གཉིས་པ་སོ་སོར་ཕྱེ་སྟེ་རྒྱས་པར་བཤད་པ་ལ་དྲི་ལན་མདོར་བསྟན་པ།

[Full Size]

༈གཉིས་པ་སོ་སོར་ཕྱེ་སྟེ་རྒྱས་པར་བཤད་པ་ལ་དྲི་ལན་མདོར་བསྟན་པ་ལྟར་བདུན་ལས། དྲི་ལན་དང་པོ་ལྟ་བ་མཐར་ཐུག་མེད་དགག་དང་མ་ཡིན་དགག་ཏུ་འདོད་པ་གང་འཐད་བསྟན་པ་ལ་གཉིས། གཞན་ལུགས་བརྗོད་ཅིང་རང་ལུགས་བཞག་པ་མདོར་བསྟན་པ་དང་། རྒྱས་པར་བཤད་པའོ། །

དང་པོ། དགེ་ལྡན་ལྟ་བ་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེ་ལ་སྤྱིར་དེ་བཞིན་གཤེགས་པའི་སྙིང་པོ་རང་གི་ངོ་བོས་མི་སྟོང་བར་གྱུར་ན་ཕྱི་རོལ་པའི་རྟག་བདག་དང་ཁྱད་པར་མེད་པས་རྣམ་ཐར་སྒོ་གསུམ་གྱི་རང་བཞིན་དུ་བསྟན་པ་དང་། འོད་གསལ་བའི་ཡེ་ཤེས་ཀྱང་མེད་པས་སྟོང་པ་ཕྱང་ཆད་ནམ་མཁའ་ལྟ་བུར་གྱུར་ན་གཅེར་བུ་པ་དང་ཁྱད་པར་མེད་པས་འོད་གསལ་བའི་ཡེ་

[Full Size]

ཤེས་འདུས་མ་བྱས་པར་བསྟན་པས་སྟོན་པའི་བཀའ་བར་ཐ་ངེས་པའི་ལུང་གིས་ངོ་བོ་སྟོང་པ་དང་རང་བཞིན་གསལ་བར་བསྟན་པ་དང་། དེའི་དགོངས་འབྲེལ་ཀྱང་། རྒྱལ་ཚབ་ཆེན་པོ་བྱམས་པས། རྒྱན་དང་རྒྱུད་བླ་སོགས་དང་། དཔལ་ལྡན་ཀླུས་རིགས་ཚོགས་དང་བསྟོད་ཚོགས་ཀྱིས་ལེགས་པར་བསྟན་པ་དག་ལ་འཕགས་ཡུལ་དུ་དཔལ་ལྡན་ཀླུའི་དབུ་མ་རྩ་བ་ཤེས་རབ་སོགས་རིགས་ཚོགས་ཀྱི་དགོངས་པ་སངས་རྒྱས་བསྐྱང་དང་ལེགས་ལྡན་འབྱེད་དང་དཔལ་ལྡན་ཟླ་བས་སོ་སོར་བཀྲལ་ཞིང་དགག་བྱ་ལ་དོན་དམ་གྱི་ཁྱད་པར་སྦྱར་མ་སྦྱར་དང་དེའི་དབང་གིས་ཐ་སྙད་དུ་རང་མཚན་གྱིས་གྲུབ་པ་སོགས་ཞལ་གྱིས་བཞེས་མི་བཞེས་ཀྱིས་ཁྱད་པར་ལ་ཕན་ཚུན་དགག་སྒྲུབ་སྣ་ཚོགས་མཛད་ཅིང་དེར་བརྟེན་བོད་འདིར་ཡང་དབུ་མ་ཐལ་རང་ཞེས་ཆེས་མི་མཐུན་པ་ཞིག་ཏུ་གོ་ཞིང་མཁས་མཆོག་རྣམས་ཀྱིས་དབུ་མ་རང་རྒྱུད་པའི་སྟོང་ཉིད་མ་ཡིན་དགག་ཏུ་སོང་བའི་འགལ་འདུའང་བསྟན་ལ། དཔལ་ལྡན་ཟླ་བའི་དབུ་མ་འཇུག་པ་རྩ་འགྲེལ་གྱི་དགོངས་པ་འགྲེལ་བ་པོ་གངས་ཅན་གྱི་མཁས་མཆོག་རྣམས་ཀྱང་ཕན་ཚུན་དཔལ་ལྡན་ཟླ་བའི་དགོངས་པ་ལོན་མ་ལོན་ཞེས་དགག་སྒྲུབ་སྣ་ཚོགས་པར་མཛད་པ་དང་། དེ་བཞིན་དུ་རྒྱལ་ཚབས་ཆེན་པོ་བྱམས་པའི་རྒྱུད་བླ་མ་སོགས་ཀྱི་དགོངས་པ་འགྲེལ་བ་པོ་གངས་ཅན་གྱི་མཁས་མཆོག་རྣམས་ཀྱང་ཕན་ཚུན་དགག་སྒྲུབ་སྣ་ཚོགས་

[Full Size]

པ་སྤྲོ་བར་གྱུར་ན་ཡང་། གཟུ་བོར་གནས་པའི་བློས་དོན་ལ་རྟོན་པའི་རིགས་ལམ་དྲི་མ་མེད་པས་གནད་ཀྱི་དགོངས་དོན་ཉམས་སུ་བསྟར་ན་རྒྱལ་བའི་ཕྲིན་ལས་གདུལ་བྱའི་དབང་གིས་སོ་སོའི་དགོངས་གནད་རེ་རྩལ་བཏོན་མཛད་པའི་ཐ་སྙད་ཀྱི་ཞལ་བཞེས་ཅུང་ཟད་མི་འདྲ་བ་ཙམ་ལས་དོན་ལ་རྒྱ་བོད་གྲུབ་ཐོབ་དགོངས་པ་གཅིག་ཟེར་བ་ལྟར་མཐར་ཐུག་གི་དགོངས་པ་དབུ་མ་ཆེན་པོ་སྤྲོས་བྲལ་མཉམ་པ་ཉིད་དུ་དབྱེ་བསྲི་མེད་པར་གཅིག་ཏུ་གཞོལ་ཞིང་འབབ་པའི་ཚུལ་རྗེ་འཇམ་དབྱངས་བླ་མས་དབུ་མ་རྒྱན་འགྲེལ་དང་བདེ་གཤེགས་སྙིང་པོའི་སྟོང་ཐུན་སེང་གེའི་ང་རོ་སོགས་སུ་ལེགས་པར་བཀྲལ་ཟིན་པའི་ལུང་རིགས་ཟབ་མོའི་དགོངས་གནད་རང་གིས་ཉམས་སུ་བསྟར་བ་ལས་འདིར་བསྐྱར་ཟློས་སུ་མ་བྱས་ལ། དེས་ན་ཐ་སྙད་ཀྱི་ཞལ་བཞེས་ཅུང་ཟད་ཙམ་མི་འདྲ་བ་རེ་རང་གཞན་སུ་ལའང་ཡོད་པ་དེར་མི་འཐད་པའི་ཀླན་ཀ་དོན་ལ་མི་གནས་པ་ལྟ་ཅི་དོན་ལ་གནས་ནའང་དེ་ཙམ་གྱིས་ལྟ་ལོག་དང་ཆོས་ལོག་ཏུ་མི་འགྱུར་ཏེ། ཚིག་ལ་མི་རྟོན་དོན་ལ་རྟོན་དགོས་པར་གསུང་བའི་ཕྱིར། དེ་ལྟ་ནའང་རང་གཞན་སུ་ཡིན་ཀྱང་གཞན་ཟེར་རྗེས་བརྗོད་ཀྱི་བྲག་ཆར་མ་སོང་བར་ཡང་དག་པའི་རིགས་ལམ་གྱིས་ཐ་སྙད་སྐྱོན་མེད་པ་ཞིག་ལ་འཇུག་པ་གལ་ཆེ་སྟེ། ཇི་སྐད་དུ། ཐ་སྙད་བདེན་པ་ཐབས་སུ་གྱུར་པ་སྟེ། །ཞེས་གསུངས་པས་སོ། །དེས་ན་ཚུལ་འདི་དང་འདི་འདྲའི་

