རྡོ་རྗེ་འཛིན་པའི་གཏོར་མའི་ཆོ་ག།
བ་སུ་དྷ་བཛྲ།
རྒྱ་གར་སྐད་དུ། །བཛྲ་དྷ་ར་བ་ལིཾ་བི་དྷི་ནཱ་མ། བོད་སྐད་དུ། རྡོ་རྗེ་འཛིན་པའི་གཏོར་མའི་ཆོ་ག་ཆེས་བྱ་བ། བླ་མ་རྗེ་བཙུན་པ་རྣམས་ལ་ཕྱག་འཚལ་ལོ། །ལས་རྣམས་ཀུན་གྱི་སྔོན་འགྲོ་བ། །བཤད་ཕྱིར་བླ་མ་ལ་བཏུད་དེ། །ཐམས་ཅད་ཚིམ་པར་བྱེད་པ་ཡི། །གཏོར་མའི་ཆོ་ག་དེ་བཤད་བྱ། །དེ་ལ་དང་པོར་རྡོ་རྗེ་འཛིན། སྒྲུབ་པར་འདོད་པའི་རྣལ་འབྱོར་བ་དག་གིས། རིན་པོ་ཆེ་ལས་སྣོད་རྒྱ་ཆེ་བ་བཟང་ལ་མཉམ་པ་དེ་དག་གི་ནང་དུ། འབྲས་ཆན་ལ་སོགས་པ་ཆན་གྱི་ཚོགས་དང༌། ཁུར་བ་ལ་སོགས་པ་བཟའ་བའི་ཚོགས་དང༌། ཉ་ཤ་ལ་སོགས་པ་
ཤའི་ཚོགས་དང༌། འོ་མ་ལ་སོགས་པ་བཏུང་བའི་ཚོགས་དང༌། བུ་རམ་ལ་སོགས་ཏེ་མྱང་བའི་ཚོགས་དང༌། བིལ་བ་ལ་སོགས་ཏེ་ཤིང་ཐོག་གི་ཚོགས་དང༌། ཏིལ་ལ་སོགས་ཏེ་འབྲུའི་ཚོགས་དང༌། ཨུཏྤལ་ལ་སོགས་ཏེ་མེ་ཏོག་གི་ཚོགས་དང༌། ཨ་ག་རུ་ལ་སོགས་ཏེ་བདུག་པའི་ཚོགས་དང༌། རིན་པོ་ཆེ་ལ་སོགས་ཏེ་སྣང་བའི་ཚོགས་དང་དུ་རུ་ཀ་དང་དྲི་ཞིམ་སྦྱར་བ་ལ་སོགས་ཏེ་དྲིའི་ཚོགས་དང༌། ག་བུར་ལ་སོགས་ཏེ་སྨན་གྱི་ཚོགས་དང༌། རོལ་མོ་དང༌། གདུགས་དང༌། རྒྱལ་མཚན་དང༌། བ་དན་དང༌། རས་བཟང་པོ་ལ་སོགས་པ་ཅི་འབྱོར་བའི་ཡོ་བྱད་བཤམས་ཏེ། མཎྜལ་སྔོན་པོ་དག་གི་སྟེང་དུ་མེ་ཏོག་ཆ་ལ་པར་བཀྲམ་ལ་དེའི་སྟེང་དུ་གཞག་པར་བྱའོ། །དེ་ནས་རྣལ་འབྱོར་པ་བདག་ཉིད་མངོན་པར་རྟོགས་པའི་ཆོ་ག་ལྟར་བསྐྱེད་ལ། ལག་པ་གཡོན་པའི་མཐིལ་དུ་དྲི་སྦྱར་བའི་ཆུ་བླུགས་ལ། ཨོཾ་སརྦ་བི་གྷྣཱ་ན་ནཱ་ཤ་ཡ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཞེས་ལན་ཉི་ཤུ་རྩ་གཅིག་ཏུ་བརྗོད་དོ། ཨོཾ་ཨཱཿ་མི་གྷྣཱ་ནྟ་ཀྲྀ་ཏ་ཧཱུཾ་ཕཊ་ཅེས་བས་གཏོར་མ་ལན་གསུམ་དུ་བྱའོ། །དེ་ནས་ཡི་གེ་ཏྲཱཾ་སེར་པོ་ལས་བསྐྱེད་པའི་སྣོད་ཀྱི་དཀྱིལ་འཁོར་གྱི་ནང་དུ། རྫས་ཀྱི་དངོས་པོ་དཔག་ཏུ་མེད་པ་བསམས་ཏེ། དེའི་སྟེང་དུ་ཟླ་བའི་ཧཱུཾ་གིས་མཚན་པ་དག་གི་འོད་ཀྱིས་བསྲེགས་ཤིང་སྦྱངས་པའི་བདུད་རྩིའི་དངོས་པོར་གྱུར་པར་བསམ་མོ། །དེ་ནས་ཐུགས་ཀའི་ས་བོན་གྱི