འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་ཞེས་བྱ་བའི་གཟུངས་ཀྱི་ཆོ་ག་ཞེས་བྱ་བ།
ཙནྡྲགོམིན།
― DTG074_Page_0533 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱཪྻ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ནཱ་མ་དྷཱ་ར་ནི་བིདྷི་ནཱ་མ། བོད་སྐད་དུ། འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་ཞེས་བྱ་བའི་གཟུངས་ཀྱི་ཆོ་ག་ཞེས་བྱ་བ། འཕགས་མ་གདུགས་དཀར་མོ་ཅན་ལ་ཕྱག་འཚལ་ལོ། །རྣལ་འབྱོར་ནུས་པ་ཆུང་གྱུར་ཞིང༌། །བསྡུས་པ་ལ་མོས་སེམས་ཅན་ལ། །ཙཎྜ་བདག་གིས་ལེགས་བསྡུས་ཏེ། །གཟུངས་ཀྱི་ཆོ་ག་དགོད་པར་བྱ། །དང་པོར་སྔགས་པ་དམ་ཚིག་ལྡན། །བྱང་ཆུབ་སེམས་ལྡན་རབ་སྦྱངས་ཏེ། །ཆོ་ག་བསྡུས་རྒྱས་མཁས་པ་ཡིས། །མཎྜ་ལ་ཆག་ཆག་བཏབ་སྟེང་དུ། །དྲི་ཡི་བྱུག་པ་ལེགས་བསྒོས་ཏེ། །དང་པོར་དབུས་སུ་པདྨ་ནི། །འདབ་བརྒྱད་གེ་སར་
― DTG074_Page_0534 ―
[མ་དཔེ་གཟིགས་ན་འདིར་གནོན།]
བཅས་པ་བྲི། །དེ་ཡི་ཕྱིར་ནི་བཅུ་དྲུག་པ། །བྲིས་ཏེ་སྒོ་ནི་གཅིག་པ་བྱ། །དེ་དབུས་རིན་ཆེན་ཁྲི་སྟེང་དུ། །བུམ་པ་མཚན་ཉིད་ལྡན་བ་གཞག །རྒྱན་དང་དྲི་ཡི་ས་ཆུས་གང་བྱའོ། །དེ་ནས་མཆོད་དང་གཏོར་མ་བཤམ། །དང་པོ་བྱང་ཆུབ་སེམས་བསྐྱེད་ལ། །བདུན་པོ་རྣམ་པར་དག་པ་ཡི། །སྔོན་འགྲོས་ལྷ་མོ་བསྐྱེད་པར་བྱའོ། །དེ་ནས་བཟླས་དང་གཏོར་མ་དང༌། །མཆོད་དང་བསྟོད་པ་ལ་སོགས་བྱ། །བུམ་པ་མི་དམིགས་བྷྲཱུཾ་ལས་ནི། །རིན་ཆེན་ལས་གྲུབ་གཞལ་ཡས་ཁང༌། །དཀྱིལ་འཁོར་ཆོ་ག་ནས་གསུངས་པ། །རིན་པས་བསྐྱེད་པ་རྫོགས་པར་བྱ། །བྱིན་བརླབས་ཡེ་ཤེས་སྤྱན་དྲང་དང༌། །དེ་རྗེས་མཆོད་པས་མཆོད་པར་བྱ། །བསྟོད་དང་གསོལ་གདབ་བཟླས་པ་བྱ། །ཕར་འཕྲོས་འོད་ཀྱིས་ལྷ་མཆོད་ལ། །ཚུར་འདུས་བདག་གི་སྡིག་པ་དག །ངོ་བོ་ཆུ་ལ་རྣམ་པ་ལྔ། །ཡང་ན་བཟློག་པའི་རྣམ་པར་བྱ། །དེ་ནས་ལེགས་ལྡན་ཆེན་པོ་ལ། །གཏོར་མ་རྒྱས་པར་བྱིན་ནས་ནི། །སློབ་མ་ཁྲུས་བྱས་སྟན་ལ་འདུག་ཐུན་མོང་ཁྱད་བར་སྡོམ་པ་ཀུན། །ཕོག་ལ་ལྷ་ལ་མཆོད་བསྟོད་བྱ། །དེ་ནས་ཐམས་ཅད་འཇོམས་པ་ཡི། །སྔགས་ཀྱིས་སློབ་མ་བསྲུང་བསྐྲད་ལ། །དེ་ནས་བུམ་པའི་ཆུ་ཡིས་ནི། །སློབ་མའི་མགོ་ནས་བླུགས་པ་དང༌། །བཀྲ་ཤིས་ཚིགས་བཅད་བརྗོད་པར་བྱ། །སྡིག་སྒྲིབ་དག་སྟེ་རང་གི་ནི། །རིགས་ཀྱིས་དབུ་ལ་བརྒྱན་པར་བྱ། །དེ་ནས་མེ་ཏོག་མཆོད་པ་དང༌། །དབུ་རྒྱན་ལ་སོགས་བྱས་དེ་ནས། །རང་གི་འདོད་དོན་གསོལ་བ་གདབ། །བླ་མ་ལ་ནི་ཡོན་ཕུལ་ལ། །རང་གི་དམ་ཚིག་བརྗོད་པར་བྱ། །བླ་མས་དཀྱིལ་འཁོར་ལ་སྲུང་བའི། །དམ་ཚིག་རྒྱས་པར་བསྒྲགས་ནས་ནི། །བྱུང་བསལ་ལ་སོགས་རྫོགས་པར་བྱ། །དེ་ནས་སྲུང་བའི་འཁོར་ལོ་ཡང༌། །ཆོ་ག་ལྟར་བྲིས་བསྔགས་པར་བྱ། །མདོར་བསྡུས་མཎྜལ་འདབ་བརྒྱད་པ། །བྱས་ཏེ་གོང་ལྟར་ཆོ་ག་བྱ། །ཤིན་ཏུ་བསྡུས་ལ་བུམ་པར་ནི། །ལྷ་མོ་ཉིད་སྐུ་རྫོགས་པར་ནི། །བྱས་ཏེ་སྨོན་ལམ་ལ་སོགས་བྱ། །དེ་ནས་ཁྲུས་སོགས་རྒྱས་པར་བྱ། །དེས་ནི་ཕྱི་ནང་གནོད་པ་དང༌། །སྡིག་པའི་ཚོགས་རྣམས་མ་ལུས་པ། །ཐམས་ཅད་ཞི་བར་འགྱུར་བ་ཡིན། །གཞན་ཡང་ལས་ཚོགས་མ་ལུས་པ། །ཀུན་ཀྱང་དེ་
― DTG074_Page_0535 ―
[མ་དཔེ་གཟིགས་ན་འདིར་གནོན།]
ལས་འགྲུབ་པར་འགྱུར། །འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གྱི་ཆོ་གའི་མན་ངག །སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།བླ་མ་ཟངས་དཀར་ལོ་ཙཱ་བས་བསྒྱུར་བའོ།།
| 
