བརྟན་པའི་འཁོར་ལོའི་ཆོ་ག།
རྒྱ་གར་སྐད་དུ། སྠི་ར་ཙ་ཀྲ་བྷཱ་བ་ན། བོད་སྐད་དུ། བརྟན་པའི་འཁོར་ལོའི་ཆོ་ག །བཅོམ་ལྡན་འདས་འཇམ་དཔལ་གཞོན་ནུར་གྱུར་བ་ལ་ཕྱག་འཚལ་ལོ། །ཐུགས་རྗེ་དང་ནི་ཤེས་རབ་གཉིས། །སངས་རྒྱས་ཀུན་ལྟར་དབྱེར་མེད་པའི། །དམ་པའི་ལམ་སྟོན་ལྟ་བུ་ཡི། །སྐུ་ཡི་རྣམ་པ་འཆད་མཛད་པ། །འཇམ་པའི་དབྱངས་ལ་ཕྱག་འཚལ་ཏེ། །སློབ་མས་ལེགས་པར་རྟོགས་ཕྱིར་དང༌། །བདག་ཉིད་ཀྱིས་ཀྱང་དྲན་པའི་ཕྱིར། །དེ་ཡི་སྒྲུབ་ཐབས་བྲི་བར་བྱ། །གསང་སྔགས་རང་ཉིད་ལེན་པ་ཡི། །འགྲོ་བ་དམྱལ་བ་འབའ་ཞིག་ཡིན། །སྔགས་ཀྱང་འགྲུབ་པར་མི་འགྱུར་ཏེ། །ལུས་ཀྱང་ཉོན་མོངས་ཁོ་ནར་ཟད། །དེ་ལ་བགེགས་ཀྱང་འབྱུང་འགྱུར་ཞིང༌། །ལུས་ལའང་གནོད་པར་འགྱུར་བ་ཡིན། །དེ་ལྟར་བརྟགས་ནས་མཁས་པ་ཡིས། །འཇམ་པའི་དབྱངས་ཀྱི་སྒྲུབ་པའི་ཐབས། །མྱུར་དུ་བྱང་ཆུབ་རབ་སྒྲུབ་པ། །སློབ་དཔོན་མེད་པར་བསྒྲུབ་མི་བྱ། །དེ་བས་དད་པས་བླ་མ་ནི། །དམ་པར་བྱས་
ཏེ་འདི་གཟུང་ངོ༌། །དེ་ལ་རེ་ཞིག་རྣལ་འབྱོར་བས། ས་ཕྱོགས་ཡིད་དུ་འོང་བ་གང་ཡང་རུང་བར་སྟན་བདེ་བ་ལ་འདུག་སྟེ། ཚངས་པའི་གནས་བཞི་བསྒོམ་པར་བྱའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་འཛིན་པ་ནི་བྱམས་པའོ།། ཀྱེ་མ་སེམས་ཅན་འདི་དག་ནི་འཁོར་བའི་རྒྱ་མཚོར་ནུབ་ཅིང་ཡུན་རིང་དུ་སྡུག་བསྔལ་ཉམས་སུ་མྱོང་བར་འགྱུར་རོ་ཞེས་དེ་ལྟར་བསམས་ལ། །བདག་ཉིད་འཇམ་པའི་དབྱངས་ཀྱི་གོ་འཕང་ཐོབ་པར་བྱས་ནས། འདི་དག་མ་ལུས་པར་སྡུག་བསྔལ་དང་སྡུག་བསྔལ་གྱི་རྒྱུ་ལས་ཐོན་ཏེ་འཇམ་པའི་དབྱངས་ཀྱི་གོ་འཕང་ལ་བདག་གིས་གཞག་པར་བྱའོ། །དེ་ལྟར་ཡང་སྐྱེ་བ་དང༌། རྒ་བ་དང༌། ན་བ་དང༌། ཡིད་མི་བདེ་བ་དང༌། བཀྲེས་པ་དང༌། སྐོམ་པ་དང༌། ནང་དང་འཆི་བ་ལ་སོགས་པའི་སྡུག་བསྔལ་ལས་བདག་དང་བདག་གིར་འཛིན་པ་ལ་མངོན་པར་ཞེན་པ་དང༌། འདོད་ཆགས་དང༌། ཞེ་སྡང་ལ་སོགས་པའི་མཚན་ཉིད་ཅན་གྱི་སྡུག་བསྔལ་གྱི་རྒྱུ་ལས་གྲུབ་པ་གཅོད་པར་བྱའོ། །དེ་ཉིད་ནི་སྙིང་རྗེ་བསྒོམ་པའོ། །སེམས་ཅན་ཐམས་ཅད་ཟག་པ་མེད་པའི་བདེ་བ་རྒྱུན་མི་འཆད་པར་འཇོག་པར་འདོད་ཅིང་དགའ་བ་ནི་དགའ་བའོ། །བདེ་བ་དང༌། སྡུག་བསྔལ་བ་དང༌། གྲགས་པ་དང༌། མ་གྲགས་པ་དང༌། རྙེད་པ་དང༌། མ་རྙེད་པ་དང༌། བསྟོད་པ་དང༌། སྨད་པ་སྟེ་འཇིག་རྟེན་གྱི་ཆོས་བརྒྱད་པོ་འདི་དག་ལ་བདེ་བ་ཇི་ལྟ་བར་སྡུག་བསྔལ་ལ་ཡང་དེ་བཞིན་དུ་ལྟ་བ་ལ་སོགས་པ་སེམས་མཉམ་པར་བསྒོམ་པ་ནི་བཏང་སྙོམས་སོ། །དེ་ནས་རང་གི་སྙིང་གར་ཨ་དཀར་པོ་ཐུབ་དུ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཡི་གེ་མུཿལི་ཁྲིའི་མདོག་འདྲ་བ་བསམས་ལ་པ་སྤུའི་བུ་གའི་ཚོགས་རེ་རེའི་གསེབ་ནས་བྱུང་བའི་འོད་ཟེར་གྱི་དྲ་བ་དཔག་ཏུ་མེད་པ་ལས་བྱུང་བའི་མཆོད་པ་སྣ་ཚོགས་པ། ཨོཾ་བཛྲ་པུཥྤེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་དྷཱུ་པེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་དཱི་པེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་གནྡྷེ་ཧཱུཾ། ཨོཾ་ན་མོ་མཉྫུ་ཤྲི་ཡེ། ཨོཾ་བཛྲ་ནཻ་བེ་དྷྱེ་ཧཱུཾ། ཨོཾ་ན་མོ་མཉྫུ་ཤྲི་ཡེ་ཤེས་བྱ་བའི་སྔགས་ཀྱིས་བྱིན་གྱིས་བརླབས་པས་འཕགས་པ་འཇམ་དཔལ་དང༌། བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་རྣམས་ལ་མཆོད་པ་
