རྡོ་རྗེ་ཕག་མོ་སྒྲུབ་པའི་ཐབས།
གཉིས་མེད་རྡོ་རྗེ།
༄། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། རྡོ་རྗེ་ཕག་མོ་སྒྲུབ་པའི་ཐབས། །རྡོ་རྗེ་ཕག་མོ་ལ་ཕྱག་འཚལ་ལོ། །གཞན་ཡང་ཕྱོགས་ཀྱི་མཁའ་འགྲོ་མ། །བྱིས་པ་བུད་མེད་བདེ་སྟེར་བ། །དེ་ཡི་སྒྲུབ་ཐབས་བསྟན་པར་བྱ། །རྣལ་འབྱོར་པས་ནང་པར་སྔ་བར་ལངས་ཏེ་གདོང་དག་པ་ལ་སོགས་པ་བྱས་ཏེ། །དམ་ཚིག་གི་རིལ་བུ་ཁར་བཅུག་ལ། རི་བོ་འམ་ཚང་ཚིང་ལ་སོགས་པ་ཡིས་དུ་འོད་པའི་གནས་སུ། སྣ་ཚོགས་གདན་ལ་གནས་ཏེ། ཨཱ་ལི་ཀཱ་ལི་ལན་གསུམ་གྱི་བར་དུ་བརྗོད་དེ། རྡོ་རྗེ་ཕག་མོའི་ང་རྒྱལ་དུ་གྱུར་པས། དེའི་རྣམ་པར་དག་པ་ཐམས་ཅད་བྱས་ཏེ་ངེས་པར་བྱས་ལ་རང་གི་སྙིང་གར་རྡོ་རྗེ་དང་ཉི་མ་ལ་བཾ་དམར་པོ་བལྟ་བར་བྱའོ། །དེའི་འོད་ཟེར་རྣམས་དམར་པོ་བསྐལ་བ་འཇིག་པའི་དུས་ཀྱི་མེ་ལྟ་བུར་འོག་མིན་གྱི་བར་དུ་འཕྲོས་པས་རྡོ་རྗེ་ཕག་མོ་འཆད་པར་འགྱུར་བའི་ཕྱག་དང་མཚོན་ཆ་དང༌། བླ་མ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་བཀུག་སྟེ། མདུན་གྱི་ནམ་མཁའ་ལ་ཡང་དག་པར་བཞུགས་ཏེ་དེ་ནས་འོད་ཟེར་རྣམས་བྱུང་སྟེ། དེ་དག་གི་མདུན་དུ་མཆོད་ནས་སྡིག་པ་བཤགས་པ་དང༌། སྡིག་པ་སླར་བསྡམ་པ་དང༌། བསོད་ནམས་ལ་རྗེས་སུ་ཡི་རང་བ་དང༌། བསོད་ནམས་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པ་བྱས་ཏེ། ཚངས་པའི་གནས་བཞི་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་དཱ་ཛྙཱན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བའི་སྔགས་ཀྱིས་མངོན་དུ་བྱས་ཏེ། །ཡུང་ཙམ་གྱིས་རབ་ཏུ་མི་གནས་པའི་ངོ་བོར་གནས་པ་ལ་སྔོན་གྱི་སྨོན་ལམ་གྱི་དབང་གིས་ནམ་མཁའི་དཀྱིལ་འཁོར་དུ་ལངས་ཏེ། ཨཾ་རཾ་བཾ་ལཾ་རྣམས་ཡོངས་སུ་གྱུར་བ་ལས་གཞུ་དང༌། གྲུ་གསུམ་པ་དང༌། ཟླུམ་པོ་དང་གྲུ་བཞི་པ་རྣམས་ནི་སྔོན་པོ་དང༌། དམར་པོ་དང༌། དཀར་པོ་དང༌། སེར་པོ་རྣམས་འབྱུང་བ་ཆེན་པོ་བཞིའི་དཀྱིལ་འཁོར་སྟེང་ནས་སྟེང་དུ་བལྟའོ། །དེའི་སྟེང་དུ་སུམ་ལས་ཡང་དག་པར་བྱུང་བའི་རི་རབ་གྲུ་བཞི་པ་རིན་པོ་ཆེ་སྣ་བཞི་ལས་བྱུང་བའི་རྭ་བརྒྱད་ཀྱིས་ཉེ་བར་མཛེས་པ། དེའི་སྟེང་དུ་
