འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་པ་སྒྲུབ་པའི་ཐབས།
― DTG074_Page_0600 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱཪྻ་སི་ཏཱ་ཏ་པ་ཏྲེ་ཨ་པ་རཱ་ཛི་ཏ་སཱ་དྷ་ནཾ། བོད་སྐད་དུ། འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་པ་སྒྲུབ་པའི་ཐབས། གསང་བའི་བདག་པོ་ལག་ན་རྡོ་རྗེ་ལ་ཕྱག་འཚལ་ལོ། །དང་པོར་ཐོ་རངས་ལངས་ཏེ། བྱང་ཆུབ་ཀྱི་སེམས་དྲན་པར་བྱས་ལ། རང་ཐ་མལ་པའི་སྙིང་ག་ཕྱེ་བའི་སྟེང་དུ་ཟླ་བ་ཉ་བ་ལ་ཨོཾ་དཀར་པོ་བསམས་ཏེ། དེའི་འོད་ཀྱིས་རང་གི་སྡིག་པ་དག་པ་དང༌། ཁ་དང་བ་སྤུའི་བུ་ག་ནས་འཐོན་ཏེ། སེམས་ཅན་གྱི་དོན་བྱས་ཤིང༌། འོག་མིན་ནས་གདུགས་དཀར་མོ་ཅན། བླ་མ་དང་སངས་རྒྱས་དང་བྱང་ཆུབ་སེམས་དཔའ་བསྐོར་བ་མདུན་གྱི་ནམ་མཁའ་ལ་སྤྱན་དྲངས་ཏེ། ཕྱག་འཚལ་བ་དང་མཆོད་པ་དང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། སྐྱབས་སུ་འགྲོ་བ་དང༌། ལམ་བསྟེན་པ་དང༌། སེམས་བསྐྱེད་དེ། ཡན་ལག་ལྔ་པ་བྱས་ལ། དེའི་བསོད་ནམས་བྱང་ཆུབ་ཏུ་བསྔོ་བར་བྱའོ། །དེ་ནས་བྱམས་སྙིང་རྗེ་དགའ་བ་བཏང་སྙོམས་བསྒོམ་པར་བྱའོ། །དེ་ནས་སྣོད་བཅུད་མ་ལུས་པ་བསྡུས་ཏེ། སྟོང་པ་ཉིད་དམིགས་ལ། ཨོཾ་ཤཱུ་ནྱ་ཏཱ་ཛྙཱ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་དོ། །དེའི་རྗེས་སུ་པཾ་ལས་པདྨའི་སྟེང་དུ་ཨ་ལས་ཟླ་བའི་ ― DTG074_Page_0601 ―
[མ་དཔེ་གཟིགས་ན་འདིར་གནོན།]
དཀྱིལ་འཁོར་དམིགས་ལ། དེའི་སྟེང་དུ་ཨོཾ་དཀར་པོ་དང་བཅས་པར་གྱུར་པ་ལས། གདུགས་དཀར་མོ་ཅན་གྱི་སྐུ་བསམ་སྟེ། ཞལ་གསུམ་པ་ལ་ཕྱག་དྲུག་མ། །སྐུ་མདོག་དཀར་མོ་འགྱིང་བག་ཅན། །དབུས་དཀར་གཡས་སྔོ་གཡོན་དམར་ཞལ། །སྤྱན་གསུམ་ཁྲོ་མོའི་ལྟ་སྟངས་ཅན། །གཡས་པ་འཁོར་ལོ་ལྕགས་ཀྱུ་མདའ། །གཡོན་པ་རྡོ་རྗེ་དཀར་པོ་གཞུ། །ཞགས་པ་དང་བཅས་སྡིགས་མཛུབ་ཉིད། །གཟའ་ཀུན་འཇོམས་པར་བྱེད་པ་མ། །སྐྱིལ་ཀྲུང་ཕྱེད་པའི་གར་གྱིས་བཞུགས། །ལྷ་ཡི་རྒྱན་དང་ན་བཟའ་ལྡན། །རྣམ་སྣང་མཛད་ཀྱིས་དབུ་བརྒྱན་མ།། དེ་ལྟར་བདག་ཉིད་ལྷ་མོར་བསམ། །དེའི་སྙིང་གང་པདྨའི་སྟེང་ཟླ་བ་ལ་ཨོཾ་དཀར་པོའི་འོད་ཟེར་གྱིས། ཡེ་ཤེས་སེམས་དཔའ་སྤྱན་དྲངས་ལ་གཞུག་པ་དང༌། དབང་བསྐུར་ཞིང་རིགས་ཀྱི་དབུ་རྒྱན་གྱི་བདག་པོ་རྣམ་སྣང་གིས་རྒྱས་གདབ་སྟེ། ཡི་གེ་གསུམ་གྱིས་བྱིན་གྱིས་བརླབས་ལ་ཕྱག་རྒྱ་བཅས་ཏེ། ལག་པ་ཁུ་ཚུར་སྙིང་གར་བཅའ་སྟེ། ལག་པ་གཡོན་པའི་ཁུ་ཚུར་གཡས་པའི་མཛུབ་མོ་ནས་གྱེན་དུ་བལྟ་བར་བྱའོ། །སྔགས་བཟླས་པ་ནི། ཨོཾ་སི་ཏཱ་ཏ་པ་ཏྲེ་ཨ་པ་རཱ་ཛི་ཏ་སརྦ་གྲ་ཧཱ་ན་ཏྲ་ཡཱ་ཡཱ་ཡ་ཡཱ་ཧ་ན་དྲཱུཾ་དྲཱུཾ་ཧྲཾ་ཧྲཾ་ཕཊ་ཕཊ་སྭཱ་ཧཱ། སྙིང་པོའོ། །གཏོར་མ་ནི་ཡི་གེ་གསུམ་གྱིས་བྱིན་གྱིས་བརླབས་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤན་ན་ཏྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་འབྱུང་པོ་ཐམས་ཅད་པའི་གཏོར་མས་སྦྱིན་པར་བྱའོ། །འཕགས་པ་གདུགས་དཀར་མོ་ཅན་གཞན་གྱིས་མི་ཐུབ་པའི་སྒྲུབ་ཐབས་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་བི་བྷཱུ་ཏི་ཙནྡྲ་དང༌། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་བསྒྱུར་བའོ།། |
