སྦྱིན་སྲེག་ཇི་ལྟར་བྱ་བའི་ཆོ་ག་རབ་ཏུ་གསལ་བ་གཅིག་ཤེས་ཀུན་གྲོལ་ཡེ་ཤེས་མེ་འོད་རབ་འབར།
ལེགས་པར་སྦྱར་བ་སཾ་སྐྲྀ་ཏའི་སྐད་དུ། ཧོ་མ་ཡ་ཧོ་ན་ན་མ༔ བོད་སྐད་དུ། བསྲེག་བླུགས་སྦྱིན་སྲེག་ཅེས་བྱ་བ། སྦྱིན་སྲེག་ཇི་ལྟར་བྱ་བའི་ཆོ་ག་རབ་ཏུ་གསལ་བ་གཅིག་ཤེས་ཀུན་གྲོལ་ཡེ་ཤེས་མེ་འོད་རབ་འབར་ཞེས་བྱ་བ་བཞུགས་སོ། །
ན་མོ་གུ་རུ་ལོ་ཀི་ཤྭ་ར་ཡ། །སྐྱབས་གནས་མཚུངས་མེད་ཆོས་ཀྱི་དབང་ཕྱུག་དང་། །བཀའ་དྲིན་ཟླ་མེད་སློབ་དཔོན་མཁས་རྣམས་ལ། །གུས་པས་འདུད་དོ་གེགས་མེད་དངོས་གྲུབ་སྩོལ། །རབ་འབྱམས་ཕྲིན་ལས་མཐའ་དག་བསྒྲུབ་པའི་ཕྱིར། །རྒྱུད་སྡེ་རྒྱ་མཚོའི་བསྲེག་བླུགས་བྱ་བའི་ཚུལ། །ཉུང་ངུའི་ཚིག་གིས་གཞན་ལ་ཕན་ཕྱིར་བརྗོད། །དེ་ལ་བདག་བསྐྱེད་དང་ལས་བུམ་བསྒྲུབ་པ་སྔོན་དུ་སོང་ནས། གནས་ཁང་དེའི་ཤར་ལྷོ་དང་ལྷོ་ནུབ་སོགས་མ་ཡིན་པའི་བྱང་ཤར་ཡིན་ན་བཟང་བས་གནས་དེར་ས་རྒོད་ཡིན་ན་རྡོ་ལེབ་བཀོད་དོ། །ས་དེ་རྐོ་བ་ཡག་ཉེས་ཆེ་བས་མི་བརྐོ་བས་གཞན་ནས་བྱེ་ཁམས་འཇམ་པོ་དེར་བླུགས་ལ་རྒྱ་ཆེ་ཆུང་ཐབ་གང་བྱེད་དང་བསྟུན་ལ། དབྱིབས་གྲུ་བཞི་དབུས་ཅུང་
ཟད་མཐོ་བར་ཤར་དང་བྱང་ཅུང་ཟད་དམའ་བར། འབུར་གཤོང་མེད་ཅིང་ཤིན་ཏུ་འཇམ་པ་ཐལ་བའི་སོལ་ཕྱེ་བྱུགས་ལ་ཡང་ཕྱིས་ལ་གཙང་མར་བྱའོ། །དེའི་དབུས་སུ་མཉྫིའི་ཁར་སྟོན་པའི་སྐུ་གཅིག་བཞག །དེའི་འོག་གི་མདུན་དུ་མཎྜལ་ལམ་མེ་ལོང་གི་སྟེང་དུ་ནས་ཀྱི་ཚོམ་བུ་གཅིག་གམ་ལྔ་ཚོམ་བཀོད་ལ། དེའི་མཐར་མདུན་གཡས་བསྐོར་མཆོད་པ་སྣ་བདུན་བསྐོར་བཤམས་དང་། མདུན་དུ་དཀར་གཏོར་བཞི་བཤམས། རང་ལྔ་སེར་ལ་གདོང་མ་ཐུག་པར་རྡོར་དྲིལ་དང་བཅས་གདན་ལ་འཁོད་ནས། ལས་བུམ་མམ་ཡང་ན་ནང་མཆོད་ཀྱིས་བསང་སྦྱངས་ནས་དཀྱིལ་འཁོར་གང་ཡིན་པ་དེའི་མཆོད་པ་བྱིན་བརླབས་བྱས་ནས། མཎྜལ་བསངས་སྦྱངས། ཨོཾ་སྭ་བྷ་ཝ་སོགས། སྟོང་པ་ཉིད་དུ་གྱུར། སྟོང་པའི་ངང་ལས་པདྨ་
འདབ་མ་བརྒྱད་པའི་སྟེང་དུ་པཾ་ལས་ས་ཡི་ལྷ་མོ་སྐུ་མདོག་སེར་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེའི་བུམ་པ་འཛིན་པ། སྐུ་ལ་རིན་པོ་ཆེའི་རྒྱན་དང་ལྡན་པ། སྐུ་ཕྱེད་ཐོན་པའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུྃ་ལས་འོད་ཟེར་འཕྲོས། དམ་ཚིག་པ་ལྟ་བུའི་ས་ཡི་ལྷ་མོ་ཡེ་ཤེས་པ་ས་བདག་གིས་བསྐོར་བ་སྤྱན་དྲངས། ཨོཾ། ཚུར་སྤྱོན་ཚུར་སྤྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་པོ་ཆེ་ཀུན་རབ་གང་མ། །བཟང་པོའི་རྒྱན་གྱིས་རྣམ་པར་བརྒྱན། །དོ་ཤལ་རྐང་གདུབ་སྒྲར་ལྡན་མ། །རྡོ་རྗེ་སེམས་དཔའ་རབ་མཆོད་མ། །དཀྱིལ་འཁོར་ལས་ནི་ལེགས་བསྒྲུབ་ཕྱིར། །གནས་འདིར་མྱུར་དུ་གཤེགས་སུ་གསོལ། །ཨོཾ་པྲི་ཤྲཱི་ཝི་ས་པཱ་རི་ཝཱ་ར་ཛ༔ ཛཧཱུྃ་བཾ་ཧོ༔ གཉིས་སུ་མེད་པར་གྱུར། ཨོཾ། འཇིག་རྟེན་ཁམས་ནི་དཔག་མེད་ན། མཆོད་ཡོན་ཇི་སྙེད་ཡོད་པ་རྣམས། །འགྲེས་སོ། ཞབས་བསིལ༴ མེ་ཏོག༴ བདུག་སྤོས༴ སྣང་གསལ༴ དྲི་ཆབ༴ ཞལ་ཟས༴ རོལ་མོ༴ བདག་གིས་གུས་པར་བཤམས་པ་འདི། །ས་ཡི་ལྷ་མོ་འཁོར་བཅས་མཆོད། །བཞེས་ནས་ས་འདི་གནང་
བར་མཛོད། །ཨོ་པྲི་ཐི་ཝི་དེ་ཝི་ས་པཱ་རི་ཝ་ར་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ། ཤབྡའི་བར་དུ་འབུལ་ལོ། །དེ་ནས་གཏོར་མ་བཞི་པོ་ཆ་གསུམ་ལྟར་བྱིན་གྱིས་བརླབས་ནས། དང་པོ་ཕྱོགས་སྐྱོང་། གཉིས་པ་འབྱུང་པོ་ལ་ཕྱོགས་སྐྱོང་ལྟར་འབུལ། གསུམ་པ་ནི། ཨོ། ཡུལ་བདག་གྲོང་བདག་གནས་བདག་གཉུག་མར་གནས་པ་ས་པཱ་རི་ཝཱ་ར། བཛྲ་ས་མ་ཛཿ ༀ་ཀྵེ་ཏྲ་པཱ་ལ་ས་པཱ་རི་ཝཱ་ར་བྷྱཿ ན་མསརྦ་ཏ་ཐཱ་ག་ཏེ་བྷྱོ། བྷི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྠ་ཏེ་སྤ་ར་ཎ་ཨེ་མཾ་ག་ག་ན་ཁཾ་གྲིཏྟ་དཾ་བ་ལེ་བྱེ་སྭཱ་ཧཱ༔ ལན་གསུམ་དང་། ཨརྒྷཾ་སོགས་ཀྱིས་མཆོད། ས་ལ་རྒྱུ་བའི་ལྷ་ཀླུ་དང་། །གང་ཡང་ས་ལ་བརྟེན་པ་རྣམས། །སེམས་ཅན་ཀུན་གྱི་དོན་གྱི་ཕྱིར། །བྱམས་པའི་སེམས་ཀྱིས་གནས་པར་མཛོད། །ཅེས་སམ་སྤྲོ་ན། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོ་གཞན་ཡང་རུང་། །དཀྱིལ་འཁོར་དོན་དུ་ས་འདི་ནི། །བདག་ཞུ་ཁྱེད་ཀྱིས་བསྩལ་དུ་གསོལ། །གནས་འདིར་དོར་ནས་དཀྱིལ་འཁོར་གྱི། །ཕྱི་རོལ་ས་གཞི་ལ་གནས་ཏེ། །རྡོ་རྗེ་འཆང་གི་བཀའ་བཞིན་མཛོད། །ལན་གསུམ་བརྗོད། ས་ཕྱོགས་འདིར་སྒྲུབ་པ་པོ་ཁྱོད་ཅི་བདེ་བར་གྱིས་ཤིག །ཅེས་གནང་བ་བྱིན་
ནས། ཞིང་སྐྱོང་འཁོར་བཅས་ཕྱི་རོལ་གྱི་ས་གཞི་ལ་འཁོད་པར་གྱུར། ཅེས་སེ་གོལ་བརྡབ། གཏོར་མ་བཞི་པ། ཨོ་པྲི་ཐི་ཝི་དྷེ་ཝི་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གཡས་རྡོ་རྗེ་ཐལ་མོ་སྙིང་གར་བཞག་ནས། ཁྱོད་ནི་ས་འཛིན་ལྷ་མོ་སྟེ། །སྐུ་ཕྱེད་ཐོན་ཏེ་གསེར་གྱི་མདོག །རིན་ཆེན་སྣ་ཚོགས་རྒྱན་གྱིས་བརྒྱན། །ས་འོག་ལྷ་མོ་ཁྱོད་ལ་བསྟོད། །པདྨའི་སྟེང་ན་བུམ་པ་འཛིན། །གསེར་མདོག་བསྟན་པ་སྲུང་མཛད་མ། །ཁྱོད་ནི་ནོར་འཛིན་རྒྱལ་མོ་སྟེ། །ནོར་འཛིན་ལྷ་མོར་ཕྱག་འཚལ་བསྟོད། །འོག་གི་ཀླུ་སྟེ་ས་ཡི་བདག །ས་འཛིན་ལག་པ་ཆེན་པོ་དང་། །དམ་ཚིག་ཤེས་པའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་
བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་ལས། །ས་དང་ཕ་རོལ་ཕྱིན་པ་ལས། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་ལྟར། །དེ་བཞིན་དུ་ནི་བདུད་ཀྱི་སྡེ། །ཕམ་པར་བྱ་ཕྱིར་དཀྱིལ་འཁོར་བྲི། །ས་ཡི་ལྷ་མོ་དགའ་བའི་མདངས་ཕྱུངས་ཏེ། ཁྱོད་ནི་རྡོ་རྗེ་སེམས་དཔའ་ཡིན། །ས་འདི་གནང་གི་འགྲོ་དོན་དཔག་མེད་སྤྱོད། །རྡོ་རྗེ་འཛིན་པ་ཁྱོད་ཅི་བདེ་བར་གྱིས་ཤིག །ཅེས་གནང་བ་བྱིན་པར་གྱུར། བཛྲ་མུཿ ཡེ་ཤེས་པ་གཤེགས། དམ་ཚིག་པ་དེ་ཉིད་དུ་ཐིམ་པས་ས་ཡང་གསེར་གྱི་ཕུང་པོར་གྱུར། ཅེས་ཚོམ་བུ་དབུས་ཀྱི་འབྲུ་ཅུང་ཟད་དལ་གྱི་དབུས་སུ་སྔའོ། །དཀྱིལ་འཁོར་ལྷ་ཁང་ཁང་པ་སོགས་ཀྱི་དོན་དུ་ཡིན་ན་འདིར་ས་རྐོ་སྟེ། ཌོ་ཚུལ་ལོགས་སུ་ཤེས་སོ། །དེ་ནས་ཐུབ་པའི་སྐུ་དང་ཚོམ་བུ་བསལ་བའི་མལ་དུ་རྡུལ་ཚོན་དབུས་སུ་དཀར་པོ་
ལ་ཨོཾ། ཤར་དུ་སྔོན་པོ་ས་དང་ཚོན་བཟང་ལ་ཧཱུཾ། ལྷོར་སེར་པོ་ལ་ཧཱུྃ། ནུབ་ཏུ་དམར་པོ་ལ་ཧཱུྃ༔ བྱང་དུ་ལྗང་གུ་ལ་ཨཱ༔ རྣམས་བྲིས་ལ་བཀོད། མཐའི་མཆོད་པ་སྔར་ནས་ཡོད་པ་དེ་ཁ་གསོ། ཐིག་སྐུད་ལྔའམ་གཉིས་ཀྱང་ཚོན་དང་མཉམ་དུ་བཤམས། བསང་སྦྱང་། སྟོང་པའི་ངང་ལས་ཐིག་སྐུད་རྡུལ་ཚོན། དཀར་པོ་ཨོ་ལས་རྣམ་སྣང་། སྔོན་པོ་ཧཱུཾ་ལས་མི་བསྐྱོད་པ། སེར་པོ་ཧཱུྃ་ལས་རིན་འབྱུང་། དམར་པོ་ཧྲཱིཿལས་འོད་དཔག་མེད། །ལྗང་གུ་ཨཱཿ ལས་དོན་ཡོད་གྲུབ་པ་རྣམས་སུ་གྱུར་ཅིང་ཡེ་ཤེས་ཀྱི་ཐིག་ཚོན་དེ་ལ་ཞུགས་ནས། རིགས་ལྔ་ཞུ་བ་ལས་ཐིག་ཚོན་སོ་སོའི་རྣམ་པར་གྱུར། ཐིག་སྐུད་ལྔ་ཡོད་ན། ཨ་ནེ་སོགས་བཟླས་ཤིང་གཅིག་ཏུ་དྲིལ། ཨོཾ་བཛྲ་ས་མཱ་ཡ་སཱུ་ཏྲ་མ་ཏི་ཀྲ་མ་ཧཱུྃ། ཞེས་བརྒྱ་རྩ་བརྒྱད་ཀྱིས་ཐིག་བྱིན་རླབས། ཨོཾ་བཛྲ་ཙི་ཏྲ་ས་མ་ཡ་ཧཱུྃ། ཞེས་ཚོན་སྣ་ལྔ་པོ་རེ་རེ་ལ་བདུན་རེ་བཟླ། ཧི་ཧི། ཞེས་རྡུལ་ཚོན་ཡིན་ན། སྦྱར་ལ་ཐིག་ཚོན་གཉིས་ཀར། ཨགྷཾ་སོགས་ཀྱིས་མཆོད། དེ་ནས་མཆོད་པ་སོགས་ཐམས་ཅད་བསལ་ལ། ཐིག་གདབ་པ་ནི། རང་དཀྱིལ་འཁོར་གྱི་ལྷོ་ནུབ་ཏུ་གནས་གྲོགས་པོ་བྱང་ཤར་དུ་གནས་པ་ལ། ཛ་ཛ་ཛ༔ ཞེས་པའི་ཐིག་སྣེ་གཏད། རང་ནུབ་དང་གྲོགས་པོ་ཤར་དུ་གནས་པས། སངས་རྒྱས་ཀྱི་ཞིང་ཐམས་ཅད་ན་བཞུགས་པའི་རྒྱལ་བ་སྲས་དང་བཅས་པ་ཐིག་སྐུད་ཀྱི་
སྒྲས་བསྐུལ་ཏེ་བྱོན་ནས་ཐིག་ལ་ཐིམ་པར་གྱུར། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ། ཞེས་དང་པོ་ནམ་མཁའ་ལ་འདེབས་པ་ཡེ་ཤེས་ཀྱི་ཐིག །དེ་ནས་ས་ལ་འདེབས་པ་བརྒྱད་ཀ་ལ་བྱ་སྟེ། གཉིས་ཀ་གཡས་སྐོར་དང་གྲོགས་རང་ལ་རྒྱབ་མི་བསྟན་པར་བྱའོ། །ཐིག་གདབ་ལུགས་ནི། སྟེགས་བུ་གྲུ་བཞིར་གནས་པ་དེའི། །ཐུང་ངུའི་དེ་ཡི་ཚད་དེ་ཡིས། །ཕྱོགས་བཞིར་ཚད་ལ་མཚན་མ་བྱ། །དེ་ཡིས་ཐིག་སྐུད་བསྟན་བྱས་ནས། །དབུས་དང་ཕྱོགས་བཞིར་ཉ་ལྟོ་བྲི། །ཉ་ལྟོའི་དབུས་སུ་ཚངས་ཐིག་གདབ། །ཚངས་ཐིག་གཉིས་གཉིས་བར་དག་ཏུ། །བྱ་རྗེས་བྱས་ཐོག་ཟུར་ཐིག་གདབ། །དེ་ཡིས་ཐིག་ཆེན་བརྒྱད་པོ་གྲུབ། །མཐེབ་སྲིན་སྦྱར་བས་སྐུད་སྣེ་འཛིན། །གྲུ་མོའི་རྩེ་རུ་ཚད་བྱས་ལ། །དེ་ཉིད་བལྟེབས་ནས་དབུས་སུ་བཟུང་། །ཟླུམ་པོར་བསྐོར་བ་ཐབ་ཀྱི་རྒྱུ། །དེ་ཡི་ཕྱི་རིམ་སོར་བཞི་པ། །གཉིས་དང་སོར་དོ་པ་གཉིས་བསྐོར། །མཆུ་དང་ཁ་ཁྱེར་ཁ་བད་དང་། །ཁ་འཕྱང་བཞི་རུ་འབྱུང་བ་ཡིན། །བསྡུ་ན་གཉིས་སམ་གཅིག་གིས་ཆོག །དེས་ནི་ལས་བཞི་ཐམས་ཅད་མཚུངས། །སྔར་ལྟར་ཐིག་སྐུད་གྲུ་གང་ཚད། །དབུས་ནས་མཚམས་བཞིར་མཚན་མ་བྱ། །དེ་སྟེང་ཐིག་གདབ་ཐབ་ཀྱི་རྒྱུ། །དེ་རྒྱབ་སོར་བརྒྱད་པ་གཉིས་དང་། །སོར་བཞི་གཉིས་གདབ་རྒྱས་པ་གྲུབ། །དབུས་ནས་ཤར་དུ་སོར་གསུམ་འཇལ། །མཚན་མ་བྱས་པའི་སྟེང་ཉིད་ནས། །ཐིག་སྐུད་སོར་མོ་ཉི་ཤུའི་ཚད། །ཟླུམ་པོར་བསྐོར་བ་ཐབ་ཀྱི་རྒྱ། །དེ་རྒྱབ་སོར་གསུམ་
པ་གཉིས་དང་། །སོར་མོ་ཕྱེད་གཉིས་པ་གཉིས་བསྐོར། །ལོགས་གསུམ་ཟླུམ་པོ་ཤར་ངོས་ནས། །རིམ་པ་བཞིན་དུ་ཐིག་གིས་གཅོད། །དབུས་ཕྱོགས་ཤར་གྱི་མཚན་མའི་དབྱིབས། །དེས་ནི་དབང་གི་ཐབ་གྲུབ་བོ། །ཐིག་སྐུད་སོར་མོ་ཉི་ཤུ་ལ། །དབུས་ནས་ཟླུམ་པོར་བསྐོར་བར་བྱ། །དེ་རྒྱབ་སོར་བཞི་པ་གཉིས་དང་། །སོར་མོ་ཕྱེད་གཉིས་པ་གཉིས་བསྐོར། །ཤར་གྱི་ཟླུམ་སྐོར་ནང་མ་ནས། །དབུས་ཀྱི་ལྟེ་བར་ཐིག་སྐུད་ཚད། །དེ་ཡི་གཡས་གཡོན་བྱ་རྗེས་བཙལ། །དེ་བཞིན་ཟླུམ་བསྐོར་བར་མ་དང་། །ཕྱི་མ་རྣམས་ལ་རིམ་བཞིན་བཙལ། །དེ་ལ་འཕྲད་ཐིག་རིམ་པར་གདབ། །འཕྲད་ཐིག་ནང་མའི་བྱ་རྗེས་ནས། །ནུབ་དབུས་ཚངས་ཟླུམ་སྟེང་དུ་གདབ། །དེ་ཡིས་གྲུ་གསུམ་ནང་མ་འབྱུང་། །དེ་བཞིན་ཕྱི་མ་རིམ་པར་གདབ། །དེ་ཡིས་དྲག་པོའི་ཐབ་ཐིག་གྲུབ། །ཐབ་ནི་དེ་དག་རྣམས་ཀྱི་ནང་། །རབ་ནི་དཀྱིལ་འཁོར་ཡོངས་རྫོགས་པ། །རང་རང་ཐིག་རྩ་བཞིན་དུ་བྲི། །འབྲིང་དུ་ལྷ་རྣམས་ཡོངས་རྫོགས་པ། །ས་བོན་ནམ་ནི་ཕྱག་མཚན་ནམ། །ཡང་ན་མཚོན་སྤུངས་རང་མདོག་བཀོད། །ཞིབ་པར་དཔེའུ་ཆུང་བཞིན་ནོ། །བསྡུས་པ་འདབ་བརྒྱད་བྲི་ཚུལ་ནི། །ཞི་བའི་ཐབ་དབུས་སོར་མོ་བཞི། །ཟླུམ་པོར་བསྐོར་ལ་པདྨའི་སྟེང་། །ཟླུམ་སྐོར་ནང་མར་རེག་ཙམ་དུ། །ཟུར་ཐིག་བཞི་ནི་གྲུ་བཞིར་གདབ། །ལོགས་ཐིག་བཞི་ནི་དེ་བཞིན་གདབ། །ཚངས་ཟུར་དབུས་གཤག་གཅུས་ཐིག་གདབ། །ཟུར་བརྒྱད་གཅུས་ཐིག་གཉིས་ཀ་ལ། །ཕྱི་ནང་གཉིས་གཉིས་གདབ་པ་ཡིས། །
འདབ་བརྒྱད་པད་ཤུན་བཅས་པ་འབྱུང་། །རྒྱས་པའི་ཐབ་ཀྱི་དབུས་སུ་ནི། །སོར་མོ་བརྒྱད་དང་བཅུ་གཅིག་གིས། །པདྨའི་ལྟེ་བར་འདབ་མ་བསྐོར། །གཅུས་ཐིག་ལ་སོགས་གོང་ལྟར་གདབ། །དབང་དང་དྲག་པོ་གཉིས་ཀ་ལ། །ཟླ་གམ་གྲུ་གསུམ་ནང་མ་ལ། །མ་རེག་ཙམ་དུ་ཟླུམ་པོར་བསྐོར། །དེ་ཡི་སུམ་ཆ་ལྟེ་བ་སྟེ། །ལྷག་མ་འདབ་བརྒྱད་གོང་ལྟར་རོ། །དེ་ལྟར་ཐིག་ཆེན་བརྒྱད་གདབ་ནས། །ཨོཾ་བཛྲ་ཙི་ཏྲ་ས་མ་ཡ་ཧཱུྃ། ཞེས་བརྗོད་ཅིང་ཐོག་མར་སློབ་དཔོན་གྱིས་དབང་ལྡན་ནས་བརྩམས་ཏེ་བརྩེགས། སྒོ་ཚད་ཙམ་གྱིས་བར། ལག་པ་རྡོ་རྗེ་དང་བཅས། ཁུ་ཚུར་གཡོན་པས་བྲི། དེ་ནས་དྲག་པོ་སོགས་ཀུན་གྱི་གང་བདེ་བར་བྲིའོ། །གོ་རིམ་ནི་དང་པོ་དཀར་པོ། དེ་ནས་དམར་པོ་སེར་པོ། ལྗང་ཁུ་ནག་པོ། དཀྱིལ་འཁོར་ཆེན་པོ་བྲི་ན། ཐིག་ཚོན་འགོངས་པའི་ཉེས་པ་སྤངས་བའི་ཕྱིར། ༀ་བཛྲ་བེ་ག་ཀྲ་མ་ཧཱུྃ། ཞེས་བརྗོད་ཅིང་ཐིག་ཚོན་ནམ་མཁར་བཏེག་ནས་རང་དེའི་འོག་ན་འགྲོ་བར་བསམ་མོ། །ཞི་བའི་ལྟེ་བ་ལྗང་གུ་ལ་རྡོ་རྗེ་དཀར་པོ། འདབ་བཞི་མེ་རླུང་སེར་པོ་དབང་ལྡན་སྔོ། །བདེན་འབྲལ་ལྗང་བ་ཞི་བ་ལས་ཐམས་ཅད་པའོ། །ཡང་ན་འདབ་བཞི་ཕྱོགས་མདོག་མཚམས་བཞིར་མཛེས་ཚོན་ནོ། །ཞི་བ་ཁོ་ན་ལ་འདབ་བརྒྱད་དཀར་པོའོ། །རྒྱ་ཡང་དཀར་པོ་ཁ་ཞེང་དཀར་པོ་ལ་རྡོ་རྗེ་དཀར་པོའམ། སྔོན་པོ་བཞིའམ་བརྒྱད། དེའི་ཕྱིར་སོར་བཞི་དཀར་པོ་ལ་སྣ་ཚོགས་རྡོ་རྗེ་ལྗང་གུ། རིན་པོ་ཆེ་སེར་པོ། དེའི་ཕྱི་སོར་གཉིས་གཞི་སེར་པོ་ལ་