༄། །ཨོཾ་མེ་དི་ནཱི་བཛྲཱི་བྷཱ་བ་བཛྲ་བནྡྷ་ཧཱུཾ་བཾ་ཧཱུཾ། ཨོཾ་བཛྲ་པྲ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་བཾ་ཧཱུཾ། ཨོཾ་ཨཱཿ་བཛྲ་བི་དཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ཤ་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ་ཧཱུཾ་ཧཱུཾ། སྔགས་དེ་དག་གིས་རྡོ་རྗེའི་ས་གཞི་ལ་སོགས་པ་དྲུག་རྣམ་པར་བསྒོམ་པར་བྱའོ། །དེའི་ནང་དུ་གྲུ་བཞི་པ་ལ་སོགས་པ་མཚན་ཉིད་ཐམས་ཅད་དང་ཡང་དག་པར་ལྡན་པའི་ཁང་པ་ལ་སོགས་པ་རྣམ་པར་བསམས་ཏེ། དེའི་སྟེང་དུ་པདྨ་འདབ་མ་བརྒྱད་པའོ། །དེ་ལས་ཨཱ་ལི་ལཱ་ལི་ཡོངས་སུ་གྱུར་པ་ལས་ཟླ་བ་དང་ཉི་མ་ཁ་སྤྱོར་གྱི་ནང་དུ་རྡོ་རྗེ་དམར་པོའི་ནང་དུ་ཆུད་པའི་བཾ་དམར་པོ་རང་བཞིན་གྱིས་འོད་གསལ་བ་བལྟའོ། །དེ་དག་ཐམས་ཅད་ཡོངས་སུ་གྱུར་པ་ལས་བདག་ཉིད་བཅོམ་ལྡན་འདས་མ་རྡོ་རྗེ་ཕག་མོ་བལ་བོའི་སེའུ་ཤིང་གི་མེ་ཏོག་དང་མཚུངས་པ་ཕྱག་གཉིས་པ། ཞལ་གཅིག་པ། སྤྱན་གསུམ་པ། སྐྲ་གྲོལ་བ། ཕྱག་རྒྱ་དྲུག་གིས་རྒྱས་བཏབ་པ། །ནམ་མཁའི་གོས་ཅན། ཡེ་ཤེས་ལྔའི་བདག་ཉིད། །ལྷན་ཅིག་སྐྱེས་པའི་རང་བཞིན་ཕྱག་གཡས་ཀྱིས་རྡོ་རྗེ་དང་སྡིགས་མཛུབ་མཛད་པ། །གཡོན་གྱིས་ཐོད་པ་དང་ཁ་ཊྭཱཾ་ག་བསྣམས་པ། གཡོན་བརྐྱང་བའི་ཞབས་ཀྱིས་འཇིགས་བྱེད་དང་དུས་མཚན་མནན་པ། བརྒྱ་ཕྱེད་ཀྱི་ཕྲེང་བས་སྐུ་ལ་བརྒྱན་པ། །ཁྲག་འཛག་པ་ཞལ་དུ་གསོལ་བར་བསྒོམ་མོ། །དེ་ནས་ཤར་ཕྱོགས་ལ་སོགས་པའི་འདབ་མ་བཞི་ལ་གོ་རིམས་ཇི་ལྟ་བར་གཡོན་སྐོར་གྱིས་མཁའ་འགྲོ་མ་དང༌། ལཱ་མ་དང༌། དུམ་སྐྱེས་མ་དང༌། གཟུགས་ཅན་མ་རྣམས་ནག་མོ་དང༌། སྡོ་བ་སངས་མ་དང༌། དམར་མོ་དང༌། དཀར་མོ་རྣམས་ཞལ་གཅིག་མ། ཕྱག་གཡོན་གྱིས་ཁ་ཊྭཱཾ་ག་དང་ཐོད་པ་བསྣམས་པ་གཡས་ཀྱིས་ཌ་མ་རུ་དང༌། གྲི་གུག་གོ །སྤྱན་གསུམ་པ། སྐྲ་གྲོལ་བ། གཅེར་བུ། གཡོན་བརྐྱང་བས་ཡང་དག་པར་གནས་པ། ཕྱག་རྒྱ་ལྔ་ཡིས་རྣམ་པར་བརྒྱན་པ་བསྒོམ་པར་བྱའོ། །མཚམས་ཀྱི་འདབ་མ་བཞི་ལ་བྱང་ཆུབ་ཀྱི་སེམས་ལ་སོགས་པས་གང་བའི་ཐོད་པ་བསམ་པར་བྱའོ། །དེའི་རྗེས་སུ་བཅོམ་ལྡན་འདས་མའི་སྙིང་གའི་ས་བོན་ལས་རྣམ་པར་བྱུང་བའི་འོད་ཟེར་དང༌། ཛའི་ཡི་གེས་ཡེ་ཤེས་ཀྱི་འཁོར་ལོ་དགུག་པ་དང༌། ཧཱུཾ་གི་ཡི་གེས་དམ་ཚིག་གི་འཁོར་ལོ་ཚུལ་བཞིན་དུ་གཞུག་པ་
