ལེའུ་གཉིས་པ། སྐྱེ་བོ་ཐ་མལ་ཆོས་སྒོར་འཇུག་པའི་ཕྱིར། །རི་ཆོས་གླེང་གཞི་མཐོང་བ་འཛུམ་ཤོར་ཡོད། །
༼ཁ༽ རི་ཆོས་མཚམས་ཀྱི་ཞལ་གདམས་ལས། གླེང་གཞི་མཐོང་བ་འཛུམ་ཤོར་ཞེས་བྱ་བ་བཞུགས་སོ། །ན་མོ་རཏྣ་གུ་རུ་ཡེ། རི་ཆོས་མཚམས་ཀྱི་ཞལ་གདམས་ཀྱི། །གླེང་གཞི་རྒྱུ་རྐྱེན་བརྩམ་པའི་དོན། །ཉུང་བསྡུས་ཚིགས་སུ་བཅད་དེ་བཀོད། །མཁས་འདོད་ཆེ་བའི་རྩོམ་པ་མཁན། །བཟང་འདོད་ཆེ་བའི་ཚུལ་འཆོས་མཁན། །རྟག་འཛིན་ཆེ་བའི་ཁང་ལས་མཁན། །ཉེ་རྩིས་ཆེ་བའི་འཁོར་སྡུད་མཁན། །
ནོར་འདོད་ཆེ་བའི་འགྲོ་དོན་མཁན། །འཆི་དོགས་ཆེ་བའི་མཚམས་སྒྲུབ་མཁན། །རཱ་ག་ཨ་སྱ་མིང་ཅན་དེས། །མཁས་གྲུབ་བླ་མ་རྣམ་བཞིའི་དྲུང་། །རྩེ་གཅིག་སྒྲུབ་པའི་དམ་བཅའ་ཕུལ། །མི་ཆེན་ཡོན་བདག་མང་པོ་ལ། །ཚེ་མཚམས་བྱེད་པའི་ཁ་ཕུད་བྱས། །རྟ་ཕྱུགས་བྲང་ང་དེ་རིན་བཞག །གྲོང་ལྟག་ཁང་ཆུང་ཕྲ་མོའི་ནང་། །ན་དོགས་འཆི་དོགས་འདོན་འབུག་གཟབ། །སོ་གསོད་ལྐོག་ཉལ་བྱེད་པ་ན། །ཟླ་ངོ་བཅུ་གཉིས་ངོ་མཐོང་དུས། །རིགས་བཟང་བློ་གསལ་ཤེས་རབ་ཅན། །དད་གུས་བརྩོན་པར་ལྡན་པ་ཡི། །བླ་མ་བརྩོན་འགྲུས་རྒྱ་མཚོ་དེ། །མཚམས་ཁང་ཕུག་སྒོའི་རྩ་རུ་སླེབས། །བདག་ནི་ད་ལོ་དེའུ་ཤི་བྱས། །ཟུག་གཟེར་དྲག་པོས་མནར་བ་ཡི། །སྡུག་བསྔལ་རྟོགས་པས་ནོན་མ་ཐུབ། །ན་བའི་སྡུག་བསྔལ་དེ་འདྲ་ན། །འཆི་བདག་གཤིན་རྗེ་བྱུང་ཙམ་ན། །ཉམས་རྟོགས་སད་ལ་ཡར་གྱིས་དོགས། །དཀོན་མཆོག་ཐུགས་ལྷ་རྗེས་མ་ཤི་བས། །སྒྱུ་ལུས་འདི་ལ་བེད་སྤྱོད་ནས། །མི་འཆིའི་ཐབས་ནི་མི་གདའ་སྟེ། །ཤི་ཡང་འགྱོད་པ་མེད་པ་ཡི། །མཚམས་དང་སྒྲུབ་པ་ཨེ་ཐོན་བསམ། །སྒྲུབ་གནས་
རི་ཁྲོད་གཅིག་ཡོད་དེ། །ས་དཔྱད་ཀྱང་ནི་མི་ཤེས་པས། །འདུག་རུང་མི་རུང་ཐག་མ་ཆོད། །དབང་ལུང་གདམས་ངག་མང་ཐོབ་ཅིང་། །བསྐྱེད་རྫོགས་གོ་བ་ཆེ་ན་ཡང་། །སྒྲུབ་པ་མ་ཐོན་ཉམས་མྱོང་མེད། །རི་ཁྲོད་ཁོ་ན་འགྲིམ་བསམ་སྟེ། །རི་ཆོས་གདམས་པ་ཐོབ་མ་མྱོང་། །བཀའ་བརྒྱུད་གོང་མས་མཛད་པ་ཡི། །རི་ཆོས་དཔེ་ཆ་འགའ་ཡོད་དེ་། །ལུང་རྒྱུན་ཙམ་ཡང་མ་ཐོབ་ཅིང་། །ཉམས་སུ་ལེན་པའང་དཀའ་བར་གདའ། །ཁྱེད་ཀྱིས་བརྩམས་ཆོས་མང་ན་ཡང་། །དེ་སྔོན་རི་ཆོས་མ་མཛད་པས། །རི་ཆོས་ཤིག་། ནི་རྩོམ་པར་ཞུ། །ཁྱེད་ཀྱི་ཕྱག་ཀྱང་བསྙུང་ཟེར་བས། །ཕྱག་བྲིས་འོ་རྒྱལ་ཆེ་ལོགས་པས། །ཞལ་ནས་གསུང་དང་ངེད་ཀྱིས་འབྲི། །དེ་ལྟར་བརྩམ་པའི་མཎྜལ་དུ། །འོད་མཚན་ཅོད་པན་འཆང་བ་ཡི། །ཞབས་རྗེས་གསེར་ཐང་བྱིན་རླབས་ཅན། །ཉིད་ཀྱིས་མཛད་ཆོས་གླེགས་བམ་བཅས། །ཕུལ་ནས་ཕྱག་ཀྱང་དགུ་ཕྲུག་འཚལ། །མཎྜལ་ཀྱང་ནི་བརྒྱ་རྩ་ཕུལ། །དེ་ཚེ་རཱ་ག་ཨ་སྱ་ཡིས། །ཧེ་ཧེ་བརྩོན་འགྲུས་རྒྱ་མཚོ་བ། །བཀའ་བརྒྱུད་གོང་མས་གསུངས་པ་ཡི། །རི་ཆོས་རྣམས་ཀྱི་དོན་རྩ་ནི། །ཚེ་འདིའི་བྱ་བ་བློས་
