གསུམ་པ། འཇོག་པའི་སྤང་བ་བསྟན་པ།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་རྣམས་ལ་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ་བྱེད་དུ་མི་འཛད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་གཞུག་གོ་སྙམ་དུ་རེ་བས་དེ་འཇོག་པར་བྱེད་ཅིང་། སྔོན་པོ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །དགེ་སློང་དོན་ཉུང་དུ་དག་ཅིའི་ཕྱིར་དགེ་སློང་རྣམས་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ་བྱེད་དུ་མི་འཛད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་གཞུག་གོ་སྙམ་དུ་རེ་བས་འཇོག་པར་བྱེད་ཅིང་སྔོན་པོ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །ཞེས་སྨོད་པར་བྱེད། ཕྱར་ཀ་གཏོང་བར་བྱ། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློག་རབ་ཏུ་མང་པོ་དག་ལ་རྨས་པ། དགེ་སློང་དག་ཁྱེད་ལ་གོས་མང་བ་ཉིད་འདི་ལྟ་བུ་འདི་བྱུང་སྟེ། དགེ་སློང་གང་ཡང་རུང་བས་གོས་སྔོན་པོ་ཞིག་རྙེད་ན་དེས་དེ་བྱེད་དུ་མི་འཛད་པར་དེ་གང་གི་ཚེ་འདི་འདྲ་བ་རྙེད་པར་གྱུར་པ་དེའི་ཚེ་གོས་བྱེད་དུ་འཇུག་གོ་སྙམ་དུ་རེ་བས་དེ་འཇོག་པར་བྱེད་

ཅིང་། སྔོན་པོ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་དུ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང་། ཆོག་མི་ཤེས་པ་དང་། གསོ་དཀའ་བ་དང་། དགང་དཀའ་བ་རྣམ་པར་སྨད་པར་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བའི་བསྔགས་པ་བརྗོད་ཅིང་། ཆོག་ཤེས་པ་དང་། གསོ་སླ་བ་དང་། དགང་སླ་བ་དང་། ཕྲི་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་རྣམས་དང་། མཛེས་པ་ཉིད་དང་། དྲོད་རིག་པའི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གངོན་པར་བྱ་སྟེ། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་དུས་མ་ཡིན་པའི་གོས་ཤིག་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །བླངས་ནས་གལ་ཏེ་ལངས་ན་མྱུར་བ་ཁོ་ནར་གོས་སུ་བྱ་སྟེ་བཅའ་བར་བྱའོ། །གལ་ཏེ་མི་ལངས་ལ་ཁ་མ་ལངས་པ་ཁ་སྐོང་བའི་གོས་ལ་རེ་བ་ཡོད་ན་དགེ་སློང་དེས་གོས་དེ་ཟླ་བ་གཅིག་གི་མཐར་གཞག་པར་བྱའོ། །དེ་ལས་འདས་པར་འཇོག་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །ཆོས་གོས་ཟིན་པས་སྲ་བརྐྱང་ཕྱུང་ན་ཞེས་བྱ་བ་ནི་ཆོས་གོས་ཟིན་ལ་སྲ་བརྐྱང་མ་ཕྱུང་བ་ཡང་ཡོད། ཆོས་གོས་མ་ཟིན་ལ་སྲ་བརྐྱང་ཕྱུང་བ་ཡང་ཡོད། ཆོས་གོས་ཟིན་ཅིང་སྲ་བརྐྱང་ཕྱུང་བ་ཡང་ཡོད། ཆོས་གོས་མ་ཟིན་ཅིང་སྲ་བརྐྱང་མ་ཕྱུང་བ་ཡང་ཡོད་དེ། མུ་བཞིར་བཅད་པ་སྔ་མ་བཞིན་ནོ། །དུས་མ་ཡིན་པའི་གོས་ཤིག་ཅེས་བྱ་བ་ལ་དགེ་སློང་གིས་གོས་ཀྱི་དུས་ནི་གང་ཡིན། དུས་མ་ཡིན་པ་ནི་གང་ཡིན་ཞེ་ན། སྲ་བརྐྱང་བཏིང་བའི་གནས་ན་ནི་སྟོན་ཟླ་འབྲིང་པོ་ཉ་ནས་དཔྱིད་ཟླ་ར་བ་ཉའི་བར་གྱི་ཟླ་བ་དེ་དག་ནི་གོས་ཀྱི་དུས་ཡིན་ལ། དེ་ཕན་ཅད་ནི་དུས་མ་ཡིིན་ནོ། །སྲ་བརྐྱང་མ་བཏིང་བའི་གནས་ན་ནི་ཐམས་ཅད་དུས་མ་ཡིན་ནོ། །རྙེད་

ལ་ཞེས་བྱ་བ་ནི་གཞན་ལས་སོ། །འདོད་ན་ཞེས་བྱ་བ་ནི་གལ་ཏེ་དོན་དུ་གཉེར་ནའོ། །དགེ་སློང་དེས་གོས་དེ་བླང་བར་བྱའོ་ཞེས་བྱ་བ་ནི་བདག་གིར་བྱའོ། །གལ་ཏེ་ལངས་ན་ཞེས་བྱ་བ་ནི་གལ་ཏེ་ཆོག་ནའོ། །མྱུར་བ་ཁོ་ནར་གོས་སུ་བྱས་ཏེ་བཅང་བར་བྱའོ་ཞེས་བྱ་བ་ནི་མི་བསྒྱང་བ་ཁོ་ནར་བྱིན་གྱིས་བརླབ་ཏུ་རུང་བར་བྱས་ཏེའོ། །ཁམ་ལངས་པ་ཁ་སྐོང་བའོ་ཞེས་བྱ་བ་ནི་སྣམ་སྦྱར་རམ། བླ་གོས་སམ། མཐང་གོས་ཁམ་ལངས་པ་ཁ་སྐོང་བའི་འོ། །གོས་ལ་རེ་བ་ཡོད་ན་ཞེས་བྱ་བ་ནི་དགེ་སློང་ལ་མས་བདག་ལ་གོས་སྦྱིན་བའི་རེ་བའམ། ཕའམ། ཕུ་ནུའམ། སྲིང་མོའམ། སློབ་དཔོན་ནམ། མཁན་པོས་བདག་ལ་གོས་སྦྱིན་པའི་རེ་བའམ། ལོ་ལྔའི་དུས་སྟོན་གྱི་ཚེ་འམ། ལོ་དྲུག་གི་དུས་སྟོན་གྱི་ཚེ་འམ། གཙུག་ཕུད་འདྲེག་པའི་དུས་སྟོན་གྱི་ཚེའམ། གནས་ཁང་གི་དུས་སྟོན་གྱི་ཚེའམ། དུས་སྟོན་ཆེན་པོའ་ཚེ་རྙེད་དུ་རེ་བ་ཡོད་ནའོ། །དགེ་སློང་དེས་གོས་དེ་ཟླ་བ་གཅིག་གི་མཐར་གཞག་པར་བྱའོ་ཞེས་བྱ་བ་ནི་ཟླ་བ་གཅིག་གི་མཐའ་ཚུན་ཆད་དུའོ། །དེ་ལས་འདས་པར་འཛོག་ན་ཞེས་བྱ་བ་ནི་དེ་ལས་ཐལ་བར་རོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། །བར་སྡོམ་ལ། དོགས་བཅས་དོགས་པ་མེད་པ་དང་། །ཉམས་གྱུར་གྲུབ་པར་མ་གྱུར་དང་། །རྒྱུན་ཆད་གོས་ལྡ་གོས་གཉིས་དང་། །སྦྱར་བ་དང་ནི་ཚད་རྣམས་སོ། །དགེ་སློང་གིས་ཚེས་ལ་གོས་སྔོན་པོ་ཞེས་རྙེད་ནས་དེས་དེ་བྱེད་དུ་མི་འཛད་པར་དེ་གང་གི་ཚེ་འདི་དང་འདྲ་བ་རྙེད་པར་དེའི་ཚེ་གོས་བྱེད་དུ་གཞུག་གོ་སྙམ་དུ་རེ་བས་དེ་འཇོག་པར་བྱེད་ཅིང་དེས་ཚེས་དེ་ཉིད་ལ་གོས་སྔོན་པོ་དོགས་པ་དང་བཅས་པ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་

གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་གསུམ་མམ། ཚེས་བཅུ་ཚུད་ཅད་ཀྱིས་གོས་སྔོན་པོ་ཞིག་རྙེད་ན། དགེ་སློང་དེས་གོས་ཞག་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་དེ་བཅུ་ལ་མ་རྙེད་ཀྱང་ཉི་མ་བཅུ་དགུ་ཚུན་ཅད་ཀྱིས་རྙེད་ན། དགེ་སློང་དེས་གོས་དེ་ཉི་མ་ཉི་ཤུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་ཉི་ཤུ་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཉི་མ་ཉི་ཤུ་པ་ལ་མ་རྙེད་ཀྱང་ཉི་མ་ཉི་ཤུ་རྩ་དགུ་ཚུན་ཅད་ཀྱིས་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་བར་མི་བྱེད་ད་མ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་སུམ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛད་པར་དེ་གང་གི་ཚེ་འདི་དང་འདྲ་བ་རྙེད་པར་གྱུར་པ་དེའི་ཆོ་གོས་བྱེད་དུ་གཞུག་གོ་སྙམ་དུ་རེ་བ་མེད་པས་དེ་འཇོག་པར་བྱེད་ཅིང་ངེས་ཚེས་དེ་ཉིད་ལ་གོས་སྔོན་པོ་དོགས་པ་མེད་པ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། རེང་གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་

བར་མི་བྱེད་ངམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཚེས་བཅུ་ཚུན་ཅད་དམ། ཉི་མ་བཅུ་དགུ་ཚུན་ཅད་དམ། ཉི་མ་ཉི་ཤུ་རྩ་དགུ་ཚུན་ཅད་ཀྱིས་གོས་སྔོན་པོ་ཞིག་རྙེད་ན། དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་རླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུ་གཅིག་གི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་གོས་ལ་རེ་བ་ཡོད་པ་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཉམས་པར་གྱུར། འགྱངས་པར་གྱུར། ཉམ་ཆུང་བར་གྱུར་ཅིང་། དེས་ཚེས་དེ་ཉིད་ལ་གོས་སྔོན་པོ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུག་ཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། ཚེས་ལ་མ་རྙེད་ཀྱང་གཉིས་སམ། ཚེས་བཅུ་ཚུན་ཆད་དམ། ཅེས་བཅུ་ལ་མ་རྙེད་ཀྱང་ཉི་མ་ཉི་ཤུ་རྩ་དགུ་ཚུན་ཆད་ཀྱི་གོས་སྔོན་པོ་ཞིག་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱི་བརླབས་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུགཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང་།

དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་གྲུབ་པར་མ་གྱུར། རྒྱུན་ཆད་པར་མ་གྱུར་པར་དེས་ཚེས་དེ་ཉིད་ལ་གོས་སྔོན་བོ་གཞན་ཞིག་རྙེད་པར་གྱུར་ན། དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེད་ཀྱང་ཚེས་གཉིས་སམ། ཉི་མ་ཉི་ཤུ་རྩ་དགུ་ཚུན་ཆད་ཀྱིས་རྙེད་ན་དགེ་སློང་དེས་གོས་དེ་ཟླ་བ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་སུམ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་རྙེད་པ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །དགེ་སློང་གིས་ཚེས་ལ་གོས་སྔོན་པོ་ཞིག་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་ན་དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན། ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །ཚེས་ལ་མ་རྙེས་ཀྱང་ཚེས་གཉིས་སམ། ཉི་མ་ཉི་ཤུ་རྩ་དགུ་ཚུན་ཆད་ཀྱིས་རྙེད་ནས་དེས་དེ་བྱེད་དུ་མི་འཛུད་པར་དེ་རེ་བས་དེ་འཇོག་པར་བྱེད་ཅིང་དེའི་གོས་ལ་རེ་བ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་

རྒྱུན་ཆད་བར་གྱུར་ན་དགེ་སློང་དེས་གོས་དེ་ཉི་མ་བཅུ་པོ་དེ་ཉིད་ཀྱི་ནང་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། རུང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་རློབ་པར་མི་བྱེད་དམ། གཏོང་བར་མི་བྱེད་དམ། རུང་བར་མི་བྱེད་དམ། གཞན་ལ་སྦྱིན་པར་མི་བྱེད་ན་ཉི་མ་བཅུ་གཅིག་པའི་སྐྱ་རེང་ཤར་ན་སྤང་བའི་ལྟུང་བྱེད་དུ་འགྱུར་རོ། །གོས་སྔོན་པོ་ཇི་ལྟ་བ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཡང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གོས་དག་དུ་མཆིས། ཉེ་བ་འཁོར་ལྔ་སྟེ། གོས་བདག་པོ་ཡོད་པ་དང་། གོས་བདག་པོ་མེད་པ་དང་། གོས་བོར་བླངས་དང་། གོས་དུར་ཁྲོད་པ་དང་། གོས་ཕྱག་དར་ཁྲོད་པ་ཉིད་ནི་ལྔ་པའོ། །དེ་ལ་གོས་བདག་པོ་ཡོད་པ་གང་ཞེ་ན། གང་ལ་བདག་པོ་སྐྱེས་པའམ། བུད་མེད་དམ། མ་ནིང་ཡོད་པ་དེ་ནི་གོས་བདག་པོ་ཡོད་པ་ཞེས་བྱའོ། །གོས་བདག་པོ་མེད་པ་གང་ཞེ་ན། གང་ལ་བདག་པོ་སྐྱེས་པའམ། བུད་མེད་དམ། མ་ནིང་མེད་པ་དེ་ནི་གོས་བདག་པོ་མེད་པ་ཞེས་བྱའོ། །གོས་བོར་བླངས་གང་ཞེ་ན། འདི་ལྟ་སྟེ། ཉེ་དུ་དག་གིས་ཉེ་དུ་ཉམས་པ་དང་། ཤི་བ་དང་། དུས་ལ་བབ་པར་རིག་ནས་དེའི་རྒྱབ་ནས་གོས