ཉི་ཟླ་སྒྲོན་མའི་ཆོ་ག།
― DTG073_Page_0322 ―
[མ་དཔེ་གཟིགས་ན་འདིར་གནོན།]
རྒྱལ་བ་ཉི་མ་དང་ཟླ་བའི་ཕྱག་མཚན་ཅན་ལ་ཕྱག་འཚལ་ལོ། །དབང་པོ་རྟུལ་པོ་ཉིད་དང་གང༌། །དེ་བཞིན་འཇིག་རྟེན་དོན་བསྒྲུབ་འདོད། །གཞན་དག་བསོད་ནམས་ནོར་འདོད་པ། །དེ་ནི་ཉི་ཟླའི་མཚན་ཅན་བསྒྲུབ། །སྤྲིན་ཚོགས་རྡུལ་དང་ཁུག་རྣ་དུ་བ་དང༌། །རླངས་བྲལ་དྲི་མེད་བཻཌཱུཪྻ་བཅག་འདྲའི། །མཁའ་ལ་དཔལ་བཟང་ཉི་ཟླ་འཆར་བར་བྱེད། །དེ་ཚེ་དང་ལྡན་སྨྲ་བ་བཅད་ནགས་འཇུག །དྲང་སྲོང་བུ་དང་ལྷན་ཅིག་ནགས་བཟང་དུ། །སྲིད་པའི་སྡུག་བསྔལ་སྐྱོན་ནི་དྲན་བྱས་ལ། །བདུད་འདུལ་ཐུབ་པའི་དམ་ཚིག་ཕྱག་རྒྱ་ཆེ། །མངོན་སུམ་བཅས་ཏེ་པདྨའི་མིག་གཉིས་བསྐྱོད། །དེའི་འོག་ཏུ་མཆོད་པ་ཐམས་ཅད་སྟ་གོན་བྱས་ནས། བདུག་པ་དྲི་ཞིམ་པོ་ཐམས་ཅད་ཀྱིས་བདུག་ཅིང༌། རྒྱལ་བར་གྱུར་ཅིག་རྒྱལ་བར་གྱུར་ཅིག །སྟོབས་བཅུའི་འོད་ཟེར་ཆེན་པོས་འགྲོ་བ་གསུམ་གྱི་མུན་པ་སེལ་བ་དུས་ཚད་མེད་པར་བརྩོན་པའི་ཆོས་ཀྱི་རྒྱལ་པོ་ཉི་མ་དང་ཟླ་བའི་མཚན་མ་ཅན་དེ་རིང་རྒྱལ་བར་གྱུར་ཅིག །བདག་ཅག་ལ་སོགས་པའི་དབང་པོ་རྟུལ་པོ་དང༌། དོན་བསྒྲུབ་པ་དང༌། བསོད་ནམས་གཉེར་བ་རྣམས་ཀྱི་ཕྲིན་ལས་ཐོགས་པ་
― DTG073_Page_0323 ―
[མ་དཔེ་གཟིགས་ན་འདིར་གནོན།]
མི་མངའ་བར་མཛོད་ཅིག །ཅེས་ལན་གཉིས་ལན་གསུམ་ཆེད་དུ་བརྗོད་པས་ཆེད་དུ་བརྗོད་དོ། །ཉི་མ་ཟླ་བ་ལས་ཀུན་ལ་སྔགས་བདུན་འདོན་རྣམ་ལས་བརྗོད་པ་གང་ཡིན་དང༌། །ཐུགས་རྗེའི་ལྷས་བསྟན་དྲང་སྲོང་ཨ་བྷིས་ཤར་དུ་ཁ་བལྟས་ཆགས་བྲལ་རྙེད་ཚེ་མངོན་བསྟོད་གང༌། །དེ་བཞིན་གང་གཞན་གླང་པོ་སྐྱོང་དང་གཏེར་བདག་གསེར་སྲུང་འོད་མའི་ཚལ་དུ་སྔོན་བྱུང་དབྱངས། །དེ་དག་མ་ལུས་མགྲིན་བཟང་རྣམས་བསྡེབས་མགྲིན་གཅིག་མཆོད་བཅས་དང་བ་དྲག་པོས་དངོས་གྲུབ་སྩོལ། །དེ་རྗེས་རྟ་བདུན་ཆུ་ཡི་སྙིང་པོ་འོད་ཀྱི་དྲ་བ་ཅན། །སྙིང་བརྩེས་ཐུགས་བརྟུལ་གློ་བུར་ལྷག་གེ་བྱོན་པས་གདོང་བསལ་གྱུར། །དེ་ཚེ་རིང་པར་མ་འཁྲུགས་མཆོད་བྱ་གསང་སྔགས་བཟླས། །དཀྱིལ་འཁོར་གཉིས་དབུས་པད་ཕྱག་ཉི་ཟླའི་རྒྱན་ཅན་འབར་བའོ། །འཁོར་ལོ་དང་རྗེས་སུ་མཐུན་པའི་ཁ་དོག་ཅན་བརྩོན་པའི་ཆ་བྱད་གཏི་མུག་དང་ཆགས་པ་དང༌། སྡིག་པ་གསུམ་སེལ་བ་དང༌། སྦྱང་བའི་ཕྱིར་བསྲེག་པ་དང༌། བསིལ་བའི་མཚན་ཉིད་ཅན་ནོ། །རྒྱུན་གྱི་མཐར་དྲན་པའི་རྒྱས་བཏབ་པ་ཞེས་བྱ་བ་དང༌། སྦྱོར་བའི་རྒྱས་བཏབ་པ་ཞེས་པ་གཉིས་ཅི་རིགས་སུ་དྲན་པར་བྱའོ། །ཨོཾ་ཨཱཿཧྲཱིཿབཛྲ་སཱུཪྻ་ཙནྡྲ་ཀཱཛ་སིདྡྷ་ས་མ་ཡ་ས་མ་ཡ་སྨར་སྨར་ཨ་ནུ་སྨྲྀ་ཏི་ཀ་ར་ཧཱུཾ། ཉི་ཟླ་སྒྲོན་མའི་ཆོ་ག་རྫོགས་སོ།།
| 
