༈ ཞལ་གདམས་ཀུན་ཏུ་རྒྱལ་བའི་སྤྲིན་ཚོགས།

ཨོཾ་སྭཱསྟི། ཀུན་ཏུ་རྒྱལ་བའི་སྤྲིན་ཚོགས་སྤྲོ་དང་བསྡུ། །མ་ལུས་བྱེད་པོ་ལག་ན་པདྨོ་ཅན། །དབྱེར་མེད་འཁོར་ལོའི་མགོན་པོ་བདེ་བ་ཆེ། །དེ་ཡི་བྱང་ཆུབ་མཆོག་བར་བསྲུང་གྱུར་ཅིག །གང་ཁྱེད་ཡུལ་དབུས་མཁས་མང་འདུ་བའི་ལྗོངས། །ཐུབ་བསྟན་སྒོར་ཞུགས་ངུར་སྨྲིག་གོས་ཀྱིས་མཛེས། །སྔོན་བསགས་མ་སྨད་ཤེས་རབ་བསླབ་གསུམ་རྒྱས། །མཚུངས་མེད་མགོན་གྱིས་རྗེས་བཟུང་དམ་པར་ངེས། །བདག་ནི་མཐའ་འཁོབ་ཡུལ་སྐྱེས་ཆོས་ཀྱིས་དབུལ། །སྐྱེ་དང་སྦྱངས་པས་མངོན་པར་མཐོ་བའང་མིན། །འོན་ཀྱང་མཆོག་གྱུར་མང་པོས་རྗེས་བཟུང་མཐུས། །ཁྱེད་ཞལ་མ་བསྐྱུང་ཙམ་དུ་འདི་སྐད་གསོལ། །རྣམ་དཀར་ཀུན་གྱི་སྔོན་འགྲོ་དགེ་བའི་ཆོས། །མཐའ་དག་བསྐྱེད་པའི་གཞི་རྟེན་དད་པ་སྟེ། །འདོད་འདུན་མི་ཕྱེད་དག་པའི་དད་པ་ཉིད། །རྒྱུད་ལ་བསྐྱེད་པ་ཤིན་ཏུ་གལ་ཆེ་མོད། །དེ་ཡང་ཇི་བཞིན་བསྐྱེད་པའི་གཞི་རྟེན་ནི། །རྫོགས་སངས་རྒྱས་ལ་ཡིད་ཆེས་སྐྱེ་བ་སྟེ། །དེ་ཡི་མཛད་པ་ཆེ་བའི་ཡོན་ཏན་རྣམས། །རྟག་པར་རྗེས་དྲན་སྙིང་གི་དཀྱིལ་དུ་བཞག །ཁམས་གསུམ་གཟུགས་འདོད་གནས་སྐྱེ་འགྲོ་བ་ཀུན། །ཡོངས་སུ་སྡོམ་ཀྱང་མཁའ་ཁམས་བ་སྤུའི་ཁྱོན། །གཟུགས་མེད་བག་ཉལ་སེམས་ཅན་ཆ་ཤས་ཡང་། །བཟུང་བར་ནུས་མིན་འཁོར་སེམས་རྫོགས་མཐའ་ཅི། །ལུས་ཅན་འགྲོ་བ་དྲུག་ལས་ལྷ་མིའི་རྟེན། །ཆོས་དཀོན་དེ་ལས་དལ་འབྱོར་ཕུན་ཚོགས་ལུས། །ངོ་བོ་རྒྱུ་དཔེ་རྣམ་གྲངས་དུ་མ་ནས། །རྙེད་པར་དཀའ་ཚུལ་དུ་མའི་སྒོ་ནས་བརྟག །མི་ཡི་ལུས་འདི་ཤིན་ཏུ་འཇིག་སླ་སྟེ། །དྲི་ཟའི་གྲོང་དང་ཆུ་ཡི་ལྦུ་བ་འདྲ། །གནོད་མང་ཕན་ཉུང་འཆི་རྐྱེན་དུ་མ་ལ། །བསམ་བྱས་སྙིང་ནས་མི་རྟག་སྐྱོ་ཤས་བསྐྱེད། །དེས་ན་ཅུང་ཟད་ཁོམ་ལོང་ལྡན་དུས་འདིར། །མགོ་ལ་མེ་ཤོར་པང་དུ་སྦྲུལ་ཞུགས་བཞིན། །མངོན་མཐོ་ངེས་ལེགས་ལམ་ལ་མ་བརྩོན་ན། །དོན་མེད་སྟོང་ལས་མཁན་དུ་ཅིས་མི་འགྱུར། །འཁོར་བའི་མཚན་ཉིད་འབར་བའི་མེ་འོབས་དང་། །ཚེར་མའི་གདན་དང་ཀིམ་པའི་འབྲས་བུ་བཞིན། །སྡུག་བསྔལ་གསུམ་གྱིས་འཁོར་བ་ཐོག་མེད་ནས། །ད་ལྟའི་བར་དུ་གདུང་འདི་ཡིད་རེ་སྐྱོ། །ད་ཡང་དེ་ཡི་བཟློག་ཐབས་མ་འབད་ན། །ནམ་མཁའ་ཇི་སྲིད་འཁོར་བའི་རྒྱ་མཚོ་རུ། །སྡུག་བསྔལ་འཛིན་འཁྲིའི་ཉེར་ཁེང་བར་མེད་དུ། །གཙེར་འདི་རང་གིས་རང་ལ་སྙིང་རྗེས་ལྟོས། །ཆོས་དབྱིངས་ཁམས་ལ་གཞན་པའི་ཆོས་ཐམས་ཅད། །རྒྱུ་རྐྱེན་རྟེན་འབྲེལ་རོལ་པ་ལས་གྲུབ་ན། །མི་དགེའི་ལས་ཀྱི་ངན་སོང་དུཿཁ་དང་། །དགེ་ཡང་བདག་ལྡན་མཐོ་རིས་འགྱུར་བཅས་རྒྱུ། །རྣམ་ཀུན་བདེ་བ་ཐར་པའི་ལམ་བཟང་ནི། །དེ་བཞིན་གཤེགས་པའི་བསྟན་ལས་གཞན་ཡོད་མིན། །དེས་ན་དེ་གསུང་ལས་འབྲས་དམ་པའི་ཆོས། །ཅི་ནུས་སྤྱོད་པ་གནད་ཀྱི་ཉམས་ལེན་སྟེ། །སྔོན་བྱོན་རྒྱལ་བ་སྲས་སློབ་ཀུན་གྱི་ཚུལ། །འདི་གཟིགས་ཐར་ལ་གཤེགས་པར་ངེས་བྱས་ནས། །སྔོན་འགྲོར་མིང་བཏགས་སྣང་ཆུང་འདི་མི་འཛིན། །ཉིན་མཚན་ཐུན་དྲུག་བསྒོམ་དགོས་ཆོས་མཆོག་ཡིན། །སྡུག་བསྔལ་རྒྱུན་ལས་སྒྲོལ་བའི་སྐབས་གནས་ནི། །མཚུངས་པ་གཞན་མེད་དཀོན་མཆོག་རིན་ཆེན་གསུམ། །འདི་ནས་བྱང་ཆུབ་བར་དུ་སྐྱབས་ཀྱི་ཡུལ། །རེ་གནས་གཅིག་པུར་ཁས་བླངས་བློ་ཐག་བཅད། །དེ་ཡང་སྐྱིད་དུས་རང་གི་ཕོ་སྒོ་དང་། །སྡུག་དུས་དཀོན་མཆོག་གསུམ་ལ་ཡུས་འཚོང་འདི། །མ་རབས་བྱིས་པ་རྣམས་ཀྱི་ངང་ཚུལ་ཏེ། །རང་ཅག་དམ་པའི་ལུགས་སུ་དེ་མི་སྤྱོད། །སྐྱིད་ན་བླ་མ་དཀོན་མཆོག་ཐུགས་རྗེར་ངེས། །སྡུག་ན་སྔོན་ལས་རྣམ་སྨིན་ལྷག་མ་སྟེ། །དེ་དག་ཀུན་ཀྱང་གཏད་མེད་སྒྱུ་མ་བཞིན། །ཤེས་པར་བྱ་བ་དམ་པའི་རིང་ལུགས་ཡིན། །ཁམས་གསུམ་འཁོར་བ་ལས་གྲོལ་ཐར་པ་ཡང་། །གཉིས་ཏེ་ཆུང་ངུ་རང་ཉིད་ཞི་བདེའི་འབྲས། །ཉན་རང་ཐེག་ཞེས་ངེས་འབྱུང་རྨ་མེད་ཙམ། །སྐྱེས་བུ་འབྲིང་པོའི་ལམ་དུ་མགོན་རྣམས་བཞེད། །ཕ་མའི་རང་བཞིན་ཁམས་གསུམ་སེམས་ཅན་རྣམས། །འཁོར་བའི་སྡུག་བསྔལ་དུ་མས་གཟིར་བ་ལ། །མི་བལྟ་རང་ཉིད་ཞི་བདེའི་ངོ་ཚ་ཆུང་། །ཁྲེལ་བོར་ཐ་ཆད་འདི་ཡིས་ཅི་ཞིག་བྱ། །ཞི་བའི་འགོག་པ་ལ་གནས་བགྲངས་ཡས་བསྐལ། །ཕ་མཐའི་བར་དུ་བྱང་ཆུབ་སྤྱད་སྤྱོད་པའི། །གེགས་འདི་རིང་སྤང་རྒྱལ་དང་དེ་སྲས་འཕགས། །ཀུན་གྱི་གསུང་ན་བློ་ཅན་སུ་ཞིག་འཇུག །ཀྱེ་ཧོ་གྲོགས་པོ་ཚུར་གཤེགས་ཐར་པའི་ལམ། །སྲིད་དང་ཞི་བའི་མཐའ་གཉིས་ལས་འདས་པ། །དོན་གཉིས་ལྷུན་གྲུབ་རྒྱལ་བའི་གནས་དམ་པ། །འདི་ལ་ལྷན་ཅིག་ཚངས་པར་མཚུངས་སྤྱོད་མཛོད། །སེམས་བསྐྱེད་ཆོ་གས་ལེན་པ་བཟང་མོད་ཀྱང་། །ཐེག་ཆེན་བསམ་པ་གཙོ་བོར་གྱུར་པ་ཡི། །དེས་ན་ལྷག་པའི་བསམ་པ་འབའ་ཞིག་པས། །མཐའ་ཡས་འགྲོ་ལ་ཕན་པ་རྟག་བསྒྲུབ་འཚལ། །མདོ་དང་ཤིང་རྟ་ཆེན་པོའི་གསུང་རྣམས་སུ། །སྨོན་འཇུག་བསླབ་བྱ་རྒྱ་མཚོ་ལྟར་གསུང་མོད། །མདོར་བསྡུས་སངས་རྒྱས་ལ་སྨོན་དེ་རྒྱུར་འཇུག །ཕྱིན་དྲུག་བསྡུ་དངོས་བཞི་ལ་འདུ་བར་རྟོགས། །འཕྲལ་དུ་དཀར་ནག་ཆོས་བརྒྱད་སྤངས་བླང་དང་། །ཕམ་པ་བཅོ་བརྒྱད་མ་གོས་པ་ཡང་གཅེས། །དོན་དམ་སེམས་བསྐྱེད་ཤེར་ཕྱིན་ཆོས་ཉིད་གཤིས། །དེ་ཉིད་རྟོགས་ཐབས་བསགས་སྦྱངས་ལས་ལ་འབད། །འོན་ཀྱང་ཕར་ཕྱིན་ལམ་གྱི་དབང་རྣོན་ནི། །བསྐལ་པ་གྲངས་མེད་གསུམ་ནས་འཚང་རྒྱར་བཞེད། །འཁོར་ལོ་གསུམ་པའི་ལམ་རིམ་འཇོག་བསྒོམ་ལུགས། །དེ་བས་ཀྱང་ནི་མྱུར་བར་འདོད་པའང་མཐོང་། །དབང་བརྟུལ་གྲངས་མེད་བསྐལ་པ་སོ་གསུམ་དང་། །སྨོན་ལམ་མཐུས་ནི་དེ་ལྟ་ཡང་མ་ངེས། །འདི་ཡི་ཚུལ་མང་མཐོང་དང་བཤེས་གཉེན་མཆོག །ཞལ་ལུང་ཞིབ་མོར་ཉན་པའང་གནད་དུ་ཆེ། །ཐེག་ཆེན་ཐུན་མིན་གསང་བ་སྔགས་ཀྱི་ལམ། །དེ་ཡི་མཐར་ཐུག་བླ་མེད་རྡོ་རྗེ་ཐེག །མྱུར་དེ་རྫོགས་པའི་ལམ་མཆོག་དེར་འཇུག་པར། །སྟོན་བྱེད་རྡོ་རྗེ་སློབ་དཔོན་མཚན་ལྡན་གཅེས། །དེ་ཡང་དབང་ཁྲིད་ལུང་གི་རྒྱུན་ཙམ་ལ། །འདྲེས་ཁྱེར་དམ་སེལ་མེད་པ་ཁོ་ནས་ཆོག །ཇི་བཞིན་འདྲེན་པ་ཉིད་དུ་བརྟེན་པ་ལ། །སངས་རྒྱས་འབྱུང་ནས་ཞལ་དང་ཐུགས་ཀྱི་སྒོར། །གནས་པ་ཉིད་ལས་གཞན་གྱི་ནུས་མིན་ཞེས། །དཔལ་ལྡན་དང་པོའི་སངས་རྒྱས་རྒྱུད་ནས་གསུངས། །འོན་ཀྱང་སྙིགས་དུས་སྐྱོན་ཡོན་འདྲེས་གྱུར་ཀྱང་། །ཡོན་ཏན་མང་ན་བླ་མར་བརྟེན་འོས་ཞེས། །ལག་ན་ཆུ་སྐྱེས་འཆང་བའི་མགོན་པོ་དེས། །དོན་དམ་བསྙེན་པའི་གཞུང་དུ་ལེགས་པར་གསུངས། །དེང་སང་མ་བརྟགས་གསར་ངེས་གྱ་ཚོམ་དབང་། །ཤས་ཆེར་སྤྱོད་ན་བཤད་ཚོད་ལས་ཅི་ཞིག །འཇིག་རྟེན་ཕལ་གྱི་ཞག་ཤས་གྲོགས་ལ་ཡང་། །བཟང་དང་ངན་ཞེས་ནན་ཏན་བརྟག་བྱེད་ན། །གཏན་བདེའི་ལམ་མཁན་རྩ་བའི་བླ་མ་གང་། །གྱ་ཚོམ་མ་ཡིན་བརྟག་དཔྱད་ཤིན་ཏུ་གཅེས། །སྔགས་ཀྱི་འཇུག་ངོགས་གཞི་རྟེན་སྨིན་བྱེད་དབང་། །རྒྱལ་བས་རྒྱུད་ནས་གསུང་བཞིན་གྲུབ་པའི་སྲོལ། །མ་ཉམས་ལྷག་ཆད་མེད་པར་མནོས་བྱས་ནས། །དེ་ཡི་བཅས་པ་སྙིང་གི་དཀྱིལ་དུ་གཅགས། །སྔགས་ཀྱི་ལམ་ལ་ཞུགས་པའི་སྲོག་རྩ་ནི། །མེད་ཐབས་མེད་པ་བླ་མའི་དམ་ཚིག་ཡིན། །བླ་མ་ལ་ཡང་རྩ་བ་ཡན་ལག་གཉིས། །རྩ་བའི་བླ་མ་སངས་རྒྱས་ཀུན་ལས་ལྷག །ཡན་ལག་ཀུན་ཀྱང་དེ་ཡི་སྤྲུལ་པར་བལྟ། །ཉིན་མཚན་མེད་པར་གསོལ་བ་ཕུར་ཚུགས་གདབ། །ཅི་མཛད་ལེགས་བལྟ་ཅི་གསུང་ཚད་མར་འཛིན། །དེ་ལ་མི་འདུ་དམ་ཚིག་འགའ་ཡོད་མིན། །ཡི་དམ་ལྷ་ཡང་བླ་མའི་སྒྱུ་འཕྲུལ་ཏེ། །མཁའ་འགྲོ་ཆོས་སྐྱོང་དེ་ཡི་རང་མདངས་ཙམ། །རྟག་ཏུ་ཤེས་བཞིན་བསྒོམ་སྒྲུབ་ལ་འབད་ན། །དངོས་གྲུབ་མྱུར་དུ་ཐོབ་ལ་སོམ་ཉི་ཅི། །སྔགས་ལམ་མདོར་བསྡུས་བསྐྱེད་རྫོགས་རིམ་པ་གཉིས། །སྐྱེས་སྦྱངས་མ་དག་དངོས་སྣང་འགོག་བསྐྱེད་རིམ། །གསལ་བརྟན་དག་པ་ལྡན་པའི་རྣལ་འབྱོར་གྱིས། །དཀྱིལ་འཁོར་འཁོར་ལོ་རག་སྦོམ་ཕྲ་གསལ་བ། །ཐུན་དང་ཉིན་ཞག་མཉམ་པར་བཞག་ནུས་ན། །ཐུན་མོང་གྲུབ་ཆེན་ཞག་ཟླས་ཉེར་འགྲུབ་ཅིང་། །ཐུན་མིན་ཕྱག་རྒྱ་ཆེ་ཡང་རིང་མིན་ཞེས། །རྡོ་རྗེ་ཅན་ཞབས་དཔལ་གྱི་མགུར་ནས་ཐོས། །རྫོགས་རིམ་ལ་ཡང་མཚན་བཅས་མཚན་མེད་གཉིས། །མཚན་བཅས་ཡིག་འབྲུ་ཐིག་ལེ་རླུང་སྦྱོར་སོགས། །ཉེར་བརྟེན་བོད་འདིར་ཆོས་དྲུག་རིགས་གཉིས་དང་། །ལམ་འབྲས་ལ་སོགས་སྔགས་ཀྱི་མྱུར་ལམ་མང་། །མཚན་མེད་དབང་བཞིའི་ཡེ་ཤེས་རྒྱ་བོད་དུ། །འདོད་ཚུལ་མང་མོད་རེ་ཞིག་བོད་ཡུལ་འདིར། །ཞི་བྱེད་གཅོད་ཡུལ་མདའ་སྣུན་ལུགས་ཕྱག་ཆེན། །རྫོགས་ཆེན་སེམས་ཀློང་གསང་སྐོར་རྣམས་ལ་བཞག །གང་ལྟར་རང་རིག་ཟབ་གསལ་བདེ་བ་ཆེ། །མངོན་སུམ་རྟོགས་ན་བཞི་པའི་ཡེ་ཤེས་ཡིན། །དེ་ཡང་ཟབ་མོའི་ཕྱོགས་ནས་གཞལ་བ་ན། །ཕར་ཕྱིན་ལྟ་བའི་ཁྲིད་དང་ཤིན་ཏུ་མཐུན། །མི་འགྱུར་བདེ་ལམ་སྔགས་ཀྱི་ཁྱད་པར་ཆོས། །གསལ་བ་དཀྱིལ་འཁོར་འཁོར་ལོས་ཡང་ནི་སོ། །འཕགས་ཀླུའི་རིམ་ལྔ་ཡེ་ཤེས་ཞབས་གྲོལ་ཐིག །དུས་འཁོར་སྦྱོར་དྲུག་རྫོགས་ཆེན་ཡང་གསང་གི །བཞི་པའི་ལམ་རྣམས་སངས་རྒྱས་ཀྱི་ཡེ་ཤེས། །བཞུགས་ཚུལ་ཉིད་དང་མཐུན་པར་ངེས་ཤེས་སྐྱེས། །འདི་དོན་ཞིབ་མོར་བླ་མའི་ཞལ་ལུང་ལས། །དཔེ་ཀློག་འཕྲིན་བསྐུར་ཙམ་གྱིས་ནུས་མ་ཡིན། །མདོ་རུ་གཞན་གྱིས་བརྗོད་མི་ལྷན་ཅིག་སྐྱེས། །ཡེ་ཤེས་དེས་ནི་བླ་མའི་བྱིན་རླབས་མཐུ། །ནམ་ཞིག་སྙིང་ལ་ཞུགས་པར་གྱུར་པའི་ཚེ། །མངོན་སུམ་བྱེད་ལས་དཔེ་ཚིག་སྤྱོད་ཡུལ་མིན། །རྒྱུད་དོན་མཁས་པས་བཞག་པ་དེ་ལྟ་ཡང་། །རྟོགས་ལྡན་རྣལ་འབྱོར་རྣམས་ཀྱི་གླེན་ཚིག་ཏུ། །རྩ་བའི་བླ་མར་སྙིང་ནས་གུས་པ་ཡི། །ཕུར་ཚུགས་གསོལ་འདེབས་ཁམས་འདུས་རྗེས་ཤེས་སུ། །དུས་གསུམ་རྣམ་པར་རྟོག་པས་མ་བསླད་པའི། །རང་རིག་རྗེན་པ་ས་ལེ་སིང་ངེ་བ། །རང་བབ་གཉུག་མའི་ངང་དུ་གནས་པ་འདི། །བསྒོམ་མེད་ཡེངས་མེད་ངང་དུ་བསྐྱང་ནུས་ན། །དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། །སེམས་ཉིད་ཆོས་ཀྱི་སྐུ་རུ་ངོ་སྤྲད་ཞེས། །ཚིག་ལ་མཁས་རྣམས་མགུའམ་མི་མགུ་རུང་། །ངེད་ཅག་རྣལ་འབྱོར་རྣམས་ཀྱི་ཉམས་ལེན་ཡིན། །དེ་ཡང་ཚིག་དང་གོ་ཉམས་རྟོགས་པ་བཞི། །མ་འདྲེས་སོ་སོར་སྤུ་རིས་འབྱེད་པ་གཅེས། །ཚིག་ཙམ་ཁོ་ནའི་རྗེས་བཟློས་ནེ་ཙོའི་དཔེ། །གོ་བ་མ་བསྒྲོད་ཡུལ་བཀོད་ཐོས་སེམས་བཞིན། །ཉམས་མྱོང་ཡུལ་བཀོད་ཤོག་ཁྲ་མཐོང་སེམས་ཙམ། །རྟོགས་པ་མངོན་སུམ་མིག་གི་སྤྱོད་ཡུལ་བཞིན། །ཚིག་ཙམ་འདྲ་ཡང་རང་གི་སེམས་ཐོག་ཏུ། །བཞག་ཚེ་དེ་རྣམས་ཁྱད་པར་ཤིན་ཏུ་ཆེ། །འོན་ཀྱང་གནས་ལུགས་ཉམས་ལེན་སྙིང་པོ་ལ། །བསྒོམ་འདོད་བློ་ཡིན་ཡེངས་དབང་འཁྲུལ་པ་ཉིད། །གནས་དང་འགྱུ་ལ་དགག་བསྒྲུབ་རེ་དོགས་གཟབ། །དེས་ན་