[Full Size]

སྒོ་ནས་དྲི་ལན་ཐམས་ཅད་ཀྱི་སྐབས་སུའང་གཟུ་བོར་གནས་པའི་བློས་ལོག་པར་མི་ལྟ་བར་ཡང་དག་པའི་དོན་ཉིད་འཚོལ་བ་ནི་མཁས་པ་རྣམས་ཀྱིས་སྙིང་ནོར་དམ་པ་རྣལ་འབྱོར་དུ་བྱ་བ་ཁོ་ནའོ། །

དངོས་དོན་ལ་གངས་ཅན་ལ་མངོན་པར་མཐོ་བ་རི་བོ་དགེ་ལྡན་པ་སོགས་སྔ་ཕྱིར་བྱོན་པའི་མཁས་མཆོག་ཕལ་ཆེ་བ་ཞིག་དབུ་མའི་ལྟ་བ་མཐར་ཐུག་པ་དགག་བྱ་བདེན་སྒྲུབ་བཅད་པའི་སྟོང་ཉིད་མེད་དགག་དུ་འདོད་དགོས་ཟེར་བ་དང་། གཞན་སྔ་ཕྱིར་བྱོན་པའི་མཁས་མཆོག་ལ་ལ་རྣམས་གནས་ལུགས་མཐར་ཐུག་དོན་དམ་པ་ཉིད་གཉིས་སྣང་འཁོར་བའི་ཆོས་ཀྱི་སྟོང་བས་སྟོང་ཉིད་མ་ཡིན་དགག་ཏུ་སྨྲ་བ་དང་། སྔ་འགྱུར་གྱི་རང་ལུགས་གཞན་དང་མ་འདྲེས་པའི་ཁས་ལེན་གང་ཡིན་ཞེ་ན། གནས་ལུགས་མཐར་ཐུག་པ་སྒྲོ་འདོགས་སོ་གཉིས་དང་བྲལ་བའི་སྤྲོས་བྲལ་མཉམ་པ་ཉིད་དམ་ཟུང་འཇུག་ཡེ་ཤེས་ཆེན་པོའི་ངོར་མེད་དགག་ཅེས་བྱ་བ་དགག་བྱ་བདེན་གྲུབ་ལ་སོགས་པ་བཀག་ཤུལ་གྱི་མེད་རྐྱང་ངམ་སྟོང་པ་ཕྱང་ཆད་དམ་སྟོང་རྐྱང་དང་ནི་མ་ཡིན་དགག་ཡིན་ཞེས་དགག་བྱ་བཀག་ཤུལ་དུ་ཆོས་ཉིད་ལ་སོགས་པ་ཆོས་གཞན་ཅི་ཞིག་འཕེན་ཏེ། དེ་གཉིས་ཀ་བློ་ཡིས་གཞན་སེལ་བའི་སྒོ་ནས་བརྟགས་པ་ཙམ་ལས་རང་གི་ངོ་བོས་མ་གྲུབ་པའི་ཕྱིར་ན་གཤིས་ལུགས་མཐར་ཐུག་པའི་དོན་ལ་ཁས་ལེན་ཐམས་ཅད་དང་བྲལ་བས་མེད་དགག་དང་མ་ཡིན་དགག་གཉིས་ཀར་ཁས་མི་ལེན་ཏེ།

[Full Size]

གནས་ལུགས་མཐར་ཐུག་པ་ནི་དགག་པ་མེད་དགག་དང་སྒྲུབ་པ་མ་ཡིན་དགག་ལ་སོགས་པའི་གཉིས་ཆོས་ཐམས་ཅད་དང་བྲལ་བ་ཡི་བློ་འདས་སྨྲ་བསམ་བརྗོད་མེད་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་གདོད་མའི་ཆོས་ཉིད་ཡིན་པའི་ཕྱིར་རོ། །དེ་ལྟར་ནའང་གནས་སྐབས་ཆོས་ཐམས་ཅད་ཀྱི་ངོ་བོ་སྟོང་པ་ཉིད་གཏན་ལ་འབེབས་ཚུལ་ཁོ་ནར་བསམ་ནས་ནི་མེད་དགག་དང་མ་ཡིན་དགག་གང་ཡིན་ཞེས་དྲི་ན་མེད་དགག་ཉིད་ཡིན་ཞེས་ཁས་ལེན་ཏེ་འཕགས་ཡུལ་གྱི་དཔལ་ལྡན་ཟླ་བ་གྲགས་པ་དང་བོད་ན་ཀུན་མཁྱེན་རོང་ཟོམ་ཆོས་བཟང་གཉིས་ཐུགས་ཀྱི་དགོངས་པ་གཅིག་དང་གསུང་གི་དབྱངས་གཅིག་གིས་འཁོར་འདས་ཀྱིས་བསྡུས་པའི་ཆོས་སོ་ཅོག་ཀུན་གདོད་མ་ནས་དག་པས་ཀ་དག་སྟོང་པ་ཆེན་པོ་ལུང་དང་རིགས་པས་སྒྲུབས་པར་མཛད་པ་བཞིན་དུ་འཁོར་འདས་ཀྱིས་བསྡུས་པའི་ཆོས་འདི་ཐམས་ཅད་ཀ་ནས་དག་པའམ་གདོད་མ་ནས་རང་བཞིན་གྱིས་མ་གྲུབ་པའམ་མེད་པའི་ཕྱིར་ཀུན་རྫོབ་དང་དོན་དམ་པའི་བདེན་པ་གཉིས་ཆར་མཐའ་བཞི་ལས་མ་སྐྱེས་པས་ན་མེད་ཅེས་བརྗོད་པ་ལ་ཅི་ཞིག་ཚོམ་སྟེ་ཐེ་ཚོམ་ཅི་ཡང་མི་དགོས་ཏེ་མདོ་ལས་གཟུགས་མེད་སྒྲ་མེད་སོགས་གཟུགས་ནས་རྣམ་མཁྱེན་གྱི་བར་མེད་པའམ་སྟོང་བར་གསུངས་པ་བཞིན་ནོ། །

གཉིས་པ་ལ་གཉིས། མི་འཐད་པ་གཞན་ལུགས་དགག་པ། འཐད་ལྡན་རང་ལུགས་

[Full Size]

བཞག་པའོ། །དང་པོ་ལ་གཉིས། གཞན་གྱི་མེད་དགག་ཀྱང་མ་ཡིན་དགག་ཏུ་འགྱུར་ཞིང་ཚིག་དང་དོན་གྱི་གཞན་སྟོང་ལ་ཟུང་འཇུག་མི་རུང་བར་མདོར་བསྟན་པ་དང་། དེ་རྒྱས་པར་བཤད་པའོ། །

