དུར་གཅོད་ཀྱི་ངག་འདོན་འགྲིགས་ཆགས་སུ་བཀོད་པ་དུར་སྲི་རྒྱུན་གཅོད་ཅེས་བྱ་བ་དུར་གཅོད་ཀུན་གྱི་དོན་བསྡུས་པ།
༼ཚ༽ །དུར་གཅོད་ཀྱི་ངག་འདོན་འགྲིགས་ཆགས་སུ་བཀོད་པ་དུར་སྲི་རྒྱུན་གཅོད་ཅེས་བྱ་བ་དུར་གཅོད་ཀུན་གྱི་དོན་བསྡུས་པ་བཞུགས་སོ།།
ན་མོ་ཛྙཱ་ན་ཌཱཀི་ཡེ། དུར་ཁྲོད་བདག་མོ་ཁྲོས་མ་ནག་མོ་ལ། །གུས་པས་ཕྱག་འཚལ་འགྲོ་ལ་ཕན་དོན་དུ། །དུར་གཅོད་ལས་རིམ་འདོན་འགྲིགས་གསལ་བཀོད་བྱ། །ཆོས་བདག་ཌཱཀིས་བཀའ་གནང་བྱིན་གྱིས་རློབས། །དང་པོ་རང་འགྲོ་རྒྱུའི་ནུབ་མོ་རང་ཉིད་ཉམས་དགའ་ཞིང་ཏིང་ངེ་འཛིན་གསལ་ན་བཟང་། བྱིང་འཐིབ་རིག་པ་མིག་གསལ་ན་ངན། རང་འགྲོ་བསམ་མ་ཐག་ཏུ་ཟིལ་གནོན་འཕེན་ཏེ། ཕཊ། རང་ཉིད་ཡུམ་ཆེན་མོར་གསལ་བའི་ཐུགས་ཀ་ནས། ཚེ་འདས་དེ་བརྗེ་ཡིན་ན་གསེར་གྱི་རྡོ་རྗེ། བུད་མེད་ཡིན་ན་དངུལ་གྱི་རྡོ་རྗེ། སྐྱེ་བོ་ལ་ལྕགས་ཀྱི་རྡོ་རྗེ་མདའ་འཕང་བ་ལྟར་འཕྲོས། དུར་དེའི་ཁྱིམ་ནང་དུ་བབ་པ་ལས། འོད་ཟེར་རྡོ་རྗེའི་ལྕགས་
ཀྱུས་ལྷ་འདྲེ་ཐམས་ཅད་བཟུང་། འོད་ཟེར་རྡོ་རྗེའི་ཞགས་པས་བསྡམས་ནས་བྲོས་དབང་མེད་པར་བསྒོམ། རོ་མཐོང་མ་ཐག་ཏུ། ཕཊ། རང་ཉིད་ཁྲོས་མ་དམར་ནག་སྤྱི་བོར་སྟག་ཞལ་ངར་སྒྲ་སྒྲོག་པ་ཞིག་གི་ཐུགས་ཀ་ནས་གསེར་གྱི་སྟ་རེ་ངར་མ་ཞིག་འཕྲོས། རོ་དེའི་སྙིང་གར་བརྒྱབས་པས་ཤག་གིས་བཀས་པར་བསྒོམ། དེ་ནས་རོ་དེའི་རྩར་ཕྱིན་པ་དང་། ཀྱེ་མ་སེམས་ཅན་ཐམས་ཅད་འདི་ལྟ་བུའི་རང་བཞིན། འདི་ལྟ་བུའི་ཆོས་ཉིད་ལས་མ་འདས་པ་ཡིན། མི་རྟག་པ་ཨ་ཙ་མ་བསམ་ལ་ཡུད་ཙམ་བསྡད། དེ་ནས་ཀྱེ་མ་ཚེ་འདས་འདི་ནི་སྐྱེ་བ་གྲངས་མེད་པའི་མ་རྒན་ཡིན། ད་ལྟ་ཚེ་འདིའི་སྣང་བ་ནུབ་ནས་གར་འགྲོ་ཆ་མེད་ཀྱི་ས་མཚམས་ན་གདའ་བ་སྙིང་རེ་རྗེ། བདག་གིས་བླ་མ་བརྒྱུད་པ་དང་མ་གཅིག་ལ་གསོལ་བ་བཏབ་ནས་དག་པའི་ཞིང་
དུ་ལམ་བསྟན་པར་བྱའོ་སྙམ་དུ་སེམས་བསྐྱེད་ལ། ཚེ་ལས་འདས་པས་ཐོག་དྲངས་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཟབ་མོ་གཅོད་ཡུལ་བརྒྱུད་པའི་བླ་མ་དམ་པ་རྣམས་ལ་སྐྱབས་སུ་མཆིའོ། །མ་གཅིག་ཡུམ་ཆེན་མོ་མཁའ་འགྲོ་སྡེ་ལྔའི་ཚོགས་དང་བཅས་པ་རྣམས་ལ་སྐྱབས་སུ་མཆིའོ། །ཚེ་ལས་འདས་པ་བདེ་བ་དང་ལྡན། སྡུག་བསྔལ་དང་བྲལ་ནས། མྱུར་དུ་སངས་རྒྱས་ཀྱི་ས་ལ་འགོད་པའི་ཆེད་དུ། ཐར་པའི་ལམ་སྟོན་ཅིང་ཕུང་པོ་ཡོན་དུ་འབུལ་བར་བྱའོ། །ཕཊ། རང་ཉིད་སྐད་ཅིག་གིས་མ་གཅིག་ལབ་ཀྱི་སྒྲོན་མ་སྐུ་མདོག་དཀར་ལ་དམར་བའི་མདངས་ཆགས་པ། ཕྱག་གཡས་གསེར་གྱི་ཌཱ་མ་རུ་ནམ་མཁའ་ལ་དཀྲོལ་རྡེབ་བྱེད་པ། གཡོན་དངུལ་དཀར་གྱི་དྲིལ་བུ་དཀུ་ལ་བརྟེན་པ། སྐུ་ལ་དར་དཀར་པོའི་རལ་ག་གསོལ་བ། དམར་པོའི་སྐེ་རགས་བཅིངས་པ། །དབུ་སྐྲ་སིལ་མས་སྐུ་རྒྱབ་ནོན་པ། སྤྱན་གསུམ་བར་སྣང་ལ་གཟིགས་པ། སྐེད་པ་སྒེག་ཅིང་ནུ་མ་འབུར་བ། བཅུ་དྲུག་ལོན་པའི་ན་ཚོད་ཅན། པད་ཟླ་ཉི་མའི་གདན་ལ་སྐུ་གར་
ཐབས་ལིང་ལིང་འཁོར་མཁའ་འགྲོ་འབུམ་གྱིས་བསྐོར་བའི་སྟེང་གི་ནམ་མཁའ་ལ་གཅོད་ཡུལ་བརྒྱུད་པའི་བླ་མ་ཐམས་ཅད་སྤྲིན་གྱི་ཕུང་པོ་ལྟ་བུར་བཞུགས་པར་གྱུར། །ཀྱི་རིགས་ཀྱི་བུའམ། རིགས་ཀྱི་བུ་མོའམ། ཚེ་ལས་འདས་པ་ཁྱོད་ཉོན་ཅིག །ཕ་གཅིག་དམ་པ་སངས་རྒྱས་ཀྱི་ཞལ་ནས། འཆི་བ་འཆི་བ་མ་ཡིན་ཏེ། །རྣལ་འབྱོར་སངས་ཆུང་རྒྱ་བ་ཡིན། །ཞེས་གསུངས་པས་འཆི་བ་ལམ་དུ་བསླང་བའི་གདམས་ངག་ཚིག་གསུམ་འདི་ཡིད་ལ་ཟུངས་ཤིག །ད་ནི་ཁྱོད་ཚེ་འདིའི་སྣང་བ་ནི་ནུབ། འཇིག་རྟེན་ཕྱི་མའི་སྣང་བ་ནི་མ་ཤར། ལམ་བཟང་ངན་གང་དུ་འགྲོ་བའི་ངེས་པ་ནི་མེད་པའི་སྐབས་འདིར། སྡིག་པོ་ཆེ་བཙན་ཐབས་སུ་སངས་རྒྱས་པའི་འཕོ་བའི་གདམས་ངག་དགོས་པ་ཡིན་ནོ། །དེ་ལ་མ་གཅིག་ལབ་ཀྱི་སྒྲོན་མའི་ཞལ་ནས། གཅོད་ཀྱི་ནམ་མཁའ་སྒོ་འབྱེད་དེ། །འཕོ་བ་བརྒྱ་ཡིས་དོ་ཟླ་མིན། །ཞེས་གསུངས་པས། དམིགས་པ་འདི་བཞིན་དུ་སྒོམས་ཤིག །དང་གི་ལུས་སྟོང་གསལ་ཕྲུ་མ་ཕུས་བཏབ་པ་ལྟ་བུའི་དབུས་སུ། རྩ་དབུ་མ་སྦ་ལྕག་འབྲིང་པོ་ཙམ་པ་ཕྱི་དཀར་ལ་ནང་དམར་བ། མར་སྣེ་གསང་གནས་སུ་ཟུག་པ། ཡར་སྣེ་
སྤྱི་གཙུག་ཏུ་ཚངས་པའི་བུ་ག་ཧད་པོར་ཡོད་པར་སྒོམས་ཤིག །འོ་རྩ་དེའི་ནང་ཁྱོད་རང་གི་སྤྱི་བོ་བདེ་ཆེན་གྱི་འཁོར་ལོ་ན་མ་གཅིག་སངས་རྒྱས་མཁའ་འགྲོ་དཀར་མོ། མགྲིན་པ་ལོངས་སྤྱོད་ཀྱི་འཁོར་ལོ་ན་མ་གཅིག་པདྨ་མཁའ་འགྲོ་དམར་མོ། སྙིང་ག་ཆོས་ཀྱི་འཁོར་ལོ་ན་མ་གཅིག་རྡོ་རྗེ་མཁའ་འགྲོ་སྔོན་མོ། ལྟེ་བ་སྤྲུལ་པའི་འཁོར་ལོ་ན་མ་གཅིག་རིན་ཆེན་མཁའ་འགྲོ་སེར་མོ། གསང་གནས་བདེ་སྐྱོང་གི་འཁོར་ལོ་ན་མ་གཅིག་ལས་ཀྱི་མཁའ་འགྲོ་ལྗང་མོ། ཐམས་ཅད་ཀྱང་སྐུ་ཆུང་ལ་ཡན་ལག་དོད་པ། གཅེར་བུ་རུས་པའི་རྒྱན་དྲུག་གསོལ་བ། ཕྱག་ན་ཌཱ་དྲིལ་སིལ་སིལ། སྐུ་གར་ཐབས་ལིང་ལིང་འཕར་ལ་ཁད་པ། འཕུར་ལ་ཁད་པ་སྒོམས་ཤིག །དེ་ནས་ངེད་ཀྱིས་གཅོད་ཡུལ་བརྒྱུད་པ་རྣམས་ལ་གསོལ་བ་བཏབ་ནས་ཕུང་པོ་ཡོན་དུ་འབུལ་ནས་ལམ་བཏན་པའི་ཚེ། མ་ཆགས་མ་ཞེན་པར་ཕུང་པོ་ཡོན་དུ་ཕུལ་ལ་ངེད་ཀྱིས་རྣམ་ཤེས་སྤར་བའི་ཚེ། ཁྱེད་རང་ཡང་ཐེ་ཚོམ་མེད་པར་འཕོས་ཤིག །ཧཱུྃ། གནས་ཆོས་དབྱིངས་རྣམ་དག་གི་ཕོ་བྲང་ན། །ཡུམ་ཆེན་ཤེས་རབ་ཕར་ཕྱིན་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །
པ་བྱུང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་བྱ་རྒོད་ཕུང་པོའི་རི་བོ་ན། །རྗེ་རྫོགས་པའི་སངས་རྒྱས་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་སེང་ཆེན་བསྣོལ་བའི་ཁྲི་སྟེང་ན། །འཇམ་དཔལ་སྨྲ་བའི་སེང་གེ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །དཔལ་གཡུ་ལོ་བཀོད་པའི་ཞིང་ཁམས་ན། །རྗེ་བཙུན་འཕགས་མ་སྒྲོན་མ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་མཁའ་སྤྱོད་མཁའ་འགྲོ་བཞུགས་གནས་ན། །མཁའ་འགྲོ་སུ་ཁ་སིདྡྷི་རིན་པོ་ཆེ། །ཚེ་འདིས་ལུས་ངག་ཡིད་གསུམ་མཆོད་པ་འབུལ། །
རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་རྒྱ་གར་འཇག་མའི་སྤྱིལ་པོ་ནས། །མཁས་པ་ཨཱརྱ་དེ་ཝ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་ལ་སྟོད་དེང་རིའི་གླང་འཁོར་ན། །ཕ་གཅིག་དམ་པ་རྒྱ་གར་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་རྒྱ་བོད་གཉིས་ཀྱི་སོ་མཚམས་ན། །སྐྱོ་སྟོན་བསོད་ནམས་བླ་མ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་ཟངས་རི་མཁར་དམར་གྱི་དགོན་པ་ན། །མ་གཅིག་ལབ་ཀྱི་སྒྲོན་མ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་
ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་བཀྲ་ཤིས་གླང་ལུང་གི་དགོན་པ་ན། །སྲས་མཆོག་རྒྱལ་བ་དོན་གྲུབ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་གཉན་ས་རི་ཁྲོད་ཀྱི་དགོན་པ་ན། །བཀའ་བབས་བུ་ཆེན་བཅུ་དྲུག་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །གནས་སྤྱི་གཙུག་པད་ཟླའི་གདན་སྟེང་ན། །དྲིན་ཅན་རྩ་བརྒྱུད་བླ་མ་རིན་པོ་ཆེ། །ཚེ་འདས་ལུས་ངག་ཡིད་གསུམ་མཆོད་པ་འབུལ། །རིག་པ་བྱང་ཆུབ་ཀྱི་ལམ་ལ་དྲོངས། །སྒྲིབ་གསུམ་སྐྱོན་བྲལ་གྱི་ས་ལ་ཁྲིད། །སྐུ་གསུམ་དབྱེར་མེད་ཀྱི་ཞིང་དུ་བཀོད། །ཕཊ་ཕཊ་ཕཊ། འོ་ཚེ་ལས་འདས་པ་ཁྱོད་ཀྱི་ལུས་རྣམ་སྨིན་ཤ་ཁྲག་གི་ཕུང་པོ་འདི་ནམ་ཡང་མི་རྟག་འབྲལ་བའི་ཆོས་ཅན་ཡིན་པས། མ་ཆགས་མ་ཞེན་
