ངག་སྒྲུབ་པའི་ཐབས་དང་འཇམ་དཔལ་གྱི་སྒྲུབ་ཐབས།

[Full Size]

རྒྱ་གར་སྐད་དུ། ཝཱ་གཱི་སཱ་དྷ་ནཾ། བོད་སྐད་དུ། ངག་སྒྲུབ་པའི་ཐབས་ཞེས་བྱ་བ། གསུང་རྡོ་རྗེ་ལ་ཕྱག་འཚལ་ལོ། །སྔར་གྱི་བཞིན་དུ་སྟོང་པ་ཉིད་དུ་རྣམ་པར་བསྒོམས་ལ། ཡི་གེ་པཾ་ལས་བྱུང་བའི་སྣ་ཚོགས་པདྨ་ཡི་གེ་ཨོཾ་ལས་བསྐྱེད་པའི་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་ཧྲཱིཿ་དམར་པོ་ཡོངས་སུ་གྱུར་པ་ལས་བདག་ཉིད་སྣང་བ་མཐའ་ཡས་ཀྱི་སྐུར་བསྒོམ་པར་བྱ་སྟེ། མཉམ་གཞག་གི་ཕྱག་རྒྱ་དང་ལྡན་པ། ཐུགས་རྗེའི་མདོག་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །དེ་ནས་སྙིང་གར་ཟླ་བ་ལ་ཡི་གེ་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ་གྱེན་དུ་ལངས་ཏེ། དེའི་དབུས་ཀྱི་རྩེ་མོའི་སྟེང་དུ་ཡི་གེ་ཨཱཿ་དམར་པོ་བསྒོམ་པར་བྱ་བའོ། །ལྕེའི་རྩེ་མེ་ལ་ཡང་ཡི་གེ་ཧྲཱིཿ་དམར་པོའོ། །འདི་ནི་ངག་སྒྲུབ་པའི་ཐབས་སོ། །མཁས་པ་དག་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།། །།རྒྱ་གར་སྐད་དུ། མཉྫུ་ཤྲཱི་སཱ་དྷ་ནཾ། བོད་སྐད་དུ། འཇམ་དཔལ་གྱི་སྒྲུབ་ཐབས། སྔར་བཞིན་དུ་སྡིག་པ་བཤགས་པ་ལ་སོགས་པའི་རྗེས་ཐོགས་ལ་སྟོང་པ་ཉིད་
ལེགས་པར་དམིགས་ཏེ། ཟླ་བ་ལ་གནས་པའི་ཡི་གེ་མཾ་གི་ས་བོན་ངེས་པར་རྫོགས་པ་ལས་འཕགས་པ་འཇམ་པའི་དབྱངས་ཏེ། སྐུ་མདོག་སེར་པོ་ཞལ་གཅིག་ཕྱག་གཉིས་པ་ཟུར་ཕུད་ལྔ་དང་ལྡན་པའི་གཞོན་ནུ་རྒྱན་ཐམས་ཅད་ཀྱིས་བརྒྱན་ཅིང་ཕྱག་གཡོན་ན་ཨུཏྤལ་བསྣམས་པ། ཕྱག་གཡས་པ་རོལ་པས་བསྐྱོད་པ། སེང་གེའི་ཁྲི་ལ་གནས་པའི་པདྨ་དང་ཟླ་བ་ལ་བཞུགས་པར་བདག་ཉིད་སྐད་ཅིག་གིས་བསྒོམ་པར་བྱ་བའོ། །དེ་ནས་སྙིམ་པ་བཅས་ལ་མཛུབ་མོ་གཉིས་དང་སྲིན་ལག་གཉིས་སེན་མོ་ལ་བརྟེན་པར་བྱས་པ་ནི་ཨུཏྤལ་ཁ་བྱེ་བའི་ཕྱག་རྒྱ་བྱ་བ་ཡིན་ནོ། །ཨོཾ་ཝཱ་གཱི་ཤྭ་རི་མུཾ། ཞེས་བྱ་བ་ནི་བཟླས་པའི་སྔགས་སོ། །རྒྱལ་པོ་ཆེན་པོ་བརྗིད་པ་ཞེས་བྱ་བའི་འཇམ་དཔལ་གྱི་སྒྲུབ་ཐབས་སོ། །མཁས་པ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །