གང་ཟག་གི་གཞི་འཆད་པ།
གང་ཟག་གི་གཞིའི་སྤྱིའི་སྔོམ་ནི། འཆར་ཀ་དང་ནི་བཏུས་པ་དང༌། །མཐའ་དང་དེ་བཞིན་གཞན་གྱིས་དང༌། ཕྱི་མ་དག་ཏུ་གྱུར་པའོ། །སྔོམ་ལ། འཆར་ཀ་གཞན་གྱིས་དྲན་པ་དང༌། །འཛེམ་
དང་དེ་གདོད་ཤེས་པ་དང༌། །གཉིས་དང་གཉིས་དང་བྱས་པའོ། །ལེགས་པར་བྱིན་དང་ཉེས་པར་བྱིན། །མུ་བཞིར་སྨྲ་དང་བརྗེད་པ་དང༌། །མུ་བཞི་དག་ཏུ་དབྱེ་བའོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་འཆར་ཀ་ལ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་བྱུང་བ་ཟླ་བ་ཕྱེད་བཅབས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་འཆར་ཀ་ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པའི་དགེ་འདུན་ལྷག་མའི་ལྟུང་བ་ཟླ་བ་ཕྱེད་བཅབས་པ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཟླ་བ་ཕྱེད་ཀྱི་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་མ་བཅབས་པ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཞག་དྲུག་གི་མགུ་བར་བྱ་བ་བྱིན་ཅིགཐཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་གཉིས་བྱུང་བ་དེ་གཉིས་སུ་མ་ཤེས་ཏེ་ཟླ་བ་གཉིས་ལོན་ནས་ཤེས་པ་དང༌། ཟླ་བ་གཉིས་སུ་བཅབས་ནས་གཅིག་ནི་དགེ་སློང་རྣམས་ལ་སྨྲས། གཅིག་ནི་མ་སྨྲས་པ་དང༌། དགེ་འདུན་གྱིས་དེ་ལ་ཟླ་བ་གཉིས་ཀྱི་སྤོ་བ་བྱིན་ཏེ། དེ་སྤོ་བ་བགྱིད་བཞིན་པ་ལས་དེས་དགེ་འདུན་གྱི་ནང་དུ་མ་སྨྲས་པའི་ལྟུང་བ་གང་ཡིན་པ་དེ་ཡང་ཤེས་ནས་སྐབས་དེ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང་གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཟླ་བ་གཉིས་པོ་དེ་ཉིད་ཀྱི་སྤོ་བ་བྱིན་ཏེ། ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་གཉིས་བྱུང་བ་དེས་ལྟུང་བ་དེ་གཉིས་ཟླ་བ་གཉིས་སུ་མ་ཤེས་ཏེ་ཟླ་བ་གཉིས་ལོན་ནས་ཤེས་པ་
དང༌། ཟླ་བ་གཉིས་བཅབས་ཏེ། གཅིག་ནི་དགེ་སློང་རྣམས་ལ་སྨྲས། གཅིག་ནི་མ་སྨྲས་པ་དང༌། དགེ་འདུན་གྱིས་དེ་ལ་ཟླ་བ་གཉིས་ཀྱི་སྤོ་པ་བྱིན་ཏེ། དེ་སྤོ་བ་བྱེད་པ་ན་ངོ་ཚ་བའི་ཆོས་སུ་གྱུར་པའི་སྐབས་དེ་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་གཉིས་བྱུང་སྟེ། བདག་གིས་ལྟུང་བ་དེ་གཉིས་ཟླ་བ་གཉིས་སུ་མ་ཤེས་ཏེ། ཟླ་བ་གཉིས་ལོན་ནས་ཤེས་པ་དང༌། ཟླ་བ་གཉིས་བཅབས་ཏེ་གཅིག་ནི་དགེ་སློང་རྣམས་ལ་སྨྲས། གཅིག་ནི་མ་སྨྲས་པ་དང༌། དགེ་འདུན་གྱིས་བདག་ལ་ཟླ་བ་གཉིས་ཀྱི་སྤོ་བ་སྩལ་ཏེ། བདག་སྤོ་བ་བགྱིད་པ་ན་ངོ་ཚ་བའི་ཆོས་སུ་གྱུར་ཏོ་ཞེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་ཇི་ལྟར་བཅབས་པ་དེ་དང༌། གཞན་ཡང་དེ་ལྟ་བུ་དང་མཐུན་བ་སུ་ཡང་རུང་བ་ལ་སྤོ་བ་བྱིན་ཏེ། ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་ལ་དེ་ཟླ་བ་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས། ཚེ་དང་ལྡན་པ་དག་བདག་གིས་ཆོས་འདི་ཇི་ལྟར་མདོ་ལས་འབྱུང་ཞིང་མདོའི་ཁོངས་སུ་གཏོགས་པར་ད་གཟོད་ཤེས་སོ་ཞེས་སྨྲ་ན། གལ་ཏེ་དགེ་སློང་དག་གིས་ཚེ་དང་ལྡན་པ་འདི་སྔར་གསོ་སྦྱོང་གི་ལས་ གཉིས་སམ་གསུམ་ལ་ནི་འདུས་ན། ལན་མང་དུ་ཡང་རེ་སྙམ་ཞེས་བྱ་བར་དེའི་རྒྱུས་ཤེས་ན། ཚེ་དང་ལྡན་པ་དེའི་མི་ཤེས་པས་ཐར་པ་མེད་པ་ཉིད་པས་དེ་ལྟུང་བ་བྱུང་བ་གང་ཡིན་པ་དེ་ཕྱིར་ཆོས་བཞིན་དུ་བྱེད་དུ་གཞུག་ཅིང་ཕྱིས་ཀྱང་འགྱོད་པ་བསྐྱེད་པར་བྱ་སྟེ། ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་ལ་དེ་སོ་སོར་ཐར་པའི་མདོ་གདོན་པ་འདོན་པ་ན་འདི་སྐད་ཅེས། ཚེ་དང་ལྡན་པ་དག་བདག་གིས་ཆོས་འདི་ཇི་ལྟར་མདོ་ལས་འབྱུང་ཞིང་མདོའི་ཁོངས་སུ་གཏོགས་པར་ད་གཟོད་ཤེས་སོ་ཞེས་སྨྲ་ན། གལ་ཏེ་དགེ་སློང་དག་གིས་ཚེ་དང་ལྡན་པ་འདི་སྔར་གསོ་སྦྱོང་གི་ལས་གཉིས་སམ་གསུམ་ལ་ནི་འདུས་ན། ལན་མང་དུ་ཡང་རེ་སྙམ་ཞེས་བྱ་བར་དེའི་རྒྱུས་
