དམ་ཅན་སྐྱེས་བུ་རྡོ་རྗེ་ལེགས་པའི་དབང་སྒྲུབ་འགུགས་པ་ལས་ཀྱི་ལྕགས་ཀྱུའི་སྒྲུབ་པ།
དམ་ཅན་སྐྱེས་བུ་རྡོ་རྗེ་ལེགས་པའི་དབང་སྒྲུབ་འགུགས་པ་ལས་ཀྱི་ལྕགས་ཀྱུའི་སྒྲུབ་པ་བཞུགས་སོ། །
དབང་གི་ལས་ཚོགས་སྒྲུབ་པ་ནི། །དབང་གི་ཕོ་ཉ་སྒྲུབ་པ་དང་། ཁམས་གསུམ་དབང་སྡུད་ལས་ཚོགས་དང་། །འབྲུ་ནོར་ལོངས་སྤྱོད་དབང་སྡུད་གསུམ། །དེ་ལ་དང་པོ་ཕོ་ཉ་སྒྲུབ་པ་ནི། །ཧཱུྃ། མདུན་བསྐྱེད་ལྷ་ཡི་ཐུགས་ཀ་ནས། །ཧཱུྃཡིག་དམར་པོ་གཅིག་འཕྲོས་པས། །ཁམས་གསུམ་སེམས་ཅན་རྣམས་ལ་ཕོག །སྙིང་རྗེ་ཆེན་པོས་དབང་བསྡུས་ནས། །འོད་ཟེར་ཚུར་འདུས་དམ་ཅན་སྐུ། །ཁམས་གསུམ་དབང་སྡུད་སྐུ་མདོག་དམར། །ཞི་མ་ཁྲོས་པ་གནོད་སྦྱིན་ཉམས། །ཕྱག་གཉིས་གཡས་ན་མདའ་དར་དང་། །ཁྲུས་བུམ་དབུ་དང་ཡིད་བཞིན་ནོར། །གཡོན་ན་ལྕགས་ཀྱུ་ཞགས་པ་
བསྣམས། །ཐོད་པ་སྐམ་རློན་རིན་ཆེན་བརྒྱན། །ཁམས་གསུམ་དབང་སྡུད་གཡུ་འབྲུག་ཞོན། །ཧྲཱི༔ དེ་ཡི་འཁོར་གྱི་དངོས་གྲུབ་ནོར་བདག་པ། །གཡས་སུ་རྣམ་ཐོས་སྲས་དང་རྒྱབ་ཏུ་ནི། །ཇི་ལྷ་མཆེད་ལྔ་ནོར་རྒྱུན་གཡོན་དུ་ནི། །འབྲོག་གནས་མཆེད་ལྔ་མདུན་དུ་ཡེ་ཤེས་གྲགས། །ཨ་པར་ཙིཏྟ་གནོད་སྦྱིན་ཟངས་མདོག་དང་། །ལྷ་མོ་བརྟན་མ་ལོངས་སྤྱོད་སྨན་རྩེ་དབང་། །ཞི་ཞལ་བཞད་ཉམས་འབུམ་ཕྲག་བཞི་ཡི་འཁོར། །ལྷ་ཚོགས་དེ་ལས་འོད་འཕྲོས་རང་གནས་ནས། །རང་འདྲ་སྤྱན་དྲངས་འདིར་གཤེགས་བཞུགས་སུ་གསོལ། །སྔོན་གྱི་
དམ་ཚིག་གཉན་པོ་མ་གཡེལ་བར། །ཀུན་དགའི་སྙན་ཕྲེང་བསྟོད་དབྱངས་སྤེལ་ཚིག་གིས། །བོས་ཚེ་མྱུར་བར་གནས་འདིར་གཤེགས་སུ་གསོལ། །ཕུན་ཚོགས་ཞིང་དེར་བྱིན་ཆེན་དབབ་ཏུ་གསོལ། །བདག་དང་ཁྱོད་གཉིས་ནམ་ཞིག་བྱང་ཆུབ་བར། །ལུས་དང་གྲིབ་བཞིན་འབྲལ་བ་མེད་བཞིན་དུ། །ཁྱོད་ཀྱིས་ཁམས་གསུམ་སྲིད་གསུམ་དབང་དུ་བསྡུས། །བདག་གི་ལུས་སེམས་སྣང་བ་ཆོས་ལ་བསྒྱུར། །རྒྱལ་ཁམས་རྒྱལ་བློན་སེར་སྐྱ་བུད་མེད་དང་། །རིན་ཆེན་ནོར་དབྱིག་རྟ་ནོར་ལུག་བང་མཛོད། །རྐང་འགྲོས་སྣ་ཚོགས་དར་ཟབ་འབྲུ་སྣ་རས། །སྣམ་རས་ཏིལ་མར་དམིགས་འདུལ་མོས་པ་བཞིའི། །གང་ལ་ཅི་འདོད་སེམས་ཅན་དབང་དུ་བསྡུས། །ཧྲཱིཿ དམ་ཅན་དབང་གི་ཕོ་ཉ་དྲག་ཤུལ་ཅན། །འབྱུང་བ་རང་དབང་ལས་བསྒྱུར་ཡིད་འོང་ཚལ། །རྒྱ་མཚོ་བཅུད་ལྡན་འཛད་མེད་གང་གཱའི་རྒྱུན། །བདུག་པ་སྤྲིན་ཕྱོགས་ཕྱོགས་ཀུན་ཁྱབ་པའི་ངད། །ཚ་ཟེར་འབུམ་གྱིས་མདངས་དང་ལྡན་པའི་མེ། །རྒྱ་མཚོའི་མུ་མེད་སྣང་སྲིད་ཀུན་འགེངས་དྲི། །རི་རྒྱལ་ལྟར་འཛོམ་རོ་མཆོག་བཅུད་ལྡན་ཟས། །འབྲུག་སྟོང་ལྡིར་འདྲ་དུས་ཀུན་བཀྲོལ་
