འཕགས་པ་ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་དོན་འདུས་གོ་བདེར་བཀོད་པ་རྒན་མོ་མཛུབ་ཚུགས།

---

^{[མ་དཔེ་གཟིགས་ན་འདིར་གནོན།]}

འཕགས་པ་ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་དོན་འདུས་གོ་བདེར་བཀོད་པ་རྒན་མོ་མཛུབ་ཚུགས་ཞེས་བྱ་བ་བཞུགས་སོ། །འདི་ཉིན་རེ་ཆོས་ཐུན་རེ་རེ་བཤད་དེ། དེ་ཡང་ལན་གཅིག་རྣ་བར་འགྲིམ་ཙམ་གྱིས་མི་ཆོག་པས་ཚར་གསུམ་བཤད་ནས་གོ་ངེས་བྱ། ཕྱིར་ཉིན་ཆོས་ཐུན་གྱི་བར་ལ་དེའི་དོན་རྩེ་གཅིག་ཏུ་བསྒོམ་འཇུག །ཕྱིར་ནངས་དེའི་དོན་གོའམ་འདྲི་ཐོན་ན་ལེགས་སོ། །

---

^{[མ་དཔེ་གཟིགས་ན་འདིར་གནོན།]}

ན་མོ་གུ་རུ་ལོ་ཀི་ཤྭ་ར་དྷེ་ཝ་ཌཱཀི་ནཱི་ཧཱུྃ། རྩ་གསུམ་ཀུན་འདུས་དྷརྨེ་ཤྭ་ར་ལ། །ཕྱག་འཚལ་བཀའ་གནང་བྱིན་གྱིས་བརླབ་ཏུ་གསོལ། །དམར་ཁྲིད་ཕྱག་རྫོགས་ཟུང་འཇུག་ཁྲིད་ཆེན་གྱི། །དོན་བསྡུས་གོ་བདེ་རྒན་མོ་མཛུབ་ཚུགས་ནི། །དང་པོ་བླ་མའི་མཚན་ཉིད་མང་དུ་གསུངས་ཀྱང་། བླ་མའི་མཚན་ཉིད་རྣམས་བདག་ལ་མི་ལྡན་ན་ཡང་། དུས་སྙིགས་མའི་སྐབས་སུ་སྐྱོན་མེད་ཡོན་ཏན་ལྡན་པའི་བླ་མ་དཀོན་ཏེ། དོན་དམ་བསྙེན་པ་ལས། སྙིགས་དུས་དབང་གིས་བླ་མའི་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །

---

^{[མ་དཔེ་གཟིགས་ན་འདིར་གནོན།]}

གང་ཞིག་ཡོན་ཏན་ལྡན་པ་ཡང་ནི་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ། །ཞེས་གསུངས་སོ། །དེ་ལ་དགོངས་ནས་བཀའ་གདམས་བླ་མ་རྣམས་ཀྱིས། གང་ཟག་སྐྱོན་གྱིས་ཆོས་ལ་མི་གོས། ཞེས་གསུངས། ནཱ་རོ་པའི་གསུངས་ལས། བླ་མའི་མཚན་ཉིད་བརྒྱུད་པར་ལྡན། །ཞེས་དང་། རྡོ་རྗེའི་གསུངས་དགོངས་པ་གཅིག་པ་ལས། དམ་ཆོས་བརྒྱུད་པར་འབྲེལ་པ་ཉིད་ཟབ། ཅེས་གསུངས་པས། ཆོས་འདི་ནི་རྟོགས་པ་དོན་གྱི་བརྒྱུད་པ་བྱིན་རླབས་ཀྱི་འཕོ་བ་ཅན། སངས་རྒྱས་ཀྱི་ཕྲེང་བ་བར་མ་ཆད་པ་

---

^{[མ་དཔེ་གཟིགས་ན་འདིར་གནོན།]}

སྟེ། རྡོ་རྗེ་འཆང་ཏཻ་ལོ། ནཱ་རོ། མར་མི་དྭགས་གསུམ་ནས། དབང་ཕྱུག་རྡོ་རྗེ། འོད་དཔག་མེད་མིའི་གཟུགས་འཛིན་པ་ཆོས་ཀྱི་དབང་ཕྱུག །དེའི་ཞབས་དྲུང་ནས་བདག་རཱ་ག་ཨ་སྱའི་ཕྱག་རྒྱ་ཆེན་པོའི་ཁྲིད་ཟླ་བ་གཅིག །ལྔ་ལྡན་གྱི་རྒྱས་བཤད་དགོངས་པ་གཅིག་པ་བདུན་གཉིས་ཙམ་ཐོབ་པས། འཇམ་དབྱངས་ཀླུ་སྒྲུབ་ནས་བརྒྱུད་པའི་ཟབ་མོ་ལྟ་རྒྱུད། བྱམས་པ་ཐོག་མེད་ནས་བརྒྱུད་པའི་རྒྱ་ཆེན་སྤྱོད་རྒྱུད། འཇམ་དབྱངས་ཞི་བ་ལྷ་གསེར་གླིང་པ་ནས་བརྒྱུད་པའི་བློ་སྦྱོང་དང་། དུས་མཁྱེན་གྱིས་བླ་མ་བྲག་དཀར་བ་ལ་རྫོགས་ཆེན་ཨ་རོ་སྙན་བརྒྱུད་གསན། ཀརྨ་པཀྴིས་ཀཿཐོག་པ་བྱམས་པ་འབུམ་ལ་མདོ་སྒྱུ་སེམས་གསུམ་ཞུས་ནས་མཁས་པར་སྦྱངས་ནས་ཉིད་ཀྱི་མཛད་ཆོས་རྣམས་ཀྱང་ཕྱག་རྫོགས་ཟུང་འཇུག་མཛད། རང་བྱུང་རྡོ་རྗེས་པདྨ་ལས་འབྲེལ་རྩལ་མཁའ་འགྲོ་སྙིང་ཐིག་ཞུས་པས། དེས་ན་རྫོགས་ཆེན་གྱི་དོན་བརྒྱུད་ཡང་བརྒྱུད་པ་འདི་ལ་འདུས། ཐུགས་རྗེ་ཆེན་པོའི་དམར་ཁྲིད་སྐུ་གསུམ་ངོ་སྤྲོད། ཐུགས་རྗེ་ཆེན་པོ་མི་ཏྲ་ལུགས་ཀྱི་དམར་ཁྲིད། ཐུགས་རྗེ་ཆེན་པོ་ཡང་གསང་བླ་མེད་ཀྱི་དམར་ཁྲིད་སེམས་ཉིད་ངལ་གསོ། ཐུགས་རྗེ་

---

^{[མ་དཔེ་གཟིགས་ན་འདིར་གནོན།]}

ཆེན་པོ་གསང་བ་འདུས་པའི་དམར་ཁྲིད། དཔལ་མོ་ལུགས་ཀྱི་དམར་ཁྲིད། ཚེམ་བུ་ལུགས་ཀྱི་དམར་ཁྲིད་དང་། ཐུགས་རྗེ་ཆེན་པོ་ངན་སོང་རང་གྲོལ། ཐུགས་རྗེ་ཆེན་པོ་དོན་ཏྲིག །དེ་ཐམས་ཅད་ཀྱི་དོན་གྱི་རྩ་བ་ནི་ཟུང་འཇུག་བརྒྱུད་རིམ་འདི་ལ་འདུས། གྲུབ་ཆེན་རྨ་སེ་ནས་ཚེར་ལུང་དྲུང་སྐྱིད་ཀུན་དགའ་རྣམ་རྒྱལ། དེའི་དྲུང་ནས་བདག་རཱ་ག་ཨ་སྱའི་ཕྱག་རྒྱ་ཆེན་པོའི་ཁྲིད་ཞག་བཅོ་བརྒྱད་ཐོབ་སྟེ། གྲུབ་ཆེན་ཀརྨ་པཀྵིའི་ཞལ་ནས། མིང་ཡོངས་སུ་གྲགས་པ་ཀརྨ་པ་དང་ཐུགས་རྗེ་ཆེན་པོའི་བར་ན་བརྒྱུད་པ་གཞན་ཡོད་ཀྱང་ཉན། མེད་ཀྱང་ཉན་གསུངས་པས། རྗེ་བཅུ་པའི་ཞལ་སྔ་ནས། ཐུགས་རྗེ་ཆེན་པོའི་བསྒོམ་ལུང་བླ་མའི་རྣལ་འབྱོར་ཕྱག་ཆེན་ངོ་སྤྲོད་རྣམས་ཐོབ། མི་འགྱུར་རྡོ་རྗེའི་ཆོས་བདག་གཏེར་བློན་དུ་ལུང་བསྟན་ཅིང་། ལོ་གསུམ་གཟིམ་མ་གཅིག་ཏུ་བྱས་ནས། རྫོགས་ཆེན་ཁྲིད་སངས་རྒྱས་ལག་འཆང་དང་། ཐུགས་རྗེ་ཆེན་པོའི་དམར་ཁྲིད་ཆོས་འབྲུ་བདུན་པ་སོགས་གནམ་ཆོས་རྣམས་ཞུས། བདུད་འདུལ་རྡོ་རྗེའི་དྲུང་ནས་ཐེག་པ་སྤྱིའི་ཁྲིད་དང་། རྫོགས་ཆེན་དང་འབྲེལ་བའི་དབང་ལུང་མང་དུ་ཐོབ་ཅིང་། ཆོས་

---

^{[མ་དཔེ་གཟིགས་ན་འདིར་གནོན།]}

བདག་ཡིན་པའི་ལུང་བསྟན་དང་དམ་རྫས་ཨ་རྒྱ་ཅན་གནང་ནས། རྫོགས་ཆེན་རང་གི་ཉམས་ལེན་དང་གཞན་ལ་སྟོན་པ་སོགས་གལ་ཆེ་ཚུལ་ཞལ་གདམས་མང་དུ་གནང་། དེ་དག་ནི་ཁྲིད་ཀྱི་བརྒྱུད་པ་ཡིན་ལ། གཞན་ཡང་དབང་ལུང་ཆོས་འབྲེལ་བླ་མ་བཞི་བཅུ་ཞེ་དགུ་ཙམ་ལས་མཐའ་ཡས་པ་ཞིག་ཐོབ་བོ། །དེ་ཐམས་ཅད་ཀྱི་དོན་གྱི་སྙིང་པོ་ཁྲིད་འདི་ལ་འདུས་ཐུགས་རྗེ་ཆེན་པོའི་དམར་ཁྲིད་ཚེམ་བུ་ལུགས། དཔལ་མོ་ལུགས། མི་ཏྲ་ལུགས། ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྐུ་གསུམ་ངོ་སྤྲོད། ཐུགས་རྗེ་ཆེན་པོ་ཡང་གསང་བླ་མེད་ཀྱི་ཁྲིད་སེམས་ཉིད་ངལ་གསོ། ཐུགས་རྗེ་ཆེན་པོ་གསང་འདུས་དམར་ཁྲིད། མ་ཎི་བཀའ་འབུམ། ཡང་སྙིང་འདུས་པ། ངན་སོང་རང་གྲོལ། དེ་རྣམས་ཀྱི་ལུང་ཐོབ་པའི་དོན་ཡང་འདིར་འདུས་པས། དམ་ཆོས་བརྒྱུད་པར་འབྲེལ་བ་ཡིན་ནོ། །རིག་འཛིན་ཀློང་གསལ་སྙིང་པོས་ཁོང་གི་གཏེར་ཆོས་ཐམས་ཅད་ཀྱི་དབང་ལུང་གི་བརྒྱུད་པ་གཏད་པ་ཡིན་པས། དངོས་སུ་མཇལ་མི་དགོས། རང་གི་ཉམས་ལེན་དང་གཞན་ལ་གང་འཕེལ་གྱིས་གསུངས་ནས་བཀའ་ཤོག་གནང་བ་དང་དུས་མཉམ་དུ་རྟགས་མཚན་བཟང་པོ་

---

^{[མ་དཔེ་གཟིགས་ན་འདིར་གནོན།]}

ཡང་བྱུང་བས། མཁའ་འགྲོ་གཏད་རྒྱ་བརྒྱུད་པ་ཡང་འདི་ལ་ཚང་། བཀའ་བབ་དོན་གྱི་བརྒྱུད་པ་ནི། ས་ཆེན་ཀུན་དགའ་སྙིང་པོས། འཇམ་དབྱངས་ཞལ་གཟིགས་ནས་ཆོས་ཚིག་བཞི་གནང་བ་ལ་བརྟེན་ནས་ཞེན་པ་བཞི་བྲལ་གྱི་ཁྲིད་མཛད། གཙང་པ་རྒྱ་རས་ཀྱིས་སངས་རྒྱས་རབས་བདུན་ཞལ་གཟིགས་ནས་ཆོས་ཤོ་ལོ་ཀ་འགའ་ཟུང་གནང་བ་ལ་བརྟེན་ནས། རྟེན་འབྲེལ་ཁོ་བོ་ལུགས་ཀྱི་ཁྲིད་མཛད། ཕག་གྲུ་ལ་སོགས་བཀའ་བརྒྱུད་གོང་མ་རྣམས་ཀྱིས། སེམས་བསྐྱེད་རྨི་ལམ་མ། ཞི་བྱེད་རྨང་ལམ་མ། །གསང་སྤྱོད་རྣལ་ལམ་མ་སོགས་མང་དུ་མཛད། དེ་རྣམས་ལ་འགྲན་ཟླ་མེད་ནའང་། བདག་རཱ་ག་ཨ་སྱས་ཐུགས་རྗེ་ཆེན་པོ་ལ་ལོ་བཅུ་གསུམ་སྒྲུབ་པའི་དམ་བཅའ་ལ་གནས་པའི་ཅིག་ཉམས་ཀྱི་སྣང་བ་ལ། མདུན་གྱི་བར་སྣང་ལ་སེང་གེ་གཡུ་རལ་སྤྲིན་ལྟར་གཏིབས་པ་གཅིག་ལ། སྲིན་པོ་སྨུག་ནག་སྐུ་གཅེར་བུ་འཇིགས་སུ་རུང་བ། མ་མཆེ་སྨིན་མཚམས་དང་། ཡ་མཆེ་བྲང་དུ་སླེབ་པ་གཅིག་གིས་སེང་གེ་ཆིབས་པའི་ལུས་སྒུར་པོར་འདུག །དེའི་སྟེང་ན་ཨོ་རྒྱན་རིན་པོ་ཆེའི་སྐུ་གཅེར་བུ་སྨུག་ནག །ཕྱག་འགག་གཡོན་

---

^{[མ་དཔེ་གཟིགས་ན་འདིར་གནོན།]}

དུ་གསེར་གྱི་ཕྱག་གདུབ་འོད་འབར་བས་བརྒྱན་པ། ཕྱག་གཉིས་སྲིན་པོའི་དཔུང་པ་གཉིས་ལ་འཇུས་ནས་འགུལ་མི་འཇུག་པ། ཞལ་ཁྲོ་གཉེར་དང་བཅས་པ་ཨོཾ་གཙིགས་བསྡམས་པ། དབུ་ལ་པད་ཞྭ་ངུར་སྨྲིག་གསོལ་བ་གཅིག་གསལ་པོར་མཇལ། དེ་ནས་མི་སྣང་བར་གྱུར་མ་ཐག །དཔེ་ཆ་གཅིག་ལག་ཏུ་བཞག་བྱུང་། འཁྲུལ་པ་ཡིན་སྙམ་ནས་མ་བལྟས་ཛ། །ལྡེབ་མ་དུང་གི་མདོག་ཅན། མཚལ་མགོ་དང་བྲིས་ཤིན་ཏུ་ལེགས་པ་གཅིག་མིག་གི་ཐད་དུ་བསྟན་ནས་བྱུང་། དེ་ལ་བལྟས་པས་ཁྲིད་འདིའི་རྩ་ཚིག་རྡོ་རྗེའི་ཚིག་རྐང་བཞི་འདུག །ཕྱིར་ནངས་ཡི་གེར་བྲིས་ནས་བལྟས་པས། ཐུགས་རྗེ་ཆེན་པོའི་དམར་ཁྲིད་དང་ཕྱག་རྫོགས་གཉིས་ཀའི་དོན་འདུས་པར་གོ །ཡང་རྨི་ལམ་དུ་གདོང་མཁའ་སྤྱོད་པ་དང་མཇལ་བས། ཕྱག་རྒྱ་ཆེན་པོའི་ངོ་སྤྲོད་གནང་། དེ་དག་ནི་བཀའ་བབ་བྱིན་རླབས་ཀྱི་བརྒྱུད་པར་རློམ་སྟེ། ཁྲིད་འདིའི་རྩ་བའོ། །དཀོན་མཆོག་བརྩེགས་པ་ལས། མི་རྣམས་གང་ཞིག་གང་གཱའི་བྱེ་སྙེད་ཀྱི། །འཇིག་རྟེན་ཁམས་མཆོག་རིན་ཆེན་བཀང་བྱས་ཏེ། །དགེ་མཆོག་སེམས་ཀྱིས་རྒྱལ་ལ་ཕུལ་བ་བས། །གང་གིས་སེམས་ཅན་གཅིག་ལ་

---

^{[མ་དཔེ་གཟིགས་ན་འདིར་གནོན།]}

ཚིགས་བཅད་བྱིན། །རིན་ཆེན་སྦྱིན་པ་རྒྱ་ཆེན་བྱིན་པ་དེས། །ཚིགས་བཅད་བྱིན་པ་སྙིང་རྗེ་བསྒྲུབ་དེ་ལ། །ཆར་ཡང་མི་ཕོད་གྲངས་སུ་ཡང་མ་ཡིན་ནོ། །ཞེས་དང་། ཡང་དཀོན་མཆོག་བརྩེགས་པ་ལས། དགེ་བ་དང་ནི་སྡིག་པའི་ཆོས། །མ་ཐོས་པས་ནི་ཤེས་མི་འགྱུར། །ཐོས་ནས་ཆོས་རྣམས་རྣམ་པར་ཤེས། །ཐོས་ནས་སྡིག་པ་བརྟེན་མི་བྱེད། །ཐོས་ནས་སྡིག་པ་སྤང་བར་བྱེད། །ཐོས་ནས་མྱ་ངན་འདས་པ་ཐོབ། །ཐོས་ནས་ཤེས་རབ་འཕེལ་བར་འགྱུར། །ཤེས་རབ་ཀྱིས་ནི་དོན་རྣམས་སྤྱོད། །དོན་མཐོང་ནས་ནི་བདེ་ཐོབ་འགྱུར། །དོན་ཐོས་དེ་ནི་ཡིད་གཞུངས་ཏེ། །ཚེ་འདི་ལ་ནི་མྱ་ངན་འདའ། །ཞེས་གསུངས་པས་ཆོས་ཐོས་པའི་ཕན་ཡོན་དཔག་ཏུ་མེད་པའི་ཕྱིར། སེམས་མ་ཡེངས་པར་རྩེ་གཅིག་ཏུ་ཉོན། ཆོས་དབུ་འཛུགས་སོ།། །།ཆོས་ཐུན། ༼༡༽ ཐུགས་རྗེ་ཆེན་པོའི་གདམས་ངག །བློ་ཆོས་སུ་འགྲོ་ཞིང་མི་ལུས་ཐོབ་པ་དོན་མེད་སྟོང་ལོག་ཏུ་མི་འགྲོ་བའི་ཐབས། དལ་འབྱོར་རྙེད་དཀའ་བ་བསྒོམ་པར་བྱ་སྟེ། སྤྱན་རས་གཟིགས་ཀྱིས་གསུངས་པའི་རྡོ་རྗེའི་ཚིག་རྐང་ལས། གང་གིས་མི་ལུས་རིན་

---

^{[མ་དཔེ་གཟིགས་ན་འདིར་གནོན།]}

ཆེན་འདི། །རྒྱུ་འབྲས་ངོ་བོ་དེ་དོན་གྱི། །དལ་འབྱོར་རྙེད་དཀའི་དོན་བསྒོམ་ཞིང་། །བརྩོན་འགྲུས་ཆེར་བསྐྱེད་ཉམས་ལེན་བྱ། །ཞེས་གསུངས། སྙིང་རྗེ་པདྨ་དཀར་པོའི་མདོ་ལས། ཀྱེ་མ་མིར་སྐྱེ་བ་ཡང་རྙེད་པར་དཀའ། །དལ་བ་ཕུན་སུམ་ཚོགས་པའང་རྙེད་པར་དཀའ། །སངས་རྒྱས་འཇིག་རྟེན་དུ་འབྱོན་པའང་རྙེད་པར་དཀའ། །དགེ་བའི་ཆོས་ལ་འདུན་པའང་རྙེད་པར་དཀའ། །ཞེས་གསུངས་སོ། །དེ་ལ་དལ་འབྱོར་གྱི་མི་ལུས་ཐོབ་དཀའ་བ་དངོས་སུ་བལྟ་རྒྱུ་ཡོད་པ་འདི་ལ་ལྟོས་དང་། འགྲོ་བ་རིགས་དྲུག་གི་ནང་ནས་དུད་འགྲོ་རིགས་གཅིག་ཡིན། དུད་འགྲོ་ལ་རིགས་མི་གཅིག་པ་བྱེ་བ་ཕྲག་བཅོ་བརྒྱད་ཡོད་པར་བཤད། དེའི་ནང་ནས་འབུ་སྲིན་ནི་རིགས་གཅིག་ཡིན། ལུང་པ་རེ་ན་མི་དུ་ཙམ་ཡོད། འབུ་སྲིན་དུ་ཙམ་འདུག་བསམ་མནོ་ཐོངས་དང་། གྲོང་པ་རེ་དང་ཁྱིམ་རེ་ན་མི་དུ་ཙམ་གདའ། འབུ་སྲིན་དུ་ཙམ་གདའ་ལྟོས་དང་། ཤིག་དང་ལྗི་བ་དང་སྲིན་བུ་བ་ཤ་ཀ་དང་། གྲོག་སྦུར་ཡན་ཆད་འདི་ཚོ་ཡང་རང་རེ་ཚོ་བས་ལྷག་ཙམ་གྱིས་མི་ལ་ཡང་སྐྱེ་མྱོང་ཚོད་རེད་དེ། ཆོས་མ་བྱས་པས་འདི་འདྲ་བ་གཅིག་རེད་གདའ་བ་ཨེ་མཐོང་། རྔ་བོ་

---

^{[མ་དཔེ་གཟིགས་ན་འདིར་གནོན།]}

ཆེའི་མདོ་ལས་ཀྱང་། རྒྱ་གྲོག་གི་ཚང་ཆེ་བ་རེ་ལ་འབུམ་ཕྲག་གསུམ་ཡོད། འབྲིང་བ་ལ་ཁྲི་ཕྲག་གསུམ་ཡོད། ཐ་མ་ལ་སྟོང་ཕྲག་གསུམ་ཡོད་པར་བཤད། ། སྡེ་ཆེན་པོ་གཅིག་གི་མངའ་འོག་ན་ཡང་མི་ལུས་ཐོབ་ཚད་ལ་ཡང་འབུམ་ཕྲག་གསུམ་ཨེ་ཡོད་ཆ་མེད། མི་ལུས་ཐོབ་ཨེ་དཀའ་དེ་ཚོ་བསམ་མནོ་ཐོང་ལ་ལྟོས་དང་གསལ་ལོ། །དེ་ཚོ་ཡང་ཐོས་གཏམ་དང་ངན་དཔྱད་མིན། ཐུབ་པ་དང་ཨོ་རྒྱན་གྱི་གསུངས་གཉིས་ཀ་ལས། དཀའ་འམ་མི་དཀའ་སེམས་ཅན་གྲངས་ལ་ལྟོས། །ཞེས་གསུངས་པའི་དོན་ཡིན་ནོ།། ༼༢༽ ཐུགས་རྗེ་ཆེན་པོའི་གདམས་ངག་ཟབ་མོ། ཆོས་མྱུར་དུ་འགྲུབ་པའི་ཐབས། འཆི་བ་མི་རྟག་པ་བསྒོམ་པ་ནི། བཅོམ་ལྡན་འདས་ཀྱི་ཞལ་ནས། དགེ་སློང་དག་འདུས་བྱས་ཐམས་ཅད་ནི་མི་རྟག་པའོ། །ཞེས་གསུངས་སོ། །ཆེད་དུ་བརྗོད་པའི་ཚོམས་ལས། བསགས་པའི་མཐའ་ནི་འཛད་པ་སྟེ། །བསླང་བའི་མཐའ་ནི་འགྱེལ་བར་འབྱུང་། །ཕྲད་པའི་མཐའ་ནི་བྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་གསུངས་སོ། །སྤྱོད་འཇུག་ལས། དེ་རིང་ཁོ་ན་མི་འཆི་ཞེས། །བདེ་བར་འདུག་

---

^{[མ་དཔེ་གཟིགས་ན་འདིར་གནོན།]}

པ་རིག་མ་ཡིན། །བདག་ནི་མེད་པར་འགྱུར་བའི་དུས། །དེ་ནི་གདོན་མི་ཟ་བར་འབྱུང་། །བདག་ལ་མི་འཇིགས་སུ་ཡིས་བྱིན། །འདི་ལས་ཇི་ལྟར་ངེས་ཐར་འགྱུར། །གདོན་མི་ཟ་བར་མེད་འགྱུར་ན། །ཇི་ལྟར་བདག་ཡིད་བདེ་བར་འགྱུར། །ཞེས་གསུངས་སོ། །འཆི་བ་མི་རྟག་པ་མིག་གིས་བལྟ་རྒྱུ་ཡོད་པ་འདི་ལ་ལྟོས་དང་། རང་དང་ས་ཕྱོགས་གཅིག་པ་དང་། གྲོང་གཅིག་པ་དང་། ངོ་ཤེས་པ་དང་ཉེ་དུ་རྣམས་སོ་ནམ་དང་ལས་དཀའ་མང་པོ་བྱེད་འཕྲོ་ལ་ཤི་སོང་དུས། རང་གིས་ཀྱང་བྱ་བ་མང་པོ་བསྒྲུབ་བསམས་ཀྱང་ལོང་མེད་པར་ཤེས་པར་གྱིས། རང་དང་ན་མཉམ་པ་དང་། དེ་བས་གཞོན་པ་ཤི་བ་མཐོང་བའི་ཚེ། ན་སོ་གཞོན་ཀྱང་མི་འཆི་བའི་གདེང་མེད་པ་གོ་བར་གྱིས། བཅོམ་ལྡན་འདས་ཀྱི་ཞལ་ནས། ནང་པ་སངས་རྒྱས་པས་བསྒོམ་པའི་འདུ་ཤེས་རྣམས་ཀྱི་ནང་ནས་མི་རྟག་པ་བསྒོམ་པའི་འདུ་ཤེས་ཁོ་ན་མཆོག་ཡིན་ནོ། །ཞེས་གསུངས་སོ།། ༼༣༽ ཐུགས་རྗེ་ཆེན་པོའི་གདམས་ངག་ཟབ་མོ། སྡུག་བསྔལ་སྤང་ཞིང་བདེ་བ་ཐོབ་པའི་ཐབས། ལས་རྒྱུ་འབྲས་ཤེས་པར་བྱ་སྟེ། ལས་བརྒྱ་པ་ལས། ལས་རྣམས་ཀྱང་ནི་སྣ་ཚོགས་

---

^{[མ་དཔེ་གཟིགས་ན་འདིར་གནོན།]}

ལས། །དེ་ཡིས་འགྲོ་འདི་སྣ་ཚོགས་བྱས། །ཞེས་གསུངས་སོ། །སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། མི་དགེའི་འབྲས་བུས་སྡུག་བསྔལ་ཏེ། །དགེ་བའི་ལས་ཀྱིས་བདེ་བ་ཐོབ། །འདྲེས་ལས་བདེ་སྡུག་འདྲེས་འབྱུང་བས། །དགེ་སྡིག་ཆུང་ནས་བླང་དོར་བྱ། །ཞེས་གསུངས་སོ། །རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་སྟེ། །དེས་བསྐྱེད་ལས་ནི་མི་དགེ་བ། །མི་དགེ་བ་ལས་སྡུག་བསྔལ་ཏེ། །དེ་བཞིན་ངན་འགྲོ་ཐམས་ཅད་དོ། །མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དགེ་བ་ཡིན། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཅེས་གསུངས་སོ། །གོ་བདེ་བར་བཤད་ན། སྲོག་བཅད་པའི་རྣམ་པར་སྨིན་པའི་འབྲས་བུ་ནི་དམྱལ་བར་སྐྱེ། རྒྱུ་མཐུན་གྱི་འབྲས་བུ་གལ་ཏེ་མིར་སྐྱེས་ནའང་ཚེ་ཐུང་ཞིང་ནད་མང་། དབང་གི་འབྲས་བུ་ཡུལ་བཀྲ་མི་ཤིས་སར་སྐྱེ། མ་བྱིན་པ་བླངས་པའི་རྣམ་སྨིན་གྱི་འབྲས་བུ་ཡི་དྭགས་སུ་སྐྱེ། རྒྱུ་མཐུན་གྱི་འབྲས་བུ་མིར་སྐྱེས་ཀྱང་དབུལ་པོར་འགྱུར། དབང་གི་འབྲས་བུ་ཡུལ་སད་སེར་མང་སར་སྐྱེ། འདོད་ལོག་སྤྱད་པའི་

---

^{[མ་དཔེ་གཟིགས་ན་འདིར་གནོན།]}

རྣམ་སྨིན་གྱི་འབྲས་བུ་ཡི་དྭགས་སུ་སྐྱེ། རྒྱུ་མཐུན་གྱི་འབྲས་བུ་དགྲ་སྡང་བའི་ཆུང་མར་སྐྱེ། དབང་གི་འབྲས་བུ་ཡུལ་ཚད་རོང་དུ་སྲོག་ཆགས་སྤུ་མེད་པའི་རིགས་སུ་སྐྱེ། རྫུན་སྨྲ་བའི་རྣམ་སྨིན་དུད་འགྲོར་སྐྱེ། རྒྱུ་མཐུན་གྱི་འབྲས་བུ་མིར་སྐྱེས་ནའང་མི་ཁ་སྡང་། དབང་གི་འབྲས་བུ་དྲི་མི་ཞིམ་སར་སྐྱེ། ཕྲ་མའི་རྣམ་པར་སྨིན་པའི་འབྲས་བུ་དམྱལ་བར་སྐྱེ། །རྒྱུ་མཐུན་གྱི་འབྲས་བུ་མཛའ་བོ་དང་བྲལ། དབང་གི་འབྲས་བུ་ཡུལ་མཐོ་དམན་ཆེ་སར་སྐྱེ། ཚིག་རྩུབ་ཀྱི་རྣམ་སྨིན་གྱི་འབྲས་བུ་དམྱལ་བར་སྐྱེ། རྒྱུ་མཐུན་གྱི་འབྲས་བུ་མི་ཁ་སྡང་། དབང་གི་འབྲས་བུ་ཡུལ་ཆུ་དཀོན་ཚྭ་སྒོ་ཅན་སྡིག་ཤས་ཅན་དུ་སྐྱེ། །ངག་འཁྱལ་གྱི་རྣམ་པར་སྨིན་པའི་དུད་འགྲོར་སྐྱེ། རྒྱུ་མཐུན་གྱི་འབྲས་བུ་ཚིག་མི་བཙུན་པར་འགྱུར། དབང་གི་འབྲས་བུ་དབྱར་དགུན་གོ་ལོག་སར་སྐྱེ། བརྣབ་སེམས་ཀྱི་རྣམ་སྨིན་གྱིས་ཡི་དྭགས་སུ་སྐྱེ། རྒྱུ་མཐུན་གྱི་འབྲས་བུ་ཆགས་པ་ཤས་ཆེ་བར་འགྱུར། དབང་གི་འབྲས་བུ་ཡུལ་འབྲུ་ངན་སར་སྐྱེ། གནོད་སེམས་ཀྱི་རྣམ་སྨིན་གྱིས་དམྱལ་བར་སྐྱེ། རྒྱུ་མཐུན་གྱི་འབྲས་བུ་ཞེ་སྡང་ཤས་ཆེ་བར་འགྱུར། དབང་གི་འབྲས་བུ་ཟས་ཁ་ཞིང་རྩུབ་པའི་སར་སྐྱེ།

