གྲོལ་བའི་ཐིག་ལེ་ཞེས་བྱ་བ།
སངས་རྒྱས་ཡེ་ཤེས་ཞབས།
― DTG042_Page_0093 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མུཀྟི་ཏི་ལ་ཀ་ནཱ་མ། བོད་སྐད་དུ། གྲོལ་བའི་ཐིག་ལེ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་འཁྲུལ་པ་བསལ་བས་དྲི་མ་མེད། །འོད་ཟེར་མཐའ་ཡས་རིགས་ཀྱི་སྤྲུལ་འཕྲོ་བ། །ཤེས་རབ་ཡན་ལག་གིས་འཁྱུད་འབར་ཞིང་མཛེས། །འཇམ་དཔལ་དེ་ལ་དངོས་ཀུན་རབ་ཏུ་འདུད། །དེ་ཡི་སྙིང་དབུས་གཞོམ་དུ་མེད་པ་ཡི། །དངོས་ཀུན་རོ་གཅིག་མི་ཤིགས་ཐིག་ལེའི་གཟུགས། །མི་གསལ་གསལ་བའི་བདག་ཉིད་དུ་གནས་པ། །བརྒྱུད་རིམ་ལས་བྱུང་དེ་ཉིད་ལ་འདུད་བྱ། །དེ་འདྲ་སྟོན་བྱེད་བླ་མ་གསུང་རབ་མཆོག །འཇིག་རྟེན་གསུམ་ཁོང་ནང་གནས་དྲི་མ་སེལ། །དེ་ལ་མེ་ཏོག་སྙིམ་བཀང་མགྲིན་དམའ་བས། །མཐའ་མེད་འཁོར་བ་ཡན་ཆད་བར་དུ་འདུད། །དཔལ་ལྡན་གསང་བ་འདུས་པའི་དམ་པའི་གཞུང༌། །བླ་མས་གསོལ་བཏབ་ཡིད་ཆེས་བྲོད་ལྡན་པས། །དངོས་པོ་ཀུན་གྲོལ་མི་ཤིགས་ཐིག་ལེའི་དོན། །རྣལ་འབྱོར་འགའ་ཞིག་དོན་དུ་བཤད་པར་བྱ། །དངོས་པོ་ཐམས་ཅད་འདི་ལྟ་སྟེ། དམྱལ་བའི་གནས་དང་ཡི་དགས་དང༌། །དེ་བཞིན་བྱོལ་སོང་གླིང་བཞི་དང༌། །ལྷ་མིན་རྒྱལ་ཆེན་བཞི་ཡི་གནས། །སུམ་ཅུ་རྩ་གསུམ་འཐབ་བྲལ་དང༌། །དགའ་ལྡན་འཕྲུལ་དགའ་གཞན་འཕྲུལ་གནས། །ཚངས་ཆེན་ཚངས་ཆུང་མདུན་ན་འདོན། །འདོ་ཆུང་འོད་གསལ་ཚད་མེད་འོད། །དགེ་ཆུང་དགེ་རྒྱས་ཚད་མེད་དགེ །སྤྲིན་མེད་བསོ་ནམས་འབྲས་བུ་ཆེ། །མི་ཆེ་མི་གདུང་ཤིན་ཏུ་མཐོང༌། །གྱ་ནོམ་སྣང་དང་འོག་མིན་གནས། །དེ་ལ་གནས་པ་ཇི་སྙེད་དང༌། །ནམ་མཁའ་མཐའ་ཡས་རྣམ་པར་ཤེས། །ཅི་ཡང་མེད་དང་ཡོད་མིན་གྱི། །སྐྱེ་མཆེད་རྒྱུ་དང་མི་རྒྱུར་བཅས། །དེ་སྦྱོང་ཚོགས་ཀྱི་ལམ་དང་ནི། །སྦྱོར་བའི་ལམ་དང་མཐོར་བའི་ལམ། །བསྒོམ་པའི་ལམ་དང་བར་མི་ཆོད། །རྣམ་གྲོལ་ཆེན་པོའི་ལམ་རྣམས་སོ། །དེ་དག་ཀུན་གྱི་རང་བཞིན་ནི། །ནམ་མཁའི་དབྱིངས་ལྟར་རྣམ་དག་པའི། །སྤྲོས་པའི་རྣམ་པ་ཀུན་བྲལ་བ། །ཟབ་གསལ་གཉིས་མེད་ཡེ་ཤེས་སོ། །ཐམས་ཅད་རྣམ་རྟོག་དང་བྲལ་བས། །འཁོར་བ་ཞེས་བྱ་ཡོད་མ་ཡིན། །འོན་ཀྱང་ཐག་པའི་སྦྲུལ་ལྟ་བུར། །སྣང་ཞིང་མེད་པ་ཉིད་དུ་འདོད། །རབ་རིབ་
― DTG042_Page_0094 ―
[མ་དཔེ་གཟིགས་ན་འདིར་གནོན།]
སྤངས་པས་ཐག་པ་ལས། །གཞན་ནི་ཅུང་ཟད་རྙེད་མི་འགྱུར། །དེ་བཞིན་སྤྲོས་སྤངས་དཀྱིལ་འཁོར་ལ། །འཁོར་བ་ཅུང་ཟད་རྙེད་མི་འགྱུར། །དེས་ན་ཟད་གསལ་དཀྱིལ་འཁོར་བས། །ད་ནི་རྟག་ཏུ་མྱ་ངན་འདས། །དེ་དོན་སྐྱེ་བོས་མ་ཤེས་པས། །སྲིད་པའི་སྡུག་བསྔལ་གྱིས་གཟིར་རོ། །དེས་ན་ཟབ་གསལ་བྱང་ཆུབ་ནི། །གཉིས་མེད་རྟོགས་པས་དེ་གྲོལ་ལོ། །ཟབ་མོ་ཁོ་ནས་རྟོགས་པ་མིན། །གསལ་བ་དག་ཀྱང་དེ་བཞིན་ནོ། །དེ་བཞིན་ཐལ་བྱུང་ཟབ་མོ་ནི། །འགྲོལ་འདོད་དེ་ལང་མི་དད། དེ་བས་གཉིས་མེད་རང་བཞིན་དུ། །རྟོགས་པས་ཚེ་འདིར་འབྲས་ཐོབ་ངེས། །རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །མཁའ་བཞིན་དྲི་མེད་ཀུན་འབྱུང་བ། །བརྟགས་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། །སྒྱུ་མ་འཇའ་ཚོན་ལྟ་བུ་རུ། །རང་དང་གཞན་གྱི་རྒྱུད་སྦྱོང་བས། །ཡང་དག་གསལ་བ་ཞེས་བྱའོ། །དེ་གཉིས་མེད་པའི་རང་བཞིན་མཆོག །དངོས་པོ་ཀུན་ལ་ཁྱབ་པའི་བདག །འཁོར་བས་རབ་ཏུ་མ་ཟིན་པ། །ཆོས་ཀྱི་དབྱིངས་ཞེས་བཤད་པའོ། །དེ་འདྲ་རབ་མཆོག་ཡེ་ཤེས་ནི། །མངོན་སུམ་ཚོགས་བས་མི་ཤེས་སོ། །དེ་བཞིན་དཔྱད་མཁན་གྱིས་མི་ཤེས། །མི་ཤེས་འཁྲུལ་པས་རབ་གཡོགས་པས། །ཉན་ཐོས་ཀྱིས་ཀྱང་མི་ཤེས་སོ། །སྤྱོད་ཡུལ་བག་ཉལ་ཤེས་པ་ཡི། །རང་སངས་རྒྱས་ཀྱིས་ཀྱང་མི་ཤེས། །དུས་གསུམ་དུ་ནི་བྱོལ་སོང་དང༌། །ཡི་དགས་དམྱལ་བ་ལྷ་རྣམས་ཀྱི། །སོ་སོ་སྐྱེ་བོས་ག་ལ་ཤེས། །སངས་རྒྱས་ཀུན་གྱི་གསང་ཆེན་འདི། །ནམ་མཁའ་ནམ་མཁའི་སྤྱོད་ཡུལ་ལོ། །འདི་ཡི་དོན་ཤེས་བརྒྱུད་པ་ཡི། །བླ་མ་དམ་པ་རྟག་བཀུར་བས། །ཨུ་དུམྺཱར་ལྟར་བརྒྱ་ལམ་ན། །བསོད་ནམས་ཅན་གྱིས་སྐད་ཅིག་ཤེས། །འདི་ཡི་དོན་ཤེས་རྣལ་འབྱོར་པས། །བྱ་བའི་ལས་ནི་དཀྱིལ་འཁོར་དང༌། །བྱ་བའི་ལས་ནི་གཏོར་མ་དང༌། བྱ་བའི་ལས་ནི་སྦྱིན་སྲེག་དང༌། །བྱ་བའི་ལས་ནི་བགྲང་ཕྲེང་དང༌། །བྱ་བའི་སྐྱིལ་མོ་ཀྲུང་ལ་སོགས། །ངལ་བྱེད་པས་ནི་ཅི་ཞིག་བྱ། །དང་པོ་པ་རྣམས་འདྲིད་ཕྱིར་རོ། །ཅི་ཕྱིར་རྟོག་ལས་སངས་རྒྱས་མིན། །རང་བཞིན་རྣམ་དག་ལས་བྱུང་ཕྱིར། །རྟོག་བཅས་ཆོ་ག་དེ་དག་ཀུན། །ངལ་བ་ལ་སོགས་སྤང་བར་བྱ། །རང་བཞིན་ལས་ནི་བྱེད་པའང་
― DTG042_Page_0095 ―
[མ་དཔེ་གཟིགས་ན་འདིར་གནོན།]
ཡོད། །རང་བཞིན་ཡོངས་སུ་ཤེས་པ་ལ། །བྱེད་པ་མེད་ཅིང་བྱ་བ་འང་མེད། །དཔེར་ན་མི་གང་ཆུ་ཀླུང་གི །ཕ་རོལ་དུ་ནི་འགྲོ་བ་དག །རྩྭ་དང་ཤིང་སོགས་བསྡུ་བྱས་ནས། །དེ་ལས་རྒལ་བའི་རྫིང་བྱས་ཏེ། །མཇུག་ཏུ་རབ་ཏུ་རྒལ་བྱས་ནས། །བོར་ནས་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །དངོས་པོ་དེ་ཉིད་རྟོགས་བྱས་ནས། །རྟོག་བཅས་ཆོས་རྣམས་སྤང་བྱས་ཏེ། །བྱང་ཆུབ་བདེ་བ་ཐོབ་པའོ། །དེ་ཕྱིར་རྣམ་རྟོག་རྣམ་སྤངས་ལ། །ཟབ་གསལ་གཉིས་མེད་ཆོས་སྤེལ་ཏེ། །དེ་བཞིན་གཤེགས་པས་གསུངས་ལམ་ལ། །སྔགས་རིགས་རྣམ་རྟོག་མ་བྱེད་ཅིག །རྣམ་རྟོག་གཏི་མུག་ཆེན་པོ་སྟེ། །འཁོར་བར་ལྷུང་བར་བྱེད་པ་ཡིན། །ནམ་མཁའ་ལྟ་བུ་དྲི་མེད་པའི། །ཟབ་གསལ་གཉིས་མེད་ཏིང་འཛིན་མནོས། །གཉིས་ཀྱི་དབང་པོ་མཉམ་སྦྱོར་བས། །ལུས་ངག་ཡིད་གསུམ་རབ་བསྡུས་ནས། །རའོ་སྙམ་པའི་གཟི་བྱིན་བསྐྱེད། །རྣམ་པ་ཀུན་གྱིས་རབ་བརྒྱན་ནས། །རྣལ་འབྱོར་ལྡན་པས་ཚེ་འདི་ལ། །ཡེ་ཤེས་རྫོགས་པ་ཉིད་ངེས་གྱུར། །རྡོ་རྗེ་ཅན་ལུས་དམ་ཚིག་པས། །ལས་བྱུང་སྐྱེས་པ་བུད་མེད་ཀྱི། །དུ་མའི་གཟུགས་ལ་བརྙས་མི་བྱ། །རྡོ་རྗེ་སེམས་ལྡན་དམ་ཚིག་པས། །ངན་པར་རྟོག་པ་བཟང་པོར་རྟོག །རང་གི་སེམས་ཀྱིས་རང་སེམས་ལས། །ཕྱི་མས་སྔ་མ་སུན་མིང་དབྱུང༌། །རྡོ་རྗེ་ངག་གི་དམ་ཚིག་པས། །འདོད་པ་བསྐྱེད་པའི་ཚིག་རྩུབ་མོ། །ཕྲ་མ་ལ་སོགས་བདེ་བ་ཡི། །ཚིག་ཏུ་རྣམ་པར་སྨྲ་བར་བྱ། །ཤ་ནི་རྣམ་པར་སྣང་མཛད་ཡིན། །རྐང་ནི་རྡོ་རྗེ་མི་བསྐྱོད་པ། །ཁྲག་ནི་དཀོན་མཆོག་དཔལ་དུ་བརྗོད། །རུས་པ་འོད་དཔག་མེད་པ་ཡིན། །རྩ་ཡི་ཚོགས་ནི་དོན་ཡོད་གྲུབ། །དེ་འདྲའི་གསང་ཆེན་དམ་པ་འདི། །བློ་ལྡན་རྣམས་ཀྱིས་བསྟེན་པར་བྱ། །འདོད་ཆགས་ཞེ་སྡང་གཏི་མུག་དང༌། །སྲེད་དང་འདུ་བྱེད་འཕེལ་བྱེད་པའི། །ཆོས་ལྔ་སྐྱེས་མཆོག་རྣམས་ཀྱིས་གསུངས། །བཤང་གཅི་ཁུ་བ་མཆིལ་མ་ཁྲག །འཛག་པ་འབྱུང་བ་བཞེས་བསྡུས་པ། །བསྒོམ་པའི་བློ་གྲོས་རྟོགས་པ་ཡིས། །རྟག་ཏུ་བཟའ་ཞིང་སྦྱིན་སྲེག་བྱ། །དམ་ཚིག་དང་ལྡན་དེ་ཉིད་བསྒོམ། །མྱུར་དུ་སྲིད་པའི་འཆིང་བ་ལ། །གློག་གིས་མུན་པ་བསལ་བ་བཞིན། །སྐད་ཅིག་
― DTG042_Page_0096 ―
[མ་དཔེ་གཟིགས་ན་འདིར་གནོན།]
ཙམ་གྱིས་ཡེ་ཤེས་འབར། །དེ་བས་དེ་ཉིད་ཐོབ་བྱས་ནས། །སྙིང་རྗེས་སེམས་ཅན་ཀུན་དམིགས་ནས། །དགོན་པ་ལ་སོགས་གནས་ནས་ནི། །རྟག་ཏུ་གཉིས་མེད་དོན་བསྒོམ་བྱ། །སྡུག་བསྔལ་གྱི་རྒྱུ་སྡུག་བསྔལ་ལས། །གྲོལ་འདོད་རྣལ་འབྱོར་གང་ཡིན་པས། །བློ་གྲོས་ཀྱིས་ནི་དེ་ཐབས་བཙལ། །ཐབས་ཀྱིས་དེ་བཞིན་གཤེགས་པར་འགྱུར། །དེ་བས་སྙིང་རྗེ་འབའ་ཞིག་གིས། །གཞིར་གྱུར་ཡོན་ཏན་ཐམས་ཅད་བྱུང༌། །སྙིང་རྗེ་སྡོང་བོ་རྩ་བ་ནི། །སྡུག་བསྔལ་སེམས་ནི་གྲོལ་འདོད་པས། །དགའ་བ་སྡོང་བུ་ཡལ་ག་ནི། །བདེ་བ་ཤིན་ཏུ་རྒྱས་པར་འདོད། །ཡལ་ག་འཕེལ་ནས་གསལ་འགྱུར་བ། །སེམས་ཀྱི་དེ་ཁོ་ན་ཉིད་རིག །མ་དག་པ་ཉིད་བསལ་བས་དག །ཐབས་ནི་དེ་དག་ཁྱད་པར་དུ། །ལྷ་ཉིད་ཀྱིས་ནི་སྤྱོད་པར་བྱེད། །དེ་དོན་སྤྱད་ནས་སྤྲོ་སྐྱེས་པ། །དགའ་བ་ཚིམ་བྱེད་ཅེས་བྱའོ། །སྤོང་བ་ལེན་པ་ལོ་མ་ནི། །རྒྱུན་མི་འཆད་པར་སྨོན་ལམ་འདེབས། །ཚོགས་གཉིས་བསྒོམས་པས་ཞིང་གཤིན་ལྟར། །བྱས་པས་མེ་ཏོག་འབྲས་བུ་བྱུང༌། །རྟེན་འབྲེལ་རྣམ་པ་གཉིས་བྱུང་བས། །རང་རྒྱུད་ནང་དུ་སྨིན་བྱེད་པའི། །སྦྱོར་བ་མེ་ཏོག་མོ་གཤམ་མིན། །གཞན་རྒྱུད་སྨིན་བྱེད་སྦྱོར་བ་ནི། །ཕྱི་རོལ་མེ་ཏོག་མོ་གཤམ་མིན། །རང་གི་རྒྱུད་ནི་སྨིན་གྱུར་ནས། །དེ་བཞིན་གཞན་རྒྱུད་རབ་སྨིན་པ། །འབྲས་བུར་ཤེས་བྱ་དེ་དག་རྣམས། །སྙིང་རྗེས་རབ་ཏུ་འགྲུབ་པར་འགྱུར། །རྩ་བ་སྙིང་རྗེ་མེད་གྱུར་ན། །དཀའ་བ་བཟོད་པར་མི་ནུས་སོ། །དེ་བཞིན་བསོད་ནམས་སྤེལ་མི་ནུས། །སེམས་ཅན་དོན་རྣམས་བྱེད་མི་ནུས། །དེས་ན་བསམ་པའི་དགའ་བ་བྲལ། །བློ་གྲོས་ཀྱིས་ནི་སྨོན་ལམ་མེད། །དགེ་བའི་ཆོས་ནི་ལེན་མི་བྱེད། །འགྲོ་བ་ཆོས་ལ་མི་འཛུད་པ། །ཡོངས་སུ་སྨིན་བྱ་ལས་ནི་བྲལ། །སྙིང་རྗེ་མེད་པས་དེ་དག་ཏུ། །འཕེལ་བས་སྙིང་རྗེ་གཞི་རབ་གཟུང༌། །སྙིང་རྗེས་བཟོད་པ་བསམ་པ་སྨོན། །སྐྱེ་བ་སེམས་ཅན་ཡོངས་སྨིན་བྱེད། །རྩ་བ་སྡོང་བུ་ཡལ་ག་དར། །ལོ་མ་མེ་ཏོག་འབྲས་བུ་དང༌། །སྙིང་རྗེ་སྡོང་པོ་འདི་དག་ནི། །རྩ་བ་ལ་སོགས་ངོ་བོ་ལ། །ཕྱིས་ནི་འབྲས་བུ་མཆོག་འགྱུར་བའི། །སྙིང་རྗེས་སེམས་ཅན་དོན་ལ་སྤྱོད། །སྡུག་བསྔལ་ལས་ནི་བདེ་བ་སྐྱེད། །ཤིན་ཏུ་རྒྱས་པར་གྱུར་པ་སྟེ། །བཟོད་པའི་
― DTG042_Page_0097 ―
[མ་དཔེ་གཟིགས་ན་འདིར་གནོན།]
