བྱིས་པ་གདོན་ལས་ཐ་བར་བྱེད་པའི་བསྒྲུབ་པ་གསང་བ་མེའི་འཁོར་ལོ་ཞེས་བྱ་བ།
ཡེ་ཤེས་རྡོ་རྗེ།
― DTG074_Page_0179 ―
[མ་དཔེ་གཟིགས་ན་འདིར་གནོན།]
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །བྱིས་པའི་གདོན་ལས་ཐར་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས་སྔོན་དུ་སྲིན་མོ་ནམ་གྲུའི་ཆོ་འབྲང་བཏོན་ཏེ་གཏོར་མ་སྦྱིན། འབྲས་ཀྱི་འོ་ཐུག་དང༌། ཀྲིས་ར་དང༌། འབྲས་ཆན་མོན་སྲན་གྲེའུ་སྦྱར་བ་དང༌། བུ་རམ་དང༌། འོ་མ་དང༌། ཉ་དང༌། ཤ་དང༌། ཏིལ་དང༌། ཆང་དང༌། འགྲོན་བུ་དང༌། དྲི་དང་མེ་ཏོག་སྣ་ཚོགས་པའི་གཏོར་མ་དུར་ཁྲོད་དུ་བྱིན་ན་བྱིས་པའི་གདོན་སྲུང་བ་དང་མི་ནད་ཆེན་པོ་རྣམས་ཞི་བར་འགྱུར་རོ། །འདི་དག་གིས་བཤོས་གཙང་མ་ལ་སོགས་པ་བཛྲ་པཱ་ཎི་འཁོར་དང་བཅས་པ་ལ་མཆོད་ཅིང་རྒྱུད་རྫོགས་པར་ཅི་རིགས་པར་བཀླག །དེ་ནས་སྲིན་མོ་ཆེན་མོ་ནམ་གྲུའི་དམ་ཚིག་གི་ཕྱག་རྒྱ་བཅས་ཏེ། ལག་པ་གཉིས་ཁུ་ཚུར་བཅངས་ཏེ་མཛུབ་མོ་གཉིས་ཚིགས་མར་བཀུག ། གུང་མོ་གཉིས་གཤིབས་ཏེ། བསྒྲེང་པའི་ཚིགས་དང་པོར་མཛུབ་མོ་གཟུགས་ཏེ། མཐེ་བོང་གཉིས་བསྒྲེང་བར་བྱས་ལ། ན་མོ་བཛྲ་པཱ་ཎི་བྱ་ཙི་ལི་ཙི་ལི་བྷིཎྚི་བྷིཎྚ། མུཉྩ་མུཉྩ། ཧི་བཱ་ལ་ཀན་སྭཱ་ཧཱ། བཛྲ་པཱ་ཎི་རཱཛྙཱི་པ་ཡ་ཏི་སྭཱ་ཧཱ། དེ་བས་མན་རཱཛྙཱ་པ་ཡ་ཏི་སྭཱ་ཧཱ། རི་ཤ་ཡ་ས་མ་རཱ་ཛྙཱ་པ་ཡ་ཏི་སྭཱ་ཧཱ་ཞེས་
― DTG074_Page_0180 ―
[མ་དཔེ་གཟིགས་ན་འདིར་གནོན།]
གསེར་དང༌། ལུང་ཏང་དང༌། ཛི་བ་ལིག་བུ་མིག་དང༌། གི་ཝང་དང༌། མར་དང༌། སྦྲང་རྩི་དང༌། ཤུ་དག་དང༌། ངན་དང༌། གྲོག་ལ་ཆོ་འབྲང་དང༌། རིག་སྔགས་བྲིས་པ་རས་སྔོན་པོའི་ནང་དུ་དྲིལ་བ་དང༌། སྐུད་པ་སྔོན་པོ་ལ་མདུད་བ་བོར་བ་རྣམས་ཀྱིས་བྱིས་པའི་མགུལ་དུ་བཏགས་ན་བྱིས་པ་ངེས་པར་གདོན་གྱི་དབང་དུ་མི་འགྱུར་བར་ངེས་སོ། །ནམ་གྲུའི་ཆོ་འབྲང་སྨོས་པས་བསྟོད་པ་ནི། ནོར་བུའི་རང་བཞིན་འོད་ཀྱི་ལུས། །རྒྱན་ནི་འཛམ་བུ་ཆུ་བོའི་གསེར། །ཁྱོད་ཀྱི་གདོང་ཡང་དངུལ་ཡིན་ཏེ། །ལྟེ་བའི་ངོས་ནི་རྡོ་རྗེ་མཁྲེགས། །མིང་པོ་མཛོད་དང་མཛོད་སྲུང་གཉིས། །ཁྱོད་ཀྱི་མིང་ནི་ཀུན་གྲོལ་མ། །ཁྱོད་ཀྱི་ཕ་ནི་རླུང་ཞེས་བྱ། །བཱ་གི་ར་ཐི་ཁྱོད་ཀྱི་རུས། །ལྷ་ཡུལ་དག་ཏུ་གྲགས་པ་ཡིན། །ཞེས་པ་སྟོད་ཅིང་གཏོར་མ་བྱིན་པས་ངེས་པར་བསྲུངས་ཏེ། གོང་གི་རྫས་རྣམས་དང་བཅས། རིག་སྔགས་བསྟོད་པ་གཉིས་གི་ཝང་གི་ཆུས་གྲོ་ག་ལ་བྲིས་ལ་མགུལ་ལམ་སྤྱི་བོར་གདགས་སོ། །དེ་ཡང་སྔོན་དུ་ཁྲུས་བྱས་ལ་གདགས་སོ། །དེ་སུ་ལ་བཏགས་པའི་འགྲོ་བ་དེ་ནི་ནམ་གྲུས་དཔག་ཚད་ལྔ་བཅུ་ཚུན་ཆད་སྲུང་བར་བྱེད་དོ། །བྱིས་པ་གདོན་ལས་ཐར་བར་བྱེད་པའི་བསྒྲུབ་པ་གསང་བ་མེའི་འཁོར་ལོ་ཞེས་བྱ་བ། སློབ་དཔོན་ཡེ་ཤེས་རྡོ་རྗེ་མཛད་པ་རྫོགས་སོ།།
| 