---

^{[མ་དཔེ་གཟིགས་ན་འདིར་གནོན།]}

ལོག་ལྟའི་རྣམ་པར་སྨིན་པས་དུད་འགྲོར་སྐྱེ། རྒྱུ་མཐུན་འབྲས་བུ་མིར་སྐྱེས་ཀྱང་གཏི་མུག་ཤས་ཆེ། དབང་གི་འབྲས་བུ་ཡོ་བྱད་ཡེ་མེད་སར་སྐྱེ། དེ་ཡང་མི་དགེ་བ་དེ་དག་ཞེ་སྡང་གི་སྒོ་ནས་སྤྱད་ན་དམྱལ་བ། འདོད་ཆགས་ཀྱི་སྒོ་ནས་སྤྱད་ན་ཡི་དྭགས། གཏི་མུག་གི་སྒོ་ནས་སྤྱད་ན་དུད་འགྲོ། ཆེན་པོར་སྤྱད་པས་དམྱལ་བ། འབྲིང་སྤྱད་པས་ཡི་དྭགས། ཆུང་ངུར་སྤྱད་པས་དུད་འགྲོ། ཡུལ་མཐོན་པོ་ལ་སྤྱད་ན་དམྱལ་བ། འབྲིང་ལ་ཡི་དྭགས། ཐ་མ་ལ་སྤྱད་ན་དུད་འགྲོར་སྐྱེའོ། །མི་དགེ་བ་བཅུ་སྤངས་པ་ནི་དགེ་བ་བཅུ་ཡིན་ཏེ། ཕན་ཡོན་ནི་གོང་གི་སྐྱོན་དེ་དག་ལས་ལྡོག་གོ །མི་གཡོ་བའི་ལས་རྒྱུ་འབྲས་ནི། ཞི་གནས་ཀྱི་བསམ་གཏན་བསྒོམས་པས་ཞི་གནས་ཆེ་ཆུང་གི་ཚོད་ཀྱིས། གཟུགས་ཁམས་གནས་རིགས་བཅུ་བདུན་དང་། །གཟུགས་མེད་སྐྱེ་མཆེད་མུ་བཞིའི་ལྷར་སྐྱེ་སྟེ། ལས་རྒྱུ་འབྲས་མིག་གི་ལྟ་རྒྱུ་ཡོད་པ་འདི་རྣམས་ལ་ལྟོས་དང་། མིའི་ལུས་ཐོབ་པ་འདྲ་འདྲ་ལ། ཚེ་རིང་ཐུང་མི་འདྲ། ནད་དཀོན་མོད་མི་འདྲ། ཕྱུག་དབུལ་མི་འདྲ་བ། ཕ་མ་གཅིག་པའི་སྤུན་ཟླ་ལ་ཡང་ཚེ་རིང་ཐུང་དང་སྐྱིད་སྡུག་མི་འདྲ་བ་འདི་

---

^{[མ་དཔེ་གཟིགས་ན་འདིར་གནོན།]}

རྣམས། ཕོ་རྒོད་ཞན་མ་ཡིན། ཚེ་སྔོན་དགེ་སྡིག་གང་བྱས་ལས་ཀྱི་ཁྱད་ཡིན་ཏེ། སྔ་མ་གང་བྱས་ད་ལྟའི་ལུས་འདི་ལ་ལྟོས། ཞེས་གསུངས་སོ། །འོ་ན་ཡུལ་མཐོན་པོ་རྣམས་རྒྱུ་འབྲས་ལ་མི་འཛེམ་པར་འདུག་པས་སྐྱོན་མེད་དམ་སྙམ་ན། རྟོགས་པ་མཆོག་ཐོབ་པ་རྣམས་ཀྱིས་ཇི་ལྟར་མཛད་ཀྱང་བྱང་ཆུབ་ཀྱི་གྲོགས་སུ་འགྲོ་སྟེ། དུག་ལྔ་ལམ་དུ་ཁྱེར་ཐུབ་པའི་ཕྱིར། སྦྱོང་རྒྱུད་ལས། རྡོ་རྗེ་སེམས་དཔའི་གནས་འདུག་ནས། །ཐམས་ཅད་ཟོས་ཤིང་ཀུན་སྤྱད་ཀྱང་། །འགྲུབ་འགྱུར་ཉེས་པར་མི་འགྱུར་ན། །སྙིང་རྗེར་ལྡན་ལ་སྨོས་ཅི་དགོས། །ཞེས་གསུངས་སོ།། ༼༤༽ ཐུགས་རྗེ་ཆེན་པོའི་གདམས་ངག་ཟབ་མོ། གཏན་བདེའི་འདུན་མ་སྒྲུབ་པའི་ཐབས། འཁོར་བའི་ཉེས་དམིགས་བསྒོམ་པར་བྱ་སྟེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། །གང་ཚེ་འཁོར་བ་གར་གནས་ཀྱང་། །སྡུག་བསྔལ་གསུམ་ལས་མ་འདས་པས། །དེ་ལས་ངེས་པར་འབྱུང་འདོད་གང་། །བདེན་དོན་ཚུལ་བཞིན་བསྒོམ་པར་བྱ། །ཞེས་དང་། མདོ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་

---

^{[མ་དཔེ་གཟིགས་ན་འདིར་གནོན།]}

ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་རྣམས་བག་མེད་པ་ཡིས་ཉམས། །ལྷ་མིན་འཐབ་ཅིང་རྩོད་པས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་སོ། །མཛོད་ལས། ཏིལ་སྦྱངས་ནང་ནས་ལོ་བརྒྱ་ཞིང་། །ཏིལ་གཅིག་ཕྱུངས་བས་ཟད་གྱུར་པ། །ཆུ་བུར་ཅན་གྱི་ཚེ་ཚད་ཡིན། །གཞན་གྱི་ཚེ་ནི་ཉི་ཤུས་འགྱུར། །ཞེས་གསུངས། བཤེས་སྤྲིངས་ལས། སེམས་ཅན་ཉེས་པ་སྤྱད་པ་སྤྱོད་པ་རྣམས། །ཡང་སོས་ཐིག་ནག་རབ་ཏུ་ཚ་བ་དང་། །བསྡུས་འཇོམས་ངུ་འབོད་མནར་མེད་ལ་སོགས་པ། །དམྱལ་བ་རྣམས་སུ་རབ་ཏུ་སྡུག་བསྔལ་འགྱུར། །འདི་ན་མི་དག་མདུང་ཐུང་ལྔ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེ་ནི་དམྱལ་བའི་སྡུག་བསྔལ་ཆུང་ངུ་ཡི། །འོལ་ཡང་མ་ཡིན་ཆར་ཡང་མི་ཕོད་དེ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་ནམ་བཀླགས་སམ་གཟུགས་སུ་བགྱིས་པས་ཀྱང་། །སྡུག་བསྔལ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་གསུངས་

---

^{[མ་དཔེ་གཟིགས་ན་འདིར་གནོན།]}

སོ། །ཡི་དྭགས་ནི། བཤེས་སྤྲིངས་ལས། ཡི་དྭགས་ན་ཡང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆད་མ་མཆིས་སོ། །བཀྲེས་སྐོམ་དྲོ་གྲང་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་བསྟེན་འཚལ་ལོ། །ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་ལྟོས་ཙམ་བཀྲེས་པས་ཉན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཁ་ཅིག་ལྤགས་རུས་འདུས་ཏེ་ལུས་ཤིང་གཅེར་བུ་སྟེ། །ཏ་ལའི་ཡལ་ཐོག་སྐམ་པ་ལྟ་བུ་ལགས། །ཁ་ཅིག་འཚལ་ཞིང་ཁ་ནས་འབར་བ་སྟེ། །ཟས་སུ་འབར་བ་ཁར་འབབ་སྡུག་བསྔལ་ཙམ། །དམངས་རིགས་འགས་ནི་རྣག་དང་ཕྱི་ས་དང་། །ཁྲག་སོགས་མི་གཙང་བ་ཡང་མི་རྙེད་དེ། །ཕན་ཚུན་འཚོགས་པར་བྱེད་ཅིང་མགྲིན་པ་ནས། །ལྦ་བ་ལས་བྱུང་སྨིན་པའི་རྣག་འཚལ་ལོ། །འདི་དག་རྣམས་ལ་སོས་ཀའི་དུས་སུ་ནི། །ཟླ་བའང་ཚ་ལ་དགུན་ནི་ཉི་མའང་གྲོང་། ། ལྗོན་ཤིང་འབྲས་བུ་མེད་འགྱུར་འདི་དག་ནི། །བལྟས་པ་ཙམ་གྱིས་ཀླུང་ཡང་སྐམ་པར་འགྱུར། །ཞེས་གསུངས་སོ། །དུད་འགྲོ་ནི། མཛོད་ལས། དུད་འགྲོ་ཕན་ཚུན་སྡང་

---

^{[མ་དཔེ་གཟིགས་ན་འདིར་གནོན།]}

དང་སྲོག རང་དབང་མེད་པར་བསད་སོགས་ཀྱི། །རྟག་ཏུ་སྡུག་བསྔལ་གྱིས་གདུང་ལ། །ཕལ་ཆེར་དམྱལ་བ་དག་དང་མཚུངས། །ཞེས་དང་། བཤེས་སྤྲིངས་ལས། དུད་འགྲོའི་སྐྱེ་གནས་ན་ཡང་བསད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་གྱུར་དགེ་བ་སྤང་བ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པས། །ཁ་ཅིག་མུ་ཏིག་བལ་དང་རུས་པ་དང་། །ཤ་དང་པས་པའི་ཆེད་དུ་གསོད་པར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕགས་དང་ལྕགས་ཀྱུ་རྣོན་པོས་བཏབ་སྟེ་བཀོལ། །ཞེས་གསུངས་སོ། །མི་ལ་ཡང་སྐྱེ་རྒ་ན་འཆིའི་སྡུག་བསྔལ་ཡོད་དེ། མདོ་དྲན་པ་ཉེར་བཞག་ལས། སྡུག་བསྔལ་བརྒྱད་ཅུ་པོ་འདིས་ལུས་ཅན་རྣམས་ལ་ཁྱབ་མོད་ཀྱིས། གཙོ་བོར་མིའི་སྡུག་བསྔལ་ལོ། །ལྷ་མིན་དག་ནི་རང་བཞིན་གྱིས་ལྷའི་དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། ཞེས་གསུངས་སོ། །འདོད་ཁམས་པའི་ལྷ་ལ་ཡང་། ལྷའི་བུ་འཆི་བ་ནི། ལྟས་རྣམ་པ་ལྔ་འབྱུང་སྟེ། གོས་ལ་དྲི་མ་ཆགས་པར་འགྱུར། མེ་ཏོག་ཕྲེང་བ་རྙིང་པར་འགྱུར། མཚན་ཁུང་གཉིས་ནས་

---

^{[མ་དཔེ་གཟིགས་ན་འདིར་གནོན།]}

རྔུལ་འབྱུང་བར་འགྱུར། ལུས་ལ་དྲི་ངན་པ་འབྱུང་བར་འགྱུར། ལྷའི་བུ་རང་གི་རྟེན་ལ་མི་དགའ་བར་འགྱུར། ཞེས་གསུངས་སོ། །རྒྱ་ཆེ་རོལ་པ་ལས། བྱིས་པ་རྣམས་འཁོར་བ་འདི་ལ་ཆགས་ཤིང་དགའ་བ་ནི་ཕག་མི་གཙང་བ་ལ་ཆགས་པ་ལྟ་བུའོ། །འདི་ན་སེམས་ཅན་རྣམས་ལྟུང་བ་ནི་ཕྱེ་མ་ལེབ་མར་མེར་ལྟུང་བ་ལྟ་བུའོ། །འདི་ན་སེམས་ཅན་རྣམས་བཏུམ་པ་ནི་ཉ་རྒྱ་ཡིས་བཏུམ་པ་ལྟ་བུའོ། །འདི་ན་སེམས་ཅན་རྣམས་འཁོར་བ་ནི་རྫ་མཁན་གྱི་འཁོར་ལོ་ལྟ་བུའོ། །འདི་ན་སེམས་ཅན་རྣམས་བསླུས་པ་ནི་གཡོ་ཅན་གྱིས་བྱིས་པ་བྲིད་པ་ལྟ་བུའོ། །ཞེས་གསུངས་སོ། །འཁོར་བའི་སྡུག་བསྔལ་མིག་གིས་ལྟ་རྒྱུ་ཡོད་དེ། ངན་སོང་གསུམ་གྱི་ནང་ནས་དུད་འགྲོ་སྡུག་བསྔལ་ཆུང་། ཀླུ་མ་གཏོགས་པའི་དུད་འགྲོའི་ནང་ནས་རི་དྭགས་གཡུང་དྭགས་འདི་ཚོ་སྐྱིད་ཤོས་ཡིན་ཏེ། རི་དྭགས་རྣམས་གཅན་གཟན་རྣམས་དང་རྔོན་པས་གསོད་ལུགས་ལ་ལྟོས་དང་། སྡུག་བསྔལ་དེ་འདྲ་རང་ཐོག་ཏུ་བབ་ན་བཟོད་ཐབས་ཨེ་གདའ། གཡུང་དྭགས་རྣམས་ཚོང་པས་བཤའ་བ་ན་ལྟོས་དང་། དེ་འདྲ་རང་ལ་བྱས་བྱུང་ན་སྡུག་བསྔལ་ཅི་ཙམ་འོང་ལེ་གདའ། དེ་འདྲ་ལ་མི་སྐྱེ་

---

^{[མ་དཔེ་གཟིགས་ན་འདིར་གནོན།]}

བའི་གདེང་ཚོད་ཅི་ཡོད། དགུན་སྒང་ཞག་གཅིག་གོས་མེད་ན་ཅི་ཙམ་འཁྱག །གྲང་དམྱལ་ན་སྐྱེས་ན་ཅི་འདྲ་བྱེད། མེ་སྟག་ཕོག་ན་བྱབས་སྔ་ཕྱི་ཨེ་མི་གདའ། །ཚ་དམྱལ་ན་སྐྱེས་ན་བསྒྱུར་ཨེ་ཚུགས། ཞག་གཉིས་གསུམ་ཞིག་ཟས་སྐོམ་མ་རག་ན་ཅི་འདྲ་ཞིག་འོངས། ཡི་དྭགས་སུ་སྐྱེས་ན་ཅི་འཁམས། བྲེལ་ཟིང་གི་འུར་ཆེན་པོ་ལངས་བ་ན་སྐྲག་སྔངས་ཅི་ཙམ་འོང་དེ། ལྷ་མ་ཡིན་དུ་སྐྱེས་ན་ཅི་འདྲ་བྱེད། རང་ལ་གང་ཡོད་ཀྱི་སྦྲ་གཞིས་ཞིང་ཁང་རྒྱུ་ཟས་ཅི་ཡོད་དགྲ་ལ་ཤོར་ནས་རང་སྤྲང་འཁྱམས་དགོས་བྱུང་ན་སྡུག་བསྔལ་ཆེན་པོར་བརྩི་སྟེ། དེ་བས་ལྷ་ཕམ་ལྟུང་གི་སྡུག་བསྔལ་བརྒྱ་སྟོང་གི་འགྱུར་ཆེ། དེ་ཚོ་ལ་བལྟ་རྒྱུ་འདུག་པ་མ་མཐོང་ན་ལོང་བ་ཡིན། དེ་ཚོ་མཐོང་ཡང་སེམས་ལ་ནེམ་འབབ་མི་ཐུབ་པ་འདི་སྙིང་རྡོ་ལས་གྲུབ་པ་ཡིན་ནམ།། ༼༥༽ ཐུགས་རྗེ་ཆེན་པོའི་གདམས་ངག་ཟབ་མོ་འཁོར་བའི་སྡུག་བསྔལ་ལས་སྐྱོབ་པའི་ཐབས། སྐྱབས་འགྲོ་གལ་ཆེ་སྟེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། འཁོར་བའི་སྡུག་བསྔལ་གྱིས་འཇིགས་རྣམས། །རིན་ཆེན་གསུམ་ལ་སྐྱབས་འགྲོ་ཞིང་། །དེ་ཡི་བསླབ་བྱ་བསྲུང་བ་ལ། །

---

^{[མ་དཔེ་གཟིགས་ན་འདིར་གནོན།]}

རང་གི་ལུས་ལྟར་གཅེས་པར་བསྲུང་། །ཞེས་དང་། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ཏེ། །ཐར་པ་འདོད་པ་རྣམས་ཀྱི་སྐྱབས། །སྐྱབས་དེ་ལ་ནི་བརྟེན་ནས་ནི། །འཇིགས་པ་ཀུན་ལས་ཐར་བར་འགྱུར། །ཞེས་དང་། ཨོ་རྒྱན་རིན་པོ་ཆེའི་ཞལ་ནས། ཡིད་ཁྱེད་ཤེས་ཀྱི་བློ་མ་བཀལ་ན། དཀོན་མཆོག་གསུམ་གྱི་བྱིན་རླབས་རྒྱང་རིང་། ཡིད་ཁྱེད་ཤེས་ཀྱི་དད་པ་བརྟན་པར་གྱིས། བློ་དཀོན་མཆོག་གསུམ་ལ་གཏོད། ཅེས་གསུངས། ད་མདུན་གྱི་ནམ་མཁར་རིན་པོ་ཆེའི་ཁྲི་དང་པདྨ་དང་ཟླ་བའི་གདན་ལ། རྩ་བའི་བླ་མ་དང་དབྱེར་མེད་པའི་སངས་རྒྱས་འོད་དཔག་མེད་སྐུ་མདོག་དམར་པོ་ཆོས་གོས་རྣམ་གསུམ་གསོལ་བ། རྡོ་རྗེ་སྐྱིལ་ཀྲུང་གིས་བཞུགས་ཤིང་མཉམ་བཞག་གི་ཕྱག་རྒྱས་ལྷུང་བཟེད་འཛིན་པ། ཞལ་འཛུམ་པ་མཛོད་དུ་དཀར་པོ་ཅན། སྤྱན་ཞི་བས་བདག་ལ་གཟིགས་པར་བསྒོམ། དེ་ཡང་སྐུ་དགེ་འདུན་ཀུན་འདུས། གསུང་དམ་ཆོས་ཀུན་འདུས། ཐུགས་སངས་རྒྱས་ཀུན་འདུས། ཡོན་ཏན་ཡི་དམ་ཀུན་འདུས། ཕྲིན་ལས་མཁའ་འགྲོ་ཆོས་སྐྱོང་ཀུན་འདུས་སུ་བསྒོམ་ལ། ཚེ་འདི་ཕྱི་བར་གསུམ་ལ་ཅི་

---

^{[མ་དཔེ་གཟིགས་ན་འདིར་གནོན།]}

མཛད་ཁྱེད་ཤེས་ཀྱི་བློ་ལིངས་ཀྱིས་གཏད་ལ། བླ་མ་དཀོན་མཆོག་གསུམ་ལ་སྐྱབས་སུ་མཆི། ཞེས་པ་དེ་ཚར་བརྒྱ་ཙམ་འདོན། དེ་ནས་སྐྱབས་ཡུལ་དེ་འོད་དུ་ཞུ་ནས་རང་ལ་ཐིམ་པས། རང་གི་ལུས་ངག་ཡིད་གསུམ་དང་སྐྱབས་ཡུལ་གྱི་སྐུ་གསུང་ཐུགས་དབྱེར་མེད་དུ་འདྲེས་པར་བསྒོམ། དེ་ལྟར་སྒོམ་མཁན་གྱི་སེམས་ལ་བལྟས་པས། ངོ་བོ་སྟོང་ཞིང་རང་བཞིན་གསལ་བ། ཐུགས་རྗེ་འགགས་མེད་ཅིར་ཡང་འཆར་བ། དེ་ནི་དོན་དམ་པའི་སྐྱབས་འགྲོ་ཡིན་ཏེ། མ་གཅིག་ལབ་སྒྲོན་གྱིས། རང་སེམས་སྟོང་པ་ཆོས་ཀྱི་སྐུ་ལ་སྐྱབས་སུ་མཆིའོ། །ཞེས་དང་། ཨོ་རྒྱན་རིན་པོ་ཆེས། ཡེ་ནས་སྟོང་ཞིང་སྤྲོས་དང་བྲལ་བ་ལ། །སྤྲོས་མེད་སྤྲོས་བྲལ་འདུས་མ་བྱས་པའི་ངང་། །འཛིན་མེད་བློ་འདས་ངང་དུ་སྐྱབས་སུ་མཆི། །ངོ་བོ་རང་བཞིན་ཐུགས་རྗེ་ཀ་ནས་དག །མཉམ་རྫོགས་ཀློང་ཡངས་ཆེན་པོའི་རང་བཞིན་ལ། །རྟོག་མེད་རང་གསལ་རྗེན་པར་སྐྱབས་སུ་མཆི། །ཞེས་དང་། ཐར་རྒྱན་ལས། ཆོས་ཐམས་ཅད་གདོད་མ་ནས་བདག་མེད་ཅིང་། ཅིའི་ངོ་བོར་ཡང་མ་གྲུབ་པས། སངས་རྒྱས་ཆོས་དང་དགེ་འདུན་ཡང་དེ་བཞིན་དུ་

---

^{[མ་དཔེ་གཟིགས་ན་འདིར་གནོན།]}

མཐོང་བར་བྱ་སྟེ། དེ་ནི་མི་ཟད་པའི་སྐྱབས། རྟོག་པའི་སྐྱབས། གཡུང་དྲུང་གི་སྐྱབས་ཡིན་ནོ། །ཞེས་གསུངས་སོ། །རྒྱུད་སྡེ་རྣམས་ནས་ཀྱང་། རང་སེམས་སྐྱབས་ཀྱི་མཆོག་ཏུ་གསུངས་པའི་ཕྱིར། ཁྱེད་ཁྲིད་ཐོབ་པ་རྣམས་ཀྱིས་དེ་ལྟར་ཉམས་སུ་ལོངས། གསར་པ་རྣམས་ཀྱིས་ཀྱང་། །སྐྱབས་ཡུལ་བསྒོམསནས་སྐྱབས་འགྲོ་བརྒྱ་ཚར་དང་། །སྐྱབས་ཡུལ་རང་ལ་བསྟིམསནས་སེམས་ལ་བལྟ་བ་དེ་ལན་མང་དུ་གྱིས་དང་དེས་འཐུས་སོ།། ༼༦༽ ཐུགས་རྗེ་ཆེན་པོའི་གདམས་ངག་ཟབ་མོ། ཅི་བྱས་བྱང་ཆུབ་ཀྱི་ལམ་དུ་འགྲོ་བའི་ཐབས། བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པར་བྱ་སྟེ། སྤྱན་རས་གཟིགས་ཀྱི་རྡོ་རྗེའི་ཚིག་རྐང་ལས། མཁའ་ཁྱབ་འགྲོ་བ་ཀུན་དོན་དུ། །བྱང་ཆུབ་མཆོག་ཏུ་སེམས་བསྐྱེད་ཅིང་། །ཕ་རོལ་ཕྱིན་དྲུག་བསླབ་བྱ་ལ། །རྒྱལ་བའི་སྲས་ཀྱིས་རྟག་ཏུ་བསླབ། །ཅེས་གསུངས་སོ། །དཔལ་སྦྱིན་གྱིས་ཞུས་པའི་མདོར། གང་གཱའི་བྱེ་མའི་གྲངས་སྙེད་ཀྱི། ། །སངས་རྒྱས་ཞིང་ཀུན་མི་གང་གིས། །རིན་ཆེན་བདུན་གྱིས་ཡོངས་བཀང་ཞིང་། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བྱས་ཏེ། །

---

^{[མ་དཔེ་གཟིགས་ན་འདིར་གནོན།]}

བྱང་ཆུབ་སེམས་ནི་བསྐྱེད་པ་ན། །མཆོད་པ་འདི་ནི་ཁྱད་འཕགས་ཏེ། །དེ་ལ་མཐའ་ནི་མ་མཆིས་སོ། །ཞེས་གསུངས་སོ། །དེ་ལ་སྡོམ་པ་དབང་གི་ཞོར་ལ་ཡང་ཐོབ་པས་དེས་ཆོག །བྱང་སྡོམ་གྱི་བསྲུང་བྱ་མང་དུ་ཡོད་ཀྱང་། ཐ་མལ་པ་རྣམས་ཀྱིས་ཤེས་དཀའ་ཞིང་སྲུང་བར་མི་ནུས་པས། རང་གི་དགེ་རྩ་ཆེ་ཕྲ་ཅི་བྱས་ཀྱང་། །སེམས་ཅན་ཐམས་ཅད་ཀྱི་དོན་དུ་འདི་བྱེད་བསམ་པའི་སེམས་བསྐྱེད་དང་། རྗེས་ནས་དགེ་བ་འདི་ཡིས་སེམས་ཅན་ཐམས་ཅད་གྱི་དོན་དུ་བདག་སངས་རྒྱས་ཐོབ་པར་ཤོག་བསམ་པ་དེས་འཐུས་ཏེ། མདོ་ལས། རྒྱལ་པོ་ཆེན་པོ་ཁྱོད་ནི་བྱ་བ་མང་ཞིང་བྱེད་པ་མང་བས་ཁྱོད་ཀྱིས་བྱང་ཆུབ་སེམས་དཔའི་བྱ་བ་མཐའ་དག་བསྒྲུབ་པར་མི་ནུས་ཀྱི། ཁྱེད་ནི་འགྲོའམ་འགྲེང་ངམ་འདུག་ཀྱང་རུང་སྟེ། བྱང་ཆུབ་ཀྱི་སེམས་ཡིད་ལ་བྱེད་པ་དང་མ་བྲལ་བར་གྱིས་ཤིག །ཁྱེད་ཀྱི་བྱང་ཆུབ་སེམས་དཔའི་སྤྱོད་པ་ལེགས་པར་སྤྱད་པར་འགྱུར་རོ། །ཞེས་དང་། བསྒོམ་རྒྱུའི་དམིགས་པ་ནི་བྱམས་སྙིང་རྗེ་གཙོ་བོ་ཡིན་པས། གཏོང་ལེན་བསྒོམ་པ་འདི་ནི་ཤིན་ཏུ་གལ་ཆེ་བ་ཡིན། དམིགས་པ་ནི། མདུན་གྱི་ནམ་མཁར་རིན་པོ་ཆེའི་

---

^{[མ་དཔེ་གཟིགས་ན་འདིར་གནོན།]}

ཁྲི་དང་པད་ཟླའི་སྟེང་དུ། རྩ་བའི་བླ་མ་དང་དབྱེར་མེད་པ། སྟོན་པ་ཆོས་སྐུ་སྣང་བ་མཐའ་ཡས། སྐུ་མདོག་དམར་པོ་དབུ་གཙུག་ཏོར་ཞབས་འཁོར་ལོ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ། སྐུ་ལ་ཆོས་གོས་རྣམ་གསུམ་གསོལ་ཞིང་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་མཉམ་བཞག་གི་སྟེང་ན་ལྷུང་བཟེད་བདུད་རྩིས་བཀང་བ་བསྣམས་པ། དེའི་གཡས་སུ་བྱང་ཆུབ་སེམས་དཔའ་སྤྱན་རས་གཟིགས་དཀར་པོ། གཡོན་དུ་མཐུ་ཆེན་ཐོབ་སྔོན་པོ། གཉིས་ཀ་བྱང་ཆུབ་སེམས་དཔའི་ཆ་ལུགས་ཅན། དེའི་དྲུང་དུ་དད་གུས་རྩེ་གཅིག་པས། སངས་རྒྱས་ཆོས་ཚོགས་མ་ཚར་མང་དུ་བརྗོད་པས་བྱང་སྡོམ་སྐྱེ་བར་དཔལ་གཙུག་ལག་ཕྲེང་བས་གསུངས། དེ་ཡང་ཤེས་དཀའ་བས། བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་བྱང་ཆུབ་སེམས་བསྐྱེད་དོ། །ཞེས་པ་འདི་བརྒྱ་ཚར་ཙམ་འདོན། མཐར་ནམ་མཁའི་སྐྱབས་ཡུལ་འོད་དུ་ཞུ་ནས། རང་ལ་ཐིམ་པས། རང་ཉིད་ཐུགས་རྗེ་ཆེན་པོ་དཀར་པོ་ཞལ་གཅིག་ཕྱག་བཞི་གཞུང་ལྟར་བསྒོམ། དེ་ནས་རླུང་ཕར་བུས་པས། རང་གི་བདེ་སྐྱིད་དང་

---

^{[མ་དཔེ་གཟིགས་ན་འདིར་གནོན།]}

དགེ་བའི་རྩ་བ་ཅི་ཡོད་པ་ཐམས་ཅད་སེམས་ཅན་ཐམས་ཅད་ལ་སིབ་ཀྱིས་ཐིམ་ནས། སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན། བདེ་བའི་རྒྱུ་བསོད་ནམས་ཡེ་ཤེས་ཀྱི་ཚོགས་གཉིས་དང་ལྡན་པར་བསྒོམ་ལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག ཅེས་བརྗོད་པ་ནི་སྙིང་རྗེ་བསྒོམ་པ་ཡིན་ལ། རླུང་ནང་དུ་རྔུབ་པའི་ཚེ། སེམས་ཅན་ཐམས་ཅད་ཀྱི་སྡུག་བསྔལ་དང་སྡིག་སྒྲིབ་ཅི་ཡོད་པ་ཐམས་ཅད་སིབས་སེ་རང་ལ་ཐིམ་པས། མེ་ལ་ཤིང་བསྣན་པ་ལྟར། རང་ཉིད་ཐུགས་རྗེ་ཆེན་པོ་བཀྲག་མདངས་སྔར་ལས་རྒྱས། སེམས་ཅན་ཐམས་ཅད་རིགས་དྲུག་སོ་སོའི་སྡུག་བསྔལ་གྱི་རྒྱུ་སྡིག་སྒྲིབ་ཐམས་ཅད་དང་བྲལ་བར་བྷེ། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །ཅེས་བརྗོད་པ་ནི་སྙིང་རྗེ་བྷཻཾ་པ་སྟེ། དེ་ཡང་བྱམས་སྙིང་རྗེའི་དབང་གིས་མཆི་མ་འཁྲུགས་པ་བྱུང་ན། བྱམས་པ་ཆེན་པོ་དང་སྙིང་རྗེ་ཆེན་པོ་ཡིན་ནོ། །དེ་ཡང་དགྲ་གཉེན་དང་ཕྱོགས་རིས་མེད་པར་སེམས་ཅན་ཐམས་ཅད་ལ་མཉམ་ན། བྱམས་པ་ཚད་མེད་དང་སྙིང་རྗེ་ཚད་མེད་ཡིན། གཏོང་

---

^{[མ་དཔེ་གཟིགས་ན་འདིར་གནོན།]}

ལེན་དམིགས་པ་དེ་གཉིས་ལ་ཐུན་རེར་བརྒྱ་རེའམ། རང་གི་ལོ་གྲངས་སམ། ཉེར་གཅིག་ཙམ་རེ་བསྒོམ། དེ་ནས་སྒོམ་མཁན་གྱི་སེམས་ལ་བལྟས་པས། བསོད་ནམས་དགེ་རྩ་ཕར་བཏང་བ་དང་། སྡིག་སྒྲིབ་ཚུར་བླང་བ། དེ་ཐམས་ཅད་སེམས་ཡིན། སེམས་ནི་གདོད་མ་ནས་མ་སྐྱེས་པ་ནམ་མཁའ་ལྟ་བུ། སྟོང་པ་ཉིད་ཀྱི་ངོ་བོ་ཡེ་ནས་འོད་གསལ་བ་ཡིན་ཏེ། སེམས་བསྐྱེད་ཆེན་པོའི་མདོ་ལས། འོད་སྲུང་ཆོས་ཐམས་ཅད་ནི་མཁའ་ལྟར་མཚན་ཉིད་མེད་ཅིང་ཡེ་ནས་འོད་གསལ་བ་རྣམ་པར་དག་པ་དེ་ལ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ། །ཞེས་གསུངས་པའི་ཕྱིར། ཁྱེད་རང་ཉམས་ལེན་ཡོད་པ་རྣམས་ཀྱིས་སེམས་ངོ་མ་ཡེངས་པའི་ངང་ནས། གཏོང་ལེན་གྱི་དམིགས་པ་བསྒོམ་དང་། བྱམས་པ་ནི་བྱམས་ཆེན་གཉུག་མའི་ཏིང་ངེ་འཛིན་དང་། སྙིང་རྗེ་ནི་སྟོང་ཉིད་སྙིང་པོ་ཅན་ཡིན་པས། དེ་ལས་ཟབ་པའི་ཆོས་མདོ་ལུགས་ལ་མེད་པ་ཡིན། གསར་བུ་རྣམས་ཀྱིས་ཀྱང་གཏོང་ལེན་དེ་ཡུན་རིང་བསྒོམ་རྗེས། དེ་ནས་སྒོམ་མཁན་གྱི་སེམས་དེ་ལ་ལྟོས་ནི་སྡོད་དང་། ལས་འཕྲོ་ཡོད་ན་འདི་སྐབས་ནས་ཉམས་རྟོགས་བཟང་པོ་སྐྱེ་ཡང་སྲིད་པ་ཡིན། །

---

^{[མ་དཔེ་གཟིགས་ན་འདིར་གནོན།]}

གཏོང་ལེན་གྱི་དམིགས་པ་དེ་ཐུན་རེ་རྒྱུན་དུ་བསྒོམ་ན། བར་ཆད་གང་གིས་ཀྱང་མི་ཚུགས་ཏེ་སྲུང་བའི་མཆོག་ཡིན། གདོན་གྱིས་གནོད་པ་ཡང་གདོན་དེ་རང་ལ་བྱམས་སྙིང་རྗེ་གཏོང་ལེན་གྱི་དམིགས་པ་ཕུར་ཚུགས་སུ་བྱས་ན། གདོན་དེ་དམ་ལ་ཐོག །རང་ཉིད་ནད་ཀྱིས་བཏབ་ན་ཡང་། སེམས་ཅན་ཐམས་ཅད་ཀྱི་ནད་དང་སྡུག་བསྔལ་རང་གི་ན་སར་བསྟིམས་ལ། གཏོང་ལེན་གྱི་དམིགས་པ་དེ་ལ་ཕུར་ཚུགས་སུ་སྒོམས་པས། ལས་ཀྱི་རྣམ་པར་སྨིན་པ་མ་གཏོགས་པའི་ནད་ཐམས་ཅད་ཕན། གལ་ཏེ་ལས་ནད་ཡིན་ནས་མ་ཕན་ན་ཡང་། དམིགས་པ་དེ་བསྒོམས་པས། ན་བའི་ཟུག་གཟེར་དེས། ཚེ་སྔོན་གྱི་སྡིག་སྒྲིབ་ཅི་ཡོད་པ་དག་པར་འགྱུར་ཏེ། དེ་བཞིན་དུ་རང་ལ་སྡུག་བསྔལ་ཅི་བྱུང་ཡང་རུང་སྟེ། སེམས་ཅན་ཐམས་ཅད་ཀྱི་སྡུག་བསྔལ་དེ་རང་གི་སྡུག་བསྔལ་དེ་ལ་བསྟིམ་ནས། གཏོང་ལེན་གྱི་དམིགས་པ་དེ་བསྒོམས་པས། སྡུག་བསྔལ་ཅི་བྱུང་ཡང་བྱང་ཆུབ་ཀྱི་ལམ་དུ་འགྱུར་རོ། །དེ་བཞིན་དུ་མ་ཉེས་པའི་ཁ་ཡོག་གཤེ་སྐུར་སྨད་བབ་གཏམ་ངན། སེམས་ལ་མི་བཟོད་པ་གང་བྱུང་ཚད། ནད་བརྒྱ་སྨན་གཅིག་ལྟར་གཏོང་ལེན་དེ་ཁོ་

---

^{[མ་དཔེ་གཟིགས་ན་འདིར་གནོན།]}

ན་བསྒོམས་པས། སྡིག་སྒྲིབ་ཐམས་ཅད་རྩད་ནས་གཅོད་དེ། དུས་སྙིགས་མ་ལྔ་འདི་བྱང་ཆུབ་ཀྱི་ལམ་དུ་འགྱུར་བའི་ཐབས། ཇོ་བོ་གསེར་གླིང་པ་ནས་ཨ་ཏི་ཤ་ལ་བརྒྱུད་པའི་གདམས་ངག བཀའ་སྡེ་སྣོད་གསུམ་གྱི་སྙིང་པོ། གང་ཟག་མཆོག་དམན་སུས་ཀྱང་ཉམས་སུ་བླངས་བདེ་བ་ཡིན་པས་ཉམས་སུ་ལོངས་ཤིག ལྔ་ལྡན་རྩ་བ་ལས། བྱང་ཆུབ་སེམས་ཀྱི་རྟ་ཕོ་ལ། །གཞན་ཕན་གྱི་དཀྱུས་ཐག་མ་བཅད་ན། །ཁྲོམ་ལྷ་མིའི་བདེ་སྐྱིད་མི་འབྱུང་བས། །ལམ་སེམས་བསྐྱེད་འདི་ལ་ནན་ཏན་མཛོད། །ཅེས་གསུངས་སོ།། ༼༧༽ ཐུགས་རྗེ་ཆེན་པོའི་གདམས་ངག་ཟབ་མོ། སྡིག་སྒྲིབ་ཉེས་ལྟུང་སྦྱངས་བའི་ཐབས། སྟོབས་བཞིའི་སྒོ་ནས་བཤགས་པ་གལ་ཆེ་སྟེ། ཚེ་རབས་ཐམས་ཅད་དུ་གནོད་པ་ནི་སྡིག་སྒྲིབ་ཡིན། དེ་བཤགས་ན་དག །མ་བཤགས་ན་དུས་ནམ་ཞིག་ངེས་པར་སྨིན་དགོས་པ་ཡིན་ཏེ། སྤྱོད་འཇུག་ལས་ཀྱང་། མི་དགེ་བ་ལས་སྡུག་བསྔལ་འབྱུང་། །འདི་ལས་ཇི་ལྟར་ངེས་ཐར་ཞེས། །ཉིན་མཚན་རྟག་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཞེས་གསུངས་སོ། །རང་རེ་རྣམས་དམ་པའི་ཆོས་སྤངས།

---

^{[མ་དཔེ་གཟིགས་ན་འདིར་གནོན།]}

དཀོན་མཆོག་གསུམ་དང་གནམ་ས་རྒྱ་དབུས། ཇོ་བོ་སོགས་རྟེན་གསུམ་མྱུ་གུས་བྲིས་ཚད་ཟེར་བ་དང་། །རང་དད་པ་གང་ཆེའི་དགོན་པ་དང་བླ་མ་ལ་ཚད་བཙུགས་པའི་མནའ་འདི་ཞོར་ལ་འགྲོ་བ་འདི་ཡང་སྡིག་ཆེ་སྟེ། ཏིང་འཛིན་རྒྱལ་པོ་ལས། གང་གི་འཛམ་བུ་གླིང་འདི་ཡི། །མཆོད་རྟེན་ཐམས་ཅད་བཤིགས་བྱེད་པས། །གང་གིས་མདོ་སྡེ་དཔང་བྱེད་པ། །སྡིག་པ་འདི་ནི་ཆེས་ཁྱད་འཕགས། །ཞེས་གསུངས་སོ། །དེང་སང་ཆོས་པ་འགའ་ཞིག་ཆོས་འགོ་མ་ཐོན་པ་ལ་བརྟེན་ནས། ཆོས་པ་འདི་ཚོ་སྒོམ་ཆེན་འདི་ཚོ་ཟེར་ནས་ཆོས་པ་སྤྱི་ལ་སྐུར་འདེབས་བྱེད་པ། མཚམས་མེད་ལྔ་ལས་ཀྱང་ཐུ་སྟེ། །ཐར་པ་ཆེན་པོའི་མདོ་ལས། གང་ཞིག་བསྒོམ་ལ་སྐུར་བ་དང་། །དགེ་འདུན་དཀྲུགས་པར་བྱེད་པ་ནི། །སྟོང་ཁམས་གསུམ་པོ་གང་བ་ཡི། །མི་རྣམས་ཀྱི་ནི་སྲོག་བཅད་དང་། །སྲོག་ཆགས་ཐམས་ཅད་བསད་དང་འདྲ། །དེའི་སྡིག་པ་ཡང་དེ་བཞིན་ནོ། །གང་ཞིག་དགེ་སྦྱོངས་མཐོང་བ་ལ། །སྐུར་པ་འདེབས་ཤིང་མ་དད་ན། །དཀོན་མཆོག་གསུམ་གྱི་རིགས་གཅོད་པས། །དེ་ནི་རྒྱལ་བའི་ལན་མི་ལོན། །ཞེས་དང་།

---

^{[མ་དཔེ་གཟིགས་ན་འདིར་གནོན།]}

དེང་སང་སྐྱེས་བུ་དམ་པ་ཡུལ་མཐོན་པོ་རྣམས་ཀྱི། མཛད་སྤྱོད་ལ་རང་ཅུང་ཟད་མ་མགུ་ནས། སྐུར་པོ་ཆེན་པོ་འདེབས་པ་འདི། ཁོང་རྣམས་ལ་ནི་གནོད་མི་ནུས། རང་གི་ལྕེ་གླང་དོར་ལྔ་བརྒྱས་རྨོ་སྟེ། རྣམ་པར་ངེས་པ་ཆོ་འཕྲུལ་གྱི་མདོ་ལས། །བསྐལ་པ་དག་ནི་དུ་མར་ཡང་། །ལུས་ནི་དཔག་ཚད་ལྔ་བརྒྱར་འགྱུར། །དེ་ལ་མགོ་ཡང་ལྔ་བརྒྱ་སྟེ། མགོ་རྣམས་རེ་རེ་དག་ལ་ཡང་། །ལྔ་བརྒྱའི་ལྕེ་ལས་མི་ཉུང་སྟེ། །ལྕེ་གཅིག་ཉིད་ལ་ཐོང་གཤོལ་ནི། །ལྔ་བརྒྱ་ཚང་སྟེ་མི་ཉུང་བ། །རབ་ཏུ་འབར་བས་རྨོ་བར་བྱེད། །སྐུར་འདེབས་སྡིག་པའི་ལས་ཀྱིས་སོ། །ཞེས་གསུངས་སོ། །བོན་དང་མུ་སྟེགས་པ་ལ་དད་གུས་ཡང་མི་རུང་སྟེ། སྐུར་པ་འདེབས་ཡང་མི་རུང་ན། རབ་ཏུ་བྱུང་བ་རྣམས་ལ་ག་ལ་རུང་སྟེ། རྣམ་སྣང་མངོན་བྱང་ལས། གྲུབ་པའི་མཐའ་ཡི་བློ་བསྐྱེད་ཕྱིར། །ཕྱི་རོལ་པ་ལ་ཡང་ལམ་ཚོལ་ཞུགས། །དེ་ཕྱིར་དེ་ལ་སྨད་མི་བྱ། །ཉན་ཐོས་ལམ་ཞུགས་སྨོས་ཅི་དགོས། །ཞེས་གསུངས་སོ། ཁྱད་པར་རང་རེ་ཆོས་སྒོར་ཞུགས་པ་རྣམས། སྐྱབས་འགྲོའི་བསླབ་པ་དགུ། དགེ་བསྙེན་གྱི་ཁྲིམས་ལྔ། དགེ་ཚུལ་གྱི་ཁྲིམས་བཅུ། དགེ་

---

^{[མ་དཔེ་གཟིགས་ན་འདིར་གནོན།]}

སློང་གི་ཁྲིམས་ཉིས་བརྒྱ་དང་ལྔ་བཅུ་རྩ་གསུམ། བྱང་ཆུབ་སེམས་དཔའི་སྡོམ་པ་ཉི་ཤུ། གསང་སྔགས་ཀྱི་རྩ་ལྟུང་བཅུ་བཞི། སྦོམ་པོ་བརྒྱད། རྙིང་མའི་རྩ་བ་སྐུ་གསུང་ཐུགས། ཡན་ལག་ཉི་ཤུ་རྩ་ལྔ། རྒྱས་པར་ས་ཡ་འབུམ་སྡེ། དེ་ཚུར་བསྡུས་ན་ཉི་ཤུ་རྩ་བརྒྱད་རྣམས་བསྲུང་དགོས་ཏེ། རྩ་བ་རྣམས་མ་ཉམས་ན་རབ་ཡིན། ཕྲ་ཞིབ་རྣམས་ཤེས་པར་ཡང་དཀའ་བསྲུང་བར་དཀའ་སྟེ། དེས་མི་གནོད་རྟོགས་པ་མཐོ་བསམ་མི་རུང་བཤགས་པ་དགོས་ཏེ། རྒྱ་མཚོས་ཞུས་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཀླུའི་བདག་པོ་གང་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་ཚུལ་ཁྲིམས་ཡང་དག་པར་རྫོགས་པར་མ་བྱས་ཏེ། ཆོ་ག་ཉམས་པ་དང་། འཚོ་བ་ཉམས་པ་དང་ཚུལ་ཁྲིམས་ནི་ཡོངས་སུ་རྫོགས་པར་མ་བྱས་ལ་དེ་དག་གི་ལྟ་བ་དྲང་པོར་གྱུར་ཏེ། དེ་སེམས་ཅན་དམྱལ་བ་རྣམས་སུ་མི་སྐྱེ་ཤིང་། ཤི་འཕོས་ནས་ཀླུའི་སྐྱེ་ཤོ །གནས་རྣམས་སུ་སྐྱེ་བར་འགྱུར་ཏེ། ཞེས་གསུངས་སོ། །དེས་ན་ཕྲ་ཞིབ་རྣམས་ལ་བཤགས་པ་འདི་གལ་ཆེ། བཤགས་ན་དག་གམ་སྙམ་ན། མདོ་སྡེ་མྱ་ངན་འདས་ཆེན་

---

^{[མ་དཔེ་གཟིགས་ན་འདིར་གནོན།]}

ལས། སྡིག་པ་བྱས་ནས་ཀྱང་ཕྱིས་འགྱོད་དེ་ཕྱིར་བཅོས་ན། ཆུ་རྙོགས་མ་ཅན་ནོར་བུ་ཆུ་དྭངས་ཀྱིས་དྭངས་བའམ། སྤྲིན་དང་བྲལ་ནས་ཟླ་བ་གསལ་བ་དང་འདྲའོ། །བཤགས་ལུགས་ཇི་ལྟར་བཤགས་ན། སྟོབས་རྣམ་པ་བཞིའི་སྒོ་ནས་བཤགས་སོ། །རྣམ་པར་སུན་འབྱིན་པའི་སྟོབས་ནི་སྡིག་པ་སྔར་བྱས་པ་ལ་འགྱོད་པ། གཉེན་པོ་ཀུན་ཏུ་སྤྱོད་པའི་སྟོབས་ནི། སྡིག་པའི་གཉེན་པོར་དགེ་བ་སྤྱོད་པའོ། །ཉེས་པ་ལས་ལྡོག་པའི་སྟོབས་ནི། ཕྱིན་ཆད་འཕྲོ་བཅད་དེ་བསྡམས་པའོ། །རྟེན་གྱི་སྟོབས་ནི། དཀོན་མཆོག་ལ་སྐྱབས་ཞུ་བའོ། །སྔོན་སོར་ཕྲེང་ཅན་གྱིས་མི་དགུ་བརྒྱ་དང་དགུ་བཅུ་གོ་དགུ་བསད་པ་དང་། ཁྱེའུ་བདེ་བྱེད་ཀྱིས་མ་བསད་པ། ཅུང་དགའ་བོ་བུད་མེད་ལ་ཆགས་པ། རྒྱལ་བུ་མཐོང་ལྡན་གྱིས་ཕ་བསད་པ། རྒྱལ་བུ་དགེ་མཐོང་གིས་མི་སུམ་སྟོང་བསད་པ་ཡང་བཤགས་པས་དག །དེ་ལྟར་ཡང་། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་བཞིན་དུ་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་སོ། །སྤྱན་རས་གཟིགས་ཀྱིས་

---

^{[མ་དཔེ་གཟིགས་ན་འདིར་གནོན།]}

གསུངས་པའི་རྡོ་རྗེའི་ཚིག་རྐང་ལས། རང་བཞིན་བཅས་པའི་སྡིག་པའི་ཚོགས། །དེ་དག་ཀུན་རྫོབ་དོན་དམ་གྱི། །བཤགས་པའི་ཐབས་ཤེས་ལ་མཁས་པས། །ཧཱི༔ཡིག་བཞི་སྦྱོར་གདམས་པ་བསྒོམ། །ཞེས་གསུངས་པ་ལྟར། རང་ཐ་མལ་པར་གནས་པའི་སྤྱི་གཙུག་ཏུ་ཧྲིདཀར་པོ་ཚེག་དྲག་དང་བཅས་པ་ལས་འོད་ཟེར་འཕྲོ་བའི་རང་བཞིན་ཅན་དུ་བསམ། དེ་ལས་བདུད་རྩི་འོ་མ་ལྟ་བུ་བབས་པས། ལུས་ཀྱི་ནང་གི་སྡིག་པ་དང་སྒྲིབ་པ་ཐམས་ཅད་བཀྲུས། བ་སྤུའི་བུ་ག་དང་རྩ་སྒོ་ཆུ་སྒོ་ཞབས་སེན་མོའི་བར་ནས་དུད་པ་དང་སོལ་ཁུའི་རྣམ་པར་ནུ་རུ་རུ་བུད་པར་བསམ་ལ་ལུས་ཀྱི་ནང་ཐམས་ཅད་ཡེ་ཤེས་ཀྱི་བདུད་རྩིས་དཀར་ལྟེམ་གྱིས་གང་བར་བསམ་པ་ནི། སྡིག་པ་དག་པར་བྱེད་པའི་སྦྱོར་བའོ། །སྡིག་སྒྲིབ་ཐམས་ཅད་སྦྱང་བར་བྱེད་པ་འོད་ཟེར་སྤྲོ་བསྡུའི་སྦྱོར་བ་ནི། ཧྲཱིཿ ཡིག་ལས་འོད་ཟེར་ཁ་དོག་ལྔ་དང་ལྡན་པ་ཉི་མ་སྟོང་གི་འོད་ལྟ་བུ་འཕྲོས་པས་ལུས་ཀྱི་ནང་གི་སྡིག་སྒྲིབ་ཐམས་ཅད་དག་ནས་མུན་པ་ལ་ཉི་མ་ཤར་བ་ལྟ་བུར་སྦྱངས། ལུས་ཀྱི་ནང་འོད་ཟེར་གྱིས་གང་འོད་ཟེར་སྣ་ལྔ་ཕྱིར་འཕྲོས་སེམས་ཅན་ཐམས་ཅད་ཀྱི་ནད་གདོན་སྡིག་

---

^{[མ་དཔེ་གཟིགས་ན་འདིར་གནོན།]}

སྒྲིབ་ཐམས་ཅད་དག་པར་བསྒོམ་པ་ནི་སྒྲིབ་པ་སྦྱོང་བར་བྱེད་པའི་སྦྱོར་བའོ། །དེ་དག་གི་སྐབས་སུ་ངག་ཏུ་ཡང་ཧྲཱིཿའདོན་པར་བྱའོ། །མཐར་རང་ལུས་འོད་དུ་ཞུ་ནས་ཧཱུྃ་ལ་ཐིམ། །ཧྲཱིཿ ཡིག་ཡང་ར་ཏ་ལ། ར་ཏ་ཧ་ཁོག་ལ། དེ་གི་གུ་ལ། དེ་རིམ་གྱིས་ནམ་མཁའ་ལ་འཇའ་ཡལ་བ་ལྟར་དམིགས་མེད་ཀྱི་ངང་ལ་འཇོགས་པ་ནི། སྦྱོང་བྱེད་ཆེན་པོའོ། །ཞེས་གསུངས་པ་ལྟར་བསྒོམ། རྗེས་ནས་སྒོམ་མཁན་གྱི་སེམས་ལ་བལྟས་པ་དོན་དམ་པའི་བཤགས་པ་ཡིན་ཏེ། ལས་རྣམ་པར་དག་པའི་མདོ་ལས། གང་ཞིག་བཤགས་པ་བྱེད་འདོད་པ། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་ལྟ། །དི་ནི་འགྱོད་ཚངས་མཆོག་ཡིན་ནོ། །ཞེས་གསུངས་སོ།། ༼༨༽ ཐུགས་རྗེ་ཆེན་པོའི་གདམས་ངག་ཟབ་མོ། བསོད་ནམས་ཀྱི་ཚོགས་བསགས་པའི་ཐབས། མཎྜལ་མཆོད་པ་འབུལ་བ་ནི། སྤྱན་རས་གཟིགས་ཀྱིས་གསུངས་པའི་རྡོ་རྗེའི་ཚིག་རྐང་ལས། ཡན་ལག་བདུན་དང་རབ་ལྡན་པ། །མཎྜལ་ཕྱི་ནང་གསང་གསུམ་འབུལ། །ཆོས་ཀུན་སྒྱུ་འདྲར་རབ་ཤེས་པའི། །ཡེ་ཤེས་ཚོགས་ལའང་བསླབ་པར་བྱ། །ཞེས་དང་། ཀློང་

---

^{[མ་དཔེ་གཟིགས་ན་འདིར་གནོན།]}

གསལ་འབར་མའི་རྒྱུད་ལས། ས་ཤིང་རིན་ཆེན་མཎྜལ་ལ། །དམིགས་རྟེན་བྱས་ལ་སྐུ་ གསུམ་གྱི། །མཎྜལ་རྒྱས་བསྡུས་མང་པོ་འབུལ། །དེ་ཡིས་བདག་རྒྱུད ་ཚོགས་གཉིས་རྫོགས། །གནས་སྐབས་རིག་སྣང་རང་ངོ་འཕྲོད། །མཐར་ཐུག་གདོད་མར་རང་ཚུགས་ཐུབ། །ཅེས་དང་། མཆོད་པ་མཎྜལ་དངོས་སུ་མ་འབྱོར་ན། །ཡིད་ཀྱིས་སྤྲུལ་ནས་མཆོད་པས་ཆོག་པ་སྟེ། །ཕྱེ་མ་ཕུར་མ་རི་རབ་མཉམ་པ་དང་། །ཞེས་སོགས་གསུངས་པ་ཡིད་སྤྲུལ་ཡིན་གྱིས། དངོས་སུ་དེ་འདྲ་ག་ལ་སྲིད། སངས་རྒྱས་ཞིང་ཁམས་རྣམས་དང་། འཇིག་རྟེན་གྱི་ཁམས་རྣམས་སུ། རང་གྲུབ་ཏུ་ཡོད་ངེས་རྣམས་ཀྱང་། བློ་ཡིས་བླངས་ནས་འབུལ་ཏེ། སྤྱོད་འཇུག་ལས། འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ཞེས་སོགས་གསུངས་པས། མདུན་གྱི་ནམ་མཁར་པད་ཟླའི་གདན་ལ། བླ་མ་ཐམས་ཅད་འདུས་པའི་ངོ་བོ། སངས་རྒྱས་འོད་དཔག་མེད་སྐུ་མདོག་བྱི་རུ་ལྟར་དམར་བ། དབུ་གཙུག་ཏོར་

---

^{[མ་དཔེ་གཟིགས་ན་འདིར་གནོན།]}

མཛོད་སྤུ་དཀར་པོ་སོགས་མཚན་དང་དཔེ་བྱད་ཡོངས་སུ་རྫོགས་ཤིང་། ཆོས་གོས་རྣམ་གསུམ་གསོལ་ནས་རྡོ་རྗེའི་སྐྱིལ་ཀྲུང་གིས་བཞུགས་པ་ཕྱག་གཉིས་མཉམ་བཞག་གི་སྟེང་ལ་། བདུད་རྩིས་བཀང་བ་བསྣམས་པ། དེ་ལྟ་བུ་གཅིག་མཎྜལ་དང་མཆོད་པ་ནམ་འབུལ་གྱི་དུས་སུ་ནམ་མཁར་ལམ་ལམ་གསལ་བཏབ། དེའི་མདུན་སྐྱེ་བ་སྔ་མ་ཐམས་ཅད་དང་ཕྱི་མ་ཐམས་ཅད་ཀྱིས། ལུས་ལོངས་སྤྱོད་དགེ་བའི་རྩ་བ་དང་བཅས་པ་ཕུལ། གླིང་བཞི་རི་རབ་དང་བཅས་པ། སྟེང་ལྷའི་ལོངས་སྤྱོད། འོག་ཀླུའི་ལོངས་སྤྱོད། བར་མིའི་ལོངས་སྤྱོད། དབྱར་ཁའི་མེ་ཏོག་ཐམས་ཅད། སྟོན་ཀའི་ལོ་ཐོག ལྷ་ཡི་ཡུལ་དུ་བདུད་རྩི་ཁ་དོག་ལྔ་ཡོད་པར་བཤད་པ་ཐམས་ཅད་རང་གི་བློ་ཡིས་བླངས་ཏེ་ཕུལ་བར་བསྒོམ། མཎྜལ་གྱི་ཚིགས་བཅད་ཤེས་སམ། མེད་ན་དམིགས་པ་བསྒོམ་ཞིང་ཡིག་དྲུག་འདོན་པས་ཆོག་སྟེ། རྒྱལ་པོ་སྲོང་བཙན་སྒམ་པོས་གསུངས་པའི། །སྣང་བ་ཚོགས་ལམ་གྱི་གཏོར་མ་ཞེས་པའི་དོན་ཡང་དེ་ཡིན་ཏེ། དཔའ་ཡིད་ལ་ཡོད་ན་མཚོན་གོར་མོ་རྡོ་ཡིས་ཆོག་ཟེར་བའི་དཔེ། དེ་ལྟར་བསྒོམ་ཤེས་ན་ཚོགས་རྫོགས་པ་ལ་དཀའ་

---

^{[མ་དཔེ་གཟིགས་ན་འདིར་གནོན།]}

ཚེགས་མེད་གསུངས། དེ་ནས་མཆོད་པའི་ཡུལ་གྱི་ལྷ་ཚོགས་རང་ལ་བསྟིམ་ནས། ལུས་ངག་ཡིད་གསུམ་མ་བཅོས་པའི་ངང་ལ་མཉམ་པར་འཇོག་པ་ནི་ཡེ་ཤེས་ཀྱི་ཚོགས་སོ། །ཞེས་གྲུབ་ཆེན་མི་ཏྲ་ཛ་ཀིས་གསུངས་ཏེ། བདུད་རྩི་གསང་བའི་རྒྱུད་ལས་ཀྱང་། །མཉེས་པ་དོན་གྱི་མཆོད་པ་སྟེ། །སྤོས་སོགས་ཕུལ་བས་མཉེས་པ་མེད། །རང་སེམས་ལས་སུ་རུང་བ་དག མཉེས་པའི་མཆོད་པ་ཆེན་པོ་ལགས། །ཞེས་གསུངས་སོ། །མཎྜལ་སྐབས་འདིར་ཚེ་བུམ་བདུད་རྩིས་བཀང་བ་མང་པོ་སྤྲུལ་ཏེ་ཕུལ་བས་ཚེ་རིང་། ཤེས་རབ་ཀྱི་རལ་གྲི་མང་པོ་དང་གླེགས་བམ་མང་པོ་སྤྲུལ་ཏེ་ཕུལ་བས་ཤེས་རབ་ཆེ། བཟང་དྲུག་སྨན་མང་པོ་སྤྲུལ་ཏེ་ཕུལ་བས་ནད་ཞི། རྒྱལ་སྲིད་སྣ་བདུན་དང་། ། རྒྱལ་པོ་ལ་འོས་པའི་ཉེར་སྤྱོད། གདུགས་བླ་བྲེ་རྟེན་མང་པོ་སྤྲུལ་ཏེ་ཕུལ་བས་མངའ་ཐང་འཕེལ། རིམ་གྲོའི་མཆོག་ཀྱང་ཡིན་ཏེ། གྲུབ་ཆེན་ཀརྨ་པཀྵིའི་ཞལ་ནས། མདོས་དང་མཎྜལ་དང་བསྐང་བ་རྣམས་དོན་གཅིག་གསུངས། སྔོན་གླིང་རས་ལ་མཎྜལ་འབུལ་བཅུག་པའི་རྗེས་སུ་གདམས་ངག་བསྟན་པས་རྟོགས་པ་མཆོག་ཏུ་གྱུར། དེས་ན་ལས་འཕྲོ་ཅན་

