གསེར་མདོག་གི་རྟོགས་པ་བརྗོད་པ།
རྒྱ་གར་སྐད་དུ། སུ་ཝརྞྞ་ཝརྞྞ་ཨ་བ་དཱ་ནཾ། བོད་སྐད་དུ། གསེར་མདོག་གི་རྟོགས་པ་བརྗོད་པ། དཀོན་མཆོག་གསུམ་ལ་ཕྱག་འཚལ་ལོ། །འདི་ལྟར་རྗེས་སུ་ཐོས་ཏེ། གནས་
བརྟན་འོད་སྲུངས་ཆེན་པོ་ཡོངས་སུ་མྱ་ངན་ལས་འདས་ནས་གནས་བརྟན་ཀུན་དགའ་བོ་བདག་ཉིད་ཆེ་བ། གནས་བརྟན་ཤ་ར་དྭ་ཏིའི་བུ་དང༌། ཤེས་རབ་མཉམ་པ། དེ་བཞིན་གཤེགས་པ་བཞིན་དུ་སྙིང་རྗེ་ཆེན་པོས་སེམས་ཤིང༌། ཡུལ་དང༌། གྲོང་ཁྱེར་དང༌། གྲོང་རྡལ་དང༌། ཚོང་འདུས་ལ་སོགས་པ་དེ་དང་དེར་གདུལ་བྱ་དེ་དང་དེ་ཐབས་ཀྱི་བྱེ་བྲག་དེ་དང་དེ་དག་གིས་འདུལ་བར་གྱུར་རོ། །ཅི་ཙམ་ན་དུས་གཞན་ཞིག་གི་ཚེ་གདུལ་བྱའི་དབང་གིས་སེམས་ཅན་བྱེ་བ་བརྒྱ་སྟོང་དཔག་ཏུ་མེད་པ་ལ་དམ་པའི་ཆོས་སྟོན་པའི་བདུད་རྩིའི་ཆར་འབེབས་པས་ཡང་དག་པར་ཚིམ་པར་བྱེད་ཅིང༌། ཡངས་པ་ཅན་གྱི་གནས་ཨ་མྲ་སྲུང་བའི་ཚལ་གང་ན་བ་ན་གནས་སོ། །ཡང་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན། དེད་དཔོན་ཉི་མ་ཞེས་བྱ་བ། ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་ཏེ། དེར་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་རྩེ་ཞིང་དགའ་ལ་དགའ་མགུར་སྤྱོད་ཀྱང་བུ་ཡང་མེད་བུ་མོ་ཡང་མེད། དེ་བུ་མེད་པས་བུ་ཤིན་ཏུ་འདོད་པས་ཡོངས་སུ་གདུངས་ཤིང་འདུག་པ་ན་སུམ་ཅུ་རྩ་གསུམ་གྱི་ལྷའི་ནང་ན་ལྷའི་བུ་བསོད་ནམས་ཀྱི་མཐུ་ཆེན་པོ་དང་ལྡན་པ་ཞིག་ལ་འཆི་བའི་ལྟས་རྣམ་པ་ལྔ་བྱུང་བར་གྱུར་པ་དང༌། སངས་རྒྱས་འབྱུང་བས་བརྒྱན་པའི་འཇིག་རྟེན་ལ་བལྟས་ནས། མྱ་ངན་ལས་འདས་པ་ལ་མངོན་པར་དགའ་བས་མིའི་ནང་དུ་མཚམས་སྦྱར་བར་འདོད་བ་དང༌། ལྷའི་དབང་པོ་བརྒྱ་བྱིན་གྱིས་ལྷའི་བུ་དེ་འཆི་འཕོ་བ་མཐོང་ཞིང༌། སངས་རྒྱས་འབྱུང་བས་བརྒྱན་པའི་འཇིག་རྟེན་གྱི་ཁམས་ལ་བལྟས་ནས་མྱ་ངན་ལས་འདའ་བར་མངོན་པར་འདོད་པས་མི་རྣམས་ཀྱི་ནང་དུ་ཉིང་མཚམས་སྦྱོར་བར་འདོད་པ་ཡང་མཐོང་ངོ༌། །མཐོང་ནས་ཀྱང་ལྷའི་བུ་དེའི་ཐད་དུ་སོང་སྟེ་དེ་སྐད་ཅེས་སྨྲས་སོ། །གྲོགས་པོ་ཁྱེད་མི་རྣམས་ཀྱི་ནང་དུ་ཉིང་མཚམས་སྦྱོར་བར་འདོད་ན་རྒྱལ་པོའི་ཁབ་ཀྱི་གྲོང་ཁྱེར་དེ་ན་དེད་དཔོན་ཉི་མའི་ཆུང་མ་ཡོད་པའི་མངལ་དུ་ཉིང་མཚམས་སྦྱོར་ཅིག །དེས་སྨྲས་པ། ཀཽ་ཤི་ཀ་དེད་དཔོན་དེ་ནི་དད་པ་མེད་པ་སྟེ། དེ་ལ་ནི་སངས་རྒྱས་ཀྱི་བསྟན་པ་ལ་རབ་ཏུ་དད་པ་མེད་དོ། །བརྒྱ་བྱིན་གྱིས་སྨྲས་པ།
གྲོགས་པོ་ཉིང་མཚམས་སྦྱོར་ཅིག་དང༌། ཇི་ལྟར་དེད་དཔོན་དེ་སངས་རྒྱས་ཀྱི་བསྟན་པ་ལ་མངོན་བར་དད་བ་དེ་ལྟར་ངས་བྱའོ། །ལྷའི་བུས་སྨྲས་པ། ཀཽ་ཤི་ཀ་གལ་ཏེ་དེད་དཔོན་ཆུང་མ་དང་བཅས་པར་ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་འགྲོ་ན་དེ་ལྟ་ན་ནི་དེད་དཔོན་དེའི་ཆུང་མའི་མངལ་དུ་ཉིང་མཚམས་སྦྱོར་བར་བྱའོ། །དེ་ནས་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་ནས་མི་སྣང་བར་གྱུར་ཏེ། རྒྱལ་པོའི་ཁབ་ཀྱི་གྲོང་ཁྱེར་དུ་དེད་དཔོན་ཉི་མའི་ཁྱིམ་གྱི་སྟེང་གི་ཁང་གི་གཞི་ལ་གནས་པར་གྱུར་པ་དང༌། ལྷའི་དབང་པོ་བརྒྱ་བྱིན་གྱི་ཁ་དོག་གི་མཐུས་ཁྱིམ་དེ་ཐམས་ཅད་ལྷའི་སྣང་བས་སྣང་བར་བྱས་སོ། །དེད་དཔོན་ཉི་མས་ལྷའི་སྣང་བ་དེ་མཐོང་ཞིང་བལྟས་ནས་ཡང་ངོ་མཚར་གྱིས་མིག་གདངས་ཏེ་ཕྱོགས་བཞིར་ལྟ་བར་བསམས་པ་དང༌། ཅི་ཙམ་ན་ལྷའི་དབང་པོ་བརྒྱ་བྱིན་མཐོང་ནས་ཡང་མྱུར་བ་ཉིད་དུ་དེའི་རྐང་པ་གཉིས་ལ་ཕྱག་བྱས་ཏེ་སྨྲས་པ། གང་ཁྱེད་བདག་གི་ཁང་པར་བྱོན་པས་ཁང་པ་འདི་ལྟར་བྱས་པ་ནི་རྙེད་པ་ཤིན་ཏུ་ལེགས་པར་རྙེད་དོ། །ཁྱེད་འདིར་བྱོན་པའི་དགོངས་པ་གང་ཡིན་པ་གསུངས་ཤིག །ལྷའི་དབང་པོ་བརྒྱ་བྱིན་གྱིས་སྨྲས་པ། དེད་དཔོན་ཁྱེད་ནི་བུ་མེད་དེ་བུ་ཡོད་པར་མངོན་པར་དགའ་ན་ཆུང་མ་དང་བཅས་པར་དེང་ནས་བཟུང་སྟེ། ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་སོང་ཤིག །ཁྱོད་ལ་བུ་ཡོད་པར་འགྱུར་རོ། །དེད་དཔོན་ཉི་མ་དགའ་བ་དང་མགུ་བ་དང་རབ་ཏུ་དགའ་བའི་ཡིད་ཀྱིས་སྨྲས་པ། ལྷའི་དབང་པོ་ཁྱོད་ཀྱིས་ཇི་ལྟར་བཀའ་སྩལ་པ་དེ་ལྟར་འཚལ་ཏེ། བདག་ཆུང་མ་དང་བཅས་པར་དེང་ནས་བཟུང་སྟེ། ཇི་སྲིད་འཚོའི་བར་དུ་དཀོན་མཆོག་གསུམ་ལ་སྐྱབས་སུ་མཆིའོ། །དེ་ནས་ལྷའི་དབང་པོ་བརྒྱ་བྱིན་གྱིས་དེད་དཔོན་ཉི་མ་ཆུང་མ་དང་བཅས་པ་སྐྱབས་སུ་འགྲོ་བ་ལ་བཀོད་ནས་རྒྱལ་པོའི་ཁབ་ནས་མི་སྣང་བར་གྱུར་ཏེ། སུམ་ཅུ་རྩ་གསུམ་གྱི་གནས་སུ་ལྷའི་བུ་དེའི་གཞལ་ཡས་ཁང་དུ་འཁོད་པར་གྱུར་རོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་དེ་ལ་གཏམ་གྱི་རྣམ་པ་རྒྱས་པར་སྨྲས་པ་དང༌། ཇི་ཙམ་ན་ལྷའི་བུ་དེ་སུམ་ཅུ་རྩ་གསུམ་གྱི་ལྷའི་གནས་ནས་འཕོས་ཏེ། རྒྱལ་པོའི་ཁབ་ཀྱི་གྲོང་དུ་དེད་དཔོན་ཉི་མའི་ཆུང་མའི་མངལ་དུ་ཞུགས་བར་གྱུར་ཏོ། །དེ་གང་གི་ཚེ་དེའི་མངལ་དུ་འཕོས་པ་དེ་ཉིད་ཀྱི་ཚེ་དེད་དཔོན་གྱི་ཆུང་མའི་ལུས་ལ་ཁ་དོག་ཤིན་ཏུ་རྒྱས་པ་དང༌། དྲི་ཡིད་དུ་འོང་བ་བྱུང་བར་གྱུར་ཏོ། །བུད་མེད་མཁས་པ་
རྣམས་ལ་ནི་ཐུན་མོང་མ་ཡིན་པ་ཆོས་རྣམ་པ་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་ཡང་ཤེས་ཤིང༌། མ་ཆགས་པར་ཡང་ཤེས་པ་དང༌། དུས་ཤེས་ཤིང་ས་བོན་ཤེས་པ་དང༌། མངལ་དུ་འཇུག་པ་ཤེས་པ་དང༌། གང་ལས་མངལ་དུ་འཇུག་པ་དེ་ཤེས་པ་དང༌། ཁྱེའུར་གྱུར་པར་ཤེས་ཤིང་བུ་མོར་གྱུར་པ་ཤེས་ཏེ། གལ་ཏེ་ཁྱེའུར་གྱུར་ན་ནི་དཀུ་གཡས་པར་རྟེན་ཅིང་གནས་ལ། གལ་ཏེ་བུ་མོར་གྱུར་ན་ནི་དཀུ་གཡོན་པར་རྟེན་ཅིང་གནས་སོ། །དེ་ནས་དགའ་བ་དང་མཆོག་ཏུ་དགའ་བའི་ཡིད་ཀྱིས་ཁྱོ་ལ་སྨྲས་པ། རྗེའི་སྲས་དགྱེས་པ་བསྐྱེད་དུ་གསོལ། བདག་སེམས་ཅན་དང་ལྡན་པར་གྱུར་ཏེ། ཇི་ནས་ཀྱང་བདག་གི་དཀུ་གཡས་པར་རྟེན་ཅིང་གནས་པ་ལས་ན་ངེས་པར་ཁྱེའུར་འགྱུར་རོ། །དེས་དེ་ཐོས་པ་དང་དེ་ཡང་ཤིན་ཏུ་དགའ་བ་དང་མཆོག་ཏུ་དགའ་བའི་ཡིད་ཀྱིས་རོ་སྟོད་བཏེག་ནས་ལག་པ་གཡས་པ་བརྐྱང་སྟེ། ཆེད་དུ་བརྗོད་པ་ཆེད་དུ་བརྗོད་པ། ཀྱེ་མ་འོངས་ཀྱང་ཡུན་རིང་དུ་མངོན་པར་འདོད་པའི་བུའི་གདོང་ལ་བལྟ་བར་འགྱུར་ལ། སྐྱེས་ཤིང་བྱུང་ནས་ཀྱང་ངའི་བྱ་བ་བྱས་ཏེ། དེ་རིགས་རྒྱུད་ཕུན་སུམ་ཚོགས་ཤིང་ངའི་རིགས་ཡུན་རིང་དུ་གནས་པར་བྱེད་པ་དང༌། བདག་ཅག་ཤི་ཞིང་དུས་བྱས་ནས་ཀྱང་ནོར་ཉུང་དུའམ་མང་པོ་སྦྱིན་པར་ནི་གཏོང༌། བསོད་ནམས་ནི་བྱས་ནས་འདི་དེ་གཉིས་གང་དང་གང་དུ་སྐྱེས་པའི་རྗེས་བཞིན་དུ་འགྲོ་བར་གྱུར་ཅིག་ཅེས་བདག་གི་མིང་གིས་ཡོན་བསྔོ་བར་འགྱུར་རོ། །འདི་ནི་སེམས་ཅན་དང་ལྡན་པར་གྱུར་ཏོ་སྙམ་དུ་ཤེས་ནས་སྟེང་གི་ཁང་བཟངས་ཀྱི་གཞི་ལ་ཉམ་ང་བ་མེད་པར་འཇོག་སྟེ། དེའི་མངལ་ཡོངས་སུ་སྨིན་པར་བྱ་བའི་ཕྱིར་ཡིད་དུ་མི་འོང་བའི་སྒྲ་ཅུང་ཟད་ཀྱང་མི་ཐོས་ཤིང་གྲང་བ་དང་གྲང་བའི་ཡོ་བྱད་དང་དྲོ་བ་དང་དྲོ་བའི་ཡོ་བྱད་དང༌། སྨན་པས་བསྟན་པའི་ཁ་ཟས་ཧ་ཅང་ཁ་བ་མ་ཡིན་པ་དང༌། ཧ་ཅང་སྐྱུར་བ་མ་ཡིན་པ་དང༌། ཧ་ཅང་ལན་ཚྭ་ཆེ་བ་མ་ཡིན་པ་དང༌། ཧ་ཅང་མངར་བ་མ་ཡིན་པ་དང༌། ཧ་ཅང་ཚ་བ་མ་ཡིན་པ་དང༌། ཧ་ཅང་བསྐ་བ་མ་ཡིན་པ་སྟེ། ཁ་བ་དང༌། སྐྱུར་བ་དང༌། ལན་ཚྭ་ཆེ་བ་དང༌། མངར་བ་དང༌། ཚ་བ་དང༌། བསྐ་བ་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ཤལ་དང༌། སེ་མོ་དོས་ལུས་བརྒྱན་ནས་ལྷའི་བུ་མོ་དགའ་བའི་ཚལ་ན་རྒྱུ་བ་བཞིན་དུ་ཁྲིའུ་ནས་ཁྲིའུ་དང༌། ཁྲི་ནས་
ཁྲིར་རྒྱུ་སྟེ། འོག་གི་ས་གཞི་ལ་མི་འབབ་པོ། །དེ་ཟླ་བ་བརྒྱད་དམ་དགུ་ལོན་པ་དང༌། ཁྱེའུ་གཟུགས་བཟང་བ། བལྟ་ན་སྡུག་པ་མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། གསེར་བཙོ་མའི་མདོག་གི་ཁ་དོག་ཤིན་ཏུ་རྒྱས་པ་དང་ལྡན་པ། འགྲོ་བ་ཐམས་ཅད་ཀྱི་ཡིད་དང་མིག་འཕྲོག་པ། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ། དེའི་ཡན་ལག་ཐམས་ཅད་ནས་ཙན་དན་གྱི་དྲི་འབྱུང་བ། དེའི་ཁ་ནས་ཨུཏྤ་ལའི་དྲི་འབྱུང་བ། དེ་སྐྱེས་པ་ཙམ་གྱིས་ཁྱིམ་དེར་གོས་ཀྱི་ཆར་དང༌། མེ་ཏོག་ཀར་ནི་ཀ་རིའི་ཆར་བབ་སྟེ། གོས་དེ་དག་ཀྱང་གསེར་གྱི་མདོག་ཅན་ཡིན་ནོ། །དེ་ནས་ངོ་མཚར་རྨད་དུ་བྱུང་བ་དེ་དང་དེའི་གཟུགས་ཕུན་སུམ་ཚོགས་པ་རྒྱ་ཆེན་པོ་མཐོང་བ་དང༌། དེད་དཔོན་ཉི་མའི་ཆུང་མ་དང་འཁོར་རྣམས་ཤིན་ཏུ་ངོ་མཚར་སྐྱེས་པར་གྱུར་ཏོ། །དེད་དཔོན་ཉི་མ་སྒོའི་ཕྱི་རོལ་ན་གནས་པ་ལ། དེད་དཔོན་ཁྱེད་ཀྱི་སྲས་བལྟམ་པ་ཙམ་གྱིས་དགྱེས་པ་སྐྱེད་ཅིག་ཅེས་གོ་བར་བྱས་པ་དང༌། དེ་དགའ་བ་དང་མགུ་བ་དང༌། རབ་ཏུ་དགའ་བའི་ཡིད་ཀྱིས་ཁྱིམ་དུ་ཞུགས་པ་དང༌། ཇི་ཙམ་ན་གཞོན་ནུ་གཟུགས་ཤིན་ཏུ་བཟང་བ། བལྟ་ན་སྡུག་པ། མཛེས་པ། ཡན་ལག་དང༌། ཉིད་ལག་ཐམས་ཅད་དང་ལྡན་པ། གསེར་བཙོ་མའི་ཁ་དོག་ལྟ་བུས་མདོག་རྒྱས་པ་དང་ལྡན་པ། འགྲོ་བ་ཐམས་ཅད་ཀྱི་མིག་དང་ཡིད་འཕྲོག་པ། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ་འདིའི་ཡན་ལག་ཐམས་ཅད་ནས་ཙན་དན་གྱི་དྲི་འབྱུང་བ། དེའི་ཁ་ནས་ཨུཏྤ་ལའི་དྲི་འབྱུང་བ། དེ་སྐྱེས་པ་ཙམ་གྱིས་ནི་ཁྱིམ་དེར་གོས་ཀྱི་ཆར་དང༌། མེ་ཏོག་ཀར་ནི་ཀ་རིའི་ཆར་བབ་སྟེ། གོས་དེ་དག་ཀྱང་གསེར་གྱི་ཁ་དོག་ཅན་དུ་མཐོང་ངོ༌། །མཐོང་ནས་ཀྱང་དགའ་བ་དང་མགུ་བ་དང་རབ་ཏུ་དགའ་བ་སྐྱེས་ཏེ། ཆེད་དུ་བརྗོད་པ་དག་ཆེད་དུ་བརྗོད་པ། ཨེ་མའོ་རྙེད་པ་རྣམས་ནི་ཤིན་ཏུ་རྙེད་དེ། ཨེ་མའོ་གང་འདི་ལྟ་བུའི་བསོད་ནམས་ཀྱི་མཐུ་ཆེན་པོ་དང་ལྡན་པའི་བུ་སྐྱེས་པ་ནི་བདག་གི་ཡིད་ལ་བསམ་པ་ཡོངས་སུ་རྫོགས་པར་གྱུར་ཏོ་ཞེས་དགའ་བ་དང་མགུ་བ་དང་རབ་ཏུ་དགའ་བའི་ཡིད་ཀྱིས་གོས་དེ་རྣམས་དགེ་སྦྱོང་དང༌། བྲམ་ཟེ་དང༌། ཕོངས་པ་དང༌། ཕོངས་ཤིང་སྡུག་བསྔལ་བ་དང༌། མཛའ་བཤེས་དང༌། གཉེན་དང༌། སྣག་གི་གཉེན་མཚམས་ལ་བྱིན་ཏེ། གཞོན་ནུ་དེའི་བཙས་པའི་བཙས་སྟོན་
བདུན་གསུམ་ཉི་ཤུ་རྩ་གཅིག་གི་བར་དུ་རྒྱ་ཆེར་བྱས་ནས་གྲོགས་པོ་དག་ཁྱེའུ་འདིའི་མིང་ཅིར་གདགས་ཞེས་མིང་འདོགས་བར་བྱེད་པ་དང༌། ཉེ་དུ་རྣམས་ཀྱིས་སྨྲས་པ། གཞན་ནུ་འདི་གསེར་བཙོ་མའི་མདོག་གིས་ཤིན་ཏུ་རྒྱས་པ་དང་ལྡན་ཏེ། དེ་བས་ན་གཞོན་ནུ་འདིའི་མིང་གསེར་མདོག་ཅེས་གདགས་པར་བྱའོ་ཞེས་ཏེ། དེ་ལ་གསེར་མདོག་ཅེས་བྱ་བའི་མིང་བཏགས་སོ། །གཞོན་ནུ་གསེར་མདོག་མ་མ་བརྒྱད་པོ་བང་ན་འཚོ་བའི་མ་མ་གཉིས་དང༌། ནུ་མ་སྣུན་པའི་མ་མ་གཉིས་དང༌། དྲི་མ་འཕྱི་བའི་མ་མ་གཉིས་དང༌། རྩེད་གྲོགས་ཀྱི་མ་མ་གཉིས་ཏེ། མ་མ་བརྒྱད་ལ་རྗེས་སུ་གཏད་ནས་དེ་མ་མ་བརྒྱད་པོ་དག་གིས་འོ་མ་དང༌། ཞོ་དང༌། མར་དང༌། ཞུན་མར་དང༌། མར་གྱི་ཉིང་ཁུ་དང༌། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྐྱེད་པར་བྱེད། སྲིང་བར་བྱེད་ཅིང་རྫིང་ན་གནས་པའི་པདྨ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང༌། གྲངས་དང༌། རྩིས་དང༌། ལག་རྩིས་དང༌། དབྱུང་བ་དང༌། གཞུག་པ་དང༌། གཞག་པ་ལ་ཉེ་བར་ཞུགས་ཤིང་བརྟག་པ་བརྒྱད་པོ། གཞི་བརྟག་པ་དང༌། གོས་བརྟག་པ་དང༌། རིན་པོ་ཆེ་བརྟག་པ་དང༌། ཤིང་རྟ་བརྟག་པ་དང༌། གླང་པོ་ཆེ་བརྟག་པ་དང༌། རྟ་བརྟག་པ་དང༌། གཞོན་ནུ་བརྟག་པ་དང༌། གཞོན་ནུ་མ་བརྟག་པ་དང༌། འབྱེད་པ་དང༌། ཀློག་པ་ལ་མཁས་པ་དང༌། གཡེར་པོར་གྱུར་ཏོ། །དེ་ཡང་བསོད་ནམས་ཀྱི་སྐལ་བ་ཆེན་པོ་དང་ལྡན་པ། བསམ་པ་དགེ་བ། བདག་དང་གཞན་ལ་ཕན་པར་ཞུགས་པ། སྙིང་རྗེ་དང་ལྡན་པ། བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་མཉེས་གཤིན་པ་སྟེ། དེ་བསྟན་བཅོས་ཐམས་ཅད་ཀློག་པ་དང༌། དེ་ཤིན་ཏུ་བསོད་ནམས་ཀྱི་མཐུ་ཆེ་བ་ཡིན་པས་གོས་ལ་སོགས་པ་དང་ནོར་རྣམས་གང་བསམས་པ་དང་གང་གསོལ་བ་དེ་ཐམས་ཅད་དེ་བཞིན་དུ་འབྱོར་པར་འགྱུར་མོད་ཀྱི། བདག་ནི་འདི་ལྟང་བསོད་ནམས་ཀྱི་མཐུ་ཆེན་པོ་དང་ལྡན་ནོ་སྙམ་དུ་མི་སེམས་སོ། །དེད་དཔོན་ཉི་མ་འདི་སྙམ་དུ་བདག་དཀོན་མཆོག་གསུམ་ལ་སྐྱབས་སུ་འགྲོ་བའི་དྲིན་གྱིས་བུ་སྐྱེས་སོ་ཞེས་བཅོམ་ལྡན་འདས་ཀྱི་བསྟན་པ་ལ་ཤིན་ཏུ་ཡང་མངོན་པར་དད་ནས་
དེ་དུས་དང་དུས་སུ་བཅོམ་ལྡན་འདས་ཀྱི་བསྟན་པ་ལ་བྱ་བ་བྱེད་པར་གྱུར་ཏོ། །ཡང་དེའི་ཚེ་དེའི་དུས་ན་རྒྱལ་པོའི་ཁབ་ཀྱི་གྲོང་ཁྱེར་དུ་དེད་དཔོན་དྲི་མ་མེད་པ་ཞེས་བྱ་བ་རྒྱ་མཚོ་ནས་གྲུ་གྲུབ་སྟེ། སླར་འོངས་ནས་དེས་བཅོམ་ལྡན་འདས་དགེ་སློང་སྟོང་ཉིས་བརྒྱ་ལྔ་བཅུས་བསྐོར་བ་ལ་བཤོས་དྲངས་ཏེ། དགེ་སློང་རེ་རེ་ཞིང་ཆོས་གོས་གསུམ་གསུམ་ཕུལ་བ་དང༌། སྐྱེས་བུ་དམ་པ་འདིའི་རྒྱ་མཚོ་ཆེན་པོར་ཞུགས་པ་དང་དེད་དཔོན་གྱི་སྒྲ་ནི་འབྲས་བུ་དང་བཅས་པར་གྱུར་ཏེ། འདི་ལྟར་བཅོམ་ལྡན་འདས་ཀྱི་བསྟན་པ་ལ་བྱ་བ་བྱས་སོ་ཞེས་བྱ་བའི་གྲགས་པས་འཇིག་རྟེན་ཐམས་ཅད་དུ་ཁྱབ་པར་གྱུར་པ་དང༌། དེད་དཔོན་ཉི་མས་ཐོས་པ་ན་འགྲན་འདོད་པར་གྱུར་ཏེ། ང་ཡང་རྒྱ་མཚོ་ཆེན་པོར་ཞུགས་ལ་གལ་ཏེ་དེ་ནས་གྲུ་ལེགས་པར་གྲུབ་ནས་བཅོམ་ལྡན་འདས་ལ་ཞུས་ཏེ། བཅོམ་ལྡན་འདས་ཀྱི་ཉན་ཐོས་འཛམ་བུའི་གླིང་ན་ཇི་སྙེད་ཅིག་གནས་པ་དེ་རྣམས་གཅིག་ཏུ་བསྡུས་ནས་ཟས་བསོད་པ་རྣམས་ཀྱིས་ཚིམ་པར་བྱས་ལ་དགེ་སློང་རེ་རེ་ཞིང་རིན་པོ་ཆེའི་ཆོས་གོས་གསུམ་གསུམ་གྱིས་དགའ་བར་བྱའོ་སྙམ་ནས་དེ་ཆུང་མ་ལ་གཏམ་དེ་སྨྲས་པ་དང༌། དེས་སྨྲས་པ། བདག་པོ་ཁྱོད་ཀྱིས་ཡང་དག་པར་རྟོག་པར་འབྱོར་པར་གྱུར་ཅིང་ཡིད་ལ་རེ་བ་རྫོགས་པར་གྱུར་ཅིག །དེ་ནས་དེད་དཔོན་ཉི་མས་རྒྱལ་པོའི་ཁབ་ཀྱི་གྲོང་ཁྱེར་དུ་ལན་གསུམ་གྱི་བར་དུ་དྲིལ་བསྒྲགས་ཏེ། ཚོང་པ་ལྔ་བརྒྱས་ཡོངས་སུ་བསྐོར་ནས་རྒྱ་མཚོ་ཆེན་པོར་ཞུགས་སོ། །དེ་རྒྱ་མཚོ་ཆེན་པོ་དེར་ཞུགས་པ་དང༌། བཅོམ་ལྡན་འདས་ཡོངས་སུ་མྱ་ངན་ལས་འདས་སོ། །དེ་དེ་ཉིད་ན་གནས་པའི་ཚེ་གནས་བརྟན་འོད་སྲུངས་ཆེན་པོ་ཡང་ཡོངས་སུ་མྱ་ངན་ལས་འདས་སོ། །ཇི་ཙམ་ན་དུས་གཞན་ཞིག་ན་གཞོན་ནུ་གསེར་མདོག་འོད་མའི་ཚལ་དུ་སོང་བ་དང༌། དེ་ནས་དགེ་སློང་ཞིག་མི་རྟག་པ་ཉིད་དང་རབ་ཏུ་ལྡན་པའི་ཚིགས་སུ་བཅད་པ་འདོན་པར་གྱུར་ཏེ། ཚེ་འདི་ཉིད་དང་མཚན་མོ་དང༌། །འགྲོ་བ་དང་ནི་ལྡོག་པ་དང༌། །ཆུ་ཀླུང་ཆེན་པོའི་རྒྱུན་བཞིན་དུ། །ཕྱིར་མི་ལྡོག་པར་འགྲོ་བར་འགྱུར། །ཆུ་ཆུང་གི་ནི་ཉ་ལྟ་བུར། །གང་ཞིག་ཉིན་མཚན་འདའ་བ་ཡི། །ཚེ་ནི་ཤིན་ཏུ་ཐུང་གྱུར་ན། །དེ་ལ་བྱ་དགར་ཅི་ཞིག་ཡོད། །གསོན་མཐའ་འཆི་བ་ཡིན་པས་ན། །ལུས་འདི་ཡོང་སུས་རྟས་པ་དང༌། །ནད་ཀྱི་ཚད་ནི་
མྱུར་འཇིག་ཅིང༌། །རྣག་གི་ཚོགས་ཀྱང་འཇིག་པར་འགྱུར།།ཀྱེ་མ་ལུས་འདི་མི་ཐོགས་པར། །སྟོང་ཞིང་རྣམ་ཤེས་དང་བྲལ་ནས། །དུར་ཁྲོད་བོར་བའི་མགལ་དུམ་ལྟར། །སའི་སྟེང་དུ་འགྱེལ་བར་འགྱུར། །རྒྱུན་དུ་ནད་ཀྱིས་མངོན་གདུངས་ཤིང༌། །རྟག་ཏུ་མི་གཙང་འཛག་པ་དང༌། །རྒ་དང་འཆི་བས་འཚེར་འགྲིབ་པའི། །ལུས་འདི་དོར་ན་ཅིར་མི་རུང༌། །མྱུར་དུ་འཇིག་ཅིང་རྣ་བ་དང༌། །རྣག་དང་ལྡན་བའི་ལུས་འདི་ཡིས། །གྲུབ་དང་བདེ་བ་བླ་མེད་དང༌། །ཞིང་མཆོག་དོན་དུ་གཉེར་བར་གྱིས། །ཚིགས་སུ་བཅད་པ་འདི་ཐོས་པ་དང༌། །གཞོན་ནུ་གསེར་མདོག་འཁོར་བ་ལས་ཡོངས་སུ་སྐྱོ་ཞིང༌། ཡོངས་སུ་མྱ་ངན་ལས་འདས་པའི་ཡོན་ཏན་མ་ཐོང་བས་དགེ་སློང་དེ་ལ་ཕྱག་བྱས་ཏེ་དྲིས་པ། འཕགས་པ་འདི་ཅི་ཞིག་ལགས། དགེ་སློང་གིས་སྨྲས་པ། རིགས་ཀྱི་བུ་འདི་ནི་སངས་རྒྱས་ཀྱི་བཀའ་ཡིན་ནོ། །དེས་དེ་ཐོས་པ་དང་བཅོམ་ལྡན་འདས་ཀྱི་བསྟན་པ་ལ་ངང་པ་ཆེན་པོ་སྐྱེས་ནས་རབ་ཏུ་འབྱུང་བ་དང་ཐར་པ་མངོན་པར་འདོད་པར་གྱུར་རོ། །དེ་ནས་དགེ་སློང་དེ་ལ་རིམ་གྲོ་བྱས་ཏེ་རྐང་པ་གཉིས་ལ་གཏུགས་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་གྱིས་ཐུགས་བརྩེ་བས་ཉེ་བར་བཟུང་སྟེ་རབ་ཏུ་དབྱུང་དུ་གསོལ། དགེ་སློང་དེས་སྨྲས་པ། རིགས་ཀྱི་བུ་ཕ་དང་མ་གཉིས་ཀྱིས་གནང་ངམ་དེས་སྨྲས་པ། མ་གནང་ལགས་སོ། །དགེ་སློང་གིས་སྨྲས་པ། རིགས་ཀྱི་བུ་སོང་ལ་ཕ་དང་མ་ལ་དྲིས་ཤིག་དང༌། ཕ་དང་མ་གཉིས་ཀྱིས་མ་གནང་བར་རབ་ཏུ་འབྱིན་པར་མི་བྱེད་དོ། །དེས་སྨྲས་པ། དེ་བཞིན་དུ་བགྱིའོ། །དེ་ནས་གཞོན་ནུ་གསེར་མདོག་འཁོར་བས་འཇིགས་ཤིང་སྐྱོ་བའི་ཡིད་དང་ལྡན་པས་རང་གི་ཁྱིམ་དུ་དོང་སྟེ་མའི་རྐང་བ་ལ་གཏུགས་ནས་ཡུམ་མཁྱེན་པར་མཛོད་ཅིག །བདག་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ༌། །དེ་སྐད་ཅེས་སྨྲས་པ་ཐོས་པ་དང་མ་ཤིན་ཏུ་མྱ་ངན་གྱིས་གདུངས་ཏེ། བྲང་བརྡུངས་ནས་སྨྲས་པ། བུ་ཁྱོད་ནི་ངའི་བུ་གཅིག་པ། སྡུག་པ། ཡིད་དུ་འོང་བ། མཛེས་པ། རྗེས་སུ་མཐུན་པ། ཡིད་ལ་རེ་བ་རྒྱས་པ་ཐོབ་པ་ཡིན་ན་ཁྱོད་ཇི་ལྟར་
ང་ཡང་སྤངས་ནས་རབ་ཏུ་འབྱུང༌། །དེས་སྨྲས་པ། ཡུམ་སྡུག་པ་རྣམས་དང་ནི་ངེས་པར་འབྲལ་བར་འགྱུར་ཏེ། དེ་མཁྱེན་པར་མཛོད་ལ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་དབྱུང་བར་རྗེས་སུ་གནང་བར་མཛད་དུ་གསོལ། དེས་ཐོས་པ་དང་ཡིད་ལ་གདུང་བ་ཆེན་པོ་སྐྱེས་ནས་དེ་མཆི་མས་བརྣངས་བཞིན་དུ་སྨྲས་པ། བུ་ང་ཁྲག་དྲོན་མོ་ཁ་ནས་སྐྱུག་པར་འགྱུར་གྱི་ལ་ན་གསུམ་གྱི་བར་དུ་དེ་སྐད་མ་ཟེར་ཅིག །དེས་ཡང་བསམས་པ། འདིའི་འབད་པ་འདི་ལྟ་བུ་ལས་ན་ངས་བཟློག་པར་མི་ནུས་ཀྱིས་ཐབས་ཤིག་སྦྱར་བར་བྱའོ་སྙམ་མོ། །དེ་ནས་དེས་སྨྲས་པ། བུ་ཁྱོད་ཀྱི་ཕ་ནི་སངས་རྒྱས་ཀྱི་བསྟན་པ་ལ་བྱ་བ་བྱའོ་སྙམ་ནས་རྒྱ་མཚོ་ཆེན་པོར་ཞུགས་ཀྱི་དེ་ཇི་སྲིད་མ་འོངས་པ་དེ་སྲིད་ཁྱོད་ལ་རྗེས་སུ་མི་གནང་ངོ༌། །གལ་ཏེ་འོངས་ན་ཁྱོད་རྗེས་སུ་གནང་ནས་རབ་ཏུ་དབྱུང་བར་བྱའོ། །དེ་མ་ལ་གུས་པ་ཡིན་པས་བསམས་པ། གལ་ཏེ་ཡང་འདི་ལ་སྨྲས་ན་ནི་བརྒྱ་ལ་འདི་གདུང་པ་ཤིན་ཏུ་ཆེན་པོ་སྐྱེ་བར་འགྱུར་གྱི། ཇི་སྲིད་ངའི་ཕ་འོངས་པ་དེ་སྲིད་དུ་འདུག་པར་བྱའོ་སྙམ་ནས་དེ་ཅང་མི་སྨྲ་བར་འདུག་གོ །གང་གི་ཚེ་གཞོན་ནུ་གསེར་མདོག་ཚོང་འདུས་སུ་རྒྱུ་བ་ན་དེའི་ཚེ་དེའི་གཟུགས་ཕུན་སུམ་ཚོགས་པ་རྒྱ་ཆེན་པོ་མཐོང་བ་དང་འཇིག་རྟེན་པ་རྣམས་བལྟས་ཀྱང་ངོམས་པར་མ་གྱུར་ཏེ། དེ་སྐྱེ་བོའི་ཚོགས་མང་པོའི་ཡིད་དུ་འོང་བར་གྱུར་ཏོ། །དེའི་གཟུགས་ཕུན་སུམ་ཚོགས་པས་ཡིད་དྲངས་ཀྱང་འདོད་པ་ལ་ཤིན་ཏུ་རྒྱབ་ཀྱིས་ཕྱོགས་པར་མཐོང་ནས་མས་བསམས་པ། ཀྱི་ཧུད་འདིའི་འབད་པ་འདི་ལྟ་བུ་འདིས་ནི་ང་སྤངས་ནས་རབ་ཏུ་འབྱུང་བར་འགྱུར་རོ་སྙམ་མོ། །དེ་ནས་རྟག་ཏུ་དོགས་པ་དང་བཅས་པས་རྗེས་སུ་མཐུན་པར་འཇུག་པར་བརྩམས་སོ། །གཞོན་ནུ་གསེར་མདོག་ནི་ཡང་དང་ཡང་དུ་མཁས་པ་དང་དགེ་སྦྱོང་དང་བྲམ་ཟེ་རྣམས་ལ་རྟེན་པར་བྱེད་ཅིང༌། དེ་དེར་ལེགས་པར་བཤད་པ་ཐར་བའི་ལམ་དང་རྗེས་སུ་མཐུན་པར་གང་དང་གང་ཐོས་པ་དེ་དང་དེ་གླེགས་བམ་ལ་འདྲིའོ། །རྒྱལ་པོའི་ཁབ་ཀྱི་གྲོང་ཁྱེར་གྱི་ཕྱི་རོལ་ན་དེད་དཔོན་ཉི་མའི་སྐྱེད་མོས་ཚལ་མེ་ཏོག་དང༌། འབྲས་
བུ་དང༌། ཆུ་ཕུན་སུམ་ཚོགས་པ་ཞིག་ཀྱང་ཡོད་པ་དང༌། དེ་ནས་གཞོན་ནུ་གསེར་མདོག་ཕའི་སྐྱེད་མོས་ཚལ་དེར་ཉིན་རེ་ཞིང་སོང་ནས་ལེགས་པར་བཤད་པའི་གླེགས་བམ་དག་ཀློག་ཅིང་འདུག་གོ །ཡང་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ན་ཀ་ཤི་མཛེས་དགའ་མོ་ཞེས་བྱ་བའི་བུད་མེད་སྨད་འཚོང་མ་གཟུགས་དང་ལང་ཚོ་དང་སྒྱུ་རྩལ་ཕུན་སུམ་ཚོགས་པ། སྐྱེ་བོ་མང་པོའི་སྙིང་དུ་སྡུག་པ་ཞིག་གནས་པ་དང༌། རྒྱལ་པོ་མ་སྐྱེས་དགྲའི་བློན་པོ་རབ་གཏུམ་ཞེས་བྱ་བ་རྒྱལ་པོས་ཤིན་ཏུ་བཀུར་བ་དེ་བུ་མོ་ཀ་ཤི་མཛེས་དགའ་མོ་ལ་ཤིན་ཏུ་ཡང་སེམས་ཆགས་པས་ཉིན་རེ་ཞིང་རང་གི་སྐྱེད་མོས་ཚལ་དུ་སོང་ནས་དེ་དང་ལྷན་ཅིག་རྩེ་ཞིང་དགའ་ལ་དགའ་མགུར་སྤྱོད་པར་གྱུར་ཏོ། །ཅི་ཙམ་ན་དུས་གཞན་ཞིག་གི་ཚེ་བུ་མོ་ཀ་ཤི་མཛེས་དགའ་མོ་རྒྱན་ཐམས་ཅད་ཀྱིས་བརྒྱན་ཏེ་རྒྱལ་པོའི་ཁབ་ནས་བྱུང་ནས་བློན་པོ་རབ་གཏུམ་གྱི་སྐྱེད་མོས་ཚལ་དུ་ཆས་པ་དང༌། གཞོན་ནུ་གསེར་མདོག་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ། རང་གི་སྐྱེད་མོས་ཚལ་དུ་འགྲོ་བ་བུ་མོ་ཀ་ཤི་མཛེས་དགའ་མོས་བལྟས་པ་དང༌། གཞོན་ནུ་གསེར་མདོག་ཤན་ཏུ་ཡང་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ། སྐྱེ་བོ་ཐམས་ཅད་ཀྱི་ཡིད་དང་མིག་འཕྲོག་པ། གསེར་མདོག་ཅན་གྱི་གོས་སེར་པོ་ལུས་ལ་གྱོན་པ་མཐོང་བ་དང༌། ཡང་དེ་འདི་སྙམ་དུ་སེམས་ཏེ། ཨེ་མའོ་གཟུགས་ཕུན་སུམ་ཚོགས་པ་རྒྱ་ཆེ་བ། ཨེ་མའོ་ཁ་དོག་ཤིན་ཏུ་རྒྱས་པ་འདི་ལྟ་བུ་བུད་མེད་གང་གི་ཁྱོར་གྱུར་པ་དེ་ནི་སྐལ་པ་བཟང་པོ་བྱས་པ་ཡིན་ནོ་སྙམ་དུ་སེམས་ཤིང༌། དེ་དེ་ལ་སེམས་ཤིན་ཏུ་ཞེན་པས་རྟོག་ཅིང་གང་འདི་ལྟ་བུའི་སྐྱེས་བུ་དང་ལྷན་ཅིག་དགའ་ཞིང་རྩེ་བ་མ་མྱོང་བའི་བུད་མེད་དེ་ནི་སྐལ་པ་ཆུང་བ་ཡིན་ནོ། །ཡང་བསམས་པ། བདག་ནི་གཟུགས་ཀྱིས་འཚོ་བ། སྐྱེས་བུ་རྣམས་ཀྱི་ཐུན་མོང་དུ་གྱུར་པ་ཡིན་ལ། གཞོན་ནུ་འདི་ནི་ལང་ཚོ་ལ་བབ་པ་དང་ལྡན་པ་ཡིན་གྱི་མ་ལ་བདག་འདི་དང་ལྷན་ཅིག་ཀུན་དུ་སྦྱོར་བར་འགྱུར་བ་དེ་ལྟར་བྲིད་པར་བྱའོ་སྙམ་ནས་དེ་དེའི་མདུན་དུ་འདུག་སྟེ། བུད་མེད་ཀྱི་སྟེག་པའི་མཚན་མ་དག་བསྟན་པར་
བརྩམས་པ་དང༌། བདག་ཉིད་ཆེན་པོ་དེ་རང་བཞིན་གྱིས་འདོད་པ་ལ་རྒྱབ་ཀྱིས་ཕྱོགས་ཤིང་མྱ་ངན་ལས་འདས་པ་ལ་གཞོལ་བས་དེ་ལ་སེམས་གཏོད་པར་མ་གྱུར་པ་དང༌། དེས་བསམས་པ་འདི་ནི་ངེས་པར་ང་ལ་མི་སེམས་པ་ནི་ངོ་ཆ་བ་ཡིན་གྱི། ཡང་འདི་སྐྱེད་མོས་ཚལ་དུ་འགྲོ་བས་ང་ཡང་དེ་ཉིད་དུ་སོང་ལ་དེར་འདི་ལྐོག་ཏུ་བྲིམ་པར་བྱའོ་སྙམ་ནས་དེ་དེའི་ཕྱི་བཞིན་འབྲང་བ་དང༌། གཞོན་ནུ་གསེར་མདོག་གིས་ཤེས་ནས་དེའི་སྔོན་དུ་སྐྱེད་མོས་ཚལ་དུ་ཞུགས་ཏེ་སྒོ་བཅད་དོ། །བུ་མོ་ཀ་ཤི་མཛེས་དགའ་མོས་སྨྲས་པ། གཞོན་ནུ་བདག་ནི་ཁྱོད་ལ་བསམས་ཏེ་འོང་ན་ཁྱོད་འདི་ལྟ་བུའི་རང་བཞིན་ངན་པ་སྟོན་པར་བྱེད་པ་ནི་རིགས་པ་མ་ཡིན་ནོ་ཞེས་སྨྲས་ཀྱང༌། དེས་དེ་ལ་ཚིག་གི་ལན་མ་བླན་པ་དང༌། དེས་བསམས་པ། འདི་ལ་རྒྱུ་གཉིས་ཡོད་དེ། ཤིན་ཏུ་འདོད་པ་དོན་དུ་མི་གཉེར་བའམ། ཡང་ན་ཆེས་བཟང་བ་གཞན་ཞིག་ལ་ཞེན་པ་ཡིན་ཏེ། རྣམ་པ་ཐམས་ཅད་དུ་འདི་ལ་ངའི་གཟུགས་སམ་ཚིག་གིས་མགུ་བར་བྱེད་མི་ནུས་ཀྱི་འདི་ལ་རེག་པས་མགུ་བར་བྱའོ་སྙམ་ནས། འདིས་ང་མཐོང་ནས་སྒོ་བཅད་ན་གང་ཞིག་གིས་འདི་ཀློག་ཏུ་ཆགས་པར་འགྱུར་བའི་ཐབས་ཅི་ཞིག་ཡོད། ཡང་ན་འདི་ངས་ཤེས་ཀྱིས་ནང་པར་འདིའི་ཆེས་སྔོན་དུ་སོང་ལ་སྐྱེད་མོས་ཚལ་དུ་འདུག་གི །ཕྱིས་འདི་འོངས་པ་དང་འཁྲིག་པ་ལ་སོགས་པའི་ལུས་ཀྱི་རེག་པ་རྣམས་ཀྱིས་ཇི་ལྟར་ངའི་དབང་དུ་འགྱུར་བ་དེ་ལྟར་མགུ་བར་བྱའོ་སྙམ་མོ། །དེ་དེ་ལྟར་རྗེས་སུ་སེམས་ཤིང་སླར་ལོག་ནས་གྲོང་ཁྱེར་དུ་ཞུགས་ཏེ། ཉི་མ་དེ་ལ་ར་བ་གཏུམ་གྱི་སྐྱེད་མོས་ཚལ་དུ་མ་སོང་ངོ༌། །བློན་པོ་རབ་གཏུམ་ཡང་རང་གི་སྐྱེད་མོས་ཚལ་དུ་དེ་ཡུན་རིང་དུ་རྟོག་པས་ཡོངས་སུ་དུབ་པ་དང་ཉི་མ་ནུབ་པའི་དུས་སུ་གྲོང་ཁྱེར་དུ་ཞུགས་ནས་དེ་རང་གི་ཁྱིམ་ནས་ཀ་ཤི་མཛེས་དགའ་མོ་ལ་ཅིའི་ཕྱིར་ཁྱེད་དེང་ངའི་སྐྱེད་མོས་ཚལ་དུ་མ་འོངས་ཞེས་ཕོ་ཉ་བཏང་བ་དང༌། བུ་མོ་མཛེས་དགའ་མོས་རྗེའི་སྲས་དེང་ནི་བདག་དེང་གླད་ནད་ཀྱིས་ཤིན་ཏུ་གདུངས་པ་གང་ཡིན་པ་དེས་ཁྱེད་ཀྱི་སྐྱེད་མོས་ཚལ་དུ་མ་འོངས་ཞེས་བསླུས་སོ། །འཇིག་རྟེན་ན་ནི་མཛའ་མོ་དང༌། དགྲ་དང༌། ཐ་མལ་པ་ཡོད་པས། གཞན་ཞིག་
གིས་སྨྲས་པ། དེ་ལ་ནི་གླད་པའི་ནད་ཀྱིས་གཟིར་བ་མེད་དེ། གཞན་དུ་ན་འདི་གཞོན་ནུ་གསེར་མདོག་གི་སྐྱེད་མོས་ཚལ་དེ་ནས་སླར་འོངས་བ་མཐོང་ངོ་ཞེས་སྨྲས་པ་ཐོས་པ་དང༌། འདི་ལྟར་བུད་མེད་ཀྱི་ཡུལ་ནས་བྱུང་བའི་ཤ་ཁོན་ནི་ཤ་ཁོན་གྱི་ཐ་ཆད་ཡིན་པས་བློན་པོ་རབ་གཏུམ་ཁྲོ་བས་ཀུན་ཏུ་འཁྲུགས་པར་གྱུར་ནས་བསམས་པ། ཅི་ནས་ཀྱང་བུ་མོ་ཀ་ཤི་མཛེས་དགའ་མོ་དང་གཞོན་ནུ་གསེར་མདོག་གཉི་ག་མེད་པར་འགྱུར་བདེ་ལྟ་བུའི་གནོད་པ་བྱའོ་སྙམ་སྟེ། དེ་ཁྲོ་བའི་མེས་སྙིང་བསྲེགས་བཞིན་དུ་མཚན་མོ་སྡུག་བསྔལ་བས་འདའ་བར་བྱས་སོ། །དེ་ནས་མཚན་མོ་འདས་ཏེ་ནམ་ལངས་པ་དང་སྐྱེས་བུ་ཡིད་བརྟན་དུ་རུང་བ་ཞིག་བོས་ཏེ་སྨྲས་པ། རྒྱལ་པོའི་ཁབ་ཀྱི་ཕྱི་རོལ་གྱི་སྐྱེད་མོས་ཚལ་དུ་འདེང༌། དེ་རང་ལ་ཤིན་ཏུ་ཆེད་ཆེ་བའི་དགོས་པ་ཞིག་ཡོད་ཀྱི་རལ་གྲི་ཐོགས་ཤིག །དེས་ཀྱང་བློན་པོ་དེ་བཞིན་དུ་བགྱིའོ་ཞེས་སྨྲས་ཏེ། སྐྱེས་བུ་དེ་རལ་གྲི་ཐོགས་ནས་དེའི་ཕྱི་བཞིན་དུ་འབྲངས་སོ། །དེ་ནས་བློན་པོ་རབ་གཏུམ་སྐྱེས་བུ་དེ་དང་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ་དེད་དཔོན་ཉི་མའི་སྐྱེད་མོས་ཚལ་དུ་ཞུགས་ནས་གནས་སོ། །བུ་མོ་ཀ་ཤི་མཛེས་དགའ་མོ་ཡང་ལུས་ལ་གོས་དང་རྒྱན་སྣ་ཚོགས་ཀྱིས་བརྒྱན་ཏེ་རྒྱལ་པོའི་ཁབ་ནས་བྱུང་ནས་དེད་དཔོན་ཉི་མའི་སྐྱེད་མོས་ཚལ་དུ་སོང་སྟེ། དེ་དེར་ཞུགས་པ་དང་ཇི་ཙམ་ན་བློན་པོ་རབ་གཏུམ་མཐོང་བ་དང་སླར་ཀུན་དུ་སྐྲག་པས་བསམས་པ། འདི་ནི་རང་བཞིན་གྱིས་གཏུམ་པས་ངེས་པར་དེང་ང་ལ་གནོད་པ་ཆེན་པོ་བྱེད་པར་འགྱུར་རོ་སྙམ་ནས་སླར་ལོག་པར་འདོད་པ་དང༌། དེ་ནས་བློན་པོ་རབ་གཏུམ་གྱིས་མཐོང་ནས་ཁྲོ་བའི་མེས་ཡིད་བསྲེགས་ནས་དཔྲལ་པར་ཁྲོ་གཉེར་གསུམ་བསྡུས་ཏེ་ཤིན་ཏུ་བརྒྱུགས་སོ། །དེ་ནས་ཚམ་ཚོམ་མེད་པར་དེའི་སྐྲ་ནས་བཟུང་ནས་སྙིང་རྗེ་མེད་པས་མགོ་ཐུར་དུ་ས་ལ་བསྒྱེལ་ཏེ་བཤལ་བཞིན་དུ་འདི་སྐད་ཅེས་སྨྲས་ཏེ། ཁྱོད་འདིར་འོངས་ནས་གཞོན་ནུ་གསེར་མདོག་དང་ལྷན་ཅིག་དགའ་མགུར་སྤྱད་ནས། ང་ལ་གླད་བ་ན་བས་ཤིང་ཏུ་གཟིར་ཏེ་དེས་ཁྱེད་ཀྱི་གན་དུ་མ་འོངས་སོ་ཞེས་སྨྲ་འམ། ངས་དེང་གང་གིས་སླར་ཡང་འཚོ་བའི་
འཇིག་རྟེན་མཐོང་ཞིང་གཞོན་ནུ་གསེར་མདོག་དང་ལྷན་ཅིག་དགའ་མགུར་སྤྱོད་པར་མི་འགྱུར་བ་དེ་ལྟ་བུའི་ཆད་པ་གཅད་པར་བྱའོ། །བུ་མོ་ཀ་ཤི་མཛེས་དགའ་མོས་དེ་ཐོས་པ་དང༌། ཕན་ཚུན་དྲུད་པའི་སྡུག་བསྔལ་ལ་མ་བསམས་པར་མཆི་མས་བརྣངས་བཞིན་སྐད་འདར་བཞིན་དུ་ཀྱི་ཧུད་ད་ནི་འཚོ་བར་མི་འགྱུར་རོ་སྙམ་ནས་ལུས་འདར་བཞིན་དུ་བློན་པོ་རབ་གཏུམ་གྱི་རྐང་པ་གཉིས་ལ་གཏུགས་ཏེ། སྙིང་རྗེ་རྗེ་སྐད་དུ་གཅོམ་ཆུང་ངུས་ཚིག་རེ་རེ་ནས་སྨྲས་པ། རྗེའི་སྲས་བཟོད་པར་མཛོད་ཅིག །བདག་ནི་གསད་པར་འོས་པ་མ་ལགས་ཏེ། བུད་མེད་ཀྱི་ཡུལ་ནི་རྟག་ཏུ་སྐྱོན་དང་བཅས་པ་ལགས་ཀྱིས་དེང་ནས་བརྩམས་ནས་སླན་ཆད་འདིར་ཅི་ཡང་མི་བགྱིད་ཀྱི། ཇི་སྲིད་འཚོའི་བར་དུ་ཁྱེད་ཀྱི་འབངས་མོ་བགྱིད་ཀྱིས་མ་བརྟགས་པ་འདི་མ་མཛད་པར་སྲོག་སྩོལ་ཅིག །རང་བཞིན་ངན་པ་དེ་དེ་ལྟ་བུའི་སྙིང་རྗེ་རྗེ་སྐད་དུ་གཅོམ་ཆུང་དུས་ཚིག་རེ་རེ་ནས་སྨྲས་ཀྱང་ཁྲོ་བའི་མེ་འཕེལ་བ་ཉིད་དོ། །དེ་ནས་དེའི་གྲོགས་པོའི་སྐྱེས་བུ་ལ་སྨྲས་པ། རལ་གྲི་འདིས་འདིའི་མགོ་དྲུངས་ནས་མྱུར་དུ་ཆོད་ལ་སལ་ལྟུང་བར་གྱིས་ཤིག་ཅེས་སྨྲས་པ་དང༌། དེ་ནས་སྐྱེས་བུ་དེས་བདག་ཉིད་ངན་པ་དེའི་རིགས་པ་དང་མི་ལྡན་པའི་ཚིག་ངན་པ་ཐོས་པ་དང་འདར་བར་གྱུར་ཅིང་བསམས་པ། ཀྱེ་མའོ་སྙིང་རྗེ་མེད་པ། བུད་མེད་འདི་ནི་འདིས་རྣམ་པ་དུ་མང་རྗེས་སུ་ལོངས་སྤྱོད་ན་དེ་ཇི་ལྟར་ཉེས་པ་ཆུང་ངུའི་ཕྱིར་གསོད་པར་འདོད། ཀྱེ་མའོ་ང་ཡང་འཚོ་བའི་འཇིགས་པ་དང་སྐྲག་པས་སྐྱེས་བུ་ཐ་མ་སྦྲུལ་གྱི་དུག་དང་མཚུངས་པའི་གན་དུ་གནས་པར་བྱེད། ང་ནི་རྣམ་པ་ཐམས་ཅད་དུ་ཉམ་ང་བ་ཆེན་པོར་ཞུགས་སོ། །འདི་ཇི་ལྟར་བསྒྲུབ་པར་བྱ། ཡང་ན་གསལ་བར་སྨྲ་བར་བྱའི། །གལ་ཏེ་གསལ་བར་སྨྲས་ན་སྡིག་པ་དང་ཆོས་མ་ཡིན་པ་ལས་ལྡོག་ཀྱང་སྲིད་དོ་སྙམ་ནས་ཀུན་དུ་སྐྱོ་བ་དང༌། དེ་ལ་བུད་མེད་དེ་ཤིན་ཏུ་སྙེང་རྗེ་བས་རྒྱུད་ཞི་བར་བྱས་པས་མིག་མཆི་མས་ཁེངས་པ་དང་ཐལ་མོ་སྦྱར་ཏེ། བློན་པོ་རབ་གཏུ་མ་ལ་སྨྲས་པ། ཇོ་བོ་བཟོད་པར་མཛོད་ཅིག །འདི་ལྟ་བུའི་བྱ་བམ་ཡིན་པ་ལ་བདག་སྦྱར་བ་ནི་མི་རིགས་སོ། །བདག་ནི་བརྩེ་བ་མེད་པ་མ་ལགས་ཏེ། གསོད་མ་པ་ཡང་
མ་ལགས་ན་ཇི་ལྟར་ན་བདག་གསོད་མ་རྣམས་ཀྱང་བྱེད་པར་སྤྲོ་བ་མ་ཡིན་པའི་ལས་གང་ཡིན་པ་དེ་ལ་བདག་པོས་བཙུད་དམ། བུད་མེད་འདི་ཡང་ཤིན་ཏུ་གཟུགས་བཟང་བ། བལྟ་ན་སྡུག་པ། མཛེས་པ། སྒྱུ་རྩལ་ཤེས་པར་གྲགས་པ་རྒྱལ་པོའི་ཁབ་ན་གནས་པ་རྣམས་དང༌། ཕྱོགས་གཞན་ནས་ལྷགས་པའི་སྐྱེ་བོ་མཁས་པ་རྣམས་ཀྱི་སྙིང་དུ་སྡུག་པ། འདི་ནི་མི་རྣམས་ཀྱི་ཐུན་མོང་གི་དགའ་བའི་གནས་སུ་གྱུར་པ་ལགས་ན། བདག་པོ་ཤེས་རབ་དང་ལྡན་ཞིང་མཁས་པའི་མི་རྣམས་རྗེས་སུ་ཆགས་པའི་གནས་འདི་ལ་སྡང་བར་ཇི་ལྟར་བྱེད་འདི་ལྟ་བུའི་འཇིག་རྟེན་གཉི་ག་དང་འགལ་བར་གྱུར་པའི་རྩོལ་བ་འདི་ལ་ལྡོག་པར་མཛོད་ཅིག །བཟོད་པར་མཛོད་ལ་བདག་དང་ཁྱེད་ཀྱང་ཉེས་པར་སྤྱོད་པའི་མེ་འདིས་བསྲེག་པར་འོས་པ་མ་ཡིན་ནོ། །གཙོ་བོ་གཞན་ཡང༌། ཤིན་ཏུ་གཞོན་པའི་ཡན་ལག་འདི། །གཟུགས་དང་ལང་ཚོ་རྣམ་བརྒྱན་པ། །འདི་ནི་མི་ཡི་དགའ་བ་དག །གཟུགས་དང་ལྡན་པ་བཞིན་དུ་ཤེས། །དམན་ཞིང་སྙིང་ནི་རྗེ་རྗེའི་ལྟའི། །སྙན་པའི་ཚིག་ནི་འདི་དག་གིས། །གཙོ་བོ་ཁྱོད་ལ་གསོལ་འདེབས་ན། །བདག་གི་ཡིད་ནི་མགུ་བར་མཛོད། །ཁྱོད་ཚིག་འབར་བར་ཐོས་པས་ན། །དེར་ནི་བདག་ཉིད་འདར་བར་འགྱུར། །གང་ཞིག་འདི་འདྲ་གསོད་གྱུར་པའི། །སྙིང་རྗེ་མེད་པ་སུ་ཞིག་མཆིས། །ཤིན་ཏུ་སྙིང་རྗེ་མེད་པ་ཡི། །ཀླ་ཀློ་འང་འདི་གསོད་མི་སྤྲོ་ན། །གཙོ་བོས་བདག་ཡིད་ཇི་ལྟར་ན། །མི་གསོད་པར་ནི་སྤྲོ་བ་སྐྱེད། །གང་ཞིག་ཕྱུགས་ཀྱིས་མཐོང་ན་ཡང༌། །རྗེས་ཆགས་ཆེན་པོ་སྐྱེ་འགྱུར་བ། །དེ་ལ་གང་ཞིག་མིར་གྱུར་ནས། །མཚོན་གྱིས་འདེབས་པ་བགྱིད་མ་མཆིས། །གཙོ་བོ་ཤིན་ཏུ་མི་བཟད་པའི། །ལས་འདི་མཉན་པ་འང་རིགས་མིན་ན། །སྤྱོད་པར་བགྱིད་པ་སྨོས་ཅི་འཚལ། །དེ་བས་བཟོད་པ་མཛད་པའི་རིགས། །དེ་ནས་སྐྱེས་བུ་རང་བཞིན་ངན་པས་བསམ་པ་ཉམས་པ་དེ་ལ་དེ་ལྟ་བུའི་སྙིང་ལ་བབ་པའི་ཚིག་སྙན་པ་དེས་སྨྲས་སུ་ཟིན་ཀྱང་རང་གི་སེམས་ཞི་བ་མ་རྙེད་པར་གྱུར་ཏེ། དེ་ཁྲོས་ཕས་སྨིན་མ་བསྡུས་ཤིང་བཞིན་མི་སྡུག་པས་དེ་ལ་སྨྲས་པ། ཀྭའི་མི་ཁྱོད་ངའི་ཚིག་ལས་