རང་བབ་མ་ཡེངས་ཙམ་སྐྱོངས་གནད། །རྣམ་རྟོག་རགས་སྦོམ་ཕྲ་བ་མི་སློང་བར། །གནས་ཉམས་ཙམ་གྱི་ཐར་ལ་འགྲོ་མིན་གྱི། །དེས་ན་རགས་སྦོམ་ཕྲ་བའི་སྤུ་རིས་གང་། །ལེགས་པར་འབྱེད་ནས་ལམ་དུ་སློང་བ་འདི། །དུས་འདིར་དུས་གསུམ་རྒྱལ་ཀུན་འདུས་པའི་ཞལ། །བདག་གི་རྩ་བའི་བླ་མ་རྡོ་རྗེ་ཅན། །གང་གི་བྱིན་རླབས་གསུང་གི་ཆ་ཕྲ་མོ། །སྙིང་ལ་གནས་པ་ཁྱེད་ལ་བརྩེ་བས་གདམས། །དེང་དུས་གནས་ཉམས་བན་བུན་སྐྱེས་པའམ། །རྦད་གཤོད་རྩིང་ཧྲལ་ཙམ་ལ་ཡིད་མགུ་ན། །བདག་གིས་གཙིགས་སུ་བཟུང་ནས་ཕྲ་མོའི་གནས། །འདི་ཡི་ཅི་བྱ་རང་ཉིད་ངལ་བར་ཟད། །འོན་ཀྱང་ཉིད་ནས་དག་པའི་སྣང་བ་ཡིས། །ཞལ་གདམས་དགོས་ཞེས་གསུང་གིས་བསྐུལ་བ་ན། །གལ་འགག་ཟབ་གནད་འགའ་ཞིག་མདོར་བསྡུས་ནས། །འདི་རུ་གསོལ་ལ་ཉེས་པ་མེད་པར་སེམས། །དེ་སྐད་ལག་ན་པདྨོའི་གདུལ་བྱའི་ཞིང་། །རྡུལ་དཀར་རབ་བརྒྱན་དབྱིག་འཛིན་དཀྱིལ་འཁོར་ལ། །དབང་བསྒྱུར་གྲུ་འཛིན་བདག་པོ་རྒྱལ་བ་མཆོག །འཇིག་རྟེན་མགོན་པོ་སྐལ་བཟང་རྒྱ་མཚོ་ཡི། །ཞབས་པད་ཉེ་བར་བསྙེན་པ་དགེ་བའི་བཤེས། །འཕྱོངས་རྒྱས་རི་བོ་བདེ་ཆེན་མཁན་པོ་ཆེ། །སྡེ་སྣོད་འཛིན་པ་བསྟན་འཛིན་རྒྱ་མཚོ་ཡིས། །གསུང་ངོ་མ་ལྕོག་ཙམ་དུ་ཞལ་གདམས་ཚུལ། །ཕྱོགས་མེད་རྒྱལ་ཁམས་ཀུན་སྤྱོད་བྱ་བྲལ་བ། །རྒྱ་བལ་བོད་ཡུལ་ཀུན་ཏུ་གྲགས་གྱུར་མིང་། །རིག་འཛིན་ཚེ་དབང་ནོར་བུ་ཞེས་པ་ཡིས། །རབ་བྱུང་བཅུ་གསུམ་སྐྱེས་བདག་ལོ་གསར་འཆར། །དཀར་ཕྱོགས་དགེ་བའི་དུས་ཚེས་བཟང་པོ་ལ། །གྲུབ་པའི་བསྟི་གནས་སྟོད་ལུང་མཚུར་ཕུ་རུ། །གང་ཤར་ཆུ་བབ་ཐུན་གཅིག་ལ་གྲུབ་པར། །སྨྲས་འདི་དགེ་ལེགས་འཕེལ་བའི་བཙས་གྱུར་ཤོག །དགེའོ། །དགེའོ། །སརྦ་མངྒ་ལཾ།