ས་བདག་སྟོང་གསུམ་འཁྲུགས་པ་ཡོ་བཅོས་ཀྱི་ལོ་རྒྱུས་ཟིན་བྲིས་གསལ་བར་བཀོད་པ།
ས་བདག་སྟོང་གསུམ་འཁྲུགས་པ་ཡོ་བཅོས་ཀྱི་ལོ་རྒྱུས་ཟིན་བྲིས་གསལ་བར་བཀོད་པ་བི་ཛ་ཧ་ར་ཏིསྨ།
འཕགས་པ་འཇམ་པའི་དབྱངས་ལ་ཕྱག་འཚལ་ལོ། །ས་བདག་འཁྲུགས་པའི་ལོ་རྒྱུས་མང་ན་ཡང་། །བཅོས་པའི་ཐབས་ནི་མང་གསུངས་ཡོད་པའི་ཕྱིར། །འཁྲུགས་བཅོས་བསྡུས་པའི་ལོ་རྒྱུས་ཅུང་ཟད་བྲི། །འཇམ་དཔལ་སྤྲུལ་པར་བཅས་པས་བཀའ་གནང་ཞུ། །ཡང་དག་རྫོགས་པའི་སངས་རྒྱས་ཤཱཀྱ་ཐུབ། །རྒྱ་ནག་དོན་དམ་ཆོས་ཀྱིས་མ་ཐུལ་བས། །ཀུན་རྫོབ་རྩིས་ཀྱིས་འདུལ་དགོངས་འཇམ་དཔལ་སྤྲུལ། །རྩིས་ཀྱི་སྒོ་མོ་ཉི་ཁྲི་ཆིག་སྟོང་གསུངས། །བག་རྩིས་རོ་རྩིས་བསམ་མི་ཁྱབ་པ་མཛད། །ཆོས་ཀྱི་བདེན་པ་མ་མཐོང་ཀུན་རྫོབ་ཀྱི། །བདེན་པ་མཐོང་བར་
དགོངས་ནས་རྩིས་ཀྱི་དཔེ། །ཐམས་ཅད་བསྲེ་ཡི་གའུར་བཅུག་ནས་གཏེར་དུ་སྦས། །དེ་ཡི་ཉེས་པས་སེམས་ཅན་ཐམས་ཅད་དང་། །རྒྱ་ནག་ཡུལ་གྱི་རྒྱལ་ཁམས་ཐམས་ཅད་ལ། །མི་རུང་སྣ་དགུ་ཤར་ཏེ་ཚེ་ཐུང་བས། །ལོ་ཉེས་སད་སེར་མུ་གེ་མི་གདུག་ནད། །ཁོལ་བུར་དར་ཏེ་རྒྱལ་ཁམས་མ་བདེ་བས། །རྒྱ་ནག་ཡུལ་དེ་སྟོང་ལ་ཐུག་པ་བྱུང་། །དེ་ཚེ་རྒྱལ་བའི་ཡེ་ཤེས་སྤྱན་གྱིས་གཟིགས། །སྤྲུལ་པ་ལྔ་ལ་ཀོང་ཙེ་འཕྲུལ་རྒྱལ་སྤྲུལ། །ཁྱད་པར་ཀོང་ཙེ་རིགས་ལྔར་སྤྲུལ་བྱས་ནས། །ཀུན་རྫོབ་དོན་དམ་རྩིས་སྨན་གཏོ་སོགས་མཛད། །ཁྱད་པར་འཇམ་དཔལ་ལུང་བསྟན་སྤྱན་
རས་གཟིགས། །རྒྱུད་བསྐུལ་ཨོ་རྒྱན་ཆེན་པོ་པདྨ་དེས། །ཚངས་པ་གདོང་བཞིར་སྤྲུལ་ནས་རྒྱ་ནག་ཡུལ། །སྔོན་གྱི་འཇམ་དཔལ་གཏེར་དུ་སྦས་པའི་གཏེར། །ཐམས་ཅད་བཏོན་ནས་ཀོང་ཙེ་འཕྲུལ་རྒྱལ་དང་། །ལྷ་ཡི་བུ་མོ་རྣམ་རྒྱལ་ཀླུ་དགའ་བོ། །དེ་སོགས་འདུས་པའི་འཁོར་གྱིས་ཞུ་བ་བྱས། །རྒྱ་ནག་རྒྱལ་ཁམས་ཀུན་རྫོབ་བདེན་པས་བཏུལ། །རྒྱ་ནག་ཡུལ་གྱི་རྒྱུད་དང་མན་ངག་ལ། །ཚངས་པ་ཟེར་ཚད་ཨུ་རྒྱན་ཡིན་པ་སྐད། །རོ་ནི་ཧལ་ཁྱིའི་ཁ་ལ་བཅུག་པས་ན། །དེ་ཡི་བཅོས་ཐབས་སུམ་བརྒྱ་དྲུག་ཅུ་ཡོད། །བག་མ་གནམ་ཁྱིའི་ཁ་དང་མཇུག་ལ་ཕོག །དེ་ཡི་བཅོས་ཐབས་སུམ་སྟོང་དྲུག་བརྒྱ་ཡོད། །ཧྭ་ཤང་ས་བདག་གཏོ་བཅོས་དཀར་པོ་མཛད། །ཧྭ་ཤང་ནག་པོས་གཏོ་ནག་མང་པོ་བརྩམས། །དེ་སོགས་གྱེར་དགོས་གཏོ་ལ་འབུམ་ཐེར་གཅིག །གྱེར་མི་དགོས་པ་བརྒྱ་དང་བརྒྱད་ཅུ་གཅིག །ལོ་རྒྱུས་སྨྲ་བཤད་བྱ་བ་བརྒྱ་རྩ་བརྒྱད། །རྒྱ་ནག་ཡུལ་གྱི་གཏོ་མཛོད་བགྲང་ལས་འདས། བན་མིན་བོན་མིན་གཏོ་ལ་ངེས་པ་མེད།་རྒྱ་གཏོ་ཕལ་ཆེར་གྱེར་སྦྱང་ཡིན་པ་ལ། །མདོས་ལེན་འདི་དང་འདི་ཞེས་འབོད་རྒྱུ་མེད། །མཆོད་མགྲོན་ཚུར་ཤོག་ཕར་སོང་ཟེར་བ་མེད། །
དེ་ཚོ་རྒྱ་ཡི་གྱེར་གཏོ་ནག་པོ་ཟེར། ༈ །ཡང་དག་རྫོགས་པའི་སངས་རྒྱས་དེ་ཉིད་ཀྱིས། །དཔལ་ལྡན་དུས་ཀྱི་འཁོར་ལོར་སྤྲུལ་བྱས་ནས། །ས་ཡི་ལྷ་མོ་བརྟན་མ་ལྷ་ཚངས་པ། །འཇམ་དཔལ་ཕྱག་རྡོར་ཀུན་དགའ་བོ་ཆེན་པོ། །བརྒྱ་བྱིན་ཀླུ་རྒྱལ་དགའ་བོ་ལ་སོགས་པས། །ཞུ་བ་པོ་བྱས་དུས་འཁོར་རྒྱུད་གསུངས་པས། །རྒྱུད་ནི་བམ་པོ་སུམ་བརྒྱ་ཡོད་པ་ལས། །རྩིས་དཀར་རྩིས་ནག་དབྱངས་འཆར་རྒྱུད་ཀུན་གསུངས། །དེ་ཡི་ས་རྩིས་འཕྲུལ་རྩིས་གསར་མ་དང་། །རི་བོ་རྒྱ་མཚོ་ལ་སོགས་བྱེད་གྲུབ་གཉིས། །གཟའ་སྐར་འཕྲུལ་རྩིས་ལ་སོགས་དེ་ལ་བརྟེན། །དེ་བརྟེན་གཏོ་བཅོས་བརྒྱ་དང་རྩ་བརྒྱད་པོ། །རྒྱ་གར་ནས་བསྒྱུར་ཛེ་ཏཱ་རི་པས་མཛད། །གཏོ་དཀར་ཟེར་བ་རྩ་བ་བཞི་ཡོད་དེ། །དེ་ལ་བརྟེན་པ་གྲངས་མེད་བཞུགས་པ་རྣམས། །པཎ་གྲུབ་རྣམས་ཀྱིས་མཛད་པ་བོད་དུ་བསྒྱུར། །མདོ་རྒྱུད་བསྟན་བཅོས་གཉིས་ལས་གསུངས་པ་དེ། །རྒྱུད་ཚིག་མིན་པ་མེད་པས་ཁ་བཀང་ཨནས། །ཡོད་པ་རྟོག་གེ་པ་ཡིས་བརྩམས་སོ་ཟེར། ༈ །དེ་ནས་གཏེར་དུ་སྦས་པ་ལུས་འཕྲོ་དེ། །རྒྱ་དང་རྒྱལ་རོང་གཉིས་ཀྱི་ས་མཚམས་ལ། །རི་བོ་ས་དུ་ར་ཞེས་བྱ་བ་ན། །
འཇམ་དཔལ་སྦས་པའི་གཏོ་འབུམ་བྱེ་བ་གཅིག །གཞན་ཡང་ཕན་གནོད་དཔེ་ཚན་ས་ཡ་གཅིག །གཏེར་དུ་སྦས་པ་བེ་རོ་ཙཱ་ནས་བཏོན། །རྒྱལ་པོའི་སྲས་མོ་གཡུ་སྒྲ་ལོ་ཙཱས་བསྒྱུར། །དེ་ལ་བཻ་རོའི་གབ་རྩེ་དཀར་ནག་ཁྲ། །གཏོ་ཁྲམ་གཏོ་འབོད་གཏོ་བྱང་གཏོ་ཡི་བྱད། །ཐག་པ་བཅད་གཏད་གྲོལ་སྒབ་དེད་པ་སོགས། །ཐམས་ཅད་ཚང་བ་བེ་རོའི་འགྱུར་ཡིན་གསུངས། །མགོན་པོའི་རྒྱུད་དང་མ་མོ་ནག་མོའི་རྒྱུད། །ས་བདག་སྲིད་རྒྱུད་ཡོ་བཅོས་ས་གཡང་སྒྲུབ། །ས་བདག་སྙིང་གཏེར་ས་བདག་བཤགས་འབུམ་དང་། །ས་བདག་ཕྱག་འཚལ་ས་བཅོས་རྡོ་བཅོས་དང་། །དེ་ལ་སོགས་པ་བཤད་དུ་མི་ལངས་བ། །རྒྱལ་མོ་རོང་ནས་ཡར་ལ་དཔག་མེད་བསྒྱུར། ༈ །སྔོན་དུས་ཆོས་རྒྱལ་སྲོང་བཙན་སྒམ་པོའི་དུས། །རྒྱ་བཟའི་རྫོངས་ལ་ས་བདག་དབང་ཆེན་རྒྱུད། །རྩིས་རྒྱུད་སྔ་འགྱུར་དཔག་མེད་འགྱུར་བ་དང་། །ཁྲི་སྡེ་གཙུག་བརྟན་ཁྲི་སྲོང་ལྡེའུ་བཙན་དུས། །གཏོ་རྩིས་གཉིས་ལ་གྲངས་མེད་དཔེ་འདས་འགྱུར། །ཁྲི་རལ་དུས་ལ་གསོན་དཔྱད་གཤིན་དཔྱད་སོགས། །གཏོ་འབུམ་དང་ནི་མཐུ་འབུམ་མང་པོ་འགྱུར། །བོད་དུ་ནམ་ཤི་ཚེ་ཡི་རིང་ཐུང་དང་། །མི་ཚེ་སྐྱིད་སྡུག་ཅི་འོང་ཤེས་པར་འབྱུང་། །
ཡིག་ཆ་གསལ་པོར་སྤེལ་དུ་མ་བྲ་སྟེ། །རྒྱལ་པོ་རང་གི་ལག་ཏུ་མ་བྲལ་བླངས། །དུས་མི་རིང་དུ་གླང་དར་གྱིས་ནི་བསྣུབས། །རྩིས་དང་གཏོ་ནི་རྩིས་ཆེར་ཡོད་པ་ནི། །ཐམས་ཅད་ནུབ་སྟེ་བོད་འདིར་མིང་མ་གྲགས། ༈ །ལར་ནི་གཏོ་ཕུག་རྩིས་ཡིན་རྩིས་ཕུག་གཏོ། །རྩིས་མ་བྱས་པར་གཏོ་ནི་བཅའ་དགོས་མེད། །གཏོ་དེ་མ་དར་རྩིས་དེ་དགོས་པ་མེད། །ཐུབ་པས་གསུངས་པའི་ཆོས་ཚོ་རྩིས་ལ་འོང་། །ཀོང་ཙེས་མཛད་པའི་གཏོ་ཚོ་རྩིས་ལ་འོང་། །རྩིས་འདི་དགེ་སྐུལ་ཆེན་པོ་འོང་བ་ཡིན། །ཡི་དྭགས་བར་དོའི་སེམས་ཅན་སྦྱིན་གཏོང་འོང་། །དེ་བས་རྩིས་འདི་ཀུན་རྫོབ་གསུངས་ནའང་། །དོན་དམ་བདེན་པ་ཡོད་པར་བདག་གིས་སེམས། །ཐམས་ཅད་ཐུགས་ལ་རྩིས་འདི་བཞག་པར་ཞུ། ༈ །དེ་ནས་སབདག་དབང་ཆེན་ཟེར་བའི་གཏོ། །ས་བདག་གཏོ་ཕུག་དཀར་པོའི་རྒྱུད་ལས་བྱུང་། །ཆོས་འདི་དབུས་ནས་མ་དར་མཐའ་ནས་དར། །ཁྱད་པར་ཁམས་འདིར་དར་ཆ་ཆེ་བས་ན། །ཡི་སྒྱུགེ་མང་དྲགས་བརྩི་ཚོད་མེད་པ་དང་། །ཕུགས་ནི་ཆོད་མི་ཐུབ་པ་བྱུང་བས་ན། །རྒྱ་ཤིང་འཁྲུགས་གསུམ་མིང་དུ་བཏགས་པ་དང་། །བཀའ་གཏེར་འཁྲུགས་གསུམ་མིང་དུ་གྲགས་པས་
ན། །བདག་གི་ཕ་རྒན་སྔགས་འཆང་དང་། །རང་པོ་བསོད་ནམས་ཡེ་ཤེས་དང་། །ཆབ་མདོའི་སྔགས་པ་མདོ་འབུམ་གསུམ། །ལྷོ་རོང་རྫོང་ལ་ས་བདག་བཅས། །དེ་དུས་རམ་བུ་མཆོད་གཡོག་བྱས། །དབང་ཆེན་དུམ་པ་བདུན་ཙམ་ལ། །བཀའ་གཏེར་འཁྲུགས་གསུམ་མ་གཏོགས་པ། །རྒྱ་ཤིང་འཁྲུགས་གསུམ་ཟེར་བ་མེད། །རང་པོ་བསོད་ནམས་ཡེ་ཤེས་ཀྱིས། །བཀའ་མ་ཤཱཀྱ་ཐུབ་པ་ཡིས། །གསལ་རྒྱལ་ཕོ་བྲང་བཏབ་དུས་མཛད། །དེ་ནས་རྒྱ་ནག་ཡུལ་དུ་བསྒྱུར། །པཎ་ཚར་ཟེར་བའི་དཔེ་ཚན་ལ། །འདྲ་བ་མི་འདྲ་བཅུ་ གསུམ་ཡོད་། །ས་བདག་འཁྲུགས་རྒྱུད 