བཏང་ནས། །ཕ་ཡུལ་སྤང་བའི་གནས་རི་རུ། །མི་རྟག་འཆི་བས་སེམས་བསྔངས་ཏེ། །ལྟོ་གོས་གཏམ་ལ་གྱོང་བསྐུར་ནས། །ཆུ་འཐུང་རྡོ་མུར་རོ་གོས་གྱོན་། །རང་སེམས་ངོ་བོ་སྐྱོང་བ་ལས། །བྱ་རྒྱུ་ཅི་ཡང་མེད་པར་བྱས། །བླ་མའི་གསོལ་འདེབས་ཚིག་གསུམ་ལས། །འདོན་རྒྱུ་བསྒྲུབ་རྒྱུ་མེད་པར་བྱས། །འཆི་བདག་ནམ་འོང་སྒུག་པ་ལས། །བསམ་རྒྱུ་ཅི་ཡང་མེད་པར་བྱས། །དད་འདུན་ཡོན་བདག་བྱུང་སྲིད་ན། །རི་དྭགས་སྨྲས་མས་མི་མཐོང་བཞིན། །ལུང་སྟོང་མི་སྐད་མེད་སར་འབྲོས། །བཀའ་བརྒྱུད་དགོངས་པའི་རི་ཆོས་ཡིན། །ནད་མེད་རླུང་ཁྱེར་ཆོས་པ་ལགས། །དེ་འདྲ་བདག་གིས་མ་ནུས་པས། །སྐྱེས་པའི་ཡུལ་འདིར་སྡོད་ཡུན་རིང་། །ས་མིང་མི་ལ་ཐོགས་ནས་ཡོད། །ཉེ་དུ་དབོན་རིགས་གྲྭ་པས་བསྐོར། །གཅིག་པུར་ཞག་གཅིག་འདུག་མ་མྱོང་། །ལོ་བརྒྱད་ལོན་ནས་དཀོར་ལ་ཟོས། །དེང་སང་རྟ་ཕྱུགས་བྲང་ང་ཡོད། །འཆི་བ་སྙིང་ལ་མ་གཟེར་བས། །རི་ཁྲོད་གནས་ཆེན་ཁང་པ་ཙམ། །དེ་ཕྱིར་རི་ཆོས་རྩོམ་ཐབས་མེད། །བཀའ་བརྒྱུད་གསུང་ལ་དཔེ་བྱས་ནས། །བྲིས་ན་རྒྱུས་ཡོད་ཀུན་གྱིས་
ཁྲེལ། །ཁ་ཡི་གཏམ་པ་སྣས་ཁྲེལ་དཔེ། །རང་གིས་ཉམས་སུ་མ་བླངས་པའི། །ཆོས་བཤད་བྱས་ཀྱང་སུ་ཡིད་ཆེས། །དེ་ཕྱིར་རི་ཆོས་རྩོམ་ཐབས་མེད། །ཅེས་སྨྲས་བརྩོན་འགྲུས་རྒྱ་མཚོ་དེས། །ཞག་གཅིག་བསམ་མནོ་བཏང་བྱས་ནས་། །སླར་ཡང་ཞུ་བ་ཕུལ་བ་ནི། །བླ་མ་རཱ་ག་ཨ་སྱ་ཁྱེད། །ཆུང་ནས་རབ་བྱུང་ཚུལ་ཁྲིམས་ལྡན། །བླ་མ་ཆེ་ཕྲ་མང་དུ་བསྟེན། །གསར་རྙིང་དབང་ལུང་གདམས་པས་ཕྱུག །གཞོན་ཚེ་གྲོང་ཆོག་མཛད་ཚེ་ཡང་། །བར་སྐབས་བསྙེན་སྒྲུབ་དཔག་མེད་མཛད། །དེ་རྗེས་ལོ་གྲངས་བཅུ་གསུམ་བར། །བསྒྲུབ་པའི་དམ་བཅའ་མཐའ་རུ་ཕྱིན། །ས་གཏེར་གནམ་ཆོས་མང་པོ་ནས། །སྐལ་ལྡན་ཆོས་བདག་ལུང་བསྟན་ཐོབ། །ལོ་བདུན་ཕྱོགས་མཚམས་འགྲོ་དོན་རྒྱས། །ཆེ་དགུ་མང་པོས་བཏུད་ཅིང་བཀུར། །ད་ནི་ཚེ་མཚམས་དམ་བཅའ་མཛད། །དེ་སྔོན་ཉིད་ཀྱིས་ཉམས་མྱོང་དང་། །བསྟུན་པའི་རི་ཆོས་གནང་བར་ཞུ། །དེ་བས་ལྷག་པའི་བྱ་བཏང་སོགས། །བཤད་ཀྱང་ང་ཡིས་ཉམས་མི་ལོན། །ཉམས་སུ་མི་ལོན་དམ་ཆོས་དེ། །དཔེ་ཆའི་ཁྲེས་པོ་ལྕི་བའི་རྒྱུ། །ཉམས་སུ་ལོན་ངེས་གདམས་པ་ཞུ། །ཟེར་བས་རྭ་
ག་ཨ་སྱ་དེས། །ཉི་ཐུང་ཐུགས་དམ་བྱེད་རྒྱུ་མང་། །རི་ཆོས་ལ་སོགས་རྩོམ་གཞི་ཡི། །དཔེ་ཆ་གཅིག་ཀྱང་མ་བལྟས་ཤིང་། སྐུ་རིམ་སྲུང་ཟློག་དམིགས་རིམ་མང་། །བསམ་མནོ་བཏང་ལོང་མ་བྱུང་ཡང་། །དགོང་མོའི་ཐུན་མཚམས་རེ་རེ་ལ། །འཕྲལ་དུ་གང་དྲན་སྨྲས་པ་རྣམས། །བླ་མ་བརྩོན་འགྲུས་རྒྱ་མཚོ་བས། །ཟབ་ཆོས་ཡིན་པའི་དད་འདུན་གྱིས། །གོས་སྲབ་ལོ་གསར་ལྷགས་པ་ལ། །བཟོད་པའི་གོ་ཆ་ཆེན་པོ་བསྒོས། །སོར་མོ་རླུང་གི་རྟ་ལ་ཞོན། །སྨྲས་རིམ་བཞིན་དུ་བྲི་ཚར