ཆོས་རྗེ་རང་བྱུང་རྡོ་རྗེས་མཛད་པའི་གཅོད་ཀྱི་ཚོགས་ལས་རིན་པོ་ཆེའི་ཕྲེང་བའི་འདོན་འགྲིགས་བལྟས་ཆོག་ཏུ་བཀོད་པ་གཅོད་ཀྱི་ལུགས་སོར་བཞག
༼ད༽ ཆོས་རྗེ་རང་བྱུང་རྡོ་རྗེས་མཛད་པའི་གཅོད་ཀྱི་ཚོགས་ལས་རིན་པོ་ཆེའི་ཕྲེང་བའི་འདོན་འགྲིགས་བལྟས་ཆོག་ཏུ་བཀོད་པ་གཅོད་ཀྱི་ལུགས་སོར་བཞག་བཞུགས་སོ། །
ན་མོ་པྲཛྙཱ་པཱ་ར་མི་ཏ་ཡེ། ཡུམ་ཆེན་མཁའ་འགྲོའི་ཚོགས་ལ་ཕྱག་འཚལ་ནས། །གཅོད་ཚོགས་ཕྱག་ལེན་གབ་སྦས་སྤངས་ཏེ་བཀོད། །ཆོས་བདག་ཌཀྐིས་བཀའ་གནང་བྱིན་གྱིས་རློབས། །དེ་ལ་བཅའ་ཚོགས་རྒྱས་པར་སྤྲོ་ན། ཕུག་གཏོར་ཆ་ཚང་བཅའ། འབྲིང་བླ་མ་ཡི་དམ་མཁའ་འགྲོ་གསུམ། ཆོས་སྐྱོང་སྤྱི་འདུས་གཅིག །ནོར་ལྷ་ཕྱི་རྒྱུད་སྤྱི་འདུས་དཀར་གཏོར་གཅིག་དང་ལྔའོ། །བསྡུ་ན་བླ་མའི་གཏོར་མ་གཅིག་གིས་ཀྱང་ཆོག །རྒྱས་པར་ན་བསྐང་འབྲས་བཙུགས་པའི་བསྐང་གཏོར་བྱ། འབྲིང་གཏོར་མ་ཟུར་གསུམ་རྒྱན་ལེགས་པ་གཅིག །བསྡུ་ན་ཕུག་གཏོར་གྱིས་བསྐང་གཏོར་གྱི་གོ་ཆོད་བྱ། ཚོགས་ཟླུམ་པོའམ་མི་རོ་བམ་གཟུགས་གཅིག་བཅའ། གཏོར་
འབུལ་དམར་གཏོར་གཅིག་དང་། གཞི་བདག་ལ་དཀར་གཏོར་གཅིག །ལྷ་བཤོས་དང་མཐེབ་སྐྱུ་གང་མང་བཅའ། ཡོད་ན་གཅོད་ཀྱི་ཐང་སྐུ་ཡང་བཤམས། མཆོད་པ་རྣམ་ལྔ། ནང་མཆོད་ཀ་པཱ་ལ་བཤམ། ཌཱ་མ་རུ་དང་དྲིལ་བུ་རྐང་གླིང་མདུན་དུ་བཞག །རིམ་གྲོ་མ་གྲོལ་བར་མལ་སྟན་གྲ་མལ་མི་འགུལ་བའི་སྟན་སོགས་ལེགས་པར་བཏིང་ལ་འདུག་གོ །སྟན་མི་ལྤགས་ཀྱི་གཡང་གཞིས་ས་གཞིར་ཁྱབ་པར་བསྒོམ། ཞག་གྲངས་དུ་འདུག་ན་ཞག་རེ་ལ་ཡང་བསྐལ་པ་རེ་རེ་ཡིན་བསམ་པའི་མོས་པ་བྱའོ། །དེ་ནས་བདུད་རྩི་བྱིན་རླབས་དང་། མཆོད་པ་བྱིན་རླབས་གཉིས་ཀ་རྒྱལ་བ་རྒྱ་མཚོ་ལྟར་བྱས་ཀྱང་རུང་མོད། ཕག་མོ་ནས་ཁ་སབ་སྲོལ་ཡོད་པས། ཨོཾ་ཀརྨ་ཌཱཀི་ནི་ཧཱུྃ་ཕཊཿ ཨོ་ཀརྨ་ཊཀི་ནི་ཧཱུྃ་ཕཊཿ ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་
ཤུདྡྷོཉཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་ཆང་ཟུང་ལ་ཡཾ་དང་མཆོག་མ་གཉིས་ལ་གཡོ་བའི་བ་དན་གྱིས་མཚན་པ། དེའི་སྟེང་དུ་རཾལས་མེའི་དཀྱིལ་འཁོར་གྲུ་གསུམ་དམར་པོ་འབར་བ་རཾ་གྱིས་མཚན་པ། དེའི་སྟེང་དུ་ཀེ་གསུམ་ལས་ཐོད་པ་བུམ་རིལ་གྱི་སྒྱེད་པུ་ལྟག་པ་ནང་དུ་བསྟན་པ་གསུམ་གྱི་སྟེང་དུ་ཡི་གེ་ཨ་ཡོངས་སུ་གྱུར་པ་ལས། ཀ་པཱ་ལ་ཕྱི་དཀར་ལ་ནང་དམར་བ། དུམ་བུ་གཅིག་པ་དཔྲལ་བ་རང་ལ་བསྟན་པ། རྒྱ་ཁྱོན་ཆོས་ཀྱི་དབྱིངས་དང་མཉམ་པ། །དེའི་དབུས་སུ་མུ་ལས་དྲི་ཆུ་བཻཌཱུརྱ་ལྟ་བུ། ཤར་དུ་བི་ལས་དྲི་ཆེན་ཤེལ་ལྟ་བུ། ལྷོར་ར་ལས་རཀྟ་གསེར་བཙོ་མ་ལྟ་བུ། ནུབ་ཏུ་ཤུ་ལས་བྱང་སེམས་དཀར་པོ། བྱང་དུ་མ་ལས་ཀླད་པ། སླར་ཡང་དབུས་སུ་ན་ལས་མིའི་ཤ །ཤར་ལྷོར་གོ་ལས་བ་གླང་གི་ཤ །ལྷོ་ནུབ་ཏུ་ཀུ་ལས་ཁྱིའི་ཤ །ནུབ་བྱང་དུ་ད་ལས་གླང་པོ་ཆེའི་ཤ །བྱང་ཤར་དུ་ཧ་ལས་རྟའི་ཤ །དེ་རྣམས་སླར་ཡང་ཡི་གེ་དེ་དག་གིས་མཚན་པའོ། །རང་གི་སྣ་བུག་གཡོན་པ་ནས་རླུང་ཧཱུྃ་གི་དབྱིབས་ཅན་འཕྲོས། རླུང་གི་དཀྱིལ་འཁོར་ལ་ཕོག །བ་དན་བསྐྱོད་རླུང་
གཡོས། མེ་འབར་ཐོད་པ་དྲོས་རྫས་རྣམས་ཁོལ། ཉེས་པའི་སྐྱོན་རྣམས་ཕྱིར་ལུད། དེའི་སྟེང་དུ་ཨོཾ་ཨཱཿཧཱུྃ་ལས་འོད་ཟེར་འཕྲོས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་འདྲེས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ། སྲིན་ལག་གམ་རྡོ་རྗེའི་རྩེ་མོས་མཆོད་པ་གཏོར་མ་ལ་ནང་མཆོད་ཟེགས་མ་གཏོར་ལ། ཨོཾ་ཀརྨ་ཊཱ་ཀི་ནི་ཧཱུྃ་ཕཊ། ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷ་ཝ་ཤུདྡྷོཉཧཾ། སྟོང་པའི་ངང་ལས་ཨ་ལས་ཐོད་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཡིག་གི་ཚོགས་དཔག་ཏུ་མེད་པ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་རྡོ་རྗེའི་མཆོད་ཡོན། མེ་ཏོག །བདུག་སྤོས་མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་པའི་དངོས་པོ་དྭངས་ཤིང་ཐོགས་པ་མེད་པ་བྱུང་ཆུབ་སེམས་དཔའ་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལས་ཀྱང་ཆེས་ཆེར་ལྷག་པའི་མཆོད་པའི་སྤྲིན་གྱི་ཕུང་པོ་རབ་འབྱམས་ནམ་མཁའི་མཐའ་ཀླས་པའི་བར་རྒྱས་པར་འགེངས་ཤིང་
འཕགས་པ་རྣམས་མཉེས་པར་བྱེད་པ། དུས་ཇི་སྲིད་འཁོར་བ་མ་སྟོངས་ཀྱི་བར་དུ་རྒྱུན་མི་ཆད་པར་འབྱུང་བའི་རང་བཞིན་དུ་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། ཨོཾ་བཛྲ་པུཥྤེ་ཨཱཿཧཱུྃ་སྭཱ་ཧཱ། ཨོཾ་བཛྲ་དྷུ་པེ་ཨཱཿཧཱུྃ་སྭཱ་ཧཱ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ་སྭཱ་ཧཱ། ཨོཾ་བཛྲ་གནྡྷེ་ཨཱཿཧཱུྃ་སྭཱ་ཧཱ། ཨོཾ་བཛྲ་ནཻ་ཝཱིརྱ་ཨཱཿཧཱུྃ་སྭཱ་ཧཱ། ཨོཾ་བཛྲ་ཤཔྟ་ཨཱཿཧཱུྃ་སྭཱ་ཧཱ། དེ་ནས་དབང་སྡུད་ཞི་སྡུད་ཕཊ། ་རང་ཉིད་སྐད་ཅིག་གིས་ཡུམ་ཆེན་མོ་གསེར་གྱི་མདོག་ཅན་རྒྱན་ཆ་ལུགས་ཡོངས་སུ་རྫོགས་པ། ཕྱག་བཞིའི་དང་པོས་རྡོ་རྗེ་གླེགས་བམ། འོག་མ་གཉིས་ཀྱིས་མཉམ་བཞག་གི་ཕྱག་རྒྱ་མཛད་པར་གྱུར། ཕཊ། རྐང་དུང་གི་ཁ་ལག་མཐིལ་དུ་ལན་གསུམ་བརྡབ་ཅིང་། འབྱུང་པོ་ཕྲན་བུ་ཉམ་ཆུང་བ་རྣམས་མ་སྐྲག་ཅིག །མ་སྔངས་ཤིག །ཤིན་ཏུ་མ་སྔངས་ཤིག །དེ་ནས་རྐང་དུང་ལན་གསུམ་འབུད་པའི་དང་པོ། ཡུམ་ཆེན་མོའི་སྐྱེ་མེད་ཆོས་ཀྱི་རང་སྒྲས་ཁམས་གསུམ་དུ་ཐོས་པར་བསམས་ལ། ཀྱཻ། ཡ་ཀི་སྲིད་རྩེ་ནས་མནར་མེད་ཡན་ཆད་ཀྱི་སེམས་ཅན་ཐམས་ཅད་ཉོན་ཅིག །ཐམས་ཅད་ཀྱིས་དུང་ངེ་ཉན་པར་བསམས་ལ་གཅིག་འབུད། འོ་ཐམས་ཅད་འདིར་འདུས་ཤིག །ཐམས་ཅད་རུབ་ཀྱིས་འདུས་པར་བསམས་ལ་གཅིག་འབུད། ཐམས་ཅད་མྱུར་དུ་
འདུས་ཤིག །མྱུར་དུ་སྤུངས་སེ་འདུས་པར་བསམས་ལ་གཅིག་འབུད། བདེ་རིམ་ལ་ནི་དེས་ཆོག །སྨྱོན་པ་སོགས་ནད་གདོན་དྲག་པོ་འདུལ་ན་དྲག་སྡུད་བྱ་སྟེ། ཕཊཿ བདག་ཉིད་སྐད་ཅིག་གིས་ཡེ་ཤེས་ཀྱི་མཁའ་འགྲོ་མ་སྐུ་མདོག་མཐིང་ནག་ཏུ་འདུག་པ་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། སྤྱན་གཡས་ཉི་མའི་དཀྱིལ་འཁོར་དམར་ཀྱི་ལི་ལི་འཁོར་བ། གཡོན་ཟླ་བའི་དཀྱིལ་འཁོར་ངང་སྒ་ར་ར་འཁོར་བ། དབུས་ཉི་ཟླ་སྤེལ་མའི་དཀྱིལ་འཁོར་དཀར་དམར་དུ་ཀྲུག་ཀྲུགས་སུ་འཁྲུགས་པ། སྤྱི་གཙུག་ན་ཕག་ཞལ་ནག་པོས་ཕག་སྐད་འབྲུག་ལྟར་ངུར་བ། ཕྱག་གཡས་མི་ལྤགས་ཀྱི་གཡང་གཞི་རྡེབ་པ། གཡོན་མི་རྐང་གི་གླིང་བུ་ཙེར་ཙེར་འབུད་པ། སྣང་ཞིང་སྲིད་པའི་ལྷ་འདྲེ་བཀའ་ལྷ་མ་སྲིན་སྡེ་བརྒྱད་ཐམས་ཅད་དབང་དུ་སྡུད་ཅིང་ཟིལ་གྱིས་གནོན་པ། ལྟེ་བ་མན་ཆད་འདོད་ཁམས། སྙིང་ག་མན་ཆད་གཟུགས་ཁམས། སྤྱི་བོ་མན་ཆད་གཟུགས་མེད་ཀྱི་ཁམས་སུ་ཡོད་པ། ཁམས་གསུམ་ལས་རྣམ་པར་རྒྱལ་བའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོ་བ་ཕུར་བུ་གཡང་གཞི་འཛིན་པ་དཔག་ཏུ་མེད་པ་
སྟེང་འོག་ཕྱོགས་བཅུར་འཕྲོས་པས། ས་འདི་ཡི་སྟོད་སྨད་སྟེང་འོག་བར་གསུམ་ཕྱོགས་བཞི་མཚམས་བརྒྱད་ན་གནས་པའི་སྣང་ཞིང་སྲིད་པའི་ལྷ་འདྲེ་བཀའ་ལྷ་མ་སྲིན་སྡེ་བརྒྱད། །ཁྱད་པར་དུ་བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་ལ་གནོད་ཅིང་འཚེ་བའི་གདོན་བགེགས་རྒྱབ་རྟེན་སྡོང་ཟླ་དང་བཅས་པ། རྩ་བ་རྩ་ལག་དང་བཅས་པ། འབྲེལ་པ་སྣ་འདྲེན་དང་བཅས་པ་ཐམས་ཅད། སྐད་ཅིག་རང་དབང་མེད་པར་བྱིའུ་ཁྲས་བཅུམས་པ་ལྟ་བུར་དེད། རི་ལུག་སེར་བས་དེད་པ་བཞིན་དུ་བསྡུས། སྨུག་པ་རླུང་གིས་དེད་པ་བཞིན་དུ་བདས་ནས། སྐད་ཅིག་ད་ལྟ་ཉིད་དུ་འདིར་འདུས་ཤིག །ཁུག་ཅིག །ཧཱུྃ་ཧཱུྃ་ཧཱུྃ། ཕཊ་ཕཊ། ཧཱུྃ། ང་ནི་ཁྲོས་མ་ནག་མོ་སྟེ། །མ་གཅིག་ལབ་སྒྲོན་དྲག་མོའི་སྐུ། །དུར་ཁྲོད་ཆས་བརྒྱད་སྐུ་ལ་རྫོགས། །ཁམས་གསུམ་མ་ལུས་དབང་དུ་སྡུད། །ཕྱག་གཡོན་མི་རྐང་གླིང་བུ་འབུད། །བུས་པས་སྲིད་གསུམ་དབང་དུ་སྡུད། །ཕྱག་གཡས་མི་ལྤགས་གཡང་གཞི་རྡེབ། །བརྡབས་པས་ལྷ་འདྲེ་དབང་དུ་སྡུད། །ཐུགས་ལས་སྤྲུལ་པ་བྱེ་བ་འབུམ། །སྤྲུལ་པའི་མཁའ་འགྲོ་གྲངས་མ་ཉུང་། །ཡང་སྤྲུལ་མཁའ་
འགྲོ་གོང་མ་གཡེལ། །ལས་བྱེད་མཁའ་འགྲོ་བང་མ་བུལ། །མི་ལྤགས་གཡང་གཞི་རྩལ་མ་ཞན། །མི་རྐང་གླིང་བུ་ངར་མ་ཆུང་། །བདག་ཅག་དཔོན་སློབ་ཡོན་མཆོད་ལ། །གནོད་ཅིང་འཚེ་བར་བྱེད་པ་ཡི། །ལྷ་དང་ལྷ་མིན་དབང་དུ་སྡུས། །མི་དང་མི་མིན་དབང་དུ་སྡུས། །གདོན་བགེགས་ལོག་འདྲེན་དབང་དུ་སྡུས། །སྟེང་གདོན་གཟའ་སྐར་དབང་དུ་སྡུས། །འོག་གདོན་ཀླུ་གཉན་དབང་དུ་སྡུས། །བར་གདོན་བཙན་བདུད་དབང་དུ་སྡུས།། །ཕོ་གདོན་རྒྱལ་འགོང་དབང་དུ་སྡུས། །མོ་གདོན་འདྲེ་མོ་དབང་དུ་སྡུས། །དམ་སྲི་ཐེའུ་རང་དབང་དུ་སྡུས། །ཟ་འདྲེ་ཤི་གཤེད་དབང་དུ་སྡུས། །ཆུང་སྲི་སྒབ་འདྲེ་དབང་དུ་སྡུས། །གོད་འདྲེ་བསེ་རག་དབང་དུ་སྡུས། །དབང་དུ་བསྡུས་ལ་གནས་འདིར་ཁུག །གནས་འདིར་ཁུག་ལ་རྡུལ་དུ་རློག །ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། དེ་ནས་ཟིལ་གནོན་འཕེན་པ་ནི། བདག་ཅག་ཡོན་མཆོད་ལ་གནོད་ཚབས་ཆེ་བ་རྣམས་ནང་དུ་འཁོད། གནོད་ཚབས་ཆུང་བ་རྣམས་བར་དུ་འཁོད། དེ་དག་གི་རྒྱབ་རྟེན་བསྡོང་ཟླ་རྣམས་ཕྱི་རོལ་དུ་འཁོད་དེ། ལས་བྱེད་ཀྱི་མཁའ་འགྲོ་མ་རྣམས་ཀྱིས་ཕྱི་ནས་བསྐོར་
བས་བྲོས་དབང་མེད་པར་གྱུར། ཕཊ་ཕཊ། རང་ཉིད་ཁྲོས་མ་ནག་མོའི་གཟི་བརྗིད་ཀྱིས་ཟིལ་གྱིས་མནན་ནས་སྐྲག་ཅིང་སྔངས་བས་འདར་ཕྲིལ་ལི་ལི། དད་ཅིང་གུས་པས་ཕྱག་རྒྱ་ཧྲུག་ཧྲུག །བཀའ་ཉན་གསུང་སྡོད་པར་གྱུར། ཕཊ་ཕཊ། ཕྱག་རྒྱ་ཆེན་པོའི་དོན་དྲན་པར་བྱས་ལ། དཀར་པོ་དགེ་བ་ལ་གནས་པའི་ཆོས་ཐམས་ཅད་སྐྱེ་འགག་མེད་པའི་དབྱིངས་སུ་ཟིལ་གྱིས་གནོན་པར་བགྱིའོ། །ནག་པོ་སྡིག་པ་ལ་གནས་པའི་ཆོས་ཐམས་ཅད་སྐྱེ་འགག་མེད་པའི་དབྱིངས་སུ་ཟིལ་གྱིས་གནོན་པར་བགྱིའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བདག་གི་སྣང་བ་ཆེན་པོས་ཁྱབ་པར་གྱུར་ཅིག །ཕཊ་ཕཊ། འདི་ནས་ཁྲོས་མ་མི་དམིགས་པར་རང་ཐ་མལ་པར་བསྐྱེད། མདུན་གྱི་ནམ་མཁའི་གནས་སུ་ཆོས་སྐུ་ཡུམ་ཆེན་མོ་ལ། སྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་ཀྱིས་བསྐོར་ནས་སྤྲིན་འཁྲིགས་པ་བཞིན་དུ་སྟེང་ཕྱོགས་ཀྱི་ནམ་མཁའ་ཁྱབ་ནས་བཞུགས་པར་གྱུར། ཕཊ་ཕཊ་ཕཊ། དེ་རྣམས་ཀྱི་སྐྱབས་འོག་ཏུ་བདག་དང་ཡོན་བདག་ལྷ་འདྲེ་གནོད་བྱེད་དང་བཅས་པ་ཐམས་ཅད་ཚུད་ནས། སེམས་དད་ཅིང་གུས་པས་ལུས་ཐལ་མོ་
སྦྱར་ནས། ངག་གིས་སྐྱབས་འགྲོའི་རམ་བུ་འུར་དི་རི་རི་བྱེད་པར་གྱུར། ཕཊ་ཕཊ་ཕཊ། ན་མོ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་ཅག་སློབ་དཔོན་གྲྭ་སྡེ་ཡོན་མཆོད་འཁོར་དང་བཅས་པ་ཐམས་ཅད་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ལུས་ངག་ཡིད་གསུམ་གྱིས་ཐར་པ་དགེ་བ་སྒྲུབ་པ་ལ་བར་དུ་གཅོད་པར་བྱེད་པའི་ལོག་འདྲེན་འབྱུང་པོ་མི་དང་མི་མ་ཡིན་པས་ཐོག་དྲངས་སེམས་ཅན་ཐམས་ཅད་དུས་འདི་ནས་བཟུང་སྟེ་ལམ་སྙིང་པོ་བྱང་ཆུབ་ཀྱི་འབྲས་བུ་ལ་མཆིས་ཀྱི་བར་དུ། བདག་སོགས་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཕྱིའི་སྐྱབས་འགྲོའོ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྐྱབས་སུ་མཆིའོ། །རིགས་ལྔའི་བདེ་བར་གཤེགས་པ་རྣམས་ལ་སྐྱབས་སུ་མཆིའོ། །རིགས་གསུམ་གྱི་མགོན་པོ་རྣམས་ལ་སྐྱབས་སུ་མཆིའོ། །ནང་གི་སྐྱབས་འགྲོའོ། །བླ་མ་རྡོ་རྗེ་མཁའ་འགྲོ་འཁོར་དང་བཅས་
པ་རྣམས་ལ་སྐྱབས་སུ་མཆིའོ། །བཀའ་བརྒྱུད་པའི་བླ་མ་མཁའ་འགྲོ་འཁོར་དང་བཅས་པ་རྣམས་ལ་སྐྱབས་སུ་མཆིའོ། །དྲིན་ཆེན་རྩ་བའི་བླ་མ་མཁའ་འགྲོ་འཁོར་དང་བཅས་པ་རྣམས་ལ་སྐྱབས་སུ་མཆིའོ། །གསང་བའི་སྐྱབས་འགྲོའོ། །རང་སེམས་སྐྱེ་བ་མེད་པ་ཆོས་ཀྱི་སྐུ་ལ་སྐྱབས་སུ་མཆིའོ། །དེ་ཁོ་ན་ཉིད་ཀྱི་སྐྱབས་འགྲོའོ། །སྙིང་ཁུང་རུས་པའི་གཏིང་ནས་སྐྱབས་སུ་མཆིའོ། །སྐྱབས་འོག་དམ་པ་རུ་ཚུད་པར་མཛད་དུ་གསོལ། བདག་གཞན་ཐམས་ཅད་སངས་རྒྱས་ལ་བརྟེན་ནོ། །ཆོས་ལ་བརྟེན་ནོ། །དགེ་འདུན་ལ་བརྟེན་ནོ། །བདག་གཞན་ཐམས་ཅད་ཀྱི་ལུས་དགེ་བར་གྱུར་ཅིག །ངག་དགེ་བར་གྱུར་ཅིག །ཡིད་དགེ་བར་གྱུར་ཅིག །དེ་ལྟར་སྐྱབས་སུ་གསོལ་བས་དཀོན་མཆོག་གསུམ་གྱི་སྐྱབས་འོག་དམ་པར་ཚུད་དེ། སྐྱོབ་པར་ཞལ་གྱིས་བཞེས་ནས། སྐུ་གསུང་ཐུགས་ལས་འོད་ཟེར་སྣ་ཚོགས་བྱུང་ནས། བདག་གཞན་ཐམས་ཅད་ཀྱི་ལུས་ངག་ཡིད་གསུམ་ལ་ཕོག་པས། སྡིག་སྒྲིབ་ཐམས་ཅད་དག་རུ་ལུས་ཤེལ་སྒོང་ལྟར་སོང་བར་གྱུར་ཅིག །བདག་གཞན་ཐམས་ཅད་ཀྱི་ནད་རིགས་བཞི་བརྒྱ་རྩ་བཞི་བྱང་བར་གྱུར་ཅིག །གློ་བུར་དགུ་བཅུ་རྩ་གཅིག་
ལས་ཐར་བར་གྱུར་ཅིག །ཡེ་འདྲོགས་སུམ་བརྒྱ་དྲུག་ཅུས་མི་ཚུགས་པར་གྱུར་ཅིག །བགེགས་རིགས་སྟོང་ཕྲག་བརྒྱད་ཅུ་རང་སར་ཞི་བར་གྱུར་ཅིག །རང་སར་དག་པར་གྱུར་ཅིག །རང་སར་སྟོང་པར་གྱུར་ཅིག་།སྐྱབས་ཡུལ་སྐྱོབ་མཁན་སྐྱབས་འགྲོ་གསུམ། །དམིགས་མེད་རང་སེམས་ཆོས་ཀྱི་སྐུ། །དོན་དམ་སྐྱེ་བ་མེད་པའོ། །ཕཊ་ཕཊ་ཕཊ། མཐར་ཐུག་དོན་དམ་པའི་སྐྱབས་འགྲོའོ། །ཡན་ལག་བདུན་པ་ནི། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་མཆོད་པ་འབུལ། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་མཆོག་ཏུ་སེམས་ཀྱང་བསྐྱེད། །སེམས་ཅན་མ་ལུས་བདག་མགྲོན་གཉེར། །བྱང་ཆུབ་སྤྱོད་པ་མཛད་བཞིན་སྤྱད། །འགྲོ་ཕན་སངས་རྒྱས་འགྲུབ་པར་ཤོག །བྱང་ཆུབ་མཆོག་ཏུ་སེམས་བསྐྱེད་པ་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །བསྐྱེད་པ་རྣམས་ནི་དྲན་པར་བགྱི། །དྲན་པ་རྣམས་ནི་རྒྱ་ཆེར་བཟུང་། །
སྐྱབས་ཡུལ་བསྡུ་མི་དགོས། མི་དམིགས་པར་བཞག་པས་ཆོག །འགྲོ་ཀུན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཕཊ་ཕཊ་ཕཊ། ཅེས་ཚད་མེད་བཞི་བསྒོམ། རང་ཉིད་ཐ་མལ་དུ་གནས་པའི་སྤྱི་བོར་ཁྲུ་གང་གི་ཐད་མདུན་གྱི་ནམ་མཁར་འོག་མིན་ཆོས་དབྱིངས་དག་པའི་ཞིང་ཁམས་ཕུན་སུམ་ཚོགས་པའི་དབུས་སུ། ཧཱུྃ་རཏྣ་མཎྜ་ལ་ཞེས་བརྗོད་པས་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ་ལྷ་རྫས་གོས་ཀྱིས་བཀབ་པ། དེའི་སྟེང་དུ་པཾ་ལས་པདྨ་མཎྜ་ལ་སྣ་ཚོགས་པདྨ་འདབ་མ་མཐའ་ཡས་ཡངས་ཤིང་རྒྱ་ཆེ་བའི་གདན། དེའི་སྟེང་དུ་མ་སཱུརྱ་མཎྜ་ལ་ཉི་མ་དང་། ཨ་ཙནྡྲ་མཎྜ་ལ་ཟླ་བའི་གདན་ཡངས་ཤིང་རྒྱ་ཆེ་བ་དང་། ལྷ་སོ་སོ་ལ་ཇི་ལྟར་འོས་པའི་གདན་གསལ་བར་གྱུར། གདན་དབུས་མ་ཉི་ཟླའི་སྟེང་དུ་ཧཱུྃ་ཡིག་དཀར་པོ་འོད་དུ་ཞུ་བ་ལས། མ་གཅིག་ལབ་ཀྱི་སྒྲོན་མ་སྐུ་མདོག་དཀར་མོ་དུང་ཕྱིས་པའི་མདོག་ལྟ་བུ། ཞལ་གཅིག་ཕྱག་གཉིས་ཕྱག་གཡས་པས་གསེར་གྱི་ཌཱ་མ་རུ་ནམ་མཁའ་ལ་འཁྲོལ་བ། གཡོན་དངུལ་དཀར་གྱི་དྲིལ་བུ་དཀུར་བརྟེན་པ། སྤྱན་གསུམ་བར་སྣང་ལ་
གཟིགས་པ། སྐུ་གཅེར་བུ་རུས་པའི་རྒྱན་ཆ་དྲུག་གིས་བརྒྱན་པ། དབུ་སྐྲ་རལ་པའི་ཐོར་ཚུགས་གྱེན་དུ་བཅིངས་ཤིང་ལྷག་མ་སྐུ་རྒྱབ་ཏུ་གྲོལ་བ། ཞབས་གཡས་བསྐུམ་གཡོན་བརྐྱངས་ཤིང་གར་སྟབས་ཀྱི་ཚུལ་དུ་ལིང་ངེར་བཞུགས་པ། སྣང་ལ་རང་བཞིན་མེད་པ། མཁའ་འགྲོ་བྱེ་བ་འབུམ་གྱིས་བསྐོར་བ། དེའི་སྙན་གོང་གཡས་ཕྱོགས་སུ་དམ་པ་རྒྱ་གར་སྐུ་མདོག་ནག་ལ་སྣུམ་པ་གཟི་བརྗིད་དང་ལྡན་པ། ཨ་ཙ་རའི་ཆ་བྱད་ཅན། ཞལ་གཅིག་ཕྱག་གཉིས་ཕྱག་གཡས་བྷནྡ་ལྟག་སྤྲོད་ནམ་མཁའ་ལ་དཀྲོལ་བ། གཡོན་མི་རྐང་གི་གླིང་བུ་འབུད་པ། གྲུབ་ཐོབ་རྒྱ་མཚོ་ལྟ་བུའི་དབུས་སུ་རྡོ་རྗེའི་སྐྱིལ་ཀྲུང་གིས་བཞུགས་པ། མ་གཅིག་གི་སྙན་གོང་གཡོན་ཕྱོགས་སུ་ཧཱི༔ལས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས། ཕྱག་གཡས་པས་གྲི་གུག་ནམ་མཁའ་ལ་ཕྱར་བ། གཡོན་པས་ཐོད་ཁྲག་ཐུགས་ཀར་བསྣམས་པ། གྲུ་མོ་ན་ཁཊྭཱཾ་ག་ཡོད་པ། རུས་པའི་རྒྱན་ཆ་དྲུག་གིས་བརྒྱན་པ། ཐོད་པ་སྐམ་པོ་ལྔས་དབུ་ལ་བརྒྱན་ཅིང་། རློན་པ་ལྔ་བཅུ་རྩ་གཅིག་གིས་དོ་ཤལ་བྱས་པ། ཞབས་གཡས་བསྐུམ་གཡོན་བརྐྱང་ཞིང་པདྨ་དང་ཉི་
མ་རོའི་གདན་ལ་གར་སྟབས་ཀྱིས་ལིང་ངེར་བཞུགས་པ། དེའི་ཤར་དུ་ཧ་ལས་རྡོ་རྗེ་མཁའ་འགྲོ་མ་དཀར་མོ། ལྷོར་རི་ལས་རིན་ཆེན་མཁའ་འགྲོ་མ་སེར་མོ། ནུབ་ཏུ་ནི་ལས་པདྨ་མཁའ་འགྲོ་མ་དམར་མོ། བྱང་དུ་ས་ལས་ལས་ཀྱི་མཁའ་འགྲོ་མ་ལྗང་གུ། བཞི་ཀའང་ཞལ་གཅིག་ཕྱག་གཉིས་གྲི་གུག་དང་ཐོད་ཁྲག་འཛིན་ཅིང་། རྒྱན་ཆ་ལུགས་ཐམས་ཅད་གཙོ་མོ་དང་མཚུངས་པའོ། །མ་ཇོ་མོའི་དབུ་ཐོག་ཉི་ཟླ་པདྨའི་གདན་ལ། མཱུཾ་་ཡིག་སེར་པོ་ལས་སངས་རྒྱས་ཤཱཀྱ་ཐུབ་པ་སྐུ་མདོག་གསེར་བཙོ་མའི་མདོག་ལྟ་བུ། ཞལ་གཅིག་ཕྱག་གཉིས། གཡས་ས་གནོན། གཡོན་མཉམ་བཞག །དབུ་ལ་གཙུག་ཏོར། ཞབས་ལ་འཁོར་ལོ་སོགས་མཚན་བཟང་པོ་སུམ་ཅུ་རྩ་གཉིས། དཔེ་བྱད་བཟང་པོ་བརྒྱད་ཅུས་བརྒྱན་པ། འོད་དང་འོད་ཟེར་གྱི་ཚོགས་དཔག་ཏུ་མེད་པ་འཕྲོ་བ། དེ་ལ་འདས་མ་འོངས་ད་ལྟ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རང་རྒྱལ་ཉན་ཐོས་ཀྱི་ཚོགས་ཀྱིས་བསྐོར་ནས་བཞུགས་པ། དེའི་དབུ་ཐོག་ཉི་ཟླ་པདྨའི་གདན་ལ་མཱུཾཿཡིག་དམར་སེར་ལས། ཆོས་སྐུ་ཡུམ་ཆེན་མོ་སྐུ་མདོག་གསེར་བཙོ་མའི་མདོག་ལྟ་བུ་ཞལ་
གཅིག་ཕྱག་བཞི་མ། གཡས་པ་གཉིས་ཀྱིས་རྡོ་རྗེ་དང་ས་གནོན། གཡོན་པ་གཉིས་ཀྱིས་པོ་ཏི་དང་མཉམ་གཞག་མཛད་པ་སྐུ་ལ་དར་དང་རིན་པོ་ཆེ་སྣ་ཚོགས་ཀྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེ་ལ་སྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་ནས་བཞུགས་པ། དེའི་དབུ་ཐོག་ཉི་ཟླ་པདྨའི་གདན་ལ་དབུས་སུ་བྷྲཱུཾ་ལས་རྣམ་པར་སྣང་མཛད། ཤར་དུ་ལས་མི་བསྐྱོད་པ། ལྷོར་ཨཾ་ལས་རིན་འབྱུང་། ནུབ་དུ་ཛིཾ་ལས་སྣང་མཐའ། བྱང་དུ་ཁཾ་ལས་དོན་གྲུབ་སྟེ་རིགས་ལྔ། ཡུམ་ཆེན་མོའི་མདུན་གྱི་ནམ་མཁར་པདྨ་ཉི་ཟླའི་གདན་ལ་སྒྲོལ་མ། དེ་དག་གི་རྒྱབ་ཕྱོགས་སུ་ཐུབ་པ་གངས་ཆེན་མཚོ་རྒྱལ། གཞན་ཡང་གཡས་སུ་དཔའ་བོ་གཡོན་ནི། དུ་དཔའ་མོ་སོགས་ཐམས་ཅད་རྒྱན་ཆ་ལུགས་ཡོངས་སུ་རྫོགས་པ་ཏིལ་གྱི་གོང་བུ་ཁ་བྱེ་བ་ལྟ་བུ། མ་གཅིག་གི་གདན་ལས་ཅུང་ཟད་དམའ་བའི་ཕྱོགས་མཚམས་ཐམས་ཅད་དུ་པད་ཉི་རོ་ཡི་གདན་ལ། གཡས་སུ་ཆོས་སྐྱོང་ཕོ་རྒྱུད་གཡོན་དུ་མོ་རྒྱུད་སོགས་དམ་པ་ཆོས་སྐྱོང་བའི་སྲུང་མ་ཐམས་ཅད་གཟི་བརྗིད་དང་ལྡན་པ། དེའི་འོག་ཏུ་ཕྱི་རྒྱུད་འཇིག་རྟེན་པའི་ཆོས་
སྐྱོང་སྲུང་མ་ཐམས་ཅད་དང་། ཕྱོགས་བཞིར་རྒྱལ་ཆེན་བཞི་ལ་སོགས་པ་ཐམས་ཅད་སྤྲིན་འཁྲིགས་པ་ལྟ་བུ། དེའི་འོག་ཏུ་སྣང་ཞིང་སྲིད་པའི་ལྷ་འདྲེ་བཀའ་ལྷ་མ་སྲིན་སྡེ་བརྒྱད་ཡུལ་ལྷ་གཞི་བདག་གི་ཚོགས་དང་བཅས་པ། དེའི་རྒྱབ་ཏུ་གནོད་བྱེད་གནས་གདོན་ལུས་གདོན་ལན་ཆགས་བགེགས་རིགས། དེ་རྒྱབ་འགྲོ་བ་རིགས་དྲུག་གི་སེམས་ཅན་སྙིང་རྗེའི་མགྲོན་དང་བཅས་པ་དཔག་ཏུ་མེད་པ་ཐམས་ཅད་ཡུམ་ཆེན་མོའི་བཀའ་ཉན་དང་གསུང་སྡོད་ཀྱི་ཚུལ་དུ་བཞུགས་པ། དེ་ལྟར་ནམ་མཁའ་ས་གཞི་བར་སྣང་ཐམས་ཅད་སྐུ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུས་གང་ནས་བཞུགས་པར་གྱུར། ལྷ་ཚོགས་དེ་དག་ཐམས་ཅད་ཀྱི་དཔྲལ་བར་སྐུ་རྡོ་རྗེ་དང་ལུས་ཀྱི་ངོ་བོ་ཨོཾ་དཀར་པོ། པར་གསུང་རྡོ་རྗེ་དང་ངག་གི་ངོ་བོ་ཨཱཿདམར་པོ། ཐུགས་ཀར་ཐུགས་རྡོ་རྗེ་དང་སེམས་ཀྱི་ངོ་བོ་ཧཱུྃ་སྔོན་པོ། སྙིང་གའི་དབུས་སུ་ཡེ་ཤེས་པ་རྣམས་ལ་རང་རང་གི་ཐུགས་སྲོག་བོན། འཇིག་རྟེན་པ་རྣམས་ལ་རང་རང་གི་མིང་ཡིག་དང་པོ་ཐིག་ལེས་མཚན་པར་གྱུར། དྷེ་ཝ་ཌཱཀི་ནཱི་ཛཿཧཱུྃ། ལྷ་ཚོགས་དེ་དག་ཐམས་ཅད་ཀྱི་ཐུགས་ཀའི་ཧཱུྃ་ལས་འོད་ཟེར་
ལྕགས་ཀྱུ་ལྟ་བུ་འཕྲོས་པས། འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་། སོ་སོའི་གནས་ནས་ཡུམ་ཆེན་མོ་ལ་གྲུབ་ཐོབ་གཅོད་ཡུལ་བརྒྱུད་པའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་སྤྱན་དྲངས། ཨོཾ་གུ་རུ་དྷེ་ཝ་ཌཱཀི་ནཱི་ས་པཱ་རི་ཝཱ་ར་བཛྲ་ས་མ་ཡ་ཛཿ རྐང་གླིང་འབུད་ཌཱ་དྲིལ་དྲག་ཏུ་འཁྲོལ་ནས། ཧཱུྃ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །ཡུམ་ཆེན་འཁོར་བཅས་གནས་འདིར་གཤེགས་སུ་གསོལ། །ཡིད་ཀྱིས་ཕྱག་དང་མཆོད་པ་བྱོན་སྐྱེམས་ཚུལ་དུ་བྱས་ཏེ། ཛཿཞེས་ལྷ་རྣམས་རང་རང་སྤྱི་བོར་བྱོན། །ཧཱུྃ་ཞེས་ཆུ་ལ་ཆུ་བཞག་ལྟ་བུར་ཐིམ། །བཾ་ཞེས་དམ་ཡེ་དབྱེར་མེད་གཅིག་ཏུ་གྱུར། །ཛཿཞེས་ཐམས་ཅད་ཤིན་ཏུ་ཐུགས་དགྱེས་གྱུར། །ཡུམ་ཆེན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་
ལགས་ན། །སེང་གེ་པད་ཟླའི་གདན་སྟེང་དུ། །ཅི་བདེར་བར་ནི་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་པདྨ་ཀ་མ་ལཱ་ཡེ་ཧཱུཾ་སྭཱ་ཧཱ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དག་པ་བཟང་པོས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཊི་ཀ་ཏེ་ས་མ་ཡ་ཤྲི་ཡེ་ཧཱུྃ། རང་གི་ཐུགས་ལས་སྤྲུལ་པ་ཡི། །མཆོད་རྫ་ས་འཛིན་པ་ལྷ་མོའི་ཚོགས། །ནམ་མཁའ་གང་བར་སྤྲོས་ནས་ཀྱང་། །ཡུམ་ཆེན་འཁོར་དང་བཅས་རྣམས་མཆོད། །ཁྲུས་ཆབ་ཡོན་ཆབ་བདུག་སྤོས་དང་། །མེ་ཏོག་མར་མེ་དྲི་མཆོག་དང་། །ཞལ་ཟས་རོལ་མོའི་མཆོད་པ་རྣམས། །ཡུམ་ཆེན་འཁོར་དང་བཅས་ལ་འབུལ། །ཞེས་པ་ཕྱི་མཆོད་དོ། །སྟོང་གསུམ་རབ་འབྱམས་འཇིག་རྟེན་ན། །འདོད་ཡོན་ལྔ་པོ་ཅི་མཆིས་པ། །འདོད་ཡོན་ལྷ་མོར་དམིགས་བྱས་ནས། །ཡུམ་ཆེན་འཁོར་དང་བཅས་ལ་འབུལ། །གཟུགས་དང་སྒྲ་དང་དྲི་དང་རོ། །དེ་བཞིན་རེག་བྱ་ལྡན་པ་ཡི། །འདོད་པའི་ཡོན་ཏན་རྣམ་པ་ལྔ། །ཡུམ་ཆེན་འཁོར་དང་བཅས་ལ་འབུལ། །ནང་གི་མཆོད་པའོ། །རྒྱལ་སྲིད་རིན་ཆེན་སྣ་བདུན་ཡང་། །
ནམ་མཁའ་གང་བར་བློས་སྤྲུལ་ཏེ། །བསོད་ནམས་ཚོགས་ཆེན་རྫོགས་པའི་ཕྱིར། །ཡུམ་ཆེན་འཁོར་དང་བཅས་ལ་འབུལ། །འཁོར་ལོ་ནོར་བུ་བཙུན་མོ་དང་། །བློན་པོ་གླང་པོ་རྟ་མཆོག་དང་། །དམག་དཔོན་རིན་ཆེན་སྣ་བདུན་རྣམས། །ཡུམ་ཆེན་འཁོར་དང་བཅས་ལ་འབུལ། །རང་གི་ཐུགས་ལས་སྤྲུལ་པ་ཡི། །སྒེག་སོགས་མཆོད་པའི་ལྷ་མོ་བརྒྱད། །གྲངས་མེད་སྤྲུལ་ནས་ལྷ་ཚོགས་རྣམས། །ཟག་མེད་བདེ་བས་མཉེས་པར་བྱས། །སྒེག་མོ་ཕྲེང་བ་གླུ་མ་གར། །སྤོས་དང་མེ་ཏོག་མར་མེ་དྲི། །ཕྱི་ནང་སྒེག་སོགས་བརྒྱད་པོ་རྣམས། །ཡུམ་ཆེན་འཁོར་དང་བཅས་ལ་འབུལ། །གསང་མཆོད་དོ། །ཕྱི་སྣོད་གླིང་བཞི་རི་རབ་བྱེ་བ་བརྒྱ། །ནང་བཅུད་ལྷ་མིའི་ལོངས་ཞི་སྤྱོད་ཟག་མེད་པ། །བདག་ལུས་ཁ་རྗེ་དབང་ཐང་དགེ་རྩར་བཅས། །མཎྜལ་གཅིག་ཏུ་བསྡུས་ནས་མཆོད་པར་འབུལ། །ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དེར་སྤྱོད་པར་ཤོག །ཨོཾ་སརྦ་ཏ་ཐཱ་ག་ཏ་ཧཱུྃ་གུ་རུ་རཏྣ་མཎྜ་ལ་པཱུ་ཛ་།
