ཕྱག་ན་རྡོ་རྗེའི་སྒྲུབ་པའི་ཐབས།
ཤྲདྡྷ་ཀར་ཝརྨ།
― DTG073_Page_0452 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཛྲ་པཱ་ཎི་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེའི་སྒྲུབ་པའི་ཐབས་ཞེས་བྱ་བ། ཕྱག་ན་རྡོ་རྗེ་ལ་ཕྱག་འཚལ་ལོ། །དྲག་པོའི་སྟོབས་ཀྱིས་འདུལ་དཀའ་འདུལ།། བདེ་གཤེགས་ཀུན་གྱི་ཐུགས་ངོ་བོ། །རྡོ་རྗེ་འཆང་ལ་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བསླབ་པ་གསུམ་ལྡན་དགེ་སློང་ངམ། །དགེ་ཚུལ་དགེ་བསྙེན་བསྙེན་གནས་པ། །བྱ་བའི་རྒྱུད་མོས་དེ་ཡིས་བསྒྲུབ། །གཞན་གྱིས་དེ་ལྟ་མ་ཡིན་ནོ། །དང་པོར་ས་ཕྱོགས་གཙང་མར་རང་ཉམས་དགའ་བའི་ཕྱོགས་སུ། སྟན་བདེ་བ་ལ་སེམས་དཔའི་དཀྱིལ་མོ་ཀྲུང་གིས་གནས་ལ། དྲི་དང་མེ་ཏོག་ལ་སོགས་པས་དཀྱིལ་འཁོར་མཛེས་པར་བྱས་ལ། མདུན་དུ་རིག་སྔགས་ཀྱི་བདག་པོ་དང༌། བླ་མ་བསམས་ལ། ཇི་སྐད་གསུངས་པའི་མཆོད་པས་མཆོད། སྡིག་པ་བཤགས་པ་དང༌། བྱེད་པ་བསྡམ་པ་དང༌། གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པར་བྱ། དེ་ནས་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོཉ྄ཧཾ་ཞེས་ལན་གསུམ་བརྗོད་པས་ཐམས་ཅད་སྟོང་པར་བསམ་མོ། །རང་སེམས་དག་པས་བཾ་པདྨ། །དཀར་པོ་འདབ་བརྒྱད་དབུས་ཟླ་བ། །དབུས་སུ་ཧཱུཾ་ལས་རྡོ་རྗེར་གྱུར། །ལྟེ་བའི་དབུས་སུ་ཧཱུཾ་མཐིང་ག །གྱུར་བ་བཞི་པ་རྡོ་རྗེ་འཆད། །བརྐྱང་བསྐུམ་སེམས་དཔའ་ཁྲོས་པ་སྟེ། །མཐིང་ག་ན་རའི་རྒྱན་གྱིས་སྦུད། །འཇིགས་བྱེད་མགོ་སྐྱེས་གྱེན་དུ་བརྫེས། །རྡོ་རྗེ་དྲིལ་འཛིན་མེ་དཔུང་བཞུགས། །རྩེ་གཅིག་པ་ཡི་སེམས་ཀྱིས་བསམ། །རང་སྙིད་ཟླ་བར་སྙིང་པོ་དགོད། །སྔོན་དུ་བསྙེན་པ་སུམ་འབུམ་བྱ། །གསང་སྔགས་རྒྱལ་པོ་འདི་ལན་ཅིག་བཟླས་པས་སྡིག་པ་ཐམས་ཅད་སྲེག་པ་དང༌། ཐམས་ཅད་སྲུང་བར་བྱེད་དོ། །འབྱུང་པོའི་གདོན་གྱིས་ཟིན་པ་ལ་སོགས་པ་ལ་བསྣུན་ན་འབྱེར་བར་བྱེད་དོ། །ཁ་ཏི་ཁས་ཁམ་ཕོར་ལ་བྲིས་ཏེ་སྒོ་ལ་དབྱངས་ན་སྲིའུ་སྲུང་བར་བྱེད་དོ། །སྤྲ་ཚིལ་ལ་གཟུགས་སོར་བཞི་པ་བྱས་ལ། དེའི་སྙིང་གར་དགྲའི་མིང་དང་སྔགས་སྤྲེལ་ནས་ཚེར་མས་ཁ་ལ་བཙུགས་ན་ཕྱིར་རྒོལ་བའི་ངག་རེངས་པར་བྱེད་དོ། །སྙིང་ལ་
― DTG073_Page_0453 ―
[མ་དཔེ་གཟིགས་ན་འདིར་གནོན།]
བཙུགས་ན་ཁྲོས་པ་ཞི་བ་དང༌། གསད་པའི་སེམས་ཀྱིས་གསད་པར་འགྱུར་བ་དང༌། རྐང་ལག་གང་ལ་བཙུགས་ན་ཞ་བར་འགྱུར་བ་དང༌། རྟགས་ལ་བཙུགས་ན་ནུས་པ་མེད་པར་འགྱུར་རོ། །མིའི་རྗེ་ངར་གྱི་ཕུར་བུའམ་ལྕགས་ཕུར་ལ་བསྔགས་ཏེ་གང་ལ་བསྣུན་པ་རེངས་པར་འགྱུར་རོ། །མི་ཐོད་ལ་སྔགས་བྲིས་ལ། དེའི་ནང་དུ་མི་ཁྲག་གིས་བཀང་བ་དུར་དུ་སྦས་ན་རིགས་རྒྱུད་འཆད་དོ། །དུག་བླུགས་ཏེ་ཀླུ་ཡོད་པའི་གནས་སུ་སྦས་ན་མཛེ་ནད་ཀྱིས་འཛིན་ཏོ། །དགྲའི་སྒོར་སྦས་ན་འབྱེར་བར་བྱེད་པ་དང༌། ཞིང་དཀྱིལ་དུ་སྦས་ན་ཞིང་ལ་མི་སྐྱེ་བ་དང༌། ཕྱུགས་ལྷས་སུ་སྦས་ན་མི་འཕེལ་བ་དང༌། ཆུར་སྦས་ན་ཆུ་སྐེམས་སོ། །སྐྱེས་བུ་མཚོན་གྱིས་བསད་པའི་ཐོད་པ་ལ་སྔགས་དང༌། ཡུལ་ལྷའི་མིང་སྤེལ་ལ་བྲིས་ནས་ཡུལ་ལྷའི་གནས་སུ་སྦས་ལ། དེའི་ཐོག་ཏུ་ཕུར་བ་ལ་སྔགས་མང་དུ་བཟླས་ལ་ཡུལ་ལྷའི་སྙིང་གར་དམ་དུ་གདབ། དེའི་སྟེང་དུ་ཚེར་མ་ཅན་གྱི་ཤིང་ལ་གདུག་པའི་མེ་བཏང་ལ། རྟ་དང༌། མི་དང༌། བ་ལང་དང༌། ཁྱི་དང་མ་ཧེ་ལ་སོགས་པའི་ཤ་ཁྲག་བསྲེགས་ལ། ལྷ་ཁྱོད་ཀྱི་ཡུལ་འདིར་ཐོག་སེར་ཕོ་བ་ཤིག །མ་ཕེབས་ན་བསྐལ་བར་མི་གཏོང་ངོ་ཞེས་བརྗོད་ལ། ཕེབས་ན་རྫས་རྣམས་འོ་མས་བཀྲུས་ལ་བཏང༌། མ་ཕེབས་ན་གཞག །ལས་དེ་དག་ཐམས་ཅད་ནི་སྔགས་དང་མིང་སྤེལ་བའི་དབྱེ་བས་ཤེས་པར་བྱའོ། །གསང་སྔགས་ནི་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཧཱུཾ་ཕཊ། གཞན་ཡང་གོང་གི་གཟུགས་བརྙན་གྱི་སྙིང་གར་མིང་འབའ་ཞིག་བྲིས་ལ། མཆོད་རྟེན་ནག་པོ་མཐོ་གང་བའི་ནང་དུ་བཅུག་ལ། ལྷུང་བཟེད་ཀྱི་འོག་ཏུ་མཎྜལ་བྱས་ལ་གཞག །དེ་ནས་དགེ་སློང་དམ། དགེ་ཚུལ་ལམ། དགེ་བསྙེན་ཕྱག་ན་རྡོ་རྗེའི་རྣལ་འབྱོར་དང་ལྡན་པ་སྔགས་བཟླས་པ་པོ་བཞི་ཡན་ཆད་ཀྱིས་དབེན་པར་ནུབ་བཅོ་ལྔར་ནམ་གུང་ལ་སྔགས་བརྒྱ་རྩ་བརྒྱད་བཟླ་ཞིང་བསྐོར་བར་བྱ། བཅུ་དྲུག་པ་ལ་བསྐོར་བར་བཟློག་ལ་གཟུགས་བསྲོགས་ན། ཇི་སྐད་སྔགས་དང་སྤེལ་བ་བཞིན་ལོ་ལས་མི་འདའོ། །སེར་བ་ལ་སོགས་པ་བཟློག་པ་ལ་འཁོར་ལོ་ལ་བྲི་བའམ་རྡ་ལའོ། །གཡུལ་དུ་འཇུག་ན་རལ་གྲི་ལ་སོགས་པའོ། །ནད་ཐམས་ཅད་ལ་ཆུ་དང་ཡུངས་ཀར་ལ་སོགས་པའོ། །གཞན་ཡང་འདིའི་
― DTG073_Page_0454 ―
[མ་དཔེ་གཟིགས་ན་འདིར་གནོན།]
ཡོན་ཏན་ནི་བརྗོད་པར་མི་ནུས་སོ། །ཕྱག་ན་རྡོ་རྗེ་སྒྲུབ་པའི་ཐབས་སློབ་དཔོན་ཆེན་པོ་ཤྲདྡྷ་ཀར་ཝརྨས་མཛད་པ་རྫོགས་སོ།།
| 
