ལེའུ་ལྔ་པ། སྡོམ་གསུམ་རིམ་གྱིས་ཞུས་ནས་སྲུང་བདེའི་ཕྱིར། །སྡོམ་གསུམ་སྲུང་ཚུལ་ཉི་མའི་དཀྱིལ་འཁོར་ཡོད། །
༼ཅ༽ རི་ཆོས་མཚམས་ཀྱི་ཞལ་གདམས་ལས། སྡོམ་པ་གསུམ་གྱི་སྲུང་ཚུལ་མུན་སེལ་ཉི་མའི་དཀྱིལ་འཁོར་ཞེས་བྱ་བ་བཞུགས་སོ། །ན་མོ་གུ་རུ་ཤཱཀྱ་མུ་ནེ་ཡེ། ཀུན་མཁྱེན་ཐུབ་པའི་ཞབས་ལ་ཕྱག་འཚལ་ལོ། །དགེ་སློང་རྡོ་རྗེ་འཛིན་པ་བརྩོན་འགྲུས་ཀྱི། །སྡོམ་གསུམ་དམ་ཚིག་སྲུང་མཚམས་གང་ཡིན་ཟེར། །འདི་ནི་རྒྱ་ཆེ་གྲངས་མང་བརྗོད་མི་ལངས། །དབུས་གཙང་མཁས་པ་ཀུན་གྱི་རྩོད་གཞི་ལགས། །འགྲན་མེད་རྒྱུད་རྒྱལ་ཀྱེ་ཡི་རྡོ་རྗེ་ལས། །
སོ་ཐར་བྱང་སྡོམ་སྔགས་སྡོམ་རིམ་པར་ཞུ། །དེ་ནས་སྔགས་ཀྱི་སྤྱོད་པ་བྱ་བར་བཤད། །གསང་སྔགས་རྙིང་མར་ཐེག་པ་རིམ་དགུའི་དབང་། །དེས་ཀྱང་སྡོམ་པ་གསུམ་ཀ་རིམ་གྱིས་ཐོབ། །འདི་དག་ཉམས་སུ་ལེན་པའི་ཕྱག་ལེན་ལ། །རྒྱ་གར་དུའང་ཆོས་ལུགས་གསུམ་དུ་ཡོད། །སྡོམ་གསུམ་གནས་འགྱུར་ས་སྐྱ་པ་ཡིས་བཞེད། །གཏོང་གནས་ཐ་དད་བཀའ་བརྒྱུད་པ་ཡིས་བཞེད། །གཅིག་ལ་གཅིག་བརྟེན་ཙོང་ཁ་པ་ཡིས་བཞེད། །ཁྱིམ་པ་རྡོར་འཛིན་དགེ་སློང་རྡོར་འཛིན་གཉིས། །འདི་དག་གྲུབ་མཐའ་དག་དང་མ་དག་པ། །རྒྱ་གར་པཎ་ཆེན་ཤོ་དྷ་ཀ་ར་སྟེ། །ཏི་པུ་གསང་སྔགས་སྡོང་པོའི་ཡབ་ཡིན་ཏེ། །མཆོག་ནི་མ་ཡིན་ཐུན་མོང་གྲུབ་པ་ཐོབ། །གྲུབ་རྟགས་རྡོ་རྗེ་ དྲིལ་བུ 
་ནམ་མཁར་བཞག །དེ་ཉིད་བོད་དུ་ལན་གསུམ་ཕེབས་པ་ཡི། །དང་པོའི་མཚན་ལ་ཤ་དྷ་ཀ་ར་ཟེར། །ལོ་ཆེན་རིན་ཆེན་བཟང་པོའི་བླ་མར་བསྟེན། །ཀུན་རིག་ལ་སོགས་རྣལ་འབྱོར་རྒྱུད་རྣམས་བསྒྱུར། །བར་རེས་བོད་དུ་ཕེབས་ཚེ་ཁོང་གི་མཚན། །ཨ་ཙར་དམར་པོའི་ཞབས་ཞེས་བྱ་བར་གྲགས། །དེ་དུས་ཆགས་ལམ་ངན་སྔགས་ཁོ་ན་སྤེལ། །མཐུ་གླ་བླངས་པས་
