འཕགས་པ་ཚེ་དང་ལྡན་པ་དགའ་བོ་ལ་མངལ་དུ་འཇུག་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་གསུམ་པ་སྟེ། ཚེ་དང་ལྡན་པ་དགའ་བོ་མངལ་ན་གནས་པ་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱཪྻ་ནནྡ་གརྦྷུ་བཀྲཱནྟི་ནིར་དེ་ཤ། བོད་སྐད་དུ། འཕགས་པ་དགའ་བོ་ལ་མངལ་ན་གནས་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱ་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་གྲོང་ཁྱེར་སེར་སྐྱ་ན་ཤིང་ནྱ་གྲོ་དྷཱི་ཀུན་དགའ་ར་བ་ན་དགེ་སློག་གི་དགེ་འདུན་ཚང་མེད་པ་རྣམས་དང་ཐབས་གཅིག་ཏུ་བཞུགས་ཏེ། དེའི་ཚེ་ན་བཅོམ་ལྡན་འདས་ཀྱི་གཅུང་དགའ་བོ་ཞེས་བྱ་བ་དེའི་ལུས་གསེར་གྱི་ཁ་དོག་ཅན་མཚན་སུམ་བཅུ་དང་ལྡན་ཞིང་ཚད་བཅོམ་ལྡན་འདས་ལས་སོར་བཞིས་ཐུང་པ་ཞིག་ཡོད་དེ་དེའི་ཆུང་མ་སུན་ད་རི་ཀ་ཞེས་བྱ་བ་བཟང་མོ་བལྟ་ན་སྡུག་པ། བྱད་བཞིན་མཛེས་ཤིང་འཇིག་རྟེན་ན་དཀོན་པ་ཁ་དོག་ཁྱད་པར་དུ་འཕགས་ཤིང་མང་པོ་ཀུན་ཀྱིས་བལྟ་བར་འདོད་པ་ཞིག་ཡོད་པས་དགའ་བོ་དེ་ལ་ཆགས་ཤིང་ཞེན་པར་གྱུར་པས་སྐད་ཅིག་ཙམ་དུ་ཡང་མི་འབྲལ་ཞིང་འདོད་པའི་སེམས་ཀྱིས་ཤིན་དུ་ཆགས་པར་གྱུར་ཏེ། སྲོག་གིས་འཇལ་བར་བྱེད་པས། བཅོམ་ལྡན་འདས་ཀྱིས་དེ་གདུལ་བའི་དུས་ལ་བབ་པར་མཁྱེན་པས་སྔ་དྲོའི་དུས་ཀྱི་ཚེ་ན་བཟའ་བནབས་ཏེ། ལྷུང་བཟེད་བསྣམས་ནས་ཞབས་འབྲིང་པ་ཚེ་དང་ལྡན་པ་ཀུན་དགའ་བོ་དང་གྲོང་ཁྱར་དུ་བསོད་སྙོམས་ལ་གཤེགས་ཏེ། མཐར་གྱིས་དགའ་བོའི་ཁྱིམ་གང་ན་བ་དེར་གཤེགས་ནས་དེའི་སྒོར་གཤེགས་ཏེ་བཞུགས་སོ། །དེ་ནས་ཐུགས་རྗེ་ཆེན་པོའི་མཐུས་འོད་ཟེར་གསེར་གྱི་ཁ་དོག་ལྟ་བུ་བཏང་བས་དགའ་བོའི་ཁྱིམ་ནིང་ཀུན་ཏུ་གསེར་བཙོ་མ་ལྟ་བུའི་ཁ་དོག་ཏུ་གྱུར་པ་དང་།་དེའི་ཚེ་དགའ་པོ་འདི་སྙམ་དུ་འོད་ཟེར་ཀུན་དུ་སྣང་བར་གྱུར་བས་གདོན་མི་ཟ་བར་འདི་ནི་དེ་བཞིན་གཤེགས་པ་ཡིན་ནོ། །སྙམ་དུ་བསམ་ནས་
མི་ཞིག་མངགས་ཏེ། ཀྱེ་སོང་ལུས་ཡིན་བལྟོས་ཤོག་ཅེས་བསྒོ་བ་དང་། དེས་ཀྱང་བཅོམ་ལྡན་འདས་མཐོང་ནས་མྱུར་ཞིང་རིངས་པས་སླར་ལོག་ནས་དགའ་བོ་ལ་བཅོམ་ལྡན་འདས་སྒོ་ན་བཞུགས་སོ་ཞེས་སྨྲས་སོ། །དེས་དེ་སྐད་སྨྲས་པ་ཐོས་ནས་མྱུར་དུ་ཕྱིར་བྱུང་སྟེ། བཅོམ་ལྡན་འདས་བསུ་སྟེ། ཕྱག་བྱ་བར་བྱས་པ་ལས་དེའི་ཚེ་སུན་ད་རི་ཀ་འདི་སྙམ་དུ་བདག་གིས། གལ་ཏེ་འདི་བཏང་བར་གྱུར་ནས་བཅོམ་ལྡན་འདས་ཀྱིས་གདོན་མི་ཟ་བར་རབ་ཏུ་བྱུང་བར་འགྱུར་རོ། སྙམ་དུ་བསམས་ནས་གོས་ཀྱི་མཐའ་ནས་བཟུང་སྟེ་མ་བཏང་བ་དང་། དགའ་པོས་སྨྲས་པ། དེར་རེ་ཤིག་ཐོང་ཤིག་དང་། བཅོམ་ལྡན་འདས་ལ་ཕྱག་བྱས་ནས་བདག་སླར་འོང་ངོ་། །སུན་ད་རི་ཀས་སྨྲས་པ། བདག་ཅག་དམ་བཅས་ནས་གདོང་དེ་བཞིན་གཏང་ངོ་། །ཞེས་དེའི་འཕྲལ་བ་ལ་ཐིག་ལེ་གཤེར་བའི་མཚན་མ་བཏབ་ནས་འདི་སྐད་དུ་ཐིག་ལེ་འདི་མ་སྐམས་པར་སླར་གཤེགས་སུ་གསོལ། །གལ་ཏེ་ཐོགས་པར་གྱུར་ནས་གསོར་གྱི་ཀཱར་ཤཱ་པཎ་ལྔ་བརྒྱས་ཆད་པས་གཅོད་དོ་ཞེས་སྨྲས་པ་དང་། དགའ་བོས་ཀྱང་དེ་བཞིན་དུ་བྱའོ། ཞེས་སྒོར་བྱུང་ནས་བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་བྱས་ཏེ་དེ་བཞིན་གཤེགས་པའི་ལྷུང་བཟེད་བླངས་ནས་སླར་ཁྱིམ་དུ་ཞུགས་ཏེ། བཟའ་བ་དང་བཅའ་བ་བསོད་པ་དག་གིས་ལྷུང་བཟེད་པ་བཀང་ནས་སྒོར་བྱུང་བ་དང་། བཅོམ་ལྡན་འདས་སླར་གཤེགས་པས་ཚེ་དང་ལྡན་པ་ཀུན་དགའ་བོ་ལ་བྱིན་པ་དང་། བཅོམ་ལྡན་འདས་ཀྱིས་ལྷུང་བཟེད་ལེན་ཅིག་པར་མཚན་མ་བསྟན་ཏོ། །དེ་བཞིན་གཤེགས་པ་སྟོན་པ་ཆེན་པོ་ཤིན་ཏུ་གཟི་བྱིན་ཆེ་བས་བཞེས་སུ་གསོལ་ཞེས་གསོལ་པའི་ཐུགས་ཀྱང་མ་ཐུབ་ནས་ཡང་དགའ་བོ་ལ་བྱིན་པ་དང་། ཀུན་དགའ་བོས་སྨྲས་པ། ཁྱོད་ཀྱིས་ལྷུང་བཟེད་འདི་སུ་ལས་བླངས་སྨྲས་པ། བཅོམ་ལྡན་འདས་ལས་བླངས་སོ། ཀུན་དགའ་བོས་སྨྲས་པ། འོ་ན་བཅོམ་ལྡན་འདས་ལ་ཕུལ་ཅིག། དེས་སྨྲས་པ་བདག་སྟོན་པ་ཆེན་པོ་ལ་གསོལ་པའི་ཐུགས་མི་ཐུབ་པོ་ཞེས་ཅང་མི་སྨྲ་བར་ཞབས་འབྲིང་དུ་སོང་ངོ་། །བཅོམ་ལྡན་འདས་སླར་གཙུག་ལག་ཁང་དུ་གཤེགས་ནས་ཕྱག་བཅས་ཞབས་བསིལ་ཏེ་གདན་ལ་ཞུགས་པ་དང་།
དགའ་བོས་ལྷུང་བཟེད་ཐོགས་པ་དེ་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་ཟས་བྱ་བ་མཛད་ནས་དགའ་བོ་ལ་བཀའ་སྩལ་པ། ཁྱོད་ངའི་ལྷུང་བཟེད་ལྷག་མ་ཟ་འམ། བདག་འཚལ་ལོ་ཞེས་གསོལ་བ་དང་། བཅོམ་ལྡན་འདས་ཀྱིས་ཀྱང་དེ་ལ་བྱིན་ནོ། ། དགའ་བོས་ཟོས་ཟིན་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཅི་ཁྱོད་རབ་ཏུ་འབྱུང་དམ། དེས་ཀྱང་རབ་ཏུ་འབྱུང་ངོ་ཞེས་གསོལ་ཏེ། དེ་ཡང་སངས་རྒྱས་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡབ་ཡུམ་དང་། མཁན་པོ་དང་། བླ་མའི་གནས་གཞན་རྣམས་ཀྱིས་རྗེས་སུ་བསྟན་པ་དག་དང་ནམ་ཡང་འགལ་བར་མ་མཛད་པའི་ཕྱིར་ད་ལྟར་ཡང་བཀའ་ལས་འགལ་བར་མི་བྱེད་པ་བརྙེས་པར་གྱུར་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་ཀྱི་དགའ་བོའི་སྐྲ་དང་ཁ་སྤུ་བྲེགས་ཤིག་ཅེས་བཀའ་སྩལ་པ་དང་། བཅོམ་ལྡན་འདས་དེ་བཞིན་དུ་འཚལ་ལོ་ཞེས་འབྲེག་མཁན་བཙལ་ནས། དེའི་སྐྲ་བྲེགས་པར་བརྩམས་པ་དང་། དགའ་བོས་འབྲེག་མཁན་དེ་ལ་བསྒོ་བ། ཀྭའི་ཁྱོད་མི་ཤེས་སམ། ང་ནི་རིང་པོར་མ་ཐོག་པར་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་བྱེད་པར་འགྱུར་བས་ཁྱོད་ཀྱིས་གལ་ཏེ་ངའི་སྐྲ་དང་ཁ་སྤུ་བྲེགས་པར་གྱུར་ན་ངས་ཁྱོད་ཀྱི་ལག་པ་གཉིས་འཁྲིག་མ་མན་ཆད་གཅད་དོ་ཞེས་བསྡིགས་པས་ཤིན་ཏུ་སྐྲག་པར་གྱུར་ནས་སྤུ་གྲི་བསྡུས་ཏེ། ཕྱིར་འགྲོ་བར་བརྩམས་པ་དང་། དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་དེ་གསོལ་ཏོ། །དེ་ནས་བཅོམ་ལྡན་འདས་ཉིད་དགའ་བོ་ག་ལ་དེར་གཤེགས་ཏེ། དགའ་བོ་ལ་ཅི་ཁྱོད་རབ་ཏུ་མི་འབྱུང་ངམ། དེས་ཀྱང་རབ་ཏུ་འབྱུང་ངོ་ཞེས་གསོལ་པ་དང་། དེ་ནས་བཅོམ་ལྡན་འདས་ཉིད་ཀྱིས་རིལ་བ་བསྣམས་ཏེ། དེའི་མགོ་བོ་ལ་ཆུ་བླུགས་ནས་འབྲེག་མཁན་གྱིས་སྐྲ་དང་ཁ་སྤུ་བྲེགས་པ་དང་། དེ་འདི་སྙམ་དེང་བདག་རེ་ཤིག་བཅོམ་ལྡན་འདས་ལ་སྲི་ཞུ་བྱས་ཏེ་རབ་ཏུ་འབྱུང་མོད་ཀྱི། འོན་ཀྱང་རྒོངས་ཀར་སླར་ཁྱིམ་དུ་འགྲོའོ་སྙམ་མོ། །དེས་རྒོངས་ཀར་ལམ་དུ་ཞུགས་ཏེ་སོང་བ་དང་། དེ་ནས་བཅོམ་ལྡན་
འདས་ཀྱིས་དེའི་འགྲོ་བའི་ལམ་དུ་གཡང་ས་ཆེན་པོ་ཞིག་སྤྲུལ་པ་དེས་མཐོང་ནས། འདི་སྙམ་དུ་སུ་ན་ད་རི་ཀ་དང་དུས་བྱས་པ་ནི་ཐག་རིང་དུ་གྱུར་པས་འགྲོ་བའི་རྐྱེན་དང་ལྡན་པར་མ་གྱུར་ཏེ། དེང་བདག་གིས་དེ་བསམས་པ་ཉིད་ཀྱི་འཆི་བའི་དུས་བྱེད་པར་འགྱུར་ཡང་སྲིད་ན་། གལ་ཏེ་ཤི་བར་མ་གྱུར་ན་ནམ་ནངས་ཏེ་འགྲོའོ་ཞེས་སུན་ད་རི་ཀ་དྲན་པའི་མྱ་ངན་དང་། སྡུག་བསྔལ་གྱིས་མཚན་མོ་འདས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་ཀྱིས་མཁྱེན་ནས་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་དགའ་བོ་དེ་ལ་ཁང་སྐྱོང་བྱོས་ཤིག་པར་བསྒོ་ཤིག །དེས་ཀྱང་དེ་བཞིན་དུ་དེའི་ཐང་དུ་སོང་ནས་བཅོམ་ལྡན་འདས་ཀྱིས་ཁང་སྐྱོང་བྱོས་ཤིག་པར་བཀའ་སྩལ་ཏོ། ཞེས་བསྒོ་བ་དང་། དེས་ཀྱང་སྐྱོང་ཞེས་བྱ་བ་ཇི་ལྟ་བུ། དེས་བྱ་བ་ནི་ཅི་ཞིག་བྱེད་ཅེས་དྲིས་སོ། །དེས་སྨྲས་པ་གཙུག་ལག་ཁང་དུ་དགེ་འདུན་གྱི་བྱ་བ་དག་ཞལ་ཏ་བྱ་དགོས་སོ། །སྨྲས་པ། ཚུལ་ཇི་ལྟ་བུར་བྱ་བའི་རིགས་སྨྲས་པ། ཁང་སྐྱོང་ཞེས་བྱ་བ་ནི་གལ་ཏེ་དགེ་སློང་རྣམས་བསོད་སྙོམས་ལ་དོང་གཙུག་ལག་ཁང་གི་ནང་གི་རྣམས་ཕྱག་ནས་ཆག་ཆག་གདབ་པར་བྱའོ། །བ་ལང་གི་ལྕི་པ་སར་པ་བླངས་ནས་གོ་རིམ་བཞིན་དུ་འཇམ་པོར་བསྐུ་བར་བྱའོ།།ལགས་པར་ཡིད་ལ་བྱས་ཏེ་བསྲུང་ཞིང་སྟོར་བརླག་མེད་པར་བྱའོ། །གྲོས་སུ་བྱ་བ་ཡོད་ན་དགེ་འདུན་ལ་གསོལ་པར་བྱའོ། །དྲི་དང་མེ་ཏོག་ཡོད་ན་དགེ་འདུན་ལ་བྲིམ་པར་བྱའོ། །མཚན་མོ་སྒོ་བཅད་ཅིང་ནམ་ནངས་ནས་དབྱེ་བར་བྱའོ། །རྣམ་ཕྱི་ས་དང་། ཆབ་ཁུང་ས་རྟག་ཏུ་བཀྲུ་ཞིང་བྱི་དོར་དགོས་སོ། །གལ་ཏེ་གཙུག་ལག་ཁང་ཞིག་ཅིང་རལ་པ་ཡོད་ན་བཅོས་ལེགས་བྱའོ་ཞེས་དེ་སྐད་བསྟན་པ་ཐོས་པ་དང་། བཙུན་པ་ཀུན་དགའ་བོ་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་བཞིན་དུ་ཐམས་ཅད་བདག་གིས་དེ་བཞིན་བགྱིའོ་ཞེས་བླངས་སོ། །དེ་ནས་དགེ་སློང་རྣམས་སྔ་དྲོའི་དུས་ཀྱི་ཚེ་ཤམ་ཐབས་བགོས། ཆོས་གོས་དང་ལྷུང་བཟེད་ཐོགས་ཏེ། གྲོང་ཁྱེར་སེར་སྐྱའི་གནས་སུ་བསོད་སྙོམས་ལ་བཞུད་པ་
དང་། དགའ་བོས་གཙུག་ལག་ཁང་ན་སུ་ཡང་མེད་པར་མཐོང་ནས་བདག་གིས་ཕྱག་དར་བྱས་ཟིན་པ་དང་། སླར་ཁྱིམ་དུ་འགྲོའོ་ཞེས་ཕྱག་དར་བྱེད་པ་ལ་ཞུགས་སོ། །བཅོམ་ལྡན་འདས་ཀྱིས་དེ་གཟིགས་ཤིང་མཁྱེན་པས་རྫུ་འཕྲུལ་གྱི་ཕྱགས་ཟིན་བའི་ས་གཙང་མ་རྣམས་སླར་ཕྱག་དར་གྱིས་གང་བར་བྱིན་གྱིས་བརླབས་པ་དང་། དེས་ཀྱང་འདི་སྙམ་དུ་བདག་གིས་ཕྱག་དར་བོར་ཏེ་སླར་ཁྱིམ་དུ་འགྲོའོ་སྙམ་དུ་བསམས་ནས་དེས་ཕྱགས་མ་བཞག་སྟེ། ཕྱག་དར་དབོ་བར་བརྩམས་པ་དང་། ཟད་པར་མ་གྱུར་ནས་དེས་བསམས་པ། གནས་ཁང་རྣམས་ཀྱི་སྒོ་བཅད་ལ་འགྲོའོ་སྙམ་ནས་དེས་གནས་ཁང་རྣམས་ཀྱི་སྒོ་བཅད་པར་བརྩམས་པ་དང་། བཅོམ་ལྡན་འདས་ཀྱིས་སྒོ་གཅིག་བཅད་ཟིན་ནས་སྒོ་གཞན་བཅད་ཙམ་ན་སྒོ་གཞན་ཡང་བྱེ་བར་བྱིན་གྱིས་བརླབས་པས་དེ་ཉོན་མོངས་པ་སྐྱེས་ནས་གཞན་ཡང་འདི་སྙམ་དུ་གལ་ཏེ་རྐུན་པོས་གཙུག་ལག་ཁང་འདི་ཉམས་པར་བྱས་ཀྱང་འདི་ལ་གནོད་པ་ཅི་ཡོད་དེ། བདག་ཀྱང་རྒྱལ་པོར་གྱུར་པ་ན་འདི་བས་ཆེས་ལྷག་པའི་གཙུག་ལག་ཁང་བཟང་པོ་བརྒྱ་སྟོང་བརྩིག་པར་ཟད་པས་བདག་ནི་སླར་ཁྱིམ་དུ་འགྲོའོ། །ཡང་བསམས་པ། གལ་ཏེ་ལམ་པོ་ཆེར་ཞུགས་ཏེ་འགྲོ་ན་ནི་བཅོམ་ལྡན་འདས་དང་ཕྲད་དུ་དོགས་པས། གསེབ་ལམ་དུ་ཞུགས་ཏེ་འགྲོ་སྙམ་དུ་བསམས་སོ། །བཅོམ་ལྡན་འདས་ཀྱིས་དེའི་བསམ་པ་ཐུགས་ཀྱིས་མཁྱེན་ནས་གསེབ་ལམ་དེ་ཉིད་ཞུགས་ཏེ་གཤེགས་སོ། །དེས་རྒྱང་ནས་བཅོམ་ལྡན་མཐོང་ནས་མི་ཕྲད་པར་བྱ་བའི་ཕྱིར་ལམ་གྱི་འགྲམ་མ་ལྗོན་ཤིང་ཡལ་ག་དང་གྲིམ་མར་ལྡན་པ་ཐུར་དུ་གཞོལ་བ་ཞིག་གི་དྲུང་དུ་གབ་སྟེ་འདུག་པ་དང་། བཅོམ་ལྡན་འདས་ཀྱིས་ལྗོན་ཤིང་དེའི་ཡལ་ག་གྱེན་དུ་བརྫེས་ནས་དེ་ལུས་མངོན་དུ་སྣང་བར་བྱིན་གྱིས་རླབས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཁྱོད་གར་འགྲོ། ངའི་ཕྱི་བཞིན་དུ་ཤིག་ཅེས་བཀའ་སྩལ་པ་དང་། དེ་ཡང་སྐྱེངས་ཏེ་ངོ་ཚ་བའི་སེམས་ཀྱིས་བཅོམ་ལྡན་འདས་ཀྱི་ཞབས་འབྲིང་དུ་འབྲངས་པ་དང་། བཅོམ་ལྡན་འདས་ཀྱིས་འདི་སྙམ་དུ་འདི་ཆུང་མ་ལ་ཤིན་ཏུ་ཆགས་ཤིང་ཞེན་པར་གྱུར་པས་འདི་དེ་དང་འབྲལ་ཞིང་ཕན་དགས་པའི་ཕྱིར་གྲོང་ཁྱེར་སེར་སྐྱ་ནས་བྱུང་སྟེ།
གྲོང་ཁྱེར་མཉན་ཡོད་དུ་གཤེགས་སོ་སྙམ་དུ་དགོངས་ནས་དེར་བྱོན་པ་དང་། རི་དགས་དགྲའི་མ་ས་གའི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་དགའ་བོ་བླུན་པོ་འདི་ནི་རྟག་ཏུ་ཆུང་མ་ལ་ཆགས་ཤིང་ཞེན་ནས་གཏོང་བར་མི་བྱེད་པས་འདི་ལ་ཐབས་ཤིག་སྦྱར་ཏེ་སེམས་ཉེ་བར་ཞི་བར་བྱའོ་སྙམ་དུ་དགོངས་ནས། ཚེ་དང་ལྡན་པ་དགའ་བོ་ལ་བཀའ་སྩལ་པ་ཁྱོད་ཀྱིས་སྔོན་ཆད་སྤོས་ཀྱི་དད་ལྡན་ཞེས་བྱ་བའི་རི་མཐོང་ངམ། གསོལ་པ། མ་མཐོང་ལགས་སོ། །གལ་ཏེ་དེ་ལྟ་ན་ངའི་ཆོས་གོས་ཀྱི་གྲྭ་ནས་ཟུང་ཤིག། དེས་ཀྱང་ན་བཟའི་གྲྭ་ནས་བཟུང་བ་དང་། དེ་ནས་བཅོམ་ལྡན་འདས་དད་པའི་རྒྱལ་པོ་བཞིན་དུ་ནམ་མཁའ་ལ་ལྡིངས་ཏེ་སྤོས་ཀྱི་ངད་ལྡང་དུ་གཤེགས་ནས་ཚེ་དང་ལྡན་པ་དགའ་བོ་དང་ཐབས་གཅིག་ཏུ་གཡས་གཡོན་དུ་གཟིགས་པ་ལས་ཤིང་དྲུང་ཞིག་ན་སྤྲ་མོ་མིག་ཡ་གཅིག་ཞར་བ་ཞིག་གདོང་བཏེག་ནས་མི་གཡོ་བར་རྩེ་གཅིག་ཏུ་བཅོམ་ལྡན་འདས་ལ་བལྟས་པ་དང་། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ཁྱོད་ཀྱིས་སྤྲ་མོ་ཞར་བ་འདི་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཇི་སྙམ་དུ་སེམས། སྤྲ་མོ་ཞར་མ་འདི་སུན་ད་རི་ཀ་དང་བསྒྲུན་ན་གང་བཟང་ཞིང་ཁྱད་པར་དུ་འཕགས། གསོལ་པ། སུན་ད་རི་ཀ་དེ་ནི་ཤཱཀྱའི་རིགས་ལགས་ཏེ། ལྷའི་བུ་མོ་དང་འདྲ་བར་བྱད་བཞིན་མཆོག་ཏུ་གྱུར་ཅིང་འཇིག་རྟེན་ན་ཟླ་མ་མཆིས་པ་ལགས་པས་སྤྲ་མོ་འདི་དང་བསྒྲུན་པར་གྱུར་ན། བརྒྱའི་ཆར་ཡང་ཉེ་བར་མི་མཆི། སྟོང་གི་ཆ་དང་། ཁྲིའི་ཆ་དང་། འབུམ་གྱི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་མི་བཟོད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་ལྷའི་གཞལ་མེད་ཁང་མཐོང་ངམ། གསོལ་པ། མ་མཐོང་ལགས་སོ། །འོ་ན། ཡང་ཆོས་གོས་ཀྱི་གྲྭ་ནས་ཟུང་ཤིག། །དེ་ནས་ཀྱང་ན་བཟའ་ལ་བཟུང་བ་དང་། དད་པའི་རྒྱལ་པོ་བཞིན་ནམ་མཁའ་ལ་མངོན་པར་འཕགས་ནས་སུམ་བཅུ་རྩ་གསུམ་གྱི་ལྷའི་གནས་སུ་གཤེགས་ཏེ། ཚེ་
དང་ལྡན་པ་དགའ་བོ་ལ་ཁྱོད་སོང་ལ་ལྷའི་གཞལ་མེད་ཁང་ཁྱད་པར་དུ་འཕགས་པའི་གནས་རྣམས་ལ་ལྟོས་ཤིག། ཅེས་བཀའ་སྩལ་པ་དང་། ཚེ་དང་ལྡན་པ་དགའ་བོས་ཀྱང་དགའ་ཚལ་དང་། ཤིང་རྟ་སྣ་ཚོགས་ཀྱི་ཚལ་དང་། རྩུབ་འགྱུར་གྱི་ཚལ་དང་། འདྲེས་པའི་ཚལ་དང་། ཡོངས་འདུའི་ཚལ་དང་། ཆོས་བཟང་ཁང་ལ་སོགས་པ་ལྷའི་ཚོགས་རྣམས་ཀྱིས་ཀུན་དགའ་ར་བ་དང་། མི་ཏོག་དང་། འབྲས་བུ་དང་། རྫིང་དང་། རྫིང་བུ་དང་། རྩེད་མོ་རྩེ་ཞིང་དགའ་མགུའི་གནས་རྣམས་སུ་སོང་སྟེ། ཀུན་དུ་ཁྱབ་པར་བལྟས་ནས་མཐར་གྱིས་གྲོང་ཁྱེར་བལྟ་ན་སྡུག་ཏུ་ཞུགས་པ་ལས་གནས་གཞན་དུ་ཡང་རྔ་དང་། པི་བང་དང་། རྒྱུད་རྣམ་པ་སྣ་ཚོགས་ལས་སྒྲ་སྙན་པ་ལ་སོགས་པ་འབྱིན་པ་དང་། གནས་དེ་དང་དེ་དག་ཏུ་ལྷའི་བུ་མོ་དང་། བུ་ཕོ་ཤིན་ཏུ་མཛེས་པ་དག་ལྷན་ཅིག་རྩེ་ཞིང་འཁོད་པ་དག་མཐོང་ངོ་། །དགའ་པོས་ཀུན་དུ་བརྟགས་པ་ལས་གནས་གཞན་ཞིག་གི་གཞལ་མེད་ཁང་ན་ལྷའི་བུ་མོ་འབའ་ཞིག་ཡོད་ཀྱི། ལྷའི་བུ་ཕོ་མེད་པར་མཐོང་ནས་ལྷའི་བུ་མོ་དེ་དག་ལ་ཅིའི་རྒྱུས་གནས་གཞན་ནི་ལྷའི་བུ་མོ་དང་། ལྷའི་བུ་ཕོ་འདྲེས་པར་གནས་ནས་བདེ་བ་རྣམས་མྱོང་བར་བྱེད་ལ་ཁྱེད་ནི་གང་གི་ཕྱིར་ལྷའི་བུ་མོ་འབའ་ཞིག་ལྷན་ཅིག་གནས་ཤིང་ལྷའི་བུ་མི་སྣང་བར་གྱུར་ཞེས་དྲིས་པ་དང་། ལྷའི་བུ་མོ་དེ་དག་གིས་བཅོམ་ལྡན་འདས་ཀྱི་གཅུང་དགའ་བོ་ཞེས་བྱ་བ། བཅོམ་ལྡན་འདས་ལས་རབ་ཏུ་བྱུང་ནས་རྩེ་གཅིག་ཏུ་ཚངས་པར་སྤྱོད་པ་ཡང་དག་པར་སྤྱོད་པ་ཞིག་ཡོད་དེ། དེ་དུས་དེ་ལས་འདས་པའི་འོག་ཏུ་འདིར་སྐྱེ་བར་འགྱུར་བས་བདག་ཅག་ནི་འདིར་དེ་ལ་སྡོད་པ་ཡིན་ནོ་ཞེས་སྨྲས་སོ། །དགའ་བོས་དེ་སྐད་ཐོས་ནས་དགའ་མགུ་རངས་པས་མྱུར་ཞིང་རིངས་པར་བཅོམ་ལྡན་འདས་ག་ལ་བ་དེར་སོང་བ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ལྷ་རྣམས་ཀྱི་ཁྱད་པར་དུ་འཕགས་པའི་དངོས་པོ་དག་མཐོང་ངམ། གསོལ་པ། མཐོང་ལགས་སོ། །བཅོམ་ལྡན་འདས་ཀྱིས་དངོས་པོ་ཅི་ཞིག་ཞེས་བཀའ་སྩལ་པ་དང་། དེས་ཀྱང་ཇི་ལྟར་མཐོང་བ་རྣམས་རྒྱས་པར་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་
ཀྱིས་བཀའ་སྩལ་པ། དགའ་བོ་ཁྱོད་ཀྱིས་ལྷའི་བུ་མོ་རྣམས་མཐོང་ངམ། གསོལ་པ། མཐོང་ལགས་སོ། །ལྷའི་བུ་མོ་དེ་དག་སུན་ད་རི་ཀ་དང་། བསྒྲུན་ན་གང་གཟུགས་བཟང་ཞིང་ཁྱད་པར་དུ་འཕགས། གསོལ་པ། བཅོམ་ལྡན་འདས་སུན་ད་རི་ཀ་ལྷའི་བུ་མོ་དང་། བསྒྲུན་ན་ཇི་ལྟར་རི་སྤོས་ཀྱི་དང་ལྡང་གི་སྦྲ་མོ་ཞར་མ་སུན་ད་རི་ཀ་དང་བསྒྲུན་པ་བཞིན་དུ་བརྒྱའི་ཆར་ཡང་ཉེ་བར་མི་མཆི་སྟེ། སྟོང་གི་ཆ་དང་། འབུམ་གྱི་ཆ་ནས་རྒྱུའི་བར་དུ་ཡང་མི་བཟོད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ་སྤྱོད་པ་ཡང་དག་པར་སྤྱད་ན་དེ་ལྟ་བུའི་ཕན་ཡོན་ཁྱད་པར་དུ་འཕགས་པ་དང་ལྡན་པར་གྱུར་པས། དེང་ཁྱོད་ཀྱིས་ཚངས་པར་སྤྱོད་པར་སྤྱོད་པ་བརྟན་པར་སྤྱོད་ཅིག་དང་། ལྷར་སྐྱེས་ནས་དེ་ལྟ་བུའི་བདེ་བ་མྱོང་བར་འགྱུར་རོ། །དེས་ཀྱང་དེ་སྐད་དུ་ཐོས་ནས་དགའ་མགུ་རངས་ཏེ་ཅང་མི་ཟེར་བར་འདུག་གོ། དེ་ནས་བཅོམ་ལྡན་འདས་ཚེ་དང་ལྡན་པ་དགའ་བོ་དང་། ཐབས་གཅིག་ཏུ་ལྷའི་གནས་ནས་མི་སྣང་བར་གྱུར་ཏེ། མཉན་ཡོད་དུ་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་གཤེགས་སོ། །དེའི་ཚེ་ཚེ་དང་ལྡན་པ་དགའ་བོ་ཡང་ལྷའི་གཞལ་མེད་ཁང་ལ་བསམ་བཞིན་དུ་ཚངས་པར་སྤྱོད་པ་ཡང་དག་པར་སྤྱད་པར་གྱུར་པ་དང་། བཅོམ་ལྡན་འདས་ཀྱིས་དེའི་བསམ་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་དགེ་སློང་རྣམས་ལ་འདི་སྐད་དུ་ཁྱེད་སུ་ཡང་དགའ་བོ་དང་ལྷན་ཅིག་སྟན་གཅིག་ལམ་འདུག་ཅིག། །འཆག་ས་གཅིག་ཏུ་མ་འཆག་ཅིག། །རྡང་བུ་གཅིག་ལ་ཆོས་གོས་ལྷན་ཅིག་མ་གཞག་ཅིག། གནས་གཅིག་ཏུ་ལྷུང་བཟེད་དང་རིལ་བ་ལྷན་ཅིག་མ་གཞག་ཅིག། གནས་གཅིག་ཏུ་མདོ་སྡེ་ཀློག་པར་མ་བྱེད་ཅིག། ཁ་ཏོན་འདོན་བར། མ་བྱེད་ཅིག་ཅེས་བསྒོ་ཅིག། །ཚེ་དང་ལྡན་པ་ཀུན་དགའ་བོས་ཀྱང་བཅོམ་ལྡན་འདས་ཀྱིས་བཀའ་སྩལ་པ་དེ་བཞིན་དུ་དགེ་སློང་རྣམས་ལ་བསྒོ་བ་དང་། དགེ་སློང་རྣམས་ཀྱིས་ཀྱང་འཕགས་པའི་བཀའ་བཞིན་དུ་འཚལ་ལོ་ཞེས་སྨྲས་སོ། །དེའི་ཚེ་ཚེ་དང་ལྡན་པ་དགའ་བོ་ཡང་མང་པོ་རྣམས་ཀྱིས་སྤངས་པར་ཡང་མཐོང་བས་ཤིན་དུ་ངོ་ཚ་
ཞིང་གནོད་པར་གྱུར་ཏོ། །དེ་ནས་དུས་གཞན་ཞིག་ན་ཚེ་དང་ལྡན་པ་ཀུན་དགའ་བོ་དགེ་སློང་མང་པོ་རྣམས་དང་ལྷན་ཅིག་ཏུ་རིམ་གྲོའི་གནས་ན་ཆོས་གོས་འདྲུབ་པའི་ལས་བྱེད་པ་དེའི་ཚེ་ཚེ་དང་ལྡན་པ་དགའ་བོས་མཐོང་ནས་འདི་སྙམ་དུ་དགེ་སློང་མང་པོ་འདི་དག་ནི་བདག་ཡོངས་སུ་སྤངས་པས་ལྷན་ཅིག་ཏུ་མི་གནས་ན། ཚེ་དང་ལྡན་པ་ཀུན་དགའ་བོ་འདི་ནི་བདག་གི་ཕུ་ནུ་བོ་ཡིན་པས་ཅིས་ཀྱང་སྨད་པར་མི་བྱེད་དོ། སྙམ་དུ་བསམ་ནས་དེའི་ཐད་དུ་སོང་སྟེ། ལྷན་ཅིག་འདུག་པ་དང་། དེའི་ཚེ་ཚེ་དང་ལྡན་པ་ཀུན་དགའ་བོ་ཡང་མྱུར་དུ་ལངས་ཏེ་སོང་ངོ་། །དེས་སྨྲས་པ། ཀུན་དགའ་བོ་དགེ་སློང་གཞན་རྣམས་ནི་བདག་སྤོང་བའི་རིགས་ན། ཁྱོད་ཁོ་བའི་ཕུ་ནུ་བོ་ཡིན་ན་ཅིའི་ཕྱིར་བདག་སྤོང་བར་བྱེད་ཚེ་དང་ལྡན་པ་ཀུན་དགའ་བོས་སྨྲས་པ། ཡང་དག་པར་དེ་ལྟ་བུའི་དོན་དང་ལྡན་མོད་ཀྱི་འོན་ཀྱང་ཁྱོད་ནི་ལམ་གཞན་དུ་འགྲོ་ལ་བདག་ཀྱང་ལམ་གཞན་དུ་འགྲོ་བས་དེའི་ཕྱིར་ཕན་ཚུན་བྱོལ་པ་ཡིན་ནོ། སྨྲས་པ་གང་ནི་ཁོ་བའི་ལམ་ཡིན། གང་ནི་ཁྱོད་ཀྱི་ལམ་ཡིན། སྨྲས་པ། ཁྱོད་ནི་ལྷར་སྐྱེ་བར་མོས་ནས་ཚངས་པར་སྤྱོད་པ་སྤྱོད་དོ། །བདག་ནི་མྱ་ངན་ལས་འདས་པ་ཡོངས་སུ་གཉེར་བའི་ཕྱིར་འདོད་པ་ཀུན་ནས་ཉོན་མོངས་པ་རབ་ཏུ་བསལ་པ་ཡིན་ནོ། །ཞེས་དེ་སྐད་སྨྲས་པ་ཐོས་པ་དང། ཤིན་དུ་མི་དགའ་ཞིང་མྱ་ངན་གྱིས་ནོན་པར་གྱུར་ཏོ། དེ་ནས་བཅོམ་ལྡན་འདས་ཀྱིས་དེའི་སེམས་ཀྱི་བསམ་པ་ཐུགས་ཀྱིས་མཁྱེན་ནས་ཚེ་དང་ལྡན་པ་དགའ་བོ་ལ་བཀའ་སྩལ་པ། ཁྱོད་ཀྱིས་སྔན་ཆད་སེམས་ཅན་དམྱལ་བ་མཐོང་ངམ། གསོལ་པ། མ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ངའི་ཆོས་གོས་ཀྱི་གྲྭ་ནས་ཟུང་ཤིག། དེས་ཀྱང་ན་བཟའ་ལ་བཟུང་བ་དང་། བཅོམ་ལྡན་འདས་ཀྱིས་དེ་ཁྲིད་ནས་སེམས་ཅན་དམྱལ་བའི་གནས་སུ་གཤེགས་སོ། དེ་ནས་བཅོམ་ལྡན་འདས་ཕྱོགས་གཅིག་ཏུ་བཞུགས་ནས་ཚེ་དང་ལྡན་པ་དགའ་བོ་ལ་བཀའ་སྩལ་པ། ཁྱོད་སོང་ལ་སེམས་ཅན་དམྱལ་བ་རྣམས་ལྟོས་ཤིག། ཚེ་དང་ལྡན་པ་དགའ་བོས་ཀྱང་དེ་བཞིན་དུ་སོང་བ་ལས་སྔར་ནི་ཆུ་བོ་འབེ་ཧ་ར་ནི་མཐོང་ངོ་། །དེ་ནས་མཐར་གྱིས་རལ་གྲིའི་ལོ་མ་ནགས་དང་། བཤང་གཅིའི་འདམ་དང་། མེ་མ་མུར་གྱིས་གནས་སུ་ཕྱིན་ཏེ། དེ་དག་ཏུ་ཞུགས་ཏེ་རྣམ་པར་བལྟས་པ་ལས་སེམས་ཅན་མང་པོ་སྡུག་
བསྔལ་སྣ་ཚོགས་མྱོང་བདག་མཐོང་སྟེ། ཁ་ཅིག་ནི་སྐམ་པས་ལྕེ་དང་། སོ་དང་མིག་ཕྱུང་བ་དང་། ཁ་ཅིག་ནི་སོག་ལེས་ལུས་འདྲ་བ་དང་། ཁ་ཅིག་ནི་སྟ་རིས་རྐང་ལག་གཏུབ་པ་དང་། ཁ་ཅིག་ནི་མཚོན་ཆ་ཤག་ཏི་དང་དགྲ་སྟ་སོ་གཉིས་པ་དང་པེ་རྒས་བསྣུན་པ་དང་། ཁ་ཅིག་ནི་ལྕགས་ཀྱིས་ཐོ་བས་འཆོག་པར་བྱས་པ་དང། ཁ་ཅིག་ནི་ལྕགས་ཀྱི་ཐུ་ལུམ་ཁར་བཅུག་པ་དང་། ཁ་ཅིག་ནི་རི་རལ་གྲི་ལོ་མ་ཅན་དང་། ལྗོན་ཤིང་རལ་གྲིའི་ལོ་མ་ཅན་ལ་འཛེག་པ་དང་། གཏུན་གྱིས་རྡུང་བ་དང་། རང་ཐག་གིས་འཐག་པ་དང་། ཟངས་ཀྱི་ཀ་བ་འཇུ་བ་དང་། ལྕགས་ཀྱི་ཁྲིལ་འདུག་ནས་སྡུག་བསྔལ་མི་བཟད་པ་རྣམས་མྱོང་བར་མཐོང་ངོ་། ཁ་ཅིག་ནི་ལྕགས་ཟངས་མེ་ལྕེ་རབ་ཏུ་འབར་ཞིང་ཁོལ་བ་རབ་ཏུ་ཚ་བའི་འོད་བྱུང་བ་དག་ཏུ་སེམས་ཅན་དེ་དག་འཚོང་བས་དེ་ལྟ་བུའི་སྡུག་བསྔལ་གྱི་དངོས་པོ་མྱོང་བ་དག་མཐོང་ངོ་། །གཞན་ཡང་ལྕགས་ཟངས་སྟོང་པར་ཁོལ་ཞིང་མི་ལྕེ་རབ་ཏུ་འབར་ཞིང་ཚ་བ་སེམས་ཅན་མེད་པ་ཞིག་མཐོང་བ་དང་། ཤིན་དུ་སྐྲག་ནས་དམྱལ་བའི་སྲུངས་མ་ལ་ཀྱེ་རྒྱུ་དང་རྐྱེན་གང་གི་ཕྱིར་ལྕགས་ཟངས་གཞན་རྣམས་ན་ནི་སེམས་ཅན་དག་འཚོད་པར་བྱེད་ལ། ལྕགས་ཟངས་འདི་འབའ་ཞིག་ནི་སྟོང་པར་ཁོལ་ཞེས་དྲིས་པ་དང་། དེས་སྨྲས་པ་དང་། བཅོམ་ལྡན་འདས་ཀྱི་གཅུང་དགའ་བོ་ཞེས་བྱ་བ་དེ་ལྷར་སྐྱེ་བར་སྨོན་ནས་སེམས་རྩེ་གཅིག་ཏུ་ཚངས་པར་སྤྱད་པ་ལ་ཡག་དག་པར་སྤྱོད་པས་ལྷའི་འཇིག་རྟེན་དུ་སྐྱེས་ནས། རེ་ཤིག་བདེ་བ་མྱོང་བར་འགྱུར་ཡང་དེ་ཤི་བའི་འོག་ཏུ་ལྕགས་ཟངས་འདིར་འཇུག་པར་འགྱུར་བས་དེའི་ཕྱིར་དེང་བདག་ཅག་ལྕགས་ཟངས་མེ་སྤར་ནས་སྡོང་པ་ཡིན་ནོ། །ཞེས་སྨྲས་པ་དགའ་བོས་ཐོས་ནས་ཤིན་དུ་འཇིགས་སྐྲག་པ་སྐྱེས་ནས་པ་སྤུ་ལངས་ཏེ། ལུས་ལས་རྡུལ་བྱུང་ནས་འདི་སྙམ་སུ་འདིས་གལ་ཏེ་བདག་དགའ་བོ་ཡིན་པ་ཤེས་པར་གྱུར་ན་ནི། གསོན་པོ་ཁོ་ནར་ཟངས་ཀྱི་ནང་དུ་བོར་བར་འགྱུར་རོ། །སྙམ་དུ་བསམས་ནས་མྱུར་ཞིང་རིངས་པར་བཅོམ་ལྡན་འདས་ག་ལ་བ་དེ་ལོགས་སུ་བྲོས་ཏེ་སོག་བ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་སེམས་ཅན་དམྱལ་
པ་མཐོང་ངམ། དེས་ཀྱང་སྙིང་རྗེ་བའི་ཆུ་ལ་དུ་མཆི་མ་བླགས་ཏེ། དུས་མས་ལྕེ་ལྐུགས་པ་བཞིན་དུ་སྐད་པྲ་མོ་ཕྱུང་ནས་མཐོང་ལགས་སོ། །ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་དངོས་པོ་ཅི་ཞིག་མཐོང་། དེས་ཀྱང་ཇི་ལྟར་མཐོང་བ་རྣམས་རྒྱས་པར་བཅོམ་ལྡན་འདས་ལ་གསོལ་པ་དག་། བཅོམ་ལྡན་འདས་ཀྱིས་བཀའ་སྩལ་པ། དགའ་བོ་མེར་སྐྱེ་བར་སྨོན་པ་དང་། ལྷའི་འཇིག་རྟེན་ཡོངས་སུ་ཚོལ་བས་ཚངས་པར་སྤྱོད་པ་ཡང་དག་པར་སྤྱད་པ་ལ་ཉེས་དམིགས་དེ་ལྟ་བུ་ཡོང་པས། དེ་ལྟ་བས་ན་དིང་ཁྱོད་ཀྱིས་མྱ་ངན་ལས་འདས་པ་ཡོངས་སུ་གཉེར་བའི་བསམ་པས་ཚངས་པར་སྤྱད་པར་བྱའི་ལྷར་སྐྱེ་བ་ལ་མངོན་པར་དགའ་བས་རབ་ཏུ་བརྩོན་པར་མྱི་བྱའོ། །ཚེ་དང་ལྡན་པ་དགའ་བོས་དེ་སྐད་ཅེས་བཀའ་སྩལ་པ་ཐོས་ནས་ངོ་ཚ་བའི་སེམས་ཀྱིས་ཅང་མི་ཟེར་བར་འདུག་པ་དང་། དེ་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་ཀྱིས་མཁྱེན་ནས་སེམས་ཅན་དམྱལ་བའི་ཁམས་ནས་མི་སྣང་བར་གྱུར་ཏེ། སླར་རྒྱལ་བུ་རྒྱལ་བྱེད་ཀྱི་ཚལ་དུ་གཤེགས་ནས་ཚེ་དང་ལྡན་པ་དགའ་བོ་དང། དགེ་སློང་རྣམས་ལ་བཀའ་སྩལ་པ། ནང་གི་དྲི་མ་རྣམ་པ་གསུམ་ཡོད་དོ། འདི་ལྟ་སྟེ། འདོད་ཆགས་དང། ཞེ་སྡང་དང་། གཏི་མུག་གང་ཡིན་པ་སྟེ། དེ་དག་ནི་སྤང་བར་བྱ་བ་ཡིན་པས་ཡོངས་སུ་སྤང་བ་ལ་རབ་ཏུ་བརྩོན་ཞིང་བསླབ་པར་བྱའོ། དེ་ནས་དེའི་ཚེ་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་དུ་བཞུགས་ནས་རིང་པོར་མ་ལོན་པར་རྐྱེན་ཇི་ལྟ་བ་བཞིན་དུ་སེམས་ཅན་གདུལ་བའི་ཕྱིར་དགེ་སློང་གི་དགེ་འདུན་དང་ཐབས་གཅིག་ཏུ་ཡུལ་ཙམ་པར་གཤེགས་ནས་གང་གཱའི་རྫིང་བུའི་འགྲམ་ན་བཞུགས་སོ། །དེ་ནས་ཚེ་དང་ལྡན་པ་དགའ་བོ་དགེ་སློང་ལྔ་བརྒྱ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ཕྱོགས་གཅིག་ཏུ་འཁོད་པར་མཁྱེན་ནས། ཚེ་དང་ལྡན་པ་དགའ་བོ་ལ་བཀའ་སྩལ་པ། ང་ལ་ཆོས་ཀྱི་རྣམ་གྲངས་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་
བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བ། ཚངས་པར་སྤྱོད་པའི་ཆོས་འདི་ལྟ་སྟེ། མངལ་དུ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་ཡོད་ཀྱིས། ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང། ངས་དིང་ཁྱོད་ལ་བཤད་པར་བྱའོ། །ཚེ་དང་ལྡན་པ་དགའ་བོས་བཅོམ་ལྡན་འདས་དེ་བཞིན་ཐོས་པར་འཚལ་ལོ་ཞེས་གསོལ་པ་དང། བཅོམ་ལྡན་འདས་ཀྱིས་བཀའ་སྩལ་པ། དགའ་བོ་མའི་མངལ་དང་ལྡན་པར་གྱུར་ཀྱང་། མངལ་དུ་འཇུག་པར་འགྱུར་བ་ཡང་ཡོད། །འཇུག་པར་མི་འགྱུར་བ་ཡང་ཡོད་དོ།། །ཇི་ལྟར་སྐྱེ་བ་ལེན་ཅིང་མའི་མངལ་དུ་འཇུག་པར་འགྱུར་ཞེ་ན། གལ་ཏེ་ཕ་མ་གཉིས་འདོད་པའི་སེམས་ཀྱིས་ལྷན་ཅིག་འཁྲིག་པ་ཡང་སྤྱོད་པར་འགྱུར། །མའི་མངལ་ཡང་ཡོངས་སུ་གཙང་བར་གྱུར། དུས་ཀྱི་ཟླ་མཚན་དང་ཡང་ལྡན་པར་འགྱུར་ལ། །བར་མ་དོའི་ཕུང་པོ་ཡང་མངོན་སུམ་དུ་སྣང་བར་གྱུར་ན། དེའི་ཚེ་མའི་མངལ་དུ་འཇུག་པར་རིག་པར་བྱའོ། །དེ་ལ་བར་མདོའི་ཕུང་པོའི་དབྱིབས་དེ་ཡང་། རྣམ་པ་གཉིས་སུ་འགྱུར་ཏེ། ཁ་དོག་སྡུག་ཅིག་མཛེས་པ་དང་། ཁ་དོག་མི་སྡུག་ཅིང་མི་མཛེས་པའོ། །སེམས་ཅན་དམྱལ་བ་རྣམས་ཀྱི་བར་མདོའི་སྲིད་པའི་ཁ་དོག་མི་སྡུག་པ་ཡིན་ཏེ། འདི་ལྟ་སྟེ་དཔེར་ན་སྡོང་དུ་མ་ཚིག་པ་དང་འདྲའོ། །དུད་འགྲོ་རྣམས་ཀྱི་བར་མདོའི་སྲིད་པའི་ཁ་དོག་ནི་འདི་ལྟ་སྟེ་དཔེར་ན་དུད་པ་དང་འདྲའོ། ཡི་དགས་རྣམས་ཀྱི་བར་མདོའི་སྲིད་པའི་བར་མདོའི་སྲིད་པའི་ཁ་དོག་འདི་ལྟ་སྟེ། དཔེར་ན་ཆུ་དང་འདྲའོ། །ལྷ་དང་མི་རྣམས་ཀྱི་བར་མདོའི་སྲིད་པའི་ཁ་དོག་མི་འདི་ལྟ་སྟེ། དཔེར་ན་གསེར་གྱི་ཁ་དོག་དང་འདྲའོ། །གཟུགས་ཀྱི་ཁམས་ཀྱི་བར་མདོའི་སྲིད་པའི་ཁ་དོག་ནི་དཀར་པོ་འདུག་གོ། །གཟགས་མིད་པའི་ཁམས་ཀྱི་ལྷ་རྣམས་ལ་ནི་བར་མདོའི་སྲིད་པ་མེད་དེ། འདི་ལྟར་དེ་ནི་གཟུགས་མེད་པའི་ཕྱིར་རོ། བར་མདོའི་ཕུང་པོའི་སེམས་ཅན་གཅིག་ལག་པ་གཉིས་དང་། རྐང་པ་གཉིས་དང་ལྡན་ནོ། ཁ་ཅིག་ནི་རྐང་པ་བཞི་དང་རྐང་པ་མང་པོ་དང་ལྡན་ནོ། ཁ་ཅིག་རྐང་པ་མེད་དོ། །སྔོན་གྱི་ལ་ཇི་ལྟ་བ་བཞིན་དུ་གང་དུ་སྐྱེས་པར་གྱུར་པ་དེ་དང་དབྱིབས་འདྲ་བའི་བར་མདོའི་སྲིད་པ་མངོན་པར་
འགྲུབ་པར་འགྱུར་རོ། །ལྷའི་བར་མདོའི་སྲིད་པ་གང་ཡིན་པ་དེ་ནི་མགོ་གྱེན་དུ་ལྟའོ། མི་དང་། དུད་འགྲོ་དང་། ཡི་དགས་རྣམས་ཀྱི་ཐང་ཀར་ལྟ་ཞིང་འགྲོའོ། །སེམས་ཅན་དམྱལ་བ་རྣམས་ཀྱི་བར་མདོའི་མགོ་ཐུར་དུ་ལྟའོ། བར་མདོའི་སྲིད་པ་ཐམས་ཅད་ཀྱང་རྫུ་འཕྲུལ་དང་ལྡན་པས་ནམ་མཁའ་ལ་འགྲོ་ཞིང་ལྷའི་མིག་བཞིན་དུ་སྐྱེ་བའི་གནས་ཐག་རིང་པོ་ཡང་མཐོང་བར་ནུས་སོ། །དེ་ལ་དུས་ཀྱི་ཟླ་མཚན་དང་ལྡན་པ་ཞེས་བྱ་བ་ནི་འདི་ལྟ་སྟེ། ཟླ་མཚན་གྱི་དུས་ལ་བབ་པ་གང་ཡིན་པའོ། །དགའ་བོ་བུད་མེད་ཁ་ཅིག་ནི་ཞག་གསུམ་དང་། ཞག་ལྔ་དང་། ཟླ་བ་ཕྱེད་དང་། ཟླ་བ་གཅིག་ལོན་ནས་ཟླ་མཚན་དང་ལྡན་པ་ཡང་ཡོད་དོ། །ཁ་ཅིག་ནི་རྐྱེན་ལ་ལྟོས་པས་ཡུན་རིང་བ་ཞིག་ལོན་ནས་གདོད་ཟླ་མཚན་དང་ལྡན་པར་འགྱུར་བ་ཡང་ཡོད་དོ། །བུད་མེད་གང་ལུས་ཀྱི་མཐུ་སྟོབས་མེད་པ་དང་། སྡུག་བསྔལ་མང་པོ་མྱོང་བ་དང་། བྱང་བཞིན་མི་སྡུག་པ་དང་། བཟའ་བ་དང་། བཏུང་བ་མི་བསོད་པ་དག་ཟོས་ཤིང་འཐུངས་པ་དེ་དག་ནི་ཟླ་མཚན་འོངས་སུ་ཟིན་ཀྱང་མྱུར་དུ་འཆད་པར་འགྱུར་ཏེ། འདི་ལྟ་སྟེ་དཔེར་ན་ས་སྐམ་པོའི་ཕྱོགས་སུ་ཆུ་ཆག་ཆག་བཏབ་པའི་ཚེ་མྱུར་ཏུ་སྐམ་པར་འགྱུར་བ་བཞིན་ནོ། །ཕུང་མེད་གང་ལུས་ཀྱི་མཐུ་སྟོབས་དང་ལྡན་པ་དང་། རྟག་ཏུ་བདེ་བ་མྱོང་བ་དང་། པྱད་བཞིན་སྡུག་པ་དང་། བཟའ་བ་དང་། བཏུང་བ་བསོད་པ་དག་ཟོས་ཤིང་འཐུངས་པ་དེ་དག་གི་ཟླ་མཚན་ནི་མྱུར་དུ་ཆད་པར་མི་འགྱུར་ཏེ་འདི་ལྟ་སྟེ་དཔེར་ན་ས་གཤེར་བའི་ཕྱོགས་སུ་ཆུས་ཆག་ཆག་བཏབ་པའི་ཚེ་མྱུར་དུ་སྐམ་པར་མི་འགྱུར་བ་བཞིན་ནོ། །ཇི་ལྟར་མའི་མངལ་དུ་འཇུག་པར་མི་འགྱུར་ཞེ་ན། གལ་ཏེ་ཕའི་ཁུ་བ་བྱུང་ལ་མའི་ཁུ་བ་མ་བྱུང་བ་དང་། མའི་ཁུ་བ་བྱུང་ཕའི་ཁུ་བ་མ་བྱུང་བ་འམ། གལ་ཏེ་གཉིས་ག་བྱུང་བར་མ་གྱུར་ན་ཐམས་ཅད་མངལ་ལེན་པར་མི་འགྱུར་རོ། །གལ་ཏེ་མ་ཡོངས་སུ་དག་པར་མི་འགྱུར་ལ་ཕ་ཡོངས་སུ་དག་འགྱུར་པ་འམ། གལ་ཏེ་ཕ་ཡོངས་སུ་དག་པར་མ་གྱུར་ལམ་ཡོངས་སུ་དག་པར་གྱུར་པ་འམ། གལ་ཏེ་གཉིས་ག་ཡོངས་དག་པར་མ་གྱུར་ན་ཡང་མངལ་ལེན་པར་མི་འགྱུར་རོ། །གལ་ཏེ་མའི་མངལ་གྱུ་གནས་རླུང་ནད་ཀྱིས་ཡོངས་སུ་ཟིན་པར་གྱུར་ཏམ། འཁྲིས་པ་དང་། བད་ཀན་གྱིས་ཡོངས་ཟིན་པར་གྱུར་ཏམ། ཁྲག་གིས་ནོན་པས་མངལ་མདུང་པ་ཅན་དུ་གྱུར་ཏམ། ཤས་གང་བར་གྱུར་ཏམ།
སྨན་འཐུངས་སམ། དབུས་ནས་འདྲ་བ་འམ། གྲོག་མའི་རྐེང་འདྲ་བ་འམ། མངལ་གྱི་སྒོ་རྔ་མོའི་ཁ་ལྟ་བུ་གྱུར་ཏམ། དབུས་ཤིང་རྩ་བ་མང་པོ་ཅན་ལྟ་བུར་གྱུར་ཏམ། སྒོ་གཤོལ་མདའ་ལྟ་བུར་གྱུར་ཏམ། ཤིང་རྟའི་རྩིབས་བཞིན་སོགས་ཀར་འདུག་པ་འམ། སྤ་ལྟ་བུར་འདུག་པ་འམ། ནས་ཀྱི་གྲམ་སྐྱེས་པར་ལྟ་བུར་གྱུར་ཏམ། མངལ་འོག་ཏུ་ཟབ་པ་འམ། སྟེང་དུ་ཟབ་པ་འམ། མངལ་སྣོད་དུ་རུང་བ་མ་ཡིན་པའམ། རྟག་ཏུ་ཁྲག་ཟག་པ་འམ། ཆུ་ཟག་པ་འམ། བྱ་རོག་གི་མཆུ་ལྟར་རྟག་ཏུ་བྱེད་ཞིང འཛུམ་དུ་མི་བཏུབ་པ་འམ། སྟེང་དང་འོག་དང་ཐ་མ་ཞེང་ཆེ་ཆུང་མི་མཉམ་པ་འམ། མཐོང་མའི་མི་སྙོམས་ཤིང་འབུར་དུ་གྱུར་པ་འམ། ནང་སྲིད་བུས་གཙེས་པ་འམ། རུལ་ཞིང་མྱགས་ནས་མི་གཙང་བར་གྱུར་པ་གང་ཡིན་པ་སྟེ། གལ་ཏེ་མ་འདི་ལྟ་བུའི་སྐྱོན་དང་ལྡན་པ་གྱུར་ན་ཐམས་ཅད་མངལ་དུ་འཇུག་པར་མི་འགྱུར་རོ། །གལ་ཏེ་ཕ་མའི་ཚེ་རིགས་བཙུན་ཞིང་བར་མ་དོའི་སྲིད་པ་དམན་པར་གྱུར་ཏམ། བར་མ་དོའི་སྲིད་པ་ཚེ་རིགས་བཙུན་ཞིང་ཕ་མ་དམན་པར་གྱུར་ན་ཡང་མངལ་དུ་འཇུག་པར་མི་འགྱུར་རོ། །གལ་ཏེ་ཕ་མ་དང་བར་མ་དོའི་སྲིད་པ་གཉིས་ག་ཚེ་རིགས་བཙུན་པར་གྱུར་ཀྱང་། གལ་ཏེ་ལས་འཐུན་པར་མ་གྱུར་ཡང་མངལ་དུ་འཇུག་པར་མི་འགྱུར་རོ། །གལ་ཏེ་བར་མ་དོའི་སྲིད་པ་བདུན་ན་སྣང་བའི་ཡུལ་ལ་ཕོ་དང་མོའི་སྲིད་པ་གཉིས་མེད་པར་གྱུར་ན་ཡང་སྐྱེ་བ་ལེན་པར་མི་འགྱུར་རོ། །དགའ་བོ་བར་མ་དོའི་སྲིད་པ་ཇི་ལྟར་མའི་མངལ་དུ་འཇུག་པ་ཐོབ་པར་འགྱུར་ཞེ་ན། གལ་ཏེ་མའི་མངལ་ཡང་ཡོངས་སུ་གཙང་བར་གྱུར་ལ་བར་མ་དོའི་སྲིད་པས་འདོད་པའི་བྱ་བ་སྤྱོད་པ་མངོན་སུམ་དུ་མཐོང་གྱུར་པ་ནས་གོང་དུ་བསྟན་པ་ལྟ་བུའི་སྐྱོན་མང་པོའི་བར་ཡང་མེད་པར་གྱུར་ཏེ། ཕ་མ་དང་བུ་ཡང་ཕན་ཚུན་མངོན་པར་ཕྲད་པའི་ལས་དང་ལྡན་པར་གྱུར་ན་གདོང་མའི་མངལ་དུ་འཇུག་པར་འགྱུར་རོ། །གཞན་ཡང་བར་མ་དོའི་སྲིད་པ་དེ་མའི་མངལ་དུ་འཇུག་པའི་ཚེ་སེམས་ཕྱིན་ཅི་ལོག་ཏུ་གྱུར་ཏེ། གལ་ཏེ་ཕོ་ཡིན་ན་ནི་མ་ལ་ནི་ཆགས་པ་སྐྱེ་བར་འགྱུར་ལ་ཕ་ལ་ནི་ཞེ་སྡང་སྐྱེ་བར་འགྱུར་རོ། །གལ་ཏེ་མོ་ཡིན་ན་ནི་ཕ་ལ་ནི་ཆགས་པ་སྐྱེ་བར་འགྱུར་ལ་མ་ལ་ནི་ཞེ་སྡང་སྐྱེ་བར་འགྱུར་ཏེ། སྔོན་འདས་པའི་དུས་སུ་མངོན་པར་འདུས་བྱས་པའི་ལས་ཀྱི་དབང་གིས་ཡང་དག་པ་མ་ཡིན་པའི་འདུ་ཤེས་ཀྱིས་ལོག་པར་ཤེས་པའི་བསམ་
པ་སྐྱེད་པར་བྱེད་དེ། གྲང་བའི་འདུ་ཤེས་དང་། རླུང་ཆེན་པོ་ལངས་པ་དང་། ཆར་ཆེན་པོ་འབབ་པ་དང་། ནམ་རྨུས་པའི་འདུ་ཤེས་དང་། སྐྱེ་བོ་མང་པོའི་སྒྲ་ཅ་ཅོ་ཐོས་པའི་འདུ་ཤེས་སྐྱེད་པར་བྱེད་པས་ལས་ཀྱི་མཐོང་མའི་ཇི་ལྟ་བཞིན་དུ་ཡང་དག་པ་མ་ཡིན་པའི་འདུ་ཤེས་རྣམ་པ་བཅུ་འབྱུང་བར་འགྱུར་རོ། །བཅུ་གང་ཞེ་ན། དེ་དང་བདག་ནི་ཁང་པའི་ནང་དུ་འཇུག་གོ་སྙམ་པ་དང་། བདག་ནི་ཁང་པ་བརྩེགས་པའི་སྟེང་དུ་འཇུག་གོ་སྙམ་པ་དང་། བདག་ནི་གཞལ་མེད་ཁང་དུ་འཇུག་གོ་སྙམ་པ་དང་། བདག་ནི་ཁྲི་ལ་འཇུག་གོ་སྙམ་པ་དང་། བདག་ནི་རྩྭའི་སྤྱིལ་བུ་འཇུག་གོ་སྙམ་པ་དང་། བདག་ནི་ལོ་མའི་ཁྱིམ་དུ་འཇུག་གོ་སྙམ་པ་དང་། བདག་ནི་རྩྭ་སྟུག་པོ་འཇུག་གོ་སྙམ་པ་དང་། བདག་ནི་ནགས་ཀྱི་ནང་དུ་འཇུག་གོ་སྙམ་པ་དང་། བདག་ནི་རྩིག་པའི་བུ་གར་འཛུལ་ལོ་སྙམ་པ་དང་། བདག་ནི་ས་ཕ་མའི་གསེབ་ཏུ་འཇུག་གོ་སྙམ་དུ་འཇུག་གོ་སྙམ་དུ་སེམས་པ་གང་ཡིན་པ་སྟེ། དགའ་བོ་དེའི་ཚེ་བར་མ་དོའི་སྲིད་པ་དེ་དེ་སྙམ་དུ་བསམ་ནས་མའི་མངལ་དུ་འཇུག་པར་འགྱུར་རོ། སྐྱེ་བ་ལེན་ཅིང་མེར་མེར་པོ་ཞེས་བྱ་བར་རིག་པར་བྱ་སྟེ། དེ་ནི་ཕའི་ཁུ་བ་དང་། མའི་ཁྲག་ཡིན་ཏེ། དངོས་པོ་གཞན་མ་ཡིན་ན་ཡང་ཕ་དང་མའི་ཁུ་བ་དང་ཁྲག་འདུས་པའི་རྒྱུ་དང་རྐྱེན་དང་། རྣམ་པར་ཤེས་པའི་རྐྱེན་ལ་བརྟེན་ཏེ་ལྷན་ཅིག་གནས་པར་བྱེད་པས་འདི་ལྟ་སྟེ་དཔེར་ན་ཞོ་དང་། རྫ་མ་དང་། བསྲུབ་ཤིང་དང་། སྐྱེས་བུའི་རྩོད་པ་ལ་བརྟེན་ནས་སུར་འབྱུང་སྟེ། གཞན་ལས་མི་འབྱུང་བ་བཞིན་སུ་ཕ་མའི་གཙང་པའི་ཁུ་བ་དང་། ཁྲག་ལས་མངོན་པར་གྲུབ་པའི་ལུས་མེར་མེར་པོ་ཡང་དེ་བཞིན་དུ་རིག་པར་བྱའོ། །གཞན་ཡང་དགའ་བོ་དཔེ་རྣམ་པ་བཞི་ཡོད་ཀྱིས་ཁྱོད་ལེགས་པར་ཉོན་ཅིག། འདི་ལྟ་སྟེ་དཔེར་ན་རྩྭ་སྔོན་པོ་ལ་བརྟེན་ཏེ། སྲིན་བུ་སྐྱེ་པར་འགྱུར་པ་རྩྭ་སྔོན་པ་ཡང་སྲིན་བུ་མ་ཡིན། རྩྭ་ལས་གུད་ན་ཡང་སྲིན་བུ་མེད་མོད་ཀྱི། འོན་ཀྱང་རྩྭ་ལ་བརྟེན་པའི་རྒྱུ་དང་རྐྱེན་འདུས་པའི་དབང་གིས་སྲིན་བུ་སྐྱེས་ནས་ལུས་ཀྱི་ཁ་དོག་ཀྱང་སྔོན་པོར་འགྱུར་བ་དེ་བཞིན་དུ་དགའ་བོ་ཕའི་ཁུ་བ་དང་། མའི་ཁྲག་གི་ལུས་མེར་མེར་པོ་ཡང་འདི་ལྟར་རྒྱུ་དང་རྐྱེན་འདུས་པ་ལས་འབྱུང་བ་ཆེན་པོའི་དབང་པོ་སྐྱེ་བར་རིག་པར་བྱའོ། །
འདི་ལྟ་སྟེ་དཔེར་ན་བ་ལང་གི་ལྕི་བ་ལ་བརྟེན་ནས་སྲིན་བུ་སྐྱེ་བར་འགྱུར་པ། བ་ལང་གི་ལྕི་བ་ཡང་སྲིན་བུ་མ་ཡིན། བ་ལང་གི་ལྕི་བ་ལས་གུད་ན་ཡང་སྲིན་བུ་མེད་མདོ་ཀྱི་འོན་ཀྱང་བ་ལང་གི་ལྕི་བ་ལ་བརྟེན་པའི་རྒྱུ་རྐྱེན་འདུས་པའི་བར་གིས་སྲིན་བུ་སྐྱེས་ནས་ལུས་ཀྱི་ཁ་དོག་ཀྱང་སེར་པོ་གྱུར་པ་དེ་བཞིན་དུ་དགའ་བོ་ཕའི་ཁུ་བ་དང་། མའི་ཁྲག་གི་ལུས་མེར་མེར་པོ་ཡང་འདི་ལྟར་རྒྱུ་རྐྱེན་འདུས་པ་ལས་འབྱུང་བ་ཆེན་པོའི་དབང་པོ་སྐྱེ་བར་རིག་པར་བྱའོ། །འདི་ལྟ་སྟེ་དཔེར་ན་རྒྱ་ཤུག་ལ་བརྟེན་ནས་སྲིད་བུ་སྐྱེ་བར་གྱུར་རྒྱ་ཤུག་ཀྱང་སྲིན་བུ་མ་ཡིན། རྒྱ་ཤུག་ལས་གུད་ན་ཡང་སྲིན་བུ་མེད་མོད་ཀྱི་འོན་ཀྱང་རྒྱ་ཤུག་ལ་བརྟེན་པའི་རྒྱུ་རྐྱེན་འདུས་པའི་དབང་གིས་སྲིན་བུ་སྐྱེས་ནས་ལུས་ཀྱི་ཁ་དོག་ཀྱང་དམར་པོ་འགྱུར་བ་དེ་བཞིན་དུ་དགའ་བོ་ཕའི་ཁུ་བ་དང་། མའི་ཁྲག་གིས་ལུས་མེར་མེར་པོ་ཡང་འདི་ལྟར་རྒྱུ་དང་རྐྱེན་འདུས་པ་ལས་འབྱུང་བ་ཆེན་པོའི་དབང་པོ་སྐྱེ་བར་རིག་པར་བྱའོ། །འདི་ལྟ་སྟེ་དཔེར་ན་ཞོ་ལ་བརྟེན་ནས་སྲིན་བུ་སྐྱེ་བར་འགྱུར་བ་ལུས་ཀྱི་ཁ་དོག་ཀྱང་དཀར་པོར་འགྱུར་པ་ཞེས་བྱ་བ་ནས་རྒྱུ་དང་རྐྱེན་འདུས་པ་ལས་འབྱུང་བ་ཆེན་པོའི་སྐྱོན་འགྱུར་ཞེས་བྱ་བའི་བར་དུ་ཡང་རྒྱས་པར་སྦྱར་རོ། །གཞན་ཡང་དགའ་བོ་ཕ་མའི་མི་གཙང་བ་ལ་བརྟེན་པའི་མེར་མེར་པོའི་དབང་གིས་སའི་ཁམས་མངོན་དུ་སྣང་བས་ནི་སྲ་བའི་བྱ་བ་བྱེད་དོ། །ཆུའི་ཁམས་མངོན་དུ་སྣང་བས་ནི་གཤེར་བའི་བྱ་བ་བྱེད་དོ། །མའི་ཁམས་མངོན་དུ་སྣང་བས་ནི་དྲོ་བའི་བྱ་བ་བྱེད་དོ། །རླུང་གི་ཁམས་མངོན་དུ་སྣང་བས་ནི་ཡང་ཞིང་གཡོ་བའི་བྱ་བ་བྱེད་དོ། །དགའ་བོ་གལ་ཏེ་ཕ་མའི་མི་གཙང་བའི་ལུས་མེར་མེར་པོ་དེ་སའི་ཁམས་འབའ་ཞིག་དང་ལྡན་ལ། ཆུའི་ཁམས་མེད་པར་གྱུར་ན་ནི་སྐམས་ཏེ་གྱེས་པར་འགྱུར་བས་འདི་ལྟ་སྟེ། དཔེར་ན་ལག་པས་ཕྱེ་དང་ཐལ་བ་སྐམ་པོ་ལ་སོགས་པ་བཅད་པ་བཞིན་དུ་འགྱུར་རོ། གལ་ཏེ་ཆུའི་ཁམས་འབའ་ཞིག་དང་ལྡན་ལ་སའི་ཁམས་མེད་པར་གྱུར་ན་ནི་བོ་བར་འགྱུར་ཏེ། འདི་ལྟ་སྟེ་དཔེར་ན་འབྲུ་མར་རམ། ཆུ་ལྟ་བུར་གྱུར་པ་ཞིག་ན་ཆུའི་ཁམས་ཀྱི་དབང་གིས་ནི་སའི་ཁམས་གྱེས་པར་མི་འགྱུར་ལ་སའི་ཁམས་ཀྱི་དབང་གིས་ནི་