དང་པོ། ཀ་བ་ཀ་ནས་སོགས་ཚིགས་བཅད་གསུམ་གྱིས་བསྟན་ཏེ། དེ་ལ་འདིར་ངོ་བོ་སྟོང་བའི་དབང་དུ་བྱས་ནས་སྤྲོས་བྲལ་མེད་དགག་དང་། རང་བཞིན་འོད་གསལ་བའི་དབང་དུ་བྱས་ན་ངོ་བོ་སྟོང་པའི་དབྱིངས་དང་འདུ་འབྲལ་མེད་པའི་སྐུ་དང་ཡེ་ཤེས་སོགས་དབྱིངས་ཡེ་གཉིས་སུ་མེད་པའི་འདུས་མ་བྱས་པའི་རང་གདངས་ལྷུན་གྱིས་གྲུབ་པའི་སངས་རྒྱས་ཀྱི་ཡོན་ཏན་བླ་ན་མེད་པ་རྣམས་ཀྱང་རྗེས་ཐོབ་ཤན་འབྱེད་པའི་ཚེ་དེ་ལྟར་ཁས་ལེན་ཅིང་། འདོད་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་པའི་ཕྱིར་མི་འཐད་པ་སྤུ་ཙམ་མེད་པར་མ་ཟད་བླ་ན་མེད་པའི་ཡོན་ཏན་ཀྱང་བདེ་བླག་ཉིད་དུ་ཐོབ་པར་འགྱུར་རོ། །འོ་ན་ཇི་ལྟར་ཞེ་ན། དོན་དམ་མཐར་ཐུག་དཔྱོད་པའི་རིགས་པ་གང་ཇི་སྙེད་པས་འཁོར་འདས་ཀྱིས་བསྡུས་པའི་ཆོས་ཅན་གང་ལ་དོན་དམ་དང་བདེན་གྲུབ་སོགས་ཀྱི་དགག་བྱའི་ཁྱད་པར་སྦྱར་ནས་དེ་ཁོ་ན་འགོགས་ཀྱི་གཞན་ཆོས་ཅན་གྱི་སྣང་བ་འདི་འགོག་ན་འགོགས་ཀྱང་མི་ནུས་ལ་ཐ་སྙད་ལ་སྐུར་པ་བཏབ་པ་སོགས་སྐྱོན་ཡང་ཆེའོ་ཞེས་དབུ་མ་རང་རྒྱུད་པའི་རྣམ་གྲངས་པའི་དོན་དམ་བདེན་སྟོང་མེད་དགག་ཙམ་ཁོ་ན་ཟབ་མོ་དབུ་མའི་ལྟ་བ་མཐར་ཐུག་ཏུ་ཞལ་གྱིས་བཞེས་ཤིང་རྩལ་

[Full Size]

འདོན་གྱིས་བསྒྲུབ་ན་མི་འཐད་དེ། དཔལ་ལྡན་ཟླ་བས། ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་དང་། དོན་དམ་པའི་སྐྱེ་བ་མི་ཁེགས་པར་ཐལ་བ་དང་། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བའི་སྐྱོན་གསུམ་གསུངས་པ་བཟློག་མེད་དུ་འབབ་ཅིང་། ཀུན་མཁྱེན་ཀློང་ཆེན་པས་ཡིད་བཞིན་མཛོད་དུ། རང་རྒྱུད་འོག་མའི་བྱེ་བྲག་སློབ་དཔོན་དཔལ་སྦས་སོགས་སྣང་སྟོང་ཐ་དད་དུ་འདོད་པ་དག་གི་ལུགས་དགག་པའི་སྐབས་སུ། སྣང་བ་མ་ཡིན་པའི་སྟོང་པ་བདེན་པ་གཉིས་ཆར་མི་སྲིད་པ་དང་། རྟོགས་བྱར་མི་རུང་བ་དང་ཐ་དད་དུ་གྱུར་ན་སྤང་གཉེན་དུ་མི་འཐད་དེ། དགྲ་ལ་ཞེ་སྡང་སྐྱེས་པ་ལ་ནམ་མཁའ་སྟོང་པར་ཤེས་པས་མི་ཕན་པ་ལྟར་གཞི་རྫུན་སྣང་ལ་ཞེན་ནས་ལོགས་སུ་སྟོང་བར་ཤེས་པས་ཅི་ཡང་མི་ཕན་པས་དེ་འདྲའི་སྟོང་པ་དེ་རྟོགས་པ་ལ་དགོས་པ་མེད་པར་འགྱུར་བའི་རིགས་པ་གང་གསུངས་པ་བཞིན་ནོ། །ཏིང་འཛིན་རྒྱལ་པོ་ལས་ཀྱང་། སུ་དག་བུ་མོར་འདུ་ཤེས་གནས། །དེ་དག་འདོད་ཆགས་རབ་ཏུ་འཕེལ། །འདུ་ཤེས་དག་ནི་རྣམ་བཤིག་ན། འདོད་ཆགས་གྱིས་ནི་གོས་མི་འགྱུར། །ཞེས་གསུངས་པ་བཞིན་ཡིན་པས་འདིར་ཡང་ཆོས་ཅན་གྱི་སྣང་བ་ཀ་བ་ལ་སོགས་པ་རང་རང་གི་ངོ་བོ་ཀ་ནས་སྟེ་ཡེ་ནས་སྟོང་བའམ། དག་པ་ཡི་རང་བཞིན་ཡིན་པའི་ཕྱིར་དེ་ལྟར་རིགས་པས་གཏན་ལ་ཕབ་པའི་

[Full Size]

ཤུལ་ན་གང་མི་སྟོང་བ་ཅུང་ཟད་ཀྱང་ནམ་ཡང་ལུས་པ་མེད་ལ། གལ་ཏེ་ཡོད་ན་དེ་རིགས་པས་དཔྱད་བཟོད་དུ་འགྱུར་བ། དེས་ན་གནས་ལུགས་མཐར་ཐུག་དཔྱོད་པའི་རིགས་པས་ཆོས་ཅན་ཀ་བ་རང་ཉིད་མེད་ཅེས་མ་བཀག་ན་སྟེ་མི་འགོག་པ་ཀ་བ་བདེན་གྲུབ་མིན་ཞེས་བརྗོད་པས་འགོགས་མི་ནུས་པའི་ཆོས་ཅན་གྱི་ཀ་བ་འདི་ཅི་ཞིག་ཡིན་ཏེ་མི་འཐད་ལ། དེ་ལྟར་ན་བདེན་གྲུབ་ཀྱི་ཀ་བ་ཁེག་པས་བདེན་པའི་སྟོང་པ་ཉིད་དང་མི་ཁེག་པར་ཤུལ་ན་ལུས་པའི་སྣང་བ་ཡི་ཀ་བ་ཞིག་སྟེ་སྟོང་པ་དང་མི་སྟོངས་པའི་ཐ་དད་པ་དེ་གཉིས་མེ་དང་ཚ་བ་ལྟ་བུ་སྣང་སྟོང་དབྱེར་མེད་དམ་ཟུང་འཇུག་ཏུ་མི་རུང་སྟེ་དཔེར་ན་སྲད་བུ་དཀར་ནག་བསྒྲིལ་བ་ཟུང་འཇུག་གམ་དབྱེར་མེད་མིན་པ་བཞིན་ནོ། །དེས་ན་ཆོས་ཅན་གྱི་ཀ་བ་ཀ་བས་ཏེ་ཀ་བ་རང་གིས་མི་སྟོང་བར་དགག་བྱ་བདེན་གྲུབ་གཞན་གྱིས་སྟོང་བར་འདོད་པ་དང་ཆོས་ཉིད་ཆོས་ཉིད་རང་གིས་མི་སྟོང་བར་གཞན་ཀ་བས་སྟོང་ངོ་ཞེས་སྟོང་གཞི་ཀ་བ་དང་ཆོས་ཉིད་བཞག་ནས་བདེན་གྲུབ་དང་ཀ་བ་ལ་སོགས་པ་གཞན་གྱིས་སྟོང་པར་འདོད་པ་དག་ནི་ཚིག་གི་གཞན་སྟོང་དང་དོན་གྱི་གཞན་སྟོང་གཉིས་ཀ་ལའང་སྣང་བ་དང་སྟོང་པ་ཆོས་ཅན་དང་ཆོས་ཉིད་དུ་མི་རུང་བ་དང་དེ་བཞིན་དུ་སྣང་སྟོང་དབྱེར་མེད་དམ་ཟུང་འཇུག་དང་མཉམ་པ་ཉིད་དང་སྤྲོས་བྲལ་མི་རུང་བའི་རིགས་པའི་གནོད་པ་ཐུན་མོང་དུ་བཟློག་མེད་དུ་འབབ་བོ། །

གཉིས་པ་ལ་གཉིས། ལུང་

[Full Size]