མེ་གྷ་ས་མུ་དྲ་སྤ་ར་ཎ་ས་མ་ཡེ་ཨཱཿཧཱུྃ། མཎྜལ་ལོ། །དེ་ལྟར་མཆོད་པ་ཕུལ་བས་སེམས་ཅན་ཀུན། །ཚོགས་རྫོགས་སྒྲིབ་སྦྱང་བྱང་ཆུབ་བདེ་བླག་འགྲུབ། །འཁོར་འདས་མཉམ་ཉིད་སྐྱེ་མེད་ཆོས་ཀྱི་སྐུ། །སྤྲོས་མེད་བདེ་བ་ཆེན་པོར་ལྷུན་གྱིས་གྲུབ། །ཕཊ་ཕཊ། ཅེས་སྟོང་ཉིད་ངང་ལ་ཡུད་ཙམ་བཞག་པ་དོན་དམ་པའི་མཆོད་པའོ། །བདྭག་གི་རམ་བུའི་ཚུལ་དུ་ནི། །སྣང་སྲིད་ལྷ་འདྲེ་ཐམས་ཅད་དང་། །འགྲོ་དྲུག་སེམས་ཅན་ཐམས་ཅད་ཀྱིས། །ཡུམ་ཆེན་འཁོར་བཅས་བསྟོད་པར་གྱུར། །གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །དང་པོར་མེ་ཏོག་ཕོག་པ་ཡི། །དཀྱིལ་འཁོར་ལྷ་ཚོགས་རྣམས་ལ་འདུད། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་བསྟོད། །བལྟ་བས་མི་ངོམས་འགྲོ་བའི་དཔལ་དུ་ཤར། །ཞལ་གཅིག་ཕྱག་བཞི་བཙོ་
མ་གསེར་གྱི་མདོག །རིན་ཆེན་རྒྱན་སྤྲས་རྡོ་རྗེའི་སྐྱིལ་ཀྲུང་བཞུགས། །རྒྱལ་བའི་ཡུམ་གྱུར་ཁྱོད་ལ་ཕྱག་འཚལ་བསྟོད། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །ཞིང་ཁམས་ཐམས་ཅད་གསེར་གྱི་ས་གཞི་ལ། །རིན་ཆེན་མེ་ཏོག་མང་པོ་གཅལ་དུ་བཀྲམ། །མེ་ཏོག་པུཎྜ་རཱི་ཀ་ཆར་ལྟར་འབེབས། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་བསྟོད། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་བསྟོད། །དག་པས་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་བསྟོད། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། དགེ་འདུན་རྣམས་ལ་ཕྱག་འཚལ་བསྟོད། །བྱ་སྤྱོད་རྣལ་འབྱོར་རྒྱུད་སྡེ་བཞི། །སྟོན་པ་ཉིད་
ཀྱིས་གང་གསུངས་པ། །ཕྱི་དང་ནང་དང་གསང་བ་ཡི། །ཡི་དམ་རྣམས་ལ་ཕྱག་འཚལ་བསྟོད། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུང་ཐུགས། །འགྲོ་བ་སྐྱོབ་ལ་ཕྱག་འཚལ་བསྟོད། །སྟོན་པའི་བསྟན་པ་རིན་པོ་ཆེ། །སྟོན་པ་ཉིད་ཀྱི་ཞབས་དྲུང་དུ། །ཇི་བཞིན་སྐྱོང་བར་ཞལ་བཞེས་པའི། །ཆོས་སྐྱོང་རྣམས་ལ་ཕྱག་འཚལ་བསྟོད། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་རྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་བསྟོད། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། དགེ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །དེ་ནས་བསྙེན་པ་བྱ་བ་ནི། ཡུམ་ཆེན་ཐུགས་ཀར་པདྨ་ཟླ་བའི་སྟེང་། །ཨ་ཡིག་དཀར་པོའི་མཐའ་མར་ག་ཏེའི་སྔགས། །ཡིག་ངོ་ནང་བསྟན་གཡས་བསྐོར་བཀོད་པ་དེ། །གཡོན་དུ་འཁོར་བས་སྔགས་ཀྱི་རང་སྒྲ་གྲག །གྲག་སྟོང་སྒྲ་དེས་སྣོད་བཅུད་འཁོར་འདས་ཀུན། །སྣང་སྟོང་སྒྱུ་མ་ཆུ་ཟླ་ལྟ་བུར་གྱུར། །
ཏདྱ་ཐཱ། ཨོཾ་གཱ་ཏེ་གཱ་ཏེ་པ་ར་ག་ཏེ་པཱ་ར་སཾ་ག་ཏེ་བྷོ་དྷི་ཡེ་སྭཱ་ཧཱ། །ཞེས་ཅུང་ཟད་བཟླ། མ་གཅིག་ཐུགས་ཀར་པདྨ་ཟླ་བའི་སྟེང་། །ཧཱུྃ་ཡིག་དཀར་པོའི་མཐའ་མར་གཡས་བསྐོར་དུ། །སྔགས་ཕྲེང་བཀོད་པ་གཡོན་དུ་དྲག་ཏུ་འཁོར། །དེ་ཡི་འོད་ཀྱིས་ལྷ་ཚོགས་ཐམས་ཅད་བསྐུལ། །དེ་ཡི་འོད་ཟེར་ཡུམ་ཆེན་ལ་ཕོག་པས། །ཡུམ་ཆེན་ཐུགས་ལས་འོད་ཟེར་ཕྱོགས་བཅུར་འཕྲོས། །འོག་མིན་གནས་དང་ཕྱོགས་བཅུའི་ཞིང་ཁམས་ནས། །ཡུམ་ཆེན་རྒྱལ་བ་སྲས་བཅས་ཐམས་ཅད་ཀྱི། །སྐུ་གསུང་ཐུགས་ཀྱི་བྱིན་རླབས་ནུས་པ་རྣམས། །འོད་ཟེར་ཚུལ་དུ་མ་གཅིག་ཐུགས་ཀར་བསྡུས། །བྱིན་རླབས་ངོ་བོ་བདུད་རྩིས་སྐུ་ལུས་གང་། །ཕཊ་ཕཊ་ཕཊ། དམིགས་པ་བྱིན་རླབས་བསྡུ་བ་འདི་ལ་གཱ་ཏེའི་སྔགས་མང་དུ་བཟླའོ། །དེ་ནས་སྡིག་སྒྲིབ་སྦྱོང་བའི་དམིགས་པ་ནི། ཕཊ། མ་གཅིག་ཞབས་གཡོན་མཐེ་བོང་རྩེ་མོ་ནས། །བདུད་རྩིའི་ཆུ་རྒྱུན་ཆུ་བོ་བཞིན་དུ་བབས། །རང་དང་བསྲུང་བྱའི་སྤྱི་བོ་ཚངས་བུག་ནས། །ཞུགས་པས་ལུས་གང་ཉམས་ཆག་སྡིག་སྒྲིབ་རྣམས། །འོག་སྒོ་རྐང་སེན་བ་སྤུའི་བུ་ག་ནས། །རྣག་ཁྲག་དུད་ཁུ་སོལ་ཁུ་བཞིན་དུ་ཐོན། །འོག་གཞི་དབང་
ཆེན་གསེར་གྱི་ས་གཞིར་ཐིམ། །བདག་དང་འགྲོ་བའི་སྡིག་སྒྲིབ་ཐམས་ཅད་དག །ལུས་རྣམས་ཟག་མེད་ཡེ་ཤེས་བདུད་རྩིའི་གང་། །སྟོང་གསལ་དྲི་མེད་ཤེལ་སྒོང་ལྟ་བུར་གྱུར། །ཕཊ་ཕཊ། དེ་ནས་ལན་ཆགས་འཇལ་བའི་དམིགས་པ་ནི་ནད་པ་ལ་བྱ་སྟེ། བདག་གཞན་སྡིག་སྒྲིབ་བཀྲུས་པའི་ཁུ་བ་དེ། །ངོ་བོ་བདུད་རྩི་རྣམ་པ་འདོད་ཡོན་ཚོགས། །བཟའ་བཏུང་ལོངས་སྤྱོད་ཕུན་སུམ་ཚོགས་པར་གྱུར། །རང་གི་འོག་ཕྱོགས་ལུས་གདོན་ནད་བདག་གི །ཁ་རུ་སོང་བས་ལན་ཆགས་བུ་ལོན་བྱུང་། །གནོད་སེམས་ཞི་ནས་ཕན་སེམས་ལྡན་པར་གྱུར། ཕཊ་ཕཊ་ཕཊ། དེ་ནས་ནམ་མཁའ་སྒོ་འབྱེད་བྱ་བ་ནི། རང་ཉིད་རྟོགས་པ་མཐོའམ་གལ་ཆེ་ན། བདག་གཞན་དབྱེར་མེད་དུ་བསྲེ་བ་ཡིན་ཀྱང་། སོ་སོར་འཕོ་བ་འདི་རང་ལ་གྲིབ་ཆུང་བས། ཕཊ། །བདག་དང་བསྲུང་བྱ་རྣམས་ཀྱི་ལུས་སྟོང་གསལ་ཕྲུ་མ་ཕུས་བཏབ་པ་ལྟ་བུའི་དབུས་སུ། རྩ་དབུ་མ་ཕྱི་དཀར་ལ་ནང་དམར་བ། ངོ་བོ་སྟོང་ལ་རང་བཞིན་གསལ་བ་སྦ་ལྕག་འབྲིང་པོ་ཙམ། ཡར་སྣེ་ཚངས་བུག་ཏུ་ཟུག་པ་སྐར་ཁུང་ལྟ་བུ། མར་སྣེ་ལྟེ་འོག་ཏུ་ཟུག་པ་གསལ་བར་གྱུར། ཕཊ། རྐང་མཐིལ་གཡས་སུ་ཕ་ལས་ཐོབ་པའི་ཐིག་ལེ་དཀར་པོ་སྲན་མ་
ཙམ། གཡོན་དུ་མ་ལས་ཐོབ་པའི་རཀྟ་དམར་པོ་སྲན་མ་ཙམ། ཕཊ། དེ་གཉིས་ཡར་འཕར་གསང་གནས་སུ་སླེབས་པས་བྱ་མ་སར་གྱི་སྒོ་ང་ཙམ། ཕཊ། །ཡར་འཕར་ནས་ལྟེ་བར་སླེབ། ཕཊ། སྙིང་གར་སླེབས་པས་བདག་དང་བསྲུང་བྱའི་ཚེ་དང་བསོད་ནམས་བཀྲག་དང་གཟི་མདངས། རླུང་སེམས་ཐམས་ཅད་འདུས་པའི་ངོ་བོ་ཐིག་ལེ་ཁ་དོག་ལྔ་ལྡན་འོད་ཟེར་དང་དང་བཅས་པ་འཕར་འདར་ལིང་ངེ་བ་ཅིག་ཏུ་གྱུར། ཕཊ། མགྲིན་པར་ཕཊ། སྤྱི་བོ་ནས་རྒྱང་གིས་ཐོན་ནས་མ་གཅིག་གི་ཐུགས་ཀར་ཐིམ་པས་ཐུགས་ཆོས་ཉིད་ཀྱི་ནམ་མཁའ་དང་དབྱེར་མེད་ཁྱབ་བརྡལ་ཆེན་པོར་གྱུར། ཕཊ། དེ་ནི་དབྱིངས་རིག་བསྲེ་བའོ། །དེ་ནས་ལུས་མཎྜལ་དུ་འབུལ་བ་ནི། ཕཊ། མ་གཅིག་ཐུགས་ལས་རང་སེམས་རིག་པ་དེ། །ཤྲིཡིག་དམར་པོ་ཕྱིར་འཕྲོས་པས། །ཕག་མོ་དམར་མོ་གྲི་ཐོད་འཛིན། །དེ་ཡིས་བེམ་པོ་བཤས་གྱུར་པས། །པགས་པ་གསེར་གྱི་ས་གཞིའི་དབུས། །རང་ལུས་རི་མཆོག་ཉི་ཟླས་བརྒྱན། །སྡེབས་བཞི་གླིང་བཞི་གླིང་ཕྲན་བརྒྱད། །སོར་མཛུབ་ལྕགས་རི་ཁོར་ཡུག་བསྐོར། །ལུས་མཎྜལ་ཡོངས་སུ་རྫོགས་པ་འདི། །
བླ་མ་ཡི་དམ་དཀོན་མཆོག་དང་། །སངས་རྒྱས་བྱང་ཆུབ་སེམས་དཔའ་དང་། །མཁའ་འགྲོ་ཆོས་སྐྱོང་རྣམས་ལ་འབུལ། །གུ་རུ་དྷེ་ཝ་ཌཱཀི་ནཱི་རཏྣ་མཎྜ་ལ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། མཆོད་སྦྱིན་སྐབས་སུ་ཕཊ་འབྲོང་གི་རྔ་མ་ལྟ་བུ་འཇམ་ཞིང་སྙན་པར་བརྗོད། འདི་དག་གི་སྐབས་ཐམས་ཅད་དུ་རྣམ་ཤེས་སྤར་བ་སྐད་ཅིག་དྲན་རྫོགས་རེ་འགྲུབ་ཀྱང་ལེགས། ཡང་ན་སྔ་མའི་ལུས་དེའི་ལྷག་མ་གང་འདོད་སོ་སོར་བསྒྱུར་ཅིང་མཆོད་ཀྱང་རུང་ངོ་།། ཕཊ། རང་གི་རྣམ་པར་ཤེས་པ་མཁའ་འགྲོ་མ་དམར་མོ་གྲི་གུག་ཐོད་ཁྲག་བསྣམས་པ། དེས་རང་གཞན་དབྱེར་མེད་ཀྱི་བེམ་པོ་དེའི་སྨིན་མཚམས་ཡན་ཆད་རྦད་དེ་བཅད་པ། ཡེ་ཤེས་ཀྱི་ཀ་པཱ་ལ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པ། དེའི་ནང་དུ་ཤ་ཁྲག་རུས་གསུམ་གྲི་གུག་གིས་གཏུབ་ཅིང་སྤུངས་པ་དེ་ཐོད་སྐྱེད་གསུམ་གྱི་སྟེང་དུ་གནས་པ་ལ། རླུང་གཡོས་ཡེ་ཤེས་ཀྱི་མེ་སྦྱར་བས་ཞུ་ཞིང་ཁོལ་ནས། ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱཿཧཱུྃ་ཧ་ཧོ་ཧཱུྃསྭཱ་ཧཱ། རང་གི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་གྲངས་མེད་པ་འཕྲོས་པས་ཐོད་པའི་བདུད་རྩི་བཅུས་ཤིང་ལྷ་སོ་སོ་ལ་མཆོད་པར་གྱུར། ཕཊ་
ཕཊ། གདོས་བཅས་ལུས་ཀྱིས་སྟོང་གསུམ་གང་། །ཡི་གེ་གསུམ་གྱིས་བྱིན་གྱིས་བརླབས། །ཟག་མེད་བདུད་རྩིར་འོད་དུ་ཞུ། །ཕུད་རླངས་མཆོད་པའི་སྤྲིན་ཕུང་འཁྲིགས། །ཕྱོགས་བཅུའི་རྒྱལ་བ་སྲས་དང་བཅས། །བླ་མ་ཡི་དམ་མཁའ་འགྲོ་དང་། །དཔའ་བོ་དཔའ་མོའི་ཚོགས་རྣམས་ཀུན། །མ་ལུས་པ་རྣམས་ཚིམས་གྱུར་ཅིག །ཕཊ་ཕཊ། ཐོད་པ་བདུད་རྩིས་གང་བ་འཕྲོས། །ཆོས་སྐྱོང་མ་མགོན་ལྕམ་དྲལ་དང་། །བྲན་གཡོག་བཀའ་སྡོད་འཁོར་བཅས་ཀྱི། །ཐུགས་དམ་མ་ལུས་བསྐངས་གྱུར་ཅིག ཕཊ་ཕཊ། སྐད་ཅིག་ལ་ཕུང་པོའི་ལྷག་རོལ་གང་ལ་ཅི་འདོད་དེ་དང་དེར་བསྒྱུར་ལ། ཕཊ། ཤ་ཁྲག་རུས་པ་འདོད་ཡོན་ཕུན་སུམ་ཚོགས། །བ་སྤུ་རྩི་ཤིང་ནགས་ཚལ་རྒྱས། །དོན་སྣོད་ལྔ་ཡི་འཇའ་ཚོན་འཁྲིགས། །དབུགས་རླུང་ན་བུན་ཆུ་འཛིན་འཁྲིགས། །ཡུལ་མཁར་བེའུ་ལུག་གླང་པོ་རྟ། །དར་ཟབ་འབྲུ་སྣ་རིན་ཆེན་གཏེར། །ལུས་དང་སྲོག་དང་ལོངས་སྤྱོད་དང་། །ཁ་རྗེ་དབང་ཐང་བཀྲག་མདངས་དང་། །མ་ལུས་ལྷུན་གྲུབ་དཔལ་འབྱོར་འདི། །ཚེ་རབས་འཁོར་བ་ཐོག་མེད་ཀྱི། །ལན་ཚོགས་བདག་པོ་བདག་མོ་
དང་། །བགེགས་རིགས་སྟོང་ཕྲག་བརྒྱད་ཅུ་དང་། །བྱིས་པའི་གདོན་ཆེན་བཅོ་ལྔ་དང་། །ལན་ཆགས་འཁོར་བའི་མགྲོན་ལ་སྦྱིན། །བུ་ལོན་ལན་ཆགས་བྱང་གྱུར་ཅིག །འཁོན་འབྲེལ་ཐག་ཆོད་གྱུར་ཅིག །རྟག་ཏུ་བདེ་སྐྱིད་ལྡན་པ་དང་། །མཐར་ཐུག་སངས་རྒྱས་ཐོབ་པར་ཤོག །ཕཊ་ཕཊ། བདག་ལུས་ནོར་བུའི་གཏེར་ཁ་ཕྱེས། །དགོས་འདོད་ལྷུན་གྲུབ་བསམ་མི་ཁྱབ། །སྡུག་བསྔལ་ཐམས་ཅད་སེལ་བའི་སྨན། །བདེ་ཆེན་ལྷུན་གྲུབ་རྒྱས་པའི་དཔལ། །ཟག་མེད་རོ་བཅུད་ལྡན་པའི་མཆོག །སྟོང་གསུམ་གང་བའི་བདུད་རྩི་འདི། །མཆོད་སྦྱིན་འདོད་པའི་ལྷ་མོ་ཡིས། །དཔག་མེད་ཐོད་པ་བདུད་རྩི་སྤྲོས། །རིགས་དྲུག་སེམས་ཅན་ཚིམ་གྱུར་ཅིག །རང་རང་སྡུག་བསྔལ་ཞི་ནས་ཀྱང་། །རྟག་ཏུ་བདེ་སྐྱིད་ལྡན་པ་དང་། །མཐར་ཐུག་སངས་རྒྱས་ཐོབ་པར་ཤོག །ཕཊ་ཕཊ། བདག་ལུས་གདོས་བཅས་ཕུང་པོ་འདི། །དཀར་གསུམ་མངར་གསུམ་སྨན་གྱི་མཆོག །དར་ཟབ་དང་ནི་རིན་པོ་ཆེ། །འབྲུ་སྣ་དང་ནི་འདོད་ཡོན་ཚོགས། །བ་གླང་རྟ་དང་གླང་པོ་དང་། །དཀོར་ནོར་སྣ་ཚོགས་བང་མཛོད་དང་། །མེ་ཏོག་རྩི་སྨན་
ནགས་ཚལ་དང་། །གཞི་བདག་འདོད་པའི་ལོངས་སྤྱོད་རྣམས། །བདག་ལ་མེད་པ་གཅིག་ཀྱང་མེད། །ཅི་འདོད་ཅི་མཁོ་བདག་གིས་སྦྱིན། །གཞི་བདག་རྣམས་ལ་མཆོད་པ་འབུལ། །ལྷག་མ་མེད་པར་བཞེས་ནས་ཀྱང་། །དགའ་མགུ་ཡི་རང་ལྡན་གྱུར་ཅིག །གདུག་རྩུབ་བསམ་ངན་ཞི་ནས་ཀྱང་། །བྱང་ཆུབ་སེམས་དང་ལྡན་གྱུར་ཅིག །མཐར་ཐུག་སངས་རྒྱས་ཐོབ་པར་ཤོག །ཕཊ་ཕཊ། བདག་ལུས་གདོས་བཅས་ཕུང་པོ་འདི། །ཤ་ཁྲག་རྫིང་བུ་ལྟེང་ཀ་དང་། །ནེའུ་སེང་དང་ནི་དཔག་བསམ་ཤིང་། །སྐྱེད་མོའི་ཚལ་དང་ཁང་བཟང་རི། །ཡིད་བཞིན་ནོར་བུ་དྲི་བཟང་སྨན། །འདོད་ཡོན་གཟུགས་སྒྲ་དྲི་རོ་རེག །ཀླུ་ལ་མཁོ་བའི་ཡོ་བྱད་རྣམས། །བདག་ལ་མེད་པ་གཅིག་ཀྱང་མེད། །ཅི་འདོད་ཅི་མཁོ་བདག་གིས་སྦྱིན། །ཀླུ་རིགས་རྣམས་ལ་མཆོད་པ་འབུལ། །ལྷག་མ་མེད་པར་བཞེས་ནས་ཀྱང་། །དགའ་མགུ་ཡི་རང་ལྡན་གྱུར་ཅིག ། རབསམ་ངན་གདུག་རྩུབ་ཞི་ནས་ཀྱང་། །བྱང་ཆུབ་སེམས་དང་ལྡན་གྱུར་ཅིག །མཐར་ཐུག་སངས་རྒྱས་ཐོབ་པར་ཤོག །ཕཊ་ཕཊ། དེ་ནས་དམར་འགྱེད་ནི། བདུད་རྩི་ལྷག་
མ་ཅུང་ཟད་ལུས་པ་ལ། མདུན་བསྐྱེད་ཀྱི་ཐུགས་ཀ་ནས།། འོད་ཟེར་ཞིག་ཕོག་མ་ཐག་ཏུ་ཕཊ། སྒྱུ་ལུས་ཤ་ཡི་རི་བོ། ཁྲག་གི་རྒྱ་མཚོ། ཀེང་རུས་རུས་པའི་གྲམ་ཁྲོད་སྟོང་གསུམ་རབ་འབྱམས་འཇིག་རྟེན་གྱི་ཁམས་གང་བ་འདི། སྣང་སྲིད་ཀྱི་ལྷ་འདྲེ་བཀའ་ལྷ་མ་སྲིན་སྡེ་བརྒྱད། དཀར་པོ་ལྷ་ཡི་སྡེ་ཚོགས། ནག་པོ་བདུད་ཀྱི་སྡེ་ཚོགས། དམར་པོ་བཙན་གྱི་སྡེ་ཚོགས། ཁྲ་བོ་གཟའི་སྡེ་ཚོགས། སྔོན་པོ་ཀླུའི་སྡེ་ཚོགས། སེར་པོ་གཉན་གྱི་སྡེ་ཚོགས། སྨུག་པོ་དམུ་ཡི་སྡེ་ཚོགས། ལྗང་གུ་ས་བདག་གི་སྡེ་ཚོགས། རཀཱ་སྲིན་པོའི་སྡེ་ཚོགས། ལ་གསུམ་ལ་འགྲིམས་པའི་བཙན། ལུང་གསུམ་ལ་འགྲིམས་པའི་བདུད། གྲོང་གསུམ་ལ་འགྲིམས་པའི་འདྲེ་མོ། གཙང་ཐིལ་འབང་ཐིལ། མགར་གི་ཐིལ། ཀླུ་ཐིལ། བེ་དཀར། བེར་ནག་ལ་སོགས་པའི་གདུག་པ་ཅན་རྣམས་དང་། གཞན་ཡང་སྟེང་གདོན་གཟའ་དང་དྲང་སྲོང་། འོག་གདོན་ཀླུ་དང་ས་བདག །བར་གདོན་གཉན་དང་ཐེའུ་རང་། བྱད་མ་ལྷ་སྲུང་དང་་བཅས་པ། ཟ་འདྲེ་ཤི་གཤེད་དང་བཅས་པ། ཐམས་ཅད་སྐད་ཅིག་རང་དབང་མེད་པར་འདིར་འདུས་ཤིག །ཧཱུྃ་ཧཱུྃ་ཧཱུྃ།
འདིར་ཤོག །འདིར་འདུས། ཤ་ཟོ། ཁྲག་འཐུང་། ཤ་ལ་དགའ་བས་ཤ་ཟོ། ཁྲག་ལ་དགའ་བས་ཁྲག་འཐུང་། རུས་པ་ལ་དགའ་བས་རུས་པ་མུར། །པགས་པ་ལ་དགའ་བས་པགས་པ་གྱོན། ཕཊ་ཕཊ་ཕཊ། ཧཱུྃ། མཐོ་སྲིད་པའི་རྩེ་མོ་མན་ཆད་ནས། །དམའ་ན་རག་དམྱལ་ཁམས་ཡན་ཆད་ཀྱི། །སྣང་ཞིང་སྲིད་པའི་ལྷ་འདྲེ་དང་། །བདག་ཅག་ཡོན་མཆོད་མི་ནོར་ལ། །གནོད་ཅིང་འཚེ་བའི་བགེགས་རིགས་དང་། །ཆོ་འཕྲུལ་སྟོན་པའི་འདྲེ་གདོན་རྣམས། །ནམ་མཁའི་སྤྲིན་ཚོགས་བཞིན་དུ་འདུས་ལ་ཤོག །བར་སྣང་ཆར་པ་བཞིན་དུ་ཕོབ་ལ་ཤོག །ས་གཞི་རླུང་དམར་བཞིན་དུ་འཚུབ་ལ་ཤོག །བཟའ་བའི་ཤ་ཡང་འདི་ན་ཆེ། །བཏུང་བའི་ཁྲག་ཀྱང་འདི་ན་མང་། །གྱོན་པའི་པགས་པ་འདི་ན་དྲོ། །མུར་བའི་ལྷ་བ་འདི་ན་ཞིམ། །ཁྱེད་ལྷ་འདྲེ་རྣམས་ལ་འདོད་ཡོན་ཚོགས། །ཐོགས་པ་མེད་པར་འབྱུང་གྱུར་ཅིག །ཕཊ་ཕཊ། ཁྱོད་འདིར་འཚོགས་རྣམས་ལ་ལུས་འདི་འབུལ། །ཕྱི་ཤ་གཟུགས་དྲུག་གི་མཆོད་པ་འབུལ། །བཀའ་ཕ་རོལ་ཕྱིན་དྲུག་ཐོབ་པར་ཤོག །ནང་ཆ་བུ་དགུའི་མཆོད་པ་འབུལ། །
ཐེག་པ་རིམ་དགུ་ཐོབ་པར་ཤོག །དོན་སྙིང་རྣམ་ལྔའི་མཆོད་པ་ཕུལ། །སྐུ་ལྔ་ཡེ་ཤེས་ཐོབ་པར་ཤོག །ཁྱེད་སྣང་ཞིང་སྲིད་པའི་ལྷ་འདྲེ་རྣམས། །རིངས་བ་རྣམས་ཀྱིས་རློན་པ་ཟོ། །མི་རིངས་བ་རྣམས་ཀྱིས་ཚོས་ལ་ཟོ། །ཤ་ཟན་ལྕབ་སྒྲ་དི་རི་རི། །ཁྲག་འཐུང་ཧུབ་སྒྲ་ཧོ་རོ་རོ། །རུས་མུར་སོ་སྒྲ་ཁྲ་ལ་ལ། །རྐང་དུང་ལྷ་བ་ལྗིབས་སེ་ལྗིབ། །དགྱེས་པའི་གད་མོ་ཤ་ར་ར། །མགུ་བའི་གླུ་ལེན་ཀྱུ་རུ་རུ། །དྲག་པོའི་རྐན་སྒྲ་ཐགས་སེ་ཐག །ཁོག་སྟོད་པ་བདུད་རྒྱལ་པོས་ཟོ། །ཁོག་སྨད་མ་བདུད་སྲིན་མོས་ཟོ། །སྐེད་པ་སྣང་སྲིད་ལྷ་འདྲེས་ཟོ། །ཕྱི་ཤ་གཟུགས་དྲུག་ཕྱི་ཡི་ལྷ་འདྲེས་ཟོ། །ནང་ཆ་བུ་དགུ་ནང་གི་ལྷ་འདྲེས་ཟོ། །བར་ཤ་གསུམ་པོ་བར་གྱི་ལྷ་འདྲེས་ཟོ། །ནང་རོལ་དམན་མོ་ཆུང་སྲིས་ཟོ། །མཆིན་པ་སྲིད་པའི་འདྲེ་དགུས་ཟོ། །མཁལ་མ་གཙུག་ལག་གདོན་བཅུས་ཟོ། །མཚེར་པ་ཡུལ་འདྲེ་འཁྱམས་པོས་ཟོ། །གློ་བ་བན་ཆེན་བརྒྱ་དང་བོན་ཆུང་སྟོང་། ཤན་པ་མི་རིང་འབུམ་གྱིས་ཟོ། །གློ་ཚིལ་བྱད་མ་རྦོད་གཏོང་ཟོ། །པགས་པ་ཀླུ་དང་ས་བདག་ཟོ། །ཀླུ་དང་ས་བདག་ཚིམས་གྱུར་ཅིག །བྱ་རྒོད་ཐེད་ལ་རོལ་པ་བཞིན། །
མཆིན་པ་སྲིད་པའི་གཟུགས་དྲུག་ཕྱི་ཡི་ལྷ་འདེདྲུག་པོའི་རྐན་སྒྲ་ཐགས་བསྐྱབ་སྒྲ་ཧོ་རོ་རོ། །ཕུད་ལྷག་མ་མེད་པར་འདི་བཞེས་ཤིག །བྱིས་ནག་སག་ཆུ་ལ་རུབ་པ་བཞིན། །ཕུད་ལྷག་མ་མེད་པར་འདི་བཞེས་ཤིག །ཤ་རུལ་སྦྲང་མ་འཚུབ་པ་བཞིན། །ཕུད་ལྷག་མ་མེད་པར་འདི་བཞེས་ཤིག །སེང་གེ་ཤ་ལ་རོལ་པ་བཞིན། །ཕུད་ལྷག་མ་མེད་པར་འདི་བཞེས་ཤིག །དམག་ཆེན་གནང་ཆེན་ཆོད་པ་བཞིན། །ཕུད་ལྷག་མ་མེད་པར་འདི་བཞེས་ཤིག །ཁྱོད་ལྷ་འདོད་ལྷས་ཀྱང་ཁྱེར་ལ་སོང་། །འདྲེ་འདོད་འདྲེས་ཀྱང་ཁྱེར་ལ་སོང་། །ཆེ་ཆུང་མེད་པར་མཉམ་པར་གྱིས། །དྲག་ཞན་མེད་པར་ཚིམས་གྱུར་ཅིག །ཕཊ་ཕཊ། ཀྱེ། མ་འདིར་ཚོགས་སྣང་སྲིད་ལྷ་མ་སྲིན། །སྐྱེ་འགྲོའི་ཚེ་སྲོག་ཉུལ་མི་ཚོ། །སྒྱུ་མ་གཟུགས་ཀྱི་ཕུང་པོ་འདི། །མི་རྟག་འཇིག་པའི་ཆོས་ཅན་ཡིན། །ངས་ཅིས་ཀྱང་མི་བཞག་འདོར་བ་ལ། །འདྲེ་ཁྱེད་རྣམས་དགོས་ན་སུ་དགོས་ཁྱེར། །སྤྱིར་འགྲོ་བ་ཡོངས་ཀྱི་གླུད་དུ་བསྔོ། །སྒོས་དྲིན་ཆེན་ཕ་མའི་གླུད་དུ་བསྔོ། །ཡང་སྒོས་བླ་མ་སློབ་དཔོན་གྱི་གླུད་དུ་བསྔོ། །གྲྭ་རོག་གྲོགས་མཆེད་ཀྱི་གླུད་དུ་བསྔོ། །འཁོར་བུ་རིགས་རྣམས་ཀྱི་གླུད་དུ་བསྟི། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཁྱོད་དགའ་
མགུ་ཡི་རང་ཚིམས་གྱུར་ཅིག །སྔོན་ཆད་འཁོར་བ་ཐོག་མེད་ཀྱི། །བུ་ལོན་ལན་ཆགས་བྱང་གྱུར་ཅིག །ཤ་འཁོན་སྒྲིབ་པ་དག་གྱུར་ཅིག །མནག་སེམས་གནོད་སེམས་ཞི་གྱུར་ཅིག །སྡང་སེམས་འཁྲུག་སེམས་ཞི་གྱུར་ཅིག །བྱང་ཆུབ་སེམས་དང་ལྡན་གྱུར་ཅིག །བྱང་ཆུབ་སེམས་དང་ལྡན་ནས་ཀྱང་། །བླ་མེད་བྱང་ཆུབ་ཐོབ་པར་ཤོག །ཕཊ་ཕཊ། དེ་ནས་གསོལ་འདེབས་དམིགས་པ་ནི། ཕཊ། གཅོད་ཡུལ་བླ་མ་དཀྱིལ་འཁོར་ལྷ་ཚོགས་ལ། །བདག་དང་བསྲུང་བྱ་ལྷ་འདྲེ་བཅས་པ་རྣམས། །ཁ་ཙམ་མིན་པར་དད་གུས་རྩེ་གཅིག་གིས། །མགྲིན་གཅིག་དབྱངས་གཅིག་གསོལ་བ་འདེབས་པར་གྱུར། །ན་མོ་གུ་རུ། །གནས་འོག་མིན་ཆོས་དབྱིངས་ཕོ་བྲང་ན། །ཡུམ་ཆེན་ཤེས་རབ་ཕར་ཕྱིན་ལ་གསོལ་བ་འདེབས། །བདག་གསོལ་འདེབས་ཀྱི་བུ་ལ་བྱིན་གྱིས་རློབས། །རྐྱེན་ཕྱི་ནང་གི་བར་ཆད་ཞི་བ་དང་། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ། རྒྱས་པར་ཚིག་མཚམས་རེ་ན་འགྲེས་བྱང་ཡིན་ཀྱང་། བསྡུ་ན་ནི། གནས་བྱ་རྒོད་ཕུང་པོའི་རི་བོ་ན། །ཡང་དག་རྫོགས་པའི་སངས་རྒྱས་ལ་གསོལ་བ་
འདེབས། །གནས་སེང་ཆེན་བསྣོལ་བའི་ཁྲི་སྟེང་ན། །འཇམ་དཔལ་སྨྲ་བའི་སེང་གེ་ལ་གསོལ་བ་འདེབས། །དཔལ་གཡུ་ལོ་བཀོད་པའི་ཞིང་ཁམས་ན། །མཚན་ལྡན་རྗེ་བཙུན་སྒྲོལ་མ་ལ་གསོལ་བ་འདེབས། །གནས་མཁའ་སྤྱོད་མཁའ་འགྲོའི་བཞུགས་གནས་ན། །མཁའ་འགྲོ་སུ་ཁ་སིདྡྷི་ལ་གསོལ་བ་འདེབས། །གནས་རྒྱ་གར་འཇག་མའི་སྤྱིལ་པོ་ནས། །མཁས་པ་ཨཱརྱ་དེ་ཝ་ལ་གསོལ་བ་འདེབས། །བདག་གསོལ་འདེབས་ཀྱི་བུ་ལ་བྱིན་གྱིས་རློབས། །རྐྱེན་ཕྱི་ནང་གི་བར་ཆད་ཞི་བ་དང་། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ། དེ་ནས་ཡིད་ཀྱིས་ལུས་སྦྱིན་དམིགས་པ་མི་གཅིག་པ་མང་པོ་བྱེད་ཅིང་། ངག་གིས་གསོལ་འདེབས་རྣམས་དབྱངས་དང་བཅས་པས་གྱེར་བ་སྔར་ནས་ཕྱག་ལེན་གྱི་རྒྱུན་ལ་ཡོད་པའི་ཕྱིར། འདི་དག་གི་སྐབས་སུ་ཡང་སྐད་ཅིག་ལ་རྣམ་ཤེས་སྤར་ཐེངས་རེ་བྱས་ན་ལེགས། མ་ཐུབ་ན་ཡང་སྔར་སྤར་ནས་ལུས་དེའི་ལྷག་མ་ལ་དེ་ལྟར་སོ་སོར་བསྒོམ་ཡང་རུང་ངོ་། །ཕཊ། ལྷ་ཚོགས་རྣམས་ཀྱི་ཐུགས་ལས་བདུད་རྩི་བབས། །ལུས་རྣམས་གྲོད་པ་འོ་མས་གང་བ་བཞིན། །སྒྱུ་ལུས་འགྱེལ་བས་སྟོང་གསུམ་བདུད་རྩིས་གང་། །
དཀར་སྣུམ་ལྕི་འབོལ་ཞིམ་མངར་རོ་བརྒྱ་ལྡན། །ཐུགས་ཀའི་འོད་ཟེར་ཕོག་པས་མི་གཙང་སྦྱངས། །རྣམ་པར་དག་པའི་ཕུད་རླངས་མཆོད་སྤྲིན་འཕྲོ། །ཟག་མེད་ཤ་ལྔ་བདུད་རྩི་ལྔའི་རང་བཞིན། །ལྷ་ཚོགས་ལྗགས་ལས་རང་རང་ཕྱག་མཚན་གྱིས། །དབྱིབས་ཅན་འོད་ཟེར་སྦུ་གུས་གསོལ་བས་མཉེས། །ཕཊ་ཕཊ། གནས་ལ་སྟོད་དིང་རིའི་གླང་འཁོར་ན། །སྤྲུལ་སྐུ་དམ་པ་སངས་རྒྱས་ལ་གསོལ་བ་འདེབས། །གནས་རྒྱ་བོད་གཉིས་ཀྱི་ས་མཚམས་ན། །སྐྱོ་སྟོན་བསོད་ནམས་བླ་མ་ལ་གསོལ་བ་འདེབས། །གནས་ཟངས་རི་མཁར་དམར་གྱི་དགོན་པ་ན། །མ་གཅིག་ལབ་ཀྱི་སྒྲོན་མ་ལ་གསོལ་བ་འདེབས། །གནས་ཤམ་པོ་གངས་ཀྱི་ར་བ་ན། །རྗེ་བཙུན་ཟིལ་གནོན་ཆེན་པོ་ལ་གསོལ་བ་འདེབས། །གནས་བཀྲ་ཤིས་གླང་ལུང་གི་དགོན་པ་ན། །སྲས་མཆོག་རྒྱལ་བ་དོན་གྲུབ་ལ་གསོལ་བ་འདེབས། །གནས་སྙི་མོ་ཁུ་ཡི་ར་བ་ན། །ཁུ་སྒོམ་ཆོས་ཀྱི་སེང་གེ་ལ་གསོལ་བ་འདེབས། །གནས་གར་བཞུགས་ཆོས་ཀྱི་ཕོ་བྲང་ན། །བཀའ་བབ་བུ་ཆེན་བཅུ་དྲུག་ལ་གསོལ་བ་འདེབས། །གནས་རྒྱལ་ཁམས་ཕྱོགས་མེད་ཀྱི་དགོན་པ་
ན། །བརྒྱུད་འཛིན་བརྒྱ་དང་རྩ་བརྒྱད་ལ་གསོལ་བ་འདེབས། །བདག་གསོལ་འདེབས་ཀྱི་བུ་ལ་བྱིན་གྱིས་རློབས། །རྐྱེན་ཕྱི་ནང་གི་བར་ཆད་ཞི་བ་དང་། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ་ཕཊ།། མ་གཅིག་ཐུགས་ལས་ཕག་མོ་དམར་མོ་འཕྲོས། །དེ་ལས་ལས་བྱེད་མཁའ་འགྲོ་གྲངས་མེད་འཕྲོས། །བེམ་པོའི་པགས་པ་རལ་བ་བྷནྡྷའི་སྣོད། །སྟོང་གསུམ་ཙམ་གྱི་ནང་དུ་ཤ་ཁྲག་རྣམས། །ཉིལ་གྱིས་ཞིག་པའི་སྟེང་དུ་ཨོཾ་ཨཱཿཧཱུྃ། །གྲི་གུག་ལན་གསུམ་དཀྲུགས་པས་ཡིག་གསུམ་ཞུ། །ཟག་མེད་ཤ་ལྔ་བདུད་རྩི་ལྔའི་རང་བཞིན། །རླངས་པ་མཆོད་པའི་སྤྲིན་ཕུང་ནམ་མཁར་ཁྱབ། །ལས་བྱེད་མཁའ་འགྲོས་ཐོད་པའི་ཞལ་བུས་བཙུས། །ལྷ་ཚོགས་རྣམས་ལ་སོ་སོར་ཕྱག་ཏུ་ཕུལ། །ཕཊ་ཕཊ། གནས་རྡོ་རྗེ་གུར་ཁང་གི་གཞལ་ཡས་ན། །ལ་འདུལ་རྡོ་རྗེ་སྒྲོན་མ་ལ་གསོལ་བ་འདེབས། །གནས་རི་གོང་དཔལ་གྱི་ཡང་དགོན་ན། །པཎ་ཆེན་དོན་ཡོད་རྡོ་རྗེ་ལ་གསོལ་བ་འདེབས། །གནས་སྟོད་ལུང་མཚུར་ཕུའི་དགོན་པ་ན། །གྲུབ་ཆེན་ཀརྨ་པཀྵི་ལ་གསོལ་བ་
འདེབས། །གནས་བདུད་བཞི་ཟིལ་གནོན་གྱི་ཕོ་བྲང་ན། །རྗེ་རང་བྱུང་རྡོ་རྗེ་གསོལ་བ་འདེབས། །ཆོས་ཕྱག་རྒྱ་ཆེན་པོའི་ཕོ་བྲང་ན། །རྗེ་ཀུན་དགའ་རྣམ་རྒྱལ་ལ་གསོལ་བ་འདེབས། །གནས་ཕྱོགས་མེད་ཕྲིན་ལས་ཀྱི་ཕོ་བྲང་ན། །རྗེ་བཙུན་ཀརྨ་ཆགས་མེད་ལ་གསོལ་བ་འདེབས། །བདག་གསོལ་འདེབས་ཀྱི་བུ་ལ་བྱིན་གྱིས་རློབས། །རྐྱེན་ཕྱི་ནང་གི་བར་ཆད་ཞི་བར་མཛོད། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ་ཕཊ་ཕཊ། རང་རིག་ཌཱཀྐི་དམར་མོ་གྲི་ཐོད་འཛིན་། །སྤྱན་གསུམ་གྱེན་གཟིགས་རང་འདྲ་གྲངས་མེད་འཕྲོས། །རང་བྱུང་ཐོད་སྐྱེད་གསུམ་སྟེང་བྷན་འཕར། །དེ་ནང་ལུས་འཕར་ཤ་ཁྲག་ཉིལ་གྱིས་ཞིག །གྲི་གུག་གིས་དཀྲུགས་ཤ་ལྔ་བདུད་རྩི་ལྔ། །དེ་སྟེང་ཡི་གེ་ཨོཾ་ཨཱཿཧཱུྃ་གསུམ་གནས། །སླར་ཡང་དཀྲུགས་པས་ཡི་གེ་གསུམ་ཡང་ཞུ། །ཡེ་ཤེས་བདུད་རྩི་རླངས་པ་མཆོད་སྤྲིན་འཕྲོ། །དྭངས་མ་བདུད་རྩི་སྙིགས་མ་ཤ་ལྔའི་ཚོགས། །རོ་བཅུད་ནུས་པ་ཕུན་སུམ་ཚོགས་པ་ནས། །མཁའ་འགྲོ་རྣམས་ཀྱིས་ཕྱག་གཡས་ཐོད་པ་ཡིས། །བཅུས་ཤིང་དཀྱིལ་འཁོར་ལྷ་ཚོགས་
རྣམས་མཆོད་དེ། །ཡུམ་ཆེན་ལན་གསུམ་ཐུབ་པ་འཁོར་བཅས་རྣམས། །དམ་པ་མ་གཅིག་ཕག་མོ་གཙོ་འཁོར་རྣམས། །ལན་གསུམ་མཆོད་རྗེས་ཆོས་སྐྱོང་ལ་སོགས་པ། །མགྲོན་རིགས་མ་ལུས་ཐམས་ཅད་མཆོད་པས་མཉེས། །ཕཊ་ཕཊ། གནས་གཉན་ས་རི་ཁྲོད་ཀྱི་དགོན་པ་ན། །གྲུབ་ཐོབ་གཅོད་ཡུལ་བརྒྱུད་པ་ལ་གསོལ་བ་འདེབས། །གནས་སྤྱི་གཙུག་ཉི་ཟླའི་གདན་སྟེང་ན། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །གནས་དངོས་གྲུབ་ཀུན་འབྱུང་གི་ཕོ་བྲང་ན། །ཡི་དམ་རྒྱལ་བའི་ལྷ་ཚོགས་ལ་གསོལ་བ་འདེབས། །གནས་བསིལ་བ་ཚལ་གྱི་དུར་ཁྲོད་ན། །ཆོས་སྐྱོང་མ་མགོན་ལྕམ་དྲལ་གསོལ་བ་འདེབས། །བདག་གསོལ་འདེབས་ཀྱི་བུ་ལ་བྱིན་གྱིས་རློབས། །རྐྱེན་ཕྱི་ནང་གི་བར་ཆད་ཞི་བ་དང་། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ་ཕཊ་ཕཊ། རིག་པ་ཕྲལ་བའི་ལྕུ་བེམ་པོ་ཆེ་ཞིང་ཚོ། །བཀྲག་མདངས་རོ་བཅུད་ལྡན་པ་ཧྲིལ་གྱིས་འགྱེལ། །འཇིག་རྟེན་ཁྱབ་པ་མགྲོན་རིགས་ཐམས་ཅད་ཀྱིས། །བདུད་རྩིའི་རྣམ་པ་གང་འདོད་ལོངས་སྤྱོད་