ཆུའི་ཁམས་པོ་བར་མི་འགྱུར་རོ། །དགའ་བོ་གལ་ཏེ་མེར་མེར་པོའི་ལུས་དང་། ཆུའི་ཁམས་དང་ལྡན་པར་འགྱུར་ལ་མེའི་ཁམས་མེད་པར་གྱུར་ན་ནི་རུལ་ཞིང་མྱགས་པར་འགྱུར་ཏེ། འདི་ལྟ་སྟེ། དཔེར་ན་དབྱར་གྱི་དུས་སུ་ཤའི་གོང་བུ་གྲིབ་མ་ལ་བཞག་པ་བཞིན་དུ་འགྱུར་རོ། །དགའ་བོ་གལ་ཏེ་མེར་མེར་པོའི་ལུས་ས་དང་ཆུ་དང་མེའི་ཁམས་འགའ་ཞིག་དང་ལྡན་ལ་རླུང་གི་ཁམས་མེད་པར་གྱུར་ན་ནི་འཕེལ་ཞིང་རྒྱས་པར་མི་འགྱུར་ཏེ། འདི་དག་ཐམས་ཅད་ནི་སྔོན་གྱི་ལས་ཀྱིས་རྒྱུ་བྱས་ནས་ཕན་ཚུན་གཅིག་གིས་རྐྱེན་གཅིག་གིས་རྒྱུ་བྱས་པ་འདི་དབང་གིས་རྣམ་པར་ཤེས་པ་སྐྱེ་བར་འགྱུར་པས་སའི་ཁམས་ཀྱིས་ནི་རྟེན་བྱེད་དོ། །ཆུའི་ཁམས་ཀྱིས་ནི་སྡུད་པར་བྱེད་དོ། །མེའི་ཁམས་ཀྱིས་ནི་ཡོངས་སུ་སྨིན་པར་བྱེད་དོ། །རླུང་གིས་ཁམས་ཀྱིས་ནི་འཕེལ་བར་བྱེད་དོ། །དགའ་བོ་འདི་ལྟ་སྟེ་དཔེར་ན་ཁུར་བ་མཁན་ན་མ་དེའི་སློབ་མས་ཁུར་བ་ལེགས་པར་བཙོས་ནས་དབུགས་ཀྱིས་བས་ཏེ་རྒྱ་ཆེར་འཕེལ་ཞིང་ནང་ཁོང་སྟོང་དུ་བྱེད་པ་ཇི་ལྟ་བ་བཞིན་ནོ། །འདི་ལྟ་སྟེ། དཔེར་ན་པད་མའི་རྩ་བ་ཇི་ལྟ་བ་བཞིན་དུ་ནང་གི་ལུས་ཀྱི་འབྱུང་བ་ཆེན་པོས་དང་། ཆུ་དང་། མེ་དང་། རླུང་གི་ཁམས་ལས་ཀྱི་སྟོབས་ཀྱིས་འཕེལ་བར་བྱེད་པ་ཡང་དེ་བཞིན་དུ་རིག་པར་བྱའོ། །དགའ་བོ་ཕ་མའི་མི་གཙང་བ་ལས་མེར་མེར་པོའི་ལུས་འབྱུང་བ་ཡང་མ་ཡིན། ཕའི་རྐང་ལས་ཀྱང་མ་ཡིན། མའི་མངལ་ནས་ཀྱང་མ་ཡིན། ལས་ལས་ཀྱང་མ་ཡིན། རྒྱུ་ལས་ཀྱང་མ་ཡིན་མོད་ཀྱི། འོན་ཀྱང་མང་པོ་འདི་དག་ཚོགས་པའི་དབང་གིས་མངལ་མངོན་པར་འགྲུབ་པར་བྱེད་དོ། འདི་ལྟ་སྟེ། དཔེར་ན་ས་བོན་སར་པ་རླུང་དང་ཉི་མས་ཉམས་པར་བྱས་པ། སྲ་ཞིང་སྙིང་པོ་དང་བཅས་པ། བུ་ག་མ་བྱུང་བ། ཤིན་སུ་ལེགས་པར་སྦས་པ་ཞིང་གཤིན་པ་ལ་བཏབ་ནས་རླན་གྱི་རྒྱུ་དང་རྐྱེན་འདུས་པར་གྱུར་ན་གདོད་མྱུ་གུ་དང་། སྡོང་བུ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་རིམ་གྱིས་སྐྱེ་ཞིག་འཕེལ་བར་འགྱུར་ཏེ་དགའ་བོས་ས་བོན་དེ་ཡང་རྐྱེན་འདུས་པ་དང་བྲལ་བ་ལས་མྱུ་གུ་ལ་སོགས་པ་སྐྱེད་པར་བྱེད་པ་མ་ཡིན་པ་དེ་བཞིན་སུ་ཕམ་འབའ་ཞིག་དང་། ལས་འབའ་ཞིག་དང་། རྐྱེན་གཞན་འབའ་ཞིག་ལས་མངལ་དུ་སྐྱེ་བ་ཐོབ་པ་མ་ཡིན་གྱི་ཕ་མའི་ཁུ་བ་དང་། ཁྲག་དང་། རྒྱུ་དང་རྐྱེན་འདུས་པའི་དབང་
གིས་མངལ་མངོན་པར་འགྲུབ་པར་རིག་པར་བྱའོ། །དགའ་བོ་འདི་ལྟ་སྟེ། དཔེར་ན་མིག་དང་ལྡན་པའི་སྐྱེས་བུས་མེ་ཡོངས་སུ་ཚོལ་བའི་ཕྱིར་ནོར་བུ་མེ་ཤེལ་ཁྱེར་ནས་ཉི་མ་ལ་བཞག་སྟེ་བ་ལང་གི་ལྕི་བ་སྐམ་པོའི་སྟེང་དུ་བཞག་ན་གདོད་མི་འབྱུང་བར་འགྱུར་བ་དེ་བཞིན་དུ་ཕའི་ཁུ་བ་དང་། ཁྲག་དང་། རྒྱུ་དང་རྐྱེན་འདུས་པ་ལ་རྟེན་པའི་ཕྱོགས་གདོད་མངལ་མངོན་པར་འགྲུབ་པ་ཡང་དེ་བཞིན་དུ་རིག་པར་བྱའོ། །ཕ་མའི་མི་གཙང་བ་ལས་མེར་མེར་པོ་མངོན་པར་གྲུབ་པ་གང་ཡིན་པ་དེ་ནི་གཟུགས་ཞེས་བྱའོ། །ཚོ་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གང་ཡིན་པ་དེ་ནི་མིང་ཞེས་བྱ་སྟེ། དེ་ནི་མིང་དང་གཟུགས་ཞེས་བྱའོ། །མིང་དང་གཟུགས་ཀྱི་ཕུང་པོ་ཤིན་དུ་སྨད་པར་བྱ་བའི་སྲིད་པ་རྣམས་སུ་སྐྱེ་བ་ལེན་པར་བྱེད་པ་འདི་ལ་ནི་ངས་ཕྱོགས་ཅུང་ཟད་ཙམ་འམ། སྐད་ཅིག་ཙམ་དུ་ཡང་བསྔགས་པ་བརྗོད་པར་མི་བྱེད་དོ། །དེ་ཅིའི་ཕྱིར་ཞེ་ན། སྲིད་པ་རྣམས་སུ་སྐྱེ་བར་འགྱུར་བ་གང་ཡིན་པ་དེ་ནི་སྡུག་བསྔལ་ཆེན་པོ་ཡིན་པས་སོ། །འདི་ལྟ་སྟེ། དཔེར་ན་སྐྱུག་པ་ནི་ཇི་ལྟར་ཆུང་ཡང་མནམ་པར་བྱེད་པ་དེ་བཞིན་དུ་སྲིད་པ་རྣམས་སུ་སྐྱེས་པ་གང་ཡིན་པ་དེ་ནི་ཆུང་ངུ་ཡང་སྡུག་བསྔལ་ཡིན་པར་རིག་པར་བྱའོ། །ཉེ་བར་ལེན་པའི་ཕུང་པོ་ལྔ་པོ་གཟུགས་དང། ཚོར་བ་དང་། འདུ་ཤེས་དང། འདུ་བྱེད་དང། རྣམ་པར་ཤེས་པ་གང་ཡིན་པ་དེ་དག་ཐམས་ཅད་ནི་སྐྱེ་བ་དང། གནས་པ་དང། འཕེལ་བ་དང། ཉམས་ཤིང་འཇིག་པ་དང་ལྡན་ཏེ་སྐྱེ་བ་གང་ཡིན་པ་དེ་ནི་སྡུག་བསྔལ་པ་ཡིན་ནོ། གནས་པ་གང་ཡིན་པ་དེ་ནི་ན་བ་ཡིན་ནོ། །འཕེལ་བ་དང། ཉམས་ཤིང་འཇིག་པ་གང་ཡིན་པ་དེ་ནི་རྒ་ཤི་ཡིན་ཏེ། དེ་ལྟ་བས་ན་དགའ་བོ་མཁས་པ་སུ་ཞིག་སྲིད་པའི་རྒྱ་མཚོ་འདིར་སྲིད་པའི་རོ་བསྐྱེད་ནས་མའི་མངལ་ན་ཉལ་ཞིང་འདི་འདྲ་བའི་སྡུག་བསྔལ་མི་བཟད་པ་ཡང་དག་པར་ཉམས་སུ་མྱོང་བར་བྱེད། གཞན་ཡང་དགའ་བོ་འདི་ལྟར་མིའི་མངལ་དུ་ཞུགས་པ་དེའི་གྲངས་ཀྱང་མདོར་བསྡུ་ན། ཞག་བདུན་ཕྲག་སུམ་བཅུ་རྩ་བརྒྱད་ཡོད་པར་རིག་པར་བྱ་སྟེ། ཞག་བདུན་ཕྲག་དང་པོའི་ཚེ་མའི་མངལ་མི་གཙལ་པ་ཐོག་མའི་གནས་སུ་ཉལ་བས་འདི་ལྟ་སྟེ། དཔེར་ན་ཟངས་རབ་ཏུ་ཚ་བའི་ནད་དུ་བཙོས་ཤིང་བརྔོས་པ་བཞིན་
དུ་ལུས་ཀྱི་དབང་པོ་དང་རྣམ་པར་ཤེས་པ་ལྷན་ཅིག་ཏུ་སྡུག་བསྔལ་མི་བཟད་པ་མྱོང་བ་གང་ཡིན་པ་དེ་ནི་མེར་མེར་པོ་ཞེས་བྱའོ། དེའི་དབྱིབས་ནི་འདི་ལྟ་སྟེ། དཔེར་ན་འབྲས་ཀྱི་ཁུ་བ་འམ། ཞོའི་པྲིས་མ་དང་འདྲ་བས་ཞག་བདུན་གྱི་བར་དུ་ནང་དུ་བཙོས། རབ་ཏུ་བཙོས་པས་ན་སའི་ཁམས་སྲ་བ་ཉི་དང་། ཆུའི་ཁམས་གཤེར་བ་ཉི་དང་། མེའི་ཁམས་དྲོ་བ་ཉིད་དང་། རླུང་གི་ཁམས་ཡང་ཞིང་གཡོ་བ་ཉིད་གདོང་མངོན་དུ་སྣང་བར་འགྱུར་རོ། །དགའ་བོ་ཞག་བདུན་ཕྲག་གཉིས་པ་ལ་མའི་མངལ་ན་མི་གཙང་བའི་གནས་སུ་འདི་ལྟ་སྟེ། དཔེར་ན་ཟངས་ཀྱི་ནང་དུ་བཙོས་ཤིང་བརྔོས་པ་བཞིན་དུ་ལུས་ཀྱི་དབང་པོ་དང་རྣམ་པར་ཤེས་པ་ལྷན་ཅིག་ཏུ་སྡུག་བསྔལ་མི་བཟད་པ་མྱོང་བ་ན་མའི་མངལ་ནས་ཀུན་དུ་རེག་པ་ཞེས་བྱ་བའི་རླུང་སྔོན་གྱི་ལས་ཀྱི་དབང་གིས་རང་བྱུང་ནས་མངལ་དེ་ལ་རེག་པ་གང་ཡིན་པ་དེ་ནི་ནུར་ནུར་པོ་ཞེས་བྱའོ། །དེའི་དབྱིབས་ནི་ཞོ་སྐ་བ་འམ། མར་འཁྱགས་པ་འདྲ་སྟེ། ཞག་བདུན་གྱི་བར་དུ་ནང་དུ་བཙོས་རབ་ཏུ་སོས་པས་ན་ཁམས་བཞི་པོ་དག་མངོན་དུ་སྣང་བར་འགྱུར་རོ། །དགའ་བོ་ཞག་བདུན་ཕྲག་གསུམ་པ་ལ་ཡང་རྒྱས་པར་སྔ་མ་བཞིན་དུ་སྦྱར་ཏེ། མའི་མངལ་ནས་མཛོད་ཁ་ཞེས་བྱ་བའི་རླུང་སྔོན་གྱི་ལས་ཀྱི་དབང་གིས་བྱུང་ནས་མངལ་དེ་ལ་རེག་པ་གང་ཡིན་པ་དེ་ནི་ལྟར་ལྟར་པོ་ཞེས་བྱའོ། །དེའི་དབྱིབས་ནི་འདི་ལྟ་སྟེ། ལྕགས་ཀྱི་ཐུར་མ་འམ། སྲིན་བུ་གྲོལ་མ་འདྲ་སྟེ། ཞག་བདུན་གྱི་བར་དུ་ཡང་བཙོས་རབ་ཏུ་བཙོས་པས་ན་ཁམས་བཞི་པོ་དག་མངོན་དུ་སྣང་བར་འགྱུར་རོ། །དགའ་བོ་ཞག་བདུན་ཕྲག་བཞི་པ་ལ་ཡང་རྒྱས་པར་སྔ་མ་བཞིན་དུ་སྦྱར་ཏེ། མའི་མངལ་ནས་ནང་རབ་ཏུ་འབྱེད་པ་ཞེས་བྱ་བའི་རླུང་སྔོན་གྱི་ལས་ལས་བྱུང་ནས་མངལ་ན་གནས་པའི་ཟུག་རྔུ་རབ་ཏུ་འབར་བ་འབུད་པར་བྱེད་པར་བྱེད་པ་གང་ཡིན་པ་དེ་ནི་མཁྲང་འགྱུར་ཞེས་བྱའོ། །དེའི་དབྱིབས་ནི་བདར་རམ་མཆི་གུ་འདྲ་སྟེ། ཞག་བདུན་གྱི་བར་དུ་ཞེས་བྱ་བ་ནས་ཁམས་བཞི་པོ་དག་མངོན་དུ་སྣང་བར་འགྱུར་ཞེས་བྱ་བའི་བར་དུ་སྔ་མ་བཞིན་ནོ། །དགའ་བོ་ཞག་བདུན་ཕྲག་ལྔ་པ་ལ་ཡང་རྒྱས་པར་སྔ་མ་བཞིན་དུ་སྦྱར་ཏེ། མའི་མངལ་ནས་ཡང་དག་པར་སྡུད་པ་ཞེས་བྱ་བའི་རླུང་འབྱུང་སྟེ། རླུང་དེས་
མངལ་ལ་རེག་པར་གྱུར་བ་ན་མཚན་མ་ལྔ་པོ་འདི་ལྟ་སྟེ། དཔུང་པ་གཉིས་དང་། བརླ་གཉིས་དང་། མགོ་བོའི་མཚན་མ་མངོན་དུ་འབྱུང་བར་བྱེད་དེ། འདི་ལྟ་སྟེ། དཔེར་ན་དབྱར་གྱི་དུས་སུ་ཆར་འབབ་པའི་ཚེ་ལྗོན་ཤིང་དང་། ནགས་ཚལ་རྣམས་ཡལ་ག་དང་ལོ་མ་རྒྱས་ཤིང་འཕེལ་བར་བྱེད་པ་དེ་བཞིན་དུ་མཚམས་ལྔ་པོ་དག་རབ་ཏུ་སྣང་བར་བྱེད་དོ། དགའ་བོ་ཞག་བདུན་ཕྲག་དྲུག་པ་ལ་ནི་མའི་མངལ་ནས་རྒྱ་ཆེན་པོ་ཞེས་བྱའི་རླུང་འབྱུང་སྟེ། རླུང་དེ་མངལ་ལ་རེག་པར་གྱུར་པ་ན་མཚན་མ་བཞི་པོ་འདི་ལྟ་སྟེ། ལག་ངར་གཉིས་དང། རྗེ་ངར་གཉིས་འབྱུང་བར་བྱེད་དོ། འདི་ལྟ་སྟེ། དཔེར་ན་དབྱར་ཆར་འབབ་པའི་ཚེ་རྩྭ་ཤིང་ཡལ་ག་སྐྱེ་བར་འགྱུར་བ་དེ་བཞིན་དུ་མཚན་མ་བཞི་པོ་དག་རབ་ཏུ་སྣང་བར་བྱེད་དོ། །དགའ་བོ་ཞག་བདུན་ཕྲག་བདུན་པ་ལ་ནི་མའི་མངལ་ནས་འབྱིལ་བར་བྱེད་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་དེ་ལ་རེག་པར་གྱུར་པ་ན་མཚན་མ་བཞི་པོ་འདི་ལྟ་སྟེ། ལག་པའི་བོལ་གཉིས་དང་། རྐང་པའི་བོལ་གཉིས་སུ་འབྱུང་བར་བྱེད་དེ། འདི་ལྟ་སྟེ། དཔེར་ན་དབུ་བ་འདུས་པ་འམ། ཉ་ལྕིབས་བཞིན་དུ་མཚན་མ་བཞི་པོ་དེ་དག་དང་ལྡན་པར་འགྱུར་རོ། །དགའ་བོ་ཞག་བདུན་ཕྲག་བརྒྱད་པ་ལ་ནི་མའི་མངལ་ནས་ཟློག་ཅིང་སྒྱུར་བར་བྱེད་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ལ་རེག་པར་གྱུར་པ་ན་མཚན་མ་ཉི་ཤུ་པོ་འདི་ལྟ་སྟེ། ལག་པ་དང་རྐང་པའི་སོར་མོ་བཅུ་ཐོག་མ་ཁོར་ར་སྣང་བར་བྱེད་དེ། འདི་ལྟ་སྟེ། དཔེར་ན་དབྱར་ཆར་འབབ་པའི་ཚེ་ལྗོན་ཤིང་གི་རྩ་བ་དང་པོར་སྐྱེས་པ་ཇི་ལྟ་བ་བཞིན་ནོ། །དགའ་བོ་ཞག་བདུན་ཕྲག་དགུ་པ་ལ་ནི་མའི་མངལ་ནས་རྣམ་པར་འབྱེད་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ལ་རེག་པར་གྱུར་པ་ན་མཚན་མ་དགུ་པོ་འདི་ལྟ་སྟེ། མིག་གཉིས་དང་། རྣ་བ་གཉིས་དང་། སྣ་གཉིས་དང་། ཁ་དང་། བཤང་བ་དང་། གཅི་བའི་བུ་ག་གཉིས་སྣང་བར་བྱེད་དོ། དགའ་བོ་ཞག་བདུན་ཕྲག་བཅུ་ལ་ནི་མའི་མངལ་ནས་སྲ་བར་བྱེད་པ་ཞེས་བྱ་བའི་རླུང་འབྱུང་སྟེ། རླུང་དེ་མངལ་ན་གནས་པ་སྲ་ཞིང་བརྟན་པར་བྱེད་དོ། །ཞག་བདུན་པ་དེ་ཉིད་ཀྱི་ཚེ་མའི་མངལ་ནས་གཞན་ཡང་ཀུན་ནས་སྐྱེ་བ་ཞེས་བྱ་བའི་རླུང་བྱུང་
ནས་དེས་མངལ་གྱི་གནས་བུས་ནས་རྒྱས་པར་བྱེད་དེ། འདི་ལྟ་སྟེ། དཔེར་ན་རྐྱལ་པ་བུས་པ་རྒྱས་པར་ཇི་ལྟ་བ་བཞིན་ནོ། །།།བམ་པོ་གཉིས་པ། དགའ་བོ་ཞག་བདུན་ཕྲག་བཅུ་གཅིག་པ་ལ་ནི་མའི་མངལ་ནས་བུ་ག་སྣང་བ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ལ་རེག་པར་གྱུར་པ་ན་མངལ་ན་གནས་པ་དེ་ཁོང་སྟོང་དུ་བྱེད་པས་བུ་ག་དགུ་པོ་དག་རབ་ཏུ་སྣང་བར་འགྱུར་ཏེ། གལ་ཏེ་མ་འགྲོ་བ་འམ། འགྲེང་བ་འམ། འདུག་པ་འམ། ཉལ་བ་འམ། ལས་དག་བྱས་པར་གྱུར་ན། དེའི་ཚེ་རླུང་དེ་འཁྱིལ་པ་ཉིད་ཀྱིས་ཁོང་སྟོང་དུ་གྱུར་ནས་བུ་ག་རྣམས་མཐར་གྱིས་ཆེ་བར་བྱེད་དོ། །གལ་ཏེ་རླུང་སྟེང་གི་ཕྱོགས་སུ་སོང་ན་ནི་སྟེང་གི་བུ་ག་འབྱིན་པར་བྱེད་ལ། གལ་ཏེ་འོག་གི་ཕྱོགས་སུ་སོང་ན་ནི། འོག་གི་བུ་ག་འབྱིན་པར་བྱེད་དེ། འདི་ལྟ་སྟེ། དཔེར་ན་མགར་བ་འམ། དེའི་སློབ་མས་སྦུད་པ་བུས་པ་ན་སྟེང་དང་འོག་ཏུ་རྒྱུ་ཞིང་རླུང་གི་བྱ་བ་བྱས་ནས་འགག་པར་གྱུར་པ་ཇི་ལྟ་བ་བཞིན་ནོ། །དགའ་བོ་ཞག་བདུན་ཕྲག་བཅུ་གཉིས་པ་ལ་ནི་མའི་མངལ་ནས་ཡོན་པའི་སྒོ་ཞེས་བྱ་བའི་རླུང་འབྱུང་སྟེ། རླུང་དེས་མངལ་བུས་པས་གཡས་གཡོན་གཉིས་ཀྱི་ནད་གྲོལ་གྱི་རྒྱུ་མ་དེ་དག་གཉེ་མ་དག་འགྲུབ་པར་བྱེད་དེ། འདི་ལྟ་སྟེ། དཔེར་ན་པད་མའི་རྩ་བ་བཞིན་དུ་ལུས་ལ་བརྟེན་ཏེ་སྣོལ་མར་གནས་སོ། ཞག་བདུན་པ་དེ་ཉིད་ཀྱི་ཚེ་གཞན་ཡང་སྤུ་བརྒྱུས་པ་ཞེས་བྱ་བའི་རླུང་འབྱུང་སྟེ། མངལ་གྱི་ནང་ཉིད་དུ་ལྷག་ཆད་མེད་པར་ཚིགས་སུ་སུམ་བརྒྱ་སུམ་བཅུ་སྐྱེད་པར་བྱེད་དོ། །གཞན་ཡང་རླུང་དེའི་སྟོབས་ཀྱིས་གནད་བརྒྱ་རྩ་གཅིག་འབྱུང་བར་བྱེད་དོ། །དགའ་བོ་ཞག་བདུན་ཕྲག་བཅུ་གསུམ་པ་ལ་ནི་མའི་མངལ་ནས་སྔ་མའི་རླུང་དེ་ཉིད་ཀྱི་སྟོབས་ཀྱིས་བཀྲེས་པ་དང་། སྐོམ་པར་ཤེས་པར་བྱེད་པས་མས་ཁྲོས་ཤིང་འཐུངས་པའི་བཅུ་ཇི་སྙེད་པ་དག་ལྟེ་བར་ཞུགས་ནས་དེའི་ལུས་ལ་ཕན་འདོགས་པར་བྱེད་དོ། །དགའ་བོ་ཞག་བདུན་ཕྲག་བཅུ་བཞི་པ་ལ་ནི་མའི་མངལ་ནས་སྐུད་པའི་ཁ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་རྩ་རྒྱུས་སྟོང་སྐྱེད་པར་བྱེད་དེ། ཉིས་བརྒྱ་ལྔ་བཅུ་ནི་ལུས་ཀྱི་མདུན་ན་གནས་སོ། །ཉིས་བརྒྱ་ལྔ་བཅུ་ནི་ལུས་ཀྱི་རྒྱ་པ་ནས་གནས་སོ། །ཉིས་བརྒྱ་ལྔ་བཅུ་ནི་
ལུས་ཀྱི་གཡས་ཕྱོགས་ན་གནས་སོ། །ཉིས་བརྒྱ་ལྔ་བཅུ་ནི་ལུས་ཀྱི་གཡོན་ཕྱོགས་ན་གནས་སོ། །དགའ་བོ་ཞག་བདུན་ཕྲག་བཅྭ་ལྔ་པ་ལ་ནི་མའི་མངལ་ནས་པད་མ་ཞེས་བྱ་བའི་རླུང་འབྱུང་སྟེ། མངལ་ན་གནས་པ་དེའི་ལུས་ལ་རྩར་རྒྱུ་བ་རྣམ་པ་ཉི་ཤུ་བསྐྱེད་ནས་རོ་རྣམས་བཞིབ་པར་བྱེད་དེ། དེ་ཡང་ལུས་ཀྱི་མདུན་ན་ལྔ་དང་། ལུས་ཀྱི་རྒྱབ་ན་ལྔ་དང་། ལུས་ཀྱི་གཡས་ན་ལྔ་དང་། ལུས་ཀྱི་གཡོན་ན་ལྔ་ཡོད་དོ། །རྩར་རྒྱུ་བ་དེ་ཡང་མིང་སྣ་ཚོགས་དང་། ཁ་དོག་སྣ་ཚོགས་དང་ལྡན་པས་མིང་ནི་ས་ག་ཞེས་ཀྱང་བྱ། སྟོབས་ཤེས་ཀྱང་བྱ། བརྟན་པ་ཞེས་ཀྱང་བྱ། མཐུ་དང་ལྡན་པ་ཞེས་ཀྱང་བྱའོ། །ཁ་དོག་ནི་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། དཔལ་ལྟ་བུའི་སེར་སྐྱ་དང་། མར་དང་། འབྲུམ་མར་དང་། ཞོ་ལ་སོགས་པའི་ཁ་དོག་དང་ལྡན་པ་གང་ཡིན་པ་དང་། གཞན་ཡང་ཁ་དོག་མང་པོ་ཕན་ཚུན་འདྲེས་པ་གང་ཡིན་པའོ། །དགའ་བོ་རྩར་རྒྱུ་བ་ཉི་ཤུ་པོ་དག་རེ་རེ་ལ་ཡང་ཡན་ལག་བཞི་བཅུ་བཞི་བཅུ་ཡོད་པས་གཅིག་ཏུ་སྡུས་ན་དབུགས་གཞི་པའི་རྩར་རྒྱུ་བ་བརྒྱད་བརྒྱ་ཡོད་པར་འགྱུར་ཏེ། ལུས་ཀྱི་མདུན་དང་། རྒྱབ་དང་། གཡས་དང་། གཡོན་གྱི་ཕྱོགས་རེ་རེ་ལ་ཡང་ཉིས་བརྒྱ་ཉིས་བརྒྱ་ཡོད་དོ། དགའ་བོ་རྩར་རྒྱུ་པ་བརྒྱད་བརྒྱ་པོ་དེ་དག་རེ་རེ་ལ་ཡང་རྩར་རྒྱུ་བའི་ཡན་ལག་ཕན་ཚུན་འབྲེལ་བ་བརྒྱ་བརྒྱ་ཡོད་པས་གཅིག་ཏུ་བསྡུས་ན་སྟོང་ཕྲག་བརྒྱད་བཅུ་ཡོད་པར་འགྱུར་ཏེ། སྟོང་ཕྲག་ཉི་ཤུ་ནི་ལུས་ཀྱི་མདུན་ན་ཡོད་དོ། །སྟོང་ཕྲག་ཉི་ཤུ་ནི་ལུས་ཀྱི་རྒྱ་བ་ན་ཡོད་དོ། །སྟོང་ཕྲག་ཉི་ཤུ་ནི་ལུས་ཀྱི་གཡས་ཕྱོགས་ན་ཡོད་དོ། །སྟོང་ཕྲག་ཉི་ཤུ་ནི་ལུས་ཀྱི་གཡོན་ཕྱོགས་ན་ཡོད་དོ། །དགའ་བོ་རྩར་རྒྱུ་བ་སྟོང་ཕྲག་བརྒྱད་བཅུ་པོ་དང་ག་ལ་ཡང་བུ་ག་མང་པོ་ཡོད་པས་བུ་ག་གཅིག་དང་གཉིས་དང་ལྡན་པ་ནས་བུ་ག་བདུན་གྱི་བར་དང་ལྡན་པ་ཡང་ཡོད་དོ། །དེ་དག་རེ་རེ་ལ་ཡང་སྤུའི་ཁུང་བུ་རེ་རེ་དང་སོ་སོར་ཕན་ཚུན་འབྲེལ་ཏེ། འདི་ལྟ་སྟེ། དཔེར་ན་པད་མའི་རྩ་བ་ལ་བུ་ག་མང་པོ་ཡོད་པ་ཇི་ལྟ་བ་བཞིན་ནོ། །དགའ་བོ་ཞག་བདུན་ཕྲག་བཅུ་དྲུག་པ་ལ་ནི་བདུད་རྩི་འགྲོ་བ་ཞེས་བྱ་བའི་རླུང་འབྱུང་སྟེ། རླུང་དེའི་སྦྱོར་བས་
མངལ་ན་གནས་པ་དེའི་མིག་གི་སྐྱེ་མཆེད་གཉིས་དང་། རྣ་བའི་སྐྱེ་མཆེད་གཉིས་དང་། །སྣའི་སྐྱེ་མཆེད་གཉིས་དང་། ཁའི་སྒོ་དང་། མིད་པའི་བུ་ག་དང་། སྙིང་གི་ཁོ་ར་ཁོར་ཡུག་དང་། བཟའ་བ་དང་། བཏུང་བ་དང་། བཅའ་བ་དང་། མྱངས་པ་རྣམས་འཇུག་པར་འགྱུར་བའི་གནས་རྣམ་པར་འཇོག་ཅིང་དབུགས་ཕྱི་ནང་དུ་རྒྱུ་བ་ཐོགས་པ་མེད་པར་བྱེད་དེ། འདི་ལྟ་སྟེ། དཔེར་ན་རྫ་མཁན་ནམ་དེའི་སློབ་མས་འཇིམ་པའི་གོང་བུ་བླངས་ཏེ་འཁོར་ལོའི་སྟེང་དུ་བཞག་ནས་ཇི་ལྟར་མོས་པ་བཞིན་དུ་སྣོད་ཀྱི་རྣམ་པར་དབྱིབས་ཐ་དད་པ་སྤེལ་ཞིང་རྣམ་པར་འཇོག་པ་དེ་བཞིན་དུ་ལུས་ཀྱི་རླུང་གི་དབང་གིས་ཀྱང་དེ་བཞིན་དུ་མིག་ལ་སོགས་པའི་སྐྱེ་མཆེད་ཇི་ལྟར་མོས་པ་བཞིན་དུ་རྣམ་པར་འཇོག་ཅིང་དབུགས་ཕྱི་ནང་དུ་རྒྱུ་བ་ཐོགས་པ་མེད་པར་བྱེད་དོ། །དགའ་བོ་ཞག་བདུན་ཕྲག་བཅུ་བདུན་པ་ལ་ནི་མའི་མངལ་ནས་འབྲི་གདོང་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་མིག་དང་། རྣ་བ་དང་། སྣ་དང་། ཁའི་སྒོ་དང་། མིད་པ་དང་། སྙིང་གི་ཕྱོགས་དང་། ཟས་འཇུག་པར་འགྱུར་པའི་གནས་རྣམས་ཀུན་དུ་དང་བར་བྱེད་ཅིང་དབུགས་ཕྱི་ནང་དུ་རྒྱུ་བའི་གནས་ཐོགས་པ་མེད་པར་བྱེད་དེ། འདི་ལྟ་སྟེ། དཔེར་ན་ཁྱེའུ་འམ། བུ་མོ་མཁས་པ་ཞིག་གིས་མེ་ལོང་གི་དཀྱིལ་འཁོར་རྡུལ་གྱིས་གཡོགས་པ་བླངས་ནས་འབྲུ་མར་དང་། ཐལ་བ་དང་། སའི་ཕྱེ་མ་ཞིབ་མོ་དག་གིས་བྱི་དོར་བྱས་ན་གསལ་བར་འགྱུར་བ་དེ་བཞིན་དུ་ལུས་ཀྱི་རླུང་གི་དབང་གིས་སྐྱེ་མཆེད་རྣམས་རྣམ་པར་འཇོག་ཅིང་ཐོགས་པ་མེད་པར་བྱེད་དོ། །དགའ་བོ་ཞག་བདུན་ཕྲག་བཅྭ་བརྒྱད་པ་ལ་ནི་མའི་མངལ་ནས་དྲི་མ་མེད་པ་ཞེས་བྱ་བའི་རླུང་འབྱུང་སྟེ། མངལ་གནས་པ་དེའི་སྐྱེ་མཆེད་དྲུག་པོ་དག་ཡོངས་སུ་དག་པར་བྱེད་དེ། འདི་ལྟ་སྟེ། དཔེར་ན་ཉི་མ་དང་ཟླ་བའི་དཀྱིལ་འཁོར་སྤྲིན་ཆེན་པོས་ཁེབས་པ་རླུང་དྲག་པོ་ལངས་ནས་བུས་ཏེ་ཕྱོགས་བཞིར་གཏོར་བར་གྱུར་ན་འོད་དང་ལྡན་ཞིང་ཡོངས་སུ་དག་པར་འགྱུར་བ་དེ་བཞིན་དུ་དགའ་བོ་ལས་ཀྱི་རླུང་དེའི་སྟོབས་ཀྱིས་མངལ་ན་གནས་པ་དེའི་དབང་པོ་དྲུག་ཡོངས་སུ་དག་པར་བྱེད་པ་ཡང་དེ་བཞིན་དུ་རིག་པར་བྱའོ། །དགའ་བོ་ཞག་བདུན་ཕྲག་བཅུ་དགུ་པ་ལ་ནི་
མའི་མངལ་ན་གནས་པ་དེའི་དབང་པོ་བཞི་པོ་མིག་དང་། རྣ་བ་དང་། སྣ་དང་། ལྕེའི་དབང་པོ་དག་མངོན་པར་འགྲུབ་པར་བྱེད་དོ། དང་པོ་མའི་མངལ་དུ་འཇུག་པའི་ཚེ་ཐོག་མ་ཁོ་ནར་དབང་པོ་གསུམ་ཐོབ་པར་འགྱུར་ཏེ། འདི་ལྟ་སྟེ། ལུས་དང་། སྲོག་དང་། ཡིད་ཀྱི་དབང་པོ་གང་ཡིན་པའོ། དགའ་བོ་ཞག་བདུན་ཕྲག་ཉི་ཤུ་པ་ལ་ནི་མའི་མངལ་ནས་ཤིན་དུ་བརྟན་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་རྐང་པ་གཡོན་པ་ལ་བརྟེན་ཏེ། སེར་མོའི་རུས་པ་ཉི་ཤུ་སྐྱེད་པར་བྱེད་དོ། །རྐང་པ་གཡས་པ་ལ་བརྟེན་ཏེ་རུས་པ་ཉི་ཤུ་དང་། རྐང་པའི་རྟིང་པའི་རུས་པ་བཞི་དང་། རྗེ་ངར་གྱི་རུས་པ་གཉིས་དང་། པུས་མོའི་རུས་པ་གཉིས་དང་། བརླའི་རུས་པ་གཉིས་དང་། རྐེད་པའི་རུས་པ་གསུམ་དང་། ལོང་བུའི་རུས་པ་གསུམ་དང་། སྒལ་ཚིགས་ཀྱི་རུས་པ་བཅྭ་བརྒྱད་དང་། རྩིབ་མའི་རུས་པ་ཉི་ཤུ་རྩ་བཞི་སྐྱེད་པར་བྱེད་དོ། །གཞན་ཡང་ལག་པ་གཡོན་པ་ལ་བརྟེན་ཏེ་སོར་མོའི་ཚིགས་ཀྱི་རུས་པ་ཉི་ཤུ་དང་། ལག་པ་གཡས་པ་ལ་བརྟེན་ཏེ་སོར་མོའི་ཚིགས་ཀྱི་རུས་པ་ཉི་ཤུ་སྐྱེད་པར་བྱེད་དོ། །གཞན་ཡང་ལག་ངར་གྱི་རུས་པ་བཞི་དང་། དཔུང་བའི་རུས་པ་གཉིས་དང་། བྲང་གི་རུས་པ་བདུན་དང་ཕྲག་པའི་རུས་པ་བདུན་དང་། གཉའ་བའི་རུས་པ་བཞི་དང་། འགྲམ་པའི་རུས་པ་གཉིས་དང་། སོའི་རུས་པ་སུམ་བཅུ་རྩ་གཉིས་དང་། མགོའི་རུས་པ་བཞི་སྐྱེད་པར་བྱེད་དེ། དགའ་བོ་འདི་ལྟ་སྟེ་དཔེར་ན་གཟུགས་མཁན་ནམ། གཟུགས་མཁན་གྱི་སློབ་མ་མཁས་པས་སྔར་ནི་ཤིང་སྲབ་ལས་དེའི་དབྱིབས་བྱས་ནས་དེའི་འོག་ཏུ་སྲད་བུས་བཅིངས་ཏེ་ཕྱི་འཇིམ་པ་རྣམས་བསྐུས་ནས་གཟུགས་བརྙན་མངོན་པར་འགྲུབ་པར་བྱེད་པ་དེ་བཞིན་དུ་ལས་ཀྱི་རླུང་གི་སྟོབས་དེས་རུས་པ་རྣམས་རྣམ་པར་གཞོག་པ་ཡང་དེ་བཞིན་དུ་བལྟ་བར་བྱའོ། །དགའ་བོ་དེ་ལྟར་ཞག་བདུན་ཕྲག་ཉི་ཤུ་པ་ལ་ནི་རུས་པ་ཕྲ་མོ་མ་གཏོགས་པར་རུས་པ་ཆེན་པོ་སྐྱེ་བའི་གྲངས་ན་ཉིས་བརྒྱ་ཡོད་པར་རིག་པར་བྱའོ། དགའ་བོ་ཞག་བདུན་ཕྲག་ཉི་ཤུ་གཅིག་པ་ལ་མའི་མངལ་ནས་ཡང་དག་སྐྱེད་པ་ཞེས་བྱའི་རླུང་འབྱུང་སྟེ། མངལ་ན་གནས་པ་དེའི་ལུས་ལ་ཤ་སྐྱེད་པར་བྱེད་པ་འདི་ལྟ་སྟེ། དཔེར་ན་ཞལ་
