དཔལ་འཇིག་རྟེན་དབང་ཕྱུག་ཝ་ཏི་ཅན་གྱི་སྒྲུབ་ཐབས།
ཝ་ཏིའི་རྒྱུད་ཅན་གྱི་ཐུགས་རྗེ་ཆེན་པོ་ལ་ཕྱག་འཚལ་ལོ། །དཀར་བསིལ་རོ་བརྒྱ་བདུད་རྩིའི་རྒྱུན་འབབ་ཉིད་ཀྱི་ཕྱག །གླང་ཆེན་སྣ་ཕུབ་ལྟ་བརྒྱའི་ཅོད་པན་གྱིས་གཏུགས་པ། །མ་ལུས་ས་སྟེངས་ཞི་བ་བསྒྲུབ་མཛད་མཆོག་གི་བུ། །དཔལ་ལྡན་དཔལ་ཆེན་སྤྱན་རས་གཟིགས་དབང་ཉིད་རྟག་འདུད། །དགར་དང་མྱ་ངན་ཧ་ཅང་སྡིག་མང་དགེ་བ་སོགས། །འགྱུར་བའི་ལས་ཀྱི་དབང་པོ་གང་ཡིན་དེ་གཞན་འགྱུར། །དེ་ཚེ་ལྷ་མཆོག་ཝ་ཏིའི་རྒྱུན་འབེབས་དུས་གསུམ་དུ། །ཉིན་དང་མཚན་མོ་རྣམ་པ་
ཀུན་དུ་མི་གཡེང་བསྒོམ། །དེ་ལ་རྒྱུན་འབབ་པ་ནི་གཉིས་ཏེ། ཡིད་ཀྱི་ལས་ཅན་དང༌། དངོས་པོའི་ལས་ཅན་ནོ། །ཡིད་ཀྱི་ལས་ཅན་ནི་མཚན་མོ་ལའོ། །དངོས་པོའི་ལས་ནི་ཉིན་པར་རོ། །གང་ན་འཇུག་ངོགས་བདེ་ཞིང་དྲི་ངད་ལྡང་བ་མེ་ཏོག་ལྗོན་ཤིང་གཡུར་ཟ་བས་མཛེས་པར། ཉིད་ཀྱི་ཕྱག་དཔུང་པ་ཚུན་ཆད་ཡོངས་སུ་རྫོགས་པའམ། །མཁྲིག་མའི་བར་དུ་ཡང་རུང་སྟེ། དེ་ལྟ་བུའི་གཟུགས་གདུ་བུ་དང་སོར་གདུབ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ་དང་བཅས་ཏེ། མདོག་བཟང་པོས་བསྒྱུར་ལ། ཟླ་བ་ཉ་བ་དང་ཉི་མ་ཤར་བའི་དུས་གང་རུང་ལ་རབ་ཏུ་གནས་པར་བྱའོ། །མེ་ཏོག་ཆར་དང་བདུག་པའི་སྤྲིན་གཏིབས་རོལ་མོ་འབྲུག་སྒྲ་ཆེར་བསྒྲགས་ཤིང༌། །བ་དན་རྔ་ཡབ་གློག་གི་རྒྱུན་འཁྲིགས་རོ་བཟངས་ཞལ་ཟས་ཀྱིས་མཆོད་དེ། །བར་སྣང་འགྲོ་བས་ཕྲིན་ལས་རྗེས་བསྟོད་ཚངས་དབྱངས་ང་རོས་དྲིལ་བསྒྲགས་ལ། །རྡོ་རྗེ་དྲིལ་སྒྲོགས་དགྱེས་པའི་གར་བསྐྱོད་རྡོ་རྗེ་དགའ་བས་བྲོ་གར་དབུལ། །དེ་ནས་ཡི་གེ་གསུམ་སྔགས་ཀྱིས། །བྱིན་གྱིས་བརླབ་པའི་རྒྱུན་ཕབ་པའི། །པདྨོའི་ཕྱག་གིས་མིང་མེད་ཀྱི། །རྩེ་ནས་ལེགས་བསྟར་སྙིང་པོ་བཏུང༌། །རྡོ་རྗེ་སེམས་དཔའི་དང་པོ་དང༌། །དག་བྱེད་དྲི་མེད་བདེ་བ་ཆེ། །དེ་འདིར་པདྨོ་སེམས་དཔའ་ཆེ། །རྣམ་དག་འོད་གསལ་རྨད་ཡིན་ནོ། །ཇི་ལྟ་ཇི་ལྟར་སྤྱི་གཙུག་ནས། །རྒྱུན་འབབ་དེ་ལ་དེ་ལྟར་ནི། །སྐལ་པ་བཟང་པོའི་ལུས་ངག་ཡིད། །དྲི་བྲལ་མི་མཉམ་མཉམ་པར་འགྱུར། །གཞན་དག་ཕོངས་པ་སྣ་ཚོགས་དང༌། །ཕུན་སུམ་ཚོགས་མིན་གང་གྱུར་པ། །དེ་དག་ཀྱང་ནི་སྐད་ཅིག་གིས། །སྤང་གྱུར་འཐུངས་པ་ཙམ་གྱིས་སོ། །དཔལ་འཇིག་རྟེན་དབང་ཕྱུག་ཝ་ཏི་ཅན་གྱི་སྒྲུབ་ཐབས་རྫོགས་སོ།།