པདྨ་དམར་པོ། ཀུན་རིག་ལ་ཐབ་ཀྱི་ནང་དུ། དཀྱིལ་འཁོར་ནང་མ་ཚང་བར་བྲི། ཐབ་ཀྱི་ཕྱི་རོལ་དུ་དཀྱིལ་འཁོར་ཕྱི་མ་འཁོར་ཡུག་དང་བཅས་པ་བྲི་བ་ནི་ཤིན་ཏུ་རྒྱས་པའི་ལུགས་སོ། །ཡང་ན་ཐབ་ཀྱི་ནང་དུ་གདུང་རེའུ་མིག་ལྔ་ལུ་རིགས་ལྔ་དང་ཡུམ་བཞིའི་ཕྱག་མཚན་བྲི། ཐབ་ཀྱི་ཕྱི་རོལ་དུ་འཁོར་ལོ་རྩིབས་བཅུ་དྲུག་ལ་སེམས་དཔའ་བཅུ་དྲུག །སྒེག་སོགས་བརྒྱད་དང་སྒོ་བ་བཞི། དེ་ཕྱིར་ལྷ་སྣམ་རིམ་བཞི་ལ་སྐལ་བཟང་དཔེ་བྲལ་ཉན་རང་ཁྲོ་བོ་རྣམས་བྲི།་དེ་སྒོ་བྱེད་པའམ་མེད་ཀྱང་རུང་སྟེ། འཁོར་ཡུལ་དཔལ་མགོན་བདུན་ཅུ་དང་རྡོ་ར་འོད་ཟེར་ཕྲེང་བ་བྲི། དེ་ནི་ས་ལུགས་དག་དང་མཐུན་ནོ། །ཟུར་བཞིར་ཟླ་ཕྱེད་རྡོ་རྗེ་བྲིའོ། །རྒྱས་པའི་ཐབས་ཀྱི་མཆུ་དང་ཁ་ཁྱེར་སོར་བརྒྱད་སེར་པོ་སོགས་རིན་ཆེན་མཚན་པ་གྲ་བཞི་རིན་པོ་ཆེ་སྤྲས་པའི་དབུས་སུ་རིན་པོ་ཆེ་སེར་པོ། དབང་གི་མཆུ་དང་ཁ་ཁྱེར་དམར་པོ་སོགས་ལ་པདྨ་དམར་པོ་དང་ལྕགས་ཀྱུས་མཚན་པ། གྲ་བཞིར་ལྕགས་ཀྱུའམ། ཨུཏྤལ་དམར་པོས་སྤྲས་པ། དབུས་འདབ་བརྒྱད་ཀྱི་ལྟེ་བར་པདྨ་དམར་པོའམ་ལྕགས་ཀྱུའོ། །དྲག་པོའི་ཐབ་ཀྱི་ཁ་ཁྱེར་སོགས་ནག་པོ་རྡོ་རྗེ་ནག་པོ་ཁ་གདངས་བ་རལ་གྲིས་མཚན་པ། ཟུར་བཞི་རྡོ་རྗེ་ནག་པོའམ་རལ་གྲིས་མཚན་པ། དབུས་སུ་ཁྲོ་བོ་ལ་རྡོ་རྗེ་ནག་པོ་བྲིའོ། །འདབ་བརྒྱད་དམ་ཡང་ན་སྣ་ཚོགས་པདྨ་བྱའོ། །ཡང་ལས་བཞི་སྤྱི་དྲིལ་ཕུན་སུམ་ཚོགས་པའི་ཐབ་ནི། ཐབ་ཀྱི་མུ་རན་སོགས་མི་བྱེད་པ། ནང་དུ་དཀྱིལ་འཁོར་ལྷ་ཚོགས་བཀོད། དེ་རྒྱབ་དབང་གི་ཐབ་བྲི། དེ་རྒྱབ་ཞི་བའི་ཐབ། དེ་
རྒྱབ་རྒྱས་པའི་ཐབ། དེ་རྒྱབ་དྲག་པོའི་ཐབ། དེ་རྒྱབ་རྡོ་རྗེའི་ར་བ་མེ་རི་དཀར་པོ་ཁྲོ་བོ་ལ་དུར་ཁྲོད་བརྒྱད་བྲི། རྙིང་མའི་ལུགས་སོགས་ཕལ་ཆེར་ལ་དྲག་པོའི་ཐབ་ལ་མེ་རི་བྲིའོ། །དེ་ཡང་རབ་བརྩེགས་ཐབ་སྟེ་ཐབ་ཀྱི་རྒྱ་ཐུར་དུ་རྐོ། རྒྱ་ཕྱེད་དཔངས་སུ་རྩིག་པའི་ཞེང་དུ་མཆུའི་ཚད། དེ་ནས་ཁ་ཁྱེར་མུ་རན་གཉིས་ནང་ནས་རིམ་པར་མཐོ་བའི་དཔངས་དང་ཞེང་མཉམ་པ། ཁ་འཕྱང་ནི་ཕྱི་ན་མར་དམའ་བར་འཕྱང་བ། མེ་སྒོ་ལས་དང་མཐུན་པའི་དབྱིབས་ལ་རྡོ་རྗེ་རིན་ཆེན་སོགས་ལས་ཀྱི་མཚན་མས་བསྐོར་བའོ། །རོ་བསྲེགས་ན་བྲིས་པའི་ཐབ་དང་དཀྱིལ་འཁོར་གྱི་སྟེང་དུ་ཞལ་ཁེབས་བྱས་ནས། དེའི་སྟེང་དུ་བླ་མ་ལ་བྱང་ཆུབ་ཆེན་པོ། རབ་བྱུང་ལ་མཆོད་རྟེན་དཀར་པོ། དགེ་བཤེས་ལ་པདྨ་དམར་པོ་ཁ་ཁྱེར་ལྟ་བུ། རྒྱལ་པོ་ལ་སྔོན་པོའི་གཙུག་ཏོར་ལྟ་བུ། བློན་པོ་ལ་དམར་སྐྱ་ཟ་མ་ཏོག་ལྟ་བུ། ཐ་མལ་པ་ཕོ་ལ་སེར་སྐྱ་གདན་ཁྲི་ལྟ་བུ། མོ་ལ་སྔོན་སྐྱ་བིལ་བའི་འབྲས་བུ་ལྟ་བུ། བྱིསྦ་ལ་དམར་སེར་ལྷུང་བཟེད་དབྱིབས། ཞ་ལ་དང་མཚོན་བྱུགས་ལ། རྒྱལ་པོ་དང་བླ་ཆེན་ལ་འོག་ཏུ་སེང་གེའི་ཁྲི་ཕྱོགས་མཚམས་སུ་རྒྱལ་མཚན་བ་དན་བུམ་པ་སོགས་བརྒྱད་བརྒྱད་དང་སྟེང་དུ་གདུགས་དུ་བས་འཁོར་བ་སོགས་བྱའོ། །སྤུར་ཁང་ལ་སྲུང་བཞི་དང་བཀྲ་ཤིས་རྟགས་བརྒྱད་བྲི་བ་ཡང་མཐོང་ངོ། །ཕལ་པ་ལ་ཤིང་གྲུ་བཞིར་བརྩེགས་པས་ཀྱང་ཆོག་གོ །འབྲིང་སྒོ་ཐབ་ནི་སྟེགས་བུའི་སྟེང་དུ་བརྩེགས། ཐབ་ཀྱི་ནང་ཇི་ལྟ་བ་བཞིན་དུ་ཐུར་དུ་རྐོ་སྟེ་ཕྱི་ནས་བརྩེགས་མི་དགོས་སོ། །ཐ་མ་བྲི་ཐབ་
ལ་ཡང་དངོས་སུ་མེད་ཀྱང་ཡོད་པར་བསྒོམས་པས་ཆོག །སྐྱེས་བུ་དམ་པའི་གདུང་ལ་གཟུངས་ཆུས་བཀྲུས་ཤིང་རས་དང་སྣམ་བུས་ཕྱིས་དྲི་བཟང་གིས་ཁྱབ་པར་བྱུག་ཞལ་དུ་བླུགས། ཕལ་པ་ལ་ཡང་ཕྱིར་ཟློག་ཚང་བར་བྱས་ཆོག །རྩ་རིག་གིས་སྔགས་པའི་གོས་དང་རྒྱན་གྱིས་བརྒྱན། གནས་ཡིག་ནི་མགོ་མཛོད་སྤུ། རྣ་བ་གཡས་གཡོན། གཙུག་ཕུད་དང་ལྔར་རིགས་ལྔའི་སྔགས། དཔུང་པ་གཡོན་པར། ཨོཾ་སརྦ་བིད་སརྦ་ཨ་ཝ་ར་ཎ་ནི་བི་ཤྭ་དྷ་ཡ་ཧ་ན་ཧཱུྃ་ཕཊ། དཔུང་པ་གཡས་པར་རྩ་རིག །སྣ་བུག་གཉིས་ལ། ཨོཾ་སརྦ་བིད་ཧཱུྃ། སྐེད་པར། ཨོཾ་སརྦ་བིད་ཕཊ། སྤུས་མོ་གཡས་ལ། ཨོཾ་སརྦ་བིད་ཨཱ༔ པུས་མོ་གཡོན་ལ། ཨོཾ་སརྦ་བིད་ཏྲཊ། བོལ་གཡས་པར། ཨོཾ་སརྦ་བིད་ཨོ། བོལ་གཡོན་པར། ཨོཾ་སརྦ་བིད་སྭ། ལོང་བུ་གཡས་སུ། ཨོཾ་སརྦ་བིད་ཨཱ༔ ལོང་བུ་གཡོན་དུ། ཨོཾ་སརྦ་བིད་ཧཱུྃ། མིག་གཡས་ལ། ཨོཾ་སརྦ་བིད་ཏཊ། མིག་གཡོན་ལ། ཨོཾ་ཤཿ གསང་གནས་སུ། ཨོ་བྷཿ ཞེས་པ་རྣམས་རབ་གུར་གུམ་གྱིས་བྲིས་ནས་སོ་སོར་སྦྱར། འབྲིང་ཚར་གསུམ་བྲིས་ནས་གནས་བཅོ་བརྒྱད་དུ་ཀློག་པའི་ཚུལ་བྱས་ནས་མགོ་དང་དཔུང་པ་གཉིས་སུ་གདབ༔ ཐ་མ་སྔགས་ཚར་གསུམ་ཀློག་ལ་གནས་སོ་སོར་གདབ་པར་བྷེ། དེ་ནི་སྦྱོང་རྒྱུད་ལུགས་སོ། །མི་འཁྲུགས་པ་བྱེད་ན་རབ་མགོ་བོའི་གནས་ལྔར་གཙོ་བོ་ལྔའི་སྔགས། འདོམས་སུ་བདུག་པ་མ། དཔྲལ་བར་མེ་ཏོག་མ། མིག་
གཉིས་ལ་མར་མེ་མ།་་སྙིང་གར་བྱུག་པ་མ། བརླ་གཡས་ལ་ལྕགས་ཀྱུ་མ། བརློ་གཡོན་ལ་ཞགས་པ་མ། བྱིན་པ་གཡས་ལ་ལྕགས་སྒྲོག་མ། གཡོན་ལ་ དྲིལ་བུ 
་མའི་སྔགས་བྲིས་ལ་བཏགས། སྤྲོ་ན་སྦྱོང་རྒྱུད་ཀྱི་གནས་ཡིག་ཀྱང་བཏགས་སོ། །བསྡུ་ན་གཙོ་བོའི་སྔགས་མགོ་དང་ལྷ་མོ་བརྒྱད།་སྒོ་མ་བཞིའི་སྔགས་ཡན་ལག་བཞི་ལ་བཏགས། དཀྱིལ་འཁོར་གཞན་གང་གིས་སྒོ་ནས་བསྲེག་ཀྱང་རྒྱས་པར་ཁམས་དང་སྐྱེ་མཆེད་ཀྱི་ལྷ་སོ་སོའི་སྔགས་གནས་སོ་སོར་སྦྱར་བ་རབ། གཙོ་བོའི་སྔགས་མགོ་དང་འཁོར་སྔགས་ཡན་ལག་ལ་སྦྱར། གཙོ་འཁོར་མ་ཕྱེ་བའི་སྔགས་ལ་ཚར་གསུམ་བྲིས་ནས་མགོ་དང་དཔུང་པར་བཏགས་སོ། །ཐོས་གྲོལ་སོགས་རྙིང་མའི་རིགས་ལ་བཏགས་གྲོལ་དང་ཡི་དམ་སོ་སོའི་སྲོག་འཁོར་ཡོད་ན་སྙིང་གར་བཏགས། མེད་ན་གོང་བཞིན་ལ་ཡིག་བརྒྱ་སྙིང་གར་བཏགས། དེ་ཐམས་ཅད་ལ་ཕྱིར་ཟློག་དང་དབང་བསྐུར་རྒྱས་བསྡུས་གང་ལྕོགས་སྔོན་དུ་ཚར་བར་བྱའོ། །དེ་ནས་གསོན་གཤིན་གྱི་སྦྱིན་སྲེག་གང་བྱེད་ཀྱང་འདྲ་སྟེ། ཁྱད་པར་དྲག་པོའི་སྦྱིན་སྲེག་ལ་ལྔ་སེར་དང་རྒྱུ་ལྡོག་ཐམས་ཅད་བརྩིས་ལ་རང་དང་གདོང་མ་ཐུག་པ་གལ་ཆེའོ། །ཞི་རྒྱས་དབང་དྲག་གི་ཁ་གྲུ་ཕྱོགས་ལོག་ཀྱང་འགལ་བ་ཆུང་སྟེ། འབྱུང་བའི་ཕྱོགས་དང་དཀྱིལ་འཁོར་དང་བདག་མདུན་བུམ་པ་ཐབ་གནས་ཁང་གང་རུང་ཞིག་གི་ཕྱོགས་སུ་བསམས་པས་ཆོག །ཡམ་ཤི་ང་ནི་ཞི་བ་ལ་བལ་བུ་གླང་མ་ལྕང་མ་མངར་སིལ་ལ་སོགས་མེ་ཏོག་དང་ཤུན་པ་དཀར་ཞིང་རོ་མངར་བ་གང་ཡང་རུང་སྟེ། རྩེ་མོའི་
ཆ་ལས་བྱུང་ཞིང་སློབ་དཔོན་གྱིས་མཐེའུ་ཆུང་གིས་ཚད་ཙམ་སོར་བཅུ་གཉིས་པ། པདྨ་འདབ་བརྒྱད་དོད་པོར་བྱས་ལ་མར་ཁུའམ་འོ་མས་སྦག །བུད་ཤིང་ནི་རྒྱུ་དེ་རྣམས་ལས་སྦོམ་དུ་མཛུབ་མོ་ཙམ་ལ་གྲུ་གང་དང་རྐང་གང་མཐོ་གང་པའི་ནང་དུ་རྒྱ་གྲམ་དང་མཐར་ཟླུམ་པོར་བརྩེགས། རྒྱས་པ་ལ་བལ་བུ་ཤུག་པ་སྐྱེར་པ་ལ་སོགས་མེ་ཏོག་དང་འབྲས་བུ་ཤུན་པ་སེར་པོ་ཅན་དང་འབྲས་བུ་རྒྱས་པའི་རིགས་ལས། ཡལ་གའི་དབུས་ལས་བྱུང་བ་སྦོམ་དུ་ཆང་གང་རིང་ཐུང་གྲུ་གང་མར་ཆུའམ་འོ་མས་སྦག །ཡང་ན་གུང་མཛུབ་ཀྱི་ཚད་ལ་སོར་བཅུ་གཉིས། བུད་ཤིང་ཁྲུ་དོ་བཞི་གཤག་དགུ་མིག་གྲུ་བཞི་བརྩེགས། དབང་ལ་སེ་བ་འོམ་བུ་སྐྱུར་སིལ་བ་ཤིང་རྣམས་ལ་སོགས་མེ་ཏོག་དང་འབྲས་བུ་ཤུན་པ་དམར་ཞིང་རོ་སྐྱུར་བའི་རིགས། མངར་གསུམ་མམ་བདུད་རྩིས་སྦག་ལ་སྲིན་ལག་གི་ཚད་སོར་བཅུའམ་བརྒྱད་འདབ་མ་ལྔ་པ་བྱ། བུད་ཤིང་གཉིས་བཀས་ཁྲུ་གང་དང་མཐོ་གང་འཕྲད་བཅད་བརྩེགས། དེ་དག་རློན་ཤིང་ལོ་མ་ཅན་དྲང་བ་བྱའོ། །དྲག་པོའི་ཤིང་ཚེར་ནག་སྐྱེར་པ་ལ་སོགས་ཚེར་མ་ཅན། རོ་ཚ་བ་དང་ཁ་བ་འཁྱོག་པོ་རྩ་བའི་ཆ་ལས་བྱུང་ཞིང་སོར་མོ་བཅུའམ་བརྒྱུད་འདབ་གསུམ་པ་གུང་མོའི་ཚད་ཁྲག་གིས་སྦགས་སོ། །འབུད་ཤིང་གསུམ་གཤག་རྐང་གང་ངོ། །མདོར་ན་ཡམ་ཤིང་ཐབ་ཀྱི་རྒྱའི་ཕྱེད་ཚད་དང་། བུད་ཤིང་ཐབ་ཆེ་ཆུང་གི་རིགས་པས་བརྟགས་སོ། །དེ་ཡང་ཐབ་ཀྱི་མཆུའི་སྟེང་དུ་བརྩེགས་སོ། །དེ་ལ་མེ་དར་ལས་ཀྱི་ཁ་དོག་དང་མཐུན་པར་བཙུགས། ཡོད་ན་མེ་ལྷའི་ཙཀླུ་བཏགས་སོ། །རླུང་
གཡབ་དངོས་སམ་དར་ལས་བྱས་པ་དང་། མདུན་དུ་མེ་གཡོལ་དང་དེའི་སྟེང་དུ་མེ་ལྷ་འཇིག་རྟེན་པའི་མཆོད་པ་སྣ་བདུན་བཤམས། ཞི་རྒྱས་དབང་གསུམ་ལ་བསྲེག་རྫས་གཡས་དང་མཆོད་རྫས་གཡོན་དུ་བཤམས། དྲག་པོ་ལ་གོ་བརྗེ་ཞིང་གཞི་དང་སྣོད་སོགས་ལས་དང་མཐུན་པའི་ཁ་དོག་དང་སྣོད་བྱ། མདུན་དུ་དགང་བླུགས་ཁ་སྦྱར་ལ་བཞག་པ་དང་རྡོར་དྲིལ་བཤམས། མཆོད་གཞིར་མེ་ལྷའི་གཏོར་མ་གཉིས་མར་མེ་དང་ལྷ་བཤོས་ཆུང་ངུ་མང་པོ། འདས་པའི་མཆོད་པ་སྣ་བདུན་རྒྱས་པ་དང་། དྲག་པོའི་རིགས་ལ་སྨན་རཀ་བུམ་པ་གཉིས་སོགས་བཤམས། རྫས་བཀོད་པའི་གོ་རིམ་ནི། ཡམ་ཤིང་། མར་ཁུ། ཏིལ། ཡུངས་ཀར། ཞོ། ཟས་མཆོག །དཱུརྦ། ནས། གྲོ། །སོ་བ། སྲན་མ། འབྲས། ཀུ་ཤ། བིལ་བ། སྟར་རྒ། ཤིང་ཐོག་སྣ་ཚོགས། མེ་ཏོག །སོ་རྩི། ན་བཟའ། དཀར་གསུམ། མངར་གསུམ། དེ་དག་ཞི་བ་ཡིན་ལ། རྒྱས་པ་ལ་མར་ཁུའི་མཚན་དུ་ཟས་མཆོག་བཞག་དབང་ལ་མེ་ཏོག་དམར་པོ། དྲག་པོ་ལ་ཟན་ལིང་ཤོག་ལིང་ཤ་དུམ་སྦུག་ལ་བཞག །མེ་ཏོག་ནི་ལས་ཀྱི་ཁ་དོག་ཅན་མ་རྙེད་ན་ནས་ལ་ཁ་དོག་མཚོན་གྱིས་བསྒྱུར། བིལ་བའི་ཚབ་སེ་ཐོག་དང་། སྟར་གའི་ཚབ་ལ་ཤུག་ཐོག་བྱའོ། །དེ་ཐམས་ཅད་སྤོས་ཀྱིས་བདུག་པའམ་བྱུག །འབྲུ་ཐམས་ཅད་ལ་མར་ཁུས་ཅུང་ཟད་བྲན། དཱུར་ཝ་ལ་འོ་མ་དང་ཀུ་ཤ་ལ་མར་ཁུ་སྦག །དབང་དང་དྲག་པོ་ལ་ཞོ་དང་འོ་མ་མི་རུང་བར་ཡེ་ཤེས་ཐིག་ལེའི་རྒྱུད་ནས་གསུངས་སོ། །
འདས་མ་འདས་ཀྱི་མཆོད་པ་གཉིས་མ་འབྱོར་ན་གཅིག་ལ་ཁ་གསོ། རྫས་གང་མ་རྙེད་པའི་ཚབ་ཏུ་ནས་བཤམས་ལ་རྫས་དེ་ཉིད་དུ་བྱིན་གྱིས་རླབས་ཤིང་དམིགས་ལ་སྔགས་སོ་སོས་འབུལ། རྙིང་མ་ལ་འདོད་གསོལ་གྱི་བྱང་བུ་འབུལ་རྒྱུ་གང་འབྱོར་ཡང་བསགས། ཞི་བ་ནི་ར་བ་བཞིའི་ཚེས་གཅིག་སྲོད་དང་སྔ་དྲོ་རྒྱན་དང་ཆས་གོས་གདན་དཀར་པོ་ལ་སེམས་དཔའི་སྐྱིལ་ཀྲུང་ངམ་རྡོ་རྗེ་སྐྱིལ་ཀྲུང་། རྒྱས་པ་ཉའམ་ཉི་དྲོས་ཉིན་ཕྱེད་དུས་རྒྱན་དང་ན་བཟའ། གདན་རྣམས་སེར་པོ་རྒྱལ་པོ་རོལ་བའི་སྟབས་སམ། ཁྲིའུ་སྟེང་དུ་བྱམས་འདུག་བྱ། དབང་ལ་ཚེས་བརྒྱད་དང་དགོང་ཁ་རྒྱན་དང་ན་བཟའ། གདན་དམར་པོ་ལ་རྡོ་རྗེའི་སྐྱིལ་ཀྲུང་ངམ་བཙུན་མོ་རོལ་པའི་སྟབས། དྲག་པོ་ལ་ཉེར་དགུའམ་སྲོད་ལ་རྒྱན་དང་ན་བཟའ་ནག་པོ་གདན་མེད་པའམ་ནག་པོ་ལ་ཙོག་པུར་རྐང་པས་རྐང་པ་མནན་པའམ།་གཡས་སྐྱིལ་ཀྲུང་ངམ་གཡོན་བསླང་བའི་མགར་འདུག་གམ། པུས་མོ་གཉིས་ས་ལ་བཙུགས་ཏེ་འདུག །སྤྱི་དྲིལ་ལ་ཆས་སྣ་ཚོགས་དང་ལྡན་པར་ཟབྱའོ། །དེ་ནས་ཕྲིན་ལས་བཞི་གང་བྱེད་ཀྱང་། ཁྱད་པར་དྲག་པོ་བྱེད་ན། སྒྲུབ་ཁང་ཐོགས་ནས་ཆུ་སྣ་ཕྱོགས་བཅུར་གཏོར། དེ་ནས་གསེར་སྐྱེམས་སམ་ཆང་ཕུད་རྒྱས་པར་གཏོར། ཤིང་སྣ་ཚོགས་ཀྱིས་བསང་དང་གསུར་མཆོད་བཏང་། གསུར་དང་གསེར་སྐྱེམས་མ་གཏོགས་དེ་ཐམས་ཅད་སྔར་ཉིན་ཚར་བར་བྱའོ། །ཉི་མ་གཅིག་ལ་ཐུབ་ན་ནི་རུང་ངོ། །དེ་ནས་ཕྱིར་ཉིན་དཀྱིལ་འཁོར་གང་ཡིན་པའི་བདག་མདུན་བུམ་གསུམ་བདག་འཇུག་དང་བཅས་པ་ཐུབ་ན་
རབ། བདག་བུམ་གཉིས་ཁོ་ན་ཐུབ་ན་འབྲིང་། ཐ་མ་བདག་བསྐྱེད་དང་ལས་བུམ་གཉིས་ཐོན་ན་ཡང་ཆོག །དེ་ནས་བཤམས་པའི་གདན་ལ་རྒྱན་ཆས་བཅས་ནས་འདུག་ལ། ཨོཾ་བཛྲ་ཡཀྵ་སོགས། དཀྱིལ་འཁོར་གང་ཡིན་གྱི་ལས་སྔགས་ཀྱིས་བསང་། སྭ་བྷ་ཝས་བསང་སྦྱངས། བསང་སྦྱངས་ཐམས་ཅད་ལ་འགྲེས་སོ། ཨོཾ་སྭ་བྷ་ཝ་སོགས། སྟོང་པའི་ངང་ལས་ཧཱུྃ་དང་ཨ་ལས་བྱུང་བའི་རྡོ་རྗེ་སེམས་དཔའ་ཡབ་ཡུམ་འོད་དུ་ཞུ་བ་ལས་བྱུང་བའི་རྡོར་དྲིལ་མཚན་ཉིད་དང་ལྡན་པ། རང་གི་ལག་མཐིལ་གཡས་སུ་ཟླ་བ་དང་གཡོན་དུ་ཉི་མའི་གདན་ལ་འཁོད་པར་གྱུར། ཞེས་པད་ཀོར་དང་བཅས་པས་རྡོར་དྲིལ་བླངས། ཨོཾ་བཛྲ་སཏྭ་ཧཱུྃ༔ ཞེས་ལན་གསུམ་རྡོ་རྗེ་གསོར་ནས་ཐུགས་ཀར་བཟུང་། ཚྭ་དྷ་ཏུ་ཤྭ་རི་ཧཱུཾ། ཞེས་
དྲིལ་བུ ་ཁྲོལ་ཞིང་དཀུར་བརྟེན་དེ་ནས་བཟུང་སྟེ་སྦྱིན་སྲེག་མ་ཚར་བར་རྡོར་དྲིལ་དང་འབྲལ་མི་རུང་ངོ། །འདིར་དཀྱིལ་འཁོར་གང་ཡིན་གྱི་སྔོན་འགྲོ་གཏོར་མ་བཏང་ལ་བགེགས་བསྐྲད་དཀྱིལ་འཁོར་སོ་སོའི་གཞུང་ལྟར་བྱ་བའམ། ཡང་ན། ཧཱུཾ། བསྐལ་པ་མེ་ལྟར་འབར་བའི་ཀློང་དཀྱིལ་ནས། །མེ་ལྷ་དྲང་སྲོང་ཡི་དམ་མ་གཏོགས་པ། །གནོད་བྱེད་འབྱུང་པོའི་ཚོགས་རྣམས་ཕྱིར་དེངས་ཤིག །གལ་ཏེ་འདུག་ན་གཞོབ་བཞིན་རྡུལ་དུ་བརླག །ཧཱུྃ། ཞེ་སྡང་འབར་བའི་མེ་ནི་མཐིང་ནག་
འབར། །ཡེ་ཤེས་འབར་བའི་མེ་ཡིས་མཚམས་ཆོད་ཅིག །ང་རྒྱལ་འབར་བའི་མེ་ནི་སེར་ནག་འབར། །ཡེ་ཤེས་འབར་བའི་མེ་ཡིས་མཚམས་ཆོད་ཅིག །འདོད་ཆགས་འབར་བའི་མེ་ནི་དམར་ནག་འབར། །ཡེ་ཤེས་འབར་བའི་མེ་ཡིས་མཚམས་ཆོད་ཅིག །ཕྲག་དོག་འབར་བའི་མེ་ནི་ལྗང་ནག་འབར། །ཡེ་ཤེས་འབར་བའི་མེ་ཡིས་མཚམས་ཆོད་ཅིག་་གཏི་མུག་འབར་བའི་མེ་ནི་སྨུག་ནག་འབར། །ཡེ་ཤེས་འབར་བའི་མེ་ཡིས་མཚམས་ཆོད་ཅིག །ཅེས་ཁྲོ་བོའི་མེ་དཔུང་གི་ཚོགས་ཀྱིས་བགེགས་བསྐྲད་པར་བསམས་ལ། ཡོ་བྱད་ཀུན་ལ་ནས་ཐུན་བྲབ་བོ། །དེ་ནས་སྲུང་འཁོར་བསྒོམ། མཆོད་པ་རྣམས་དཀྱིལ་འཁོར་སོ་སོའི་གཞུང་ལྟར་བྱིན་གྱིས་རླབས། བསྲེག་རྫས་རྣམས་དཀྱིལ་འཁོར་སོ་སོའི་གཏོར་མ་ལྟར་བྱིན་གྱིས་རླབས་ཏེ། གཏོར་མ་ཞེས་པའི་མལ་དུ། བསྲེག་རྫས་ཞེས་བསྒྱུར་ཏེ། ཨོཾ་ཨཱཧཱུཾ། ཨོཾ་ཁ་ཁ་ཁྲ་ཁྲ་ཁྲ་ཁྲ་ཥཱ༔ ཞེས་བརྗོད་ནས་རྡོར་དྲིལ་དང་བཅས་པས། དགང་བླུགས་ཁ་སྦྱར་བས་བསྲེག་རྫས་ཐམས་ཅད་ལ་རེག་ཅིང་། ཨོཾ་ཨཱཿ ཧཱུྃ་སྭཱ་ཧཱ། རྫས་ཐམས་ཅད་བཀྲུས་པར་བསམ། དེ་ནས་ཡམ་ཤིང་ལ་རེག་སྟེ། ཨོཾ་ཤྲཱི་སྭཱ་ཧཱ། མར་ཁུ་ལ་རེག་སྟེ། ཨོ་ཨཱསཱ་ཧུ། ཡམ་ཤིང་དང་མར་ཁུ་གཉིས་སྔགས་བསྣོལ་བའི་རིགས་ཀྱང་སྣང་ངོ། །འབྲུ་ཐམས་ཅད་ལ་རེག་སྟེ། ཨོ་ཛཾ་སྭ་ཧཱ། ཡང་
རྫས་ཐམས་ཅད་ལ་རེག་ཅིང་། ཨོ་ཀུ་རུ་ཀུ་རུ་སྭཱ་ཧཱ། ཞེས་བྱིན་རླབས་རྒྱས་པར་སྤྲོ་ན་རྫས་སྔགས་སོ་སོའི་མཇུག་ཏུ། ཨོ་ཨཱཧཱུྃ། སྦྱར་བས་རེག་གོ །དེ་ནས་རོ་བསྲེག་ཡིན་ན་ཀུ་ཤ་ལས་བུམ་དཔལ་འབར་ལྔའམ་གསུམ་རླུང་གཡབརྣམས་སྣོད་གཅིག་ཏུ་བཞག་ནས་མཆོད་གཡོག་པས་བཟུང་།་རང་རྒྱན་ཆས་དང་བཅས་སྤུར་ཁང་སྒོར་འགྲོའོ། །དེ་ནས་ཀུ་ཤ་ཆེན་པོ་བཅུ་ལས་བུམ་གྱིས་ཆུས་བསངས་ཤིང་། སྟོང་པའི་ངང་ལས་ཨོཾ་ལས་ཀུ་ཤ་གསར་པ་སྔོ་ལྗང་རྩ་བ་དང་རྩེ་མོ་མ་ཉམས་པ། ཧ་ཅང་མི་རིང་ཞིང་མི་ཐུང་བར་དག་པར་བྱེད་ཅིང་སྲུང་བའི་ནུས་པ་ཕུན་སུམ་ཚོགས་པར་གྱུར། ཨོཾ་བཛྲ་ས་ཏྭ་ཨཱཿ ཞེས་པས་པད་ཀོར་དང་བཅས་པས་གཉིས་རེ་བླངས་ནས། ཨོ། ཀུ་ཤ་འདི་ནི་གཙང་ཞིང་དགེ། །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལ་སྐྱེས་པ་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་ཞིང་བདེ་ལེགས་མཛད་དུ་གསོལ། །ཨོཾ་བཛྲ་ས་ཏཱ་ཨཱཿ ཞེས་ཆུན་པོ་གཉིས་ཐབ་ཀྱི་སྟེང་དུ་རྩེ་མོ་ཤར་དུ་བསྟན་ཏེ་བཞག་པ་མེ་ལྷའི་གདན་དུ་བསམ་ལ་འདི་རྒྱ་གྲམ་དུ་བཅིངས་སྲོལ་ཡང་སྣང་། གཞན་རྣམས་གཡས་བསྐོར་དུ་ཐབ་ཀྱི་ཁ་ཁྱེར་ལ་རྩ་བ་སྔོན་དུ་འགྲོ་བས་སྔ་མའི་རྩ་བ་ཕྱི་མའི་རྩེ་མོས་ནོན་པར་ཆུན་པོ་བརྒྱད་པོ་བཀོད། རྒྱས་པ་དང་དབང་དང་དྲག་པོ་ལ་
ཀུ་ཤ་རྩེ་མོ་ཡང་བྱང་དང་ནུབ་དང་ལྷོ་ཕྱོགས་སུ་བསྟན། དེ་ནས་ཐབ་ལས་བུམ་གྱི་ཆུས་བསང་སྦྱངས། སྟོང་པའི་ངང་ལས་ཧཱུྃ་འམ། དྷིའམ་ས་བོན་གང་ཡིན་ལས། ཞི་བའི། རྒྱས་པའི། དབང་གི །དྲག་པོའི། །ཕུན་སུམ་ཚོགས་པའི། ཐབ་ཁུང་། སྤྲོ་ན་ཇི་ལྟར་བྲིས་པའི་མཚན་ཉིད་རྒྱས་པར་བརྗོད། མཚན་ཉིད་དང་ལྡན་པའི་དབུས་སུ་པདྨ་དང་ར་སྐྱེས་ཀྱི་གདན་ལ་རཾ་ལས་མེ་ལྷ། དཀར་པོ། སེར་པོ། དམར་པོ། ནག་པོ། འོད་ལྔ་འཕྲོ་བ། ཞལ་གཅིག་ཕྱག་བཞི། སྤྱན་གསུམ་རལ་པའི་ཐོར་ཚུགས་ཅན། གཡས་གཉིས་དབྱུག་པ་དང་མི་འཇིགས་པའི་ཕྱག་རྒྱ། གཡོན་གཉིས་ཕྲེང་བྷྱོབ་དང་རིལ་བ་འཛིན་པ། མེ་ལྕེ་སྟོང་གིས་དཀྲིས་པའི་འོད་འབར་བའི་དཔྲལ་བར་ཨོཾ། མགྲིན་པ་ཨཱཿ ཐུགས་ཀར་ཧཱུྃ་དང་རཾ་གྱིས་མཚན་པར་གྱུར། དེ་ནས་ཞི་བ་ལ་དགེ་སྦྱོང་ཁྱེའུ་གཙང་མ། རྒྱས་པ་ལ་དཔོན་རིགས་སམ་ཕྱུག་པོ། དབང་ལ་བུད་མེད་དམ་གཞོན་ནུ། དྲག་པོ་ལ་མི་ལག་སྨེ་ཅན་ནམ། སྡིག་ཅན་གྱིས་མེ་ལེན་བཅུག་ལ། མེ་ལས་བུམ་ཆུས་བསངས་ནས་མེ་ལེན་མཁན་དེ་ཉིད་ལ་མེ་རུ་སྦར་བཅུག་ནས། རང་གི་ལག་ཏུ་གཏད་བཅུག་ནས། བསངས་སྦྱངས། སྟོང་པའི་ངང་ལས་རས་འདི་ཨོ་ཧཱུྃ་ཧཱུྃ་ཧྲིལླཱརྣམས་ལས་བྱུང་བའི་རྒྱལ་བ་རིགས་ལྔའི་ངོ་བོ་ཡེ་ཤེས་ཀྱི་མེ་ཁ་དོག་ལྔ་ལྡན་དུ་འབར་
བར་གྱུར། རོ་བསྲེག་ཡིན་ན་དཀྱིལ་འཁོར་སོ་སོའི་བྱང་བུ་མེ་སྦར་གྱེར་ཏེ་གང་ཟག་མཆོག་ལ། དཔལ་ལྡན་བླ་མ་དགོངས་སུ་གསོལ། །ཞེས་སྦྱར། ཕུན་སུམ་ཚོགས་པའི་སྦྱིན་སྲེག་ལ་འདི་ཐམས་ཅད་སྦྱར། ཞི་བ་དང་། ལས་ཐམས་ཅད་པ་ཡང་དེ་དང་འདྲ་ལས་བཞི་གཞན་ལ་འདི་ཐམས་ཅད་ནང་ནས་གང་འོས་བསལ་ལ་གྱེར་རོ། ཧཱུྃ། དང་པོ་མེ་བྱུང་གོང་ནས་བྱུང་། །སྔོན་ཚེ་བསྐལ་པ་དང་པོ་ལ། །བཅོམ་ལྡན་རྒྱལ་བ་རིགས་ལྔ་ཡི། །ཐུགས་ཀའི་འོད་ཀྱི་གོང་བུ་ནས། །ཡི་གེ་རཾ་གྱི་འཕྲོ་འདུ་ལས། །ཡེ་ཤེས་ལྔ་ཡི་མེ་བྱུང་ནས། །དུག་ལྔའི་ཕུང་པོ་གཏན་ནས་བརླག །ཡེ་ཤེས་ལྔ་རུ་ལྷུན་གྱིས་གྲུབ། །དོ་ནུབ་གཞལ་ཡས་ཕོ་བྲང་འབར་བ་འདི། །ཉོན་མོངས་དུག་ལྔའི་ཡམ་ཤིང་ལ། །ཡེ་ཤེས་ལྔ་ཡི་མེ་སྦར་བས། །ཕྲིན་ལས་རྣམ་བཞི་འགྲུབ་གྱུར་ཅིག །ཅེས་པ་ཙམ་མོ། །ཡང་ན་ཞི་བ་ལ། ཧཱུྃ། ཤར་གྱི་ཕྱོགས་ནས་མེ་ལེན་མ། །སྐུ་མདོག་དཀར་མོ་རྡོ་རྗེའི་རིགས། །དྲི་ཟའི་ཡུལ་ནས་མེ་ལོངས་ལ། །ཞི་བའི་མེ་ནི་སྦར་བར་མཛོད། །རྒྱས་པ་ལ། ཧཱུྃ། ལྷོ་ཡི་ཕྱོགས་ནས་མེ་ལེན་མ། །སྐུ་མདོག་སེར་མོ་རིན་ཆེན་རིགས། །གཤིན་རྗེའི་ཡུལ་ནས་མེ་ལོངས་ལ། །རྒྱས་པའི་མེ་ནི་
སྦར་བར་མཛོད། །དབང་ལ། ཧཱུྃ། ནུབ་ཀྱི་ཕྱོགས་ནས་མེ་ལེན་མ། །སྐུ་མདོག་དམར་མོ་པདྨའི་རིགས། །ཀླུ་ཡི་ལག་ནས་མེ་ལོངས་ལ། །དབང་གི་མེ་ནི་སྦྱར་བར་མཛོད། །དྲག་པོ་ལ། ཧཱུྃ། བྱང་གི་ཕྱོགས་ནས་མེ་ལེན་མ། །སྐུ་མདོག་ལྗང་གུ་ལས་ཀྱི་རིགས། །གནོད་སྦྱིན་ལག་ནས་མེ་ལོངས་ལ། །དྲག་པོའི་མེ་ནི་སྦྱར་བར་མཛོད། །ཨོཾ་ཛཱ་ལ་ཛཱ་ལ་ཧཱུཾ། ཞེས་ཐབ་ཀྱི་ཤར་ལྷོ་ནས་སྦྱར་རོ། །དེ་ནས་ལག་པ་གཡས་བུད་ཤིང་དང་། གཡོན་རླུང་གཡབ་ཅིང་། ཞི་བ་ལ། ཧཱུྃ། ཤར་ལྷོ་མཚམས་ནས་ཤིང་ཐུ་མ། །མེ་ལྷའི་ཡུལ་ནས་ཤིང་ཐུས་ལ། །ཞི་བའི་མེ་ནི་འབར་བར་མཛོད། །རླུང་གཡབ་མ་ཡིས་རླུང་གཡོབ་ཅིག །རྒྱས་པ་ལ། ཧཱུྃ།་ལྷོ་ནུབ་མཚམས་ནས་ཤིང་ཐུ་མ། །སྲིན་པོའི་ཡུལ་ནས་ཤིང་ཐུས་ལ། །རྒྱས་པའི་མེ་ནི་འབར་བར་མཛོད། །རླུང་གཡབ་མ་ཡིས་རླུང་གཡོབ་ཅིག །དབང་ལ། ཧཱུྃ། ནུབ་བྱང་མཚམས་ནས་ཤིང་ཐུ་མ། །རླུང་ལྷའི་ཡུལ་ནས་ཤིང་ཐུས་ལ། །དབང་གི་མེ་ནི་སྦར་བར་མཛོད། །རླུང་གཡབ་མ་ཡིས་རླུང་གཡོབ་ཅིག །དྲག་པོ་ལ། ཧཱུྃ། བྱང་ཤར་མཚམས་ནས་ཤིང་ཐུ་མ། །དབང་ལྡན་ཡུལ་
ནས་ཤིང་ཐུས་ལ། །དྲག་པོའི་མེ་ནི་སྦར་བར་མཛོད། །རླུང་གཡབ་མ་ཡིས་རླུང་གཡོབ་ཅིག །ཨོཾ་ཨཱཙྪཧཱུྃ། ཞེས་འབུད་ཤིང་རེ་བཞག་ཅིང་རླུང་གཡབ་རེ་གཡབ་བོ། །དེ་ནས་མེ་དར་ལག་ཏུ་ཐོགས་ནས་བཀའ་བསྒོ་བ་ནི། ཧཱུྃ། ཡེ་ཤེས་ལྔ་ཡི་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་པར། །མེ་ལྕེ་ཤར་དུ་མ་འཕྲོ་ཞིག །མེ་ལྕེ་ཤར་དུ་འཕྲོས་གྱུར་ན། །ཞི་བའི་ཕྲིན་ལས་མི་འགྲུབ་པས། །དེ་ཕྱིར་ཤར་དུ་མ་འཕྲོ་ཞིག །རྒྱས་པ་ལ། ཧཱུྃ། མཉམ་ཉིད་ཡེ་ཤེས་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་པར། །མེ་ལྕེ་ལྷོ་རུ་མ་འཕྲོ་ཞིག །མེ་ལྕེ་ལྷོ་རུ་འཕྲོས་གྱུར་ན། །རྒྱས་པའི་ཕྲིན་ལས་མི་འགྲུབ་པས། །དེ་ཕྱིར་ལྷོ་རུ་མ་འཕྲོ་ཞིག །དབང་ལ། ཧཱུྃ། ཀུན་རྟོག་ཡེ་ཤེས་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་པར། །མེ་ལྕེ་ནུབ་ཏུ་མ་འཕྲོ་ཞིག །མེ་ལྕེ་ནུབ་ཏུ་འཕྲོས་གྱུར་ན། །དབང་གི་ཕྲིན་ལས་མི་འགྲུབ་པས། །དེ་ཕྱིར་ནུབ་ཏུ་མ་འཕྲོ་ཞིག །དྲག་པོ་ལ། ཧཱུྃ། ནན་ཏན་ཡེ་ཤེས་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་པར། །མེ་ལྕེ་བྱང་དུ་མ་འཕྲོ་
ཞིག །མེ་ལྕེ་བྱང་དུ་འཕྲོས་གྱུར་ན། །དྲག་པོའི་ཕྲིན་ལས་མི་འགྲུབ་པས། །དེ་ཕྱིར་བྱང་དུ་མ་འཕྲོ་ཞིག །ཕུན་སུམ་ཚོགས་པ་ལ། ཧཱུྃ། ཆོས་དབྱིངས་ཡེ་ཤེས་མེ་དཔུང་འབར་བ་འདི། །དུར་ཁྲོད་མེ་ཡི་མཆོད་པ་མ་རྫོགས་པར། །མེ་ལྕེ་འོག་ཏུ་མ་འཁྱིལ་ཅིག །མེ་ལྕེ་འོག་ཏུ་འཁྱིལ་བ་ན། །ཕྲིན་ལས་རྣམ་བཞི་མི་འགྲུབ་པས། །དེ་ཕྱིར་འོག་ཏུ་མ་འཁྱིལ་ཅིག །ཨོ་རཾ་ནན་ཤཱནྟི་ཀུ་རུ་སྭཱ་ཧཱ། ཞེས་མེ་དར་གཡབ།་བུད་ཤིང་རླུང་གཡབ་མེ་དར་གསུམ་གྱི་ཚིགས་བཅད་འདི་རྣམས་ཀུན་རིག་སོགས་ལ་མི་དགོས་སོ། །དེ་ནས་མེ་ལྷ་ཡེ་ཤེས་པ་སྤྱན་འདྲེན་པ་ནི། ཐབ་ཏུ་གནས་པའི་མེ་ལྷ་དམ་ཚིག་པའི་ཐུགས་ཀའི་འོད་ཟེར་གྱིས་འཇིག་རྟེན་གྱི་ཤར་ལྷོ་ན་གནས་པའི་མེ་ལྷ་དྲང་སྲོང་གི་ཚོགས་ཀྱིས་བསྐོར་བ་སྤྱན་དྲངས། ལག་པ་གཡས་མི་འཇིགས་པའི་ཕྱག་རྒྱ་མཐེ་བོང་སྲིན་ལག་གིས་རྩ་བར་གཡོབ་ཅིང་རྣ་བ་གཡོན་ངོས་ནས་གཡས་ངོས་སུ་ཁྱེར་ཞིང་ལག་གཡོན་ དྲིལ་བུ ་བསིལ་བས། ཨོ། ཚུར་བྱོན་ཚུར་བྱོན་འབྱུང་པོ་ཆེ། །ལྷ་ཡི་དྲང་སྲོང་གཉིས་སྐྱེས་མཆོག་བསྲེག་བླུགས་ཞལ་ཟས་བཞེས་སླད་དུ། །འདི་ནི་ཡང་དག་བརྙེས་པར་མཛོད། །ཅེས་པ་ཙམ་མམ། སྤྲོ་ན། གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་སྒྲུབ་པ། །
ཐུགས་རྗེའི་སེམས་ཅན་དོན་གྱི་ཕྱིར། །འདི་ཉིད་དུ་ནི་གཤེགས་སུ་གསོལ། །ཨོ་ཊཀྐི་ཧཱུཾ་ཛ༔ ཧཱུཾ། གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་རབ་སྒྲུབ་པ། །ཐུགས་རྗེས་སེམས་ཅན་དོན་གྱི་ཕྱིར། །འབར་བའི་གནས་འདིར་བཞུགས་སུ་གསོལ། །ཨོཾ་ཨཀྵེ་དྷེ་ཝ་ས་མ་ཡ་ཏིཥྛ་ལྷན། ཐབ་ཀྱི་ཤར་ལྷོའི་ཁ་ཁྱེར་ཀུ་ཤའི་གདན་ལ་མེ་ལྷ་ཡེ་ཤེས་པ་འཁོར་བཅས་འཁོད་པར་གྱུར། ཨོཾ་ཨཀྵེ་ཡེ་ས་པ་རི་ཝཱ་ར་ཨརྒྱུ་སོགས། ཆུ་བཞིའམ་གསུམ་འབུལ། ལག་གཡས་རྡོ་རྗེ་དང་བཅས་པའི་མཐེ་བོང་གིས་མཐེའུ་ཆུང་མནན་པའི་རྩེ་གསུམ་གྱི་ཕྱག་རྒྱ་བཅས་ལ། ཧཱུཾ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་གྱིས་བརླབས། །དམ་ཚིག་འདི་ལས་འདས་ན་ནི། །རིག་ན་མྱུར་དུ་རླག་པར་བྱེད། །ཨོཾ་ཧ་ན་ས་མ་ཡ་ཧཱུྃ་ཕཊ༔ ཅེས་དམ་ལ་བཞག །མེ་ལྷ་ཡེ་ཤེས་པ་དང་དམ་ཚིག་པ་དབྱེར་མེད་དུ་གྱུར། ཛཧཱུྃ་བཾ་ཧོ༔ སླར་ཡང་ཐུགས་ཀའི་ཧཱུྃ་གི་འོད་ཟེར་གྱིས་རིགས་ལྔ་སྤྱན་དྲངས། དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་རིགས་ཀྱི་བདག་པོ། རྣམ་སྣང་གིས། མི་བསྐྱོད་པས། རིན་ཆེན་འབྱུང་ལྡན། འོད་དཔག་མེད། དོན་ཡོད་གྲུབ་པས། རིགས་
ལྔས། ཞེས་ལས་དང་བསྟུན་པས། དབུར་བརྒྱན་པར་གྱུར། ཨོཾ་ཨཀྵེ་ཡེ་ས་པཱ་རི་ཝཱ་ར་པུཊྚེ༴ ནས། ཤབྡ་པྲ་ཏཱིཙྪ་སྭཱ་ཧཱ། ཧཱུཾ། གཟི་བརྗིད་ལྡན་པ་མེ་ཡི་ལྷ། །འབར་བཅས་སྐུ་ཡི་རྒྱན་གྱིས་བརྒྱན། །རྔམ་པའི་བྱིན་ཅན་ལས་ལ་བརྩོན། །བསྲེག་བླུགས་འབུལ་ལོ་ལས་ཀུན་སྒྲུབས། །ཚངས་པ་འཇིག་རྟེན་མགོན་གྱི་སྲས། །ཞི་ལ་སོགས་པའི་ལྷ་དཔལ་ཏེ། །ཇི་ལྟར་འདོད་པའི་དོན་སྒྲུབ་པའི། །གཟི་བརྗིད་ཆེན་པོར་ཕྱག་འཚལ་བསྟོད། །དགང་བླུགས་ཁར་ཧུའམ་ཧཱིསོགས་ལྷ་གཙོ་བོའི་ས་བོན། དང་མེ་ལྷའི་ཞལ་ཅུང་ཟད་གདངས་བའི་ལྗགས་ལ་རཾ་ཡིག་གིས་མཚན་པས་བསྲེག་རྫས་བདུད་རྩི་བཞེས་པར་གྱུར། ལག་གཉིས་རྡོར་དྲིལ་དང་བཅས་པས་ཁུ་ཚུར་ལས་མཛུབ་མོ་གཉིས་བརྐྱངས་བས་དགང་བླུགས་བཟུང་སྟེ། བླུག་གཟར་གྱིས་དགང་གཟར་དུ་མར་ཁུ་གསུམ་མམ། བདུན་འབུལ་ཞིང་། ཨོ་ཨགེ་ཡེ་སྭཱ་ཧཱ། ཞེས་བརྗོད་ཅིང་། ཞི་རྒྱས་དབང་གསུམ་ལ་གྲུ་མོ་པུས་མོ་ལས་ཕྱིར་མི་འདར་བར་དགང་བླུགས་ཁ་སྦྱར་ནས་ཐབ་ཀྱི་ཁར་གཡས་བསྐོར་གསུམ་དང་དྲག་པོ་ལ་གཡོན་བསྐོར་གསུམ་བྱ་ཞིང་། ཨོཾ་ཨགེ་ཡེ་ཧ་བྱ་ཀ་བྱ་ཝ་ཧ་ན་ཡ་ཨ་དྷི་བྱ་སྭཱ་ཧཱ། ཞེས་མར་ཁུ་དེ་ཐབ་ཏུ་འབུལ། དེ་ལྟ་བུ་གསུམ་མམ་བདུན་འབུལ། དེ་ནས་མེ་སྤྲ་བརྟག་པ་ནི། གང་ཟག་བཟང་པོའི་
གདུང་ཡིན་ན། མེ་དུད་མཚམས་སུ་སྐུ་དང་ཡི་གེ་སྣང་བ་དང་། དུད་པ་སྔོན་པོ་གྱེན་དུ་འགྲེང་ན་ཞག་བརྒྱད་ནས་གྲོལ་ཞིང་གཟུགས་སྐུ་ཐོབ་བོ། །མེ་ལྕེ་གཡས་སུ་འཁྱིལ་ཞིང་མེ་འོད་དཀར་གསལ་དང་། མེ་ལྕེ་གཡོ་འགུལ་མེད་ཅིང་མེ་ལྕེ་རི་མོ་ལ་ལྷའི་ཕྱག་མཚན་དང་། ས་བོན་ཡིག་འབྲུ་སྣང་བ་དང་། མེ་ལྕེ་ལ་འོད་ཟེར་ཆེན་པོ་འཕྲོ་ན་ཞག་ལྔ་ནས་གྲོལ་ཞིང་གཟུགས་སྐུ་ཐོབ་པའི་རྟགས་སོ། །མེ་ཡི་སྒྲ་ལས་འུར་སེང་གཟུགས་འབིར་ཆེན་པོ་བྱུང་ན། ཞག་བཅུ་ནས་གྲོལ་ནས་གཟུགས་སྐུ་ཐོབ་བོ། །གཞན་ཡང་སྔགས་པ་ནུས་ལྡན་གྱི་གདུང་ལ་ཡང་གོང་གི་རྟགས་རྣམས་འབྱུང་ཞིང་ཁྱད་པར་མེ་ལྕེ་མཐིང་གསལ་ཤར་དུ་འཕྲོ་བ་དང་། སེར་གསལ་ལྷོར་འཕྲོ་བ་དང་། དམར་གསལ་ནུབ་ཏུ་འཕྲོ་བ་དང་། ལྗང་གསལ་བྱང་དུ་འཕྲོ་བ་དང་། དུད་པ་ཡང་གོང་ལྟར་ཕྱོགས་བཞིར་འཕྲོ་བ་དང་། མེ་རྟག་གཡས་སུ་འཁྱིལ་ཞིང་འཕྲོ་བ་དང་། མེ་ལྕེ་ཕྱོགས་དེ་དག་ཏུ་ལུ་གུ་རྒྱུད་དུ་འཕྲོ་བ་འབྱུང་སྟེ། ཕྱོགས་གང་དུ་འཕྲོ་བའི་རིགས་ཀྱི་ཁྲོ་བོ་ཁྲོ་མོས་རྗེས་སུ་བཟུང་ནས་གྲོལ་བའི་རྟགས་སོ། །ཕལ་པའི་རོ་ཡིན་ན་མེ་ལྕེ་དཀར་པོ་ལྷམ་མེར་འབར་བ་དང་གཡས་སུ་འབར་བ་དང་། གྱེན་དུ་འབར་ཞིང་དྲི་མ་མེད་པའམ་དྲི་ཞིམ་པ་ཟླུམ་པོར་འབར་ཞིང་མི་འཕྲོ་བ་རྣམས་བྱུང་ན། ཆོ་ག་དང་སྦྱིན་སྲེག་ཀྱི་བྱིན་རླབས་ཀྱིས་ངན་སོང་ལས་ཐར་ནས་བདེ་འགྲོར་སྐྱེ་བའི་རྟགས་སོ། །དུད་པ་ཆེ་ཞིང་མི་གསལ་ན་སྒྲིབ་པ་ཆེ་བའི་རྟགས་སོ། །དེ་ལ་སྒྲིབ་སྦྱོང་ལ་འབད་པ་གལ་ཆེའོ། ༈ །རིམ་གྲོ་སོགས་ཀྱི་མེ་སྤྲ་ནི། མེ་
ལྕེ་རྩེ་གཅིག་པ་ཕྲ་ཞིང་ལྡེམ་པ་ཕུན་སུམ་ཚོགས་པའི་རྟགས་ཏེ་རབ་ཡིན་ནོ། །རྩེ་མོ་གཉིས་པོ་མཉམ་ཞིང་མི་གཡོ་ན་འབྲིང་པོ་ཡིན་ནོ། །མེ་ལྕེ་དཀར་པོའམ་སྔོན་པོ་སྣུམ་ཞིང་རྩེ་མོ་ཟླུམ་ལ་དུད་པ་མེད་ན་ནད་ཞི་ཞིང་རིགས་རྒྱུད་འཕེལ། དཀར་པོའམ་དཀར་སྔོན་ནམ་དམར་པོ་མདངས་བཟང་ན་ནད་སེལ་ཞིང་སྡིག་པ་དག་གོ །དཀར་ཞིང་འཇམ་སྟེ་ཤར་དུ་འཁྱིལ་ན་ཞི་བའི་ལས་ཐམས་ཅད་འགྲུབ་བོ། །སེར་པོ་མདངས་བཟང་ན་རྒྱལ་སྲིད་ཐོབ་བོ། །རྩེ་མོ་བཞི་མཉམ་པར་འབར་ན་རྒྱས་པའི་དངོས་གྲུབ་མི་འགྱུར་བརྟན་པོར་འགྲུབ་བོ། །དྲི་ཞིམ་པོར་བྲོ་ན་དགེ་ཞིང་ས་གཞིའི་བདག་པོར་འགྱུར་རོ། །སེར་ཞིང་གྲུ་བཞིར་འབར་བ་དང་སེར་ཞིང་ལྷོར་འཁྱིལ་ན་རྒྱས་པའི་ལས་ཐམས་ཅད་འགྲུབ་བོ། །དམར་པོ་ལྕགས་ཀྱུ་ལྟ་བུ་རང་ལ་འཁོར་ཞིང་འབར་བ་དང་དམར་པོ་ནུབ་ཏུ་འཁྱིལ་ན་དབང་གི་ལས་ཐམས་ཅད་འགྲུབ་བོ། །མེ་སྒྲ་རོལ་མོའི་སྒྲ་ལྟ་བུར་སྙན་པ་དང་མེ་མཐོང་ན་ཡིད་དགའ་བ་དང་བདེ་བ་སྐྱེ་བ་དང་། མེ་ལྕེར་བཀྲ་ཤིས་པའི་རྟགས་བརྒྱད་གང་རུང་དང་། ཁ་ཊཱི་རྔ་ཡབ་གཡུང་དྲུང་དགང་གཟར་བླུགས་སོགས་ཕྱག་མཚན་གྱི་རྣམ་པ་དང་། རྟ་དང་གླང་ཆེན་གྱི་དབྱིབས་དང་། སྒྲ་མེད་ཅིང་གཡས་སུ་འཁྱིལ་བ་རྣམས་བྱུང་ན་ཕྲིན་ལས་གང་བརྩམ་འགྲུབ་ཅིང་། དགེ་ཞིང་ཕུན་སུམ་ཚོགས་ལ་ཚེ་རིང་ཞིང་ནད་མེད་པར་འགྲུབ་བོ། །དྲག་པོའི་མེ་ནི་དམར་ནག་གྲུ་གསུམ་རྣོ་བར་འབར་ཞིང་ལིང་ག་དེ་མ་ཐག་ཚིག་ན་བཟང་། དྲག་པོའི་སྐབས་སུ་འཚག་པ་དང་། སྒྲ་མི་སྙན་པ་དང་། རོ་དྲི་སོགས་ངན་རྟགས་ཕལ་ཆེར་བཟང་།
འོན་ཀྱང་མེ་དང་དུད་པ་རང་ངོས་སུ་ཆད་ཅིང་བྱུང་ན་ངན། འོན་ཀྱང་རླུང་གི་བྱེད་ལས་སུ་འདུག་ན་རྐྱེན་མེད་མིན་ན་རང་གི་སྲུང་ཟློག་ལ་འབད་དོ། ༈ །ངན་པའི་ལྟས་ནི་གཡོ་ཞིང་མདུན་ཕྱོགས་སུ་འབར་བ་དང་། མང་དུ་འཚག་པ་དང་རྩེ་མོ་གསུམ་དུ་འབར་བ་དང་། འཁོར་ཞིང་མེ་སྟག་འཕྲོ་བ་དང་། མེ་ལྕེ་རྣམ་པར་འཕྲོ་བ་ནི་ཕུགས་སུ་གདོན་ཞུགས་ནས་ནད་འབྱུང་བའི་རྟགས་སོ། །མེ་ཡང་ཡང་རྩུབ་ཅིང་ཡང་ཡང་གཡོན་དུ་འཁོར་བ་དང་། ཡང་ཡང་ས་ལ་མེ་ལྕེ་རེག་པ་དང་ཐིག་ལེ་ནག་པོ་བྱུང་བ་རྣམས་མྱུར་དུ་རིགས་རྒྱུད་བརླག་པའི་ལྟས་སོ། །རྒྱལ་པོ་དང་སྡེ་དང་། སྡེ་བདག་བརླག་པར་འགྱུར་བའི་ལྟས་སོ། །མེ་ལྕེ་དུད་པའི་མདོག་ལྟར་ནག་པ་དང་མདོག་ལྗང་གུའམ་སྣ་ཚོགས་ལ་རྩུབ་པ་དང་།་མདོག་ངན་ན་དོན་གང་ཡིན་མི་འགྲུབ་པའི་ལྟས་སོ། །མི་རོའི་དྲི་དང་བོང་བུའི་དྲི་དང་ཉ་སོགས་ཆུ་གནས་སེམས་ཅན་གྱི་དྲི་བྲོ་ན་བགེགས་ཡོད་པས་གཙོ་བོ་གང་ཡིན་ལ་ངན། དུ་བ་འཁུ་ཞིང་རང་ཚིག་པ་ཟ་ན་བགེགས་ཆེན་པོ་ཡོད་པའི་ལྟས་སོ། །ཚིག་ཙིག་དང་འུར་ཧུར་འུར་ཧུར་དང་སིལ་སིལ་གྱིས་སྒྲ་མི་སྙན་པ་གྲག་ན་དོན་མི་འགྲུབ་པའི་ལྟས་སོ། །མེ་ལྕེ་མདུང་དང་རལ་གྲི་མདའ་དང་སྦྲུལ་རྔ་མོང་བ་ལང་མགོ་འདྲ་བའི་འཇིགས་པའི་གཟུགས་སུ་མཐོང་ན། ཡོན་བདག་གི་ཁྱིམ་དུ་རིམ་གྲོ་ལ་བརྩོན་པར་བྱའོ། །ད་རུང་རིམ་གྲོ་དགོས་སོ་སྨྲའོ། །མེ་ལྕེ་དུམ་བུར་ཆད་ན་གློ་བུར་དུ་ནད་འབྱུང་ངོ། །མེ་ལྕེ་ཡང་ཡང་དུ་འདར་ན་དགྲ་དང་རྐུན་མ་འོང་། མདངས་མེད་ཤིན་ཏུ་ནག་ན་ན་ཚ་དྲག་པོ་འབྱུང་
ངོ། །ངན་པའི་ལྟས་བྱུང་བ་ན། ཨོཾ་བཛྲ་ཡཀྵ་ཧཱུྃ། ཞེས་སོགས་ལས་བུམ་གང་ཡིན་གྱི་སྔགས་བཟླ་ཞིང་ལས་བུམ་གྱི་ཆུས་བསངས། ཡང་སྔར་ལྟར་མར་ཁུ་དགང་བླུགས་བདུན་ནམ་གསུམ་འབུལ། རོ་བསྲེག་ཡིན་ན་འདི་ནས་སློབ་དཔོན་གྱིས་དགང་བླུགས་བཟུང་བཞིན་པས་ དྲིལ་བུ ་འཁྲོལ། གྲྭ་སློབ་རྣམས་རོལ་མོ་དང་བཅས་སྤུར་ཁང་ལ་ལན་གསུམ་བསྐོར་ནས་དེ་ནས་ཐབ་ཀྱི་རྩར་སྡོད་མི་དགོས་པར་མཆོད་གཞི་སར་འདུག་ནས། བསྲེག་རྫས་མར་ཁུ་སྐྱོགས་དང་གཞན་རྣམས་གཞོང་པ་སོགས་སུ་བསོགས་ནས་མཆོད་གཡོག་པ་ཞིག་ལ་བསྐུར་བ་ཕྱག་ལེན་ནོ། །འདིར་རོ་བསྲེགས་ལ། ༈ མེ་ལྷའི་ཐུགས་ཀའི་འོད་ཟེར་གྱིས་ཚེ་འདས་བཀུག་ནས། དེའི་སྡིག་སྒྲིབ་དང་སྡུག་བསྔལ་ཐམས་ཅད་འོད་ཟེར་གྱིས་དྲངས་ནས་བསྲེག་རྫས་ལ་བསྟིམས་སྟེ་གསོལ་བར་གྱུར། གང་ཟག་བཟང་པོ་ཡིན་ན་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་བཀུག་ནས་བསྲེག་རྫས་ལ་བསྟིམ། གདུང་དང་དཀྱིལ་འཁོར་གྱི་ལྷ་ཚོགས་ལ་དབྱེར་མེད་དུ་འབུལ། ཕལ་པ་ལ་བསྲེག་རྫས་དང་ཤ་ཁྲག་དབྱེར་མེད་དཀྱིལ་འཁོར་གྱི་ལྷ་ཚོགས་ལ་མཆོད་པར་འབུལ་བའོ། །དེ་ཡང་བསྲེག་རྫས་ཐམས་ཅད་མཐེབ་སྲིན་ནམ་གུང་ཐེབ་ཀྱིས་འབུལ། ཡམ་ཤིང་བྱང་ཆུབ་ཀྱི་ཤིང་དུ་བསམ་ལ་རྩེ་མོ་སྟེང་དུ་བསྟན་ལ་འབུལ་ཞིང་། ཨོཾ་ཨཀྵེ་ཡེ་ས་པ་རི་ཝཱ་རའི་ཤམ་དུ་རྫ་ས་སྔགས་ཐམས་ཅད་སྦྱར་ནས་ལན་གསུམ་རེ་འབུལ། མེ་ལྷ་རྫོགས་ནས། ༈ ཡི་དམ་ཆྒེ་
གང་ཡིན་མེ་ལྷའི་ཐུགས་ཀར་བསྐྱེད་ཅིང་ཆོ་གའི་གཞུང་བཏང་ནས་ལྷ་སྔགས་ཤམ་དུ་རྫས་སྔགས་སྦྱར་ནས་བརྒྱའམ། ཉི་ཤུའམ། བཅུའམ། བདུན་རེ་ཙམ་འབུལ་ཞིང་། ཨོཾ་བོ་དྷི་བྷིཀྟ་ཡེ་སྭཱ་ཧཱ། རིམ་འགྲོ། ཡིན་ན་སྤེལ་ཚིག་ནི། བདག་ཅག་ཡོན་མཆོད་འཁོར་བཅས་ལ། ཡང་ན།་བདག་ཅག་མི་ནོར་འཁོར་བཅས་ལ། བར་དུ་གཅོད་པའི་རྨི་གང་ཡིན་མཐར་ལས་སྔགས་སྦྱར་བའོ།། ༈ རོ་བསྲེག་ཡིན་ན་ཞི་བར་གཤེགས་པའམ། ཚེ་ལས་འདས་པའི་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཞི་བ་ཡིན་ན། ཤཱནྟིཾ་ཀུ་རུ་སྭཱ་ཧཱ། རྒྱས་པ་ཡིན་ན། །པུཊྚི་ཀུ་རུ་ཨོ། དབང་ཡིན་ན། འགྲོ་བའི་གཟི་བརྗིད་ཕུན་སུམ་ཚོགས་པ་པ་ཤང་ཀུ་རུ་ཧོ༔ དྲག་པོ་ཡིན་ན། གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པའི་དགྲ་བགེགས་མཱ་ར་ཡ་ཕཊ༔ ཅེས་ཚིག་གིས་བསྒྱུར་སོ་རིག་པས་དཔག་སྟེ་གོ་མ་ལོག་པར་བྱ། མར་ཁུ་འབུལ་ཞིང་། ཨོ་ཨགེ་ཡེ་སྭཱ་ཧཱ། འབྱོར་པ་ཕུན་སུམ་ཚོགས་པ་ལ་བར་དུ༴ ཚེ་ལས་འདས་པ་སྐྱེ་བ་གཞན་དུ་འབྱོར་པ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཏིལ་ནག་ལ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། སྡིག་པ་དང་སྒྲིབ་པ་ཐམས་ཅད་རྒྱས་པ་དང་དབང་ལ་དགེ་བ་ཕུན་སུམ་ཚོགས་པ་
སོགས་སྦྱར། ཡུངས་ཀར་ལ། ཨོཾ་སརྦ་ཨརྦ་སིདྡྷི་ཡེ་སྭཱ་ཧཱ། བགེགས་མེད་པ་ཕུན་སུམ་ཚོགས་པའི་བར་དུ་གཅོད་པའི་སྡིག་སྒྲིབ༔ ཚེ་ལས་འདས་པའི་བར་དོའི་འཇིགས་སྐྲག་ཐམས་ཅད༔ ཟས་མཆོག་ནི་ཞོ་ཟན་ལ་ཟན་སྣ་ཚོགས་པ་བཏབ་པ་ཕྱེ་མའི་རིལ་བུ། ཨོཾ་སརྦ་སཾ་པཱ་དེ་སྭཱ་ཧཱ། བདེ་བ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ བར་དུ་གཅོད་པའི༔ ཡང་སྔགས་དེ་ཉིད་ཀྱིས་ཞོ་དང་འོ་མ་འབུལ་ཏེ། ཤེས་རབ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ༔ བར་དུ་གཅོད་པའི་སྡིག་སྒྲིབ་སོགས་སྦྱར་བར་བྱེད། དུརྦའི་མྱུ་གུའི་རྩ་བ་ཡང་རུང་བ་སྟེ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཚེ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ༔ ཚེ་ལས་འདས་པ་སྐྱེ་བ་གཞན་དུ་ཚེ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ནས་ལ། ཨོཾ་མ་ཧཱ་བེ་ག་ཡ་སྭ་ཧུ། ཤུགས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ ཚེ་ལས་འདས་པ་དག་པའི་ཞིང་ཁམས་བསྒྲོད་པ་ལ་མྱུར་བའི་ཤུགས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ གྲོ་ལ། ཨོཾ་བཛྲ་གྷསྨཱ་རེ་སྭཱ་ཧཱ། ནད་མེད་པ་ཕུན་སུམ་ཚོགས་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཟླ་སྐྱེ་བ་གཞན་དུ་ནད་མེད་པ༴ སོ་བ་ལ། ཨོཾ་བཛྲ་བི་ཛ་ཡེ་སྭཱ་ཧཱ།
ནོར་དང་འབྲུ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ༔ ཚེ་ལས་འདས་པ་སྐྱེ་བ་གཞན་དུ་ནོར་དང་འབྲུ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ༔ སྲན་མ་ལ་མ་ཤ་རྙེད་ན། རབ་མེད་ན་སྲན་མའི་རིགས་ཐམས་ཅད་གང་རྙེད་བྱེད་པར་འདུག་གོ །ཨོཾ་བཛྲ་མ་ཧཱ་བ་ལ་ཡེ་སྭཱ་ཧཱ། སྒོའི་སྟོབས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཚེ་ལས་འདས་པ་སྐྱེ་བ་གཞན་དུ་སྟོབས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ འབྲས་ལ། ཨོཾ་བཛྲ་པུཥྛ་ཡེ་སྭཱ་ཧཱ། བསོད་ནམས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་འ། དཔལ་འབྱོར་ཕུན་སུམ་ཚོགས་པ་ལ་བར་དུ་གཅོད་པའི༴ ཀུ་ཤ་ལ། ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། སྲུང་བ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༴ བིལ་བའམ་སྟར་སྒ་དང་ཛཱ་ཏི་ཕ་ལ་རྣམས་རིམ་བཞིན་ལན་གསུམ་རེ་ཕུལ། ཨོཾ་ཤྲཱི་ཝ་ཡེ་སྭ་ཧཱ། ཤིང་ཐོག་སྣ་ཚོགས་ལ། ཨོཾ་ཨ་ས་མ་དྷི་ཕ་ལ་ཡ་སྭཱ་ཧཱ། ཡང་ན། ཨོ་ཏི་པ་ན་ཡ་སྭཱ་ཧཱ། རིགས་རྒྱུད་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ དཀར་གསུམ་མངར་གསུམ་གང་འཛོམས་ལ། ཨོཾ་བཛྲ་མ་ལེ་པུཏྟ་ཡེ་སྭཱ་ཧཱ། ཤེས་རབ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་