འདའ་བར་བྱས་ཏེ། འདི་ལ་ཁྱོད་རྗེས་སུ་ཆགས་པར་བྱད་ནས་གསོད་པར་མི་འདོད་དམ། རྣམ་པ་ཐམས་ཅད་དུ་ཁྱོད་ཀྱིས་འདི་བསད་པར་གྱུར་ན་ལེགས་ཀྱི་གལ་ཏེ་མ་བསད་ན་དང་ཁྱོད་ཀྱི་སྲོག་མེད་པར་བྱའོ། །དེ་ནས་སྐྱེས་བུ་དེ་དེའི་ཚིག་རྩུབ་མོའི་རྩོམ་པ་ཤེས་ནས་འཇིགས་པས་སེམས་པ་ལ་ཞུགས་པར་གྱུར་ཏེ། ཀྱེ་མའོ་བདག་ནི་ཤིན་ཏུ་ཉམ་ང་བར་གྱུར་ཏེ། གལ་ཏེ་འདིའི་ཚིག་བཞིན་མ་བྱས་ན་ངེས་པར་དེང་བདག་ཉིད་སྲོག་དང་བྲལ་བར་བྱེད་དེ། གང་ཞིག་འདི་ལྟ་བུའི་བུད་མེད་རྣམ་པ་དུ་མར་ཉེ་བར་ལོངས་སྤྱོད་པ་ཡང་གསོད་པར་རྩོམ་ན་དེང་ང་མི་གསོད་པར་ག་ལ་འགྱུར། ཅི་འདི་ལྟ་བུའི་སྐྱེ་བོའི་ཆོགས་ཀྱི་ཡིད་དུ་འོང་བའི་བུད་མེད་ཀྱི་ལུས་ལ་མཚོན་གྱིས་འདེབས་པར་བྱེད་ན། བདག་ཉིད་མིར་ཡང་མི་རུང་གི །རྣམ་པ་ཐམས་ཅད་དུ་རང་གི་སྲོག་དང་བྲལ་བ་ནི་བླའི་འདི་ལྟ་བུ་འདི་ལ་སྣུན་པར་མི་བྱའོ་ཞེས་ངེས་པར་བསམས་ནས་ཡང་དེའི་སླར་སྐྱེས་པ་གང་འདི་རལ་གྲི་ཁྱེར་ལ་འབྲོས་པར་བྱའི། དེས་ནི་ངའི་ལུས་དང་བུ་མོ་ཀ་ཤི་མཛེས་དགའ་མོའི་ལུས་ཀྱང་ཡོངས་སུ་བསྲུངས་པར་འགྱུར་རོ་སྙམ་ནས་རལ་གྲི་ཐོགས་ནས་སྐྱེད་མོས་ཚལ་ནས་བྱུང་ནས་བང་ཐམས་ཅད་གཏུགས་པ་དང་བྲོས་པར་གྱུར་ཏོ། །བློན་པོ་རབ་གཏུམ་གྱིས་ཀྱང་དེའི་རྗེས་བཞིན་སྒོའི་ཕྱི་རོལ་གྱི་བར་དུ་བསྙེགས་སོ། །དེ་ནས་བུ་མོ་ཀ་ཤི་མཛེས་དགའ་མོ་བདག་ཉིད་སྲོག་སྟོར་བ་སླར་རྙེད་པ་ཙམ་དུ་སེམས་ཤིང་རིངས་པ་རིངས་པར་བྲོས་ཏེ་ར་བའི་རྩར་ཕྱིན་པ་དང༌། ར་བ་དེ་ཡང་མཐོ་བས་བརྒལ་བར་མ་ནུས་པ་ན་བློན་པོ་རབ་གཏུམ་སླར་ལག་ནས་ཇི་སྲིད་ཕྱོགས་དེ་ན་བུ་མོ་ཀ་ཤི་མཛེས་དགའ་མོ་མ་མཐོང་ནས་ཕན་ཚུན་ཀུན་དུ་བལྟས་པར་བརྩམས་པ་དང༌། ཅི་ཙམ་ན་ར་བའི་རྩར་ཕྱིན་པ་མཐོང་ནས་རིངས་པ་རིངས་པར་དེའི་གན་དུ་འགྲོ་བར་བརྩམས་སོ། །དེ་ན་ཡང་སྦྲུལ་ནག་པོ་ཞིག་གནས་ཏེ། དེས་བུ་མོའི་རྐང་པ་གཡས་པ་ནས་བཟུང་བ་དང་དེས་དེ་མཐོང་ནས་བྲོས་སོ། །བུ་མོ་ཀ་ཤི་མཛེས་དགའ་མོས་བསམས་པ། བློན་པོ་རབ་གཏུམ་འདི་འོངས་ནས་གསོད་པར་འགྱུར་རོ་སྙམ་པ་དེར་གཏོད་པའི་ཡིད་དང་འཆི་བའི་འཇིགས་པས་སྦྲུལ་ནག་པོས་ཟིན་པར་མ་ཤེས་ནས་ཨ་ཏི་མུག་ཏིའི་ཚང་ཚིང་དུ་ཞུགས་པ་དང༌།
བློན་པོ་རབ་གཏུམ་ཡང་ཨ་ཏི་མུག་ཏིའི་ཡལ་གའི་ཚང་ཚིང་དུ་ཕྱིན་ཏོ། །དེ་ནས་རང་བཞིན་ངན་པ་སྙིང་རྗེ་མེད་པའི་སེམས་ཀྱིས་ཞེ་སྡང་དྲག་པོས་ཀུན་དུ་འཁྲུགས་པའི་ཡིད་ཀྱིས་བུ་མོ་ཀ་ཤི་མཛེས་དགའ་མོ་ཨ་ཏི་མུག་ཏིའི་ཡལ་གའི་ཚང་ཚིང་ནས་དྲངས་ཏེ། དེའི་མགོ་ལ་རྐང་པའི་རྟིང་པ་དང་རྡོག་པས་བསྣུན་ཏོ། །བུད་མེད་དེ་ནི་ཤིན་ཏུ་གཞན་ཤ་ཅན་ཡིན་པས་རྡོག་པས་བསྣུན་བ་དེ་དང་དུག་གི་ཞུགས་ཀྱིས་བརྒྱལ་བར་གྱུར་ཏོ། །བློན་པོ་རབ་གཏུམ་དེ་ལྟ་བར་བསམས་པ་དང༌། ཅི་ཙམ་ན་སེམས་མེད་པར་ས་ལ་འགྱེལ་བར་མཐོང་ནས་དེ་འདི་སྙམ་དུ་སེམས་ཏེ་འདི་ནི་ཤི་ཟིན་གྱིས་ད་ནི་འགྲོ་བར་བྱས་ཏེ། འགའ་ཞིག་གིས་མཐོང་ན་མི་རུང་ངོ་སྙམ་ནས་ར་བ་རྒལ་ཏེ་ལམ་གཞན་ནས་རྒྱལ་པོའི་ཁབ་ཏུ་ཞུགས་སོ། །དེར་ཕྱིན་ནས་རྒྱལ་པོའི་སྐྱེས་བུ་གཞན་དག་ཅིག་ལ་སྨྲས་པ། ཤེས་ལྡན་དག་སོང་ལ་དེད་དཔོན་ཉི་མའི་སྐྱེད་མོས་ཚལ་ལྟོས་ཤིག །དེ་ཡང་ཆས་སོ། །གཞོན་ནུ་གསེར་མདོག་ཀྱང་རྒྱལ་པོའི་ཁབ་ནས་བྱུང་སྟེ་སྐྱེད་མོས་ཚལ་དེར་ཕྱིན་པ་དང༌། ཇི་སྲིད་ཅིག་ན་བུ་མོ་ཀ་ཤི་མཛེས་དགའ་མོ་ཕན་ཚུན་དུ་བཤལ་ཞིང་དྲུད་པ་དང༌། སྐྲ་གྲོལ་ལ་སེམས་མེད་པར་ས་ལ་འགྱེལ་བར་མཐོང་བ་དང༌། དེ་སྐྱོ་བ་ཆེན་པོ་སྐྱེས་པར་གྱུར་ནས་དེས་བསམས་པ་ནི་རང་བཞིན་ངན་པ་སྙིང་རྗེ་མེད་པའི་སེམས་འཇིག་རྟེན་ཕ་རོལ་སྤངས་པ་ཤ་ཁོན་དང་བཅས་པ་སུ་ཞིག་གིས་འདིར་ཁྱེར་ཏེ་འོངས་ནས་བསད་པར་གྱུར། ཀྱི་ཧུད་ངན་ཅིང་སྡུག་བསྔལ་ཏེ། འདི་ལྟ་བུའི་བུད་མེད་བརྩེ་བ་མེད་པས་གསོད་པའི་སེམས་ཅན་སུ་ཞིག་བྱུང་སྙམ་ནས་སྐྱེད་མོས་ཚལ་དེ་ཐམས་ཅད་དུ་བལྟས་ནས་སུ་ཡང་མ་མཐོང་བ་དང༌། དེ་འདི་སྙམ་དུ་སེམས་ཏེ། བུད་མེད་འདི་ནི་ཀུན་གྱིས་ཤེས་པ་ཡིན་ལ། འདི་སྐྱེད་མོས་ཚལ་འདིར་བསད་ནས་འདིར་སུ་ཡང་མི་སྣང་བ་ནི་རྣམ་པ་ཐམས་ཅད་དུ་འགའ་ཞིག་གིས་རང་གི་རང་བཞིན་ངན་པ་སྦས་ནས་གྲགས་པ་མ་ཡིན་པའི་སེར་བ་ངའི་མགོར་དབབ་པའི་ཕྱིར་དེས་འདིར་མངོན་དུ་ཕྱུང་ངོ་སྙམ་ནས་དེ་དེ་ལྟར་མི་དགའ་བཞིན་དུ་ལག་པ་འགྲམ་པ་ལ་གཏད་དེ་ཤིན་ཏུ་སེམས་པ་ལ་ཞུགས་ཤིང་འདུག་པ་དང༌།
རྒྱལ་པོའི་སྐྱེས་བུ་དེ་རྣམས་ཀྱང་ཕྱིན་ནས་དེར་ཞུགས་ཏེ། སྐྱེད་མོས་ཚལ་དེ་བལྟ་བར་བརྩམས་པ་དང༌། ཇི་ཙམ་དུ་བུ་མོ་ཀ་ཤི་མཛེས་དགའ་མོ་ཕན་ཚུན་བཤལ་ནས་དྲུད་པ་དང༌། སྐྲ་གྲོལ་ཞིང་ས་ལ་དྲུད་པ་དང་འགྱེལ་བ་མཐོང་བ་དང༌། གཞོན་ནུ་གསེར་མདོག་གི་སྔོན་གྱི་ལས་ཀྱི་རྣམ་པར་སྨིན་པའི་སྟོབས་ཀྱིས་དེ་སུས་ཀྱང་ངེས་པ་མ་རྙེད་ཅིང་བརྒྱལ་བ་ཡིན་ནམ། འོན་ཏེ་དུས་བྱས་པ་ཡིན་པར་ཤེས་པར་ཡང་མ་གྱུར་ཏོ། །དེ་ནས་རྒྱལ་པོའི་སྐྱེས་བུ་དེ་དག་ཕན་ཚུན་དུ་སྨྲས་པ། ཤེས་ལྡན་དག་བུད་མེད་འདི་ནི་འགའ་ཞིག་གིས་བསད་དོ་ཞེས་ཏེ། དེ་རྣམས་ཀྱིས་སྐྱེད་མོས་ཚལ་ཀུན་དུ་བལྟས་ནས་གཞོན་ནུ་གསེར་མདོག་མ་གཏོགས་པ་སུ་ཡང་མཐོང་བར་མ་གྱུར་པ་དང༌། དེ་རྣམས་ཀྱིས་གསེར་མདོག་ལ་དྲིས་པ། གཞོན་ནུ་བུད་མེད་འདི་སུས་བསད། དེས་སྨྲས་པ། ཤེས་ལྡན་དག་ངས་ཀྱང་མི་ཤེས་ཏེ། འདི་ཁོ་བོས་ཀྱང་འདི་ཁོ་ན་ལྟར་མཐོང་ངོ༌། །དེ་ནས་རྒྱལ་པོའི་སྐྱེས་བུ་དེ་དག་ཕན་ཚུན་སྨྲ་བར་རྩོམ་པ། ཤེས་ལྡན་དག་གཞོན་ནུ་འདི་ནི་ཤིན་ཏུ་དུལ་བ་ཡིན་པས་འདི་ནི་ལས་འདི་བྱེད་པར་མི་སྲིད་པ། འདིར་གཞན་སུ་ཡང་མ་མཐོང་བས་ཡུ་བུ་ཅག་ནི་རྣམ་པ་ཐམས་ཅད་དུ་ཤིན་ཏུ་ཉམ་ང་བཞུགས་ལ་འདི་ལ་ཇི་ལྟར་བསྒྲུབ་པར་བྱ། དེ་ལ་གཅིག་གིས་སྨྲས་པ། ཤེས་ལྡན་དག་ཡུ་བུ་ཅག་གིས་འདི་ཡོངས་སུ་གཅོད་ནུས་པ་མ་ཡིན་གྱི། བུད་མེད་འདི་དག་གཞོན་ནུ་ཞལ་མཆུའི་གནས་སུ་ཁྱེར་ན་དེར་བློན་པོ་རྣམས་ཀྱི་ས་ཡོངས་སུ་གཅོད་པར་འགྱུར་རོ། །དེ་ནས་རྒྱལ་པོའི་སྐྱེས་བུ་རྣམས་ཀྱིས་བུད་མེད་དེ་ཁྱོགས་ལ་བཏེག་པ་དང༌། གཞོན་ནུ་གསེར་མདོག་ཀྱང་ཁྱེར་ཏེ། ཞལ་མཆུའི་གནས་སུ་སོང་ངོ༌། །ཞལ་མཆུའི་གནས་དེ་ན་ཡང་བློན་པོ་རབ་གཏུམ་རྗེས་སུ་མཐུན་པའི་ལས་བྱེད་པ་རྣམས་དང་ལྷན་ཅིག་འདུག་པར་གྱུར་ཅིང་འདུག་པར་གྱུར་པ་དང༌། རྒྱལ་པོའི་སྐྱེས་བུ་དེ་རྣམས་འོང་བ་དེས་རིང་པོ་ཉིད་ནས་མཐོང་ནས་དྲིས་པ། ཤེས་ལྡན་དག་འདི་ཅི་ཞིག་ཡིན། བུད་མེད་འདི་བདག་ཅག་རྣམས་ཀྱིས་དེད་དཔོན་ཉི་མའི་སྐྱེད་མོས་ཚལ་དུ་དུས་བྱས་པ་མཐོང་ལགས་ཏེ། སྐྱེད་མོས་ཚལ་དེར་བདག་ཅག་རྣམས་ཀྱིས་བལྟས་ན་གཞོན་ནུ་གསེར་མདོག་མ་གཏོགས་པ་སུ་
ཡང་མ་མཐོང་ནས་འདི་ཉིད་ལ་བདག་ཅག་གིས་གཞོན་ནུ་བུད་མེད་འདི་སུ་ཞིག་གིས་བསད་ཅེས་དྲིས་པ། ཤེས་ལྡན་དག་ངས་ཀྱང་མི་ཤེས་ཏེ། ཁོ་བོས་ཀྱང་འདི་ཁོ་ན་ལྟར་མཐོང་ངོ་ཞེས་གླེང་ན་ད་ནི་གཙོ་བོ་ཁྱེད་རྣམས་ཀྱིས་རྣམ་པར་དཔྱོད་ཅིག །བློན་པོ་རབ་གཏུམ་གྱིས་སྨྲས་པ། ཁྱེད་རྣམས་འདིར་ཡུད་ཙམ་ཅིག་སྡོད་ཅིག །ངས་རྒྱལ་པོ་ལ་ཞུ་བར་བྱའོ་ཞེས་སྨྲས་ནས། དེས་རྒྱལ་པོ་མ་སྐྱེས་དགྲའི་ཕོ་བྲང་དུ་སོང་སྟེ། སྒོ་སྲུངས་ཀྱི་སྐྱེས་བུ་ལ་དྲིས་པ། ཀྱེ་སྐྱེས་བུ་ལྷ་ཅི་ཞིག་མཛད། དེར་སྨྲས་པ། སྟེང་གི་ཁང་བཟངས་ཀྱི་གཞི་ན་སྐྱེས་པ་མེད་པར་བུད་མེད་ཀྱི་རོལ་མོས་རྩེ་བར་མཛད་དགའ་བར་མཛད་དགའ་མགུར་སྤྱད་པར་མཛད་དོ། །དེས་སྐབས་རྙེད་པས་སྒོ་དཔོན་མོ་ཆེན་པོ་ཞིག་ལ་སྨྲས་པ། སོང་ལ་ལྷ་ལ་བློན་པོ་རྣམས་ཀྱིས་ཞུ་བ་འདི་སྐད་ཞུས་ཤིག །དེད་དཔོན་ཉི་མའི་བུས་བསྐྱེད་མོས་ཚལ་དུ་བུ་མོ་ཀ་ཤི་མཛེས་དགའ་མོ་བཀུམ་ལ་དེ་ཡང་གཡར་གྱིས་འཆེས་པར་མི་བགྱིད་ན། འདི་ལ་བདག་ཅག་རྣམས་ཀྱིས་ཅི་ལྟར་བསྒྲུབ་པར་བགྱི། དེ་སོང་སྟེ་རྒྱལ་པོ་ལ་ཞུས་པ། རྒྱལ་པོ་དགའ་བའི་རོལ་མོ་དེ་ལ་ཤིན་ཏུ་ཆགས་ནས་སྨྲས་པ། སོང་ལ་བློན་པོ་ལ་ཁྱེད་རྣམས་ཉིད་ཀྱིས་ལེགས་པར་དཔྱོད་ཅིག་ཅེས་སྨྲས་སོ། །དེ་ཕྱིར་བྱུང་སྟེ། བློན་པོ་རབ་གཏུམ་ལྷས་འདི་སྐད་ཅེས་བཀའ་སྩལ་ཏོ་ཞེས་སྨྲས་སོ། །དེ་ནས་བློན་པོ་རབ་གཏུམ་ཞལ་ཆེའི་གནས་སུ་འོངས་ནས་རྒྱལ་པོའི་སྐྱེས་བུ་རྣམས་ལ་སྨྲས་པ། ཤེས་ལྡན་དག་ཁྱེད་སོང་ལ་གསོད་མ་པ་རྣམས་སྦྲོན་ཅིག །དེ་རྣམས་ཀྱིས་ཀྱང་སྦྲན་པ་དང་བློན་པོ་རབ་གཏུམ་གྱིས་གསོད་མ་བ་རྣམས་ལ་སྨྲས་པ། གཞོན་ནུ་འདིས་བུ་མོ་ཀ་ཤི་མཛེས་དགའ་མོ་འདི་བསད་ཀྱི་ཁྱེད་རྣམས་སོང་ལ་ངན་པར་སྤྱོད་པ་འདི་རྒྱ་བ་ལག་དམ་པོར་ཆིངས་ལ་སྒྲ་རྩུབ་པའི་རྔ་བརྡུངས་ཤིང་ལམ་པོ་ཆེ་དང༌། ཚོང་འདུས་དང༌། བཞི་མདོ་དང༌། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ལ་གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཕྱུང་སྟེ། དུར་ཁྲོད་ཆེན་པོར་ཁྱེར་ལ་གསལ་ཤིང་ལ་སྐྱོན་ཅིག །ཤི་བ་དང་བུ་མོ་ཀ་ཤི་མཛེས་དགའ་མོ་དང་ལྷན་ཅིག་རོ་བསྲེགས་པའི་
གནས་ཅིག་ན་ཞོག་ལ་སྲེགས་ཤིག །དེ་ནས་གསོད་མ་པ་རྣམས་ཀྱིས་གཞོན་ནུ་གསེར་མདོག་ཤིན་ཏུ་གཟུགས་བཟང་བ་གསེར་བཙོ་མའི་རིའི་རྩེ་མོ་ལྟ་བུར་དཔལ་གྱིས་འབར་བ་ལ་བལྟས་ཏེ་ཀུན་དུ་ཡི་མུག་པར་གྱུར་ནས་ཕན་ཚུན་སྨྲས་པ། ཤེས་ལྡན་དག་ཇི་ལྟར་ཡུ་བུ་ཅག་གསོད་མ་པ་ཡིན་ཡང་སྐྱེས་བུ་མཐོང་བར་དཀའ་བ་ཁྱད་པར་ཅན་འདི་ལྟ་བུ་ཇི་ལྟར་གསད་པར་བྱ། རྣམ་པ་ཐམས་ཅད་ཡུ་བུ་ཅག་ཉིད་རང་གི་སྲོག་དོར་བ་ནི་བླའི་འདི་ལྟ་བུ་གསད་པར་ནི་མི་བྱའོ། །བློན་པོ་རབ་གཏུམ་གྱིས་ཕན་ཚུན་གཅིག་ལ་གཅིག་སྨྲ་བར་བྱེད་པ་དེ་མཐོང་བ་དང་དེ་རྣམས་ལ་སྨྲས་པ། ཤེས་ལྡན་དག་ཅི་སྟེ་འདུག་འདི་མྱུར་དུ་ཁྱེར་ཅིག་དེ་རྣམས་ཀྱིས་ཐལ་མོ་སྦྱར་ཏེ་གསོལ་བ་བཏབ་པ། བདག་པོ་བཟོད་པར་མཛོད་ཅིག །ཇི་ལྟར་བདག་ཅག་གསོད་མ་པ་རྣམས་ལགས་ཀྱང་འདི་ལྟ་བུའི་སྐྱེས་བུ་ཁྱད་པར་ཅན་སྐྱེ་བ་མང་པོའི་ཡིད་དུ་འོང་བ་གསོད་པར་རྔོ་མི་ཐོགས་སོ། །བློན་པོ་རབ་གཏུམ་ཤིན་ཏུ་འཁྲུགས་ནས་གལ་ཏེ་ཁྱེད་རྣམས་ཀྱིས་འདི་མ་བསད་ན་དེང་ཁྱེད་རྣམས་ཉིད་བུ་དང་ནང་མི་དང་གཉེན་འདུན་དང་བཅས་པ་རྣམས་ཀྱི་སྲོག་མེད་པར་བྱའོ་ཞེས་སྨྲས་པ་དང༌། དེ་རྣམ་སྐྲག་པས་ཕན་ཚུན་སྨྲས་པ། ཤེས་ལྡན་དག་བློན་པོ་འདིའི་རྩོམ་པ་ན་རིགས་པ་དང་མི་ལྡན་པ་སྟེ། གང་འདི་གཞོན་ནུ་གསེར་མདོག་འདི་ལྟར་མཐོང་བར་དཀའ་བ་སྐྱེས་བུ་ཁྱད་པར་ཅན་ཡོངས་སུ་སྤོང་བར་བརྩོན་ན་དེ་ཡུ་བུ་ཅག་རྣམས་ཀྱི་བུ་དང་ཆུང་མ་དང་གཉེན་འདུན་དང་བཅས་པ་གསོད་པར་ཅི་སྟེ་མི་བྱེད་དེ། །འདི་ལྟ་བུ་ཤིན་ཏུ་ཉམ་པ་བར་ཞུགས་ན། འདི་ལ་ཇི་ལྟ་བུར་བསྒྲུབ་པར་བྱ། ཡང་དེ་རྣམས་འཆི་བས་འཇིག་སྐྲག་པས་བློ་སྐྱེས་པ། གཞོན་ནུ་འདི་སྐྱེ་བོ་མང་པོའི་ཡིད་དུ་འོང་བ་ཡིན་འདི་རེ་ཞིག་ལམ་པོ་ཆེར་དགྱེར་གྱི་སྐྱེ་བོ་མང་པོའི་ཚོགས་གང་ཡིན་པ་འདི་ཐར་བར་བྱེད་པའི་གནས་ནི་ཡོད་དོ། །འདི་གསོད་པ་ལ་བཏང་སྙོམས་སུ་འཇོག་པ་སུ་ཞིག་གིས་ནུས་སྙམ་ནས་དེ་རྣམས་དེའི་གན་དུ་སོང་ནས་འདི་རྒྱབ་ལག་བཅིང་ངོ་སྙམ་པ་དང༌། དེའི་གཟུགས་ཕུན་སུམ་ཚོགས་པ་རྒྱ་ཆེན་པོར་མཛེས་པ་མཐོང་བ་དང་རེག་པར་མ་ནུས་སོ། །
དེ་ནས་ཡན་ལག་དང་ཉིང་ལག་འདར་ཞིང་མཆི་མ་འཛག་ལ་སྐད་འཛེར་བཞིན་དུ་སྨྲེ་སྔགས་འདོན་པར་རྩོམ་པ། ཀྱི་ཧུད་འདི་ལྟ་བུའི་སྡིག་པ་བྱད་དུ་བཅུག་པ་བདག་ཅག་ནི་ཤིན་ཏུ་སྡུག་བསྔལ་ཏེ། སུ་ཞིག་གིས་འདི་ལྟ་བུའི་བྱ་བ་མ་ཡིན་པ་ལ་སྦྱར་བར་འགྱུར། དེ་ནས་བློན་པོ་རབ་གཏུམ་གྱིས་ཤིན་ཏུ་རྩུབ་པ་དང་བཅས་པའི་ལུང་ཡང་བསྒོ་བ། ཁྱེད་རྣམས་ཅི་ལ་འགོར་དེ་ནས་དེ་རྣམས་སྐྲག་ཅིང་ཀུན་དུ་བྲེད་པར་གྱུར་པས་དེ་རྣམས་མཆི་མས་མིག་ཁེངས་ཤིང་འདར་བཞིན་དུ་དེ་བཟུང་སྟེ། གསེར་གྱི་མདོག་ཅན་གྱི་གོས་སེར་པོ་དེ་ཉིད་ཀྱིས་རྒྱབ་ལག་ཏུ་བཅིངས་སོ། །རྒྱབ་ལག་ཏུ་བཅིང་བས་བཅིངས་པ་དེ་མཐོང་བ་དང༌། བློན་པོ་རབ་གཏུམ་མ་གཏོགས་པའི་ཞལ་ཆེའི་གནས་སུ་ཚོགས་པའི་སྐྱེ་བོའི་ཚོགས་དེ་དག་ཐམས་ཅད་དེ་དང་བྲལ་བའི་གདུང་བས་སེམས་ཀྱི་རྒྱུད་ཞུ་བར་གྱུར་ནས་མཆི་མ་ཀློག་པར་གྱུར་ཏེ། ཀྱི་ཧུད་ད་ནི་མཐོང་བར་དཀའ་བའི་གཞོན་ནུ་འདི་ལྟ་བུ་མེད་པར་འགྱུར་རོ་ཞེས་སྨྲས་སོ། །དེ་ནས་གསོད་མ་པ་རྣམས་ཀྱིས་དེ་ལམ་པོ་ཆེར་བཏེག་པ་དང༌། དེ་ནས་བར་སྐབས་དེར་ཅ་ཅོའི་སྒྲ་བྱུང་བ་དང༌། ཅ་ཅོའི་སྒྲ་དེ་ཐོས་པས་རྒྱལ་པོའི་ཁབ་ན་གནས་པ་དང༌། ཕྱོགས་སྣ་ཚོགས་པ་ནས་ལྷགས་པའི་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་དང༌། སྐྱེ་བོའི་ཚོགས་རྣམས་འདུས་པར་གྱུར་པ་དང༌། གཞོན་ནུ་གསེར་མདོག་རྒྱབ་ལག་ཏུ་བཅིང་བ་དམ་པོས་བཅིངས་པ་བལྟས་ཏེ། ཐམས་ཅད་སྐྱོ་བའི་ཡིད་ཀྱིས་རྟབས་བག་དང་བཅས་པར་འདྲི་བར་རྩོམ་པ། ཤེས་ལྡན་དག་འདི་ཅི་ཞིག་ཡིན། དེ་ནས་གསོད་མ་པ་དེ་རྣམས་མཆི་མ་ཤིན་ཏུ་འཛག་ཅིང་སྐད་འཛེར་བཞིན་དུ་སྨྲེ་ཞིང་སྨྲས་པ། གཞོན་ནུ་འདིས་བུ་མོ་ཀ་ཤི་མཛེས་དགའ་མོ་བསད་དོ་ཞེས་གྲག་ནས་བསད་པའི་ཕྱིར་ཡོངས་སུ་སྤངས་ཏེ། ལམ་པོ་ཆེ་དང༌། ཚོང་འདུས་དང༌། བཞི་མདོ་དང༌། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ནས་འདི་དུར་ཁྲོད་ཆེན་པོར་ཁྱེར་ཏེ་རིང་པོ་མི་ཐོགས་པར་གསོད་པ་ཡིན་ནོ། །དེ་ཐོས་པ་དང༌། སྐྱེ་བོའི་ཚོགས་ཆེན་པོ་དེ་དག་དེ་དང་བྲལ་བའི་སྡུག་བསྔལ་གྱིས་གདུངས་པས་སྒྲ་གཅིག་
ཏུ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཀྱི་ཧུད་ཇི་ལྟར་གཞོན་ནུ་འདི་འདི་ལྟར་གཟུགས་བཟང་བ་བལྟ་ན་སྡུག་པ་མཛེས་པ་ཡན་ལག་དང་ཉིང་ལག་ཐམས་ཅད་འབྱེས་པ་དང་ལྡན་པ། གསེར་བཙོ་མ་ལྟ་བུའི་ཁ་དོག་རྒྱས་པ་དང་ལྡན་པ། སྐྱེ་བོ་ཐམས་ཅད་ཀྱི་མིག་དང་ཡིད་འཕྲོག་པ། མཁས་པ། དུལ་བ། དེས་པ། སྒྲིན་པ། སྙིང་རྗེ་ཅན། བདག་ཉིད་ཆེ་བ། ཆོས་འདོད་པ། སྐྱེ་དགུ་རྣམས་ལ་མཉེས་གཤིན་པ་གསོད་ན་ཅི་སྟེ་དམ་པ་རྣམས་ནུབ་པར་གྱུར་ཏམ། ཅིའི་ཕྱིར་ཆོས་ནུབ་པར་གྱུར་ཏམ། ཅིའི་ཕྱིར་ཆོས་མ་ཡིན་པའི་ས་འབྱོར་པར་གྱུར་ཅིང་རྒྱལ་སྲིད་ཀྱི་དབང་ཕྱུག་ལ་གནས་པར་གྱུར་ཏམ། ཀྱི་ཧུད་སྡུག་བསྔལ་ལོ། །འདི་ཡི་གཟུགས་དང་མདོག་མདངས་དང༌། །ཕུན་ཚོགས་རྒྱན་གྱི་མཆོག་རྣམས་ནི། །མཐོང་ཞིང་མཐོང་ཞིང་བདག་ཅག་རྣམས། །སྔོན་ཆད་མཆོག་ཏུ་དགའ་བར་གྱུར། །ད་ལྟར་དེ་ཉིད་གསོད་མ་པའི། །སྐྱེས་བུས་ཟིན་པ་མཐོང་བས་ན། །མྱ་ངན་དྲག་པོས་ཟིལ་མནན་པས། །བདག་ཅག་སྙིང་ནི་གས་སྙམ་བྱེད། །ཡིད་དང་མིག་ནི་འཕྲོག་བྱེད་ཅིང༌། །སྐྱེ་བོ་མང་པོའི་ཡིད་འོང་གང༌། །དེ་ལ་ཅི་ཕྱིར་རྒྱལ་པོ་ཡི། །ཆད་པ་དག་ནི་འབེབས་པར་འགྱུར། །རྟག་ཏུ་བལྟས་པར་གྱུར་ཀྱང་ནི། །ལུས་ཅན་ངོམས་པར་མི་འགྱུར་བ། །སྙིང་རྗེ་སྤངས་པའི་བློན་པོ་ཡིས། །གསོད་པའི་ཕྱིར་ནི་ཅི་ཡི་ཕྱིར། །གང་ཞིག་ཐུབ་པ་ལྟ་བུ་ཡི། །ཀུན་སྤྱོད་དུལ་བར་ལྡན་གྲགས་པའི། །དེ་ལ་ཉེས་པ་འདི་འདྲ་བ། །འབྱུང་བར་འགྱུར་བ་ག་ལ་སྲིད། །འདི་ལྟར་ཡོན་ཏན་ཅན་འདི་དང༌། །འབྲལ་བ་འདིར་ནི་ཉེར་གནས་པ། །ཀྱེ་མ་ཆོས་མིན་མེལ་ཙེ་བྱེད། །ཆོས་ནི་ཤིའམ་གཉིད་ལོག་གྱུར། །དེ་ལ་བུད་མེད་རྣམས་ཤིན་ཏུ་དགའ་བ་ཡིན་པས་དེར་བུད་མེད་ལ་ལ་ནི་དེ་དང་བྲལ་བའི་སྡུག་བསྔལ་གྱིས་གདུངས་པས་ས་ལ་འགྲེ་ལྡོག་པར་བྱེད་དོ། །ལ་ལ་ནི་བྲང་རྡུང་ངོ༌། །ལ་ལ་ནི་དྲན་བ་སྟོར་བར་གྱུར་ཏེ། དེ་རེ་རེ་ཞིང་བུ་གཅིག་པ་དང་བྲལ་བ་ལྟ་བུའི་སྡུག་བསྔལ་ཉམས་སུ་མྱོང་བར་གྱུར་ཏོ། །བདག་ཉིད་ཆེན་པོ་དེ་ནི་སྐྱེ་བོ་མང་པོའི་ཡིད་དུ་འོང་བ་ཡིན་པས་རྒྱལ་པོའི་ཁབ་ཀྱི་གྲོང་
ཁྱེར་ན་གནས་པའི་སྐྱེ་བོའི་ཚོགས་ཆེན་པོ་དེ་དང་བྲལ་བའི་སྡུག་བསྔལ་གྱིས་གདུངས་པས་ཆོ་ངེ་འདེབས་པ་ལ་ཞུགས་པའི་ཕྱིར། རྒྱལ་པོའི་ཁབ་ཀྱི་གྲོང་ཁྱེར་ཤིན་ཏུ་འཁྲུགས་པར་ཤེས་ཤིང་དེ་དང་བྲལ་བའི་སྡུག་བསྔལ་གྱིས་གདུངས་བས་གཡོ་བར་གྱུར་ཏོ། །དེད་དཔོན་ཉི་མའི་ཁྱིམ་ནས་བུ་མོ་གཅིག་ལམ་པོ་ཆེ་དེར་སོང་བ་དང༌། དེས་ཇི་ལྟར་གྱུར་བ་དེ་ཐོས་པ་དང༌། དེ་བྲང་བརྡུངས་སྨྲེ་སྔགས་འདོན་ཏེ། རིངས་པ་རིངས་པར་ཁྱིམ་དུ་སོང་ནས་གཞོན་ནུ་གསེར་མདོག་གི་མ་གང་ན་བ་ངེར་སོང་སྟེ་ཕྱིན་པ་དང༌། དེའི་མདུན་དུ་བདག་ཉིད་འགྱེལ་ཏོ། །དེ་ནས་གཞོན་ནུ་གསེར་མདོག་གི་མས་རྟབས་བག་གིས་དྲིས་པ། བུ་མོ་ཅི་ཞིག་ཡིན་སྨྲོས་ཤིག །དེ་གསང་མཐོན་པོས་ཆོ་ངེས་འདེབས་ཤིང་རྗེའི་སྲས་གཞོན་ནུ་གསེར་མདོག་གིས་སྐྱེད་མོས་ཚལ་དུ་བུ་མོ་ཀ་ཤི་མཛེས་དགའ་མོ་བསད་ཅེས་གྲག་གོ་ཞེས་ཟེར་ནས་མ་བརྟགས་པར་རྒྱབ་ལག་བཅིང་བ་དམ་པོས་བཅིང་ནས་གསོད་པའི་ཕྱིར་ཡོངས་སུ་སྤངས་ཏེ། གསོད་མ་པ་རྣམས་ཀྱིས་ཡོངས་སུ་བསྐོར་ནས་ལམ་པོ་ཆེ་དང༌། ཚོང་འདུས་དང༌། བཞི་མདོ་དང༌། སུམ་མདོ་རྣམས་སུ་བསྒྲགས་པའི་སྒོར་བསྒྲགས་ཏེ། དུར་ཁྲོད་ཆེན་པོར་ཁྱེར་ནས་འདི་ཡུན་རིང་པོ་མི་ཐོགས་པར་གསོད་པར་བྱེད་དོ། །དེ་ཐོས་པ་དང་གཞོན་ནུ་གསེར་མདོག་གི་མ་མྱ་ངན་གྲག་པོས་ནོན་ཏེ། བརྒྱལ་ནས་ས་ལ་འགྱེལ་ཏོ། །དེ་ནས་ཆུ་གཏོར་བས་སླར་དབུགས་ཕྱུང་སྟེ་བསླང་བ་དང༌། ཀྱི་ཧུད་ཀྱི་ཧུད་བུ་ཞེས་ཆོ་ངེས་འདེབས་ལ། སྐྲ་འབལ་ཞིང་བྲང་བརྡུངས་ཏེ། འདར་བཞིན་དུ་ཡང་དང་ཡང་དྲན་པ་སྟོར་བར་གྱུར་པ་དང་གྲོང་ཁྱེར་ནས་བྱུང་སྟེ། ལམ་པོ་ཆེར་ཞུགས་པ་དང༌། དེ་བུ་དང་བྲལ་བའི་སྡུག་བསྔལ་གྱིས་གདུངས་པས་ཡིད་རྨོངས་པ་དང༌། སྨྲེ་སྔགས་འདོན་ཅིང་རེ་རེ་ནས་དྲིས་པ། ལམ་གང་ནས་གཞོན་ནུ་གསེར་མདོག་ཁྱེར་བར་གྱུར། ཀྱི་ཧུད་བུ་སྡུག་མ་མཐོང་གིས་སྐྱོབས་ཤིག །སྐྱོབས་ཤིག །བུ་སྡུག་ང་ལ་སྟོན་ཅིག་ཅེས་ཟེར་ཞིང་དུ་བཞིན་དུ་ལམ་པོ་ཆེའི་དབུས་སུ་ཆས་པ་དང༌། ཇི་ལྟ་ཇི་ལྟར་དེད་དཔོན་གྱི་ཆུང་མས་གཞོན་ནུ་གསེར་མདོག་མ་མཐོང་བ་དེ་ལྟ་དེ་ལྟར་
སྡུག་བསྔལ་མི་བཟད་པའི་སྡུག་བསྔལ་གྱིས་གདུངས་ཏེ་ཆོ་ངེས་འདེབས་ཤིང་རེ་རེའི་རྐང་པ་ལ་གཏུགས་ནས་ཐལ་མོ་སྦྱར་ཏེ། གསོལ་བ་འདེབས་པ་བདག་གི་སྐྱབས་མཛོད་ཅིག །བདག་གི་སྐྱབས་མཛོད་ཅིག །ཇི་སྲིད་གཞོན་ནུ་ལམ་འདི་ནས་འདའ་བར་མ་གྱུར་གྱི་བར་དུ་མྱུར་དུ་སྐབས་དབྱེ་བར་མཛོད་ཅིག །ལམ་འདི་ནས་བདག་གི་བུ་གསེར་མདོག་ཁྱེར་བ་དེ་ཇི་ལྟར་མཐོང་བར་འགྱུར་བ་དེ་ལྟ་བུའི་དྲིན་གྱིས་བདག་ལ་བསྐྱབ་ཏུ་གསོལ། དེ་ཡང་དེ་ན་གོ་སྐབས་མ་ཕྱེད་པས་ཀྱི་ཧུད་བུ་རྙེད་པར་མ་གྱུར་ཅེས་ཟེར་ཞིང་ལུས་ཐམས་ཅད་བདག་ཉིད་ཀྱིས་ས་ལ་བརྡབས་ཏེ། དེ་ན་ཆུ་ནས་བཏོན་པའི་ཉ་བཞིན་དུས་ལ་འགྲེ་ལྡོག་པ་དང༌། བྱ་ཁྲུང་ཁྲུང་ཕྲུ་གུ་སྟོར་བ་ལྟར་སྙིང་རྗེ་རྗེ་སྐད་དུ་ངུ་བ་དང༌། བ་བེའུ་སྟོར་བ་འབུ་སྒྲ་འདོན་པ་བཞིན་སྨྲེ་སྔགས་འདོན་ཏེ། ཀྱི་ཧུད་བུ་སྡུག་ཅིང་ཡིད་དུ་འོང་བ། ཀྱི་ཧུད་བཟོད་པ། ཀྱི་ཧུད་རྗེས་སུ་མཐུན་པ། ཀྱི་ཧུད་ཡིད་ལ་རེ་བ་བརྒྱས་ཐོབ་པ། ཀྱི་ཧུད་གཟུགས་བཟང་བ། བལྟ་ན་སྡུག་པ་མཛེས་པ། ཀྱི་ཧུད་ཡན་ལག་ཐམས་ཅད་འབྱེས་པ་དང་ལྡན་པ། ཀྱི་ཧུད་གསེར་བཙོ་མའི་ཁ་དོག་ལྟ་བུ། མདོག་ཤིན་ཏུ་རྒྱས་པ་དང་ལྡན་པ། ཀྱི་ཧུད་སྐྱེ་བེ་ཐམས་ཅད་ཀྱི་མིག་དང་ཡིད་འཕྲོག་པ། ཀྱི་ཧུད་སྐྱེ་བོ་ཐམས་ཅད་ཀྱི་ཡིད་དུ་འོང་བ། ཀྱི་ཧུད་མི་ཀུན་དགའ་བར་བྱེད་པ། ཀྱི་ཧུད་མཁས་པ། དུལ་བ། རྣམ་པར་བྱང་བ། ཡིད་དུ་འོང་བའི་ཚིག་སྨྲ་བ། ཀྱི་ཧུད་སྙིང་རྗེ་ཅན་ཆོས་འདོད་པ། སེམས་ཅན་ལ་མཉེས་གཤིན་པ། ཀྱི་ཧུད་ངའི་རིགས་ཀྱི་སྒྲོན་མ། ཀྱི་ཧུད་ངའི་སྙིང་དུ་སྡུག་པ། ཀྱི་ཧུད་ངའི་སྙིང་ཐམས་ཅད་པ། ཀྱི་ཧུད་ངའི་གཅེས་པ་རྣམས་བསྡུས་པ། ཀྱི་ཧུད་ངའི་མིག་གི་བདུད་རྩི། ཀྱི་ཧུད་ངའི་སྡུག་པའི་འཆིང་བ། ཀྱི་ཧུད་ངའི་རིགས་ཀྱི་ཐམས་ཅད་པ། ཀྱི་ཧུད་ཇི་ལྟར་ན་མ་བརྟགས་པར་མགོན་མེད་པར་གསད་པའི་ཕྱིར་ཁྱེར་བར་གྱུར་ཅེས་སྨྲས་སོ། །སླར་ཡང་ཐལ་མོ་སྦྱར་ཏེ་གྲོང་ཁྱེར་བ་རྣམས་ལ་གསོལ་བ་འདེབས་ཤིང་ཡིད་དུ་འོང་བས་སྨྲས་པ། ཀྱི་ཧུད་དགའ་བྲལ་བཅོམ་བ་བདག །ང་ནི་ད་གོ་ཇི་ལྟར་གནས། །འདི་ནི་རྨིས་པ་འམ་ཡང་ན་མྱོས། །
འོན་ཏེ་སེམས་ནི་འཁྲུགས་གྱུར་ཏམ། །དགེ་བ་བུ་ཡི་མྱ་ངན་ནི། །དྲག་པོ་ཡིས་ནི་གཡེངས་བཞིན་དུ། །དེ་ནི་ཡང་ཡང་སྨྲེ་སྔགས་འདོན། །གྲོང་ཁྱེར་བ་ལ་གསོལ་བ་འདེབས། །མ་དུལ་པའམ་གཟུགས་ངན་པ། །བདག་གི་ཡིད་འོང་མ་ཡིན་པའི། །བདག་གི་བུ་ནི་ཁྱེར་གྱུར་ན། །ཁྱེད་རྣམས་བཏང་སྙོམས་བྱེད་ལ་རབ། །ཡོན་ཏན་ཅན་གྱི་ཕྱོགས་བྱེད་པ། །གལ་ཏེ་བརྩེ་བ་ཡོད་ཅེ་ན། །ཇི་ལྟར་ངས་ནི་བུ་མཐོང་བ། །དེ་ལྟར་གྲོང་ཁྱེར་པ་རྣམས་མཛོད། །དེང་བདག་གིས་ནི་ཙན་དན་སོགས། །བྱུག་པ་རྣམས་ཀྱིས་མ་བྱུགས་ཤིང༌། །གི་ཝང་ཐིག་ལེས་ཡན་ལག་ལ། །མང་དུ་བརྒྱན་པ་མ་བྱས་སོ། །གདུ་བུ་ལ་སོགས་རྒྱན་རྣམས་ཀྱིས། །བདག་གིས་དེང་དེ་མ་བརྒྱན་ཅིང༌། །ཕེབས་པས་ཡོངས་སུ་མ་འཁྱུད་ལ། །འོ་ཡང་མང་དུ་མ་བྱས་སོ། །ང་ལ་བསྐོར་བ་མ་བྱས་ཤིང༌། །འདི་ཡིས་ཕྱག་ཀྱང་མ་བྱས་ན། །ཚམ་ཚོམ་མེད་པར་འདི་ལྟ་བུར། །ང་ཡི་བུ་ནི་ཁྱེར་བར་བྱེད། །དེང་བདག་ཕྱོགས་ཀུན་སྟོང་པ་སྟེ། །བདག་གི་ལུས་འདི་འདར་བ་དང༌། །སྙིང་ཡང་སྲེག་པར་འགྱུར་བ་དང༌། །ཡིད་ནི་ཀུན་དུ་རྨོངས་པར་གྱུར། །བརྩེ་བ་མེད་པའི་གསོད་མ་པས། །རིངས་པ་རིངས་པར་ཁྱེར་གྱུར་པས། །སྙིང་དུ་སྡུག་པའི་བུ་འདི་ནི། །ཀྱི་ཧུད་ཀྱི་ཧུད་སླར་མི་མཐོང༌། །བུ་ཡི་མྱ་ངན་འདི་འདྲ་བས། །རྩྭ་བཞིན་སྙིང་ནི་སྲེག་གྱུར་པ། །བདག་གིས་སྡིག་པ་མི་བཟད་པ། །སྐྱེ་བ་གཞན་དུ་བྱས་པར་ངེས། །བདེན་པ་གང་གིས་བདག་གི་སེམས། །སྡིག་ཅན་དགྲ་ལའང་མ་བསྐྱེད་པའི། བདེན་པ་དེས་ནི་བདག་གི་བུ། །ཕངས་པ་འདི་ལས་ཐར་པར་ཤོག །ཅེས་སྨྲས་སོ། །དེད་དཔོན་ཉི་མ་ཡང་རྒྱ་མཚོ་ཆེན་པོ་ལས་གྲུ་ལེགས་པར་གྲུབ་ནས་རྒྱལ་པོའི་ཁབ་ཏུ་ཕྱིན་ཏེ། དེ་རྒྱལ་པོའི་ཁབ་ཀྱི་གྲོང་ཁྱེར་དུ་ཕྱིན་པ་ན་བཀྲ་མི་ཤིས་པའི་ལྟས་མཐོང་སྟེ། དེའི་སྙིང་འདར་བ་དང༌། །ཡན་ལག་རྡུལ་བ་དང༌། །མིག་འགུལ་བ་དང༌། བྱ་རྣམས་དེའི་མདུན་དུ་སྒྲ་དྲག་པོ་སྒྲོགས་པར་རྩོམ་པར་གྱུར་པ་དང༌། དེ་ལྟས་ལ་མཁས་ཤིང་བྱ་སྐད་ལ་མཁས་པས་སེམས་པ་ལ་ཞུགས་པར་གྱུར་ཏེ། འདི་ལྟ་བུའི་ལྟས་ངན་པ་ཀུན་དུ་མཐོང་བ་ལས་ན་གཞོན་ནུ་གསེར་མདོག་དེང་ངས་པར་
སྡུག་བསྔལ་ཆན་པོས་ཀྱང་གནས་པར་ཡང་ངེས་ལ། དེ་ཡང་མཚན་མ་འདི་དག་ནི་དེ་དང་བྲལ་བར་སྟོན་པ་ཡིན་ནོ། །ཡང་སྨྲས་པ། ཇི་ལྟར་བདག་མིག་འགུལ་པ་དང༌། །ཇི་ལྟར་བྱ་རྣམས་སྒྲ་སྒྲོགས་ནས། །ད་ནི་ངེས་པར་བུ་དང་དེང༌། །བྲལ་བར་ཉེ་བར་གནས་པ་ཡིན།། ཇི་ལྟར་ཡན་ལག་རྡུལ་བ་དང༌། །ང་ཡི་སྙིང་ནི་འདར་བ་ལས། །ངེས་པར་བུ་དང་བྲལ་བ་སྟེ། །མི་བཟད་པ་ནི་ཉེས་བར་གནས། །དེ་འདི་ལྟར་སྡུག་བསྔལ་བརྒྱ་སྟོང་སེམས་ཤིང་ལུས་དང་ཡན་ལག་རྡུལ་ལ་འདར་བས་གོམ་པ་འདོར་མི་ནུས་བཞིན་དུ་ཉམ་ཐག་པས་རྒྱལ་པོའི་ཁབ་ཏུ་ཞུགས་པ་དང༌། ཅི་སྲིད་ཅིག་ན་སྐྱེ་བོའི་ཚོགས་མང་པོ་ང་རོ་འདོན་པའི་སྒྲ་ཐོས་ཏེ། དེ་སྨྲེ་སྔགས་ཀྱི་སྒྲ་དེའི་རྗེས་སུ་འབྲངས་ནས་ལམ་པོ་ཆེར་ཞུགས་པ་དང༌། ཇི་སྲིད་ཅིག་ན་སྐྱེ་པོའི་ཚོགས་མང་པོའི་སྲིན་པོས་གཙེས་པ་བཞིན་དུ་གྲོང་ཁྱེར་ན་སྡུག་བསྔལ་གྱིས་གདུངས་ཤིང་ང་རོ་འདོན་པ་མཐོང་ནས་དེ་མདུན་ནས་འོངས་པའི་སྐྱེས་བུ་གཞན་ཞིག་ལ་དྲིས་པ། ཀྱེ་ནང་རྗེ་འདི་ཅི་ཞིག་ཡིན། དེས་ཀྱང་འདི་ནི་དེད་དཔོན་ཉི་མ་ཡིན་ནོ་སྙམ་དུ་མ་ཤེས་ནས་དེས་སྨྲས་པ། དེད་དཔོན་ཉི་མ་ཞེས་བྱ་བའི་བུ་གཞོན་ནུ་གསེར་མདོག་ཅེས་བྱ་བ་གཟུགས་ལ་སོགས་པ་ཡོན་ཏན་ཕུན་སུམ་ཚོགས་པ་དང་ལྡན་པ་ཞིག་ཡོད་པ་དེས། སྐྱེད་མོས་ཚལ་དུ་བུ་མོ་ཀ་ཤི་མཛེས་དགའ་མོ་བསད་ཅེས་གྲག་གོ་ཞེས་ནས་མ་བརྟགས་པར་གསད་པའི་ཕྱིར་ཡོངས་སུ་སྤངས་ཏེ། ལམ་པོ་ཆེ་དང༌། ཚོང་འདུས་དང༌། བཞི་མདོ་དང༌། སུམ་མདོར་བསྒྲགས་ནས་རིང་པོ་མི་ཐོགས་པ་དུར་ཁྲོད་ཆེན་པོར་ཁྱེར་ཏེ་གསོད་པར་འགྱུར་རོ། །དེ་ཐོས་པ་དང་དེད་དཔོན་ཉི་མ་བུ་དང་བྲལ་བའི་སྡུག་བསྔལ་གྱིས་གདུངས་བས་འཕྲལ་དུ་བརྒྱལ་ཏེ་ས་ལ་འགྱེལ་ཏོ། །དེ་ནས་ཆུ་གཏོར་བས་སླར་དབུགས་ཕྱུང་བ་དང༌། མཆི་མའི་ཆུ་རླབས་ཀྱིས་གདོང་གི་པདྨ་ཁེབས་བཞིན་དུ་ཀུན་དུ་འཁོར་ལ་ད་ལྟ་བཞིན་དུ་ཀྱི་ཧུད་ལམ་གང་ནས་གཞོན་ནུ་གསེར་མདོག་ཁྱེར་བར་གྱུར་ཅེས་ཟེར་ཞིང་ལམ་པོ་ཆེའི་དབུས་སུ་རིངས་པ་རིངས་པར་སོང་བ་དང༌། ཇི་སྲིད་ཅིག་ན་ཆུང་མ་སྐྲ་གྲོལ་བ། །ལག་པ་གཉིས་ཀྱིས་བྲང་བརྡུང་བ། །ཉམ་ཐག་པའི་ང་
རོ་དང༌། དེ་དང་དེའི་སྨྲེ་སྔགས་འདོན་པ་དང༌། བུ་དང་བྲལ་བ་ལས་བྱུང་བའི་སྡུག་བསྔལ་མི་བཟད་པ། རྩུབ་པ། ཚ་བ། ཡིད་དུ་མི་འོང་བའི་ཚོར་བ་ཉམས་སུ་མྱོང་བར་མཐོང་ནས་དེ་ཡང་དྲག་ཅིང་ཉམ་ཐག་པས་སྐད་མཛེར་ཞིང་བརྣངས་བཞིན་དུ་མཆི་མས་མིག་ཁེངས་པ་དང༌། དེའི་གན་དུ་སོང་ངོ༌། །ཆུང་མས་དེ་མཐོང་བ་དང་ཉིས་འགྱུར་བས་ལྷག་པའི་སྡུག་བསྔལ་གྱི་ཟུག་རྔུས་གཟིར་ཏེ། མཆི་མའི་ཆུ་རླབས་ཀྱིས་བཞིན་གྱི་པདྨ་ཁེབས་ཤིང་རྟབས་བག་ཏུ་རིངས་པ་རིངས་པར་ལངས་ཏེ། དེའི་མདུན་དུ་བདག་ཉིད་འགྱེལ་བར་གྱུར་ཏོ། །དེ་ནས་དེད་དཔོན་ཉི་མས་ཉམ་ཐག་པའི་སྐད་ཀྱི་ང་རོས་སྨྲ་ཞིང་འཁྱུད་ནས་བསླང་བ་དང༌། དེ་དེའི་རྐང་པ་གཉིས་ལ་གཏུགས་ཏེ་སྨྲས་པ། དེད་དཔོན་སྐྱབས་མཛོད་ཅིག་སྐྱབས་མཛོད་ཅིག །ང་ལ་བུའི་སློང་སྩོལ་ཅིག །ཡང་སྨྲས་པ། སྐལ་བ་ངན་ཅིང་དགའ་བྲལ་བ། །ད་ལྟར་དབུགས་ནི་དབྱུང་དུ་གསོལ། །བུ་དང་བྲལ་བར་གྱུར་བ་ཡི། །སྡུག་བསྔལ་དྲག་པོས་རྣམ་པར་དུ། །གང་ཞིག་སྐྱེས་ཚེ་བདག་པོ་ཁྱེད། །མཆོག་ཏུ་དགྱེས་པར་གྱུར་པ་ཡི། །ཡིད་དུ་འོང་བའི་བུ་དེ་ཉིད། །དེད་ནི་གསོད་ཕྱིར་ཁྱེར་བར་གྱུར། །དུལ་ཞིང་དེས་ལ་མཁས་པ་དང༌། །བསྟན་བཅོས་ཀུན་ལ་མཁས་གྱུར་ཅིང༌། །གང་ཞིག་གཟུགས་ནི་མཉམ་མེད་པ། །མཁས་པར་གྱུར་བའི་བུ་ཁྱེར་རོ། །ཁྱེད་ཀྱི་རིགས་རྒྱུད་ཆད་གྱུར་ཅིང༌། །རིགས་ཀྱི་མཚམས་སྦྱོར་འཛིན་པ་དང༌། །དཔལ་ལྡན་རིགས་ནི་གསལ་བྱེད་པའི། །ཁྱེད་ཀྱི་སྒྲོན་མ་མེད་པར་གྱུར། །འདི་ནི་སྙིང་གི་ཐམས་ཅད་དེ། །འདི་ནི་དགའ་བའི་འཆིང་བ་ཡིན། །མི་རྣམས་མིག་གི་བདུད་རྩི་འདི། །གཤེད་མ་རྣམས་ཀྱིས་ཁྱེར་བར་གྱུར། །འདི་དག་ཐམས་ཅད་བཅིངས་པ་དང༌། །མིག་ནི་འདི་དག་འགག་པ་སྟེ། །བུ་ཞེས་བཏགས་པའི་སྙིང་གང་ཡིན། །འདི་ནི་བཏོན་ཏེ་ཁྱེར་བར་གྱུར། །བུ་འདི་རབ་ཏུ་ཐར་བའི་ཕྱིར། །འབད་པ་དེ་ནི་མྱུར་དུ་མཛོད། །ནོར་ནི་ཐམས་ཅད་བྱིན་ནས་སུ། །བདག་དང་བུ་ནི་ཐར་བར་མཛོད། །ཁྱོད་ཀྱིས་ལེགས་རྟོགས་འབྱོར་པ་དང༌། །ཁྱེད་ཡིད་བསམ་པ་འགྲུབ་ནས་ནི། །འདི་ལྟར་ཡང་ནི་འཚེ་བ་ཡི། །ཁྱེད་ཀྱི་བུ་ནི་
བལྟ་བར་བགྱི། །དེ་ནས་དེད་དཔོན་ཉི་མ་བུ་དང་བྲལ་བའི་སྡུག་བསྔལ་གྱིས་ཡིད་གདུངས་པར་གྱུར་ཀྱང་བརྟན་པས་སྲན་ཚུགས་པའི་སེམས་དང་ལྡན་པས་ཐལ་མོ་སྦྱར་ཏེ་གྲོང་ཁྱེར་པ་རྣམས་ལ་སྨྲས་པ། ཀྱེ་ཀྱེ་གྲོང་ཁྱེར་བ་རྣམས་ཉོན་ཅིག །ཅི་ལྟར་ན་ང་ལ་འདི་ལྟ་བུའི་སྡུག་བསྔལ་ཉེ་བར་གནས་པ་ལ་ཁྱེད་རྣམས་བཏང་སྙོམས་སུ་བྱེད་པ་ནི་རིགས་པ་མ་ཡིན་ཏེ། ཅིའི་ཕྱིར་འབྲོག་སྟོང་པ་བཞིན་དུ་གྲོང་ཁྱེར་གྱི་དབུས་སུ་མ་བརྟགས་པར་ཁྱེད་རྣམས་ཀྱིས་མཐོང་བཞིན་དུ་ངའི་གཞོན་ནུ་ཡོན་ཏན་གསལ་བར་སྟོན་པ་ལྟ་བུ་གསོད་པའི་ཕྱིར་ཁྱེར་ན། ཅིའི་ཕྱིར་སེམས་ལས་ཆུང་བས་གནས། །ཅིའི་ཕྱིར་ཉེ་བར་དཔྱད་པའི་ཐབས་མི་སེམས། ཅིའི་ཕྱིར་གཞོན་ནུ་ཐར་པའི་དོན་དུ་བརྩོན་པར་མི་བྱེད། དེ་རྣམས་ཀྱིས་སྨྲས་པ། དེད་དཔོན་འདི་ལྟ་བུའི་གཞོན་ནུ་ཡོན་ཏན་དང་ལྡན་པ་འདི་ནི་ཁྱེད་གཅིག་པུ་ལ་འདི་ལྟར་སྡུག་བསྔལ་བར་མ་ཟད་ཀྱི། གཞན་དུ་ན་བདག་ཅག་ཐམས་ཅད་ཀྱང་སྡུག་བསྔལ་མོད་ཀྱི། འོན་ཀྱང་གཞོན་ནུ་འདི་ཐར་བར་བྱ་བའི་ཐབས་མ་མཐོང་ནས། གང་འདི་ལྟ་བུའི་ཡི་མུག་པས་གནས་པ་ཡིན་ནོ། །དེད་དཔོན་ཉི་མས་སྨྲས་པ། ཤེས་ལྡན་དག་ཁྱེད་རྣམས་ཀྱིས་ཡོངས་སུ་ཤེས་པ་ཉིད་དེ། གཞོན་ནུ་འདི་ཇི་ལྟ་བུ་ཤིན་ཏུ་སྙིང་རྗེ་བ་དང་ལྡན་པ། བདག་ཉིད་ཆེ་བ། ཆོས་འདོད་པ། སེམས་ཅན་ཐམས་ཅད་ལ་མཉེན་གཤིན་པ་ཡིན་ཏེ། འདིས་འདི་ལྟ་བུ་བྱ་བ་མ་ཡིན་པ་ལ་འཇུག་པ་སེམས་ཀྱིས་ཀྱང་མི་ནུས་ན། ཀུན་དུ་སྤྱོད་པར་བྱེད་པ་ལྟ་སྨོས་ཀྱང་ཅི་དགོས། དེ་བས་ན་གཞོན་ནུ་དེ་སླར་དཔྱད་པའི་དོན་ལ་འབད་པས་རྩོམ་པར་གྱིས་ཤིག །གལ་ཏེ་གཞོན་ནུ་ལེགས་པར་དཔྱད་ན་ངེས་པར་སྡུག་བསྔལ་འདི་ལས་ཐར་བར་འགྱུར་རོ། །ཁྱེད་རྣམས་ཀྱང་དམ་པ་སྐྱེ་བོ་ཐམས་ཅད་ལ་ཐུན་མོང་དུ་གྱུར་པ་ཡིན་པས་ཁྱེད་རྣམས་ཀྱིས་དེ་གསོལ་བ་ལ་ཉེས་པར་ནི་གང་ཡང་མ་མཐོང་སྟེ། གཞན་དུ་ན་བདག་ལ་རྗེས་སུ་བརྩེ་བ་ཁོ་ནར་སྣང་བ་དང༌། དམ་པ་ཉིད་ཀྱིས་ན་ཡོན་ཏན་ལ་རྗེས་སུ་དགའ་བ་ཉིད་སྟོན་པར་འགྱུར་གྱི། དེ་བས་ན་གང་སྙིང་རྗེའི་སེམས་ཉེ་བར་འཇོག་པས་སོང་ལ་རྒྱལ་པོའམ་བློན་པོ་ལ་ཞུས་ཤིག །གལ་ཏེ་དེ་དོན་ལ་སྲེད་པ་ཤིན་ཏུ་རིགས་པ་དང་ལྡན་པ་ཁྱེད་རྣམས་ཀྱི་ཚིག་ཀྱང་གཞན་
དུ་མི་འགྱུར་རོ། །བདག་ཀྱང་བུ་དང་བྲལ་བས་ཤིན་ཏུ་གདུངས་ཀྱིས་བདག་གི་ནོར་འདི་ཐམས་ཅད་ཀྱང་ཕུལ་ལ། །ཇི་ལྟར་གཞོན་ནུ་ལེགས་པར་དཔྱད་པ་དེ་ལྟར་མཛོད་ཅིག །དེད་དཔོན་དེ་ནི་ཀུན་གྱིས་ཤེས་པ་དང༌། མཛའ་བོར་བྱས་པ་ཡོད་པ་དེ་རྣམས་ཀྱིས་དེའི་ཚིག་དང༌། གཞོན་ནུ་ཡོན་ཏན་ལ་དགའ་བས་ཁས་བླངས་སོ། །དེ་ནས་གྲོང་ཁྱེར་པ་དེ་རྣམས་ཀྱིས་ཐ་སྙད་ལ་ཤིན་ཏུ་བྱང་བའི་གྲོང་ཁྱེར་བ་ཞིག་རྒྱལ་པོའི་ཕོ་བྲང་དུ་བཏང་སྟེ་བསྒོ་བ། གལ་ཏེ་དེང་གཞོན་ནུ་ཤིན་ཏུ་ལེགས་པར་དཔྱད་པ་མཛད་ན་བདག་ཅག་རྣམས་ཀྱིས་ཀྱང་རྒྱལ་པོ་ལ་གསེར་སྲང་འབུམ་དབུལ་ལོ། །དེ་ནས་ཐ་སྙད་ལ་བྱང་བའི་གྲོང་ཁྱེར་བ་ཞལ་ཆེའི་གནས་སུ་སོང་བ་དང༌། བློན་པོ་རབ་གཏུམ་གྱིས་འོང་བ་རིང་པོ་ནས་མཐོང་སྟེ་སྨྲས་པ། ཤེས་ལྡན་དག་ཁྱེད་འདིར་འོངས་པའི་དགོས་པ་ཅི་ཡོད། དེས་སྨྲས་པ། རྒྱལ་པོའི་ཁབ་ན་གནས་པའི་གྲོང་ཁྱེར་པ་རྣམས་འདི་སྐད་དུ་ཞུ་བ་གསོལ་ཏོ། །གཞོན་ནུ་གསེར་མདོག་འདི་ནི་ཤིན་ཏུ་གཟུགས་ཕུན་སུམ་ཚོགས་པ་རྒྱ་ཆེན་པོ་དང་ལྡན་པ། སྐྱེ་བོ་མང་པོའི་ཡིད་དུ་འོང་བ་ལགས་པ་ལས་དེ་དང་བྲལ་བ་རྒྱལ་པོའི་ཁབ་ན་གནས་པའི་སྐྱེ་བོ་ཚོགས་ཤས་ཆེར་སྡུག་བསྔལ་བར་གྱུར་པ་དང༌། འདི་ནི་རྟག་ཏུ་ཆོས་ལ་མངོན་པར་དགའ་བའི་ཕྱིར་དང༌། དུལ་བ་ལ་སོགས་པའི་ཡོན་ཏན་དང་ལྡན་པས་སྡིག་པའི་ཉེས་པ་གང་ལ་ཡིད་མངོན་པར་དགའ་བ་མ་ལགས་ཏེ། ད་བདག་ཅག་རྣམས་གསེར་སྲང་འབུམ་འབུལ་ལ། དེད་དཔོན་ཉི་མའི་ནོར་ཐམས་ཅད་ཀྱང་འབུལ་བར་བདག་ཅག་རྩོལ་གྱིས་གཞོན་ནུ་གསེར་མདོག་སླར་བཟློག་པ་ལ་ཤིན་ཏུ་ལེགས་པར་དཔྱད་ནས་སྦྱར་དུ་གསོལ། དེ་ལྟར་མཛད་ན་ནི་བདག་ཅག་རྣམས་ཀྱིས་གསོལ་བ་ཡང་འབྲས་བུ་དང་བཅས་པར་འགྱུར་ལ། རྒྱལ་པོའི་བང་མཛོད་ཀྱང་འཕེལ་བར་འགྱུར་རོ། །བློན་པོ་རབ་གཏུམ་གྱིས་ཐོས་ནས་ཁྲོས་ཏེ་སྨྲས་པ། ཤེས་ལྡན་འདི་ཅི་ཞིག་མ་བརྟགས་པ་ཡོད་ནས་གང་ལ་སླར་དཔྱད་པར་བྱ། རྒྱལ་པོའི་བང་མཛོད་རྒྱས་པར་འགྱུར་རོ་ཞེས་གང་ཞིག་སྨྲ་ན། དེ་ཡང་ཅི་དེད་ཀྱི་རིགས་པ་དང་མི་ལྡན་པར་བསགས་པའི་ནོར་གྱིས་རྒྱལ་པོའི་བང་མཛོད་འཕེལ་བར་བྱའམ། ཁྱེད་རྣམས་
ཀྱིས་རྒྱལ་པོའི་དགོངས་པ་ཡང་མི་ཤེས་ཏེ། གང་འདི་ལྟར་ཐབས་འདི་ལྟ་བུས་རྣམ་པ་ཐམས་ཅད་དུ་ཡངས་པ་ཅན་གྱི་གྲོང་ཁྱེར་གྱི་མི་རྣམས་ཀྱིས་ཐབས་ཀྱི་སྦྱོར་བས་ངེས་པར་རྒྱལ་པོ་ལ་གནོད་པ་ཆེན་པོ་བྱེད་པར་འདོད་པ་ཡིན་ཏེ། འདི་ལྟར་མ་བརྟགས་པར་སྐྱེ་བོ་རྣམས་ལོག་པར་བྱེད་པས་རྒྱལ་པོ་ནི་མི་རིགས་པར་བྱེད་པ་ཉིད་ཡིན་ནོ་ཞེས་རྒྱལ་པོའི་གྲགས་པ་མ་ཡིན་པ་སྒྲོགས་པར་འདོད་པ་ཡིན་ནོ་སྨྲས་ཏེ། དེས་དེ་ཚར་བཅད་དོ། །ཚར་གཅད་ནས་ག་ཤིན་རྗེའི་སྐྱེས་བུ་དང་འདྲ་བའི་མི་ཤིན་ཏུ་ཡང་དྲག་པོའི་ལས་ཅན་རྟག་ཏུ་གོམས་པའི་དབང་གིས་རྒྱུད་སྙིང་རྗེ་མེད་པར་བྱས་པ་བརྩེ་བ་མེད་པ་བཞི་ཞིག་ཡོད་དེ། དེ་རྣམས་བོས་ནས་སྨྲས་པ། མྱུར་བར་སོང་ལ་གསོད་མ་པ་རྣམས་བསྐུལ་ཞིང་ངའི་ཚིག་ཀྱང་འདི་སྐད་དུ་འདི་གྲོང་ཁྱེར་ནས་མྱུར་དུ་ཐོན་ལ་ཇི་ལྟར་བསྒོ་བའི་ལས་ཀྱིས་སོད་ཅིག །ཁྱེད་རྣམས་ཀྱིས་ངའམ་རྒྱལ་པོའི་ལུང་མ་གཏོགས་པ་གཞན་གང་གི་ཚིག་ཀྱང་མ་བཏང་ཅིག །དེ་ལྟར་བྱས་ན་ལེགས་ཀྱི་གཞན་དུ་བྱས་ནངས་ཁྱེད་རྣམས་ཆད་པ་ཆེན་པོས་གཅད་བར་བྱའོ་སྨྲོས་ཤིག །དེས་ཀྱང་རྒྱལ་པོ་དེ་ལྟར་བགྱིའོ་ཞེས་སྨྲས་ཏེ། རྒྱལ་པོའི་སྐྱེས་བུ་དེ་དག་དེའི་ཚིག་མཉན་ནས་ལག་ཏུ་རལ་གྲི་ཐོགས་ཏེ་ཆས་སོ། །གསོད་མ་པ་དེ་རྣམས་ཀྱང་ཕྱི་ཤོལ་གྱི་ཐབས་བརྒྱ་སྙེད་བྱེད་ཅིང་དལ་བུས་དལ་བུས་གཞོན་ནུ་གསེར་མདོག་ལམ་པོ་ཆེ་དང༌། ཚོང་འདུས་དང༌། བཞི་མདོ་དང༌། སུམ་མདོ་རྣམས་སུ་སྒྲ་སྒྲོགས་ཤིང་ཡོངས་སུ་བསྐོར་ཏེ། ཀྱེ་མ་ཀྱི་ཧུད་གཞོན་ནུ་ནི་གཏོང་བར་སུ་ཞིག་བྱེད་པར་འགྱུར། བདག་ཅག་ཀྱང་འདེ་ལྟ་བུའི་བྱ་བ་མ་ཡིན་པ་མི་བྱེད་པ་སུ་ཞིག་སྒྲུབ་པར་འགྱུར་ཞེས་སྨྲས་སོ། །རྒྱལ་པོའི་སྐྱེས་བུ་དེ་དག་ཀྱང་རལ་གྲི་ཕྱུང་བ་ལག་ན་ཐོགས་ཏེ་ཕྱིན་ནས་དེས་གསོད་མ་པ་དེ་རྣམས་ལ་དེས་ཇི་ལྟར་བསྒོ་བ་དེ་ལྟར་སྨྲས་སོ། །འདི་སྐད་ཅེས་ཀྱང་སྨྲས་ཏེ། གལ་ཏེ་འདི་མྱུར་བར་གྲོང་ཁྱེར་ལས་བཏོན་ཏེ། ཇི་ལྟར་བསྒོ་བ་བཞིན་དུ་མ་བསད་ན་ངེད་ཀྱིས་ཁྱེད་ཅག་འཕྲལ་དུགས་ད་པར་བྱའོ། །དེ་རྣམས་ཀྱིས་ཤིན་ཏུ་ཡང་སྡུག་ཅིང་ར་ལ་གྲི་ཕྱུང་བ་ལག་ན་ཐོགས་པ་ག་ཤིན་རྗེའི་སྐྱེས་བུ་དང་མཚུངས་པ་དེ་ལ་བལྟས་ནས་ཀུན་དུ་སྐྲག་པར་གྱུར་ཏོ། །དེ་ནས་འཆི་བས་འཇིགས་
སྐྲག་པས་སེམས་པ་ལ་ཞུགས་ཏེ། ཀྱི་ཧུད་སུས་ཀྱང་གཞོན་ནུའི་སྐྱབས་མ་བྱས་པ་ནི་སྡུག་བསྔལ་ལོ། །བདག་ཅག་རྣམས་ཀྱང་འདིས་འཕྲལ་དུ་གསོད་པར་འགྱུར་རོ་སྙམ་ནས་མཆིམས་ཁེངས་པའི་མིག་དང༌། རྒྱལ་པོའི་སྐྱེས་བུ་དེ་རྣམས་ཀྱིས་སྲུང་བཞིན་དུ་གཞོན་ནུ་གསེར་མདོག་གྲོང་ཁྱེར་ནས་ཕྱུང་བར་བརྩམས་པ་དང༌། དེ་གྲོང་ཁྱེར་ལས་འབྱིན་པར་འགྱུར་བ་ལ་བལྟས་ནས་སྲོག་ཆགས་བརྒྱ་སྟོང་དཔག་ཏུ་མེད་པ་སྒྲ་གཅིག་ཏུ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་དེད་དཔོན་ཉི་མ་ཐམས་ཅད་དང་བྲལ་བར་གྱུར་པ་ནི་སྡུག་བསྔལ་ལ། །དེད་དཔོན་ཉི་མ་འདིའི་ཕ་མའི་རིགས་ཆད་པར་གྱུར་ཏོ། །དེད་དཔོན་ཉི་མ་འདིའི་རིགས་ཀྱི་སྒྲོན་མ་ནུབ་པར་གྱུར་ཏོ། །དེད་དཔོན་ཉི་མ་འདིའི་རིགས་རྣམས་ཀྱི་ཀུན་དུ་དགའ་བ་ནུབ་པར་གྱུར་ཏོ། །དེད་དཔོན་ཉི་མ་འདིའི་རིགས་ཀྱི་གཙུག་གི་ནོར་ཕྲོགས་སོ། །དེད་དཔོན་ཉི་མ་འདིའི་མིག་ཕྲོགས་པར་གྱུར་ཏོ། །དེད་དཔོན་ཉི་མ་འདིའི་རིགས་ཀྱི་རྒྱན་ཕྲོགས་པར་གྱུར་ཏོ། །དེད་དཔོན་ཉི་མ་འདིའི་སྙིང་ཕྱུང་ངོ༌། །དེད་དཔོན་ཉི་མ་འདིའི་སྲོག་ལུས་དང་ལྡན་བཞིན་དུ་ཕྲོགས་སོ། །ཀྱི་ཧུད་འདི་འབྲོག་སྟོང་པར་འཁྱམས་པ་བཞིན་དུ་ཡོངས་སུ་བསྐོར་ནས་ཕྱུང་བ་ལས་སུས་ཀྱང་སྐྱབས་མ་བྱས་པར་སྡུག་བསྔལ་ལོ། །ད་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་ཟླ་བ་འདི་འཆི་བདག་གི་སྒྲ་གཅན་གྱིས་གཟུང་ངོ༌། །རྒྱལ་པོའི་ཁབ་ཀྱི་གྲོང་ཁྱེར་གྱི་ཉི་མ་འདི་ནམ་མཁའི་དཀྱིལ་དུ་ནུབ་བོ། །རྒྱལ་པོའི་ཁབ་ཀྱི་གྲོང་ཁྱེར་ན་གནས་པའི་མིག་གི་བདུད་རྩི་འདི་མཐོང་བའི་ལམ་ན་མི་གནས་པར་གྱུར་ཏོ། །རྒྱལ་བོའི་ཁབ་ཀྱི་གྲོང་ཁྱེར་བ་རྣམས་ཀྱི་དགའ་བའི་རྒྱུན་འདི་མི་སྣང་བར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་གྱི་རྒྱན་འདི་ཕྲོགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་བ་རྣམས་ཀྱི་གཙུག་གི་ནོར་བུ་འདི་ཕྲོགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་ན་གནས་པའི་གྲོང་ཁྱེར་བ་རྣམས་ཀྱི་ཡིད་དུ་འོང་བ་ཕྲོགས་ཏེ་ཁྱེར་ན་རྒྱལ་པོའི་ཁབ་ཀྱི་གྲོང་ཁྱེར་ན་གནས་པའི་མི་རྣམས་སུ་ཞིག་ལ་མིག་མི་འཛུམས་པར་ལྟ་བར་བྱེད། ད་ནི་གང་ཞིག་མཐོང་ན་ཡིད་དགའ་བར་བྱེད་ཅེས་ཡི་ཆད་པར་གྱུར་ཏོ། །བློན་པོ་རབ་གཏུམ་གྱིས་སྐྱེས་བུ་
གཞན་ཞིག་སླར་ལོག་ནས་གཞོན་ནུ་གསེར་མདོག་གྲོང་ཁྱེར་ནས་ཕྱུང་ངོ་ཞེས་སྨྲས་པ་དང༌། དེ་ཐོས་ནས་ཡིད་ཤིན་ཏུ་དགའ་བར་གྱུར་ཏོ། །དེ་ནས་གྲོང་ཁྱེར་པ་རྣམས་ཀྱི་ཕོ་ཉ་དེས་དེ་ཐོས་ནས་རེ་ཐག་ཆད་པར་གྱུར་ཏོ། །དེ་སོང་ནས་གྲོང་ཁྱེར་བ་དེ་རྣམས་ལ་རྣམ་པ་དེ་དག་རྒྱ་ཆེར་སྨྲས་སོ། །དེ་ཐོས་པ་དང་གྲོང་ཁྱེར་པ་རྣམས་ཀྱང་རེ་ཐག་བཅད་ཅིང་ཤིན་ཏུ་ཡི་མུག་པས་ཕན་ཚུན་སྨྲ་བ། ཤེས་ལྡན་དག་རྩོད་པའི་རྒྱལ་པོ་འདིས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་དེ་ལྟ་བུ་བསད་ནས་ད་ནི་འདི་ལྟ་བུའི་ཡོན་ཏན་དང་ལྡན་པར་གྲགས་པ། སྐྱེ་བོ་མང་པོའི་ཡིད་དུ་འོང་བ་ཁྱད་པར་ཅན་གྱི་སྐྱེས་བུ་ཉེས་པ་མེད་པ་གནོད་པ་མི་བྱེད་པ་འདི་ལྟ་བུ་གསོད་པ་ནི། ཨེ་མའོ་སྙིང་རྗེ་མེད་པ། ཨེ་མའོ་ཡོན་ཏན་མི་ཤེས་པ། ཨེ་མའོ་ཁྱད་པར་མི་ཤེས་པའོ། །བློན་པོ་རྣམས་ཀྱང་གང་འདི་ལྟ་བུའི་གཟུགས་ཕུན་སུམ་ཚོགས་པ་རྒྱ་ཆེན་པོ་དང་ལྡན་པ་ནི་མཆོད་པར་འོས་པ་ཡིན་ན། འདི་ལྟ་བུའི་ཡོན་ཏན་དང་ལྡན་པའི་སྐྱེས་བུ་ཁྱད་པར་ཅན་ཅིའི་ཕྱིར་མ་བརྟགས་པར་གསོད་ཅིང་ཡོངས་སུ་སྤོང་བར་བྱེད། ཡང་ན་དུས་འདི་ལྟ་བུ་ཉེ་བར་གནས་པ་ཡིན་ཏེ། གང་དམ་པ་མ་ཡིན་པ་རྣམས་ནི་འཕེལ་བར་འགྱུར་ལ། ཡོན་ཏན་འདི་ལྟ་བུ་དང་ལྡན་པའི་སྐྱེ་པོ་དང་བྲལ་བར་འགྱུར་བ་དུས་འགྲིབས་པའི་ཉེས་པའི་བདག་ཉིད་བྱུང་བ་ཡིན་ནོ། །དེད་དཔོན་ཉི་མ་ལ་རྣམ་པ་འདི་དག་རྒྱ་ཆེར་སྨྲས་པ་དང༌། དེ་ཐོས་ནས་དེད་དཔོན་ཉི་མ་རེ་ཐག་ཆད་པར་གྱུར་ཏེ། མྱ་ངན་དྲག་པོའི་སྡུག་བསྔལ་གྱིས་གདུངས་ནས་བརྒྱལ་ཏེ་སལ་འགྱེལ་བར་གྱུར་ཏོ། །དེ་ནས་ཆུ་གཏོར་པས་སླར་དབུགས་དབྱུང་བ་དང༌། ཡི་མུག་པའི་ཡིད་ཀྱིས་ཀུན་དུ་དགའ་བ་དང་བྲལ་བ་སུ་ཞིག་ད་ལྟར་ངའི་བུ་གསོད་པར་བྱེད་ཅེས་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད། མིག་ནི་དགའ་བར་བྱེད་པ་ཡི། །ང་ཡི་རིགས་ཀྱི་རྒྱུན་གྱུར་པ། །སྐལ་ལྡན་ཕ་ནི་ང་ལྟ་བུ། །སྨྲེ་ས་མེད་པར་གསོད་པར་བྱེད། །ང་ཡི་ཡིད་ནི་རྨོངས་པ་དང༌། །ཕྱོགས་རྣམས་ད་ནི་འཁྲུལ་པར་བྱེད། །ཁྱོད་བྲལ་མྱ་ངན་མེས་གདུངས་པས། །ཀྱེ་མ་བདག་ཉིད་ཚིག་པར་གྱུར། །ཀྱི་ཧུད་མཁས་ཤིང་ཤིན་ཏུ་དུལ། །
སྙིང་རྗེ་ལ་ནི་དགའ་གྱུར་བ། །བུ་ཁྱོད་ལ་ནི་སྡུག་བསྔལ་དག །མི་བཟད་ཇི་ལྟར་འོངས་པར་གྱུར། །བུ་ཁྱོད་འོངས་པར་གྱུར་པའི་ཚེ། །དགའ་བ་མཉམ་མེད་ངས་ཐོབ་པ། །བུ་བཟང་ཁྱོད་དང་བྲལ་བའི་ས། །སླར་ཡང་མྱ་ངན་མེད་ལྟུང་འགྱུར། །བརྩེ་མེད་ཁྱད་པར་མི་ཤེས་པའི། །ཨེ་མ་རྒྱལ་པོའི་བློན་པོ་དག །གང་ཞིག་འདི་འདྲ་ཁྲིམས་ལྡན་པས། །བུ་ཁྱོད་རྣམ་པར་མ་བརྟགས་སོ། །ཨེ་མའོ་ས་བདག་དེ་ཡིས་ནི། །གང་གིས་འདི་ལྟར་དེ་མ་བརྟགས། །བུ་ཁྱོད་ཡོངས་སུ་སྤངས་གྱུར་པ། །རང་གི་བརྩེ་མེད་གསལ་སྒྲོགས་ཡིན། །ཁྱད་པར་དུ་ཡང་དམ་པ་ངན། །སེམས་ནི་ངེས་པར་ནུབ་པ་སྟེ། །བུ་གང་ཡོན་ཏན་ལྡན་པ་ཡང༌། །སྨྲེ་ས་མེད་པར་གསོད་པར་བྱེད། །ཡོན་ཏན་ལྡན་མི་འདི་འདྲ་བ། །གསོད་ཀྱང་བཏང་སྙོམས་བྱེད་པ་ནི། །གྲོང་ཁྱེར་གྱི་ནི་ལྷ་ཐམས་ཅད། །དེ་དག་བྲོས་པར་གྱུར་ཏམ་ཅི། །དབང་བཅས་འཇིག་རྟེན་སྐྱོང་བཅས་དང༌། །གང་ཡང་མཐུ་ཆེན་ལྡན་པའི་ལྷའི། །ཐུགས་བརྩེ་པས་ནི་ཉེར་བཟུང་སྟེ། །དེ་རྣམས་བདག་གི་བུ་སྲུངས་ཤིག །བརྟུལ་ཞུགས་གྲུབ་པའི་བདག་ཉིད་ཆེ། །ཐུབ་པ་གང་ཞིག་ད་ལྟར་བཞུགས། །དེས་ནི་ཐུགས་བརྩེ་སྔོན་བཞག་སྟེ། །བདག་གི་བུ་ནི་བསྲུང་དུ་གསོལ། །ཡང་དེའི་བློ་སྐྱེས་པ་ཅིའི་ཕྱིར་བདག་བློ་ཞུམ་པར་བྱེད། གང་བཅོམ་ལྡན་འདས་འགྲོ་བ་ཐམས་ཅད་ཀྱི་གཉེན་གཅིག་བུ་ཐུགས་རྗེ་དང་ལྡན་པ་དེ་རྗེས་སུ་དྲན་པར་བྱའོ། །བཅོམ་ལྡན་འདས་དེ་ཡང་མགོན་མེད་པ་རྣམས་ཀྱི་མགོན། སྐྱབས་མེད་པ་རྣམས་ཀྱི་སྐྱབས། །སྐྱོབ་པ་མེད་པ་རྣམས་ཀྱི་སྐྱོབ་པ། དཔུང་གཉེན་མེད་པ་རྣམས་ཀྱི་དཔུང་གཉེན་ཡིན་ལ། དེ་བཞིན་དུ་བཅོམ་ལྡན་འདས་དེས་ཉམ་ཐག་པར་ཞུགས་པའི་སེམས་ཅན་མང་པོ་འཇིགས་པ་ཆེན་པོ་དེ་དང་དེ་ལས་ཐར་པར་མཛད་དེ། དེ་ཡང་ཚོང་པ་རྒྱ་མཚོའི་དབུས་སུ་ཆུད་པ་ཆུ་སྲིན་དང་ཉའི་འཇིགས་པས་སྐྲག་པ་རྣམས་ལ་དེ་རྗེས་སུ་དྲན་པ་ཙམ་གྱིས་འཇིགས་པ་ཆེན་པོ་དེ་ལས་ཡོངས་སུ་སྐྱོབ་པར་མཛད་པ་དང༌། དེ་བཞིན་དུ་སོར་ཕྲེང་གིས་དྲག་ཅིང་གཏུམ་བས་མཚོན་ཆ་ཕྱར་ཏེ་སྐྱེས་བུ་དུ་མ་བསད་ལ་དེའི་མ་སྲོག་དང་དབྲལ་བར་འདོད་བ་ལས་འཇིགས་པ་དེ་ལས་
སྐྱོབ་པར་མཛད་པ་དང༌། དེ་བཞིན་དུ་སྔོན་གྱི་སྐྱེ་པོའི་ཤ་ཁོན་དང་རྗེས་སུ་འབྲེལ་བའི་སྟོབས་ཀྱིས་སྲོག་ཆགས་བརྒྱ་སྟོང་དུ་མ་གསོད་ཅིང་ཁྲོ་བའི་མེ་ཤིན་ཏུ་འབར་བ། མིའི་ཤ་དང་རྐང་ལ་ཆགས་པས་ལྡག་པ་ན་ལྕེ་ལས་ཁ་ཆུའི་ཐིགས་པ་འཛག་ཅིང༌། མཆེ་བ་རིང་ཞིང་རྣོ་བ་གཙིགས་པས་འཇིགས་སུ་རུང་བའི་གནོད་སྦྱིན་ལ་ཟས་ཀྱི་ཕྱིར་དེའི་ཁའི་གན་དུ་ཕྱག་བཞག་སྟེ། འབྲོག་གནས་ལས་སེམས་ཅན་འཆི་བས་འཇིགས་པ་ལས་ཡོངས་སུ་སྐྱོབ་པར་མཛད་པ་ཡིན་པས་ན་བཅོམ་ལྡན་འདས་དེ་ནི་བདག་གི་བུ་ཡང་ཉམ་ང་བ་ཆེན་པོ་འདི་ལས་ཡོངས་སུ་ཐར་པར་མཛད་པར་སྤྱོད་ཅིག །གང་འདི་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་མཆོག་ཏུ་མ་ཉེས་གཤིན་པའི་རང་བཞིན་ཅན་དེ་བདག་གིས་རྗེས་སུ་དྲན་པར་བྱའོ་སྙམ་ནས་གན་ན་གནས་པའི་དགེ་བསྙེན་ཞིག་ལ་བཅོམ་ལྡན་འདས་དེ་ལྟ་གང་ན་བཞུགས་ཞེས་དྲིས་པ་དང༌། དགེ་བསྙེན་དེ་བཅོམ་ལྡན་འདས་རྗེས་སུ་དྲན་ནས། མཆི་མ་འཛག་ཅིང་སྐད་འཛེར་བཞིན་དུ་སྨྲས་པ། དེད་དཔོན། གང་ཞིག་འཇིག་རྟེན་དེད་དཔོན་འགྱུར། །གང་ཞིག་འཇིག་རྟེན་བདེ་སྩོལ་བ། །འཇིག་རྟེན་ཀུན་གྱི་གཉེན་གཅིག་པུ། །སྟོན་པ་ཆེ་དེ་མྱ་ངན་འདས། །གང་ཞིག་སྒྲོན་མེད་རྣམས་ཀྱི་སྒྲོན། །གང་ཞིག་སྐྱབས་དང་དཔུང་གཉེན་གྱུར། །རྒྱལ་བ་སྣུམ་ཟད་མར་མེ་བཞིན། །འཇིག་རྟེན་སྒྲོན་མ་མྱ་ངན་འདས། །དེ་སྐད་ཐོས་པ་དང༌། དེད་དཔོན་ཉི་མ་བཅོམ་ལྡན་འདས་དང་བྲལ་བས་ཉིས་འགྱུར་གྱི་མྱ་ངན་གྱི་ཟུག་རྔུས་ཟུག་སྟེ་ས་ལ་འགྱེལ་ཏོ། །དེ་ནས་ཆུ་གཏོར་བ་དང་དབུགས་སླར་རྙེད་དེ་སློང་བ་དང༌། ཕྱོགས་གང་དུ་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེར་ཕྱོགས་ཏེ་གསང་མཐོན་པོས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཆོས་རྒྱལ་ཐམས་ཅད་མཁྱེན། །ཉེས་པའི་དགྲ་ཚོགས་འདུལ་མཛད་པ། །མགོན་མེད་འགྲོ་བ་སྤངས་ནས་ནི། །འཇིག་རྟེན་མགོན་པོ་ཅི་ཕྱིར་གཤེགས། །ཀྱི་ཧུད་མཛད་པར་གྲགས་གྱུར་གཙོ། །སེམས་ཅན་ཀུན་གྱི་གཉེན་གཅིག་པུ། །སྦྱོར་བ་ཀུན་ལས་ཡང་དག་འདས། །མྱ་ངན་འདས་ལམ་སྟོན་པ་པོ། །ཀྱི་ཧུད་ཀྱེ་མ་འཇིག་རྟེན་འདི། །མ་རིག་པས་ནི་མིག་ཁེབས་པ། །མགོན་
པོ་ཁྱོད་དང་བྲལ་བས་ན། །འཁོར་བར་རྣམ་པར་འཁྱམས་པར་གྱུར། །དཔའ་བོ་གཞན་ལ་རྗེས་བརྩེ་བ། །ཁྱེད་ནི་མྱ་ངན་འདས་གཤེགས་པས། །འཇིག་རྟེན་འདི་ནི་མགོན་མེད་དེས། །མགོན་དུ་སུ་ཞིག་སྟེན་པར་གྱུར། །གང་ཞིག་ཁྱེད་ཆོས་ལས་བྱུང་བའི། །གདུལ་བྱ་རྒྱལ་བའི་སྲས་པོ་རྣམས། །དེ་ཀུན་ཁྱེད་དང་བྲལ་གྱུར་ན། །གནས་ནི་གང་ཞིག་བགྱིད་པར་གྱུར། །མང་པོའི་བསམ་པ་འབྲས་བཅས་མཛད། །སྡུག་བསྔལ་ངེས་པར་གདུལ་མཛད་ནས། །འགྲོ་བ་རེ་ཐག་གཅོད་མཛད་པ། །ཐུབ་ཁྱོད་ཕྱོགས་ནི་གང་དུ་བཞུད། །གང་ཕྱིར་ཁྱོད་གསུང་མཉན་པར་ནི། །དགའ་བས་གྲོང་ཁྱེར་མ་མཆིས་ན། །ད་ལྟར་ཁྱོད་ནི་མྱ་ངན་འདས། །དམ་ཆོས་སུ་ཞིག་རྗེས་སུ་སྟོན། །ཀྱི་ཧུད་སྣང་བྱེད་འཇིག་རྟེན་འདི། །མི་འམ་ཅི་ལྟར་བཅས་འཇིག་རྟེན། །མགོན་པོ་ཤིན་ཏུ་རྙེད་དཀའ་བའི། །ཐུབ་པ་ཁྱོད་དང་བྲལ་བས་བཅོམ། །སྲོག་ཆགས་ཆོས་ལ་ཡིད་དགའ་པའི། །བསྟན་ལ་དགའ་རྣམས་མགོན་པོ་ཁྱོད། །མྱ་ངན་འདས་པ་ཐོབ་གྱུར་ན། །དེ་དག་ཇི་ལྟར་བགྱིད་པར་འགྱུར། །ཐུགས་རྗེ་དང་གཅིག་དཔའ་བོ་ནི། །བརྩེར་ལྡན་ཁྱེད་ལ་བརྟེན་ནས་སུ། །གང་ཞིག་ཡོན་ཏན་ཐོབ་གྱུར་པ། །སླར་དེ་སུ་ཞིག་སྟོན་པར་བགྱིད། །ཅི་ཕྱིར་འཇིག་རྟེན་གསུམ་དོན་དུ། །ཐུགས་རྗེ་ཆེན་པོ་སྐྱེད་མཛད་པའི། །འཇིག་རྟེན་འདི་ཉིད་མཁྱེན་བརྩེར་ལྡན། །ཅི་ཕྱིར་བཏང་སྙོམས་ཁྱེད་བརྟེན་མཛད། །ཀྱི་ཧུད་ཡོན་ཏན་རིན་ཆེན་རྒྱས། །བསྐལ་པ་བྱེ་བར་བསྒྲུབས་པ་ནི། །འཆི་བདག་ས་འོག་གིས་ཟིན་ཏེ། །ཆོས་ཀྱི་གྲུ་ནི་འགྱེལ་བར་འགྱུར། །ཀྱི་ཧུད་མ་རིག་མདོངས་པ་གང༌། །བློ་དང་སྟོན་པ་པོ་བྲལ་བ། །འཇིག་རྟེན་སྐྱོང་བ་མགོན་པོ་རུ། །རབ་ཏུ་འཇིག་ཅིང་ངལ་བར་གྱུར། །ཀྱེ་མ་འཇིག་རྟེན་ཆེ་བ་ནི། །ཉམས་པ་ཉིད་དུ་ཉེ་གནས་ཏེ། །སངས་རྒྱས་རིན་ཆེན་ཆེན་པོ་དང༌། །འདི་ནི་ད་ལྟར་བྲལ་བར་གྱུར། །ཁྱུ་མཆོག་མེད་པའི་བ་ལང་བཞིན། །ཁྱེད་ཀྱི་དགེ་སློང་ཚོགས་རྣམས་སྟོང༌། །མཁས་པ་རྣམས་ནི་མཐོང་ན་སྙིང༌། །ཅི་ཡི་ཕྱིར་ན་གས་མ་གྱུར། །ལྷ་རྣམས་དད་པས་ཡན་ལག་གི །མཆོག་བཏུད་ནས་ནི་སྤྱི་བོ་ལ། །ཞབས་ཀྱི་རྡུལ་གྱི་མཆོག་གྱུར་པ། །གང་ཞིག་ཡང་ནི་འཇིག་པར་འགྱུར། །
སེམས་ཅན་ཀུན་ལ་མཉམ་མཉེས་པས། །རྟག་ཏུ་གནོད་པ་བྱེད་པ་དག །གང་ཡིན་པ་ལ་ད་རུང་ཁྱོད། །ཕྱོགས་ལྟུང་མཛད་པས་མ་མཐོང་ངོ༌། །ཡན་ལག་བརྒྱད་ལྡན་སྨན་གྱིས་ནི། །ཉོན་མོངས་ནད་གསོ་མཛད་པ་པོ། །སྟོན་པ་ཐུགས་རྗེ་ཆེར་ལྡན་པ། །སྨན་པའི་རྒྱལ་པོ་མེད་པར་གྱུར། །ཀྱི་ཧུད་བརྩེ་མེད་འཇིག་རྟེན་མགོན། །མྱ་ངན་འདས་པ་ཧ་ཅང་སྔས། །འཇིག་རྟེན་ལོང་བར་གྱུར་པ་ལ། །བླ་མེད་མིག་ནི་སྩོལ་བ་ཡིན། །ཁྱོད་ཀྱི་མྱ་ངན་འདས་ཀྱང་དེང༌། །སྡིག་པ་མེད་པའི་ནོར་ཆེན་བུ། །གསོད་པའི་དོན་དུ་འདིས་སྤངས་ན། །སུ་ཞིག་འཕྲལ་དུ་ཐར་བར་བགྱིད། །མགོན་མེད་རྣམས་ཀྱི་སྐྱོབ་པ་ཁྱོད། །བགྲོད་པ་མཆོག་ཏུ་གཤེགས་གྱུར་པ། །ཀྱི་ཧུད་གུ་ནི་འཚོ་བ་ཡི། །རེ་བ་ད་ནི་མ་མཆིས་སོ། །བདག་ཉིད་ཆེན་པོ་ཁྱོད་ཀྱིས་གང༌། །སྡུག་པ་ཀུན་དང་བྲལ་འགྱུར་ཞེས། །གསུང་གི་དམ་པ་བཀའ་སྩལ་ཏེ། །ལེགས་གསུང་ཡིན་པར་དེང་འཚལ་ཏོ། །དེ་དེ་ལྟར་རྣམ་པ་མང་པོར་སྨྲེ་སྔགས་འདོན་ཅིང་དགེ་བསྙེན་དེ་ལ་སྨྲས་པ། ཀྱེ་བཅོམ་ལྡན་འདས་དེའི་ཉན་ཐོས་ཆེན་པོ་འགའ་ཞིག་ལུས་པ་ཡོད་དམ། བཅོམ་ལྡན་འདས་ཀྱིས་བསྟན་བ་སུ་ལ་རྗེས་སུ་གཏད་ནས་མྱ་ངན་ལས་འདས་པར་མཛད། དེ་ནས་དགེ་བསྙེན་དེས་སྨྲས་པ། །དེད་དཔོན་བཅོམ་ལྡན་འདས་ཀྱིས་གནས་བརྟན་འོང་སྲུངས་ཆེན་པོ་ལ་ཡོངས་སུ་གཏད་ནས་མྱ་ངན་ལས་འདས་སོ། །གནས་བརྟན་འོད་སྲུངས་ཆེན་པོས་ཀྱང་བཅོམ་ལྡན་འདས་ཀྱི་བཀའ་ཉིད་ཀྱིས་གནས་བརྟན་ཀུན་དགའ་བོ་ལ་བསྟན་པ་རྗེས་སུ་གཏད་ནས་མྱ་ངན་ལས་འདས་སོ་ཞེས་ཐོས་ཏེ། ད་ལྟར་ནི་གནས་བརྟན་ཀུན་དགའ་བོ་བདག་ཉིད་ཆེ་བ། བསྟན་པ་གཅེས་པར་འཛིན་པ་ཡིན་ཏེ། དེ་ད་ལྟར་དེ་བཞིན་གཤེགས་པ་བཞིན་དུ་སྙིང་རྗེས་གྲོང་དང་གྲོང་ཁྱེར་དང༌། གྲོང་རྡལ་དང༌། ཚོང་འདུས་ལ་སོགས་པ་དེ་དང་དེར་སོང་ནས་སྡུག་པའི་སེམས་ཅན་རྣམས་རྗེས་སུ་འཛིན་པར་བྱེད་དོ། །དེ་བཞིན་དུ་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ནི་དགེ་བའི་རྩ་བ་སྐྱེད་པར་བྱེད་དོ། །དགེ་བའི་རྩ་བའི་རྒྱུན་ཡང་དག་པར་བསགས་པ་རྣམས་ནི་ཡོངས་སུ་སྨིན་པར་བྱེད་དོ། །དགེ་བའི་རྩ་བའི་རྒྱུད་ཡོངས་སུ་སྨིན་པ་རྣམས་ནི་རྣམ་པར་གྲོལ་
བར་བྱེད་དོ། །དེ་བཞིན་དུ་སྨན་པ་བཟང་པོ་བཞིན་དུ་ཉོན་མོངས་བའི་ནད་ཀྱིས་ཟི་ན་པའི་སེམས་ཅན་རྣམས་ནི་ཆོས་སྟོན་པའི་སྨན་གྱི་སྦྱིན་པས་གསོ་བར་བྱེད་དོ། །ཉི་མ་བཞིན་ཉོན་མོངས་པའི་མུན་པར་ཞུགས་པའི་སེམས་ཅན་རྣམས་ལ་ནི་དམ་པའི་ཆོས་སྟོན་པའི་འོད་ཟེར་གྱི་ཚོགས་ཀྱིས་ཉོན་མོངས་པའི་མུན་པ་སེལ་བར་བྱེད་དོ། །ཟླ་བ་བཞིན་དུ་ཚིག་གི་འོད་ཟེར་གྱི་ཚོགས་ཀྱིས་གདུལ་བྱའི་ཀུ་མུ་ཏའི་ཚལ་གྱི་ཁ་དབྱེ་བར་བྱེད་དོ། །འཁོར་ལོས་སྒྱུར་པའི་རྒྱལ་པོ་བཞིན་དུ་གདུལ་བྱ་ཁམས་ཀྱི་རྒྱལ་པོ་སྟོང་ཕྲག་དམ་པའི་ཆོས་སྟོན་པས་འདུལ་བར་བྱེད་དོ། །སེང་གེ་ལྟར་རང་གི་ཤེས་རབ་ཀྱི་སྤོབས་པའི་སྒྲས་མུ་སྟེགས་ངན་པའི་རི་དགས་ཀྱི་ཚོགས་དག་འབྱེར་བར་བྱེད་དོ། །ལམ་སྟོར་བ་དག་ཡང་དག་པར་སྟོན་པས་གདུལ་བྱའི་ཚོང་པ་རྣམས་སྒྲོལ་བར་བྱེད་དོ། །དེད་དཔོན་ལྟར་དམ་པའི་ཆོས་ཀྱི་ཟོང་ལ་འཇུག་པར་བྱེད་དོ། །སྤྲིན་ཆེན་པོ་ལྟར་དགེ་བའི་རྩ་བའི་ས་བོན་སྐྱེད་པར་བྱེད་དོ། །ཕ་དང་མ་ལྟར་ཕན་པ་དང་གནོད་པ་ཉེ་བར་སྟོན་པར་བྱེད་ཅིང་མ་དུལ་བའི་སེམས་ཅན་རྣམས་ནི་འདུལ་བར་བྱེད་དོ། །མ་གྲོལ་བ་རྣམས་ནི་གྲོལ་བར་བྱེད་དོ། །དབུགས་མ་ཕྱིན་པ་རྣམས་ནི་དབུགས་འབྱིན་པར་བྱེད་དོ། །ཡོངས་སུ་མྱ་ངན་ལས་མ་དས་པ་རྣམས་ནི་ཡོངས་སུ་མྱ་ངན་ལས་འདའ་བར་བྱེད་དོ། །དེ་བཞིན་དུ་ཉམ་ཐག་པ་ཆེན་པོས་ཉེན་པའི་སེམས་ཅན་རྣམས་ནི་འཇིག་པ་ཆེན་པོ་ལས་ཐར་བར་བྱེད་དོ། །མདོར་ན་བདག་ཉིད་ཆེ་ན་པོ་དེས་ནི་སངས་རྒྱས་ཀྱི་བྱ་བ་བྱེད་དོ། །དེ་ཉིད་རྗེས་སུ་སྦྲོན་ཅིག་དང༌། དེས་ནི་ཁྱེད་ཀྱི་བུ་ཉམ་ང་བ་འདི་ལས་ཐར་བར་བྱེད་པར་ནུས་སོ། །དེ་ཐོས་པ་དང་དེད་དཔོན་ཉི་མ་སྲོག་སྟོར་བ་ལས་སླར་རྙེད་པ་བཞིན་དུ་ཤིན་ཏུ་དགའ་སྟེ་རྟབས་བག་གིས་དྲིས་པ། འཕགས་པ་ཀུན་དགའ་བོ་དེད་ལྟ་གང་ན་བཞུགས། དེས་སྨྲས་པ། དེད་དཔོན་གནས་བརྟན་ཀུན་དགའ་བོ་ནི་ད་ལྟར་ཡངས་པ་ཅན་གྱི་ཨ་མྲ་སྐྱོང་བའི་ནགས་ན་བཞུགས་སོ་ཞེས་ཐོས་སོ། །དེ་ནས་དེད་དཔོན་ཉི་མ་དེ་མ་ཐག་ལངས་ཏེ་པུས་མོའི་ལྷ་ང་གཉིས་ས་ལ་བཙུགས་ནས་ཡངས་པ་ཅན་གང་ན་པ་དེར་བཏུད་ནས་བུ་དང་བྲལ་བའི་སྡུག་བསྔལ་གྱིས་ཉེན་ཅིང་མཆི་མའི་ཆུ་རླབས་ཀྱིས་གདོང་
གི་པདྨོ་ཁེབས་བཞིན་དུ་མཆི་མས་ཀུན་དུ་ཁྱབ་པ་དང་ལྡན་ཞིང་བསམ་པ་དྲག་པོས་གནས་བརྟན་ཀུན་དགའ་བོ་ལ་གསོལ་བ་འདེབས་པ་ལ་ཞུགས་པར་གྱུར་ཏོ། །གལ་ཏེ་ཁྱེད་ནི་སློབ་དཔོན་མཆོག །སེམས་ཅན་བསམ་མཁྱེན་མཆོག་ཡིན་ན། །བསམ་དང་བག་ལ་ཉལ་མཁྱེན་ཏོ། །གསོལ་བ་འདེབས་པ་འདི་གསོན་ཅིག །སངས་རྒྱས་བཅོམ་ལྡན་སློབ་མ་ནི། །རྫུ་འཕྲུལ་རྩེ་དང་མྱ་ངན་འདས། །དེ་ཡི་བསྟན་པ་འཕེལ་བྱེད་པའི། །ཁྱེད་གཅིག་པུ་ནི་ལུས་པར་གྱུར། །ཁྱོད་ནི་འགྲོ་བའི་དཔུང་གཉེན་དང༌། །ཁྱོད་ནི་དབུགས་ཕྱིན་གྱུར་པ་ཡིན། །རྟག་ཏུ་སེམས་ཅན་དོན་མཛད་པ། །ད་ལྟར་དགོངས་པ་གཟིར་བར་མཛོད། །མགོན་ཁྱོད་མ་ལུས་བསྲུང་བ་ནི། །འདི་འདྲ་དེ་རིང་བཞུགས་བཞིན་དུ། །སྨྲེ་ས་མེད་པར་བདག་གི་བུ། །ཅི་ཕྱིར་འདི་ལྟར་གསོད་པར་བྱེད། །གལ་ཏེ་འགྲོ་དོན་མི་མངའ་ན། །ཁྱེད་འདྲ་བ་ནི་བཞུགས་མི་འགྱུར། །འགྲོ་བ་དང་ལྡན་གསོད་བཞིན་དུ། །འདི་ལ་ཇི་ལྟར་བཏང་སྙོམས་མཛད། །འགྲོ་བའི་དོན་དུ་སྐུ་ལུས་ནི། །བརྟུལ་ཞུགས་བཟང་པོ་འཛིན་མཛད་པའི། །ཐུགས་རྗེ་དེ་མངོན་མཛད་ནས་ནི། །བདག་གི་བུ་ལ་དགོངས་སུ་གསོལ། །ལས་ཀྱི་སྒོ་ཀུན་བཅོམ་གྱུར་ཅིང༌། །སྐྱབས་མེད་དཔུང་གཉེན་མེད་པར་ནི། །མྱ་ངན་འདམ་ལ་ནུབ་པ་བདག །ཆུང་མར་བཅས་པ་གདོན་དུ་གསོལ། །ཤཱཀྱའི་སེང་གེས་ཁྱེད་ཉིད་ནི། །ད་ལྟར་གཙོ་བོར་བསྟན་མཛད་ན། །འགྲོ་ལ་ཕན་པ་གཞན་གང་ལ། །གཞན་གང་ལ་ནི་གསོལ་བ་བཏབ། །གཙོ་བོ་ཁྱོད་ནི་མ་གཏོགས་པ། །བུ་ཡི་སྐྱབས་གཞན་མ་མཆིས་པས། །དེ་བས་རིངས་པར་བྱོན་ནས་ནི། །བདག་གི་བུ་ནི་བསྐྱབ་ཏུ་གསོལ། །བུ་ཡི་མྱ་ངན་བཟོད་དཀའ་ལ། །རང་བཞིན་ངན་པའི་སྒྲས་ཟིན་པའི། །ཆུང་མར་བཅས་པ་དགའ་བྲལ་བ། །ཀུན་དགའ་དེང་ནི་དགའ་སྐྱེད་གསོལ། །དེ་ནས་བར་སྐབས་དེར་གནས་བརྟན་ཀུན་དགའ་བོ་སྙིང་རྗེས་གདུངས་བཞིན་དུ་ཉིན་ལན་གསུམ་མཚན་ལན་གསུམ་དུ་ཉན་ཐོས་ཀྱི་མིག་གིས་འཇིག་རྟེན་ལ་བལྟས་ཏེ། སུ་ནི་འགྲིབ། སུ་ནི་འཕེལ། སུ་ནི་གསོད་པར་གྱུར། སུ་ནི་ཉམ་ང་བར་གྱུར། སུ་ནི་སྡུག་བསྔལ་བར་གྱུར། །སུ་ནི་
ངན་སོང་ལ་གཞོལ། སུ་ནི་ངན་སོང་ལ་བབ། སུ་ནི་ངན་སོང་ལམ་ལས་བླན་ཏེ་མཐོ་རིས་དང་ཐར་པ་ལ་གཞག་པར་བྱ། སུ་ནི་འདོད་བའི་འདམ་དུ་བྱིང་བ་ལག་ནས་དྲང་བར་བྱ། སུ་ནི་འཕགས་པའི་ནོར་དང་བྲལ་བ་ལ་འཕགས་པའི་ནོར་གྱི་དབང་ཕྱུག་གི་བདག་པོ་ལ་རབ་ཏུ་གཞག་པར་བྱ་ཞེས་གནས་བརྟན་ཀུན་དགའ་བོས་གནས་བརྟ་ན་ཤཱ་རིའི་བུ་དང་མཉམ་པའི་མིག་གིས་བལྟས་ན། གཞོན་ནུ་གསེར་མདོག་དགེ་བའི་རྩ་བའི་ཚོགས་ཉེ་བར་བསགས་པ་ཉམ་ཐག་པ་ཆེན་པོས་ཉེན་པར་གྱུར་པར་མཐོང་ངོ༌། །མཐོང་ནས་ཀྱང་ཡང་དེ་ཉིད་ནས་གནས་གཞན་དུ་རྫུ་འཕྲུལ་གྱིས་གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་དེའི་མོད་ཁོ་ན་ལས་རྒྱལ་པོ་མ་སྐྱེས་དགྲ་ཁང་བཟངས་ཀྱི་སྟེང་གི་གཞི་ན་ཤིན་ཏུ་བག་མེད་པར་གནས་པ་ན། སེ་གོལ་གི་སྒྲས་གོ་བར་བྱས་ནས་སྒྲ་གསལ་བར་སྨྲས་པ། རྒྱལ་པོ་ཆེན་པོ་གང་གཞོན་ནུ་གསེར་མདོག་རང་ཉིད་ཀྱིས་རྣམ་པར་མ་དཔྱད་པ་ནི་ལེགས་པར་བྱས་པ་མ་ཡིན་ནོ། །དེ་ཡང་ད་ལྟ་གནོད་པ་མེད་ཅིང་ཉེས་པ་མ་བྱས་བཞིན་དུ་རྒྱལ་པོའི་ཁབ་ནས་ཕྱུང་སྟེ་དུར་ཁྲོད་ཆེན་པོར་ཁྱེར་ནས་གསོད་ཀྱིས་དེ་ལས་ཟློག་ཤིག །དེ་ནས་གནས་བརྟན་ཀུན་དགའ་བོའི་ཚིག་དེ་ཐོས་པ་དང༌། རྒྱལ་པོ་རྟབས་བག་ཏུ་རིངས་པར་གནས་བརྟན་ཀུན་དགའ་བོ་ཁང་བཟངས་ཀྱི་སྟེང་ན་འདུག་པ་ལ་ཕྱག་བྱས་ཏེ་ལངས་ནས་སྒྲ་ཆེན་པོར་ཕྱོགས་པ་ཞིར་བོས་པ། ཀྱེ་ཉོན་ཅིག་གང་དུར་ཁྲོད་ཆེན་པོར་རིངས་པ་རིངས་པར་སོང་ནས། །གཞོན་ནུ་གསེར་མདོག་གསོད་པར་བྱེད་པ་ལ་པའི་ཚིག་གིས་ཐར་པར་བྱེད་པ་དེ་ལངས་གསེར་གྱི་ཟམ་ཏོག་ཆེན་པོ་དང༌། ཡུལ་གྱི་མཆོག་ལྔ་སྦྱིན་ནོ། །རྒྱལ་པོའི་ཚིག་དེ་ཐོས་པ་དང༌། གཞོན་ནུ་དེ་ནི་སྐྱེ་བོ་མང་པོའི་ཡིད་དུ་འོང་བ་ཡིན་པས་སྲོག་ཆགས་བརྒྱ་སྟོང་དུ་མས་རིངས་པར་བརྒྱུགས་པར་གྱུར་ཏོ། །དེ་ནས་བར་སྐབས་དེར་གཤེད་མ་པ་རྣམས་རྒྱལ་པོའི་སྐྱེས་བུ་དེ་རྣམས་ཀྱིས་བསྲུངས་ནས་གཞོན་ནུ་གསེར་མདོག་ཁྱེར་ཏེ་དུར་ཁྲོད་ཆེན་པོར་ཕྱིན་ཏོ། །བུ་མོ་ཀ་ཤི་མཛེས་དགའ་མོ་ཡང་རང་གི་ཉེ་དུ་རྣམས་ཀྱིས་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོས་བརྒྱན་པ་བྱས་པའི་ཁྱོགས་
ལ་བཏེག་སྟེ་དུར་ཁྲོད་ཆེན་པོར་ཁྱེར་ནས་དེའི་གཉེན་རྣམས་ཀྱིས་དེ་ཕྱོགས་གཅིག་ཏུ་བཞག་སྟེ། ཤིང་བསྡུས་ནས་རོ་བསྲེགས་པའི་ཤིང་བརྩིག་པ་ལ་ཞུགས་ཏེ། གཤེད་མ་པ་དེ་རྣམས་ཀྱིས་སྨྲས་པ། ཁྱེད་རྣམས་ཀྱིས་རེ་ཞིག་འདིའི་རོ་བསྲེག་པའི་ཤིང་མ་བརྩིག་པར་ཅི་ཙམ་ན་ཁྱེད་ཀྱིས་ངེད་ཀྱི་གཞོན་ནུ་གསེར་མདོག་གསལ་ཤིང་ལ་སྐྱོན་ཏེ། བསད་ཀྱི་བར་དུ་ཡུད་ཙམ་ཞིག་སྡོད་ཅིག །དེ་ཅིའི་ཕྱིར་ཞེ་ན། གཞོན་ནུ་གསེར་མདོག་དེ་དང་བུ་མོ་ཀ་ཤི་མཛེས་དགའ་མོ་རོ་བསྲེག་ཤིང་གཅིག་ལ་བཞག་སྟེ་བསྲེག་པར་བྱའོ་ཞེས་སྨྲས་ནས། གསལ་ཤིང་ལ་བཙུགས་པར་གྱུར་ཏོ། །གཞོན་ནུ་གསེར་མདོག་གསལ་ཤིང་ས་ལ་བཙུགས་པ་བལྟས་ནས་མ་རྗེས་སུ་དྲན་ཏེ། སྡུག་བསྔལ་དྲག་པོས་རྒྱུད་ཞུ་བར་བྱས་པས་མཆི་མ་གློག་པ་ལ་ཞུགས་པར་གྱུར་ཏེ། དེ་ལྟར་མ་ང་དང་བྲལ་བར་ཐོས་པ་དང་གནས་སྐབས་ཅིར་གྱུར་ཞིག་གུ། གང་གི་ཚེ་ཐུན་དང་པོའི་མཚན་ཕྱེད་ལ་མ་མཐོང་ན་ཡང་ཤིན་ཏུ་གནོད་པ་དྲག་པོ་མྱོང་ན་དེས་དེང་བུ་གཅིག་པ་དང་བྲལ་ན་སྲོག་ཇི་ལྟར་འཛིན་པར་འགྱུར། ཀྱི་ཧུད་ང་ནི་འདི་ལྟ་བུའི་སྐལ་བ་ངན་པ་སྟེ། ང་སྐྱེས་པས་མ་ང་དང་བྲལ་བའི་སྡུག་བསྔལ་ཉམས་སུ་མྱོང་བར་གྱུར་ཏོ། །དེ་ནས་གཤེད་མ་པ་རྣམས་ཀྱིས་གསལ་ཤིང་དེ་ས་ལ་བཙུགས་ཏེ་ཕན་ཚུན་སྨྲ་བར་རྩོམ་པ། བདག་ཅག་ལས་སུ་ཞིག་གིས་གཞོན་ནུ་འདི་གསལ་ཤིང་ལ་བསྐྱོན་པར་བྱ། དེར་ཡང་རེ་རེ་ནས་སྒྱུ་བྱེད་པ་ལ་ཞུགས་ཏེ། ཁྱེད་རྣམས་ཀྱིས་སྐྱོན་ཅིག །ང་ནི་དེང་མགོ་བོའི་ནད་ཀྱིས་ཤིན་ཏུ་གཟིར་ཏོ། །དེ་བཞིན་དུང་ནི་རྒྱབ་ནས་གཟེར་རོ། །ང་ནི་མཆན་ཁུང་ནས་གཟེར་རོ་ཞེས་ཟེར་ཞིང་དེ་རྣམས་གང་ཡང་བྱ་བ་མ་ཡིན་པ་དེ་བྱེད་པར་སྤྲོ་བར་མ་གྱུར་ཏོ། །དེ་ནས་གཞོན་ནུ་གསེར་མདོག་གིས་དེ་རྣམས་ཕན་ཚུན་སྨྲ་བ་ཐོས་ནས་གསལ་ཤིང་ས་ལ་བཙུགས་པ་ལ་བལྟས་ཏེ། ཀྱི་ཧུད་ད་ནི་ངེས་པར་ང་མེད་པར་འགྱུར་རོ་ཞེས་འཁོར་བའི་ཉེས་པ་ལ་སྐྱོ་ཞིང་ཐར་པའི་ལམ་མངོན་པར་འདོད་པས་བདག་ཉིད་དགའ་བ་དང་བྲལ་བར་ཤེས་ནས་མཆོག་ཏུ་འཇིགས་པའི་མྱ་ངན་གྱིས་གཡོ་བའི་མིག་གིས་ལྟ་ཞིང་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་སྡུག་བསྔལ་ལོ། །ད་ནི་ངའི་ཤིན་ཏུ་
རྙེད་པར་དཀའ་བའི་དམ་པའི་ཆོས་ཀྱི་དགའ་སྟོན་རྙེད་ནས་དོན་གྱི་བྱ་བ་མ་བྱས་པ་ཉིད་ན་འཆི་བར་འགྱུར་རོ། །ཀྱི་ཧུད་ཡང་འཁོར་བར་འཁོར་བར་འགྱུར་རོ། །སླར་འཁོར་བའི་བཙོན་ར་ཆེན་པོར་གནས་པར་འགྱུར་རོ། །ཡང་འཁོར་བའི་འབྲོག་སྟོང་པར་ཡོངས་སུ་འཁྱམས་པར་འགྱུར་རོ། །ཡང་འཁོར་བའི་ཚང་ཚིང་ཆེན་པོར་ཞུགས་པར་འགྱུར་རོ། །ཡང་འཁོར་བའི་གཡང་ས་ཆེན་པོ་རབ་ཏུ་ལྟུང་བར་འགྱུར་རོ། །ཡང་འཁོར་བའི་འདམ་རྫབ་ཀྱི་ནང་དུ་གནས་པར་འགྱུར་རོ། །ཡང་བདག་ནི་ཡང་སོས་དང༌། ཐིག་ནག་དང༌། བསྡུས་འཇོམས་དང༌། ངུ་འབོད་དང༌། ངུ་འབོད་ཆེན་པོ་དང༌། ཚ་བ་དང༌། རབ་ཏུ་ཚ་བ་དང༌། མནར་མེད་པ་ལ་སོགས་པའི་དམྱལ་བ་རྣམས་སུ་སྐྱེ་བར་འགྱུར་རོ། །སླར་ཡང་བདག་གླང་པོ་ཆེ་དང༌། བ་ལང་དང༌། མ་ཧེ་དང༌། རི་བོང་དང༌། ཤ་ར་བཱ་དང༌། རི་དགས་རུ་རུ་དང༌། བྱི་ལ་སྟེ་སྣ་ཚོགས་པའི་སྐྱེ་གནས་སུ་སྐྱེ་བར་འགྱུར་རོ། །སླར་ཡང་རྟག་ཏུ་བཀྲེས་པ་དང༌། སྐོམ་པ་ལ་སོགས་པའི་སྡུག་བསྔལ་ཆེན་པོ་དང༌། སྡུག་བསྔལ་བ་དང༌། ཡིད་མི་བདེ་བས་ཉེན་པ་རྣམས་དང༌། བཟའ་བ་དང༌། བཏུང་བའི་སྒྲ་རྣམས་ཡང་མི་ཐོས་ཤིང་བཤང་བ་དང༌། གཅིན་དང༌། མཆིལ་མ་དང༌། ངར་སྣབས་ལ་སོགས་པ་ཟ་ཞིང་ཡི་དགས་ལྐོག་མའི་ལྦ་བ་ཅན་དུ་སྐྱེ་བར་འགྱུར་རོ། །དཔེར་ན་ཨུ་དུམ་བཱ་རའི་མེ་ཏོག་ནི་བརྒྱ་ལམ་ན་ལན་འགའ་འབྱུང་བ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་དུ་བརྒྱ་ལམ་ན་ལན་འགའ་འབྱུང་བར་འགྱུར་རོ་ཞེས་ཐོས་ཏེ། དེ་བཞིན་གཤེགས་པས་གསུངས་པའི་ཆོས་འདུལ་བ་འཇིག་རྟེན་དུ་སྟོན་པར་མཛད་པ་ཡང་འབྱུང་བར་དཀའ་བར་ཤེས་སོ། །དལ་འབྱོར་ནི་རྙེད་པར་དཀའོ། །མིར་སྐྱེས་བ་ནི་རྙེད་པར་དཀའོ། །འཕགས་པའི་ཡུལ་དུ་སྐྱེས་པ་དང༌། དབང་པོ་ཚང་བ་དང༌། གླེན་པ་མ་ཡིན་པ་དང༌། འོན་པ་མ་ཡིན་པ་དང༌། ལྐུགས་པ་མ་ཡིན་པ་དང༌། ལག་བརྡས་མི་སྨྲ་བ་དང༌། ལེགས་པར་བཤད་པ་དང༌། ཉེས་པར་བཤད་པའི་ཆོས་རྣམས་ཀྱི་དོན་བཤད་པ་རྙེད་པར་དཀའོ་ཞེས་
ཐོས་ལ། བདག་ཀྱང་སྐྱབས་དང་བྲལ་བས་དེང་ནི་མེད་པར་འགྱུར་ཏེ། མི་ཁོམ་པ་བརྒྱད་ལས་ཐར་པའི་མིར་སྐྱེས་བ་ཉིད་ཀྱང་ད་ནི་འབྲས་བུ་མེད་པར་འགྱུར་ན་དེ་ལ་ད་ཅི་ཞིག་བྱ། ཅི་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པའི་སངས་རྒྱས་བཞུགས་པ་ནི་གང་ཞིག་རྗེས་སུ་དྲན་པས་ང་གནས་སྐབས་འདི་ལྟ་བུ་མགོན་མེད་པ། སྐྱབས་མེད་པ། སྐྱོབ་པ་མེད་པ། དཔུང་གཉེན་མེད་པ། སྣང་བ་མེད་པ། ཤིན་ཏུ་ཉམ་ཐག་པའི་སྡུག་བསྔལ་གྱིས་ཉེན་པར་གྱུར་པ་ལ་ཐུགས་རྗེ་ཆེན་པོའི་དབང་གིས་བྱོན་ནས་ཡོངས་སུ་སྐྱོབ་པར་མཛད་པར་གྱུར་པ་ཞིག་ན། བཅོམ་ལྡན་འདས་དེ་ཡང་ངའི་སྐ་ལ་བ་ངན་པའི་ཉེས་པས་མྱུར་བ་མྱུར་བར་ཡོངས་སུ་མྱ་ངན་ལས་འདས་པས་དེ་ལ་ད་སུ་ཞིག་གནས་སྐབས་འདིར་རྗེས་སུ་དྲན་པར་བྱ། སུ་ཞིག་ང་ལ་དེ་བཞིན་གཤེགས་པ་བཞིན་དུ་ཐུགས་རྗེ་ཆེན་པོས་བྱོན་ནས་ཡོངས་སུ་སྐྱོབ་པར་བྱེད་པར་འགྱུར་ཞེས་རེ་ཐག་ཆད་དེ་དཔྱོད་འདར་བ་ལ་ཞུགས་པ་དང༌། དེ་ལ་ཡང་བློ་སྐྱེས་པ། གནས་བརྟན་ཀུན་དགའ་བོ་ཞེས་བྱ་བ་བདག་ཉིད་ཆེན་པོ་བཞུགས་ཀྱིས་དེ་རྗེས་སུ་དྲན་པར་བྱ་སྟེ། བདག་ཉིད་ཆེན་པོ་དེ་ལ་སེམས་ཅན་ཐམས་ཅད་ལ་ཕན་པར་སེམས་པ་ལ་རྩེ་གཅིག་པའི་རྒྱུད་ཆེན་པོ་དང་ལྡན་པ་བཅོམ་ལྡན་འདས་དེ་དང་གནས་བརྟན་འོད་སྲུངས་ཆེན་པོས་བསྟན་པ་མ་ལུས་པར་རྗེས་སུ་གཏད་པ་ཡིན་ཏེ། དེས་ད་ལྟར་སེམས་ཅན་ཐམས་ཅད་ལ་ཕན་པ་མཛད་པ། དེ་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་པར་ཐོས་ཏེ། གནས་བརྟན་ཀུན་དགའ་བོས་ནི་ཕོངས་པ་འདི་ལས་བདག་ཡོངས་སུ་སྐྱོབ་པར་སྤྱོད་ཅིག །དེ་ཉིད་རྗེས་སུ་དྲན་པར་བྱའོ་སྙམ་དུ་བསམས་ནས་མཆི་མས་མིག་ཁེབས་ཤིང་འཁོར་བའི་འཇིགས་པས་སྐྱོ་ལ་མཆོག་ཏུ་ཡིད་བྱུང་བར་གྱུར་པའི་བསམ་པ་དྲག་པོས་གནས་བརྟན་ཀུན་དགའ་བོ་སྤྱན་དྲང་བ་ལ་ཞུགས་སོ། །འཁོར་བའི་འཇིགས་པས་སྐྲག་གྱུར་པ། །དགའ་དང་བྲལ་པར་གནས་པ་དག །གནས་བརྟན་ཀུན་དགའ་བོ་ལ་ཞུས། །བདག་ལ་ཁྱོད་གསན་མཛད་པའི་རིགས། །ཀུན་མཁྱེན་ཐུགས་རྗེའི་བདག་ཉིད་ཅན། །དེ་ནི་མྱ་ངན་འདས་གྱུར་ལ། །བདག་ཉིད་ཆེན་པོ་འོད་སྲུངས་ལ། །འགྲོ་བའི་དོན་གྱི་
ཁུར་གཏད་དོ། །གནས་བརྟན་འོད་སྲུངས་ཆེན་པོས་ནི། །དོན་བྱས་མྱ་ངན་འདས་ནས་ནི། །འགྲོ་བའི་དོན་ནི་འབྱོར་བའི་ཕྱིར། །ཁྱེད་ཉིད་ལ་ནི་ཁུར་ཡང་གཏད། །འཇིག་རྟེན་གཉེན་འགྱུར་རྫོགས་སངས་རྒྱས། །འགྲོ་བ་ཀུན་ལ་ཕན་བརྩོན་དང༌། །གྲགས་ལྡན་འོད་སྲུངས་ཆེན་པོ་ཡང༌། ད་ལྟར་མྱ་ངན་འདས་པར་གྱུར། །ཁྱེད་ནི་མགོན་མེད་རྣམས་ཀྱི་མགོན། །འཇིགས་པ་རྣམས་ལ་མི་འཇིགས་སྩོལ། །ངལ་བ་རྣམས་ཀྱི་བསྟི་ས་དང༌། །སྐྱབས་དོན་གཉེར་བ་རྣམས་ཀྱི་སྐྱབས། །སྟོན་པའི་བྱ་བ་ཁྱེད་མཛད་པས། །ཁྱེད་ཉིད་འཇིག་རྟེན་གཉེན་གཅིག་པུ། །སངས་རྒྱས་སློབ་མ་རྣམས་ཀྱི་མཆོག །ཁྱེད་ནི་བསྟན་པ་གཅེས་མཛད་པ། །གལ་ཏེ་སྡུག་བསྔལ་ས་འོག་ལས། །དེང་བདག་གདོན་པར་མ་མཛད་ན། །ཁྱེད་ལས་གཞན་པའི་མགོན་པོ་ནི། །ད་ལྟར་མེད་པས་བདག་བཅོམ་ལགས། །སྐྱེས་ནས་ངེས་པར་འཆི་བས་ན། །འཆི་བས་བདག་སྐྲག་མ་ལགས་ཀྱིས། །ཇི་ལྟར་འཁོར་བའི་བཙོན་ར་ལས། །འབྱིན་པར་མཛད་པ་ཁྱེད་ཀྱིས་མཁྱེན། །དེ་བཞིན་མི་ཁོམ་བརྒྱད་སྤངས་པའི། །དལ་བ་ཐོབ་པ་རྙེད་དཀའ་བ། །དོན་མ་བྱས་པས་འཆི་འགྱུར་བས། །དེས་བདག་ཤས་ཆེར་སྡུག་བསྔལ་གྱུར། །སངས་རྒྱས་ཐམས་ཅད་གཟིགས་པ་ནི། །འབྱུང་བ་ངེས་པར་རྙེད་དཀའ་བས། །ཁྱེད་གཤེགས་ནས་ནི་ཇི་ལྟར་བདག །འབྲས་མེད་མི་འགྱུར་དེ་ལྟར་མཛོད། །ཁྱེད་ནི་ཐུགས་རྗེ་མི་གཡོ་བ། །སྲོག་ཆགས་ཀུན་ལ་མངལ་གྱུར་པ། །ཐར་པའི་ལས་ནི་མངོན་འདོད་པའི། །བདག་ལ་བཏང་སྙོམས་མི་མཛད་རིགས། །གལ་ཏེ་ཁྱེད་ནི་གཙོ་ཅན་ཏེ། །སེམས་ཅན་ཀུན་གྱི་དོན་བརྩོན་ན། །ཤིན་ཏུ་ཉམ་ངར་ཞུགས་གྱུར་པ། །བདག་ལ་གཟིགས་པར་མཛད་དུ་གསོལ། །དེ་ལྟར་སྐྱོབ་པ་མེད་པ་ལ། །ལྷ་ཡི་སྤྱན་གྱིས་གཟིགས་ནས་ནི། །ཁྱེད་དེང་མྱུར་དུ་གཤེགས་ནས་སུ། །བདག་ལ་སྐྱབས་པར་མཛད་པའི་རིགས། །དེ་ནས་བར་སྐབས་དེར་གནས་བརྟན་ཀུན་དགའ་བོ་བདག་ཉིད་ཆེ་བ། འགྲོ་བ་མ་ལུས་པའི་དོན་ཡོངས་སུ་རྫོགས་པར་བྱ་བའི་ཕྱིར་ངེས་པར་ཞུགས་པ། སྙིང་རྗེ་དང་ལྡན་པ་དེས་དེ་བཞིན་
དུ་སེམས་ཅན་མཐའ་ཡས་པའི་སྤྱོད་པ་ལ་ལྟ་ཞིང་ཕན་པར་སེམས་པའི་རྒྱུད་དང་ལྡན་པའི་མཆོག་ཏུ་ཉོན་མོངས་པ་དང་ལྡན་པའི་ལྷའི་མིག་གིས་གཞོན་ནུ་གསེར་མདོག་གནས་སྐབས་འདི་ལྟ་བུར་འདུག་པ་མཐོང་ནས། སེམས་ཀྱི་འཇུག་པ་སྙིང་རྗེས་ཡང་དག་པར་བསྐུལ་བས་ལྷའི་སྣང་བས་སའི་དཀྱིལ་འཁོར་རྣམས་སྣང་བར་བྱས་ནས་དགྲ་བཅོམ་པ་ལྔ་བརྒྱས་ཡོངས་སུ་བསྐོར་ཏེ། འཕྲལ་དུ་རྫུ་འཕྲུལ་གྱིས་ནམ་མཁའི་གཞི་ལ་འཕགས་ཏེ་འཚམས་ཀྱི་སྤྲིན་གྱིས་གཡོགས་པ་བཞིན་དུ་ནམ་མཁའི་ངོས་ཀུན་དུ་བཀང་སྟེ། སའི་དཔལ་གྱི་ཚོགས་བཞིན་དུ་དཔལ་གྱིས་ལུས་འབར་བར་གྱུར་ཅིང་དུར་ཁྲོད་དུ་མངོན་པར་བལྟས་ཏེ་ཡང་དག་པར་ཆས་པ་དང༌། རྒྱལ་པོ་མ་སྐྱེས་དགྲ་ཁང་བཟངས་ཀྱི་སྟེང་ན་འདུག་པས་གནས་བརྟན་ཀུན་དགའ་བོ་དགེ་སློང་གི་དགེ་འདུན་ཆེན་པོ་དང་ལྷན་ཅིག་ཟླ་བ་ཁམ་པ་ལྟ་བུར་ཉེ་བར་བསྐོར་ཏེ། རྫུ་འཕྲུལ་གྱིས་ནམ་མཁའ་ལ་འཕགས་ནས་མཚམས་ཀྱི་སྤྲིན་བཞིན་དུ་ནམ་མཁའི་ངོས་བརྒྱན་ཏེ། དུར་ཁྲོད་ཆེན་པོར་མངོན་པར་ཕྱོགས་ནས་འགྲོ་བར་མཐོང་ངོ༌། །དེ་མཐོང་བ་དང་ཡང་དེ་འདི་སྙམ་དུ་སེམས་ཏེ། གནས་བརྟན་ཀུན་དགའ་བོ་ནི་གཞོན་ནུ་གསེར་མདོག་གི་ཕྱིར་གཤེགས་པ་ཡིན་ལ། །དེ་བཞུད་ནས་ཀྱང་ངོ་མཚར་ཤིན་ཏུ་ཆེ་བའི་ཆོས་སྟོན་པར་མཛད་པ་ཡིན་གྱི་ང་ཡང་དུར་ཁྲོད་ཆེན་པོར་འགྲོ་བར་བྱ་སྙམ་མོ། །དེ་ནས་དེའི་མོད་ལ་གནས་བརྟན་ཀུན་དགའ་བོ་འཁོར་དང་བཅས་པ་ལ་ཕྱག་བྱས་ཏེ། ཁང་བཟངས་ནས་རིངས་པ་རིངས་པར་བབས་ཏེ། སྲོག་ཆགས་བརྒྱ་སྟོང་དུ་མས་ཡོངས་སུ་བསྐོར་ནས་རྐང་པ་གཉིས་ཀྱིས་དུར་ཁྲོད་ཆན་པོར་ཆས་སོ། །བར་སྐབས་ཀྱི་གཤེད་མ་པ་རྣམས་རྒྱལ་པོའི་སྐྱེས་བུ་དེ་རྣམས་ཀྱིས་མཚོན་ཕྱར་ཏེ་བསྡིགས་པ། ཅིའི་ཕྱིར་འདི་ལྟར་ཕྱི་ཤོལ་བྱེད། མྱུར་དུ་གཞོན་ནུ་འདི་གསལ་ཤིང་ལ་སྐྱོན་ཅིག །དེ་ནས་གཤེད་མ་པ་དེ་སྐྲག་ཏེ། གཞོན་ནུ་གསེར་མདོག་གསལ་ཤིང་ལ་བསྐྱོན་པར་བྱའོ་ཞེས་སྨྲས་ནས་གསལ་ཤིང་ལ་བསྐྱོན་པར་བརྩམས་པ་དང༌། གཞོན་ནུ་གསེར་མདོག་འཁོར་པའི་ཉེས་པས་ཡིད་བྱུང་བའི་སེམས་དང༌། རེ་ཐག་ཆད་
པར་གྱུར་ནས་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་འཕགས་པ་ཀུན་དགའ་བོས་བདག་ཡོངས་སུ་སྤངས་ཏེ་གང་ལ་མཁྱེན་པར་གསོལ་ཡང་ཡོངས་སུ་མ་བསྐྱབས་པ་ནི་སྡུག་བསྔལ་ལོ། །དེ་ནས་བར་སྐབས་དེར་གནས་བརྟན་ཀུན་དགའ་བོ་བདག་ཉིད་ཆེ་བས་རིང་པོ་ཉིད་ནས་འོངས་བཞིན་དུ་སྐད་ཤིན་ཏུ་གསལ་བས་ཕྱོགས་ཀུན་དུ་ཁྱབ་པར་བྱས་ཏེ། གཞོན་ནུ་གསེར་མདོག་དབུགས་དབྱུང་བའི་ཕྱིར་སྨྲས་པ། བུ་མ་འཇིགས་ཤིག །ཁྱེད་ལྟ་བུའི་གདུལ་བྱ་རྣམས་ཀྱི་དོན་དུ་ངས་སྦྲུལ་དུག་ཅན་ལྟ་བུའི་ལུས་འདི་བཟུང་བ་ཡིན་གྱི་བུ་མ་འཇིགས་ཤིག །ངས་དེང་ཁྱོད་ཉམ་ང་པ་འདི་ལས་ཡོངས་སུ་ཐར་པར་བྱའོ། །དེང་ངས་སངས་རྒྱས་བཅོམ་ལྡན་འདས་ཀྱི་ཐུགས་ལ་དགོངས་པ་རྫོགས་པར་བྱའོ། །དེང་ཉིད་ངས་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དང༌། གནས་བརྟན་འོད་སྲུངས་ཆེན་པོས་བསྟན་པ་ང་ལ་གཏད་པ་དེ་ཡང་འབྲས་བུ་ཡོད་པར་བྱའོ། །དེང་ངས་དེ་བཞིན་གཤེགས་པའི་ཉན་ཐོས་རྣམས་ཀྱི་མཆོག་གི་བདག་ཉིད་ཆེ་བ་ཉེ་བར་བརྟན་པར་བྱའོ། །དེང་ཁྱེད་ཀྱི་ཡིད་ལ་རེ་བ་ཡོངས་སུ་རྫོགས་པར་བྱའོ། །དེང་ཁྱེད་ཀྱི་འཆི་བའི་འཇིགས་པ་འདི་དང་འཁོར་བའི་འཇིགས་པ་བསལ་བར་བྱའོ། །དེང་ཁྱེད་ཀྱི་ཐེ་ཚོམ་གྱི་རྣམ་པ་ཡིན་ནམ་མ་ཡིན་སྙམ་པའི་ཟུག་རྡུ་དབྱུང་བར་བྱའོ། །ལྟ་བ་ངན་པའི་རབ་རིབ་ཀྱིས་ཁེབས་པའི་ཡེ་ཤེས་ཀྱི་མིག་སྨན་གྱི་ཐུར་མས་རྣམ་པར་སྣང་བར་བྱའོ། །དེང་ཁྱེད་ཀྱི་ཁྲོ་བའི་མེ་གཞིག་པར་བྱའོ། །དེང་ཁྱེད་འདོད་ཆགས་དང་བྲལ་བས་བསྐྱབ་པར་བྱའོ། །དེང་ཁྱེད་ཀྱི་དགེ་བའི་ས་བོན་བསྐྱེད་པར་བྱའོ། །དེང་ཁྱེད་འཁོར་བའི་འདམ་ལས་གདོན་པར་བྱའོ། །དེང་ཁྱེད་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱའོ། །དེང་ཁྱེད་འཁོར་བའི་འབྲོག་དགོན་པའི་མཐར་དབྱུང་བར་བྱའོ། །དེང་ཁྱེད་ཉོན་མོངས་པའི་འཆིང་བ་གཅད་པར་བྱའོ། །དེང་ཁྱེད་ཉོན་མོངས་པའི་སྒོ་གླེགས་གཅད་པར་བྱའོ། །དེང་ངས་ཇི་ལྟར་ཁྱེད་ཀྱི་མཐའ་བྱེ་བ་བརྒྱ་སྟོང་དཔག་ཏུ་མེད་པར་ཤིན་ཏུ་རྙེད་པར་
དཀའ་བ་ཉོན་མོངས་པ་དང་ཉེ་བའི་ཉོན་མོངས་པ་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་ངས་བྱའོ། །དེང་ནི་ཉོན་མོངས་བུད་ཤིང་ཀུན། །ཡེ་ཤེས་མེ་ཡིས་བསྲེག་པར་བྱ། །དེ་ནི་ཐེ་ཚོམ་མེད་པའི་བློས། །རིགས་དང་བྲལ་བ་ཉིད་དུ་གྱུར། །དེང་ནི་བུ་ཁྱོད་མི་ཐོགས་པར། །ཡུན་རིང་སྐྱེད་པའི་སྐྱེ་བའི་ཤིང༌། །ཡེ་ཤེས་ཆེན་པོའི་རྡོ་རྗེ་ཡིས། །བཅད་དཀའ་ཤིན་ཏུ་གཅོད་པར་འགྱུར། །ཆགས་ཆུ་དྲེགས་པའི་དབའ་ཀློང་ཅན། །ང་རྒྱལ་ཆུ་རླབས་སྲིད་མཚོ་ལས། །བརྩོན་པའི་གཟིངས་ལ་ལེགས་ཞོན་ཏེ། །ཁྱོད་ནི་རབ་ཏུ་རྒལ་བར་གྱུར། །སྐྱེ་བའི་ལྷན་ཅིག་དགའ་བའི་རྩེ། །འཆི་བའི་རི་ཁྲོད་དོག་པ་ནི། །ཡེ་ཤེས་རྡོ་རྗེ་ཆེན་པོ་ཡིས། །སྡུག་བསྔལ་རི་བོ་གཞིག་པར་འགྱུར། །བསྐལ་པ་བྱེ་བ་བརྒྱ་སྟོང་དུ། །གང་ཞིག་ཁྱོད་ཀྱིས་མ་ཐོབ་གནས། །དེ་འདྲ་ཤིན་ཏུ་རྙེད་དཀའ་ཡི། །གནས་མེད་དེང་ནི་ཐོབ་པར་འགྱུར། །དེ་ནས་གནས་བརྟན་ཀུན་དགའ་བོ་ལས་དེ་དག་ཐོས་པ་དང༌། གཞོན་ནུ་གསེར་མདོག་གཏོར་བ་ལས་སླར་རྙེད་པ་བཞིན་དུ་དབུགས་ཕྱིན་ཅིང་རྙེད་ནས་ཤིན་ཏུ་དགའ་བས་བ་སྤུ་ལྡང་བ་དང༌། ནམ་མཁའི་ངོས་སུ་ཤས་ཆེར་ལྟ་ཞིང་གནས་བརྟན་ཀུན་དགའ་བོ་ལ་དགའ་བས་བསྡུས་པའི་ཡིད་རྩེ་གཅིག་ཏུ་གྱུར་ཏོ། །དེ་ནས་རྒྱལ་པོའི་སྐྱེས་བུ་དེ་རྣམས་ཀྱིས་གསོད་མ་པ་རྣམས་ལ་སྨྲས་པ། ཤེས་ལྡན་དག་དགེ་སློང་ནམ་མཁའི་ངོས་ལ་རྟེན་ཅིང་འོང་བ་འདི་དག་ནི་སྙིང་རྗེ་ཅན་ཡིན་པས་འདི་དག་འོངས་ནས་གལ་ཏེ་བར་ཆོད་བྱེད་ཀྱི་མྱུར་དུ་གཞོན་ནུ་འདི་གསལ་ཤིང་ལ་སྐྱོན་ཅིག །ཁྱེད་རྣམས་རྒྱལ་པོའི་ཁྲིམས་ལས་འདས་པས་སྡུག་བསྔལ་ཆེན་པོ་ཐོབ་པར་གྱུར་ཏ་རེ། དེ་ནས་གཤེད་མ་པ་དེ་རྣམས་བུ་དང༌། བུ་མོ་དང༌། ནང་མི་དང༌། ཉེ་དུ་དང༌། སྲོག་དང་བྲལ་བས་འཇིགས་སྐྲག་ནས་གཞོན་ནུ་གསེར་མདོག་བཏེག་སྟེ་གསལ་ཤིང་ལ་གཟུགས་པར་བརྩམས་པ་དང༌། གནས་བརྟན་ཀུན་དགའ་བོས་དེའི་མོད་ཁོ་ན་ལ་ཇི་ལྟར་གསལ་ཤིང་དེའི་སྟེང་དུ་ཟླ་བའི་དཀྱིལ་འཁོར་དང་འགྲན་དུ་རུང་བ། ལྟེ་བ་ཡངས་པ་དང་ལྡན་པའི་པདྨ་ཆེན་པོ་བྱུང་བར་གྱུར་ལ། ཟླ་བའི་སྟེང་དུ་ལྟེ་བ་ལ་
གཞོན་ནུ་གསེར་མདོག་སྐྱིལ་མོ་ཀྲུང་གིས་འདུག་པ་དེ་ལྟར་བྱིན་གྱིས་བརླབས་སོ། །པདྨ་དེའི་ལྟེ་བའི་སྟེང་ན་གཞོན་ནུ་གསེར་མདོག་སྐྱིལ་མོ་ཀྲུང་གིས་འདུག་པ་མཐོང་བ་དང༌། ནམ་མཁའ་ལས་ལྷ་བྱེ་བ་བརྒྱ་སྟོང་དཔག་ཏུ་མེད་པས་ཅ་ཅོའི་སྒྲ་བཏོན་ཏེ། ཀྱེ་མའོ་བསྟན་པའི་བདག་ཉིད་ཆེ། །ཀུན་མཁྱེན་གྱི་ནི་རྨད་བྱུང་དང༌། །དེ་བཞིན་གཤེགས་པའི་རྣམ་འཕྲུལ་གང༌། །དེ་བཞིན་ཉན་ཐོས་རྣམས་ཀྱང་བྱེད། །དེ་ནི་འཕགས་པ་ཀུན་དགའ་བོས། །བདག་ཉིད་ཆེ་མཐོ་རབ་སྟོན་ཅིང༌། །བདེ་གཤེགས་བཞིན་དུ་བྱེད་པ་ནི། །ཡང་དག་ཤིན་ཏུ་རྨད་བྱུང་ཆེ། །ཕོངས་པའི་མུན་པ་ཀུན་སེལ་བའི། །རྒྱལ་པོའི་ཉི་མ་ནུབ་གྱུར་ཀྱང༌། །ཀྱེ་མ་གནས་བརྟན་ཀུན་དགའ་བོས། །དཔལ་ལྡན་ཉི་མ་འདི་ཤར་རོ། །འགྲོ་བ་ནམ་མཁའི་དཀྱིལ་འཁོར་དུ། །གནས་བརྟན་ཀུན་དགའི་ཟླ་བ་ཡིས། །རང་གི་བདག་ཉིད་ཤེས་རབ་ཆེའི། །འོད་ཀྱི་དྲི་མ་མེད་པར་བྱས། །བདེར་གཤེགས་སྒྲོན་མ་དང་བྲལ་བས། །འགྲོ་བའི་མུན་པས་ཁྱབ་གྱུར་ལ། །འཕགས་པ་ཀུན་དགའི་སྒྲོན་མ་ཡིས། །དེང་ནི་ཡང་དག་གསལ་བར་བྱས། །ཡོན་ཏན་བསམ་མི་ཁྱབ་ཀུན་ལྡན། །སངས་རྒྱས་རིན་ཆེན་ནུབ་གྱུར་ཀྱང༌། །དཔལ་ལྡན་འགྲོ་བའི་གཙུག་ནོར་བུ། །འཕགས་པ་ཀུན་དགའ་ཡང་དག་འཕགས། །དེ་ནས་གནས་བརྟན་ཀུན་དགའ་བོས་སྟོན་ཀའི་ཟལ་བའི་དཀྱིལ་འཁོར་བལྟར་མེད་པ་བས་ལྷག་པའི་འོད་དང་ལྡན་པ་མཚམས་ཀྱི་སྤྲིན་གྱིས་བསྐོར་བའི་ཉི་མ་ལྟ་བུ་སའི་དཔལ་མ་ལུས་པ་བཞིན་དུ་དཔལ་གྱིས་ལུས་འབར་བར་གྱུར་པ། རང་གི་གཟི་བརྗིད་ཀྱིས་ཉི་མའི་འོད་ཟིལ་གྱིས་གནོན་པ། དགྲ་བཅོམ་པ་ལྔ་བརྒྱས་ཡོངས་སུ་བསྐོར་ཏེ་ཕྱིན་པ་དང༌། ནམ་མཁའི་ངོས་ཉིད་ན་གནས་བཞིན་དུ་གཞོན་ནུ་གསེར་མདོག་ལ་གསུངས་པ། །འཇིག་རྟེན་དུ་ནི་ལན་འགའ་ཞིག ། མིག་ལྡན་གཡུལ་གྱི་མཐར་བྱོན་པ། །ལྷ་དང་མི་ཡི་སྟོན་པ་ཡི། །དེ་བཞིན་གཤེགས་པ་འབྱུང་བར་འགྱུར། །སྡུག་བསྔལ་ཐམས་ཅད་རྣམ་སེལ་བའི། །ཆོས་གང་རབ་ཏུ་སྟོན་པ་དང༌། །སྡུག་བསྔལ་སྡུག་བསྔལ་ཀུན་འབྱུང་དང༌། །སྡུག་བསྔལ་ཡང་དག་འདས་པ་
དང༌། །འཕགས་པའི་ལམ་ནི་ཡན་ལག་བརྒྱད། །ཞི་བ་མྱ་ངན་འདས་འགྲོ་བ། །ཆོས་འདི་སྟོན་པར་མཛད་པ་ན། །སྡུག་བསྔལ་ཐམས་ཅད་སེལ་བྱེད་པའི། །ཤེས་པས་མི་ཤེས་བཅོམ་ནས་ནི། །སླར་ནི་འབྱུང་བར་མི་འགྱུར་རོ། །དེ་ནས་ཚིག་འདི་ཐོས་པའི་རྗེས་ཐོགས་ཉིད་ལ་གཞོན་ནུ་གསེར་མདོག་འཇིག་ཚོགས་ལ་ལྟ་བའི་རི་བོ་མཐོན་པོ་ཉི་ཤུ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་ནས་གཞོན་ནུ་གསེར་མདོག་ཚོང་པ་རྙེད་པ་རྙེད་པ་ལྟ་བུའམ། ཞིང་པ་ལོ་ལེགས་པ་ལྟ་བུའམ། དཔའ་བོ་གཡུལ་ལས་རྒྱལ་བ་ལྟ་བུའམ། འཁོར་ལོས་སྒྱུར་བའི་རྒྱལ་པོ་ཐོབ་པ་ལྟར་མཆོག་ཏུ་དགའ་བ་དང༌། མགུ་བ་སྐྱེས་པར་གྱུར་ནས་དེ་ཉིད་དུ་གནས་བཞིན་དུ་ལག་པ་ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་མངོན་པར་བསྟོད་པར་བརྩམས་པ། གནས་བརྟན་ཀུན་དགའ་ཕྱག་འཚལ་ལོ། །གནས་བརྟན་མཆོག་ལ་ཕྱག་འཚལ་ལོ། །རྒྱལ་སྲས་རྣམས་ཀྱི་ཏོག་གྱུར་པའི། །ཐུབ་པ་ཆེ་ལ་ཕྱག་འཚལ་ལོ། །ཨེ་མའོ་ཁྱོད་ཀྱི་ཐུགས་རྗེ་རྒྱས། །ཨེ་མའོ་ཐུགས་རྗེ་མཆོག་ལྡན་པ། །གང་གིས་བདག་ནི་ཉམ་ང་བ། །ཆེན་པོ་ལས་ནི་དེང་མཛད་ཐར། །འཇིགས་པས་ཉེན་ཅིང་མགོན་མེད་བདག །མགོན་པོ་ཁྱོད་ཀྱིས་ཐར་མཛད་པ། །འཇིག་རྟེན་མགོན་ཞེས་མི་ཡུལ་གྱི། །གནས་སུ་ཁྱེད་ཀྱི་སྒྲ་བསྒྲགས་གྱུར། །སྡུག་བསྔལ་ཚ་བས་གདུངས་པ་ཡི། །འཇིག་རྟེན་ཁྱེད་ཀྱིས་འཛིན་མཛད་ཅིང༌། །བྱམས་དང་སྙིང་རྗེ་བསིལ་བའི་འོད། །ཐུབ་པ་ཟླ་བ་ཤར་བ་ཡིན། །དགེ་བའི་བཤེས་དང་མཇལ་ནས་ནི། །ཁྱེད་ཀྱིས་བདག་ལ་གང་ཐོབ་མཛད། །བྱ་བ་དེ་ནི་མས་མིན་ཞིང༌། །ཕ་དང་གཉེན་རྣམས་ཀྱིས་མ་ཡིན། །ངན་སོང་ཐམས་ཅད་སྒོ་གཅད་ཅིང༌། །ཐར་པའི་སྒོ་ནི་ཀུན་དུ་ཕྱེ། །རྒྱ་མཚོ་ཐམས་ཅད་སྐམས་པ་དང༌། །རུས་པའི་རི་ལས་ཐར་བར་མཛད། །འཁོར་བ་ཐོག་མཐའ་དབུས་མེད་ཅིང༌། །ཉོན་མོངས་འཇིགས་པས་དཀྲུགས་པ་ལས། །བློ་དང་བཅས་པའི་ཡོན་ཏན་གྱིས། །ཁྱད་ཀྱི་མཐར་ནི་བཞག་པར་གྱུར། །ཐོག་མེད་དུས་ནས་ཞེན་པ་ཡི། །
ལྟ་བའི་ཟུག་རྡུ་ལེགས་འབྱིན་པའི། །སྨན་པའི་མཆོག་འདིར་རྙེད་པས་ན། །བདག་ནི་ནད་མེད་བདེ་བ་སྐྱེས། །དེ་ནས་ལྷ་རྣམས་ཀྱིས་གནས་བརྟན་ཀུན་དགའ་བོའི་སེམས་ལ་བལྟས་ནས་སྐད་ཅིག་མ་དེ་ཉིད་ལ་དུར་ཁྲོད་ཆེན་པོའི་རྡོ་དང་གསེག་མ་དང༌། གྱོ་མོ་རྣམས་བསལ་བ་དང༌། ཙནྡན་གྱི་ཆུས་ཆག་ཆག་བཏབ་ཅིང་སྤོས་ཀྱི་དྲི་ཞིམ་པོས་གཏུལ་ཏེ། གདུགས་དང་རྒྱལ་མཚན་དང༌། བ་དན་དང༌། རྟ་བབས་བསྒྲེངས་པ་དང༌། མུ་ཏིག་གི་དོ་ཤལ་གྱི་ཚོགས་དང༌། གོས་ཀྱི་ཆུན་འཕྱང་མང་པོ་དཔྱངས་པ་དང༌། མེ་ཏོག་དྲི་ཞིམ་པོ་སྣ་ཚོགས་ཀྱི་སིལ་མ་བཀྲམ་སྟེ། ལྷ་རྣམས་དགའ་བའི་ཚལ་བཞིན་དུ་ཤིན་ཏུ་ཉམས་དགའ་བར་བྱས་སོ། །དེར་ཡང་གནས་བརྟན་ཀུན་དགའ་བོའི་དོན་དུ་རིན་པོ་ཆེ་སྣ་ཚོགས་པས་རྣམ་པར་སྤེལ་ཅིང་སྤྲས་པས་ཁྱད་པར་ཅན་དུ་ཕྱེ་ཞིང་ཐམས་ཅད་ལྷའི་གསེར་ལས་བྱས་པ། རྐང་རྟེན་དང་བཅས་པས་ལྷའི་སེང་གེའི་ཁྲི་ཆེན་པོ་བཅས་པ་དང༌། དགྲ་བཅོམ་པ་ལྔ་བརྒྱ་པོ་དེ་རྣམས་ཀྱི་དོན་དུ་ཡང་ལྷའི་གདན་རྣམས་བཏིང་ངོ༌། །དེ་ནས་གནས་བརྟན་ཀུན་དགའ་བོ་ནམ་མཁའ་ལས་བབས་ཏེ། སེང་གེའི་ཁྲི་དེའི་སྟེང་དུ་བཞུགས་སོ། །དགྲ་བཅོམ་པ་ལྔ་བརྒྱ་པོ་དེ་རྣམས་ཀྱང་བབས་ཏེ་གདན་བཤམས་པ་ལ་འདུག་པར་གྱུར་ཏོ། །རྒྱལ་པོ་མ་སྐྱེས་དགྲ་ཡང་སྲོག་ཆགས་བརྒྱ་སྟོང་དཔག་ཏུ་མེད་པས་ཡོངས་སུ་བསྐོར་ནས་ཕྱིན་པ་དང༌། ཅི་ཙམ་ན་འབྱོར་པ་དེ་དག་ཀྱང་མཐོང་ཞིང༌། གཞོན་ནུ་གསེར་མདོག་ཟླ་བའི་དཀྱིལ་འཁོར་དང་འགྲན་དུ་རུང་བའི་པདྨའི་ལྟེ་བའི་སྟེང་ན་འདུག་པ་སྤྲིན་དུམ་སྟུག་པོ་ལས་བྱུང་བའི་སྟོན་ཀའི་ཟླ་བ་རྒྱས་པ་ལྟ་བུའམ། གསེར་གྱི་མཆོད་སྡོང་ལྟར་དཔལ་གྱིས་འབར་བ་མཐོང་བ་དང༌། དེ་བལྟས་ཏེ་སེམས་ཀྱི་རྒྱུད་ངོ་མཚར་ཤིན་ཏུ་བསྡུས་པར་གྱུར་ནས་བ་སྤུ་ལྡང་བར་གྱུར་པ་དང༌། མཆོག་ཏུ་དགའ་བའི་རླབས་འཁྱིལ་པའི་གདོང་གི་པདྨ་རྒྱས་པ་དང༌། མཆོག་ཏུ་དད་པའི་ཤུགས་ཀྱིས་སེམས་ཤིན་ཏུ་བསྡུས་པ་དང༌། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་ཞབས་གཉིས་ལ་ཕྱག་འཚལ་ལོ། །དེ་ནས་ཞབས་ལ་བྱུགས་ཏེ་
ལངས་ནས་པུས་མོ་གཉིས་ས་ལ་བཙུགས་ཏེ། ལག་པ་ཐལ་མོ་སྦྱར་ནས་གནས་བརྟན་ཀུན་དགའ་བོ་ལ་ལྟ་ཞིང་སྨྲས་པ། གང་གིས་དེ་ཉིད་འགྲོ་བ་འདི། །ཡོངས་སུ་སྐྱོབ་པར་མཛད་པ་དང༌། །བདག་ཉིད་ཀྱང་ནི་དོན་མཛད་པའི། །སློབ་དཔོན་མཆོག་ལ་ཕྱག་འཚལ་ལོ།། ད་ནི་སྐྱེ་བོ་འདི་དག་ལ། །ཁྱེད་ཀྱིས་དགོངས་པ་མ་མཛད་ན། །སྨོད་པའི་སེར་བ་འབེབས་པ་ཡིས། །ཐུབ་པ་བདག་ནི་བརླག་པར་འགྱུར། །ཐུབ་པ་སེམས་ལ་བཏང་སྙོམས་མཛད། །གལ་ཏེ་སྐྱོབ་ཁྱོད་མི་བཞུགས་ན། །རྗེས་སུ་འགྱོད་པའི་ནགས་མེས་ནི། །བདག་ཉིད་དེང་ཉིད་སྲེག་པར་འགྱུར། །ཨེ་མའོ་ཡེ་ཤེས་ཆེ་བ་ཉིད། །ཐུགས་རྗེའི་ཐུགས་ནི་དམ་པ་ཡིས། །རྨད་དུ་བྱུང་བའི་སྤྱོད་པ་འདི། །ཨེ་མའོ་ཡང་དག་བསྟན་པར་མཛད། །སྡིག་མེད་ཁྱོད་ཀྱི་ཆོ་འཕྲུལ་དང༌། །རྨད་བྱུང་ཆེན་པོ་འདི་ཐོས་ན། །དེ་བཞིན་གཤེགས་པ་མཆོག་ཏུ་ནི། །ཞི་བར་གཤེགས་པ་མི་སྙམ་སེམས། །ཉམ་ཐག་གྱུར་པའི་འཇིག་རྟེན་གྱི། །ཁྱེད་ནི་མགོན་ཡིན་ཁྱེད་དཔུང་གཉེན། །སེམས་ཅན་ཀུན་ལ་ཕན་མཛད་པས། །བཅོམ་ལྡན་བཞིན་མཉེས་གཤིན་པ་པོ། །བཅོམ་ལྡན་འདས་དེ་ཁུམས་པ་དང༌། །དགའ་བ་གང་ཞིག་སྔོན་སྐྱེ་བ། །རྒྱལ་བའི་བསྟན་པ་གཅེས་འཛིན་པ། །ཁྱོད་དེ་དེ་དང་འདྲ་བར་ཁུམས། །དེ་ནས་རྒྱལ་པོ་དེས་གནས་བརྟན་ཀུན་དགའ་བོ་ལ་དེ་ལྟར་མངོན་པར་བསྟོད་ནས་ལངས་ཏེ། མཆོག་ཏུ་དགའ་བས་ཡིད་རྒྱས་པ་དང་རིངས་པ་རིངས་པར་གསལ་ཤིང་གི་གན་དུ་སོང་སྟེ། ལག་པ་གཉིས་བརྐྱང་ནས་ཡིད་དུ་འོང་བའི་བུ་སྟོར་བ་ལས་སླར་རྙེད་པ་ལྟར་མཆོག་ཏུ་དགའ་བས་གཞོན་ནུ་གསེར་མདོག་རང་ཉིད་ཀྱི་སྟན་དེ་ལ་ཕབ་སྟེ། དམ་དུ་འཁྱུད་ནས་ཡང་དང་ཡང་དུ་མགོ་ལ་འོ་བྱས་ཤིང་དགའ་བས་བྱུང་བའི་མཆིམས་ཀུན་དུ་ཁེབས་པས་གཞོན་ནུ་གསེར་མདོག་ལ་མིག་མི་འཛུམས་པར་ལྟ་ཞིང་སྨྲས་པ། ཉམ་ཐག་འདི་ལས་ཁྱོད་ཐར་ནས། །གནས་པ་ད་ལྟར་མཐོང་བ་ན། །དགའ་བར་གྱུར་པ་དེ་འདྲ་སྔོན། །རྒྱལ་པོ་ཐོབ་ནའང་མ་མྱོང་ངོ༌། །ཟླ་བ་རྒྱས་པའི་མདངས་འཕྲོགས་ཤིང༌། ཨུཏྤལ་སྔོན་པོ་འདབ་
འདྲའི་མིག །བུ་ཡི་གདོང་གི་པདྨ་ནི། །མཐོང་བ་དེ་ནི་བལྟ་བར་བྱ། །བཙོ་མའི་གསེར་གྱི་མདངས་ལྡན་ཞིང༌། །ཡོན་ཏན་ཕུན་ཚོགས་རྣམས་ཀྱིས་བརྒྱན། །ཡན་ལག་ཐམས་ཅད་འབྱེས་གྱུར་པའི། །ཁྱེད་ལུས་མཐོང་བ་བལྟ་བར་བྱ། །སྙིང་རྗེ་མེད་ཅིང་བདག་ཉིད་ངན། །གང་གི་རང་བཞིན་ངན་སྨྲས་ནས། །སུས་ནི་མི་རྣམས་ཡིད་འོང་ཁྱོད། །བསད་བའི་ཕྱིར་ནི་ཡོངས་སུ་སྤངས། །སྤྱོད་པ་དུལ་བར་ལྡན་པ་དང༌། །ཚིག་ནི་མཉན་ལ་དགའ་བྱེད་ལ། །གཟུགས་ནི་ཤིན་ཏུ་རྨད་བྱུང་བའི། །སུ་ཡི་ཡིད་དུ་མི་འོང་སྨྲས། །ཡོན་ཏན་ལྡན་པ་སུ་ཞིག་ལྡང༌། །གང་ཞིག་རྟག་ཏུ་ཉེ་རྗེས་འབྲངས། །རྡོ་རྗེ་སྙིང་པོ་མཉམ་སེམས་གང༌། །ཁྱད་པར་མི་ཤེས་སུ་ཞིག་ཡིན། །བུ་སྡུག་ཁྱོད་ལ་སྡང་བ་གང༌། །དེ་ནི་རྡོ་ཡི་རང་བཞིན་ནམ། །སེམས་དང་བྲལ་བས་བྱས་པའམ། །སྙིང་ནི་ཕྱུང་བར་གྱུར་པར་ངེས། །སྐྱེ་བོ་ཀུན་ལ་སྡུག་པ་ཁྱོད། །གང་གིས་གསོད་པར་ལུང་བསྒོ་བ། །རྡོ་རྗེ་རབ་འབར་ཐོགས་ནས་ནི། །ང་ཡི་སྤྱི་བོར་འཕེན་པ་ཡིན། །འགུལ་པར་མཚོན་གྱིས་འདེབས་པ་དང༌། །མདུང་གིས་སྙིང་གར་རབ་བསྣུན་ཞིང༌། །གྲགས་པ་མིན་པའི་སེར་བ་འདི། །སུ་ཞིག་གིས་ནི་དབབ་པར་བརྩམས། །གྱི་ཧུད་སུ་ཡིས་མི་བཟད་པའི། །ཚིག་གིས་ལས་འདི་བྱེད་དུ་བཅུག །སུ་ཞིག་ངའི་དགྲར་འབྲེལ་གྱུར། །ང་ནི་གང་ཡིད་མི་འང་གྱུར། །སུ་ཞིག་མཆི་བདག་དག་གིས་འཁྱུད། །སུ་ཞིག་སྲོག་ལས་སྐྱོབ་པར་གྱུར། །གང་གིས་ཁྱོད་ལ་ལུང་བསྒོ་བ། །མྱུར་དུ་སྨྲ་བར་བྱ་བའི་རིགས། །དེ་ནས་གཞོན་ནུ་གསེར་མདོག་སེམས་པ་ལ་ཞུགས་པར་གྱུར་ཏེ། གལ་ཏེ་རྒྱལ་པོ་འདི་ལ་བློན་པོ་རབ་གཏུམ་གྱིས་བདག་ལ་ལས་འདི་བྱེད་དུ་བཅུག་གོ་ཞེས་སྨྲ་བ་ནི་ད་ལྟ་ཉིད་ནི་བློན་པོ་རབ་གཏུམ་གསོད་པར་འགྱུར་ཏེ། བློན་པོ་རབ་གཏུམ་ལ་རྒྱལ་པོས་ལས་བྱེད་པར་གྱུར་པའི་གནས་ཡོད་ན་འདིར་ཇི་ལྟར་བསྒྲུབ་པར་བྱ། ཡང་བསམས་པ་ལས་བདག་གིས་བྱ་བ་ལ་དམིགས་པར་བྱ་སྟེ། ངེས་པར་ན་ངས་སྐྱེ་བ་གཞན་དུ་སྡིག་པ་མི་དགེ་བའི་ལས་བྱས་པ་གང་ཡིན་པ་དེའི་རྣམ་པར་སྨིན་པ་འདི་ཡིན་ཏེ། སྔོན་གྱི་
ལས་ཀྱི་རྣམ་པར་སྨིན་པ་མ་གཏོགས་པར་སྡིག་པ་མེད་པ་འདི་ལྟར་གསོད་པར་འོང་བ་སུ་ཞིག་བྱེད་ཅེས་ངེས་པར་བསམས་ནས་རྒྱལ་པོ་ལ་སྨྲས་པ། ལྷ་ཅིག་གང་ལ་ཡིད་འདྲ་བའི། །རྣམ་སྨིན་ཉེ་བར་གནས་པ་འདི། །སྡིག་པ་སྔོན་གྱི་ཚེ་རབས་སུ། །བདག་ཉིད་ཀྱིས་ནི་བྱས་པ་ཡིན། །བདག་ཉིད་ཀྱིས་ནི་བྱས་པའི་ལས། །ཡིད་དུ་མི་འོང་ཞེས་བྱ་དེ། །རྣམ་སྨིན་ལ་ནི་ལོངས་སྤྱོད་ན། །ཁྱོད་ལ་བདག་གིས་སུ་ཞིག་བསྟན། །དེ་སྐད་ཅེས་སྨྲས་ནས་གནས་བརྟན་ཀུན་དགའ་བོའི་གན་དུ་སོང་སྟེ། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་རྐང་པ་གཉིས་ལ་ཕྱག་བྱས་པ་དང༌། གནས་བརྟན་ཀུན་དགའ་བོས་སྨྲས་པ། བུ་བུ་མོ་ཀ་ཤི་མཛེས་དགའ་མོ་འདི་ནི་དུག་གི་ཤུགས་ཀྱིས་ཟིན་པ་ཡིན་གྱི། དེ་བདེན་པའི་བྱིན་གྱིས་རླབས་ཀྱིས་སློང་ལ་བདེ་ལེགས་སུ་གྱིས་ལ་སྐྱེ་བོའི་ཚོགས་མང་པོ་ཡང་ཡིད་ཆེས་པར་གྱིས་ཤིག །གཞོན་ནུ་གསེར་མདོག་གནས་བརྟན་ཀུན་དགའ་བོའི་ལུང་མཉན་ཏེ། སེམས་ཅན་ཐམས་ཅད་ལ་ལྷག་པའི་བསམ་པས་འཇུག་པའི་སེམས་དང༌། བདེན་པའི་བྱིན་གྱིས་རླབས་བྱེད་པ་ལ་ཞུགས་ཏེ། བདེན་པ་དང་བདེན་པའི་ཚིག་གང་གིས་བུ་མོ་ཀ་ཤི་མཛེས་དགའ་མོ་འདི་ལ་འདོད་ཆགས་སམ། ཞེ་སྡང་ངམ། གཏི་མུག་གམ། ཐེ་ཚོམ་མམ། གཞན་གང་ཡང་རུང་བའི་ཉོན་མོངས་པའམ། ཉེ་བའི་ཉོན་མོངས་པ་ཐ་ན་ཕྲན་ཚེགས་ཙམ་ཡང་མ་སྐྱེས་པའི་བདེན་པ་དང༌། བདེན་པའི་ཚིག་འདིས་འདིའི་ལུས་ལ་དུག་རྣམ་པར་འཇིག་པར་གྱུར་ཅིག་ཅེས་སྨྲས་སོ། །དེ་ནས་བདེན་པའི་བྱིན་གྱི་རླབས་བྱས་པའི་མོད་ཁོ་ན་ལ་བུ་མོ་ཀ་ཤི་མཛེས་དགའ་མོའི་ལུས་ལ་དུག་མེད་པར་གྱུར་ཏེ། བདེ་བར་གནས་ནས་གཉིད་ལོག་པ་ལས་སད་པ་བཞིན་དུ་ལངས་ནས་དེ་ལུས་བདེ་བར་གྱུར་པ་དང༌། ལངས་པ་ལས་བལྟས་ནས་སྐྱེ་བོ་མང་པོ་ཚོགས་དང༌། ལྷ་བརྒྱ་སྟོང་དུ་མ་རྣམས་ཀྱིས་སྒྲ་གཅིག་ཏུ་སྒྲ་གསུང་མཐོན་པོས་སྨྲས་པ། ཨེ་མའོ་ངོ་མཚར་ཆེ་སྟེ། །ཨེ་མའོ་གཞོན་ནུ་བསམ་པ་རྣམ་པར་དག་གོ །གཞོན་ནུ་འདི་ནི་རྫུ་འཕྲུལ་ཆེ་བ་དང་མཐུ་ཆེ་བ་སྟེ། གང་འདིར་བདེན་པའི་བྱིན་གྱི་རླབས་ཀྱི་སྟོབས་
ཀྱིས་འདི་བུ་མོ་ཀ་ཤི་མཛེས་དགའ་མོ་བསླང་ཞིང་ཡིད་དུ་འོང་བའི་སྲོག་གིས་སྐྱོབས་པར་གྱུར་ཏོ། །དེ་ནས་བུ་མོ་ཀ་ཤི་མཛེས་དགའ་མོ་ཕྱོགས་ཀུན་དུ་ལྟ་བར་རྩོམ་པ་དང༌། ཇི་སྲིད་ཅིག་ན་དུར་ཁྲོད་ཆེན་པོར་གནས་བརྟན་ཀུན་དགའ་བོ་དགེ་སློང་གི་དགེ་འདུན་ལྔ་བརྒྱ་དང་ཐབས་ཅིག་ཏུ་ཟླ་བ་ཁམ་པ་ལྟར་བསྐོར་ནས་རིན་པོ་ཆེ་སྣ་ཚོགས་ཀྱིས་སྤྲས་པའི་ལྷའི་སེང་གེའི་ཁྲི་ཆེན་པོ་ལ་བཞུགས་པ་དང༌། རྒྱལ་པོ་མ་སྐྱེས་དགྲ་ཡང་སྲོག་ཆགས་བརྒྱ་སྟོང་དཔག་ཏུ་མེད་པས་ཡོངས་སུ་བསྐོར་བ་དང༌། བདག་ཉིད་ཀྱང་གོས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོའི་ཁྱོགས་ལ་བཏེག་པ་མཐོང་ངོ༌། །མཐོང་ནས་ཀྱང་སེམས་སོམ་ཉི་དང་བཅས་པས་སེམས་པ་ལ་ཞུགས་ཏེ། ཅི་འདི་རྨི་ལམ་ཡིན་ནམ། འོན་ཏེ་སེམས་ཀྱི་འཁྲུལ་བ་ཡིན་ནམ། ཡང་ན་འགའ་ཞིག་གིས་ང་ལ་སྒྱུ་མའི་ལས་འདི་ལྟ་བུ་བསྟན་པ་ཡིན་ནམ་སྙམ་པ་དང༌། ཅི་ཙམ་ན་དེའི་ཉེ་དུ་རྣམས་ཀྱིས་དེ་རྒྱ་ཆེར་བརྗོད་དེ་དེ་ཡང་སྨྲས་པ། གང་ཁྱོད་ཀྱིས་འཚོ་བ་འདི་དང༌། འདི་དག་ཐམས་ཅད་ནི་གནས་བརྟན་ཀུན་དགའ་བོ་བྱོན་ནས་རྣམ་པ་ཐམས་ཅད་ཡོད་པར་གྱུར་ཏོ། །དེ་སྐད་ཅེས་ཐོས་པ་དང་བུ་མོ་ཀ་ཤི་མཛེས་དགའ་མོ་གནས་བརྟན་ཀུན་དགའ་བོ་ལ་མཆོག་ཏུ་དགའ་བ་སྐྱེས་ཏེ། རབ་ཏུ་དད་པས་ཤིན་ཏུ་རྟོག་པ་ལ་ཞུགས་སོ། །དེ་ནས་བུ་མོ་ཀ་ཤི་མཛེས་དགའ་མོ་སྐྱེད་མོས་ཚལ་ཡང་དག་པར་དྲན་ཅིང་བློན་པོ་རབ་གཏུམ་ཡང་དྲན་ཏེ། ཀུན་ནས་སྐྱོ་བའི་ཡིད་ཀྱིས་འཆི་བའི་འཇིགས་པའི་ཡི་མུག་པས་རྨོངས་པའི་མིག་དང༌། གནས་སྐབས་དེ་དང་འདྲ་བར་གཞན་ཡང་ཤེས་ཤིང་བུད་མེད་ཀྱི་དངོས་པོར་གྱུར་པའི་མྱ་ངན་བྱེད་པ་ལ་ཞུགས་ཏེ། ཨེ་མའོ་བུད་མེད་ཅེས་བྱ་བ་ནི་ཤིན་ཏུ་སྨད་པ་སྟེ། སྡུག་བསྔལ་ཐམས་ཅད་ཀྱི་གནས་སུ་གྱུར་པ་གང་ཞིག་ཐོབ་ནས། བདག་གནས་སྐབས་འདི་ལྟ་བུར་གྱུར་ཏོ་སྙམ་ནས་ཀུན་དུ་སྐྱོ་བའི་ཡིད་ཀྱིས་མྱུར་བར་ལངས་ཏེ། གོས་གཅིག་བླངས་ནས་གནས་བརྟན་ཀུན་དགའ་བོའི་གན་དུ་ཉེ་བར་སོང་སྟེ། གོས་གཅིག་པོ་དེ་གནས་བརྟན་ཀུན་དགའ་བོ་ལ་
ཕུལ་ནས་ཞབས་གཉིས་ལ་ཕྱག་བྱས་ཏེ། དད་པའི་ཤུགས་དགྲ་པོས་གནས་བརྟན་ཀུན་དགའ་བོའི་ཡོན་ཏན་རྗེས་སུ་དྲན་པ་སྔོན་དུ་འགྲོ་བས་བདེན་པའི་བྱིན་གྱི་རླབ་བྱ་བར་བརྩམས་པ། བདེན་པ་དང་བདེན་པའི་ཚིག་གང་གིས་ཐུབ་པ་ཁྱེད་ཀྱི་སྐུ་འཕགས་པ་དང་སངས་རྒྱས་ཀྱི་སློབ་མ་ཐམས་ཅད་ཀྱི་མཆོག་བརྙེས་པ། མཆོག་དམ་པ་དང༌། ཁྱད་པར་དུ་འཕགས་པ་དང༌། རབ་མཆོག་དང་བླ་མ་དང༌། བླ་ན་མེད་པ་དང༌། ཉན་ཐོས་ཀྱི་གཙོ་བོ་དང༌། ཉན་ཐོས་ཀྱི་སེང་གེ་དང༌། ཉན་ཐོས་ཀྱི་ཁྱུ་མཆོག་དང༌། ཉན་ཐོས་ཀྱི་ཅང་ཤེས་དང༌། ཉན་ཐོས་ཀྱི་པདྨ་དང༌། ཉན་ཐོས་ཀྱི་ཀུ་མུ་ཏ་དང༌། ཉན་ཐོས་ཀྱི་པུཎྜ་རཱི་ཀ་དང༌། ཉན་ཐོས་ཀྱི་ཁ་ལོ་སྒྱུར་བ་དང༌། ཉན་ཐོས་ཀྱི་དེད་དཔོན་དང༌། ཉན་ཐོས་ཀྱི་ཟླ་བ་དང༌། ཉན་ཐོས་ཀྱི་ཉི་མ་དང༌། ཉན་ཐོས་ཀྱི་རིན་པོ་ཆེ་དང༌། ཉན་ཐོས་ཀྱི་གཙུག་གི་ནོར་བུ་དང༌། བསྟན་པའི་གྲུ་པ་དང༌། བསྟན་པ་གཅེས་པར་འཛིན་པ་དང༌། དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། རྫུ་འཕྲུལ་ཆེ་བ། མཐུ་ཆེ་བ། བྱིན་གྱི་རླབས་ཆེ་བ། སྦྱིན་གནས་ཆེན་པོ་ཡིན་པའི་བདེན་པ་དང༌། བདེན་པའི་ཚིག་འདིས་དེ་ཉིད་བདག་གི་བུད་མེད་ཀྱི་དབང་པོ་མི་སྣང་བར་གྱུར་ནས་སྐྱེས་པའི་དབང་པོ་འབྱུང་བར་གྱུར་ཅིག་ཅེས་སྨྲས་སོ། །དེ་ནས་བདེན་པའི་བྱིན་གྱི་རླབས་གསོལ་པའི་མོད་ཁོན་ལ་དེའི་བུད་མེད་ཀྱི་དབང་པོ་མི་སྣང་བར་གྱུར་ནས་སྐྱེས་པའི་དབང་པོ་བྱུང་བར་གྱུར་ཏེ། གཟུགས་བཟང་བ། མཛེས་པ། བལྟ་ན་སྡུག་པ། ལུས་ལ་གོས་དང་རྒྱན་རྣམ་པ་སྣ་ཚོགས་ཀྱིས་བརྒྱན་པའི་སྐྱེས་པར་གྱུར་ཏོ། །ནམ་མཁའི་ངོས་ནས་འདིའི་ལྷའི་གོས་རྣམ་པ་སྣ་ཚོགས་པ་ཡིད་དུ་འོང་བ་ཡང་བབ་པར་གྱུར་ཏོ། །གཞན་ཡང་དེར་གོས་ཀྱི་ཆར་དེ་བབ་པ་ན་ཇི་ལྟར་སྐད་ཅིག་དེ་ལ་དུར་ཁྲོད་ཆེན་པོའི་ཉི་མའི་འོད་ཟེར་ཡང་མི་སྣང་བར་གྱུར་པ་དེ་ལྟར་ན་ནམ་མཁའི་དཀྱིལ་འཁོར་ཁེབས་པ་ཞིག་བབ་པོ། །དེ་ནས་གནས་བརྟན་ཀུན་
དགའ་བོའི་ཡོན་ཏན་གྱི་བདག་ཉིད་ཆེ་བ་ལྷ་དང་མི་རྣམས་འདུན་པར་བྱེད་པའི་ངོ་མཚར་དེ་མཐོང་བ་དང༌། ནམ་མཁའི་ངོས་ན་གནས་པའི་ལྷ་བྱེ་བ་བརྒྱ་སྟོང་དུ་མ་ཅ་ཅོའི་སྒྲ་བྱུང་སྟེ། ཨེ་མའོ་ངོ་མཚར་ཆེའོ། །ཨེ་མའོ་རྨད་དུ་བྱུང་བ་ཆེན་པོ། །ཨེ་མའོ་གནས་བརྟན་ཀུན་དགའ་བོ་ཡོན་ཏན་གྱི་བདག་ཉིད་ཆེན་པོ། །ཨེ་མའོ་རྒྱ་ཆེ་བ་ཉིད། ཨེ་མའོ་སྦྱིན་པའི་ཞིང་རྣམ་པར་དག་པ། གང་ལ་གོས་གཅིག་ཕུལ་བ་ཙམ་གྱིས་སྨོན་ལམ་བཏབ་པའི་རྗེས་ཐོགས་ཉིད་ལ། བུ་མོ་ཀ་ཤི་མཛེས་དགའ་མོ་བུད་མེད་ཀྱི་དབང་པོ་མི་སྣང་བར་གྱུར་པས་སྐྱེས་པའི་དབང་པོ་བྱུང་ཞིང་དེ་ལྟ་བུའི་སྦྱོར་བ་དང་ལྡན་པར་གྱུར་རོ། །དེ་ནས་ལྷའི་བུ་དེ་རྣམས་རབ་ཏུ་དད་པའི་ཡིད་ཀྱི་ལྷའི་མེ་ཏོག་གི་ཆར་འབེབས་པ་དང༌། ལྷའི་མེ་ཏོག་ཤིན་ཏུ་ལྟུང་བར་གྱུར་ཏོ། །དེ་ནས་སྐྱེས་བུ་ཀ་ཤི་མཛེས་དགའ་མོ་གནས་བརྟན་ཀུན་དགའ་བོའི་མཐུ་སྟོབས་ཀྱིས་ཤིན་ཏུ་ཡིད་དུ་འོང་ཞིང་བདག་ཉིད་ཇི་ལྟར་འདོད་པས་འཕྲལ་དུ་སྨིན་པའི་འབྲས་བུ་ལ་བལྟས་ཏེ། མཆོག་ཏུ་ངོ་མཚར་དུ་གྱུར་པས་འདུན་པར་གྱུར་པའི་སེམས་ཀྱི་རྒྱུད་ལ་མཆོག་ཏུ་དགའ་བ་སྐྱེས་ནས་བ་སྤུ་ལྡང་བས་ལུས་རྩུབ་པར་བྱས་པ་དང༌། ལངས་ཏེ་པུས་མོ་གཉིས་ས་ལ་བཙུགས་ནས་ཐལ་མོ་སྦྱར་ཏེ། གནས་བརྟན་ཀུན་དགའ་བོ་ལ་བསྟོད་པ་བྱེད་པ་ལ་ཞུགས་སོ། །གང་གིས་དེ་ཉིད་མགོན་མེད་བདག །ཁྱོད་ཀྱིས་བདག་ལ་སྲོག་སྩོལ་བ། །ཤིན་ཏུ་རྣམ་དག་ཡོན་ཏན་བསགས། །དཔག་ཡས་རྙེད་དཀའ་ཕྱག་འཚལ་ལོ། །རྣམ་དག་ཡེ་ཤེས་སྤྱན་ལྡན་པ། །གལ་ཏེ་ཁྱོད་སྐྱབས་མ་མཛད་ན། །བདག་སྲོག་ལྷག་མ་མ་མཆིས་ཏེ། །ཐུབ་ཁྱོད་བདག་སྲོག་སྩོལ་བ་ལགས། །ཨེ་མའོ་ཡོན་ཏན་ཆེ་བདག་ཉིད། །ཨེ་མའོ་སེམས་ཅན་ཕན་བཞེད་པ། །གང་ཞིག་ཉམ་ཐག་མི་བཟད་པ། །འདི་ལས་འགྲོ་བ་ཁྱོད་ཀྱིས་སྐྱབས། །ཨེ་མའོ་ཁྱོད་ནི་སྦྱིན་པའི་ཞིང༌། །ཤིན་ཏུ་རྣམ་དག་རབ་རྙེད་དཀའ། །གང་ལ་གོས་གཅིག་ཕུལ་བས་ཀྱང༌། །རིན་ཆེན་འདི་འདྲ་ཐོབ་པར་གྱུར། །བདག་གིས་ཐུབ་པ་ཆེ་ཁྱོད་ལ། །དེ་ལྟར་གོས་གཅིག་ཕུལ་བ་ཡིས། །འཕྲལ་དུ་འབྲས་བུ་བཟང་པོ་
འདི། །ཇི་ལྟར་མངོན་པར་འདོད་པ་ཐོབ། །ཉེས་པ་ཆེན་པོ་དག་གི་ཡང༌། །གཞིར་གྱུར་བཞིན་དུ་ཤེས་པ་ཡང༌། །བུད་མེད་ཉིད་དེ་དེ་སྤངས་ནས། །སྐྱེས་པ་ཉིད་དུ་བདག་གྱུར་ཏོ། །དེ་ཡང་ལྷ་དང་འདྲ་བ་ཉིད། །ལྷ་ཡི་རྒྱན་གྱིས་རྣམ་པར་བརྒྱན། །ནམ་མཁའ་ལ་ཡང་གོས་ཀྱི་ཆར། །ཡིད་དུ་འོང་བ་བབ་པར་གྱུར། །བཞིན་བཟངས་ཡོན་ཏན་ལྡན་འདི་ལ། །གང་ཞིག་བསྙེན་བཀུར་མི་བྱེད་པ། །རྨོངས་སོགས་ཉོན་མོངས་དག་རྣམས་ཀྱིས། །སྐལ་ངན་དེང་ནི་སླུས་པ་ཡིན། །དེས་དེ་ལྟར་གནས་བརྟན་ཀུན་དགའ་བོ་ལ་མངོན་པར་བསྟོད་ནས་ལས་ཀྱི་འབྲས་བུ་མངོན་སུམ་དུ་མཐོང་བ་དང༌། སེམས་པ་ལ་ཞུགས་ཏེ། ད་ནི་བདག་ཡིད་དུ་འོང་བ་དང༌། ཡིད་དུ་མི་འོང་བའི་ལས་ཀྱི་འབྲས་བུ་མངོན་སུམ་དུ་མཐོང་བཞིན་དུ་སླར་ཡང་ཁྱིམ་གྱི་ནང་དུ་འདུག་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེ་ནས་གནས་བརྟན་ཀུན་དགའ་བོའི་རྐང་པ་ལ་ཕྱག་བྱས་ཏེ་སྨྲས་པ། འཕགས་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོར་གྱུར་ནས་གནས་བརྟན་གྱི་ཐད་དུ་ཚངས་པར་སྤྱད་པར་བགྱིའོ། །དེ་ཡང་གནས་བརྟན་ཀུན་དགའ་བོས་རབ་ཏུ་ཕྱུང་བ་ནས། ཇི་ལྟར་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པའི་འབྲས་བུ་ཐོབ་པར་གྱུར་པ་དེ་ལྟར་ཆོས་བསྟན་ཏོ། །དེ་ནས་པར་སྐབས་དེར་དེད་དཔོན་ཉི་མ་ཆུང་མ་དང་བཅས་པ་བུ་དང་བྲལ་བའི་མྱ་ངན་གྱི་སྡུག་བསྔལ་གྱིས་གཟིར་ཞིང༌། རྒྱལ་པོའི་ཁབ་ཀྱི་གྲོང་ཁྱེར་གྱི་དབུས་ཀྱི་སུམ་མདོ་ནས་ལྡང་ཞིང་བདག་ཉིད་འགྱེལ་པར་གྱུར་པར་ཡང་དང་ཡང་ས་ལ་འགྲེ་ལྡོག་པར་བྱེད་ཅིང་ལག་པ་གཉིས་ཀྱིས་བདག་ཉིད་ལ་བརྡེགས་ཏེ་ཀྱི་ཧུད་བུ་ཀྱི་ཧུད་བུ་ཞེས་ཉམ་ཐ་པའི་སྒྲའི་ང་རོ་འདོན་པར་གྱུར་པ་ན། དེད་དཔོན་ཉི་མས་གནས་བརྟན་ཀུན་དགའ་བོ་ནམ་མཁའི་དཀྱིལ་ནས་བྱོན་ཏེ། གཞོན་ནུ་གསེར་མདོག་ཡོངས་སུ་སྐྱོབ་ཅིང་དུར་ཁྲོད་ཆེན་པོ་ན་ངོ་མཚར་དང་རྨད་དུ་བྱུང་བས་བཞུགས་སོ་ཞེས་ཐོས་པ་དང༌། ཆུང་མ་དང་བཅས་པར་བདུད་རྩིའི་རྒྱུན་ལུས་ལ་བླུགས་པ་བཞིན་དུ་ཡིད་མཆོག་ཏུ་དགའ་བ་དང༌། །
འཁོར་ལོས་སྒྱུར་བའི་རྒྱལ་པོར་དབང་བསྐུར་བ་ཐོབ་པ་བཞིན་དུ་མཆོག་དུ་དགའ་བ་སྐྱེས་པར་གྱུར་ནས། དེའི་མོད་ལ་ལངས་ཏེ་རིངས་པར་འགྲོ་བ་གོམ་སྟབས་ཀྱིས་རྒྱལ་པོའི་ཁབ་ནས་བྱུང་སྟེ་དུར་ཁྲོད་ཆེན་པོར་ཕྱིན་པ་དང༌། ཇི་སྲིད་ཅིག་ན་གསེར་མདོག་སྟོན་ཁའི་ཟླ་བ་རྒྱས་པ་སྒྲ་གཅན་གྱིས་ཟིན་པ་ལས་རྣམ་པར་ཐར་པ་ལྟ་བུ་གནས་བརྟན་ཀུན་དགའ་བོའི་གན་ན་འདུག་པ་དེ་དང༌། གནས་བརྟན་ཀུན་དགའ་བོའི་ཡོན་ཏན་གྱི་སྟོབས་ལས་བྱུང་བའི་འབྱོར་བ་ཡང་མཐོང་ངོ༌། །དེ་ནས་ལྷ་དང་མིའི་ཡིད་སྡུད་པར་བྱེད་པའི་རྨད་དུ་བྱུང་བའི་ཚེ་འཕྲུལ་དེ་ཡང་མཐོང་ནས་གནས་བརྟན་ཀུན་དགའ་བོ་ལ་ཡིད་མགུ་བ་སྐྱེས་ཏེ། མཆོག་ཏུ་དད་པའི་ཤུགས་ཀྱིས་བརླན་པའི་སེམས་གྱི་རྒྱུ་དང༌། ལུས་ཐམས་ཅད་ཀྱིས་གནས་བརྟན་ཀུན་དགའ་བོའི་ཞབས་གཉིས་ལ་ཕྱག་བྱས་ཏེ། ལངས་ནས་པུས་མོ་གཉིས་ས་ལ་བཙུགས་ཏེ་དགའ་བའི་མཆི་མའི་ཆུ་རླབས་ཀྱིས་བཞིན་གྱི་པདྨ་ཁེབས་པ་དང༌། ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་བསྟོད་པ་བྱེད་པར་བརྩམས་པ། ཨེ་མའོ་སྐལ་བ་ཆེ་ཁྱོད་ཀྱི། བདག་ཉིད་ཆེན་པོ་སྟོན་མཛད་པ། །གང་ཞིག་ཉམ་ཐག་མི་བཟད་པས། །ཁྱོད་ཀྱིས་འགྲོ་བའི་སྐྱབས་མཛད་དོ། །ཨེ་མའོ་ཐུགས་བརྩེའི་བདག་ཉིད་ཆེ། །ཨེ་མའོ་ཡེ་ཤེས་ཕུན་སུམ་ཚོགས། །བཅོམ་ལྡན་ཐམས་ཅད་མཁྱེན་པ་བཞིན། །རྣམ་དག་ཡང་དག་བསྟན་པ་མཛད། །དེ་བཞིན་བདག་གི་བུ་སྡུག་འདི། །སྡུག་བསྔལ་རྒྱ་མཚོ་ཆེན་པོ་ལས། །ཐུགས་རྗེ་ཡེ་ཤེས་དག་གི་མཐུས། །ཁྱེད་ཀྱིས་ཡང་དག་སྟོན་པར་མཛད། །གལ་ཏེ་འདི་ལས་ཁྱེད་ཀྱིས་ནི། །དེ་ཉིད་དགོངས་པར་མཛད་ན་ནི། །བདག་ནི་ཆུང་མར་བཅས་པ་འདི། །ཡུན་རིང་སྡུག་བསྔལ་འདམ་རྫབ་ནུབ། །ཐུགས་རྗེ་ཆེན་པོ་སྲས་ཀྱི་མཆོག །ཁྱོད་ནི་དེ་རིང་ཕྱིན་ནས་སུ།། བདག་སུའི་སྡུག་བསྔལ་རྒྱ་མཚོ་བསྒྲལ། །མྱ་ངན་འབྲོག་ལས་རྣམ་པར་བཏོན། །མྱ་ངན་རང་བཞིན་རྙི་ལས་ཐར། །མྱ་ངན་བཅོམ་པ་ལས་བྱུང་ཞིང༌། །མྱ་ངན་ཉོན་མོངས་འཇིགས་ལས་གྲོལ། །སྡུག་བསྔལ་གཟེབ་ལས་ཐར་བར་གྱུར། །མྱ་ངན་འདམ་ལས་དེང་མ་
གོས། །མྱ་ངན་ཚེར་མས་མ་ཟུག་ཅིང༌། །མྱ་ངན་སྦྲུལ་གྱིས་མ་ཟིན་ལ། །མྱ་ངན་མདའ་ཡིས་མ་ཕོག་གོ །མྱ་ངན་རལ་གྲིས་མ་བཅད་ཅིང༌། །མྱ་ངན་དགྲ་ཡིས་མ་རྙེད་ལ། །མྱ་ངན་ཆུ་སྲིན་གྱིས་མ་ཟིན། །མྱ་ངན་མེ་ཡིས་མ་བསྲེགས་སོ། །ཁྱོད་ཉིད་ཀྱིས་ནི་སེམས་ཅན་ཚེ། །དེ་རིང་དབུགས་ནི་འབྱིན་མཛད་ཅིང༌། །མིག་ནི་ཕྱེ་བར་མཛད་པ་དང༌། །ཡིད་ཀྱང་ཚིམ་པར་མཛད་པར་གྱུར། །གང་གིས་འདི་ལྟར་མཛད་གྱུར་པས། །བདག་ཅག་མཆོག་ཏུ་དགའ་འགྱུར་ཏེ། །ཀུན་དགའ་ཞེས་བྱའི་མཚན་བཏགས་འདི། །ཨེ་མའོ་དོན་དང་བཅས་པར་འགྱུར། །དེ་ནས་དེད་དཔོན་ཉི་མས་གནས་བརྟན་ཀུན་དགའ་བོ་ལ་བསྟོད་ནས་ལངས་ཏེ་གཞོན་ནུ་གསེར་མདོག་གི་གན་དུ་སོང་ནས་ཆུང་མ་དང་བཅས་པས་མགུལ་ནས་དམ་དུ་འཁྱུད་དེ་ཡང་དང་ཡང་དུའོ་བྱས་ལ། རབ་ཏུ་དགའ་བ་ལས་བྱུང་བའི་མཆི་མས་ཀུན་དུ་ཁེབས་པའི་མིག་གིས་གཞོན་ནུ་གསེར་མདོག་ལ་མིག་མི་འཛུམས་པར་ལྟ་ཞིང་སྨྲས་པ། སྟོན་ཀའི་ཟླ་རྒྱས་གཟུགས་ཀྱི་དཔལ། །མདངས་དང་གཟི་ནི་འཕྲོག་པའི་ལུས། །ཡིད་ལ་རེ་བ་རྒྱས་ཐོབ་པ། །མཐོང་གིས་ཁྱེད་ལ་སླར་ཡང་ལྟ། །སྣུམ་ཞིང་སྔོ་ལ་ཡངས་པ་དང༌། །ཐ་མར་མིག་ནི་བསྔགས་འོས་པ། ཁྱེད་གདོད་གནས་བརྟན་ཀུན་དགའ་བོ། །བྱོན་ནས་སླར་ཡང་བལྟ་བ་ཡིན། །དེ་ནས་གཞོན་ནུ་གསེར་མདོག་འཁོང་བའི་ཉེས་པས་ཀུན་དུ་སྐྱོ་བའི་སེམས་ཀྱིས་ཕ་དང་མ་ལ་གནང་པ་གསོལ་ཏོ། །གནས་བརྟན་ཀུན་དགའ་བོའི་རྐང་པ་གཉིས་ལ་བཏུད་ནས་གནས་བརྟན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོ་ཐོབ་པར་གྱུར་ནས། ལེགས་པར་གསུངས་པའི་ཆོས་འདུལ་བ་ལ་ཚངས་པར་སྤྱད་པར་འཚལ་ལོ། །དེ་ཡང་གནས་བརྟན་ཀུན་དགའ་བོས་རབ་ཏུ་བྱུང་ནས་ཇི་ལྟར་འདི་སྐད་ཅིག་མ་དེ་ཉིད་ལ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་ཡང་དག་པར་རྗེས་སུ་བསྟན་པ་དང༌། དེས་ཀྱང་དགྲ་བཅོམ་པ་ཉིད་ཐོབ་སྟེ། སྔོན་གྱི་སྐྱེ་བ་གཅིག་ནས་གཅིག་ཏུ་བརྒྱུད་པར་བལྟས་པར་བརྩམས་པ་
དང༌། ཇི་ཙམ་དུ་བདག་ཉིད་བསོད་ནམས་ཀྱི་མཐུ་ཆེན་པོ་དང་ལྡན་པར་མཐོང་ནས་དེས་འདི་སྙམ་དུ་སེམས་ཏེ། བདག་ཉིད་ཀྱིས་འདི་ལྟར་ཤེས་ཀྱི་པ་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་པར་ཤེས་ལ། ངས་ཇི་ཙམ་ཞིག་སྦྱིན་པ་བྱིན་པ་དང༌། བསོད་ནམས་བྱས་པ་མཐར་ཕྱིན་པར་འགྱུར་བ་ཡིན་ལ། དེ་ནི་དེ་ལྟར་ཡང་སེམས་ཅན་རྣམས་བསོད་ནམས་ལ་གུས་པ་བསྐྱེད་པར་བྱ་བའི་ཕྱིར་བསོད་ནམས་ཀྱི་བདག་ཉིད་ཆེ་བ་བསྟན་པར་བྱའོ་སྙམ་མོ། །དེ་ནས་གོས་དེ་རང་གི་ལུས་ལས་ཕུད་པ་དང༌། ཡང་དེ་ལྟ་བུའི་གཉིས་པ་བྱུང་བར་གྱུར་ཏོ། །དེ་ནས་ཡང་ནས་ཡང་དུ་དབུད་པར་བརྩམས་པ་དང༌། དེ་བཞིན་དུ་ཡང་དང་ཡང་དུ་བྱུང་བར་གྱུར་ཏེ། དེས་ཕུད་ཅིང་ཕུད་ཅིང་གནས་བརྟན་ཀུན་དགའ་བོའི་མདུན་དུ་གོས་ཀྱི་ཕུང་པོ་ཞིག་བྱས་ལ། གོས་ཀྱི་ཕུང་པོ་དེ་དག་ཀྱང་ཤིན་ཏུ་རིན་ཆེ་བ་འཛམ་བུ་ཆུ་བོའི་གསེར་གྱི་ཕུང་པོ་ལ་ཉི་མ་འཆར་ཀའི་གཟེར་གྱིས་ཕོག་པ་ལྟར་འོད་འབར་བར་འདུག་པ་ལ་སྐྱེ་བོའི་ཚོགས་མང་པོས་བལྟས་ནས། མཆོག་ཏུ་ངོ་མཚར་གྱི་དགའ་བའི་ཡིད་ཀྱིས་སྨྲས་པ། ཨེ་མའོ་ངོ་མཚར་ཆེ་བ། ཨེ་མའོ་རྨད་དུ་བྱུང་བ། ཨེ་མའོ་བསོད་ནམས་ཀྱི་བདག་ཉིད་ཆེན་པོ། །ཨེ་མའོ་ལེགས་པར་བྱས་པའི་བསོད་ནམས་ཀྱི་བདག་ཉིད་ཆེན་པོ་འདིས་རྟག་ཏུ་རྒྱུན་མི་འཆད་པར་རིན་པོ་ཆེའི་གོས་ཕུད་དུ་ཟིན་ཡང་མཐར་ཐུག་པ་ཡང་མི་སྣང་ངོ༌། །དེ་ནས་དེས་གོས་དེ་རྣམས་ཀྱང་ཕ་དང་མ་ལ་བྱིན་ལ། དེ་གཉིས་ཀྱིས་ཀྱང་གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་ཐོག་མར་བྱས་པ་ནས། ཇི་སྲད་དུ་དུར་ཁྲོད་ཆེན་པོར་འདུས་པའི་སྐྱེ་བོའི་ཚོགས་ཆེན་པོ་རྣམས་ལ་བྱིན་ཏེ། དེང་སྲོག་ཆགས་རེ་རེ་ལ་ཡང་གོས་ཟུང་རེ་བསྐོན་ཡང་དགེ་སློང་གསེར་མདོག་གི་བསོད་ནམས་ཀྱི་མཐུས་གོས་དེ་ཡང་ཡོངས་སུ་གཏུགས་པར་མ་གྱུར་ཏོ། །དེ་ནས་དགེ་སློང་གསེར་མདོག་སྟེང་གི་ནམ་མཁའ་ལ་མངོན་པར་འཕགས་ཏེ་རྫུ་འཕྲུལ་གྱིས་རྒྱལ་པོའི་ཁབ་ཀྱི་གྲོང་ཁྱེར་དུ་སོང་ནས་སུམ་མདོའི་ད་བུས་སུ་འདུག་སྟེ། མདུན་དུ་གསེར་མདོག་ཅན་གྱིས་གོས་ལུས་ལས་ཕུད་ཅིང་གོས་ཀྱི་ཕུང་པོ་ཆེན་པོ་བྱས་ཏེ། སྒྲས་རྒྱལ་པོའི་ཁབ་ཀྱི་གྲོང་ཁྱེར་འགེངས་
ཤིང༌། སྨྲས་པ། ཤེས་ལྡན་དག་ངས་གོས་ཀྱི་ཕུང་པོ་འདི་ཡོངས་སུ་གཏང་གིས་ཁྱེད་རྣམས་གང་ལ་ཇི་ཙམ་དགོས་པ་དེ་ཙམ་ལོང་ཤིག་ཅེས་བསྒྲགས་པ་ཐོས་པ་དང༌། སྐད་ཅིག་ཙམ་དེ་ཉིད་ལ་སྲོག་ཆགས་བརྒྱ་སྟོང་དཔག་ཏུ་མེད་པ་འདུས་པར་གྱུར་པ་དང༌། ཅི་ཙམ་ན་གྲོང་ཁྱེར་གྱི་དབུས་ཀྱི་སུམ་མདོ་ན་གསེར་གྱི་མདོག་ཅན་གྱི་གོས་སེར་པོའི་ཕུང་པོ་ཤིན་ཏུ་ཆེ་བ། འཛམ་བུ་ཆུ་བོའི་གསེར་གྱི་ཕུང་པོ་ལ་ཉི་མ་འཆར་ཀའི་འོད་ཀྱིས་ཕོག་པ་ལྟར་འབར་བར་གྱུར་པ་དང༌། ཚེ་དང་ལྡན་པ་གསེར་གྱི་མདོག་ཅན་གསེར་བཙོ་མའི་རིའི་རྩེ་མོ་ལྟར་དཔལ་གྱིས་མཆོག་ཏུ་འབར་ཞིང་ནམ་མཁའི་དཀྱིལ་ན་འདུག་པ་མཐོང་བ་དང༌། སྐྱེ་བོའི་ཚོགས་མང་པོ་མཆོག་ཏུ་ངོ་མཚར་གྱིས་བསྡུས་པའི་སེམས་ཀྱི་རྒྱུད་དང་མཆོག་ཏུ་དགའ་བའི་རླབས་ཀྱིས་གང་བའི་བཞིན་གྱི་པདྨ་དང༌། དེ་ལ་ལྟ་ཞིང་བསམས་པ་དང༌། ཨེ་མའོ་ངོ་མཚར་ཆེ་བ། ཨེ་མའོ་རྨད་དུ་བྱུང་བ། བདག་ཉིད་ཆེན་པོ་འདིས་ལས་གང་ཞིག་བྱས་ན་གང་གིས་འདི་ལྟར་རྫུ་འཕྲུལ་ཆེ་བ། མཐུ་ཆེ་བར་གྱུར་པ། གལ་ཏེ་བདག་ཅག་རྣམས་ཀྱིས་ཤེས་ན་ནི་བདག་ཀྱང་དེ་ལྟར་བྱ་སྟེ། བདག་གིས་བདག་ཅག་རྣམས་ཀྱང་འདི་ལྟར་མཐུ་ཆེ་བར་འགྱུར་བ་དེ་ལྟར་བྱའོ་ཞེས་མངོན་པར་འདོད་པ་སྐྱེས་ཤིང་སོམ་ཉིའི་དཔྱང་ཐག་ལ་འཇུག་བཞིན་དུ་ཕན་ཚུན་སྨྲ་བར་རྩོམ་པ་ན། དེ་རྣམས་འདི་སྙམ་དུ་སེམས་ཏེ། འདི་ནི་འདི་ལྟར་བདག་ཉིད་ཆེ་བ། རྫུ་འཕྲུལ་ཆེ་བ། མཐུ་ཆེ་བ། བརྟུལ་ཞུགས་གྲུབ་པ། ལྷའི་ཤེས་པ་དང་ལྡན་པ་ཡིན་པས་འདི་ཉིད་ལ་ཡོངས་སུ་དྲི་བར་བྱའོ་སྙམ་མོ། །དེ་ནས་སྐྱེ་བོའི་ཚོགས་ཆེན་པོ་ད་ངོ་མཚར་གྱི་མཆོག་ཏུ་མིག་གདངས་པ་དང་ཐལ་མོ་སྦྱར་ཏེ། ནམ་མཁའི་དཀྱིལ་དུ་ཞེན་པར་ལྟ་ཞིང༌། ཚེ་དང་ལྡན་པ་གསེར་མདོག་ལ་ཕྱག་བྱས་ཏེ་སྒྲ་གཅིག་ཏུ་སྨྲས་པ། ལྷ་ཡི་ཡེ་ཤེས་སྤྱན་དང་ནི། །སྐལ་པ་ཆེན་པོ་ཁྱོད་ལྡན་པས། །གང་གིས་ཁྱེད་ནི་མཐུ་ཆེ་བ། །དེ་ནི་ཡང་དག་བཤད་པའི་རིགས། །འཇིག་རྟེན་འདི་དང་ཕ་རོལ་དུ། །ལོངས་སྤྱོད་དང་ནི་ཡོན་ཏན་རྣམས། །ཕུན་ཚོགས་གང་གིས་ཐོབ་པར་གྱུར། །དེ་ནི་བདག་ཅག་ལ་བཤད་རིགས། །དེ་ནས་སེམས་
ཅན་ཆེན་པོ་དེ། །སྙིང་རྗེས་དྲངས་པའི་ཡིད་ལྡན་པས། །དེ་དག་ཚིམ་པའི་ཚིག་ཆེན་གྱི། །སྒྲས་ནི་ཕྱོགས་རྣམས་འགེངས་པར་གྱུར། །འདི་ཉིད་དོན་ནི་བཤད་པའི་ཕྱིར། །ཁྱེད་རྣམས་ལ་ནི་ངས་འདི་བསྟན། །གོ་རིམས་བཞིན་དུ་ངས་བཤད་ཀྱི། །ང་ཡི་ཚིག་འདི་མཉན་པར་གྱིས། །འཇིག་རྟེན་འདི་དང་ཕ་རོལ་དུ། །ལོངས་སྤྱོད་དང་ནི་ཡོན་ཏན་རྣམས། །ཕུན་ཚོགས་བསོད་ནམས་ཀྱིས་ཐོབ་ཅིང༌། །བསོད་ནམས་ཀྱིས་བདག་རྫུ་འཕྲུལ་ཆེ། །གལ་ཏེ་སྡུག་བསྔལ་ཁྱེད་མི་འདོད། །བདེ་བ་ཕུན་སུམ་ཚོགས་འདོད་ན། །བསོད་ནམས་སོགས་པ་བདེ་འགྱུར་བས། །མྱུར་བ་ཉིད་དུ་བསོད་ནམས་ཀྱིས། །འཇིག་རྟེན་འདི་དང་ཕ་རོལ་དུ། །བདེ་བ་གང་ཅིའང་རུང་བ་དང༌། །མྱ་ངན་འདས་པ་ཐོབ་པ་ནི། །བསོད་ནམས་ཉིད་ཀྱི་འབྲས་བུ་ཡིན། །ནོར་ཅན་ཆང་དཔོན་བྲམ་ཟེ་དང༌། །དེད་དཔོན་ལ་སོགས་གང་དག་ནི། །ལོངས་སྤྱོད་རྒྱ་ཆེན་སྤྱོད་འགྱུར་བ། །དེ་ནི་བསོད་ནམས་འབྲས་བུ་ཡིན། །མངོན་པར་ཡིད་དགའ་བུ་དང་འཁོར། །མཛའ་བོ་ལ་སོགས་ཕུན་ཚོགས་པ། །གང་ཞིག་མི་ལ་ཡོད་འགྱུར་བ། །དེ་ནི་བསོད་ནམས་འབྲས་བུ་ཡིན། །གཟུགས་དང་མདངས་ནི་ཕུན་སུམ་ཚོགས། །ཡིད་དང་མིག་ནི་འཕྲོག་བྱེད་པ། །འཐོབ་ཅིང་མི་ཡུལ་རྒྱལ་སྲིད་གང༌། །དེ་ནི་བསོད་ནམས་འབྲས་བུ་ཡིན། །མི་ཕྱེད་པ་ཡི་འཁོར་ཉིད་དང༌། །མི་ཟད་ནོར་གྱི་ཕུན་སུམ་ཚོགས། །མི་ཡུལ་ན་ནི་ངེས་ཐོབ་གང༌། །དེ་ནི་བསོད་ནམས་འབྲས་བུ་ཡིན། །སྐྱེ་བ་དྲན་ཅིང་སྐལ་བཟང་དང༌། །ཐོས་ལྡན་ཚིག་ནི་གཟུང་བར་འོས། །མིས་ནི་གང་ཞིག་ཐོབ་འགྱུར་བ། །དེ་ནི་བསོད་ནམས་འབྲས་བུ་ཡིན། །ལོངས་སྤྱོད་ཕུན་ཚོགས་རྒྱ་ཆེན་དང༌། །རྟག་པར་གཉེན་དང་ལྷན་ཅིག་ཏུ། །དགའ་བས་མི་ཡུལ་གང་སྤྱོད་པ། །དེ་ནི་བསོད་ནམས་འབྲས་བུ་ཡིན། །གྲངས་མེད་ནོར་ནི་ཕུན་ཚོགས་དང༌། །འགྲན་ཟླ་མེད་ཅིང་བརྟན་པ་ཉིད། །མི་ལ་གང་ཞིག་ཡོད་གྱུར་པ། །དེ་ནི་བསོད་ནམས་འབྲས་བུ་ཡིན། །གང་ཞིག་སྒྲ་མི་སྙན་གླིང་དུ། །བདག་གི་མེད་ཅིང་ཡོངས་འཛིན་མེད། །མི་ཡི་ཚེ་ནི་ངེས་གྱུར་པ། །དེ་ནི་བསོད་ནམས་འབྲས་བུ་ཡིན། །
འབྲས་ཀྱི་སཱ་ལུའི་འབྲས་བུ་ནི། །མ་རྨོས་པ་ནི་རིན་ཆེ་བ། །གང་ཞིག་དེ་ནི་མི་རྣམས་སྤྱོད། །དེ་ནི་བསོད་ནམས་འབྲས་བུ་ཡིན། །དཔག་བསམ་ཤིང་ལས་སྣ་ཚོགས་པའི། །གོས་དང་རྒྱན་རྣམས་བྱུང་བ་ཡིས། །མི་རྣམས་རབ་ཏུ་འགེབས་གྱུར་པ། །དེ་ནི་བསོད་ནམས་འབྲས་བུ་ཡིན། །གང་ཞིག་སྒྲ་མི་སྙན་གླིང་དུ། །མི་རྣམས་འཕོས་པའི་རྗེས་ཐོགས་ལ། །དེ་ནི་ལྷ་རྣམས་དག་ཏུ་སྐྱེ། །དེ་ནི་བསོད་ནམས་འབྲས་བུ་ཡིན། །བདུད་རྩི་འབྲས་ཆེན་སོགས་ཕུན་ཚོགས། །ས་བླ་ཡི་ནི་ལྷ་བུ་ལྟར། །ལྷ་ཡི་ལོངས་སྤྱོད་ལ་སྤྱོད་པ། །དེ་ནི་བསོད་ནམས་འབྲས་བུ་ཡིན། །གང་གི་མཐུ་ཡིས་རྒྱལ་པོའི་དཔལ། །ལྷ་འདྲའི་ཕུན་སུམ་ཚོགས་ཐོབ་པའི། །མི་ཡི་དབང་པོ་རྣམ་མཛེས་པ། །དེ་ནི་བསོད་ནམས་འབྲས་བུ་ཡིན། །བྱིས་པས་འཁོར་ལོས་སྒྱུར་བ་ཉིད། །ས་ཆེན་ལ་ནི་ལོངས་སྤྱོད་ཐོབ། །ལྷ་དབང་བཞིན་དུ་རྣམ་མཛེས་གང༌། །དེ་ནི་བསོད་ནམས་འབྲས་བུ་ཡིན། །མ་ལུས་པ་ཡི་མི་རྣམས་དང༌། །རིན་ཆེན་བདུན་སོགས་ཕུན་ཚོགས་པའི། །འཁོར་ལོས་སྒྱུར་ལ་སྤྱོད་པ་གང༌། །དེ་ནི་བསོད་ནམས་འབྲས་བུ་ཡིན། །ཕུན་ཚོགས་སུམ་ཅུ་རྩ་དབང་འདྲ། །ཐོབ་ནས་གང་ཞིག་སྤྱོད་པ་དང༌། །ཐགས་ཟངས་རིས་སོགས་ལྷ་མིན་རྣམས། །དེ་ནི་བསོད་ནམས་འབྲས་བུ་ཡིན། །འཇིག་རྟེན་སྐྱོང་བ་བཞི་རྣམས་ཀྱིས། །ནོར་གྱིས་གཞི་ཡི་འབྱོར་པ་ལ། །དགའ་བས་སྣ་ཚོགས་ལོངས་སྤྱོད་གང༌། །དེ་ནི་བསོད་ནམས་འབྲས་བུ་ཡིན། །དགའ་བའི་ཚལ་ལ་སོགས་པ་ནི། །ལྷ་མོ་རྣམས་དང་ལྡན་ཅིག་ཏུ། །འབྱོར་ལྡན་ལྷ་རྣམས་སྤྱོད་པ་གང༌། །དེ་ནི་བསོད་ནམས་འབྲས་བུ་ཡིན། །སྣ་ཚོགས་ལྷ་ཡི་རྒྱལ་སྲིད་སོགས། །ཕུན་སུམ་ཚོགས་ལ་ལྷ་དབང་ནི། །རྟག་ཏུ་དགའ་བས་སྤྱོད་པ་གང༌། །དེ་ནི་བསོད་ནམས་འབྲས་བུ་ཡིན། །གཞལ་ཡས་ཁང་གནས་ལྷ་རྣམས་ནི། །ཇི་ལྟར་མངོན་འདོད་ལྷ་རྣམས་ཀྱིས། །ལོངས་སྤྱོད་ལ་ནི་ལོངས་སྤྱོད་གང༌། །དེ་ནི་བསོད་ནམས་འབྲས་བུ་ཡིན། །གང་སུ་གནས་ནི་བཅུ་པོ་ཡི། །ཚེ་དང་མདོག་ལ་སོགས་པ་ཡིས། །ལྷ་རྣམས་ལས་ཀྱང་ལྷག་པའི་ལྷ། །དེ་ནི་བསོད་ནམས་འབྲས་བུ་ཡིན། །འདོད་ཁམས་མཆོག་
གྱུར་སྣ་ཚོགས་པའི། །ལྷ་ཡི་ལོངས་སྤྱོད་ཕུན་སུམ་ཚོགས། །འདོད་ཁམས་དབང་ཕྱུག་ལ་སྤྱོད་གང༌། །དེ་ནི་བསོད་ནམས་འབྲས་བུ་ཡིན། །ལྷ་རྣམས་དང་ནི་མི་རྣམས་སུ། །ཇི་ལྟར་དགའ་བའི་འདོད་པ་ནི། །འབད་པ་མེད་པ་ཐོབ་གྱུར་གང༌། །དེ་ནི་བསོད་ནམས་འབྲས་བུ་ཡིན། །གང་ཡང་ཚངས་པ་ལྷ་སོགས་ལྷ། །བསམ་གཏན་ས་པ་བསམ་གཏན་གྱི། །བདེ་བའི་དམ་པ་ཐོབ་གྱུར་པ། །དེ་ནི་བསོད་ནམས་འབྲས་བུ་ཡིན། །བསམ་གཏན་བསམ་གཏན་ལས་བྱུང་དང༌། །སྲེད་པ་ཟད་པའི་བདེ་བ་གང༌། །ཞི་བའི་བདེ་བ་ཐོབ་གྱུར་པ། །དེ་ནི་བསོད་ནམས་འབྲས་བུ་ཡིན། །རྫོགས་སངས་རྒྱས་དང་ཉན་ཐོས་གང༌། །ཡོན་ཏན་མཆོག་དང་ལྡན་གྱུར་ཅིང༌། །རྫུ་འཕྲུལ་ཆེ་ཞིང་བདག་ཉིད་ཆེ། །དེ་ནི་བསོད་ནམས་འབྲས་བུ་ཡིན། །གང་ཡང་བསྐལ་པ་བརྒྱ་འདས་ནས། །རང་སངས་རྒྱས་ཀྱི་བྱང་ཆུབ་ནི། །བདག་ཉིད་ཆེ་བ་ཐོབ་གྱུར་པ། །དེ་ནི་བསོད་ནམས་འབྲས་བུ་ཡིན། །ཚད་མེད་པ་དང་དཔེ་མེད་པའི། །ཡོན་ཏན་གྱིས་ནི་ལེགས་བརྒྱན་པའི། །རྫོགས་སངས་རྒྱས་སུ་གྱུར་པ་གང༌། །དེ་ནི་བསོད་ནམས་འབྲས་བུ་ཡིན། །གཟུགས་དང་ལང་ཚོ་བསྔགས་པར་འོས། །སྐྱེས་བུ་རིགས་ཀྱི་རྒྱུན་གྱུར་དང༌། །རང་དང་རྗེས་མཐུན་ཡིད་འཕྲོག་པའི། །བུད་མེད་བསོད་ནམས་བདག་གིས་འཐོབ། །བསོད་ནམས་ཀྱིས་ནི་མཐོ་རིས་འཐོབ། །ལྷ་ཡི་བུ་མོའང་བསོད་ནམས་ཀྱིས། །འདོད་པ་ཀུན་ཡང་ཡང་དག་འབྱོར། །མངོན་འདོད་བསོད་ནམས་རྣམས་ཀྱང་འཐོབ། །བསོད་ནམས་ཀྱིས་ནི་བློ་རྣོ་དང༌། །དེ་བཞིན་བློ་གྲོས་དྲི་མེད་འཐོབ། །བསོད་ནམས་ཀྱིས་ནི་གནས་ལ་དད། །བསོད་ནམས་ཀྱིས་ནི་དྲང་གསལ་འཐོབ། །སྡུག་པ་ཉིད་དང་སྒྲ་མཁས་དང༌། །དབྱངས་སྙན་གྲགས་ལྡན་བསོད་ནམས་ཀྱིས། །དགེ་བའི་བཤེས་གཉེན་འབྱོར་པ་རྣམས། །ཐམས་ཅད་བསོད་ནམས་དག་གིས་འཐོབ། །བསོད་ནམས་ཀྱིས་ནི་མི་འཐོབ་པའི། །བདེ་བ་འཇིག་རྟེན་དག་ན་མེད། །དེ་བས་བདེ་བ་འདོད་རྣམས་ཀྱིས། །རྟག་ཏུ་བསོད་ནམས་བསགས་པར་བྱ། །དེ་བཞིན་གཤེགས་པ་རྣམ་གཟིགས་ལ། །བསོད་ནམས་ཉུང་ཟད་ངས་བྱས་པས། །འབྲས་བུ་ཤིན་ཏུ་རྒྱ་ཆེ་བ། །
ཇི་ལྟར་མངོན་པར་འདོད་པ་འཐོབ། །འདོད་ཁམས་ལྷ་ཚོགས་དྲུག་པོ་རུ། །རྒྱལ་སྲིད་དབང་ཕྱུག་བདག་པོ་ནི། །སྐྱེ་བ་སྟོང་ཕྲག་བྱེ་བ་རུ། །ང་ཡིས་བདེ་ལོ་ཡང་དག་སྤྱད། །དཔག་མེད་འགྲན་ཟླ་མེད་པ་དང༌། །དེ་བཞིན་མི་ཡི་དམ་པ་ཡི། །འཁོར་ལོ་བསྒྱུར་ཆོགས་གྱུར་པ་ཡི། །ང་ཡིས་ལོངས་སྤྱོད་ཕུན་ཚོགས་སྤྱད། །བསོད་ནམས་དེ་ཡི་བདག་ཉིད་ཆེ། །ང་ནི་གང་དང་གར་སྐྱེས་པ། །དེ་དང་དེར་ནི་མཐུ་ཆེ་བའི། །བདེ་དང་བདག་ནི་ལྡན་པར་གྱུར། །གཟུགས་ལྡན་ཐོས་པ་ཕུན་སུམ་ཚོགས། །ཁ་ནས་ཨུཏྤ་ལ་དྲི་བྱུང་ཞིང༌། །སྡུག་ཅིང་ཚིག་ནི་གཟུང་འོས་དང༌། །ཤིན་ཏུ་ཡིད་འོང་དབྱངས་སྙན་ལྡན། །ད་ལྟ་འང་བསོད་ནམས་དེ་ཉིད་ཀྱིས། །ང་ཡི་གཟུགས་སོགས་ཡོན་ཏན་ནི། །ཕུན་སུམ་ཚོགས་ཤིང་ཡིད་འོང་བ། །མངོན་པར་འདོད་པ་འདི་ལ་ལྟོས། །ནོར་རྫས་ལོངས་སྤྱོད་ཆེ་བ་ཡི། །རྒྱལ་ཆེན་རིགས་སུ་སྐྱེས་པ་དང༌། །འཛམ་བུའི་ཆུ་བོའི་གསེར་འདྲ་བའི། །གོས་ཀྱིས་ལུས་ལ་བཀབ་བ་ཡིན། །ངའི་ལུས་ཡན་ལག་ཐམས་ཅད་ལས། །ཙན་དན་ལྟ་བུའི་དྲི་བྱུང་ཞིང༌། །ཁ་ནས་ཨུཏྤལ་སྔོན་པོ་ཡི། །དྲི་ཉིད་འབྱུང་བར་གྱུར་པ་ཡིན། །གོས་དང་རིན་ཆེན་ལ་སོགས་པའི། །ཕུན་ཚོགས་གང་ཞིག་མངོན་འདོད་ན། །དེ་ཡང་བསམས་པ་ཙམ་གྱིས་ནི། །ཐམས་ཅད་ང་ནི་འབྱོར་པར་གྱུར། །ཤཱཀྱ་སེང་གེའི་བསྟན་པ་ལས། །རབ་ཏུ་བྱུང་བ་ངས་རྙེད་ནས། །དགྲ་བཅོམ་ཉིད་ནི་ངས་ཐོབ་སྟེ། །ང་ནི་བསིལ་གྱུར་མྱ་ངན་འདས། །འདི་ངའི་སྐྱེ་བ་ཐ་མ་སྟེ། །ཡང་སྲིད་བདག་ལ་ཡོད་མ་ཡིན། །གནས་མེད་མྱ་ངན་འདས་ནས་ནི། །སླར་ཡང་ང་ནི་འོང་མི་འགྱུར། །རྣམ་སྨིན་འབྲས་བུ་རྒྱ་ཆེ་བའི། །ལས་གང་བསྒྲུབ་པར་གྱུར་པ་ནི། །ད་ལྟར་འདི་ལྟར་ཡོད་ཟིན་ཀྱང༌། །དེ་ཡི་མཐར་ཐུག་མ་གཏོགས་སོ། །དེ་ལྟར་དེ་ལས་རྨད་དུ་བྱུང་བ་དང༌། དཔག་ཏུ་མེད་པ་དང༌། བསམ་གྱིས་མི་ཁྱབ་པའི་བསོད་ནམས་ཀྱི་ཆེ་བའི་བདག་ཉིད་ཐོབ་པས་སྲོག་ཆགས་བརྒྱ་སྟོང་བྱེ་བ་དཔག་ཏུ་མེད་པ་མཆོག་ཏུ་དད་པས་བརླན་པའི་སེམས་ཀྱི་རྒྱུད་དང༌། བཅོམ་ལྡན་འདས་ཀྱི་བསྟན་པ་ལ་བསྙེན་བཀུར་བྱ་བ་ལ་རྒྱབ་ཀྱིས་ཕྱོགས་པ་རྣམས་ཀྱང་སྦྱིན་པ་ནི་
གཏོང་བསོད་ནམས་དག་ནི་བྱེད་ཅིང་སྨོན་ལམ་འདེབས་པར་གྱུར་ཏོ། །དེ་ནས་ཚེ་དང་ལྡན་པ་གསེར་མདོག་གིས་སྐྱེ་བོའི་ཚོགས་མང་པོ་དེ་ལྟར་རྣམ་པ་དུ་མར་བསོད་ནམས་ལ་གུས་པ་བསྐྱེད་པར་བྱ་བའི་ཕྱིར་བསོད་ནམས་ཀྱི་བདག་ཉིད་ཆེ་བ་རབ་ཏུ་བཤད་ནས། སྟེང་གི་ནམ་མཁའ་དེ་ཉིད་ནས་རྫུ་འཕྲུལ་གྱིས་དུར་ཁྲོད་ཆེན་པོར་སོང་སྟེ། གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་ལ་རིམ་བཞིན་དུ་ཕྱག་བྱས་ནས་ཕྱོགས་གཅིག་ཏུ་འདུག་གོ །དེ་ནས་རྒྱལ་པོ་མ་སྐྱེས་དགྲས་བློན་པོ་རབ་གཏུམ་ཕྲག་དོག་གི་རང་བཞིན་ཅན་གྱིས་བུ་མོ་ཀ་ཤི་མཛེས་དགའ་མོ་སྡུག་བསྔལ་འདི་དང་འདི་བྱས་ལ་གཞོན་ནུ་གསེར་མདོག་ལ་སྐུར་པ་བཏབ་སྟེ། ཉེས་པ་མེད་པ་ཉིད་དུ་གསད་པའི་ཕྱིར་ཡོངས་སུ་སྤངས་སོ་ཞེས་ཇི་ལྟར་གྲགས་པ་ཐོས་སོ། །ཐོས་ནས་ཀྱང་ཤིན་ཏུ་ཁྲོས་པས་འཁྲུགས་པའི་མིག་གིས་ནང་འཁོར་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འདི་ལྟ་བུའི་སྐྱེས་བུ་ངན་པ་འདིས་ལས་སུ་བྱ་བའི་ཐ་སྙད་བྱ། བློན་པོ་རབ་གཏུམ་ནི་ངས་རྣམ་པ་ཐམས་ཅད་དུ་སྤངས་སོ། །བློན་པོ་རབ་གཏུམ་ཡང་དེ་ཉིད་དུ་འདུས་པར་གྱུར་ཏོ། །དེ་ནས་བློན་པོ་རབ་གཏུམ་གྱིས་རྒྱལ་པོའི་ཚིག་དེ་ཐོས་པ་དང༌། འཆི་བས་འཇིགས་སྐྲག་ཅིང་ཡི་མུག་ལ་རྨོངས་པའི་མིག་གིས་ཡན་ལག་ཐམས་ཅད་རབ་ཏུ་འདར་བཞིན་དུ་མྱུར་བར་ལངས་ཏེ་རིངས་པར་འབྲོས་པར་བརྩམས་པ་དང༌། དེར་སྐྱེ་བོའི་ཚོགས་མང་པོའི་ནང་དུ་ཞུགས་ཏེ་གནས་པས་དེའི་ཕྱི་ནས་སྲོག་ཆགས་བརྒྱ་སྟོང་དུ་མ་ཞིག་གིས་བདས་ཏེ། སྐྱེ་བོའི་ཚོགས་མང་པོས་ཀུན་ནས་བསྐོར་ནས་གཟུང་ངོ༌། །བཟུང་ནས་ཀྱང་ཐལ་ལྕག་དང་རྡོག་པ་ལ་སོགས་པས་བསྣུན་པ་ལ་ཞུགས་ཏེ། དེ་བརྡེགས་བཞིན་དུ་ཤིན་ཏུ་སྡུག་བསྔལ་དྲག་པོའི་ཤུགས་ཀྱིས་ཉམ་ཐག་ཅིང་ཆོ་ངེས་འདེབས་པ་ལ་ཞུགས་ཏེ། འཕགས་པ་ཀུན་དགའ་བོ་ཡོངས་སུ་སྐྱོབས་ཤིག །བདག་ནི་མགོན་མེད་པ། སྐྱོབ་པ་མེད་པ། སྐྱབས་མེད་པ། སྣང་བ་མེད་པ་ལགས་ཀྱི་སྡུག་པའི་སྲོག་གིས་བསྐྱབ་ཏུ་གསོལ། གནས་བརྟན་ཀུན་དགའ་བོས་ཀྱང་སྐྱེ་བོའི་ཚོགས་མང་པོ་ལ་སྨྲས་པ། ཤེས་ལྡན་དག་ཁྱེད་རྣམས་
ཀྱིས་འདི་མ་བསད་ཅིག །ངས་རྒྱལ་པོ་མ་སྐྱེས་དགྲ་ལ་ཤེས་པར་བྱའོ། །དེ་ནས་སྐྱེ་བོ་མང་པོའི་ཚོགས་དེ་རྣམས་ཀྱིས་གནས་བརྟན་ཀུན་དགའ་བོའི་ཚིག་ཐོས་ནས་དེ་བཏང་ངོ༌། །གནས་བརྟན་ཀུན་དགའ་བོས་ཀྱང་རྒྱལ་པོ་ལ་གཟིགས་པ་དང༌། རྒྱལ་པོས་གསོལ་པ། ཅི་ཞིག་གསུང༌། གནས་བརྟན་ཀུན་དགའ་བོས་སྨྲས་པ། རྒྱལ་པོ་ཆེན་པོ་འདི་ཐོང་ཤིག །རྒྱལ་བོས་གསོལ་པ། དམ་ཞིག་བཅས་ལ་གཏང་བར་བགྱི་སྟེ། གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཇི་སྲིད་འཚོའི་བར་དུ་གནས་བརྟན་གྱི་བསྙེན་བཀུར་བགྱིད་ན་གཏང་བར་བགྱིའོ། །གནས་བརྟན་ཀུན་དགའ་བོས་སྨྲས་པ། དེ་བཞིན་དུ་བྱའོ། །དེ་ཡང་སྐྱེ་བོའི་ཚོགས་དེ་རྣམས་ཀྱིས་བརྩེ་བ་མེད་པར་བརྡེགས་པར་སྡུག་བསྔལ་དྲག་པོའི་ཚོར་བས་བཅོམ་ནས་བརྒྱལ་ཏེ་འདུག་པ་དང༌། གནས་བརྟན་ཀུན་དགའ་བོས་ཚེ་དང་ལྡན་པ་གསེར་མདོག་ལ་གསུངས་པ། བདེན་པའི་བྱིན་གྱི་རླབས་ཀྱིས་བློན་པོ་རབ་གཏུམ་གྱི་ལུས་ལ་སྡུག་བསྔལ་གྱི་ཚོར་བ་རབ་ཏུ་སོལ་ཅིག །དེ་ནས་ཚེ་དང་ལྡན་པ་གསེར་མདོག་སེམས་ཅན་ཐམས་ཅད་ལ་ཕན་པའི་ལྷག་པའི་བསམ་པས་རབ་ཏུ་ཞུགས་པའི་སེམས་དང༌། བདེན་པའི་བྱིན་གྱི་རླབས་བྱེད་པ་ལ་ཞུགས་ཏེ། བདེན་པ་དང་བདེན་པའི་ཚིག་གང་གིས་བློན་པོ་རབ་གཏུམ་འདི་ལྟར་ཤིན་ཏུ་གནོད་པ་བྱེད་པ་ཡིན་ཡང་བདག་གིས་ཐ་ན་ཁོང་ཁྲོ་བ་ཕྲན་ཚེགས་ཀྱང་མ་བསྐྱེད་པའི་བདེན་པ་དང་བདེན་པའི་ཚིག་དེས་འདིའི་ལུས་ལ་སྡུག་བསྔལ་གྱི་ཚོར་བ་མེད་དེ་སླར་སོས་པར་གྱུར་ཅིག །བདེན་པའི་བྱིན་གྱི་བརླབས་བྱས་པའི་མོད་ཁོན་ལ་བློན་པོ་རབ་གཏུམ་གྱི་ལུས་སྡུག་བསྔལ་གྱི་ཚོར་བ་དང་བྲལ་ཏེ། ལུས་བདེ་བར་གྱུར་ནས་ལངས་ཏེ། བཅོམ་ལྡན་འདས་ཀྱི་བསྟན་པ་ལ་ཤིན་ཏུ་དད་པར་གྱུར་ནས་གནས་བརྟན་ཀུན་དགའ་བོའི་གན་དུ་སོང་སྟེ། ཞབས་གཉིས་ལ་ཕྱག་བྱས་ནས་སྨྲས་པ། གནས་བརྟན་ཀུན་དགའ་བོ་བདག་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་སྟེ་བསྙེན་པར་རྫོགས་ཤིང་དགེ་སློང་གི་དངོས་པོ་ཐོབ་པར་བགྱིས་ལ། བདག་གནས་བརྟན་ཀུན་དགའ་བོའི་ཐད་དུ་ཚངས་པར་སྤྱོད་པ་སྤྱད་པར་བགྱི་
བར་འཚལ་ལོ། །དེ་ནས་གནས་བརྟན་ཀུན་དགའ་བོས་ཀྱང་རབ་ཏུ་ཕྱུང་སྟེ། ཇི་ལྟར་དེས་སྐད་ཅིག་མ་དེ་ཉིད་ལ་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་ཐོབ་པ་དེ་ལྟར་རྗེས་སུ་བསྟན་པ་མཛད་པ་དང༌། དེས་ཀྱང་དགྲ་བཅོམ་པ་ཉིད་ཐོབ་པ་དང༌། དེ་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་པས་སྐྱེ་བོའི་ཚོགས་མང་པོ་ཡིད་ཚིམ་བར་བྱས་ནས་ནམ་མཁའི་དཀྱིལ་ནས་བབས་ཏེ། གནས་བརྟན་ཀུན་དགའ་བོ་ལ་སོགས་པ་དགེ་སློང་གི་དགེ་འདུན་རྣམས་ལ་རིམ་བཞིན་དུ་ཕྱག་བྱས་ནས་ཕྱོགས་གཅིག་ཏུ་འདུག་གོ །དེ་ནས་རྨད་དུ་བྱུང་བ་དེ་དང༌། གནས་བརྟན་ཀུན་དགའ་བོའི་བདག་ཉིད་ཆེ་བ་མཐོང་ནས་འཁོར་དེ་རྣམས་གནས་བརྟན་ཀུན་དགའ་བོ་ལ་རབ་ཏུ་དད་པར་གྱུར་ཏོ། །དེ་ནས་འཁོར་དེ་རྣམས་དེ་ལྟར་མངོན་པར་དད་པ་ལ་གཟིགས་ནས་གནས་བརྟན་ཀུན་དགའ་བོས་གང་ཞིག་ཐོས་པས་སྲོག་ཆགས་བརྒྱ་སྟོང་དཔག་ཏུ་མེད་པ་རྣམས་ཀྱིས་ཁྱད་བར་ཆེན་པོ་ཐོབ་པར་གྱུར་པ་དེ་ལྟར་ཆོས་བསྟན་པར་མཛད་དེ། ལ་ལ་ནི་རྒྱུན་དུ་ཞུགས་པའི་འབྲས་བུ་ཐོབ་པ་ནས། དགྲ་བཅོམ་པ་ཉིད་མངོན་དུ་བྱས་པའི་བར་དང༌། ལ་ལ་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་པ་ནས་ལ་ལ་ནི་སངས་རྒྱས་ལ་གཞོལ་བ་དང༌། ཆོས་ལ་འབབ་པ་དང༌། དགེ་འདུན་ལ་བབ་པའི་བར་ལ་རྣམ་པར་བཀོད་དོ། །དེད་དཔོན་ཉི་མ་ཆུང་མ་དང་བཅས་པས་ཀྱང་བདེན་པ་མཐོང་བར་གྱུར་ཏོ། །དེ་ནས་ལྷ་བརྒྱ་སྟོང་དཔག་ཏུ་མེད་པ་རབ་ཏུ་དང་བའི་ཡིད་དང་ལྡན་པ་རྣམས་ཀྱིས་ལྷའི་གོས་ཀྱི་ཆར་ཕབ་ཅིང་ལྷའི་རོལ་མོ་རྣམས་ཀྱང་བརྡུངས་པར་གྱུར་པ་དང༌། ལྷའི་མེ་ཏོག་ཨུཏྤལ་དང༌། པདྨ་དང༌། ཀུ་མུ་ཏ་དང༌། པུཎྜ་རཱི་ཀ་དང༌། མན་དཱ་རབ་ལ་སོགས་པ་མེ་ཏོག་པུས་མོ་ནུབ་པ་ཙམ་རྣམ་པ་སྣ་ཚོགས་པས་དུར་ཁྲོད་ཆེན་པོ་དེར་ཆལ་པར་བཀྲམ་མོ། །དེ་ནས་རྒྱལ་པོ་མ་སྐྱེས་དགྲས་ལྷ་དང་མི་རྣམས་ཤིན་ཏུ་འདུན་པར་བྱེད་པའི་ཆོ་འཕྲུལ་རྨད་དུ་བྱུང་བ་དེ་མཐོང་བ་དང༌། མཆོག་ཏུ་དད་པས་སེམས་ཀྱི་རྒྱུད་དགའ་བར་གྱུར་ནས་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་ངོ་མཚར་ཆེ་བ། ཨེ་མའོ་རྨད་དུ་བྱུང་བ། ཨེ་མའོ་འཕགས་པ་ཀུན་དགའ་
བོ་རང་གི་ཡོན་ཏན་གྱི་བདག་ཉིད་ཆེན་པོ་རབ་ཏུ་བསྟན་ཏེ། ཨེ་མའོ་དེ་བཞིན་གཤེགས་པའི་བསྟན་པའི་བདག་ཉིད་ཆེ་བ་གསལ་བར་མཛད་པ། ཨེ་མའོ་གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཞིང་གཟིགས་པ་དེ་དང༌། གནས་བརྟན་འོད་སྲུངས་ཆེན་པོས་འདི་ལ་བསྟན་པ་རྣམ་པར་གཏད་པ་དེ་ནི་འབྲས་བུ་ཡོད་པར་མཛད་དོ། །ཨེ་མའོ་དེ་བཞིན་གཤེགས་པའི་ཉི་མ་ནུབ་པར་གྱུར་ནས་འཕགས་པ་ཀུན་དགའ་བོའི་ཉི་མ་རང་གི་ཡོན་ཏན་གྱི་འོད་ཟེར་གྱི་དྲ་བས་ཕྱོགས་ཐམས་ཅད་དུ་ཁྱབ་པར་མཛད་དོ། །ཨེ་མའོ་དེ་བཞིན་གཤེགས་པའི་ཟླ་བ་མི་རྟོག་པའི་ལྷ་མ་ཡིན་གྱི་དབང་པོ་སྒྲ་གཅན་གྱིས་ཟིན་ནས། །འཕགས་པ་ཀུན་དགའ་བོའི་ཟླ་བས་རང་གི་བླ་གོས་ཀྱི་འོད་ཟེར་རྣམ་པར་བཀྱེ་བས་གདུལ་བྱའི་ཀུ་མུ་ཏའི་ནགས་རབ་ཏུ་རྒྱས་པར་མཛད་དོ། །ཨེ་མའོ་དེ་བཞིན་གཤེགས་པ་དང་བྲལ་བའི་སྡུག་བསྔལ་ཚ་བ་རྩུབ་པའི་ཉི་མའི་འོད་ཟེར་གྱིས་ཀུན་དུ་གདུངས་པ་གནས་བརྟན་ཀུན་དགའ་བོའི་སྤྲིན་ཆེན་པོས་རང་གི་བདུད་རྩིའི་ཆར་གྱིས་འཇིག་རྟེན་རྣམས་ཚིམ་པར་མཛད་དོ། །ཨེ་མའོ་དེ་བཞིན་གཤེགས་པའི་ཐུགས་ལ་དགོངས་པ་ཡང་དག་པར་རྫོགས་པར་མཛད་དོ། །ཨེ་མའོ་དེ་བཞིན་གཤེགས་པའི་བསྟན་པའི་གྲུབ་པ་ཉིད་བསྟན་པ་མཛད་དོ། །ཨེ་མའོ་དེ་བཞིན་གཤེགས་པའི་བསྟན་པ་གཅེས་པར་འཛིན་པ་ཉིད་གསལ་བར་མཛད་དོ། །ཨེ་མའོ་ཉན་ཐོས་ཀྱི་མཆོག་ཉིད་འབྲས་བུ་ཡོད་པར་མཛད་དོ། །ཤིན་ཏུ་རྨད་དུ་བྱུང་བ་འདི་དང་རང་གི་ཡོན་ཏན་གྱི་ཆེ་བའི་སྟོབས་དང༌། མཐའ་ཡས་པའི་སེམས་ཅན་རྣམས་རྫོགས་པར་མཛད་པས་ཐམས་ཅད་མཁྱེན་པའི་ཡོན་ཏན་གྱི་བདག་ཉིད་ཆེ་བ་རབ་ཏུ་མཛད་དོ། །ཨེ་མའོ་བདག་ཉིད་ཆེན་པོ་འདིས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དེའི་བཀའ་དྲིན་ལ་ལན་གླན་པའི་བློ་གྲོས་སྟོན་པར་མཛད་པ་ཡིན་ནོ། །དེ་ནས་རྒྱལ་པོ་དེ་གནས་བརྟན་ཀུན་དགའ་བོ་ལ་རབ་ཏུ་དད་པའི་ཤུགས་ཀྱི་བསྡས་པའི་སེམས་ཀྱི་རྒྱུད་ཀྱི། གནས་བརྟན་ཀུན་དགའ་བོའི་གན་དུ་སོང་སྟེ། ལུས་ཐམས་ཅད་ཀྱིས་གནས་
བརྟན་ཀུན་དགའ་བོའི་ཞབས་གཉིས་ལ་ཕྱག་བྱས་ཏེ། ལངས་ནས་པུས་མོ་གཉིས་ལ་བཙུགས་ཏེ། རབ་ཏུ་དད་པས་བ་སྤུ་ལངས་པར་རྩུབ་པར་བྱས་པའི་ལུས་དང་ལག་པ་ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་མངོན་པར་བསྟོད་པར་རྩོམ་པ། སྐྱེས་བུའི་མཆོག་ལ་ཕྱག་འཚལ་ལོ། །ཐོས་པའི་རྒྱ་མཚོ་ཕྱག་འཚལ་ལོ། །རྒྱལ་བའི་བསྟན་པ་གཅེས་འཛིན་པ། །རྨད་བྱུང་བསམ་ཡས་ཕྱག་འཚལ་ལོ། །ཨེ་མའོ་སངས་རྒྱས་བསྟན་པ་ཡི། །བདག་ཉིད་ཆེ་བ་ཡང་དག་བསྟན། །རྨད་བྱུང་བསམ་གྱིས་མི་ཁྱབ་པའི། །འགྲོ་ལ་ཕན་དེ་ཁྱོད་ཀྱིས་མཛད། །གང་དེ་བཅོམ་ལྡན་འདས་དང་ནི། །འཕགས་པ་འོད་སྲུངས་བློ་ལྡན་པས། །ཁྱོད་ལ་བསྟན་པ་རྣམས་གཏད་པ། །དེང་དེ་འབྲས་བུ་བཅས་པར་མཛད། །རྨད་བྱུང་བསམ་གྱིས་མི་ཁྱབ་པའི། །འགྲོ་བའི་དོན་ཆེན་མཛད་པ་འདི། །ཀུན་མཁྱེན་ཡོན་ཏན་བདག་ཉིད་ཆེ། །དེ་རིང་ཁྱེད་ལ་གཟུགས་བརྙན་གྱུར། །གལ་ཏེ་རྫོགས་པའི་སངས་རྒྱས་ནི། །དེ་ལྟར་འགྲོ་དོན་མཛད་གྱུར་ཀྱང༌། །འདི་ནི་ཀུན་མཁྱེན་ཐམས་ཅད་གཟིགས། །ཐུགས་རྗེ་ལྡན་བས་མཚར་མི་ཆེ། །ཁྱེད་ནི་ཉན་ཐོས་ཉིད་འགྱུར་ཞིང༌། །ཐུགས་རྗེ་ཆེ་ལྡན་དེ་བཞིན་དུ། །སེམས་ཅན་དོན་ཆེན་གང་མཛད་པ། །འདི་ནི་ཤིན་ཏུ་ངོ་མཚར་ཆེ། །ཨེ་མའོ་འདི་ལྟར་བག་མེད་པ། །མ་ག་དྷཱ་ཡི་སྐྱེ་བོ་འདིས། །ཁྱེད་འདྲ་ཕན་ལ་བརྩོན་མཛད་པ། །རྙེད་པ་ལེགས་པར་རྙེད་པ་ཡིན། །དེ་བཞིན་གཤེགས་པའི་གནས་འདི་ནི། །བསྟན་པ་ཁྱེད་ལ་གཏད་གྱུར་པ། །གང་གིས་དེར་ནི་བདེ་གཤེགས་བཞིན། །རྨད་བྱུང་ཤིན་ཏུ་ཆེན་པོ་མཛད། །དེ་ནས་གནས་བརྟན་ཀུན་དགའ་བོའི་ཡོན་ཏན་གྱི་བདག་ཉིད་ཆེན་པོའི་ངོ་མཚར་གྱིས་ཡང་དག་པར་རྫོགས་པའི་སངས་རྒྱས་རྗེས་སུ་དྲན་ནས་རྟག་ཏུ་ཕྱག་འཚལ་བ། རྫོགས་པའི་སངས་རྒྱས་རྐང་གཉིས་མཆོག །གང་ཁྱེད་ཉན་ཐོས་འདི་ལྟ་བུར། །རྟག་ཏུ་འགྲོ་ལ་ཕན་བརྩོན་པ། །དཔའ་བོ་ཆེན་པོ་ཕྱག་འཚལ་བསྟོད། །དེ་བཞིན་གཤེགས་པའི་བདག་ཉིད་ཆེ། །མཐོང་བ་ཉིད་དུ་ཡང་དག་བསྟན། །ཇི་ལྟར་འགྲོ་ཚོགས་འདི་ཁྱེད་ཀྱིས། །སྟོང་པ་མིན་པ་སྙམ་དུ་སེམས། །དེ་
ནས་རྒྱལ་པོས་གནས་བརྟན་ཀུན་དགའ་བོ་ལ་ཞུས་པ། གནས་བརྟན་དེད་དཔོན་ཉི་མ་ཆུང་མ་དང་བཅས་པས་སུག་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་བ་དང༌། ནོར་ཆེ་བ་དང༌། ལོངས་སྤྱོད་ཆེ་བར་གྱུར་པ་དང༌། བཅོམ་ལྡན་འདས་ཀྱི་བསྟན་པ་ལ་བདེན་པ་མཐོང་བར་གྱུར། དགེ་སློང་ཀ་ཤི་མཛེས་དགའ་བོ་དང༌། དགེ་སློང་རབ་གཏུམ་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ཕྱུག་པ་དང༌། ནོར་ཆེ་བ་དང༌། ལོངས་སྤྱོད་ཆེ་བར་སྐྱེས་ཤིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས། དགེ་སློང་གསེར་མདོག་གིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་ཆེ་བ་དང་ལོངས་སྤྱོད་ཆེ་བའི་རིགས་སུ་སྐྱེས་ཤིང་འདི་ལྟར་གཟུགས་བཟང་བ་དང༌། བལྟ་ན་སྡུག་པ་དང༌། མཛེས་པ་དང༌། ཡན་ལག་དང༌། ཉིང་ལག་ཐམས་ཅད་དང་ལྡན་པ་དང༌། གསེར་བཙོ་མའི་མདོག་གི་ཁ་དོག་ཤིན་ཏུ་རྒྱས་པ་དང༌། ལྡན་པ་དང༌། འགྲོ་བ་ཐམས་ཅད་ཀྱི་ཡིད་དང་མིག་འཕྲོག་པ་དང༌། གསེར་གྱི་མདོག་ཅན་གྱི་གོས་ཀྱིས་ལུས་དཀྲིས་པ་དང༌། འདིའི་ཡན་ལག་ཐམས་ཅད་ནས་ཙན་དན་གྱི་དྲི་འབྱུང་བ་དང་འདིའི་ཁ་ནས་ཨུཏྤ་ལའི་དྲི་འབྱུང་བ་དང༌། དེ་སྐྱེས་པ་ཙམ་གྱིས་ཁྱིམ་དེར་གོས་ཀྱི་ཆར་དང༌། མེ་ཏོག་ཀར་ནི་ཀ་རའི་ཆར་འབབ་པར་གྱུར་ཅིང་གོས་དེ་དག་ཀྱང་གསེར་གྱི་མདོག་ཅན་ཉིད་དུ་གྱུར་བ་དང༌། འདི་ལྟར་ཤིན་ཏུ་རྫུ་འཕྲུལ་ཆེ་ཞིང་མཐུ་ཆེ་བ་དང༌། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས་ལགས། གནས་བརྟན་ཀུན་དགའ་བོས་གསུངས་པ། རྒྱལ་པོ་ཆེན་པོ་འདི་རྣམས་ཉིད་ཀྱིས་སྔོན་གྱི་སྐྱེ་བ་གཞན་དུ་ལས་གང་ཞིག་བྱས་ཤིང་བསགས་པས། འདི་རྣམས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་
ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་བ་དག་ནི་ཟིན་པའི་ཕུང་པོ་དང༌། ཁམས་དང་སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་ཞིང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་བསྐལ་པ་དགུ་བཅུ་རྩ་གཅིག་ན། བཅོམ་ལྡན་འདས་རྣམ་པར་གཟིགས་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་མཉན་ལྡན་ཞེས་བྱ་བའི་རྒྱལ་པོའི་ཕོ་བྲང་ནས་བྱུང་སྟེ། མཉན་ལྡན་གྱི་ཚལ་ཞེས་བྱ་བ་ན་བཞུགས་སོ། །ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་མཉེན་ལྡན་ན་རྣ་ཅན་ཞེས་བྱ་བའི་དེད་དཔོན་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བ་ཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་རྒྱལ་པོའི་ཕོ་བྲང་མཉེན་ལྡན་ན་སྐྱེས་བུའི་མཆོག་ཏུ་གྱུར་པ་ཞིག་གནས་པ་དང༌། དེར་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་པར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་ལྟར་རྩེ་ཞིང་དག་ལ་དགའ་མགུར་སྤྱོད་པས་ཆུང་མ་སེམས་ཅན་དང་ལྡན་པར་གྱུར་པ་ནས། ཇི་སྲིད་དེད་དཔོན་རྣ་ཅན་ཚོང་བ་ལྔ་བརྒྱས་བསྐོར་ཏེ། རྒྱ་མཚོ་ཆེན་པོར་ཞུགས་ཀྱི་བར་དུ་སྦྱར་རོ། །དེ་ཡང་མངལ་དུ་ཇི་ལྟར་སྐྱེ་བར་གྱུར་པ་དེ་ལྟར་དེད་དཔོན་རྣ་ཅན་གྱི་ཚོང་སར་གཏོགས་པ་དང༌། ཞིང་དུ་གཏོགས་པ་དང༌། ཡུལ་གཞན་དུ་གཏོགས་པའི་ནོར་གྱི་རིགས་ལས་དེར་ལ་ལ་ནི་མེས་ཚིག །ལ་ལ་ནི་རྐུན་མས་ཁྱེར། ལ་ལ་ནི་མི་རྣམས་ཀྱིས་ཁྱེར་ཏེ་བྲོས་པར་གྱུར་ཏོ། །ཇི་ཙམ་ན་དེད་དཔོན་རྣ་ཅན་གྱི་ཆུང་མ་ཟླ་བ་ཚང་པ་དང་བུ་སྐྱེས་པར་གྱུར་ཏེ། པགས་པ་ནག་པོ། ཤིན་ཏུ་གཟུགས་
