སྒྲོལ་མ་དཀར་མོའི་སྒྲུབ་ཐབས།

[Full Size]

རྒྱ་གར་སྐད་དུ། སཱི་ཏ་ཏཱ་ར་སཱ་དྷ་ནཾ། བོད་སྐད་དུ། སྒྲོལ་མ་དཀར་མོའི་སྒྲུབ་ཐབས། ཟླ་བ་དྲུག་ཏུ་སྒྲུབ་པ་ལ་བརྩོན་པས། །སྒྲོལ་མའི་ཐུགས་ཀར་འཁོར་ལོ་བསྒོམ་པ་ལ། །འཆི་བདག་སྐྱོན་གྱིས་གོས་པར་འགྱུར་མ་ཡིན། །དངོས་གྲུབ་རྣམས་ཀྱང་ཐམས་ཅད་ཐོབ་པར་འགྱུར། །འཆི་བ་སླུ་བ་བསྡུས་པ་ལས། །སྒྲོལ་མ་དཀར་མོ་བཏོན་པ་ཡི། །བསྒོམས་པས་འཇིགས་པ་སེལ་བྱེད་པའི། །ངག་གི་དབང་ཕྱུག་གིས་འདི་བྱ། །སྡེ་བཞི་དང་པོའི་ཡིག་ལྡན་ལས། །འོད་ཟེར་ནམ་མཁར་རྣམ་སྤྲོས་པས། །པད་དཀར་ཟླ་བའི་གདན་བལྟས་ལ། །མདུན་དུ་གསུམ་ལ་སྐྱབས་འགྲོ་བརྗོད། །རང་བཞིན་སྒྲོ་བཏགས་གཞོམ་དོན་དུ། །སྟོང་པ་ཉིད་དུ་ཡུད་ཙམ་བལྟ། །དེ་ནས་སྨོན་ལམ་སྟོབས་ལས་ནི། །བྱང་ཆུབ་སེམས་ཀྱི་ཡི་གེ་ཡིན། །ཟླ་བའི་དཀྱིལ་འཁོར་གདན་སྟེང་ན། །རྡོ་རྗེའི་སྐྱིལ་ཀྲུང་ལེགས་པར་གནས། །མཆོག་སྦྱིན་མ་དང་ཨུཏྤལ་བསྣམས། །སྟོན་ཀའི་ཟླ་བ་ལྟར་དཀར་ཞིང༌། །རྒྱབ་ནི་ཟླ་བ་ལ་ལེགས་བརྟེན། །ལོ་ནི་བཅུ་དྲུག་མ་ཡི་ལུས། །རྒྱན་རྣམས་ཀུན་གྱིས་ལེགས་བརྒྱན་མ། །རྫོགས་སངས་དེ་དག་ཐམས་ཅད་སྲས། །ཡུམ་གྱུར་འདོད་པའི་གཟུགས་འཛིན་མ། །བསྒོམས་ལ་འཕགས་མ་སྒྲོལ་མ་དེའི། །ཐུགས་ཀར་འཁོར་ལོའི་འོད་དཀར་བ། །རྩིབས་བརྒྱད་ལ་ནི་ཡི་གེ་ཡང༌། །བརྒྱད་ཀྱིས་ཡོངས་སུ་དགང་བྱ་བ། །ཨོཾ་ཧཱ་གསལ་བྱེད་དབུས་གནས་པའི། །བསྒྲུབ་བྱའི་མིང་སོགས་
ལྟེ་བར་ནི། །བསྒོམ་བྱ་རྩེ་གཅིག་སེམས་ཀྱིས་ཀྱང༌། །ཟླ་དྲུག་བརྟན་པས་ངེས་བྱ་ཞིང༌། །སེམས་སྐྱོན་ནི་བཟླས་བྱ་བ། །སྔགས་ཀྱི་ཡི་གེ་བཅུ་པོ་འདི། །ཨོཾ་གྱི་ཡི་གེ་དང་པོར་སྦྱིན། །ཕྱི་ནས་ཏཱ་རེ་ལེགས་པར་སྦྱར། །འདི་དག་རྗེས་ལ་ཏུཏྟཱ་རེ། །དེ་མཐའ་སྭཱ་ཧཱ་ལས་ཀུན་བྱེད། །ཚངས་དབང་ཁྱབ་འཇུག་ཉི་ཟླ་དྲུག །ཕྱོགས་སྐྱོད་འདོད་པའི་རྒྱལ་པོས་ཀྱང༌། །དགག་པར་མི་ནུས་སྤུ་ཡི་རྩེ། །འཆི་བདག་འབྱུང་ལས་གྲོལ་འགྱུར་ཞིང༌། །གཉེར་མ་སྐྲ་དཀར་སྐལ་ངན་ནད། །དབུལ་བའང་ཀུན་ནས་ཟད་པར་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་འཇིག་པར་བྱེད། །གོས་སྐོམ་ཁང་བསངས་རིན་ཆེན་སོགས། །བཙལ་བ་མེད་པར་བདེ་བར་རྙེད། །རལ་གྲི་མིག་རྩི་རྐང་བྱུག་དང༌། །བུམ་པ་བཟང་སོགས་དངོས་གྲུབ་འབྱུང༌། །ཡིད་གཞུངས་སྨྲ་མཁས་སྙན་དང་དངགས་ཏེ། །ཤེས་རབ་གཅིག་ཏུ་དྲི་མེད་དང། །འདོད་པའི་དངོས་གྲུབ་གཞན་རྣམས་ཀྱང༌། །འཁོར་ལོ་འདི་ལས་རབ་ཏུ་འབྱུང༌། །སྒྲོལ་མ་དཀར་མོའི་སྒྲུབ་ཐབས་ཀྱིས། །ནད་དང་འཆི་བདག་རྣམ་འཇོམས་པ། །ལེགས་བྱུང་དགེ་བ་གང་ཡིན་དེས། །སྐྱེ་དགུ་སྒྲོལ་མ་ཉིད་དུ་ཤོག །སྒྲོལ་མ་དཀར་མོའི་སྒྲུབ་ཐབས། ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །