འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ངན་སྔགས་བྱད་ཀྱི་འཁོར་ལོས་བསད་པ།
འཇམ་དཔལ་བཤེས་གཉེན།
― DTG065_Page_0074 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱཪྻ་མཉྫ་ཤྲཱི་ནཱ་མ་སཾ་གཱི་ཏི་ཙཀྲ་མ་ར་མཱ་ར་ཡ་མནྟྲ། བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ངན་སྔགས་བྱད་ཀྱི་འཁོར་ལོས་གསད་པ། འཇམ་དཔལ་གཤིན་རྗེའི་གཤེད་ལ་ཕྱག་འཚལ་ལོ། །རྡོ་རྗེ་འཇིགས་བྱེད་འཇིགས་པར་བྱེད། །ཁྲོ་བོའི་རྒྱལ་པོ་གདོང་དྲུག་པོ། །བཅོ་བརྒྱད་སྤྱན་དམར་གཉིས་ཀྱིས་མཛེས། །གཤིན་རྗེ་གཤེད་ལ་ཕྱག་འཚལ་ཏེ། །འཇམ་དཔལ་མགོན་གྱིས་མི་འདུལ་ཚེ། །ངན་སྔགས་བྱད་ཀྱི་འཁོར་ལོ་བརྩམ། །དེ་ལ་དུར་
― DTG065_Page_0075 ―
[མ་དཔེ་གཟིགས་ན་འདིར་གནོན།]
ཁྲོད་ཆེན་པོ་རབ་འཇིགས་པར། །མ་རུངས་འདུལ་བའི་བློན་མཆོག་གིས། །དཔལ་ལྡན་འབྱོར་བ་དྲུག་རྫས་བསོག །སྲིད་པའི་རི་བོ་ཕམ་བྱས་ཏེ། །སེམས་ཅན་ངན་སོང་རྣམ་པར་སྦྱངས། །དོན་ཡོད་འགྲོ་བའི་དོན་བྱས་ཏེ། །གཙོ་བོ་དཀོན་མཆོག་ལྷུར་བླང་ཞིང༌། །བླ་མ་ཕྱག་བྱར་འོས་པ་ལ། །ཚོགས་གཉིས་ཚོགས་ནི་འབད་དེ་བསགས། །སྲིད་པའི་འདོད་ཆགས་རྣམ་སྤངས་ཏེ། །སྟོང་པ་ཉིད་དགའ་སྟོང་བའི་བློས། །ཡང་དག་བདག་མེད་དེ་བཞིན་ཉིད། །ཡང་དག་མཐའ་སྟེ་ཡི་གེ་བྲལ། །ཤེས་རབ་ཆེན་པོའི་སྐད་ཅིག་གིས། །ཆོས་ཀུན་ངོ་བོ་ཉིད་མེད་བྱ། །འོན་ཀྱང་སྣང་བ་མ་བཀག་པས། །ཆོས་ཀུན་ནམ་མཁའི་མཚན་ཉིད་ལ། །ཡེ་ཤེས་སྐར་མ་ལམ་མེ་པ། །རང་སེམས་ཉམས་སུ་མྱོང་བ་དེ། །དགག་ཏུ་བཏུབ་པ་མ་ཡིན་པས། །རང་རིག་སེམས་ཀྱི་ཆོ་འཕྲུལ་དུ། །ཡི་གེའི་ཕྲེང་བས་ཉེ་བར་མཇོས་། །འོད་ཀྱི་ཕུང་པོའི་འཕྲོ་འདུ་ཡིས། །འབྱུང་བ་ཆེན་པོ་རྒྱུ་གཅིག་པོ། །རིམ་པ་བཞི་ཡིས་དཀྱིལ་འཁོར་བརྩེགས། །འབྱུང་བ་འདུས་པའི་འབྲས་བུ་ལ། །མཐུན་འཇུག་སྤྱོད་ཡུལ་བྱ་བའི་ཕྱིར། །རི་རབ་གཞལ་ཡས་ཁང་ཡང་བརྩེགས། །འཁོར་ལོ་རྩིབས་དྲུག་འབར་བ་སྟེ། །དབུས་སུ་གླང་ཆེན་བསྣོལ་བའི་ཁྲི། །ཉི་ཟླ་བ་པདྨ་མདངས་བསྐྱེད་དེ། །རང་རིག་སེམས་ཀྱི་ཆོ་འཕྲུལ་འདུས། །སྒྱུ་འཕྲུལ་དྲ་བས་མངོན་བྱང་ཆུབ། །ཡེ་ཤེས་ལྔ་རྫོགས་བཅོམ་ལྡན་འདས། །སངས་རྒྱས་ཀུན་གྱི་སྐུ་ཡི་མཆོག །དང་པོའི་སངས་རྒྱས་ཞལ་མངའ་བ། །རྒྱན་རྣམས་ཀུན་གྱིས་སྦྲས་པ་ནི། །དུང་དང་ཀུན་དེའི་འོད་འཕྲོ་བ། །ཉི་མའི་སྙིང་པོ་འམ་གསེར་གྱི་མདོག །ཕྱག་བཞི་བ་ལ་ཞི་བའི་སྐུ། །ཤེས་རབ་རལ་གྲི་མདའ་གཞུ་བསམས། །དེ་ཡི་ཐུགས་ཀར་འཁོར་ལོ་དང༌། །འཇམ་དཔལ་ཡེ་ཤེས་སེམས་དཔའ་བསྒོམ། །ཟླ་བ་ཨ་ཡི་འཕྲོ་འདུ་ཡིས། །འོག་མིན་གནས་མཆོག་དམ་པ་ནས། །རྣམ་སྣང་ཆེན་པོ་ལ་སོགས་པའི། །དཀྱིལ་འཁོར་ཆེན་པོ་དྲུག་བྱོན་ཏེ། །ཐུགས་ཀའི་ཟླ་སྟེང་བཞུགས་པ་ལ། །བཀུར་སྟི་རིམ་གྲོས་མཉེས་པར་བྱ། །ཤེས་རབ་འཁོར་ལོ་ལ་བློ་གཏད། །ཡེ་ཤེས་ཕྲེང་སྔགས་བཟླས་པ་བརྩམ། །ཡེ་ཤེས་ལྔ་ཡི་སྒོ་ནས་བསྟོད། །གལ་ཏེ་ཞི་བས་མ་འདུལ་ཞིང༌། །དེ་རྣམས་གཞི་དང་བཅས་པ་ཀུན། །ཆོས་ཀྱི་
― DTG065_Page_0076 ―
[མ་དཔེ་གཟིགས་ན་འདིར་གནོན།]
དབྱིངས་སུ་ཐིམ་འགྱུར་ཏེ། །དང་པོའི་སངས་རྒྱས་རྒྱུ་མེད་པའི། །ཡེ་ཤེས་མིག་གཅིག་དྲི་མ་མེད། །ཆོས་ཀྱི་དབྱིངས་ལས་དྲག་པོར་བཞེངས། །ཡེ་གེ་དྲུག་པོ་ཡེ་ཤེས་སྒྲས། །འཇམ་དབྱངས་ཆེན་པོ་སྒྲ་ཆེ་བ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོག །ནམ་མཁའི་མཐའ་ཡས་སྒྲ་སྒྲོགས་པས། །ཧཱུཾ་ལས་དྲག་པོར་སྐྱེས་པ་ནི། །གཤིན་རྗེ་གཤེད་པོ་བགེགས་ཀྱི་རྒྱལ། །ཁྲོ་བོའི་རྒྱལ་པོ་གདོང་དྲུག་འཇིགས། །སྤྱན་དམར་བཅོ་བརྒྱད་ཕྱག་བཅུ་གཉིས། །རྡོ་རྗེ་འཁོར་ལོ་རྡོ་རྗེ་དང༌། །པདྨ་རིན་ཆེན་རྒྱ་གྲམ་བསྣམས། །གཡས་པའི་ཕྱག་ན་ལེགས་པར་བསྣམས། །མཚོན་དུ་རྡོ་རྗེའི་མདའ་ཐོགས་པ། །གཡོན་པའི་ཕྱག་རྒྱ་དང་པོ་ནི། །རྡོ་རྗེ་རལ་གྲི་མ་ལུས་གཅོད། །གཡོན་པའི་ཕྱག་རྒྱ་ཕ་རོལ་བསྡིགས། །ལྷག་པའི་ཕྱག་རྒྱ་གཞན་རྣམས་ན། །ཤེས་རབ་རལ་གྲི་མདའ་གཞུ་ཐོགས། །ཧ་ལ་ཧ་ལ་དུག་ལྟར་བཞང་། །ཀེང་རུས་མཆེ་བ་གཙིགས་པ་པོ། །རལ་པ་གྱེན་བརྫེས་ཐོད་ཕྲེང་ལ། །སངས་རྒྱས་ལྔ་ཡི་ཅོད་པན་འཛིན། །སྤྲུལ་དང་ཐོད་རློན་ཕྲེང་བས་ཀླུབས། །དུས་མཐའི་མེ་ལྟར་འབར་བ་འཕྲོ། །འཇམ་དཔལ་གཤིན་རྗེ་གཤེད་པོ་ནི། །རྔམ་པ་ཆེན་པོར་བདག་ཉིད་གྱུར། །ཐུགས་ཀར་ཉི་མའི་སྟེང་ན་ཧཱུཾ། །དེ་ཡི་བྱིན་རླབས་ཡ་མཚན་ནི། །ཨོཾ་ཨ་ར་པ་ཙ་ན་ཡ་མཱནྟ་ཀ་ཧཱུཾ། ཨོཾ་པྲ་ཛྙཱ་ཛྙཱ་ན་མཱུ་རྟ་ཡེ་ཡ་མཱནྟ་ཀ་ཧཱུཾ། ཨོཾ་དུཿ་ཁ་ཙྪེ་ད་ཡ་མཱནྟ་ཀ་ཧཱུཾ། ཨོཾ་བཛྲ་ཏཱིཀྵྞ་ཡ་མཱནྟ་ཀ་ཧཱུཾ། ཨོཾ་ཝཱ་གཱི་ཤྭ་ར་ཡ་མཱནྟ་ཀ་ཧཱུཾ། ཨོཾ་ཛྙཱ་ན་ཀཱ་ཡ་ཡ་མཱནྟ་ཀ་ཧཱུཾ། ཨོཾ་ཧཱུཾ་ཧཱུཾ་སརྦ་ཏ་ཐཱ་ག་ཏ་ཧྲི་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ་བྷ་ག་བཱ་ན་ཛྙཱ་ན་མཱུརྟི། བཱ་གཱི་ཤྭ་རི་མ་ཧཱ་པཱ་ཙ་སརྦ་དྷརྨཱ་ག་ག་ན། ཨ་མ་ལ་སུ་བ་རི་ཤུདྡྷ་དྷརྨཱ་ཏུ་ཛྙཱ་ན་གརྦྷྲ་ཧཱུཾ། ཁྲོ་བོའི་རྒྱལ་པོ་ཧཱུཾ་ལས་བྱུང༌། །འཁོར་ལོ་འབར་བའི་རྩིབས་དྲུག་ལས། །རིམ་པ་འདི་ལྟར་ཁྲོས་པས་གནས། །མནར་མེད་གཤིན་རྗེ་གཤེད་པོ་ནི། །ཞལ་གཞིག་ཕྱག་གཉིས་རྡོ་རྗེ་འཛིན། །གཏི་མུག་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་འཁོར་ལོ་འཛིན། །ཞེ་སྡང་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་རྡོ་རྗེ་འཛིན། །འདོད་ཆགས་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་པདྨ་འཛིན། །ང་རྒྱལ་གཤིན་རྗེ་གཤེད་པོ་ནི། །ཞལ་གཅིག་ཕྱག་གཉིས་རིན་ཆེན་འཛིན། ཕྲག་དོག་གཤིན་རྗེ་གཤེད་པོ་ནི། །
― DTG065_Page_0077 ―
[མ་དཔེ་གཟིགས་ན་འདིར་གནོན།]
ཞལ་གཅིག་ཕྱག་གཉིས་འཁོར་ལོ་འཛིན། །གཡོན་པས་ཀུན་ཀྱང་འཁོར་ལོ་བསྐོར། །སྤྲུལ་དང་ཐོད་པའི་ཕྲེང་བས་བརྒྱན། །དུས་མཐའི་མེ་དཔུང་ནང་ན་བཞུགས། །བརྐྱང་བསྐུམ་ཞབས་ཀྱིས་གཤིན་རྗེ་བརྫིས། །རེ་རེའི་སྐུ་ལ་ཁྲོ་བོའི་ཚོགས། །ཁྲོ་གཉེར་རིམ་པར་ལྡན་ལ་སོགས། །གྲངས་མེད་མཐའ་ཡས་པ་ཡིས་བསྐོར། །ལག་ན་རྡོ་རྗེ་མཐའ་ཡས་པ། །དེ་ལྟར་གསལ་བའི་ཏིང་འཛིན་གྱིས། །ཡེ་ཤེས་ཁྲོ་བོ་ཉེ་བར་བསྡུ། །ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། ཧཱུཾ་བཛྲ་ཀྲོ་དྷ་ས་པ་རི་ཝཱ་རེ་བཛྲ་ས་མནྟ་ཨེ་ཧྱེ་ཧི་དྲྀ་ཤྱ་ཛཿ་ཧཱུཾ་བཾ་ཧོཿ་ཞེས་རིགས་བསྡུས་ཀྱི་དཀྱིལ་འཁོར་ཆེན་པོ་རྣམས། ཁྲོ་བོར་བྱོན་ནས་ཉེ་བར་བྱོན། །རྒྱལ་བ་མཆོད་པས་མཉེས་བྱས་ཏེ། །བདག་དང་གཉིས་སུ་མེད་པར་བཞུགས། །གསང་སྔགས་རྒྱལ་པོས་གཟི་མདངས་བསྐྱེད། །འཇམ་དཔལ་མཚན་ནི་ཁྲོས་པས་བརྗོད། །གསང་སྔགས་རྒྱལ་པོ་ཁྲོས་པས་བཟླས། །སངས་རྒྱས་ཀུན་གྱི་ཁྲོ་བོའི་སྐུ། །དབྱེ་བ་དཔག་མེད་སྐྱེ་བ་ཡིས། །ཁམས་གསུམ་ཁྲོ་བོས་བཀང་བྱས་ཏེ། །རྡོ་རྗེ་ཁྲོ་བོའི་དམག་ཚོགས་ཀྱིས། །བདུད་ཀྱི་དཔུང་རྣམས་ཕམ་བྱས་ཏེ། །གསད་ཅིང་མནན་པ་ཁོ་ནར་ཟད། །སྤྲུལ་པ་ཉེ་བར་བསྡུ་བྱ་སྟེ། །རྡོ་རྗེ་འཇིགས་བྱེད་སོགས་ཀྱིས་བསྟོད། །དེ་ལྟར་བརྟན་པ་སྟོབས་སུ་འགྱུར། །གལ་ཏེ་ཏིང་འཛིན་མི་གསལ་ན། །དམིགས་པ་རྩེ་གཅིག་ཆོ་ག་བྱ། །དུས་མཐའི་དགྲ་བོ་གསད་པ་ནི། །མ་རུངས་འདུལ་བའི་སེམས་ཀྱིས་སུ། །དུར་ཁྲོད་ཐོད་པ་མི་སྲུན་གཤགས། །ནང་དུ་གཤིན་རྗེའི་རྒྱལ་པོ་བྲི། །ཁ་གདངས་པར་ནི་ཤིན་ཏུ་གསལ། །འོག་མ་གཤིན་རྗེའི་ཁང་པར་བཅད། །ཡ་གནག་བཅུ་བདུན་མུན་པའི་སྨག །སྒོ་མེད་སྒོ་ང་ལྟ་བུའི་ནང༌། །ཡིད་ཀྱིས་གཟུགས་བརྙན་རྫུ་འཕྲུལ་ལྡན། །དགྲ་བོའི་རྣམ་ཤེས་རླུང་འདྲ་བ། །སྲོག་དང་འགྲོགས་ཏེ་ཆུད་གྱུར་ན། །སླར་རི་ཐོན་པའི་སྐལ་མེད་དོ། །གཤིན་རྗེས་ཟིན་པས་མི་འཆོར་རོ། །གང་དམིགས་བསྒྲུབ་བྱའི་སྙིང་གི་དཀྱིལ། །སྲོག་བ་རྩ་ཡི་རང་བཞིན་ལས། །ངན་སྔགས་བྱད་ཀྱི་འཁོར་ལོ་བཅའ། །རྩིབས་དྲུག་ལ་སོགས་གསང་སྔགས་བཅས། །ཀུན་ལ་འཆི་རྐྱེན་སྤེལ་ཏེ་བྲིའོ། །ཨོཾ་ཨ་ར་པ་ཙ་ཤ་ཏྲཱུཾ་ཆེ་གེ་མོ་མཱ་ར་ཡ། ཨོཾ་པྲ་ཛྙཱ་ཛྙཱ་ན་མཱུརྟྟ་ཡ། ཤ་ཏྲཱུཾ་མཱ་ར་ཡ། ཨོཾ་དུཿ་ཁཙྪེ་ད་ཤ་ཏྲཱུཾ་མཱ་ར་ཡ་
― DTG065_Page_0078 ―