མཚན་ཉིད་སྡོང་པོ་ནི། །རྒྱས་པ་ལས་ནི་ཡལ་ག་འཕེལ། །དེ་བས་དེ་ཉིད་བསྒོམ་པ་ལ། །དོན་ཆེན་རབ་ཏུ་འདོད་པ་ཡི། །བཏང་སྙོམས་ཀུན་དུ་ཁྱབ་པ་སྟེ། །ཚངས་ཆེན་སྤྱོད་པ་དམ་པའོ། །དེ་དག་ལ་གནས་རྣལ་འབྱོར་པས། །སྙིང་པོ་སངས་རྒྱས་སྤྱོད་ཡུལ་མཆོག །གང་དེ་ཀུན་བདག་ལ་གནས་པའི། །མཐའ་ཡི་དེ་ཉིད་བསྒོམ་པར་བྱ། །དཔྲལ་བ་ལ་གནས་རྐང་མཐིལ་བར། །ཐིག་ལེ་རུ་ནི་བསྡུ་བར་བྱ། །བྱང་ཆུབ་སེམས་དག་འོད་གསལ་བས། །ཟླ་བ་ཤེས་དང་མཉམ་པའི་འོད། །ཡེ་ཤེས་ལྔ་ཡི་ངོ་བོ་ཉིད། །ཙ་ན་ཀ་ཡི་འབྲུ་ཚོད་ཙམ། །དེ་དབུས་གཡོ་གནས་དཀྱིལ་འཁོར་ནི། །མི་གསལ་གསལ་བར་ཡང་དག་སྦྱོར། །དེ་གསལ་མི་ཤིགས་ཐིག་ལེའི་གཟུགས། །ཡུངས་ཀར་གྱི་ནི་འབྲུ་ཚོད་ཙམ། །འོད་ཟེར་སྣ་ལྔ་འབར་འཛག་པའི། །ཚུལ་ཅན་སྙིང་དབུས་རྟག་ཏུ་གནས། །དེ་ལ་བལྟས་པས་ཡེ་ཤེས་ཆེ། །སྐད་ཅིག་ཙམ་གྱིས་རྣལ་འབྱོར་བ། །འབར་བ་འདི་ལ་ཐེ་ཚོམ་མེད། །སྟེང་གི་སྣ་ལས་ངེས་པར་འབྱུང༌། །ཕྱོགས་བཅུའི་དེ་བཞིན་གཤེགས་པ་ཡི། །ཞལ་ཞུགས་སྙིང་གི་བདུད་རྩི་བླངས། །རྡོ་རྗེ་ལམ་བྱུང་འོ་མ་ལྟར། །འདུས་ནས་གཡས་གཡོན་རབ་ཞུགས་ཏེ། །གོང་གི་ཐིག་ལེ་ལ་གནས་ཏེ། །འགོག་པའི་རྡོ་རྗེ་སེམས་ཉིད་དུ། །དེ་ལ་ནམ་ཞིག་སུས་རེག་པ། །སངས་རྒྱས་ཀུན་གྱིས་མཆོག་སྦྱིན་པ། །ཡིད་བཞིན་དཔལ་དང་འདྲ་བར་འགྱུར། །ཡང་ནི་འཛག་པའི་ཐིག་ལེ་ལས། །བྱུང་བས་ནོར་བུ་རྣམ་པར་གནས། །རང་གི་མཚན་མའི་དབུས་གནས་པ། །གོང་གི་དཀྱིལ་འཁོར་ལྟར་བསྒོམས་ཏེ། །དེ་ལ་སྣང་བའི་ཐིགས་པ་ལས། །གོང་གི་རིམ་པས་སྤྲོ་བསྡུ་བས། །བཟུང་སྟེ་དེ་ལ་རེག་འགྱུར་བས། །རྒྱུད་གསུངས་ལྔ་པོ་ཡང་དག་འབྱུང༌། །དེ་བྱུང་རྗེས་དྲན་རབ་བསྒོམས་པས། །དོན་དེས་ཀུན་ལ་ཁྱབ་པར་བྱ། །ཡང་ནི་སྤྲུལ་པའི་ཐིག་ལེ་ནི། །རྣམ་པ་བཞི་པོ་བསྒོམ་པར་བྱ། །སྤྱི་བོར་རླུང་དབུས་ཨོཾ་བསམ་མོ། །མགྲིན་པར་ཆུ་དབུས་ཨཱཿ་བསམ་མོ། །ཐུགས་ཀར་མེ་དབུས་ཧཱུཾ་བསམ་མོ། །མགྲིན་འོག་དབང་ཆེན་རང་ལྷ་ཡི། །ས་བོན་ཐིག་ལེར་བསམ་པའོ། །ཐིག་ལེ་བཞི་ལས་ཟེར་འབྱུང་བ། །སྟེང་གི་སྣ་ལས་ངེས་པར་འབྱུང༌། །གཡས་འབྱུང་རླུང་གི་དཀྱིལ་འཁོར་
― DTG042_Page_0098 ―
[མ་དཔེ་གཟིགས་ན་འདིར་གནོན།]
ནི། །ཁ་དོག་ནག་པོའི་ངོ་བོ་ནི། །སྐུ་ཡི་རྡོ་རྗེ་རང་བཞིན་ནི། །མུན་པ་རུ་ནི་ཤེས་པར་བྱ། །གཡོན་འབྱུང་ཆུ་ཡི་དཀྱིལ་འཁོར་ནི། །ཁ་དོག་དཀར་པོའི་ངོ་བོ་ཉིད། །གསུང་གི་རྡོ་རྗེ་རང་བཞིན་ཏེ། །རྡུལ་དུ་རབ་ཏུ་ཤེས་པར་བྱ། །གཉི་ག་དྲག་འབྱུང་མེད་དཀྱིལ་འཁོར། །ཁ་དོག་དམར་པོའི་ངོ་བོ་ཉིད། །ཐུགས་ཀྱི་རྡོ་རྗེ་རང་བཞིན་ཏེ། །སྙིང་སྟོབས་སུ་ནི་ཤེས་པར་བྱ། །གཉི་ག་དལ་འབྱུང་དབང་ཆེན་ཏེ། །གསེར་གྱི་མདོག་ཏུ་སྣང་བ་སྟེ། །ལྷ་ཐམས་ཅད་ཀྱི་ངོ་བོ་སྟེ། །དགའ་བ་བར་མའི་ཡེ་ཤེས་སོ། །རེ་རེ་ཕྱག་རྒྱ་བཞི་བཞི་སྟེ། །འབྱུང་བ་ཧཱུཾ་གི་ངོ་བོ་ཡིས། །སངས་རྒྱས་ལ་སོགས་སྤྲོ་བར་བྱེད། །དེ་ཡི་དུས་སུ་གནས་པ་ཡིས། །ཆོས་ཀུན་འགྲུབ་པར་བྱེད་པའོ། །འཇུག་པ་ཨོཾ་གྱི་ངོ་བོ་ཡིས། །སངས་རྒྱས་ལ་སོགས་སྡུད་པར་བྱེད། །དེ་ཡི་དུས་སུ་གཡོ་བ་ཡི། །ཆོས་ཀུན