ལམ་ཆེན་པོའི་སྒྲུབ་ཐབས།
ཐུགས་རྗེ་ཆེན་པོ་ལམ་གྱི་བཞི་མདོ་ཅན་ལ་ཕྱག་འཚལ་ལོ། །རྒྱུ་དང་མི་རྒྱུའི་འཇིག་རྟེན་ལ། །ཐུགས་བརྩེས་དབེན་པ་སྤངས་ནས་ནི། །ལམ་གྱི་བཞི་མདོར་ཀུན་དོན་སྤྱོད། །སྐྱོ་བ་མེད་སྐྱོབ་སྒྲུབ་ཐབས་བྲི། །བྱང་ཆུབ་སེམས་དཔའ་ཆེན་པོ་སྙིང་རྗེ་ཆེན་པོ་ཅན་གྱིས་བདག་ཉིད་གྲགས་པ་ལ་སོགས་པའི་ཕྱིར་མ་ཡིན་པར་ལམ་གྱི་བཞི་མདོ་དང་ཚོད་འདུས་ཆེན་པོ་ལ་སོགས་པར་འཕགས་པ་སྤྱན་རས་གཟིགས་དབང་ཕྱུག་བསྒྲུབ་པར་བྱའོ། །དེ་ནི་ཐུགས་རྗེ་ཤེས་རབ་ཀྱིས། །དབེན་པ་སྤངས་ཕྱིར་ཆགས་མེད་ཕྱིར། །ལམ་ཆེན་ཞུགས་དང་ལྟོས་མེད་ཕྱིར། །འདུ་འཛིར་འདུ་འཛི་མེད་པས་གྲུབ། །རེ་ཞིག་སྐྱེ་བོ་མང་པོའི་སྤྱོད་ཡུལ་དུ་བྱེད་པའི་གནས་ནི་འཕགས་པ་དགྱེས་པའི་གནས་ཡིན་པས་དེར་སྤྱིལ་བུ་འམ་ཁང་བུ་ལ་སོགས་པ་གནས་མལ་ཁ་དོག་དཀར་པོ་པདྨོའི་ཏོག་
ཅན་ལེགས་པར་བཅོས་ལ། ཇི་སྙེད་འབྱོར་པའི་ཡོ་བྱད་ཐམས་ཅད་ཀྱིས་འཕགས་པ་ཉིད་མཆོད་པའི་ཕྱིར་བརྩོན་པར་བྱའོ། །སྐྱོབ་པ་སྐྱོབ་པ་མེད་གཅིག་པུ། །ལྗོན་ཤིང་བཟང་ལ་སྐུ་བརྟེན་ཏེ། །པདྨོ་དང་ནི་འབྲས་བུ་སྟེར། །བཅུ་དྲུག་ན་ཚོད་མཛེས་པའོ། །ཆོ་ག་བཟང་ཤེས་བདག་དང་ལྷ། །ཐ་དད་རིམ་གྲོ་བྱ་བྱེད་དུ། །བལྟས་ཏེ་དུས་གསུམ་མཆོད་པས་མཆོད། །དེ་མཉེས་བྱ་ཕྱིར་རིག་པ་བཟླས། །ཨོཾ་ཨཱཿཧྲཱིཿསརྦ་ལོ་ཀཱརྠཱ་སརྦ་སིདྡྷི་སིདྡྷི་ཧཱུཾ་ཧཱུཾ་ཧཱུཾ། སརྦ་སཏྭཱརྠཱ་པ་རི་པཱུ་རུ་པཱུརྦ་ས་མ་ཡ་སྨ་ར་ཧཱུཾ་ཧཱུཾ་ཧཱུཾ་སརྦ་ཙིཏྟ་སཾ་དུཥྚཱན་བྷ་ར་བྷ་ར། སཾ་བྷ་ར་སཾ་བྷ་ར། པྲ་ཏྱུཏྤནྣ་སུ་སཾ་བྷ་བ་ཀ་ར་ཧཱུཾ་ཧཱུཾ་ཧཱུཾ་ཞེས་བྱ་བའི་འབུམ་ཕྲག་གཅིག་བཟླས་ལ། དེའི་ཕྲིན་ལས་ཡོངས་སུ་རྫོགས་པར་བྱ་བའི་ཕྱིར། ལམ་གྱི་བཞི་མདོ་ལ་སོགས་པར་མཆོད་རྟེན་བཞེངས་པར་བྱའོ། །དེའི་ནང་དུ་པདྨོའི་སྡོང་བུ་དབུས་མ་ལ་བཞུགས་པའི་སྤྱན་རས་གཟིགས་སྐྱོ་བ་རྣམ་པར་སྤངས་པ་དང༌། ཤར་ལ་སོགས་པའི་སྡོང་བུ་བཞི་ལ་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་ཅན་གྱི་ཐུགས་རྗེ་ཆེན་པོ་དཀར་པོ་དང༌། སེར་པོ་དང༌། དམར་པོ་དང༌། ལྗང་གུའི་ཁ་དོག་ཅན་རྣམས་བཅོས་ལ། རབ་ཏུ་གནས་པ་ཆོ་ག་ཇི་ལྟ་བ་བཞིན་བྱིན་གྱིས་བརླབ་པར་བྱའོ། །སྐྱེ་བོ་མང་པོ་དོན་གཉེར་ལ། །སྐྱེ་མེད་དཀྱིལ་འཁོར་སྤྲིན་གྱི་ཚུལ། །མཁའ་ལ་ལྡིང་བས་སྟེང་བརྒྱན་པ། །མགོན་པོ་རྣམས་ཀྱི་ཡིད་བཞིན་ནོར། །སྲོག་ཆགས་གང་གང་དད་ཡོད་དང༌། །དད་མེད་ཤེས་དང་མི་ཤེས་པའང༌། །ཀུན་ཏུ་ལམ་ཆེན་འདིར་རྒྱུ་ན། །དེ་དག་ངན་འགྲོར་འགྲོ་མི་སྲིད། །རང་གིས་མཐོང་དང་ཐོས་དང་དྲན། །གྲིབ་མས་རེག་དང་སོ་སོར་རྟོག །དེ་དག་རྣམས་ཀྱང་མ་ཐོགས་པར། །འཇིག་རྟེན་མགོན་གྱི་ཞིང་དུ་སྐྱེ། །ལམ་ཆེན་པོའི་སྒྲུབ་ཐབས་རྫོགས་སོ།།