས་མ་ཉིས་སྟོང་ལྔ་བརྒྱ་སྐོར། བལ་ཡུལ་གྱི་སྟོན་པའི་བཞུགས་ཁྲིའི་ས་དང༌། སྟག་མོ་ལུས་སྦྱིན་གྱི་ས། མཆོད་རྟེན་བྱ་རུང་ཁ་ཤོར་དང་གོ་མ་ས་ལ་གནྡྷའི་སྐུ་དཀར། མཚོ་མ་ཕམ་གྱི་བྱེ་མ། ར་ལའི་ཟ་འོག་ཕུག །ཞུར་མོའི་གངས། བྲག་དཀར་དབུ་མ་རྟ་སོ་སོགས་མི་ལའི་སྒྲུབ་ཕུག་རྣམས་ཀྱི་ས་སྣ། གཡའ་བཟང༌། རི་བོ་མདངས་ཅན། ལྷ་ས། བསམ་ཡས། ཕ་བོང་ཁ། རྭ་སྒྲེང༌། ཡེར་པ་སོགས་ཀྱི་གནས་ས། རི་བོ་གྲུ་འཛིན་གྱི་རྩྭ། རི་བོ་རྩེ་ལྔའི་རྡོའི་རིལ་བུ་དང་ཀུན་བཟང༌། སྐུ་འབུམ་གྱི་ཙན་དན། དམར་ཚང་དན་ཏིག་ཡང་ཏིག་ལོ་ཀྱ་ཏུན་སོགས་ཀྱི་གནས་རྡོས་མཚོན་པའི་རྒྱ་བོད་ཀྱི་བྱིན་རྟེན་དང་ས་སྣ་སོགས་ཆ་ཤས་རེ་མ་ཚང་བ་མེད་པ་ལྟ་བུ་ཡིན་ནོ། །དེ་ཡང་ཤོད་ཁང་མཐའ་སྐོར་གྱི་གཡབ་དང་བཅས་པ་སེང་ཁྲིའི་ཁུངས་དང༌། དེའི་སྟེང་གི་ཐོག་སོ་གཉིས་ལ་སྐེད་པར་སླེབ་པའི་སོ་ཕག་གི་པུ་ཤུས་བསྐོར་བ་བང་རིམ་བཞི་དགེ་བཅུ་དང་བཅས་པའི་རྣམ་པ། དེ་སྟེང་བུམ་གདན་ལ་བུམ་པ་ནང་དུ་ཀ་བ་བཞི་དཔངས་ཐོག་
སོ་གཅིག་གི་ཚད། དེ་སྟེང་བྲེ་ཡན་ཆོད་ཐོག་སོ་གཉིས་ལྷག་ཙམ་སྟེ་དཔངས་ཐོག་སོ་དྲུག་བརྒལ་བ་དང༌། རྒྱ་ཁྱོན་སེང་ཁྲིའི་མཐར་ངོས་རེ་ལ་ཀ་བར་དགུ་རེ་འབྱུང་བས། ད་ལྟ་ཡོངས་གྲགས་ཀྱི་མཆོད་རྟེན་ཆུང་ངུ་རྣམས་དང་ཚད་མི་མཚུངས་ཀྱང་སྐྱོན་མེད་དེ། སྐུ་གཟུགས་ཀྱི་ཆ་ཚད་ཏཱ་ར་ནཱ་ཐས་མཛད་པ་ལས། མཆོད་རྟེན་ལ་ཆ་ཚད་ངེས་པ་ཅན་གསུང་བ་ཉུང་ཞིང༌། སྐུ་གཟུགས་ལ་མདོ་རྒྱུད་གཉིས་ཀ་ནན་ཏན་དུ་གསུངས་པས། གནས་སྐབས་ཕལ་ཆེར་དུ་ཚད་དང་མི་འགལ་བ་ལ་ནན་ཏན་དུ་བྱའོ། །ཞེས་གསུངས་པ་ལྟར། སྐུ་བརྙན་ནི་གང་བཞེངས་རྒྱུའི་སྐུ་དེ་དང་རྣམ་པ་མཐུན་དགོས་པས་ཚད་ལས་འདས་ན་ཉེས་དམིགས་ཆེ་བར་སྡོམ་འབྱུང་སོགས་ལས་ཡང་ཡང་གསུངས་ཀྱང༌། མཆོད་རྟེན་ནི་ནང་གི་སྤངས་རྟོགས་སོགས་མཚོན་བྱེད་ཙམ་ལས་དེ་དང་དབྱིབས་བསྟན་རྒྱུ་མེད་པས་སྔ་མ་དང་མི་འདྲ་བར་མ་ཟད། དུས་ཀྱི་འཁོར་ལོ་ལས་མགྲིན་ཐུང་མཆོད་རྟེན། དྲི་མེད་འགྲེལ་པའི་མགྲིན་རིང་མཆོད་རྟེན་བཤད་པ་ཤིན་ཏུ་མི་འདྲ་ལ། བུ་སྟོན་དང་སྟག་ལོ། བྲག་ནག་པ། སྤྲུལ་སྐུ་འཕྲང་ཁ་སོགས་ཀྱིས་གསུངས་པ་རྣམས་ཀྱང་རིག་པས་དཔྱད་དེ་མཛེས་བཙལ་བས་རྒྱ་དཔངས་སོགས་མི་འདྲ་བ་ཁོ་ནར་འབྱུང༌། གྲགས་ཆེ་བར་མཆོད་རྟེན་གྱི་དཔངས་ལ་རྒྱ་ཉིས་འགྱུར་ལྟ་བུ་བྱེད་ཀྱང༌། ཤིན་ཏུ་ཆེ་བ་རྣམས་དེ་ལྟར་བྱས་ཚེ་མི་བརྟན་པས། དཔངས་ལ་རྒྱའི་ཕྱེད་དུ་བྱས་ཀྱང་ཆོག་སྟེ། སྟག་ལོའི་དཔལ་འབྱོར་རྒྱ་མཚོ་ལས། རྒྱར་དཔག་ཚད་ཙམ་ལ་འཕངས་སུ་དེ་བྱེད་པ་བཤད་ན། ཞེས་པ་ནས། རྒྱ་ཆེས་གྲགས་པས་འཕང་དུ་དེའི་ཕྱེད་ལས་སློང་མི་ཐུབ་པ་ལ་དགོངས། ཞེས་གསུངས་པ་ལྟར་རོ། །དེར་མ་ཟད་སྔོན་གྱི་དམ་པ་རྣམས་ཀྱིས་བཞེངས་པའི་མཆོད་རྟེན་ཆེན་མོ་ཕལ་ཆེར་ཡང་དཔངས་
ཚད་ལས་རྒྱ་ཆེ་བ་ཤ་སྟག་ཡིན་ཏེ། དཔེར་ན་ཤྲཱི་དྷ་ན་ཀ་ཊ་ཀའམ། དཔལ་ལྡན་འབྲས་སྤུངས་ཀྱི་མཆོད་རྟེན་ཡང་རྒྱར་ངོས་རེ་ལ་དུས་འཁོར་ལུགས་ཀྱི་རྒྱང་གྲགས་བཅུ་སྟེ་འདོམ་ཁྲི་ཕྲག་རེ་ཡོད་ཀྱང༌། དཔངས་སྔོན་རྒྱལ་པོ་བ་ལ་མི་ཏྲས་རས་ཡུག་འདོམ་བཞི་བརྒྱ་པ་ཞིག་རྩེ་མོ་ནས་བརྐྱངས་པ་བང་རིམ་སྟེང་མའི་ཁར་སླེབ་པར་བཤད་པས། རྒྱ་ཁྱོན་གྱི་ཁུངས་སུ་སོང་བའི་ཤུལ་ནས་དེ་ཡན་གྱི་དཔངས་ལ་འདོམ་བརྒྱ་སྐོར་ལྷག་མི་ལུས་པའི་ཚོད་དུ་སྣང་སྟེ། དེའི་འདྲ་བཤུས་ལ་བུ་སྟོན་གྱིས་ཞལ་བྱང་བཏབ་པ་ལས། རྒྱ་ཆེ་ཞིང་དཔངས་མི་མཐོ་བ་རྩེ་ནས་རས་ཡུག་འདོམ་བཞི་བརྒྱ་ཡོད་པ་བརྐྱངས་པས་བང་རིམ་གོང་མ་ལ་སླེབ་པ་ཙམ་བཞུགས། ཞེས་པ་ལྟར་ཏེ། གཞན་ཡང་བྱ་རུང་ཁ་ཤོར། རྒྱལ་རྩེའི་མཆོད་རྟེན་ཆེན་མོ་སོགས་དཔངས་ལས་རྒྱ་ཆེ་བའི་ཁུངས་ཐུབ་མང་ངོ༌། །དེ་བཞིན་དུ་བུམ་པ་ཡང་ཡོངས་གྲགས་སྟོད་ཆེ་ལ་སྨད་ཕྲ་བར་བྱེད་ཀྱང༌། སྟག་ལོས་ས་ལ་བཞེངས་ན་བུམ་པ་དང་བྲེ་གདོང་བསྐྱུང་ཞིང་གཞན་རྣམས་བསྐྱེད། ཅེས་གསུངས་པ་ལྟར། འདི་འདྲ་ལ་དམིགས་བསལ་གྱིས་དེ་མི་དགོས་ཤིང༌། གཞུང་གཞན་ལས་དྲིལ་བུའི་ཅུང་གང་ལྟ་བུར་གསུངས་པས། ད་ལྟ་བཀའ་གདམས་གདུང་རྟེན་དུ་གྲགས་པ་ཐམས་ཅད་ཀྱང་དབྱིབས་དེ་ལྟར་འབྱུང་ངོ༌། །གལ་ཏེ་ཚད་དབྱིབས་གཅིག་ཁོ་ནར་མ་བྱས་ཀྱང་ཉེས་པར་མི་འགྱུར་ན་ཆག་ཚད་བཤད་པ་དགོས་མེད་དུ་འགྱུར་རོ་སྙམ་ན་མ་ཡིན་ཏེ། དེ་ནི་གཞན་གྱི་དགག་བྱ་དགོས་པ་སོགས་མེད་ཚེ་ཆག་ཚད་ཅིག་ལ་མ་བརྟེན་ན་རྟོག་བཟོ་ཁོ་ན་མཆེད་པས་སྐབས་ཤིག་ནས་རྣམ་པ་ཅི་ཡང་མིན་པ་ཞིག་ཏུ་འགྲོ་བ་འགོག་པའི་ཆེད་ཡིན་ནོ། །ཚད་ཀྱི་མཚན་ཉིད་བཤད་པ་ཡོད་ཕྱིན་དེ་དང་མ་མཐུན་པ་ཉེས་པ་ཁོ་ནར་འགྱུར་ན། ཡི་གེ་ལ་ཡང་རྫབ་ཆེན་རྫབ་ཆུང༌། འབྲུ་ཆེན་འབྲུ་ཆུང༌། ནང་གསེས་ཀྱི་ལི་ལུགས། ལྡན་ལུགས་སོགས་ཀྱི་མཚན་ཉིད་སོ་སོར་བཤད་པ་མང༌
ཞིང༌། ཁྱད་པར་རྩ་བ་ལྟ་བུ་རྫབ་ཆེན་གྱི་རྣམ་བཞག་ཐུ་མིའི་དགོངས་པ་སྐ་བ་དཔལ་བརྩེགས་ཀྱི་ལུགས་བཞིན་ཁྱུང་པོ་གཡུ་ཁྲིས་ཐིག་རིས་སུ་བཏབ་པ་སུམ་པ་གནོད་སྦྱིན་སོགས་ཀྱིས་དར་རྒྱས་སུ་བྱས་པ་ལྟར། མ་ཆོས་ཉེར་གཅིག །བུ་ཆོས་བཅུ་དྲུག། །སྤྱི་ཆོས་གསུམ། གཅེས་སོ་བརྒྱད། ཡི་གེ་རང་རང་ལ་སྒོས་ཀྱི་ཐིག་འདེབས་ལུགས་སོགས་མང་ཡང་དེང་སང་དེ་ཇི་ལྟ་བ་བཞིན་བྱས་པ་མི་སྲིད་ནའང༌། གསུང་རབ་བཞེངས་པ་དགག་བྱ་མེད་པ་བཞིན་ནོ། །ཡང་མཆོད་རྟེན་འདི་གོང་དུ་མཆོད་རྟེན་གྱི་དབྱེ་བ་མང་དུ་བཤད་པ་དེ་ལས་གང་དུ་གཏོགས་སྙམ་ན། ཁང་བུ་བརྩེགས་པའམ་གཙང་ཁང་ཅན་དུ་གྲགས་པ་དེ་ཉིད་ཡིན་ནོ། །མཆོད་རྟེན་བརྒྱད་ཀྱི་ནང་ནས་གང་དུ་གཏོགས་ཤེ་ན། དུས་འཁོར་ཊཱིཀ་ཆེན་གྱི་ཁ་སྐོང་ཞང་ཞུང་པས་མཛད་པའི་ཡེ་ཤེས་ལེའུར། སྤྱིར་མཆོད་རྟེན་གྱི་དབྱེ་བ་མཐའ་ཡས་པས་དེ་བརྒྱད་གང་རུང་དུ་འདུ་བའི་ངེས་པ་མེད་ཀྱང༌། ཁྱད་ཆོས་ཕྱོགས་མཐུན་རེའི་སྒོ་ནས་གང་ཡང་རུང་བར་བསྡུས་ཆོག་པར་གསུངས་པ་ལྟར་ན་འདི་ལ་གློ་འབུར་དང་ཐེམ་སྐས་པད་སྤུངས་སོགས་མེད་པས་གཞན་དུ་དོགས་པ་མི་དགོས་ཤིང༌། འདིའི་བང་རིམ་ལ་སྒོ་ཁ་ཤས་ཡོད་ཀྱང་བང་རིམ་བཞི་ཀར་ཆ་མཉམ་དུ་མེད་པས་བྱང་ཆུབ་ཆེན་པོར་གཏོགས་པ་བྱས་ན་ལེགས་སོ། །ཞེས་བྱ་བ་ནི་གསུམ་པ་རྟེན་ཇི་ལྟར་བཞུགས་པའི་མཚན་བྱང་གི་སྐབས་སོ།། །།༈ བཞི་པ་རྟེན་བཞེངས་པའི་ཕན་ཡོན་བརྗོད་པ་ལ། དེ་ཡང་དཔལ་ལྡན་ཟླ་བས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་གསུངས་པ་ལྟར། སྲིད་ཞིའི་འཇིགས་པ་མཐའ་དག་སྒྲོལ་བའི་མགོན་སྐྱབས་གཅིག་པུར་གྱུར་པ་ནི་དཀོན་མཆོག་རིན་པོ་ཆེ་རྣམ་པ་གསུམ་ལས་གཞན་ན་མེད་པས། ཐར་པ་འདོད་པ་རྣམས་ཀྱིས་དེ་ཉིད་གཙུག་རྒྱན་དུ་བཟུང་ནས་བཀུར་སྟི་
རིམ་གྲོ་བྱ་དགོས་ཏེ། ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་འགའ་ཡོད་མ་ཡིན། །ཞེས་གསུངས་སོ། །བཀུར་སྟི་བྱ་བའི་ཚུལ་ཡང་སྟོན་པ་བཞུགས་པའི་དུས་ནས་མཛད་པ་ཁྱད་པར་ཅན་གང་བསྟན་པའི་ས་དེར་མཆོད་རྟེན་བརྩིགས་ནས་དེ་ལ་ཕྱག་མཆོད་སོགས་ཀྱི་དགེ་བ་རླབས་པོ་ཆེ་བསྒྲུབ་པའི་སྲོལ་བཟང་བྱུང་བ་བཞིན། རབ་མཆོད་རྟེན་དང༌། ཐ་ན་སངས་རྒྱས་རྗེས་སུ་དྲན་པའི་ཐབས་ཀྱི་མཚོན་བྱེད་ཅི་རིགས་བྱས་པས་རང་གཞན་གྱི་དོན་མཆོག་ཏུ་འགྱུར་ཏེ། དགེ་བའི་རྩ་བ་ཡོངས་སུ་འཛིན་པའི་མདོ་ལས། ལམ་པོ་ཆེའི་བཞི་མདོ་སྐྱེ་བོ་མང་པོ་འདུ་བའི་སར་མཆོད་རྟེན་དང་ཁང་པ་བརྩེགས་པའམ། རྡོ་བའི་ཀ་བའམ། དེ་བཞིན་གཤེགས་པའི་སྐུའམ། དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད་དེ། ཞེས་སྤྱིར་བསྟན་ནས། འདི་ལྟ་སྟེ་དཔེར་ན། ཆོས་ཀྱི་འཁོར་ལོ་བསྐོར་བའམ། མངོན་པར་འབྱུང་བའམ། བྱང་ཆུབ་ཀྱི་ཤིང་དྲུང་དུ་བདུད་འཇོམས་པའམ། དེ་བཞིན་གཤེགས་པའི་ཆོ་འཕྲུལ་ཆེན་པོའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཆེན་པོ་ཡང་དག་པར་བསྟན་པའམ། ལྷ་ལས་བབས་པའམ། ལྷ་ཡུལ་དུ་མངོན་པར་འཛེགས་པར་བྱེད་པའི་དེ་བཞིན་གཤེགས་པའི་མཆོད་རྟེན་བརྩིགས་པར་བྱེད་པ་ཡིན་ཞེས་མཆོད་རྟེན་གཙོ་བོར་གསུངས། ཁྱད་པར་དུ་མདོ་དྲན་པ་ཉེར་བཞག་ལས། རྟེན་དང་བརྟེན་པ་ལེགས་བསྐྲུན་དང༌། །དགེ་འདུན་གནས་མལ་བཅའ་བ་སོགས། །དགེ་ནས་དགེ་བར་རྟག་ཏུ་འགྱུར། །བསྐལ་པ་བྱེ་བ་སྟོང་དུ་ཡང༌། །
