ཕྱག་ན་རྡོ་རྗེ་སྒྲུབ་པའི་ཐབས།

[Full Size]

རྒྱ་གར་སྐད་དུ། བཛྲ་པཱ་ཎི་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེ་སྒྲུབ་པའི་ཐབས་ཞེས་བྱ་བ། བཅོམ་ལྡན་འདས་རྡོ་རྗེ་ཧཱུཾ་ལ་ཕྱག་འཚལ་ལོ། །དཔལ་ལྡན་སངས་རྒྱས་འདུས་པའི་སྐུ། །གདུག་པ་འདུལ་མཛད་སྦྲུལ་སོགས་བརྒྱན། །རྡོ་རྗེ་འཛིན་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །བཅོམ་ལྡན་རྡོ་རྗེ་འཛིན་པ་ཡི། །སྒྲུབ་ཐབས་ཀྱི་ནི་གོ་རིམས་རྣམས། །བླ་མ་ཇི་ལྟར་གསུངས་པ་ལྟར། །མན་ངག་བརྗེད་བྱང་དུ་བཀོལ་ལ། །ཁྲོ་བོའི་རྒྱལ་པོ་བསྙེན་འདོད་པས། །གནས་ནི་དུར་ཁྲོད་ཤིང་གཅིག་གམ། །ཡང་ན་རྡོ་རྗེ་འཛིན་པའི་ཁྱིམ། །བཀྲ་ཤིས་ཉམས་དགའི་གནས་དག་ཏུ། །མཎྜལ་སྔོན་པོ་ལེགས་བྱས་ལ། །མེ་ཏོག་ལ་སོགས་མཆོད་རྫས་དགྲམ། །བདེ་བའི་སྟན་ལ་རབ་འདུག་སྟེ། །གདོང་ལ་སོགས་པ་ཁྲུས་བྱས་ལ། །སྐད་ཅིག་མ་ཡི་ཏིང་འཛིན་གྱིས། །ཧཱུཾ་ཡིག་ལས་ནི་མདོག་ནག་པ། ཁྲོ་བོའི་རྒྱལ་པོ་རབ་བསྒོམས་ཏེ། །དཔའ་བའི་ཉམས་གྱིས་ཡུངས་ཀར་ལ། །སྐད་ཅིག་མ་ཡི་ཏིང་འཛིན་གྱིས། །སྔགས་བཟླས་ཁྲོ་བོའི་སྤྲུལ་པ་སྤྲོ། །གདུག་པ་ཚར་བཅད་ཚུར་འདུས་པས། །རྡོ་རྗེ་གུར་དང་ར་བར་གྱུར། །དེ་ནས་རང་གི་སྙིང་གར་ནི། །ཨ་དཀར་ཞུ་བས་ཟླ་བ་ཡི། །དཀྱིལ་འཁོར་ཉ་གང་ལྟ་བུར་བསམ། །དེ་སྟེང་ཧཱུཾ་སྔོན་ཞུ་བ་ལས། །རྡོ་རྗེ་སྔོན་པོ་རྩེ་ལྔ་བསམ། །དེ་ཡི་བུམ་པར་ཧཱུཾ་སྔོན་པོ། །དེ་ལས་འོད་ཟེར་ཕྱོགས་བཅུར་འཕྲོས། །སངས་རྒྱས་བྱང་ཆུབ་སེམས་དཔའ་དང༌། ལྷག་པའི་ལྷ་དང་བླ་མ་རྣམས། །སྤྱན་དྲངས་མདུན་གྱི་མཁའ་ལ་བཞུགས། །བསོད་ནམས་ཚོགས་ནི་བསགས་པའི་ཕྱིར། །ཕྱག་འཚལ་མཆོད་སྦྱིན་སྡིག་བཤགས་རྣམས། །བདུན་པོ་ཡོངས་སུ་བདག་པ་ཡི། །ཚིག་ཏུ་བརྗོད་དེ་ཚོགས་བསགས་བྱ། །སྤྱན་དྲངས་རྣམས་ནི་གཤེགས་སུ་གསོལ། །དེ་ནས་ཡེ་ཤེས་ཚོགས་བསགས་ཕྱིར། །ཕྱི་ནང་སྣོད་བཅུད་འོད་ཞུ་ནས། །བདག་ཉིད་ཀྱི་ནི་ཐུགས་ཀར་ཐིམ། །དེ་ཉིད་འོད་ཞུ་ཧཱུཾ་ལ་འདུས། །ཧཱུཾ་ཞུ་ཟླ་ཚེས་ཐིག་ལེར་ཐིམ། །ཆོས་རྣམ་རང་བཞིན་རྣམ་དག་པའི། །ངོ་བོ་ཉིད་ལས་བྱུང་བ་ཡི། །སྔགས་