བའི་སྒྲ། །མཛེས་སྡུག་མིག་མཛེས་ཡིད་འཕྲོག་བསིལ་ཟེར་གཟུགས། སྤྲིན་ཕུང་ལྟར་འཁྲིགས་འཕན་གདུགས་ན་བཟའ་རེག །རྩིབས་སྟོང་མུ་ཁྱུད་དང་ལྡན་འོད་འབར་བ། །བསོད་འཕེལ་དོན་ལྡན་གཏི་མུག་མུན་སེལ་མེ། །ཁྱིམ་བདག་སྟོབས་ལྡན་ལྕང་ཤེས་མྱུར་བའི་ཤུག །མ་རུངས་རྒྱལ་བྱེད་མཐའ་ནོར་ནོར་ཆ་བདུན། །རང་ལུས་བསྲུང་དང་གཞན་སྲོག་གཅོད་པ་ཡི། །གོ་ཆའི་མཚོན་ཆ་དཀར་ནག་འབྲུ་སྣ་ལྔ། །ཁ་དཀར་མངར་སྐྱུར་ཞིམ་དགུ་འབྲས་བུ་དང་། །དཀར་གསུམ་མར་དང་མངར་གསུམ་རྐང་འགྲོ་སྟེ། །ཇ་ཆང་གསེར་སྐྱེམས་ཏིལ་མར་རྐང་ཚིལ་སྣུམ། །རས་ཕྲུག་བལ་ཚོན་དར་སྐུད་གོས་སྐུད་ཚེམ། །ཤེལ་སྒོང་ཙ་ར་དཀོར་ནོར་སྣ་ཚོགས་སོགས། །དམ་ཅན་སྐྱེས་བུ་རྡོ་རྗེ་ལེགས་པ་དང་། །དབང་གི་ཕོ་ཉ་གནོད་སྦྱིན་ས་ཡ་བདུན། །མ་ལུས་འཁོར་དང་བཅས་པའི་ཐུགས་དམ་བསྐང་། །དགའ་མགུ་དགྱེས་ཚིམས་མཉེས་པའི་རང་བཞིན་གྱུར། ། ཧཱུྃ། ཁམས་གསུམ་དབང་སྡུད་རྟ་བདུན་དབང་པོའི་ཟེར། །འབྱུང་བ་རང་དབང་ཅན་ཞོན་མཁའ་ལ་རྒྱུག །མྱུར་མགྱོགས་འདོད་རྒྱལ་ནོར་མཆོག་ཡ་གའི་
གསོས། །འགུགས་ཆིངས་ཤེས་རབ་ཀྱི་བསྣམས་ཁྱོད་ལ་བསྟོད། །རྐང་གཉིས་སྒོ་གསུམ་རློག་འདྲའི་ཕྱག་རྒྱས་བཀུག །མཁའ་ཁྱབ་འགྲོ་བའི་དཔལ་འབྱོར་ལོངས་སྤྱོད་བསྡུ། །དབང་ཕྱུག་ལས་ལྷག་དབང་བསྒྱུར་ཚངས་པ་འགུགས། །གང་ལ་གང་འདོད་ཉེ་བར་སྩོལ་ལ་འདུད། །འཁོར་གྱི་ངལ་གསོ་སྨུག་འཛིན་ཕོ་དང་མོ། །འབྲོག་གནས་ཡེ་གྲགས་གནོད་གནས་དངོས་གྲུབ་བདག །ཁྱད་པར་དབང་གི་ཕོ་ཉ་ཟངས་ཀྱི་མདོག །ཁམས་གསུམ་སྲིད་གསུམ་དབང་དུ་བསྡུས་ལ་འདུད། །ཁྱེད་ལ་མཆོད་ཅིང་བསྟོད་པའི་བྱིན་ཅན་གྱིས། ཁམས་གསུམ་འདི་ཡི་སེམས་ཅན་དབང་དུ་སྡུས། །ཡུལ་ཕྱོགས་འདི་ཡི་རྒྱལ་པོ་དབང་དུ་སྒྱུར། །མངའ་རིས་འདི་ཡི་མི་སྡེ་དཔུང་དབང་སྡུས། །ཕྱག་འོས་བསྐུར་འོས་བླ་མ་རྒྱལ་བློན་སྡུས། །ཡོན་བདག་ཕོ་མོའི་ཡིད་དང་ལག་པ་བསྒུལ། །ཡུལ་འདིས་སྐྱ་སེར་ཀུན་གྱིས་སྙིང་རྩ་བསྒུལ། །ཁྱད་པར་ཡིད་ལ་དམིགས་པ་དབང་དུ་སྡུས། །མ་མཐོང་མཁན་གྱིས་ཁ་བསྒུལ་བྲ་ཁ་ཕྱེས། །མི་ཟད་རིན་ཆེན་གཏེར་གྱི་ནོར་རྣམས་ཕྱེས། །དགོས་འདོད་ཡིད་བཞིན་ནོར་བུ་ཆར་ལྟར་ཕོབ། །ཕྱུག་གཡང་ཟབ་གཡང་འཕེན་གཡང་
དབང་དུ་སྡུས། །སྐྱེ་ཡག་ལྟ་སྡུག་སྒོ་གསུམ་དབང་དུ་སྡུས། །འཇིག་རྟེན་ཁམས་ཀྱི་ཟས་ནོར་དབང་དུ་སྡུས། །ཡུལ་ཕྱོགས་འདིའི་སྦྱིན་བདག་དབང་དུ་སྡུས། །ལྷ་ཀླུ་གཞི་བདག་ཡུལ་ལྷ་དབང་དུ་སྡུས། །ནག་ཕྱོགས་དབང་བསྡུས་ཆོས་ལ་དཀར་བ་གྱིས། །ཨོ་བཛྲ་སཱ་དྷུ་ས་མ་ཡ། བཛྲ་སཱ་དྷ་གྷི་ཊི་སྭཱ་ཧཱ། ཞེས་གྲངས་བསྙེན་འབྲུ་འབུམ་མོ། །རང་ཡི་དམ་གསལ་བའི་ཐུགས་ཀ་ནས། འོད་ཟེར་དམར་པོ་ལྕགས་ཀྱུ་ལྟར་འཕྲོས་པས། དམ་ཅན་ཕོ་ཉེ་འཁོར་དང་བཅས་པའི་ཐུགས་ཀར་ཕོག །དེ་ལས་འོད་ཟེར་ལྕགས་ཀྱུ་ལྟ་བུར་འཕྲོས། ཕྱོགས་བཅུའི་སངས་རྒྱས་སྲས་དང་བཅས་ལ་ཕོག །སངས་རྒྱས་ཀྱི་མཐུ་བྱིན་དང་འགྲོ་བའི་ཚེ་བསོད་དཔལ་འབྱོར་ལོངས་སྤྱོད་དབང་ཐང་ཐམས་ཅད་དབང་དུ་བསྡུས། བདག་ལ་ལོངས་སྤྱོད་ཆར་ལྟར་བབས། ཚེ་བསོད་དཔལ་འབྱོར་ཟླ་བ་ཡར་གྱི་ངོ་ལྟར་བྱས། །འོད་ཟེར་ཚུར་འདུས་ཕོ་ཉ་ལ་ཐིམ། ཡང་ཕོ་ཉ་ལྕགས་ཀྱུའི་ཞགས་པའི་རྣམ་པར་འཕྲོས། ཡུལ་དེའི་སྐྱེས་པ་ཕོ་མོ་སྐྱ་སེར་རྒྱལ་བློན་རྣམས་ཀྱི་སྙིང་ནས་ལྕགས་ཀྱུས་བཟུང་། སྐེ་ནས་ཞགས་པས་སྡུད། རང་དབང་མེད་པར་དབང་དུ་བསྡུས་པར་བསམ། ཕོ་ཉ་བསྒྲུབས་པའོ།། ༧ གཉིས་པ་ཁམས་གསུམ་དབང་དུ་སྡུད་པའི་ལས་ཚོགས་ནི་དེ་ལ་སྤྱིར་ཁམས་གསུམ་དབང་སྡུད་དང་། དགོས་ཡུལ་ཕྱོགས་དབང་དུ་བསྡུས་པ། ལྷ་པ་སོ་སོ་དབང་དུ་བསྡུ་བའོ།། ༧ སྤྱིར་ཁམས་