དགེ་བ་ཡོངས་སུ་ཆུད་མི་ཟ། །ཞེས་བརྟེན་པ་སྐུ་གཟུགས་སོགས་དང་རྟེན་ཁང༌པ། དེའི་ཡོ་བྱད་སོགས་གང་བསྒྲུབ་ཀྱང་ཕན་ཡོན་མཐའ་ཡས་པ་འབྱུང་བར་གསུངས་ལ། འདི་ནི་ལུང་ཞུ་བའི་འགྲེལ་པ་དགེ་ལེགས་བཤེས་གཉེན་གྱིས་མཛད་པ་ལས། མཆོད་རྟེན་དེ་ཉིད་གནས་ཡིན་ཏེ། བསོད་ནམས་མཐའ་ཡས་པ་འདུ་བའི་སྒོ་རྒྱས་པར་བྱེད་པའི་གནས་ཡིན་པའི་ཕྱིར་རོ། །ཞེས་དང༌། ཁྱད་པར་དཔལ་གསང་བ་འདུས་པ་ལས། མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཅེས་པ་སྤྱི་དོན་དུ་བཤད་པ་ལྟར། རྟེན་དུ་འགྲོ་བར་མ་ཟད་དངོས་སུ་ཡང་རྟེན་ལྷ་ཁང་དང༌། ནང་དུ་སྐུ་གསུང་ཐུགས་རྟེན། ཕྱི་དབྱིབས་མཆོད་རྟེན་གྱི་རྣམ་པར་ཡོད་པ་ཀུན་གྱི་སྒོ་ནས་རྟེན་དང་བརྟེན་པ་ཐམས་ཅད་བཞེངས་པར་ཡང་འགྲོ་བས། དེའི་ཕན་ཡོན་ནི་མེ་ཏོག་བརྩེགས་པའི་མདོ་ལས། གང་གིས་དེ་བཞིན་གཤེགས་པ་མཐོང་སྟེ་སེམས་དང་བས་མཆོད་པ་དང༌། གང་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་ལ་མཆོད་པ་བྱེད་པ་ནི་རྣམ་པར་སྨིན་པ་མཉམ་པར་ཤེས་པར་བྱ་སྟེ། བྱེ་བྲག་གམ་ཐ་དད་མེད་དོ། །ཞེས་དང༌། དཀོན་མཆོག་བརྩེགས་པ་ལས། གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང༌། ད་ལྟ་བཞུགས་པ་ལ་མཆོད་པ་བྱེད་པ་དེའི་ཕན་ཡོན་རྣམས་ནི་མཚུངས། མཉམ་ཞིང་འདྲའོ་ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་ཆོས་ཀྱི་སྐུའི་རབ་ཏུ་ཕྱེ་བ་ཡིན་གྱི། གཟུགས་ཀྱི་སྐུའི་རབ་ཏུ་ཕྱེ་བ་མ་ཡིན་པའི་ཕྱིར་རོ། །ཞེས་
སངས་རྒྱས་དངོས་སུ་མཆོད་པ་དང་ཁྱད་པར་མེད་པར་གསུངས་ཏེ། དེའི་རྒྱུ་མཚན་གྱིས་ཨ་བྷྱཱ་ཀ་རས་ཐུབ་པ་དགོངས་རྒྱན་ལས། འདིར་སངས་རྒྱས་ནི་གཉིས་ཏེ། དོན་དམ་པ་ནི་སྐུ་གསུམ་གྱིས་ཡང་དག་པར་བསྡུས་པའོ། །ཐ་སྙད་པ་ནི་སྐུ་གདུང་གི་མཆོད་རྟེན་དང་སྐུ་གཟུགས་དང༌། ཞེས་པ་ནས། མཉམ་པར་སེམས་རབ་ཏུ་དྭངས་པའི་རྣམ་པར་སྨིན་པ་མཉམ་པར་གསུངས་སོ། །ཞེས་དང༌། ཀུན་མཁྱེན་འཇམ་དབྱངས་བཞད་པས། སྐུ་འདྲ་དང་སྐུ་གདུང་དེ་མིན་ཀྱང་མཆོད་སོགས་སངས་རྒྱས་དང༌མཉམ་པས་སངས་རྒྱས་ཀྱི་ཐ་སྙད་བྱས། ཞེས་གསུངས་པ་ལྟར་རོ། །དེ་ལྟར་ན་ཉན་རང་དགྲ་བཅོམ་སོགས་ལ་བསྙེན་བཀུར་བ་ལྟ་བུའི་དགེ་རྩ་ཐམས་ཅད་ལས་འདི་ཉིད་ཆེས་ཁྱད་པར་དུ་འཕགས་ཏེ། རྨད་དུ་བྱུང་པའི་མདོ་ལས། འཛམྦུའི་གླིང་དཔག་ཚད་བདུན་སྟོང་ཡོད་པ་དང༌། ལུས་འཕགས་པའི་གླིང་དཔག་ཚད་བརྒྱད་སྟོང་ཡོད་པ་དང༌། བ་ལང་སྤྱོད་དཔག་ཚད་དགུ་སྟོང་པ་དང༌། སྒྲ་མི་སྙན་དཔག་ཚད་སྟོང་ཕྲག་བཅུ་པ་དང༌། ལྷའི་དབང་པོའི་ཁང་བཟང་རྣམ་པར་རྒྱལ་བའི་རྒྱལ་བྱེད་རྣམས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། དད་པས་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་རྣམས་དང༌། ཕྱིར་མི་འོང་བ་རྣམས་དང༌། དགྲ་བཅོམ་པ་རྣམས་དང༌། རང་སངས་རྒྱས་རྣམས་དང༌། ཕྱོགས་བཅུའི་དགེ་སློང་གི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་འཇིམ་པ་ལས་སྐྱུ་རུ་རའི་འབྲུ་ཙམ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏེ། རྒྱ་ཤུག་
གི་ལོ་མ་ཙམ་གྱི་གདུགས་གསོལ་ནས། ནས་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་བཅུག་ན་དེ་ནི་དེ་བས་བསོད་ནམས་ཆེའོ་ཞེས་ང་སྨྲའོ། །ཞེས་དང༌། སའི་སྙིང་པོ་འཁོར་ལོ་བཅུ་པ་ལས་ཀྱང༌། སྟོང་གསུམ་གང་བའི་དགྲ་བཅོམ་པ་རྣམས་ཀྱི་བཅིངས་པ་བཀྲོལ་ཏེ་བསྙེན་བཀུར་བ་བས། སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པ་བསོད་ནམས་མང་བར་གསུངས། ལས་རྣམ་པར་འབྱེད་པའི་མདོར་རྒྱལ་པོའི་རིགས་སུ་སྐྱེ་བ་ནས་མྱ་ངན་ལས་འདས་པའི་བར་གྱི་ཕན་ཡོན་བཅོ་བརྒྱད་གསུངས་ལ། གསལ་རྒྱལ་གྱིས་ཞུས་པ་ལས། ཐུབ་པའི་དབང་པོའི་མཆོད་རྟེན་བཞེངས་པ་ཡིས། །མྱ་ངན་རྣམ་བསལ་ལུས་ཀུན་རྒྱས་པ་དང༌། །གཙོ་བོར་གྱུར་པ་རིན་ཆེན་མཛོད་མང་དང༌། །ས་སྟེང་དགྲ་ཡི་ཚོགས་ལས་རྒྱལ་བར་འགྱུར། །ཞེས་སོགས་གནས་སྐབས་ཀྱི་ཕན་ཡོན་དུ་མ་དང༌། དཀོན་མཆོག་ཏ་ལ་ལས། གཟུགས་རྣམས་སྦྱོང་བའི་འོད་ཟེར་རྣམ་གཏོང་ཞིང༌། །མི་དབང་རྣམས་ཀྱིས་བསམ་ཡས་སྐུ་མཐོང་སྟེ། །སྐུ་གཟུགས་རི་མོ་སྣ་ཚོགས་མང་པོ་དང༌། །མཆོད་རྟེན་བྱས་པས་གཟུགས་སྤྱོད་འོད་འགྲུབ་བོ། །ཞེས་གཟུགས་སྐུ་འགྲུབ་པའི་མཐར་ཐུག་གི་ཕན་ཡོན་བསྟན་ལ། མདོར་ན་གསལ་རྒྱལ་གྱིས་ཞུས་པ་ལས། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམ་པ་རྡུལ་ཕྲན་ཅི་སོང་བ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་ངེས་པར་རྒྱལ་སྲིད་འཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱང་ནས། །ཐ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་
གོ་འཕང་འཐོབ། །ཅེས་གསུངས་པ་བཞིན། མཆོད་རྟེན་རྫོགས་པར་བཞེངས་པ་དང་དེའི་གྲོགས་བྱེད་པ་རྣམས་ལ་གནས་སྐབས་དང་མཐར་ཐུག་གི་ཕན་ཡོན་བསམ་གྱིས་མི་ཁྱབ་པར་མ་ཟད། དེའི་ནང་དུ་འཇིམ་གོང་ཙམ་ཞིག་འཇོག་པ་ཡང་ཕན་ཡོན་ཤིན་ཏུ་ཆེ་བའི་ཚུལ། ལུང་གཞི་ལས། གང་ཞིག་རབ་དྭངས་སེམས་ཀྱིས་སངས་རྒྱས་ཀྱི། །མཆོད་རྟེན་ལ་ནི་འཇིམ་གོང་འཇོག་བྱེད་ན། །ཛམྦུ་ཆུ་བོའི་གསེར་གྱི་གར་བུ་ནི། །སྟོང་ཕྲག་བརྒྱས་ཀྱང་དེ་དང་མཉམ་པ་མིན། །ཞེས་གསུངས་ལ། དེར་མ་ཟད་དམ་ཆོས་པད་དཀར་ལས། བྱིས་པས་རྩེད་མོས་དེ་དང་དེ་དག་ཏུ། །གང་གི་རྒྱལ་བ་དེ་ཕྱིར་མཆོད་རྟེན་དང༌། །བྱེ་མ་ལས་ནི་ཕུང་པོ་བྱས་པ་ཡང༌། །དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར། །ཞེས་དང༌། འཕགས་པ་སངས་རྒྱས་ཀྱི་སྟོབས་བསྐྱེད་པའི་ཆོ་འཕྲུལ་བསྟན་པ་ལས། གང་གིས་དེ་བཞིན་གཤེགས་པ་ལ་མཆོད་པའི་ཕྱིར་བཞད་གད་དམ། ཀུ་རེའམ་བྱིས་པའི་ཀྱལ་ཀའམ། རྩེད་མོར་བྱེད་པས་འཇིམ་པ་ལས་མཆོད་རྟེན་བྱེད་ན། དེ་དག་ཐམས་ཅད་སྡུག་བསྔལ་མཐར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར། ཞེས་རྩེད་མོ་ཚུན་ཆད་ལ་མཆོད་རྟེན་གྱི་རྣམ་པ་བཞེངས་པ་ཡང་ཞིང་གི་མཐུས་ཐར་པའི་རྒྱུར་འགྲོ་བར་གསུངས་ན། དད་པའི་ཀུན་སློང་རྣམ་དག་གི་སྒོ་ནས་དེའི་བྱ་བ་ལ་བརྩོན་པ་ལྟ་ཅི་སྨོས་ཏེ། སློབ་དཔོན་མ་ཏི་ཙི་ཏྲས། གཙུག་ལག་ཁང་གི་དོན་དུ་ནི། །ཚིག་གིས་རབ་ཏུ་བསྐུལ་བ་དང༌། །ཚོགས་པ་ཡི་ནི་གྲོགས་བྱེད་ཅིང༌། །ངེས་པར་ཀུན་ཏུ་འགྲོ་བྱེད་པ། །གཉིད་ལོག་པ་འམ་ལངས་པ་ན། །བསོད་ནམས་རྒྱུན་ནི་ཚད་མེད་འཕེལ། །ཞེས་གསུངས་ཤིང་། ཐ་ན་རྟེན་
བཞེངས་པ་དེའི་བཟའ་བཏུང་གི་ཆ་བྱད་བསྒྲུབ་པ་དང༌། དེའི་རྐྱེན་གྱིས་རྐང་འོག་ཏུ་ཤི་བའི་འབུ་སྲིན་ཕྲ་མོ་ཚུན་ཆད་ཀྱང་འཁོར་བ་མཐའ་ཅན་དུ་འགྱུར་བའི་ཚུལ། པཎྚི་ཏ་ནགས་ཀྱི་རིན་ཆེན་གྱི་གསུང་༸རྒྱལ་དབང་བདུན་པས་རྟེན་དེབ་ཏུ་དྲངས་པ་ལས། སྐུ་གསུང་ཐུགས་ཀྱི་རྟེན་བཞུགས་པའི་དྲི་གཙང་ཁང་དང་གཙུག་ལག་ཁང་དང་གནས་མལ་བཞེངས་པ་ལྟ་ཅི་སྨོས། ཐ་ན་དེ་རྣམས་ཀྱི་སྒོ་ཁྱམས་དང༌། གཡོས་མལ་བྱེད་པའི་ཁང་ཕྲན་ཙམ་བཞེངས་པའི་ཆེད་དུ་གོམ་པ་བདུན་བརྒྱབ་ན་ཡང་ངན་སོང་དུ་མི་འགྲོ་ཞིང་ལྷ་ལུས་འཐོབ་བོ། །དཀོན་མཆོག་གསུམ་བཞུགས་པའི་གནས་གཞི་བཟོ་བ་དེ་ལ་དམིགས་པའི་བཟའ་བཏུང་གི་སྦྱོར་བའི་དུ་བ་ཕོག་པའི་སེམས་ཅན་དང༌། ལས་མིའི་རྐང་འོག་ཏུ་སྲོག་ཆགས་ཤི་བ་རྣམས་ཀྱང་ངན་སོང་གསུམ་གྱི་གནས་སུ་མི་ལྟུང༌། ཕ་ལ་ཕ་ལ། ཞེས་གསུངས་པ་ཡང་རྒྱལ་བའི་བཀའ་ཚད་མར་གྱུར་པའི་ཁུངས་དང་ལྡན་པ་གཞིར་བཅས་ཤིང༌། འདི་དག་སངས་རྒྱས་ཀྱི་མཐུ་བསམ་གྱིས་མི་ཁྱབ་པའི་གནས་ཡིན་པས་ཕལ་བའི་བློར་ཤོང་དཀའ་ཡང་དོན་བསླུ་བ་མེད་དེ། དཔེར་ན་ཁྱིམ་བདག་དཔལ་སྐྱེས་སྔོན་སྲིན་བུར་སྐྱེས་པ་ཆུས་ཁྱེར་ཏེ་མཆོད་རྟེན་ལ་སྐོར་བ་ཞིག་བྱས་པས་ཐར་པའི་ས་བོན་བཞག་ནས་སྟོན་པའི་དྲུང་དུ་དགྲ་བཅོམ་ཐོབ་པར་ལུང་ལས་གསུངས་པ་བཞིན་ནོ། །སྐུ་གཟུགས་བཞེངས་པའི་ཕན་ཡོན་ཡང་ཕལ་ཆེར་མཆོད་རྟེན་དང་ཕྱོགས་མཚུངས་ལྟ་བུར་གསུངས་མོད། འོན་ཀྱང་སྒོས་ཆོས་ཁྱད་པར་བ་དུ་མ་ཡོད་པས་ཟུར་ཙམ་སྨོས་ན། བདེ་མཆོག་སྡོམ་འབྱུང་ལས། སྔགས་པ་ལས་ནི་དང་པོ་བས། །གཟུགས་བརྙན་
ལ་སོགས་བྱ་བ་སྟེ། །བྲིས་སྐུ་སྒྲུབ་ན་མྱུར་བར་ནི། །དངོས་གྲུབ་རྒྱ་ཆེན་ཐོབ་པར་འགྱུར། །ཞེས་ཏིང་འཛིན་སྒྲུབ་པའི་དམིགས་རྟེན་དུ་བསྔགས་ཤིང༌། དེ་བཞིན་གཤེགས་པའི་སྐུ་གཟུགས་ཀྱི་ལེའུ་ལས། གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང༌། དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན། ལས་དེས་སེམས་ཅན་དམྱལ་བ་མྱོང་བ་ཆུང་ངུ་མྱོང་སྟེ་ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །ཞེས་སོགས་ཀྱིས་སྡིག་ལྟུང་འདག་པ་དང༌། དཀོན་མཆོག་སྤྲིན་ལས། བྱང་ཆུབ་སེམས་དཔའ་ཆོས་བཅུ་དང་ལྡན་ན། མངལ་གྱི་དྲི་མས་མ་གོས་པར་སྐྱེའོ། །བཅུ་གང་ཞེ་ན་འདི་ལྟ་སྟེ། དེ་བཞིན་གཤེགས་པའི་སྐུ་གཟུགས་བཞེངས་པ་དང༌། མཆོད་རྟེན་ཞིག་པ་གསོ་བ་དང༌། ཕ་མ་ལ་ལུས་ཀྱིས་རིམ་གྲོ་བྱེད་པ་དང༌། མཁན་པོ་དང་སློབ་དཔོན་ལ་ལུས་ཀྱི་རིམ་གྲོ་བྱེད་པ་དང༌། ཞེས་སོགས་ཀྱིས་མངལ་དུ་མི་སྐྱེ་བར་གསུངས་པས་མཚོན་ཏེ་སྐྱེ་སྒོ་དམན་པ་ཐམས་ཅད་ཁེགས་པར་འགྱུར་བ་དང༌། སྤྱན་རས་གཟིགས་ཀྱི་མདོ་ལས། འདྲེན་པའི་གཟུགས་སྐུ་རབ་ཏུ་མཛེས་བྱས་ན། །དེ་ནི་མཆོག་གྱུར་སྐྱེས་བུ་མང་མཆོད་འོས། །བློ་ལྡན་ཕྱུག་ཅིང་ཆེ་ཉིད་རྒྱ་ཆེར་ལྡན། །དབང་ལྡན་འཁོར་ལོས་བསྒྱུར་བའི་རྒྱལ་པོར་འགྱུར། །ཞེས་སོགས་གནས་སྐབས་ཀྱི་ཕན་ཡོན་དུ་མ་གསུངས་ལ། གཙོ་བོར་གྱུར་པ་ནི། ཏིང་ངེ་འཛིན་རྒྱལ་པོ་ལས། དེ་བཞིན་གསེར་དག་དང་ནི་དངུལ་དག་དང༌། །ཙནྡན་གྱིས་ནི་སྐུ་གཟུགས་བཟང་པོ་དག །མཛེས་ཤིང་ཤིན་ཏུ་ལྟ་ན་སྡུག་པ་བགྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །འཇིམ་པ་དང་ནི་དེ་བཞིན་རྡོ་བ་དང༌། །ཤིང་དང་རི་མོར་