གྱུར། །འདི་བཅོམ་ལྡན་འདས་ཀྱི་ཉ་དེས་པའི་སྐྱེས་རབས་ཀྱི་དོན་བསྡུས་མན་ངག་གོ །ཕཊ། ཐུབ་དབང་བྱམས་པ་ཐོགས་མེད་དབྱིག་གི་གཉེན། །ཨཱརྱ་དེ་ཝ་དམ་པ་རྒྱ་གར་སོགས། །མདོ་ལུགས་བརྒྱུད་པ་རྣམས་ལ་གསོལ་བ་འདེབས། །ཡུམ་ཆེན་རྡོ་རྗེ་འཆང་དང་ཤཱཀྱ་ཐུབ། །སྨྲ་སེང་ཨཱརྱ་དེ་ཝ་དམ་པ་རྗེ། །སྔགས་ལུགས་རིང་བརྒྱུད་རྣམས་ལ་གསོལ་བ་འདེབས། །སྟོན་པ་རབ་འབྱོར་འཕགས་པ་ཀུན་དགའ་བོ། །ཀླུ་སྒྲུབ་ཨཱརྱ་དེ་ཝ་ཆེ་ཆུང་གཉིས། །ཕ་རྒྱུད་ཐབས་ཀྱི་བརྒྱུད་པ་ལ་གསོལ་བ་འདེབས། །ཡུམ་ཆེན་སྒྲོལ་མ་སུ་ཁ་སིདྡྷི་དང་། །དམ་པ་རྒྱ་གར་མ་གཅིག་ལབ་ཀྱི་སྒྲོན། །མ་རྒྱུད་ཤེས་རབ་བརྒྱུད་པ་ལ་གསོལ་བ་འདེབས། །བཅོམ་ལྡན་ཤཱཀ་ཐུབ་མགོན་པོ་འཇམ་པའི་དབྱངས། །རྗེ་བཙུན་སྒྲོལ་མ་མ་གཅིག་ལབ་ཀྱི་སྒྲོན། །དོན་གྱི་བརྒྱུད་པ་རྣམས་ལ་གསོལ་བ་འདེབས། །རྡོ་རྗེ་འཆང་ཆེན་རྗེ་བཙུན་འཕགས་མ་སྒྲོལ། །ལབ་ཀྱི་སྒྲོན་མ་ཐོད་སྨྱོན་བསམ་འགྲུབ་སོགས། །སྔགས་ལུགས་བརྒྱུད་པ་རྣམས་ལ་གསོལ་བ་འདེབས། །ཡུམ་ཆེན་ཤཱཀ་ཐུབ་སྨྲ་སེང་སྒྲོལ་མ་དང་། །སུ་ཁ་སིདྡྷི་ཨཱརྱ་དེ་ཝ་སོགས། །རིང་བརྒྱུད་བླ་མ་རྣམས་ལ་
གསོལ་བ་འདེབས། །རྡོ་རྗེ་ཕག་མོ་མ་གཅིག་ལབ་ཀྱི་སྒྲོན། །ཁམ་བུ་ཡ་ལེ་གྲུབ་ཆེན་ཡེ་ཤེས་འབར། །ཉེ་བརྒྱུད་བླ་མ་རྣམས་ལ་གསོལ་བ་འདེབས། །རྒྱལ་བ་དོན་གྲུབ་གཉན་ཆུང་ལོ་ཙཱ་བ། །གྲྭ་པ་ཧིར་ཐོན་ཁམ་བུ་ཡ་ལེ་སོགས། །མདོ་ལུགས་བརྒྱུད་པ་རྣམས་ལ་གསོལ་བ་འདེབས། །ཐོད་སྨོན་བསམ་འགྲུབ་གངས་པ་སྨུག་སངས་དང་། །གངས་པ་ལྷུན་གྲུབ་གྲུབ་ཆེན་ཀརྨ་པ། །གཅོད་ཚོགས་བརྒྱུད་པ་རྣམས་ལ་གསོལ་བ་འདེབས། །ཁུ་སྒོམ་ཆོས་སེང་སངས་རྒྱས་གཉེན་སྟོན་དང་། །ཁམ་བུ་ཡ་ལེ་གྲུབ་ཆེན་ཡེ་ཤེས་འབར། །ཟུང་འཇུག་བརྒྱུད་པ་རྣམས་ལ་གསོལ་བ་འདེབས། །མ་གཅིག་ལབ་སྒྲོན་སྤྲུལ་སྐུ་ལ་འདུལ་མ། །བརྩོན་འགྲུས་སེང་གེ་ཁམ་བུ་ཡ་ལེ་སོགས། །གཏེར་ཆོས་བརྒྱུད་པ་རྣམས་ལ་གསོལ་བ་འདེབས། །ཡེ་ཤེས་འབར་དང་རྟོགས་ལྡན་གནམ་མཚོ་བ། །རང་བྱུང་གཡུང་སྟོན་རོལ་པའི་རྡོ་རྗེའི་ཞབས། །རྟོགས་ལྡན་དར་མ་རྒྱལ་མཚན་མཁའ་སྤྱོད་དབང་། །དེ་བཞིན་གཤེགས་པ་རཏྣ་བྷ་དྲ་དང་། །དོན་ལྡན་འཇམ་དཔལ་བཟང་པོ་མཉན་པའི་ཞབས། །མི་བསྐྱོད་རྡོ་རྗེ་རྒྱལ་བ་དཀོན་མཆོག་འབངས། །དབང་
ཕྱུག་རྡོ་རྗེ་ཆོས་ཀྱི་དབང་ཕྱུག་དང་། །ཀུན་དགའ་རྣམ་རྒྱལ་ཀརྨ་ཆགས་མེད་སོགས། །གཅོད་ཁྲིད་བརྒྱུད་པ་རྣམས་ལ་གསོལ་བ་འདེབས། །རྩ་བའི་བླ་མ་སངས་རྒྱས་ཆོས་ཀྱི་སྐུ། །ཡིན་པར་མདོ་རྒྱུད་ཀུན་ལས་རྒྱ་ཆེར་གསུངས། །ཉེ་བའི་བརྒྱུད་པ་དེ་ལ་གསོལ་བ་འདེབས། །རང་སེམས་རྟོགས་ན་ཡུམ་ཆེན་དེ་ཉིད་རང་། །དེ་ལས་གཞན་ན་སངས་རྒྱས་མེད་གསུངས་ཕྱིར། །ཤིན་ཏུ་ཉེ་བརྒྱུད་དེ་ལ་གསོལ་བ་འདེབས། །ཡི་དམ་ཁྲོས་མ་བདུད་འདུལ་ལྷ་ལྔ་མ། །དངོས་གྲུབ་ཀུན་སྟེར་གཅོད་ཡུལ་བཀའ་བབས་ལྷ། །སྣང་སྲིད་ཟིལ་གནོན་མ་ལ་གསོལ་བ་འདེབས། །མ་གཅིག་བཀའ་སྡོད་ཌཱ་ཀི་སྲུང་མའི་ཚོགས། །གཅོད་ཡུལ་བཀའ་སྲུང་རྣལ་འབྱོར་བུ་བཞིན་སྐྱོང་། །བསྟན་སྲུང་ཆོས་སྐྱོང་རྣམས་ལ་གསོལ་བ་འདེབས། །དེ་ལྟར་གསོལ་བ་བཏབ་པས་ལྷ་རྣམས་ཀྱི། །དཔྲལ་བ་མགྲིན་པ་ཐུགས་ཀ་སོ་སོ་ནས། །ཨོཾ་དཀར་ཨཱཿདམར་ཧཱུྃ་མཐིང་དཔག་མེད་བྱུང་། །བདག་དང་བསྲུང་བྱའི་ལུས་ངག་ཡིད་ལ་ཐིམ། །སྐུ་གསུང་ཐུགས་ཀྱི་བྱིན་རླབས་དཔག་མེད་ཐོབ། །ཕཊ་ཕཊ་ཕཊ། གཅོད་ཡུལ་བརྒྱུད་པའི་བླ་མ་ཡི་དམ་དང་། །མཁའ་འགྲོ་ཆོས་
སྐྱོང་སྲུང་མ་ཐམས་ཅད་ལ། །སྙིང་ཁོང་རུས་པའི་གཏིང་ནས་གསོལ་བ་འདེབས། །བྱིན་གྱིས་རློབས་ཤིག་གཅོད་ཡུལ་བརྒྱུད་པའི་ཚོགས། །དངོས་གྲུབ་སྩོལ་ཅིག་ཨ་མ་ལབ་ཀྱི་སྒྲོན། །གསོལ་བ་འདེབས་སོ་དམ་པ་རྒྱ་གར་བ། །དངོས་གྲུབ་སྩོལ་ཅིག་བདུད་འདུལ་ཁྲོས་མའི་ཚོགས། །གསོལ་བ་འདེབས་སོ་རྗེ་བཙུན་གླང་ལུང་པ། །དངོས་གྲུབ་སྩོལ་ཅིག་གནས་གསུམ་མཁའ་འགྲོའི་ཚོགས། །ལུས་ལ་སྐུ་ཡི་བྱིན་གྱིས་བརླབ་ཏུ་གསོལ། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །ངག་ལ་གསུང་གི་བྱིན་གྱིས་བརླབ་ཏུ་གསོལ། །ནུས་མཐུ་ཆོས་ཀྱི་དངོས་གྲུབ་བསྩལ་དུ་གསོལ། །སེམས་ལ་ཐུགས་ཀྱི་བྱིན་གྱིས་བརླབ་ཏུ་གསོལ། །ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ། །གསོལ་བ་འདེབས་སོ་སྣང་སྲིད་བྱིན་གྱིས་རློབས། །གཉན་ས་རི་ཁྲོད་འགྲིམ་པར་བྱིན་གྱིས་རློབས། །ཕུང་པོ་གཟན་དུ་སྐྱུར་བར་བྱིན་གྱིས་རློབས། །བདག་འཛིན་རྩ་བ་ཆོད་པར་བྱིན་གྱིས་རློབས། །རྐྱེན་ངན་གྲོགས་སུ་འཆར་བར་བྱིན་གྱིས་རློབས། །ན་ཚ་ལམ་དུ་སློང་བར་བྱིན་གྱིས་རློབས། །བདུད་བཞི་རང་སར་གྲོལ་བར་བྱིན་གྱིས་རློབས། །དངོས་
གྲུབ་རྣམ་གཉིས་ཐོབ་པར་བྱིན་གྱིས་རློབས། །དེ་ལ་རློམས་སེམས་མེད་པར་བྱིན་གྱིས་རློབས། །མཐའ་བྲལ་སྟོང་ཉིད་རྟོགས་པར་བྱིན་གྱིས་རློབས། །དེ་ལ་ཡེངས་བ་མེད་པར་བྱིན་གྱིས་རློབས། །ལྷ་འདྲེ་སེམས་སུ་ཆོད་པར་བྱིན་གྱིས་རློབས། །དངོས་མེད་འགྲོ་དོན་ནུས་པར་བྱིན་གྱིས་རློབས། །འཕོ་བ་མཁའ་སྤྱོད་འགྲུབ་པར་བྱིན་གྱིས་རློབས། །ཉག་གཅིག་རྩད་ནས་ཆོད་པར་བྱིན་གྱིས་རློབས། །གཅོད་ཡུལ་མཐའ་རུ་ཕྱིན་པར་བྱིན་གྱིས་རློབས། །གཉན་ས་འདི་རུ་བྱིན་གྱིས་རློབས། །མལ་ས་འདི་རུ་བྱིན་གྱིས་རློབས། །ད་ལྟ་ཉིད་དུ་བྱིན་གྱིས་རློབས། །མྱུར་བ་ཉིད་དུ་བྱིན་གྱིས་རློབས། །སྐད་ཅིག་ཉིད་ལ་བྱིན་གྱིས་རློབས། །ཕཊ་ཕཊ། དེ་ནས་དམ་པའི་བསྟོད་པ་མ་གཅིག་གིས་མཛད་པའི་བྱིན་རླབས་དམིགས་པ་ནི། ཕཊ། མདུན་གྱི་ནམ་མཁར་ཕ་གཅིག་དམ་པ་ཡི། །སྐུ་ལས་བྱིན་རླབས་མེ་ཡི་ཚྭ་ཚྭའི་ཚུལ། །ཕྲོམ་ཕྲོམ་འཕྲོས་པས་བདག་དང་བསྲུང་བྱ་ཡི། །ལུས་ཀྱི་ནད་གདོན་ལུས་དང་བཅས་པ་རྣམས། །ཐལ་བ་བུན་གྱིས་བསྲེགས་ནས་དངོས་མེད་གྱུར། །བྱིན་རླབས་ཞུགས་ཤིང་སྐྱེ་མེད་དོན་རྟོགས་ཤོག །ཕཊ་ཕཊ། རྗེ་བླ་མ་རྣམས་ལ་ཕྱག་
འཚལ་ལོ། །བཀའ་བརྒྱུད་པ་རྣམས་ལ་གསོལ་བ་འདེབས། །སྒོས་བཀའ་དྲིན་ཅན་གྱིས་བྱིན་གྱིས་རློབས། །གནས་མཆོག་དམ་པ་ཡ་ཀི་ན། །ཕྱི་སྐོར་ཅིག་སྐོར་གཉིས་སྐོར་མ་གསུམ། །ཕྱི་བསྐོར་བ་ལྕགས་རི་མུ་ཁྱུད་བསྐོར། །བར་བསྐོར་བ་ལྷོ་རྒྱལ་འཛམ་བུ་གླིང་། །ནང་བསྐོར་བ་དིང་རི་གླང་འཁོར་བསྐོར། །རི་མཁན་པ་ཁྲོད་ཀྱི་དགོན་པ་ན། །ཉི་ཟླ་པདྨའི་གདན་སྟེང་ན། །གནས་དེ་ན་སུ་བཞུགས་སུ་མི་བཞུགས། །གནས་དེ་ན་དམ་པ་སངས་རྒྱས་བཞུགས། །སྐུ་འཁྲུངས་པ་རྒྱ་གར་ཡུལ་དུ་འཁྲུངས། །གསུང་བསྒྲགས་པ་བོད་ཡུལ་དབུས་སུ་བསྒྲགས། །རྗེ་འགྲོ་བའི་མགོན་པོ་རྡོ་རྗེ་འཆང་། །སྨྲ་བའི་སེང་གེ་མཚུངས་པ་མེད། །དཔལ་ཆེན་བིརླ་དྲོད་ཚད་མཁས། །ཨཱརྱ་དེ་ཝ་སྒྲ་ཚད་མཁས། །དམ་པ་མུ་སྟེགས་རྒྱུད་སྡེ་མཁས། །རྗེ་མི་ཕམ་མགོན་པོ་བཅོམ་ལྡན་འདས། །འཛམ་བུ་གླིང་གི་རྒྱན་གཅིག་པོ། །རྗེ་འགྲོ་བའི་མགོན་པོ་ལ་གསོལ་བ་འདེབས། །རྗེ་འགྲོ་བའི་མགོན་པོས་བྱིན་གྱིས་རློབས། །རྗེ་དམ་པ་སངས་རྒྱས་རིན་པོ་ཆེ། །ཁོང་སྟེང་དེར་ལྷ་ཚོགས་ཐིབས་སེ་ཐིབ། །གཡས་དེར་
དཔའ་བོའི་ངར་དང་ལྡན། །གཡོན་དེར་དཔའ་མོའི་མདངས་དང་ལྡན། །མདུན་དེར་དམ་ཅན་སྤུངས་སེ་སྤུང་། །རྒྱབ་ཏུ་ཌཀྐི་ཤིགས་སེ་ཤིག །འོག་དེར་གདོན་ཚོགས་མྱ་ལ་ལ། །རྗེ་དེར་བཞུགས་དམ་པ་ལ་གསོལ་བ་འདེབས། །དེར་བཞུགས་དམ་པས་བར་ཆད་སོལ། །དེར་བཞུགས་དམ་པ་ལམ་སྣ་དྲོངས། །ཕཊ་ཕཊ། དམིགས་པ་མགྲོན་འགྱེད་མ་ནི༔ ཕཊ། ཐོད་སྣོད་ནང་དུ་བེམ་རོ་བདུད་རྩིར་ཞུ། །རླངས་པས་མགྲོན་རྣམས་ཅི་འདོད་ལོངས་སྤྱོད་འཕྲོས། །དྭངས་མ་བདུད་རྩི་སྙིགས་མ་ཁ་ཟས་ཚོགས། །ལས་བྱེད་མཁའ་འགྲོས་ཀླུ་དང་གཞི་བདག་ལ། །རང་རང་ཡིད་མཐུན་བཟའ་བཏུང་མགུ་བར་སྦྱིན། །གདོལ་པ་ཀླུ་དང་སྡང་དགྲ་གནོད་བྱེད་ལ། །ཤ་ཁྲག་རླངས་པ་དྲོད་དང་བཅས་པ་སྦྱིན། །ཐམས་ཅད་དགའ་མགུ་ཡི་རང་ལྡན་པར་གྱུར། །ཕཊ། ཧཱུྃ། ཕ་ནག་པོ་ཆེན་པོ་གཟི་མདངས་ཅན། །སྐུ་སྟོད་སེང་གེ་འགྱིང་བ་འདྲ། །དེ་བདུད་བཞི་ཟིལ་གྱིས་གནོན་པའི་བརྡ། །སྐུ་སྨད་རྨ་བྱ་འཇུམ་པ་འདྲ། །དེ་དུག་ལྔ་གནས་སུ་དག་པའི་བརྡ། །སྐེད་པ་རྡོ་རྗེ་འཁྲིལ་པ་འདྲ། །དེ་འཁྲུལ་གཞི་རྩད་ནས་གཅོད་པའི་བརྡ། །
ཞབས་གཉིས་སྦ་ཕྲན་གཤིབས་པ་འདྲ། །དེ་བྱང་ཆུབ་རྒྱུད་ལམ་བགྲོད་པའི་བརྡ། །སྐུ་མདོག་ནག་ལ་སྣུམ་པ་དེ། །ཆོས་ཉིད་དོན་ལ་འགྱུར་བ་མེད་པའི་བརྡ། །དབུ་སྐྲ་ནག་སྣུམ་གྱེན་དུ་འཁྱིལ་བ་དེ། །མཐོ་རིས་ཐར་ལམ་བགྲོད་པའི་བརྡ། །སྙན་ཤལ་རིང་ལ་སྙན་ཁུང་ཟབ་པ་དེ། །ཆོས་ཀྱི་སྙན་བརྒྱུད་ཟབ་པའི་བརྡ། །སྤྱན་མིག་དམར་ལ་སྤྱན་རྩ་འཁྲུགས་པ་དེ། །སྣང་སྲིད་ཟིལ་གྱིས་གནོན་པའི་བརྡ། །ཤངས་བག་རིང་ལ་ཤངས་རྩེ་རྣོ་བ་དེ། །སྣང་བ་དབང་དུ་འདུས་པའི་བརྡ། །ཚེམས་མདོག་དཀར་ལ་ཚེམས་རྩེ་རྣོ་བ་དེ། །སྐྱེ་ཤི་རྩད་ནས་གཅོད་པའི་བརྡ། །ཕྱག་སོར་རིང་ལ་ཕྱག་སེན་རྣོ་བ་དེ། །སྐལ་ལྡན་ཐུགས་རྗེས་འདྲེན་པའི་བརྡ། །ཞབས་སོར་མོ་སེང་ཕྲུག་བཀྲམ་པ་འདྲ། །དེ་དུག་གསུམ་རྩད་ནས་གཅོད་པའི་བརྡ། །རྗེ་རེས་འགའ་ཉིན་མཚན་ཁོར་ཡུག་གཟིམས། །སྒོམ་གཉུག་མ་ལ་རྒྱུན་ཆད་མེད་པའི་བརྡ། །རྗེ་རེས་འགའ་རྟེན་འབྲེལ་སྣ་ཚོགས་མཛད། །བཀའ་འཁོར་གཡོག་བྱིན་གྱིས་བརླབས་པའི་བརྡ། །རྗེ་རེས་འགའ་སྨྱོན་པའི་བརྟུལ་ཞུགས་མཛད། །དེ་འཁོར་གྱི་བར་ཆད་སེལ་བའི་བརྡ། །རྗེ་དེར་
བཞུགས་དམ་པ་ལ་གསོལ་བ་འདེབས། །རྗེ་དེར་བཞུགས་དམ་པས་བྱིན་གྱིས་རློབས། །རྗེ་དེར་བཞུགས་དམ་པས་ལམ་སྣ་དྲོངས། །རྗེ་རྒྱང་ན་བཞུགས་ན་མོས་ཕྱག་འཚལ། །དྲུང་ན་བཞུགས་ནི་གུས་ཕྱག་འཚལ། །ཡིད་མོས་གུས་ཀྱི་ཕྱག་ལ་ཉེ་རིང་མེད། །གསོལ་བ་སྙིང་གི་དཀྱིལ་ནས་འདེབས། །བྱིན་རླབས་ཐུགས་ཀྱི་ཀློང་ནས་ཞུ། །རྗེ་སྐུ་ཡི་བྱིན་རླབས་ལུས་ལ་ཞུགས། །ལུས་ན་ཚའི་སྡུག་བསྔལ་ཞི་བར་མཛོད། །ལུས་ལ་བདེ་དྲོད་སྦྱར་དུ་གསོལ། །ལུས་ཀྱི་སྒྲིབ་པ་དག་ནས་ཀྱང་། །ལུས་སྤྲུལ་སྐུ་ཐོབ་པར་མཛད་དུ་གསོལ། །རྗེ་གསུང་གི་བྱིན་རླབས་ངག་ལ་ཞུགས། །ངག་འགག་འཛེར་གྱི་སྡུག་བསྔལ་ཞི་བར་མཛོད། །ངག་ལ་ནུས་པ་སྦར་དུ་གསོལ། །ངག་གི་སྒྲིབ་པ་དག་ནས་ཀྱང་། །ངག་ལོངས་སྐུ་ཐོབ་པར་མཛད་དུ་གསོལ། །རྗེ་ཐུགས་ཀྱི་བྱིན་རླབས་སེམས་ལ་ཞུགས། །སེམས་ཉོན་མོངས་སྡུག་བསྔལ་ཞི་བར་མཛོད། །སེམས་ལ་རྟོགས་པ་སྦྱར་དུ་གསོལ། །སེམས་ཀྱི་སྒྲིབ་པ་དག་ནས་ཀྱང་། །སེམས་ཆོས་སྐུ་རྟོགས་པར་བྱིན་གྱིས་རློབས། །རྒྱུ་འདོད་ཆགས་ཞེ་སྡང་གཏི་མུག་གསུམ། །དུག་གསུམ་རང་སར་ཞི་བར་བྱིན་
གྱིས་རློབས། །གདོན་ཕོ་གདོན་མོ་གདོན་ཀླུ་གདོན་གསུམ། །གདོན་གསུམ་རང་སར་ཞི་བར་བྱིན་གྱིས་རློབས། །ནད་རླུང་མཁྲིས་བད་ཀན་འདུས་པ་བཞི། །བཞི་བརྒྱ་རྩ་བཞི་རང་སར་ཞི་བར་མཛད་དུ་གསོལ། །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་མངོན་དུ་འཆར་བར་མཛད་དུ་གསོལ། །གཞན་དོན་དཔག་མེད་འབྱུང་བར་བྱིན་གྱིས་རློབས། །ནད་གདོན་སྡིག་སྒྲིབ་དག་པར་བྱིན་གྱིས་རློབས། །ཕཊ་ཕཊ། དམིགས་པ་བང་མིག་མ་ནི། ཕཊ། བེམ་པོའི་པགས་པ་ཤགས་ཀྱིས་རལ་པ་དེ། །བདག་ཉིད་ཕག་མོས་བཏིང་བས་སྟོང་གསུམ་ཁྱབ། །དེ་ལ་གྲི་གུག་གིས་ནི་མིག་མང་རིས། །བྲིས་པས་གྲུ་ཆོད་བང་བའི་བྲེས་ལྟ་བུར། །པད་སྣོད་རེ་རེའི་ནང་དུ་ཤ་ཁྲག་བླུགས། །རེ་རེའི་སྟེང་དུ་ཨོཾ་ཨཱཿཧཱུྃ་རེ་ཞུ། །ལ་ལ་དཀར་གསུམ་ལ་ལ་མངར་གསུམ་དང་། །ལ་ལ་སྨན་སྣ་ལ་ལ་འབྲུ་སྣའི་ཚོགས། །ལ་ལ་རིན་ཆེན་ལ་ལ་དར་ཟབ་གྱུར། །དེ་དག་སོ་སོར་གང་འདོད་སྤྱོད་པར་གྱུར། །ཕཊ་ཕཊ། རྗེ་དེ་ཡི་བརྒྱུད་པའི་འཛིན་པའི་མ། །མཚན་ནི་ཇོ་མོ་ལབ་སྒྲོན་མ། །མས་ནི་བདག་གཞན་འགྲོ་བ་སྒྲོལ། །ཇོ་མོ་བདེ་གཤེགས་
ཀུན་གྱི་ཡུམ། །ལབ་ནི་འཁྲུངས་ཡུལ་རྒྱལ་བའི་ཞིང་། །སྒྲོན་ནི་མ་རིག་མུན་པ་སེལ། །མ་མཚན་དང་ལྡན་ལ་ཕྱག་འཚལ་ལོ། །ཀྱེ་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་ཡུམ་ཆེན་ཐུགས་ལས་སྤྲུལ་པའི་སྲས། །མ་གཅིག་ཇོ་མོ་རྣལ་འབྱོར་མ། །མ་ཕ་རོལ་ཕྱིན་པའི་གྲུབ་ཐོབ་མ། །སྐལ་ལྡན་ཀུན་གྱི་རྒྱུད་གྲོལ་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །ཕཊ་ཕཊ། དམིགས་པ་བེམ་སྐྱུར་མ་ནི། བེམ་པོ་ཆེ་ཚོ་བཀྲག་མདངས་རོ་བཅུད་ལྡན། །མཐོང་བ་ཙམ་གྱིས་ལྷ་འདྲེའི་ཡིད་འཕྲོག་པ། །མགྲོན་གྱི་དཀྱིལ་དུ་བདག་མེད་ལིང་ངེར་བསྒྱུར། །ཀུན་གྱིས་ཧབ་ཐོབ་ཟོས་པས་ཚིམས་པར་གྱུར། །ཕཊ་ཕཊ། ཀྱེ་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་སྐུ་ལུས་ཆུང་ལ་གཟི་བརྗིད་ཆེ། །སྐུ་ཤ་དཀར་ལ་འོད་ཟེར་འཕྲོ། །སྐྱེ་བ་དམན་ལ་དགོངས་པ་མཐོ། །ཀུན་དང་མཐུན་པའི་སྤྱོད་པ་ཅན། །དུས་གསུམ་སངས་རྒྱས་གདུང་འཛིན་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །ཕཊ་ཕཊ་ཕཊ། བེམ་ཤུན་སྟོང་གསུམ་ཁྱབ་སྟེང་ཤ་ཁྲག་རྣམས། །སོ་སོར་
བཤམས་པའི་གློ་སྙིང་ཤ་དང་ཁྲག །སོ་སོར་གང་ལ་གང་འདོད་ཁྱེར་བ་ཡིས། །ཐམས་ཅད་དགའ་མགུ་ཡི་རིང་ལྡན་པར་གྱུར། །ཕཊ། དེ་ནས་སྤུས་འདོད་མའོ། །ཀྱཻ་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་སེར་སྣ་མེད་པའི་དོན་རྟོགས་ཤིང་། །ཀུན་ཁྱབ་སྦྱིན་པ་བློས་ཐོངས་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་ཀུན་འབྱུང་ཡེ་ཤེས་དོན་རྟོགས་ཤིང་། །ཉམས་པ་མེད་པའི་ཚུལ་ཁྲིམས་བསྲུང་། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་སྐྱེ་བ་མེད་པའི་དོན་རྟོགས་ཤིང་། །སྐྱེ་མེད་བཟོད་པ་སྒོམ་མཛད་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་བྱ་རྩོལ་མེད་པའི་དོན་རྟོགས་ཤིང་། །བྱར་མེད་བརྩོན་འགྲུས་རྩོམ་མཛད་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །སྒྱུ་མ་གཡོ་བ་མེད་པའི་དོན་རྟོགས་ཤིང་། །ཡེངས་མེད་བསམ་གཏན་སྒོམ་མཛད་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་ཀུན་གྱི་
རང་བཞིན་དོན་རྟོགས་ཤིང་། །བདག་མེད་ཤེས་པའི་རྣལ་འབྱོར་མ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་ཕྱོགས་མེད་ལྟ་བས་ཆགས་ཞེན་གྲོལ། །མཉམ་ཉིད་བསྒོམས་པས་དམིགས་པ་གྲོལ། །སྐྱེ་མེད་རྟོགས་པས་འཁོར་བ་གྲོལ། །རྟོག་མེད་སྤྱོད་པས་ཉམ་ང་གྲོལ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །ཕཊ་ཕཊ། རང་རིག་ལས་བྱེད་མཁའ་འགྲོ་དམར་མོ་ཡིས། །བེམ་པོའི་ལག་པ་གཡས་བཅད་ཤར་དུ་འཕངས། །ཤར་ཕྱོགས་ལྷ་འདྲེ་རྣམས་ཀྱིས་ཟོས་ཤིང་ཚིམས། །དེ་བཞིན་ལག་པ་གཡོན་བཅད་ལྷོ་རུ་འཕངས། །རྐང་གཡས་ནུབ་དང་རྐང་གཡོན་བྱང་དུ་འཕངས། །ཕྱོགས་བཞིར་གནས་པའི་ལྷ་འདྲེ་ཐམས་ཅད་ཚིམས། །བེམ་སྒོག་དབུས་བཞག་དབུས་དང་སྟེང་འོག་གི །ལྷ་འདྲེ་ཐམས་ཅད་ངོམས་ཤིང་ཚིམ་པར་གྱུར། །ཅེས་པ་གླིང་བཞི་མ་ཡིན་ནོ། །ཀྱཻ་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་མཉམ་ཉིད་ངང་ལ་གཟིམས་ཙ་ན། །དོན་ཉོན་མོངས་སངས་ནས་ཡེ་ཤེས་རྒྱས། །སངས་རྒྱས་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་
མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་སྐྱེ་མེད་དབྱིངས་ནས་བཞེངས་ཙ་ན། །དོན་རྗེས་ཐོབ་རྟོགས་པའི་ཉམས་དང་ལྡན། །ཡེ་ཤེས་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དགོངས་པ་ཤར་དུ་བསྐྱོད་ཙ་ན། །དོན་འགྱུར་བ་མེད་པའི་ཉམས་དང་ལྡན། །རྡོ་རྗེ་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དགོངས་པ་ལྷོ་རུ་བསྐྱོད་ཙ་ན། དོན་ཡོན་ཏན་རྫོགས་པའི་ཉམས་དང་ལྡན། །རིན་ཆེན་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ།།
དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དགོངས་པ་ནུབ་ཏུ་བསྐྱོད་ཙ་ན། །དོན་སྐྱེ་བ་མེད་པའི་ཉམས་དང་ལྡན། །པདྨ་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དགོངས་པ་བྱུང་དུ་བསྐྱོད་ཙ་ན། །དོན་འགགས་པ་མེད་པའི་ཉམས་དང་ལྡན། །ལས་ཀྱི་མཁའ་འགྲོ་འབུམ་གྱིས་བསྐོར། །གསུང་ཉམས་དབྱངས་མགུར་མ་འུ་རུ་རུ། །བྱིན་རླབས་ན་བུན་ཐིབས་སེ་ཐིབ། །དངོས་གྲུབ་ཆར་རྒྱུན་སི་ལི་ལི། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དགོངས་པ་སྟེང་དུ་བསྐྱོད་ཙ་ན། །དོན་མཐའ་དབུས་མེད་པའི་ཉམས་དང་ལྡན། །རིག་པ་དབྱིངས་སུ་པུ་རུ་རུ།། རིས་མེད་ལྟ་བ་ཕྱ་ལ་ལ། །མཉམ་ཉིད་དགོངས་པ་ཕྲི་ལི་ལི། །མཁའ་འགྲོའི་དམག་ཚོགས་ཐིབས་སེ་ཐིབ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་
དུ་གསོལ། །ཕཊ་ཕཊ། དེ་ནས་དམིགས་པ་སྤྱང་སྟོན་མ་ནི། ཕཊ། ལས་བྱེད་མཁའ་འགྲོས་བེམ་པོ་སིལ་བུར་གཏུབ། །ཤ་དུམ་ཚིག་དུམ་ལྤགས་དུམ་ཁྲག་ཐིགས་རེ། །རུས་དུམ་ནང་ཆའི་དུམ་བུ་སྣ་ཚང་རེ། །སོ་སོར་བྱིན་པས་ཕམ་རྒྱལ་མེད་པར་ཐོབ། །ཕཊ། ཀྱི་མ་མི་མིན་ཡེ་ཤེས་ཀྱི་མཁའ་འགྲོ་མ། །མ་གཉན་ས་རི་ཁྲོད་འགྲིམས་ཙ་ན། །སྙེམས་བྱེད་རྟོག་པ་མྱ་ལ་ལ། །བདེ་སྟོང་རྒྱུད་ལ་ཕྲི་ལི་ལི། །མཁའ་འགྲོ་མ་ཚོགས་ཐིབས་སེ་ཐིབ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་འགྲོ་བའི་དོན་ལ་བསྐྱོད་ཙ་ན། །གནད་ཀྱི་གདམས་པ་ཤ་ར་ར། །བདུད་ཀྱི་གཅོད་ཐབས་སི་ལི་ལི། །མཁའ་འགྲོ་མ་ཚོགས་ཐིབས་སེ་ཐིབ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་སྐྱེ་མེད་ངང་དུ་གཤེགས་ཙ་ན། །གཟུང་འཛིན་མདུད་པ་ཁྲོ་ལོ་ལོ། །སྣང་ཆའི་ན་བུན་ཡ་ལ་ལ། །མཉམ་ཉིད་དགོངས་པ་ཕྲི་ལི་ལི། །མཁའ་འགྲོ་མ་ཚོགས་ཐིབས་སེ་ཐིབ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་དབྱིངས་
ལ་སྐྱེ་བ་མི་མངའ་ཡང་། །དོན་འགགས་པ་མེད་པའི་ཐུགས་རྗེ་ཡིས། །བདག་མ་རིག་འཁྲུལ་པའི་སེམས་ཅན་རྣམས། །དོན་ངེས་པར་ཐུགས་རྗེས་བཟུང་དུ་གསོལ། །དོན་ངེས་པར་བར་ཆད་བསལ་དུ་གསོལ། །དོན་ངེས་པར་ལམ་སྣ་དྲང་དུ་གསོལ། །ཕཊ་ཕཊ། དམིགས་པ་བ་དན་མ་ནི། ཕཊ། རང་རིག་ལས་བྱེད་མཁའ་འགྲོ་དམར་མོ་དེས། །བེམ་པོར་གྲི་གུག་བརྒྱབས་པས་ཁྲག་མཚོར་གྱུར། །དེ་ནང་རྐང་རུས་ཐམས་ཅད་དར་ཡུ་ལྟར། །ཤ་རྣམས་དར་ཡུག་བ་དན་ལྟར་བསྐྱོད་པ། །དེ་ལས་ཤ་ཁྲག་ཟག་མེད་རྒྱུན་བབས་ནས། །ལྷ་འདྲེ་ཐམས་ཅད་ངོམ་ཞིང་ཚིམས་པར་གྱུར། །ཕཊ། གདུང་སྒྲོམ་ཤར་སྒོ་ནས་བསྟོད་པ། ཧཱུྃ། མ་ཕ་རོལ་ཕྱིན་པའི་གྲུབ་ཐོབ་མ། ་།སྐལ་ལྡན་ཡོངས་ཀྱི་རྒྱུད་གྲོལ་མ། །མ་མདོ་རྒྱུད་དགོངས་པ་ཐུགས་སུ་ཆུད། །ཡང་དག་དོན་རྟོགས་འགྲོ་བའི་མགོན། །ལབ་ཀྱི་སྒྲོལ་མའི་སྐུ་ལ་ཕྱག་འཚལ་བསྟོད། །མ་རང་རིག་རྣམ་དག་ཐུགས་སུ་ཆུད། །ཐུགས་ཆོས་ཉིད་དབྱིངས་དང་མཚུངས་པར་ཁྱབ། །ཐོག་མཐའ་གཉིས་པོ་གཞི་ལ་དག །བདག་ཏུ་འཛིན་པ་རང་སར་གྲོལ། །མ་ངོ་བོ་ཉིད་ཀྱི་སྐུ་ལ་ཕྱག་འཚལ་
བསྟོད། །མ་ཤེས་རབ་ནམ་མཁའི་དབྱིངས་སུ་ཤར། །སྤྱོད་ལམ་རྣམ་བཞི་རྟོག་མི་མངའ། །སྙེམས་བྱེད་ཉམ་ང་གཞི་ལ་དག །རྣམ་པར་རྟོག་པ་རང་སར་གྲོལ། །མ་ཆོས་ཀྱི་སྐུ་ལ་ཕྱག་འཚལ་བསྟོད། །མ་མངོན་ཤེས་དྲུག་པོ་ཤེས་བྱར་མཁྱེན། །ཟག་མེད་བདེ་སྟོང་རྒྱུད་ལ་སྐྱེས། །སྒོམ་མཚན་མར་འཛིན་པ་གཞི་ལ་དག །སྣང་སྲིད་ལྷ་འདྲེ་རང་སར་གྲོལ། །མ་ལོངས་སྤྱོད་རྫོགས་པའི་སྐུ་ལ་ཕྱག་འཚལ་བསྟོད། །མ་སྐྱེ་བ་བུད་མེད་ལུས་སུ་སྤྲུལ། །བཟང་ངན་མེད་པར་འགྲོ་དོན་མཛད། །ཆགས་སྡང་གཉིས་པོ་གཞི་ལ་དག །ཟོལ་ཟོག་གཉིས་པོ་རང་སར་གྲོལ། །མ་སྤྲུལ་པའི་སྐུ་ལ་ཕྱག་འཚལ་བསྟོད། །ཕཊ་ཕཊ། དེ་ནས་སྐུ་བཞིའི་བསྟོད་པའོ། །དམིགས་པ་རུས་སྤྲུགས་མ་ནི། ཕཊ། རང་རིག་ལས་བྱེད་རྡོ་རྗེ་རྣལ་འབྱོར་མས། །བེམ་པོའི་རྐང་པ་ནས་བཟུང་ནམ་མཁའ་ཁྱེར། །སྤྲུགས་པས་ཉ་རོ་ཚོས་པ་སྤྲུགས་པ་ལྟར། །ཤ་ཁྲག་སིལ་བུར་སོང་ཞིང་རུས་པ་འཕང་། །ཤ་ཁྲག་རུས་གསུམ་རྒྱ་མཚོ་ཆེན་པོ་ལས། །ལྷ་འདྲེ་རྣམས་ཀྱིས་ཟོས་ནས་ཚིམས་པར་གྱུར། །ཕཊ་ཕཊ། ཡོན་ཏན་བརྒྱད་ཀྱི་བསྟོད་པ་གདུང་ཁང་ལྷོ་ནས་བསྟོད་པ་ནི། ་
ཀྱཻ། མ་མི་མིན་ཡེ་ཤེས་ཀྱི་མཁའ་འགྲོ་མ། །མ་སྒྲིབ་པ་བྱང་ནས་སྟོང་ཉིད་རྟོགས། །མ་ཤེས་རབ་ཅན་ལ་ཕྱག་འཚལ་བསྟོད། །མ་ལུས་སེམས་བྲལ་བས་སྟོང་ཉིད་སྟོན། །མ་གདམས་ངག་ཅན་ལ་ཕྱག་འཚལ་བསྟོད། །མ་དུར་ཁྲོད་འགྲིམས་པས་ཉམ་ང་མེད། །མ་ཉམས་མྱོང་ཅན་ལ་ཕྱག་འཚལ་བསྟོད། །མ་སྙེམས་ཐག་ཆོད་པས་བདུད་རྣམས་ཞི། །མ་ནུས་པ་ཅན་ལ་ཕྱག་འཚལ་བསྟོད། །མ་བདུད་རྣམས་ཞི་བས་ཡེ་ཤེས་འཕེལ། །མ་རྟོགས་པ་ཅན་ལ་ཕྱག་འཚལ་བསྟོད། །མ་སྟོང་ཉིད་རྟོགས་པས་ས་རྣམས་གནོན། །མ་ཚོགས་གཉིས་རྫོགས་ལ་ཕྱག་འཚལ་བསྟོད། །མ་སྐྱེ་མེད་བསྒོམས་པས་མངོན་ཞེན་ལོག །མ་འཁོར་བ་སྤངས་ལ་ཕྱག་འཚལ་བསྟོད། །མ་གདམས་ངག་བཀའ་དང་བསྟུན་ནས་སྟོན། །མ་ལུང་སྟོན་མཁྱེན་ལ་ཕྱག་འཚལ་བསྟོད། །མ་མགུར་ཙམ་བཞེངས་པས་ཡེ་ཤེས་འཕེལ། །མ་བྱིན་རླབས་ཅན་ལ་ཕྱག་འཚལ་བསྟོད། །མ་ཞབས་ཏོག་མེད་ཀྱང་གདམས་ངག་སྟོན། །མ་ཐུགས་རྗེ་ཅན་ལ་ཕྱག་འཚལ་བསྟོད། །ཕཊ། དམིགས་པ་རོ་འགྱེད་མ་ནི། ཕཊ། བེམ་རོ་སོ་མ་དང་རྙ་རྙིང་ཚོགས། །འབུམ་ཕྲག་བྱེ་བ་གྲངས་མེད་
འཇིག་རྟེན་ཁྱབ། །ལས་བྱེད་མཁའ་འགྲོ་རོ་ཡི་གྲངས་མཉམ་པས། །ལྷ་འདྲེ་རྣམས་ལ་བཀྱེས་པས་ཧབ་ཐོབ་ཟོས། །ཕཊ། ཆེ་བ་བཞིའི་བསྟོད་པ་གདུང་སྒྲོམ་ནུབ་ནས་བསྟོད་པ་ནི། ཀྱཻ། མ་མི་མིན་ཡེ་ཤེས་ཀྱི་མཁའ་འགྲོ་མ། །མ་ངན་སོང་གསུམ་པོར་མི་འཇིགས་པའི། །མི་དགེ་བཅུ་པོ་སྙེམས་ཐག་ཆོད། །ངན་འགྲོའི་ཕྱོགས་ཀྱི་བདུད་ལས་གྲོལ། །མ་མཐོ་རིས་འདྲེན་ལ་ཕྱག་འཚལ་བསྟོད། །མ་འགྲོ་བའི་དོན་ལ་མི་ཞེན་པའི། །དགེ་བའི་ལས་རྣམས་དབྱིངས་སུ་གྲོལ། །ལྷ་མིའི་འཁོར་བའི་བདུད་ལས་ཐར། །མ་ཐར་ལམ་བགྲོད་ལ་ཕྱག་འཚལ་བསྟོད། །མ་སྐྱེ་འཆི་གཉིས་ལ་མི་འཇིགས་པའི། །སྙེམས་ཐག་ཡུམ་གྱི་ཀློང་དུ་ཆོད། །སྐྱེ་མེད་ཀློང་ནས་སྐྱེ་འཆི་མེད། །མ་བཙན་ས་ཟིན་ལ་ཕྱག་འཚལ་བསྟོད། །མ་ལོག་འདྲེན་བགེགས་ལ་མི་འཇིགས་པའི། །འདྲེ་གདོན་རང་སྣང་སེམས་སུ་ཆོད། །གདོན་གནོད་སྦྱིན་ཕོ་མོའི་བདུད་ལས་གྲོལ། །མ་བར་ཆད་སེལ་ལ་ཕྱག་འཚལ་བསྟོད། །མ་དང་པོ་ལུས་སེམས་བསྐྱེད་པའི་མ། །བར་དུ་ཟང་ཟིང་ཕོག་པའི་མ། །ཐ་མར་སྐྱེ་མེད་སྟོན་པའི་མོ། །མ་དྲིན་མོ་ཆེ་ལ་ཕྱག་འཚལ་བསྟོད། །མ་
ལུས་སྲོག་གཟན་དུ་བོར་བའི་མ། །རིག་པ་གཞི་ལ་དག་པའི་མ། །མ་དབྱིངས་ཀྱི་ཐུགས་ལ་འཁྲུལ་པ་མེད། །བུས་ད་རུང་སེམས་ཀྱི་ཐག་མ་ཆོད། །མ་བཞུགས་པའི་ཚེ་ལ་དགའ་མ་ཚོར། །གཤེགས་པའི་ཚེ་ན་སྙིང་མ་དགའ། །མ་བཞུགས་ནས་བྱིན་གྱིས་བརླབ་ཏུ་གསོལ། །བུས་ཀྱང་མ་ལ་གསོལ་བ་འདེབས། །མས་ཀྱང་བུ་ལ་བྱིན་གྱིས་རློབས། །བདག་དང་མོས་པའི་རྗེས་འཇུག་ལ། །བྱིན་གྱིས་བརླབ་པར་མཛད་དུ་གསོལ། །ལུས་ལ་བདེ་བ་བསྐྱེད་དུ་གསོལ། །ངག་ལ་ནུས་པ་སྦྱར་དུ་གསོལ། །སེམས་ལ་རྟོགས་པ་འཆར་དུ་གསོལ། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །མ་དང་པོ་ལུས་སེམས་ཞེས་པ་མན་ཆད་འཇིགས་སྐྱོབ་ཕྲིན་ལས་ཀྱི་བསྟོད་པ་གདུང་སྒྲོམ་བྱང་སྒོ་ནས་བསྟོད་པའོ། །ཕཊ། བེམ་པོ་དཀར་གསུམ་མངར་གསུམ་སྨན་གྱི་ཚོགས། །དར་ཟབ་བལ་ཚོན་ནམ་མཁའ་མདའ་འཕང་དང་། །རིན་ཆེན་འབྲུ་སྣ་བྱ་རིགས་གཅན་གཟན་ཚོགས། །རི་དྭགས་གཡུང་དྭགས་གོ་མཚོན་ཤིང་རྩི་རྣམས། །དཔག་ཏུ་མེད་པ་གཞི་བདག་རྣམས་ལ་བྱིན། །དད་གུས་ཕྲིན་ལས་གང་འདོད་སྒྲུབ་པར་