རིགས་ཁས་བླང་དང་འགལ་པ། ཟུང་འཇུག་སོགས་མི་རུང་བར་བསྟན་པའོ། །དང་པོ།

ཨེ་མ་དེས་དེ་སོགས་ཚིགས་བཅད་བཅུ་དང་རྐང་པ་གཅིག་གིས་བསྟན་ཏེ། འདི་ལ་ལུང་དང་རིགས་པ་དང་ཁས་བླང་དང་འགལ་བ་གསུམ་རིམ་པར་ཨེ་མ་ཀ་བ་དང་ཆོས་ཉིད་ལ་སོགས་དེ་དང་དེས་ཀ་བ་དང་ཆོས་ཉིད་ལ་སོགས་པ་རང་རང་གི་ངོ་བོས་དེ་དང་དེ་མ་སྟོང་པའམ་མི་སྟོང་བར་དགག་བྱ་བདེན་གྲུབ་ལ་སོགས་པ་ཁོ་ནས་སྟོང་པ་ཡིན་ན་སྟོང་གཞི་ཀ་བ་དང་ཆོས་ཉིད་ལ་སོགས་པ་མི་སྟོང་བར་ལྷག་མར་ལུས་ཏེ་རང་རང་གི་ངོ་བོས་གྲུབ་པར་འགྱུར་ཏེ། དེ་ལྟར་ན་གཟུགས་ནི་གཟུགས་ཀྱིས་སྟོང་ངོ་ཞེས་སོགས་གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་རང་རང་གི་ངོ་བོས་སྟོང་པར་གསུངས་པའི་ཡུམ་རྒྱས་འབྲིང་སོགས་ངེས་དོན་གྱི་ལུང་དོན་དང་འགལ་ཞིང་རིགས་པར་བཅས་པ་ལས་ཀྱང་འགལ་ཏེ། ཇི་ལྟར་འགལ་ན། ཆོས་ཅན་ཀ་བ་ལ་སོགས་པ་དང་དགག་བྱ་ཀ་བའི་བདེན་གྲུབ་ལ་སོགས་པ་དེ་གཉིས་ངོ་བོ་གཅིག་གམ་ཐ་དད་གང་ཡིན། དང་པོ་ལྟར་ངོ་བོ་གཅིག་ཡིན་ནོ་ཞེ་ན། དགག་བྱ་བདེན་གྲུབ་ལ་སོགས་པ་གཅིག་ཤོས་ཁེག་པས་ཆོས་ཅན་ཀ་བ་ལ་སོགས་པ་གཅིག་ཤོས་ཀྱང་ཁེག་པར་འགྱུར་ཏེ་དེ་གཉིས་གཅིག་ཡིན་པའི་ཕྱིར་དཔེར་ན་མེ་ཉིད་མེད་པས་ཚ་བ་ཡང་མེད་པར་འགྱུར་བ་བཞིན་ནོ། །དེས་ན་བདེན་གྲུབ་འགོགས་

[Full Size]

ཀྱི་ཀ་བ་མི་འགོགས་ཞེས་པ་དོན་མེད་དོ། །གཉིས་པ་ལྟར་ངོ་བོ་གཞན་ཡིན་ནོ་ཞེ་ན། ཆོས་ཅན་ཀ་བ་ལ་སོགས་པ་རང་རང་མ་ཡིན་པའི་དགག་བྱ་གཞན་བདེན་གྲུབ་ཅེས་པ་ལ་སོགས་པ་དེ་ཁེག་ཀྱང་། ཆོས་ཅན་ཀ་བ་ལ་སོགས་པ་རང་རང་གི་ངོ་བོ་ནི་དོན་དམ་དཔྱོད་པའི་རིགས་པ་གང་གིས་མི་སྟོང་བར་དཔྱད་བཟོད་པས་བདེན་གྲུབ་དུ་འགྱུར་བ་ལ་སོགས་པའི་སྐྱོན་ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ་ལ་སོགས་པ་གོང་དུ་ཇི་སྐད་བསྟན་པ་བཞིན་ནོ། །

ཁོ་ན་རེ་བདེན་གྲུབ་ཐ་སྙད་དུ་ཡང་ཡོད་མ་མྱོང་བའི་ཕྱིར་ན་འདི་ལྟར་དེ་གཉིས་གཅིག་དང་ཐ་དད་གང་ཡིན་ཞེས་དཔྱད་མི་དགོས་སོ་ཞེ་ན། དེ་མི་འཐད་དེ་དོན་ལ་བདེན་པར་གྲུབ་པ་ཞིག་མེད་ཀྱང་སོ་སྐྱེའི་ངོར་བུམ་པ་ལ་སོགས་པ་བདེན་པར་འཛིན་པ་ཡོད་པའི་ཕྱིར་དེ་ལྟར་ངེས་པར་དཔྱད་དགོས་སོ། །དབུ་མ་ཐལ་འགྱུར་བའི་ལུགས་ཀྱི་དགག་བྱའི་ངོས་འཛིན་ཀྱང་དོན་དམ་དཔྱོད་པའི་རིགས་པས་དཔྱད་བཟོད་ཀྱི་མི་སྟོང་བའི་བུམ་པའམ་འགོག་མི་ནུས་པའི་བུམ་པའི་ཕ་རོལ་ཏེ་གཞན་ལོགས་ཤིག་ན་དགག་བྱ་བདེན་པར་གྲུབ་རྒྱུ་དཔྱད་མི་བཟོད་པ་སུ་ཞིག་ཡིན་ཏེ་ཡན་གར་དུ་མེད་པའི་ཕྱིར་ན་དགག་བྱའི་སྣང་ཚུལ་ཀྱང་གཞན་དག་གིས་ངོས་མ་ཟིན་ལ་ཁྱེད་ཅག་ཁོ་ནས་ངོས་ཟིན་པས་ངེས་སོ་ལོ་སྟེ་ཞེས་མ་རངས་པའོ། །འོན་ཀྱང་བདེན་པར་གྲུབ་པ་སོགས་ཀྱི་ཁྱད་པར་གང་ཞིག་དགག་བྱར་སྦྱར་བའམ་དགག་བྱ་ལ་དོན་

[Full Size]

དམ་གྱི་ཁྱད་པར་སྦྱར་ནས་སྟོན་པ་ནི་བདེན་གཉིས་སོ་སོར་ཕྱེ་ནས་ཚད་མ་སོ་སོས་རྙེད་དོན་སོ་སོར་འཆད་པ་དབུ་མར་རང་རྒྱུད་པའི་གཞུང་ལ་ཆེས་གྲགས་ཤིང་སྒྲུབ་མོད་ཀྱང་འདིར་དོན་དམ་དཔྱོད་པའི་རིགས་པའི་དབང་དུ་བྱས་ན་ཡང་ཀ་བ་དང་བུམ་པ་ལ་སོགས་པ་དེས་དེ་མི་སྟོང་ཞེས་པ་དེ་སྦྱར་བ་ལ་དགོས་ནུས་ཀྱི་འཐད་པ་ཅི་ཞིག་ཡོད་དེ་མེད་དོ། །གལ་ཏེ་བུམ་པ་བུམ་པས་སམ་ཀ་བ་ཀ་བས་སྟོང་པར་འགྱུར་ན་ཁྱོད་ཀུན་རྫོབ་ཐ་སྙད་ཙམ་དུ་ཡང་ཀ་བ་དང་བུམ་པ་ལ་སོགས་པ་དེ་དག་མེད་པ་ལྟར་ཞེས་གཏན་མེད་ལྟ་བུ་འགྱུར་བར་སེམས་ནས་ཐ་སྙད་ལ་བསྐུར་པ་འདེབས་པ་ལ་སོགས་པའི་ཚིག་འཁྲིའི་དོགས་པས་ཀ་བ་ཀ་བས་མི་སྟོང་ཞེས་པ་ལ་སོགས་པ་འདི་སྦྱར་བར་བྱས་ཀྱང་ཚིག་འཁྲིའི་འགལ་བ་བཟློག་ཏུ་མེད་པ་འདི་ལ་ལྷག་པར་ཆེ་སྟེ། ཇི་ལྟར་ན་ཀུན་རྫོབ་ཙམ་སྟེ་མ་བརྟགས་མ་དཔྱད་པའི་ཐ་སྙད་ཙམ་དུ་ཀ་བ་ནི་ཡོད་ཅེས་བརྗོད་པར་བྱས་པས་མི་ཆོག་པར་ཀ་བ་དེས་ཀ་བ་དེ་མི་སྟོང་ངོ་ཞེས་ཅི་ལ་ཟེར་ཏེ་འཆད་འགྱུར་ལྟར་མི་འཐད་དོ། །དེ་གཉིས་དོན་གཅིག་ཡིན་པས་མི་འཐད་པ་མེད་དོ་ཟེར་ན་དེ་གཉིས་དོན་གཅིག་མ་ཡིན་ཏེ། འདི་ལྟར་ཀ་བ་ཡོད་ཅེས་བརྗོད་པ་དང་ཀ་བར་ཏེ་ཀ་བ་ལ་ཀ་བ་ཡོད་ཅེས་བརྗོད་པ་གཉིས་མི་མཚུངས་ཏེ་ཕྱི་མ་ཀ་བ་ལ་ཞེས་རྟེན་དང་ཀ་བ་ཡོད་ཅེས་བརྟེན་པར་དོན་གྱི་ཁས་བླངས་སུ་སོང་བ་དཔེར་ན་རྟེན་ཀ་བ་གཞན་ལ་བརྟེན་པ་ཀ་བ་གཞན་

