བག་རྩིས་ཁྲ་མོའི་དོན་བསྡུས་གསལ་བའི་མེ་ལོང་།
བག་རྩིས་ཁྲ་མོའི་དོན་བསྡུས་གསལ་བའི་མེ་ལོང་བཞུགས་སོ། །
ན་མོ་མཉྫའི་ཡེ། བག་རྩིས་ཁྲ་མོ་དོན་བསྡུས་ནས། །སྟག་སྤྲེལ་བྱ་ཡོས་ཁྱི་འབྲུག་དང་། །ཕག་སྦྲུལ་གྱི་རྟ་གླང་ལུག་རྣམས། བདུན་ཟུར་མི་མཐུན་དགྲ་གཤེད་ཡིན། །སྲོག་དང་རླུང་རྟ་གཉིས་པོ་ནི། །སྐྱེས་པ་བརྩི་བྱར་བྱས་ནས་ནི། །བུད་མེད་དེ་དང་འཐབ་པར་བྱ། ལུས་དང་དབང་ཐང་གཉིས་པོ་ནི། །བུད་མེད་བརྩི་བྱར་བྱས་ནས་ནི། །སྐྱེས་པ་དེ་དང་འཐབ་པར་བྱ། །དེ་དག་རྡེའུ་དཀར་བ་ན། །མི་མཐུན་ནང་ཡང་མཐུན་པར་བརྩི། །དེ་ནས་གི་གང་རྐྱང་པའི་རྩིས། །ནང་ལྟར་ཁུག་པ་བརྩི་བ་ནི། །སྐྱེས་སྨེ་མཐུན་དང་མི་མཐུན་ནི། །གཅིག་དཀར་དགུ་
དམར་གཉིས་མཐུན་སོགས། །རབ་འབྲིང་ཐ་མ་གསུམ་པོ་ལ། །རེ་རེ་ལའང་གསུམ་རེ་སྟེ། །ལིང་ཚེ་ནང་དུ་བལྟ་བར་བྱ། །སྐྱེས་པ་ལྔ་སེར་ཡིན་པ་ནི། །གཉིས་ནག་དག་དང་དོན་གཅིག་བརྩི། །བུད་མེད་ལྔ་སེར་ཡིན་ན་ནི། །བདུན་དམར་དག་དང་དོན་གཅིག་བརྩི། །གི་གང་སྨེ་བའི་རྩིས་ལ་ནི། །བུད་པ་ཅུང་ཞིག་རྒན་པ་དང་། །བུད་མེད་ཅུང་ཞིག་གཞོན་པར་ལེགས། །གསང་བ་ཡང་ཁུག་བརྩི་བ་ནི། །དང་པོ་སྐྱེས་པ་བརྩི་བྱར་བྱས། །བུད་མེད་སྲོག་ལུས་དབང་རླུང་བཞི། །རུས་ཁམས་དང་ནི་ལྔ་ཁར་འཐབ། །དེ་བཞིན་སྲོག་ལུས་དབང་ཐང་དང་། །
རླུང་རྟ་རུས་ཁམས་ལྔ་ཁ་ལ། །རིམ་བཞིན་འཐབ་པའི་རྡེལ་ཉེར་ལྔ། །དེ་ནས་བུད་མེད་བརྩི་བྱར་བྱས། །སྐྱེས་པ་དང་ནི་སྔོན་བཞིན་འཐབ། །དེ་ནས་ཁོ་རང་གཉིས་ཀ་ཡི། །སྲོག་ལུས་དབང་རླུང་བཞི་ཀ་ཡི། །སྨེ་བ་འགྲིགས་དང་མི་འགྲིགས་བལྟ། །རབ་ལ་བབས་ན་རྡེལ་དཀར་གཉིས། །འབྲིང་ལ་དཀར་ནག་གཉིས་རེ་བཞག །ཐ་མའི་ཐ་མ་རྡེལ་ནག་གཉིས་།ཐ་མའི་རབ་ལ་རྡེལ་ནག་གཅིག །སྨེ་བ་འགྲིགས་དང་མི་འགྲིག་གི །དཀར་ནག་གང་བཞག་རིགས་པས་དཔྱད། །དེ་ནས་སྲོག་ལུས་དབང་རླུང་སོགས། །བརྩིས་ལ་སྲོག་ལུས་ར་བ་བཞག །སྲོག་མཐུན་འགྲོགས་ཡུན་རིང་བ་ཡིན། །གཅིག་གི་སྐྲ་དཀར་གཅིག་གི་འཐུད། །གཅིག་གི་གཉེར་མ་གཅིག་གི་འདྲེན། །ཤིན་ཏུ་འགྲོགས་ཡུན་རིང་བ་ཡིན། །ལུས་མཐུན་བུ་ཚ་འཕེལ་བ་ཡིན། །ནད་དཀོན་ཚེ་ལ་བར་ཆད་མེད། །བུ་ཚ་དབང་པོ་སྐྱོན་མེད་ཡོང་། །དབང་ཐང་མཐུན་ན་ཟས་ནོར་འཕེལ། །ལོ་དང་ཕུགས་སུ་བྱར་མི་བརྟན། །ལག་པ་མི་ལ་མི་ལྡིང་ཞིང་། །ཟས་དང་ནོར་རྣམས་ཕུན་སུམ་ཚོགས། །རླུང་རྟ་མཐུན་ན་མི་ཁ་བྱམས། །ནོར་དང་རྟ་དང་བོང་བུ་འཕྲད། །ཕྱི་མི་ནང་མི་གཉིས་ཀས་
བྱམས། །ལྷག་པར་ཡ་རབས་གོང་མས་བྱམས། །རུས་ཆེན་གཉིས་པོ་མཐུན་པས་ན། །ཚེ་ཚད་རིང་ཐུང་མཉམ་པ་ནི། །ཤིན་ཏུ་འགྲོགས་ཡུན་རིང་བའོ། །སྲོག་མི་མཐུན་ན་འགྲོགས་ཡུན་ཐུང་། །ནད་མང་ཚེ་ཐུང་བྱར་མི་གཏུབ། །ལུས་ནི་མི་མཐུན་ནད་མང་ཞིང་། །བུ་ཚ་བྱར་མི་གཏུབ་པ་ལ། །བྱིས་པ་དབང་པོ་སྐྱོན་ཅན་འོང་། །དབང་ཐང་མི་མཐུན་ནོར་མི་ཆག །ཕྱི་ན་སྒྲོམ་གྱི་གསེར་ཡོད་ཀྱང་། །དགོས་དུས་ནང་དུ་ས་རྡོ་སོང་། །རླུང་རྟ་མི་མཐུན་མི་ཁ་ལྡང་། །སྟོར་རླག་ལྡང་ཞིང་མི་ཁ་མང་། །ལེགས་པོ་ངོས་ན་བྱས་གྱུར་ཀྱང་། །ངོ་སོ་གཞན་གྱིས་ཁྱེར་བ་འོང་། །རུས་ཆེན་གཉིས་པོ་མ་མཐུན་ན། །འབྱུང་བ་གང་ཕམ་ཕུགས་སུ་ངན། །དེ་ནས་སྨེ་བ་མཐུན་མི་མཐུན། །རབ་ཀྱི་རབ་ལ་བབ་པ་ན། །བུ་ཚ་མིང་སྲིང་བདུན་གྱིས་བསྐོར། །རབ་ཀྱི་འབྲིང་ལ་བབ་པ་ན། །ནད་དཀོན་ཚེ་ལ་བར་ཆད་མེད། །གདོན་བགེགས་མི་ཚུགས་བུ་ནོར་འཕེལ། །རབ་ཀྱི་ཐ་མར་བབ་པ་ན། །གོད་ཁ་མི་འོང་ཟ་ཐང་ཆེ། །བུ་ནི་འབྲིང་སྟེ་ཞིང་ལ་ཟོལ། །འབྲིང་གི་རབ་ཀྱང་དེ་དང་འདྲ། །འབྲིང་གི་འབྲིང་ལ་བབ་པ་ན། །ནོར་ལ་གང་སྟེ་བུ་རྒྱུད་འབྲིང་། །དེ་མན་