གྱུར། །གཞི་བདག་གཏོར་མའོ། །ཕཊ་ཕཊ། ཀྱཻ། མ་མི་མིན་ཡེ་ཤེས་ཀྱི་མཁའ་འགྲོ་མ། །མ་རི་ཁྲོད་འགྲིམ་ཞིང་ཉམས་སུ་ལེན། །མ་གཅིག་སྟོང་པ་ཉིད་ནས། །སྟོང་པ་ཉིད་ལ་སེར་སྣ་མེད། །མ་སྦྱིན་པ་རྫོགས་ལ་ཕྱག་འཚལ་བསྟོད། །མ་གཅིག་སྟོང་པ་ཉིད་ལ་གནས། །སྟོང་པ་ཉིད་ལ་འཆལ་བ་མེད། །མོ་ཚུལ་ཁྲིམས་རྫོགས་ལ་ཕྱག་འཚལ་བསྟོད། །མ་གཅིག་སྟོང་པ་ཉིད་ལ་གནས། །སྟོང་པ་ཉིད་ལ་ཁོང་ཁྲོ་མེད། །མ་བཟོད་པ་རྫོགས་ལ་ཕྱག་འཚལ་བསྟོད། །མ་གཅིག་སྟོང་པ་ཉིད་ལ་གནས། །སྟོང་པ་ཉིད་ལ་ལེ་ལོ་མེད། །མ་བརྩོན་འགྲུས་རྫོགས་ལ་ཕྱག་འཚལ་བསྟོད། །མ་གཅིག་སྟོང་པ་ཉིད་ལ་གནས། །སྟོང་པ་ཉིད་ལ་གཡོ་བ་མེད། །མ་བསམ་གཏན་རྫོགས་ལ་ཕྱག་འཚལ་བསྟོད། །མ་གཅིག་སྟོང་པ་ཉིད་ལ་གནས། །སྟོང་པ་ཉིད་ལ་གཏི་མུག་མེད། །མ་ཤེས་རབ་རྫོགས་ལ་ཕྱག་འཚལ་བསྟོད། །མ་ཕ་རོལ་ཕྱིན་དྲུག་ཐུགས་ལ་མངའ། །ཡང་དག་དོན་རྟོགས་འགྲོ་བའི་མགོན། །མ་གཅིག་ཁྱེད་ལ་ཕྱག་འཚལ་བསྟོད། །མ་གཅིག་གི་བསྟོད་པ་དེ་ཐམས་ཅད་སྲས་རྒྱལ་བའི་དོན་གྲུབ་ཀྱིས་མཛད་པའོ། །ཕཊ། །
བེམ་རོ་དེ་ཉིད་སིལ་བུར་གྱུར་པ་ལས། །རང་གི་ཐུགས་ཀའི་འོད་ཟེར་ཕོག་པ་ཡིས། །མི་གཙང་དྲི་མ་ཐམས་ཅད་སྦྱངས་ནས་ཀྱང་། །ཤ་རྣམས་བདུད་རྩི་ཁྲག་རྣམས་འོ་མའི་མཚོ། །མཚོ་དང་རྫིང་བུ་ནེའུ་སེང་ཆུ་མིག་དང་། །རིན་ཆེན་རི་བོ་ཤིང་རྩི་མེ་ཏོག་ཚོགས། །ཁང་བཟང་ཆུ་བྱ་ཆུ་གནས་སྣ་ཚོགས་གྱུར། །ཀླུ་ལ་བྱིན་པས་ནད་དང་སྡུག་བསྔལ་ཞི། །བཀྲག་མདངས་རབ་རྒྱས་དད་གུས་བྱམས་སེམས་ལྡན། །ཕྲིན་ལས་གང་བཅོལ་ཐོགས་མེད་སྒྲུབ་པར་གྱུར། །ཕཊ་ཕཊ། མ་ནམ་མཁའ་ལྟ་བུའི་ཡུམ་ཆེན་ལ། །སྲས་ཉི་ཟླ་ལྟ་བུའི་རྒྱལ་བོ་འཁྲུངས། །མ་ཡུམ་ཆེན་དེ་ཡི་ཐུགས་ཀྱི་སྲས། །སྐུ་ཡི་བྱིན་རླབས་ལུས་ལ་ཞུགས་པས་གཟི་བརྗིད་ཆེ། །གསུང་གི་བྱིན་རླབས་ངག་ལ་ཞུགས་པས་ནུས་པ་ཆེ། །ཐུགས་ཀྱི་བྱིན་རླབས་སེམས་ལ་ཞུགས་པས་རྟོགས་པ་ཆེ། །ཡོན་ཏན་བྱིན་རླབས་ཞུགས་པས་ཐུགས་རྗེ་ཆེ། །ཕྲིན་ལས་བྱིན་རླབས་ཞུགས་པས་འགྲོ་དོན་ཆེ། །རྗེ་མཁྱེན་པ་ཀུན་ལྡན་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །རྗེ་ཐོགས་བཅས་བདུད་ཀྱི་དོན་རྟོགས་ཤིང་། །དངོས་སྣང་སྒྱུ་
མ་ལྟ་བུར་མཁྱེན། །ཐོགས་མེད་བདུད་ཀྱི་དོན་རྟོགས་པས། །ཉོན་མོངས་རང་སར་གྲོལ་བར་མཁྱེན། །དགའ་བྲོད་བདུད་ཀྱི་དོན་རྟོགས་པས། །ཡོན་ཏན་སེམས་སུ་མཉམ་པར་མཁྱེན། །སྙེམས་བྱེད་བདུད་ཀྱི་དོན་རྟོགས་པས། །འཁོར་བ་དབྱིངས་སུ་གྲོལ་བར་མཁྱེན། །རྗེ་མཁྱེན་པ་ཀུན་ལྡན་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །མ་ཡུམ་ཆེན་སྲས་སུ་གྱུར་པའི་རིགས་རྒྱུད་ཅན། །ལྟ་སྒོམ་དམིགས་པ་བྲལ་བའི་རྟོགས་པ་ཅན། །སྒྲོ་འདོགས་སེམས་སུ་ཆོད་པའི་མཁྱེན་པ་ཅན། །རྒྱ་བོད་ཧོར་གསུམ་ཐོས་པའི་གྲགས་པ་ཅན། །རྗེ་ཡོན་ཏན་ཀུན་ལྡན་གླང་ལུང་པ། །བདག་དང་མོས་པའི་བུ་སློབ་ལ། །བྱིན་གྱིས་བརླབ་པར་མཛད་དུ་གསོལ། །ཕཊ་ཕཊ་ཕཊ། སྲས་བསྟོད་འདི་གཉན་ཆུང་ལོ་ཙཱ་བས་མཛད་པའོ། །ཕཊ། མ་གཅིག་སྙན་གོང་གཡོན་ངོས་བཞུགས་པ་ཡི། །རྗེ་བཙུན་ཕག་མོ་ལྷ་ལྔ་དེ་ཉིད་ཀྱི། །སྐུ་ལས་འོད་ཟེར་ཁ་དོག་སྣ་ཚོགས་འཕྲོས། །བདག་དང་བསྲུང་བྱ་ཀུན་ལ་ཐིམ་པ་ཡིས། །ཡང་དག་བདེ་ཆེན་ཡེ་ཤེས་བསྐྱེད་པར་གྱུར། །ཕཊ་ཕཊ། ཀྱཻ། མ་
མི་མིན་ཡེ་ཤེས་མཁའ་འགྲོ་མ། །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་འབུམ། །ཡང་དག་བདེ་ཆེན་བསྐྱེད་པའི་ཌཱཀི་ལ། །དད་མོས་དྲག་པོས་སྟོབས་ཀྱིས་གསོལ་བ་འདེབས། །ཐུགས་རྗེས་རྒྱུན་ཆད་མེད་པར་དགོངས་མཛོད་ལ། །ལས་ཅན་ཕོ་མོ་རྣམས་ལ་བྱིན་གྱིས་རློབས། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ཕཊ་ཕཊ། རྒྱས་པར་འགྲེས་ཡིན་ཀྱང་བསྡུ་ན། སྐྱེ། མ་མི་མིན་ཡེ་ཤེས་མཁའ་འགྲོ་མ། །ཤར་ཕྱོགས་རྡོ་རྗེ་རིགས་ཀྱི་ཌཱཀི་འབུམ། །ལྷོ་ཕྱོགས་རིན་ཆེན་རིགས་ཀྱི་ཌཱཀི་འབུམ། །ནུབ་ཕྱོགས་པདྨ་རིགས་ཀྱི་ཌཱཀི་འབུམ། །བྱང་ཕྱོགས་ལས་ཀྱི་རིགས་ཀྱི་ཌཱཀི་འབུམ། །ཡང་དག་བདེ་ཆེན་བསྐྱེད་པའི་ཌཱཀི་ལ། །དད་མོས་དྲག་པོས་སྟོབས་ཀྱིས་གསོལ་བ་འདེབས། །ཐུགས་རྗེས་རྒྱུན་ཆད་མེད་པར་དགོངས་མཛོད་ལ། །ལས་ཅན་ཕོ་མོ་རྣམས་ལ་བྱིན་གྱིས་རློབས། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ཕཊ་ཕཊ། གཙོ་མོའི་སྐུ་ལས་སྤྲུལ་པའི་མཁའ་འགྲོ་བྱེ་བ་ལ་གསོལ་བ་འདེབས་པ་ནི། ཀྱཻ། མ་མི་མིན་ཡེ་ཤེས་མཁའ་འགྲོ་མ། །སྤྱན་གསུམ་བར་སྣང་མཁའ་ལ་གཟིགས་པ་ལས། །དུས་གསུམ་ཐོགས་མེད་གཟིགས་པའི་
ཌཀི་འབུམ། །མི་མགོ་སུམ་བརྩེགས་རབ་ཏུ་བརྒྱན་པ་ལས། །ཁམས་གསུམ་དབང་དུ་སྡུད་པའི་ཌཱཀི་འབུམ། །ཐོད་སྐམ་ལྔ་ཡིས་དབུ་ལ་བརྒྱན་པ་ལས། །རིགས་ལྔས་འགྲོ་དོན་མཛད་པའི་ཌཱཀི་འབུམ། །ཐོད་རློན་ལྔ་བཅུའི་དོ་ཤལ་བྱས་པ་ལ། །འཁྲུལ་པ་ལྔ་བཅུ་རྩ་གཅིག་ཟད་པའི་ཌཱཀི་འབུམ། །དབུ་སྐྲ་སིལ་མས་སྐུ་རྒྱབ་ཁེབས་པ་ནི། །སེམས་ཅན་བདེ་ལ་བཀོད་པའི་ཌཱཀི་འབུམ། །རུས་པའི་རྒྱན་དྲུག་སྐུ་ལ་བརྒྱན་པ་ལ། །རྟོགས་མེད་ཉམས་དང་ལྡན་པའི་ཌཱཀི་འབུམ། ཡང་དག་བདེ་ཆེན་བསྐྱེད་པའི་ཌཱཀི་ལ། །དད་མོས་དྲག་པོས་སྟོབས་ཀྱིས་གསོལ་བ་འདེབས། །ཐུགས་རྗེས་རྒྱུན་ཆད་མེད་པར་དགོངས་མཛོད་ལ། །ལས་ཅན་ཕོ་མོ་རྣམས་ལ་བྱིན་གྱིས་རློབས། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ཕཊ་ཕཊ། ཀྱི། མ་མི་མིན་ཡེ་ཤེས་མཁའ་འགྲོ་མ། །ཁཊཾ་རྩེ་གསུམ་རབ་ཏུ་བརྒྱན་པ་ལས། །སྲིད་གསུམ་ཟིལ་གྱིས་གནོན་པའི་ཌཀི་འབུམ། །བམ་ཆེན་གདན་ལ་བརྐྱང་བསྐུམ་བཞུགས་པ་ནི། །འགྲོ་དྲུག་གནས་ནས་འདྲེན་པའི་ཌཱཀི་འབུམ། །ཌཱ་རུ་ཅང་ཏེའུ་གསེར་གྱི་རྡེའུ་ཆུང་
ལས༔ །དོན་དམ་སྙན་བརྒྱུད་འཛིན་པའི་ཌཱཀི་འབུམ། །གསེར་གྱི་དྲིལ་བུ་གཡེར་ཁས་གསུང་སྙན་སྒྲོགས་པ་ལས། །སྟོང་གསུམ་ཆོས་སྒྲ་སྒྲོགས་པའི་ཌཱཀི་འབུམ། །དར་གྱི་འཕུར་ལྕེས་རབ་ཏུ་བརྒྱན་པ་ལས། །སྤྲུལ་པ་ཡང་སྤྲུལ་འགྱེད་པའི་ཌཱཀི་འབུམ། །དུར་ཁྲོད་ཤ་ལ་རོལ་བར་མཛད་པ་ཡིས། །ཡེ་ཤེས་རོལ་བར་མཛད་པའི་ཀླུའི་འབུམ། །ཡང་དག་བདེ་ཆེན་བསྐྱེད་པའི་ཌཱཀི་ལ། །དད་མོས་དྲག་པོས་སྟོབས་ཀྱིས་གསོལ་བ་འདེབས། །ཐུགས་རྗེས་རྒྱུན་ཆད་མེད་པར་དགོངས་མཛོད་ལ། །ལས་ཅན་ཕོ་མོ་རྣམས་ལ་བྱིན་གྱིས་རློབས། །དད་ལྡན་སྐྱེས་བུ་རྣམས་ལ་བཅུད་དུ་ཕོབ། །ཕཊ་ཕཊ། མཁའ་འགྲོ་འབུམ་བསྐུལ་འདི་མ་གཅིག་གིས་མཛད་པ་ཡིན་ནོ།། ༈ དེ་ནས་ཚོགས་ལ་ཆུ་གཙང་དང་བདུད་རྩིས་བྲན་ལ། ཨོཾ་ཨཱཿཧཱུྃ། ཨོཾ་ག་ཏེ་ག་ཏེ་པ་ར་ག་ཏེ་པཱ་ར་སཾ་ག་ཏེ་བྷོ་དྷི་སྭཱ་ཧཱ། ཞེས་པས་བསངས་ནས། ཕཊ། མདུན་གྱི་གཅོད་ཡུལ་བརྒྱུད་པ་ཐམས་ཅད་ཀྱི། །སྐུ་ལས་འོད་ཟེར་དཔག་མེད་འཕྲོས་པ་ཡིས། །ཡུལ་དེར་ཕོག་པས་ཨོ་རྒྱན་ཡུལ་དུ་གྱུར། །གནས་ཁང་ལ་ཕོག་གཞལ་ཡས་ཁང་དུ་གྱུར། །མགྲོན་ལ་ཕོག་པས་དཔའ་བོ་དཔའ་
མོར་གྱུར། །སྣོད་སྤྱད་ལ་ཕོག་པདྨ་བྷནྡྷར་གྱུར། །ཚོགས་རྫས་ལ་ཕོག་ཡེ་ཤེས་བདུད་རྩིར་གྱུར། །ཕཊ་ཕཊ། བཀའ་བརྒྱུད་ཚོགས་ལས་ནི། གནས་ཆོས་དབྱིངས་རྣམ་དག་གི་གཞལ་ཡས་ན། །ཡུམ་ཆེན་ཤེས་རབ་ཕར་ཕྱིན་རིན་པོ་ཆེ། །ཁོང་དཔའ་བོ་དཔའ་མོའི་དབུས་ན་བཞུགས། །བདག་མོས་གུས་གདུང་བས་གསོལ་བ་འདེབས། །རྗེ་མཁའ་འགྲོའི་ཚོགས་རྣམས་གཤེགས་སུ་གསོལ། །མཁའ་འགྲོའི་ཚོགས་རྣམས་གཤེགས་ནས་ཀྱང་། །བདག་སྒྲུབ་པ་པོ་ལ་དངོས་གྲུབ་སྩོལ། །ས་གཞི་བྱིན་གྱིས་བརླབ་པར་མཛད་དུ་གསོལ། །ཀྱཻ། ཚོགས་ཁང་གཞལ་ཡས་འབར་བ་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐྱེས་བུ་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་ཆེན་ལ་སོགས་སྣོད་མཆོག་རྣམས། །པདྨ་བྷནྡཱར་བྱིན་གྱིས་རློབས། །བཅུད་ཚོགས་ཀྱི་འཁོར་ལོ་ཐམས་ཅད་ཀྱང་། །ཡེ་ཤེས་བདུད་རྩིར་བྱིན་གྱིས་རློབས། །མི་མཐུན་རྐྱེན་དང་བར་ཆད་སོལ། །མཐུན་པའི་ལམ་སྣ་དབྱིངས་སུ་དྲོངས། །རྒྱས་པར་འགྲེས་ཡིན་ཀྱང་བསྡུ་ན། གནས་བྱ་རྒོད་ཕུང་པོའི་རི་བོ་ན། །རྗེ་ཡང་
དག་རྫོགས་པའི་སངས་རྒྱས་རིན་པོ་ཆེ། །གནས་སེང་ཆེན་བསྣོལ་བའི་ཁྲི་སྟེང་ན། །འཇམ་དཔལ་སྨྲ་བའི་སེང་གེ་རིན་པོ་ཆེ། །གནས་གཡུ་ལོ་བཀོད་པའི་ཞིང་ཁམས་ན། །རྗེ་བཙུན་སྒྲོལ་མ་དཀར་མོ་རིན་པོ་ཆེ། །གནས་འཇའ་འོད་འཁྱིལ་པའི་ཞིང་ཁམས་ན། །མཁའ་འགྲོ་སུ་ཁ་སིདྡྷི་རིན་པོ་ཆེ། །གནས་རྒྱ་གར་སྤྱིལ་པོའི་ཁ་སྦྱོར་ན། །བྲམ་ཟེ་ཨཱརྱ་དེ་ཝ་རིན་པོ་ཆེ། །གནས་ལ་སྟོད་དིང་རིའི་དགོན་པ་ན། །ཕ་གཅིག་དམ་པ་སངས་རྒྱས་རིན་པོ་ཆེ། །གནས་དབུས་གཙང་གཉིས་ཀྱི་ས་མཚམས་ན། །སྐྱོ་སྟོན་བསོད་ནམས་བླ་མ་རིན་པོ་ཆེ། །ཁོང་དཔའ་བོ་དཔའ་མོའི་དབུས་ན་བཞུགས། །བདག་མོས་གུས་གདུང་བས་གསོལ་བ་འདེབས། །རྗེ་མཁའ་འགྲོའི་ཚོགས་རྣམས་གཤེགས་སུ་གསོལ། །མཁའ་འགྲོའི་ཚོགས་རྣམས་གཤེགས་ནས་ཀྱང་། །བདག་སྒྲུབ་པ་པོ་ལ་དངོས་གྲུབ་སྩོལ། །ས་གཞི་བྱིན་གྱིས་བརླབ་པར་མཛད་དུ་གསོལ། །ཚོགས་ཁང་གཞལ་ཡས་འབར་བ་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐྱེས་བུ་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་
ཆེན་ལ་སོགས་སྣོད་མཆོག་རྣམས། །པདྨ་བྷནྡཱར་བྱིན་གྱིས་རློབས། །བཅུད་ཚོགས་ཀྱི་འཁོར་ལོ་ཐམས་ཅད་ཀྱང་། །ཡེ་ཤེས་བདུད་རྩིར་བྱིན་གྱིས་རློབས། མི་མཐུན་རྐྱེན་དང་བར་ཆད་སོལ། །མཐུན་པའི་ལམ་སྣ་དབྱིངས་སུ་དྲོངས། །གནས་ཟངས་རི་མཁར་དམར་གྱི་དགོན་པ་ན། །མ་གཅིག་ལབ་ཀྱི་སྒྲོན་མ་རིན་པོ་ཆེ། །གནས་བཀྲ་ཤིས་གླང་ལུང་གི་དགོན་པ་ན། །སྲས་མཆོག་རྒྱལ་བ་དོན་གྲུབ་རིན་པོ་ཆེ། །གནས་རྒྱལ་ཁམས་ཕྱོགས་མེད་ཀྱི་དགོན་པ་ན། །བཀའ་བབ་བུ་ཆེན་བཅུ་དྲུག་རིན་པོ་ཆེ། །གནས་སྟོད་ལུང་མཚུར་ཕུའི་དགོན་པ་ན། །གྲུབ་ཆེན་ཀརྨ་པཀཱི་རིན་པོ་ཆེ། །གནས་བདུད་བཞི་ཟིལ་གནོན་གྱི་ཕོ་བྲང་ན། །རྗེ་རང་བྱུང་རྡོ་རྗེ་རིན་པོ་ཆེ། །གནས་གར་བཞུགས་ཆོས་ཉིད་ཀྱི་དགོན་པ་ན། །ཕ་གྲུབ་ཐོབ་གཅོད་ཡུལ་བརྒྱུད་པ་རིན་པོ་ཆེ། །གནས་སྤྱི་གཙུག་པད་ཟླའི་གདན་སྟེང་ན། །དྲིན་ཆེན་རྩ་བའི་བླ་མ་རིན་པོ་ཆེ། །ཁོང་དཔའ་བོ་དཔའ་མོའི་དབུས་ན་བཞུགས། །བདག་མོས་གུས་གདུང་བས་གསོལ་བ་འདེབས། །རྗེ་མཁའ་འགྲོའི་ཚོགས་རྣམས་གཤེགས་སུ་གསོལ། །མཁའ་འགྲོའི་
ཚོགས་རྣམས་གཤེགས་ནས་ཀྱང་། །བདག་སྒྲུབ་པ་པོ་ལ་དངོས་གྲུབ་སྩོལ། །ས་གཞི་བྱིན་གྱིས་བརླབ་པར་མཛད་དུ་གསོལ། །ཀྱཻ། ཚོགས་ཁང་གཞལ་ཡས་འབར་བ་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐྱེས་བུ་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་ཆེན་ལ་སོགས་སྣོད་མཆོག་འདི། །པདྨ་བྷནྡར་བྱིན་གྱིས་རློབས། །བཅུད་ཚོགས་ཀྱི་འཁོར་ལོ་ཐམས་ཅད་ཀྱང་། །ཡེ་ཤེས་བདུད་རྩིར་བྱིན་གྱིས་རློབས། །མི་མཐུན་རྐྱེན་དང་བར་ཆད་སོལ། །མཐུན་པའི་ལམ་སྣ་དབྱིངས་སུ་དྲོངས། །ཕཊ་ཕཊ། བཀའ་བརྒྱུད་ཚོགས་ལས་སྟོད་ཆ་འདི། །སྲས་རྒྱལ་བ་དོན་གྲུབ་ཀྱིས་མཛད་པའོ།། ཕཊ། དཀྱིལ་འཁོར་ལྷ་ཚོགས་འོད་ཀྱིས་མ་གཅིག་བསྐུལ། །མ་གཅིག་ཐུགས་ལས་འོད་ཟེར་འཕྲོས་པ་ཡིས། །ཨོ་རྒྱན་དག་པ་མཁའ་སྤྱོད་ཞིང་ཁམས་ནས། །མཁའ་འགྲོ་སྡེ་ལྔ་འཁོར་ཚོགས་འབུམ་སྡེར་བཅས། །མདུན་གྱི་ནམ་མཁར་སྤྱན་དྲངས་སྤྲིན་ལྟར་འཁྲིགས། །ཀུན་ཀྱང་རྒྱན་ཆ་རོལ་མོ་ཏི་རི་རི། །པད་ཟླའི་གདན་བཞུགས་འདོད་ཡོན་སྣ་ཚོགས་མཆོད། །བདག་དང་བསྲུང་བྱ་ལྷ་འདྲེས་ཕྱག་འཚལ་གྱུར། །
ཕཊ་ཕཊ། ཅེས་བསྒོམ་ཞིང་ཚོགས་ལྷ་སྤྱན་འདྲེན་ནི། ཀྱཻ། མ་མི་མིན་ཡེ་ཤེས་མཁའ་འགྲོ་མ། །དབུས་ཕྱོགས་སངས་རྒྱས་རིགས་ཀྱི་ཌཱཀིའི་ཚོགས། །སྐུ་མདོག་ནག་ལ་འོད་ཟེར་འབར། །ཕྱག་ན་འཁོར་ལོའི་པད་སྣོད་བསྣམས། །མུ་མེན་ཐོར་ཚུགས་ལྡེམས་སེ་ལྡེམ། །རིན་ཆེན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་སི་ལི་ལི། །དར་གྱི་ཅོད་པན་པུ་རུ་རུ། །རུས་པའི་རྒྱན་ཆ་ཁྲ་ལ་ལ། །ཌཱ་རུ་ཅང་ཏེའུ་ཁྲོ་ལོ་ལོ། །རྔ་སྒྲ་དུང་སྒྲ་འུ་རུ་རུ། །པི་ཝཾ་གླིང་བུ་ལྷངས་སེ་ལྷང་། །དུར་ཁྲོད་ཚོགས་མཆོད་བྱིན་གྱིས་བརླབ་པའི་ཕྱིར། །རྗེ་མཁའ་འགྲོའི་ཚོགས་རྣམས་གཤེགས་སུ་གསོལ། །མཁའ་འགྲོའི་ཚོགས་རྣམས་གཤེགས་ནས་ཀྱང་། །དུག་ལྔ་གཅོད་ཕྱིར་པད་ཟླའི་གདན་ལ་བཞུགས་། །ཕ་རོལ་ཕྱིན་དྲུག་རྫོགས་ལ་གུས་ཕྱག་འཚལ། །གཟུགས་སྒྲ་དྲི་རོ་རེག་བྱའི་མཆོད་པ་འབུལ། །སྟོང་ཉིད་བཅོ་བརྒྱད་རྫོགས་ལ་གུས་ཕྱག་འཚལ། །ཀྱཻ། ཚོགས་ཁང་གཞལ་ཡས་འབར་བ་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐལ་ལྡན་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་ཆེན་ལ་སོགས་
སྣོད་མཆོག་འདི། །པདྨ་བྷནྡཱར་བྱིན་གྱིས་རློབས། །བཅུད་ཚོགས་ཀྱི་ཞལ་ཟས་ཐམས་ཅད་ཀྱང་། །ཟག་མེད་བདུད་རྩིར་བྱིན་གྱིས་རློབས། །མཎྜལ་འདི་ལ་རྟེན་ཞིག་ཆོས། །མར་མེ་འདི་ལ་མདངས་ཤིག་ཕྱུང་། །སློབ་མ་རྣམས་ལ་དབང་ཞིག་སྐུར། །ཚོགས་གཏོར་འདི་ལ་བཅུད་ཅིག་ཕོབ། །རྣལ་འབྱོར་བར་ཆད་ཞི་བ་དང་། །མཆོག་དང་ཐུན་མོང་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ་ཕཊ། བྱིན་འབེབས་དམིགས་པ་ནི། ཕཊ། ལྷ་ཚོགས་རྣམས་ཀྱི་འོད་ཀྱིས་བསྐུལ་བ་ཡིས། །ཌཀི་རྣམས་ཀྱི་ཐུགས་ལས་འོད་ཟེར་འཕྲོས། །གནས་ལ་ཕོག་པས་ཨོ་རྒྱན་རང་བྱུང་གནས། །ནམ་མཁའ་འཇའ་ཡི་གུར་དང་བླ་རེ་འཁྲིགས། །བར་སྣང་མེ་ཏོག་ཆར་པ་ལང་ལོང་བབ། །ས་གཞིར་འདོད་ཡོན་མཆོད་རྫས་གཅལ་དུ་བཀྲམ། །ལྷ་ཡི་བུ་དང་བུ་མོ་ཐམས་ཅད་ཀྱིས། །གླུ་གར་རོལ་མོས་ནམ་མཁའ་བར་སྣང་གང་། །འོད་ཟེར་གནས་ཁང་ལ་ཕོག་ཐོད་པའི་མཁར། །གཞལ་ཡས་གྲུ་བཞི་སྒོ་བཞི་རྟ་བབས་རྫོགས། །འོད་ཟེར་རྣལ་འབྱོར་ཕོ་མོར་ཕོག་པ་ཡིས། །ཐམས་ཅད་དཔའ་བོ་མཁའ་འགྲོ་ཁོ་ནར་གྱུར། །སྣོད་ལ་ཕོག་པས་
ཐོད་པ་མཚན་དང་ལྡན། །ཚོགས་རྫ་ས་ལ་ཕོག་ཤ་ལྔ་བདུད་རྩི་ལྔ། །མཎྜལ་ལ་ཕོག་རྒྱན་བཀོད་ཕུན་སུམ་ཚོགས། །མཆོད་རྫས་ལ་ཕོག་སྣང་སྟོང་མཆོད་པའི་སྤྲི། །གནོད་བྱེད་གཙོར་བྱས་འགྲོ་དྲུག་ཀུན་ལ་ཕོག །སྡིག་སྒྲིབ་དག་ནས་སྐུ་བཞིའི་ས་བོན་བཞག །ཕཊ་ཕཊ། ཀྱཻ། མ་མི་མིན་ཡེ་ཤེས་མཁའ་འགྲོ་མ། །ཤར་ཕྱོགས་རྡོ་རྗེ་རིགས་ཀྱི་ཌཱཀིའི་ཚོགས། །སྐུ་མདོག་དཀར་ལ་འོད་ཟེར་འབར། །ཕྱག་ན་རྡོ་རྗེ་པད་སྣོད་བསྣམས། །ཤེལ་གྱི་ཐོར་ཚུགས་ལྡེམས་སེ་ལྡེམ། །རྒྱས་པར་འགྲེས་ཡིན་ཀྱང་བསྡུ་ན། ལྷོ་ཕྱོགས་རིན་ཆེན་རིགས་ཀྱི་ཌཱཀིའི་ཚོགས། །སྐུ་མདོག་སེར་ལ་འོད་ཟེར་འབར། །ཕྱག་ན་རིན་ཆེན་པད་སྣོད་བསྣམས། །གསེར་གྱི་ཐོར་ཚུགས་ལྡེམས་སེ་ཀཾ་ལྡེམ། །ནུབ་ཕྱོགས་པདྨ་རིགས་ཀྱི་ཌཱཀིའི་ཚོགས། །སྐུ་མདོག་དམར་ལ་འོད་ཟེར་འབར། །ཕྱག་ན་པདྨའི་པད་སྣོད་བསྣམས། །བྱུ་རུའི་ཐོར་ཚུགས་ལྡེམས་སེ་ལྡེམ། །བྱང་ཕྱོགས་ལས་ཀྱི་རིགས་ཀྱི་ཌཱཀིའི་ཚོགས། །སྐུ་མདོག་ལྗང་ལ་འོད་ཟེར་འབར། །ཕྱག་ན་རྒྱ་གྲམ་པད་སྣོད་བསྣམས། །གཡུ་ཡི་ཐོར་ཚུགས་ལྡེམས་སེ་
ལྡེམ། །རིན་ཆེན་སྙན་ཆ་ཁྲ་ལ་ལ། །ཕྱག་གདུབ་ཞབས་གདུབ་སི་ལི་ལི། །དར་གྱི་ཅོད་པན་པུ་རུ་རུ། །རུས་པའི་རྒྱན་ཆ་ཁྲ་ལ་ལ། །ཌཱ་རུ་ཅང་ཏེའུ་ཁྲོ་ལོ་ལོ། །རྔ་སྒྲ་དུང་སྒྲ་འུ་རུ་རུ། །པི་ཝཾ་གླིང་བུ་ལྷངས་སེ་ལྷང་། །དུར་ཁྲོད་ཚོགས་མཆོད་བྱིན་གྱིས་བརླབ་པའི་ཕྱིར། །ཀྱཻ། མཁའ་འགྲོའི་ཚོགས་རྣམས་གཤེགས་སུ་གསོལ། །མཁའ་འགྲོའི་ཚོགས་རྣམས་གཤེགས་ནས་ཀྱང་། །དུག་ལྔ་གཅོད་ཕྱིར་པད་ཟླའི་གདན་ལ་བཞུགས། །ཕ་རོལ་ཕྱིན་དྲུག་རྫོགས་ལ་གུས་ཕྱག་འཚལ། །གཟུགས་སྒྲ་དྲི་རོ་རེག་བྱའི་མཆོད་པ་འབུལ། །སྟོང་ཉིད་བཅོ་བརྒྱད་རྫོགས་ལ་གུས་ཕྱག་འཚལ། །ཀྱཻ། ཚོགས་ཁང་གཞལ་ཡས་འབར་བ་འདི། །ཨོ་རྒྱན་གནས་སུ་བྱིན་གྱིས་རློབས། །འདིར་ཚོགས་སྐལ་ལྡན་ཕོ་མོ་རྣམས། །དཔའ་བོ་དཔའ་མོར་བྱིན་གྱིས་རློབས། །རིན་ཆེན་ལ་སོགས་སྣོད་མཆོག་འདི། །པདྨ་བྷནྡཱར་བྱིན་གྱིས་རློབས། །བཅུད་ཚོགས་ཀྱི་ཞལ་ཟས་ཐམས་ཅད་ཀྱང་། །ཟག་མེད་བདུད་རྩིར་བྱིན་གྱིས་རློབས། །མཎྜལ་འདི་ལ་རྟེན་ཞིག་ཆོས། །མར་མེ་འདི་ལ་མདངས་ཤིག་ཕྱུངས། །སློབ་མ་རྣམས་ལ་དབང་ཞིག་སྐུར། །ཚོགས་
གཏོར་འདི་ལ་བཅུད་ཅིག་ཕོབ། །རྣལ་འབྱོར་བར་ཆད་ཞི་བ་དང་། །མཆོག་དང་ཐུན་མོང་དངོས་གྲུབ་སྩོལ། །བུ་སྐྱེ་བ་མེད་པར་ལམ་སྣ་དྲོངས། །ཕཊ་ཕཊཿ མ་རྒྱུད་ཚོགས་ལས་འདི་མ་གཅིག་གིས་མཛད་པའོ། །དེ་ནས་བསྲེ་བ་བཞི་ཡི་དམིགས་པ་བྱ་བ་ནི། ཕཊ། བསྲུང་བྱའི་ལུས་དང་བདག་ལུས་དབྱེར་མེད་འདྲེས། །རྣམ་ཤེས་གཉིས་པོ་དབྱེར་མེད་ཧཱུྃ་དུ་གྱུར། །ཧཱུཾ་དེ་ཚངས་བུག་ནས་ཐོན་ནམ་མཁར་ཡལ། །ནམ་མཁའ་སེམས་ཉིད་དབྱེར་མེད་གཅིག་ཏུ་འདྲེས། །ལས་བྱེད་མཁའ་འགྲོས་བེམ་པོ་དེ་བླངས་ནས། །ཚོགས་ནང་བཅུག་ནས་གྲི་གུག་གིས་དཀྲུགས་པས། །ཚོགས་དང་བེམ་པོ་དབྱེར་མེད་གཅིག་ཏུ་བསྲེས། །ཕཊ་ཕཊ་ཕཊ་ཕཊ། དེ་ནས་ཚོགས་བྱིན་རླབས་ནི། ཕཊ། སྟོང་པའི་ངང་ལས་རླུང་གི་དཀྱིལ་འཁོར་ནི། །གཞུ་ཡི་དབྱིབས་ཅན་བ་དན་ཡཾ་གྱིས་མཚན། །དེ་སྟེང་མེ་དཀྱིལ་གྲུ་གསུམ་རཾ་གྱིས་མཚན། །དེ་སྟེང་ཀེ་ལས་ཐོད་སྐྱེད་རི་རབ་ཙམ། །དེ་སྟེང་ཚོགས་གཞོང་ཨ་ལས་ཀ་པཱ་ལ། །ཕྱི་ནི་དཀར་ལ་ཟླ་བའི་གཞོང་པའི་ཚུལ། །ནང་ནི་དམར་བ་ཉི་མའི་གཞོང་པ་སྟེ། །ཐབས་དང་ཤེས་རབ་དབྱེར་མེད་སྣོད་
གཅིག་ཚུལ། །དེ་ནང་ཕུང་པོ་ཚོགས་རྫས་དབྱེར་མེད་པ། །དེ་སྟེང་དམ་ཚིག་བདུད་རྩིའི་ས་བོན་ལས། །ཨོཾ་དཀར་ཨཱཿདམར་ཧཱུྃ་མཐིང་བརྩེགས་མར་གནས། །ཕཊ། དེ་ནས་ཡེ་ཤེས་བདུད་རྩི་བཀུག་པ་ནི། ཕཊ། རང་རིག་ལས་བྱེད་ཌཱཀི་དམར་མོ་དང་། །མདུན་གྱི་མ་གཅིག་དཔྲལ་མགྲིན་ཐུགས་ཀ་རུ། །ཨོཾ་དཀར་ཨཱདམར་ཧཱུྃ་མཐིང་འབྲུ་གསུམ་གསལ། །བདག་གི་ཡི་གེ་གསུམ་ལས་འོད་ཟེར་འཕྲོས། །ཚོགས་སྟེང་ཡི་གེ་གསུམ་ལ་སོ་སོར་ཐིམ། །དེ་ནས་མ་གཅིག་གནས་གསུམ་འབྲུ་གསུམ་ལས། །བདུད་རྩི་དཀར་དམར་མཐིང་གསུམ་རྒྱུན་བབ་ནས། །ཚོགས་སྟེང་ཡིག་འབྲུ་གསུམ་ལ་ཐིམ་པ་ཡིས། །ཡི་གེ་གསུམ་ཞུ་ཚོགས་དང་དབྱེར་མེད་འདྲེས། །ཟག་མེད་ཡེ་ཤེས་བདུད་རྩིའི་རྒྱ་མཚོ་ནི། དཀར་ལ་དམར་བའི་མདངས་ཆགས་ཅུང་ཟད་སྔོ། །འདོད་ཡོན་མཆོད་སྤྲིན་དཔག་མེད་འཕྲོ་བར་གྱུར། །ཕཊ། དེ་ལྟར་བསྒོམ་ཞིང་། ཨོཾ་མ་གཅིག་མ་ལ་གསོལ་བ་འདེབས། །ཨཱཿམ་གཅིག་མ་ལ་གསོལ་བ་འདེབས། །ཧཱུྃ་མ་གཅིག་མ་ལ་གསོལ་བ་འདེབས། །དཀར་པོ་ཨོ་གྱིས་བྱིན་གྱིས་རློབས། །དཀར་པོ་ཨ་གྱི་བྱིན་རླབས་ཀྱིས། །
གཞོང་པ་ཉི་ཟླའི་གཏོར་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདི། །བླ་མ་ཡི་དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །དམར་པོ་ཨཱཡིས་བྱིན་གྱིས་རློབས། །དམར་པོ་ཨཱཡི་བྱིན་རླབས་ཀྱིས། །གཞོང་པ་ཉི་ཟླའི་གཏོར་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདི། །བླ་མ་ཡི་དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །སྔོན་པོ་ཧཱུྃ་གིས་བྱིན་གྱིས་ལཾ་རློབས། །སྔོན་པོ་ཧཱུྃ་གི་བྱིན་རླབས་ཀྱིས། །གཞོང་པ་ཉི་ཟླའི་གཏོར་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདི། །བླ་མ་ཡི་དམ་མཁའ་འགྲོ་དང་། རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །ཕཊ་ཕཊ། དེ་ནས་
ཚོགས་འབུལ་བ་ནི། ཕཊ། ཚོགས་མཆོད་བདུད་རྩིའི་རྒྱ་མཚོའི་རླངས་པ་ལས། །མཆོད་པའི་ལྷ་མོ་བཅུ་དྲུག་བར་སྣང་གང་། །རྒྱལ་སྲིད་བཀྲ་ཤིས་རྫས་རྟགས་འདོད་ཡོན་ལྔ། །ཕྱི་ནང་གསང་བའི་མཆོད་ཚོགས་དཔག་མེད་མཆོད། །བདུད་རྩི་ཐོད་པས་བཅུས་ཤིང་སོ་སོར་ཕུལ། །སྙོམས་པར་ཞུགས་པས་ཟག་མེད་ཏིང་འཛིན་མཆོད། །ཕཊ། ན་མོ་ཐབས་དང་ཤེས་རབ་གཉིས་སུ་མེད་པའི་ཚོགས་ཀྱི་འཁོར་ལོ་རྒྱ་ཆེན་པོ་འདི། རང་བཞིན་གྱི་རྣམ་པར་དག་པ་སྐྱེ་བ་མེད་པ། ངོ་བོ་རྣམ་པར་དག་པ་ཨཱ་ལི་ཀཱ་ལི་མཚན་ཉིད་རྣམ་པར་དག་པ་ཤ་ལྔ་བདུད་རྩི་ལྔའི་རྒྱས་བཏབ་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། བྱིན་རླབས་ཀྱི་རྩ་བ་བཀའ་བརྒྱུད་བླ་མ་རྣམས་ཀྱི་ཞལ་དུ་ཁཱ་ཧི། དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ་ཁཱ་ཧི། ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་ཁཱ་ཧི། པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཕཊ། ལས་བྱེད་མཆོད་པའི་ལྷ་མོ་དཔག་མེད་ཀྱིས། །ཉེར་སྤྱོད་ལྔ་དང་འདོད་པའི་ཡོན་ཏན་ལྔ། །ལྷ་མིའི་དཔལ་འབྱོར་ལོངས་སྤྱོད་ཕུན་ཚོགས་རྣམས། །བླ་མ་སངས་རྒྱས་བྱང་སེམས་རྣམས་ལ་
མཆོད། །ཤ་ལྔ་བདུད་རྩི་ལྔ་དང་གསང་ཡུམ་ཚོགས། །ཡི་དམ་ཞི་དང་ཁྲོ་བོའི་ཚོགས་ལ་མཆོད། །བསྐང་རྫ་ས་སྒྲུབ་རྫས་རྟེན་རྫས་ལ་སོགས་པ། །མ་མགོན་ཆོས་སྐྱོང་སྲུང་མ་རྣམས་ལ་མཆོད། །དཀར་གསུམ་མངར་གསུམ་རིན་ཆེན་འབྲུ་སྨན་ཚོགས། །རིགས་དྲུག་ཀླུ་དང་གཞི་བདག་རྣམས་ལ་སྦྱིན། །སྦྲ་ཁང་བང་མཛོད་གསེར་གཡུ་ཇ་དར་སོགས། །ལན་ཆགས་བདག་པོ་བདག་མོ་རྣམས་ལ་སྦྱིན། །ཐམས་ཅད་འདོད་ཡོན་ཅི་འདོད་ཚོགས་ཀྱིས་ཚིམས། །དགའ་མགུ་ཡི་རངས་བདེ་ཆེན་ཏིང་འཛིན་སྐྱེས། །ཕཊ། དེ་ནས་ཚོགས་ལག་ཏུ་ཐོགས་བཅུག་ལ། དྲུག་པ་རྡོ་རྗེ་འཆང་ཆེན་མན་ཆད་ནས། །རྩ་བའི་བླ་མ་ཡན་ཆད་རྣམས། །མ་ལུས་འཁོར་བཅས་ཚོགས་ལ་རོལ། །ལ་ལ་ཕྱི་ཡི་ཚོགས་ལ་རོལ། །ལ་ལ་ནང་གི་ཚོགས་ལ་རོལ། །ལ་ལ་གསང་བའི་ཚོགས་ལ་རོལ། །ལ་ལ་དེ་ཉིད་ཀྱི་ཚོགས་ལ་རོལ། །ཨ་ལ་ལ་ཏེ་དགྱེས་པར་མཛོད། །ཕཊཿ རྒྱས་པར་འགྲེས་ཡིན་ཀྱང་བསྡུ་ན། ཡི་དམ་ལྷ་ཚོགས་མན་ཆད་ནས། །དཔའ་བོ་དཔའ་མོ་ཡན་ཆད་རྣམས། །མ་ལུས་འཁོར་བཅས་ཚོགས་ལ་རོལ། །རྡོ་རྗེ་ཕག་མོ་མན་ཆད་ནས། །
རིགས་བཞི་མཁའ་འགྲོ་ཡན་ཆད་རྣམས། །མ་ལུས་འཁོར་བཅས་ཚོགས་ལ་རོལ། །ཆོས་སྐྱོང་མ་མགོན་མན་ཆད་ནས། །དཀྱིལ་འཁོར་མཐའ་སྐྱོང་ཡན་ཆད་རྣམས། །མ་ལུས་འཁོར་བཅས་ཚོགས་ལ་རོལ། །ཤཱཀྱ་ཐུབ་པ་མན་ཆད་ནས། །དམྱལ་ཁམས་བཅོ་བརྒྱད་ཡན་ཆད་རྣམས། །མ་ལུས་འཁོར་བཅས་ཚོགས་ལ་རོལ། །སྟོང་གསུམ་གཞི་བདག་མན་ཆད་ནས། །གནས་པོ་དགེ་བསྙེན་ཡན་ཆད་རྣམས། །མ་ལུས་འཁོར་བཅོས་ཚོགས་ལ་རོལ། །ལ་ལ་ཕྱི་ཡི་ཚོགས་ལ་རོལ། །ལ་ལ་ནང་གི་ཚོགས་ལ་རོལ། །ལོ་ལ་གསང་བའི་ཚོགས་ལ་རོལ། །ལ་ལ་དེ་ཉིད་ཀྱི་ཚོགས་ལ་རོལ། །ཨ་ལ་ལ་ཏེ་དགྱེས་པར་མཛོད། །ཕཊ་ཕཊ། གོང་འོག་འདི་གཉིས་ཚོགས་བསྟབ་པའམ། ནད་པ་ལ་སྤྱིར་བས་འདེབས་ཚུལ་གང་འདོད་བྱ་ཆོག་པ་ཡིན་ནོ། །ཕཊ། དབུས་དང་ཕྱོགས་བཅུར་གཙོ་མོ་རེ་རེ་ལ། །མཁའ་འགྲོ་འབུམ་ཕྲག་རེ་རེའི་མཐའ་བསྐོར་དུ། །ཕྱོགས་མཚམས་སོ་སོའི་ལྷ་འདྲེ་ཀུན་གྱིས་བསྐོར། །ལས་བྱེད་མཁའ་འགྲོ་འབུམ་ཚོ་འབུམ་ཚོ་ཡིས། །ཕྱོགས་བཅུའི་མགྲོན་རྣམས་ཀུན་ལ་སོ་སོར་མཆོད། །ཐམས་ཅད་མཉེས་ཚིམས་དགའ་མགུ་ཡི་རང་