གསུམ་དབང་སྡུད་རྫས་ལ། མི་ཁྲག །ར་ཁྲག །བོང་ཁྲག །མཚལ། དམ་རྫས་རིལ་བུ། བདུད་རྩི་ཨ་མྲྀ་ཏ། བྲག་ཞུན། སིན་དྷུ་ར། རིན་ཆེན་སྣ་ལྔ། ལྕགས་ཟངས་གསེར་དངུལ་དར་ཚོན་སྣ་ལྔ་ནི་བཞུ་བའི་ཁམས། །མུ་མེན། མུ་ཏིག །བྱུ་རུ། དུང་། གཡུ་ལྔ་མི་ཞུ་བའི་ཁམས། འབྲུ་སྣ་ལྔ། དར་སྣ་ལྔ། ད་ལི་མེ་ཏོག །ཨུཏྤལ་དམར་པོ། གླང་སྣ་དམར་པོ། ཙནྡན། རྒྱུ་སྐག །བཙོད། བྱང་སེམས་དཀར་དམར། མངལ་ཁྲག །མོ་རྒྱུད་མེད་ཁྲག །བུ་དགུའི་ཕའི་སེ་མོ་དང་གཉིས། བུ་མོ་དགུའི་མའི་སོ། པདྨ་རཀྟ། སྟག་ལོ་ཕོ་མོའི་ཁྲག །དམ་ལྡན་གྱི་སྔགས་པ་དང་། སྐྱེ་བོ་དགྲ་བླ་ཅན་གྱི་རུས་པ་རྣམས་ཕྱོགས་གཅིག་ཏུ་བཏུལ་ལ། རའམ། །ཟློསྤྲེའུ་མའི་གཟུགས་གཅིག་བཅོལ། སྲེ་མོང་གི་ཐོད་པའི་ནང་དུ་བཅུག །དར་སྣ་ཟ་འོག་གི་སྦས་ལ་དྲིལ། ཨོཾ་བཛྲ་སཱ་དྷུ་ས་མ་ཡ། ཝཀ་ཏྭཾ་ཀྲྀ་ཤི་ནི་ཀྲ་མ་ནི་སཱ་དྷ་ཧྲི་ཏྲི་སྭཱ་ཧཱ་པ་ཤཾ་ཀུ་རུ་སརྦ་ཨང་ཀུ་ཤ་ཛཿ ཞེས་བཟླ། འབུམ་གྲངས་ཐེབས་ནས། སྲེ་ཐོད་མཁར་རམ། རྒྱབ་རི་ལ་སྦས། མིའི་མི་རིག་པ་གསང་རྒྱ། མཚན། ཁམས་གསུམ་དབང་དུ་བསྡུས་ཤིང་། མཐར་མི་ནོར་འདུས་པ་ཐེ་ཚོམ་མེད་དོ། །གོང་གི་རྫས་རྣམས་དང་། ཡུངས་ཀར། བབ་བླ། རྡོ་དྲེག །མགར་བའི་ཁུལ་པ། ཐུན་དང་བསྲེས། རིལ་བུ་བྱས་ནས། ཐོད་པའམ། སྣོད་གས་ཆག་མེད་པའི་ནང་དུ་བླུགས། །དམར་པོའམ། དམ་རྫས་ལྟར། རིལ་ཆགས་བྱས། དར་དཀར་
དམར་གྱིས་ཁ་བཀབ། དབང་གི་སྐབས་སུ་ཤམ་བུའོ། །ཨོ་ཧྲི་བཛྲ་སཱ་དྷ་མི་སྙིང་བསྒུལ་བསྒུལ། ཡུལ་མི་སརྦ་ཎི༔ ཝ་ཤམ་ཀུ་རུ་ཧོ། ཞག་བདུན་ནམ་གསུམ་དུ་བསྒྲུབ་ལ། ཡུལ་མི་ལ་སྦྱིན། ཡང་ན་ནས་དང་བསྲེས་ལ་གཏོར། དེ་ནས་ཡུལ་ཁམས་དབང་དུ་འདུས་སོ། །རྣལ་འབྱོར་སྒྲུབ་པ་པོ་དེ་ཡི་དར་རམ། གསེར་དངུལ་ལ་སྔགས་ནས། བླ་མ་དབང་དུ་བསྡུ་ན། ཤམ་བུར། ཨོཾ་བཛྲ་སཱ་དྷ་ཧྲི་ཀུ་རུ་སརྦ་ཝ་ཤམ་ཀུ་རུ་ཧོ། ཁྲི་སྔགས་ནས་བླ་མ་ལ་འབུལ་ན་འདུའོ། །མཚལ་རིམ་ལ་སོགས་པ་བཏབ་ན་མི་དཔོན་དབང་དུ་བསྡུ་ན། ཤམ་བུར། ཨོཾ་བཛྲ་ཨངྐུ་ཤ་སརྦ་ཝ་ཤམ་ཀུ་རུ་ཧོ། སྟོང་རྩ་བཏབ་ནས། རང་གི་དཔྲལ་བ་ལ་ཐིག་ལེ། དེ་མཐོང་བར་དབང་དུ་འདུའོ།། ༧ གོང་གི་རྫས་རྣམས་སྨྱུག་ཚིགས་སུ་བླུགས་པས་རྒྱལ་པོ་དང་བློན་པོ་དབང་དུ་བསྡུ་བ་ནི། ཤམ་བུར། ཨོཾ་བཛྲ་སཱ་དྷ་ཧྲི་ཏྲི་རཱ་ཛ་ཧ་ཏ་སརྦ་ཝ་ཤཾ་ཀུ་རུ་ཧོ། ཨཱ་ཀརྵ་ཡ་ཛཿ དྲུག་ཁྲི་བཏབ་ནས་རྗེས་དེའི་བླ་རི་ཏུ་སྦས་པས་འདུའོ།། ༧ ཨ་རུ་ར། ཙནྡན། ད་ལི། བཟང་དྲུག །སྤོས་དཀར། ཨ་ག་རུ། ཛཱ་ཏི། གླང་ཆེན། སྤང་སྤོས། མཁན་དཀར། འཇའ་ཚོན་དར་ལྔ་རས་ལྔ། རིན་ཆེན་འབྲུ་སྣ་བསྲེས་ལ། ཕྱེ་མ་བྱས་ལ། ལྷ་ཀླུ་དབང་དུ་བསྡུ་བ་ནི། ཤམ་བུར། ༀ་བཛྲ་སཱ་དྷ་ཧྲི་ཏྲི་ཨཎཱ་ན་ག་ལོ་ཀ་པཱ་ལ་སརྦ་ཨཱ་ཀར་ཡ་ཝ་ཤཾ་ཀུ་རུ་ཧོ། སྟོང་ལྔ་བཏབ་ནས་རྒྱུན་བསངས་དང་