གསེར་སྲང་སུམ་བརྒྱ་རྙེད། །དེ་དུས་ཇོ་བོ་རྗེ་དང་དུས་མཉམ་པས། །ཁོང་གིས་ཆགས་ལམ་སྤེལ་ལ་མ་མཉེས་ནས། །ཇོ་བོས་ཁོང་ལ་བཀའ་སྐྱོན་འབར་ཤ་ཆེ། །དེ་དོན་བཀའ་གདམས་གླེགས་བམ་ནང་དུ་གསལ། །ཁོང་གི་ཆོས་ལུགས་དང་པོ་སྐྱབས་སྡོམ་ནས། །དགེ་སློང་བར་དུ་རིམ་པར་ཞུས་བྱས་ཏེ། །རེ་རེ་གཞུང་བཞིན་ལོ་ཤས་ཟླ་ཤས་བསྲུངས། །དེ་ནས་བྱང་ཆུབ་སེམས་བསྐྱེད་ཞུས་པ་ཡིས། །སོ་ཐར་སྡོམ་པ་བྱང་སེམས་སྡོམ་པར་གྱུར། །དེ་ནས་འདུལ་ཁྲིམས་གཅིག་ཀྱང་སྲུང་མི་དགོས། །བྱང་སེམས་བསླབ་བྱ་གཏོང་ལེན་ལོ་ཤས་བསྒོམས། །དེ་ནས་གསང་སྔགས་དབང་བཞི་ཞུས་པ་ཡིས། །བྱང་སྡོམ་དེའང་སྔགས་ཀྱི་སྡོམ་པར་འགྱུར། །དེ་ནས་བྱང་སྡོམ་བསླབ་པ་བསྲུང་མི་དགོས། །སྔགས་འཆང་ཡིན་ཕྱིར་ཆུང་མ་ལེན་ཡང་ཆོག །བླང་ཡང་སྡོམ་པ་ཤོར་བའི་ཉེས་པ་མེད། །ཁོང་གི་རྗེས་འབྲང་མང་པོ་དར་བའི་ཕྱིར། །མངའ་རིས་དབུས་ཀླུ་གཙང་ཀུན་ཏུ་སེར་ཁྱིམ་དར། །འདི་ལ་ཨ་ཙར་དམར་པོའི་ཆོས་ལོག་ཅེས། །མཁས་གྲུབ་ཀུན་གྱིས་གཤེ་ཞིང་བཀག་པ་མཛད། །སྡོམ་གསུམ་གནས་འགྱུར་ངོ་བོ་གཅིག་ཅེས་པ།
སྡོམ་པ་གསུམ་ཀ་རིམ་གྱིས་ཞུས་པའི་ཚེ། །གནས་འགྱུར་སྔགས་སྡོམ་ཉིད་དུ་འགྱུར་ན་ཡང་། །ངོ་བོ་གཅིག་ཕྱིར་གསུམ་ཀ་བསྲུང་དགོས་པ། །དེང་སང་ས་ལུགས་རྣམས་ཀྱིས་བཞེད་པ་སྟེ། །རྒྱབ་རེས་ཤདྨ་ཀ་ར་བོད་དུ་ཕེབས། །འབྲོག་མི་ལོ་ཙཱས་བླ་མར་བསྟེན་པའི་དུས། །ལམ་འབྲས་ལ་སོགས་ཟབ་ཆོས་མང་བ་དང་། །བདེ་མཆོག་རྭ་ལི་ཉེར་བཞིའི་རྒྱུད་རྣམས་གསུངས། །དེ་དུས་མཚན་ལ་ག་ཡ་དྷ་རིར་གྲགས། །གོང་འོག་གཉིས་ཀ་སྡོམ་གསུམ་གནས་འགྱུར་ལུགས། །སྡོམ་གསུམ་རིམ་གྱིས་ཞུས་ཤིང་སོ་སོར་སྲུང་། །རྩ་རླུང་ལས་སུ་རུང་བ་དེ་ཡི་ཚེ། །ཆགས་ལམ་ལ་སོགས་བརྟེན་པར་བྱས་ན་ཡང་། །སོ་སོར་ཐར་པའི་སྡོམ་པ་མི་འཆོར་ཞིང་། །དྲག་སྔགས་ངན་མཐུས་ཞིང་བཅུ་བསྒྲལ་བ་ན། །དགེ་སློང་སྡོམ་པ་འཆོར་བར་མི་འགྱུར་བ། །འདི་ཡང་སྡོམ་གསུམ་གནས་འགྱུར་ངོ་བོ་གཅིག །དཔེར་ན་ཨོ་རྒྱན་རྗེ་འབངས་ཉེར་ལྔ་བཞིན། །སྦྱོར་སྒྲོལ་མཛད་ཀྱང་ཆོས་གོས་མནབ་པའོ། །དེ་ནི་རྙིང་མ་དག་པའི་ལུགས་ཡིན་ཏེ། །མ་དག་སྔ་འགྱུར་རྙིང་མའི་ཆོས་ལུགས་ལ། །མདོ་དབང་ལ་སོགས་ཐེག་དགུའི་དབང་ཐོབ་ནས། །སྡོམ་