༄། །དང། བཾ་གྱི་ཡི་གེས་བཅིངས་པ་དང༌། ཧོཿའི་ཡི་གེས་དགྱེས་པར་བྱའོ། །དེ་ནས་བྷྲཱཾ་ཧཱུཾ་ཁཾ་ཨཾ་ཧཾ་ཧཱོཾ་གིས་ཡི་གེས་རྣམ་པར་སྦྱང་བར་བྱའོ། །ལྷ་མོ་དྲུག་གི་སྔགས་ཀྱིས་བཅོམ་ལྡན་འདས་མའི་གོ་བགོའོ། །ཨོཾ་བཾ་ནི་ལྟེ་བར་རོ། །ཧཾ་ཡོཾ་ནི་སྙིང་གར་རོ། །གྲིཾ་མོཾ་ནི་ཁ་ལའོ། །ཧྲེཾ་ཧྲིཾ་ནི་མགོ་ལའོ། །ཧཱུཾ་ཧཱུཾ་ནི་སྤྱི་གཙུག་ཏུའོ། །ཕཊ་ཕཊ་ནི་ཡན་ལག་ཐམས་ཅད་ལ་མཚོན་ཆའོ། །དེ་ནས་བཅོམ་ལྡན་འདས་མའི་སྐུ་དང་གསུང་དང་ཐུགས་ཀྱི་གནས་རྣམས་སུ་ཨོཾ་ཨཱཿ་ཧཱུཾ་དགོད་པར་བྱའོ། །བསྒོམ་པས་དུབ་ན་སྔགས་བཟླའོ། །དེ་ནས་སྔགས་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཐུན་གསུམ་དུ་གཏོར་མ་སྔོན་དུ་འགྲོ་བས་བཅོམ་ལྡན་འདས་མ་བསྒོམ་པར་བྱའོ། །དེ་ལ་འདིའི་གཏོར་མའི་རིམ་པ་ནི་དམ་ཚིག་གི་རིལ་བུ་ཁར་བཅུག་པའི་རྣལ་འབྱོར་པས་གཡོན་བརྐྱང་བའི་ཞབས་ཀྱིས་མནན་ཏེ། མཐོ་བའི་གནས་ལ་བརྟེན་པས་ཁ་ལྷོར་བལྟས་ཏེ་སྐྲ་གྲོལ་ཞིང་གཅེར་བུས་མཚན་ཕྱེད་ན་རྐང་པ་མནན་ཅིང་གྱེན་དུ་བལྟས་པའི་སྟེང་དུ་ཕེཾ་གི་སྒྲ་སྒྲོགས་པས་རྡོ་རྗེ་ཐལ་མོ་གྱེན་དུ་ཁ་ཕྱེ་སྟེ། དེའི་རྗེས་སུ་དྲན་པའི་ཕྱག་རྒྱ་བཅིངས་ཏེ་བསྐོར་ཞིང་བསྐོར་བར་དཔའ་བོ་དང་རྣལ་འབྱོར་མ་རྣམས་དགུག་གོ །ཨོཾ་ཨ་རལླི་ཧོ་ཛཿ་ཧཱུཾ་བཾ་ཧོཿ་བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོ། །དེ་ལྟར་ལན་གསུམ་ལན་བཞི་ལན་ལྔའི་བར་དུ་བརྗོད་དེ་བསྔགས་སོ། །དེའི་རྗེས་སུ་བདུད་རྩི་མྱང་བའི་ཆོ་གས་རྫོགས་པ་དེའི་གཏོར་མ་སྔགས་འདིས་སྦྱིན་ནོ། །ཨོཾ་ཁ་ཁ་ཁཱ་ཧི་ཁཱ་ཧི་སརྦྦ་ཡཀྵ་རཱཀྵ་སརྦ་བྷཱུ་ཏ་པྲེ་ཏ་པི་ཤཱ་ཙཽ་ན་མཱ་ད་ཨ་པ་སྨཱ་ར་ཌཱ་ཀི་ནྱ་ཨི་མཾ་བ་ལིཾ་གྲི་ཧྞ་ཏུ་ས་མ་ཡ་རཀྴ་ན་ཏུ་མ་མ་སརྦ་སིདྡྷིཾ་མྨེ་པྲ་ཡ་ཙྪན་ཏུ་ཡ་ཐཻ་བཾ་ཡ་ཐེ་ཥྚཾ་བྷུ་ཉྫ་ཐ་པོ་བ་ལ། མཱ་ཏི་ཀྲ་མ་ཐ་མ་མ་སརྦྦ་ཀརྟ་ཡ་སདྶུ་ཁཾ་པོ་བྲྀ་དྡྷ་ཡེ་ས་ཧཱ་ཡི་ཀཱ་བྷ་བན་ཏུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་གནས་པ་ན་བཅོམ་ལྡན་འདས་མའི་གཟུགས་སུ་གནས་སོ། །རྡོ་རྗེ་ཕག་མོ་སྒྲུབ་པའི་ཐབས་རྫོགས་སོ།། །།མཁས་པ་ཆེན་པོ་ཨ་བ་དྷཱུ་ཏཱི་པ་གཉིས་སུ་མེད་པའི་རྡོ་རྗེས་མཛད་པའོ།། །།རྒྱ་གར་གྱི་མཁན་པོ་བཛྲ་པྰྞིའི་ཞལ་སྔ་ནས་དང༌། ལོ་ཙཱ་བ་མཚུར་སྟོན་དབང་ངེས་བསྒྱུར་བའོ།།