སུམ་ཅུ་སོ་བདུན་པ། དེ་བཞིན་གཤེགས་པའི་ལེའུམན་ཆད།
འདུལ་བ་གཞི། བམ་པོ་ལྔ་བཅུ་ལྔ་པ། ཐུན་མོང་མ་ཡིན་པ་གང་ཞེ་ན། དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་དུ་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ་འབྱོར་པ་དང་ཞེས་རྒྱས་པར་བྱ་སྟེ། དེའི་ཚེ་སྨད་འཚོང་མ་བཟང་མོ་ཞེས་བྱ་བ་དང༌། སྐྱེས་བུ་གཡོན་ཅན་པད་མའི་རྩ་ལག་ཅེས་བྱ་བ་ཞིག་གནས་སོ། །དེས་དེ་ལ་དགའ་མགུར་སྤྱད་པའི་ཕྱིར་གོས་དང༌། རྒྱན་རྣམས་བསྐུར་བ་དང༌། དེས་གོས་དང་རྒྱན་རྣམས་བགོས་ནས་སོང་བ་ལས། སྐྱེས་པ་གཞན་ཞིག་ཀྱང་དོང་ཚེ་ལྔ་བརྒྱ་ཐོགས་ཏེ་འོངས་ནས། བཟང་མོ་དགའ་མགུར་སྤྱད་ཀྱིས་ཚུར་ཤོག་ཅེས་སྨྲས་སོ། །དེས་བསམས་པ། གལ་ཏེ་སོང་ན་ནི་དོང་ཚེ་ལྔ་བརྒྱ་ཡང་མི་འཐོབ་ལ། ཁྱིམ་དུ་འོངས་པ་བོར་ཏེ་གཞན་དུ་འགྲོ་བ་འདི་ནི་གསོལ་ཀ་མི་ཡང་བར་ཡང་འགྱུར་རོ་སྙམ་ནས། དེས་བུ་མོ་མངག་གཞུག་མ་ལ་སྨྲས་པ། སོང་ལ་པད་མའི་རྩ་ལག་ལ་ཇོ་བོ་རེ་ཞིག་
བདག་གིས་སྟ་གོ་མ་བགྱིས་ཀྱིས་སླད་ཀྱིས་མཆིའོ་ཞེས་ཟེར་རོ་ཞེས་སྨྲོས་ཤིག །དེ་དེའི་གན་དུ་སོང་ནས་སྨྲས་སོ། །སྐྱེས་པ་དེ་ཡང་བྱ་བ་མང་པོ་ཞིག་པས་དགའ་མགུར་སྤྱད་ནས་སྲོད་ཉིད་ལ་ཕྱིར་སོང་ངོ༌། །དེས་བསམས་པ། ཐུན་མོང་དུ་ཡོད་པས་བདག་གིས་དེའི་སེམས་ཀྱང་བསྲུང་ནུས་སོ་སྙམ་ནས། དེས་ཡང་བུ་མོ་དེ་ལ་སྨྲས་པ། སོང་ལ་པད་མའི་རྩ་ལག་ལ་ཇོ་བོ་སྟ་གོན་བགྱིས་ལགས་ན། སྐྱེད་མོས་ཚལ་གང་དུ་མཆི་ཤིག་ཅེས་མཆིའོ་ཞེས་སྨྲོས་ཤིག །དེས་དེའི་དྲུང་དུ་སོང་ནས་སྨྲས་པ་དང༌། དེས་སྨྲས་པ། ཁྱོད་ཀྱི་ཇོ་མོ་སྐད་ཅིག་གིས་ནི་སྟ་གོན་བྱས། སྐད་ཅིག་གིས་ནི་སྟ་གོན་མ་བྱས། བུ་མོ་དེ་ཡང་དེ་དང་རིགས་མི་འཕྲོད་པ་ཞིག་པས་དེས་སྨྲས་པ། རྗེའི་སྲས་ངེས་སྟ་གོན་མ་བགྱིས་ཏེ། འོན་ཀྱང་ཁྱོད་ཀྱི་གོས་དང་རྒྱན་རྣམས་ཀྱིས་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ། །དེ་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་དང་ནི་བྲལ། གནོད་སེམས་ཀྱིས་ཀུན་ནས་དཀྲིས་པ་ནི་སྐྱེས་པར་གྱུར་ཏེ། དེ་མི་བཟོད་པ་སྐྱེས་ནས་སྨྲས་པ། བུ་མོ་བཟང་མོའི་དྲུང་དུ་སོང་ལ། པད་མའི་རྩ་ལག་ན་རེ་སྐྱེད་མོས་ཚལ་ག་གེ་མོ་ཞིག་ཏུ་ཤོག་ཤིག་ཅེས་ཟེར་རོ་ཞེས་སྨྲོས་ཤིག །དེས་སོང་ནས་བཟང་མོ་ལ་སྨྲས་པ་དང༌། དེ་ནས་དེ་སྐྱེད་མོས་ཚལ་དེར་སོང་བ་དང༌། སྐྱེས་བུ་གཡོན་ཅན་པད་མའི་རྩ་ལག་གིས་སྨྲས་པ། ཁྱོད་ཁོ་བོའི་གོས་དང་རྒྱན་གྱིས་གཞན་དང་ལྷན་ཅིག་དགའ་མགུར་ཡོངས་སུ་སྤྱད་པ་ཇི་ག་རིགས་སམ་དེས་སྨྲས་པ། རྗེའི་སྲས་འདི་ནི་བདག་གིས་ནོངས་ལགས་ཏེ། འོན་ཀྱང་བུད་མེད་ནི་
རྟག་པར་སྐྱོན་ཅན་ལགས་ཀྱིས་བཟོད་པ་མཛོད་ཅིག །དེ་ནས་དེས་མི་བཟོད་པ་སྐྱེས་ནས། རལ་གྲི་ཤུབས་ནས་ཕྱུང་སྟེ་སྲོག་དང་ཕྲལ་ལོ། །དེ་ནས་བུ་མོ་དེས་ཇོ་མོ་བསད་དོ་ཇོ་མོ་བསད་དོ་ཞེས་ཀུ་ཅོའི་སྒྲ་ཆེན་པོ་བཏོན་པ་དེ་སྐྱེ་བོའི་ཚོགས་ཆེན་པོས་ཐོས་ནས་བརྒྱུགས་སོ། །དེ་ཙམ་ན་སྐྱེད་མོས་ཚལ་དེ་ན་རང་སངས་རྒྱས་ལེགས་སྨོན་ཞེས་བྱ་བ་བསམ་གཏན་བྱེད་དོ། །དེ་ནས་སྐྱེས་བུ་གཡོན་ཅན་པད་མའི་རྩ་ལག་དེ་སྐྲག་པས་རལ་གྲི་ཁྲག་ཅན་རང་སངས་རྒྱས་ལེགས་སྨོན་གྱི་མདུན་དུ་བོར་ནས་སྐྱེ་བོའི་ཚོགས་ཆེན་པོ་དེ་ཉིད་ཀྱི་ནང་དུ་ཞུགས་སོ། །སྐྱེ་བོའི་ཚོགས་ཆེན་པོས་རལ་གྲི་ཁྲག་ཅན་མཐོང་ནས་རབ་ཏུ་བྱུང་བ་འདིས་ནི་བཟང་མོའི་སྲོག་དང་ཕྲལ་ལོ་ཞེས་དེ་ནས་རང་སངས་རྒྱས་དེ་ཀུན་ནས་བསྐོར་ནས་མི་བཟོད་པ་བསྐྱེད་དེ་སྨྲས་པ། ཀྱེ་རབ་ཏུ་བྱུང་བ་དྲང་སྲོང་གི་རྒྱལ་མཚན་བསྲེལ་ནས་འདི་འདྲ་བའི་ལས་བྱེད་དམ། དེས་སྨྲས་པ་ཅི་ཞིག་བྱས། དེ་རྣམས་ཀྱིས་སྨྲས་པ། ཁྱོད་ཀྱིས་བཟང་མོ་དང་ལྷན་ཅིག་དགའ་མགུར་སྤྱད་ནས་དེ་སྲོག་དང་ཕྲལ་ལོ། །དེས་སྨྲས་པ། རྣས་མི་བཟོད་པ་དེ་ང་ནི་ལས་འདི་མི་བྱེད་དོ། །དེས་རྣས་མི་བཟོད་པའི་ཚིག་སྨྲས་ཀྱང༌། སྐྱེ་བོའི་ཚོགས་ཆེན་པོ་དེས་ལག་པ་ཕྱིང་ཀེ་ལོག་ཏུ་དམ་དུ་བཅིངས་ནས་རྒྱལ་པོ་ལ་ཕུལ་ཏེ། ལྷ་རབ་ཏུ་བྱུང་བ་འདིས་བཟང་མོ་དང་ལྷན་ཅིག་དགའ་མགུར་སྤྱད་ནས་དེས་སྲོག་དང་ཕྲལ་ལགས་སོ། །རྒྱལ་པོ་དག་ནི་མི་རྟོག་པ་ཡིན་པས་དེས་སྨྲས་པ། གལ་ཏེ་དེ་ལྟ་ན་རབ་ཏུ་བྱུང་བ་འདི་ངས་སྤངས་ཀྱིས་དེང་ལ་སོད་ཅིག །དེ་ནས་དེའི་མགུལ་པར་མེ་ཏོག་ཀ་ར་བཱི་རའི་ཕྲེང་བས་བཏགས་ནས་གཤེད་མ་གོས་སྔོན་པོ་གྱོན་པ་མཚོན་ཐོགས་པ་རྣམས་ཀྱིས་ཡོངས་སུ་བསྐོར་ནས་ལམ་བོ་ཆེ་དང༌། ཚོས་དུས་དང༌། བཞི་མདོ་དང༌། སུམ་མདོ་རྣམས་སུ་བསྒྲགས་ཏེ། གྲོང་ཁྱེར་ནས་སྐྱེད་མོས་ཚལ་ལོགས་སུ་ཁྲིད་དོ། །དེ་ནས་སྐྱེས་བུ་གཡོན་ཅན་པད་མའི་རྩ་ལག་གི་བློ་སྐྱེས་པ་རབ་ཏུ་བྱུང་བ་དཀའ་ཐུབ་ཅན་སྐྱོན་མེད་པ་ཉེས་པ་མི་བྱེད་པ་
འདི་ལ་ཡང་དག་པ་མ་ཡིན་པས་སྐུར་པ་བཏབ་པས་ད་འདི་གསད་པ་ལ་ཐུག་ན། བདག་གིས་འདི་ཡལ་བར་དོར་བ་ནི་བདག་གི་ཆ་མ་ཡིན་ནོ་སྙམ་དུ་བསམས་ནས་སླར་ལོག་སྟེ། རྒྱལ་པོའི་དྲུང་དུ་སོང་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་རབ་ཏུ་བྱུང་བ་འདིས་ནི་ལས་འདི་མ་བགྱིས་ཏེ། སྡིག་པའི་ལས་འདི་ནི་བདག་གིས་བགྱིས་ཀྱིས་རབ་ཏུ་བྱུང་བ་འདི་གཏང་བར་གསོལ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྐྱེས་བུ་གཡོན་ཅན་པད་མའི་རྩ་ལག་གང་ཡིན་པ་དེ་ནི་ང་ཉིད་ཡིན་ཏེ། ངས་རང་སངས་རྒྱས་ལ་ཡང་དག་པར་མ་ཡིན་པས་སྐུར་པ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ང་ལོ་མང་པོ་དང་ཞེས་བྱ་བ་ནས། སེམས་ཅན་དམྱལ་བ་རྣམས་སུ་བཙོས་སོ་ཞེས་བྱ་བའི་བར་གོང་མ་བཞིན་དུའོ། །ལས་ཀྱི་ལྷག་མ་དེ་ཁོ་ནས་ད་ལྟར་ང་མངོན་པར་རྫོགས་པར་བྱང་ཆུབ་པ་ན་ཡང་བྲམ་ཟེའི་བུ་མོ་རྩྭ་མིས་ཡང་དག་པ་མ་ཡིན་པས་སྐུར་པ་བཏབ་སྟེ། འདི་ནི་ཐུན་མོང་མ་ཡིན་པའོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་ཡུལ་དགྲ་མཐར་དགེ་སློང་གཉིས་ཀྱིས་ལྔ་བརྒྱར་མ་ཚང་བའི་དགེ་སློང་རྣམས་དང་ཐབས་ཅིག་ནས་རུལ་གསོལ་པ། ཚེ་དང་ལྡན་པ་ཤཱ་རིའི་བུ་དང༌། མཽད་གལ་གྱི་བུ་གཉིས་ནི་ལྷའི་ཞལ་ཟས་ལ་ལོངས་སྤྱོད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་རྣམས་བྱས་ཤིང་བསགས་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་འཇིག་རྟེན་དུ་སྟོན་པ་རྣམ་པར་གཟིགས་ཞེས་བྱ་བ་ཞིག་བྱུང་ནས་ཞེས་བྱ་བ་ནས། སངས་རྒྱས་བཅོམ་ལྡན་འདས་ཞེས་བྱ་བའི་བར་གོང་མ་བཞིན་དུའོ། །དེ་འཁོར་དྲུག་ཁྲི་དང་ལྗོངས་རྒྱུ་ཞིང་གཤེགས་པ་ན། རྒྱལ་པོའི་ཕོ་བྲང་
བཤེས་ལྡན་དུ་བྱོན་ཏོ། །བཤེས་ལྡན་དེའི་བྲམ་ཟེ་ཞིག་བྲམ་ཟེའི་ཁྱེའུ་ལྔ་བརྒྱ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ །དེས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་འཁོར་ལྔ་བརྒྱ་དང་མཐོང་ནས། དེས་བྲམ་ཟེའི་ཁྱེའུ་རྣམས་ལ་སྨྲས་པ། ཤེས་ལྡན་དག་དགེ་སྦྱོང་མགོ་རེག་འདི་དག་ལྷའི་ཞལ་ཟས་ལ་ལོངས་སྤྱད་པའི་འོས་མ་ཡིན་གྱི། ནས་རུལ་པ་ཟ་བའི་འོས་ཡིན་ནོ། །དེ་རྣམས་ཀྱིས་ཀྱང་རྗེས་སུ་ཡི་རང་བ་བྱས་ཏེ། མཁན་པོ་དེ་མད་དེ། དགེ་སྦྱོང་མགོ་རེག་འདི་དག་ནི་ལྷའི་ཞལ་ཟས་ལ་ལོངས་སྤྱད་པའི་འོས་མ་ལགས་ཀྱི་ནས་རུལ་པ་འཚལ་བའི་འོས་ལགས་སོ། །དེ་ན་ཡང་བྲམ་ཟེའི་ཁྱེའུ་དཀར་པོ་ཅན་གཉིས་ཤིག་གིས་སྨྲས་པ། མཁན་པོས་ནི་མ་ལེགས་པ་ཞིག་གསུངས་ཏེ། བདག་ཉིད་ཆེན་པོ་འདི་དག་ནི་ལྷའི་ཞལ་ཟས་ལ་ལོངས་སྤྱོད་པའི་འོས་ལགས་སོ། །དགེ་སློང་དག་ཇི་སྙམ་དུ་སེམས།དེའི་ཚེ་དེའི་དུས་ཀྱི་བྲམ་ཟེ་ལྔ་བརྒྱ་ཅན་གང་ཡིན་པ་དེ་ནི་ང་ཉིད་ཡིན་ཏེ། ངས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཉན་ཐོས་ཀྱི་དགེ་འདུན་དང་བཅས་པ་ལ་ངག་གི་ལས་རྩུབ་མོ་ཕྱུང་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་ང་ལོ་མང་པོ་དང༌། ལོ་བརྒྱ་ཕྲག་མང་པོ་དང༌། ལོ་སྟོང་ཕྲག་མང་པོ་དང༌། ལོ་བརྒྱ་སྟོང་ཕྲག་མང་པོར་ནས་རུལ་པ་ཟོས་སོ། །ལས་ཀྱི་ལྷག་མ་དེ་ཁོ་ནས་ད་ལྟར་མངོན་པར་རྫོགས་པར་བྱང་ཆུབ་པ་ན་ཡང་དགྲ་མཐར་དགེ་སློང་གཉིས་ཀྱིས་ལྔ་བརྒྱར་མ་ཚང་བའི་དགེ་སློང་རྣམས་དང་ཐབས་ཅིག་ནས་རུལ་པ་ལ་ལོངས་སྤྱད་དོ། །བྲམ་ཟེའི་ཁྱེའུ་གཉིས་པོ་གང་ཡིན་པ་དེ་ནི་དགེ་སློང་ཤཱ་རིའི་བུ་དང༌། མཽད་གལ་གྱི་བུ་འདི་དག་ཉིད་ཡིན་ནོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག མཛད་ན་ཕྲིན་ལས་དེའི་རྣམ་པར་སྨིན་པས་ལོ་དྲུག་ཏུ་དཀའ་བ་སྤྱད་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་རྣམས་བྱས་ཤིང་བསགས་པ་དག་ནི་ཞེས་བྱ་བ་ནས།
འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་ལྗོངས་ཀྱི་གྲོང་རྡལ་བཻ་བྷི་ཊིང་གི་ཞེས་བྱ་བ་འབྱོར་པ་དང་རྒྱས་པ། བདེ་བ་དང༌། ལོ་ལེགས་པ། སྐྱེ་བོ་དང༌། མི་མང་པོས་རབ་ཏུ་གང་བ་ཞིག་ཡོད་དེ། དགེ་སློང་དག་ལྗོངས་ཀྱི་གྲོང་རྡལ་བཻ་བྷི་ཊིང་གི་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དང་བ། ཆོས་དང་དགེ་འདུན་ལ་མངོན་པར་དད་པ། སངས་རྒྱས་ལ་སྐྱབས་སུ་སོང་བ། ཆོས་དང་དགེ་འདུན་ལ་སྐྱབས་སུ་སོང་བ། སངས་རྒྱས་ལ་གཅིག་ཏུ་བྱེད་པ། ཆོས་དང་དགེ་འདུན་ལ་གཅིག་ཏུ་བྱེད་པ། སངས་རྒྱས་ལ་ཡིད་གཉིས་དང་ཐེ་ཚོམ་མེད་པ། ཆོས་དང་དགེ་འདུན་ལ་ཡིད་གཉིས་དང་ཐེ་ཚོམ་མེད་པ། སྡུག་བསྔལ་དང་ཀུན་འབྱུང་དང༌། འགོག་པ་དང༌། ལམ་ལ་ཡིད་གཉིས་དང་ཐེ་ཚོམ་མེད་པ། བདེན་པ་མཐོང་བ། འབྲས་བུ་ཐོབ་པ། ལོ་མ་དང༌། གཏུན་སྤངས་པ་ཞིག་བྱུང་སྟེ། དེ་གང་ན་ཆུས་བརྐོས་པའམ། བྱི་བྲུན་མ་གཏོགས་པ་རང་གི་ལག་གིས་ས་མི་རྐོ་ཞིང་རྐོར་མི་འཇུག་གོ །དེ་ནས་རང་གིས་ས་བླངས་ནས་སྲོག་ཆགས་མེད་པའི་ཆུས་སྤྲུས་ཏེ་སྣོང་རྣམས་བྱས་ནས་མཐའ་གཅིག་ཏུ་བཞག་སྟེ། འདི་སྐད་ཅེས་འཕགས་པའམ། བཞིན་བཟངས་དག་འདིར་ཏིལ་ལམ། འབྲས་སམ། སྲན་མུད་ག་ཚལ་ཚོལ་དག་མཐའ་གཅིག་ཏུ་ཞོག་ལ། ཁྱེད་ཅག་ལས་གང་ཞིག་སྣོད་གང་དགོས་པ་དེ་དེ་ལོང་ལ་དེང་ཤིག་ཅེས་སྨྲས་ནས། དེ་ནས་ཕ་མ་ལོང་བ་གཉིས་གསོ་ཞིང་དུས་དུས་སུ་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསོད་སྙོམས་འབུལ་ལོ། །བྲམ་ཟེའི་ཁྱེའུ་བླ་མའི་གྲོགས་པོ་དང༌། སྙིང་དུ་སྡུག་པ་དང༌། ནེའུ་ཟླ་ཡང་ཡིན་ནོ། །དགེ་སློང་དག་ལྗོངས་ཀྱི་གྲོང་ཁྱེར་བཻ་བྷི་ཊིང་གི་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་བྱུང་སྟེ། བཻ་བྷི་ཊིང་གི་རྒྱས་པ། འདུ་ཐང་དང་བཅས་རྩྭ་ཤིང་དང་འབབ་ཆུར་བཅས་པ། རྒྱལ་
པོ་ཀྲི་ཀིས་བྲམ་ཟེའི་སྦྱིན་པར་བྱིན་པ་ལ་ཡོངས་སུ་ལོངས་སྤྱོད་དོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷའི་སློབ་མ་བྲམ་ཟེའི་ཁྱེའུ་བླ་མ་ཞེས་བྱ་བ་ཕ་དང་མའི་རིགས་དང་ལྡན་པ། མོ་ཕྱོགས་ནས་དག་པ། མེས་པོའི་ཕྱོགས་དང༌། ཕྱི་མོའི་ཕྱོགས་ཟུང་བདུན་རྒྱུད་ཀྱི་བར་གྱིས་བཟུང་སྟེ། རིགས་ལ་གཏམ་གྱིས་མ་ཕོག་པ། ཀློག་ཏུ་འཇུག་པ། གསང་ཚིག་འཛིན་པ། རིག་བྱེད་གསུམ་པོ་སྒྲ་ངེས་པར་སྦྱར་བ་དང༌། ཤེས་གསལ་དང་བཅས་པའི་ཡི་གེ་རབ་ཏུ་འབྱེད་པ་དང་བཅས་པ་དང༌། ལྔ་པ་དེ་ལྟ་བུ་བྱུང་བ་ཅན་རྣམས་ཀྱིས་ཕ་རོལ་ཏུ་ཕྱིན་ཅིང་ལུང་སྟོན་པར་བྱེད་པ། གཟུགས་བཟང་བ། བལྟ་ན་སྡུག་པ། མཛེས་པ་ཞིག་ཡོད་དེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་དྷའི་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ །རྫ་མཁན་དགའ་སྐྱོང་གི་གྲོགས་པོ་དང༌། སྙིང་དུ་སྡུག་པ་དང་ནེའུ་ཟླ་ཡང་ཡིན་ནོ། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་སྟེ་ཕྱིན་པ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ༌། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་གིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་
ལས་ལངས་ནས་སོང་ངོ༌། །དེའི་ཚེ་བྲམ་ཟེའི་ཁྱེའུ་བླ་མ་རྟ་རྒོད་མ་དང་ལྡན་པའི་ཤིང་རྟ་ཐམས་ཅད་ནས་དཀར་བའི་ནང་དུ་ཞུགས་ཏེ། གསེར་གྱི་རིལ་བ་དང༌། དབྱུག་པ་ཐོགས་ནས་བྲམ་ཟེའི་ཁྱེའུའི་ཚོགས་ཀྱིས་ཡོངས་སུ་བསྐོར་ཅིང༌། བྲམ་ཟེའི་ཁྱེའུའི་ཚོགས་ཀྱིས་མདུན་དུ་བདར་ནས། བཻ་བྷི་ཊིང་གི་ཕྱི་རོལ་དུ་བྲམ་ཟེ་རྣམས་ཀློག་ཏུ་འཇུག་པར་འདོད་ནས། བཻ་བྷི་ཊིང་གི་ནས་བྱུང་བ་དང་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་ཐག་རིང་པོ་ཁོ་ན་ནས་མཐོང་ངོ༌། །མཐོང་ནས་ཀྱང་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་ད་གཟོད་ག་ལས་འོངས། དེས་པ་བླ་མ་ཁོ་བོ་ནི་འོ་ནི་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འགྲོས་དེས་པ་བླ་མ་ཚུར་ཤོག །བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་དོང་ངོ༌། །དེས་པ་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་པ་ཐོང་ཤིག །དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ། །དེས་པ་བླ་མ་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བའོ་ཞེས་དེ་སྐད་མ་སྨྲ་ཞིག །འོན་ཀྱང་བཅོམ་ལྡན་འདས་དེ་ཉིད་སངས་རྒྱས་ཡིན་ཏེ། འདིས་ཆོས་ཐམས་ཅད་སངས་རྒྱས་སོ། །དེས་པ་བླ་མ་ཚུར་བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང༌། བྲམ་ཟེའི་ཁྱེའུ་བླ་མས་ལན་གཉིས་ལན་གསུམ་དུ་ཡང་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཐོང་ཤིག །སངས་རྒྱས་འོད་སྲུང་ཞེས་བྱ་བ་ནས། བྱང་ཆུབ་ནི་མཆོག་ཏུ་དཀའ་བའོ་ཞེས་བྱ་བའི་བར་གོང་མ་བཞིན་དུའོ། །རྫ་མཁན་དགའ་སྐྱོང་གིས་ཀྱང་ལན་གཉིས་ལན་གསུམ་དུ་བྲམ་ཟེའི་ཁྱེའུ་བླ་མ་ལ་འདི་སྐད་ཅེས་སྨྲས་སོ། །དེས་པ་བླ་མ་ཁྱོད་དེ་སྐད་མ་སྨྲ་བར་ཞེས་བྱ་བ་ནས། བསྙེན་བཀུར་བྱེད་དུ་ཞེས་བྱ་བའི་བར་དུའོ། །དེ་ནས་རྫ་མཁན་དགའ་སྐྱོང་གིས་
བྲམ་ཟེའི་ཁྱེའུ་བླ་མའི་ཤིང་རྟ་ལ་འཛེགས་ནས་བྲམ་ཟེའི་ཁྱེའུ་བླ་མའི་ཅོ་ཏོ་ནས་བཟུང་སྟེ། འདི་སྐད་ཅེས་སྨྲས་སོ། །དེས་པ་བླ་མ་ཚུར་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང༌། དེ་ནས་བྲམ་ཟེའི་ཁྱེའུ་བླ་མ་འདི་སྙམ་དུ་སེམས་ཏེ། ཨེ་མའོ་སངས་རྒྱས་ནི་མཆོག་མ་ཡིན་པ་མ་ཡིན་ཞིང་ཆོས་བསྟན་པ་ཡང་མཆོག་མ་ཡིན་པ་མ་ཡིན་པས་ད་ལྟར་རྫ་མཁན་དགའ་སྐྱོང་ཡུན་རིང་པོ་ནས་གཏུམ་པོ་མ་ཡིན། གཟུ་ལུམས་ཅན་མ་ཡིན། བརླང་པོ་མ་ཡིན་བསྲི་བ་མེད་པ་མ་ཡིན་པ་དེས་བདག་གི་སྐྲ་རྣམས་བཟུང་བར་གྱུར་ཏོ་སྙམ་དུ་རིག་ནས། རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་དེ་ཙམ་བྱ་བ་ལ་ཐུག་གམ། དེས་པ་དེ་ཙམ་བྱ་བ་ལ་ཐུག་ཅེས་སོ། །དེས་པ་དགའ་སྐྱོང་དེ་ལྟ་ན་ཐོང་ཤིག་དང་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ༌། །དེ་ནས་རྫ་མཁན་དགའ་སྐྱོང་དང་བྲམ་ཟེའི་ཁྱེའུ་བླ་མ་ཤིང་རྟ་གཅིག་གི་ནང་དུ་ཞུགས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་དོང་སྟེ། དེ་གཉིས་ཀྱིས་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ། རྐང་པ་ཁོ་ནས་ཀུན་དགའ་ར་བའི་ནང་དུ་ཞུགས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་ཕྱིན་པ་དང༌། དེ་ནས་རྫ་མཁན་དགའ་སྐྱོང་གིས་ཡང་དག་པར་རྫོགས་པའི་སངས་རྒྱས་འོང་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །བྲམ་ཟེའི་ཁྱེའུ་བླ་མས་ནི་བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང༌། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ །དེ་ནས་རྫ་མཁན་དགའ་སྐྱོང་གིས་ཐལ་མོ་སྦྱར་བ་བཏུད་དེ་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེ་ལོགས་སུ་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་མ་འདི་སངས་རྒྱས་ལ་མངོན་པར་མ་དད་ཅིང་ཆོས་དང་དགེ་འདུན་ལ་མངོན་པར་མ་དད་
ལགས་ན། བཅོམ་ལྡན་འདས་ཀྱིས་ཇི་ལྟར་བྲམ་ཟེའི་ཁྱེའུ་བླ་མ་འདི་སངས་རྒྱས་ལ་མངོན་པར་དད་ཅིང་ཆོས་དང་དགེ་འདུན་ལ་མངོན་པར་དད་པར་འགྱུར་བའི་ཆོས་དེ་ལྟ་བུ་ལེགས་པར་བཤད་དུ་གསོལ། དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ༌། །དེ་ནས་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་ཆོས་འདུལ་བ་འདི་ལྟ་བུ་ཐོས་ན་ཅིའི་ཕྱིར་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་མི་འབྱུང༌། དེས་པ་བླ་མ་ཁོ་བོ་འདི་ལྟར་ཕ་མ་ལོང་བ་གཉིས་གསོ་བ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་དུས་སུ་བསོད་སྙོམས་འབུལ་བ་ཁྱོད་ཀྱིས་མི་ཤེས་སམ། དེས་པ་བླ་མ་ཁྱོད་རབ་ཏུ་བྱུང་ཤིག །ཁོ་བོ་ནི་རེ་ཞིག་རབ་ཏུ་མི་འབྱུང་ངོ༌། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྫ་མཁན་དགའ་སྐྱོང་གིས་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་མ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། རབ་ཏུ་འབྱུང་བ་དང་བསྙེན་པར་རྫོགས་པར་མཛད་གསོལ། བྲམ་ཟེའི་ཁྱེའུ་བླ་མས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་གྱུར་ཏོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་རབ་ཏུ་ཕྱུང་ཞིང་བསྙེན་པར་
རྫོགས་པར་མཛད་ནས། བཻ་བྷི་ཊིང་གིར་ཇི་ཙམ་བཞེད་ཀྱི་བར་དུ་བཞུགས་ནས་བཱ་རཱ་ཎ་སཱི་གང་ན་བ་དེར་རྒྱུ་ཞིང་གཤེགས་ཏེ་རིམ་གྱིས་རྒྱུ་ཞིང་གཤེགས་པ་དང་བཱ་རཱ་ཎ་སཱིར་བྱོན་ཏོ། །རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་པ་དང་བཱ་རཱ་ཎ་སཱིར་གཤེགས་ཏེ། བཱ་རཱ་ཎ་སཱིའི་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་སྟེ། ཕྱིན་པ་དང་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ༌། །དེ་ནས་རྒྱལ་པོ་ཀྲི་ཀི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་སང་བདག་གིས་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་ཅང་མི་གསུང་བས་གནང་ངོ༌། །དེ་ནས་རྒྱལ་པོ་ཀྲི་ཀིས་ཡང་དག་པར་རྫོགས་པའི་སངས་རྒྱས་འོད་སྲུང་ཅང་མི་གསུང་བས་གནང་བར་རིག་ནས། ཡང་དག་པར་རྫོགས་པའི་སངས་རྒྱས་འོད་
སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ནས་སོང་ངོ༌། །དེ་ནས་རྒྱལ་པོ་ཀྲི་ཀིས་དེ་ཉིད་ཀྱི་ནུབ་མོ་ནས་ གཙང 
་ཞིང་བསོང་པའི་བཟའ་བ་དང༌། བཅའ་བ་རྣམས་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས། ནོར་བུའི་ཆུ་སྣོད་བཞག་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་ཚོད་གསོལ་པ། བཙུན་པ་གདུགས་ཚོད་ལགས་ཤིང་མཆིས་ན་བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང༌། དགེ་སློང་གི་དགེ་འདུན་གྱིས་མདུན་དུ་བདར་ཏེ། རྒྱལ་པོ་ཀྲི་ཀིའི་བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཀྲི་ཀིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་ཟིན་པར་རིག་ནས་
གཙང ་ཞིང་བསོད་པའི་བཟའ་བ་དང༌། བཅའ་བ་རྣམས་ཀྱིས་རང་གི་ལག་ནས་སྟོབས་ཤིང་ཚིམ་པར་བྱེད་དེ། གཙང ་ཞིང་བསོད་པའི་བཟའ་བ་དང་བཅའ་བ་རྣམས་ཀྱིས་རང་གི་ལག་ནས་བསྟབས་ཤིང་ཚིམ་པར་བྱས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་གསོལ་ཟིན་ནས་ཕྱག་བཅབས་ཏེ། ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་གསོལ་བ་བཏབ་པ་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་གིས་དགུང་ཟླ་གསུམ་དུ་ན་བཟའ་ཆོས་གོས་དང༌། བསོད་སྙོམས་དང༌། གཟིམས་ཆ་དང༌། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་འབུལ་ཞིང༌། བདག་གིས་བཅོམ་ལྡན་འདས་ཀྱི་སླད་དུ་གཙུག་ལག་ཁང་ལྔ་བརྒྱ་ཙམ་བརྩིག་ཅིང་ཁྲི་དང་ཁྲིའུ་དང༌། སྟན་ནང་ཚངས་ཅན་དང༌། སྔས་ནང་ཚངས་ཅན་དང༌། གོར་བུ་ལྔ་བརྒྱ་ཙམ་དབུལ་ཞིང་འབྲས་སྦུབས་སུ་
སྨིན་པ་དེ་ལྟ་བུ་འདིས་བཅོམ་ལྡན་འདས་དགེ་སློང་གི་དགེ་འདུན་ལ་བསྙེན་བཀུར་བགྱིད་ལགས་ན་གནང་བར་མཛད་དུ་གསོལ། རྒྱལ་པོ་ཆེན་པོ་ཇི་ཙམ་སེམས་མངོན་པར་དད་པར་བྱས་པ་དེ་ཙམ་གྱིས་བྱས་ཟིན་གྱིས་ཆོག་གོ །ལན་གཉིས་ལན་གསུམ་དུ་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲི་ཀིས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་ཞེས་བྱ་བ་ནས། བདག་ལ་གནང་བར་མཛད་དུ་གསོལ་ཞེས་བྱ་བའི་བར་གོང་མ་བཞིན་དུའོ། །ལན་གཉིས་ལན་གསུམ་དུ་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཇི་ཙམ་སེམས་མངོན་པར་དད་པར་བྱས་པ་དེ་ཙམ་གྱིས་བྱས་ཟིན་གྱིས་ཆོག་གོ །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲི་ཀིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལ་བསྙེན་བཀུར་བགྱིད་པ། དཔེར་ན་ད་ལྟར་གྱི་བདག་འདྲ་བ་གཞན་འགའ་ལྟ་མཆིས་ལགས་སམ། རྒྱལ་པོ་ཆེན་པོ་ཁྱོད་ཉིད་ཀྱི་ཡུལ་ན་བཻ་བྷི་ཊིང་གི་ཞེས་བྱ་བའི་གྲོང་ཡོད་དེ། དེ་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དད་པ་ཞེས་བྱ་བ་ནས་གནས་སོ་ཞེས་བྱ་བའི་བར་གོང་མ་བཞིན་དུའོ། །དེས་ཕ་མ་ལོང་བ་གཉིས་གསོ་ཞིང་དུས་དུས་སུ་ང་ལ་ཡང་བསོད་སྙོམས་ཀྱིས་སྟོབས་པར་བྱེད་དེ། རྒྱལ་པོ་ཆེན་པོ་དུས་གཅིག་ཅིག་ན་ང་བཻ་བྷི་ཊིང་གིའི་ལྗོངས་ཀྱི་གྲོང་རྡལ་ན་ཉེ་བར་བསྟེན་ཅིང་བཞུགས་ནས་སྔ་དྲོ་ཤམ་ཐབས་མནབས་ཏེ་ལྷུང་བཟེད་དང་ཆོས་གོས་བསྣམས་ནས། བཻ་བྷི་ཊིང་གི་ལྗོངས་ཀྱི་གྲོང་རྡལ་དུ་བསོད་སྙོམས་ལ་ཞུགས་ཏེ། ངས་བཻ་བྷི་ཊིང་གིར་བསོད་སྙོམས་སྤྱོད་ཅིང་རྫ་མཁན་དགའ་སྐྱོང་གི་ཁྱིམ་གང་ན་བ་དེར་གཤེགས་པ་དང༌། དེའི་ཚེ་རྫ་མཁན་དགའ་སྐྱོང་དགོས་པ་ཞིག་ལ་ཕྱི་ལོགས་སུ་སོང་ནས། ངས་རྫ་མཁན་དགའ་སྐྱོང་གི་སྒོ་འཕར་ལ་རིམ་གྱིས་དལ་བུ་དལ་བུས་བརྡུངས་པ་ལས་རྫ་མཁན་དགའ་སྐྱོང་གི་ཕ་དང་མས་སྒོ་འཕར་ལ་
བརྡུངས་པའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །འཕགས་པ་འདི་སུ་ཞིག་བཞིན་བཟངས་འདི་སུ་ཞིག་རྫ་མཁན་དགའ་སྐྱོང་གི་སྒོ་འཕར་ལ་རྡུང༌། དེ་གཉིས་ལངས་འདི་སྐད་ཅེས་སྨྲས་ཏེ། ང་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ། །དེ་གཉིས་ཀྱིས་འདི་སྐད་ཅེས་སྨྲས་སོ། །འཕགས་པ་ནང་དུ་སྦྱོན་ཅིགཐབཞིན་བཟངས་ནང་དུ་སྦྱོན་ཅིག །ཁྱོད་ལ་རིམ་གྲོ་བགྱིད་པ་ནི་སླད་རོལ་དུ་མཆིས་ཀྱིས་ཕྲུ་བ་ན་ཟན་དྲོན་དང་རྫེའུ་ན་སྲན་ཚོད་མཆིས་ཀྱིས་ཉིད་ཀྱིས་བཞེས་ཏེ་ལོངས་སྤྱད་དུ་གསོལ། རྒྱལ་པོ་ཆེན་པོ་ངས་བྱང་གི་སྒྲ་མི་སྙན་གྱི་དུས་བྱིན་གྱིས་བརླབས་ནས་ཕྲུ་བ་ན་ཟན་དྲོན་དང༌། རྗེའུ་ན་སྲན་ཚོད་ཡོད་པ་དེ་ཉིད་ཀྱིས་བླངས་ནས་ལོངས་སྤྱད་དོ། །དེ་ནས་ཕྱི་ཞིག་ན་རྫ་མཁན་དགའ་སྐྱོང་འོངས་ནས་ཕྲུ་བ་ན་ཟན་དྲོན་དང་རྫེའུ་ན་སྲན་ཚོད་ཡོད་པ་ཟོས་པར་མཐོང་ནས་ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ་ཕྲུ་བ་ན་ཟན་དྲོན་དང་རྫེའུའི་སྲན་ཚོད་སུ་ཞིག་གིས་འཚལ་ལགས། དེ་གཉིས་ཀྱིས་འདི་སྐད་ཅེས་སྨྲས་སོ། །དགའ་སྐྱོང་ཁྱོད་འདི་ནས་ཕྱིར་བྱུང་བ་ན་བདག་ཅག་གིས་སྒོ་འཕར་ལ་རྡུང་བའི་སྒྲ་ཞིག་ཐོས་སོ། །ཐོས་ནས་འདི་སྐད་ཅེས་སྨྲས་སོ། །འཕགས་པ་འདི་སུ་ཞིག་བཞིན་བཟངས་འདི་སུ་ཞིག་སྒོ་འཕར་ལ་རྡུང༌། དེས་འདི་སྐད་ཅེས་གསུངས་སོ། །ང་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ། །དེ་ལ་བདག་ཅག་གིས་འདི་སྐད་ཅེས་གསོལ་ཏོ། །འཕགས་པ་ནང་དུ་སྤྱོན་ཅིག །བཞིན་བཟངས་ནང་དུ་སྤྱོན་ཅིག །ཁྱོད་ལ་རིམ་གྲོ་བགྱིད་པ་ནི་སླད་རོལ་དུ་མཆིས་ཀྱིས་ཕྲུ་བ་ན་ཟན་དྲོན་དང༌། རྫེའུ་ན་སྲན་ཚོད་མཆིས་ཀྱིས་ཉིད་ཀྱིས་བཞེས་ལ་ལོངས་སྤྱད་དུ་གསོལ། དེས་དེ་དག་ལོངས་སྤྱད་པར་གྱུར་ཏོ། །དེ་ནས་རྫ་མཁན་དགའ་སྐྱོང་འདི་སྙམ་དུ་སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་བདག་གི་ཁྱིམ་དུ་ཤིན་ཏུ་བག་ཕབ་ཅིང་འདྲིས་པར་གྱུར་པ་