གསུར་ལ་བསྲེགས་པས་འདུའོ།། ༧ དྲི་བཟང་ལ་བཏབ་པས་སྐྱེ་བོ་དབང་དུ་བསྡུ་བ་ནི། ཤམ་བུར། བཛྲ་སཱ་དྷ་ཧྲི་ཊི་སརྦ་ཨངྐུ་ཤ་ཛཿ ཁྲི་ལྔ་བཏབ་སྟེ་ལུས་ལ་བྱུགས་ན་དྲི་ཚོར་བ་དེ་དབང་དུ་འདུའོ། །ཁ་ཟས་མངར་གསུམ་ལ་བཏབ་སྟེ་བུད་མེད་དབང་དུ་བསྡུ་བ་ནི་ཤམ་བུར། བཛྲ་སཱ་དྷ་ཧྲི་ཊི་མ་མ་ཧྥེ་མོ་ཎི་ཛཿ ཁྲི་གྲངས་བཏབ་ལ། གོང་གི་རྫས་སོ་གཉིས་དང་བསྲེས་ལ་བྱིན་པས་འདུའོ། །གསེར་གྱིས་བནྡྷེ་དབང་དུ་འདུའོ། །མཚལ་གྱིས་བོན་པོ་དབང་དུ་འདུའོ། །དུང་གིས་སྐྱེས་པ་དབང་དུ་འདུའོ། །གཡུས་བུད་མེད་དབང་དུ་འདུའོ། །སིནྡྷུ་རས་ན་ཆུང་དབང་དུ་འདུའོ། །ཅུ་གང་དཀར་པོས་སྟག་ཤར། ཛཱ་ཏིས་རྒྱལ་པོ། བཟང་དྲུག་སྨན་གྱིས་སྨན་པ། གེ་སར་གྱིས་བླ་མ། བབ་བླས་གཙོ་བོ་རྒན་གསུམ། སྤང་སྤོས་ཀྱིས་ཕུག་ལྷ། སྤོས་དཀར་གྱིསལྷ་ཀླུ་དབང་དུ་བསྡུ་བ་ནི། ཤམ་བུར། བཛྲ་སཱ་དྷ་ཧྲི་ཏྲི་སརྦ་པ་ཤཾ་ཀུ་རུ་ཧོ། ཁམས་གསུམ་སེམས་ཅན་བླ་མ་རྒྱལ་བློན་སྐུ་སེར་ཕོ་མོ་དབང་དུ་སྡུས་ཤིག །སྙིང་འགུལ་འགུལ་སེམས་བསླུས་བསླུས་ལག་ཁྱོག་ཛ། དྲུག་སྟོང་བཏབ་ལ་སྤྲེའུ་ཡི་ཐོད་པར་བཅུག །དར་རས་ཀྱིས་དྲིལ་ནས་ལུས་ལ་འཆང་ན་མིང་ཐོས་པ་དང་གཟུགས་མཐོང་བས་དབང་དུ་འདུའོ། །༧ དམིགས་པ་ཁོ་ནས་དབང་དུ་བསྡུ་ན། རང་ཡི་དམ་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཐུགས་ཀ་ནས་ཕོ་ཉའི་ཐུགས་ཀར། ཕོ་ཉ་ལྕགས་ཀྱུ་གྲངས་མེད་འཕྲོས། རྒྱལ་བློན་སྐྱ་སེར་དབང་དུ་
བསྡུས། མི་དེའི་སྙིང་ལ་ལྕགས་ཀྱུ་བཏབ། མདུན་དུ་བཀུག །རང་གི་སྨིན་མཚམས་ནས་འོད་ལྕགས་ཀྱུ་ཅན་ལྟར་གྲངས་མེད་འཕྲོས། བསྒྲུབ་བྱའི་སྙིང་ཁར་ཞུགས། ཚེ་བསོད་རྨི་ཡིག་རྣམ་པར་རང་ལ་ཐིམ་པར་བསམ། ཕོ་རྒྱུད་སྙིང་ཁར། མོ་རྒྱུད་བྷ་ག་ལ། བཏབ་བོ། དམ་ཅན་ལྕགས་ཀྱུ་ཅན་གྲངས་མེད་འཕྲོས། དམིགས་པའི་བྷ་ག་ནས་བཏབ། རང་མདུན་བཀུག །ཤམ་བུར། ཨོཾ་བཛྲ་ཧྲི་ཏྲི་ཌྷ་མོ་པ་ཤཾ་ཀུ་རུ་ཧོ། ཞག་བདུན་བསྒྲུབ། དེ་ནས་རྫསབ་སྒྲུབ། དམིགས་པས་དབང་དུ་བསྡུས་པ་སོགས་བྱས་ནས་ནི། ༧ ཁམས་གསུམ་དབང་དུ་བསྡུས་པའི་ལས་ཚོགས་འཁོར་ལོར་གྲགས་པ་ནི། ཁམས་གསུམ་དབང་སྡུད་འཁོར་ལོ་ཡུལ་ཚོགས་དབང་སྡུད་འཁོར་ལོ་ལྷ་འདྲེ་མི་གསུམ་དབང་དུ་སྡུད་པའི་འཁོར་ལོ། །སྲིད་གསུམ་ཟིལ་གནོན་འཁོར་ལོ། དེ་རྣམས་དཔེའུ་རིས་དང་ཟིན་བྲིས་ལོགས་ན་ཡོད། ༧ གསུམ་པ་འབྲུ་ནོར་ལོངས་སྤྱོད་དབང་དུ་བསྡུ་བ་ནི། ཟས་འགུགས། ནོར་འགུགས། འབྲུ་སྤེལ། ནོར་འགུགས་ལོངས་སྤྱོད་དབང་སྡུད་ཏེ་ལས་ཚོགས་ལྔའོ།། ༧་ཟས་འགུགས་བྱ་བ་ནི། གསེར་ཤོག་གམ། གསེར་གྱི་ཡི་གེ་འདི་བྲིས་ལ་སྔགས་འདི་བྱ། ཨོཾ་བཛྲ་སཱ་དྷ་ཧྲི་ཏྲི་ན་ན་ཁ་དྷེ་སརྦ་ཁ་ཟས་པཱ་ཤཾ་ཀུ་རུ་ཧོ། ཞེས་ཕྲིན་ལས་སྔགས་ནི། ཨོཾ་བཛྲ་སཱ་དྷ་ཧྲི་ཊི་ཝ་ཤཾ་ཀུ་རུ་ཟས་སྣ་བཏུང་སྣ་སྡུས་ཤིག །བརྒྱ་ཕྲག་བཏབ་ལ། རང་གི་སྲིན་ལག་ལ་བཅིངས་སྐུད་པ་དམར་པོས་ཕྱི་ནས་བཅིང་། ཐོད་པ་