བྲིས་པའི་སྐུ་གཟུགས་དག །ཤིན་ཏུ་མཛེས་ཤིང་ལྟ་ན་སྡུག་པར་བགྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །ཅེས་མྱུར་དུ་ཡང་དག་པའི་ལམ་བཟང་མངོན་དུ་འགྱུར་བ་དང༌། དོན་རྣམ་པར་ངེས་པའི་མདོར། དེ་བཞིན་གཤེགས་པའི་སྐུ་སྲེད་མེད་ཀྱི་བུ་ཆེན་པོ་ལྟ་བུར་ཀུན་ཏུ་མཛེས་པ་འདི་ནི་སྔོན་དེ་བཞིན་གཤེགས་པའི་སྐུ་གཟུགས་བྱས་པ་དང༌། མཆོད་རྟེན་ཞིག་པ་བཅོས་པ་དང༌། གཞན་དག་འཇིགས་པ་དབུགས་དབྱུང་བ་བྱས་པས་འགྲུབ། ཅེས་མཐར་ཐུག་རྒྱལ་བའི་གཟུགས་སྐུ་འགྲུབ་པས་ཐེག་དམན་གྱི་དགེ་རྩ་ཀུན་ལས་ལྷག་པ་ཡང༌། དད་པའི་སྟོབས་བསྐྱེད་པའི་མདོ་ལས། འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་རང་སངས་རྒྱས་དག་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་བྱིན་པ་དང༌། དེ་བཞིན་དུ་ལྷའི་གོས་རྣམས་སྦྱིན་པ་བས། འཇམ་དཔལ། རིགས་ཀྱི་བུའམ་རིགས་ཀྱི་བུ་མོ་གང་ཞིག་སངས་རྒྱས་ཀྱི་སྐུ་གཟུགས་གཅིག་རི་མོར་བྲིས་པ་འདི་ནི་བསོད་ནམས་གྲངས་མེད་པ་བསྐྱེད་དོ། །ཞེས་ཡུལ་སངས་རྒྱས་ལ་བརྟེན་པའི་དགེ་བ་ནི་ངོ་བོ་ཆེ་ཆུང་གང་ཡིན་ཀྱང་འབྲས་བུ་ཟད་པ་མེད་པའི་བླ་མེད་བྱང་ཆུབ་ཀྱི་རྒྱུ་ཁོ་ནར་འགྲོ་བར་གསུངས་ཏེ། དམ་ཆོས་པདྨ་དཀར་པོའི་ཐབས་མཁས་པའི་ལེའུ་གཉིས་པ་ལས་ཀྱང༌། གང་གི་རྩིག་ངོས་གཟུགས་ཀྱི་རི་མོ་དག །བསོད་ནམས་རྒྱལ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང༌། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་བསམ་པ་ཐག་པས་བཞེངས་པ་དང༌། དེར་
མ་ཟད། གང་དག་དེ་ལ་དེ་ནི་སློབ་པའི་ཚེ། །རྩེད་མོ་དག་དང་གསར་པ་བྱེད་པ་ན། །རྩིག་ངོས་སེན་མོས་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་རྩེད་མོ་ཚུན་ཆོད་དུ་བྱས་ན་རང་བྱང་ཆུབ་ཀྱི་ས་བོན་བསྐྲུན་པ་ནི་མཐོང་ཐོས་དྲན་རེག་དོན་ལྡན་དུ་འགྱུར་བའི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་དང༌། སྨོན་གནས་མཁྱེན་པའི་ཏིང་ངེ་འཛིན་གྱི་བྱེད་པ་བླ་ན་མེད་པ་ཡིན་ནོ། །གཞན་ཡང་ཕན་ཡོན་མཐའ་ཡས་པའི་ཚུལ་མཁས་མཆོག་དཔའ་བོའི་སྐུ་གཟུགས་ཀྱི་གཏམ་སོགས་ལས་འབྱུང་ཡང་མ་སྤྲོས་སོ། །དེ་ནས་གསུང་རྟེན་བཞེངས་པའི་ཕན་ཡོན་ཡང་མདོ་རྒྱུད་རང་རང་གི་ནང་དུ་དེ་ཉིད་བྲི་ཀློག་འཛིན་ཅིང་ཆུབ་པ་དང༌། དོན་སེམས་པའི་ཕན་ཡོན་མི་འདྲ་བར་གསུངས་པ་སྨོས་ཀྱིས་མི་ལང་ལ། ཆ་ཤས་ཙམ་མཚོན་ན། རྒྱལ་བ་བྱམས་པས། ཡི་གེ་འདྲི་མཆོད་སྦྱིན་པ་དང༌། །ཉན་དང་ཀློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་བསྒོམ་པ་སྟེ། །སྤྱོད་པ་འདི་བཅུའི་བདག་ཉིད་ཀྱི། །བསོད་ནམས་ཕུང་པོ་གཞལ་དུ་མེད། །ཅེས་ཆོས་སྤྱོད་བཅུའི་བསོད་ནམས་གཞལ་དུ་མེད་པར་གསུངས་པའི་རྩ་བ་འདི་ལ་རག་ལས་ཤིང༌། གཞན་ཡང་གནས་སྐབས་ཀྱི་དབང་དུ་བྱས་ན། རྡོ་རྗེ་སྙིང་པོའི་གཟུངས་ཀྱི་མདོ་ལས། ཡི་གེར་འདྲི་བ་དང༌། གཞན་དག་ལ་ཡང་རྒྱ་ཆེར་སྟོན་པ་དེ་ལ་ཚེ་འདི་ལ་ཡོན་ཏན་ཇི་སྙེད་ཅིག་མཆིས་པར་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་ལ་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་རྣམས་བསྲུང་བར་ཤེས་པར་བྱའོ། །དེ་ཆོས་ཐམས་ཅད་ལ་ཐེ་ཚོམ་མེད་པར་ཤེས་པར་བྱའོ། །ཞེས་
དང༌། དཀོན་མཆོག་ཏ་ལ་ལས། ཆོས་ཀྱི་རྣམ་གྲངས་འདི་ཡི་གེར་འདྲི་བ་དེ་ནི་མིག་ན་བར་མི་འགྱུར། ཞེས་སོགས་མཐོང་བའི་ཆོས་ལས་ནད་གདོན་སོགས་ཀྱི་ཉེར་འཚེ་ཞི་བ་དང༌། སྒོ་མཐའ་ཡས་པར་སྒྲུབ་པའི་གཟུངས་ལས། བླ་མེད་བྱང་ཆུབ་ལ་རེག་བར་དུ་ཡང༌། །དེ་ནི་ཏིང་ངེ་འཛིན་དང་མངོན་ཤེས་དང༌། །གཟུངས་རྣམས་དང་ནི་གཟུགས་དང་ལོངས་སྤྱོད་དང༌། །སངས་རྒྱས་མཐོང་ལས་ཉམས་པར་ཡོང་མི་འགྱུར། །ཞེས་ཚེ་རབས་ཀུན་ཏུ་རྟེན་བཟང་རྣམ་པར་དག་པ་ཐོབ་ཅིང༌། སངས་རྒྱས་མཐོང་བ་དང་མི་འབྲལ་བས་གཟུངས་སྤོབས་སོགས་ཀྱི་ཡོན་ཏན་ཐམས་ཅད་བདེ་བླག་ཏུ་ཐོབ་པར་གསུངས་ལ། མདོར་ན་གཟུངས་དེ་ཉིད་ལས། མདོ་སྡེ་ཐོས་ནས་རྗེས་སུ་ཡི་རང་དང༌། །ཡི་གེར་བྲིས་དང་གཟུང་དང་བཀླགས་པ་ཡི། །བསོད་ནམས་ཕུང་པོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང༌། །དེ་དག་ལ་ཡང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །ཞེས་མཐར་ཐུག་མངོན་པར་འཚང་རྒྱ་བའི་བར་གྱི་ཕན་ཡོན་ཚད་མེད་པ་འབྱུང་བར་གསུངས་སོ། །ཁྱད་པར་དུ་ཐེག་པ་ཆེན་པོའི་སྡེ་སྣོད་རྣམས་ནི་རིགས་ཅན་གསུམ་གྱིས་བསྡུས་པའི་འགྲོ་བ་ཀུན་གྱི་ཕན་བདེ་མ་ལུས་པའི་འབྱུང་གནས་ཡིན་པས་དེ་ལ་བརྟེན་པའི་བསོད་ནམས་ནི་གཞན་གྱི་དགེ་རྩ་ཐམས་ཅད་ལས་ཁྱད་པར་དུ་འཕགས་ཏེ། སྡུད་པ་ལས། ལ་ལས་གངྒཱའི་ཀླུང་གི་ཇི་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་ཀུན་དགྲ་བཅོམ་གྱིས་
བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བྱིན་བསོད་ནམས་ཁྱད་པར་འཕགས། །ཞེས་དང༌། འཕགས་པ་སངས་རྒྱས་ཀྱི་སྟོབས་བསྐྱེད་པའི་ཆོ་འཕྲུལ་བསྟན་པ་ལས། ཛམྦུའི་གླིང་གི་སེམས་ཅན་ཐམས་ཅད་འཕགས་པའི་ལམ་ཡན་ལག་བརྒྱད་པ་ལ་འཇོག་ཅིང༌། བཞག་ནས་ཀྱང་ལྷའི་ལོ་སྟོང་དུ་ཡོ་བྱད་ཐམས་ཅད་ཀྱིས་མཆོད་པ་བས། གང་གིས་ཆོས་ཀྱི་རྣམ་གྲངས་འདི་ལས་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་ཉན་པ་དང༌། འཆང་བ་དང༌། འདྲི་བ་དང༌། འདྲིར་འཇུག་པ་དང༌། གཞན་ལ་རྒྱས་པར་བྱེད་ན་འདི་ཆེས་བསོད་ནམས་མང་དུ་འཕེལ་ལོ། །ཞེས་གསུངས་ཏེ། དེའི་རྒྱུ་མཚན་ཡང༌། སྤྱོད་འཇུག་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲ་འོ། །ཞེས་པ་ལྟར། དམིགས་པ་དང་ཆེད་དུ་བྱ་བ་ཐམས་ཅད་ནམ་མཁའ་དང་མཉམ་པས། ཕན་ཡོན་ཡང་དེ་ལྟར་འབྱུང་ངོ༌། །ཚུལ་དེ་ལྟ་བུའི་སྒོ་ནས་ཐེག་པ་ཆེན་པོའི་མདོ་རྒྱུད་དེ་དག་ཆ་ཚང་བ་ལྟ་ཞོག །ནང་གི་མཚན་རེ་རེ་འཛིན་པ་ལ་ཡང་བྱིན་རླབས་བསམ་གྱིས་མི་ཁྱབ་སྟེ། ཆོས་ཐམས་ཅད་ཀྱི་ཡོན་ཏན་བཀོད་པའི་མདོ་ལས། བཅོམ་ལྡན་འདས། སྤྱན་རས་གཟིགས་དབང་ཕྱུག་གི་མིང་ཙམ་ལ་རྟོགས་པ་གང་ལགས་པ་དེ་ཡང་བསམ་པ་ཐམས་ཅད་ཡོངས་སུ་རྫོགས་པར་འགྱུར་ན། ཡི་གེར་འདྲི་བ་དང༌། གོས་དང་རྒྱུན་གྱི་མཆོད་པ་ཆེན་པོ་དག་གིས་མཆོད་པ་བགྱིད་པ་དང༌། ཡི་གེར་འདྲིར་སྩོལ་བ་ལྟ་ཅི་སྨོས། ཞེས་དང༌། བདེ་མཆོག་རྩ་རྒྱུད་ལས། དེ་བཞིན་ཤྲཱི་ཧེ་རུ་ཀའི། །མཚན་གྱིས་སྡིག་པ་འཇིག་པར་
འགྱུར། །བསམ་གཏན་བསམ་པ་ཙམ་གྱིས་སམ། །ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་ལ། །ཡང་ན་འཁོར་ལོས་བསྒྱུར་བ་འཐོབ། །ཅེས་སོགས་གཟུངས་དང་མཚན་གྱི་ཕན་ཡོན་བསྟན་པ་ཤིན་ཏུ་མང་ངོ༌། །ཕན་ཡོན་དེ་ལྟར་གསུངས་པ་སྔོན་གྱི་དུས་བཟང་པོ་ལ་དགོངས་ཀྱི། སྙིགས་དུས་དེ་ལྟར་མི་འོང་སྙམ་ན་ཤིན་ཏུ་མི་རིགས་ཏེ། སྙིང་རྗེ་པད་དཀར་ལས། མ་འོངས་པའི་དུས་ལྔ་བརྒྱ་པ་ན། ཐ་ན་བྲིས་ཏེ་འཆང་བར་བྱེད་ན། དེ་བསོད་ནམས་ཆེས་མང་དུ་བསྐྱེད་པར་འགྱུར་གྱི། བྱང་ཆུབ་སེམས་དཔའ་གང་དག་བསྐལ་པ་ཆེན་པོ་བཅུའི་བར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པའི་བསོད་ནམས་ཀྱི་ཕུང་པོ་ནི་དེ་ལྟ་མ་ཡིན་ནོ། །ཞེས་སྙིགས་མའི་དུས་ཚུལ་ཁྲིམས་སྣ་རེ་བསྲུང་བ། ཐོས་བསམ་སྣ་རེ་བྱས་པ་ཚུན་ཆད་ལྷག་པར་ཕན་ཡོན་ཆེ་བར་གསུངས་པས། པཎ་ཆེན་ཐམས་ཅད་མཁྱེན་པ་བློ་བཟང་ཡེ་ཤེས་ཀྱི་མྱུར་ལམ་དུ་ལས་སྟོབས་ཆེ་ཆུང་གསུངས་པའི་ཚེ་དུས་ཀྱི་སྟོབས་ཞེས་བསྣན་ནས་གསུངས་པའི་རྒྱུ་མཚན་དེ་ཡིན་ནོ། །ཞེས་བྱ་བ་ནི་བཞི་པ་རྟེན་བཞེངས་པའི་ཕན་ཡོན་གྱི་སྐབས་སོ།། །།༈ ལྔ་པ་རྟེན་ལ་ཕྱག་མཆོད་བྱས་པའི་ཕན་ཡོན་བཤད་པ་ལ། སའི་སྙིང་པོ་འཁོར་ལོ་བཅུ་པའི་མདོ་ལས། འཇིག་རྟེན་དག་ན་བདེ་ཞིང་སྐྱིད་པ། །དེ་ཀུན་དཀོན་མཆོག་མཆོད་ལས་འབྱུང་བས། །དེ་བས་བདེ་ཞིང་སྐྱིད་པ་འདོད་པས། །དཀོན་མཆོག་མཆོད་ལ་རྟག་ཏུ་བརྩོན་བྱ། །ཞེས་སྤྱིར་སྲིད་ཞིའི་ལེགས་ཚོགས་ཐམས་ཅད་དཀོན་མཆོག་མཆོད་པའི་འབྲས་བུར་གསུངས་