[Full Size]

བརྟེན་པར་ཁས་བླངས་བ་བཞིན་ནོ། །གཞན་ཡང་དེས་དེ་མི་སྟོང་ཞེས་པ་འདི་བདེན་པ་གཉིས་ཆར་མི་འཐད་དོ། །ཇི་ལྟར་ན། དོན་དམ་པར་དོན་དམ་དཔྱོད་པས་དཔྱད་བཟོད་ཀྱི་ཀ་བ་མི་དམིགས་པའམ་ཡོད་པ་མིན་པས་སྟོང་བར་གྱུར་ན་ཀ་བ་དེ་ཀ་བས་མི་སྟོང་ཞེས་ཅི་སྟེ་བརྗོད་པ་འདི་ལ་དགོས་ནུས་ཅི་ཡང་མེད་པས་དོན་མེད་དུ་འགྱུར་ལ། ཀུན་རྫོབ་ཏུ་ནའང་ཀ་བ་ཀ་བས་ཞེས་ལན་གཉིས་བརྗོད་པ་འདི་བརྡ་ཐ་སྙད་ལ་རྨོངས་ཤིང་དོན་དང་འགལ་བའོ། །ཁས་བླང་བ་དང་ཡང་འགལ་ཏེ། ཀ་བ་ལ་སོགས་པ་རང་རང་རྣམས་ནི་རང་གིས་ཏེ་རང་རང་གི་ངོ་བོས་མི་སྟོང་པར་འགྱུར་ན་རང་རང་གི་ངོ་བོ་ཡོད་བཞིན་དུ་བདེན་གྲུབ་སོགས་དགག་བྱ་གཞན་དང་གཞན་གྱིས་སྟོང་བས་གཞན་སྟོང་དུ་ཁས་མི་ལེན་པར་རང་སྟོང་དུ་ཁས་ལེན་པ་འགལ་ཞིང་། ཀ་བ་ལ་སོགས་པའི་སྣང་བ་འདི་ལས་དགག་བྱ་གཞན་ཐ་དད་དུ་མེད་པས་རང་རང་ངོ་བོས་སྟོང་བར་གྱུར་ན་ཀ་བ་ཀ་བ་རང་གིས་མི་སྟོང་བར་ཁས་ལེན་པའང་འགལ་བ་ཡིན་ནོ། །

གཉིས་པ་ནི། སྤྱིར་ན་གཞན་གྱིས་སོགས་ཚིགས་བཅད་བཞི་དང་རྐང་པ་གཉིས་ཀྱིས་བསྟན་ཏེ། སྤྱིར་རྒོལ་སྔ་ཕྱི་སོགས་གྲུབ་མཐའ་སྨྲ་བ་སུ་ལྟར་ན་ཡང་ཆོས་ཅན་ཀ་བ་དང་ཆོས་ཉིད་མྱང་འདས་སོགས་རང་རང་གིས་མི་སྟོང་བར་དགག་བྱ་བདེན་གྲུབ་དང་འཁོར་བ་སོགས་གཞན་དང་གཞན་གྱིས་སྟོང་བར་གྱུར་པ་དེ་དང་དེས་ཀ་བ་ལ་སོགས་པའི་ཆོས་ཅན་དེ་དང་དེ་སྟོང་བའི་གོ་ངེས་པར་མི་ཆོད་དེ། དེ་

[Full Size]

དག་ཆོས་ཅན་དང་དེའི་ཆོས་ཉིད། སྣང་བ་དང་། དེའི་སྟོང་ཉིད་མ་ཡིན་ཏེ་ཐ་དད་པ་ཉིད་ཡིན་པའི་ཕྱིར། དཔེར་ན་རྟ་ཉིད་བ་ལང་མིན་ལ་བ་ལང་རྟ་ཉིད་མ་ཡིན་པས་མངོན་སུམ་མ་འཁྲུལ་བས་མཐོང་བའི་རྟ་ལ་རྟ་དེ་ཉིད་ལས་གཞན་བ་ལང་ཞིག་རྟ་དེའི་སྟེང་དུ་མ་མཐོང་བས་ཐ་སྙད་དུ་ཡང་མ་གྲུབ་པས་བ་ལང་དེས་རྟ་དེ་སྟོང་པར་ཤེས་ཀྱང་དེས་རྟ་དེ་སྟོང་ཉིད་ཡིན་པར་ག་ལ་ངེས་ཏེ་ངེས་མི་ནུས་ཏེ་རྟ་ཉིད་ཡོད་པ་དང་བ་ལང་གང་མེད་པ་གཉིས་ཆོས་ཅན་དང་ཆོས་ཉིད། རྟེན་འབྱུང་དང་སྟོང་པ། ཐབས་དང་ཐབས་བྱུང་ཉིད་མ་ཡིན་ཏེ་འབྲེལ་མེད་ཐ་དད་ཡིན་པའི་ཕྱིར་ན་དེ་གཉིས་ལ་སྟོང་རྟེན་འབྱུང་ངམ་སྣང་སྟོང་དབྱེར་མེད་དམ་ཟུང་འཇུག་གི་དོན་ཅི་ཡང་མི་བྱེད་དོ། །དེས་ན་རྟ་ཉིད་མཐོང་བ་དེ་ཡིས་ཀྱང་བ་ལང་སྟོང་པར་མཐོང་བ་ལ་ཅི་ཞིག་ཕན་ཏེ་མི་མཐོང་བ་ལའང་ཅི་ཞིག་གནོད་དེ་ཕན་གནོད་ཅི་ཡང་མི་བྱེད་དོ། །དེ་ཡི་ཕྱིར་ན་རང་གིས་ངོ་བོས་མི་སྟོང་བའི་མྱང་འདས་ལ་སོགས་པ་དང་། འཁོར་བ་ལ་སོགས་པས་དེ་དང་དེ་སྟོང་དེ་སྟོང་བའང་ཆོས་ཅན་དང་ཆོས་ཉིད་དུ་མི་རུང་སྟེ་རྟ་ཉིད་བ་ལང་གིས་སྟོང་པའམ་བུམ་པ་དང་རི་རྭ་བཞིན་ནོ། །དེའི་ཕྱིར་དེ་གཉིས་སྣང་བ་དང་སྟོང་པ་དབྱེར་མེད་དམ་ཟུང་འཇུག་དང་། སྲིད་པ་འཁོར་བ་དང་ཞི་བ་མྱང་འདས་གཉིས་མཉམ་པ་ཉིད་ལུགས་འདི་ལ་མི་རུང་བས་མེད་དེ་དཔེར་ན་ཡོད་པའི་རྟ་དང་བ་ལང་མེད་པའམ་བུམ་པ་དང་རི་བོང་གི་རྭ་གཉིས་ཟུང་

[Full Size]