ཐམས་ཅད༔ མེ་ཏོག་ཞི་བ་དཀར་པོ་ལས་དང་བསྟུན་ནོ། །ཨོཾ་བཛྲ་པུཎྜེ་སྭཱ་ཧཱ། ཁ་དོག་དང་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༴ དྲི་དང་སོ་རྩི་སྟེ་ཇ་སོགས་བཏུང་བའི་རིགས་ལ། ཨོཾ་བཛྲ་ཏཾ་བུ་ལ་ཡེ་སྭཱ་ཧཱ། བཀྲ་ཤིས་པ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༴ སྨན་སྣ་ཚོགས་ལ། ཨོཾ་ཨོ་ཥ་དྷི་སྭཱ་ཧཱ། ནད་མེད་པ་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ ནད་ཐམས་ཅད༔ དར་རས་གོས་སྣམ་དུམ་བུ་ལ། ཨོཾ་བཛྲ་ཝས་ཡེ་སྭཱ་ཧཱ། རྒྱུན་དང་གོས་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད༔ འདིར་མ་མཐུས་པའི་འབྲུའི་རིགས་བཟའ་བཏུང་སོགས་འབུལ་རྒྱུ་ཡོད་ན། ཨོཾ་ཨཱཿ ཧཱུྃ་གིས་འབུལ་ཞིང་ལས་བཞི་སོ་སོའི་འདོད་གསོལ་སྤྱི་འཚམ་པ་སྦྱར་རོ། །དེ་ཡང་སྡིག་པ་ཆེ་བ་ལ་ཏིལ་མང་དུ་འབུལ་ཞིང་གཞན་གང་འབྱོར། མེད་ཀྱང་རུང་། ཚེ་རིང་བ་ལ་དྭརླ་ལ་སོགས་འགྲེས་ཤེས་པར་བྱའོ། །མར་ཁུ་དང་ཡམ་ཤིང་ནི་ཐམས་ཅད་ལ་དགོས་སོ། །དེ་ནས་མེ་ལྷ་ལ་གསུམའམ་བདུན་རེ་ཕུལ་ཏེ། འཇིག་རྟེན་ཁམས་ནི་དཔག་མེད་ན། མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་ནི། །དྲང་སྲོང་མེ་ལྷའི་ཚོགས་ལ་འབུལ། །བཞེས་ནས། ཞི་བའི། རྒྱས་
པའི། དབང་གི །དྲག་པོའི། ལས་བཞིའི། ཕྲིན་ལས་མཛོད། ཞབས་བསིལ༴ མེ་ཏོག༴ བདུག་སྤོས༴ སྣང་གསལ༴ དྲི་ཆབ༴ ཞལ་ཟས༴ རོལ་མོ༴ ཨོཾ་ཨཀྵེ་ས་པཱ་རི་ཝ་ར་ཨགྷཾ། པཱཏྱཾ། པུཊྚེ། དྷ་ཝེ། ཨཱ་ལོ་ཀེ། གྷནྡྷེ། ནེ་ཝི་ཏྱ། ཤཐཱ། པྲ་ཏིཙྪ་ཡེ་སྭཱ་ཧཱ། ཞེས་མཆོད་པ་རྣམས་རིམ་བཞིན་དུ་འབུལ་ཞིང་མཚམས་འཛིན་ དྲིལ་བུ ་བསིལ། བདེ་མཆོག་དང་ཞི་ཁྲོ་སོགས་ལ་རོལ་མོ་འུར་རྡུང་སོགས་བྱིའོ། །བསྟོད་པ་ནི། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱཀྐིའི་དབང་བསྐུར་རོ། །ཤེས་རབ་མཆོག་གི་ཉོན་མོངས་ཐམས་ཅད་བསྲེགས། །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པ་ཙམ་མམ། སྤྲོ་ན། ཧཱུྃ།་ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་བ་ལ་ཡང་བསྐྱབ་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པའི། །རིག་སྔགས་གྲུབ་པའི་དྲང་སྲོང་མཆོག །ཕྲིན་ལས་བསྒྲུབ་པ་མངའ་བདག་ཆེ། །ཉོན་མོངས་བསྲེགས་པའི་ཤེས་རབ་འོད། །བསྐལ་པའི་མེ་ལྟར་གཟི་བརྗིད་ཆེ། །མངོན་ཤེས་རྫུ་འཕྲུལ་སྟོབས་དང་ལྡན། །ཐབ་ཀྱི་ཐེག་མཆོག་ར་སྐྱེས་
ཆིབས། །བགྲང་འཕྲེང་འཛིན་ཅིང་རིག་སྔགས་གསུང་། །བདུད་རྩིའི་བཅུད་དང་གྷནྡེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་སྐྱོན་བྲལ་བས་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་མཉེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞི་བའི། རྒྱས་པའི། དབང་གི །དྲག་པོའི། ལས་བཞིའི། ཕྲིན་ལས་བསྒྲུབ་པ་དང་། །དངོས་གྲུབ་མ་ལུས་སྩོལ་བར་མཛོད། །ཅེས་བསྟོད། དྲང་སྲོང་ཆེན་པོ་མེ་ལྷ་ཡི། །སྔོན་གྱི་དམ་བཅས་མནའ་དོར་བ། །ལྷ་རྣམས་ཞལ་ནས་མེ་ཡིན་ཏེ། །སྦྱིན་སྲེག་དེ་ནི་མེ་ལ་གནས། །མེ་ལྷ་ཁྱོད་ཉིད་མེ་འབར་བ་དང་གཉིས་སུ་མེད་པར་བཞུགས་པ་ལ་སྦྱིན་སྲེག་གི་མཆོད་པ་འདི་རྣམས། རྗེའི། ལྷ་ཚོགས་རྣམས་ཀྱི་ཞལ་དུ་སྟོབ་པའི་ཕྲིན་ལས་མཛོད་ཅིག །ཞི་རྒྱས་གཉིས་ལ་མེ་ལྷའི་ལྟོ་བའམ་ཐུགས་ཀར་ལྷ་བསྐྱེད། ཐུགས་ཀ་ནས་སྤྲུལ་པའི་མེ་ལྷ་ཡིད་ལས་བསྐྱེད་པ་རང་འདྲ་བ་ཞིག་བྱོན་ནས། ཡི་དམ་རྗེའི་དཀྱིལ་འཁོར་གྱི་ལྷ་ལ་མཆོད་པས་ཕྱག་ཚང་མཛད་པར་གྱུར། མེ་ལྷའི་ལྟོ་བ་ཡངས་ཤིང་རྒྱ་ཆེ་བར། ཞེས་ལྷ་བསྐྱེད། དབང་དྲག་གཉིས་ལ་སྔགས་དང་བཅས་པས་མར་ཁུ་དགང་བླུགས་གསུམ་ཕུལ་བས། མེ་
ལྷ་འཁོར་བཅས་འོད་དུ་ཞུ་ནས་འབར་བའི་རྣམ་པར་གྱུར། མེ་དཔུང་གི་དབུས་སུ། ཞེས་ལྷ་བསྐྱེད། དཀྱིལ་འཁོར་གང་ཡིན་ཡང་མདུན་བསྐྱེད་ཚང་བར་བསྐྱེད། སྤྱན་འདྲེན་བཞུགས་གསོལ། དབང་བསྐུར་རྒྱས་གདབ་ཀྱི་བར་བྱ་བ་འདྲ་ཞིང་། ཁྱད་པར་ཀུན་རིག་ལ་མི་འདྲ་བའི་ཁྱད་པར་ནི། མེ་ལྷའི་ལྟོ་བར་འཇིག་རྟེན་གསུམ་རྒྱལ་སྐུ་མདོག་སྔོན་པོ་དབུ་དང་ཕྱག་མཐའ་ཡས་པ་ཞེས་པ་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། དེའི་ཐུགས་ཀའི་དབུས་ཧཱུྃ་ལས་འོད་འཕྲོས་ཡེ་ཤེས་པ་སྤྱན་དྲངས། ཧཱུྃ། ཡེ་ཤེས་བསྐལ་པ་མེ་ལྟར་འབར་བའི་འོད། །ཅེས་པ་ནས། འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཨོཾ་བཛྲ་མ་ཧཱ་ཀྲོ་དྷ་རཱ་ཛ་ས་པཱ་རི་ཝཱ་ར་བཛྲ་ས་མཱ་ཛ༔ ཛཿཧཱུྃ་བཾ་ཧོ༔ པདྨ་ཀ་མ་ལཱ་ཡ་སྟྭཾ། ཨོཾ་བུདྡྷ་ཨ་བྷི་ཥིཉྩ་ཨོ་སོགས་བརྗོད། ཨོཾ་བཛྲ་ཀྲོ་དྷ་ཏྲེ་ལོཀྱ་བི་ཛ་ཡ་སྭཱ་ཧཱ། ཨབྷཾ་སོགས་དང་སྔགས་དེ་ཉིད་ཀྱིས་སྤེལ་ཚིག་དང་བཅས་པ་བསྲེག་རྫས་བདུན་ནམ་གསུམ་འབུལ། ཧཱུྃ། ཆོས་ཉིད་ཉིས་མེད་ངང་ཉིད་ལས། །ཞེས་པ་ནས། བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །ཅེས་བསྟོད་དོ། །བསྡུ་ན། ཁྲོ་བོ་སྲིན་པོའི་ཆ་ལུགས་ཅན། །ཁམས་
གསུམ་རྣམ་རྒྱལ་ཕྱག་འཚལ་བསྟོད། །ཅེས་པ་ནས་ཕྲིན་ལས་བཅོལ། སླར་ཡང་ཐུགས་ཀའི་འོད་ཟེར་གྱིས་འཕགས་པ་དཀོན་མཆོག་རིན་ཆེན་རྣམ་པ་གསུམ་སྤྱན་དྲངས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །སོགས་ནས། བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཛཧཱུྃ་བཾ་ཧོ༔ ཐབ་ཀྱི་ཤར་ཕྱོགས་སུ་པད་ཟླའི་གདན་ལ་བཞུགས་པར་གྱུར། པདྨ་ཀ་མ་ལཱ་ཡ་ཧཱུཾ། ན་མོ་རཏྣ་ཏྲ་ཡཱ་ཡ། བུདྡྷ་དྷརྨ་སཾ་གྷ་བྷྱོ་ཨབྷཾ་སོགས་དང་། བསྲེག་རྫས་གསུམ་མམ་བདུན་འབུལ། སྟོན་པ་བླ་མེད་སངས་རྒྱས་རིན་པོ་ཆེ།། སོགས་དང་། རྒྱས་པར་འདོན་ན། མགོན་པོ་ཐུགས་རྗེ་ཆེན་ལྡན་པ་ཞེས་པ་ནས། དགེ་འདུན་ལ་ཡང་ཕྱག་འཚལ་བསྟོད། །འཕགས་པ་དཀོན་མཆོག་གསུམ་གྱིས་ཚེ་ལས་འདས་པའི་སྡིག་སྒྲིབ་ཐམས་ཅད་དག་ནས་མྱུར་དུ་སངས་རྒྱས་པའི་ཕྲིན་ལས་མཛད་དུ་གསོལ། ཞེས་གསོལ་བ་བཏབ་པས་ཚེ་ལས་འདས་པའི་སྡིག་སྒྲིབ་ཐམས་ཅད་ཐུགས་ཀའི་འོད་ཟེར་གྱིས་བཀུག་ནས་མེ་ལ་ཐིམ་སྟེ་བསྲེགས་པར་གྱུར། འཇིག་རྟེན་གསུམ་ལས་རྣམ་པར་རྒྱལ་བའི་ལྟོ་བར་པཾ་ལས་པདྨ་སོགས་རྡོར་སེམས་བསྐྱེད། སེམས་དཔའི་སྐྱིལ་ཀྲུང་གིས་བཞུགས་པ། དེའི་
ཐུགས་ཀའི་ཧཱུྃ་ལས་འོད་འཕྲོས་རྡོ་རྗེ་སེམས་དཔའ་སྤྱན་དྲངས། ཨོཾ་བཛྲ་སཏྭ་ས་པ་རི་ཝཱ་ར་བཛྲ་ས་མཱ་ཛ༔ ཛཧཱུྃ་བཾ་ཧོ༔ བུདྡྷ་ཨ་བྷི་ཥིཉྩ་ཨོཾ། སོགས། ཨོ་བཛྲ་སཏྭ་ཧཱུྃ། ཨརྒྷཾ་སོགས་དང་བསྲེག་རྫས་བདུན་ནམ་གསུམ་འབུལ། རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་ཕྱག་ན་རྡོ་རྗེ་ལའོ། །རྡོ་རྗེ་ཁུ་ཚུར་གཉིས་ཀྱིས་མཛུབ་མོ་དང་ཐེའུ་ཆུང་གཉིས་མདུད་དེ་བཀན་པ་གཡས་སུ་བསྐོར་ཞིང་། ཨོཾ་སརྦ་བིད་མཎྜལ་བཛྲ་ཙཀྲ་ཧཱུཾ། རྡོ་རྗེ་སེམས་དཔའི་ལྟོ་བར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཀྱི་ཁང་པ། ཞེས་པ་ནས་ལྷ་བསྐྱེད་སྤྱན་འདྲེན་དབང་བསྐུར་རྒྱས་འདེབས་ཀྱི་བར་མདུན་བསྐྱེད་ལྟར་བྱའོ། །རྙིང་མའི་རིགས་ལ་ཕྱི་མཆོད་ནས་བཟུང་སྟེ་ནང་མཆོད་གསང་མཆོད་ཡིན་ལས་ལ་བྱང་ལྟར་བྱ། ཀུན་རིག་ལ་སོགས་ལ། །རབ་འབྱམས་རྒྱ་མཚོ་དཔག་མེད་ན། །སོགས་ཀྱིས་མཆོད་པ་སྣ་བདུན་མར་མེ་ལྷ་བཤོས་སོགས་འབུལ་བ་གསར་མ་སྤྱི་ཐམས་ཅད་ལ་འདྲ་ཞིང་། བདེ་མཆོག་ཕག་མོ་རྒྱལ་བ་རྒྱ་མཚོ་སོགས་ལ་ཡང་། རྒྱལ་བའི་སྐུ་ལ་ཉོན་མོངས་མི་མངའ་ཡང་། །སོགས་རང་གཞུང་གི་ཚིགས་བཅད་ཀྱིས་འབུལ། ལྷ་ཐམས་ཅད་ལས་དང་མཐུན་པའི་ཁ་དོག་གམ། ལས་དང་མཐུན་པའི་འོད་ཟེར་འཕྲོ་བས་ལས་གང་ཡིན་
འགྲུབ་པར། ཀུན་རིག་ལ་འདིར་མཉམ་མེད་མས་བསྟོད་ཀྱང་རུང་མ་བྱས་ཀྱང་ཆོག །དེ་ནས་འདིར་ཞི་ཁྲོ་ཡིན་ན་ཕུང་པོ་ཡོན་འབུལ་འདོན། རྒྱལ་བ་རྒྱ་མཚོ་ལ། ཆོས་སྐུ་དྲི་མེད་རྡོ་རྗེ་འཆང་ཞེས་སོགས་འདོན། ཀུན་རིག་ལ་ཕྲིན་ལས་བཅོལ་བ་གཞུང་ལྟར་བྱ། སྤྲོ་ན། བཅོམ་ལྡན་རྒྱལ་བ་རིགས་ལྔ་ལ། །ཚེ་འདས་ཕུང་ལྔའི་མཆོད་པ་འབུལ། །ཕུང་པོའི་སྒྲིབ་པ་མ་ལུས་པ། །།ཡེ་ཤེས་མེ་ཡིས་སྦྱང་དུ་གསོལ། །སྤྱན་མ་ལ་སོགས་ཡུམ་བཞི་ལ། །ཚེ་འདས་འབྱུང་བཞི་མཆོད་པ་འབུལ། །འབྱུང་བཞིའི་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །རྡོར་སེམས་ལ་སོགས་སེམས་དཔའ་ལ། །ཚེ་འདས་དབང་ལྔ་མཆོད་པ་འབུལ། །དབང་པོའི་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །སྒེག་སོགས་ལྷ་མོ་བརྒྱད་རྣམས་ལ། །ཚེ་འདས་ཡུལ་དྲུག་མཆོད་པ་འབུལ། །ཡུལ་དྲུག་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །སྒོ་མ་ཁྲོ་ཆེན་ཚོགས་རྣམས་ལ། །ཚེ་འདས་ཡན་ལག་མཆོད་པ་འབུལ། །ཡན་ལག་སྒྲིབ་པ་མ་ལུས་པ། །ཡེ་ཤེས་མེ་ཡིས་སྦྱང་དུ་གསོལ། །ཞེས་གསོལ་བ་བཏབ་པས་ལྷ་རྣམས་ཀྱི་ཐུགས་ཀ་ནས་ཞེས་སོགས་ནས། དེ་ཉིད་ལ་ཐིམ་པར་གྱུར།
ཞེས་ཕྲིན་ལས་སྒྲུབ་པར་ཞལ་གྱིས་བཞེས་པར་བསམ། འདིའི་མཚམས་ཐམས་ཅད་དུ། ཨརྒྱུ་སོགས་འབུལ་བ་འགྲེས་གཙོ་བོ་ལ་རྩ་རིག་གམ། ཨོཾ་སརྦ་བིད་སརྦ་ཨ་ཝ་ར་ཎ་བི་ཤུ་དྡྷ་ཡ་ཧ་ན་ཧཱུྃ་ཕཊ། ཅེས་པ་ལ་གོང་གི་རྫས་སྔགས་སྤེལ་ཚིག་དང་བཅས་པ་བརྒྱ་རྩ་འབུལ། ཆོས་དབྱིངས་ཡེ་ཤེས་རྣམ་པར་དག །སོགས་ཤོ་ལོ་ཀས་བསྟོད། དེ་ནས་མགོའི་མཚམས་སུ་རྩ་རིག་བརྗོད། བླ་མ་དམ་པའི་གདུང་ལ་མཚམས་འདི་དག་ཏུ་རྩ་རིག་བརྗོད་བཞིན་རོལ་ཆེན་སྣ་ཚོགས་དང་བཅས་གདུང་ཁང་ལ་བསྐོར་བ་གསུམ་གསུམ་གཉིས་གཉིས་བྱ་སྟེ། སློབ་དཔོན་གྱིས་དགང་བླུགས་བཟུང་བཞིན་པས། དེ་ནས་རིགས་བཞི་ལ་ཉེར་གཅིག་འབུལ། མེ་ལོང་ཡེ་ཤེས་རང་བཞིན་ལས། །ནས། མེ་ཏོག་ཆེར་རྒྱས་ཁྱོད་ཕྱག་འཚལ། །ཡུམ་བཞི་ལ་བདུན་རེ། གྲྭ་ཡི་ཕྱོགས་ནས་ཀུན་ཏུ་ཡང་། །སོགས་བསྟོད། སེམས་དཔའ་བཅུ་དྲུག་ལ་བདུན་རེ་འབུལ། རྩིབས་ཀྱི་ནང་ནས་ཐམས་ཅད་ལ། །སོགས་བསྟོད། སྒེག་སོགས་བརྒྱད་ལ་བདུན་རེ་འབུལ། །སྒེག་མོ་ཕྲེང་བ་གླུ་གར་མ། །སོགས་བསྟོད། སྒོ་མ་བཞི་ལ་གསུམ་རེ་འབུལ། སྒོ་ཡི་དབུས་ན་བཞུགས་པ་གང་། །ཞེས་བསྟོད། བྱང་སེམས་བཅུ་དྲུག་ལ་གསུམ་རེ་འབུལ། སྒོ་ཡི་ཁྱམས་ན་བཞུགས་པ་ཡི། །སོགས། དཔེ་བྲལ་ལ་གསུམ་རེ་འབུལ། ཏ་ར་ཎ་ཡི་བར་ཁྱམས་ན། །སོགས་དང་། ཉན་ཐོས་
བཅུ་དྲུག་ལ་གསུམ་རེ་འབུལ། སྟོན་པའི་རྟགས་འཆང་ཉན་ཐོས་མཆོག །སོགས་དང་། རང་རྒྱལ་བཅུ་གཉིས་ལ་གསུམ་རེ་འབུལ། རྟེན་འབྲེལ་དོན་ལ་བརྟེན་གནས་པའི། །སོགས། ཁྲོ་བོ་བརྒྱད་ལ་གསུམ་རེ་འབུལ། ཁྲོ་བོ་སྲིན་པོའི་ཆ་ལུགས་ཅན། །སོགས་བསྟོད། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ། སོགས་ཕྲིན་ལས་བཅོལ་བ་གཞུང་ལྟར་བྱའོ། །རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས། ཕྱག་ན་རྡོ་རྗེ་ཁམས་གསུམ་རྣམ་རྒྱལ་ཞལ་གཅིག་ཕྱག་བཞི་དང་པོ་གཉིས་ཧཱུྃ་མཛད་ཀྱི་ཕྱག་རྒྱས་རྡོར་དྲིལ་འཛིན་པ། ཐ་མ་གཉིས་པདྨ་དམར་པོ་ཞགས་པ་དང་བཅས་པའི་སྡིགས་མཛུབ་ཅན། ཁྲོ་བོའི་རྒྱན་ཐམས་ཅད་དང་ལྡན་པ་སྤྱན་དྲངས་ཏེ། བཅོམ་ལྡན་འདས་ཀུན་རིག་གི་སྤྱན་སྔར་བཞུགས་པར་གྱུར། ཨོ་བཛྲ་སཏཱ་ཀྲོ་དྷ་ཨ་ན་ལརྐ་སོགས་ནས། པྲ་ཎ་ཎ་ཧཱུཾ་ཕཊ། ཨརྒྱུ་སོགས་བསྲེག་རྫས་བརྒྱ་རྩའམ་ཉེར་གཅིག་འབུལ། ཧཱུྃ། ཆོས་ཉིད་སྟོང་པ་གཉིས་མེད་ངང་ཉིད་ལས། །སོགས་ནས། ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད། །འདིར་བར་ཆད་ཞི་བའི་ཆེད་དུ། གུར་དྲག་གམ། ཕག་མོ། ཁྲོས་མ་སོགས་ཡི་དམ་དང་། བེར་ཕྱག་བཞི་ཕྱག་དྲུག་ལྷ་མོ་སོགས། དཀྱིལ་འཁོར་གྱི་ཕྱིའི་ཁྱམས་སུ་