མཚན་ལྡན་ནང་དུ་གཡང་རྩིས་བྱས་པ། ཟས་ཕུད། ནོར་ཕུད། དུང་ཤོག །ཕ་ཝང་ལོང་བུའི་ཏྲི་ལོག་ཅན་འཁོར་ལོ་འདི་དང་མཉམ་དུ་ཐོད་བསྒྲུབ་བྱ། དེ་ལྟར་བྱས་ནས་ནོར་འགུགས་སྔགས་ཤམ་བུའོ། །ཨོཾ་བཛྲ་སཱ་དྷ་ཧྲི་ཏྲི་གྲི་དུ་པ་ཡེ་ནོར་ཕྱུགས་སརྦ་སིདྡྷི་པ་ཤི་ཧོ། དུས་རྒྱུན་སྔགས་ཤམ་བཟླས། གྲངས་ནི་མ་གསུངས་སོ། །ཐོད་པ་དེ་བང་མཛོད་དམ་ནོར་ལྷས་སུ་སྦས་སོ། །ཐོད་པ་ནང་གི་འཁོར་ལོ་ནི་ལྟེ་བར་སྔགས་འདི་སྦྲུལ་ལྟར་འཁྱིལ་པ་ལྟར་བྲིས། ༀ་བཛྲ་སཱ་དྷུ་ས་མ་ཡ་ཝཀ་ཏྲ་ཏྲི་ཤི་ནི་ཀྲ་མ་ནི་པ་ཧྲི་ཏྲི། ནོར་བསྒུལ་བསྐུལ་འདུས་འདུས་མཐའི་ནོར་ཟས་དབང་དུ་སྡུས། ཕྱུགས་སྤེལ། ཁྱུ་བསྲུང་། ནོར་སྤེལ། རཏྣ་སིདྡྷི་གཏེར་གཏེར། མ་མ་ཆེ་གེ་མོའི་ནོར་སྤེལ། གསེར་དངུལ་བསྡུས། ཨརྱ་བཻ་ཤྲ་མ་ཎ་རཏྣ་སིདྡྷི་གཏེར་གཏེར་ཛམྦྷ་དན་ལོ་ཀ་ཌཱ་ཀི་ནཱི་ཨ་པར་ཙིཏྟ་སིདྡྷི་རཏྣ་སིདྡྷི་གཏེར་གཏེར། དེའི་ཕྱི་རིམ་མུ་ཁྱུད་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་སྔགས་བྲིས། དེ་ཕྱིར་ནོར་བུ་ཤིང་ལོ་འབྲས་བུ་བྲི། དེ་ཡང་ཐོད་པའི་ནང་དུ་གཞུག །ནོར་འགུགས་སོ།། ༧ སྤྲེའུ་སྙིང་དང་། རིན་ཆེན་ལྔ་དང་། འབྲུ་སྣ་ལྔ། བླ་རྡོ་བཅས་དར་སྣ་ལྔས་ དྲིལ་ནས། དབང་གི་བསྙེན་སྐབས། ཤམ་བུ 
་འདོགས། ཨོཾ་བཛྲ་སཱ་དྷ་ཧཱིཏྲི་ཡཀྵ་ཀུ་བེ་ར་ཡ་སརྦ་བཱ་སུ་ན་འབྲུ་ལྔ་སིདྡྷི་པ་ཤཾ་ཀུ་རུ་ཧོ། འབྲུ་སྤེལ་ཅིང་། རཏྣ་དེ་བ་བཱ་
སུ་སིདྡྷི་བདག་ལ་གཏེར་གཏེར། འབུམ་ཕྲག་ལྔ་བཟླ། བང་མཛོད་དམ་གནས་ཁང་དུ་སྦ། འབྲུ་སྤེལ་བའོ།། ༧ ལོངས་སྤྱོད་དབང་སྡུད་རྫ་འམ་ཟངས་བུམ་ཆག་གས་མེད་པའི་ནང་དུ་འབྲུ་སྣ་རིན། ཆེན་ས་སྣ་ཆུ་སྣ་གཞན་རྒྱལ་པོའི་ཁྲལ་བསྡུས་པའི་ཡོ་བྱད། བླ་མའི་དམ་བསྡུས་པའི་ཡོ་བྱད། སྐུ་གྲགས་ཅན་གྱི་གོས་དང་སྐྲ་སེན། ལོངས་སྤྱོད་གང་ཆེ་བའི་རྒྱུ་ཟས་རྣམས་བསྡུས་ནས་བུམ་པར་བླུག །གསེར་རམ་མཚལ་བསྲེས་ལ། །ལྷ་བསྙེན་དང་རྩ་སྔགས་བྲི། ཨོཾ་བཛྲ་བཱ་དྷ་ཧིཊི་པ་ཤཾ་ཀུ་རུ་ཧོ། བདག་ལ་ལོངས་སྤྱོད་ཆར་ལྟར་ཕོབ། སྟེང་ལྷ་ཡི་ལོངས་སྤྱོད་པ་ཤཾ་ཀུ་རུ་ཧོ་སྭཱ་ཧཱ། འོག་ཀླུའི་ལོངས་སྤྱོད་པ་ཤཾ་ཀུ་རུ་ཧོ་སྭཱ་ཧཱ། བར་མིའི་ལོངས་སྤྱོད་པ་ཤཾ་ཀུ་རུ་ཧོ་སྭཱ་ཧཱ། གནོད་སྦྱིན་བྱེ་བ་ས་ཡ་ཕྲག་བདུན་གྱི་ལོངས་སྤྱོད་སིདྡྷི་ཧོ། ཨ་པར་ཙིཏྟ་ལོངས་སྤྱོད་སརྦ་སིདྡྷི་ཧོ། ཞེས་བྲིས་གཞན་ཡང་འདོད་གསོལ་གང་འོས་འཇུག་རུང་བས་ལོངས་སྤྱོད་ཆེ་བའི་སྔགས་བྲིས། ནང་སྒྲུབ་དབང་གི་བསྙེན་སྐབས་ཞག་བདུན་སྒྲུབ་པར་བྱས། བུམ་པ་དར་རས་དཀར་པོས་དྲིལ། སྤྲ་ཚིལ་གྱིས་ལེགས་པར་གཏུམ། རྡོ་རྗེའི་ཕྱག་རྒྱས་བཏབ་ལ། རྒྱབ་རིའི་བང་མཛོད་དུ་རྒྱུད་ནས་བཤད་ལྟར་གཏེར་དུ་མི་རུལ་བར་སྦས་སོ། །མི་ཟད་པའི་གཏེར་དང་ལྡན་ནས་ལོངས་སྤྱོད་ཕུན་སུམ་ཚོགས་པར་འགྱུར་རོ། །ཁ་ཕོར་ལ་སྔགས་འདི་ཁྲི་ཕྲག་བཏབ་ན་ཁ་ཟས་ལོངས་སྤྱོད་ཆེན་པོ་ཆེ་བར་འབྱུང་
ངོ་། །ཨོཾ་བཛྲ་སཱ་དྷ་ཧྲི་ཏྲི་བ་གོང་གི་བུམ་པ་བསྒྲུབ་དུས་སྔགས་འདི་ཁ་ཟས་མལ་དུ་ལོངས་སྤྱོད་སྦྱརབ་སྙན་བརྒྱུད། མན། སུ་ཁ་ཟས་པཱ་ཤཾ་ཀུ་རུ་ཧྲི། ཕོར་པའི་ནང་གཞན་གྱིས་བཏུང་མི་རུང་བ་མན་ངག་གོ། ༧ གོས་ལ་བཏབ་ན་གོས་ལོངས་སྤྱོད་ནོར་ལ་བཏབ་ན་ནོར་ལོངས་སྤྱོད། གསེར་སོགས་ཟངས་སམ་རིན་པོ་ཆེ་ལས་བྱས་པའམ། མིའི་ལག་པ་གཡོན་པ་དཔུང་པ་ཡན་མགར་བས་ལེགས་པར་བཅོམ། དེའི་ནང་སྨད་འཚོང་རཀྟ་འམ། མོ་གཙང་སྟག་ལོའི་རཀྟ། ཁྱིའི་མངལ་ཁྲག་རའི་མངལ་ཁྲག །སྤྲེའུ་སྙིང་། གངས་སྦལ་ཤ །དེ་རྣམས་གསེར་དང་མཚལ་བསྲེས་ལ་འདི་བྲིས། ཨོ་ཧྲི་ཊི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། གདུལ་བྱ་སརྦ་པཱ་ཤཾ་ཀུ་རུ་ཧོ། རྟ་དྲེལ་ཞོན་པའི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། དར་ཟབ་གོས་ཀྱི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། ཇ་ཆང་བཏུང་བའི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། གསེར་དངུལ་ནོར་གྱི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། བྲང་ཁང་གནས་ཀྱི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། བང་མཛོད་འབྲུའི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། རྐང་གཉིས་མིའི་ལོངས་སྤྱོད་སརྦ་པཱ་ཤཾ་ཀུ་རུ་ཧོ། རྐང་བཞི་ཕྱུགས་ཀྱི་ལོངས་སྤྱོད་སརྦ་པཱ་ཤཾ་ཀུ་རུ་ཧོ་སྭཱ་ཧཱ། བཟའ་བའི་ལོངས་སྤྱོད་བཏུང་བའི་ལོངས་སྤྱོད་གྱོན་པའི་ལོངས་སྤྱོད་ཞོན་པའི་ལོངས་སྤྱོད་ཆར་ལྟར་ཕོབ། ཁམས་གསུམ་སྲིད་
གསུམ་ལྷ་ཀླུ་མི་གསུམ་བླ་མ་རྒྱལ་བློན་སྐྱ་སེར་བུད་མེད་ཐམས་ཅད་ཀྱི་ལོངས་སྤྱོད་མངའ་ཐང་དབང་དུ་སྡུས་ཤིག །ལུས་དབང་དུ་སྡུས་ཤིག །ངག་དབང་དུ་སྡུས་ཤིག །ཡིད་དབང་དུ་སྡུས་ཤིག །སརྦ་ལོ་ཀ་པཱ་ཤཾ་ཀུ་རུ་ཧོ་སྭཱ་ཧཱ། ཨོཾ་ཧྲི་སྭཱ་ཧཱ། ཞེས་པ་བྲིས་ནས་འབྲུ་སྣ་རིགས་བྱེད་རིན་པོ་ཆེའི་རིགས་བྱེད་ཀྱིས་ནང་ཁེངས་པར་བྱས་ནས། བསྙེན་སྐབས་སུ་ཤམ་བུའོ། །ཨོ་བཛྲ་སཱ་དྷ་གྷི་ཊི་སྦ་རཏྣ་སརྦ་ལོ་ཀ་པཱ་ཤཾ་ཀུ་རུ་ཧོ། ལོངས་སྤྱོད་དང་གདུལ་བྱ་དབང་དུ་པཱ་ཤཾ་ཀུ་རུ་ཧོ་སྭཱ་ཧཱ། ཞེས་ཞག་གྲངས་མང་བ་དགོས་གསུངས་པ་ཞག་ཉེར་གཅིག་བསྒྲུབ། ལོངས་སྤྱོད་དབང་དུ་སྡུད་པའི་ལས་ཚོགས་ལས། ནོར་འགུགས་འཁོར་ལོ། འབྲུ་སྤེལ་འཁོར་ལོ། ལོངས་སྤྱོད་འཁོར་ལོ། ནོར་དབང་དུ་སྡུད་པའི་འཁོར་ལོ། སྦྱིན་པ་སྤེལ་བའི་འཁོར་ལོ་དང་ལྔའོ། །དེ་དག་གི་དབང་གི་འཁོར་ལོ་དགུ་ཡི་ཟིན་བྲིས་ལོགས་ན་ཡོད། ༧ ཅེས་རིག་འཛིན་སྔགས་འཆང་ཐུགས་གཏེར་དང་། ཚལ་པའི་ནོར་
བུ་སྐོར་གསུམ་སོགས། བཀའ་གཏེར་འགའི་དོན་ལས་ཚོགས་གཅིག་ཏུ་དྲིལ ་བསྒྲིགས་ནས། བིརྱ་ས་ག་རས་བསྐུལ་བའི་ངོར། རཱ་ག་ཨ་སྱས་སྙིང་ལ་འཕངས་པའི་ལས་ཚོགས་སོ། །ཉེས་འགལ་མཆིས་ན་ཕོ་ཉ་འཁོར་གནོད་སྦྱིན་ས་ཡ་ཕྲག་བདུན་སོགས་ཀྱི་ཕྱོགས་ལ་བཤགས་ཤིང་། དགེ་དེས་འགྲོ་ཀུན་སེམས་ཅན་དབང་དུ་བསྡུས་ནས། རིགས་དྲུག་སེམས་ཅན་བདེ་ཆེན་ཞིང་གི་དཔལ་
