སྐྱོ་བྲག་གནས་ཀྱི་ཆེ་བའི་ཡོན་ཏན་བརྗོད་པའི་ཉམས་མགུར་དད་འདུན་སྐྱེ་བའི་ས་བོན།
སྐྱོ་བྲག་གནས་ཀྱི་ཆེ་བའི་ཡོན་ཏན་བརྗོད་པའི་ཉམས་མགུར་དད་འདུན་སྐྱེ་བའི་ས་བོན་བཞུགས་སོ། །
ན་མོ་གུ་རུ་བྷྱཿ ཕ་སྒྲ་སྒྱུར་མར་པ་ཆོས་བློ་གྲོས། །ཐུགས་དེའི་སྲས་དར་མ་དབངཕྱུག་མཆོག །མི་བདག་གི་སྤྱི་བོའི་རྒྱན་དུ་མཆོད། །དཔལ་འབའ་རོལ་གྱི་གདན་ས་བྱིན་རླབས་ཅན། །རྫ་མེར་ཆེན་གྱི་གདན་ས་སྐུ་འབུམ་དགོན། །ས་དེར་སྐྱེས་ཀྱི་སློབ་ཕྲུག་ཏི་ཤི་རས། །ཆབ་ཟླ་ཆུ་སྔོན་མོའི་གཡས་འགྲམ་དེར། །ཆོས་ཕྱག་རྒྱ་ཆེན་པོའི་ཉམས་རྟོགས་དེ། །སེམས་ཁུ་འཕྲིག་མེད་པར་ཁོང་ནས་སྐྱེས། །དེ་སྐྱེས་བཞིན་ཉམས་ཀྱི་སྣང་བ་ལ། །ཐོ་རངས་ཀྱི་སྐར་རྒྱན་ཤར་བའི་དུས། །མ་མཛེས་གཟུགས་བུད་མེད་གོས་དཀར་ཅན། །ལག་གཉིས་ན་དཱ་དྲིལ་སིལ་སིལ་འཁྲོལ། །རྐང་གཉིས་ཀྱི་གར་སྟབས་སྣ་ཚོགས་བསྒྱུར། །གཟུགས་མཛེས་ལྡན་ཀུན་ཡིད་འཕྲོག་ནུས་ཤིག །གླུ་ཉམས་འགྱུར་ཚངས་དབྱངས་སྙན་པ་ཞིག །ཚིག་རབ་བཟང་འདི་འདྲའི་གླུ་ཆུང་ཞིག །མི་བདག་གི་རྣ་བར་ལྷང་ལྷང་ཐོས། །དེ་མཁའ་འགྲོ་མཚོ་རྒྱལ་ཨི་ཡིན་སྙམ། །ཀི་ལྷ་བསོ་ཌཱ་ཀིའི་གླུ་འདི་ཉོན། །ཕ་རྩ་གསུམ་ཡི་དམ་རྒྱལ་བའི་ལྷ། །མ་གནས་གསུམ་མཁའ་འགྲོ་དགོངས་སུ་གསོལ། །བུ་ཡར་ལྟོས་ངོ་མཚར་ལྟད་མོ་ལྟོས། །རྫ་ཆབ་བསྟི་ཞིང་སྐྱོང་དཀར་པོའི་མདུན། །ཆབ་ཟླ་ཆུ་སྔོན་མོའི་གཡས་ལོག་ན། །དཔལ་ཤཱཀ་ཐུབ་ཀྱི་ཐུགས་རྗེས་བྱིན་བརླབས་ཤིང༌། །མགོན་སྤྱན་རས་གཟིགས་ཀྱིས་ཐུགས་རྗེ་སྤྲོས། །རྗེ་པད་འབྱུང་ཆེན་པོའི་ཞབས་ཀྱིས་བཅག །སེམས་སྐྱོ་བའི་བྲག་རི་དཀར་པོ་འདི། །གནས་སེང་གེ་གནམ་མཆོང་མཚན་གསོལ་ནས། །ཡུལ་སྤྱི་འབྱམས་ཟུང་འབྲེལ་གནས་མཆོག་འདི། །བྲག་དཀར་གསལ་དར་དཀར་ཡོལ་བྲེས་འདྲ། །རྩེ་ལ་ལྷོ་སྤྲིན་འཇའ་སྤྲིན་འཁྲིགས། །ཕ་བརྒྱུད་པ་སུམ་ལྡན་བླ་མ་བཞུགས། །ལོག་ན་རྩི་ཤིང་ནགས་ཚལ་བརྗིད། །རྒྱུད་སྡེའི་ལྷ་ཚོགས་ཐེམ་མེར་བཞུགས། །ཉིན་བཞིན་དུ་རོལ་མོའི་སྙན་དབྱངས་སྒྲོགས། །མ་གནས་གསུམ་མཁའ་འགྲོའི་ཚོགས་འཁོར་བསྐོར། །བྲག་ཆུ་ཤིང་གྲམ་ཁྲོད་དུར་ཁྲོད་གནས། །མགོན་ཆོས་སྐྱོང་སྲུང་མ་ཁྲོམ་ལྟར་འཚོགས། །གནས་གཡས་ལོག་གསང་སྔགས་རྙིང་མའི་ལྗོངས། །དཔལ་རྒྱུད་སྡེ་དྲུག་གི་ལྷ་ཚོགས་བཞུགས། །རི་དཀྱིལ་རྫོང་གསང་སྔགས་གསར་མའི་ལྗོངས། །ལྷ་བདེ་དགྱེས་གསང་འདུས་ཡང་དག་བཞུགས། །གནས་གཡོན་ལོག་ལྕངལོ་ཅན་གྱི་གནས། །དཔལ་ཕྱག་རྡོར་དང་རྡོ་རྗེ་ཕུར་པ་བཞུགས། །གནས་སྤྱི་འབྱམས་ཉི་ཟླ་གསལ་ཡངས་ལ། །རྗེ་པད་འབྱུང་གྲུབ་ཆེན་བརྒྱད་ཅུའི་བསྐོར། །གནས་གསང་སྤྱོད་དག་པ་མཁའ་སྤྱོད་ལ། །ཡུམ་རྡོ་རྗེ་ཕག་མོ་མཁའ་འགྲོ་འབུམ། །བྲག་སེང་གེ་གནམ་ལ་མཆོང་འདྲ་ལ། །བཀའ་སྒྲུབ་ཆེན་བཀའ་བརྒྱད་ལྷ་ཚོགས་བཞུགས། །བྲག་དུང་དཀར་འདྲ་བའི་གཞལ་ཡས་ན། །ལྷ་ཐུགས་རྗེ་ཆེན་པོ་སངས་རྒྱས་སྟོང༌། །བྲག་པདྨ་བརྩེགས་འདྲའི་ནང་ཤེད་ན། །ཡུམ་སྒྲོལ་མ་དཀར་སྔོན་ཌཱ་ཀི་དུང༌། །རི་གསེར་བུམ་འདྲ་བའི་ནང་ལོག་ན། །དཔལ་དགོངས་པ་འདུས་པའི་ལྷ་ཚོགས་བཞུགས། །བྲག་འཁོར་བཟང་གི་སངས་རྒྱས་སྟོང་རྩ་བཞུགས། །རི་རྩེ་མོ་གདུགས་དཀར་ཕྱར་འདྲ་ལ། །མགོན་རྒྱལ་བ་རིགས་ལྔ་ཡུམ་བཅས་བཞུགས། །བྲག་རྒྱལ་མཚན་འགྲེང་འདྲའི་ཕོ་བྲང་ན། །དཔལ་འཁོར་སྡོམ་དྲུག་ཅུ་རྩ་གཉིས་བཞུགས། །སྤང་གསེར་ཉ་འགྱུར་འདྲའི་རི་ལོག་ན། །ཡུམ་རྡོ་རྗེ་ཕག་མོ་མཁའ་འགྲོ་འབུམ། །གཡའ་དཔལ་བེའུ་འདྲ་བའི་རེ་མིག་ལ། །སྐྱབས་ཉེ་བའི་སྲས་ཆེན་བརྒྱད་པོ་ཡོད། །བྲག་རི་ལོག་ནོར་བུ་འབར་འདྲ་ལ། །མགོན་རྒྱལ་བ་རིག་ས་ གསུམ་མགོན་པོ་བཞུགས། །དེ་ཆ་ལུགས་བཀྲ་ཤིས་རྟག་བརྒྱད 