[Full Size]

འདི་ཡང་དག་བརྗོད་པར་བྱ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོཉ྄ཧཾ། ཚིག་གི་དོན་དང་བཅས་པར་བསྒོམ། །ཆུ་ལས་ཆུ་བུར་རྡོ་བའི་ཚུལ། །ཡཾ་ལས་རླུང་གི་དཀྱིལ་འཁོར་དེ། །རཾ་ལས་མེ་ཡི་ཁ་དོག་ལྔ། །དབུས་སུ་པཾ་ལས་པདྨ་བསམ། །ཨ་ལས་ཟླ་བའི་དཀྱིལ་འཁོར་རོ། །དེ་ཡི་སྟེང་དུ་ཧཱུཾ་སྔོན་ལས། །དེ་ཞུ་རྡོ་རྗེ་སྔོན་པོ་ནི། །འོད་ཟེར་སྔོན་པོ་འཕྲོ་བར་བསམ། །དེ་ཡི་བུམ་པར་ཧཱུཾ་སྔོན་བསམ། །དེ་ལས་འོད་ཟེར་ཧཱུཾ་ཕྲ་མོ། །འཕྲོས་ནས་ཕྱི་ནང་སྣོད་བཅུད་སྦྱངས། །ཚུར་འདུས་རྡོ་རྗེ་ཕྲ་མོར་གྱུར། །སྔར་གྱི་གནས་སུ་ཐིམ་པ་ལས། །དེ་ཞུ་རྡོ་རྗེ་སྔོན་པོ་ནི། །ནམ་མཁའི་མཐའ་དང་མཉམ་པར་བསམ། །དེ་ཡི་བུམ་དཀྱིལ་ཧཱུཾ་སྔོན་ལས། །སྐུ་མདོག་ནམ་མཁའི་མདོག་ཅན་ལ། །དེ་ལས་འོད་བྱུང་བཅུད་སྦྱངས་ཏེ། །ཚུར་འདུས་ཕྱག་ན་རྡོ་རྗེ་ཡི། །སྐུ་ནི་ཕྲ་མོའི་ཚུལ་དུ་འདུས། །དེ་ལས་ཕྱག་ན་རྡོ་རྗེའི་སྐུ། །མདོ་ནས་ཇི་ལྟར་གསུངས་བཞིན་བསྒོམས། །དེ་ནས་དམ་ཚིག་སེམས་དཔའི་སྐུ། །བསྙེན་པའི་དུས་སུ་བསྒོམ་པ་ནི། །སྐུ་མདོག་ནམ་མཁའི་འོད་ཅན་ལ། །ཞལ་གཅིག་ཕྱག་ཀྱང་གཉིས་པ་སྟེ། །སྤྱན་དམར་མཆེ་བ་གཙིགས་པ་ལ། །ཕྱག་གཡས་རྡོ་རྗེ་གཡོན་སྡིགས་མཛུབ། །ཤིན་ཏུ་གདུག་ཅིང་ཁྲོས་པ་སྟེ། །ཀླུ་ཆེན་བརྒྱད་ཀྱིས་རྣམ་པར་བརྒྱན། །སྟོང་གཡོགས་སྔོན་པོ་ལེགས་བསྣམས་ཤིང༌། །ན་བཟའ་ཆོས་གོས་སྔོན་པོ་འཆང༌། །སྨད་གཡོགས་བ་ཏི་ཁྲ་བོ་དང༌། །སྟག་གི་སྨད་གཡོགས་སེང་སྟོད་གཡོགས། །ཉི་ཟླའི་སྟེང་ན་གར་བྱེད་དགྱེས། །བདག་ཉིད་དང་ནི་སྤྲུལ་རྒྱན་གྱི། །ཁ་ནས་ཧ་ཧའི་སྒྲ་སྒྲོགས་པས།། ལོག་འདྲེན་ཚོགས་རྣམས་འཇོམས་པར་བྱེད། །དེ་ལྟར་ཁྲོ་བོའི་རྒྱལ་པོར་ནི། །བདག་ཉིད་རྣམ་པར་བསམ་པར་བྱ། །བདག་ཉིད་དམ་ཚིག་སེམས་དཔའ་ཡི། །ཐུགས་ཀར་ཟླ་བ་རྡོ་རྗེ་ཧཱུཾ། །འཕྲོ་འདུས་ཡེ་ཤེས་སེམས་དཔའ་བསྒོམ། །ཐུགས་ཀར་ཉི་མ་རྡོ་རྗེ་ཧཱུཾ། །སྲན་མ་ནས་ཚད་ཡུངས་འབྲུ་ལ། །རྩ་བའི་སྔགས་ཀྱིས་བསྐོར་བར་བསམ། །རྡོ་རྗེ་གོ་ཆའི་ཕྱག་རྒྱ་ཡིས། །གནས་ལྔར་གཏུག་ཅིང་ལུས་བསྲུང་བྱ། །ནམཿ་ས་མནྟ་བཛྲཱ་ཎཱཾ་ཀ་བ་ཙ་ཧཱུཾ། རྡོ་རྗེ་རྩེ་ལྔའི་ཕྱག་རྒྱ་ཡིས། །སྔགས་འདི་བརྗོད་དེ་བརྟན་པར་བསམ། །ན་མཿ་ས་མནྟ་བཛྲཱ་ཎཱཾ་བཛྲ་ཙཎྜ་མཧཱ་རོ་ཥ་ཎཱ་ཡ་ཧཱུཾ། ལྕགས་ཀྱུའི་ཕྱག་