པར་ཕུང་པོ་མ་གཅིག་མཁའ་འགྲོའི་ཚོགས་ལ་ཡོན་དུ་ཕུལ་ལ། རིག་པ་དག་པ་མཁའ་སྤྱོད་ཀྱི་ཞིང་དུ་འཕོས་ཤིག །གནས་སྤྱི་གཙུག་ཉི་ཟླའི་གདན་སྟེང་ན། །དྲིན་ཅན་རྩ་བའི་བླ་མ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །མཁའ་སྤྱོད་དག་པའི་ཞིང་ཁམས་ནས། །ཡི་དམ་ལྷ་ཚོགས་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །དུར་ཁྲོད་ཆེན་པོའི་གནས་བརྒྱད་ནས། །ཁྲོས་མ་ནག་མོ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །ཤར་ཕྱོགས་དུར་ཁྲོད་གཞལ་ཡས་ནས། །རྡོ་རྗེ་མཁའ་འགྲོ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤྱོར། །སེམས་ཉིད་བྱང་ཆུབ་ལམ་དུ་དྲོངས། །ལྷོ་ཕྱོགས་དུར་ཁྲོད་གཞལ་ཡས་ནས། །རིན་ཆེན་མཁའ་འགྲོ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །
ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །ནུབ་ཕྱོགས་དུར་ཁྲོད་གཞལ་ཡས་ནས། །པདྨ་མཁའ་འགྲོ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །བྱང་ཕྱོགས་དུར་ཁྲོད་གཞལ་ཡས་ནས། །ལས་ཀྱི་མཁའ་འགྲོ་གཤེགས་སུ་གསོལ། །ཚེ་འདས་ཕུང་པོ་ཡོན་དུ་འབུལ། །ཡོན་འདི་བཞེས་ལ་གནས་འདི་སྤོར། །སེམས་ཉིད་བྱང་ཆུབ་ལམ་དུ་དྲོངས། །དཔའ་བོའི་ཚོགས་རྣམས་གཡས་གྲལ་བྱས། །དཔའ་མོའི་ཚོགས་རྣམས་གཡོན་གྲལ་བྱས། །ཊཱཀི་རྣམས་ཀྱིས་ཚོགས་འཁོར་བཤམས། །ཤ་ཟན་ཚོགས་རྣམས་རྔམ་ཞིང་རྒྱུག །ཁྲག་འཐུང་ཚོགས་རྣམས་ལྷག་ལྷག་རྒོད། །བདུད་ཀྱི་ཤ་ལེན་ཤ་ར་ར། །བཙན་གྱི་ལས་བྱེད་ཁྱུགས་སེ་ཁྱུག །སྨན་གྱི་བྲོ་བརྡུང་ཁྲིགས་སེ་ཁྲིག །མཁའ་འགྲོའི་སུན་མ་དཔུངས་སེ་དཔུང་། །ད་ནི་གཤེགས་སོ་དབྱིངས་སུ་གཤེགས། །སེམས་ཉིད་བྱང་ཆུབ་ལམ་ལ་དྲོངས། །ཕ྄ཊ་ཕ྄ཊ་ཕ྄ཊ། ཚེ་ལས་འདས་པའི་རྐང་པ་གཡས་པའི་འོག་ཏུ་ཕ་ལས་ཐོབ་པའི་
ཐིག་ལེ་དཀར་པོ་བྱ་མ་སར་གྱི་སྒོ་ང་ཙམ། ཕཊ་ཕཊ། རྐང་པ་གཡོན་པའི་འོག་ཏུ་མ་ལས་ཐོབ་པའི་རཀྟ་དམར་པོ་བྱ་མ་སར་གྱི་སྒོ་ང་ཙམ། ཕ྄ཊ་ཕ྄ཊ། ཐིག་ལེ་དེ་གཉིས་ཡར་འཕར་ནས་གསང་གནས་བདེ་སྐྱོང་གི་འཁོར་ལོ་ན་མ་གཅིག་ལབ་སྒྲོན་སྐུ་མདོག་ལྗང་མོ་དང་རྣམ་པར་ཤེས་པ་གཅིག་ཏུ་འདྲེས། ཕ྄ཊ། མ་གཅིག་ལབ་སྒྲོན་ལྗང་མོ་དེ་ཡར་འཕར༔ ལྟེ་བ་སྤྲུལ་པའི་འཁོར་ལོ་ན་མ་གཅིག་ལབ་སྒྲོན་སྐུ་མདོག་སེར་མོ་དང་རྣམ་པར་ཤེས་པ་དབྱེར་མེད་གཅིག་ཏུ་འདྲེས། ཕ྄ཊ། མ་གཅིག་ལབ་སྒྲོན་སེར་མོ་དེ་ཡར་འཕར། སྙིང་ཁ་ཆོས་ཀྱི་འཁོར་ན་མ་གཅིག་ལབ་སྒྲོན་སྐུ་མདོག་སྔོན་མོ་དང་རྣམ་པར་ཤེས་པ་དབྱེར་མེད་གཅིག་ཏུ་འདྲེས། ཕ྄ཊ། མ་གཅིག་ལབ་སྒྲོན་སྔོན་མོ་དེ་ཡར་འཕར། །མགྲིན་པ་ལོངས་སྤྱོད་ཀྱི་འཁོར་ལོ་ན་མ་གཅིག་ལབ་སྒྲོན་སྐུ་མདོག་དམར་མོ་དང་རྣམ་པར་ཤེས་པ་དབྱེར་མེད་གཅིག་ཏུ་འདྲེས། ཕ྄ཊ། མ་གཅིག་ལབ་སྒྲོན་དམར་མོ་དེ་ཡར་སྤྱི་བོ་བདེ་ཆེན་གྱི་འཁོར་ལོ་ན་མ་གཅིག་ལབ་སྒྲོན་སངས་རྒྱས་མཁའ་འགྲོ་དཀར་མོ་དང་རྣམ་པར་ཤེས་པ་དབྱེར་མེད་གཅིག་ཏུ་འདྲེས་པར་གྱུར། ཕ྄ཊ། འདི་ནས་
ནུབ་ཀྱི་ཕྱོགས་རོལ་ན། །འོད་དཔག་མེད་པའི་ཞིང་ཁམས་ཡོད། །སྲིད་པའི་སྡུག་བསྔལ་ཀུན་ལས་གྲོལ། །ཞིང་གི་ཡོན་ཏན་བསམ་མི་ཁྱབ། །རྫོགས་པའི་སངས་རྒྱས་འོད་དཔག་མེད། །སུ་ཞིག་དེ་ཡི་མཚན་འཛིན་པ། །ཞིང་མཆོག་དེ་རུ་སྐྱེ་བར་གསུངས། །ཚེ་འདས་རིགས་ཀྱི་བུ་ཁྱོད་ཀྱང་། །འོད་དཔག་མེད་པའི་མཚན་བཟུང་ནས། །ཞིང་མཆོག་དེ་རུ་འགྲོ་བར་གྱིས། །པདྨོ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨོ་ལས་འཁྲུངས་ཏེ། །བདེ་བ་ཅན་དུ་སྐྱེ་བར་ཤོག །ཕ྄ཊ། ཚེ་ལས་འདས་པ་ཁྱོད་ཀྱི་རྣམ་པར་ཤེས་པ་དེ་སངས་རྒྱས་མཁའ་འགྲོ་དང་དབྱེར་མེད་པར་འོད་དུ་ལྟེམས་སེ་ཞུ་ནས། འོད་ཀྱི་ཐིག་ལེ་དཀར་པོ་རྣམ་པར་ཤེས་པའི་ངོ་བོ་བྱ་མ་སར་གྱི་སྒོ་ང་ཙམ་དེ། སྤྱི་བོ་ཚངས་པའི་བུ་ག་རྒྱ་སྐར་ཁ་ཕྱེས་པ་ལྟ་བུའི་ནང་ནས། སྐྱེན་པོའི་མདའ་འཕང་བ་བཞིན་དུ། ནུབ་ཕྱོགས་བདེ་བ་ཅན་གྱི་ཞིང་ཁམས་མེ་ཏོག་པདྨའི་སྦུབས་སུ་གཤེགས་ཤིག །ཕ྄ཊ་ཕ྄ཊ་ཕ྄ཊ། དེ་ཡན་ཆད་ཞི་བ་བྱང་ཆུབ་སེམས་ཀྱི་ལམ་སེལ། ཕུང་པོ་ཡོན་འབུལ་གྱི་རིམ་པ་ཡིན་ནོ།། ༈ །དེ་ནས་ཕུང་པོ་ཚོགས་འབུལ་ནི། ཆུ་ཡིས་བྲན་ལ་འདི་
སྐད་དོ། ཕ྄ཊ། རང་ཉིད་སྐད་ཅིག་ལ་མ་གཅིག་གནས་འགྱུར་ནས། ཁྲོས་མ་ནག་མོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། འཁོར་རིགས་བཞིའི་མཁའ་འགྲོ་བྱེ་བ་འབུམ་དང་བཅས་པ་ཐམས་ཅད་ཕྱག་གཡས་མི་ལྤགས་ཀྱི་གཡང་གཞི་རྡེབ་ཅིང་། གཡོན་མི་རྐང་གི་གླིང་བུ་འབུད་པ་དཔག་ཏུ་མེད་པས་སྟེང་འོག་ཕྱོགས་མཚམས་ཐམས་ཅད་གང་ནས། ཟ་འདྲེ་ཤི་གཤེད་དར་སྲི་ཤི་སྲི་ཐམས་ཅད་གཟུགས་ཤ་ཁྲག་གི་བེམ་པོ་འདི་ལ་སྐད་ཅིག་རང་དབང་མེད་པར་ཁུག་ཅིག །ཛཿཧཱུྃ་བ་ཧོ། ཕཊ་ཕཊ་ཕཊ། མ་འདི་ནས་ནུབ་ཀྱི་ཕྱོགས་རོལ་ན། །ཨོ་རྒྱན་ཡུལ་གྱི་ནུབ་ཕྱོགས་ན། །ཨུ་ཙ་ལ་ཡི་དུར་ཁྲོད་ན། །རི་བོ་ཐམས་ཅད་རུས་པའི་རི། །རྩི་ཤིང་ཐམས་ཅད་མདའ་དང་མདུང་། །ཆུ་ཀླུང་ཐམས་ཅད་ཁྲག་དང་རྣག །སྒྲ་སྐད་ཐམས་ཅད་ངུར་མོའི་སྒྲ། །ཁྲོ་བཅུ་རྒྱུ་བར་མི་ནུས་ཤིང་། །ཕྱག་ན་རྡོ་རྗེ་འཇིགས་པའི་ས། །དུས་གསུམ་སངས་རྒྱས་ཡ་ང་བའི། །རྩུབ་འགྱུར་ཚལ་གྱི་དུར་ཁྲོད་ནས། །ཁྲོས་མ་ནག་མོ་གཤེགས་སུ་གསོལ། །སྐུ་མདོག་སྨུག་ནག་མདངས་དང་ལྡན། །སྤྱི་གཙུག་ཕག་ཞལ་ནམ་མཁར་
ངུར། །ཕྱག་གཡས་ཞིང་ཆེན་གཡང་གཞི་རྡེབ། །ཕྱག་གཡོན་མི་རྐང་གླིང་བུ་འབུད། །དུར་ཁྲོད་ཆས་བརྒྱད་སྐུ་ལ་གསོལ། །བམ་ཆེན་རོ་ཡི་གདན་ལ་འགྱིངས། །མ་གཡང་གཞི་ཤར་དུ་གཡུག་ཙ་ན། །རྡོ་རྗེ་མཁའ་འགྲོ་ཕོ་ཉར་འགྱེད། །རྡོ་རྗེ་མཁའ་འགྲོའི་བརྟུལ་ཞུགས་ཀྱི། །ཤར་ཕྱོགས་ཟ་འདྲེ་ཤི་གཤེད་རྣམས། །མ་ལུས་ཐམས་ཅད་གནས་འདིར་ཁུག །གནས་འདིར་ཁུག་ལ་དབང་དུ་བསྡུས། །དབང་དུ་བསྡུས་ལ་རྡུལ་དུ་རློག །མ་གཡང་གཞི་ལྷོ་རུ་གཡུག་ཙ་ན། །རིན་ཆེན་མཁའ་འགྲོ་ཕོ་ཉར་འགྱེད། །རིན་ཆེན་མཁའ་འགྲོའི་བརྟུལ་ཞུགས་ཀྱིས། །ལྷོ་ཕྱོགས་ཟ་འདྲེ་ཤི་གཤེད་རྣམས། །མ་ལུས་ཐམས་ཅད་གནས་འདིར་ཁུག །གནས་འདིར་ཁུག་ལ་དབང་དུ་བསྡུས། །དབང་དུ་བསྡུས་ལ་རྡུལ་དུ་རློག །མ་གཡང་གཞི་ནུབ་ཏུ་གཡུག་ཙ་ན། །པདྨ་མཁའ་འགྲོ་ཕོ་ཉར་འགྱེད། །པདྨ་མ་མཁའ་འགྲོའི་བརྟུལ་ཞུགས་ཀྱིས། །ནུབ་ཕྱོགས་ཟ་འདྲེ་ཤི་གཤེད་རྣམས། །མ་ལུས་ཐམས་ཅད་གནས་འདིར་ཁུག །གནས་འདིར་ཁུག་ལ་དབང་དུ་བསྡུས། །དབང་དུ་བསྡུས་ལ་རྡུལ་དུ་རློག །མི་གཡང་གཞི་བྱང་དུ་
གཡུག་ཙ་ན། །ལས་ཀྱི་མཁའ་འགྲོ་ཕ་ཉར་འགྱེད། །ལས་ཀྱི་མཁའ་འགྲོའི་བརྟུལ་ཞུགས་ཀྱིས། །བྱང་ཕྱོགས་ཟ་འདྲེ་ཤི་གཤེད་རྣམས། །མ་ལུས་ཐམས་ཅད་གནས་འདིར་ཁུག་གནས་འདིར་ཁུག་ལ་དབང་དུ་བསྡུས། །དབང་དུ་བསྡུས་ལ་རྡུལ་དུ་རློག །ཕཊ་ཕཊ་ཕཊ། དེ་ནས་ཕུང་པོ་ཟ་འདྲེ་ཤི་གཤེད་དང་དབྱེར་མེད་པ་དེ་བྲན་ལ། ཚོགས་བྱིན་གྱིས་བརླབས་ཏེ། །ཨོཾ་མ་གཅིག་མ་ལ་གསོལ་བ་འདེབས། །ཨཱཿམ་གཅིག་མ་ལ་གསོལ་བ་འདེབས། །ཧཱུྃ་མ་གཅིག་མ་ལ་གསོལ་བ་འདེབས། །དཀར་པོ་ཨོཾ་གྱིས་བྱིན་གྱིས་རློབས། །དཀར་པོ་ཨོཾ་གྱི་བྱིན་རླབས་ཀྱིས། །གཞོང་པ་ཉི་ཟླའི་གཏོང་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདིས། །བླ་མ་ཡི་དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །དམར་པོ་ཨཱཿཡིས་བྱིན་གྱིས་རློབས་དམར་པོ་ཨཱཿཡི་བྱིན་རླབས་ཀྱིས། །གཞོང་པ་ཉི་ཟླའི་གཏོང་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདིས། །བླ་མ་ཡི་
དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །སྔོན་པོ་ཧཱུྃ་གིས་བྱིན་གྱིས་རློབས། །སྔོན་པོ་ཧཱུྃ་གི་བྱིན་རླབས་ཀྱིས། །གཞོང་པ་ཉི་ཟླའི་གཏོང་གཞོང་དུ། །ཚོགས་ཀྱང་འོད་དུ་ལྟེམས་སེ་ཞུ། །འོད་ཕུང་འབར་བའི་ཚོགས་མཆོད་འདིས། །བླ་མ་ཡི་དམ་མཁའ་འགྲོ་དང་། །རྒྱལ་བའི་དཀྱིལ་འཁོར་མཉེས་གྱུར་ཅིག །ཆོས་སྐྱོང་མ་མགོན་ལྕམ་དྲལ་དང་། །དམ་ཅན་སྲུང་མའི་ཐུགས་དམ་བསྐང་གྱུར་ཅིག །ཕུང་པོ་དེ་ཤ་ཁྲག་གི་ཕུང་པོ་ཚོགས་ཀྱི་འཁོར་ལོ་སྟོང་གསུམ་འཇིག་རྟེན་གྱི་ཁམས་གང་བར་བསྒོམ། མ་གཅིག་ཁྲོས་མ་ནག་མོ་འཁོར་བྱེ་བ་འབུམ་དང་བཅས་པས་ཟ་འདྲེ་ཤི་གཤེད་ཕུང་པོ་དང་བཅས་པ་ཚོགས་སུ་རོལ་པར་དམིགས་ལ། ༈ མ་ཤར་མི་འགྱུར་རྡོ་རྗེའི་དུར་ཁྲོད་ནས། །རྡོ་རྗེ་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་དཀར་མོའི་རང་བཞིན་ལ། །འཁོར་ཡང་དཀར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐྱེད་པས་སྤྱི་ཀྱོག་
ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ།། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །མ་ལྷོ་ཕྱོགས་དུར་ཁྲོད་གཞལ་ཡས་ནས། །རིན་ཆེན་མཁའ་འགྲོ་བྱིན་རླབས་ཅན་བྱིན་རླབས་ཅན་ལ་གསོལ་བ་འདེབས། །སྐུ་མདོག་སེར་མོའི་རང་བཞིན་ལ། །འཁོར་ཡང་སེར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་
ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །མ་ནུབ་ཕྱོགས་དུར་ཁྲོད་གཞལ་ཡས་ནས། །པདྨ་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་དམར་མོའི་རང་བཞིན་ལ། །འཁོར་ཡང་དམར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག། པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །མ་བྱང་ཕྱོགས་དུར་ཁྲོད་གཞལ་ཡས་ནས། །ལས་ཀྱི་མཁའ་
འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་ལྗང་མོའི་རང་བཞིན་ལ། །འཁོར་ཡང་ལྗང་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག་།ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །ཕཊ་ཕཊ་ཕཊ། ཧཱུྃ། མ་ཤར་གྱི་ཕྱོགས་ཀྱི་དུར་ཁྲོད་ནས། །རྡོ་རྗེ་མཁའ་འགྲོ་གཤེགས་སུ་གསོལ། །སྐུ་མདོག་དཀར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་
རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊཕཊཕཊཿ ཧཱུྃ༔ ལྷོ་ཡི་ཕྱོགས་ཀྱི་དུར་ཁྲོད་ནས། །རིན་ཆེན་མཁའ་འགྲོ་གཤེགས་སུ་གསོལ། །སྐུ་མདོག་སེར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊཕཊཕཊཿ ཧཱུྃ། ནུབ་ཀྱི་ཕྱོགས་ཀྱི་དུར་
ཁྲོད་ནས། །པདྨ་མཁའ་འགྲོ་གཤེགས་སུ་གསོལ། །སྐུ་མདོག་དམར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊ་ཕཊ་ཕཊཿ ཧཱུྃ། བྱང་གི་ཕྱོགས་ཀྱི་དུར་ཁྲོད་ནས། །ལས་ཀྱི་མཁའ་འགྲོ་གཤེགས་སུ་གསོལ། །སྐུ་མདོག་ལྗང་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས་། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་
ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊ་ཕཊཕཊཿ ཧཱུྃ། དབུས་ཀྱི་ཕྱོགས་ཀྱི་དུར་ཁྲོད་ནས། །སངས་རྒྱས་མཁའ་འགྲོ་གཤེགས་སུ་གསོལ། །སྐུ་མདོག་ནག་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་ལ་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊ་ཕཊ་ཕཊཿ ཧཱུྃ། མ་ཡུམ་ཆེན་ཐུགས་ལས་སྤྲུལ་པའི་སྲས། །ཤར་རྡོ་རྗེ་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །དུང་གི་
བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག ། ཧཱུྃ༔ མ་ཡུམ་ཆེན་ཡོན་ཏན་སྤྲུལ་པ་ལས། །ལྷོ་རིན་ཆེན་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །གསེར་གྱི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་གསུང་གི་སྤྲུལ་པ་ལས། ནུབ་པདྨ་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །ཟངས་ཀྱི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན།
གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཁྲ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་ཕྲིན་ལས་སྤྲུལ་པ་ལས། །བྱང་ལས་ཀྱི་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །གཡུ་ཡི་བུད་མེད་ལྗང་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་ཐུགས་ཀྱི་སྤྲུལ་པ་ལས། །དབུས་སངས་རྒྱས་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །མཐིང་གི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་
འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་སྲོལ་ཅིག །ཕཊ་ཕཊ་ཕཊཿ དེ་ནས་རླུང་ལན་གསུམ་རྡུབ་ལ། རོ་ཡི་གྲིབ་དང་གདོན་ཐམས་ཅད་རང་ལ་བསྟིམ། ཕཊ། རང་གི་བེམ་རིག་ཕྲལ་ལ་མི་རོ་རང་རོ་གཅིག་ཏུ་བསྲེ། ཕཊ། རང་རིག་རྡོ་རྗེ་རྣལ་འབྱོར་མས་ཐོད་པ་བྲེག །མདུན་དུ་རང་བྱུང་གི་མི་མགོའི་སྒྱེད་པུ་གསུམ་གྱི་སྟེང་དུ་བཙུགས། ཕཊ། ཐོད་པའི་ནང་དུ་བེམ་པོ་བཅུག །ཕཊ། གྲི་གུག་གིས་གཏུབས་རླུང་གཡོས་མེ་སྦར། ཤ་ཁྲག་བདུད་རྩིར་ཞུ། སྤྲུལ་པའི་རྣལ་འབྱོར་མ་དཔག་ཏུ་མེད་པས་ཐོད་པས་བདུད་རྩི་བཅུས། བླ་མ་ཡི་དམ་རྣམས་ཀྱི་ཞལ་དུ་ཨོཾ་ཨཱཧཱུཾ། ཕཊཿ མཁའ་འགྲོ་ཆོས་སྐྱོང་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཕཊ། འགྲོ་བ་རིགས་དྲུག་རྣམས་ཀྱི་ཞལ་དུ་ཨོཾ་ཨཱཿཧཱུྃ། ལན་ཆགས་གདོན་བགེགས་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཕཊ། ཅེས་དམིགས་པ་མང་དུ་བཟུང་། རོ་ལ་སྐྲག་ན་རང་གི་རོ་ལ་ཡང་སྐྲག །རོ་ལ་སྔས་བྱས་ནས་ང་ནི་ཇི་སྲིད་སངས་མ་རྒྱས་ཀྱི་བར་དུ་གར་ཡང་མི་འགྲོ་བསམ་ལ་ཉལ། གལ་ཏེ་ལུས་ན་བའམ་གྲིབ་སོགས་ཀྱིས་མ་བདེ་བ་བྱུང་ན། ན་སར་ཟ་འདྲེ་
ནད་གདོན་བསྟིམས་ལ་དམར་འགྱེད་མང་དུ་བྱའོ། །རོ་དེ་ས་རྡོར་ཤེས་པར་བྱས་ལ་ཉམས་ལེན་ངང་ལ་བཞག །དེས་ནད་ངན་ཡང་ཆོད། གྲིབ་མི་འོང་ངོ་། །རོ་ལ་སྐྲག་སྣང་དང་བཙོག་སྣང་མེད་ཅིང་བདེན་མེད་དུ་ཤེས་ཤིང་བྱམས་སྙིང་རྗེ་ཤུགས་ལ་སྐྱེས་ན་ཆོད་པ་ཡིན་ནོ། །དེ་ཡང་ཞག་འགའ་ཟུང་རོ་ཁྱིམ་ལ་བཞག་རྒྱུ་ཡིན་ན། གཅོད་ཚོགས་དུས་མཉམ་དུ་རོ་དང་ཚོགས་དབྱེར་མེད་དུ་དམིགས། ཞག་ཕྱེད་བཞི་ཚུན་ལ་ཕུད་པར་མི་བྱའོ། །གལ་ཏེ་རྣམ་ཤེས་འཕོ་མ་ནུས་ན་ཡོད་སྲིད་པས་ཉེས་པ་ཆེའོ།། ༈ དེ་ནས་རོ་བསྒུལ་བ་ནི། ཕཊཿ རང་ཉིད་སྐད་ཅིག་གིས་ཡེ་ཤེས་ཀྱི་མཁའ་འགྲོ་ཁྲོས་མ་ནག་མོ་དམར་ནག་མེའི་མདོག་ཅན། །ཞལ་གནམ་ས་ཙམ་གདེངས་བ། མཆེ་བ་གངས་རི་ལྟར་གཙིགས་པ། ལྗགས་གློག་དམར་ལྟར་འཁྱུགས་པ། དུར་ཁྲོད་ཆས་བརྒྱད་སྐུ་ལ་གསོལ་བ། དབུ་ཡི་གཙུག་ནས་སྟག་ཞལ་དམར་ཁྲ་སྟག་སྐད་འབྲུག་ལྟར་ངར་བ། ཟ་འདྲེ་ཤི་གཤེད་སྣང་སྲིད་ལྷ་འདྲེ་ཐམས་ཅད་བསྔངས་ཤིང་བརྒྱལ་བར་བྱེད་པ། ཞབས་གར་ཐབས་སུ་འགྱིང་བའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་རང་འདྲ་བ་དཔག་ཏུ་མེད་པ་འཕྲོས་པས། གནོད་བྱེད་ཟ་འདྲེ་ཤི་གཤེད་ཐམས་ཅད་རང་དབང་མེད་པར་བེམ་རོ་འདི་ལ་ཁུག་ཅིག །བཛྲ་ཨངྐུ་ཤ་ཛ་ཛཿ