---

^{[མ་དཔེ་གཟིགས་ན་འདིར་གནོན།]}

ལ་འདི་ཡི་སྐབས་སུ་རྟོགས་པ་སྐྱེ་ཡང་སྲིད། མཎྜལ་འདི་ནི་བརྒྱ་སྟོང་ཁྲི་འབུམ་ཙམ་ཕུལ་ན། བསོད་ནམས་འཕྲལ་དུ་བསྐྱེད་པའི་མན་ངག་ཟབ་མོ་ཡིན། ང་བསོད་ནམས་ཆུང་ཟེར་ནས་རྨོང་ད་མང་པོ་བྱས་པས་ཅི་ལ་ཕན། ཚོགས་བསགས་ཀྱི་ཆོས་ཐུན་དེ་ཉམས་སུ་ལོངས།། ༼༩༽ ཐུགས་རྗེ་ཆེན་པོའི་མན་ངག་ཟབ་མོ། བྱིན་རླབས་མྱུར་དུ་འཇུག་པའི་ཐབས་བླ་མའི་རྣལ་འབྱོར་ནི། སློབ་དཔོན་མཚན་ཉིད་དང་ལྡན་པ་རྙེད་ན། བླ་མ་དེ་ཉིད་དངོས་ཀྱི་སྐུར་བསྒོམ་ནས་གསོལ་བ་འདེབས་རུང་སྟེ། རྗེ་མི་བསྐྱོད་ཞབས་ཀྱི་གསུངས་ལས། བླ་མ་ཡང་བླ་མ་མིན་པ་བླ་མར་བཅོས་པ་ལ་མི་ཟེར། བླ་མ་ཡིན་པ་བླ་མར་བྱོན་པ་ཞིག་དགོས་ཞེས་གསུངས། བླ་མ་དེ་ལྟ་བུ་མ་རྙེད་ན། བླ་མ་དེ་ཉིད་རྡོ་རྗེ་འཆང་སོགས་ལྷའི་སྐུར་བསྒོམ་ལ་གསོལ་བ་བཏབ་ན། བླ་མ་སོ་སོའི་སྐྱེ་བོ་འཆིང་བ་དང་ལྡན་པ་ཞིག་ཡིན་ཀྱང་། སངས་རྒྱས་དངོས་ཀྱི་མོས་གུས་ཕུལ་ན། སློབ་བུ་དད་ལྡན་དེ་རྗེས་སུ་བཟུང་བའི་ཕྱིར་སངས་རྒྱས་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་བླ་མ་དེ་ལ་ཞུགས་ཏེ། སངས་རྒྱས་ཀྱི་མཛད་པ་སྟོན་ནུས་པར་གསུངས། ཡང་ཁྲིད་ཀྱི་ལུང་རྒྱུན་

---

^{[མ་དཔེ་གཟིགས་ན་འདིར་གནོན།]}

ཐོབ་ནས། སྔར་གྱི་བཀའ་བརྒྱུད་གོང་མའི་བླ་མ་གང་དང་གང་ལ་མོས་ཤིང་དད་ན་དེ་ཉིད་རང་གི་རྩ་བའི་བླ་མར་འགྱུར་ཞིང་། བྱིན་རླབས་འཇུག་པར་ངེས་པས་ཚིག་བརྒྱུད་མི་དགོས། དོན་བརྒྱུད་འདི་ཁོ་བོ་རང་ལ་དད་ཆོག་ཅེས། སྒམ་པོ་པ། དུས་གསུམ་མཁྱེན་པ། ཀརྨ་པཀྵི། ཞང་གཡུ་བྲག་པ། རྗེ་རྒོད་ཚང་པ་སོགས་ཀྱིས་གསུངས་པས། དེ་ལྟར་བྱའོ། །དམ་ཚིག་ གསུམ་བཀོད་པའི་རྒྱུད ་ལས། རྟོགས་པ་བྱིན་རླབས་ལས་སྐྱེ་སྟེ། །དེ་ཡི་རྩ་བ་མོས་གུས་ཡིན། །སེམས་ལ་མོས་གུས་མེད་པ་ལ། །བླ་མའི་བྱིན་རླབས་མི་འཇུག་སྟེ། །མཆོག་གི་ལམ་དང་བྲལ་བ་ཡིན། །ཞེས་གསུངས། ས་སྐྱ་པཎྜི་ཏས། ཉི་མའི་དཀྱིལ་འཁོར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་ཡོན་ཏན་ཡང་། །བླ་མ་མེད་པར་འབྱིན་མི་ནུས། །ཞེས་གསུངས་སོ། །ཡིད་བཞིན་མཆོག་གི་རྒྱུད་ལས། རང་གི་བླ་མ་ལ་འདུན་པའི་ལྷ། །སྤྱི་བོའི་གཙུག་ཏུ་བསྒོམ་པ་ཡི། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་ཁར་ལན་ གསུམ་བསྟིམས་བྱས་

---

^{[མ་དཔེ་གཟིགས་ན་འདིར་གནོན།]}

པས། །བརྒྱ་སྟོང་རྒྱུད ་དང་ཆེར་མི་ཕོད། །དེ་བས་རྟག་ཏུ་དྲན་པ་ཡི། །སྤྱི་གཙུག་འཁོར་ལོའི་རྒྱན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་གསུངས་སོ། །རྫོགས་ཆེན་ཀློང་གསལ་འབར་མའི་རྒྱུད་ལས། བླ་མ་སངས་རྒྱས་ཀུན་གྱི་ཚབ། །མོས་གུས་གདུང་བས་གསོལ་བཏབ་ན། །སྒྲུབ་ཐབས་གཞན་ཚོ་ག་ལ་དགོས། །དངོས་གྲུབ་ཆེན་པོ་དུས་གཅིག་འབྱུང་། །ཞེས་གསུངས་པས། བླ་མ་ལྷ་གང་འདོད་དུ་བསྒོམ་ནས་གསོལ་བ་བཏབ་པས་ལྷ་དེ་འགྲུབ་པའི་ཕྱིར་སྒྲུབ་ཐབས་གཞན་མི་དགོས་ཏེ། གྲུབ་ཆེན་མི་ཏྲ་ཛཱ་ཀིའི་ཞལ་ནས། མཆོག་འདོད་པས་བླ་མ་རྡོ་རྗེ་འཆང་། ཤེས་རབ་འདོད་པས་བླ་མ་འཇམ་དབྱངས་སུ་བསྒོམ། བྱམས་སྙིང་རྗེ་འདོད་པས་བླ་མ་སྤྱན་རས་གཟིགས། མཐུ་སྟོབས་ཆེ་བར་འདོད་པས་ཕྱག་ན་རྡོ་རྗེ། འཇིགས་སྐྱོབ་ལ་སྒྲོལ་མ། ཚེ་རིང་བར་འདོད་པས་ཚེ་དཔག་མེད། ནད་ཞི་བར་འདོད་པས་སྨན་བླ། ལོངས་སྤྱོད་ཆེ་བར་འདོད་པས་རྣམ་སྲས་རིན་འབྱུང་། ཞི་བ་ལ་རྡོ་རྗེ་སེམས་དཔའ། རྒྱས་པ་ལ་རིན་ཆེན་འབྱུང་ལྡན། དབང་ལ་འོད་དཔག་མེད་དང་ཀུ་རུ་ཀུལླེ། དྲག་པོ་ལ་རྡོ་རྗེ་འཇིགས་བྱེད་དང་ཆོས་སྐྱོང་

---

^{[མ་དཔེ་གཟིགས་ན་འདིར་གནོན།]}

དུ་བསྒོམ་ནས། འདོད་པའི་གསོལ་འདེབས་བྱས་པས། སོ་སོའི་ལས་འགྲུབ་པ་ཡིན་གསུངས། ཁྱད་པར་དུ་ཨོ་རྒྱན་རིན་པོ་ཆེ་བསྒོམ་ན་ཐུགས་རྗེ་བྱིན་རླབས་མྱུར་ཏེ། ཨོ་རྒྱན་རིན་པོ་ཆེའི་ཞལ་ནས། ཁྱད་པར་བྱིན་རླབས་དངོས་གྲུབ་མྱུར་འདོད་ན། །རྡོ་རྗེ་དྲག་རྩལ་པདྨ་ང་ཉིད་བསྒོམ། །དུས་གསུམ་སངས་རྒྱས་ཡོན་ཏན་བདག་ལ་རྫོགས། །རྒྱལ་བ་ཞི་ཁྲོ་གསང་སྔགས་ཕྱི་ནང་དང་། །དཔའ་བོ་མཁའ་འགྲོའི་དངོས་གྲུབ་བྱིན་རླབས་རྣམས། །ནོར་བུ་རིན་ཆེན་ཡོན་ཏན་ཀུན་རྫོགས་ལྟར། །དེ་དག་ཐམས་ཅད་མ་ལུས་བདག་ལ་རྫོགས། །ང་ཉིད་བསྒོམ་དང་དྲན་པ་ཙམ་གྱིས་ཀྱང་། །རྒྱལ་བ་སྲས་བཅས་དེ་ལ་ཐུགས་རྗེས་གཟིགས། །གསང་སྔགས་ཕྱི་ནང་ལྷ་ཚོགས་ཐམས་ཅད་ཀྱིས། །དབང་བསྐུར་བྱིན་རླབས་དངོས་གྲུབ་སྟེར་བར་བྱེད། །ཡོན་ཏན་ཐམས་ཅད་ང་ཉིད་བསྒོམས་པས་འབྱུང་། །དངོས་གྲུབ་ཐམས་ཅད་ང་ཉིད་བསྒོམས་པས་ཐོབ། །ཕྲིན་ལས་ཐམས་ཅད་ང་ཉིད་བསྒོམས་པས་འགྲུབ། །ཅེས་གསུངས་པས། རང་གི་སྤྱི་གཙུག་ཁྲུ་གང་ཙམ་གྱི་ནམ་མཁར། པདྨ་འདབ་མ་སྟོང་དང་ལྡན་པའི་གེ་སར་གྱི་སྟེང་དུ། ཉི་

---

^{[མ་དཔེ་གཟིགས་ན་འདིར་གནོན།]}

མ་ཟླ་བའི་སྟེང་དུ་རྩ་བའི་བླ་མ་ཨོ་རྒྱན་པདྨ་པཎྜི་ཏ་བཅུ་དྲུག་ལོན་པའི་ཚུལ་ཅན། དཀར་དམར་མདངས་དང་ལྡན་པ། ཆོས་གོས་གསེར་གྱི་པ་ཏྲ་ཅན། ཟ་འོག་གི་བེར་དང་པད་ཞུ་པདྨ་ཞྭ་ཁ་ཕྱེས་པ་ལྟ་བུ་ལ། རྒོད་སྒྲོ་དར་སྣ་ཉི་ཟླ་རྒྱ་གྲམ་གྱིས་མཚན་པ། ཕྱག་གཡས་གསེར་གྱི་རྡོ་རྗེ་ཐུགས་ཀར་འཛིན་པ། གཡོན་པས་ཡེ་ཤེས་ཀྱི་བདུད་རྩིས་བཀང་བའི་བྷནྡྷ་བསྣམས་པ། ཁ་ཊཱཾ་གཡོན་གྱི་མཆན་དུ་བཅུག་པ། འོད་ཟེར་སྟོང་གསུམ་ཁེངས་པར་བསྒོམ། ཕྱོགས་བཅུའི་བླ་མ་ཡི་དམ་སངས་རྒྱས་བྱང་སེམས་ཐམས་ཅད་ཁ་བ་བུ་ཡུག་ལྟར་བྱོན་ནས་དེ་ལ་ཐིམ། དེ་ལ་དད་གུས་རྩེ་གཅིག་གི་ངང་ནས། གུ་རུ་པདྨ་འབྱུང་གནས་ལ་གསོལ་བ་འདེབས་སོ། །ཞེས་པ་བརྒྱ་ཚར་བརྗོད་པའམ། ཡི་གེ་བཅུ་གཅིག་སྔགས་ཀྱི་ཕྲེང་བ་འདི། །ཕྱི་ལྟར་གསོལ་བ་འདེབས་པའི་སྙིང་པོ་ཡིན། །ཞེས་གསུངས་པས། བཛྲ་གུ་རུ་སྟོང་ཚར་རམ་ལྔ་བརྒྱ་ཙམ་བཟླས། དེ་ནས་ཨོ་རྒྱན་འོད་དུ་ཞུ་ནས་རང་ལ་ཐིམ་པས། རང་དང་དབྱེར་མེད་དུ་འདྲེས། རང་གི་སེམས་ལ་སེམས་ཀྱིས་བལྟ་བ་ཙམ་མ་གཏོགས་བཅོས་བསླད་མེད་པར་བྱིན་རླབས་ལས་བྱུང་བའི་ཉམས་མྱོང་དེ་སྐྱོང་སྟེ་

---

^{[མ་དཔེ་གཟིགས་ན་འདིར་གནོན།]}

ཨོ་རྒྱན་རིན་པོ་ཆེས་གསུངས་པའི་བླ་མ་ཆོས་སྐུའི་སྒྲུབ་ཐབས་ལས། གཉིས་མེད་ཐུགས་རྒྱུད་འཕོས་པའི་ངང་དེ་ལ། །སྟོན་སེར་ནམ་མཁའ་བཞིན་དུ་གསལ་དྭངས་བཞག སྨྲར་མེད་ཡིད་ཆེས་འདི་ཞེས་བརྗོད་བྱ་བྲལ། །འདི་འདྲའི་ཡིན་ལུགས་མ་མཐོང་མཐོང་རྒྱུ་གཅིག །ས་ལེ་རང་གསལ་རྟོག་མེད་རྗེན་ནེ་བ། །དེ་ཚེ་རང་བྱུང་བླ་མའི་རང་ཞལ་མཇལ། །འགྲོ་མགོན་བླ་མའི་བྱིན་རླབས་དེ་ཚེ་ཞུགས། །དེ་ཡི་དོན་རྟོགས་རྒྱུན་དུ་དེ་ལྟར་བསྒོམ། །ཞེས་གསུངས་སོ། །དཔལ་ཕག་མོ་གྲུ་པའི་ཞལ་ནས། །དོན་དམ་བློ་འདས་སེམས་ཉིད་ཆོས་ཀྱི་སྐུ། །གདོད་ནས་རྣམ་དག་མ་སྐྱེས་འདུས་མ་བྱས། །རང་བཞིན་འོད་གསལ་ལྷུན་གྲུབ་དེ་བཞིན་ཉིད། །གློ་བུར་རྟོག་པའི་དྲི་མས་མ་བསླད་ཅིང་། །མི་རྟོག་ཟག་མེད་བདེ་ཆེན་ཞི་བའི་ངང་། །བསྒོམ་བྱ་སྒོམ་བྱེད་རྩོལ་བ་རྣམས་སྤངས་ཏེ། །འབད་མེད་ཆེན་པོར་མ་བཅོས་ལྷུག་པར་བཞག །བརྗོད་བྲལ་བློ་འདས་ཕྱག་རྒྱ་ཆེན་པོ་ནི། །སྐུ་གསུམ་དབྱེར་མེད་བླ་མ་དམ་པ་སྟེ། །དེས་ནི་བདུད་དང་ཉོན་མོངས་ལས་རྒྱལ་ཞིང་། །དཔག་མེད་ཡོན་ཏན་རྒྱ་མཚོའི་བདག་ཉིད་དེ། །བསྒྲུབ་མཆོག་

---

^{[མ་དཔེ་གཟིགས་ན་འདིར་གནོན།]}

བླ་ན་མེད་པར་རྒྱལ་བས་བཤད། །ཅེས་གསུངས་སོ། །དེ་ལྟར་རྩེ་གཅིག་ཏུ་བསྒོམས་པས། ཉམས་རྟོགས་ངེས་པར་སྐྱེ་སྟེ། དེ་ལ་ངོ་སྤྲོད་ཡང་མི་དགོས་སོ། །གེགས་དང་། གོལ་ས་ཡང་མེད་པར། མོས་གུས་ཆེན་པོའི་ཁྲིད་ལས་གསུངས། ལྔ་ལྡན་གྱི་ཡང་རྩ་བ་ཡིན་ཏེ། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་བོ་མི་འབབ་པས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པས་ཉམས་སུ་ལོངས་ཤིག། ༼༡༠༽ ཐུགས་རྗེ་ཆེན་པོའི་མན་ངག་ཟབ་མོ། །བྱང་ཆུབ་མྱུར་དུ་ཐོབ་པའི་ཐབས། བསྐྱེད་རིམ་བསྒོམ་པ་ནི། གསང་སྔགས་ཀྱི་ཁྱད་ཆོས་ཡིན་པས། མདོ་ལུགས་ལས་ཀྱང་ཁྱད་པར་འཕགས་ཏེ། སཾ་བྷུ་ཏྲི་ལས། མདོར་བསྡུས་ན་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་མ་ཐོབ་པར། །གང་གིས་དམ་པས་བདེ་བ་ཁྱོད། །སྐྱེ་བ་འདིས་ནི་འཐོབ་པར་འགྱུར། །ཡང་ན་རྡོ་རྗེ་འཛིན་པ་ཉིད། །ཡང་ན་འཁོར་ལོས་སྒྱུར་བའམ། །འདི་ཡི་དངོས་གྲུབ་ཆེན་པོ་བརྒྱད། །གཞན་ཡང་ཡིད་ལ་འདོད་པ་ཐོབ། །ཅེས་གསུངས། །ཕ་

---

^{[མ་དཔེ་གཟིགས་ན་འདིར་གནོན།]}

རོལ་ཏུ་ཕྱིན་པའི་ལམ་གྱིས། བསྐལ་པ་གྲངས་མེད་བདུན་དང་ལྔ་དང་གསུམ་ལས་ཉེ་བར་སངས་རྒྱས་ཐོབ་པའི་ཐབས་མེད་ལ། གསང་སྔགས་ལུགས་ཀྱི་རབ་ཚེ་འདི་འབྲིང་བར་དོ་ཐ་མ་སྐྱེ་བ་གསུམ་དང་བདུན་དང་བཅུ་དྲུག་ལས་མི་འགྱང་བར་སངས་རྒྱས་ཐོབ་པ་ནི། དཔེར་ན་ལོ་དང་ཟླ་བ་འགོར་བའི་ལམ་རྐང་མགྱོགས་འགྲུབ་པས་ཉིན་ལྷ་གཅིག་གིས་བགྲོད་པ་ལྟར། ཡི་དམ་གྱི་ལྷ་དང་རང་གཉིས་དབྱེར་མེད་མཉམ་པ་ཉིད་དུ་བསྒོམ་པའི་མཐུ་ཡིན་ཏེ། སློབ་དཔོན་ཛྙཱ་ན་ས་ག་རས། དཔེར་ན་སྐྱེས་བུ་སྟོབས་ཆུང་བའམ། །ཕྱུགས་ཀྱི་ཤིང་རྟས་ཡུན་རིང་གིས། །བགྲོད་པར་བྱ་བའི་གནས་དེར་ནི། །རྐང་མགྱོགས་གྲུབ་པའི་ཉི་ཟླས་ནི། །མྱུར་བ་ཉིད་དུ་འགྲོ་བར་འགྱུར། །དེ་བཞིན་ཕ་རོལ་ཕྱིན་པའམ། །ལམ་གཞན་དག་ལ་བརྟེན་ནས་ནི། །ཡུན་རིང་འཇུག་པར་འགྱུར་བ་དེས། །སྔགས་པས་ཚེ་འདིར་འཇུག་པ་ནི། །མཉམ་ཉིད་མཐུ་ལ་བརྟེན་ཕྱིར་རོ། །ཞེས་གསུངས། གྲུབ་ཆེན་ཀརྨ་པཀྵིའི་ཞལ་ནས། ཡི་གེ་མི་ཤེས་པ་རྣམས་སྐད་ཅིག་དྲན་རྫོགས་ཀྱི་རྣལ་འབྱོར་བྱའོ། །ཞེས་གསུངས་སོ། །དཔལ་ཕག་མོ་གྲུ་པའི་ཞལ་ནས།

---

^{[མ་དཔེ་གཟིགས་ན་འདིར་གནོན།]}

འཇའ་ཚོན་ལྟ་བུའི་ལྷ་སྐུ་བསྒོམ། །དགོངས་པ་ཐ་མལ་ཞེན་པ་སྤོངས། །ཞེས་གསུངས་པས། ལར་གསང་སྔགས་ཀྱི་ཉམས་ལེན་ལ་དབང་ཐོབ་དགོས། མ་ཐོབ་ན་མི་རུང་ན་ཡང་། གྲུབ་ཆེན་ཀརྨ་པཀི་ལ། ཐུགས་རྗེ་ཆེན་པོའི་ལུང་བསྟན་ཅིང་གནང་བའི་རྒྱལ་བ་རྒྱ་མཚོ་ཁྲོམ་ཆོས་མ་འདི་དབང་མ་ཐོབ་ན་ཡང་རུང་སྟེ། དབང་མ་ཐོབ་པ་དང་། ལུང་མ་མནོས་པ་དང་། སློབ་དཔོན་གྱིས་ཆོས་མ་རྫོགས་པ་རྣམས་ཀྱང་ཕྲིན་ལས་ཐུགས་རྗེ་ཆེན་པོ་དང་མཉམ་པར་གྱུར་ཅིག །ཀརྨ་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྒྲུབ་ཐབས་ལགས་པས་ཀུན་གྱིས་བྲིས་ཤིག །སྒྲུབས་ཤིག །དབང་བསྐུར་ཅིག །ཁྲོམ་ཆོས་རྒྱུ་ཆེན་པོས་གཞན་དོན་གྱིས་ཤིག །བླ་མ་ཡི་དམ་མཁའ་འགྲོའི་བྱིན་རླབས་ཀྱིས་ལུང་མ་མནོས་ཀྱང་། དཔེ་འདི་གང་གིས་བྲིས་པ་དང་མཐོང་བར་གྱུར་པ་རྣམས་ཀྱང་རང་གཞན་གྱི་དོན་ཉི་མ་ཤར་བ་ལྟ་བུར་གྱུར་ཅིག །ཅེས་གསུངས་སོ། །འདི་ཡབ་སྲས་རྣམས་དབུ་ཞྭ་བཞེས་དུས་ཁྲོམ་ཆོས་སུ་གནང་བ་སྟེ། དེ་ཉིད་རྗེ་དཀོན་མཆོག་ཡན་ལག་གིས་ཚིགས་བཅད་དུ་ཕབ་པ་འདི། རཱ་ག་ཨ་སྱའི་ཡབ་སྲས་གསུམ་ཀའི་དྲུང་ནས་ལན་བཞི་བཅུ་ཞེ་བསྒང་

---

^{[མ་དཔེ་གཟིགས་ན་འདིར་གནོན།]}

ཙམ་ཐོབ་པས། བྱིན་རླབས་ལྷག་པར་ཆེ་བ་ཡིན་ཏེ། བྱང་ཆུབ་མཆོག་ཏུ་སེམས་བསྐྱེད་ཅིང་། །རང་གི་རྣམ་ཤེས་ཧཱི༔ཡིག་དཀར། །འོད་ཟེར་དཀར་པོ་འཕྲོས་པ་ཡིས། །སེམས་ཅན་ཀུན་གྱི་སྡིག་སྒྲིབ་དག །ཕྱི་སྣོད་ནང་བཅུད་གཞལ་ཡས་ལྷ། །འོད་ཟེར་ཚུར་འདུས་ཧྲིལ་ཐིམ། །པདྨ་ཉི་ཟླའི་གདན་གྱི་སྟེང་། །ཧྲཱིཿཡིག་འོད་དུ་ཞུ་བ་ལས། །རང་ཉིད་ཐུགས་རྗེ་ཆེན་པོར་གྱུར། །སྐུ་མདོག་དཀར་པོ་ཞལ་གཅིག་པ། །པདྨ་རྒྱས་ལྟར་འཛུམ་མདངས་ཅན། །རལ་པའི་ཐོར་ཚུགས་བཅིངས་པ་ལ། །རིན་ཆེན་ལྔ་ཡི་རྩེ་བྲན་དང་། །དར་གྱི་ཅོད་པན་གྱིས་བརྒྱན་པ། །ཕྱག་བཞིའི་དང་པོས་ཐལ་མོ་སྦྱར། །གཡས་འོག་མུ་ཏིག་ཕྲེང་བ་འཛིན། །གཡོན་གྱི་འོག་མས་པདྨ་འཛིན། །རིན་ཆེན་སྣ་ཚོགས་མགུལ་དོ་དང་། །སེ་མོ་དོ་དང་དོ་ཤལ་དང་། །དོ་ཤལ་ཕྱེད་པས་ཡང་དག་བརྒྱན། །ཕྱི་དང་ནང་གི་སྒྲིབ་མེད་གསལ། །ཞབས་གཉིས་སྐྱིལ་མོ་ཀྲུང་གིས་བཞུགས། །འོད་ཟེར་སྣ་ཚོགས་འཕྲོ་བ་ནི། །དམ་ཚིག་སེམས་དཔའི་རང་བཞིན་ནོ། །ཐུགས་ཀར་ཟླ་བའི་དཀྱིལ་འཁོར་སྟེང་། །ཧྲཱིཿཡི་ཡི་གེ་དཀར་པོ་ལ། །ཡི་

---

^{[མ་དཔེ་གཟིགས་ན་འདིར་གནོན།]}

གེ་དྲུག་པས་གཡས་སུ་བསྐོར། །དེ་ནི་ཏིང་འཛིན་སེམས་དཔའོ། །ཨོཾ་མ་ཎི་པདྨེ་ཧཱུྃ། ཞེས་པ་ངག་ཏུ་བརྗོད་པའི་མཐུས། །དུས་གསུམ་བདེར་གཤེགས་ཐམས་ཅད་ནི། །ཐུགས་རྗེ་ཆེན་པོའི་ངོ་བོ་རུ། །གྱུར་ནས་ཆར་ལྟར་རང་ལ་ཐིམ། །ཡེ་ཤེས་སེམས་དཔའ་ཡོངས་རྫོགས་པའོ། །སྣོད་བཅུད་ཐམས་ཅད་ལྷ་རུ་གྱུར། །སྣང་བ་སྐུ་ཡི་ཁྱེར་སོ་ཡིན། །སྒྲ་སྐད་ཐམས་ཅད་ཡི་གེ་དྲུག །གྲག་པ་གསུང་གི་ཁྱེར་སོ་ཡིན། །སེམས་ནི་ཟུང་འཇུག་རང་བྱུང་སྟེ། །དྲན་རྟོག་ཐུགས་ཀྱི་ཁྱེར་སོ་ཡིན། །ཞེས་གསུངས་སོ། །གྲུབ་ཆེན་མི་ཏྲ་ཛཱ་ཀིའི་ཞལ་ནས། སྙིང་ཁར་པདྨ་དམར་པོ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཚེག་དྲག་དང་བཅས་པའི་མཐར། ཡི་གེ་དྲུག་པ་གཡས་སུ་འཁོར་བ་ལས། འོད་ཟེར་སྣ་ལྔ་འཕྲོས་པས་ལུས་ཀྱི་ནང་གང་། སླར་འོད་ཟེར་ཕྱིར་འཕྲོས། ཕྱི་སྣོད་འཇིག་རྟེན་ལ་ཕོག །ཞིང་ཁམས་བདེ་བ་ཅན་དུ་བྱས། ནང་བཅུད་ཀྱི་སེམས་ཅན་ཐམས་ཅད་ལ་ཕོག །སྤྱན་རས་གཟིགས་སུ་གྱུར། ཐམས་ཅད་ཀྱི་ཞལ་ནས་སྔགས་འདྲེན་པར་བསམ་ལ། ཁང་པའི་ནང་དུ་ཚོར་ཙམ་དུ་འདོན་པའོ། །རང་ཉིད་

---

^{[མ་དཔེ་གཟིགས་ན་འདིར་གནོན།]}

སྤྱན་རས་གཟིགས་སུ་གསལ་བར་བསྐྱེད་པའི་སྙིང་ཁའི་ཧྲིལས་འོད་ཟེར་འཕྲོས། ལུས་ཀྱི་ཕྱི་ནང་བ་སྤུའི་བུ་ག་དང་བཅས་པ་ཐམས་ཅད་ཐུགས་རྗེ་ཆེན་པོས་གང་། ཕྱི་སྣོད་ཀྱི་འཇིག་རྟེན་གྱི་ཁམས་ལ་ཕོག་པས་བདེ་བ་ཅན་དུ་བྱས། ནང་བཅུད་ཀྱི་སེམས་ཅན་ཐམས་ཅད་ལ་ཕོག་པས་ཐམས་ཅད་སྤྱན་རས་གཟིགས་སུ་གྱུར། མདོར་ན་གཟུགས་སྣང་ཐམས་ཅད་སྤྱན་རས་གཟིགས་ཀྱི་སྐུར་གྱུར། སྒྲ་གྲག་པ་ཐམས་ཅད་ཡི་གེ་དྲུག་པར་གསལ་བཏབ་ནས། ཡིད་ཀྱི་བཟླས་པ་བྱེད་པའོ། །ཞེས་གསུངས་སོ། །ཡང་ཤེས་རབ་ཆུང་བ་རྣམས་ཀྱིས་དེ་ལྟར་བསྒོམ་མི་ཤེས་ན། རང་ཉིད་ཐུགས་རྗེ་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་བཞི་པ། རྒྱན་ཆ་ལུགས་དང་ལྡན་པ་གཅིག་ཡིན་བསམ་པའི་ངེས་ཤེས་ཀྱིས། དེའི་ཐུགས་ཀར་ཟླ་བའི་སྟེང་དུ་ཧྲཱིཿདཀར་པོའི་མཐར་ཡིག་དྲུག་གཡས་སུ་འཁོར་ཞིང་ཡོད་པར་བསྒོམ། དེ་ལས་འོད་ཟེར་ཕྱོགས་ཐམས་ཅད་དུ་འཕྲོས་པས་ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ་འོད་ཟེར་དེས་མཆོད། དེ་ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས་ཆར་བབ་པ་ལྟར་བྱོན་ཏེ། རང་ལ་སིབ་སིབ་ཐིམ་པར་

---

^{[མ་དཔེ་གཟིགས་ན་འདིར་གནོན།]}

བསྒོམ། ཡང་རང་གི་འོད་དེས་ཕོག་པས། སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས་ཡིག་དྲུག་འདོན་པར་བསྒོམ། སྐབས་སུ་སྒོམ་མཁན་སེམས་ལ་ཡང་ལྟ་སྟེ། ཀྱེའི་རྡོ་རྗེ་ལས། བསྒོམ་མེད་བསྒོམ་པ་པོ་ཡང་མེད། །ལྷ་མེད་སྔགས་ཀྱང་ཡོད་མ་ཡིན། །སྤྲོས་པ་མེད་པའི་རང་བཞིན་ལ། །ལྷ་དང་སྔགས་རྣམས་ཡང་དག་གནས། །རྣམ་སྣང་མི་བསྐྱོད་དོན་འགྲུབ་དང་། །རིན་ཆེན་དཔག་མེད་སེམས་དཔའོ། །ཞེས་གསུངས་སོ། །ལྔ་ལྡན་ལས། རང་ལུས་ལྷ་སྐུའི་རྒྱལ་པོ་ལ། །འགྱུར་མེད་ཀྱི་བཙན་ས་མ་ཟིན་ན། །མ་མཁའ་འགྲོའི་འཁོར་ཚོགས་མི་འདུ་བས། །ལུས་ཡི་དམ་ལྷ་ལ་འབད་ཀྱང་འཚལ།། ༼༡༡༽ ཐུགས་རྗེ་ཆེན་པོའི་མན་ངག་ཟབ་མོ། རང་གི་སེམས་འདུལ་བའི་ཐབས། ཞི་གནས་བསྒོམ་པར་བྱ་སྟེ། དགའ་བོ་མངལ་གནས་ཀྱི་མདོ་ལས། གང་ལ་མཉམ་བཞག་སེམས་མེད་པས། །རྣམ་དག་ཡེ་ཤེས་མེད་པ་སྟེ། །ཟག་པ་རྣམས་ནི་སྤངས་མི་འགྱུར། །དེ་བས་ཁྱོད་ཀྱིས་ནན་ཏན་སྒྲུབས། །ཞེས་དང་། པདྨ་དྲྭ་བའི་རྒྱུད་ལས། ཤིན་ཏུ་འཇམ་པའི་སྟན་ལ་ནི། །རྡོ་རྗེ་སྐྱིལ་ཀྲུང་

