དུར་ཁྲོད་དུ་བམ་རོ་བསྐྱལ་བ་ལ་བརྟེན་ནས་མི་རྟག་པའི་བསྐུལ་མར་ངོ་སྤྲོད་པ།
ཟབ་ཆོས་ཞི་ཁྲོ་དགོངས་པ་རང་གྲོལ་ལས། ངོ་སྤྲོད་ཐམས་ཅད་ཀྱི་སྔོན་འགྲོ་དུར་ཁྲོད་དུ་བམ་རོ་བསྐྱལ་བ་ལ་བརྟེན་ནས་མི་རྟག་པའི་བསྐུལ་མར་ངོ་སྤྲོད་པ་བཞུགས་སོ། །
ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ། །ལས་དང་པོ་བས་སྐྱོ་ཤས་བསྐྱེད་པ་ལ། དུར་ཁྲོད་དུ་བམ་རོ་བསྐྱལ་བ་ལ་བརྟེན་ནས་མི་རྟག་པའི་བསྐུལ་མར་ངོ་སྤྲད་པ་ནི། ནགས་སམ་དུར་ཁྲོད་ལ་སོགས་པར་ཤིན་ཏུ་དབེན་པ་ལ། ཉིན་མོའམ། དེ་མ་ཡིན་ན་འགོལ་བའི་ས་རུ། ནུབ་མོར་ཁྲིད་ཞུ་རྣམས་ཚོགས་པ་ལ། དབུས་སུ་སྟེགས་བུའི་སྟེང་དུ་བྲ་ཟན་ནམ། ཁམ་ས་ལས་བཟོས་པའི་གཟུགས་བརྙན། རོའི་ཤ་གདན་སྟེང་དུ་བམ་རོ་དང་། རོ་མང་པོ་གཅལ་དུ་བཀྲམ་པའམ། གཅན་ཟན་གྱི་གཟུགས་བརྙན་སྣ་ཚོགས་བས་གང་བ། རོ་ཁུར་ནས་དེར་བསྐྱལ་བའི་གཟུགས་བརྙན་མང་པོ་འགྲོ་བའི་ཚུལ་དང་། བྱ་རྒོད་ལ་སོགས་པ་འདབ་ཆགས་ཀྱི་གཟུགས་བརྙན་མང་པོས་རོ་ལ་ཟ་བའི་ཚུལ་དང་། རོ་བསྐྱལ་བའི་ལམ་གྱི་གཡས་གཡོན་དང་། དུར་ཁྲོད་ཀྱི་མཐའ་སྐོར་དང་། ཟུར་གཅིག་ཏུ་དུར་ཁྲོད་རྙིང་བ་རུལ་བ་བམ་པ་དམ་དུམ་མང་པོ་ཁྲོལ་ལེ་བའི་མཐའ་མ་རྣམས་སུ། འཇག་མའི་སྐྱིལ་ཆུང་བཟོས་པའི་ནང་དུ། སྒོམ་ཆེན་པའི་གཟུགས་བརྙན་བཞུགས་སུ་བཅུག །དེ་ནས་བླ་མས་ཁྲིད་ཞུ་མི་རྣམས་ལ། སྐྱབས་འགྲོ་སེམས་བསྐྱེད་ལ་སོགས་སྔོན་དུ་བཏང་ལ། དལ་འབྱོར་རྙེད་དཀའ་དང་། ལས་རྒྱུ་འབྲས་དང་། འཁོར་བའི་ཉེས་དམིགས་ལ་སོགས་པ་མང་དུ་
གསུངས༔ད་འཆི་བ་མི་རྟག་པ་བསྒོམ་པ་ལ། ཕྱི་སྣོོད་ཀྱི་འཇིག་རྟེན་མི་རྟག་པ་དང་། ནང་བཅུད་ཀྱི་སེམས་ཅན་མི་རྟག་པའོ། །ཕྱི་སྣོད་ཀྱི་འཇིག་རྟེན་མི་རྟག་པ་ནི། མེ་བདུན་ཆུ་གཅིག །ཆུ་བདུན་རླུང་གཅིག་ལ་སོགས་པས་སྣོད་བཅུད་ཐམས་ཅད་མི་རྟག་པར་མྱུར་དུ་སྟོང་པར་འགྲོ་རྒྱུ་ཡིན་ཅིང་། ཁྱད་པར་དུའང་རང་རེ་བོད་དུ་མི་རྟག་པ་བསྒོམས་པ་དང་། རྒྱ་གར་དུ་མི་རྟག་པ་བསྒོམ་པའོ། །བོད་དུ་མི་རྟག་པ་བསྒོམ་པ་ལ། ནམ་ཟླ་དུས་བཞི་འདི་འགྱུར་ལྡོག་ལ་བརྟེན་ནས་མི་རྟག་པ་བསྒོམས་ཏེ། དེ་ཡང་ནམ་ཟླ་དཔྱིད་ཀའི་དུས་སུ། རི་ལུང་ཐམས་ཅད་དྲོ་ཤིག་གིས་འོང་། དེ་ཡང་རྟག་གམ་སྙམ་ན་མི་རྟག་སྟེ། དབྱར་གྱི་དུས་སུ་རི་ལུང་ཐམས་ཅད་སྔོ་ཕྱུར་གྱིས་འགྲོ། དེ་ཡང་རྟག་གམ་སྙམ་ན་མི་རྟག་པར་འགྱུར་ཏེ། སྟོན་གྱི་དུས་སུ་རི་ལུང་ཐམས་ཅད་ཁམ་སྤུང་གིས་འགྲོ། དེ་ཡང་རྟག་གམ་སྙམ་ན་མི་རྟག་པར་འགྱུར་ཏེ། དགུན་གྱི་དུས་སུ་རི་ལུང་ཐམས་ཅད་སྐྱ་ཁྲོག་གིས་འགྲོ་བ་ལ་གཟིགས་ཤིག །ཕྱིའི་ནམ་ཟླ་ཡང་། འདི་ལྟ་བུའི་འགྱུར་ལྡོག་གི་རང་བཞིན་ཅན་ནོ། །ནང་བཅུད་ཀྱི་སེམས་ཅན་ཡང་མི་རྟག་པར་འགྱུར་ཞིང་འགྲོ་སྟེ། རང་ཅག་རྣམས་ཀྱི་ཚེ་ལ་ཡང་སྐད་ཅིག་གིས་མི་རྟག་པར་འགྱུར་ཞིང་འགྲོ་བར་བསྒོམ་པ་དང་། གཞན་ཡང་རང་གི་ཡུལ་གྲོང་། ཁྱིམ་མཚེས། སྤུན་ཟླ། གྲོགས་རྒན་གཞོན། དར་མ། ཕ་མ། བུ་སྲིང་ལ་སོགས་པ་ཐམས་ཅད་འཆི་བ་ལ་བསམ་ཞིང་། སེམས་ཅན་ཐམས་ཅད་ཀྱང་འདི་ལྟ་བུའི་ཆོས་ཅན། འདི་ལྟ་བུའི་རང་བཞིན་ཅན། ཆོས་ཉིད་འདི་ལྟ་བུ་ལས་མ་འདས་པ་ཡིན་ཏེ། བདག་རང་ལ་ཡང་ཅིས་ཀྱང་འདི་ལྟ་བུ་ཞིག་འོང་ངེས། དེ་ཙ་ན་དམ་པའི་ཆོས་མ་གཏོགས་པ། བསགས་པའི་ནོར་གྱིས་ཀྱང་ཕན་པར་མི་འདུག །འདུས་པའི་གཉེན་གྱིས་ཀྱང་ཕན་པར་མི་འདུག །མཛའ་བའི་གྲོགས་ཀྱིས་ཀྱང་ཕན་པར་མི་འདུག །གཅེས་པའི་
ལུས་འདིས་ཀྱང་ཕན་པར་མི་འདུག །གཞན་དག་གང་དང་གང་གིས་ཀྱང་ཕན་པ་མི་འདུག །སྐྱོབ་པར་ཡང་མི་འདུག་བསམ་ལ། འཇིགས་པས་སྐྲག་པ་ཡིད་དབྱུང་བའི་གནས་སུ་སྒོམ་པ་ཡིན་ནོ། །རྒྱ་གར་དུ་མི་རྟག་པ་བསྒོམ་པ་ལ་གསུམ་སྟེ། ལྷོ་སྒོ་ལ་བརྟེན་ནས་མི་རྟག་པ་བསྒོམ་པ་དང་། དུར་ཁྲོད་ལ་བརྟེན་ནས་མི་རྟག་པ་བསྒོམ་པ་དང་། ཀེང་རུས་ལ་བརྟེན་ནས་མི་རྟག་པ་བསྒོམ་པའོ། །དང་པོ་ལྷོ་སྒོ་ལ་བརྟེན་ནས་མི་རྟག་པ་བསྒོམ་པ་ནི། འོ་སྐོལ་བོད་ཀྱི་གྲོང་ཁྱེར་ཐོ་རེ་ལང་ངེ་བ་འདི་ལྟ་བུ་མ་ཡིན་པས། རྒྱ་གར་ལ་གྲོང་ཁྱེར་ཆེན་པོ་བསམ་གྱིས་མི་ཁྱབ་པ་འབུམ་ཚོ་སུམ་ཅུ་སོ་དྲུག་ཙམ་ཡོད་པའི་གྲོང་ཁྱེར་ལ་རྒྱུ་སྲང་ཆེན་པོ་བཞི་ཡོད་དེ། ཕྱོགས་བཞིར་སྒོ་བཞི་ཡོད། ཤར་སྒོ་དང་ནུབ་སྒོ་བྱང་སྒོ་གསུམ་ལ་ཚོང་དང་སོ་ནམ་དོན་གཉེར་དང་རྒྱུ་འགྲུལ་བྱེད་པའི་སྒོ་ཡིན་ནོ། །ལྷོ་སྒོ་ལ་ནི། ལྷོ་ཕྱོགས་སུ་གཤིན་རྗེ་གནས་པའི་ས་ཡིན་པས། མི་རོ་བསྐྱལ་བ་མིན་པ། གཞན་གྱི་རྒྱུ་འགྲུལ་མི་བྱེད་པ་ཡིན། གྲོང་ཁྱེར་ཆེ་བ་དང་། ན་ཚ་མོད་པའི་ཤུགས་ཀྱིས་མི་རོ་བསྐྱལ་བ་ལ་དཔེར་ན། གྲོང་མོ་ཆེར་ནམ་ཟླ་དཔྱིད་ཀའི་དུས་སུ་ས་ལུད་བསྐྱལ་བ་བཞིན་དུ། ན་རེ་བྲིང་ངེ་བ་རྒྱུན་མི་ཆད་པར་འོང་བར་འདུག །དེར་ཡང་རོ་བསྐྱལ་བ་ལ་ཤིང་གཉའ་ཤིང་འདྲ་བ་གཉིས་ཀྱི་སྟེང་དུ་རོ་དེ་བཞག་ནས། སྣ་ལ་རྔ་མ་དག་གི་ཐག་པ་གཅིག་བརྒྱུས་ལ། མི་གཉིས་ཀྱིས་བཏེགས་ནས། གང་ཤི་བའི་མིང་ནས་འབོད་ཅིང་། ཀྱེ་ཧུད་ཕ། ཀྱེ་ཧུད་མ། ཅེས་པ་ལ་སོགས་པ་བརྗོད་ཅིང་དུར་ཁྲོད་དུ་རོ་བསྐྱལ་བ་ཡིན་པར་འདུག །དཔེ་དེ་བཞིན་དུ། ལྷོ་སྒོ་ན་རོ་བསྐྱལ་བ་དང་། དུར་ཁྲོད་ཀྱི་ཚོགས་འདི་རྣམས་ལ་ལེགས་པར་གཟིགས་ཤིག །ཅེས་བརྗོད་ཅིང་། ཤིང་ཐུར་རིང་པོས་གཟུགས་བརྙན་རྣམས་ངོས་ལེགས་པར་བསྟན། དེ་ལ་འདིར་ཡང་མི་རྟག་པ་སྒོམ་པའི་སྒོམ་ཆེན་དཔོན་སློབ་འདི་རྣམས།
ལྷོ་སྒོའི་རྒྱ་སྲང་གཡས་ གཡོན་རྣམས་སུ། འཇག་མའི་སྐྱིལ་ཆུང་འདི་དག་གི་ནང་དུ 
་སྒོམ་ཆེན་པ་དཔོན་སློབ་རྣམས་ཀྱིས། མི་རོ་བསྐྱལ་བ་འདི་རྣམས་ལ་གཟིགས་ཤིང་། སེམས་ཅན་ཐམས་ཅད་ཀྱང་འདི་ལྟ་བུའི་རང་བཞིན་ཅན། འདི་ལྟ་བུའི་ཆོས་ཅན། ཆོས་ཉིད་འདི་ལྟ་བུ་ལས་མ་འདས་པ་ཡིན་ཏེ། བདག་ཀྱང་རང་ལ་ཡང་འདི་ལྟ་བུ་ཞིག་ཅིས་ཀྱང་འོང་ངེས་སོ། །དེ་ཙ་ན་དམ་པའི་ཆོས་མ་གཏོགས་པ། བསགས་པའི་ནོར་གྱིས་ཀྱང་ཕན་པར་མི་འདུག །འདུས་པའི་གཉེན་གྱིས་ཀྱང་ཕན་པར་མི་འདུག །མཛའ་བའི་གྲོགས་ཀྱིས་ཀྱང་ཕན་པར་མི་འདུག །གཅེས་པའི་ལུས་འདིས་ཀྱང་ཕན་པར་མི་འདུག །གཞན་དག་གིས་ཀྱང་ཕན་པར་མི་འདུག །སྐྱོབ་པར་མི་འདུག་བསམས་ལ། འཇིགས་ཤིང་སྐྲག་པས་ཡིད་དབྱུང་བའི་གནས་སུ་བསྒོམ་པར་བྱའོ། །དེ་དག་ནི་ལྷོ་སྒོ་ལ་བརྟེན་པའི་མི་རྟག་པ་བསྒོམ་པའོ། །གཉིས་པ་དུར་ཁྲོད་ལ་བརྟེན་ནས་མི་རྟག་པ་བསྒོམ་པ་ནི། རང་ཤར་གྱི་རྒྱུད་ལས། དུར་ཁྲོད་དག་ཏུ་སོང་ནས་ནི། །དང་པོ་རྣམ་པར་བམ་པར་བསྒོམ། །དེ་ན་རྣམ་པར་སྔོ་བར་བསྒོམ། །དེ་ནས་རྣམ་པར་ཟོས་པར་བསྒོམ། །དེ་ནས་རྣམ་པར་འབུ་ཞུགས་བསྒོམ། །ཞེས་གསུངས་པ་ལྟར། མི་རྟག་པ་སྒོམ་པའི་སྒོམ་ཆེན་པ་དཔོན་སློབ་འདི་རྣམས་ཀྱིས་དུར་ཁྲོད་ཆེན་པོ་འདིར་ཕེབས་ནས། འཇག་མའི་སྐྱིལ་ཆུང་འདི་རྣམས་སུ་བཞུགས་ཤིང་། སྐྱིལ་པོའི་སྒོ་རྣམས་དུར་ཁྲོད་ལ་བསྟན་ནས། རོ་འདི་རྣམས་ལ་གཟིགས་ཤིང་། ལ་ལ་ནི་ཤི་མ་ཁད་ཀྱི་རོ། ལ་ལ་ནི་ཞག་གཉིས་གསུམ་ཙམ་སོང་བའི་རོ་རྣམ་པར་བམ་པ་དང་། ལ་ལ་ནི་ཤི་ནས་ཞག་འགའ་ཡང་སོང་བའི་རོ་སྔོ་བམ་དུ་སོང་བ། ལ་ལ་ནི་ཤི་ནས་ཞག་མང་དུ་སོང་ནས་གཅན་གཟན་རྣམས་ཀྱིས་ཟ་འཕྲོ་ལིང་ངེ་བ། ལ་ལ་ནི་ཤི་ནས་ཟླ་བ་གཅིག་ཙམ་སོང་ནས། ཁོག་པར་འབུ་
ཞུགས་ནས་ཕུང་པོ་འབུས་གཡེངས་བ་དང་། འདབ་ཆགས་སྣ་ཚོགས་པ་འདི་དག་དང་། སྟག་གཟིག་ལ་སོགས་པའི་གཅན་གཟན་སྣ་ཚོགས་པ་འདི་དག་གིས། མི་རོ་ཕར་འཐེན་ཚུར་འཐེན་བྱེད་པ་འདི་དག་རྣམས་ལ་གཟིགས་པ་ལགས། སྐབས་འདིར་གཟུགས་བརྙན་རྣམས་ངོ་ལེགས་པར་བསྟན་ཏེ། སེམས་ཅན་ཐམས་ཅད་ཀྱང་འདི་ལྟ་བུའི་རང་བཞིན་ཅན། འདི་ལྟ་བུའི་ཆོས་ཅན། འདི་ལྟ་བུ་ུལས་མ་འདས་པ་ཡིན་ཏེ། བདག་རང་ལ་ཡང་འདི་ལྟ་བུ་ཞིག་འོང་ངེས། དེ་ཙ་ན། དམ་པའི་ཆོས་མ་གཏོགས་པ་བསགས་པའི་ནོར་གྱིས་ཕན་པར་མི་འདུག །འདུས་པའི་གཉེན་གྱིས་ཕན་པར་མི་འདུག །མཛའ་པའི་གྲོགས་ཀྱིས་ཕན་པར་མི་འདུག །གཅེས་པའི་ལུས་འདིས་ཀྱང་ཕན་པར་མི་འདུག །གཞན་དག་གང་གིས་ཀྱང་ཕན་པར་མི་འདུག །སྐྱོབ་པར་མི་འདུག་བསམ་ལ། འཇིགས་ཤིང་སྐྲག་པས་ཡིད་དབྱུང་བའི་གནས་སུ་བསྒོམ་པ་ཡིན་ནོ། །དེས་དུར་ཁྲོད་ལ་བརྟེན་ནས་མི་རྟག་པ་བསྒོམ་པའོ། །གསུམ་པ་ཀེང་རུས་ལ་བརྟེན་ནས་མི་རྟག་པ་བསྒོམ་པ་ནི། མི་རྟག་པ་སྒོམ་པའི་སྒོམ་ཆེན་པ་དཔོན་སློབ་རྣམས་ཀྱིས། དུར་ཁྲོད་རྙིང་པ་རྣམས་སུ་ཕྱིན་ནས། འཇག་མའི་སྐྱིལ་པོ་དུར་ཁྲོད་ལ་ཁ་བསྟན་ནས་རོའི་རུས་པ་རྣམས་ལ་གཟིགས་ཤིང་། ལ་ལ་ནི་ཤ་ཟོས་མ་ཁད་ཀྱི་རུས་པ་སྣུམ་ཙེ་རེ་བ། ལ་ལ་ཤ་རུས་བྲལ་ནས་ཟླ་བ་མང་དུ་སོང་བའི་རུས་པ་དཀར་སང་སང་བ། ལ་ལ་ནི་ལོ་གཅིག་གཉིས་ཙམ་སོང་བའི་རུས་པ་སྔོ་སང་སང་བ། ལ་ལ་ནི་ལོ་མང་དུ་སོང་བའི། རུས་པ་ཐི་བྱའི་མདོག་ལྟ་བུ་སོང་བ་རྣམས་ལ་གཟིགས་ཤིག །ཅེས་རུས་པ་བསྟན་ཅིང་། སེམས་ཅན་ཐམས་ཅད་ཀྱང་འདི་ལྟ་བུའི་རང་བཞིན་ཅན། འདི་ལྟ་བུའི་ཆོས་ཅན། ཆོས་ཉིད་འདི་ལྟ་བུ་ལས་མ་འདས་པ་ཡིན། བདག་རང་ཡང་འདི་ལྟ་བུ་ཞིག་ཅེས་ཀྱང་འོང་བར་ངེས། དེ་ཙ་ན་དམ་པའི་
ཆོས་མ་གཏོགས་པ། བསགས་པའི་ནོར་གྱིས་ཕན་པར་མི་འདུག །འདུས་པའི་གཉེན་གྱིས་ཀྱང་ཕན་པར་མི་འདུག །མཛའ་བའི་གྲོགས་ཀྱིས་ཀྱང་ཕན་པར་མི་འདུག །གཅེས་པའི་ལུས་འདིས་ཀྱང་ཕན་པར་མི་འདུག །གཞན་དག་གང་གིས་ཀྱང་ཕན་པར་མི་འདུག །སྐྱོབ་པར་མི་འདུག་བསམ་ལ། འཇིགས་ཤིང་སྐྲག་པས་ཡིད་དབྱུང་བའི་གནས་སུ་བསྒོམ་པ་ཡིན་ནོ། །དེ་དག་ནི་ཀེང་རུས་ལ་བརྟེན་ནས་མི་རྟག་པ་སྒོམ་པའོ། །དོ་ནུབ་ཀྱི་སྐབས་སུ། ས་ཕྱོགས་འདི་ཡང་རྒྱ་གར་གྱི་ས་ཕྱོགས། གནས་འདི་ཡང་དུར་ཁྲོད་ཆེན་པོ་བསིལ་བའི་ཚལ་ཡིན་སྙམ་དུ་བསྒོམ། དུར་ཁྲོད་འདིར་མི་རོ་བསྐྱལ་བ་ལ་ན་རེ་བྲེང་ངེ་བ་རྒྱུན་མི་ཆད་པར་འོང་བ་ལགས་སོ། །དེ་སྐད་བརྗོད་མ་ཐག་ཏུ། ཕྱི་རོལ་ན་མི་གཉིས་