དགོངས་གཏེར་ཐུགས་ཀྱི་ཀློང་གསལ་ལས་ཚེ་དབང་ནམ་མཁའི་ནོར་བུ།
དགོངས་གཏེར་ཐུགས་ཀྱི་ཀློང་གསལ་ལས་ཚེ་དབང་ནམ་མཁའི་ནོར་བུ་ཞེས་བྱ་བ་བཞུགས་སོ༔
ན་མོ་གུ་རུ་ཨཱ་ཡུ་སིདྡྷི་ཧཱུྃ༔ དགོངས་གཏེར་ཚེ་དབང་ནི༔ བུམ་པ་ཚེ་གཏོར་མཆོད་པ་ཅི་འབྱོར་བཤམས༔ སྐྱབས་སེམས་སྔོན་དུ་གཞན་སོང་ན་འཐུསཿ མ་སོང་ན་གནམ་ཆོས་ཀྱི་སྔོན་འགྲོ་སྐྱབས་སེམས་སོགས་བྱ༔ དེ་ལས་རྒྱས་པར་སྤྲོ་ན༔ གནམ་ཆོས་རྩ་གསུམ་སྤྱིའི་ལས་བྱང་གི་ནང་དུ་འདིའི་མངོན་རྟོགས་བཙུད་བསྡུ་ན་དྲན་རྫོགས་སུ་བསྒོམ༔ སྤྱན་འདྲེན་མི་དགོས་དམ་ཡེ་དབྱེར་མེད་ཡིན༔ རང་ཉིད་དང་བུམ་པའི་ནང་དང་མདུན་གྱི་ཚེ་གཏོར་མགོན་པོ་ཚེ་དཔག་མེད་སྐུ་མདོག་དམར་གསལ་ལོངས་སྐུའི་རྒྱན་རྫོགས་པ༔ ཕྱག་གཉིས་མཉམ་བཞག་ན་ཚེ་བུམ་འཛིན་པར་བསྐྱེད༔ ཞབས་སྐྱིལ་ཀྲུང་འོད་ཟེར་གྱི་ངོ་བོར་གནས་པར་བསྐྱེད་ལ༔ དེ་
རྣམས་ཀྱི་ཐུགས་ཀར་ཟླ་བའི་སྟེང་ཧྲིཝཡིག་དམར་པོའི་མཐར་སྔགས་ཕྲེང་གཡས་སུ་འཁོར་བ་དེ་ལས་འོད་ཟེར་ཕྱོགས་བཅུར་འཕྲོས་པས་བདེ་བ་ཅན་གྱི་ཞིང་ཁམས་ནས་ཚེ་དཔག་ཏུ་མེད་པ་སྤྱན་དྲངས་ནས་བདག་མདུན་བུམ་ལྷར་ཐིམ༔ སླར་ཡང་འོད་ཟེར་འཕྲོས་པས་འཁོར་འདས་ཀྱི་ཚེ་བཅུད་ཐམས་ཅད་བསྡུས་ཏེ་བུམ་ལྷ་ལ་བསྟིམས་པས་བུམ་པ་འཆི་མེད་བདུད་རྩིས་གང་བར་སྒོམས་ཤིང་༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ འདི་བུམ་པ་ལ་བརྟེན་ནས་བསྒྲུབ༔ རང་དོན་ཡིན་ན་ཞག་བདུན་སོགས་ནས་བདག་འཇུག་བརྒྱ་རྩ་སོགས་བླངས་ནས་རྐྱེན་བཟློག་གི་མཆོག་ཏུ་འགྱུར༔ གཞན་ལ་སྦྱིན་ན་བདག་མདུན་བུམ་གསུམ་ལ་
སྔགས་ཕྲེང་བསྐོར་རེ་རེ་བསྙེན༔ ཨནྡྷུ་སོགས་ཀྱིས་མཆོད༔ ཧཱུྃ༔ སྐུ་མདོག་པདྨ་རཱ་གའི་མདོག་ལྟར་དམར༔ འཆི་མེད་དབང་པོ་སྐུ་ཚེར་འགྲན་ཟླ་བྲལ༔ སྒྲུབ་མཆོག་ཚེ་ཡི་རིག་འཛིན་ངེས་པར་སྟེར༔ མཐའ་ཡས་ཚེ་དཔག་མེད་ལ་ཕྱག་འཚལ་བསྟོད༔ ཅེས་བསྟོད་ནས༔ དེ་ནས་སློབ་མ་ལ་དབང་བསྐུར་ཏེ༔ སྔོན་དབང་མ་བསྐུར་ན་བགེགས་གཏོར་བཏང་མཚམས་བཅད་ཁྲུས་བྱས་མཎྜལ་ཕུལ་ལ་འོ་ན་ད་ལམ་ཁྱེད་རྣམས་ལ་ཚེ་དབང་ཟབ་མོ་ཞིག་བསྐུར་བ་ཡིན་ཏེ༔ དེའི་ཐོག་མར་ལོ་རྒྱུས་དོན་གྱིས་མ་བཤད་ན༔ གསང་ཆེན་ངེས་པའི་བཀའ་འདི་ལ༔ ཡིད་མི་ཆེས་པའི་སྐྱོན་དུ་འགྱུར༔ ཞེས་གསུངས་པས༔ འདིའི་ལོ་རྒྱུས་ལ༔ ལྷ་དངོས་ཀྱི་ལོ་རྒྱུསཿ རྒྱུད་ཇི་ལྟར་གསུངས་ཚུལཿ མན་ངག་ཇི་ལྟར་བྱུང་ཚུལ༔ ཕན་ཡོན་དགོས་ཆེད་བསྟན་པ་དང་བཞི་ལས༔ དང་པོ་ལྷ་ཡི་ལོ་རྒྱུས་ནི༔ སྔོན་བསྐལ་པ་དཔག་ཏུ་མེད་གོང་རོལ་ན་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་སྟེ༔ དེས་སངས་རྒྱས་རིན་ཆེན་སྙིང་པོ་འཁོར་དང་བཅས་པ་སྤྱན་དྲངས་ནས་བསྙེན་བཀུར་རྒྱ་ཆེན་པོ་བྱས་ནས་བྱང་ཆུབ་ཏུ་སེམས་བསྐྱེད་ནས་མ་འོངས་པ་ན་བདག་མངོན་པ་འཚང་རྒྱ་བ་དེའི་ཚེ༔ བདག་གི་ཚེ་དཔག་
ཏུ་མེད་པ་ཐུབ་ཅིང་བདག་གི་མཚན་ཐོས་པ་རྣམས་ཀྱིས་ཀྱང་ཚེ་བསྲིང་ནུས་པར་གྱུར་ཅིག༔ ཞིང་ཁམས་དེར་བདེ་སྐྱིད་ཕུན་སུམ་ཚོགས་ཤིང་ངན་སོང་གསུམ་དང་སྡུག་བསྔལ་གྱི་སྒྲ་མི་གྲག་པར་གྱུར་ཅིག༔ མཚམས་མེད་པ་ལྔ་དང་དམ་པའི་ཆོས་སྤངས་བ་མ་གཏོགས་ངའི་ཞིང་ཁམས་དེར་སྨོན་ལམ་བཏབ་ན་སྐྱེ་བ་གྱུར་ཅིག༔ དེར་སྐྱེས་ན་བསམ་བཞིན་དུ་སེམས་ཅན་གྱི་དོན་ལ་འབྱོན་ན་མ་གཏོགས་ཕྱིར་མི་ལྡོག་པར་གྱུར་ཅིག༔ དེར་སྐྱེས་ཚད་མཚན་དང་དཔེ་བྱད་ཀྱིས་བརྒྱན་པའི་ལུས་ཐོབ་ཅིང་༔ མངོན་ཤེས་རྫུ་འཕྲུལ་དཔག་ཏུ་མེད་པས་སངས་རྒྱས་ཀྱི་ཞིང་ཐམས་ཅད་བགྲོད་ཅིང་༔ ཚེ་ཚད་བསྐལ་པ་བྱེ་བ་ཁྲག་ཁྲིག་དཔག་ཏུ་མེད་པ་ཐུབ་ཅིང་དེ་ནས་ཚེ་འཕོས་མ་ཐག་སངས་རྒྱས་མི་ཐོབ་མི་སྲིད་པར་གྱུར་ཅིག༔ སྨོན་ལམ་དེ་རྣམས་མ་འགྲུབ་བར་དུ་བདག་འཚང་མི་རྒྱ་བར་གྱུར་ཅིག༔ ཅེས་སོགས་སྨོན་ལམ་རྒྱ་ཆེན་པོ་བཏབ་ནས༔ བསྐལ་པ་བྱེ་བ་ཁྲག་ཁྲིག་གྲངས་མེད་པར་ཕ་རོལ་ཏུ་ཕྱིན་པ་དྲུག་ལ་སྤྱོད་པས༔ ཁོང་དང་མཉམ་དུ་སེམས་བསྐྱེད་པའི་བྱང་ཆུབ་སེམས་དཔའ་གཞན་རྣམས་སྔར་ནས་སངས་རྒྱས་ཚར་ཡང་ཁོང་སངས་མི་རྒྱ་བར་བཞུགས་སོ༔ དེར་
གཞན་རྣམས་ཀྱིས་ཞུས་པ༔ རང་རེ་རྣམས་དང་པོ་བྱང་ཆུབ་ཏུ་སེམས་བསྐྱེད་པ་མཉམ༔ བར་དུ་ཕར་ཕྱིན་དྲུག་སྤྱད་པའང་མཉམ༔ ངེད་རྣམས་སྔར་ནས་སངས་རྒྱས༔ ཁྱེད་ད་དུང་འཚང་མི་རྒྱ་བ་ཅི་ལགས་ཞུས་པས༔ ངའི་མཚན་ཐོས་པས་ཚེ་བསྲིང་ནུས་པ་དང་༔ མཚམས་མེད་པ་ལྔ་དང་ཆོས་སྤངས་པ་མ་གཏོགས་ངའི་ཞིང་ཁམས་སུ་སྨོན་ལམ་གདབ་ན་སྐྱེ་སླ་བ་དང་༔ དེར་སྐྱེས་ཚད་ཕྱིར་མི་ལྡོག་པ་དང་༔ སྨོན་ལམ་དེ་གསུམ་མ་འགྲུབ་པས་ད་དུང་འཚང་མི་རྒྱའོ་གསུངས་ནས༔ བསྐལ་པ་བྱེ་བ་གྲངས་མེད་པ་ཕ་རོལ་ཏུ་ཕྱིན་པ་དྲུག་སྤྱད་པས་མཐར་མངོན་པར་རྫོགས་པར་སངས་རྒྱས་ནས༔ ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སངས་རྒྱས་ཚེ་དཔག་མེད་ཅེས་བྱ་བར་སངས་རྒྱུས་ནས་བཞུགས་ཏེ༔ ཡབ་ནི་འཁོར་ལོས་སྒྱུར་བའི་རྒྱལ་པོ་བཟང་པོ་མཆོག༔ ཡུམ་གཟི་བརྗིད་ཅན༔ བཙུན་མོ་རྒྱལ་རིགས་བཟང་སྐྱོང་མ༔ སྲས་ཟླ་བའི་འོད༔ རིམ་གྲོ་པ་ནི་སྙན་པ་དྲི་མ་མེད་པ༔ ཤེས་རབ་ཅན་གྱི་མཆོག་ནི་བཟང་པོའི་ཏོག༔ རྫུ་འཕྲུལ་ཅན་གྱི་མཆོག་ནི་བཀོད་པ་ཆེན་པོ༔ ཉན་ཐོས་འདུས་པ་དང་པོ་ལ་ནི་དྲུག་ཁྲི་སྟེ༔ གཞན་ཉན་ཐོས་གྲངས་མེད་པར་བཤད་
དོ༔ གཉིས་པ་རྒྱུད་གསུངས་ཚུལ་ནི༔ ཚེ་དཔག་མེད་ཀྱིས་གསུངས་པའི་ཚེ་རྒྱུད་ཏན་བཅོ་བརྒྱད་དང་༔ གཞན་ཡང་རྩ་རྒྱུད་འབུམ་པ༔ བཤད་རྒྱུད་འོད་ཟེར་དྲྭ་བ༔ སྤྲུལ་སྐུ་ཤཱཀྱ་ཐུབ་པས་གསུངས་པའི་ཚེའི་མདོ་དང་གཟུངས་རྣམས་སོ༔ གསུམ་པ་མན་ངག་གི་བྱུང་ཚུལ་ནི༔ རྒྱ་གར་མ་ར་ཏི་ཀའི་བྲག་ཕུག་ཏུ་གུ་རུ་པདྨ་འབྱུང་གནས་དང་༔ ལྷ་ལྕམ་མནྡཱ་ར་བ་གཉིས་ཀྱིས་སྒྲུབ་པ་མཛད་པས་ཚེ་དཔག་མེད་དངོས་སུ་བྱོན་ནས་ཚེ་དབང་བསྐུར༔ ཚེའི་རྒྱུད་མན་ངག་ཐམས་ཅད་གནང་བས་ནམ་མཁའ་ཇི་སྲིད་དུ་སྐྱེ་འཆི་མེད་པ་རྡོ་རྗེའི་སྐུ་འགྲུབ༔ ཡུམ་མནྡ་ར་བའང་བགྲེས་རྒུད་མེད་པ་ལོ་བཅུ་དྲུག་གི་ན་ཚོད་དུ༔ ཀེ་རི་མཁའ་འགྲོ་འདུ་བའི་བྲག་ཕུག་ཏུ་ད་ལྟའང་དངོས་སུ་བཞུགས་སྐད༔ དེ་ནས་ཨོ་རྒྱན་རིན་པོ་ཆེ་བོད་དུ་ཕེབས་ཏེ་རྒྱལ་པོ་ཁྲི་སྲོང་ལྡེའུ་བཙན་ལ་ཚེ་དབང་བསྐུར་ནས་རྒྱལ་པོ་ལོ་སྟོང་ཚོ་གསུམ་ཐུབ་པ་ཞིག་བྱེད་དགོངས་པ་ལ༔ བདུད་བློན་དབང་ཆེན་རྣམས་ཀྱིས་དབྱེན་བྱས་ནས་དབང་མ་ཞུས་པས་རྟེན་འབྲེལ་འཆུགས༔ ཚེ་ཆུ་དང་ཚེ་སྒྲུབ་རྣམས་གཏེར་དུ་སྦས༔ ཇོ་མོ་མཁར་ཆེན་མཚོ་རྒྱལ་དང་༔ གནུབས་ནམ་མཁའི་སྙིང་པོ༔ ཉང་
ཏིང་འཛིན་བཟང་པོ༔ བེ་རོ་ཙ་ན་ལ་སོགས་ལ་ཚེ་དབང་གནང་བས་ཚེའི་རིག་འཛིན་ཐོབ་སྟེ༔ མཐར་སྐུ་ལུས་མ་བཞག་པར་འཇའ་ལུས་མཁའ་སྤྱོད་དུ་གཤེགས་སོ༔ དེ་ནས་དུས་སྙིགས་མ་ཚེ་ལོ་བཞི་བཅུ་ཁ་རལོ་སུམ་ཅུར་ཉེ་བའི་དུསཿ གཏེར་ཁ་གསར་རྙིང་མང་པོ་ནས་ལུང་བསྟན་པ་ལྟར༔ ཤུད་བུ་དཔལ་གྱི་སེང་གེའི་ངོ་བོ་བེ་རོ་ཙ་ནའི་རྣམ་འཕྲུལ་སྤྲུལ་སྐུ་མི་འགྱུར་རྡོ་རྗེ་དེ་ཉིད་ཀྱིས་དགུང་ལོ་བཅུ་བཞི་ནས་བཅུ་བདུན་གྱི་བར་དུ་དགོངས་གཏེར་ཐུགས་ཀྱི་ཀློང་གསལ་ཞེས་བྱ་བ་གཏེར་ཁ་ཕྱེས་ཏེ༔ ཚེ་དབང་འདིའང་དེའི་ནང་ནས་བྱོན་པའོ༔ དགོངས་གཏེར་དེ་ཇི་ལྟར་བུ་ཞེ་ན༔ སྔོན་ཨོ་རྒྱན་གྱི་རྗེ་འབངས་རྣམས་ལ་གསུངས་པའི་དབང་གདམས་ངག་འགའ་ཞིག་གསལ་པོར་དྲན་ནས་ཡི་གེར་བཀོད་པ་ཡིན་ཏེ༔ ཆུ་ཀླུང་རོལ་པའི་མདོ་ལས༔ ང་ཡིས་བསྟན་པའི་ཆོས་ཀྱི་གཞུང་༔ ཐུགས་ནས་ཐུགས་ཀྱི་གཏེར་དུ་སྦས༔ ཞེས་དང་༔ རིག་པའི་རྒྱལ་པོའི་རྒྱུད་ལས༔ དུས་གསུམ་རྒྱལ་བའི་ཐུགས་གཏེར་འདི༔ རྡོ་ཤིང་སྣོད་ལ་ཡང་མ་བསྟན༔ ཞེས་གསུངས་སོ༔ བཞི་པ་དགོས་ཆེད་ཕན་ཡོན་ནི༔ ཚེ་དཔག་མེད་ཀྱི་སྙིང་པོའི་གཟུངས་ལས༔ གང་ལ་ལ་
ཚེ་དཔག་མེད་དེའི་མཚན་ཡང་དག་པར་འཛིན་པ་དེ་ལ་མེའི་འཇིགས་པ་མི་འབྱུང་༔ ཆུའི་འཇིགས་པ་མི་འབྱུང་༔ དུག་གི་འཇིགས་པ་མི་འབྱུང་༔ མཚོན་གྱི་འཇིགས་པ་མི་འབྱུང་༔ གནོད་སྦྱིན་གྱི་འཇིགས་པ་མི་འབྱུང་༔ སྲིན་པོའི་འཇིགས་པ་མི་འབྱུང་༔ སྔོན་གྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ༔ ཞེས་གསུངས་པའི་ཕྱིར་མཚན་ཐོས་པ་ལ་ཕན་ཡོན་དེ་ཙམ་ན༔ དབང་ཐོབ་ན་སྨོས་ཅི་དགོས་ཏེ་ཚེ་འདིའི་རྐྱེན་ཟློག་པ་ལ་འདི་ལས་ཟབ་པ་མེད༔ ཡང་འཆི་མེད་རྔ་སྒྲའི་གཟུངས་ལས༔ འདི་ནས་ནུབ་ཀྱི་ཕྱོགས་རོལ་ན༔ བདེ་བ་ཅན་གྱི་ཞིང་ཁམས་ན༔ དེ་ན་རྫོགས་པའི་སངས་རྒྱས་བཞུགས༔ དེ་བཞིན་གཤེགས་པ་ཚེ་དཔག་མེད༔ སུ་ཞིག་དེ་ཡི་མཚན་འཛིན་པ༔ དེ་ནི་དེ་རུ་སྐྱེ་བ་འགྱུར༔ ཞེས་གསུངས་པའི་ཕྱིར་འདིའི་དབང་མང་དུ་ཐོབ་ན་འཁོར་བ་དང་ངན་སོང་གི་སྐྱེ་སྒོ་ཆོད་ནས་བདེ་བ་ཅན་གྱི་ཞིང་ཁམས་སུ་སྐྱེས་ནས་གཏན་བདེའི་འདུན་མ་འགྲུབ་པ་ཡིན་ནོ༔ དེ་ལྟ་བུའི་དབང་ཟབ་མོ་ཞུ་བའི་དོན་དུ་འདིའི་རྗེས་ཟློས་མཛོད༔ བླ་མ་ཚེ་དཔག་མེད་པ་ལ༔ གསོལ་བ་འདེབས་སོ་འཆི་མེད་ཀྱི༔ ཚེ་ཡི་དབང་མཆོག་
