འཇམ་པའི་དབྱངས་དཔའ་བོ་གཅིག་ཏུ་གྲུབ་པའི་སྒྲུབ་ཐབས།
མར་མེ་མཛད་ཡེ་ཤེས།
― DTG073_Page_0139 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། སིད་དྷཻ་ཀབཱི་ར་མཉྫུ་གྷོ་ཥ་སཱ་དྷ་ནཾ། བོད་སྐད་དུ། འཇམ་པའི་དབྱངས་དཔའ་བོ་གཅིག་ཏུ་གྲུབ་པའི་སྒྲུབ་ཐབས། འཇམ་པའི་དབྱངས་དཔའ་བོ་གཅིག་ཏུ་གྲུབ་པ་ལ་ཕྱག་འཚལ་ལོ།། དེ་ལ་དང་པོར་སྔགས་པས་གདོང་བཀྲུ་བ་ལ་སོགས་པ་བྱ་སྟེ་ཡིད་དང་མཐུན་པའི་བསམ་གཏན་གྱི་གནས་གཙང་ཞིང༌། མེ་ཏོག་དྲི་ཞིམ་པོས་གཅལ་དུ་བཀྲམ་པར། སྟན་གཙང་ལ་བདེ་བར་སྐྱིལ་མོ་ཀྲུང་གིས་འདུག་སྟེ། འབྱུང་པོ་ཐམས་ཅད་པའི་གཏོར་མའི་སྔགས་ཀྱིས་གཏོར་མ་བྱིན་གྱིས་བརླབས་ལ། ཨོཾ་ཨཱཿ་བིགྷཱནྟ་ཀྲྀཏ་ཧཱུཾ་ཕཊ་ཅེས་བྱ་བའི་སྔགས་ལན་བཅུའི་བར་དུ་བརྗོད་དེ་ཕྱོགས་བཅུ་ན་གནས་པའི་བགེགས་ཐམས་ཅད་བསྐྲད་པར་བྱའོ། །དེ་ནས་རང་གི་སྙིང་གར་ཨ་ཆོས་ཐམས་ཅད་ཆོས་ཀྱི་དབྱིངས་ཀྱི་རང་བཞིན་སྐྱེ་བ་མེད་པར་སྟོན་པར་བྱེད་པ། སྟོན་ཀའི་ཟླ་བ་ལྟར་དཀར་བ། འོད་ཟེར་དཀར་པོ་འཕྲོས་པས་རང་གི་ལུས་གསལ་བར་བྱེད་པ་ཤིན་ཏུ་ཕྲ་བ་བསམས་ལ། དེ་ཡོངས་སུ་གྱུར་པས་འོད་ཟེར་དཀར་པོའི་ཐིག་ལེ་ཤིལ་སྒོང་དག་པ་ལྟ་བུ། དེ་རིམ་གྱིས་འཕེལ་བར་གྱུར་པས་ཟླ་བའི་དཀྱིལ་འཁོར་གྱི་གཟུགས་སུ་བསམ་ཞིང༌། དེའི་སྟེང་དུ་ཡི་གེ་དྷཱིཿ་དེའི་འོད་ཟེར་གྱི་ཚོགས་འཕྲོ་བ་རིན་པོ་ཆེའི་སྒྲོན་མ་ལྟར་དཀར་བ་རྣམ་པར་བསམ་མོ། །དེ་ནས་ཡི་གེ་དྷཱིཿ་དེའི་འོད་ཟེར་ཤིན་ཏུ་དཀར་བའི་ཚོགས་ཀྱིས་འཇིག་རྟེན་གྱི་ཁམས་
― DTG073_Page_0140 ―
[མ་དཔེ་གཟིགས་ན་འདིར་གནོན།]
ཐམས་ཅད་གསལ་བར་བྱས་པ་སྔོན་དུ་འགྲོ་བས་འཕགས་པ་འཇམ་དཔལ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དང༌། བླ་མ་རྣམས་བསྐུལ་ཏེ་སྤྱན་དྲངས་ལ་མདུན་གྱི་ནམ་མཁའི་ཕྱོགས་ལ་རྣམ་པར་བསམས་ལ་ཕྱག་བྱའོ། །དེའི་འོག་ཏུ་ཡིད་ཀྱིས་རང་བཞིན་གྱི་མཆོད་པས་མཆོད་པར་བྱ་བ་ཡིན་ལ། དེ་ལ་མཆོད་པའི་ཆོ་གའི་རིམ་པ་ནི་འདི་ཡིན་ཏེ། ཨོཾ་བཛྲ་པུཥྤེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿ་ལས་བྱུང་བའི་མེ་ཏོག་གི་མཆོད་པའི་ཚོགས་ཀྱིས་མཆོད་པར་བྱའོ། །དེ་ནས་ཨོཾ་བཛྲ་དྷཱུ་པེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿདེ་ཉིད་ལས་ཡང་དག་པར་སྤྲོས་པའི་བདུག་པའི་མཆོད་པའི་ཚོགས་ཀྱིས་མཆོད་པར་བྱའོ། །དེའི་འོག་ཏུ་ཨོཾ་བཛྲ་དཱི་པེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷཱིཿདེ་ཉིད་ལས་རིན་པོ་ཆེའི་སྒྲོན་མ་སྤྲོས་ལ་མཆོད་པར་བྱའོ། །དེ་ནས་ཨོཾ་བཛྲ་གནྡྷེ་ཧཱུཾ་ཞེས་བྱ་བའི་སྔགས་བརྗོད་ལ། ཡི་གེ་དྷིཿདེ་ཉིད་ལས་བྱུང་བའི་དྲིའི་མཆོད་པའི་སྤྲིན་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་བཛྲ་ནཻ་བི་དྱེ་ཧཱུཾ་ཞེས་བྱ་བའི་སྔགས་བརྗོད་པས། ཡི་གེ་དྷཱིཿདེ་ཉིད་ལས་རིན་པོ་ཆེ་སྣ་ཚོགས་ཀྱི་སྣོད་དུ་བཅུག་པའི་ཞལ་ཟས་རོ་མཆོག་དང་ལྡན་པའི་མཆོད་པའི་སྤྲིན་རྣམ་པ་སྣ་ཚོགས་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་སརྦ་ཤིཥྚ་པཱུ་ཛ་མེ་གྷ་པྲ་ས་ར་ས་མུ་དྲ་ཨཱཿ་ཧཱུཾ་ཞེས་བྱ་བའི་སྔགས་བརྗོད་ལ། དེ་ཉིད་ལས་རིན་པོ་ཆེ་སྣ་ཚོགས་ཀྱི་གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དང༌། བླ་རེ་ལ་སོགས་པ་དང༌། འཁོར་ལོས་སྒྱུར་བའི་རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ལྟར་མཆོད་པ་བྱས་ནས་དེ་དག་གི་སྤྱན་སྔར་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང་གསོལ་བ་གདབ་པ་དང༌། བསྐུལ་བ་དང༌། བསོད་ནམས་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་བྱས་ལ། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཏེ་ཚངས་བའི་གནས་བཞི་བསྒོམས་ནས་བྱང་ཆུབ་ཀྱི་སེམས་བརྟན་པར་བྱའོ། །དེ་ནས་ཨོཾ་སྭ་བྷཱ་བ་བི་ཤུདྡྷཿསརྦ་དྷ་རྨཱཿསྭ་བྷཱ་བ་བི་ཤུདྡྷོཉ྄ཧཾ་ཞེས་བྱ་བའི་སྔགས་ལན་བདུན་བརྗོད་ལ། འགྲོ་བ་ཐམས་ཅད་སྒྱུ་མ་དང༌། རྨི་ལམ་དང་སྨིག་རྒྱུ་ལྟ་བུར་སྟོང་པ་ཉིད་ཀྱི་རང་བཞིན་དུ་དམིགས་པར་བྱའོ།
― DTG073_Page_0141 ―
[མ་དཔེ་གཟིགས་ན་འདིར་གནོན།]
དེ་ནས་རང་གི་སྙིང་གར་ཆུད་པའི་ཡི་གེ་དྷཱིཿ་དེའི་འོད་ཟེར་གྱི་ཚོགས་སྤྲོས་པས་རང་གི་ལུས་སྟོང་པར་བལྟ་ཞིང༌། དེ་ནས་བདག་ཉིད་འཇམ་དཔལ་ཡེ་ཤེས་ཀྱི་སྐུའི་བདག་ཉིད་ཅན་ཡི་གེ་དྷཱིཿ་ཙམ་དུ་གནས་པར་བྱའོ། །ཕྱིས་ཡི་གེ་དྷཱེཿ་དེ་ཡོངས་སུ་གྱུར་པའི་ཨུཏྤལ་སྔོན་པོ་བསྒོམས་པ་ལ་དེའི་དབུས་སུ་ཡང་ཡི་གེ་དྷཱིཿ་གནས་པར་བསམ་མོ། །འོད་ཟེར་དེ་ཡིས་འགྲོ་བ་ཀུན། །ཀུན་ནས་ཡོངས་སུ་སྦྱངས་ནས་ནི། །རང་གི་འདོད་ལྷའི་གཟུགས་དག་ཏུ། །གྱུར་པ་ཨུཏྤལ་ལ་བསྟིམ་མོ། །དེ་ནས་དེ་ཡོངས་སུ་གྱུར་པ་ལས་ཤེལ་སྒོང་དག་པ་དང་འདྲ་བ། དབུ་གཅིག་པ་དང་ཕྱག་གཉིས་པ། །ཟླ་བའི་གདན་བཞུགས་ཟླ་བ་འདྲའོ། །ཟུར་ཕུད་ལྡ་པོ་དག་གི་ཐོད། །ཞི་བ་རིན་ཆེན་ཅོད་པན་འཆང༌། །རྒྱན་ཀུན་རྣམ་པར་འཛིན་འགྱུར་དང༌། །གཡས་ཀྱིས་མཆོག་སྦྱིན་གཡོན་དག་གིས། །ཨུཏྤལ་སྔོན་པོ་འཛིན་འགྱུར་པ། །ཨུཏྤལའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་ཡང་དག་པར་འཛིན་པའོ། །འཇམ་པའི་དབྱངས་སུ་བདག་ཉིད་བསྒོམས་ལ། རང་གི་ལུས་ལས་འོད་ཟེར་འཕྲོས་པས་ནམ་མཁའི་ཁམས་མ་ལུས་པ་ཁྱབ་པར་བྱའོ། །དེའི་འོག་ཏུ་ཉིད་ཀྱི་ཐུགས་ཀའི་ཟླ་བའི་དཀྱིལ་འཁོར་ལ་ཡི་གེ་དྷཱིཿ་དཀར་པོ་འབར་བའི་ཕྲེང་བ་གཏམས་པར་བསམས་ལ། དེ་ནས་རང་གི་སྙིང་ག་ལ་གནས་པའི་ཡི་གེ་དྷཱིཿ་ལས་འོད་ཟེར་གྱི་ཚོགས་ཀྱི་སྤྲིན་ཀུན་ཏུ་སྤྲོས་པ་དེས། དམ་ཚིག་སེམས་དཔའ་དང་འདྲ་བའི་ཡེ་ཤེས་སེམས་དཔའ་བསྐུལ་ནས། སྤྱན་དྲངས་པ་མདུན་གྱི་ནམ་མཁའ་ལ་རྣམ་པར་བསམས་ལ། སྔ་མ་བཞིན་ཡང་དག་པར་མཆོད་དེ། ཛཿ་ཧཱུཾ་བཾ་ཧོཿ་ཞེས་བྱ་བའི་ཡི་གེ་བཞིས་སྤྱན་དྲངས་ནས། དམ་ཚིག་སེམས་དཔའ་བདག་ཉིད་ལ་དགུག་པ་དང༌། བཅིང་བ་དང༌། དགྱེས་པ་བྱས་ལ། ཨོཾ་དྷརྨ་དྷཱ་ཏུ་བཱ་གཱི་ཤྭ་རི་སྭ་བྷཱ་བ་ཨཱཏྨ་ཀོཉ྄ཧཾ། ཞེས་ང་རྒྱལ་བྱའོ། །དེའི་རྗེས་ལ་ཡི་གེ་དྷཱིཿ་ལས་འོད་ཟེར་སྤྲོ་བ་བྱས་ལ་དེ་བཞིན་གཤེགས་པ་མདུན་གྱི་ནམ་མཁའ་ལ་རྣམ་པར་བསམས་ལ། དབང་བསྐུར་བའི་ཚིགས་སུ་བཅད་པ་འདིས་དོན་དུ་མཉེས་པར་བྱས་སྟེ། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་སྩོལ་མཛད་པ། །བདག་ལའང་བསྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ནས་
― DTG073_Page_0142 ―
[མ་དཔེ་གཟིགས་ན་འདིར་གནོན།]