ཞལ་མཁན་ནམ། ཞལ་ཞལ་མཁན་གྱི་སློབ་མས་འཇིམ་པ་ལེགས་པར་སྦྱར་ནས་བརྩིག་ངོས་ལ་ཞལ་ཞལ་བྱེད་པ་བཞིན་དུ་ལས་ཀྱི་རླུང་དེས་ཤ་སྐྱེད་པར་བྱེད་པ་ཡང་དེ་བཞིན་དུ་བལྟ་བར་བྱའོ། །དགའ་བོ་ཞག་བདུན་ཕྲག་ཉི་ཤུ་གཉིས་པ་ལ་ནི་མའི་མངལ་ནས་ཀུན་དུ་རྒྱལ་བ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་ཁྲག་སྐྱེད་པར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་གསུམ་པ་ནི་མངལ་ནས་ཡོངས་སུ་དག་པར་འཛིན་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་ལྤགས་བསྐྱེད་པར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་བཞི་པ་ལ་ནི་མའི་མངལ་ནས་ཀུན་དུ་འཕྱོ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་སྤགས་པ་རབ་ཏུ་དང་བར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་ལྔ་པ་ལ་ནི་མའི་མངལ་ནས་གྲོང་ཁྱེར་འཛིན་ཅེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་ཤ་དང་ཁྲག་རབ་ཏུ་ལྡང་བར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་དྲུག་པ་ལ་ནི་མའི་མངལ་ནས་སྐྱེ་བ་མངོན་པར་གྲུབ་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ནས་གནས་པ་དེའི་ལུས་ཀྱི་སྐྲ་དང་སྤུ་དང་སེན་མོ་རྣམས་སྐྱེད་པར་བྱེད་དོ། །དེ་དག་ཐམས་ཅད་ཀྱང་རྩ་རྒྱུས་རྣམས་དང་ཕན་ཚུན་འབྲེལ་བར་བལྟ་བར་བྱའོ། །དགའ་བོ་ཞག་བདུན་ཕྲག་ཉི་ཤུ་བདུན་པ་ལ་ནི་མའི་མངལ་ནས་སྨན་ཡོན་ཆེན་པོ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེའི་སྐྲ་དང་། སེན་མོ་རྣམས་མངོན་པར་འགྲུབ་པར་བྱེད་དོ། །དགའ་བོ་མངལ་ན་གནས་པ་དེ་གལ་ཏེ་ཚེ་རབས་སྔ་མ་ལ་སྡིག་པ་མི་དགེ་བའི་ལས་མངོན་པར་འདུས་བྱས་པས་སེར་སྣས་ལོངས་སྤྱོད་བདོག་པ་རྣམས་འཕངས་ཤིང་ཤིན་དུ་བསྟེན་པར་མངོན་པར་ཞེས་ནས་སྦྱིན་པ་གཏོང་བར་མི་བྱེད་པ་དང་། ཕ་མ་དང་། མཁན་པོ་དང་། སློབ་དཔོན་དང་། བླ་མའི་གནས་རྣམས་ཀྱིས་རྗེས་སུ་བསྟན་པ་དག་མཉན་པར་མི་བྱེད་པ་དང་། ལུས་དང་ངག་དང་། ཡིད་ཀྱིས་མི་དགེ་བའི་ལས་མངོན་པར་འདུས་བྱས་ཤིང་ཉིན་མཚན་དུ་འཕེལ་བར་བྱེད་པ་ཞིག་ཡིན་ན་ནི་འདི་ལྟ་བུའི་རྣམ་པར་སྨིན་པ་མྱོང་བར་འགྱུར་ཏེ། གལ་ཏེ་མིར་སྐྱེས་པར་གྱུར་ན་ཡང་འབྲས་བུ་རྣམ་པར་སྨིན་པ་ཡིད་དུ་མི་འོང་བ་ཐོབ་པར་འགྱུར་བས་གལ་ཏེ་འཇིག་རྟེན་པ་རྣམས་འདི་ལྟར་རིང་པོས་མཛེས་པར་གྱུར་ན་ནི་
དེ་ཐུང་བར་འགྱུར་རོ། གལ་ཏེ་ཐུང་དུས་མཛེས་པར་གྱུར་ན་ནི་དེ་རིང་པོར་འགྱུར་རོ། །སྦོམ་པོས་མཛེས་པར་གྱུར་ན་ནི་དེ་ཕྲ་བར་འགྱུར་རོ། །གལ་ཏེ་ཕྲ་མོས་མཛེས་པར་གྱུར་ན་ནི་དེ་སྦོམ་པོར་འགྱུར་རོ། །གལ་ཏེ་ཡན་ལག་དང་ཉིད་ལག་ཕན་ཚུན་ཐག་ཉེ་པས་མཛེས་པར་གྱུར་ནི་དེ་ཐག་རིང་པོར་འགྱུར་རོ། །གལ་ཏེ་ཐག་རིང་པོས་མཛེས་པར་གྱུར་ན་ནི་དེ་ཐག་ཉེ་བར་འགྱུར་རོ། །གལ་ཏེ་མང་པོས་མཛེས་པར་གྱུར་ནི་དེ་ཉུང་བར་འགྱུར་རོ། གལ་ཏེ་ཉུང་བར་མཛེས་པར་གྱུར་ན་ནི་དེ་མང་པོར་འགྱུར་རོ། །གལ་ཏེ་ཚོ་བ་འདོད་ན་ནི་རིང་པར་འགྱུར་རོ། །རིང་བ་འདོད་ན་ནི་ཚོ་བར་འགྱུར་རོ། །ཞན་ཅིང་མཉེན་པ་འདོད་ན་ནི་བཤོར་བར་འགྱུར་རོ། བཤོར་བར་འདོད་ན་ནི་ཞན་ཅིང་མཉེས་པར་འགྱུར་རོ། །དཀའ་བར་འདོད་ན་ནི་གནག་པར་འགྱུར་རོ། །གནག་པར་འདོད་ན་ནི་དཀའ་བར་འགྱུར་རོ། །དགའ་བོ་གཞན་ཡང་སྡིག་པ་མི་དགེ་བའི་ལས་ཀྱི་དབང་གིས། སྡིག་པ་མི་དགེ་བའི་རྣམ་པར་སྨིན་པ་འོན་པ་དང་། ལོང་བ་དང་། ལྐུག་པ་དང་། གླེན་པ་དང་། བྱད་བཞིན་མི་སྡུག་པ་དང་། ཚིག་སྨྲས་པ་རྣམས་གཞན་གྱིས་མཉན་པའི་འོས་སུ་མི་འགྱུར་བ་དང་། རྐ་ལག་འཕྱེ་ཞིང་འགྲོ་བ་དང་། ལུས་མི་སྡུག་ཅིང་ཡི་དགས་དང་འདྲ་བས་ཉེ་བ་ཤེས་རྣམས་ཀྱང་མཐོང་བར་མི་འདོད་ན་གཞན་ལྟ་སྨོས་ཀྱང་ཅི་དགོས་པ་དང་། ལུས་དང་། ངག་དང་། ཡིད་ཀྱི་ལས་ཇི་སྙེད་བཙལ་བ་དག་གཞན་ལ་སྨྲས་ན་ཡང་གཞན་གྱིས་ཡིད་མི་ཆེས་ཤིང་ཡིད་ལ་མི་འཛིན་པར་དག་མངོན་པར་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན། དེས་ཚེ་རབས་སྔ་མ་ལ་སྡིག་པ་མི་དགེ་བའི་ལས་མངོན་པར་འདུས་བྱས་པའི་དབང་གིས་དེ་ལྟ་བུའི་རྣམ་པར་སྨིན་པ་འཐོབ་པར་འགྱུར་བས་སོ། །དགའ་བོ་མངལ་ན་གནས་པ་དེ་ཚེ་རབས་སྔ་མ་ལ་བསོད་ནམས་ཀྱི་ལས་མངོན་པར་བསྒྲུབས་པ་དང་། སེར་སྣ་མེད་པར་ལེགས་པར་སྦྱིན་པར་སྦྱིན་པ་གཏོང་ཞིང་ཕོངས་པ་རྣམས་ལ་སྙིང་བརྩེ་བ་དང་། ལོངས་སྤྱོད་རྣམས་ལ་ཕངས་ཤིང་མངོན་པར་ཞེན་པའི་སེམས་མེད་པ་དང་། དགེ་བའི་ལས་མངོན་པར་འདུས་བྱས་པ་རྣམས་ཉིན་མཚན་དུ་འཕེལ་བར་བྱེད་པ་ཞིག་ཡིན་ན་ནི་འདི་ལྟ་བུའི་རྣམ་པར་སྨིན་པ་ཁྱད་པར་དུ་འཕགས་པ་མྱོང་བར་འགྱུར་ཏེ། མིར་སྐྱེས་པར་གྱུར་ན་ཡང་འབྲས་བུ་
རྣམ་པར་སྨིན་པ་ཡིད་དུ་འོང་བ་ཐོབ་པར་འགྱུར་བས་གལ་ཏེ་འཇིག་རྟེན་པ་རྣམས་རིང་པོས་མཛེས་པར་གྱུར་ན་ཡང་དེ་བཞིན་དུ་རིང་པོར་འགྱུར་རོ། །གལ་ཏེ་ཐུང་དུས་མཛེས་པར་གྱུར་ན་ཡང་དེ་བཞིན་དུ་ཐུང་བར་འགྱུར་བ་དང་། ཕྲ་སྦོམ་རན་ཞིང་ཡན་ལག་དང་ཉིད་ལག་འཚམ་པ་དང་། མང་ཉུང་བ་དང་། ཚེ་རིང་དང་། བཤོར་མི་བཤོར་ཡང་དེ་བཞིན་དུ་མཛེས་ཤིང་ཡིད་དུ་མི་འོང་བ་མེད་པ་དང་། དབང་པོ་དྲུག་ཚང་ཞིང་བྱད་བཞིན་སྡུག་པས་གཞན་ལས་ཁྱད་པར་དུ་འཕགས་པ་དང་། ཚིགས་གསལ་ཞིང་དབྱངས་སྙན་པ་དང་། སྐྱེས་བུའི་མཚན་ཕུན་སུམ་ཚོགས་ཤིང་གང་གིས་མཐོང་བ་རྣམས་དགའ་བར་འགྱུར་བ་དང་། ལུས་དང་ངག་དང་། ཡིད་ཀྱི་ལས་ཇི་སྙེད་བཙལ་བ་དག་གཞན་ལ་བསྙད་ན་ཡང་གཞན་གྱིས་ཡིད་ཆེས་ཤིང་གུས་པས་ཡིད་ལ་འཛིན་པར་འགྱུར་རོ། །དེ་ཅིའི་ཕྱིར་ན། དེས་ཚེ་རབས་སྔ་མ་ལ་དགེ་བའི་ལས་རྣམས་མངོན་པར་འདུས་བྱས་པའི་དབང་གིས་དེ་ལྟ་བུའི་རྣམ་པར་སྨིན་པ་ཐོབ་པར་འགྱུར་བས་སོ། །དགའ་བོ་མངལ་ན་གནས་པ་དེ་གལ་ཏེ་ཁྱེའུ་ཡིན་ན་ནི་མའི་རྩི་བ་ལོགས་གཡས་ཕྱོགས་སུ་ཅོག་པུར་འདུག་ལ། ལག་པ་གཉིས་ཀྱིས་གདོང་གཡོགས་ནས་མའི་སྒལ་ཚིགས་ལོགས་སུ་བལྟས་ཏེ་འདུག་གོ། །གལ་ཏེ་བུ་མོ་ཡིན་ན་ནི་མའི་རྩིབ་ལོགས་གཡོན་ཕྱོགས་སུ་ཅོག་པུར་འདུག་ལ། ལག་པ་གཉིས་ཀྱིས་གདོང་གཡོགས་ནས་མའི་ལྟོ་བ་ལོགས་སུ་ཁ་བལྟས་ཏེ་མ་ཞུ་བའི་གནས་ཀྱི་འོག། ཞུ་བའི་གནས་ཀྱི་ནི་སྟེང་ན་མ་ཞུ་བའི་དངོས་པོས་ནི་ཐུར་དུ་མནན། ཞུ་བའི་དངོས་པོས་ནི་ཡར་འདེགས་པར་བྱེད་པས། འདི་ལྟ་སྟེ་དཔེར་ན་གནས་ལྔ་བཅིངས་ནས་གསལ་ཤིང་རྣོན་པོའི་ཁར་བཙུགས་པ་བཞིན་དུ་གནས་སོ། །གལ་ཏེ་མས་ཟས་མང་དུ་ཟོས་སམ་ཉུང་དུ་ཟོས་ན་ཡང་སྡུག་བསྔལ་མྱོང་བར་འགྱུར་རོ། །དེ་བཞིན་དུ་གལ་ཏེ་ཤིན་དུ་སྣུམ་པ་འམ། ཤིན་དུ་རྩུབ་པ་དང་ཤིན་དུ་གྲང་བ་འམ། ཤིན་དུ་ཚ་བ་འམ། ལན་ཚྭ་བྲོ་བ་འམ། མི་བྲོ་བ་འམ། ཁ་བ་འམ། སྐྱུར་བ་འམ། མངར་བ་ལ་སོགས་པ་ཟས་འདི་ལྟ་བུ་དག་ཟོས་ན་ཡང་ཐམས་ཅད་དུ་སྡུག་བསྔལ་མྱོང་བར་འགྱུར་རོ། །གལ་ཏེ་མས་འདོད་པ་སྤྱད་པར་གྱུར་ཏམ། དྲག་ཏུ་སོང་ངམ། བརྒྱུགས་སམ། ཉམ་ང་
བའི་ཕྱོགས་སུ་འདུག་གམ། ཡུན་རིང་དུ་འདུག་པ་གྱུར་ཏམ། ཡུན་རིང་དུ་ཉལ་བར་གྱུར་ཏམ། མཆོངས་པར་གྱུར་ན་ཡང་ཐམས་ཅད་དུ་སྡུག་བསྔལ་མྱོང་བར་འགྱུར་རོ། །དགའ་བོ་མའི་མངལ་དུ་གནས་པ་ན་དེ་ལྟ་བུའི་སྡུག་བསྔལ་རྣམ་པ་སྣ་ཚོགས་བརྗོད་ཀྱིས་མི་ལང་པས་ལུས་ལ་ཉོན་མོངས་པར་རིག་པར་བྱ་སྟེ། མིའི་འགྲོ་བ་ན་ཡང་སྡུག་བསྔལ་དེ་ལྟ་བུ་མྱོང་བར་འགྱུར་ན་ངན་འགྲོ་སེམས་ཅན་དམྱལ་བའི་སྡུག་བསྔལ་དཔེ་བྱ་བར་དཀའ་བ་ལྟ་སྨོས་ཀྱང་ཅི་དགོས་ཏེ། དེ་ལྟ་བས་ན་དགའ་བོ་མཁས་པ་སུ་ཞིག་འཁོར་བ་རྒྱ་མཚོ་དཔག་ཏུ་མེད་པ་ན་གནས་པར་མོས་ཤིང་སྡུག་བསྔལ་འདི་ལྟ་བུ་ཉམས་སུ་མྱོང་བར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་རྩ་བརྒྱད་པ་ལ་ནི་མའི་མངལ་ན་གནས་པ་དེ་ཕྱིན་ཅི་ལོག་གིས་འདུ་ཤེས་རྣམ་པ་བརྒྱད་སྐྱེ་བར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། ཁྱིམ་གྱི་འདུ་ཤེས་དང་། བཞོན་པའི་འདུ་ཤེས་དང་། ཀུན་དགའ་ར་བའི་འདུ་ཤེས་དང་། ཁང་པ་བརྩེགས་པའི་འདུ་ཤེས་དང། བསྐྱེད་མོས་ཚལ་གྱི་འདུ་ཤེས་དང་། ཁྲིལ་འདུག་པའི་འདུ་ཤེས་དང་། ཆུ་བོའི་འདུ་ཤེས་དང་། རྫིང་གི་འདུ་ཤེས་ཏེ། ཡང་དག་པར་འདི་དག་ཡོད་པ་མ་ཡིན་ཡང་ཡང་དག་པ་མ་ཡིན་པའི་རྣམ་པར་རྟོག་བསྐྱེད་པར་བྱེད་དོ། །དགའ་བོ་ཞག་བདུན་ཕྲག་ཉི་ཤུ་དགུ་པ་ལ་ནི་མའི་མངལ་ནས་མེ་ཏོག་ཕྲེང་བ་ཞེས་བྱ་བའི་རླུང་འབྱུང་སྟེ། རླུང་དེས་མའི་མངལ་ན་གནས་པ་དེའི་ལྤགས་པའི་མདོག་ཀུན་དུ་གསལ་ཞིང་ཡོངས་སུ་དཀར་བ་དང་། ཡོངས་སུ་དག་ཅིང་དང་བར་བྱེད་དེ། །ལས་ཀྱི་སྟོབས་ཀྱིས་ཁ་ཅིག་ནི་ཁ་དོག་ནག་པོར་འགྱུར། ཁ་ཅིག་ནི་ཁ་དོག་སྔོན་པོར་འགྱུར་ཏེ། གཞན་ཡང་ཁ་དོག་རྣམ་པ་སྣ་ཚོགས་དང་ལྡན་པ་དང་། ཁ་ཅིག་ནི་རྩུབ་ལ་སྣུམ་པ་མེད་པ་དང་། ཁ་དོག་དཀར་བ་དང་། ཁ་དོག་གནག་པ་དག་ཀྱང་ཅི་རིགས་པར་འབྱུང་བར་འགྱུར་རོ། །དགའ་བོ་ཞག་བདུན་ཕྲག་སུམ་བཅུ་པ་ལ་ནི་མའི་མངལ་ནས་ལྕགས་ཀྱི་སྒོ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེ་བུས་པས་སྐྲ་དང་སྤུ་དང་། སེན་མོ་རྣམས་སྐྱེ་ཞིང་འཕེལ་བར་བྱེད་དེ་སྔོན་གྱི་ལས་ཀྱི་དབང་གིས་ཁ་དོག་དཀར་གནག་ལ་སོགས་པ་ཅི་རིགས་པ་སྣང་བར་འགྱུར་བ་ཡང་གོང་མ་བཞིན་དུ་རིག་པར་
བྱའོ། །དགའ་བོ་ཞག་བདུན་ཕྲག་སུམ་བཅུ་གཅིག་པ་ལ་ནི་མའི་མངལ་ན་གནས་པ་དེ་མཐར་གྱིས་ཆེར་སྐྱེ་བར་བྱེད་དེ། དེ་བཞིན་དུ་ཞག་བདུན་ཕྲག་གསུམ་བཅུ་གཉིས་པ་དང་། གསུམ་དང་། བཞི་པའི་བར་དུ་ཡང་། །རྒྱ་ཆེར་སྐྱེ་ཞིང་འཕེལ་བར་བྱེད་དོ། །དགའ་བོ་ཞག་བདུན་ཕྲག་སུམ་བཅུ་ལྔ་པ་ལ་ནི་མངལ་ན་གནས་པ་དེ་མའི་མངལ་དུ་ཡན་ལག་དང་ཉིང་ལག་ཐམས་ཅད་ཡོངས་སུ་རྫོགས་པར་འགྱུར་རོ། །དགའ་བོ་ཞག་བདུན་ཕྲག་སུམ་བཅུ་དྲུག་པ་ལ་ནི་མངལ་ན་གནས་པ་དེ་མའི་མངལ་ན་འདུག་མི་འདོད་པར་འགྱུར་རོ། །དགའ་བོ་ཞག་བདུན་ཕྲག་སུམ་བཅུ་བདུན་པ་ལ་ནི་མངལ་ན་གནས་པ་དེ་ཕྱིན་ཅི་ལོག་མ་ཡིན་པའི་འདུ་ཤེས་རྣམ་པ་གསུམ་པོ་འདི་ལྟ་སྟེ། མི་གཙང་བའི་འདུ་ཤེས་དང་། དྲི་མི་ཞིམ་པའི་འདུ་ཤེས་དང། མུན་ནག་གི་འདུ་ཤེས་སྐྱེ་བར་འགྱུར་རོ། །འདི་ནི་ཕྱོགས་གཅིག་གི་དབང་དུ་བྱས་ཏེ་བསྟན་ཏོ། །དགའ་བོ་ཞག་བདུན་ཕྲག་སུམ་བཅུ་བརྒྱད་པ་ལ་ནི་མའི་མངལ་ནས་ཡན་ལག་སྡུད་པ་ཞེས་བྱ་བའི་རླུང་འབྱུང་སྟེ། རླུང་དེས་མངལ་ན་གནས་པ་དེ་ལུས་བསྒྱུར་ནས་མཐུར་དུ་ཕྱོགས་ཤིང་ལག་གཉིས་སུ་བཅུམ་ནས་སྐྱེ་བའི་གནས་ཀྱི་སྒོར་འཇོག་པར་བྱེད་དོ། །དགའ་ཡང་དེའི་ཚེ་ཁ་མཐུར་དུ་ལྟ་བ་ཞེས་བྱ་བའི་རླུང་འབྱུང་སྟེ། ལས་ཀྱི་སྟོབས་ཀྱིས་རླུང་དེས་གནས་པ་དེ་བུས་པས་མགོ་མཐུར་དུ་ལྟ་ཞིང་རྐང་པ་གཉིས་ནི་གྱེན་དུ་ཕྱོགས་པར་བྱས་ནས་སྐྱེ་བའི་གནས་ཀྱི་སྒོ་ནས་འབྱུང་བར་འགྱུར་རོ། །དགའ་བོ་གལ་ཏེ་མངལ་ན་གནས་པ་དེ་ཚེ་རབས་སྔ་མ་ལ་སྡིག་པ་མི་དགེ་བའི་ལས་མང་པོ་མངོན་པར་འདུས་བྱས་ཤིང་གཞན་གྱི་མངལ་ལྷུང་བར་འགྱུར་བའི་ལས་བྱས་པ་ཞིག་ཡིན་ན་ནི་རྒྱུ་དང་རྐྱེན་དེས་མངལ་ནས་འབྱུང་བར་འགྱུར་བའི་ཚེ་རྐང་ལག་ལོག་ཅིང་སྣོལ་མར་གྱུར་ནས་བསྒྱུར་མི་ནུས་པས་མའི་མངལ་ཉིང་དུ་འཆི་བའི་འདུས་བྱེད་པར་འགྱུར་ཏེ། དེའི་ཚེ་ཤེས་པ་དང་ལྡན་པའི་བུད་མེད་དམ་སྨན་པ་མཁས་པས་མར་དང་འབྲུ་མར། འཇམ་པ་འམ། ཤིང་ཤལ་མ་ལའི་ཤུན་པའི་ཁུ་བ་འམ། གཞན་ཡང་དངོས་པོ་འཇམ་པོ་དག་གིས་ལག་པ་བསྐུལ་ནས་ལག་པའི་སོར་མོས་གྲི་རྣོན་པོ་བླངས་ཏེ། སྣམ་ཕྱིས་དད་འདྲ་ཞིང་མཆོག་ཏུ་དྲི་མི་ཞིམ་པ་སྐྱུག་བྲོ་བའི་འདམ་ཁུང་། སྲིན་བུའི་རིགས་བརྒྱ་སྟོང་ཚད་མེད་པ་རྟག་ཏུ་གནས་པ། མི་གཙང་བའི་ཁུ་བ་རྟག་
ཏུ་འཛག་པ། ཁུ་བ་དང་ཁྲག་རླང་རྣམས་རུལ་ཞིང་མྱགས་པ་མཐོང་ན་སྐྱོ་བར་འགྱུར་བ། ལྤགས་པ་སྲབ་མོས་གཡོགས་པ་སྡིག་པའི་ལས་ལས་བྱུང་བའི་ལུས་རྨ་དང་བཅས་པ་མི་གཙང་བའི་གནས་དེར་སོར་མོ་བདུམ་སྟེ་དེར་བཅུ་གནས་སྲི་རྣོན་པོས་མངལ་ན་གནས་པ་དེའི་ལུས་དུམ་བུར་གཏུབས་ནས་མའི་མངལ་ནས་འབྱིན་པར་བྱེད་པས། དེས་ན་ཡིད་དུ་མི་འོང་བའི་སྡུག་བསྔལ་ཤིན་དུ་མི་བཟང་ཅིང་ཚ་བརྩུབ་པ་དག་མྱོང་བའི་རྒྱུས་མ་དེ་ཡང་འཆི་བའི་དུས་བྱེད་པར་འགྱུར་ཏེ། གལ་ཏེ་ཤི་བར་མ་གྱུར་ན་ཡང་ཤི་བ་དང་བྱེ་བྲག་མེད་དོ། །དགའ་བོ་གལ་ཏེ་མངལ་ན་གནས་པ་དེ་དགེ་བའི་ལས་ལས་མངོན་པར་གྲུབ་པ་ཡིན་ན་ནི་གལ་ཏེ་ལོག་པར་གྱུར་ན་ཡང་མ་ལ་གནོད་པ་མེད་པར་བདེ་བར་བཙས་པར་འགྱུར་བས་སྡུག་བསྔལ་ཡང་མྱོང་བར་མི་འགྱུར་རོ། །དགའ་བོ་གང་བགེགས་འདི་ལྟ་བུ་དང་མི་ལྡན་པ་དེ་དག་ནི་ཞག་བདུན་ཕྲག་སུམ་ཅུ་རྩ་བརྒྱད་འདས་ནས་བཙའ་བར་འགྱུར་བའི་ཚེ་སྡུག་བསྔལ་ཆེན་པོ་སྲོག་ལ་བབ་པ་མྱོང་ནས་གདོད་མའི་མངལ་ནས་འབྱུང་བར་འགྱུར་ན། དགའ་བོ་ཁྱོད་ཀྱིས་ཤིན་དུ་ལེགས་པར་བརྟགས་ནས་ངེས་པར་འབྱུང་བ་ཡོངས་སུ་བཙལ་བར་བྱའོ། །དེ་ནས་བཅོམ་ལྡན་འདས་ཀྱིས་ཡང་དེའི་ཚེ་ཆེ་དང་ལྡན་པ་དགའ་བོ་ལ་བཀའ་སྩལ་པ། དགའ་བོ་ཁྱོད་ཀྱིས་མངལ་ན་གནས་པའི་སྡུག་བསྔལ་དང་། བཙས་པའི་སྡུག་བསྔལ་ཤེས་པར་བྱས་ནས་སོ་སོའི་སྐྱེ་བོ་མངལ་ནས་སྐྱེ་བ་ལེན་པ་གང་ཡིན་པ་དེ་དག་ནི་ཤིན་ཏུ་སྡུག་བསྔལ་བ་ཡིན་པར་རིག་པར་བྱའོ། །དང་པོ་བཙས་པའི་ཚེ་ཁྱེའུ་འམ་བུ་མོ་ཡང་རུང་སྟེ། ལག་པའི་སྟེང་དམ། གོས་ལ་སོགས་པའི་སྟེང་དུ་ལྷུང་ནས་ཉི་མའམ་གྲིབ་མ་འམ། བསྒུལ་བའི་ཤིང་ལེབ་བམ། སྟན་ནམ། པད་པའི་སྟེང་དུ་བཞག་པ་ན་རྒྱུ་དང་རྐྱེན་དེས་ཐམས་ཅད་དུ་སྡུག་བསྔལ་མི་བཟད་པ་ཚ་བརྩུབ་པ་ཡིད་དུ་མི་འོང་བ་མྱོང་བར་འགྱུར་ཏེ། དགའ་པོ་འདི་ལྟ་སྟེ་དཔེར་ན་བ་ལང་གསོན་པོར་ལྤགས་པ་བཤུས་པ་བརྩིག་པ་དང་ཉེ་བར་གྱུར་ན་བརྩིག་པ་ལ་གནས་པའི་སྲོག་ཆགས་ཀྱིས་ཟ་བར་འགྱུར་བ་འམ། གལ་ཏེ་ཤིང་དང་། རྩྭའི་ཕུང་པོ་དང། ཉེ་བར་གྱུར་ན་ཤིང་དང་རྩྭ་ལ་གནས་པའི་སྲོག་ཆགས་ཀྱིས་ཟ་བར་འགྱུར་བ་འམ། གལ་ཏེ་བླག་པ་མེད་པར་འདུག་པར་གྱུར་ན་བླག་པ་མེད་པ་ན་གནས་པའི་སྲོག་ཆགས་
ཀྱིས་ཟ་བར་གྱུར་ཞིང་ཐམས་ཅད་དུ་སྡུག་བསྔལ་མྱོང་བར་འགྱུར་བ་དེ་བཞིན་དུ་དང་པོ་བཙས་པ་ཡང་དེ་བཞིན་དུ་བལྟ་བར་བྱའོ། །དང་པོ་བཙས་པ་དེ་ལ་ཆུ་དྲོན་རན་པས་བཀྲུས་ན་ཡང་སྡུག་བསྔལ་ཆེན་པོ་མྱོང་བར་འགྱུར་ཏེ། འདི་ལྟ་སྟེ་དཔེར་ན་སྐྱེས་བུ་མཛེ་ཅན་ལྤགས་པ་རུལ་ཅིང་མྱགས་པ་རྣག་ཁྲག་ཟག་པ་ལ་ཡང་ལྕག་གིས་བཞུས་ན་སྡུག་བསྔལ་མི་བཟད་པ་ཚ་བ་དང་རྩུབ་པ་མྱོང་བར་འགྱུར་བ་དེ་བཞིན་དུ་དང་པོ་བཙས་པའི་ལུས་ཆུ་དྲོན་གྱིས་བཀྲུས་པ་ཡང་དེ་བཞིན་དུ་བལྟ་བར་བྱའོ། །དང་པོ་བཙས་པའི་ལུས་དེ་ཡང་ཕྱིས་མའི་ཁྲག་གི་དྲི་མ་འཐུངས་ནས་ཆེར་སྐྱེ་བར་འགྱུར་ཏེ། དེ་ལ་ཁྲག་གི་དྲི་མ་ཞེས་བྱ་བ་ནི་འཕགས་པའི་ཆོས་འདུལ་བ་ལས་ནུ་ཞོ་ཉིད་ལ་བྱ་བར་བསྟན་པས་དེ་ལྟ་བས་ན་དགའ་བོ་འདི་ལྟར་ཤིན་དུ་མི་ཟད་པའི་སྡུག་བསྔལ་རྣམ་པ་སྣ་ཆོགས་དང་ལྡན་ཞིང་བདེ་བ་ཅུང་ཟད་ཀྱང་མེད་ན། མཁས་པ་སུ་ཞིག་སྡུག་བསྔལ་གྱི་རྒྱ་མཚོ་འདི་ལ་རྗེས་སུ་ཆགས་པ་བསྐྱེད་ནས་རྟག་ཏུ་འཁོར་བའི་རྒྱུན་ཕྱོགས་སུ་འཇུག་ཅིང་རྒྱུན་འཆད་པ་མེད་པར་བྱེད་། དང་པོ་བཙས་པ་དེ་ཞག་བདུན་ལོན་པ་དང་ལུས་དེ་ཉིད་ལས་སྲོག་ཆགས་སྲིན་བུའི་རིགས་སྟོང་ཕྲག་བརྒྱད་བཅུ་བྱུང་ནས་ལུས་ལ་ཟ་བར་བྱེད་དེ། དགའ་བོ་སྲིན་བུའི་རིགས་སྐྲ་ལ་ཟ་བ་ཞེས་བྱ་བ་གཅིག་ཡོད་དེ་སྐྲའི་རྩ་བ་ལ་གནས་རྟག་ཏུ་སྐྲ་ལ་ཟ་བར་བྱེད་དོ། །སྲིན་བུའི་རིགས་ཁར་བའི་མཛོད་དང་། མགོ་སྦོམ་ཞེས་བྱ་བ་གཉིས་ཡོད་དེ་མགོ་ལ་རྟེན་ཏེ་གནས་ནས་རྟག་ཏུ་མགོ་ལ་ཟ་བར་བྱེད་དེ། །སྲིན་བུའི་རིགས་མིག་འཁོར་ཞེས་བྱ་བ་གཅིག་ཡོད་དེ་མིག་ལ་གནས་ནས་རྟག་ཏུ་མིག་ལ་ཟ་བར་བྱེད་དོ། །སྲིན་བུའི་རིགས་དེད་པ་དང་། འབྲོས་པ་དང་། ཁང་ཁྱིམ་དང་། ཡོངས་སུ་རྫོགས་པ་ཞེས་བྱ་བ་བཞི་ཡོད་དེ་ཀླད་པ་ལ་གནས་ནས་རྟག་ཏུ་ཀླད་པ་ལ་ཟ་བར་བྱེད་དོ། །སྲིན་བུའི་རིགས་སཱ་ལུའི་ལོ་མ་ཞེས་བྱ་བ་གཅིག་ཡོད་དེ་རྣ་བ་ལ་གནས་ནས་རྣ་བ་ལ་ཟ་བར་བྱེད་དོ། །སྲིན་བུའི་རིགས་མཛོད་སྒོ་ཞེས་བྱ་བ་གཅིག་ཡོད་དེ་སྣ་ལ་གནས་ནས་སྣ་ལ་ཟ་བར་བྱེད་དོ། །སྲིན་བུའི་རིགས་འཕན་པ་དང་། ཀུན་དུ་འཕེན་པ་ཞེས་བྱ་བ་གཉིས་ཡོད་དེ་མཆུ་ལ་གནས་ནས་མཆུ་ལ་གནས་ནས་མཆུ་ལ་ཟ་བར་བྱེད་དོ། །སྲིན་བུའི་རིགས་སྦྲང་རྩིའི་ལོ་མ་ཞེས་བྱ་བ་གཅིག་ཡོད་དེ།