བྱའོ། །དེ་ནས་མདུན་དུ་དཀྱིལ་འཁོར་བྱས་ནས་ཕྱག་བྱས་ལ་པུས་མོ་གཡས་པའི་ལྷ་བས་ལ་བཙུགས་ཏེ། སྙིང་གར་ཐལ་མོ་སྦྱར་ནས་བཤགས་པ་ལ་སོགས་པ་བྱའོ། །གང་ཡང་བདག་རྨོངས་པའི་དབང་གིས་ལུས་དང་ངག་དང་ཡིད་ཀྱིས་སྡིག་པ་མི་དགེ་བའི་ལས་ཅི་བ་གྱིས་པ་དང༌། བགྱིད་དུ་སྩལ་བ་དང༌། བགྱིད་པ་ལ་རྗེས་སུ་ཡི་རན་བ་དེ་དག་ཐམས་ཅད་མ་ལུས་པར་བཤགས་པར་བགྱིའོ། །སླར་ཡང་སྡིག་པ་མི་བགྱིད་དོ། །སངས་རྒྱས་དང༌། བྱང་ཆུབ་སེམས་དཔའ་དང་འཕགས་པ་གཞན་རྣམས་ཡིས་དགེ་བ་གང་མཛད་པ་དེ་དག་ཐམས་ཅད་ལ་རྗེས་སུ་ཡི་རང་བར་བགྱིའོ། །དེང་ནས་བརྩམས་ཏེ་བྱང་ཆུབ་ཀྱི་སྙིང་པོའི་བར་དུ་ཁྱེད་རྣམས་ལ་བདག་ཉིད་ལུས་དབུལ་བར་བགྱིའོ། །དགེ་བའི་རྩ་བ་འདིས་བདག་འཇམ་དཔལ་དབྱངས་སུ་གྱུར་ནས་སྲིད་པའི་རྒྱ་མཚོར་ནུབ་པའི་སེམས་ཅན་རྣམས་གདོན་པར་བགྱིའོ། །བརྟན་པའི་འཁོར་ལོ་བསྒོམ་པའི་རིམ་པ་འདི་ཉིད་ཀྱིས་ཀྱང་བྱང་ཆུབ་ཆེན་པོར་བསྒྲུབ་པའི་ལམ་ལ་བདག་གནས་པར་བགྱིའོ། །བདག་གི་བསོད་ནམས་འདིས་འཁོར་བའི་སེམས་ཅན་མ་ལུས་པ་འཇམ་པའི་དབྱངས་དང་འདྲ་བར་གྱུར་ཅིག་ཅེས་དགེ་བའི་རྩ་བ་བསྔོ་བར་བྱའོ། །དེ་ནས་འོད་ཟེར་གྱི་ཚོགས་རྣམས་བ་སྤུའི་བུ་ག་རྣམས་ནས་མུཿདེ་ཉིད་ལ་ཞུགས་པར་བསམས་ལ། ཨོཾ་བཛྲ་མུཿཞེས་བྱ་བའི་སྔགས་ཀྱིས་གཤེགས་སུ་གསོལ་ལོ། །དེ་ནས་ཨོཾ་སྭ་བྷཱ་བ་བི་ཤུདྡྷཿསརྦ་དྷརྨཱཿསྭ་བྷཱ་བ་བི་ཤུད་དྷོ྅ ཧཾ་ཞེས་བྱ་བའི་སྔགས་འདི་བརྗོད་ནས་རྒྱུ་བ་དང་མི་རྒྱུ་བའི་དངོས་པོ་རྣམས་དང་བཅད་ཉིད་ཀྱང་སྒྱུ་མ་ལྟ་བུར་བསྒོམ་པར་བྱའོ། །དེ་ཡང་སྒྱུ་མ་མཁན་གྱིས་འཇིམ་པའི་གོང་བུ་ལ་སོགས་དངོས་པོ་གཅིག་ལས་གླང་པོ་ཆེ་དང༌། རྟ་ལ་སོགས་པ་སྟོན་ཡང་དེ་རྣམས་དེ་ན་ཡོད་པ་མ་ཡིན་གྱི་འཁྲུལ་བ་འབའ་ཞིག་ཏུ་ཟད་ལ་འཁྲུལ་པ་དེ་ཡང་བརྟགས་ནས་དངོས་པོ་མེད་དེ། །དེ་བས་ན་སྣང་དུ་ཟིན་ཀྱང་ཡོད་པ་མ་ཡིན་ལ། །དངོས་པོའི་ཚོགས་ཐམས་ཅད་ཀྱང་དེ་དང་འདྲའོ་ཞེས་དེ་ལྟར་རང་བཞིན་གྱིས་དག་པར་ལྷག་པར་མོས་པར་བྱས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བའི་སྔགས་བརྗོད་པར་བྱའོ། །འདི་བརྗོད་པའི་རྗེས་ཐོགས་ཁ་ན་ལ་རྒྱུ་བ་དང་མི་རྒྱུ་བའི་དངོས་པོ་དང་བདག་ཉིད་ཀྱང་སྟོང་པ་ཉིད་དུ་
