སྤྱིལ་བུ་ཅན་གྱི་སྒྲུབ་ཐབས།
ཐུགས་རྗེ་ཆེན་པོ་རི་ཁྲོད་པ་ལ་ཕྱག་འཚལ་ལོ། །རབ་ཏུ་ཡིད་དགའ་ནགས་ཀྱི་དབུས། །མེ་ཏོག་འབྲས་བུ་འདུད་པ་ཡི། །ཤིང་དྲུང་རྩྭ་ཡི་སྤྱིལ་བུ་ཉིད། །ཆགས་བྲལ་རྙོག་པ་མེད་བཞུགས་འདུད། །དེ་ནས་སྒྲུབ་པོ་སྤྲོས་པས་འཇིགས་པ་དང༌། །རྣམ་པར་གཡེང་བས་དལ་བ་ཐོབ་བ་ཡང་རུང་སྟེ། གཅིག་པུ་དག་དབེན་པ་དང་ཡིད་བྱུང་བའི་བློ་ཅན་གྱིས། དུས་བཟང་པོའི་ཚེ་ནགས་སུ་སོང་ལ་གང་ན་ལྗོན་ཤིང་བཟང་བ་ལ་ཡལ་ག་དང་ལོ་འབྲས་གྱ་ནོམ་པ་དང་ལྡན་པ། གྲིབ་མ་བསིལ་བས་ལུས་སྐྱོབ་ཅིང་དྲུང་ན་འདུག་ན་སྐྱིད་ལྟར་སྣང་བ་ཡོད་པ་ཞིག་བཙལ་ཏེ། དེའི་འགྲམ་དུ་གཏོར་མ་སྦྱིན་པ་སྔོན་དུ་བཏང་ནས་རྩྭའི་སྤྱིལ་བུ་མཛེས་པ་བཅོས་པར་བྱའོ། །དེའི་ནང་གི་སྟེང་གི་གཞིར་རྗེ་བཙུན་སྤྱན་རས་གཟིགས་སྤྱིལ་བུ་ཅན་གྱི་རྟེན་བྱིན་གྱིས་བརླབས་པ་དང་ལྡན་པ་ཞིག་བཞུགས་ལ། མཆོད་པ་ཐམས་ཅད་ཀྱིས་མཆོད་ནས། མེ་ཏོག་གིས་སྙིམ་པ་བཀང་སྟེ། ཙོག་བུར་འདུག་ལ་སྔགས་འདི་བརྗོད། །ཨོཾ་ཨཱཿཧྲཱིཿབ་ན་ལོ་ཀ་ནཱ་ཐ། །མ་ཧཱ་ཀཱ་རུ་ཎི་ཀ །སརྦ་བུདྡྷ་ཛྙཱ་ནཱ་གརྦྷ་མ་མ་ཙིཏྟེ་ཀནྟཱ་ཧཱུཾ་ཧཱུཾ་སྭཱ་ཧཱ། དེ་ནས་སྤྱིལ་བུ་དེ་དང་རྟེན། །ཕོ་བྲང་མཆོག་དང་ལྷ་ཉིད་དུ། །བྱིན་གྱིས་བརླབས་ལ་མེ་ཏོག་གཏོར། །སྐད་ཅིག་དེ་ལ་བསམ་གཏན་བྱ། །སྙོམ་མེད་མི་གཡེངས་བརྟན་པ་ཡིས། །ཟླ་བ་དྲུག་གམ་གསུམ་མམ་གཅིག །ངེས་པར་བྱས་ན་ནགས་ཀྱི་ནང༌། །མགོན་པོ་གང་རུང་གཟུགས་སུ་སྟོན། །དེ་ཡི་སྨིན་མཚམས་པདྨོ་འདྲའི། །རི་མོ་འམ་ཐིག་ལེ་གསལ་བར་འགྱུར། །བརྩོན་པས་མ་འཁྲུགས་དཀྱིལ་འཁོར་བྱ། །མགོ་བཏུད་ཞབས་ལ་གཏུགས་ཏེ་གསོལ། །ཨོཾ་ཨཱཿཧྲཱིཿཔཱུ་ར་བེ་པྲ་ཏཱིཙྪ་སུརྨར་ཧོ། །ཐལ་སྦྱར་མིག་མི་འཇུམས་པ་ཡིས། །མེ་ཏོག་བསྟབས་ལ་སྔགས་འདི་བརྗོད། །དེ་ཚེ་བདག་ནི་ཅི་འདྲ་ཡང༌། །སྐྱོབ་པས་རྗེས་སུ་འཛིན་པ་འགྱུར། །སྤྱིལ་བུ་ཅན་གྱི་སྒྲུབ་ཐབས་རྫོགས་སོ།།