---

^{[མ་དཔེ་གཟིགས་ན་འདིར་གནོན།]}

གིས་གནས་ནས། །བསྲང་སྟེ་མིག་ནི་སྣ་རྩེར་ཕབ། །དལ་བའི་རླུང་ལྡན་རྐན་ལ་ནི། །ལྕེ་ཡིས་ཅུང་ཟད་རེག་པར་བྱས། །ལྟེ་བ་ཅུང་ཟད་བཀུག་པ་ཡིས། །སེམས་ནི་བག་ཡོད་གནས་པར་བྱ། །དེ་ལྟར་ལུས་བསམ་གཏན་གྱི་ཆོས་ལྔའམ་བདུན་བཅས་པས་དུག་ལྔ་རང་ཞིར་འགྲོ་ཞིང་། རླུང་སེམས་རང་བཞིན་གྱིས་དྷུ་ཏིར་ཚུད་ནས། རྟོག་པ་ཐམས་ཅད་རང་འགག་ལ་འབོལ་ལེ་ཤིག་གེ་དྭངས་སང་ངེ་འགྲོ་ཞིང་། རྟོགས་པ་མྱུར་དུ་འཆར་བས་ལུས་གནད་གལ་ཆེ། སྙིང་གི་དཀྱིལ་དུ་ཐིག་ལེ་དཀར་པོ་སྲན་མ་ཙམ་འོད་དང་ལྡན་པ་ཞིག་ལ་རིག་པ་གཏད་ལ་གནས་ཅི་ཐུབ་བྱ། དེ་ལ་མི་གནས་ན་ཡིད་ལ་ཅི་ཡང་མི་བསམ་པར་སེམས་ལྷོད་དེ་བཞག་སྟེ། དུས་གསུམ་གྱི་རྣམ་རྟོག་འཕྲོ་བཅད་དེ། སེམས་སེམས་ཐོག་ཏུ་བསྡུས་ནས་ལས་མེད་དུ་ལྷོད་ཤིག་གེ་བཞག །རྩ་ཚིག་ལས། རང་གི་སེམས་ལ་རང་གིས་ལྟོས། །ཞེས་དང་། ཁྲིད་ཆེན་རྩ་ཚིག་ལས། ཕྱོགས་ལུས་གནད་བསམ་གཏན་ཆོས་བདུན་སྐྱོན་མེད་བཅའ། །སེམས་གནད་དུས་གསུམ་རྟོག་པའི་སྤྲོས་པ་བཅད། །གང་ཤར་ངང་དུ་མ་ཡེངས་རྩོལ་མེད་བཞག །ཅེས་གསུངས་པ་

---

^{[མ་དཔེ་གཟིགས་ན་འདིར་གནོན།]}

ལྟར་སེམས་རང་བབས་སུ་གནས་ཅི་ཐུབ་བྱའོ།། ཐུགས་རྗེ་ཆེན་པོའི་མན་ངག་ཟབ་མོ། འཁོར་བ་ནས་ཐར་ཞིང་། འཕགས་ལམ་ཐོབ་པའི་ཐབས། ལྷག་མཐོང་གི་ཤེས་རབ་བསྐྱེད་པར་བྱ་སྟེ། རང་ཅག་རྣམས་འཁོར་བར་འཁྱམས་པ་ཅི་ཡི་སྐྱོན་ཡིན་ན། བདག་མེད་པ་ལ་བདག་ཏུ་བཟུང་བའི་སྐྱོན་ཡིན་ཏེ། འཕགས་པ་དཀོན་མཆོག་སྤྲིན་ལས་སེམས་ནི་ཆོས་ཐམས་ཅད་ཀྱི་སྔོན་དུ་འགྲོ་བས་ཏེ། སེམས་ཡོངས་སུ་ཤེས་ན་ཆོས་ཐམས་ཅད་ཡོངས་སུ་ཤེས་པར་འགྱུར་རོ། །ཞེས་དང་། ཆོས་ཀྱི་དབྱིངས་དབྱེར་མེད་པའི་ལེའུ་ལས། སེམས་འདི་ནི་སྔོན་པོའམ། སེར་པོའམ། དམར་པོའམ། དཀར་པོའམ། བཙོད་ཁའམ། ཤེལ་གྱི་ཁ་དོག་ལྟ་བུའམ། ཡང་དག་པའམ། ཡང་དག་པ་མ་ཡིན་པའམ། རྟག་ཅེས་བྱ་བའམ། མི་རྟག་ཅེས་བྱ་བའམ། གཟུགས་ཅན་ནམ། གཟུགས་ཅན་མ་ཡིན་པ་ཞིག་ཅེས་སོ་སོར་རྟོགས་ཤིག །ཅེས་གསུངས་སོ། །འོད་སྲུང་གིས་ཞུས་པའི་ལེའུ་ལས། འདི་ལྟར་སེམས་ཡོངས་སུ་ཚོལ་ཏེ། འདི་ལྟར་འདོད་ཆགས་པའམ། ཞེ་སྡང་བར་འགྱུར་བའམ། གཏི་མུག་པར་གྱུར་པའི་སེམས་དེ་གང་

---

^{[མ་དཔེ་གཟིགས་ན་འདིར་གནོན།]}

ཡིན། ཞེས་འདས་པའམ་མ་འོངས་པའམ། ད་ལྟར་བྱུང་བ་ཞིག་ཡིན་ནམ། ཞེས་སོགས་རྒྱ་ཆེར་གསུངས་སོ། །རྫོགས་ཆེན་ཀློང་གསལ་འབར་མའི་རྒྱུད་ལས། སེམས་ཀྱི་རུ་ཤན་ཕྱེ་བའི་ཕྱིར། །བསམ་མནོ་འདི་ལ་ཉག་གཅིག་བྱ། །རིག་པ་སྤྲོས་མེད་ཆོས་ཀྱི་སྐུ། །འདི་ལ་བྱུང་གནས་འགྲོ་གསུམ་མེད། །སེམས་ཞེས་བྱ་བའི་འགྱུ་འགྱུ་པོ། །འོལ་འོལ་ཕྲིག་ཕྲིག་ཡུད་ཡུད་འདི། །དང་པོ་གང་ལས་བྱུང་བ་དང་། །བར་དུ་གནས་དང་ཐ་མར་འགྲོ། །དབྱིབས་དང་ཁ་དོག་ཇི་ལྟ་བུ། །ཕྱི་ནང་བར་གསུམ་བཤིག་འབྲེལ་བལྟ། །ཞེས་དང་། ཐལ་འགྱུར་ལས། དང་པོ་སེམས་ཀྱི་བྱུང་ས་དང་། །བར་དུ་གནས་དང་ཐ་མ་འགྲོ། །གསུམ་ལ་ངེས་པར་བརྟགས་བསྐྱེད་ན། ། སེམས་སྦྱངས་སེམས་ལ་ཕན་པའོ། །ཞེས་དང་། །དྲུང་སྒམ་པོ་པའི་ཞལ་ནས། དེ་དག་ཐམས་ཅད་གོ་ཡུལ་གྱིས་མི་ཕན། རྣ་ཟག་དང་ཁ་སྐད་བཟང་པོ་སྟོང་པ་ཡིན། མ་གྲུབ་པ་ཡིན། མེད་པ་ཡིན་ཟེར་བ་སོགས་དེ་རྣམས་ཡིན་པ་ལས་འོས་མེད། དེ་རྣམས་ཁྱེད་ལ་མི་དྲི། ད་ལན་གང་དྲི་ན། སེམས་ལ་འདི་འདྲ་ཞིག་འདུག་ཟེར་བ་གཅིག་འདོད་

---

^{[མ་དཔེ་གཟིགས་ན་འདིར་གནོན།]}

པ་ཡིན་པས་ཐག་ཆོད་པ་གཅིག་མཛོད། ཅི་ཡང་མ་ཡིན་པའི་ཕུང་གསུམ་ཤོ་རེ་མི་འོང་བས། ཆོས་སྐད་ཅིག་ཀྱང་མི་འདོད། བླུན་ཚིག་རྐྱང་པས་མི་ཆོག་པས། ངས་འདི་ལྟར་བསྒོམས་པས་འདི་རེད། འདི་འདྲ་བ་ཅིག་འདུག །འདི་འདྲ་ཞིག་བྱུང་གསུངས་པ་འདོད་པ་ཡིན། འབད་ལ་བསྒོམ། གྲོགས་མཆེད་ལ་ཡང་དྲི་རྟོགས་མ་བྱེད། འདི་ལ་སོ་གཅིག་མ་ཐེབ་ན།། ཁྱེད་ལ་བསྒོམ་སྐྱེས་ན་ཕ་བཀའ་བརྒྱུད་རྣམས་མི་བདེན་པའི་ཐག་ངས་གཅོད། ཁྱེད་རང་ཡང་དེ་ལྟར་སོམ་མཛོད། སང་ཉིན་ཆོས་ཐུན་མ་བྱུང་ཚུན་འདི་ལ། །སྐད་ཅིག་ཀྱང་མ་ཡེངས་པར་སེམས་ཚོལ་བ་གལ་ཆེ་སྟེ། ཏཻ་ལོའི་ཞལ་ནས། དཔེར་ན་ལྗོན་ཤིང་སྡོང་པོ་ཡལ་ག་ལོ་འདབ་རྒྱས། །རྩ་བ་གཅིག་བཅད་ཡལ་ག་ཁྲི་འབུམ་སྐམ། །དེ་བཞིན་སེམས་ཀྱི་རྩ་བ་བཅད་པས་འཁོར་བའི་ལོ་འདབ་སྐམ། །ཞེས་གསུངས། དེས་ན་སེམས་ཚོལ་བ་གལ་ཆེ་གནད་ཆེ་བས། སང་ཉིན་བར་ལ་མ་ཡེངས་མ་རྙེད་བར་ཚོལ། སང་ནམ་ལངས་ནས་ཁྲིད་གཉེར་པ་རྣམས་ལ་ཞུ་དགོས། མ་རྙེད་ན་མ་རྙེད་པའི་ལུགས་དེ་ཤོད་དང་ཆོག །སེམས་ངོ་རྟོགས་མི་རྟོགས་འདི་ལ་རིག་ལས། ཁྱེད་ཁྲིད་

---

^{[མ་དཔེ་གཟིགས་ན་འདིར་གནོན།]}

ཐོབ་པ་རྣམས་ཀྱིས་ཀྱང་ཚོལ་དང་། འབྲུག་ལུགས་ལ། རྩེ་གཅིག་ཆེན་པོ་རྟོགས་རྗེས་སླར་སེམས་ཚོལ་བྱས་པས་སྤྲོས་བྲལ་རྟོགས་པར་བཤད། འདི་ཡི་ཕྱིར་ཉིན་གསར་བུ་རྣམས་ཀྱི་རྟོགས་འབུལ་གལ་ཆེ།། ༼༡༣༽ ཐུགས་རྗེ་ཆེན་པོའི་མན་ངག་ཟབ་མོ། རང་གི་སེམས་ཉིད་འདི། ཕྱག་རྒྱ་ཆེན་པོ་དང་། རྫོགས་པ་ཆེན་པོ་གཞི་ཁྲེགས་ཆོད་ངོ་སྤྱད་པ་ནི། བྲམ་ཟེ་ཆེན་པོས། བུ་ལྟོས་ཤིག་རང་གི་སེམས་ལ་ལྟོས། །བལྟས་པས་སེམས་ལ་གྲུབ་པ་མེད། །གྲུབ་པ་མེད་པའི་སེམས་འདི་ཉིད། །སྣ་ཚོགས་སུ་སྣང་བ་ངོ་མཚར་ཆེ། །རང་སེམས་སྐྱེ་མེད་ཆོས་ཀྱི་སྐུ། །ཞེས་གསུངས། རྣམ་སྣང་མངོན་བྱང་ལས། སེམས་དེ་ནི་དེ་བཞིན་གཤེགས་པས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ། །ཁ་དོག་མ་ཡིན། དབྱིབས་སུ་མ་ཡིན། སྣང་བ་མ་ཡིན། མུན་པ་མ་ཡིན། སྐྱེས་པ་མ་ཡིན། བུད་མེད་མ་ཡིན། མ་ནིང་མ་ཡིན་ནོ། །ཞེས་དང་། །བྱང་ཆུབ་སེམས་འགྲེལ་ལས། ནང་ངམ་དེ་བཞིན་ཕྱི་རོལ་ལམ། །ཡང་ན་གཉིས་ཀའི་བར་དག་ཏུ། །རྒྱལ་བ་རྣམས་ཀྱི་སེམས་མ་རྙེད། །ཅེས་དང་། བྱམས་པས་ཞུས་པ་

---

^{[མ་དཔེ་གཟིགས་ན་འདིར་གནོན།]}

ལས། སེམས་ནི་དབྱིབས་མེད་པ། ཁ་དོག་མེད་པ། གནས་མེད་པ་ནམ་མཁའ་ལྟ་བུའོ། །ཞེས་དང་། ཏཻ་ལོ་པས། དཔེར་ན་ནམ་མཁའ་སྟོང་པར་ཐ་སྙད་རབ་བརྟོགས་ཀྱང་། །ནམ་མཁའ་ལ་ནི་འདི་འདྲ་བརྗོད་དུ་མེད། །དེ་བཞིན་རང་སེམས་འོད་གསལ་བརྗོད་གྱུར་ཀྱང་། །བརྗོད་པས་འདི་འདྲ་གྲུབ་ཅེས་གདག་གཞི་མེད། །ཅེས་དང་། །སེམས་ནི་ནམ་མཁའི་དཀྱིལ་ལྟར་བསམ་པའི་ཡུལ་ལས་འདས། །དེ་ངང་བཏང་བཞག་མེད་པར་ཀློད་ལ་ཞོག །སེམས་ལ་གཏད་སོ་མེད་པས་ཕྱག་རྒྱ་ཆེན་པོ་ཡིན། །དེ་ལ་གོམས་པས་བླ་མེད་བྱང་ཆུབ་ཐོབ། །ཅེས་དང་། ས་ར་ཧས། འཁོར་འདས་ཀུན་གྱི་རྩ་བ་སེམས་ཀྱི་རང་བཞིན་ཏེ། །རྟོགས་ན་བསྒོམ་དུ་མེད་ཅིང་མ་བཅོས་ལྷུག་པར་ཞོག །རང་ལ་བཞག་ནས་གཞན་ལ་ཚོལ་བ་ཨ་རེ་འཁྲུལ། །འདི་ཡིན་འདི་མིན་མེད་དོ་ཐམས་ཅད་གཉུག་མའི་ངང་། །ཞེས་དང་། མཁའ་འགྲོ་སྙིང་ཏིག་ལས། དང་པོ་བྱུང་ས་མེད་དེ་ཆོས་ཀྱི་སྐུ། །བར་དུ་གནས་ས་མེད་པས་ལོངས་སྤྱོད་རྫོགས། །ཐ་མ་འགྲོ་ས་མེད་པ་སྤྲུལ་པའི་སྐུ། །ཞེས་གསུངས་པས། སེམས་ཉིད་སྐུ་གསུམ་གྱི་རང་བཞིན་དུ་རང་གྲོལ་

---

^{[མ་དཔེ་གཟིགས་ན་འདིར་གནོན།]}

བའོ། །ཞེས་དང་། རྩ་ཚིག་ལས། རང་གི་སེམས་ཀྱི་ངོ་བོ་ལ་ལྟོས། ཅིའི་ངོ་བོར་ཡང་མ་གྲུབ་ཅེས་དང་། རྗེ་རང་བྱུང་རྡོ་རྗེའི་ཞལ་ནས། དུས་གསུམ་སངས་རྒྱས་ཀྱི་དགོངས་པ། དམ་པ་རྣམས་ཀྱི་དོན་དུ་གཉེར་བ། ཆོས་སྐུ་ཕྱག་རྒྱ་ཆེན་པོ་ཟེར་བའི་སྒྲ་བོ་ཆེ། གཡེར་པོ་ཆེ་དེ་རང་གི་སེམས་ལ་ཟེར་བ་ཡིན། རང་སེམས་ངོ་མ་ཤེས་ན་ངའི་སེམས་ངའི་སེམས་ཟེར་བའི་མི་དྲན་དགུ་དྲན་དེ་ཡིན། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱང་། རིག་པ་འདི་རང་ལས་མ་འདས། སྡེ་སྣོད་མདོ་རྒྱུད་ཀྱི་བཅུད་ཀྱང་འདི་ཡིན་འདི་ཉམས་སུ་ལེན་ན་བསྒོམ་རྒྱུ་ཅི་ཡང་མེད། རིག་པ་འདི་ཧྲིག་གེ་རང་སལ་ཞོག །དེ་ཕྱག་རྒྱ་ཆེན་པོ་ཡིན་ནམ་མ་ཡིན་སྙམ་པའི་ཐེ་ཚོམ་མི་དགོས། ཡགས་སུ་རེ་བ་དང་། ཉེས་པའི་དོགས་པ་ཡེ་མ་བྱེད། རྟོགས་པ་སྤྱན་སྤུན་མང་པོའི་རྗེས་སུ་མ་འབྲང་། རིག་པ་ཧྲིག་གེ་རང་གི་ཐོག་ཏུ་ཞོག །ལྷོད་དེ་ཀློད་ལ་ཞོག །བསྒོམ་རྒྱུ་ཅི་ཡང་མི་བདོག་གོ །དེ་ལྟར་ཡང་ནས་ཡང་དུ་བསྒོམས་པས་དུས་ཚོད་གཅིག་ནས་རྣམ་རྟོག་རང་ངོ་ཤེས་ནས། སྐད་ཅིག་ལ་བག་ཆགས་མུན་པ་དྲུང་ནས་ཕྱུངས་ཏེ། དེ་ཉིད་

---

^{[མ་དཔེ་གཟིགས་ན་འདིར་གནོན།]}

སངས་རྒྱས་ཞེས་བྱའོ། །སྐད་ཅིག་གཅིག་གིས་བྱེ་བྲག་ཕྱེད། ཕྱག་རྒྱ་ཆེན་པོའི་སྙིང་གཏམ་ཚིག་གཅིག་མ་བླ་མ་དམ་པ་གྲུབ་ཐོབ་རྣམས་ཀྱི་མན་ངག་མཐར་ཐུག་དེ་ལས་ཡོད་རེ་ཤི། ཞེས་གསུངས་སོ། །ཇོ་འབྲོམ་ཞུས་ལེན་ལས། རྗེ་ཡང་ཡང་བཙལ་ཞིང་མ་རྙེད་ན། །འབྲོམ་རང་ལུགས་ཡང་ཡང་མཐོང་བ་ཡིན། །རྗེ་མ་རྙེད་པ་ལ་བཞག་ལགས་སམ། །འབྲོམ་ལྷོད་དེ་ཀློད་ན་དམ་པ་ཡིན། །ཞེས་དང་། འཇིག་རྟེན་གསུམ་མགོན་གྱི་ཞལ་ནས། རང་གི་རིག་པ་རིག་རིག་ཏུར་ཏུར་པོ་འདི་ལ་བལྟས་པའི་དུས་སུ། གང་ཡང་མ་མཐོང་བ་དེ་ནི་དེ་ཁོ་ན་ཉིད་མཐོང་བའོ། །ཞེས་གསུངས་སོ། །དོན་ལ་སེམས་མི་འཕྲོ་བར་ཀྱི་ལེ་གནས་པ་དེ་ཞི་གནས་ཡིན། དེའི་ངོ་བོ་ལ་བལྟས་པས་སྟོང་པ་ཉིད་དུ་ལྷག་གིས་མཐོང་བ་དེ་གནས་པའི་སྟེང་ནས་ལྷག་མཐོང་ཤར་བ་ཡིན། སེམས་ཅུང་ཟད་མ་གནས་ན་མི་མཐོང་བས། སེམས་སྣ་ཚོགས་སུ་འཕྲོ་བ་མཐོང་བ་དེ་ཞི་གནས་ཡིན། དེའི་ངོ་བོ་ལ་བལྟས་པས་སྟོང་པར་མཐོང་བ་དེ་འགྱུ་བའི་སྟེང་ནས་ལྷག་མཐོང་ཤར་བ་ཡིན། ལྔ་ལྡན་རྩ་བ་ལས། སེམས་མི་རྟོགས་ཆོས་སྐུའི་ནམ་མཁའ་ལ། །རྣམ་རྟོག་གི་སྤྲིན་

---

^{[མ་དཔེ་གཟིགས་ན་འདིར་གནོན།]}

ཚོགས་མ་དྭངས་ན། །མཁྱེན་གཉིས་ཀྱི་ཉི་ཟླ་མི་གསལ་བས། །བསྒོམ་གཉུག་མ་འདི་ལ་ནན་ཏན་མཛོད། །ངོ་སྤྲོད་ཚར།། ༼༡༤༽ ཐུགས་རྗེ་ཆེན་པོའི་མན་ངག་ཟབ་མོ། ངོ་སྤྲོད་པའི་དོན་དམ་ཉམས་སུ་ལེན་པའི་ཐབས། བྲམ་ཟེ་ཆེན་པོས། འཇུར་བུས་བཅིང་བའི་སེམས་ཉིད་འདི། །ཀློད་ན་གྲོལ་བར་ཐེ་ཚོམ་མེད། །ཅེས་དང་། སྤྱན་རས་གཟིགས་ཀྱིས་མི་ཏྲ་ཛཱ་ཀི་ལ་གདམས་པ་ལས། གང་སྐྱེས་གཞུག་མ་ཉིད་ཡིན་ཕྱིར། །གང་ཤར་དྲན་པས་མ་བརྗེད་ན། །དེ་ཤར་སྟོང་པ་ཉིད་བདག་ཏུ། །རྣལ་འབྱོར་རྒྱལ་པོ་གདོན་མི་ཟ། །ཞེས་གསུངས། མཻ་ཏྲི་པས། མ་སྐྱེས་པ་ལ་རྣམ་རྟོག་གློ་བུར་བ། །རྣམ་རྟོག་དེ་ཡང་ཆོས་ཀྱི་དབྱིངས་ཉིད་དེ། །དེ་གཉིས་ཐ་དད་མེད་པར་གང་གིས་ཤེས། །དེ་ཉིད་ཟུང་དུ་འཇུག་པར་ངས་སྨྲའོ། །ཞེས་གསུངས་སོ། །ཤ་ཝ་རི་པས། ཡིད་ལ་བྱར་མེད་ཕྱག་རྒྱ་ཆེན་པོ་ལ། །བསྒོམ་རྒྱུ་རྡུལ་ཙམ་མེད་པས་མི་བསྒོམ་སྟེ། །སྒོམ་མེད་དོན་དང་འབྲལ་མེད་བསྒོམ་པའི་མཆོག །ཅེས་དང་། རྗེ་བཙུན་གྲགས་པ་རྒྱལ་མཚན་གྱི་ཞལ་ནས། སེམས་མེད་སེམས་ཀྱི་སེམས་ལ་ལྟོས། ། ཅེས་དང་། སྤྱན་རས་གཟིགང་ན་མི་ཟ། །ཞེས་གསྲུངས། །ཞེས་གསུངས་སོ། །བྷ་ཝ་གྲོ་བ་ལ་རྒྱལ་

---

^{[མ་དཔེ་གཟིགས་ན་འདིར་གནོན།]}

མཐོང་རྒྱུ་བྱུང་ན་སེམས་ཉིད་མིན། །མཐོང་མེད་མཐོང་ན་སེམས་ཉིད་མཐོང་། །མཐོང་མེད་སེམས་ལ་མ་ཡེངས་ཞོག །ཅེས་དང་། རྒྱུ་སྟོན་ཆོས་ཀྱི་བཟང་པོའི་ཞལ་ནས། གང་ཤར་གང་བྱུང་ངོ་བོ་ལྟོས། །ལྟ་མཁན་འདུག་ན་དེ་ལ་ལྟོས། །བདེ་ན་བདེ་བའི་ངོ་བོ་ལྟོས། །ལྟ་མཁན་འདུག་ན་དེ་ལ་ལྟོས། །སྡུག་ན་སྡུག་པའི་ངོ་བོ་ལྟོས། །ལྟ་མཁན་འདུག་ན་དེ་ལ་ལྟོས། །བལྟས་པས་ལྟ་རྒྱུ་མ་རྙེད་ན། །དེ་ཡང་མ་འཛིན་ཕྱལ་བར་སྐྱུར། །ལྟ་མཁན་རང་ཡང་མ་རྙེད་ན། །དེ་ཡང་མ་འཛིན་ཕྱལ་བར་སྐྱུར། །ཞེས་གསུངས་སོ། །དྲུང་ཆེན་ཀུན་དགའ་རྣམ་རྒྱལ་གྱི་ཞལ་ནས། ཏིང་འཛིན་གྱི་གནད་ལ་སེམས་རང་ལུགས་སུ་ཀློད་ལ་ཞོག །ཀློད་པའི་སེམས་ཀྱི་ངོ་བོ་ལ་རྗེན་ལྷང་གིས་ལྟོས། མ་ཡེངས་པ་ཙམ་གྱི་དྲན་པ་རྒྱུན་ཆགས་སུ་བརྟེན། རྣམ་རྟོག་ཅི་ཤར་ཡོང་ཆེད་དུ་སྤང་བླང་དང་བཅས་བཅོས་གང་ཡང་མ་བྱེད་པར་རང་ངོ་ལ་ལྟོས། ཞེས་གསུངས་སོ། །བསྒོམ་སྐྱེ་བའི་རེ་བ། མི་སྐྱེ་བའི་དོགས་པ། ཡགས་སུ་རེ་བ། ཉམས་རྟོགས་བཟང་པོའི་རེ་བ། གེགས་དང་གོལ་སར་ཤོར་བའི་དོགས་པ་སྤུ་རྩེ་ཙམ་ཡང་མ་བྱེད་པར། བསྒོམ་རྒྱུ་ཅི་ཡང་

---

^{[མ་དཔེ་གཟིགས་ན་འདིར་གནོན།]}

མེད་པར་མ་ཡེངས་ཙམ་གྱི་དྲན་རྫི་བརྟེན་པར་མཛོད་ཅིག། ༼༡༥༽ ཐུགས་རྗེ་ཆེན་པོའི་མན་ངག་ཟབ་མོ། ཉམས་རྟོགས་ཇི་ལྟར་འཆར་ཚུལ་ནི། ཡུན་རིང་མི་འགོར་བར་རྟགས་ཐམས་ཅད་དུས་གཅིག་ལ་འཆར་བ་ནི། སྔོན་གྱི་ལས་འཕྲོ་ཅན་གང་ཟག་ཅིག་ཆར་བ་ཞེས་བྱ་སྟེ་དཀོན། རྟོགས་རྣམས་མ་ངེས་པར་འཆར་ཞིང་མཐོ་དམན་ཆེ་བ་ནི། གང་ཟག་འབྲིང་ཐོད་རྒལ་བའི་རིགས་ཡིན་པས་བསྒོམ་ན་རྩལ་ཆེ་སྟེ། རྐྱེན་གྱིས་ཁྱེར་ན་ཐ་མལ་པར་འགྲོ་ཉེན་ཡོད། རིམ་སྐྱེས་པ་ནི་རྟགས་འོང་དཀའ་སྟེ། །གཉུག་བསྲིང་ནས་བསྒོམས་པས་མུས་ཀྱི་འོངས། སྔོན་འགྲོ་རྣམས་བསྒོམ་པའི་རྟགས་ཀྱང་ནམ་འོང་ངེས་པ་རང་མེད། རིམ་པ་ལྟར་འོང་བ་དང་འཆར་ནས་འོང་བར་མ་ངེས་ཏེ། །རྟགས་བཟང་བ་ལ་ཧ་ཅང་དགའ་བྲོད་ཀྱང་མི་བྱ། རྟགས་མ་ཐོན་ན་སྒྲིབ་པ་འཐུག་པའི་རྟགས་ཡིན་པས་བརྩོན་འགྲུས་བསྐྱེད། རྟགས་ངན་པ་བྱུང་ན་སྒྲིབ་པ་དག་པའི་རྟགས་སུ་ཤེས་པར་བྱ། དེ་ལ་རྣམ་རྟོག་མི་བྱ། དང་པོ་སྔོན་འགྲོའི་རྟགས་ནི། རྒོད་ཚང་པའི་ཞལ་ནས། ཕ་ཡུལ་འབྲེལ་ཐག་ཆོད་པ་དང་། །ཉེ་འབྲེལ་དབྱར་རྩི་གོག་པ་དང་། །

---

^{[མ་དཔེ་གཟིགས་ན་འདིར་གནོན།]}

ཟས་ནོར་འཁྲི་བ་ཆོད་པ་གསུམ། །འཆི་བ་མི་རྟག་བསྒོམ་ན་ཡོང་། །དོན་མེད་བྱ་བ་མི་བྱེད་ཅིང་། །ཉིན་མཚན་ཆོས་ཀྱི་ལས་ལ་བརྩོན། །སྡིག་པའི་གྲོགས་པོ་སྤངས་པ་གསུམ། །དལ་འབྱོར་རྙེད་དཀའ་བསྒོམ་ན་ཡོང་། །འདོད་པའི་ཡོན་ཏན་བྱུར་དུ་མཐོང་། །དཀོན་མཆོག་གསུམ་ལ་བློ་གཏད་བསྐུར། །འཇིག་རྟེན་ཆོས་ལ་ཞེན་པ་ལོག །འཁོར་བའི་ཉེས་དམིགས་བསྒོམ་ན་ཡོང་། ཞེས་གསུངས་སོ། །གསོལ་བ་བཏབ་པས་བྱིན་རླབས་ཞུགས་པའི་རྟགས། མོས་གུས་ཀྱི་གདུང་ཤུགས་ཚད་མེད། ཉམས་འབར། །ཤེས་པ་གསལ་སྟོང་རྗེན་པ་རུ་འཆར། བླ་མ་དང་ཞལ་མཇལ་བ། དབང་བསྐུར་བ། ཆོས་བཤད་པ། འོད་ཟེར་གྱི་འཕྲོ་འདུ་བྱས་པ་རྣམས་ཡིན་ནོ། །ཧཱུབཟླས་པས་སྡིག་པ་དག་པའི་རྟགས་སུ། ལུས་ཡང་བ། གཉིད་ཆུང་བ། ཁམས་བདེ་བ། སྙིང་དགའ་ཡལ་བ་འབྱུང་། རྨིས་རྟགས་སུ་ཡང་། ཁྲུས་བྱས་པ། གཅེར་བུ་ཐོན་པ། ལུས་ལ་རྣག་ཁྲག་ཟག་པ། འཁྲུ་བ། སྐྱུགས་པ། གོས་དཀར་པོ་གྱོན་པ་འབྱུང་ངོ་། །མཎྜལ་འབུལ་བས་ཚོགས་རྫོགས་པའི་རྟགས་སུ། ཁམས་བདེ་བ། ཉམས་དགའ་བ། །

