དཔལ་ཕྱག་ན་རྡོ་རྗེ་ལ་བསྟོད་པ།
དཱི་པཾ་ཀ་ར་ཤྲཱི་ཛྙཱ་ན།
རྒྱ་གར་སྐད་དུ། ཤྲཱི་བཛྲ་པཱ་ཎི་སྟོ་ཏྲ། བོད་སྐད་དུ། དཔལ་ཕྱག་ན་རྡོ་རྗེ་ལ་བསྟོད་པ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཧཱུཾ་བསྐལ་པ་མེ་ལྟར་འབར་བའི་ཀློང་དཀྱིལ་ནས། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཆོས་སྐུ་ནམ་མཁའ་ལྟ་བུའི་དང་ཉིད་ལས། །གཟུགས་སྐུ་འཇའ་ཚོན་ལྟ་བུའི་སྐུར་སྣང་བ། །བཅོམ་ལྡན་རྡོ་རྗེ་གུམ་པོ་ཁྲོས་པའི་སྐུ། །ཞལ་གཅིག་ཕྱག་གཉིས་སྐུ་མདོག་མཐིང་ནག་ལ། །གཡས་པ་རྡོ་རྗེ་རྩེ་ལྔ་བསྣུན་པའི་ཚུལ། །གཡོན་པ་སྡིགས་མཛུབ་འཆད་བ་ཐུགས་ཀར་འཛིན། །དབུ་སྐྲ་དམར་སེར་གྱེན་བརྫེས་ཅོད་པན་ཅན། །དབང་བསྐུར་སངས་རྒྱས་མི་བསྐྱོད་པ་ཡིས་མཛེས། །སྨིན་བསྡུས་སྨིན་མ་གློག་སྟོང་འོད་དུ་འཕྲོ། །སྤྱན་གསུམ་འབར་བ་ཁྲོ་བོའི་ལྟ་བས་མཛེས། །མཆེ་བ་གཙིགས་ཤིང་དབུགས་རྒྱུ་མེ་ལྟར་འབར། །ཨ་ལ་ལ་ཡི་གད་རྒྱངས་ཆེན་པོ་སྒྲོགས། །ཧ་ཧའི་གང་མོས་སྟོང་གསུམ་བརྒྱལ་བར་བྱེད། །ཧཱུཾ་གི་ང་རོ་འབྲུག་སྟོང་ལྡིང་བའི་སྒྲ། །ཕཊ་ཀྱིས་ཐོག་འབེབས་རྡོ་རྗེ་སེར་ཆེན་འབེབས། །གཤིན་རྗེའི་གཟུགས་ཅན་རྒྱན་དང་ཆ་ལུགས་ལྡན། །སྐུ་སྟོད་སེང་གེའི་པགས་པས་རྣམ་པར་བརྒྱན། །ན་བཟའ་ཆོས་གོས་སྔོན་པོ་འཆང་བ་བསྣམས། །སྟག་གི་སྨད་གཡོགས་པ་ཏི་ཁྲ་བོས་བརྒྱན། །རིན་ཆེན་འབར་བའི་སྤྲུལ་གྱིས་དབུ་བརྒྱན་ཅིང༌། །དགའ་བོ་ཉེ་དགའི་སྙན་ཆས་རབ་ཏུ་མཛེས། །གདུག་པ་འབར་བ་ཟས་སུ་གསོལ་བར་མཛད། །ཀླུ་ནག་སེ་རལ་ཁ་རུ་བརྒྱན་པ་སྟེ། །འདབ་བཟང་དཀར་པོས་སྐ་རགས་རྣམ་པར་བཅིངས། །ནོར་རྒྱས་བུས་ནི་ཕྱག་
དང་ཞབས་བརྒྱན་ཏེ། །ཉི་ཟླའི་སྟེང་ན་ཁྲོ་རྒྱལ་གར་བྱེད་དགྱེས། །སྣ་ཚོགས་པདྨའི་གདན་ལ་རྣམ་པར་བཞུགས། །རྡོ་རྗེའི་རིགས་མཆོག་བཅོམ་ལྡན་གཏུམ་པོ་སྟེ། །སངས་རྒྱས་འདུས་པའི་སྐུ་ལ་ཕྱག་འཚལ་བསྟོད། །ཧཱུཾ་བསྐལ་པའི་མེ་འབར་ཀློང་ན་བཞུགས་པ་ནི། །ཉོན་མོངས་འཁོར་བ་རྩད་ནས་གཅོད་པའི་རྟགས། །ཞལ་གཅིག་ཕྱག་གཉིས་སྐུ་མདོག་མཐིང་ནག་ནི། །ཐབས་དང་ཤེས་རབ་ཟུང་དུ་འབྲེལ་པའི་རྟགས། །རྡོ་རྗེ་རྩེ་ལྔ་གཡས་ན་བསྣམས་པ་ནི། །ཡེ་ཤེས་ལྔ་ལྡན་དུག་ལྔ་འཇོམས་པའི་རྟགས། །གཡོན་པས་སྡིགས་མཛུབ་ཐུགས་ཀར་འཆང་བ་ནི། །ཆོས་ཀྱི་དབྱིངས་ལས་འགྱུར་བ་མེད་པའི་རྟགས། །དབུ་སྐྲ་དམར་སེར་གྱེན་དུ་བརྫེས་པ་ནི། །ཁམས་གསུམ་འཁོར་བའི་སེམས་ཅན་འདྲེན་པའི་རྟགས། །སངས་རྒྱས་མི་བསྐྱོད་པ་ཡིས་བརྒྱན་པ་ནི། །དེ་བཞིན་གཤེགས་པའི་རིགས་ལ་དགོངས་པའི་རྟགས། །སྨིན་བསྡུས་སྨིན་མ་གློག་སྟོང་འཕྲོ་བ་ནི། །ཐུགས་རྗེའི་ཐབས་ཀྱིས་གདུག་པ་འདུལ་བའི་རྟགས། །མཆེ་གཙིགས་དབུགས་རྒྱ་མེ་ལྟར་འབར་བ་ནི། །ཐབས་ཀྱི་སྤྱོད་པས་ཉོན་མོངས་སྲེག་པའི་རྟགས། །སྤྱན་གསུམ་དམར་བ་ཁྲོ་བོས་བལྟ་བ་ནི། །སྐུ་གསུང་ཐུགས་ཀྱི་དོན་དང་ལྡན་པའི་རྟགས། །ཨ་ལ་ལ་ཡི་གད་རྒྱངས་སྒྲོགས་པ་ནི། །འཇིག་རྟེན་གསུམ་ན་འགྲན་ཟླ་མེད་པའི་རྟགས། །ཧ་ཧའི་གང་རྒྱངས་སྟོང་གསུམ་བརྒྱལ་བ་ནི། །ཐབས་མཁས་ཐུགས་རྗེས་གདུག་པ་འདུལ་བའི་རྟགས། །ཧཱུཾ་གི་ང་རོ་འབྲུག་སྟོང་ལྡིར་བ་ནི། །ཁྲོ་བོའི་རིགས་རྣམས་དབང་དུ་སྡུད་པའི་རྟགས། །ཕཊ་ཀྱིས་རྡོ་རྗེའི་ཐོག་སེར་འབེབས་པ་ནི། །མ་མོ་མཁའ་འགྲོ་དབང་དུ་སྡུད་པའི་རྟགས། །གཤིན་རྗེའི་གཟུགས་ཅན་རྒྱན་དང་ཆ་ལུགས་ནི། །སྐུ་ཆེ་ཡན་ལག་རགས་ཏེ་ཆེ་བའི་རྟགས། །སྐུ་སྟོད་སེང་གེའི་པགས་པས་བརྒྱན་པ་ནི། །ཆོས་ཉིད་དོན་ལྡན་སྤྲོས་དང་བྲལ་བའི་རྟགས། །ན་བཟའ་ཆོས་གོས་སྔོན་པོ་འཆང་བ་ནི། །ཚུལ་ཁྲིམས་དོན་ལྡན་དྲི་མ་མེད་པའི་རྟགས། །སྟག་ཤམ་བ་ཏི་ཁྲ་བོས་བརྒྱན་པ་ནི། །ཞེ་སྡང་འདུལ་མཛད་སྒྲུབ་མཆོག་སྐྱོད་པའི་རྟགས། །རིན་ཆེན་འབར་བའི་སྤྲུལ་གྱིས་དབུ་བརྒྱན་པ། །འདོད་དགུ་བསམ་པ་རེ་བ་སྐོང་བའི་རྟགས། །དགའ་བོ་ཉེ་དགའི་སྙན་ཆས་བརྒྱན་པ་ནི། །བྲམ་ཟེའི་ཀླུ་རྣམས་དབང་དུ་སྡུད་པའི་
རྟགས། །གདུག་པ་འབར་བ་ཟས་སུ་གསོལ་བ་ནི། །གདོལ་པའི་རིགས་རྣམས་དབང་དུ་སྡུད་པའི་རྟགས། །ཀླུ་ནག་སེ་རལ་ཁ་རུ་བརྒྱན་པ་ནི། །དམངས་རིགས་ཀླུ་རྣམས་དབང་དུ་སྡུད་པའི་རྟགས། །འདབ་བཟད་དཀར་པོ་སྐ་རགས་བཅིངས་པ་ནི། །རྒྱལ་རིགས་ཀླུ་རྣམས་དབང་དུ་སྡུད་པའི་རྟགས། །ནོར་རྒྱས་བུ་ཡིས་ཕྱག་ཞབས་བརྒྱན་པ་ནི། །རྗེ་རིགས་ཀླུ་རྣམས་དབང་དུ་སྡུད་པའི་རྟགས། །ཉི་ཟླའི་སྟེང་ན་གར་བྱེད་དགྱེས་པ་ནི། །ཐབས་དང་ཤེས་རབ་ཟུང་དུ་འབྲེལ་པའི་རྟགས། །སྣ་ཚོགས་པདྨའི་གདན་ལ་བཞུགས་པ་ནི། །ཉོན་མོངས་འཁོར་བའི་སྐྱོན་གྱིས་མ་གོས་རྟགས། །རྡོ་རྗེའི་རིགས་མཆོག་བཅོམ་ལྡན་གཏུམ་པོ་ནི། །ཐབས་ཀྱི་སྤྱོད་པས་འགྲོ་དོན་བྱེད་པའི་རྟགས། །སངས་རྒྱས་ཐམས་ཅད་འདུས་པའི་སྐུ་བསྟན་པ། །སངས་རྒྱས་ཀུན་གྱི་ཕྲིན་ལས་མཛད་པའི་རྟགས། །སྐུ་ཡི་ཡན་ལག་རགས་ཏེ་དཔའ་དཔའ་འདྲ། །རྒྱན་དང་ཆ་ལུགས་ལྡན་ཏེ་སྒེག་སྒེག་འདྲ། །ཞེ་སྡང་འཇོམས་མཛད་སྟག་གི་ཤམ་ཐབས་ཅན། །གདུག་པ་འདུལ་མཛད་སྤྲུལ་གྱི་ཆུན་པོས་བརྒྱན། །ཉོན་མོངས་འཇོམས་མཛད་མེ་དཔུང་ཀློང་ན་བཞུགས། །སངས་རྒྱས་ཀུན་གྱི་བདག་ཉིད་རྡོ་རྗེ་འཆང༌། །བཅོམ་ལྡན་གཏུམ་པོའི་སྐུ་ལ་ཕྱག་འཚལ་བསྟོད། །དཔལ་ཕྱག་ན་རྡོ་རྗེ་ལ་དོན་རྟགས་ཀྱི་སྒོ་ནས་བསྟོད་པ་སློབ་དཔོན་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། །།པཎྜི་ཏ་དེ་ཉིད་དང༌། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ།།