་འགྲུབ་པར་བྱེད་པའོ། །གནས་པ་ཨཱཿ་ཡི་ངོ་བོ་ཡིས། །སངས་རྒྱས་ལ་སོགས་གཟུང་བ་ཡིས། །དེ་བཞིན་གཡོ་གནས་ཆོས་རྣམས་ཀུན། །གཉིས་མེད་ཡེ་ཤེས་འཇུག་པའོ། །དེ་ལ་དེ་ཉིད་རབ་བཟུང་བས། །ཡེ་ཤེས་སེམས་དཔའི་ངོ་བོའོ། །དེ་དུས་ཆོས་ཀུན་གཉིས་མེད་ཀྱི། །ཡེ་ཤེས་སུ་ནི་སྐད་ཅིག་ཞུགས། །དེ་ལྟར་དབྱེར་མེད་བཟླས་པ་འདི། །སེམས་ཅན་ཐམས་ཅད་རབ་ཟློས་ཀྱང༌། །རྣམ་རྟོག་རྨོངས་པས་རབ་བསྒྲིབས་པས། །དེ་ཡི་ངོ་བོ་མི་ཤེས་ཏེ། །འགྲོ་བ་ལྔར་ནི་འཁོར་བར་འགྱུར། །ཕྱག་རྒྱ་བཞི་འབྲེལ་རེ་རེ་ནེ། །ཉིས་བརྒྱ་ཉི་ཤུ་རྩ་ལྔ་སྟེ། །དེ་བཞིས་བསྒྲེས་པས་དགུ་བརྒྱའོ། །དེ་ནི་འཕོ་བ་ཉི་ཤུ་བཞིས། །བརྩིས་པ་ཁྲི་ཕྲག་གཉིས་དང་ནི། །ཆིག་སྟོང་དང་ནི་དྲུག་བརྒྱའོ། །དེ་ནི་རྒྱུད་ཆེན་གསང་འདུས་སུ། །ཀློག་དང་ཁ་ཏོན་བྱེད་པ་དང༌། །སྤྲོ་དང་བསྡུ་བའི་ངོ་བོ་ལས། །བཟླས་པ་རུ་ནི་བཤད་པའོ། །འདི་འདྲའི་བཟླས་པ་མ་རྟོགས་པས། །ཕྱི་རོལ་བཟླས་པ་མངོན་ཞེན་པས། །ཡང་དག་དོན་ནི་རྟོགས་མི་ནུས། །དེ་བས་རྣལ་འབྱོར་བར་ཆོད་པ། །ཕྱི་རོལ་བཟླས་པ་སྤང་བྱས་ཏེ། །རྡོ་རྗེ་འཆང་བའི་ངོ་བོ་མཆོག །རང་བཞིན་བཟླས་པ་མཆོག་ཆེན་བསྒོམ། །དེ་བསྒོམས་སྟོབས་ཀྱིས་ཕྱོགས་རྣམས་ཀུན། །སྒྱུ་མ་དང་ནི་སྨིག་རྒྱུ་དང༌། །དྲི་ཟའི་གྲོང་ཁྱེར་དབང་པོ་དང༌། །ཆུ་ཟླ་དང་ནི་རྨི་ལམ་དང༌། །སྤྲུལ་པ་དང་ནི་ཆུ་བུར་དང༌། །
― DTG042_Page_0099 ―
[མ་དཔེ་གཟིགས་ན་འདིར་གནོན།]
བྲག་ཅ་དང་ནི་གཟུགས་བརྙན་དང༌། །འཁྲུལ་པ་མགལ་མེ་འཁོར་ལོ་རུ། །སྐད་ཅིག་སོགས་པས་རབ་རྟོགས་སོ། །དེ་བས་ཐབས་དེ་དངོས་ཀུན་གྱི། །དེ་ཉིད་བདེན་པས་བསྒྲུབ་པའོ། །གཉིས་མེད་བདེ་བ་གསང་ཆེན་པོའོ། །སངས་རྒྱས་བྱང་ཆུབ་སྒྲུབ་བྱེད་པ། །སངས་རྒྱས་ཀྱི་ནི་ངོ་བོ་སྟེ། །ཟད་མེད་མི་འཇིགས་རྟག་པའོ། །ཐོག་མ་ཐ་མ་མེད་པའི་མཆོག །ཡོད་པ་མེད་ཅིང་མེད་པ་མེད། །དབང་པོ་དང་བཅས་དབང་པོ་མེད། །འབྱུང་བའི་ངོ་བོ་འབྱུང་བ་མེད། །གཟུགས་དང་བཅས་ཤིང་གཟུགས་མེད་པས། །སྦྱོར་བའི་ལམ་གྱིས་མཐོང་བའོ། །ཕྱི་ཡི་སྦྱོར་བ་གཟུགས་ཕུང་སོགས། །ཀུན་རྫོབ་འབྱུང་བ་བཞི་པོ་དང༌། །གཡོ་དང་བཅས་པའི་ཆོས་རྣམས་ཀུན། །དེ་གཅིག་པོས་ནི་ཁྱབ་པ་སྟེ། །ཐམས་ཅད་སེམས་ཙམ་ཁོ་ནའོ། །ཅི་ཕྱིར་སེམས་ཅན་ཐམས་ཅད་ཀུན། །རྣམ་ཤེས་ཕུང་པོ་ཁོ་ནའོ། །བླུན་པོ་རྨོངས་པ་རྣམས་ཀྱིས་ནི། །དེ་དོན་ཅུང་ཟད་ཤེས་མི་འགྱུར། །སེམས་དང་སེམས་བྱུང་ཡེ་ཤེས་དང༌། །ཤེས་པ་རྣམ་ཤེས་གཅིག་པའོ། །གང་ཚེ་ལུས་ཀྱི་རྐྱེན་ཉིད་འགྱུར། །ཆོས་ཀུན་ཆོས་རོ་གཅིག་ཏུ་འགྱུར། །དངོས་པོ་ཀུན་ཀྱང་དེ་ཚེ་འགྱུར། །ཅི་ཡི་ཕྱིར་ན་ཆོས་རྣམས་ནི། །ཆུ་རྒྱུན་བཞིན་དུ་རྒྱ་མཚོ་ལས། །ཐར་པ་ན་གཅིག་ཁོ་ན་སྟེ། །མང་པོ་རུ་ནི་མི་སྣང་ངོ༌། །དེ་ཡི་ནང་གི་སྦྱོར་བ་ནི། །བླ་མ་དམ་པའི་ཞལ་ནས་ནི། །ཐོབ་ཀྱི་དེ་ལ་ཐེ་ཚོམ་མེད། །དེ་ནི་ཟབ་གསལ་གཉིས་སྦྱོར་བས། །སྦྱོར་བ་ཞེས་སུ་བཤད་པའོ། །རྩེ་གཅིག་པས་ནི་ཏིང་ངེ་འཛིན། །མཉེས་བྱེད་ཚིམ་པར་བྱེད་པ་སྟེ། །གཏོར་མ་ཞེས་ནི་རབ་ཏུ་བྱ། །སྡིག་པ་ཞི་ཕྱིར་ཞི་བའོ། །བསོད་ནམས་ཀུན་གྱིས་རྒྱས་པའོ། །ཆགས་པ་ཆེན་པོས་དབང་དུ་འདོད། །ཐམས་ཅད་གསོད་ཕྱིར་མངོན་སྤྱོད་དོ། །རྟགས་ཆེན་དགུག་ཕྱིར་དགུག་པའོ། །ཉན་ཐོས་ལ་སོགས་ཆོས་རྣམས་ནི། །རིང་དུ་ཞི་བྱེད་བསྐྲད་པའོ། །སྔགས་པ་གང་གནས་རྣལ་འབྱོར་པས། །རྟོགས་པར་ནུས་པས་བསྲུང་པའོ། །དེ་ཤེས་ཆོས་རྣམས་ངོ་བོ་ཀུན། །གཉིས་མེད་གཅིག་རྟོགས་མིག་རྣོན་ནོ། །རྣམ་པར་རྟོག་པ་མ་ལུས་རྣམས། །ཡེ་ཤེས་ངོ་བོར་དེ་འགྱུར་བས། །དུག་གཞོམ་པ་ཡི་ཆོ་གའོ། །ཕུང་པོ་ལ་སོགས་བླུན་པའི་རྫས། །ཡེ་ཤེས་མེས་
― DTG042_Page_0100 ―
[མ་དཔེ་གཟིགས་ན་འདིར་གནོན།]
བསྲེགས་སྦྱིན་སྲེག་གོ །ཟབ་པ་དང་ནི་གསལ་བ་ཡིས། །ཆོས་ཀུན་མཉམ་པས་ཐིག་གདབ་པོ། །གསལ་བའི་འཇའ་ཚོན་ལྟ་བུའི་སྐུས། །ཉི་ཤུ་རྩ་གཅིག་ཆོས་ཀུན་ལ། །རང་བཞིན་གྱིས་བཟུང་མཚོན་བཏབ་པོ། །དེ་ཡི་ངོ་བོ་ཀུན་གནས་པ། །སློབ་དཔོན་སློབ་མ་ཀུན་ཞུགས་པའོ། །མིང་ཙམ་གྱིས་ནི་ལོག་འབྱུང་ཡང༌། །རང་རིག་བདེ་བས་རྟོགས་པས་ན། །དབང་བསྐུར་ཞེས་ནི་བཤད་པ་ཡིན། །དེ་ལ་སོགས་པ་མཐའ་ཡས་ཀྱིས། །ཆོས་ཀུན་མིང་ཅན་དེ་ཉིད་མཆོག །ཡན་ལག་ཐམས་ཅད་ལས་འདས་ཤིང༌། །རྟོག་དང་རྟོག་པ་མེད་ལས་གྲོལ། །གུག་སྐྱེད་ཚེག་དྲག་ལས་འདས་པ། །འདི་ནི་དཀྱིལ་འཁོར་མཆོག་ཅེས་བྱ། །ཆོས་དང་ཆོས་མིན་རྣམ་དཔྱོད་པ། །ཆོས་རྣམས་ཐམས་ཅད་རྟོགས་པར་སྣང༌། །རྣམ་དག་ནམ་མཁའ་འདྲ་བ་ཡི། །དཀྱིལ་འཁོར་འདི་ནི་བསྟན་པ་ཡིན། །འདོད་ཆགས་མི་ཆགས་འདོད་ཆགས་མཉམ། །ཆུ་ཡི་པདྨ་དམར་པོ་འདྲ། །རང་སེམས་འདོད་ཆགས་ཤིན་ཏུ་ཆགས། །འདི་ནི་དཀྱིལ་འཁོར་མཆོག་ཡིན་ནོ། །གཟུགས་དང་གཟུགས་མིན་དྲི་མེད་པའི། །གང་ཁམས་ཀུན་འཇུག་གྱུར་པ་ཡི། །སེམས་ནི་ཆུ་དང་སྐུལ་བྱེད་པའི། །དཀྱིལ་འཁོར་དཀྱིལ་འཁོར་ཞེས་བྱའོ། །དེ་འདྲའི་རང་རིག་དཀྱིལ་འཁོར་ལས། །རྟོག་ལས་རླུང་བྱུང་མེ་དང་ནི། །ཆུ་དང་ས་སྟེ་དེ་དག་ལས། །ཕྱིར་ལོག་ཕུང་སོགས་རབ་གྲུབ་པས། །དེ་འདྲའི་དཀྱིལ་འཁོར་བསྒྲིབས་པར་འགྱུར། །སྐྱེས་བུ་གང་ཞིག་བླ་མ་ཆེ། །དེ་བཞིན་ཉིད་ཤེས་བཀུར་བ་ལས། །དེ་ཡི་བྱིན་རླབས་ཡེ་ཤེས་ཆེ། །གང་གིས་རྟོགས་པས་སྔ་མ་ཡི། །རིམ་པས་བསྒྲུབ་ལ་ཤིན་ཏུ་དཔའ། །དེ་ཡིས་ཕུང་ཕྱིན་ལོག་རྣམས་ལ། །རིམ་གྱིས་ལོག་ནས་ཡེ་ཤེས་ཀྱི། །སྤྲོས་བྲལ་དཀྱིལ་འཁོར་འབར་བར་འགྱུར། །དེ་བས་ནན་ཏན་ཐམས་ཅད་ཀྱིས། །མཆོག་གི་དཀྱིལ་འཁོར་འདི་བསྒོམ་བྱ། །སྐད་ཅིག་ཙམ་དུ་དད་པ་ཡང༌། །མྱུར་དུ་རྡོ་རྗེ་སེམས་དཔར་འགྱུར། །དེ་ཡི་ཐེག་པ་བསམ་ཡས་ཀྱི། །ཚུལ་ཁྲིམས་སྔོམ་པ་ཀུན་ཀྱང་བསྲུངས། །དཀྱིལ་འཁོར་ཀུན་དུ་ཞུགས་པའོ། །དེ་ཕྱིར་འདི་ཡི་བསོད་ནམས་ཚོགས། །ནམ་མཁའ་སྣོད་བྱས་ཤོང་མི་འགྱུར། །ཅིའི་ཕྱིར་ཤཱཀྱ་ཐུབ་པ་ཡིས། །གྲངས་མེད་པར་དུ་ཚོགས་
― DTG042_Page_0101 ―
[མ་དཔེ་གཟིགས་ན་འདིར་གནོན།]
