ཡབ་ཡུམ་གཉིས་པའི་དཀྱིལ་འཁོར་དུ་དབང་བསྐུར་བ་བདེ་སྦྱིན་དམ་པ་ཞེས་བྱ་བ།
― DTG074_Page_0064 ―
[མ་དཔེ་གཟིགས་ན་འདིར་གནོན།]
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །དཔལ་རྡོ་རྗེ་རྣམ་པར་འཇོམས་པ་ཡབ་ཡུམ་གཉིས་སུ་མེད་པའི་དཀྱིལ་འཁོར་དུ་དབང་བསྐུར་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས་གནས་ཁང་ཡིད་དང་མཐུན་པར་སའི་ཆོ་ག་ལ་སོགས་པ་སྔོན་དུ་སོང་བས། དཔལ་རྡོ་རྗེ་རྣམ་པར་འཇོམས་པ་ཡབ་ཡུམ་གྱི་དཀྱིལ་འཁོར་བཞེངས་ཏེ། ས་སྟེགས་གྲུ་བཞི་པ་མེ་ལོང་གི་ངོས་ལྟར་བྱས་ལ་ཐིག་བཏབ་ལ་ཚོན་དགྱེ་སྟེ། དབུས་སུ་འཁོར་ལོ་རྩིབས་བཞི་པ་དཀར་པོ། །མུ་ཁྱུད་སེར་པོ་མདུད་རྩེ་གསུམ་པས་བསྐོར་བ། དེའི་ཕྱི་རིམ་པདྨ་བཅུ་དྲུག་པ་དམར་པོ། མུ་ཁྱུད་སེར་པོ་ཕུར་བུས་བསྐོར་བ། གྲུ་ཆད་ལྗང་གུ་མུ་ཁྱུད་དང་བཅས་པ་མཐའ་མ་མེ་རིས་བསྐོར་བ། གྲྭ་རྣམས་སུ་བུམ་པ་བཟང་པོ་བྲི་བར་བྱའོ།། དེ་ལྟར་བྲིས་ལ་དཀྱིལ་འཁོར་གྱི་མཐའ་མ་རྣམས་སུ་ཤུ་གུ་བརྒྱ་རྩ་བརྒྱད་ཀྱིས་བསྐོར་བ་གཟུགས་སོ། །དེ་དག་ཀྱང་རས་ཀྱི་སྐུད་པ་སྒྲིལ་མས་སྤྲེལ་ལོ། །མཚན་ཉིད་དང་ལྡན་པའི་བུམ་པ་གཉིས་ལ་རྒྱན་ཐམས་ཅད་ཀྱིས་བརྒྱན་པ་འཁོར་ལོ་དང་པདྨའི་སྟེང་དུ་གཞག་གོ །བུམ་པ་གཉིས་ལ་ཡང་དར་ཚོན་སྣ་ལྔས་སྤྲེལ་ལོ། །དཀྱིལ་འཁོར་གྱི་ཁོར་ཁོར་ཡུག་ཏུ་རྩྭ་ཀུ་ཤ་གསར་པ་བཏིང་བའི་སྟེང་དུ་སྤོས་ཆུ་དང་འོ་མའི་ཆུས་བསང་བར་བྱའོ། །དེ་ནས་ཁྲུས་ཀྱི་ཆོ་ག་ནས་བྱུང་བ་བཞིན་དུ་ཉེ་རེག་དང་འཐོར་འཐུང་ལ་སོགས་པ་བྱས་ལ་བདག་ཉིད་ལག་པ་གཉིས་ཁོང་སྟོང་དུ་སྦྱར་ལ་མཐེ་བོང་གཉིས་བསླང་ལ་མཐེའུ་ཆུང་ནང་དུ་བསྐུམ་ལ། ཨོཾ་མ་ཧཱ་ཡཀྵ་སེ་ནཱ་པ་ཏ་ཡེ་བཛྲ་པཱ་ཎི་ཧཱུཾ་ཕཊ། ཅེས་བརྒྱ་རྩ་བརྒྱད་བརྗོད་པས་རྡོ་རྗེ་རྣམ་པར་འཇོམས་པ་སྐུ་མདོག་སེར་པོ་རྒྱན་སྣ་ཚོགས་པས་བརྒྱན་པ། དར་གྱི་ཅོད་པན་དང་མུ་ཏིག་གི་དྲ་བས་བརྒྱན་པ། དབུ་ལ་རིགས་ལྔའི་སངས་རྒྱས་ཀྱིས་བརྒྱན་པ། ― DTG074_Page_0065 ―