་དངོས་ནས་གསུངས། །དེང་སང་རྒྱལ་རོང་ཁོག་ལ་དར། །གཏེར་མ་རི་བོ་ས་དུར་དར། །བེ་རོ་ཙཱ་ནས་གཏེར་བཏོན་པས། །གཏེར་མ་ཟེར་བ་དེ་ལས་བྱུང་། །དབང་ཆེན་དངོས་དང་གླུད་འཇལ་སོགས། །དཔེ་ཚན་ཉི་ཤུ་རྩ་གཅིག་ཡོད། །ཕྱེད་ཕྱེད་བོད་འདིར་དར་བར་འདུག །རྒྱུ་ཚེ་ཟེར་བའི་འཁྲུགས་བཅོས་གཞུང་། །པོད་བུམ་ཆེ་བ་བདུན་ཙམ་ཡོད། །སེར་སྐྱ་ཡིག་ཆ་བཟང་བ་ནི། །བདུན་གྱི་བཏོན་མིག་མི་ཚང་གསུངས། །ཤིང་ཚེ་རྒྱ་ཚེ་འཁྲུགས་བཅོས་གསུམ། །གཅིག་ཡིན་ལོགས་ན་མེད་དོ་
གསུངས། །འབྱུང་བ་ལྔ་ལ་ལེའུ་ཁ་གཅིག །ས་བདག་དངོས་ལ་བཅུ་གསུམ་ཡོད། །སྦར་ཁ་བརྒྱད་ལ་འདྲ་མིན་གྱི། །ཡི་གེ་བརྒྱ་དང་བརྒྱད་ཅུ་ཡོད། །ལོ་ལ་ལོ་གཏོ་ཟེར་བ་དང་། །གཤེད་བཞིའི་གཤེད་གཏོ་ཟེར་བ་དང་། །ལོ་བཅོས་སུམ་བརྒྱ་དྲུག་ཅུ་ཡོད། །གཤེད་བཞི་ལ་ནི་བཅུ་གསུམ་ཡོད། །སྨེ་བ་བརྒྱད་ཅུ་རྩ་གཅིག་ཡོད། །ལྷ་ཀླུ་གཟའ་ཆེན་རྒྱུ་སྐར་དང་། །གཉན་དང་སྡེ་བརྒྱད་ཐམས་ཅད་ལ། །ཀུན་ལ་ལེའུ་ཁ་གྲངས་མེད་ཡོད། །ཤིང་ཚེ་དངོས་ལ་བཅུ་གསུམ་ཡོད། །བྱང་བུ་རྒྱང་བུ་མདའ་འཕང་པན། །ནམ་མཁའ་མདའ་དར་ཡོལ་བ་དང་། །བླ་རེ་གདུགས་དང་རྒྱལ་མཚན་དང་། །མེ་ལོང་གྲི་མདུང་པགས་བུ་དང་། །རྒྱང་མཛོད་ལ་སོགས་ཐམས་ཅད་ལ། །ལེའུ་རེ་ཡོད་དེ་བསྡུ་མི་ཐུབ། །དེ་ནས་ཡན་ལག་ཡི་གེའི་གྲངས། །གཟའ་ཀླུ་གཉིས་ལ་འདྲ་མིན་དང་། །བདུད་དམུ་གཉིས་ལ་འདྲ་མིན་དང་། །བཙན་དང་གྲི་བོ་འདྲ་མིན་དང་། །སྨན་བཟེད་གཉིས་པ་དང་ཀླུ་ཐེའུ་གཉིས། །དགུ་མིག་སྣང་བརྒྱད་ཀ་གདུང་དང་། །སྲིད་པ་ཡོ་བཅོས་སྙིང་དཀར་ནག །ལི་ཁམ་བདུན་གཏོ་གྲངས་ལས་འདས། །རང་པོ་བསོད་ནམས་ཡེ་ཤེས་གསུངས།
དེ་ནས་བོད་འདིར་དར་བའི་ཆབ་ཆོབ་མང་། །བོད་ལ་དར་རྒྱ་ཆེ་བ་དབང་ཆེན་འདི། །གཞུང་ནི་འདྲ་བ་མི་འདྲ་མང་ན་ཡང་། །གཞུང་དོན་ཐམས་ཅད་རྒྱ་ཚེ་ཁོ་ནའོ། །འཁྲུགས་བཅོས་གཞུང་ལ་དཔེ་ཚེམ་ཡོད་གྲངས་ལ། །ཐིག་གདབ་ཤིང་རྩི་དཀར་པོ་མར་ཤིང་བཙུགས། །བཅོས་པ་འདི་དག་བཅའ་ཐབས་རྫས་བསགས་པ། །བདག་བསྐྱེད་རྣམ་རྒྱལ་ལས་བུམ་མདུན་བསྐྱེད་དང་། །ལོ་རྒྱུས་ཟུར་ཙམ་སྤྱན་འདྲེན་བཞུགས་གསོལ་དང་། །དགྱེས་པ་བསྐྱེད་པ་ཡན་ཆད་སྔོན་འགྲོ་ཡིན། །དངོས་གཞི་ཕྱག་འཚལ་བཤགས་པ་ལྷ་ཁྲུས་གསུམ། །འཁྲུགས་པ་སྤྱི་བཅོས་སྤར་ཁའི་ལེའུ་ཁ་དང་། །ལོ་སྐོར་ལེའུ་ཁར་སྣང་བརྒྱད་བསང་ཡིག་གསུམ། །དངོས་གཞི་ཡིན་པས་ཚར་གྲངས་དུ་ཐོན་བྱ། །སྔགས་ལ་ཤམ་བུ་བཏགས་ནས་བཟླ་བར་བྱ། །སྐུ་བསྟོད་ཡན་ཆད་དངོས་གཞི་ཆ་ཚང་ཡིན། །རྗེས་ལ་སྒོ་དབྱེ་དངོས་གྲུབ་ལེན་པ་དང་། །བཀྲ་ཤིས་བརྗོད་ལ་སྨོན་ལམ་བཏབ་པ་དང་། །གཤེགས་གསོལ་རྡུལ་ཚོན་བསྡུ་བས་ཚང་བའོ། །བག་མ་ཡིན་ན་གནམ་ཁྱིའི་བཅོས་པ་བཙུད། །སྤུར་གྱི་དོན་ཡིན་དུར་ཁ་རྒྱས་འདེབས་བཏགས། །ཁང་ལས་དང་པོར་ས་བདག་སྙིང་གཏེར་
བཏགས། །བར་པར་ས་གཡང་སྤར་ཁེབས་དེ་དང་སྦྲགས། །ཁང་ལས་ཐ་མར་ཡུལ་གྱི་ཁ་དོག་སྦྲགས། །ཡུལ་སར་བཟུང་ན་ཡུལ་ལྷའི་བཅོས་དང་སྦྲགས། །ཀླུ་དང་འགྲས་ཟེར་ཀླུ་ཆོག་དངོས་དང་སྦྲགས། །གཉན་དང་འགྲས་ན་གཉན་འབུམ་དལ་བཀྱག་སྦྲགས། །ས་བཅུད་སྤེལ་ན་སྣང་བརྒྱད་ཉང་མ་སྦྲགས། །དགྲ་བླ་གུད་ན་ཡར་བསང་བརྔན་དང་སྦྲགས། །དགེ་བསྙེན་འགྲས་ན་དེ་ཡི་བཅོས་པ་སྦྲགས། །གཟའ་ནད་བྱུང་ན་གཟའ་བཅོས་དེ་དང་སྦྲགས། །ས་གནད་ཉམས་ན་ས་བདག་སྙིང་གཏེར་སྦྲགས། །དེ་བཞིན་མི་འདྲ་བཅུ་
གསུམ་འདི་ཡི་གཏོ་བཅོས་ལུགས། །ས་བདག་གསེར་ཁོག་དངུལ་ཁོག་རྒྱུད ་དང་བསྟུན། །བདག་གི་ཕ་རྒན་སྔགས་པ་རྒས་པོ་ཡིས། །སི་ཏུ་ཆོས་ཀྱི་རྒྱ་མཚོའི་ལག་ལེན་ཁྲིད། །འདི་ལུགས་བསླབས་པ་བདག་གིས་བྲིས་སོ་སྐད། །གཞན་ཡང་གཟའ་ཀླུ་འཁྲུགས་བཅོས་སྙིང་དཀར་ནག །གནམ་སྒོ་ས་སྒོ་བཞི་སོགས་གཏོ་བཞི་དེ། །འདི་རུ་ཉུང་ཙམ་ཁ་མ།ཐོན་ཙམ་དུ་ཡོད། །དེ་བས་རགས་བསྡུས་ཉུང་ངུ་ཉུང་ངུར་བསྡུས། །དཔེ་ཚེམ་ཉུང་ཡང་ཚིག་དོན་ཆ་ཚང་བ། །རྒྱས་འབྲིང་བསྡུས་དང་ཡང་བསྡུས་འཁྲུགས་བཅོས་རིགས། །མི་འདྲ་