མི་ཤེས་ན། ཚེ་དང་ལྡན་པ་དེའི་མི་ཤེས་པས་ཐར་པ་མེད་པ་ཉིད་པས་དེ་ལྟུང་བ་བྱུང་བ་གང་ཡིན་པ་དེ་ཕྱིར་ཆོས་བཞིན་དུ་བྱེད་དུ་གཞུག་ཅིང་ཕྱིས་འགྱོད་པ་བསྐྱེད་པར་ནི་མི་བྱ་སྟེ། ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་དེ་དེས་ཟླ་བ་གཅིག་ཏུ་མ་ཤེས་ཏེ། ཟླ་བ་གཅིག་ལོན་ནས་ཤེས་པ་དང༌། ཟླ་བ་གཅིག་བཅབས་ཏེ་དགེ་སློང་རྣམས་ལ་སྨྲས་པ་དང༌། དགེ་འདུན་གྱིས་དེ་ལ་ཟླ་བ་གཉིས་ཀྱི་སྤོ་བ་བྱིན་ཏེ། དེ་སྤོ་བ་བྱེད་པ་ན་ལྷགས་ཤིང་ལྷགས་པའི་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་ལྟུང་བ་དེ་བདག་གིས་ཟླ་བ་གཅིག་ཏུ་མ་ཤེས་ཏེ། ཟླ་བ་གཅིག་ལོན་ནས་ཤེས་པ་དང༌། ཟླ་བ་གཅིག་ཏུ་བཅབས་ཏེ་དགེ་སློང་རྣམས་ལ་སྨྲས་པ་ལ། དགེ་འདུན་གྱིས་བདག་ལ་ཟླ་བ་གཉིས་ཀྱི་སྤོ་བ་བྱིན་ཏེ། ཚེ་དང་ལྡན་པ་ཟླ་བ་གཅིག་ནི་ལེགས་པར་བྱིན་ནོ། །ཟླ་བ་གཅིག་ནི་ཉེས་པར་བྱིན་ཏེ། དེ་ཅིའི་ཕྱིར་ཞེ་ན། ཆོས་མ་ཡིན་པའི་ལས་འཁྲུགས་པ་ཡིན་ཏེ་ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ།། །།འདུལ་བ་གཞི། བམ་པོ་བདུན་བཅུ་གཉིས་པ། ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་དེས་ལྟུང་བ་དེ་ཟླ་བ་གཅིག་ཏུ་མ་ཤེས་ཏེ། ཟླ་བ་གཅིག་ལོན་ནས་ཤེས་པ་དང་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་འདུན་གྱིས་དེ་ལ་ཟླ་བ་གཅིག་གི་སྤོ་བ་བྱིན་ཏེ། དེ་སྤོ་བ་བྱེད་པ་ན་ལྷགས་ཤིང་ལྷགས་པའི་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་བདག་གིས་ལྟུང་བ་དེ་ཟླ་བ་གཅིག་ཏུ་མ་ཤེས་ཏེ། ཟླ་བ་གཅིག་ལོན་ནས་ཤེས་པ་དང་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་འདུན་གྱིས་བདག་ལ་ཟླ་བ་གཅིག་གི་སྤོ་བ་བྱིན་ཏེ། ཚེ་དང་ལྡན་པ་དག་ལེགས་པར་བྱིན་བ་མ་ཡིན་གྱིས་ཉེས་པར་བྱིན་པ་ཡིན་ཏེ། དེ་ཅིའི་ཕྱིར་ཞེ་ན། ཚེ་དང་ལྡན་པ་མགུ་བར་བྱ་བར་འོས་པ་སྟེ། ཇི་ལྟར་ཤེས་པ་དེ་བཞིན་དུ་དྲན་པར་འགྱུར་རོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཤགས་པར་བྱའོ་ཞེས་མ་བཅབས་པ་ལས་བརྗེད་དོ། །དེས་
ལྟུང་བ་དེ་དྲན་ནས་ནི་བཅབས་ཏེ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་སྔ་མ་དང་ཕྱི་མའི་རྒྱུད་གཉིས་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་བཤགས་པར་བྱའོ་སྙམ་པ་ལས་བརྗེད་དོ། །དེས་དེ་དྲན་ནས་ནི་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་སྔ་མའི་རྒྱུད་ནས་བཟུང་སྟེ་སྤོ་བ་བྱིན་ཅིགཐཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་བཤགས་པར་བྱའོ་སྙམ་པ་ལས་བརྗེད་དོ། །དེས་དེ་དྲན་ནས་ནི་མ་བཅབས་ཏེ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཤགས་པར་བྱའོ་ཞེས་མ་བཅབས་པ་ལས་བརྗེད་དོ། །དེས་དེ་དྲན་ནས་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཞག་དྲུག་གི་མགུ་བར་བྱ་བ་བྱིན་ཅིག །སྡོམ་ལ། བཏུས་པ་བཅུ་དྲུག་གཉིས་དང་ནི། །ལྔ་དང་ བརྒྱད་དང་ཉི་ཤུ་དང༌། །གསུམ་དང་གསུམ 
་
བརྒྱད་གསུམ ་དང་ནི། །བཞི་དང་བཞི་ཚན་བརྒྱད་དག་དང༌། །གནས་ནས་དབྱུང་ བརྒྱད་གསུམ ་དང་ནི། །སྒོ་ལྔ་དག་ནི་བསྟན་པ་ཡིན། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་ནས་བབས་ཏེ། དེ་འོངས་ནས་སླར་བསྙེན་པར་རྫོགས་ཏེ། དེས་ལྟུང་བ་དེ་
བཅབས་བཞིན་དུ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཉིས་ཀའི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་ནསབབས་ཏེ། དེ་འོངས་ནས་སླར་བསྙེན་པར་རྫོགས་ཏེ། དེས་ལྟུང་བ་དེ་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་སྔ་མའི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པར་བབས་ནས། དེ་འོངས་ནས་སླར་བསྙེན་པར་རྫོགས་ཏེ། དེ་ལྟུང་བ་དེ་བཅབས་ནས་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཕྱི་མའི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པར་བབས་ནས། དེ་འོངས་ནས་སླར་བསྙེན་པར་རྫོགས་ནས་དེས་ལྟུང་བ་མ་བཅབས་པ་ཉིད་དུ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཞག་དྲུག་གི་མགུ་བར་བྱ་བ་བྱིན་ཅིག །ཇི་ལྟར་ཁྱད་པར་མེད་པས་བཞི་ཡིན་པ་ཇི་ལྟ་བ་བཞིན་དུ་ཤེས་པས་བཞི་དང༌། དྲན་པས་བཞི་དང༌། ཡིད་གཉིས་ཀྱི་བཞི་ཡང་དེ་བཞིན་ནོ། །རྣམ་གྲངས་འདིས་བཞི་ཚན་གཞན་དག་སྟེ། འོན་ཀྱང་བསྒྲེ་བའི་ཁྱད་པར་ཡོད་དོ། །ཇི་ལྟར་གང་ཟག་གཞན་ཞེས་བྱ་བ་དེ་བཞིན་དུ་སྤོ་བ་ཞེས་བརྗོད་པར་བྱའོ། །སྤོ་བ་ཇི་ལྟ་བ་དེ་བཞིན་དུ་སྤོ་བ་སྤྱད་པ་དང༌། མགུ་
བར་བྱ་བ་དང༌། མགུ་བར་བྱ་བ་སྤྱོད་པ་དང༌། བསླབ་པ་བྱིན་པའི་བཞི་ཚན་དུ་སྦྱར་བར་བྱའོ། །བབས་པ་ཇི་ལྟ་བ་བཞིན་དུ་དགེ་ཚུལ་ཉིད་དུ་ཁས་བླངས་པ་དང༌། སྨྱོས་པ་ཉིད་དང༌། སེམས་འཁྲུགས་པ་ཉིད་དང༌། ཚོར་བས་ཉེན་པ་ཉིད་དང༌། མ་མཐོང་བས་གནས་ནས་དབྱུང་བ་ཉིད་དང༌། ཕྱིར་མི་བྱེད་པས་གནས་ནས་དབྱུང་བ་ཉིད་དང༌། སྡིག་པ་ཅན་གྱི་ལྟ་བ་ལོག་པར་སོང་བ་མི་འདོར་བས་གནས་ནས་དབྱུང་བ་ཉིད་ལ་ཡང་དེ་བཞིན་དུ་རྒྱས་པར་སྦྱར་བར་བྱའོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་གཉིས་བྱུང་བ་བཅབས་པ་དང༌། མ་བཅབས་པར་བབས་ཏེ། དེ་འོངས་ནས་སླར་བསྙེན་པར་རྫོགས་ཏེ། དེ་བཅབས་ནས་བབས་པ་གང་ཡིན་པ་དེ་བཅབས་བཞིན་དུ་དགེ་སློང་རྣམས་ལ་སྨྲས། མ་བཅབས་པ་གང་ཡིན་པ་དེ་ཡང་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཅིག་གིས་སྔ་མ་དང་ཕྱི་མ་གཉིས་ཀའི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་གཉིས་བྱུང་བ་བཅབས་པ་དང༌། མ་བཅབས་པར་བབས་ཏེ་འོངས་ནས་སླར་བསྙེན་པར་རྫོགས་ཏེ། དེས་བཅབས་ནས་བབས་པ་གང་ཡིན་པ་དེ་མ་བཅབས་པར་དགེ་སློང་རྣམས་ལ་སྨྲས། མ་བཅབས་པར་གང་ཡིན་པ་དེ་མ་བཅབས་པར་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཅིག་ནི་སྔ་མའི་རྒྱུད་ནས་བཟུང་སྟེ་སྤོ་བ་བྱིན་ཅིག །གཅིག་ནི་ཞག་དྲུག་གི་མགུ་བར་བྱ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་གཉིས་བྱུང་བ་བཅབས་པ་དང༌། མ་བཅབས་པར་བབས་ཏེ། དེ་འོངས་ནས་སླར་བསྙེན་པར་རྫོགས་ཏེ། དེས་བཅབས་པ་གང་ཡིན་པ་དེ་མ་བཅབས་པར་དགེ་སློང་རྣམས་ལ་སྨྲས། མ་བཅབས་པ་གང་ཡིན་པ་དེ་བཅབས་པར་
དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཅིག་ནི་སྔོན་གྱི་རྒྱུད་ནས་བཟུང་སྟེ་སྤོ་བ་བྱིན་ཅིག །གཅིག་ནི་ཕྱི་མའི་རྒྱུད་ནས་བཟུང་སྟེ་སྤོ་བ་བྱིན་ཅིགཐཡང་གང་ཟག་གཞན་ཞིག་གིས་དགེ་འདུན་ལྷག་མའི་ལྟུང་བ་གཉིས་བྱུང་བ་བཅབས་པ་དང༌། མ་བཅབས་པར་བབས་ཏེ། དེ་འོངས་ནས་སླར་བསྙེན་པར་རྫོགས་ཏེ། དེས་བཅབས་པ་གང་ཡིན་པ་དེ་མ་བཅབས་པར་དགེ་སློང་རྣམས་ལ་སྨྲས། མ་བཅབས་པ་གང་ཡིན་པ་དེ་མ་བཅབས་པ་ཁོ་ནས་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གཅིག་གི་ནི་སྔོན་གྱི་རྒྱུད་ནས་བཟུང་སྟེ་སྤོ་བ་བྱིན་ཅིག །གཅིག་གི་ནི་ཞག་དྲུག་གི་མགུ་བར་བྱ་བ་བྱིན་ཅིག །བབས་པ་ཇི་ལྟ་བ་བཞིན་དུ་སྤོ་བ་དང༌། སྤོ་བ་སྤྱད་པ་དང༌། མགུ་བར་བྱ་བ་དང༌། མགུ་བར་བྱ་བ་སྤྱོད་བ་དང༌། བསླབ་པ་བྱིན་པ་ལ་ཡང་དེ་བཞིན་དུ་བརྗོད་པར་བྱའོ། །བབས་པ་ཇི་ལྟ་བ་བཞིན་དུ་དགེ་ཚུལ་ཉིད་དུ་ཁས་བླངས་པ་དང༌། སྨྱོས་པ་ཉིད་དང༌། སེམས་འཁྲུགས་པ་ཉིད་དང༌། ཚོར་བས་ཉེན་པ་ཉིད་དང༌། མ་མཐོང་བས་གནས་ནས་དབྱུང་བ་ཉིད་དང༌། ཕྱིར་མི་བྱེད་པས་གནས་ནས་དབྱུང་བ་ཉིད་དང༌། སྡིག་པ་ཅན་གྱི་ལྟ་བར་སོང་བ་མི་འདོར་བས་གནས་ནས་དབྱུང་བ་ཉིད་ལ་ཡང་དེ་བཞིན་དུ་རྒྱས་པར་བརྗོད་པར་བྱའོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་དང་ལྡན་པ་བྱུང་བ་བཅབས་པ་དེ་དགེ་འདུན་གྱིས་མ་མཐོང་བས་གནས་ནས་དབྱུང་བ་བྱས་ཏེ་བསླང་ཟིན་པ་དེས་ལྟུང་བ་རྣམས་བཅབས་ནས་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་དང་ལྡན་པའོ་ཞེས་བྱོས་ལ་སྔ་མ་
དང་ཕྱི་མ་གཉིས་ཀའི་རྒྱུད་ནས་བཟུང་སྟེ་སྤོ་བ་བྱིན་ཅིག་ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་དང་ལྡན་པ་བྱུང་བ་བཅབས་པ་དེ་དགེ་འདུན་གྱིས་མ་མཐོང་བས་གནས་ནས་དབྱུང་བ་བྱས་ཏེ་བསླང་ཟིན་པ་དེས་ལྟུང་བ་དེ་རྣམས་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་དང་ལྡན་པའོ་ཞེས་བྱོས་ལ་སྔོན་གྱི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་དང་ལྡན་པ་བྱུང་བ་མ་བཅབས་པ་དེ་དགེ་འདུན་གྱིས་མ་མཐོང་བས་གནས་ནས་དབྱུང་བ་བྱས་ཏེ་བསླང་ཟིན་པ་དེས་ལྟུང་བ་དེ་རྣམས་བཅབས་ཏེ་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་དང་ལྡན་པའོ་ཞེས་བྱོས་ལ་ཕྱི་མའི་རྒྱུད་ནས་བཟུང་སྟེ་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་དང་ལྡན་པ་བྱུང་བ་མ་བཅབས་པ་དེ་དགེ་འདུན་གྱིས་མ་མཐོང་བས་གནས་ནས་དབྱུང་བ་བྱས་ཏེ། བསླང་ཟིན་པ་དེས་ལྟུང་བ་དེ་རྣམས་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་དང་ལྡན་པའོ་ཞེས་བྱོས་ལ་ཞག་དྲུག་གི་མགུ་བར་བྱ་བ་བྱིན་ཅིག །ཚད་དང་ལྡན་པ་ཇི་ལྟ་བ་བཞིན་དུ་ཚད་དང་མི་ལྡན་པ་ཡང་དེ་བཞིན་ནོ། །མ་མཐོང་བས་གནས་ནས་དབྱུང་བ་བརྒྱད་ཡིན་པ་ཇི་ལྟ་བ་བཞིན་དུ་ཕྱིར་མི་བྱེད་པས་གནས་ནས་དབྱུང་བ་བརྒྱད་དང༌། སྡིག་པ་ཅན་གྱི་ལྟ་བར་སོང་བ་མི་འདོར་བས་གནས་ནས་དབྱུང་བ་བརྒྱད་ཀྱང་དེ་བཞིན་ནོ། །སྤོ་བ་པོའི་གང་ཟག་དགེ་འདུན་ལྷག་མའི་ལྟུང་བ་བྱུང་ནས་བབས་ཏེ། དེ་འོངས་ནས་སླར་བསྙེན་པར་རྫོགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་
གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། མ་སྤྱད་པ་སྤྱོད་དུ་ཆུག་ཤིག་དང་སྤོ་བ་སྤྱད་པར་འགྱུར་རོ། །བབས་པ་ཇི་ལྟ་བ་བཞིན་དུ་དགེ་ཚུལ་ཉིད་དུ་ཁས་བླངས་པ་དང༌། སྨྱོས་པ་ཉིད་དང༌། སེམས་འཁྲུགས་པ་ཉིད་དང༌། ཚོར་བས་ཉེན་པ་ཉིད་དང༌། མ་མཐོང་བས་གནས་ནས་ཕྱུང་བ་ཉིད་དང༌། སླར་མི་བྱེད་པས་གནས་ནས་དབྱུང་བ་ཉིད་ཀྱང་དེ་བཞིན་ནོ། །གང་ཟག་གཞན་སྤོ་བ་སྤྱད་ཟིན་པ་དགེ་འདུན་ལྷག་མའི་ལྟུང་བ་བྱུང་ནས་བབས་ཏེ། དེ་འོངས་ནས་སླར་བསྙེན་པར་རྫོགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གང་ཟག་དེས་སྤོ་བ་སྤྱད་ཟིན་པ་ཉིད་པས་དེ་དང༌། དེ་ལྟ་བུ་དང་མཐུན་པ་སུ་ཡང་རུང་བ་ལ་མགུ་བར་བྱ་བ་བྱིན་ཅིགཐབབས་པ་ཇི་ལྟ་བ་བཞིན་དུ་དགེ་ཚུལ་ཉིད་དུ་ཁས་བླངས་པ་དང་ཞེས་བྱ་བ་དང༌། སྡིག་པ་ཅན་གྱི་ལྟ་བར་སོང་བ་མི་འདོར་བས་གནས་ནས་དབྱུང་བ་ཉིད་ཀྱི་བར་དུ་བསྒྲེ་བ་ཡང་གོང་མ་ལྟ་བུ་དེ་ཉིད་ཡིན་ནོ། །གང་ཟག་མགུ་བར་བྱ་བ་སྤྱོད་པ་དགེ་འདུན་ལྷག་མའི་ལྟུང་བ་བྱུང་ནས་བབས་ཏེ། དེ་འོངས་ནས་སླར་བསྙེན་པར་རྫོགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། མ་སྤྱད་པ་སྤྱོད་དུ་ཆུག་ཤིག་དང་མགུ་བར་བྱ་བ་སྤྱད་པར་འགྱུར་རོ། །བབས་པ་ཇི་ལྟ་བ་བཞིན་དུ་བསྒྲེ་བ་གོང་མ་ལྟ་བུ་དེ་ཉིད་ཡིན་ནོ། །གང་ཟག་མགུ་བ་སྤྱད་ཟིན་པ་དགེ་འདུན་ལྷག་མའི་ལྟུང་བ་བྱུང་ནས་བབས་ཏེ། དེ་འོངས་ནས་སླར་བསྙེན་པར་རྫོགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་མགུ་བར་བྱ་བ་སྤྱད་ཟིན་པ་ཉིད་པས་འདི་ཕྱུང་ཤིག །བབས་པ་ཇི་ལྟ་བ་བཞིན་དུ་བསྒྲེ་བ་གོང་མ་ལྟ་བུ་དེ་ཉིད་ཡིན་ནོ། །མ་མཐོང་བས་གནས་ནས་ཕྱུང་བའི་གང་ཟག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་དགེ་འདུན་གྱི་གནས་ནས་ཕྱུང་སྟེ་བསླང་ཟིན་པ་དེས་ལྟུང་བ་དེ་བཅབས་ནས་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ།
དགེ་སློང་དག་ཁྱེད་ཀྱིས་གང་ཟག་དེའི་ལྟུང་བ་དེ་དང༌། གཞན་ཡང་དེ་ལྟ་བུ་དང་མཐུན་བ་སུ་ཡང་རུང་བ་ལ་ཕྱི་མའི་རྒྱུད་ནས་བཟུང་སྟེ་སྤོ་བ་བྱིན་ཅིག །མ་མཐོང་བས་གནས་ནས་ཕྱུང་བའི་གང་ཟག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་དགེ་འདུན་གྱིས་མ་མཐོང་བས་གནས་ནས་ཕྱུང་སྟེ་བསླང་ཟིན་པ་དེས་ལྟུང་བ་དེ་མ་བཅབས་པར་དགེ་སློང་རྣམས་ལ་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ཞག་དྲུག་གི་མགུ་བར་བྱ་བ་བྱིན་ཅིག །ཁྱད་པར་མེད་པས་གཉིས་ཡིན་པ་དེ་བཞིན་དུ་ཤེས་པས་གཉིས་དང༌། དྲན་པས་གཉིས་དང༌། ཡིད་གཉིས་ཀྱིས་གཉིས་ཀྱང་དེ་བཞིན་ནོ། །མ་མཐོང་བས་གནས་ནས་ཕྱུང་བ་བརྒྱད་ཡིན་པ་ཇི་ལྟ་བ་བཞིན་དུ་སླར་མི་བྱེད་པས་གནས་ནས་ཕྱུང་བ་བརྒྱད་དང༌། སྡིག་པ་ཅན་གྱི་ལྟ་བར་སོང་བ་མི་འདོར་བ་གནས་ནས་ཕྱུང་བ་བརྒྱད་ཀྱང་དེ་བཞིན་ནོ།། །།སྡོམ་ལ། བརྩམས་པ་བཅུ་གཉིས་དག་དང་ནི། །དགུ་བ་ཐམས་ཅད་ནག་པོ་དང༌། །ཟུང་དགུ་དག་ཏུ་བྱས་པ་དང༌། །ཚིག་བཅུ་དང་ནི་ལྔ་པའོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་མེད་པ་དང་ལྡན་པ་བྱུང་བ་བཅབས་ཏེ། དེས་ལྟུང་བ་དེ་རྣམས་ཀྱི་བརྩམས་པ་ནི་ཤེས་ཀྱི། ཞག་གི་མཐའ་ནི་མི་ཤེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་
ལྟུང་བ་དེ་རྣམས་ཚད་དང་མི་ལྡན་པའོ་ཞེས་བྱོས་ལ་དག་པའི་མཐའ་ཅན་གྱི་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་མེད་པ་དང་ལྡན་པ་བྱུང་བ་བཅབས་ནས་དེས་ལྟུང་བ་དེ་རྣམས་ཀྱི་ཞག་གི་མཐའ་ནི་ཤེས་ཀྱི། ལྟུང་བ་བརྩམས་པ་མི་ཤེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་མེད་པ་དང་ལྡན་པའོ་ཞེས་བྱོས་ལ་ཇི་ལྟར་ཤེས་པ་རྣམས་ཀྱི་སྤོ་བ་བྱིན་ཅིག །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་མེད་པ་དང་ལྡན་པ་བྱུང་བ་བཅབས་ནས། དེས་ལྟུང་བ་དེ་རྣམས་ཀྱི་བརྩམས་པ་ཡང་མི་ཤེས། ཞག་གི་མཐའ་ཡང་མི་ཤེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་མེད་པ་དང་ལྡན་པའོ་ཞེས་བྱོས་ལ་དག་པའི་མཐའ་ཅན་གྱི་སྤོ་བ་བྱིན་ཅིགཐཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་ཚད་མེད་པ་དང་ལྡན་པ་བྱུང་བ་བཅབས་ནས་དེས་ལྟུང་བ་དེ་རྣམས་ཀྱི་བརྩམས་པ་ཡང་ཤེས། ཞག་གི་མཐའ་ཡང་ཤེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་གང་ཟག་དེ་དང༌། གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་ལྟུང་བ་དེ་རྣམས་ཚད་མེད་པ་དང་ལྡན་པའོ་ཞེས་བྱོས་ལ་ཇི་ལྟར་བཅབས་པ་རྣམས་ཀྱི་སྤོ་བ་བྱིན་ཅིག །ཤེས་པ་བཞི་ཡིན་པ་ཇི་ལྟ་བ་བཞིན་དུ་དྲན་བ་བཞི་དང༌། ཡིད་གཉིས་བཞི་ཡང་དེ་བཞིན་ནོ། །ཡང་གང་ཟག་གཞན་ཞིག་དགེ་འདུན་ལྷག་མའི་
ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དེ་དགེ་འདུན་ལྷག་མའི་ལྟུང་བ་བར་མ་སྔ་མ་དང་འདྲ་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་ཏེ། དེ་བཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་བ་དང༌། མགུ་བར་བྱ་བ་ཡང་ཆོས་མ་ཡིན་པས་བྱིན་ལ། ཕྱུང་བ་ཡང་ཆོས་མ་ཡིན་པས་བྱས་ན་གང་ཟག་འདི་ནི་ཐམས་ཅད་ནག་པོ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པས་གཞག་པར་མི་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་ཏེ། དེ་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་བ་དང་མགུ་བར་བྱ་བ་ཡང་ཆོས་མ་ཡིན་པས་བྱིན་ལ། ཕྱུང་བ་ཡང་ཆོས་མ་ཡིན་པས་བྱས་ན་གང་ཟག་འདི་ནི་ཕལ་ཆེར་གནག་པ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་སྦོ་བ་བྱིན་ཏེ། དེ་གཞི་ནས་སྤོ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་
མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་བ་དང༌། མགུ་བར་བྱ་བ་ཡང་ཆོས་མ་ཡིན་པས་བྱིན་ལ། ཕྱུང་བ་ཡང་ཆོས་མ་ཡིན་བས་བྱས་ན་གང་ཟག་དེ་ནི་ཕྱེད་གནག་པ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན་ཏེ། སྤོ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་སྤོ་བ་བྱིན་ཏེ། དེ་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་བསླང་བ་བྱིན་ཏེ། མགུ་བར་བྱ་བ་ཡང་ཆོས་ཀྱིས་བྱས་ལ། ཕྱུང་བ་ནི་ཆོས་མ་ཡིན་པས་བྱས་ན་གང་ཟག་འདི་ནི་ཕྱོགས་གཅིག་ནག་པོ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་སྤོ་བ་བྱིན་ཏེ། དེ་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་བསླང་བ་དང་མགུ་བར་བྱ་བ་ཡང་ཆོས་ཀྱིས་བྱིན། ཕྱུང་བ་ཡང་ཆོས་ཀྱིས་བྱིན་ན་གང་ཟག་འདི་ནི་ནག་པོ་དང་བྲལ་བ་ཞེས་བྱ་སྟེ། དག་པ་བསླང་བ་སྟེ། ལྟུང་བ་དེ་ལས་ཡོངས་སུ་གྲོལ་ལོ། །ཡང་གང་ཟག་
གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་པ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་ཏེ། དེ་གཞི་ནས་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་སྟེ་མགུ་བར་བྱ་བ་ཆོས་མ་ཡིན་པས་བྱིན་ལ། ཕྱུང་བ་ཡང་ཆོས་མ་ཡིན་པས་བྱས་ན་གང་ཟག་འདི་ནི་ཐམས་ཅད་ནག་པོ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་སྔ་མ་དང་འདྲ་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་ཏེ། གཞི་ནས་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་ནས་མགུ་བར་བྱ་བ་བྱིན་ལ། ཕྱུང་ཡང་ཆོས་མ་ཡིན་པས་བྱས་ན་གང་ཟག་འདི་ནི་ཕལ་ཆེར་ནག་པོ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་པ་དེ་ལ་དགེ་
འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་མགུ་བར་བྱ་བ་ཕྱིན་ཏེ། དེ་གཞི་ནས་མགུ་བར་བྱ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་བསླང་སྟེ་མགུ་བར་བྱ་བ་བྱིན་ལ། ཕྱུང་བ་ནི་ཆོས་མ་ཡིན་པས་བྱས་ན། གང་ཟག་འདི་ནི་ཕྱོགས་གཅིག་ནག་པོ་ཞེས་བྱ་སྟེ། མ་དག་པ་མ་བསླང་བ་སྟེ། ལྟུང་བ་དེ་ལས་ཡོངས་སུ་མ་གྲོལ་ལོ། །ཡང་གང་ཟག་གཞན་ཞིག་དགེ་བདུན་ལྷག་མའི་ལྟུང་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས། གཞི་ནས་མགུ་པར་བྱ་བ་ཕྱིན་ཏེ། དེ་གཞི་ནས་མགུ་བར་བྱ་བ་བྱེད་བཞིན་པ་ལས། དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་པ་དེ་ལ། དགེ་འདུན་གྱིས་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས། གཞི་ནས་བསླང་ནས་མགུ་བར་བྱ་བ་བྱིན་ལ། ཕྱུང་བ་ཡང་ཆོས་ཀྱིས་བྱས་ན། གང་ཟག་འདི་ནི་ནག་པོ་དང་བྲལ་བ་ཞེས་བྱ་སྟེ། དག་པ་བསླང་བ་སྟེ། ལྟུང་བ་དེ་ལས་ཡོངས་སུ་གྲོལ་ལོ། །གང་ཟག་གཉིས་ཤིག་དགེ་འདུན་ལྷག་མའི་ལྟུང་བ་བྱུང་ནས་བཤགས་པར་བྱའོ། །བཤགས་པར་བྱའོ་སྙམ་པ་ལས། དེ་ན་གཅིག་གིས་ནི་བཤགས། ཅིག་ཤོས་ཀྱིས་ནི་མ་བཤགས་ན། དེ་ལ་མ་བཤགས་པ་གང་ཡིན་པ་དེ་འདུལ་བ་ལས་འགལ་བའི་ཉེས་བྱས་རབ་ཏུ་མང་པོའི་ལྟུང་བ་འཆགས་སུ་བཅུག་ལ། དེའི་འོག་ཏུ་སྤོ་བ་དང༌། གཞི་ནས་སྤོ་བ་དང༌། མགུ་བར་བྱ་བ་བྱིན་ཏེ་དབྱུང་བར་བྱའོ། །ཡང་གང་ཟག་གཉིས་ཤིག་དགེ་འདུན་ལྷག་མའི་ལྟུང་བ་བྱུང་ནས། དེ་གཉིས་གནས་དེ་ཉིད་དུ་གང་ཟག་གི་མདུན་དུ་བཤགས་པར་བྱའོ། །བཤགས་པར་བྱའོ་སྙམ་པ་ལས། དེ་ན་གཅིག་གིས་ནི་བཤགས་ལ། ཅིག་ཤོས་ཀྱིས་ནི་མ་བཤགས་ན། དེ་ལ་མ་བཤགས་པ་གང་ཡིན་པ་དེ་འདུལ་བ་ལས་འགལ་བའི་ཉེས་བྱས་རབ་ཏུ་མང་པོའི་ལྟུང་བ་འཆགས་སུ་བཅུག་ལ། དེའི་འོག་ཏུ་སྤོ་བ་དང༌། གཞི་ནས་སྤོ་བ་དང༌། མགུ་བར་བྱ་བ་བྱིན་ཏེ་དབྱུང་བར་བྱའོ། །གང་ཟག་གཅིག་གི་དྲུང་དུ་ཇི་ལྟ་བ་བཞིན་དུ་གཉིས་ཀྱིའམ། མང་པོའམ། དགེ་འདུན་གྱི་ཡང་དེ་བཞིན་ནོ། །གནས་དེ་ཉིད་དུ་ཇི་ལྟ་བར་གནས་གཞན་དུ་ཡང་དེ་བཞིན་ནོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ། དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་ལྟུང་བ་གཞན་ཤེས་ཏེ། དེས་དགེ་འདུན་གྱི་ནང་དུ་མ་སྨྲས་པའི་ལྟུང་བ་གང་ཡིན་པ་དེ་ཡང་ཤེས། དེས་དགེ་འདུན་གྱི་ནང་དུ་སྨྲས་པའི་ལྟུང་བ་གང་ཡིན་པ་དེ་ཡང་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དང༌། བདག་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་ལྟུང་བ་གཞན་