ལ། ཁྱད་པར་དུ་མཆོད་པའི་བྱེ་བྲག་མི་འདྲ་བ་དུ་མས་བསྙེན་བཀུར་བ་ལས་ཕན་ཡོན་རྣམ་པ་ཐ་དད་པ་སོ་སོར་འབྱུང་བའི་ཚུལ། རྣམ་འདྲེན་སྟོབས་བཅུ་མངའ་བ་ཉིད་ཀྱིས་ཚངས་པའི་དབྱངས་སུ་བསྒྲགས་པ་ནི་འདི་ལྟར། རྒྱལ་པོ་གསལ་རྒྱལ་ལ་གདམས་པ་ལས། མཆོད་རྟེན་མཆོག་ལ་གདུགས་བརྩེགས་ཕུལ་བ་ཡིས། །ལྷ་དང་མི་ཡི་ནང་དུ་སྐྱེ་བ་དང༌། །སྲེད་མེད་བུ་ཡི་ལུས་འདྲ་ལུས་ཀུན་བརྟན། །བཀུར་སྟི་བྱས་པའི་ཡོན་ཏན་ལྡན་པར་འགྱུར། །ཐུབ་དབང་མཆོད་རྟེན་རྡོ་ཐལ་བྱུགས་པ་ཡིས། །ལྷ་མིའི་འཇིག་རྟེན་དག་ན་ཚེ་རིང་ཞིང་། །ལུས་སེམས་ནད་དང་མྱ་ངན་མེ་སྤངས་ཏེ། །རྟག་ཏུ་སྐྱིད་ཅིང་ནོར་གྱིས་ཕྱུག་པར་འགྱུར། །གསེར་དངུལ་སྤ་བའི་གླེག་མས་གཡོགས་པ་ཡི། །ཐུབ་པའི་དབང་པོའི་མཆོད་རྟེན་བྱས་པ་ཡིས། །མི་རྣམས་སྲིད་པའི་ཁྱད་པར་གཞན་དག་ཏུ། །ལུས་མཁྲེགས་འོད་ཀྱང་འབར་ཞིང་མཛེས་པར་འགྱུར། །སུ་དག་ལ་ལ་མཆོད་རྟེན་སྐུ་གཟུགས་ལ། །དད་པའི་སེམས་ཀྱིས་བླ་རེ་འབུལ་བྱེད་པ། །དེ་དག་ས་སྟེང་རྒྱ་མཚོའི་མཐའ་ཀླས་པ། །མ་ལུས་གནོན་བྱེད་རྒྱལ་གཅིག་དབང་བྱེད་འགྱུར། །བདེ་གཤེགས་མཆོད་རྟེན་དག་ལ་དགའ་བཞིན་དུ། །རྣམ་མང་རྒྱ་ཆེན་གདུགས་ནི་བཏགས་པ་ཡིས། །ལྷ་མིའི་འཇིག་རྟེན་དག་ན་གདུགས་འདྲ་བར། །ལྷ་དང་མི་ཡི་དབང་པོ་ལྟ་བུར་འགྱུར། །མི་རྣམས་སུ་དག་སྐུ་གདུང་སྙིང་པོ་ཅན། །དྲི་མེད་བསོད་ནམས་འབྱུང་གནས་འགྱུར་བ་ལ། །བ་དན་མཛེས་པ་སྣ་ཚོགས་འདོགས་པ་དག །མཐུ་དང་ལྡན་ཞིང་སྲིད་གསུམ་མཆོད་གནས་འགྱུར། །བདེ་གཤེགས་མཆོད་རྟེན་ཅོད་པན་བཏགས་
པ་ཡིས། །མི་དབང་དཔལ་དང་ལྷ་དབང་དཔལ་ཐོབ་ཅིང༌། །བདེ་བའི་མཆོག་ཀྱང་ཉམས་སུ་མྱོང་གྱུར་ནས། །རྣམ་པར་གྲོལ་བའི་ཅོད་པན་ཁྱད་པར་འཐོབ། །རྒྱལ་བའི་མཆོད་རྟེན་དག་ལ་དྲི་ཕུལ་བས། །ཚིག་བཙན་གྲགས་པ་ཆེན་པོ་དག་དང་ལྡན། །ཚངས་པའི་སྒྲ་དབྱངས་ཡིད་འོང་སྐྱེ་བ་དྲན། །དེ་དག་གིས་ནི་རྒྱན་རྣམས་སྣ་ཚོགས་འཐོབ། །མཁས་པ་སུ་དག་བདེ་གཤེགས་མཆོད་རྟེན་ལ། །དད་པའི་སེམས་ཀྱིས་ཕྲེང་བ་འདོགས་བྱེད་པ། །གསེར་ཕྲེང་རིན་ཆེན་མང་པོས་ལེགས་སྤྲས་པ། །བསོད་ནམས་ལས་ལྡན་དེ་ཡི་མགོ་ལ་ཐོགས། །སྟོན་པའི་མཆོད་རྟེན་དག་ལ་རྒྱན་འཕྲེང་འདོགས། །དེ་དག་དོ་ཤལ་རྒྱན་ལྡན་ནོར་བུ་དང༌། །གདུ་བུ་དག་དང་དཔུང་རྒྱན་མཆོག་རྣམས་ཀྱིས། །ལུས་བརྒྱན་འཇིག་རྟེན་དག་ན་རྒྱུ་བར་འགྱུར། །སུ་དག་བདེ་བར་གཤེགས་པའི་མཆོད་རྟེན་ལ། །ས་དང་ལྕི་བས་ཉུག་པ་དེ་དག་ནི། །ལྷ་དང་མིར་སྐྱེ་ལུས་མདོག་སྡུག་པ་དང༌། །རྣམ་དག་རྨ་མེད་བདེ་དང་ལྡན་པར་འགྱུར། །ཐུབ་དབང་མཆོད་རྟེན་བྱི་དོར་བྱས་པ་ཡིས། །ཤིན་ཏུ་ལྟ་ན་སྡུག་ཅིང་མིག་ཏུ་མཛེས། །བྱད་བཞིན་བཟང་ཞིང་པདྨའི་མདོག་དང་ལྡན། །སྲིད་པའི་སྐྱོན་རྣམས་དང་ཡང་བྲལ་བར་འགྱུར། །སུ་དག་སྤོས་མཆོག་སྦར་བའི་འབྲུ་མར་གྱིས། །བདེ་བར་གཤེགས་པའི་མཆོད་རྟེན་ཉུག་བྱེད་པ། །དེ་དག་སྤོས་ཀྱིས་མཆོད་ཅིང་ཙན་དན་གྱིས། །ལུས་བྱུགས་ཉི་མའི་འོད་དང་འདྲ་བར་འགྱུར། །མི་རྣམས་གང་དག་ཐུབ་དབང་མཆོད་རྟེན་ལ། །སྤོས་ཆུ་དྲངས་ཤིང་གཙང་བས་ཁྲུས་གསོལ་བ། །དེ་དག་ལུས་
ལ་དྲི་མ་མེད་པ་དང༌། །གདུང་བ་མེད་ཅིང་མདོག་འཇམ་མྱ་ངན་མེད། །སུ་ཞིག་སངས་རྒྱས་མཆོད་རྟེན་སྐུ་གཟུགས་ཁང༌། །ཚོན་རྩི་སྣ་ཚོགས་རྣམས་ཀྱིས་མཛེས་བྱེད་པ། །དེ་ནི་བདེ་གཤེགས་མངའ་བའི་ཡོན་ཏན་རྣམས། །སྣ་ཚོགས་ལྡན་པ་ཀུན་གྱིས་བརྩེགས་པར་འགྱུར། །ཞེས་དང༌། ལས་རྣམ་པར་འབྱེད་པའི་མདོར། བྲམ་ཟེའི་ཁྱེའུ་ནེ་ཙོ་ལ་བཀའ་སྩལ་པ། བྲམ་ཟེའི་ཁྱེའུ་དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་བཅུ་འདི་དག་སྟེ། བཅུ་གང་ཞེ་ན། རྒྱལ་པོ་ཆེན་པོའི་ཁྱིམ་དུ་སྐྱེ་བ་འཐོབ་པ་དང༌། རྒྱ་ཆེ་བའི་གཟུགས་དང༌། རྒྱ་ཆེ་བའི་གཡོག་འཁོར་དང༌། རྒྱ་ཆེ་བའི་མཆོད་པ་དང་བཀུར་སྟི་དང༌། རྒྱ་ཆེ་བའི་ནོར་དང༌། རྒྱ་ཆེ་བའི་ཐོས་པ་དང༌། རྒྱ་ཆེ་བའི་དད་པ་དང༌། རྒྱ་ཆེ་བའི་དྲན་པ་དང༌། རྒྱ་ཆེ་བའི་ཤེས་རབ་དང༌། རྒྱ་ཆེ་བའི་རྟོགས་པ་འཐོབ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནོ། །ཕྱག་འཚལ་བའི་ཕན་ཡོན་བཅུ་སྟེ། བཅུ་གང་ཞེ་ན། གཟུགས་བཟང་ལ་མདོག་གསེར་གྱི་ཁ་དོག་ལྟ་བུར་འགྱུར་བ་དང༌། མཛེས་ཤིང་མིག་ཏུ་སྡུག་པར་འགྱུར་བ་དང༌། སྐད་སྙན་ཞིང་སྨྲ་བ་སྙན་པར་བཟུང་བའི་ཚིག་ཏུ་འགྱུར་བ་དང༌། བག་ཚ་བ་མེད་པར་འཁོར་གྱི་ནང་དུ་འགྲོ་བ་དང༌། ལྷ་དང་མི་རྣམས་དགའ་བར་འགྱུར་བ་དང༌། གཟི་བརྗིད་ཆེན་པོར་འགྱུར་བ་དང༌། གང་ཟག་ནི་འདི་ལྟ་སྟེ་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་རྣམས་དང༌། སངས་རྒྱས་ཀྱི་ཉན་ཐོས་རྣམས་དང་འགྲོགས་པར་འགྱུར་བ་དང༌། ལོངས་སྤྱོད་ཆེ་བར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། མྱུར་དུ་ཡོངས་སུ་མྱ་ངན་
ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་བའི་ཕན་ཡོན་ནོ། །ཕྱག་དར་བྱས་པའི་ཕན་ཡོན་བཅུ་སྟེ། བཅུ་གང་ཞེ་ན། གཟུགས་བཟང་བ་དང༌། བལྟ་ན་སྡུག་པར་འགྱུར་བ་དང༌། མཛེས་པར་འགྱུར་བ་དང༌། སྐད་སྙན་པར་འགྱུར་བ་དང། དེའི་འདོད་ཆགས་དང་ཞེ་སྡང་དང་གཏི་མུག་སྲབ་པར་འགྱུར་བ་དང་ལམ་དུ་འགྲོ་ན་རྩྭ་དང༌། གསེག་མ་དང༌། གྱོ་མོ་རྣམས་མེད་པར་འགྱུར་བ་དང༌། བཙུན་པའི་རིགས་སུ་སྐྱེ་བར་འགྱུར་བ་དང༌། ལོངས་སྤྱོད་ཆེ་བར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྱག་དར་བྱས་པའི་ཕན་ཡོན་ནོ། །མེ་ཏོག་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་མེ་ཏོག་ལྟ་བུར་འགྱུར་བ་དང༌། སྣའི་དབང་པོ་ནམ་ཡང་ཉམས་པར་མི་འགྱུར་བ་དང༌། ལུས་ཀྱི་དྲི་ང་བ་རྣམ་པར་དག་པར་འགྱུར་བ་དང༌། དྲི་ཞིམ་པོ་འབྱུང་བར་འགྱུར་བ་དང༌། ཕྱོགས་དང་ཕྱོགས་མཚམས་སུ་དེའི་ཚུལ་ཁྲིམས་ཀྱི་དྲི་ངད་ལྡང་བར་འགྱུར་བ་དང༌། འཇིག་རྟེན་གྱིས་མངོན་དུ་འགྲོ་བར་འགྱུར་བ་དང༌། སྡུག་པའི་ཆོས་རྣམས་ཐོབ་པར་འགྱུར་བ་དང༌། ལོངས་སྤྱོད་ཆེ་བར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་ནོ། །མར་མེ་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་མར་མེ་ལྟ་བུར་འགྱུར་བ་དང༌། ཤའི་མིག་རྣམ་པར་དག་པར་འགྱུར་བ་དང༌། ལྷའི་མིག་འཐོབ་པར་འགྱུར་བ་དང༌། དགེ་བ་
དང་མི་དགེ་བའི་ཆོས་རྣམས་ལ་ཤེས་རབ་འབྱུང་བར་འགྱུར་བ་དང༌། མ་རིག་པ་དང་གཏི་མུག་གི་མུན་པ་སེལ་བ་དང༌། ཤེས་རབ་ཀྱི་སྣང་བ་ཐོབ་པར་འགྱུར་བ་དང༌། དེ་འཁོར་བ་ན་འཁོར་བའི་ཚེ་ནམ་དུ་ཡང་མུན་པ་ན་གནས་པར་མི་འགྱུར་བ་དང༌། ལོངས་སྤྱོད་ཆེ་བར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། །མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་ནོ། །སྤོས་ཕུལ་བའི་ཕན་ཡོན་བཅུ་སྟེ། བཅུ་གང་ཞེན། འཇིག་རྟེན་ན་སྤོས་ལྟ་བུར་འགྱུར་བ་དང༌། སྣའི་དབང་པོ་རྣམ་པར་དག་པར་འགྱུར་བ་དང༌། ལུས་ཀྱི་དྲི་མི་ཞིམ་པ་རྣམ་པར་དག་པར་འགྱུར་བ་དང༌། རྟག་ཏུ་དྲི་ཞིམ་པར་འགྱུར་བ་དང༌། འཇིག་རྟེན་གྱིས་མངོན་དུ་འགྲོ་བར་བྱ་བར་འགྱུར་བ་དང༌། ལོངས་སྤྱོད་ཆེ་བར་འགྱུར་བ་དང༌། མཐོ་རིས་སུ་སྐྱེ་བར་འགྱུར་བ་དང༌། སྡུག་པའི་ཆོས་རྣམས་ཐོབ་པར་འགྱུར་བ་དང༌། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་སྤོས་ཕུལ་བའི་ཕན་ཡོན་ནོ། །ཞེས་སོགས་མཆོད་པའི་ཁྱད་པར་རང་རང་གི་ཐུན་མོང་མ་ཡིན་པའི་ལག་རྗེས་འགྲུབ་ཚུལ་སོ་སོར་གསུངས་ལ། ཐུན་མོང་དུ་བསྟན་པ་ཡང༌། འཕགས་པ་བྱམས་པའི་མདོ་ལས། མར་མེ་སྟོང་ཕྲག་གཅིག་གམ། མེ་ཏོག་ཕུལ་བ་སྟོང་ཕྲག་གཅིག་གམ། ཨུཏྤ་ལ་སྔོན་པོ་སྟོང་ཕྲག་གཅིག་གིས་མཆོད་པ་བྱེད་པ་དང༌། མཆོད་རྟེན་དེ་དག་གི་ཏོག་བྱེད་པ་དང་སྐུ་གཟུགས་བྱེད་པ་དེ་དག་ནི་བྱམས་པ་སངས་རྒྱས་པ་དེའི་ཚེ་དེའི་དྲུང་དུ་སྐྱེ་ཞིང་དང་པོའི་ཆོས་ཐོབ་པར་འགྱུར་རོ། །ཞེས་པ་ནས། མེ་ཏོག་སྙིམ་གང་ཙམ་མམ། མར་མེ་གཅིག་
ཙམ་འབུལ་བའམ། གཞན་དག་བསོད་ནམས་བྱེད་པ་ལ་རྗེས་སུ་ཡི་རང་བ་སྟེ། དགེ་བ་འདི་དག་བྱེད་པའི་ལྷ་དང་མི་རྣམས་ཀྱིས་ཡང་དག་པར་རྫོགས་པའི་སངས་རྒྱས་བྱམས་པ་མཐོང་བར་འགྱུར་རོ། །ཞེས་བསྟན་པ་འདི་ལ་དེ་ལྟ་བུའི་དགེ་རྩ་བསྒྲུབས་པ་རྣམས་སྐབས་འདིར་མ་གྲོལ་ཡང༌། བྱམས་པའི་འཁོར་གྱི་ཐོག་མར་སྐྱེས་ནས་སྨིན་ཅིང་གྲོལ་བར་གསུངས་པ་དང༌། གཞན་ཡང་འཇམ་དཔལ་རྩ་རྒྱུད་ལས། སྤོས་དང་དྲི་དང་བྱུག་པ་ཡིས། །མཆོད་བྱ་བསྙེན་བཀུར་བྱ་བ་དང༌། །རྣམ་པ་སྣ་ཚོགས་གོས་མཆོག་དང༌། །གཞན་ཡང་ནོར་བུའི་གདུབ་ཀོར་རྒྱན། །རྣམ་པ་སྣ་ཚོགས་བཅའ་དང་བཟའ། །ཡང་དག་སྦྱར་བ་དབུལ་བར་བྱ། །རྣམ་པ་སྣ་ཚོགས་ཕུན་སུམ་ཚོགས། །ཅི་འདོད་ཁ་ཟས་བྱས་པ་ལ། །དེ་བཞིན་སྔགས་ནི་བཟླས་བྱས་དབུལ། །སེམས་ཅན་དགེ་བའི་སྐྱེ་གནས་འགྱུར། །དམ་པའི་འགྲོ་བའི་སྐྱེ་གནས་སུ། །གྲོང་མཆོག་དག་ཏུ་སྐྱེ་བར་འགྱུར། །མཐར་ནི་བྱང་ཆུབ་གཞོལ་འགྱུར་ཞིང༌། །ཕྱིས་ནི་ཞི་བར་ཡང་དག་འགྲོ། །ཞེས་དང༌། རིན་ཆེན་ཕྲེང་བ་ལས། གསེར་དང་རིན་ཆེན་དྲ་བ་དང༌། །ཉིད་ཀྱིས་མཆོད་རྟེན་རྣམས་ལ་ཐོགས། །གསེར་དང་དངུལ་གྱི་མེ་ཏོག་དང༌། །རྡོ་རྗེ་བྱུ་རུ་མུ་ཏིག་དག །ཨནྜ་རྙིལ་དང་བཻ་ཌཱུརྻ། །མཐོན་ཀ་ཆེན་པོས་མཆོད་རྟེན་མཆོད། །ཅེས་དང༌། ཡང་དེ་ཉིད་ལས། མཆོད་རྟེན་མར་མེ་ཕྲེང་བ་དང༌། །མུན་ཁང་དག་ཏུ་སྒྲོན་མེ་དང༌། །མར་མེ་འབྲུ་མར་བྱིན་པ་ཡིས། །ལྷ་ཡི་མིག་ནི་ཐོབ་པར་འགྱུར། །མཆོད་རྟེན་མཆོད་པར་རོལ་མོ་དང༌། །དྲིལ་བུ་དག་ནི་ཕུལ་བ་དང༌། །དུང་དང་རྔ་ནི་རབ་ཕུལ་བས། །ལྷ་ཡི་རྣ་བ་ཐོབ་