དེ་བཞིན་གཤེགས་པ་དེ་དག་གི་སྐུ་ལས་བྱུང་བའི་ལོ་ཙ་ན་དང༌། མཱ་མ་ཀཱི་དང༌། གོས་དཀར་མོ་དང༌། ཏཱ་རས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་ཕྱག་ན་བསྣམས་པས། རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་པོ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང༌། །སངས་རྒྱས་ཀུན་གྱིས་སྦྱིན་པར་བྱ། །ཞེས་བྱ་བ་འདོན་ཅིང་དབང་བསྐུར་བར་བསམ་མོ། །དབང་བསྐུར་བ་རྫོགས་མ་ཐག་རིན་པོ་ཆེའི་ཅོད་པན་གྱི་སྟེང་དུ། དེ་བཞིན་གཤེགས་པ་མི་བསྐྱོད་པ་བསམས་ལ། ལུས་དང་ངག་དང་ཡིད་གསུམ་བྱིན་གྱིས་བརླབ་པའི་ཕྱིར། སྤྱི་བོ་ལ་ཡི་གེ་ཨོཾ་དཀར་པོ་ཟླ་བའི་དཀྱིལ་འཁོར་ལ་གནས་པ་དང༌། ལྐོག་མར་ཡི་གེ་ཨཱཿ་དམར་པོ་ཟླ་བའི་དཀྱིལ་འཁོར་ལ་གནས་པ་དང༌། སྙིང་གར་ཡི་གེ་ཧཱུཾ་ནག་པོ་ཟླ་བའི་དཀྱིལ་འཁོར་ལ་གནས་པ་རྣམ་པར་བཀོད་པ་ལ། སྤྲོ་བ་དང་བསྡུ་བའི་སྦྱོར་བས་ཇི་སྲིད་མངོན་སུམ་དང་འདྲ་བར་སྣང་བ་དེ་སྲིད་དུ་བསྒོམ་པར་བྱ་ཞིང༌། བསྒོམས་པས་སྐྱོ་བར་གྱུར་ན་སྔགས་བཟླ་བར་བྱའོ། །སྔགས་ཇི་ཙམ་འོས་བ་བཟླས་པ་བྱས་ནས། ཆོ་ག་ཉམས་པ་བསྐང་བར་བྱ་བའི་ཕྱིར་རྡོ་རྗེ་སེམས་དཔའི་སྙིང་པོ་ཡི་གེ་བརྒྱ་པ་ཞེས་བྱ་བའི་སྔགས་བཟླས་ནས། ཡེ་ཤེས་སེམས་དཔའ་ཡང་དག་པར་མཆོད་དེ་བསོད་ནམས་སུ་བསྔོས་ལ་གཤེགས་སུ་གསོལ་ལོ། །དེ་ལ་ཡེ་ཤེས་སེམས་དཔའ་གཤེགས་སུ་གསོལ་བའི་ཚིགས་སུ་བཅད་པ་ནི། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །མུཿ་ཞེས་བྱ་བ་འདི་ཡིན་ནོ། །དེ་ལ་རྡོ་རྗེ་སེམས་དཔའི་སྙིང་པོའི་ཡི་གེ་བརྒྱ་པའི་སྔགས་ནི། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏཥྛི་དྲྀ་ཌྷོ་མེ་བྷ་བ། SUO་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ་བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡས་ས་ཏྭ་ཨཱཿ་ཞེས་བྱ་བ་འདི་ཡིན་ནོ། །དེ་ལ་བཟླས་པའི་སྔགས་ནི། ཨོཾ་ཨཱཿ་དྷཱིཿ་ཧཱུཾ་ཞེས་བྱ་བ་འདི་ཡིན་ནོ། །ཡང་ཨོཾ་བཛྲ་ཏཱིཀྵྞ་དུཿ་ཁཙྪེད་པྲ་ཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར།
― DTG073_Page_0143 ―
[མ་དཔེ་གཟིགས་ན་འདིར་གནོན།]
ཨ་ར་པ་ཙ་ནཱ་ཡ་ཏེ་ན་མཿ་ཞེས་བྱ་བ་ནི་བཟླས་པའི་སྔགས་སོ། །འཇམ་པའི་དབྱངས་དཔའ་བོ་གཅིག་ཏུ་གྲུབ་པ་ཞེས་བྱ་བའི་སྒྲུབ་ཐབས། སློན་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀར་ཤྲཱི་ཛྙཱ་ན་དང༌། བོད་ཀྱི་ལོ་ཙཱ་བ་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།
| 