ཐོག་མཐའ་བར་གསུམ་དགེ །འབྲིང་གི་ཐ་མར་བབ་པ་ན། །འགྲོགས་ཡུན་རིང་སྟེ་ན་ནད་མང་། །ནོར་ཕྱུགས་མང་སྟེ་ཟས་མི་འགོས། །ཅི་ཡོད་བྱིན་ཀྱང་མི་མི་མགུ། །ཐ་མའི་རབ་ལ་བབ་པ་ན། །སྟོར་བརླག་གོད་ཁ་མང་བ་དང་། །ཆུང་ཞིག་ནད་མང་རྒྱུད་མི་སོས། །ཉེ་བ་དགྲར་ལྡང་སྲིད་མི་འཕེལ། །བསམ་པ་མི་འགྲུབ་ལོག་པར་འགྲོ། །ཐ་མའི་འབྲིང་ལ་བབ་པ་ན། །བཟའ་མི་མི་མཐུན་བྱེ་བྲལ་འོང་། །ལོ་ཏོག་མིས་ཟོས་མི་ཁ་ལྡང་། །བསགས་པའི་ནོར་རྣམས་གཞན་གྱིས་ཟ། །ཐ་མའི་ཐ་མར་བབ་པ་ན། །རང་དོན་གང་ཡོད་མི་ཡིས་འདེབས། །ལག་སྟོང་མཆན་བཅུག་དབང་ཐང་ཆུང་། །ཐ་མར་རབས་ཆད་ཁོང་སྟོང་ལུས། ༧ །གི་གང་སྨེ་བའི་བཤད་པ་ནི། །ཕོ་རྒན་མོ་གཞོན་འགྲིག་པ་ན། །འཕྲལ་ཕུག་གཉིས་བཟང་རྒས་དུས་སྐྱིད། །གོ་ལོག་བྱུང་ན་མོ་དབང་ཆེ། །ཕོ་རྒྱུད་མི་འཕེལ་མོ་རྒྱུད་འཕེལ། །དེ་ཙམ་བརྩི་བ་ཕྱག་ལེན་ཏེ། །རུས་ཆེན་སྐྱེས་ཟླ་བཙན་ཀླུ་དང་། །དར་རྒུད་བཟང་ངན་གང་ལ་སྐྱེས། །སྤྱན་གྲངས་རུས་མི་རུས་ཆེན་རྣམས། །བརྩི་བར་བཤད་ཀྱང་འགྲིགས་དཀའ་བས། །བརྩི་བའི་སྲོལ་ནི་མི་སྣང་ངོ་། ༧ །བག་ལམ་ཡོད་མེད་བརྩི་
བ་ནི། །རྒྱས་པར་བག་རྩིས་རིན་ཆེན་ཕྲེང་བ་ལྟར། །ཡིན་ཀྱང་དེ་དག་འགྲིགས་དཀའ་བས། །རྩིས་པ་རྣམས་ཀྱི་བརྩི་སྲོལ་ཆུང་། །བག་མ་རང་ལོ་སྟེང་དང་ནི། །གནམ་ལོ་བདུན་ཟུར་སྟེང་དུ་འཛེམ། །སྤར་ཁ་ལི་ཐོག་འགྲོ་བ་སྤང་། །ཁེན་ལ་སོང་ན་བག་མ་སྨྱོ། །དེ་གཉིས་ཤིན་ཏུ་འཛེམ་སྲོལ་ཆེ། །མག་པ་དྭ་དང་བག་མ་ཟིན། །དེ་ལ་མག་པ་གྲི་ཁར་འཆི། །མག་པ་གིན་དང་བག་མ་ཁོན། །བཤའ་གྲི་བརྡར་མི་གོད་ཁ་ཆེ། །བག་མའི་སྐྱེས་སྨེ་འཕུར་བྱས་ལ། །གཉིས་ནག་བདུན་དམར་སྟེང་ཕྱིན་ཚེ། །བག་མ་ཕྱིན་ན་ཤིན་ཏུ་ངན། །རང་ལོ་རང་ཟླའི་སྟེང་མི་འགྲོ། །མག་པ་ལི་ཐོག་ཡོད་དུས་འཛེམས། །མག་པའི་ཕ་མ་སྤུན་ཟླ་སོགས། །ལི་ཐོག་ཡོད་པ་དེ་ཉིད་གཡོལ། །ཇ་ཆང་མ་མཆོད་བར་དུ་ནི། །བག་མ་ལ་ནི་བལྟ་མི་རུང་། །བག་མ་རང་གི་ཟླ་བ་དང་། །ཉི་མ་ལ་ཡང་འཛེམས་པ་ཡིན། །སྐར་སྐྱོན་ལ་ཡང་འཛེམས་པ་དང་། །སྐྲ་བཀྲུ་ཉིན་ཡང་སྐར་འཇམ་སྤྱད། །སྨིན་དྲུག་བྲ་ཉེ་ཤིན་ཏུ་འཛེམ། །བཟང་དྲག་གཡང་སྐར་འགྲུབ་སྦྱོར་མིན། །ངན་དྲག་སྐར་ངན་སྐར་སྐྱོན་མེད། །ཞག་གི་གནམ་ཁྱི་གཙོ་ཆེ་སྟེ། །ལྟོ་བ་ལ་སོགས་བཟང་པོ་
སྤྲད། །དུས་ཚོད་མག་པ་བག་མ་ཡི། །དུས་ཚོད་མིན་པ་གཅིག་ལ་གཉེར། །ཕྱོགས་མི་ཕྱོགས་ཀྱི་ གཙང 
་ས་སྟེ། །ཧལ་ཁྱི་ཐེ་ཁྱིམ་ཤིན་ཏུ་འཛེམ། །ཟླ་བའི་གནམ་ཁྱི་གཙོ་ཆེ་སྟེ། །ལྟོ་བ་ལ་སོགས་བཟང་པོ་སྤྲད། །བག་མའི་སྐྱེས་སྨེ་དགུ་དམར་དང་། །འཕུར་སྨེ་དགུ་དམར་ལ་བབ་ན། །གཡང་ནི་རྗེས་སུ་འགྲོ་བཤད་པས། །གཡང་སྐྱབས་གཡང་ལེན་གཟབ་པར་བྱ། །གནམ་ལོ་བག་མའི་བདུན་ཟུར་རམ། །ཟླ་བའི་བདུན་ཟུར་སྟེང་འགྲོ་ན། །སྣ་འདྲེ་ཆེ་བས་སྣ་ཁྲུས་གཟབ། །ཁྱིམ་བསང་བཏང་སྟེ་སྒོར་འདུག་དུས། །བག་མ་ཁ་ཡི་གྱུ་ཕྱོགས་ནི། །ཕྱོགས་ནི་
གཙང ་སར་རྒྱུ་བའམ། །སྣ་སའི་ཁྱིམ་དུ་ཕྱིན་པའི་ཚེ། །སྒོ་རྒྱབ་ཏུ་ནི་གནམ་མཐོང་དང་། །རྩིག་རྩ་ཀ་བའི་རྩ་བ་ནི། །ཐབ་ཀའི་རྩ་རུ་བཞག་མི་རུང་། །སྟན་ནི་སྲོག་གི་མདོག་དག་ཏུ། །བག་མའི་སྲོག་ནི་རྒུད་པ་ན། །གདན་སྟེང་རྡོ་རྗེ་རྒྱ་གྲམ་བྲི། །ལུས་རྒུད་འཁོར་ལོ་རྩིབས་བརྒྱད་བྲི། །དབང་ཐང་ངན་དང་སྤར་ཁ་རྩུབ། །གཡུང་དྲུང་གཡས་འཁྱིལ་བྲི་བར་བྱ། །སྨེ་བ་རྩུབ་བམ་ངན་པ་ན། །སྨེ་བའི་ཕོ་བྲང་གླིང་དགུ་བྲི། །རླུང་རྟ་རྒུད་ཅིང་ངན་པ་ན། །པདྨ་འདབ་བརྒྱད་བྲི་བར་བྱ། །དེ་
རྣམས་ནས་འབྲུའི་བཏོད་ནས་བྲི། །དེ་སྟེང་བག་མ་བཞག་པར་བྱ། །ཁ་ནི་ཀུན་གྱིས་མ་ཕྱོགས་རྒྱུ། །དེ་རྣམས་རྩིས་མཁན་མཁས་རྣམས་ཀྱི། །བརྩི་སྲོལ་ཕྱག་ལེན་གཞུང་མ་ཡིན། །ཞིབ་པར་བྱུར་སྟག་ཉི་ཤུ་སོགས། །ཤིན་ཏུ་བརྩི་རྒྱུ་མང་དྲག་པས། །རྩིས་ན་འགྲིགས་པའི་དུས་མི་ཡོང་། །ཕྲན་ཚེག་སྐག་ཕྲན་སྤྱི་བཅོས་ནི། །སྣ་ས་ཕ་མེས་གཉིས་ཀ་ཡི། །བསང་དང་གཏོར་མ་བཏང་བ་དང་། །མཚན་བརྗོད་རྣམ་འཇོམས་ཟབ་མདོ་འདོན། །གཡང་སྐྱབས་རང་རང་ཕུག་ལྷ་མཆོད། །སྣ་སེལ་གླང་ཆེན་སྣ་བསྒྱུར་བྱ། །རྣམ་འཇོམས་སྨེ་བརྩེགས་གཟུངས་ཆུས་བཀྲུ། །གཉེ་བོ་མཐུན་གསུམ་ལོ་པས་བྱ། །སྣ་ཁྲིད་བག་མ་དེ་ཉིད་ཀྱི། །སྲོག་གི་མའམ་གྲོགས་ཀྱིས་བྱ། །རྟ་ཁ་ཁྲིད་མཁན་བག་མ་ཡི། །ཀུན་གྱི་མ་ནི་ཡིན་པས་བྱ། །རྟ་ནི་ལུས་ཀྱི་འབྱུང་བའི་མདོག །ཡང་ན་རླུང་རྟའི་སྤུ་མདོག་བྱ། །སྣ་ཁྲུས་པ་ལ་བག་མ་ཡི། །རླུང་རྟའི་དགྲ་ཡི་རླུང་རྟ་ཅན། །བག་མའི་དབང་ཐང་དེ་རྣམས་ཀྱི། །མ་རུངས་གྱུར་པའི་དབང་ཐང་ཅན། །དེ་ཡི་ཕྱེ་མར་བཞག་པར་བྱ། །སྣ་མི་བདུན་ཟུར་ལོ་པས་འབུད། །དེ་ཙམ་ལག་ལེན་ཀུན་གྱི་ལུགས། །རྒྱས་པར་ཁྲ་མོ་གླིང་
དགུ་དང་། །བག་རྩིས་རིན་ཆེན་ཕྲེང་བར་ལྟོས། །དེ་དག་ཐམས་ཅད་འགྲིགས་དཀའ་བས། །བཤོལ་ནི་དགོས་པ་མ་ཡིན་ཏེ། །སོ་སོའི་བཅོས་ཀ་བྱས་ལ་བརྫ་ང་། །ཤིན་ཏུ་གལ་ཆེན་གནམ་ཁྱི་བརྩི། །ཟླ་བ་ཕོ་དྲུག་ཤར་བའི་ཚེ། །ཚེས་གཅིག་མཆུ་ལ་ཚེས་གཉིས་སྣ། །དེ་ཡི་གཡས་སུ་བསྐོར་ལ་བརྩི། །ཟླ་བ་མོ་དྲུག་ཤར་བའི་ཚེ། །ཚེས་གཅིག་མཇུག་མ་ཚེས་གཉིས་རྒྱབ། །དེ་ཡི་གཡོན་དུ་བསྐོར་ལ་བརྩི། །བརྩི་ཚུལ་ལིང་ཚེ་ཉིད་དུ་བརྩི། །མཆུ་ལ་སོང་ན་ཁ་མཆུ་འོང་། །སྣ་ལ་སོང་ན་སྤུ་གྲི་ཐོགས། །མིག་ལ་མིག་འདྲའི་བུ་གཉིས་སྐྱེ། །རྣ་བ་བུ་གཉིས་རྣ་ཅོ་འདྲ། །ལྟག་པ་ལ་ནི་གཉའ་བ་བཅིང་། །རྒྱབ་ན་མི་རུང་རྒྱས་ནས་ངན། །མཇུག་མ་ལ་ནི་བུ་མོ་དགུ། །རྐང་པ་ལྕགས་ཀྱུ་བཤལ་