[Full Size]

རྒྱ་བཅས་ནས་ནི། ཐུགས་ཀའི་ཧཱུཾ་ལས་འོད་འཕྲོས་པས། །འོད་ཟེར་ལྕགས་ཀྱུའི་དབྱིབས་བྱུང་ནས། །ཡེ་ཤེས་སེམས་དཔའ་སྤྱན་དྲངས་ཏེ། །འོག་མིན་གནས་མཆོག་དམ་པ་ཡི། །ལྕང་ལོ་ཅན་གྱི་ཕོ་བྲང་ནས། །སངས་རྒྱས་ཀུན་གྱིས་རྗེས་གནང་བའི། །གསང་བདག་འཕགས་པ་གོས་སྔོན་ཅན། །འཁོར་བཅས་མ་ལུས་སྤྱན་འདྲེན་གྱིས། །འདིར་གཤེགས་མཆོད་པ་དམ་པ་བཞེས། །ཨོཾ་ནཱི་ལཱཾ་བར་དྷ་ར་བཛྲ་པཱ་ཎི་ས་མ་ཡ་མཎྜ་ལ་མ་དྷེ་ཨཱ་གཙྪ་ཡ། ཨཱ་གཙྪ་ཡ། པྲ་བེ་ཤ་ཡ། པྲ་བེ་ཤ་ཡ། ཏིཥྛ་ཡ་ཏིཥྛ་ཡ། ཨ་བ་ལོ་ཀཱ་ཡ་ཧཱུཾ་ཛཿ་མདུན་གྱི་ནམ་མཁར་བཞུགས་པར་བསམ། །སྙིང་གའི་ལྷ་མོའི་ཚོགས་ཀྱིས་མཆོད། །ཨོཾ་ནཱི་ལཱཾ་བར་དྷ་ར་བཛྲ་པཱ་ཎི། བཛྲ་པུཥྤེ་པཱུ་ཛ་མ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། བཛྲ་དྷཱུ་པེ་ཧཱུཾ། བཛྲ་ཨཱ་ལོ་ཀེ་ཧཱུཾ། བཛྲ་གནྡྷེ་ཧཱུཾ། བཛྲ་ནཻ་ཝི་དྱེ་ཧཱུཾ། བཛྲ་གཱི་ཏི་ག་ཏ་ག་ཏ་ཧཱུཾ་སྭཱཧཱ། སྔགས་དང་ཚིགས་བཅད་རབ་བརྗོད་པས། །དངོས་སམ་ཡིད་ཀྱིས་མཆོད་པ་དབུལ། །དེ་ནས་བསྟོད་དང་ཕྲིན་ལས་བཅོལ། །མདུན་དུ་གཏའ་ཡི་གཏོར་མ་ལ། །ཨ་ལས་བནྡྷ་གཞལ་ཡས་ཁང༌། །ཐུན་མོང་གདན་དང་ཉི་མའི་སྟེང༌། །ཧཱུཾ་ཡིག་ལས་ནི་མདོག་གང་པ། །ལས་ཀྱི་སེམས་དཔར་བསྐྱེད་པར་བྱ། །རི་རབ་ཆེན་པོའི་ལྷོ་ཤར་ནས། །ལྕང་ལོ་ཅན་གྱི་བསྐུལ་ཚིག་དང༌། །སྔགས་དང་ཕྱག་རྒྱས་སྤྱན་དྲངས་བསྟིམ། །མཆོད་དང་སྡིག་བཤགས་ལ་སོགས་བྱ། །ཛཿཧཱུཾ་བཾ་ཧོཿ་ཞེས་པ་ཡིས། །ཡེ་ཤེས་སེམས་དཔའ་བསྟིམ་པ་བྱ། །སྤྱི་བོ་མགྲིན་པ་སྙིང་གར་རུ། །ཨོཾ་ཨཱཿཧཱུཾ་གསུམ་རབ་བཀོད་དེ། །ཡི་གེ་བཅུ་གསུམ་འཁོར་ལོ་བསྒོམ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོཉཧཾ། སྐུ་གསུང་ཐུགས་སུ་བྱིན་བརླབས་ནས། །མི་བསྐྱོད་སངས་རྒྱས་བྱེ་སྙེད་རྣམས། །སྤྱན་དྲངས་མཆོད་དང་སྡིག་བཤགས་ཏེ། །རྗེས་སུ་གནང་བ་གསུམ་ལྡན་གྱིས། །དབང་བསྐུར་བྱིན་བརླབས་གཉིས་མེད་ཐིམ། །ཨོཾ་ཤྲཱི་བཛྲ་པཱ་ཎི་ཧཱུཾ་མ་ཧཱ་ཙཎྜ་སརྦ་དུཥྚཱ་ན། སརྦ་བུདྡྷ་ས་པ་རི་ཝཱ་ར་བཛྲ་ས་མ་ཡ་ཧཱུཾ། ཆོས་ཀྱི་རྒྱལ་པོར་དབང་བསྐུར་རོ། །ཐུགས་ཀའི་ཏིང་འཛིན་སེམས་དཔའ་ལ། །གཏད་དེ་སྔགས་ཀྱི་ཕྲེང་བས་བསྐོར། །བདག་དང་ལས་ཀྱི་སེམས་དཔའ་ལ། །སྤྲོ་དང་བསྡུ་བའི་རིམ་པ་

[Full Size]

རྣམས། །ཇི་ལྟ་བར་ནི་གསལ་བར་བསྒོམ། །བཅོམ་ལྡན་འདས་ཀྱིས་གསུངས་པ་ཡི། །གསང་སྔགས་སྐྱོན་སྤངས་བཟླས་པར་བྱ། །བསྙེན་དུས་ལྷ་ལ་གཏད་དེ་བཟླས། །སྒྲུབ་པའི་དུས་སུ་སྔགས་ལ་གཏད། །བཟླས་དུས་གཟས་པ་པོ་རྣམས་ལ། །གཏད་དེ་སྔགས་ཀྱི་འཕྲོ་འདུ་བྱ། །དེ་ནས་བདག་དང་རྒྱན་ཆ་ཡི། །སྤྲུལ་གྱི་ཁ་ནས་སྔགས་བཟླས་པས། །མེ་ཡི་འཚུབས་མ་དམར་ནག་དང༌། །ཁྲོ་བོ་གྲངས་མེད་འཕྲོས་པ་ལས། །དེ་ཡིས་དེ་དག་བསྲེགས་ནས་ཀྱང༌། །ལྷག་མ་ལུས་པར་གྱུར་པ་རྣམས། །སྤོགས་པ་ཡི་ནི་སྦྱོར་བས་བསྲེག །དེ་ལྟར་བྱས་ནས། བསྒོམ་ཞིང་བཟླས། །དེ་ནས་དང་པོའི་ཐུན་ཐོན་ནས། །སྐྱོའམ་དུ་བ་ན་མཆོད་བྱས་ཏེ། །གཏོར་མ་བྱིན་གྱིས་བརླབས་ཏེ་དབུལ། །བསྟོད་དང་ཕྲིན་ལས་བཅོལ་བར་བྱ། །ཇི་ལྟར་ཉེ་བར་མ་གྱུར་པ། །ཡེ་ཤེས་སེམས་དཔའ་གཤེགས་མི་གསོལ། །མཆོད་རྟེན་སྔོན་པོ་དག་ལའོ། །ཐུན་ནི་གཉིས་དང་གསུམ་པ་ལ། །ཡེ་ཤེས་སེམས་དཔའ་མཆོད་པ་དང༌། །ཐུན་ནི་ཐ་མ་བསྒོམ་པའི་ཚེ། །དང་པོ་ཐུན་ནི་མཐུན་པར་གསུངས། །ཡི་གེ་བརྒྱ་པས་བརྟན་པར་ཡ། །དེ་ནས་ལྡང་བའི་དུས་དག་ཏུ། །རིག་སྔགས་ལས་ཀྱི་ལྷ་ལ་གཏད། །དེ་ལྟར་མ་ནོར་བསྒོམས་བྱས་ན། །དངོས་གྲུབ་དམ་པ་ཅི་འདོད་པ། །གང་ལ་དམིགས་པ་དེ་འགྲུབ་འགྱུར། །བསྙེན་རྫོགས་མཚན་མ་བཟང་བ་དང༌། །ཡེ་ཤེས་སེམས་དཔའ་གཤེགས་མི་གསོལ། །གཤེགས་ན་དངོས་གྲུབ་ཡལ་འགྱུར་བས། །ལྷ་ནི་རྒྱུན་དུ་འཁོར་བ་ཡི། །མན་ངག་ཞལ་ལས་ཤེས་པར་བྱ། །གཏོར་མ་བཀའ་ལས་ཕབ་