བསྐུར་དུ་གསོལ༔ བདག་ལ་ཚེ་ཡི་རིག་འཛིན་སྩོལ༔ ཞེས་ལན་གསུམ་མམ་ཚིག་འཇུག་གསུམ༔ བླ་མ་དང་མདུན་བསྐྱེད་ཚེ་དཔག་མེད་དུ་གསལ་བའི་དྲུང་དུ་སྐྱབས་འགྲོ་སེམས་བསྐྱེད་ཀྱི་སྡོམ་པ་ཞུ་སྙམ་པས་འདིའི་རྗེས་ཟློས་མཛོད༔ ཚེ་དཔག་མེད་ལ་སྐྱབས་སུ་མཆི༔ མི་དགེ་གང་བྱས་མཐོལ་ལོ་བཤགས༔ དགེ་བ་ཀུན་ལ་བདག་ཡི་རང་༔ ཆོས་ཀྱི་འཁོར་ལོ་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ བྱང་ཆུབ་མཆོག་ཏུ་སེམས་བསྐྱེད་དོ༔ འགྲོ་བ་བྱང་ཆུབ་ཐོབ་ཕྱིར་བསྔོ༔ ཞེས་པ་སྔོན་དབང་མ་ཐོབ་ན་ལན་གསུམ་གལ་ཆེ༔ སྔོན་ཐོབ་ན་རྗེས་མ་གསུམ་གྱིས་ཆོག༔ ཀུ་ཤས་སློབ་མ་བྲན་ཚུལ་བྱས་ལ༔ ཨོཾ་བྱ་གྷི་ཝ་ཧཱུྃ་ཕཊ༔ ཨོཾ་སྭ་བྷ་ཝ་སོགས༔ སྟོང་པའི་ངང་ལས་སློབ་མ་རང་ཉིད་མགོན་པོ་ཚེ་དཔག་མེད་སྐུ་མདོག་དམར་གསལ་ལོངས་སྐུའི་རྒྱན་རྫོགས་པ༔ ཕྱག་གཉིས་མཉམ་བཞག་ན་ཚེ་བུམ་འཛིན་པ༔ ཞབས་རྡོ་རྗེའི་སྐྱིལ་ཀྲུང་འོད་ཟེར་གྱི་ངོ་བོར་གནས་པ༔ པད་ཟླའི་གདན་ལ་བཞུགས་པའི་དཔྲལ་བར་ཨོཾ༔ མགྲིན་པར་ཨཱཿ ཐུགས་ཀའི་ཆ་སྨད་དུ་ཧཱུྃ༔ ཐུགས་ཀའི་དབུས་སུ་ཧྲཱིཿ དེ་ལས་འོད་ཟེར་འཕྲོས་པས་བདེ་བ་ཅན་གྱི་ཞིང་ཁམས་ནས་ཚེ་དཔག་
མེད་ཀྱི་སྐུ་ཆེ་ཕྲ་ཅི་རིགས་པ་ཁ་བ་བུ་ཡུག་ལྟར་བྱོན་ནས་སློབ་མ་ལ་སིབ་སིབ་ཐིམ་པར་གྱུརཿ དབྱངས་རོལ་མོ་སྤོས་དུད་དང་བཅས༔ ཧཱུྃ༔ ཚེ་དཔག་མེད་ཀྱི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་འདི་ལ་དབང་མཆོག་བསྐུར༔ ལོག་འདྲེན་ཚེ་ཡི་བར་ཆད་བསལ་དུ་གསོལ༔ རྩ་སྔགས་ལཿ ཨོཾ་བཛྲ་ཨཱ་ཝེ་ཤ་ཡ་ཨ་ཨཱ༔ ཞེས་གསུམ་མམ་མདུན་བརྗོད༔ རོལ་མོ་བྱ༔ ཡེ་ཤེས་པ་དེ་ཉིད་བརྟན་པར་གྱུར་པའི་མོས་པ་མཛོད༔ རྡོ་རྗེ་མགོར་བཞག་ལ༔ ཏིཥྛ་བཛྲ༔ བུམ་པ་ལག་ཏུ་ཐོགས་ལ༔ བུམ་པ་འདི་ཉིད་ཕྱི་བུམ་པ་ལ་ནང་རིན་པོ་ཆེའི་གཞལ་ཡས་ཁང་དུ་གྱུར་པའི་དབུས་སུ་སངས་རྒྱས་ཚེ་དཔག་མེད་དངོས་སུ་བཞུགས་པའི་སྐུ་ལས་འོད་ཟེར་ཕྱོགས་བཅུར་འཕྲོས་པས་འཁོར་འདས་ལམ་གསུམ་གྱི་ཚེའི་བཅུད་ཐམས་ཅད་བསྡུས་ཏེ་བུམ་པ་བདུདརྩིས་གང་༔ བདུད་རྩི་ཕྱུར་ཞིང་ལུད་པས་ཁྱེད་རང་རྣམས་ཀྱི་ཚངས་བུག་ནས་ཞུགས༔ སྤྱི་བོར་བདེ་ཆེན་གྱི་འཁོར་ལོའི་རྩ་འདབ་སུམ་ཅུ་སོ་གཉིས་གང་༔ ལུས་ཀྱི་སྒྲིབ་པ་དག༔ ཚེ་དཔག་མེད་ཀྱི་སྐུའི་དབང་དང་དངོས་གྲུབ་ཐམས་ཅད་ཐོབ་པར་སྒོམས་ཤིག༔ དྲིལ་ བུ་
ཁྲོལ ་ཞིང་དབྱངས་དང་བཅས༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པཿ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ བུམ་པ་མགོར་བཞག་ལ་རྩ་སྔགས་མཇུག་ཏུ༔ ཀཱ་ཡ་སིདྡྷི་ཧཱུཾ༔ ཞེས་བརྗོད་བུམ་ཆུ་བླུད༔ ཧཱུྃ༔ སྐུ་མདོག་པདྨ་རཱ་གའི་མདོག་ལྟར་དམར༔ འཆི་མེད་དབང་པོ་སྐུ་ཚེར་འགྲན་ཟླ་བྲལ༔ སྒྲུབ་མཆོག་ཚེ་ཡི་རིག་འཛིན་ངེས་པར་སྟེརཿ ཚེ་དཔག་མེད་པའི་སྐུ་ཡི་བཀྲ་ཤིས་ཤོག༔ མེ་ཏོག་འཐོར་བུམ་པ་སྤྱི་བོར་བཞག་པས་བདུད་རྩིའི་རྒྱུན་བབསཿ ཚངས་བུག་ནས་ཞུགས༔ རྩ་ཨ་ཝ་དྷ་ཏི་བརྒྱུད༔ མགྲིན་པ་ལོངས་སྤྱོད་ཀྱི་འཁོར་ལོའི་རྩ་འདབ་བཅུ་དྲུག་གང་བས་ངག་གི་སྒྲིབ་པ་དག༔ ཚེ་དཔག་མེད་ཀྱི་གསུང་གི་དབང་དང་དངོས་གྲུབ་ཐོབ་པར་སྒོམས་ཤིག༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ རྩ་སྔགས་མཇུག་ཏུ་ཝཱཀ་སིདྡྷི་ཨཱ༔ ཞེས་བུམ་པ་མགྲིན་པར་བཞག་ལ༔ ཧཱུྃ༔ སྐུ་མདོག་པདྨ་རཱ་གའི་མདོག་ལྟར་དམར༔ འཆི་མེད་དབང་པོ་སྐུ་ཚེར་འགྲན་ཟླ་བྲལ༔ སྒྲུབ་མཆོག་ཚེ་ཡི་རིག་འཛིན་ངེས་པར་སྟེར༔ ཚེ་དཔག་
མེད་པའི་གསུང་གི་བཀྲ་ཤིས་ཤོག༔ བུམ་པ་ནས་བདུད་རྩིའི་རྒྱུན་བབ༔ ཚངས་བུག་ནས་ཞུགས༔ རྩ་དབུ་མ་བརྒྱུད༔ སྙིང་ག་ཆོས་ཀྱི་འཁོར་ལོའི་རྩ་འདབ་བརྒྱད་གང་༔ ཡིད་ཀྱི་སྒྲིབ་པ་དག༔ ཚེ་དཔག་མེད་ཀྱི་ཐུགས་ཀྱི་དབང་དང་དངོས་གྲུབ་ཐོབ་པར་སྒོམས་ཤིག༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ རྩ་སྔགས་མཇུག་ཏུ་ཙིཏྟ་སིདྡྷི་ཧཱུྃ༔ ཞེས་བུམ་པ་སྙིང་གར་བཞག་ལ༔ ཧཱུྃ༔ སྐུ་མདོག་པདྨ་རཱ་གའི་མདོག་ལྟར་དམར༔ འཆི་མེད་དབང་པོ་སྐུ་ཚེར་འགྲན་ཟླ་བྲལ༔ སྒྲུབ་མཆོག་ཚེ་ཡི་རིག་འཛིན་ངེས་པར་སྟེར༔ ཚེ་དཔག་མེད་པའི་ཐུགས་ཀྱི་བཀྲ་ཤིས་ཤོག༔ བུམ་པ་ནས་འཆི་མེད་བདུད་རྩི་ཆེར་ལུད་པས་ཚངས་བུག་ནས་ཞུགས༔ རྩ་ཀུན་འདར་མ་ནས་བརྒྱུད༔ ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི༔ སྤྱི་གཙུག་མན་ཆད༔ རྐང་མཐིལ་ཡན་ཆད་འཆི་མེད་བདུད་རྩིས་མེ་རེ་རེ་གང་༔ ལུས་ངག་ཡིད་གསུམ་ཆ་མཉམ་གྱི་སྒྲིབ་པ་དག༔ ཚེ་དཔག་མེད་ཀྱི་དབང་དང་དངོས་གྲུབ་ཡོངས་སུ་རྫོགས་པ་ཐོབ་པར་