ནི་བདག་གིས་རྙེད་པ་ལེགས་པར་རྙེད་དོ་སྙམ་ནས་དགའ་བ་དང་རབ་ཏུ་དགའ་བས་སྐྱིལ་མོ་ཀྲུང་བཅས་ཏེ་ཞག་བདུན་འདས་པར་བྱས་སོ། །ཟླ་བ་ཕྱེད་ཀྱི་བར་དུ་ཡང་དེའི་ལྷན་ཅིག་ལྡན་པའི་དགའ་བ་ལུས་མི་འདོར་ཞིང་དེ་རྟག་ཏུ་ལུས་ལ་བར་ཆད་མེད་པར་འདུག་གོ །འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང༌། ལྷ་རྣམས་ཀྱི་ལྷའི་མཐུས་ཞག་བདུན་གྱི་བར་དུ་ཕ་དང་མ་གཉིས་ཀྱི་ཕྲུ་བའི་ཟན་དྲོན་དང་རྗཻའུུ་ཡི་སྲན་ཚོད་ཀྱང་དེ་བཞིན་དུ་འདུག་གོ་རྒྱལ་པོ་ཆེན་པོ་དུས་གཅིག་ན་ང་བཻ་བྷི་ཊིང་གི་ལྗོངས་ཀྱི་གྲོང་རྡལ་དུ་ཉེ་བར་བརྟེན་ཏེ་དབྱར་གནས་པར་དམ་བཞེས་པ་དང༌། ངའི་གཙུག་ལག་ཁང་དུ་ཆར་འབེབས་པའི་ལྷས་ཐོག་མར་ཆར་ཕབ་པར་གྱུར་ཏོ། །དེའི་ཚེ་རྫ་མཁན་དགའ་སྐྱོང་གི་ལས་བྱེད་པའི་ཁང་པ་རྩྭ་སར་པས་གཡོགས་སོ། །ངའི་ཞབས་འབྲིང་བྱེད་པ་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཅག་དེང་ལ་རྫ་མཁན་དགའ་སྐྱོང་གི་ལས་བྱེད་པའི་ཁང་པའི་གཡོགས་མས་ངའི་གཙུག་ལག་ཁང་གཡོགས་ཤིག ། བཙུན་པ་བཀའ་བཞིན་འཚལ་ཞེས་དགེ་སློང་དེ་རྣམས་ཀྱིས་ང་ལས་མཉན་ནས། རྫ་མཁན་དགའ་སྐྱོང་གི་ལས་བྱེད་པའི་ཁང་པའི་གཡོགས་མ་འཆུ་བར་བྱེད་པ་ན། དེའི་ཚེ་རྫ་མཁན་དགའ་སྐྱོང་དགོས་པ་འགའ་ཞིག་ལ་ཕྱི་རོལ་ཏུ་སོང་ངོ༌། །རྫ་མཁན་དགའ་སྐྱོང་གི་ཕ་དང་མ་གཉིས་ཀྱིས་ལས་བྱེད་པའི་ཁང་པའི་གཡོགས་མ་འཆུ་བའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །འཕགས་པ་འདི་སུ་ཞིག་བཞིན་བཟངས་འདི་སུ་ཞིག་ལས་བྱེད་པའི་ཁང་པའི་གཡོགས་མ་འཆུ། དེ་རྣམས་ཀྱིས་འདི་སྐད་ཅེས་སྨྲས་སོ། །ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བའི་དགེ་སློང་དག་ཡིན་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དུ་ཆར་འབེབས་པའི་ལྷས་ཐོག་མར་ཆར་ཕབ་པས་ཁོ་བོ་ཅག་གིས་འདི་བཤུས་ཏེ་དེ་གཡོག་གོ །དེ་གཉིས་ཀྱིས་འདི་སྐད་ཅེས་སྨྲས་སོ། །ཁྱེད་ལ་རིམ་གྲོ་བགྱིད་པ་ནི་སླད་རོལ་དུ་མཆིས་ཀྱིས། འཕགས་པ་དག་སྣོམས་ཤིག
བཞིན་བཟངས་དག་སྣོམས་ཤིག །དེ་ནས་དགེ་སློང་དེ་རྣམས་ཀྱིས་ལས་བྱེད་པའི་ཁང་པ་བཤུས་ནས་ངའི་གཙུག་ལག་ཁང་གཡོགས་སོ། །དེ་ནས་ཕྱི་ཞིག་ན་རྫ་མཁན་དགའ་སྐྱོང་འོངས་ནས་རྫ་མཁན་དགའ་སྐྱོང་གིས་ལས་བྱེད་པའི་ཁང་པའི་གཡོགས་མ་བཤུས་པ་མཐོང་ངོ༌། །མཐོང་ནས་ཀྱང་ཕ་དང་མ་ལ་འདི་སྐད་ཅེས་སྨྲས་སོ། །ཡབ་ཡུམ་ལས་བྱེད་པའི་ཁང་པ་འདི་སུ་ཞིག་གིས་བཤུས་དེ་གཉིས་ཀྱིས་འདི་སྐད་ཅེས་སྨྲས་སོ། །འདི་ནས་ཁྱོད་ཕྱི་ལོགས་སུ་སོང་བ་ན་བདག་ཅག་གིས་ལས་བྱེད་པའི་ཁང་པའི་གཡོགས་མ་འཆུ་བའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །འཕགས་པ་འདི་སུ་ཞིག་བཞིན་བཟངས་འདི་སུ་ཞིག་ལས་བྱེད་པའི་ཁང་པ་འཆུ། དེ་རྣམས་ཀྱིས་འདི་སྐད་ཅེས་སྨྲས་སོ། །ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བ་དགེ་སློང་དག་ཡིན་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དུ་ཆར་འབེབས་པའི་ལྷས་ཐོག་མར་ཆར་ཕབ་པས་ཁོ་བོ་ཅག་གིས་འདི་བཤུས་ལ་དེ་གཡོགས་སོ། །དེ་རྣམས་ལ་བདག་ཅག་གིས་འདི་སྐད་ཅེས་སྨྲས་སོ། །ཁྱེད་ཅག་ལ་རིམ་གྲོ་བགྱིད་པ་ནི་སླད་རོལ་དུ་མཆིས་ཀྱིས་འཕགས་པ་དག་སྣོམས་ཤིག །བཞིན་བཟངས་དག་སྣོམས་ཤིག །དེ་རྣམས་ཀྱིས་ལས་བྱེད་པའི་ཁང་པ་དེ་བཤུས་སོ། །དེ་ནས་རྫ་མཁན་དགའ་སྐྱོང་འདི་སྙམ་དུ་སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་བདག་གི་ཁྱིམ་དུ་ཤིན་ཏུ་བག་ཕབ་ཅིང་འདྲིས་པར་གྱུར་པ་ནི་བདག་གིས་རྙེད་པ་ལེགས་པར་རྙེད་དོ་ཞེས་བྱ་བ་ནས་ཞག་བདུན་དུ་ཞེས་བྱ་བའི་བར་གོང་མ་བཞིན་དུའོ། །འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་ལྷ་རྣམས་ཀྱི་ལྷའི་མཐུས་རྫ་མཁན་དགའ་སྐྱོང་གི་ཕ་མའི་དབྱར་གྱི་གནས་དེར་ལས་བྱེད་པའི་ཁང་པར་ཆར་པ་ཐིགས་པ་གཅིག་ཀྱང་མ་བབ་བོ། །རྒྱལ་པོ་ཆེན་པོ་ཁྱོད་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཟླ་བ་གསུམ་དུ་ན་བཟའ་ཆོས་གོས་དང༌། བསོད་སྙོམས་དང༌།
གཟིམས་ཆ་དང༌། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་འབུལ་ན་མ་གནང་ངོ༌། །ཞེས་ཁྱོད་ཀྱི་སེམས་གཞན་དུ་འགྱུར་གྱི། དགའ་སྐྱོང་ནི་ལས་བྱེད་པའི་ཁང་པའི་གཡོགས་མ་བཤུས་ཀྱང་སེམས་གཞན་དུ་མ་གྱུར་ཏོ། །བཙུན་པ་རྫ་མཁན་དགའ་སྐྱོང་གིས་ནི་ཐོབ་པ་ལེགས་པར་ཐོབ་ལགས་ཏེ། བཅོམ་ལྡན་འདས་ཀྱིས་དེའི་སྡུམ་པར་ཤིན་ཏུ་བག་ཕབ་ཅིང་འདྲིས་པར་གྱུར་ལགས་སོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀིའི་སྦྱིན་པ་དེ་ལ་རྗེས་སུ་ཡི་རང་བ་འདིས་རྗེས་སུ་ཡི་རང་བར་མཛད་དེ། སྦྱིན་སྲེག་མཆོད་སྦྱིན་རྣམས་ཀྱི་མཆོག །བདེ་སྦྱོར་མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐར་རྣམས་ཀྱི་གཙོ། །ཉི་མ་སྣང་བྱེད་རྣམས་ཀྱི་གཙོ། །སྟེང་དང་འོག་དང་ཐད་ཀར་ཡང༌། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་འཇིག་རྟེན་ན། །སྨྲ་བའི་མཆོག་ནི་རྫོགས་སངས་རྒྱས། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲི་ཀི་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གཤེགས་ནས་རིང་པོ་མ་ལོན་པར་རྒྱལ་པོ་ཀྲི་ཀིས་མི་ཞིག་ལ་སྨྲས་པ། ཀྭའི་ནང་རྗེ་ཁྱོད་སོང་ལ་སྦུབས་སུ་སྨིན་པའི་འབྲས་ཀྱིས་ཤིང་རྟ་ལྔ་བརྒྱ་ཙམ་ཁོང་ལ། རྫ་མཁན་དགའ་སྐྱོང་གང་ན་བ་དེར་སོང་སྟེ་ཕྱིན་པ་དང༌། དེ་ལ་འདི་སྐད་ཅེས་དེས་པ་དགའ་སྐྱོང་རྒྱལ་པོ་ཀྲི་ཀིས་ཁྱོད་ལ་སྦུབས་སུ་སྨིན་པའི་འབྲས་ཀྱིས་བཀང་བའི་ཤིང་རྟ་ལྔ་བརྒྱ་ཙམ་པོ་འདི་དག་བསྐུར་གྱིས་འདིས་ཁྱོད་ཀྱི་ཕ་མ་ལོང་བ་གཉིས་གསོ་བ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་དུས་སུ་བསོད་སྙོམས་དབུལ་བ་དང༌། བདག་ཉིད་ཀྱང་ལེགས་པར་བདེ་བས་ཚིམ་པར་བྱོས་ཤིག །ལྷ་བཀའ་བཞིན་འཚལ་ཞེས་མི་དེས་རྒྱལ་པོ་
ཀྲི་ཀི་ལས་མཉན་ནས་སྦུབས་སུ་སྨིན་པའི་འབྲས་ཀྱིས་ཤིང་རྟ་ལྔ་བརྒྱ་ཙམ་བཀང་སྟེ། རྫ་མཁན་དགའ་སྐྱོང་གང་ན་བ་དེར་སོང་ནས་ཕྱིན་པ་དང༌། རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་རྒྱལ་པོ་ཀྲི་ཀིས་ཁྱོད་ལ་སྦུབས་སུ་སྨིན་པའི་འབྲས་ཀྱིས་བཀང་བའི་ཤིང་རྟ་ལྔ་བརྒྱ་ཙམ་པོ་འདི་དག་བསྐུར་གྱིས། འདིས་ཁྱོད་ཀྱི་ཕ་མ་ལོང་བ་གཉིས་གསོ་བ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་ལ་བསོད་སྙོམས་འབུལ་བ་དང༌། བདག་ཉིད་ཀྱང་ལེགས་པར་བདེ་བས་ཚིམ་པར་བྱོས་ཤིག་ཅེས་གསུང་ངོ༌། །ཀྱེ་ནང་རྗེ་རྒྱལ་པོ་ཀྲི་ཀི་ནི་དགོས་པ་མང་ཞིང་བྱ་བ་མང་བ་ཡིན་ལ། བདག་ནི་དགོས་པ་ཉུང་ཞིང་བྱ་བ་ཉུང་བ་ཡིན་ནོ་ཞེས་སྨྲས་ནས་མ་བླངས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་བླ་མ་གང་ཡིན་པ་དེ་ནི་ང་ཉིད་ཡིན་ཏེ། ངས་གང་ཟག་ལ་སྐུར་གྱི་བྱང་ཆུབ་ལ་མ་ཡིན་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་བྱང་ཆུབ་ཀྱི་སྙིང་པོར་དཀའ་བ་ལོ་དྲུག་སྤྱད་དོ། །གལ་ཏེ་ངས་བྱང་ཆུབ་ལ་བསྐུར་བར་གྱུར་ན། ངས་སླར་ཡང་བསྐལ་པ་གྲངས་མེད་པ་གསུམ་དུ་བྱང་ཆུབ་ཀྱི་ཆེད་དུ་བདག་ཉིད་ཤིན་ཏུ་དུབ་པར་འགྱུར་རོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་མངོན་པར་རྫོགས་པར་བྱང་ཆུབ་པ་ན་ཡང་བཅོམ་ལྡན་འདས་ལ་འཁྲུ་བའི་སྙུན་གྱིས་ཐེབས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་འདི་དག་བྱས་ཤིང་བསགས་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་ནོ། །དགེ་སློང་དག་སྔོན་བྱུང་བ་རི་འོར་ཞིག་ན་སྨན་པ་ཞིག་ཡོད་པ་ལས་དེ་ན་ཁྱིམ་བདག་ཅིག་གི་བུ་ནད་ཀྱིས་ཐེབས་ནས། དེས་སྨན་པ་དེ་བཀུག་སྟེ་དྲིས་ནས་དེས་དེ་ལ་སྨན་བྱིན་པས་སོས་པར་གྱུར་ན། ཁྱིམ་བདག་དེས་དེ་ལ་རྔན་པ་མ་བྱིན་ནོ། །ཁྱིམ་བདག་གི་བུ་དེ་ལན་གསུམ་
གྱི་བར་དུ་ནད་ཀྱིས་ཐེབས་ཏེ། སྨན་པ་དེས་ལན་གསུམ་གྱི་བར་དུ་སོས་པར་བྱས་ཀྱང་དེས་དེ་ལ་རྔན་པ་མ་བྱིན་ནས་དེ་ནས་སྨན་པ་དེ་ཀུན་ནས་དཀྲིས་པ་དྲག་པོས་མི་བཟོད་པར་གྱུར་ནས་བསམས་པ། ཁྱིམ་བདག་གི་བུ་འདི་བདག་གིས་ལན་གསུམ་གྱི་བར་དུ་དཔྱད་བྱས་ཀྱང་འདིས་ཅུང་ཟད་ཀྱང་ལན་དུ་ཕན་མ་བཏགས་ཀྱིས། ད་ནི་བརྒྱ་ལ་ནད་ཀྱིས་ཐེབས་པར་གྱུར་དང༌། དེ་ལ་སྨན་མ་ཡིན་པ་གང་ཞིག་གིས་དེའི་ནང་གྲོལ་རྣམས་དུམ་བུ་དུམ་བུར་འཛག་པར་འགྱུར་བ་དེ་ལྟ་བུ་སྦྱིན་ནོ་སྙམ་པ་ལས་ཇི་ཙམ་ན་ཁྱིམ་བདག་དེའི་བུ་མ་བདེ་སྟེ་སླར་ན་བར་གྱུར་པ་དང༌། སྨན་པ་དེས་མི་བཟོད་པ་སྐྱེས་པས། དེ་ལ་སྨན་མ་ཡིན་པ་བྱིན་ནས་དེས་ནང་གྲོལ་རྣམས་དུམ་བུ་དུམ་བུར་ཟགས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྨན་པ་གང་ཡིན་པ་དེ་ནི་ང་ཉིད་ཡིན་ཏེ། ངས་ངན་སེམས་ཀྱིས་ཁྱིམ་བདག་གི་བུ་ལ་སྨན་མ་ཡིན་པ་བྱིན་པས་དེས་ནང་གྲོལ་རྣམས་དུམ་བུ་དུམ་བུར་ཟགས་པ་གང་ཡིན་པ་དེའི་ལས་དེའི་རྣམ་པར་སྨིན་པས་ལོ་མང་པོ་ཞེས་བྱ་བ་ནས། སེམས་ཅན་དམྱལ་བ་རྣམས་སུ་བཙོས་སོ་ཞེས་བྱ་བའི་བར་གོང་མ་བཞིན་དུའོ། །ལས་དེའི་ལྷག་མ་དེ་ཁོ་ནས་ད་ལྟར་མངོན་པར་རྫོགས་པར་བྱང་ཆུབ་བ་ན་ཡང་འཁྲུ་བའི་སྙུན་གྱིས་ཐེབས་སོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་ཤཱཀྱ་རྣམས་བཀུམ་པ་ན། བཅོམ་ལྡན་འདས་ཀྱི་དབུ་སྙུན་རབ་ཏུ་དྲག་པོས་ཐེབས་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་འདི་དག་བྱས་ཤིང་བསགས་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་ཆུ་བོ་གཉེན་ལྡན་གྱི་འགྲམ་ན་ཉ་པ་ལྔ་བརྒྱ་རྟེན་ཅིང་གནས་ཏེ། དེ་རྣམས་ཀྱིས་ཉ་ཤིན་ཏུ་ཆེ་བ་གཉིས་ཤིག་ཇི་ལྟར་གཉེན་ལྡན་གྱི་ནང་དུ་ཞུགས་ཏེ་ཉལ་བ་ཟིན་པ་དང༌། དེ་དག་འདི་སྙམ་དུ་སེམས་ཏེ། གལ་ཏེ་འདི་གཉིས་བསད་ན་ཤ་ལོམ་པར་མི་འགྱུར་ཞིང་རུལ་བར་
འགྱུར་རོ་སྙམ་ནས་དེ་རྣམས་ཀྱིས་དེ་གཉིས་ཕུར་པ་ལ་བཏགས་ནས་བཞག་གོ །གང་གི་ཚེ་ལན་འགའ་ཞིག་ཉོ་བར་འོངས་པ་དེའི་ཚེ་བཅད་ཅིང་བཅད་ཅིང་སྦྱིན་པར་བྱེད་དོ། །དེ་གཉིས་ཀྱི་ལུས་ལ་གཅོད་པ་ན་སྡུག་བསྔལ་གྱི་ཚོར་བས་ཉེན་པས་རང་གི་རིས་མཐུན་པའི་སྐད་འབྱིན་པས་འབོ་སྒྲ་འདོན་པར་བྱེད་དོ། །དེ་ན་ཉ་པའི་ཁྱེའུ་གཅིག་ཅིག་དེ་གཉིས་ཀྱི་ཤ་གཅོད་པ་ན་ཡང་དང་ཡང་དུ་འབོ་སྒྲ་འདོན་པ་ལ་དགའ་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཉ་པའི་ཁྱེའུ་གང་ཡིན་པ་དེ་ནི་ང་ཡིན་ཏེ། ངས་ཉ་གསོད་པར་བྱེད་པ་ལ་དགའ་བ་བསྐྱེད་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ང་ལོ་མང་པོ་ཞེས་བྱ་བ་ནས། ཀླད་པ་ན་བར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །ལས་ཀྱི་ལྷག་མ་དེ་ཁོ་ནས་ད་ལྟར་མངོན་པར་རྫོགས་པར་བྱང་ཆུབ་པ་ན་ཡང་ཤཱཀྱ་རྣམས་བསད་པ་ན་ཀླང་ནད་རབ་ཏུ་དྲག་པོས་ཐོབས་པར་གྱུར་ཏོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་མངོན་པར་རྫོགས་པར་བྱང་ཆུབ་པ་ན་ཡང་བཅོམ་ལྡན་འདས་ཀྱི་སྐུ་རྒྱབ་བསེར་མའི་སྙུན་གྱིས་ཐེབས་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་འདི་དག་བྱས་ཤིང་བསགས་པས་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གྱད་གཅིག་གིས་ཡུལ་ལྗོངས་ཀྱི་གྱད་ཐམས་ཅད་བརྡབས་ནས་རྒྱལ་པོའི་ཕོ་བྲང་དུ་ཕྱིན་པ་དང༌། རྒྱལ་པོའི་ཕོ་བྲང་དེ་ན་རྒྱལ་པོའི་གྱད་སྟོབས་དང་ཕ་རོལ་གནོན་པ་ཐུབ་རླག་པ་ཞིག་ཡོད་དེ། དེ་དེ་དང་ལྷན་ཅིག་རྒྱལ་མཚན་གྱི་ཕྱིར་སྟོབས་འགྱེད་པ་ལ་ཞུགས་སོ། །གྱད་དེ་དག་གི་ཀུན་ཏུ་སྤྱོད་པ་ནི་ལག་པ་ནས་བཟུང་བ་ཁོ་ནས་གྱད་ཀྱིས་གྱད་ཤེས་པ་ཡིན་པས། དེ་ནས་རྒྱལ་པོའི་གྱད་དེས་ཡུལ་ལྗོངས་ཀྱི་གྱད་འདི་ནི་བདག་པས་སྟོབས་ཆེའོ་ཞེས་བྱ་བར་ཤེས་ནས་དེས་སྨས་
པ་ནེའུ་ཟླ་བདག་གི་འདི་ནི་རིགས་ཀྱི་རྒྱུད་ཀྱིས་འོངས་པ་ཡིན་གྱིས། ཁྱོད་བདག་ཉིད་འགྱེལ་བར་བྱོས་ཤིག་དང༌། བདག་ལ་ནི་གྲགས་པར་ཟད་ལ་རུ་མཚོན་ནི་ཁྱོད་ཀྱི་ཡིན་པར་འགྱུར་རོ། །དེས་ཁས་བླངས་པ་དང༌། དེས་དེ་མནན་ཏོ། །དེས་རུ་མཚོན་བླང་བར་བརྩམས་པ་དང༌། དེས་སྨྲས་པ། ནེའུ་ཟླ་སྒྱུའམ་མཐུས་རྒྱལ་བ་དོན་དུ་གཉེར་བ་ཡིན་པ་ལས་ཁྱོད་ངས་སྒྱུས་བསླུས་ན། ཅིའི་ཕྱིར་རུ་མཚོན་སྦྱིན་བདག་ཉིད་ཆེན་པོ་དེ་ང་རྒྱལ་བཅོམ་པ་ཞིག་པས་ལན་གསུམ་གྱི་བར་དུ་གྱད་དེ་དང་ལྷན་ཅིག་འགྱེད་པར་ཞུགས་པ་ན་ཡང་དེ་ལ་བསླུ་བར་བརྩམས་པ་ན་ནེའུ་ཟླ་ཁྱོད་ལ་རུ་མཚོན་གྱིས་ཅི་ཞིག་བྱ་བདག་གི་སྲིང་མོ་ཕྱུགས་ཆུང་མ་ཁྱིམ་ཐབ་ལ་མ་སོང་བ་ཞིག་ཡོད་པ་དེ་ཁྱོད་ལ་སྦྱིན་གྱིས་བདག་ཉིད་འགྱེལ་བར་བྱོས་ཤིག །བསླུས་པ་དེ་དེའི་ཆུང་མས་ཐོས་ནས་དེས་སྨྲས་པ། རྗེའི་སྲས་སྔ་མའི་གླེང་གཞི་དག་དགོངས་སམ། དེ་ནས་དེའི་ཆུང་མས་ང་རྒྱལ་བསྐྱེད་ནས་ཀུན་ནས་དཀྲིས་པ་དྲག་པོས་དེ་བཏེག་སྟེ། བརྡབས་པས་དེ་སྒལ་ཚིགས་ཆག་ནས་ཤིའོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཡུལ་ལྗོངས་ཀྱི་གྱད་གང་ཡིན་པ་དེ་ནི་ང་ཉིད་ཡིན་ཏེ། ངས་ངན་སེམས་བསྐྱེད་ནས་ཀུན་ནས་དཀྲིས་པ་དྲག་པོས་རྒྱལ་པོའི་གྱད་སྒལ་ཚིགས་བཅག་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ང་ལོ་མང་པོ་དང༌། ལོ་བརྒྱ་ཕྲག་མང་པོ་དང༌། ལོ་སྟོང་ཕྲག་མང་པོ་དང༌། ལོ་བརྒྱ་སྟོང་ཕྲག་མང་པོ་རྣམས་་སེམས་ཅན་དམྱལ་བ་རྣམས་སུ་བཙོས་སོ། །ལས་ཀྱི་ལྷག་མ་དེ་ཁོ་ནས་ད་ལྟར་མངོན་པར་རྫོགས་པར་བྱང་ཆུབ་པ་ན་ཡང་ངའི་སྒལ་ཚིགས་རླུང་ནད་ཀྱིས་ཐེབས་པར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་ནོ།། །།འདུལ་བ་གཞི། བམ་པོ་ལྔ་བཅུ་དྲུག་པ། ཐམས་ཅད་ཟིལ་གནོན་ཐམས་ཅད་གཟིགས། །ཐུབ་པ་འཇིག་རྟེན་ཀུན་ལ་སྨན། །སྲེད་པ་ཐམས་ཅད་
ཟད་པ་བརྙེས། །སྦྱོར་བ་ཀུན་གྱི་མཐར་ཕྱིན་མཛད། །ཐམས་ཅད་མཁྱེན་ཅིང་ཐམས་ཅད་རིག །ཐུབ་ཆེན་ཐམས་ཅད་མངོན་པར་མཁྱེན། །འཁོན་དང་འཇིགས་པ་ཀུན་ལས་འདས། །ཆོས་ཀུན་གྱི་ནི་ཕ་རོལ་གཤེགས། །བསམ་པ་ཀུན་ལ་མཁས་པ་པོ། །སྲེད་པ་ཐམས་ཅད་རབ་ཏུ་བཅོམ། །སེམས་ཅན་ཀུན་ལ་ཕན་དགོངས་པ། །མདུད་པ་ཐམས་ཅད་རབ་ཏུ་གྲོལ། །བག་ལ་ཉལ་ཀུན་བཅད་ནས་ནི། །འཆིང་བ་ཐམས་ཅད་ཡང་དག་བཅད། །སེམས་ཅན་ཀུན་གྱི་མཆོག་རབ་སྟེ། ཐུབ་པ་ཆོས་རྣམས་སྟོན་པར་མཛད། །སེམས་ཅན་ཆེན་པོ་ཤེས་རབ་ཆེ། །བརྩོན་འགྲུས་ཆེན་པོ་གྲགས་པ་ཆེ། །ཆོས་ཆེན་འོད་ནི་ཆེན་པོ་པ། །ཆོས་ཆེན་དོན་གྱི་ཕ་རོལ་གཤེགས། །ཀླུ་ཆེན་སེང་གེ་ཆེན་པོ་པ། །དགེ་སློང་ཆེན་པོ་དྲང་སྲོང་ཆེ། །ཤེས་རབ་ཆེན་པོའི་རལ་གྲི་མཚོན། །ཉོན་མོངས་ཆེན་པོ་རབ་ཏུ་བཅོམ། །སྟོབས་དང་བརྩོན་འགྲུས་རབ་ཏུ་ཆེ། །བརྟན་པ་ཆེན་པོ་ཕ་རོལ་གནོན། །བྱང་ཆུབ་ཆེན་པོ་བརྙེས་པ་གང༌། །དགྲ་ཆེན་རྣམས་ལས་རྣམ་པར་རྒྱལ། །ནད་ཆེན་པོ་ཡི་དཔྱད་མཛད་པས། །བཅོམ་ལྡན་སྨན་པ་ཆེན་པོ་ལགས། །འདོད་ཆགས་ཆེན་པོ་ཟིལ་གནོན་ལ། །སྨན་ཆེན་པོ་ནི་སྩོལ་བ་པོ། །འཁོར་བ་ཆེན་པོའི་བཙོན་ར་ན། །འཆིང་བ་ཆེན་པོས་བཅིངས་རྣམས་ལ། །ཐུགས་རྗེ་ཆེན་པོ་དང་ལྡན་པས། །འཆིང་བ་ཀུན་ལས་གྲོལ་བར་མཛད། །སྐྱེས་བུ་ཆེན་པོ་ལྷ་ཆེན་པོ། །ཚོགས་རྣམས་ཀྱི་ནི་ཚོགས་ཆེན་ལྡན། །སྦྱིན་པའི་མཆོག་ནི་སྦྱིན་ཆེན་པོ། །ཞི་བ་ཆེན་པོའི་གོ་འཕང་རེག །སེམས་ཅན་མཆོག་སྟེ་དྲང་སྲོང་མཆོགཐདེ་བཞིན་རྣམ་པར་འདྲེན་མཆོག་བརྙེས། །ཉན་ཐོས་མཆོག་ནི་ཕུན་སུམ་ཚོགས། །ཆོས་ཀྱི་མཆོག་ནི་རབ་སྟོན་པ། །ཤིན་ཏུ་མཉམ་པར་བཞག་པའི་མཆོག །ཡོན་གནས་རྣམས་ཀྱི་མཆོག་ཏུ་འོས། །རྣམ་པར་གྲོལ་བ་རྣམས་ཀྱི་མཆོག །མཚན་ནི་མཆོག་རབ་ཀུན་དང་ལྡན། །བཅོམ་ལྡན་སྲིད་ལས་
རབ་ཏུ་གྲོལ། །སྲིད་པའི་དགའ་བ་ལས་འཕགས་པ། །སྲིད་པའི་འདོད་ཆགས་ཀུན་ནས་བཅད། །སྲིད་པའི་སྲེད་པ་རབ་ཏུ་བཅོམ། །ཆོས་ཆེན་པོ་ནི་བསྒོམས་པས་ན། །འཇིགས་དང་འཇིགས་སུ་རུང་བ་སྤངས། །ཀླུ་ཡི་རྒྱལ་པོ་རྣམས་ཀྱི་གནས། །མ་དྲོས་པ་ཡི་མཚོ་ཆེན་དུ། །ཐམས་ཅད་བྱ་བ་བྱས་པ་ཡི། །ཉན་ཐོས་རྣམས་ཀྱི་མདུན་བྱས་ཏེ། །ལྔ་བརྒྱ་རྣམས་དང་ཐབས་ཅིག་ཏུ། །རྫུ་འཕྲུལ་གྱིས་ནི་མཁའ་ལས་གཤེགས། །ཆུ་བོ་དེ་ཡི་འགྲམ་དག་ཏུ། །སྨྲ་བའི་མཆོག་ནི་བཞུགས་ནས་ནི། །རྗེས་སུ་བརྩེ་བ་ཐུགས་རྗེ་ཅན། །ལུས་ཅན་ཀུན་ལ་ཕན་མཛད་པས། །མཚོ་ལ་གཟིགས་ནས་དགེ་སློང་ལ། །འདི་སྐད་ཅེས་ནི་བཀའ་སྩལ་ཏོ། །ངས་ནི་སྡིག་པ་གང་བྱས་དང༌། །ང་ཡི་ཚིག་འདི་མཉན་པར་གྱིས། །ངས་ནི་སྔོན་གྱི་ཚེ་རབས་སུ། །གཡོན་ཅན་པད་མའི་རྩ་ལག་གྱུར། །རང་སངས་རྒྱས་ནི་ལེགས་སྨོན་ཏེ། །སྐྱོན་མེད་ལ་ནི་སྐུར་བཏབ་ནས། །སྐྱེ་བོའི་ཚོགས་ཆེན་ལྷགས་ནས་སུ། །ཐུབ་པ་ཆོས་ཀྱི་ཡོན་ཏན་དགའ། །བཅིང་བ་དམ་པོས་དེ་བཅིངས་ནས། །གྲོང་ཁྱེར་ནས་ནི་ཕྱུང་བ་དང༌། །དགེ་སྦྱོང་བཅིང་བས་དམ་བཅིངས་པས། །སྡུག་བསྔལ་གྱུར་དེ་ང་ཡིས་མཐོང༌། །དེ་ལ་སྙིང་རྗེ་བསྐྱེད་ནས་ཀྱང༌། །ང་ཉིད་ཀྱིས་ནི་ཐར་བར་བྱས། །ལས་ཀྱི་རྣམ་པར་སྨིན་པ་དེས། །དམྱལ་བ་རྣམས་སུ་ཡུན་རིངས་འཕངས། །སླར་ཡང་མིར་ནི་འོངས་པ་ན། །ངས་ནི་སྐུར་པ་ཐོབ་པར་གྱུར། །དེ་ནས་ལས་ཀྱི་ལྷག་མས་ཀྱང༌། །ང་ཡི་ཡང་སྲིད་ཐ་མ་ལ། །མུ་སྟེགས་རྣམས་ཀྱིས་མཛེས་མའི་ཕྱིར། །ཡང་དག་མ་ཡིན་སྐུར་པ་བཏབ། །ང་སྔོན་བྲམ་ཟེར་གྱུར་པ་ན། །གསང་ཚིག་འཛིན་ཅིང་མང་ཐོས་པ། །བྲམ་ཟེ་ལྔ་བརྒྱ་རྣམས་ལ་ནི། །ཚལ་ན་གསང་ཚིག་བརྗོད་པའི་ཚེ། །མངོན་ཤེས་ལྔ་ལྡན་རྫུ་འཕྲུལ་ཆེ། །བྱིན་ཅན་དྲང་སྲོང་དེར་འོངས་པ། །བཀུར་སྟི་བྱེད་པ་ངས་མཐོང་ནས། །སྐྱོན་མེད་ལ་ནི་སྐུར་པ་བཏབ། །དྲང་སྲོང་འདི་ནི་འདོད་སྤྱོད་ཅེས། །ངས་ནི་བྲམ་ཟེའི་ཁྱེའུ་ལ་
སྨྲས། །བྲམ་ཟེའི་ཁྱེའུ་རྣམས་ང་ཡི་ཚིག །ཐོས་ནས་རྗེས་སུ་ཡི་རང་ཞིང༌། །དེ་ནས་བྲམ་ཟེའི་ཁྱེའུ་རྣམས་ཀྱིས། །ཁྱིམ་དང་ཁྱིམ་དུ་སློང་བ་ན། །དྲང་སྲོང་འདི་ནི་འདོད་སྤྱོད་ཅེས། །སྐྱེ་བོ་མང་པོ་དག་ལ་སྨྲས། །ལས་ཀྱི་རྣམ་པར་སྨིན་པ་དེས། །དགེ་སློང་ལྔ་བརྒྱ་དག་དང་ཡང༌། །མཛེས་མ་ཁོ་ནའི་རྒྱུ་ལས་ནི། །སྐུར་པ་དག་ནི་ཐོབ་པར་གྱུར། །སངས་རྒྱས་ཐམས་ཅད་ཟིལ་ནོན་གྱིས། །ཉན་ཐོས་གྱུར་པ་གནས་འཇོག་བུ། །དེ་ཚེ་དགེ་སྦྱོང་དེ་ལ་ནི། །ངས་ནི་མི་བདེན་སྐུར་པ་བཏབ། །སྡིག་པའི་ལས་དེ་བྱས་པས་ན། །མི་བཟད་ངན་འགྲོར་སོང་ནས་ནི། །སེམས་ཅན་དམྱལ་བ་རྣམས་སུ་སྐྱེས། །སྡུག་བསྔལ་ཚོར་བ་ཉམས་སུ་མྱོང༌། །དེ་ནས་ལས་ཀྱི་ལྷག་མས་ནི། །ང་ལ་བྲམ་ཟེ་རྩ་མིས་འདིར། །སྐྱེ་བོའི་ཚོགས་ནི་འདུས་པ་ན། །ཡང་དག་མ་ཡིན་སྐུར་པ་བཏབ། །ནོར་གྱི་ཕྱིར་ནི་སྐྱོན་མེད་པར། །ངས་ནི་གཡས་ཁྱིམ་ནུ་བོ་ནི། །རི་ཡི་གསེབ་ཏུ་བཅུག་ནས་སུ། །ངས་ནི་རྡོ་བ་དག་གིས་བསྣུན། །ལས་ཀྱི་རྣམ་པར་སྨིན་པ་དེས། །དམྱལ་བ་དག་ཏུ་ཡུན་རིངས་འཕངས། །རབ་ཏུ་ཚ་དང་ཐིག་ནག་གི༌། །སྡུག་བསྔལ་ཚོར་བ་མྱོང་བར་གྱུར། །དེ་ནས་ལས་ཀྱི་ལྷག་མས་ནི། །ལྷ་སྦྱིན་གྱིས་ནི་རྡོ་འཕངས་ཏེ། །ང་ཡི་ཞབས་ཀྱི་མཐེ་བོ་ནི། །རྡོ་བའི་དུམ་བུས་རྨ་ཡང་ཕྱུང༌། །རྒྱ་མཚོ་ཡི་ནི་གྲུ་བོ་ཆེས། །རྒྱ་མཚོ་ལ་ནི་འགྲོ་བ་ན། །གྲུ་ན་འདུག་པའི་ཚོང་པ་ནི། །མདུང་ཐུང་རྣོན་པོས་བསད་པར་གྱུར། །ལས་ཀྱི་རྣམ་པར་སྨིན་པ་དེས། །དམྱལ་བ་རྣམས་སུ་ཡུན་རིངས་འཕངས། །དེ་ཡི་ལས་ཀྱི་ལྷག་མས་ངའི། །ཞབས་ལ་ཚལ་པས་ཟུག་པར་གྱུར། །སྔོན་ནི་ཉ་པའི་གྲོང་ཁྱེར་གྱི། །ཉ་པའི་བུར་ནི་གྱུར་པ་ན། །ཉ་རྣམས་གསོད་པར་བྱེད་པ་དང༌། །ཡིད་དགའ་བ་ནི་སྐྱེས་པར་གྱུར། །ལས་ཀྱི་རྣམ་པར་སྨིན་པ་དེས། །ང་ནི་དམྱལ་བར་ཡུན་རིངས་འཕངས། །རབ་ཏུ་ཚ་དང་ཐིག་ནག་དང༌། །སྡུག་བསྔལ་མང་པོ་མྱོང་བར་གྱུར། །དེ་ནས་ལས་ཀྱི་ལྷག་མས་ནི། །གང་གི་ཚེ་ན་འཕགས་
སྐྱེས་པོས། །ཤཱཀྱ་རྣམས་ནི་གསོད་པ་ན། །ཀླད་པ་མི་བཟད་ནད་ཀྱིས་ཐེབས། །རྣམ་པར་གཟིགས་ཀྱི་གསུང་རབ་ཀྱི། །ཉན་ཐོས་ཡོངས་སུ་སྨད་བྱས་ཏེ། །ཁྱེད་ནི་ནས་དག་ཟ་བར་འོས། །ཁྱེད་ལ་འབྲས་ནི་མི་རིགས་ཞེས། །ངག་གིས་ཉེས་པར་སྤྱད་པ་དང༌། །ལས་ཀྱི་རྣམ་པར་སྨིན་པ་དེས། །དམྱལ་བ་ཐིག་ནག་རྣམས་སུ་ནི། །སྡུག་བསྔལ་མང་པོ་ཉམས་སུ་མྱོང༌། །དེ་ནས་ལས་ཀྱི་ལྷག་མས་ནི། །དགྲ་མཐར་དབྱར་ནི་གནས་བཅས་ཏེ། །བྲམ་ཟེ་ཡིས་ནི་སྤྱན་དྲངས་ཚེ། །ཟླ་བ་གསུམ་དུ་ནས་དག་ཟོས། །ང་ནི་སྨན་པར་གྱུར་པ་ན། །ཚོང་དཔོན་བུ་ཕོ་འཁྲུར་འཇུག་ཚེ། །ནད་ཀྱིས་སྡུག་བསྔལ་གྱུར་པ་ལ། །སྨན་མ་ཡིན་པ་ངས་བྱིན་ནོ། །ལས་ཀྱི་རྣམ་པར་སྨིན་པ་དེས། །སྡུག་བསྔལ་མང་པོ་ཉམས་སུ་མྱོང༌། །དེ་ནས་ལས་ཀྱི་ལྷག་མས་ནི། །དེ་འདྲའི་འཁྲུ་བའི་ནད་ཀྱིས་ཐེབས། །སྔོན་གྱི་ཚེ་རབས་གཞན་རྣམས་སུ། །ང་ནི་མཐུ་ཅན་གྱད་གྱུར་ཚེ། །སྟོབས་དག་འགྱེད་པར་བྱེད་པ་ན། །ངས་ནི་གྱད་ཀྱི་བུ་ཞིག་བསད། །ལས་ཀྱི་རྣམ་པར་སྨིན་པ་དེས། །སྡུག་བསྔལ་མང་པོ་ཉམས་སུ་མྱོང༌། །དེ་ནས་ལས་ཀྱི་ལྷག་མས་ནི། །འདི་ན་ང་ཡི་རྒྱབ་བསྙུང་ངོ༌། །སྔོན་ནི་ངན་སྤོང་བུར་གྱུར་པ། །དགའ་སྐྱོང་ལ་ནི་སྨྲས་པ་ནི། །མགོ་རེག་ངས་མཐོང་ཅི་ཞིག་བྱ། །འདི་ལ་བྱང་ཆུབ་ཡོད་མ་ཡིན། །ངག་གིས་ཉེས་པར་སྤྱོད་པ་དང༌། །ལས་ཀྱི་རྣམ་པར་སྨིན་པ་དེས། །འདིར་ཡང་མིར་ནི་འོངས་པ་ན། །ཁྱིམ་མེད་པར་ནི་རབ་བྱུང་ནས། །བྱང་ཆུབ་མཆོག་ནི་འདོད་པའི་ཕྱིར། །ལྟེང་རྒྱས་འགྲམ་དུ་ལོ་དྲུག་ཏུ། །མཆོག་ཏུ་དཀའ་བ་སྤྱད་པ་ངས། །སྡུག་བསྔལ་མང་པོ་ཉམས་སུ་མྱོང༌། །སེམས་ཅན་ཀུན་གྱི་རབ་མཆོག་གིས། །ཆོས་ཀྱི་དམ་པ་ཐུགས་ཆུད་ནས། །སྡིག་པའི་ལས་ནི་གང་མཛད་པ། །ཚོགས་ཀྱི་མཆོག་ལ་བཀའ་སྩལ་ཏོ། །ཐམས་ཅད་ཟིལ་གནོན་སྟོབས་བརྙེས་ཀྱིས། །དགེ་སློང་དགེ་འདུན་གུང་བཞུགས་ནས། །མ་དྲོས་པ་ཡི་མཚོ་ཆེན་དུ། །ཉིད་ཀྱི་ཕྲིན་ལས་
ལུང་བསྟན་ཏོ། །དེ་བཞིན་གཤེགས་པའི་ལེའུའོ།། །།སྡོམ་ནི། གནས་འཇོག་སྦྲང་རྩི་ཅན་དང་ནི། །རྒྱུ་ཅན་ཀཽཎྜི་ཉ་ཉེ་བ་འཁོར། །འོད་བྱེད་དང་ནི་ནམ་གྲུ་སྟེ། །ཕྱི་མ་བདེ་བར་གཤེགས་པ་ཡིན། །མ་དྲོས་པའི་ཚིགས་སུ་བཅད་པའོ། །དེ་ནས་བཅོམ་ལྡན་འདས་དགྲ་བཅོམ་པ་ལྔ་བརྒྱ་དང་ཐབས་ཅིག་ཏུ་མཚོ་ཆེན་པོ་མ་དྲོས་པར་ཕྲིན་ལས་ཀྱི་རྒྱུ་བ་ལུང་བསྟན་ནས་མ་དྲོས་པ་ནས་མི་སྣང་བར་མཛད་དེ། མཉན་ཡོད་ཀྱི་རི་དགས་འཛིན་གྱི་མའི་སྔོན་གྱི་ཀུན་དགའ་ར་བའི་ཁང་བཟངས་ན་བཞུགས་སོ། །རི་དགས་འཛིན་གྱི་མ་ས་གས། བཅོམ་ལྡན་འདས་མཚོ་ཆེན་པོ་མ་དྲོས་པ་ནས་མི་སྣང་བར་མཛད་དེ། མཉན་ཡོད་དུ་གཤེགས་ནས་མཉན་ཡོད་ཀྱི་བདག་གི་ཁང་བཟངས་ཁོ་ན་ན་བཞུགས་སོ་ཞེས་ཐོས་སོ། །ཐོས་ནས་ཀྱང་མཉན་ཡོད་ནས་བྱུང་ནས་བཅོམ་ལྡན་འདས་གང་ན་བ་དེར་སོང་སྟེ་ཞེས་བྱ་བ་ནས་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་ནོ། །དེ་ནས་རི་དགས་འཛིན་གྱི་མ་ས་ག་སྟན་ལས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཚོ་ཆེན་པོ་མ་དྲོས་པར་རང་རང་གི་ལས་ཀྱི་རྒྱུ་བ་ལུང་བསྟན་པའི་དགྲ་བཅོམ་པ་ལྔ་བརྒྱ་གང་དག་ལགས་པ་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན། བཅོམ་ལྡན་འདས་ཀྱིས་གནང་བར་མཛད་དུ་གསོལ། །རི་དགས་འཛིན་གྱི་མ་ས་གས་གནང་བར་རིག་ནས་ཞེས་བྱ་བ་ནས། བཅོམ་ལྡན་འདས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་ཞེས་བྱ་བའི་བར་གོང་མ་བཞིན་དུ་སྟེ། སྟན་ཆེས་དམའ་བ་ཞིག་བླངས་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་རི་དགས་འཛིན་གྱི་མ་ས་ག་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་
དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་ནས་གཙུག་ལག་ཁང་དུ་བྱོན་པ་དང་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་རི་དགས་འཛིན་གྱི་མ་ས་ག་ལ་མ་རྫོགས་པ་ཡོད་དེ། དེས་དགེ་སློང་གི་དགེ་འདུན་སྤྱན་དྲངས་ཏེ་གདུགས་ཚོད་གསོལ་ན། འོན་ཀྱང་དགེ་འདུན་གྱི་ཆེད་དུ་ཡོན་མ་ཕུལ་ལོ། །དེ་ནས་བཅོམ་ལྡན་འདས་ཀོ་ས་ལའི་ལྗོངས་རྒྱུ་ཞིང་གཤེགས་པ་ན། གྲོང་ཁྱེར་ཐིགས་པ་ཅན་དུ་བྱོན་ནས། གྲོང་ཁྱེར་ཐིགས་པ་ཅན་གྱི་བྱང་ཕྱོགས་ཀྱི་གྲོང་ཤིང་ཤ་པའི་ཚལ་ན་བཞུགས་སོ། །གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཀོ་ས་ལ་ནས་ཞེས་བྱ་བ་ནས་ཤིང་ཤ་པའི་ཚལ་ན་བཞུགས་སོ་ཞེས་ཐོས་སོ་བྱ་བའི་བར་གོང་མ་བཞིན་དུའོ། །ཐོས་ནས་ཀྱང་ཚོགས་ནས་ཚོགས་དང་ཁྱུ་ནས་ཁྱུར་ཕྲད་ཅིང་འདུས་ཏེ་གྲོང་ཁྱེར་ཐིགས་པ་ཅན་ནས་བྱུང་ནས། བཅོམ་ལྡན་འདས་གང་ན་བ་དེར་དོང་སྟེ་ལྷགས་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཞེས་བྱ་བ་ནས་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་ཅག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ༌། །དེ་ནས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཅང་མི་གསུང་པས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་
འདས་ཀྱི་སྤྱན་སྔ་ནས་དོང་ངོ༌། །དེ་ནས་ཡི་དགས་རུས་གོང་སྦྲེལ་བ་བསྒྲེང་བ་ལྟ་བུ་རང་གི་སྐྲས་ཡོག་པ་ལྟོ་རི་རབ་ཙམ། ཁ་ཁབ་ཀྱི་མིག་ཙམ་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་ལྔ་བརྒྱ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང༌། བཅོམ་ལྡན་འདས་ལ་ཀུན་ནས་ཡོངས་སུ་བསྐོར་ཏེ་འདུག་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་འདི་དག་ནི་བདག་ཅག་གི་ཉེ་དུ་ར་གྱུར་པ་ལགས་ན། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་ཅག་ཁོ་ནའི་མིང་ནས་ཡོན་བསྔོ་བ་མཛད་དུ་སོལ། །བཅོམ་ལྡན་འདས་ཀྱིས་བཀའ་སྩལ་པ། ངས་དམ་ཞིག་བཅས་ཏེ། གལ་ཏེ་ཁྱེད་ཅག་ཆ་བྱད་འདི་ཉིད་ཀྱིས་ཡོན་སྔོ་བ་བྱེད་པའི་ཚེ་འོང་ན་ནི་ཁྱེད་ཅག་གི་མིང་ནས་ཡོན་བསྔོ་བར་བྱའོ། །དེ་རྣམས་ཀྱིས་གསོལ་པ། བཅོམ་ལྡན་འདས་གཡར་ཚ་ལགས་ན་ཇི་ལྟར་མཆི་ལགས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པས་བཀའ་སྩལ་པ། ངོ་ཚ་མེད་ལ་ངོ་ཚ་བྱེད། །ངོ་ཚ་བ་ལ་ངོ་མི་ཚ། །འཇིགས་པ་མེད་ལ་འཇིགས་པར་ལྟ། །འཇིགས་པ་ལ་ནི་མི་འཇིགས་ལྟ། །ལོག་པའི་ལྟ་བ་བླངས་པས་ན། །སེམས་ཅན་རྣམས་ནི་ངན་འགྲོར་འགྲོ། །ངོ་ཚ་བ་ལ་ངོ་ཚ་དང༌། །ངོ་ཚ་མེད་ལ་ངོ་མི་ཚ། །མི་འཇིགས་པ་ལ་མི་འཇིགས་ལྟ། །འཇིགས་པ་ལ་ནི་འཇིགས་ལྟ་བའི། །ཡང་དག་ལྟ་བ་བླངས་པ་ཡིས། །སེམས་ཅན་རྣམས་ནི་བདེ་འགྲོར་འགྲོ། །དེ་རྣམས་ཀྱིས་གསོལ་པ། བཅོམ་ལྡན་འདས་གལ་ཏེ་དེ་ལྟ་ན་མཆི་ལགས་སོ། །དེ་ནས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་དེ་ཉིད་ཀྱི་ནུབ་མོ་ནས་ གཙང ་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ཞེས་བྱ་བ་ནས། སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །ཡི་དགས་ལྔ་བརྒྱ་པོ་དེ་དག་འོངས་པ་དང༌། དེ་
ནས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང༌། ཁྱིམ་བདག་རྣམས་ཀྱིས་ཡི་དགས་རྣམས་མཐོང་ནས་འབྲོས་པར་བརྩམས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཤེས་ལྡན་དག་ཅིའི་ཕྱིར་འབྲོས། དེ་རྣམས་ཀྱིས་གསོལ་པ། བཅོམ་ལྡན་འདས་ཡི་དགས་འོ་ནི་དག་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཚུར་ཤོག་འདི་དག་ནི་ཁྱེད་ཅག་གི་ཉེ་དུ་ཡིན་ནོ། །གལ་ཏེ་ཁྱེད་ཅག་གིས་གནང་ན་ངས་འདི་རྣམས་ཀྱི་མིང་གིས་ཡོན་བསྔོའོ། །དེ་རྣམས་ཀྱིས་གསོལ་པ། བཅོམ་ལྡན་འདས་རུང་ལགས་སོ། །དེ་ནས་བཅོམ་ལྡན་འདས་ཀྱིས་ཡན་ལག་ལྔ་དང་ལྡན་པའི་གསུང་དབྱངས་ཀྱིས་དེ་རྣམས་ཀྱི་མིང་ནས་ཡོན་བསྔོ་བ་མཛད་དེ། སྦྱིན་པ་འདི་ཡི་བསོད་ནམས་གང༌། །དེ་ནི་ཡི་དགས་རྗེས་འགྲོ་ཞིང༌། །འདི་དག་ཡི་དགས་འཇིག་རྟེན་ནི། །མི་བཟང་བ་ནས་མྱུར་ལྡང་ཤོག །འདི་ཡིས་གོས་དང་སྐོམ་དང་ཟས། །གནས་མལ་རྣམ་པ་སྣ་ཚོགས་པ། །དུས་ཀུན་ཏུ་ནི་མི་ཟད་པར། །དེ་རྣམས་ལ་ནི་གྲུབ་པར་ཤོག །དེ་ནས་བཅོམ་ལྡན་འདས་ཀྱིས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང༌། ཁྱིམ་བདག་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང༌། ཁྱིམ་བདག་རྣམས་རྟོག་ཁང་དུ་ལྷགས་ཤིང་ཚོགས་ནས་འདི་ལྟ་བུའི་སྐབས་ཀྱི་གཏམ་དག་གླེང་བར་བྱེད་དེ། ཀྱེ་དགེ་སྦྱོང་གཽ་ཏ་མ་ནི་འདོད་ཞེན་ཆེ་ཞིང་དེའི་ཉན་ཐོས་རྣམས་ཀྱང་འདོད་ཞེན་ཆེ་བ་ཡིན་ནོ། །ཁ་ཅིག་གིས་སྨྲས་པ། ཤེས་ལྡན་དག་དགེ་སྦྱོང་གཽ་ཏ་མ་ནི་འདོད་ཞེན་ཆུང་ཞིང་དེའི་ཉན་ཐོས་རྣམས་ཀྱང་འདོད་ཞེན་ཆུང་སྟེ། མུ་སྟེགས་ཅན་རྣམས་ནི་དེ་ལྟ་མ་ཡིན་ནོ། །དེའི་ཚེ་བྲམ་ཟེ་སྨྲ་འདོད་ཀྱི་སེང་གེ་ཞེས་བྱ་བ་འཁོར་དེ་ཉིད་དུ་འདུས་ཤིང་འདུག་པར་གྱུར་ཏོ། །དེ་ནས་བྲམ་ཟེ་སྨྲ་འདོད་ཀྱི་སེང་གེས་གྲོང་ཁྱེར་ཐིགས་པ་ཅན་གྱི་བྲམ་ཟེ་དང༌།
ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །དགེ་སྦྱོང་གཽ་ཏ་མ་འདོད་ཞེན་ཆེའམ་འདོད་ཞེན་ཆུང་བ་དང༌། དེའི་ཉན་ཐོས་རྣམས་འདོད་ཞེན་ཆེའམ། འདོད་ཞེན་ཆུང་བ་ངས་ཁྱེད་ཅག་ཡིད་ཆེས་པར་བྱའོ། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏམ་དགེ་སློང་གི་དགེ་འདུན་དང་ཐབས་ཅིག་ལ་བདག་གིས་བཅའ་བ་བུ་རམ་ཞིག་འབུལ་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་བྲམ་ཟེ་སྨྲ་འདོད་ཀྱི་སེང་གེ་ལ་ཅང་མི་གསུང་བས་གནང་ངོ༌། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ༌། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་སྨྲ་འདོད་ཀྱི་སེང་གེ་ཀླན་ཀ་ཚོལ་བས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་བཅའ་བ་བུ་རམ་ལ་སྤྱན་དྲངས་ཀྱིས། ཁྱེད་ཅག་ལས་གང་གིས་ཇི་ཙམ་ཡོག་པ་དེས་དེ་ཙམ་ཞིག་བླང་བར་བྱའོ། །བྲམ་ཟེ་སྨྲ་འདོད་ཀྱི་བུ་སེང་གེ་ལ་བུ་རམ་འཚོང་བའི་ཁང་པ་ལྔ་བརྒྱ་ཡོད་པ་ནས་དེས་བུ་རམ་གྱི་ཁང་པ་རེ་རེ་ནས་བུ་རམ་གྱི་སྣོད་བླངས་ཏེ། བུ་རམ་གྱི་སྣོད་ལྔ་བརྒྱ་ཁྱེར་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏ་མ་བུ་རམ་བསྡོགས་ལགས་ན། ཉན་ཐོས་ཀྱི་དགེ་འདུན་དང་ཐབས་ཅིག་ཏུ་བཞུགས་ཏེ། ལོངས་སྤྱད་དུ་གསོལ། དེ་ནས་བཅོམ་ལྡན་འདས་ཕྱག་དང་ལྷུང་བཟེད་བཅབས་ནས་དགེ་སློང་གི་དགེ་འདུན་གྱི་གུད་ལ་གདན་བཤམས་པ་ཉིད་ལ་བཞུགས་སོ། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བུ་རམ་གྱི་སྣོད་ཅིག་བླངས་ཏེ་བྲིམ་པར་བརྩམས་པ་དང༌། བཅོམ་ལྡན་འདས་ཀྱིས་ཇི་ལྟར་དགེ་སློང་གི་དགེ་འདུན་གྱི་བར་དུ་བྲིམས་ཀྱང་ལྷག་པས་ཐམས་ཅད་དེ་ཁོ་ན་བཞིན་དུ་འདུག་པ་དེ་ལྟར་བྱིན་གྱིས་བརླབས་སོ། །དེ་ནས་བྲམ་ཟེ་སྨྲ་འདོད་ཀྱི་སེང་གེ་མངོན་པར་
དད་པར་གྱུར་ཏོ། །དེ་ནས་དེ་དད་པ་སྐྱེས་ནས་ཕྱོགས་མཐའ་དག་ཏུ་སྒྲ་བསྒྲགས་པ། ཤེས་ལྡན་དག་དགེ་སྦྱོང་གཽ་ཏ་མ་ནི་འདོད་ཞེན་ཆུང་ཞིང་དེའི་ཉན་ཐོས་རྣམས་ཀྱང་འདོད་ཞེན་ཆུང་བ་ཡིན་ནོ། །དེ་ནས་དེས་མུ་སྟེགས་ཅན་རྣམས་བུ་རམ་ལ་ལོངས་སྤྱོད་དུ་གཞུག་བའི་ཕྱིར་མགྲོན་དུ་བོས་པ་དང༌། དེ་རྣམས་ཀྱིས་བུ་རམ་བག་མེད་པར་བླངས་ནས་ཁ་ཅིག་གིས་ནི་ལོངས་སྤྱོད་དོ། ཁ་ཅིག་གིས་ནི་སྣོད་བཀང་ནས་བོར་ཞིང་ཁྱེར་ཏེ་དོང་ངོ༌། །དེ་ནས་བྲམ་ཟེ་སྨྲ་འདོད་ཀྱི་སེང་གེས་སྨྲས་པ། སྐྱེས་བུ་བླུན་པོ་ཁྱེད་ཅག་ཁོ་ན་འདོད་ཞེན་ཆེ་བ་ཡིན་ལ་དགེ་སྦྱོང་གཽ་ཏ་མ་ནི་འདོད་ཞེན་ཆུང་ཞིང་དེའི་ཉན་ཐོས་རྣམས་ཀྱང་འདོད་ཞེན་ཆུང་བ་ཡིན་ནོ་ཞེས་སྨྲས་ནས། བཅོམ་ལྡན་འདས་ལ་ལྷག་པར་ཡང་མངོན་པར་དད་པར་གྱུར་ཏེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་དང་ལྷན་ཅིག མངོན་དུ་ཞེས་བྱ་བའི་བར་གོང་མ་བཞིན་དུ་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལེགས་པར་གསུངས་པའི་ཆོས་འདུལ་བ་ལ་བདག་ཅེས་བྱ་བ་ནས་ཚངས་པར་སྤྱད་པར་བགྱིའོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བ་ནས་དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་གསུངས་པ་ཞེས་བྱ་བ་ནས། སངས་རྒྱས་དགོངས་པས་ལུས་གཟུགས་བཀབ་པར་གྱུར་ཅེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དུས་སམ་དུས་མ་ཡིན་པའམ། ན་བའམ་མི་ན་བས། བུ་རམ་ལ་ལོངས་སྤྱད་པར་བྱ་སྟེ། འདི་ལ་འགྱོད་པར་ནི་མི་བྱའོ། །ཚེ་དང་ལྡན་པ་སྨྲ་འདོད་ཀྱི་སེང་གེ་རོ་མྱགས་པའི་དྲི་མི་ཞིམ་པས་སེམས་རྩེ་གཅིག་པ་ཉིད་མ་ཐོབ་ནས་བཅོམ་ལྡན་འདས་ཀྱིས་དགོངས་པ། དགེ་སློང་སྨྲ་འདོད་ཀྱི་སེང་གེ་ནི། སྲིད་པ་ཐ་མ་ཡིན་ན་ཅིའི་ཕྱིར་བདེན་པ་མ་མཐོང་སྙམ་དུ་དགོངས་ན། ལུས་རུལ་པའི་དྲི་མི་ཞིམ་པ་ལས་གྱུར་པར་གཟིགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་
དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་སྨྲ་འདོད་ཀྱི་སེང་གེའི་གཙུག་ལག་ཁང་དྲི་དང་མེ་ཏོག་གི་ཕྲེང་བ་དང༌། བདུག་པ་དང༌། ཕྱེ་མ་རྣམས་ཀྱིས་གཏོར་ལ་གནས་མལ་ལ་ཡང་བདུག་པས་བདུག་ཅིང་མེ་ཏོག་དྲི་ཞིམ་པོས་བརྒྱན་པའི་མེ་ཏོག་གི་གདུགས་བྲེས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ། །ཇི་ཙམ་ན་དེ་བསོད་སྙོམས་ལ་སོང་བ་དེའི་བར་དུ་དེའི་གཙུག་ལག་ཁང་དུ་སོང་ནས་བཅོམ་ལྡན་འདས་ཀྱིས་བཀའ་སྩལ་བ་བཞིན་ཐམས་ཅད་བྱས་སོ། །དེ་ནས་ཚེ་དང་ལྡན་པ་སྨྲ་འདོད་ཀྱི་སེང་གེ་བསོད་སྙོམས་ལ་བརྒྱུས་ནས་གཙུག་ལག་ཁང་དུ་འོངས་པ་དང་ལྷའི་འབྱོར་པ་མཐོང་ནས། དེ་ནས་དགའ་བའི་ཡིད་ཀྱིས་བསོད་སྙོམས་ལ་ལོངས་སྤྱད་དེ་ཟས་ཀྱི་བྱ་བ་བྱས་ནས་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ཏེ་གཙུག་ལག་ཁང་དུ་ཞུགས་ནས། སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་མངོན་དུ་ཕྱོགས་པར་དེར་བཞག་སྟེ་འདུག་པ་དང༌། དྲི་ཞིམ་པོ་མནམ་ནས་དེའི་སེམས་མཉམ་པར་བཞག་པར་སྐྱེས་སོ། །དེ་ནས་དེས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱས་ནས་ཞེས་བྱ་བ་ནས། མངོན་དུ་སྨྲ་བར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་དགེ་སློང་དང་ངའི་ཉན་ཐོས་སྡུག་པས་རྣམ་པར་གྲོལ་བ་རྣམས་ཀྱི་མཆོག་ནི་འདི་ལྟ་སྟེ། དགེ་སློང་སྨྲ་འདོད་ཀྱི་སེང་གེ་འདི་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དགེ་སློང་གཞན་རྣམས་ནི་མི་སྡུག་པས་རྣམ་པར་གྲོལ་ན། ཚེ་དང་ལྡན་པ་སྨྲ་འདོད་ཀྱི་སེང་གེ་སྡུག་པས་རྣམ་པར་གྲོལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ནི་ཚེ་རབས་ལྔ་བརྒྱ་བཏུད་མར་སུམ་བཅུ་རྩ་གསུམ་གྱི་ལྷ་རྣམས་ནས་ཤི་འཕོས་ཤིང་དེ་ཉིད་དུ་སྐྱེས་ཏེ། ད་ལྟར་
གྱི་སྲིད་པ་ཐ་མ་མི་རྣམས་སུ་སྐྱེས་པ་ན་ལུས་རུལ་བའི་དྲི་མནམ་པས་སེམས་རྩེ་གཅིག་པ་མ་གྲུབ་པའོ། །དྲི་ཞིམ་པོའི་དྲི་མནམ་པ་དང༌། སེམས་མཉམ་པ་ཐོབ་ནས་སྡུག་པས་རྣམ་པར་གྲོལ་བར་གྱུར་ཏོ། །གལ་ཏེ་འདི་ལ་ཐབས་འདི་མ་བྱས་པར་གྱུར་ན། དྲོ་བར་གྱུར་པ་ཡང་འདིས་བསྐྱེད་པར་མི་འགྱུར་རོ། །དེ་ལྟ་བས་ན་རྗེས་སུ་གནང་སྟེ། གཞན་གང་ཞིག་སྡུག་པ་འདི་ལྟ་བུས་རྣམ་པར་གྲོལ་བར་འགྱུར་བ་དེས་རིམ་པ་དེ་ལྟ་བུ་བྱ་སྟེ། འདི་ལ་འགྱོད་པར་ནི་མི་བྱའོ། །དེ་ནས་བཅོམ་ལྡན་འདས་ཡུལ་སྤོང་བྱེད་ནས་ལྗོངས་རྒྱུ་ཞིང་གཤེགས་ཏེ་ཡངས་པ་ཅན་དུ་བྱོན་ནས། ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས་སོ། །ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཡུལ་སྤོང་བྱེད་ནས་ལྗོངས་རྒྱུ་ཞིང་གཤེགས་ཏེ་ཡངས་པ་ཅན་དུ་བྱོན་ནས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་གཅིག་ཏུ་འདུས་ནས་སྨྲས་པ། ཤེས་ལྡན་དག་བཅོམ་ལྡན་འདས་ཡུལ་སྤོང་བྱེད་ནས་ལྗོངས་རྒྱུ་ཞིང་གཤེགས་ཏེ་ཡངས་པ་ཅན་དུ་བྱོན་ནས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས་སོ་ཞེས་གྲག་གིས། གལ་ཏེ་བདག་ཅག་རེ་རེ་ནས་བཅོམ་ལྡན་འདས་སྤྱན་དྲངས་ཏེ་གདུགས་ཚོད་གསོལ་ན་ནི། བཅོམ་ལྡན་འདས་སླར་གཤེགས་དང༌། གཞན་གྱི་སྐབས་མི་རྙེད་པར་འགྱུར་བས་དེ་ལ་ཁྲིམས་ཤིག་བཅས་ཏེ། ཅི་ནས་ཀྱང་ཚོགས་ཤིང་འདུས་པ་ཁོ་ནས་བཅོམ་ལྡན་འདས་གདུགས་ཚོད་གསོལ་གྱི་མི་གཅིག་པུས་ནི་མ་ཡིན་ནོ་ཞེས་དེ་རྣམས་ཀྱིས་ཁྲིམས་སུ་བཅའ་བ་དག་བྱས་ནས་བཞག་གོ །དེའི་ཚེ་ཡངས་པ་ཅན་གྱི་བསོད་ནམས་ཆེན་པོ་དང་ལྡན་པ་བཞི་ཞིག་གནས་ཏེ། ནོར་ཅན་དང༌། ནོར་ཅན་གྱི་ཆུང་མ་དང༌། ནོར་ཅན་གྱི་བུ་དང༌། ནོར་ཅན་གྱི་མནའ་མའོ། །དེ་དག་གི་ཁྱིམ་དུ་ནི་ལྷ་དང་མི་རྣམས་ཀྱི་གཡང་བབས་པར་གྱུར་ཏོ། །དེ་རྣམས་ཀྱིས་ཁྲིམས་སུ་བཅས་པ་དེ་མ་ཐོས་པར་ཁྱིམ་བདག་
ནོར་ཅན་གྱིས་བཅོམ་ལྡན་འདས་ཡུལ་སྤོང་བྱེད་ནས་ལྗོངས་རྒྱུ་ཞིང་གཤེགས་ཏེ་ཡངས་པ་ཅན་དུ་བྱོན་ནས། ཡངས་པ་ཅན་གྱི་སྤྲེའུ་རྫིང་གི་འབྲམ་ན་ཁང་པ་བརྩེགས་པའི་གནས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཡངས་པ་ཅན་ནས་བྱུང་ནས་བཅོམ་ལྡན་འདས་གང་ན་བ་དེར་སོང་སྟེ་ཞེས་བྱ་བ་ནས་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཁྱིམ་བདག་ནོར་ཅན་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་ཁྱིམ་བདག་ནོར་ཅན་ལ་གནང་ངོ༌། །དེ་ནས་ཁྱིམ་བདག་ནོར་ཅན་གྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ༌། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཡངས་པ་ཅན་ནས་བྱུང་ནས་བཅོམ་ལྡན་འདས་གང་ན་བ་དེར་སོང་སྟེ་ཞེས་བྱ་བ་ནས་བཅོམ་ལྡན་འདས་དགེ་སློང་གི་དགེ་འདུན་རྣམས་དང་ཐབས་ཅིག་ཏུ་སང་བདག་ཅག་གི་སྡུམ་པར་གདུགས་ཚོད་སྒྱོར་ཞིང་མཆིས་ན་གནང་བར་མཛད་དུ་གསོལ་ཞེས་བྱ་བའི་བར་གོང་མ་བཞིན་དུའོ། །བཅོམ་ལྡན་འདས་ཀྱིས་བཀའ་སྩལ་པ། གནས་འཇོག་གི་བུ་དག་ང་སྔར་ཁྱིམ་བདག་ནོར་ཅན་གྱིས་སྤྱན་དྲངས་ཟིན་ཏོ། །དེ་རྣམས་ཀྱིས་སྨྲས་པ། ཤེས་ལྡན་དག་ཁྱིམ་བདག་ནོར་ཅན་གྱིས་ནི་ཚོགས་ཀྱི་ཁྲིམས་བཅས་པ་ལས་འདས་པར་བྱས་སོ། ཁ་ཅིག་དག་གིས་སྨྲས་པ། ཅི་སྟེ་དེ་འདས་པར་བྱེད། གདོན་མི་ཟ་བར་དེས་ཁྲིམས་བཅས་པ་མ་ཐོས་སོ། །འོན་ཀྱང་བདག་ཅག་པས་དེ་ནི་སྐྱེས་བུ་དམ་པ་ཡིན་པས་གདུགས་ཚོད་གསོལ་དུ་ཆུག་བདག་ཅག་གིས་ནི་
གནངས་གདུགས་ཚོང་གསོལ་ལོ། །དེ་ནས་ཚེ་དང་ལྡན་པ་ཀུན་དགའ་བོ་ནང་བར་སྔར་ལངས་ཏེ། ལྷུང་བཟེད་དང་ཆོས་གོས་ཐོགས་ནས། ཁྱིམ་བདག་ནོར་ཅན་གྱི་ཁྱིམ་གང་ན་བ་དེར་སོང་སྟེ་ཕྱིན་ནས་ཤར་སྒོ་ནས་ཞུགས་པ་དང༌། ཇི་ཙམ་ན་གདན་མ་བཤམས་ཤིང་ཞལ་ཟས་རྣམས་སྟ་གོན་མ་བྱས་པ་མཐོང་ནས། དེ་ནས་ཁྱིམ་བདག་ནོར་ཅན་ལ་འདི་སྐད་ཅེས་སྨྲས་སོ། ཁྱིམ་བདག་ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་སྤྱན་དྲངས་ནས་སྙིང་ལས་ཆུང་དུས་གནས་སམ། དེས་སྨྲས་པ། འཕགས་པ་ཀུན་དགའ་བོ་ཅི་སྟེ་དེ་སྐད་གསུང༌། ཁྱིམ་བདག་གདན་མ་བཤམས་ཤིང་ཞལ་ཟས་རྣམས་སྟ་གོན་མ་བྱས་པ་མཐོང་ངོ༌། །འཕགས་པ་ཁྱོད་ཆབ་སྒོ་གང་ནས་ཞུགས་ཁྱིམ་བདག་ཤར་ནས་སོ། །འཕགས་པ་ལྷོ་ནས་ཞུགས་ཤིག །དེས་ཞུགས་པ་ལས་ཇི་ཙམ་ན་ལྷའི་གདན་བཤམས་ཤིང་ལྷའི་ཞལ་ཟས་རྣམས་སྟ་གོན་བྱས་པ་ཡང་མཐོང་ངོ༌། །མཐོང་ནས་ཀྱང་ཤིན་ཏུ་ངོ་མཚར་སྐྱེས་པར་གྱུར་ཏོ། །དེ་ནས་ཁྱིམ་བདག་ནོར་ཅན་གྱི་སྤྱན་འདྲེན་གྱིས་བཅོམ་ལྡན་འདས་ལ་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ཤིང་མཆིས་ན། བཅོམ་ལྡན་འདས་ད་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་བྱ་བ་ནས་བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས། སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ནོར་ཅན་གྱི་ཆུང་མ་སྟན་ལས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་རྣམས་དང་ཐབས་ཅིག་ཏུ་སངས་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་ནོར་ཅན་གྱི་ཆུང་མ་ལ་གནང་ངོ༌། །གནང་ནས་ཀྱང་ཁྱིམ་བདག་ནོར་ཅན་ལ་ཆོས་བཤད་པ་མཛད་
ནས་གདན་ལས་བཞེངས་ཏེ་གཤེགས་སོ། །ནོར་ཅན་གྱི་ཆུང་མས་ཀྱང་ཞལ་ཟས་རྣམས་སྟ་གོན་བྱས་སོ། །དེ་ནས་ཚེ་དང་ལྡན་པ་ཀུན་དགའ་བོ་ནང་པར་སྔར་ལངས་ཏེ་ལྷུང་བཟེད་དང་ཆོས་གོས་ཐོགས་ནས་ཁྱིམ་བདག་ནོར་ཅན་གྱི་ཁྱིམ་གང་ན་བ་དེར་སོང་སྟེ་ཕྱིན་ནས་ལྷོ་སྒོ་ནས་ཞུགས་ན་གདན་མ་བཤམས་ཤིང་ཞལ་ཟས་རྣམས་ཀྱང་སྟ་གོན་མ་བྱས་པར་མཐོང་ངོ༌། །མཐོང་ནས་ཀྱང་ནོར་ཅན་གྱི་ཆུང་མ་ལ་འདི་སྐད་ཅེས་སྨྲས་སོ། །ཁྱིམ་བདག་གི་ཆུང་མ་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་ནས་ཅི་སྙིང་ལས་ཆུང་དུས་གནས་སམ་དེས་སྨྲས་པ། འཕགས་པ་ཅི་སྟེ་དེ་སྐད་གསུང་གདན་མ་བཤམས་ཤིང་ཞལ་ཟས་རྣམས་ཀྱང་སྟ་གོན་མ་བྱས་པ་མཐོང་ངོ༌། །འཕགས་པ་ཁྱོད་ཆབ་སྒོ་གང་ནས་ཞུགས་ལྷོ་ནས་སོ། །འཕགས་པ་ཤར་ནས་ཞུགས་ཤིག །ཇི་ཙམ་ན་གདན་བཟང་པོ་བཤམས་ཤིང་ཞལ་ཟས་བསོད་པ་སྟ་གོན་བྱས་པ་ཡང་མཐོང་ངོ༌། །མཐོང་ནས་ཀྱང་ཤིན་ཏུ་ངོ་མཚར་སྐྱེས་པར་གྱུར་ཏོ། །དེ་ནས་ནོར་ཅན་གྱི་ཆུང་མའི་སྤྱན་འདྲེན་གྱིས་བཅོམ་ལྡན་འདས་ལ་དུས་ཚོད་གསོལ་པ། བཙུན་པ་བཅོམ་ལྡན་འདས་གདུགས་ཚོད་བཤམས་ལགས་ཤིང་མཆིས་ན། བཅོམ་ལྡན་འདས་ད་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་བྱ་བ་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས། སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ནོར་ཅན་གྱི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་ནོར་ཅན་གྱི་བུ་ལ་གནང་ངོ༌། །དེ་ནས་བཅོམ་ལྡན་འདས་ཀྱིས་ནོར་ཅན་གྱི་ཆུང་
མ་ལ་ཆོས་བཤད་པ་མཛད་ནས་གཤེགས་སོ། །ནོར་ཅན་གྱི་བུས་ཀྱང་ གཙང ་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་སོ། །དེ་ནས་ཚེ་དང་ལྡན་པ་ཀུན་དགའ་བོ་ནང་པར་སྔར་ལངས་ཏེ་ལྷུང་བཟེད་དང་ཆོས་གོས་ཐོགས་ཏེ་ནོར་ཅན་གྱི་ཁྱིམ་གང་ན་བ་དེར་སོང་སྟེ་ཕྱིན་ནས་ལྷོ་སྒོ་ནས་ཞུགས་ན་གདན་མ་བཤམས་ཤིང་ཞལ་ཟས་སྟ་གོན་མ་བྱས་པ་མཐོང་ངོ༌། །མཐོང་ནས་ཀྱང་ནོར་ཅན་གྱི་བུ་ལ་འདི་སྐད་ཅེས་སྨྲས་སོ། །ཁྱིམ་བདག་གི་བུ་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་ནས་ཅི་སྙིང་ལས་ཆུང་དུས་གནས་སམ། དེས་སྨྲས་པ། འཕགས་པ་ཇི་སྟེ་དེ་སྐད་གསུང༌། གདན་མ་བཤམས་ཤིང་ཞལ་ཟས་སྟ་གོན་མ་བྱས་པ་མཐོང་ངོ༌། །འཕགས་པ་ཁྱོད་ཆབ་སྒོ་གང་ནས་ཞུགས་ལྷོ་ནས་སོ། །འཕགས་པ་ནུབ་ནས་ཞུགས་ཤིག །ཇི་ཙམ་ན་གདན་བཟང་པོ་བཤམས་ཤིང་ཞལ་ཟས་བསོད་པ་སྟ་གོན་བྱས་པ་ཡང་མཐོང་ངོ༌། །མཐོང་ནས་ཀྱང་ཤིན་ཏུ་ངོ་མཚར་སྐྱེས་པར་གྱུར་ཏོ། །དེ་ནས་ནོར་ཅན་གྱི་བུའི་སྤྱན་འདྲེན་གྱིས་བཅོམ་ལྡན་འདས་ལ་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ཤིང་མཆིས་ན་བཅོམ་ལྡན་འདས་ད་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་བྱ་བ་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས། སྟན་ཆེས་དམའ་བ་ཞིག་བླངས་ཏི་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ནོར་ཅན་གྱི་མནའ་མ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་ནོར་ཅན་གྱི་མནའ་མ་ལ་གནང་ངོ༌། །དེ་ནས་བཅོམ་ལྡན་འདས་ཀྱིས་ནོར་ཅན་གྱི་བུ་ལ་ཆོས་བཤད་པ་མཛད་ནས་གཤེགས་སོ། །དེ་ནས་ཡངས་པ་ཅན་གྱི་བྲམ་ཟེ་དང་
ཁྱིམ་བདག་རྣམས་བཅོམ་ལྡན་འདས་གང་ན་བ་དེར་སོང་སྟེ་ལྷགས་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང༌། བཅོམ་ལྡན་འདས་ཀྱིས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་གཏམ་གྱིས་ཞེས་བྱ་བ་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སངས་བདག་ཅག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གནས་འཇོག་གི་བུ་དག་ང་སྔར་ནོར་ཅན་གྱི་མནའ་མས་སྤྱན་དྲངས་ཟིན་ཏོ། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་རྔམ་ནས་སྨྲས་པ། ཤེས་ལྡན་དག་ནོར་ཅན་གཅིག་པུ་ལ་ནོར་ཡོད་ཀྱི་བདག་ཅག་ལ་མེད་དམ་ཅི་ན། དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཉི་མ་རེ་རེ་གདུགས་ཚོང་སྦྱོར་ཞིང་བདག་ཅག་ཁོ་ནས་སྐབས་མཐོབ་པར་གྱུར་ཏོ། །དེ་ལ་ཇི་ལྟར་བསྒྲུབ་པར་བྱ། གཞན་དག་གིས་སྨྲས་པ། གང་གི་ཚེ་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཟིན་ནས་གཤེགས་པར་གྱུར་པ་དེའི་ཚེ་དེའི་ཁྱིམ་རྡོ་བ་རེ་རེ་ནས་བཀོགས་ཏེ་གཞིག་གོ །དེ་ནས་ཚེ་དང་ལྡན་པ་ཀུན་དགའ་བོ་ནང་པར་སྔར་ལངས་ཏེ་ལྷུང་བཟེད་དང་ཆོས་གོས་ཐོགས་ནས་ཁྱིམ་བདག་ནོར་ཅན་གྱི་ཁྱིམ་གང་ན་བ་དེར་སོང་སྟེ་ཕྱིན་ནས་ནུབ་སྒོ་ནས་ཞུགས་ན་གདན་མ་བཤམས་ཤིང་ཞལ་ཟས་ཀྱང་སྟ་གོན་མ་བྱས་པ་མཐོང་ངོ༌། །མཐོང་ནས་ཀྱང་ནོར་ཅན་གྱི་མནའ་མ་ལ་འདི་སྐད་ཅེས་སྨྲས་སོ། །ནོར་ཅན་གྱི་མནའ་མ་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་སྤྱན་དྲངས་ནས་ཅི་སྙིང་ལས་ཆུང་དུས་གནས་སམ། དེས་སྨྲས་
པ། འཕགས་པ་ཅི་སྟེ་དེ་སྐད་གསུང༌། གདན་མ་བཤམས་ཤིང་ཞལ་ཟས་རྣམས་ཀྱང་སྟ་གོན་མ་བྱས་པ་མཐོང་ངོ༌། །འཕགས་པ་ཆབ་སྒོ་གང་ནས་ཞུགས་ནུབ་ནས་སོ། །འཕགས་པ་བྱང་ནས་ཞུགས་ཤིག །དེས་བྱང་ནས་ཞུགས་ནས་ཇི་ཙམ་ན་ལྷའི་གདན་བཤམས་ཤིང་ལྷའི་ཞལ་ཟས་སྟ་གོན་བྱས་པ་མཐོང་ངོ༌། །མཐོང་ནས་ཀྱང་ཤིན་ཏུ་ངོ་མཚར་སྐྱེས་པར་གྱུར་ཏོ། །དེ་ནས་ནོར་ཅན་གྱི་མནའ་མའི་སྤྱན་འདྲེན་གྱིས་བཅོམ་ལྡན་འདས་ལ་དུས་ཚོད་གསོལ་པ། བཙུན་པ་གདུགས་ཚོད་བཤམས་ལགས་ཤིང་མཆིས་ན་བཅོམ་ལྡན་འདས་ད་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་བྱ་བ་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་ཐམས་ཅད་འདུས་ནས་ཁྱིམ་བདག་ནོར་ཅན་གྱི་སྒོ་ན་འདུག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་ནོར་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཡངས་པ་ཅན་གྱི་ཚོགས་རྡམ་ནས་སྒོ་ན་འདུག་སྟེ་དེ་དག་གིས་ཁྱེད་ཅག་ལ་གནོད་པ་བྱས་པར་འགྱུར་དུ་འོང་གིས་སོང་ལ་བཟོད་པར་གསོལ་ཅིག །དེ་ཕྱིར་བྱུང་ནས་བཟོད་པར་གསོལ་བར་བརྩམས་པ་དང་དེ་རྣམས་ཀྱིས་སྨྲས་པ། ཁྱིམ་བདག་ཅི་ཁྱོད་གཅིག་པུ་ལ་ནོར་ཡོད་དམ། གང་གི་ཕྱིར་ཁྱོད་ཀྱིས་ཉིན་རེ་ཞིང་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཏེ་ཁོ་བོ་ཅག་གིས་སྐབས་མི་རྙེད་པར་བྱེད། དེས་སྨྲས་པ། ཤེས་ལྡན་དག་བདག་གིས་ཚོགས་ཀྱི་ཁྲིམས་སུ་བཅས་པ་མ་ཐོས་ཀྱིས། དེ་བས་ན་ཚོགས་ཀྱིས་བཟོད་པར་བྱ་བའི་རིགས་སོ། །གཞན་དག་གིས་སྨྲས་པ། ཤེས་ལྡན་དག་སྐྱེས་བུ་འདི་ནི་དམ་པ་ཡིན་པས་འདི་ལ་བཟོད་པར་བྱའོ་ཞེས་དེ་རྣམས་བཟོད་བར་གྱུར་པ་དང༌། དེ་སྨྲས་པ། གལ་ཏེ་དེ་ལྟ་ན་ནང་དུ་ཞུགས་ཤིག་དེ་རྣམས་ཁྱིམ་དུ་ཞུགས་པ་དང༌། གདན་བཟང་པོ་བཤམས་ཤིང་ཞལ་ཟས་བསོད་པ་སྟ་གོན་བྱས་པ་ཡང་མཐོང་ངོ༌། །མཐོང་ནས་ཀྱང་ཤིན་ཏུ་ངོ་མཚར་སྐྱེས་པར་གྱུར་ནས་སྨྲས་པ། ཁྱིམ་བདག་
ཁྱོད་འབའ་ཞིག་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་བར་འོས་ཀྱི། ཁོ་བོ་ཅག་ནི་མ་ཡིན་ནོ། །དེས་དེ་རྣམས་ལ་རིན་པོ་ཆེ་དག་བྱིན་པ་དང་དེ་རྣམས་ཀྱིས་མ་བླངས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ་དང༌། རིན་པོ་ཆེ་འདི་དག་ནི་རྙེད་པར་དཀའ་བ་ཡིན་གྱིས་ལོང་ཤིག །དེ་རྣམས་ཀྱིས་བླངས་པ་ལས་གང་གིས་ཅི་འདྲ་བ་བླངས་པ་དེའི་ཁ་དོག་དེ་འདྲ་བ་ཁོ་ནར་སྣང་བར་གྱུར་ཏོ། །དེ་ནས་ནོར་ཅན་གྱི་མནའ་མས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། གཙང ་ཞིང་བསོད་པའི་བཟའ་བ་དང་བཅའ་བ་དག་གིས་ཞེས་བྱ་བ་ནས་ཕྱག་བཅབས་ཏེ། ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་ནོར་ཅན་དང༌། ནོར་ཅན་གྱི་ཆུང་མ་དང༌། ནོར་ཅན་གྱི་བུ་དང༌། ནོར་ཅན་གྱི་མནའ་མ་རྣམས་ཀྱི་བསམ་པ་དང༌། བག་ལ་ཉལ་དང༌། ཁམས་དང༌། རང་བཞིན་མཁྱེན་ནས་གང་ཐོས་ན་ནོར་ཅན་དང༌། ནོར་ཅན་གྱི་ཆུང་མ་དང༌། ནོར་ཅན་གྱི་བུ་དང༌། ནོར་ཅན་གྱི་མནའ་མ་རྣམས་ཀྱིས་འཇིག་ཚོགས་ལ་ལྟ་བ་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་རྣམས་སོ་སོར་རྟོགས་པར་བྱེད་པའི་ཆོས་བཤད་པ་མཛད་དེ། དེ་རྣམས་ཀྱིས་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ་ཞེས་བྱ་བ་ནས། བདག་ཅག་ནི་མངོན་པར་འཕགས་སོ་ཞེས་བྱ་བའི་བར་གོང་མ་བཞིན་དུའོ། །བདག་ཅག་བཅོམ་ལྡན་འདས་དང༌། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བཅོམ་ལྡན་འདས་ཀྱིས་བདག་ཅག་དགེ་བསྙེན་དུ་གཟུང་དུ་གསོལ། ཇི་སྲིད་འཚོ་བའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བཅོམ་ལྡན་འདས་ཀྱིས་ནོར་ཅན་དང༌། ནོར་ཅན་གྱི་ཆུང་མ་དང༌། ནོར་ཅན་གྱི་བུ་དང༌། ནོར་
ཅན་གྱི་མནའ་མ་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ།། །།འདུལ་བ་གཞི། བམ་པོ་ལྔ་བཅུ་བདུན་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ་བཙུན་པ་ནོར་ཅན་དང༌། ནོར་ཅན་གྱི་མཆིས་འབྲང་དང༌། ནོར་ཅན་གྱི་བུ་དང༌། ནོར་ཅན་གྱི་མནའ་མ་རྣམས་ཀྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཤིང་ལྷ་དང་མི་རྣམས་ཀྱི་དཔལ་ཉམས་སུ་མྱོང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་རྣམས་ཁོ་ནས་ལས་རྣམས་བྱས་ཤིང་བསགས་པ་ཚོགས་རྙེད་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་ནོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་མེ་ཏོག་ཕྲེང་རྒྱུད་མཁན་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ། །དེས་དེ་ཡང་རིགས་མཉམ་པ་ལས་ཆུང་མ་བླངས་སོ། །དེ་དུས་ཕྱི་ཞིག་ན་བཀྲེན་ཞིང་ཤིན་ཏུ་བཀྲེན་པར་གྱུར་ཏེ། དེ་དང༌། བུ་དང༌། ཆུང་མ་དང༌། མནའ་མས་བརྩོན་པ་ཆེན་པོས་འབད་པས་རས་ཡུག་གཅིག་ཅིག་གྲུབ་ནས། དེ་ནས་མེ་ཏོག་ཕྲེང་རྒྱུད་མཁན་ཡང་དེ་བགོས་ནས། རྒྱལ་པོ་ལ་མེ་ཏོག་འབུལ་མེ་ཏོག་ཕྲེང་རྒྱུད་མཁན་གྱི་ཆུང་མ་ཡང་དེ་ཉིད་བགོས་ནས་བཙུན་མོ་ལ་འབུལ། མེ་ཏོག་ཕྲེང་རྒྱུད་མཁན་གྱི་བུ་ཡང་དེ་ཉིད་བགོས་ནས་གཞོན་ནུ་རྣམས་ལ་འབུལ། མེ་ཏོག་ཕྲེང་རྒྱུད་མཁན་གྱི་མནའ་མ་ཡང་དེ་ཉིད་བགོས་ནས་རྒྱལ་པོའི་མནའ་མ་རྣམས་ལ་མེ་ཏོག་ཕྲེང་འབུལ་བར་བྱེད་དོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་
དམན་པ་དང༌། ངན་པ་ལ་སྙིང་བརྩེ་བ་དང༌། གནས་མལ་བས་མཐའ་ལ་བརྟེན་པ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བས་ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་ཞིང་འགྲོ་བ་ན་ཉི་མ་ནུབ་ཀའི་དུས་སུ་བཱ་རཱ་ཎ་སཱིར་ཕྱིན་ནས་མེ་ཏོག་ཕྲེང་རྒྱུད་མཁན་དེའི་ཁྱིམ་གྲོང་ཁྱེར་གྱི་སྒོ་ན་འདུག་པ་དེའི་ལྡུམ་རར་ནུབ་མོ་གནས་བཏབ་སྟེ་མེའི་ཁམས་ལ་སྙོམས་པར་ཞུགས་སོ། །དེ་ནས་མེ་ཏོག་ཕྲེང་རྒྱུད་མཁན་དེས་མེའི་ཕུང་པོ་འབར་བ་ལྟ་བུར་མཐོང་ནས་དེ་དད་པ་སྐྱེས་ཏེ་ཆུང་མ་ལ་སྨྲས་པ་དང་དེ་ཡང་དད་པར་གྱུར་ཏོ། །དེས་བུ་ལ་སྨྲས་པ་དང་དེ་ཡང་དད་པར་གྱུར་ཏོ། །དེས་མནའ་མ་ལ་སྨྲས་པ་དང་དེ་ཡང་དད་པར་གྱུར་ཏོ། །དེ་ནས་དེ་རྣམས་ཀྱིས་གྲོས་བྱ་བར་བརྩམས་པ། བདག་ཅག་སང་ཟན་མ་ཟོས་ཀྱང་བླ་འདུས་ལ་རབ་ཏུ་བྱུང་བ་ཞི་བའི་བདག་ཉིད་ཅན་འདི་བཤོས་གསོལ་ལོ། །དེ་ནས་ནམ་ནངས་ནས་དེ་རྣམས་ཀྱིས་དེ་ལ་བསོད་སྙོམས་ཕུལ་ལོ། །མེ་ཏོག་ཕྲེང་རྒྱུད་མཁན་གྱིས་སྨྲས་པ། བཟང་མོ་ཁོ་བོའི་རས་ཀྱི་བགོ་སྐལ་གང་ཡིན་པ་དེ་ནི་རབ་ཏུ་བྱུང་བ་འདི་ལ་འབུལ་ལོ། །དེས་སྨྲས་པ། རྗེའི་སྲས་བདག་གི་ཡང་དབུལ་ལོ། །བུས་སྨྲས་པ། བདག་གི་ཡང་དབུལ་ལོ། །མནའ་མས་སྨྲས་པ། བདག་གི་ཡང་དབུལ་ལོ། །དེ་ནས་དེ་རྣམས་འདུས་ནས་དེ་ལ་རས་བསྐོན་ཏོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་མ་ཡིན་པས་དེ་ནས་བདག་ཉིད་ཆེན་པོ་དེ་དེ་རྣམས་ལ་སྙིང་བརྩེ་བའི་ཕྱིར་ནམ་མཁའ་ལ་འཕགས་ནས་འབར་བ་དང༌། གསལ་བ་དང༌། ཆར་འབེབས་པ་དང༌། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་རྣམས་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་ཤིང་རྩ་བ་ནས་བཅད་པ་བཞིན་དུ་རྐང་པ་གཉིས་ལ་གཏུགས་ཏེ་སྨོན་ལམ་གདབ་པར་བརྩམས་པ། བདག་ཅག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་འདིས་བདག་ཅག་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་ཞིང་བདག་ཅག་གི་ཁྱིམ་དུ་ལྷ་དང་
མིའི་གཡང་འབབ་པར་གྱུར་ཅིག །འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཀྱི། མི་མཉེས་བར་བྱེད་པར་མ་གྱུར་ཅིག་ཅེས་བྱས་སོ། །དེ་ནས་རང་སངས་རྒྱས་ཀྱིས་དེ་རྣམས་ལ་སྙིང་བརྩེ་བར་རྫུ་འཕྲུལ་བྱས་ནས་རྒྱལ་པོའི་ཁབ་ཀྱི་སྟེང་ནས་ཕར་ཆས་ཏེ་སོང་བ་དང༌། དེའི་གྲིབ་མ་རྒྱལ་པོའི་སྟེང་དུ་བབ་པ་ལས་དེ་གདོང་བསྟོད་དེ་བལྟ་བར་བརྩམས་པ་དང༌། བདག་ཉིད་ཆེན་པོ་དེ་མཐོང་ནས་དེས་བསམས་པ། བདག་ཉིད་ཆེན་པོ་འདིས་ཡང་སུ་ཞིག་གི་བཀྲེན་པའི་རྩ་བ་ཕྱུང་བར་འགྱུར་སྙམ་མོ། །མེ་ཏོག་ཕྲེང་རྒྱུད་མཁན་དེ་རྒྱལ་པོ་ལ་མེ་ཏོག་འབུལ་བའི་དུས་གང་ཡིན་པ་དེ་ལས་ཐེག་གི་ཙམ་ཞིག་ཡོལ་ལོ། །རྒྱལ་པོ་ཡང་མེ་ཏོག་ལ་སྡོད་ཅིང་འདུག་གོ །དེ་ནས་མེ་ཏོག་ཕྲེང་རྒྱུད་མཁན་དེ་རྒྱལ་པོའི་ཞོ་ཤས་འཚོ་བ་རྣམས་ཀྱིས་བཀུག་པ་དང་རྒྱལ་པོས་དེ་ལ་སྨྲས་པ། ཅིའི་ཕྱིར་ཁྱོད་ཀྱིས་མེ་ཏོག་དེ་རིང་དུས་ལས་ཡོལ་དེས་ཇི་ལྟར་གྱུར་པ་རྒྱས་པར་སྨྲས་པ་དང༌། དེ་ནས་རྒྱལ་པོས་ཇི་སྙེད་གྱོན་པ་བྱིན་ནོ། །དེ་བཞིན་དུ་མེ་ཏོག་ཕྲེང་རྒྱུད་མཁན་གྱི་ཆུང་མ་ལ་ནི་བཙུན་མོ་རྣམས་ཀྱིས་ཇི་སྙེད་གྱོན་པ་བྱིན་ནོ། །མེ་ཏོག་ཕྲང་རྒྱུད་མཁན་གྱི་བུ་ལ་ནི་གཞོན་ནུ་རྣམས་ཀྱིས་སོ། །མེ་ཏོག་ཕྲེང་རྒྱུད་མཁན་གྱི་མནའ་མ་ལ་ནི་རྒྱལ་པོའི་མནའ་མ་རྣམས་ཀྱིས་ཏེ། དེ་མཐོང་བའི་ཆོས་དེ་ཉིད་ལ་ནོར་གྱི་མེ་ཏོག་མངོན་པར་གྲུབ་པར་གྱུར་ཏེ་དབུལ་བ་མེད་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་མེ་ཏོག་ཕྲེང་རྒྱུད་མཁན་གང་ཡིན་པ་དེ་ནི་ནོར་ཅན་འདི་ཉིད་ཡིན་ནོ། །མེ་ཏོག་ཕྲེང་རྒྱུད་མཁན་གྱི་ཆུང་མ་ནི་ནོར་ཅན་གྱི་ཆུང་མ་ཡིན་ནོ། །མེ་ཏོག་ཕྲེང་རྒྱུད་མཁན་གྱི་བུ་ནི་ནོར་ཅན་གྱི་བུ་ཡིན་ནོ། །མེ་ཏོག་ཕྲེང་རྒྱུད་མཁན་གྱི་མནའ་མ་ནི་ནོར་ཅན་གྱི་མནའ་མ་ཡིན་ཏེ། འདི་དག་གིས་རང་སངས་རྒྱས་ལ་བྱ་བ་བྱས་ཤིང་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ནས། ཁྱིམ་དུ་ལྷ་དང་མིའི་གཡང་བབས་པར་གྱུར་ཏོ། །ངའི་
སྤྱན་སྔ་ནས་ཀྱང་བདེན་པ་མཐོང་བར་བྱས་ཏེ། ང་རང་སངས་རྒྱས་བྱེ་བ་བརྒྱ་སྟོང་བས་ཁྱད་པར་དུ་འཕགས་པའི་སྟོན་པ་འདི་དག་གིས་མཉེས་པར་བྱས་ཀྱི་མི་མཉེས་པར་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ནི་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལྷག་པར་ཡང་མངོན་པར་དད་པར་གྱུར་ནས་སྟན་ལས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཅག་གིས་དགུང་ཟླ་གསུམ་དུ་ན་བཟའ་ཆོས་གོས་དང་བསོད་སྙོམས་དང༌། གཟིམས་ཆ་དང༌། སྙུན་དཔྱད་ཀྱི་རྐྱེན་སྨན་དང༌། ཡོ་བྱད་རྣམས་འབུལ་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་གནང་ངོ༌། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་དོང་ངོ༌། །དེ་ནས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་དེ་ཉིད་ཀྱི་ནུབ་མོ་ནས་ གཙང ་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ཏེ་ཞེས་བྱ་བ་ནས། ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག་ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་བཞིན་དུ་ཉི་
མ་གཉིས་སམ་གསུམ་གྱི་བར་དུ་འདས་སོ། །ཡངས་པ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱི་འཁོར་རྒྱ་ཆེན་པོ་མུ་གེ་དང་བཅས་པའི་དུས་བྱུང་ནས་དེ་རྣམས་ཀྱི་ཉེ་དུ་ངག་ཟས་ཀྱི་ཕྱིར་ཉི་མ་རེ་རེ་ཞིང་འོང་བས་དེ་དག་གིས་གཙེས་པར་གྱུར་ནས་དགེ་སློང་རྣམས་ལ་སྨྲས་པ།འཕགས་པ་དག་མུ་གེ་དང་བཅས་པའི་དུས་བྱུང་བས་བདག་ཅག་གི་ཉེ་དུ་དག་སྐྲུར་མཆིས་ཏེ་དེ་རྣམས་ལ་བདག་ཅག་གདུགས་གཅིག་བཞིན་དུ་སྩོལ་བས་ཁྱེད་ཅག་དང་དེ་རྣམས་ལ་ཁྱད་པར་རྔོ་མི་ཐོག་ན། ཀྱེ་འཕགས་པ་དག་བདག་ཅག་གིས་ཡོ་བྱད་རྣམས་དབུལ་གྱིས་ཞལ་ཏ་ཁོ་ན་མཛོད་ཅིག །དགེ་སློང་རྣམས་ཀྱིས་སྨྲས་པ། བཅོམ་ལྡན་འདས་ལ་ཞུས་ཏེ་བྱའོ་ཞེས་དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ་དགེ་སློང་རྣམས་ཀྱིས་ཞལ་ཏ་བྱའོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཟས་ཀྱི་ཞལ་ཏ་བྱའོ་ཞེས་གསུངས་པས་དེ་རྣམས་ཀྱིས་ཞལ་ཏ་བྱ་བར་བརྩམས་ཏེ་ཇི་ཙམ་ན་སྟེང་གཡོགས་མེད་པར་ཐུག་པ་འཚེད་པའི་ཞལ་ཏ་བྱས་པ་ལས་ལྷས་ཆར་ཕབ་པས་དེ་མ་རུང་བར་གྱུར་པའི་སྐབས་དེ་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྟེང་གཡོགས་མེད་པར་བཙོ་བར་མི་བྱའོ། །སྒོ་ཁང་དང་ཁྱམས་སུ་འཚེད་པར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྒོ་ཁང་དང་ཁྱམས་སུ་བཙོ་བར་མི་བྱའོ། །དགེ་སློང་དག་དེ་ལྟ་བས་ན་རུང་བའི་གནས་ཀྱི་གཞིར་མི་རུང་བ་ནི་བཅུ་པོ་འདི་དག་སྟེ། འདི་རྣམས་སུ་ཟས་ཀྱི་ཞལ་ཏ་མི་བྱའོ། །བཅུ་གང་ཞེ་ན། སྟེང་གཡོགས་མེད་བ་དང༌། སྒོ་ཁང་དང༌། ཁྱམས་དང༌། བསྲོ་གང་དང༌། ཁྲུས་ཁང་དང༌། རྒྱལ་པོའི་གནས་དང༌། མཆོད་རྟེན་གྱི་གནས་དང༌། མུ་སྟེགས་ཅན་གྱི་གནས་དང༌། ཁྱིམ་བདག་གི་གནས་དང༌། དགེ་སློང་མའི་དབྱར་ཁང་ངོ༌། །གཞི་བཅུ་པོ་འདི་དག་ནི་རུང་བ་མ་ཡིན་པའི་གནས་ཀྱི་གཞི་ཡིན་ཏེ། དེ་རྣམས་སུ་དགེ་སློང་གིས་ཟས་ཀྱི་ཞལ་ཏ་མི་བྱའོ། །ཞལ་ཏ་བྱེད་ན་འགལ་ཚབས་ཅན་དུ་འགྱུར་རོ།། །།
སྡོམ་ནི། ནང་བུ་ཅན་དང་ཟས་དག་དང༌། །གཡར་ཚུས་ལྷག་པ་དག་དང་ཡང༌། །ཚལ་གྱི་འབྲས་བུ་ཆུ་སྐྱེས་དང༌། །པད་མའི་རྩ་དང་ལུག་དག་གོ །གླེང་གཞི་ནི་མཉན་ཡོད་ནའོ། །མཉན་ཡོད་ན་དགེ་སློང་ནང་བུ་ཅན་ཞིག་ཡོད་པ་དེས་སྨན་པ་ལ་དྲིས་པ། བཞིན་བཟངས་ཁོ་བོ་ལ་སྨན་སྟོན་ཅིག །དེས་ནད་ཀྱི་གཞི་དྲིས་ནས་སྨྲས་པ། འཕགས་པ་ཐུག་པ་གསོལ་ཅིག་དང་སོས་པར་འགྱུར་རོ། །དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་མ་གནང་ངོ༌། །སྨན་པས་སྨྲས་པ། འཕགས་པ་ཁྱོད་ཀྱི་སྟོན་པ་ཐུགས་རྗེ་ཅན་ཡིན་པས་འདི་ཉིད་ཀྱིས་རྐྱེན་བྱས་ནས་གནང་བར་འགྱུར་བའི་གནས་དེ་ཡོད་དོ། །དེས་སྐབས་དེ་དགེ་སློང་རྣམས་ལའོ། །དགེ་སློང་རྣམས་ཀྱིས་ནི་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པས་ཐུག་པ་འཐུང་ཤིག་ཅེས་ཟེར་ན་སྨན་པས་བསྒོ་བ་བཞིན་ཐུག་པ་བཏུང་བར་བྱ་སྟེ་དེ་ལ་འགྱོད་པ་མི་བྱའོ། །བཅོམ་ལྡན་འདས་ཀྱིས་སྨན་པས་བསྒོ་བ་བཞིན་ཐུག་པ་བཏུང་བར་བྱའོ་ཞེས་བཀའ་སྩལ་པ་དང༌། དེའི་ནད་གཡོག་གིས་ཐུག་པ་གྲང་མོ་ཞིག་ཁྱེར་ཏེ་བྱིན་ནོ། ། དེ་ནས་སྨན་པས་འོངས་ནས་དྲིས་པ་འཕགས་པ་ཁྱོད་བདེའམ། དེས་སྨྲས་པ། བཞིན་བཟངས་མི་བདེའོ། །ཅི་ཁྱོད་ཀྱིས་ཐུག་པ་མ་གསོལ་ཏམ། འཐུངས་སོ། །ཅི་འདྲ་བ་ཞིག །གྲང་མོའོ། །འཕགས་པ་མ་ལེགས་པ་ཞིག་བགྱིས་སོ། །སང་ནི་དྲོན་མོ་གསོལ་ཅིག །དེ་ནས་ནད་གཡོག་གིས་བླངས་ནས་གྲང་མོ་ཁོ་ན་རྙེད་ནས་དེས་དེ་ལ་བསྲོས་ཏེ་བྱིན་ནོ། །དེ་ནས་སྨན་པ་འོངས་ཏེ་དེ་བཞིན་དུ་དྲིས་པ་དང་དེས་སྨྲས་པ། མི་བདེའོ། །ཅི་ཐུག་པ་མ་གསོལ་ཏམ། འཐུངས་སོ། །ཅི་འདྲ་བ་ཞིག །གྲང་མོ་ཞིག་བསྲོས་ནས་སོ། །འཕགས་པ་མ་ལེགས་པ་ཞིག་བགྱིས་སོ། །དེ་གྲངས་ཏེ་བསྲོས་པ་ལགས་ཀྱིས་སང་ནི་རང་བཞིན་གྱིས་དྲོན་པོར་མཛོད་ལ་གསོལ་ཅིག །དེ་ནས་དེའི་ནད་གཡོག་གིས་འབྲས་དང་སྣོད་སྟ་གོན་བྱས་ནས་གཙུག་ལག་ཁང་གི་ཕྱི་རོལ་གྱི་ཤིང་དྲུང་ཞིག་ཏུ་བཙོ་བར་བརྩམས་པ་ལས་དེ་ནས་
ཁྭའི་རྟུག་པས་དེ་མ་རུང་བར་བྱས་པས་དགེ་སློང་དེ་ཕོངས་པར་གྱུར་པའི་སྐབས་དེ་དགེ་སློང་རྣམས་ལའོ། །དགེ་སློང་རྣམས་ཀྱིས་ནི་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་རུང་བའི་གནས་བསྐོ་བར་བྱའོ། བཅོམ་ལྡན་འདས་ཀྱིས་རུང་བའི་གནས་བསྐོ་བར་བྱའོ་ཞེས་བཀའ་སྩལ་པ་དང༌། དགེ་སློང་རྣམས་ཀྱིས་ཅི་འདྲ་བ་དང་ཇི་ཙམ་པ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རུང་བའི་གནས་ལྔ་སྟེ། རྩོམ་པའི་མཐའ་ཅན་དང༌། སེམས་གཏོད་པའི་མཐའ་ཅན་དང༌། བ་ཉལ་བ་ལྟ་བུ་དང༌། སྟོང་པའི་གནས་དང༌། བསྐོས་པའོ། །དེ་ལ་རྩོམ་པའི་མཐའ་ཅན་ནི་འདི་ལྟ་སྟེ། དགེ་སློང་ལག་གི་བླས་གནས་རྩོམ་པ་ན་དེར་ཐོག་མར་གཞི་འདི་ནི་དགེ་འདུན་གྱི་རུང་བའི་གནས་སུ་འགྱུར་རོ་ཞེས་སེམས་བསྐྱེད་ཅིང་ཚིག་ཏུ་སྨྲས་པ་སྟེ། འདི་ནི་རུང་བའི་གནས་རྩོམ་པའི་མཐའ་ཅན་ཞེས་བྱའོ། །སེམས་གཏོད་པའི་མཐའ་ཅན་གང་ཞེ་ན། འདི་ལྟ་སྟེ། དགེ་སློང་ལག་གི་བླས་དེར་ཐོག་མར་གཞི་རྔོ་བ་འདྲེན་པ་ན་ཉེ་འཁོར་གྱི་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་གཞི་འདི་ནི་དགེ་འདུན་གྱི་རུང་བའི་གནས་སུ་འགྱུར་བར་ངེས་པར་ཟུང་ཤིག་ངེས་པར་ཟུང་ཤིག་ཅེས་བྱ་སྟེ། འདི་ནི་སེམས་གཏོད་པའི་མཐའ་ཅན་ཞེས་བྱའོ། །བ་ཉལ་བ་ལྟ་བུ་གང་ཞེ་ན། གང་ལ་སྒོ་ཐ་དད་པར་གསེས་པ་སྟེ། འདི་ནི་བ་ཉལ་བ་ལྟ་བུ་ཞེས་བྱའོ། །གནས་སྟོང་པ་གང་ཞེ་ན། སྤངས་པའི་གནས་ཏེ་འདི་ནི་གནས་སྟོང་པ་ཞེས་བྱའོ། །བསྐོས་པ་གང་ཞེ་ན། གསོལ་བ་དང་གཉིས་ཀྱི་ལས་ཀྱིས་བསྐོས་པའོ། །དགེ་སློང་རྣམས་ཀྱིས་ཇི་ལྟར་བསྐོ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་གང་ཞིག་ཐམས་ཅད་ཟིན་པར་བྱས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་ལ་དགེ་འདུན་གྱིས་འདོད་ན་དེ་བསྐོ་བར་བྱའོ། །བསྐོ་བ་ཡང་འདི་ལྟར་བྱ་སྟེ། གནས་མལ་བཤམས་ལ་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་
ཅད་འདུག་ཅིང་མཐུན་པར་གྱུར་པ་དང༌། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་གནས་ཐམས་ཅད་ལགས་པ་ནང་མཚམས་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོ་བར་བཞེད་དེ། དེའི་སླད་དུ་དགེ་འདུན་གྱིས་གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོ་ན། ཚེ་དང་ལྡན་པ་རྣམས་ལས་གང་དག་གནས་ཐམས་ཅད་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གནས་ཐམས་ཅད་བགྱིས་ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་རུང་བའི་གནས་སུ་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་དུ་དགེ་འདུན་གྱི་རུང་བའི་གནས་སུ་བསྐོས་པ་དེར་གཉིས་སྐབས་དབྱེ་སྟེ། མཚམས་ཀྱི་ནང་དུ་བཙོས་པ་དང༌། མཚམས་ཀྱི་ནང་དུ་ཞག་ལོན་པའོ། །སངས་རྒྱས་བཅོམ་ལྡན་འདས་ཡངས་པ་ཅན་གྱི་སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས་སོ། །ཡངས་པ་ཅན་ན་སྡེ་དཔོན་སེང་གེ་ཞེས་བྱ་བ་ཞིག་གནས་ཏེ། དེའི་ཉེ་འཁོར་ན་གནས་པ་རྣམས་ཀྱིས་དེའི་ཆེད་
དུ་ཤ་ཁྱེར་ཏེ་འོངས་ནས་དེ་ཡང་ཟ་བར་བྱེད་དོ། །གང་གི་ཚེ་དེས་བཅོམ་ལྡན་འདས་ལས་བདེན་པ་མཐོང་བ་དེའི་ཚེ་མི་ཟ་བས་ཁྱེར་ཏེ་འོངས་ནས་ཡང་དགེ་སློང་རྣམས་ལ་སྦྱིན་པར་བྱེད་དོ། །དགེ་སློང་རྣམས་ཀྱིས་ཀྱང་དེ་དག་ཟོས་པ་དང་མུ་སྟེགས་ཅན་རྣམས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་དེ། ཤེས་ལྡན་དག་སྡེ་དཔོན་སེང་གེའི་ཆེད་དུ་བྱས་ཏེ་ཤ་ཁྱེར་ཏེ་འོངས་ན་ནི་དེས་དེ་དག་མ་ཟོས་ལ། ཤཱཀྱའི་སྲས་ཀྱི་དགེ་སྦྱོང་རྣམས་ལ་བྱིན་པ་དང༌། ཤཱཀྱའི་སྲས་ཀྱི་དགེ་སྦྱོང་རྣམས་ཀྱི་ཆེད་དུ་བྱས་པའི་ཤ་ནི་ཟོས་སོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ངས་གནས་གསུམ་གྱིས་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་གསུམ་གང་ཞེ་ན། བདག་གི་ཆེད་དུ་བྱས་པར་མངོན་དུ་མཐོང་བ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་དང༌། ཡིད་ཆེས་པ་ལས་ཁྱོད་ཀྱི་ཆེད་དུ་བྱས་པ་ཡིན་ནོ་ཞེས་ཐོས་པ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་དང༌། རང་ཉིད་ཀྱི་བློ་ལ་རྣམ་པར་རྟོག་པ་སྐྱེས་བ་ཚུལ་ལས་འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་དུ་རུང་བ་མ་ཡིན་པའི་ཤ་བཟའ་བར་མི་བྱའོ་ཞེས་གསུངས་པ་ཡིན་ནོ། །དགེ་སློང་དག་ངས་གནས་གསུམ་གྱིས་རུང་བའི་ཤ་བཟའ་བར་བྱའོ་ཞེས་གསུངས་པ་གསུམ་གང་ཞེ་ན། འདིས་བདག་གི་ཆེད་དུ་བྱས་པར་མངོན་སུམ་དུ་མ་མཐོང་བ་རུང་བའི་ཤ་བཟའ་བར་བྱའོ་ཞེས་གསུངས་པ་དང༌། ཡིད་ཆེས་པ་ལས་འདིས་ཁྱོད་ཀྱི་ཆེད་དུ་བྱས་པ་མ་ཡིན་ནོ་ཞེས་ཐོས་པ་རུང་བའི་ཤ་བཟའ་བར་བྱའོ་ཞེས་གསུངས་པ་དང༌། བདག་ཉིད་ཀྱི་བློ་ལ་རྣམ་པར་རྟོག་པ་སྐྱེས་པ་ཚུལ་ལས་འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་པ་མ་སྐྱེས་པ་རུང་བའི་ཤ་བཟའ་བར་བྱའོ་ཞེས་གསུངས་པ་ཡིན་ནོ། །གླེང་གཞི་ནི་མཉན་ཡོད་ནའོ། །མུ་གེ་དང་བཅས་པའི་དུས་བྱུང་ནས་དགེ་སློང་དག་ལྟོགས་པར་གྱུར་པས་དེ་རྣམས་གློས་ཕབ་སྟེ་འདུག་པ་དང་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། འཕགས་པ་དག་
གཅིག་ཏུ་བརྩོན་བར་བྱ་བའི་ཕྱིར་བསྟན་པ་ལ་ཅིའི་སླད་དུ་གློས་ཕབ་སྟེ་བཞུགས་ཤིང་དགེ་བའི་ཕྱོགས་ལ་བརྩོན་པར་མི་མཛད། དེ་རྣམས་ཀྱིས་སྨྲས་པ། མུ་གེ་དང་བཅས་པའི་དུས་བྱུང་བས་བསོད་སྙོམས་ལྟོ་འགྲངས་པར་མི་རྙེད་པས་ཁོ་བོ་ཅག་ལྟོགས་ཏེ་ཉམ་ཆུང་བས་དེས་ན་གློས་ཕབ་སྟེ་འདུག་གོ །དེ་རྣམས་ཀྱིས་སྨྲས་པ། ཅི་སྟེ་ཞལ་ཚུས་མི་གསོལ། བཅོམ་ལྡན་འདས་ཀྱིས་མ་གནང་ངོ༌། །ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་པས་གནང་བར་འགྱུར་བ་གང་ཡིན་པའི་གནས་དེ་ཡོད་དོ་ཞེས་བྱ་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེའི་ཕྱིར་རྗེས་སུ་གནང་སྟེ། མུ་གེའི་སྡུག་བསྔལ་དགོན་པ་འདི་ལྟ་བུར་དགེ་སློང་རྣམས་ཀྱིས་གཡར་ཚུས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །མུ་གེ་དང་བཅས་པའི་དུས་བྱུང་ནས་དགེ་སློང་རྣམས་ལ་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་སྨྲས་པ། འཕགས་པ་དག་འདི་ཉིད་དུ་ཟས་ཀྱི་བྱ་བ་མཛོད་ཅིག །དེ་རྣམས་ཀྱིས་ཟས་ཀྱི་བྱ་བ་བྱས་ནས་བསོད་སྙོམས་སྔར་རྙེད་པ་ཁྱེར་ནས་གཙུག་ལག་ཁང་དུ་སོང་སྟེ། དེ་རྣམས་ཀྱིས་མུ་གེའི་སྐྱོན་གྱིས་དེ་ཡང་བཟའ་བར་འདོད་ན་འོན་ཀྱང་འགྱོད་པས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། མུ་གེའི་སྡུག་བསྔལ་དགོན་པ་འདི་ལྟ་བུར་འདོད་ན་སྔར་བླངས་ཟིན་ཏོ་སྙམ་དུ་སོམས་ལ་སྔར་རྙེད་པ་ཡང་བཟའ་པར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །མུ་གེ་དང་བཅས་པའི་དུས་བྱུང་ནས་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དགེ་སློང་རྣམས་ཁྱིམ་གྱི་ནང་དུ་ཟས་ལ་མགྲོན་དུ་བོས་ནས་དེ་རྣམས་ཀྱིས་ཟོས་པ་དང་བཅའ་བ་ལས་ལྷག་མ་ཞིག་ལུས་སོ། །བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། འཕགས་པ་དག་ཁྱེད་ཀྱི་ཆེད་དུ་སྟ་གོན་བགྱིས་པ་ལགས་ཀྱིས་སྣོམས་ཏེ་བཞུད་ལ་ཕྱིས་གསོལ་ཅིག
དེ་རྣམས་ཀྱིས་ཁྱེར་ཏེ་དོང་ངོ༌། །དོང་ནས་དེ་ཡང་ཟ་བར་འདོད་ན་འགྱོད་པས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། མུ་གེའི་སྡུག་བསྔལ་དགོན་པ་འདི་ལྟ་བུར་འདི་དག་ནི་བྱིན་པ་ཡིན་ནོ་སྙམ་དུ་བསམས་ནས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །མུ་གེ་དང་བཅས་པའི་དུས་བྱུང་བ་ན་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དགེ་སློང་རྣམས་ཟས་ལ་མགྲོན་དུ་བོས་ཏེ། དེ་རྣམས་ཀྱིས་ཟོས་ནས་བཅའ་བ་ལ་སོགས་པ་ཅུང་ཟད་ཅིག་ལྷག་སྟེ། དགེ་སློང་རྣམས་དོང་བ་དང་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། འདི་ནི་བདག་ཅག་གིས་འཕགས་པ་དག་ཁོ་ན་ལ་ཡོངས་སུ་བཏང་བ་ལགས་ཏེ། འཚལ་ཏེ་མཆིས་ལ་ཁྱོད་ཁོ་ན་ལ་དབུལ་ལོ་ཞེས་དེ་རྣམས་ཀྱིས་ཁྱེར་ཏེ་འོངས་པ་དང༌། དགེ་སློང་རྣམས་དེ་ལ་ཟ་བར་འདོད་ན་འགྱོད་པས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། མུ་གེའི་དགོན་པ་སྡུག་བསྔལ་འདི་ལྟ་བུར་སྔར་ཡོངས་སུ་བཏང་བའོ་སྙམ་དུ་བསམས་ནས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ནུབ་ཕྱོགས་ཀྱི་ཚལ་ན་ཡོད་པའི་འབྲས་བུ་རྣམས་གྲུབ་ནས་དེ་རྣམས་ཀྱིས་བསམས་པ། འདི་དག་ནི་རྙེད་དཀའ་བ་ཡིན་པས་འཕགས་པ་རྣམས་ལ་འབུལ་ལོ་ཞེས་དེ་དག་གིས་དགེ་སློང་རྣམས་ཟས་ཟོས་ནས་སྤང་བ་བྱས་པ་རྣམས་ལ་དེ་དག་བྱིན་པ་དང༌། དགེ་སློང་རྣམས་ཀྱིས་སྤང་བ་བྱས་ཟིན་ནོ་ཞེས་འགྱོད་པས་མ་ཟོས་པ་དང༌། བྲམ་ཟེ་དང་ཁྱིམ་བདག་དད་བ་ཅན་རྣམས་ཀྱིས་སྨྲས་པ། འཕགས་པ་དག་གང་གི་ཚེ་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་མུ་སྟེགས་ཅན་རྣམས་ལ་ཡོན་གནས་བགྱིད་པ་ལས། ད་ནི་བཅོམ་ལྡན་འདས་འཇིག་རྟེན་དུ་བྱུང་ནས་ཁྱེད་རྣམས་ཀྱང་ད་ནི་ཡོན་གནས་སུ་གྱུར་པ་ལགས་ན། གལ་ཏེ་
ཁྱེད་ཀྱིས་མ་བཞེས་ན་ཅི་བདག་ཅག་གི་དགེ་བའི་ཤུལ་རྒྱགས་དང་བྲལ་ཏེ། འཇིག་རྟེན་འདི་ནས་འཇིག་རྟེན་ཕ་རོལ་དུ་མཆི་བར་བགྱིའམ། དེ་ལྟ་བས་ན་ཐུགས་བརྩེ་བས་བཞེས་ཤིག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། རྙེད་པར་དཀའ་བ་ཡིན་ནོ་སྙམ་ནས་བཟའ་བར་བྱ་སྟེ། འདི་ལ་འགྱོད་པར་མི་བྱའོ། །དེ་ལ་ཚལ་ན་ཡོད་པའི་འབྲས་བུ་ནི་འདི་དག་ཡིན་ཏེ། རྒུན་འབྲུམ་དང༌། བལ་པོ་སེའུ་དང༌། འབྲ་གོ་དང༌། སྟ་རྒ་དང༌། ཡོན་ཚེ་དང༌། ཤིང་ཏོག་ཨུ་ར་མ་ན་དང༌། ཤིང་ཏོག་ཨུ་རུ་མ་ཡི་ཀ་དང༌། ཤིང་ཏོག་ནི་ཀོ་ཙ་དང༌། ཤིང་ཏོག་བ་བྷུ་དང༌། ཤིང་ཏོག་སིན་ཙི་ཀའོ། །གླེང་གཞི་ནི་མཉན་ཡོད་ནའོ། །བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་དགེ་སློང་རྣམས་ཟས་ཟོས་ཟིན་པ་དང༌། ཆུ་ནས་སྐྱེས་པ་དག་ཕུལ་བ་དང༌། དགེ་སློང་རྣམས་འདོད་ཀྱང་སྤང་བ་བྱས་ཟིན་ཏོ་ཞེས་འགྱོད་པས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། རྙེད་པར་དཀའ་བ་ཡིན་ནོ་སྙམ་དུ་བསམས་ནས་བཟའ་བར་བྱ་སྟེ། དེ་ལ་འགྱོད་པར་མི་བྱའོ། །དེ་ལ་ཆུ་ནས་སྐྱེས་པ་ནི་འདི་དག་ཡིན་ཏེ། ཨུཏྤ་ལའི་རྩ་བ་དང༌། པད་མའི་རྩ་བ་དང༌། ཀུ་མུ་དའི་ས་བོན་དང༌། པད་མའི་ས་བོན་ནོ། །གླེང་གཞི་ནི་མཉན་ཡོད་ནའོ། །ཚེ་དང་ལྡན་པ་ཤཱ་རིའི་བུ་ཁམས་མ་སྙོམས་པས་ཁྲག་དང་བད་ཀན་འཁྲུགས་པར་གྱུར་ཏོ། །དེའི་རིམ་གྲོ་བྱེད་པ་ཚེ་དང་ལྡན་པ་མཽད་གལ་གྱི་བུ་ཆེན་པོས་བསམས་པ། བདག་རང་གི་བློས་ནི་ཚེ་དང་ལྡན་པ་ཤཱ་རིའི་བུ་ལ་ལན་མང་དུ་རིམ་གྲོ་བྱས་ཀྱི་ལན་འགའ་ཡང་སྨན་པ་ལ་མ་དྲིས་ཀྱིས། མ་ལ་བདག་གིས་དྲིའོ་སྙམ་ནས་དེས་སྨན་པ་ལ་དྲིས་པ། བཞིན་བཟངས་ཚེ་དང་ལྡན་པ་ཤཱ་རིའི་བུ་ཁྲག་དང་བད་ཀན་འཁྲུགས་པར་གྱུར་ན་དེའི་སྨན་སྟོན་ཅིག །དེས་སྨྲས་པ་འཕགས་པ་པད་མའི་རྩ་བའི་འོ་མ་སྩོལ་ཅིག་དང་སོས་པར་འགྱུར་རོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་བསམས་པ། གལ་ཏེ་བདག་གིས་ཚེ་དང་ལྡན་པ་ཤཱ་རིའི་བུ་ལ་པད་མའི་རྩ་བ་ཕལ་པའི་