[མ་དཔེ་གཟིགས་ན་འདིར་གནོན།]
ཐུགས་ཀ་ནས་ཁྲོ་ཆུང་མེ་ལྟར་འབར་བ། དཔག་ཏུ་མེད་པ་འཕྲོ་བ་ཡབ་ཞལ་བགྲད་ལྗགས་འགྱུ་བ་ཕྱག་གཡས་བུམ་པའི་སྟེང་ན་ཁྲོ་བོའི་ཞལ་གཉིས་ཕྱུང་བ། གཡོན་རྡོ་རྗེ་དང་ལྕགས་ཀྱུ་ལྷན་ཅིག་ཏུ་འཛིན་པ་བསྐྱེད་དོ། །དེ་ནས་ལག་པའི་སོར་མོ་བསྣོལ་སྲིན་ལག་གཉིས་བསྒྲེངས་ལ་མཐེ་བོང་དང༌། མཛུབ་མོ་གཉིས་སྦྱར་ལ། ཨོཾ་བཛྲ་དྷ་ར་ཏིཥྛ་ཏིཥྛ་ཧཱུཾ་ཕཊ། ཅེས་བརྗོད་པས་ཡུམ་ལུ་གུ་རྒྱུད་མ་སྐུ་མདོག་དམར་མོ་རྒྱན་སྣ་ཚོགས་པས་བརྒྱན་པ་གཡས་ལྕགས་སྒྲོག་རྡོ་རྗེ་རྩེ་གསུམ་པས་མཚན་པ་བསྣམས་ཏེ་ཡབ་ལ་འཁྱུད་པ་གཡོན་བདུད་རྩིའི་བུམ་པས་ཆུ་རྒྱུན་འབེབས་པ་ཡབ་ཀྱི་བུམ་པ་དང་གཉིས་མེད་དུ་བསྐྱེད་དོ། །དེ་ནས་སྒྲུབ་པ་པོ་དམ་ཚིག་དང་ལྡན་པ་བཞིས་ཕྱོགས་བཞི་ནས་མཆོད་པ་དང་བསྟོད་པ་བྱས་ལ་བགེགས་ཞི་བར་བྱ་བའི་དོན་དུ་གཏོར་མ་རེ་རེ་བཏང༌། དེ་ནས་ཡབ་ཡུམ་གྱི་ཡེ་ཤེས་སེམས་དཔའ་ལ་དམིགས་ལ་ཤུག་པ་རེ་ལ་རྒྱུད་རེ་བཏོན་ལ། གཡས་ནས་གཅིག་ཅིག་ལ་བསྐོར་བ། དེ་ལྟར་བཞི་རྫོགས་པ་དང་རེ་རེ་ལ་དབང་དུ་གྱུར་པའི་སྦྱིན་སྲེག་བྱའོ། །དེའི་དུ་བ་ལ་སློབ་མ་བདུགས་ཏེ་ཁྲུས་རེ་ཡང་བྱའོ། །དེ་ནས་དབང་ལུགས་བཞིན་དུ་བསྐུར་རོ། །གཏོར་མ་བཏང༌། དཀྱིལ་འཁོར་བསྡུ། བཀྲ་ཤིས་གསོལ། ཁྲུས་རེ་ཡང་བྱའོ། །སློབ་མས་བླ་མ་ལ་ཡོན་དབུལ་ལོ། །ཡབ་ཡུམ་གཉིས་པའི་དཀྱིལ་འཁོར་དུ་དབང་བསྐུར་བ་བདེ་སྦྱིན་དམ་པ་ཞེས་བྱ་བ་དཔལ་མར་མེ་མཛད་ཀྱིས་མཛད་པ་རྫོགས་སོ།། |