[མ་དཔེ་གཟིགས་ན་འདིར་གནོན།]
ཨོཾ་བཛྲ་ཏཱི་ཀྵྞ་ཤ་ཏྲཱུཾ་མཱ་ར་ཡ། ཨོཾ་པའ་གཱི་ཤྭ་ར་ཤ་ཏྲུའུཾ་མཱ་ར་ཡ། ཨོཾ་ཛྙཱ་ན་ཀཱ་ཡ་ཤ་ཏྲཱུཾ་མཱ་ར་ཡ། ཨོཾ་ཧཱུཾ་ཧཱུཾ་ཧཱུཾ་སརྦ་ཏ་ཐཱ་ག་ཏ་ཧྲི་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ་བྷ་ག་ཝཱ་ན་ཛྙ་ན་མཱུརྟི་བཱ་གཱི་ཤྭ་ར་མ་ཧཱ་པཱ་ཙ་སརྦ་དྷརྨྨ་ག་ག་ན་ཨ་མ་ལ་སུ་པ་རི་ཤུདྡྷ། དྷརྨྨ་དྷཱ་ཏུ་ཛྙཱ་ན་གརྦྷ་ཧཱུཾ། ཤ་ཏྲཱུ་མཱ་ར་ཡ་ཧཱུཾ་ཕཊ་ཅེས། གསང་སྔགས་རྒྱལ་པོ་འདི་དྲན་པས། གང་དམིགས་གདུག་པ་ཉེ་བར་འཇིག །རང་རྒྱུད་གནས་ནས་གཤིན་རྗེ་བཀུག །ཐོད་པ་རང་བྱུང་དེ་ལ་བསྟིམ། །གདུག་པའི་གནས་ནས་དགྲ་བོ་དགུག །མཐུན་པའི་གཟུགས་བརྙན་དེ་ལ་བསྟིམ། །བདག་ཉིད་སྙིང་གའི་སྔགས་འོད་ཀྱིས། །དགྲ་བོའི་སྙིང་གའི་འཁོར་ལོ་བསྐོར། །ལྟེ་བ་འཁོར་ཞིང་རྩིབས་ཀྱིས་གཅོད། །གང་དམིགས་བསྒྲུབ་བྱའི་ཚེ་སྲོག་ཕྲལ། །ལུང་སྟོང་མེ་མར་མེ་ལྟར་འགྱུར། །གཟུགས་དེ་འཁོར་ལོས་དུམ་བུར་གཏུབ། །དྲག་པོའི་གཏོར་མར་བཅུག་བྱས་ཏེ། །ཐོད་ནང་གཤིན་རྗེ་དེ་ལ་སྦྱིན། །ཆོས་སྐྱོང་སྲུང་མར་བསྒོ་བྱ་སྟེ། །རང་གི་གནས་སུ་ཆི་བདེར་བཏང༌། །གཏོར་མ་དག་ཀྱང་ལྷོ་ཕྱོགས་བསྐྱལ། །དེ་ནས་རང་ཉིད་བརྟན་བྱས་ཏེ། །ཆོ་ག་མ་ལུས་རྫོགས་པར་བྱ། །སྤྱི་དང་ཁྱད་པར་རིམ་པ་ཡིས། །བསྡུས་རྒྱས་བྱེ་བྲག་ཤེས་པར་བྱ། །ཐ་མའི་རྒྱུད་དྲག་དང་ཐུང་ཆེ། །འགྲོ་བ་ལོག་ལྟ་འཁྲུལ་གྱུར་ནས། །སངས་རྒྱས་སྒྲུབ་ལ་བར་གཅོད་ཅིང༌། །བྱང་ཆུབ་ཚེ་སྲོག་འཕྲོག་བྱེད་ལ། །འཁོར་ལོ་འདི་ཡིས་གཅོད་གྱུར་ཅིག །དེ་ཡི་ནུས་པ་བསྐྱེད་ནས་ནི། །བདུད་དགྲ་ཐམས་ཅད་ཕམ་བྱས་ནས། །ཕས་ཀྱི་རྒོལ་བ་ཉེར་ཞི་སྟེ། །རྫོགས་པའི་བྱང་ཆུབ་ཐོབ་པར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་ངན་སྔགས་ཀྱི་བྱད་ཀྱི་འཁོར་ལོའི་སྒྲུབ་ཐབས། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང༌། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།
| 
