དང་པོ། རྒྱལ་པོ་མངོན་པར་དད་པར་བྱས་པའི་ལེའུ།
འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་དྲུག་པ་སྟེ། །འཕགས་པ་ཡབ་དང་སྲས་མཇལ་བ་ཞེས་བྱ་བ་དེ་ཁོ་ན་ངེས་པར་བསྟན་པ། བམ་པོ་དང་པོ། །རྒྱ་གར་སྐད་དུ་ཨཱ་ཪྻ་པི་ཏཱ་པུ་ཏྲ་ས་མཱ་ག་མ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། །འཕགས་པ་ཡབ་དང་སྲས་མཇལ་བ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་། བྱང་ཆུབ་སེམས་དཔའ་དང་། འཕགས་པ་ཉན་ཐོས་དང་། རང་སངས་རྒྱས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོལ་བ་གྲོལ་བའི་འཁོར་དང་ལྡན་པ། དུལ་བ་དུལ་བའི་འཁོར་དང་ལྡན་པ། ཞི་བ་ཞི་བའི་འཁོར་དང་ལྡན་པ། རྒལ་བ་རྒལ་བའི་འཁོར་དང་ལྡན་པ། ཕ་རོལ་དུ་ཕྱིན་པ་ཕ་རོལ་དུ་ཕྱིན་པའི་འཁོར་དང་ལྡན་པ། ཐང་ལ་ཕྱིན་པ་ཐང་ལ་ཕྱིན་པའི་འཁོར་དང་ལྡན་པ། དབུགས་ཕྱིན་པ་དབུགས་ཕྱིན་པའི་འཁོར་དང་ལྡན་པ། དགེ་སློང་དགེ་སློང་གི་འཁོར་དང་ལྡན་པ། ཉོན་མོངས་པ་བཅོམ་པ་ཉོན་མོངས་པ་བཅོམ་པའི་འཁོར་དང་ལྡན་པ། དགེ་སྦྱོང་དགེ་སྦྱོང་གི་འཁོར་དང་ལྡན་པ། སྡིག་པ་བསལ་བ་སྡིག་པ་བསལ་བའི་འཁོར་དང་ལྡན་པ། ཚངས་པ་ཚངས་པའི་འཁོར་དང་ལྡན་པ། སྡིག་པ་བསལ་བའི་ཆོས་ཅན་སྡིག་པ་བསལ་བའི་འཁོར་
དང་ལྡན་པ། རིག་པ་ཅན་རིག་པ་ཅན་གྱི་འཁོར་དང་ལྡན་པ། ཁྲུས་བྱས་པ་ཁྲུས་བྱས་པའི་འཁོར་དང་ལྡན་པ། སྒྲོགས་པ་པོ་སྒྲོགས་པོའི་འཁོར་དང་ལྡན་པ། ཉོན་མོངས་པ་བྱང་བ་ཉོན་མོངས་པ་བྱང་བའི་འཁོར་དང་ལྡན་པ། ཡན་ལག་ལྔ་རྣམ་པར་བསལ་པ་ཡན་ལག་ལྔ་རྣམ་པར་བསལ་བའི་འཁོར་དང་ལྡན་པ། སྒྲིབ་པ་དང་རྣམ་པར་བྲལ་བ་སྒྲིབ་པ་དང་རྣམ་པར་བྲལ་བའི་འཁོར་དང་ལྡན་པ། ཡིད་རྣམ་པར་དང་བ་ཡིད་རྣམ་པར་དང་བའི་འཁོར་དང་ལྡན་པ། ཡན་ལག་དྲུག་དང་ལྡན་པ་ཡན་ལག་དྲུག་དང་ལྡན་པའི་འཁོར་དང་ལྡན་པ། བསྙེན་བསྲིང་དང་བྲལ་བ་བསྙེན་བསྲིང་དེ་དང་བྲལ་བའི་འཁོར་དང་ལྡན་པ། བསྲུང་བ་གཅིག་པ་བསྲུང་བ་གཅིག་པའི་འཁོར་དང་ལྡན་པ། དྲན་པའི་སྒོ་སྲུངས་ཕུན་སུམ་ཚོགས་པ་དྲན་པའི་སྒོ་སྲུངས་ཕུན་སུམ་ཚོགས་པའི་འཁོར་དང་ལྡན་པ། རྟོན་པ་བཞི་དང་ལྡན་པ་རྟོན་པ་བཞི་དང་ལྡན་པའི་འཁོར་དང་ལྡན་པ། ཉི་ཚེ་བའི་བདེན་པ་བསལ་བ་ཉི་ཚེ་བའི་བདེན་པ་བསལ་བའི་འཁོར་དང་ལྡན་པ། བཙལ་བ་སྤངས་པ་བཙལ་བ་སྤངས་པའི་འཁོར་དང་ལྡན་པ། མཐར་ཕྱིན་པ་མཐར་ཕྱིན་པའི་འཁོར་དང་ལྡན་པ། དོན་གྱི་མཐར་ཐུག་པ་དོན་གྱི་མཐར་ཐུག་པའི་འཁོར་དང་ལྡན་པ། བདག་ཉིད་བསྒོམས་པ་བདག་ཉིད་བསྒོམས་པའི་འཁོར་དང་ལྡན་པ། ཀུན་དུ་རྟོག་པའི་རྙོག་པ་མེད་པ་ཀུན་ཏུ་རྟོག་པའི་རྙོག་པ་མེད་པའི་འཁོར་དང་ལྡན་པ། རྣམ་པར་རྟོག་པ་ཡོངས་སུ་ཆད་པ་རྣམ་པར་རྟོག་པ་ཡོངས་སུ་ཆད་པའི་འཁོར་དང་ལྡན་པ། ལུས་ཀྱི་འདུ་བྱེད་རབ་ཏུ་བསལ་བ་ལུས་ཀྱི་འདུ་བྱེད་རབ་ཏུ་བསལ་བའི་འཁོར་དང་ལྡན་པ། མི་གཡོ་བ་ལ་མངོན་
པར་མོས་པ་མི་གཡོ་བ་ལ་མངོན་པར་མོས་པའི་འཁོར་དང་ལྡན་པ། སེམས་ཤིན་དུ་རྣམ་པར་གྲོལ་བ་སེམས་ཤིན་དུ་རྣམ་པར་གྲོལ་བའི་འཁོར་དང་ལྡན་པ། ཤེས་རབ་ཤིན་དུ་རྣམ་པར་གྲོལ་བ་ཤེས་རབ་ཤིན་དུ་རྣམ་པར་གྲོལ་བའི་འཁོར་དང་ལྡན་པ། འཕགས་པ་འཕགས་པའི་འཁོར་དང་ལྡན་པ། ཡལ་ག་དང་། ལོ་མ་དང་། འདབ་མ་དང་། ལྕག་མ་དང་། ཤུན་ཕྲགས་ཀྱི་སྐྱོན་དང་བྲལ་བ། དག་པ། སྙིང་པོ་ལ་གནས་པ། ཤཱཀྱའི་ཡུལ་ན་སེར་སྐྱེའི་གནས། ཤིང་ནཱ་གྲོ་དྷའི་ཀུན་དགའ་ར་བ་ན་ལྡ་སྡེ་དང་། གྲགས་བྱིན་དང་། འཆར་ཀ་དང་། ལྟེང་རྒྱས་འོད་སྲུང་དང་། ག་ཡཱ་འོད་སྲུང་དང་། ཆུ་ཀླུང་འོད་སྲུང་དང་། འོད་སྲུངས་ཆེན་པོ་དང་། ཤཱ་རིའི་བུ་དང་། མཽང་གལ་གྱི་བུ་ལ་སོགས་པ། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་དུ་རྣམ་པར་གྲོལ་བ། ཤེས་རབ་ཤིན་དུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་པ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་ཕྱིན་པ་ཤ་སྟག་དང་ཐབས་གཅིག་སྟེ། དེའི་ཚེ་ནམ་གྱི་ཐོ་རངས་ཀྱི་ངེས་ལ་བཅོམ་ལྡན་འདས་དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་གྱིས་བལྟས་ཏེ། བླ་གབ་མེད་པ་ན་ཞུགས་སོ། །དེའི་ཚེ་བཅོམ་ལྡན་འདས་ཅང་མི་གསུང་བར་ཐམས་ཅད་ལྡན་པའི་དགེ་སློང་གི་དགེ་འདུན་ཅང་མི་སྨྲ་བ་ལ་གཟིགས་སོ། །ཐམས་ཅད་ལྡན་པའི་དགེ་སློང་གི་དགེ་འདུན་ལ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་གང་གིས། རྒྱལ་པོས་ཟས་གཙང་མ་མངོན་པར་དད་པར་འགྱུར་བ་དེ་ལྟ་བུ་འགའ་ཞིག་ཚོལ་ཅིག །དེ་ནས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཟས་གཙང་མ་མངོན་པར་དད་པར་གྱུར་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱི་ཚེ་དང་ལྡན་པ་ཀུན་ཤེས་ཀོ་ཌི་ནྱ་ལ་འདི་སྐད་ཅེས་བཀའ་སྩལ་ཏོ། ། ཀཽ་ཌི་ནྱ་ཁྱོད་ནི་བླ་མ་ལ་བླ་མར་བྱ་བའི་ཆོས་དང་ལྡན་པར་བྱ་བ་ཡིན་གྱིས་འདུག་ཤིག །དེ་བཞིན་དུ་ཚེ་དང་ལྡན་པ་རླངས་པ་དང་། མིང་ཆེན་དང་། གྲགས་བྱིན་དང་། ལྟེང་རྒྱས་འོད་སྲུང་དང་། ཆུ་ཀླུང་འོད་སྲུང་དང་། ག་ཡཱ་འོད་སྲུང་དང་། འོད་སྲུང་ཆེན་པོ་དང་། ཚེ་དང་ལྡན་པ་ཤཱ་རིའི་བུ་དང་། མཽང་གལ་གྱི་བུ་ཆེན་པོས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོས་ཟས་གཙང་མ་མངོན་པར་དད་པར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽང་གལ་གྱི་བུ་ཆེན་པོ་འདི་སྙམ་དུ་སེམས་ཏེ། རྒྱལ་པོ་ཟས་གཙང་མ་མངོན་པར་དད་པར་བྱེད་པའི་དགེ་སློང་གང་ཞིག་བཅོམ་ལྡན་འདས་བཞེད་སྙམ་སྟེ། དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། དེ་ལྟར་མཉམ་པར་བཞག་པའི་སེམས་ཀྱིས་བཅོམ་ལྡན་འདས་བཞེད་སྙམ་སྟེ། དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། དེ་ལྟར་མཉམ་པར་བཞག་པའི་སེམས་ཀྱིས་བཅོམ་ལྡན་འདས་ཀྱིས་དགོངས་པ་ཚེ་དང་ལྡན་པ་འཆར་ཀ་ལ་གནས་ཤིང་དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དོ་ཞེས་དགོངས་པ་མཐོང་སྟེ་འདི་ལྟ་སྟེ། དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་སྒོ་བྱང་ཕྱོགས་སུ་ལྟ་བའི་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་བྱུང་སྟེ། ནུབ་ཕྱོགས་ཀྱི་བརྩིག་ངོས་ལ་ཤར་བ་དེ་བཞིན་དུ་དེའི་ཚེ་ཚེ་དང་ལྡན་པ་མཽང་གལ་གྱི་བུ་ཆེན་པོས་བཅོམ་ལྡན་འདས་ཀྱི་དགོངས་པ་ཚེ་དང་ལྡན་པ་འཆར་ཀ་ལ་ཤར་ཅིང་དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དེ་ཞེས་དགོངས་པ་མཐོང་ངོ་། །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོ་ཏིང་ངེ་འཛིན་དེ་ལས་ལངས་ཏེ། ཚེ་དང་ལྡན་པ་འཆར་ཀ་ག་
ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ནི་ཁྱོད་ལ་དགེ་སློང་འཆར་ཀས་རྒྱས་པོ་ཟས་གཙང་མ་མངོན་པར་དད་པར་བྱ་བར་ནུས་སོ་ཞེས་དགོངས་ཤིང་བཞེད་དོ། །ཚེ་དང་ལྡན་པ་འཆར་ཀ་དེ་ལྟར་ཡིན་གྱིས། །ཁྱོད་ཀྱིས་རྒྱལ་པོ་ཟས་གཙང་མ་མངོན་པར་དང་པར་བྱ་བར་དང་པ་སྐྱེད་ཅིག །དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་མཽང་གལ་གྱི་བུ་ཆེན་པོ་རིགས་རྣམས་ནི་དད་པར་བྱ་བར་ཤིན་དུ་དཀའ་སྟེ། རྒྱལ་པོའི་རིགས་ནི་ལྷག་པར་དཀའོ། །དེ་ཅིའི་ཕྱིར་ཞེ་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི་མགུ་བར་དཀའ་བ་སྟེ། ཚེ་དང་ལྡན་པ་མཽང་གལ་གྱི་བུ་ཆེན་པོ་འདི་ལྟ་སྟེ། དཔེར་ན་ཤིང་ཁུར་བཅུའམ། ཉི་ཤུའམ། སུམ་བཅུ་འམ། བཞི་བཅུ་འམ། ལྔ་བཅུ་འམ། ཤིང་ཁུར་བརྒྱ་ཡང་རུང་སྟེ། གཤེར་བ་མེད་ཅིང་སྐམ་ལ་མང་དུ་ལོན་པ་ཞིག་ཡོད་ལ་དེ་ལ་མི་ལ་ལ་ཞིག་གིས་མེ་བཏང་ན་མེའི་ཕུང་པོ་འབར་བར་འགྱུར་རོ། །དེ་ལ་ཡང་ལ་ལ་ཞིག་གིས་མར་རམ། འབྲུ་མར་ཞིག་གིས་གཏོར་ན་མེའི་ཕུང་པོ་དེ་བས་ཆེས་ཆེ་བར་ འབར་ཏེ། དེའི་སྟེང་ངམ་དྲུང་གི་འཁོར་དུ་འགྲོ་བ 
་ནི་ཤིན་དུ་དཀའོ། །ཚེ་དང་ལྡན་པ་མཽང་གལ་གྱི་བུ་ཆེན་པོ་དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི་མགུ་བར་དཀའ་བའོ། །ཚེ་དང་ལྡན་པ་མཽང་གལ་གྱི་བུ་ཆེན་པོ་འདི་ལྟ་སྟེ། དཔེར་ན་གླང་པོ་ཆེ་མཆེ་བ་ཅན་ཁ་གདངས་པའི་སོ་ཕྲག་ཏུ་འགྲོ་བ་ནི་ཤིན་དུ་དཀའོ། །ཚེ་དང་ལྡན་པ་མཽང་གལ་གྱི་བུ་ཆེན་པོ་དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ཀྱང་མགུ་བར་དཀའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་མཽང་གལ་གྱི་བུ་ཆེན་པོས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་དེ་ནི་དེ་ལྟ་མོད་ཀྱི། འོན་ཀྱང་ཁྱོད་ནི་དགེ་སློང་འཆར་ཀ་འདིས་རྒྱལ་པོ་ཟས་གཙང་མ། མངོན་པར་དང་བར་བྱ་བར་ནུས་སོ་ཞེས་བཅོམ་ལྡན་འདས་ཀྱིས་དགོངས་ཤིང་བཞེད་པ་ཡིན་ནོ། །སྨྲས་པ། ཚེ་དང་ལྡན་པ་
མཽང་གལ་གྱི་བུ་ཆེན་པོ་བཅོམ་ལྡན་འདས་ཀྱིས་བདག་ལ་རྒྱལ་པོ་ཟས་གཙང་མ་དང་པར་བྱེད་པར་དགོངས་སམ། སྨྲས་པ། ཚེ་དང་ལྡན་པ་འཆར་ཀ་དེ་དེ་བཞིན་ཏེ། བཅོམ་ལྡན་འདས་ཀྱིས་དགེ་སློང་འཆར་ཀ་ནི་རྒྱལ་པོ་ཟས་གཙང་མ། དང་པར་བྱེད་དོ་ཞེས་དགོངས་སོ། །དེ་ནས་བཅོམ་ལྡན་འདས་ཉིད་ཀྱིས་ཚེ་དང་ལྡན་པ་འཆར་ཀ་ལ་བཀའ་སྩལ་པ། འཆར་ཀ་རྒྱལ་པོ་ཟས་གཙང་མ་དད་པར་གྱིས་ཤིག །དེ་ཅིའི་ཕྱིར་ཞེ་ན། འཆར་ཀ་རྒྱལ་པོ་ཟས་གཙང་མ་ནི་ཡང་ན་ངས་དད་པར་བྱ་ཡི། ཡང་ན་ཁྱོད་ཀྱིས་དད་པར་བྱའོ། །འཆར་ཀ་ངའི་ཉན་ཐོས་ཇི་སྙེད་ཅིག་ཡོད་པ་དེ་དག་གི་ནང་ན་ཁྱོད་ནི་འདི་ལྟར་རིགས་དང་པར་བྱེད་པའི་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་འཆར་ཀ་ལ་ཚིགས་སུ་བཅད་དེ་བཀའ་སྩལ་པ། འཆར་ཀ་བཟང་པོ་ང་ལས་མཉན་པར་བྱོས། ། ཁྱོད་ནི་རིགས་དང་བྱེད་མཆོག་རབ་ཡིན་གྱིས། །ཤཱ་ཀྱའི་རིགས་རྣམས་དགའ་བ་སྐྱེད་པ་ཡི། །རྒྱལ་པོའི་དམ་པ་རབ་ཏུ་དང་པར་བྱོས། །རྒྱལ་པོའི་རབ་དེ་དད་པར་བྱས་ན་ནི། །རིགས་བུ་ལྷ་དག་དང་ནི་མི་རྣམས་ལ། །མཐའ་དབུས་མེད་པའི་ལེགས་པ་འབྱུང་འགྱུར་གྱིས། །མི་ཡི་དམ་པ་མྱུར་དུ་དད་པར་བྱོས། །ད་ལྟ་ན་ནི་ཤཱ་ཀྱའི་བདག་པོ་དེ། །མངོན་པའི་ང་རྒྱལ་རྟོག་པས་དཀྲུགས་ཤིང་ཉམས། །རི་ཡི་ངོས་ནས་རྦ་བ་འདྲིལ་ཇི་བཞིན་དུ། །བརྩོན་འགྲུས་རྩོམ་པ་ཐམས་ཅད་བཏང་སྟེ་གནས། །དབང་ཕྱུག་ཉམས་པ་རྗེས་སུ་དྲན་བྱེད་པས། །ཡིད་ལ་གནོད་གྱུར་སེམས་དད་ཡིད་ཀྱང་སྟོར། །དཔེར་ན་ཚོང་བ་ནོར་དང་བྲལ་བ་དག། །རྗེས་སུ་དྲན་ཞིང་ཉོན་མོངས་གནས་པ་བཞིན། །ལྷ་ཡི་གནས་ནས་ལྷ་དག་ཤི་འཕོ་ས། །ལྷ་རྫས་འདོད་པ་རྗེས་སུ་དྲན་པ་བཞིན། །རྒྱལ་བའི་བསྟན་པ་མངོན་པར་མི་ཤེས་ཤིང་། །རྒྱལ་པོ་བདེ་ཉམས་སྙིང་རྗེ་སྨྲེ་སྔགས་འདོན། །ང་ཡི་རིན་པོ་ཆེ་སྣ་བདུན་དང་། །མི་ཡི་ཕུན་སུམ་ཚོགས་པ་བཞི་པོ་དང་། །ལོངས་སྤྱོད་དག་ནི་རྗེས་སུ་དྲན་བྱེད་ཅིང་། །ས་བདག་དེ་ནི་སྙིང་རྗེར་སྨྲེ་སྔགས་འདོན། །མདངས་འཕྲོག་བྱེད་པའི་སྲིན་པོ་སྟོབས་ཅན་གྱིས། །ཇི་ལྟར་མི་ཞིག་ཡོངས་སུ་