བསྐྱེད་པའམ་སྐད་ཅིག་སྤྱན་དྲངས་ནས་བཞུགས་པར་བསམ་ལ་སྤྱན་འདྲེན་མན་ཆོད་བསྡུས་པ་གཅིག་བྱས་ལ། བསྲེག་རྫས་བདུན་ནམ་ཉེར་གཅིག་འབུལ་ལ། གཤིན་པོའི་གནས་བདེ་བ་དང་གསོན་པོ་བཀྲ་ཤིས་པའི་ཕྲིན་ལས་བཅོལ་བསྟོད་བྱའོ། །ཆོས་སྐྱོང་འདི་ལ་སྦྱར་ཡང་ཆོག །འཇིག་རྟེན་པ་ལ་རྩ་རིག་གིས། ཨརྒྷཾ་སོགས་དང་བསྲེག་རྫས་བདུན་འབུལ། ཕྱིའི་འཁོར་ཡུག་ལ་གནས་པའི། སོགས་ཀྱིས་བསྟོད། སླར་ཡང་། །སྙེདཔག་མེད་བསོད་ནམས་སྟོབས་ལས་བྱུང་བ་ཡི། །ཞེས་སོགས་མཆོད་པ་རྒྱས་པ་དང་། མཉམ་མེད་མི་གཡོ་སོགས་དང་། སངས་རྒྱས་ཀུན་བས་སྔར་སངས་རྒྱས། །ཞེས་སོགས་བསྟོད་པ་རྒྱས་པར་བྱའོ། །དེ་ནས་མེ་ལྷ་ཡེ་ཤེས་པའི་གཏོར་མ་སྔོན་འགྲོ་ལྟར་བྱིན་གྱིས་བརླབས་ནས་རྩ་རིག་ལ། ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ལན་གསུམ་བཏགས་པས་འབུལ་ནས། བཅོམ་ལྡན་འཁོར་དང་བཅས་རྣམས་ཀྱིས། །སོགས་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་མཆོད་གཡོག་པས་གཏོར་མའི་ཕུད་ཐབ་ཏུ་འབུལ། དེ་ནས་ཆ་གསུམ་བཏང་བ་ཐབ་ཏུ་མི་འབུལ། དེ་ནས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་ཚེ་ལས་འདས་པ་རྡོ་རྗེ་སེམས་དཔའ་སོགས་ནས། སེམས་དཔའི་སྐྱིལ་ཀྲུང་གིས་བཞུགས་པར་གྱུར། དེ་ལ་ཐབ་ཀྱི་ལྷ་ཐམས་ཅད་ཀྱིས་འོད་ཟེར་ཆེན་
པོས་དབང་བསྐུར་བར་གྱུར་པ་ནི། ཨོཾ་བུདྡྷ་ཨ་བྷི་ཥིཉྩ་ཨོ། ཞེས་ནས། ཀརྨ་ཨ་བྷི་ཥིཉྩ་ཨཱཿ དེ་ལྟར་དབང་བསྐུར་བས་ཚེ་ལས་འདས་པ་ལྷ་རྣམས་དང་སྐལ་བ་མཉམ་པར་གྱུར། །ཟས་བསྔོ་ལམ་བསྟན་གཞུང་ལྟར་བྱ། ཨོཾ་སརྦ་བུདྡྷ་ཨཀྵེ་ཏྲ་གཙུན་སྭཱ་ཧཱ། དེ་ཡན་ཆད་ཀུན་རིག་ཐུན་མོང་མ་ཡིན་པ་རྣམས་སོ། །འདི་ནི་ཀུན་རིག་གི་ཕྱག་ལེན་རྒྱས་པ་ཡིན་ལ། གཞན་གོང་བཞིན་ལ་བསྟོད་པ་མི་བསྲེ་བར་མཇུག་ཏུ་བྱེད་ཅིང་བར་བར་དུ་མཆོད་པ་སྣ་བདུན་འབུལ་བ་མི་བྱེད་པ་ནི་འབྲིང་པོ་ཡིན། གཙོ་བོ་ཐམས་ཅད་ལ་རྩ་རིག་ཁོ་ནས་འབུལ་ཞིང་རྫས་ཐམས་ཅད་བསྲེས་ནས་ལས་སྔགས། ཨོཾ་སརྦ་པཱ་པཾ་སོགས་ཁོ་ནས་འབུལ་བས་ཆོག་པ་ཤིན་ཏུ་བསྡུས་པ་སྟེ། དགེ་བའི་བཤེས་གཉེན་སྤྲོ་ལུང་པའི་ལུགས་སོ། །དེ་བྱེད་མཁན་ཉུང་ཞིང་རྒྱས་པ་དེ་ཁོ་ན་ལེགས་སོ།། ༈ དེ་ལས་གཞན་པའི་དཀྱིལ་འཁོར་ཐམས་ཅད་ལ་ཡང་ལྷ་གཙོ་བོ་དང་འཁོར་གྱི་སྔགས་དང་བསྟོད་པ་སོ་སོར་ཡོད་པ་ཐམས་ཅད་ལ་ཀུན་རིག་ལྟར་བྱའོ། །ཕག་མོ་ལྟ་བུར་གཙོ་འཁོར་ཕྱོགས་གཅིག་ཏུ་ཕུལ་ནས་མཆོད་བསྟོད་གཞུང་ལྟར་བྱའོ། །ལས་བཞིའི་སྦྱིན་སྲེག་སོ་སོ་དུས་རྫས་ཚན་པ་རེ་རེ་གཙོ་བོ་ལ་རྫོགས་པའི་མཚམས་དང་འཁོར་རྣམས་ལ་ཚང་བ་རེ་རེ་སོང་བའི་སྐབས་སུ་དབྱངས་དང་བཅས་པས། ཞི་བ་ལ། ནད་གདོན་སྡིག་སྒྲིབ་བག་ཆགས་ངན། །སྡང་དགྲ་གནོད་བྱེད་གདུག་པའི་དབལ། རྣོ་བའི་མཚོན་དང་སྦྱོར་བའི་དུག །
སྟོང་ཕྲག་བརྒྱད་ཅུའི་བགེགས་ཀུན་དང་། །བཞི་བརྒྱ་རྩ་བཞིའི་ནད་རྣམས་དང་། །རྨིས་ལྟས་མཚན་ངན་ཐམས་ཅད་ཀུན། །མྱུར་བ་ཉིད་དུ་ཞི་གྱུར་ཅིག །ཨོ་ཤཱནྟི་ཀུ་རུ་ཡེ་སྭཱ་ཧཱ། རྒྱས་པ་ལ། ཚེ་དང་བསོད་ནམས་སྙན་གྲགས་སྟོབས། །འཁོར་དང་བུ་སློབ་ཕྲིན་ལས་རྒྱུས། །མངའ་ཐང་ལོངས་སྤྱོད་ཡོན་ཏན་ཀུན། །མྱུར་བ་ཉིད་དུ་རྒྱས་གྱུར་ཅིག །ཧཱུཾ་པུཎྚི་ཀུ་རུ་ཡེ་སྭཱ་ཧཱ། དབང་ལ། རྒྱལ་བའི་ཐུགས་རྗེའི་བྱིན་རླབས་དང་། །འགྲོ་བའི་སྟོབས་དང་དཔལ་འབྱོར་བཅས། །སྐྱེ་འགྲོ་མཐོང་ཐོས་དྲན་རེག་སོགས། །ཁམས་གསུམ་དབང་དུ་འདུས་གྱུར་ཅིག །ཧཱིཔཱ་ཤཾ་ཀུ་རུ་ཡེ་སྭཱ་ཧཱ། དྲག་པོ་ལ། བདག་ཅག་རྣམས་ལ་གནོད་པའི་བགེགས། །དམ་སྲི་འབྱུང་པོ་མ་རུངས་པ། །བསྟན་དགྲ་སྒོས་དགྲ་ལ་སོགས་པའི། །ཞིང་བཅུ་ལྡན་རྣམས་བརླག་གྱུར་ཅིག །ཧཱུཾ་མཱ་ར་ཡ་ཕཊ༔ དྲག་པོ་ལ་ལིང་ག་འབུལ་དུས་མགོར་རྙིང་མ་ལ་བསྒྲིལ་མཆོད་ཚིག་གིས་འབུལ། སྨན་རཀ་གི་ཚིག་གིས་སྨན་རཀ་ཡང་ཅི་རིགས་འབུལ། མེ་ལྷ་ཆོས་སྐྱོང་གི་སྦྱིན་སྲེག་དྲག་པོ་ལ་འདིར་བསྐུལ་པ་འདོན་ལ་ཐབ་ཏུ་འབུལ་ཏེ་ལྷག་མ་མི་བཞག །ཡེ་ཤེས་ཀྱི་གཏོར་མ་བྱིན་རླབས་ལྟར་འབུལ་བའི་ཚིགས་བཅད་ཡོད་དམ་མེད་ཀྱང་གཞུང་ལྟར་འབུལ་
ཏེ། ཡོན་བདག་གིས་ཐབ་ཀྱི་གཡོན་དུ་བཟུང་ནས་བཏེག་སྟེ། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པའི་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་རྗེས་ཟློས་བཅུག །གཏོར་མའི་ཕུད་ཅུང་ཟད་ཐབ་ཏུ་འབུལ། དེ་ནས་རིམ་གྲོ་དང་དྲག་པོའི་སྦྱིན་སྲེག་ལ། སྦང་མ་སླ་ངར་བརྔོས་ནས་ཞིབ་ཏུ་བཏགས་པའམ་ཤིང་རུལ་དང་ལྕི་བ་དམར་གསུ་སླ་ངར་བསྲེགས་ནས་ཁམ་ཕ་ལེ་བྱ་བའམ། ནས་དང་གྲོ་ཤིན་ཏུ་ཆོག་པའི་ཕྱེ་ཞིབ་ལ་རུང་གསུངས། དྲག་སྔགས་ཀྱིས་ཅུང་ཟད་སྔགས་ལ་རང་རྒྱུ་ལྡོག་
དང་མཐུན་པར་ཁ་རྒྱུ་ནས་མེ་ཞགས་འཕེན་པ་ནི། སྦྱིན་བདག་རྣམས་གོས་ཀྱི་ཕྱི་ལོགས་སུ་སྤུ་མེད་པས་མདུན་གཡོགས་ཏེ་འཁོད་ནས། ད་ཡེ་ཤེས་མེ་ལྷའི་ཐུགས་ཀ་ནས་ཡེ་ཤེས་ཀྱི་མེ་རི་དང་མེ་དཔུང་མེ་ཡི་ཁྲོ་བོ་དང་ཁྲོ་མོ་མེ་དཔུང་གི་རྟ་ལ་ཞོན་པ་རྣམས་འཕྲོས་ནས་གནོད་བྱེད་ཐམས་ཅད་མཐའི་རྒྱ་མཚོའི་ཕ་རོལ་དུ་བསྐད། ནད་དང་གནོད་པ་སྡིག་སྒྲིབ་ཐམས་ཅད་གཞོབ་ཐུལ་གྱིས་སྲེག་པའི་མོས་པ་མཛོད་ཅིག །ཅེས་བརྡ་སྦྱར་ནས། ཧཱུྃ། དབུས་ཕྱོགས་དེ་བཞིན་རིགས་ཀྱི་དུར་ཁྲོད་ནས། །ཆོས་དབྱིངས་ཡེ་ཤེས་མེ་དཔུང་འབར་བ་འདི། །ལན་གཅིག་སྟེང་གི་ཕྱོགས་སུ་འཕྲོས། །མེ་ལྕེ་མཐིང་གས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུགས། །ཡང་སྤྲུལ་ཚྭ་ཚྭ་སྐར་ལྟར་འཁྲུགས།དྲག་པོ་ཐོད་ཕྲེང་། སངས་རྒྱས་འགྲོའི། ཁྲོས་མ་ནག་མོའི། བུདྡྷ་ཐོད་ཕྲེང་། ཆེ་མཆོག་ཧེ་རུ་ཀ །དཔལ་ལྡན་མགོན་པོའི། དཔལ་ལྡན་ལྷ་མོའི། སོགས་སྐབས་སུ་གང་བབ་སྦྱར་རོ། །ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་ནས། །ས་འོག་ལྟོ་འཕྱེ་ཡན་ཆད་དུ། །ཕྲིན་ལས་ཕུན་སུམ་ཚོགས་པའི་ལས་མཛོད་ཅིག །འདོད་པའི་དོན་རྣམས་བསྐང་གྱུར་
ཅིག །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཧཱུྃ། ཤར་ཕྱོགས་རྡོ་རྗེ་རིགས་ཀྱི་དུར་ཁྲོད་ནས། །མེ་ལོང་ཡེ་ཤེས་མེ་དཔུང་འབར་བ་འདི། །ལན་གཅིག་ཤར་གྱི་ཕྱོགས་སུ་འཕྲོས། །མེ་ལྕེ་དཀར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུགས། །ཡང་སྤྲུལ་ཚྭ་ཚྭ་སྐར་ལྟར་འཁྲུགས། རྡོ་རྗེ་དྲག་པོ། རྡོ་རྗེ་མཁའ་འགྲོ། བདེ་ཆེན་དཀར་མོ། བཛྲ་ཐོད་ཕྲེང་། བཛྲ་ཧེ་རུ་ཀའི། སྐུ་མགོན་དཀར་པོ། མ་མོ་དཀར་མོའི། ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་ནས། །ས་འོག་ལྟོ་འཕྱེ་ཡན་ཆད་དུ། །ནད་གདོན་སྡིག་སྒྲིབ་ཞི་བའི་ཕྲིན་ལས་མཛོད། །རྣལ་འབྱོར་བདག་ལ་དངོས་གྲུབ་བསྩལ་དུ་གསོལ། །ཧཱུྃ། ལྷོ་ཕྱོགས་རིན་ཆེན་རིགས་ཀྱི་དུར་ཁྲོད་ནས། །མཉམ་ཉིད་ཡེ་ཤེས་མེ་དཔུང་འབར་བ་འདི། །ལན་གཅིག་ལྷོ་ཡི་ཕྱོགས་སུ་འཕྲོས། །མེ་ལྕེ་སེར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུགས། །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །རཏྣ་དྲག་པོ། རིན་ཆེན་མཁའ་འགྲོ། སེར་མོ་དོན་འགྲུབ། རཏྣ་ཐོད་ཕྲེང་། རཏྣ་ཧེ་རུ་
ཀ །ཡོན་ཏན་མགོན་པོའི། མ་མོ་སེར་མོའི། ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་ནས། །ས་འོག་ལྟོ་འཕྱེ་ཡན་ཆད་དུ། །ཚེ་དང་བསོད་ནམས་རྒྱས་པའི་ཕྲིན་ལས་མཛོད། །རྣལ་འབྱོར་བདག་ལ་དངོས་གྲུབ་བསྩལ་དུ་གསོལ། །ཧཱུྃ། ནུབ་ཕྱོགས་པདྨ་རིགས་ཀྱི་དུར་ཁྲོད་ནས། །ཀུན་རྟོག་ཡེ་ཤེས་མེ་དཔུང་འབར་བ་འདི། །ལན་གཅིག་ནུབ་ཀྱི་ཕྱོགས་སུ་འཕྲོས། །མེ་ལྕེ་དམར་པོས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུགས། །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །པདྨ་དྲག་པོ། པདྨ་མཁའ་འགྲོའི། དམར་མོ་སྒྲ་སྒྲོགས། པདྨ་ཐོད་ཕྲེང་། པདྨ་ཧེ་རུ་ཀའི། པདྨ་དབང་ཆེན། གསུང་མགོན་དམར་པོའི། མ་མོ་དམར་མོའི། ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་ནས། །ས་འོག་ལྟོ་འཕྱེ་ཡན་ཆད་དུ། །ཐམས་ཅད་དབང་དུ་འདུས་པའི་ཕྲིན་ལས་མཛོད། །རྣལ་འབྱོར་བདག་ལ་དངོས་གྲུབ་བསྩལ་དུ་གསོལ། །ཧཱུྃ། བྱང་ཕྱོགས་ལས་ཀྱི་རིགས་ཀྱི་དུར་ཁྲོད་ནས། བྱ་གྲུབ་ཡེ་ཤེས་མེ་དཔུང་འབར་བ་འདི། །ལན་གཅིག་བྱང་གི་ཕྱོགས་སུ་འཕྲོས། །མེ་
ལྕེ་ལྗང་ཁུས་སྟོང་གསུམ་གང་། །ཡེ་ཤེས་མེ་སྒྲ་འབྲུག་ལྟར་ལྡིར། །སྤྲུལ་པའི་མེ་ལྕེ་གློག་ལྟར་འཁྱུགས། །ཡང་སྤྲུལ་ཚྭ་ཚྭ་སྐར་ལྟར་འཁྲུགས། །ཀརྨ་དྲག་པོའི། ཀརྨ་མཁའ་འགྲོ། །སྣ་ཚོགས་མཐར་ཕྱིན། ཀརྨ་ཐོད་ཕྲེང་། ཀརྨ་ཧེ་རུ་ཀ །ཀརྨ་རྟ་མགྲིན། ལས་ཀྱི་མགོན་པོ། མ་མོ་ལྗང་མོའི། །ཚོགས་ཀྱང་དེ་འདྲ་སྟེ། །ཚངས་པའི་འཇིག་རྟེན་མན་ཆད་ནས། །ས་འོག་ལྷོ་འཕྱེ་ཡན་ཆད་དུ། །དྲེགས་པ་དགྲ་བགེགས་བསྒྲལ་བའི་ཕྲིན་ལས་མཛོད། །རྣལ་འབྱོར་བདག་ལ་དངོས་གྲུབ་བསྩལ་དུ་གསོལ། །ཅེས་དྲག་སྔགས་བརྗོད་ཅིང་མེ་ཞགས་འཕང་ལ། སླ་ང་ཡུ་བ་ཅན་ལ་མེ་བླུགས་ནས། ཁྱིམ་ཀུན་ཏུ་ཁྱེར་ལ་མེ་ཞགས་ཀྱིས་བགེགས་བསྐྲད། སླར་མེ་དེ་ཐབ་ཁུང་དུ་བླུག །དེ་ནས་རྗེས་ཆོག་གཏང་རག་གི་མཆོད་པ་ནི། ལྷ་གཙོ་འཁོར་སྤྱི་དྲིལ་ལ་བསྲེག་རྫས་གསུམ་མམ་བདུན་སོགས་འབུལ། རྒྱས་པར་མཆོད་པ་སྣ་བདུན་རྒྱས་པའམ། ཨབྷཾ་སོགས་ནས། ཤབྡའི་བར། བསྟོད་པ་ཉུང་བ་གཅིག་གིས་བསྟོད། བཟོད་གསོལ། གཤེགས་གསོལ་གཞུང་ལྟར་བྱའོ། །ཀུན་རིག་ལ། ཡང་དཀྱིལ་འཁོར་དང་། རྡོར་སེམས་ཁྲོ་བོ་ཁམས་གསུམ་རྣམ་རྒྱལ་དཀོན་མཆོག་གསུམ་རྣམས་སོགས། ཡེ་ཤེས་པ་ཐམས་ཅད་དུས་གཅིག་ལ་གཤེགས། རྒྱས་འདེབས་བྱས་པ་ཡིན་ན་གནད་བཀྲོལ་བར་བྱའོ། །དེ་ནས་མེ་ལྷའི་གཏོར་མ་མར་ཁུས་བྲན་ལ་ཐབ་ཀྱི་གཡོན་དུ་སྦྱིན་
བདག་གིས་བཏེག་ལ། དཀྱིལ་འཁོར་སོ་སོའི་གཏོར་མ་བྱིན་རླབས་སམ། ཨོཾ་ཨ་ཀཱ་རོ་སོགས་བྱིན་གྱིས་བརླབས། ཨོཾ་ཨཀྵེ་ཡེ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁཱ་ཧི་ཁཱ་ཧི། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོའི་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱུས་ལ་སོགས་པའི་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་འདོད་དོན་ཡོན་བདག་གིས་རྗེས་ཟློས་བྱའོ། །དེ་ནས་མེ་ལྷ་ལ་
བསྲེག་རྫས་ལྷག་མ་ཐམས་ཅད་གྲངས་ངེས་པ་མེད་པར་འབུལ་ནས། རོ་བསྲེགས་དང་དྲག་པོ་ལ་སྣོད་སྒྲུབ་ནས་བཞག །ཨཀྵེ་ཡེ་ཨགྷཾ་སོགས་ནས་དང་། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཌཱཀྐིའི་དབང་བསྐུར་བས། །ཤེས་རབ་མཆོག་གིས་ཉོན་མོངས་ཐམས་ཅད་བསྲེགས། །འཛིན་བྱེད་མེ་ལྷ་ཉིད་ལ་རྣམ་པར་འདུད། །བཟོད་གསོལ་ནི། །ཨོ་མ་འབྱོར་པ་དང་ཉམས་པ་དང་། །ནས། དེ་ཀུན་དྲང་སྲོང་བཟོད་པར་གསོལ། །ཡིག་བརྒྱ་བཟླ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ནི་བསྒྲུབས་ཀྱིས་གཤེགས། །ཇི་བཞིན་དུས་སུ་སླར་བྱོན་ཏེ། །བདག་གིས་དངོས་གྲུབ་ཐམས་ཅད་སྒྲུབས། །ཨོ་ཨཀྵེ་ཡེ་ས་པཱ་རི་ཝཱ་ར་བཛྲ་མུཿ མེ་ལྷ་ཡེ་ཤེས་པ་ཤར་ལྷོའི་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར། སྤྱན་དྲངས་བའི་ཕྱག་རྒྱ་ལས་མཐེ་བོང་གིས་ཕྱིར་བསྐྱེད་དོ། །དེ་ནས་དཀྱིལ་འཁོར་གང་ཡིན་པའི་བཀྲ་ཤིས་བརྗོད་བསྔོ་བ་སྨོན་ལམ་བྱ། དེ་ནས་ཡིག་བརྒྱ་དབྱངས་གསལ་རྟེན་འབྲེལ་སྙིང་པོ་བརྗོད། དེ་ནས་ངག་བཏང་རྡོར་དྲིལ་ས་ལ་བཞག་གོ །མེ་ལྷའི་གཏོར་མ་ནང་འཁོར་གྱིས་དངོས་གྲུབ་ཏུ་རོལ་གཞན་ལ་མི་སྦྱིན། ཡང་སྤྲོ་ན་ལས་དང་མཐུན་པའི་ཁ་དོག་ཅན་གྱིས་སྲུང་སྐུད་རྩ་སྔགས་ཞབས་སུ་