པ་གསུམ་ཀ་ཐོབ་པར་རློམས་ནས་ཀྱང་། །འདུལ་ཁྲིམས་སྡོམ་པ་གཞན་ནི་མི་ཞུ་བར། །ཆོས་གོས་སྣམ་སྦྱར་གྱོན་ནས་སྲུང་སྡོམ་གཟབ། །དེ་ནི་ཨོ་རྒྱན་ཆེན་། པོའི་ལུང་བསྟན་ལས། །སྡོམ་པ་དབང་གིས་ཐོབ་པར་བརྩི་བ་ནི། །འདུལ་བའི་བསྟན་པ་ཉམས་པའི་རྟགས་སུ་གསུངས། །འདི་ལ་ཉེས་འགལ་ཆེན་པོ་མ་མཆིས་ཏེ། །འདུལ་ཁྲིམས་མ་ཞུས་འདུལ་ཁྲིམས་སྲུང་བ་དེས། །ཕན་ཡོན་ཆེན་པོ་མི་འབྱུང་སྐྱོན་ཅིག་གདའ། །འདི་ནི་མདོ་ཁམས་ཤར་ཕྱོགས་མཐའ་ནས་དར། །ཇོ་བོ་རྗེ་དང་པཎ་ཆེན་ཤཱཀྱ་ཤྲཱི།། ཡོངས་སུ་དག་པའི་མཁས་གྲུབ་ཐམས་ཅད་ཀྱིས། །སྡོམ་པ་གསུམ་པོ་རིམ་གྱིས་ཞུས་ནས་ཀྱང་། །སོ་སོའི་བསྲུང་བྱ་ཐམས་ཅད་སྲུང་དགོས་གསུངས། །ཀུན་གྱི་རྩ་བ་སོ་ཐར་སྡོམ་པ་སྟེ། །དེ་ནི་ཆུ་སྣོད་ཆག་གས་མེད་པ་འདྲ། །དེ་ནང་ཆུ་ཡིས་བཀང་འདྲ་བྱང་སེམས་སྡོམ། །དེ་ལ་ཟླ་གཟུགས་ཤར་འདྲ་སྔགས་སྡོམ་སྟེ། །སྣོད་ཆག་ཆུ་འབོ་ཟླ་བའི་གཟུགས་ཀླུ་བརྙན་ཡལ། །དེ་བཞིན་སོ་ཐར་སྡོམ་པ་ཤོར་བའི་ཚེ། །བྱང་སྡོམ་སྔགས་སྡོམ་གཉིས་ཀ་མེད་པར་འགྱུར། །དེ་ཕྱིར་སོ་ཐར་སྡོམ་པ་གཟབ་དགོས་པར། །འཇམ་པའི་དབྱངས་
དངོས་ཙོང་ཁ་པ་ཡིས་བཞེད། །དེ་ཕྱིར་དགེ་ལུགས་འདུལ་ཁྲིམས་བཙུན་པོ་བྱུང་། །པཎ་ཆེན་ཤཱཀ་ཤི་སློབ་མ་པཎ་ཆུང་ནི། །བི་བྷུ་ཏི་ཙན་ཞེས་བྱ་བ་ཡིས། །མཛད་པའི་སྡོམ་གསུམ་འོད་འཕྲོ་རྒྱ་གཞུང་དོན། །སོ་ཐར་སྐར་མ་བྱང་སྡོམ་ཟླ་བ་དང་། །སྔགས་སྡོམ་ཉི་མ་དག་དང་མཚུངས་པ་སྟེ། །གང་ཟག་གཅིག་གི་རྒྱུད་ལ་སོ་སོར་ཡོད། །གཅིག་དེ་ཤོར་ཡང་གཞན་ཀུན་མི་ཤོར་ཏེ། །ཤོར་བའི་ཉེས་ལྟུང་སོ་སོར་ཡོད་ན་ཡང་། །འོག་མ་ཤོར་བས་ངན་འགྲོར་ལྟུང་མི་ནུས། །དཔེར་ན་ཟླ་བ་སྐར་མ་ནུབ་ན་ཡང་། །ཉི་མ་ཡོད་ན་མུན་པས་གནོད་མི་ནུས། །དེ་ཕྱིར་ཐུབ་ན་ཐམས་ཅད་སྲུང་དགོས་ཀྱི། །མ་ལྕོགས་སྔགས་སྡོམ་གོང་མ་གཙོ་བོར་འཛིན། །བཀའ་བརྒྱུད་པ་རྣམས་འདི་ཡི་ལུགས་མཛད་པས། །བཀའ་བརྒྱུད་པ་རྣམས་འདུལ་ཁྲིམས་ཅུང་ཞིག་ལྷོད། །འོན་ཀྱང་སྐྱོབ་པ་འཇིག་རྟེན་གསུམ་མགོན་གྱིས། །སྡོམ་གསུམ་གོང་ནས་གོང་དུ་དོག་ཏུ་འགྲོ། །གསུངས་ཕྱིར་སྔགས་སྡོམ་མི་སླ་ཤིན་ཏུ་དཀའ། །དེ་དོན་རྒྱལ་བ་འབྲོམ་གྱི་ཞལ་ནས་ཀྱང་། །སོ་སོ་སྐྱེ་བོས་སྲུང་ཀྱང་སླ་བ་ཡི། །འདུལ་ཁྲིམས་སྡོམ་པ་གཙང་མར་མི་སྲུང་བར། །འཕགས་
པ་མིན་པས་ཉམས་སུ་མི་ལོན་པའི། །གསང་སྔགས་ཉམས་ལེན་དམ་ཚིག་སྲུང་ཟེར་བ། །དེ་དག་རྫུན་དུ་ཆེ་གསུངས་བཞད་གད་མཛད། །ཁྱིམ་པ་རྡོ་རྗེ་འཛིན་པ་ཞེས་བྱ་བ། །སྐྱབས་སྡོམ་དང་ནི་བསྙེན་གནས་སྡོམ་པ་དང་། །སྣ་འགའ་སྲུང་བའི་དགེ་བསྙེན་ཞེས་བྱ་བ། །མི་ཚངས་སྤྱོད་པ་མ་གཏོགས་གསུམ་པོ་སྲུང་། །དེ་མིན་བྱང་སྡོམ་སྔགས་སྡོམ་གཞུང་བཞིན་སྲུང་། །སྲས་དང་བཙུན་མོ་ལ་སོགས་ཡོད་ན་ཡང་། །དབང་བསྐུར་ཆོས་བཤད་བླ་མའི་སར་བཞུགས་པ། །ས་འབྲུག་གཏེར་སྟོན་རྣམས་ཀྱི་གདུང་རྒྱུད་བཞིན། །དེ་ནི་ཁྱིམ་པ་རྡོར་འཛིན་རྣམ་པར་དག །དེ་མིན་འདུལ་ཁྲིམས་སྡོམ་པ་ཞུས་ཕྱིན་ནས། །རྩ་རླུང་ལས་སུ་རུང་བ་མེད་བཞིན་དུ། །གདུང་རྒྱུད་ཡིན་ཞེས་བུ་རྒྱུད་སྤེལ་བ་ན། །ཨ་ཙར་དམར་པོའི་ཆོས་ལོག་ངན་འགྲོའི་རྒྱུ། །དེ་བཞིན་སོ་ཐར་སྡོམ་པ་ཉིད་ལ་ཡང་། །མདོ་སྡེ་པ་དང་བྱེ་བྲག་སྨྲ་བ་ཞེས། །རྒྱ་གར་ན་ཡང་ཆོས་ལུགས་གཉིས་ཡོད་དེ། །བྱེ་བྲག་སྨྲ་བ་རྣམས་ཀྱི་ཆོས་ལུགས་ལ། །འདུལ་ཁྲིམས་རྩ་བ་བཞི་པོ་གཅིག་ཤོར་ན། །སྡོམ་པ་ཐམས་ཅད་འཆོར་ཞིང་མི་གནས་ཏེ། །དཔེར་ན་ཁང་པ་སྒོ་བཞི་ཡོད་
པའི་ནང་། །ཡིད་བཞིན་ནོར་བུ་རིན་ཆེན་གཅིག་ཡོད་ན། །རྐུན་མ་སྒོ་བཞི་གང་ནས་འོང་ཡང་འདྲ། །ནོར་བུ་ཤོར་ནས་ནོར་བུ་མེད་དང་འདྲ། །ཉན་ཐོས་མདོ་སྡེ་པ་ཡི་ལུགས་ལ་ནི། །རེ་རེ་ཤོར་བས་ཐམས་ཅད་མི་འཆོར་ཏེ། །དཔེར་ན་དགེ་སློང་མི་ཚངས་སྤྱོད་ན་ཡང་། །གསུམ་པོ་མ་ཤོར་ཡོད་པས་སྲུང་ན་ནི། །ཕན་ཡོན་ཡོད་ཅེས་ཉམས་པའི་དགེ་སློང་ཟེར། །འདི་ཉིད་བཀའ་བརྒྱུད་པ་ཡིས་བཞེད་པ་སྟེ། །འཇིག་རྟེན་གསུམ་གྱི་མགོན་པོའི་རྡོ་རྗེའི་གསུང་། །སྣ་གཅིག་བསྲུང་ཡང་མྱང་འདས་རྒྱུར་འགྱུར་གསུངས། །དེ་དོན་སློབ་མ་དགེ་སློང་གཅིག་ལོག་སྟེ། །བུ་རྒྱུད་གསོ་ཕྱིར་བྱ་ཕག་གསོད་ན་ཡང་། །ད་རུང་ཆབ་རིལ་བཏགས་ཤིང་ཆབ་བླངས་པས། །མཆེད་གྲོགས་གྲྭ་སློབ་ཀུན་གྱིས་དེ་ལ་འབར། །འཇིག་རྟེན་མགོན་པོས་དེ་ལ་མ་འབར་ཞིག་།སྣ་གཅིག་བསྲུངས་ཀྱང་མྱང་འདས་རྒྱུར་འགྱུར་གསུངས། །དགེ་སློང་སྡོམ་པ་ཐམས་ཅད་ཤོར་ཚར་ཡང་། །ད་རུང་དེ་ཉིད་ཉམས་པའི་དགེ་སློང་སྟེ། །མི་ཚངས་ལ་སོགས་ལན་རེ་ནམ་སྤྱད་ཀྱང་། །སྡོམ་པ་གསར་དུ་ཤོར་འདྲའི་ཉེས་ལྟུང་འབྱུང་། །དེ་ཕྱིར་སྡོམ་རོ་ཕུལ་ན་ཉེས་ལྟུང་འཆད། །དེ་