གྱུར། །ཕཊ། ཀྱེ། མ་མི་མིན་ཡེ་ཤེས་ཀྱི་མཁའ་འགྲོ་མ། །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། །སྣང་སྲིད་ལྷ་འདྲེའི་འཁོར་གྱིས་བསྐོར། །འདིར་གཤེགས་བཤམས་པའི་ཚོགས་མཆོད་བཞེས། །སྣང་སྲིད་ལྷ་འདྲེས་བཞེས་སུ་གསོལ། །འདོད་ཡོན་ལྔ་ཡིས་ཚིམ་གྱུར་ཅིག། ཀ་གི་དངོས་གྲུབ་ཐོབ་པར་ཤོག །ཕཊ། རྒྱས་པར་འགྲེས་ཡིན་ཀྱང་བསྡུ་ན། ཀྱཻ། མ་མི་མིན་ཡེ་ཤེས་མཁའ་འགྲོ་མ། །ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ། ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་མ། །ནུབ་ཕྱོགས་པདྨ་རིགས་ཀྱི་མཁའ་འགྲོ་མ། །བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་མ། །སྟེང་ཕྱོགས་མཁའ་སྤྱོད་རིགས་ཀྱི་མཁའ་འགྲོ་མ། །འོག་ཕྱོགས་ས་སྤྱོད་རིགས་ཀྱི་མཁའ་འགྲོ་མ། །མཚམས་བཞི་འཇིག་རྟེན་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། །སྣང་སྲིད་ལྷ་འདྲེའི་འཁོར་གྱིས་བསྐོར། །འདིར་གཤེགས་བཤམས་པའི་ཚོགས་མཆོད་བཞེས། །སྣང་སྲིད་ལྷ་འདྲེས་བཞེས་སུ་གསོལ། །འདོད་ཡོན་ལྔ་
ཡིས་ཚིམ་གྱུར་ཅིག །མཆོག་གི་དངོས་གྲུབ་ཐོབ་པར་ཤོག །ཕཊ་ཕཊ། ཕཊ་ཕཊ། ཕཊ་ཕཊ། ཕཊ། ས་བླ་ས་འོག་ས་སྟེང་གི །འཁོར་འདས་གཉིས་ཀྱི་མགྲོན་རིགས་རྣམས། །འདོད་ཡོན་ལྔ་ཡིས་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཚེ་རབས་འཁོར་བ་ཐོག་མེད་ཀྱི། །ཤ་འཁོན་ལན་ཆགས་བྱང་གྱུར་ཅིག །ཕཊ་ཕཊ། སྐབས་འདིར་ནད་པ་ཡོད་ན་མདུན་དུ་བསྙལ་ལ། ཕཊ། རང་ཉིད་སྐད་ཅིག་གིས་དུར་ཁྲོད་ཀྱི་བདག་མོ་ཁྲོས་མ་ནག་མོ། ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་མི་ལྤགས་ཀྱི་གཡང་གཞི་རྡེབ་པ། གཡོན་མི་རྐང་གི་གླིང་བུ་འབུད་པ། མཐུ་སྟོབས་དང་ལྡན་པ། གཟི་བརྗིད་དང་ལྡན་པ། ཁམས་གསུམ་དབང་དུ་སྡུད་པ། སྲིད་གསུམ་ཟིལ་གྱིས་གནོན་པ། དེའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་དཔག་ཏུ་མེད་པ་འཕྲོས་པས། གནོད་བྱེད་ཐམས་ཅད་རང་དབང་མེད་པར་མདུན་དུ་བཀུག་པར་གྱུར། ཕཊ། ན་མོ་སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། མ་གཅིག་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ལྷ་ཚོགས་་
འཁོར་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། བསྲུང་བྱ་འདི་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་ཚང་བཅའ་བ། ཐ་མ་ནད་ལ་མི་ཕན་པར་བྱེད་པ། ནད་ནད་བདག་དང་བཅས་པ། །གདོན་སྣ་འདྲེན་དང་བཅས་པ་ཐམས་ཅད་སྐད་ཅིག་རང་དབང་མེད་པར་འདིར་ཁུག་ཅིག །ཧཱུྃ་ཧཱུྃ་ཧཱུྃ། ཛཿཧཱུྃ་བྃ་ཧོཿ ཕཊ་ཕཊ། ཅེས་འགུགས་གཞུག་ལན་གསུམ་བྱས་ལ། རྐང་དུང་བུས་ནས། ཀྱཻ། འདུས་ཤིག་འདུས་ཤིག་ཤ་ཟ་འདུས། །དབུགས་ལེན་ཐམས་ཅད་འདིར་འདུས་ཤིག །བཤས་བཤུས་རོགས་ལ་སླེབ་པར་གྱིས། །ཤ་བགོས་རོགས་ལ་སླེབ་པར་གྱིས། །འདྲེ་ཁྱེད་རྣམས་བདག་གི་ཕ་མ་ཡིན། །བུ་ཡི་ཤ་ཁྲག་རོལ་དུ་ཤོག །ཁྱོད་ནི་དྲིན་ཆེན་ཕ་མ་ཡིན། །ད་རེས་བཟང་ལེན་ལེན་དུ་ཤོག །སྔོན་ཆད་ལུས་འདི་གཅེས་པར་བཟུང་། །རྒྱུ་དེས་ད་རུང་འཁོར་བར་འཁྱམས། །ད་ནི་མི་ཆགས་སྟོན་མོར་འགྱེད། །མགྲོན་རིགས་སྲིད་རྩེ་མན་ཆད་ནས། །ན་རཀ་དམྱལ་ཁམས་ཡན་ཆད་ཀྱི། །གནས་པའི་ལྷ་དང་ལྷ་མ་སྲིན། །ཕོ་བདུད་ལས་ཀྱི་རྒྱལ་འགོང་འདུས། །མོ་བདུད་ལས་ཀྱི་འདྲེ་མོ་འདུས། །ཕོ་བདུད་
རྒྱལ་འགོང་སྲོག་བདག་འདུས། །མོ་བདུད་འདྲེ་མོ་སྲིན་མོ་འདུས། །སྲིད་པའི་ཡུལ་ནས་འདྲེ་དགུ་འདུས། །གཙུག་ལག་ཁང་གི་གདོན་བཅུ་འདུས། །གཙོ་བོ་གདོན་ཆེན་བཅོ་བརྒྱད་འདུས། །བགེགས་རིགས་སྟོང་ཕྲག་བརྒྱད་ཅུ་འདུས། །བྱིས་པའི་གདོན་ཆེན་བཅོ་ལྔ་འདུས། །ཡེ་འདྲོགས་སུམ་བརྒྱ་དྲུག་ཅུ་འདུས། །གློ་བུར་དགུ་ཅུ་རྩ་གཅིག་འདུས། །འདིར་ཤོག་འདིར་འདུས་ཤ་ཁྲག་རོལ། །སྤྱི་བོ་ཚངས་བུག་མན་ཆད་དང་། །རྐང་མཐིལ་སེན་མོ་ཡན་ཆད་ཀྱི། །ལུས་འདི་ཕྱི་ནང་ཐམས་ཅད་ལ། །ཁོ་བོས་ཆགས་ཞེན་མི་བྱེད་དོ། །ཤ་ཟོ་ཁྲག་འཐུང་རུས་པ་མུར། །མགོ་བོ་ཡན་ལག་དོན་སྙིང་ཁྱེར། །ཐམས་ཅད་བག་ཕེབ་ཚིམ་པར་རོལ། །ཞི་བར་གྱིས་ཤིག་བརླག་པར་གྱིས། །ཕུང་བར་གྱིས་ཤིག་རྩ་བ་ཆོད། །ཐུལ་ཅིག་ཆོམས་ཤིག་མཱ་རཱ་ཡ། །ཕུད་ལྷག་མ་མེད་པར་བཞེས་སུ་གསོལ། །ཕཊ་ཕཊ། འདི་ནི་བདག་འཛིན་རྩ་བ་གཅོད་ཕྱིར་པཎྜིཏ་ཇོ་བོ་རྗེས་མཛད་པའོ། །དེ་ནས་ལག་པ་གཉིས་ཀྱིས་ཕུང་པོ་ལ་སྦྱར་བས་བཅད་ནས་མཆོད་སྦྱིན་བྱེད་ཚུལ་བྱ་ཞིང་། རང་གི་སོར་མོ་རིགས་ལྔའི་མཁའ་འགྲོ་མ། །དཀར་སེར་དམར་ལྗང་ཁྲི་ཕྲག་རེ་རེས་བསྐོར། །ཕུང་པོ་བཅད་ཅིང་མགྲོན་
རྣམས་མཆོད་པར་གྱུར། །ཕཊ། ཤར་ཕྱོགས་གཏུམ་དྲག་དུར་ཁྲོད་ནས། །མི་ཕྱེད་རྡོ་རྗེ་མཁའ་འགྲོ་མ། །དཀར་མོ་འབུམ་གྱི་འཁོར་དང་བཅས། །དབང་པོ་བརྒྱ་བྱིན་ལ་སོགས་པའི། །ཤར་ཕྱོགས་དྲི་ཟའི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། ལྷོ་ཕྱོགས་གད་རྒྱང་སྒྲོགས་པའི་དུར་ཁྲོད་ནས། །རིན་ཆེན་མཁའ་འགྲོ་གཟི་བརྗིད་ཅན། །སེར་མོ་འབུམ་གྱི་འཁོར་དང་བཅས། །ཡ་མ་ར་ཙ་ལ་སོགས་པའི། །ལྷོ་ཕྱོགས་གཤིན་རྗེའི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། ནུབ་ཕྱོགས་པདྨ་འཁྱིལ་བའི་དུར་ཁྲོད་ནས། །པདྨ་མཁའ་འགྲོ་དྲི་མེད་མ། །དམར་མོ་འབུམ་གྱི་འཁོར་དང་བཅས། །ཝ་རུ་ཎ་ལ་སོགས་པ་ཡི། ནུབ་ཕྱོགས་ཀླུ་ཡི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ།
བྱང་ཕྱོགས་ཀཱི་ལ་ཡ་ཡི་དུར་ཁྲོད་ནས། །ལས་ཀྱི་མཁའ་འགྲོ་བདེ་བ་ཅན། །ལྗང་མོ་འབུམ་གྱི་འཁོར་དང་བཅས། །ཀུ་ཝེ་ར་ལ་སོགས་པ་ཡི། །བྱང་ཕྱོགས་གནོད་སྦྱིན་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། ཤར་ལྷོ་རབ་འཇིགས་དུར་ཁྲོད་ནས། །དམ་ཚིག་མཁའ་འགྲོ་དམིགས་པ་ཅན། །དཀར་སེར་འབུམ་གྱི་འཁོར་དང་བཅས། །ཨགེ་རཱ་ཛ་ལ་སོགས་པའི། །ཤར་ལྷོ་དྲང་སྲོང་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། ལྷོ་ནུབ་གཏུམ་པོའི་དུར་ཁྲོད་ནས། །སྣ་ཚོགས་མཁའ་འགྲོ་མི་ཐུབ་མ། །དམར་སེར་འབུམ་གྱི་འཁོར་དང་བཅས། །ནི་རི་ཏི་ལ་སོགས་པ་ཡི། །ལྷོ་ནུབ་སྲིན་པོའི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རིང་ལྡན་གྱུར་ཅིག་།ཕཊ། ནུབ་བྱང་རབ་འཇིགས་དུར་ཁྲོད་ནས། །ཐམས་ཅད་མཁའ་འགྲོ་ཀུན་
རྒྱུ་མ། །དམར་ལྗང་འབུམ་གྱི་འཁོར་དང་བཅས། །བཱ་ཡ་བེ་ལ་སོགས་པ་ཡི། །ནུབ་བྱང་རླུང་ལྷའི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། བྱང་ཤར་རྒྱུག་བྱེད་དུར་ཁྲོད་ནས། །རྒྱུད་འཛིན་འཇིག་རྟེན་མཁའ་འགྲོ་མ། །དཀར་ལྗང་འབུམ་གྱི་འཁོར་དང་བཅས། །དབང་ཕྱུག་ཆེན་པོ་ལ་སོགས་པའི། །བྱང་ཤར་བགེགས་ཀྱི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། སྟེང་ཕྱོགས་མཁའ་སྤྱོད་དུར་ཁྲོད་ནས། །དབྱིངས་ཕྱུག་སངས་རྒྱས་མཁའ་འགྲོ་མ། །མཐིང་ག་འབུམ་གྱི་འཁོར་དང་བཅས། །ཚངས་པ་ཉི་ཟླ་གཟའ་སྐར་སོགས། །སྟེང་ཕྱོགས་ལྷ་ཡི་གདོན་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། །འོག་ཕྱོགས་ས་སྤྱོད་དུར་ཁྲོད་ནས། །ལས་བྱེད་སྤྲུལ་པའི་མཁའ་འགྲོ་མ། །ནག་མོ་འབུམ་གྱི་
འཁོར་དང་བཅས། །ལྷ་མོ་བརྟན་མ་ལ་སོགས་པའི། །འོག་ཕྱོགས་ས་བདག་གདོནཱ་ཚོགས་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ་ཕཊ། ཕུང་པོ་རང་རང་ཡིད་དང་མཐུན་པ་ཡི། །འདོད་ཡོན་ལོངས་སྤྱོད་དཔག་ཏུ་མེད་པ་རྣམས། །མགྲོན་རྣམས་སོ་སོའི་ཞལ་དུ་བསྟབ་པ་ཡིས། །དགའ་མགུ་ཡི་རང་བྱང་ཆུབ་སེམས་ལྡན་གྱུར། །ཕཊ། ལྷ་དང་ཀླུ་དང་གནོད་སྦྱིན་དང་། །ནམ་མཁའ་ལྡིང་དང་དྲི་ཟ་དང་། །མིའམ་ཅི་དང་ལྟོ་འཕྱེ་ཆེ། །འཁོར་ཚོགས་བྱེ་བ་ས་ཡར་བཅས། །བཀའ་ཡི་ལྷ་སྲིན་སྡེ་བརྒྱད་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ། འབྱུང་པོ་ཤ་ཟ་སྲིན་པོ་དང་། །ཡི་དྭགས་ལན་ཆགས་འདྲེ་གདོན་རིགས། །བགེགས་རིགས་སྟོང་ཕྲག་བརྒྱད་ཅུ་དང་། །བྱིས་པའི་གདོན་ཆེན་བཅོ་ལྔ་དང་། །སྲིད་པའི་འདྲེ་དགུ་གཙུག་ལག་གདོན། །རྒྱལ་བསེན་གྲི་བོ་གྲི་མོ་དང་། །ཆུང་སྲི་ཟ་འདྲེ་ཤི་གཤེད་སོགས། །གནོད་བྱེད་
བགེགས་རིགས་ཐམས་ཅད་ལ། །ལུས་ཤ་ཁྲག་མཆོད་སྦྱིན་འདི་བསྔོས་པས། །ཐམས་ཅད་ངོམ་ཞིང་ཚིམས་གྱུར་ནས། །དགའ་མགུ་ཡི་རང་ལྡན་གྱུར་ཅིག །ཕཊ་ཕཊ། རྒྱུན་དུ་འདི་ཙམ་གྱིས་ཆོག་ལ། ནད་པ་སོགས་སྤར་ཐབས་བྱེད་པ་ཡོད་ན། སྐབས་འདིར་གདོན་ཚོགས་དགུ་མ་སྦྱར། གཞན་ཡང་ཆ་དྲུག་ཆངས་བུ་བརྒྱ་རྩ་མཐའ་གཏད་རིགས་གང་དགོས་སྐབས་འདིར་སྦྱར་རོ། །ཡང་ནད་པ་འཕྱར་འཁྱོག་གིས་བསྟབ་པ་དྲག་པོ་བྱེད་ན་ཡང་སྐབས་འདིར་བྱའོ།། ༈ དེ་ནས་ཚོགས་ཕུད་ཀྱིས་ཕུག་གཏོར་ཐམས་ཅད་དང་། བསྐང་གཏོར་ཡང་གསོས་ལ་བདུད་རྩིས་བྲན་ལ། ཨོཾ་ཀརྨ་ཊཱཀི་ནི་ཧཱུཾ་ཕཊ། ཨོཾ་སྭ་བྷ་ཝ་ཤུདྡྷཱ་སརྦ་དྷརྨཱཿསྭ་བྷ་ཝ་ཤུདྡྷོཉཧཾ། སྟོང་པའི་ངང་ལས་ཡཾ་ལས་རླུང་། རཾ་ལས་མེ། ཀཾ་ལས་ཐོད་པའི་སྒྱེད་པུ་གསུམ་གྱི་སྟེང་དུ། གཏོར་སྣོད་ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། གཏོར་མ་ཤ་ལྔ་བདུད་རྩི་ལྔའི་རང་བཞིན། །ཡཾ་ལས་རླུང་གཡོས་རཾ་ལས་མེ་སྦར་ཐོད་པ་དྲོས། རྫས་རྣམས་ཁོལ་དམ་ཚིག་གི་བདུད་རྩིའི་འོད་ཀྱིས་ཡེ་ཤེས་ཀྱི་བདུད་རྩི་སྤྱན་དྲངས་ནས་ཐིམ་པས། ཡེ་ཤེས་ཀྱི་བདུད་རྩི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། རྐང་པ་གཡས་པས་གཡོན་པ་མནན། ལུས་ཙོག་པུར་བྱས་ཏེ་མཐེབ་མཛུབ་མདུད་ལ། །ལྷག་མ་
གདེངས་པ་འབར་བའི་ཕྱག་རྒྱ་དཔྲལ་བར་བསྐོར་ཞིང་མིག་གྱེན་དུ་བལྟས་ནས། ཕེཾ་ཕེཾ། བཛྲ་ཨ་རལླི་ཧོཿ ཛཿཧཱུྃ་བཾ་ཧོཿ བཛྲ་ཌཱ་ཀི་ནི་ས་མ་ཡ་སྟྭཾ། དྲྀ་ཤྱ་ཧོཿ ཞེས་གཏོར་མགྲོན་ཐམས་ཅད་མདུན་གྱི་ནམ་མཁར་བྱོན་ནས་མདུན་བསྐྱེད་དང་དབྱེར་མེད་པར་བསམས་ལ། ན་མོ་པྲཛྙཱ་པཱ་ར་མི་ཏ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་བུདྡྷཱ་བེ་རོ་ཙ་ནི་ཨོཾ་ཧཱུྃ་ཧཱུྃ་ཧཱིཝཨཱཿ ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོ་ཨཱརྱ་ཏཱ་རེ་ཨི་དཾ་བ་ལིཾ་ཏ་ཁ་ཁ་ཁཱ་ཧི། ༀ་མུ་ནི་མུ་ནི་མ་ཧཱ་མུ་ན་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་ཀ་མ་ལ་ཤཱི་ཛྷཱ་ན་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་ཨཱཿཧཱུྃ། བྃ་ཌཱ་ཀི་ནཱི་ཧ་རི་ནི་ས་ཡེ་སྭཱ་ཧཱ། ཨི་དཾ་བ་ལི་ཏ་ཁ་ཁ་ཁཱ་ཧི། ཨོཾ་སརྦ་གུ་རུ་ཨི་དཾ་བ་ལིཾ་ཏ་ཁ་ཁ་ཁཱ་ཧི། ༀ་བཛྲ་བེ་རོ་ཙ་ན་ཡེ་ཧ་རི་ནི་ས་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨི་དཾ་བ་ལཾ་ཏ་ཁ་ཁ་ཁཱ་ཧི། ༀ་བཛྲ་བྷ་རཱ་ཧི་ཀྲོ་ཏི་ཀ་ལི་ཧ་རི་ནི་ས་བཛྲ་ཌཱ་ཀི་ནཱི་ཨཱ་ཝེ་ཤ་ཡ་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ཆོས་སྐུ་ཡུམ་ཆེན་མོ། སྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ། རྣམ་སྣང་གངས་ཆེན་མཚོ་རྒྱལ། རྒྱལ་བ་རིགས་ལྔ། རྗེ་བཙུན་འཕགས་མ་སྒྲོལ་མ། བཅོམ་ལྡན་འདས་རྒྱལ་བ་ཤཱཀྱ་ཐུབ་པ་ལ་སོགས་བསྐལ་
བཟང་གི་སངས་རྒྱས་སྟོང་རྩ་གཉིས་རྣམས་ཀྱི་ཞལ་དུ་དམ་རྫས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་ལོ། །བྱིན་གྱིས་བརླབ་པར་མཛད་དུ་གསོལ། འཇམ་དཔལ་སྨྲ་བའི་སེང་གེ །མཁའ་འགྲོ་སུ་ཁ་སིདྡྷི། བྲམ་ཟེ་ཨཱརྱ་དེ་ཝ། ཕོ་གཅིག་དམ་པ་སངས་རྒྱས། སྐྱོ་སྟོན་བསོད་ནམས་བླ་མ། མ་གཅིག་ལབ་ཀྱི་སྒྲོན་མ། གྲུབ་ཆེན་ཡེ་ཤེས་འབར་བ། རྟོགས་ལྡན་གནམ་མཚོ་དོལ་པ། ཆོས་རྗེ་རང་བྱུང་རྡོ་རྗེ། རྒྱལ་བ་གཡུང་སྟོན་ཞིག་པོ། འཛམ་གླིང་རོལ་པའི་རྡོ་རྗེ། དཔལ་ལྡན་མཁའ་སྤྱོད་དབང་པོ། ཐུབ་ཆེན་དེ་བཞིན་གཤེགས་པ། རྗེ་བཙུན་རཏྣ་བྷ་དྲ། སྤྲུལ་སྐུ་མཐོང་བ་དོན་ལྡན། ཀུན་མཁྱེན་འཇམ་དཔལ་བཟང་པོ། སངས་རྒྱས་མཉན་པ་རས་ཆེན། ཀུན་མཁྱེན་མི་བསྐྱོད་རྡོ་རྗེ། རྒྱལ་བ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །དྲུང་ཆེན་ཀུན་དགའ་རྣམ་རྒྱལ། མཁས་གྲུབ་ཀརྨ་ཆགས་མེད་ལ་སོགས་པ་དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་འབུལ་ལོ། །སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་བྱིན་གྱིས་
བརླབ་པར་མཛད་དུ་གསོལ། གཞན་ཡང་རྗེ་བཙུན་ཟིལ་གནོན་ཆེན་པོ། སྲས་མཆོག་རྒྱལ་བ་དོན་གྲུབ། སྲས་མོ་ལ་འདུལ་མ། ཁུ་སྒོམ་ཆོས་ཀྱི་སེང་གེ །སྲས་མོ་རྒྱན་བཞི༔ སྐྱེ་མེད་དགའ་ཡན་ཆེན་པོ། ཕོ་སྐོར་སེང་གེ །སྨྱོན་པ་རང་སངས། དོལ་པ་ཟང་ཐལ། ཞིག་པོ་ཧུར་ཐོན། རྩི་སྟོན་དར་མ། རྒྱ་སྒོམ་ཧག་ཐོན། ཀོང་པོ་རྗེ་བཙུན་ཟིལ་གནོན་ལ་སོགས་པ་བཀའ་བབས་བུ་ཆེན་བཅུ་དྲུག །བརྒྱུད་འཛིན་བརྒྱ་དང་རྩ་བརྒྱད་རྣམས་ཀྱི་ཞལ་དུ་འབུལ་ལོ། །བྱིན་གྱིས་བརླབ་པར་མཛད་དུ་གསོལ། རྒྱ་ནག་གཅེར་བུ། གངས་པ་སྨུག་སངས། སྐྱེ་མེད་ཟང་ཐལ། འབྲི་སྒོམ་རྟོག་མེད། སྤྲུལ་སྐུ་ལ་འདུལ་རྡོ་རྗེ་སྒྲོན་མ། ཀུན་སྤངས་བརྩོན་འགྲུས་སེང་གེ། སྒོམ་གཅོད་ཉི་མ་རྒྱལ་མཚན། མོན་གཅོད་བརྩོན་འགྲུས་སེང་གེ། གྲུབ་ཆེན་ཀུན་དགའ་སེང་གེ། སྐྱེས་མཆོག་ཀརྨ་པཀཱི་ལ་སོགས་པ་གཅོད་ཡུལ་བཀའ་བབས་གྲུབ་ཆེན་རྣམས་ཀྱི་ཞལ་དུ་འབུལ་ལོ། །བྱིན་གྱིས་བརླབ་པར་མཛད་དུ་གསོལ། རྗེ་བཙུན་རྡོ་རྗེ་རྣལ་འབྱོར་མ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ། ཡི་
དམ་བདུད་འདུལ་ཁྲོས་མ་ནག་མོ། བདེ་ཆེན་དཀར་མོ། སེར་མོ་དོན་གྲུབ། དམར་མོ་སྒྲ་སྒྲོགས། སྣ་ཚོགས་མཐར་ཕྱིན། མཁའ་འགྲོ་བྱེ་བ་འབུམ་དང་བཅས་པའི་ཞལ་དུ་འབུལ་ལོ། །མཆོག་ཐུན་མོང་གི་དངོས་གྲུབ་བསྩལ་དུ་གསོལ། ༀ་བཛྲ་མ་ཧཱ་ཀ་ལ་ཀྵིཾ་ཀྵེ་ཊ་བིགྷ་ནཱན་བི་ན་ཡ་ཀ་ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་ཨ་གྷོ་ར་མ་ཧཱ་ཀཱ་ལ་དུ་རེ་སྭཱ་ཧཱུྃ་ཧཱུྃ་ཀཱ་ལ་རཀྵ་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ༀ་གྷྲྀ་རཱ་ཛ་གྷྲྀ་རཱ་ཛ་ཀུ་མ་ཀུ་མ་ཁུཾ་ཐིས་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ན་མོ་རུ་ཏྲ་ས་མ་ཡ་ཛཿ ནག་མོ་ནག་མོ་ཏྲི་ཡཾ་ཛཿ མ་མ་སྲོག་ལ་ཛཿ ས་མ་ཡ་ཙིཏྟ་བཾ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷཱུ་ཏ་པྲེ་ཏ་པི་ཤ་ཙ་ཨུདྨ་ད། ཨ་པ་སྨཱ་ར་ཌཱ་ཀ་ཌཱ་ཀི་ནྱ་ད་ཡ། ཨི་དཾ་བ་ལིཾ་གྲྀཧྣནྟུ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪནྟུ། ཡ་ཐེ་བཾ། ཡ་ཐཻཥྚཾ། བྷུཉྫཐཱ། ཛི་གྷྲཱ་ཐ། པི་བ་ཐ། མ་ཏི་ཀྲ་མ་ཐཱ། མ་མ་སརྦ་ཀརྟ་ཡ་སད་སུ་ཁཾ་བི་ཤུདྡྷ་ཡ་ས་ཧ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྔགས་རིང་འདི་གསུམ་མམ་བདུན་བརྗོད་དོ། །དཔལ་ཡེ་ཤེས་ཀྱི་མགོན་པོ་ཕྱག་དྲུག་པ།
དཔལ་ལྡན་ལྷ་མོ་རེ་མ་ཏི། གནོད་སྦྱིན་མཆེད་བཞི། བིང་བེར་ནག་ཨ་གྷོ་ར། དཔལ་དུར་ཁྲོད་ཀྱི་བདག་པོ་ཡབ་ཡུམ། སྤྱང་ཞོན་ལྷ་མོ་མཆེད་གསུམ་ལ་སོགས་པ་གཅོད་ཡུལ་བརྒྱུད་པའི་ཆོས་སྐྱོང་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་ཞལ་དུ་འབུལ་ལོ། །སངས་རྒྱས་ཀྱི་བསྟན་པ་ཐམས་ཅད་ཀྱི་སྙིང་པོ་གཅོད་ཡུལ་ཕྱག་རྒྱ་ཆེན་པོ་དར་ཞིང་རྒྱས་པ་དང་། རྣལ་འབྱོར་པ་བདག་གི་ཕྲིན་ལས་རྣམ་པ་བཞི་ཐོགས་པ་མེད་པར་འགྲུབ་པའི་ཕྲིན་ལས་མཛོད་ཅིག །གཞན་ཡང་ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད། གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་ལ་གནས་པའི་དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས་ཀྱི་ཞལ་དུ་འབུལ་ལོ། །རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་བའི་ཕྲིན་ལས་མཛོད་ཅིག །བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་འོད་དུ་ཞུ་བ་ལས་གཏོར་མ་དཀར་གསུམ་མངར་གསུམ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨ་ཀཱ་རོ་མུ་ཁཾ་སརྦ་དྷམཱ་ནཾ་ཨ་དྱ་ནུཏྤནྣ་ཏོཏྟ་ཨོཾ་ཨཱཿཧཱུྃ་ཕཊ་སྭཱ་ཧཱ། ཨོཾ་མ་ཧཱ་ཀཱ་ལ་ཡཀྵ་ཙིཏྟ་རཱ་ག་ཧཱུྃ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི།
ཨོཾ་དྷྲིཥྚཱ་རཱཥྚཱ་ཡ། བེ་རུ་ཌྷ་ཀཱ་ཡ། བི་རུ་པཀྵ་ཡ། བཻ་ཤྲ་མ་ཎ་ཡ་ཨི་དཾ་བ་ལིཾ་ཏ་ཁ་ཁ་ཁཱ་ཧི། ཨོཾ་སརྦ་ལོ་ཀ་པཱ་ལ་ཨི་དཾ་བ་ལིཾ་ཏ་ཁ་ཁ་ཁ་ཁཱ་ཧི། གནོད་སྦྱིན་། ཆེན་པོ་རྡོ་རྗེ་བདུད་འདུལ། རྒྱལ་པོ་ཆེན་པོ་སྡེ་བཞི་འཁོར་དང་བཅས་པ། གནོད་སྦྱིན་གང་བ་བཟང་པོ། ནོར་ལྷ་མཆེད་བརྒྱད། འབྲོག་གནས་མཆེད་ལྔ་ལ་སོགས་པ་ནོར་ལྷ། གཏེར་བདག་ཐམས་ཅད་ཀྱི་ཞལ་དུ་འབུལ་ལོ། །ཆོས་དང་མཐུན་པའི་ལོངས་སྤྱོད་རྒྱ་ཆེན་པོ་བསྩལ་དུ་གསོལ། ཁྱད་པར་དུ་མ་གཅིག་ལབ་ཀྱི་སྒྲོན་མའི་སྤྱན་སྔར། གཅོད་ཡུལ་གྱི་བསྟན་པ་བསྲུང་བར་ཁས་བླངས་ཤིང་དམ་བཅས་པའི་ལས་བདག་མཚན་མོ་སྒྲ་སྒྲོགས། བོད་ཁམས་བརྟན་མ་བཅུ་གཉིས། བཙན་རྒོད་ཟངས་རི་སྤུན་བདུན། ཐང་ལྷ་ཡར་བཞུད། འོད་དེ་གུང་རྒྱལ། སྐུ་ལྷ་མཁའ་རི། ཡར་ལྷ་ཤམ་པོ་ལ་སོགས་པ་གངས་གཉན་ཉི་ཤུ་རྩ་གཅིག །ཤམ་པོ་གཟའ་བདུད་མགོ་དགུ། ཀླུ་རྒྱལ་དྲག་པོ་ཟླ་སྐྱོང་ལ་སོགས་པ་གཅོད་ཡུལ་བཀའ་ཡི་སྲུང་མ་རྣམས་ཀྱི་ཞལ་དུ་འབུལ་ལོ། །སྒྲུབ་པ་པོའི་ཆོས་མཐུན་གྱི་བསམ་པ་ཡིད་བཞིན་དུ་འགྲུབ་པའི་སྡོང་གྲོགས་མཛོད་ཅིག གཞན་ཡང་སྟོང་
གསུམ་སྟོང་གི་གཞི་བདག སྟོད་མངའ་རི་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ལ་གནས་པའི་གཞི་བདག་གནས་བདག་རྣམ་ཀྱི་ཞལ་དུ་འབུལ་ལོ། །གནས་འདི་ཡི་ཕ་རི་ཚུ་རི་གཡས་རི་གཡོན་རི་མདུན་རི་རྒྱབ་རི་མཚེར་ས་སྦྲ་ཁང་འདི་ལ་གནས་པའི་གནས་བདག་གཞི་བདག་རྣམས་ཀྱི་ཞལ་དུ་འབུལ་ལོ། །བསམ་པའི་དོན་ཐམས་ཅད་ཆོས་ལྡན་ཡིད་བཞིན་དུ་འགྲུབ་པའི་སྡོང་གྲོགས་མཛོད་ཅིག །ཕཊ་ཕཊ། རི་གོང་པ་བརྩོན་འགྲུས་སེང་གེས་མཛད་པའི་གཏོར་བསྔོས་ནི། ཨོཾ་ཨཱཿཧཱུྃ། ཁམས་གསུམ་མ་ལུས་སྐུ་གསུང་ཐུགས། །སྐུ་གསུམ་འཁོར་འདས་ཐུགས་རྗེའི་མགྲོན། །སྟོང་གསུམ་བདུད་རྩིས་ཁེངས་པའི་རྫ་ས། །གཏོར་མ་འདོད་ཡོན་ལྔ་རུ་བསྔོ། །ཕྱི་སྣོད་འཇིག་རྟེན་གཏོར་གཞོང་དུ། །ནང་བཅུད་སེམས་ཅན་གཏོར་མས་བཀང་། །སྐྱེ་འཆི་མེད་པའི་མཆོད་པ་བཞེས། །ཕྱི་ནམ་མཁའ་ཡངས་པའི་གཏོར་གཞོང་དུ། །ནང་འབྱུང་བ་ལྔ་ཡི་གཏོར་མས་བཀང་། །རང་གསལ་རང་དག་མཆོད་པ་བཞེས། །བཀའ་ཕ་རོལ་ཕྱིན་པའི་གཏོར་གཞོང་དུ། །ས་བཅུ་དག་པའི་གཏོར་མས་བཀང་། །མྱ་ངན་མི་འདའི་མཆོད་པ་བཞེས། །
བཀའ་རྫོགས་པ་ཆེན་པོའི་གཏོར་གཞོང་དུ། །ཐེག་པ་རིམ་དགུའི་གཏོར་མས་བཀང་། །མ་འདྲེས་ཡོངས་རྫོགས་མཆོད་པ་བཞེས། །ཀུན་གཞི་ཡངས་པའི་ཏོར་གཞོང་དུ། །རྣམ་ཤེས་ཚོགས་དྲུག་གཏོར་མས་བཀང་། །འཕེལ་འགྲིབ་མེད་པའི་མཆོད་པ་བཞེས། །རང་སེམས་གཉུག་མའི་གཏོར་གཞོང་དུ། །ལུས་ངག་ཡིད་གསུམ་གཏོར་མས་བཀང་། །བརྗོད་དུ་མེད་པའི་མཆོད་པ་བཞེས། །སྐྱེ་བ་མེད་པའི་གཏོར་གཞོང་དུ། །རིག་པ་ཚོར་མྱོང་གཏོར་མས་བཀང་། །འགྱུ་བ་རང་གྲོལ་མཆོད་པ་བཞེས། །ཆོས་སྐུ་དག་པའི་གཏོར་གཞོང་དུ། །གཟུགས་སྐུ་རྣམ་གཉིས་གཏོར་མས་བཀང་། །འགྲོ་དོན་ཕྱོགས་མེད་མཆོད་པ་བཞེས། །སྟོང་པ་ཉིད་ཀྱི་གཏོར་གཞོང་དུ། །སྣང་བ་དཀར་དམར་གཏོར་མས་བཀང་། །སྣང་མེད་ཆེན་པོའི་མཆོད་པ་བཞེས། །རང་རྒྱུད་དག་པའི་གཏོར་གཞོང་དུ། །གཉིས་མེད་དག་པའི་གཏོར་མས་བཀང་། །བདེ་བ་ཆེན་པོའི་མཆོད་པ་བཞེས། །ཆོས་ཉིད་དག་པའི་གཏོར་གཞོང་དུ། །བདེ་གསལ་མི་རྟོག་གཏོར་མས་བཀང་། །ངོས་བཟུང་མེད་པའི་མཆོད་པ་བཞེས། །རང་ལུས་རྒྱལ་བའི་གཏོར་གཞོང་
དུ། །མོས་གུས་དག་པའི་གཏོར་མས་བཀང་། །རེ་དོགས་མེད་པའི་མཆོད་པ་བཞེས། །ཀ་པཱ་ལ་ཡི་གཏོར་གཞོང་དུ། །ཤ་ཁྲག་དོན་སྙིང་གཏོར་མས་བཀང་། །ཆགས་ཞེན་མེད་པའི་མཆོད་པ་བཞེས། །ཕཊ་ཕཊ། དེ་ནས་བསྔོ་སྦྱངས་ནི། དྲུག་པ་རྡོ་རྗེ་འཆང་ཆེན་མན་ཆད་དང་། །རྩ་བའི་བླ་མ་ཡན་ཆད་ལ། །བསྔོས་པ་ཙམ་གྱིས་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཀུན་ཏུ་བཟང་པོ་མན་ཆད་དང་། །འཇག་མའི་སྲིན་བུ་ཡན་ཆད་ལ། །བསྔོས་པ་ཙམ་གྱིས་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །ཤཱཀྱ་ཐུབ་པ་མན་ཆད་དང་། །དམྱལ་ཁམས་བཅོ་བརྒྱད་ཡན་ཆད་ལ། །བསྔོས་པ་ཙམ་གྱིས་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །སྟོང་གསུམ་གཞི་བདག་མན་ཆད་དང་། །འདིར་གནས་ལྷ་འདྲེ་ཡན་ཆད་ལ། །བསྔོས་པ་ཙམ་གྱིས་ཚིམ་གྱུར་ཅིག །བསམ་པ་བཞིན་དུ་འགྲུབ་གྱུར་ཅིག །གཏོར་མ་འདི་ཡི་ཡོན་ཏན་གྱིས། །བདག་དང་འགྲོ་དྲུག་སེམས་ཅན་ཐམས་ཅད་ལ། །ལུས་ལ་བདེ་བ་བསྐྱེད་དུ་གསོལ། །ངག་ལ་ནུས་པ་སྦར་དུ་གསོལ། །སེམས་ལ་རྟོགས་པ་འཆར་དུ་གསོལ། །
མཆོག་དང་ཐུན་མོང་དངོས་གྲུབ་བསྩལ་དུ་གསོལ། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། མཆོད་བསྟོད་ནི། ཨོཾ་གུ་རུ་དྷེ་ཝ་ཌཱཀི་ནཱི་ས་པ་རི་ཝཱ་ར་བཛྲ་ཨརྒྷཾ། པཱདྱཾ་ པུཥྤེ་ དྷུ་པེ། ཨཱ་ལོ་ཀེ་ གནྡྷེ་ ནཻ་ཝིདྱ་ ཤབྡ་པྲ་ཏིཙྩཨཱཿཧཱུྃ། རང་རིག་ཡེ་ཤེས་སྟོན་མཛད་པའི། །ཕ་བླ་མ་རྣམས་ལ་ཕྱག་འཚལ་བསྟོད། །དངོས་གྲུབ་ངེས་པར་སྟེར་མཛད་པའི། །ཡི་དམ་རྣམས་ལ་ཕྱག་འཚལ་
བསྟོད། །རྟེན་འབྲེལ་རྒྱ་མཚོ་འབྱུང་བ་ཡི། །མཁའ་འགྲོ་རྣམས་ལ་ཕྱག་འཚལ་བསྟོད། །བར་ཆད་ཐམས་ཅད་སེལ་མཛད་པའི། །ཆོས་སྐྱོང་རྣམས་ལ་ཕྱག་འཚལ་བསྟོད། །སྤངས་རྟོགས་ཕུན་སུམ་ཚོགས་པ་ཡི། །སངས་རྒྱས་རྣམས་ལ་ཕྱག་འཚལ་བསྟོད། །ཞི་གྱུར་འདོད་ཆགས་བྲལ་བ་ཡི། །བཀའ་དམ་ཆོས་རྣམས་ལ་ཕྱག་འཚལ་བསྟོད། །གང་ལ་ཕུལ་ན་དོན་ཆེ་བ། །དགེ་འདུན་རྣམས་ལ་ཕྱག་འཚལ་བསྟོད། །སྐྱེ་བ་བདུན་ལ་འགྲོ་དོན་མཛད། །དམ་པ་རྒྱ་གར་སྐུ་ལ་ཕྱག་འཚལ་བསྟོད། །མ་མི་མིན་ཡེ་ཤེས་མཁའ་འགྲོ་མ། །ལབ་ཀྱི་སྒྲོན་མ་དེ་ལ་ཕྱག་འཚལ་བསྟོད། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །དེ་ནས་བསྐང་གཏོར་གསོ་བྲན་བྱས་ལ། ཧཱུྃ། བེམ་ཤུན་གཏོར་སྣོད་གསེར་གྱི་ས་གཞིའི་སྟེང་། །ཞག་དང་ཆུ་སེར་སྤོས་ཆུས་ཆག་ཆག་བཏབ། །སོར་མཛུབ་ལྕགས་རི་མུ་ཁྱུད་ཕྲེང་བས་བསྐོར། །ཡན་ལག་གླིང་བཞི་ཉིང་ལག་གླིང་ཕྲན་བརྒྱད། །ཟོ་ཁོག་རི་རབ་མགོ་ནི་རྣམ་རྒྱལ་ཁང་། །མིག་གཉིས་ཉི་ཟླ་རྒྱུ་མ་གསེར་རི་