་ཚུལ། །རི་རྩེ་མོ་བྱ་ཁྱུང་ལྡིང་འདྲའི་གནས། །ཕ་བཀའ་བརྒྱུད་བླ་མ་སྤྲིན་ལྟར་འཁྲིགས། །རྗེ་ཨོ་རྒྱན་རྗེ་འབངས་ཉེར་ལྔ་བཞུགས། །ས་སེང་གེ་འདྲ་བའི་རི་ལོག་ལ། །དཔལ་ཐུབ་པའི་གནས་བརྟན་ཉན་རང་འཁོར། །ཕྱི་བྲག་དཀར་རྩི་ཤིང་སྟུག་པོའི་ཆུལ། །ནང་རྩ་གསུམ་ལྷ་ཚོགས་ཁྲ་ཐེམ་གསལ། །ཕྱི་གཡའ་སྤང་བྲག་རོང་ན་བུམ་འཐིབས། །ནང་རྒྱུད་སྡེ་བཞི་དྲུག་ཐེམ་མེར་གང༌། །ཕྱི་བྲག་རི་རླུང་ནག་འུར་སྒྲ་སྒྲོགས། །ནང་དུར་ཁྲོད་རབ་འཇིགས་ཆོས་སྐྱོང་འཚོགས། །ཕྱི་སྤང་ལྗོང་ཤིང་རྩི་མེ་ཏོག་བཀྲ། །དཔལ་ཆེན་པོའི་བཀའ་ཉན་རི་རབ་རྡུལ། །རྡོ་ཐེ་བོང་ཙམ་ལ་དཔའ་བོ་རེ། །ཤིང་གཡགརྔ་ཙམ་ལ་མཁའ་འགྲོ་རེ། །གནས་ས་སྤྱོད་དག་པ་མཁའ་སྤྱོད་གནས། །ཕ་རྩ་གསུམ་འཇའ་བཞིན་འཁྲིགས་པའི་ལྗོངས། །མ་གནས་
གསུམ་སྤྲིན་ལྟར་འདུ་བའི་གནས༌། །མགོན་ཆོས་སྐྱོང་ཁྲོམ་ལྟར་འཁྲིགས་པའི་གུར། །བྲན་སྡེ་བརྒྱད ་རྡུལ་བཞིན་འཚུབས་པའི་མཁར། །མི་ལས་དག་ངོ་མཚར་སྐྱེ་བའི་གནས། །བུ་དད་ལྡན་ཉམས་རྟོགས་འཁྲུངས་པའི་ཡུལ། །དཔལ་ཕུན་ཚོགས་ལྔ་ལྡན་རྒྱལ་བའི་ཞིང༌། །སྐུ་རང་བྱུང་དང་ཞབས་རྗེས་ཕྱག་མཚན་བཀྲ། །གསུང་ཡིག་འབྲུ་གཟུངས་སྔགས་སྙིང་པོ་ཤར༌། །ཐུགས་རིང་བསྲེལ་མཆོད་རྟེན་བརྟེན་གྱི་གཟུགས། །བྱ་འདབ་ཆགས་ཐམས་ཅད་དཔའ་བོ་སྟེ། །དེར་རི་དྭགས་སྣ་ཚོགས་དཔའ་མོའི་སྡེ། །ངོགས་གཅན་གཟན་སྣ་ཚོགས་གནས་སྲུང་ཡིན། །གནས་འབྲེལ་བ་ཐོག་ཚད་བྱང་ཆུབ་བགྲོད། །ཡུལ་དེར་སྐྱེས་འགྲོ་བ་ཚོགས་རེ་བསགས། །དོན་ངེས་པ་ལྔ་ལྡན་མཁའ་སྤྱོད་ཡིན། །གནས་གཞན་གྱི་འགྲན་ཟླ་ཡེ་ནས་མེད། །མི་ང་ཡི་སྣང་སེམས་ཤིན་ཏུ་སྐྱོ། །ཤར་རི་བོ་ཏ་ལའི་ཕོ་བྲང་དང༌། །ལྷོ་དཔལ་གྱི་རི་དང་ཙ་རི་ཏྲ། །ནུབ་གངས་དཀར་ཏི་སེའི་གནས་མཆོག་དང༌། །བྱང་ལ་ཕྱི་ཆུ་བར་དགོན་གནས་དང༌། །དོན་ཁྱད་པར་མེད་པ་ངོ་བོ་གཅིག །གནས་འདི་ལ་འབྲེལ་བ་ཕྱག་བསྐོར་དང༌། །ངག་དད་འདུན་གྱིས་གསོལ་འདེབས་བསྟོད་གསོལ་དང། །ཡིད་མ་ཡེངས་རྩེ་གཅིག་མོས་གུས་དང༌། །མ་ཎི་དང་ཚ་ཚ་དར་ལྕོག་སོགས། །རེ་རེ་ལ་བྱེ་བ་འབུམ་འགྱུར་ཡོད། །བུ་དད་ལྡན་འདུན་པའི་རྟེན་མཆོག་ཡིན། །རབ་དག་པ་མཁའ་སྤྱོད་ཞིང་ཁམས་བགྲོད། །འབྲིང་མི་ལུས་རྟེན་བཟང་ངེས་པར་འཐོབ། །ཐ་མ་ངན་སོང་སྐྱེ་སྒོ་ཆོད་པར་ངེས། །ཚིག་འདི་སྐད་ཀུན་གྱི་རྣ་བར་ཤོད། །དཔལ་བཀྲ་ཤིས་ཟླ་རྒྱས་ཡར་ངོའི་ཟླ། །གནས་ཁམས་གསུམ་ཡོངས་ལ་ཁྱབ་པར་ཤོག །གནས་དག་པ་རབ་འབྱམས་ཆེན་མོ་ཡི། །མ་འགྲོ་དྲུག་མཁའ་མཉམ་འབྲེལ་ཐོག་ཀུན། །དོན་འགྲོ་དོན་ཕྱོགས་མེད་འབྱུང་བར་ཤོག །ཅེས་ཚིག་རྐང་བརྒྱ་དང་བརྒྱད་ཀྱི་མགུར་མ་རྡོ་རྗེའི་ཤོ་ལོ་ཀ་ཉེར་བདུན་གྱི་སྨྲས་པ་འདི་ཉམས་དང་རྨི་ལམ་འདྲེས་པའི་མཚམས་ནས་འདི་ལྟར་ཐོལ་བྱུང་དུ་སྨྲ་བའི་ཌཱཀྐི་ནི་འཇའ་ཡལ་བ་བཞིན་མི་སྣང་བར་གྱུར་ཏོ། །དེའི་སྐབས་རང་ཅག་ཀྱང་ཉིན་དུས་དང་མི་འདྲ་བའི་སེམས་ལ་དགའ་སྤྲོ་ཆེན་པོ་བྱུང་ཞིང་། དེ་ལོ་དབྱར་མཐར་ཚེས་བཅུ་ལ་གནས་འབྲེལ་དུ་མི་འགྲོ་བའི་ཐབས་མེད་སྙམ་ནས་བྱོན་སྐབས། གོང་གི་ཚིག་གི་ནང་ལས་ལྷག་པའི་མཐོང་སྣང་དཔག་ཏུ་མེད་པར་བྱུང་ཞིང་། ནམ་མཁའ་ཐམས་ཅད་ནི་འཇའ་ཟེར་ཁྲ་ལམ་མེ། རི་བྲག་ས་རྡོ་ཐམས་ཅད་ནི་ཡི་དམ་དཔའ་བོ་མཁའ་འགྲོ་ཉི་ཟེར་གྱི་རྡུལ་བཞིན། ས་གཞི་ཐམས་ཅད་དཔའ་བོ་མཁའ་འགྲོ་ཆོས་སྐྱོང་མ་མགོན་ལྕམ་དྲལ་འགྲོ་བའི་ལམ་མི་རྙེད་པའི་ཁྲོམ་བཞིན་ཚོགས་ཤིང་། བྲག་ས་རྡོ་རྩྭ་ཕོ་ཐུར་མོ་ཐུར་རེ་རེ་ལའང་སངས་རྒྱས་ཡི་དམ་ཞི་ཁྲོའི་སྐུ་གཟུགས་དེ་དང་ཡིག་འབྲུ་གཟུངས་སྔགས་མཆོད་རྟེན་རིང་བསྲེལ་གྲངས་དང་བརྗོད་ལས་འདས་པར་སྣང་ཞིང་། སྒྲ་ཐམས་ཅད་མ་ཎི་བཛྲའི་རང་སྒྲ་འུ་རུ་རུ་དགེ་འདུན་སྟོང་གིས་ཚོགས་པ་འདྲ་བའི་སྒྲ་སྒྲོགས་ཤིང་གོམ་པ་བགྲོད་པ་ལ་རྡོག་པ་སྤོ་ཐབས་མེད་པ་བྱུང་ཞིང་། ཉམས་སྤྲོ་ཤེས་པ་འཕྱོ་ཞིང་དགའ་སྤྲོ་དེ་སྔོན་ཡོང་མ་མྱོང་བ་བྱུང་ཞིང་དེའི་ནུབ་མོ་ཚེས་བཅོ་ལྔ་རང་ཉལ་བའི་བསམ་གཞིགས་བྱས་ནས། གནས་འདི་བདག་ཏུ་བཟུང་བའི་ལས་ཅན་སུ་ཡིན་ཨང་སྙམ་ཚེ། རྐྱེན་མེད་པའི་ནམ་མཁའ་ནས། སྒྲ་གཅིག་བྱུང་སྣང་ཐོབ་པར། གནས་འདི་ཡི་སྲུང་མ་གྲངས་མང་སྟེ། གསང་སྔགས་རྙིང་མའི་ཚུལ་དུ་ནང་གི་བཀའ་སྲུང་ཨེ་ཀ་ཙ་ཏྲི། ཕྱི་ཡི་སྲུང་མ་དམ་ཅན་རྡོར་ལེགས། གསང་བའི་བཀའ་སྲུང་མཁའ་འགྲོ་སེང་གདོང་མ། གསང་སྔགས་གསར་མའི་དཀྱིལ་འཁོར་ཡིན་པས། ནང་གི་སྲུང་མ་མགོན་པོ་ཕྱག་བཞི། ཕྱི་ཡི་བཀའ་སྲུང་ཀེང་རུས་དུར་བདག གསང་བའི་སྲུང་མ་མགོན་པོ་བྱ་རོག་མཚན་ཅན། ཆེ་མཆོག་ཧེ་རུ་ཀའི་ཕོ་བྲང་ཡིན་ཕྱིར། ཕྱི་ཡི་བཀའ་སྲུང་དབང་ཕྱུག་ཉེར་བརྒྱད། ནང་གི་བཀའ་སྲུང་དཔལ་མགོན་མ་ནིང་། གསང་བའི་བཀའ་སྲུང་ཏྲཀྴད་ནག་པོ། སྤྱི་ཁྱབ་གནས་ཀྱི་སྲུང་མ་ཕྱི་ཡི་སྲུང་མ་དགེ་བསྙེན་སྦ་བ་ནག་པོ། ནང་གི་བཀའ་སྲུང་ཞིང་སྐྱོང་མེ་ལོང་སེང་ཕྲུག གསང་བའི་བཀའ་སྲུང་གཟའ་བདུད་རཱ་ཧུ་ལ་ཡིན་ཕྱིར་དྲག་རྩལ་ཤིན་ཏུ་ཆེ། དམ་ལྡན་རྣམས་བུ་བཞིན་སྐྱོང་དཀར་པོ་གནས་འཁོར་སྲུང་མ། ཀླུ་བདུད་རི་དམར་ལྕམ་བདུད་དེ། བཀའ་སྲུང་སྤུ་གྲི་མཆེད་གསུམ་རྣོ་མྱུར་ཐོག་ལྟར་འབེབས་ནུས་པ་ཡིན།