ཕྱིར་སྡོམ་རོ་ཕུལ་བར་མ་བྱས་ཚེ། །བཙུན་ལོག་རྣམས་ཀྱང་བཙུན་པའི་གྲངས་སུ་འགྲོ། །དེ་ཕྱིར་དགེ་བསྙེན་ལྕགས་ཀྱི་རྐང་པ་ཅན། །པོ་ཊ་ལ་རུ་ལན་གསུམ་བྱོན་པ་ཡི། །བར་རེས་དགེ་སློང་ཆོས་གོས་རུལ་བ་ཅན། །བུ་དང་ཆུང་མ་ཞིང་གི་མུ་ན་བཞག །ལྷུང་བཟེད་ཤིང་གི་ཡལ་ག་ལ་བཀལ་ནས། །ཞིང་རྨོ་འཕྲུ་ནི་སློག་ཅིང་འདུག་པ་ལ། །ཐོང་སོ་ཁྲག་གིས་དམར་དང་ཅང་ཅང་པའི། །འབུ་སྲིན་སེམས་ཅན་མང་པོ་འཆི་འདུག་པས། །ཁྱེད་ནི་བན་ལོག་འཕྲུ་འདུལ་དགོས་ན་ཡང་། །ལྷུང་བཟེད་ཆོས་གོས་མ་བཟུང་བསྟན་ལ་གནོད། །སྨྲས་པས་བྱིན་པ་ཁྱེར་ཡོང་གཙང་སར་སྦས། །དེ་ནས་པོ་ཊ་ལ་རུ་སོང་པ་ན། །སྔར་བཞིན་ལྷ་ཚོགས་གཅིག་ཀྱང་མ་མཐོང་བས། །ཕྱག་དང་བསྐོར་བ་དཔག་མེད་བྱས་པའི་རྗེས། །སྒྲོལ་མ་ཁྲོ་གཉེར་ཅན་སོགས་མ་མཐོང་སྟེ། །རྩེ་རུ་སོང་བས་སྨུག་པས་རབ་ཏུ་བཏུམས། །གཞལ་ཡས་སྒོ་ཕྱེ་མ་ཐུབ་ཡུན་རིང་འགོར། །ཕྱག་བསྐོར་མང་བྱས་ནང་དུ་ཐར་བའི་ཚེ། །སྔར་དང་མི་འདྲ་ཅི་ལགས་ཞུས་པའི་ལན། །ལམ་དུ་ཚུལ་ཁྲིམས་འཆལ་བའི་མི་དེ་ལ། །བཙུན་པའི་ཆ་ལུགས་ཕྲལ་བ་དེ་ཡིས་བསྒྲིབས། །
མི་དེ་ཆ་ལུགས་དེ་དང་མ་བྲལ་ན། །ད་རུང་བཙུན་པའི་བག་ཙམ་སེམས་ལ་ཡོད། །ད་ནི་དགེ་བའི་བག་མེད་དམྱལ་བར་འགྲོ། །དེ་ཡི་སྡིག་པས་ཁྱོད་ལ་སྒྲིབ་བོ་གསུངས། །དེ་ནས་ཚུར་ལམ་ཆོས་གོས་ལྷུང་བཟེད་གཏད། །དེ་དོན་པདྨ་དཀར་པོའི་མདོ་སྡེ་ལས། །ཐུབ་དབང་བསྟན་ལ་རབ་ཏུ་བྱུང་ཚད་རྣམས། །ཚེ་འདིར་མི་དགེ་མཚམས་མེད་ཅི་སྤྱད་ཀྱང་། །སྐྱེ་བ་བརྒྱ་སྟོང་འབུམ་ཕྲག་དུ་མའི་བར་། །ངན་སོང་གསུམ་གྱི་སྡུག་བསྔལ་མྱོང་ན་ཡང་། །སངས་རྒྱས་སྟོང་གི་རྗེས་ལ་མོས་པ་ཡི། །བསྟན་པའི་མཇུག་ལ་མི་ཡི་ལུས་ཐོབ་ནས། །ཐེག་དམན་རིགས་ཡིན་དགྲ་བཅོམ་འབྲས་བུ་ཐོབ། །ཐེག་ཆེན་ཡིན་ན་རབ་དགའི་ས་ཐོབ་སྟེ། །འཁོར་བའི་གནས་ན་གཅིག་ཀྱང་མི་ལུས་པ། །འདི་ནི་ཐུབ་པའི་སྨོན་ལམ་མཐུ་ཡིན་གསུངས། །དེ་ཕྱིར་ཡབ་སྲས་ལ་སོགས་མཁས་གྲུབ་རྣམས། །ཅི་འོང་ཅིར་འགྱུར་དགོངས་པས་གསལ་ན་ཡང་། །སྡོམ་པ་ཐུབ་དང་མི་ཐུབ་མི་དཔྱད་པར། །ཀུན་ལ་བསྙེན་རྫོགས་གནང་བ་དེ་ཡི་དོན། །སྡོམ་པ་ཞུས་ནས་ཆོས་མགོ་མ་ཐོན་པ། །ངན་སོང་དམྱལ་ཚབས་ཆེ་ཡང་མཐའ་ལ་ཐར། །དེ་ལ་འཁོར་བ་མཐའ་ཅན་ཞེས་བྱ་ཡིན། །
སྡོམ་པ་མ་ཞུས་མི་དགེ་སྤྱོད་པ་རྣམས། །འཁོར་བའི་གནས་ནས་ནམ་ཡང་ཐར་དུས་མེད། །དེ་ལ་འཁོར་བ་མཐའ་མེད་ཅེས་བྱ་ཡིན། །དེ་དོན་དམ་ཆོས་དགོངས་པ་གཅིག་པ་ལས། །ཉམས་ལས་མ་ཐོབ་ཉེས་པ་ཆེ་ཞེས་གསུངས། །མེ་ཏོག་ཙམ་པ་ཀ་ནི་རྙིང་ན་ཡང་། །མེ་ཏོག་ཕལ་པ་རྣམས་ཀྱི་དོ་ཟླ་མིན། །ང་ཡི་ཉན་ཐོས་ཇི་ལྟར་ངན་ན་ཡང་། །ཐ་མལ་སྐྱེ་བོ་རྣམས་ཀྱི་སྨད་བྱ་མིན། །དེ་སྐད་བཅོམ་ལྡན་ཐུབ་པ་ཉིད་ཀྱིས་གསུངས། །མ་འོངས་ཐུབ་པའི་བསྟན་པ་འཇིག་པའི་ཚེ། །དམར་དང་སེར་པོའི་ཚོས་ཅན་གོས་ཐམས་ཅད། །ལྷ་རྣམས་ཀྱིས་བསྡུས་དད་པའི་རྟེན་དུ་ཁྱེར། །རི་རབ་རྩེ་རུ་མཆོད་རྟེན་བརྩེགས་ནས་མཆོད། །བསྟན་པ་ནུབ་ནས་གོས་ཀྱིས་ཚོས་མི་ཟ། །དེ་དོན་རྟོགས་བརྗོད་ལ་སོགས་མདོ་འགར་གསལ། །དེ་དོན་དགེ་འདུན་རྣམས་ལ་སྐྱབས་ཞུས་ནས། །སེར་གོས་གྱོན་ཚད་རྣམས་ལ་གུས་དགོས་གསུངས། །འཇམ་དབྱངས་སྤྲུལ་པ་རྔོག་ལོ་ཆེན་པོ་ཡིས། །ཕྱགས་དར་བྱས་པའི་ཉལ་ཉིལ་གསེབ་དག་ནས། །ལྭ་བ་སེར་པོའི་རས་མ་བྱུང་བ་རྣམས། །ན་བཟའ་འདི་འདྲ་མནབ་པའི་རྒྱུད་དག་ལ། །ཡོན་ཏན་སྣ་རེ་མེད་
པ་མེད་གསུངས་ནས། །གོས་དུམ་དབུ་ཞྭའི་གསེབ་ཏུ་བཅུག་པར་མཛད། །བདག་གི་འདྲེན་མཆོག་ཆོས་ཀྱི་དབང་ཕྱུག་གིས། །ཚོགས་པའི་ཚོགས་གདན་དྲིལ་ནས་དབུ་ལ་བཞག །སྣ་ཚོགས་གདན་རྡུལ་སྤྲུགས་ལྗགས་ཀྱི་སྟེང་དུ་བཞག །རྒྱུན་དུ་ནམ་འབྱོན་ཚོགས་པར་ཕྱག་འབུལ་མཛད། །འབྱོན་དུས་སྐུ་རྒྱབ་མི་སྟོན་ཕྱི་འགྲོས་མཛད། །དེ་དག་དོན་ལ་ལེགས་པར་དཔྱད་བྱས་ན། །ཕྱོགས་རིས་མེད་པའི་སེར་མོ་གྱོན་ཚད་ལ། །གཞན་སྐྱོན་མི་བྱ་ལོག་ལྟ་གཤེ་སྐུར་སྤངས། །ཀུན་ཀྱང་སྐྱབས་ཡུལ་དགེ་འདུན་ཡིན་པར་བཟུང་། །དེ་ཡིས་རང་ཉིད་བསོད་ནམས་དཔག་མེད་ཐོབ། །རབ་ཏུ་བྱུང་བས་ཆོག་པར་བརྩི་བ་ཡི། །བསམ་པ་དེ་འདྲ་རང་གིས་འཆང་མི་བྱ། །རང་རེ་བདེ་ནས་བདེ་བར་འགྲོ་འདོད་པ། །འཁོར་བ་མཐའ་ཡོད་ཙམ་གྱིས་ག་ལ་ཆོག །ལྟ་བ་རྣམ་པར་དག་པ་ཡོད་ན་ཡང་། །སྤྱོད་པ་འདུལ་ཁྲིམས་ཕྲ་ཞིབ་ཉམས་པ་དེ། །གསོ་སྦྱོང་བཤགས་སྡོམ་ལེགས་པར་མ་བྱས་ན། །ཀླུ་རུ་སྐྱེ་བ་རྒྱ་མཚོའི་ཞུས་མདོར་གསལ། །ཀླུ་རུ་སྐྱེས་ན་གཞན་ལ་གནོད་པ་དང་། །མཛེ་དང་བྱེ་ཚན་ཆར་དང་ཉི་ཚན་དང་། །རྒྱལ་པོའི་ཆད་པ་ཁྱུང་
གི་འཇིགས་པ་སོགས། །སྡུག་བསྔལ་དེ་དག་བཟོད་པར་ཇི་ལྟར་ནུས། །ད་ལྟ་ཀུན་གྱིས་དད་ཅིང་ཆོས་པར་བརྩི། །ཤི་དུས་ཀླུ་བདུད་འཁོར་དུ་སྐྱེ་ཤོར་ན། །དེ་ལས་བཙོག་དང་དེ་ལས་སྡུག་པ་ཅི། །དེ་བཞིན་གསང་སྔགས་དམ་ཚིག་ཉམས་ན་ནི། །རྡོ་རྗེ་དམྱལ་བའི་གནས་ནས་ཐར་དུས་མེད། །གསང་སྔགས་སྤྱོད་ཅིང་བླ་མར་དགྲར་བལྟས་པས། །བདུད་དང་རྒྱལ་འགོང་དམ་སྲིའི་རིགས་སུ་སྐྱེ། །ཕལ་ཆེར་ཆོས་པ་དམ་ཚིག་ཉམས་པ་ཀུན། །པེ་ཀར་རྒྱལ་པོའི་འཁོར་དུ་སྐྱེ་བའི་ཚུལ། །གུར་དྲག་ལོ་རྒྱུས་རྣམས་སུ་གསལ་བ་ཡིན། །ཀྱེ་མ་ཀྱི་ཧུད་རང་ལ་སྙིང་རྗེ་ལྟོས། །སྐྱབས་སྡོམ་གསུམ་དང་དགེ་བསྙེན་སྡོམ་པ་ལྔ། །རབ་བྱུང་དགེ་ཚུལ་སྡོམ་པ་བཅུ་པོ་དང་། །དགེ་སློང་ཁྲིམས་ནི་ཉིས་བརྒྱ་ལྔ་བཅུ་གསུམ། །བྱང་སྡོམ་དཀར་ནག་ཆོས་བཞི་བླང་དོར་དང་། །ལྟུང་བ་ལྔ་ལྔ་བརྒྱད་དང་ཉི་ཤུ་པ། །སྔགས་སྡོམ་རྩ་ལྟུང་བཅུ་བཞི་སྦོམ་པོ་བརྒྱད། །རྙིང་མའི་རྩ་བ་སྐུ་གསུང་ཐུགས་དང་ནི། །ཡན་ལག་དམ་ཚིག་ཉི་ཤུ་རྩ་ལྔ་སྟེ། །རྒྱས་པར་ས་ཡ་འབུམ་སྡེ་ཡོད་པར་གསུངས། །དེ་དག་རྩ་བ་བསྡུས་ཤིང་དྲིལ་བ་ན། །གཞན་གནོད་གཞིར་