མི་སྡུག་པ། མི་སྡུག་པའི་མཚན་མ་བཅོ་བརྒྱད་གྱིས་ལུས་སྨད་པར་བྱས་པ། དེའི་ཁ་དང་དེའི་ལུས་ལས་གང་ཞིག་བསྣམས་ན་ཁྱིམ་ན་གནས་པའི་འཁོར་ཤིན་ཏུ་ཡང་གདོང་རྒྱབ་ཀྱིས་ཕྱོགས་པར་གྱུར་པ་དེ་ལྟ་བུའི་ཤིན་ཏུ་དྲི་མི་ཞིམ་པར་གྱུར་ཏོ། །ཁྱེའུ་དེ་སྐྱེས་པ་ཙམ་གྱིས་གང་གི་ཁྱིམ་དེར་རྫས་མ་ལུས་པར་ཚིག་པར་གྱུར་པ་དེ་ལྟ་བུའི་མེ་བྱུང་བ་དང༌། དེད་དཔོན་གྱི་ཆུང་མ་ཉམ་ཐག་པས་ཁྱེའུ་དེ་ཐོགས་ཏེ་ཁྱིམ་དེ་ལས་བྱུང་ངོ༌། །གང་གི་ཚེ་ཡང་མེ་དེས་ཁྱིམ་དེ་དང་རྫས་མ་ལུས་པར་བསྲེགས་ནས་རང་ཉིད་ཞི་བར་གྱུར་པ་དེའི་ཚེ་དེད་དཔོན་གྱི་ཆུང་མ་གནས་ངན་པ་ཕྱེད་ཚིག་པའི་ཞིག་རལ་ཅན་ཞིག་ཏུ་ཞུགས་ནས་གོས་ཕྱེད་ས་ལ་བཏིང་སྟེ་བྱིས་པ་བསྙལ་ནས་ཚ་བའི་དབུགས་རིང་པོ་ཕྱུང་སྟེ། དེད་དཔོན་རྗེས་སུ་དྲན་ཞིང་དུ་བ་ལ་ཞུགས་སོ། །ཀྱི་ཧུད་འདི་ལྟ་བུའི་ཕྱིན་ཅི་ལོག་ཀུན་དུ་གནས་པ་ནི་སྡུག་བསྔལ་ལོ། །དེད་དཔོན་རྣ་ཅན་གྱི་བྲན་ཕོ་དང༌། བྲན་མོ་དང༌། ལས་བྱེད་པའི་སྐྱེས་བུ་རྣམས་ཀྱིས་རྒུད་པ་གང་ཡིན་པ་དེ་མཐོང་བ་དང༌། ཡུ་བུ་ཅག་ཀུན་ཀྱང་བརླག་པར་འགྱུར་གྱི། འདེང་ཞེས་སྨྲས་ཏེ། སྐྲག་པས་དེད་དཔོན་གྱི་ཆུང་མ་སྤངས་ནས་ཐམས་ཅད་བྲོས་པར་གྱུར་ཏོ། །དེར་མངག་གཞུག་པའི་བུ་མོ་གཅིག་གིས་བསམས་པ། ངས་ནི་དེད་དཔོན་རྣ་ཅན་གྱི་ཁྱིམ་ཕུན་སུམ་ཚོགས་པ་དུ་མ་ལ་ཀུན་དུ་ལོངས་སྤྱད་ནས། ད་དེད་དཔོན་གྱི་ཆུང་མ་གནས་སྐབས་འདི་ལྟ་བུར་གྱུར་པ་ན་གཅིག་པུ་སྤངས་ནས་འབྲོས་པ་གང་ཡིན་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེ་གཅིག་པུ་དེད་དཔོན་རྣ་ཅན་གྱི་ཆུང་མའི་གན་ན་འདུག་གོ །དེད་དཔོན་གྱི་ཆུང་མ་དེའི་ནོར་ཐམས་ཅད་མེས་བསྲེགས་པས་ཉི་མ་གཅིག་གི་བཟའ་བ་ཡང་མེད་པར་གྱུར་ཏོ། །དེ་ནས་བུ་མོ་མངག་གཞུག་དེ་དེད་དཔོན་རྣ་ཅན་གྱི་མཛའ་བོ་དང་འབྲེལ་པ་དང༌། གཉེན་རྣམས་གང་ཡིན་པ་དེ་རྣམས་ཀྱི་གན་དུ་སོང་སྟེ་སྨྲས་པ། བཞིན་བཟངས་དག་དེད་དཔོན་རྣ་ཅན་གྱི་ཆུང་མ་གནས་སྐབས་འདི་ལྟ་བུ་ལ་གནས་ན་དེ་གསོ་ཞིང་བསྐྱར་བར་མཛོད་ཅིག་དང་ཞེས་སྨྲས་པ་དང༌། དེ་ནས་དེ་རྣམས་དེ་གསོ་ཞིང་བསྐྱང་བ་ལ་ཞུགས་པ་དེ་ཉིད་ཀྱི་ཚེ་དེ་རྣམས་ཀྱི་རིགས་ལ་ཡང་སྡུག་བསྔལ་
བརྒྱ་ཕྲག་བྱུང་བར་གྱུར་བ་དང༌། དེ་རྣམས་ཀྱིས་བསམས་པ་དེད་དཔོན་རྣ་ཅན་གྱི་བུ་འདི་ཤིན་ཏུ་བཀྲ་མི་ཤིས་པ་ཞིག་སྟེ། འདིའི་བསོད་ནམས་མ་ཡིན་པའི་སྟོབས་ཀྱིས་དེད་དཔོན་རྣ་ཅན་གྱི་ཁྱིམ་གྱི་འབྱོར་བ་ཤིན་ཏུ་རྒྱ་ཆེ་བ་རྣམ་པར་འཇིག་པར་འགྱུར་ལ། དེ་གལ་ཏེ་ཡུ་བུ་ཅག་རྣམས་ཀྱིས་གསོས་ཤིང་བསྐྱབ་ན་ཡུ་བུ་ཅག་རྣམས་ཀྱི་ཁྱིམ་དུ་ཡང་འདི་ལྟ་བུའི་གནས་སྐབས་འབྱུང་བར་འགྱུར་གྱི། འདི་ལྟར་ཡང་རྣམ་པ་ཐམས་ཅད་དུ་མིང་ཙམ་ཡང་གཟུང་བར་རིགས་པ་མ་ཡིན་ནོ་སྙམ་ནས། བུ་མོ་མདག་གཞུག་པ་དེ་ལ་སྨྲས་པ། ཁྱེད་ཕྱིན་ནས་ཀྱང་ངེད་ཀྱི་ཁྱིམ་དུ་འཇུག་པར་ཡང་མ་བྱེད་ཅིག །བུ་མོ་དེ་ལྟར་བར་བཅད་པ་དང་བསམས་པ། ད་ནི་དེད་དཔོན་གྱི་ཆུང་མ་རྣམ་པ་ཐམས་ཅད་ནས་ཐམས་ཅད་དུ་སྨྲ་བ་མེད་པར་གྱུར་ན་དེ་ཇི་ལྟར་བསྒྲུབ་པར་བྱ། གཞན་དུ་ན་ངན་ནི་ཁུར་འདི་བླངས་པ་ཡིན་གྱི། ཤིན་ཏུ་འབད་པ་ཉིད་ཀྱིས་ད་བདག་གིས་དེད་དཔོན་གྱི་ཆུང་མ་བསྐྱང་པར་བྱའོ་སྙམ་མོ། །དེ་ནས་གཞན་གྱི་ཁྱིམ་དུ་སོང་ནས་གླ་བའི་ལས་བྱེད་པ་ལ་ཞུགས་ནས་དེར་གླ་གང་དག་རྙེད་པ་དེས་དེད་དཔོན་གྱི་ཆུང་མ་བདག་ཉིད་དང༌། ཁྱེའུ་གསོ་བ་ལ་ཞུགས་སོ། །ཁྱེའུ་དེ་ནི་ཤིན་ཏུ་ཡང་མི་སྡུག་པས་མི་སྡུག་པ་ཞེས་མིང་བཏགས་སོ། །བུ་མོ་མངག་གཞུག་མོ་དེ་ཡང་ལས་ཀྱི་དཔང་གིས་ཉི་མ་རེ་རེ་ཞིང་གླའི་རྙེད་པ་ཐོབ་པར་གྱུར་ཏོ། །དེ་ནས་དེ་སྲོག་ཆགས་གསུམ་པོ་ཤིན་ཏུ་ཉམ་ང་བས་གསོ་བར་རྩོམ་པ་དང༌། དེད་དཔོན་གྱི་ཆུང་མས་བསམས་པ། ང་ནི་བྲན་ཕོ་དང༌། བྲན་མོ་དང༌། ལས་བྱེད་པའི་མི་དང༌། མཛའ་བཤེས་དང༌། ཉེ་དུ་རྣམས་ཀྱིས་ཡོངས་སུ་སྤངས་ནས་གང་བདག་ཅུང་ཟད་འཚོ་བ་འདི་ནི་བུ་མོ་མངག་གཞུག་མ་འདིའི་ཡོན་ཏན་ཡིན་པས་འདི་ནི་ངའི་མ་དང་འདྲ་བར་བརྩེ་པ་ཡིན་མོད་ཀྱི། དེ་དུས་ཇི་སྲིད་གཅིག་ཏུ་གཅིག་པུས་ལས་བྱེད་མི་ནུས་ཏེ་ཡོངས་སུ་སྐྱོ་བར་འགྱུར་ལ། གླ་ཇི་ཙམ་རྙེད་པ་དེས་ཀྱང་འཚོ་བ་མི་ནུས་ཀྱིས། དེས་ན་ངས་ཀྱང་རང་གི་ཉེས་པ་ཉམས་སུ་མྱོང་བར་བྱ་ཞིང་གླ་མིའི་ལས་བྱའོ་ཞེས་རྣམ་པར་བསམས་ནས། བུ་མོ་མངག་གཞུག་མ་དེ་དང་ལྷན་ཅིག་གཞན་གྱི་ཁྱིམ་དུ་ཞུགས་ཏེ་གླ་མིའི་ལས་བྱེད་པར་བརྩམས་པ་དང༌། དེ་ཤིན་ཏུ་ཡང་གཞོན་ཤ་
ཅན་ཡིན་པས་བཀྲེས་པ་ལ་སོགས་པའི་སྡུག་བསྔལ་གྱིས་ཡོངས་སུ་གཟིར་ཞིང་ལས་པ་ན་ཡང་དང་ཡང་དུ་བརྒྱལ་བར་གྱུར་ཏོ། །དེ་ནས་ཡོངས་སུ་སྐྱོ་བས་དབུགས་ཚ་བ་རིང་པོ་བྱུང་ནས་དེད་དཔོན་རྣ་ཅན་རྗེས་སུ་དྲན་ཞིང་དུ་བ་ལ་ཞུགས་ཏེ། ཀྱི་ཧུད་འདི་ལྟ་བུའི་ཕྱིན་ཅི་ལོག་ཀུན་དུ་གནས་པ་ནི་སྡུག་བསྔལ་ལོ། །གང་གྲོང་ཁྱེར་མ་ལུས་པའི་མཆོག་དུ་གྱུར་ཅིང༌། དཔལ་གྱི་ཕུན་སུམ་ཚོགས་པ་ཉམས་སུ་མྱོང་ནས་ཀྱང་ཚེ་འདི་ལ་གྲོང་ཁྱེར་ཐམས་ཅད་ཀྱི་མཆོག་ཏུ་གྱུར་ནས། ད་ལྟར་གཞན་གྱི་ཁྱིམ་དུ་གླ་མིའི་ལས་བྱེད་པའི་སྡུག་བསྔལ་དང་ཡིད་མི་བདེ་བ་རྗེས་སུ་མྱོང་བར་གྱུར་ཏོ། །དེ་དེ་ལྟར་སྡུག་བསྔལ་གྱིས་ཡོངས་སུ་གཟིར་ཞིང་དུ་བ་ལ་བལྟས་ནས་བུ་མོ་མངག་གཞུག་མ་དེ་ཆོ་ངེས་འདེབས་པ་ལ་ཞུགས་ཏེ། ཀྱི་ཧུད་ཚེ་འདི་ཉིད་ལ་དེད་དཔོན་རྣ་ཅན་གྱི་ཆུང་མ་རས་ཀ་ཤི་པ་ལ་སོགས་པ་གོས་སྣ་ཚོགས་གྱོན་པ་དང༌། ལུས་ལ་དྲི་ཞིམ་པའི་མེ་ཏོག་གི་ཕྲེང་བ་དུ་མས་བརྒྱན་པ་དང༌། ཁུར་བ་ལ་རྫས་དྲི་ཞིམ་པོ་དུ་མ་སྦྱར་བའི་དྲི་ཞིམ་པོས་བསྒོས་པ་དང༌། ལྷའི་བུ་མོ་བཞིན་དུ་དགའ་བའི་ཚལ་གྱི་སྐྱེད་མོས་ཚལ་དུ་སོང་ནས་བྲན་པོ་དང༌། བྲན་མོ་དང༌། ལས་བྱེད་པའི་མི་དང༌། མཛའ་བཤེས་དང༌། ཉེ་དུ་རྣམས་དང༌། ཟས་དང་སྐོམ་དང༌། གོས་དང༌། རྒྱན་ལ་སོགས་པ་ཅི་རིགས་པར་འགེད་པ་ཡིན་ན། ད་ནི་ཚེ་འདི་ཉིད་དུ་སྐྲ་སྤགས་ཤིང་ལུས་ལ་དྲི་མའི་ཚོགས་ཀྱིས་གོས་པ་དང༌། བཀྲེས་པ་ལ་སོགས་པའི་སྡུག་བསྔལ་གྱིས་ལུས་དང༌། ཡན་ལག་ལ་སོགས་པ་ཐམས་ཅད་ཡོངས་སུ་སྐམས་པ། རས་རྙིངས་ཤིང་དེངས་ལ་ཤིན་ཏུ་དྲི་མ་ཅན་གྱི་དུམ་བུ་རས་རྙིང་ཞིག་བརྒྱ་སྟོང་གི་གནས་སུ་གྱུར་པས་རྐེད་པའི་ཕྱོགས་བཀབ་པ། གྲོང་ཁྱེར་བ་ཐམས་ཅད་ཀྱི་ཐ་ཆད་དུ་གྱུར་ནས་གཞན་གྱི་ཁྱིམ་དུ་གླ་མིའི་ལས་བྱེད་པས་སྡུག་བསྔལ་དང༌། ཡིད་མི་བདེ་བ་ཆེན་པོ་ཉམས་སུ་མྱོང་བར་འགྱུར་རོ། །ཀྱེ་མའོ་སྐལ་བའི་ཕྱིར་ཅི་ལོག །ཀྱེ་མའོ་ལོངས་སྤྱོད་རྣམས་ཀྱིས་ཤིན་ཏུ་གཡོ་བ། ཀྱེ་མའོ་ལས་རྣམས་ཀྱི་རྣམ་པ་སྣ་ཚོགས་པ་ཡང་སྨྲས་པ། དར་གྱི་གོས་སོགས་རབ་གྱོན་ཞིང༌། །རྒྱན་རྣམས་ཀུན་གྱིས་རབ་བརྒྱན་ཏེ། །སྔོན་ཆད་ལྷ་ཡི་བུ་མོ་འདྲ། །ད་ལྟར་ལམ་པོ་ཆེན་འཁྱམས། །སྐལ་བ་དེ་ཉིད་ཟད་གྱུར་པས། །ལུས་ལ་དྲི་མས་གོས་གྱུར་
ཅིང༌། །རས་རྙིང་དྲི་ངའི་དུམ་བུ་གྱོན། །ད་ལྟ་འདི་འདྲ་གྱུར་པ་ཡིན། །སྔོན་ནི་ལྷ་ཡི་བུ་མོ་ལྟར། །སྐྱེས་པའི་མིག་གི་བདུད་རྩིར་གྱུར། །ད་ལྟར་ཡི་དགས་མོ་འདྲ་བར། །མཐོང་ནས་དེ་ཉིད་ཡིད་ཀྱང་སྐྱོ། །སྔོན་ནི་ནོར་གྱིས་ཕུན་སུམ་ཚོགས། །གྲོང་ཁྱེར་པ་ཡི་མཆོག་གྱུར་གང༌། །དེ་ནི་ད་ལྟར་ཕོངས་པ་བས། །ཤིན་ཏུ་ཕོངས་པ་ཉིད་དུ་འགྱུར། །སྔོན་གྱི་ཕུན་ཚོགས་ཆེན་པོ་ལ། །དགའ་བས་ཡོངས་སུ་ལོངས་སྤྱོད་པ། །མྱ་ངན་སྡུག་བསྔལ་ལྡན་པ་ཡི། །གནས་སྐབས་དེ་འདིས་ཐོབ་པར་གྱུར། །ཀྱེ་མའོ་འཁོར་བའི་བདག་ཉིད་ངན། །ཀྱེ་མའོ་ཕུན་ཚོགས་མི་རྟག་ཉིད། །གང་ཞིག་དེ་ལྟར་བདེར་གྱུར་ཉིད། །སྡུག་བསྔལ་སྣོད་ཅན་ཉིད་དུ་གྱུར། །དེ་ནས་དེད་དཔོན་གྱི་ཆུང་མ་མང་ག་གཞུག་པའི་བུ་མོ་དང་ལྷན་ཅིག་ཏུ་རིམ་པ་དེ་ཉིད་ཀྱིས་གཞན་གྱི་ཁྱིམ་དུ་གླ་མིའི་ལས་བྱེད་པ་ལ་ཞུགས་པ་ན་གཞོན་ནུ་གཟུགས་ངན་གྱི་བསོད་ནམས་ཀྱི་དབང་གིས་ཉིན་རེ་ཞིང་གླ་རྙེད་པ་འགྲིབས་པར་གྱུར་ཏོ། །ཇི་ཙམ་ན་དུས་གཞན་ཞིག་གི་ཚེ་ཉི་མ་མ་ནུབ་བར་དུ་ཉིན་མོ་ལས་བྱེད་དུ་བཅུག་ཀྱང་ཅི་ཡང་རྙེད་པར་མ་གྱུར་པ་ནས། ཇི་སྲིད་ལས་ཀྱང་སུས་ཀྱང་བྱེད་དུ་མ་བཅུག་པ་དང༌། ཇི་ཙམ་ན་དེད་དཔོན་གྱི་ཆུང་མ་མངག་གཞུག་མའི་བུ་མོ་དེ་དང་ལྷན་ཅིག་ཀུན་དུ་སྨྲ་བ་རྩོམ་པ། ཡང་ད་ནི་ལས་ཀྱང་བྱེད་དུ་མ་བཅུག་གིས་རྣམ་པ་ཐམས་ཅད་དུ་སློང་མོ་སྤྱད་པར་བྱའོ་ཞེས་བགྲོས་ཏེ། དེ་སློང་ཕོར་ཐོགས་ནས་སློང་མོ་སྤྱད་པ་ལ་ཞུགས་སོ། །གང་གི་ཚེ་གཞན་ནུ་མི་སྡུག་པ་འགྲོ་ནུས་པ་དེའི་ཚེ་དེ་ལ་མས་བུ་ད་ནི་ཁྱོད་རང་ཉིད་སློང་མོ་སྤྱོད་དུ་སོང་ལ་ལོངས་སྤྱོད་ཅིག་ཅེས་སྨྲས་ནས། དེས་དེ་ལ་སློང་ཕོར་བྱིན་པ་དང༌། དེ་སློང་ཕོར་དེ་ཐོགས་ནས་ཚོང་འདུས་སུ་ཞུགས་པ་དང༌། དེ་ཡང་པགས་པའི་མདོག་ཤིན་ཏུ་གནག་པ། གཟུགས་ཤིན་ཏུ་མི་སྡུག་པ། མཚན་མ་ངན་པ་བཅོ་བརྒྱད་དང་ལྡན་པས་ལུས་སྨད་པར་འོས་པ་མཐོང་བ་དང༌། འཇིག་རྟེན་པ་རྣམས་ཤིན་ཏུ་ཡང་རྒྱབ་ཀྱིས་ཕྱོགས་པར་གྱུར་ནས་ཐུར་དུ་ལྟ་ཞིང་འགྲོའོ།། དེ་གང་གི་ཁྱིམ་གྱི་སྒོར་སོང་བ་དེར་དེའི་ལུས་ལས་དྲི་ཤིན་ཏུ་མི་ཞིམ་པ་འབྱུང་བ་དང༌། མོད་ཁོ་ན་ལ་སྣ་ཁུང་གཉིས་བཀག་ནས་ཤིང་དང་རྡོ་བ་དང་གྱོ་མོ་ལ་སོགས་པས་བརྡེགས་ཏེ་འདི་ནས་མྱུར་དུ་སོང་ཤིག་ཅེས་གྲོང་ཁྱེར་གྱི་མི་གཙང་པ་འདམ་རྫབ་འགྲོ་ཤེས་པ་ལྟ་བུར་ལྟ་ཞིང་སྐྲོད་པར་བྱེད་དོ།
གང་དང་གང་དུ་སོང་བ་དེ་དང་དེར་ཤིང་དང་རྡོ་དང་གྱོ་མོ་ལ་སོགས་པ་རྣམས་ཀྱིས་བརྡེགས་ནས་སྐྲོད་པར་བྱེད་དོ། །དེས་སློང་མོ་གཅིག་ཀྱང་རྙེད་པར་མ་གྱུར་ཅིང་ཤིང་དང་རྡོ་དང་གྱོ་མོ་ལ་སོགས་པ་རྣམས་ཀྱིས་བརྡེགས་པས་སློང་ཕོར་ཡང་ཆག་པར་གྱུར་ནས། སྨྲེ་སྔགས་འདོན་བཞིན་དུ་མའི་དྲུང་དུ་ཕྱིན་ཏེ། ཤིན་ཏུ་ཡང་ཞུམ་པར་གྱུར་པས་ཆོ་ངེས་འདེབས་པ་ལ་ཞུགས་སོ། །དེ་ནས་དེ་མཐོང་པ་དང་བྲང་བརྡུངས་ཏེ། སྨྲས་པ། ཀྱི་ཧུད་བུ་ཁྱོད་སྡུག་བསྔལ་ཏེ། །སུ་ལའང་གནོད་པ་མ་བྱས་པར། །སྙིང་རྗེ་སྤངས་པ་གང་ཞིག་གིས། །འདི་ལྟར་བརྡེགས་པས་ཁྱོད་སྡུག་བསྔལ། །དེ་ནས་གཞོན་ནུ་མི་སྡུག་པས་སྒྲ་དང་བཅས་པར་རབ་ཏུ་དུས་ཏེ་སྨྲས་པ། གང་དང་གང་གི་ཁྱིམ་སྒོར་ནི། །སློང་མོ་སྤྱད་ཕྱིར་བདག་འགྲོ་བ། །དེ་དང་དེར་ནི་གྱོ་མོ་རྡོ། །ཤིང་ལ་སོགས་པ་བདག་ལ་རྡེག །དེ་ཐོས་པ་དང་དེད་དཔོན་གྱི་ཆུང་མས་གཞོན་ནུ་མི་སྡུག་པའི་མགུལ་ནས་འཁྱུད་དེ། སྒྲ་དང་བཅས་པས་དུས་ཏེ་སྨྲས་པ། ཉེས་པ་མེད་ཀྱང་ཤིན་ཏུ་ནི། །གང་དག་གཞན་གྱིས་བརྡེགས་གྱུར་པས། །སྐྱེ་བ་གཞན་དུ་བུ་ཁྱོད་ཀྱིས། །སྡིག་པ་མི་བཟང་བྱས་པར་ངེས། །ཀྱི་ཧུད་ཁྱོད་ནི་སྡུག་བསྔལ་ལོ། །བདེ་བ་ཀུན་དང་རྣམ་བྲལ་བ། །ཤིན་ཏུ་མི་སྡུག་གྱུར་པ་འདི། །དམན་པ་ཅི་ཙམ་མཐོང་ན་གོ །སེམས་ལྡན་སྙིང་རྗེ་ཅིས་མི་སྐྱེ། །ཀྱི་ཧུད་བཅོམ་ཞིང་ཉམས་པ་བདག །བུ་ཁྱོད་ཀྱི་ནི་སློང་མོ་སྣོད། །བཅོམ་པས་ལུས་ཀྱང་བཅོམ་ཡིན་ཏེ། །སློང་མོ་ཙམ་གྱིས་འཚོ་བ་ཡིན། །ཕ་དང་མ་དང་བྲལ་བ་དང༌། །ཁྱིམ་གྱི་རྟེན་ནི་མེད་གྱུར་ལ། །གང་གིས་སྙིང་རྗེ་སྤངས་ནས་ནི། །ཁྱོད་ཀྱི་སློང་སྣོད་དེ་བཅག་གྱུར། །རིགས་རྒྱུད་ཐམས་ཅད་ཉམས་གྱུར་ཅིང༌། །བཤེས་དང་གཉེན་གྱིས་རྣམ་སྤངས་པས། །བླ་མ་མཛའ་བོ་མགོན་གྱུར་ཉིད། །སློང་སྣོད་སུ་ཡིས་བཅག་པར་གྱུར། །ཀྱི་ཧུད་བུ་སྡུག་དམན་པ་མཐོང་ནས་ནི། །ཁྱོད་ལ་སུ་ཡིས་དཔལ་ཚུལ་བསྟན་པར་གྱུར། །ཀྱི་ཧུད་སྔོན་གྱི་རང་གི་ལས་ཀྱིས་ནི། །བུ་སྡུག་ཁྱོད་ནི་གནོད་པས་བཅོམ་པར་གྱུར། །ཀྱི་ཧུད་དམན་པའི་བུ་ལ་དཔའ་བ་ནི། །གང་གི་སྙིང་ལ་བརྩེ་བ་མི་སེམས་པས། །རྡོ་དང་སོ་ཕག་རྩུབ་པ་ལྟ་བུ་ཡི། །སེམས་ཅན་གང་ཡིན་དེ་རིང་ཁྱོད་ཀྱིས་སྨྲོས། །ཀྱི་ཧུད་སྒོ་བརྒྱས་བཅོམ་པ་ཡི། །སྡུག་བསྔལ་གྱིས་གདུངས་སློང་མོ་རྒྱུ། །ཇི་ལྟར་ཁྱོད་ལ་གཞན་
རྡེག་པར། །འཇིག་རྟེན་ཡིད་ནི་སྤྲོ་བར་གྱུར། །བཀྲེས་དང་སྐོམ་པས་ཡོངས་དུབ་ཅིང༌། །ཕུན་ཚོགས་ཀུན་གྱིས་རྣམ་སྤངས་པ། །ནད་དང་སྡུག་བསྔལ་རྣམས་ཀྱིས་གདུངས། །ཁྱེད་ལ་སུ་ཞིག་བརྡེག་པར་བརྩོན། །ཉམ་ཐག་དམན་པའི་བཞིན་གྱིས་ནི། །དུ་ཞིང་བཀྲེས་པས་རབ་གཟིར་བ།། ལྐོག་མ་སྐམ་པ་མཐོང་ན་དེང༌། །ཁྱོད་ལ་སུ་ཡིས་བརྩེ་མ་བྱས། །དེར་ནི་ནད་ཀྱིས་ཟིལ་མནན་ཅིང༌། །སྡུག་བསྔལ་ལྡན་པ་བརྩེ་སྤངས་ཏེ། །རིགས་སྙེམས་དྲེགས་པས་དཀྲུགས་པ་ནི། །གང་གིས་བུ་ཁྱོད་ཇི་ལྟར་རྡེགས། །ཀྱི་ཧུད་གང་གིས་ཁྱེད་བཀྲེས་གཟིར། །སློང་མོས་ཉེས་བསགས་གྱུར་པ་ཡིས། །བཟའ་བ་ཆུང་དུ་དེ་ཡང་དེང༌། །ཁྱི་དང་ཝ་ཡང་སྤྱོད་པར་བྱེད། །ཀྱི་ཧུད་བུ་སྡུག་བསྔལ་ངན་པ། །དྭ་གོ་ད་ནི་ཇི་ལྟར་བྱེད། །སྔོན་བྱས་སྡིག་པ་བྱེད་པ་པོ། །མི་སྡུག་ལས་ཀྱིས་བཅོམ་པར་གྱུར། །དེ་ལྟར་དེ་རྣམ་པ་དུ་མས་མྱ་ངན་བྱེད་བཞིན་དུ་འཆག་ཅིང་གྲུགས་པའི་གནས་ཀྱི་བུམ་བུའི་མདུན་དུ་ཁྲག་གི་རྒྱུན་གྱིས་ཡན་ལག་གོས་པའི་བུ་ལ་འཁྱུད་ནས། ཕྱག་དར་དང༌། གྱོ་མོ་མི་གཙང་བ་དང༌། ཚེར་མ་ལ་སོགས་པས་ཁྱབ་པའི་སར་བསྙལ་ཏེ། དལ་བུ་དལ་བུས་ལག་པས་མཉེ་བར་བརྩམས་པ་དང༌། ཇི་ཙམ་ན་སྲང་བར་དེ་ན་ཚོང་དཔོན་གྱི་བུ་དང༌། དེད་དཔོན་གྱི་བུ་དང༌། གཞན་ཡང་མཐོ་ཞིང་མཐོ་བའི་བྲམ་ཟེ་དང་ཁྱིམ་བདག་རྣམས་ཀ་ཤི་ཀའི་རས་དང༌། བ་ཀུ་ལའི་རས་དང༌། ཀོ་ཏམ་པའི་རས་དང༌། དར་དང་མོན་དར་དང༌། རས་ཕྲ་ཞིང་རིན་ཆེ་བ་སྣ་ཚོགས་གྱོན་པ་དང༌། མགུལ་གདུབ་དང༌། གདུ་བུ་དང༌། དཔུང་རྒྱན་དང༌། རྣ་ཆ་དང༌། དོ་ཤལ་དང༌། སེ་མོ་དོ་སྣ་ཚོགས་པའི་རྒྱན་གྱིས་བརྒྱན་པ་དང༌། དྲི་ཞིམ་པའི་མེ་ཏོག་གི་ཚོགས་ཁ་བྱེ་བ་རྣམ་པ་སྣ་ཚོགས་ཀྱིས་ལུས་ལ་སྤུད་པ་འགྲོ་བ་མཐོང་བ་དང༌། དེ་བདག་ཉིད་ཤིན་ཏུ་སྡུག་བསྔལ་བའི་གནས་སྐབས་ལ་བལྟས་ཤིང༌། བུ་མི་སྡུག་པ་དེ་ཡང་དེ་བཞིན་དུ་བཞིན་དམན་པ་ལ་བལྟས་ནས་དབུགས་ཚ་བ་རིང་པོ་ཕྱུང་སྟེ། མཆི་མ་དང་བདས་པས་ཤིན་ཏུ་དམན་པའི་ཚིག་གསང་མཐོང་པོས་སྨྲས་པ། ཕུན་ཚོགས་དུ་མ་བརྒྱས་ཁྱབ་པ། །རིན་ཆེན་གྱིས་ནི་རྒྱ་མཚོ་བཞིན། །རྒྱས་པའི་རིས་སུ་གྱུར་ནས་ཀྱང༌། །བདེ་བའི་མཆོག་ལ་རྗེས་སུ་སྤྱད། །རྒུད་པའི་ཆ་ལས་བྱུང་བས་ན། །ཕྱག་དར་
ཁྲོད་ཀྱི་སེབ་གནས་ཤིང༌། །ཟས་མ་རྙེད་པས་བཀྲེས་པ་དང༌། །ཤིན་ཏུ་ཉམ་ངས་འཚོ་བར་གྱུར། །མྱ་ངན་རྒྱ་མཚོ་སྡུག་བསྔལ་ཆུ་རླབས་འཇིགས། །གདུང་བའི་ཆུ་སྲིན་མི་ཟད་བརྒྱ་ཡིས་ཁྱབ། །དབུལ་བའི་ཆུ་ཀླུང་རྒྱ་མཚོར་ཞུགས་གྱུར་ནས། །ཀྱེ་ཧུད་བཅོམ་ཞེས་སྒྲ་ནི་རྣམ་པར་སྒྲོགས། །རྒུད་པའི་ཆུ་སྲིན་བརྒྱ་ཡིས་ཀུན་དུ་དཀྲུགས། །ཕོངས་པའི་རྦ་རླབས་འཇིགས་པ་རབ་ཏུ་གཡོ། །ནད་ཅེས་འཇིགས་པ་མི་བཟད་ནུབ་པ་ཡིས། །དབུ་བའི་རང་བཞིན་ཆུ་བོར་ཞུགས་པར་གྱུར། །སྡུག་བསྔལ་རྡོ་ཁྲོད་ནད་ནི་རྩུབ་པས་ཁྱབ། །གདུང་བའི་སེང་གེའི་སྒྲ་ཡིས་གང་བའི་ཡུལ། །མྱ་ངན་བྱ་ནི་བརྒྱ་ཕྲག་ལྷགས་གྱུར་པ། །དབུལ་བའི་སྡུག་བསྔལ་གནས་ནི་ཐོབ་པར་གྱུར། །བག་མེད་འཁྲུལ་པ་དག་གིས་བསམས་པས་སྔོན། །དམ་པ་རྣམས་ལ་སྦྱིན་པ་མ་བྱིན་པས། །ད་ལྟ་འདི་ནས་སྐལ་ངན་དམན་པ་ཡིས། །དྲེགས་ལྡན་གདོང་ལ་རྟག་ཏུ་ལྟ་བར་བྱེད། །དམན་དང་སྐལ་པ་དང་བྲལ་རྨོངས་དང་ནི། །སློང་མོ་ལ་སྤྱོད་སློང་མོའང་མང་དུ་མ་བྱིན་པས། །གང་དེས་གནས་ཁང་ཙམ་ཡང་འབྱོར་པར་མ་གྱུར་པའི། །དམན་ཞིང་ཕོངས་པའི་མི་བཟད་དག་ཏུ་ཞུགས་པར་གྱུར། །ངེས་པར་ས་སྟེང་ཀུན་གྱིས་བཀུར་བའི་བླ་མ་དང༌། །ཡང་དག་ཕྲད་ཀྱང་བརྙས་ཤིང་བསྙེན་བཀུར་མ་བྱས་པ། །གང་དེས་དེ་ལྟར་ཡུ་བུ་བརྙས་པར་གྱུར་པ་དང༌། །དེ་ལྟར་འགྲོ་བའི་རྨོངས་པའི་སྣོད་དུ་གྱུར་པ་ཡིན། །གང་གིས་རྡོ་དང་བོང་པ་ཡིས། །འགྲོ་འདི་བདག་ཅག་བརྡེགས་གྱུར་པ། །སྔོན་གྱི་སྐྱེ་བར་ལེགས་བསྡམས་པ། །མང་པོ་ངེས་པར་བརྡེགས་པ་ཡིན། །གང་གིས་འཇིག་རྟེན་པ་རྣམས་ནི། །ཀུན་ནས་ཡོངས་སུ་སྣད་གྱུར་པ། །སྔོན་ནི་བླ་མའི་སྐྱེ་བོ་ལ། །ཡོངས་སུ་སྤྱོས་པར་གྱུར་པར་ངེས། །གང་འདིས་བརྙས་པའི་སྡུག་བསྔལ་ནི། །ཤིན་ཏུ་མི་བཟད་རྗེས་ཐོབ་པ། །སྔོན་ཆད་བླ་མའི་སྐྱེ་བོ་ལ། །ཡོངས་སུ་བརྙས་པར་གྱུར་པར་ངེས། །ཡུ་བུས་སྔོན་གྱི་སྐྱེ་བོ་ལ། །བློ་བུར་ལྷགས་ལ་གོས་དག་ནི། །མ་བྱིན་པ་ནི་གང་ཡིན་པས། །ད་ལྟར་ཡུ་བུ་གོས་མེད་གྱུར། །གང་གིས་གཉེན་བཤེས་དང་བྲལ་ཏེ། །ཡུ་བུ་སྡུག་བསྔལ་ཡུན་རིང་དུ། སེ་པོ་མང་པོ་དུ་བ་ཡི། །ང་རོ་འདོན་དུ་བཅུག་པ་ཡིན། །གང་གིས་གསེག་མ་རྡོས་ཁྱབ་པའི། །ས་གཞིར་ཡུ་བུ་ཉལ་གྱུར་པ། །སྣ་ཚོགས་གོས་ནི་བཀབ་པ་
ཡིས། །མལ་སྟན་སྔོན་མ་བྱིན་པ་ཡིན། །སྟན་ནི་རྣམ་པ་སྣ་ཚོགས་པ། །དམ་པ་རྣམས་ནི་མ་བྱིན་པས། །གང་གི་ཚེར་མ་མང་པོ་ཡིས། །ཁྱབ་པའི་ས་ཡི་གཞི་ལ་གནས། །གང་གི་ཚེར་མས་ཁྱབ་པ་ཡི། །ས་གཞིར་ཡུ་བུ་རྣམ་རྒྱུ་བ། །སྔོན་ཆད་ལྷམ་དང་བཞོན་པ་ནི། །བདེ་བསྐྱེད་པ་མ་བྱིན་ཡིན། །ཉི་མའི་འོད་ཚོགས་རྣམས་ཀྱིས་དབུས་ཀྱི་ཆ་སྣང་བྱས། །ཕྱག་དར་ཕུང་པོ་གང་གིས་འདི་ནི་ཡུ་བུ་གནས། །སློང་བའི་འགྲོ་ལ་ཁང་པའི་གནས་ཙམ་ཕལ་ཆེར་ནི། །གནས་ཀྱི་སེར་སྣས་ངེས་པར་མ་བྱིན་གྱུར་པ་ཡིན། །གང་གིས་ད་ལྟར་ཡུ་བུ་ཤིན་ཏུ་ཁ་སྐམས་ལ། །མགྲིན་པར་སྐམས་ཤིང་ཁ་དང་འགྲམ་པ་ཡོངས་སྐམས་པ། །ཡིད་ལ་ཆུ་འདོད་ཀུན་དུ་བལྟས་ནས་སྔོན་ཆད་ནི། །དེ་ལ་བསིལ་གྱུར་ཆུ་ནི་སྦྱིན་པ་མ་བྱིན་ཞིང༌། །སློང་དང་སྡུག་ཕོངས་པ་ལ་ཟས་མ་བྱིན་པ་དང༌། །གཉེན་དང་མཛའ་བཤེས་ལ་མིན་རྩ་ལག་ཚོགས་ལའང་མིན། །ལེགས་པར་སྤྱད་ནས་ཐམས་ཅད་ལས་ཀྱིས་ལོངས་སྤྱོད་པ། །དེས་ན་འདིར་ནི་ཟས་བྲལ་ཡུ་བུ་ཡོངས་སུ་འཁྱམས། །སྲིད་པ་གཞན་དུ་རྣམ་པ་མང་པོར་ངེས་པར་ནི། །གཞན་གྱི་དོན་སྒྲུབ་མཁས་པ་རྣམས་ལ་མཚང་འདྲུ་བས། །གང་གིས་འདི་ན་ད་ལྟར་འཇིག་རྟེན་དམན་པའི་ཡང༌། །ཤིན་ཏུ་མཚང་འདྲུའི་གནས་སུ་ཡུ་བུ་ཉེ་བར་གྱུར། །ཡུ་བུས་ཉེས་པ་རྣམ་མང་དུ། །རིགས་ཀྱིས་ཁེངས་ཤིང་དྲེགས་བརྟེན་ལ། །ཡོན་ཏན་ལྡན་པའང་བརྡེགས་པས་ན། །གང་གིས་དེ་ལྟར་མི་བཟད་སྐྱེད། །འཁོར་བའི་རྒྱ་མཚོ་འདི་ཉིད་དུ། །ནད་རྣམས་ཐམས་ཅད་སེལ་བྱེད་པའི། །སྨན་ནི་སྔོན་ཆད་མ་བྱིན་པས། །གང་གིས་ནད་ཀྱིས་མངོན་གདུངས་ཡིན། །ཕ་ལ་ཁྲུས་མ་བྱས་ཤིང་མ་དང་བཤེས་ལའང་མིན། །བླ་མ་ཚིམ་པར་མ་བྱས་འཇིག་རྟེན་མགོན་ལའང་མིན། །གང་གིས་ཁྲུས་དང་གདུང་བྲལ་བྱས་པས་སྐྱེས་གྱུར་ཅིང༌། །འདི་ནི་སྡུག་བསྔལ་བརྒྱ་ཡིས་སྐལ་བཅོམ་མགོན་མེད་གྱུར། །བཀྲེས་དང་སྐོམ་པས་ཡོངས་དུབ་ཅིང༌། །གཟའ་དང་བགོ་བ་རྣམ་བྲལ་བ། །ནད་དང་སྡུག་བསྔལ་གྱིས་གདུངས་པ། །ཡུ་བུ་སུ་ཞིག་སྐྱོང་བར་གྱུར། །འཇིག་རྟེན་དུ་ནི་རྙེད་དཀའ་བའི། །གང་གིས་དེ་ནི་སྲོག་སྟོར་ཞིང༌། །ཡུ་བུས་གང་གི་བྲན་དང་ནི། །དེ་རིང་སུ་ཡི་ལས་བྱེད་བྱ། །ཀྱེ་མའོ་དབུལ་བ་སྡུག་བསྔལ་ཏེ། །
ཀྱེ་མའོ་བསོད་ནམས་མ་བྱས་ཉིད། །འདི་ལྟར་རྒྱས་པའི་གྲོང་ཁྱེར་དུའང༌། །མགོན་མེད་ཡུ་བུ་ཇི་བཞིན་ནོ། །འདི་དང་གཞན་དག་ཡང་དེད་དཔོན་གྱི་ཆུང་མ་བཀྲེས་པས་ཡོངས་སུ་གདུངས་པའི་ཡིད་དང་བདག་ཉིད་སྨྲེ་སྔགས་འདོན་ཞིང་གནས་སོ། །དེད་དཔོན་རྣ་ཅན་ཡང་རྒྱ་མཚོ་ཆེན་པོར་གྲུ་ཞིག་པ་དང༌། སྟེས་དབང་གིས་བྱིས་པ་གཅིག་དང་ལྷན་ཅིག་སྤང་ལེབ་ལ་འཇུས་ཏེ་ཆུའི་གནས་ནས་རྒལ་ནས་ཤིན་ཏུ་ཉམ་ཐག་པ་ཆེན་པོས་སློང་མོ་རྒྱུ་ཞིང་རྒྱལ་པོའི་ཕོ་བྲང་མཉན་ལྡན་དུ་ཕྱིན་པ་དང༌། དེ་དེར་ཕྱི་རོལ་གྱི་ཞིང་གཅིག་ཏུ་མཚན་མོ་གནས་པར་གྱུར་པ་ན། དེར་ཡང་ཞོ་ཤས་འཚོ་བའི་སྐྱེས་བུ་གཞན་ཞིག་གནས་པ་དེས་དེ་ཤེས་པ་དང༌། དེ་འདི་སྙམ་དུ་སེམས་ཏེ། དེད་དཔོན་འདི་ཤིན་ཏུ་རིང་པ་དང༌། བདོག་བའི་རྫས་ཐམས་ཅད་ཉམས་པ་དང༌། ཁྱེའུ་གཅིག་དང་ལྷན་ཅིག་འོངས་ན་དེ་ལ་ཁྱིམ་གྱི་ལོ་རྒྱུས་ཇི་ལྟར་བརྗོད་པར་བྱ། ཡང་ན་རང་ཉིད་ཀྱིས་ཤེས་པར་འགྱུར་གྱི་སྙམ་ནས་དེས་དེ་ལ་ལག་པ་བཀྲུ་བའི་ཆུ་བྱིན་ཏེ། མ་ཤའི་སྣུམ་ཁུར་གཉིས་བྱིན་ནོ། །དེ་ནས་དེད་དཔོན་རྣ་ཅན་ལག་པ་སྟོང་པས་ཁྱིམ་དུ་འཇུག་པར་མི་བྱའོ་སྙམ་ནས། མ་ཤའི་སྣུམ་ཁུར་གཅིག་བཞག་ནས་ཁྱེའུའི་ལག་ཏུ་གཏད་ཅིང༌། གཅིག་ཕྱེད་ཕྱེད་དུ་བགོས་ཏེ་བཟའ་བའི་དོན་དུ་ཁྱེའུ་དེ་དང་ལྷན་ཅིག་ཟོས་སོ། །དེ་ནས་ཉི་མ་གཉིས་པ་ལ་མ་ཤའི་སྣུམ་ཁུར་དེ་ཐོགས་ནས་ཤིན་ཏུ་རྩུབ་ཅིང་ལུས་ཉམ་ཆུང་བ་དང༌། ཤིན་ཏུ་དྲི་མ་དང་བཅས་པའི་རས་གཅིག་ཙམ་ཞིག་གྱོན་ནས་རྒྱལ་པོའི་ཕོ་བྲང་མཉན་ལྡན་དུ་ཞུགས་ཏེ། རང་གི་ཁྱིམ་དུ་ཆས་སོ། །གཞོན་ནུ་མི་སྡུག་པའམ་ནམ་ལངས་པའི་དུས་ཉིད་ན་བཀྲེས་པ་དང༌། སྐོམ་པས་ཡོངས་སུ་ཉམ་ཆུང་བ་བཞིན་དུ་དང༌། སྐལ་པ་ངན་པ་བདག་ཉིད་འདི་ན་གནས་པས་ཅི་ཞིག་བྱ། སྲོག་ཀྱང་དགོས་པ་མེད་ཀྱིས་སོང་ལ་བདག་ཉིད་གསོད་པར་བྱའོ་སྙམ་ནས། དེས་མ་ལ་སྨྲས་པ། མ་བདག་ནི་ཕའི་སྐྱེད་མོས་ཚལ་དུ་མཆི་ཞེས་སྨྲས་ཏེ། སྐྱེད་མོས་ཚལ་དེར་ཆས་སོ། །དེད་དཔོན་རྣ་ཅན་ཡང་རང་གི་ཁྱིམ་དང་ཉེ་བར་ཕྱིན་པ་དང༌། ཅི་ཙམ་ཞིག་ནས་རིང་པོ་མ་ལོན་པར་དུར་ཁྲོར་གྱི་མདོག་ཅན་གྱི་སའི་ཚོགས་ཙམ་ལྷག་མར་ལུས་པ་མཐོང་ནས་བལྟས་ཏེ། འདི་ཅི་ཞིག་ཡིན་ཞེས་བསམས་ནས། གནས་ཞིག་པའི་ཕྱེད་དུ་མ་དེར་ཕྱིན་པ་དང༌། གནས་ཞིག་པའི་ཕྱེད་དུམ་དེ་ན་
ཆུང་མ་བྲན་མོ་ཞིག་དང་ལྷན་ཅིག་གནས་ལ། ཤིན་ཏུ་དམན་པས་ཉམ་ཆུང་བའི་བཞིན་དང༌། རས་ཀྱི་དུམ་བུ་དྲི་མ་ཅན་གྱིས་སྐེད་པའི་ཕྱོགས་བཀབ་པ་དྲི་མའི་ཚོགས་ལུས་ལ་གོས་པ་མཐོང་ངོ༌། །མཐོང་ནས་ཀྱང་ཀྱི་ཧུད་འདི་ཅི་ཞིག་ཡིན་ཞེས་སྨྲས་ཏེ། བརྒྱལ་ནས་ས་ལ་འགྱེལ་བ་དང༌། རླུང་གྲང་མོས་ཕོག་པས་ཡུན་རིང་མོ་ཞིག་ནས་དྲན་པ་རྙེད་དེ། དེ་ཆུང་མའི་ཐད་དུ་ཕྱིན་པ་དང་འདི་ཅི་ཞིག་ཡིན་ཞེས་སྨྲས་ཏེ། གསང་མཐོན་པོས་ཆོ་ངེས་འདེབས་པ་ལ་ཞུགས་སོ། །དེ་ནས་ཆུར་མ་ལས་ཇི་ལྟར་གྱུར་པ་ཐོས་པ་དང༌། དབུགས་ཚ་བ་རིང་པོ་ཕྱུང་སྟེ་སྨྲས་པ། ངས་ནི་ངེས་པར་སྦྱིན་པའི་ཞིང་ལ་བྱ་བ་མ་བྱས་པ་གང་གིས་འདི་ལྟར་རྒྱུད་པར་གྱུར་ན། ད་འདི་ལ་ཇི་ལྟར་བསྒྲུབ་པར་བྱ། གང་ལ་སྐྱབས་སུ་འགྲོ་བར་བྱ། སུའི་བཞིན་ལ་བལྟ་བར་བྱ། འཇིག་རྟེན་དམན་ཞིང་གཞན་པ་ལ་ཐུགས་བརྩེ་བ་ནི་སུ་ཞིག་ཡིན། སུ་ཞིག་འོངས་ནས་ང་དབུལ་བའི་རྒྱ་མཚོ་འདི་ལས་བརྒལ་བར་བྱ། སུ་ཞིག་འོངས་ནས་རྒུད་བའི་འདམ་འདི་ལྟ་བུ་བཀྲུ་བར་བྱ། སུ་ཞིག་འོངས་ནས་སྡུག་བསྔལ་གྱི་ཆུ་བོ་འདི་ལས་བརྒལ་བར་བྱ། སུ་ཞིག་འོངས་ནས་དབུལ་བའི་དགྲ་འདི་ལས་རྒྱལ་བར་བྱ། སུ་ཞིག་འོངས་ནས་སྡུག་བསྔལ་ཐམས་ཅད་ཀྱི་རྩ་བའི་ཤིང་དབྱུང་བར་བྱ། སུ་ཞིག་འོངས་ནས་སྡུག་བསྔལ་གྱི་ཤིང་འདི་རྩ་བ་ནས་གདོན་པར་བྱ། སུ་ཞིག་འོངས་ནས་བཀྲེས་པ་དང་སྐོམ་པའི་མཆེ་བ་གཙིགས་པའི་ཁ་ནས་ཧ་ཧ་ཞེས་འཇིགས་པའི་སྒྲ་ཅན་གྱི་དབུལ་བའི་སྲིན་པོ་ཆེན་པོ་མེད་པར་བྱ། སུ་ཞིག་འོངས་ནས་དབུལ་བའི་གྱད་འདི་ལས་རྒྱལ་བར་བྱ། སུ་ཞིག་འོངས་ནས་བཀྲེས་པ་དང་སྐོམ་པ་ལ་སོགས་པས་རབ་ཏུ་འབར་བའི་མེ་འདི་གསད་པར་བྱ། སུ་ཞིག་འོངས་ནས་རྒུད་པ་གསོ་བའི་གླང་པོ་ཆེ་འདི་གདུལ་བར་བྱ། སུ་ཞིག་འོངས་ནས་ངའི་སྡུག་བསྔལ་དཔག་ཏུ་མེད་པའི་དུག་གི་མཆེ་བ་དང་ལྡན་པའི་སྤྲུལ་ཆེན་འདིའི་དུག་འདི་དུག་མེད་པར་བྱ། སུ་ཞིག་འོངས་ནས་ངའི་ཐམས་ཅད་འཕྲོག་པའི་དབུལ་བའི་དཔའ་བོ་བཟློག་པར་བྱ། སུ་ཞིག་འོངས་ནས་ངའི་སྡུག་བསྔལ་ཐམས་ཅད་ཀྱིས་བསྡམས་པའི་བདག་ཉིད་ཅན་གྱི་དབུལ་བའི་ལྕགས་སྒྲོག་འདི་གཅད་པར་བྱ། སུ་ཞིག་འོངས་ནས་ངའི་དབུལ་བའི་བཙོན་ར་འདི་ལས་བརྒལ་བར་བྱ། སུ་ཞིག་འོངས་ནས་ངའི་
དབུལ་བའི་སྒོ་གླེགས་འདི་དབྱེ་བར་བྱ། སུ་ཞིག་འོངས་ནས་ངའི་དབུལ་བའི་གཤིན་རྗེ་འདི་མི་སྣང་བར་བྱ། སུ་ཞིག་འོངས་ནས་ངའི་སྲེད་པའི་རྒྱ་མཚོ་འདི་ལས་བརྒལ་བར་བྱ། སུ་ཞིག་འོངས་ནས་ངའི་དབུལ་བའི་འབྲོག་དགོན་པ་འདི་ལས་ཐར་པར་བྱ་ཞེས་བྱ་བ་ལ་སོགས་ལ་སྙིང་རྗེ་ཞིང་དམན་པ་ལ་དམིགས་པའི་ཚིག་རྣམ་པ་དུ་མ་བརྗོད་ཅིང་ཆོ་ངེས་འདེབས་པར་གྱུར་ཏོ། །གནས་སྐབས་དེར་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་རིག་པ་ཅི་ཡང་མི་མངའ་བ་ནི་ཆོས་ཉིད་ཡིན་པས། སངས་རྒྱས་བཅོམ་ལྡན་འདས་སྟོན་ཀའི་ཉི་མ་འཆར་ཀ་ལྟར་འོད་ཟེར་དམར་སེར་འགྱེད་པ་དང༌། ནོར་བུ་རང་གི་ཡོན་ཏན་གྱིས་ཡོངས་སུ་སྤྲས་པས། ཀུན་ནས་དམར་སེར་དུ་སྣང་བ་དང༌། ཉི་མ་འཆར་ཀས་ཕྱེ་བའི་པདྨའི་གེ་སར་མ་ལུས་པའི་ཚོགས་དང༌། ཨུཏྤ་ལ་དང༌། མརྒད་དང༌། འཇའ་ཚོན་དང༌། དྲི་མ་མེད་པའི་གློག་འཁྱིལ་པ་དང༌། མར་གྱི་རྒྱུན་བླུགས་པའི་མེའི་ཚོགས་ལྟར་ཤིན་ཏུ་འབར་བའི་འོད་ཀྱི་ཚོགས་བཀྲ་ཤིས་པའི་འོད་ཟེར་གྱི་ཚོགས་ཀྱིས་རབ་རིབ་དཔག་ཏུ་མེད་པའི་ཚོགས་རྣམ་པར་འཇིག་ཅིང༌། རྒ་ཤི་སྲིད་པའི་གཟེབ་འཛིན་པར་མཛད་པ། དགེ་བའི་རྩ་བ་དཔག་ཏུ་མེད་པ་ལ་མཉམ་པར་གཞག་པ་སྟོབས་སུ་གྱུར་པས་ཀུ་མུ་ཏ་དང༌། དུང་དང༌། ཀུནད་དང༌། དྲི་མ་མེད་པའི་དངུལ་དང༌། མུ་ཏིག་དང༌། ཁ་བ་དང༌། པདྨའི་རྩ་བ་དང༌། དྲི་མ་མེད་པའི་གླང་པོ་ཆེའི་སོ་བཅག་པ་དང༌། འཛམ་བུའི་ཆུ་བོའི་གསེར་གྱི་ཕུང་པོའི་རྩེ་ན་གནས་པའི་མིག་སྟོང་ལྡན་གྱི་གཞུ་ལྟ་བུའི་འོད་ཟེར་འཁྱིལ་པའི་སྣང་བ་དང༌། ནམ་མཁའི་མཐའ་མེད་པར་ཟླ་བ་བརྒྱ་སྟོང་འཆར་བ་ལྟར་དཀར་ཞིང་འཇམ་ལ། སྣུམ་ཞིང་གཡས་སུ་འཁྱིལ་བའི་འོད་འདོམ་གང་བ་དང༌། སྨིན་མ་མཛེས་པའི་བར་ནས་བྱུང་བའི་སྨིན་མཚམས་ཀྱི་མཛོད་སྤུ་རྣམ་པར་མཛེས་པ་དང༌། པདྨ་ཁ་བྱེ་མ་ཐག་ལྟ་བུའི་ཞལ་མངའ་བ། བསྐལ་པ་གྲངས་མེད་པ་གསུམ་དུ་ཕྱག་དང༌། ཞབས་དང༌། སྤྱན་དང༌། ཡན་ལག་མཆོག་དབུ་དང༌། ཉིད་ཀྱི་ཤ་དང༌། རྐང་དང༌། པདྨ་གཞོན་ནུ་ལྟ་བུའི་རང་བཞིན་དང་ལྡན་པའི་སྲས་དང་བཙུན་མོ་དང༌། གླང་པོ་དང༌། རྟ་དང༌། ཤིང་རྟ་དང༌། རྒྱན་དང༌། གོས་
དང༌། སྟན་དང༌། མལ་སྟན་དང༌། ནོར་བུ་དང༌། གསེར་དང༌། དངུལ་དང༌། དངོས་པོ་ཐམས་ཅད་དང༌། རྒྱལ་སྲིད་ལ་སོགས་པ་ཡོངས་སུ་གཏོང་བས་བླ་ན་མེད་པའི་བྱང་ཆུབ་ཀྱི་ཚོགས་ཡོངས་སུ་འཕེལ་བར་མཛད་པ། ཆགས་པ་མི་མངའ་བས་བདུད་ཀྱི་སྟོབས་རྣམས་རབ་ཏུ་བཅོམ་པར་མཛད་པས་སྟོན་ཀའི་ཟླ་བ་དྲི་མ་མེད་པ་ལྟར་ཤིན་ཏུ་དཀར་ཞིང་གསལ་པའི་གྲགས་པའི་ཚོགས་སྟོང་གི་ཕྲེང་བས་བསྐོར་བ་རི་བོ་ལ་འཆར་ཀའི་ཟླ་བའི་འོད་ཟེར་གྱི་ཚོགས་ཀྱི་ལྕུག་མའི་རལ་པའི་དཀྱིལ་འཁོར་དང༌། ཉི་མ་འཆར་ཀའི་འོད་ཟེར་གྱི་ཚོགས་དང༌། སྤྲིན་གྱི་ཚོགས་ལས་བྱུང་བའི་གློག་བརྒྱ་སྟོང་དང༌། བརྒྱ་བྱིན་གྱི་གླང་པོ་ཆེའི་མཆེ་བ་མདུང་གིས་བསྒྱེལ་བ་དང༌། ས་འོག་འཁྲུགས་པ་དང༌། འོ་མའི་རྒྱ་མཚོའི་རབ་རླབས་གྱེས་པ་དང༌། དབང་པོའི་གཞུའི་འོད་ཀྱི་རྩེ་མ་དང༌། ནོར་བུ་མར་གད་བཅག་པ་དང༌། ཟླ་བ་རྒྱས་པ་དང༌། པདྨའི་འདབ་མ་དང༌། ཀླུའི་དབང་པོའི་གཙུག་གི་ནོར་བུ་དང༌། བཻ་ཌཱུཪྻའི་རྡོ་ལེབ་དང༌། ཙམ་པ་ཀ་རྒྱས་པ་རྨ་མེད་པ་ལྟ་བུའི་འོད་ཀྱི་དཀྱིལ་འཁོར་གྱིས་སྐུ་ལ་བསྐོར་བར་གྱུར་པ། ཉིད་ཀྱི་ཐུགས་སུ་ཆུད་པའི་ཡེ་ཤེས་ཀྱིས་མེས་ཉོན་མོངས་པའི་ཚང་ཚིང་སྲེག་པར་མཛད་པ། ལྷ་བརྒྱ་སྟོང་གིས་ཞབས་ལ་བཏུད་ཅིང་ཅོད་པན་གྱིས་གཏུགས་པས་ནོར་བུ་དང༌། གསེར་གྱི་འོད་ཟེར་གྱིས་ཤིན་ཏུ་མཛེས་ཤིང་བརྒྱན་པའི་ཞབས་ཀྱི་པདྨ་དང་ལྡན་པ། གླང་པོ་ཆེ་གཞོན་ནུའི་དཀན་དང༌། རྒྱ་སྐྱེགས་ཀྱི་ཁུ་བ་དང༌། པདྨ་དང༌། སྟོན་ཀའི་མཚམས་ཀྱི་སྤྲིན་གྱི་ཚོགས་དང༌། ཨ་ཤོ་ཀ་དང༌། ལེ་བརྒན་རྩིའི་མེ་ཏོག་གི་ཆུན་པོ་དང༌། ཟངས་ཀྱི་མདོག་ཅན་གྱི་ཞབས་དང་ལྡན་པ། སེན་མོ་སྲབ་ཅིང་ཟངས་ལྟར་དམར་བའི་ཟླ་ཚེས་དགོད་བ་ལྟ་བུ་མེད་པའི་ཞབས་ཀྱི་པདྨ་དང་ལྡན་པ། སྲེད་པའི་ཁྲི་ཤིང་བཏོན་པ། གཏི་མུག་གི་མུན་པ་མ་ལུས་པ་རྣམ་པར་བསལ་བ། འགྲོ་བ་མ་ལུས་པའི་གཉེན་དུ་གྱུར་པ། དགོས་པ་མེད་པར་གཞན་ལ་མཉེས་གཤིན་པར་གྱུར་པ། ཡེ་ཤེས་ཀྱི་སྤྱོད་ཡུལ་བསམ་གྱིས་མི་ཁྱབ་པ། འདོད་ཆགས་ཆེན་པོའི་དུག་རྣམ་པར་བསལ་བ། དགའ་བ་བརྒྱ་སྟོང་གིས་བསྙེལ་བའི་ཡོན་ཏན་གྱི་ཚོགས་དང་ལྡན་པ། བསོད་ནམས་ཀྱི་ཚོགས་ཉེ་བར་བསགས་ཤིང་ཤེས་རབ་ཀྱིས་
སྤྲས་པས་ཉོན་མོངས་པ་མ་ལུས་པའི་ཤིང་རྩ་ནས་འདོན་པར་མཛད་པ། ཚངས་པ་དང༌། དབང་པོ་དང༌། ཉེ་དབང་དང༌། མེ་དང༌། གཤིན་རྗེ་དང༌། བདེན་བྲལ་དང༌། ཆུ་ལྷ་དང༌། རླུང་ལྷ་དང༌། ལུས་ངན་པོ་དང༌། དབང་ལྡན་ལ་སོགས་པས་བསྟན་པ་མངོན་པར་བསྟོད་པ། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་བ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་ལ་གནས་པར་མཛད་པ། འདུལ་བའི་བསྡུས་པ་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིའི་ཞབས་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་གོམས་པ། ཡན་ལག་ལྔ་སྤངས་པ། ཡན་ལག་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། བྱང་ཆུབ་ཀྱི་ཡན་ལག་བདུན་ཀྱི་མེ་ཏོག་གིས་བྱུགས་པ། ཡན་ལག་བརྒྱད་པའི་ལམ་སྟོན་པར་མཛད་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལ་ཁྱད་པར་དུ་འཕགས་པ་རྣམས་ནི་ཉིན་ལག་གསུམ་མཚན་ལན་གསུམ་དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་སུ་ནི་འཕེལ། སུ་ནི་འགྲི་བ། སུ་ནི་གནོད་པར་གྱུར། སུ་ནི་ཉམ་ང་བར་འགྱུར། སུ་ནི་སྡུག་བསྔལ་བར་གྱུར། སུ་ནི་ངན་སོང་ལ་གཞོལ། སུ་ནི་ངན་སོང་ལ་འབབ། སུ་ནི་འཁོར་བའི་རྒྱ་མཚོ་ཆེན་པོ་ལས་ཉེ་བར་འདོན་པར་བྱ། སུ་ནི་དེང་ངས་འཁོར་བའི་སྲིན་པོས་རྣམ་པར་གཙེས་པ་ལས་ཐར་བར་བྱ། སུ་ནི་དེང་ངས་དབུལ་བའི་སྤྲུལ་གྱིས་བདས་པ་ལས་ཡོངས་སུ་བསྐྱབ་པར་བྱ། སུ་ནི་དེང་གནས་ཞེ་སྡང་གི་མེས་ལུས་ཀུན་ནས་བསྲེགས་པ་ལས་དམ་པའི་ཆོས་ཀྱི་ཆར་གྱིས་དབང་བསྐུར་བར་བྱ། སུ་ནི་དེང་ངས་གཏི་མུག་གི་མུན་ནག་གི་ནང་དུ་ཞུགས་པ་ལ་རབ་རིབ་མེད་པའི་སྣང་བ་བླ་ན་མེད་པའི་ཏིང་ངེ་འཛིན་མཆོག་གི་རྩེ་མོ་ལ་བསྐྱོན་པར་བྱ། སུ་ནི་དེང་ངས་སྡུག་བསྔལ་ཐམས་ཅད་ཟད་པར་བྱེད་པའི་ལམ་གྱི་མཆོག་ཡན་ལག་