འཇུག་དང་མཉམ་ཉིད་ཀྱི་དོན་མེད་པ་བཞིན་ནོ། །དེ་ལ་ཡང་ཆུ་ཟླ་ཉིད་ཟླ་བ་དངོས་མིན་ནོ་ཞེས་གནམ་ཟླས་སྟོང་བ་དང་ཆུ་ཟླ་རང་སྣང་བ་དེ་གཉིས་ཟུང་འཇུག་ཡིན་ན་ཀོ་སྟེ། དེ་འདྲའི་སྣང་སྟོང་ཟུང་འཇུག་ཉིད་རྟོགས་པ་མཁས་བླུན་སུས་ཀྱང་སླ་སྟེ་བླུན་པོ་བ་ལང་རྫིས་ཀྱང་རྟོགས་པར་འགྱུར་བ་ལང་རྟ་མིན་པའམ་རྟས་སྟོང་པར་མཁས་བླུན་ཀུན་གྱིས་ཤེས་ཤིང་བ་ལང་སྣང་བར་མངོན་སུམ་དུ་ཡང་མཁས་བླུན་ཀུན་གྱིས་མཐོང་བར་གྱུར་ན་དེ་འདྲའི་སྟོང་པ་དང་རྟེན་འབྱུང་དེ་རྟོགས་པ་ལ་ངོ་མཚར་ཆེའོ་ཞེས་བསྔགས་བརྗོད་སངས་རྒྱས་བཅོམ་ལྡན་འདས་བདག་ཉིད་ཆེན་པོས་ཇི་སྟེ་གསུངས་ཏེ་གསུངས་མི་རིགས་སོ། །

གཉིས་པ་འཐད་ལྡན་རང་ལུགས་བཞག་པ་ནི། དེས་ན་རང་གི་སོགས་ཚིགས་བཅད་ལྔ་དང་རྐང་པ་གསུམ་གྱིས་བསྟན་ཏེ། ཇི་སྐད་བསྟན་པ་དེས་ན་སྔ་འགྱུར་བ་རང་གི་ལུགས་མ་འཁྲུལ་པ་ལ་ནི་ཆུ་ཟླ་ཡི་སྣང་བ་དེ་ཉིད་ལ་རིགས་པས་བརྟགས་ན་ཆུ་ཟླ་དེ་ཉིད་ཕྱི་ནང་གཞན་སོགས་གང་དུའང་རང་གི་ངོ་བོ་ཅུང་ཟད་ཙམ་དུ་ཡང་མི་རྙེད་པས་མེད་པའང་སྟོང་བཞིན་དུ་ཆུ་ཟླ་ཉིད་སྣང་བར་མངོན་སུམ་དུ་མཐོང་བའི་ཚེ་ན་ཆུ་ཟླ་ཉིད་ཡོད་མེད་ལ་སོགས་པའི་སྤྲོས་པ་ཀུན་དང་བྲལ་བའི་མེད་དགག་ཡིན་ཀྱང་རྟེན་འབྱུང་འགགས་པ་མེད་པས་སྣང་རུང་བ་དེ་འདྲའི་སྟོང་པ་དང་སྣང་བའམ་ཡོད་པ་གཉིས་མེ་དང་ཚ་བ་བཞིན་དུ་རྣམ་དབྱེར་མེད་པ་སོ་སྐྱེའི་བློར་མ་ཤོང་བས་འགལ་བ་ལྟར་སྣང་ན་ཡང་འདིར་ནི་མངོན་སུམ་དུ་

[Full Size]

སྟོང་དང་རྟེན་འབྱུང་ངམ་སྣང་སྟོང་གཉིས་མི་འགལ་བར་མ་ཟད་མེ་དང་ཚ་བ་བཞིན་དུ་དབྱེར་མེད་དམ་ཟུང་འཇུག་ཏུ་མཐོང་བ་འདི་ལ་ཨེ་མ་ཧོ་རྨད་བྱུང་བས་ཀྱང་འདི་རྨད་དུ་བྱུང་བའོ་ཞེས་ཤིན་ཏུ་ངོ་མཚར་བའི་ཚིག་གིས་མཁས་པ་ཆེན་པོ་སངས་རྒྱས་བཅོམ་ལྡན་འདས་ཐུགས་ཀྱི་སྲས་མཆོག་དང་བཅས་པ་རྣམས་ཀྱིས་མགྲིན་གཅིག་ཏུ་བསྔགས་འོས་མཆོག་ལ་བསྔགས་བརྗོད་ཀྱང་ཆེར་མཛད་པ་ཡིན་ནོ། །དེ་འདྲའི་གནས་ལུགས་སྣང་སྟོང་དབྱེར་མེད་དམ་ཟུང་འཇུག་གི་ངོ་བོར་ཆོས་ཀུན་གདོད་ནས་གནས་པའི་ཕྱིར་ངོ་བོ་སྟོང་བའི་ངོས་ནས་གཏན་ལ་ཕབས་པའམ་གཞལ་བ་ན་འཁོར་འདས་ཀྱི་བསྡུས་པའི་ཆོས་སོ་ཅོག་ཀུན་ལ་རང་གི་ངོ་བོས་མི་སྟོང་པ་གང་ཅུང་ཟད་ཙམ་དུ་གྲུབ་པ་ཡོད་པ་མིན་པ་དེའི་ཕྱིར་ན་ཆོས་ཐམས་ཅད་མེད་ཅེས་སམ་སྟོང་པ་ཉིད་ཡིན་ནོ་ཞེས་མཐའ་གཅིག་ཏུ་སྨྲར་བཏུབ་ཀྱང་དེ་ལྟ་ནའང་མེད་པའམ་སྟོང་པ་དེའི་མེད་ཚུགས་སམ་སྟོང་ཚུགས་མ་ཤོར་བཞིན་དུ་རྟེན་འབྱུང་གི་སྣང་བ་སུས་ཀྱང་འགོག་ཏུ་མེད་པ་ཉིད་དུ་རང་ཤར་བས་དབྱིངས་དང་ཡེ་ཤེས་གཉིས་སུ་མེད་པར་ལྷུན་གྱིས་གྲུབ་ན་ཡང་སྣང་བ་དེའི་སྣང་ཚུགས་དེ་སྣང་བའི་སྣང་ཚུལ་མ་ཤོར་བཞིན་དུ་གཞི་མེད་རྩ་བ་དང་བྲལ་བའི་སྟོང་པ་ཆེན་པོར་ཡེ་ནས་གནས་པ་སྟེ། གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན་

[Full Size]

ནོ། །སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ་ཞེས་གསུངས་པ་བཞིན་དུ། མེ་དང་ཚ་བ་ཆུ་དང་རླན་ལྟར་རྣམ་དབྱེར་མེད་པའི་ཟུང་འཇུག་མཉམ་པ་ཉིད་སྣང་སྟོང་རིས་སུ་མ་ཆད་པས་སྤྲོས་པ་དང་བྲལ་བའི་གནས་ལུགས་དེ་ལ་ཀ་བ་དང་མྱང་འདས་ལ་སོགས་པའི་ཆོས་ཅན་འདི་སྟོང་པ་དང་བདེན་གྲུབ་ལ་སོགས་པའི་དགག་བྱ་འདིས་སྟོང་པ་དང་འདི་ནི་སྣང་བ་འདི་ནི་སྟོང་པའོ་ཞེས་པ་ལ་སོགས་པའི་གཉིས་ཆོས་ཀྱི་དབྱེ་བ་ཞིག་ནམ་ཡང་རྙེད་པ་མེད་པ་སྤྲོས་ཀུན་བྲལ་བའི་སྣང་སྟོང་རིས་སུ་མ་ཆད་པ་ལ་ངེས་ཤེས་ཀྱི་ཁོ་ཐག་ནང་ནས་ཆོད་པའི་ཚེ་ན་གནས་ལུགས་མཐར་ཐུག་རྟོགས་པ་དོན་དུ་གཉེར་ཞིང་ཚོལ་བའི་མཁན་པོ་མཁས་པ་རྣམས་ལ་སྟོང་ན་སྣང་མི་རུང་སྣང་ན་སྟོང་མི་རུང་ངོ་སྙམ་དུ་སྣང་སྟོང་འགལ་བར་འཛིན་པ་ལ་སོགས་པ་དོན་མེད་པའི་ལོག་པར་རྟོག་པས་གནས་ལུགས་མཐར་ཐུག་གི་དོན་ཟབ་མོ་རྟོགས་པར་དཀའ་བའི་གནས་ཟབ་མོ་ལ་ཡིད་ཆད་པའི་ཡིད་མུག་སྐྱེ་བ་མེད་ཀྱི་སྟེང་སྟེ་མེད་པར་མ་ཟད་སླར་སྣང་སྟོང་ཟུང་འཇུག་སྤྲོས་བྲལ་མཉམ་པ་ཉིད་ལ་ངེས་ཤེས་ཀྱི་ཁོ་ཐག་ནང་ནས་ཆོད་པས་ཡིད་བདེ་བླ་ན་བྲལ་བ་ཐོབ་པ་ཉིད་ཤིན་ཏུ་ངོ་མཚར་ཆེ་སྟེ་སྔ་འགྱུར་རིག་འཛིན་བརྒྱུད་པའི་རང་ལུགས་བཟང་པོའི་འབྲས་རྟགས་ཡང་དག་པའོ་ཞེས་སོ། །