ཕྲིན་ལས་གང་ཡིན་ཤམ་བུ་བཏགས་པས་སྔགས། ལྷ་མོ་གཤེགས་གོང་དུ་མེ་ཐབ་ཁར་ལན་གསུམ་གཡུགས་ནས་དངོས་གྲུབ་འདོད་གསོལ་དུས་རང་དང་སྦྱིན་བདག་ལ་བཏགས་སོ། །ཡང་ཞི་བ་ལ་སྤྲོ་ན་མེ་ལྷ་གཤེགས་ཚར་ནས་སྒྱེད་པུ་གསུམ་བཙུགས་ནས། དེ་རྫ་གསར་པའམ་ཟངས་བལ་མ་ལྕགས་འགུ་སོགས་ཤིན་ཏུ་གཙང་མ་བཙུགས་པའི་ལུང་དང་མགུལ་དུ་མེ་ཏོག་གི་ཕྲེང་བ་བཏགས། ནང་དུ་འོ་མ་མང་དུ་བླུགས་པར། འབྲས་སྦྲང་རྩི་ཀ་ར་དང་མར་བཏབ། ཞིབ་ཅུང་ཟད་ཀྱང་བླུགས་ལ་བསྐོལ་ཏེ། བསངས་སྦྱངས། སྟོང་པའི་ངང་ལས་ཡཾ་ལས་བྱུང་བའི་རིན་པོ་ཆེའི་སྣོད་དུ་དཀར་གསུམ་མངར་གསུམ་འོ་ཐུག་བདུད་རྩིའི་རྒྱ་མཚོ་ཆེན་པོར་གྱུར་ཨོཾ་ཨ་ཀཱ་རོ་སོགས་ལན་གསུམ་གྱིས་བྱིན་གྱིས་བརླབས། བླ་མ་བརྒྱུད་པའི་མཚན་ལ། ཞལ་དུ་ཨོཾ་ཨཱཿ ཧཱུྃ། ཞེས་པ་བཏགས་པ་དང་། སངས་རྒྱས་ཀུན་གྱིས་བྱིན་རླབས་པའི། །ཡང་དག་ཡེ་ཤེས་བདག་ཉིད་ཀྱི། །འོ་ཐུག་རོ་མཆོག་ལྡན་པ་འདི། །ཆ་འི་ལྷ་ཚོགས་རྣམས་ལ་འབུལ། །འཇིག་རྟེན་སྐྱོང་བ་རྣམས་ལ་འབུལ། །ཞེས་སམ་སྤྲོ་ན་ཡི་དམ་ཆོས་སྐྱོང་ཐམས་ཅད་དང་དཔལ་མགོན་བདུན་ཅུ་ཡུལ་ལྷ་སོགས་ཐམས་ཅད་ཀྱི་མཚན་བཅུག་ལ་འབུལ་ཏེ། རྔ་ཡབ་བམ་ཀུ་ཤའི་ཆུན་པོས་མཆོད་ཚུལ་བྱ། །ཤཱཀྱ་སེང་གེའི་ལྷག་མ་ཡིས། །ལེགས་འོང་ལ་སོགས་བདེ་མཛད་ལྟར། །དེ་བཞིན་
གཤེགས་པའི་ལྷག་མ་འདིས། །ནད་དམ། སྡིག་པའམ། བར་ཆད་དམ། གདོན་བགེགས་སམ། གང་ཡིན། རྣམ་པར་ཉམ་བྱེད་གསོལ། །ཞེས་བདག་དང་སྦྱིན་བདག་སོགས་དེར་ཡོད་པ་ཐམས་ཅད་ཀྱིས་ཚིམས་པར་བཏུང་ངོ། །དྲག་པོ་ལ་སྤྲོ་ན་མེ་ལྷ་གཤེགས་ཚར་ནས་ཐབ་ཀྱི་སྟེང་དུ་སྒྱེད་པུ་གསུམ་བཙུགས་ནས་སླ་ང་བཙུགས། སོལ་བ་སྤུངས་ནས། སྦྱད་པས་བསྲེགས་ལ་མར་ཁུ་བསྐོལ་ནས་ཁོལ་བ་དང་སླ་ང་བསངས་སྦྱངས། སྟོང་པའི་ངང་ལས་སླ་ངའི་ནང་དུ་རཾ་ལས་བྱུང་བའི་ཡེ་ཤེས་ཀྱི་མེ་དཔུང་དུས་མཐའི་མེ་ལྟར་འབར་ཞིང་། དམྱལ་བའི་མེ་ལྟར་རེག་བྱ་རབ་ཏུ་ཚ་བར་གྱུར། དེ་ནས་བསྲེག་རྫས་ལྷག་མ་ཅུང་ཟད་དང་རྫོམ་ཚིག་པ་རྣམས་བསྡུས་ལ་གནོད་བྱེད་བཀུག་གཞུག་གསུམ་བྱས་ལ་བསྲེགས་ཤིང་། མར་ཁུ་མ་ཟད་བར་དུ་ཐུན་གྱིས་བྲབ་ཅིང་དྲག་སྔགས་བཟླ། དེ་ནས་སྙིག་མ་རྣམས་སོལ་མེར་བླུགས་ལ། སྐད་ཅིག་གིས་ས་འོགྲྭ་ནས་ལས་ཀྱི་གཤིན་རྗེ་མ་ཧེ་གླང་གི་མགོ་ཅན། ཁ་གནམ་ས་ཙམ་གདངས་བ་མཆེ་བ་གངས་རིའི་ཕྲེང་བ་ལྟར་གཙིགས་པ། ལྕེ་གློག་ལྟར་འཁྱུག་པའི་ཁའི་ནང་དུ། གནོད་བྱེད་དགྲ་བགེགས་དམ་སྲི་ཐམས་ཅད་ཚུད་པར་གྱུར། བཀུག་གཞུག་བྱས་ལ། གཤིན་རྗེའི་གནོད་བྱེད་ཐམས་ཅད་གྱུར་གྱིས་མིད་ནས་ས་རིམ་པ་དགུའི་འོག་ཏུ་སོང་བའི་སྟེང་ནས། སླ་ང་རྡོ་རྗེ་
རྒྱ་གྲམ་རི་ཡི་རྒྱལ་པོ་རི་རབ་གླིང་བཞི་དང་བཅས་པས་མནན་པའི་སྟེང་ནས། རྒེའི་ལྷ་ཚོགས་འཁོར་དང་བཅས་པས་མནན་པར་གྱུར། ཞེས་རྟ་བྲོ་བྱ་ཞིང་། རྩ་སྔགས་མཇུག་ཏུ། དགྲ་བགེགས་མཱ་ར་ཡ་ནན། སྟམྦྷ་ཡ་ནན། ཞེས་བརྗོད་སླ་ངའི་སྟེང་དུ་དམར་གཏོར་བཞག་ལ། བསྐུལ་ཐུང་ཞིག་གིས་ཕུལ། གཏོར་མ་གནོད་བྱེད་ཀྱི་ཕྱོགས་སུ་བཏང་། སླ་ང་ཁ་ཕྱེས་ལ་སོལ་བས་མནན་ནོ། །ཕྱིར་ནངས་ཐལ་བ་དགྲ་ཕྱོགས་སུ་ཕྱར་བས་ནད་དང་མཚོན་ཆའི་ཆར་གྱིས་བདུན་རྒྱུད་རྩད་ནས་གཅོད་པར་བསམ། དེ་ལྟར་བྱས་ན་མནན་བསྲེགས་འཕང་གསུམ་གཅིག་ཏུ་དྲིལ་བ་སྟེ་ཟབ་བོ། །དེ་ནས་ལས་བཞི་ཐམས་ཅད་ལ་ལོང་ཡོད་ན་ཐལ་བ་མ་བསྒུལ་བར་བཞག །མེད་ན་ལས་མཐུན་གྱིས་ཆུས་གཞིལ་ལ། རོ་བསྲེགས་ལ། ཨོཾ་བཛྲ་ས་མ་ཡ་ཛ༔ ཛཧཱུྃ་བཾ་ཧོ༔ ཞེས་རུས་པ་དང་ཐལ་བ་བསྡུས་ལ་སྣོད་གཙང་མར་བླུག །རུས་པ་ལ་ཕྱིར་ལྡོག་ཁྲུས་གསོལ་བྱས་ནས་ཞིབ་ཏུ་བཏུལ་ལ་ཆུ་ལ་སྦྱངས་པས་སྦྲུས་པའི་འཇིམ་པས། རྩ་རིག་བཟླ་ཞིང་སཱཙྪ་གདབ། སཱཙྪ་བཞུགས་པར་བསངས་སྦྱངས་ནས། སྟོང་པའི་ངང་ལས་མཆོད་རྟེན་ཆེན་པོ་མང་པོར་གྱུར་པའི་བུམ་པའི་ནང་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཀྱི་ཁང་པ་སོགས་ནས། རྩ་ལྷ་སོ་བདུན་མདུན་བསྐྱེད་ལྟར་བསྐྱེད་བསྟིམ་རྒྱས་གདབ་བཟླས་པ་མཆོད་བསྟོད་བྱས་ནས། ༈ མཆོད་རྟེན་དེ་རྣམས་ཞུ་བ་
ལས་སྔར་གནས་པའི་མཆོད་རྟེན་སོ་སོའི་རྣམ་པར་གྱུར། སླར་ཡང་ཕྱག་མཆོད་བསྔོ་བ་སྨོན་ལམ་བྱའོ། །གང་ཟག་རྟེན་འབྱོན་པའི་རིགས་ལ་རྟེན་མཁའ་འགྲོའི་སྤྱན་འདྲེན་སྲིད་པས་སྤུར་ཁང་ཐོག་ཏུ་སྐུ་གསུང་ཐུགས་ཀྱི་རྟེན་གཞུག ། བསྲེག་ཚོད་ཟིན་པར་བྱ། གདུང་ཁང་ཞལ་མི་ཕྱེ་བ་ལ་ཁོང་རང་གི་ཡི་དམ་གང་ཡིན་གྱི་སྤྱན་འདྲེན་བྱིན་འབེབས་དང་། མེ་ལོང་ངོས་ལ་ཁྲུས་གསོལ་རྒྱས་པ་དང་། མཆོད་བསྟོད་གསོལ་འདེབས་རྣམས་མཆེད་གྲོགས་སམ་སློབ་མ་དམ་ཚིག་དང་ལྡན་པས་མ་ཆག་པར་བྱའོ། །ཞི་བའི་ཐལ་བ་ཆུར་དོར་བ་ནི་ཆུ་འཐུང་བའི་སེམས་ཅན་གྱི་སྒྲིབ་པ་དག་པའི་ཚད་ཡིན་ཀྱང་སྡིག་པ་ཞི་བའི་སྦྱིན་སྲེག་དང་གང་ཟག་འབྲེལ་ཚད་དོན་ལྡན་ཡིན་ངེས་ན་དེ་ལྟར་བྱའོ། །ཕལ་པའི་ཐལ་བ་ཀླུ་མེད་ཅིང་ས་བཀྲ་བཟང་བར་བླུག །རིམ་གྲོའི་ཐལ་བ་ནི་གནོད་འཚེ་ཕྲན་བུ་ཞི་བར་བཤད་པས་རྩྭ་དང་ར་ལུག་གི་མི་འབྲེལ་བའི་ལྷས་སོགས་དང་ནད་པའི་མལ་འོག་ཏུ་བཏབ། རྒྱས་པའི་ཐལ་བ་མཛོད་ཕུག་དང་ནོར་ལྷས་སོགས་སུ་བཏབ། དབང་གི་ཐལ་བ་ཆ་གཅིག་ཁྱིམ་དེར་བཞག །འགའ་ཞིག་ཡུལ་གྱི་འཐུང་ཆུ་ལེན་ས་དང་མི་ནོར་མང་དུ་འགྲིམ་སར་བླུག །དྲག་པོའི་ཐལ་བ་ཆ་གཅིག་རླུང་ལ་བསྐུར། ཆ་གཅིག་མནན། ཆ་གཅིག་ཟོར་ལས་བྱེད་པའམ། རིམ་གྲོ་ཡིན་ན་མཁའ་འགྲོ་མ་དང་གདོང་མ་ཐུག་པར་མ་ཎིའི་འོག་གམ་ལམ་རྒྱ་གྲམ་དུ་བླུག །འབྱུང་པོ་ཕྲན་བུ་ཐལ་བས་འཆི་བར་བཤད་པས། ཞོ་ལད་ཆང་ལད་ཀྱི་མལ་དུ་བླུགས་ན་ཐུབ་བོ། །དེ་ཡན་ཆད་ནི་ངེས་པར་ལག་བླངས་བདེ་བ་རྣམས་ཡིན་ནོ། །
༈ འདིར་འཕྲོས་དོན་གོ་བདེ་བ་ཅུང་ཟད་ཅིག་སྤྲོ་ན། དེ་ལྟར་བཤད་པ་དེ་ནི་རྒྱུད་སྡེ་ཐམས་ཅད་དང་མི་འགལ་ཞིང་བླ་མ་མཁས་པ་རྣམས་ཀྱི་ཕྱག་ལེན་དང་མཐུན་ནོ། །འོན་ཀྱང་མཐའ་གཅིག་ཏུ་ངེས་པ་མེད་དེ། རྒྱུད་སྡེ་སོ་སོ་དང་ལྷ་སོ་སོ་དང་གསར་རྙིང་སོ་སོ་ལ་མི་འདྲ་བའི་ཁྱད་པར་སྣ་ཚོགས་དང་། གྲུབ་མཐའ་དང་སློབ་དཔོན་སོ་སོའི་བཞེད་པ་དང་དགག་བཞག་མང་དུ་ཡོད་ཅིང་། ཐབ་ལ་ཡང་སོར་བརྒྱད་ནས་ཁྲུ་སྟོང་གི་བར་སྡོམ་འབྱུང་ནས་གསུངས་པ་དང་། ཐབ་དབྱིབས་ཀྱང་ཟུར་ལྔ་དང་ཟུར་དྲུག་དང་ཟུར་བདུན་དང་ཟུར་བརྒྱད་དང་ཟུར་དགུ་དང་ཟུར་བཅུ་པ་སོགས་བདེ་མཆོག་མཁའ་འགྲོ་རྒྱ་མཚོ་ལས་གསུངས། མཁའ་འགྲོ་རྒྱ་མཚོ་དང་དུས་འཁོར་སོགས་ནས་མེ་ལྷ་ལུག་ལ་ཆིབས་པ་སོགས་བཤད། མེ་ལྷ་བཞོན་པ་མེད་པ་དང་མེ་ལྷ་འཇིག་རྟེན་པ་མེད་པར་ཡེ་ཤེས་པ་དང་པོ་ནས་བསྐྱེད་པ་དང་། གཉིས་ཀ་དུས་གཅིག་ལ་བསྐྱེད་པ་དང་། སྦྱོང་རྒྱུད་རང་རྐང་ལུགས་ལ་མེ་ལྷ་དང་ལྷ་ཐམས་ཅད་ལ་དམ་ཚིག་པ་མི་བསྐྱེད་པ་དང་ཡེ་ཤེས་པ་ཁོ་ན་སྤྱན་དྲངས་པ་ནས་ལྷར་མངོན་རྟོགས་ཀྱིས་གསལ་བཏབ་པར་བཤད་དེ། དེ་ལ་དབང་བསྐུར་རྒྱས་འདེབས་མི་དགོས་པར་བཤད། སྒྲུབ་མཆོད་དཀྱིལ་ཆོག་དང་འབྲེལ་ན་དམ་ཚིག་པ་བསྐྱེད་པའམ་མི་བསྐྱེད་ཀྱང་རུང་སྟེ། །ཡེ་ཤེས་པ་རྡུལ་ཚོན་ནས་སྤྱན་དྲངས་ཤིང་མེ་ཏོག་བླངས་ལ་ཐབ་ཏུ་འཕངས། སླར་གཤེགས་དུས་རྡུལ་ཚོན་གྱི་དཀྱིལ་འཁོར་དུ་གཤེགས་ནས་བཞུགས་པར་མོས་ནས་མེ་ཏོག་དོར་བར་བཤད་དོ། །ཆོ་ག་བསྡུས་པ་ལ་ལྷ་རྣམས་མི་བསྐྱེད་པར་
སྤྱན་འདྲེན་ཙམ་བྱེད་ནས་མཆོད་པར་བཤད། ཡང་གང་ཟག་བཟང་པོ་ལ་གསང་སྔགས་བླ་མེད་ཀྱི་ཐུགས་དམ་རྒྱུད་ཡིན་ན་བསྲེག་ཁང་དུ་བཞུགས་ཁ་དུས་ཁོང་རང་གི་ཡི་དམ་དེ་ཡི་དཀྱིལ་འཁོར་ཡོངས་རྫོགས་སམ་དཔའ་བོ་གཅིག་པར་བསྐྱེད། མཆོད་བསྟོད་བྱས་ལ་སྤུར་དེའི་ཡེ་ཤེས་པ་ལ་གཤེགས་གསོལ་བྱས་ཏེ། ཡང་གསར་དུ་རྣམ་སྣང་ལྟ་བུའི་དམ་ཚིག་པ་གཅིག་བསྐྱེད་ནས་མཆོད་བསྟོད་བསྡུས་པ་གཅིག་བྱ། ཆོས་འབྲེལ་མེད་པ་གཅིག་གིས་མེ་སྦར་དེ་ལྟར་མ་བྱས་ན་ཉེས་པ་ཤིན་ཏུ་ཆེའོ། །མེ་སྦར་དུས། དཔལ་ལྡན་བླ་མ་དགོངས་སུ་གསོལ། །ཞེས་དང་། ལམ་སྦྱང་བསྟན་མི་བྱ་བར་གཙོ་བོ་དང་དབྱེར་མེད་དུ་བསྐྱེད་དོ། །བྱེ་མས་མི་བྲབ་པར་མེ་ཏོག་དོར་རོ། །ཡང་དེ་ལྟ་བུའི་སྦྱིན་སྲེག་ཤེས་ཀྱང་ཡོ་བྱད་མ་འབྱོར་ན། དེ་དག་ཐམས་ཅད་ཡིད་ཀྱིས་བྱས་པར་སྒོམས་ཤིང་ཇི་ལྟར་ངག་གིས་ཚར་གཅིག་འདོན་པས་ཆོག་གོ །ཡང་དེ་དག་གི་བྱེད་ཚུལ་གྱི་དོན་ཐམས་ཅད་ཤེས་ཀྱང་ཚིག་རྣམས་མི་ངེས་པའམ། ངེས་ཀྱང་རྟེན་ལ་དགའ་ན་རང་ཉིད་ཡི་དམ་གཙོ་བོར་བསྒོམ་པའི་ནམ་མཁར་མེ་དཔུང་ཆེན་པོའི་ནང་དུ་དཀྱིལ་འཁོར་ཡོངས་རྫོགས་བསྐྱེད་ལ། རང་ཡང་རིན་པོ་ཆེའི་ཁྲི་ལ་གནས་ནས་གཡས་གཡོན་དུ་རིན་པོ་ཆེ་སྣ་བདུན་གྱི་སྣོད་དུ་སྦྲང་རྩི་ལ་སོགས་པའི་བསྲེག་རྫས་རྣམས། རིན་པོ་ཆེའི་དགང་བླུགས་ཀྱིས་འབུལ་བར་བསྒོམ་སྟེ་ཡིད་ཁོ་ནས་ཐམས་ཅད་བྱ་སྟེ། པཎྜི་ཏ་ཨ་བྷཱ་ཡས། ཇི་ལྟར་རིག་པས་ཡིད་དང་ལུས། །ཀློག་པའི་ལས་ནི་ཡང་དག་བརྩམས། །ཡང་ན་ཐམས་ཅད་ཡིད་ཀྱིས་སོ། །ཞེས་
གསུངས་པའི་དོན་ཡིན་ནོ། །དེ་ཡན་ཆད་ནི་ཕྱིའི་སྦྱིན་སྲེག་ཡིན་ལ། ༈ ནང་གི་སྦྱིན་སྲེག་ནི་རང་ཡི་དམ་ལག་པ་དགང་གཟར་བླུགས་ཁ་ཐབ་ཁུང་ལྕེ་མེ་ལྕེར་བསམ། ཨོཾ་ཨཱཿ ཧཱུྃ༔ གིས་བཟའ་བཏུང་བསྲེག་རྫས་སུ་བྱིན་གྱིས་བརླབས། མགྲིན་པར་བླ་མ། སྙིང་ཁར་ཡི་དམ། ལྟེ་བར་མཁའ་འགྲོ། གསང་བར་ཆོས་སྐྱོང་བསྐྱེད་ནས་སྦྱིན་སྲེག་རྒྱུན་དུ་བྱ་སྟེ། ཡེ་ཤེས་ཐིག་ལེའི་རྒྱུད་ལས། ཁ་ནི་ཧཾ་ཁུང་དགང་གཟར་ལག །ཚུལ་ནི་རང་བྱུང་མེ་ཡིན་ནོ། །ཞེས་གསུངས་སོ། །གསང་བའི་སྦྱིན་སྲེག་ནི། རོ་རྐྱང་གཉིས་དགང་གཟར་བླུགས། དབུ་མ་ཐབ་ཁུང་། གཏུམ་མོ་ཨ་ཤད་མེ་དཔུང་། ཨ་ཧཾ་བྱང་ཆུབ་སེམས་ཀྱི་རྒྱུན་ནི་མར་ཁུ། ཕུང་ཁམས་སྐྱེད་མཆེད་བསྲེག་རྫས་རྣམས། བདེ་སྟོང་གཉིས་སུ་མེད་པའི་ལྷ་ལ་འབུལ་ཏེ། ཡེ་ཤེས་ཐིག་ལེ་ལས། དགང་གཟར་བླུགས་གཟར་མར་གྱི་སྣོད། །རྩ་གསུམ་དུ་ནི་བརྗོད་པའོ། །ཞེས་གསུངས་སོ། །དེ་ཁོ་ན་ཉིད་ཀྱི་སྦྱིན་སྲེག་ནི། །ཀུན་གཞི་མ་བཅོས་པའི་ཐབ་ཁུང་དུ། དབྱིངས་དང་ཡེ་ཤེས་དབྱེར་མེད་པའི་དགང་བླུགས་ཀྱིས། རྣམ་པར་རྟོག་པ་གང་ཤར་བཟོ་མེད་དུ་བསྲེགས་ནས། ཆོས་སྐུ་རབ་འབྱམས་ཀྱི་ལྷ་ལ་ཕུལ་ཏེ། ཨོ་རྒྱན་རིན་པོ་ཆེས། འགྱུ་བ་རྟོགས་ཚོགས་བག་ཆགས་བསྲེག་རྫས་རྣམས། །ཆོས་སྐུ་ཀློང་ཡངས་རབ་འབྱམས་ཞལ་དུ་བསྟབ། །ཅེས་གསུངས་སོ། །མདོར་ན་ཐབ་དང་རྫས་སོགས་གཙོ་མི་ཆེ། སྔགས་དང་ཏིང་འཛིན་གཙོ་བོ་ཡིན་ཏེ། ཐབ་བྲི་བ་སོགས་མེད་ཀྱང་སྟེགས་བུ་ལ་ཤིང་ཐབ་ཀྱི་