བསྒོམ་ལ་སེམས་ཙམ་དུ་གནས་པར་བསྒོམས་ནས་སེམས་དེ་ཡང་ཡོད་པར་མི་བརྟག་གོ །དེ་ནས་སྙིང་རྗེ་ཆེན་པོ་ཅན་གྱི་སྔོན་གྱི་སྨོན་ལམ་གྱི་འཕེན་ཤུགས་ཀྱིས་ལངས་ནས། ཀྱེ་མ་སེམས་ཅན་འདི་དག་རང་བཞིན་གྱིས་རྣམ་པར་དག་པ་ཡིན་ཡང་མ་རྟོགས་པས་ད་དུང་འཁོར་བའི་རྒྱ་མཚོར་འཁྱམས་པར་གྱུར་གྱི། །དེས་ན་དེ་ལས་སྟོད་པ་ཉིད་དུ་གནས་པས་ཕན་མི་ཐོགས་པས་གཉིས་སུ་དམིགས་སུ་མེད་ཀྱང་སྙིང་རྗེ་ཆེན་པོའི་དབང་གིས་རེ་ཞིག་འཇམ་པའི་དབྱངས་སུ་གྱུར་བར་བྱའོ་ཞེས་རྣམ་པར་བསམས་ལ་རང་གི་སེམས་ཡོངས་སུ་གྱུར་བ་ལས་བྱུང་བའི་ཡི་གེ་མུཿ་དམར་པོ་དེ་ལས་ཟླ་བའི་དཀྱིལ་འཁོར་རྒྱ་སྐྱེགས་ཀྱི་མེ་ཏོག་གསར་བའི་མདོག་ཅན་དུ་གྱུར་ལ། དེའི་སྟེན་དུ་དབྱངས་ཀྱི་ཡི་གེ་ཁ་དོག་དམར་པོ་ཉིས་འགྱུར་བྱས་པ་ལས་མགོ་གྱེན་དུ་བལྟས་པ་བསམ་པར་བྱའོ། །དེའི་སྟེང་དུ་ཡི་གེ་མུཿགྙིས་པ་ཁ་དོག་དམར་པོ་ཅན་ལས་བྱུང་བའི་ཟླ་བའི་དཀྱིལ་འཁོར་བསམ་པར་བྱའོ། །དེའི་སྟེང་དུ་ཀ་ནས་ཀྵའི་མཐར་ཐུག་པ་ལ་ཌ་ཌྷ་ད་དྷ་ཡ་ལ་ཞེས་བྱ་བའི་ཡི་གེས་བསྣན་པ་ཉིས་འགྱུར་དུ་བྱས་པའི་ཡི་གེ་བརྒྱད་ཅུ་མགོ་གྱེན་དུ་བལྟས་པ་མདོག་རྣམ་པར་དམར་བ་བསམ་པར་བྱའོ། །དེའི་སྟེང་དུ་ཡི་གེ་མུཿགྶུམ་པ་ཡོངས་སུ་གྱུར་པ་ལས་ཨུཏྤ་ལ་ཤིན་ཏུ་སྔོ་བ་དེའི་ལྟེ་བར་ཡི་གེ་མུཿབྮི་པ་ཁ་དོག་རྣམ་པར་དམར་བར་བསམ་པར་བྱའོ། །དེ་ནས་དེ་རྣམས་ལས་འོད་ཟེར་བྱུང་བས་ནམ་མཁའི་གཏོས་ཁྱབ་པར་སྤྲོས་ལ། དེ་བཞིན་གཤེགས་པ་མ་ལུས་པ་བ་སྤུའི་བུ་གའི་གསེབ་ནས་ཐུགས་ཀར་ཞུགས་ཏེ། དེ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་དང༌། ལྷན་ཅིག་ཏུ་རོ་གཅིག་པར་གྱུར་ནས་བ་སླུའི་བུ་ག་ནས་སླར་ལོག་སྟེ་དེ་རྣམས་ཉིད་ལ་ཞུགས་པར་བསམ་པར་བྱའོ། །དེ་ནས་དེ་དག་ཐམས་ཅད་ཡོངས་སུ་གྱུར་པ་ལས་འཕགས་པ་འཇམ་དཔལ་དབྱངས་ཀྱི་སྐུ་བནྡུ་ཀའི་མེ་ཏོག་ལྟར་དམར་བ། ཆོས་ཆེན་པོའི་ཚོན་གྱིས་བསྒྱུར་བ་ལྟ་བུ་པདྨའི་སྟེང་དུ་རྒོལ་བ་མ་ལུས་པའི་སྙིང་གནོན་པ་ལྟ་བུའི་ཚུལ་གྱིས་ཟླ་བའི་དཀྱིལ་འཁོར་གྱི་སྟེང་དུ་སེམས་དཔའི་སྐྱིལ་མོ་ཀྲུང་གིས་བཞུགས་པ། འདས་པ་དང་མ་འོངས་པ་དང༌། ད་ལྟར་བྱུང་བའི་བསྟན་བཅོས་མ་ལུས་པ་འཛིན་པའི་ཚུལ་གྱིས་ཕྱག་གཡོན་པས་ཐུགས་ཀར་གླེགས་བམ་བསྣམས་པ། འགྲོ་བ་
མ་ལུས་པའི་མི་ཤེས་པའི་རི་བོ་འཇིག་པར་མཛད་པའི་ཚུལ་གྱིས་ཕྱག་གཡས་པ་ན་རལ་གྲི་བསྣམས་པ། ཟུར་ཕུང་ལྔ་དང་ལྡན་པ་གཞོན་ནུའི་ཆ་ལུགས་འཆང་བ། མི་བསྐྱོད་པ་དབུ་ལ་བཞུགས་པའི་ཅོད་པན་འཆང་བ་སྒེག་པའི་ཉམས་ཀྱིས་གནས་ཤིང་གཅིག་པུར་འགྲོ་བ་བླ་ཞི་བ་ཐུགས་རྗེ་ལ་གཅིག་ཏུ་གཞོལ་བ། ཤིན་ཏུ་ཡིད་དུ་འོང་བའི་གཞིར་གྱུར་བར་བདག་ཉིད་བསྒོམ་པར་བྱའོ། །དེ་ནས་རང་གི་སྙིང་གར་ཡི་གེ་མུཿདྨར་པོ་ཡོངས་སུ་གྱུར་བ་ལས་འཁོར་ལོ་རྩིབས་བརྒྱད་པ་བསྒོམ་པར་བྱའོ། །འཁོར་ལོའི་ཤར་དང༌། ལྷོ་དང་ནུབ་དང༌། བྱང་གི་རྩིབས་ལ་ཨ་ར་པ་ཙ་ཞེས་བྱ་བའི་ཡི་གེ་བཞི་གོ་རིམས་ཇི་ལྟ་བ་བཞིན་དུ་བསམས་ལ། དབུས་སུ་ཡི་གེ་ནའོ། །མེ་དང་བདེན་བྲལ་དང༌། རླུང་དང་དབང་ལྡན་གྱི་མཚམས་སུ་ནི་པྲ་པན་ཙ་ཞེས་བྱ་བ་སྔ་མ་བཞིན་བསམ་མོ། །རྩིབས་རྣམས་ཀྱི་བར་མཚམས་སུ་དབྱངས་ཀྱི་ཡི་གེ་བཅུ་དྲུག་ལས་གཉིས་གཉིས་སོ། །འཁོར་ལོའི་མུ་ཁྱུད་ལ་ཀ་ལ་སོགས་པའི་ཡི་གེ་གཡས་ནས་ཀུན་ནས་བསྐོར་བར་བསྒོམ་པར་བྱའོ། །འདི་དག་ཐམས་ཅད་ཀྱང་བཅོམ་ལྡན་འདས་ཀྱི་སྐུ་མདོག་གི་མདངས་དང་འདྲའོ། །དེ་ནས་སྙིང་ག་ན་གནས་པའི་འཁོར་ལོ་ལས་བྱུང་བའི་འོད་ཟེར་རྩེ་མོ་ལྕགས་ཀྱུ་དང་འདྲ་བ་རྣམས་ཀྱིས་གདོད་མ་ནས་ཡང་དག་པར་གྲུབ་པའི་བརྟན་པའི་འཁོར་ལོ་སྤྱན་དྲངས་ལ་དེ་དང་ལྷན་ཅིག་ཏུ་འདྲེས་པར་བདག་ཉིད་བསྒོམ་པར་བྱའོ། །དེའི་རྗེས་ལ་འཁོར་ལོའི་ཡི་གེའི་ཚོགས་རྣམས་ལས་འོད་ཟེར་དམར་པོའི་རྣམ་པ་བ་སྤུའི་བུ་ག་རྣམས་ནས་བྱུང་སྟེ། བརྟན་པའི་འཁོར་ལོའི་གཟུགས་སུ་གྱུར་པས་ནམ་མཁའི་གཏོས་ཁྱབ་པར་བསྒོམས་ཏེ། དེས་རེག་པ་ཙམ་གྱིས་སེམས་ཅན་གྱི་ཚོགས་རྣམས་འཇམ་པའི་དབྱངས་ཀྱི་གཟུགས་སུ་བྱས་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བས་བུའི་བུ་གནས་འོད་ཟེར་གྱི་གཟུགས་ཀྱིས་ཐུགས་ཀར་ཞུགས་ཏེ། དེ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་དང་ལྷན་ཅིག་ཏུ་རོ་གཅིག་པར་གྱུར་ནས་དེ་ཉིད་ནས་སླར་བྱུང་ནས་འཕགས་པ་འཇམ་པའི་དབྱངས་ཀྱི་སྐུས་ནམ་མཁའ་ངོས་མ་ལུས་པ་ཁྱབ་པར་མཛད་ནས་སླར་བྱོན་ནས་སེམས་ཅན་གྱི་ཚོགས་མ་ལུས་པ་འཇམ་པའི་དབྱངས་ཀྱི་སྐུ་ལྟ་བུར་མཛད་ནས་ཉིད་ཀྱི་སྐུའི་ཐད་དུ་ལྷགས་ཏེ་
བ་སྤུའི་བུ་ག་དེ་ཉིད་ནས་འཁོར་ལོ་དང་ཡི་གེའི་ཚོགས་དེ་དག་གི་ནང་འོད་ཟེར་གྱི་གཟུགས་ཀྱིས་བཞུགས་པར་བསམ་པར་བྱའོ། །ཇི་ལྟར་བཤད་པའི་ཚུལ་གྱིས་བཅོམ་ལྡན་འདས་ཀྱི་ང་རྒྱལ་ཤིན་ཏུ་བརྟན་པ་སྔོན་དུ་འགྲོ་བ་དང༌། སྤྲོ་བ་དང་བསྡུ་བའི་རིམ་པ་ཇི་སྲིད་སྐྱོ་བར་མ་གྱུར་གྱི་བར་དུ་དེ་སྲིད་དུ་རྒྱུན་དུ་བསྒོམ་པར་བྱའོ། །གལ་ཏེ་སྐྱོ་བར་གྱུར་ན་འོད་ཟེར་བསྡུས་ནས་སྤྲོ་བར་མི་བྱ་བར་འཁོར་ལོ་དང་ཡི་གེ་རྣམས་བསམ་པ་དང༌། རང་གི་ཕྱག་མཚན་དང་དབྱིབས་ཀྱི་ཚུལ་ལ་རྟོག་ཅིང་སྔགས་བཟླས་