་བྱས། །རིམ་ཚོ་པ་བཞིན་དུ་བྲིས་པའོ། །མདོ་རྒྱུད་ལུང་འདྲེན་མེད་པའི་ཕྱིར། །མཁས་པ་རྣམས་ཀྱིས་གཟིགས་ཉན་མེད། །འོན་ཀྱང་མདོ་རྒྱུད་བསྟན་བཅོས་ནི། །ཚད་ལྡན་གང་ལའང་མི་འགལ་སྙམ། །སྟོང་སྐད་མཐོན་པོ་མ་མཆིས་པས། །རྟོགས་པ་མཐོན་པོས་གཟིགས་ཉན་མེད། །འོན་ཀྱང་གོལ་ས་ཤོར་ས་ལ། །ལྟུང་བའི་སྐྱོན་ནི་མེད་སྙམ་བགྱི། །སྡེབ་སྦྱོར་སྙན་དངགས་མ་མཆིས་པས། །རྩོམ་པའི་ཡན་ལག་མ་ཚང་ཡང་། །སེམས་ལ་ཕན་པ་ཡོད་སྙམ་བགྱི། །འདི་ཉིད་ཚུལ་བཞིན་ཉམས་བླངས་ན། །གྲུབ་ཐོབ་ཟེར་བ་མ་བྱུང་
ཡང་། །བྱང་ཆུབ་ལམ་ལ་འགྲོ་སྙམ་བགྱིད། །དེ་ཕྱིར་སྣག་ཤོག་སྨྱུ་གུ་ལ། །སེར་སྣ་མ་བྱས་བྲིས་པ་ལགས། །རི་ཆོས་མཚམས་ཀྱི་ཞལ་གདམས་ལས། །གླེང་གཞིའི་སྐོར་ཏེ་དང་པོའོ།། ༈ །།ན་མོ་གུ་རུ། །བླ་མ་བརྩོན་འགྲུས་རྒྱ་མཚོ་ཁྱེད། །ངེས་པར་རི་ཁྲོད་འགྲིམ་དགོངས་ན། །ལུས་ལ་སྙིང་པོ་ལེན་དགོངས་ན། །མི་ལུས་དོན་ལྡན་བྱེད་དགོངས་ན། །འཆི་ཁ་འགྱོད་མེད་བྱེད་དགོངས་ན། །འཆི་ལ་མི་འཚེར་བྱེད་དགོངས་ན། །བར་དོ་མེད་པར་བྱེད་དགོངས་ན། །ཕྱི་མའི་བདེ་སྐྱིད་བསྒྲུབ་དགོངས་ན། །ཟློབདེ་ནས་བདེ་བར་འགྲོ་དགོངས་ན། །གཏན་བདེའི་འདུན་མ་བསྒྲུབ་དགོངས་ན། །མཐར་ཐུག་སངས་རྒྱས་ཐོབ་འདོད་ན། །ང་ཡི་སྙིང་གཏམ་ཡིད་ལ་ཞོགས། །བསྐལ་པ་བྱེ་བ་བརྒྱ་སྟོང་ལ། །མི་ལུས་ཐོབ་པ་ལན་རེ་ལགས། །ད་རེས་ལོ་བརྒྱ་ཐོག་གཅིག་ཡིན། །མི་ལུས་དོན་དང་ལྡན་པར་མཛོད། །བསྐལ་པ་བརྒྱ་སྟོང་དུ་མ་ལ། །སངས་རྒྱས་ཆོས་ཀྱི་སྒྲ་ཡང་མེད། །ད་རེས་བསྐལ་པ་བཟང་པོར་སྐྱེས། །སངས་རྒྱས་སྟོང་རྩ་འབྱོན་ན་ཡང་། །བར་སྐབས་བསྟན་པ་ནུབ་ཡུན་རིང་། །ད་རེས་ཤཱཀྱའི་བསྟན་དང་མཇལ། །
འཛམ་གླིང་ཡུལ་གྲུ་མང་པོ་ན། །བོད་མིན་གཞན་ལ་དམ་ཆོས་ནུབ། །ད་རེས་ཁ་བ་ཅན་དུ་སྐྱེས། །འོན་ལོང་དབང་པོ་མི་གསལ་ན། །མི་ལུས་ཙམ་པོས་ཆོས་་མི་གོ །ད་རེས་ཤེས་རབ་རིག་པ་གསལ། །ད་རེས་ཆོས་ཤིག་མ་བྱས་ན། །ཕྱིས་ནས་འདི་འདྲའི་ལུས་མི་རྙེད། །དེ་ཕྱིར་མི་ལུས་དོན་ལྡན་མཛོད། །མི་ལུས་དོན་ལྡན་གང་ཞེ་ན། །སྡོམ་གསུམ་རིམ་གྱིས་ཞུས་པ་རྣམས། །རྩ་བ་མ་ཉམས་སྲོག་ལྟར་བསྲུང་། །ཕྲ་ཞིབ་ཉམས་ན་གསོ་སྦྱོང་མཛོད། །ལུས་ལ་གཡོག་གི་འདུ་ཤེས་ཀྱིས། །དལ་བར་ཡུད་ཙམ་ཉལ་མ་བཅུག །ལུས་ལ་བེད་ཆོད་ཕྱག་བསྐོར་མཛོད། །ཡང་ན་རླུང་དང་འཁྲུལ་འཁོར་སྦྱོངས། །ངག་ལ་བེད་ཆོད་བསྙེན་སྒྲུབ་མཛོད། །ཡང་ན་གསོལ་འདེབས་ཆོས་སྤྱོད་འབུངས། །སེམས་ལ་བེད་ཆོད་བསྐྱེད་རྫོགས་སྒོམས། །ཡང་ན་སྙིང་རྗེའི་གཏོང་ལེན་གཅེས། །གཡོག་ལོ་གླ་དང་ཚས་མ་ལྟར། །དམ་ཆོས་བསྒྲུབ་པའི་གླ་བརྔན་དུ། །ལྟོ་གོས་ཅི་འབྱོར་ཙམ་རེ་གྱིས། །མ་འཛོམ་དཀའ་ཐུབ་བཅུད་ལེན་མཛོད། །ཤ་ཐུད་ཇ་སོགས་ཟས་བཟང་ཡང་། །ཞག་གཅིག་སོང་ནས་མི་ གཙང 
