རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་སྒྲུབ་ཐབས།
མ་ཎི་བཛྲ།
― DTG073_Page_0625 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎཱི་སཱ་དྷཱ་ནཾ། བོད་སྐད་དུ། །རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་སྒྲུབ་ཐབས། །རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རང་གི་རང་བཞིན་ཞི་བ་ལས། །གདུག་པ་འདུལ་ཕྱིར་ཁྲོ་བོའི་སྐུ། །མ་རུངས་ཚར་གཅོད་རྡོ་རྗེ་ཅན། །རྡོ་རྗེ་ཆེ་ལ་མགོས་ཕྱག་འཚལ། །ཇི་ལྟར་བླ་མའི་ཞལ་སྔ་ནས། །ལེགས་རྟོགས་གང་དེ་བྲི་བར་བྱ། །རྡོ་རྗེ་རྣམ་པར་འཇོམས་པ་སྒྲུབ་པར་འདོད་པས་དབེན་ཞིང་ཡིད་དང་མཐུན་པའི་ས་ཕྱོགས་སུ་ཀུན་དུ་སྤྱོད་པའི་གཙང་ཞིང་གཙང་བ་དང་ལྡན་པ་སྟན་བདེ་བར་འདུག་སྟེ། སེམས་ཅན་ཐམས་ཅད་སྲིད་པའི་སྡུག་བསྔལ་ལས་བསྒྲལ་ལ་རྫོགས་པའི་བྱང་ཆུབ་ཀྱི་བདེ་བ་ལ་འགོད་པའི་བློ་སྔོན་དུ་བཏང་སྟེ་རང་གི་སྙིང་གར་བཾ་ལས་པདྨ་དང༌། དེར་ཨ་ལས་བསིལ་བའི་འོད་ཟེར་གྱི་དཀྱིལ་འཁོར་ལ་གནས་པ། ཧཱུཾ་ཡིག་མཐིང་ཤུན་གྱི་མདོག་ལྟ་བུ་བསམ་པར་བྱའོ། །དེ་ལས་རྣམ་
― DTG073_Page_0626 ―
[མ་དཔེ་གཟིགས་ན་འདིར་གནོན།]
པར་འཕྲོས་པའི་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་དང༌། རྡོ་རྗེ་ཁྲོ་བོའི་དཀྱིལ་འཁོར་མདུན་དུ་དམིགས་ལ། ཡིད་ལས་བྱུང་བའི་མཆོད་པ་རྣམས་ཀྱིས་ཡང་དག་པར་མཆོད་དེ། ཕྱག་འཚལ་བ་ལ་སོགས་པ་བྱའོ། །སངས་རྒྱས་ཀུན་གྱི་སྐུ་གསུང་ཐུགས། །གདུག་པ་ཚར་གཅོད་ཁྲོ་བོའི་སྐུ། །རྡོ་རྗེ་ཆེན་པོ་འཇིགས་ཆེན་པོ། །རྡོ་རྗེ་འཇོམས་ལ་ཕྱག་འཚལ་ལོ། །ཐོག་མེད་འཁོར་བར་ལོག་པ་ཡི། །རྣམ་རྟོག་དབང་གྱུར་སྒོ་གསུམ་གྱིས། །སྡིག་པ་བགྱིད་ལ་བདག་འགྱོད་ཅིང