བསགས་ཀྱང༌། །འདི་དོན་མ་རྟོགས་ནཻ་ར་ཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་བདེ་གཤེགས་ཀུན་གྱས་ཀྱང༌། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གསལ་མེད་རབ་བསྟན་ཏེ། །ནམ་ཕྱེད་དུས་སུ་རྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་དག་རྟོགས། །བྱང་ཆུབ་སྙིང་པོར་བཞུགས་བྱས་ནས། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བའོ། །དེ་ནས་བཟུང་སྟེ་དོན་མཆོག་འདི། །སྐལ་བར་ལྡན་པ་འགའ་ཞིག་ལ། །ཞལ་གནས་ཞལ་དང་སྙན་ནས་སྙན། །བརྒྱུད་དེ་ངེས་པའི་དོན་བསྟན་པའོ། །དེ་དོན་བསྒོམ་འགྱུར་རྣལ་འབྱོར་པས། །འཁོར་བ་ཉིད་ན་གནས་པའི་ཚེ། །འཁོར་བའི་ཉེས་པས་མི་གོས་སོ། །ཡེ་ཤེས་ཀྱིས་ནི་རྒྱས་བཏབ་པས། །ཉོན་མོངས་རྟག་ཏུ་འགལ་འགྱུར་ཏེ། །སྨན་ནི་ཕྱེ་མར་སྦྱར་བ་ཡིས།། སྦྲུལ་ནི་གསོད་པར་བྱེད་པ་བཞིན། །གྲོལ་བའི་ཐིག་ལེ་མི་ཕྱེད་འདིས། །ཚེ་འདི་ཉིད་ལ་དངོས་གྲུབ་ཐོབ། །འདི་ཡི་སྟོབས་ཀྱིས་དགོས་པ་ཀུན། །སྐད་ཅིག་གིས་ནི་འགྲུབ་པར་བྱེད། །གང་གིས་དེ་མཐོང་ཡང་དག་བལྟ། །བདག་པོ་ཆེན་པོ་རབ་མཆོད་ན། །དེ་ཡི་སྟོན་པ་ཀུན་མཐོང་སྟེ། །རྒྱལ་བ་མཆོག་ལ་མཆོད་པར་འགྱུར། །སྲིད་པ་གཅོད་པར་གྱུར་པ་དང༌། །འགྲོ་བའི་སྟོན་པ་མཆོག་ཏུ་འགྱུར། །དེ་ལ་ལྷ་ཀུན་མཆོད་བྱེད་ཅིང༌། །སྐད་ཅིག་སྐད་ཅིག་ཕྱག་ཀྱང་བྱེད། །ཇི་ལྟར་སྟོན་པ་རྫོགས་སངས་རྒྱས། །ཕན་བྱེད་འཇིག་རྟེན་སྐྱེས་གྱུར་པ། །སྣ་ཚོགས་ཡེ་ཤེས་རྗེས་བསྡུས་པ། །རྣལ་འབྱོར་ཆེན་པོ་དེ་བཞིན་འགྱུར། །གང་གིས་དམ་སྡོམ་རྣམས་བསྡུས་ཏེ། །བདེ་ཆེན་རྡོ་རྗེ་སེམས་བསྒོམས་ན། །དངོས་གྲུབ་ཆེན་པོ་དེས་ཐོབ་པའི། །རྡོ་རྗེ་སེམས་དཔས་རྒྱས་བཏབ་པོ། །མི་འགྲུབ་པ་ནི་ཅུང་ཟད་མེད། །བདེ་ཆེན་ཕྱག་རྒྱ་ཆེན་པོ་ཡིས། །སོ་སོ་རང་གི་རྗེས་ལས་གྲུབ། །དེ་བས་འདི་བསྒོམས་རྣལ་འབྱོར་པས། །སྤྱོད་པ་ཀུན་ལ་རོལ་པར་བྱ། །རྣལ་འབྱོར་གསུམ་པའི་དུས་ཀྱི་ཚེ། །སྣ་ཚོགས་དོན་ཆེན་ལ་གཟུད་ཕྱིར། །ལ་ལར་ཤིན་ཏུ་དཀའ་བ་སྤྱོད། །ལ་ལར་ཁབ་ནས་བྱུང་ཚུལ་བྱ། །ལ་ལར་བྱང་ཆུབ་སེམས་དཔའི་ཚུལ། །ལ་ལར་ལྷུམས་སུ་ཞུགས་པའི་ཚུལ། །
― DTG042_Page_0102 ―
[མ་དཔེ་གཟིགས་ན་འདིར་གནོན།]
ལ་ལར་སྐྱེ་བ་སྟོན་པའམ། །ལ་ལར་འཆི་བ་སྟོན་པའམ། །ལ་ལར་སྤྱོད་ཅིང་རོལ་པའམ། །ལ་ལར་བདུད་ལས་རྒྱལ་བ་དང༌། །ལ་ལར་བྱང་ཆུབ་མངོན་བྱང་ཆུབ། །ལ་ལར་ཆོས་ཀྱི་འཁོར་ལོ་བསྐོར། །ལ་ལར་སྣ་ཚོགས་འཇུག་པར་མཛད། །ལ་ལར་དུས་སུ་མཛེས་པའི་གཟུགས། །ལ་ལར་འདོད་གཟིར་བུད་མེད་གཟུགས། །ལ་ལར་མི་སྡུག་རྒན་མོའི་གཟུགས། །ལ་ལར་གཅེར་བུ་པད་གདོང་མ། །ལ་ལར་སྐྱེས་བུ་རྒན་པོའི་ཚུལ། །རེས་འགའ་དར་བབ་སྐྱེས་ཚུལ་དང༌། །ལ་ལར་ལང་ཚོ་སྐྱེས་བུའི་ཚུལ། །ལ་ལར་དགེ་སློང་ཚུལ་དུ་གནས། །ལ་ལར་དེ་བཞིན་དགེ་སློང་མ། །ལ་ལར་རྣལ་འབྱོར་དབང་ཕྱུག་ཆེ། །ལ་ལར་ཕུག་གནས་བསམ་གཏན་པ། །ལ་ལར་རྒྱལ་པོ་ལོངས་སྤྱོད་ཅན། །ལ་ལར་མཚོན་ཐོགས་སྐྱེས་བུའི་ཚུལ། །ལ་ལར་སྨྱོན་པ་བརྟུལ་ཞུགས་ཅན། །ལ་ལར་ཁྱི་དང་བྱ་རོག་གཟུགས། །ལ་ལར་དེ་བཞིན་གླང་ཆེན་སོགས། །ལ་ལར་ཚངས་པ་ཆེན་པོའི་ཚུལ། །ལ་ལར་སྐྱེ་དགུའི་བདག་པོའི་ཚུལ། །ལ་ལར་འདོད་པའི་དབང་ཕྱུག་ཚུལ། །ལ་ལར་འདོད་པ་བྲལ་བའི་མཆོག །ལ་ལར་ཞི་བ་ཚུལ་གནས་པ། །ལ་ལར་དྲག་པོ་ཚུལ་གནས་པ། །ལ་ལར་སྲིན་པོའི་གདོན་ལ་སོགས། །ལ་ལར་རྟག་ཏུ་ཉལ་བར་བྱེད། །ལ་ལར་ཀུན་དུ་རྒྱུག་པར་བྱེད། །ལ་ལར་ཀུན་དུ་ཚིག་ངན་སྨྲ། །དེ་ལ་སོགས་པ་མཐའ་ཡས་པ། །རྣལ་འབྱོར་ཆེན་པོས་སྤྲུལ་པའོ། །ཐབས་དེས་སེམས་ཅན་ཐམས་ཅད་ཀུན། །དོན་གཅིག་ལ་ནི་གཟུད་ཕྱིར་རོ། །དེ་འདྲའི་སྤྱོད་པ་ལ་གནས་པ། །སྐད་ཅིག་གིས་ནི་སྦྱོར་བ་བདུན། །རྟོགས་ནས་ཇི་སྲིད་བར་དུ་ནི། །རོ་མྱང་མཚན་ཉིད་བརྒྱད་ལྡན་པར། །ཡང་དག་ཡེ་ཤེས་དབང་གྱུར་ལ། །བྱ་བ་བྱེད་པའི་དབང་ཕྱུག་ཆེ། །འཁོར་བའི་མཐའ་ཡི་ཕ་རོལ་སོན། །བདེན་པ་གཉིས་མེད་རྣལ་འབྱོར་ཆེ། །ཁུར་བོར་བདག་དོན་རྗེས་སུ་རྙེད། །གླང་པོ་ཆེན་པོ་དུལ་བའོ། །ཚེར་མ་དཀྲུགས་པ་ཐམས་ཅད་མཁྱེན། །དེ་བཞིན་གཤེགས་པ་བཅོམ་ལྡན་འདས། །ལོངས་སྤྱོད་རྫོགས་སྐུ་ཆོས་ཀྱི་སྐུ། །སྦྲུལ་པའི་སྐུ་ཞེས་བྱ་བའོ། །སྐུ་གསུང་ཐུགས་ཀྱི་དཀྱིལ་འཁོར་མཆོག །སྤྲུལ་པ་དཔག་མེད་སྤྱི་ཡིག་གཟུགས། །བདག་པོ་རྡོ་རྗེ་འཆང་བ་སྟེ། །གྲོལ་བའི་ཐིག་ལེས་མཚོན་པའོ། །དཔལ་ལྡན་སངས་རྒྱས་ཀུན་གྱི་
― DTG042_Page_0103 ―
[མ་དཔེ་གཟིགས་ན་འདིར་གནོན།]
བདག །རྡོ་རྗེ་འཆང་བ་ཀུན་གྱི་གནས། །ཆོས་རྣམས་ཀུན་གྱི་ཆོས་ཉིད་དེ། །སངས་རྒྱས་ཀུན་གྱིས་བསྒྲུབ་བྱའོ། །སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་ཉིད་དང༌། །རྫོགས་བའི་རིམ་བ་ཁོ་ནའོ། །བསྐྱེད་པའི་རིམ་པ་རྣམ་པ་གཉིས། །དེ་བཞིན་རྫོགས་པའི་རིམ་པའོ། །རིམ་པ་གཉིས་ཀྱི་བྱེ་བྲག་གིས། །སྔགས་ཀྱི་སྐུ་དང་ཡེ་ཤེས་སྐུ། །ཡེ་ཤེས་སྐུ་ལ་ཡེ་ཤེས་དང༌། །རྣམ་པར་དག་པའི་སྐུ་གཉིས་སོ། །རྣམ་པར་དག་པ་སྦྱོར་བ་བདུན། །རྫོགས་པའི་རིམ་པའི་རྫོགས་རིམ་སྟེ། །རྣམ་པ་ཀུན་གྱི་མཆོག་ལྡན་པ། །ཐམས་ཅད་མཁྱེན་པ་བླ་མེད་འགྱུར། །དོན་འདི་གནས་པའི་རྣལ་འབྱོར་ཆེ། །བསྐྱེད་པའི་རིམ་པ་ཞལ་གཅིག་དང༌། །ཞལ་གསུམ་ནག་པོ་ལ་སོགས་པ། །གང་དད་བ་ཡིས་ཉེས་མི་འགྱུར། །སྣ་ཚོགས་རྣམ་པར་སྣང་གྱུར་པའི། །དག་དང་མ་དག་ཆོས་རྣམས་ཀུན། །གསང་བའི་དོན་གྱི་དེ་ཁོ་ནའོ། །རྡོ་རྗེ་སེམས་ལས་བྱུང་ཕྱིར་རོ། །དེ་བས་དེ་ཉིད་དོན་དམ་པ། །རྣལ་འབྱོར་གང་གིས་རྟོགས་འདོད་པས། །དེ་ཤེས་བླ་མ་མཉེས་བྱས་ཏེ། །ཇི་བཞིན་དོན་ནི་ཡང་དག་བླང༌། །ཤེས་རབ་དྲི་མེད་མ་ལུས་སེལ་བྱེད་པས། །རྣམ་པར་བཤད་པ་བདག་འདྲས་མི་དཔོགས་ཀྱང༌། །སྐྱེས་བུ་དམ་པ་འགའ་ཞིག་གིས་བཟུང་ནས། །བཅིངས་པ་གྲོལ་འདོད་ཕྱིར་ན་བདག་གིས་ཀྱང༌། །དེ་ལྟར་བྱས་པ་ལས་བྱུང་དགེ་བ་དེས། །འགྲོ་སེམས་ཕྱིན་ཅི་ལོག་ལས་བཟློག་བྱས་ཏེ། །སངས་རྒྱས་ཡེ་ཤེས་དཀྱིལ་འཁོར་འཁོར་ལོ་ཡི། །ལམ་གྱིས་རྡོ་རྗེ་འཛིན་པའི་སར་འགྲོ་ཤོག །གྲོལ་བའི་ཐིག་ལེ་ཞེས་བྱ་བ་དཀྱིལ་འཁོར་ཆེན་པོའི་རྡོ་རྗེ་སློབ་དཔོན་སངས་རྒྱས་དཔལ་ཡེ་ཤེས་ཞབས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང༌། བོད་ཀྱི་ཞུ་ཆེན་གྱི་ལོ་ཙཱ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།
| 