ཕཊ་ཕཊ་ཕཊཿ རང་ཉིད་ཡེ་ཤེས་མཁའ་འགྲོའི་ཞབས་གཡས་གནམ་ལྕགས་ཀྱི་ཕུར་པ་རྣོ་ངར་དང་ལྡན་པས་ཟ་འདྲེའི་སྙིང་དཀར་ནག་མཚམས་སུ་མཱ་ར་ཡ། ཕཊ་ཕཊ་ཕཊཿ རྡོག་ཐོ་གསུམ་བརྒྱབ། རང་ཉིད་ཡེ་ཤེས་ཀྱི་མཁའ་འགྲོའི་ཕྱག་གཡས་གནམ་ལྕགས་ཀྱི་རྡོ་རྗེ་རྩེ་དགུ་པ་ལས་རྡོ་རྗེ་མེ་ཡི་ཐོག་དང་སེར་བ་འཕྲོས་པས་གནོད་བྱེད་ཟ་འདྲེ་ཤི་གཤེད་ཐམས་ཅད། བྱ་སྒྲོ་མེ་ལ་བསྲེགས་པ་བཞིན་དུ་གྱུར། ཕཊ་ཕཊཕཊཿ ནས་ལྕག་གིས་བྲབ། རང་ཉིད་དུར་ཁྲོད་ཀྱི་བདག་མོ་ཁྲོས་མ་སྟག་ཞལ་ཅན་གྱི་ཕྱག་གཡས་སོར་མོ་ལྔ་ལས་གསེར་གྱི་སྟག་མོ་ཆེ་ལ་འཇིགས་པ་ལྔ་འཕྲོས། བེམ་རོ་ཟ་འདྲེ་དང་བཅས་པའི་སྟེང་ནས་སྲུབ་ཅིང་ངར་སྒྲ་དང་བཅས་ནས་ཧབ་ཐོབ་ཏུ་ཟོས། ཕཊ་ཕཊ་ཕཊཿ ཅེས་ལག་གཡས་ཅོ་ཐོའམ། །གཉའ་ཁུང་ནས་བཟུང་ལ་བསུབ་བོ། །ཕཊཿ རང་ཉིད་ཁྲོས་མའི་ཕྱག་གཡས་རྡོ་རྗེས་རོ་དེ་ཕར་འཕེན་ཚུར་འཕེན་བྱས་པར་གྱུར། །ཕཊ། ཅེས་ཆ་ཐོག་ཏུ་འཕེན་པའམ་བཞག་བཅུག་གོ། །དེ་ནས་རོ་འཁྱེར་བའི་དམིགས་པ་ནི། ཕཊ། རང་ཉིད་སྐད་ཅིག་གིས་སྟག་གདོང་མ་གནས་འགྱུར་ནས་ཡེ་ཤེས་ཀྱི་མཁའ་འགྲོ་མ། རྡོ་རྗེ་རྣལ་འབྱོར་མ་སྐུ་མདོག་དུང་ལྟར་དཀར་
བ། ཕྱག་ན་གྲི་གུག་ཐོད་ཁྲག་བསྣམས་པ། ཁཊྭཱཾ་ག་ལ་འཁྱུད་ནས་གར་ཐབས་ལིང་ལིང་བྱེད་པར་གྱུར། ཕཊ། རང་གི་སྐུ་ལས་འོད་ཟེར་ཕྱོགས་བཅུར་འཕྲོས༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ་ཟག་མེད་བདེ་སྟོང་གི་མཆོད་པ་ཕུལ་དེ་རྣམས་ཀྱི་ཐུགས་ཀ་ནས་བྱིན་རླབས་ཐུགས་རྗེ་ནུས་པ་ཐམས་ཅད་འོད་ཟེར་བདུད་རྩི་དཀར་པོའི་རྣམ་པར་བསྡུས་ནས་རང་ལ་ཐིམ་པས་རང་ལུས་དཀར་ལྟེམ་གྱིས་གང་། རང་གི་སྐུ་ལུས་ལས་ཡེ་ཤེས་ཀྱི་བདུད་རྩིའི་རྒྱུན་ངང་ན་ར་ར་བབས་ནས་རོ་ལ་ཐིམ་པས་རོ་དེ་ཡེ་ཤེས་ཀྱི་བདུད་རྩི་རོ་བརྒྱ་ནུས་པ་སྟོང་དང་ལྡན་པ་རྐྱལ་པ་གང་དུ་གྱུར། ཕཊཿ རང་ཉིད་ཁྲོས་མ་དཀར་མོ་དེ་གནས་འགྱུར་ནས། རང་ཉིད་མ་གཅིག་ལབ་ཀྱི་སྒྲོན་མ། །སྐུ་མདོག་དམར་མོ་གཅེར་བུ་རུས་པའི་རྒྱན་དྲུག་གསོལ་བ། ཕྱག་ཏུ་ཌཱ་དྲིལ་འཁྲོལ་ཞིང་འཁོར་མཁའ་འགྲོ་འབུམ་གྱིས་བསྐོར་ནས་བྲོ་ཁྲིག་ཁྲིག་གར་ཁྱུག་ཁྱུག་བྱེད་པར་གྱུར། ཌཱ་དྲིལ་འཁྲོལ་ཞིང་འཆམས་ནས་རོ་ལ་བསྐོར་བ་བྱེད་ཅིང་ཕཊཿ ཤར་དང་བཅས་ཏེ། རོ་སྟོད་ལ་རྡོག་ཐོ་གསུམ། ཕཊ་ཕཊ་ཕཊཿ མཁལ་ཁུང་གཡས་པ་ལ་རྡོག་ཐོ་གསུམ། ཕཊ་ཕཊ་ཕཊཿ མཁལ་ཁུང་གཡོན་པ་ལ་
རྡོག་ཐོ་གསུམ། ཕཊ་ཕཊ་ཕཊ། གཞོགས་གཡས་པ་ལ་རྡོག་ཐོ་གཅིག་རྒྱབ། ཕཊ། གཞོགས་གཡོན་པ་ལ་རྡོག་ཐོ་གཅིག་རྒྱབ། ཕཊ། དེ་ནས་བདུད་རྩི་རྐྱལ་པ་གང་དུ་བསྒོམས་ལ་ཁྱེར། ནད་ངན་ཡིན་ན་ཚེ་འདས་ཀྱི་རྣམ་ཤེས་རང་ལ་མི་བསྡུ། ནམ་མཁའི་མ་གཅིག་གི་ཐུགས་ཀར་འཕང་། ནད་འགོས་སམ་མི་འགོས་ཀྱི་རྣམ་རྟོག་མི་བྱ་བར་སྟོང་ཉིད་ཀྱི་ངང་དུ་བཞག་ནས་ཁྱེར། རོ་ཡི་སྤྱི་བོ་ལ་རང་མ་གཅིག་བསྒོམས། ༈ ཕུང་པོ་དེ་བདུད་རྩི་རྐྱལ་པ་གང་ལ་མཁའ་འགྲོ་མང་པོས་བསྐོར། ཤར་དུ་འགྲོ་ན་རྡོ་རྗེ་མཁའ་འགྲོས་སྣ་ཁྲིད། ལྷོར་རིན་ཆེན་མཁའ་འགྲོ། ནུབ་ཏུ་པདྨ་མཁའ་འགྲོ། བྱང་དུ་འགྲོ་ན་ལས་ཀྱི་མཁའ་འགྲོས་སྣ་ཁྲིད་ནས་འགྲོ་བར་བསྒོམ་མོ། །ཕཊ་ཕཊ་ཕཊ། བདུད་རྩིའི་རྐྱལ་པ་ལ་མཁའ་འགྲོ་འབུམ་གྱིས་བསྐོར་ནས་ཕྱོགས་སོ་སོའི་མཁའ་འགྲོ་མས་སྣ་ཁྲིད་པར་གྱུར། ཕཊ་ཕཊ་ཕཊ། དེ་ནས་འགྲོ་བའི་ས་ནི་སྔར་གྱི་དུར་རྙིང་མང་ས་ཡིན་ན་བཟང་། དུར་ཁྲོད་ཡིན་པའི་པས་མཁའ་འགྲོ་འདུ་བར་གསུངས། ས་རྒོད་ཡིན་ན་ས་དགྲ་མེད་པའི་ས་མིག་བཟང་པོར་འགྲོ། འགའ་ཞིག་གིས་གཅོད་ལུགས་ཡིན་ཟེར་ནས་ས་གང་ངན་ལ་གཏོར་བ་ནི་ཧ་མ་གོ་བ་ཡིན། གཅོད་ལུགས་ཡིན་མིན་གཉིས་ས་མིག་དགོས་པ་ལ་ཁྱད་མེད། གཅོད་ལུགས་མིན་ན་ས་བཟང་ཡང་ཀླུ་དང་ལྷ་འདྲེ་དྲག་པོ་གནས་ས་ན་མི་རུང་། གཅོད་ལུགས་ལ་གཉན་ན་བཟང་། གཅོད་ལུགས་མིན་ན་ས་འབེབས་དགོས། གཅོད་ལུགས་ལ་ས་འབེབས་མི་དགོས། གཞན་ལ་ཕྱོགས་
དང་གཟའ་སྐར་དུས་ཚོད་གལ་ཆེའོ། །གཅོད་ལུགས་ལ་དེ་རྣམས་རྩིས་ཀྱང་རུང་ལ་མ་བརྩིས་སྙེམས་ཐག་བཅད་ཀྱང་རུང་། ས་དགྲ་ཁྲམ་མིག་ཅེས་བྱ་སྟེ། གཅོད་གཞུང་ནས་ཀྱང་མི་རུང་བར་གསུངས་སོ། །དེ་ནས་དུར་ཁྲོད་དམ་གང་དུ་འགྲོ་བསམ་ས་དེར་རྒྱང་དམིགས་འཕེན་པ་ནི། ཕཊཿ རང་ཉིད་སྐད་ཅིག་གིས་ཕ་དམ་པ་སྐུ་མདོག་མཐིང་ནག་གཟི་བརྗིད་དང་ལྡན་པ་ཞིག་ཏུ་གྱུར། ཕཊཿ རང་གི་ཐུགས་ཀ་ནས་ལྕགས་ཀྱི་རྡོ་རྗེ་ནག་པོ་ཅིག་འཕྲོས་ནས་དུར་ཁྲོད་ལ་ཕོག་པས་རྡོ་རྗེ་དེ་ཨ་ཙ་ར་ནག་པོ་འཇིགས་སུ་རུང་བ་ཕྱག་གཡས་གྲི་གུག་མེ་འབར་བ་བསྣམས་པ་ཞིག་ཏུ་གྱུར། །ཕཊཿ གྲི་གུག་དེས་དུར་ཁྲོད་ལྷ་འདྲེ་དང་བཅས་པ་ལིང་གིས་བཀོག་ནས་ཁ་ཞབས་ལྡོག་སྟེ་ལེབ་ཀྱིས་བཀབ་པ་ལས་ལྷ་འདྲེ་འགུལ་འཆུག་མེད་པར་གྱུར། ཕཊཿ དེའི་སྟེང་དུ་ཨ་ཙ་ར་དེ་གསེར་ཞུན་མ་ལྟར་འོད་དུ་ཞུ་ནས་གཉན་ས་དུར་ཁྲོད་དེ་ལེབ་ཀྱིས་བཀབ་པས་ཞ་ལ་བྱས་པ་ལྟར་སེར་ཞུམ་མེ་སྲ་བརྟན་འགུལ་འཆུག་མེད་པར་གྱུར། ཕཊ་ཕཊ་ཕཊ། དེ་ནས་དུར་ཁྲོད་དམ་ས་མིག་ཏུ་ཕྱིན་ནས། ཌཱ་དྲིལ་འཁྲོལ་ཞིང་འཆམས་ལ་ས་མིག་བཙལ། གང་དུ་དགའ་བ་དེར། ཕྱོགས་བཞི་དབུས་དང་ལྔར་ཐོ་ལྔ་བརྩེགས་ལ་མཁའ་འགྲོ་སྡེ་ལྔར་བསྒོམ། ཐོ་དབུ་མའི་རྩེ་དེར་རོ་དེ་བཞག །དང་པོ་ཁ་
ནུབ། མགོ་བྱང་། གཞོགས་གཡས་ས་ལ་བཙུགས། ༈ དེ་ནས་དུར་ཁྲོད་ཟིལ་གྱིས་གནོན་ཅིང་དབང་དུ་སྡུད་པ་ནི། ཕཊ། རང་ཉིད་སྐད་ཅིག་གིས་མ་དུར་ཁྲོད་ཀྱི་བདག་མོ་ཁྲོས་མ་སྐུ་མདོག་དམར་ནག་ཞལ་གདངས་ཤིང་སྤྱན་གསུམ་བསྒྲད་པ། མཆེ་བ་གཙིགས་ཤིང་ལྗགས་འདྲིལ་བ། སྤྱི་བོར་སྟག་ཞལ་ངར་སྒྲ་སྒྲོག་པ། དུར་ཁྲོད་ཆས་བརྒྱད་སྐུ་ལ་གསོལ་བ་ཕྱག་ན་གསེར་གྱི་གྲི་གུག་དང་ཐོད་ཁྲག་བསྣམས་ནས་གར་ཐབས་སུ་འགྱིངས་བའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་ནག་མོ་རིགས་བཞིའི་མཁའ་འགྲོ་མ་དཔག་ཏུ་མེད་པ་འཕྲོས་ནས་ཟ་འདྲེ་ཤི་གཤེད་ཐམས་ཅད་རང་དབང་མེད་པར་གཡང་གཞིས་བྲབ་ཅིང་དེད་ནས་བེམ་རོ་ལ་ཐིམ་པར་གྱུར། ཕཊ་ཕཊ་ཕཊཿ བདེན་བརྡར་འགུགས་གཞུག་ལན་གསུམ་གྱིས་ལྷ་འདྲེ་གནོད་བྱེད་ཐམས་ཅད་རོ་ལ་བསྟིམ། མ་འདི་ནས་ནུབ་ཀྱི་ཕྱོགས་རོལ་ནས། །སོགས། གོང་ལྟར་གཡང་གཞི་རྩ་སྡུད་ཀྱི་བསྐུལ་པ་བྱེད་ཅིང་། གཡང་གཞི་ཕྱོགས་བཞི་ནས་གཡུག་ཅིང་ཕུང་པོ་ལ་བྲབ་སྟེ། མོ་གཡང་གཞི་ཤར་དུ་གཡུག་ཙ་ན། ཟེར་དུས་ཤར་དུ་གཡང་གཞིའམ་གཟན་ལྕག་རེ་གཡུག །རྡུལ་དུ་རློག་ཟེར་དུས་གཡང་གཞིའམ་གཟན་ལྕག་རོ་ལ་བརྒྱབ་བོ། །གཡང་གཞིའི་དམིགས་རྟེན་ར་ཐོང་གི་པགས་པ་མཉེན་མོ་གཅིག་རྒྱུན་དུ་ཚགས་བྱེད་སྲོལ་