དེ་ལྟར་ན་སྤྱིར་མདོ་རྒྱུད་མན་ངག་ཟབ་མོའི་གསང་ཚིག། བོད་སྔ་ཕྱིའི་མཁས་པའི་ཞལ་བཞེས། གསང་

[Full Size]

སྔགས་གསར་རྙིང་གི་བཀའ་སྲོལ་ནང་གི་བྱེ་བྲག་མི་འདྲ་བ་དུ་མའི་ཐ་སྙད། ལྟ་སྒོམ་སྤྱོད་པའི་ཆོས་སྐད། ཕྱག་བཞེས་ཕྲིན་སྒྲུབ་ཀྱི་རྣམ་བཞག་སྣ་ཚོགས་པ་འདི་སྙེད་ཅིག་དར་ཞིང་བཞུགས་པའི་ནང་པ་སངས་རྒྱས་པ་མཉམ་མེད་ཤཱཀྱའི་རྒྱལ་པོའི་བསྟན་པ་འདི་ལ་རང་གཞན་སུས་ཀྱང་འགལ་འདུར་མི་རྟོག་པར་གདུལ་བྱའི་ཁམས་དབང་དང་བསམ་པ་བཞིན་རྒྱལ་བའི་ཕྲིན་ལས་འགོགས་པ་མེད་པར་གང་ལ་གང་འདུལ་དུ་རང་ཤར་བ་ལ་དད་པས་ཡིད་ཆེས་པར་བྱས་ཏེ་རྟོགས་པར་བྱ་དགོས་ཏེ། །མགོན་པོ་བྱམས་པས། །རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཉིད། །ཅེས་གསུངས་པ་ལྟར། དད་པས་ལེགས་པར་ཞུགས་ཏེ། རྒྱུ་མཚན་ཉིད་ཀྱི་ཐེག་པ་དྲང་ངེས་ལྡེམ་དགོངས། སྔགས་རྡོ་རྗེའི་ཐེག་པར་མཐའ་དྲུག་ཚུལ་བཞིའི་སྒོ་ནས་བསྟན་པ་རྣམས་ངང་པས་ཆུ་ལས་འོ་མ་བཞིན་དོན་ལ་རྟོན་པས་གནས་སྐབས་དང་། མཐར་ཐུག་གི་དགོངས་གནད་ཇི་བཞིན་ཉམས་སུ་བསྟར་བས་བསྟན་པ་ཐམས་ཅད་འགལ་མེད་དུ་རྟོགས་པ་དང་། གཞུང་ལུགས་ཐམས་ཅད་གདམས་པར་འཆར་བའི་བཤད་སྒྲུབ་ནི་མང་དུ་ཐོས་པའི་མཁས་པ་རྣམས་ཀྱི་ཉམས་ལེན་ཐུགས་དམ་གྱིས་སྙིང་ནོར་དུ་བགྱི་འོས་དམ་པར་སྐྱེས་པས་ཆོས་དང་གང་ཟག་ལ་འཕྲད་པའི་ཆོས་དང་གང་ཟག་གཞན་ལ་ཞེན་ལྟ་དང་ཕྱོགས་ཞེན་རང་མཐོང་གིས་སྡང་ཞུགས་མི་བྱ་ཞིང་། དེ་ལྟར་ན་ཡང་

[Full Size]

སྔོན་ལས་བཙན་པོས་རང་རང་དང་པོ་ཉིད་ནས་གསར་རྙིང་གང་ལ་འཕྲད་པའི་ཆོས་དང་གང་ཟག་ལ་ལོག་པར་མི་བལྟ་བར་བཤད་པ་དང་སྒྲུབ་པའི་བཀའ་སྲོལ་སུན་མི་འབྱིན་པར་རང་ནུས་གང་ཡོད་ཀྱིས་བཟུང་ཞིང་བསྐྱང་ན་འདི་ཕྱིར་དགེ་ཞིང་བསྟན་འགྲོ་ལ་ཕན་པ་འབྱུང་ཞིང་དོན་གཉིས་ཀྱི་འབྱོར་བའི་དམ་པ་ཡང་དག་པར་འགྱུར་ལ། གཞན་དུ་དམ་ཚིག་ཉམས་པའི་ཆད་པ་མི་ཟད་པས་འདི་ཕྱིར་ཕུང་ཁྲོལ་མཐའ་ཡས་པར་འགྱུར་རོ། །དེས་ན་རིགས་པའི་གནས་ཆེན་ལྔ་ལ་སོགས་པར་སྐྱེས་སྦྱང་གི་བློ་གྲོས་ཆེ་ཞིང་། ཉམས་མྱོང་གི་དྲོད་ཚད་རྙེད་པས་བླ་མ་ལྷག་པའི་ལྷས་མངོན་སུམ་རྗེས་སུ་བཟུང་ཞིང་ལུང་བསྟན་ལེགས་པར་ཐོབ་པའི་མཁས་གྲུབ་དམ་པ་རྣམས་ཀྱིས་བསྟན་འགྲོར་སྨན་ངེས་ཀྱིས་མཁས་པའི་བྱ་བ་འཆད་རྩོད་རྩོམ་གསུམ་གྱི་དགག་སྒྲུབ་ཀྱི་རྩོད་རིགས་དོན་ལྡན་སུ་ལ་ཡོད་ཀྱང་རང་གཞན་གྱི་མཁས་པ་སུ་ཡང་དེ་ལ་ལོག་པར་མི་ལྟ་བར་གཟུ་བོར་གནས་པས་དགོངས་གནད་ལེགས་པར་འཚོལ་བར་བྱས་ན་བློ་གྲོས་ཟབ་མོའི་གསོས་སུ་འགྱུར་བས་ཕན་པ་མཆོག་ལས་གནོད་པ་ཅི་ཡང་མེད་ལ། དེ་ལྟར་མ་ཡིན་པར་གལ་ཏེ་རང་གར་སྡང་ཞུགས་ཀྱིས་སུན་ཅི་ཕྱིན་དང་སྒྲོ་སྐུར་ཅི་ཐོན་བྱས་ན་ཅི་ཡང་མི་ཤེས་པའི་བླུན་པོ་བ་ལང་རྫི་ཡན་ཆད་ཀྱང་རི་བོང་ཅལ་འགྲོགས་ཀྱིས་དེའི་རབ་མདར་བསྙེགས་ནས་ཡང་དག་པའི་ཆོས་དང་གང་ཟག་ལ་ལོག་པར་ལྟ་བས་བསྐུར་འདེབས་ཀྱི་ཉེས་

[Full Size]