མི་གཅིག་སུམ་ཅུ་ཙམ་ཞིག་བརྩམས། །ང་རང་རང་བཟོ་མ་ཡིན་རྒྱལ་བའི་བཀའ། །ཡི་གེ་ཉུང་ཡང་ཚིག་དོན་ས་ལེར་གསལ། །གྲགས་པའི་དབྱར་རྔའི་ཆར་རྒྱུན་འབེབས་པར་ངེས། ༈ །དབང་ཆེན་རྒྱས་པར་བོད་དུ་མ་དར་ཡང་། །མདོར་བསྡུས་ཤུན་རྩིའི་ནང་དུ་ཤིང་ཏ་ལའི། །ལོ་མར་བྲིས་པའི་ཡི་གེ་དཔེ་བུམ་གཅིག །མཁས་པ་གྲགས་ཏེ་བྱ་བས་བོད་དུ་བསྒྱུར། །མེ་ཉག་ལྕེ་འབར་བྱ་བས་ས་རྩིས་སྐོར། །གླང་ཆེན་འགྱིང་རིའི་ཧུན་དྷུ་རུ་ལ་ཞུས། །གསེར་གྱི་ཞོ་ཁལ་ཕུལ་བས་འཁྲུགས་བཅོས་དང་། །ལར་ཡང་ཡི་གེ་པོད་ལངས་བདུན་ཙམ་སྨྱུགནང་། །དེ་གཉིས་བསྡེབས་པས་རྒྱ་ཤིང་གཉིས་ཟེར་ཡང་། །དོན་ལ་རྒྱ་ཚེ་མ་གཏོགས་གཞན་ན་མེད། །དེ་བས་གཏོ་བཅོས་མང་ཡོད་འདིར་མ་དར། །ཁྱད་པར་ས་བདག་འདི་ཚོ་བཅའ་བའི་དུས། །ས་བདག་ཐེབས་ལ་ཕོག་ན་ཤིན་ཏུ་ལེགས། །འདི་ལ་ཤ་ཁྲག་མི་རུང་ཟེར་བྱུང་ན། །ཡིག་རྙིང་ངོས་ལ་བྱང་དུ་ཤ་དུམ་བདུན། །གསུངས་པས་ཤ་དུམ་མཐའ་ལ་འཁོར་བར་བཞག །ཀླུ་བཅོས་དུས་ལ་ཤ་ཁྲག་བཞག་པ་མིན། །དཀར་གསུམ་མངར་གསུམ་མེ་ཏོག་དམར་པོ་བཞག །དེ་བཞིན་འདོན་ཆ་ནང་བཞིན་ལྟར་དུ་བཅའ། ༈ །འབྲིང་
བར་དཀྱིལ་འཁོར་དབུས་སུ་སྤྱོད་བཤོས་ཟླུམ། །དེ་མདུན་ཞལ་དཀར་དེ་རྒྱབ་པད་ཕོར་བཞི། །མཚམས་བཞིར་ཞལ་དཀར་བཞི་བཞག་དེ་ཡི་ཕྱིར། །སྤར་ཁ་བརྒྱད་་ལ་རང་རང་བཤོས་བུ་བརྒྱད། །སྨེ་བ་དགུ་ལ་དེ་བཞིན་དགུ་ཚར་དགུ། །དེ་བཞིན་མདུན་དུ་ལོ་སྐོར་བཅུ་གཉིས་ཀྱི། །བཤོས་བུ་སྤར་ཁའི་སྐག་བསྒྱུར་ནང་ལྟར་བཅའ། །སྲུང་བཞི་གཟུགས་བཞིའི་རྒྱབ་དེར་ལོ་བཤོས་དང་། །དེ་རྒྱབ་ཟླུམ་གཏོར་རིལ་བུས་བརྒྱན་པ་བརྒྱད། །གཟའ་ལ་རུ་ལྡེབ་དཀྱུས་པ་འདྲ་བ་དང་། །རྒྱུ་སྐར་ཉེར་བརྒྱད་ལྷ་བཤོས་རྩེ་རྒྱལ་དང་། །ཞལ་དཀར་འབྲང་རྒྱས་བརྒྱད་དང་བཅས་པ་དང་། །དེ་ཕྱིར་སྡེ་བརྒྱད་ཡར་རྗེའི་བཤོས་བུ་བརྒྱད། །སྒོ་བཞིར་རྒྱལ་ཆེན་སྡེ་བཞི་ལྕོག་ཟླུམ་པོ། །དེ་རྣམས་ཀླད་དུ་རྒྱང་བུ་སྐུ་གཟུགས་བཙུགས། །དེ་ཕྱིར་མཆོད་པ་སྣ་ཚོགས་བཤམས་པའོ། །དེ་ཕྱིར་ཤིང་རྩི་བཙུགས་པས་འཐུས་པ་ཡིན། ༈ །བསྡུ་ན་དཀྱིལ་འཁོར་པད་མ་འདབ་མ་བརྒྱད། །དེ་མཐར་མཆོད་བཤམས་དཀར་གཏོར་དགུ། །དབུས་དང་ཕྱོགས་མཚམས་བརྒྱད་དུ་བཀོད། །དེ་མཐར་ཤིང་རྩི་བཙུགས་པས་འཐུས། །འདི་ལ་བསྐང་བ་གསུངས་ན་ཡང་། །བསང་མ་གཏོགས་པ་
མི་དགོས་སོ། །ཚོགས་ནི་ཡོད་ན་སྐོང་བ་དགོས། །དེ་བས་བསང་དང་འབྲེལ་བ་ན། །བསྐང་བ་མི་དགོས་པར་ནི་གསུངས། །ཅི་ཕྱིར་བསང་དང་བསྐང་བ་གཅིག །གསུངས་སོ། །རྒྱང་བུ་ཏང་ཚེ་ཁྱད་པར་ཆེ་བའི་ཕྱིར། །རྒྱང་བུ་རྒྱང་མཛོད་དཔེའུ་རིས་ལྟར་ལྟོས། །ཏང་ཆེ་རྒྱ་ཧོར་ནས་བྱུང་ཆོག་པར་གསུངས། །མ་བྱུང་བ་ནི་བྲན་བྱས་རུང་ངོ་གསུངས། །ས་བདག་ལོ་རྒྱུས་ཟིན་བྲིས་བྲིས་པ་འདིས། །ཁ་མཁས་ཟོལ་པོ་ཡིད་ཆེས་འགྲོ་བ་དང་། །འགྲོ་བ་ཉམ་ཆུང་བར་ཆད་རྐྱེན་ལས་ཐར། །ཚེ་འདིར་ནད་དང་སྡུག་བསྔལ་ཞི་བ་དང་། །འདི་བརྩམས་སྔགས་པ་ཞལ་དྲོ་བདེ་སྐྱིད་ལྡན། །བཀྲ་ཤིས་བདེ་ལེགས་ཡུན་དུ་གནས་པར་ཤོག །ཅེས་པ་སྣོན་ཟླའི་ཚེས་བཅུར་བྲིས་པའོ། །རཱ་ག་ཨ་སྱས་འཁྲུགས་བཅོས་་་་དབང་ཆེན། འགའ་ནས་བསྡུས། །ཀརྨ་ཚེ་བརྟན་ཐུགས་རབ་བརྟན་པར་ཤོག །སརྦ་མངྒ་ལ་ཀུརླནྟུ། དགེའོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།