སྒོམས་ཤིག༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག་རྩ་སྔགས་མཐར༔ སརྦ་སིདྡྷི་ཧི༔ ཞེས་བུམ་པ་ལྟེ་བར་བཞག༔ ཧཱུྃ༔ སྐུ་མདོག་པདྨ་རཱ་གའི་མདོག་ལྟར་དམར་་་འཆི་མེད་དབང་པོ་སྐུ་ཚེར་འགྲན་ཟླ་བྲལ་་སྒྲུབ་མཆོག་ཚེ་ཡི་རིག་འཛིན་ངེས་པར་སྟེར་ཚེ་དཔག་མེད་ཀྱི་སྐུ་གསུམ་བཀྲ་ཤིས་ཤོག༔ དེ་ནས་ཚེ་གཏོར་ལག་ཏུ་ཐོགས་ལ༔ གཏོར་མ་འདི་ཉིད་མགོན་པོ་ཚེ་དཔག་ཏུ་མེད་པར་གསལ་བའི་སྟེང་གི་ཆ་ལ་རིག་འཛིན་ཚེ་དབང་བརྒྱུད་པའི་བླ་མ༔ བར་གྱི་ཆ་ལ་ཡི་དམ་རྒྱུད་སྡེ་དྲུག་གི་ལྷ་ཚོགསཿ འོག་གི་ཆ་ལ་ཡེ་ཤེས་ཀྱི་མཁའ་འགྲོ་ཆོས་སྐྱོང་ཐམས་ཅད་སྤྲིན་འཁྲིགས་པ་ལྟར་བཞུགས་པ་ཁྱེད་རང་གི་སྤྱི་བོའི་གཙུག་ཏུ་བྱོན་ཏེ་ངེད་ཀྱི་གསོལ་བ་ཇི་ལྟར་བཏབ་པའི་བྱིན་རླབས་དངོས་གྲུབ་ཐམས་ཅད་གནང་ཞིང་ཐོབ་བྱུང་སྙམ་པའི་མོས་པ་རྩེ་གཅིག་ཏུ་མཛོད་ལ༔ མཐར་འཁོར་རྣམས་འོད་དུ་ཞུ་ནས་གཙོ་བོ་ལ་ཐིམ༔ གཙོ་བོ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་ཚེ་དཔག་མེད་ཀྱི་སྐུ་གསུང་ཐུགས་དང་ཁྱེད་རང་རྣམས་ཀྱི་ལུས་ངག་ཡིད་གསུམ་ཕྲུག་གིས་འདྲེས་པའི་
ངང་ལ་སེམས་མ་བཅོས་པར་མཉམ་པར་ཞོག༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ ཆོས་སྐུ་སྣང་བ་མཐའ་ཡས༔ ལོངས་སྐུ་ཐུགས་རྗེ་ཆེན་པོ༔ སྤྲུལ་སྐུ་པདྨ་འབྱུང་གནས༔ ལྷ་ལྕམ་མན་ར་བ༔ མཁའ་འགྲོ་ཡེ་ཤེས་མཚོ་རྒྱལ༔ སྒྲ་བསྒྱུར་བེ་རོ་ཙ་ན༔ ཤུད་བུ་དཔལ་གྱི་སེང་གེ༔ མི་འགྱུར་རྡོ་རྗེ་བདུད་འདུལ་རོལ་བ་རྩལ་ལ་སོགས་པ་རིག་འཛིན་བརྒྱུད་པའི་དཔལ་ལྡན་བླ་མ་དམ་པ་རྣམས་དང་༔ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་ཚེ་དང་བསོད་ནམས་དང་གཟི་བརྗིད་དང་ཡེ་ཤེས་དང་༔ ཡོན་ཏན་ཚད་མེད་པའི་རྒྱལ་པོས་བྱིན་གྱིས་རློབས་ཤིག༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ནད་མེད་བདེ་བའི་དངོས་གྲུབ་བསྩལ་དུ་གསོལཿ བགྲེས་རྒུད་མེད་པའི་ལང་ཚོ་བསྩལ་དུ་གསོལ༔ དུས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་རྗེས་སུ་འཛིན་པར་མཛད་དུ་གསོལ༔ དེ་ནས་གཏོར་མ་མགོར་བཞག་ལ་རྩ་སྔགས་ཚར་གསུམ་མམ་བདུན༔ སྤྲོ་ན་ཚེ་གཟུངས་ཀྱང་བརྗོད༔ ཧཱུྃ༔ སྐུ་མདོག་པདྨ་