ཤེས་ཏེ་བདག་གིས་དགེ་འདུན་གྱི་ནང་དུ་མ་སྨྲས་པ་གང་ཡིན་པ་དང༌། བདག་གི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་བ་གང་ཡིན་བའི་ལྟུང་བ་དེ་ཡང་བདག་གིས་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་དེ་དང་ཕྱི་མ་འདི་ལ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན། ཕྱི་མ་དེ་ལ་ནི་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ནས། དེས་དེའི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་བའི་ལས་འཁྲུགས་པ་གཞག་པར་འོས་པས་སྤོ་བ་བྱིན་པ་དེ་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དང༌། བདག་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། བདག་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་གི་ལྟུང་བ་བར་མ་དེ་དང༌། བདག་གི་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་པ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་དེ་སྤོ་བ་དང༌། ལྟུང་བ་བར་མ་དེ་གཞི་ནས་སྤོ་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན།
ལྟུང་བ་བར་མ་དེ་ལ་ནི་ཆོས་མ་ཡིན་བའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་ཏེ། དེ་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ཏེ། དེས་ཡང་བཟླས་ཏེ་བྱུང་བའི་ལྟུང་བ་དེ་ཡང་ཤེས། ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་བའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་པ་ཡང་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་གིས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པ་ཤེས་ཏེ། བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་ནས། བདག་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ཏེ། བདག་གིས་ཡང་བཟླས་པའི་ལྟུང་བ་དེ་ཡང་ཤེས་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་པས་བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གིས་ལྟུང་བ་བར་མ་དེ་ལ་གཞི་ནས་སྤོ་བ་དང༌། ཡང་བཟླས་ཏེ་བྱུང་བ་འདི་ལ་གཞི་ནས་སྤོ་བ་དང༌། ཡང་བཟླས་ཏེ་བྱུང་བ་འདི་ལ་གཞི་ནས་བསླང་བ་དེ་ལ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། །དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་སྤོ་བ་བྱིན། ཡང་བཟླས་པའི་ལྟུང་བ་དེ་ལ་ནི་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་བ་བྱིན་ནོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པར་གཞག་པར་འོས་བས་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་དང༌། དེས་ལྟུང་བ་བར་མ་དེ་དང༌། གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་མགུ་བར་བྱ་བ་བྱིན་པ་ཡང་ཤེས་ནས་དེས་དགེ་
སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་མ་བཅབས་ཏེ། བདག་གིས་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་མགུ་བར་བྱ་བ་བྱིན་ཏེ། བདག་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་ཏེ། བདག་གི་ལྟུང་བ་བར་མ་དང༌། བདག་གི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་མགུ་བར་བྱ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་དེ་ལ་མགུ་བར་བྱ་བ་དང༌། ལྟུང་བ་བར་མ་འདི་ལ་གཞི་ནས་མགུ་བར་བྱ་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། །དགེ་སློང་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་མགུ་བར་བྱ་བ་བྱིན། ལྟུང་བ་བར་མ་འདི་ལ་ནི་ཆོས་མ་ཡིན་པའི་ལས་འཁྲུགས་པ་གཞག་བར་འོས་པས་གཞི་ནས་མགུ་བར་བྱ་བ་བྱིན་ཏེ། དེ་གཞི་ནས་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་ཏེ། དེས་ཡང་བཟླས་ཏེ་བྱུང་བའི་ལྟུང་བ་དེ་དང༌། དེའི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་པ་དེ་ཡང་ཤེས་ནས། དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་པ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་ཏེ། བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་ཏེ། བདག་གཞི་ནས་མགུ་བར་བྱ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་ཏེ། བདག་གིས་ཡང་བཟླས་པའི་ལྟུང་བ་དང༌། བདག་གི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་བར་མ་དེ་
གཞི་ནས་མགུ་བར་བྱ་བ་དེ་དང༌། ཡང་བཟླས་པའི་ལྟུང་བ་འདི་ལ་གཞི་ནས་བསླང་སྟེ་མགུ་བར་བྱ་བའི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་བར་མ་དེ་ལ་གཞི་ནས་མགུ་བར་བྱ་བ་དང༌། ཡང་བཟླས་པའི་ལྟུང་བ་འདི་ལ་གཞི་ནས་བསླང་སྟེ་མགུ་བར་བྱ་བར་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་བྱིན་ནོ། །ཤེས་པས་ལྔ་ཡིན་པ་ཇི་ལྟ་བར་དྲན་པས་ལྔ་དང༌། ཡིད་གཉིས་ཀྱིས་ལྔ་ཡང་དེ་བཞིན་ནོ། །སྡོམ་ལ། ཡང་གཞན་དག་གིས་བཅུ་གཉིས་དང༌། །གཞི་དག་པ་ནི་དྲུག་དང་ནི། །ས་ཆེན་པོ་ནི་དག་བྱ་དགཐགང་ཟག་བཞིར་ནི་བསྟན་པ་ཡིན། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། དེ་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ནས། དེས་ལྟུང་བ་བར་མ་དེ་དང༌། དེའི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་པ་དེ་ཡང་ཤེས་ནས། དེས་དགེ་སློང་རྣམས་ལ་སྨྲས་པ། ཚེ་དང་ལྡན་བ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་བཅབས་ནས་བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་ཏེ། བདག་སྤོ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་པ་བཅབས་ཏེ། བདག་གིས་ལྟུང་བ་བར་མ་དེ་དང༌། བདག་གི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་སྤོ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་དེ་ལ་སྤོ་བ་དང༌། ལྟུང་བ་བར་མ་འདི་ལ་གཞི་ནས་སྤོ་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་དེ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་སྤོ་བ་བྱིན། ལྟུང་བ་བར་མ་དེ་ལ་ནི་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་
བྱིན་ཏེ། དེ་གཞི་ནས་སྤོ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས་དེས་ཡང་བཟླས་པའི་ལྟུང་བ་དེ་ཡང་ཤེས། དེའི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་པ་དེ་ཡང་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་བཅབས་ཏེ། བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་ཏེ། བདག་གཞི་ནས་སྤོ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་བཅབས་ནས་བདག་གིས་ཡང་བཟླས་པའི་ལྟུང་བ་དེ་ཡང་ཤེས། བདག་གི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་སྤོ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་བར་མ་དེ་གཞི་ནས་སྤོ་བ་དང༌། ཡང་བཟླས་པའི་ལྟུང་བ་འདི་ལ་གཞི་ནས་བསླང་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། །དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་གཞི་ནས་སྤོ་བ་བྱིན། ཡང་བཟླས་པའི་ལྟུང་བ་དེ་ལ་ནི་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་བསླང་བ་བྱིན་ནོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བ་མ་བཅབས་པ་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་ཞག་དྲུག་གི་མགུ་བར་བྱ་བ་བྱིན་ཏེ། དེ་མགུ་བར་བྱ་བ་བྱེད་བཞིན་བ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་ཏེ། དེས་ལྟང་བ་བར་མ་དེ་ཡང་ཤེས། དེའི་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་མགུ་བར་བྱ་བ་བྱིན་པ་དེ་ཡང་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་བ་དག་བདག་ལ་དགེ་འདུན་ལྷག་མའི་ལྟུང་བ་བྱུང་བ་མ་བཅབས་ཏེ། བདག་
གི་དེ་ལ་དགེ་འདུན་གྱིས་ཆོས་མ་ཡིན་བའི་ལས་འཁྲུགས་པར་གཞག་པར་འོས་པས་ཞག་དྲུག་གི་མགུ་བར་བྱ་བ་བྱིན་ནས། མགུ་བར་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་ཏེ། བདག་གིས་ལྟུང་བ་བར་མ་དེ་ཡང་ཤེས། བདག་གིས་ལྟུང་བ་གང་ལ་དགེ་འདུན་གྱིས་ཆོས་མ་ཡིན་པ་ལས་འཁྲུགས་པ་གཞག་པར་འོས་པས་ཞག་དྲུག་གི་མགུ་བར་བྱ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་དེ་ལ་མགུ་བར་བྱ་བ་དང༌། ལྟུང་བ་བར་མ་འདི་ལ་གཞི་ནས་མགུ་བར་བྱ་བའི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་མགུ་བར་བྱ་བ་བྱིན། ལྟུང་བ་བར་མ་འདི་ལ་ནི་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་ཏེ། དེ་གཞི་ནས་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་ཏེ། དེས་ཡང་བཟླས་པའི་ལྟུང་བ་དེ་ཡང་ཤེས། དེའི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པ་གཞི་ནས་མགུ་བར་བྱ་བ་བྱིན་པ་དེ་ཡང་ཤེས་ནས་དེས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་ལྟུང་བ་བར་མ་ལྟུང་བ་སྔ་མ་དང་འདྲ་བ་བྱུང་བ་མ་བཅབས་ཏེ། བདག་གི་དེ་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་ཏེ། བདག་གཞི་ནས་མགུ་བར་བྱ་བ་བྱེད་བཞིན་པ་ལས་དགེ་འདུན་ལྷག་མའི་ལྟུང་བ་ལྟུང་བ་བར་མ་དང་འདྲ་བ་ཡང་བཟླས་ཏེ་བྱུང་བ་མ་བཅབས་ཏེ། བདག་གིས་ཡང་བཟླས་པའི་ལྟུང་བ་དེ་ཡང་ཤེས། བདག་གི་ལྟུང་བ་བར་མ་གང་ལ་དགེ་འདུན་གྱིས་ཆོས་མ་ཡིན་པའི་ལས་འཁྲུགས་པ་གཞག་པར་འོས་པས་གཞི་ནས་མགུ་བར་བྱ་བ་བྱིན་པ་དེ་ཡང་ཤེས་ཀྱིས། ཚེ་དང་ལྡན་པ་དག་བདག་གི་ལྟུང་བ་སྔ་མ་བར་མ་དེ་ལ་གཞི་ནས་མགུ་བར་བྱ་བ་དང༌། ཡང་བཟླས་པའི་ལྟུང་བ་འདི་ལ་གཞི་ནས་བསླང་
སྟེ། མགུ་བར་བྱ་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པས་ལེགས་པར་སྩལ་དུ་གསོལ། དགེ་སློང་དེ་རྣམས་ཀྱིས་དེའི་ལྟུང་བ་སྔ་མ་ལ་ནི་གཞི་ནས་མགུ་བར་བྱ་བ་དང༌། ཡང་བཟླས་པའི་ལྟུང་བ་འདི་ལས་གཞི་ནས་བསླང་སྟེ་མགུ་བར་བྱ་བ་ཆོས་ཀྱི་ལས་མི་འཁྲུགས་པ་གཞག་པར་མི་འོས་པ་བྱིན་ནོ། །ཤེས་པས་བཞི་ཡིན་པ་ཇི་ལྟ་བར་དྲན་པས་བཞི་དང༌། ཡིད་གཉིས་ཀྱིས་བཞི་ཡང་དེ་བཞིན་ནོ། །སྤོ་བ་པོའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་ནས་དག་པར་བྱས་ཏེ་འདུལ་བ་དང༌། འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་སྤོ་བ་སྤྱོད་པ་ཁོ་ན་ཡིན་ནོ། །སྤོ་བ་ཕྱེད་སྤྱད་པའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་དག་བར་བྱས་ཏེ་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་སྤོ་བ་ཕྱེད་སྤྱད་པ་ཁོ་ན་ཡིན་ནོ། །སྤོ་བ་ཕལ་ཆེར་སྤྱད་པའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་དག་པར་བྱས་ཏེ་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་སྤོ་བ་ཕལ་ཆེར་སྤྱད་པ་ཁོ་ན་ཡིན་ནོ། །མགུ་བར་བྱ་བ་སྤྱོད་པའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་དག་པར་བྱས་ཏེ་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་མགུ་བར་བྱ་བ་སྤྱད་པ་ཁོ་ན་ཡིན་ནོ། །མགུ་བར་བྱ་བ་ཕྱེད་སྤྱད་པའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་
དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་དག་པར་བྱས་ཏེ་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་མགུ་བར་བྱ་བ་ཕྱེད་སྤྱད་པ་ཁོ་ན་ཡིན་ནོ། །མགུ་བར་བྱ་བ་ཕལ་ཆེར་སྤྱད་པའི་གང་ཟག་དགེ་འདུན་ལྷག་མའི་ལྟུང་བ་བྱུང་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གཞི་དག་པར་བྱས་ཏེ་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་ན་དེ་མགུ་བར་བྱ་བ་ཕལ་ཆེར་སྤྱད་པ་ཁོ་ན་ཡིན་ནོ། །ཡང་གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་བར་གྱུར་ཏེ། ཆེད་དུ་བསམས་ཏེ་ཁུ་བ་ཕྱུང་བ་ལས་གྱུར་པ་ཞག་གཅིག་བཅབས། ལུས་ཀྱི་རེག་པ་ལས་གྱུར་བ་ཞག་གཉིས་བཅབས། འཁྲིག་པ་དང་ལྡན་པའི་སྨྲ་བ་ལས་གྱུར་པ་ཞག་གསུམ་བཅབས། བསྙེན་བཀུར་བསྔགས་པ་ལས་གྱུར་པ་ཞག་བཞི་བཅབས། སྨྱན་བྱེད་པ་ལས་གྱུར་པ་ཞག་ལྔ་བཅབས། ཁང་པ་ལས་གྱུར་པ་ཞག་དྲུག་བཅབས། ཁང་ཆེན་ལས་གྱུར་པ་ཞག་བདུན་བཅབས། རྩ་བ་མེད་པ་ལས་གྱུར་པ་ཞག་བརྒྱད་བཅབས། བག་ཙམ་ལས་གྱུར་པ་ཞག་དགུ་བཅབས། དགེ་འདུན་གྱི་དབྱེ་ན་བྱེད་པ་ལས་གྱུར་པ་ཞག་བཅུ་བཅབས། དེའི་རྗེས་སུ་ཕྱོགས་པ་ལས་གྱུར་པ་ཞག་བཅུ་གཅིག་བཅབས། ཁྱིམ་སུན་འབྱིན་པ་ལས་གྱུར་བ་ཞག་བཅུ་གཉིས་བཅབས། བཀའ་བློ་མི་བདེ་བ་ལས་གྱུར་པ་ཞག་བཅུ་གསུམ་བཅབས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྟུང་བ་དེ་རྣམས་ལས་ལྷག་པར་མི་བཟད་པ། ལྷག་པར་ལྕི་བ། མངོན་བར་ཞེན་པ་དྲག་པོས་བྱས་པ་གང་ཡིན་པ་དེའི་དབང་དུ་བྱས་ཏེ་སྤོ་བ་དང༌། གཞི་ནས་སྤོ་བ་དང༌། གཞི་ནས་བསླང་བ་དང༌། མགུ་བར་བྱ་བ་བྱིན་ཏེ་དབྱུང་བར་བྱའོ། །གང་ཟག་གི་གཞི་རྫོགས་སཧོ། །།