པར་འགྱུར། །ཞེས་སོགས་མདོ་རྒྱུད་བསྟན་བཅོས་དུ་མ་ནས་གསུངས་པ་བསམ་གྱིས་མི་ཁྱབ་ལ། ཁྱད་པར་དྭངས་ཤིང་བསིལ་བའི་ཡོན་ཆབ་གཙང་མ་ཕུལ་ན་ཤེས་རྒྱུད་ཀྱི་སྡིག་ལྟུང་སྦྱངས་ཏེ་ས་ལམ་གྱི་རྟོགས་པ་སྐྱེ་བའི་དགོས་པ་ཆེ་ཞིང་བསྒྲུབ་སླ་ལ། སེར་སྣ་སོགས་ཀྱི་ཉེས་པ་མི་འཇུག་པས་བླ་མ་གོང་མ་རྣམས་ཀྱིས་གཙོ་བོར་མཛད། དེ་བཞིན་དུ་ཁྲུས་གསོལ་བྱེད་པ་ཡང་དཀོར་དང་ལས་སྒྲིབ་སོགས་ཀྱིས་ཤེས་རྒྱུད་རྙོག་པའི་དབང་གིས་ཉམས་ལེན་ཚུལ་བཞིན་མི་འོང་བ་སེལ་བའི་ཐབས་ལ་མཆོག་ཏུ་བསྔགས་ཏེ། དཔལ་ལྡན་དཔའ་བོས། ཁྲུས་གསོལ་གང་ཞིག་མཆོད་བྱེད་ན། །དེ་དག་རྙོག་པ་ཐམས་ཅད་ཀྱི། །དྲི་མ་བཀྲུས་ནས་ཐར་པ་འཐོབ། །ཅེས་དང༌། གསལ་རྒྱལ་གྱི་མདོ་ལས། མི་རྣམས་གང་དག་ཐུབ་དབང་མཆོད་རྟེན་ལ། །སྤོས་ཆུ་གཙང་ཞིང་དྭངས་པས་ཁྲུས་གསོལ་བ། །དེ་དག་ལུས་ལ་དྲི་མ་མེད་པ་དང༌། །གདུང་བ་མེད་ཅིང་མདོག་འཇམ་མྱ་ངན་མེད། །ཅེས་གསུངས་པ་ལྟར་རོ། །དེ་བཞིན་དུ་སྤྱན་རས་གཟིགས་ཀྱི་མདོ་ལས། འཇིག་རྟེན་མགོན་པོ་སྐྱོབ་པ་ལ། །དར་གྱི་དབུལ་བ་ཕུལ་བྱས་ནས། །ལྷ་ཡི་དག་དང་མི་རྣམས་ཀྱི། །དོན་རྣམས་ཐམས་ཅད་འགྲུབ་པར་འགྱུར། །ཞེས་སྙན་ཤལ་དང༌། ཟ་མ་ཏོག་ལྟ་བུའི་གཏམ་ལས། མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང༌། །སྣ་ཚོགས་ནད་ཀྱི་འཇིགས་ལས་སྒྲོལ། །གང་ཡིན་དེ་ཡིས་སྐད་ཅིག་འཐོབ། །བདེ་གཤེགས་མཎྜལ་བྱེད་དེ་དག །ཕ་རོལ་ཕྱིན་དྲུག་ཐོབ་འགྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེད་པ་བཟོད་པ་ཡིན། །འབད་པ་བྱེད་པ་བརྩོན་འགྲུས་
ཡིན། །སྐད་ཅིག་དེ་ལ་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོབ་པ་ཤེས་རབ་བོ། །ཞེས་མཎྜལ་ཕུལ་བའི་ཕན་ཡོན་བཤད་ལ། གསང་འདུས་རྩ་རྒྱུད་ལས། ཞིང་འདི་རིན་ཆེན་ཞེས་སོགས་དང༌། སྤྱོད་འཇུག་ལས། ནམ་མཁའ་རབ་འབྱམས་ཞེས་སོགས་ཀུན་གྱིས་བསྟུན་ཅིང༌། བླ་མ་ལྔ་བཅུ་པར་དུས་དྲུག་ཏུ་འབུལ་དགོས་པར་གསུངས་པ་སོགས་ཤིན་ཏུ་མང༌། ཁྱད་པར་དུ་མར་མེ་འབུལ་བ་ནི་ཚོགས་རྫོགས་ཤིང་བྱིན་རླབས་མྱུར་དུ་འཇུག་པའི་རྟེན་འབྲེལ་གྱི་སྒོ་ཁྱད་པར་ཅན་ཡིན་པས། བདེ་མཆོག་རྩ་རྒྱུད་ལེའུ་གཉིས་པར། གལ་ཏེ་དངོས་གྲུབ་མཆོག་འདོད་ན། །མར་མེ་བརྒྱ་ནི་དབུལ་བར་བྱ། །ཞེས་དང༌། དེའི་འོག་ཏུ་ཡང༌། གལ་ཏེ་དངོས་གྲུབ་མཆོག་འདོད་ན། །དྲི་དང་མེ་ཏོག་དེ་བཞིན་སྤོས། །ཆོ་ག་བཞིན་དུ་དེ་བཞིན་མཆོད། །མར་མེ་བརྒྱ་ཡང་འབུལ་བྱ་ཞིང༌། །ཞེས་མར་མེ་བརྒྱ་སྔ་ཕྱིར་ལན་གཉིས་གསུངས་པ་ཕྱི་ནང་གི་ཁྱད་དམ། མར་མེ་གཙོ་ཆེ་བའི་དོན་དུ་སྦས་དོན་ཀུན་གསལ་ལས་གསུངས་ཏེ། ད་ལྟ་བརྒྱ་མཆོད་དུ་གྲགས་པ་ཡང་ཁུངས་འདི་འདྲ་ལ་བརྟེན་པར་མངོན་ནོ། །དེ་དག་གིས་མཚོན་ཏེ་གདུགས་རྒྱན་བླ་བྲེ་བ་དན་རྔ་ཡབ་དྲིལ་བུ་བདུག་སྤོས་ཞལ་ཟས་ལ་སོགས་པ་ཕུལ་བ་དང༌། དེའི་སྟེང་གི་བརྒྱ་བསལ་བ། ཞིག་རལ་བཅོས་པ། ཕྱག་དར་བྱས་པ། རྡོ་ཐལ་བྱུགས་པ། ཆག་ཆག་བཏབ་པ་སོགས་སོ་སོའི་རྣམ་སྨིན་འབྱིན་ཚུལ་ཞིབ་ཏུ་ཤེས་པར་འདོད་ན་སྤྱན་རས་གཟིགས་ཀྱི་མདོ། གསལ་རྒྱལ་གྱི་མདོ། དཀོན་མཆོག་ཏ་ལ་སོགས་སུ་བལྟའོ། །ཕྱག་འཚལ་བའི་ཕན་ཡོན་བཅུ་གོང་དུ་བཤད་པ་དེ་
ཡིན་ལ། གཞན་ཡང་འདུལ་བ་ལུང་ལས། དགེ་སློང་དག །དགེ་སློང་འདིས་འདི་ལྟར་སྐྲ་དང་སེན་མོའི་མཆོད་རྟེན་ལ་ཡན་ལག་ཐམས་ཅད་ཀྱིས་ཕྱག་འཚལ་ཏེ་སེམས་དང་བར་བྱེད་པ་ལ་ལྟོས། བཙུན་པ་དེ་ལྟ་ལགས་སོ། །དགེ་སློང་དག །དགེ་སློང་འདིས་ས་ཇི་ཙམ་ནོན་པའི་འོག་དཔག་ཚད་བརྒྱད་ཁྲི་བཞི་སྟོང་ན་གསེར་གྱི་འཁོར་ལོ་ལ་ཐུག་གི་བར་ན་བྱེ་མ་ཇི་སྙེད་ཡོད་པ་དེ་སྙེད་དུ། དགེ་སློང་འདིས་འཁོར་ལོས་བསྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་འགྱུར་རོ། །ཞེས་དང༌། སྨན་མདོ་བརྒྱད་བརྒྱ་པ་ལས། བཅོམ་ལྡན་འདས་དེ་བཞིན་གཤེགས་པ་སྨན་གྱི་བླ་བཻ་ཌཱུརྻའི་འོད་དེ་ལ་ཕྱག་འཚལ་ཞིང་མཆོད་པ་སྣ་ཚོགས་བྱེད་ན། དེ་དག་ངན་སོང་གསུམ་གྱི་སྡུག་བསྔལ་མེད་པར་ཤེས་པར་བྱའོ། །ཞེས་སོགས་རྒྱ་ཆེར་གསུངས་སོ། །འོན་ཀྱང་ཕན་ཡོན་མདོ་རྒྱུད་ནས་བཤད་པ་ཇི་ལྟ་བ་བཞིན་འབྱུང་བ་ལ་ཕྱག་འཚལ་ཚུལ་གྱི་ཀུན་སློང་ཀུན་སྤྱོད་ཚུལ་ལྡན་དགོས་ཤིང༌། དེ་ཡང་མདོ་སྡེ་རྣམས་སུ་སྡོང་པོ་རྩ་བ་ནས་བཅད་པ་བཞིན་ལུས་ཐམས་ཅད་ས་ལ་ཕབ་སྟེ་ཕྱག་བྱ་བར་གསུངས་པ་ད་ལྟའི་བརྐྱང་ཕྱག་ཏུ་གྲགས་པ་འདི་ཡིན་པས། དེ་བྱུང་ན་མཆོག་དང༌། ཡང་ན་མདོ་རྩ་བ་ལས། ཕྱག་ནི་རྣམ་པ་གཉིས་ཏེ། ཡན་ལག་ལྔས་ཕྱག་བཙལ་བ་དང༌། སྒྱིད་པ་ལ་འཁྱུད་པས་བཙལ་བའོ། །ཞེས་གསུངས་པའི་ཕྱི་མ་བོད་འདིར་ཆེར་མ་དར་ཀྱང༌། སྔ་མ་བྱེད་པ་ལ་ལག་པའི་མཐིལ་གཉིས། པུས་མོའི་ལྷ་ང་གཉིས། དཔྲལ་བ་སྟེ་ལྔ་ཀ་ས་ལ་རེག་པ་དགོས་པས། ཕྱག་གཅིག་བཙལ་ན་ཡང་གནད་དུ་འགྲོ་ངེས་ཤིག་གལ་ཆེ། དེ་ཡང་རྣམ་སྨིན་རྒྱ་ཆེ་ཆུང་དང༌། དུས་མྱུར་བུལ་ཤིན་ཏུ་མི་འདྲ་བ་མ་གཏོགས།
ཞིང་གི་མཐུ་ལ་བརྟེན་པའི་སྟོབས་ཀྱིས་གུས་པའི་རྣམ་འགྱུར་ཅུང་ཟད་ཙམ་ཞིག་བྱས་པ་དང༌། ངག་ནས་གཡམ་ལ་རྒྱུག་པ་ལྟ་བུས་ཕྱག་འཚལ་ལོ་ཞེས་བརྗོད་པ་ཚུན་ཆད་ཀྱིས་ཤེས་རྒྱུད་ལ་ཐར་པའི་ས་བོན་བཞག་ནས་འཁོར་བ་མཐའ་ཅན་དུ་བྱེད་པ་ཡིན་ཏེ། མདོ་སྡེ་པད་དཀར་ལས། མཆོད་རྟེན་དེ་ལ་གང་གི་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་འདུད་པ་དང༌། །དེ་བཞིན་ལན་ཅིག་ལུས་ཀྱང་འདུད་པ་དང༌། །གང་གི་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང༌། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་གསུངས་ཤིང༌། ཐ་ན་ལྟ་བ་ལོག་པ་འཛིན་པའི་གང་ཟག་ལྟ་བུས་དེ་མཐོང་བ་ལ་བརྟེན་ནས་མི་དགའ་བ་སྐྱེས་ན་དེའི་འབྲས་བུ་སྡུག་བསྔལ་དྲག་པོ་མྱོང་ཡང༌། ཞར་ལ་འབྲེལ་བཞག་པ་དེས་ནམ་ཞིག་ན་རྗེས་སུ་འཛིན་པའི་རྒྱུར་འགྱུར་བ་དཔེར་ན་བཟོད་པར་སྨྲ་བའི་ཡན་ལག་བཅད་པའི་ལོ་རྒྱུས་སོགས་སྐྱེས་རབས་རྣམས་སུ་འབྱུང་བ་བཞིན་ཡིན་ཏེ། སྐུ་གསུང་ཐུགས་ཀྱི་རྟེན་འདི་དག་སངས་རྒྱས་ཀྱི་འཕྲིན་ལས་ཀྱིས་བསྐྲུན་པ་ཤ་སྟག་ཡིན་པས་དགོས་པ་དེ་ལྟ་བུ་ཞིག་མེད་ན་དེ་དག་ལ་སྟོན་པར་མི་འགྱུར་ཞིང་། མངོན་རྟོགས་རྒྱན་ལས། གྲོང་སོགས་སུ་དེའི་ཉོན་མོངས་རྣམས། །རྒྱུན་གཅོད་རྒྱལ་བའི་ཉོན་མོངས་མེད། །ཅེས་ཉོན་མོངས་མེད་པའི་ཁྱད་པར་གསུངས་པས་ཀྱང་འགྲུབ་བོ། །འདི་དག་རྟོག་གེའི་བློ་ཡུལ་དུ་ཤོང་དཀའ་བའི་གནས་ཡིན་ཀྱང༌། པད་དཀར་ལས། བདེ་གཤེགས་གཟུགས་ནི་རྩིག་ངོས་བྲིས་པ་ལ། །འཁྲུགས་
བཞིན་པ་ཡི་སེམས་ཀྱིས་བལྟས་ན་ཡང༌། །དེ་དག་རིམ་གྱིས་སངས་རྒྱས་བྱེ་བ་མཐོང༌། །ཞེས་དང༌། སྙིང་རྗེ་པད་དཀར་ལས། ཀུན་དགའ་བོ་གང་དག་ཐ་ན་རྨི་ལམ་དུ་དེ་བཞིན་གཤེགས་པའི་མཆོད་རྟེན་མཐོང་ནས་སེམས་དང་བར་བྱེད་ན། ཀུན་དགའ་བོ་དགེ་བའི་རྩ་བ་དེའི་འབྲས་བུ་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པ་ཀླས་ཤིང་མྱ་ངན་ལས་འདས་པའི་མཐས་གཏུགས་པར་འགྱུར་བར་ང་སྨྲའོ། །ཞེས་ཚད་མར་གྱུར་པའི་ལུང་ལས་གསུངས་པས། བསམ་མི་ཁྱབ་ཀྱི་གནས་ལ་བསམ་མི་ཁྱབ་དེ་ཉིད་རྒྱུ་མཚན་དུ་བྱས་ནས་ཡིད་ཆེས་པར་བྱེད་དགོས་ཏེ། འཆི་མེད་རྔ་སྒྲའི་གཟུངས་ལས། བསམ་མི་ཁྱབ་ལ་དད་བྱས་ན། །རྣམ་པར་སྨིན་པའང་བསམ་མི་ཁྱབ། །ཅེས་གསུངས་ཤིང༌། དེ་བཞིན་དུ་སྤྱན་རས་གཟིགས་ཀྱི་མདོ་ལས། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སངས་རྒྱས་ཀྱི་ཆོས་ཐམས་ཅད་ཚད་མེད་པ་དེ་བཞིན་དུ། དེ་བཞིན་གཤེགས་པ་ལ་ཡོན་ཕུལ་བ་ཡང་ཚད་མེད་དོ། །མཐའ་ཡས་སོ། །བསམ་གྱིས་མི་ཁྱབ་བོ། །མཚུངས་པ་མེད་དོ། །དཔག་ཏུ་མེད་དོ། །གྲངས་མེད་དོ། །ཞེས་དང༌། ལུང་ཕྲན་ཚེགས་ལས། ཟླ་བ་སྐར་མར་བཅས་པ་ས་ལ་ལྷུངས་ཀྱང་སྲིད། །ས་འདི་རི་དང་ནགས་ཚལ་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། །ཞེས་གསུངས་པ་རྣམས་ཡིད་ལ་བཅངས་ཏེ་བདེ་ལེགས་ཐམས་ཅད་ཀྱི་རྩ་བ་ལས་འབྲས་ལ་ཡིད་ཆེས་ཀྱི་དད་པ་དང༌། དཀོན་མཆོག་རིན་པོ་ཆེ་རྣམ་པ་གསུམ་གྱི་ཐུགས་རྗེ་བྱིན་རླབས་ལ་མོས་པ་དྲག་པོ་བསྐྱེད་དེ་ལོ་ཟླ་ཞག་ཤས་ཀྱི་གཡར་པོ་ལྟ་བུའི་ལུས་དང་ལོངས་སྤྱོད་
