རྨ་བྱ་ཆེན་མོའི་སྒྲུབ་ཐབས།
༈། །རྨ་བྱ་ཆེན་མོ་སྒྲུབ་ཐབས་བཞུགས། དེ་བཞིན་དུ་སྔར་བསྟན་བའི་ཆོ་གས་སྟོང་པ་ཉིད་ཀྱི་རྗེས་ལ་སྣ་ཚོགས་པདྨ་དང་ཟླ་བ་ལ། མཾ་ཡིག་ལྗང་གུ་ཡོངས་སུ་གྱུར་པ་ལས། འཕགས་མ་རྨ་བྱ་ཆེན་མོ་མདོག་ལྗང་གུ་།ཞལ་གསུམ་པ། ཕྱག་དྲུག་པ། ཞལ་སོ་སོ་ལ་སྤྱན་གསུམ་པ་སྟེ། ཞལ་གཡས་དང་གཡོན་སྔོན་པོ་དང་དཀར་པོའོ། །གཡས་ཀྱི་ཕྱག་གསུམ་ལ་གོ་རིམས་བཞིན་དུ་རྨ་བྱའི་མཇུག་སྒྲོ་དང༌། མདའ་དང་མཆོག་སྦྱིན་པའོ། །ཕྱག་གཡོན་པ་གསུམ་ན་རིན་པོ་ཆེའི་སྙེ་མ་དང༌། གཞུ་དང༌། ཕང་པར་གནས་པའི་བུམ་པའོ། །སྣ་ཚོགས་པའི་རྒྱན་དང་ཤམ་ཐབས་ཅན། སྒེག་པ་ལང་ཚོ་ལ་བབ་པའི་ཆ་ལུགས་ཅན། ཟླ་བའི་འོད་དང་ལྡན་པའི་གདན་ཅན། ཕྱེད་ཀྱི་སྐྱིལ་ཀྲུང་ཅན། དོན་ཡོད་གྲུབ་པའི་དབུ་རྒྱན་ཅན་དུ་སྐད་ཅིག་གིས་བསྐྱེད་ལ། དེའི་སྤྱི་བོ་དང༌། ལྐོག་མ་དང༌། སྙིང་ག་དང༌། ལྟེ་བ་རྣམས་སུ་ཟླ་བ་ལ་གོ་རིམས་ཇི་ལྟ་བར། ཨོཾ་ཨཱཿམཾ་ཧཱུཾ་ཞེས་པའི་ཡི་གེ་བསམས་ཏེ་སྤྲོ་བ་དང་བསྡུ་བ་བྱའོ། །དེ་ནས་ངལ་ན་སྔགས་བཟླས་པར་བྱ་སྟེ། ཨོཾ་མ་ཧཱ་མཱ་ཡཱུ་རི་བིདྱཱ་རཱ་ཛྙཱི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པའོ། །འཕགས་མ་རྨ་བྱ་ཆེན་མོའི་སྒྲུབ་ཐབས་རྫོགས་སོ།།