---

^{[མ་དཔེ་གཟིགས་ན་འདིར་གནོན།]}

ཟས་མ་ཟོས་ཀྱང་མི་རྟོགས་པ། ཤེས་རབ་མཆེད་འགྲོ་བ་འོང་བ། རྨིས་རྟགས་སུ་ཉི་ཟླ་ཤར་བ། གྱེན་ལ་འཛེགས་པ། མེ་ཏོག་གི་ཐང་ལ་ཕྱིན་པ་དང་། ། བུད་མེད་བཟང་མོས་ཟས་བྱིན་པ་དང་། མེ་ལོང་ལ་བལྟས་པ་ལ་སོགས་པ་འབྱུང་ངོ་། །ཞི་གནས་བསྒོམ་པའི་རྟགས་ནི། རྣམ་པར་རྟོགས་པ་ཐམས་ཅད་རང་སར་ཞི་ནས། །སེམས་གར་གཏད་དུ་གནས་པ། དེ་ཡང་གསལ་སིང་ངེ་གནས་ན་ཞི་གནས་སྐྱོན་མེད་ཡིན། དྲན་མེད་དུ་གཉིད་འཐུག་པོ་ལྟར་ནག་ཐིབས་སེ་སོང་ན། འགོགས་པ་ཆ་མཐུན་ཏེ། །ཕྱི་བས་བསྒོམ་ཤེས་པ་དེ་ཡིན། ཡང་སེམས་ནག་ཐིབས་སེ་མ་སོང་ཡང་སེམས་ལ་དྲན་རྟོག་མེད། ལུས་འགུལ་བསྐྱོད་མི་ཤེས་པར་ལུས་པ་དེ་ཞི་གནས་ཡིན་ཏེ། དེའི་ལག་པ་ནས་བསྡུས་ཏེ་བསློང་བ་སོགས་མི་རུང་། རྣ་བར་ཏིང་ཤག་བརྡུངས། སྣ་ལ་སྤོས་བདུག །ངོ་ལ་ཆུ་བཏབ་པས་གཉིད་སད་པ་ལྟར་འོང་། སེམས་ལ་རྣམ་རྟོག་ཅི་ཡང་མི་འགྱུ་ལྟ་བར་དྲན་མེད་དུ་གནས་པ་ལ། ཕྱག་རྒྱ་ཆེན་པོ་ཡིན་པར་བྱེད་པ་ནི། རྒྱ་ནག་ཧྭ་ཤང་གི་བལྟ་བ་དང་། མུ་སྟེགས་པའི་ལུགས་ཡིན་ཏེ། ས་སྐྱ་པཎྜི་ཏའི་ཞལ་ནས། ཚོགས་

---

^{[མ་དཔེ་གཟིགས་ན་འདིར་གནོན།]}

བརྒྱད་འགགས་པའི་ཞི་གནས་ནི། །ཉན་ཐོས་འགོག་པ་ཆ་མཐུན་ཏེ། །དུད་འགྲོར་སྐྱེ་བའི་རྒྱུ་རྐྱེན་ཡིན། །ཞེས་དང་། རྒོད་ཚང་པའི་ཞལ་ནས། ང་ནི་རྣམ་རྟོག་བཀག་ནས་བསྒོམ་པ་འདི་འདྲ། མུ་སྟེགས་པ་རང་ཡིན་སྙམ་གསུངས། གཞན་ཡང་ཞི་གནས་ཀྱི་སྐབས་འདིར་གསལ་བའི་ཉམས་ལ། རྩ་རིགས་བཟང་ན་རྟགས་བཅུ་ཆ་མཐུན་པ། མིག་གི་ཡུལ་དུ་དུ་བ་དང་། མེ་ཁྱེར་དང་། སྨིག་སྒྱུ་དང་། མར་མེ་དང་། ཟླ་བ། ཉི་མ། མེ་འོད་ལྟ་བུ་དང་། ཐིག་ལེ་དང་། འོད་ཀྱི་གོང་བུ་དང་། འཇའ་ཚོན་སོགས་དང་། གཞན་ཡང་མིག་བཙུམ་ཡང་གསལ་པོར་མཐོང་བ་དང་། འགྲོ་བ་དང་། གཟུགས་སྒྲ་དྲི་རོ་རེག་སོགས་དུ་མ་མཐོང་ཞིང་མྱོང་བར་འབྱུང་སྟེ། ལང་ཀའི་མདོ་ལས། བྱིས་པ་ཉེར་སྤྱོད་བསམ་གཏན་དང་། །དོན་རབ་འབྱེད་པའི་བསམ་གཏན་དང་། །དེ་བཞིན་ཉིད་དམིགས་བསམ་གཏན་དང་། །དེ་བཞིན་གཤེགས་དགེའི་བསམ་གཏན་རྣམས། །རྣལ་འབྱོར་ཅན་གྱི་བརྩོན་བྱས་ཏེ། །ཉི་མ་ཟླ་བའི་དབྱིབས་འདྲ་དང་། །འོད་དང་པདྨོ་ལྟ་བུ་དང་། །རི་མོ་ནམ་མཁའ་མེ་འདྲ་མཐོང་། །མཚན་མ་སྣ་ཚོགས་

---

^{[མ་དཔེ་གཟིགས་ན་འདིར་གནོན།]}

དེ་དག་གིས། །མུ་སྟེགས་ཅན་ལམ་ཁྲིད་པར་བྱེད། །ཉན་ཐོས་དག་དང་རང་རྒྱལ་གྱི། །སྤྱོད་ཡུལ་དུ་ཡང་ལྟུང་བར་བྱེད། །དེ་དག་ཐམས་ཅད་རྣམས་སྤངས་ཤིང་། །སྣང་བ་མེད་པར་ནམ་གྱུར་པ། །དེ་ཚེ་སངས་རྒྱས་ལྷ་ཡི་ཕྱག །ཐམས་ཅད་ཞི་གནས་འབྱུང་བ་ཡི། །དེ་ཡི་མགོ་ལ་བྱུག་མཛད་དེ། །ཡང་དག་རྗེས་སུ་འགྲོ་བའི་ལྟས། །ཞེས་གསུགངས་པས་ངོ་མཚར་བའི་མཐོང་སྣང་ཅི་བྱུང་ཡང་། ཞི་གནས་ཀྱི་རྟགས་ཕྲན་བུ་ཡིན་གྱི། བསྒོམ་དངོས་ནི་མ་ཡིན་ནོ། །དེ་ནས་གནས་པ་དང་པོ་འཆར་ཏེ། གཙུག་ན་རིན་ཆེན་གྱིས་ཞུས་པའི་མདོ་ལས། རིགས་ཀྱི་བུ་གཞན་ཡང་མགྱོགས་པ་རབ་ཏུ་མགྱོགས་པ། མི་གནས་པར་རྒྱུ་བ། སྤྲེའུ་དང་རླུང་དང་འདྲ་བ་འབབ་ཆུའི་རྒྱུན་དང་། འབྲུ་མར་གྱི་མར་མེ་འདྲ་བ། རྒྱང་རིང་པོར་འགྲོ་བ། ལུས་མེད་པ། ཡུལ་ལ་བསྐམ་པ། སྐྱེ་མཆེད་དྲུག་ལ་སྤྱོད་ཡུལ་བ། གཞན་གྱི་སེམས་ཤེས་པ་དང་ལྡན་པའི་སེམས། གནས་པར་རྩེ་གཅིག་པ། མི་འཕྲོ་བ། ཞི་གནས་ལ་རྩེ་གཅིག་པ། གཡེང་བ་མེད་པ་འདི་ནི་སེམས་གནས་པའོ། །ཞེས་དང་། ཏེ་ལོ་པའི་ཞལ་ནས། ལས་

---

^{[མ་དཔེ་གཟིགས་ན་འདིར་གནོན།]}

ནི་དང་པོ་གཅོང་རོང་ཆུ་དང་འདྲ། །ཞེས་དང་། ཞང་རིན་པོ་ཆེའི་ཞལ་ནས། གནས་པ་དང་པོ་བྱུང་དུས་སུ། །རི་གཟར་ལོག་ལ་རྦབ་འདྲིལ་འདྲ། །རྣམ་རྟོག་ཟམ་མི་ཆད་པ་འབྱུང་། །བསྒོམ་ཉམས་མེད་དམ་སྙམ་པ་འོང་། །རྣམ་རྟོག་བྱུང་ཚད་ཚོར་བ་དེ། །ཤེས་པ་ཅུང་ཟད་གནས་པ་ཡིན། །གནས་པ་མེད་པའི་གོང་རོལ་ན། །རྣམ་རྟོག་རང་གར་ཤོར་བ་ཡིན། །རྟག་པར་འགྱུས་ཀྱང་ངོ་མ་ཤེས། །ཞེས་དང་། ངེས་དོན་རྒྱ་མཚོ་དང་། གྲུབ་ཐོབ་བརྒྱུད་པའི་ཞལ་ལུང་གཉིས་ཀ་ནས། དང་པོར་དམིགས་པ་ལ་སེམས་དམ་དུམ་གནས་པ་འདྲ་བ་གཅིག་ཡོད་དེ་སྣ་ཟིན་ཙམ་ཡིན། དེ་ནས་རིམ་པར་བག་ཙམ་དང་། རྩ་ན་རྟོགས་པ་སྔར་བས་མང་དུ་སོང་བ་དང་འདྲ་ཞིང་བྱུང་ན་དེ་མང་དུ་སོང་བ་མིན། སྔར་ཕན་ཆད་མ་བསྒོམ་པས་རྣམ་རྟོག་བྱུང་ཡང་མ་ཚོར། ད་ལྟར་སེམས་མཉམ་པར་བཞག་སྟེ་རིག་པ་དྭངས་བས་ཚོར་བ་ཡིན། དེ་ལ་རྟོགས་པའི་སྣ་མ་བསྐྱིལ། རྗེས་སུ་མ་འབྲང་བར་བཞག་པ་རྟོགས་པ་འོག་འགྱུ་མ་འཆོར་བར་སྐྱེས་ཚད་ངོས་ཟིན། ཐུན་བཏུང་མི་དགོས་པར་རིག་པ་སྤྱན་སི་ལི་ལི་འགྲོ་བ་འདྲ་ཞིག་འདུག་ཀྱང་བསྒོམ་གྱི་རྒྱུན་དེ་མ་

---

^{[མ་དཔེ་གཟིགས་ན་འདིར་གནོན།]}

ཆད་པར་བྱུང་ན། གནས་པ་དང་པོ་རི་གཟར་གྱི་ཁ་ནས་ཆུ་འབབ་པ་འདྲ་བ་ཟེར་བ་དེ་ཡིན། ཏེ་ལོ་པའི་ཞལ་ནས། བར་པ་ཆུ་བོ་གང་གཱ་དལ་གྱི་གཡོ། །ཞེས་དང་། ཞང་རིན་པོ་ཆེས། དེ་ནས་དལ་འབབ་ཆུ་བོ་བཞིན། །ཤེས་པ་དལ་ཞིང་རྣམ་རྟོག་ཉུང་། །ཞེས་གསུངས་སོ། །དེའི་དོན་ངེས་དོན་རྒྱ་མཚོ་དང་། གྲུབ་ཐོབ་བརྒྱུད་པའི་ཞལ་ལུང་གཉིས་ཀ་ལས། དེ་ལ་ལྟ་བ་སྐྱོངས་ལུགས་གོང་ལྟར་བྱས་པས་རྣམ་རྟོག་དེ་ཕྲ་ཉལ་གྱིས་སོང་ནས་མི་རྟོག་པའི་ངང་ལ་འགྲོ། སྐབས་སྐབས་སུ་རྟོག་པ་རེ་ཏོལ་གྱིས་འབྱུང་ཡང་རྒྱུན་མི་འབྲལ་བར་རྡོ་ཚན་ལ་ཁ་བ་བབས་པ་ལྟར་ཡལ་འགྲོ། རྟོག་པ་ཅི་འགྱུས་སྤུ་རིས་དང་གྲངས་སུ་ཐེབ་པ་ཡོང་ཞིང་རང་གི་བསྒོམ་རྒྱུན་དེ་ན་ར་ར་འགྲོ་བ་ཞིག་བྱུང་ན་གནས་པ་བར་པ་ཆུ་ཀླུང་དལ་གྱིས་འབབ་པ་ལྟ་བུ་ཟེར། འདི་སྐབས་སུ་ཉམས་གཉིས་པ་གཅོང་རོང་གི་ཆུ་འབབ་འདྲ་ཞེས་པ། བླ་མ་དམ་པ་རྣམས་ཀྱི་གསུང་རྒྱུན་ལས་བྱུང་སྟེ། རེས་འགའ་ཀྱི་ལེ་མེ་རེ་གནས། རེས་འགའ་ཚུབ་ཚུབ་ཚུབ་འཕྲོ་སྟེ། འཕྲོ་བའི་ཚེ་ལྷོད་ཅིང་ལྟ། གནས་ཚེ་ཅུང་ཟད་བསྒྲིམ་ལ་དེའི་ངང་ལ་བཞག །འདི་སྐྱེ་མཁན་ཡང་མང་བར་

---

^{[མ་དཔེ་གཟིགས་ན་འདིར་གནོན།]}

སྣང་། ཏེ་ལོ་པའི་ཞལ་ནས། ཐ་མ་ཆུ་རྣམས་མ་བུ་འཕྲད་པ་འདྲ། །ཞེས་དང་། ཞང་རིན་པོ་ཆེའི་ཞལ་ནས། དེ་ནས་རྒྱ་མཚོའི་གཏིང་བཞིན་དུ། །ཤེས་པ་མི་གཡོ་བརྟན་པར་གནས། །ཞེས་དང་། ངེས་དོན་རྒྱ་མཚོ་དང་གྲུབ་ཐོབ་གོང་མའི་ཞལ་ལུང་གཉིས་ཀ་ལས། དེ་ལ་གོང་བཞིན་སྐྱོང་བར་ཕྲ་རགས་ཀྱི་རྣམ་རྟོག་རྒྱུན་ཆད་དེ་མི་རྟོག་པའི་ངང་ལ་མེ་རེ་གནས། ལུས་བདེ་བའམ་ཡོད་དུ་མི་ཚོར། རླུང་འགྲོ་འོང་དང་འགགས་པའང་མི་ཚོར། སེམས་བདེ་གསལ་མི་རྟོག་པ་ཕྱམ་ཕྱམ་འགྲོ། རྗེས་ཐོབ་དུའང་ལེགས་པར་མ་སྤྱད་ན་ཡུལ་གྱི་སྤུ་རིས་མི་ཟིན། རྣམ་གཡེང་ལ་བློ་མི་འཇུག །བརྗེད་ངེས་ཆེར་སོང་བ་འདྲ་བ། མ་བསྒོམས་ཀྱང་བསྒོམ་དུ་ཕྱམ་ཕྱམ་འགྲོ། དྭངས་ཆ་ཡོད་པ་སྤྲིན་མེད་པའི་ནམ་མཁའ་དྭངས་པའི་དཀྱིལ་ལྟ་བུ་ལ་ཁ་གཏིང་མེད་པ་གསལ་མེར་རེ་བྱུང་ན་གནས་པ་ཐ་མ་མི་གཡོ་བ་རྒྱ་མཚོ་ལྟ་བུ་བྱ་བ་ཡིན། འདི་རྣམས་བསམ་གཏན་གྱི་དངོས་གཞི་ཡིན་པས་རྒྱུན་བསྲིང་ན་མངོན་ཤེས་སོགས་འཆར་ཞིང་བདེན་པ་མཐོང་བའི་རྟེན་བྱེད་དོ། །དེ་ཡན་ཆད་ཅི་སྐྱེས་པ་ཐམས་ཅད་ཞི་གནས་ཡིན་པས། ཕྱི་ནང་ཐུན་མོང་། བན་བོན་ཐུན་མོང་

---

^{[མ་དཔེ་གཟིགས་ན་འདིར་གནོན།]}

ཐེག་པ་ཆེ་ཆུང་ཐུན་མོང་གི་ལམ་ཡིན། དེ་བསྒོམ་ཕྱག་རྒྱ་ཆེན་པོ་ནི་མ་ཡིན་ཏེ། དཔལ་ཕག་མོ་གྲུ་པའི་ཞལ་ནས། བླ་མ་དམ་པའི་རྩར་ཕྱིན་ནས། །གདམས་ངག་གང་རུང་ཉམས་བླངས་ན། །བདེ་བས་ལུས་སེམས་གང་བ་འབྱུང་། །ཞེན་ཅིང་ཆགས་པ་སྐྱེས་གྱུར་པས། །འདོད་ཁམས་གནས་སུ་གོལ་བར་འགྱུར། །གསལ་བ་དྭངས་པ་མཁའ་ལྟ་བུ། །ཕྱི་ནང་ཟླ་བ་ཤར་བ་འདྲ། །ཕྱེ་དང་བཙུམ་ལ་ཁྱད་པར་མེད། །དེ་ལ་ཞེན་ཅིང་ཆགས་པ་ཡིས། །སྒྲུབ་པ་པོ་ཡིས་སྐྱོངས་གྱུར་ན། །གཟུགས་ཀྱི་ཁམས་སུ་གོལ་བར་འགྱུར། །ཕྱི་དང་ནང་དུ་བལྟས་གྱུར་ཀྱང་། །རྟོག་པ་ཕྲ་བ་ཙམ་ཡང་མེད། །རྡུལ་བྲལ་ཆོས་སྐུ་བལྟས་བྱས་པས། །དགའ་དང་མི་དགའ་ཡིད་བསམ་པའི། །ཉམས་དེ་ལེགས་པར་སྐྱོང་གྱུར་ན། །གཟུགས་མེད་ཁམས་སུ་གོལ་བར་འགྱུར། །བདེ་དང་གསལ་དང་མི་རྟོག་གསུམ། །ཞེན་པ་བྲལ་བར་བསྒོམས་བྱས་ཀྱང་། །ཉན་ཐོས་རང་རྒྱལ་པ་ཡང་སྲིད། །ཅེས་དང་། རྗེ་འཇིག་རྟེན་མགོན་པོའི་ཞལ་ནས། བདེ་དང་གསལ་དང་མི་རྟོག་གསུམ། །འདི་གསུམ་བསྒོམ་གྱི་གོལ་ས་ཡིན། །ཞེས་

---

^{[མ་དཔེ་གཟིགས་ན་འདིར་གནོན།]}

དང་། དེ་ཡང་ཇི་ལྟར་བྱ་ཞེ་ན། རྗེ་རིན་པོ་ཆེ་སྒམ་པོ་པའི་ཞལ་ནས། གནས་པ་དང་རྟོག་པ་གཉིས་ལ་གནས་པ་གཙོ་ཆེར་མི་བྱ། གནས་པ་ནི་བརྒྱལ་བ་དང་ར་རོ་བ་དང་། །གཉིད་འཐུག་པོ་ལའང་ཡོད་དེ། རྟོག་པ་མིན་པའི་ཕྱིར་རོ། །ཞེས་གསུངས་སོ། །འོ་ན་ཞི་གནས་དེ་སྐྱེ་མི་རུང་བའི་ངན་པ་གཅིག་ཡིན་ནམ་སྙམ་ན། དེ་ནི་མ་ཡིན་ཏེ། ཕྱག་རྒྱ་ཆེན་པོ་སྐྱེ་བའི་གཞི་དང་རྟེན་ཡིན་ཏེ། དགའ་བོ་མངལ་གནས་ཀྱི་མདོ་ལས། གང་ལ་མཉམ་བཞག་སེམས་མེད་པར། །ཟག་པ་རྣམས་ནི་སྤངས་མི་འགྱུར། །ཞེས་དང་། གྲུབ་ཐོབ་བརྒྱུད་པའི་ཞལ་ལུང་ལས། གནས་པ་གསུམ་པོ་དེ་དག་གང་སྐྱེས་འདུག་ཀྱང་དེ་ཙམ་ནས་ངོ་སྤྲད་པར་རང་ངོ་ཤེས། དྲོད་ཁ་རྙེད། སྒྲོ་འདོགས་ཆོད། མ་སྐྱེས་པ་ལ་ངོ་སྤྲད་ན། དེ་ལྟར་འོང་བར་འདོད་ནས་ཉམས་ལེན་འཆུག །དེ་ལའང་གནས་པ་དང་པོ་དེས་ཅུང་གྲུལ་མི་ཐུབ། ཁྲིད་ཐེང་གཅིག་ལ་ཐ་ནའང་གནས་པ་བར་པ་ཙམ་མ་སྐྱེས་པའི་ཐབས་མེད། ཅེས་གསུངས་པས། ཁྲིད་གཉུག་རིང་ཐུང་གང་ཡིན་ཡང་གནས་པ་འབྲིང་ངམ་ཐ་མ་ཙམ་ངེས་པར་སྐྱེ་བས། དེ་ལ་ལྷག་མཐོང་ངོ་སྤྲད་ནས་བསྒོམས་པས། རྩེ་

---

^{[མ་དཔེ་གཟིགས་ན་འདིར་གནོན།]}

གཅིག་ལམ་སྣེ་ཟིན་པ་ཡིན་ནོ། །དེ་ལ་རྗེ་མི་ཕམ་པདྨ་དཀར་པོ་སོགས། འབྲུག་ལུགས་ཁ་ཅིག་གིས་ནི། རྩེ་གཅིག་རབ་འབྲིང་ཐ་གསུམ་ཞི་གནས་ཁ་རྐྱང་ཡིན་ཞིང་། དེ་ནས་སེམས་ཚོལ་ཞིང་ལྷག་མཐོང་ངོ་སྤྲད་པས། སྤྲོས་བྲལ་གྱི་རྟོག་པ་སྐྱེ་བར་བཤད་དེ། རྩེ་གཅིག་རབ་མ་སྐྱེས་ཀྱི་བར་ལྷག་མཐོང་ངོ་མི་སྤྱད་པ་ནི། ཞི་གནས་རབ་དང་ལྡན་པའི་ལྷག་མཐོང་གི་ཞེས་པ་མདོ་ལུགས་བཀའ་གདམས་ལམ་རིམ་གྱི་ལུགས་ཡིན། ཕྱག་རྫོགས་ཀྱི་ལུགས་མ་ཡིན་ཏེ། མཉམ་མེད་དྭགས་པོས་བསྒོམ་ཚུལ་ལ་ཁྱད་ཆོས་སུ་གནང་བ། རྣལ་འབྱོར་བཞིའི་ཞལ་གདམས་དང་། འཇིག་རྟེན་གསུམ་མགོན། ཞང་རིན་པོ་ཆེ། རྒྱ་རས་གསུམ་གྱི་དགོངས་པ་དང་། ཡང་དགོན་པ་ཉིད་ཀྱི་མྱོང་བ་དང་བསྟུན་པའི། རྣལ་འབྱོར་བཞི་རིམ་ལས། རྣལ་འབྱོར་ཅེས་པ་ནི་ཐབས་དང་ཤེས་རབ་བམ། ཞི་གནས་ལྷག་མཐོང་མཉམ་པོར་སྦྱོར་བས་རྣལ་འབྱོར་དེ་དག་དང་གང་གིས་སྦྱོར་བར་ནུས་པ་དེ་ལ་རྣལ་འབྱོར་ཞེས་བྱ་བ་ཡིན་གསུངས། སྔ་འགྱུར་གསང་བ་བསམ་གྱིས་མི་ཁྱབ་པའི་རྒྱུད་དང་། ཕྱི་འགྱུར་ཨཱ་ལི་ཀཱ་ལིའི་ཆུ་ཀླུང་ཆེན་པོའི་རྒྱུད་ལས། སེང་

---

^{[མ་དཔེ་གཟིགས་ན་འདིར་གནོན།]}

གེ་རྣམ་པར་འགྱིང་བའི་ཏིང་འཛིན་གྱིས། །རྩེ་གཅིག་མི་གཡོ་དྭངས་པས་ཤེས་པ་གསལ། །རང་བྱུང་ཡེ་ཤེས་ཁོང་ན་སད་པར་བྱེད། །བཟོད་པ་བརྟན་པོས་ངན་སོང་སྡུག་བསྔལ་སྤོངས། །ཞེས་དང་། ཡང་དགོན་པའི་ཞལ་ནས། དང་པོ་ངང་ལ་གནས་པ་རྩེ་གཅིག་གི་རྣལ་འབྱོར་ཏེ། དེ་ལ་ཡང་གནས་པའི་ཏིང་ངེ་འཛིན་ཞི་གནས་རྐྱང་པ་ཡིན་ལ། །འདིར་རྣལ་འབྱོར་ཅེས་པས། ཞི་གནས་དང་ལྷག་མཐོང་ཟུང་དུ་འབྲེལ་དགོས་ཏེ། ཕྲ་རགས་ཀྱི་རྣམ་རྟོག་རང་སར་ཞི་ནས། སེམས་གསལ་སྟོང་ནམ་མཁའ་དྭངས་པའི་དཀྱིལ་ལྟ་བུར་གསལ་སེང་ངེ་གནས་པ་ལ། རྟོག་མེད་དུ་ངེས་ཤེས་སྐྱེས་པ་ནི། ལྷག་མཐོང་གི་ཉམས་ཡིན་པས། ཞི་གནས་དང་ལྷག་མཐོང་ཟུང་དུ་འབྲེལ་བའི་བསྒོམ་དེ། བསྒོམ་བཟང་པོའི་དུས་ན་རྟོག་མེད་ཀྱི་ཤེས་པ། བདེ་གསལ་དུ་སེང་གེ་ཡེ་རེ། རྗེན་ནེ་ལྷང་ངེ་གནས་པ་ནི། བདེ་གསལ་གྱི་ངོ་བོ་མཐོང་བ་སྟེ། རེས་བསྒོམས་ཀྱང་མི་འོང་། རེས་མ་བསྒོམས་ཀྱང་འོང་བ། རྩེ་གཅིག་ཆུང་ངུ་ཡིན་ནོ། །ཞེས་དང་། རྒྱལ་དབང་ཆོས་རྗེས་གསུངས་པ། འདིར་བཤད་ན་རྩེ་གཅིག་གི་རྩེ་གཅིག་ནི། རྣམ་གཡེང་གི་རྟོག་པ་ཞི་

---

^{[མ་དཔེ་གཟིགས་ན་འདིར་གནོན།]}

བའི་ངང་དུ་རྩེ་གཅིག་ཏུ་གནས་པ་དེ་ཡིན། རྩེ་གཅིག་གི་སྤྲོས་བྲལ་ནི། གནས་པ་དེའི་ངོས་ནས་མཚན་མའི་སྤྲོས་པ་དེ་མི་དམིགས་པ་དེ་ཡིན། རྩེ་གཅིག་གི་རོ་གཅིག་ནི། མི་རྟོག་པ་དང་རྣམ་པ་བདེ་བ་དང་གསལ་བ་དེ་ལ། ཉམས་ཀྱི་བདེ་གསལ་མི་རྟོག་པ་གསུམ་རོ་གཅིག་ཏུ་འདྲེས་པ་ཡིན། རྩེ་གཅིག་གི་བསྒོམ་མེད་ནི། དེ་ལ་བརྟན་པ་ཐོབ་ནས་ཉིན་མཚན་འཁོར་ཡུག་ཏུ་སོང་བ་དེ་ཡིན། ཞེས་གསུངས་སོ། །བཀའ་བརྒྱུད་སྤྱིའི་ལུགས་ལ། འདི་ཙམ་ངོ་འཕྲོད་ནས། དེ་ཡན་ཆད་ས་མཚམས་མི་ཕྱེ་བ་སྐྱོང་འཇུག་པ་ཡིན། ས་མཚམས་ཕྱེས་ཀྱང་ཞུ་ཤེས་མི་ཤེས་ཀྱི་དབང་གིས་ས་མཚམས་འབྱེད་པར་དཀའ། གོལ་ས་རྣམས་ནི་ཞི་གནས་ཀྱི་སྐབས་ནས་ཡིན་གྱི། ལྷག་མཐོང་ངོ་འཕྲོད་ནས་གོལ་ས་མེད། རྩེ་གཅིག་གི་སྣེ་ཟིན་ནས་ཕྱག་རྒྱ་ཆེན་པོའི་ལམ་སྣེ་ཟིན་པ་ཡིན་པས། མི་སྐྱུར་བར་སྐྱོང་བ་རང་གིས་ཆོག །བོགས་འདོན་ཡང་ལོག་ནས་མི་དགོས་ཏེ། མོས་གུས་དང་གསོལ་འདེབས་ཁོ་ནས་ཆོག །གཞན་ལ་དྲི་རྟོགས་དང་བཅས་བཅོས་ཡང་མི་དགོས་ཏེ། མོས་གུས་དྲག་པོས་གསོལ་བ་བཏབ་ནས། བླ་མ་རང་ལ་བསྟིམ་སྟེ། །

---

^{[མ་དཔེ་གཟིགས་ན་འདིར་གནོན།]}

སེམས་ལ་བལྟས་པས། གང་ཤར་བའི་རྟོགས་པ་དེ་ལ། གེགས་དང་གོལ་ས་ཅི་ཡང་མེད་པས། དེ་ལ་ངོ་སྤྲོད་ཀྱང་མི་དགོས། ས་ལམ་ཐམས་ཅད་མོས་གུས་ཀྱི་སྟོབས་ལས་སྐྱེས་པའི་ཉམས་རྟོགས་དེས་བསྒྲོད་པ་ནི། རྡོ་རྗེ་ཕག་མོས་རྒོད་ཚང་བ་ལ་གནང་བའི་མོས་གུས་ཕྱག་རྒྱ་ཆེན་པོ་ཡིན་ནོ། །ཚར་རོ།། ༼༡༦༽ འདི་སྐབས་གནས་འགྱུ་ངོ་སྤྲོད་དྲི། ཐུགས་རྗེ་ཆེན་པོའི་མན་ངག་ཟབ་མོ། ཆུ་བུར་མིག་གིས་བལྟས་པས། ཡེ་ཤེས་ཀྱི་སྤྱན་ཤར་བའི་གདམས་ངག །རྫོགས་པ་ཆེན་པོ་འོད་གསལ་ཐོད་རྒལ་གྱི་ཁྲིད་འདི་ཡང་ཐུགས་རྗེ་ཆེན་པོའི་དམར་ཁྲིད་དང་། འབྲེལ་ཆེ་བ་ཡིན་པས་རྒྱལ་པོ་སྲོང་བཙན་སྒམ་པོའི་ཞལ་ནས། ཐུགས་རྗེ་ཆེན་པོའི་ཆོས་འདི་རྫོགས་པ་ཆེན་པོ་ཡང་ཡིན་ཏེ། ཞེས་སོགས་རྒྱ་ཆེར་གསུངས། སྤྱིར་རྫོགས་ཆེན་འདི་ཐེག་པ་དགུའི་ཡང་རྩེ་མཁའ་འགྲོའི་སྙིང་ཁྲག་མན་ངག་གི་ཆོས། བཀའ་སྲུང་མ་གཟའ་དམ་གསུམ་ཡོད་པས་ཤིན་ཏུ་གཉན་པའི་ཕྱིར། གཅིག་བརྒྱུད་མ་གཏོགས་ཁྲོམ་ཆོས་སུ་བཤད་མི་རུང་ནའང་། ཀརྨ་གླིང་པའི་གཏེར་ཁ། ཐུགས་རྗེ་ཆེན་པོ་པདྨ་ཞི་ཁྲོ་དང་། དགོངས་པ་རང་གྲོལ་གཉིས་ཀའི་ཐུན་མོང་གི་ཆོས།