༌། །མགོན་པོའི་སྤྱན་སྔར་རབ་ཏུ་བཤགས། །ཉན་ཐོས་སངས་རྒྱས་རང་སངས་རྒྱས། །སོ་སོའི་སྐྱེ་བོ་བྱང་ཆུབ་སེམས། །ཀུན་གྱི་དགེ་ལ་དགའ་བ་ཡིས། །བདག་ནི་རྗེས་སུ་ཡི་རང་བགྱིད། །སེམས་ཅན་ཁམས་ནི་མ་ལུས་རྣམས། །སངས་རྒྱས་བདེ་ལ་དགོད་པའི་ཕྱིར། །བདག་ནི་དགེ་ཀུན་ལྟོས་མེད་པར། །བྱང་ཆུབ་ཆེན་པོར་བསྔོ་བར་བགྱི། །འགྲོ་བའི་སྐྱབས་ཆེན་གཅིག་པུ་བ། །སངས་རྒྱས་ཐེག་པ་མཆོག་གི་མཆོག །ཚོགས་མཆོག་ཕྱིར་མི་ལྡོག་པ་ལ། །བདག་ནི་སྐྱབས་སུ་ཉེ་བར་མཆི། །སྲིད་པའི་རྒྱ་མཚོ་སྡུག་བསྔལ་གྱི། །ཉམ་ཐག་མགོན་མེད་གྱུར་པ་རྣམས། །བླ་མེད་བདེ་ལ་གཞག་པའི་ཕྱིར། །སེམས་མཆོག་ཡང་དག་བསྐྱེད་པར་བགྱི། །ལམ་གང་གིས་ནི་དེར་འགྲོ་བ།། སྔགས་ཀྱི་ཐེག་པའི་ལམ་འདི་ལ། །དེང་ནས་བྱང་ཆུབ་སྙིང་པོའི་བར། །བདག་ནི་ཚུལ་བཞིན་གནས་པར་བགྱི། །ཞེས་བརྗོད་ལ་དེ་ནས་བྱམས་པ་དང༌། སྙིང་རྗེ་དང༌། རབ་ཏུ་དགའ་བ་དང༌། ཀུན་ལ་བཏང་སྙོམས་བསྒོམ་པར་བྱའོ། །དེའི་རྗེས་ལ་བརྟན་པ་དང་གཡོ་བར་སྣང་བའི་ཆོས་ཐམས་ཅད་རང་བཞིན་གྱིས་རྣམ་པར་དབེན་པའི་དོན་ཅན་དུ་རིག་པར་བྱ་སྟེ། ཨོཾ་སྭ་བྷཱ་བ་ཤུདྡྷཿ་སརྦ་དྡྷརྨཿསྭ་བྷཱ་བ་ཤུདྡྷོ་ཉ྄ཧཾ་ཞེས་པའི་སྔགས་ཀྱིས་བྱིན་གྱིས་བརླབ་པོ། །སྟོང་པར་གནས་པའི་པཾ་ཡིག་དང༌། །རཾ་ལས་པདྨ་ཉི་མ་ལ། །ཧཱུཾ་བྱུང་བ་ལས་རྒྱ་གྲམ་གྱི། །རྡོ་རྗེ་ཆེན་པོ་རྣམ་པར་བསྒོམ། །དེར་གནས་ཧཱུཾ་ལས་འོད་འཕྲོས་པས། །རབ་ས་གཞི་གུར་ཡང་བསྒོམ། །དེ་ནས་བྷཱུཾ་ལས་གཞལ་ཡས་ཁང༌། །ཀུན་ནས་གྲུ་བཞི་སྒོ་བཞི་པ། །རྩིབས་བརྒྱད་འཁོར་ལོའི་ལྟེ་བ་ལ། །རྒྱ་གྲམ་རྡོ་རྗེ་དང་བཅས་བསྒོམ། །དེར་ཡང་ཟླ་བ་ཉི་མ་དང༌། །ཧཱུཾ་བྱུང་རྡོ་རྗེ་ཆེ་ལས་འོད། །སྤྲོས་ཤིང་བསྡུས་ལས་ཁྲོ་བོ་ཆེ།།
― DTG073_Page_0627 ―
[མ་དཔེ་གཟིགས་ན་འདིར་གནོན།]
ཁྲོ་བོའི་འཁོར་ལོ་རྫོགས་པར་བསྐྱེད། དབུས་གནས་རྡོ་རྗེའི་ལྟེ་དབུས་སུ། །ཁྲོ་བོ་རྡོ་རྗེ་འཇོམས་ཆེན་པོ། །ཆར་སྤྲིན་སྔོན་པོའི་མདོག་འདྲ་བ། །རྡོ་རྗེ་དྲིལ་བུ་འགྱིང་བཅས་འཛིན། །ཤར་ཕྱོགས་རྡོ་རྗེའི་རྭ་དབུས་སུ། །རྡོ་རྗེ་ཁྲོ་བོ་ཕུར་བུ་ཆེ། །ཨུཏྤལ་སྔོན་པོའི་མདོག་མཚུངས་པ། །ཕྱག་གཡས་རྡོ་རྗེ་ཕུར་བུ་འཛིན། །ལྷོ་ཡི་ཕྱོགས་སུ་ཁྲོ་བོ་ཆེ། །རྡོ་རྗེ་བེ་ཅོན་སྟང་ཟིལ་མདོག །གཡས་ན་རྡོ་རྗེ་བེ་ཅོན་ཏེ། །རྡོ་རྗེའི་རྭ་དབུས་ལ་གནས་པའོ། །ནུབ་གནས་རྡོ་རྗེའི་རྭ་དབུས་སུ། །རྡོ་རྗེ་ཐོ་བ་ཁྲོ་བོ་ཆེ། ནམ་མཁའི་མདོག་ཅན་ཕྱག་གཡས་ན། །རྡོ་རྗེ་ཐོབ་ཕྱར་བའོ། །བྱང་གནས་རྡོ་རྗེ་ཁྲོ་བོ་ཆེ། །གཏུམ་པོ་བུང་བའི་མདོག་ལྟ་བུ། །རྡོ་རྗེ་རྒྱ་གྲམ་ཕྱག་གཡས་འཛིན། རྡོ་རྗེའི་རྭ་དབུས་གནས་པར་བསྒོམ། །ཕྱི་རོལ་རྡོ་རྗེའི་རྩིབས་རྣམས་ལ། །གཞན་གྱིས་མི་ཐུབ་གཤིན་རྗེ་གཤེད། །རྟ་མགྲིན་རྡོ་རྗེ་བདུད་རྩི་འཁྱིལ། །ཨུཏྤལ་ཀུནད་ཛ་བ་དང༌། །མར་གད་མདོག་ཅན་གཡས་པ་ན། །ཐོད་པ་དབྱིག་པ་པདྨ་དང༌། རྒྱ་གྲམ་རྡོ་རྗེ་འཕྱར་བའི་འཛིན། །ཤར་ནས་གཡས་སྐོར་རིམ་པས་བསྒོམ། །འདོད་པའི་རྒྱལ་པོ་དབྱིག་པ་སྔོ། །མི་གཡོ་སྟོབས་ཆེན་སྐུ་མདོག་གནག །གཡས་རྣམས་རིམ་བཞིན་ལྕགས་ཀྱུ་དང༌། །དབྱིག་པ་རལ་གྲི་རྩེ་གསུམ་འཛིན། །བྱང་ཤར་ནས་ནི་ནུབ་བྱང་མཐར། །འདི་ཡང་གཡས་སྐོར་རིམ་པས་བསྒོམ། །མཁར་གནས་རྡོ་རྗེ་ཧཱུཾ་མཛད་དང༌། །ས་འོག་གནོད་མཛེས་རྡོ་རྗེ་ཆེ། །མདོག་ནག་གཡས་ན་རྡོ་རྗེ་འཛིན། །ཁྲོ་བོ་འདི་དག་ཐམས་ཅད་ཀྱང༌། །ཕྱག་གཡོན་སྡིགས་མཛུབ་ཞགས་པར་ལྡན། །ཀུན་ཀྱང་གཡོན་བརྐྱང་གོམ་པ་ཡིས། །ཉི་མའི་དཀྱིལ་འཁོར་ལ་གནས་པའོ། །ཤར་སྒོར་རྡོ་རྗེ་ལྕགས་ཀྱུ་དཀར། །ལྷོར་གནས་རྡོ་རྗེ་ཞགས་པ་སེར། །ནུབ་ཏུ་རྡོ་རྗེ་ལྕགས་སྒྲོག་དམར། །རྡོ་རྗེ་དྲིལ་ལྗང་བྱང་སྒོར་ཏེ། །ལྕགས་ཀྱུ་ཞགས་པ་ལྕགས་སྒྲོག་དང༌། །དྲིལ་བུ་འཛིན་ཅིང་གཡོན་བརྐྱང་པས། །ཉི་མའི་སྟེང་ན་གནས་པའོ། །ཐམས་ཅད་མཆེ་གཙིགས་སྤྱན་གསུམ་ཞལ། །དམར་སེར་དབུ་སྐྲ་གྱེན་བརྫེ་དང༌། །སྟག་གི་པགས་པས་སྨད་དཀྲིས་ཤིང༌། །སྦྲུལ་དང་རིན་ཆེན་རྒྱན་མཛེས་པ། །རང་སྙིང་ཟླ་བར་ས་བོན་དང༌། །གནས་གསུམ་རྡོ་རྗེ་གསུམ་བསྒོམས་ཏེ། །ས་བོན་འོད་ཀྱི་སྦྱོར་བ་ཡིས། །ཡེ་ཤེས་བཀུག་མཆོད་གཉིས་མེད་བྱ། །སྙིང་གར་སྔགས་ཀྱི་ཕྲེང་བཀོད་དེ། །འཁོར་
― DTG073_Page_0628 ―
[མ་དཔེ་གཟིགས་ན་འདིར་གནོན།]
ལོར་གནས་པ་ཐམས་ཅད་དང༌། །མགྲིན་གཅིག་སྐད་གསང་མཐོན་པ་ཡི། །སྔགས་མཆོག་ཡང་དག་བཟླས་པར་ཡ། །ན་མོ་རཏྣ་ཏྲ་ཡཱ་ཡ། །ན་མཿཙཎྜ་བཛྲ་པཱ་ཎ་ཡེ། །མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་ར་ཡ་དྷཱ་ར་ཡ་བཛྲ། དཱ་རུ་ཎ་ཎཱ་དཱ་རུ་ཎ་བཛྲ། ཙྪིནྡ་ཙྪིད་བཛྲ། བྷིནྡ་བྷིནྡ་བཛྲ་ཧཱུཾ་ཕཊ། ན་མཤྩ་ཎ་ཌ་བཛྲ་ཀྲོ་དྷཱ་ཡ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། འདི་ནི་རྡོ་རྗེ་ཁྲོ་བོ་རྣམས་ཀྱི་ཐུགས་བསྐུལ་ནས། །སྒྲུབ་ལ་བགེགས་མེད་བྱེད་ཅིང་དངོས་གྲུབ་སྟེར་བའོ། །ཇི་སྲིད་མི་སྐྱོའི་བར་དུ་མངོན་པར་བཟླས་པའི་མཐར། །ཡེ་ཤེས་འཁོར་ལོ་ཕྱུང་ནས་མདུན་གཞག་མཆོད་པ་དང༌། །ཡི་གེ་བརྒྱ་པའི་མཐར་ནི་རྡོ་རྗེའི་སྔགས་བརྗོད་དེ། །རང་གནས་གཤེགས་ལ་འཁོར་ལོ་སྙིང་གར་བསྡུ་བར་བྱ། །རྡོ་རྗེ་རྣམ་པར་འཇོམས་པའི་གཟུངས་ཀྱི་སྒྲུབ་ཐབས་བྲམ་ཟེ་མ་ཎི་བཛྲ་མཛད་པ་རྫོགས་སོ།། །།པཎྜི་ཏ་ཆེན་པོ་ཛྙཱ་ན་ཤྲཱི་དང༌། །ལོ་ཙཱ་བ་རབ་ཞི་བཤེས་གཉེན་གྱིས་བསྒྱུར་བའོ། །
| 