ཡོད་དོ། །དེ་ལྟར་ཕྱོགས་བཞི་ཀ་ནས་འཆམས་ཤིང་བྱེད་པ་ཡིན་ནོ། །དེ་ལྟར་གནོད་བྱེད་ཐམས་ཅད་བཀུག་ནས་རོ་དང་དབྱེར་མེད་དུ་དམིགས་ལ། ཕཊཿ ཅེས་ལག་པ་གཡོན་ནས་འཐེན་ལ་གན་རྐྱལ་དུ་འཕང་ངོ་། ཕཊཿ རང་ཉིད་དུར་ཁྲོད་ཀྱི་བདག་མོའི་ཞབས་གཡས་པས་གནོད་བྱེད་ཟ་འདྲེའི་སྙིང་ག་ནས་མནན་པས་དབང་ཆེན་གསེར་གྱི་ས་གཞི་ལ་བཅར་ནས་རྡུལ་དུ་བརླག་པར་གྱུར། ཕཊ་ཕཊ་ཕཊཿ སྙིང་གར་ཕྱི་རྟིང་གཡས་པ་བཞག་ལ། ཕཊཿ རང་ཉིད་དུར་ཁྲོད་ཀྱི་བདག་མོ་ཁྲོས་མ་སྟག་གི་གདོང་པ་ཅན། འཇིགས་ལ་རྔམ་པའི་སྐུ་སྨད་གནམ་ལྕགས་ཀྱི་རྡོ་རྗེ་མེ་འབར་བ་རྭ་ཐམས་ཅད་ཕུར་བུ་རྣོ་དབལ་དང་ལྡན་པའི་རྭ་དབུས་མས་བེམ་རོ་དང་ཟ་འདྲེ་ཤི་གཤེད་དབྱེར་མེད་པའི་སྙིང་དཀྱིལ་དུ་གཟེར་ནས། གཡས་སྐོར་དུ་སྒ་ར་ར།། གཡོན་སྐོར་དུ་ཀྱི་ལི་ལི་འཁོར་བས། གནོད་བྱེད་ཟ་འདྲེའི་ཁ་ནས་ཁྲག་ལྷུད་ལྷུད། སྐད་ངན་ཙེར་ཙེར་བྱས་ནས་ཚེ་བསོད་བཀྲག་མདངས་ཐམས་ཅད་རང་ལ་ཕུལ་བས། ཚེ་བསོད་ནམས་བཀྲག་མདངས་གཟི་མདངས་ཐམས་ཅད་རང་དང་བསྲུང་བྱ་ལ་སིབ་སིབ་ཐིམ་པར་གྱུར། ཕཊ་ཕཊ་ཕཊཿ ཌཱ་དྲིལ་འཁྲོལ་ཞིང་། ཕཊ་ཤར་བྱེད། དམིགས་པ་དེ་བཟུང་ལ་རྐང་པ་
གཡས་བསྐུམ་ལ་གཡས་སྐོར་གསུམ། རྐང་གཡོན་བསྐུམ་ལ་གཡོན་སྐོར་གསུམ་བྱ། དེ་ནི་རོ་འདུལ་ཡིན་ནོ། ༈ །དེ་ནས་དམིགས་མེད་སྟོང་ཉིད་ངང་ནས་རོ་ཡི་སྟེང་ན་ཕར་མཆོང་ཚུར་མཆོང་གསུམ་དང་ཕཊ་ཤར་རེ་སྤྲད་པ་ནི་རོ་མནོལ་ཕབ་པ་ཡིན་ནོ།། ་ཕཊཿ ཟ་འདྲེ་ཤི་གཤེད་ཐམས་ཅད་སྐྱུར་མ་རླུང་གིས་དེད་པ་བཞིན་དུ་རོ་ལ་ཐིམ་ནས་དབྱེར་མེད་པར་གྱུར། ཕཊཿ རང་ཉིད་ཁྲོས་མ་ནག་མོས་རོའི་རྐང་འགགས་ནས་བཟུང་ནས་ནམ་མཁའི་ཁམས་སུ་ལན་གསུམ་གཡུགས་ནས་ལྕགས་སྲེག་གི་ས་གཞི་ལ་བརྡབས་པས། ཟ་འདྲེའི་སྙིང་ཚལ་པ་བརྒྱར་བཀས་ནས་ཟ་འདྲེ་དང་རོ་དང་བཅས་པ་རྗེས་མེད་དུ་བྱ་སྒོ་མེ་ལ་བསྲེགས་པ་ལྟར་གྱུར། ཕཊ་ཕཊ་ཕཊཿ རོའི་རྐང་པ་ནས་བཀྱགས་ལོ་ལན་གསུམ་ས་མལ་དུ་བརྔུབས་ལ། ཕཊཿ རང་ཉིད་མ་གཅིག་བྱི་རུའི་མདོག་ཅན་འོད་དང་ལྡན་ཞིང་སྟོང་གསུམ་གང་བ་ཉི་ཟླའི་སྤྱན་བསྒྲད་ཅིང་ཁྲོ་མོའི་ཆ་ལུགས་དང་ལྡན་པའི་ཐུགས་ཀ་ནས་ལས་བྱེད་ཀྱི་གཤིན་རྗེ་སྲིན་པོའི་གཟུགས་ལ་མ་ཧེ་ཁྲོས་པའི་གདོང་པ་ཅན་ཕྱག་ན་སྡིག་གྲི་ནག་པོ་མུན་པའི་མདོག་ཅན་མེ་འབར་བ་ཕྱིར་བ་གཅིག་འཕྲོས། རལ་གྲིས་རོའི་སྙིང་བཀས་ནས་ཟ་འདྲེ་ཤི་གཤེད་ཀྱི་སྲོག་དབུགས་སྙིང་ཁྲག་དང་བཅས་པ་གཤིན་
རྗེས་གསོལ་བར་གྱུར། ཕཊ་ཕཊ་ཕཊཿ རོའི་སྙིང་ཁ་བྲང་དེ་ལ་གྲིས་ཁྲམ་བྲིས་རྒྱ་གྲམ་དུ་གཤགས། ཕཊ། རང་ཉིད་སྐད་ཅིག་གིས་རྗེ་བཙུན་མ་མེ་ཡི་མདོག་ཅན་ཞིང་ཆེན་གྱི་སྟོད་གཡོགས། གཟིག་ལྤགས་ཀྱི་ཤམ་ཐབས་སྦྲུལ་ནག་གི་སྐེ་རགས་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པར་གྱུར། ཕཊ་ཕཊ་ཕཊཿ གྲི་གུག་གིས་བེམ་པོའི་པགས་པ་དེ་ཤགས་ཀྱིས་གཤགས་ནས་ཕྱལ་གྱིས་བཏིང་བས་ལྕགས་སྲེག་གི་ས་གཞི་དམར་ལམ་མེ་བར་གྱུར། ཕཊ་ཕཊ་ཕཊཿ གྲི་གུག་གིས་སྐེ་ནས་གསང་གནས་བར་དུ་གཤགས། ཡན་ལག་གི་རྒྱུད་ཐམས་ཅད་གཤགས། གྲི་ལྕགས་ཀྱི་གྲི་གུག་རྣོན་པོ་ཞིག་རྒྱུན་དུ་ཚགས་བྱ་དགོས་སོ།། ཕཊཿ ཟོ་འདྲེ་ཤི་གཤེད་མཉམ་པོར་འོང་བའི་བདུད་ཐམས་ཅད་ཟོ་ཁོག་དེའི་ནང་དུ་ཐིམ་པར་གྱུར། ཕཊ། རང་ཉིད་རྗེ་བཙུན་མས་ཟོ་ཁོག་དེ་ནམ་མཁའི་དབྱིངས་སུ་བཀྱགས་ནས་ལྕགས་སྲེག་གི་ས་གཞི་ལ་མར་བརྒྱབས་པས་བྱ་སྒྲོ་མེ་ལ་བསྲེགས་པ་ལྟར་རྗེས་མེད་དུ་སོང་། ཕཊ་ཕཊ་ཕཊཿ ཅེས་ལག་གཡས་ནས་བཟུང་ལ་ཁ་སྦུབ་ཏུ་འཕེན། ཕཊ། རང་ཉིད་ཀྱི་ཐུགས་ཀ་ནས་ལས་བྱེད་ཀྱི་མཁའ་འགྲོ་དམར་མོ་གྲི་གུག་དང་ལྕགས་ཀྱུ་འཛིན་པ་འཕྲོས་བེམ་རོ་དང་དབྱེར་
མེད་པའི་ཟ་འདྲེ་ཤི་གཤེད་ཀྱི་སྐེ་གྲི་གུག་གིས་རྦད་ཀྱིས་བཅད་པར་གྱུར། ཕཊ་ཕཊ་ཕཊཿ ཅེས་སྐེའི་མཚམས་ནས་བཅད་གཉའ་བ་བེམ་པོ་ལ་འབྱར་བར་བྱས། ཕཊཿ རང་ཉིད་ཡུམ་ཆེན་མོ་མཐིང་ནག་ཆར་སྤྲིན་གྱི་མདོག་ཅན་འཇིགས་སུ་རུང་བ། སྤྱན་གསུམ་ཉི་ཟླ་ལྟར་བསྒྲད་ཅིང་མཆེ་བ་གཙིགས་པ། དབུ་སྐྲ་ཁམ་ནག་ལྷོ་སྤྲིན་ལྟར་ནམ་མཁའི་དབྱིངས་སུ་འཁྱིལ་ཞིང་ལྷག་མ་ཐུར་དུ་གྲོལ་བ། སྟག་ཤམ་དང་སྦྲུལ་ནག་གི་ཆུན་པོ་མང་པོས་བརྒྱན་པ། སྐུ་ལས་ཡེ་ཤེས་ཀྱི་མེ་འབར་བ་གཅིག་ཏུ་གྱུར། ཕཊཿ ཟ་འདྲེ་ཤི་གཤེད་མཉམ་པོར་འོང་བའི་བདུད་དང་གནོད་བྱེད་ཐམས་ཅད་རང་དབང་མེད་པར་བེམ་པོ་འདི་ལ་ཐིམ་པར་གྱུར། ཕཊཿ ཕྱག་གཡས་དགྲ་སྟ་ངར་མས་གཏུབས་ནས་ཕྱོགས་ཕྱོགས་ཀྱི་ལྷ་འདྲེ་ཐམས་ཅད་ལ་བྱིན། ཅེས་རྐང་ལག་བཞི་སྟྭ་རེས་བཅད་ལ་ཕྱོགས་བཞིར་འཕངས། ཕཊཿ ཤར་ཕྱོགས་ཀྱི་ལྷ་འདྲེས་ཁྱེར། ཕཊཿ ལྷོ་ཕྱོགས་ཀྱི་ལྷ་འདྲེས་ཁྱེར། ཕཊཿ ནུབ་ཕྱོགས་ཀྱི་ལྷ་འདྲེས་ཁྱེར་ཕཊཿ བྱང་ཕྱོགས་ཀྱི་ལྷ་འདྲེས་ཁྱེར། ཕཊཿ ཅེས་ཐག་ཉེ་ས་དེར་འཕང་ལ་བཞག་པས། ལྷ་འདྲེ་ཐམས་ཅད་ཀྱིས་ཟོས་འཐུངས་ངོམ་ཞིང་ཚིམས་ནས་སྐྱིད་ལྷམ་མེ་སོང་བ་
དང་། ལེ་ལེན་བདས་ཏེ་སྡེ་བརྒྱད་གཅིག་གིས་གཅིག་ཟོས། མཐར་གཅིག་ཀྱང་མ་ལུས་པར་སྟོང་པ་ཉིད་དུ་གྱུར། ཕཊ་ཕཊ་ཕཊཿ དེ་ནས་མགོ་དེ་ལག་ཏུ་ཐོགས་ལ་འཆམས་ཤིང་རང་ཁྲོས་མར་བསྒོམས་ལ། ཧཱུྃ། ང་ནི་དུར་ཁྲོད་བདག་མོ་སྟེ། །ཡེ་ཤེས་ཁྲོས་མ་ནག་མོ་ཡིན། །མཁའ་འགྲོ་ཀུན་གྱི་གཙོ་མོ་ཡིན། །མ་མོ་ཀུན་གྱི་རྗེ་མོ་ཡིན། ཐུན་དང་ཟོར་གྱི་བདག་མོ་ཡིན། །དྲག་པོ་དཔལ་གྱི་ཐོད་ཟོར་འདི། །སྟེང་གི་ལྷ་ལ་མི་འཕེན་ནོ། །མཐོ་བ་རྣམས་ཀྱིས་ཞབས་ཡར་སྐུམས། །འོག་གི་ཀླུ་ལ་མི་འཕེན་ནོ། །དམའ་བ་རྣམས་ཀྱིས་དབུ་མར་ཆུམས། །བར་གྱི་གཉན་ལ་མི་འཕེན་ནོ། །བར་པ་རྣམས་ཀྱིས་སྐུ་བཟུར་ཅིག །གལ་ཏེ་སྐུ་ལ་ཕོག་སྲིད་ན། །ང་ནི་མ་ཉེས་མ་ལེན་ནོ། །ཉེས་ལེན་དགྲ་དང་བགེགས་ལ་ཆོད། །ཧཱུྃ། རུ་ཏྲ་བསྒྲལ་བའི་མགོ་ཟོར་འདི། །ལྕང་ལོའི་སྤྲིན་ནག་ཉི་ལི་ལི། །རྣ་བ་འབྲུག་སྒྲ་འུ་རུ་རུ། །ཁྲག་གི་ཆར་པ་སི་ལི་ལི། །སྡང་མིག་ཚྭ་ཚྭ་ཐུ་ལུ་ལུ། །སྣ་ནས་དུད་པ་ཕྱུ་རུ་རུ། །ཁ་ནས་མེ་འབར་ལྷབས་སེ་ལྷབ། །ལྕེ་ནས་གློག་དམར་ཁྱུགས་སེ་ཁྱུག །ཁ་གདངས་སོ་གཙིགས་ཁྲིགས་སེ་ཁྲིག །འཇིགས་པའི་
ཧ་སྒྲ་དི་རི་རི། །རཀྟ་སྲིན་པོའི་མགོ་ཟོར་འདི། །སྡང་བར་བྱེད་པའི་དགྲ་ལ་འཕེན། །དགྲ་དཔུང་བདུན་བརྒྱུད་རྩད་ནས་ཆོད། །གནོད་པར་བྱེད་པའི་བགེགས་ལ་འཕེན། །བགེགས་དཔུང་ཐལ་བ་རྡུལ་དུ་རློག །སངས་རྒྱས་བསྟན་པའི་སྤྱི་དགྲ་ལ། །དྲག་པོའི་མགོ་ཟོར་ཧྲི་ལི་ལི། །རྣལ་འབྱོར་བདག་གི་སྒོས་དགྲ་ལ། །དྲག་པོའི་མགོ་ཟོར་ཧྲི་ལི་ལི། །གནོད་བྱེད་ཟ་འདྲེ་ཤི་གཤེད་ལ། །དྲག་པོའི་མགོ་ཟོར་ཧྲི་ལི་ལི། །མཱ་ར་ཡ་ཡི་དུས་ལ་བབ། །ཨོཾ་བཛྲ་བྷ་ར་ཧཱི་ཀྲོ་ཏི་ཀཱ་ལི་ཧ་རི་ནི་ས། བྷོ་བྷོ་ཐུན་ཐུན་དགྲ་ལ་ཐུན། རྦད་རྦད་ཐུན་ཐུན་དགྲ་ལ་ཐུན། རཀཱ་མཱ་ར་ཡ་ཕཊཿ ཕཊ་ཕཊ་ཕཊཿ ཅེས་འཕང་ངོ་། །དགྲ་བགེགས་ཟ་འདྲེ་ཤི་གཤེད་ཀྱི་སྟེང་དུ་ཐོག་སེར་གཉིས་དུས་གཅིག་ལ་བརྒྱབ་པ་ལྟར་སོང་བར་བསྒོམ། ཡང་འགའ་ཞིག་གིས་ཕྱོགས་བཞི་ཀར་འཕེན་ཟེར་ཏེ། དེ་བྱས་ན་ལྷ་འདྲེ་དང་དཀར་ཕྱོགས་གཟུར་ས་མེད་པར་འགྱུར་བས་མི་ལེགས། རྒྱབ་རི་ལ་རྒྱབ་གཏད་ནས་ལུང་པའི་མདའ་ངོས་ལ་འཕེན་ནམ། ས་དགྲ་ཅུང་ཟད་འདུག་ན་དེ་ངོས་སུ་འཕེན་ནོ། །འགའ་ཞིག་གིས་ཁ་ངོ་ཚུར་བསྟན་ན་རྒྱུ་བ་ཡིན་པས་ལེགས་ཟེར་ཡང་། འདི་གཅོད་གཞུང་དུ་མི་གསལ་བས་འབར་བའི་གཏོར་ཆེན་པྲ་བརྟག་དང་བསྟུན་ནས། སྐེ་རང་ལ་བསྟན་སྤྱི་བོ་ཕར་བསྟན་ནས་ཁ་སྦུབ་ན། ན་ཚ་མི་འོང་
བས་བཟང་། སྐེ་ས་ལ་བཙུགས་ནས་ཁ་ཕར་གྱུན་དགྲ་ཐུབ་པས་བཟང་། སྐེ་ཚུར་བསྟན་འགྲམ་པ་གཡས་ས་ལ་བཙུགས་ན་ཕོ་རིགས་ལ་ན་ཚ་མེད། སྐེ་ཚུར་བསྟན་འགྲམ་པ་གཡོན་ས་ལ་བཙུགས་ན་མོ་རིགས་ལ་ན་ཚ་མེད། སྤྱི་བོ་ཚུར་བསྟན་ལ་ཁ་སྦུབ་ན་ཡོན་བདག་དངོས་ལ་ངན། སྤྱི་བོ་ཚུར་བསྟན་ནས་འགྲམ་པ་གཡས་ས་ལ་བཙུགས་ན་ཕོ་ལ་ངན། གཡོན་བཙུགས་ན་མོ་ལ་ངན། སྐེ་ས་ལ་བཙུགས་ནས་ཁ་ཚུར་གྱུ་ན་རང་ལ་ངན། ངན་པའི་རྟགས་བྱུང་ན་རང་ཁྲོས་མའི་ང་རྒྱལ་ཆེན་པོ་བྱས་ལ་ལན་གསུམ་འཕེན་ནོ། །དེ་ནས་བསྟབ་པ་བྱེད་དེ། ཕཊཿ ཐོ་ལྔ་པོ་དང་དབྱེར་མེད་པའི་མཁའ་འགྲོ་སྡེ་ལྔ་བར་མཚམས་སྟེང་འོག་ཐམས་ཅད་མཁའ་འགྲོ་མ་སྣ་ཚོགས་དང་བཅས་པ་ཐམས་ཅད་ཤ་ལ་དགའ་བ་ཁྲག་ལ་རྔམ་པ། ཉི་ཟླ་ཙམ་གྱི་སྤྱན་བསྒད་པ། གངས་རི་ཙམ་གྱི་མཆེ་བ་གཙིགས་པ། གློག་དམར་ཙམ་གྱི་ལྗགས་བརྐྱང་བ། གནོད་བྱེད་ཟ་འདྲེ་ཤི་གཤེད་སྲོག་གཅོད་དབུགས་ལེན་ཤི་འདྲེ་ཤི་སྲི་ཐམས་ཅད་ད་ལྟ་ཉིད་དུ་བཞེས་ཤིག་རོལ་ཅིག །ཕཊ་ཕཊ་ཕཊཿ ཡང་མགོ་དེ་ལག་ཏུ་ཐོགས་ལ། ཧཱུྃ་ཧཱུྃ། །མ་གནམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །དབུས་སངས་རྒྱས་
མཁའ་འགྲོའི་ཞལ་དུ་བསྟབ། །གཏི་མུག་ཕུང་པོ་ཞལ་དུ་བསྟབ། །ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །ཆོས་དབྱིངས་ཡེ་ཤེས་དངོས་གྲུབ་སྩོལ། །ཕཊ་ཕཊ་ཕཊཿ ཅེས་ཐོ་དབུས་མའི་དྲུང་དུ་འཕངས་སོ། །དེ་ནས་རྐང་པ་གཡས་དེ་བཟུང་ལ། མ་གནོམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །ཤར་རྡོ་རྗེ་མཁའ་འགྲོའི་ཞལ་དུ་བསྟབ། །ཞེ་སྡང་ཕུང་པོ་ཞལ་དུ་བསྟབ། །ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །མེ་ལོང་ཡེ་ཤེས་དངོས་གྲུབ་སྩོལ། ཕཊཿ ལག་གཡས་བཟུང་ལ། མ་གནམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །ལྷོ་རིན་ཆེན་མཁའ་འགྲོའི་ཞལ་དུ་བསྟབ། །ང་རྒྱལ་ཕུང་པོ་ཞལ་དུ་བསྟབ། །ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །མཉམ་ཉིད་ཡེ་ཤེས་དངོས་གྲུབ་
སྩོལ། །ཕཊཿ ལག་གཡོན་དེ་བཟུང་ལ། མ་གནམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །ནུབ་པདྨ་མཁའ་འགྲོའི་ཞལ་དུ་བསྟབ། །འདོད་ཆགས་ཕུང་པོ་ཞལ་དུ་བསྟབ། །ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །སོར་རྟོག་ཡེ་ཤེས་དངོས་གྲུབ་སྩོལ། །ཕཊཿ རྐང་པ་གཡོན་དེ་བཟུང་ལ། མ་གནམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །བྱང་ལས་ཀྱི་མཁའ་འགྲོའི་ཞལ་དུ་བསྟབ། །ཕྲག་དོག་ཕུང་པོ་ཞལ་དུ་བསྟབ་ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །བྱ་གྲུབ་ཡེ་ཤེས་དངོས་གྲུབ་སྩོལ། །ཕཊཿ ཅེས་ཕྱོགས་བཞིའི་ཐོ་བཞིའི་རྩར་འཕངས་ལ་མཁའ་འགྲོ་བཞི་འཁོར་དང་བཅས་པས་ཧབ་ཐོབ་ཏུ་གསོལ་བར་བསྒོམ། ཞལ་དུ་བསྟབས་པས་ལྷག་མེད་དུ་བསམ། དེ་ནས་བེམ་ཁོག་དེ་ལ་འཇུས་ནས། མ་གནམ་ས་ཙམ་གྱི་ཞལ་ཕྱེས་ལ། །གངས་རི་
ཙམ་གྱི་མཆེ་བ་གཙིགས། །རི་རབ་ཙམ་གྱི་ལྗགས་བརྐྱངས་ལ། །མ་བསྟབ་བོ་བསྟབ་བོ་ཞལ་དུ་བསྟབ། །སྣ་ཚོགས་མཁའ་འགྲོའི་ཞལ་དུ་བསྟབ། །འབྱུང་བཞིའི་ཕུང་པོ་ཞལ་དུ་བསྟབ། །ལུས་ཤ་ཁྲག་ཕུང་པོ་ཚོགས་སུ་རོལ། །སེམས་དམིགས་མེད་ཆོས་སྐུའི་དབྱིངས་སུ་སྤོར། །བདེ་བ་ཆེན་པོའི་དངོས་གྲུབ་སྩོལ། །ཕཊ་ཕཊ་ཕཊཿ ཅེས་དམིགས་མེད་དུ་ཡུད་ཙམ་བཞག་གོ །དེ་ཡན་ཆད་དམར་འགྱེད་བསྟབ་པའི་རིམ་པ་ཟ་འདྲེ་འདུལ་བའི་རིམ་པ་ཡིན་ནོ། ༈ །དེ་ནས་བདུད་རྩིའི་ཚོགས་མཆོད་ལ་བརྟེན་ནས་ཟ་འདྲེ་དང་ཁ་ཕྲལ་ཞིང་། བསོད་ནམས་ཀྱི་ཚོགས་རྫོགས་པར་བྱ་བ་ནི། རྐང་ལག་གཏོར་བ་ཐམས་ཅད་ཡར་བེམ་སྒོག་དང་མཉམ་དུ་བསྡུ། རྒྱས་པར་བྱེད་ན་ཚོགས་མཆོད་ཤ་ཆང་གཏོར་མ་ཡང་བཤམས་ལ། གཅོད་ཚོགས་རྒྱས་པར་བྱ། གཅོད་ཚོགས་གཞུང་གི་ཚོགས་ལས་དང་འདིའི་ཚོགས་ལས་གཉིས་པོ་གབ་སྤྲད་ཤེས་པར་བྱའོ། །འབྲིང་པོ་བྱེད་ན་ཚོགས་གཏོར་བཤམས་ལ་རང་ཁྲོས་མར་གསལ་བས། གཅོད་ཚོགས་ཀྱི་ཚོགས་ལས་རྐྱང་པ་འདི་གཉིས་གབ་སྤྲད་ཤེས་པར་བྱའོ། །བསྡུས་པ་ན་གཅོད་ཚོགས་ནས་ཁ་སབ་མི་དགོས་འདི་རང་གིས་ཆོག །ཚོགས་གཏོར་མི་དགོས་ཕུང་པོ་རང་གིས་ཆོག་གོ །ཕུང་པོ་དེ་ཆང་ཕུད་དམ་ཇ་ཕུད་མེད་ན་ཆུ་གཙང་གིས་བྲན་ལ། ཕག་ཁྲོས་རྒྱལ་བ་རྒྱ་མཚོ། བླ་མེད་རྒྱུད་སྡེ་གང་རུང་གིས་བདུད་རྩི་བྱིན་བརླབས་བྱས་ལ། ན་
མོ་ཐབས་དང་ཤེས་རབ་གཉིས་སུ་མེད་པའི་ཚོགསཀྱི་འཁོར་ལོ་རྒྱ་ཆེན་པོ་འདི། རང་བཞིན་གྱི་རྣམ་པར་དག་པ་སྐྱེ་བ་མེད་པ། ངོ་བོ་རྣམ་པར་དག་པ་ཨཱ་ལི་ཀཱ་ལི་མཚན་ཉིད་རྣམ་པར་དག་པ་ཤ་ལྔ་བདུད་རྩི་ལྔའི་རྒྱས་བཏབ་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། བྱིན་རླབས་ཀྱི་རྩ་བ་བཀའ་བརྒྱུད་བླ་མ་རྣམས་ཀྱི་ཞལ་དུ་ཁཱ་ཧི། །སྤྱི་དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ་ཁཱ་ཧི། ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ཀྱི་ཞལ་དུ་ཁཱ་ཧི། པཉྩ་ཨ་མྲྀ་ཏ་ལ་ཁཱ་ཧི། ག་ཎ་ཙཀྲ་ལ་ཁཱ་ཧི། ཞེས་བརྗོད་ལ། མ་ཤར་མི་འགྱུར་རྡོ་རྗེའི་དུར་ཁྲོད་ནས། །རྡོ་རྗེ་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་དཀར་མོའི་རང་བཞིན་ལ། །འཁོར་ཡང་དཀར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་
རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །མ་ལྷོ་ཕྱོགས་དུར་ཁྲོད་གཞལ་ཡས་ནས། །རིན་ཆེན་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་སེར་མོའི་རང་བཞིན་ལ། །འཁོར་ཡང་སེར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ།། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་
མོ་ས་མ་ཡ། །མ་ནུབ་ཕྱོགས་དུར་ཁྲོད་གཞལ་ཡས་ནས། །པདྨ་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་དམར་མོའི་རང་བཞིན་ལ། །འཁོར་ཡང་དམར་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག། །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །མ་བྱང་ཕྱོགས་དུར་ཁྲོད་གཞལ་ཡས་ནས། །ལས་ཀྱི་མཁའ་འགྲོ་བྱིན་རླབས་ཅན། །བྱིན་རླབས་ཅན་ལ་གསོལ་བ་འདེབས། །སྐུ་མདོག་ལྗང་མོའི་རང་བཞིན་ལ། །འཁོར་ཡང་ལྗང་མོ་འབུམ་གྱིས་བསྐོར། །དབུ་ལ་ཐོར་ཚུགས་ལྡེམས་
སེ་ལྡེམ། །དར་གྱི་ཅོད་པན་པུ་རུ་རུ། །དཔུང་པས་སོག་འགུལ་ཤིགས་སེ་ཤིག །སྐེད་པས་སྤྱི་ཀྱོག་ལིངས་སེ་ལིང་། །ཕྱག་གིས་གར་ཐབས་ཁྱུགས་སེ་ཁྱུག །ཞབས་ཀྱིས་བྲོ་བརྡུང་ཁྲིགས་སེ་ཁྲིག །ཞིང་ཆེན་གཡང་གཞི་ཤམས་སེ་ཤམ། །ཞུན་ཆེན་མར་མེ་ཏ་ལ་ལ། །མི་རྐང་གླིང་བུ་ཀྱུ་རུ་རུ། །མི་ཐོད་ཌཱ་རུ་ཁྲོ་ལོ་ལོ། །རུས་པའི་རྒྱན་ཆ་ཁྲིགས་སེ་ཁྲིག །ཚོགས་ཀྱི་འཁོར་ལོ་ཀྱི་ལི་ལི། །མ་ཚོགས་བདག་ཆེན་མོ་ཚོགས་ལ་བྱོན། །ཚོགས་ལ་བྱོན་ཅིང་ཚོགས་ལ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ས་མ་ཡ། །ཕཊ་ཕཊ་ཕཊ། ཧཱུྃ། མ་ཤར་གྱི་ཕྱོགས་ཀྱི་དུར་ཁྲོད་ནས། །རྡོ་རྗེ་མཁའ་འགྲོ་གཤེགས་སུ་གསོལ། །སྐུ་མདོག་དཀར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་
དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་སྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊཕཊཕཊཿ ཧཱུྃ། ལྷོ་ཡི་ཕྱོགས་ཀྱི་དུར་ཁྲོད་ནས། །རིན་ཆེན་མཁའ་འགྲོ་གཤེགས་སུ་གསོལ། །སྐུ་མདོག་སེར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆེས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱུན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊཕཊཕཊཿ ཧཱུྃ། ནུབ་ཀྱི་ཕྱོགས་ཀྱི་དུར་ཁྲོད་ནས། །པདྨ་མཁའ་འགྲོ་གཤེགས་སུ་གསོལ། །སྐུ་མདོག་དམར་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །
ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊ་ཕཊ་ཕཊཿ ཧཱུྃ། བྱང་གི་ཕྱོགས་ཀྱི་དུར་ཁྲོད་ནས། །ལས་ཀྱི་མཁའ་འགྲོ་གཤེགས་སུ་གསོལ། །སྐུ་མདོག་ལྗང་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་དང་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་
དབྱིངས་སུ་སྤོར། །ཕཊཕཊཕཊཿ ཧཱུྃ། དབུས་ཀྱི་ཕྱོགས་ཀྱི་དུར་ཁྲོད་ནས། །སངས་རྒྱས་མཁའ་འགྲོ་གཤེགས་སུ་གསོལ། །སྐུ་མདོག་ནག་མོ་མདངས་དང་ལྡན། །རིགས་ལྔའི་སངས་རྒྱས་དབུ་ལ་བཞུགས། །དུར་ཁྲོད་ཆས་ཀྱིས་སྐུ་ལ་བརྒྱན། །ཀེང་རུས་བམ་ཆེན་གདན་ལ་བཞུགས། །གྲི་གུག་ཐོད་ཁྲག་ཕྱག་ན་བསྣམས། །གཅེར་བུ་རུས་པའི་རྒྱན་ཆ་ཅན། །གར་ཐབས་བྱེད་ཅིང་རྒྱང་གླུ་ལེན། །དུར་ཁྲོད་བམ་ཆེན་འདི་ལ་ད་རོལ་ཅིག །ལས་ངན་རྣམ་སྨིན་འདི་ལ་ད་ཕྲོལ་ཅིག །དབུགས་ལེན་སྲོག་གཅོད་འདི་དང་ད་ཕྲོལ་ཅིག །གསོན་བདུད་གཤིན་ལྕགས་འདི་དང་ད་ཕྲོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །རིག་པ་ཆོས་ཀྱི་དབྱིངས་སུ་སྤོར། །ཕཊ་ཕཊ་ཕཊཿ ཧཱུྃ༔ མ་ཡུམ་ཆེན་ཐུགས་ལས་སྤྲུལ་པའི་སྲས། །ཤར་རྡོ་རྗེ་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །དུང་གི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་
ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་ཡོན་ཏན་སྤྲུལ་པ་ལས། །ལྷོ་རིན་ཆེན་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །གསེར་གྱི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་གསུང་གི་སྤྲུལ་པ་ལས། །ནུབ་པདྨ་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །ཟངས་ཀྱི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །
ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་ཕྲིན་ལས་སྤྲུལ་པ་ལས། །བྱང་ལས་ཀྱི་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །གཡུ་ཡི་བུད་མེད་ལྗང་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཧཱུྃ། མ་ཡུམ་ཆེན་ཐུགས་ཀྱི་སྤྲུལ་པ་ལས། །དབུས་སངས་རྒྱས་རིགས་ཀྱི་མཁའ་འགྲོ་མ། །ཏི་ར་རོ་ཡི་ཁྲི་སྟེང་ན། །མཐིང་གི་བུད་མེད་ཆེན་མོ་ལ། །རོ་སྒྲོལ་མཁའ་འགྲོ་འབུམ་གྱིས་བསྐོར། །གཅེར་བུ་རུས་པའི་རྒྱན་ཆ་ཅན། །གར་ཐབས་བསྒྱུར་ཞིང་ཐར་ལམ་བགྲོད། །རྒྱང་གླུ་ལེན་ཅིང་འཇིགས་སྒོ་གཅོད། །ཧ་ཧ་ཧི་ཧིའི་སྒྲ་སྒྲོག་ཅིང་། །མ་འདིར་གཤེགས་ཚོགས་ཀྱི་མཆོད་པ་བཞེས། །ཀེང་རུས་བམ་ཆེན་འདི་ལ་ད་རོལ་ཅིག །ཟ་འདྲེ་ཤི་གཤེད་འདི་དང་ད་ཕྲོལ་ཅིག །ཕཊ་ཕཊ་ཕཊཿ མགོ་ཡར་བཞག་ལ་
བྲན་ནས་ཚོགས་ཕུད་ལྟར་བྱས་ཏེ། ཨོཾ་ཨཱཿཧཱུྃ། ལན་གསུམ། ཨོཾ་སརྦ་མ་ཧཱ་གུ་རུ་ཨི་དཾ་བ་ལིཾ་ཏ་ག་ན་ཙཀྲ་ལ་ཁ་ཁ་ཁཱ་ཧི་ཁཱ་ཧི། ཟག་མེད་བདུད་རྩིའི་ཚོགས་ཕུད་དམ་པ་འདི་བསྔོ་ཞིང་། འབུལ་བའི་གནས་ནི། ཆོས་སྐུ་ཡུམ་ཆེན་མོ། རྒྱལ་བ་ཤཱཀྱ་ཐུབ་པ། འཇམ་དཔལ་སྨྲ་བའི་སེང་གེ །རྗེ་བཙུན་འཕགས་མ་སྒྲོལ་མ། མཁའ་འགྲོ་སུ་ཁ་སིདྡྷི། མཁས་པ་ཨཱརྱ་དེ་ཝ། ཕ་གཅིག་དམ་པ་སངས་རྒྱས། སྐྱོ་སྟོན་བསོད་ནམས་བླ་མ། མ་གཅིག་ལབ་ཀྱི་སྒྲོན་མ། སྲས་མཆོག་རྒྱལ་བ་དོན་གྲུབ། བཀའ་བབ་བུ་ཆེན་བཅུ་དྲུག །ཕ་རྒྱུད་ཐབས་ཀྱི་བརྒྱུད་པ། །མ་རྒྱུད་ཤེས་རབ་ཀྱི་བརྒྱུད་པ། སྲས་རྒྱུད་ཉམས་ཀྱི་བརྒྱུད་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། ཕཊ་ཕཊ་ཕཊཿ དེ་ནས་ཁོག་སྟོད་བཅད། བཅད་མ་ཐུབ་ན་ཁོག་སྟོད་ཡན་དེ་གྲི་ཡིས་གཤགས། ཆོས་གོས་ལེའུ་ཚུལ་དུ་ཁྲག་ཤ་ལྟར་གཤགས་ལ་བྲན་ནས། ཨོཾ་ཨཱཿཧཱུྃ། ལན་གསུམ། ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས། ཨཱ་ཝེ་ཤ་ཡ་ཨི་དཾ་བ་ལི་ཏ་ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། ཟག་མེད་བདུད་རྩི་ཚོགས་ཀྱི་མཆོད་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། ཡི་དམ་ཁྲོས་མ་ནག་
མོ། བདེ་ཆེན་དཀར་མོ། སེར་མོ་དོན་གྲུབ། དམར་མོ་སྒྲ་སྒྲོགས། སྣ་ཚོགས་མཐའ་ཕྱིན། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ་ལས་ཀྱི་མཁའ་འགྲོ། སྣ་ཚོགས་མཁའ་འགྲོ། འཇིག་རྟེན་མཁའ་འགྲོ། ཐམས་ཅད་མཁའ་འགྲོ། ཤ་ཟ་མཁའ་འགྲོ། མཁའ་འགྲོའི་ཕོ་ཉ་རྣམས་དང་། །གཞན་ཡང་ཕ་རྒྱུད་གསང་བ་འདུས་པ། མ་རྒྱུད་མ་ཧཱ་མཱ་ཡཱ། སྤྱི་རྒྱུད་དུས་ཀྱི་འཁོར་ལོ། སྙིང་པོ་དགྱེས་པ་རྡོ་རྗེ། ཡང་སྙིང་འཁོར་ལོ་བདེ་མཆོག་གི་ལྷ་ཚོགས་འཁོར་དང་བཅས་པའི་ཞལ་དུ་ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། ཕཊ་ཕཊ། སྐེད་པ་དེ་བཅད་ལ་བྲན། བཅད་མ་ཐུབ་ན་རི་མོ་བྲིས་ལ། སྐེད་པ་ལ་ཆོས་གོས་རིས་སུ་གཤགོས་ལ་བྲན་ནས། ཨོཾ་ཤྲཱི་མ་ཧཱ་ཀཱ་ལ་མ་ཧཱ་ཀཱ་ལཱི་ཨི་དཾ་བ་ལི་ཏ་ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། དམ་རྫས་བདུད་རྩི་ཚོགས་ཀྱི་མཆོད་པ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། དཔལ་ཡེ་ཤེས་ཀྱི་མགོན་པོ་བེར་ནག་པོ་ཅན་ཕྱག་བཞི་པ། ཕྱག་དྲུག་པ། གུར་གྱི་མགོན་པོ། དཔལ་ལྡན་ལྷ་མོ་རང་བྱུང་གི་རྒྱལ་མོ། དུད་པའི་སོལ་བ་མ། རེ་མ་ཏི་མཆེད་གསུམ། སྤྱང་ཞོན་ལྷ་མོ་མཆེད་
གསུམ། ཞིང་སྐྱོང་སེང་གདོང་ཡབ་ཡུམ། དུར་ཁྲོད་ཀྱི་བདག་པོ་བདག་མོ། ལས་བདག་མཚན་མོ་སྒྲ་སྒྲོགས། བདུད་མགོན་ཏྲཀཱད། སྲིན་མགོན་ཐོད་ཕྲེང་ཅན། གཉན་མགོན་ཞལ་བཞི་པ། གཞན་ཡང་ནག་པོ་སྟོང་། ཤ་ཟ་འབུམ། མ་མོ་བྱེ་བ། གནོད་སྦྱིན་ཁྲི། མཁའ་འགྲོ་བསམ་གྱིས་མི་ཁྱབ་པ་ཐམས་ཅད་ཀྱི་ཞལ་དུ་ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། ཕཊ་ཕཊ་ཕཊཿ ཁོག་སྨད་བཅད་དེ་བྲན། བཅད་མ་ཐུབ་ན་གཤགས་ལ་བྲན། ཨོཾ་ཨཱཿཧཱུྃ། བདུད་རྩི་ཚོགས་ཀྱི་འཁོར་ལོ་རང་རང་གི་ཡིད་དང་མཐུན་པའི་ལོངས་སྤྱོད་རྒྱ་ཆེན་པོ་འདི༔ བཀའ་སྣང་ཞིང་སྲིད་པའི་ལྷ་འདྲེ་བགེགས་རིགས་ལན་ཆགས་ཀྱི་བདག་པོ་བདག་མོ་ཁྱད་པར་དུ་ས་ཆ་ཡུལ་རིས་འདི་ན་གནས་པའི་ལྷ་འདྲེ། དཀར་པོ་ལྷ་ཡི་སྡེ་ཚོགས། ནག་པོ་བདུད་ཀྱི་སྡེ་ཚོགས། དམར་པོ་བཙན་གྱི་སྡེ་ཚོགས། ཁྲ་བོ་གཟའ་ཡི་སྡེ་ཚོགས། སེར་པོ་གཉན་གྱི་སྡེ་ཚོགས། སྔོན་པོ་ཀླུའི་སྡེ་ཚོགས། སྨུག་པོ་དམུ་ཡི་སྡེ་ཚོགས། ལྗང་གུ་ས་བདག་གི་སྡེ་ཚོགས། ཕ་རི་གཡས་ལ་གནས་པ། ཚུ་རི་གཡོན་ལ་གནས་པ། མདུན་རི་རྒྱབ་རི་ལ་གནས་པ། དུར་ཁྲོད་འདི་ལ་གནས་པ། དུར་ས་འདི་ལ་གནས་