་རྫས། །དེ་ལ་སྙིང་པོ་མེད་པར་
སོམས། །ལྟོགས་དང་སྐོམ་པའི་ཡི་མུག་སྐྱུར། །རླུང་བཅུད་དམིགས་པས་ལུས་སྟོབས་བསྐྱེད། །འཛོམ་ན་དཀའ་ཐུབ་དགོས་རྒྱུ་མེད། །ལུས་ལྷ་ཡི་དམ་རྣམས་ལ་མཆོད། །རང་གཞན་བསོད་ནམས་ཚོགས་སུ་བསྔོ། །མ་ཤིའི་བར་དུ་དེར་འབད་ན། །མི་ལུས་དོན་དང་ལྡན་པ་དང་། །ཤི་ཡང་འགྱོད་མེད་འགྲུབ་པ་ཡིན། །ལུས་ལ་སྙིང་པོ་ལེན་པའི་གླུ། །རི་ཆོས་ཀུན་གྱི་ཐོག་མ་ཡིན།། ༈ །།ན་མོ་གུ་རུ། །གསོན་དང་ཀརྨ་བརྩོན་འགྲུས་པ། །ངེས་པར་རི་ཁྲོད་འགྲིམ་པ་ན། །སྔོན་འགྲོའི་ཆོས་སུ་གསུངས་ན་ཡང་། །དུས་རྣམས་ཀུན་ཏུ་གལ་ཆེ་བ། །མི་རྟག་འཆི་བ་དྲན་པ་གཅེས། །འཆི་བ་སྙིང་ནས་མ་དྲན་ན། །ཆོས་སྒོར་ཞུགས་པ་དོན་མ་མཆིས། །ལྟོ་ཕྱིར་རབ་ཏུ་བྱུང་བ་དང་། །གྲལ་ཕྱིར་བསྙེན་པར་རྫོགས་ན་ཡང་། །ཆོས་མེད་སེར་མོའི་གཟུགས་བརྙན་ཙམ། །རིག་གནས་ཡོན་ཏན་ཀུན་བསླབ་ཀྱང་། །ཟང་ཟིང་ལོངས་སྤྱོད་བསྡུ་ཕྱིར་ཙམ། །མཚམས་སྒྲུབ་རི་ཁྲོད་འགྲིམས་ན་ཡང་། །ངག་ནུས་ནད་གདོན་ཞི་ཕྱིར་ཙམ། །སྡོམ་པ་དམ་ཚིག་སྲུང་ན་ཡང་། །ངོ་ཚས་མི་ཁ་སྲུང་ཕྱིར་ཙམ། །གང་བྱས་ཚེ་འདི་ཁོ་
ནའི་དོན། །དེ་ཀུན་འཆི་བ་མ་དྲན་སྐྱོན། །འདུས་བྱས་མཚན་ཉིད་མི་རྟག་པ། །སྟོང་གསུམ་འཇིག་རྟེན་སྲ་མཁྲེགས་ཅན། །འདི་ཡང་མེ་ཆུ་རླུང་གིས་འཇིག །རྫོགས་པའི་སངས་རྒྱས་རྡོ་རྗེའི་སྐུ། །དེ་ཡང་འདས་པའི་ཚུལ་སྟོན་ན། །བསོད་ནམས་ཆུང་ངུའི་འབྲས་བུ་ཡི། །མི་ལུས་ཉམ་ཆུང་ལྟ་ཅི་སྨོས། །ཚངས་དང་བརྒྱ་བྱིན་འཁོར་ལོས་སྒྱུར། །སྟོབས་ཆེན་དེ་རྣམས་འཆི་དགོས་ན། །སྲོག་ཆགས་གཞན་ལྟ་སྨོས་ཅི་དགོས། །འཛམ་གླིང་ཚེ་ལ་ངེས་པ་མེད། །ཁྱད་པར་དེང་སང་སྙིགས་མའི་སྐབས་། །ཚེ་ཚད་བཞི་བཅུ་ཁ་རལ་དུས། །དེ་ཡང་མི་ཐུབ་འཆི་བ་མང་། །མཁས་དང་བཙུན་དང་བཟང་བ་དང་། །རྒྱལ་པོ་མན་ནས་སྤྱང་པོ་ཡན། །མི་འཆི་འདུག་ས་གཅིག་ཀྱང་མེད། །ཀྱེ་མ་བརྩོན་འགྲུས་རྒྱ་མཚོ་བ། །འཆི་བ་ཀུན་གྱིས་ཤེས་མོད་ཀྱང་། །ད་དུང་མི་དོགས་བསམ་པ་འདིས། །ཐམས་ཅད་འདི་ཡིས་བསླུས་ནས་གདའ། །སྒྱུ་ང་ཡང་འདི་ཡིས་བསླུ་བསླུ་འདྲ། །ཁྱེད་ཀྱང་འདི་ཡིས་བསླུ་དོགས་མཛོད། །ཕུ་ཤི་མདའ་ཤི་ཟེར་བའི་དུས། །ཆ་ངག་ཡིན་པ་གོ་བར་མཛོད། །ན་མཉམ་གཞོན་པ་ཤི་བའི་
དུས། །ཚེ་ལ་ངེས་མེད་དྲན་པར་མཛོད། །རོ་དང་རུས་པ་མཐོང་བའི་ཚེ། །ལུས་ཀྱི་ཆོས་ཉིད་དྲན་པར་མཛོད། །སྨན་གྱིས་མ་ཕན་ཤི་ཐོས་ཚེ། །སྨན་གྱིས་ཕན་མེད་དྲན་པར་མཛོད། །རིམ་གྲོས་མ་ཕན་ཤི་ཐོས་ཚེ། །ཟློག་ཐབས་མེད་པ་དྲན་པར་མཛོད། །ནངས་པར་ཐེགས་པའི་མགྲོན་པོ་བཞིན། །མྱུར་དུ་འགྲོ་དགོས་དྲན་པར་མཛོད། །ལོངས་སྤྱོད་རྒྱ་མཚོ་ཡོད་ན་ཡང་། །ཞག་རྒྱགས་ཁྱེར་དབང་ཨེ་གདའ་ན། །འཁོར་གཡོག་བརྒྱ་སྟོང་ཡོད་ན་ཡང་། །གཅིག་ཙམ་ཁྲིད་དབང་ཨེ་གདའ་ན། །ཁྲབ་ཆེན་བརྒྱ་སྟོང་དཔུང་ཡོད་ཀྱང་། །འཆི་བདག་བཀག་ས་ཨེ་གདའ་ན། །ཟས་ནོར་འཛམ་གླིང་བཀང་ཡོད་ཀྱང་། །འཐེན་ས་གཏོང་ས་ཨེ་གདའ་ན། །ནམ་འོང་ཆ་མེད་འཆི་བདག་དེ། །ནམ་མཁའི་དབྱིངས་ནས་ཐོག་རྒོད་བཞིན། །ནམ་ཙམ་འོང་ན་ཨ་ཙ་མ། །འཆི་ཁ་གནད་གཅོད་སྡུག་བསྔལ་དེ། །གཉེན་འདུན་མང་པོས་མཐའ་བསྐོར་ཡང་། །བགོ་ནས་ཁུར་ཐབས་ཨེ་གདའ་ན། །འབྱུང་བཞིའི་གཏོང་ལེན་ཐིམ་རིམ་ལ། །ལོག་པའི་འཁྲུལ་སྣང་སྣ་ཚོགས་དེ། །།ཤེས་རིགས་བཀྲ་ཡང་ཨེ་ཕན་ན། །བར་དོའི་འཇིགས་སྐྲག་སྣ་ཚོགས་
པས། །ཉེས་ཆེན་བཙོན་དུ་བཟུང་བ་བཞིན། །སྔངས་སྐྲག་འཇིགས་གསུམ་ཨ་ཙ་མ། །ཆ་མེད་ཡུལ་དུ་རྒྱུས་མེད་མི། །གྲོགས་མེད་གཅིག་པུར་འཁྱམས་པའི་དུས་། །གར་འགྲོའི་གཏད་སོ་ཡོད་ལགས་སམ། །རྒྱགས་ཕྱེ་གྲབས་སུ་ཚུད་ལགས་སམ། །ལས་ཀྱི་གཤིན་རྗེའི་ཁྲིམས་ར་ན། །རྫུན་གྱི་ཕན་པ་མེད་དོ་སྐད། །མེ་ལོང་ཡིག་ཆུང་གསལ་ལོ་སྐད། །དེ་དུས་ངོ་གནོང་མེད་པ་ཞིག །བརྩོན་འགྲུས་རྒྱ་མཚོ་ད་རེས་རེམ། །མི་རྟག་འཆི་བ་དྲན་པའི་གླུ། །རི་ཁྲོད་འགྲིམ་པའི་ཆ་རྐྱེན་ཡིན།། ༈ །།ན་མོ་གུ་རུ། །རྒྱུ་འབྲས་ཕྲ་ཞིང་ཕྲ་བ་རྣམས། །རྫོགས་པའི་སངས་རྒྱས་མ་གཏོགས་པ། །དགྲ་བཅོམ་རྣམས་ཀྱིས་མི་དགོངས་ན། །རང་ཅག་རྣམས་ཀྱིས་ག་ལ་ཤེས། །བདེན་བཞི་ཆོས་ཀྱི་འཁོར་ལོ་ནི། །གཙོ་བོར་རྒྱུ་འབྲས་སྟོན་པ་ལགས། །རོ་གཅིག་རྟོགས་པའི་སྐྱེས་བུ་ཡིས། །རྒྱུ་འབྲས་དོན་ལ་འཕྲིགས་ཚུད་པས། །རྟེན་འབྲེལ་སྣ་ཚོགས་འཆར་བར་གསུངས། །དེ་འདྲ་བདག་གི་སྤྱོད་ཡུལ་མིན། །འོན་ཀྱང་ཐུབ་པའི་དབང་པོ་ཡི། །གསུང་ལ་དཔང་པོ་བྱས་ནས་ཀྱང་། །ཅུང་ཟད་སྨྲ་ནུས་བླ་མའི་དྲིན། །ཕྱི་རོལ་སྣོད་ཀྱི་
འཇིག་རྟེན་ཡང་། །སེམས་ཅན་སྤྱི་མཐུན་ལས་ཀྱིས་གྲུབ། །ནང་བཅུད་འགྲོ་བའི་སྐྱིད་སྡུག་རྣམས། །ཐམས་ཅད་ལས་ཀྱི་རྒྱུ་ལས་བྱུང་། །དགེ་བའི་ལས་ཀྱིས་བདེ་འགྲོ་གསུམ་། །མི་དགེའི་ལས་ཀྱིས་ངན་འགྲོ་གསུམ། །མི་གཡོ་བ་ཡི་ལས་ཞེས་པ། །བསམ་གཏན་རོ་ལ་ཆགས་པ་ཡིས། །གཟུགས་དང་གཟུགས་མེད་ལྷ་ཡི་གནས། །ཀུན་སློང་བསམ་པའི་དབང་གིས་ནི། །ཞེ་སྡང་བསམ་པའི་ཀུན་སློང་གིས། །མི་དགེ་གང་བྱས་དམྱལ་བ་སྟེ། །སེར་སྣ་འདོད་ཆགས་ཀྱིས་སྤྱད་པའི། །མི་དགེའི་ལས་ཀྱིས་ཡི་དྭགས་སོ། །གཏི་མུག་ཀུན་བསླངས་མི་དགེ་བ། །གང་བྱས་དུད་འགྲོ་རྣམས་སུ་སྐྱེ། །སེར་སྣ་དགེ་བ་འདྲེས་མ་ཡིས། །བྲེལ་ཕོངས་མི་ཡི་གནས་སུ་སྐྱེ། །ཕྲག་དོག་དགེ་བ་འདྲེས་མ་ཡིས། །འཐབ་རྩོད་ལྷ་མིན་གནས་སུ་སྐྱེ། །ང་རྒྱལ་དགེ་བ་འདྲེས་མ་ཡིས། །ཕམ་ལྟུང་ལྷ་ཡི་གནས་སུ་སྐྱེ། །སྡིག་པ་ཆེན་པོས་དམྱལ་བ་སྟེ། །འབྲིང་གིས་ཡི་དྭགས་གནས་སུ་སྐྱེ། །ཆུང་ངུས་དུད་འགྲོ་རྣམས་སུའོ། །དགེ་བ་ཆེན་པོས་ལྷ་རུ་སྐྱེ། །འབྲིང་གིས་མི་རུ་སྐྱེ་བ་སྟེ། །ཆུང་ངུས་ལྷ་མ་ཡིན་སྐྱེ་གསུངས། །སྲོག་གཅོད་རྣམ་སྨིན་དམྱལ་
བ་སྟེ། །དབང་གི་འབྲས་བུས་མིར་སྐྱེས་ཀྱང་། །ཚེ་ནི་ཐུང་བར་འགྱུར་བ་ཡིན། །རྒྱུ་མཐུན་འབྲས་བུ་སྲོག་གཅོད་དགའ། །མ་བྱིན་བླངས་པའི་རྣམ་སྨིན་གྱིས། །ཡི་དྭགས་གནས་སུ་སྐྱེ་འགྱུར་ཏེ། །དབང་གི་འབྲས་བུ་མིར་སྐྱེས་ཀྱང་། །དབུལ་ཞིང་ཕོངས་པར་འགྱུར་བ་ཡིན། །རྒྱུ་མཐུན་འབྲས་བུ་རྐུ་འཕྲོག་དགའ། །མི་ཚངས་སྤྱོད་ཀྱི་རྣམ་སྨིན་གྱིས། །ཡི་དྭགས་གནས་སུ་སྐྱེ་འགྱུར་ཏེ། །དབང་གི་འབྲས་བུ་ཚད་རོང་གི །སྲོག་ཆགས་སྤུ་མེད་རིགས་སུ་སྐྱེ། །རྒྱུ་མཐུན་འབྲས་བུ་མིར་སྐྱེས་ཀྱང་་། །གཞན་གྱི་བུད་མེད་གཡེམ་ལ་དགའ། །རྫུན་གྱི་རྣམ་སྨིན་དུད་འགྲོ་སྟེ། །དབང་གི་འབྲས་བུ་མིར་སྐྱེས་ཀྱང་། །ཁ་ན་དྲི་ངན་བྲོ་བ་ཡིན། །རྒྱུ་མཐུན་འབྲས་བུ་རྫུན་ལ་དགའ། །ཕྲ་མའི་རྣམ་སྨིན་ལྷ་མ་ཡིན། །དབང་གི་འབྲས་བུ་མིར་སྐྱེས་ཀྱང་། །གཉེན་བཤེས་ཀུན་དང་བྱེ་བྲལ་མང་། །རྒྱུ་མཐུན་འབྲས་བུ་དབྱེན་ལ་དགའ། །ཚིག་རྩུབ་རྣམ་སྨིན་དམྱལ་བ་སྟེ། །དབང་གི་འབྲས་བུས་མིར་སྐྱེས་ཀྱང་། །ཉེས་མེད་གཤེ་སྐུར་མང་བ་ཡིན། །རྒྱུ་མཐུན་འབྲས་བུ་ཚིག་རྩུབ་འཆོར། །ངག་འཆལ་རྣམ་སྨིན་དུད་འགྲོ་
སྟེ། །དབང་གི་འབྲས་བུ་མིར་སྐྱེས་ཀྱང་། །བདེན་པར་སྨྲས་ཀྱང་རྫུན་ཡིན་ཟེར། །རྒྱུ་མཐུན་འབྲས་བུ་ངག་མི་བཙུན། །བརྣབ་སེམས་ལ་ཡང་གཉིས་ཡིན་ཏེ། །རང་རྩིས་ཆེ་བ་བདག་ལ་བརྣབ། །གཞན་ལ་བརྣབ་པ་ཞེས་བྱ་ནི། །གཞན་གྱི་ཕུན་སུམ་ཚོགས་པ་རྣམས། །རང་གི་ཡིན་ན་ཨང་སྙམ་པ། །རྣམ་སྨིན་ངན་སོང་གང་རུང་སྟེ། །དབང་གི་འབྲས་བུ་མིར་སྐྱེས་ཀྱང་། །ཅི་བསམ་མི་འགྲུབ་ལོག་པར་འགྲོ། །རྒྱུ་མཐུན་འབྲས་བུ་བརྣབ་སེམས་འདོད། །གནོད་སེམས་རྣམ་སྨིན་དམྱལ་བར་སྐྱེ། །དབང་གི་འབྲས་བུ་མིར་སྐྱེས་ཀྱང་། །དགྲ་དང་མི་བྲལ་འཇིགས་སྐྲག་དང་། །རྒྱུ་མཐུན་འབྲས་བུ་གནོད་སེམས་འདོད། །ལོག་ལྟའི་རྣམ་སྨིན་དུད་འགྲོ་སྟེ། །དབང་གི་འབྲས་བུ་མིར་སྐྱེས་ཀྱང་། །ལྟ་ལོག་མུ་སྟེགས་རིགས་སུ་སྐྱེ། །རྒྱུ་མཐུན་འབྲས་བུ་ལོག་ལྟ་ཆེ། །མི་དགེ་བཅུ་པོ་སྤངས་པ་ནི། །དགེ་བ་བཅུ་པོ་ཞེས་བྱ་སྟེ། །སྐྱོན་ནི་སུམ་ཅུ་དེ་དག་ལས། །ལྡོག་པའི་ཡོན་ཏན་སུམ་ཅུ་ཐོབ། །སྤྱིར་ནི་ལས་ལ་རྣམ་པ་བཞི། །ཚེ་སྔོན་ནམ་ཞིག་བསགས་པའི་ལས། །ཚེ་འདིར་ངེས་པར་སྨིན་དགོས་པས། །དགེ་བའི་འབྲས་བུ་བདེ་སྐྱིད་