སམ་གཅིག་གིས། བམ་རོ་ཁུར་བའི་ཚུལ་དུ་བྱ། མི་ལག་གིས་ལྕོགས་ན། ལ་ལས་གཅོད་པའི་ཚུལ་དང་། ལ་ལས་དུར་བྱའི་ཚུལ་དང་། ལ་ལས་རོལ་མོ་དང་རྐང་གླིང་འབུད་པ་ལ་སོགས་པ་ཤིན་ཏུ་སྐྱི་གཡའ་བའི་ཚུལ་དུ་བྱས་ནས། གསོལ་འདེབས་ཅི་རིགས་པ་བྱ། དེར་རོ་བསྐྱལ་ནས། བསྐོར་བ་ལན་གཅིག་གཉིས་ཙམ་སོང་བ་དང་། ཡང་བླ་མས་འདི་སྐད་གསུང་། འོ་སེམས་ཅན་ཐམས་ཅད་འདི་ལྟ་བུའི་རང་བཞིན་ཅན། འདི་ལྟ་བུའི་ཆོས་ཅན། ཆོས་ཉིད་འདི་ལྟ་བུ་ལས་མ་འདས་པ་ཡིན་ནོ། །འདི་རྣམས་ནི་སྔ་དྲོ་འགྲོ་བའི་ཚོད་ཙམ་ཡིན། རང་ཅག་རྣམས་ནི་ཕྱི་དྲོ་འགྲོ་བའི་ཚོད་ཙམ་ཡིན་ནོ། །ངེད་རང་རྣམས་ལའང་འདི་ལྟ་བུ་ཞིག་ཅིས་ཀྱང་འོང་ངེས། དེ་ཙ་ན་བསགས་པའི་ནོར་གྱིས་ཀྱང་ཕན་པར་མི་འདུག །འདུས་པའི་གཉེན་གྱིས་ཀྱང་ཕན་པར་མི་འདུག །མཛའ་བའི་གྲོགས་ཀྱིས་ཀྱང་ཕན་པར་མི་འདུག །གཅེས་པའི་ལུས་འདིས་ཀྱང་ཕན་པར་མི་འདུག །ཆོས་མ་གཏོགས་པ་གཞན་དག་གང་དང་གང་གིས་ཀྱང་ཕན་པར་མི་འདུག །སྐྱོབ་
པར་མི་འདུག་བསམ་ལ། འཇིགས་ཤིང་སྐྲག་པས་ཡིད་དབྱུང་བའི་གནས་སུ་བསྒོམ་པ་གལ་ཆེ་བ་ཡིན་ཅིང་། དེ་ལྟ་ན་དགེ་བ་ལ་འབད་སྡིག་པ་ལ་འཛེམ། སྙོམ་ལས་དང་ལེ་ལོ་སྤངས་ནས། ཡེངས་མེད་བརྩོན་འགྲུས་ཀྱི་ལྕག་གིས་བྲབ་ནས། ཐར་པ་ཆེན་པོའི་གྲོང་མཆོག་ཏུ་སླེབ་པར་མཛོད་ཅིག །ཅེས་གསུངས་སོ། །དེ་ནས་བམ་རོ་ཕྱིར་བསྐྱལ་གཟུགས་བརྙན་རྣམས་བསྡུ་ཞིང་། བསྔོ་བ་དང་སྨོན་ལམ་རྣམ་དག་བྱའོ། །དེ་དག་ནི་ལས་དང་པོ་པ་སྐྱོ་ཤེས་བསྐྱེད་པ་ལ་དུར་ཁྲོད་དུ་བམ་རོ་བསྐྱལ་བ་ལ་བརྟེན་ནས་མི་རྟག་པའི་བསྐུལ་མར་ངོ་སྤྲད་པའོ། །དུར་ཁྲོད་ངོ་སྤྲོད་ཀྱི་ཡིག་ཆུང་འདི་ཉིད། ལུག་ལོ་ཟླ་བ་དྲུག་པའི་ཉེར་བདུན་ལ། སྨན་མོ་ཡང་དབེན་དུ། རྒྱ་ར་བ་ནམ་མཁའ་ཆོས་ཀྱི་རྒྱ་མཚོས་བྲིས་པའི་དགེ་བའི་རྩ་བས། སེམས་ཅན་ཐམས་ཅད་ཀྱིས་དམ་པའི་ཆོས་ཡོངས་སུ་རྫོགས་པ་འཛིན་པར་གྱུར་ཅིག །དགེའོ།། །།