---

^{[མ་དཔེ་གཟིགས་ན་འདིར་གནོན།]}

བར་དོ་ཁྲིད་དྲུག་གི་ནང་ནས། སྒྲོན་མ་དྲུག་གི་ངོ་སྤྲོད། ཤེས་རིག་རང་གྲོལ་དང་། ཆོས་ཉིད་བར་དོའི་ངོ་སྤྲོད་མཐོང་བ་རང་གྲོལ་ལས། ལྔ་པ་ཉི་ཟེར་འོད་། ཟེར་ངོ་སྤྲོད་ཀྱིས། །སྐུ་གསུམ་དག་པའི་ཞིང་ཁམས་ངོ་སྤྲོད་བྱ། །ཞེས་གསུངས་པ་དེ་བཤད། འདི་ནི་འགྲོ་དོན་ཆོས་ཡིན་པས་ཁྲོམ་ཆོས་རུང་བར་བཤད། དེ་བཤད་པ་ལ་ཐོག་མར་རྫོགས་ཆེན་དང་འབྲེལ་པའི་དབང་ཞིག་ཐོབ་དགོས། རྫོགས་ཆེན་དང་འབྲེལ་བའི་དབང་ཞིག་སྔོན་དུ་བསྐུར་ཡོད་པ་དེས་འཐུས། དམིགས་པ་འདི་ལྟར་སྒོམས་ཤིག །ཁྱེད་རང་རྣམས་ཀྱི་རྐང་མཐིལ་གཡས་སུ་ཡི་གེ་དུ་ནག་པོ་གཅིག་ལ་བདག་དང་སེམས་ཅན་ཐམས་ཅད་ཚ་དམྱལ་དུ་སྐྱེ་བའི་སྡིག་སྒྲིབ་ཐམས་ཅད་ཐིམ་པས། མེ་ལོང་ལ་གཟུགས་བརྙན་འཆར་བ་ལྟར། ཚ་དམྱལ་བརྒྱད་དུ་གྱུར། དེའི་ནང་དུ་རང་ཚུད་ནས་སྡུག་བསྔལ་དཔག་ཏུ་མེད་པ་ཡོད་པར་བསྒོམས་ལ། རཾ་ན་ར་ཀ །ལན་བདུན་ནམ་གསུམ་ཙམ་བརྗོད་ཅིང་། ད་དེ་སྒོམ་མཁན་གྱི་སེམས་ལ་ལྟོས། ཅི་ཡི་ངོ་བོར་ཡང་མ་གྲུབ། ད་རྐང་མཐིལ་གཡོན་དུ་ཡི་གེ་དུ་ནག་པོ་གཅིག་ལ། གྲང་དམྱལ་དུ་སྐྱེ་བའི་སྡིག་སྒྲིབ་ཐམས་ཅད་ཐིམ་པས་གྲོང་

---

^{[མ་དཔེ་གཟིགས་ན་འདིར་གནོན།]}

དམྱལ་དུ་གྱུར། དེའི་ནང་དུ་རང་ཚུད་ནས་ཤིན་ཏུ་འཁྱག་ཅིང་ལུས་གས་པར་བསྒོམས་ལ། ཁཾ་ན་ར་ཀ །ལན་བདུན་བརྗོད་ཅིང་། དེ་སྒོམ་མཁན་གྱི་སེམས་ཀྱི་ངོ་བོ་ལ་ལྟོས། །གསང་གནས་སུ་ཡི་གེ་སྦེ་དམར་པོ་ལ་ཡི་དྭགས་སུ་སྐྱེ་བའི་སྡིག་སྒྲིབ་ཐམས་ཅད་ཐིམ་པས་ཡི་དྭགས་ཀྱི་གླིང་དུ་གྱུར། དེའི་ནང་དུ་རང་ཚུད་པས་བཀྲེས་སྐོམ་གྱི་སྡུག་བསྔལ་དཔག་ཏུ་མེད་པ་ཡོད་པར་བསྒོམས་ལ། སརྦ་པྲ་ཏ་ཀ །ལན་བདུན་བརྗོད། ད་སེམས་ལ་ལྟོས། ལྟེ་བར་ཡི་གེ་ཏྲི་དམར་ནག་གཅིག་ལ་དུད་འགྲོར་སྐྱེ་བའི་སྡིག་སྒྲིབ་ཐམས་ཅད་ཐིམ་པས་དུད་འགྲོའི་གླིང་དུ་གྱུར། གླེན་ཞིང་ལྐུགས་པ་བསྒོམས་ལ། སརྦ་ཏིདྨ་ཀ་ལན་བདུན་བརྗོད། ད་སེམས་ལ་ལྟོས། སྙིང་གར་ཡི་གེ་ནི་ལྗང་ཁུ་གཅིག་ལ་མིར་སྐྱེ་བའི་རྒྱུ་ཐམས་ཅད་ཐིམ་པས་གླིང་བཞི་མི་ཡི་འཇིག་རྟེན་དུ་གྱུར། སྐྱེ་རྒས་ན་འཆིའི་སྡུག་བསྔལ་ཐམས་ཅད་བསྒོམས་ལ། སརྦ་མ་ནུ་ཁེ་ལན་བདུན་བརྗོད། དེ་ནས་སེམས་ལ་ལྟོས། །མགྲིན་པར་ཡི་གེ་སུ་སེར་པོ་གཅིག་ལ་ལྷ་མིན་དུ་སྐྱེ་བའི་སྡིག་སྒྲིབ་ཐམས་ཅད་ཐིམ་པས་ལྷ་མིན་འཐབ་རྩོད་ཀྱི་གནས་སུ་གྱུར། རང་དེའི་ནང་དུ་ཚུད་ནས་འཐབ་རྩོད་སྡུག་བསྔལ་སྐྲག་

---

^{[མ་དཔེ་གཟིགས་ན་འདིར་གནོན།]}

སྔངས་ཡོད་པར་བསྒོམས་ལ། སརྦ་ཨ་སུ་ར་ལན་བདུན་བརྗོད། དེ་སྒོམ་མཁན་སེམས་ལ་ལྟོས། སྤྱི་བོར་ཡི་གེ་ཨ་དཀར་པོ་གཅིག་ལ་ལྷར་སྐྱེ་བའི་རྒྱུ་ཐམས་ཅད་ཐིམ་པས། འདོད་ལྷ་རིགས་དྲུག་སོགས་ལྷའི་གནས་སུ་གྱུར། རང་དེའི་ནང་དུ་སྐྱེས་ནས་ཕམ་ལྟུང་གི་སྡུག་བསྔལ་མྱོང་བར་བསྒོམས་ལ། སརྦ་དེ་ཝ་ལན་བདུན་བརྗོད། །དེ་ལྟར་སྒོམ་མཁན་སེམས་ལ་ལྟོས། སེམས་སྟོང་པ་ཉིད་ཡིན། སྟོང་པ་ཉིད་ལ་བདེ་བ་དང་སྡུག་བསྔལ་ཞེས་བྱ་བ་མ་གྲུབ་བོ། །དེ་ལྟར་བསྒོམས་པས་རིགས་དྲུག་གི་སྐྱེ་སྒོ་ཆོད་པའི་གདམས་ངག་ཡིན། ད་སྐྱེ་སྒོ་གཅོད་པའི་སྔགས་འདི་འུར་འདོན་མཛོད། འཿཨཿཤཿསཿམཿ ད་ཁྱེད་རང་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ་གསུམ་བསྒོམ། དེ་ལ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཐིམ་པས་ཡེ་ཤེས་ཀྱི་མེ་ཁ་དོག་ལྔ་ལྡན་དུ་འབར། ལུས་ཀྱི་རྩ་ལྷ། གནས་དྲུག་གི་རིགས་དྲུག་གི་གྲོང་ཁྱེར་ས་བོན་ཡིག་འབྲུ་དང་བཅས་པ་བསྲེགས་ནས་རིགས་དྲུག་གི་གནས་སྟོང་པར་བསྒོམས་ལ། ཨོཾ་ཨཱཿཧཱུྃ་ལ་འུར་འདོན་གཅིག་མཛོད། དེ་ནས་

---

^{[མ་དཔེ་གཟིགས་ན་འདིར་གནོན།]}

ཁྱེད་རང་རྣམས་དགེ་འདུན་དཀོན་མཆོག་གི་ངོ་བོ་དགེ་སློང་མ་ཕམ་པ་ཡིན་པར་བསྒོམས་ལ་ན་མཿསཾ་གྷ་ཡ་ལན་གསུམ་བརྗོད། ད་ཁྱེད་རང་རྣམས་ཆོས་དཀོན་མཆོག་གི་ངོ་བོ་ཡུམ་ཆེན་མོ་ཡིན་པར་བསྒོམས་ལ་ན་མོ་དྷརྨཱ་ཡ་ལན་གསུམ་བརྗོད། དེ་ནས་ཁྱེད་རང་རྣམས་སངས་རྒྱས་ཤཱཀྱ་ཐུབ་པའི་སྐུར་བསྒོམས་ལ། ན་མོ་བུདྡྷ་ཡ་ལན་གསུམ་བརྗོད། དེ་ནས་ཁྱེད་རང་རྣམས་ཞི་བ་ཐུགས་རྗེ་ཆེན་པོའི་སྐུར་བསྒོམས་ལ། ཡིག་དྲུག་ལན་གསུམ་བརྗོད། ཁྲོ་བོ་རྟ་མགྲིན་གྱི་སྐུར་བསྒོམས་ལ་ཨོ་རྒྱ་གྲི་ཝ་ཧཱུྃ་ཕཊ། ལན་གསུམ་བརྗོད། ལུས་འདི་ཡང་འབྱུང་བ་ལྔ་ལས་གྲུབ། ཕྱིའི་འབྱུང་བ་ལྔ་ཡང་ནང་རིག་པ་སེམས་ཉིད་ཀྱི་རྩལ་ཡིན་པར་འདུག་བསམ་པ་གྱིས་ལ་རྗེས་ཟློས་ལན་གསུམ་མཛོད། ཨེ་ཡཾ་རཾ་བཾ་ལཾ། ད་ཁྱེད་རང་རྣམས་སྐྱིལ་ཀྲུང་དང་ལུས་དྲང་པོར་བསྲང་ལ་སྤྱི་བོར་ཐལ་མོ་སྦྱོར། ལུས་འདི་གསེར་གྱི་རྡོ་རྗེ་རྩེ་ལྔ་པ་ལྟེ་བར་ཡི་གེ་ཧཱུྃ་སྔོན་པོས་མཚན་པ། དེ་ལས་ཧཱུྃ་སྔོན་པོ་ཐུགས་ཀ་ནས་འཕྲོས། འཇིག་རྟེན་ཐམས་ཅད་ཧཱུྃ་སྔོན་པོས་གང་། ཚུར་འདུས་ནམ་མཁར་ཧཱུྃ་སྔོན་པོ་ཁྲུ་གང་ཙམ་ཞིག་བསྒོམ། ལུས་ཀྱི་ནང་ཐམས་ཅད་ཀྱང་ཧཱུྃ་སྔོན་པོ་མང་པོས་གང་བར་

---

^{[མ་དཔེ་གཟིགས་ན་འདིར་གནོན།]}

བསྒོམས་ལ། ཧཱུྃ་རིང་ལན་གསུམ་ལ་དབྱངས་དང་། ཧཱུྃ་ཐུང་འུར་འདོན་གཅིག་མཛོད། ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། དེ་ལྟར་ཁམས་གསུམ་འཁོར་བའི་རུ་ཤན་ཕྱེ་བས། འཁོར་བར་མི་འཁྱམས་པའི་གདམས་ངག་ཡིན་ཏེ། ལུས་གནད་ཅི་བདེར་བཅས། ངག་ཅི་ཡང་མི་སྨྲ། སེམས་བསམ་བརྗོད་བྲལ་བའི་ངང་ལ་མ་ཡེངས་པར་བཞག །དེ་ནས་དངོས་གཞི་སྒྲོན་མ་དྲུག་གི་ངོ་སྤྲོད་གོ་བར་བཤད་ན། སྒྲོན་མའི་ངོ་བོ་ནི། རང་གི་རིག་པའི་ངོ་བོ། སྒྲོན་མའི་རང་བཞིན་ནི་སྟོང་པ་ཉིད། སྒྲོན་མའི་མཚན་ཉིད་ནི། །གསལ་སྟོང་གཉིས་སུ་མེད་པ་སྟེ། དེ་དག་ནི་སྔོན་ངོ་སྤྲོད་ཀྱི་སྐབས་སུ་སོང་བས་འདིར་བཤད་མི་དགོས། ངེས་ཚིག་ནི་སྤྱིར་གཞི་བདེ་གཤེགས་སྙིང་པོ་ལ་གནས་པ་གཞིའི་སྒྲོན་མ་ཞེས་བྱ་བ། དེ་དག་ནི་རྫོགས་པ་ཆེན་པོའི་གཞི་ཁྲེགས་ཆོད་ཅེས་བྱ་སྟེ། ཕྱག་རྒྱ་ཆེན་པོ་དང་དོན་གཅིག །རྫོགས་ཆེན་སེམས་སྡེའི་སྐོར་ཡིན། གཞི་རྟོགས་པར་བྱས་ནས་ལམ་ཐོད་རྒལ་གྱིས་བསྒྲོད་པ་ནི། རྫོགས་ཆེན་ཀློང་སྡེ་དང་མན་ངག་གི་སྡེ་ཞེས་བྱ་བ་སྟེ། ཕྱག་ཆེན་ལས་ཀྱང་ཐེག་པ་མཐོ་བར་བཤད་པ་ཡིན། ཙིཏྟ་ཤའི་སྒྲོན་མ་ཞེས་བྱ་བ་ནི།

---

^{[མ་དཔེ་གཟིགས་ན་འདིར་གནོན།]}

གནས་ལུགས་ཀྱི་དོན་དེ་སྤྱིར་ལུས་ལ་གནས་ཤིང་ཁྱད་པར་དུ་ཡང་སྙིང་གི་ནང་ན་གནས་ཏེ། རིག་པ་སྙིང་དཀྱིལ་དུ་གནས་པ་ལ། །ཙིཏྟ་ཤའི་སྒྲོན་མ་ཞེས་བྱའོ། །དཀར་འཇམ་རྩའི་སྒྲོན་མ་ཞེས་བྱ་བ་ནི། སྙིང་དང་མིག་གཉིས་འབྲེལ་བའི་རྩ་སྐྱོན་མེད་དབང་པོ་དྭངས་བྱེད་ཀྱི་རྩ་ཞེས་བྱའོ། །ཞེས་དང་། ནང་ན་ཁྲག་དང་ཆུ་སེར་མེད་པའི་སྟོང་གསལ་གཅིག་ཡོད་པ་སྟེ། རིག་པ་འགྱུར་བ་མེད་པ་ཡིན། དེ་ལ་ནི་དཀར་འཇམ་རྩའི་སྒྲོན་མ་ཞེས་བྱ་སྟེ། རྒྱང་ཞགས་ཆུའི་སྒྲོན་མ་ཞེས་བྱ་བ་ནི། མིག་ཆུའི་དཀྱིལ་འཁོར་ནས། །མཐོང་བ་མ་འགགས་པར་གསལ་ཏེ། མིག་གིས་མཐོང་བ་མ་འགགས་པར་གསལ་བ་འདི་རྒྱང་ཞགས་ཆུའི་སྒྲོན་མ་ཞེས་བྱའོ། །ངོ་སྤྲོད་མཐོང་བ་རང་གྲོལ་ཨོ་རྒྱན་གྱི་གསུངས་པ་ལོས། སྔ་དྲོའམ་དགོང་མོ་ནམ་མཁའ་ཉི་ཟེར་གསལ་བའི་དུས་སུ། སློབ་བུ་ཐམས་ཅད་ཕྱེད་བསྙེས་སུ་ཉི་མ་ལ་མིག་ཟིམ་བུས་བལྟས་པས། འདིར་བལྟ་བཅུག་ཀྱང་རུང་། དེ་དག་ཀྱང་རྨ་བྱའི་མདངས་ལྟ་བུའམ། ཕུབ་ཀྱི་ཆ་འཁོར་ལྟ་བུའམ། འཇའ་འོད་མུ་ཁྱུད་ལྔ་ལྡན་ནང་ན་བཞུགས་པ་ནི། རྣམ་དག་ཆོས་དབྱིངས་སྒྲོན་མ། དེ་དག་གི་ཟེར་དང་

---

^{[མ་དཔེ་གཟིགས་ན་འདིར་གནོན།]}

མདངས་ལས་འོད་ཟེར་ཕྱོགས་ཐམས་ཅད་དུ་འཕྲོ་ཞིང་གསལ་བ། འོད་ཟེར་དེ་དག་གི་ནང་ནས་ཐིག་ལེ་ཐིག་ཕྲན་བསམ་གྱིས་མི་ཁྱབ་པ། ཉ་མིག་ལྟ་བུ་དང་། །གི་དྲྭ་བ་ལྟ་བུའི་བར་དུ། དྲ་བ་དྲྭ་ཕྱེད། ལུ་གུ་རྒྱུད་དུ་འབྲེལ་ཞིང་འགུལ་བ་དང་། འཕྲིག་པར་སྣང་བ། ཉི་མ་ལ་མིག་ཟིམ་བུར་བལྟས་པས། ཉི་མའི་ཟེར་མཚོན་ཆ་གཤིབ་པ་འདྲ་བ་དང་། མདུང་རྩེ་གཤིབས་པ་འདྲ་བ་དང་། བ་དག་གཟེང་བ་འདྲ་བ་འོང་སྟེ། དེ་ནི་ཆོས་ཉིད་བར་དོར་འོད་ཟེར་མཚོན་ཆའི་ཆར་འབབ་པ་འདྲ་བ། རང་གི་ཐོག་ཏུ་ཟུག་ནས་འོང་བའི་སྣང་བ་འཆར་ནས་འོང་སྟེ། དེ་ནི་མཚོན་ཆ་མ་ཡིན་ཏེ། ཡེ་ཤེས་གསལ་བའི་ཟེར་ཡིན་ཏེ། དེ་ལ་མ་སྐག་པར་རང་སྣང་ངོ་ཤེས་པར་གྱིས་ཤིག །འོད་ཁ་དོག་ལྔ་སྣང་བ་འདི། ངོ་མ་ཤེས་ན་ཉོན་མོངས་པ་དུག་ལྔ་ཡིན། འོད་ལྔ་ངོ་ཤེས་ན་རྒྱལ་བ་རིགས་ལྔ་སྟེ། འོད་ཟེར་མཐིང་ཀ་རྡོ་རྗེ་སེམས་དཔའ། འོད་ཟེར་དཀར་པོ་རྣམ་ཕྱོགས་པར་སྣང་མཛད་ཡིན། འོད་ཟེར་སེར་པོ་རིན་ཆེན་འབྱུང་ལྡན་ཡིན། འོད་ཟེར་དམར་པོ་སྣང་བ་མཐའ་ཡས་ཡིན། འོད་ཟེར་ལྗང་ཁུ་དོན་ཡོད་གྲུབ་པ་ཡིན། ངོ་མ་ཤེས་ན་ཕུང་

---

^{[མ་དཔེ་གཟིགས་ན་འདིར་གནོན།]}

པོ་ལྔ་ཡིན་ནོ། །འོད་ལྔའི་དོན་རྟོགས་ན་ཡུམ་ལྔ་ཡིན་ཏེ། འོད་ཟེར་མཐིང་ཀ་ནམ་མཁའི་དབྱིངས་ཕྱུག་མ། འོད་ཟེར་དཀར་པོ་སངས་རྒྱས་སྤྱན་མ་ཡིན། འོད་ཟེར་སེར་པོ་ཡུམ་མཆོག་མཱ་མ་ཀཱི། །འོད་ཟེར་དམར་པོ་ཡུམ་མཆོག་གོས་དཀར་མོ། །འོད་ཟེར་ལྗང་ཁུ་དམ་ཚིག་སྒྲོལ་མའོ། །ངོ་མ་ཤེས་ན་འབྱུང་བ་ལྔ་ཡིན་ནོ། །འོད་ལྔའི་དོན་ཤེས་ན་ཞིང་ཁམས་ལྔ་ཡིན་ཏེ། འོད་ཟེར་མཐིང་ཁ་འཐུག་པོ་བཀོད་པའི་ཞིང་། འོད་ཟེར་དཀར་པོ་མངོན་པར་དགའ་བའི་ཞིང་། འོད་ཟེར་སེར་པོ་དཔལ་དང་ལྡན་པའི་ཞིང་། འོད་ཟེར་དམར་པོ་བདེ་བ་ཅན་གྱི་ཞིང་། འོད་ཟེར་ལྗང་ཁུ་ལས་རབ་རྫོགས་པའི་ཞིང་། ངོ་མ་ཤེས་ན་འོད་ལྔ་ཕྱོགས་ལྔའོ། །འོད་ལྔའི་དོན་ཤེས་ན་ཁྲག་འཐུང་རིགས་ལྔའི་སྐུ། འོད་མཐིང་ཀ་བཛྲ་ཧེ་རུ་ཀ །དཀར་པོ་བྷུདྡྷ་ཧེ་རུ་ཀ །སེར་པོ་རཏྣ་ཧེ་རུ་ཀ །དམར་པོ་པདྨ་ཧེ་རུ་ཀ །ལྗང་ཁུ་ཀརྨ་ཧེ་རུ་ཀ །ངོ་མ་ཤེས་ན་ཉོན་མོངས་བདུད་ལྔའོ། །འོད་ལྔ་ཤེས་ན་མཁའ་འགྲོ་སྡེ་ལྔ་སྟེ། འོད་ཟེར་མཐིང་ཀ་རྡོ་རྗེ་མཁའ་འགྲོ་ཡིན། འོད་ཟེར་དཀར་པོ་སངས་རྒྱས་མཁའ་འགྲོ་ཡིན། འོད་ཟེར་སེར་པོ་རིན་ཆེན་མཁའ་འགྲོ་ཡིན། འོད་

---

^{[མ་དཔེ་གཟིགས་ན་འདིར་གནོན།]}

ཟེར་དམར་པོ་པདྨ་མཁའ་འགྲོ་ཡིན། འོད་ཟེར་ལྗང་གུ་ལས་ཀྱི་མཁའ་འགྲོ་ཡིན། ངོ་ཤེས་པར་གྱིས་ཤིག །མ་འཁྲུལ་ཞིག །མ་སྐྲག་ཅིག །ངོ་ཤེས་པར་གྱིས་ཤིག །རྒྱ་མཚོ་ཨར་གཏད་ངོ་སྤྲོད་ནི། མིག་གཉིས་མཛུབ་མོ་ཡིས་མནན་པས་འོད་སྐོར་བུ་འོང་སྟེ། ད་ལྟ་སྙིང་གི་དཀྱིལ་ན་ཞི་བའི་སྐུ། འཇའ་འོད་ཀྱི་ར་བ་ན་ཡོད་པའི་རྟགས་ཡིན་པས་ཤེས་པར་གྱིས་ཤིག །རྒྱ་མཚོའི་རྦ་ཀློང་ངོ་སྤྲོད་ནི། རྣ་བ་གཉིས་མཛུབ་མོས་མནན་པས། སྟེང་ནས་འུར་ཏིང་སྒྲ་འབྱུང་སྟེ། ཆོས་ཉིད་བར་དོར་ཆོས་ཉིད་ཀྱི་རང་སྒྲ་འབྲུག་སྟོང་ལྡིར་བ་ཙམ་འོང་བའི་རྟགས་ཡིན་ནོ། །ཆོས་ཉིད་ཟེར་གྱི་ངོ་སྤྲོད་ནི། མིག་གཉིས་ཀ་ཡུན་རིང་མཛུབ་མོས་བཙིར་བས། ཟེར་དང་ཐིག་ལེ་ལུ་གུ་རྒྱུད་དུ་རྒྱ་ཆེ་བར། འགུལ་འཕྲིག །ཡེ་ཤེས་ཤིག་འཕྲོ་བ་སྟེ། ཆོས་ཉིད་བར་དོར་ཟེར་གྱི་སྣང་བ་འཆར་བས། དེའི་རྟགས་ཡིན་པར་ཤེས་པར་གྱིས་ཤིག །འོ་ན་འཇའ་འོད་འདི་བལྟས་པས་ཅི་ལ་ཕན་ཞེ་ན། བར་དོ་དུས་ཀྱི་སྒྲོན་མ་ཞེས་བྱ་བ། ཆོས་ཉིད་བར་དོར་འཇའ་འོད་ཐིག་ལེ་ཐིག་ཕྲན་འདི་ལྟ་བུས་གང་ནས་འཆར། དེའི་ནང་ནས་ཞི་བ་དང་ཁྲོ་བོའི་སྐུ་

---

^{[མ་དཔེ་གཟིགས་ན་འདིར་གནོན།]}

དཔག་ཏུ་མེད་པ་འཆར་བའི་ཚེ་ད་ལྟ་ངོ་སྤྲད་པའི་དོན་དྲན་ནས་འཇིགས་སྐྲག་དང་བྲལ་ནས་དག་པའི་ཞིང་ཁམས་སུ་སྐྱེ་བར་གསུངས་སོ། །སྐབས་འདིར་ཡེ་ཤེས་འོད་ལམ་གྱི་སྨོན་ལམ་རྣམ་པར་དག་པ་གདབ་པར་བྱའོ། །ཞེས་གསུངས་པས། དུག་ལྔ་དྲག་པོས་འཁོར་བར་འཁྱམས་པའི་ཚེ། །ཡེ་ཤེས་བཞི་སྦྱོར་གསལ་བའི་འོད་ལམ་ལ། །བཅོམ་ལྡན་རྒྱལ་བ་རིགས་ལྔས་ལམ་སྣ་དྲོངས། །ཡུམ་མཆོག་རིགས་ལྔ་མཁའ་འགྲོས་རྒྱབ་ནས་སྐྱོལ། །བར་དོ་འཇིགས་པའི་འཕྲང་ནས་བསྒྲལ་དུ་གསོལ། །ཡང་དག་རྫོགས་པའི་སངས་རྒྱས་ས་རུ་སྐྱོལ། །སྒྲ་འོད་ཟེར་གསུམ་སྒྲ་རུ་མི་སྡང་ཞིང་། །ཞི་ཁྲོ་རབ་འབྱམས་ཞིང་ཁམས་མཐོང་བར་ཤོག །འོ་ད་ནང་ནུབ་ནམ་མཁའ་ལ་དུས་རྒྱུན་དུ་ལྟོས་དང་། ངོ་མཚར་ཅན་གྱི་མཐོང་རྒྱུ་མང་པོ་ཡོད། འོད་ཁ་དོག་ལྔ་མཐོང་བ་ཡང་འཛའ་མཐོང་བ་དང་མི་འདྲ། ཡེ་ཤེས་ལྔ་དངོས་སུ་མཐོང་བ་ཡིན་པས། དོན་ལ་རྒྱལ་བ་རིགས་ལྔ་མཇལ་བ་དང་ཁྱད་པར་མེད། ལས་དག་པ་ལ་རྒྱལ་བ་རིགས་ལྔ་དང་། ཐུགས་རྗེ་ཆེན་པོ་དང་ཨོ་རྒྱན་ལ་སོགས་པ་ཞི་བའི་ལྷ་མང་པོ་དང་། རྟ་མགྲིན་ལ་སོགས་པ་ཁྲོ་བོ་མང་པོ་ཡང་དངོས་སུ་

---

^{[མ་དཔེ་གཟིགས་ན་འདིར་གནོན།]}

མཇལ་རྒྱུ་ཡོད་དེ། དེ་དག་མཇལ་ན་ཡང་བླ་མ་དང་མཆེད་གྲོགས་མ་གཏོགས་ལ་བཤད་མི་རུང་གསང་དགོས། མ་གསང་ན་བཀའ་སྲུང་མ་གཟའ་དམ་གསུམ་གཉན་དྲག་པས་རང་ལ་ན་བ་སོགས་འོང་བས་གསང་བར་མཛོད།། ༼༡༧༽ ཐུགས་རྗེ་ཆེན་པོའི་མན་ངག་ཟབ་མོ། རྗེས་ཞལ་གདམས་དང་བསྔོ་བས་རྒྱས་འདེབས་པ་ནི། རྒྱལ་བ་ཡང་དགོན་པའི་ཞལ་ནས། ཆོས་རྫོགས་པ་ཆེན་པོ་ཡིན་པས་མི་ཕན། གང་ཟག་རྫོགས་པ་ཆེན་པོར་འགྲོ་དགོས། ཆོས་སྐད་ལ་རྟ་རི་བ་བྱས་ཀྱང་། གང་ཟག་ལ་ཁྱི་མི་རི་བ་མང་པོ་མཐོང་། ཆོས་ལ་ཚིག་ཤེས་པ་དང་བློ་ཡུལ་དུ་གོ་བ་རྐྱང་པས་མི་ཕན། ཚིག་མིང་རྐྱང་དང་ལག་ལེན་མི་རྒན་དུ་སོང་ནས། ཚིག་ཟིན་སྐམ་པོ་སྒྲིགས་སྐྱེད་ཐམས་ཅད་ནེ་ཚོའི་འདོན་པ། པཀའི་གླུ་དང་ཁྱད་མེད། ཆོས་གཅིག་གོ་གཉིས་གོ་ཐམས་ཅད་ལག་ལེན་ལ་འདེབས་པ་ཞིག་དགོས། གཅིག་ཤེས་གཉིས་ཤེས་རང་རྒྱུད་ལ་སྦྱོར་བ་ཞིག་དགོས། ཆོས་རང་གི་རྒྱུད་ཐོག་ཏུ་མ་བྱོན། སེམས་དང་ཆོས་ཀྱི་ཕྱེ་ཆུ་མ་འདྲེས་པར། ཆོས་དང་གང་ཟག་གི་བར་ན་ཧམ་དཔག་མི་ཤོང་བ་ཙམ་བྱས། ཆོས་གློ་བའི་ཚོད་མ་

