རྟོག་པ་ལས་གསུངས་པའི་ཀུ་རུ་ཀུལླེའི་སྒྲུབ་ཐབས།
རྒྱ་གར་སྐད་དུ། ཀལྤོཀྟ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་ཀུ་རུ་ཀུལླེའི་སྒྲུབ་ཐབས། འཕགས་མ་ཀུ་རུ་ཀུལླེ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། བཅོམ་ལྡན་འདས་མའི་རས་བྲིས་ལ་སོགས་པ་བཀྲམ་སྟེ་ཕྱིའི་མཆོད་པས་མཆོད་ནས་རང་གི་སྙིང་གར་
དྲི་མ་མེད་མའི་ཟླ་བ་ཡོངས་སུ་གང་བའི་འོད་ལ་དབྱངས་ཡིག་དང་པོ་ལས་བྱུང་བའི་སེམས་ཀྱི་ཟླ་བ་རྣམ་པར་བསྒོམས་ནས། དེའི་ས་བོན་དགོད་པར་བྱ་སྟེ། དྲོ་བ་རྣམས་ཀྱི་བཞི་པ་ནི། །མེ་ཡི་ཡི་གེའི་སྟེང་དུ་གནས། །ཨཱི་ཡིག་དང་ནི་ཡང་དག་ལྡན། །ནམ་མཁའ་གཉིས་ཀྱིས་རྣམ་པར་བརྒྱན། །དེ་ཡི་སེམས་ཀྱི་འོད་ཟེར་གྱིས། །འགྲོ་བ་རྣམས་ནི་དྲི་མེད་བྱས། །ལྷན་ཅིག་ལ་སོགས་ཁམས་རྣམས་སྦྱངས། །ཀུ་རུ་ཀུལླེའི་རི་བོར་སོང༌། །ཡང་དག་བསྐུལ་བ་དེ་ཡིས་ནི། །སྒྲོལ་མ་འགུགས་ཤིང་མདུན་དུ་འཕྲོ། །དེ་ལ་ས་བོན་མཆོད་ཆེན་གྱི། །མཁས་པས་སྤྲིན་ཚོགས་སྤྲོ་བར་བྱ། །མེ་ཏོག་བདུག་པ་དེ་བཞིན་དུ། །མར་མེ་དྲི་དང་ཞལ་ཟས་ཚོགས། །སྒེག་མོ་ཕྲེང་མ་གླུ་མ་གར། །དེ་བཞིན་རོལ་མོ་སོགས་ཀྱིས་མཆོད། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །འདི་ཡི་སྔགས་ནི་རྣམ་གསུམ་བརྗོད། །དེ་ནས་བཟོད་པར་གསོལ་བར་བྱ། །དེ་ལ་ཚིགས་སུ་བཅད་པ་འདིས། །གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །ལུས་ཅན་ཀུན་གྱི་སྐྱབས་ཡིན་ཕྱིར། །ལྷ་མོ་ཁྱོད་ཀྱིས་བཟོད་པར་མཛོད། །བྱམས་པའི་སེམས་ལ་གནས་པ་ནི། །སླར་ཡང་དེ་ལ་ངེས་པར་བཅིང༌། །སྙིང་རྗེའི་སེམས་ནི་ཡང་དག་བསྐྱེད། །རབ་ཏུ་དགའ་བའི་སེམས་འབབ་བྱ། །ཕྱི་ནས་བཏང་སྙོམས་བྱ་བ་སྟེ། །ཀུན་ནས་སེམས་ཙམ་རྣམ་པར་བཞག །སེམས་ནི་སྟོང་པ་ཉིད་བྱ་སྟེ། །རང་གཞན་རྣམ་པར་སྤང་བར་བྱ། །སྟོང་ཉིད་མེ་ཡིས་བསྲེགས་བྱས་ནས། །ཕུང་ལྔ་སླར་ཡང་སྲིད་མི་འབྱུང༌། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཱཏྨ་ཀོ྅ཧཾ། སྐད་ཅིག་སྟོང་ཉིད་སྦྱར་བྱས་ནས། །སེམས་ཉིད་ཀྱི་ནི་ངལ་གསོ་བྱ། །སྔོན་གྱི་དམ་བཅས་དྲན་བྱས་ལ། །ས་བོན་ཙམ་ཞིག་སླར་ཡང་བསམ། །གཅིག་པུ་ཡོངས་སུ་མྱང་འདས་ན། །བདག་གིས་སེམས་ཅན་བསླུས་འགྱུར་ལ། །སྲིད་པའི་རྒྱ་མཚོ་གཏིང་མེད་ལས། །དེ་ལ་ཇི་ལྟར་བདག་གིས་གདོན། །ཞེས་པའི་འདོད་པས་སྙིང་རྗེར་བྱ། །སེམས་ཉིད་སྟོང་ཉིད་སྤང་བྱས་ལ། །ཀུན་གྱི་ཁམས་ཀྱི་རང་བཞིན་དུ། །སེམས་བསྐྱེད་པ་ཡི་སེམས་
ཀྱིས་ནི། །སངས་རྒྱས་བྱིན་རླབས་ནམ་མཁར་ནི། །ས་བོན་ཨུཏྦལ་དེ་གྱུར་ལས། །ཨུཏྤ་ལ་ནི་ཟླ་བའི་གཟུགས། །ཨ་ཡིག་དབྱངས་ལས་ཡང་དག་བྱུང༌། །ཟླ་བདེ་ལས་སྔར་ས་བོན། །དེ་ལས་འོད་ཟེར་བྱུང་གྱུར་པ། །དེ་ཡི་རྣམ་པར་སྦྱངས་གྱུར་པར། །འཇིག་རྟེན་ཁམས་རྣམས་མ་ལུས་བསམ། །ཀུན་ནས་སྦྱངས་པར་རྟོགས་དེ་ཡི། །འོད་ཀྱིས་སངས་རྒྱས་བྱེ་བ་རྣམས། །ཞུགས་གྱུར་དེ་ལས་ཨུཏྤ་ལ་བསམ། །དེ་ཡིས་སྒྲོལ་མར་གྱུར་བྱས་ཏེ། །སྐུ་མདོག་དམར་པོ་ཕྱག་བཞི་མ། །པདྨ་དམར་པོའི་གདན་ལ་བཞུགས། །སྐལ་བཟང་གོས་ཟུང་དམར་པོས་བརྒྱན། །རྣ་རྒྱན་དམར་པོ་དབུ་རྒྱན་བཅས། །ཕྱག་གཡས་མི་འཇིགས་པ་དང་ནི། །གཞན་ཡང་མདའ་ནི་བསྣམས་པའོ། །གཡོན་ན་གཞུ་དང་གཉིས་པ་ན། །ཨུཏྤལ་དམར་པོ་བསྣམས་པ་ནི། །ཀུ་རུ་ཀུལླེའི་ཕུག་སོན་པ། །ཨཱ་རོ་ལི་ཀའི་དབུ་རྒྱན་ཅན། །སྒྲ་གཅན་སྟེང་དུ་འདོད་ལྷ་ཡི། །ཆུང་མར་བཅས་པའི་གདན་ལ་བཞུགས། །སྒྱུ་རྩལ་ཀུན་དང་ལྡན་པ་ཡི། །དེ་ལ་རྡོ་རྗེའི་སྐྱིལ་ཀྲུང་བཅས། །ཡང་དག་རྒྱན་རྣམས་ཀུན་ལྡན་པའི། །བཅོམ་ལྡན་འདས་མ་བསྒོམ་པར་བྱ། །དམ་ཚིག་སེམས་དཔའ་རྫོགས་པ་ལ། །ཡེ་ཤེས་འཁོར་ལོ་སྤྱན་དྲང་བྱ། །སྐད་ཅིག་རྣམ་པས་ཡོངས་རྫོགས་པའི། །ཡེ་ཤེས་འཁོར་ལོ་མདུན་བཞུགས་ལ། །ཛཿཧཱུཾ་བཾ་ཧོཿཞེས་བྱ་འདིས། །དགུག་གཞུག་བཅིང་དང་མཉེས་པར་བྱ། །དམ་ཚིག་ཕྱག་རྒྱ་རབ་སྦྱོར་བས། །ཞལ་གྱི་ལམ་ནས་གཞུག་བྱ་སྟེ། །ལག་གཉིས་ཐལ་མོ་རབ་སྦྱར་ཏེ། །གང་ཚེ་ལེགས་སྦྱར་སྨད་བྱ་སྟེ། །འདི་དག་རྩེ་མོར་བྱ་བ་སྟེ། །དབུས་སུ་མིང་མེད་བྱ་བ་ལ། །འཁྲི་ཤིང་གུང་མོ་འཁྱུད་པའོ། །མཐེབ་ཆེན་གཉིས་པོ་འོག་ཏུ་སོན། །དམ་ཚིག་འདི་ནི་བཅིང་བྱས་ནས། །འདིས་ནི་འཁོར་ལོ་རབ་གཞུག་བྱ། །དེ་ནས་དབང་བསྐུར་ཞུ་བྱ་སྟེ། །སངས་རྒྱས་ཞེས་བྱའི་ཚིགས་བཅད་བརྗོད། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཆེར་གྱུར་དེ་རྣམས་ཀྱིས་སྦྱིན་བྱེད། །རྒྱལ་སྲིད་དབང་བསྐུར་མིང་ལས་ནི། །མེ་ཏོག་དབང་དང་རྡོ་རྗེས་གནང༌། །སྤྱན་མ་ལ་སོགས་ལྔ་རྣམས་ཀྱིས། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་
ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱེད། །སངས་རྒྱས་དབང་བསྐུར་སྒྲོལ་མ་ཡི། །ཆོས་ཀྱི་གཙུག་གི་ནོར་བུར་གྱུར། །འོད་ཟེར་དམར་པོ་རྣམས་ཀྱིས་ནི། །འགྲོ་བ་གསུམ་པོ་སྣང་བྱེད་ཅིང༌། །རིན་ཆེན་དབང་བསྐུར་ཐོབ་གྱུར་ནས། །དངོས་གྲུབ་ཐམས་ཅད་བསྒྲུབ་པར་བྱ། །དེ་རིང་སྔོན་གསུངས་ཆོ་ག་ཡིས། །ལོ་ཕྱེད་བརྟན་པར་ཞུགས་པ་ཡི། །བསྒོམ་པའི་རིམ་པ་སྔོན་འགྲོ་བས། །ཐུན་མཚམས་གསུམ་དུ་གཏོར་མ་དབུལ། །སྒྲོལ་མའི་སྙིང་པོ་འདི་ཡིས་ནི། །ཏིང་ངེ་འཛིན་གྱི་སྔགས་བཟླས་བྱ། །ཨོཾ་ཀུ་རུ་ཀུལློ། ཧྲཱིཿཧཱུཾ་སྭཱ་ཧཱ། དེ་ནས་སྔོན་བསྙེན་ཡི་གེ་འབུམ། །བཟླས་ནས་ལས་ནི་བརྩམ་པར་བྱ། །ཆ་ཤས་ཀྱིས་ནི་ཤེས་རབ་འཕེལ། །ཆ་ཤས་གཞན་གྱིས་དབང་དུ་བྱེད། །དེ་བཞིན་ཆ་ཤས་གསུམ་པ་ཡིས། །མི་ཡི་དུག་ནི་འགུགས་པར་བྱེད། །འཇིག་རྟེན་གྱིས་ནི་མཆོད་བྱེད་འགྱུར། །བུད་མེད་སྒེག་མ་མྱོས་པས་ཀྱང༌། །གོམས་སྦྱོར་ལྷ་ཡི་བུ་མོ་མཛེས། །ཇི་ལྟར་འདོད་བཞིན་སྔགས་འཛིན་སྤྱོད། །ཧྲཱིཿཡིག་མྱོས་བྱེད་འདབ་མ་ལ་བཀོད་བུད་མེད་རྣམས་ཀྱི་ལྕེ་འཛག་བྱེད། །དེ་ངག་ཉིད་ཀྱང་བློ་ཡིས་སྐྱེ་བོའི་སྙིང་གི་དབུས་སུ་འགའ་ཞིག་ཏུ། །མཆེ་རྣམས་ཀྱི་སྔོན་བསྒོམས་དུག་འཇོམས་ཆོས་ཀྱི་ཡི་གེ་རང་ཉིད་འབབ། །སྒྲོལ་མའི་སྙིང་པོ་འཇིག་རྟེན་གསུམ་ལས་རྣམ་རྒྱལ་ཤེས་བྱ་བརྩེ་བའི་གནས། །རང་ཉིད་སྒྲོལ་མ་ལས་སྐྱེས་པའི། །ཀུ་རུ་ཀུལླེར་བསྒོམ་པར་བྱ། །བསྒྲུབ་བྱ་དེ་ཡི་ཁ་ནང་སོན། །འདོད་པས་མྱོས་པར་བསམ་པར་བྱ། །ཡེ་ཤེས་སེམས་དཔའི་ཆུ་སྐྱེས་ལས། །སྤྱི་བོར་བདུད་རྩིའི་རྒྱུན་འབབ་བསམ། །བརྟུལ་ཞུགས་ཅན་གྱིས་ཐུན་གསུམ་བསྒོམས། །ཉི་མ་བདུན་གྱིས་ལྟུང་བར་འགྱུར། །རིམ་པ་གོམས་པས་དངོས་གྲུབ་ཕྲན། །མཁས་པ་ཡིས་ནི་བསྒྲུབ་པར་བྱ། །འདིར་ནི་དཔལ་དང་བཅས་གྱུར་པའི། །དངོས་གྲུབ་ཆེན་པོ་ཉིད་ཀྱང་འགྲུབ། །རྟོག་པ་ལས་གསུངས་པའི་ཀུ་རུ་ཀུལླེའི་སྒྲུབ་ཐབས་རྫོགས་སོ།།