ཚོགས། །བདུད་ཀྱིས་བར་དུ་གཅོད་མི་ནུས། །སྡིག་པའི་ལས་འབྲས་སྡུག་བསྔལ་ཚོགས། །སངས་རྒྱས་ཀྱིས་ཀྱང་སྐྱོབ་མི་ནུས། །ལས་ཀྱི་རྣམ་སྨིན་མ་། གཏོགས་སོ། །གསུངས་པའི་ལས་ནི་དེ་ཡིན་ཏེ། །མཐོང་ཆོས་མྱོང་འགྱུར་ཞེས་བྱའོ། །ཚེ་འདི་ལས་འབྲས་དགེ་དང་སྡིག །འབྲིང་ཙམ་ཕྱི་མ་མི་སྨིན་ཏེ། །སྐྱེ་བ་གཅིག་གིས་བར་ཆོད་ནས། །དེ་ཡི་རྒྱབ་མ་སྨིན་པ་ནི། །སྐྱེས་ནས་མྱོང་འགྱུར་ལས་ཞེས་བྱ། །དགེ་བ་སྡིག་པ་ཆུང་ངུ་རྣམས། །རྣམ་སྨིན་ངེས་པ་མེད་པ་ལ། །ནམ་ཞིག་ངེས་པར་སྨིན་དགོས་པ། །ལན་གྲངས་གཞན་དུ་མྱོང་འགྱུར་ཟེར། །ཕ་མ་སློབ་དཔོན་དགྲ་བཅོམ་བསད། །སངས་རྒྱས་དགྲོང་བར་ཤོམ་པ་རྣམས། །སྐྱེ་བ་གཞན་གྱིས་བར་མི་ཆོད། །བར་དོ་ཡང་ནི་མི་བགྲོད་པར། །མནར་མེད་གནས་སུ་ལྟུང་འགྱུར་ཕྱིར། །མཚམས་མེད་མར་གྱི་ཟང་ཐལ་ཡིན། །འཆི་དུས་ཐུགས་དམ་ཡུན་རིང་ཟིན། །འཕོ་བ་སྐར་ཁུང་མདའ་འཕངས་ལྟར། །བར་དོ་མི་བགྲོད་ཞིང་ཁམས་སྐྱེ། །ཡར་གྱི་ཟང་ཐལ་ཞེས་བྱའོ། །དགེ་བ་ཤིན་ཏུ་སྟོབས་ཆེ་ན། །འདི་ཡི་ཕྱི་མ་ཉིད་ལ་སྨིན། །དགེ་བ་མཚམས་མེད་
ཅེས་བྱའོ། །ཕ་མ་རྡོ་རྗེ་སློབ་དཔོན་དང་། །ས་བཅུའི་སེམས་དཔའ་སངས་རྒྱས་ལ། །དགེ་དང་སྡིག་པ་གང་བསགས་པ། །ཚེ་འདིར་སྨིན་པའང་སྲིད་ཅེས་གསུངས། །ཚེ་སྟོད་སྡིག་པ་བྱས་གྱུར་ཀྱང་། །ཚེ་སྨད་དགེ་ལ་འབད་པ་ན། །སྔོན་ལ་དགེ་བ་སྨིན་གྱུར་ཏེ། །འཕེན་བྱེད་སྡིག་པས་འཕང་ན་ཡང་། །རྫོགས་བྱེད་དགེ་བས་རྫོགས་པ་ཟེར། །ཚེ་སྟོད་ཆོས་ལ་འབད་གྱུར་ཀྱང་། །ཚེ་སྨད་མི་དགེ་སྤྱོད་གྱུར་ན། །།འཕེན་བྱེད་དགེ་བས་འཕངས་ན་ཡང་། །རྫོགས་བྱེད་སྡིག་པས་རྫོགས་པའོ། །བསྔོ་བའི་རྒྱ་ཡིས་མ་ཐེབས་པའི། །དགེ་བ་ངོམ་དང་འགྱོད་ན་འཛད། །སྡིག་པ་བཤགས་ན་འཛད་པ་ཡིན། །དེ་ལྟར་མིན་པའི་དགེ་དང་སྡིག །བསྐལ་པ་བརྒྱར་ཡང་ཆུད་མི་ཟ། །རང་བྱས་རང་ལ་སྨིན་པ་ཡིན། །མ་བྱས་ལས་དང་འཕྲད་མི་སྲིད། །བྱས་པ་ནམ་ཡང་ཆུད་མི་ཟ། །ཉི་ཟླ་ཐང་ལ་ལྟུང་བའམ། །རླུང་ནི་ཞགས་པས་ཟིན་པ་དང་། །མེ་ནི་གྲང་བར་འགྱུར་སྲིད་ཀྱི། །ལས་འབྲས་བསླུ་བ་མི་སྲིད་པ། །སངས་རྒྱས་ཀུན་གྱི་བཀའ་ཡིན་ཏེ། །འདི་ལ་མི་བདེན་སུས་ཟེར་བ། །ཚེ་འདིར་ལྕེ་ཡི་དབང་པོ་རྟུལ། །སྐྱེ་བ་ལྔ་བརྒྱར་ཞུགས་པར་
སྐྱེ། །དེ་ཕྱིར་རི་ཁྲོད་འགྲིམ་འདོད་ན། །ལས་འབྲས་ཕྲ་ཞིབ་ཡང་ཡང་བསམ། །སྤང་བླང་ལག་ལེན་ཐེབས་པར་མཛོད། །ལས་འབྲས་དོན་རྩའི་གླུ་ཆུང་འདི། །རྟ་ལོ་རྒྱལ་ཟླའི་ཚེས་གཅིག་གི །དགོང་ཐུན་མཚམས་ལ་སྨྲས་པའོ།། ༈ །།ན་མོ་ལོ་ཀི་ཤྭ་ར་ཡེ། །གསོན་དང་བརྩོན་འགྲུས་རྒྱ་མཚོ་བ། །བསམ་མནོ་ལེགས་པར་ཐོངས་མཛོད་དང་། །བློ་བདེ་ཉལ་བའི་སྐབས་མ་ཡིན། །གཉིད་ཀྱང་བྱ་ཡལ་གློ་སྙིང་འདར། །འཁོར་བའི་རྒྱ་མཚོ་ཆེན་པོ་འདིར། །རང་ཅིག་སེམས་ཅན་ཐམས་ཅད་ལྟུང་། །སྐྱེ་རྒས་ན་འཆིའི་རྦ་ཀློང་འཁྲུགས། །ངན་སོང་ཆུ་སྲིན་པིར་གྱིས་གང་། །སྡུག་བསྔལ་རླབས་ཕྲེང་བར་སྐབས་མེད། །འདི་ལས་ད་རེས་མ་ཐར་ན། །ངན་འགྲོ་ལོག་པའི་ཉ་མིད་དང་། །དེ་མིད་ཆུ་སྲིན་པིར་གྱིས་འཛིན། །འདི་ལས་སྒྲོལ་བའི་དེད་དཔོན་ནི། །མཚན་ལྡན་བླ་མ་ཁོ་ན་ལགས། །དེ་ཕྱིར་དེ་ལ་གུས་པ་བསྐྱེད། །རྒྱ་མཚོར་སྒྲོལ་བའི་གྲུ་ཀླུ་གཟིངས་ནི། །སྡོམ་པ་དམ་ཚིག་ཁོ་ན་ལགས། །དེ་ཕྱིར་དེ་ལ་གཅེས་སྤྲས་བྱ། །རྒྱ་མཚོར་སྒྲོལ་བའི་སྐྱ་བ་ནི། །བླ་མའི་གདམས་ངག་གཅིག་པུ་ལགས། །དེ་ཕྱིར་དེ་ཉིད་