བའི་ཕྱིར། །ཕ་མིང་ནོར་ལ་ངན་པ་ཡིན། །ལྟ་བའམ་ལྟེ་བར་མངལ་ཅིག་གམ། །བུ་རྒྱུད་དཀོན་ཀྱང་ཉེས་སྐྱོན་མེད། །ལྟོ་བ་ལག་པ་བུ་མང་བཟང་། །ཐང་དཀར་རྨོ་ཀྱང་རུང་བ་ཙམ། །དེ་ནི་ཞག་གི་གནམ་ཁྱི་སྟེ། །ཟླ་བའི་གནམ་ཁྱི་འགྲོ་ཕྱོགས་བརྩི། །གནམ་ཁྱི་ཁར་སོང་རབས་ཆད་ཅིང་། །གཉའ་བར་སོང་ན་རྣ་བ་བཅིང་། །རྒྱབ་ཏུ་སོང་ན་ཚེ་ཐུང་ལ། །སྤྱི་མགོར་སོང་ན་
ནོར་ལ་ངན། །རྔ་མར་སོང་ན་སྲིད་རྒྱུད་ཆད། །རྐང་པར་སོང་ན་དབུལ་པོར་འགྱུར། །ལྟོ་བར་སོང་ན་དཔལ་ཆེ་བཟང་། །ལག་པར་སོང་ན་མི་བདག་འཆི། །དེ་ནས་དུས་ཚོད་གནམ་ཁྱི་ནི། །ཕོ་དྲུག་མཆུ་ནས་གཡས་སྐོར་ལ། །མོ་དྲུག་མཇུག་མ་ནས་གཡོན་སྐོར། །བརྩི་ཚུལ་ལིང་ཚེ་ནང་བཞིན་ཏེ། །བཟང་ངན་ཞག་གི་གནམ་ཁྱི་མཚུངས། །ཞག་དང་ཟླ་བའི་གནམ་ཁྱི་གཉིས། །གལ་ཆེན་གནམ་ཁྱི་བརྩི་སྲོལ་ཆེ། །དུས་ཚོད་གནམ་ཁྱི་རྩི་བསྲོལ་ཆུང་། །མདོར་ན་བག་མའི་ཕྱོགས་སྐོར་ལ། །གནམ་ཁྱི་ཁོ་ན་གཙོ་ཆེ་ཞེས། །རྒྱ་ནག་རྩིས་གཞུང་འཛིན་མཁན་གྱི། །རྩིས་པ་ཐམས་ཅད་མགྲིན་གཅིག་གོ །མདོར་ན་ལོ་ཁམས་མཐུན་མི་མཐུན། །བག་ལམ་ཡོད་མེད་བག་ལམ་སོགས། །ཤིན་ཏུ་བརྩི་རྒྱུ་མང་བའི་ཕྱིར། །ཐམས་ཅད་འགྲིགས་ཤིང་ལེགས་པ་ནི། །འཁོར་ལོས་སྒྱུར་བའི་རྒྱལ་པོ་སོགས། །བསོད་ནམས་ཅན་ལ་ཨི་སྲིད་ཙམ། །གཞན་ལ་དེ་འདྲ་མི་སྲིད་ཅིང་། །འདི་ག་ཙམ་ཞིག་བརྩི་བ་ལས། །ཞིབ་རྒྱས་བརྩི་སྲོལ་མི་སྣང་ངོ་། །དབོན་པོ་བསོད་ནམས་རྒྱལ་མཚན་གྱིས། །བསྐུལ་ཕྱིར་རཱ་ག་ཨ་སྱ་ཡིས། །འཕྲལ་དུ་ཆེ་ལོང་མདོར་
བསྡུས་ཙམ། །ངག་ནས་བརྗོད་པ་ཇི་བཞིན་དུ། །དགེ་སློང་ཨོ་རྒྱན་ཐབས་མཁས་ཀྱིས། །མགྱོགས་པར་བྲིས་པའི་དགེ་བ་དེས། །འགྲོ་བ་བདེ་སྐྱིད་འབྱུང་གྱུར་ཅིག །སརྦ་མངྒ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།