འོ་མས་རིམ་གྲོ་བྱ་བ་ནི་བདག་གི་ཆ་མ་ཡིན་ནོ་སྙམ་དུ་བསམས་ནས་ཇི་ལྟར་སེམས་མཉམ་པར་བཞག་པས་མཉན་ཡོད་ནས་མི་སྣང་བར་གྱུར་ཏེ། དལ་གྱིས་འབབ་ཅེས་བྱ་བའི་འགྲམ་དུ་ཕྱིན་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང༌། ཀླུའི་རྒྱལ་པོ་རབ་བརྟན་གྱི་གནས་དང་ཉེ་བར་གྱུར་པ་དང༌། དེ་ནས་ཀླུའི་རྒྱལ་པོ་རབ་བརྟན་གྱིས་མཐོང་ནས་སྨྲས་པ། འཕགས་པ་དགོས་པ་ཅི་ཞིག་གི་ཕྱིར་བྱོན། དེས་སྨྲས་པ། ཚེ་དང་ལྡན་པ་ཤཱ་རིའི་བུ་ཁྲག་དང་བད་ཀན་འཁུགས་ནས་དེ་ལ་སྨན་པས་པད་མའི་རྩ་བའི་འོ་མ་བསྟན་ཏོ། །ཀླུའི་རྒྱལ་པོ་རབ་བརྟན་གྱིས་སྨྲས་པ། འཕགས་པ་གལ་ཏེ་དེ་ལྟར་ན་རེ་ཞིག་གཞེས་ཤིག །དེ་དལ་གྱིས་འབབ་ཀྱི་ནང་དུ་ཞུགས་ནས་མིའི་ཚད་ཙམ་གྱི་པད་མའི་རྩ་བ་དག་བཏོན་ཅིང་པད་མའི་རྩ་བའི་འོ་མ་པད་མའི་འདབ་མའི་སྐྱོ་རར་གཟར་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་ལྷུང་བཟེད་བཀང་ངོ༌། །ཚེ་དང་ལྡན་པ་མཽད་གལ་གྱི་བུ་ཆེན་པོས་པད་མའི་རྩ་བ་གཤེགས་པ་ལ་ལྟ་བར་བརྩམས་པ་དང་དེ་ནས་ཀླུའི་རྒྱལ་པོ་རབ་བརྟན་གྱིས་སྨྲས་པ། འཕགས་པ་ཅི་གཟིགས་པད་མའི་རྩ་བ་དག་གསོལ་བར་བཞེད་དམ། དེ་ཅང་མི་སྨྲ་བར་འདུག་པ་དང་སྨྲས་པ། འཕགས་པ་བཞུད་ཅིག་དང་བསྐུར་རོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་པད་མའི་རྩ་བའི་འོ་མས་ལྷུང་བཟེད་བཀང་བ་ཁྱེར་ནས་དལ་གྱིས་འབབ་ཀྱི་འགྲམ་ནས་མི་སྣང་བར་བྱས་ཏེ་མཉན་ཡོད་ཀྱི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་ཕྱིན་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་སྨན་པས་བསྟན་པ་བཞིན་པད་མའི་རྩ་བའི་འོ་མ་འཐུངས་པས་སོས་པར་གྱུར་ཏོ། །ཀླུའི་རྒྱལ་པོ་རབ་བརྟན་གྱིས་ཀྱང་གླང་པོ་ཆེ་ནག་པོའི་ཆ་བྱད་འཆང་ལ་པད་མའི་རྩ་བ་ཁུར་ཅིག་བཀུར་ནས་མཉན་ཡོད་ཀྱི་རྒྱལ་བུ་རྒྱལ་བྱེད་ཀྱི་ཚལ་དུ་སོང་ལ་གཙུག་ལག་ཁང་གི་ཁྱམས་ཀྱི་མདུན་དུ་ཞོག་ལ་ཤོག་ཤིག །དེ་རླུང་གི་ཤུགས་ལྟར་མགྱོགས་པའི་མཐུས་མཉན་ཡོད་ཀྱི་རྒྱལ་བུ་རྒྱལ་བྱེད་ཀྱི་ཚལ་གྱི་གཙུག་ལག་ཁང་དུ་འོངས་ནས་པད་མའི་རྩ་བ་རྣམས་ཁྱམས་ཀྱི་མདུན་དུ་བཞག་ནས་སླར་ལོག་པ་ལས་ལམ་གྱི་ཕྱེད་ན་ཚལ་གྱི་བལ་གླང་མོ་ཞིག་ཡོད་པ་དང་ལྷན་
ཅིག་འདུས་པར་གྱུར་ཏོ། །དུས་གཞན་ཞིག་ན་བལ་གླང་མོ་དེ་ལས་བལ་གླང་ཕྲུག་གུ་ཅིག་འབྲངས་ཏེ་འབྲངས་པའི་མོད་ལ་སེང་གེའི་སྒྲ་འབྱིན་ཏོ། །དེ་ནས་བལ་གླང་མོ་དེ་སྐྲག་པས་གཅིག་རྟུག་ཤོར་ནས་བལ་གླང་ཕྲུག་གུ་བོར་ཏེ་བྲོས་སོ། །དེ་ནས་རྒྱལ་པོའི་ཁབ་ན་གནས་པའི་ཤིང་མཁན་ཞིག་ཤིང་གི་ཆེད་དུ་ཚལ་དུ་སོང་བ་ལས་བལ་གླང་ཕྲུག་གུ་དེ་མཐོང་ནས་ཁྱིམ་དུ་བླངས་ཏེ་བསྣུན་གསོས་བསྐྱེད་དེ། ནོར་གྱིས་བསྐྱངས་པས་མིང་ནོར་སྐྱོང་ནོར་སྐྱོང་ཞེས་བྱ་བར་གྲགས་སོ། །ཁ་ཅིག་ནི་རྒྱལ་པོ་གསལ་རྒྱལ་གྱིས་རྒྱལ་པོ་གཟུགས་ཅན་སྙིང་པོ་ལ་ནོར་སྐྱོང་སྐྱེས་སུ་བསྐུར་བ་ལས། དེ་མཉན་ཡོད་ཀྱི་ཡུལ་ན་གནས་པའི་སྐྱེ་བོས་ནོར་གྱིས་བསྐྱངས་པས་ན་ནོར་སྐྱོང་ཞེས་འདོན་ཏོ། །པད་མའི་རྩ་བ་ཁ་ཅིག་ནི་ཚེ་དང་ལྡན་པ་མཽད་གལ་གྱི་བུ་ཆེན་པོས་ཟོས། ཁ་ཅིག་ནི་ཚེ་དང་ལྡན་པ་ཤཱ་རིའི་བུས། ཁ་ཅིག་ནི་དགེ་འདུན་ལ་བྲིམས་པ་ལས་འོན་ཀྱང་ལྷག་པར་གྱུར་ཏོ། །དེ་ནས་དགེ་སློང་རྣམས་ཀྱིས་སྤང་བ་བྱས་ནས་ཀྱང་ཟ་བར་འདོད་ན་བདག་ཅག་གིས་སྤང་བ་བྱས་སོ་ཞེས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མི་རྣམས་ཀྱིས་ལྷའི་པད་མའི་རྩ་བ་རྙེད་པར་དཀའ་བས་དེའི་ཕྱིར་རྗེས་སུ་གནང་ངོ༌། །པད་མའི་རྩ་བ་རྙེད་པར་དཀའ་བ་ཡིན་ནོ་སྙམ་དུ་བསམས་ནས་བཟའ་བར་བྱ་སྟེ། དེ་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །དེའི་ཚེ་གྲོང་ཁྱེར་བཟང་བྱེད་ན་བསོད་ནམས་ཆེན་པོར་ཤེས་པར་བྱ་བ་དྲུག་གནས་ཏེ། ཁྱིམ་བདག་ལུག་ཅེས་བྱ་བ་དང༌། ལུག་གི་ཆུང་མ་དང༌། ལུག་གི་བུ་དང༌། ལུག་གི་མནའ་མ་དང༌། ལུག་གི་བྲན་པོ་དང༌། ལུག་གི་བྲན་མོའོ། །ཁྱིམ་བདག་ལུག་བསོད་ནམས་ཆེ་བར་ཇི་ལྟར་ཤེས་ཞེ་ན། གལ་ཏེ་བང་མཛོད་སྟོང་པ་རྣམས་ལ་བལྟས་ན་མཐོང་མ་ཐག་ཁོ་ནར་དགང་བར་འགྱུར་ཏེ། དེ་ལྟར་ན་ཁྱིམ་བདག་ལུག་བསོད་ནམས་ཆེ་བར་ཤེས་སོ། །ལུག་གི་ཆུང་མ་ཇི་ལྟ་བུ་ཞེ་ན། དེས་གཅིག་གི་དོན་དུ་སྣོད་དུ་བཙོས་པ་ནི་བརྒྱ་སྟོང་གི་བཟའ་བ་འབྱུང་སྟེ། ལུག་གི་ཆུང་མ་ནི་དེ་ལྟ་བུ་ཡིན་ནོ། །ལུག་གི་བུ་ཇི་ལྟ་བུ་ཞེ་ན། དེའི་རྐེད་པ་ལ་ལྔ་བརྒྱ་པའི་སྣོད་
བཏགས་ཏེ་འདུག་ལ། དེས་གང་གི་ཚེ་བརྒྱའམ་སྟོང་ཡོངས་སུ་བཏང་བ་དེའི་ཚེ་དེ་བཞིན་དུ་གང་བར་འདུག་སྟེ། ཡོངས་སུ་ཟད་པར་མི་འགྱུར་ཏེ། ལུག་གི་བུ་ནི་དེ་ལྟ་བུ་ཡིན་ནོ། །ལུག་གི་མནའ་མ་ཇི་ལྟ་བུ་ཞེ་ན། དེས་གཅིག་གི་དོན་དུ་དྲི་སྦྱར་ན་བརྒྱ་སྟོང་ཁྱེད་པར་འགྱུར་ཏེ། ལུག་གི་མནའ་མ་ནི་དེ་ལྟ་བུ་ཡིན་ནོ། །ལུག་གི་བྲན་ཕོ་ཇི་ལྟ་བུ་ཞེ་ན། དེས་གང་གི་ཚེ་ཞིང་ལ་རོལ་གཅིག་རྨོས་པ་དེའི་ཚེ་ཞིང་ལ་རོལ་བདུན་རྨོས་པར་འགྱུར་ཏེ། ལུག་གི་བྲན་ཕོ་ནི་དེ་ལྟ་བུ་ཡིན་ནོ། །ལུག་གི་བྲན་མོ་ནི་ཇི་ལྟར་བསོད་ནམས་ཆེ་བར་ཤེས་ཞེ་ན། དེ་གང་གི་ཚེ་འབྲས་གཏུན་གང་ཙམ་དྲུས་པ་དེའི་ཚེ་བདུན་ཙམ་དུ་སྐྱེས་པར་འགྱུར་ཏེ། དེ་ལྟར་ན་ལུག་གི་བྲན་མོ་བསོད་ནམས་ཆེ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལུག་གདུལ་བའི་དུས་མཁྱེན་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ནི་ལྗོངས་རྒྱུ་ཞིང་གྲོང་ཁྱེར་བཟང་བྱེད་དུ་གཤེགས་ཀྱིས། ཁྱེད་ཅག་ལས་གང་ཞིག་དེ་བཞིན་གཤེགས་པ་དང་ཐབས་ཅིག་ཏུ་ལྗོངས་རྒྱུ་ཞིང་གྲོང་ཁྱེར་བཟང་བྱེད་དུ་འདོད་བར་སྤྲོ་བ་དེ་ནི་ཆོས་གོས་རྣམས་ལོང་ཤིག་ཅེས་སྒོ་ཞིག །བཙུན་པ་བཀའ་བཞིན་འཚལ་ཞེས་ནས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ཀྱི་ལྟར་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ལྗོངས་རྒྱུ་ཞིང་གྲོང་ཁྱེར་བཟང་བྱེད་དུ་གཤེགས་ཀྱིས། ཁྱེད་ཅག་ལས་གང་ཞིག་དེ་བཞིན་གཤེགས་པ་དང་ཐབས་ཅིག་ཏུ་ལྗོངས་རྒྱུ་ཞིང་གྲོང་ཁྱེར་བཟང་བྱེད་དུ་འདོང་བར་སྤྲོ་བ་དེ་ནི་ཆོས་གོས་རྣམས་ལོང་ཤིག །ཚེ་དང་ལྡན་པ་བཀའ་བཞིན་འཚལ་ཞེས་དགེ་སློང་དེ་རྣམས་ཀྱིས་ཚེ་དང་ལྡན་པ་ཀུན་དགའ་བོ་ལས་མཉན་ཏོ། །དེ་ནས་བཅོམ་ལྡན་འདས་དུལ་བ། འཁོར་དུལ་བ། ཞི་བ། འཁོར་ཞི་བ། དགྲ་བཅོམ་པ། འཁོར་དགྲ་བཅོམ་པ་དང་ལྗོངས་རྒྱུ་ཞིང་གྲོང་ཁྱེར་བཟང་བྱེད་དུ་གཤེགས་སོ། །གང་གི་ཚེ་བཅོམ་ལྡན་འདས་ཀྱིས་མཉན་ཡོད་དུ་ཆོ་འཕྲུལ་ཆེན་པོ་བསྟན་པ་དེའི་ཚེ་མུ་སྟེགས་ཅན་རྣམས་མཐའ་འཁོབ་ཏུ་དོང་བ་ལས་དེ་ནས་ཁ་ཅིག་གྲོང་ཁྱེར་བཟང་བྱེད་དུ་དོང་
ནས་གནས་པ་དེ་རྣམས་ཀྱིས་དགེ་སྦྱོང་གཽ་ཏ་མ་འོང་ངོ་ཞེས་ཐོས་སོ། །ཐོས་ནས་ཀྱང་རོད་རོད་པོར་གྱུར་ནས་བདག་ཅག་སྔོན་ནི་དགེ་སྦྱོང་གཽ་ཏ་མས་ཡུལ་དབུས་ནས་སྤྱུགས་སོ། །དེ་གལ་ཏེ་འདིར་འོངས་ན། གདོན་མི་ཟ་བར་བདག་ཅག་འདི་ནས་ཀྱང་སྤྱུགས་པར་འགྱུར་གྱིས་དེ་ལ་ཐབས་ཤིག་བཤམ་པར་བྱའོ་སྙམ་མོ། །དེ་རྣམས་རིགས་ཀྱི་ཁྱིམ་དག་ཏུ་དོང་ནས་སྨྲས་པ། ཆོས་ཐོབ་པར་གྱུར་ཅིག །ཆོས་ཐོབ་པར་གྱུར་ཅིག །འཕགས་པ་དག་དེ་ཅི་ལགས། ཤེས་ལྡན་དག་བལྟས་ཟིན་གྱིས་འགྲོའོ། །ཅིའི་སླད་དུ་རེ་ཞིག་ཁྱེད་ཅག་གི་འབྱོར་པ་ཕུན་སུམ་ཚོགས་པ་ནི་ཁོ་བོ་ཅག་གིས་མཐོང་གིས་ཇི་སྲིད་རྒུད་པ་མ་མཐོང་བ་དེའི་བར་དུ་འདོང་ངོ༌། །འཕགས་པ་དག་བདག་ཅག་ལ་རྒུད་པ་ཅི་ཞིག་འབྱུང་བར་འགྱུར་ལགས། ཤེས་ལྡན་དག་དགེ་སྦྱོང་གཽ་ཏ་མ་སྤུ་གྲིའི་སེར་བ་འབེབས་ཤིང་དུ་མ་ཞིག་བུ་མེད་པ་དང༌། ཁྱིམ་ཐབ་མེད་པར་བྱེད་ཅིང་འོང་ངོ༌། །འཕགས་པ་དག་གལ་ཏེ་དེ་ལྟ་ན་གང་གི་དུས་ཁོ་ནར་གཞེས་པར་བགྱི་བ་དེ་ཁོ་ནའི་དུས་སུ་བདག་ཅག་སྤང་བར་བགྱིའམ། བཞུགས་ཤིག་མ་བཞུད་ཅིག །དེ་རྣམས་ཀྱིས་སྨྲས་པ། བདག་ཅག་ཅི་སྟེ་འདུག་ཁྱེད་ཅག་ཁོ་བོ་ཅག་གི་ཉན་དུ་མི་བཏུབ་བོ། །འཕགས་པ་དག་གསུང་ཤིག་མཉན་པར་བགྱིའོ། །དེ་རྣམས་ཀྱིས་སྨྲས་པ། ཤེས་ལྡན་དག་གྲོང་ཁྱེར་བཟང་བྱེད་ཀྱི་ཉེ་འཁོར་གྱི་སྐྱེ་བོའི་ཚོགས་ཐམས་ཅད་གནས་ནས་ཕྱུང་ལ་གྲོང་ཁྱེར་བཟང་བྱེད་ཀྱི་ནང་དུ་ཚུད་ཅིག་རྩྭ་སྔོན་པོ་རྣམས་རྔོས་ཤིག །འདུག་གནས་རྣམས་ནི་ཤིག་ཅིག །མེ་ཏོག་དང་འབྲས་བུའི་ཤིང་རྣམས་ནི་ཆོད་ཅིག །ཆུ་རྣམས་ནི་དུག་ལུགས་ཤིག །དེ་རྣམས་ཀྱིས་སྨྲས་པ། འཕགས་པ་དག་བཞུགས་ཤིག་དང་ཐམས་ཅད་བགྱིའོ། །དེ་ནས་དེ་རྣམས་ཀྱིས་གྲོང་ཁྱེར་བཟང་བྱེད་ཀྱི་ཉེ་འཁོར་གྱི་སྐྱེ་བོའི་ཚོགས་ཐམས་ཅད་གནས་ནས་བཏོན་ནས་གྲོང་ཁྱེར་བཟང་བྱེད་ཀྱི་ནང་དུ་བཙུད་དེ།རྩྭ་སྔོན་པོ་རྣམས་ནི་བརྔས། འདུག་གནས་རྣམས་ནི་བཤིག །མེ་ཏོག་དང་འབྲས་བུའི་ཤིང་ནི་བཅད། ཆུ་རྣམས་ནི་དུག་བླུགས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསམས་པ། བཅོམ་ལྡན་འདས་ལ་བཀུར་སྟི་མ་ཡིན་པ་བྱེད་པ་ཡལ་བར་དོར་བ་ནི་བདག་གི་ཆ་མ་
ཡིན་ཏེ། འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་དུ་དཀའ་བ་བརྒྱ་སྟོང་དུ་མས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་པས་བླ་ན་མེད་པའི་ཡེ་ཤེས་བརྙེས་པའི་བཅོམ་ལྡན་འདས་དེ་འཇིག་རྟེན་ཐམས་ཅད་མེད་པའི་ཡུལ་སྟོང་རྒྱུ་ཞིང་གཤེགས་པར་བྱ་འམ། མ་ལ་བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་བདེ་བ་ལ་རེག་པར་བྱ་བའི་ཕྱིར་འབད་པར་བྱའོ་སྙམ་ནས་དེས་རླུང་གཏོང་བའི་ལྷའི་བུ་ལ་བསྒོ་བ། སོང་ལ་ཆུ་དུག་ཅན་རྣམས་སྐོམས་ཤིག །ཆར་འབེབས་པའི་ལྷའི་བུ་ལ་བསྒོ་བ། འདི་རྣམས་ཀྱིས་བསྐམས་པ་དང༌། ཁྱོད་ཀྱིས་ཆུ་ཡན་ལག་བརྒྱད་དང་ལྡན་པས་ཁོང་ཤིག །རྒྱལ་ཆེན་བཞིའི་རིས་ཀྱི་ལྷ་རྣམས་ལ་ཡང་བསྒོ་བ། ཁྱེད་ཀྱིས་གྲོང་ཁྱེར་བཟང་བྱེད་ཀྱི་ཉེ་འཁོར་དུ་གནས་ཐོབ་ཤིག །དེ་ནས་རླུང་གཏོང་བའི་ལྷའི་བུས་ནི་ཆུ་དུག་ཅན་རྣམས་བསྐམས་སོ། །ཆར་འབེབས་པའི་ལྷའི་བུས་ནི་དེར་ཡང་ཆུ་ཡན་ལག་བརྒྱད་དང་ལྡན་པས་བཀང་ངོ༌། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ཀྱང་གྲོང་ཁྱེར་བཟང་བྱེད་ཀྱི་ཉེ་འཁོར་དུ་གནས་བཏབ་ནས་ལྗོངས་རྣམས་འབྱོར་ཅིང་རྒྱས་པར་གྱུར་ཏོ། །མུ་སྟེགས་ཅན་རྣམས་ཀྱིས་གྲོང་ཁྱེར་ན་གནས་པའི་སྐྱེ་བོའི་ཚོགས་རྣམས་བསོགས་ནས་དེ་རྣམས་ཀྱིས་རྟོག་ཆེན་དག་མངགས་ཏེ་ལྗོངས་རྣམས་ཅི་འདྲ་ལྟོས་ཤིག །དེ་རྣམས་དོང་བ་ལས་ལྗོངས་རྣམས་ལྷག་པར་ཡང་འབྱོར་ཅིང་རྒྱས་པར་གྱུར་པ་མཐོང་ནས་སླར་འོངས་ཏེ་སྨྲས་པ། ཤེས་ལྡན་དག་ལྗོངས་རྣམས་འདི་ལྟ་བུར་འབྱོར་ཅིང་རྒྱས་པ་ནི་སྔོན་ལན་འགའ་ཡང་བདག་ཅག་གིས་མ་མཐོང་ངོ༌། །མུ་སྟེགས་ཅན་རྣམས་ཀྱིས་སྨྲས་པ། ཤེས་ལྡན་དག་ཁྱེད་ཀྱིས་མཐོང་ངམ། རེ་ཞིག་གང་ཞིག་སེམས་མེད་པའི་དངོས་པོ་རྣམས་ཀྱང་སྒྱུར་བར་བྱེད་པ་དེས། ཁྱེད་ཅག་སྒྱུར་བར་མི་བྱེད་པ་དེ་ལྟ་སྲིད་རེ་སྐན། ཁྱེད་ཅག་རྣམ་པ་ཐམས་ཅད་དུ་བལྟས་ཟིན་ཏེ། བལྟ་བའི་ཐ་མ་བྱས་ནས་འགྲོའོ། །དེ་རྣམས་ཀྱིས་སྨྲས་པ། འཕགས་པ་དག་བཞུགས་ཤིག །ཁྱེད་ཅག་ལ་དགེ་སྦྱོང་གཽ་ཏ་མས་ཅི་ཞིག་བགྱིར་མཆིས། དེ་ཡང་རབ་ཏུ་བྱུང་བ་ལགས་ལ། ཁྱེད་ཀྱང་རབ་ཏུ་བྱུང་བ་སློང་ཞིང་འཚོ་བ་ལགས་ན།
ཅི་དེས་ཁྱེད་ཅག་གི་སློང་བ་བཀག་པར་འགྱུར་སྙམ་མམ། མུ་སྟེགས་ཅན་རྣམས་ཀྱིས་སྨྲས་པ། དམ་ཞིག་བཅས་ཏེ་གལ་ཏེ་ཁྱེད་ཅག་སུས་ཀྱང་དགེ་སྦྱོང་གཽ་ཏ་མ་ལ་བལྟ་བར་འགྲོ་བར་མི་བྱ་ཞིང་གང་ཞིག་འགྲོ་བ་དེ་ལ་ཆད་པར་ཀཱར་ཥཱ་པ་ཎ་དྲུག་བཅུས་གཅད་པར་ཁྲིམས་འཆའ་ན་འདུག་གོ །དེ་རྣམས་ཀྱིས་ཀྱང་ཁས་བླངས་ནས་ཁྲིམས་སུ་བཅས་སོ། །དེ་ནས་བཅོམ་ལྡན་འདས་ལྗོངས་རྒྱུ་ཞིང་གཤེགས་ཏེ་རིམ་གྱིས་གྲོང་ཁྱེར་བཟང་བྱེད་དུ་གཤེགས་ནས་བཟང་བྱེད་ཀྱི་ལྷོ་ཕྱོགས་ཀྱི་གནས་ཤིག་ན་བཞུགས་སོ། །དེའི་ཚེ་སེར་སྐྱའི་གཞིའི་བྲམ་ཟེའི་བུ་མོ་གྲོང་ཁྱེར་བཟང་བྱེད་དུ་བག་མར་བཏང་བ་དེ་ར་བའི་ཁ་ན་འདུག་པས་བཅོམ་ལྡན་འདས་མུན་ཁུང་ན་བཞུགས་པ་མཐོང་ནས་དེས་བསམས་པ། བཅོམ་ལྡན་འདས་ཤཱཀྱའི་རིགས་དགའ་བར་མཛད་པ། ཤཱཀྱའི་རིགས་ཀྱི་རྒྱལ་པོ་སྤངས་ནས་རབ་ཏུ་བྱུང་བ་དེ་ནི་འདི་ཡིན་ཏེ། གལ་ཏེ་འདི་ལ་ཐེམ་སྐས་ཤིག་ཡོད་པར་གྱུར་ན་བདག་མར་མེ་ཐོགས་ལ་འབབས་པ་ཞིག །དེ་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་སུ་ཆུད་ནས་ཐེམ་སྐས་ཞིག་སྦྲུལ་ཏོ། །དེ་ནས་དེ་སྙིང་དགའ་བ་དང་མགུ་བ་དང༌། རབ་ཏུ་དགའ་བས་མར་མེ་ཐོགས་ཏེ་ཐེམ་སྐས་ལས་བབས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ཀྱི་སྤྱན་སྔར་མར་མེ་བཞག་ནས་ཞབས་གཉིས་ལ་མགོ་བོས་ཕྱག་བྱས་ཏེ་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་དེའི་བསམ་པ་དང༌། བག་ལ་ཉལ་དང༌། ཁམས་དང༌། རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བའི་ཆོས་བཤད་པ་མཛད་དོ་ཞེས་བྱ་བ་ནས། སྐྱབས་སུ་མཆི་བར་མངོན་པར་དད་ལགས་སོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཅོམ་ལྡན་འདས་ཀྱིས་བུ་མོ་དེ་ལ་འདི་སྐད་ཅེས་བཀའ་སྩལ་ཏོ། །བུ་མོ་ཁྱོད་ཚུར་ཁྱིམ་བདག་ལུག་གང་ན་བ་དེར་སོང་ལ་ཕྱིན་པ་དང་དེ་ལ་ང་ན་རེ་ནད་མེད་པར་གྱུར་ཅིག་ཅེས་སྨྲོས་ལ་འདི་སྐད་ཅེས་ཀྱང་སྨྲོས་ཤིག །ཁྱིམ་བདག་ཁྱོད་ཀྱི་ཆེད་ཁོ་ནར་ང་འདིར་འོངས་ན་ཁྱོད་སྒོ་བཅད་ནས་འདུག་པས་གློ་བུར་བ་ལ་ཇི་ལྟར་ཁྱོད་བྱེད་པ་དེ་ལྟ་བུར་བྱ་བ་དེ་ཅིག་རིགས་སམ། གལ་ཏེ་
ཚོགས་ཀྱིས་ཁྲིམས་སུ་བཅའ་བ་བྱས་སོ་ཞེས་སྨྲས་པ་དང༌། ཁྱོད་ཀྱི་བུའི་རྐེད་པ་ལ་ལྔ་བརྒྱ་པའི་སྣོད་བཏགས་ཏེ་འདུག་པ་དེས་གལ་ཏེ་བརྒྱའམ་སྟོང་འགེད་པར་བཏང་ན་ཡང་གང་བ་ཉིད་དུ་འདུག་ཅིང་ཡོངས་སུ་ཟད་པར་མི་འགྱུར་ན་ཁྱོད་ཀཱར་ཥཱ་པ་ཎ་དྲུག་བཅུ་བྱིན་ནས་འོང་མི་ནུས་སམ་ཞེས་སྨྲོས་ཤིག །བཙུན་པ་བཀའ་བཞིན་འཚལ་ཞེས་བུ་མོ་དེས་བཅོམ་ལྡན་འདས་ཀྱི་ལྟར་མཉན་ནས་ཆས་པ་དང༌། བཅོམ་ལྡན་འདས་ཀྱིས་ཇི་ལྟར་སུས་ཀྱང་མི་ཚོར་བ་དེ་ལྟར་བྱིན་གྱིས་བརླབས་ནས་ཁྱིམ་བདག་ལུག་གི་གན་དུ་སོང་སྟེ་ཕྱིན་པ་དང་སྨྲས་པ། ཁྱིམ་བདག་བཅོམ་ལྡན་འདས་ཁྱོད་ལ་ནད་མེད་པར་གྱུར་ཅིག་ཅེས་གསུང་ངོ༌། །དེས་སྨྲས་པ། བུ་མོ་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ཁྱིམ་བདག །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཁོ་ནའི་ཆེད་དུ་ང་འདིར་གཤེགས་ན་ཁྱོད་སྒོ་བཅད་ནས་འདུག་པ་གློ་བུར་བ་ལ་ཇི་ལྟར་ཁྱོད་བྱེད་པ་དེ་ལྟ་བུར་བྱ་བ་ཅིག་རིགས་སམ། དེས་སྨྲས་པ། བུ་མོ་ཚོགས་ཀྱིས་ཁྲིམས་སུ་བཅའ་བ་སུས་ཀྱང་དགེ་སྦྱོང་གཽ་ཏ་མ་ལ་བལྟ་བར་བྱ་བའི་ཕྱིར་འགྲོ་བར་མི་བྱའོ། །གང་ཞིག་འགྲོ་ན་དེ་ཚོགས་ཀྱིས་ཀཱར་ཥཱ་པ་ཎ་དྲུག་བཅུའི་ཆད་པས་གཅད་དོ་ཞེས་དམ་བཅས་སོ། །ཁྱིམ་བདག །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་བུའི་རྐེད་པ་ལ་ལྔ་བརྒྱ་པའི་སྣོད་བཏགས་ཏེ་འདུག་པ་དེས་གལ་ཏེ་བརྒྱའམ་སྟོང་འགེད་པར་བཏང་ན་ཡང་གང་བ་ཁོ་ནར་འགྱུར་ཞིང་ཡོངས་སུ་ཟད་པར་མི་འགྱུར་ན་ཀཱར་ཥཱ་པ་ཎ་དྲུག་བཅུ་བྱིན་ནས་ཁྱོད་འོང་བར་མི་ནུས་སམ་ཞེས་གསུང་ངོ༌། །དེས་བསམས་པ། འདི་ནི་སུས་ཀྱང་མི་ཤེས་ན་བཅོམ་ལྡན་འདས་དེ་ནི་ཐམས་ཅད་མཁྱེན་པ་ཡིན་པས་འགྲོའོ་སྙམ་ནས། དེས་ཀཱར་ཥཱ་པ་ཎ་དྲུག་བཅུ་སྒོར་བཞག་ནས་བྲམ་ཟེའི་བུ་མོས་བསྟན་པའི་ཐེམ་སྐས་ལས་བས་ཏེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་ལུག་གི་བསམ་པ་དང༌། བག་ལ་ཉལ་དང༌། ཁམས་དང༌། རང་བཞིན་མཁྱེན་ནས་འཕགས་པའི་
བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། ཁྱིམ་བདག་ལུག་གིས་དེ་ཐོས་ནས་ཞེས་བྱ་བ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ་ཞེས་བྱ་བའི་བར་གོང་མ་བཞིན་ནོ། །དེས་བདེན་པ་མཐོང་ནས་གསོལ་པ། བཅོམ་ལྡན་འདས་བཟང་བྱེད་ན་གནས་པའི་སྐྱེ་བོའི་ཚོགས་འདི་དག་གིས་ཀྱང་ཅིག་འདི་ལྟ་བུའི་ཆོས་རྣམ་པ་སྣ་ཚོགས་འཐོབ་པར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་ལས་བརྟེན་ནས་ཕལ་ཆེར་ཀུན་གྱིས་འཐོབ་པ་ཁོ་ནར་འགྱུར་རོ། །དེ་ནས་ཁྱིམ་བདག་ལུག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་སྟེ། དེ་ཁྱིམ་དུ་ཕྱིན་ནས་གྲོང་ཁྱེར་གྱི་ནང་དུ་ཀཱར་ཥཱ་པ་ཎའི་ཕུང་པོ་བཅེར་ཏེ་ཚིགས་སུ་བཅད་པས་སྨྲས་པ། གང་ཞིག་རྒྱལ་བ་འདོད་ཆགས་སྐྱོན་བཅོམ་རྩོད་མེད་པ། །མཚུངས་པ་མེད་པ་གསེར་གྱི་མདོག་ཅན་ལྟ་འདོད་པ། །དེ་ནི་འཇིགས་མེད་སྙིང་གིས་ཤིན་ཏུ་ངེས་བྱོས་ལ། །མྱུར་དུ་དེངས་ཤིག་དེ་ཡི་ནོར་ནི་ཁོ་བོས་གཞལ། །སྐྱེ་བོའི་ཚོགས་ཀྱིས་སྨྲས་པ། ཁྱིམ་བདག་དགེ་སྦྱོང་གཽ་ཏ་མ་མཐོང་ན་དགེ་བར་འགྱུར་རམ། དེས་སྨྲས་པ། དགེ་བར་འགྱུར་རོ། །དེ་རྣམས་ཀྱིས་སྨྲས་པ། གལ་ཏེ་དེ་ལྟ་བས་ན་ཚོགས་ཁོ་ནས་ཁྲིམས་སུ་བཅས་པ་ཚོགས་ཁོ་ནས་བཤིག་ཏུ་ཟད་མོད། འདི་ལ་འགལ་བ་ཅི་ཞིག་ཡོད། དེ་རྣམས་ཀྱིས་ཁྲིམས་སུ་བཅས་པ་བཤིག་ནས་འབྱུང་བར་བརྩམས་སོ། །དེ་ནས་ཕན་ཚུན་སྔོས་པས་འབྱུང་བར་མ་ནུས་པ་དང་གནོད་སྦྱིན་ལག་ན་རྡོ་རྗེས་འདུལ་བའི་སྐྱེ་བོ་ལ་སྙིང་བརྩེ་བའི་ཕྱིར་རྡོ་རྗེ་འཕངས་པས་ར་བ་དྲལ་ནས་སྲོག་ཆགས་བརྒྱ་སྟོང་ཕྲག་དུ་མ་ཁ་ཅིག་ནི་ཡ་མཚན་སྐྱེས། ཁ་ཅིག་ནི་སྔོན་གྱི་དགེ་བའི་རྩ་བས་ཡང་དག་པར་བསྐུལ་ནས་བྱུང་ངོ༌། །དེ་ནས་སྐྱེ་བོའི་ཚོགས་ཆེན་པོ་འདུས་པས་བཅོམ་ལྡན་འདས་ཀྱི་ཉེ་འཁོར་དཔག་ཚད་གཅིག་ཚུན་ཆད་འཁོར་བར་འདུག་གོ །དེ་ནས་བཅོམ་ལྡན་འདས་ཀྱིས་འཁོར་དེ་རྣམས་ཟིལ་གྱིས་མནན་ཏེ་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ནས་སེམས་ཅན་དུ་མ་དག་གི་རྒྱུད་ལ་དགེ་བའི་རྩ་བ་སྐྱེད་པར་བྱེད་པའི་ཆོས་བཤད་པ་མཛད་དེ། དེ་
ཐོས་ནས་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ་ཞེས་བྱ་བ་ནས། ཁ་ཅིག་ནི་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་སོ་ཞེས་བྱ་བའི་བར་གོང་མ་བཞིན་དུའོ།། །།འདུལ་བ་གཞི། བམ་པོ་ལྔ་བཅུ་བརྒྱད་པ། བཅོམ་ལྡན་འདས་ཀྱིས་ཡུན་རིང་པོ་ཞིག་ཏུ་ཆོས་བཤད་པས་གདུགས་ཚོད་ཀྱི་དུས་ལས་ཡོལ་བར་གྱུར་ཏོ། །ཁྱིམ་བདག་ལུག་གིས་གསོལ་པ། བཅོམ་ལྡན་འདས་ཞལ་ཟས་ཀྱི་མཛད་པ་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཟས་ཀྱི་དུས་ལས་ཡོལ་བར་གྱུར་ཏོ། །དེས་གསོལ་པ། བཅོམ་ལྡན་འདས་དུས་མ་ལགས་པར་རུང་བ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། མར་དང༌། བུ་རམ་དང༌། ཧྭགས་དང༌། ཤ་ཁར་དང༌། བཏུང་བ་དག་གོ །དེ་ནས་ཁྱིམ་བདག་ལུག་གིས་གྱོས་མཁན་དག་བཀུག་སྟེ་སྨྲས་པ། ཤེས་ལྡན་དག་དུས་མ་ཡིན་པའི་བཅའ་བ་རྣམས་མྱུར་དུ་སྟ་གོན་གྱིས་ཤིག །དེ་རྣམས་ཀྱིས་དུས་མ་ཡིན་པའི་བཅའ་བ་རྣམས་སྟ་གོན་བྱས་སོ། །དེ་ནས་ཁྱིམ་བདག་ལུག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་དུས་མ་ཡིན་པའི་བཅའ་བ་དང༌། དུས་མ་ཡིན་པའི་བཏུང་བ་རྣམས་ཀྱིས་ཚིམ་པར་བྱས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལུག་འཁོར་དང་བཅས་པ་ཡང་བདེན་པ་རྣམས་ལ་སོ་སོར་བཀོད། རི་འོར་ན་གནས་པའི་སྐྱེ་བོའི་ཚོགས་དེ་ཡང་སྐལ་བ་ཇི་ལྟ་བ་བཞིན་དུ་བཏུལ་ཏེ་གཤེགས་པ་ན་ཁྱིམ་བདག་ལུག་གིས་གསོལ་པ། བཅོམ་ལྡན་འདས་ཤུལ་གྱི་སྙུན་རྒྱགས་ཀྱི་ཟོང་ཀཱར་ཥཱ་པ་ཎ་དག་བཞེས་ཤིག །བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ། །བཅོམ་ལྡན་འདས་ཀྱིས་ཀཱར་ཥཱ་པ་ཎ་བླང་བར་བྱའོ་ཞེས་བཀའ་སྩལ་པ་དང༌། དགེ་སློང་རྣམས་ཀྱིས་སུ་ཞིག་གིས་བླང་བར་བྱ་བ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རུང་བ་བྱེད་པས་སོ། །རུང་བ་བྱེད་པ་མེད་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་གྱིས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་ཚུལ་གྱི་བསླབ་པའི་གཞི་བཅུ་
བར་གསེར་དངུལ་ལེན་པར་གསུངས་ལ། བཅོམ་ལྡན་འདས་ཀྱིས་དགེ་ཚུལ་གྱིས་བླང་བར་བྱའོ་ཞེས་གསུངས་པ་དེ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཉེ་བ་འཁོར་ངས་འཆང་བར་བྱེད་པ་ལས་དགོངས་ཏེ་གསུངས་ཀྱིས་མི་བླང་བ་ནི་མ་ཡིན་ཏེ། དེ་བས་ན་དགེ་ཚུལ་གྱིས་བླང་བར་བྱའི་བླངས་ནས་བདག་གིར་ནི་མི་བྱའོ། །ཁྱིམ་བདག་ལུག་གིས་གསོལ་པ། བཅོམ་ལྡན་འདས་བུ་རམ་དག་བཞེས་ཤིག །བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ། །དགེ་སློང་རྣམས་ཀྱིས་སུ་ཞིག་གིས་ཇི་ལྟར་བླང་བར་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པའམ་དགེ་ཚུལ་མེད་ན། དགེ་སློང་གིས་ཞག་བདུན་པར་བྱིན་གྱིས་བརླབས་ནས་རང་ཉིད་ཀྱིས་བཀུར་བར་བྱའོ། །དགེ་སློང་དག་གིས་ཇི་ལྟར་བྱིན་གྱིས་བརླབ་པར་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ལག་པ་གཉིས་བཀྲུས་ནས་བྱིན་ལེན་བྱས་ཏེ་ལག་པ་གཡོན་པའི་སྟེང་དུ་བཞག་ལ་ལག་པ་གཡས་པས་བཀབ་ནས་དགེ་སློང་གི་མདུན་དུ་འདུག་ནས་ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བའི་སྨན་འདི་བདག་དང་ཚངས་པ་མཚུངས་པར་སྤྱོད་པ་རྣམས་ཀྱི་ཕྱིར་ཞག་བདུན་པར་བྱིན་གྱིས་བརླབ་བོ་ཞེས་དེ་སྐད་ལན་གཉིས་ལན་གསུམ་དུ་བརྗོད་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་བུ་རམ་ཞག་བདུན་པར་བྱིན་གྱིས་བརླབ་པར་བྱའོ་ཞེས་གང་གསུངས་པ་སུ་ཞིག་གིས་འཚལ་བར་བགྱི་ལགས། ཉེ་བ་འཁོར་གང་ཟག་ལྔ་རྣམས་ཀྱིས་ཏེ། ལམ་དུ་ཞུགས་པ་དང་སྨྱུང་བ་བྱས་པ་དང༌། ནད་པ་དང༌། དགེ་སྐོས་དང༌། ལག་གི་བླས་སོ། །དགེ་སློང་ལྗོངས་རྒྱུར་ཆས་པ་རྣམས་ཀྱིས་འབྲས་དང་ཕྱེ་དག་གི་ནང་དུ་བུ་རམ་བཅུག་པ་ལས་ལམ་གྱིས་ངལ་ནས་བཟའ་བར་འདོད་ན་འགྱོད་པས་མ་ཟོས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཟས་དེ་ཟས་ཀྱི་བྱ་བ་བྱེད་མི་ནུས་པས་འབྲས་དག་གི་ནང་དུ་བཅུག་པ་གང་ཡིན་པ་དེ་སྤྲུགས་ནས་བཟའ་བར་བྱའོ། །
ཕྱེ་རྣམས་ཀྱི་གང་ཡིན་པ་དེ་ནི་ཆུས་བཀྲུས་ནས་བཟའ་བར་བྱའོ། །ཁ་ཅིག་ཞུ་བར་གྱུར་པ་དེ་བཀྲུར་མ་རུང་སྟེ་ཟས་དང་བཅས་པ་ཉིད་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྨྱུག་མའི་ཚལ་པས་བཞར་ལ་ཆུས་བཀྲུ་བར་བྱའོ། །འོན་ཀྱང་ཟས་མེད་པར་བྱ་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་བསལ་ཏེ། ཆུའི་ནང་དུ་མཉེས་ལ་བཏུང་བར་བྱས་ནས་དེ་ཚགས་ཀྱིས་བཙགས་ལ་བཏུང་བར་བྱ་སྟེ། དེ་ལ་འགྱོད་པར་མི་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཁྱིམ་བདག་ལུག་དང༌། ལུག་གི་མཆིས་འབྲང་དང༌། ལུག་གི་བུ་དང༌། ལུག་གི་མནའ་མེ་དང༌། ལུག་གི་བྲན་ཕོ་དང༌། ལུག་གི་བྲན་མོས་ལས་ཅི་ཞིག་བགྱིས་ན། དེས་ན་དེ་དྲུག་བསོད་ནམས་ཆེན་པོར་གྱུར་ཅིང༌། བཅོམ་ལྡན་འདས་ཀྱི་སྦྱན་སྔར་བདེན་པ་མཐོང་ནས་འདི་དག་གིས་བཅོམ་ལྡན་འདས་མཉེས་པར་བགྱིས་ཀྱི་མ་མཉེས་པར་ནི་མ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ཉིད་ཀྱིས་ལས་རྣམས་བྱས་ཤིང་བསགས་པ་ཚོགས་རྙེད་པ་ཞེས་བྱ་བ་ནས་འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་དུ་རྒྱལ་པོ་ཚངས་པས་བྱིན་ཞེས་བྱ་བ་རྒྱལ་སྲིད་བྱེད་དུ་འཇུག་གོ །དེའི་ཚེ་བཱ་རཱ་ཎ་སཱིའི་གྲོང་ཁྱེར་དུ་ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་པས་ཐུར་མས་འཚོ་བའི་མུ་གེ་ཆེན་པོ་འབྱུང་བར་འགྱུར་རོ་ཞེས་ལུང་བསྟན་ཏོ། །མུ་གེ་རྣམ་པ་གསུམ་ནི་ཟ་མ་ཏོག་དང༌། རུས་གོང་དཀར་པོ་དང༌། ཐུར་མས་འཚོ་བའོ། །དེ་ལ་ཟ་མ་ཏོག་ཅེས་བྱ་བ་ནི་ཟ་མ་ཏོག་དེའི་ནང་དུ་མི་རྣམས་ཀྱིས་འབྲུ་དག་བླུགས་ཏེ། མ་འོངས་པའི་སེམས་ཅན་རྣམས་ཀྱི་ཆེད་དུ་བཞག་ནས་བདག་ཅག་ཤི་ནས་འབྲུ་འདིས་མི་དེ་དག་གི་བྱ་བ་བྱེད་པར་འགྱུར་རོ་སྙམ་པ་སྟེ། འདི་ནི་ཟ་མ་ཏོག་དང་འབྲེལ་པས་ཟ་མ་ཏོག་ཅེས་བྱའོ། །རུས་གོང་དཀར་པོ་གང་ཞེ་ན། དུས་དེ་ན་མི་རྣམས་ཀྱི་རུས་པ་དག་བསྡུས་ནས་རེ་ཞིག་བཙོས་ཏེ། ཇི་ཙམ་ན་རུས་པ་དེ་དཀར་པོར་གྱུར་པ་