ནོན་གྱུར་ན། །བདག་ཀྱང་མི་ཤེས་གཞན་ཡང་མི་ཤེས་ལྟར། །ས་ཡི་བདག་པོ་དེ་ཡང་དེ་བཞིན་ནོ། །ཏི་སེའི་གངས་གྱི་རི་བོས་བསྒྲིབས་གྱུར་ན། ཇི་ལྟར་མི་དག་བལྟ་བྱ་མི་མཐོང་བ། །དེ་བཞིན་ང་རྒྱལ་ཆེན་པོས་བསྒྲིབས་པས་ན། །རྒྱལ་པོས་བལྟ་བར་བྱ་བ་མི་མཐོང་ངོ་། །གཉིད་ཀྱིས་ལོག་གམ་ཤི་བས་མྱོས་འགྱུར་བའི། །མིས་ནི་རང་གི་སེམས་ཀྱང་མི་ཤེས་ཏེ། དེ་བཞིན་ང་རྒྱལ་ཆེན་པོས་མྱོས་གྱུར་པས། །རྒྱལ་པོ་དེས་ཀྱང་དགེ་བ་མི་ཤེས་སོ། །དཔེར་ན་ཁྱིམ་ཐབ་ཤི་བས་མྱོས་པ་ཡི། །བུད་མེད་སྙིང་རྗེར་སྨྲེ་སྔགས་འདོན་བྱེད་པ། །དེ་བཞིན་ང་རྒྱལ་ཆེན་པོས་མྱོས་གྱུར་པས། །རྒྱལ་པོ་དེ་ཡང་སྙིང་རྗེར་སྨྲེ་སྔགས་འདོན། །དེ་ལྟ་བས་ན་འཆར་ཀ་ཐབས་མཁས་པ། །ཁྱོད་ཀྱིས་འདིར་ནི་རྒྱལ་པོ་དད་པར་གྱིས། །ང་རྒྱལ་རྒྱལ་མཚན་རབ་ཏུ་བསྙལ་བར་བྱོས། །ཆོས་ཀྱི་རྒྱལ་མཚན་དམ་པ་བསླད་པར་གྱིས། །འཆར་ཀ་ཁྱོད་མ་གཏོགས་པར་སྲིད་པ་ཡི། །འགྲོ་བ་དག་ན་སྐལ་འཐུན་སྤྱད་མེད་པས། །རྒྱལ་པོའི་སེམས་ནི་རབ་ཏུ་དད་བྱ་བར། །གང་གིས་ནུས་པའི་དགེ་སློང་གང་ཡང་མེད། །འཆར་ཀ་སྔོན་གྱི་དུས་ན་བྱུང་བ་ནི། །འདས་པའི་དུས་ན་ས་ཡི་བདག་པོ་ཞིག །མིང་ནི་བདེན་པ་འཕེལ་ཞེས་བྱ་བ་སྟེ། །ས་སྐྱོང་བྱེད་པ་རྣམ་པར་གྲགས་པ་བྱུང་། །དེ་ནི་ཆོས་ཀྱི་རྒྱལ་པོ་ཆོས་དང་ལྡན། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རྒྱ་མཚོའི་མཐའ་མར་ཐུག་པའི་ས་འདི་ནི། །ཆོས་དང་ལྡན་པའི་རྒྱལ་པོ་དེས་ཀྱང་བསྐྱངས། །གྲོང་དང་གྲོང་ཁྱེར་དག་ཀྱང་འདབ་ཉི་ཞིང་། །བཟའ་ཤིང་འབྲས་བུ་མེ་ཏོག་རྒྱས་པས་གང་། །འཕགས་པའི་སྐྱེ་བོ་དག་དང་ཤིང་ལས་སྐྱེས། །སྡིག་དང་བྲལ་བ་རྣམས་ཀྱིས་རབ་ཏུ་གང་། །དྲི་ཟ་བརྒྱ་མང་དག་གིས་གང་བ་སྟེ། །སྡོང་དུ་མཚེར་མ་རྩྭ་ཤིང་ངན་པ་མེད། །འཇམ་ཞིང་དགེ་སྦྱོང་གནས་ཀྱི་ཚོགས་ཀྱིས་སྤྲས། །ཆུ་ཀླུང་འབབ་སྟེགས་བདེ་བས་རབ་ཏུ་བརྒྱན། །དྲང་སྲོང་ཚོགས་བརྒྱ་རྗེས་སུ་རྒྱུ་བ་སྟེ། །སྐྱེ་བོའི་དཀར་ཆོས་རྣམས་ཀྱིས་ཀུན་དུ་བསྒྲུབས། ། ངན་སོང་ལམ་ངན་རྣམས་ནི་རབ་ཏུ་བཅད། །དེ་ནས་སེམས་ཅན་ཐམས་ཅད་ལྷ་གནས་འདོང་། །རྒྱལ་པོ་དེ་ལ་བུ་དག་ཡོད་པ་ནི། །སྔོན་གྱི་སངས་རྒྱས་བྱུང་བ་མཐོང་