པ་ཤིན་ཏུ་ཆེ་བས་གཞན་ཕུང་ཁྲོལ་ཆེན་པོར་སྦྱོར་ཞིང་རང་ཡང་དམ་པའི་རྣམ་ཐར་ལས་རིང་ཞིང་སྨྲ་ལ་དགའ་བའི་ཕུང་ཁྲོལ་གྱིས་ཟིན་ཅིང་ནང་ཆ་མངོན་པ་ཡིན་ཏེ། རྒྱལ་བ་སྲས་དང་བཅས་པའི་གསུང་ལས་ཀྱང་རིང་ཞིང་ཤིན་ཏུ་མི་རུང་བ་ཞིག་སྟེ། ཇི་ལྟར་ན་བདག་ཅག་གི་སྟོན་པ་མཆོག་གི་མདོ་སྡེ་དགོངས་པ་ངེས་འགྲེལ་ལས་ཆོས་འཁོར་གསུམ་ལས་རིམ་པར་ཐ་མ་ལ་མཆོག་ཏུ་བསྟོད་ཅིང་བསྔགས་པ་དང་། དང་པོ་དང་བར་པ་གཉིས་ལ་སུན་འབྱིན་གྱི་སྨད་པར་མཛད་པ་ལ་སོགས་སྡེ་སྣོད་གསུམ་པོར་དགག་སྒྲུབ་ཅི་རིགས་པས་བསྟན་པར་མཛད་པ་དང་། རྡོ་རྗེའི་ཐེག་པ་ལའང་རྒྱུད་སྡེ་གོང་འོག་ནང་གི་དབྱེ་བ་དང་བཅས་པའི་ཁྱད་པར་དང་དགག་སྒྲུབ་སྣ་ཚོགས་པས་གསལ་བར་བསྟན་པ་དང་། བསྲེགས་བཅད་བརྡར་བས་གསེར་བཞིན་དུ་ལེགས་པར་བརྟགས་ཏེ་བླང་དགོས་པ་དང་། ཡང་དག་པར་བརྟགས་པའི་ཕན་ཡོན་ཀྱང་མཐའ་ཡས་པ་དག་གསུངས་ཤིང་། བརྟགས་ཚུལ་ཀྱང་མགོན་པོ་བྱམས་པའི་མན་ངག་ལས། བརྒལ་ལན་གྱི་སྒོ་ནས་བརྟགས་པར་གསུངས་པ་དང་། དེ་ལྟར་བརྟགས་པ་ན་གཞན་ལ་གནོད་པར་གྱུར་ཀྱང་ཉེས་པ་མེད་པ་ཡང་། དཔལ་ལྡན་ཟླ་བས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་

[Full Size]

མེད། །ཅེས་གསུངས་པའི་ཕྱིར་རོ། །ཉེས་པ་མེད་པར་མ་ཟད་དེ་ལྟ་བུའི་ཚུལ་འདི་ཆོས་བསྲུང་བའང་ཡིན་ཏེ། ཏིང་འཛིན་རྒྱལ་པོ་ལས། དེ་ལ་ཆོས་སྲུང་བ་གང་ཞེ་ན། འདི་ལྟ་སྟེ་སངས་རྒྱས་ཀྱི་ཆོས་ལ་སྨོད་པ་རྣམས་ཆོས་དང་མཐུན་པར་ཚར་གཅོད་པའོ། །ཞེས་དང་། ཆོས་འཛིན་པའང་ཡིན་པར། ནམ་མཁའ་མཛོད་ཀྱིས་ཞུས་པ་ལས། རྒྱལ་བའི་བྱང་ཆུབ་མཚན་ཉིད་གང་བརྙེས་པ། །ཆོས་ཀྱི་མཚན་ཉིད་དེ་ཉིད་ཡང་འཛིན་ཅིང་། །གང་གིས་རྡུལ་མེད་མཐའ་འདི་རབ་ཤེས་པ། །དེ་ནི་སངས་རྒྱས་ཀུན་གྱི་ཆོས་འཛིན་ཡིན། །ཞེས་དང་། དེ་ལྟར་ཆོས་བཟུང་བ་དེ་ནི་སངས་རྒྱས་ལ་བྱས་པ་བཟོ་བ་དང་། བསོད་ནམས་ཚད་མེད་པའང་ཐོབ་སྟེ། དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པའི་མདོ་ལས། འདི་ལྟར་རྒྱལ་བའི་ཆོས་ཀྱིས་ཉེར་གནས་ཤིང་། །ཆོས་ཀྱི་ངེས་པར་འབྱུང་གི་ཟང་ཟིང་མིན། །དེ་བས་གང་ཞིག་བདེ་གཤེགས་ཆོས་འཛིན་པ། །དེ་ནི་སངས་རྒྱས་ཀུན་ལ་བྱས་པ་བཟོ། །ཞེས་དང་། ནམ་མཁའ་མཛོད་ཀྱིས་ཞུས་པའི་མདོ་ལས། ཇི་ལྟར་བསྐལ་པ་བྱེ་བ་སྟོང་བརྗོད་ཀྱང་། །སངས་རྒྱས་ཡེ་ཤེས་མཐའ་ཡོད་མ་ཡིན་ལྟར། །དེ་བཞིན་གཤེགས་ཀྱི་དམ་ཆོས་འཛིན་པ་ཡི། །བསོད་ནམས་དེ་ཡང་ཚད་ཡོད་མ་ཡིན་ནོ། །ཞེས་གསུངས་པས་སོ། །དེའི་ཕྱིར་འཕགས་བོད་ཀྱི་མཁས་དབང་དག་གིས་དགོས་དབང་

[Full Size]

གིས་རྣམ་པར་དཔྱོད་པའི་དགག་སྒྲུབ་ཇི་སྙེད་པར་བཞུགས་པ་གང་ལ་ཡང་ལོག་པར་མི་རྟོག་པར་བློ་གཟུ་བོར་གནས་པས་དགོངས་གནད་ལེགས་པར་བཙལ་བས་རང་གི་རྣམ་དཔྱོད་ཀྱི་རྩལ་རྫོགས་ཤིང་མདོ་རྒྱུད་ངེས་དོན་གྱི་དགོངས་དོན་ཟབ་མོ་ཉམས་སུ་བསྟར་བས་ཡོན་ཏན་གྱི་ལུས་ཟུང་བརྟས་ཏེ་བསྟན་འགྲོའི་གསོས་སྨན་ཆེན་པོར་འགྱུར་བའི་དམ་པའི་རྣམ་ཐར་ཉམས་འོག་ཏུ་ཆུད་པར་འགྱུར་བས་ན་འདིར་ཡང་ད་ལྟར་བཞུགས་ཤིང་སླད་ནས་འབྱོན་པ་རྣམས་ལ་སྙིང་ནས་དེ་ལྟར་གསོལ་བ་ཡང་ཡང་འདེབས་པ་ལགས་ན་ཆོས་མཐུན་སྤྲང་པོའི་ངག་ལས་ཀྱང་བླང་བར་འོས་ཕྱིར་ཕྱོགས་དུས་ཀྱི་མཁས་པ་རྣམས་ཀྱི་ཐུགས་དམ་སྙིང་ནོར་དུ་བཅིངས་ཏེ་དགག་པ་དང་སྒྲུབ་པའི་ཚུལ་གྱིས་བརྟགས་པ་འདི་དང་གཞན་འོག་མ་འོག་མ་ལ་སོགས་པ་ལའང་ཐུགས་དམ་རྒྱུད་བསྐུལ་དུ་དང་ལེན་མཛད་ནས་བག་ཡོད་པ་རྣལ་འབྱོར་དུ་བྱའོ་ཞེས་གོང་འོག་ཀུན་གྱི་བར་གྱི་གསལ་བྱེད་དུ་བསྟན་པ་འདི་དག་བསྙེལ་བ་མེད་པར་ཐུགས་ལ་བཅིངས་ཏེ་བལྟ་ཞིང་ཉམས་སུ་ལེན་པར་ཞུ་བའོ། །

རང་སྟོང་གཞན་སྟོང་ཕན་ཚུན་ཆེར་རྩོད་ཀྱང་། །

སྣང་སྟོང་ཕྱོགས་སུ་ལྷུང་ན་སུ་ལའང་སྐྱོན། །

སྣང་སྟོང་མི་འགལ་ཟུང་འཇུག་གྲུབ་མཐའི་མཆོག།

འདི་འཛིན་ཕྱོགས་ལས་རྣམ་པར་རྒྱལ་མིན་ནམ། །ཞེས་ཀྱང་སྨྲས་སོ། །