ནས་ནི། །གཏའ་ཡི་བདག་པོ་མཆོད་བྱས་ནས། །གཏའ་གཏོར་བསྐུལ་ཚིགས་བཅས་ལ་གཏད། །བསྒྲུབ་བྱའི་ཕྱོགས་སུ་དམར་ལམ་བསྟན། །གཏའ་ཡི་བདག་པོ་གཤེགས་སུ་གསོལ། །ལས་ཀྱི་སེམས་དཔའ་བདག་ལ་བསྡུ། །ཧཱུཾ་ཧཱུཾ་ཞེས་བསྡུ་མི་དམིགས་བསྒོམ། །སྐད་ཅིག་མ་ཡི་ང་རྒྱལ་གྱིས། །སྤྱོད་ལམ་ཅི་བདེར་གནས་པར་བྱ། །བསྙེན་རྫོགས་མཚན་མ་བཟང་གྱུར་ནས། །དྲག་པོ་ལས་ལ་སྦྱར་བྱས་ཏེ། །མཆོད་རྟེན་སྔོན་པོ་སྐུ་གདུང་ལྡན། །མེ་ཏོག་སྔོན་པོ་དྲིར་བསྙུགས་ཀྱིས། །ཉི་ཤུ་རྩ་གཅིག་ཏུ་མཆོད་ཅིང༌། །བདག་ཉིད་གོས་སྔོན་ཆས་

[Full Size]

གོན་ལ། །རཀྵ་རུས་པའི་ཕྲེང་བ་བགྲང༌། །སྔགས་ནི་བརྒྱ་དང་བརྒྱ་ལྔ་བཅུས། །ཐུན་བདུན་གྱིས་ནི་རྣལ་འབྱོར་བྱ། རྡོ་རྗེའམ་སེང་ལྡེང་ཕུར་པ་ལ། །གཟུངས་སྔགས་སྟོང་རྩ་བརྒྱད་བཟླས་ཏེ། །བསམ་གཏན་རྡོ་རྗེ་ཐོགས་པ་ཡི། །དྲག་སྔགས་ལྔ་བཅུ་རྩ་གཅིག་བཟླས། །གཟས་པ་པོ་ལ་བསྣུན་གྱུར་ན། །དེས་ནི་ལས་རྣམ་ཐམས་ཅད་འགྲུབ། །བདག་སའི་འདི་བྱས་དགེ་བ་ཡི། །བློ་ཆུང་རྣམས་ཀྱིས་དོན་རྟོགས་ཏེ། །འབད་པས་ཚོགས་གཉིས་བསགས་ནས་ནི། །ཕྱག་ན་རྡོ་རྗེ་ཐོབ་པར་ཤོག །ཕྱག་ན་རྡོ་རྗེ་མདོ་ལུགས་ཀྱི་མན་ངག །སློབ་དཔོན་སུ་ལཱ་གཱི་ཤྭ་ར་ཀཱི་རྟིས་གཟུངས་ཀྱི་འགྲེལ་པ་ལྟར་མཛད་པ་འགྲེལ་པ་ལས་གཟུངས་སྒྲུབ་ཐབས་སུ་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ངའི་པཾཀ་ར་ཤྲཱི་ཛྙཱ་ན་དང༌། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ། །