་ཀྱིས་བཀབ་སྟེ་དུར་ཁྲོད་དུ་ཁྱེར་ནས་དེ་དག་གིས་གོས་དེ་ཡང་ཕྱིར་ཁྱེར་ཏེ་འོངས་ནས་དགེ་འདུན་ལ་འབུལ་བ་དེ་ནི་གོས་བོར་བླངས་ཞེས་བྱའོ། །གོས་དུར་ཁྲོད་པ་གང་ཞེ་ན། ཡོངས་སུ་འཛིན་པ་མེད་པའི་དུར་ཁྲོད་ནས་བླངས་པ་གང་ཡིན་པ་དེ་ནི་གོས་དུར་ཁྲོད་པ་ཞེས་བྱའོ། །གོས་ཕྱག་དར་ཁྲོད་པ་གང་ཞེ་ན། ཕྱག་དར་ཁྲོད་པ་རྣམ་པ་ལྔ་སྟེ། ལམ་པོ་ཆེའི་གོས་དང་། དགོན་པར་བོར་བ་དང་། ཆུ་འགྲམ་པ་དང་། སྲིལ་ཟན་དང་། རལ་རུལ་ཉིད་ནི་ལྔ་པ་ཡིན་ཏེ། རལ་རུལ་ཞེས་བྱ་བ་ནི་ཧ་ཅང་ཟེགས་པ་གང་ཡིན་པའོ། །གཞན་ཡང་ཕྱག་དར་ཁྲོད་པ་རྣམ་པ་ལྔ་སྟེ། མེས་ཚིག་པ་དང་། ཆུས་ཁྱེར་བ་དང་། བྱི་བས་ཟོས་པ་དང་། བེའུས་ཟོས་པ་དང་། མ་མའི་གོས་ཉིད་ནི་ལྔ་པ་ཡིན་ནོ། །གཞན་ཡང་གོས་གཉིས་ཏེ་

སར་པ་དང་དུས་ཚིགས་སུ་སྤྱད་པའོ། །གོས་སར་པ་གང་ཞེ་ན། ཐ་ག་པས་གསར་དུ་བཏགས་པ་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བའི་དུས་ཚིགས་སུ་མ་སྤྱད་བ་གང་ཡིན་པ་དེ་ནི་གོས་སར་པ་ཞེས་བྱའོ། །གོས་དུས་ཚིགས་སུ་སྤྱད་པ་གང་ཞེ་ན། དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བའི་དུས་ཚིགས་སུ་སྤྱད་པ་གང་ཡིན་པ་སྟེ། དུས་ཚིགས་ཞེས་བྱ་བ་ནི་ཟླ་བ་བཞི་སྟེ། དེ་ནི་གོས་དུས་ཚིགས་སུ་སྤྱད་པ་ཞེས་བྱའོ། །དགེ་སློང་གིས་གོས་སར་པ་རྙེད་ན་གལ་ཏེ་དགེ་སློང་དེས་བཅག་པ་དང་། གདིང་བ་དང་། དྲ་བ་དང་། བཙེམ་པ་དང་། ཁ་བསྒྱུར་བར་ནུས་ན་དགེ་སློང་དེས་གོས་དེ་ལས་སྣམ་སྦྱར་ནི་ཉི་རིམ་དུ་བྱ། གདིང་བ་ཡང་ཉི་རིམ་དུ་བྱ། བླ་གོས་ནི་ཅིག་རྐྱང་དུ་བྱ། མཐང་གོས་ཀྱང་ཅིག་རྐྱང་དུ་བྱའོ། །དགེ་སློང་གིས་སྣམ་སྦྱར་ཉི་རིམ་ལ་རིམ་པ་གསུམ་པ་གློན་པར་བྱེད་ན་དེ་གློན་པར་བྱེད་པ་ན་ཉེས་བྱས་སུ་འགྱུར་ལ། ཞག་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་ཉི་རིམ་ལས་གཞན་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་ཉི་རིམ་ལས་བཀྲུས་ཤིང་ཁ་བསྒྱུར་ཏེ་འདི་ཉིད་ལ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་བ་ན་ལྟུང་བ་མེད་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །སྣམ་སྦྱར་ལ་ཇི་ལྟ་བ་བཞིན་དུ་གདིང་བ་ལ་ཡང་དེ་བཞིན་ནོ། །དགེ་སློང་གིས་བླ་གོས་ཅིག་བརྐྱང་ལ་རིམ་པ་གློན་པར་བྱེད་ན་དེ་གློན་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །བླ་གོས་ལ་ཇི་ལྟ་བ་བཞིན་དུ་མཐང་གོས་ལ་ཡང་དེ་བཞིན་ནོ། །དགེ་སློང་གིས་གོས་དུས་ཚིགས་སུ་སྤྱད་པ་ཞིག་རྙེད་ལ་གལ་ཏེ་དགེ་སློང་དེས་བཅག་པ་དང་། །གདིང་བ་དང་། དྲ་བ་དང་། བཅོམ་པ་དང་། ཁ་བསྒྱུར་བར་ནུས་ན་དགེ་སློང་དེས་གོས་དེ་ལས་སྣམ་སྦྱར་ནི་བཞི་རིམ་དུ་བྱ། གདིང་བ་ཡང་བཞི་རིམ་དུ་བྱ། བླ་གོས་ནི་ཉི་རིམ་དུ་བྱ། མཐང་

གོས་ཀྱང་ཉི་རིམ་དུ་བྱའོ། །དགེ་སློང་གིས་སྣམ་སྦྱར་བཞི་རིམ་ལ་རིམ་པ་ལྔ་པ་གློན་པར་བྱེད་ན་དེ་གློན་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་སྣམ་སྦྱར་བཞི་རིམ་ལས་གཞན་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གོས་སྣམ་སྦྱར་བཞི་རིམ་ལས་བཀྲུས་ཤིང་ཁ་བསྒྱུར་ཏེ་འདི་ཉིད་དུ་ཀླན་པར་བྱའོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ལྟུང་བ་མེད་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །སྣམ་སྦྱར་ལ་ཇི་ལྟ་བ་དེ་བཞིན་དུ་གདིང་བ་ལ་ཡང་དེ་བཞིན་དུ་བརྗོད་པར་བྱའོ། །དགེ་སློང་གིས་བླ་གོས་ཉི་རིམ་ལ་རིམ་པ་གསུམ་པ་གློན་པར་བྱེད་ན་དེ་གློན་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་བླ་གོས་ཉི་རིམ་ལས་གཞན་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ཉེས་བྱས་སུ་འགྱུར་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་བླ་གོས་ཉི་རིམ་ལས་འདི་ཉིད་བཀྲུས་ཤིང་ཁ་བསྒྱུར་ཏེ་འདི་ཉིད་དུ་ཀླན་ནོ་སྙམ་པས་རིམ་པ་འབོགས་པར་བྱེད་ན་དེ་འབོགས་པ་ན་ལྟུང་བ་མེད་ལ། ཉི་མ་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །བླ་གོས་ལ་ཇི་ལྟ་བ་བཞིན་དུ་མཐང་གོས་ལ་ཡང་དེ་བཞིན་ནོ། །ཕྱག་དར་ཁྲོད་ལ་ནི་ཇི་ཙམ་འདོད་པ་ཀླན་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་སྣམ་སྦྱར་དག་གི་སྣམ་ཕྲན་དུ་ལགས། ཉེ་བ་འཁོར་དགུ་སྟེ། སྣམ་ཕྲན་དགུ་པ་དང་། སྣམ་ཕྲན་བཅུ་གཅིག་པ་དང་། སྣམ་ཕྲན་བཅུ་གསུམ་པ་དང་། སྣམ་ཕྲན་བཅྭ་ལྔ་པ་དང་། སྣམ་ཕྲན་བཅུ་བདུན་པ་དང་། སྣམ་ཕྲན་བཅུ་དགུ་པ་དང་། སྣམ་ཕྲན་ཉི་ཤུ་གཅིག་པ་དང་། སྣམ་ཕྲན་ཉི་ཤུ་གསུམ་པ་དང་། སྣམ་ཕྲན་ཉི་ཤུ་ལྔ་པའོ། །ཉེ་བ་འཁོར་དེ་ལ་སྣམ་ཕྲན་དགུ་པ་ནི་གསུམ་སྦྱར་གསུམ་མོ། །སྣམ་ཕྲན་བཅུ་གཅིག་པ་ནི་གསུམ་སྦྱར་གསུམ་དང་སྣམ་ཕྲན་གཉིས་སོ། །སྣམ་ཕྲན་

བཅུ་གསུམ་པ་ནི་གསུམ་སྦྱར་བཞི་དང་སྣམ་ཕྲན་གཅིག་གོ །སྣམ་ཕྲན་བཅྭ་ལྔ་པ་ནི་གསུམ་སྦྱར་ལྔའོ། །སྣམ་ཕྲན་བཅུ་བདུན་པ་ནི་གསུམ་སྦྱར་ལྔ་དང་སྣམ་ཕྲན་གཉིས་སོ། །སྣམ་ཕྲན་བཅུ་དགུ་པ་ནི་གསུམ་སྦྱར་དྲུག་དང་སྣམ་ཕྲན་གཅིག་གོ །སྣམ་ཕྲན་ཉི་ཤུ་གཅིག་པ་ནི་གསུམ་སྦྱར་བདུན་ནོ། །སྣམ་ཕྲན་ཉི་ཤུ་གསུམ་པ་ནི་གསུམ་སྦྱར་བདུན་དང་སྣམ་ཕྲན་གཉིས་སོ། །སྣམ་ཕྲན་ཉི་ཤུ་ལྔ་པ་ནི་ གསུམ་སྦྱར་བརྒྱད ་དང་སྣམ་ཕྲན་གཅིག་གོ །ཉེ་བ་འཁོར་དེ་ལ་སྣམ་སྦྱར་སྣམ་ཕྲན་དགུ་པ་གང་ཡིན་པ་དང་། སྣམ་ཕྲན་བཅུ་གཅིག་པ་གང་ཡིན་པ་དང་། སྣམ་ཕྲན་བཅུ་གསུམ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་གསུམ་པར་བྱས་ཏེ་བཅང་བར་བྱའོ། །སྣམ་སྦྱར་སྣམ་ཕྲན་བཅྭ་ལྔ་པ་གང་ཡིན་པ་དང་། སྣམ་ཕྲན་བཅུ་བདུན་པ་གང་ཡིན་པ་དང་། སྣམ་ཕྲན་བཅུ་དགུ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་བཞི་པར་བྱས་ཏེ་བཅང་བར་བྱའོ། །སྣམ་སྦྱར་སྣམ་ཕྲན་ཉི་ཤུ་གཅིག་པ་གང་ཡིན་པ་དང་། སྣམ་ཕྲན་ཉི་ཤུ་གསུམ་པ་གང་ཡིན་པ་དང་། སྣམ་ཕྲན་ཉི་ཤུ་ལྔ་པ་གང་ཡིན་པ་དེ་གསུམ་ནི་གླེགས་བུ་ཕྱེད་དང་ལྔ་པར་བྱས་ཏེ་བཅང་བར་བྱའོ། །ཉེ་བ་འཁོར་དེ་ཡན་ཅད་ནི་ཚེམ་བུའོ། །བཙུན་པ་སྣམ་སྦྱར་གྱི་ཚད་ཇི་ཙམ་ལགས། ཉེ་བ་འཁོར་གསུམ་སྟེ། སྣམ་སྦྱར་ཆེན་པོ་དང་། འབྲིང་དང་། ཆུང་ངུར་རིག་པར་བྱའོ། །དེ་ལ་ཆེན་པོ་ནི་ཁྲུ་གསུམ་དང་ལྔའོ། །ཆུང་དུ་ནི་ཁྲུ་ཕྱེད་དང་གསུམ་ངང་ཕྱེད་དང་ལྔའོ། །འབྲིང་གི་ནི་དེ་གཉིས་ཀྱི་བར་མའོ། །སྣམ་སྦྱར་ཇི་ལྟ་བ་བཞིན་དུ་བླ་གོས་དང་། མཐང་གོས་ཀྱང་དེ་བཞིན་ནོ། །གཞན་ཡང་མཐང་གོས་རྣམ་པ་གཉིས་ཏེ། ཁྲུ་དོ་དང་ལྔ་པ་དང་། ཁྲུ་དོ་དད་བཞི་པའོ། །མཐང་གོས་ཐ་མ་ནི་འཁོར་གསུམ་ཁེབས་པ་གང་ཡིན་པའོ། །སྤང་བ་རྣམས་ཀྱི་གོས་ཐ་མ་ནི་ཁྲུ་གང་ཁོ་ར་ཁོར་ཡུག་གོ །དགེ་སློག་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་བར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བམ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་

ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་ཇི་ཙམ་དུ་དགེ་སློང་གི་སྤང་བའི་དངོས་པོ་དེ་ཉིད་ཀྱིས་མ་བཤགས་ཤིང་། སོ་སོར་མ་བཤགས་པར་ལྟུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱང་གང་ཡང་རུང་བ་གཞན་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །འཇོག་པའི་སྤང་བ་སྟེ་གསུམ་པ་རྫོགས་སྷོ། །