བཅས་སྤངས་ལ་སོ་ཐར་འདུས། །གཞན་ཕན་གཞིར་བཅས་སྒྲུབ་ལ་བྱང་སྡོམ་འདུས། །བླ་མར་རྩེ་གཅིག་གུས་ལ་སྔགས་སྡོམ་འདུས། །རྒྱས་པ་རྒྱས་དྲགས་བསྡུས་པ་བསྡུས་དྲགས་ནས། །ཉམས་སུ་བླང་བྱ་རང་དེ་གང་ཞེ་ན། །རྩ་བ་བཞི་པོ་སྲོག་ལྟར་སྲུང་བ་དང་། །ཆང་དང་བསྔོས་ཤ་དགོང་སོགས་སྤང་བ་དེས། །དེང་སང་དུས་ཀྱི་སྡོམ་པ་གཙང་མར་བརྩི། །བྱང་སྡོམ་སྔགས་སྡོམ་གཉིས་ལའང་དེ་གལ་ཆེ། །དགེ་ཚོགས་བྱ་བ་གང་དང་གང་སྒྲུབ་པ། །འགྲོ་བ་ཀུན་ལ་ཕན་པའི་སེམས་བསྐྱེད་དང་། །དགེ་རྩ་འགྲོ་བ་ཀུན་ལ་ཕན་པའི་ཕྱིར། །རྫོགས་པའི་བྱང་ཆུབ་ཐོབ་ཕྱིར་བསྔོ་སྨོན་གདབ། །དེ་ཡིས་བྱང་སེམས་སྡོམ་པའི་བསླབ་བྱ་འདུས། །དེ་དོན་ཐུབ་པས་རྒྱལ་པོར་རྒྱ་ཆེར་གདམས། །རང་གི་རྩ་བའི་བླ་མ་གང་ཡིན་དེ། །སེམས་ཅན་ཡིན་ནམ་སངས་རྒྱས་ཡིན་ཀྱང་རུང་། །སྤྱི་གཙུག་རིགས་བདག་ཉིད་དང་དབྱེར་མེད་མོས། །དེ་ནི་བླ་མའི་སྐུ་ཡི་དམ་ཚིག་ཡིན། །ལུས་ཀྱི་ལྷ་བསྒོམ་ངག་གི་བསྙེན་པའམ། །རླུང་བཟུང་ངམ་ནི་རྡོར་བཟླས་གང་རུང་བྱ། །དེ་ནི་ཡི་དམ་གསུང་གི་དམ་ཚིག་ཡིན། །སེམས་ནི་སྟོང་ཉིད་ཕྱག་རྒྱ་ཆེན་པོར་ལྟ། །
ཚེས་བཅུ་ལ་སོགས་དུས་མཆོད་ཚོགས་གཏོར་གཟབ། །ལོག་ལྟ་ཅན་ལ་གསང་སྔགས་གནད་མི་བཤད། །དེ་ནི་མཁའ་འགྲོའི་ཐུགས་ཀྱི་དམ་ཚིག་ཡིན། །རྒྱུན་དུ་གཏོར་བསྔོས་དགུ་གཏོར་བསྐང་གསོལ་འབད། །ལོ་དུས་རྣམས་སུ་བསྐང་གསོལ་ཚོགས་མཆོད་གཟབ། །ཡོན་ཏན་ནོར་ལྷ་ཕྲིན་ལས་ཆོས་སྐྱོང་གི །དམ་ཚིག་རྣམས་ནི་དེ་ལ་འདུས་པ་ཡིན། །དུས་རྣམ་ཀུན་ཏུ་རང་སེམས་ངོ་བོ་བལྟ། །རྟོགས་པས་བདག་རྒྱུད་གྲོལ་བའི་དམ་ཚིག་ཡིན། །སྐབས་སུ་སྙིང་རྗེའི་གཏོང་ལེན་དམིགས་པ་སྦྱང་། །དབང་ལུང་ཁྲིད་སོགས་གདུལ་བྱའི་རེ་བ་སྐོང་། །ཐུགས་རྗེས་གཞན་རྒྱུད་སྨིན་པའི་དམ་ཚིག་ཡིན། །མཐོང་ཐོས་དྲན་རེག་འབྲེལ་པ་ཐོགས་ཚད་ཀུན། །བདེ་ཆེན་ཞིང་དུ་སྐྱེ་བའི་བསྔོ་སྨོན་བྱ། །འཁོར་བ་དོང་སྤྲུགས་ཐེག་ཆེན་དམ་ཚིག་ཡིན། །དེ་ལྟར་དམ་ཚིག་རྣམ་དབྱེ་མདོར་བསྡུས་པ། །དབྱེ་བ་གསལ་ཞིང་ལག་ཏུ་བླངས་བདེ་བ། །རྟ་ལོ་ཁྲུམས་ཟླའི་དམར་པོའི་ཚེས་དགུའི་ཉིན། །གུང་གི་ཐུན་ལ་རཱ་ག་ཨ་སྱས་སྨྲས། །ཞུ་མཁན་བརྩོན་འགྲུས་རྒྱ་མཚོས་ཡི་གེར་བྲིས། །ནོངས་པ་མཆིས་ན་མཁས་པ་རྣམས་ལ་འཆགས། །དགེ་བས་
འགྲོ་ཀུན་སྡོམ་གསུམ་མཐར་ཕྱིན་ཤོག །ལེའུ་ལྔ་པ་མངྒ་ལཾ།། །།