དང༌། དེ་ནས་དེའི་ཁུ་བ་འཐུང་བ་སྟེ། འདི་ནི་རུས་གོང་དཀར་པོ་དང་འབྲེལ་བས་རུས་གོང་དཀར་པོ་ཞེས་བྱའོ། །ཐུར་མས་འཚོ་བ་གང་ཞེ་ན། དུས་དེ་ན་མི་རྣམས་ཀྱིས་གྱུལ་གྱི་སེར་ག་ནས་འབྲུའི་འབྲུམ་བུ་དག་ཐུར་མས་བྲུས་ནས་ཆུ་མང་པོའི་སྣོད་དུ་བཙོས་ནས་འཐུང་བ་སྟེ། འདི་ནི་ཐུར་མ་དང་འབྲེལ་པས་ཐུར་མས་འཚོ་བ་ཞེས་བྱའོ། །དེ་ནས་རྒྱལ་པོ་ཚངས་པས་བྱིན་གྱིས་བཱ་རཱ་ཎ་སཱིར་དྲིལ་སྒྲོགས་སུ་བཅུག་པ། བཱ་རཱ་ཎ་སཱི་ན་གནས་པའི་ཤེས་ལྡན་གྲོང་ཁྱེར་པ་དག་ཉོན་ཅིག །ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་པས་ཟ་མ་ཏོག་དང༌། རུས་གོང་དཀར་པོ་དང༌། ཐུར་མས་འཚོ་བའི་མུ་གེ་འབྱུང་བར་ལུང་བསྟན་གྱིས། ཁྱེད་ལས་གང་དག་ལོ་བཅུ་གཉིས་ཀྱི་བཟའ་བ་ཡོད་པ་དེ་རྣམས་ནི་འཁོད་ཅིག །གང་དག་ལ་མེད་པ་དེ་དག་ནི་གར་དགའ་བར་དེང་ལ་མུ་གེ་མེད་ཅིང་ལོ་ལེགས་པར་གྱུར་ནས་སླར་གཤེགས་ཤིག །དེའི་ཚེ་ན་བཱ་རཱ་ཎ་སཱི་ན་ཁྱིམ་བདག་ཕྱུག་ཅིང་ནོར་མང་བ། ལོངས་སྤྱོད་ཆེ་བ། འཁོར་ཡངས་ཤིང་རྒྱ་ཆེ་བ་ཞིག་ཡོད་དེ། དེས་མངན་བཀུག་སྟེ་སྨྲས་པ། ཀྱེ་ནང་རྗེ་ཁོ་བོ་འཁོར་དང་བཅས་པའི་ལོ་བཅུ་གཉིས་ཀྱི་བཟའ་བ་ཡོད་དམ། དེས་སྨྲས་པ། དཔོན་པོ་མཆིས་སོ། །དེ་དེ་ཉིད་ན་གནས་པ་ལས་མུ་གེ་དེ་བརྒྱུད་མ་ཁོ་ནར་བྱུང་བས་དེའི་བང་མཛོད་རྣམས་ཡོངས་སུ་ཟད་པས་འཁོར་གྱི་སྐྱེ་བོ་ཐམས་ཅད་ཤི་བར་གྱུར་ཏེ་བདག་ཉིད་དང་དྲུག་ཅིག་ལུས་སོ། །དེ་ནས་ཁྱིམ་བདག་དེས་བང་མཛོད་རྣམས་ཕྱགས་པ་ལས། འབྲས་བྲེའུ་ཆུང་གང་ཞིག་བྱུང་ནས། དེའི་ཆུང་མས་སྣོད་དུ་བླུགས་ཏེ་བཙོས་སོ། །སངས་རྒྱས་རྣམས་འབྱུང་བ་མེད་པ་ན་རང་སངས་རྒྱས་ཞེས་བྱ་བ་ནས། འཇིག་རྟེན་གྱི་ཡོན་གནས་གཅིག་པུ་ངག་འཇིག་རྟེན་དུ་འབྱུང་བར་འགྱུར་བ་ཞེས་བྱ་བའི་བར་གོང་མ་བཞིན་དུའོ། །ཇི་ཙམ་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་དང་བཱ་རཱ་ཎ་སཱིར་ཕྱིན་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བཱ་རཱ་ཎ་སཱིར་བསོད་སྙོམས་ལ་ཞུགས་པ་ན་ཁྱིམ་བདག་དེས་ཀྱང་བཟའ་བ་བསྡོགས་པ་དང༌། རང་སངས་རྒྱས་དེ་ཡང་རིམ་བཞིན་དུ་བསོད་སྙོམས་ལ་བརྒྱུས་ནས་
དེའི་ཁྱིམ་དུ་ཕྱིན་ཏོ། །ཁྱིམ་བདག་དེས་དེ་ལུས་མཛེས་ཤིང་སེམས་དང་བ་མཐོང་ངོ༌། །མཐོང་ནས་ཀྱང་བསམས་པ། འདི་བདག་གིས་ཟོས་ཀྱང་གདོན་མི་ཟ་བར་སྲོག་དང་འབྲལ་བར་འགྱུར་གྱིས། མ་ལ་བདག་གི་སྐལ་བ་རབ་ཏུ་བྱུང་བ་འདི་ལ་སྦྱིན་ནོ་སྙམ་ནས་དེས་ཆུང་མ་ལ་སྨྲས་པ། བཟང་མོ་ཁོ་བོའི་སྐལ་བ་ནི་རབ་ཏུ་བྱུང་བ་འདི་ལ་དབུལ་ལོ། །དེས་བསམས་པ། བདག་གི་ཁྱིམ་ཐབ་མི་ཟ་ན་བདག་གིས་ཅི་སྟེ་བཟའ་སྙམ་ནས། དེས་སྨྲས་པ། རྗེའི་སྲས་བདག་གི་སྐལ་བ་ཡང་འདི་ལ་དབུལ་ལོ། །དེ་བཞིན་དུ་བུ་དང༌། མནའ་མ་དང༌། བྲན་ཕོ་དང༌། བྲན་མོས་ཀྱང་དབྱད་ནས་རང་རང་གི་སྐལ་བ་ཡོངས་སུ་བཏང་སྟེ། དེ་ནས་དེ་ཐམས་ཅད་འདུས་ནས་རང་སངས་རྒྱས་ལ་བསོད་སྙོམས་ཕུལ་ལོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་ནི་མ་ཡིན་པས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང༌། གསལ་བ་དང༌། ཆར་འབེབས་པ་དང༌། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་དག་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་ཤིང་རྩ་བ་ནས་བཅད་དེ་འགྱེལ་བ་བཞིན་དུ་རྐང་པ་གཉིས་ལ་གཏུགས་ནས་སྨོན་ལམ་ཅི་འདོད་པ་གདབ་པར་རྩོམ་སྟེ། ཁྱིམ་བདག་གིས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་གིས་གལ་ཏེ་བང་བ་དང་མཛོད་སྟོང་པ་དག་ལ་བལྟས་ན་མཐོང་བ་དེའི་མོད་ལ་གང་བར་གྱུར་ཅིག །འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་བ་རྣམས་མཉེས་པར་བགྱིད་ཅིང་མི་མཉེས་པར་མི་བགྱིད་པར་གྱུར་ཅིག །ཆུང་མས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་གིས་གལ་ཏེ་གཅིག་ཅིག་གི་དོན་དུ་སྣོད་དུ་བཙོས་པ་དེ་བརྒྱའམ་སྟོང་གིས་ཟོས་ཀྱང་ཇི་སྲིད་བདག་གིས་སྦྱོར་བ་མ་བཏང་བའི་བར་དུ་ཡོངས་སུ་ཟད་པར་མི་འགྱུར་ཞིང༌། འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་
སྟོན་པ་རྣམས་མཉེས་པར་བགྱིད་ཅིང་མི་མཉེས་པར་མི་བགྱིད་པར་གྱུར་ཅིག །བུས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་གི་རྐེད་པ་ལ་ལྔ་བརྒྱ་པའི་སྣོད་བཏགས་ཏེ་འདུག་པ་གལ་ཏེ་བརྒྱ་འམ་སྟོང་འགེད་པར་བཏང་ཡང་གང་བ་ཉིད་དུ་འདུག་སྟེ་ཡོངས་སུ་ཟད་པར་མི་འགྱུར་ཞིང༌། འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་པ་རྣམས་མཉེས་པར་བགྱིད་ཅིང་མི་མཉེས་པར་མི་བགྱིད་པར་གྱུར་ཅིག །མནའ་མས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས། བདག་གིས་གལ་ཏེ་གཅིག་གི་ཕྱིར་དྲི་རྣམས་སྦྱར་ན་དེས་བརྒྱའམ་སྟོང་བྱུགས་ཀྱང་ཇི་སྲིད་སྦྱོར་བ་མ་བཏང་གི་བར་དུ་ཟད་པར་མི་འགྱུར་ཞིགན་འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་པ་རྣམས་མཉེས་པར་བགྱད་ཅིང་མི་མཉེས་པར་མི་བགྱིད་པར་གྱུར་ཅིག །རན་ཕོས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་གིས་གལ་ཏེ་ཞིང་རོལ་གཅིག་རྨོས་ན་རོལ་བདུན་རྨོས་པར་འགྱུར་ཞིང༌། འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་པ་རྣམས་མཉེས་པར་བགྱིད་ཅིང་མི་མཉེས་པར་མི་བགྱིད་པར་གྱུར་ཅིག །བྲན་མོས་སྨོན་ལམ་བཏབ་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་གིས་གལ་ཏེ་སྣོད་གང་ཙམ་དྲུས་པ་གང་ཡིན་པ་དེས་སྣོད་བདུན་ཙམ་དུ་འཕེལ་བར་འགྱུར་ཞིང༌། འདི་ལྟ་བུའི་ཆོས་རྣམས་ཀྱང་ཐོབ་ནས་འདི་བས་ཁྱད་པར་དུ་འཕགས་པའི་སྟོན་པ་རྣམས་མཉེས་པར་བགྱིད་ཅིང་མི་མཉེས་པར་མི་བགྱིད་པར་གྱུར་ཅིག །དེ་རྣམས་ཀྱིས་དེ་ལྟ་བུའི་སྨོན་ལམ་བཏབ་ནས་རང་སངས་རྒྱས་བདག་ཉིད་ཆེན་པོ་དེ་དེ་རྣམས་ལ་སྙིང་བརྩེ་བའི་ཕྱིར་རྫུ་འཕྲུལ་གྱིས་ཆས་པ་དང་ཇི་ཙམ་ན་རྒྱལ་པོ་ཚངས་བྱིན་སྟེང་གི་ཁང་བཟངས་ཀྱི་གཞིར་སོང་སྟེ་འདུག་པ་ལས། རྫུ་འཕྲུལ་གྱིས་སོང་བའི་གྲིབ་མ་རྒྱལ་པོ་ཚངས་བྱིན་
གྱི་སྟེང་དུ་བབས་ནས། དེས་གྱེན་དུ་བལྟ་བར་བརྩམས་པ་ལས་རང་སངས་རྒྱས་དེ་མཐོང་ནས་དེ་འདི་སྙམ་དུ་བདག་ཉིད་ཆེན་པོ་འདིའི་རྫུ་འཕྲུལ་གྱི་གཤོལ་ཆེན་པོས་ཡང་སུ་ཞིག་གི་བཀྲེང་པའི་དྲུངས་ཕྱུང་བར་གྱུར་སྙམ་མོ། །དེ་ནས་ཁྱིམ་བདག་དེ་རེ་བ་ཆེན་པོས་མཛོད་དང་བང་མཛོད་རྣམས་ལ་བལྟས་པ་དང༌། ཇི་ཙམ་ན་གང་བར་མཐོང་ངོ༌། །དེས་ཆུང་མ་ལ་སྨྲས་པ། རེ་ཞིག་ཁོ་བོའི་སྨོན་ལམ་ནི་རྫོགས་པར་གྱུར་གྱིས་ད་ཁྱེད་ཅག་གི་བལྟའོ། །དེ་ནས་བྲན་མོས་འབྲས་སྣོད་གང་ཙམ་དྲུས་ན་བདུན་ཙམ་དུ་འཕེལ་བར་གྱུར་ཏོ། །ཆུང་མས་གཅིག་གི་དོན་དུ་སྣོད་དུ་བཙོས་པ་ལ་དེ་དག་ཐམས་ཅད་ཀྱིས་ཟོས་ཀྱང་དེ་ཁོ་ན་བཞིན་དུ་འདུག །ཉེ་འཁོར་གྱི་སྲོག་ཆགས་སྟོང་ཕྲག་དུ་མས་ཟོས་ཀྱང་དེ་ཁོ་ན་བཞིན་དུ་འདུག་གོ །དེ་ནས་ཁྱིམ་བདག་དེས་བཱ་རཱ་ཎ་སཱིར་དྲིལ་སྒྲོགས་སུ་བཅུག་པ། ཤེས་ལྡན་དག་ཁྱེད་ཅག་ལས་སུ་ཞིག་ཅི་དོན་དུ་གཉེར་བ་དེ་ཤོག་ཤིག །བཱ་རཱ་ཎ་སཱིར་སྒྲ་གསལ་བ་དང་སྒྲ་ཆེན་པོར་བྱུང་བ་རྒྱལ་པོས་ཐོས་ནས་དེས་སྨྲས་པ། ཤེས་ལྡན་དག་སྒྲ་གསལ་བ་དང༌། སྒྲ་ཆེན་པོ་འདི་ཅི་ཞིག་ཡིན། བློན་པོ་རྣམས་ཀྱིས་སྨྲས་པ། ལྷ་ཁྱིམ་བདག་ཆེ་གེ་མོ་ཞིག་ཅེས་བྱ་བས་མཛོད་དང་བང་བ་རྣམས་ཕྱེ་བ་ལགས་སོ། །རྒྱལ་པོས་སྨྲས་པ། གང་གི་ཚེ་འཇིག་རྟེན་ཐམས་ཅད་ཤི་ཟིན་པ་དེའི་ཚེ་ཁྱིམ་བདག་དེས་མཛོད་དང་བང་བ་རྣམས་ཕྱེའམ། ཤེས་ལྡན་དག་ཁྱིམ་བདག་དེ་ཁུག་ཤིག །དེ་རྣམས་ཀྱིས་བཀུག་པ་དང༌། དེ་ནས་རྒྱལ་པོས་སྨྲས་པ། ཁྱིམ་བདག་གང་གི་ཚེ་འཇིག་རྟེན་ཐམས་ཅད་ཤི་ཟིན་པ་དེའི་ཚེ་ཁྱོད་ཀྱིས་མཛོད་དང་བང་བ་རྣམས་ཕྱེའམ། ལྷ་སུའི་མཛོད་དང་བང་བ་རྣམས་ཕྱེ། འོན་ཀྱང་རིང་ཁོ་ནར་ས་བོན་སྩལ་བའི་འབྲས་བུ་དེ་ཉིད་དུ་གྲུབ་ལགས་སོ། །རྒྱལ་པོས་སྨྲས་པ། དེ་ཇི་ལྟ་བུ་ཞིག །དེས་སྐབས་དེ་རྒྱས་པར་སྨྲས་པ་དང་རྒྱལ་པོས་སྨྲས་པ། ཁྱིམ་བདག་ཀྱོད་ཀྱིས་བདག་ཉིད་ཆེན་པོ་དེ་ལ་བསོད་སྙོམས་ཕུལ་ལམ། ལྷ་བདག་གིས་ཕུལ་ལོ། །དེ་ཡང་ལྷག་པར་དད་པར་གྱུར་ནས། ཚིགས་སུ་བཅད་པས་སྨྲས་པ། ཀྱེ་མའོ་ཡོན་ཏན་ལས་བྱུང་བའི། །སྐྱོན་ཀུན་རྣམ་པར་སྤངས་པའི་ཞིང༌། །དེ་ལ་ས་བོན་བཏབ་པ་ཡི། །འབྲས་བུ་དེ་ཉིད་ཐོབ་པར་
གྱུར། །དགེ་སློང་དག་ཇི་སྙམ་དུ་སེམས། ཁྱིམ་བདག་དང༌། ཁྱིམ་བདག་གི་ཆུང་མ་དང༌། ཁྱིམ་བདག་གི་བུ་དང༌། ཁྱིམ་བདག་གི་མནའ་མ་དང༌། ཁྱིམ་བདག་གི་བྲན་ཕོ་དང༌། ཁྱིམ་བདག་གི་བྲན་མོ་གང་ཡིན་དེ་ནི་ཁྱིམ་བདག་ལུག་དང༌། ལུག་གི་ཆུང་མ་དང༌། ལུག་གི་བུ་དང༌། ལུག་གི་མནའ་མ་དང༌། ལུག་གི་བྲན་ཕོ་དང༌། ལུག་གི་བྲན་མོ་འདི་དག་ཉིད་ཡིན་ནོ། །འདི་དག་གིས་རང་སངས་རྒྱས་ལ་བྱ་བ་བྱས་ཤིང་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་དྲུག་ཆར་ཡང་བསོད་ནམས་ཆེན་པོར་གྱུར་ཅིང་ངའི་སྤྱན་སྔར་བདེན་པ་མཐོང་ཞིང༌། རང་སངས་རྒྱས་བྱེ་བ་བརྒྱ་སྟོང་པས་ཆེས་ཁྱད་པར་འཕགས་པའི་སྟོན་པ་ང་མཉེས་པར་བྱས་ཀྱི། མི་མཉེས་པར་ནི་མ་ཡིན་ནོ། །དགེ་སློང་དག་དེ་ལྟ་བས་ན། ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན་པས་ཞེས་བྱ་བ་ནས་བཙལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ།། །།སྡོམ་ནི། ཀེ་ནའི་བུ་ཡིས་བཏུད་བ་བླངས། །ཀ་ཤིའི་ཚོང་རྡལ་ནས་ཐུག་དང༌། །སྡིག་ཅན་དུ་ནི་བཅའ་བ་དང༌། །འགྱོད་དང་སྦྱར་བའི་ཟས་དག་གོ །བཅོམ་ལྡན་འདས་ཡུལ་ཨ་དུ་མའི་གནས་ན་བཞུགས་སོ། །དེའི་ཚེ་དྲང་སྲིང་ཀེ་ནའི་བུ་གནས་ནི་ཡུལ་ཨ་དུ་མ་ན་འདུག་གོ །ཉིན་པར་ནི་རྫིང་བུ་དལ་གྱིས་འབབ་ཀྱི་འགྲམ་ན་གནས་སོ། །བཅོམ་ལྡན་འདས་ཀྱིས་དགོངས་པ། ངས་གང་དུ་འཇིག་རྟེན་སྐྱོང་བ་བཞི་རྣམས་ལ་ཆོས་བཤད་ན་དེར་ངས་ཚེགས་ཆུང་ངུས་དྲང་སྲོང་ཀེ་ནའི་བུ་ཐུལ་བར་འགྱུར་སྙམ་པ་དང༌། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་རྫིང་བུ་དལ་གྱིས་འབབ་ཀྱི་འགྲམ་དུ་བཤད་ན་དེར་ཐུལ་བར་འགྱུར་རོ་སྙམ་མོ། །དེ་ནས་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་དེ་ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་དེའི་ཚེ་བརྒྱ་བྱིན་དང་ཚངས་པ་ལ་སོགས་ཏེ་ལྷ་རྣམས་ཀྱིས་བཅོམ་ལྡན་འདས་ཀྱི་དགོངས་པ་སེམས་ཀྱིས་ཤེས་པར་འགྱུར་བས་རྒྱལ་པོ་ཆེན་པོ་རྣམ་ཐོས་ཀྱི་བུས་བསམས་པ།
བཅོམ་ལྡན་འདས་ཀྱིས་ཅི་ཞིག་གི་ཕྱིར་འཇིག་རྟེན་པའི་ཐུགས་བསྐྱེད་པ་མཛད་པ་བལྟས་ན། བདག་ཅག་འཇིག་རྟེན་སྐྱོང་བ་བཞི་རྣམས་ཁོ་ན་ལ་ཆོས་བཤད་པར་བཞེད་དོ་སྙམ་དུ་རིག་ནས། གནོད་སྦྱིན་གྱི་སྡེ་དཔོན་ཆེན་པོ་ལྡས་རྩེན་ལ་བསྒོ་བ་ལྔས་རྩེན་སོང་ལ་རྫིང་བུ་དལ་གྱི་འབབ་ཀྱི་འགྲམ་དུ་བཅོམ་ལྡན་འདས་ཀྱི་གདན་ཤོམ་ཏེ། འདུས་པ་ཆེན་པོ་འདུས་པ་ན་སུས་ཀྱང་དེའི་མདངས་འཕྲོགས་པར་མི་འགྱུར་བར་དྲང་སྲོང་ཀེ་ནའི་བུའི་སྲུང་མ་གཅིག་ཀྱང་སྐོས་ཤིག །དེས་རྫིང་བུ་དལ་གྱིས་འབབ་ཀྱི་འགྲམ་དུ་དྲང་སྲོང་ཀེ་ནའི་བུའི་སྲུང་མ་བཞག་ནས་གནས་ཤོམ་པར་རྩོམ་པ་ན་དེ་ན་སྐྱེ་བོའི་ཚོགས་ཆེན་པོའི་ཅ་ཅོའི་སྒྲ་བྱུང་བ་དང༌། དེ་ནས་དྲང་སྲོང་ཀེ་ནའི་བུ་ཅ་ཅོའི་སྒྲས་ལངས་ནས་སྲུང་མ་དེ་ལ་དྲིས་པ། ཅ་ཅོའི་སྒྲ་འདི་ཅི་ཞིག་དེས་སྨྲས་པ། གདན་ཤོམ་པར་བྱེད་པའིའོ། །ཅི་ཁོ་བོའི་ཕྱིར་རམ། ཁྱོད་ཀྱི་ཕྱིན་ནི་མ་ཡིན་མོད་ཀྱི་འོན་ཀྱང་སངས་རྒྱས་བཅོམ་ལྡན་འདས་ཀྱི་ཕྱིར་ཡིན་ནོ། ཁྱོད་འདི་ན་ཅི་ཞིག་ལ་སྡོད། ཁྱོད་ཁོ་ན་སྲུང་ངོ༌། །ཅིའི་ཕྱིར་འབྱུང་པོ་མང་པོ་འདུ་བར་འགྱུར་བས་སོ། །དེས་སྨྲས་པ། དགེ་སྦྱོང་གཽ་ཏ་མ་དེ་སུ་ཞིག་གིས་སྲུང་བར་བྱེད་པར་འགྱུར། དེས་སྨྲས་པ། བཅོམ་ལྡན་འདས་དེ་ལ་སུ་ཞིག་སྲུང༌། བཅོམ་ལྡན་འདས་དེ་ཉིད་ནི་འཇིག་རྟེན་ལྷ་དང༌། བཅས་པའི་སྲུང་མ་མཛད་དོ་ཞེས་བྱས་པ་དང་དྲང་སྲོང་ཀེ་ནའི་བུས་ཐོས་ནས་ཅང་མི་སྨྲའོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ནས་ཨ་དུ་མར་བསོད་སྙོམས་ལ་ཞུགས་ཏེ། ཨ་དུ་མར་བསོད་སྙོམས་སྤྱད་ནས་ཟས་ཀྱི་བྱ་བ་མཛད་དེ། ཟས་ཕྱི་མའི་བསོད་སྙོམས་སྤངས་ནས་ཇི་ལྟར་ཐུགས་མཉམ་པར་བཞག་ན་དགེ་སློང་གི་དགེ་འདུན་དང་ཐབས་ཅིག་ཏུ་ཨ་དུ་མ་ནས་མི་སྣང་བར་གྱུར་ཏེ། རྫིང་བུ་དལ་གྱིས་འབབ་ཀྱི་འགྲམ་དུ་བྱོན་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུག་སོ། །དེ་ནས།བཅོམ་ལྡན་འདས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཆེན་པོ་ཡུལ་འཁོར་སྐྱོང་དྲི་ཟ་དུ་མའི་འཁོར་དང༌། དྲི་ཟ་བརྒྱ་ཕྲག་དུ་མའི་འཁོར་དང༌། དྲི་ཟ་སྟོང་ཕྲག་དུ་མའི་འཁོར་དང༌། དྲི་ཟ་བརྒྱ་སྟོང་ཕྲག་དུ་མའི་འཁོར་དང༌། ལྷའི་ནོར་
བུས་ཐུབ་བཀང་སྟེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ལ་ལྷའི་ནོར་བུ་རྣམས་ཀྱིས་གཏོར་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མདུན་གྱིས་བལྟས་ནས་ཤར་ཕྱོགས་སུ་བརྟེན་ཏེ་འདུག་གོ །རྒྱལ་བོ་ཆེན་པོ་འཕགས་སྐྱེས་པོ་ཡང་གྲུལ་བུམ་དུ་མའི་འཁོར་དང༌། གྲུལ་བུམ་བརྒྱ་ཕྲག་དུ་མའི་འཁོར་དང༌། གྲུལ་བུམ་སྟོང་ཕྲག་དུ་མའི་འཁོར་དང༌། གྲུལ་བུམ་བརྒྱ་སྟོང་ཕྲག་དུ་མའི་འཁོར་དང༌། ལྷའི་མུ་ཏིག་གིས་ཐུབ་བཀང་སྟེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ལ་ལྷའི་མུ་ཏིག་གིས་གཏོར་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མདུན་གྱིས་བལྟས་ནས་ལྷོ་ཕྱོགས་སུ་བརྟེན་ཏེ་འདུག་གོ །རྒྱལ་པོ་ཆེན་པོ་མིག་མི་བཟང་ཡང་ཀླུ་དུ་མའི་འཁོར་དང༌། ཀླུ་བརྒྱ་ཕྲག་དུ་མའི་འཁོར་དང༌། ཀླུ་སྟོང་ཕྲག་དུ་མའི་འཁོར་དང༌། ཀླུ་བརྒྱ་སྟོང་ཕྲག་དུ་མའི་འཁོར་དང༌། ལྷའི་མེ་ཏོག་ཨུཏྤ་ལ་དང༌། པད་མ་དང༌། ཀུ་མུ་ད་དང༌། པད་མ་དཀར་པོ་དང༌། མན་དཱ་ར་བ་རྣམས་ཀྱིས་ཐུ་བ་བཀང་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ལ་ལྷའི་མ་ཏོག་ཨུཏྤ་ལ་དང༌། པད་མ་དང༌། ཀུ་མུ་ད་དང༌། པད་མ་དཀར་པོ་དང༌། མན་དཱ་ར་བ་རྣམས་ཀྱིས་གཏོར་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མདུན་གྱིས་བལྟས་ནས་ནུབ་ཕྱོགས་སུ་བརྟེན་ཏེ་འདུག་གོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ཡང་གནོད་སྦྱིན་དུ་མའི་འཁོར་དང༌། གནོད་སྦྱིན་བརྒྱ་ཕྲག་དུ་མའི་འཁོར་དང༌། གནོད་སྦྱིན་སྟོང་ཕྲག་དུ་མའི་འཁོར་དང༌། གནོད་སྦྱིན་བརྒྱ་སྟོང་ཕྲག་དུ་མའི་འཁོར་དང༑ ལྷའི་དབྱིག་དང༌། གསེར་གྱིས་ཐུ་བ་བཀང་སྟེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ལ་ལྷའི་དབྱིག་དང༌། གསེར་གྱིས་གཏོར་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་དང་དགེ་སློང་
གི་དགེ་འདུན་ལ་མདུན་གྱིས་བལྟས་ནས་བྱང་ཕྱོགས་སུ་བརྟེན་ཏེ་འདུག་གོ །དེ་ལ་དབུས་པའི་རིགས་ནི་གཉིས་ཏེ། ཡུལ་འཁོར་སྐྱོང་དང༌། འཕགས་སྐྱེས་པོའོ། །མཐའ་འཁོབ་པའི་རིགས་ནི་གཉིས་ཏེ། མིག་མི་བཟང་དང༌། རྣམ་ཐོས་ཀྱི་བུའོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་ངས་དབུས་པའི་ཚིག་གིས་ཆོས་བཤད་ན་གཉིས་ཁོ་ནས་ཤེས་པར་འགྱུར་གྱི་གཉིས་ཀྱིས་ནི་མི་ཤེས་ལ། གལ་ཏེ་མཐའ་འཁོབ་པའི་ཚིག་གིས་བཤད་ན་གཉིས་ཁོ་ནས་ཤེས་པར་འགྱུར་གྱི་གཉིས་ཀྱིས་ནི་མི་ཤེས་པས་མ་ལ་ངས་གཉིས་ལ་ནི་དབུས་པའི་ཚིག་གིས་ཆོས་བཤད་དོ། །གཉིས་ལ་ནི་མཐའ་འཁོབ་པའི་ཚིག་གིས་ཆོས་བཤད་དོ་སྙམ་དུ་དགོངས་ནས་རྒྱལ་པོ་ཆེན་པོ་ཡུལ་འཁོར་སྐྱོང་ལ་བཀའ་སྩལ་པ། རྒྱལ་པོ་ཆེན་པོ་འདི་ལྟར་ལུས་ཞིག་པ་དང༌། ཚོར་བ་བསིལ་བར་གྱུར་པ་དང༌། འདུ་ཤེས་འགགས་པ་དང༌། འདུ་བྱེད་རྣམས་ཉེ་བར་ཞི་བ་དང༌། རྣམ་པར་ཤེས་པ་ནུབ་པར་གྱུར་པ་དེ་ཉིད་སྡུག་བསྔལ་གྱི་མཐའ་ཡིན་ནོ། །ཆོས་ཀྱི་རྣམ་གྲངས་འདི་བཀའ་སྩལ་པ་ན་རྒྱལ་པོ་ཆེན་པོ་ཡུལ་འཁོར་སྐྱོང་དང༌། དེ་དང་སྐལ་བ་མཉམ་པའི་དྲི་ཟ་བརྒྱ་སྟོང་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་འཕགས་སྐྱེས་པོ་ལ་བཀའ་སྩལ་པ། རྒྱལ་པོ་ཆེན་པོ་དེ་ལ་ཁྱོད་ཀྱིས་མཐོང་བ་ལ་མཐོང་བ་ཙམ་དང༌། ཐོས་པ་དང༌། རྟོགས་པ་དང༌། རྣམ་པར་ཤེས་པ་ལ་རྣམ་པར་ཤེས་པ་ཙམ་དུ་གྱིས་ཤིག །ཆོས་ཀྱི་རྣམ་གྲངས་འདི་བཀའ་སྩལ་པ་ན་རྒྱལ་པོ་ཆེན་པོ་འཕགས་སྐྱེས་པོ་དང༌། དེ་དང་སྐལ་བ་མཉམ་པའི་གྲུལ་བུམ་བརྒྱ་སྟོང་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་མིག་མི་བཟང་ལ་བཀའ་སྩལ་པ། དེ་ལྟར་ན་རྒྱལ་པོ་ཆེན་པོ་ཨེ་ནེ་མེ་ནེ། དབ་བེ། ད་ཌབ་ཕེ་འདི་ཉིད་སྡུག་བསྔལ་གྱི་མཐའ་ཡིན་ནོ། །ཆོས་ཀྱི་རྣམ་གྲངས་འདི་བཀའ་སྩལ་པ་ན་རྒྱལ་པོ་ཆེན་པོ་མིག་མི་བཟང་དང༌། དེ་དང་སྐལ་བ་མཉམ་པའི་ཀླུ་བརྒྱ་སྟོང་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་
བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་ལ་བཀའ་སྩལ་པ། དེ་ལྟར་ན་རྒྱལ་པོ་ཆེན་པོ་མཱ་ཥཱ། ཏུ་ཥཱ། སང་ཤཱ་མཱ། སརྦ་ཏྲ་བིརཱ་ཌཱི་འདི་ཉིད་སྡུག་བསྔལ་གྱི་མཐའ་ཡིན་ནོ། །ཆོས་ཀྱི་རྣམ་གྲངས་འདི་བཀའ་སྩལ་པ་ན། རྒྱལ་པོ་ཆེན་པོ་རྣམ་ཐོས་ཀྱི་བུ་དང་དེ་དང་སྐལ་བ་མཉམ་པའི་གནོད་སྦྱིན་བརྒྱ་སྟོང་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །བཅོམ་ལྡན་འདས་ཀྱིས་དགོངས་པ། ད་ནི་བདག་ཡོངས་སུ་མྱ་ངན་ལས་འདའ་བའི་དུས་ལ་ཁད་ཀྱིས་ཉེ་ན། སུ་ལ་བསྟན་པ་གཏད་ནས་ཡོངས་སུ་མྱ་ངན་འདའ། གལ་ཏེ་ལྷ་རྣམས་ལ་ནི་ལྷ་རྣམས་བག་མེད་པ་ལ་དགའ་བ་མང་བས་ཡུན་རིང་དུ་གནས་པར་མི་འགྱུར་རོ། །འོན་ཏེ་མི་རྣམས་ལ་ནི་ཚེ་ཐུང་བ་ཡིན་པས་དེ་བཞིན་དུ་ཡུན་རིང་དུ་གནས་པར་མི་འགྱུར་གྱི། མ་ལ་ངས་ལྷ་དང༌། མི་རྣམས་དང༌། དགེ་སློང་འོད་སྲུང་ལ་གཏད་ནས་ཡོངས་སུ་མྱ་ངན་ལས་འདའོ་སྙམ་དུ་དགོངས་ནས་རྒྱལ་པོ་ཆེན་པོ་ཡུལ་འཁོར་སྐྱོང་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ང་ཡོངས་སུ་མྱ་ངན་ལས་འདས་པའི་བསྟན་པ་ཤར་ཕྱོགས་ནས་བསྲུང་བ་བྱོས་ཤིག །རྒྱལ་པོ་ཆེན་པོ་འཕགས་སྐྱེས་པོ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ཀྱང་ལྷོ་ཕྱོགས་ནས་བསྲུང་བ་བྱོས་ཤིག །རྒྱལ་པོ་ཆེན་པོ་མིག་མི་བཟང་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ཀྱང་ནུབ་ཕྱོགས་ནས་བསྲུང་བ་བྱོས་ཤིག །རྒྱལ་པོ་ཆེན་པོ་རྣམ་ཐོས་ཀྱི་བུ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ཀྱང་བྱང་ཕྱོགས་ནས་བསྲུང་བ་བྱོས་ཤིག །དེ་ནས་རྒྱལ་པོ་ཆེན་པོ་བཞི་རབ་ཏུ་དགའ་བའི་ཡིད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་ཇི་སྐད་སྩལ་པ་དེ་བཞིན་དུ་བགྱིའོ། །བཅོམ་ལྡན་འདས་བདག་ཅག་གིས་བསྲུང་བར་བགྱི་ལགས་སོ་ཞེས་གསོལ་ནས། བཅོམ་ལྡན་འདས་ལས་བདེན་པ་མཐོང་ནས་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་བ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བསྟན་པ་མཐའ་དག་གི་བྱ་བ་རྣམས་གཏད་ནས་ཚེ་དང་
ལྡན་བ་ཀུན་དགའ་པོ་ལ་ཡང་བཀའ་སྩལ་པ། ཀུན་དགའ་བོ་ཁྱོད་ཀྱིས་ཀྱང་བསྟན་པའི་དོན་གྱི་བྱ་བ་ལ་བརྩོན་པར་གྱིས་ཤིག །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་ཆེན་པོ་བཞི་རྣམས་ཀྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་རྒྱལ་པོ་ཆེན་པོ་བཞིར་གྱུར་ཅིང༌། བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་རྣམས་བྱས་ཤིང་བསགས་པ་ཚོགས་རྙེད་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་སྟོན་པ་ཞེས་བྱ་བ་ནས། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ངོ༌། །ཞེས་བྱ་བའི་བར་གོང་མ་བཞིན་དུའོ། །དེའི་ཚེ་རྒྱ་མཚོ་ཆེན་པོ་ན་ཀླུ་གཉིས་ཤིག་གནས་ཏེ་དབུགས་འབྱིན་དང༌། དབུགས་ཆེར་འབྱིན་ནོ། །ཤིང་ཤལ་མ་བརྩེགས་པ་ན་ཡང་ནམ་མཁའ་ལྡིང་གཉིས་ཤིག་ཡོད་པ་འགྲོ་བའི་དབང་ཕྱུག་དང༌། གཙུག་གི་དབང་ཕྱུག་གོ །གང་གི་ཚེ་དབུགས་འབྱིན་དང་དབུགས་ཆེར་འབྱིན་གཉིས་ལ་དེ་གཉིས་གནོད་པ་བྱེད་པ་དེའི་ཚེ་དེ་གཉིས་སའི་འོག་ཏུ་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན་དབུགས་འབྱིན་དང༌། དབུགས་ཆེར་འབྱིན་གཉིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྱབས་སུ་སོང་ཞིང་བསླབ་པའི་གཞི་རྣམས་བླངས་པ་དང༌། དེ་གཉིས་ལ་ནམ་མཁའ་ལྡིང་གིས་གནོད་པ་བྱ་བར་བརྩམས་པ་ལས། རི་རབ་ལ་རླུང་དང་ཆུའི་ཤུགས་བཞིན་དུ་རྡུགས་ནས་སླར་ལོགས་པ་དང༌། དེ་གཉིས་ཀྱིས་སྨྲས་པ། ཤེས་ལྡན་དག་སྔོན་ནི་ཁོ་བོ་ཅག་གིས་ཁྱེད་ཅག་གནོད་པ་བྱས་ན་སའི་འོག་ཏུ་འགྲོ་ན། ད་གང་གིས་ན་ཁོ་བོ་ཅག་ཁྱེད་དང་ཕྲད་ནས་རི་རབ་ལ་རླུང་དང་ཆུ་བཞིན་དུ་རྡུགས་ནས་ཕྱིར་ལྡོག་པ་འདི་ལ་རྒྱུ་ཅི་ཞིག་ཡོད། དབུགས་འབྱིན་དང་དབུགས་ཆེར་འབྱིན་
གྱིས་སྨྲས་པ། བདག་ཅག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་སོ། །དེ་གཉིས་ཀྱིས་སྨྲས་པ། གལ་ཏེ་དེ་ལྟ་ན་བདག་ཅག་གིས་ཀྱང་བླང་ངོ་ཞེས་དེ་གཉིས་དེ་དག་དང་ལྷན་ཅིག་འགྲོགས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་དོང་ནས་དེ་དག་ཕྱིན་པ་དང༌། ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔ་ནས་འཇིག་རྟེན་སྐྱོང་བ་བཞི་པོ་དག་གིས་ཆོས་ཐོས་ནས་དོང་བ་དེ་དག་དེ་གཉིས་ཀྱིས་མཐོང་ནས། ནམ་མཁའ་ལྡིང་དེ་གཉིས་ཀྱིས་ཀླུ་དབུགས་འབྱིན་དང༌། དབུགས་ཆེར་འབྱིན་གཉིས་ལ་དྲིས་པ། འགྲོ་བ་ཕ་བི་དག་སུ་དག་ཡིན། དེ་གཉིས་ཀྱིས་རྒྱས་པར་སྨྲས་པ་དང༌། ནམ་མཁའ་ལྡིང་གཉིས་ཀྱིས་སྨྲས་པ། གལ་ཏེ་དེ་ལྟར་བདག་ཅག་གིས་ཀྱང་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྱབས་སུ་འགྲོ་དང་བསླབ་པའི་གཞི་རྣམས་བླངས་ལ་སྨོན་ལམ་གདབ་བོ་ཞེས་དེ་གཉིས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་སོ། །དབུགས་འབྱིན་དང་དབུགས་ཆེར་འབྱིན་གཉིས་ནི་སྔར་བླངས་སོ། །དེ་ནས་ལྷན་ཅིག་འདུས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་གཏུགས་ནས་སྨོན་ལམ་བཏབ་པ། ཇི་ལྟར་འཇིག་རྟེན་སྐྱོང་བ་བཞི་པོ་འདི་དག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་ཆོས་མཉན་ནས་བདེན་པ་མཐོང་སྟེ་རང་གི་གནས་སུ་མཆིས་པ་དེ་བཞིན་དུ་བདག་ཅག་ཀྱང་དགེ་བའི་རྩ་བ་འདིས་འཇིག་རྟེན་སྐྱོང་བ་བཞིར་གྱུར་ཅིང༌། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བགྱི་བ་གང་ལགས་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པའི་བཅོམ་ལྡན་འདས་དེས་ཀྱང་དེ་བཞིན་དུ་རྫིང་བུ་དལ་གྱིས་འབབ་ཀྱི་འགྲམ་དུ་བདག་ཅག་ལ་ཆོས་བཤད་དེ་བདག་ཅག་གིས་ཆོས་དེ་ཐོས་ནས་བདེན་པ་མཐོང་སྟེ། འདི་བཞིན་
དུ་རང་གི་གནས་སུ་མཆི་བར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། ཀླུ་དང་ནམ་མཁའ་ལྡིང་བཞི་པོ་གང་དག་ཡིན་པ་དེ་དག་ནི་འཇིག་རྟེན་སྐྱོང་བ་བཞི་པོ་འདི་དག་ཉིད་ཡིན་ཏེ། དེའི་ཚེ་དེའི་དུས་ན་དབུགས་འབྱིན་གང་ཡིན་པ་དེ་ནི་ཡུལ་འཁོར་སྐྱོང་འདི་ཉིད་ཡིན་ནོ། །དབུགས་ཆེར་འབྱིན་གང་ཡིན་པ་དེ་ནི་འཕགས་སྐྱེས་པོ་ཡིན་ནོ། །འགྲོ་བའི་དབང་ཕྱུག་ནི་མིག་མི་བཟང་ཡིན་ནོ། །གཙུག་གི་དབང་ཕྱུག་ནི་རྣམ་ཐོས་ཀྱི་བུ་ཡིན་ཏེ། དེའི་ཚེ་དེའི་དུས་ན་འདི་དག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་ཤིང་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་འཇིག་རྟེན་སྐྱོང་བ་བཞིར་གྱུར་ཅིང་ངའི་སྤྱན་སྔར་བདེན་པ་མཐོང་བར་བྱས་ནས་རང་གི་གནས་སུ་སོང་ངོ༌། །ཆོས་བཤད་པ་དེ་དྲང་སྲོང་ཀེ་ནའི་བུས་ཐོས་ནས་མཆོག་ཏུ་དགའ་བ་སྐྱེས་ཏེ། བཅོམ་ལྡན་འདས་ལ་མངོན་པར་དད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང༌། བག་ལ་ཉལ་དང༌། ཁམས་དང༌། རང་བཞིན་མཁྱེན་ནས་གང་ཐོས་ནས་མོད་ལ་དྲང་སྲོང་ཀེ་ནའི་བུས་འཕགས་པའི་བདེན་པ་རྣམས་མངོན་པར་རྟོགས་ནས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟ་བུའི་ཆོས་བཤད་པ་མཛད་དོ། །དེ་ནས་དེ་རྟོགས་པའི་དད་པ་དང་ལྡན་པར་གྱུར་ནས། བཏུང་བ་བརྒྱད་པོ་ཙོ་ཙའི་བཏུང་བ་དང༌། ཆུ་ཤིང་གི་འབྲས་བུའི་བཏུང་བ་དང༌། རྒྱ་ཤུག་གི་བཏུང་བ་དང༌། ཨ་ཤྭཏྠའི་བཏུང་བ་དང༌། ཨུ་དུམ་བཱ་རའི་བཏུང་བ་དང༌། རྩུབ་འགྱུར་གྱི་བཏུང་བ་དང༌། འབྲ་གོའི་བཏུང་བ་དང༌། རྒུན་གྱི་བཏུང་བ་ཁྱེར་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཏུང་བ་བརྒྱད་པོ་འདི་དག་ནི་སྔོན་གྱི་དྲང་སྲོང་རྣམས་ཀྱིས་བསྟོད་ཅིང་བསྔགས་པ་ལགས་ཀྱིས། བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་བཞེས་སུ་གསོལ། བཅོམ་ལྡན་འདས་ཀྱིས་དྲང་སྲོང་ཀེ་ནའི་བུ་ལ་ཐུགས་བརྩེ་བར་དགོངས་ནས་བཏུང་བ་བརྒྱད་པོ་དག་བཞེས་སོ། །བཞེས་ནས་དགེ་སློང་རྣམས་ལ་བཀའ་སྩལ་པ།
དགེ་སློང་དག་བཏུང་བ་བརྒྱད་པོ་འདི་དག་དུས་སུ་བྱིན་ལེན་བྱས། དུས་སུ་མཉེས། དུས་སུ་བཙགས། དུས་སུ་བྱིན་གྱིས་བརླབས་ན་དུས་སུ་ལོངས་སྤྱད་པར་བྱ་ཞིང་དུས་མ་ཡིན་པར་ཡང་ལོངས་སྤྱད་པར་བྱ་ལ། ནམ་གྱི་ཐུན་དང་པོ་ཐལ་ནས་ནི་ལོངས་སྤྱད་པར་མི་བྱའོ། །བཏུང་བ་བརྒྱད་པོ་འདི་དག་དུས་སུ་བྱིན་ལེན་བྱས་ལ་དུས་མ་ཡིན་པར་མཉེས། དུས་མ་ཡིན་པར་བཙགས། དུས་མ་ཡིན་པར་བྱིན་གྱིས་བརླབས་པ་ནི་ལོངས་སྤྱད་པར་མི་བྱའོ། །བཏུང་བ་བརྒྱད་པོ་འདི་དག་དུས་སུ་བྱིན་ལེན་བྱས། དུས་སུ་མཉེས་ལ། དུས་མ་ཡིན་པར་བཙགས་དུས་མ་ཡིན་པར་བྱིན་གྱིས་བརླབས་པ་ནི་ལོངས་སྤྱད་པར་མི་བྱའོ། །བཏུང་བ་བརྒྱད་པོ་འདི་དག་དུས་མ་ཡིན་པར་བྱིན་ལེན་བྱས། དུས་མ་ཡིན་པར་མཉེས། དུས་མ་ཡིན་པར་བཙགས་པ་ནི་ཟས་ཀྱི་འོག་ཏུ་ཡང་ལོངས་སྤྱད་པར་མི་བྱ་ལ། ནམ་གྱི་ཆ་སྟོད་འདས་ན་ཡང་ལོངས་སྤྱད་པར་མི་བྱའོ། །དེ་ནས་དྲང་སྲོང་ཀེ་ནའི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གིས་གདུགས་ཆོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་དྲང་སྲོང་ཀེ་ནའི་བུ་ལ་ཅང་མི་གསུང་བས་གནང་ངོ༌། །དེ་ནས་དྲང་སྲོང་ཀེ་ནའི་བུ་བཅོམ་ལྡན་འདས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ་སོང་ངོ༌། །བཅོམ་ལྡན་འདས་ཀྱང་རྫིང་བུ་དལ་གྱིས་འབབ་ཀྱི་འགྲམ་ནས་མི་སྣང་བར་མཛད་དེ་དགེ་སློང་གི་དགེ་འདུན་དང་ཐབས་ཅིག་ཏུ་ཨ་དུ་མར་གཤེགས་སོ། །དེ་ནས་དྲང་སྲོང་ཀེ་ནའི་བུ་ནམ་མ་ལངས་པར་ལངས་ནས་ནང་མི་རྣམས་ལ་སྨྲས་པ། འཕགས་བདག་བཞེངས་ཤིག །བཞིན་བཟངས་དག་ལོངས་ཤིག །ཤིང་དག་གཤེགས་ཤིག །མེ་བུས་ཤིག །ཞལ་ཟས་དག་བྲིམ་པར་གྱིས་ཤིག །བཀད་ས་དག་བྱི་དོར་གྱིས་ཤིག །དེའི་ཚེ་དྲང་སྲོང་ཀེ་ནའི་བུའི་སྲིང་མོའི་བུ་དྲང་སྲོང་རི་བོ་ཞེས་བྱ་བ་གནས་དེ་ཉིད་དུ་ནུབ་མོ་གནས་བཏབ་པ་ལས། དྲང་སྲོང་རི་བོས་དྲང་སྲོང་ཀེ་ནའི་བུ་ནམ་མ་
ལངས་པར་ལངས་ནས་ནང་མི་རྣམས་ལ་སྨྲ་བ་ཐོས་སོ། །ཐོས་ནས་ཀྱང་དྲང་སྲོང་ཀེ་ནའི་བུ་ལ་འདི་སྐད་ཅེས་སྨྲས་སོ། །དྲང་སྲོང་ཅི་ཁྱོད་ཚངས་པ་མཚུངས་པར་སྤྱོད་པ་རྣམས་མགྲོན་དུ་བོས་སམ། ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའམ། ཕོ་བྲང་འཁོར་ན་གནས་པའི་སྐྱེ་བོའི་ཚོགས་སམ། དྲང་སྲོང་གི་ཆོས་ཇི་ལྟར་འདོད་པ་ཡོངས་སུ་རྫོགས་པའམ། དེས་སྨྲས་པ། རི་བོ་ཁོ་བོ་ནི་ཚངས་པ་མཚུངས་པར་སྤྱོད་པ་རྣམས་མགྲོན་དུ་བོས་པ་ཡང་མ་ཡིན། ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་མ་ཡིན། ཕོ་བྲང་འཁོར་ན་གནས་པའི་སྐྱེ་བོའི་ཚོགས་ཀྱང་མ་ཡིན། དྲང་སྲོང་གི་ཆོས་ཇི་ལྟར་འདོད་པ་ཡོངས་སུ་རྫོགས་པ་ཡང་མ་ཡིན་མོད་ཀྱི། འོན་ཀྱང་ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་ལ་སྤྱན་དྲངས་སོ། །དེས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་ནས་བ་སྤུ་ཐམས་ཅད་ཟིང་ཞེས་བྱེད་ནས་གུས་པ་དང་བཅས་པས་དྲིས་པ། དྲང་སྲོང་སངས་རྒྱས་ཞེས་བྱ་བ་དེ་ཅི་ཞིག་ཡིན། རི་བོ་དགེ་སྦྱོང་གཽ་ཏ་མ་ཤཱཀྱའི་སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཞིག་ཡོད་དེ། རི་བོ་སངས་རྒྱས་ཞེས་བྱ་བ་ནི་དེ་ཡིན་ནོ། །རི་བོས་སྨྲས་པ། དྲང་སྲོང་དགེ་འདུན་ཞེས་བྱ་བ་འདི་ཅི་ཞིག་ཡིན། དྲང་སྲོང་ཀེ་ནའི་བུས་སྨྲས་པ། རི་བོ་རྒྱལ་རིགས་ཀྱི་རིགས་ཀྱི་བུ་རྣམས་ལས་ཀྱང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡང་ཡོད། བྲམ་ཟེའི་རིགས་དང༌། རྗེའུའི་རིགས་དང༌། དམངས་རིགས་ཀྱི་རིགས་ཀྱི་བུ་རྣམས་ལས་ཀྱང་ཞེས་བྱ་བ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་བྱུང་བ་དེ་ཉིད་ཀྱི་རྗེས་སུ་རབ་ཏུ་བྱུང་བ་ཡོད་དེ་ཞེས་བྱ་བའི་བར་གོང་མ་བཞིན་དུ་སྟེ། རི་བོ་འདི་ནི་དགེ་འདུན་ཞེས་བྱའོ། །རི་བོ་དགེ་འདུན་འདི་དང་སྔར་སྨོས་པའི་སངས་
རྒྱས་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་འདི་ཁོ་བོས་གདུགས་ཚོད་ལ་སྤྱན་དྲངས་སོ། །དེ་ནས་དྲང་སྲོང་རི་བོས་སངས་རྒྱས་ལ་དམིགས་པའི་དྲན་པས་ནང་པར་སྔར་ལངས་ཏེ་འཁོར་ལྔ་བརྒྱ་དང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དྲང་སྲོང་རི་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལེགས་པར་གསུངས་པའི་ཆོས་འདུལ་བ་ལ་བདག་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པར་བགྱིའོ། །དྲང་སྲོང་རི་བོ་དང་འཁོར་ལྔ་བརྒྱས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་གྱུར་ཏོ།། །།འདུལ་བ་གཞི། བམ་པོ་ལྔ་བཅུ་དགུ་པ། དེ་ནས་དྲང་སྲོང་ཀེ་ནའི་བུས་དེ་ཉིད་ཀྱི་ནུབ་མོ་ནས་ གཙང ་ཞིང་བསོད་པའི་བཟའ་བ་དང་བཅའ་བ་དག་ཅེས་བྱ་བ་ནས་བསྟབས་ཤིང་ཚིམ་པར་བྱས་སོ་ཞེས་བྱ་བའི་བར་གོང་མ་བཞིན་དུའོ། །དེས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་བ་ན་རི་བོ་རབ་ཏུ་བྱུང་བ་མཐོང་ནས་དེས་སྨྲས་པ། རི་བོ་ཁྱོད་རབ་ཏུ་བྱུང་ངམ། རབ་ཏུ་བྱུང་ངོ༌། །ལེགས་པར་བྱས་སོ། །ཤིན་ཏུ་ལེགས་པར་བྱས་སོ། །ཁོ་བོ་ཡང་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཟིན་ནས་རབ་ཏུ་འབྱུང་ངོ༌། །དེ་ནས་དྲང་སྲོང་ཀེ་ནའི་བུས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་རྣམ་གྲངས་དུ་མར་ གཙང ་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ། ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་དེ་ལ་ཡོན་བསྔོ་བ་དང་ཆོས་བཤད་པ་མཛད་ནས་གཤེགས་སོ། །དེ་ནས་དྲང་སྲོང་ཀེ་ནའི་བུས་རྒྱུ་ལྷག་དེ་དག་ཐམས་ཅད་
བཏང་བའི་ཆོས་བྱས་ནས་འཁོར་ལྔ་བརྒྱ་དང་བཅོམ་ལྡན་འདས་གང་ན་བ་དེར་དོང་སྟེ་ཕྱིན་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་དྲང་སྲོང་ཀེ་ནའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལེགས་པར་གསུངས་པའི་ཆོས་འདུལ་བ་ལ་བདག་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པར་བགྱིའོ། །དྲང་སྲོང་ཀེ་ནའི་བུ་འཁོར་ལྔ་བརྒྱ་དང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་རབ་ཏུ་བྱུང་ཞིང་བསྙེན་པར་རྫོགས་པའི་དགེ་སློང་སྟོང་པོ་དེ་དག་དང༌། འབབ་ཆུ་རབ་ཏུ་བཟང་པོའི་འགྲམ་དུ་ཨ་མྲའི་ཚལ་གདུགས་ལྟ་བུར་དབྱར་གནས་པར་ཞལ་གྱིས་བཞེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བྲམ་ཟེ་ཀ་པི་ན་ལ་དགེ་སློང་ལྔ་བརྒྱ་གཏད་དོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ཉིས་བརྒྱ་ལྔ་བཅུ་གཏད་དོ། །ཚེ་དང་ལྡན་པ་ཤཱ་རིའི་བུ་ལ་ཉིས་བརྒྱ་ལྔ་བཅུ་གཏད་དོ། །དེ་ནས་ཚེ་དང་ལྡན་པ་བྲམ་ཟེ་ཀ་པི་ནས་གདམས་ངག་ཕོག་པ་གང་ཡིན་པ་དེ་དག་ནི་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པའི་འབྲས་བུ་མངོན་སུམ་དུ་བྱས་སོ། ཚེ་དང་ལྡན་པ་མཽད་གལ་གྱི་བུ་ཆེན་པོའི་གང་དག་ཡིན་པ་དེ་དག་ནི་ལན་གཅིག་ཕྱིར་འོང་བའི་འབྲས་བུའོ། །ཚེ་དང་ལྡན་པ་ཤཱ་རིའི་བུའི་གང་དག་ཡིན་པ་དེ་དག་ནི་རྒྱུན་དུ་ཞུགས་པའི་འབྲས་བུའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ནི་ཤེས་རབ་ཆེ་བ་རྣམས་དང༌། ཚེ་དང་ལྡན་པ་མཽད་གལ་གྱི་བུ་ཆེན་པོ་ནི་མཐུ་ཆེ་བ་དང༌། རྫུ་ཕྲུལ་ཆེ་བ་རྣམས་ཀྱི་མཆོག་ཏུ་བསྟན་ལགས་ན། འོན་ཀྱང་ཚེ་དང་ལྡན་པ་བྲམ་ཟེ་ཀ་པི་ནས་གདམས་ངག་ཕོག་བ་གང་དག་ལགས་པ་དེ་དག་ནི་དགྲ་བཅོམ་པ། ཚེ་དང་ལྡན་པ་མཽད་གལ་གྱི་བུ་ཆེན་པོའི་གང་དག་ལགས་པ་དེ་དག་ནི་ལན་གཅིག་ཕྱིར་འོང་བའི་འབྲས་བུ། ཚེ་དང་
ལྡན་པ་ཤཱ་རིའི་བུའི་གང་དག་ལགས་པ་དེ་དག་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་ཇི་ལྟར་འདས་པའི་དུས་ན་ཡང་ཀ་པི་ནའི་གདམས་ངག་ཕོག་པ་གང་དག་ཡིན་པ་དེ་དག་ནི་གཟུགས་མེད་པའི་ཁམས་ལ་རབ་ཏུ་བཀོད། མཽད་གལ་གྱི་བུའི་གང་དག་ཡིན་པ་དེ་དག་ནི་གཟུགས་ཀྱི་ཁམས་དང༌། ཤཱ་རིའི་བུའི་གང་དག་ཡིན་པ་དེ་དག་ནི་མངོན་པར་ཤེས་པ་ལྔ་ལ་རབ་ཏུ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་དགོན་པའི་གནས་ཞིག་ན་དྲང་སྲོང་གཉིས་ཤིག་གནས་ཏེ་སོ་སོར་འཁོར་ལྔ་བརྒྱ་ལྔ་བརྒྱ་ཡོད་དོ། །ཇི་ཙམ་དུས་གཞན་ཞིག་ན་དེ་གཉིས་ལས་གཅིག་ཤི་ནས་དེའི་བྲམ་ཟེའི་ཁྱེའུ་རྣམས་བླ་མ་དང་བྲལ་བའི་སྡུག་བསྔལ་བ་དང༌། ཡིད་མི་བདེ་བས་གདུངས་ནས་ཕན་ཚུན་འཕྱན་འཕྱན་ནས་དྲང་སྲོང་ཅིག་ཤོས་དེའི་དྲུང་དུ་འོངས་པ་དང༌། དེས་དེ་རྣམས་མིག་མཆི་མས་གང་བ་མཐོང་ནས་དྲིས་པ། བྲམ་ཟེའི་ཁྱེའུ་དག་ཁྱེད་ཀྱི་མཁན་པོ་དེ་གར་སོང༌། གུམ་མོ། །དེས་བསམས་པ། བདག་འདས་ན་བྲམ་ཟེའི་ཁྱེའུ་རྣམས་འདི་འདྲ་བའི་གནས་སྐབས་སུ་འགྱུར་གྱིས། མ་ལ་བདག་གིས་འདི་དག་བསྡུ་བར་བྱའོ་སྙམ་ནས་དེས་དེ་རྣམས་དབུགས་ཕྱུང་སྟེ་བསྡུས་སོ། །ཇི་ཙམ་དུས་གཞན་ཞིག་ན་དྲང་སྲོང་དེ་ཡང་ནད་ཀྱིས་ཐེབས་པར་གྱུར་ནས། དེའི་སློབ་མ་མཆོག་གསུམ་ཡོད་པ་ལ་དེས་གཅིག་ལ་ནི་ལྔ་བརྒྱ། གཉིས་པ་ལ་ནི་ཉིས་བརྒྱ་ལྔ་བཅུ། གསུམ་པ་ལ་ནི་ཉིས་བརྒྱ་ལྔ་བཅུ་གཏད་དོ། །དེ་ནི་འཆི་བའི་ཆོས་དང་ལྡན་པར་གྱུར་ཏོ། །དེ་ལ་ལྔ་བརྒྱ་གཏད་པ་གང་ཡིན་པ་དེས་ནི་ཇི་ལྟར་གཟུགས་མེད་པའི་ཁམས་ལ་བཀོད་པ་དེ་ལྟར་གདམས་ངག་ཕོག་གོ །ཉིས་བརྒྱ་ལྔ་བཅུ་གཏད་པ་གང་ཡིན་པ་དེས་ནི་ཇི་ལྟར་གཟུགས་ཀྱི་ཁམས་ལ་བཀོད་པ་དེ་ལྟར་གདམས་ངག་ཕོག་གོ །ཉིས་བརྒྱ་ལྔ་བཅུ་ཕོག་པ་ཅིག་ཤོས་ཀྱིས་ནི་ཇི་ལྟར་མངོན་པར་ཤེས་པ་ལྔ་ལ་བཀོད་པ་དེ་ལྟར་གདམས་ངག་ཕོག་གོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་བྲམ་ཟེའི་ཁྱེའུ་ལྔ་བརྒྱ་གཟུགས་མེད་པའི་ཁམས་ལ་འགོད་པ་གང་
ཡིན་པ་དེ་ནི་དགེ་སློང་ཀ་པི་ན་འདི་ཉིད་ཡིན་ནོ། །ཉིས་བརྒྱ་ལྔ་བཅུ་གཟུགས་ཀྱི་ཁམས་ལ་རབ་ཏུ་འགོད་པ་གང་ཡིན་པ་དེ་ནི་དགེ་སློང་མཽད་གལ་གྱི་བུ་འདི་ཉིད་ཡིན་ནོ། །ཅིག་ཤོས་ཀྱིས་ཉིས་བརྒྱ་ལྔ་བཅུ་མངོན་པར་ཤེས་པ་ལྔ་ལ་རབ་ཏུ་དཀོད་པ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ནོ། །འོན་ཀྱང་དགེ་སློང་ཀ་པི་ནས་གདམས་ངག་ཕོག་པ་གང་ཡིན་པ་དེ་ནི་དཔང་པོ་རྣོན་པོ་ཡིན་ནོ། །མཽད་གལ་གྱི་བུའི་གང་ཡིན་པ་དེ་དག་ནི་དབང་པོ་འབྲིང་པོ་ཡིན་ནོ། །ཤཱ་རིའི་བུའི་གང་ཡིན་པ་དེ་དག་ནི་དབང་པོ་རྟུལ་པོ་ཡིན་ནོ། །གལ་ཏེ་ཤཱ་རིའི་བུས་གདམས་ངག་ཕོག་པར་མ་གྱུར་ན་དེ་དག་གིས་དྲོ་བར་གྱུར་པ་ཡང་རྟོགས་པར་མི་འགྱུར་རོ། །ཀེ་ནའི་བུ་ནི་རལ་བ་ཅན། །ཇི་ལྟར་སངས་རྒྱས་བསྔགས་བརྗོད་པ། །རབ་ཏུ་དང་བའི་སེམས་ཀྱིས་ནི། །ཐམས་ཅད་མཐུན་པར་མཉན་པར་གྱིས། །ཀེ་ནའི་བུ་ཡི་ཁྱིམ་དུ་ནི། །དུས་གཅིག་ཅིག་ན་སྟོན་པ་པོ། །དཔའ་ཆེན་ཉན་ཐོས་ཐབས་ཅིག་ཏུ། །གདུགས་ཚོད་ལ་ནི་སྤྱན་དྲངས་སོ། །ཀེ་ནའི་བུ་ཡི་ཁྱིམ་དུ་ནི། །ཟས་ཀྱི་ཞལ་ཏ་བྱེད་པ་དག །བྲམ་ཟེ་རི་བོས་མཐོང་གྱུར་ཏེ། །མཐོང་ནས་ཀེ་ནའི་བུ་ལ་དྲིས། །བག་མ་ལེན་ཏམ་འོན་ཏེ་ཅི། །རྒྱལ་པོ་ཡུལ་འཁོར་མགྲོན་བོས་སམ། །ཁྱོད་ཀྱི་མཆོད་སྦྱིན་ཆེ་དུས་སམ། །དྲིས་པ་དེ་ནི་བདག་ལ་སྨྲོས། །བདག་ནི་བག་མ་མི་ལེན་ལ། །རྒྱལ་པོའམ་ཡུལ་འཁོར་མགྲོན་མ་བོས། །བདག་གིས་སངས་རྒྱས་སེམས་དཔའ་མཆོག །གདུགས་ཚོད་ལ་ནི་སྤྱན་དྲངས་སོ། །རི་བོས་སངས་རྒྱས་སྒྲ་ཐོས་ནས། །ཡིད་སྐྱོ་བ་ནི་སྐྱེས་གྱུར་ཏེ། །སངས་རྒྱས་དེ་ཅི་ཀེ་ནའི་བུ། །དྲིས་པ་དེ་ནི་བདག་ལ་སྨྲོས། །ཤཱ་ཀྱའི་རིགས་ལས་སྐྱེས་པ་ཡི། །སྟོན་པ་གང་ཟག་ཟླ་མེད་ཡོད། །དེ་ནི་ཆོས་ཀུན་བློ་ལྡན་པས། །དེ་བས་སངས་རྒྱས་ཞེས་བྱའོ། །འདུས་བྱས་འཇིག་པར་འགྱུར་བའི་ཆོས། །འདས་པ་སངས་རྒྱས་ཀྱིས་གཟིགས་ལ། །དེ་བཞིན་མ་འོངས་པ་གཟིགས་ཤིང༌། །ད་ལྟར་བྱུང་བ་རྣམས་ཀྱང་གཟིགས། །མངོན་ཤེས་བྱ་བ་ཇི་སྙེད་པ། །དེ་ཀུན་རྟོགས་པས་ཐམས་ཅད་རིག །ཐམས་ཅད་མཁྱེན་ཅིང་ཐམས་ཅད་གཟིགས། །དེ་བས་སངས་རྒྱས་ཞེས་བྱའོ། །མངོན་པར་ཤེས་བྱ་མངོན་
ཤེས་བྱས། །བསྒོམ་པར་བྱ་བ་རྣམས་ཀྱང་བསྒོམས། །སྤང་བར་བྱ་བ་སྤངས་པས་ན། །དེ་བས་སངས་རྒྱས་ཞེས་བྱའོ། །གང་ཞིག་བལྟམས་པར་གྱུར་པ་ན། །རྒྱ་མཚོ་རི་བོར་བཅས་པ་ཡི། །ས་འདི་རབ་ཏུ་གཡོས་མཛད་པ། །དེ་ལ་ཐལ་སྦྱར་ཕྱག་འཚལ་ལོ། །གང་གིས་བདུད་དང་ནག་པོ་ཡི། །རྩ་ལག་བཞོན་བཅས་བཅོམ་ནས་ནི། །དེ་བཞིན་གཤེགས་ཀྱི་སྟོབས་ཐོབ་པ། །དེ་ལ་ཐལ་སྦྱར་ཕྱག་འཚལ་ལོ། །བཱ་རཱ་ཎ་སཱིའི་གྲོང་བཞུད་ནས། །གང་གིས་རྣམ་པ་བཅུ་གཉིས་པའི། །ཆོས་ཀྱི་འཁོར་ལོ་དེ་བསྐོར་བ། །དེ་ལ་ཐལ་སྦྱར་ཕྱག་འཚལ་ལོ། །གང་གིས་འདོད་ཆགས་བཅིང་བས་བཅིངས། །འདོད་ཆགས་ཞེ་སྡང་གིས་གདུངས་པའི། །སེམས་ཅན་མང་པོ་གྲོལ་མཛད་པའི། །དེ་ལ་ཐལ་སྦྱར་ཕྱག་འཚལ་ལོ། །སངས་རྒྱས་བཅོམ་ལྡན་གང་ཞིག་ན། །རྣམ་འདྲེན་དེ་ནི་ཇི་སྲིད་ན། །ཤཱཀྱའི་སྲས་པོ་འོད་མཛད་ལ། །དེ་རིང་ཉིད་ནས་སྐྱབས་སུ་འགྲོ། །ཚལ་སྡུག་ཡིད་དུ་འོང་བ་དེ། །གང་ན་བ་ནི་བྲམ་ཟེའི་ཆོས། །དྲི་ཟའི་རྒྱལ་པོ་ལྟ་བུ་ཡི། །སངས་རྒྱས་བླ་མེད་མཐོང་བར་གྱུར། །ན་བཟའ་ངུར་སྨྲིག་འོད་ལྡན་དེ། །གསེར་མདོག་ཉི་མའི་འོད་ཟེར་ཅན། །དེ་བཞིན་གསེར་ནི་བཙོ་མ་ཡི། །གསེར་ལས་གཟུགས་ནི་བྱས་པ་བཞིན། །སཱ་ལ་ཤིང་གི་མེ་ཏོག་དང༌། །ཀར་ནི་ཀ་རའི་མེ་ཏོག་འདྲ། །རིན་ཆེན་སྣ་ཚོགས་སྤྲས་པ་ཡི། །རིན་ཆེན་མཆོད་སྡོང་ཇི་བཞིན་ནོ། །ནྱགྲོ་དྷ་ལྟ་བུར་ནི། །ཆུ་ཞེང་གབ་པར་གྱུར་པ་དང༌། །ཁོར་ཡུག་འདོམ་གང་འོད་ཀྱིས་ནི། །ཀུན་ནས་སྣང་བ་དག་ཏུ་མཛད། །རྒྱལ་སྲིད་རྒྱས་དང་ཉེ་དུར་བཅས། །འདོད་པ་ཀུན་དགའ་སྤངས་ནས་ནི། །རབ་ཏུ་བྱུང་བར་མངོན་བྱུང་བའི། །ཐུབ་པ་དབེན་པ་རྣམས་ལ་དགྱེས། །སྤོས་ངད་ལྡང་བའི་སེང་གེ་ནི། །ནགས་སུ་འཇིགས་པ་མེད་པ་ལྟར། །སེང་གེ་ལྟ་བུར་བསྙེངས་མེད་གསུང༌། །བྲམ་ཟེ་སངས་རྒྱས་མཐོང་བར་འགྱུར། །ཞལ་འཛུམ་འཇམ་པའི་གསུང་དང་ནི། །ཚངས་པའི་གསུང་དང་སྙན་པའི་གསུང༌། །རྔ་ཡི་སྒྲ་ཡི་གསུང་ལྟ་བུའི། །སངས་རྒྱས་བྲམ་ཟེ་མཐོང་བར་འགྱུར། །ཟླ་བ་དག་པ་ནམ་མཁའ་ལ། །རྒྱུ་སྐར་རྣམས་ཀྱིས་
ཡོངས་བསྐོར་བའི། །ཟླ་བའི་དཀྱིལ་འཁོར་ལྟ་བུ་ཡི། །སངས་རྒྱས་བྲམ་ཟེ་མཐོང་བར་འགྱུར། །ཉི་མའི་འོད་ཟེར་དང་ལྡན་པ། །ནམ་མཁའི་ངོས་ལ་མཛེས་ལྟ་ཡི། །སངས་རྒྱས་མུན་པ་བྲལ་གྱུར་ཅིང༌། །མཛེས་པ་བྲམ་ཟེ་མཐོང་བར་འགྱུར། །ཇི་ལྟར་ཁྱུ་བའི་ཁྱུ་མཆོག་ནི། །ནོག་དང་ལྡན་པ་མི་གཡོ་གནས། །སྐྱེས་བུ་ཁྱུ་མཆོག་སྟོབས་བཅུ་ལྡན། །སངས་རྒྱས་བྲམ་ཟེ་མཐོང་བར་འགྱུར། །རྒྱ་མཚོ་དག་ནི་གཏིང་ཟབ་པའི། །ཆུ་ཆེན་ཚད་གཟུང་མེད་ལྟ་ཡི། །སངས་རྒྱས་བསམ་གཏན་པ་ཡི་མཆོག །བསམ་གྱིས་མི་ཁྱབ་བླ་མེད་མཐོང༌། །ནག་པོའི་ཕྱོགས་ལས་ངེས་བྱུང་བའི། །ཉི་མ་མཁའ་ལ་གསལ་བ་དང༌། །མེ་ཡི་ཕུང་པོ་འབར་བ་ལྟའི། །གཽ་ཏམ་སངས་རྒྱས་མཐོང་བར་འགྱུར། །ཇི་ལྟར་འཁོར་ལོས་སྒྱུར་རྒྱལ་པོ། །ཞབས་འབྲིང་བྱེ་བས་ཡོངས་བསྐོར་ལྟར། །དེ་བཞིན་རྫོགས་པའི་སངས་རྒྱས་ནི། །དགྲ་བཅོམ་རྣམས་ཀྱིས་མདུན་བྱས་མཛེས། །འདོད་པ་རྣམས་ལ་དབང་སྒྱུར་དང༌། །ཇི་ལྟར་ཚངས་ཆེན་དབང་ཕྱུག་ལྟར། །སྟོང་གསུམ་གྱི་ནི་འཇིག་རྟེན་ཁམས། །ཐུབ་པ་དབང་ནི་སྒྱུར་བར་མཛད། །གང་ཐོས་ཉེ་བར་ཞི་འགྱུར་ཞིང༌། །སྡུག་བསྔལ་མཚོ་ཆེན་ལས་སྒྲོལ་བ། །སྡུག་བསྔལ་རྣམ་པ་དུ་མ་དང༌། །སྡུག་བསྔལ་ཀུན་འབྱུང་གང་ཡིན་དང༌། །སྡུག་བསྔལ་ཉེ་བར་ཞི་བ་དང༌། །ལམ་ནི་ཡན་ལག་བཞི་ཚན་གཉིས། །སྦྲང་རྩི་མ་བསྐོལ་རོ་ལྟ་བུའི། །བདེན་པ་དག་ནི་རབ་ཏུ་འཆད། །ནོར་མེད་རྣམས་ལ་ནོར་སྦྱིན་ཞིང༌། །ནད་པ་རྣམས་ཀྱི་དཔྱད་ཀྱང་མཛད། །གནོད་པ་རྣམས་ཀྱི་སྐྱབས་གྱུར་པས། །སྐྱེ་དགུ་སྡུག་བསྔལ་གྲོལ་བར་མཛད། །མུན་པར་གྱུར་པའི་སེམས་ཅན་དང༌། །བླུན་པོ་ལམ་གོལ་རྒྱུ་བ་དང༌། །བདེ་བ་མྱ་ངན་འདས་འགྲོ་བའི། །ལམ་ནི་དྲང་པོ་རབ་ཏུ་སྟོན། །འདོད་ཆགས་ཞེ་སྡང་ཀུན་འབར་ཞིང༌། །གཏི་མུག་རབ་འབར་སྐྱེ་དགུ་རྣམས། །ཇི་ལྟར་སྤྲིན་ཆེན་ཆར་འབེབས་ལྟར། །ཐུབ་པ་ཆེན་པོས་ཞི་བར་མཛད། །གཟུགས་དང་ཁ་དོག་སྟོབས་ལྡན་པ། །དེ་དང་འདྲ་བ་ཡོད་མ་ཡིན། །སྐུ་མཁྲེགས་སྟོབས་མཆོག་ལྡན་པ་ནི། །རི་བོ་བཞིན་དུ་ཤིན་ཏུ་གནས། །རྙེད་དང་མ་རྙེད་བདེ་སྡུག་དང༌། །སྨད་པ་དང་ནི་བསྟོད་པ་དང༌། །གྲགས་
པ་དང་ནི་མ་གྲགས་པས། །ཆུ་ཡིས་པད་མ་བཞིན་མ་གོས། །སྲོག་གཅོད་པ་ནི་རྣམ་སྤངས་ཏེ། །མ་བྱིན་པ་ལ་དགའ་མི་བྱེད། །བདེན་པ་གསུང་ཞིང་ཚངས་པར་སྤྱོད། །དེ་ནི་ཕྲ་མ་སྤངས་པ་ཡིན། །ཚིག་རྩུབ་དག་ནི་མི་གསུང་ཞིང༌། །དུས་སུ་བབ་པ་འཇམ་པོར་གསུང༌། །དེ་ནི་འདོད་ལ་བརྣབ་སེམས་མེད། །སྐྱེ་བོ་རྣམས་ལ་དེ་སེམས་བྱམས། །ཡང་དག་ལྟ་བ་ཕུན་སུམ་ཚོགས། །ཏིང་ངེ་འཛིན་སྟོབས་སྤྱོད་ཡུལ་བ། །བསམ་གཏན་ཆེན་པོ་མངོན་ཤེས་དྲུག །རྫུ་འཕྲུལ་གྱིས་ནི་མཁའ་ལ་གཤེགས། །ལྷ་དང་མི་ཡི་སྒྲ་དག་ནི། །གང་ཡིན་རྣམ་པ་སྣ་ཚོགས་གསན། །ཉོན་མོངས་ཅན་ནམ་དགེ་ཡང་རུང༌། །ཕ་རོལ་གྱི་ནི་སེམས་ཀྱང་མཁྱེན། །གང་དང་གང་དུ་སྔོན་གནས་པ། །སྔོན་གྱི་གནས་ལ་མཁས་པ་དང༌། །སེམས་ཅན་འགྲོ་དང་འོང་བ་ཡི། །འཆི་འཕོ་དང་ནི་སྐྱེ་བ་མཁྱེན། །ཟག་པ་ཟད་ཅིང་མི་ལྡན་པས། །ཉེར་ཞི་ཤིན་ཏུ་མྱ་ངན་འདས། །དབང་པོ་ཞི་ཞིང་ཐུགས་ཞི་བ། །མཚོ་ནི་གང་བ་བཞིན་དུ་གནས། །པད་མའི་རྫིང་ན་གླང་པོ་ཆེ། །དམ་པ་དྲུག་བཅུ་ལོན་པ་ལྟར། །མཐོང་ན་ངོམས་ནི་མི་ཤེས་པས། །བྲམ་ཟེ་དགའ་བ་ཐོབ་པར་འགྱུར། །རི་བོ་བཅོམ་ལྡན་འདི་འདྲ་སྟེ། །དེ་ཡི་སྐུ་ནི་སྐྱེས་ཆེན་གྱི། །སུམ་བཅུ་རྩ་གཉིས་མཚན་མངའ་ཞིང༌། །གཟི་བརྗིད་མེ་ཡི་ཕུང་པོ་བཞིན། །གང་གིས་ལོ་བརྒྱ་ཚང་བར་ནི། །སྐྱོབ་པའི་བསྔགས་པ་བརྗོད་བྱས་ཀྱང༌། །དེ་བཞིན་གཤེགས་པ་ཚད་མེད་པས། །དེས་ནི་མཐར་ཕྱིན་མི་འགྱུར་རོ། །བྲམ་ཟེ་གང་གིས་དེ་མཐོང་བ། །དེ་ཡི་རྙེད་པ་བླ་ན་མེད། །གང་གིས་མཐོང་བས་སྐྱབས་སོང་བ། །དེ་ཡི་རྙེད་པ་དེ་བས་འཕགས། །བྲམ་ཟེ་རི་བོས་ཐུབ་ཆེན་གྱི། །བསྔགས་པ་ཐོས་ནས་སྐྱོ་བར་གྱུར། །དབེན་པའི་སེམས་ཀྱི་རྟོག་པ་ཡིས། །ཀེ་ནའི་བུ་ལ་འདི་སྐད་སྨྲས། །མིར་གྱུར་པ་ལ་བདག་གིས་ནི། །དེ་འདྲའི་བསྔགས་པ་ཐོས་མ་མྱོང༌། །ཀེ་ན་འཆད་པ་དང་སྦྱར་ན། །དེ་ནི་འཇིག་རྟེན་ཀུན་གྱི་གཙོ། །ཚོང་པ་ནོར་དག་དོན་གཉེར་ལྟར། །ཁྱོད་ཀྱིས་ང་རྒྱལ་རྒྱལ་མཚན་སྤོངས། །དེ་ལ་བཀུར་སྟི་གུས་བྱོས་དང༌། །བྲམ་ཟེ་དགའ་བ་ཐོབ་པར་འགྱུར། །བྲམ་ཟེ་ཁྱེའུ་ནི་ལྔ་བརྒྱ་ཡིས། །སློབ་
མ་དག་གིས་མདུན་བདར་ཏེ། །སངས་རྒྱས་བཞུགས་པ་བཟང་པོ་དེར། །བྲམ་ཟེ་རི་བོ་སོངས་བར་གྱུར། །ལྷ་རྣམས་ཀྱི་ནི་དགའ་ཚལ་ལྟར། །མེ་ཏོག་ཤིང་ནི་ཕུན་སུམ་ཚོགས། །རྣམ་པར་དབེན་ཞིང་སྒྲ་མེད་ཅིང༌། །བྱ་ཡི་ཚོགས་ཀྱིས་བསྟེན་གྱུར་པ། །མི་མིན་གདུག་པ་མི་རྒྱུ་བ། ། ཤཱཀྱའི་སྲས་ཀྱིས་བསྟེན་པ་ཡི། །ཆོས་ཀྱི་རྒྱལ་པོའི་གནས་སུ་ནི། །དེ་ནས་བྲམ་ཟེས་ཞུགས་པར་གྱུར། །མ་དུལ་འདུལ་བ་ཁ་ལོ་སྒྱུར། །སྐྱེས་བུ་དམ་པ་མཐོང་ནས་ནི། །རི་བོ་ཡིས་ནི་ཚིག་གསོལ་པ། །ཤེས་ལྡན་ཅིག་སྙུན་མི་མངའམ། །ཀ་ལ་པིང་ཀའི་སྒྲ་དབྱངས་ཅན། །སངས་རྒྱས་སྙན་ཅིང་གསལ་བའི་བཀས། །རི་བོ་ལ་ནི་སླར་གསུངས་པ། །ང་ལ་ནད་ནི་ཡོད་མིན་ཏེ། །ཉེས་པ་མེད་ཅིང་སྡིག་པ་མེད། །ཐེ་ཚོམ་ཐམས་ཅད་རྣམ་པར་ཆད། །རྣམ་པར་གྲོལ་ཞིང་མི་ལྡན་པ། །ང་ནི་ཟག་མེད་ཐ་བ་མེད། །འཇིག་རྟེན་ན་ནི་རྡུལ་མེད་རྒྱུ། །གཙང་ཞིང་དག་ལ་དྲི་ང་མེད། །དེས་ན་བྲམ་ཟེ་ང་ གཙང ་སྟེ། །ཁོན་དང་འཇིགས་པ་ཀུན་ལས་རྒལ། །རི་བོ་ཁྱོད་ཀྱང་འོངས་པ་ལེགས། །སྟན་འདི་ལ་ནི་ལེགས་པར་འདུག །བྲམ་ཟེ་ཅི་ག་བདེ་འམ་ཁྱོད། །ལུས་ནི་ངལ་བར་མ་གྱུར་མོད། །དཔའ་བོ་ཆེན་པོ་ཁྱོད་མཐོང་བས། །ཐུབ་པ་ཆེན་པོ་ད་ལྟར་བདོ། །རྒྱན་རྣམས་ཀྱིས་ནི་བརྒྱན་པ་ལྟར། །ཡིད་ནི་རབ་ཏུ་དགའ་བ་ཡིས། །དེ་དང་རྗེས་སུ་འཚམ་པའི་གཏམ། །རིམ་པ་བཞིན་དུ་བྱས་ནས་ནི། །དེ་ནས་བྲམ་ཟེ་འཛེམ་པ་དང༌། །དམན་པའི་ཡིད་ཀྱིས་འདུག་པར་གྱུར། །ཀློག་པ་དང་ནི་གསང་ཚིག་འཛིན། །རིག་བྱེད་གསུམ་གྱི་རིག་མཐར་ཕྱིན། །བྲམ་ཟེ་རི་བོ་འདུག་ནས་ནི། །ཐུབ་པའི་མཚན་ལ་རྟོག་པར་བྱེད། །འཇིག་རྟེན་གྱི་ནི་མགོན་པོ་ཡི། །སྐུ་ལ་མཚན་ནི་སུམ་བཅུ་མཐོང༌། །ལྗགས་སྲབ་མདོམས་སྦ་སྦུབས་ནུབ་པ། །གཉིས་ལ་རི་བོ་ཐེ་ཚོམ་ཟ། །ཐུབ་པ་ཆེན་པོའི་མཚན་རྣམས་ལ། །ཐེ་ཚོམ་ཡིད་གཉིས་གྱུར་ནས་ནི། །རྫོགས་པའི་སངས་རྒྱས་ཉི་མའི་རིགས། །བདེན་པའི་མཆན་ལ་ཡོངས་ཞུས་པ། །ཐུབ་པ་ཆེན་པོའི་མཚན་རྣམས་ནི། །སུམ་བཅུ་རྩ་གཉིས་ཐོབ་པ་གང༌། །གཽ་ཏམ་ཁྱོད་ཀྱིས་སྐུ་དག་ལ། །གཉིས་ནི་གཡར་སྔར་མ་བབ་བོ། །མི་ཡི་དམ་པ་མདོམས་
ཀྱི་ནི། །སྦ་བ་སྦུབས་སུ་ནུབ་ལགས་སམ། །ལྗགས་བཟང་ཞེས་ནི་བགྱི་བ་ཡང༌། །ཅི་ག་ཐུང་བ་མ་ལགས་གྲང༌། །ཐུབ་ཆེན་བདག་གིས་ཅི་ནས་ཀྱང༌། །ལྗགས་རིང་གློ་བར་ཆུད་འགྱུར་བ། །ལྗགས་སྲབ་མྱུར་དུ་བརྐྱང་མཛད་དེ། །བདག་གི་ཐེ་ཚོམ་བསལ་དུ་གསོལ། །རྣམ་པར་འདྲེན་རྣམས་འཇིག་རྟེན་དུ། །བརྒྱ་ལམ་ན་ནི་ལན་འགའ་འབྱུང༌། །ཨུ་དུམ་བཱ་རིའི་མེ་ཏོག་བཞིན། །ཐུབ་པ་ཆེན་པོ་དཀོན་པ་ལགས། །སོས་ཀ་སྐམ་པ་ཆབ་དང་ནི། །བཀྲེས་པ་ལ་ནི་གཡར་ཟས་དང༌། །ནད་པ་སྨན་ལ་ཇི་ལྟ་བར། །སྟོན་པ་ལ་ནི་བཀུར་སྟི་བགྱིད། །ཀ་ལ་པིང་ཀའི་སྒྲ་དབྱངས་ཅན། །སངས་རྒྱས་སྙན་ཅིང་གསལ་བའི་བཀས། །རི་བོ་ལ་ནི་སླར་གསུངས་པ། །བྲམ་ཟེ་ཐེ་ཚོམ་སྤང་བར་གྱིས། །ལྗགས་ཀྱིས་སྦྱན་དང་སྙན་དག་ནི། །རབ་ཏུ་ཁེབས་པར་ལྗགས་རིང་གིས། །ཞལ་གྱི་དཀྱིལ་འཁོར་ཁེབས་པར་མཛད། །རྫུ་འཕྲུལ་བཞི་ལ་མཁས་པ་ཡིས། །རྫུ་འཕྲུལ་གྱིས་ཀྱང་བསྟན་མཛད་པས། །ཐུབ་པའི་མདོམས་སྦ་སྦུབས་ནུབ་པ། །བྲམ་ཟེ་རི་བོས་མཐོང་བར་གྱུར། །ཐུབ་པ་ཆེན་པོས་མཚན་རྣམས་ལ། །ཐེ་ཚོམ་མེད་ཅིང་ཟུག་རྔུ་ཕྱུང༌། །སེམས་ཀྱི་རྟོག་པ་རབ་དགའ་ནས། །རི་བོ་ཡིས་ནི་ཚིག་གསོལ་པ། །སུམ་བཅུ་གཉིས་དང་དཔེ་བྱད་རྣམས། །བདག་གིས་གསང་ཚིག་ལས་ཐོས་པ། །དེ་ཀུན་ཁྱོད་ཀྱི་སྐུ་འདི་ལ། །ཡོངས་སུ་རྫོགས་ཏེ་མ་ཚང་མེད། །དགེ་དང་ལྡན་པས་སྤྱོད་པ་བཟང༌། །ལེགས་པར་འཁྲུངས་པས་བལྟ་ན་སྡུག །ཉན་ཐོས་དགེ་འདུན་དབུས་ན་ནི། །གདུགས་བདལ་བ་ནི་ལྟ་བུར་མཛེས། །དམ་པར་བསྔགས་པ་ཁྱོད་ལ་ནི། །དགེ་སྦྱོང་དངོས་པོས་ཅི་ཞིག་བགྱི། །མི་ཡི་ཁྱུ་མཆོག་ཁྱོད་ལྟ་བུ། །དཔུང་གི་ཡན་ལག་བཞི་དག་དང༌། །རིན་ཆེན་བདུན་དང་ལྡན་པ་ཡི། །འཁོར་ལོས་སྒྱུར་བའི་རྒྱལ་པོར་འོས། །ས་བདག་རྒྱལ་པོ་མཛད་ནས་ནི། །ས་སྟེང་འཁོར་ལོས་སྒྱུར་བར་མཛོད། །རི་བོ་ང་ནི་རྒྱལ་པོ་སྟེ། །ཆོས་ཀྱི་རྒྱལ་ཆེན་བླ་ན་མེད། །ང་ནི་ས་ཡི་དཀྱིལ་འཁོར་འདིར། །ཆོས་ཀྱི་འཁོར་ལོ་སྐོར་བར་བྱེད། །ང་ཡི་རིགས་ནི་རྒྱལ་རིགས་ཏེ། །ང་ནི་དགེ་བའི་རིག་ལས་འཁྲུངས། །བདུད་དཔུང་བཅས་པར་
བཅོམ་ནས་ནི། །རྫོགས་པའི་བྱང་ཆུབ་དམ་པ་ཐོབ། །བྲམ་ཟེ་ངའི་དྲན་འཁོར་ལོ་སྟེ། །ང་ཡི་ཤེས་རབ་བློན་པོ་ཡིན། །བརྩོན་འགྲུས་ཤུགས་མགྱོགས་རྟ་ཕོ་ནི། །བཏང་ན་དང་ལ་འབྱུང་བ་ཡིན། །ང་ཡི་ནོར་བུ་དམ་པ་ནི། །ཏིང་འཛིན་མུན་པ་གསལ་བྱེད་ཡིན། །བཏང་སྙོམས་གླང་ཆེན་དམ་པ་སྟེ། །བསྐུལ་ན་དང་ལ་རྒྱུག་པ་ཡིན། །ཆགས་བཅས་བུད་མེད་འདོད་པ་ལྟར། །བྲམ་ཟེ་ངའི་དགའ་འདོད་པ་ཡིན། །བྲམ་ཟེ་ང་ཡི་ཁྱིམ་བདག་ནི། །ཤིན་ཏུ་སྦྱངས་ནོར་དམ་པ་ཡིན། །ང་ཡི་བྱང་ཆུབ་ཡན་ལག་བདུན། །འཇིག་རྟེན་ཀུན་འདས་རིན་ཆེན་དེས། །ལོང་བར་གྱུར་ཅིང་གཉིད་ལོག་པའི། །སྐྱེ་དགུ་འདི་དག་སད་པར་བྱ། །ཕྱོགས་རྣམས་ཀུན་ནས་ང་རྒྱལ་བས། །ང་ལ་སྡོ་བའི་དགྲ་ཡོད་མིན། །ཉོན་མོངས་ཚོགས་རྣམས་འཇོམས་པ་ཡི། །འཁོར་བཞི་པོ་དག་ང་ཡི་སྲས། །རྫུ་འཕྲུལ་ཀུན་དགའ་ཕུན་སུམ་ཚོགས། །ལམ་གྱི་བཞི་མདོར་སྤྲུལ་པ་བྱས། །མདོ་སྡེ་སྐྱེས་པའི་རབས་དག་བཀྲམ། །སྐྱེས་བུ་ཆེན་པོ་རྣམས་ཀྱིས་སྟེན། །རྣམ་ཐར་གསུམ་གྱི་སྒོ་མོ་ཅན། །དྲན་པའི་སྲུང་མ་རྣམས་ཀྱིས་བསྲུངས། །ངོ་ཚ་ཁྲེལ་ཡོད་ཀྱིས་གཡོགས་པའི། །གྲོང་ཁྱེར་སྔོན་གྱི་སངས་རྒྱས་ཀྱིས། །བསྟེན་པ་དག་ཏུ་དེ་བཞིན་གཤེགས། །རྒྱལ་པོ་ང་ནི་བཞུགས་ནས་སུ། །ང་ཡི་ཆོས་ཀྱི་གཡུལ་སྤྲད་དེ། །ཆོས་ཀྱི་རྔ་བོ་ཆེ་བརྡུངས་ནས། །བདུད་རྣམས་མཐའ་དག་བཅོམ་བྱས་ཏེ། །ཇ་ནི་བྱང་ཆུབ་ཕྱིར་དབང་བསྐུར། །ཚད་མེད་པ་དག་རབ་བསྒོམས་པ། །ང་ཡི་རྒྱན་དུ་བདོག་པ་ཡིན། །ཚངས་པའི་གནས་པ་བཞི་པོ་ཡིས། །ཉོན་མོངས་པ་དག་རབ་ཏུ་བཟློག །ཕ་རོལ་རབ་ཏུ་རྒོལ་བཅོམ་སྟེ། །རྣམ་པར་བཅོམ་ཞིང་རྨེག་མེད་བྱས། །སྲོག་ཆགས་རྣམས་ལ་འཇིག་རྟེན་འདིར། །སྣང་བ་སྦྱིན་ཞིང་ཡང་དག་སྤྱད། །ང་ནི་བདེ་བར་གནས་བཅས་ནས། །ཡེ་ཤེས་ཀྱི་ནི་མཚོན་གྱིས་བཅད། །རྫུ་འཕྲུལ་རྐང་པ་གནས་ཡིན་ཏེ། །ཞི་གནས་དག་ནི་འཛིན་སྟངས་ཡིན། །ཚུལ་ཁྲིམས་ཤིང་རྟ་སྒྲ་སྙན་ལ། །ང་ཡི་ལྷག་མཐོང་ཁ་ལོ་སྒྱུར། །བཟོད་དང་དེས་པའི་གོ་བགོས་ནས། །ལམ་བསྒོམས་པས་ན་གཡུལ་ངོར་ནི། །གང་གིས་