པར་བྱའོ། །དེ་ལ་བཟླས་པར་བྱ་བའི་སྔགས་ནི། ཨོཾ་ཨ་ར་པ་ཙ་ན་མུཿ་ཞེས་བྱའོ། །ཉིན་དང་མཚན་མོ་བསྒོམ་པའི་རྒྱུ་ཡིས་ནི། །གང་ཚེ་འཁོར་ལོ་གསལ་བར་གྱུར་པ་དང༌། །རང་གི་ལྷ་ཡི་གཟུགས་ཀྱི་ང་རྒྱལ་ནི། །གཡོ་བ་མེད་པ་ཉིད་དུ་གྱུར་པ་ནི། །བསྟན་བཅོས་ནུབ་པར་གྱུར་པ་ཇི་སྙེད་དང༌། །གང་ཞིག་འཇིག་རྟེན་དུ་ནི་རིང་གནས་འགྱུར། །བསྟན་བཅོས་གང་ཞིག་དེ་ལྟར་གནས་པ་དང༌། །སྲོག་ཆགས་རྣམས་ཀྱི་སྐད་ནི་མ་ལུས་དང༌། །བཟོད་དང་སྒྱུ་རྩལ་ལ་སོགས་མཁས་གང་དང༌། །དེ་ལས་གཞན་པའི་དབང་པོ་ལས་འདས་གང༌། །དེ་དག་ཐམས་ཅད་ཚིག་དོན་བཅས་པར་གོ །སྙིང་ལ་གཟུགས་བརྙན་ཚུལ་དུ་གནས་པར་འགྱུར། །ཕྱོགས་གང་ཚར་བཅད་པ་དང་སྒྲུབ་འདོད་པ། །འབད་པ་མེད་པ་ཉིད་དུ་འཇུག་འགྱུར་ཏེ། །ཕུར་བུ་ལྷ་ཆེན་བརྒྱ་བྱིན་ཚངས་པས་ཀྱང༌། །ཚར་ཆོད་སྒྲུབ་པ་དེ་ནི་རྒོལ་མི་ནུས། །འཁོར་ལོ་འདི་མེད་པར་ནི་ཤེས་རབ་དག །རྣོ་བར་མི་འགྱུར་དེ་མེད་ཕྲ་བ་ཡིས། །ཆོས་རྣམས་འཛིན་པར་མི་ནུས་དེ་མེད་པར། །ནམ་ཡང་འཁོར་བའི་མཚོ་ལས་སྒྲོལ་མི་ནུས། །དེ་བས་རང་ལ་ཕན་འདོགས་པས། །འཁོར་ལོ་བསྒོམ་པ་མི་སྤང་ཞིང༌། །གསང་སྔགས་རྒྱལ་པོ་བཟླས་པ་ཡང༌། །མཉམ་པར་བཞག་པས་རྟག་ཏུ་བྱ། །བདག་གི་དགེ་བ་འདི་ཡིས་སྲིད་གསུམ་ལས་བྱུང་འཇིག་རྟེན་རྣམས། །བདེ་གཤེགས་མ་ལུས་ཐུགས་དང་གཅིག་འགྱུར་འཇམ་དབྱངས་འདྲ་བར་ཤོག །བདག་དང་རྣམ་རྟོག་མང་པོའི་ཚོགས་བྲལ་བདེ་མཆོག་ལྡན་པ་ཡི། །ཕྱག་རྒྱ་ཆེན་པོ་དངོས་གྲུབ་ཚོགས་འདིས་ཚེ་འདིར་མྱུར་ཐོབ་ཤོག །བཅོམ་ལྡན་འདས་འཇམ་པའི་དབྱངས་ཀྱི་སྒྲུབ་ཐབས་བརྟན་པའི་འཁོར་ལོ་སྒོམ་པ་ཞེས་བྱ་བ་རྫོགས་སོ།། །།
རྒྱ་གར་གྱི་མཁན་པོ་བཱིཪྻ་བྷ་དྲ་དང་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།།