ལ་སྤྱོད་པར་ཤོག །དབང་གི་ལས་ཚོགས་འདི་དང་གསང་སྒྲུབ་ནོར་སྒྲུབ་གསུམ་ལ་དབང་སྒྲུབ་ནོར་བུ་སྐོར་གསུམ་ཟེར། མངྒ་ལཾ།། ༈ དབང་གི་ཕོ་ཉ་གནོད་སྦྱིན་ཟངས་མདོག་སྒྲུབ་པ་ནི། དཀར་ཡོལ་ལམ་སྣོད་གཙང་ནང་དུ་གཏོར་མ་ནོར་བུ་འོད་འབར་པདྨས་བརྒྱན་པ། མར་རིལ། ཟན་རིལ། འབྲུ་དང་། རྩི་བཅུད། དཀར་གསུམ། མངར་གསུམ་ཚོགས་ཕུད་སྤུངས། གཞུང་ལྟར་གོང་བསྙེན་སོང་ལ། རང་ལྷར་གསལ་བའི་མདུན་དུ་ཏྲི་ལས་ཕོ་ཉ་ཟངས་ཀྱི་མདོག་ཅན་ཕྱག་ན་ནོར་བུ་ལྕགས་ཀྱུ་ནེའུ་ལེ་བསྣམས་པ། འཇིགས་གཟུགས་གནོད་སྦྱིན་རིན་པོ་ཆེའི་རྒྱན་ཅན་དུ་གསལ་བར་བསམ། དེའི་ཐུགས་ཀར་ཏྲིལས་འོད་འཕྲོས་གནོད་སྦྱིན་གནོད་གནས་དབང་པོའི་ཕོ་བྲང་ནས་སྤྱན་དྲངས། །གཉིས་སུ་མེད་པར་བདག་གི་བཀའ་ཉན་ཅིང་དངོས་གྲུབ་སྩོལ་བར་བསམ། ཨོ་ཧཱུྃཨ་པར་ཙིཏྟ་ཛཿཛཿ ས་མ་ཡ་ཧཱུྃ་ཛཿ ཅེས་བཏབ་ལ། མཚན་བར་བསྒྲུབ། སྐབས་སུ་ཐུན་འབུལ། དེའི་ལས་སྦྱོར་བྱ་བ་ནི། དར་རས་དྲི་མ་མེད་པར་གསེར་གྱི་གནོད་སྦྱིན་སྐུ་བྲིས་ལ་འབྱོར་ན་གསེར་བྱུག །ཡིད་ཀྱིས་སྤྱན་དྲངས་དར་སྐུ་ལ་ཐིམ་པར་བསྒོམ། ཨོཾ་ཨ་པ་ར་ཙིཏྟ་རཏྣ་མ་ཎི་ཁཉྩཨ་བྷི་སིདྡྷི་ཕ་ལ་ཧཱུྃ། སྐུ་འབག་དང་ནོར་སྣ་བཅས་རིན་པོ་ཆེའི་རྫའི་གའུར་བཅུག ། ཐབ་ཁ་ལ་སྦ། ཟས་སྣ་བཏུང་སྣ་འདུས་སོ། །བོང་བུ་དང་མཛོད་དུ་སྦས་ན་རྣམ་ཐོས་བུ་དང་ལོངས་སྤྱོད་མཉམ་པ་འགྱུར་རོ། །སྲེད་བུ་དཀར་པོ་ལ་རྡོ་རྗེའི་མདུད་པ་བརྒྱབ་ནས་སྔགས་འདི་བཏབ། ཨོ་ཧྲཱིཿཨ་
པར་ཙིཏྟ་མི་ལ་ཧུར་ཧུར་ཁ་ཐམ་སྣོད་དང་བང་བ་ལ་བཏགས། བསེ་རག་གི་གནོད་པ་བསྲུང་ངོ་།། ༧ དུག་ཤིང་ལ་བྱང་བུ་བྱས་ནས་མཚལ་གྱིས་བྲིས། ཨོ་ཨ་པ་ར་ཙིཏྟ་ཛཿ སྲིས་རྐུན་ཁ་ཆིངས་མ་མ་སྡང་རཀྵ་རཀྵ༔ སྒོའི་ནང་གི་ཡ་ཐེམ་ལ་བཏགས་པས་སྲིས་རྐུན་བསྲུང་བའོ།། ༧ མཐིང་ཤོག་ལ་གསེར་གྱིས་བྲིས་ནེའུ་ལེའི་ཁྲག་གིས་བྱུགས་ནས་ཕུར་བུ་དང་ལྷན་ཅིག །ཨོཾ་ཨ་པ་ར་ཙིཏྟ་བཛྲ་ཛ་གོད་འདྲེ་གོད་སྲི་ཁ་ཆིངས། གོད་བདག་སྙིང་ལ་ནུར་ནུར་བྷན་ཧ་ན་ཀྲོ་དྷ་རཱ་ཛ་ཀུ་བུ་ར་རཀྵ༔ ཕྱུགས་ལ་བཏབ། བྲན་མ་ལ་སྤྲེའུ་མི་གཟུགས་བཅོལ། སྙིང་གར་མཚལ་གྱི་སྙིང་པོ་བྲིས་ལ་བཅུག །མཚལ་དང་པདྨ་རཀྟས་བྱུག །ཨོཾ་སཱ་དྷུ་ཨ་པ་ར་ཙིཏྟ་ཛསརྦ་ཝ་ཤཾ་ཀུ་རུ་ཧོ༔ རྨེ་པ་ཤཾ་ཀུ་རུ་ཧོ། མི་ཀུན་གྱིས་མཐོང་བར་བྱས་པས་ཁམས་གསུམ་དབང་དུ་འདུས་སོ། །དེ་ནས་དཀར་གཏོར་དང་དར་དཀར་ཕུད་འབུལ། རང་མདུན་པད་ཟླ་ནོར་བདག་སྟེང་། །ཨ་པར་ཙིཏྟ་སྐུ་མདོག་དམར། །འཇིགས་གཟུགས་རིན་ཆེན་མཛེས་པའི་བརྒྱན། །ཕྱག་གཡས་ལྕགས་ཀྱུ་ནོར་བུ་བསྣམས། །གཡོན་པས་ནེའུ་ལེ་རྐྱལ་པ་འཛིན། །ནོར་བུ་ཡིད་བཞིན་ཆར་ལྟར་འབེབས། །འཁོར་དུ་གནོད་སྦྱིན་ས་ཡས་བསྐོར། །ཀུན་ཀྱང་ནོར་བུ་ནེའུ་ལེ་བསྣམས། །རང་བཞིན་གནས་