སྒྲིབ་པ་འཇོམས་པ་ཡི། །དབང་པོ་ལྔ་ཡི་དོང་བ་དང༌། །གང་གི་ཉོན་མོངས་ཐག་འཇུད་པའི། །ཡང་དག་སྤོང་བ་བཞི་པོ་ཡིས། །ངས་ནི་དཔའ་བོ་གཡུལ་སྤྲད་དེ། །ཆོས་ཀྱི་རྔ་བོ་ཆེ་བརྡུངས་ནས། །བདུད་དཔུང་བཅས་པར་བཅོམ་བྱས་ཏེ། །ང་ནི་བྱང་ཆུབ་དབང་བསྐུར་རོ། །རིག་པས་མ་རིག་བཅོམ་ནས་ནི། །ཕུང་པོ་སྐྱེ་ཞིང་འཇིག་པ་ཅན། །གཡུལ་གྱི་རྩེ་མོ་རྒལ་ཏེ་ང༌། །སྐྱེ་དགུ་བྱང་ཆུབ་ཕྱིར་སངས་རྒྱས། །གང་གི་སྐྱེ་དགུ་གནོད་བྱེད་པ། །འཇིག་རྟེན་ཆོམ་རྐུན་ཆེན་པོ་གསུམ། །འདོད་ཆགས་ཞེ་སྡང་གཏི་མུག་རྣམས། །དེ་ཀུན་ང་ཡིས་བཅོམ་པས་ན། །མངོན་ཤེས་ཀུན་གྱི་སྟོབས་བྱུང་བས། །ང་ནི་དགྲ་བཅོམ་ཡོན་གནས་འོས། །ཞིང་གཤིན་པ་ལ་ཞུགས་པ་ཡི། །སྦྱིན་སྲེག་རྣམས་ཀྱང་ལེན་པ་ཡིན། །བརྩོན་འགྲུས་དམ་པ་བརྩམས་ནས་ནི། །ངས་ནི་ཟག་པ་རྣམས་བཅོམ་མོ། །ཆུ་བོ་ཆེ་ལས་རྒལ་ནས་ནི། །བསྒྲལ་བའི་ཕྱིར་ནི་གནས་པ་ཡིན། །ཇི་ལྟར་སེང་གེ་མཆེ་བའི་སྟོབས། །ནགས་སུ་སྲོག་ཆགས་དང་ཕྲད་ནས། །ཆུང་དང་འབྲིང་དང་ཆེན་པོའང་རུང༌། །དེ་ལ་མཚུངས་པར་སྣུན་པ་ལྟར། །མི་ཡི་སེང་གེ་རྣམ་འདྲེན་པ། །རྫོགས་སངས་དེ་བཞིན་འཇིག་རྟེན་ནི། །བྱིས་བའམ་འབྲིང་ངམ་ཆེན་པོ་ལ། །མཉམ་པོར་ཆོས་ནི་སྟོན་པར་མཛད། །གཽ་ཏམ་ཁྱོད་ཀྱིས་འདི་རུ་ནི། །ནད་པ་བདག་ནི་ཐེ་ཚོམ་སོངས། །ཟུག་རྔུ་འབྱིན་པ་རྣམས་དང་ནི། །མིག་མཁན་རྣམས་ཀྱི་མཆོག་ཁྱོད་ལགས། །ཁྱོད་ཀྱི་ཐེ་ཚོམ་བསལ་བར་བྱས། །བྲམ་ཟེ་ཁྱོད་ནི་འདུན་པར་གྱིས། །གྲགས་ལྡན་རྫོགས་པའི་སངས་རྒྱས་རྣམས། །མཐོང་བ་རྙེད་པར་དཀའ་བ་སྟེ། །གང་ཞིག་འདི་ན་རྙེད་དཀའ་བ། །བརྒྱ་ལམ་ན་ནི་ལན་འགའ་འབྱུང༌། །བྲམ་ཟེ་རྫོགས་པའི་སངས་རྒྱས་ང༌། །ཆོས་ཀྱི་རྒྱལ་པོ་བླ་མེད་ཡིན། །དེ་བཞིན་གཤེགས་ལ་རིས་གསོལ་བ། །རྫོགས་སངས་རྒྱས་ཞེས་བཀའ་སྩལ་ཏེ། །མ་འདྲེས་འཁོར་ལོ་སྐོར་མཛད་ན། །གཽ་ཏམ་ཇི་སྐད་གསུང་བ་བཞིན། །ཁྱོད་ཀྱིས་འཁོར་ལོ་བསྐོར་བ་གང༌། །རྗེས་སུ་མཁས་པར་བསྐོར་བགྱིད་པ། །སྟོང་པ་ཉིད་འཁྲུངས་ཉན་ཐོས་ནི། །སྡེ་དཔོན་དག་ཏུ་
སུ་འགྱུར་ལགས། །བྲམ་ཟེ་ང་ལ་ཉན་ཐོས་ནི། །ཤེས་རབ་མཚུངས་པའི་སྲས་ཡོད་པ། །ཉེ་རྒྱལ་ཞེས་ནི་གྲགས་པ་པོ། །མང་དུ་ཐོས་པ་ཤཱ་རིའི་བུ། །མདུད་པ་ཀུན་ལས་རྣམ་གྲོལ་བ། །ཉེར་ཞི་ཟག་པ་མེད་ཡོད་དེ། །ངས་ནི་འཁོར་ལོ་གང་བསྐོར་བ། །མཁས་པ་རྗེས་སུ་སྐོར་བར་བྱེད། །ཨེ་མའོ་སངས་རྒྱས་ཆོས་དང་ནི། །ཨེ་མའོ་ཉན་ཐོས་ཕུན་སུམ་ཚོགས། །ཨེ་མའོ་རིན་ཆེན་དམ་པ་གསུམ། །འཇིག་རྟེན་བྱུང་བ་ངོ་མཚར་ཆེ། །བཟང་པོ་ཁྱོད་ཀྱི་ཉན་ཐོས་སུ། །བདག་གིས་གཡར་གྱིས་བླང་བགྱིས་ལ། །ཀྱེ་མའོ་ཆོས་ཀྱི་བཅུད་འཚལ་ནས། །ཤིན་ཏུ་མྱ་ངན་འདས་པར་བགྱི། །སེམས་རྟོག་རབ་ཏུ་དགའ་གྱུར་ནས། །དེ་ནས་བྲམ་ཟེ་སྐྱོ་གྱུར་ཏེ། །དབེན་པ་འདོད་པའི་སེམས་ཀྱིས་ནི། །འཁོར་ལ་འདི་སྐད་ཅེས་སྨྲས་སོ། །ནགས་ན་སེང་གེ་སྒྲ་འབྱིན་ལྟར། །བསམ་གཏན་ཆེན་པོའི་ཟུག་རྔུ་འབྱིན། །སྤྱོན་དང་ལྡན་པས་ཅི་གསུང་བ། །འདི་ནི་ཤེས་ལྡན་དག་ཉོན་ཅིག །གང་དག་འདོད་པ་རྗེས་སུ་སོང༌། །གང་དག་མི་འདོད་དེ་དག་དེང༌། །ཤེས་རབ་མཆོག་གི་བསྟན་པ་ལ། །དེ་རིང་ཁོ་ན་རབ་འབྱུང་ངོ༌། །ཚངས་སྤྱོད་འདི་ལ་ལེགས་སྤྱད་ཅིང༌། །ལམ་ཉིད་ཤིན་ཏུ་གོམས་བྱས་ན། །བག་ཡོད་པ་ལ་གནས་པ་ཡི། །རབ་བྱུང་འབྲས་བུ་བཅས་པར་འགྱུར། །གལ་ཏེ་ཁྱེད་ཅག་རབ་འབྱུང་ཞིང༌། །བསྙེན་པར་རྫོགས་པར་འདོད་ན་ནི། །བྲམ་ཟེ་རལ་པ་འདི་བྲེགས་ཏེ། །བདག་ཅག་རབ་ཏུ་འབྱུང་བར་བྱ། །སེམས་རྟོག་རབ་ཏུ་མགུ་གྱུར་པས། །སོར་མོ་བཅུ་ཡི་ཐལ་སྦྱར་ཏེ། །བླ་གོས་ཕྲག་པ་གཅིག་གཟར་ནས། །བྲམ་ཟེ་རི་བོ་དེས་གསོལ་པ། །བྲམ་ཟེའི་ཁྱེའུ་ལྔ་བརྒྱ་པོ། །འདི་དག་ཐལ་སྦྱར་འཁོད་པ་ནི། །ཐུབ་ཆེན་རབ་ཏུ་འབྱུང་བ་དང༌། །བསྙེན་པར་རྫོགས་པ་ཐོབ་པར་འཚལ། །དེ་ནས་སྟོན་པ་ཐུགས་རྗེ་ཅན། །དྲང་སྲོང་ཆེན་པོ་ཐུགས་བརྩེ་བས། །དགེ་སློང་ཚུར་ཤོག་བཀའ་སྩལ་པས། །དེ་དག་བསྙེན་པར་རྫོགས་པར་གྱུར། །ཤེས་རབ་ཆེན་པོ་ཤཱ་རིའི་བུ། །རྫུ་འཕྲུལ་ལྡན་པ་མཽད་གལ་དང༌། །དགའ་ཡོད་གནས་བརྟན་ཀ་པི་ན། །སྤོབས་པ་རྟོགས་པར་ཁོང་དུ་ཆུད། །ཆུ་བོ་བཟང་པོའི་འགྲམ་དུ་ནི། །ཡིད་དུ་འོང་བའི་ཚལ་ཁྲོད་དུ། །སྤོབས་པ་བྱང་བའི་གནས་
བརྟན་གྱིས། །དེ་དག་ལ་ནི་གདམས་ངག་ཕོག །དེར་ནི་དེ་ལས་ཆོས་ཀྱི་གཏམ། །རྗེས་སུ་མཐུན་པ་དེ་ཤེས་ནས། །རིང་པོ་མ་ཐོགས་རྣམ་གྲོལ་ཏེ། །དམ་པའི་དོན་ལ་རབ་ཏུ་བཀོད། །དེ་དག་མཐོང་ཐོབ་བདེ་གྱུར་པས། །མཐོང་བའི་ཆོས་ལ་མྱ་ངན་འདས། །སངས་རྒྱས་འཇིག་རྟེན་འདྲེན་པ་ལ། །རབ་ཏུ་མགུ་བས་ཕྱག་བྱས་སོ། །དམ་པའི་ཆོས་དང་ཚོགས་གཙོ་དང༌། །རྒྱལ་བས་བསྔགས་པའི་བསླབ་པ་དང༌། །ཏིང་ངེ་འཛིན་དང་བགེད་པ་དང༌། །བག་ཡོད་པ་ལ་ཕྱག་བྱས་སོ། །དེ་བས་བདག་ལ་ཕན་འདོད་པའམ། །བདག་ཉིད་ཆེན་པོ་མངོན་འདོད་པས། །སངས་རྒྱས་ཆོས་དང་དགེ་འདུན་ལ། །བཀུར་སྟི་བྱོས་ལ་སྐྱབས་སུ་དེང༌། །འདི་ནི་དེ་ཉིད་གཟིགས་པ་ཡིས། །འཇིག་རྟེན་ན་ནི་སྐྱབས་སུ་བསྔགས། །གནོད་པ་རྣམས་ཀྱིས་སྐྲག་པ་ལ། །བདེ་བ་ཀུན་ནི་རབ་སྦྱིན་མཛད། །ཆོས་ཀྱི་རྒྱལ་པོ་ཉི་མའི་གཉེན། །སངས་རྒྱས་བསྟན་པ་ཆོས་ཀྱི་ནི། །བདག་ཉིད་ཆེན་པོར་མཆོག་གྱུར་ལ། །ཐར་པ་འདོད་པས་རྟག་ཏུ་བསྟེན། །ཀེ་ནའི་བུའི་ཚིགས་སུ་བཅད་པ་རྫོགས་སྟོ།། །།དེ་ནས་བཅོམ་ལྡན་འདས་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་ཏེ། ཀ་ཤིའི་ཚོང་རྡལ་དུ་བྱོན་ཏོ། །ཀ་ཤིའི་ཚོང་རྡལ་དེ་ན་སྔོན་འདྲེག་མཁན་བྱེད་བྱེད་པ་རབ་ཏུ་བྱུང་བ་ཕ་སྤང་གཉིས་ཤིག་ཡོད་པ་ལས། བུས་སྨྲས་པ། ཕ་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་ཡུལ་ཀ་ཤིའི་ལྗོངས་རྒྱུ་ཞིང་གཤེགས་ནས་གཙུག་ལག་ཁང་དུ་བྱོན་པ་བཅོམ་ལྡན་འདས་དང་དགེ་སློང་གི་དགེ་འདུན་སྐུ་མཉེལ་གྱིས། མ་ལ་བདག་ཅག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ནས་ཐུག་ལ་སྤྱན་དྲང་ན། དེ་ལ་ཅི་ཁྱོད་ཐུག་པ་སྟ་གོན་བྱེད་དམ། འོན་ཏེ་དགེ་སློང་གི་དགེ་འདུན་སྤྱན་འདྲེན། དེས་སྨྲས་པ། ཁྱོད་སོང་ལ་དགེ་སློང་གི་དགེ་འདུན་སྤྱན་དྲོངས་ཤིག །ང་ནི་ཐུག་པ་སྟ་གོན་བྱེད་དོ། །དེས་དགེ་སློང་གི་དགེ་འདུན་སྤྱན་དྲངས་སོ། །དེ་ཡང་མེ་ལོང་ཞིག་ཐོགས་ནས་ཚོང་དུས་སུ་སོང་བ་ལས། དེས་དེ་ན་ཚོང་དཔོན་ཞིག་སྐྲ་དང་ཁ་སྤུ་རིང་བ་མཐོང་ནས། དེས་ངེ་ལ་མེ་ལོང་བསྟན་པ་དང༌། དེས་སྨྲས་པ། འཕགས་པ་འདི་ལྟ་བུའི་
མཁྱེན་པ་ཡང་མངའ་འམ། དེས་སྨྲས་པ་ཡོད་དོ། །གལ་ཏེ་མངའ་ན་བྲེགས་ཤིག །དེས་བྲེག་པར་བརྩམས་པ་དང་ཁྱིམ་བདག་གཉིད་ལོ་གནས་བྲེགས་ཟིན་པ་དང་སད་དོ། །དེས་སྨྲས་པ། འཕགས་པ་བྲེགས་ལགས་སམ། ཁྱིམ་བདག་བྲེགས་ཟིན་ཏོ། །དེ་མགུ་ནས་སྨྲས་པ། འཕགས་པ་བདག་ལྷག་པར་གློབ་དགའ་བས་ཁྱོད་མཆོག་ཅི་བཞེད་པ་དོན་ཏོ། །དེས་སྨྲས་པ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ནས་ཐུག་ལ་སྤྱན་དྲངས་ཀྱིས་ནས་ཐུག་བྱིན་ཅིག །དེས་སྨྲས་པ། འཕགས་པ་ནས་ཐུག་ལྟ་ཁྱོད་ཅི་རུང་བཟའ་བ་དང་བཅའ་བ་བསོད་པ་དག་འབུལ་གྱིས་བཞུད་ལ་སྤྱན་དྲོངས་ཤིག །ནད་མེད་པར་གྱུར་ཅིག་ཅེས་སྨྲས་ནས་དེ་སོང་ངོ༌། །དེ་ནས་ཁྱིམ་བདག་དེས་ གཙང ་ཞིང་བསོད་པ་ཞེས་བྱ་བ་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བཟའ་བ་དང་བཅའ་བ་བསོད་པ་དག་བྲིམས་པ་ན། དགེ་སློང་རྣམས་ཀྱིས་བསམས་པ། བདག་ཅག་ངན་པ་ལ་མགྲོན་དུ་བོས་ན་ཁ་ཟས་བསོད་པ་འདི་བདག་ཅག་གིས་ཇི་ལྟར་བླང་ཞེས་དེ་རྣམས་ཀྱིས་མ་བླངས་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ངན་པ་ལ་མགྲོན་དུ་བོས་ལ་ཁ་ཟས་བསོད་པ་རྙེད་ན་ལོངས་སྤྱད་པར་བྱ་སྟེ། དེ་ལ་འགྱོད་པར་མི་བྱའོ། །བཅོམ་ལྡན་འདས་ཀྱིས་དགོངས་པ། ཉེས་པ་གང་བྱུང་བ་དེ་ནི་དགེ་སློང་དག་རིགས་དང་མཐུན་པའི་སྣོད་ཐོགས་པ་ལས་གྱུར་གྱིས། དེ་ལྟ་བས་ན་དགེ་སློང་གིས་རང་གི་བཟོ་བསྟན་པར་མི་བྱ། རིགས་དང་མཐུན་པའི་སྣོད་ཀྱང་བསྲེལ་བར་མི་བྱའོ། །སྲེལ་ན་འགལ་ཚབས་ཅན་དུ་འགྱུར་རོ། །སྔོན་སྨན་པ་ཡིན་ན་གཙའ་ཁབ་ཀྱི་སྣོད་སྲེལ་བ་དང༌། སྔོན་ཡི་གེ་པ་ཡིན་ན་རམ་ཕྱིས་སྲེལ་བ་དང༌། བཟོ་མཁན་རབ་ཏུ་བྱུང་ན་ཁབ་རལ་སྲེལ་བ་ནི་མ་གཏོགས་སོ། །བཅོམ་ལྡན་འདས་གྱད་ཡུལ་ནས་ལྗོངས་རྒྱུ་ཞིང་གཤེགས་ཏེ་སྡིག་ཅན་དུ་བྱོན་ནས་སྡིག་ཅན་ན་སྲིན་བུ་པད་པའི་ཚལ་སྟུག་པོ་ན་བཞུགས་སོ། །སྡིག་ཅན་ན་ཚེ་དང་ལྡན་པ་ཀུན་དགའ་བོའི་ཞང་པོ་གྱད་སྣ་ཆེན་པོ་ལ་གཏོགས་པ་འོད་ལྡན་ཞེས་བྱ་བ་ཞིག་གནས་པ་དེ་ཤིན་ཏུ་མ་དད་པ་ཞིག་སྟེ། བཅོམ་ལྡན་འདས་སྡིག་ཅན་གྱི་གྱད་ཡུལ་ནས་ལྗོངས་རྒྱུ་ཞིང་གཤེགས་ཏེ། སྡིག་ཅན་དུ་བྱོན་ནས་སྡིག་ཅན་ན་
སྲིན་བུ་པད་པའི་ཚལ་སྟུག་པོ་ན་བཞུགས་སོ། །ཞེས་ཐོས་སོ། །ཐོས་ནས་ཀྱང་གྲོས་བྱ་བར་བརྩམས་པ། ཤེས་ལྡན་དག་བཅོམ་ལྡན་འདས་གྱད་ཡུལ་ནས་ལྗོངས་རྒྱུ་ཞིང་གཤེགས་པ་ན་སྡིག་ཅན་དུ་བྱོན་ནས། སྡིག་ཅན་ན་སྲིན་བུ་པད་པའི་ཚལ་སྟུག་པོ་ན་བཞུགས་སོ། །ཞེས་ཐོས་ཀྱིས། གལ་ཏེ་བདག་ཅག་རེ་རེས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ན་གཞན་གྱིས་སྐབས་མི་རྙེད་པར་འགྱུར་བས་ཡེ་ཁྲིམས་ཞིག་བཅའ་བར་བྱ་སྟེ། བདག་ཅག་སུས་ཀྱང་གཅིག་པུས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་བར་མི་བྱ་ཞིང་བདག་ཅག་འདུས་པ་ཁོ་ནས་གདུགས་ཚོད་གསོལ་བར་བྱའོ། །བདག་ཅག་ལས་གང་ཞིག་གཅིག་པུ་ཁོ་ནས་གདུགས་ཚོད་གསོལ་ན། དེ་ལ་ཚོགས་ཀྱིས་ཀཱར་ཥཱཔཎ་དྲུག་བཅུའི་ཆད་པ་གཅད་དོ། །དེ་ནས་སྡིག་ཅན་གྱི་གྱད་ཐམས་ཅད་འདུས་ནས། བཅོམ་ལྡན་འདས་གང་ན་བདེར་དོང་སྟེ་ལྷགས་པ་དང༌། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང༌། བཅོམ་ལྡན་འདས་ཀྱིས་ཆོས་དང་ལྡན་པའི་གཏམ་གྱིས་སྡིག་ཅན་གྱི་གྱད་རྣམས་ལ་ཞེས་བྱ་བ་ནས། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །དེ་ནས་སྡིག་ཅན་གྱི་གྱད་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སངས་བདག་ཅག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། །བཅོམ་ལྡན་འདས་ཀྱིས་སྡིག་ཅན་གྱི་གྱད་རྣམས་ལ་ཅང་མི་གསུང་བས་གནང་ངོ༌། །དེ་ནས་སྡིག་ཅན་གྱི་གྱད་རྣམས་ཀྱིས། བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ། རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ཏེ་སོང་ངོ༌། །གྱད་སྣ་ཆེན་པོ་ལ་གཏོགས་པ་འོད་ལྡན་ནི་དེ་ཉིད་ན་འདུག་པ་དང༌། དེ་ལ་ཚེ་དང་ལྡན་པ་ཀུན་དགའ་བོས་སྨྲས་པ། འོད་ལྡན་ཅི་ཁྱོད་
དད་པར་གྱུར་ཏམ། དེས་སྨྲས་པ། བདག་དད་པར་ནི་མ་གྱུར་མོད་ཀྱི་འོན་ཀྱང་ཚོགས་ཀྱི་ཁྲིམས་སུ་བཅས་པ་ཞེས་བྱ་བ་ནས། ཀཱར་ཥཱ་པ་ཎ་དྲུག་བཅུའི་ཆད་པས་གཅད་དོ་ཞེས་བྱ་བའི་བར་གོང་མ་བཞིན་དུའོ། །ཁྱོད་ཆད་པས་འཇིགས་ནས་བཅོམ་ལྡན་འདས་ལ་བལྟ་བའི་ཕྱིར་འོངས་པ་ལྟ་ཞིག །བཙུན་པ་དེ་ལྟ་ལགས་སོ། །དེ་ནས་ཚེ་དང་ལྡན་པ་ཀུན་དགའ་བོས་གྱད་སྣ་ཆེན་པོ་ལ་གཏོགས་པ་འོད་ལྡན་ཁྲིད་དེ་བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། གྱད་སྣ་ཆེན་པོ་ལ་གཏོགས་པ་འོད་ལྡན་འདི་ནི་སངས་རྒྱས་ལ་མངོན་པར་མ་དང༌། ཆོས་ལ་མ་ལགས། དགེ་འདུན་ལམ་ལགས་ན། བཅོམ་ལྡན་འདས་ཀྱིས་ཇི་ལྟར་འདི་སངས་རྒྱས་ལ་མངོན་པར་དད་ཅིང་ཆོས་དང་དགེ་འདུན་ལ་མངོན་པར་དད་པར་འགྱུར་བ་དེ་ལྟར་ཆོས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་ཅང་མི་གསུང་བས་གནང་ངོ༌། །དེ་ནས་བཅོམ་ལྡན་འདས་ཀྱིས་གྱད་སྣ་ཆེན་པོ་ལ་གཏོགས་པ་འོད་ལྡན་གང་ཐོས་པས་གྱད་སྣ་ཆེན་པོ་ལ་གཏོགས་པ་འོད་ལྡན་སངས་རྒྱས་ལ་མངོན་པར་དད། ཆོས་དང་དགེ་འདུན་ལ་མངོན་པར་དད་པར་འགྱུར་བ་དེ་ལྟ་བུའི་ཆོས་བཤད་པ་མཛད་དོ། །དེ་ནས་གྱད་སྣ་ཆེན་པོ་ལ་གཏོགས་པ་འོད་ལྡན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། འོད་ལྡན་ང་སྔར་སྡིག་ཅན་གྱི་གྱད་རྣམས་ཀྱིས་སྤྱན་དྲངས་ཟིན་ཏོ། །བཅོམ་ལྡན་འདས་གནང་བར་མཛོད་ཅིག་དང༌། ཇི་ལྟར་སྡིག་ཅན་གྱི་གྱད་རྣམས་བཏུབ་པ་དེ་ལྟར་བདག་བགྱིད་དོ། །འོད་ལྡན་གལ་ཏེ་སྡིག་ཅན་གྱི་གྱད་རྣམས་བཏུབ་ན་དེ་བཞིན་དུ་ངས་ཁྱོད་ལ་གནང་ངོ༌། །དེ་ནས་གྱད་སྣ་ཆེན་པོ་ལ་གཏོགས་པ་འོད་ལྡན་གྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་ཆས་ནས་སྡིག་ཅན་གྱི་གྱད་རྣམས་གང་ན་བ་དེར་སོང་སྟེ་ཕྱིན་པ་དང༌། སྡིག་ཅན་གྱི་གྱད་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་
རེ་ཞིག་སྡོད་ཅིག་བདག་གིས་ཐོག་མར་བཅོམ་ལྡན་འདས་དང་དགེ་སློང་གི་དགེ་འདུན་གདུགས་ཚོད་གསོལ་ནས། དེའི་འོག་ཏུ་ཁྱེད་ཅག་གིས་ཀྱང་བཅོམ་ལྡན་འདས་དང༌། དགེ་སློང་གི་དགེ་འདུན་གདུགས་ཚོད་གསོལ་ན་དཀའ་བར་མི་འགྱུར་རོ། །དེ་རྣམས་ཀྱིས་སྨྲས་པ། ཁོ་བོ་ཅག་གིས་སྔར་སངས་རྒྱས་ལ་སོགས་པ་དགེ་སློང་གི་དགེ་འདུན་སྦྱན་དྲངས་ཟིན་པས་ཁོ་བོ་ཅག་མི་ཉན་ཏོ། །དེས་སྨྲས་པ། ཇི་སྟེ་མི་བཏུབ་ན་བཅའ་བ་དང་བཏུང་བ་རེ་རེ་ཞིང་བྲིམ་མོ། །དེ་ན་མ་དད་པ་གང་ཡིན་པ་དེ་དྲག་གིས་སྨྲས་པ། མི་གནང་ངོ༌། །དད་པ་ཅན་གང་ཡིན་པ་དེ་དག་གིས་སྨྲས་པ། ཤེས་ལྡན་དག་འདི་དད་པ་མེད་པ་ཞིག་ལས། འདིས་དགེ་འདུན་མངའ་བའི་ཡོན་དག་འབུལ་བར་འགྱུར་བས་གནང་ངོ་ཞེས་དེ་རྣམས་ཀྱིས་དེ་ལ་གནང་ངོ༌། །དེ་ནས་དེས་གཡོས་མཁན་དག་བཀུག་སྟེ་བསྒོ་བ། ཤེས་ལྡན་དག་ཁོ་བོས་ཡོ་བྱད་ཐམས་ཅད་སྦྱར་གྱིས་བཅའ་བ་གཅིག་པུ་གང་ཁོ་ནས་འགྲངས་པར་འགྱུར་བ་དེ་ལྟ་བུར་སྟ་གོན་གྱིས་ཤིག །དེས་དྲི་ཞིམ་པོ་སྣ་ཚོགས་ཀྱི་རྫས་ལ་སོགས་པ་དང་ལྡན་པའི་ཡོ་བྱད་རྣམས་ཕོག་པ་དང༌། དེ་རྣམས་ཀྱིས་དྲི་ཞིམ་པོ་སྣ་ཚོགས་ཀྱིས་ཡོངས་སུ་རྒྱས་པ་རེ་རེས་རེ་རེ་འགྲངས་པར་འགྱུར་བའི་བཅའ་བ་གང་ཡིན་པ་དག་བྱས་སོ། །དེ་ནས་སྡིག་ཅན་གྱི་གྱད་རྣམས་ཀྱིས་དེ་ཉིད་ཀྱི་ནུབ་མོ་ནས་ གཙང ་ཞིང་བསོད་པའི་ཞེས་བྱ་བ་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །དེ་ནས་གྱད་སྣ་ཆེན་པོ་ལ་གཏོགས་པ་འོད་ལྡན་གྱིས་བཅའ་བ་དང་བཏུང་བ་བྲིམ་པར་བརྩམས་པ་དང༌། དགེ་སློང་རྣམས་འགྱོད་པས་ལོངས་མ་སྤྱད་དོ། །བཅོམ་ལྡན་འདས་ཀྱིས་བཀའ་སྩལ་པ། ཡོན་བདག་ལ་བལྟ་བར་བྱའོ། །དགེ་སློང་རྣམས་ཀྱིས་སྡིག་ཅན་གྱི་གྱད་རྣམས་ལ་བལྟས་པ་དང་དེ་རྣམས་ཀྱིས་སྨྲས་པ། འཕགས་པ་དག་གྱད་སྣ་ཆེན་པོ་ལ་གཏོགས་པ་འོད་ལྡན་གྱིས་བདག་ཅག་བསླུས་ལགས་ཀྱིས་བཞེས་ཤིག །དེ་ནས་གྱད་སྣ་ཆེན་པོ་ལ་གཏོགས་པ་འདོ་ལྡན་གྱིས་བཅའ་བ་བྲིམས་པ་དང་དེ་ཁོ་ནས་དགེ་སློང་རྣམས་འགྲངས་ཏེ། བཅོམ་ལྡན་འདས་ཀྱིས་ཡོན་བསྔོ་བ་མཛད་དེ་གཤེགས་པས་སྡིག་ཅན་གྱི་གྱད་རྣམས་ཀྱི་ཟས་དེ་དག་ལོངས་མ་སྤྱད་པར་གྱུར་ཏོ། །ཉི་མ་གཞན་ཞིག་
ལ་དགེ་སློང་རྣམས་བསོད་སྙོམས་ལ་ཞུགས་པ་དང་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ། སངས་རྒྱས་ཚུར་སྤྱོན། ཆོས་ཚུར་སྦྱོན། དགེ་འདུན་ཚུར་སྦྱོན་འདི་དག་སྣོམས་ཤིག །དགེ་སློང་རྣམས་འགྱོད་པས་མ་བླངས་སོ། །བཅོམ་ལྡན་འདས་ཀྱིས་བཀའ་སྩལ་པ། ཅི་ཁོ་བོ་ལ་སྦྱིན་ནམ། འོན་ཏེ་བཅོམ་ལྡན་འདས་རྐང་གཉིས་རྣམས་ཀྱི་མཆོག་གང་ཡིན་པ་དེ་ལ་དབུལ་ཞེས་དྲི་བར་བྱའོ། །གལ་ཏེ་བཅོམ་ལྡན་འདས་རྐང་གཉིས་རྣམས་ཀྱི་མཆོག་གང་ཡིན་པ་དེ་ལའོ་ཞེས་སྨྲན་བདག་གིར་མི་བྱའོ། །འོན་ཏེ་བདག་ཅག་གི་སངས་རྒྱས་ནི་ཁྱོད་ཉིད་ལགས་སོ་ཞེས་སྨྲན་བླང་བར་བྱ་སྟེ། འདི་ལ་འགྱོད་པར་མི་བྱའོ། །དེ་བཞིན་དུ་ཆོས་འདོད་ཆགས་དང་བྲལ་བ་རྣམས་ཀྱི་མཆོག་གང་ཡིན་པ་དེ་ལའམ་ཞེས་བརྗོད་པར་བྱ་ཞིང༌། དགེ་འདུན་ཚོགས་རྣམས་ཀྱི་མཆོག་གང་ཡིན་པ་དེ་ལའམ་ཞེས་རྒྱས་པར་སྦྱར་བར་བྱའོ། །གླེང་གཞི་ནི་མཉན་ཡོད་ནའོ། །ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བསྲོ་ཁང་ལ་སྤྱན་དྲངས་སོ། །དེའི་ཚེ་ཚེ་དང་ལྡན་པས་རི་ཞེས་བྱ་བ་གཞོན་ནུ་ཐོར་བུ་ལང་ཚོ་ལ་བབ་པ་རབ་ཏུ་བྱུང་ནས་རིང་པོ་མ་ལོན་པ། བསྙེན་པར་རྫོགས་ནས་རིང་པོ་མ་ལོན་པ། ཆོས་འདུལ་བ་འདིར་འོངས་ནས་རིང་པོ་མ་ལོན་པ། དེས་བསམས་པ། བཅོམ་ལྡན་འདས་ཀྱིས་གང་གིས་ཉུང་དུ་བྱིན་པ་དང་གང་གིས་མང་དུ་བྱིན་པ་དང༌། གང་གིས་བཟང་པོ་བྱིན་པ་དང༌། གང་གིས་ཡིད་དགའ་བས་ལས་བྱས་པ་དང༌། གང་གིས་རབ་ཏུ་དང་བའི་སེམས་ཀྱིས་རྗེས་སུ་ཡི་རང་བ་དེ་དག་ཐམས་ཅད་ནི་བསོད་ནམས་ཀྱི་སྐལ་བ་ཅན་དུ་འགྱུར་རོ་ཞེས་གསུངས་ཀྱིས། མ་ལ་བདག་གིས་ཀྱང་ལས་ཤིག་བྱའོ་སྙམ་ནས་དེས་ཤིང་གཤག་བར་བརྩམས་པ་ལས་ཇི་ཙམ་ན་ཤིང་རུལ་པ་ཞིག་གི་སེར་ཀ་ནས་སྦྲུལ་གདུག་པ་ཞིག་བྱུང་ནས་རྐང་པ་གཡས་པའི་མཐེ་བོ་ལ་ཟིན་པ་དང༌། དེ་དུག་གི་ཤུགས་ཀྱིས་བརྒྱལ་ནས་ས་ལ་འགྱེལ་ཏེ་དབུ་བར་སྐྱུག་ཅིང་བཞིན་ཡང་གྱུར། མིག་ཀྱང་གྱུར་ཏེ། དེ་དེ་ལྟར་སྡུག་བསྔལ་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། ཤེས་ལྡན་དག་འདི་ཁྱིམ་བདག་སུ་ཞིག་གི་བུ་ཡིན། གཞན་དག་གིས་སྨྲས་པ། ཆེ་གེ་མོ་ཞིག་གིའོ། །དེ་དག་གིས་སྨྲས་པ། དགེ་སྦྱོང་ཤཱཀྱའི་སྲས་མགོན་
མེད་པ་རྣམས་ཀྱི་ནང་དུ་རབ་ཏུ་བྱུང་གི་གལ་ཏེ་རབ་ཏུ་མ་བྱུང་བར་གྱུར་ན་ཉེ་དུ་རྣམས་ཀྱིས་འདི་ལ་སྤྱད་བྱས་པ་ཞིག་ཅེས་བྱ་བའི་ཀབས་དེ་དགེ་སློང་རྣམས་ཀྱིས་བཅོམ་ལྡན་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྨན་པ་ལ་དྲིས་ལ་སྤྱད་བྱོས་ཤིག །དགེ་སློང་དག་གིས་སྨན་པ་ལ་དྲིས་པ་དང༌། དེས་སྨྲས་པ། འཕགས་པ་སྦྱར་བའི་ཟས་གསོལ་ཅིག་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྨན་པས་བསྟན་ན་སྦྱིན་པར་བྱའོ། །དགེ་སློང་ དག་གིས་ཟས་སྦྱར་བ་ཇི་ལྟ་བུ་ཡིན་པ་མ་ཤེས་ནས། དེ་རྣམས་ཀྱིས་སྨན་པ་ལ་དྲིས་པ་དང༌། དེས་སྨྲས་པ། འཕགས་པ་དག་ཁྱེད་ཉིད་ཀྱི་སྟོན་པ་བཅོམ་ལྡན་འདས་ནི་ཐམས་ཅད་མཁྱེན་པ་ཐམས་ཅད་གཟིགས་པ་ཁོ་ན་ཉིད་ཡིན་ཏེ། དེ་ཉིད་མཁྱེན་ཏོ་ཞེས་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཟས་སྦྱར་བ་ནི་ལྕི་བ་དང༌། གཅིན་དང༌། ཐལ་བ་དང་སའོ། །དེ་ལ་ལྕི་བ་ནི་བྱུང་ནས་རིང་པོ་མ་ལོན་པའི་པེའུ་རྣམས་ཀྱིའོ། །གཅིན་ཡང་དེ་དག་ཁོ་ནའོ། །ཐལ་བ་ནི་ཤིང་ལྔ་པོ་ཀན་ཙན་ནའི་དང༌། ཀ་པིདྷ་ཀའི་དང༌། ཨ་ཤྭ་ཐའི་དང༌། ཨུ་དུམ་བ་རའི་དང༌། ནྱ་གྲོ་དྷའིའོ། །ས་ནི་ས་ལས་སོར་བཞིའི་འོག་ནས་ཕྱུང་བའོ། །འདི་ནི་སྦྱར་བའི་ཟས་ཡིན་ནོ། །དེ་ནས་དགེ་སློང་རྣམས་ཀྱིས་ཚེ་དང་ལྡན་པས་རིལ་ཟས་སྦྱར་བ་བྱིན་ན། འོན་ཀྱང་སོས་པར་མ་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ང་ལས་རྨ་བྱ་ཆེན་མོའི་རིག་སྔགས་བཟུང་ནས་ཀུན་ཆུབ་པར་བྱས་ཏེ། དགེ་སློང་རི་ལ་བསྲུངས་བ་དང༌། ཡོངས་སུ་བསྐྱབ་པ་དང༌། ཡོངས་སུ་གཟུང་བ་དང༌། དུག་གཞིལ་བ་དང༌། ཆད་པ་སྤང་བ་དང༌། དུག་གསད་པ་དང༌། མཚམས་གཅད་པ་དང༌། ས་བཅིང་བར་ནུས་སམ། བཅོམ་ལྡན་འདས་ཀྱིས་བཀའ་སྩལ་དུ་གསོལ་མཉན་ཏེ་བགྱིའོ།། །།འདུལ་བ་གཞི། བམ་པོ་དྲུག་བཅུ་པ། དེ་ནས་བཅོམ་ལྡན་འདས་ཀྱིས་དེའི་ཚེ་རྨ་བྱ་ཆེན་མོའི་རིག་སྔགས་འདི་བཀའ་སྩལ་ཏོ། །སངས་རྒྱས་ལ་ཕྱག་འཚལ་
ལོ། ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །འདི་ལྟ་སྟེ། ཨ་མ་ལེ། བི་མ་ལེ། ནིར་མ་ལེ། མངྒ་ལྱེ། ཧི་ར་ཎྱེ། ཧི་ར་ཎྱེ། གརྦྷེ། བྷ་དྲེ། སུ་བྷ་དྲེ། ས་མནྟ། བྷདྲེ། ཤྲཱི་བྷ་དྲེ། སརྦ་ཨཱརྠ་སཱདྷ་ནི། པར་མཱར་ཐ་སཱ་དྷ་ནི། སརྦ་ཨ་ནར་ཐ་པྲ་ཤ་མ་ནི། སརྦ་མང་ག་ལ་སཱ་དྷ་ནི། མཱ་ན་སི། མཱ་ན་སི། མ་ཧཱ་མཱ་ན་སི། ཨ་ཙྱུ་ཏེ། ཨཱད་བྷུ་ཏེ། ཨཱད་དྱན་བྷུ་ཏེ། མུག་ཏེ། མོ་ཙ་ནི། མོ་ཀྵ་ནི། ཨ་ར་ཛེ། བི་ར་ཛེ། ཨ་མ་རེ། ཨྀ་མྲ་ཏེ། ཨ་མར་ཎི། བྲ་ཧྨེ། བྲ་ཧྨཱ་སྭ་རེ། སཱུ་ར་ཎི། སཱུར་ཎ་མ་ནོར་ཐེ། མུག་ཏེ། ཛཱི་བན་ཏེ། ས་རིའི་གནོད་པ་དང༌། འཇིགས་པ་དང༌། ནད་ཐམས་ཅད་ལས་སྲུངས་ཤིག་སྭཱ་ཧཱ། བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་སྤྱན་སྔ་ནས་རྨ་བྱ་ཆེན་མོའི་རིག་སྔགས་བླངས་ནས། དགེ་སློང་ས་རི་ལ་བདེ་ལེགས་སུ་འགྱུར་བ་བྱས་པས་དུག་མེད་ནས་སྔོན་གྱི་ཇི་ལྟ་བ་བཞིན་དུ་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཇི་ཙམ་དུ་བཅོམ་ལྡན་འདས་ཀྱིས་རྨ་བྱ་ཆེན་མོའི་རིགས་སྔགས་སྨན་པ་དང༌། གཅེས་སྤྲས་བགྱིད་པ་ངོ་མཚར་ཆེ་ལགས་སོ། །དགེ་སློང་དག་ད་ལྟར་འབའ་ཞིག་ཏུ་མ་ཡིན་ཏེ། ཇི་ལྟར་འདས་པའི་དུས་ན་ཡང་ང་ལོག་པར་ལྟུང་བའི་ལུས་མི་ཁོམ་པར་གྱུར་པ་ན་རིག་སྔགས་ཀྱི་རྒྱལ་མོ་རྨ་བྱ་ཆེན་མོས་ཕན་པ་དང་གཅེས་སྤྲས་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཞིག་གནས་ཏེ། དེ་ནང་པར་རྨ་བྱ་ཆེན་མོའི་རིག་སྔགས་འདིས་བདེ་ལེགས་སུ་འགྱུར་བ་བྱས་ཏེ་ཉིན་མོ་བདེ་ལེགས་སུ་གནས། ནུབ་ཀར་བདེ་ལེགས་སུ་འགྱུར་བ་བྱས་ཏེ་མཚན་མོ་བདེ་ལེགས་སུ་གནས་སོ། །དེ་དུས་གཞན་ཞིག་ན་འདོད་པའི་འདོད་ཆགས་ལ་ལྷག་པར་ཆགས། འདོད་པ་རྣམས་ལ་ཞེ་ན། འཆུམས། བརྒྱལ། མྱོས། རབ་ཏུ་རྨོངས། རབ་ཏུ་བརྒྱལ་ཏེ། བག་མེད་པས་ནགས་ཀྱི་རྨ་བྱ་ཆེན་མོ་རབ་ཏུ་མང་པོ་རྣམས་དང་ལྷན་ཅིག་ཏུ་ཀུན་དགའི་ར་བ་ནས་ཀུན་དགའི་ར་བ་དང༌། སྐྱེད་མོས་ཚལ་ནས་སྐྱེད་མོས་ཚལ་དང༌། རིའི་ངོས་ནས་རིའི་ངོས་སུ་རྒྱུབ་བ་ལས་ཇི་ཙམ་ན་རིའི་སེར་ག་ཞིག་ཏུ་ཞུགས་པ་དང༌། དེ་
དེར་ཡུན་རིང་དུ་ཕྱིར་རྒོལ་བ། དགྲར་གྱུར་བ། འཚེ་བར་གྱུར་བ། གླགས་ལྟ་བ་རྣམས་ཀྱིས་རྨ་བྱའི་རྙིས་བཟུང་སྟེ། དེ་མི་མཛའ་བའི་ནང་དུ་སོན་པ་དང༌། རབ་ཏུ་རྨོངས་པ་ལས་དྲན་པ་རྙེད་ནས་རྨ་བྱ་ཆེན་མོའི་རིག་སྡགས་འདི་ཁོ་ན་ཡིད་ལ་བྱས་སོ། །འདི་ལྟ་སྟེ། ཨ་མ་ལེ། བི་མ་ལེ། ནིར་མ་ལེ། མང་ག་ལྱེ། ཧི་ར་ཎྱེ། ཧི་ར་ཎྱེ། གརྦྷེ། བྷ་དྲེ། སུ་བྷ་དྲེ། ས་མནྟ་བྷ་དྲེ། ཤྲཱི་བྷ་དྲེ། སརྦ་ཨཱརྠ་སཱ་དྷ་ནི། བ་ར་མཱར་ཐ་སཱ་དྷ་ནི། སརྦ་ཨ་ནར་ཐ་བྲ་ཤ་མ་ཎི། སརྦ་མང་ག་ལ་སཱ་དྷ་ནི། མཱ་ན་སི་མཱ་ན་སི། མ་ཧཱ་མཱ་ན་སི། ཨ་ཙྱུ་ཏེ། ཨཱད་བྷུ་ཏེ། ཨཱད་དྱན་བྷུ་ཏེ། མུག་ཏེ་མོ་ཙ་ནི། མོ་ཀྵ་ཎི། ཨ་ར་ཛེ། བི་ར་རྫེ། ཨ་མ་རེ། ཨ་མྲྀ་ཏེ། ཨ་མ་ར་ཎི། བྲ་ཧྨེ། བྲ་ཧྨཱ་སྭ་རེ། སཱུ་ར་ཎེ། སཱུ་ར་ཎམ་ནོ་ར་ཐེ། མུག་ཏེ། ཛཱི་བན་ཏི། བདག་གནོད་པ་ཐམས་ཅད་ལས་སྲུངས་ཤིག་སྭཱ་ཧཱ། དེས་རྨ་བྱའི་རྙི་ཆད་ནས་བྲོས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་གང་ཡིན་པ་དེ་ནི་ང་ཡིན་ཏེ། དེ་ན་ཡང་ང་ལ་རྨ་བྱ་ཆེན་མོའི་རིག་སྔགས་ཀྱིས་ཕན་པ་དང་གཅེས་སྤྲས་བྱས་སོ། །ད་ལྟར་ན་ཡང་ངའི་རྨ་བྱ་ཆེན་མོའི་རིག་སྔགས་ཀྱིས་ཕན་པ་དང་གཅེས་སྤྲས་བྱས་སོ། །བཙུན་པ་བཅོམ་ལྡན་འདས་ཀྱི་རིག་སྔགས་ཀྱིས་དགེ་སློངས་རིལ་ཇི་ཙམ་པ་བདེ་ལེགས་སུ་བྱས་པར་གྱུར་པ་ལ་གཟིགས། དགེ་སློང་དག་ད་ལྟར་འབའ་ཞིག་མ་ཡིན་གྱི་ཇི་ལྟར་འདས་པའི་དེ་ཡང་ཉོན་ཅིག །དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་ན་སྦྲུལ་སྔགས་མཁན་ཞིག་ཡོད་དོ། །རྒྱལ་རིགས་ཀྱི་ཁྱེའུ་ཞིག་སྦྲུལ་གྱིས་ཟིན་ནས་དེ་ཤི་བ་དང༌། སྦྲུལ་སྔགས་མཁན་གྱིས་རིག་སྔགས་ཀྱིས་དེ་སོས་པར་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྦྲུལ་སྔགས་མཁན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཁྱེའུ་གང་ཡིན་པ་དེ་ནི་དགེ་སློང་ས་རི་ཡིན་ནོ། །སྨན་གྱི་གཞི་རྫོགས་སོ། །