བརྒྱད་པ་བསྟན་པར་བྱ། སུ་ནི་དེང་ངས་དབུལ་བའི་སྒོ་གླེགས་མཐའ་མེད་པར་གཞིག་པར་བྱ། སུ་ནི་དེང་ངས་མི་ཤེས་པའི་རབ་རིབ་ཀྱིས་མིག་མདོངས་པ་ལ་ཡེ་ཤེས་ཀྱི་མིག་སྨན་རྗེས་སུ་སྦྱིན་པར་བྱ། སུ་ནི་དེང་ངས་ལྕགས་སྒྲོག་ཆེན་པོས་བཅིངས་པ་ལས་ཐར་པར་བྱ་ཞེས་མཁྱེན་པའི་གཟིགས་པ་འཇུག་གོ །ཡང་སྨྲས་པ། རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས། འཇིག་རྟེན་མ་ལུས་པ་འདི་དག་ལ་གཟིགས་པར་གྱུར་པ་དང༌། བཅོམ་ལྡན་འདས་ཀྱི་དེད་དཔོན་རྣ་ཅན་དབུལ་བའི་སྡུག་བསྔལ་གྱི་འདམ་རྫབ་ཏུ་ཤིན་ཏུ་ནུབ་ཅིང་བདག་ཉིད་ཤིན་ཏུ་མྱ་ངན་གྱིས་སྨྲེ་ཞིང་གནས་པར་གཟིགས་སོ། །གཟིགས་ནས་ཀྱང་ཐུགས་རྗེ་ཆེན་པོས་ཡང་དག་པར་སྐུ་ལ་བའི་ཐུགས་ཀྱིས་ལྷུང་ཟེད་བསྣམས་ཤིང་ཆོས་གོས་མནབས་ཏེ། མཉན་ལྡན་གྱི་སྐྱེད་མོས་ཚལ་ནས་མངོན་པར་བྱུང་ནས་མཉན་ལྡན་དུ་གཤེགས་སོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་རྒྱལ་པོའི་ཕོ་བྲང་མཉན་ལྡན་དུ་བསོད་སྙོམས་ལ་གཤེགས་པ་དང༌། དེ་མཐོང་ནས། རྒྱལ་པོ་དང༌། བློན་པོ་དང༌། ཚོང་དཔོན་དང༌། བྲམ་ཟེ་དང༌། ཁྱིམ་བདག་དང༌། གྲོང་ཁྱེར་གྱི་སྐྱེ་བོ་རྣམས་དང༌། དེད་དཔོན་རྣམས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་འདིར་བསོད་སྙོམས་ལ་བྱོན་གྱི། བཅོམ་ལྡན་འདས་འདིའི་བསོད་སྙོམས་པས་དགང་བར་བྱའོ་སྙམ་ནས་སྲོག་ཆགས་བརྒྱ་སྟོང་དཔག་ཏུ་མེད་པ་བཟའ་བ་དང་བཅའ་བ་རྣམས་ཐོགས་ཏེ་གནས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེད་དཔོན་རྣ་ཅན་ལ་རྗེས་སུ་ཐུགས་བརྩེ་བས་ཚོང་འདུས་ཀྱི་དབུས་ན་ཐུགས་རབ་ཏུ་ཞི་ཞིང་སྐུ་ལ་ཉི་མ་འཆར་ཀའི་འོད་པས་ལྷག་པའི་འོད་ཀྱིས་འབར་བ་ལྟ་བུ་སྟོན་ཀའི་ཟླ་བ་རྒྱས་པའི་མཚམས་ཀྱི་སྤྲིན་གྱིས་བསྐོར་བ་ལྟ་བུ་དང༌། ལྷའི་སྐྱེད་མོས་ཚལ་གྱི་དཔག་བསམ་གྱི་ཤིང་ལྟ་བུ་དང༌། གསེར་གྱི་མཆོད་སྡོང་བདུད་རྩིའི་བྱི་རུའི་ཤིང་གི་ཡལ་གས་བརྒྱན་
བ་ལྟ་བུ་དང༌། གསེར་གྱི་གཞོང་པའི་སྟེང་དུ་ཏིལ་མར་གྱི་མར་མེ་བལྟམས་པ་ལྟ་བུ་དང༌། རིན་པོ་ཆེའི་རི་བོ་རིན་པོ་ཆེ་ཕྲ་མོ་སྣ་ཚོགས་ཀྱིས་སྤྲས་པ་ལྟ་བུ་དང༌། ངང་པའི་རྒྱལ་པོ་གསེར་གྱི་པདྨའི་རྡུལ་གྱིས་གོས་པ་ལྟ་བུ་དང༌། ས་སྲུང་དལ་གྱིས་འབབ་པའི་པདྨའི་རྡུལ་གྱིས་བརྒྱན་པ་ལྟ་བུ་དང༌། སེང་གེ་ལྡོང་རོས་ཀྱིས་བྱུགས་པ་ལྟ་བུ་དང༌། ས་ཐམས་ཅད་ཀྱི་དཔལ་གྱི་ཚོགས་ལྟ་བུ་དང༌། སྐུ་ཤིན་ཏུ་འབར་བ་ལྟ་བུ་དང༌། ཞབས་ཀྱི་མཐིལ་གཉིས་ཤིན་ཏུ་ལེགས་པར་བྱས་པའི་ཤིང་རྟའི་འཁོར་ལོ་ནོར་བུས་སྤྲས་པའི་འོད་དང་ལྡན་པ་ལྟ་བུ་དང༌། ཞབས་ཀྱི་མཐིལ་རབ་ཏུ་གསར་པའི་པདྨའི་ཁ་རྒྱས་པ་ལྟར་ཤིན་ཏུ་མཉེན་ཤིང་གཞོན་ཤ་ཆགས་པ་དང༌། ཞབས་ཀྱི་མཐིལ་དཔལ་བེའུ་དང༌། གཡུང་དྲུང་དང༌། དགའ་བ་འཁྱིལ་པ་དང༌། ཉ་དང་ལྡོང་རོས་ཀྱིས་བརྒྱན་པ་དང༌། ཞབས་གཉིས་ལ་ཟླ་བ་རྒྱས་པའི་དབྱིབས་ལྟ་བུ་ལ་ཟངས་ཤིན་ཏུ་སྦྱངས་པ་ལྟ་བུའི་མདངས་དང༌། འོད་དང་ལྡན་པའི་སེན་མོ་ཤིན་ཏུ་དྲི་མ་མེད་པ་གཅིག་ཏུ་གསལ་བ། ལེགས་པར་སྐྱེས་པ། བལྟ་ན་སྡུག་ཅིང་མཐོ་བའི་སེན་མོ་དག་དང་ཞབས་ཀྱི་སེན་མོའི་ཐིག་ལེའི་ཕྲེང་བས་སྤྲས་ཤིང་ཉམས་པ་མེད་པ་དང༌། ལེགས་པར་སྐྱེས་པ་དང༌། རིང་ཞིང་ཟླུམ་པ་ཡངས་པའི་སེན་མོ་དང༌། འཇམ་ཞིང་ཤིན་ཏུ་མཉེན་ལ་ཤིང་བལ་ལྟར་རེག་ན་བདེ་བའི་རྟིང་པ་གཉིས་དང༌། དཔལ་གྱིས་འབར་བའི་ཉི་མ་ནམ་མཁའི་དཀྱིལ་ན་འདུག་པ་ལྟ་བུར་ཕྱོགས་ཀྱི་དཀྱིལ་འཁོར་ཐམས་ཅད་མ་ལུས་པར་ཀུན་དུ་སྣང་བར་མཛད་ཅིང༌། དེད་དཔོན་རྣ་ཅན་གྱི་གནས་ཞིག་པའི་ཕྱེད་དུམ་དེར་བྱོན་ཏོ།། དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས། གསེར་བཙོ་མ་བཞིན་དུ་སྦྱངས་པའི་འོད་འཕྲོ་བ་ལྟ་བུ་དང༌། མར་གྱི་རྒྱུན་གྱིས་བླུགས་པའི་མེའི་ཚོགས་ལྟ་བུ་དང༌། ཤིན་ཏུ་ཁ་རྒྱས་པའི་ཀིང་ཤུ་ཀ་དང་ཨ་ཤོ་ཀ་དང༌། ཨུཏྤ་ལ་དམར་པོ་དང༌། ཨུན་རན་ད་ཀ་དམར་པོ་དང༌། ཀ་ར་བཱི་ར་དང༌། ཙམ་པ་ཀ་དང༌། ལེ་བརྒན་རྩིའི་ཁུ་བ་དང༌། མཚམས་ཀྱི་སྤྲིན་དང༌། གླང་པོ་ཆེའི་དཀན་དང༌། པདྨ་དམར་པོ་དང༌། གློག་བརྒྱ་སྟོང་བས་ལྷག་པའི་འོད་ཟེར་ཡང་དག་པར་འགྱེད་པར་མཛད་ཅིང༌། གང་གིས་དེའི་མོད་ཁོ་ན་ལ་གནས་ཞིག་པའི་ཕྱེད་དུམ་ཕྱི་
དང་ནང་དུ་བཅས་པ་གསེར་ཞུན་མ་ལྟར་སྣང་བར་གྱུར་པ་དེ་ལྟར་མཛད་དོ། །དེ་མཐོང་ནས་དེད་དཔོན་རྣ་ཅན་གྱིས་འདི་ཅི་ཞིག་ཡིན་སྙམ་ཏེ་ལངས་པ་དང༌། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་མཚན་སུམ་བཅུ་རྩ་གཉིས་ཀྱིས་བརྒྱན་པ། ཆོས་ཞེས་བྱ་བ་ལུས་དང་ལྡན་པ་ལྟ་བུ་དང༌། མར་གྱི་སྤྱིན་བླུགས་བླུགས་པའི་རྗེས་ཐོགས་ཀྱི་མེ་ལྟ་བུ་དང༌། གསེར་བཞུ་བའི་ཁུ་བའི་མདངས་དང༌། ཀར་ནི་ཀ་ར་དང༌། གུར་གུམ་དང༌། ལེ་བརྒན་རྩི་དང༌། ལྡོང་རོས་དང༌། བ་བླ་དང༌། ཨུཏྤ་ལ་དམར་པོ་དང༌། སྟོན་གྱི་མཚམས་ཀྱི་སྤྲིན་དང༌། རྨ་བྱའི་ལྐོག་མའི་མདངས་དང༌། གསེར་དང༌། མཐིང་ཤིང་དང༌། མཚལ་དང༌། ཨ་ཏི་མུག་ཏ་དང༌། ཀུ་རན་ད་ཀ་ལྟ་བུའི་འོད་ཀྱི་དཀྱིལ་འཁོར་གྱིས་སྐུ་ལ་བསྐོར་བ་མཐོང་ངོ༌། །མཐོང་ནས་ཀྱང་དེད་དཔོན་རྣ་ཅན་དེ་ཤིན་ཏུ་དད་པ་ཆེན་པོ་སྐྱེས་ནས་ངས་བཅོམ་ལྡན་འདས་ལ་ཅི་ཞིག་དབུལ་བར་བྱ་སྙམ་དུ་སེམས་ཏེ། བདག་ཉིད་ཀྱི་འབྱོར་པ་ལ་བལྟས་པ་དང༌། མ་ཤའི་སྣུམ་ཁུར་གཅིག་པོ་ཡོད་པར་མཐོང་ནས་དེས་དེ་བླངས་ཏེ་ཆུང་མ་ལ་སྨྲས་པ། བཟང་མོས་ངས་ནི་ལག་པ་སྟོང་པས་ངའི་ཁྱིམ་དུ་འཇུག་པར་མི་བྱའོ་སྙམ་ནས། མ་ཤའི་སྣུམ་ཁུར་ཅིག་ཁྱེར་ཏེ་འོངས་ཏེ། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་འདི་ཡང་ཡོན་གནས་ཀྱི་དམ་པ། དམན་པ་དང་ཞན་པ་རྣམས་ལ་རྗེས་སུ་ཐུགས་བརྩེ་བ་ཡིན་ལ། འདི་ལ་སྦྱིན་པའི་ས་བོན་ཉུང་ཟད་ཙམ་ཞིག་བཏབ་པས་ཀྱང་དབུལ་བའི་སྡུག་བསྔལ་རྩ་ནས་འབྱིན་པར་མཛད་པ་ཡིན་ན། བཅོམ་ལྡན་འདས་དེ་ལ་ངས་མ་ཤའི་སྣུམ་ཁུར་འདི་དབུལ་བར་བྱའམ། དེས་སྨྲས་པ། རྗེའི་སྲས་ལེགས་ཀྱིས་དེ་ལྟར་མཛོད་ཅིག །འདི་ཙམ་གྱི་དགེ་བའི་རྩ་བས་ཀྱང་འཁོར་བ་ན་བདེ་བའི་རྒྱུར་འགྱུར་རོ། །དེ་སྐད་ཅེས་སྨྲས་པ་དང༌། དེད་དཔོན་གྱིས་བསམས་པ། མ་ཤའི་སྣུམ་ཁུར་འདི་ནི་ཤིན་ཏུ་ཞན་པ་ཡིན་ལ། ད་ནི་གྲོང་ཁྱེར་འདི་ཉིད་དུ་དེ་ལྟ་བུ་ཞིག་ཏུ་གྱུར་ནས་ང་འདི་ལྟ་བུའི་ངན་པ་རྒྱལ་པོ་དང༌། བློན་པོ་དང༌། བྲམ་ཟེ་དང༌། ཁྱིམ་བདག་དང༌། གྲོང་ཁྱེར་གྱི་སྐྱེ་བོ་དང༌། དེད་དཔོན་རྣམས་ཀྱིས་མི་མཐོང་བ་ཇི་ལྟར་ནི་བཅོམ་ལྡན་འདས་ལ་དབུལ་བར་
བྱ། གཞན་དུ་ན་ལོ་མས་དཀྲིས་ལ་དབུལ་བར་བྱ་སྟེ། དེ་ལྟར་མ་བྱས་ན་ནི་འདི་རྣམས་ཀྱིས་ཤེས་པར་འགྱུར་རོ་སྙམ་ནས། རང་གི་གནས་ཞིག་པའི་ཕྱེད་ཀྱི་ནང་དུ་ཞུགས་ཏེ། ལོ་མ་བཙལ་བར་སེམས་པ་དང་ཅི་ཡང་མ་རྙེད་པར་གྱུར་ཏོ། །དེ་ནས་དེད་དཔོན་དེ་ཤིན་ཏུ་ཡང་ཡི་མུག་པར་གྱུར་ཏེ། ཀྱི་ཧུད་འདི་ལྟ་བུའི་སྐལ་བ་ཞན་པ་ནི་སྡུག་བསྔལ་ལོ་ཞེས་དབུགས་ཚབ་རིང་པོ་ཕྱུང་ནས། དེའི་མོད་ལ་གནས་ཞིག་པའི་ཕྱེད་དུམ་དེ་ནས་བྱུང་སྟེ། དད་པ་ཆེན་པོའི་ཤུགས་ཀྱིས་མ་ཤའི་སྣུམ་ཁུར་དེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ལྷུང་བཟེད་དུ་ཕུལ་ལོ། །ཕུལ་ནས་ཀྱང་ཞབས་གཉིས་ལ་ཕྱག་བྱས་ཏེ། སྨོན་ལམ་བྱེད་པར་བརྩམས་པ། བཅོམ་ལྡན་འདས་སྦྱིན་པར་བྱ་བའི་ཆོས་ཡོངས་སུ་ཕུལ་བའི་དགེ་བའི་རྩ་བ་འདིས་སྐྱེ་བ་འདི་ཉིད་ནས་གཟུང་སྟེ། ཉིན་ཞག་གཅིག་ཙམ་ཡང་དབུལ་པོར་ནམ་ཡང་མ་གྱུར་ཅིང༌། ཤིན་ཏུ་ཕྱུག་པ་དང༌། ནོར་དང་ལོངས་སྤྱོད་ཡོངས་སུ་རྫོགས་པ་དང་ལྡན་པར་གྱུར་ཅིག །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་ལ། དེད་དཔོན་རྣ་ཅན་གྱིས་བཏུད་པ་ཙམ་དེ་ཉིད་ཀྱི་རྗེས་ཐོགས་ཁོ་ན་ལ་ཤིན་ཏུ་ཞན་ཅིང་རིད་པ་དེ་མི་སྣང་བར་གྱུར་ནས། སྔོན་གྱི་མདོག་མདངས་ལྟ་བུ་དང་ལྡན་པར་གྱུར་ཏོ། །དེ་ནས་དེད་དཔོན་རྣ་ཅན་གྱིས་སྨོན་ལམ་བཏབ་ནས་ལངས་པ་དང༌། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སླར་བཞུད་དེ། མཉན་ལྡན་གྱི་སྐྱེད་མོས་ཚལ་དུ་གཤེགས་སོ། །དེ་ནས་དེད་དཔོན་རྣ་ཅན་མཉན་ལྡན་གྱི་ཚོང་དཔོན་དང༌། དེད་དཔོན་རྣམས་ཀྱིས་ངོ་ཤེས་པར་གྱུར་ཏོ། །དེ་ནས་དེད་དཔོན་ཞིག་གིས་གྲོང་ཁྱེར་པ་དེ་རྣམས་ལ་འདི་སྐད་ཅེས་སྨྲས་སོ། །ང་དང་ཁྱེད་རྣམས་ཀྱི་དེད་དཔོན་རྣ་ཅན་རྒུད་པར་གྱུར་པ་ལ། བཏང་སྙོམས་སུ་འཇོག་པ་ནི་རིགས་པ་མ་ཡིན་ནོ། །དེ་ནས་རས་གཅིག་བཏིང་སྟེ་ཡང་སྨྲས་པ། གྲོགས་པོ་དག་མང་པོས་ནི་གཅིག་ལེགས་པར་གདོན་ནུས་ཀྱི། གཅིག་གིས་ནི་མང་པོ་མ་ཡིན་པས། དེ་ལ་གང་གིས་འདིར་ཡོངས་སུ་བཏང་བ་དེ་རས་འདིའི་སྟེང་དུ་ཞོག་ཤིག་ཅེས་སྨྲས་པ་དང༌། དུ་མ་ཞིག་གིས་མགུལ་གདུབ་དང༌། གདུ་བུ་དང༌། དཔུང་རྒྱན་དང༌། དོ་ཤལ་དང༌། སེ་མོ་
དོ་དང༌། ལག་གདུབ་ལ་སོགས་པ་རྒྱན་བརྒྱ་སྟོང་དཔག་ཏུ་མེད་པ་ཞིག་བྱིན་པ་དང༌། ཀ་ཤིའི་རས་དང༌། དུ་ཀུ་ལའི་རས་དང༌། ཀོ་ཏམ་པའི་རས་དང༌། དར་དང་མོན་དར་ལ་སོགས་པ་ཤིན་ཏུ་ཕྲ་ཞིང་རིན་ཆེ་བ་སྣ་ཚོགས་པའི་གོས་ཟུང་བརྒྱ་སྟོང་དཔག་ཏུ་མེད་པ་བྱིན་ཏེ། དེ་ལ་སྐད་ཅིག་མ་དེ་ཉིད་དུ་གོས་དང་རྒྱན་གྱི་ཕུང་པོ་ཞིག་ཏུ་གྱུར་ཏོ། །དེ་ནས་དེད་དཔོན་རྣ་ཅན་གྱིས་འབྱོར་པ་དེ་ལ་བལྟས་ནས་ཆུང་མ་ལ་སྨྲས་པ། བཟང་མོ་ཞིང་གཤིན་པ་ལ་སྦྱིན་པའི་ས་བོན་བཏབ་པའི་མྱུ་གུ་འཐོན་པ་ལ་ལྟོས། དེ་ཡང་དགའ་བ་དང་མགུ་བ་སྐྱེས་ཏེ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེ་ལ་ཕྱག་བྱས་ནས་རྒྱན་དང་གོས་དེ་རྣམས་གནས་ཞིག་པའི་ཕྱེད་དུ་མ་དེར་གཞུག་པར་བརྩམས་སོ། །ཁྱེའུ་མི་སྡུག་པ་དེ་ཡང་ཕའི་སྐྱེད་མོས་ཚལ་དེར་ཞུགས་ནས་བཀྲེས་པས་གདུངས་པའི་ཡིད་དང༌། རང་ཉིད་མཆོག་ཏུ་གཟུགས་ངན་པས་འདི་ལྟར་ཡང་དང་ཡང་དུ་མྱ་ངན་བྱེད་ཅིང་བསམས་པ། ཤིན་ཏུ་སྡིག་པའི་ལས་བྱེད་པ། མཆོག་ཏུ་སྡུག་བསྔལ་བའི་སྐལ་བ་ཅན་ཤིན་ཏུ་གཟུགས་ངན་པ། མཐོང་ན་བཀྲ་མི་ཤིས་པ་ང་གསོན་པས་ཀྱང་དགོས་པ་ཅི་ཞིག་ཡོད་དེ། བདག་ཉིད་ཀྱི་སྲོག་དང་འབྲལ་བར་བྱའོ་སྙམ་ནས་སྒྱིད་ལུག་པའི་ཡིད་ཀྱིས་མོད་ཁོ་ན་ལ་པ་ལའི་ཤིང་གི་ཡལ་གའི་རྩེར་མོར་འཛེགས་པ་དང༌། ཤིང་གི་ཡལ་ག་ཆག་ནས། ཤིང་གི་ཡལ་ག་དང་ལྷན་ཅིག་ཏུ་ལྷུང་སྟེ། ཚོར་བ་ཉམས་ཤིང་འདུག་གོ །བར་སྐབས་དེར་སངས་རྒྱས་བཅོམ་ལྡན་འདས་ལ་ནི་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་རིག་པ་ཅི་ཡང་མི་མངའ་བས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སངས་རྒྱས་ཀྱི་ལྷའི་སྤྱན་རྣམ་པར་དག་པ། མིའི་ལས་འདས་པས་ཁྱེའུ་མི་སྡུག་པ་དེ་ལྟར་སྡུག་བསྔལ་བ་གཟིགས་སོ། །གཟིགས་ནས་ཀྱང་ཐུགས་རྗེ་ཆེན་པོས་ཡང་དག་པར་བསྐུལ་ཏེ། སྐྱེད་མོས་ཚལ་དེར་རྫུ་འཕྲུལ་གྱིས་གཤེགས་ནས་ཉིད་ཀྱི་སྐུ་ལས་འོད་ཟེར་འགྱེད་པར་མཛད་དེ། བཀྲེས་པ་དང་སྐོམ་པའི་སྡུག་བསྔལ་དེ་ཡང་རྒྱུན་ཆད་པར་གྱུར་ནས་དེའི་མོད་ལ་ལངས་པ་དང༌། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་
བསྐལ་པ་བྱེ་བ་བརྒྱ་སྟོང་དཔག་ཏུ་མེད་པ་མཐོང་བ་ཤིན་ཏུ་རྙེད་པར་དཀའ་བ་དང༌། མཚན་སུམ་ཅུ་རྩ་གཉིས་ཀྱི་སྣང་བས་འབར་བར་བྱས་པའི་སྐུ་དང་ལྡན་པ་མཐོང་ངོ༌། །དེ་མཐོང་བའི་མོད་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་དད་པ་ཆེན་པོ་སྐྱེས་ཏེ། དེས་ཀྱང་ཡུང་བས་བཙོས་པའི་གོས་ཀྱི་དུམ་བུ་ཁྲུ་གང་གྱོན་ཏེ་འདུག་པ་ལས། དེས་དད་པའི་ཤུགས་ཀྱིས་ལུས་ལས་ཕུད་དེ། དེ་དང་ཀར་ནི་ཀའི་མེ་ཏོག་ཅིག་དད་པའི་ཤུགས་ཆེན་པོས་འཕྲལ་དུ་བཅོམ་ལྡན་འདས་རྣམ་པར་གཟིགས་ཀྱི་སྐུ་ལ་གསོལ་ལོ། །དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཇི་ལྟར་གོས་ཀྱི་དུམ་བུ་དེ་བཞིན་གཤེགས་པའི་སྐུ་ཚད་དང་ལྡན་པ་ཙམ་དུ་གྱུར་ནས་སྐུ་ལ་གསོལ་བ་དང༌། མེ་ཏོག་ཀར་ནི་ཀ་ཡང་དབུའི་སྟེང་དུ་ཤིང་རྟའི་འཕང་ལོ་ཙམ་དུ་གྱུར་ནས་གདུགས་ལྟར་གནས་པ་དེ་ལྟར་བྱིན་གྱིས་བརླབས་སོ། །དེ་མཐོང་བ་དང་ཁྱེའུ་མི་སྡུག་པ་ཤིན་ཏུ་ཡང་དད་པ་ཆེན་པོ་སྐྱེས་ནས། དེ་དད་པ་ཆེན་པོའི་ཤུགས་ཀྱིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་ཕྱག་བྱས་ཏེ། སྒྲ་གསང་ཆེན་པོས་སྨོན་ལམ་བྱེད་པར་བརྩམས་པ། རྐང་གཉིས་མཆོག་གྱུར་སྦྱིན་པ་འདི། །འདི་ཡིས་འདི་ནས་གཟུགས་ངན་ཉིད། །དེ་ལས་བརྩམས་ཏེ་ལེགས་སྤངས་ནས། །བདག་ཉིད་གཟུགས་བཟང་ཉིད་ཐོབ་ཤོག །གསེར་གྱི་གདོང་ཅན་གོས་རྣམས་ནི། །གསེར་སྦྱངས་ལྟ་བུ་གྱོན་པ་དང༌། །བདག་གིས་ལུས་དང་ཁ་ནས་ཀྱང༌། །ཙན་དན་ཨུཏྤལ་དྲི་ལྟར་ཤོག །གསེར་གྱི་མདོག་ལྟར་སྣང་གྱུར་ཅིང༌། །འཇིག་རྟེན་ཀུན་གྱི་ཡིད་དུ་འོང༌། །ནད་ཀུན་ལས་ནི་རྣམ་ཐར་ཅིང༌། །བསྟན་བཅོས་ཀུན་དུ་ཕ་རོལ་ཕྱིན། །ཀུན་དུའང་ནོར་དང་ཡང་དག་ལྡན། །སྡུག་བསྔལ་ཐམས་ཅད་རྣམ་སྤངས་པ། །ཀུན་མཆོག་ཀུན་གྱིས་ལྟ་བར་འོས། །རྒྱན་རྣམས་ཀུན་གྱིས་རྣམ་བརྒྱན་ཤོག །རྫོགས་སངས་རྒྱས་དོན་ཀུན་གྲུབ་ཅིང༌། །སེམས་ཅན་རྣམས་ལ་མཉེས་གཤིན་ཤོག །དྲི་མེད་ཡོན་ཏན་དཔལ་ལྡན་ལྷ། །བདེ་ཞིང་རྫས་ཀུན་ལྡན་པར་ཤོག །དེས་སྨོན་ལམ་འདི་བྱས་
པ་དང་དུས་མཉམ་པ་ཉིད་ལ་ཁྱེའུ་མི་སྡུག་པ་འཕྲལ་དུ་མི་སྣང་བར་གྱུར་ཅིང༌། མཛེས་པ་ལྟ་ན་སྡུག་པ། ལུས་ཀྱི་པགས་པའི་མདོག་གསེར་གྱི་མདོག་ཅན་གྱི་གཟུགས་བཟང་བར་གྱུར་ཏོ། །འཕྲལ་དུ་དེ་ལ་ནམ་མཁའ་ལས་གསེར་གྱི་མདོག་ཅན་གྱི་གོས་བྱུང་བས་ལུས་ལ་བཀབ་ཅིང་རིན་པོ་ཆེའི་དབུ་རྒྱན་དང༌། རྣ་ཆ་ལ་སོགས་པའི་རྒྱན་གྱི་ཁྱད་པར་རྣམས་བྱུང་བས་བརྒྱན་ཏོ། །ལྷ་རྣམས་ཀྱིས་ཀྱང་མེ་ཏོག་ཀར་ནི་ཀ་དང༌། ཨུཏྤ་ལ་དང༌། ཙམ་པ་ཀ་དང༌། པདྨ་དང༌། ཀུ་མུ་ཏ་དང༌། མན་དཱ་ར་བ་ལ་སོགས་པ་མེ་ཏོག་གི་ཆར་ཆེན་པོ་ཕབ་པ་དང༌། ལྷའི་ཙན་དན་དང༌། ཨ་ཀ་རུ་དང༌། གུར་གུམ་དང༌། ཏ་མ་ལའི་ལོ་མའི་ཕྱེ་མའི་ཆར་ཕབ་ཅིང་འདི་སྐད་ཅེས་ཀྱང་སྨྲས་སོ། །ཨེ་མའོ་དེ་བཞིན་གཤེགས་པ་ལ་བསྐྲུན་པའི་སྦྱིན་པའི་ས་བོན་ཁྱད་པར་ཅན་གྱི་མྱུ་གུ་ཡང་དག་པར་འབྱུང་བ་ཡིན་ནོ། །ལྷའི་མེ་ཏོག་དང༌། ཕྱེ་མའི་ཆར་ཡང་པུས་མོ་ནུབ་པ་ཙམ་དུ་སྐྱེད་མོས་ཚལ་དེ་ཐམས་ཅད་དུ་བབ་ནས་གནས་སོ། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སྐྱེད་མོས་ཚལ་དེ་ནས་མངོན་པར་ཕྱུང་སྟེ་མཉན་ལྡན་གྱི་སྐྱེད་མོས་ཚལ་དུ་གཤེགས་སོ། །དེད་དཔོན་རྣ་ཅན་གྱིས་ཆུང་མ་ལ་སྨྲས་པ། བཟང་མོ་གང་ཞིག་སྐྱེས་ནས་དེ་ལས་འདི་ལྟ་བུའི་རྒུད་པ་བྱུང་བར་གྱུར་པའི་བུ་དེ་གར་སོང༌། དེས་སྨྲས་པ། དེས་སྐྱེད་མོས་ཚལ་དུ་འགྲོའོ་ཞེས་ཟེར་རོ། །དེས་སྨྲས་པ། དེས་དེ་ཉིད་དུ་ཡི་མུག་པས་བདག་ཉིད་གསོད་པར་འགྱུར་གྱི་དེ་མྱུར་དུ་བཞུད་ཅིག །དེད་དཔོན་རྣ་ཅན་གྱིས་སྨྲས་པ། ཡུ་བུའི་བུའི་མིང་ནི་ཅི། །གཟུགས་ནི་ཅི་ལྟ་བུ་ཞིག་ཡོད། །དེས་སྨྲས་པ། རྗེའི་སྲས་ཤིན་ཏུ་བལྟ་ན་མི་སྡུག་པས་མི་སྡུག་པ་ཞེས་བགྱིའོ། །དེ་ནས་དེད་དཔོན་རྣ་ཅན་དེ་ཤིན་ཏུ་མྱུར་བའི་གོམ་སྟབས་ཀྱིས་སྐྱེད་མོས་ཚལ་དེར་སོང་བ་དང༌། གཞོན་ནུ་མི་སྡུག་པ་ལུས་གསེར་གྱི་མདོག་ཅན་རིན་པོ་ཆེའི་གོས་སེར་པོ་ཕྲ་བ་ལུས་ལ་གྱོན་པ། རྒྱན་ཐམས་ཅད་ཀྱིས་བརྒྱན་པ། མཐོང་ན་ཡིད་འཕྲོག་པ། ལྷའི་བུ་གཞོན་ནུ་བཞིན་དུ་དཔལ་གྱི་མཆོག་ཏུ་འབར་བ་མཐོང་ངོ༌། །མཐོང་ནས་ཀྱང་ཨེ་མའོ་གང་ལ་འདི་ལྟ་བུའི་བུ་ཡོད་པ་དེ་ནི་སྐྱེས་བུ་སྐལ་བ་དང་ལྡན་པའོ་ཞེས་ཟེར་ཞིང་གཞོན་
ནུ་ལ་སྨྲས་པ། ཁྱེའུ་ཁྱོད་སུའི་བུ་ཡིན། དེས་སྨྲས་པ། རྣ་ཅན་ཞེས་བྱ་བའི་དེད་དཔོན་ཞིག་ཡོད་དེ། ང་ནི་དེའི་བུ་ཡིན་ནོ། །དེད་དཔོན་རྣ་ཅན་གྱིས་བསམས་པ་ལ། གཞོན་ནུ་འདིས་ནི་ང་ལ་བསྟིངས་སོ་སྙམ་དུ་སེམས་ཤིང༌། ཤིན་ཏུ་ལྟད་མོ་སྐྱེས་ཏེ། མིག་མི་འཛུམས་པར་ལྟ་ཞིང་གཞོན་ནུ་དེ་ལ་ཡང་སྨྲས་པ། ཀྱེ་གཞོན་ནུ་སུའི་བུ་ཡིན་པ་བདེན་པར་སྨྲོས་ཤིག །མི་སྡུག་པས་སྨྲས་པ། འདིར་ཅི་ཞིག་བརྟག་པར་བྱ་སྟེ། ང་ནི་བདེན་པ་ཉིད་དུ་དེད་དཔོན་རྣ་ཅན་གྱི་བུ་ཡིན་ནོ། །དེས་སྨྲས་པ། ཨེ་མའོ་གཞོན་ནུ་འདིས་ནི་ང་ལ་ཤིན་ཏུ་ཡང་བསྟིངས་སོ་སྙམ་ནས་སྨྲས་པ། གཞོན་ནུ་ངས་ནི་ཤིན་ཏུ་མི་སྡུག་གོ་ཞེས་ཐོས་ན། ཁྱེད་ནི་གཟུགས་བཟང་ན། དེ་ཐབས་གང་གིས་གཟུགས་བཟང་བར་གྱུར། གཞོན་ནུ་མི་སྡུག་པས་དགའ་བས་མིག་གདངས་ཏེ་སྒྲ་གསང་ཆེན་པོས་སྨྲས་པ། དེང་ནི་དབུལ་བའི་སྡུག་བསྔལ་མེས། །སེམས་ནི་ཡོངས་སུ་གདུངས་པས་ན། །ཤིང་གི་ཡལ་གའི་རྩེར་འཛེགས་ཏེ། བདག་གིས་རང་ཉིད་ལྟུང་བར་བྱས། །ལྷུང་བས་ཡན་ལག་སྣད་པས་གཟིར། །བདག་ནི་བ་རྒྱལ་བ་ཉིད་དུ་གྱུར། །སེམས་ནི་དབུགས་མེད་མ་ཐོན་པར། །སྐད་ཅིག་ཙམ་ཞིག་རྣམ་པར་གནས། །དེ་ནས་རྣམ་གཟིགས་རྫོགས་སངས་རྒྱས། །སེམས་ཅན་རྣམས་ལ་རྗེས་བརྩེ་བ། །མགོན་པོ་བདག་ལ་ཐུགས་བརྩེའི་ཕྱིར། །སྐྱེད་མོས་ཚལ་ནི་འདིར་བྱོན་ཏོ། །སུམ་ཅུ་རྩ་གཉིས་མཚན་འཆང་ཞིང༌། །པགས་པ་གསེར་ནི་སྦྱངས་པ་འདྲ། །བཙོ་མའི་གསེར་འདྲའི་འོད་རྣམས་ཀྱིས། །ཕྱོགས་བཅུ་དག་ནི་འགེངས་པར་མཛད། །དེ་སྐུའི་འོད་ཟེར་རབ་བསིལ་བས། །བདག་ལ་རེག་པ་ཙམ་གྱིས་ན། །མཉམ་མེད་བདུད་རྩིའི་རྒྱུན་གྱིས་ནི། །འདི་དག་ཐམས་ཅད་ཚིམ་པར་མཛད། །བཀྲེས་སྐོམ་ལྟུང་བའི་སྡུག་བསྔལ་དང༌། །མ་ལུས་བདག་གི་བཀྲ་མི་ཤིས། །དེ་ཡི་མོད་ལ་ཞི་གྱུར་ཅིང༌། །བདག་ནི་སེམས་ཅན་རྙེད་པར་གྱུར། །འདི་ཅི་ཡིན་ཞེས་སྤྲོ་བཅས་པར། །བདག་ལངས་དེ་ཚེ་ཐུབ་པ་ཡི། །ཤིན་ཏུ་མདངས་བཟངས་འགྲོ་བ་ཡི། །ཕུན་སུམ་ཚོགས་པའི་གནས་གྱུར་མཐོང༌། །བདག་གིས་བལྟ་བྱའི་རིན་ཆེན་དེ། །མགོན་པོ་དཔལ་གྱི་མཆོག་གིས་ནི། །ཕྱོགས་
རྣམས་རྒྱས་པར་གསལ་མཛད་པ། །མཐོང་ནས་བདག་སྔར་དད་པར་གྱུར། །དེ་ནས་རབ་དགའི་སེམས་ཀྱིས་སུ། །བདག་གིས་གོས་ཀྱི་དུམ་བུ་ནི། །ཡུང་བས་བཙོས་པ་དེ་ཉིད་ལ། །མཆོག་ཏུ་དགའ་བས་ཕུལ་བར་གྱུར། །ཀར་ནི་ཀ་ཡི་མེ་ཏོག་གཅིག། བདག་གིས་བརྟུལ་ཞུགས་བཟང་དེ་ལ། །གཏོར་བ་དེ་ཡང་ཐུབ་པ་ཡི། །སྟེང་དུ་གདུགས་བཞིན་གནས་པར་གྱུར། །དེས་ན་དགའ་ཞིང་མགུ་བ་ཡིས། །ཞབས་གཉིས་ལ་ནི་རབ་བཏུད་དེ། །ཤིན་ཏུ་དང་བ་བསྐྱེད་པ་ཡིས། །བདག་གིས་སྨོན་ལམ་འདི་བྱས་སོ། །མགོན་པོ་སྦྱིན་པ་འདི་ཡིས་ནི། །དེ་ཉིད་བདག་ནི་གཟུགས་ངན་པ། །ཡོངས་སུ་སྤངས་ཤིང་གཟུགས་བཟང་བའང༌། །སྲིད་པའི་རྒྱ་མཚོ་ཐོབ་པར་ཤོག །གསེར་གྱི་མདོག་ཅན་གོས་རྣམས་ཀྱང༌། །གསེར་སྦྱངས་ལྟ་བུ་གྱོན་པ་དང༌། །བདག་གི་ལུས་དང་ཁ་དོག་ཀྱང༌། །ཙན་དན་ཨུཏྤལ་དྲི་ལྡན་ཤོག །བདག་གི་སྨོན་ལམ་དེ་དག་ནི། །འདིས་ནི་བྱས་པར་གྱུར་པ་ན། །གཟུགས་དང་ཁ་དོག་འདི་འདྲ་བ། །ཡིད་དུ་འོང་བ་བྱུང་བར་གྱུར། །གོས་ནི་རིན་ཐང་ཆེར་གྱུར་པ། །སེར་ཞིང་ཤིན་ཏུ་འཇམ་པ་དང༌། །བདག་གི་ལུས་ལ་འཕྲལ་དུ་ནི། །སྐད་ཅིག་དེ་ཉིད་དག་ལས་བྱུང༌། །ནམ་མཁའི་ངོས་ནས་ལྷ་རྣམས་ཀྱིས། །མེ་ཏོག་དང་ནི་ཙན་དན་དང༌། །ཨ་ག་རུ་དང་ཏ་མ་ལ། །ཨ་ག་རུ་སོགས་ཆར་འདི་ཕབ། །ཅ་ཅོ་རྣམ་པ་ཆེན་པོ་དང༌། །ཡིད་འཕྲོག་པ་ཡི་རྔ་བརྡུང་ཞིང༌། །སངས་རྒྱས་བཅོམ་ལྡན་ཕྱག་འཚལ་ཞེས། །བྱ་བའི་སྒྲ་ནི་སྨྲ་བར་གྱུར། །དེང་ནི་དགེ་བ་འདི་བྱས་པས། །བདག་གི་གཟུགས་ནི་འདི་དག་དང༌། །གསེར་འདྲའི་མདོག་ནི་ཡིད་འོང་བ། །འདི་ནི་བྱུང་བར་གྱུར་པ་ཡིན། །དེ་ནས་དེད་དཔོན་རྣ་ཅན་གྱིས་དེ་སྐད་ཐོས་པ་དང༌། འཕྲལ་དུ་དད་པའི་ཤུགས་ཀྱིས་བ་སྤུའི་བུ་ག་ཐམས་ཅད་ལྡང་བར་གྱུར་ཅིང་དེ་བཞིན་གཤེགས་པ་རྣམ་པར་གཟིགས་ལ་ཡང་དང་ཡང་དུ་ཕྱག་འཚལ་ཞིང་མཆོག་ཏུ་ཡིད་དགའ་བ་སྐྱེས་པ་དང༌། བུ་གཟུགས་བཟང་བ་ལ་མིག་མི་འཛུམས་པས་བལྟས་ཏེ་སྨྲས་པ། བུ་ཚུར་ཤོག་ཡུ་བུ་འདེངས། དེ་ནས་གཞོན་ནུ་གཟུགས་བཟང་ཀྱིས་བདག་ནི་ཕ་འདི་ལས་སྐྱེས་པ་ཡིན་ནོ་སྙམ་ནས་ཤིན་ཏུ་གུས་པ་དང་བཅས་
པས་ཕའི་རྐང་པ་ལ་ཕྱག་བྱས་ནས་ཡབ་ལེགས་པར་བྱོན་ཏམ་ཞེས་སྨྲས་ཏེ། ཕ་དང་ལྷན་ཅིག་ཁྱིམ་དུ་ཆས་སོ། །དེའི་ཚེ་ལྷའི་དབང་པོ་བརྒྱ་བྱིན་ལྷའི་ཤེས་པས་འོག་ཏུ་འཇུག་པར་འགྱུར་བ་ཡིན་པས་དེ་འདི་སྙམ་དུ་སེམས་ཏེ། དེད་དཔོན་རྣ་ཅན་འདི་ནི་སངས་རྒྱས་བཅོམ་ལྡན་འདས་ལ་ལྷག་པར་བྱ་བ་བྱས་པ་ཡིན་ནོ།། དེ་རྩྭ་ཁྱིམ་ན་གནས་པ་ནི་རེགས་པ་མ་ཡིན་ནོ་སྙམ་ནས་ལྷའི་བུ་ལས་སྣ་ཚོགས་པ་ལ་སྨྲས་པ། ལས་སྣ་ཚོགས་པ་སོང་ལ་དེད་དཔོན་རྣ་ཅན་གྱི་ཁང་པ་རིན་པོ་ཆེ་སྣ་བཞི་ལས་གྲུ་བཞི་པའི་རྣམ་པ་གྱིས་ཤིག །དེ་ནས་ལས་རྣམ་པ་སྣ་ཚོགས་པས་བརྒྱ་བྱིན་གྱི་ཚིག་སྨྲས་ཏེ། སྐད་ཅིག་དེ་ཉིད་ལ་རྒྱལ་པོའི་ཕོ་བྲང་མཉན་ལྡན་དུ་འོངས་ནས་རིན་པོ་ཆེ་སྣ་བཞིའི་ཕ་གུ་ལས་བརྩིགས་ཤིང་ཀ་བས་བཏེག་པ། ཁྱམས་མཐོ་ཞིང་མཛེས་པ་དང༌། སྐར་ཁུང་དང༌། སྒོ་ཁང་དང༌། ངོས་ན་ལྕོག་གིས་ལེགས་པར་བཀོད་པའི་ཡན་ལག་ཅན་དང༌། གདུང་ཕྲན་ལ་སྤང་ལེབ་ལེགས་པར་བཀོད་པ། ཤིན་ཏུ་མཐོ་བའི་ཁང་པ་ཟུར་བཞི་པ། ཤིན་ཏུ་ཡིད་དུ་འོང་བའི་རྟ་བབས་ཀྱིས་སྒོ་ཉེ་བར་མཛེས་པ་དང༌། སྟོན་ཀའི་སྤྲིན་མཛེས་པ་དང༌། གངས་ཀྱི་ཕུང་པོ་དང༌། ཟླ་བའི་འོད་ཟེར་དང༌། པདྨའི་རྩ་བ་ལྟར་དཀར་བ། གདུགས་དང་རྒྱལ་མཚན་དང༌། བ་དན་བསྒྲེང་བ་དང༌། མུ་ཏིག་གི་ཆུན་འཕྱང་དང་གོས་ཀྱི་ཆུན་འཕྱང་གི་ཚོགས་བཏགས་པ། གྲོང་ཁྱེར་གྱི་མཆོག་མ་ལུས་པ་ཉེ་བར་མཛེས་པར་བྱེད་པའི་གནས་སུ་གྱུར་པ། ཤིན་ཏུ་འབར་བའི་གསེར་གྱི་རང་བཞིན་ཅན་གསར་དུ་མངོན་པར་འབྱུང་བའི་ཨ་ནུའི་རྒྱན་བྱས་ཤིང་ཡན་ལག་བརྒྱད་པའི་ཆུས་ཡོངས་སུ་གང་བའི་བུ་མ་པ་བརྒྱད་ཀྱིས་སྒོ་ཉེ་བར་གནས་པར་བྱས་པ། དཔག་ཏུ་མེད་པའི་དངུལ་དང༌། བཻ་ཌཱུཪྻ་དང༌། ཤེལ་དང༌། སྤུག་དང༌། མཐོན་ཀ་དང༌། མཐོན་ཀ་ཆེན་པོ་ལ་སོགས་པའི་རིན་པོ་ཆེ་རྣམས་ཀྱིས་ཡོངས་སུ་སྐོར་བ། གཏེར་དུ་མས་ཡོངས་སུ་ཁེངས་པ། རིན་པོ་ཆེའི་རྫིང་དང༌། ཡོ་བྱད་ཀྱིས་ཡོངས་སུ་གང་བའི་ཁང་པའི་མཆོག་ཅིག་བྱས་སོ། །དེ་ནས་དེད་དཔོན་རྣ་ཅན་གྱིས་ཁྱིམ་དུ་འོངས་པ་དང༌། དེའི་ཆུང་མ་དགའ་ཞིང་མགུ་ལ་རངས་པས། གསེར་གྱི་རིལ་བ་ལས་ཆུ་བྱིན་ཏེ་སྨྲས་པ། རྗེའི་སྲས་ཁྱེད་ཀྱི་བསོད་ནམས་ཀྱི་མཐུས་འགའ་ཞིག་གིས་འདི་ལྟ་བུའི་ཁང་པའི་མཆོག་བྱས་སོ། །དེ་ནས་
དེད་དཔོན་རྣ་ཅན་གཞལ་ཡས་ཁང་དེ་ལ་མངོན་པར་ལྟ་ཞིང༌། མཆོག་ཏུ་དགའ་བ་དང་ཡིད་བདེ་བ་སྐྱེས་ནས། སངས་རྒྱས་བཅོམ་ལྡན་འདས་ལ་ཤིན་ཏུ་ཡང་དད་པ་སྐྱེས་ཏེ། བ་སྤུ་ལྡང་བ་དང་ཐལ་མོ་སྤྱི་བོར་སྦྱར་ཏེ། དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསམ་གྱིས་མི་ཁྱབ་པའི་ཡིད་བཞིན་གྱི་ནོར་བུ་རིན་པོ་ཆེ་བསོད་ནམས་ཀྱི་ཞིང་བླ་ན་མེད་པ་ལ་ཕྱག་འཚལ་ལོ་ཞེས་སྨྲས་ཏེ་ཕྱག་བྱས་ནས་རབ་ཏུ་དགའ་བས་རྒྱས་པའི་བཞིན་དང་བས་སྨྲས་པ། ཨེ་མའོ་ཡོན་ཏན་རང་བཞིན་ཞི། །ཉེས་པ་ཐམས་ཅད་རབ་སྤངས་པས། །གང་དུ་བདག་གིས་ས་བོན་བཏབ། །འབྲས་བུ་དེ་ཉིད་སྩོལ་བར་མཛད། །སྦྱིན་པ་ངན་ངོན་དེ་ཙམ་ནི། །ལེགས་པར་སྦྱར་བ་ཀུན་བྲལ་གང༌། །ཉམས་དགའ་མཐོང་བའི་གསེར་དང་ནི། །རིན་ཆེན་རང་བཞིན་ཁྱིམ་འདི་གང༌། །རྩིག་པའི་ལྷག་མ་ལུས་པ་ཙམ། །བདག་ཁྱིམ་མྱ་ངན་འཕེལ་བྱེད་པའི། །སྤྲིན་དང་ངེས་པར་བྲལ་བ་ཡི། །ཟླ་བའི་འོད་ལྟར་དཀར་འདི་གང༌། །བྱི་བ་འབུས་རྟོལ་བུ་ག་ཡི། །སྐར་ཁུང་ལྡན་པའི་ཁྱིམ་ཡང་གང༌། །རིན་ཆེན་རབ་མཆོག་དུ་མ་ཡི། །སྐར་ཁུང་ལྡན་པའི་ཁྱིམ་འདི་གང༌། །ཁྲོས་པའི་ཁྱིམ་ཁྱབ་ཚེར་མ་དང༌། །མི་གཙང་ཚོགས་ཀྱིས་གཟིངས་དེ་གང༌། །ཁྱིམ་འདི་སྔོན་ཆད་དེ་འདྲ་ལས། །རིན་ཆེན་བསགས་འདི་གང་ཡིན་མཚར། །སྦྲུལ་གྱིས་བོར་བའི་ལྤགས་རྙིང་འདི། །འཕྱང་བའི་གོས་ཀྱིས་ཁྱབ་དེ་གང༌། །ཕྲ་བའི་གོས་ནི་ཕུན་ཚོགས་བཀྲ། །རྔ་ཡབ་འཕྱང་བ་འདི་ནི་གང༌། །ཁྱི་མོས་བསྡུས་པའི་རུས་གོང་ནི། །དཀར་པོས་གཅལ་བཀྲམ་ཁྱིམ་དེ་གང༌། དྲི་ཞིམ་མེ་ཏོག་བཟང་པོ་འདི། །སིལ་མས་ཉེ་བར་མཛེས་འདི་གང༌། །མྱ་ངན་འཆི་མའི་རྒྱུན་གྱིས་ནི། །རྟག་ཏུ་བརླན་པའི་ཁྱིམ་དེ་གང༌། །དྲི་ཞིམ་གླ་རྩི་ཙན་དན་གྱི། །ཆུ་ཡིས་ཆག་ཆག་བཏབ་འདི་གང༌། །མེ་ལྕེས་ཚིག་ཅིང་ཁྭ་རྣམས་ཀྱིས། །མི་རྣམས་རྟ་བབས་ཅན་དེ་གང༌།། གསེར་དང་རིན་ཆེན་མུ་ཏིག་མཆོག །ཕྲེང་བས་ཉེ་བར་མཛེས་འདི་གང༌། །སྤང་ལེབ་ཆག་པའི་སྒོ་ཡིས་ནི། །བསྒྲིབས་པ་ཡི་ནི་ཁྱིམ་འདི་གང༌། །ཤེལ་ལས་བསྒྲུབས་པའི་སྒོ་གླེགས་ནི། །སྒོ་འཕར་ལྡན་པ་འདི་ནི་གང༌། །ང་ནི་ཡུན་རིང་ཉམས་པ་ཡི། །འཇིག་དུ་མ་བྱེད་པའི་ཁྱིམ་འདི་གང༌། །ནོར་
བུའི་རང་བཞིན་ཀ་བ་དང༌། །སྒོ་གང་གིས་ནི་བརྒྱན་འདི་གང༌། །སྨྲེ་སྔགས་སྒྲ་ཡིས་ཀུན་དུ་ནི། །ཁྱབ་པའི་བཞི་མདོ་དེ་ནི་གང༌། །རོལ་མོའི་སྒྲ་དང་གླིང་བུ་ཡི། །སྐད་དང་ཡང་དག་ལྡན་ནི་གང༌། །སྔོན་ནི་ཐོད་པའི་ཚོགས་དང་ནི། །ཕྱག་དར་ཕུང་པོས་ཁེམས་ཏེ་གང༌། །རིན་ཆེན་ཕུང་པོས་མཛེས་པ་གང༌། གང་དུ་བསགས་པ་འདི་ནི་གང༌། །ལྕོག་དང་གདུང་ཕྲན་བཀོད་པ་རྣམས། །མ་ལུས་ལྷག་པར་གྱུར་ཏེ་གང༌། །ནང་ན་མཐོན་ཀ་ཆེན་པོ་དང༌། །ཤེལ་ནི་ཆེན་པོ་བཞག་འདི་གང༌། །སྟན་དང་བྲལ་བའི་སོ་ཕག་ནི། །གཅིག་ལ་བརྟེན་པར་གྱུར་དེ་གང༌། །སྣ་ཚོགས་གོས་གཡོགས་ནང་ཚངས་ཅན། །བརྒྱ་ཕྲག་དང་ནི་ལྡན་དེ་གང༌། །སྔོན་ནི་གསེགས་མས་ཁྱབ་གྱུར་པའི། །ས་ཡི་ཆ་ཡི་མལ་དེ་གང༌། །རྒྱ་ཆེན་དང་ལྡན་དཔལ་གྱི་ཁྲི། །ཉམས་སུ་དགའ་བ་འདི་ནི་གང༌། །རྩྭས་གཡོགས་པ་ཡི་མལ་སྟན་ནི། །བདག་ལ་རབ་ཏུ་རྩུབ་སྟེ་གང༌། །ཤིང་བལ་ཡང་ཞིང་འཇམ་པའི་སྟན། །དེང་རབ་ཡིད་དུ་འོང་བ་གང༌། །ཁྱིམ་ནས་ཁྱི་ཡིས་གང་གྱུར་པས། །ཤིན་ཏུ་དྲི་མི་ཞིམ་དེ་གང༌། །གཞལ་ཡས་ཁང་ན་ཡིད་འོང་བ། །དྲི་ཞིམ་དམ་པས་བསྒོས་འདི་གང༌། །སྔོན་ཆད་ཁང་པའི་ཕྱི་ནང་ན། །གོས་དེངས་སྣལ་མས་ཁྱབ་དེ་གང༌། །སྣ་ཚོགས་རིན་ཆེན་མཆོག་གྱུར་པས། །རྣམ་སྤྲས་ཉམས་དགའ་འདི་ནི་གང༌། །ཁྲ་ཡིས་མི་གཙང་རི་མོ་ཡིས། །དཀར་པོ་བརྒྱ་རབ་འཆང་དེ་གང༌། །རྒྱན་རྣམས་སྣ་ཚོགས་མུ་ཏིག་གིས། །དྲ་བས་ཉེ་བར་མཛེས་འདི་གང༌། །སྡུག་བསྔལ་ཚིག་སྨྲེ་ལག་པ་དག །བསྒྲེང་བའི་ཁང་པ་དེ་ནི་གང༌། །དྲི་མེད་གདུགས་དང་བ་དན་དག །བསྒྲེངས་པས་བརྒྱན་པར་གྱུར་འདི་གང༌། །སྐྱོབ་པ་བསོད་ནམས་ཞིང་གྱུར་པ། །གང་ཞིག་བྱོན་པས་བདག་དེང་ཉིད། །དབུལ་བའི་རྒྱ་མཚོ་ལས་སྒྲོལ་བ། །མགོན་པོ་དེ་ལ་ཕྱག་འཚལ་ལོ། །གང་ཞིག་བྱོན་པས་བདག་དེ་ཉིད། །ཕུན་ཚོགས་འདི་འདྲ་ཐོབ་འགྱུར་བ། །ཐམས་ཅད་མཁྱེན་པ་རྣམ་པར་གཟིགས། །འཇིག་རྟེན་མགོན་ལ་ཕྱག་འཚལ་ལོ། །རྣམ་པར་རྒྱལ་བཞིན་བསམ་ཡས་པའི། །ཡོན་ཏན་དཔག་མེད་རྣམས་ཀྱིས་བརྒྱན། །ཡང་དག་བྱོན་ནས་དེ་བདག་ནི། །གཞལ་ཡས་ཁང་མཆོག་ཐོབ་པར་མཛད། །སྟོན་པ་དེ་ནི་ལེགས་རྙེད་པས། །ཏི་སེའི་རྩེ་མོ་བསྒྲེངས་པ་
ལྟའི། །སྟོན་ཀའི་ཟླ་བ་ལྟར་དཀར་བའི། །གཞལ་ཡས་ཁང་མཐོ་ཐོབ་པར་གྱུར། །དེ་ཉིད་གྲོང་ཁྱེར་འདི་མགོན་མེད། །དབུལ་བའི་སྡུག་བསྔལ་ཅན་གྱུར་ནས། །དེ་ཉིད་ཀུན་གྱི་མཆོག་གྱུར་ཅིང༌། །ནོར་ཆེ་བ་དང་ལྡན་པར་གྱུར། །ས་བོན་དེ་ཉིད་བཏབ་ཙམ་གྱིས། །འབྲས་བུ་འཕྲལ་དུ་སྩོལ་བ་པོ། །འཇིག་རྟེན་མཆོག་གྱུར་ཁྱབ་བདག་དེ། །སུ་ཞིག་གིས་ནི་མཆོག་འོས་མིན། །དེ་ནས་དེད་དཔོན་རྣ་ཅན་དད་པའི་ཤུགས་དྲག་པོས་སེམས་ཀྱི་རྒྱུད་བརླན་པ་དང་བསམས་པ། བཅོམ་ལྡན་འདས་བྱོན་ནས། །ངལ་འབྱོན་པ་འདི་ལྟ་བུ་ཐོབ་པར་མཛད་པ་ཡིན་པས། ད་ཡང་ངས་དང་པོ་ཉིད་དུ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཁང་པ་འདིར་སྤྱན་དྲངས་ལ། ཉན་ཐོས་ཀྱི་ཚོགས་དང་བཅས་པ་ལ་བཤོས་གཙང་དབུལ་བར་བྱའོ་སྙམ་ནས། གུས་པ་ཆེན་པོས་དེ་བཞིན་གཤེགས་པ་རྣམ་པར་གཟིགས། ཉན་ཐོས་ཀྱི་དགེ་འདུན་དང་བཅས་པ། ཁང་པའི་ནང་དུ་སྤྱན་དྲངས་ཏེ། ཞལ་ཟས་རོ་བརྒྱ་པ་ཉིན་ཞག་བདུན་གྱི་བར་དྲངས་ནས་ཞབས་གཉིས་ལ་ཕྱག་བྱས་ཏེ། ཇི་སྲིད་འཚོའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པར་གྱུར་ཏོ། །དེ་ནས་ཉི་མ་གཞན་ཞིག་ལ་ཞིང་བསྲུང་བའི་སྐྱེས་བུ་ཞོ་ཤལ་འཚོ་བ་ཞིག་ལ། རྗེ་བོས་འབྲས་ཆན་གྱི་ཐུམ་བུ་ཞིག་བྱིན་པ་དང༌། དེ་ཐོགས་ཏེ་ཞིང་ལས་ལ་ཆས་པ་དང༌། ལམ་གྱི་བར་ཞིག་ཏུ་ཞོ་ཤས་འཚོ་བའི་སྐྱེས་བུ་དེས་དགེ་བསྙེན་གཞན་ཞིག་ལ། དེད་དཔོན་རྣ་ཅན་གྱིས་མ་ཤའི་སྣུམ་ཁུར་གཅིག་སངས་རྒྱས་བཅོམ་ལྡན་འདས་ལ་ཕུལ་བས། འབྱོར་བ་འདི་ལྟ་བུ་ཐོབ་ཅེས་ཐོས་སོ། །ཐོས་ནས་ཀྱང༌། སྐྱེས་བུ་དེས་དགེ་བསྙེན་དེ་ལ་སྨྲས་པ། ཀྱེ་བཞིན་བཟངས་བཅོམ་ལྡན་འདས་དེ་ཆེ་བའི་ཡོན་ཏན་དེ་ཇི་ལྟ་བུ་ཞིག་ཡོད། དེས་སྨྲས་པ། བཞིན་བཟངས་བཅོམ་ལྡན་འདས་དེའི་ཡོན་ཏན་དེའི་ཁྱད་པར་སྨྲ་བར་ག་ལ་ནུས། འོན་ཀྱང་མདོར་བསྡུས་པའི་དོན་འདི་ཉོན་ཅིག །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དེ་ནི་སྐྱེས་བུ། རབ་མཆོག་མཚན་གྱིས་བརྒྱན་པས། གསེར་གྱི་རི་ལྟར་སྣང་བས། ཉི་མ་དང་ཟླ་བ་བས་ལྷག་པའི་འོད་གཅིག་པུ་ལ། དུལ་བ། བརྟུལ་ཞུགས་བཟང་བ། ཐུགས་དུལ་བ། གསུང་སྙན་བ། ཆ་ལུགས་བཟང་བ།
སྐུ་མཛེས་པ། ཞལ་མཛེས་པ། སྤྱན་མཛེས་པ། ཕྲིན་ལས་བཟང་བ། ཆོས་བཟང་བ། བཟོད་པ་དང་ལྡན་པ། སྤོབས་པ་དང་ལྡན་པ། དེས་པ་ཤིན་ཏུ་འདྲེན་པ་དུལ་བ་མཁྱེན་པ། ཞི་བ་མཁྱེན་པ། སྤྱན་ཡངས་པ། བྱས་པ་མཁྱེན་པ། དབང་པོ་རབ་ཏུ་ཞི་བ། དབང་པོའི་རྟ་ཤིན་ཏུ་དུལ་བ། དབང་པོ་ཤིན་ཏུ་ཞི་བ། ཆོས་ཀྱི་རྒྱལ་པོ་ཆེན་པོ། སེམས་ཅན་གྱི་སྙིང་པོ་ཆེན་པོ། འཇིག་རྟེན་གྱི་མགོན་པོ་ཆེན་པོ། ཡེ་ཤེས་ཀྱི་ཏོག་ཆེན་པོ། སྨྲ་བའི་དཔའ་བོ་ཆེན་པོ། བསོད་ནམས་ཀྱི་མཛོད་ཆེན་པོ། ཆོས་ཀྱི་གྲུ་ཆེན་པོ། དེད་དཔོན་ཆེན་པོ། སྦྱིན་གནས་ཆེན་པོ། གྲུབ་ཆེན་པོ་ཆོས་ཀྱི་སྦྱིན་བདག་ཆེན་པོ། སྲེད་པ་རྣམས་གཅོད་པར་མཛད་པ། རྨོངས་པ་ངེས་པར་འཇིག་པར་མཛད་པ། ཁྲོ་བ་ཞི་བར་མཛད་པ། ཐར་པ་སྟོན་པར་མཛད་པ། ཆོས་ཡང་དག་པར་མཛད་པ། ངན་པ་ལས་འཕོ་བར་མཛད་པ། ལམ་བཟང་པོ་སྟོན་པར་མཛད་པ། ཐེ་ཚོམ་གཅོད་པར་མཛད་པ། བདེན་པ་ཡང་དག་པར་སྟོན་པར་མཛད་པ། ཉོན་མོངས་པ་ཞི་བར་མཛད་པ། བདུད་འཇོམས་པར་མཛད་པ། འཇིག་རྟེན་རྣམས་སྒྲོལ་བར་མཛད་པ། ཚངས་པས་མཆོད་པ། བརྒྱ་བྱིན་གྱིས་ཡང་དག་པར་བཀུར་བ། འཇིག་རྟེན་ཐམས་ཅད་པས་ལྷག་པ། འཇིག་རྟེན་ཐམས་ཅད་ཀྱི་མཛེས་པ། སེམས་ཅན་ཐམས་ཅད་ཀྱི་མཆོག །སྡུག་བསྔལ་ཐམས་ཅད་གཅོད་པར་མཛད་པ། ཐམས་ཅད་རིག་པ། ཚུལ་དང་དུལ་བ་ལ་མཁས་པ། ཟག་པ་ཐམས་ཅད་ལས་འདས་པ། སྨྲ་བའི་གཙོ་བོ་ཟིལ་གྱིས་མ་མནན་པ། ཉེས་པ་ཐམས་ཅད་ཟིལ་གྱིས་མ་གཡེངས་པ། དོན་ཐམས་ཅད་ལ་མངོན་པར་བརྩོན་པ། གཟུགས་དན་ལྡན་པ། ཚུལ་ཁྲིམས་དང་ལྡན་པ། བསམ་གཏན་དང་ལྡན་པ། བརྩོན་འགྲུས་དང་ལྡན་པ། ཡེ་ཤེས་དང་ལྡན་པ། རེ་བ་མི་མངའ་བ། སྒྱུ་མི་མངའ་བ། ནན་མི་མངའ་བ། སྤྲོས་པ་མི་མངའ་བ། སྐྱོན་མེད་པར་ཞུགས་པ། འཇུག་པ་དང་ཟད་པའི་སྟོབས་ཉེ་བར་སྟོན་པར་མཛད་པ། སེམས་ཅན་ཐམས་ཅད་ལ་བྱམས་པའི་དགོངས་པ་ཅན། སྡིག་པ་རྣམས་ལས་གྲོལ་བ། ལྷག་པར་མོས་པ་དང་ལྡན་པ། བླ་ན་མེད་པ། གཙོ་བོ། སྟོན་པ་པོ། ཉོན་མོངས་པའི་ནད་ཀྱིས་གདུངས་པ་རྣམས་ཀྱི་སྨན་པ་ཆེན་པོ། རང་བྱུང་ཁྱབ་བདག་ཡང་