བདུན། །ཁྲག་ནི་རོལ་མཚོ་སོ་ནི་རྒྱུ་སྐར་ཚོགས། །རྣ་བ་གཉིས་ནི་གདུགས་དང་རྒྱལ་མཚན་ཏེ། །ལྕེ་ནི་རྔ་ཡབ་བ་དན་ལྷུན་གྱིས་གྲུབ། །ཀླད་སྤྱི་བླ་རེ་མཆིན་ཁྲི་ཡོལ་བ་དང་། །ཨོལ་ཁྲོང་རང་བྱུང་ཤེལ་གྱི་མཆོད་རྟེན་བརྒྱད། །སྙིང་ནི་ནོར་བུ་གློ་བ་ཅང་ཤེས་རྟ། །མིད་ཡུ་སྲོག་རྩ་དཔག་བསམ་ལྗོན་པའི་ཤིང་། །མཚེར་པ་འདོད་འཇོའི་བ་མོ་ལྷུན་གྱིས་གྲུབ། །ཕོ་བ་རིན་ཆེན་གཏེར་གྱི་བུམ་པ་དང་། །ཤ་ཁྲག་འདོད་ཡོན་དཔག་མེད་བསྐང་རྫས་ཀྱིས། །འཕགས་བཞི་སྐྱེད་བྱེད་ཆོས་སྐུ་ཡུམ་ཆེན་མོ། །ཤེས་རབ་ཕ་རོལ་ཕྱིན་མའི་ཐུགས་དམ་བསྐང་། །སྲས་ནི་ཕྱོགས་བཅུ་དུས་གསུམ་བདེ་གཤེགས་ཚོགས། །བྱང་སེམས་ཉན་རང་བཅས་པའི་ཐུགས་དམ་བསྐང་། །ངེས་པ་ལྔ་ལྡན་ལོངས་སྤྱོད་རྫོ་གས་པའི་སྐུ། །ལོངས་སྐུ་གངས་ཆེན་མཚོ་རྒྱལ་ཐུགས་དམ་བསྐང་། །ཡེ་ཤེས་ལྔ་ལྡན་སྐུ་ལྔ་ལྷུན་གྱིས་གྲུབ། །བཅོམ་ལྡན་རིགས་ལྔ་ཡབ་ཡུམ་ཐུགས་དམ་བསྐང་། །མ་རྒྱུད་ཀུན་གྱི་སྤྲུལ་གཞི་རྩ་བའི་ལྷ། །རྗེ་བཙུན་འཕགས་མ་སྒྲོལ་མའི་ཐུགས་དམ་བསྐང་། །འཁོར་ལོ་ལྔ་ཡི་དཔའ་བོ་ཌཱཀིའི་ཚོགས། །བླ་མེད་དཀྱིལ་འཁོར་ལྷ་
ཡི་ཐུགས་དམ་བསྐང་། །དམ་པ་རྒྱ་གར་ཨཱརྱ་དེ་ཝ་སོགས། །གཅོད་ཡུལ་བརྒྱུད་པའི་བླ་མའི་ཐུགས་དམ་བསྐང་། །གྲུབ་ཆེན་བརྒྱད་ཅུ་བཀའ་བབས་བཅུ་དྲུག་སོགས། །འཛིན་གྲུབ་ཐོབ་རྣམས་ཀྱི་ཐུགས་དམ་བསྐང་། །ཡུམ་ཆེན་ཐུགས་སྤྲུལ་གངས་ཅན་འགྲོ་བའི་དཔལ། །མ་གཅིག་ལབ་ཀྱི་སྒྲོན་མའི་ཐུགས་དམ་བསྐང་། །སྲས་མོ་ལ་འདུལ་ཐུགས་ཀྱི་སྲས་མོ་བཞི། །ལ་འདུལ་རྡོ་རྗེ་སྒྲོལ་མའི་ཐུགས་དམ་བསྐང་། །རྩ་བརྒྱུད་བླ་མ་རྒྱལ་བ་སྲས་བཅས་ཀྱི། །ཐུགས་དམ་གཉན་པོ་བསྐང་བའི་བྱིན་རླབས་ཀྱིས། ཉམས་ཆག་སྡིག་སྒྲིབ་ཐམས་ཅད་བྱང་ནས་ཀྱང་། །ཉམས་དང་རྟོགས་པ་ཡར་ངོའི་ཟླ་བཞིན་འཕེལ། །བྱིན་རླབས་མཛད་མེད་ཆུ་བོའི་རྒྱུན་བཞིན་སྩོལ། །ཚེ་གཅིག་སངས་རྒྱས་འགྲུབ་པར་མཛད་དུ་གསོལ། །ཧཱུྃ། བེམ་ཤུན་བྷན་སྟོང་གསུམ་མཉམ་པའི་ནང་། །ཕུང་པོ་ཤ་ལྔ་ཡེ་ཤེས་བདུད་རྩི་ལྔ། །ཕུད་རླངས་སྒེག་སོགས་བརྒྱད་དང་མཆོད་ལྷ་ལྔ། །མཆོད་པའི་ལྷ་མོ་བཅུ་དྲུག་ནམ་མཁའ་གང་། །སྙན་པའི་གླུ་དབྱངས་རྡོ་རྗེའི་གར་དང་བཅས། །འདོད་ཡོན་མཆོད་སྤྲིན་ཟག་མེད་བསྐང་རྫས་འདིས། །ཡི་དམ་བདུད་
འདུལ་ཁྲོས་མའི་ཐུགས་དམ་བསྐང་། །བདེ་ཆེན་དཀར་མོ་སེར་མོ་དོན་གྲུབ་དང་། །དམར་མོ་སྒྲ་སྒྲོགས་སྣ་ཚོགས་མཐར་ཕྱིན་གྱི། །ཡེ་ཤེས་མཁའ་འགྲོ་རྣམས་ཀྱི་ཐུགས་དམ་བསྐང་། །ལྷན་ཅིག་སྐྱེས་མ་རྡོ་རྗེ་རྣལ་འབྱོར་མ། །ཨོ་རྒྱན་གནས་ཀྱི་གཙོ་མོའི་ཐུགས་དམ་བསྐང་། །རྡོ་རྗེ་མཁའ་འགྲོ་རིན་ཆེན་མཁའ་འགྲོ་དང་། །པདྨ་ལས་མཁའ་འགྲོའི་ཐུགས་དམ་བསྐང་། །སྐུ་ལས་སྤྲུལ་པའི་ལྕཀི་དཀར་མོ་འབུམ། །ཞི་བའི་ལས་མཛད་མ་ཡི་ཐུགས་དམ་བསྐང་། །གསུང་ལས་སྤྲུལ་པའི་དམར་མོ་འབུམ། །དབང་གི་ལས་མཛད་མ་ཡི་ཐུགས་དམ་བསྐང་། །ཐུགས་ལས་སྤྲུལ་པའི་ཌཱཀི་སྔོན་མོ་འབུམ། །དྲག་པོའི་ལས་མཛད་མ་ཡི་ཐུགས་དམ་བསྐང་། །ཡོན་ཏན་སྤྲུལ་པའི་ཊཱཀི་སེར་མོ་འབུམ། །རྒྱས་པའི་ལས་མཛད་མ་ཡི་ཐུགས་དམ་བསྐང་། །ཕྲིན་ལས་སྤྲུལ་པའི་ཌཱཀི་ལྗང་མོ་འབུམ། །སྣ་ཚོགས་ལས་མཛད་མ་ཡི་ཐུགས་དམ་བསྐང་། །སྐུ་ལས་སྤྲུལ་པའི་ཌཱཀི་འབུམ་ཕྲག་བཅུ། །བྱིན་རླབས་དངོས་གྲུབ་འབེབས་མའི་ཐུགས་དམ་བསྐང་། །ཡི་དམ་ཕག་ཁྲོས་ལྷ་ཚོགས་འཁོར་བཅས་ཀྱི། །ཐུགས་དམ་གཉན་པོ་བསྐང་བའི་བྱིན་
རླབས་ཀྱིས། །དངོས་གྲུབ་འཛད་མེད་ཆུ་བོའི་རྒྱུན་བཞིན་སྩོལ། །ལུས་ངག་ཡིད་གསུམ་བསྲུང་ཞིང་བསྐྱབ་པ་དང་། །བསྐྱེད་རྫོགས་བརྟན་ཐོབ་སྣང་སྲིད་དབང་དུ་འདུས། །འཇའ་ལུས་མཁའ་སྤྱོད་འགྲུབ་པར་མཛད་དུ་གསོལ། །ཧཱུྃ། བེམ་ཤུན་བྷནྡྷ་ལྕང་ལོ་བཅས་པའི་ནང་། །ཕུང་པོ་ཤ་ཁྲག་རུས་པ་བདུད་རྩིའི་མཚོ། །ཕུད་རླངས་ལས་བྱེད་ཌཱཀི་ཁྲོ་མོའི་ཚོགས། །སྨན་རཀ་གཏོར་མ་ཐོགས་པས་བར་སྣང་གང་། །བསྐང་རྫས་སྒྲུབ་རྫས་རྟེན་རྫས་སྤྲིན་ལྟར་གཏིབས། །བྱ་ནག་ཁྱི་ནག་རྟ་ནག་གཡག་ནག་འཕྱོ། །གོ་མཚོན་དར་ནག་ལ་སོགས་བསྐང་རྫས་འདིས། །ཐུགས་རྗེ་ཁྲོས་པས་གདུག་པ་འདུལ་མཛད་པ། །མྱུར་མཛད་ཡེ་ཤེས་མགོན་པོའི་ཐུགས་དམ་བསྐང་། །འདོད་ཁམས་དབང་ཕྱུག་ས་བརྒྱད་སེམས་མ་ཆེ། །དཔལ་ལྡན་རེ་མ་ཏི་ཡི་ཐུགས་དམ་བསྐང་། །ཀྵེ་ཏྲ་པཱ་ལ་ལ་སོགས་གནོད་སྦྱིན་བཞི། །གཙང་རིགས་དཔལ་མགོན་བཅས་པའི་ཐུགས་དམ་བསྐང་། །ཞི་བྱེད་རྒྱུད་ཀྱི་སྲུང་མ་ནག་པོ་ཆེ། །མགོན་པོ་ཨ་གྷོ་ར་ཡི་ཐུགས་དམ་བསྐང་། །ཟློག་བྱེད་མ་དང་ནོར་རྒྱུན་མ་ལ་སོགས། །འཁོར་དང་ཡང་འཁོར་བཅས་པའི་ཐུགས་དམ་བསྐང་། །
གཅོད་ཡུལ་བཀའ་སྲུང་དུར་ཁྲོད་ཀུན་ན་བཞུགས། །དུར་ཁྲོད་བདག་པོ་ཡབ་ཡུམ་ཐུགས་དམ་བསྐང་། །ལས་བདག་མཚན་མོ་སྒྲ་སྒྲོགས་གཅེར་བུ་མ། །ཤ་ཟ་ཞིང་སྐྱོང་མཁའ་འགྲོའི་ཐུགས་དམ་བསྐང་། །བུད་མེད་ནག་མོ་ལྕགས་སྤྱང་མགོ་དགུ་ཆིབས། །ལྷ་མོ་སྤྱང་ཞོན་མ་ཡི་ཐུགས་དམ་བསྐང་། །བུད་མེད་དམར་མོ་མཚལ་སྟག་མགོ་དགུ་བཅིབས། །ལྷ་མོ་སྟག་ཞོན་མ་ཡི་ཐུགས་དམ་བསྐང་། །བུད་མེད་སྔོན་མོ་ཟངས་འཕར་མགོ་དགུ་ཆིབས། །ལྷ་མོ་འཕར་ཞོན་མ་ཡི་ཐུགས་དམ་བསྐང་། །མགོ་དགུ་མིག་མང་འོད་འཕྲོ་སྦྲུལ་མཇུག་ཅན། །ཤམ་པོ་གཟའ་བདུད་མགོ་དགུའི་ཐུགས་དམ་བསྐང་། །ཐོག་གི་བུ་ཡུག་གདོང་མོ་མཆེད་སྡེ་བཞི། །སྤྲུལ་པའི་གཟའ་བརྒྱད་འཁོར་བཅས་ཐུགས་དམ་བསྐང་། །བཙན་རྒོད་འབར་བ་མ་རུངས་མཆེད་སྡེ་བདུན། །ཟངས་རི་འཁྱིལ་པ་འཁོར་བཅས་ཐུགས་དམ་བསྐང་། །གཅོད་ཡུལ་བརྒྱུད་པའི་ཆོས་སྐྱོང་ཐམས་ཅད་ཀྱི། །ཐུགས་དམ་གཉན་པོ་བསྐང་བའི་བྱིན་རླབས་ཀྱིས། །གཅོད་ཡུལ་བསྟན་པ་དར་ཞིང་རྒྱས་པ་དང་། །རྣལ་འབྱོར་བདག་གི་ཕྲིན་ལས་རྣམ་པ་བཞི། །གང་བཅོལ་ཐོགས་
པ་མེད་པར་སྒྲུབ་པ་དང་། །བསྟན་དགྲ་རྩད་ནས་བརླག་པའི་ཕྲིན་ལས་མཛོད། །ཧཱུྃ། བེམ་ཤུན་བེཟླུར་ས་གཞི་མིག་མང་རིས། །ཁྲག་རྣམས་འོ་མའི་མཚོ་རྫིང་ནེའུ་སེང་། །ཤ་རུས་རིན་ཆེན་རི་བོ་གཞལ་ཡས་ཁང་། །དཀར་གསུམ་མངར་གསུམ་སྨན་འབྲུ་རིན་པོ་ཆེ། །དར་ཟབ་ཤིང་ཐོག་ཀླུ་སྨན་བདུད་རྩིའི་མཚོ། །བྱ་རིགས་རི་དྭགས་གཅན་གཟན་ཆུ་གནས་ཚོགས། །བསྐང་རྫས་སྣ་ཚོགས་ཟག་མེད་ལོངས་སྤྱོད་འདིས། །གནོད་སྦྱིན་ཞང་བློན་རྡོ་རྗེ་བདུད་འདུལ་བ། །ཡབ་ཡུམ་འཁོར་དང་བཅས་པའི་ཐུགས་དམ་བསྐང་། །ནོར་ལྷ་མཆེད་བརྒྱད་གནོད་སྦྱིན་བརྒྱད་ཁྲིའི་ཚོགས།་།འབྲོག་གནས་མཆེད་ལྔར་བཅས་པའི་ཐུགས་དམ་བསྐང་། །ཡུལ་འཁོར་སྲུང་དང་འཕགས་སྐྱེས་སྤྱན་མི་བཟང་། །རྣམ་ཐོས་སྲས་པོ་འཁོར་བཅས་ཐུགས་དམ་བསྐང་། །ཐང་ལྷ་ཡར་བཞུད་འོད་དེ་གུང་རྒྱལ་དང་། །མཁའ་རི་ཤམ་པོ་རྣམས་ཀྱི་ཐུགས་དམ་བསྐང་། །བརྟན་མ་བཅུ་གཉིས་སྨན་བཙུན་འབུམ་དང་བཅས། །ཀླུ་རྒྱལ་དྲག་པོ་ཟླ་སྐྱོང་ཐུགས་དམ་བསྐང་། །གཞན་ཡང་མ་གཅིག་ལབ་ཀྱི་སྒྲོན་མོ་ཡིས། །དམ་བཏགས་སྡེ་བརྒྱད་ཀུན་གྱི་ཐུགས་དམ་བསྐང་། །ཡུལ་
ཕྱོགས་འདིར་གནས་གཞི་བདག་དཀར་པོའི་ཕྱོགས། །ཆོས་ལ་དགའ་བ་རྣམས་ཀྱི་ཐུགས་དམ་བསྐང་། །དེ་ལྟར་ཐུགས་དམ་བསྐང་བའི་བྱིན་རླབས་ཀྱིས། །ལོངས་སྤྱོད་འཛད་མེད་ཆུ་བོའི་རྒྱུན་བཞིན་སྩོལ། །གཞི་བྱེས་ལམ་གསུམ་གར་འགྲོ་གར་འདུག་ཀྱང་། །སྐྱེལ་བསུ་རོགས་དན་ཁ་འཛིན་མ་གཡེལ་ཅིག །ཉིན་གྱི་བྱ་ར་མཚན་གྱི་མེལ་ཚེ་མཛོད། །བཀྲ་ཤིས་བདེ་ལེགས་འགྲུབ་པར་མཛད་དུ་གསོལ། །དེ་ནས་རིགས་དྲུག་གནས་སྦྱངས་དམིགས་པ་ནི། ཕཊཿ རང་གི་སྤྱི་གཙུག་མ་གཅིག་ལབ་སྒྲོན་གསལ། །སྤྱི་བོར་ལྷ་ཡི་ས་བོན་ཨོཾ་དཀར་པོ། །མགྲིན་པར་ལྷ་མིན་ས་བོན་ཨཱཝདམར་པོ། །སྙིང་གར་མི་ཡི་ས་བོན་ནི་ལྗང་གུ། །ལྟེ་བར་བྱོལ་སོང་ས་བོན་དྭ་སྐྱ་བོ། །གསང་བར་ཡི་དྭགས་ས་བོན་ར་སེར་པོ། །རྐང་ཞབས་དམྱལ་བའི་ས་བོན་ཏྲི་ནག་པོ། །ཡི་གེ་དེ་དག་རང་མདོག་འོད་འཕྲོས་པས། །བདག་དང་སེམས་ཅན་མ་ལུས་ཐམས་ཅད་ཀྱི། །རིགས་དྲུག་སྐྱེ་བའི་ལས་སྒྲིབ་སྡུག་བསྔལ་བཅས། །སིབ་སིབ་བསྡུས་ནས་ཡི་གེ་སོ་སོར་ཐིམ། །བདག་ལུས་ཆེར་རྒྱས་སྲིད་རྩེའི་བར་དུ་སླེབ། །རྐང་མཐིལ་ཡི་གེ་འོད་ཀྱི་ཐིག་ལེར་ཞུ། །
ཡུངས་འབྲུ་ཙམ་གྱུར་གསང་གནས་ཡི་གེར་ཐིམ། །དེ་ཡང་སྲན་མ་ཙམ་གྱུར་ལྟེ་བར་ཐིམ། །དེ་ཉིད་ཐིག་ལེར་གྱུར་པ་སྙིང་གར་ཐིམ། །ཤེལ་སྒོང་ལྟར་གྱུར་མགྲིན་པའི་ཡི་གེར་ཐིམ། །དེ་ཡང་ཡར་འཕྲོས་སྤྱི་བོའི་ཨོཾ་ལ་ཐིམ། །འོད་ཀྱི་ཐིག་ལེ་བྱ་ཆེན་སྒོ་ང་ཙམ། །མ་གཅིག་ཐུགས་ཀར་ཐིམ་པས་དབྱེར་མེད་འདྲེས། །ཕུང་པོ་བདུད་རྩིར་ཞུ་བ་འཇིག་རྟེན་གང་། །རིགས་དྲུག་ཀུན་གྱིས་འཐུང་བས་སྒྲིབ་པ་དག །ཐམས་ཅད་སངས་རྒྱས་རིགས་དྲུག་འཁོར་བ་སྟོང་། །ཆོས་དབྱིངས་སྐྱེ་མེད་ངང་དུ་གནས་པར་གྱུར། །ཕཊ་བཤགས་པ་ནི། །རྗེ་སུམ་ལྡན་གྱི་བླ་མ་རིན་པོ་ཆེ། །སྐྱབས་གནས་ཡིན་པར་མ་ཤེས་ནས། །དད་མདུན་མོས་གུས་ཆུང་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །འདི་ཕྱིའི་བདེ་ལེགས་ཇི་སྙེད་པ། །རྩ་བའི་བླ་མར་འབྱུང་བར་མ་ཤེས་ནས། །དངོས་གྲུབ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །རང་སེམས་རྩ་བ་ཆོད་པ་དེ། །ཆོས་སྐུ་ཡིན་པར་མ་ཤེས་ནས། །སངས་རྒྱས་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །རྣམ་རྟོག་རང་སར་གྲོལ་བ་དེ། །སྐྱེ་མེད་ཡིན་
པར་མ་ཤེས་ནས། །གཉེན་པོ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །རང་སེམས་ཡིད་བཞིན་ནོར་བུ་ལས། །དགོས་འདོད་འབྱུང་བར་མ་ཤེས་ནས། །འབད་རྩོལ་གཞན་དུ་བྱས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ང་བདག་རྩ་བ་ཆོད་པ་དེ། །ཉམས་ལེན་ཡིན་པར་མ་ཤེས་ནས། །ལྷ་འདྲེ་གཞན་དུ་བཙལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཁམས་གསུམ་སེམས་ཅན་ཐམས་ཅད་དེ། །ཕ་མ་ཡིན་པར་མ་ཤེས་ནས། །གཞན་ལ་གནོད་པ་བསྐྱལ་བ་ད། །མ་སྤྲུལ་པའི་སྐུ་ལ་མཐོལ་ལོ་བཤགས། །བརྩེ་གདུང་ལྡན་པའི་མཆེད་གྲོགས་དེ། །དཔའ་བོ་མཁའ་འགྲོ་ཡིན་པར་མ་ཤེས་ནས། །རུ་ང་ཕྲག་དོག་སྐྱེས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །གདམས་པ་བདུད་ཀྱི་གཅོད་ཡུལ་དེ། །སྣོད་ངན་ཡིན་པར་མ་ཤེས་ནས། །རྒྱལ་ཁམས་ཡོངས་ལ་སྤེལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཚུལ་ཁྲིམས་རྣམ་དག་དྲི་མེད་དེས། །ཐར་ལམ་བགྲོད་པར་མ་ཤེས་ནས། །འཆལ་བའི་མངོན་ལྐོག་ཤོར་བ་དེ། །མ་སྤྲུལ་པའི་སྐུ་ལ་མཐོལ་ལོ་
བཤགས། །དངོས་འབྱོར་ཡིད་སྤྲུལ་མཆོད་པ་དེས། །ཚོགས་གཉིས་རྫོགས་པར་མ་ཤེས་ནས། །རློམས་སེམས་སེར་སྣ་བྱས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཟབ་མོ་མཁའ་འགྲོའི་ཚོགས་གྲལ་དེ། །གསང་གནས་ཡིན་པར་མ་ཤེས་ནས། །ཉམས་གྲིབ་ཅན་དང་འདྲེས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཞལ་ཟས་ཚོགས་ཀྱི་ལོངས་སྤྱོད་དེ། །དངོས་གྲུབ་ཡིན་པར་མ་ཤེས་ནས། །ལོག་ལྟ་ཅན་ལ་སྤེལ་བ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ལུས་ཆགས་མེད་སྦྱིན་པ་བཏང་བ་དེས། །སྒྲིབ་གཉིས་བྱང་བར་མ་ཤེས་ནས། །ལུས་ལ་གཅེས་འཛིན་བྱས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །མཐོལ་ལོ་བཤགས་སོ་ཡེ་ཤེས་མཁའ་འགྲོ་མ། །གནོང་ངོ་འགྱོད་དོ་གཅོད་ཡུལ་བརྒྱུད་པ་རྣམས། །དག་ཚངས་སྐུ་གསུང་ཐུགས་ཀྱི་དངོས་གྲུབ་སྩོལ། །ལམ་མ་ནོར་ཆོས་ཀྱི་དབྱིངས་སུ་དྲོངས། །མི་ལྡོག་བདེ་ཆེན་གྱི་ས་ལ་འགོད་གྱུར་ཅིག །ཕཊ་ཕཊ། ཅེས་སྟོང་ཉིད་ཀྱི་ངང་ལ་ཡུད་ཙམ་བཞག་གོ། །བཤགས་པ་འདི་བོད་ཀྱི་པཎྜི་ཏ་དོན་ཡོད་རྡོ་རྗེས་མཛད་པའོ། ༈ །དེ་ནས་ཚོགས་སྤེལ་ལ། མཆོད་གཡོག་པས་ལག་པ་གཡས་སུ་
ཐབས་ཀྱི་རྫས་ཤ་དང་ཟན། གཡོན་དུ་ཤེས་རབ་ཀྱི་རྫས་བདུད་རྩི་ཐོགས་ལ། ཀྱཻ། གཟིགས་ཤིག་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱར་མི་རུང་། །བྲམ་ཟེ་ཁྱི་དང་། གདོལ་པ་ཕག །རང་བཞིན་གཅིག་ཏུ་དགོངས་ཏེ་རོལ། །ལེན་པ་པོས་ཀྱང་། བདེ་བར་གཤེགས་པ་ཆོས་ཀྱི་སྐུ། །འདོད་ཆགས་དྲི་མ་དང་བྲལ་བ། །གཟུང་དང་འཛིན་པ་རྣམ་པར་སྤང་། །དེ་བཞིན་ཉིད་ལ་བདག་ཕྱག་འཚལ། །ཞེས་པད་ཀོར་དང་བཅས་ཏེ་བླངས་ལ་ཕུད་བཅད་ནས། ཨོཾ་ཨ་གྲ་པིཎྜ་ཨཀྱི་སྭཱ་ཧཱ། ཞེས་ཕུད་ལ་དབང་བའི་འབྱུང་པོ་ལ་བསྔོས་ནས། རང་ཡེ་ཤེས་ཀྱི་ཌཱཀི་གཅིག་ཏུ་གསལ་ཞིང་ཉམས་ལེན་དང་མ་བྲལ་བར་རོལ་ནས། མང་མའི་ལྷག་མ་སྣོད་གཅིག་ཏུ་བླུགས་ནས་ཆུས་བྲན་ལ། སྔར་ལུས་སྦྱིན་དམིགས་པ་མང་དུ་བྱས་པའི་ལྷག་མར་བསྔོ། ཕཊ་ཕཊ། ཕུང་པོ་ཚོགས་ཀྱི་ལྷག་རོལ་ལ་དཀར་གསུམ་མངར་གསུམ་འོ་མའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ཁས་ཞན་དབང་ཆུང་བ་ཞ་བོ་ལོང་བ་འོན་པ་ལྐུགས་པ་མ་ཐོབ་པ་མ་ཐེམས་པ། ལྷག་མ་ལ་རེ་བ་འོང་མི་ཉན་པ་མི་ཁོམ་པ་བང་བུལ་བ་འབྱུང་པོ་ལྷག་སྡུད་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཕཊ་ཕཊ། གཙོ་བོ་རྣམས་ཀྱི་རྗེས་འབྲང་བ། །འབྱུང་པོ་ལྷག་སྡུད་འདིར་འདུས་
ཚོགས། །འདོད་ཡོན་ལྷག་མ་འདི་བཞེས་ལ། །མ་ལུས་སོ་སོར་ཚིམ་གྱུར་ཅིག །ཕཊ་ཕཊ། ཁར་རག་པ་ཙམ་གྱིས་ཚིམ་གྱུར་ཅིག །ཕཊ་ཕཊ། ཅེས་སྒོ་རྒྱབ་སྲང་མདོ་ཅིག་ཏུ་བླུག་གོ །དེ་ནས་རྣལ་འབྱོར་པ་དམ་ཚིག་དང་ལྡན་པར་ངེས་པའི་ལྷག་མ་དང་། སྔར་ཚོགས་སྤེལ་དུས་ནས་གཙང་ལྷག་བཞག་པ་གཅིག་ཏུ་བསྲེས་ལ། སྟེང་དུ་རང་གིས་ཕུད་མཆོད་དེ་ཡང་བཞག་ལ་བདུད་རྩིས་བྲན། སྐབས་འདིར་རྣལ་འབྱོར་པ་ལ་དགྲ་ཡོད་ན་མཚོན་ཆ་ལྟ་བུའི་གདམས་ངག་དམིགས་རིམ་ཟབ་མོ་ཞིག་ཡོད་ཀྱང་། དྲུང་པ་རིན་པོ་ཆེས་ཀྱང་སེམས་ཅན་ལ་གནོད་པའི་གཞིར་འགྱུར་དོགས་པས་བཀའ་རྒྱ་ཤིན་ཏུ་དམ་པས་འདིར་མ་བྲིས་ལ། རིམ་གྲོའི་སྐབས་ལ་འདིས་ཆོག་གོ །ཨོཾ་ཀརྨ་ཊཱཀི་ནཱི་ཧཱུྃ་ཕཊཿ ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ནཾ་ཨ་དྱ་ནུཏྤནྣ་ཏོཏྟ་ཨོཾ་ཨཱཏྟཱཧཱུྃ་ཕཊ་སྭཱ་ཧཱ། ཕཊ། བྷནྡྷའི་སྣོད་དུ་ལྷག་གཏོར་ཤ་ཁྲག་གི །ཕུང་པོ་འདོད་ཡོན་ལྔ་ལྡན་རྒྱ་མཚོར་གྱུར། །ལས་བྱེད་མཁའ་འགྲོའི་སྤྲུལ་པ་ཀེང་རུས་ཀྱིས། །གཟུགས་ཅན་མཁའ་འགྲོ་མང་པོས་ལྷག་གཏོར་ཁྱེར། །ལྷག་སྡུད་འཇིག་རྟེན་རིགས་ལྔའི་ཊཱཀི་ལྔ་། །རང་རང་མདོག་མཚུངས་ཐོར་ཚུགས་རལ་པ་ཅན། །ལག་ན་རང་རྟགས་གྲི་གུག་ཐོད་ཁྲག་འཛིན། །ཤ་ཟ་ཞིང་སྐྱོང་ལྷག་མགྲོན་འཁོར་བཅས་ལ། །སོ་སོར་ཅི་འདོད་
བྱིན་པས་དགྱེས་པར་རོལ། །དགྲ་བགེགས་བསྒྲལ་བའི་ཕྲིན་ལས་སྒྲུབ་པར་གྱུར། །ཕཊ་ཕཊ། ཧཱུྃ། ཕྱོགས་བཞི་འཇིགས་པའི་དུར་ཁྲོད་ནས། །རིགས་ལྔའི་མཁའ་འགྲོ་དཔལ་འབར་མ། །དཀར་སེར་དམར་ལྗང་མཐིང་ནག་རལ་པ་ཅན། །ཁྱོད་དོན་ནི་སངས་རྒྱས་ཡིན་མོད་ཀྱང་། །བདག་སྒྲུབ་པ་པོ་ལ་ཕན་གདག་ཕྱིར། །བྲན་གྱི་ཚུལ་དུ་ཁས་བླངས་པས། །ལྷག་མའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ཡི་འཁོར་དུ་གཏོགས་པ་ཡི། །མཁའ་ལ་འགྲོ་བའི་མཁའ་འགྲོ་མ། །ཤུགས་ལ་འགྲོ་བའི་ཤུགས་འགྲོ་དང་། །བར་སྣང་བགྲོད་པའི་མཁའ་འགྲོ་དང་། །དེ་འོག་ཞིང་སྐྱོང་མཁའ་འགྲོའི་ཚོགས། །བྲན་གྱི་ཚུལ་དུ་ཁས་བླངས་པས། །ལྷག་མའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །སངས་རྒྱས་བསྟན་པ་བཤིག་པ་དང་། །དཀོན་མཆོག་དབུ་འཕང་སྨད་པ་དང་། །བླ་མའི་སྐུ་ལ་བསྡོ་བ་དང་། །རྣལ་འབྱོར་བདག་གི་དགྲ་བོ་དང་། །སློབ་མ་དམ་ལ་ལོག་པ་དང་། །བྱང་ཆུབ་བསྒྲུབ་ལ་བར་ཆད་བྱེད་པའི་བགེགས། །ལྷག་མའི་
གཏོར་མ་འདི་དང་མཉམ་དུ་བཞེས། །ཨོཾ་ཨུཙྪིཥྚ་བྷཀྵ་བྷཀྵ་སྭཱ་ཧཱ། །ཕཊ། ཕྱི་རོལ་གཙང་སར་བླུགས་བཤལ་ཆུ་ཡང་སྟེང་དེར་བླུག་གོ །ལྷག་མ་འོག་མ་འདི་དང་གཏོར་འབུལ་ལ་རང་དང་བསྲུང་བྱའི་ཤ་ཁྲག་འདྲེས་མི་རུང་ངོ་། །དེ་ནས་དམར་གཏོར་མཁའ་འགྲོ་མ་ལ་གཅིག །ཆོས་སྐྱོང་ལ་གཅིག །ཕྱི་རྒྱུད་འཇིག་རྟེན་པ་ལ་དཀར་གཏོར་གཅིག་དང་གསུམ་བཤམ། བསྡུ་ན་དམར་གཏོར་གཅིག་དང་དཀར་གཏོར་གཅིག་གིས་ཆོག །ཕུད་རྒོད་ཀྱིས་བྲན་ལ། འདིར་ཏྲི་ཤུལ་ལམ་གནམ་ལྕགས་འཁོར་ལོ་རྩིབས་བརྒྱད་བསམ། ན་མོ་དྲིན་ཆེན་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་བདེན་པ་དང་། དཀོན་མཆོག་གསུམ་གྱི་བདེན་པ་དང་། །ཡི་དམ་རྡོ་རྗེ་རྣལ་འབྱོར་མ་ལྷ་ལྔ་བདུད་འདུལ་ཁྲོས་མ་ནག་མོའི་ལྷ་ཚོགས་འཁོར་དང་བཅས་པའི་བདེན་པ་དང་། མ་གཅིག་ལབ་ཀྱི་སྒྲོན་མ་མཁའ་འགྲོ་བྱེ་བ་འབུམ་སྡེ་བཀའ་སྲུང་ཆོས་སྐྱོང་དང་བཅས་པའི་བདེན་པ་དང་། བདེན་པ་ཆེན་པོའི་མཐུས། སྤྱིར་སངས་རྒྱས་བསྟན་པའི་སྤྱི་དགྲ། ཁྱད་པར་དུ་རྣལ་འབྱོར་པ་བདག་གི་བཀའ་དང་དམ་ལ་མི་གནས་ཤིང་འགྱུར་ལོག་འཕར་སྡང་མགོ་གཡོག་མགོ་བསྐོར་བྱེད་པའི་གདོན་བགེགས། བསམ་ངན་འཆང་བའི་བྱད་མ། དོ་བསྔོ་ཞིང་ཕོད་བཙུགས་པའི་དགྲ་བོ་ཐམས་ཅད་ཀྱི་བླ་
སྲོག་རྣམ་པར་ཤེས་པ་སྐད་ཅིག་རང་དབང་མེད་པར་དྲག་པོ་དམར་གྱི་གཏོར་མ་འདི་ཡི་ནང་དུ་ཁུག་ཅིག །ཛཿཧཱུྃ་བྃ་ཧོ༔ བྷནྡྷ་ལྕང་ལོ་ཅན་གྱི་ནང་དུ་དགྲ་བགེགས་ཀྱི་ཤ་ཁྲག་དོན་སྙིང་གི་ངོ་བོ་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུ། གསུམ་དང་། ཨོཾ་བཛྲ་ཌཱཀི་ནཱི་སརྦ་དྷརྨ་པཱ་ལ་ས་པ་རི་ཝཱ་ར་དགྲ་བགེགས་ཀྱི་མ་ཧཱ་མཾ་ས་ལ་ཁཱ་ཧི། རཀྟ་ལ་ཁཱ་ཧི། ཙིཏྟ་ལ་ཁཱ་ཧི། གོ་རོ་ཙ་ན་ལ་ཁཱ་ཧི། ཀིཾ་ནི་རི་ཏི་ལ་ཁཱ་ཧི། བ་སུ་ཏ་ལ་ཁཱ་ཧི། བ་ལི་ཏ་ལ་ཁཱ་ཧི་ཁཱ་ཧི། དེ་ནས་མཁའ་འགྲོ་འབུམ་བསྐུལ་ནི། ཧཱུྃ་བྷྱོཿ ཕྱོགས་ཕྱོགས་དག་ཀྱང་ཕ་ཀི་ན། །ཉི་མ་ནུབ་ཕྱོགས་ཕ་ཀི་ན། །རྡོ་རྗེ་གདན་གྱི་ནུབ་བྱང་མཚམས། །ཨོ་རྒྱན་ཡུལ་གྱི་དུར་ཁྲོད་ནས། །རི་བོ་ཐམས་ཅད་རུས་པའི་རི། །རྩི་ཤིང་ཐམས་ཅད་མདའ་དང་མདུང་། །ཆུ་རྣམས་ཐམས་ཅད་ཁྲག་དང་རྣག །སྒྲ་སྐད་ཐམས་ཅད་ངུར་མོའི་སྒྲ། །ཕྱག་ན་རྡོ་རྗེ་འཇིགས་པའི་ས། །ཁྲོ་བཅུ་རྒྱུ་བར་མི་ནུས་ཤིང་། །རིགས་ལྔའི་སངས་རྒྱས་བཞུགས་པའི་གནས། །དེ་ན་སུ་བཞུགས་སུ་མི་བཞུགས། །དུས་གསུམ་སངས་རྒྱས་སྐྱེད་པའི་ཡུམ། །རྡོ་རྗེ་ཕག་མོ་དེ་ན་བཞུགས། །འཁོར་གྱི་ལྷ་མོ་དེ་ན་
བཞུགས། །མ་གཡས་ཀྱི་ཕག་ཞལ་ནག་མོ་ཁྲོས་པ་ལས། །ཆོས་ཉིད་འགྱུར་བ་མེད་པའི་མཁའ་འགྲོ་འབུམ། །གཡོན་གྱི་ཁྲོ་ཞལ་དམར་པོ་བརྗིད་པ་ལས། །བདེ་གཤེགས་ལས་ལ་འགྱེད་པའི་མཁའ་འགྲོ་འབུམ། །ཞལ་གདངས་མཆེ་བ་རབ་ཏུ་གཙིགས་པ་ལས། །བདུད་བཞི་རྩད་ནས་གཅོད་པའི་མཁའ་འགྲོ་འབུམ། །སྤྱན་གསུམ་རབ་ཏུ་དམར་ཞིང་འཁྲུགས་པ་ལས། །མངོན་ཤེས་དྲུག་དང་ལྡན་པའི་མཁའ་འགྲོ་འབུམ། །ཐོད་པ་ལྔ་ཡིས་དབུ་ལ་བརྒྱན་པ་ལས། །རིགས་ལྔས་འགྲོ་དོན་མཛད་པའི་མཁའ་འགྲོ་འབུམ། །དབུ་སྐྲ་སིལ་མ་སྐུ་རྒྱབ་གྲོལ་བ་ལས། །ཐུགས་རྗེ་ཆར་ལྟར་འབེབས་པའི་མཁའ་འགྲོ་འབུམ། །ཕྱག་གཡས་གྲི་གུག་ནམ་མཁར་ཕྱར་བ་ལས། །སྲོག་གཅོད་དབུགས་ལེན་བྱེད་པའི་མཁའ་འགྲོ་འབུམ། །ཕྱག་གཡོན་ཐོད་པ་ཁྲག་གིས་བཀང་བ་ལས། །ཁྲག་ནད་རྒྱུ་གཟེར་གཏོང་བའི་མཁའ་འགྲོ་འབུམ། །ཁཊྭཱཾ་རྩེ་གསུམ་རབ་ཏུ་འབར་བ་ལས། །ཁམས་གསུམ་དབང་དུ་སྡུད་པའི་མཁའ་འགྲོ་འབུམ། །ཡུ་བ་དྲང་ཤིང་དཀར་པོ་ལྡེམ་པ་ལས། །ལྷ་མིན་གཡུལ་ལས་རྒྱལ་བའི་མཁའ་འགྲོ་འབུམ། །རྡོ་རྗེ་རྩེ་ལྔས་རབ་ཏུ་བརྒྱན་
པ་ལས། །སྐུ་ལྔ་ཡེ་ཤེས་དག་པའི་མཁའ་འགྲོ་འབུམ། །ཐོད་པ་སུམ་བརྩེགས་རབ་ཏུ་བརྒྱན་པ་ལས། །སྲིད་གསུམ་ཟིལ་གྱིས་གནོན་པའི་མཁའ་འགྲོ་འབུམ། །དར་གྱི་འཕུར་ལྕེས་རབ་ཏུ་བརྒྱན་པ་ལས། །བདུད་ཀྱི་རྒྱལ་མཚན་བསྙིལ་བའི་མཁའ་འགྲོ་འབུམ། །ཌཱ་རུ་གསེར་གྱི་དྲིལ་ཆུང་བརྒྱན་པ་ལས། །སྙན་བརྒྱུད་གདམས་པ་འཛིན་པའི་མཁའ་འགྲོ་འབུམ། །བདུད་རྩི་བུམ་པས་རབ་ཏུ་བརྒྱན་པ་ལས། །ཡོན་ཏན་ཡོངས་སུ་རྒྱས་པའི་མཁའ་འགྲོ་འབུམ། །སྣ་ཚོགས་རྡོ་རྗེ་རྒྱ་གྲམ་བརྒྱན་པ་ལས། །ཕྲིན་ལས་ཐོགས་པ་མེད་པའི་མཁའ་འགྲོ་འབུམ། །མི་མགོ་ལྔ་བཅུའི་དོ་ཤལ་བྱས་པ་ལས། །འདུ་བྱེད་ལྔ་བཅུ་དག་པའི་མཁའ་འགྲོ་འབུམ། །རུས་པའི་རྒྱན་དྲུག་རབ་ཏུ་བརྒྱན་པ་ལས། །ཕ་རོལ་ཕྱིན་དྲུག་རྫོགས་པའི་མཁའ་འགྲོ་འབུམ། །གཅེར་བུ་བརྐྱང་བསྐུམ་གར་གྱིས་རོལ་པ་ལས། །བདེ་ཆེན་ཉམས་དང་ལྡན་པའི་མཁའ་འགྲོ་འབུམ། །རྟོག་མེད་རོ་ཡི་གདན་ལ་བཞུགས་པ་ལས། །འགྲོ་དྲུག་གནས་ནས་འདྲེན་པའི་མཁའ་འགྲོ་འབུམ། །པདྨ་ཉི་ཟླའི་གདན་ལ་བཞུགས་པ་ལས། །ཐབས་ཤེས་ཟུང་དུ་འཇུག་པའི་མཁའ་འགྲོ་འབུམ། །
བསྐལ་པའི་མེ་རི་རབ་ཏུ་འབར་བ་ལས། །ཐ་དད་རྟོག་པ་བསྲེགས་པའི་མཁའ་འགྲོ་འབུམ། །ཧོཿ ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ་འབུམ། །བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་འབུམ། །ནུབ་ཕྱོགས་པདྨ་རིགས་ཀྱི་མཁའ་འགྲོ་འབུམ། །ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་འབུམ། །སྐུ་ཡི་རིགས་ཀྱི་མཁའ་འགྲོ་དཀར་མོ་འབུམ། །གསུང་གི་རིགས་ཀྱི་མཁའ་འགྲོ་དམར་མོ་འབུམ། །ཐུགས་ཀྱི་རིགས་ཀྱི་མཁའ་འགྲོ་ནག་མོ་འབུམ། །ཡོན་ཏན་རིགས་ཀྱི་མཁའ་འགྲོ་སེར་མོ་འབུམ། །ཕྲིན་ལས་རིགས་ཀྱི་མཁའ་འགྲོ་ལྗང་མོ་འབུམ། །བདུད་རྩི་གཏོར་མ་འདི་བཞེས་ལ། །ཕྲིན་ལས་གཅིག་ཏུ་མ་ངེས་ཏེ། །སྐལ་ལྡན་རྣམས་ལ་ཡེ་ཤེས་སྤོར། །སྐལ་མེད་རྣམས་མ་མོས་པ་བསྐྱེད། །ཉམས་པའི་དགྲ་བགེགས་རྣམས་ལ་ཆད་པ་ཆོད། །དབྱིངས་ཀྱི་མཁའ་འགྲོའི་བསྐུལ་པ་ནི། ཧཱུྃ་བྷྱོཿ མཁའ་དབྱིངས་བདེ་བ་ཆེན་པོ་ནས། །ཡེ་ཤེས་མཁའ་འགྲོ་བྱེ་བ་འབུམ། །རྡོ་རྗེ་མཁའ་འགྲོ་བདུད་འདུལ་མ། །རིན་ཆེན་མཁའ་འགྲོ་དངོས་གྲུབ་དཔལ། །པདྨ་མཁའ་འགྲོ་བདེ་ཆེན་མ། །ལས་ཀྱི་མཁའ་འགྲོ་ཕྲིན་ལས་བདག །ཀུན་ཀྱང་
མི་བཟད་འདི་འདྲ་སྟེ། །སྐུ་མདོག་གཅིག་ཏུ་མ་ངེས་ཏེ། །དཀར་སེར་དམར་དང་ལྗང་གུའི་མདོག །ལ་ལ་མཐིང་ནག་མུན་པའི་མདོག །ལ་ལ་སྔོ་སངས་ནམ་མཁའི་མདོག །ཕྱག་མཚན་གཅིག་ཏུ་མ་ངེས་ཀྱང་། །ལ་ལས་གྲི་གུག་ཐོད་ཁྲག་བསྣམས། །ལ་ལས་ཁཊྭཱཾ་རྗེའུ་ཆུང་བསྣམས། །ལ་ལས་བརྡེག་པའི་མཚོན་ཆ་བསྣམས། །ལ་ལས་བདུད་རྩི་བུམ་པ་བསྣམས། །ལ་ལས་མཛེས་པའི་མེ་ཏོག་བསྣམས། །དུར་ཁྲོད་རྒྱན་མངའ་མཛེས་པའི་སྐུ། །སྐ་རགས་དྲིལ་ཆུང་གཡེར་ཁ་ཅན། སྙན་པའི་སྒྲ་སྒྲོག་སི་ལི་ལི། །དབུ་ལ་དར་གྱི་ཅོད་པན་ཅན། །རླུང་གིས་བསྐྱོད་ཅིང་པུ་རུ་རུ། །རྐང་པ་རྡོ་རྗེ་འགྲོས་སྟབས་ཅན། །མཁའ་ལ་ཐོགས་མེད་བུན་ནེ་བུན། །ལག་པ་མཉེན་ལྕུག་གདུ་བུ་ཅན། །སྣ་ཚོགས་གར་བྱེད་ཁྱུགས་སེ་ཁྱུག །བདུད་རྩིའི་གཏོར་མ་འདི་བཞེས་ལ། །ཕྲིན་ལས་གཅིག་ཏུ་མ་ངེས་པས། །སྐལ་ལྡན་རྣམས་ལ་ཡེ་ཤེས་སྤོར་། །སྐལ་མེད་རྣམས་ལ་མོས་པ་བསྐྱེད། །ཉམས་པའི་དགྲ་བགེགས་རྣམས་ལ་ཆད་པ་ཆོད། །གནས་ཉི་ཤུ་རྩ་བཞིའི་མཁའ་འགྲོ་བསྐུལ་པ་ནི། ཧཱུྃ་བྷྱོཿ གནས་མཆོག་ཉི་ཤུ་རྩ་བཞི་
ནས། །མཁའ་འགྲོའི་གཙོ་མོ་ཉི་ཤུ་བཞི། །མཁའ་འགྲོ་བྱེ་བའི་ཚོགས་དང་བཅས། །གཙོ་མོ་མི་མངོན་དབྱིངས་ན་བཞུགས། །འཁོར་ནི་མཁའ་འགྲོ་བྱེ་བ་འབུམ། །ལ་ལ་བུད་མེད་རྒན་མོ་ལ། །རོ་གོས་རྙིང་པའི་ན་བཟའ་གསོལ། །སྣུམ་དང་ཁྲག་གི་ཐིག་ལེས་བརྒྱན། །ཐལ་ཆེན་བསྐུས་པས་སྔོ་སྐྱའི་མདོག །དབུ་སྐྲ་སེར་མོ་ལྟག་པར་བཅིངས། །མེ་ཏོག་རྙིང་པའི་དབུ་རྒྱན་ཅན། །ཁ་ན་སོ་མེད་ཧ་ཧ་དགོད། །རྐང་པ་ས་ལ་འཁྱོལ་ཞིང་འགྲོ། །དེ་འདྲའི་ཆ་བྱེད་སྟོན་པ་ཡང་། །སྐལ་ལྡན་རྣམས་ལ་བརྡ་ཆོས་སྟོན། །ཕྲད་པ་ཙམ་གྱིས་བྱིན་གྱིས་རློབས། །བདུད་རྩིའི་གཏོར་མ་འདི་བཞེས་ལ། །ཕྲིན་ལས་གཅིག་ཏུ་མ་ངེས་ཏེ། །ཉམ་ང་མེད་པའི་བརྟུལ་ཞུགས་སྐྱེད། །རྣམ་རྟོག་མེད་པའི་ཉམས་མྱོང་སྤོར། །ལ་ལ་བུད་མེད་གཞོན་ནུ་མ། །སྣ་ཚོགས་རྒྱན་གྱིས་བརྒྱན་པ་མོ། །རིགས་ཀྱི་ཁ་དོག་སོ་སོ་ལ། །སྤྱོད་པ་སོ་སོའི་རིགས་དང་མཐུན། །ལ་ལ་དཀར་མོ་མདངས་བཟང་མ། །རྡོ་རྗེ་རིགས་ཀྱི་ཕྱག་རྒྱ་མོ། །བྱང་ཆུབ་སེམས་ཀྱི་སྐུལ་མ་འདེབས། །ལ་ལ་སེར་སྐྱ་དཔལ་འཛིན་མ། །རིན་ཆེན་རིགས་ཀྱི་ཕྱག་རྒྱ་མོ། །མཆོག་གི་
དངོས་གྲུབ་སྐུལ་མ་འདེབས། །ལ་ལ་དམར་མོ་དབྱིབས་མཛེས་མ། །པདྨ་རིགས་ཀྱི་ཕྱག་རྒྱ་མོ། །ཟག་མེད་བདེ་བའི་སྐུལ་མ་འདེབས། །ལ་ལ་སྔོ་སངས་ཁྲོ་གཉེར་ཅན། །ལས་ཀྱི་རིགས་ཀྱི་ཕྱག་རྒྱ་མོ། །འགྲོ་བའི་དོན་ལ་སྐུལ་མ་འདེབས། །ལ་ལ་དཀར་ཤམ་ནམ་མཁའི་མདོག །དེ་བཞིན་རིགས་ཀྱི་ཕྱག་རྒྱ་མོ། །ཡང་དག་དོན་ལ་སྐུལ་མ་འདེབས། །ཀུན་ཀྱང་མི་བཟད་འདི་འདྲ་སྟེ། །མཛེས་པའི་ཞལ་ལ་གཟི་མདངས་ཅན། །གཞོན་ནུའི་སྐུ་ལ་འགྱིང་བག་ཅན། །དབུ་ནི་རིན་ཆེན་ཅོད་པན་ཅན། །རང་རང་དཔའ་བོའི་ཡབ་ལ་འཁྱུད། །སྐེད་པར་གསེར་གྱི་དྲིལ་ཆུང་ཅན། །སིལ་སིལ་སྒྲོག་ཅིང་སྐུ་ལ་སྦྱོར། །ཞལ་ནི་པདྨའི་དུང་སོ་ཅན། །འཛུམ་པའི་གསུང་ནི་སྙན་པར་སྨྲ། །སྐད་སྙན་ཚངས་པའི་དབྱངས་དང་ལྡན། །རྡོ་རྗེའི་གླུ་ལེན་ཡིད་འཕྲོག་མ། །བདུད་རྩིའི་གཏོར་མ་འདི་བཞེས་ལ། །ཕྲིན་ལས་གཅིག་ཏུ་མ་ངེས་ཏེ། །ཟག་བཅས་ལུས་ལ་བདེ་བ་སྐྱེད། །ཟག་མེད་སེམས་ལ་ཉམས་མྱོང་སྤྱོར། །ལ་ལ་བུད་མེད་ཐ་མལ་གཟུགས། །འཇིག་རྟེན་སྤྱོད་པ་སྣ་ཚོགས་ལ། །ཁྱོད་ཉིད་མི་སྤྱོད་གང་ཡང་
མེད། །ལ་ལ་འགྱུར་བྱེད་ཚོས་མཁན་མོ། །གཞན་སེམས་རང་དབང་སྒྱུར་བྱེད་མ། །མ་ལ་མྱོས་བྱེད་ཆང་ཚོང་མོ། །ལོགས་པར་ཤེས་པ་མྱོས་བྱེད་མ། །ལ་ལ་སྦྱོར་བྱེད་སྨད་འཚོང་མོ། །ཐབས་དང་ཤེས་རབ་སྦྱོར་བྱེད་མ། །ལ་ལ་དག་བྱེད་ཁྲུས་མཁན་མོ། །བག་ཆགས་དྲི་མ་དག་བྱེད་མ། །ལ་ལ་གསོད་བྱེད་ཤན་པ་མོ། །རྣམ་རྟོག་དབྱིངས་སུ་གསོད་བྱེད་མ། །ལ་ལ་གནོད་བྱེད་ཆོམ་རྐུན་མོ། །གཞན་སེམས་རང་དབང་མྱོས་བྱེད་མ། །ལ་ལ་དཀའ་ཐུབ་བྲམ་ཟེ་མོ། །འཁོར་བའི་རྒྱུན་ཐག་གཅོད་བྱེད་མ། །དེ་ལ་སོགས་ཏེ་མཐའ་ཡས་པའི། །རི་རབ་ལྷོ་ཡི་འཛམ་བུ་གླིང་། །གནས་མཆོག་ཉི་ཤུ་རྩ་བཞི་ནས། །འགྲོ་བའི་དོན་ལ་བཞུགས་པ་རྣམས། །ཐབས་རྣམ་སྣ་ཚོགས་དུ་མ་ཡི། །སྤྱོད་པ་སྣ་ཚོགས་ཐབས་ཀྱིས་འདུལ། །བདུད་རྩིའི་གཏོར་མ་འདི་བཞེས་ལ། །ཕྲིན་ལས་གཅིག་ཏུ་མ་ངེས་པ། །བདག་ཅག་རྣལ་འབྱོར་ལ་སོགས་པའི། །སྒྲུབ་པ་བྱེད་པའི་གང་ཟག་རྣམས། །འཇིག་རྟེན་ཆོས་བརྒྱད་སྙོམས་པ་དང་། །འགྲོ་དོན་ཕྱོགས་མེད་ལྷུན་གྲུབ་ཤོག །།མཁའ་འགྲོའི་བསྐུལ་པ་ཚན་གསུམ་པོ་འདི་མཁའ་འགྲོའི་སྙིང་ཐིག་ནས། དྲུང་རྨ་སེས་བསྡུས་ནས་
སྙན་བརྒྱུད་ཀྱི་གཏོར་འབུལ་ལ་སྦྱར་བ་ཡིན་ཀྱང་། གཅོད་ཚོགས་ལ་སྔར་ནས་སྦྱར་སྲོལ་འདུག་ཅིང་འབྲེལ་ཤིན་ཏུ་ཆགས་ཤིང་བྱིན་རླབས་ཆེའོ། །ཧཱུྃ་བྷྱོཿ རབ་ཏུ་འཇིགས་པའི་དུར་ཁྲོད་ནས། །འཇིག་རྟེན་མཁའ་འགྲོ་མཐུ་མོ་ཆེ། །ཤིན་ཏུ་མི་བཟད་འཇིགས་པའི་གཟུགས། །བུད་མེད་ལུས་ལ་མགོ་བརྙན་ཅན། །ཐོད་པ་བཟུང་ཞིང་ཁྲག་ཆེན་འཐུང་། །མི་རོ་ཟ་ཞིང་བཤུད་གླུ་ལེན། །ཏིང་འཛིན་ཉུལ་ཞིང་ཚོགས་ཁང་འགྲིམ། །དེ་དག་མ་ལུས་ཐམས་ཅད་ཀྱིས། །བཀའ་ཡི་གཏོར་མ་འདི་བཞེས་ལ། །སྔོན་གྱི་དམ་བཅའ་ཇི་བཞིན་དུ། །དམ་ཚིག་སྲུངས་ལ་ཕྲིན་ལས་མཛོད། །འཇིག་རྟེན་མཁའ་འགྲོའི་བསྐུལ་པ་ལ་དབང་ཕྱུག་ཉེར་བརྒྱད་དོན་གྱིས་ཚང་ཞིང་གཅོད་ཀྱི་བཀའ་སྲུང་ཡིན་ནོ། །དེ་ནས་གཅོད་ཡུལ་བཀའ་སྲུང་རྣམས་ལ་འབུལ་ཏེ། ཧཱུྃ། མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །ཞབས་གདུབ་དང་བཅས་བི་ན་ཡ་ཀ་མནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་སྦྲུལ་གྱི་རྒྱན་གྱིས་རྣམ་པར་བརྒྱན། །དང་པོས་གྲི་གུག་བར་པས་ཕྲེང་བ་འཛིན། །ཐ་མས་ཌཱ་མ་རུ་ནི་དྲག་ཏུ་འཁྲོལ། །གཡོན་གྱི་དང་པོས་ཐོད་ཁྲག་མདུང་རྩེ་གསུམ། །དེ་བཞིན་ཞགས་པ་འཛིན་པས་
འཆིང་བར་མཛད། །དྲག་པོའི་ཞལ་གདངས་མཆེ་བ་རྣམ་པར་གཙིགས། །སྤྱན་གསུམ་དྲག་པོའི་དབུ་སྐྲ་གྱེན་དུ་བརྫེས། །དཔྲལ་བར་སིན་དྷུ་ར་ཡིས་ལེགས་པར་བརྒྱན། བོར་མི་བསྐྱོད་པ་ཡིས་རྒྱས་བཏབ་ནས། །ཤིང་ལས་བྱོན་ནས་གཏོར་མ་ལེན་པར་མཛོད། །དེ་ཡན་ཤ་བ་རིའི་རྒྱ་གཞུང་ངོ་། །མྱུར་མཛད་མགོན་པོ་ཡུམ་ཆེན་རེ་མ་ཏི། །བཞི་དང་དཔལ་མགོན་བདུན་ཅུའི་ཚོགས། །དམ་རྫས་བརྒྱན་པའི་གཏོར་མ་འདི་བཞེས་ལ། །བསོད་ནམས་བླ་མས་བཀའ་བསྒོས་དམ་བཞག་བཞིན། །ཞི་བྱེད་གཅོད་ཡུལ་བསྟན་པ་དར་བ་དང་། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །རྐྱེན་དང་བར་ཆད་ཐམས་ཅད་བསལ་དུ་གསོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། སྐུ་མདོག་མཐིང་ནག་ཁྲོ་གཉེར་འཇིགས་པའི་ཞལ། །དབུ་སྐྲ་ཁམ་ནག་ཐོར་ཚུགས་གྱེན་དུ་བཅིངས། །དར་དཔྱང་ཅོད་པན་རིན་ཆེན་འབར་བས་བརྒྱན། །རིགས་ལྔས་དབུ་ལ་བརྒྱན་ལ་བདག་བསྟོད་དོ། །སྤྱན་གསུམ་བཟློག་ཅིང་ཞལ་གདངས་མཆེ་བ་གཙིགས། །སྨིན་མ་ཨག་ཚོམ་དམར་སེར་མེ་ལྟར་འབར། །ལྗགས་འདྲིལ་ཧ་ཧ་
བཞད་པའི་ང་རོ་སྒྲོག །འཇིགས་བྱེད་ནག་པོ་ཁྱོད་ལ་བདག་བསྟོད་དོ། །ཕྱག་གཡས་ཙན་དན་བེང་ཆེན་སྨུག་པོ་ལ། །ལྷ་དམག་ཉི་ཁྲི་ཆིག་སྟོང་སྤྲུལ་པ་འགྱེད། །ལྷ་མིན་གྲོང་ཁྱེར་རྩད་ནས་བརླག་པར་མཛད། །བསྟན་པའི་ཕྲིན་ལས་སྐྱོང་ལ་བདག་བསྟོད་དོ། །ཕྱག་གཡོན་ཐོད་པ་བདུད་རྩིས་གང་བ་འཐུང་། །ཐུན་རྫས་མཚོན་ཆ་གཟས་པོའི་སྙིང་ལ་རྡེག །དཔའ་བོ་སྲིད་གསུམ་བདག་པོ་ཆེན་པོ་སྟེ། །མ་རུངས་འཇོམས་མཛད་ཁྱོད་ལ་བདག་བསྟོད་དོ། །ཞབས་གཉིས་གར་སྟབས་བགྲད་པའི་འགྱིང་བག་ཚུལ། །སྟག་ཤམ་བེར་ནག་མི་མགོའི་ཕྲེང་བ་འཕྱང་། །བདུད་དཔུང་རྩད་ནས་གཅོད་མཛད་ཚོགས་ཀྱི་བདག །ཟློག་བྱེད་མ་དང་བཅས་ལ་བདག་བསྟོད་དོ། །བསྟོད་པ་འདི་རྒྱུད་ཁྲག་མཚོ་ཁོལ་ཆེན་ནས་བྱུང་བའོ། །ཧཱུྃ། དཔལ་ལྡན་མ་ཧཱ་ཀཱ་ལ་ཨ་གྷོ་ར། །ཡུམ་ཆེན་ཟློག་བྱེད་མ་དང་ནོར་རྒྱུན་མ། །རིགས་བཞི་ཊཱཀི་བདུན་དང་ཌོཀིའི་ཚོགས། །དམ་རྫས་བརྒྱན་པའི་གཏོར་མ་འདི་བཞེས་ལ། །ཕ་གཅིག་དམ་པས་ཇི་ལྟར་བཀའ་སྒོས་བཞིན། །ཞི་བྱེད་གཅོད་ཡུལ་བསྟན་པ་དར་བ་དང་། །རྣལ་འབྱོར་བདག་ཅག་དཔོན་སློབ་ཡོན་
མཆོད་ཀྱི། །རྐྱེན་ངན་བར་ཆད་ཞི་བའི་ཕྲིན་ལས་མཛོད། །ཧཱུྃ། རབ་འཇིགས་དུར་ཁྲོད་ཀུན་གྱི་བདག་པོ་སྟེ། །ཁྱད་པར་སོ་ས་གླིང་གི་ཞིང་སྐྱོང་བ། །ཀེང་རུས་ཆེན་པོ་གར་བྱེད་མཆེ་བ་གཙིགས། །རང་འདྲའི་ཡུམ་བཅས་ཁྲོ་བོ་ཁྲོ་མོའི་སྐུ། །རབ་གཏུམ་དབྱུག་ཏོ་ཕྱར་ཞིང་ཐོད་ཁྲག་འཛིན། །དར་དང་རིན་ཆེན་རྒྱན་གྱིས་ལེགས་པར་བརྒྱན། །ཤ་ཟ་ཕོ་མོའི་ཁྲོམ་གྱིས་ལེགས་པར་བསྐོར། །མཚན་བཞིན་དུར་ཁྲོད་ཉལ་ལ་ཕྱག་འཚལ་བསྟོད། །དམ་རྫ་ས་བརྒྱན་པའི་གཏོར་མ་འདི་བཞེས་ལ། །རྒྱ་གར་ཡུལ་གྱི་དུར་ཁྲོད་གནས་བརྒྱད་དུ། །ཕ་གཅིག་དམ་པའི་སྤྱན་སྔར་ཁས་བླངས་བཞིན། །བདག་ཅག་མི་ནོར་གཞི་བྱེས་ཐམས་ཅད་ལ། །དགྲ་རྐུན་གཅན་གཟན་གནོད་པ་ཐུབ་པར་སྲུངས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །བྷྱོཿ འཇིགས་སུ་རུང་བའི་དུར་ཁྲོད་ཆེན་པོའི་ཀློང་། །དུག་གསུམ་ཁྲོས་པའི་མེ་དཔུང་མཚོན་ཆའི་ཚལ། །མི་རྟ་ཁྱི་མགོ་བརྩེགས་པའི་མཁར་ནང་ནས། །རྡོ་རྗེ་ཕག་མོའི་བཀའ་ཉན་མཐུ་མོ་ཆེ། །བུད་མེད་ནག་མོ་གྲི་ཐོད་སྙིང་བཅས་བསྣམས། །ཆིབས་སུ་ལྕགས་ཀྱི་སྤྱང་མོ་མགོ་དགུ་བཅིབས།
གཡས་ན་བུད་མེད་དམར་མོ་བཙན་ཞགས་འཕེན། །ཆིབས་སུ་མཚལ་སྟག་དམར་པོ་མགོ་དགུ་བཅིབས། །གཡོན་ན་བུད་མེད་སྔོན་མོ་བདུད་ཞགས་འཕེན། །ཆིབས་སུ་ཟངས་ཀྱི་འཕར་བ་མགོ་དགུ་བཅིབས། །གསུམ་ཀ་གཅེར་བུ་རལ་པས་སྟོང་གསུམ་ཁྱབ། །སྤྱན་གསུམ་ཞལ་གདངས་མཆེ་བ་ཟངས་ཡག་གཙིགས། །ལྗག་དམར་གློག་འཁྱུགས་མེ་འབར་རླུང་ནག་འཚུབ། །མ་རྒྱུད་ཡོངས་ཀྱི་ལས་མཁན་ཆེན་མོ་སྟེ། །སྤྱང་ཞོན་ལྷ་མོ་མཆེད་གསུམ་འཁོར་དང་བཅས། །དམ་རྫས་བརྒྱན་པའི་གཏོར་མ་འདི་བཞེས་ལ། །བདག་དང་བསྲུང་བྱ་མི་ནོར་འཁོར་བཅས་ལ། །ནད་རིམས་དལ་ཁ་ཐམས་ཅད་ཞི་བ་དང་། །བདག་ལ་སྡང་བར་བྱེད་པའི་དགྲ་བོ་ལ། །སྔོ་དམར་ནད་ཀྱི་ཆར་པ་དབབ་པ་དང་། །དལ་དང་ཡམས་ཀྱི་ས་བོན་གདབ་པར་མཛོད། །བྷྱོ། ཕྲིན་ལས་རྣམ་པ་སྣ་ཚོགས་པ། །ཐམས་ཅད་སྒྲུབ་པའི་བདག་ཉིད་མ། །མཚན་མོ་སྟོང་གསུམ་ཁྱབ་པར་རྒྱུག་་ཧཱུྃ་ཕཊ་བྷོ་ཡི་སྒྲ་ཆེན་སྒྲོག །གཅེར་བུ་རལ་པ་ས་ལ་དྲུད། །ལག་ན་གྲི་གུག་ཐོད་ཁྲག་ཐོགས། །སྐུ་མདོག་མ་ངེས་ཅི་ཡང་བསྒྱུར། །སོ་སོའི་ལས་ཀྱི་ཁ་དོག་སྟོན།
རྣལ་འབྱོར་ཀུན་གྱི་ཕྲིན་ལས་སྒྲུབ། །དམ་ཚིག་ཅན་གྱི་སྡོང་གྲོགས་བྱེད། །དམ་ཉམས་རྣམས་ལ་ཆད་པ་གཅོད། །ལས་བདག་མཚན་མོ་སྒྲ་སྒྲོགས་མ། །བཀའ་ཡི་གཏོར་མ་འདི་ལོངས་ལ། །མ་གཅིག་སྤྱན་སྔར་ཁས་བླངས་བཞིན། །བདག་གིས་བཅོལ་བའི་ཕྲིན་ལས་ཀུན། །ད་ལྟ་ཉིད་དུ་འགྲུབ་པར་མཛོད། །ཧཱུྃ། ཁྱབ་འཇུག་ཆེན་པོ་རཱ་ཧུ་ལ། །ལུས་གཅིག་མགོ་དགུ་འཇིགས་པའི་གཟུགས། །རྩ་བའི་ཞལ་ནི་གཟའ་བདུད་གདོང་། །མགོ་བརྒྱད་ལྷ་སྲིན་སྡེ་བརྒྱད་དེ། །བྱ་རོག་མགོས་ནི་བསྟན་པ་བསྲུང་། །ཁོག་སྟོད་སྲིན་པོ་ཕ་ཡི་ལུས། །ཁོག་སྨད་སྦྲུལ་མཇུག་ཀླུ་མོ་ལ། །ཕྱོགས་བཞི་སྲིན་མོ་གདོང་མོ་བཞི། །སྤྱན་སྟོང་སྲིད་གསུམ་བྱ་ར་བྱེད། །སྡེ་བརྒྱད་འདུས་པའི་དྲལ་རྩལ་ཅན། །ཆུ་སྲིན་རྒྱལ་མཚན་མདའ་གཞུ་བསྣམས། །མེ་འབར་འོད་འཁྱུགས་ཐོག་སེར་འབེབས། །སྤྲུལ་པའི་གཟའ་བརྒྱད་ཕྱོགས་ཀུན་འཇོམས། །གདོང་མོ་བཞིས་ནི་ཀིང་ཀང་འབེབས། །གཟའ་བརྒྱད་མ་རུངས་གདུག་པ་ཅན། །ཤམ་པོ་གངས་ཀྱི་ར་བ་རུ། །མ་གཅིག་ལབ་སྒྲོན་སྤྱན་སྔ་རུ། །ཁས་བླངས་དམ་བཅས་དྲན་མཛོད་ལ། །བརྒྱན་
པའི་གཏོར་མ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །གནམ་ནད་དལ་གཟེར་མ་བཏང་ཞིག །གཅོད་ཡུལ་བསྟན་དང་བདག་ཅག་ལ། །སྡང་བར་བྱེད་པའི་དགྲ་བོ་རྣམས། །ཧུར་ཐུམ་ལྐུགས་རེངས་ནད་ཀྱིས་སོད། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། བཙན་རྒོད་འབར་བ་མི་སྲུན་པ། །མི་དམར་རྟ་དམར་དམག་ཆས་ཅན། །བ་དན་མདུང་དམར་མེ་ལྟར་འབར། །བཙན་རྟ་དམར་པོ་རླུང་བས་མགྱོགས། །ཟངས་རི་འབར་བ་སྤྱན་བདུན་པོ། །བཙན་འཁོར་སུམ་བརྒྱ་དྲུག་ཅུར་བཅས། །འབྲུག་སྒྲ་ལྡིར་ཞིང་གློག་འོད་འཁྱུགས། །ཐོག་སྒྲ་ཆེམས་ཆེམ་སེར་ཆེན་འབེབས། །འདིར་གཤེགས་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔ་རུ། །ཁས་བླངས་དམ་བཅས་དྲན་མཛོད་ལ། །གཅོད་ཡུལ་བསྟན་པ་བསྲུང་བ་དང་། །གཅོད་མཁན་བདག་གི་སྡོང་གྲོགས་མཛོད། །ཡིད་ལ་བརྣག་པའི་དགྲ་བོ་ལ། །མི་སྡུག་རྟགས་དང་ཆོ་འཕྲུལ་སྟོན། །བཅོལ་བའི་ཕྲིན་ལས་འགྲུབ་པར་མཛོད། །བྷོ༔ འཇིག་རྟེན་བོད་ཀྱི་ཞིང་ཁམས་འདི། །སྐྱོང་མཛད་ཞིང་སྐྱོང་མཁའ་འགྲོ་
མ། །གནོད་སྦྱིན་མོ་བཞི་བདུད་མོ་བཞི། །སྨན་བཙུན་ཆེན་མོ་མཆེད་སྡེ་བཞི། །ལྷབ་ལྷུབ་ན་བཟའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །བྲན་གཡོག་མང་པོའི་འཁོར་དང་བཅས། །ནམ་མཁའི་མཐོངས་ནས་འདིར་གཤེགས་ལ། །དམ་རྫས་བདུད་རྩིའི་མཆོད་པ་དང་། །ཤ་ཁྲག་དམར་གཏོར་འདི་བཞེས་ལ། །མ་གཅིག་ལབ་སྒྲོན་སྤྱན་སྔ་རུ། །ཁས་བླངས་དམ་དུ་བཅས་པ་བཞིན། །བདག་ཅག་དཔོན་སློབ་འཁོར་བཅས་རྣམས། །གཞི་བྱེས་ལམ་གསུམ་གར་འགྲོ་ཡང་། །བསམ་པ་སྒྲུབས་ལ་རེ་བ་སྐོངས། །དལ་ཡམ་འཁྲུགརྩོད་ཞི་བ་དང་། །བོད་ཁམས་བདེ་བའི་ཕྲིན་ལས་མཛོད། །དེ་ནས་དཀར་གཏོར་ཕུད་རྒོད་ཀྱིས་བྲན་ལ། ཨོཾ་ཀརྨ་ཊཱཀི་ནི་ཧཱུྃ་ཕཊཿ ཨོཾ་སྭ་བྷ་ཝས་སྦྱངས། །སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་དུ་ཁཾ་ཞུ་བ་ལས་གཏོར་མ་དཀར་གསུམ་མངར་གསུམ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ཨོཾ་སརྦ་ལོ་ཀ་པཱ་ལ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཧཱུྃ། གྲོས་སྔོན་འཆང་བ་ལག་ན་རྡོ་རྗེའི་སྲས། །གཏེར་བདག་བྱེ་བའི་ཅོད་པན་གྱིས་བཏུད་པ། །ཞང་བློན་བན་ཆེན་རྡོ་རྗེ་བདུད་འདུལ་བ། །གནོད་
སྦྱིན་ནག་པོ་ཁྲག་རལ་ཅན་ཞེས་བྱ། །འཇིག་རྟེན་འདས་དང་མ་འདིས་ལས་རྣམས་ཀུན། །ཐོགས་མེད་བསྒྲུབ་ལ་རྫུ་འཕྲུལ་མཛད་པའི་སྐུ། །དུས་མཐའི་ཆར་སྤྲིན་འཁྲིགས་འདྲ་ཆེར་མནག་ཅིང་། །ཐུང་ཞིང་སྦོམ་ལ་ཡན་ལག་རགས་པ་ཅན། །ཁྲོས་པའི་མིག་དམར་གཙིགས་ཞལ་གད་རྒྱང་ཅན། །སྨིན་མ་ཨག་ཚོམ་དམར་སེར་འབར་ལ་འཁྲུགས། །སྒྲུབ་པོའི་རེ་སྐོང་ཡིད་བཞིན་ནོར་བུ་དང་། །ལུས་ཅན་ནད་འཇོམས་བདུད་རྩིའི་བུམ་པ་འཛིན། །ཕྲོག་ཞུ་རིན་ཆེན་རྒྱན་དང་ཟ་འོག་བེར། །གསེར་སྐྱེད་སག་ལྷམ་གསོལ་ནས་འདོར་སྟབས་ཀྱིས། །སྲིན་མོ་རྡོ་རྗེ་ཀུན་འགྲུབ་མར་བཅས་ནས། །ས་གསུམ་རྣམ་པར་གནོན་ལ་ཕྱག་འཚལ་བསྟོད། །རྡོ་རྗེ་བདུད་འདུལ་གནོད་སྦྱིན་ནག་པོ་ཡུམ། །ཛམ་ལྷ་ལ་སོགས་ནོར་ལྷ་ཆེན་པོ་བརྒྱད། །འབྲོག་གནས་མཆེད་ལྔ་ལ་སོགས་གཡུ་ཁྲབ་ཅན། །ཞི་བའི་ལས་མཛད་ཉི་ཁྲི་ཆིག་སྟོང་དང་། །ཉི་མའི་གཟི་བརྗིད་ལ་སོགས་གསེར་ཁྲབ་ཅན། །རྒྱས་པའི་ལས་མཛད་ཉི་ཁྲི་ཆིག་སྟོང་དང་། །ཧ་ལ་འབར་བྱེད་ལ་སོགས་ཟངས་ཁྲབ་ཅན། །དབང་གི་ལས་མཛད་ཉི་ཁྲི་ཆིག་སྟོང་དང་། །ནག་པོ་
འབར་བ་ལ་སོགས་ལྕགས་ཁྲབ་ཅན། །དྲག་པོའི་ལས་མཛད་ཉི་ཁྲི་ཆིག་སྟོང་དང་། །ནོར་ལྷ་གནོད་སྦྱིན་བྱེ་བའི་ཚོགས་བཅས་ཀྱིས། །དམ་རྫས་དཀར་གསུམ་གཏོར་མ་འདི་བཞེས་ལ། །གྲྭ་པ་མངོན་ཤེས་ཅན་གྱིས་བཀའ་བསྒོས་ལྟར། །ཡུམ་ཆེན་བསྟན་པ་དར་ཞིང་རྒྱས་པ་དང་། །བདག་ཅག་རྣལ་འབྱོར་འཁོར་དང་བཅས་པ་ཡི། །ཚེ་དང་བསོད་ནམས་དཔལ་འབྱོར་རྒྱས་པ་དང་། །སད་སེར་མུ་གེ་གོད་ཁ་ཞི་བ་དང་། །མངའ་ཐང་ཆོས་སྲིད་རྒྱས་པའི་ཕྲིན་ལས་མཛོད། །ཧཱུྃ། ཤར་ཕྱོགས་སྐྱོང་མཛད་རྒྱལ་ཆེན་ཡུལ་འཁོར་སྲུང་། །དུང་མདོག་ཕྱག་ན་སྒྲ་སྙན་པི་ཝང་འཛིན། །ལྷོ་ཕྱོགས་སྐྱོང་མཛད་རྒྱལ་ཆེན་འཕགས་སྐྱེས་པོ། །མཐིང་མདོག་ཕྱག་ན་གསོད་པའི་རལ་གྲི་བསྣམས། །ནུབ་ཕྱོགས་སྐྱོང་མཛད་རྒྱལ་ཆེན་སྤྱན་མི་བཟང་། །མཚལ་མདོག་ཕྱག་ན་མཆོད་རྟེན་སྦྲུལ་ཞགས་འཛིན། །བྱང་ཕྱོགས་སྐྱོང་མཛད་རྒྱལ་ཆེན་རྣམ་ཐོས་སྲས། །གསེར་མདོག་ཕྱག་ན་རྒྱལ་མཚན་ནེའུ་ལེ་འཛིན། །ཀུན་ཀྱང་དར་བེར་རྨོག་ཞུ་བསྲེ་ཁྲབ་ཅན། །རང་རིང་བཙུན་མོ་སྲས་དང་དམག་དཔུང་བཅས། །འདིར་གཤེགས་དཀར་གསུམ་བརྒྱན་པའི་གཏོར་
མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་བསྟན་པ་ཕྱོགས་བཞིར་རྒྱས་པ་དང་། །བདག་ཅག་དཔོན་སློབ་འཁོར་དང་བཅས་པ་ཡི། །དཔལ་དང་བསོད་ནམས་མངའ་ཐང་དར་བ་དང་། །ཕྱོགས་བཞིའི་དགྲ་དཔུང་ཞི་བའི་ཕྲིན་ལས་མཛོད། །ཧཱུྃ། ས་བརྒྱད་ནོན་པའི་སེམས་དཔའ་སྟོབས་པོ་ཆེ། །དྲི་ཟའི་རྒྱལ་པོ་ཟུར་ཕུད་ལྔ་ལྡན་པའི། །ཀླུ་ཡི་རྒྱལ་པོ་ནེའུ་ལེ་ཐོད་དཀར་ཞེས། །བོད་ཁམས་གནས་ཆེན་བརྒྱད་ཀྱི་བདག་པོ་སྟེ། །གཉན་ཆེན་ཐང་ལྷ་ཡར་བཞུད་ཅེས་སུ་གྲགས། །མི་དཀར་མཛེས་པ་གཡུ་ཡི་ཟུར་ཕུད་ཅན། །དར་དཀར་བེར་གྱོན་དབུ་ལ་དུང་ཞྭ་གསོལ། །ཕྱག་གཡས་སྦ་ལྕག་གཡོན་པས་དར་མདུང་འཕྱར། །རྟ་དཀར་གཟི་མིག་གཡུ་རྔོག་འཕུར་ཤེས་ཆིབས། །ཐང་ལྷ་ལྷ་འཁོར་སུམ་བརྒྱ་དྲུག་ཅུར་བཅས། །བདུད་འཁོར་བཙན་འཁོར་སྨན་འཁོར་སུམ་བརྒྱའི་ཚོགས། །བརྒྱ་བྱིན་སྲས་མོ་གནམ་མཚོ་ཡུམ་དང་བཅས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་བསྟན་པ་དར་ཞིང་རྒྱས་པ་
དང་། །རྣལ་འབྱོར་བདག་ཅག་འཁོར་དང་བཅས་པ་ཡི། །ཁ་འཛིན་རྒྱབ་རྟེན་སྡོང་གྲོགས་མ་གཡེལ་ཅིག །ཧཱུྃ། སྲིད་པའི་ལྷ་རབ་ཤམ་པོ་བོད་རྗེའི་ལྷ། །དུང་མདོག་རབ་བརྗིད་དར་དཀར་བེར་ཆེན་གསོལ། །དར་མདུང་དཀར་པོ་ཕྱར་བས་ལྷ་དམག་སྡུད། །ཆིབས་སུ་ལྷ་གཡག་དཀར་པོ་རི་ལོགས་ཙམ། །ཁ་རླངས་སྣ་རླངས་བུ་ཡུག་འཚུབ་པ་ཆིབས། །ཡུམ་ནི་གནམ་སྨན་ཐོག་གི་བུ་ཡུག་སོགས། །སྲིད་པའི་ལྷ་དམག་བྱེ་བ་འབུམ་དང་བཅས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་བསྟན་པ་བསྲུང་ཞིང་སྐྱོང་བ་དང་། །བདག་གི་མཐུན་རྐྱེན་ཀུན་སྒྲུབས་འགལ་རྐྱེན་སོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། སིང་ག་ལ་ཡི་ཡུལ་རྒྱུད་ཆུ་ཡི་ཡུལ། །གངས་དཀར་རིན་ཆེན་ཤེལ་གྱི་གཞལ་ཡས་ནས། །སྐུ་ལྷ་མཁའ་རི་མ་སང་སྤྲུལ་པའི་སྐུ། །མི་དཀར་ཤེལ་ཁྲབ་ཤེལ་རྨོག་དར་བེར་གསོལ། །ཕྱག་གཡས་མདུང་དར་གཡོན་པས་སྤྱང་ཐོད་འཛིན། །ཆིབས་སུ་རྟ་དཀར་འཕུར་ཤེས་གཟི་མིག་ཆིབས། །སྐྱེས་བུ་ཞུབས་ཆེན་
མཚོན་ཐོགས་འབུམ་གྱིས་བསྐོར། །ལྕམ་མོ་ཤེལ་བཟའ་ཤ་བ་ཡུ་མོ་ཆིབས། །རིན་ཆེན་རྒྱན་ལྡན་མཛོ་མོ་དཀར་མོ་ཁྲིད། །མཁའ་རི་མིང་སྲིང་འཁོར་དང་བཅས་པ་རྣམས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་གཏེར་ཆོས་བསྟན་པ་སྲུང་བ་དང་། །བདག་ཅག་བསམ་པོ་སྒྲུབས་ལ་རེ་བ་སྐོངས། །འཁོར་སྲུངས་རྐྱེན་ཟློག་བར་ཅད་ཐམས་ཅད་སོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། རི་མཐོ་ས་གཙང་གངས་རི་གཉན་པོའི་རྩེར། །རང་སྣང་རིན་ཆེན་འཕྲུལ་གྱི་ཁང་བཟང་ནས། །སྲིད་པའི་ལྷ་རྒན་འོད་དེ་གུང་རྒྱལ་ཞེས། །མི་བོ་ཆེན་པོ་དར་གྱི་ལ་ཐོད་ཅན། །དར་ཟབ་བེར་གསོལ་གཡུ་ཆེན་མགུལ་པར་བརྒྱན། །མདུང་དར་སྦ་ལྕག་བསྣམས་ནས་ཅང་ཤེས་ཆིབས། །ཕ་མཚུན་མ་སང་དགྲ་བླའི་ཚོགས་དང་བཅས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་བསྟན་པ་བསྲུང་ཞིང་རྒྱས་པ་དང་། །བདག་གི་ཕྲིན་ལས་འགྲུབ་
པའི་སྡོང་གྲོགས་མཛོད། །ཧཱུྃ། ཤིང་གཅིག་སྡོང་པོ་གསེར་གླག་ཅན་གྱི་དྲུང་། །ཆུ་མིག་དྲག་པོ་གནམ་དུ་འཕྱུར་བའི་ནང་། །ཡིད་ལས་གྲུབ་པའི་རིན་ཆེན་ཁང་བཟང་ནས། །སྣང་སྲིད་ལྷ་སྲིན་སྡེ་བརྒྱད་ཀུན་གྱི་གཙོ། །ཀླུ་ཡི་རྒྱལ་པོ་ཆེན་པོ་མཐུ་བོ་ཆེ། །དྲག་པོ་ཟླ་བ་སྐྱོང་མཛད་ཅེས་གྲགས་པ། །སྐུ་མདོག་དཀར་ལ་འཇའ་ཚོན་འོད་ཟེར་འཕྲོ། །སྦྲུལ་མགོ་འབར་བ་བདུན་གྱི་གདེངས་ཀ་འཕྱོ། །ཡིད་བཞིན་རིན་ཆེན་འབར་བའི་དབུ་གཙུག་བརྒྱན། །ཕྱག་གཉིས་ཐལ་སྦྱར་ཡིད་བཞིན་ནོར་བུ་འཛིན། །དར་དང་རིན་ཆེན་དུ་མས་སྐུ་ལ་བརྒྱན། །སྐུ་སྨད་ལྟོ་འཕྱེ་གདུག་པ་སྦྲུལ་དུ་འཁྱིལ། །རྒྱལ་རིགས་རྗེ་རིགས་དམངས་རིགས་བྲམ་ཟེའི་རིགས། །གདོལ་པ་ཀླུ་རིགས་བྱེ་བ་འབུམ་དང་བཅས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །མ་གཅིག་ལབ་སྒྲོན་སྤྱན་སྔར་ཁས་བླངས་བཞིན། །གཅོད་ཡུལ་བསྟན་པ་ཡུན་རིང་སྐྱོང་བ་དང་། །བདག་ཅག་དཔོན་སློབ་ཡོན་མཆོད་འཁོར་བཅས་ལ། །ཀླུ་དང་ས་བདག་ནད་རྣམས་ཞི་བ་དང་། །ཀླུ་གཡང་དངོས་གྲུབ་རྒྱ་ཆེན་འབེབས་པ་དང་། །བདག་ལ་སྡང་བའི་དགྲ་བོ་
དམ་ཉམས་ལ། །མཛེ་ནད་ལྷོག་རྒོད་འབེབས་པའི་ཕྲིན་ལས་མཛོད། །ཧཱུྃ། སྤྲུལ་སྐུ་མ་གཅིག་ལབ་ཀྱི་སྒྲོལ་མ་ཡིས། །གངས་རི་གཉན་པོ་ཉི་ཤུ་རྩ་གཅིག་དང་། །གཉན་ས་བརྒྱ་དང་རྩ་བརྒྱད་བཅད་པའི་ཚེ། །བཀའ་དང་དམ་ལ་བཏགས་པའི་ལྷ་འདྲེ་རྣམས། །འདིར་གཤེགས་དཀར་གསུམ་བརྒྱན་པའི་གཏོར་མ་བཞེས། །གཞན་ཡང་གཅོད་ཡུལ་བརྒྱུད་པའི་བླ་མ་ཡིས། །བཀའ་དང་དམ་ལ་བཏགས་པའི་ལྷ་འདྲེ་རྣམས། །ཐམས་ཅད་དཀར་གསུམ་གཏོར་མ་འདི་བཞེས་ལ། །གཅོད་ཡུལ་བསྟན་པ་ཕྱོགས་བཅུར་རྒྱས་པ་དང་། །བདག་གིས་ཕྲིན་ལས་འགྲུབ་པའི་སྡོང་གྲོགས་མཛོད། །དེ་ནས་གཏོར་མ་ལ་དཔལ་འབར་བཙུགས་ཏེ་བཀྱག་བཅོལ་ལ། ཕཊ། དེ་ལྟར་དམར་གཏོར་དཀར་གསུམ་གཏོར་མ་ནི། །སོ་སོར་གང་འདོད་ཕུལ་བས་མཉེས་ཤིང་ཚིམ། །ཕྲིན་ལས་གང་འདོད་བསྒྲུབ་པར་ཞལ་གྱིས་བཞེས། །བསྟན་དང་བདག་ལ་གནོད་པའི་དགྲ་བགེགས་ལ། །ཡེ་ཤེས་མཁའ་འགྲོ་རྣམས་ཀྱང་ཐུགས་ཁྲོས་ནས། །ཆོས་སྐྱོང་ཤ་ཟ་འཇིག་རྟེན་མཁའ་འགྲོའི་ཚོགས། །རང་དབང་མེད་པར་རབ་ཁྲོས་ང་རོ་སྒྲོག །ཡང་འཁོར་ལྷ་སྲིན་སྡེ་བརྒྱད་
དམག་དང་བཅས། །མེ་དཔུང་རླུང་ནག་ཐོག་སེར་འབྲུག་སྒྲ་དང་། །མགོ་བརྙན་སྤྲུལ་པ་གློག་ལྟར་འཁྱུག་བྱེད་ཅིང་། །དགྲ་བགེགས་ཐམས་ཅད་རྡུལ་དུ་བརླག་པར་གྱུར། །ཀྱཻ། མ་མི་མིན་ཡེ་ཤེས་མཁའ་འགྲོ་མ། །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། །སྣང་སྲིད་ལྷ་འདྲེའི་འཁོར་གྱིས་བསྐོར། །མ་འདིར་གཤེགས་བརྒྱན་པའི་གཏོར་མ་བཞེས། །དམ་རྫ་ས་བརྒྱན་པའི་གཏོར་མ་བཞེས། །ཤ་ཁྲག་དམར་གྱི་གཏོར་མ་བཞེས། །ད་རེས་སྡང་བའི་དགྲ་ལ་ཡ། །ད་རེས་གནོད་པའི་བགེགས་ལ་ཡ། བཅོལ་བའི་ཕྲིན་ལས་འགྲུབ་པར་མཛོད། །རྒྱས་པར་འགྲེས་ཡིན་ཀྱང་བསྡུ་ན། ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ་མ། །ལྷོ་རིན་ཆེན་རིགས་ཀྱི་མཁའ་འགྲོ་མ། །ནུབ་པདྨ་རིགས་ཀྱི་མཁའ་འགྲོ་མ། །བྱང་ལས་ཀྱི་རིགས་ཀྱི་མཁའ་འགྲོ་མ། །སྟེང་མཁའ་སྤྱོད་རིགས་ཀྱི་མཁའ་འགྲོ་མ། །འོག་ས་སྤྱོད་རིགས་ཀྱི་མཁའ་འགྲོ་མ། །མཚམས་བཞི་འཇིག་རྟེན་རིགས་ཀྱི་མཁའ་འགྲོ་མ། །མཁའ་འགྲོ་བྱེ་བ་འབུམ་དང་བཅས། །སྣང་སྲིད་ལྷ་འདྲེའི་འཁོར་གྱིས་བསྐོར། །མ་འདིར་གཤེགས་བརྒྱན་
པའི་གཏོར་མ་བཞེས། །དམ་རྫས་བརྒྱན་པའི་གཏོར་མ་བཞེས། །ཤ་ཁྲག་དམར་གྱི་གཏོར་མ་བཞེས། །ད་རེས་སྡང་བའི་དགྲ་ལ་ཡ། །ད་རེས་གནོད་པའི་བགེགས་ལ་ཡ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གནོད་པའི་ཕྱོགས་སམ་ཕྱི་རོལ་དུ་ཕུལ་ལོ། །དེ་ནས་བྲོ་བརྡུང་བ་ནི། ལྷག་མའི་སྣོད་དང་གཏོར་འབུལ་སྣོད་ཐམས་ཅད་གཅིག་ཐོག་ཏུ་གཅིག་སྦུབས་ཏེ། སྟེང་དུ་རྡོ་རྗེ་རྒྱ་གྲམ་བཞག་ལ། ཕཊ། གནོད་བྱེད་དམ་སྲི་མི་མིན་མི་རུ་བརྫུ་བ། །ལྷ་མིན་ལྷ་རུ་བརྫུ་བ། མགོ་གཡོག་མགོ་བསྐོར་བྱེད་པ་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག །ཛཿཧཱུྃ་བ་ཧོ་ཧཱུྃ། ཕྱོགས་བཞིར་འཁོར་ལོའི་རྩིབས་སྟེང་ནས། །རྟོག་མེད་རོ་ཡི་གདན་སྟེང་ན། །རིགས་བཞི་མཁའ་འགྲོས་བྲོ་བརྡུངས་པས། །དཔའ་བོས་བྲོ་བརྡུང་ཁྲིགས་སེ་ཁྲིག །དཔའ་མོས་གར་བྱེད་ཁྱུགས་སེ་ཁྱུག །ད་ལན་བློ་གཅིག་བརྡུང་བ་ནི། །ཕྱོགས་བཞིའི་གདོན་བགེགས་རྡུལ་དུ་བརླག་པའི་བྲོ། །ཡ་བདུད་རྒྱལ་པོ་ཐལ་བར་བརླག་པའི་བྲོ། །མ་བདུད་རྒྱལ་མོ་ཐལ་བར་བརླག་པའི་བྲོ། །དམ་སྲི་དམ་ལ་བཏགས་པའི་བྲོ། །རྐྱེན་ངན་བར་ཆད་བཟློག་པའི་བྲོ། །