ཀྱི་སྟེང་ནས་ཞིང་ས་ཁྱད་པར་ཅན་ལ་ས་བོན་ཅི་ཐེབས་ཀྱི་སྙིང་པོ་བླངས་པའི་ཕྱི་ཉིན་མཚན་ཀུན་ཏུ་འབད་པར་བྱའོ། །ཞེས་བྱ་བ་ནི་ལྔ་པ་ཕྱག་དང་མཆོད་པའི་ཕན་ཡོན་གྱི་སྐབས་སོ།། །།༈ དྲུག་པ་སྐོར་བ་བྱེད་ཚུལ་ཕན་ཡོན་དང་བཅས་ཏེ་བཤད་པ་ལ། ཐོག་མར་བསྐོར་བ་བྱ་བ་འདི་དགོས་ཆེད་ཅི་ཞིག་ཏུ་གཏོགས་པ་ཡིན་ཤེས་དགོས་པས། དེ་ནི་བློ་གྲོས་བསྟན་པའི་རྒྱན་གྱི་འགྲེལ་བཤད་ལས། དེ་བཞིན་གཤེགས་པ་མཆོད་པ་ལ་རྣམ་པ་གཉིས་ཏེ། ཟང་ཟིང་གིས་མཆོད་པ་དང༌། སྒྲུབ་པས་མཆོད་པའོ། །ཟང་ཟིང་གིས་མཆོད་པ་ལ་ཡང་རྣམ་པ་གཉིས་ཏེ། རྙེད་པས་མཆོད་པ་དང༌། བཀུར་སྟིས་མཆོད་པའོ། །དེ་ལ་ཆོས་གོས་དང་ལྷུང་བཟེད་ལ་སོགས་པ་ཕུལ་བ་ནི་རྙེད་པས་མཆོད་པའོ། །ཕྱག་འཚལ་བ་དང་བསྐོར་བ་བྱེད་པ་ལ་སོགས་པ་ནི་བཀུར་སྟིས་མཆོད་པའོ། །ཞེས་སྐྱབས་ཡུལ་རྣམས་ལ་བཀུར་སྟི་བྱ་བའི་ཡན་ལག་ཏུ་གསུངས་སོ། །དེ་ལ་ཕན་ཡོན་ཇི་ལྟར་འབྱུང་བའི་ཚུལ་ནི། མཆོད་རྟེན་བསྐོར་བ་ཞེས་བྱ་བའི་མདོ་ལས། མཆོད་རྟེན་བསྐོར་བ་བྱས་པས་ནི། །མི་ཁོམ་བརྒྱད་རྣམས་སྤོང་བར་འགྱུར། །ལྷ་དང་དེ་བཞིན་མི་རྣམས་ཀྱི། །ཚེ་རིང་བ་ཡང་དེ་ཡིས་འཐོབ། །ཤ་ཟ་དང་ནི་སྲིན་རྣམས་ཀྱིས། །དེ་ལ་གནོད་པར་མི་འགྱུར་རོ། །བསྐལ་པ་བརྒྱར་ཡང་དེ་དག་རྣམས། །ཞར་དང་གྲུམ་པོར་ཡོངས་མི་འགྱུར། །མཆོད་རྟེན་བསྐོར་བ་བྱས་པས་ནི། །སྟོབས་དང་བརྩོན་འགྲུས་ཕུན་སུམ་ཚོགས། །དེ་ནི་ལེ་ལོ་མེད་པ་དང༌། །ཤིན་ཏུ་སྒྲུབ་པ་ཐོབ་པར་འགྱུར། །མཆོད་རྟེན་བསྐོར་བ་བྱས་པས་ནི། །མངོན་ཤེས་དྲུག་
ལྡན་ཟག་པ་མེད། །ཉོན་མོངས་ཐམས་ཅད་སྤངས་པ་ཡི། །དགྲ་བཅོམ་རྫུ་འཕྲུལ་ཆེན་པོར་འགྱུར། །མཆོད་རྟེན་བསྐོར་བ་བྱས་པས་ནི། །འཇིག་རྟེན་དག་ཏུ་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང༌། །གསེར་གྱི་སྐུ་མདོག་ཐོབ་པར་འགྱུར། །ཞེས་སོགས་དང༌། སྤྱན་རས་གཟིགས་ཀྱི་མདོ་ལས། འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱེད་པ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །མཆོད་རྟེན་བསྐོར་བ་བྱས་ན་ནི། །ཚེ་རབས་དག་ནི་ཐམས་ཅད་དུ། །ལྷ་དང་ཀླུ་དང་གནོད་སྦྱིན་དང༌། །སྲིན་པོ་རྣམས་ཀྱིས་མཆོད་པར་འགྱུར། །ངས་ནི་གང་དག་བསྟན་པ་ཡི། །མི་ཁོམ་བརྒྱད་པོ་དེ་དག་སྤོང༌། །འཇིག་རྟེན་སྒྲོན་མ་མཉེས་བྱས་ནས། །ཡང་དང་ཡང་དུ་བསྟི་སྟང་བྱེད། །བདག་མེད་སྟོང་པའི་ཆོས་ཐོས་ན། །དེ་ནི་ཆོས་ལ་རྨོངས་མི་འགྱུར། །མྱུར་དུ་དད་པ་ཐོབ་འགྱུར་ཞིང༌། །ཆོས་དོན་ཇི་བཞིན་མཁས་པར་འགྱུར། །འཇིག་རྟེན་མགོན་གྱི་མཆོད་རྟེན་ལ། །མི་གང་བསྐོར་བ་བྱེད་པ་ཡི། །བསྔགས་པ་བསྐལ་པ་བྱེ་བར་ཡང༌། །བརྗོད་པས་ཟད་པར་བྱ་མི་ནུས། །ཞེས་དང༌། གསལ་རྒྱལ་ལ་གདམས་པ་ལས། སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་བསྐོར་བ་བྱེད་པ་དེ། །ཕྱི་མའི་ཚེ་ན་དགྲ་ཆེན་རྣམས་ཀྱིས་བཏུད། །བཟང་པོའི་སྣོད་གྱུར་ཡོན་ཏན་རྣམས་དང་ལྡན། །མི་རྣམས་སུ་དག་དགའ་ཞིང་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་ནི། །སྲིད་པ་ཀུན་ཏུ་
མཛོད་རྣམས་ཤིན་ཏུ་རྒྱས། །ཞེས་སོགས་གནས་སྐབས་དང་མཐར་ཐུག་གི་ཕན་ཡོན་བསམ་གྱིས་མི་ཁྱབ་པ་གསུངས་ལ། ཁྱད་པར་སྒྲིབ་སྦྱོང་གི་མཆོག་ཏུ་གྱུར་པས་ངན་འགྲོའི་སྐྱེ་སྒོ་ཁེགས་ཚུལ། མེ་ཏོག་བརྩེགས་པའི་གཟུངས་ལས། དགའ་བའི་སེམས་ཀྱིས་གོམ་པའི་གར་སྟབས་འགའ་བོར་ཏེ། སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ཞེས་སྨྲ་བ་དེ་དག་ནི་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་ཕྲག་སྟོང་དུ་ཡང་ངན་འགྲོ་ལོག་པར་ལྟུང་བའི་གནས་མེད་དོ། །ཞེས་དང་། གསང་བ་རིང་བསྲེལ་གྱི་ཟ་མ་ཏོག་ལས། སེམས་ཅན་གང་དག་མཆོད་རྟེན་དེ་ལ་བསྐོར་བ་གཅིག་གམ། ཕྱག་འཚལ་བ་གཅིག་གིས་མནར་མེད་པ་ལ་ཐུག་པའི་བར་ལ་སོགས་པ་རྣམས་ལས་ཡོངས་སུ་ཐར་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཞེས་གསུངས་སོ། །དེ་ཡང་སྒོ་གསུམ་བག་མེད་པའི་འཕྱར་གཡེང་དང་ངག་ཀྱལ་མི་དགེ་བའི་རྣམ་རྟོག་སོགས་ཀྱི་དབང་དུ་འགྲོ་བཞིན་པར་བསྐོར་བ་བྱས་ཀྱང་ཕན་ཡོན་དེ་ཙམ་མི་འབྱུང་ལ། ལུས་ཀྱི་སྤྱོད་ལམ། ངག་གི་བཟླས་བརྗོད། ཡིད་ཀྱི་དད་གུས་གསུམ་ག་ཚོགས་པའི་སྒོ་ནས་བྱས་ན་ལུས་ངག་ཡིད་གསུམ་གའི་དགེ་སྦྱོར་ཚང་བས་དོན་ཤིན་ཏུ་ཆེ་སྟེ། མཆོད་རྟེན་བསྐོར་བའི་མདོ་ལས། ལུས་ཀྱི་ལས་ཀྱང་བསྐོར་བ་ཡིན། །ངག་གི་ལས་ཀྱང་བསྐོར་བ་ཡིན། །ཡིད་ཀྱི་ལས་ཀྱང་བསྐོར་བ་ཡིན། །སྨོན་ལམ་བཏབ་པའང་བསྐོར་བ་ཡིན། །ཞེས་གསུངས། དེ་ལ་དགོངས་ཏེ་སྔོན་ཇོ་བོ་ཨ་ཏི་ཤ་རྒྱུན་དུ་
བསྐོར་བ་མཛད་པ་ལ། དགེ་བཤེས་སྟོན་པ་རིན་པོ་ཆེས། དགེ་སྦྱོར་བཞུགས་ནས་མི་མཛད་པར་བསྐོར་བ་ཉི་ཚེ་མཛད་པ་ཇི་ལྟར་ལགས་ཞུས་པས། ཁྱོད་ཀྱིས་མ་གོ་བ་ཡིན། འདི་ལ་ལུས་ངག་ཡིད་གསུམ་གའི་ལས་ཡོད་པ་ཡིན། བསྒོམ་པ་ལ་གཅིག་ལས་མེད། འདི་ལས་ལས་འཁོས་ཆེ་བ་མེད་གསུངས་པ་དང༌། ཡང་འདུ་བྱས་ཀྱི་དགེ་རྩ་ལ་བསྐོར་བ་ལས་བསོད་ནམས་ཆེ་བ་མེད། ལུས་ངག་ཡིད་གསུམ་གྱི་ལས་གསུམ་གས་བསྐོར་བ་ཡིན། རྒྱ་གར་ན་གྲོང་ཁྱེར་ཆེན་པོ་ལ་བསྐོར་བ་བྱས་པས་དངོས་གྲུབ་ཐོབ་པ་དང༌། གཙུག་ལག་ཁང་ལ་བསྐོར་བ་བྱས་པས་དངོས་གྲུབ་ཐོབ་པ་དང༌། ཁ་སཔར་ཎིའི་ལྷ་ཁང་ལ་བསྐོར་བ་བྱས་པས་དངོས་གྲུབ་ཐོབ་ཅིང་ནད་སོས་པ་སོགས་ཀྱི་གཏམ་རྒྱུད་མང་དུ་ཡོད་གསུང༌། དེའི་སྟོབས་ཀྱིས་བཀའ་གདམས་པ་ལ་བསྐོར་བའི་སྲོལ་དར་ཤོས་ཆེ་ཞིང༌། འབྲོམ་རིན་པོ་ཆེ་ཡང་རྒྱུན་དུ་བསྐོར་བ་མཛད་དོ། །ཕྱིས་ཞབས་ཀྱི་མི་ལྕོགས་པ་ན་ཁྱོགས་ནས་ཀྱང་བསྐོར་བ་གསུམ་གསུམ་མ་ཆག་པར་མཛད་ཅེས་བཀའ་གདམས་གོང་མའི་གསུང་སྒྲོས་ལས་འབྱུང༌། དེས་ན་སེམས་ཡེང་མ་ཡེང་དུ་མ་སོང་བར་ཡིད་ཀྱིས་དད་པའི་ཀུན་སློང་ཤུགས་དྲག་པོ་གསལ་འདེབས་པ་ནི་རྩ་བ་ཡིན་ཏེ། འདུལ་བ་ལུང་གཞི་ལས། མཁས་པ་གང་ཞིག་རབ་ཏུ་སེམས་དང་བས། །སངས་རྒྱས་མཆོད་རྟེན་ལ་ནི་གོམ་འདོར་ན། །ཛམྦུའི་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་ཡིན། །ཞེས་སོ། །དེའི་ཚེ་ངག་གིས་བཟླས་བརྗོད་སོགས་ལ་འབད་དགོས་པ་ཡང༌། ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མེད་ལས། ཚེས་བརྒྱད་དང་བཅུ་བཞིའམ། བཅོ་ལྔ་ལ་ཡིད་བཞིན་གྱི་ནོར་བུ་རིན་པོ་ཆེའི་གཟུངས་སྔགས་འདི་གཉིས་ལན་བརྒྱ་རྩ་བརྒྱད་
བཟླས་བརྗོད་བྱས་ཤིང་རིང་བསྲེལ་དང་བཅས་པའི་མཆོད་རྟེན་ལ་བསྐོར་བ་བྱས་ན་འཕྲལ་དུ་སྡིག་པའི་དྲི་མ་དང་ཉོན་མོངས་པ་ཐམས་ཅད། འདོད་ཆགས་དང༌། ཞེ་སྡང་དང༌། གཏི་མུག་གི་དྲི་མ་དང༌། སེར་སྣ་དང་ཕྲག་དོག་དང་བྲལ་བར་འགྱུར་རོ། །ཞེས་དང༌། དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་ལ་བསྐོར་བ་བྱའོ། །ཡིད་བཞིན་གྱི་ནོར་བུ་རིན་པོ་ཆེ་འདི་གཉིས་ཀྱང་དུས་གཅིག་ཏུ་དྲན་པར་བྱའོ། །དེ་ནི་གངྒཱའི་ཀླུང་བྱེ་བ་ཕྲག་ཁྲིག་ཕྲག་འབུམ་གྱི་བྱེ་མ་སྙེད་ཀྱི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པར་འགྱུར་རོ། །བསོད་ནམས་ཆེན་པོ་དང་ལྡན་པར་འགྱུར་རོ། །མཚམས་མེད་པ་ལྔའི་ལས་ཀྱི་སྒྲིབ་པ་རྣམས་ཡོངས་སུ་བྱང་བར་འགྱུར་རོ། །སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་གྱི་ངན་སོང་རྣམས་ལས་ཡོངས་སུ་ཐར་པར་འགྱུར་རོ། །ཚེ་རིང་པོར་འགྱུར་རོ། །སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །ཞེས་གསུངས་ལ། འདིར་བསྟན་པའི་གཟུངས་གཉིས་ནི། ཨོཾ་ན་མ་སྟྲཻ་ཡ་དྷཱིཀཱ་ནཱཾ། སརྦ་ཏ་ཐཱ་ག་ཏ་ཧྲྀ་ད་ཡ་གརྦྷེ་ཛྭ་ལ་ཛྭ་ལ། དྷརྨ་དྷ་ཏུ་གརྦྷེ་སཾ་བྷ་ར་མ་མ་ཨ་ཡུཿ སཾ་ཤོ་དྷཱ་ཡ་སཾ་ཤོ་དྷཱ་ཡ་སརྦ་པཱ་པཾ་སརྦ་ཏ་ཐཱ་ག་ཏ་སནྟོཥྞཱི་ཥ་བི་མ་ལ་བི་ཤུདྡྷེ། ཧཱུཾ་ཧཱུཾ་ཧཱུཾ་ཧཱུཾ། ཨཾ་བཾ་སཾ་ཛ་སྭཱཧཱ། ཞེས་དང༌། ན་མཿ སརྦ་ཏ་ཐཱ་ག་ཏ་ཎཱཾ། མཧཱ་ཙིནྟཱ་མ་ཎི་ཛྭ་ལ་ཞེས་སོགས་ཀྱི་གཟུངས་རིང་གཉིས་ཡིན་ཞིང༌། གཞན་ཡང་དེ་བཞིན་གཤེགས་པ་རིན་ཆེན་རྒྱལ་མཚན་གྱི་མཚན་དང༌། ན་མོ་བྷ་ག་ཝ་ཏེ། རཏྣ་
ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་རཏྣེ་རཏྣེ་མཧཱ་རཏྣེ། རཏྣེ་བི་ཛ་ཡེ་སྭཱཧཱ། ཞེས་དང༌། ཨོཾ་ན་མོ་ད་ཤ་དིཀ་ཏྲི་ཀཱ་ལ་སརྦ་རཏྣ་ཏྲ་ཡཱ་ཡ། ན་མཿ པྲ་དཀྵ་སུ་པྲ་དཀྵ། སརྦ་པཱ་པཾ་པ་བི་ཤོ་དྷ་ནི་སྭཱཧཱ། ཞེས་པའི་གཟུངས་འདི་གཉིས་ཀྱིས་ཀྱང་སྐོར་བ་སྟོང་འགྱུར་དུ་འགྲོ་བ་སོགས་ཕན་ཡོན་མཐའ་ཡས་པར་གསུངས། གཞན་ཡང་བཀའ་གདམས་གོང་མའི་མན་ངག་ལས་བསྐོར་བ་རྟེན་བཅས་རྟེན་མེད་གཉིས་གསུངས་པས། རྟེན་བཅས་འདི་ལྟ་བུ་ལ་མཚོན་ན་འདིར་བཞུགས་པའི་སྐུ་བརྙན་རྣམས་ཀྱི་མཛོད་སྤུ་དང༌། གླེགས་བམ་གྱི་ཡིག་འབྲུ་མཆོད་རྟེན་གྱི་བུམ་པ་སོགས་ནས་འོད་ཟེར་འཕྲོས། བླ་མ་ཡི་དམ་སངས་རྒྱས་བྱང་སེམས་ཉན་རང་ཆོས་སྲུང་ཕྱོགས་གཞན་གྱི་སྐུ་གསུང་ཐུགས་རྟེན་ལ་སོགས་པ་ཐམས་ཅད་སྤྱན་དྲངས་ཏེ་རྟེན་འདི་རྣམས་ལ་ཐིམ་པར་མོས་ཤིང༌། རང་གི་ལུས་བརྒྱ་སྟོང་ཁྲི་འབུམ་སོགས་སུ་སྤྲུལ་བར་མོས། ངག་ཏུ་གཟུངས་དེ་རྣམས་བརྗོད་བཞིན་པར་སོང་ན་ཕན་ཡོན་བསམ་གྱིས་མི་ཁྱབ་ཅིང༌། གནས་ཆེན་ཐམས་ཅད་བསྐོར་བ་བྱས་པར་འགྲོའོ། །རྟེན་མེད་ནི་སྐུ་གསུང་ཐུགས་རྟེན་དངོས་སུ་མེད་པའི་ཐང་སྟོང་ལྟ་བུར་ཡང་སྐོར་བ་བྱེད་འདོད་ན། བྷྲུཾ་སེར་པོ་ལས་བྱུང་བའི་དཔག་བསམ་གྱི་ཤིང་ཡངས་ཤིང་རྒྱ་ཆེ་བའི་སྟེང་དུ་སྐྱབས་ཡུལ་ཐམས་ཅད་བཞུགས་པར་མོས་ལ་བཟླས་པ་སོགས་སྔ་མ་བཞིན་དུ་བྱས་པས་བསོད་ནམས་རླབས་པོ་ཆེ་འཐོབ་བོ། །གཟུངས་དེ་དག་བློར་མི་ཟིན་ན་གཟུངས་སྔགས་ཟབ་མོ་གང་ཤེས་ཀྱིས་རུང་ལ། ཁྱད་པར་རང་ཅག་ཁ་བའི་ལྷ་སྐལ་སྤྱན་རས་གཟིགས་ཀྱི་གཟུངས་ལ་འབད་ན་བྱིན་རླབས་མྱུར་བས་ཤིན་ཏུ་ལེགས་ཏེ།
ཆོས་རྒྱལ་སྲོང་བཙན་སྒམ་པོའི་བཀའ་འབུམ་ལས། བསྐོར་བའི་རྣལ་འབྱོར་ནི། ཐུགས་རྗེ་ཆེན་པོའི་སྐུ་གཅིག་ལ། ཕྱི་ལྟར་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། ནང་ལྟར་ན་བརྒྱུད་པའི་བླ་མ་ཐམས་ཅད། གསང་བ་ལྟར་ན་ཡི་དམ་མཁའ་འགྲོ་ཐམས་ཅད་བསྟིམ་ལ། ཨོཾ་མ་ཎི་པདྨེ་ཧཱུཾ། ཞེས་བཟླས་ཤིང་བསྐོར་བ་བྱའོ། །རྟེན་ལས་འོད་བྱུང་ནས་རང་ལ་ཕོག་པས་སྡིག་སྒྲིབ་ཐམས་ཅད་བྱང་བར་བསམ་ལ་བསྐོར་བ་བྱའོ། །ཞེས་གསུངས་པ་ལྟ་བུ་རེ་མ་མཐའ་ཡང་དགོས་སོ། །ཁ་ཅིག་ཕྱག་མཆོད་བསྐོར་བ་ལ་སོགས་པ་འདི་དག་ཆོས་ཟབ་མོ་ཉམས་ལེན་མི་ཤེས་པའི་ཕལ་བ་རྣམས་ལ་བསྔགས་པ་ཡིན་གྱི། བློའི་ནུས་པ་ཤིན་ཏུ་ཆེ་བ་རྣམས་ལ་འདི་མི་དགོས་སྙམ་པ་གཏན་ནས་མི་རུང་སྟེ། མདོ་སྡེ་ས་བཅུ་པ་ལས། དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བ་འོད་ཤིན་ཏུ་གསལ་བ་ཞེས་བྱ་བ་བྱེད་དེ། མཆོད་པ་དང་རིམ་གྲོ་བྱེད་པ་དེ། སེམས་དང་པོ་བསྐྱེད་པ་ཡན་ཆད། ས་དགུ་པ་ཐོབ་པའི་བར་དག་གིས་དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱས་པའི་བརྒྱའི་ཆར་ཡང་ཉེ་བར་མི་འགྲོ། ཞེས་སོགས་ཀྱིས་ས་གོང་མ་གོང་མའི་སྐབས་སུ་ལུས་ངག་གི་དགེ་སྦྱོར་ཡང་ཆེས་གོང་འཕེལ་དུ་འགྲོ་བར་གསུངས་ཤིང༌། བྱང་ས་ལས་ཀྱང༌། བྱང་ཆུབ་སེམས་དཔའ་དེ་དེ་བཞིན་གཤེགས་པའམ། དེ་བཞིན་གཤེགས་པའི་མཆོད་རྟེན་ལ་ན་བཟའ་དང༌། ཞལ་ཟས་དང༌། གཟིམས་ཆས་དང༌། གདན་དང༌། བསྙུན་གྱི་གསོས་སྨན་དང༌། ཡོ་བྱད་རྣམས་དང༌། གུས་པར་སྨྲ་བ་དང༌། ཕྱག་འཚལ་བ་དང༌། སྔོན་དུ་ལྡང་བ་དང༌། ཐལ་མོ་སྦྱར་བ་དང༌།
ཞེས་པ་ནས། བྱང་ཆུབ་སེམས་དཔའི་མཆོད་པ་རྣམ་པ་བདུན་རྒྱ་ཆེན་པོ་ཞེས་བྱའོ། །ཞེས་ཕྱག་མཆོད་བསྐོར་བ་སོགས་རྒྱལ་སྲས་ཀྱི་ཉམས་ལེན་རྨད་དུ་བྱུང་བར་གསུངས་སོ། །ལ་ལ་རྒྱུད་ཀྱི་རྡོ་རྗེའི་ཚིག་འགའ་ཞིག་གིས་དགོངས་པ་མ་ཕྱེད་པར་གསང་སྔགས་པས་འདི་འདྲ་མི་དགོས་པར་སྨྲ་བ་ཡང་ལོག་པར་རྟོག་པ་ཡིན་ཏེ། རྗེ་མི་ལས། ང་རེས་འགའ་འགྲོ་ཞིང་འགྲོ་ཞིང་བསྒོམ། །འགྲོ་ཞིང་འགྲོ་ཞིང་བསྒོམ་ཙ་ན། །འགྲོ་འདུག་བསྐོར་བར་ཤེས་པའི་གདམས་ངག་ཡོད། །ཅེས་གསུངས་པ་ལྟ་བུ་གྲུབ་ཆེན་དུ་མས་གསུངས་ཚུལ་དང་ལོ་རྒྱུས་མང་དུ་ཡོད་ལ། མཧཱ་ར་ཏ་ཞེས་སོགས་ཀྱི་སྔགས་དོན་ལྟར་སྔགས་རང་ལམ་ལ་བསྐོར་བ་བྱེད་ཚུལ་ཐུན་མོང་བ་ལས་ཀྱང་ཆེས་ཟབ་ཏུ་བཏང་ནས་བྱེད་དགོས་པ་ཡིན་ནོ། །བསྐོར་ཚད་ནི་༸རྒྱལ་དབང་བདུན་པའི་གསུང་ལས། བསྐོར་བའི་ཚད་ཇི་ཙམ་དུ་བྱ་བ་ནི་མཐའ་གཅིག་ཏུ་ངེས་པ་བཟུང་དུ་མ་མཆིས་ཀྱང༌། དེང་སང་སྐོར་འབུམ་དུ་གྲགས་པ་ལྟར་གྱིས་གཞལ་ན། ཞེས་གསུངས་པ་ལྟར། རང་རང་གི་འབད་པས་ནུས་ཚད་དུ་བྱེད་པ་ལས་གྲངས་ཀྱི་ངེས་བཟུང་ལ་ཆེར་མི་ལྟོས། འོན་ཀྱང་སྔོན་འགྲོ་ཁྲིད་ཆེན་བཞིའི་སྐབས་སུ་ཕྱག་འབུམ་མཎྜལ་འབུམ། ཡིག་བརྒྱ་འབུམ་སོགས་གསུངས་པའི་རིགས་འགྲེ་སྦྱར་ཏེ་རྟེན་གཙོ་གང་ལ་གཞལ་བ་དེར་གྲངས་འབུམ་ཕྲག་གཅིག་འགྲོ་བའི་ཚོད་ལ་སྐོར་ཚད་དུ་གྲགས་པ་ལྟར་ན། རྟེན་གཙོ་འོད་དཔག་མེད་ཀྱི་པད་གདན་ལ་གཞལ་ཏེ། དེ་ཉེར་ལྔའི་འགྱུར་གྱིས་སེང་ཁྲིའི་འགྲམ་འཁོར་བས། མཆོད་རྟེན་རང་ལ་བསྐོར་བ་བཞི་སྟོང་བྱས་ཚེ་གཙོ་བོ་ལ་འབུམ་ཕྲག་གཅིག་གི་ཚོད་འཁྲོལ་དང་བཅས་ཏེ་འགྲོའོ། །དེ་ལྟར་ཕྱག་མཆོད༌
བསྐོར་བ་སོགས་ཀྱི་དགེ་བའི་ཆ་ཤས་ཕྲ་མོ་རེ་ལ་ཡང་ཕན་ཡོན་མཐའ་ཡས་དེ་ལྟ་བུ་འབྱུང་བ་ནི་མངོན་པ་ཀུན་བཏུས་སུ་བསམ་མི་ཁྱབ་ཀྱི་གནས་བཞི་གསུངས་པ་ལས། ལས་དང་འབྲས་བུའི་འབྲེལ་བ་བསམ་གྱིས་མི་ཁྱབ་པ་དེ་ཉིད་ཡིན་པས། སྐྱེ་བོ་བློ་གྲོས་མཆོག་ཏུ་གྱུར་པའི་དབང་རྣོན་རྣམས་ཆོས་ཉིད་ཀྱི་རིགས་པའི་སྒོ་ནས་ལེགས་པར་ངེས་པ་དྲངས་ཏེ་ཆོས་ཀྱི་རྗེས་སུ་འབྲང་བའི་དད་པ་ཕྱིར་མི་ལྡོག་པ་བསྐྱེད་ན་བྱིན་རླབས་དང་དངོས་གྲུབ་ཤིན་ཏུ་མྱུར་རོ། །འོན་ཀྱང་དབང་པོ་རྣོ་བར་རློམ་པ་རིགས་ལམ་འཆར་སྐྱེན་པ་ལྟར་སྣང་ཡང༌། དོན་གྱི་གཏིང་མི་དཔོག་པར་རྟོག་གེའི་རིགས་པ་ལྟར་སྣང་དུ་མས་གཡེང་སྟེ་ཟབ་མོའི་ཆོས་ལ་ཡིད་མི་ཆེས་པ་ནི། རྒྱན་གྱི་འགྲེལ་པ་རྣམས་སུ་སྤོབས་པ་མྱུར་བའི་སྦྱོར་སྐྱོན་བཤད་པ་བཞིན་ཤེས་རབ་འཆལ་བྱེད་དང་དངོས་གྲུབ་ཀྱི་གེགས་ཡིན་པས། དེ་ལས་དབང་པོ་རྟུལ་པོའི་ལུགས་ཀྱི་ཡིད་ཆེས་པའི་ལུང་གི་རྗེས་སུ་འབྲང་སྟེ་དད་པ་བསྐྱེད་ན་བྱིན་རླབས་མྱུར་ཏེ། གཤིན་རྗེའི་གཤེད་ཀྱི་རྒྱུད་རྟོག་པ་གསུམ་པ་ལས། ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་མྱུར། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་སྦྱོར་བའི་དངོས་གྲུབ་རིང༌། །ཞེས་དང༌། ཏིང་ངེ་འཛིན་རྒྱལ་པོ་ལས། རི་དང་ནགས་བཅས་ས་འདི་གས་འགྱུར་ཞིང༌། །རྒྱ་མཚོའི་ཆུ་དག་དེ་བཞིན་འཕོ་འགྱུར་ལ། །ཟླ་བ་ཉི་མ་ས་ལ་ལྷུང་གྱུར་ཀྱང༌། །རྒྱལ་བས་བཤད་པ་རྣམ་པ་གཞན་མི་འགྱུར། །ཞེས་གསུངས་པ་
བཞིན་རྒྱལ་བའི་བཀའ་དྲི་མ་མེད་པ་རྣམས་ནས་ལན་གཅིག་མ་ཡིན་པར་ཡང་དང་ཡང་དུ་གསུངས་པ་ལ་ཐེ་ཚོམ་མེད་པའི་དད་པ་རྩེ་གཅིག་ཏུ་བསྐྱེད་དེ། དེས་ཀུན་ནས་བསླང་བའི་ཕྱག་དང་མཆོད་པ། གསོལ་འདེབས་བཟླས་བརྗོད་བསྐོར་བ་སོགས་ལ་འབད་ན་ཇི་སྐད་དུ་༸རྒྱལ་དབང་བདུན་པ་བསྐལ་བཟང་རྒྱ་མཚོས། གནས་སྐབས་མཐར་ཐུག་དོན་གཉིས་མུཀྟིཀ། །འབད་མེད་སྟེར་བའི་ལེགས་བྱས་བསྐོར་བའི་ལས། །དགེ་ཚོགས་རྣམ་དཀར་ཉ་ལྕིབས་ཁོག་ཡངས་པོར། །བཀང་བའི་འགྲོ་རྣམས་འདི་དང་ཕྱི་མར་འཚེངས། །ཞེས་གསུངས་པ་ལྟར། འདི་ཕྱི་ཀུན་གྱི་ལེགས་ཚོགས་མ་ལུས་པར་ལྷུན་གྱིས་གྲུབ་པ་ཞིག་འབྱུང་ངོ༌། །ཞེས་བྱ་བ་ནི་དྲུག་པ་བསྐོར་བ་བྱེད་ཚུལ་ཕན་ཡོན་དང་བཅས་པའི་སྐབས་སོ།། །།༈ བདུན་པ་དགེ་བའི་དངོས་པོ་རྫོགས་པའི་བྱང་ཆུབ་ཏུ་བསྔོ་བས་རྒྱས་གདབ་པ་ནི། ཨོཾ་སྭ་སྟི། བདེན་ཚིག་གྲུབ་པའི་འཁོར་ལོ་རྩིབས་སྟོང་གིས། །ཕུན་ཚོགས་གསེར་ལྡན་ཡོངས་ལ་དབང་འབྱོར་བ། །རྒྱལ་དང་རྒྱལ་སྲས་ཉན་རང་རིག་པ་འཛིན། །མཐའ་དག་ལེགས་སྨོན་འགྲུབ་པའི་མགོན་མཛོད་ཅིག །བསམ་སྦྱོར་མི་དམན་བརྩོན་པའི་ཆུ་བོ་བརྒྱ། །ལེགས་བྱས་རྫིང་བུར་གཅིག་ཏུ་འཁྱིལ་བ་གང༌། །མངོན་མཐོ་ངེས་པར་ལེགས་པའི་ཕྱོགས་གང་དུ། །བགྲོད་པ་བསྔོ་བའི་འཇུག་ངོགས་སྲོལ་ལ་བརྟེན། །གསེར་སྦྱངས་གར་བུ་གཅིག་གི་ཆ་ཤས་ལས། །རྣམ་པ་ཐ་དད་བསྒྲུབ་པའི་བཟོ་བོ་བཞིན། །དགེ་བ་དམན་འབྲིང་མཆོག་གི་འབྲས་ལྡན་དུ། །བསྒྱུར་བའི་མངའ་བདག་འགྲོ་ན་གཞན་ཡོད་མིན། །དེ་ཕྱིར་བདག་སོགས་མཁའ་མཉམ་འགྲོ་བའི་ལས། །
རྣམ་པར་དཀའ་བའི་ཕྱོགས་སུ་སྣང་ངོ་ཅོག །དོན་མེད་འཁོར་བའི་ལམ་དུ་མི་ལྟུང་བར། །རྣམ་གྲོལ་རྒྱུ་ཡི་སྲད་བུར་བསྟར་གྱུར་ཅིག །མདོ་རྒྱུད་འཁྲུལ་བྲལ་གསེར་སྦྱངས་ཁམས་ལས་གྲུབ། །བསླབ་གསུམ་བཅུད་ལྡན་བསྟན་པའི་ཀཱ་ལ་ཤ །སྲི་ཞུའི་མགུལ་ཆིངས་གཡོ་བ་དང་བཅས་པས། །འགྲོ་ཀུན་གཙུག་ཏོར་རྩེ་ནས་དབང་སྦྱིན་ཤོག །ཁྱད་པར་དགེ་ལྡན་རིང་ལུགས་གསེར་གྱི་རྔ། །ཁོར་ཡུག་སྲིད་དུ་བརྡུང་བའི་སྒྲ་བོ་ཆེས། །མ་རྟོགས་ལོག་རྟོག་འཁྲུལ་བའི་དཔུང་ཚོགས་ལས། །རྣམ་པར་རྒྱལ་བའི་དགའ་བ་མཚོན་གྱུར་ཅིག །བརྗོད་པ་མ་ནོར་རྐྱེན་དང་རྣམ་འགྱུར་གྱི། །འཕང་འགྲོའི་ལྟོ་བར་སྤེལ་ལེགས་སྡེབ་སྦྱོར་དུ། །དྲངས་པའི་སྙན་ཚིག་རྒྱུད་སྟོང་འཁྲོལ་བ་ལས། །སྒྲ་རིག་དབྱངས་ཀྱི་དཀྱིལ་འཁོར་རྫོགས་གྱུར་ཅིག །ཕྱོགས་གླང་གྲགས་པའི་གཞུང་ལུགས་འོད་མའི་གཞུ། །རྣམ་དཔྱོད་འདོམ་གྱིས་ཉེར་གཞལ་རིགས་པའི་མདས། །རྒོལ་ངན་ལྟ་བ་ལོག་པའི་འབེན་བཤིག་པ། །གཏན་ཚིགས་རིག་པའི་ལུས་རྩལ་འབྱོངས་གྱུར་ཅིག །ལུས་བཟོ་ཀུན་ཕན་ལས་ཀྱི་གྲུ་ཆར་འབེབས། །ངག་བཟོ་འདེགས་འཇོག་འགྱུར་ཁུག་སྒྲ་བརྒྱ་རྒོད། །ཡིད་བཟོ་རྣམ་དཔྱོད་འཕྲུལ་གྱི་གློག་འགྱུ་བའི། །བཟོ་རིག་སྤྲིན་སྔོན་ཕུང་པོ་འཁྲིགས་གྱུར་ཅིག །ཆགས་སྡང་རྨོངས་པའི་མུན་ནག་ཚང་ཚིང་ནས། །གདུངས་པའི་དུག་རླངས་མི་བཟད་སྤྲོ་བ་ཡི། །རླུང་མཁྲིས་པད་ཀན་ནད་རིམས་གདུག་པའི་སྦྲུལ། །གསོ་རིག་མཁའ་ལྡིང་དཔུང་བས་གཞོམ་གྱུར་ཅིག །ལས་ཉོན་བག་ཆགས་ནག་པོ་བརྩེགས་
པ་ཡིས། །ཡོངས་སུ་ཟིན་པའི་གདུང་བ་རབ་བཅིལ་ཏེ། །རྣམ་གྲོལ་ཟག་མེད་དགའ་བའི་མཆོག་སྦྱིན་པ། །ནང་དོན་རིག་པའི་བདུད་རྩི་མྱོང་གྱུར་ཅིག །འཆད་མཁས་ཚིག་དོན་ཆ་ཤས་ཡོངས་གང་ཞིང༌། །རྩོད་ངག་དྲི་མེད་རིགས་པའི་འོད་དཀར་སྤྲོ། །རྩོམ་པའི་ཉམས་འགྱུར་རི་དྭགས་མཚན་མ་ཅན། །སྨྲ་བའི་ཟླ་བ་ཚར་དུ་དངར་བར་ཤོག །ཚུལ་ཁྲིམས་ཡོན་ཏན་ཚོགས་ཀྱི་ཆུ་འཛིན་ཀློང༌། །ཏིང་འཛིན་གློག་འཕྲེང་དྲ་བ་འཇུག་ཅིང་ལྡང༌། །ཤེས་རབ་ཟབ་མོའི་འབྲུག་སྒྲ་རོལ་བ་ཡི། །གྲུབ་དབང་བྱེ་བས་ཐུབ་བསྟན་མཁའ་ཁྱབ་ཤོག །རང་ཁྱིམ་གསལ་བའི་མེ་ཁྱེར་ཙམ་མིན་པར། །རིས་མེད་འཁོར་ལོ་གསུམ་གྱི་འོད་སྣང་ཅན། །རྒྱལ་བསྟན་སྤྱི་ལ་དགོངས་པའི་བསྟན་འཛིན་རྣམས། །བཞེད་པའི་སྙེ་མ་འབྲས་བུས་གང་གྱུར་ཅིག །བློ་བཟང་ཆོས་ཚུལ་ཐུབ་བསྟན་ཆུ་བོ་བརྒྱ། །འཇིགས་མེད་རྣམ་དཔྱོད་ཧུབ་ཀྱིས་ཉེར་གཞལ་ཏེ། །སླར་ཡང་ས་གསུམ་སྐྱེ་དགུའི་ཉེར་འཚོ་རུ། །ལེགས་གསུང་བདུད་རྩིའི་རྒྱ་མཚོར་འབེབས་གྱུར་ཅིག །ལུང་རིགས་སྒྲ་དབྱངས་ཆོས་ཀྱི་ཤུགས་འཆང་བ། །བཀྲ་ཤིས་རི་མོ་གཡས་སུ་འཁྱིལ་བའི་དུང༌། །སྐྱེ་དགུའི་བསོད་ནམས་སྤོ་མཐོར་བཞད་པའི་སྒྲས། །ས་གསུམ་རྒུད་པ་མིང་གི་མཐར་བྱེད་ཤོག །ཞི་དུལ་ཚངས་སྤྱོད་སྤུ་སྡུག་གོས་ཀྱིས་ཀླུབས། །ལེགས་བཤད་སྙན་འགྱུར་གཏམ་གྱིས་མགྲིན་པ་གང༌། །བགྲང་ཡས་བློ་གསལ་ཐར་འདོད་ཀོ་ཀི་ལས། །ཐུབ་བསྟན་དཔྱིད་ཀྱི་དགའ་ཚལ་མཛེས་གྱུར་ཅིག །དྲིན་དུ་མི་བགྲང་དད་པའི་ཁ་ལོ་ཡིས། །བསྟན་ལ་བཀུར་སྟི་རིམ་གྲོ་ལྷུར་བྱེད་
རྣམས། །དེ་དང་རྗེས་མཐུན་ཚེ་དཔལ་བསོད་ནམས་སོགས། །ལེགས་པའི་དཔལ་གྱིས་ཕྱིར་ཡང་བསྟི་བར་ཤོག །རླབས་ཆེན་བསོད་ནམས་གཞིར་གྱུར་མཎྜལ་ལར། །གསེར་དངུལ་རྐང་འགྲོ་ནོར་འབྲུ་རྡོ་ཤིང་སོགས། །རྒྱུ་སྦྱོར་ལྷག་བསམ་ཚོམ་བུར་དགོད་པ་ཀུན། །མངོན་མཐོ་ངེས་ལེགས་དགའ་བའི་དཔལ་ཐོབ་ཤོག །མཐོང་ཐོས་དྲན་རེག་གདུལ་བྱ་གླིང་བཞིའི་མཁར། །རྣམ་གྲོལ་ས་བོན་རྣམ་བཞིའི་མདངས་འཕྲོ་བ། །ངོ་མཚར་མཆོད་སྡོང་རིན་ཆེན་ལྷུན་པོ་འདི། །ཐུབ་བསྟན་རོལ་མཚོའི་རྒྱན་དུ་གནས་གྱུར་ཅིག །སད་སེར་ནད་རིམས་འཁྲུག་པས་མ་རྙོགས་ཤིང༌། །བདེ་འབྱོར་ལྦུ་བ་དཀར་པོའི་ཕྲེང་དཀྲིགས་པ། །དུས་ཀྱི་རྒྱལ་མོའི་ཆུ་བོ་རྣམ་བཞི་ཡང༌། །འཆོལ་མེད་ལེགས་བྱས་རྒྱ་མཚོར་འཇུག་གྱུར་ཅིག །རབ་གཏུམ་སྲིན་པོ་ཁྲོས་པའི་ལྟོ་བ་ན། །བག་མེད་རྩེན་པ་བྱིས་པའི་བློ་ཅན་རྣམས། །བདེན་དོན་ཆོས་ཀྱི་གླུ་ཡིས་རྒྱུད་བསྐུལ་ཏེ། །ཞི་བའི་གོ་འཕང་སྒྲུབ་ལ་གཞོལ་བར་ཤོག །སྒོ་གསུམ་དགེ་བར་བསྒྱུར་བའི་གོམ་སྟབས་ཀྱང༌། །ཆོས་བརྒྱད་འོག་འགྱུའི་གདོན་གྱིས་མ་བསླད་པས། །ཡོན་པོར་མ་ཡིན་ཆོས་ལམ་དྲང་པོ་རུ། །ཞུགས་ཏེ་ཡང་དག་ལམ་བཟང་མྱུར་བགྲོད་ཤོག །ཕུང་ཁྲོལ་ཀུན་གྱི་བྱེད་པོ་ནང་གི་དགྲ། །དེ་ཡི་རང་མདངས་ཕྱི་རོལ་ཉེར་འཚེ་སོགས། །བར་དུ་གཅོད་པའི་མིང་ཡང་མི་གྲགས་ཤིང༌། །མཐུན་པའི་དངོས་ཀུན་ལྷུན་གྱིས་འགྲུབ་པར་ཤོག །མ་འོངས་ཚེ་རབས་པདྨ་དཀར་པོའི་ཕྲེང༌། །བཤེས་གཉེན་ཉིན་བྱེད་འོད་ཀྱིས་མི་གཏོང་ཞིང༌། །ཚུལ་
གནས་ཐོས་བསམ་སྒོམ་པ་སྦྲང་རྩིའི་བཅུད། །ཡིད་ཀྱི་བུང་བའི་ཉེར་འཚོར་སྨིན་གྱུར་ཅིག །མི་ཟད་ནོར་གྱིས་གང་ཞིང་ལེགས་པར་བསྡམས། །ཉེར་འཚེས་མི་ཚུགས་མཐུན་པའི་རླུང་གིས་བསྐྱོད། །རབ་ཏུ་བརྟན་པའི་ཤེས་རབ་གྲུ་བོ་ཆེས། །ཕྲ་རགས་སྲིད་པའི་མཚོ་ལས་བརྒལ་གྱུར་ཅིག །དབྱིངས་ཀྱི་མཁའ་ལ་ཀུན་རྟོག་ལས་ཉོན་ལུས། །འབྱུང་བ་རིམ་བརྩེགས་སྲིད་པའི་འཇིག་རྟེན་འདི། །མེ་གསུམ་ལས་འདས་ལྟ་བའི་བྱིན་ཟ་ཡིས། །ཕྱིས་འབྱུང་མེད་པ་ཉིད་དུ་སྦྱོང་གྱུར་ཅིག །མཁོ་བ་སྦྱིན་པའི་དྲི་ངད་ཕྱོགས་སུ་ལྡང༌། །སྙན་སྨྲ་རབ་མྱོས་བུང་བའི་སྒྲ་ལྡན་པ། །དོན་མཐུན་ཡོན་ཏན་སྦྲང་རྩིའི་འབྱུང་གནས་ཀྱིས། །སྐལ་བཟང་སྐྱེ་བོའི་རྒྱན་གྱི་དོན་སྤྱོད་ཤོག །གདོད་ནས་དག་པ་མ་ལུས་འགྲོ་བའི་ཁམས། །གློ་བུར་དྲི་མ་སྦྱངས་པའི་བྱང་ཆུབ་མཆོག། །སྟོབས་སོགས་ཡོན་ཏན་ཡོངས་སུ་རྫོགས་པ་ཡི། །ཀུན་བཟང་འཕྲིན་ལས་སྣང་བ་འབར་གྱུར་ཅིག །བདག་སོགས་དགེ་བའི་བསམ་སྦྱོར་ས་བོན་ནི། །བདེ་གཤེགས་ཐུགས་རྗེའི་རླན་གཤེར་གྱིས་སྨིན་ཅིང༌། །བསླུ་མེད་རྟེན་འབྱུང་དུས་སུ་ཕྱིན་པ་ལས། །གང་བཏབ་སྨོན་པའི་འབྲས་བུ་སྨིན་གྱུར་ཅིག །ལྟར་སྣང་དགེ་ལ་དམན་པའི་ཀུན་སློང་གིས། །འབྲས་བུའི་རྣམ་པ་གཞན་དུ་བསྒྱུར་བ་ཀུན། །སྲས་བཅས་རྒྱལ་བའི་བསོད་ནམས་དང་འདྲེས་ཏེ། །ཕུལ་བྱུང་རྣམ་པར་སྨིན་པའི་རྒྱུར་གྱུར་ཅིག །རྣམ་དཀར་དོན་ལྡན་ལས་ཀྱི་དོན་མཐུན་རྣམས། །ཁྲོ་སོགས་མི་བཟད་ཆོམ་པོས་མི་འཕྲོག་ཕྱིར། །ཐུགས་རྗེ་མངའ་བའི་ཐུགས་བསྐྱེད་བཙན་རྫོང་དུ། །རྟག་ཏུ་ཞུགས་ནས་རྟག་པའི་དཔལ་
ཐོབ་ཤོག །བློ་ཆུང་དགེ་བའི་ཆུ་ཐིགས་ཉམ་ཆུང་ཡང༌། །མཐུ་ཆེན་རྒྱལ་སྲས་སྤྱོད་པའི་རླབས་ཆེན་མཚོར། །གཅིག་ཏུ་འདྲེས་ཏེ་གཏན་ཏུ་མི་ཟད་པ། །ཀུན་བཟང་སྨོན་པའི་འབྲས་བཟང་སྨིན་གྱུར་ཅིག །ཅེས་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་པ་དང་ཕྱག་མཆོད་བསྐོར་བའི་ཕན་ཡོན་བསྟན་པ་མཆོད་རྟེན་མཐོང་གྲོལ་ཆེན་མོའི་དཀར་ཆག་ལྷའི་རྔ་ཆེན་ཞེས་བྱ་བ་འདི་ནི། སྤྱིར་བསྟན་པའི་གནས་ཚད་མདོ་སྡེ་བསྐལ་བཟང༌། སྙིང་རྗེ་པད་དཀར། ཟླ་བ་སྙིང་པོའི་མདོ། བློ་གྲོས་མི་ཟད་པའི་མདོ་འགྲེལ། ཐུབ་དགོངས། ཡུམ་གསུམ་གནོད་འཇོམས་སོགས་སུ་ལོ་སྟོང་དང༌། ཉིས་སྟོང༌། ཕྱེད་སུམ་སྟོང༌། ལྔ་སྟོང་སོགས་བཤད་ཚུལ་མི་འདྲ་བ་མང་བས། ཕྱི་མ་སྒྲ་ཇི་བཞིན་པར་བྱས་ཤིང༌། དེ་ལ་ཡང་འདས་ལོ་རྩི་ཚུལ་མང་ཉུང་གི་ལུགས་གཉིས་ལས། མང་བའི་ཕྱོགས་ལྟར་ན་དགྲ་བཅོམ། ཕྱིར་མི་འོང། རྒྱུན་ཞུགས་ཏེ་འབྲས་བུའི་ལེའུ་གསུམ། ཤེས་རབ། ཏིང་འཛིན། ཚུལ་ཁྲིམས་ཏེ་སྒྲུབ་པའི་ལེའུ་གསུམ། ལུང་མངོན་པའི་ལེའུ་དང་། མདོ་སྡེའི་ལེའུའི་ནང་ནས་བཞི་བརྒྱ་གོ་དྲུག་རྣམས་སོང་ཟིན་པའི་གོ་བདུན་པ་ཡིན་ཞིང་། ཐུབ་བསྟན་རིན་པོ་ཆེ་ལོ་ཟླ་རེར་ཡང་གནས་ན་ཅི་མ་རུང་སྙམ་དུ་སྨོན་པས་འདས་ལོ་ཉུང་བ་ལྟར་བྱེད་ཚེ། དེ་ལ་ཡང་སྟོན་པའི་འཁྲུངས་ལོ་སོགས་མི་འདྲ་བའི་དབང་གིས་བཤད་ཚུལ་སྣ་ཚོགས་ཡོད་ཀྱང༌། མཁས་གྲུབ་ཐམས་ཅད་མཁྱེན་པའི་དུས་འཁོར་ཊཱིཀ་ཆེན་གཞིར་བཞག་ན། བསྟན་པ་ལོ་ཉིས་སྟོང་དྲུག་བརྒྱ་བཞི་བཅུ་སྟེ། ཚུལ་ཁྲིམས་ལེའུའི་སྟེང་ནས་
བརྒྱ་བཞི་བཅུ་པ་དང༌། དུས་འཁོར་རྒྱུད་འགྲེལ་གྱི་བསྟན་པའི་གནས་ཚད་དུས་བཞིར་གསུངས་པ་ལས། རྫོགས་ལྡན། གསུམ་ལྡན། གཉིས་ལྡན་རྣམས་འདས་ནས། རྩོད་ལྡན་གྱི་ཡང་ཉིས་བརྒྱ་རེ་ལྔར་སླེབ་ཅིང༌། རྗེ་བདག་ཉིད་ཆེན་པོས་རབ་བྱུང་བདུན་པའི་ས་གླང་ལ་རི་བོ་དགེ་ལྡན་བཏབ་ནས་སུམ་བརྒྱ་གོ་བདུན་དང༌། ལྔ་བརྒྱ་ཐ་མ་ཚུགས་ཏེ་ལོ་གྲངས་བཅུ་ལྷག་གི་རྗེས་ལ་ཀུན་མཁྱེན་འཇམ་དབྱངས་བཞད་པ་འཁྲུངས་ཤིང༌། རྗེ་དེ་ཉིད་ཀྱིས་རབ་བྱུང་བཅུ་གཉིས་པའི་ས་གླང་ལ་བཀྲ་ཤིས་འཁྱིལ་བཏབ་ནས། གོ་བདུན་པ་རབ་བྱུང་བཅུ་གསུམ་པའི་མཇུག་གི་ཆ། ཁྲོ་བོ་ཞེས་པ་ཤིང་མོ་གླང་གི་ལོ། ྋབཙུན་པ་དཀོན་མཆོག་བསྟན་པའི་སྒྲོན་མེས་མཆོད་སྡོང་གསར་བཞེངས་ཀྱི་བགྱི་བ་ལེགས་པར་གྲུབ་སྟེ། རང་གཞན་གྱི་དགེ་རྩ་སྤེལ་བའི་ཕྱིར་དཀར་ཆག་ཅིག་ཀྱང་བསྒྲིག་འདུན་ཡོད་པའི་ཐོག །དད་བརྩོན་ལྡན་པ་དཀོན་མཆོག་བདེ་ཆེན་གྱིས་འདིའི་དཀར་ཆག །མཆོད་རྟེན་གྱི་རྣམ་བཞག་དང་བཅས་པ་ཞིག་དགོས་ཚུལ་ཡང་ཡང་བསྐུལ་ཞིང༌། སྤྲུལ་སྐུ་འཇིགས་མེད་མཁས་མཆོག །དུས་འཁོར་དཔོན་སློབ་དོན་ཡོད་ཚུལ་ཁྲིམས། སྨན་པ་དཔོན་སློབ་བློ་བཟང་རྒྱལ་མཚན་རྣམས་ནས་ཀྱང༌། རྟེན་གྱི་དཀར་ཆག་དང༌། ཕྱག་མཆོད་བསྐོར་བའི་ཕན་ཡོན། བསྐོར་ཚད་ལ་སོགས་པ་ཤིན་ཏུ་རྒྱས་པ་མདོ་རྒྱུད་ཀྱི་ཁུངས་དང་བཅས་པ་ཞིག་བྲི་དགོས་ཚུལ་གྱི་བསྐུལ་མ་གནང་བ་བཞིན་འཕྲལ་དུ་བསྒྲིགས་པའི་ཡི་གེ་པ་ནི་དགེ་སློང་དཀོན་མཆོག་ཀུན་དགས་བགྱིས་པ་འདི་ཡང་ལེགས་བྱས་ཀྱི་དགེ་མཚན་ཕྱོགས་བརྒྱར་འཕེལ་ཞིང༌། ཐུབ་བསྟན་རིན་པོ་ཆེའི་གསོས་སྨན་དམ་པར་ཡུན་དུ་གནས་པའི་རྒྱུར་གྱུར་ཅིག།། །།
དཀོ༷ན་མཆོ༷ག་ཐུགས་རྗེའི་བདེན་མཐུས་ལེགས་བཤད་འདི། །བསྟ༷ན་པ༷འི་སྒྲོ༷ན་མེ༷ར་ཡུན་དུ་གནས་པ་དང༌། །འབྲེལ་ཐོགས་འགྲོ་ཀུན་གནས་སྐབས་དག༷འ་བདེས་འཚོ། །མཐར་ཐུག་རྣ༷མ་མཁྱེན་རྒྱ༷ལ་བའི་གནས་ཐོབ་ཤོག །ཅེས་པ་འདིའང་སུ་ཉིད་ཤོག་ནས་རྣམ་དཔྱོད་ཡངས་པ་རབ་འབྱམས་པ་ཀུན་དགའ་རྣམ་རྒྱལ་གྱིས་འདི་ཀའི་ངག་རྩོམ་པར་དུ་མ་འཁོད་པ་རྣམས་བརྐོ་དགོས་ཚུལ་ཐེབས་དང་བཅས་ཏེ་བསྐུལ་བ་བཞིན་བསྒྲུབས་པའི་ཚེ་བྲིས་པའོ། །