ཡིད་ལ་འཆང་། །རྒྱ་མཚོར་མྱུར་དུ་སྒྲོལ་བའི་ཐབས། །ཉམས་ལེན་བརྩོན་འགྲུས་ཁོ་ན་ལགས། །དེ་ཕྱིར་དེ་ལ་འབད་པར་བྱ། །མེ་སྟག་ཕོག་པའི་བྱབས་ལུགས་ལ། །མི་ཡི་མེ་ལས་བདུན་འགྱུར་གྱིས། །དམྱལ་བའི་མེ་ནི་ཚ་གསུངས་ན། །ལོ་གྲངས་སྟོང་ཕྲག་དུ་མ་རུ། །བཙོ་ཞིང་སྲེག་པ་སུ་ཡིས་བཟོད། །དགུན་ཁ་གོས་སྲབ་འདེར་ལུགས་ལ། །ལུས་ནི་གས་ཤིང་ཆུ་བུར་རྡོལ། །ལོ་གྲངས་བྱེ་བ་དཔག་མེད་དུ། །འཁྱགས་ན་སུ་ཞིག་བསྲན་པར་ནུས། །ཉིན་གཅིག་ཟོས་མེད་ལྟོགས་ཡུས་ལ། །ལོ་གྲངས་སྟོང་ཕྲག་རེ་རེར་ཡང་། །ཟས་སྐོམ་མིག་གིས་མ་མཐོང་ན། །དེ་འདྲའི་ལྟོགས་སྡུག་སུ་ཡིས་ཁྱགས། །ཁྱི་རྒན་ཟེར་བའི་ཀོ་ལོང་ལ། །ཁྱི་ཡི་སྐྱེ་བ་ལྔ་བརྒྱ་ཙམ། །བཏུད་མར་བླངས་ན་ཅི་འདྲ་འཁམ། །འུར་ཞོག་ལང་བའི་སྐྲག་སྣང་ལ། །ལྷ་མིན་སྐྱེས་ན་གང་དུ་བྲོས། །ཁ་རྒྱལ་ཕམ་པའི་སེམས་སྡུག་ལ། །ལྷ་ཡི་ཕམ་ལྟུང་ཇི་ལྟར་བཟོད། །ངན་སོང་གསུམ་གྱི་སྡུག་བསྔལ་འདི། །རྣ་བས་ཐོས་ཀྱང་ཡ་ང་ན། །ཐོག་ཏུ་བབས་ན་ཇི་ལྟར་བྱེད། །བདེ་འགྲོ་གསུམ་གྱི་བདེ་སྐྱིད་འདི། །ཟས་བཟང་དུག་དང་འདྲེས་པ་
བཞིན། །འཕྲལ་དུ་སྐྱིད་དེ་ཕུགས་སུ་ཕུང་། །རྫི་བོ་ཟ་མར་རེས་པ་བཞིན། །འགྲོ་བ་དྲུག་ཏུ་རེས་མོས་འཁོར། །སྡུག་བསྔལ་གྲངས་མེད་རྒྱ་མཚོ་འདྲ། །སྐྱེ་རྒ་ན་འཆི་བར་མེད་མྱོང་། །དེ་ལྟར་འཁོར་བའི་སྡུག་བསྔལ་དེ། །མུ་སྟེགས་པ་ཡིས་ཟེར་བ་བཞིན། །ཕྱུ་དང་དབང་ཕྱུག་གིས་མ་བྱས། །བཙན་པོ་གཞན་གྱིས་ཆད་པ་མིན། །རང་གིས་བྱས་པའི་ལས་འབྲས་ལགས། །དེ་ཕྱིར་རང་ལ་སྙིང་རྗེ་ལྟ། །སྔར་བྱས་སྡིག་ལ་བཤགས་སྡོམ་དང་། །ཕྱིན་ཆད་མི་བྱེད་དམ་བཅའ་བཟུང་། །ནུབ་རེ་བཞིན་དུ་རང་རྒྱུད་ལ། །བརྟག་ལ་དགེ་སྡིག་གང་མང་བལྟ། །ཉེས་ལྟུང་གང་བྱུང་འཕྲལ་དུ་བཤགས། །དགེ་བ་གང་འགྲུབ་བྱང་ཆུབ་བསྔོ། །ལུས་ངག་མི་དགེ་མ་བྱས་ཀྱང་། །སེམས་ལ་མི་དགེ་འགྱུས་པ་རྣམས། །རང་གིས་རང་ལ་ཞེ་ཁྲེལ་བཟླ། །མདོར་ན་ཆོས་ཕུང་བརྒྱད་ཁྲིའི་དོན། །བཅོམ་ལྡན་འདས་ཀྱིས་བཀའ་སྩལ་པ། །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཅེས་གསུངས་ཤོ་ལོ་ཀ་དེ་ལ། །མདོ་ཕྱོགས་ཆོས་རྣམས་འདུས་
པ་ཡིན། །དེ་ཕྱིར་ཚིག་དེ་ཡིད་ལ་ཆོངས། །འཁོར་བའི་སྡུག་བསྔལ་དྲན་པའི་གླུ། །དགེ་སློང་རཱ་ག་ཨ་སྱ་ཡིས། །རྟ་ལོ་རྒྱལ་ཟླའི་ཡར་ཚེས་གསུམ། །དགོང་མོའི་ཐུན་ལ་སྨྲས་པ་སྟེ། །བརྩོན་འགྲུས་རྒྱ་མཚོས་བརྗེད་ཐོར་བྲིས། །འགྲོ་བ་མང་པོར་ཕན་ཐོགས་ཤོག །ལེའུ་གཉིས་པ་མངྒ་ལཾ།། །།