---

^{[མ་དཔེ་གཟིགས་ན་འདིར་གནོན།]}

བཞིན་ཁ་ན་ཡམ་མེ་བྱས་པ་དེས། ཆོས་ཀྱིས་དོན་བྱེད་མ་ནུས་པ་ལགས་མོད། ཅེས་གསུངས་པས། ད་རེས་ངས་བཤད་པའི་དོན་དེ་དག་རང་གི་ཆེ་གོ་ཆུང་གོ་དེ་མི་སྐྱུར་བར་ཉམས་སུ་ལེན་པ་གལ་ཆེ། དེ་ལྟར་ཉམས་སུ་བླངས་བའི་ཕན་ཡོན་ནི། རྟོགས་ཆེན་གྱི་མདོ་ལས། ཐང་ཅིག་ཏིང་འཛིན་སྒོར་ཞུགས་ན། །ཁམས་གསུམ་གང་བའི་མི་རྣམས་ལ། །སྲོག་བྱིན་པས་ནི་འདི་དོན་ཆེ། །ཞེས་དང་། ཐར་ཆེན་ལས། གང་གི་ཆོས་འདི་འཇིག་པའི་ཚེ། །རྒྱལ་བའི་དྲིན་ལེན་ལོན་འདོད་པས། །སྐད་ཅིག་ཡུད་ཙམ་སྒོམ་བྱེད་པ། །སྟོང་ཁམས་གང་བའི་སེམས་ཅན་ལ། །སྲོག་གི་སྦྱིན་པ་བཏང་བ་བས། །བསམ་གཏན་བསྒོམ་པ་བསོད་ནམས་ཆེ། །ཞེས་དང་། དམ་པ་འཇུག་པའི་མདོ་ལས། སེམས་ཅན་ཐམས་ཅད་ལ་ཇི་སྲིད་འཚོའི་བར་དུ། འཚོ་བའི་ཡོ་བྱད་ཀྱིས་ཚོགས་བསགས་པ་བས། སྟོང་པ་ཉིད་ཐུན་གཅིག་བསྒོམ་པ་བསོད་ནམས་ཆེའོ། །ཞེས་དང་། གཙུག་ཏོར་ཆེན་པོའི་མདོ་ལས། བསྐལ་པ་མང་པོར་ཐོས་པ་བསགས་པ་བས་ནི། ཉིན་གཅིག་ཆོས་ཉིད་ཀྱི་དོན་བསྒོམ་པ་བསོད་ནམས་ཆེའོ། །དེ་ཅིའི་ཕྱིར་ཞེ་ན། སྐྱེ་ཤིའི་ལམ་དང་

---

^{[མ་དཔེ་གཟིགས་ན་འདིར་གནོན།]}

རིང་དུ་བྱེད་པའི་ཕྱིར་རོ། །ཞེས་དང་། ཏེ་ལོ་པའི་ཞལ་ནས། དཔེར་ན་བསྐལ་པ་སྟོང་དུ་བསགས་པའི་མུན་པ་ཡང་། །སྒྲོན་མེ་གཅིག་གིས་མུན་པའི་ཚོགས་རྣམས་སེལ། །དེ་བཞིན་རང་སེམས་འོད་གསལ་སྐད་ཅིག་གིས། །བསྐལ་པར་བསགས་པའི་མ་རིག་སྡིག་སྒྲིབ་སེལ། །ཞེས་གསུངས་པས། དེ་ལྟར་ཉམས་ལེན་བྱས་པ་ལ་ཕན་ཡོན་དཔག་ཏུ་མེད་པ་ཡོད་ཅིང་། རབ་ཚེ་གཅིག་ལུས་གཅིག་ལ་སངས་རྒྱ། ཡང་ན་ཕྱི་དབུགས་ཆད་ཙ་ན་འཆི་བ་ཆོས་ཀྱི་སྐུར་སངས་རྒྱས། བར་དོ་ལོངས་སྤྱོད་རྫོགས་པའི་སྐུ་ཡི་དམ་གྱི་ལྷ་དང་དབྱེར་མེད་དུ་སངས་རྒྱ་བ་སོགས། གང་ཟག་དབང་པོའི་བྱེ་བྲག་གིས་འབྲས་བུ་སངས་རྒྱས་ཐོབ་ལུགས་ཉི་ཤུ་རྩ་གཅིག་གསུངས་པའི་ནང་ནས། ཐ་མའི་ཡང་ཐ་ནི། སྤྲུལ་སྐུའི་ཞིང་ཁམས་དག་པར་དབུགས་དབྱུང་བ་ཞེས་བྱ་སྟེ། སྨོན་ལམ་གར་བཏབ་པའི་སངས་རྒྱས་ཀྱི་ཞིང་ཁམས་སུ་སྐྱེ་བར་གསུངས། དེ་ལ་མ་གཅིག་ལབ་སྒྲོན་གྱི་ཞལ་ནས། བདེ་བ་ཅན་མ་གཏོགས་པའི་ཞིང་ཁམས་རབ་རྣམས་སུ། ས་བརྒྱད་པ་མ་ཐོབ་བར་མི་སྐྱེ། ཞིང་ཁམས་འབྲིང་རྣམས་སུ་ཉོན་སྒྲིབ་ཕྲ་བ་ཡང་སྤངས་ནས་སྒོམ་ལམ་

---

^{[མ་དཔེ་གཟིགས་ན་འདིར་གནོན།]}

ཡན་ཆད་ཐོབ་དགོས། དེ་མིན་མི་སྐྱེ། གཙང་མའི་གནས་ལྔ་འོག་མིན་སོགས་དང་ལྕང་ལོ་ཅན་སོགས་ནའང་བདག་འཛིན་རྩ་བ་ནས་ཆོད་ནས་ཆོས་ཉིད་ཀྱི་བདེན་པ་མཐོང་བའི་མཐོང་ལམ་ཐོབ་དགོས། དེ་མིན་ན་མི་སྐྱེ། འོན་ཏེ་མཐོང་ལམ་མ་ཐོབ་པར་དམ་ཚིག་སྡོམ་པ་ལ་སྐྱོན་ཕྲ་མོ་ཡང་མེད་ཅིང་། དགེ་བ་ཁོ་ན་དང་སྨོན་ལམ་ལ་འབད་ན་དགའ་ལྡན་སོགས་ཞིང་ཁམས་ཆུང་ངུ་འགའ་ཞིག་ཏུ་སྐྱེ་རུང་ཙམ་སྟེ་དཀའ་བར་གདའོ། །དེས་ན་གང་ཟག་ཉོན་མོངས་པ་ཅན་རྣམས་སངས་རྒྱས་ཀྱི་ཞིང་ཁམས་སུ་སྐྱེ་བའི་རེ་བ་ཡོད་པ་མི་སྲིད་པ་ཡིན་ཏེ། འོན་ཀྱང་མགོན་པོ་འོད་དཔག་མེད་ཀྱི་སྨོན་ལམ་གྱི་དབང་གིས་ཞིང་དེ་རུ་སྐྱེ་བར་མགོན་པོ་ཉིད་ཀྱི་ཞལ་གྱིས་བཞེས་པ་ཡིན་པས་ན། བདེ་བ་ཅན་གྱི་ཞིང་དུ་སྐྱེ་བའི་སྨོན་ལམ་ལ་སྒོ་ཐམས་ཅད་ནས་འབད་དགོས་སོ། །དེ་ལ་ཐེ་ཚོམ་དང་སོམ་ཉི་ལེ་ལོ་སྤངས་ཏེ། ངེས་ཤེས་དང་བརྩོན་འགྲུས་དྲག་ལ་མྱུར་བའི་སྒོ་ནས་བདེ་བ་ཅན་གྱི་ཞིང་ཁམས་ཀྱི་བཀོད་པ་དང་། ཕན་ཡོན་རྣམས་དྲན་པ་བྱས་ལ་སྨོན་ལམ་བཏབ་པར་བྱའོ། །བདེ་བ་ཅན་ནི་སངས་རྒྱས་གཞན་གྱི་ཞིང་ཁམས་ལས་ཁྱད་པར་ལྷག་སྟེ། ཐ་མལ་པ་ཉོན་མོངས་པ་

---

^{[མ་དཔེ་གཟིགས་ན་འདིར་གནོན།]}

དང་བཅས་པའི་གང་ཟག་རྣམས་སྐྱེ་རུང་བས་ལྷག་པ་དང་། དེར་སྐྱེས་ནས་བསམ་པའི་དོན་ཐམས་ཅད་ཀྱང་བསམ་མ་ཐག་ནས་འགྲུབ་ཅིང་ཉོན་མོངས་ཀྱི་སྒྲིབ་པ་ཕྲ་བས་ཀྱང་མི་གོས་པ་དང་། གཞན་སངས་རྒྱས་ཀྱི་ཞིང་དུ་འགྲོ་བས་ཆོག་པས་ལྷག་པ་དང་། གཞན་གྱི་ཞིང་ཁམས་ལས་སངས་རྒྱས་པ་ཡང་མྱུར་བ་ལ་སོགས་པའི་ཕན་ཡོན་བསམ་གྱིས་མི་ཁྱབ་པ་དང་ལྡན་པའི་བདེ་བ་ཅན་ལས་ཟུང་ཐག་ཉེ་བའི་ཞིང་ཁམས་གཞན་མེད་པས། བདེ་བ་ཅན་དུ་སྐྱེ་བའི་སྨོན་ལམ་ལ་འབད་པ་ཤིན་ཏུ་གལ་ཆེ། ཞེས་གསུངས་སོ། །དེ་ལྟར་བདེ་བ་ཅན་གྱི་བཀོད་པའི་མདོ་དང་། དཀོན་མཆོག་བརྩེགས་པའི་ལེའུ་འོད་དཔག་མེད་ཀྱི་མདོ་དང་། པདྨ་དཀར་པོའི་མདོ་དང་། རྔ་སྒྲའི་གཟུངས་དང་། །ཨོ་རྒྱན་རིན་པོ་ཆེའི་གསུངས་རྣམས་མཐུན་པར། མཚམས་མེད་པ་ལྔ་དང་། ཆོས་སྤང་བ་མ་གཏོགས་སེམས་རྩེ་གཅིག་གིས་ཞིང་ཁམས་དེར་སྨོན་ལམ་བཏབ་ན། བདེ་བ་ཅན་གྱི་ཞིང་ཁམས་སུ་སྐྱེ་ཐུབ་པར་གསུངས། དེ་ཡང་ཞེ་ཐག་པ་ནས་སྨོན་ལམ་བཅུ་བཏབ་ན་སྐྱེ་གསུངས། དེ་ནི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་སྨོན་ལམ་གྱི་མཐུས་ཡིན། །

---

^{[མ་དཔེ་གཟིགས་ན་འདིར་གནོན།]}

དེ་ཕྱིར་ཞིང་ཁམས་དེར་སྨོན་ལམ་འདེབས་པ་གལ་ཆེ། ། བསྔོ་བ་སྨོན་ལམ་གྱིས་རྟ་ཁ་སྲབ་ཀྱིས་བསྒྱུར་བ་དང་འདྲ། བསྔོ་བས་ནི་རང་དོན་དང་གཞན་དོན་ཐམས་ཅད་འགྲུབ་སྟེ། །དཀོན་བརྩེགས་ལས། བྱང་ཆུབ་སེམས་དཔའི་སྦྱིན་བཏང་བས། །བྱང་ཆུབ་ཏུ་ནི་བསྔོ་བྱེད་ན། །སེམས་ཅན་ཀུན་ལ་ཕན་བྱེད་ཅིང་། །རང་དོན་དཔག་མེད་འཐོབ་པར་འགྱུར། །ཞེས་དང་། བསྔོ་བ་བྱས་པས་དགེ་བ་ཆུང་ངུ་གཅིག་ཡིན་ཡང་། སངས་རྒྱས་མ་ཐོབ་ཀྱི་བར་དུ་མི་ཟད་པ་དང་། ཞག་རེ་སོང་ཞིང་སྐྱིད་རེ་འཕེལ་བས་ཆུང་ངུ་ལ་ཆེན་པོར་འགྱུར་བ་དང་། མཐར་ཐུག་འབྲས་བུ་སངས་རྒྱས་ཐོབ་པར་འགྱུར་བས་ཤིན་ཏུ་གལ་ཆེ། དེ་ཡང་སེམས་ངོ་མ་ཡེངས་པའི་ངང་ནས་བསྔོ་བ་བྱས་ན། འཁོར་གསུམ་ཡོངས་དག་གི་བསྔོ་བར་འགྱུར་བས་ཤིན་ཏུ་ཕན་ཡོན་ཆེ་སྟེ། མངོན་རྟོགས་རྒྱན་ལས། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས། ལྔ་ལྡན་རྩ་བ་ལས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱི་བྱི་དོར་མོ་བྱས་ན། །དགོས་འདོད་ཀྱི་

---

^{[མ་དཔེ་གཟིགས་ན་འདིར་གནོན།]}

འབྲས་བུ་མི་འབྱུང་བས། །རྗེས་བསྔོ་བ་འདི་ལ་འབད་ཀྱང་འཚལ། །ཞེས་གསུངས་སོ། །དེས་ན་དགེ་སྦྱོར་གང་བྱེད་ཀྱང་སེམས་ཅན་ཐམས་ཅད་ཀྱི་དོན་དུ། །དགེ་སྦྱོར་འདི་བྱའོ་སྙམ་པའི་བསམ་པ་བཟང་པོའི་སེམས་བསྐྱེད་དང་། དངོས་གཞིའི་ཚེ་ཡང་། དལ་འབྱོར་རྙེད་དཀའ་བ། འཆི་བ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་རྣམས་དྲན་པར་བྱ། སྐྱབས་འགྲོ་སེམས་བསྐྱེད། རྡོར་སེམས། མཎྜལ། བླ་མའི་རྣལ་འབྱོར་རྣམས་ཀྱི་དམིགས་པ་ཐུན་རེ་བྱ། དེ་ནས་རང་ཉིད་ཡི་དམ་ཐུགས་རྗེ་ཆེན་པོར་སྒོམ། སྤྱི་བོར་བླ་མ་ཀུན་འདུས་འོད་དཔག་མེད་ཀྱི་སྐུ་གཅིག་བསྒོམ། བླ་མ་ཐམས་ཅད་སྤྱན་དྲངས་དེ་ལ་བསྟིམ་ནས། བླ་མ་ཀུན་འདུས་སུ་བསྒོམ། ཡི་དམ་ཐམས་ཅད་སྤྱན་དྲངས་ནས་རང་ལ་བསྟིམས་པས། རང་ཉིད་ཡི་དམ་ཀུན་འདུས་སུ་བསྒོམ། རང་གི་ཐུགས་ཀར་ཟླ་བའི་སྟེང་དུ། ཧྲཱིཿཡིག་ལ་ཡིག་དྲུག་གིས་གཡས་སུ་བསྐོར་བ། དེ་གསང་སྔགས་རིག་སྔགས་གཟུངས་སྔགས་ཀུན་འདུས་སུ་བསྒོམ། དེ་ལྷ་གཅིག་བསྒྲུབས་པས་ཐམས་ཅད་འགྲུབ་པའི་གདམས་ངག་ཟབ་མོ་ཡིན། རང་གི་ཐུགས་

---

^{[མ་དཔེ་གཟིགས་ན་འདིར་གནོན།]}

ཀ་ནས་འོད་ཟེར་འཕྲོས་པས། སྣོད་ཀྱི་འཇིག་རྟེན་བདེ་བ་ཅན་གྱི་ཞིང་ཁམས་སུ་བྱས། བཅུད་ཀྱི་སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར་པར་བསྒོམ། དེ་སྣང་བ་སྐུ་ཡི་ཁྱེར་སོ་ཡིན། དེ་རྣམས་ཀྱིས་རང་གི་རམ་བུ་བཀྱག་ནས་ཡིག་དྲུག་དི་རི་རི་འདོན་པར་བསྒོམ། སྒྲ་སྐད་ཐོས་ཚད་ཡི་གེ་དྲུག་པར་བསྒོམ། དེ་གྲག་པ་གསུང་གི་ཁྱེར་སོ་ཡིན་པས། སྐད་ཅིག་ལ་ཡང་དུང་ཕྱུར་མང་པོ་འགྲོ་བའི་གདམས་ངག་ཡིན། སེམས་ལ་བཟང་ངན་གྱི་རྟོག་པ་ཅི་ཤར་ཡང་དགག་སྒྲུབ་མེད་པར་དེའི་ངོ་བོ་བལྟས་ནས་མ་བཅོས་པར་བཞག་པ་ནི། དྲན་རྟོག་ཐུགས་ཀྱི་ཁྱེར་སོ་སྟེ། ཕྱག་རྒྱ་ཆེན་པོ་དང་། རྫོགས་པ་ཆེན་པོ་གཞི་ཁྲེགས་ཆོད་ཀྱི་ཉམས་ལེན་ཡིན། དེ་གསུམ་ཀ་མི་ཤོར་བ་བྱུང་ན་བསྐྱེད་རྫོགས་ཟུང་འཇུག་གི་ཉམས་ལེན་མཆོག་ཡིན། ཐ་ན་ཡང་དེ་གསུམ་གཅིག་དང་རྒྱུན་དུ་མི་འབྲལ་བར་བྱ། ཉི་མ་རྩེ་ཤར་དང་ནུབ་ཁ་ཟེར་གཉིས་ལ་རྫོགས་པ་ཆེན་པོ་འོད་གསལ་ཐོད་རྒལ་གྱི་དོན་ལ་བལྟ། ཞོགས་པ་ནམ་ལངས་དུས་སམ་ནུབ་མོ་སྲོད་ཀྱི་དུས། གཏོང་ལེན་གྱི་དམིགས་པ་ཐུན་རེ་མ་ཆག་པར་བསྒོམ། ཉལ་ཁ་དུས་དེ་རིང་དགེ་སྦྱོར་གང་འགྲུབ་ཐམས་

---

^{[མ་དཔེ་གཟིགས་ན་འདིར་གནོན།]}

ཅད། སེམས་ཅན་ཐམས་ཅད་རྫོགས་པའི་སངས་རྒྱས་ཐོབ་པར་བྱ། དེའི་ཕྱིར་དུ་བདག་མངོན་པར་རྫོགས་པར་སངས་རྒྱས་པར་བྱ། དེ་ཡང་བར་ཆད་མེད་ཅིང་མྱུར་དུ་སངས་རྒྱས་ཐོབ་པའི་ཕྱིར། །འདི་ནས་ཚེ་འཕོས་མ་ཐག་ཏུ་བདེ་བ་ཅན་གྱི་ཞིང་ཁམས་སུ་སྐྱེ་བར་གྱུར་ཅིག་བསམ་པ་བྱས་ནས་ཤེས་ན་བདེ་བ་ཅན་དུ་སྐྱེ་བའི་བསྔོ་བ་དང་བདེ་སྨོན་བཟང་སྤྱོད་སོགས་འདོན། མི་ཤེས་ན་བདེ་བ་ཅན་དུ་སྐྱེ་བར་ཤོག་ཟེར་བ་དེ་རང་གིས་ཆོག །ནམ་འཆི་བའི་ཚེ་བདེ་བ་ཅན་དུ་འགྲོ་བསམ་པའི་ཐག་རྦད་གཅོད་བྱ། །མཚམས་མེད་ལྔ་དང་ཆོས་སྤངས་པ་མ་གཏོགས་དེར་སྐྱེ་ངེས་པ་ནི། སངས་རྒྱས་ཀྱི་སྨོན་ལམ་གྱི་སྟོབས་ཡིན། ཕ་མ་དང་རྩ་བའི་བླ་མ་རྡོ་རྗེ་སློབ་དཔོན་དང་། འཕགས་པ་དགྲ་བཅོམ་པ་རྣམས་བསད་པ་དང་། རྫོགས་པའི་སངས་རྒྱས་གཅིག་དགྲོངས་པའམ་དགྲོང་ཤོམ་བྱས་ན་མཚམས་མེད་ཡིན་ཏེ། དེ་འདྲ་བྱེད་མཁན་ནི་སུ་མེད་དམ། དམ་པའི་ཆོས་སྤང་ན་མི་སྐྱེ་སྟེ། ཆོས་ནི་མ་སྤང་བར་ཅི་འགྲུབ་བྱེད་པའི་རྩིས་ཡིན་ལ། སྐྱེའམ་མི་སྐྱེ་བསམ་པའི་ཐེ་ཚོམ་མི་རུང་། ཐེ་ཚོམ་བྱས་ན་ཞིང་དེར་སྐྱེས་ནའང་། མེ་ཏོག་གི་ཁ་མི་བྱེ་

---

^{[མ་དཔེ་གཟིགས་ན་འདིར་གནོན།]}

བས་སངས་རྒྱས་ཞལ་མཐོང་འཕྱི་བའི་སྐྱོན་ཡོད་གསུངས། དེ་ཕྱིར་སྐྱེའམ་མི་སྐྱེ་བསམ་པའི་ཐེ་ཚོམ་མི་བྱ། དེར་སྐྱེས་ན་ཅི་དགའ་སྙམ་ན། ཞིང་དེར་སྐྱེ་བའི་སྡུག་བསྔལ་མེད་དེ། མེ་ཏོག་པདྨའི་སྦུབས་ལ་བརྫུས་སྐྱེས་སྐད་ཅིག་ལ་ལུས་གྲུབ་པ་ཡིན། དེར་སྐྱེས་ཚད་ལ་སྐུ་གསེར་གྱི་མདོག་ཅན་མཚན་དང་དཔེ་བྱད་ཀྱིས་བརྒྱན་པ། མངོན་ཤེས་དང་རྫུ་འཕྲུལ་དཔག་ཏུ་མེད་པ་དང་ལྡན་པ་ཁོ་ན་ཡིན། ཞིང་ཁམས་དེ་ན་ནད་དང་གདོན་དང་དགྲ་དང་མུ་གེ་ལ་སོགས་པའི་སྡུག་བསྔལ་གང་ཡང་རྣ་བས་ཀྱང་མི་ཐོས། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སྟེ། དུག་ལྔ་ནི་དེར་སྐྱེས་ཚད་ལ་མེད། ཞིང་ཁམས་འདིའི་བསྐལ་པ་གཅིག་གི་ཡུན་ནི་བདེ་བ་ཅན་གྱི་ཞིང་གི་ཞག་གཅིག་ཡིན། དེའི་རྩིས་བྱས་པའི་ལོ་གྲངས་བྱེ་བ་དུང་ཕྱུར་ལ་ཡང་འཆི་རྒྱུ་མེད། ན་རྒྱུ་མེད། རྒས་རྒྱུ་མེད། ཅི་འདོད་པའི་ཟས་གོས་ལོངས་སྤྱོད་དང་། སངས་རྒྱས་ལ་མཆོད་པ་འབུལ་རྒྱུ་རྣམས་བསམ་པ་ཙམ་གྱིས་ལྷུན་གྲུབ་ཏུ་འོངས། དེ་ལ་རྩོལ་སྒྲུབ་དང་ཉ་ར་འཚོ་སྐྱོང་མི་དགོས། ད་ལྟའི་སྡིག་སྒྲིབ་ཐམས་ཅད་རྣམ་སྨིན་གྱི་སྡུག་བསྔལ་མྱོང་མི་དགོས་པར། འོད་དཔག་མེད་ཀྱི་

---

^{[མ་དཔེ་གཟིགས་ན་འདིར་གནོན།]}

ཞལ་མཇལ་ཕྱག་ཕུལ་བསྐོར་བ་བྱེད། མཆོད་པ་འབུལ་ཆོས་ཉན་པས་དག་པར་འགྱུར། རྫུ་འཕྲུལ་དང་མངོན་ཤེས་ལ་ཐོགས་པ་མེད་པས། སངས་རྒྱས་ཀྱི་ཞིང་ཁམས་ཐམས་ཅད་དུ་འགྲོ་ནས་སངས་རྒྱས་མཇལ་ཆོས་ཉན། འབྲེལ་ཐོགས་ཀྱི་སེམས་ཅན་རྣམས་འདྲེན། དེ་དགོང་སླར་བདེ་བ་ཅན་དུ་ཚུར་སླེབས་པའི་རྫུ་འཕྲུལ་ལ་ཐོགས་པ་མེད། དེ་ལྟར་བདེ་སྐྱིད་ཕུན་སུམ་ཚོགས་པའི་ངང་ནས་སངས་རྒྱས་ལ་ཆོས་ཉན་མཆོད་པ་འབུལ། བསྐལ་པ་གྲངས་མེད་པར་ཏིང་ངེ་འཛིན་གྱི་རྩལ་སྦྱངས་བས། མདོ་ལུགས་ཀྱི་ས་བཅུ་ལམ་ལྔ། སྔགས་ལུགས་ཀྱི་བཅུ་གསུམ་རྡོ་རྗེ་འཛིན་པའི་ས། རྫོགས་ཆེན་ལུགས་ཀྱི་བཅུ་དྲུག་ཡེ་ཤེས་བླ་མའི་ས་ཐོབ་སྟེ། མཐར་ནམ་ཞིག་ཚེ་འཕོས་མ་ཐག་ཏུ་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་དབྱེར་མེད་དུ་སངས་རྒྱས་པར་བཤད་དོ། །དེས་ན་ཁྲིད་འདི་ཐོབ་ནས་ཚིག་རྣམས་ཡིད་ལ་མི་ཟིན་ཀྱང་། དོན་གྱི་རྩ་བ་རྣམས་ཡིད་ལ་ལ་བཟུང་ནས་བརྩོན་འགྲུས་ཀྱིས་ཉམས་སུ་བླངས་ན་བདེ་བ་ཅན་དུ་སྐྱེ་བར་ཐེ་ཚོམ་མེད་དེ། མདོ་རྒྱུད་དང་ཨོ་རྒྱན་གྱི་གསུངས་ལ་དཔང་པོ་ཡིན་ཅིང་། བདག་རཱ་ག་ཨ་སྱས་ཁྲིད་ཡིག་

---

^{[མ་དཔེ་གཟིགས་ན་འདིར་གནོན།]}

འདི་བསྒྲིགས་ན་འགྲོ་དོན་འོང་ངམ་མི་འོངས་ཞེས། ཐུགས་རྗེ་ཆེན་པོ་ལ་གསོལ་བ་རྩེ་གཅིག་ཏུ་བཏབ། ཚོགས་དང་མཆོད་པ་མཎྜལ་བརྒྱ་རྩ་ཕུལ་ནས་བརྟགས་པ་བྱས་ནུབ། ཉམས་དང་རྨི་ལམ་གྱི་མཚམས་སུ་དུང་ཕྱུར་བདུན་བདེ་བ་ཅན་དུ་འགྲོ་ཟེར་ནས་ལུང་བསྟན་པའི་སྣང་བ་བྱུང་། འདི་ཉིད་བྲི་བའི་ཚེ་ཡང་ཆོས་བདག་ཡེ་ཤེས་ཀྱི་མཁའ་འགྲོ་མ་རྣམས་འདུ་ཞིང་། བྱིན་གྱིས་རླབས་པའི་རྨི་ལྟས་ཡང་མང་དུ་བྱུང་བས། ཁྱེད་ཁྲིད་ཕྲུག་རྣམས་ལ་ཡང་ཕན་ཐོགས་པའི་རྟེན་འབྲེལ་བཟང་པོ་ཡོད་དོ།། ༼༡༨༽ དེང་སང་མཆོག་དམན་སྐྱ་སེར་ཕལ་ཆེར་རྣམས། །ཕྱག་རྫོགས་ལམ་འབྲས་ཆོས་དྲུག་སྦྱོར་དྲུག་སོགས། །མིང་ཆེན་ཁྲིད་རིམ་མང་དུ་ཐོབ་པ་དང་། །གསར་རྙིང་དབང་ལུང་རྒྱ་མཚོ་ཙམ་ཐོབ་ཅིང་། །ཁྲིད་གཅིག་ལོ་གསུམ་བར་དུ་མི་རྫོགས་པའི། །ཁྲིད་ཆེན་ལན་གྲངས་དུ་མར་ཐོབ་རྣམས་ཀྱང་། །དེ་དག་ཐོབ་པའི་ཕན་ཡོན་ཙམ་ཞིག་ལས། །དམིགས་པའི་རྐང་གྲངས་ཙམ་ཡང་ཡིད་ལ་མེད། །ཉམས་ལེན་ཐུགས་རྗེ་ཆེན་པོའི་སྒོམ་བཟླས་དང་། །སེམས་ངོ་སྐྱོངས་པ་ཁོ་ནའི་སྟེང་དུ་འབབ། །ཐུགས་རྗེ་ཆེན་པོའི་དམར་ཁྲིད་རིགས་མང་ཡང་། །རྩ་ཚིག་ཙམ་ལས་རྒྱས་པར་བཤད་པ་མེད། །དེ་ཕྱིར་ཐུགས་རྗེ་ཆེན་པོའི་དམར་ཁྲིད་ལ། །ཁོག་ཕུབ་ཕྱག་རྫོགས་ཟུང་འཇུག་ཁྲིད་ཆེན་འདི། །ཁྲིད་དང་ཉམས་ལེན་ཐ་དད་མ་ཡིན་

---

^{[མ་དཔེ་གཟིགས་ན་འདིར་གནོན།]}

པར། །ཁྲིད་དོན་ཉམས་སུ་ལེན་པས་ཀུན་ལ་ཕན། །དེ་ཕྱིར་མཁས་འདོད་རང་འདོད་མ་ཡིན་ཏེ། །རང་གིས་སློབ་བུ་དམ་ཚིག་གཙང་བ་དང་། །ཐུགས་རྗེ་ཆེན་པོ་ཡི་དམ་ལྷར་བཟུང་ནས། །ཕྱག་རྫོགས་ཉམས་རྟོགས་ལེགས་པོ་ཡོད་པའི་ཕྱིར། །གཞན་ལ་བཤད་ཀྱང་རུང་བ་མ་མཆིས་ཀྱང་། །ཤེས་རབ་ཆུང་ཞིང་སློབ་གཉེར་མ་བྱས་པས། །བཤད་རྒྱུའི་ཚིག་གི་ལུང་འདྲེན་དཀོན་པར་མཆིས། །ལུང་འདྲེན་ཤེས་ཀྱང་སྐབས་སུ་གང་བབ་དང་། །ཆོས་ཐུན་མང་ཉུང་ཚོད་ཀྱང་ཟིན་དཀའ་བས། །གབ་སྦས་མེད་པར་བཀླག་པས་ཆོག་པ་འདི། །མཁས་བཙུན་མཐོན་པོ་སུས་ཀྱང་མི་གསན་ཏེ། །སྤྲང་པོ་བྱ་བྲལ་རྒན་འཁོག་མང་པོ་ལ། །གཏན་བདེའི་འདུན་མ་འགྲུབ་པར་འགྱུར་བསམ་བྲིས། །དེ་ལྟར་དམར་ཁྲིད་ཆོས་ཐུན་བཅོ་བརྒྱད་ཀྱི། །དོན་བསྡུས་རྩ་བ་གོ་བདེར་བཀོད་པ་འདི། །རིག་འཛིན་ཆེན་པོ་ཀརྨ་འདུལ་བ་ཡི། །གསུང་གིས་བསྐུལ་ཕྱིར་ལེགས་པར་བསྡུས་པ་ཡིན། །འདི་ལ་འགལ་འཁྲུལ་ཉེས་པ་མཆིས་ན་བཤགས། །དགེ་བས་འདི་ལ་འབྲེལ་བ་ཐོགས་ཚད་ཀུན། །ཚེ་འདིར་ཐུགས་རྗེ་ཆེན་པོ་འགྲུབ་གྱུར་ནས། །ཕྱི་མ་བདེ་ཆེན་ཞིང་ཁམས་བགྲོད་ནས་ཀྱང་། །ལུས་རྟེན་དེ་ལ་ས་བཅུ་ཐོབ་གྱུར་ཏེ། །སྤྲུལ་པས་ཕྱོགས་བཅུར་འགྲོ་བ་འདྲེན་པར་ཤོག །སརྦ་མངྒ་ལཾ། ཞལ་གྲོ།། །། ༈ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།