རཱ་གའི་མདོག་ལྟར་དམརཿ འཆི་མེད་དབང་པོ་སྐུ་ཚེར་འགྲན་ཟླ་བྲལ༔ སྒྲུབ་མཆོག་ཚེ་ཡི་རིག་འཛིན་ངེས་པ་སྟེར༔ མཐའ་ཡས་ཚེ་དཔག་མེད་པའི་བཀྲ་ཤིས་ཤོག༔ དེ་ནས་ཚེ་ཆང་བླུད་ཅིང་རྩ་ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ རྩ་སྔགས༔ པཉྩ་ཨ་མྲྀ་ཏ་སིདྡྷི་སྭཱ༔ ཚེ་རིལ་སྦྱིན་ཅིང་༔ ཧཱུྃ༔ དུས་མིན་འཆི་བ་ཀུན་ལས༔ རྟག་ཏུ་སྐྱོབ་པར་མཛད་པ༔ ཚེ་དང་ཡེ་ཤེས་དཔག་མེད༔ འདི་ལ་བྱིན་གྱིས་རློབས་ཤིག༔ རྩ་སྔགས༔ ཨཱ་ཡུ་སིདྡྷི་ཧཱུཾ༔ ཁྱེད་རང་རྣམས་ཀྱིས་མེ་ཏོག་དམར་པོའི་ཕྲེང་བ་སློབ་དཔོན་ལ་ཕུལ་བའི་མོས་པས་རྗེས་ཟློས་མཛོད༔ བཅོམ་ལྡན་བདག་གིས་བཟུང་ལགས་ཀྱིས༔ བདག་ལ་འགོ་བར་མཛད་དུ་གསོལ༔ གསུམ་མམ་གཅིག༔ དེ་ལྟར་གསོལ་བ་བཏབ་པས་སློབ་དཔོན་གྱི་ཐུགས་ཀ་ནས་སྔགས་ཕྲེང་བྱི་རུའི་ཕྲེང་བ་ལྟར་འཕྲོས༔ སློབ་དཔོན་གྱི་ཞལ་ནས་ཐོན༔ ཁྱེད་རང་རྣམས་ཀྱི་ཞལ་དུ་ཞུགས༔ ཐུགས་ཀར་གཡས་སུ་འཁོད་པའི་མོས་པས་རྗེས་ཟློས་མཛོད༔ ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱཿ གསུམ༔ སྔགས་ཀྱི་ཕྲེང་བ་དེ་མེ་
ཏོག་དམར་པོའི་ཕྲེང་བར་གྱུར་ནས་སྤྱི་བོར་བཅིངས་པའི་མོས་པ་མཛོད༔ མེ་ཏོག་ཙམ་པ་ཀའམ་རྡོ་རྗེ་དང་བཅས་པས་ནས་འབྲུ་མགོར་བཞག༔ བཅོམ་ལྡན་འདི་ལ་བསྩལ་ལགས་ཀྱིསཿ འདི་ལ་འགོ་བར་མཛད་དུ་གསོལ༔ གསུམ་མམ་གཅིག༔ མེ་ཏོག་འཐོར་ཞིང་༔ མགོན་པོ་ཚེ་དཔག་ཏུ་མེད་པའི་གསང་སྔགས་རིག་སྔགས་གཟུངས་སྔགས་ཀྱི་བྱིན་རླབས་ནུས་པ་ཐམས་ཅད་རྡོ་རྗེའི་སློབ་མ་འདི་རྣམས་ལ་འཇུག་པར་གྱུར་ཅིག༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ དེས་དགོངས་གཏེར་ཐུགས་ཀྱི་ཀློང་གསལ་གྱི་ཚེ་དབང་ནམ་མཁའི་ནོར་བུ་ཞེས་བྱ་བ་ཐོབ་པ་ཡིན་པས༔ ཚེ་དཔག་མེད་ཡི་དམ་གྱི་ལྷར་འཛིན་པའི་མོས་པས་འདིའི་རྗེས་ཟློས་མཛོད༔ གཙོ་བོས་ཇི་ལྟར་བཀའ་སྩལ་པ་སོགས༔ དེ་ལྟར་དབང་ཐོབ་པའི་གཏང་རག་ཏུ་མཎྜལ་འབུལཿ ས་གཞི་སྤོས་ཆུ་སོགསཿ ཞེས་དགོངས་གཏེར་རྩ་ཚིག་རྡོ་རྗེའི་གསུང་གི་དོན་རྒྱས་པར་བཀྲོལ་བ་ལ༔ ཉེས་འགལ་མཆིས་ན་ལྷ་དང་སྲུང་མའི་ཚོགས་ལ་བཤགས་ཤིང་དགེ་བས་འགྲོ་བ་དཔག་ཏུ་མེད་པ་ལ་ཕན་པར་གྱུར་ཅིག༔ ཅེས་རཱ་ག་ཨ་སྱས་བསྒྲིགས་པའི་ཡི་གེ་པ་ནི་དབོན་པོ་མཐུ་སྟོབས་སོ༔ མངྒ་ལཾ༔