ཉི་གྲགས་གཏེར་བྱོན་ལྷ་མོ་སྔགས་བདག་འབར་མའི་བསང་མཆོད་ནི།

ཧཱུྃ་བྷྱོཿ དབྱིངས་ཉིད་ངང་ལས་ཐུགས་རྗེས་སྐུ་སྤྲུལ་པ། །དཔལ་ལྡན་སྔགས་ཀྱི་སྲུང་མ་རེ་མ་ཏི། །དར་སྣ་བ་དན་རོལ་མོའི་དབྱངས་དང་བཅས། །དགྱེས་བྱེད་བསང་གི་མགྲོན་དུ་སྤྱན་འདྲེན་ནོ། །མདུན་གྱི་ནམ་མཁའ་མེ་རླུང་འཁྲུགས་པའི་དབུས། །ཁྲག་མཚོ་ཐོད་མཁར་འབར་བའི་གཞལ་ཡས་སུ། །དྲག་པོའི་རྒྱན་ཅན་བོང་བུ་དམར་གྭའི་སྟེང་། །མཐིང་ནག་རྔམ་པ་སྤྱན་གསུམ་མཆེ་གཙིགས་ཞལ། །རྩེ་གསུམ་བ་དན་ནད་ཀྱི་རྐྱལ་བ་འཛིན། །མ་བཞི་དྲེགས་བདུན་མཁའ་འགྲོ་བྱེ་བ་འབུམ། །ཡང་འཁོར་སྣང་སྲིད་དྲེགས་པའི་ཚོགས་ཀྱིས་བསྐོར། །ཧཱུྃ་ཕཊ་རུ་ལུའི་གད་རྒྱང་འབྲུག་ལྟར་སྒྲོག །རྟོག་མེད་དྲེགས་འཇོམས་ཡེ་ཤེས་ཐུགས་ལྡན་ཞིང་། །དྲག་ཤུགས་ཁྱབ་འགྲོ་གློག་གི་བང་ཅན་མ། །བྱང་ཤར་མུ་ལེ་མཐིང་མཚོའི་ཐོད་མཁར་ནས། །དྲན་པ་ཙམ་གྱིས་གནས་འདིར་གཤེགས་སུ་གསོལ། །མ་མོ་ཁྱེད་ལ་དད་ཅིང་གདུང་བའི་བློས། །དྲི་ཞིམ་བསང་མཆོད་དུད་པའི་སྤྲིན་ཕུང་ལས། །རབ་འབྱམས་ཞིང་གི་འདོད་ཡོན་ཆར་ལྟར་འབེབས། །ཕྱི་ནང་ཉེར་སྤྱོད་སྨན་གཏོར་རཀྟ་དང་། །ཤ་རུས་ཁྲག་ཀླད་མཁྲིས་པ་སྣ་ཚོགས་སྟོང་། །རི་དྭགས་གཡུང་དྭགས་གཅན་གཟན་གཟུགས་འགྲོས་ཚོགས། །མིག་དབང་སྙིང་སོགས་ཁྱད་པར་མཐུན་པའི་རྫས། །དུས་བཞིར་བསྟུན་པ་དམ་རྫས་མཆོད་པའི་ཚོགས། །མདོར་ན་གང་བཞེད་དགྱེས་དགུར་འཆར་བ་ཡི། །བདེ་སྟོང་ཡེ་ཤེས་རོལ་བའི་མཆོད་སྤྲིན་འདིས། །མ་གཅིག་དཔལ་ལྡན་ལྷ་མོ་བསང་ཞིང་མཆོད། །སྔགས་བདག་འབར་མ་ཆེན་མོ་བསང་ཞིང་མཆོད། །འཁོར་དང་བཀའ་ཉན་ཡང་སྤྲུལ་བསང་ཞིང་མཆོད། །བསང་ངོ་མཆོད་དོ་བསྟན་སྲུང་རེ་མ་ཏི། །བསྟོད་དོ་བརྔན་ནོ་དཔལ་ལྡན་དུད་སོལ་མ། །དབུ་འཕང་གཉན་པོ་སྲིད་པའི་རྩེ་མོར་བསྟོད། །རང་བྱུང་རྒྱལ་མོ་མིང་བརྒྱ་མཚན་སྟོང་མ། །ནད་རིམས་ཁྲམ་དལ་མཚོན་གྱི་མངའ་བདག་མཛད། །སྣང་སྲིད་དྲེགས་པ་ཡོངས་ཀྱི་བཀའ་བསྒྱུར་བྱེད། །སྲིད་གསུམ་ཁྱབ་རྒྱུགས་སྣ་ཚོགས་རྣམ་འཕྲུལ་སྟོན། །གདུང་བའི་བུ་ཆུང་མ་ལ་རེ་བ་བཞིན། །གུས་པས་མཆོད་དོ་ཐུགས་རྗེ་མ་གཡེལ་ཞིག །རྣལ་འབྱོར་བདག་ཅག་འཁོར་དང་བཅས་པ་ལ། །རྟག་ཏུ་མི་འབྲལ་མགོན་སྐྱབས་སྡོང་གྲོགས་མཛོད། །ནད་རིམས་འཇིགས་གནས་རྒྱལ་པོའི་ཆད་པ་དང་། །གདུག་པའི་སྲོག་ཆགས་དམག་དང་འབྱུང་བཞིའི་དགྲ། །ལྟས་ངན་ཐོག་སེར་བྱད་སྟེམས་ལ་སོགས་པ། །འཇིགས་པ་ཀུན་ལས་སྐྱོབ་པར་མཛད་དུ་གསོལ། །མི་མཐུན་ཕྱོགས་ཞི་མཐུན་པའི་དཔལ་ཀུན་རྒྱས། །སྐྱེ་རྒུ་དབང་འདུས་དགྲ་བགེགས་ཚར་ཆོད་ཅིང་། །བསྟན་དང་བསྟན་འཛིན་དབུ་འཕང་མཐོ་བ་དང་། །མཆོག་ཐུན་དངོས་གྲུབ་ཡིད་བཞིན་འགྲུབ་པར་མཛོད། །སྔགས་བདག་འབར་མའི་བསང་མཆོད་མཆོག་སྤྲུལ་རིན་པོ་ཆེའི་བཀའ་བཞིན་མི་ཕམ་རྣམ་པར་རྒྱལ་པས་བཀོད་པའོ། །