དག་པར་སྡོམ་པའི་བདག་ཉིད་ཅན། མཐུ་ཚད་མེད་པ། མཛད་པ་ཉུང་བ། ཆོ་ག་མཁྱེན་པ་དང་ལྡན་པ། དུས་དང་ལྡན་པ། ཡེ་ཤེས་དང་ལྡན་པ། ཉོན་མོངས་པའི་དགྲ་ལས་ངེས་པར་རྒྱལ་བ། མེ་རབ་ཏུ་ཞི་བ། མི་བསྐྱོད་པའི་ཆོས་དང་ལྡན་པ། མཆོག་ཏུ་སྡུག་བསྔལ་བའི་འཇིག་རྟེན་མ་རིག་པའི་འདམ་ལ་ནུབ་པ་ལ་གཟིགས་ཤིང་དེ་ལ་ཉིད་ཀྱིས་ཡང་དག་པར་འདོན་པ་སྤྱོད་ལ། ཉིད་ཀྱི་མཐུའི་བདག་ཉིད་སེམས་ཅན་ཐམས་ཅད་ལ་མཚུངས་པར་ཡོད་པར་བཞེད་པའི་ཐུགས་རྗེ་ཆེན་པོས་དོན་མཛད་པའི་བློ་གྲོས་ཀྱི་མཆོག་གིས་འདི་ལས་འགྲོ་བ་འདོན་པར་མཛད་པ། ཇི་ལྟར་སྡུག་བསྔལ་རྣམས་གནོན་པར་བྱ། ཇི་ལྟར་སྐྲག་པ་རྣམས་དབུགས་དབྱུང་བར་བྱ། ཇི་ལྟར་ན་འཁོར་བར་ནུབ་པ་རྣམས་གདོན་པར་བྱ། ཇི་ལྟར་ན་བཀྲེས་པ་རྣམས་ཚིམ་པར་བྱ་ཞེས་དེ་ལྟ་བུའི་བརྟན་པོ་ཡང་དག་པར་བསྐྱེད་དེ། བརྩོན་འགྲུས་མཆོག་རྩོམ་པར་མཛད་ཅིང༌། སྐུ་ཚེ་བྱེ་བ་བརྒྱ་སྟོང་དུ་སྔ་མ་བཞིན་དུ་ཟས་དང༌། སྐོམ་དང་གནས་དང༌། ལྷམ་དང༌། བཟའ་བ་དང༌། གདུགས་དང༌། བཞོན་པ་དང༌། སྟན་ལ་སོགས་པ་ཡིད་དུ་འོང་བ་དང༌། གླང་པོ་ཆེ་དང༌། རྟ་དང་ཆུང་མ་དང་བུ་དང༌། བྲན་ཕོ་དང༌། བྲན་མོ་དང༌། མགོ་དང༌། མིག་དང༌། བདག་གི་ཤ་དྲོན་པོ་བཅད་ནས་བརྒྱ་བྱིན་ཁྲའི་གཟུགས་ཅན་ལ་སོགས་པ་དང༌། སེམས་ཅན་ཐམས་ཅད་ལ་ཐབས་ཐམས་ཅད་ཀྱིས་ཕན་བར་དགོངས་པ། དུས་ཐམས་ཅད་དུ་ཡང་རྒས་པ་དང༌། ན་བ་དང༌། ཕོངས་པ་དང༌། ཀུན་དུ་རྨོངས་པ་དང༌། ཀུན་དུ་འཁྲུལ་པ་དང༌། འཁྲུགས་པ་དང༌། མི་བདེ་བར་གནས་པ་རྣམས་ལ་གཟིགས་ནས་ཐམས་ཅད་དབུགས་ཕྱུང་སྟེ། ཡོད་དམ་མེད་པ་ལ་ཡང་སྤྱོད་པ་ཇི་ལྟ་བས་བརྟན་པར་མཛད་པ། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ལ་སོགས་པའི་ཡོན་ཏན་སྐུ་ཚེ་བརྒྱ་སྟོང་དུ་མར་བསགས་པས་ཞི་བའི་བྱང་ཆུབ་ཀྱི་མཆོག་བླ་ན་མེད་པ་བརྙེས་པའོ། །གཞན་ཡང་ཡང་དག་པར་རྫོགས་པའི་སངས་རྒྱས་གྲགས་པས་ཁྱབ་པ། དབུགས་འབྱིན་པའི་ཆོས་ཐུགས་རྗེ་སྟོན་པར་མཛད་པ་ཡེ་ཤེས་ཡོངས་སུ་རྫོགས་པ། བརྩོན་འགྲུས་ཆེ་བ། དམ་བཅས་པ་ཐམས་ཅད་མཐར་ཕྱིན་པར་མཛད་པའོ། །ཉེས་པ་ཐམས་ཅད་ལས་ཉེ་བར་གྲོལ་བ་རྨོངས་
བ་རྣམས་ཉེ་བར་བསལ་བ། དུལ་བ་དང༌། ཞི་བ་དང༌། དབང་པོའི་ཡུལ་ཐམས་ཅད་ལ་མ་ཆགས་པ། ཐམས་ཅད་ཀྱི་དབང་ཕྱུག །ལུས་ཀྱི་ཐ་མ་བརྙེས་པ། ཚད་མེད་པའི་མཐུའི་འོད་ཀྱིས་བརྒྱན་པའི་ཡེ་ཤེས་ཀྱི་མཛོད། ཟླ་བ་རྒྱས་པ་བས་ལྷག་པའི་འོད་དང་ལྡན་པའི་ཞལ་མངའ་བ། ལྷའི་དབང་པོ་དང༌། ལྷ་མ་ཡིན་གྱི་དབང་པོ་དང༌། ཀླུའི་དབང་པོ་རྣམས་ཀྱིས་མོས་པས་རབ་ཏུ་དང་བ་དང༌། རྟག་ཏུ་ཕྱག་བྱས་པ། གཟི་བརྗིད་རབ་ཏུ་འབར་བ། བསོད་ནམས་དང་གྲགས་པ་དང་ལྡན་པ། དྲང་སྲོང་ཆེན་པོ་བྱུང་བ། གསེར་ཤིན་ཏུ་སྦྱངས་པ། ཆོས་ཀྱི་དབང་ཕྱུག་མཆོག་གི་ཆོས་ཀྱི་ཕ་རོལ་ཏུ་ཕྱིན་པ། སེམས་ཅན་གྱི་མཆོག །ཅང་ཤེས་པ་གྲོལ་བ། དཔའ་བ། ལྷའི་ཡང་ལྷ། ཡང་དག་པར་རྫོགས་པའི་སངས་རྒྱས། དེའི་ཡོན་ཏན་མ་ལུས་པར་སྟོན་པ་སུ་ཞིག་གིས་ནུས། གཞན་ཡང༌། གཟུགས་དང་མདངས་བཟང་ཐམས་ཅད་ཀྱི། །ཕུན་སུམ་ཚོགས་པས་ལེགས་བརྒྱན་པ། །སྐུར་ལྡན་སངས་རྒྱས་མ་གཏོགས་པ། །འདི་འདྲའི་མཆོག་གཞན་ཡོད་མ་ཡིན། །སངས་རྒྱས་འདྲ་བའི་སྟོན་པ་མེད། །སངས་རྒྱས་འདྲ་བའི་བློ་བཟང་མེད། །སངས་རྒྱས་འདྲ་བའི་རྟོགས་པ་མེད། །སངས་རྒྱས་འདྲ་བའི་ཐུབ་པ་མེད། །སངས་རྒྱས་འདྲ་བའི་སྣོད་མེད་དེ། །སངས་རྒྱས་འདྲ་བའི་བདེ་ལྡན་མེད། །སངས་རྒྱས་འདྲ་བའི་དུལ་བ་མེད། །སངས་རྒྱས་འདྲ་བའི་གཙོ་བོ་མེད། །སངས་རྒྱས་འདྲ་བའི་སྨྲ་བ་མེད། །སངས་རྒྱས་འདྲ་བའི་ཕ་མེད་དེ། །སངས་རྒྱས་འདྲ་བའི་གཉེན་འདུན་མེད། །སངས་རྒྱས་འདྲ་བའི་བཤེས་མེད་དོ། །བདག་གི་མེད་ཅིང་དྲེགས་པ་མེད། །འཇིགས་པ་མེད་ཅིང་ཉེས་པ་མེད། །སྲིད་པའི་དགོན་པ་ངེས་རྒལ་ཞིང༌། །འགྲན་ཟླ་མེད་ཅིང་སྐྱོན་མི་མངའ། །མཛེས་དུལ་ཞི་ཞིང་གཙང་བ་དང༌། །དྲན་ལྡན་སྟོབས་ལྡན་དབང་དང་ལྡན། །སེམས་ཅན་ཀུན་ལ་ཕན་མཛད་པ། །སངས་རྒྱས་འདྲ་བ་གཞན་མེད་དོ། །མདོར་ན་ཡོན་ཏན་དམ་པ་ནི། །ཁྱད་པར་སྣ་ཚོགས་ལྡན་པས་ན། །ཁམས་གསུམ་ན་ནི་སངས་རྒྱས་དང༌། །མཉམ་པ་མེད་པར་གཟུང་བར་གྱིས། །དེ་ཐོས་པ་དང་ཞོ་ཤས་འཚོ་བའི་སྐྱེས་བུ་དེ་དད་པས་བ་སྤུ་ལྡང་ཞིང་ཤིན་ཏུ་རྙེད་པར་དཀའ་བའི་སྤོབས་པ་འཕྲལ་དུ་སྐྱེས་ཏེ། དེས་སྨྲས་པ། དེད་དཔོན་རྣ་ཅན་གྱི་སྲེད་པས་དེ་ལྟ་བུའི་སྦྱིན་
གནས་དམ་པ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ལ་མ་ཤའི་སྣུམ་ཁུར་ཅིག་ཕུལ་ནས། སྐད་ཅིག་དེ་ཉིད་ལ་དེད་དཔོན་དེད་བུལ་བ་མེད་པར་གྱུར་ཅིག་ཅེས་དེ་ལྟར་སེམས་ཀྱི་ནོར་བུ་རིན་པོ་ཆེར་གྱུར་པ་དེ་བཞིན་གཤེགས་པ་ལས་རྙེད་དེ། ཤིན་ཏུ་ཞན་པ་ལ་ལོངས་སྤྱོད་ཀྱི་རྒྱུར་གྱུར་པའི་སྨོན་ལ་མ་བཏབ་པ་ཡིན་ལ། ང་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་བརྒྱ་སྟོང་དཔག་ཏུ་མེད་པར་ཡང་མི་མཐོང་བ། ཤིན་ཏུ་བལྟ་བར་འོས་པ། བླ་ན་མེད་པ་བསྐལ་པ་བརྒྱ་སྟོང་དཔག་ཏུ་མེད་པར་སེམས་ཅན་ཐམས་ཅད་ཀྱི་དོན་ལ་ཞུགས་པར་བསགས་པའི་བསོད་ནམས་ཀྱི་ཚོགས་མངའ་བ་ཐུགས་རྗེ་ཆེན་པོ་ལས་མི་ལྡོག་པ། འཁོར་བ་དུ་མའི་ཉོན་མོངས་པའི་དུག་ཅན་གྱི་སྦྲུལ་ཆེན་པོས་ཟིན་པའི་དམན་པ་རྣམས་ལ་རྗེས་སུ་ཐུགས་བརྩེ་བ། རྣམ་པར་ལྟུང་པའི་འགྲོ་བ་རྣམས་ལ་ཁྱད་པར་དུ་མཉེན་གཤིན་པ་རྗེས་སུ་མི་སྤོང་བའི་ཉེ་དུ་ཡིན་ལ། ངས་ནི་དུས་དཔག་ཏུ་མེད་པར་ལོངས་སྤྱོད་མ་བསྒྲུབས་པ་ཡིན་ཏེ། ངས་ཞིང་ལས་ཀྱིས་བསྒྲུབས་པའི་འབྲས་ཆན་གྱི་སློང་མོ་ཤིན་ཏུ་ཞན་པ་རྙེད་པ་འདི་ཕུལ་ལ་མཉེས་པར་བྱ་སྟེ། དེའི་ཚེ་གང་གིས་སེམས་ཅན་ཐམས་ཅད་ཀྱི་མཆོག་ཏུ་འགྱུར་བ་དེ་ལྟ་བུའི་སྨོན་ལམ་གདབ་པར་བྱའོ་སྙམ་པའི་ཡིད་ལ་བརྗོད་པའི་རྗེས་ཐོགས་ཉིད་ལ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པ་གཟིགས་ཀྱིས་སེམས་དང་སེམས་ཀྱི་རྟོགས་པ་མཁྱེན་ནས་རྫུ་འཕྲུལ་གྱིས་གཤེགས་ཏེ་དེའི་མདུན་དུ་བཞུགས་སོ། །ལས་བྱེད་པའི་སྐྱེས་བུ་དེས་དེ་བཞིན་གཤེགས་པ་རྣམ་པར་གཟིགས་སྐུ་བལྟ་བས་ཆོག་མི་ཤེས་པ། གསེར་ཤིན་ཏུ་སྦྱངས་པ་ལྟར་མངོན་པར་མཛེས་པའི་མདངས་དང་ལྡན་པའི་ལྷའི་རིའི་རྩེ་མོ་ལ་ཉི་མ་འཆར་ཀའི་འོད་ཟེར་རྣམ་པར་འབྱུང་བས་མཚམས་སྣང་བར་བྱས་པས་ཤིན་ཏུ་གསལ་བར་བྱས་པ་ལྟ་བུའི་སྐུ་ལ་འོད་དང་ལྡན་པ་མཐོང་ངོ༌། །མཐོང་ནས་ཀྱང་མཆོག་ཏུ་དགའ་བ་དང་ཡིད་བདེ་བ་སྐྱེས་ནས་དད་པའི་ཤུགས་ཆེན་པོས་འབྲས་ཆན་ཐུམ་བུ་བླངས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ལྷུང་
བཟེད་དུ་ཕུལ་ཏེ། དད་པའི་ཤུགས་ཆེན་པོས་ཞབས་གཉིས་ལ་ཕྱག་བྱས་ཏེ་སྨོན་ལམ་བྱེད་པར་བརྩམས་པ། མགོན་པོའི་བསོད་ནམས་འདི་ཡིས་ནི། །སྐྱེ་བ་འདི་ནས་བཟུང་ནས་སུ། །སེམས་ཅན་ཀུན་ལ་ཕན་སེམས་ཤིང༌། །སྙིང་རྗེའི་བདག་ཉིད་ཅན་གྱུར་ཅིག །ཇི་ལྟར་ཁྱོད་ནི་མཚན་ལྡན་ཞིང༌། །བླ་མེད་བྱང་ཆུབ་བརྙེས་གྱུར་པ། །དེ་བཞིན་བདག་ཀྱང་རྫོགས་བྱང་ཆུབ། །དྲི་མེད་ཡང་དག་ཐོབ་གྱུར་ཅིག །ཇི་ལྟར་ཁྱེད་ནི་ཀུན་མཁྱེན་ཞིང༌། །ཆོས་རྣམས་ཇི་ལྟར་སྟོན་མཛད་པ། །བརྙེས་པ་དེ་བཞིན་བདག་ཀྱང་ནི། །ཀུན་མཁྱེན་ཉིད་ནི་ཐོབ་པར་ཤོག །ཇི་ལྟར་ཁྱེད་བདུད་ལས་རྒྱལ་ཞིང༌། །ཆོས་ཀྱི་འཁོར་ལོ་བསྐོར་མཛད་པ། །དེ་བཞིན་བདག་ཀྱང་ངེས་རྒྱལ་ནས། །ཆོས་ཀྱིས་འཁོར་ལོ་བསྐོར་གྱུར་ཅིག །ཇི་ལྟར་མགོན་པོས་འཁོར་བ་ཡི། །རྒྱ་མཚོའི་ངོགས་སུ་སྒྲོལ་མཛད་བཞིན། །ཐུབ་པའི་དམ་པ་དེ་ལྟར་ནི། །བདག་གིས་སེམས་ཅན་མང་དགྲོལ་བགྱི། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཆར་དང་བཅས་པའི་སྤྲིན་བཞིན་ཟབ་ཅིང་གསལ་བའི་གསུང་གིས་བཀའ་སྩལ་པ། བཞིན་བཟངས་དོན་གྲུབ་ཅེས་བྱའི་སྟོན་པར་ནི། །མཐུ་ལྡན་ཁྱོད་ནི་སྟོན་པར་རབ་འགྱུར་ཏེ། །བདུད་སྡེ་བཅས་ལས་འདི་ན་མངོན་རྒྱལ་ཞིང༌། །ཀུན་ནས་འཇིགས་པ་མངོན་པར་ལྟུང་བྱེད་འགྱུར། །དེ་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སྐྱེས་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལུང་བསྟན་ཟིན་པ་དང༌། ཇི་ལྟར་གྱུར་པ་དེ་རྒྱལ་པོའི་ཕོ་བྲང་མཉན་ལྡན་ཀུན་དུ་གྲགས་པར་གྱུར་ཏོ། །ཇི་ཙམ་ན་རྒྱལ་པོ་མཉན་ལྡན་གྱིས་ཐོས་པ་དང༌། དེར་རང་ཉིད་སོང་སྟེ། དགེ་བའི་རྩ་བའི་ཚོགས་དེས་སྤྲོ་བའི་སེམས་ཀྱིས་སྐྱེས་བུ་དེ་ལ་བསྙེན་བཀུར་ཆེན་པོས་གླང་པོ་ཆེའི་རྒྱབ་ལ་བསྐྱོན་ཏེ་ཕོ་བྲང་དུ་ཁྱེར་ནས་སྟན་ཕྱེད་ལ་བཞག་སྟེ། རྒྱལ་སྲིད་ཀྱི་ཕྱེད་བྱིན་པས་མཆོད་པ་དང༌། དེས་སྨྲས་པ། རྒྱལ་པོ་ཆེན་པོ་བདག་ནི་འདོད་པ་དོན་དུ་གཉེར་བ་མ་ལགས་ཏེ། བདག་རབ་ཏུ་བྱུང་ནས་ཚངས་པར་སྤྱོད་པ་སྤྱད་པར་གནང་བར་མཛད་དུ་གསོལ། །དེ་ཡང་རྒྱལ་པོས་གནང་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས། དེ་དེར་ཇི་སྲིད་འཚོའི་བར་དུ་ཚངས་པར་སྤྱོད་པ་སྤྱད་དེ། དུས་བྱས་
ནས་འཕྲུལ་དགའི་ལྷ་རྣམས་སུ་སྐྱེས་སོ། །རྒྱལ་པོ་མཉན་ལྡན་ཡང་དུས་བྱས་ནས་དེའི་རྒྱལ་སྲིད་ལ་བཞག་གོ །དེས་ཀྱང་དུས་ཆུང་ཟད་ཅིག་རྒྱལ་སྲིད་བྱས་ནས་དུས་བྱས་པ་དང༌། བློན་པོ་རྣམས་ཀྱིས་བསྙེན་བཀུར་ཆེན་པོས་གཟུགས་བཟང་རྒྱལ་པོར་བསྐོས་ཏེ། དེ་ལོ་དྲུག་ཁྲིའི་བར་དུ་ཆོས་ཀྱི་རྒྱལ་པོ་བྱས་ཏེ། དེ་ནས་ཤི་འཕོས་ནས་དགའ་ལྡན་གྱི་ལྷའི་ནང་དུ་སྐྱེས་སོ། །རྒྱལ་པོ་ཆེན་པོ་འདི་ཇི་སྙམ་དུ་སེམས། དེའི་ཚེ་དེའི་དུས་ན་གཟུགས་བཟང་ཞེས་བྱ་བའི་རྒྱལ་པོ་དེ་གཞན་ཞིག་ཡིན་པ་སྙམ་དུ་སེམས་ན་དེ་དེ་ལྟར་མི་བལྟ་སྟེ། གསེར་མདོག་འདི་དེའི་ཚེ་དེའི་དུས་ན་གཟུགས་བཟང་ཞེས་བྱ་བའི་རྒྱལ་པོར་གྱུར་ཏེ། གང་འདིས་དེ་བཞིན་གཤེགས་པ་རྣམ་པར་གཟིགས་ལ་ཡུང་བས་བཙོས་པའི་གོས་ཀྱི་དུམ་བུ་ཕུལ་ནས་སྨོན་ལམ་བཏབ་སྟེ། ལས་ཀྱི་རྣམ་པར་སྨིན་པ་འདིས་ལྷ་དང་མི་རྣམས་ཀྱི་བདེ་བ་དཔག་ཏུ་མེད་པ་ཉམས་སུ་མྱོང་སྟེ། གང་དང་གང་དུ་སྐྱེས་པ་དེ་དང་དེར་ལུས་གསེར་གྱི་མདོག་ཅན་དང་གསེར་གྱི་མདོག་ཅན་གྱི་གོས་ལུས་ལ་གྱོན་པ་དང༌། བཙས་པའི་དུས་སུ་ཡང་ཀར་ནི་ཀ་རའི་མེ་ཏོག་གི་ཆར་བབ་པར་གྱུར་པ་དང༌། ཇི་སྲིད་ད་ལྟར་ཡང་རང་གི་ལུས་ལ་གོས་ལན་ཅིག་ཕུད་ན་དེའི་སྐད་ཅིག་ཉིད་ལ་ལུས་ལས་སྐྱེས་པར་འགྱུར་བའི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་ནོ། །དེའི་ཚེ་དེའི་དུས་ན་དེད་དཔོན་རྣ་ཅན་ཞེས་བྱ་བ་དེ་ནི་དེད་དཔོན་ཉི་མ་འདི་ཉིད་ཡིན་ནོ། །དེད་དཔོན་རྣ་ཙན་གྱི་ཆུང་མ་གང་ཡིན་པ་དེ་ནི་ད་ལྟར་དེད་དཔོན་ཉི་མའི་ཆུང་མ་ཡིན་ནོ། །བྲན་མོ་ནི་ཀ་ཤི་མཛེས་དགའ་མོ་ཡིན་ནོ། །དེའི་ཚེ་དེའི་དུས་ཀྱི་བྲན་པོ་ནི་བློན་པོ་རབ་གཏུམ་ཡིན་ནོ། །ཡང་རྒྱལ་པོ་མ་སྐྱེས་དགྲས་གནས་བརྟན་ཀུན་དགའ་བོ་ལ་འདི་སྐད་ཅེས་གསོལ་ཏོ། །བཙུན་པ་ཀུན་དགའ་བོ་དགེ་སློང་གསེར་མདོག་གིས་ལས་ཅི་ཞིག་བགྱིས་ན་ལས་གང་གི་རྣམ་པར་སྨིན་པས་ཉེས་པ་མེད་ཅིང་གནོད་པ་མི་བྱེད་པ་གསལ་ཤིང་ལ་བསྐྱོན་པ་དང༌། རབ་ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་པ་ལགས། གནས་བརྟན་ཀུན་དགའ་བོས་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་བའི་དུས་ན་ཡང་དག་པར་རྫོགས་པའི་སངས་རྒྱས་ཟླ་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་
སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་རྒྱལ་པོའི་ཕོ་བྲང་གཞན་ཞིག་ན་ཉེ་བར་བསྟེན་ཞིང་བཞུགས་སོ། །ཡང་དེའི་ཚེ་དེའི་དུས་ན་གཙུག་ལག་ཁང་གཞན་ཞིག་ན་དགེ་སློང་ག་གེ་མོ་ཞེས་བྱ་བའི་ཆོས་སྟོན་པ་ཞིག་གནས་པ་དང༌། དེ་དུས་དང་དུས་སུ་འོང་ཞིང་འགྲོ་བའི་བྲམ་ཟེ་དང༌། ཁྱིམ་བདག་རྣམས་ལ་ཆོས་སྟོན་པར་བྱེད་པ་ན་དེས་རྙེད་པ་དང་བཀུར་སྟི་ཆེན་པོ་ཐོབ་པར་གྱུར་ཏོ། །ཇི་ཙམ་ན་དུས་གཞན་ཞིག་ན་མ་ཕམ་པ་ཞེས་བྱ་བའི་དགེ་སློང་ཆོས་སྨྲ་བ། རིག་པ་དང་གྲོལ་བའི་སྤོབས་པ་ཅན། སྣ་ཚོགས་པའི་གཏམ་དང༌། སྙན་པའི་གཏམ་དང༌། ཡུལ་གྱི་ལྗོངས་རྒྱུ་ཞིང་གཙུག་ལག་ཁང་དེར་འོངས་པ་དང༌། དེ་འཁོར་བཞི་པོ་ལ་ཚངས་པར་སྤྱོད་པ། ཐོག་མར་དགེ་བ་དང༌། བར་དུ་དགེ་བ་དང༌། ཐ་མར་དགེ་བ་དང༌། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་དག་པ། ཡོངས་སུ་བྱང་བ་ཡོངས་སུ་རྫོགས་པ་ཡང་དག་པར་སྟོན་ཏེ། དེས་ཡུལ་གྱི་ཕྱོགས་དེ་ན་གནས་པའི་སྐྱེ་བོ་ཐམས་ཅད་མངོན་པར་དད་པར་བྱས་ཤིང༌། དེ་ཆོས་གོས་དང་བསོད་སྙོམས་དང༌། མལ་སྟན་དང༌། ནད་ཀྱི་གསོས་སྨན་དང༌། ཡོ་བྱད་རྣམས་རྙེད་པར་གྱུར་ཅིང༌། གཞི་ན་གནས་པའི་ཆོས་སྨྲ་བ་དེའི་རྙེད་པ་དང་བཀུར་སྟི་ཆད་པར་གྱུར་པ་དང༌། དེ་འདི་སྙམ་དུ་སེམས་ཏེ། དགེ་སློང་མ་ཕམ་པས་ངའི་རྙེད་པ་དང༌། བཀུར་སྟི་རྒྱུན་བཅད་པར་བྱས་ཏེ། ཇི་སྲིད་འདི་ན་གནས་པ་དེ་སྲིད་ཀྱི་བར་བུ་ངས་རྙེད་པ་དང་བཀུར་སྟི་ག་ལ་རྙེད་ཀྱི་འགྲོ་བའི་ཕྱིར་ཐབས་བསམ་པར་བྱའོ་སྙམ་མོ། །ཡང་བསམས་པ། འདི་ནི་ཐོས་པ་མང་བ་ཡིན་པས་བསྙེན་བཀུར་མེད་པས་འཇིགས་པ་ཡིན་ཏེ། དེ་བས་ན་བསྙེན་བཀུར་མེད་པ་ལ་སྦྱར་བར་བྱའོ་སྙམ་ནས་བྲམ་ཟེ་མོ་གཞོན་ནུ་མ་གཞན་ཞིག་ལ་སྨྲས་པ། སྲིད་མོ་ངས་ཁྱོད་ལ་རས་ཟུང་ཅིག་སྦྱིན་པར་བྱ་ཡིས་ཁྱེད་ཀྱིས་འདི་དང་ལྷན་ཅིག་མི་ཚངས་པར་སྤྱད་པར་བྱ་བ་ཡིན་ནོ་ཞེས་དགེ་སློང་མ་ཕམ་པ་ལ་སྐུར་བ་ཐོབ་ཤིག །དེས་སྨྲས་པ། འཕགས་པ་ངས་དེ་ལྟར་སྨྲས་ན་ང་སུ་ཞིག་ལན་པར་འགྱུར་ཏེ། ཇི་སྲིད་འཚོའི་བར་དུ་ཕ་དང་མ་གསོ་བར་བྱེད་པ་ཞིག་ཏུ་མི་
འགྱུར་རམ། དེས་སྨྲས་པ། ངས་ཇི་ལྟར་ན་སྐྱེ་བོ་མང་པོས་ཤེས་པར་མི་འགྱུར་བ་དེ་ལྟར་བྱ་ཡིས་གཞན་དུ་ནང་འདི་ན་དགེ་སློང་གཞན་གསུམ་མམ་བཞི་དང་ལྷན་ཅིག་འདུག་གིས། དེའི་ཚེ་ཁྱོད་གསང་བའི་ཚིག་གིས་སྨྲོས་ཤིག །དེས་དེ་ལྟར་བགྱིའོ་ཞེས་ཁས་བླངས་སོ། །ཇི་ཙམ་ན་ཉི་མ་གཞན་ཞིག་ན་ཆོས་སྟོན་པའི་དགེ་སློང་དེ་དགེ་སློང་དེ་རྣམས་དང་ལྷན་ཅིག་ཁང་པའི་སྒོ་ན་འདུག་སྟེ་གཏམ་གྱིས་སྦྱོར་བར་གནས་པ་དང༌། བྲམ་ཟེ་མོ་དེ་འོངས་ན་སྨྲས་པ། འཕགས་པ་ཁྱེད་རྣམས་ནི་རབ་ཏུ་བྱུང་བ་ལགས་སོ་སྙམ་ནས་བདག་ཅག་བག་ཕེབས་པས་འགྲོ་ཞིང་རྒྱུ་བར་བྱའོ་སྙམ་དུ་བདག་སེམས་ན། གང་དགེ་སློང་མ་ཕམ་པ་འདིས་བདག་སྟོབས་ཀྱིས་གཟུང་ནས་གཞོན་ནུ་མའི་ཚུལ་ཉམས་པར་བྱས་ན། ཅི་རིགས་པ་ལགས་སམ་དེ་ནས་དགེ་སློང་དེ་རྣམས་ཀྱིས་རྣ་བ་བཀག་སྟེ། སྲིང་མོ་དེ་སྐད་མ་ཟེར་ཅིག །འདི་ནི་མཉན་པར་བྱ་བ་མ་ཡིན་ནོ། །དེ་ནས་ཆོས་སྟོན་པའི་དགེ་སློང་དེས་ལེགས་པར་བྱས་པ་མ་ཡིན་ནོ། །ལེགས་པར་བྱས་པ་མ་བྱས་པ་ཡིན་ནོ་ཞེས་ཟེར་ཞིང་དགེ་སློང་མ་ཕམ་པའི་གྲགས་པ་མ་ཡིན་པ་སྒྲོགས་སོ། །ཅི་ཅམ་ན་ཐོས་པ་གཅིག་ནས་གཅིག་ཏུ་བརྒྱུད་པས་དགེ་སློང་མ་ཕམ་པས་ཐོས་སོ། །ཐོས་ནས་ཀྱང་སྨྲས་པ། སུ་ཞིག་དེ་སྐད་ཟེར། ཡང་སྨྲས་པ། དགེ་སློང་ཆོས་སྟོན་པ་འདི་དེ་སྐད་ཟེར་རོ། །དེ་ནས་དེ་ཆོས་སྨྲ་བའི་དགེ་སློང་གང་ན་བ་དེར་སོང་སྟེ་ཕྱིན་ནས་ཀྱང་སྨྲས་པ། བཙུན་པ་བདག་གིས་ཁྱེད་ལ་གནོད་པ་ཅི་ཞིག་བྱས་ན་གང་འདི་ལྟ་བུའི་བསྔགས་པ་མ་ཡིན་པ་སྒྲོགས་པར་བྱེད། དེས་དེ་ལ་སེམས་ཤིན་ཏུ་འཁྲུགས་པས་ངག་གི་ལས་ཤིན་ཏུ་མི་བཟད་པ་སྨྲས་པ། ཁྱོད་ཀྱིས་ནི་གང་གིས་གསལ་ཤིང་ལ་གཟུགས་པར་འོས་པ་དེ་བྱས་སོ། །དེ་ཐོས་པ་དང་དགེ་སློང་མ་ཕམ་པ་འདི་སྙམ་དུ་སེམས་ཏེ། དཀའ་ཐུབ་ཅན་འདི་ནི་ཉེ་བར་བཅོམ་ཞིང་ཉམས་པར་གྱུར་ཏོ་སྙམ་ནས། ཆོས་གོས་དང་ལྷུང་བཟེད་བླངས་ཏེ། ཇི་ལྟར་ཡོངས་སུ་ལོངས་སྤྱོད་པའི་མལ་སྟན་བསྡུས་ནས་གཙུག་ལག་ཁང་དེ་ནས་བྱུང་སྟེ་ཆས་སོ། །དེ་ཆས་པ་མཐོང་ནས་དགེ་སློང་དང༌། དགེ་སློང་མ་དང༌། ཡུལ་དེ་ན་གནས་པའི་སྐྱེ་བོའི་ཚོགས་རྣམས་དེ་བཟློག་པའི་ཕྱིར་ཕྱི་བཞིན་འབྲངས་སོ། །ཆོས་སྨྲ་བའི་དགེ་སློང་དེ་ཡང་འདི་སྙམ་དུ་ངས་ནི་བཟང་པོ་བྱས་པ་
མ་ཡིན་ཏེ། གང་རྙེད་པ་དང་བཀུར་སྟི་ཙམ་གྱི་ཕྱིར་འདི་ལྟ་བུའི་ངན་སོང་ཙམ་དུ་འགྲོ་བར་འཇུག་པའི་ལས་བྱེད་པ་ལ་ཞུགས་པ་ནི་བདག་གིས་ལེགས་པར་བྱས་པ་མ་ཡིན་ནོ་སྙམ་ནས་འགྱོད་པ་སྐྱེས་ཏེ། ཡིད་མི་བདེ་བར་གྱུར་ནས་བསམས་པ། སོང་ལ་བཟོད་པར་གསོལ་བར་བྱའོ་སྙམ་ནས་རིངས་པ་རིངས་པར་གཙུག་ལག་ཁང་དེ་ནས་བྱུང་སྟེ། ཤིན་ཏུ་སྐྱོ་བའི་ཡིད་དང༌། མཆི་མའི་རྒྱུན་གྱིས་བརླན་པར་གྱུར་པའི་དམན་པའི་བཞིན་དང༌། བྱིས་པ་གཞོན་ནུ་བཞིན་དུ་གསང་མཐོན་བོས་ངུ་ཞིང་བྲམ་ཟེ་དང༌། ཁྱིམ་བདག་བརྒྱ་སྟོང་དཔག་ཏུ་མེད་པས་མཐོང་ཞིང་དགེ་སློང་མ་ཕམ་པའི་རྐང་པ་ལ་ཕྱག་བྱས་ནས། མི་རིགས་པར་བགྱིས་ཀྱི་མཐོལ་ལོ་མཐོལ་ལོ་ཞེས་འཆགས་པར་རྩོམ་སྟེ། བཙུན་པ་བྱིས་པ་ཇི་ལྟ་བ་དང༌། རྨོངས་པ་ཇི་ལྟ་བ་དང༌། བྱེ་བྲག་མི་ཕྱེད་པ་ཇི་ལྟ་བའི་དགེ་བས་རྙེད་པ་དང༌། བཀུར་སྟི་ཟིལ་གྱིས་མནན་ཏེ། བདག་གིས་ཁྱེད་ལ་མེད་བཞིན་དུ་བསྔགས་པ་མ་ཡིན་པ་བསྒྲགས་པ་དེ་བཟོད་པར་མཛོད་ཅིག །མི་རིགས་པར་བགྱིས་པ་དེ་འཆགས་ཀྱི་ཐུགས་བརྩེ་བས་ཟུང་ལ་བཟོད་པ་མཛོད་ཅིག །དགེ་སློང་མ་ཕམ་པས་ཚེ་དང་ལྡན་པ་བཟོད་པ་གྱིས་ཞེས་སྨྲས་ཏེ། ཤིན་ཏུ་སྐྱེ་བའི་སེམས་དང་ཤིང་དྲུང་གཞན་ཞིག་ལ་རྟེན་ཅིང་འདུག་ནས་སྐྱིལ་མོ་ཀྲུང་བཅས་ཏེ་ལུས་དྲང་བོར་བསྲང་ནས་དྲན་པ་ཉེ་བར་བཞག་སྟེ། དེས་དེ་ཉིད་དུ་ཤིན་ཏུ་སྐྱོ་བས་བརླན་པར་བྱས་པའི་སེམས་དང༌། འབད་ཅིང་རྩོལ་ལ། བརྩོན་འགྲུས་བརྩམས་པས་འཁོར་བའི་འཁོར་ལོ་ཕོལ་མིག་ལྔ་དང་བཅས་པ་གཡོ་བ་དང་མི་གཡོ་བ་ཤེས་ནས། ཇི་སྲིད་དབང་པོ་དང༌། ཉེ་དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་ལ། མངོན་པར་བསྟོད་པའི་དགྲ་བཅོམ་པ་ཞིག་ཏུ་གྱུར་ནས། དེ་ངང་པའི་རྒྱལ་པོ་འདབ་མ་བརྐྱང་བ་བཞིན་དུ་ནམ་མཁའི་དཀྱིལ་དུ་མངོན་པར་འཕགས་ཏེ་སྐྱེ་བོའི་ཚོགས་ཆེན་པོ་ཡིད་མངོན་པར་དད་པར་བྱེད་པའི་ཆོ་འཕྲུལ་སྣ་ཚོགས་པ་བྱ་བར་བརྩམས་སོ། །དགེ་སློང་ཆོས་སྨྲ་བ་དེ་ཡང་ནམ་མཁའི་དཀྱིལ་ན་གནས་པ་དེ་ལ་བལྟས་ཏེ། ཀྱི་ཧུད་འདི་ལྟ་བུའི་དྲང་སྲོང་ཆེན་པོ་ལ་ངན་སེམས་ཀྱིས་སྨད་ཅིང་སྐུར་བ་བཏབ་བོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་བར་གྱུར་ཏོ། །བར་སྐབས་དེར་ཡང་དག་པར་རྫོགས་པའི་སངས་རྒྱས་ཟླ་བ་ཐུགས་རྗེ་ཆེན་པོས་ཡོངས་སུ་གདུངས་པའི་ཐུགས་དང་ལྡན་པས་དགེ་སློང་ཆོས་སྨྲ་བ་ཁྲག་
དྲོན་མོ་སྐྱུགས་ནས་འཆི་བར་གྱུར་ན་མི་རུང་ངོ་སྙམ་དུ་དགོངས་ནས་རྫུ་འཕྲུལ་གྱིས་ས་ཕྱོགས་དེར་གཤེགས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་འཁོར་ལོ་དང༌། གཡུང་དྲུང་དང༌། དགའ་བ་འཁྱིལ་པ་དང༌། དྲ་བས་འབྲེལ་བ་དང༌། བསོད་ནམས་དཔག་ཏུ་མེད་པ་ལས་བྱུང་བ་དང༌། སྐྲག་པ་རྣམས་དབུགས་འབྱིན་པར་མཛད་པའི་ཕྱག་གིས་དགེ་སློང་ཆོས་སྨྲ་བའི་མགོ་ལ་བྱུགས་སོ། །དེས་རེག་པ་ཙམ་གྱིས་དྲན་པ་སླར་རྙེད་དེ་ལངས་ནས་བཅོམ་ལྡན་འདས་དང༌། དགེ་སློང་གི་དགེ་འདུན་ལ་བདག་ནི་མི་རིགས་པའོ་ཞེས་འཆགས་པར་བརྩམས་སོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་དེའི་ཚེ་ཚིགས་སུ་བཅད་དེ་གསུངས་པ། སྐྱེས་བུ་སྐྱེས་པའི་ཁ་ནས་ནི། །ཚིག་ངན་སྨྲ་བར་བྱེད་པ་ཡི། །ཚིག་གི་སྟ་རེ་སྐྱེས་གྱུར་ནས། །བདག་ཉིད་གཅོད་པར་བྱེད་པར་འགྱུར། །གང་ཞིག་སྨད་འོས་སྐྱེ་བོ་སྟོད་བྱེད་དང༌། །བསྟོད་འོས་སྐྱེ་བོ་རྣམ་པར་སྨོད་བྱེད་པ། །དེ་ནི་ཁའི་འཐབ་ཀྲོལ་ཀུན་སྩོགས་ཤིང༌། །འཐབ་ཀྲོལ་ཅན་གང་དེས་ནི་བདེ་མི་འཐོབ། །གང་འདིར་ཆོ་ལོས་རང་ནོར་ཕམ་བྱེད་པ། །འཐབ་ཀྲོལ་དེ་ནི་ཅུང་ཟད་ཙམ་དུ་ཟད། །གང་ཡིད་བདེ་བར་གཤེགས་ལ་ཡིད་འཁྲུགས་པ། །དེ་འདིར་འཐབ་ཀྲོལ་ཤིན་ཏུ་ཆེན་པོ་ཡིན། །ངག་ཡིད་འཕགས་པས་སྨད་བའི་སྡིག་བསྟེན་ན། །བྱེ་བ་ཆུ་བུར་ཅན་དང་སྟོང་ཕྲག་ནི། །བཞི་བཅུ་གཅིག་ཏུ་ཆུ་བུར་རྡོལ་བ་ཡི། །སེམས་ཅན་དམྱལ་བ་རྣམས་སུ་སྐྱེ་བར་འགྱུར། །སྡིག་པའི་སེམས་ཀྱིས་མ་ཉེས་སྐྱོན་བརྗོད་པ། །བདག་ཉིད་བསད་ཕྱིར་དམྱལ་བ་སྤེལ་བར་ཟད། །སྟོབས་ལྡན་ཉེས་མེད་པ་དག་བཟོད་བྱེད་ཅིང༌། །དེ་ལ་སེམས་ཀྱང་འཁྲུགས་པར་མི་བྱེད་དོ། །སེམས་ནི་འཁྲུགས་པར་གྱུར་པའི་རྒྱུས། །སེམས་ཅན་ངན་འགྲོར་འགྲོ་འགྱུར་ལ། །སེམས་ནི་རབ་ཏུ་དང་བའི་རྒྱུས། །སེམས་ཅན་བདེ་འགྲོ་རྣམས་སུ་འགྲོ། །དེ་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བས་ཇི་སྲིད་ཆོས་དང་ལྡན་པའི་གཏམ་གྱིས་ཡང་དག་པར་མགུ་བར་གྱུར་གྱི་བར་དུ་མཛད་དེ། གདན་ལས་བཞེངས་ནས་གཤེགས་སོ། །རྒྱལ་པོ་ཆེན་པོ་ཇི་སྙམ་དུ་སེམས། །དེའི་ཚེ་དེའི་དུས་ན་དགེ་སློང་ཆོས་སྟོན་པ་དེ་གཞན་ཞིག་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། གཞན་དུ་ན་དགེ་སློང་གསེར་མདོག་
འདི་ཉིད་ཡིན་ཏེ། དེའི་ཚེ་དེའི་དུས་ན་དགེ་སློང་དེ་ལ་སེམས་འཁྲུགས་ཤིང་ངག་གི་ལས་རྩུབ་པ་སྨྲས་པས་ལས་དེའི་རྣམ་པར་སྨིན་པས་སྐྱེ་བ་ལྔ་བརྒྱའི་བར་དུ་སེམས་ཅན་དམྱལ་བ་ཉམས་སུ་མྱོང་ནས། མིར་སྐྱེས་ནས་ཀྱང་སྐྱེ་བ་ལྔ་བརྒྱའི་བར་དུ་ཉེས་པ་མེད་ཅིང་གནོད་པ་མི་བྱེད་བཞིན་དུ་གསལ་ཤིང་ལ་བསྐྱོན་ཏེ། ད་ལྟར་ཡང་ལས་དེ་ཉིད་ཀྱི་དབང་གིས་ཡང་གནོད་པ་མི་བྱེད་པར་གསལ་ཤིང་ལ་བསྐྱོན་པ་ཡིན་ནོ། །གལ་ཏེ་འདི་ལས་དེ་མི་རིགས་པ་ཡིན་པར་ཕན་ཚུན་བཤགས་པ་མ་བྱས་ན་ནི་སེམས་ཅན་དམྱལ་བ་རེ་རེར་ཡང་སྐྱེ་བ་ལྔ་བརྒྱ་ལྔ་བརྒྱ་མྱོང་བར་འགྱུར་ཞིང༌། སྐྱེ་བ་ལྔ་བརྒྱར་ནི་ཡི་དགས་རྣམས་སུ། སྐྱེ་བ་ལྔ་བརྒྱར་ནི་དུད་འགྲོ་རྣམས་སུ་སྐྱེ་བར་འགྱུར་རོ། །གང་ཡང་འདིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཟླ་བའི་བསྟན་པ་ལ་རབ་ཏུ་བྱུང་སྟེ། ཚངས་པར་སྤྱོད་པ་སྤྱད་པས་ལས་དེའི་རྣམ་པར་སྨིན་པས་ད་ལྟར་ཡང་འདི་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་ནས་དགྲ་བཅོམ་པའི་འབྲས་བུ་ཉིད་མངོན་སུམ་དུ་བྱས་པ་ཡིན་ནོ། །རྒྱལ་པོ་ཆེན་པོ་དེ་བས་ན་བདག་སྡུག་བསྔལ་བར་མི་འདོད་པས་གཞན་དག་ལ་ཐ་ན་སེམས་ཀྱིས་སྨད་པ་ཙམ་ཡང་མི་བྱའོ། །གྲགས་པ་མེད་པས་འཇིགས་པས་གཞན་དག་ལ་གྲགས་པ་མ་ཡིན་པ་བསྒྲགས་པར་མི་བྱའོ། །བདག་ཉིད་བདེ་བར་འདོད་པས་གཞན་རྣམས་ཀྱི་བདེ་བ་དབྲོག་པར་མི་བྱའོ། །དེ་ནས་ཆོས་ཀྱི་རྣམ་གྲངས་འདི་བསྟན་པ་ན་སྲོག་ཆགས་བརྒྱ་སྟོང་དུ་མ་དཔག་ཏུ་མེད་པས་ཁྱད་པར་རྟོགས་པར་གྱུར་ཏེ། ལ་ལ་ནི་རྒྱུན་དུ་ཞུགས་པའི་འབྲས་བུ་དང༌། ལ་ལ་ནི་ལན་ཅིག་ཕྱིར་འོང་པའི་འབྲས་བུའོ། །ལ་ལ་ནི་རབ་ཏུ་བྱུང་བས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་སོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལ་ལ་ནི་ཉན་ཐོས་ཀྱི་བྱང་ཆུབ་བོ། ལ་ལ་ནི་སྐྱབས་སུ་སོང་ཞིང་བསླབ་པའི་གཞི་རབ་ཏུ་བཟུང་བར་གྱུར་ཏོ། །ཡང་འཁོར་ཕལ་མོ་ཆེ་སངས་རྒྱས་ལ་གཞོལ་བ་དང༌། ཆོས་ལ་བབ་པ་དང༌། དགེ་འདུན་ལ་བབ་པ་ལ་བཞག་པར་གྱུར་ཏོ། །དེ་ནས་དེད་དཔོན་ཉི་མ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ། ཐལ་མོ་སྦྱར་ཏེ་གནས་བརྟན་ཀུན་དགའ་བོ་ལ་འདི་སྐད་
ཅེས་གསོལ་ཏོ། །འཕགས་པ་ཀུན་དགའ་བོ་བདག་གིས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལྡུམ་བུའི་ནང་དུ་སྤྱན་དྲངས་ལ་ཞལ་ཟས་རོ་དྲུག་ཅུ་པའི་བཤོས་དྲངས་ཏེ། དགེ་སློང་རེ་རེ་ཞིང་སྲང་འབུམ་རི་བའི་ཆོས་གོས་དབུལ་བར་བྱའོ་སྙམ་དུ་དགོངས་ན་བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པས། ད་ནི་འཕགས་པ་ཀུན་དགའ་བོ་ལ་སོགས་པ་དགེ་སློང་གི་དགེ་སློང་གི་དགེ་འདུན་རྣམས་ལ་བཤོས་གཙང་སྦྱར་བར་འཚལ་ལོ། །གནས་བརྟན་ཀུན་དགའ་བོས་བཀའ་སྩལ་པ། དེད་དཔོན་དེ་བཞིན་དུ་གྱིས་ཤིག །ངས་ཇི་ལྟར་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་འཛམ་བུའི་གླིང་ན་ཇི་སྙེད་ཅིག་གནས་པ་ཐམས་ཅད་འདིར་འདུ་བར་འགྱུར་བ་དེ་ལྟར་བྱའོ། །དེ་ནས་དེད་དཔོན་ཉི་མ་རབ་ཏུ་དགའ་བས་རྒྱས་པའི་ཡིད་དང༌། རྒྱལ་པོའི་ཁབ་ཀྱི་གྲོང་ཁྱེར་གྱི་ཕྱི་རོལ་འདུ་བའི་གནས་རྡོ་དང་གྱོ་མོ་དང་གསེག་མ་བསལ་ཏེ། ཙན་དན་གྱི་ཆུས་ཆག་ཆག་བཏབ་ནས་གདུགས་དང༌། རྒྱལ་མཚན་དང༌། བ་དན་བསྒྲེངས་ཏེ། མུ་ཏིག་དང༌། གོས་ཀྱི་ཆུན་འཕྱང་གདགས་ཤིང༌། མེ་ཏོག་སྣ་ཚོགས་ཀྱི་གཅལ་བཀྲམ་པ་དང༌། སྤོས་དྲི་ཞིམ་པོའི་སྤོས་སྣོད་ཉེ་བར་བཀྲམ་པ་དང༌། ཤིན་ཏུ་མཛེས་པའི་བླ་རེ་དང༌། རྟ་བབས་བྲེས་པས་ཤིན་ཏུ་ཉམས་དགའ་བ་བྱེད་དུ་བཅུག་སྟེ། དེ་ཉིད་ཀྱི་མཚན་མོ་གཙང་ཞིང་བསོད་པའི་བཟའ་པ་དང་བཅའ་བ་རྣམས་གཡོས་ཏེ། ནང་པར་སྔ་བ་ཉིད་དུ་ལངས་ནས་གདན་བཤམས་ཏེ། ཆུ་བཞག་ནས། གནས་བརྟན་ཀུན་དགའ་བོ་ལ་ཕོ་ཉས་དུས་ལ་བབ་པར་གསོལ་པ། བཙུན་པ་བཟའ་བ་དང༌། བཅའ་བ་རྣམས་སྟ་གོན་བགྱིས་ལགས་ཏེ། ད་དེ་དུས་ལ་བབ་པ་ལགས་པར་མཁྱེན་པར་མཛད་དུ་གསོལ། དེ་ནས་གནས་བརྟན་ཀུན་དགའ་བོ་རྫུ་འཕྲུལ་གྱིས་ནམ་མཁའི་དཀྱིལ་དུ་མངོན་པར་འཕགས་ཏེ། འཛམ་བུའི་གླིང་འདི་མ་ལུས་པར་གསེར་བཅོམ་ལྟ་བུའི་མདོག་གིས་ཀུན་དུ་སྣང་བར་མཛད་ནས་རང་ཉིད་ཀྱིས་གཎྜཱི་བརྡུངས་ཏེ། ཆུ་དང་བཅས་པའི་སྤྲིན་གྱིས་འབྲུག་སྒྲ་བཞིན་དུ་ཟབ་ཅིང་གསལ་བའི་སྐད་ཀྱིས་སྒྲ་བསྒྲགས་པ། བཅོམ་ལྡན་འདས་ཀྱི་ཉན་ཐོས་ལས་གང་རྫུ་འཕྲུལ་ཐོབ་པ་རྣམས་ནི་རང་ཉིད་ཀྱི་རྫུ་འཕྲུལ་གྱིས་ཤོག་ཤིག །གང་དག་སོ་སོའི་སྐྱེ་བོ་རྣམས་ནི་ངའི་རྫུ་འཕྲུལ་
གྱིས་ཤོག་ཤིག །དེ་ནས་གྷཎྜཱི་དེ་ཐོས་པས་ཁ་བ་ཅན་དང༌། འབིགས་བྱེད་དང་མ་ལ་ཡ་དང༌། བ་རི་ཡ་ཏྲ་དང་སྤོས་གྱི་ངད་ལྡང་དང༌། རིའི་རྒྱལ་པོ་རི་རབ་དང༌། གཉའ་ཤིང་འཛིན་དང༌། གཤོལ་མདའ་འཛིན་དང༌། སེང་ལྡེང་ཅན་དང༌། བལྟ་ན་སྡུག་དང༌། རྟ་རྣ་རིན་དང༌། རྣམ་པར་འདུད་དང༌། མུ་ཁྱུད་འཛིན་ལ་སོགས་པ་ནགས་ཚལ་དང༌། འབབ་ཆུ་དང་གཡའ་ཆུ་དང༌། རྒྱ་མཚོ་དང༌། གྲོང་རྡལ་དང༌། ཤིང་གི་མཆོག་དང༌། གཙུག་ལག་ཁང་རྣམས་ན་གང་དག་གནས་པ་དང༌། ཆུ་མདོ་དང༌། ཁང་སྟོང་དང༌། དུར་ཁྲོད་ལ་སོགས་པ་ན་དགེ་སློང་གང་ཞིག་ཏིང་ངེ་འཛིན་ལ་སྙོམས་པར་ཞུགས་ཤིང་བདེ་བ་ཐོབ་ནས་རབ་ཏུ་གནས་པ་རྣམས་སྐད་ཅིག་མ་དེ་ལ་དེ་དག་ཐམས་ཅད་ནམ་མཁའི་ངོས་ནས་ཨ་ཤོ་ཀ་དང༌། ཀིང་ཤུ་ཀ་དང༌། ཟངས་དང༌། དུས་མཚམས་ཀྱི་སྤྲིན་དྲི་མ་མེད་པས་ནམ་མཁའ་ཁེབས་པ་དེ་ལྟ་བུར་བྱས་ཏེ། རྒྱལ་པོའི་ཁབ་ཀྱི་གྲོང་ཁྱེར་དུ་ལྷགས་ནས་འདུ་བའི་གནས་དེར་འཚོགས་ཏེ། སྐད་ཅིག་མ་དེ་ཉིད་ལ་དགེ་སློང་བྱེ་བ་ཕྲག་གསུམ་ཡང་དག་པར་འདུས་པར་གྱུར་ཏེ། བྱེ་བ་གཅིག་ནི་ཟག་པ་ཟད་པ་རྣམས་སོ། །གཉིས་པ་ནི་བསླབ་པ་ལ་ཞུགས་པ་རྣམས་སོ། །གསུམ་པ་ནི་སོ་སོའི་སྐྱེ་བོ་དགེ་བ་ཅན་རྣམས་ཏེ། དེ་ནས་རྒན་པའི་རིམ་པ་ཇི་ལྟ་བ་བཞིན་དུ་གདན་བཤམས་པ་ལ་བཞུགས་སོ། །དེ་ནས་དེད་དཔོན་ཉི་མས་གནས་བརྟན་ཀུན་དགའ་བོ་ལ་སོགས་པ། དགེ་སློང་གི་དགེ་འདུན་རྣམས་བདེ་བར་གཤེགས་པར་རིག་ནས་གཙང་ཞིང་བསོད་པའི་བཟའ་བ་དང༌། བཏུང་བ་རྣམས་རང་གི་ལག་ནས་ཀུན་དུ་ཚིམ་པར་བསྟབས་ཏེ། ཇི་སྲིད་དགེ་སློང་གི་དགེ་འདུན་གྱིས་ལོངས་སྤྱད་པར་རིག་ནས། བྱག་བཅབས་ཤིང་ལྷུང་བཟེད་བསྡུས་ནས་ཆོས་གོས་གསུམ་པོ་བརྒྱ་སྟོང་དུ་མ་གསོལ་བར་འདོད་ནས་དགེ་སློང་དང་དགེ་འདུན་དེ་རྣམས་ལ་བལྟས་པ་དང༌། ཡིད་ཤིན་ཏུ་དགའ་བ་སྐྱེས་པར་གྱུར་ཏོ། །དགེ་སློང་གསེར་མདོག་གིས་བསམ་པ་ཤེས་ནས་སྨྲས་པ། ཡབ་ཁྱེད་ཐུགས་ལས་ཆུང་བར་མཛོད་ཅིག །བདག་ཉིད་ཀྱིས་དགེ་སློང་གི་དགེ་འདུན་ལ་གསེར་གྱི་མདོག་ཅན་གྱི་ཆོས་གོས་གསུམ་གསུམ་དབུལ་བར་བགྱིའོ། །དེ་ནས་དགེ་སློང་གསེར་མདོག་གི་རང་གི་ལུས་ལས་གསེར་གྱི་མདོག་ཅན་གྱི་གོས་ཕུད་ཅིག་ཕུད་ཅིང་སྲང་འབུམ་རི་བའི་ཆོས་གོས་གསུམ་གསུམ་དགེ་སློང་བྱེ་བ་ཕྲག་གསུམ་ལ་རྒན་པའི་རིམ་པ་
བཞིན་དུ་བསྟབས་སོ། །བར་སྐབས་དེར་ལྷ་བརྒྱ་སྟོང་དུ་མས་ཅ་ཅོའི་སྒྲ་སྒྲོགས་ཤིང་རོལ་མོ་སྣ་ཚོགས་ཡང་དག་པར་རྡུང་བ་དང༌། ལྷའི་མེ་ཏོག་དང༌། ཕྱེ་མ་དང༌། གོས་ཀྱི་ཆར་ཕབ་པར་གྱུར་ཏོ། །ཇི་ལྟར་ཕྱོགས་དེར་ཕྱོགས་སྣ་ཚོགས་ནས་ལྷགས་པའི་སྐྱེ་བོའི་ཚོགས་རྣམས་དང༌། རྒྱལ་པོ་མ་སྐྱེས་དགྲ་བཙུན་མོ་དང༌། གཞོན་ནུ་དང༌། བློན་པོ་དང༌། གྲོང་ཁྱེར་པ་རྣམས་དང༌། སྐྱེ་བོའི་ཚོགས་དང་བཅས་པ་དེ་རྣམས་ཀྱིས་རྣམ་པ་དེ་ལྟ་བུའི་ངོ་མཚར་ལ་བལྟས་ནས་རྨད་དུ་བྱུང་ནས་མིག་གདངས་ཏེ། ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་བསོད་ནམས་ཀྱི་འབྲས་བུའི་རྣམ་པར་སྨིན་པ། ཨེ་མའོ་བསོད་ནམས་ཀྱི་སྟོབས། ཨེ་མའོ་སྦྱིན་གནས་ཀྱི་ཞིང་ལ་སྦྱིན་པའི་ས་བོན་བཏབ་པའི་རྣམ་པར་སྨིན་པར་གདའ་བར་མི་བྱེད་པ་ཡིན་ན། མཁས་པ་སུ་ཞིག་གིས་རྣམ་པ་འདི་ལྟ་བུའི་བསོད་ནམས་ཀྱི་འབྲས་བུའི་རྣམ་པར་སྨིན་པ་ཡང་དག་པར་མཐོང་ན། སྦྱིན་པའི་ཞིང་ལ་སུ་ཞིག་སྦྱིན་པར་མི་བྱེད་ཅེས་ཟེར་ཞིང༌། དེ་ལྟར་སྲོག་ཆགས་བརྒྱ་སྟོང་དུ་མ་རྣམས་ཐལ་མོ་སྦྱར་ཏེ། སྒྲ་གསང་མཐོན་པོས་སངས་རྒྱས་ལ་ཕྱག་འཚལ་ཞེས་ཟེར་བར་གྱུར་ཏོ། །དེ་ནས་གནས་བརྟན་ཀུན་དགའ་བོས་སྦྱིན་པའི་རབ་བཏོན་པ་མཛད་དོ། །དེ་ནས་དེད་དཔོན་ཉི་མ་སྟན་ལས་ལངས་ཉེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཉིས་ས་ལ་བཙུགས་ཏེ། གནས་བརྟན་ཀུན་དགའ་བོ་གང་ན་བ་དེར་ཐལ་མོ་སྦྱར་ཏེ། ཕྱག་བྱས་ནས་ལན་གསུམ་གྱི་བར་དུ་ཆེད་དུ་བརྗོད་པ་ཆེད་དུ་བརྗོད་དེ། བཙུན་པ་གང་བདག་ཅག་ལ་འཕགས་པ་ཀུན་དགའ་བོས་མཛད་པ་འདི་ནི་མས་ཀྱང་མ་བགྱིས། ཕས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། ནང་མི་དང་ཉེ་དུའི་ཚོགས་ཡིད་དུ་འོང་བས་ཀྱང་མ་བགྱིས། སྔོན་གུམས་པ་རྣམས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་སྐམས་པ་ནས། །ལྷ་དང་ལྷ་མིན་རྣམས་ཀྱིས་མཆོད་གྱུར་ཅིང༌། །སྐྱེ་བ་རྒ་ཤིའི་སྐྱོན་དང་རྣམ་བྲལ་བས། །སྲིད་པ་བརྒྱ་སྟོང་དག་ན་མཐོང་དགའ་བ། །ཐུབ་པ་ཁྱོད་མ་ཐོང་དེང་བདག་འབྲས་ལྡན་གྱུར། །དེ་ནས་གནས་བརྟན་ཀུན་དགའ་བོས་རྒྱལ་པོ་དང་བཅས་པའི་འཁོར་དེ་རྣམས་ཆོས་དང་ལྡན་པའི་གཏམ་ཡང་དག་པར་
བསྟན་པ་དང༌། ཡང་དག་པར་འཛིན་དུ་འཇུག་པར་མཛད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་མཛད་ནས་ལྷ་བརྒྱ་སྟོང་དེ་དག་དང༌། རྒྱལ་པོའི་ཁབ་ན་གནས་པའི་སྲོག་ཆགས་བརྒྱ་སྟོང་གིས་ཕྱག་བྱས་ནས་གདན་ལས་བཞེངས་ཏེ་གཤེགས་སོ། །དེ་ལྟར་ན་སངས་རྒྱས་བཅོམ་ལྡན་འདས་ལ་ནི་བྱ་བ་ཅུང་ཟད་ཅིག་བྱས་ན་ཡང་འབྲས་བུ་ཆེན་པོར་འགྱུར་བ་ཡིན་ནོ། །གསེར་མདོག་གི་རྟོགས་པ་བརྗོད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ། །།