ནས་སྤྱན་དྲངས་གྱུར། །ཧཱུྃ། ལྕང་ལོ་ཅན་གྱི་གནས་མཆོག་ནས། །རིན་ཆེན་མཛེས་པའི་གཞལ་ཡས་ནས། །ན་པའི་སྟོབས་ལས་གྲུབ་པའི་འཁོར། །ཨ་པར་ཙིཏྟ་ཤུགཤེགས་སུ་གསོལ། །རིན་ཆེན་མཛེས་པའི་གདན་ལ་བཞུགས། །དཀར་གསུམ་ཕུད་དང་མངར་གསུམ་མཆོད། །མཆོད་ཡོན་ཞབས་བསིལ་མེ་ཏོག་སྤོས། །མར་མེ་དྲི་ཆབ་བཅུད་ལྡན་ཟས། །རོལ་མོ་བཏགས་དཀྲོལ་གཏོར་མ་སོགས། །རང་མཐུན་དགྱེས་པའི་མཆོད་པ་འབུལ། །གནོད་སྦྱིན་འཁོར་བཅས་ཐུགས་དམ་བསྐང་། །སེར་སྣ་ལ་སོགས་ཉེས་ཀུན་བཤགས། །མི་ཟད་ནོར་གྱིས་དངོས་གྲུབ་སྩོལ། །ཨོ་ཧྲིཨ་པར་ཙིཏྟ་ཛཿཛཿ ཨི་དམ་བ་ལིཾ་ཏ་ལ་ཁཱ་ཧི། ལན་བདུན་ནམ་ཉེར་གཅིག་གིས་འབུལ། གཏོར་མ། ཨ་ཀཱ་རོས་བྱིན་གྱིས་བརླབས་ནས། ཧཱུྃ། ལྕང་ལོ་ཅན་གྱི་ཕོ་བྲང་ནས། །གནོད་གནས་དབང་པོ་གཉེར་ཁ་ན། །ནོར་བདག་ཆེན་པོ་ཟངས་ཀྱི་མདོག །ཨ་པར་ཙིཏྟ་དངོས་གྲུབ་བདག །སྒྲུབ་པ་པོ་ལ་དངོས་གྲུབ་སྟེར། །ལོངས་སྤྱོད་ཆར་ལྟར་འབེབས་ལ་འདུད། །ལྷུ་ཐུང་གསུས་འཕྱང་གནོད་སྦྱིན་ཞི་མ་ཁྲོ། །ཕྱག་གཡས་ལྕགས་ཀྱུས་སྐྱེ་འགྲོ་དབང་དུ་བསྡུས། །ནོར་
བུ་འོད་འོབར་རཏྣ་ཆར་ལྟར་འབེབས། །གཡོན་གྱི་ནེའུ་ལེས་དབུལ་བའི་སྡུག་བསྔལ་སེལ། །རིན་ཆེན་སྤྲུལ་བརྒྱན་ལོངས་སྤྱོད་འཛད་མེད་སྟེར། །དབུལ་ཕོངས་འཇིགས་ལས་སྐྱོབས་ལ་ཕྱག་འཚལ་བསྟོད། །དཀར་གཏོར་དཀར་ཕུད་མངར་གསུམ་ཨ་མྲྀ་ཏ། །རིན་ཆེན་འབྲས་ཆན་འབྲས་ཆང་དམ་ཚིག་རྫས། །ལ་སོགས་མཐུན་པའི་དམ་རྫས་སྣ་ཚོགས་འབུལ། །ལོངས་སྤྱོད་འདོད་ཡོན་དངོས་གྲུབ་ཆར་ལྟར་ཕོབ། །གོད་འདྲེ་གོད་སྲི་ལྟོག་འགོང་དབུལ་སྲི་ཟློག །འགོང་པོ་བསེ་རག་སྲིས་རྐུན་ཁ་ཆིངས་ཤིག །སྙིང་འགོང་གོད་ཁ་ལོ་ཉེས་ཚོང་ཉེས་དང་། །མེད་སྲི་བོར་འདྲེ་མུ་གེ་ཐན་ལྟས་ཟློག །འཛད་མེད་ནོར་གྱི་དངོས་གྲུབ་བསྩལ་དུ་གསོལ། །རྨ་གཡང་ཟས་ཀྱི་དངོས་གྲུབ་བསྩལ་དུ་གསོལ། །བང་མཛོད་འབྲུ་ཡི་དངོས་གྲུབ་བསྩལ་དུ་གསོལ། །དབང་ཐང་བུ་ཡི་དངོས་གྲུབ་བསྩལ་དུ་གསོལ། །འདོ་བ་རྟ་ཡི་དངོས་གྲུབ་བསྩལ་དུ་གསོལ། །ཟ་ལེ་འབྲི་ཡི་དངོས་གྲུབ་བསྩལ་དུ་གསོལ། །ཚེ་རེ་ར་ཡི་དངོས་གྲུབ་བསྩལ་དུ་གསོལ། །གཡང་དཀར་ལུག་གི་དངོས་གྲུབ་བསྩལ་དུ་གསོལ། །རབ་འཕེལ་ཚེ་ཡི་དངོས་གྲུབ་བསྩལ་དུ་
གསོལ། །ར་བ་ཕྱུགས་ཀྱི་དངོས་གྲུབ་བསྩལ་དུ་གསོལ། །ཇ་དར་ཕྲུག་གི་དངོས་གྲུབ་བསྩལ་དུ་གསོལ། །གསེར་དངུལ་ནོར་གྱི་དངོས་གྲུབ་བསྩལ་དུ་གསོལ། །གནས་ཁང་སྒོ་བང་དངོས་གྲུབ་བསྩལ་དུ་གསོལ། །བང་མཛོད་འབྲུ་ཡི་དངོས་གྲུབ་བསྩལ་དུ་གསོལ། །རྩི་མར་སྣུམ་བཅུད་དངོས་གྲུབ་བསྩལ་དུ་གསོལ། །བདེ་སྐྱིད་དཔལ་གྱི་དངོས་གྲུབ་བསྩལ་དུ་གསོལ། །སྙན་གྲགས་བསོད་ནམས་དངོས་གྲུབ་བསྩལ་དུ་གསོལ། །ཁམས་གསུམ་དབང་སྡུད་དངོས་གྲུབ་བསྩལ་དུ་གསོལ། །རྣལ་འབྱོར་བཅོལ་བའི་ལས་ཀུན་བསྒྲུབ་ཏུ་གསོལ། །ཅེས་གཙང་སར་བསྐྱལ། ཨ་རཱ་གས་བྲིས་པ་ཉེས་དང་འགལ་བ་བཤགས་ཤིང་། སྦྱིན་པའི་ཕ་རོལ་ཏུ་ཕྱིན་པར་སངས་རྒྱས་བསྟན་པའི་སྦྱིན་བདག་ཆེན་པོར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།