དཔའ་བོ་གཅིག་ཏུ་གྲུབ་པའི་སྒྲུབ་ཐབས།
རྒྱ་གར་སྐད་དུ། སིདྡྷཻ་ཀ་བཱི་ར་སཱ་དྷ་ནཾ། བོད་སྐད་དུ། དཔའ་བོ་གཅིག་ཏུ་གྲུབ་པའི་སྒྲུབ་ཐབས། སྔོན་གྱི་ཟླ་ལྟར་གསལ་འབར་བའི། །དང་པོར་འཇམ་རྡོར་ཕྱག་འཚལ་ནས། །མདོར་བསྡུས་གསལ་བའི་མཆོག་གིས་ནི། །དེ་ཡི་སྒྲུབ་ཐབས་བདག་གིས་བཤད། །དང་པོར་རེ་ཞིག་སྔགས་པས་ཡིད་ཀྱི་རྗེས་སུ་མཐུན་པའི་ས་ཕྱོགས་གཙང་མར་བདེ་བའི་སྟན་གྱི་དབུས་སུ་གནས་ལ། རང་གི་སྙིང་གར་ཡི་གེ་ཨ་ལས་ངེས་པར་བྱུང་བའི་ཟླ་བར་རལ་གྲི་དང་བའི་དེ་ཁོ་ན་ཉིད་མཾ་རྣམ་པར་དགོད་པར་བྱ་བའོ། །དེའི་འོད་ཟེར་ནམ་མཁའ་བཀང་བས་བཅོམ་ལྡན་འདས་དང༌། རྗེ་བཙུན་བླ་མ་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་གནས་ལ། ཡིད་ཀྱི་རང་བཞིན་གྱི་མཆོད་པས་འཇམ་དཔལ་དང༌། བླ་མ་རྗེ་བཙུན་མཆོད་པར་བྱ་ཞིང་ཕྱག་འཚལ་ལོ། །དགེ་བ་འཕེལ་བར་བྱ་བའི་དོན་དུ་དེ་ནས་སྡིག་པ་བཤགས་པ་ཐམས་ཅད་ནི་བདག་གིས་བཤགས་པར་བགྱིའོ། །བསོད་ནམས་ཐམས་ཅད་ལ་ནི་བདག་ཡི་རང་ངོ༌། །དེ་དག་ཀྱང་བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་བདག་གིས་ཡོངས་སུ་བསྔོ་བར་བགྱིའོ། །བྱང་ཆུབ་ཀྱི་བར་དུ་སངས་རྒྱས་དང༌། ཆོས་དང་དགེ་འདུན་ལ་བདག་སྐྱབས་སུ་མཆིའོ། །བདག་གིས་བརྗོད་པའི་བྱང་ཆུབ་ཏུ་སེམས་བསྐྱེད་པར་བགྱི་བའོ། །དེ་ནས་བཅོམ་ལྡན་འདས་གཉུག་མའི་ས་བོན་དང་ལྷན་ཅིག་གྱུར་པར་བལྟས་ལ།
ཁམས་གསུམ་པོ་ཐམས་ཅད་ཀྱི་འགྲོ་བ་དང་གནས་པའི་རྟེན་ཅིང་འབྲེལ་བར་འབྱུང་བ་རྣམས་རྨི་ལམ་དང༌། སྒྱུ་མ་དང་གཟུགས་བརྙན་དང་མཚུངས་ཤིང་དཔྱད་མི་བཟོད་པ་ཉིད་དུ་རྣམ་པར་བསམ་པ་སྟེ། རང་བཞིན་གྱིས་འོད་གསལ་བ་ཉིད་ཡིན་པས་བདག་ཉིད་ཡོངས་སུ་དག་པ་འབའ་ཞིག་ཏུ་བསྒོམ་པར་བྱ་བའོ། །ཨོཾ་རང་བཞིན་གྱིས་རྣམ་པར་དག་པས་ཆོས་ཐམས་ཅད་རང་བཞིན་གྱིས་དག་པ་ནི་བདག་ཡིན་ནོ་ཞེས་བྱ་བ་འདིས་ཀྱང་བརྟན་པར་བྱ་བའོ། །ཡང་སྨོན་ལམ་གྱི་སྟོབས་ཀྱིས་བསྐྱེད་པའི་ཟླ་བའི་རལ་གྲི་ལ་ལཾ་རྣམ་པར་བལྟས་ལ། དེའི་འོད་ཟེར་སྤྲོས་པས་འཇམ་པའི་རྡོ་རྗེའི་བདག་ཉིད་ལ་ལེགས་པར་བཅུག་པའི་བདག་ཉིད་ཡི་གེ་མཾ་ལས་བྱུང་བར་བསྒོམ་པར་བྱ་སྟེ། སྐུ་སྟོན་ཀའི་ཟླ་བ་ལྟར་དཀར་བ། ཟུར་ཕུད་ལྔ་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་པས་ཨུཏྤལ་སྔོན་པོ་བསྣམས་ཤིང༌། ཕྱག་གཡས་པས་མཆོག་སྦྱིན་པ། སྣ་ཚོགས་པདྨ་དང་ཟླ་བའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །དེ་ནས་རང་གི་སྙིང་གའི་ཟླ་བ་ལ་ནོར་བུ་ཤེལ་གྱི་འོད་དང་མཚུངས་པའི་མཾ་གི་འོད་ཟེར་གྱིས་ནམ་མཁའི་མཐས་ཁྱབ་པའི་སྐྱེ་དགུ་རྣམས་ཀྱི་དོན་བྱེད་པར་གྱུར་པ། ཁྱད་པར་གསལ་བར་བྱེད་པ། ཇི་སྲིད་དུ་སྐྱོ་བར་མ་གྱུར་པ་དེ་སྲིད་དུ་བསྒོམ་པར་བྱ་བའོ། །བསྒོམས་པས་སྐྱོ་བར་གྱུར་ན་གསང་སྔགས་བཟླས་པར་བྱ་བ་ནི། ཨོཾ་ཝཱ་ཀྱེ་དཾ་ན་མཿ་དང་ཉེ་བའི་སྙིང་པོ་ཡང་བཟླས་པར་བྱ་སྟེ། ཨོཾ་ཧྲཱིཿ་ཧཱུཾ་དེ་ནས་ཡི་གེ་བརྒྱ་པ་བཏོན་ལ། འཇམ་པའི་རྡོ་རྗེའི་ང་རྒྱལ་གྱིས་ལངས་ཏེ། དེ་ཁོ་ན་བཞིན་དུ་རྒྱུ་བར་བྱ་བའོ། །འདིས་ནི་ཟླ་བ་དྲུག་གིས་ངག་གི་དབང་ཕྱུག་ཉིད་ངེས་པར་སྒྲུབ་པར་བྱེད་དོ། །རྟག་ཏུ་གོམས་པར་བྱས་པའི་སྦྱོར་བས་སྐྱེ་བ་འདི་ཉིད་ཁོ་ན་ལ་སངས་རྒྱས་ཉིད་ཀྱང་སྒྲུབ་པར་བྱེད་པ་ཡིན་ནོ། །བསམ་གཏན་དེ་ལྟ་བུས་གནས་པས་སྔོན་དུ་འགྲོ་བའི་བཟླས་པ་འབུམ་ཕྲག་བདུན་བྱས་ལ། རལ་གྲི་ལ་སོགས་པའི་དངོས་གྲུབ་རྣམས་བསྒྲུབ་པར་བྱ་བའོ། །དེ་ནས་ཉི་མ་གཟས་བཟུང་བའམ་ཟླ་བ་གཟས་བཟུང་བ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་རང་གི་ལག་ཏུ་བཟུང་ལ། ཟླ་བ་ལྟ་བས་ཇི་སྲིད་དུ་བཏང་བར་མ་གྱུར་པ་དེ་སྲིད་དུ་བཟླས་པ་བྱས་ན། རལ་གྲིའི་རིག་པ་འཛིན་པར་འགྱུར་རོ། །དེ་བཞིན་དུ་
རྡོ་རྗེ་དང༌། འཁོར་ལོ་དང༌། མདུང་རྩེ་གསུམ་དང༌། ཐོ་བ་དང༌། ཞགས་པ་དང༌། ལྕགས་ཀྱུ་ལ་སོགས་པ་རྣམས་ཀྱང་ཡིན་ནོ། །མིག་རྩི་དང༌། རྐང་པའི་བྱུག་པ་དང༌། ཐིག་ལེ་དང༌། དབང་དུ་བྱ་བའི་རྫས་རྣམས་བསོགས་ལ་བསྒྲུབ་པར་བྱ་བའོ། །རིག་པས་བཅུད་ཀྱིས་ལེན་ལེགས་པར་འདུ་བྱས་ལ་བསྒྲུབ་པར་བྱ་བའོ། །འོ་ཐུག་གི་བཟའ་བའམ། ཞོའི་ཟས་སམ། མར་དང་བཅས་པའམ། ཤ་ཀ་རས་ལྷུང་བཟེད་ཁེངས་པར་བྱས་ལ། ལག་པས་ཀྱང་བཀབ་སྟེ། བཟླས་པ་བྱས་ལ་བཟའ་བར་བྱ་སྟེ། ཚེ་ལོ་ལྔ་བརྒྱ་ཐུབ་པར་འགྱུར་རོ། །མོན་སྲན་དྲེའུ་ཁར་བཅུག་ལ་མྱུ་གུ་བྱུང་གི་བར་དུ་བཟླས་པ་བྱས་ཏེ། དེ་དག་མེད་པར་གྱུར་ན་སྙན་དངགས་པར་འགྱུར་རོ། །ཐོས་པ་དང་འཛིན་པ་དང༌། ངག་ལ་དབང་བ་དང༌། ཡིད་གཞུངས་པར་ཡང་འགྱུར་རོ། །ཤིང་ཐོག་པི་ཝང་དག་གིས་འབུམ་ཕྲག་གཅིག་སྦྱིན་སྲེག་བྱས་ན་འཇིག་རྟེན་གསུམ་གྱི་རྒྱལ་སྲིད་ངེས་པར་འགྲུབ་པར་འགྱུར་རོ། །ཇི་སྙེད་པའི་མེ་ཏོག་དཀར་པོ་རྣམས་ཀྱིས་འབུམ་ཕྲག་བཞི་སྦྱིན་སྲེག་བྱས་པས། ངག་གི་གྲུབ་པ་ཐོབ་ནས་ངག་གི་དབང་ཕྱུག་དང་མཚུངས་པར་འགྱུར་རོ། །མར་གྱིས་བྱུག་པའི་འབྲུ་ལྔའི་སྦྱིན་སྲེག་འབུམ་ཕྲག་བཞི་ཙམ་གྱིས་ཀྱང་གནོད་སྦྱིན་མོ་དང༌། ས་འོག་གི་བུ་མོ་ཡང་འགུགས་པར་བྱེད་དོ། །ཚངས་པའི་ཕྱེ་མ་བྱི་ལ་སྤར་པ་ཙམ་ལ་ལེན་བརྒྱ་རྩ་བརྒྱད་མངོན་པར་བསྔགས་ཏེ། ནམ་མཁའ་བྱུང་བ་དང་མཎྜལ་བྱས་ནས་ཕུན་སུམ་ཚོགས་པ་ཇི་ལྟ་བར་བཅོམ་ལྡན་འདས་ལེགས་པར་མཆོད་ལ་མར་དང་གཉིས་སྦུ་གུས་བཏུང་བར་བྱ་བའོ། །ཤུ་དག་ཞོ་ཕྱེད་ཀྱི་ཚད་ཙམ་དེ་ཁོ་ན་བཞིན་དུ་མངོན་པར་བསྔགས་ལ། མར་རམ་འོ་མའམ། མར་ནག་དང་ཡང་རུང་སྟེ། ཟླ་བ་གཅིག་ཏུ་བཏུང་བར་བྱ་སྟེ། གླེན་པ་དང་ལྐུགས་པ་ཉིད་དང༌། ངར་ངར་པོ་དག་ཀྱང་རྣམ་པར་འཇོམས་པར་འགྱུར་རོ། །ཟླ་བ་དྲུག་གས་ནི་མ་ཐོས་པའི་བསྟན་བཅོས་རྣམས་ཀྱང་མངོན་སུམ་དུ་འགྱུར་རོ། །ཤེས་ཟིན་པ་རྣམས་ལས་ནི་རྣམ་པར་ཉམས་པར་མི་འགྱུར་རོ། །ཐོས་པ་འཛིན་པ་དང༌། མཚུངས་པ་མེད་པའི་ཁུ་བྱུག་དང་འདྲ་བར་སྐད་སྙན་པ་དང༌། ངག་གསལ་བར་ཡང་འགྱུར་རོ། །དེ་ལ་ཡི་གེ་བརྒྱ་པའི་སྔགས་ནི་འདི་ཡིན་ཏེ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོ་ཥྱོ་མེ་
བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦྦ་ཀརྨྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ་བྷ་ག་ཝཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩ་བིཛྲཱ་བྷ་བ་མ་ཧཱ་ས་མཱ་ཡ་སཏྭ་ཨཱཿ་འཕགས་པ་དཔའ་བོ་གཅིག་ཏུ་གྲུབ་པའི་སྒྲུབ་ཐབས་སོ། །པཎྜི་ཏ་ཆེན་པོ་ཨ་བྷ་ཡ་ཀ་ར་གུཔྟའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །