ཕྱག་ན་རྡོ་རྗེ་གོས་སྔོན་པོ་ཅན་གྱི་ཀླུ་གཏོར་གྱི་ཆོ་ག།
འགྲོ་བཟང་སྙིང་པོ།
རྒྱ་གར་སྐད་དུ། བཛྲ་པཱ་ཎི་ནཱི་ལཱཾ་བར་དྷ་ར་ནཱ་ག་བ་ལིཾ་བི་དྷི། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་ཀླུ་གཏོར་གྱི་ཆོ་ག །བཅོམ་ལྡན་འདས་ཁྲོ་བོའི་རྒྱལ་པོ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །རང་ཉིད་ལྷ་ཡི་ང་རྒྱལ་གྱིས། །བྱམས་དང་སྙིང་རྗེ་བྱང་ཆུབ་སེམས། །ཡང་ནས་ཡང་དུ་བསྒོམ་བྱས་ནས། །མདུན་དུ་པཾ་ལས་པདྨ་ནི། །ཁ་དོག་དམར་པོ་འདབ་བརྒྱད་དེ། །ཕུཿ་བརྒྱད་ལས་ནི་ཀླུ་བརྒྱད་བསྐྱེད། །དེ་ནས་སྙིང་གའི་འོད་ཟེར་དང༌། །ཨོཾ་ཕཻཾ་ཕུཿ་ཞེས་པས་ཀླུ་ཆེན་བརྒྱད། །འཁོར་དང་བཅས་པ་བཀུག་ལ་བསྟིམ། །དཀར་གསུམ་མངར་གསུམ་བདུད་རྩིར་བཅས། །དམ་ཚིག་ཡེ་ཤེས་ཀླུ་རྣམས་མཆོད། །དེ་ནས་གཏོར་མ་བྱིན་བརླབ་སྟེ། །སྣོད་ནི་ཁཾ་ལས་རིན་པོ་ཆེ། །ཤིན་ཏུ་མཛེས་ཤིང་བལྟ་ན་སྡུག །ཡངས་ལ་རྒྱ་ནི་ཆེ་བར་བསྒོམ། །རིན་ཆེན་སྣོད་མཆོག་དེ་ནང་དུ། །དཀར་གསུམ་མངར་གསུམ་བདུད་རྩིར་བཅས། །སྣོད་ནི་ཤིན་ཏུ་གང་བར་བསམ། །དེ་ཡི་སྟེང་དུ་ཡི་གེ་གསུམ། །ཁ་དོག་དྲི་དང་རོ་སྦྱངས་དང༌། །བདུད་རྩི་རོ་མཆོག་བརྒྱད་དང་ལྡན། །གཡས་པ་མཆོག་སྦྱིན་ཕྱག་རྒྱ་ལ། །ཧ་ཧོཿ་ཧྲཱིཿ་བཾ་དག་ལས་ནི། །དཔག་བསམ་ཤིང་ཆེན་བསམ་བྱས་ལ། །ལོ་མ་ཡལ་ག་ཐམས་ཅད་ལ། །རིན་ཆེན་བུམ་པ་བདུད་རྩིས་གང༌། །དཔག་ཏུ་མེད་པ་བསམས་ནས་ནི། །བྲུཾ་ལས་བདུད་རྩིའི་ཆར་བབས་པས། །གཏོར་མ་ཡོངས་སུ་གང་བར་བསམ། །ཨོཾ་ཨཱཿཧཱུཾ་ཞེས་ལན་གསུམ་བརྗོད། །མགྲོན་རྣམས་ཐམས་ཅད་ལྕེ་ལས་ནི། །ཧཱུཾ་ལས་རྡོ་རྗེ་སྦུ་གུས་རྔུབ། །ཨོཾ་བ་སུ་ཀི་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཏཀྵ་ཀ་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཀརྐོ་ཊ། ཨོཾ་ཧུ་ལུ་ཏ་ཀ །ཨོཾ་པདྨ། ཨོཾ་མ་ཧཱ་པདྨ། ཨོཾ་ཤཾ་ཁ་པཱ་ལ། ཨོཾ་ཀུ་ལི་ཀ་ཡ། ཨོཾ་ནཱ་ག་པ་ན་སཾ་ཁྲུ་ཧ་ར་ཧ་ར་ཨི་མཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨི་མཾ་བ་ལིཾ་ཙཾ་ལ་གདགས། །ཨོཾ་ཕཻཾ་ཀླུའི་རྒྱལ་པོ་སོག་མ་མེད། །ཨི་མཾ་བ་ལིཾ་ཁ་ཁ་ཁཱ་ཧི་ཁཱ་ཧི། ཨོཾ་མཐའ་ཡས་དང་ནི་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང༌། །དུང་སྐྱོང་དང་ནི་རིགས་ལྡན་དང༌། །ལྷ་མོ་ལྷ་མོ་ཆེན་མོ་དང༌། །ཟླ་བ་ཟླ་བ་སྤྱི་གཙུག་ཆེ། །སྙིང་པོ་མེད་དང་ཧུ་ལུནྟ། །དགའ་བོ་དང་ནི་ཉེར་དགའ་དང༌། །རྒྱ་མཚོ་དང་ནི་རྒྱ་མཚོ་ཆེ། །གདུང་བ་དང་ནི་གདུང་བ་ཆེ། །དཔལ་གྱི་འོད་དང་འོད་པོ་ཆེ། །
རིན་ཆེན་འོད་དང་གཟུགས་བཟང་དང༌། །གཟུགས་ཆེན་འོད་དང་སྤྲུལ་བཟང་ལྟོ་འཕྱེ་ཆེ། །སྨིག་རྒྱུ་དང་ནི་སྨིག་རྒྱུ་ཆེ། །ཀླུ་ཆེན་བརྒྱད་པོ་འཁོར་དང་བཅས། །འདིར་གཤེགས་མཆོད་སྦྱིན་གཏོར་མ་བཞེས། །མཛེས་པའི་དཀར་གསུམ་གཏོར་མ་འདི། །མངར་གསུམ་འོ་མའི་རྒྱ་མཚོར་བཅས། །རིན་ཆེན་ཕྲེང་བའི་ཐེམ་སྐས་ཅན། །ཀླུ་ཡི་གནོད་པ་སྐྱོབ་བྱེད་པ། །མཐུན་པའི་རྫས་སུ་འདི་གྱུར་ཅིག །མཆོད་སྦྱིན་གཏོར་མ་འདི་བཞེས་ལ། །བདག་ཅག་འཁོར་དང་བཅས་རྣམས་ལ། །ཀླུ་ལས་གྱུར་པའི་ནད་རྣམས་ནི། །མཐོང་བའི་དུག་དང་ཁ་རླངས་དུག །བསམ་པའི་དུག་ལ་སོགས་པ་ཀུན། །དེ་དག་ཐམས་ཅད་ཞི་གྱུར་ཅིག །བདག་པས་གཅེས་པའི་རྫས་ཁྱེར་ལ། །བདག་ལ་གནོད་པ་མ་བྱེད་པར། །རྟག་ཏུ་བྱམས་པའི་སེམས་དང་ནི། །ཕ་མ་ལྟ་བུའི་སེམས་ཀྱིས་ལྟོས། །གཞན་ཡང་ལས་ལས་སྐྱེས་པ་ཡི། །བཀའ་དང་དམ་ལས་ཐོགས་པ་ཡི། །གདུག་པ་ཅན་གྱི་ཚོགས་རྣམས་ཀུན་།བཀའ་ཡི་ཕམ་འབབ་འདི་སྣོམས་ལ། །སོ་སོ་རང་རེའི་གནས་སུ་དེངས། །ཉོན་ཅིག་ཉོན་ཅིག་རིགས་ཀྱི་བུ། །ཇི་ལྟར་ས་བོན་ཚ་བ་ལ། །མྱུ་གུ་ཚ་བ་འབྱུང་བ་ལྟར། །སོ་སོ་རང་རེའི་གནས་ལ་སྦྱོན། །འབྱུང་བཞི་སོ་སོར་གྱུར་ཡང་སྲིད། །བདེ་གཤེགས་བཀའ་ལས་འགྱུར་བ་མེད། །ལས་འབྲས་འགྱུར་ཞིང་སླུ་མི་སྲིད། །དེ་ལས་ཁྱོད་སྡིག་མི་བྱེད་པར། །དགེ་བའི་བསམ་པས་གནས་པར་གྱིས། །བདེན་པ་བདར་ལ་ཆོས་བཤད་བྱ། །དེ་རྗེས་ཡི་གེ་བརྒྱ་པ་བརྗོད། །ཡེ་ཤེས་ཀླུ་རྣམས་གཤེགས་སུ་གསོལ། །དམ་ཚིག་པ་ནི་མི་དམིགས་བསམ། །གཏོར་མ་རྒྱ་མཚོ་ཆེན་པོའམ། །ཡང་ན་གནོད་པའི་ཕྱོགས་སུ་གཏོང༌། །རྡོ་རྗེ་གོས་སྔོན་གྱི་ཀླུ་གཏོར་ཆོ་ག་སློབ་དཔོན་འགྲོ་བཟང་ས་སྙིང་པོས་མཛད་པ་རྫོགས་སོ།།