དབྱིབས་བརྩེགས་པས་ཆོག་པའི་ལུགས་དང་། རྒྱུན་གྱི་ཐབ་ཀའི་མེ་ལ་ཡང་སྦྱིན་བསྲེག་བྱ་བའི་ལུགས་དང་། རྫས་གང་འཛོམས་སམ་རེ་རེས་ཆོག་པ་དང་། རྫས་དང་ཐབ་མེད་ཀྱང་ཡིད་ཀྱིས་ཆོག་པར་བཤད་པས་སོ། །འོན་ཀྱང་ཐབ་དང་ཐིག་ཚོན་བསྲེག་རྫས་རྣམས་ཇི་ལྟར་རྒྱས་ཤིང་ལེགས་བཞིན་དུ། བསོད་ནམས་ཆེ་སྟེ། མེད་ཀ་མེད་པ་མ་ཡིན་ཞིང་སྔགས་དང་ཏིང་ངེ་འཛིན་ཁོ་ན་གཙོ་ཆེ་བ་ཡིན་ནོ། ༈ དེ་ལྟར་སྦྱིན་བསྲེགས་མ་བྱས་པའི་ཉེས་སྐྱོན་ཅི་ཡོད་སྙམ་ན། གུར་ལས། གང་གིས་སྦྱིན་སྲེག་མ་བྱས་ན། །འཇིག་རྟེན་འདིའམ་གཞན་དག་ཏུ། །དེ་ལ་མཆོག་གི་དངོས་གྲུབ་མེད། །ཅེས་དང་། པཎྜི་ཏ་རྡོ་རྗེ་གདན་པ་ཆེན་པོས། སྦྱིན་སྲེག་དང་བྲལ་ལས་རྣམས་མང་། །ཡང་དག་དངོས་གྲུབ་མི་འབྱུང་སྟེ། །ཞེས་གསུངས་སོ། །སྦྱིན་བསྲེགས་བྱས་པས། ཚེ་འདས་ཀྱི་སྒྲིབ་པ་བྱུང་བ་ནི། ངན་སོང་སྦྱོང་རྒྱུད་ལས། དེ་ཡི་མིང་ནས་བརྗོད་ནས་ནི། །མཁས་པ་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་རྙེད་པ་དུ། །སྦྱིན་བསྲེགས་བྱས་པར་གྱུར་ན་ནི། །དམྱལ་བ་ཆེན་པོར་གྱུར་པ་ཡི། །སྡིག་པ་དག་ལས་ཐར་བར་འགྱུར། །ཇི་སྲིད་མཚན་པར་ཤིན་ཏུ་ནི། །འབར་བའི་གནས་སུ་སྐྱེས་གྱུར་པ། །ཏིལ་དང་ཡུངས་ཀར་འབྲས་རྣམས་དང་། །ར་ཡི་འོ་མར་ལྡན་པ་དང་། །དྲི་ཡིས་བཀུས་པའི་ཡམ་ཤིང་ནི། །ཆོ་ག་བཞིན་དུ་སྦྱིན་བསྲེག་བྱ། །དེ་ནས་འདི་ནས་ངེས་པར་ཡང་། །ལྷ་ཡི་གནས་སུ་སྐྱེས་གྱུར་ནས། །དེ་ཡི་མཚན་མར་སྟོན་པར་བྱེད། །ཡང་ན་ལྷ་ཡི་མཆོག་ཏུ་
འགྱུར། །ཞེས་གསུངས་སོ། །ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། བསྲེག་པའི་རིམ་པ་སྟོན་པར་བྱ། །རྣམ་ཤེས་ལྔ་བྲལ་བེམ་པོའི་ལུས། །བག་ཆགས་སྦྱངས་བས་ཐར་པ་ཐོབ། །སྦྱང་གཞི་ཕྱི་དང་ནང་གི་རོ། །སྦྱོང་བྱེད་འབྱུང་བ་ཡེ་ཤེས་མེ། །འབྱུང་བ་མེ་ཡིས་བག་ཆགས་སྦྱངས། །ཡེ་ཤེས་མེ་ཡིས་ཉོན་མོངས་བསྲེགས། །ཞེས་གསུངས་སོ། སློབ་དཔོན་པདྨས། དེ་ལྟར་བྱས་པའི་ཕན་ཡོན་ནི། །བླ་མ་གང་ཟག་དམ་པ་ཡིན་ན་ནི། །ཐུགས་ཀྱི་དགོངས་པ་མཐར་ཕྱིན་པར་བྱེད། རྣལ་འབྱོར་པ་ཡིན་ན་ནི་ས་ལམ་ཕྱིར་མི་ལྡོག་པའི་ས་ཐོབ། སྐྱེ་བོ་ལ་སོགས་ཐ་མལ་པ་ཡིན་ན། འཁོར་བ་ངན་སོང་རིགས་དྲུག་གི་དུཁ་སྦྱོང་བར་བྱེད་དོ། །རང་བྱུང་ཡེ་ཤེས་ཀྱི་མེ་ལ། ལས་དང་བག་ཆགས་སྦྱངས་ཏེ། སྐུ་གསུམ་ཡོངས་སུ་རྫོགས་པར་བྱེད། ཅེས་གསུངས་སོ། །གཞན་ཡང་ཆད་ལྷག་བསྐང་བ་སོགས་ཕན་ཡོན་མཐའ་ཡས་ཏེ། དཔལ་ཡང་དག་སྦྱོར་བ་ལས། སྦྱིན་སྲེག་གིས་ནི་ལྷ་རྣམས་ཚིམས། །ཚིམས་ནས་དངོས་གྲུབ་རབ་ཏུ་སྩོལ། །གང་ཟག་གསང་སྔགས་ལྷག་ཆད་དག །སྦྱིན་སྲེག་གིས་ནི་དེ་ཀུན་དགོངས། །ཞེས་དང་། ཡང་བརྟག་པ་བཅུ་པ། འགྱུར་མི་འདྲ་བ་གཅིག་ལས། མེ་ནི་ལྷ་ཡི་ཞལ་དུ་བརྗོད། སྦྱིན་སྲེག་ལྷ་རྣམས་ཚིམ་བྱེད་དེ། །ཚིམ་པའི་ལས་ནི་དངོས་གྲུབ་སྩོལ། །སྔགས་འདི་ལྷག་གམ་མ་ཚང་གང་། །ཐམས་ཅད་སྦྱིན་སྲེག་དག་གིས་བཀང་། །དེ་བས་སྐུ་གསུམ་མཆོག་སྐྱེས་པ། །སྦྱིན་སྲེག་གིས་ནི་སྔགས་ནས་བརྗོད།
ཅེས་དང་། བདེ་མཆོག་སྡོམ་པ་འབྱུང་བ་ལས། དགང་གཟར་ཤེས་རབ་བླུགས་གཟར་ཐབས། །དེ་གཉིས་སྦྱར་བ་གཉིས་མེད་བསྒོམ། །དེ་ལ་ངེས་འབྱུང་མར་གྱི་རྒྱུད། །ཡེ་ཤེས་ཆེན་པོའི་བདུད་རྩིར་འདོད། །རྒྱུ་དང་མི་རྒྱུ་བདག་ཉིད་ཀྱིས། །མེ་ནི་དེ་ཡིས་ཡང་དག་མཆོད། །འདི་ལྟར་སྦྱིན་བསྲེགས་གང་བྱས་ལ། །བསྐལ་བཟང་དངོས་གྲུབ་རབ་ཏུ་སྟེར། །ཞེས་གསུངས་སོ། །པདྨ་དྲྭ་བ་ཅན་གྱི་རྒྱུད་ལས། སྦྱིན་སྲེག་གིས་ནི་ལྷ་མཉེས་ཤིང་། །སྔགས་འགྲུབ་སྔགས་ཀྱིས་ལས་རྣམས་འགྲུབ། །དྲང་སྲོང་ཚོགས་རྣམས་ཐམས་ཅད་དང་། །དྲི་ཟའི་ཚོགས་རྣམས་ཐམས་ཅད་དང་།། །འབྱུང་པོའི་ཚོགས་རྣམས་ཐམས་ཅད་དང་། །སྦྱིན་སྲེག་དག་གིས་རབ་དགའ་བས། །རྣལ་འབྱོར་གྲོགས་བྱེད་བསྲུང་བ་དང་། །སྐྱོབ་ཕྱིར་ཚེ་རིང་དཔའ་འཕེལ་ཞིང་། །ནད་མེད་ལོངས་སྤྱོད་འགྲུབ་པ་དང་། །བསམ་པ་ཡིད་བཞིན་འགྲུབ་པར་འགྱུར། །ཞེས་དང་། བཟང་པོ་ཡོངས་བཟུང་ལས། རབ་གནས་ལ་སོགས་རྗེས་ལ་ནི། །མ་དྲན་པ་དང་མ་ནུས་པ། །ཆོ་ག་མ་ཚང་གྱུར་པ་རྣམས། །སྦྱིན་སྲེག་གིས་ནི་རྫོགས་པར་བྱེད། །ཅེས་གསུངས་པ་དང་། རྟ་མཆོག་རོལ་པ་དབུགས་བདག་གི་རྒྱུད་ལས། རོལ་པ་ཁྲག་འཐུང་རྒྱལ་པོ་ཡིས། །ཞི་རྒྱས་དབང་དྲག་སྦྱིན་སྲེག་གིས། །ལས་ཀྱི་མཐའ་བརྟུལ་བཤད་པར་བུ། །ཞི་ནི་རྣམ་རྟོག་དུག་ལྔ་ནི། །རྒྱས་ནི་ཡོན་ཏན་ཐམས་ཅད་རྒྱས། །དབང་གིས་ཐམས་ཅད་ཟིལ་གནོན་ཏེ། །དྲག་པོས་བདུད་བཞི་ཐམས་ཅད་སྒྲོལ། །ཞེས་དང་། ཨོ་རྒྱན་རིན་པོ་
ཆེས། འཇིག་རྟེན་འདི་ན་ལས་མྱུར་བ། །མེ་དང་རླུང་གིས་བྱེད་པ་ཡིན། །ཞེས་དང་། མེ་ཡིས་ལས་རྣམས་མྱུར་དུ་འགྲུབ། །ཕྲིན་ལས་གང་བརྩམ་ཐོགས་པ་མེད། །དེ་ཕྱིར་ཡོན་ཏན་བསམ་མི་ཁྱབ། །ཅེས་དང་། མགོན་པོ་དངོས་གྲུབ་འབྱུང་རྒྱུད་ལས། །མེ་སྦར་བསྲེགས་པས་ལྷ་ལ་མཆོད། །གསང་སྔགས་འདོད་དོན་བསྒྱུར་ལྡན་པས། །ཕྲག་གཅིག་གིས་ནི་ལན་གཅིག་སྟེ། །ལན་གྲངས་རོལ་མཚོ་ཁྱད་པར་གྱིས། །ཕྱིར་མི་ལྡོག་ཅིང་།སྲེག་གཏོར་བྱེད། །དེ་རྗེས་གསོལ་བཏབ་བཅོལ་བསྐུལ་བྱ། །ཤིན་ཏུ་རྟགས་རྣམས་མྱུར་བར་འགྲུབ། །ཅེས་དང་། བྱ་རོག་གདོང་གི་གཞི་སྙིང་གསང་བ་སྲོག་གཟེར་སྦས་པའི་རྒྱུད་ལས་ཀྱང་། སྦྱིན་བསྲེག་བྱ་ཚུལ་རྒྱས་པར་གསུངས་ནས། དེ་ཡི་ཕན་ཡོན་གསུངས་པ། དེ་ནས་ལས་ཀྱི་འབྲས་བུ་མྱུར་དུ་འགྲུབ། །ཞི་རྒྱས་དབང་དྲག་མཐར་ཕྱིན་ཅིང་། །ཐུན་མོང་ལས་ཆེན་བརྒྱད་ཐོབ་ནས། །བསམ་པའི་དངོས་གྲུབ་ཐམས་ཅད་འགྲུབ། །ལྷ་ཀླུ་གནོད་སྦྱིན་སྲིན་པོས་ཀྱང་། །ཚེ་བསྲིང་ནད་སོགས་གནོད་པ་ཀུན་ལས་ཐར། །ཞེས་དང་། ཆོས་སྐྱོང་སྤྱི་ཡི་གཏོར་མའི་ལས་རྒྱུད་ལས། བཅོམ་ལྡན་འདས་ཀྱིས་བཀའ་སྩལ་པ། གང་དག་གནོད་པ་ཞི་བ་དང་། །སྡིག་དང་སྒྲིབ་པ་དག་འདོད་པས། །ཞི་བའི་སྦྱིན་བསྲེག་བྱ་བའོ། །ཚེ་དབང་བསོད་ནམས་རྒྱས་པ་དང་། །དཔལ་འབྱོར་ཐམས་ཅད་རྒྱས་འདོད་པས། །རྒྱས་པའི་སྦྱིན་སྲེག་རྒྱས་པར་བྱ། །འཇིག་རྟེན་འདས་དང་འཇིག་རྟེན་པར། །རྒྱལ་པོའི་བུ་ལ་སོགས་པ་དང་། །དབང་
དུ་འདུ་བར་འདོད་པ་ཡིས། །དབང་གི་སྦྱིན་སྲེག་རྫོགས་པར་བྱ། །དགྲ་བགེགས་གདུག་པ་མ་ལུས་པ། །དྲག་པོ་ལས་ཀྱི་བསྒྲལ་བའི་ཕྱིར། །དྲག་པོའི་སྦྱིན་སྲེག་རྫོགས་པར་བྱ། །མཆོག་དང་ཐུན་མོང་དངོས་གྲུབ་ཀུན། །མྱུར་དུ་འགྲུབ་པར་འདོད་པའི་ཕྱིར། །ཞི་རྒྱས་དབང་དྲག་གཅིག་ཆར་དང་། །སྦྱིན་སྲེག་ཆོ་ག་རྫོགས་པར་བྱ། །ཞེས་དང་། བདེ་མཆོག་རྒྱུད་ལས། དེ་ནས་སྦྱིན་སྲེག་ཆོ་ག་ནི། །ངེས་པར་དབང་དུ་བྱེད་པར་འགྱུར། །གང་ཞིག་ཤེས་པ་ཙམ་གྱིས་ནི། །མྱུར་དུ་དངོས་གྲུབ་ཐོབ་འགྱུར་བཤད། །ཅེས་དང་། འདི་ལས་རབ་མཆོག་གཞན་དག་གི །འཇིག་རྟེན་གསུམ་ན་ཡོད་མ་ཡིན། །ཞེས་གསུངས་སོ། །དེ་དག་ནི་སྤྱིར་སྦྱིན་སྲེག་གི་ཕན་ཡོན་ཡིན་ལ། ༈ བྱེ་ཟློབྲག་རྫས་སོ་སོའི་ཕན་ཡོན་ནི། བདེ་མཆོག་སྡོམ་འབྱུང་ལས། དེ་ནས་གཞན་ཡང་སྦྱིན་སྲེག་གི།ཡན་ལག་ཀུན་འབྱུང་འབྲས་རབ་བཤད། །ས་དང་ས་གཞི་ཞིང་རྒྱས་པའི། །ཐབ་ཀྱི་ཡན་ལག་ཡོན་བདག་རྒྱས། །མར་གྱིས་འབྱོར་བ་ཐམས་ཅད་བྱེད། །ཡམ་ཤི་ང་གཟི་བརྗིད་རྣམ་པར་འཕེལ་བའོ། །བུད་ཤིང་ལྷག་པར་དཔའ་བར་བྱེད། །ཀུ་ཤས་ཐམས་ཅད་སྲུང་བར་བྱེད། །ཡུངས་ཀར་པས་ནི་ཞི་བར་བྱེད། །འབྲས་ཀྱིས་རྒྱས་པར་བྱེད་པར་བཤད། །ཏིལ་གྱིས་སྡིག་པ་འཇོམས་པར་རིག་པར་བྱ། །སོ་བས་ནོར་དང་འབྲུ་རྣམས་འགུགས། །མ་ཤས་སྲན་མས་སྟོབས་ནི་ཆེན་པོར་བྱེད། །ནས་ཀྱིས་རླུང་གི་ཤུགས་རབ་སྟེར། །དུརྦས་ཚེ་ནི་འཕེལ་བར་བྱེད། །གྲོ་ཡིས་ནད་རྣམས་འཇོམས་པར་
བྱེད། །འོ་མ་སྦྲང་རྩིས་ཤེས་རབ་འཕེལ། །ཟས་མཆོག་གིས་ནི་བདེ་ཀུན་སྟེར། །མེས་ནི་འདོད་དོན་དངོས་གྲུབ་སྟེར། །གང་འདོད་ལས་ནི་གྲོལ་བ་སྩོལ། །ལྷག་མ་ལས་ཀྱི་རྗེས་མཐུན་པ། །ཞི་སོགས་ལས་བྱ་ཤེས་པར་བྱ། །ཞེས་དང་། ཡང་རྒྱ་གཞུང་འགའ་ཞིག་ལས། ཚིག་དེ་དག་ཕལ་ཆེར་འདྲ་བ་ལས། ཤིང་ཐོག་ཕུན་ཚོགས་བུ་རྒྱུད་འཕེལ། །མེ་ཏོག་ཁ་དོག་གཟི་བརྗིད་འཕེལ། །དྲི་དང་སོ་རྩིས་བཀྲ་ཤིས་བྱེད། །ཅེས་གསུངས་པ་རྣམས་ནི། ཡི་དམ་ཆོས་སྐྱོང་གསར་རྙིང་རྒྱུད་སྡེ་ཐམས་ཅད་སྤྱིའི་རིགས་འགྲེ་རུང་བའི་ཕན་ཡོན་ཡིན་པས། ༈ ཡང་ལྷ་སོ་སོའི་བདེ་མཆོག་རྩ་རྒྱུད་དང་ཧེ་རུ་ཀ་མངོན་འབྱུང་དང་འཇམ་དཔལ་རྩ་རྒྱུད་སོགས་ནས་བསྲེག་རྫས་མི་འདྲ་བ་སྣ་ཚོགས་ལ་བརྟེན་ནས་ལས་རབ་འབྱམས་སྣ་ཚོགས་འགྲུབ་པ་ལ་ཐབས་གསུངས་པ་དང་། དེ་དང་མཚུངས་པར་རྙིང་མ་ལ་ཡང་ཐུན་མོང་མ་ཡིན་པའི་སྦྱིན་སྲེག་གི་མན་ངག་མཐའ་ཡས་པར་གསུངས་པ་ཐམས་ཅད་ལྷ་སོ་སོའི་སྐབས་སུ་ཤེས་པར་བྱའོ། །འདི་དག་མདོར་བསྡུས་པ་སྟེ། རྒྱས་པར་རྒྱུད་གཞུང་མཐའ་ཡས་པ་ནས་སྦྱིན་སྲེག་གི་ལས་སྒྲུབ་ཚུལ་དང་སྔགས་པ་མཐའ་ཡས་པར་གསུངས་པས་ན། རང་རེའི་མི་ལུས་ཐོབ་པའི་དོན་གོར་ཕྱི་ནང་གསང་བ་དེ་ཁོ་ན་ཉིད་ཀྱི་སྦྱིན་སྲེག་གང་རུང་དང་མ་བྲལ་བར་གལ་ཆེ། ༈ ཨེ་མ་ཧོ། མཆོག་དང་ཐུན་མོང་དངོས་གྲུབ་མ་ལུས་པ། །ཕྱི་དུས་མི་འགྱང་འབྲས་བུ་མངོན་འབྱིན་ཐབས། །རྒྱུད་སྡེ་ཀུན་ཏུ་རྒྱ་ཆེར་གསུངས་པའི་དོན། །རྒྱ་བོད་ལོ་པཎ་དུ་མས་ཡང་
ཡང་བཀྲལ། །འོན་ཀྱང་རྡོ་རྗེའི་གསུང་རྣམས་གོ་བར་དཀའ། །འགའ་ཞིག་བཤད་པ་མང་བས་ལག་ལེན་བསྒྲིབ། །འགའ་ཞིག་རྒྱུད་སྡེ་སོ་སོའི་བཞེད་པ་དང་། །དཀྱིལ་འཁོར་སོ་སོའི་སྦྱིན་སྲེག་མང་ན་ཡང་། །རིགས་འགྲེ་མི་ཤེས་སོ་སོར་བཟུང་བར་དཀའ། །རྒྱུད་སྡེ་སྤྱི་ཡི་སྦྱིན་སྲེག་འགའ་ཞིག་ཀྱང་། །ས་ཐིག་ཆོ་ག་དེ་རུ་མ་གསུངས་པས། །ཆོས་སྐྱོང་ལ་སོགས་ས་ཐིག་མེད་པ་ཡི། །སྦྱིན་སྲེག་བླུག་ཚེ་ས་ཆོག་ཅི་ལྟར་བྱ། །དེ་ཕྱིར་ཚད་ལྡན་བསྟན་བཅོས་དེ་རྣམས་ཀྱང་། །གསར་བུ་རྣམས་ཀྱིས་ལག་ཏུ་ལོན་པར་དཀའ། །བཤད་པའི་རྗེས་སུ་འབྲང་བའི་སྦྱིན་སྲེག་འགའ། །ལག་ལེན་མི་བདེ་བཞད་བགད་གནས་སུ་སྣང་། །དེང་སང་སློབ་དཔོན་ཕལ་གྱི་ཕྱག་ལེན་ཡང་། །རྒྱུད་གཞུང་མི་མཐུན་རང་ཟློབཟོ་གང་མོས་དང་། །འགའ་ཞིག་ཤེས་བཞིན་མི་བྱེད་ཆེ་ཚུལ་བཟུང་། །འགའ་ཞིག་མ་ཤེས་ཟ་འདོད་མཆུ་བསྐུང་ཆེ། །ཐིག་ཆེན་བརྒྱད་པ་ཙམ་ཡང་མི་ཤེས་པར། །སྒོ་རུའི་རྩེ་མོས་བྲིས་པའི་ཟླུམ་སྐོར་ལ། །ཕྱེ་དང་ཆུ་བའི་རྡུལ་ཚོན་བྱེད་པ་དང་། །འགའ་ཞིག་ས་ཆོག་ཐིག་ལ་ཉི་མ་འབུད། །དོན་རྩ་སྔགས་ལ་གྲངས་ཉུང་བྱེད་པ་དང་། །ས་བདག་ལྟོ་འཕྱེ་ཐེ་སེ་སྤྲེལ་ཁོག་སོགས། །རྩི་མི་ཤེས་པས་ས་ལ་རྐོ་བ་དང་། །ལྔ་སེར་མཁའ་འགྲོ་དུས་མཚན་བིཊྚི་སོགས། །རྒྱུ་ལྡོག་ཐེབ་ལྡོག་གང་ཡང་མི་ཤེས་པར། །ཁེ་བས་ཉེས་ཆེ་བྱེད་པ་མང་མཐོང་ནས། །བླ་མ་རྡོར་འཛིན་དྲག་པ་དབང་ལྡན་དང་། །ཀརྨ་ཕྲིན་ལས་ལ་སོགས་ཤེས་ལྡན་འགས། །ཡང་ཡང་བསྐུལ་ཕྱིར་ལེགས་པར་སྦྱར་བ་ཡིན། །གོ་སླ་
ལག་ལེན་བདེ་བར་བཀོད་པ་ལ། །རྒྱུད་སྡེའི་ལུང་འདྲེན་གྲུབ་མཐའི་བཞེད་ཚུལ་དང་། །དགག་བཞག་མང་པོ་བྲིས་ན་པོ་ཏིར་ལོངས། །ཙནྡན་བྱང་ཆུབ་ཤིང་སོགས་ཡམ་ཤིང་དང་། །གསེར་དང་དངུལ་གྱི་དགང་གཟར་དགོས་ཚུལ་སོགས། །ཉམས་སུ་མི་ལོན་བྲིས་པས་རྒྱུ་བ་ཆག །དེ་ཕྱིར་བཤད་པ་ཅི་མང་མ་བྲིས་པས། །མི་ཤེས་སྙམ་པའི་ཐུགས་ཁྲེལ་མི་མཛད་ཞུ། །གསར་རྙིང་རྒྱུད་སྡེ་ཀུན་གྱི་དགོངས་པ་བསྟུན། །སློབ་དཔོན་མང་པོའི་ཞལ་ཤེས་མང་པོ་དང་། །མཐོང་བ་བརྒྱུད་པའི་ཕྱག་ལེན་མང་པོས་བརྒྱན། །ཀུན་མཐུན་ཀུན་ལས་ལྷག་འདི་ངོ་མཚར་ཆེ། །འོན་ཀྱང་འགལ་འཁྲུལ་མཁས་པ་རྣམས་ལ་བཤགས། །འདི་བྲིས་དགེ་བས་མེ་དཔུང་རྒྱ་ཆེན་པོས། །འགྲོ་བའི་སྒྲིབ་|གཉིས་བུད་ཤིང་ཀུན་བསྲེགས་ནས། །གཟི་བརྗིད་འོད་དཔག་མེད་པ་ཐོབ་པར་ཤོག །དེ་ཡི་དགེ་བས་བདག་དང་སློབ་མར་བཅས། །བསྟན་བཅོས་འདི་ལ་འབྲེལ་བ་ཐོབ་པ་རྣམས། །ཚེ་འདིར་ཕྲིན་ལས་བཞི་ལ་མངའ་བརྙེས་ཤིང་། །ལུས་འདིར་བོར་མ་ཐག་ཏུ་ནུབ་ཀྱི་ཕྱོགས། །བདེ་བ་ཅན་དུ་བརྫུས་ཏེ་སྐྱེ་བར་ཤོག །ཅེས་པ་འདི་རྣམས་གསང་སྔགས་རྡོ་རྗེ་ཐེག་པ་ལ་མོས་པའི་དགེ་སློང་ཀརྨ་ཨ་རཱ་གས་སྦྱར་བའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །སརྦ་མངྒ་ལཾ། །ཞལ་དྲོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།