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྨིན་མཚན་གྱི་མཛོས་སྤུ་ནས། བདུད་རྩི་འོ་མའི་རྒྱུན་ལྟ་བུ་འབབ་པས་སྣོད་གང་བར་བསམས་ལ། ཨོཾ་བཛྲ་པཱ་ནི་རཏྣ་དྷ་རཱ་ཡ། ཨོཾ་ཨཱཿ་ཞེས་ལན་བདུན་བརྗོད་པས་བྱིན་གྱིས་བརླབ་པར་བྱའོ། །དེ་ནས་སྙིང་གའི་ས་བོན་གྱི་འོད་ཀྱིས་བཅོམ་ལྡན་འདས་རྡོ་རྗེ་འཛིན་པ་སྤྱན་དྲངས་ལ་བརྫ་ཛི་ཧྭ་ཞེས་ལྕེ་བྱིན་གྱིས་བརླབས་ལ་སྔགས་འདི་ལན་བདུན་བརྗོད་ལ་དབུལ་བར་བྱའོ། །ཨོཾ་བཛྲ་པཱ་ནི་དྷ་རཱ་ཡ། ཀཱ་ཡ་བཱ་ཀ་ཙི་ཏྟ་དྷཱུ་པ། པུ་ཥྤེ། དཱི་པ། གནྡྷེ་བ་ལིཾ། ཨ་རྒྷ་ཏ་བ་ལིཾ་མ་ད་མཱཾ་ས་ཨི་དཾ་གྲྀ་ཁཱ་ཧི་ཁཱ་ཧི་བྷུ་ཉྫ་ཧོ། པོ་པ་ཧོ། ཨ་ཏི་ཀྲ་མ་ཡེ་སྭཱ་ཧཱ། དེ་ནས་ཐུགས་ཀའི་ས་བོན་གྱི་འོད་ཀྱིས་ཁམས་གསུམ་གྱི་འབྱུང་པོའི་ཚོགས་མ་ལུས་པ་བཀུག་སྟེ། ཨོཾ་བཛྲ་ཧཱུཾ་ག་ར་ཀ་ཊ་ཀ་ཊ་ཕཊ། ཅེས་བྱ་བས་སྦྱར་རོ། །དེ་ཐམས་ཅད་རྡོ་རྗེ་འཛིན་གྱི་ངོ་བོར་གྱུར་པར་བསམས་ཏེ། ཡི་གེ་གསུམ་བཀོད་ལ་ལྕེ་
བྱིན་གྱིས་བརླབ་པར་བྱའོ། །དེ་ནས་ཨོཾ་ཨ་ཀཱ་རོ་མུ་ཁི་སརྦ་དྷ་རྨཱ་ནཱཾ་ཨཱ་དྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་ལན་གསུམ་བརྗོད་དོ། །དེ་ནས་འབྱུང་པོའི་ཚོགས་དེ་དག་མཉེས་པར་གྱུར་ནས། རྒྱལ་བར་གྱུར་ཅིག་ཅེས་བརྗོད་པར་བསམ་མོ། །དེ་ནས་ལག་ཏུ་མེ་ཏོག་ཐོགས་ཏེ། འདོད་པའི་དོན་ལ་གསོལ་བ་བཏབ་ལ། བཟོད་པ་གསོལ་བ་ནི། ཧཱུཾ་ལྷག་པ་དང་ནི་ཆད་པས་ཀྱང༌། །བདག་གིས་བརྗེད་ངས་གང་བགྱིས་པ། །མགོན་པོ་ཁྱོད་ཀྱིས་བཟོད་མཛད་ནས། །ཐུན་མོང་མཆོག་གི་དངོས་གྲུབ་སྩོལ། །ཞེས་བརྗོད་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོར་པར་མཛད་དུ་གསོལ། །ཨོཾ་ཨཱཿཧཱུཾ་མུཿ་ཞེས་པས་གཤེགས་སུ་གསོལ། །དེ་ནས་ཕྱག་རྒྱ་བཀྲོལ་ཏེ། གཏོར་མ་གཙང་མའི་ས་ཕྱོགས་སུ་བསྐྱལ་ལ། ཅི་བདེར་གནས་པར་བྱའོ། །རྡོ་རྗེ་འཛིན་པ་མཆོད་པའི་ཕྱིར།། མཆོད་སྦྱིན་འདི་བརྩམས་བསོད་ནམས་ཀྱིས། །འགྲོ་བ་ཐམས་ཅད་རྒྱས་གྱུར་ཏེ། །རྡོ་རྗེ་འཛིན་པའི་ས་ཐོབ་ཤོག །རྡོ་རྗེའི་འཛིན་པའི་གཏོར་མའི་ཆོ་ག་རྫོགས་སོ།། །།སློབ་དཔོན་བ་སུ་དྷ་བཛྲས་མཛད་པའོ།།