པའི་ལྷ་འདྲེ་རྣམས་ཀྱི་ཞལ་དུ་ཟག་མེད་ཡེ་ཤེས་ཀྱི་བདུད་རྩི་རང་རང་གི་ཡིད་དང་མཐུན་པའི་ལོངས་སྤྱོད་རྒྱ་ཆེན་པོ་འདི་འབུལ་ལོ། །གཞན་ཡང་བཙན་རྒོད་ཟངས་རི་འཁྱིལ་པ། ཤམ་པོ་གཟའ་བདུད་མགོ་དགུ། ཀླུ་རྒྱལ་དྲག་པོ་ཟླ་སྐྱོང་།། བོད་ཁམས་བརྟན་མ་བཅུ་གཉིས་རྣམས་ཀྱི་ཞལ་དུ་འབུལ་ལོ། །ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། གཞན་ཡང་འགྲོ་བ་རིགས་དྲུག་གི་སེམས་ཅན་ཐམས་ཅད་ལ་ཟག་མེད་བདུད་རྩི་ཚོགས་ཀྱི་འཁོར་ལོ་རྒྱ་ཆེན་པོ་རང་རང་ཡིད་དང་མཐུན་པའི་ལོངས་སྤྱོད་རྒྱ་ཆེན་པོ་འདི་སྦྱིན་ནོ། །བསྔོའོ། །ག་ཎ་ཙཀྲ་ལ་ཁ་ཁ་ཁཱ་ཧི་ཁཱ་ཧི། དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལན་ཆགས་བུ་ལོན་བྱུང་གྱུར་ཅིག །རྣམ་བཞིའི་མགྲོན་གྱི་ཚོགས་རྣམས་ལ། །ཚད་མེད་མཆོད་སྦྱིན་འདི་བསྔོས་པས། །ཚེ་འདས་ཚོགས་རྫོགས་སྒྲིབ་བྱང་ནས། །མྱུར་དུ་སངས་རྒྱས་ཐོབ་པར་ཤོག །ཕཊ་ཕཊ་ཕཊཿ ཚོགས་གཏོར་ཚོགས་རྫས་ཤ་ཆང་ཡོད་ན་སྐབས་འདིར་རོལ་ལ། གཟིགས་ཤིང་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱ་མི་རུང་། །བྲམ་ཟེ་ཁྱི་
དང་གདོལ་པ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཞེས་གུས་པ་དང་བཅས་པས་དྲངས་ལ། སློབ་དཔོན་གྱིས་ཀྱང་པད་ཀོར་དང་བཅས་པས། ཧཱུྃ། བདེ་བར་གཤེགས་པ་ཆོས་ཀྱི་སྐུ། །འདོད་ཆགས་དྲི་མ་དང་བྲལ་བའི། །གཟུང་དང་འཛིན་པ་རྣམ་པར་སྤང་། །དེ་ཁོ་ན་ཉིད་ལ་བདག་ཕྱག་འཚལ། །ཨ་ཧོསུ་ཁ། ཞེས་བརྗོད་པར་བྱའོ། །ཨོཾ་ཨཱཿཧཱུྃ། ལྷག་མ་བདུད་རྩིའི་རྒྱ་མཚོ་ཆེན་པོ་འདི། ཁས་ཞན་པ་དབང་ཆུང་བ་ཕུད་ལ་མི་དབང་བ། ལྷག་མ་ལ་རེ་བ་རྣམས་ལ་བདུད་རྩི་ལྷག་མའི་གཏོར་མ་འདི་བསྔོས་པས་ཚིམ་པར་ཟོ་ཞིག །ཨོཾ་ཨུཙྪིཥྛ་བ་ལི་ཏ་ཁཱ་ཧི། ཕཊཕཊཕཊཿ ཕཊཿ རང་ཉིད་མཁའ་འགྲོ་མ་དམར་མོ་ལྕགས་ཀྱུ་དང་ཐོད་པ་འཛིན་པའི་འོད་ཟེར་གྱིས་ལྷ་འདྲེ་དུར་སྲི་ཐམས་ཅད་ཀྱི་ཚེ་བསོད་ནམས་བཀྲག་མདངས་ཐམས་ཅད་བསྡུས་ནས་ཐོད་པའི་ནང་དུ་ཐིག་ལེ་དཀར་དམར་མཐིང་གསུམ་དུ་གྱུར་ནས་རང་ཉིད་དང་བསྲུང་བྱ་ལ་ཐིམ་པར་གྱུར། ཕཊ་ཕཊ་ཕཊཿ ཅེས་དངོས་གྲུབ་བླང་ངོ་། །དེ་ནས་ཚོགས་བྲོ་བརྡུང་ཞིང་ཚོགས་མགྲོན་སྤྱན་དྲངས་པ་རྣམས་གཤེགས་ཏེ། ཌཱ་དྲིལ་དང་བཅས་པས་ཕྱོགས་བཞིར་ཁ་རྒྱུ་ནས། འགྲོ་སྟངས་བར་འཆམས་ནས་ཐོ་རྣམས་བསྒྱེལ་ཞིང་མཁའ་འགྲོ་མས་ཚེ་འདས་
ཞིང་ཁམས་སུ་ཁྲིད་པར་བསྒོམས་ལ། ཧཱུྃ། ཤར་ཕྱོགས་རྡོ་རྗེ་མཁའ་འགྲོའི་བྲོ། །རྡོ་རྗེ་མཁའ་འགྲོས་བྲོ་བརྡུངས་པས། །ཚེ་འདས་མངོན་དགར་ལམ་སྣ་དྲོངས། །མངོན་དགར་སླེབ་པར་བྱིན་གྱིས་རློབས། །ཕཊ་ཕཊ་ཕཊཿ ལྷོ་ཕྱོགས་རིན་ཆེན་མཁའ་འགྲོའི་བྲོ། །རིན་ཆེན་མཁའ་འགྲོས་བྲོ་བརྡུངས་པས། །དཔལ་དང་ལྡན་པར་ལམ་སྣ་དྲོངས། །དཔལ་ལྡན་སླེབ་པར་བྱིན་གྱིས་རློབས། །ཕཊཿཕཊཿ་ཕཊཿ ནུབ་ཕྱོགས་པདྨ་མཁའ་འགྲོའི་བྲོ། །པདྨ་མཁའ་འགྲོས་བྲོ་བརྡུངས་པས། །བདེ་བ་ཅན་དུ་ལམ་སྣ་དྲོངས། །བདེ་ཆེན་སླེབ་པར་བྱིན་གྱིས་རློབས། །ཕཊཿཕཊཿཕཊཿ བྱང་ཕྱོགས་ལས་ཀྱི་མཁའ་འགྲོའི་བྲོ། །ལས་ཀྱི་མཁའ་འགྲོའི་བྲོ་བརྡུངས་པས། །ལས་རབ་རྫོགས་པར་ལམ་སྣ་དྲོངས། །ལས་རབ་སླེབ་པར་བྱིན་གྱིས་རློབས། །ཕཊཿཕཊཿཕཊཿ དབུས་ཕྱོགས་སངས་རྒྱས་མཁའ་འགྲོའི་བྲོ། །སངས་རྒྱས་མཁའ་འགྲོའི་བྲོ་བརྡུངས་པས། །འོག་མིན་གནས་སུ་ལམ་སྣ་དྲོངས། །འོག་མིན་སླེབ་པར་བྱིན་གྱིས་རློབས། །ཕཊཿཕཊཿཕཊཿ ཚོགས་མགྲོན་ཐམས་ཅད་རང་རང་གི་གནས་སུ་བཛྲ་མུཿ ཕཊ་ཕཊ་ཕཊ་ཕཊ་
ཕཊཿ ཕཊཿ དུར་ཁྲོད་གཞལ་ཡས་ཁང་གྲུ་བཞིའི་སྟེང་པད་ཉིའི་གདན་གྱི་སྟེང་དུ་མ་ཡེ་ཤེས་ཀྱི་མཁའ་འགྲོ་མ་ཁ་ནས་མེ་དཔུང་འབར་བར་གྱུར། ཕཊཿ རང་ཉིད་ཁྲོས་མའི་ཐུགས་ཀ་ནས་འོད་ཟེར་འཕྲོས་པས། བཀའ་དང་དམ་ལ་མི་གནས་པའི་གནོད་བྱེད་ཟ་འདྲེ་ཐམས་ཅད་བཀུག་ནས་མཁའ་འགྲོ་མའི་ཞལ་དུ་བསྟབས་པས་དངོས་མེད་དུ་བསྲེགས་པར་གྱུར། ཕཊཿཕཊཿཕཊཿ ཕཊཿཕཊཿཕཊཿ ཕཊ་ཕཊ་ཕཊཿ དམིགས་པ་རེ་དང་ཕཊ་རེ་སྤྲད། ཕཊཿ དུར་གྱི་འོག་ཏུ་ལྕགས་ཁང་གྲུ་གསུམ་པའི་ནང་དུ་བཀའ་དང་དམ་ལ་མི་གནས་པའི་གནོད་བྱེད་དུར་སྲི་ཐམས་ཅད་ཚུད་པར་གྱུར། ཕཊ། གནམ་ལྕགས་ཀྱི་འཁོར་ལོ་རྩིབས་བརྒྱད་པས་ཁ་བཅད་པར་གྱུར། ཕཊ། གཞལ་ཡས་ཁང་མཁའ་འགྲོ་དང་བཅས་པ་གནས་འགྱུར་ནས། གསེར་གྱི་མཆོད་རྟེན་བང་རིམ་དགུ་པར་གྱུར་ནས། གནོད་བྱེད་ཟ་འདྲེ་ཐམས་ཅད་བསྐལ་པའི་བར་དུ་མི་ཐར་བར་མནན་པར་གྱུར། །ཕཊཿཕཊཿཕཊཿ འོ། ས་ཆ་འདི་ཡི་ལྷ་འདྲེ་མཐུ་བོ་ཆེ་ཁྱེད་རྣམས་ཉོན་ཅིག །གནོད་བྱེད་ཟ་འདྲེ་ཤི་གཤེད་འདི་རྣམས་ཁྱོད་གཏད་པ་ཡིན་པས་མ་ཤོར་ཅིག །ནོན་ཅིག །
ཟུངས་ཤིག །ཆིངས་ཤིག །གལ་ཏེ་ཤོར་ན་ཡེ་ཤེས་ལྷ་ཡི་དམག་འདྲེན། གནམ་ས་ཁ་ཞབས་ལྡོག །ཁྲག་སྣའི་ཐབ་བཏང་། རྫས་རྒོད་ཀྱི་དུད་པས་བདུག་་ཁྱེད་རྣམས་རྡུལ་དུ་བརླག །དེ་བས་ཟ་འདྲེ་མ་ཤོར་ཅིག །ཁྱེད་ལ་མཐུ་སྟོབས་ཅི་གདའ་ལྟའོ། །ཞེས་འོ་འབོད་པ་བྱའོ། །ཕུང་པོ་ཤ་ཁྲག་གི་ལྷག་མ་འདི། ཤ་ཐམས་ཅད་བདུད་རྩིའི་ལོངས་སྤྱོད། ཁྲག་འོ་མའི་རྒྱ་མཚོ། དཀར་གསུམ་མངར་གསུམ། ཙནྡན་གྱི་ནགས་ཚལ། གུར་གུམ་གྱི་སྤང་རི། རིན་ཆེན་འབྲུ་སྨན་དར་ཟབ་སྣ་ཚོགས་ཀླུ་དང་གཞི་བདག་ཐམས་ཅད་ལ་ཅི་འདོད་པའི་ལོངས་སྤྱོད་ཕུན་སུམ་ཚོགས་པས་ས་ཕྱོགས་འདི་མེར་གྱིས་གང་བར་གྱུར། ཕཊ་ཕཊ་ཕཊཿ ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ཕཊ་ཕཊ་ཕཊཿ ཅེས་བརྗོད་འདི་བསྡུས་པའི་ལུགས་ཡིན། རྒྱས་པར་གཅོད་ཚོགས་གཞུང་ལྟར་བྱས་ནས་པགས་པ་བཤུས་ནས་ཤ་ཐམས་ཅད་ལྷུ་རེ་རེ་ནས་བཀྲལ་ནས། ལྷ་རེ་རེ་ནས་བྲན་ལ། དུར་ཁྲོད་ཀྱི་མཁའ་འགྲོའི་ཚོགས་ལས་དུས་སོ་སོར་བསྔོ་དགོས་སོ། །དེ་ནས་ཕྱི་མིག་མི་ལྟ་བར་ཁྱིམ་དུ་འོང་།
གཞན་ཐམས་ཅད་སྐྱུགས་མི་བྲོ་བ་དང་བེམ་རོ་དང་ཚོགས་འཁོར་བསྐོར་བ་ཡང་གསང་སྤྱོད་ཡིན་པས། རང་དང་གཅོད་གཡོག་གི་གོས་དང་ལག་པ་བཀྲུས་ནས་མི་མངོན་པར་བྱའོ། །དེ་ལྟར་རོ་བཤའ་འདི་ལ་མནན་བསྲེག་འཕང་གསུམ་ཚང་བས་གཤེད་འདུལ་གྱི་གོ་ཆོད་པར་རྩི་སྲོལ་ཡོད་ལ། གལ་ཆེ་ན་སླར་ཡང་གཅོད་ཚོགས་དང་གཤེད་འདུལ་ལ་རྟགས་ཐོན་པར་བྱའོ། །ཨེ་མ་ཡུམ་ཆེན་ཌཱཀི་གདམས་ངག་ཁྱད་པར་ཅན། །རོ་བཤའ་ཞེས་བྱ་ཀུན་ལ་ཡོངས་གྲགས་ཀྱང་། །དེང་སང་ཕྱག་ལེན་ཇི་ལྟར་ཤེས་པ་དཀོན། །རོ་བཤའ་གྲངས་མེད་བྱས་པའི་གཅོད་པ་རྣམས། །ཕྱག་ལེན་དམིགས་རིམ་བློ་གཏད་བྲལ་བཞིན་དུ། །མི་རུང་པ་ཡི་བྱ་བ་ཐམས་ཅད་ཀུན། །གཅོད་ལུགས་ཡིན་པར་རློམས་ནས་ས་དཔྱད་དང་། །གཟའ་སྐར་དུས་ཚོད་ས་བདག་ལ་སོགས་པ། །དཀར་ནག་རྩིས་གཞུང་ཐམས་ཅད་ཁྱད་དུ་གསོད། །མི་རུང་སྣ་དགུ་ཡིད་ལ་གང་དྲན་སྤྱོད། །ཀྱེ་མ་སྦྱིན་བདག་ཕལ་ཆེར་བསོད་ནམས་ཟད། །གཉིས་ཕུང་རང་མགོ་རང་གཡོག་བྱེད་པ་མང་། །དེ་དག་རྣམས་ལ་བྱམས་པས་མ་བཟོད་ནས། །དུར་གཅོད་རྒྱ་མཚོ་ཙམ་གྱི་བཅུད་བསྡུས་ནས། །ཞལ་ཤེས་ངག་ཁྲིད་མང་པོས་མཚམས་སྦྱར་ཏེ། །རྒྱས་བསྡུས་འཚམས་ཤིང་ལག་བླངས་བདེ་བ་འདི། །རང་གིས་དབོན་པོ་གཅོད་པ་ཆོས་འཕེལ་གྱིས། །ཡང་ཡང་བསྐུལ་ཕྱིར་ལེགས་པར་སྦྱར་བའོ། །འདི་བྲིས་འགལ་འཁྲུལ་ཉེས་པ་ཅི་མཆིས་པ། །མ་གཅིག་དུར་ཁྲོད་ཌཱཀིའི་ཚོགས་ལ་བཤགས། །འདི་བྲིས་དགེ་བས་འདི་དང་འབྲེལ་ཚད་ཀུན། །ཚེ་
འདས་བདེ་ཆེན་ཞིང་ཁམས་བགྲོད་པ་དང་། །སྦྱིན་བདག་རྣམས་ཀྱང་བཀྲ་ཤིས་བདེ་ལེགས་འཕེལ། །གཅོད་པ་བདུད་བཞིའི་གཡུལ་ལས་རབ་རྒྱལ་ནས། །རྒྱལ་བའི་ཡུམ་གྱི་གོ་འཕང་མྱུར་ཐོབ་ཤོག །དེ་སྐད་སྨྲ་བ་མ་གཅིག་ལབ་སྒྲོན་ལ། །དད་པའི་ཡིད་ཅན་རཱ་གའི་མིང་ཅན་ནོ། །འདི་ཉིད་ཕྱོགས་དུས་ཀུན་ཏུ་དར་གྱུར་ཅིག །སརྦ་མངྒ་ལཾ། །བྷ་ཝན་ཏུ། དགེའོ། །བཀྲ་ཤིས་པར་ཤོག། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།