སོ་ལ་གནས་ནས་སོ་ལ་ཟ་བར་བྱེད་དོ། །སྲིན་བུའི་རིགས་ཤིང་གདོད་ཞེས་བྱ་བ་གཅིག་ཡོད་དེ་སོའི་རྩ་བ་ལ་གནས་ནས་སོའི་རྩ་བ་ལ་ཟ་བར་བྱེད་དོ། །སྲིན་བུའི་རིགས་ཁ་བ་མཆུ་ཞེས་བྱ་བ་གཅིག་ཡོད་དེ་ལྕེ་ལ་གནས་ནས་ལྕེ་ལ་ཟ་བར་བྱེད་དོ། །སྲིན་བུའི་རིགས་ཁ་རྣོན་ཞེས་བྱ་བ་གཅིག་ཡོད་དེ་ལྕེའི་རྩ་བ་ལ་གནས་ནས་ལྕེའི་རྩ་བ་ལ་ཟ་བར་བྱེད་དོ། །སྲིན་བུའི་རིགས་ལག་རྫོགས་ཞེས། བྱ་བ་གཅིག་ཡང་དེ་རྐན་ལ་གནས་ནས་རྐན་ལ་ཟ་བར་བྱེད་དོ། །སྲིན་བུའི་རིགས་ལག་པ་དྲ་བ་ཅན་དང་། ཕྱེད་སྒྱུར་ཞེས་བྱ་བ་གཉིས་ཡོད་དེ་ལག་མཐིལ་ལ་གནས་ནས་ལག་མཐིལ་ལ་ཟ་བར་བྱེད་དོ། །སྲིན་བུའི་རིགས་འཕྱང་བ་དང་། རབ་ཏུ་འཕྱང་བ་ཞེས་བྱ་བ་གཉིས་ཡོད་དེ་ལག་ངར་ལ་གནས་ནས་ལག་ངར་ལག་ངར་ལ་ཟ་བར་བྱེད་དོ། །སྲིན་བུའི་རིགས་དཔུང་པ་དང་ཉེ་བའི་དཔུང་པ་ཞེས་བྱ་བ་གཉིས་ཡོད་དེ་དཔུང་པ་ལ་གནས་ནས་དཔུང་པ་ལ་ཟ་བར་བྱེད་དོ། སྲིན་བུའི་རིགས་མིང་པ་དང་། ཉེ་བའི་མིང་པ་ཞེས་བྱ་བ་གཉིས་ཡོད་དེ་མིང་པ་ལ་གནས་ནས་མིད་པ་ལ་ཟ་བར་བྱེད་དོ། །སྲིན་བུའི་རིགས་དཔའ་བ་དང་། དཔའ་བ་ཆེན་པོ་ཞེས་བྱ་བ་གཉིས་ཡོད་དེ་བྲང་ལ་གནས་ནས་བྲང་ལ་ཟ་བར་བྱེད་དོ། །སྲིན་བུའི་རིགས་དུང་དང་། དུང་ཁ་ཞེས་བྱ་བ་གཉིས་ཡོད་དེ་ཤ་ལ་གནས་ནས་ཤ་ལ་ཟ་བར་བྱེད་དོ། །སྲིན་བུའི་རིགས་ཁ་དོག་དང་ལྡན་པ་དང་། སྟོབས་ལྡན་ཞེས་བྱ་བ་གཉིས་ཡོད་དེ་ཁྲག་ལ་གནས་ནས་ཁྲག་ལ་ཟ་བར་བྱེད་དོ། །སྲིན་བུའི་རིགས་དཔའ་བོ་དང་། དྲི་གདོང་ཞེས་བྱ་བ་གཉིས་ཡོད་དེ་ཆུ་ལ་གནས་ནས་ཆུ་ལ་ཟ་བར་བྱེད་དོ། །སྲིན་བུའི་རིགས་མི་མཐོ་བ་དང་། ཁ་སྦུབ་ཅེས་བྱ་བ་གཉིས་ཡོད་དེ་རྒྱབ་ཀྱི་སྒལ་ཚིགས་ལ་གནས་ནས་རྒྱབ་ཀྱི་རྒལ་ཚིགས་ལ་ཟ་བར་བྱེད་དོ། །སྲིན་བུའི་རིགས་གཉིས་ག་ཡང་ཚིལ་གྱི་ཁ་དོག་ཅེས་བྱ་བ་གཉིས་ཡོད་དེ་ཚིལ་ལ་གནས་ནས་ཚིལ་ཟ་བར་བྱེད་དོ། །སྲིན་བུའི་རིགས་མཁྲིས་པའི་ཁ་དོག་ཅེས་བྱ་བ་གཅིག་ཡོད་དེ་མཁྲིས་པ་ལ་གནས་ནས་མཁྲིས་པ་ལ་ཟ་བར་བྱེད་དོ། །སྲིན་བུའི་རིགས་མུ་ཏིག་ཅེས་བྱ་བ་གཅིག་ཡོད་དེ་མཁལ་མ་ལ་གནས་ནས་མཁལ་མ་ལ་ཟ་བར་བྱེད་དོ། །སྲིན་
བུའི་རིགས་མུ་ཏིག་ཆེན་པོ་ཞེས་བྱ་བ་གཅིག་ཡོད་དེ་རྐེད་པ་ལ་གནས་ནས་རྐེད་པ་ལ་ཟ་བར་བྱེད་དོ། །སྲིན་བུའི་རིགས་མ་འོངས་པ་ཞེས་བྱ་བ་གཅིག་ཡོད་དེ་མཚེར་པ་ལ་གནས་ནས་མཚེར་པ་ལ་ཟ་བར་བྱེད་དོ། །སྲིན་བུའི་རིགས་ཆུ་སྲོག་དང་། ཆུ་སྲོག་ཆེན་པོ་དང་། ཁབ་ཀྱི་མཆུ་དང་མཚོན་ཆའི་མཆུ་ཞེས་བྱ་བ་བཞི་ཡོད་དེ་རྒྱུ་མ་ལ་གནས་ནས་རྒྱུ་མ་ལ་ཟ་བར་བྱེད་དོ། །སྲིན་བུའི་རིགས་ཟླ་བ་རྫོགས་པ་དང་། ཟླ་བ་གཏོང་དང་། བསིལ་བྱེད་གཏོང་དང་། སོ་སོར་གནས་པ་ཞེས་བྱ་བ་ལྔ་ཡོད་དེ་རྩིབ་ལོགས་གཡས་པ་ལ་གནས་ནས་རྩིབ་ལོགས་གཡས་པ་ལ་ཟ་བར་བྱེད་དོ། །གཞན་ཡང་སྲིན་བུའི་རིགས་གོང་མ་དང་མིང་འཐུན་པ་ལྔ་ཡོད་དེ་རྩིབ་ལོགས་གཡོན་པ་ལ་གནས་ནས་རྩིབ་ལོགས་གཡོན་པ་ལ་ཟ་བར་བྱེད་དོ། །གཞན་ཡང་སྲིན་བུའི་རིགས་མདུན་དུ་འབིགས་པ་དང་། རྒྱབ་ཏུ་འབིགས་པ་དང་། བརྟན་པར་འབིགས་པ་དང་འབིགས་ཏེ་གནས་ཞེས་བྱ་བ་བཞི་ཡོད་དེ་རུས་པ་ལ་གནས་ནས་རུས་པ་ལ་ཟ་བར་བྱེད་དོ། །སྲིན་བུའི་རིགས་ཆེར་དཀར་བ་དང་། ཅུང་ཟད་དཀར་བ་དང་། སྤྲིན་བརྩེགས་དང་། དྲི་མི་ཞིམ་ཞེས་བྱ་བ་བཞི་ཡོད་དེ་རྩ་རྒྱུས་ལ་གནས་ནས་རྩ་རྒྱུས་ལ་ཟ་བར་བྱེད་དོ། །སྲིན་བུའི་རིགས་སེང་གེ་དང་། སྟོབས་ལྡན་དང་། མགྱོགས་མའི་མངའ་དང་། པད་མ་ཞེས་བྱ་བ་བཞི་ཡོད་དེ་མ་ཞུ་བའི་གནས་ལ་གནས་ནས་མ་ཞུ་བའི་གནས་ལ་ཟ་བར་བྱེད་དོ། །སྲིན་བུའི་རིགས་བརྟན་པ་དང་། ཉེ་བའི་བརྟན་པ་ཞེས་བྱ་བ་དང་གཉིས་ཡོད་དེ། ཞུ་བའི་གནས་ལ་གནས་ནས་ཞུ་བའི་གནས་ལ་ཟ་བར་བྱེད་དོ། །སྲིན་བུའི་རིགས་མུ་ཁ་དང་། ཕུང་པོའི་ཁ་དང་། བྱིའུ་ཁ་ཞེས་བྱ་བ་བཞི་ཡོད་དེ་གཅི་བའི་ལམ་ལ་གནས་ནས་གཅི་བའི་ལམ་ལ་ཟ་བར་བྱེད་དོ། །སྲིན་བུའི་རིགས་བྱེད་པ་དང་། བྱེད་པ་ཆེན་པོ་དང་། དབྱིབས་ཆུང་དང་། པོ་ཏ་རཀ་ཞེས་བྱ་བ་བཞི་ཡོད་དེ་བཤང་བའི་ལམ་ལ་གནས་ནས་བཤང་བའི་ལམ་ཟ་བར་བྱེད་དོ། །སྲིན་བུའི་རིགས་ཁ་ནག་དང་། ཁ་ནག་ཆེན་པོ་ཞེས་བྱ་བ་གཉིས་ཡོད་དེ་བརླ་ལ་གནས་ནས་བརླ་ལ་ཟ་བར་བྱེད་དོ། །སྲིན་བུའི་རིགས་མཛེ་ཅན་དང་། མཛེ་ཅན་ཆུང་ངུ་ཞེས་བྱ་བ་གཉིས་ཡོད་དེ་པུས་མོ་ལ་གནས་ནས་པུས་མོ་ལ་ཟ་བར་བྱེད་དོ། །སྲིན་བུའི་རིགས་མྱོས་པའི་རྩ་བ་ཞེས་
བྱ་བ་གཅིག་ཡོད་དེ་བྱིན་པ་ལ་གནས་ནས་བྱིན་པ་ལ་ཟ་བར་བྱེད་དོ། །སྲིན་བུའི་རིགས་མགོན་ཅེས་བྱ་བ་གཅིག་ཡོད་དེ་རྐང་པ་ལ་གནས་ནས་རྐང་པ་ལ་ཟ་བར་བྱེད་དོ། །དགའ་བོ་ཡོངས་སུ་སྐྱོབ་པར་བྱ་བའི་ལུས་འདི་འདྲ་བ་འདི་བ་འདི་ལ་ནི་སྲིན་བུའི་རིགས་འདི་ལྟ་བུ་སྟོང་ཕྲག་བརྒྱད་བཅུ་རྟག་པར་ཉིན་མཚན་དུ་ཟ་བར་བྱེད་པ་དེས་ན་ལུས་ལ་གདུང་བ་དང་། རབ་ཏུ་གདུང་བ་དང་། ཉམ་ཆུང་ཞིང་རྨ་བ་དང་། སྐོམ་པར་བྱེད་ཅིང་གཞན་ཡང་སེམས་ཀྱི་སྡུག་བསྔལ་སྣ་ཚོགས་དང་ལྡན་ཞིང་གདུང་བ་དང་། རབ་ཏུ་གདུང་བ་དང་། ཡོངས་སུ་གདུང་བ་དང་། ནད་མང་པོ་རྣམས་མངོན་དུ་སྣང་བར་བྱེད་པས་སྨན་པ་མཁས་པ་གང་གིས་ཀྱང་གསོ་ཞིང་བསལ་བར་མི་ནུས་ཏེ། དགའ་བོ་སྲིད་པ་རྒྱ་མཚོ་ཆེན་པོ་འཁོར་བ་འདིར་སྡུག་བསྔལ་དེ་ལྟ་བུ་དང་ལྡན་པ་ཡིན་ན་ཅིའི་ཕྱིར་འདི་ལ་རྗེས་སུ་ཆགས་པ་སྐྱེད་པར་བྱེད། གཞན་ཡང་གནོད་པ་མང་པོས་ཡོངས་སུ་བཟུང་བ་འདི་ལྟ་སྟེ། ལྷའི་གདོན་དང་། ཀླུའི་གདོན་དང་། ཀ་ཏ་པུ་ཏ་ནི་བར་གྱི་གདོན་རྣམས་ཀྱིས་ཡོངས་སུ་ཟིན་པ་དང་། གཞན་ཡང་གཅན་ཟན་གྱི་གདོན་རྣམས་ཀྱིས་ཡོངས་སུ་ཟིན་པ་དང་། གཞན་ཡང་ཉི་མ་དང་། ཟླ་བ་དང་། གཟའ་དང་། རྒྱུ་སྐར་གྱི་གདོན་ལ་སོགས་པས་ཡོངས་སུ་ཟིན་ནས་ནང་སྣ་ཚོགས་ཀྱིས་ལུས་དང་། སེམས་ཉོན་མོངས་པར་བྱེད་པ་ཡོད་དེ་བརྗོད་ཀྱིས་མི་ལང་ང་ོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ་མཁས་པ་སུ་ཞིག་འཁོར་བ་འདིར་མའི་མངལ་དུ་འཇུག་པར་མོས་ཤིང་སྡུག་བསྔལ་མི་བཟད་པ་མྱོང་བར་བྱེད། དེ་ལྟར་བཙས་ཤིང་དེ་ལྟར་གྱུར་ནས་མའི་ནུ་ཞོ་ཁྲག་དང་འདྲེས་པ་འཐུང་ཞིང་བཟའ་བ་དང་། བཏུང་བ་རྣམས་ཟོས་ཤིང་འཐུངས་པ་ན་ཡང་དག་པ་མ་ཡིན་པའི་སེམས་ཀྱིས་ཞིམ་པའི་འདུ་ཤེས་སྐྱེད་པར་བྱེད་དོ། །མཐར་གྱིས་ཚར་སྐྱེས་ནས་ལུས་བདེ་ཞིང་ནད་མེད་པ་དང་། གོས་དང་། བཟའ་བ་དང་། བཏུང་བ་དང་ལྡན་ཞིང་ཚེ་ལོ་བརྒྱ་ཐུབ་པར་གྱུར་ན་ཡང་ཚེ་འདི་ཉིད་ལ་གཉིད་ཀྱིས་ཕྱེད་བྲི་བར་བྱེད་དོ། །དང་པོ་བྱིས་པ་དང་། དེའི་འོག་ཏུ་གཞོན་ནུ་ནས་མཐར་གྱིས་ཆེར་སྐྱེས་པར་གྱུར་པའི་བར་དུ་ཡང་མྱ་ངན་དང་། སྨྲེ་སྔགས་འདོན་པ་དང་། ནད་རྣམ་པ་
སྣ་ཚོགས་ཀྱིས་རབ་ཏུ་གཟིར་ཅིང་སྡུག་བསྔལ་གྱི་རེག་པ་བརྒྱ་སྟོང་ཚད་མེད་པ་བརྗོད་ཀྱིས་མི་ལང་བ་རྣམས་ཀྱིས་ལུས་ཉོན་མོངས་པར་བྱེད་པས་ལུས་ཀྱི་སྡུག་བསྔལ་དང་དུ་ལེན་པར་མི་ནུས་པའི་ཚེ་གསོན་པར་མི་སྨོན་ཅིང་ཤི་བར་དགའ་བས་ན་ལུས་འདི་ནི་སྡུག་བསྔལ་མངལ་བ་རབ་ཆུང་བ་ཡིན་ཏེ། རེ་ཤིག་ཙམ་དུ་གནས་པར་བྱེད་ཀྱང་མཐར་འཇིག་པར་འགྱུར་བས་དགའ་བོ་སྐྱེ་བ་རྣམས་ནི་ཐམས་ཅད་ཀྱང་འཆི་བར་འགྱུར་བས་རྟག་པར་གནས་པ་གང་ཡང་མེད་དོ། །གལ་ཏེ་སྨན་དང་ཟས་ཀྱིས་གསོས་ནས་ཚེ་རིང་པོར་འགྱུར་བ་ན་ཡང་མཐར་འཆི་བདག་གི་རྒྱལ་པོས་གསོད་ཅིང་ཡུལ་སྟོང་དུ་སྐྱེ་བར་འགྱུར་བས་དེའི་ཕྱིར་སྐྱེ་བ་ལ་དགའ་བ་ཅི་ཡང་མེད་པར་རིག་པར་བྱས་ནས་ནན་ཏན་བརྩོན་འགྲུས་ཀྱིས་མ་འོངས་པའི་ཚོགས་བསགས་པ་ལ་བག་ཡོད་པར་བྱ་བ་དང་། ཚངས་པར་སྤྱོད་པ་ལ་བརྩོན་ཞིང་ལེ་ལོ་མི་བྱ་བ་དང་། དོན་གྱི་སྤྱོད་པ་དང་། ཆོས་ཀྱི་སྤྱོད་པ་དང་། ཡོན་ཏན་གྱི་སྤྱོད་པ་དང། དགེ་བ་འབའ་ཞིག་གི་སྤྱོད་པ་ལ་རྟག་པར་མོས་པས་བསྒོམ་པར་བྱའོ། །རྟག་པར་བདག་ཉིད་ཀྱི་དགེ་བ་དང་། མི་དགེ་བའི་ལས་རྣམ་པ་གཉིས་ལ་སོ་སོར་བརྟགས་ནས་སེམས་ལ་གཏད་དེ། མ་འོངས་པ་ན་འགྱོད་པ་ཆེན་པོ་མེད་པར་བྱའོ། །རྗེས་སུ་ཆགས་པར་བྱ་བའི་དངོས་པོ་ཐམས་ཅད་ནི་མཐར་འབྲལ་བར་འགྱུར་ཞིང་དགེ་བ་དང་མི་དགེ་བའི་ལས་ཇི་ལྟ་བ་བཞིན་དུ་ཚེ་ཕྱི་མ་ལེན་པར་འགྱུར་རོ། །དགའ་བོ་ཚེ་ལོ་བརྒྱ་ཐུབ་པ་དེ་ཡང་གནས་སྐབས་བཅུ་དང་ལྡན་པར་འགྱུར་ཏེ། དད་པ་ནི་བྱིས་པའི་གནས་སྐབས་ཏེ་ཉམ་ཆུང་གན་རྒྱལ་དུ་ཉལ་བར་བྱེད་དོ། །གཉིས་པ་ནི་གཞོན་ནུར་གྱུར་པ་སྟེ་བྱིས་པའི་རྩེད་མོ་ལ་དགའ་བར་བྱེད་དོ། །གསུམ་པ་ནི་ལང་ཚོ་ལ་བབ་པ་སྟེ་འདོད་པའི་བདེ་བ་རྣམས་མྱོང་བར་བྱེད་དོ། །བཞི་པ་ནི་མཐུ་དང་ལྡན་པར་གྱུར་པ་སྟེ་དཔའ་ཞིང་སྟོབས་དང་ལྡན་པ་ཡིན་ནོ། ། ལྔ་པ་ནི་རལ་བབ་པ་སྟེ་ཤེས་རབ་ཀྱི་སྤོབས་པ་དང་ལྡན་པར་གྱུར་པ་ཡིན་ནོ། །དྲུག་པ་ནི་ཡོངས་སུ་རྫོགས་པ་སྟེ་དྲན་པ་དང་ལྡན་ཞིང་དཔྱོད་པ་ལ་མཁས་པའི་རང་བཞིན་ཅན་ཡིན་ནོ། །བདུན་པ་ནི་མཐར་གྱིས་རྒས་པ་སྟེ་ཆོས་ཀྱི་གཞུང་ལུགས་རབ་ཏུ་ཤེས་
པ་ཡིན་ནོ། །བརྒྱད་པ་ནི་རྒས་པར་གྱུར་པ་སྟེ་བྱ་བ་མང་པོ་རྣམས་ལ་མཐུ་ཆུང་བར་གྱུར་པ་ཡིན་ནོ། །དགུ་པ་ནི་ཤིན་དུ་རྒས་པ་སྟེ་ཅི་ཡང་མི་ནུས་པ་ཡིན་ནོ། །བཅུ་པ་ནི་ལོ་བརྒྱ་པ་སྟེ། འཆི་བའི་གནས་སྐབས་གང་ཡིན་པའོ། །དགའ་བོ་གནས་སྐབས་ཆེན་པོ་དེ་དག་ཀྱང་མདོར་བསྡུས་ཏེ་བསྟན་འདི་ལྟར་ཟླ་བ་བཞི་ཞིང་དུས་གཅིག་ཏུ་བྱས་ནས་ལོ་བརྒྱ་ལ་དུས་སུམ་བརྒྱ་ཡོད་པར་འགྱུར་ཏེ་དཔྱིད་དང་། དབྱར་དང་། དགུན་གྱི་དུས་རེ་རེ་ལ་ཡང་དུས་བརྒྱ་བརྒྱ་ཡོད་པས་སོ། །ལོ་གཅིག་ལ་ཟླ་བ་བཅུ་གཉིས་ཡོད་པས་ཟླ་བ་ཡང་བརྒྱ་ཕྲག་བཅུ་གཉིས་ཡོད་པར་འགྱུར་ལ། དེ་ཡང་ཟླ་བ་ཕྱེད་ཕྱེད་བགྲངས་ནས་ཟླ་བ་ཕྱེད་ཀྱང་བརྒྱ་ཕྲག་ཉི་ཤུ་རྩ་བཞི་ལན་སྟོང་ཕྲག་བདུན་བཅུ་རྩ་གཉིས་ཟ་བར་འགྱུར་ཏེ། རྐྱེན་གྱིས་བར་ཆད་བྱས་ནས་མ་ཟོས་པའི་གྲངས་ཀྱང་དེར་གཏོགས་སོ། །ཟས་མ་ཟོས་པའི་རྐྱེན་ནི་འདི་ལྟ་སྟེ། ཁྲོས་ནས་མ་ཟོས་པ་དང་། སྡུག་བསྔལ་ནས་མ་ཟོས་པ་དང་། བརྩལ་ཏེ་མ་རྙེད་ནས་མ་ཟོས་པ་དང་། གཉིད་ལོག་སྟེ་མ་ཟོས་པ་དང་། སྡོམ་པ་བླངས་པ་དང་། རྩེ་བས་མྱོས་ཏེ་མ་བཟོས་པ་དང་། བྲེལ་ཏེ་མ་ཟོས་པ་སྟེ། ཟོས་པ་དང་། མ་ཟོས་པ་གཅིག་ཏུ་བསྡུས་ན་སྤངས་དེ་སྙེད་ཡོད་དེ་མའི་ནུ་ཞོ་འཐུངས་པ་ཡང་གྲངས་དེར་གཏོགས་སོ། །དེར་ལྟར་ངས་མི་རྣམས་ཀྱི་འཚོ་བའི་ཚེ་ལོ་བརྒྱ་པའི་ལོ་དང་། ཟླ་བ་དང་། ཉིན་མཚན་དང་། བཏུང་བ་ཟོས་པ་དང་། འཐུངས་པའི་གྲངས་ཡོངས་སུ་རྫོགས་པར་བསྟན་པ་ཡིན་གྱིས་ཁྱོད་ཀྱིས་འདི་ལ་ཡོངས་སུ་སྐྱོ་བར་བསྐྱེད་པར་བྱའོ། །དགའ་བོ་དེ་ལྟར་བཙས་ཤིང་ཆེར་སྐྱེས་པའི་ལུས་ལ་ཡང་ནད་མང་པོ་འདི་ལྟ་སྟེ། ཀླད་པ་ན་བ་དང་། མིག་ན་བ་དང་། སྣ་ན་བ་དང་། ལྕེ་ན་བ་དང་། སོ་ན་བ་དང་། ལྐོག་མ་ན་བ་དང་། སྙིང་ན་བ་དང་། ལྟོ་ན་བ་དང་། ལག་པ་ན་བ་དང་། རྐང་པ་ན་བས་གནོད་པ་དང་། གཡན་པ་དང་། མཛེ་དང་། མྱོས་པ་དང་། སྐྲངས་པ་དང་། ལུང་པ་དང་། མཁྲིས་པ་དང་།
བད་ཀན་ལ་སོགས་པ་ནད་མང་པོ་རྣམས་ཀྱིས་ཡན་ལག་དང་། ཉིང་ལག་ན་ཞིང་སྡུག་བསྔལ་མྱོང་བར་བྱེད་དེ། དགའ་བོ་མའི་ལུས་ལ་འདི་འདྲ་བའི་ནད་ཀྱིས་སྡུག་བསྔལ་རྣམ་པ་སྣ་ཚོགས་ཡོད་དོ། །གཞན་ཡང་རླུང་ནད་བརྒྱ་རྩ་གཅིག་དང་། མཁྲིས་པའི་ནད་བརྒྱ་རྩ་གཅིག་དང་། བད་ཀན་གྱི་ནད་བརྒྱ་རྩ་གཅིག་དང་། བདུས་པའི་ནད་བརྒྱ་རྩ་གཅིག་ཡོད་པས་མདོར་བསྡུས་ན་ནད་བཞི་བརྒྱ་རྩ་བཞི་ནང་གི་ལུས་སྐྱེ་བར་འགྱུར་བས་དགའ་བོ་ལུས་འདི་ནི་འབྲས་དང་འདྲ་ཞིང་ཟུག་རྔུ་འདྲ་བས་ནད་མང་པོ་ལས་མངོན་པར་གྲུབ་པ། སྐད་ཅིག་ཙམ་དུ་ཡང་མི་གནས་ཤིང་སྐད་ཅིག་མར་འགྱུར་བ། རང་བཞིན་གྱིས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་གྱུར་པ། འཆི་བ་དང་ཉེ་ཞིང་འཇིག་པར་འགྱུར་བའི་ཆོས་ཅན་ཡིད་བརྟན་དུ་མི་རུང་བ་ཡིན་ནོ། །དགའ་བོ་ལྟར་སེམས་ཅད་རྣམས་ནི་གཞན་ཡང་སྐྱེ་བའི་སྡུག་བསྔལ་འདི་ལྟ་བུ་མྱོང་བར་འགྱུར་ཏེ། འདི་ལྟ་སྟེ། ལག་པ་བཅང་པ་དང་། རྐང་པ་བཅད་པ་དང་། མིག་ཕྱུང་བ་དང་། རྣ་བ་བཅད་པ་དང་། སྣ་བཅད་པ་དང་། ལྕེ་བཅད་པ་དང་། མགོ་བཅད་པ་དང་། ཡན་ལག་དང་། ཉིང་ལག་བཅད་པའི་སྡུག་བསྔལ་དང་། གག་ཤིང་། ལྕག་གིས་གཞུ་པ་དང་། རྡེག་པ་དང་། བཅིང་བ་ལ་སོགས་པའི་སྡུག་བསྔལ་དང་། བཀྲེས་པ་དང། སྐོམ་པ་དང་། ངལ་བའི་སྡུག་བསྔལ་དང། གྲང་བ་དང་། ཚ་བ་དང་། རླུང་དང་། ཆར་པ་དང། སྦྲང་བུ་མཆུ་རིངས་དང་།ཤ་སྤྲང་དང་། གཅན་ཟན་དང་། སྡིག་སྦྲུལ་ལ་སོགས་པའི་རེག་པ་ལས་བྱུང་བའི་སྡུག་བསྔལ་རྣམ་པ་སྣ་ཚོགས་ཚད་མེད་པ་དཔག་ཏུ་མེད་པ་བརྗོད་ཀྱིས་མི་རྫོགས་པ་དག་མྱོང་བར་འགྱུར་ཏེ། སེམས་ཅན་རྣམས་ནི་རྟག་ཏུ་འདི་འདྲ་བའི་སྡུག་བསྔལ་མི་བཟད་པ་རྩུབ་པ་ཡིད་དུ་མི་འོང་བ་ལ་གནས་ཤིང་རྗེས་སུ་ཆགས་པ་དང་། བྱིང་བར་གྱུར་པ་ཡིན་པས་འདོད་པ་རྣམས་ནི་སྡུག་བསྔལ་གྱི་རྩ་བར་གྱུར་པ་ཡིན་ཡང་དེ་སྤང་བར་བྱ་བ་ཡིན་པར་མི་ཤེས་ཤིང་། ཡང་ཡོངས་སུ་གཉེར་བར་བྱེད་པས་ཉིན་མཚན་དུ་ལུས་དང་སེམས་ཡོངས་སུ་གདུང་བ་དང་། ནང་སྲེག་ཅིང་ཚིག་པར་བྱེད་པ་ལ་ཡང་རྒྱུན་འཆད་པ་མེད་དེ། དེ་བཞིན་དུ་སྐྱེ་བ་ཡང་སྡུག་
བསྔལ་ཡིན་ནོ། །རྒ་བ་ཡང་སྡུག་བསྔལ་ཡིན་ནོ། །ན་བ་ཡང་སྡུག་བསྔལ་ཡིན་ནོ། འཆི་བ་ཡང་སྡུག་བསྔལ་ཡིན་ནོ། །།སྡུག་པ་དང་བྲལ་བ་ཡང་སྡུག་བསྔལ་ཡིན་ནོ། །མི་སྡུག་པ་དང་ཕྲད་པ་ཡང་སྡུག་བསྔལ་ཡིན་ནོ། །གང་འདོད་པ་བཙལ་ཏེ་མ་རྙེད་པ་ཡང་སྡུག་བསྔལ་ཡིན་ནོ། །ཉེ་བར་ལེན་པའི་ཕུང་པོ་ལྔ་ཡང་སྡུག་བསྔལ་ཡིན་ནོ། །འགྲོ་བ་དང་། འགྲེང་བ་དང་། འདུག་པ་དང་། ཉལ་བའི་སྤྱོད་ལམ་བཞི་པོ་དག་ཀྱང་སྡུག་བསྔལ་ཡིན་པས། གལ་ཏེ་རྟག་ཏུ་འགྲོ་ཞིང་འགྲེང་བ་དང་། འདུག་པ་དང་། ཉལ་བར་མ་གྱུར་ན་ཡང་སྡུག་བསྔལ་མྱོང་ཞིང་བདེ་བ་མེད་པར་འགྱུར་རོ། །གལ་ཏེ་རྟག་ཏུ་འགྲེང་ཞིང་འགྲོ་བ་དང་། འདུག་པ་དང་། ཉལ་བར་གྱུར་ཏམ། གལ་ཏེ་རྟག་ཏུ་འདུག་ལ་འགྲོ་བ་དང་། འགྲེང་བ་དང། ཉལ་བར་མ་གྱུར་ཏམ། གལ་ཏེ་རྟག་ཏུ་ཉལ་ལ་འགྲོ་བ་དང་། འགྲེང་བ་དང་། འདུག་པར་མ་གྱུར་ན་ཡང་ཐམས་ཅད་སྡུག་བསྔལ་མི་ཟད་པ་མྱོང་ཞིང་བདེ་བ་ཐོབ་པར་མི་འགྱུར་བས་དགའ་བོ་འདི་དག་ཐམས་ཅད་སྡུག་བསྔལ་མ་སྤངས་པས་སྡུག་བསྔལ་ཡོངས་སུ་གཉེར་བར་བྱེད་པ་ཡིན་པས་སྡུག་བསྔལ་ཁོ་ན་སྐྱེ་ཞིང་། སྡུག་བསྔལ་ཁོ་ན་འགག་པར་འགྱུར་བས་འདུ་བྱེད་རྣམས་ཀྱི་རྒྱུ་དང་རྐྱེན་རྒྱུན་ཆད་པ་མེད་པར་འབྱུང་བར་འགྱུར་ཏེ། དེ་བཞིན་གཤེགས་པས་འདི་དག་ཐུགས་སུ་ཆུད་པའི་ཕྱིར་སེམས་ཅན་རྣམས་ཀྱི་འཁོར་བའི་ཆོས་འདུ་བྱེད་རྣམས་མི་རྟག་ཅིང་ཡང་དག་པའི་མཐར་ཕྱིན་པ་མ་ཡིན་པ། རྣམ་པར་འགྱུར་བའི་ཆོས་ཅན་ཡིད་བརྟན་དུ་མི་རུང་བ་ཡིན་པས་ཆོག་ཤེས་པ་ཡོངས་སུ་བཙལ་ནས་ཤིན་ཏུ་སྐྱོ་བ་བསྐྱེད་དེ། ནན་ཏན་བརྩོན་འགྲུས་ཀྱིས་རྣམ་པར་གྲོལ་བ་ཡོངས་སུ་གཉེར་བར་བྱའོ་ཞེས་གསུངས་པ་ཡིན་ནོ། །དགའ་བོ་བདེ་འགྲོར་སྐྱེས་པའི་སེམས་ཅན་ཡང་སྐྱེ་གནས་མི་གཙང་བ་དག་ཏུ་སྡུག་བསྔལ་མི་བཟད་པ། ཡང་དག་པ་མ་ཡིན་པ། རྣམ་པ་སྣ་ཚོགས་མྱོང་བ་ཡང་བརྗོད་ཀྱིས་མི་རྫོགས་ན་ངན་སོང་གསུམ་པ་ཡི་དགས་དང་། དུད་འགྲོ་དང་། སེམས་ཅན་དམྱལ་བའི་སེམས་ཅན་རྣམས་ཀྱིས་མྱོང་བར་གྱུར་བའི་སྡུག་བསྔལ་མི་བཟད་པ་བཟོད་པར་དཀའ་བ་ཡོངས་
སུ་རྫོགས་པར་བརྗོད་པ་ལྟ་སྨོས་ཀྱང་ཅི་དགོས།། །།བམ་པོ་གསུམ་པ་སྟེ་ཐ་མ།། །།གཞན་ཡང་དགའ་བོ་མའི་མངལ་དུ་འཇུག་པ་རྣམ་པ་བཞི་ཡོད་དེ། བཞི་གང་ཞེ་ན། སེམས་ཅན་ཁ་ཅིག་ནི་ཡང་དག་པར་ཤེས་བཞིན་དུ་འཇུག། ཡང་དག་པར་ཤེས་བཞིན་དུ་གནས། ཡང་དག་པར་ཤེས་པ་བཞིན་དུ་འབྱུང་བ་ཡང་ཡོད། །གཅིག་ནི་ཡང་དག་པར་ཤེས་བཞིན་དུ་འཇུག། ཡང་དག་པར་ཤེས་བཞིན་དུ་གནས་ལ་ཡང་དག་པར་མི་ཤེས་བཞིན་དུ་འབྱུང་བ་ཡོད། ཁ་ཅིག་ནི་ཡང་དག་པར་ཤེས་བཞིན་དུ་འཇུག་ལ་ཡང་དག་པར་མི་ཤེས་བཞིན་དུ་གནས་ཤིང་ཡང་དག་པར་མི་ཤེས་བཞིན་དུ་འབྱུང་བ་ཡང་ཡོད། ཁ་ཅིག་ནི་ཡང་དག་པར་མི་ཤེས་བཞིན་དུ་འཇུག། ཡང་དག་པར་མི་ཤེས་བཞིན་དུ་གནས། ཡང་དག་པར་མི་ཤེས་བཞིན་དུ་འབྱུང་བ་ཡང་ཡོད་དོ། །དེ་ལ་སུ་ཞིག་ཡང་དག་པར་ཤེས་བཞིན་དུ་འཇུག་པ་དང་། གནས་པ་དང་། འབྱུང་བར་འགྱུར་ཞེ་ན། འདི་ལྟར་འདི་ནི་སོ་སོའི་སྐྱེ་བོའི་སེམས་ཅན་ཁ་ཅིག་རང་བཞིན་གྱིས་ཚུལ་ཁྲིམས་བསྲུང་བ་ལ་དགའ་ཞིང་ཡང་ནས་ཡང་དུ་དགེ་བའི་ཕྱོགས་ལ་གོམས་པར་བྱེད་པ་དང་། དངོས་པོ་མཆོག་ལ་མོས་ཤིང་བསོད་ནམས་རྣམས་མངོན་པར་འདུ་བྱེད་པ་དང་། ཤིན་ཏུ་ཡང་དག་པར་སྡོམ་པ་དང་། རྟག་པར་དྲང་པོར་སེམས་ཤིང་བག་མེད་པར་མི་བྱེད་པ་དང་། ཤེས་རབ་ཆེན་པོ་དང་ལྡན་པས་འཆི་ཀའི་དུས་ཀྱི་ཚེ་འགྱོད་པ་མེད་པར་སྐྱེ་བ་ཡང་དག་པར་ལེན་པར་བྱེད་པ་རྒྱུན་དུ་ཞུགས་པ་སྐྱེ་བ་ལན་བདུན་པ་འམ། རིགས་ནས་རིགས་སུ་སྐྱེ་བ་འམ། ལན་ཅིག་ཕྱིར་འོང་བ་འམ། བར་ཆད་གཅིག་པ་དག་ཡིན་ཏེ། གང་ཟག་དེ་དག་གིས་སྔར་དགེ་བ་སྤྱད་པའི་ཕྱིར་འཆི་ཀའི་དུས་ཀྱི་ཚེ་སྡུག་བསྔལ་ཉེ་བར་འོངས་ཤིང་ན་བ་དང་། ཚ་བ་ཉམས་སུ་མྱོང་བར་གྱུར་ཀྱང་སེམས་ལ་གཡེང་བ་མེད་པར་ཡང་དག་པར་དྲན་བཞིན་དུ་འཆི་བའི་དུས་བྱས་ཏེ། ཡང་དག་པར་དྲན་བཞིན་དུ་མའི་མངལ་དུ་ཞུགས་ནས་ཆོས་རྣམས་ལས་ཀྱི་དབང་གིས་སྐྱེ་བ་དང་། ཐམས་ཅད་རྒྱུ་དང་རྐྱེན་ལས་སྐྱེ་བར་འགྱུར་བས་རྟག་ཏུ་བདུད་ཀྱི་གནས་བྱས་པར་གྱུར་ཏོ། །ཞེས་རབ་ཏུ་ཤེས་སོ། །
དགའ་བོ་ལུས་འདི་ནི་མི་གཅང་པ་ཐམས་ཅད་ཀྱི་ཁྱིམ་ཡིན་པས་རང་བཞིན་གྱིས་རྟག་པར་གནས་པ་མ་ཡིན་པ་དང་། གླེན་པའི་དངོས་པོ་ཡིན་པས་རྨོངས་པ་དག་ལ་སླུ་བར་བྱེད་པ་ཡིན་ནོ་སྙམ་དུ་རིག་པར་བྱའོ། །ལུས་འདི་ནི་རུས་པའི་འཁྲུལ་འཁོར་རྩ་རྒྱུས་རྣམ་ཕན་ཆུན་འབྲེལ་པ། བུ་ག་དང་གནད་རྣམས་དོད་པར་གྱུར་པ། ཤ་དང་། ཚིལ་དང་། རུས་པ་དང་། རྐང་ཕན་ཚུན་དུ་དཀྲིས་ཤིང་ལྤགས་པས་གཡོས་པ་ཡིན་ཡང་སྐྱོན་དུ་མ་མཐོང་བས་རབ་ཏུ་གདུངས་པའི་ཕུག་མི་གཙང་བས་ཡོངས་སུ་གང་བ། སྐྲ་དང་། སྤུ་དང་། སེན་མོ་དང་། སོའི་གནས་སྐབས་ཐ་དད་པ་ལ། བདག་དང་བདག་གིར་བཟུང་བའི་ཕྱིར་རྟག་ཏུ་རང་དབང་མེད་པར་ཁྲིད་པ། རྟག་ཏུ་མཆིལ་མ་དང་། སྣབས་དང་། མི་གཙང་བ་དང་། ཁ་ཆུ་དང་། རྡུལ་དང་། མཁྲིས་པ་དང་། བད་ཀན་འབྱུང་ཞིང་ཞག་དང་། ཆིལ་རུལ་ཞིང་མྱགས་པ་དང་། མཁལ་མ་དང་། མཚེར་བ་དང་། མཆིན་པ་དང་། གློ་བ་དང་། རྒྱུ་མ་ཆེ་ཕྲ་མི་གཙང་བས་གང་ཞིང་སྐྱག་བྲོ་བ། སྲིན་བུའི་རིགས་མང་པོས་ཀུན་དུ་ཁྱབ་པར་གང་བ། སྟེང་དང་འོག་གི་བུ་ག་རྣམས་སུ་རྟག་ཏུ་མི་གཙང་བ་འཛག་པ་ཞུ་བ་དང་། མ་ཞུ་བའི་གནས་གཉིས་ལྤགས་པ་སྲ་བ་མོས་གཡོགས་པས། འདི་ནི་སྣམ་ཕྱིས་དང་འདྲ་བ་ཡིན་ནོ་སྙམ་དུ་ཁྱོད་ཀྱིས་སོ་སོར་བརྟག་པར་བྱའོ། །ཇི་ཙམ་དུ་བཟའ་བ་དང་། བཅའ་བ་ཟོས་འཆོས་ཤིང་བལྡད་པ་ན་མཆིལ་སྣབས་སུ་གྱུར་ནས་མིད་པར་འཇུག་ཅིང་རྐང་དང་ཀླད་པ་ཕན་ཚུན་འདྲེས་ནས་ལྟོ་བར་འབབ་པར་འགྱུར་ཏེ། འདི་ལྟ་སྟེ་དཔེར་ན་ཁྱི་རུས་པ་སྐམ་པོ་བལྡད་པ་ལྟ་བུར་གྱུར་པ་ཡིན་ཡང་ཡང་དག་པ་མ་ཡིན་པའི་སེམས་ཀྱིས་ཞིམ་པའི་འདུ་ཤེས་སྐྱེད་པར་བྱེད་པས་ཟས་རྐེད་པར་ཕྱིན་ནས་གྱེན་དུ་ཟློན་པར་བྱེད་ཀྱང་སླར་མིད་པར་བྱེད་དོ། །དགའ་བོ་ལུས་འདི་ནི་དང་པོ་མེར་མེར་པོ་དང་། ནུར་ནུར་པོ་དང་། ལྟར་ལྟར་པོ་དང་། མཁྲང་འགྱུར་དང་། རྐང་ལག་འགྱུས་པ་མི་གཙང་བའི་དངོས་པོ་ཆེར་སྐྱེས་ནས། བྱིས་པའི་ཚེ་འཁོར་བར་གྱུར་པ་ནས་རྒས་པའི་བར་དུ་འཁོར་ཞིང་བཅིངས་པར་གྱུར་པ་ནི་འདི་ལྟ་སྟེ། དཔེར་ན་མུན་པའི་གཡང་ས་
དང་འདྲའོ། །ཁྲོན་པ་མནམ་པོ་དང་འདྲ་བར་རྟག་ཏུ་ལན་ཚྭ་དང་། བསྐ་བ་དང་། ཚ་བ་དང་། སྐྱུར་བ་ལ་སོགས་པའི་ཟས་ཀྱི་རོས་ཡོངས་སུ་གསོས་པ། གཞན་ཡང་མའི་མངལ་ཀྱི་མེས་ལུས་ཀྱི་དབང་པོ་རབ་ཏུ་བཙོས་པ། མི་གཙང་བའི་སྣོད་དུ་རྟག་པར་རབ་ཏུ་གདུང་བའི་སྡུག་བསྔལ་མྱོང་བར་འགྱུར་བ། གལ་ཏེ་མི་འགྲེང་ངམ། འདུག་གམ། ཉལ་བར་གྱུར་པ་ན་བཅིང་བ་ལྔས་བཅིངས་པ་འམ། མེས་གདུངས་པ་བཞིན་ཤིན་དུ་བཟོད་པར་དཀའ་བའི་སྡུག་བསྔལ་མྱོང་བར་འགྱུར་བས་དཔེ་བྱར་ཡང་མི་ནུས་སོ། །དགའ་བོ་མངལ་ན་གནས་པ་དེ་དེ་ལྟར་མི་གཙང་བའི་འདམ་དུ་གནས་ཤིང་སྡུག་བསྔལ་མང་པོས་ཉོན་མོངས་པར་འགྱུར་མོད་ཀྱི་འོན་ཀྱང་དབང་པོ་རྣོ་བའི་ཕྱིར་སེམས་གཡེང་བར་མི་འགྱུར་རོ། །གཞན་ཡང་སེམས་ཅན་བསོད་ནམས་ཆུང་བ་ཁ་ཅིག་ནི་མའི་མངལ་ན་འཕྲེང་དུ་ཉལ་བ་འམ། ལོག་པར་འདུག་པར་ཡང་འགྱུར་ཏེ། དེ་ཡང་སྔོན་གྱི་ལས་ཀྱི་སྟོབས་ཀྱི་ཕྱིར་རམ། ཡང་ན་མས་ཁ་ཟས་མ་སྙོམས་པ་ཤིན་དུ་གྲང་བ་འམ། ཤིན་དུ་ཆ་བ་འམ། ཤིན་དུ་སྐྱུར་བ་འམ། ཤིན་དུ་མངར་བ་འམ། ཤིན་དུ་ཁ་བ་ཟོས་པའི་ཕྱིར་རམ། ཡང་ན་ཚད་ལས་འདས་པར་སྐོམ་འཐུངས་སམ། འདོད་ཆགས་མང་དུ་སྤྱད་དམ། ནད་བུ་ཅན་དུ་གྱུར་ཏམ། མྱ་ངན་མང་པོས་ནོན་ཏམ། རྡེག་འཚོས་སམ། བརྡེགས་པར་གྱུར་ན་ཡང་རྐྱེན་འདི་དག་གི་དབང་གིས་མའི་ལུས་ཀྱང་ཡོངས་སུ་གདུང་བར་འགྱུར་ལ་མའི་ལུས་ཡོངས་སུ་གདུངས་པར་གྱུར་པའི་ཕྱིར་མངལ་ན་གནས་པ་ཡང་ཡོངས་སུ་གདུང་བར་འགྱུར་རོ། །ཡོངས་སུ་གདུངས་པར་གྱུར་པའི་ཕྱིར་ན་སྡུག་བསྔལ་མང་པ་མྱོང་བར་འགྱུར་རོ། །སྡུག་བསྔལ་མང་པོ་མྱོང་བར་གྱུར་བའི་ཕྱིར་ན་གཡོ་བར་འགྱུར་རོ། །གཡོས་པར་གྱུར་པའི་ཕྱིར་ན་ལུས་ལོག་པར་འཕྲེད་དུ་ཉལ་ཞིང་འབྱུང་བར་མི་ནུས་པ་ལ་བུད་མེད་མཁས་པས་མར་རམ། འབྲུ་མར་གྱིས་ལག་པ་བསྐུས་ནས་མའི་མངལ་དུ་འཇུག་སྟེ། བགས་ཀྱིས་བགས་ཀྱི་མཇལ་ལ་མྱངས་ནས་སྔར་ཇི་ལྟར་གནས་པ་བཞིན་དུ་འཇོག་པར་བྱེད་པས་ལག་པས་རེག་པར་གྱུར་པ་ན་མངལ་ན་གནས་པ་དེ་སྡུག་བསྔལ་ཆེན་པོ་མི་ཟད་པ་དག་
མྱོང་བར་འགྱུར་ཏེ། དགའ་བོ་འདི་ལྟ་སྟེ་དཔེར་ན་ཁྱེའུ་འམ་བུ་མོ་ཤིན་དུ་གཞོན་པའི་ལུས་ལ་ལ་ཞིག་གིས་མཚོན་རྣོན་པོས་ལྤགས་པ་དང་ཤ་གཅད་ནས་དེའི་སྟེང་ཏུ་ཐལ་བས་གཏོར་ན། དེའི་རྐྱེན་གྱིས་སྡུག་བསྔལ་ཆེན་པོ་མྱོང་བར་འགྱུར་བ་དེ་བཞིན་དུ་མངལ་ན་གནས་པའི་སྡུག་བསྔལ་མི་བཟད་པ་རྩུབ་པ་ཡང་དེ་འདྲ་སྟེ། དེ་ལྟ་བུའི་སྡུག་བསྔལ་མྱོང་བར་གྱུར་ཀྱང་དབང་པོ་མཆོག་ཏུ་རྣོ་བའི་ཕྱིར་ཡང་དག་པའི་དྲན་པ་དང་ལྡན་པས་རྣམ་པ་གཡེང་བར་མི་འགྱུར་ཏེ། དགའ་བོ་དེ་ལྟར་ན་མངལ་ན་གནས་པ་དེ་མའི་མངལ་ན་གནས་པའི་ཚེ་དེ་ལྟ་བུའི་སྡུག་བསྔལ་མྱོང་བར་འགྱུར་རོ། །གཞན་ཡང་བཙས་སུ་ཉེ་བའི་ཚེ་ན་སྡུག་བསྔལ་དང་བཅས་བཞིན་དུ་འབྱུང་བར་འགྱུར་ཏེ། ལས་ཀྱི་རླུང་གི་དབང་གིས་དེའི་ལག་པ་བསྣོལ་ནས་ཡན་ལག་དང་ཉིང་ལག་བཅུམ་སྟེ། སྡུག་བསྔལ་ཆེན་པོ་མི་བཟད་པ་མྱོང་ནས། མའི་མངལ་ནས་བྱུང་བར་གྱུར་པས་ལུས་ཀྱི་ཡན་ལག་ཐམས་ཅད་སྔོན་པོར་འགྱུར་ཏེ་འདི་ལྟ་སྟེ། དཔེར་ན་གསར་དུ་སྐྲངས་པ་ལ་རེག་པར་མི་བཟོད་པ་བཞིན་དུ་བཀྲེས་སྐོམ་གྱིས་གདུང་བ་དང་། སྙིང་འཕྱང་ཞིང་གདུང་བ་དང་བཅས་བཞིན་དུ་ལས་ཀྱི་རླུང་གི་རྒྱུ་དང་རྐྱེན་གྱིས་བུས་ནས་མངལ་ནས་འབྱུང་བར་འགྱུར་རོ། །མངལ་ནས་བྱུང་ནས་ཀྱང་ཕྱི་རོལ་གྱི་རླུང་གིས་རེག་པར་གྱུར་བ་ན་འདི་ལྟ་སྟེ། དཔེར་ན་མཚོན་གྱིས་བཅད་ནས་ཐིལ་བས་བསྐུས་པ་ཇི་ལྟ་བ་བཞིན་དུ་འགྱུར་རོ། །ལག་པ་དང་གོས་ཀྱིས་རེག་པར་གྱུར་པའི་ཚེ་ན་ཡང་ཐམས་ཅད་དུ་སྡུག་བསྔལ་མི་བཟད་པ་མྱོང་བར་འགྱུར་ཏེ། འདི་ལྟ་བུའི་བསྔལ་མྱོང་བར་གྱུར་ཀྱང་དབང་པོ་རབ་ཏུ་རྣོ་བའི་ཕྱིར་ཡང་དག་པའི་དྲན་པ་དང་ལྡན་པས་རྣམ་པར་གཡེང་བར་མི་འགྱུར་ཏེ། མའི་མངལ་དུ་ཤེས་བཞིན་དུ་འཇུག་པ་དང་། གནས་པ་དང་། འབྱུང་བ་ཐམས་ཅད་ཀྱང་སྡུག་བསྔལ་པ་ཡིན། དགའ་བོ་མཁས་པ་སུ་ཞིག་འདི་འདྲ་བའི་མངལ་དུ་འཇུག་པ་ལ་མོས་པར་བྱེད། དགའ་བོ་དེ་ལ་སུ་ཞིག་མའི་མངལ་དུ་ཡང་དག་པར་ཤེས་བཞིན་དུ་འཇུག་ཅིང་གནས་ལ་ཡང་དག་པར་མི་ཤེས་པ་བཞིན་དུ་འབྲུང་བར་འགྱུར་ཞེ་ན། དགའ་བོ་ཇི་ལྟར་འདི་ནི་སྐྱེ་བོའི་སེམས་ཅན་ཁ་ཅིག་ནི་རང་བཞིན་
གྱིས་ཚུལ་ཁྲིམས་སྲུང་བ་ལ་དགའ་ཞིང་ཡང་ནས་ཡང་དུ་དགེ་བའི་ཕྱོགས་ལ་གོམས་པར་བྱེད་པ་དང་། རྟག་ཏུ་དངོས་པོ་མཆོག་ལ་མོས་ཤིག་བསོད་ནམས་རྣམས་མངོན་པར་འདུ་བྱེད་པ་དང་། དེའི་སེམས་དྲང་ཞིང་བག་མེད་པར་མི་བྱེད་པ་དང་། ཤེས་རབ་ཆུང་ངུ་དང་ལྡན་པས་འཆི་ཀའི་དུས་ཀྱི་ཚེ་འགྱོད་པ་མེད་པར་གྱུར་བ་རྒྱུན་དུ་ཞུས་པ་སྐྱེ་བ་ལན་བདུན་པ་འམ། རིགས་ནས་རིགས་སུ་སྐྱེ་བ་འམ། ལན་ཅིག་ཕྱིར་འོང་བ་འམ། བར་ཆད་གཅིག་པ་དག་ཡིན་ཏེ། གང་ཟག་དེ་དག་གིས་སྔར་དགེ་བ་སྤྱད་པས་འཆི་ཀའི་དུས་ཀྱི་ཚེ་སྡུག་བསྔལ་ཉེ་བར་འོངས་ཤིང་ན་བ་དང་ཚ་བ་ཉམས་སུ་མྱོང་བར་གྱུར་ཀྱང་སེམས་ལ་གཡེང་བ་མེད་པར་ཡང་དག་པར་དྲན་བཞིན་དུ་མའི་མངལ་དུ་བཞུགས་ནས་ཆོས་རྣམས་ལས་ཀྱི་དབང་གིས་སྐྱེ་བ་དང་། ཐམས་ཅད་རྒྱུ་དང་རྐྱེན་ལས་སྐྱེ་བར་རབ་ཏུ་ཤེས་སོ་ཞེས་བྱ་བ་ནས་མའི་མངལ་ནས་ཞེས་བྱ་བའི་བར་དུ་ཡང་སྔ་མ་བཞིན་དུ་རྒྱས་པར་སྦྱར་ཏེ། དེ་ལྟ་བུའི་སྡུག་བསྔལ་མི་བཟད་པ་ཚ་ཞིང་རྩུབ་པ་རྣམས་མྱོང་བར་གྱུར་ཀྱང་དབང་པོ་འབྲི་དང་ལྡན་པའི་ཕྱིར་ཡང་དག་པར་ཤེས་བཞིན་དུ་འཇུག་ཅིང་གནས་ལ། ཡང་དག་པར་མི་ཤེས་བཞིན་དུ་འབྱུང་བར་འགྱུར་ཏེ། མཁས་པ་སུ་ཞིག་འདི་འདྲ་བའི་མངལ་དུ་འཇུག་པ་ལ་མོས་པར་བྱེད་ཅེས་བྱ་བའི་བར་དུ་ཡང་སྔ་མ་བཞིན་དུ་རྒྱས་པར་སྦྱར་རོ། དགའ་བོ་སུ་ཞིག་ཡང་དག་པར་ཤེས་བཞིན་དུ་མའི་མངལ་དུ་འཇུག་ལ། ཡང་དག་པར་མི་ཤེས་བཞིན་དུ་གནས་ཤིང་འབྱུང་བར་བྱེད་ཅེ་ན། དགའ་བོ་འདི་ལྟར་འདི་ན་སོ་སོའི་སྐྱེ་བོའི་སེམས་ཅན་ཁ་ཅིག་རང་བཞིན་གྱིས་ཚུལ་ཁྲིམས་སྲུང་བ་ལ་དགའ་ཞིང་ཡང་ནས་ཡང་དུ་དགེ་བའི་ཕྱོགས་ལ་གོམས་པར་བྱེད་པ་དང་། རྟག་ཏུ་དངོས་པོ་མཆོག་ལ་མོས་ཤིང་བསོད་ནམས་མངོན་པར་འདུ་བྱེད་པ་ཞེས་བྱ་བ་ནས་འཆི་ཀའི་དུས་ཀྱི་ཚེ་འགྱོད་པ་མེད་པར་གྱུར་པ་རྒྱུན་དུ་ཞུགས་པ་སྐྱེ་བར་ལན་བདུན་པ་ཞེས་བྱ་བ་ལ་སོགས་པའི་བར་དུ་ཡང་སྔ་མ་བཞིན་དུ་རྒྱས་པར་སྦྱར་སྟེ། འཆི་ཀའི་དུས་ཀྱི་ཚེ་སྡུག་བསྔལ་ཉེ་བར་འོངས་ཤིང་ན་བ་དང་། ཚ་བ་ཉམས་སུ་མྱོང་བར་གྱུར་ཀྱང་སེམས་ལ་གཡེང་བ་མེད་པར་ཡང་དག་པར་དྲན་
བཞིན་དུ་མའི་མངལ་དུ་འཇུག་པར་བྱེད་དེ། དབང་པོ་རྣོན་པོ་མ་ཡིན་པའི་ཕྱིར་ཤེས་བཞིན་དུ་མངལ་དུ་འཇུག་པར་བྱེད་ཀྱང་མི་ཤེས་བཞིན་དུ་གནས་ཤིང་འབྱུང་བར་བྱེད་དེ། མཁས་པ་སུ་ཞིག་འདི་འདྲ་བའི་མངལ་དུ་འཇུག་པ་ལ་མོས་པར་བྱེད་ཅེས་བྱ་བ་ལ་སོགས་པ་ཡར་སྔ་མ་བཞིན་དུ་རྒྱས་པར་སྦྱར་རོ། །དགའ་བོ་སུ་ཞིག་ཡང་དག་པར་མི་ཤེས་བཞིན་དུ་འཇུག་པ་དང་། གནས་པ་དང་། འབྱུང་བར་བྱེད་ཅེ་ན། འདི་ལྟར་འདི་ན་སོ་སོའི་སྐྱེ་བོའི་སེམས་ཅན་ཁ་ཅིག་ཚུལ་ཁྲིམས་ཡོངས་སུ་དག་པ་འབྲལ་བ་ལ་དགའ་ཞིང་དགེ་བའི་ཕྱོགས་སྒྲུབ་པར་མི་བྱེད་པ་རྟག་ཏུ་དངོས་པོ་ངན་པ་ལ་མོས་ཤིང་སྡིག་པ་རྣམས་སྤྱོད་པ། སེམས་ཀྱི་རང་བཞིན་མི་དྲང་ཞིང་བག་མེད་པ་མང་བ། ཤེས་རབ་དང་མི་ལྡན་པ་དང་ལོངས་སྤྱོད་ལ་མངོན་པར་ཞེན་ཅིང་སེར་སྣ་བྱས་པ་དང་། རྟག་ཏུ་ལག་པ་བསྐུམས་ནས་གཞན་དག་ལ་རྐྱོང་ཞིང་གཏོང་བར་མི་བྱེད་པ་དང་། རྟག་ཏུ་རེ་བ་བཅས་ཤིང་སེམས་རབ་ཏུ་དུལ་བར་མ་གྱུར་བ་དང་། ལྟ་བ་དང་། སྤྱོད་པ་ཕྱིན་ཅི་ལོག་ཏུ་གྱུར་པས་འཆི་ཀའི་དུས་ཀྱི་ཚེ་འགྱོད་པ་དང་། བཅས་ཤིང་སྡིག་པ་མི་དགེ་བའི་ལས་མངོན་དུ་གྱུར་པས་འཆི་ཀའི་དུས་ཀྱི་ཚེ་སྡུག་བསྔལ་མི་བཟད་པ་དང་། ཚ་བ་དང་། རྩུབ་པ་དང་། ཡིད་དུ་མི་འོང་བ་དག་གིས་རབ་ཏུ་གཟིར་ཅིང་དེའི་སེམས་རྣམ་པ་གཡེང་བར་བྱེད་པས་སྡུག་བསྔལ་གྱི་དབང་གིས་བདག་ནི་སུ་ཞིག་གང་ནས་འདིར་འོངས། དེ་གང་དུ་འགྲོ་བར་འགྱུར་ཞེས་རབ་ཏུ་མི་ཤེས་པས་དགའ་བོ་འདི་ནི་དུས་གསུམ་དུ་ཡང་དག་པར་ཤེས་བཞིན་མེད་པ་ཞེས་བྱ་སྟེ་རྒྱས་པར་གོང་མ་བཞིན་དུ་སྦྱར་རོ། དགའ་བོ་སེམས་ཅན་དེ་དག་མིར་སྐྱེས་ནས་དེ་ལྟ་བུའི་སྡུག་བསྔལ་ཚད་མེད་པ་དང་ལྡན་པར་འགྱུར་མོད་ཀྱི་འོན་ཀྱང་དེ་དག་ནི་གནས་མཆོག་ཏུ་གྱུར་པ་ཡིན་པས་བསྐལ་པ་བྱེ་བ་བརྒྱ་སྟོང་ཚད་མེད་པ་སྙེད་དུ་ཡང་མིའི་ལུས་ཤིན་དུ་རྙེད་པར་དཀའ་བ་ཡིན་ནོ། གལ་ཏེ་མཐོ་རིས་སུ་སྐྱེས་པར་གྱུར་ན་ཡང་རྟག་ཏུ་ལྟུང་བས་འཇིགས་པས་སྡུག་པ་དང་བྲལ་བའི་སྡུག་བསྔལ་དང་ལྡན་ཏེ། འཆི་བའི་དུས་ཀྱི་ཚེ་ལྷ་གཞན་རྣམས་ཀྱིས་འདི་སྐད་དུ་ཁྱོད་བདེ་འགྲོའི་འཇིག་རྟེན་དུ་སྐྱེ་བར་གྱུར་ཅིག། བདེ་འགྲོའི་འཇིག་རྟེན་གང་ཞེ་ན། འདི་ལྟ་སྟེ། དེ་ནི་མིའི་འགྲོ་བ་གང་ཡིན་པའོ་ཞེས་ཟེར་བས་མིའི་འགྲོ་བ་ནི་ཤིན་དུ་རྙེད་པར་དཀའ་བ་ཡིན་ལ། ཁོམ་
པ་དང་ལྡན་པ་ནི་དེ་བས་ཀྱང་ཆེས་ཤིན་དུ་རྙེད་པར་དཀའོ། །ངན་འགྲོ་གང་ཞེ་ན། འདི་ལྟ་སྟེ། ངན་སོང་གསུམ་པོ་དག་གང་ཡིན་པའོ། །སེམས་ཅན་དམྱལ་བའི་འགྲོ་བ་ནི་རྟག་ཏུ་སྡུག་བསྔལ་མི་བཟང་བ། ཤིན་བཅས་པ། གསོད་ཅིང་གནོད་པར་བྱེད་པ། ལག་པ་ཁྲག་གིས་བསྐུས་པ། བྱམས་པ་དང་། སྙིང་རྗེ་མེད་པ། བྱད་བཞིན་མི་སྡུག་པ། མཐོང་ན་འཇིགས་སུ་རུང་བ། གལ་ཏེ་མི་དང་ཉེ་བར་གྱུར་ན་ཡང་བཀྲེས་པ་དང་། སྐོམ་པའི་སྡུག་བསྔལ་མྱོང་བར་བྱེད་པས་རྟག་པར་སྒྲིབ་པ་དང་བཅས་ཤིག་ཐོགས་པ་དང་བཅས་པ་ཡིན་ནོ། །དུད་འགྲོའི་སྐྱེ་གནས་ཀྱི་འགྲོ་བ་ནི་ཚད་མེད་དཔག་ཏུ་མེད་དེ། དོན་གྱི་སྤྱོད་པ་དང་མི་ལྡན་པ། བསོད་ནམས་ཀྱི་སྤྱོད་པ་དང་མི་ལྡན་པ། ཆོས་ཀྱི་སྤྱོད་པ་དང་མི་ལྡན་པ། དགེ་བའི་སྤྱོད་པ་དང་མི་ལྡན་པ། དྲང་པོའི་སྤྱོད་པ་དང་མི་ལྡན་པ། མཐུ་དང་ལྡན་པ་རྣམས་མཐུ་ཆུང་བ་དག་ལ་ཟ་བར་བྱེད་པ་དག་ཡིན་ནོ། །དུད་འགྲོའི་སྐྱེ་གནས་ཁ་ཅིག་ནི་མུན་པར་སྐྱེས། མུན་པར་རྒས། མུན་པར་འཆི་བའི་དུས་བྱེད་ཅིང་། མི་གཙང་བའི་གནས་གཅིན་རྐྱག་གི་ནང་དུ་གནས་ནས་རི་འགའ་སྣང་བར་བཅས་པ་ཡང་ཡོད་དེ། འདི་ལྟ་སྟེ། ཕྱེ་མ་ལེབ་དང་། སྦྲང་མ་དང་། སྲོ་ཤིག་དག་། ཏྲེ་ལ་ཏ་ལྟ་བུ་རྣམས་སོ། །གཞན་ཡང་རྟག་པར་མུན་པའི་ནང་དུ་སྐྱེས། མུན་པའི་ནང་དུ་རྒས་པར་གྱུར་པ་ཚད་མེད་དཔག་ཏུ་མེད་པ་དག་ཡོད་དེ་དེ། དེ་ནི་ཚེ་རབས་སྔ་མ་མིར་གྱུར་པ་ན་གླེན་ཞིང་གཏི་མུག་པས་ཆོས་ཡང་དག་པ་མ་མཉན་པ། ལུས་དང་ངག་དང་ཡིད་ཐལ་རངས་སུ་གཏོང་ཞིང་འདོད་པ་ལྔ་ལ་མངོན་པར་ཞེན་པར་གྱུར་པ། སྡིག་པ་མི་དགེ་བའི་ལས་མང་པོ་མངོན་པར་འདུས་བྱས་པས་དེའི་རིགས་སུ་སྐྱེས་ནས་གླེན་ཞིང་རྨོངས་པའི་སྡུག་བསྔལ་མྱོང་བར་འགྱུར་བ་དག་ཡིན་ནོ། །དགའ་བོ་གཞན་ཡང་དུད་འགྲོའི་སྐྱེ་གནས་པའི་སེམས་ཅན་ཆུའི་ནང་དུ་སྐྱེས་ནས་ཆུའི་ནང་དུ་རྒས། ཆུའི་ནང་དུ་དུས་བྱེད་པར་འགྱུར་བ་ཚད་མེད་དཔག་ཏུ་
མེད་པ་དག་ཡོད་དེ། འདི་ལྟ་སྟེ། ཉ་དང་། རུ་སྦལ་དང་། སྦལ་པ་དང་། སྦལ་པ་དཀར་པོ་དང་། བ་ལུ་ཀ་ལྟ་བུ་རྣམས་ཏེ། ཐམས་ཅད་ཀྱང་ཚེ་རབས་སྔ་མ་ལ་ལུས་དང་ངག་དང་། ཡིད་ཀྱི་ལས་མི་དགེ་བའི་དབང་གིས་ཞེས་བྱ་བ་ལ་སོགས་པ་ཡང་གོང་མ་བཞིན་དུ་རྒྱས་པར་སྦྱར་རོ། འདི་ལྟ་སྟེ། ཕག་དང་། ལུག་དང་། ཁྱིམ་དང་། ཝ་དང་། བྱ་རྒོད་དང་། བྱ་རོག་དང་། སྦྲང་བུ་དང་། སྦུར་བ་དང་། གཅན་ཟན་རྣམས་ཏེ། ཐམས་ཅད་ཀྱང་ཚེ་རབས་སྔ་མའི་སྡིག་པ་དགེ་བའི་ལས་ཀྱི་དབང་གིས་དེ་ལྟ་བུའི་རྣམ་པར་སྨིན་པ་མྱོང་བར་འགྱུར་རོ། །དགའ་བོ་གཞན་ཡང་དུད་འགྲོའི་སྐྱེ་གནས་པ་རྟག་ཏུ་རྩྭ་དང་ཤིང་མི་གཙང་བའི་དངོས་པོ་རྣམས་ཟ་ཞིང་འཐུང་བར་པ་ཚད་མེད་དཔག་ཏུ་མེད་པ་སྙེད་ཡོད་དེ། འདི་ལྟ་སྟེ། གླང་པོ་ཆེ་དང་། རྟ་དང་། རྔ་མོ་དང་། བ་ལང་དང་། བོང་བུ་དང་། དྲེའུ་ལ་སོགས་པ་ལྟ་བུ་རྣམས་ཏེ། དེ་དག་ཐམས་ཅད་ཀྱང་ཚེ་རབས་སྔ་མའི་ལས་མི་དགེ་བའི་དབང་གིས་ཇི་སྲིད་འཚོའི་བར་དུ་དེ་ལྟ་བུའི་རྣམ་པར་སྨིན་པ་མྱོང་བར་འགྱུར་རོ། །གཞན་ཡང་དགའ་བོ་ཀྱེ་མ་ཀྱེ་ཧུད་སྲིད་པར་འཁོར་བའི་རྒྱ་མཚོ་འདི་ནི་འབར་བ། རབ་ཏུ་འབར་བ། མཆོག་ཏུ་འབར་བ། ཤིན་ཏུ་མཆོག་ཏུ་འབར་བ་ཡན་པས་སེམས་ཅན་འགའ་ཙམ་ཡང་དེས་མ་བསྲེགས་ཤིང་མ་བརྩོས་པ་མེད་དེ། དེ་ཡང་མིག་དང་། རྣ་བ་དང་། སྣ་དང་། ལུས་དང་། ཡིད་ཀྱི་མེ་རབ་ཏུ་འབར་བའི་འདོད་པས་མངོན་དུ་སྣང་བའི་ཡུལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཡོངས་སུ་གཉེར་བའི་དབང་གིས་དེ་ལྟར་གྱུར་པ་ཡིན་ནོ། །དགའ་བོ་འབར་རབ་ཏུ་འབར་བྱེད་པའི་མེ་གང་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་གི་མེ་དང་། སྐྱེ་བ་དང་། རྒ་བ་དང་། ན་བ་དང་། འཆི་བའི་མེ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་
བ་དང་། འཁྲུག་པའི་མེ་ངག་གིས་རྟག་ཏུ་བསྲེགས་ཤིང་འབར་བར་བྱེད་པས་འཁོར་བར་འཁོར་བ་ཡང་ཉེ་བར་ཞི་ཞིང་རྒྱུན་ཆད་པར་མི་འགྱུར་རོ། །བརྩོན་འགྲུས་བརྩམས་པ་གང་ཡིན་པ་དེ་དག་ནི་བདེ་བ་མང་དུ་མྱོང་ཞིང་བརཏལ་བའི་སེམས་སྐྱེད་པར་བྱེད་པས་ཉོན་མོངས་པ་ཡོངས་སུ་བསལ་ནས་དགེ་བའི་ཆོས་བསྒོམས་པའི་རབ་ཏུ་བརྩོན་པ་མི་གཏོང་བ་ལ་རྒྱུན་འཆད་པ་མེད་དོ། །དེ་ལྟ་བས་ན་དེང་ཁྱོད་ཀྱི་ལུས་འདིའི་ལྤགས་པ་དང་། ཤ་དང་། ཆུ་བ་དང་། རུས་པ་དང་། ཁྲག་དང་། རྩ་རྒྱུས་དང་། རྐང་རྣམས་ནི་རིང་པོ་མི་ཐོགས་པར་གྱས་ཤིང་འཇིག་པར་འགྱུར་རོ་སྙམ་དུ་སོ་སོར་བརྟགས་ནས་རྟག་པར་སེམས་རྩེ་གཅིག་ཏུ་ལེ་ལོ་མི་བྱ་བར་མངོན་སུམ་དུ་བྱ་བའི་ཕྱིར་ནན་ཏན་བརྩོན་འགྲུས་ཀྱིས་དེ་ལྟར་བསླབ་པར་བྱའོ། །དགའ་བོ་ང་ནི་འཇིག་རྟེན་པ་རྣམས་དང་རྩོད་པར་མི་བྱེད་ན་འོན་ཀྱང་འཇིག་རྟེན་པ་རྣམས་ནི་ནན་གྱིས་ང་དང་རྩོད་པར་བྱེད་དོ། །དེ་ཅིའི་ཕྱིར་ཞེ་ན། །གང་ཆོས་ཤེས་པ་རྣམས་ནི་གཞན་དང་རྩོད་པར་མི་བྱེད་དེ། །བདག་དང་བདག་གིར་འཛིན་པ་དང་བྲལ་བ་ཡིན་ན་སུ་དང་ལྷན་ཅིག་རྩོད་པར་བྱེད། འོན་ཀྱང་མཐོང་བ་དང་། ཤེས་པ་མེད་པ་དག་ཡང་དག་པ་མ་ཡིན་པའི་འཛིན་པ་སྐྱང་བར་བྱེད་པའི་ཕྱིར་ངས་ཡང་དག་པར་མངོན་པར་རྫོགས་པར་སངས་རྒྱས་ནས་འདི་སྐད་དུ་ངས་ནི་ཆོས་རྣམས་གང་ཡང་མི་ཤེས་པ་མེད་དོ་ཞེས་སྨྲས་པ་ཡིན་ཏེ། དགའ་བོ་ངས་དེ་སྐད་སྨྲས་པ་ཐ་དད་དུ་གྱུར་པ་ཡོད་དམ། དགའ་བོས་གསོལ་པ། བཅོམ་ལྡན་འདས་དེ་ནི་མ་མཆིས་ཏེ། དེ་བཞིན་གཤེགས་པས་དེ་སྐད་གསུངས་པ་ལ་གཞན་དུ་འགྱུར་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །དགའ་བོ་དེ་བཞིན་གཤེགས་པའི་གསུང་ལ་གདོན་མི་ཟ་བར་ཐ་དད་དུ་གྱུར་པ་མེད་པས་དེ་བཞིན་གཤེགས་པ་ནི་ཡང་དག་པར་གསུང་བ། བདེན་པར་གསུང་བ། དེ་བཞིན་ཉིད་དུ་
གསུང་བ། ཐ་མི་དད་པར་གསུང་བ། སླུ་བ་མེད་པར་གསུང་བ། འཇིག་རྟེན་པ་རྣམས་ལ་ཡུན་རིང་པོར་ཕན་པ་དང་། བདེ་བ་དང་། ཕན་ཡོན་ཆེན་པོ་ཐོབ་པར་མཛད་པ། ལམ་མཁྱེན་པ། ལམ་རིག་པ། ལམ་སྟོན་པ། ལམ་འབྱེད་པ། ལམ་འདྲེན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བ། ཁ་ལོ་སྒྱུར་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་གྱུར་པ་ཡིན་ནོ། །འཇིག་རྟེན་པ་རྣམས་ནི་ཤེས་པ་མེད་པ། མངོན་པར་ཡིད་ཆེས་པ་མེད་པ། །རྟག་པར་དབང་པོ་རྣམས་ཀྱི་བྲན་བྱེད་པ། ལག་འཐིལ་ན་ཡོད་པ། ཁོ་ན་མཐོང་ཞིང་དོན་ཆེན་པོ་ལ་མི་ལྟ་བ། སླ་བའི་དངོས་པོ་མི་སྒྲུབ་པར་གང་བྱ་དཀའ་བ་རྒྱུན་དུ་བྱེད་པ་ཡིན་ནོ། །དགའ་བོ་ཤེས་རབ་དང་ལྡན་པའི་སྤྱོད་ཡུལ་འདི་ལྟར་རེ་ཤིག་ཞོག་ལ་དེད་ཁྱོད་ཀྱིས་ཤའི་མིག་གིས་ལྟ་བས་ཤེས་པ་དང་མཐོང་བ་ཇི་སྙེད་པ་དག་ཡང་དག་པ་མ་ཡིན་པར་སོ་སོར་བརྟགས་ན་དེ་ཉིད་རྣམ་པར་ཐར་པ་ཞེས་བྱ་བས། །དགའ་བོ་ཁྱོད་ང་ལ་དད་པའི་ཕྱིར་མ་འགྲོ་ཤིག །ང་ལ་འདུན་པའི་ཕྱིར་འབྲང་བར་མ་བྱེད་ཅིག ངའི་ཚིག་ལ་རྟོན་པར་མ་བྱེད་ཅིག །ངའི་མཚན་མ་ལ་རྟོག་པར་མ་བྱེད་ཅིག །དགེ་སྦྱོང་གི་ལྟ་བ་དང་ཤེས་པའི་རྗེས་སུ་མ་འབྲང་ཤིག །དགེ་སྦྱོང་ལ་གུས་པ་མ་སྐྱེད་ཅིག །འདི་སྐད་དུ་དགེ་སྦྱོང་གཽ་ཏ་མ་ནི་བདག་གི་སྟོན་པ་ཆེན་པོ་ཡིན་ནོ་ཞེས་མ་ཟེར་བར་ངས་མངོན་པར་རྫོགས་པར་སངས་རྒྱས་པའི་ཆོས་གང་ཡིན་པ་དེ་གཅིག་པུ་དབེན་པར་སོང་ལ་ཡིད་ལ་བསམས་ཏེ།འཇལ་བར་གྱིས་ཤིག། སོ་སོར་རྟོགས་ཤིག། རྟག་པར་མང་དུ་སྒོམས་ཤིག། སེམས་རྩེ་གཅིག་ཏུ་ཆོས་རྣམས་སོ་སོར་བརྟགས་ཏེ། ཆོས་དེ་དག་ལས་བསྒོམ་པའི་འདུ་ཤེས་ཡོངས་སུ་རྫོགས་པར་བྱས་ཏེ། ཡང་དག་པའི་དྲན་པ་ལ་གནས་ནས་བདག་ཉིད་ཀྱི་གླིང་དུ་བྱོས་ཤིག། བདག་ཉིད་ཀྱི་གནས་དང་། སྐྱབས་བྱོས་ཤིག། ཆོས་ཀྱི་བྱོས་ཤིག། ཆོས་ཀྱི་གནས་དང་སྐྱབས་བྱོས་ཤིག་དང་། དེ་ལས་གཞན་པའི་གླིང་དང་། གནས་དང་། སྐྱབས་མེད་དོ། །དགའ་བོ་ཇི་ལྟར་ན་དགེ་སློང་བདག་ཉིད་གླིང་དུ་གྱུར་པ་དང་། བདག་
ཉིད་གནས་དང་། སྐྱབས་སུ་གྱུར་པ་དང་། ཆོས་གླིང་དུ་གྱུར་པ་དང་། ཆོས་གནས་དང་སྐྱབས་སུ་གྱུར་ཅིང་དེ་ལས་གཞན་པའི་གླིང་དང་། དེ་ལས་གཞན་པའི་གནས་དང་། སྐྱབས་མེད་པར་གྱུར་པ་ཡིན་ཞེ་ན། དགའ་བོ་འདི་ལྟར་དགེ་སློང་གང་ལ་ལ་ཞིག་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་བ་ལ་རབ་ཏུ་གནས་ནས་བརྩོན་འགྲུས་ཀྱི་དྲན་པ་རྩེ་གཅིག་ཏུ་བྱས་པས་ཡང་དག་པའི་ཤེས་པ་ཐོབ་ནས་འཇིག་རྟེན་པའི་ཁོང་ཁྲོ་བ་ཇི་སྙེད་པ་དག་རྟག་ཏུ་ཡིད་ལ་སེམས་ཤིང་རབ་ཏུ་དུལ་བར་གྱུར་པ་གང་ཡིན་པ་དེ་ནི་ནང་གི་ལུས་ལ་ལུས་ཀྱི་རྗེས་སུ་ལྟ་བ་ཞེས་བྱ་སྟེ། གང་གིས་ཕྱི་རོལ་གྱི་ལུས་དང་། ནང་དང་ཕྱི་རོལ་དང་གཉིས་གའི་ལུས་ལ་རྗེས་སུ་ལྟ་བ་ཡང་དེ་བཞིན་ནོ། །དགའ་བོ་དེའི་འོག་ཏུ་ཀུན་འབྱུང་བའི་ཆོས་ལ་ལུས་སུ་བལྟས་ནས་རབ་ཏུ་གནས་དང་། འགོག་པའི་ཆོས་སུ་བལྟས་ནས་རབ་ཏུ་གནས་པ་ཡང་བྱེད་ལ། གཞན་ཡང་ཀུན་འབྱུང་བ་དང་། འགོག་པའི་ཆོས་གཉིས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ཉིད་ཀྱི་ལུས་འདི་ལ་ཡང་དག་པར་དྲན་པར་བྱེད་པས་རེས་འགའ་ནི་ཤེས་པ་ཁོ་ན་དང་ལྡན་པར་འགྱུར། རེས་འགའ་ནི་མཐོང་བ་ཁོ་ན་དང་ལྡན་པར་འགྱུར། རེས་འགའ་ནི་དྲན་པ་ཁོ་ན་དང་ལྡན་པར་འགྱུར་ཞིང་རྟེན་པ་མེད་པར་གནས་པར་འགྱུར་བས་འཇིག་རྟེན་འདི་ལ་བླང་བར་བྱ་བ་ཅི་ཡང་མེད་པར་རབ་ཏུ་ཤེས་པར་འགྱུར་ཏེ། དེ་ལྟར་ན་དགའ་བོ་འདི་ནི་དགེ་སློང་བདག་ཉིད་ཀྱི་ནང་གི་ལུས་ལ་ལུས་ཀྱི་རྗེས་སུ་ལྟ་བ་ལ་གནས་པ་ཞེས་བྱ་སྟེ། ཕྱི་རོལ་གྱི་ལུས་དང་། ནང་དང་ཕྱི་རོལ་གཉིས་གའི་ལུས་ལ་ལྟ་བ་ཡང་དེ་བཞིན་ནོ། དེའི་འོག་ཏུ་ནང་གི་ཚོར་བ་དང་། ཕྱི་རོལ་གྱི་ཚོར་བ་དང་། ནང་དང་ཕྱི་རོལ་གཉིས་གའི་ཚོར་བར་ལྟ་བ་ལ་རབ་ཏུ་གནས་དང་། ནང་གི་སེམས་དང་། ཕྱི་རོལ་གྱི་སེམས་དང་། ནང་དང་ཕྱི་རོལ་གཉིས་གའི་སེམས་སུ་ལྟ་བ་ལ་གནས་པ་དང་། ནང་གི་ཆོས་དང་། ཕྱི་རོལ་གྱི་ཆོས་དང་། ནང་དང་ཕྱི་རོལ་གཉིས་གའི་ཆོས་སུ་ལྟ་བ་ལ་རབ་ཏུ་གནས་ནས་བརྩོན་འགྲུས་ཀྱིས་དྲན་པ་རྩེ་གཅིག་ཏུ་བྱས་པས་ཡང་དག་པར་ཤེས་པ་ཐོབ་ནས་འཇིག་རྟེན་པའི་ཁོང་ཁྲོ་བ་ཇི་སྙེད་པ་དག་ཏུ་ཡིད་ལ་མི་སེམས་ཤིང་རབ་ཏུ་དུལ་བར་གྱུར་ནས་ཀུན་འབྱུང་བའི་ཆོས་སུ་བལྟས་ཏེ་རབ་ཏུ་གནས་པ་དང་། འགོག་པའི་ཆོས་སུ་བལྟས་ནས་རབ་ཏུ་གནས་པར་ཡང་བྱེད་ལ།
གཞན་ཀུན་འབྱུང་བ་དང་། འགོག་པའི་ཆོས་གཉིས་ལ་ཆོས་སུ་བལྟས་ནས་རབ་ཏུ་གནས་པར་བྱེད་པར་བྱེད་པ་ཉིད་ཀྱིས་ལུས་འདི་ཉིད་ལ་ཡང་དག་པར་དྲན་པར་བྱེད་པས་རེས་འགའ་ནི་ཤེས་པ་ཁོ་ན་དང་ལྡན་པར་འགྱུར། རེས་འགའ་ནི་མཐོང་བ་ཁོ་ན་དང་ལྡན་པར་འགྱུར། རེ་འགའ་ནི་དྲན་པ་ཁོ་ན་དང་ལྡན་པར་འགྱུར་བས་འཇིག་རྟེན་འདི་ལ་བླང་བར་བྱ་བ་ཅི་ཡང་མེད་པ་རབ་ཏུ་ཤེས་པར་འགྱུར་ཏེ། དེ་ལྟར་ན་དགའ་བོ་འདི་ནི་དགེ་སློང་བདག་ཉིད་གླིང་དུ་གྱུར་པ་དང་། བདག་ཉིད་གནས་དང་སྐྱབས་སུ་གྱུར་པ་དང་། ཆོས་གླིང་དུ་གྱུར་པ་དང་། ཆོས་གནས་དང་སྐྱབས་སུ་གྱུར་ཅིང་དེ་ལས་གཞན་པའི་གླིང་མེད་པ་དང་། དེ་ལས་གཞན་པའི་གནས་དང་སྐྱབས་མེད་པ་ཞེས་བྱའོ། དགའ་བོ་སྐྱེས་བུ་རབ་ཏུ་རང་བཞིན་དྲང་ཞིང་གཡོ་སྒྱུ་སྤངས་པ་གང་ལ་ལ་ཞིག་སྔ་དྲོའི་དུས་ཀྱི་ཚེ་ངའི་ཐང་དུ་འོངས་པ་ལ་ངས་དབང་པོ་ཇི་ལྟ་བ་བཞིན་དུ་དགེ་བའི་ཆོས་དེ་ལ་རྗེས་སུ་བསྟན་ནས་དེ་ཕྱི་དྲོའི་དུས་ཀྱི་ཚེ་བདག་ཉིད་ཐོབ་པ་དང་ལྡན་པར་གྱུར་ལ། ཕྱི་དྲོའི་དུས་ཀྱི་ཚེ་ཆོས་རྗེས་སུ་བསྟན་པ་ཡང་བདག་ཉིད་ཐོབ་པ་དང་ལྡན་པར་སྨྲ་བར་བྱེད་པས་ན། དགའ་བོ་ངས་ལེགས་པར་བསྟན་པའི་ཆོས་ནི་མཐོང་བའི་ཆོས་ལ་མངོན་སུམ་དུ་རྟོགས་པ། རབ་ཏུ་གདུང་བ་སེལ་བར་བྱེད་པ། དུས་དང་དབང་པོ་དང་རབ་ཏུ་འཚམ་པར་འགྱུར་བ། ཐབས་དང་ལྡན་པ་རང་གིས་རིག་པའི་ཆོས་ལེགས་པར་སྐྱོབ་པར་བྱེད་པ་ཡིན་པས་གང་གིས་ངའི་མངོན་སུམ་དུ་ཆོས་བསྟན་པ་ཐོས་པར་གྱུར་ན་མྱ་ངན་ལས་འདས་པའི་རྗེས་སུ་འཐུན་པར་འགྱུར་ཞིང་བྱང་ཆུབ་ལ་གཞོལ་བར་བྱེད་པ་གང་ཡིན་པ་འདི་ནི་ངའི་མཁྱེན་པ་ཡིན་ཏེ། དེ་ལྟ་བས་ན་དེང་ཁྱོད་ཀྱིས་བདག་གི་དོན་དང་། གཞན་གྱི་དོན་དང་། གཉིས་གའི་དོན་དེ་ལྟ་བུ་མཐོང་ནས་ཆོས་འདི་ལ་རྟག་པར་ཡང་དག་པར་བརླབས་ཏོ། རབ་ཏུ་བྱུང་བའི་ཆོས་བག་ཡོད་པར་བསྒྲུབས་ནས་ཆུད་མི་གཟན་ཅིང་འབྲས་བུ་ཁྱད་པར་དུ་འཕགས་པ་འདུས་མ་བྱས་ཀྱི་བདེ་བ་ཐོབ་པར་བྱས་ནས་གཞན་གྱིས་བྱིན་པའི་ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་ལ་སོགས་པ་བླང་བར་བྱ་ཞིང་སྦྱིན་བདག་རྣམས་བསོད་ནམས་ཀྱི་ཕན་ཡོན་ཆེན་པོ་ཐོབ་པ་དང་། འབྲས་བུ་རྣམ་པར་སྨིན་པ་ཁྱད་པར་དུ་འཕགས་པ་ཡངས་ཤིང་རྒྱ་ཆེ་བ་དག་འཐོབ་པར་འགྱུར་བར་དེ་ལྟར་དགའ་བོ་
ཁྱོད་ཀྱིས་བསླབ་པར་བྱའོ། ། གཞན་ཡང་དགའ་བོ་གཟུགས་འགའ་ཙམ་ཡང་རྗེས་སུ་ཆགས་པར་བྱ་བ་འམ། མ་འོངས་པའི་དུས་ན་རྣམ་པར་འགྱུར་ཞིང་འཇིག་པར་མི་འགྱུར་བ་གང་ཡང་མེད་དེ་དེའི་གནས་མེད་དོ། གང་ཡང་མྱ་ངན་དང་། སྨྲེ་སྔགས་འདོན་པ་དང་། ཉོན་མོངས་པ་མི་སྐྱེད་པ་གང་ཡང་མེད་དེ་དེའི་གནས་མེད་དོ། དགའ་བོ་འདི་ཇི་སྙམ་དུ་སེམས། གཟུགས་དེ་རྟག་པ་ཞིག་ཡིན་ནམ། འོན་ཏེ་མི་རྟག་པ་ཞིག་ཡིན། བཙུན་པ་པ་དེ་ནི་རང་བཞིན་གྱིས་མི་རྟག་པ་ལགས་སོ། དགའ་བོ་གལ་ཏེ་རང་བཞིན་གྱིས་མི་རྟག་པ་ཡིན་ན་ཅི་དེ་བདེ་བ་ཅིག་ཡིན་ནམ། འོན་ཏེ་སྡུག་བསྔལ་བ་ཞིག་ཡིན། བཙུན་པ་དེ་ནི་སྡུག་བསྔལ་བ་ལགས་སོ། གང་མི་རྟག་ཅིང་སྡུག་བསྔལ་བ་དེ་ནི་རྣམ་པར་འགྱུར་ཞིང་འཇིག་པའི་ཆོས་ཅན་ཡིན་ན་ངའི་ཉན་ཐོས་འཕགས་པ་མང་དུ་ཐོས་པ་དང་ལྡན་པ་དག་ཅི་གཟུགས་འདི་ནི་བདག་ཡིན་ནོ། བདག་ནི་གཟུགས་རྣམས་དང་ལྡན་ནོ། གཟུགས་ནི་བདག་གི་ཡིན་ནོ། བདག་ནི་གཟུགས་ལ་གནས་སོ་ཞེས་ཁས་ལེན་པར་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། འདི་ཇི་སྙམ་དུ་སེམས། ཅི་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དེ་དག་རྟག་པ་ཞིག་ཡིན་ནམ། འོན་ཏེ་མི་རྟག་པ་ཞིག་ཡིན། བཙུན་པ་ཐམས་ཅད་རང་བཞིན་གྱིས་མི་རྟག་པ་ལགས་སོ། དགའ་བོ་གལ་ཏེ་རང་བཞིན་གྱིས་མི་རྟག་པ་ཡིན་ཅི་བདེ་བ་ཞིག་ཡིན་ནམ། འོན་ཏེ་སྡུག་བསྔལ་བ་ཞིག་ཡིན། བཙུན་པ་སྡུག་བསྔལ་བ་ལགས་སོ། གང་མི་རྟག་ཅིང་སྡུག་བསྔལ་བ་དེ་ནི་རྣམ་པར་འགྱུར་ཞིང་འཇིག་པའི་ཆོས་ཅན་ཡིན་ན། ངའི་འཕགས་པ་ཉན་ཐོས་མང་དུ་ཐོས་པ་དང་ལྡན་པ་དག་ཅི་ཚོར་བ་ལ་སོགས་པ་འདི་དག་ནི་བདག་ཡིན་ནོ། བདག་ནི་ཚོར་བ་ལ་སོགས་པ་དང་ལྡན་ནོ། ཚོར་བ་ལ་སོགས་པ་ནི་བདག་གི་ཡིན་ནོ། བདག་ནི་ཚོར་བ་ལ་སོགས་པ་ལ་གནས་སོ་ཞེས་ཁས་ལེན་པར་བྱེད་དམ། བཅོམ་ལྡན་འདས་ད་ནི་མ་ལགས་སོ། །དེ་ལྟ་བས་ན་ཇི་ཙམ་དུ་གཟུགས་སུ་གྱུར་བ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱི་རོལ་གྱི་འམ། རགས་པ་འམ། ཕྲ་བ་འམ། བཟང་པོ་འམ། ངན་པ་འམ། ཐག་རིང་བ་འམ། ཐག་ཉེ་བ་ཡང་རུང་སྟེ།
ཇི་ཙམ་དུ་གཟུགས་སུ་གྱུར་པ་ཐམས་ཅད་ཀྱང་བདག་མ་ཡིན་ལ། བདག་ཀྱང་གཟུགས་དང་ལྡན་པ་མ་ཡིན་པ་དང་། གཟུགས་ཀྱང་བདག་ནི་མ་ཡིན་ལ། བདག་ཀྱང་གཟུགས་ལ་གནས་པ་མ་ཡིན་པར་རིག་པར་བྱའོ། དེ་བཞིན་དུ་ཡང་དག་པའི་དྲན་པ་དང་། ཡང་དག་པའི་ཤེས་རབ་ཀྱིས་ཇི་ཙམ་དུ་ཚོར་བ་དང་། འདུ་ཤེས་དང་། འདུ་བྱེད་དང་རྣམ་པར་ཤེས་པར་གྱུར་པ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱི་རོལ་གྱི་འམ། རགས་པ་འམ། ཕྲ་བ་འམ། བཟང་པོ་འམ། ངན་པ་འམ། ཐག་རིང་བ་འམ། ཐག་ཉེ་བ་ཡང་རུང་སྟེ། དེ་དག་ཐམས་ཅད་ཀྱང་བདག་མ་ཡིན་ལ་བདག་ཀྱང་དེ་དག་དང་ལྡན་པ་མ་ཡིན་པ་དང་། དེ་དག་ཀྱང་བདག་གི་མ་ཡིན་ལ། བདག་ཀྱང་དེ་དག་ལ་གནས་པ་མ་ཡིན་པར་ལེགས་པར་སོ་སོར་བརྟག་པར་བྱའོ། དེ་བཞིན་དུ་ཡང་དག་པའི་དྲན་པ་དང་། ཡང་དག་པའི་ཤེས་རབ་ཀྱིས་ངའི་ཉན་ཐོས་འཕགས་པ་མང་དུ་ཐོས་པ་དང་ལྡན་པ་དག་ནི་འདི་ལྟར་གཟུགས་ལ་སོ་སོར་བརྟགས་ནས་ཡོངས་སུ་སྐྱོ་བ་སྐྱེ་བ་དང་། གཞན་ཡང་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་སོ་སོར་བརྟགས་ནས་ཡོངས་སུ་སྐྱོ་བ་སྐྱེ་བར་འགྱུར་རོ། །གལ་ཏེ་སྐྱོ་བར་གྱུར་ན་མངོན་པར་ཞེན་པར་མི་བྱེད་དོ། །མངོན་པར་ཞེན་པ་མེད་པས་རྣམ་པར་གྲོལ་བ་ཐོབ་པར་འགྱུར་རོ། རྣམ་པར་གྲོལ་ནས་བདག་རྣམ་པར་གྲོལ་ལོ་སྙམ་དུ་ཤེས་པས་འདི་སྐད་དུ་བདག་གི་སྐྱེ་བ་ཟད་དོ། ཚངས་པར་སྤྱོད་པ་ཡང་དག་པར་སྤྱོད་དོ། །བྱ་བ་བྱས་པས་ཡང་སྲིད་པ་ཕྱི་མ་ལེན་པར་མི་འགྱུར་རོ་ཞེས་སྒྲོགས་པར་འགྱུར་རོ་སྙམ་དུ་སོ་སོར་བརྟག་པར་བྱའོ། དེའི་ཚེ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཀའ་སྩལ་པ་ན། ཚེ་དང་ལྡན་པ་དགའ་བོ་རྡུལ་སྤངས་ཤིང་དྲི་མ་དང་བྲལ་ནས་ཆོས་ཀྱི་མིག་རྣམ་པར་དག་པ་ཐོབ་པར་གྱུར་ཏོ་དགེ་སློང་ལྔ་བརྒྱ་པོ་རྣམས་ནི་ཟག་པ་རྣམས་ལས་སེམས་རྣམ་པར་གྲོལ་བ་ཐོབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་དག་དགའ་བོ་ལ་བཀལ་སྩལ་པ། གང་ལ་མཉམ་བཞག་སེམས་མེད་པས། རྣམ་དག་ཡེ་ཤེས་མེད་པས་ན། །ཟག་པ་རྣམས་ནི་སྤོང་མི་འགྱུར། དེ་བས་ཁྱོད་ཀྱིས་ནན་ཏན་བསྒྲུབས། ཁྱོད་ཀྱིས་རྣལ་འབྱོར་རྟག་བསྒོམས་ལ། ཕུང་པོ་སྐྱེ་
འགག་ཤེས་པར་གྱིས། རྣམ་དག་གལ་ཏེ་རྫོགས་གྱུར་ན། ལྷ་རྣམས་ཀུན་ནི་དགའ་བར་འགྱུར། །མཛའ་བ་ཤེས་ལྷན་ཅིག་འབྲེལ་དགའ་ཞིང་། ཕན་ཚུན་འདྲུལ་ཞིང་ཆགས་པ་དང་། ཐོབ་དང་གྲགས་པ་མངོན་ཞེན་པ། དགའ་བོ་ཁྱོད་ཀྱིས་ཀུན་སྤོངས་ཤིག། ཁྱིམ་པ་དང་ནི་རབ་བྱུང་ལ། བསྟེན་ཅིང་བཤེས་ནི་མ་བྱེད་པར། འཁོར་བའི་རྒྱ་མཚོ་འདིའི་སེམས་ལ། སྡུག་བསྔལ་མཐར་ནི་ཕྱིན་པར་བྱོས། དད་པོ་མེར་མེར་པོ་ལས་ནི། ཤ་ཡི་ཆུ་བུར་སྐྱེ་བར་འགྱུར། ཆུ་བུར་ལས་ནི་ལྟར་ལྟར་སྐྱེ། ལྟར་ལྟར་པོ་ལས་མཁྲང་བར་འགྱུར། མཁྲང་བ་རྣམ་པར་གྱུར་ནས་ནི། མགོ་དག་ཡན་ལག་བཞི་སྐྱེ་བས། རུས་པ་འདུས་ནས་ལུས་གྲུབ་པ། ཐམས་ཅད་ལས་ཀྱི་རྒྱུ་ལས་བྱུང་། མགོ་ཐོང་རུས་པ་དགུ་འདུས་ཤིང་། །འགྲམ་པའི་རུས་པ་གཉིས་འབྲེལ་ཏེ། །སོ་ན་སུམ་བཅུ་རྩ་གཉིས་ལྡན། །དེ་ཡི་རྩ་བ་འང་དེ་བཞིན་ནོ། །རྣ་རྩ་གཉའ་བའི་རུས་པ་དང་། །རྐན་དང་སྣ་ཡི་རུས་པ་དང་། །བྲང་དང་མིང་པའི་རུས་པ་དང་། །བསྡུས་ན་རུས་པ་ཉི་ཤུ་ཡོད། །མིག་ལ་རུས་པ་བཞི་ཡོད་དོ། །ཕྲག་པ་བྱིན་པ་ཟུང་གཉིས་ཡོད། །ལག་པ་གཉིས་དང་སོར་མོ་རྣམས་། །བསྡུས་ན་རུས་པ་ལྔ་བཅུ་ཡོད། །ལྟག་རྒྱ་བ་རུས་པ་བརྒྱད་ཡོད་དེ། །སྒལ་ཚིགས་ལ་ནི་སུམ་བཅུ་གཉིས། །འདི་དག་ཀུན་ལ་རྩ་ཡོད་པས། །དེ་ཡི་གྲངས་ནི་ཆ་བཞིར་འགྱུར། །རྩིབ་ལོགས་གཡས་པའི་རུས་པ་ནི། །ཕན་ཚུན་འབྲེལ་པ་བཅུ་གསུམ་ཡོད། །རྩིབས་ལོགས་གཡོན་འབྲེལ་སྐྱེ་བ་ཡི། །རུས་པ་དག་ནི་བཅུ་གསུམ་ཡོད། །རུས་པའི་ལུ་གུ་ རྒྱུད་འདི་དག། །གསུམ་གསུམ ་དག་ནི་ཕན་ཆུན་འབྲེལ། །གཉིས་གཉིས་དག་ནི་ཆིགས་ལྡན་ཏེ། །ལྷག་མ་གཞན་ནི་འབྲེལ་པ་མེད། །གཡས་གཡོན་བརླ་ནི་གཉིས་པོ་ལ། །བསྡུས་ན་རུས་པ་ལྔ་བཅུ་ཡོད། །ལུས་ནང་འབྲེལ་པའི་རུས་པ་ནི། །བསྡོམས་ནས་སུམ་བརྒྱ་དྲུག་བཅུ་ཡོད། །རུས་རིགས་ཕན་ཚུན་འབྲེལ་ན་ནི། །སེམས་ཅན་ལུས་ནི་གྲུབ་པ་ཡིན་ཞེས། །ཡང་དག་སངས་རྒྱས་མཁྱེན་པ་ཡིས། །བདེན་ཚིག་ཏུ་ནི་གསུངས་པ་ཡིན། །རྐང་མཐིལ་ནས་ནི་མགོ་ཡིན་པར། །མི་གཙང་འདྲེས་ཤིང་མི་བརྟན་པ། །དེ་དག་ལྷན་ཅིག་ལུས་པ་བསྒྲུབས་པས། །ཉམས་ཆུང་འདམ་བུའི་ཁྱིམ་དང་འདྲ། །རུས་པའི་འབའ་ཤིག་གཟེར་པུ་མེད། །ཤ་ཁྲག་ཀུན་དུ་བསྐུས་པས་ན། མི་གཙང་
འཁྲུལ་འཁོར་རབ་འདྲ་ཞིང་། །སྒྱུ་མས་སྤྲུལ་པའི་གཟུགས་བརྙན་འདྲ། །ལུས་འདི་རྩ་རྒྱུས་དཀྲིས་ནས་ནི། ། ལྤགས་པ་གཤེར་པས་གཡོགས་པས་ན། །གནས་གུད་རྨ་ཡི་སྒོ་ཡོད་པར། །དེ་ལྟ་བུར་ནི་བལྟ་བར་བྱ། །ཀུན་ནས་གཅིན་རྐྱག་མི་གཙང་བ། །རྟག་ཏུ་གང་ཞིང་འཛག་པས་ན། །དཔེར་ན་བང་བ་རྡོལ་རྣམས་སུ། །འབྲུ་རྣམས་རྣ་ཚོགས་པ་ཀང་བ་ལྟར། །ལུས་འདི་ཡང་ནི་དེ་བཞིན་ཏེ། །མི་གཙང་སྣ་ཚོགས་རབ་ཏུ་གང་། །རུས་པའི་འཁྲུལ་འཁོར་གཡོས་པས་ན། །ཉམས་ཆུང་སྙིང་པོ་ཅི་ཡང་མེད། །བྱིས་པའི་སྐྱེ་བ་རྟག་ཏུ་ཆགས། །མཁས་པ་དག་ནི་ཞེན་མི་བྱེད། །མཆིལ་རྣབས་རྡུལ་ནི་རྟག་ཏུ་འབབ། རྣག་ཁྲག་དག་གིས་རྒྱུན་དུ་གང་། །གཞན་སེར་འོ་མ་ལྷན་ཅིག་འདྲེས། །གླང་རྒྱས་དག་ནི་གླད་པས་གང་། །སྙིང་ཁར་བད་ཀན་རྒྱུན་དུ་འབྱུང་། །ནང་གི་ཞུ་དང་མ་ཞུའི་གནས། །གླང་རྒྱས་དང་ནི་ལྤགས་པ་དང་། །སྙིང་དང་ནང་གྲོལ་གློ་མཆིན་དང་། །འདི་ལ་སོགས་པའི་རུལ་མྱགས་དང་། །མི་གཙང་རྣམས་དང་ལྷན་ཅིག་གནས། སྡིག་པའི་ལུས་ནི་འཇིགས་རུང་པས། །འདི་ཉིད་བདག་གི་དགྲ་ཡིན་ན། ཤེས་མེད་འདོད་ལ་ཞེན་པ་ཡི། །བླུན་པོ་རྟག་ཏུ་ཕངས་པར་བྱེད། །འདི་འདྲའི་མི་གཙང་ལུས་ནི་འདི་ནི། །གྲོང་ཁྱེར་རྙིང་བ་འདྲ་བས་ན། །ཉིན་མཚན་ཉོན་མོངས་རབ་གཟིར་ཅིང་། །སྐད་ཅིག་མི་གནས་ཀུན་དུ་འཁྱམ། །རུས་པར་གྲོང་ཁྱེར་བརྩིག་པར་བྱེད། །ཤ་དང་ཁྲག་གིས་ཞལ་ཞལ་བསྐུས། །འདོད་སྡང་གཏི་མུག་ཚོན་བཀྱེ་ནས། །ཅི་རིགས་པར་ནི་རྒྱན་པར་བྱེད། །རུས་པའི་གྲོང་ཁྱེར་སྐྱུག་བྲོ་བ། །ཤ་ཁྲག་འབྲེལ་ཅིང་འདུས་པས་ན། རྟག་ཏུ་སྡུག་པའི་གྲོགས་པོ་ཡིས། །ཕྱི་ནང་སྡུག་བསྔལ་གདུང་བར་བྱེད། །དགའ་བོ་ཁྱོད་ཀྱིས་ཤེས་པར་བྱོས། །ངས་ནི་ཇི་སྐད་བསྟན་པ་བཞིན། ཉིན་མཚན་རྟག་ཏུ་དྲན་བྱོས་ལ། །འདོད་པའི་ཡུལ་ལ་སེམས་མ་བྱེད། །གལ་ཏེ་འདོད་པ་སྤོང་འདོད་ན། །རྟག་ཏུ་དེ་བཞིན་རབ་སྒོམས་ལ། །རྣམ་གྲོལ་ཡོངས་སུ་བཙལ་བར་གྱིས། །མྱུར་དུ་འཁོར་བའི་རྒྱ་མཚོ་འདའ། །བཅོམ་ལྡན་འདས་ཀྱིས་མངལ་དུ་འཇུག་པའི་ཆོས་ཀྱི་རྣམ་གྲངས་འདི་བཀའ་སྩལ་པ་ན། །ཚེ་དང་ལྡན་པ་དགའ་བོ་དང་། དགེ་སློང་ལྔ་བརྒྱ་པོ་དེ་དག་རབ་ཏུ་དགའ་བར་གྱུར་པས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེའི་ཚེ་ཚེ་དང་ལྡན་པ་དགའ་བོ་
འཁོར་བའི་རྒྱ་མཚོ་འབྲོག་དགོན་པ་ལས་ཡང་དག་པར་འདས་ཏེ། མཐར་ཐུག་པའི་བདེ་བ་མྱ་ངན་ལས་འདས་པའི་གནས་སུ་ཕྱིན་ནས་དགྲ་བཅོམ་པའི་འབྲས་བུ་ཐོབ་པར་གྱུར་པས་བདག་ཉིད་ཤིན་དུ་དགའ་བར་གྱུར་ནས་ཚིགས་སུ་བཅད་དེ་སྨྲས་པ། །གུས་སེམས་ཁྲུས་ནི་བསྟབས་པ་དང་། ཆུ་གཙང་བྱུག་སྤོས་ཕུལ་བ་དང་། བསོད་ནམས་རྣམས་ནི་བསྐྱབས་པས་ན། །རྣམ་སྨིན་མཆོག་འདི་ཐོབ་པ་ཡིན། །དེ་ནས་འཁོར་མང་པོ་རྣམས་དེ་སྐད་ཅེས་སྨྲས་པ་ཐོས་པས་ཐམས་ཅད་ཐེ་ཚོམ་དུ་གྱུར་ནས་ཐེ་ཚོམ་བཅད་པའི་ཕྱིར་སྟོན་པ་ཆེན་པོ་ལ་འདི་སྐད་ཅེས་གསོལ་ཏོ། །བརྩུན་པ་ཚེ་དང་ལྡན་པ་དགའ་བོ་འདིས་སྔོན་སུག་ལས་ཅི་བགྱིས་ན་དའི་རྣམ་པར་སྨིན་པས་ལུས་ཀྱི་མདོག་གསེར་གྱི་ཁ་དོག་ལྟ་བུར་གྱུར་ལ། མཚན་སུམ་བཅུ་དང་ལྡན་པས་བདག་ཉིད་བརྒྱན་ཅིང་བཅོམ་ལྡན་འདས་ཀྱི་སྐུ་བས་སོར་བཞིས་ཐུད་པར་གྱུར། ཅིའི་སླད་དུ་འདོད་པའི་ཡུལ་ལ་ཤིན་དུ་འདོན་པར་ཞེན་པ་ལས་སྟོན་པ་ཆེན་པོས་ཐུགས་བརྩེ་བར་དགོངས་ནས་མཐུས་འཁོར་བའི་རྒྱ་མཚོ་ལས་བསྒྲལ་ཏེ། །ཐབས་ཀྱིས་ཤིན་དུ་མཐར་ཐུག་པའི་མྱ་ངན་ལས་འདས་པ་ལ་རྣམ་པར་གཞག་པ་བཀས་བཤད་དུ་གསོལ། བཅོམ་ལྡན་འདས་ཀྱིས་བཀའ་བསྩལ་པ། དགེ་སློང་དག་དགེ་སློང་དགའ་བོས་སྔོན་ལས་མངོན་པར་འདུས་བྱས་པའི་འབྲས་བུ་རྣམ་པར་སྨིན་པ་ཡོངས་སུ་སྨིན་པས་ན་ཐམས་ཅད་མངོན་དུ་གྱུར་པ་ཡིན་ནོ་ཞེས་གཞན་ནས་བསྟན་པ་བཞིན་དུ་རྒྱ་ཆེར་བཀའ་སྩལ་ནས་ཚིགས་སུ་བཅད་དེ་བཀའ་སྩལ་པ། གལ་ཏེ་བསྐལ་པ་བརྒྱ་ལོན་ཀྱང་། །ལས་བྱས་ཆུད་ཟར་མི་འགྱུར་ཏེ། །རྒྱུ་དང་རྐྱེན་ནི་ཚོགས་པ་ན། ལུས་ཅན་ཉིད་ལ་འབྲས་བུར་སྨིན། །དགེ་སློང་དག་ཁྱེད་ཉོན་ཅིག། །སྔོན་བྱུང་བས་འདས་པའི་དུས་བསྐལ་པ་དགུ་བཅུ་རྩ་གཅིག་གི་སྔོན་རོལ་ན་སྐྱེ་དགུ་རྣམས་ཚེ་ལོ་བརྒྱད་ཁྲི་ཐུབ་པའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཤེས་བྱ་བ་འཇིག་རྟེན་དུ་བྱུང་སྟེ། དགེ་སློང་གི་དགེ་འདུན་བརྒྱ་སྟོང་ཕྲག་དྲུག་བཅུ་རྩ་གཉིས་དང་ཐབས་གཅིག་ཏུ་ལྗོངས་རྒྱུ་ཞིང་གྲོང་ཁྱེར་མཉེན་ལྡན་རྒྱལ་པོ་ཕོ་བྲང་འཁོར་དུ་གཤེགས་ནས་མཉེན་ལྡན་གྱི་
ཚལ་ན་བཞུགས་སོ། དེའི་ཚེ་བཅོམ་ལྡན་འདས་དེའི་གཡས་ཁྱིམ་གྱི་གཅུང་ཞིག་ཡོད་པ་དེ་འདོད་པའི་ཡུལ་ལ་ཤིན་དུ་མངོན་པར་ཞེན་ཅིང་ཆགས་པ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེས་འཁོར་བའི་རྒྱ་མཚོ་ལས་ཡོངས་སུ་བཟླ་བའི་ཕྱིར་རབ་ཏུ་འབྱུང་བར་བསྐུལ་ནས་ཐབས་ཀྱིས་མཐར་ཐུག་པའི་མྱ་ངན་ལས་འདས་པའི་དབྱིངས་སུ་རྣམ་པར་གཞག་གོ། །དེའི་ཚེ་ཡུལ་དེའི་བདག་པོ་མཉེན་ལྡན་ཞེས་བྱ་བ་རྒྱལ་པོ་བྱེད་དེ། འདི་ལྟར་རྒྱལ་པོ་ཆོས་ཀྱིས་མི་རྣམས་འདུལ་བ། མི་དང་སྐྱེ་བོ་མང་པོ་རྒྱས་པ། ལོ་ལེགས་ཤིང་བདེ་བ། གཡོ་སྒྱུ་དང་ཆོམ་རྐུན་མེད་ཅིང་ནད་དང་བྲལ་བ། བ་ལང་དང་། ར་ལུག་དང་། སཱ་ལུ་དང་། བུ་རམ་ཤིང་ཀུན་དུ་གང་ཞིང་རྒྱས་པར་གྱུར་ཏེ། རྒྱལ་པོ་དེའི་གཡས་ཁྱིམ་གྱི་ནུ་བོ་ཞིག་ཡོད་པ་ཡང་ཤིན་དུ་འདོད་པ་ལ་མངོན་པར་ཞེན་ཅིང་ཆགས་པར་གྱུར་ཏོ། །རྒྱལ་པོ་དེས་བཅོམ་ལྡན་འདས་འཁོར་དང་བཅས་ཏེ་མཉེན་ལྡན་གྱི་ཚལ་ན་བཞུགས་པར་ཐོས་པས་བཙུན་མོ་དང་། གཞོན་ནུ་དང་། བློན་པོ་དང་། སྐྱེ་བོ་མང་པོའི་ཚོགས་དང་ལྷན་ཅིག་ཏུ་བཅོམ་ལྡན་འདས་ག་ལ་དེར་དོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འཁོད་པ་དང་། དེ་ནས་བཅོམ་ལྡན་འདས་དེས་རྒྱལ་པོ་འཁོར་དང་བཅས་པ་ལ་ཤིན་དུ་གྱ་ནོམ་པའི་ཆོས་ཀྱི་གཏམ་ཀུན་དུ་བསྟན་ཅིང་གཟེང་བསྟོད་པས་ཁྱད་པར་དུ་འཕགས་པའི་ཤེས་པ་ཐོབ་པར་གྱུར་ཏོ། །དེའི་ནུ་བོ་འདོད་པ་ལ་ཞེན་ཅིང་ཁྱིམ་ནས་འབྱུང་དུ་མ་བཏུབ་པ་དང་། དེའི་ཚེ་དེ་ལ་བློན་པོའི་བུ་དང་། གཞན་ཡང་སྔ་ནས་ལྷན་ཅིག་རྩེ་རྩེ་བའི་གྲོགས་པོ་དག་གིས་ཀྱེ་གྲོགས་པོ་ཤེས་པར་གྱིས་ཤིག། འདི་ལྟར་རྒྱལ་པོའི་གཞོན་ནུ་དང་། བཙུན་མོའི་འཁོར་དང་། བློན་པོ་དང་། སྐྱེ་བོ་མང་པོ་དང་བཅས་ཏེ། དེ་བཞིན་གཤེགས་པ་རྣམ་པར་གཟིགས་ག་ལ་བ་དེར་དོང་སྟེ། གུས་པས་དམ་པའི་ཆོས་མཉན་པས་ཁྱད་པར་དུ་འཕགས་པའི་ཤེས་པ་ཐོབ་པར་གྱུར་ཏེ། འདི་ལྟར་ཁྱོད་ཀྱང་མུ་ལུས་ཤིན་དུ་ཐོབ་པར་དཀའ་བ་ལས་དེང་ཐོབ་པར་གྱུར་ན་ཅིའི་ཕྱིར་འདོད་པ་ལ་མངོན་པར་ཞེན་ཅིང་ཆགས་ནས་སྒོ་ཡང་འབྱུང་དུ་མི་བཏུབ་ཅེས་སྨྲས་པ་དང་། དེས་ཀྱང་དེ་སྐད་དུ་སྤྱོ་བ་ཐོས་པས་ཤིན་དུ་ངོ་ཚ་བར་གྱུར་ནས་དེ་དག་གི་རྗེས་སུ་འབྲངས་ཏོ་ལྷན་ཅིག་དོད་དོ། །དེའི་ཚེ་བཅོམ་ལྡན་འདས་དེའི་གཅུང་དགེ་སློང་དེས་མང་པོ་དེ་དག་
ལྷན་ཅིག་འགྲོགས་ཏོ་དོད་པ་མཐོངས་ནས་ཀྱེ་ཁྱེ་དེ་ཅིའི་ཕྱིར་མི་འདི་གཅིག་པུ་ཁྲིད་ནས་ལྷན་ཅིག་འགྲོགས་ཏེ་འགྲོ་ཞེས་དྲིས་པ་དང་། དེ་དག་གིས་ཀྱང་ཇི་ལྟར་གྱུར་པ་ཞིབ་ཏུ་སྨྲས་སོ། །དགེ་སློང་དེས་སྨྲས་པ། བདག་ནི་བཅོམ་ལྡན་འདས་ཀྱི་གཅུང་ཡིན་ཏེ། སྔོན་ཁྱིམ་ན་གནས་པའི་ཚེ་འདོད་པའི་ཡུལ་རྣམས་ལ་ཤིན་དུ་མངོན་པར་ཞེན་ཅིང་ཆགས་པ་ལས་སྟོན་པ་ཆེན་པོས་ཐུགས་རྗེ་དགོངས་ནས་མཐུས་འཁོར་བ་ལས་བཟླས་ཏེ་མཐར་ཐུག་པའི་མྱ་ངན་ལས་འདས་པ་ལ་བཞག་པ་ཡིན་ནོ། །གཞན་ཡང་སྐྱེས་བུ་གླེན་པ་བདག་དང་འདྲ་བ་འདི་ལྟ་བུ་ཡོད་པ་ལས་ཁྱེད་ཀྱིས་སྙིང་བརྩེ་ནས་ལྷན་ཅིག་ཁྲིད་དེ་འོངས་པ་ཤིན་དུ་ལེགས་སོ། །དེང་བླ་ན་མེད་པའི་སྟོན་པ་ཆེན་པོ་བཅོམ་ལྡན་འདས་ག་ལ་བ་དེར་ཁྲིད་ཅིག་དང་། གདོན་མི་ཟ་བར་ཤིན་དུ་དད་པ་སྐྱེ་བར་འགྱུར་རོ་ཞེས་སྨྲས་པས་དེ་དག་ཀྱང་ལྷན་ཅིག་འགྲོགས་ནས་བཅོམ་ལྡན་འདས་ག་ལ་བ་དེར་དོད་པ་དང་། བཅོམ་ལྡན་འདས་དེས་ཀྱང་དེ་དག་ལ་གཟིགས་ནས་དབང་པོ་དང་མོས་པ་ཇི་ལྟ་བ་བཞིན་དུ་ཡང་དག་པར་བསྟན་པས་དེ་དག་གིས་ཐོས་པར་གྱུར་ནས་ཤིན་དུ་དད་པ་སྐྱེས་པས་འདུག་པའི་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྟོན་པ་ཆེན་པོ་འཕགས་པའི་དགེ་འདུན་དང་ཐབས་གཅིག་ཏུ་སང་གི་གདུགས་གི་སྡུམ་པར་བསྲོ་ཁང་དུ་ཁྲུས་ལ་གཤེགས་པར་ཅིག་ནང་ཞེས་གསོལ་པ་དང་། བཅོམ་ལྡན་འདས་ཀྱང་ཅང་མི་གསུང་བར་གཤེགས་པར་ཞལ་གྱིས་བཞེས་སོ། དེས་ཀྱང་ཞལ་གྱིས་བཞེས་པར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བྱས་ཏེ་སོང་ངོ་། དེ་ནས་རྒྱལ་པོ་ག་ལ་བ་དེར་སོང་སྟེ་ཕྱིན་པ་དང་། རྒྱལ་པོ་ལ་ལུས་གུས་པས་ཕྱག་བྱས་ནས་འདི་སྐད་ཅེས་སྨྲས་སོ། རྒྱལ་པོ་ཆེན་པོ་བདག་བཅོམ་ལྡན་འདས་ག་ལ་བ་དེར་མཆིས་ནས་ཆོས་ཐོས་པ་དང་། ཤིན་དུ་དང་བ་སྐྱེས་ཏེ་འདོད་པའི་ཡུལ་རྣམས་ལ་ཡོངས་སུ་སྐྱོ་བའི་སེམས་སྐྱེས་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པར་སང་གི་གདུགས་ལ་བདག་གི་སྡུམ་པར་བསྲོ་གང་དུ་ཁྲུས་ལ་གཤེགས་པར་གསོལ་པ་ལས་དེ་བཞིན་གཤེགས་པ་སྟོན་པ་ཆེན་པོས་ཀྱང་ཐུགས་བརྩེ་བར་དགོངས་ནས་གཤེགས་པར་ཞལ་གྱིས་བཞེས་ཏེ། བཅོམ་ལྡན་འདས་དེ་ནི་ལྷ་དང་མི་རྣམས་ཀྱིས་མཆོད་པར་བགྱི་བའི་འོས་སུ་གྱུར་པ་ལགས་ན། ལྷས་ཀྱང་གྲོང་ཁྱེར་གྱི་ཤུལ་དང་། སྲང་རྣམས་ཕྱག་
དར་བྱས་ནས་ཆག་ཆག་བཏབ་སྟེ་མཛེས་པར་བགྱི་བའི་རིགས་སོ་ཞེས་སྨྲས་པ་དང་། རྒྱལ་པོས་འདི་སྙམ་དུ་བཅོམ་ལྡན་གྲོང་ཁྱེར་དུ་གཤེགས་ན་བདག་གི་གྲོང་ཁྱེར་མཛེས་པར་བྱ་མོད་ཀྱི་འོན་ཀྱང་བདག་གི་ནུ་བོ་འདོད་པ་ལ་མངོན་པར་ཞེན་ནས་བཟློག་པ་སྨྲས་པ་དང་། དཀའ་བ་ལས་དེང་བཅོམ་ལྡན་ཀྱིས་ཐུལ་བར་གྱུར་པ་ནི་ཡང་དག་པར་ངོ་མཚར་ཆེའོ་སྙམ་དུ་བསམས་ནས་ནུ་བོ་ཤིན་དུ་ལེགས་ཀྱིས་ཁྱོད་སོང་ལ་ཁྲུས་ཀྱི་ཡོ་བྱད་ཅི་དགོས་པ་སྤྱོད་ཅིག་དང་། ངས་ཀྱང་ཅི་ནུས་གྱིས་གྲོང་ཁྱེར་བརྒྱན་པར་བྱའོ་ཞེས་སྨྲས་པས་རྒྱལ་པོའི་ནུ་བོ་ཡང་ཤིན་དུ་དགའ་བར་གྱུར་ཏེ། རྒྱལ་པོ་ལ་ཕྱག་བྱས་ནས་ལངས་ཏེ་སོང་ངོ་། དེ་ནས་རྒྱལ་པོས་བློན་པོ་རྣམས་ལ་བསྒོ་བ། ཀྱེ་ཁྱེད་ཅག་དེང་ལ་གྲོང་ཁྱེར་དུ་དྲིལ་ཆེན་བསྒྲགས་ཏེ་ཕྱོགས་སུ་འདི་སྐད་དུ་སང་བཅོམ་ལྡན་འདས་གྲོང་ཁྱེར་དུ་གཤེགས་ཀྱིས་གྲོང་ཁྱེར་ན་གནས་པ་དང་། ཡུལ་སོ་སོ་ནས་ལྷགས་པའི་སྐྱེ་པོ་རྣམས་སོ་སོ་ནས་ཅི་ནུས་གྱིས་གྲོང་ཁྱེར་མཛེས་པར་གྱིས་ལ། ལམ་དང་སྲང་རྣམས་ཕྱག་དེར་བྱས་ཏེ། ཆག་ཆག་བཏབ་ནས་མེ་ཏོག་དང་། སྤོས་དང་། དྲི་རྣམས་ཐོགས་ཏེ། སྟོན་པ་ཆེན་པོ་གཤེགས་པ་སུ་ཤིག་ཅེས་སྒོ་ཤིག། བློན་པོ་རྣམས་ཀྱིས་ཀྱང་ལྷ་དེ་བཞིན་འཚལ་ལོ་ཞེས་རྒྱལ་པོའི་བཀའ་ཁྱེར་ནས་ཕྱོགས་སུ་གོ་བར་བསྒོ་ཞིང་དྲིལ་ཆེན་གྱི་སྒྲ་བསྒྲགས་པས་སྐྱེ་བོ་རྣམས་གྲོང་ཁྱེར་དེའི་རྡོ་བ་དང་། གྱོ་མོ་དང་། བོང་བ་རྣམས་བསལ་ཏེ། ས་སྤོས་ཀྱི་ཆུས་ཀུན་དུ་ཁྱབ་པར་ཆག་ཆག་བཏབ་ནས་བདུག་པ་དམ་པ་རྣམས་ཀྱང་བསྲེགས་གདུགས་དང་། རྒྱལ་མཚན་དང་། བ་དན་མང་པོ་ཡང་བཙུགས་ཏེ་མེ་ཏོག་རྣམས་མངོན་པར་གཏོར་བས་ལྷའི་དབང་པོ་བརྒྱ་བྱིན་གྱི་བསྐྱེད་མོས་ཚལ་དགའ་བ་བཞིན་དུ་བྱས་སོ། དེའི་ཚེ་རྒྱལ་པོའི་ནུ་བོས་ཀྱང་སྤོས་ཆུ་དང་། སྤོས་མར་ལ་སོགས་པ་སྦྱར་ཏེ་བསྲོ་ཁང་མཛེས་པར་བྱས། ཁྲི་བཤམས་ནས་གང་ན་ཡང་བཏིང་ངོ་། དེ་བཞིན་གཤེགས་པ་རྣམ་པར་གཟིགས་མཐར་གྱིས་གྲོང་ཁྱེར་དུ་གཤེགས་སུ་ཉེ་བ་དང་། རྒྱལ་པོ་དང་། རྒྱལ་བུ་དང་། བློན་པོ་དང་། བཙུན་མོ་དང་། སླས་དང་། སྐྱེ་བོ་མང་པོ་རྣམས་གྲོང་ནས་བྱུང་སྟེ། དེ་བཞིན་གཤེགས་པ་བསུ་ནས་རྒྱང་ནས་བཅོམ་ལྡན་འདས་ལ་ཕྱག་བྱས་ཏེ་ཞབས་འབྲིང་བྱས་ནས་གྲོང་ཁྱེར་དུ་གཤེགས་པ་དང་། དེའི་ཚེ་རྒྱལ་པོའི་ནུ་བོ་དེས་ཀྱང་བཅོམ་ལྡན་འདས་བསྲོ་ཁང་དུ་གཤེགས་པར་སྤྱན་དྲངས་ཏེ། སྤོས་ཆུ་ལ་སོགས་པ་ཕུལ་ནས་སྐུ་བསིལ་བར་གསོལ་ཏེ། བཅོམ་ལྡན་འདས་ཀྱི་སྐུ་གསེར་གྱི་ཁ་དོག་ཅན་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་
བརྒྱད་བཅུས་ཡོངས་སུ་བརྒྱན་པ་མཐོང་བ་དང་། རབ་ཏུ་དགའ་ནས་ཤིན་དུ་དང་བའི་དད་པ་སྐྱེས་པར་གྱུར་ཏོ། །སྐུ་བསིལ་ནས་ན་བཟའ་མནབས་པ་དང་། དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་བས་འདི་སྐད་དུ་དེང་བདག་གིས་བསོད་ནམས་ཀྱི་ཞིང་མཆོག་དམ་པ་ལ་མཆོད་པ་ཅུང་ཟད་བགྱིས་པ་འདིའི་དགེ་བའི་རྩ་བས་མ་འོངས་པའི་ནུས་ན་བཅོམ་ལྡན་འདས་འདི་དང་ཐ་དད་པ་མེད་པའི་གསེར་གྱི་ཁ་དོག་ཅན་གྱི་ལུས་ཐོབ་པར་གྱུར་ཅིག། ཇི་ལྟར་བཅོམ་ལྡན་འདས་འདིའི་གཅུང་འདོད་པའི་ཡུལ་ལ་མངོན་པར་ཞེན་ཅིང་ཆགས་པ་ལས་མཐུས་ཡོངས་སུ་བཟླས་ཏེ། ཤིན་དུ་མཐར་ཐུག་པའི་མྱ་ངན་ལས་འདས་པ་ལ་གཞོལ་བར་འགྱུར་བ་དེ་བཞིན་དུ་བདག་ཀྱང་མ་འོངས་པའི་དུས་ན་དེ་བཞིན་གཤེགས་པའི་གཅུང་དུ་གྱུར་ནས་གསེར་གྱི་ཁ་དོག་ཅན་གྱི་ལུས་ཐོབ་པར་གྱུར་ཏེ། འདི་ལྟར་བདག་འདོད་པའི་ཡུལ་ལ་མངོན་པར་ཞེན་ཅིང་ཆགས་པར་གྱུར་པ་ན་ཡང་མཐུས་སྲེད་པའི་ཆུ་བོ་ཟབ་མོ་ལས་ཡོངས་སུ་བཟླས་ཏེ་མྱ་ངན་ལས་འདས་པའི་བདེ་བ་ལ་གཞོག་པར་གྱུར་ཅིག་ཅེས་སྨོན་ལམ་བཏབ་པོ། དགེ་སློང་དག་ཁྱེད་ཀྱིས་དེའི་ཚེ་དེའི་དུས་ན་རྒྱལ་པོ་མཉེན་ལྡན་གྱི་ནུ་བོ་འདོད་པ་ལ་མངོན་པར་ཞེན་པར་གྱུར་པ་དེ་གཞན་ཡིན་སྙམ་དུ་སེམས་ན་དེ་ལྟར་མི་ལྟ་སྟེ། དེ་ནི་དགེ་སློང་དགའ་བོ་འདི་ཉིད་ཡིན་ནོ། །འདིས་སྔོན་འདས་པའི་དུས་སུ་དེ་བཞིན་གཤེགས་པ་རྣམས་པར་གཟིགས་བསྲོ་ཁང་དུ་གཤེགས་པར་གསོལ་ནས་སྤོས་ཆུ་ལ་སོགས་པས་སྐུ་བསིལ་ཏེ། ཤིན་དུ་དང་བའི་དད་པས་སྨོན་ལམ་བཏབ་པ་དེའི་དགེ་རྩ་བའི་རྒྱུས་དེང་དེ་བཞིན་གཤེགས་པའི་གཅུང་དུ་གྱུར་ནས་ལུས་གསེར་གྱི་ཁ་དོག་ལྟ་བུར་གྱུར་པ་དང་། འདོད་པའི་ཡུལ་ལ་མངོན་པར་ཞེན་ཅིང་ཆགས་པ་ལས་ངས་མཐུས་ཕྱུང་སྟེ། ཁྱིམ་མེད་པར་རབ་ཏུ་བྱུང་ནས་མཐར་ཐུག་པའི་མྱ་ངན་ལས་འདས་པ་ཤིན་དུ་བདེ་བའི་གནས་སུ་ཕྱིན་པར་གྱུར་པ་ཡིན་ནོ། །དེ་ནས་འཁོར་མང་པོ་རྣམས་ཐེ་ཚོམ་དུ་གྱུར་ནས་ཡང་བཅོམ་ལྡན་འདས་ལ་གསོལ་པ། བཙུན་པ་ཚེ་དང་ལྡན་པ་དགའ་བོས་སྔོན་ལས་ཅི་བགྱིས་ན་སྐྱེ་བར་ཆེན་པོའི་མཚན་སུམ་བཅུ་མངོན་པར་གྲུབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདིས་ལས་མངོན་པར་འདུས་བྱས་པས་ན་ཞེས་བྱ་བ་ལ་སོགས་པ་རྒྱ་ཆེར་སྔ་མ་བཞིན་ཏེ། སྔོན་འདས་པའི་དུས་སུ་རི་བྲགས་ཀྱི་གྲོང་ཁྱེར་གཞན་ཞིག་ན་ཁྱིམ་བདག་ཕྱུག་ཅིང་ནོར་
མང་བ། ཡོད་བྱད་ཀྱིས་བྲེལ་བ་མེད་པ་ཞིག་གནས་པ་དེ་ལ་བསྐྱེད་མོས་ཚལ་མེ་ཏོག་དང་འབྲས་བུ་རྒྱས་ཤིང་ཆུ་མིག་དང་འབབ་ཆུ་དང་། ལྗོན་ཤིང་དང་ལྡན་པ། རབ་ཏུ་བྱུང་བའི་དབེན་གནས་སུ་འོས་པ་ཞིག་ཡོད་དེ། དེའི་ཚེ་རང་སངས་རྒྱས་སེམས་ཅན་ལ་སྙིང་བརྩེ་བའི་ཕྱིར་འཇིག་རྟེན་དུ་བྱུང་ནས་དབེན་པ་ན་གནས་པ་ཡོད་པས་ནམ་འཇིག་རྟེན་དུ་སངས་རྒྱས་མི་འབྱུང་བའི་ཚེ་འདི་འབའ་ཤིག་བསོད་ནམས་ཀྱི་ཞིང་དུ་གྱུར་ཏེ། དེ་ནས་སངས་རྒྱས་གཞན་ཞིག་ལྗོངས་རྒྱུ་ཞིང་རི་བྲགས་ཀྱི་གྲོང་དེར་ཕྱིན་ནས་ཕན་ཚུན་ཀུན་དུ་བརྟགས་ཏེ། གནས་བཙལ་བ་ལས་དེའི་སྐྱེད་མོས་ཚལ་དུ་ཕྱིན་པ་དང་། བསྐྱེད་མོས་ཚལ་དེ་སྲུང་བའི་མིས་འཕགས་པ་དེ་མཐོང་ནས་བདེ་བར་གཤེགས་སམ་སེལ་པའི་སླད་དུ་འཕགས་པ་འདི་བཞུགས་སུ་གསོལ་སྨྲས་སོ། དེས་ནམ་གྱི་གུང་ཐུན་ལ་མེའི་ཁམས་ལ་སྙོམས་པར་ཞུགས་པ་དང་། བསྐྱེད་མོས་ཚལ་བསྲུང་བའི་མིས་མཐོང་ནས་འདི་སྙམ་དུ་བཙུན་པ་ཆེན་པོ་འདི་ནི་ལྟ་བུའི་སྤྱོད་པ་མཆོག་གྲུབ་པོ་སྙམ་དུ་བསམས་ནས་དེ་ནས་ནུ་བ་མོ་ལངས་ཏེ། ཁྱིམ་བདག་ག་ལ་བ་དེར་སོང་འདི་སྐད་དུ་ཁྱིམ་བདག་ཆེན་པོ་དེང་དགའ་བ་ཆེན་པོ་སྐྱེད་ཅིག། བསྐྱེད་མོས་ཚལ་ན་འཕགས་པ་ཞིག་བདག་གི་ཐད་དུ་གཤེགས་ནས་མཚན་མོ་གནས་པ་ལས་དེའི་སྤྱོད་པ་གྱ་ནོམ་པ་དང་ལྡན་ཞིང་རྫུ་འཕྲུལ་ཆེན་པོ་ཕུན་སུམ་ཚོགས་པ་ཞིག་པས་འོད་ཟེར་ཆེན་པོ་བཀྱེ་ནས་བསྐྱེད་མོས་ཚལ་གྱི་ནང་དུ་གསལ་པར་བྱས་སོ་ཞེས་སྨྲས་པ་ཁྱིམ་བདག་གིས་ཐོས་ནས་མྱུར་ཞིང་རིངས་པར་བསྐྱེད་མོས་ཚལ་དུ་སོང་སྟེ། རྐང་པ་གཉིས་ལ་ཕྱག་བྱས་ནས་འདི་སྐད་དུ་འཕགས་པ་ནི་བསོད་སྙོམས་བཞེད་པ་ལགས་ལ་བདག་ནི་བསོད་ནམས་འཚལ་བ་ལགས་ན་ཐུགས་བརྩེ་བར་དགོངས་ཏེ། བསྐྱེད་མོས་ཚལ་འདིར་བཞུགས་སུ་གསོལ། བདག་གིས་རྟག་པར་བསོད་སྙོམས་སྦྱར་རོ་ཞེས་སྨྲས་པ་དང་། དེས་ཀྱང་དེས་གུས་པས་གསོལ་བ་བཏབ་པར་མཐོང་ནས་ཁས་བླངས་ཏེ། བསྐྱེད་མོས་ཚལ་དེའི་ནང་དུ་གནས་ནས་བསམ་གཏན་དང་། རྣམ་པར་ཐར་པ་མཆོག་ལ་སྙོམས་པར་ཞུགས་ཏེ། བདེ་བ་རྗེས་སུ་མྱོང་བར་གྱུར་ཏོ། །དུས་གཞན་ཞིག་ན་དེ་འདི་སྙམ་དུ་བདག་གི་ལུས་རུལ་པ་འདི་ནི་འཁོར་བར་འཁོར་བ་ལས་བདག་གིས་གང་བྱ་བ་དེ་ནི་ཐོབ་པར་གྱུར་པས་མྱ་ངན་ལས་འདས་པ་ཞི་བའི་དབྱིངས་སུ་ཞུག་ནས་གཏན་དུ་མི་སྐྱེ་བར་དེ་མངོན་སུམ་དུ་བྱའི་རིག་སོ་སྙམ་ནས་ནམ་མཁའ་ལ་མངོན་པར་འཕགས་ཏེ།
མེའི་ཁམས་ལ་སྙོམས་པར་ཞུགས་ནས་རྫུ་འཕྲུལ་རྣམས་མངོན་པར་བསྟན་ཏེ། འོད་ཟེར་ཆེན་པོ་བཀྱེ་ནས་སྟེང་དུ་འབར་བ་དང་། ཚ་བ་དང་། འོག་ཏུ་ཆུ་ལ་འབབ་པ་ལ་སོགས་པ་བསྟན་ཏེ། ལུས་འདི་སྤངས་ནས་རྣམ་པར་ཤེས་པ་སྐྱེ་བར་མི་འགྱུར་བ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་ནས་ཁྱིམ་བདག་དེས་དེའི་རུས་བུ་བླངས་དྲིའི་ཤིང་ཐམས་ཅད་ཀྱིས་བསྲེགས་ཏེ། འོ་མས་མེ་བསད་ནས་རུས་པ་ལྷག་མ་ལུས་པར་བསྡུས་ཏེ་བུམ་པ་སར་པའི་ནང་དུ་བཅུག་ནས་མཆོད་རྟེན་བརྩིགས་ཏེ། གདུགས་དང་། རྒྱལ་མཚན་དང་། བ་དན་རྣམས་བཙུགས་ནས་ཤིན་དུ་དང་བའི་དད་པས་དྲིའི་ཆུ་གྱ་ནོམ་པ་སུམ་བཅུ་གཏོར་ཏེ། མཚན་བཟང་པོ་རྣམས་གྲུབ་པར་ཤོག་ཤོག་ཅེས་སྨོན་ལམ་ཆེན་པོ་བཏབ་བོ། །དགེ་སློང་དག་ལེགས་པར་ཉོན་ལ་དེའི་དུས་ན་ཁྱིམ་བདག་ཏུ་གྱུར་པ་དེ་གཞན་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། དེ་ནི་དགའ་བོ་འདི་ཉིད་ཡིན་ནོ། འདིས་མཆོད་པ་མཆོག་བྱས་པ་དང་། གུས་པ་དང་། ཤིན་དུ་དད་པ་བསྐྱེད་པའི་ལས་ཀྱི་དབང་གིས་དེང་འདིས་མཚན་མཆོག་ཁྱད་པར་དང་འཕགས་པ་སུམ་བཅུ་མངོན་པར་གྲུབ་པའི་རྣམ་པར་སྨིན་པ་མྱོང་བར་གྱུར་པ་ཡིན་ནོ། །དེ་ནས་འཁོར་མང་པོ་རྣམས་ཡང་ཐེ་ཚོམ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་དགའ་བོས་ལས་ཅི་བགྱིས་ན་གལ་ཏེ་འདིར་རབ་ཏུ་མ་བྱུང་ཞིང་ཁྱིམ་ན་གནས་པར་གྱུར་གདོན་མི་ཟ་བར་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་འདིས་བགྱིས་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགའ་བོས་ཚེ་རབས་སྔ་མ་ལས་མངོན་པ་འདུས་བྱས་པའི་འབྲས་བུ་རྣམ་པར་སྨིན་པར་གྱུར་པའི་ཚེ་གདོན་མི་ཟ་བར་བདག་ཉིད་ཀྱིས་མྱོང་བར་འགྱུར་རོ་ཞེས་བྱ་བ་ལ་སོགས་པ་ཡང་རྒྱས་པར་གོང་མ་བཞིན་དུ་རྒྱས་པར་སྦྱར་ཏེ། དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཚེ་ལོ་སྟོང་ཕྲག་ཉི་ཤུ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུངས་ཞེས་བྱ་བ་མཚན་སུམ་བཅུ་དང་ལྡན་པ་འཇིག་རྟེན་དུ་བྱུང་ཏེ། ཡུལ་བཱ་ར་ན་སཱི་དྲང་སོང་ལྷུང་བའི་
གནས་རི་དགས་བྱིན་པའི་ཚལ་ན་བཞུགས་སོ། །དེའི་ཚེ་གྲོང་ཁྱེར་དེ་ན་རྒྱལ་པོ་ཀྲི་ཀི་ཞེས་བྱ་བ་རྒྱལ་པོ་བྱེད་དེ། འདི་ལྟར་ཆོས་ཀྱིས་འཇིག་རྟེན་འདུལ་བར་བྱེད་པས་ཆོས་བཞིན་དུ་རྒྱལ་པོ་བྱེད་དོ་ཞེས་བྱ་བ་ལ་སོགས་པ་ཡང་རྒྱས་པར་གོང་མ་བཞིན་དུ་སྒྱུར་རོ། །རྒྱལ་པོ་དེ་ལ་གསུམ་ཡོད་དེ། འདི་ལྟ་སྟེ་རབ་དང་། འབྲིང་པོ་དང་། ཐ་ཆུངས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོང་སྲུངས་སངས་རྒྱས་ཀྱི་མཛད་པ་མཐར་གྱིས་ཕྱིན་ནས་ཤིང་ཟད་པའི་མེ་བཞིན་དུ་ལྷག་མ་མེད་པའི་མྱ་ངན་ལས་འདས་པའི་དབྱིངས་ས་ཡོངས་སུ་མྱ་ངན་ལས་པ་དང་། རྒྱལ་པོ་དེས་གུས་པའི་སེམས་ཀྱིས་དེ་བཞིན་གཤེགས་པའི་སྐུ་གདུང་བླངས་ཏེ། དྲིའི་ཤིང་ཅན་དན་དང་། གོ་ཤིང་དང་། ལྷའི་སྤོས་ཀྱི་ཤིང་ལ་སོགས་པས་བསྲེགས་ཏེ། འོ་མས་མེ་བསད་ནས་རིང་བསྲེལ་བསྡུས་ཏེ། རིན་པོ་ཆེའི་བུམ་པའི་ནང་དུ་བཅུ་གནས་མཆོད་རྟེན་ཆེན་པོ་རིན་པོ་ཆེ་སྣ་བཞི་ལས་བྱས་པ་ཁོར་ཁོར་ཡུག་ཏུ་ནི་དཔག་ཚད་གཅིག། འཕང་དུ་ནི་དཔག་ཚད་ཕྱེད་ཡོད་པ་བརྩིགས་ནས་དེ་ལ་གནས་འཁོར་ལོ་འཛུགས་པའི་ཚེ་རྒྱལ་པོའི་བུ་འབྲིང་ངེས་བདག་ཉིད་སྟེང་དུ་འཛེགས་ནས་འཁོར་ལོ་བར་མ་བཙུགས་སོ། །དགེ་སློང་དག་དེའི་ཚེ་དེའི་དུས་ན། རྒྱལ་པོའི་བུ་འབྲིང་པོར་གྱུར་པ་དེ་གཞན་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། དགའ་བོ་འདི་ཉིད་ཡིན་ནོ། །འདིས་སྔོན་འདས་པའི་དུས་སུ་གུས་པའི་སེམས་ཀྱིས་མཆོད་པ་བྱས་པ་དང་། འཁོར་ལོ་བར་མ་བཙུགས་པའི་དགེ་བའི་ལས་དེས་ཚེ་རབས་ཉིས་སྟོང་ལྔ་བརྒྱའི་བར་རྟག་པར་གླིང་གཅིག་ལ་དབང་བའི་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་བྱས་སོ། ཚེ་འདི་ལ་གལ་ཏེ་རབ་ཏུ་བྱུང་བར་མ་གྱུར་ན་དེ་བཞིན་དུ་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དབང་ཕྱུག་ཆེན་པོ་ལ་དབང་སྒྱུར་བ་བྱེད་པར་འགྱུར་རོ། །དེ་ནས་འཁོར་མང་པོ་རྣམས་ཐེ་ཚོམ་དུ་གྱུར་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཚེ་དང་ལྡན་པ་དགའ་བོས་སྔོན་ཅི་བགྱིས་ན་ཉན་ཐོས་ཀྱི་ནང་ན་དབང་པོའི་སྒོ་རབ་ཏུ་སྡོམ་པའི་མཆོག་ཏུ་བཀའ་སྩལ་ལགས། བཅོམ་ལྡན་འདས་ཀྱིས་བཀའ་སྩལ་པ་འདི་ནི་སྔོན་གྱི་སྨོན་ལམ་གྱི་སྟོབས་ལས་གྱུར་པ་ཡིན་ཏེ། དགེ་སློང་དག་དགའ་བོ་འདི་སྔོན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལས་དེའི་མཁན་པོ་བཅོམ་ལྡན་འདས་དེའི་བསྟན་པ་ལ་དབང་པོའི་སྒོ་རབ་ཏུ་སྡོམ་པའི་མཆོག་ཏུ་བསྔགས་པ་བརྗོད་པར་གྱུར་ཏོ། །དེས་ཇི་སྲིད་འཚོའི་བར་དུ་ཚངས་པར་སྤྱད་ཀྱང་ཚེ་དེ་ཉིད་ལ་མངོན་པར་རྟོགས་པ་ཅི་ཡང་ཐོབ་པར་མ་གྱུར་པས་དེ་འཆི་བའི་དུས་ཀྱི་ཚེ། འདི་སྐད་དུ་བདག་གིས་དེ་བཞིན་གཤེགས་པའི་བསྟན་པ་ལ་ཇི་སྲིད་འཚོ་བའི་བར་དུ་ཚངས་པར་སྤྱད་ཀྱང་ཚེ་འདི་ཉིད་ལ་མངོན་པར་རྟོགས་པ་ཅི་ཡང་མེད་པས་བདག་གིས་ཚངས་པར་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་འོད་སྲུང་གིས་མ་འོངས་པའི་དུས་ན་བྲམ་ཟེའི་ཁྱེའུ་བླ་མ་ཞེས་བྱ་བ་འདི་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མཚན་ཡང་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པས་བདག་ཀྱང་བཅོམ་ལྡན་འདས་དེའི་བསྟན་པ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ཉོན་མོངས་པ་རྣམས་སྤངས་ནས་དགྲ་བཅོམ་པའི་འབྲས་བུ་ཐོབ་པར་གྱུར་ཏེ། ཇི་ལྟར་བདག་གི་མཁན་པོ་འདི་བཅོམ་ལྡན་འདས་འདིའི་བསྟན་པ་ལ་དབང་པོའི་སྒོ་རབ་ཏུ་སྡོམ་པའི་མཆོག་ཏུ་གྱུར་པ་དེ་བཞིན་དུ་བདག་ཀྱང་བཅོམ་ལྡན་འདས་དེའི་བསྟན་པ་ལ་དབང་པོའི་སྒོ་རབ་ཏུ་སྡོམ་པའི་མཆོག་ཏུ་གྱུར་ཅིག་ཅེས། སྨོན་ལམ་བཏབ་བམ་ན་སྨོན་ལམ་དེའི་སྟོབས་ཀྱིས་དེང་འདིར་ངའི་བསྟན་པ་ལ་ཉན་ཐོས་ཀྱི་ནང་ན་དབང་པོའི་སྒོ་རབ་ཏུ་སྡོམ་པའི་མཆོག་ཏུ་གྱུར་པ་ཡིན་ནོ། །འདི་ལྟར་དགེ་སློང་དག་གང་གཅིག་ཏུ་གནག་པའི་ལས་ཀྱི་རྣམ་པར་སྨིན་པ་ཡང་གཅིག་ཏུ་གནག་གོ། །གང་གཅིག་ཏུ་དཀར་བའི་ལས་ཀྱི་རྣམ་པར་སྨིན་པ་ཡང་གཅིག་ཏུ་དཀར་རོ། །ལས་འདྲེན་མ་གང་ཡིན་པ་དེ་ནི་རྣམ་པར་སྨིན་པ་ཡང་འདྲེན་མར་མྱོང་བར་འགྱུར་ཏེ། དེ་ལྟ་བས་ན་ཁྱེད་ཀྱིས་གཅིག་ཏུ་གནག་པ་དང་། འདྲེན་མའི་ལས་སྤངས་ལ་གཅིག་ཏུ་དཀར་བའི་ལས་བསྒྲུབ་པར་བྱའོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་མངལ་ན་གནས་པ་བསྟན་པའི་འདུས་པ་སྟེ་འདུས་པ་བཅུ་གསུམ་པ་རྫོགས་སོ།། །།