བེ་ཐེལ་རྡུལ་དུ་བརླགས་པའི་བྲོ། །དབེན་གནས་དུར་ཁྲོད་ཆེན་པོ་འདིར། །རྟོག་མེད་རོ་ཡི་གདན་སྟེང་དུ། །རྡོ་རྗེ་ཕག་མོས་བྲོ་བརྡུངས་པས། །དཔའ་བོས་བྲོ་བརྡུང་ཁྲིགས་སེ་ཁྲིག །དཔའ་མོས་གླུ་ལེན་ཀྱུ་རུ་རུ། །དབེན་གནས་དུར་ཁྲོད་ཆེན་པོ་འདིར། །ཡ་བདུད་རྒྱལ་པོ་ཐལ་བར་བརླག་པའི་བྲོ། །མ་བདུད་རྒྱལ་མོ་ཐལ་བར་བརླག་པའི་བྲོ། །དམ་སྲི་དམ་ལ་བཏགས་པའི་བྲོ། །རྐྱེན་ངན་བར་ཆད་བཟློག་པའི་བྲོ། །བེ་ཐེལ་རྡུལ་དུ་བརླག་པའི་བྲོ། །བྲོ་འདི་གང་དང་གང་གི་བྲོ། །བྲོ་འདི་ཕ་རོལ་ཕྱིན་དྲུག་བྲོ། །ཕ་རོལ་ཕྱིན་དྲུག་བྲོ་བརྡུངས་པས། །དགྲ་ཉོན་དྲུག་མགོ་ལ་ཆེམས་སེ་ཆེམ། །དུག་གསུམ་མགོ་ལ་ནེམས་སེ་ནེམ། །དུག་ལྔའི་མགོ་ལ་ད་རོལ་ཅིག །བྲོ་འདི་གང་དང་གང་གི་བྲོ། བྲོ་འདི་ཡུམ་སྲས་གཉིས་ཀྱི་བྲོ། །ཡུམ་སྲས་གཉིས་ཀྱི་བྲོ་བརྡུངས་པས། །དགྲ་རྒྱལ་འགོང་མགོ་ལ་ཆེམས་སེ་ཆེམ། །དུག་གསུམ་མགོ་ལ་ནེམས་སེ་ནེམ། །དུག་ལྔའི་མགོ་ལ་ད་རོལ་ཅིག །བྲོ་འདི་གང་དང་གང་གི་བྲོ། །བྲོ་འདི་རྣལ་འབྱོར་བདག་གི་བྲོ། །རྣལ་འབྱོར་བདག་གིས་བྲོ་བརྡུངས་པས། །དགྲ་དམ་སྲིའི་མགོ་ལ་ཆེམས་སེ་ཆེམ། །དུག་
གསུམ་མགོ་ལ་ནེམས་སེ་ནེམ། །དུག་ལྔའི་མགོ་ལ་ད་རོལ་ཅིག །ཨོཾ་ལྃ་ཧཱུྃ་ལྃ། སྟྭཾ་བྷ་ཡ་ནན། ཕཊ་ཕཊ་ཕཊ། དེ་ནས་གནོད་བྱེད་རྣམས་མཁོན་སེམས་སྦྱང་ཞིང་ཆོས་བཤད་པ་ནི། ཕཊ། བདག་ཉིད་ཐུགས་རྗེ་ཆེན་པོ་སྐུ་མདོག་དཀར། །ཞལ་གཅིག་ཞི་འཛུམ་ཕྱག་གཡོན་པད་དཀར་འཛིན། །སྐུ་ཡིས་ཁམས་གསུམ་སྲིད་རྩེའི་བར་དུ་ཁྱབ། །ཞབས་གཉིས་སྐྱིལ་ཀྲུང་དར་དང་རིན་ཆེན་བརྒྱན། །ཐུགས་ཀར་ཟླ་སྟེང་ཧྲིལ་ཡིག་དྲུག་བསྐོར། །དེ་ལས་བདུད་རྩི་བབས་པས་སྐུ་ལུས་གང་། །ཕྱག་གཡས་མཆོག་སྦྱིན་མཛད་པའི་ཕྱག་སོར་ནས། །བདུད་རྩི་འོ་མ་ལྟ་བུའི་ཆུ་རྒྱུན་བབས། །མགྲོན་རྣམས་འཐུང་ཞིང་ཁྲུས་བྱས་སྡུག་བསྔལ་ཞི། །གནོད་སེམས་གདུག་རྩུབ་ཞི་ནས་བྱང་སེམས་ལྡན། །ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས། །ཐམས་ཅད་མགྲིན་གཅིག་ཡིག་དྲུག་འདོན་པར་གྱུར། །ཨོཾ་མ་ཎི་པདྨེ་ཧཱུྃ། ཞེས་ཅུང་ཟད་བཟླས་ནས། ལུས་ཤ་ཁྲག་གི་མཆོད་སྦྱིན་འདི་བསྔོས་པ་ལ་བརྟེན་ནས། བདག་དང་བསྲུང་བྱ་འཁོར་དང་བཅས་པས་ཚེ་འཁོར་བ་ཐོག་མ་མེད་པ་ནས་བསད་བསད་བཅད་བཅད་ཚེ་ཐུང་བའི་ལན་ཆགས་བྱང་བར་གྱུར་ཅིག །
བརྡུངས་བརྡུངས་བཙོག་བཙོག་ནད་མང་བའི་ལན་ཆགས་བྱང་བར་གྱུར་ཅིག །འཕྲོག་འཕྲོག་བཅོམ་བཅོམ་ནོར་དབུལ་བའི་ལན་ཆགས་བྱང་བར་གྱུར་ཅིག །བཟང་དར་ཟབ་དབྱིག་གསེར་དངུལ་འབྲུ་བང་མཛོད། གྲོགས་ཁྱིམ་ཐབ། རྟ་མ་ཧེ་ལ་སོགས་པ་མདོར་ན་ཚེ་དང་སྲོག་གི་ལན་ཆགས་པའི་བུ་ལོན་འཁོར་ལན་ཆགས་བྱང་ཤ་འཁོན་དག་ནས་བྱང་ཆུབ་ཀྱི་སེམས་རིན་པོ་ཆེ་ཐོབ་པར་གྱུར་ཅིག །ཕཊ་ཕཊ། ལུས་ཤ་ཁྲག་མཆོད་སྦྱིན་འདི་བསྔོས་པས། །ཚེ་རབས་འཁོར་བ་ཐོག་མེད་ཀྱི། །བུ་ལོན་འབྲེལ་ཐག་ཆོད་གྱུར་ཅིག ཤ་འཁོན་སྡིག་སྒྲིབ་དག་གྱུར་ཅིག །སེམས་འགྱུ་བ་དངོས་མེད་སྟོང་པ་འདི། །འདྲེ་ཁྱོད་བས་ངས་ཀྱང་མཐོང་མ་མྱོང་། །དུས་གསུམ་སངས་རྒྱས་རྣམས་ཀྱིས་གཟིགས་མ་མྱོང་། །དངོས་སུ་གྲུབ་ཅིང་མཐོང་བའི་ཆོས། །ལུས་གཟུགས་ཕུང་ཤ་ཁྲག་མཆོད་པ་བཞེས། །དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལན་ཆགས་བུ་ལོན་བྱང་གྱུར་ཅིག །རྣམ་བཞིའི་མགྲོན་གྱི་ཚོགས་རྣམས་ལ། །ཚད་མེད་མཆོད་སྦྱིན་འདི་བསྔོས་པས། །
ཁམས་གསུམ་སེམས་ཅན་ཐམས་ཅད་ཀྱང་། །ལོངས་སྤྱོད་ལྡན་ཞིང་ཚོགས་རྫོགས་ནས། །ཀུན་ཀྱང་སངས་རྒྱས་ཐོབ་པར་ཤོག །ཕཊ་ཕཊ་ཕཊ། ན་མོ། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བར་ཆད་མེད་པའི་ལམ་བགྲོད་ནས། །མ་ཡུམ་ཆེན་གྱི་གོ་འཕང་ཐོབ་པར་ཤོག །ཕཊ་ཕཊ། བདག་གི་ལུས་ཤ་ཁྲག་གི་མཆོད་སྦྱིན་འདི་ཁར་རག་པ་ཙམ། དྲི་ཚོར་བ་ཙམ་གྱིས་ན་བ་ཕན། ཤི་བ་སོས། རྒས་པ་དར། ཕོ་ཐམས་ཅད་སྤྱན་རས་གཟིགས་ཀྱི་གོ་འཕང་ཐོབ་པར་གྱུར་ཅིག །མོ་ཐམས་ཅད་རྗེ་བཙུན་སྒྲོལ་མའི་གོ་འཕང་ཐོབ་པར་གྱུར་ཅིག ཕཊ་ཕཊ། ལན་ཆགས་གདོན་བགེགས་དང་། རིགས་དྲུག་སྙིང་རྗེའི་མགྲོན་ཐམས་ཅད། མགྲོན་པོ་རང་ཁྱིམ་དུ་སོང་བར་ལྟར།
སོ་སོ་རང་རང་གི་གནས་སུ་སོང་བར་གྱུར། ཕཊ་ཕཊ། འབྱུང་པོ་ས་འོག་རྒྱུ་བ་དང་། །གང་ཡང་ས་སྟེང་འཁོད་པ་དང་། །ས་བླར་རྒྱུ་བ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། །སརྦ་བྷུ་ཏ་གཙྪ། དེ་ནས་དཀོན་མཆོག་སྲིད་ཞུའི་མགྲོན་དང་། མགོན་པོ་ཡོན་ཏན་གྱི་མགྲོན་རྣམས་ལ་རྗེས་ཆོག་བྱ་བ་ནི། ཨོཾ་གུ་རུ་དེ་ཝ་ཌཱཀི་ནི་སརྦ་དྷརྨ་པཱ་ལ་ས་པ་རི་ཝཱ་ར་ཨརྒྷཾ་ནས་ཤབྟ་པྲ་ཏཱིཙྪ་སྭཱ་ཧཱ། བར། ནང་མཆོད་སྲིན་ལག་གིས་གཏོར་ཞིང་། བྱིན་རླབས་ཀྱི་རྩ་བ་བཀའ་བརྒྱུད་བླ་མ་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་ཧི། དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་ཧི། །རྟེན་འབྲེལ་གྱི་རྩ་བ་མ་རྒྱུད་མཁའ་འགྲོ་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་ཧི། ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་ཧི། བཀའ་བརྒྱུད་བླ་མ་རྣམས་ལ་ཕྱག་འཚལ་བསྟོད། །ཡི་དམ་ལྷ་ཚོགས་རྣམས་ལ་ཕྱག་འཚལ་བསྟོད། །མཁའ་འགྲོ་ཆོས་སྐྱོང་རྣམས་ལ་ཕྱག་འཚལ་བསྟོད། །ཆད་པ་དང་ནི་ལྷག་པ་དང་། །ཆོ་གའི་ཡན་ལག་མ་ཚང་དང་། །བདག་གིས་བགྱིད་ནོང་ཅི་མཆིས་པ། །
དེ་ཡང་བཟོད་པར་མཛད་དུ་གསོལ། །ཨོཾ་བཛྲ་སཏཱ་ས་མ་ཡ་སོགས་བརྗོད། མདུན་གྱི་ལྷ་ཚོགས་ཐམས་ཅད་ཀྱི་བསྔོ་བའི་དཔང་པོ་དང་མཐུན་འགྱུར་མཛད་པར་གྱུར། ཡུམ་ཆེན་མོ་སྲས་དང་སློབ་མར་བཅས་པ་བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་བདག་ལ་དགོངས་སུ་གསོལ། ཟབ་མོ་གཅོད་ཡུལ་བརྒྱུད་པ་ལ་སོགས་པ་འཕགས་པ་དང་སོ་སོའི་སྐྱེ་བོའི་དགེ་བའི་རྩ་བ་ཅི་མཆིས་པ་དེ་དག་ཐམས་ཅད་ལ་བདག་དགའ་ཞིང་གུས་པས་རྗེས་སུ་ཡི་རང་ངོ་། །དེ་ལྟར་རྗེས་སུ་ཡི་རང་བའི་དགེ་བའི་རྩ་བ་དང་། ལུས་ཚོགས་མཆོད་མཆོད་སྦྱིན་དུ་བསྔོས་པའི་དགེ་བའི་རྩ་བ་འདི་ཡུམ་ཆེན་མོ་སྲས་དང་སློབ་མར་བཅས་པའི་སྤྱན་སྔར་འབུལ་བར་བགྱིའོ། །དེ་ལྟར་ཕུལ་བས་ཀུན་ཏུ་བཟང་པོའི་མཆོད་པའི་སྤྲིན་རྒྱ་མཚོ་བསམ་གྱིས་མི་ཁྱབ་པ་དུས་གསུམ་རྒྱུན་ཆད་མེད་པར་འབྱུང་བར་གྱུར་ཅིག །དེའི་དགེ་བའི་རྩ་བ་གནས་གདོན་ལུས་གདོན་གཉིས་ཀྱིས་ཐོག་དྲངས་སེམས་ཅན་ཐམས་ཅད་ལ་ཡོངས་སུ་བསྔོ་བར་བགྱིའོ། །བསྔོས་པ་བཞིན་དུ་ཐོབ་ནས་བདེ་བ་ཐམས་ཅད་དང་ལྡན། སྡུག་བསྔལ་ཐམས་ཅད་དང་བྲལ་ནས་མྱུར་དུ་མངོན་པར་རྫོགས་པར་
འཚང་རྒྱ་བར་གྱུར་ཅིག །དེའི་དགེ་བའི་རྩ་བ་བདག་དང་བསྲུང་བྱའི་རྒྱུད་ལ་ད་ལྟ་ཉིད་དུ་ཡོངས་སུ་སྨིན་པར་གྱུར་ཅིག །དེ་ལྟར་སྨིན་པ་ལ་བརྟེན་ནས་ཚེ་འཁོར་བ་ཐོག་མ་མེད་པ་ནས་བསགས་པའི་ནད་གདོན་སྡིག་སྒྲིབ་ཐམས་ཅད་ད་ལྟ་ཉིད་དུ་བྱང་ཞིང་དག་པར་གྱུར་ཅིག །ཚེ་དང་བསོད་ནམས་ཉམས་དང་རྟོགས་པ་ཐམས་ཅད་ཡར་ངོའི་ཟླ་བ་བཞིན་དུ་འཕེལ་ཞིང་རྒྱས་པར་གྱུར་ཅིག །གཅོད་ཡུལ་ཕྱག་རྒྱ་ཆེན་པོ་མཆོག་གི་དངོས་གྲུབ་ད་ལྟ་ཉིད་དུ་ཐོབ་པར་གྱུར་ཅིག །ནམ་འཆི་བའི་ཚེ་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་བསུས་ནས་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་བགྲོད་ནུས་པར་གྱུར་ཅིག །དེར་མེ་ཏོག་པདྨའི་སྙིང་པོ་ལ་བརྫུས་ཏེ་སྐྱེ་བ་ལེན་པར་གྱུར་ཅིག །སྐྱེས་མ་ཐག་ཏུ་མེ་ཏོག་པདྨ་ཁ་བྱེ་ནས་སངས་རྒྱས་འོད་དཔག་མེད་ཀྱི་ཞལ་མངོན་སུམ་དུ་མཐོང་བར་གྱུར་ཅིག །དེར་ས་བཅུ་ལམ་ལྔ་མཐར་ཕྱིན་ནས་མངོན་པར་རྫོགས་པར་འཚང་རྒྱ་བར་གྱུར་ཅིག །སངས་རྒྱས་ནས་ནམ་མཁའ་ཇི་སྲིད་དུ་འགྲོ་བ་སེམས་ཅན་ཐམས་ཅད་ཀྱི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག །བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་
སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་ཀུན་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །ཐོགས་པ་མེད་པ་འབྱུང་བར་ཤོག །གཅོད་ཡུལ་ཉམས་སུ་ལེན་པའི་གང་ཟག་གིས། །རང་སེམས་བདུད་དུ་མི་ལྟ་བར། །སྙེམས་རྟོག་མ་ལུས་ཆོད་པར་ཤོག །བཟང་པོའི་ཡོན་ཏན་ཅི་བྱུང་ཡང་། །དེ་ལ་རློམས་སེམས་མེད་པར་ཤོག། །ངན་པའི་རྣམ་རྟོག་ཅི་བྱུང་ཡང་། །དེ་ལ་སྙེམས་རྟོག་མེད་པར་ཤོག །དམ་ཆོས་བདུད་ཀྱི་གཅོད་ཡུལ་འདི། །མཁའ་ལ་ཉི་མ་ཤར་བ་བཞིན། །ཕྱོགས་དུས་ཀུན་ཏུ་ཁྱབ་པར་ཤོག །མདུན་གྱི་ལྷ་ཚོགས་ཐམས་ཅད་ཀྱིས། །མགྲིན་གཅིག་དབྱངས་གཅིག་གིས་བཀྲ་ཤིས་བརྗོད་པར་བསམས་ལ། མེ་ཏོག་ཆར་པ་འབེབས་པར་གྱུར། །ཆོས་དབྱིངས་ལྷུན་གྱིས་གྲུབ་པ་ཡི། །ཡུམ་ཆེན་ཤེས་རབ་ཕར་ཕྱིན་བཀྲ་ཤིས་ཤོག །འགྱུར་བ་མེད་པ་རྡོ་རྗེ་མཁའ་འགྲོའི་བཀྲ་ཤིས་ཤོག །དགོས་འདོད་ཀུན་འབྱུང་རིན་ཆེན་མཁའ་འགྲོའི་བཀྲ་ཤིས་ཤོག །སྐྱོན་གྱིས་མ་གོས་པདྨ་མཁའ་འགྲོའི་བཀྲ་ཤིས་
ཤོག །ཐམས་ཅད་ལྷུན་གྲུབ་ལས་ཀྱི་མཁའ་འགྲོའི་བཀྲ་ཤིས་ཤོག །དམ་ཚིག་ལ་གནས་འཇིག་རྟེན་མཁའ་འགྲོའི་བཀྲ་ཤིས་ཤོག །བར་ཆད་ཀུན་སེལ་ཆོས་སྐྱོང་སྲུང་མ་རྣམས་ཀྱི་བཀྲ་ཤིས་ཤོག །ལས་དང་འཇིག་རྟེན་མཁའ་འགྲོའི་ཚོགས། །ཤ་ཟ་དམ་ཚིག་མཁའ་འགྲོ་མ། །འཇིག་རྟེན་ཆོས་སྐྱོང་སྲུང་མ་རྣམས། །ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སོ་སོའི་ཡུལ་དུ་གཤེགས་སུ་གསོལ། །སོ་སོའི་ཡུལ་དུ་གཤེགས་ནས་ཀྱང་། །སེམས་ཅན་རྣམས་ཀྱི་དོན་སླད་དུ། །སླར་ཡང་འབྱོན་པར་མཛད་དུ་གསོལ། །བཛྲ་མུ་དེ་ནས་སྔར་སྤར་བའི་རྣམ་ཤེས་དབབ་པ་ནི། ཕཊ། མདུན་གྱི་ཡུམ་ཆེན་མ་གཅིག་ཐུགས་ཀ་ནས། །རང་དང་བསྲུང་བྱའི་རྣམ་ཤེས་ངོ་བོ་ནི། །འོད་ཀྱི་གོང་བུའི་དབུས་སུ་མ་གཅིག་སྐུ། །དཀར་གསལ་འཛུམ་མཛེས་གར་སྟབས་ཁྱུག་ཁྱུག་གཅིག །ཚངས་བུག་ནས་ཞུགས་དབུ་མའི་ལམ་ནས་བརྒྱུད། །སྙིང་ནི་པདྨ་འདབ་བརྒྱད་དབུས་སུ་ཞུགས། །གྱེན་དུ་ཁ་ཟླུམ་བུམ་སྐུའི་རྣམ་པར་གྱུར། །དེ་ནས་བྱིན་རླབས་ཞུ་བ་ནི། མ་གཅིག་ཡུམ་ཆེན་ལྷ་ཚོགས་འཁོར་བཅས་ཀྱིས། །བདག་དང་བསྲུང་
བྱའི་ལུས་ངག་ཡིད་གསུམ་ལ། །སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ། །དེ་ལྟར་གསོལ་བ་བཏབ་པས་ལྷ་རྣམས་ཀྱི། །སྐུ་གསུང་ཐུགས་ལས་འོད་ཟེར་སྣ་ཚོགས་འཕྲོས། །ཡུམ་ཆེན་འོད་ཟེར་འཕྲོས་པས་མ་གཅིག་བསྐུལ། །མ་གཅིག་སྐུ་ལས་འོད་ཟེར་འཕྲོས་པ་ཡིས། །གཡོན་ཕྱོགས་རིགས་ཀྱི་མཁའ་འགྲོ་སྡེ་ལྔ་བསྐུལ། །།ཀུན་གྱི་བྱིན་རླབས་མཁའ་འགྲོ་སྡེ་ལྔར་བསྡུས། །སྡེ་ལྔའི་སྐུ་གསུང་ཐུགས་ཀྱི་བྱིན་རླབས་ཀུན། །འོད་ཟེར་དཀར་དམར་མཐིང་གའི་རྣམ་པར་བྱོན། །བདག་དང་བསྲུང་བྱའི་ལུས་ངག་ཡིད་གསུམ་ལ། །སིབ་སིབ་ཐིམ་པས་བྱིན་རླབས་དངོས་གྲུབ་ཐོབ། །ཕཊ་ཕཊ་ཕཊ། དེ་ནས་དབང་བླང་བ་ནི། མ་གཅིག་ཡུམ་ཆེན་ལྷ་ཚོགས་ཐམས་ཅད་ཀྱིས། །བདག་ཅག་དཔོན་སློབ་བསྲུང་བྱ་ཐམས་ཅད་ལ། །དབང་བཞི་རྫོགས་པར་བསྐུར་བར་མཛད་དུ་གསོལ། །གསོལ་བ་བཏབ་པས་ལྷ་ཚོགས་ཐམས་ཅད་ཀྱི། །དཔྲལ་བའི་ཨོཾ་ལས་འོད་ཟེར་དཀར་པོ་འཕྲོས། །བདག་དང་བསྲུང་བྱའི་ཚངས་པའི་བུག་ནས་ཞུགས། །ལུས་ཀྱི་ནད་གདོན་སྡིག་སྒྲིབ་ཐམས་ཅད་དག །འོད་ཟེར་དཀར་པོས་ལུས་རྣམས་མེར་གྱིས་
གང་། །བུམ་པའི་དབང་ཐོབ་སྤྲུལ་སྐུའི་ས་བོན་བཞག །མགྲིན་པའི་ལས་འོད་ཟེར་དམར་པོ་འཕྲོས། །བདག་དང་བསྲུང་བྱའི་མགྲིན་པའི་གནས་ནས་ཞུགས། །ངག་གི་སྒྲིབ་པ་དིག་ལྷགས་ཐམས་ཅད་དག །ལུས་ནང་འོད་ཟེར་དམར་པོས་གང་བ་ཡིས། །གསང་བའི་དབང་ཐོབ་ལོངས་སྐུའི་ས་བོན་བཞག །ལྷ་ཚོགས་ཐུགས་ཀའི་ཧཱུྃ་ཡིག་སྔོན་པོ་ལས། །འོད་སྔོན་བདག་དང་བསྲུང་བྱའི་སྙིང་གར་ཐིམ། །སེམས་ཀྱི་སྒྲིབ་པ་སྨྱོ་འབོག་ཐམས་ཅད་དག །འོད་ཟེར་སྔོན་པོས་ལུས་རྣམས་ལྟེམ་གྱིས་གང་། །ཤེར་ཡེའི་དབང་ཐོབ་ཆོས་སྐུའི་ས་བོན་བཞག །ལྷ་རྣམས་གནས་གསུམ་འོད་ཟེར་སྣ་ཚོགས་འཕྲོས། །བདག་དང་བསྲུང་བྱའི་ལུས་ཀུན་ལ་ཐིམ་པས། །སྒོ་གསུམ་ཆ་མཉམ་སྒྲིབ་པ་ཐམས་ཅད་དག །ནད་གདོན་སྡིག་སྒྲིབ་དུད་ཁུ་སོལ་ཁུ་དང་། །ཉ་ལྕོང་སྦ་སྦྲུལ་རྣམ་པར་ཉིལ་གྱིས་བུད། །ལུས་ཀུན་འོད་ཟེར་ཁ་དོག་དུ་མས་གང་། །དབང་བཞི་ཡོངས་སུ་རྫོགས་པ་ཐོབ་གྱུར་ནས། །ངོ་བོ་ཉིད་སྐུ་འགྲུབ་པའི་སྐལ་ལྡན་གྱུར། །ཡུམ་ཆེན་དཀྱིལ་འཁོར་ལྷ་ཚོགས་ཐམས་ཅད་རྣམས། །འོད་དུ་ཞུ་ནས་མ་གཅིག་ཉིད་ལ་ཐིམ། མ་གཅིག་བདག་
དང་བསྲུང་བྱའི་གྲངས་མཉམ་པ། ཁ་དོག་ལྔ་ལྡན་གྱུར་ནས་བདག་ཉིད་དང་། །བསྲུང་བྱའི་སྤྱི་བོར་ཞུགས་ནས་བྱིན་གྱིས་རློབས། །ཀྱཻ། མ་མི་མིན་ཡེ་ཤེས་མཁའ་འགྲོ་མ། །མ་ཤར་ནས་གོམ་གསུམ་བྱོན་ཙམ་ན། །སྐུ་ཤ་ཆུང་ལ་སྐུ་མདོག་དཀར། །རྡོ་རྗེ་མཁའ་འགྲོ་འབུམ་གྱིས་བསྐོར། །ཆོས་ཉིད་ནམ་མཁའི་ཀློང་ཡངས་ནས། །ཐུགས་རྗེའི་སྤྲིན་ཕུང་ཐིབས་སེ་ཐིབ། །བྱིན་རླབས་ཆར་རྒྱུན་སི་ལི་ལི། །མ་སྤྱི་གཙུག་རྒྱན་འདིར་བཞུགས་སུ་གསོལ། །མ་སྤྱི་གཙུག་རྒྱན་དེར་བཞུགས་ནས་ཀྱང་། །མས་བྱིན་གྱིས་བརླབ་པར་མཛད་དུ་གསོལ། །བྱིན་གྱིས་རློབས་ཤིག་མ་གཅིག་མ། །བར་ཆད་སོལ་ཅིག་མ་གཅིག་མ། །རྟོགས་པ་བསྐྱེད་ཅིག་མ་གཅིག་མ། །དབང་མཆོག་བསྐུར་ཅིག་མ་གཅིག་མ། །ཐུགས་རྗེས་ཟུངས་ཤིག་མ་གཅིག་མ། །རྒྱས་པར་འགྲེས་ཡིན་ཀྱང་བསྡུ་ན། མ་ལྷོ་ནས་གོམ་གསུམ་བྱོན་ཙམ་ན། །སྐུ་ཤ་ཆུང་ལ་སྐུ་མདོག་སེར། །རིན་ཆེན་མཁའ་འགྲོ་འབུམ་གྱིས་བསྐོར། །མ་ནུབ་ནས་གོམ་གསུམ་བྱོན་ཙམ་ན། །སྐུ་ཤ་ཆུང་ལ་སྐུ་མདོག་དམར། །པདྨ་མཁའ་འགྲོ་འབུམ་གྱིས་བསྐོར། །མ་བྱང་
ནས་གོམ་གསུམ་བྱོན་ཙམ་ན། །སྐུ་ཤ་ཆུང་ལ་སྐུ་མདོག་ལྗང་། །ལས་ཀྱི་མཁའ་འགྲོ་འབུམ་གྱིས་བསྐོར། །མ་དབུས་ནས་གོམ་གསུམ་བྱོན་ཙམ་ན། །སྐུ་ཤ་ཆུང་ལ་སྐུ་མདོག་ནག །ཡེ་ཤེས་མཁའ་འགྲོ་འབུམ་གྱིས་བསྐོར། །ཆོས་ཉིད་ནམ་མཁའི་ཀློང་ཡངས་ནས། །ཐུགས་རྗེའི་སྤྲིན་ཕུང་ཐིབས་སེ་ཐིབ། །བྱིན་རླབས་ཆར་རྒྱུན་སི་ལི་ལི། །མ་སྤྱི་གཙུག་རྒྱན་འདིར་བཞུགས་སུ་གསོལ། །མ་སྤྱི་གཙུག་རྒྱན་དེར་བཞུགས་ནས་ཀྱང་། །མས་བྱིན་གྱིས་བརླབ་པར་མཛད་དུ་གསོལ། །མས་བྱིན་གྱིས་རློབས་ཤིག་ཚོམ་གཅིག་མ། །བར་ཆད་སོལ་ཅིག་མ་གཅིག་མ། །རྟོགས་པ་བསྐྱེད་ཅིག་མ་གཅིག་མ། །དབང་མཆོག་བསྐུར་ཅིག་མ་གཅིག་མ། །ཐུགས་རྗེས་ཟུངས་ཤིག་མ་གཅིག་མ། །ཕཊ་ཕཊ། བདག་དང་བསྲུང་བྱའི་སྤྱི་བོར་མ་གཅིག་རིགས་ལྔ་འོད་དུ་ཞུ་ནས་བདག་དང་བསྲུང་བྱ་ལ་ཐིམ་པས་སྐུ་དང་ལུས་དབྱེར་མེད་དུ་འདྲེས། གསུང་དང་ངག་དབྱེར་མེད་དུ་འདྲེས༔ ཐུགས་དང་སེམས་དབྱེར་མེད་དུ་འདྲེས། བདག་དང་བསྲུང་བྱ་རྣམས་མ་གཅིག་དང་དབྱེར་མེད་པ། ཆོས་ཀྱི་སྐུར་ལམ་གྱིས་སོང་བར་གྱུར། ཕཊ་ཕཊ་ཕཊ། ཅེས་
སྤྲོས་བྲལ་སྟོང་ཉིད་ངང་ལ་ཡུན་རིང་དུ་བཞག་གོ །སླར་ཡང་རང་ཉིད་ཊཱའི་དམར་མོ་རྒྱུན་མེད་པ་སྒྱུ་མའི་སྐུར་ལྡངས་ལ། སྤྱོད་ལམ་ལ་འཇུག་གོ། །དེའང་ཤིན་ཏུ་རྒྱས་པར་འདོད་ན་འགྲེས་རྩ་བསྡུས་པ་རྣམས་རྒྱས་པར་བཤངསལ་འདོན། དེ་བས་བསྡུ་ན་ནི་འདིར་ཡོད་ཚུགས་ལ་གདོན་ཚོགས་དགུ་མ་སྦྱར་རོ། །དེ་བས་བསྡུ་ན་གདོན་ཚོགས་དགུ་མ་མི་དགོས། དེ་བས་བསྡུ་ན་སེར་མ་རྣམས་བསྒྱུར་ལ་དམིགས་པ་ཡིད་ཀྱིས་བསྒོམས་ལ་གཞུང་རྣམས་འདོན། བདུད་རྩི་བྱིན་རླབས་དང་པོ་གཅིག་བྱས་ནས་རྒྱུན་དུ་མི་དགོས། དབང་སྡུད་ཞི་དྲག་གང་རུང་རེ་རེས་ཆོག །དེ་ལས་བསྡུ་ན་བསྐང་བ་བསྐྱུར། གཏོར་འབུལ་འབུམ་བསྐུལ་རྐྱང་པ་དང་། གཅོད་ཀྱི་གཏོར་འབུལ་མཁའ་འགྲོ་སྡེ་དྲུག་ཙམ་གྱིས་ཆོག །དེ་ལས་བསྡུ་ན་གཏོར་བསྔོས་སྔགས་བསྔོས་བྱེད། འདི་ཚར་རེའམ་ཞག་རེ་ལའང་རུང་། ལྔ་བདུན་དགུ་སོགས་རྟགས་ཐོན་བྱེད་ན། གཅོད་ཚོགས་ཚར་གསུམ་མམ་གཉིས་རེ། ལུས་སྦྱིན་གསུམ་མམ་གཉིས་རེ་ཐུན་བཞིའམ་དྲུག་བྱ། ཐུན་མཚམས་སུ་སྨྱོ་འདུལ་ལ་སོགས་གང་དགོས་ཀྱི་དམིགས་པ་གསེབ་དམིགས་སུ་བཏང་བ་ཡིན་ནོ། །ཨེ་མ་ཡུམ་ཆེན་ཐུགས་སྤྲུལ་མ་གཅིག་གཅོད་ཚོགས་འདི། །མདོ་ལུགས་སྔགས་ལུགས་ཟུང་འཇུག་ལུགས་གསུམ་ལས། །རྒྱ་ཆེར་འཕེལ་བས་ཧ་ཅང་འཆལ་དྲགས་པས། །མི་འདྲ་མི་མཐུན་ནམ་མཁའི་སྐར་མ་ཙམ། །དེང་སང་གཅོད་པ་ཕལ་གྱིས་གང་རྙེད་འདོན། །མཛད་བྱང་ཙམ་ཡང་ཕལ་ཆེར་མི་སྣང་བས། །རྣམ་པར་དག་
དང་གཅོད་ལོག་འབྱེད་པ་དཀའ། །ཐོད་སྨྱོན་གངས་པ་སྨུག་སངས་ལྷུན་གྲུབ་ནས། །གྲུབ་ཆེན་ཀརྨ་པ་ལ་གཅོད་ཚོགས་བརྒྱུད། །གཉན་རས་པ་ཡིས་རང་བྱུང་བ་ལ་བརྒྱུད། །འོན་ཀྱང་དེ་ཉིད་སྔགས་ལུགས་གཙོ་ཆེ་བས། །བརྒྱུད་པ་ཧ་ཅང་མི་འཕེལ་རྟེན་འབྲེལ་གཟིགས། །གནམ་མཚོ་བ་ནས་མདོ་ལུགས་བརྒྱུད་པ་དང་། །མདོ་སྔགས་ཟུང་འཇུག་བརྒྱུད་པ་གསན་མཛད་ནས། །གཅོད་ཚོགས་གསལ་དག་རང་བྱུང་རྒྱལ་བས་མཛད། །འོན་ཀྱང་དར་ཆེ་ཕྱག་ལེན་མང་དུ་དར། །ལ་ལས་རྒྱས་འདོད་ཚིག་ལྷད་མང་དུ་བཙུད། །ལ་ལས་བསྡུས་འདོད་བཀའ་བརྒྱུད་ཚོགས་ལས་འཕྲོ། །དེ་སོགས་མི་འདྲ་མང་དུ་དར་ན་ཡང་། །འདི་ཡི་དམིགས་རིམ་བཤད་པ་མཐའ་ཆོད་བཅས། །དབོན་པོ་རཏྣ་སིང་ཧས་མཛད་པ་དང་། །དེ་ཡི་དོན་བསྡུས་ཀུན་དགའ་རྣམ་རྒྱལ་གསུང་། །གཞན་ཡང་མན་ངག་མང་པོ་མཐོང་ཞིང་ཐོས། །ཟུར་མང་ལུགས་དང་རྒྱ་སྟོན་ཞིག་གཅོད་ལུགས། །ཚད་ལྡན་ཚད་ལྡན་མིན་པ་མང་པོ་ཡི། །ཕྱག་ལེན་མང་པོ་མཐོང་ཞིང་ཐོས་པ་དང་། །ཆོས་ཀྱི་དབང་ཕྱུག་ཀུན་དགའ་རྣམ་རྒྱལ་ལས། །ལུས་སྦྱིན་གཙོད་ཚོགས་འབྲེལ་པ་བྱིན་རླབས་ཐོབ། །གཞན་ཡང་ཡོངས་འཛིན་ལྔ་ལས་གཅོད་ཁྲིད་ཐོབ། །དབང་ལུང་དམིགས་རིམ་སོ་སོར་ཅི་རིགས་ཞུས། །ཆར་འབོད་དང་ནི་ནད་གཅོད་དམིགས་རིམ་ལས། །ལན་གྲངས་འགའ་འགར་ཚར་ལྷོང་འདྲེས་ཙམ་བྱུང་། །དམ་པ་མ་གཅིག་སོགས་ཀྱིས་རྨི་ལམ་དུ། །བྱིན་གྱིས་བརླབས་པའི་མཚན་མ་ཅུང་ཟད་མཐོང་། །དབོན་པོ་ཆོས་འཕེལ་ཞེས་བྱས་ཡང་
ཡང་དུ། །འདི་ཉིད་བསྒྲིག་དགོས་ནན་ཏན་ཆེར་བྱས་པས། །གཅོད་ཡུལ་བརྒྱུད་པའི་བླ་མ་ཡི་དམ་ལྷར། །གསོལ་བ་བཏབ་ནས་རུང་ངམ་མི་རུང་བརྟག །འདི་ཉིད་མ་རྒྱུད་མཁའ་འགྲོའི་སྲོག་ཡིན་ཕྱིར། །རང་གི་ཚེ་ལ་ཅུང་ཟད་གཟན་པ་དང་། །རང་ཉིད་ཡོངས་སུ་མ་གྲགས་འཁོས་ཞན་པས། །ཚད་ལྡན་སྟོབས་ཆེན་སུ་ལ་མི་ཕན་ཡང་། །ཉམ་ཆུང་དམན་པ་འགའ་ལ་ཕན་པའི་ལྟས། སྐུ་ཡི་རྣམ་པ་གསལ་བར་མ་མཐོང་ཡང་། །བཅོམ་ལྡན་ཤཱཀ་ཐུབ་དངོས་སུ་བྱོན་ནས་ཀྱང་། །ཤེར་ཕྱིན་རྒྱས་པའི་ཆོས་འཁོར་བསྐོར་འདུག་པའི། །དེ་ཡི་ཁྲི་ནས་ཁྱོན་ཐག་དཀར་པོ་བཞི། །བདག་གིས་ཕྱོགས་བཞིར་འཐེན་ཅིང་དེ་ཡི་རྒྱུད། །དར་ཅོག་དཀར་པོ་ཆུང་ཆུང་མཐོ་རེ་ཙམ། །གྲངས་མེད་ཕྱོགས་བཞི་ཀུན་ཏུ་བཙུགས་པ་རྨིས། །རང་ལ་གནོད་ཀྱང་བཟོད་བྱས་གཞན་ཕན་གྱི། །བསམ་པ་བཟང་པོས་ཀུན་ནས་བསླངས་ཏེ་བྲིས། །དེ་ཕྱིར་ཕྱིན་ཆད་འདི་ལ་སུ་ཡིས་ཀྱང་། །སྣོན་ཕྲི་བཅོས་བསླད་ཅིས་ཀྱང་མི་མཛད་ཞུ། །མཚན་མོ་སྒྲ་སྒྲོགས་ཤམ་པོ་གཟའ་བདུད་དང་། །ཟངས་རི་སྤུན་བདུན་དྲག་པོ་ཟླ་སྐྱོང་སོགས། །བཀའ་སྲུང་རྣམས་ལ་གཏད་དོ་ཐུབ་པར་སྲུངས། །མ་གཅིག་དམ་ལས་མ་འདའ་ས་མ་ཡ། །བདག་ནི་མི་ཤེས་སོ་སྐྱེའི་དབང་གྱུར་པས། །མ་རྟོགས་ལོག་རྟོག་སྦྲ་འོས་གསལ་བཀོད་སོགས། །འགལ་འཁྲུལ་ཉེས་པའི་ཚོགས་རྣམས་ཅི་མཆིས་པ། །མ་གཅིག་ཆོས་བདག་སྲུང་མའི་ཚོགས་ལ་བཤགས། །འདི་ཕྱིར་སྒྲིབ་པར་མི་འགྱུར་དངོས་གྲུབ་སྩོལ། །འདི་ཉིད་བྲིས་ཤིང་།
བརྩམས་པའི་དགེ་བ་དེས། །བདག་དང་བདག་ལ་འབྲེལ་བ་ཐོགས་པ་དང་། །འདི་ཉིད་མཐོང་ཐོས་འབྲེལ་ཐོགས་འགྲོ་བ་རྣམས། །ཚེ་འདིར་བར་ཆད་བདུད་བཞིའི་གཡུལ་ལས་རྒྱལ། །ནམ་ཞིག་འཕོས་ཚེ་ཊཱཀིའི་ཚོགས་རྣམས་ཀྱིས། །མེ་ཏོག་ཆར་འབེབས་རོལ་མོའི་སྒྲ་དང་བཅས། །བདེ་བ་ཅན་གྱི་ཞིང་དེར་ཁྲིད་བྱེད་ཅིང་། །ཆོས་སྐུ་འོད་དཔག་མེད་པའི་ཞལ་མཐོང་ནས། །བྱང་ཆུབ་སྤྱོད་པ་རྒྱ་ཆེར་སྤྱོད་གྱུར་ཅིག །དེ་སྐད་སྨྲ་བ་རཱ་གའི་མིང་ཅན་དེས། །ཤིང་རྟ་གྲོ་ཞུན་ཟླ་བར་རྫོགས་པར་བཀོད། །གཅོད་ཡུལ་བསྟན་པ་དར་རྒྱས་བཀྲ་ཤིས་ཤོག །མངྒ་ལཾ།། ༈ །།སླར་སྨྲས་པ། རྣམ་འདྲེན་བཞི་པས་བྱ་རྒོད་སྤུང་རིར་སོགས། །འཁོར་ལོ་བར་པའི་ལེགས་བཤད་སེང་གེའི་སྒྲ། །འོད་གསལ་ཕྱག་ཆེན་བློ་འདས་རྫོགས་ཆེན་ལ། །ལབ་ཀྱི་སྒྲོན་མའི་གཅོད་ཡུལ་མིང་དུ་ཆགས། །གང་གི་ཆོས་ཚུལ་ཉེ་ལམ་རྨད་བྱུང་བ། །ཡེ་ཤེས་མཁའ་འགྲོས་ཁ་བའི་ཞིང་འདིར་ཕབ། །རྒྱ་གར་པཎ་གྲུབ་དུ་མས་རྒྱ་འགྱུར་གནང་། །བོད་ཆོས་རྒྱ་ལ་འགྱུར་བའི་དབུ་འཁྱུད་བྲིས། །བཀའ་བབ་ལས་ཅན་བུ་ཆེན་བཅུ་དྲུག་དང་། །སྲས་བརྒྱུད་སློབ་བརྒྱུད་རྟོགས་པའི་ཉམས་མགུར་ལས། །གདམས་པ་བདུད་ཀྱི་སྤྱོད་ཡུལ་ཟབ་མོ་འདིས། །ཡངས་པའི་ས་ཆེན་ཡོངས་སུ་ཁྱབ་པར་བྱས། །དེ་ལས་གྲུབ་པའི་དབང་ཕྱུག་ཨ་རཱ་གས། །རྩ་བ་སྙན་བརྒྱུད་དགོངས་
པ་ཇི་བཞིན་དུ། །ཞལ་ཤེས་མན་ངག་གབ་པ་མངོན་དུ་ཕྱུང་། །ཁ་ཚང་དོན་འདྲིལ་ཕྱི་རབས་དོན་དུ་བཀོད། །ཉེར་གཅིག་དུས་རབས་སྒེག་མོའི་འཛུམ་ཞལ་ངོགས། །གྲུབ་བརྙེས་རཱ་གའི་གསུང་བསྐོར་ནན་ཞུས་ཀྱིས། །བསྡུ་སྒྲིག་སྐབས་སུ་བསྟན་རྒྱས་གླིང་དང་ནི། །པར་སྤུང་དབུས་པར་བྲིས་རྙིང་ནང་བཞིན་བཀོད། །འོན་ཀྱང་རྒྱས་བསྡུས་འབྲིང་གི་འགྲོ་ཚུལ་ཡང་། །གཞུང་ནས་སེར་མ་བསྐྱུར་ཞེས་གསུངས་པའི་དོན། །སེར་རྟགས་དབུ་འཇུག་ཉི་ཟླའི་མཚན་མ་ཡོད། །དེ་ལས་སྣོན་ཕྲི་བཅོས་སླད་མེད་དོ་སྙམ། །ངག་འདོན་འདི་ཉིད་རྣལ་འབྱོར་མགུར་དབྱངས་དང་། །རྒྱ་འགྱུར་བསྟོད་ཚོགས་རྣམས་ལས་བསྡུས་ཏེ་བསྒྲིགས། །དེ་ཕྱིར་ཚིག་བར་རིང་ཐུང་མངོན་ན་ཡང་། །དོན་ལ་དགོངས་པས་ཚིག་ལ་འགལ་བ་མེད། །མཚན་མོ་སྒྲ་སྒྲོག་ཤམ་པོ་གཟའ་བདུད་དང་། །ཟངས་རི་སྤུན་བདུན་དྲག་པོ་ཟླ་སྐྱོང་སོགས། །གཅོད་ཡུལ་སྒོས་ཀྱི་བསྟན་སྲུང་རྒྱ་མཚོའི་ཚོགས། །འཛིན་སྐྱོང་སྤེལ་བའི་ཕྲིན་ལས་ཁྱོད་ཀྱིས་གྱིས། །གང་གི་མཐུ་ལས་རྒྱལ་བསྟན་དར་ཞིང་རྒྱས། །བསྟན་འཛིན་དམ་པའི་བཞེད་དོན་མཐའ་རུ་ཕྱིན། །ཁྱད་པར་མཉམ་མེད་རྒྱལ་བ་གནས་མདོ་བའི། །བསྟན་པ་དམ་པས་ས་གསུམ་ཤིས་གྱུར་ཅིག །འདིར་འབད་ལས་ཐོབ་རྣམ་
དཀར་དགེ་བའི་རྒྱུན། །མ་ལུས་འགྲོ་བའི་གསོས་སུ་ཉེར་ཞུགས་ནས། །མི་འདོད་རྒུད་པའི་གདུང་བ་རབ་ཞི་སྟེ། །མཐར་ཐུག་བདེ་ཆེན་ཞིང་དེར་ཁྲིད་བྱེད་ཤོག །གདམས་ཟབ་ཞི་བྱེད་ལམ་འདིར་ཞུགས་པ་རྣམས། །འཁྲུལ་སྣང་རིང་གཟུགས་ལྷ་འདྲེ་འདུལ་སྙམ་གྱིས། །ལོག་ལམ་རིང་རྒྱུད་ཆུད་ཟོས་མ་སོང་བར། །ང་བདག་རྩད་ཆོད་ཡུམ་དོན་མངོན་གྱུར་ཤོག །ཅེས་སྤར་བྱང་སྨོན་ཚིག་འདི་གསུང་སྐོར་བསྡུ་སྒྲིག་པ་རྣམས་ཀྱིས་མདོ་སྨད་ཙོང་ཆུ་དལ་གྱིས་བཞུར་བའི་ཉེ་འགྲམ་ནས་བཀོད་པའོ། །མངྒ་ལཾ།། །། ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།