བ་སྟེ། །དགེ་བའི་རྩ་བ་དག་ནི་བསྐྱེད་པ་ཅན། །ཡོན་ཏན་མང་པོ་བསྒོས་པའི་བློ་གྲོས་ལྡན། །མིང་ནི་བློ་གྲོས་སྙིང་པོ་ཞེས་བྱ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །འདོད་པ་རྣམས་ལ་སྐྱོན་དུ་ལྟ་བ་ཅན། །མི་བདག་ཁྱིམ་ན་གནས་ཀྱང་དབེན་ལ་དགའ། །རྒྱལ་པོ་བདེན་པ་འཕེལ་ཞེས་བྱ་བ་དེས། །ལྷ་ཡི་ཕོ་བྲང་འདྲ་བའི་ཁྱིམ་མཆོག་འདིར། །ན་ཆུང་ཚོགས་ཀྱིས་ཀུན་ནས་མདུན་བདར་ཏེ། འདོད་པའི་ཡོན་ཏན་བཟང་ལ་སྤྱོད་ཅེས་སྨྲས། །བུ་ཡི་དམ་པ་ཁྱོད་ལ་ང་ཡིས་ནི། །ཇི་ལྟར་འདོད་པའི་བྱེ་བ་གང་མ་བྱས། །འདོད་པ་རྣམས་ལ་ཁྱོད་ཡིད་ཅི་ཡི་ཕྱིར། མ་མོས་ང་ལ་བུ་ཁྱོད་མྱུར་དུ་སྨྲོས། སྲིད་པའི་འགྲོ་བའི་ཡོན་ཏན་མཁས་གྱིས་ཏེ། བུ་ཁྱོད་རིན་ཆེན་ཁྱིམ་ལ་དགའ་བ་སྐྱེད། །བུད་མེད་རིན་ཆེན་འཁོར་དང་འགྲོགས་གྱིས་ཏེ། ཡུལ་ལ་དགའ་ཞིང་མོས་པ་བསྐྱེད་པར་གྱིས། དཀའ་ཐུབ་ནགས་ན་འཁོད་པའི་དྲང་སྲོང་དག །དེ་བཏང་ནས་ནི་ཕྱིར་ཡང་འདི་དག་ན། དཀའ་ཐུབ་བཏང་ཞིང་འདོད་པའི་དགའ་ལ་སྤྱོད། འདོད་པ་དེ་དག་བུ་གཅིག་ཁྱོད་ལ་བསྟབས། དེ་ལྟ་བས་ན་འདོད་པའི་དགའ་ལ་སྤྱོད། ད་དང་རྒྱལ་སྲིད་ཐམས་ཅད་ཁྱོད་དང་མཐུན། རྣམ་ཐོས་བུ་ཡི་གནས་དང་འདྲ་བ་ཡི། གཞལ་མེད་ཁང་གི་རྒྱན་ཅན་ཁྱིམ་འདིར་སྤྱོད། འདི་དག་རྣམས་ཀྱང་མཆོག་གི་གཟུགས་ལྡན་ཞིང་། ལྷ་མོ་འདྲ་ལ་སྒྱུ་རྩལ་ཚར་ཕྱིན་པ། རོལ་མོའི་སྒྲ་ཡི་ཚུལ་དང་གླུ་ལ་མཁས། བསྙེན་བཀུར་སྙོམས་ཤིང་ཡོན་ཏན་ཡིད་ཀྱང་འཕྲོག །མིག་ནི་པད་མའི་ལོ་མ་འདྲ་བ་སྟེ། བིམ་པའི་མདོག་འདྲ་མཆུ་མཛེས་ཡིད་དུ་འོང་། སོ་དང་བཞིན་མདོག་དྲི་མ་མེད་ཅིང་བཟང་། དཔྲལ་བ་སྨིན་མ་ལེགས་ཤིང་མགུལ་པ་སྡུག །བརླ་ནི་གླང་པོ་ཆེ་ཡི་སྣ་ཡང་འདྲ། ཕྲག་སོ་ཤས་རྒྱས་ཐལ་གོང་ལེགས་དང་ལྡན། ལག་དང་རྐང་བའི་མཐིལ་ན་ཟངས་ཀྱི་མདོག །སོར་མོ་བྱིན་པ་ཕྲ་བར་ལེགས་དང་ལྡན། ལྕེ་ནི་ཟངས་མདོག་འདྲ་བ་སྲབ་ཅིང་དག །ཚིག་རན་འཇམ་པར་སྨྲ་བའི་ཚུལ་དང་ལྡན། སོ་ནི་ཐགས་བཟང་སོ་རྣམས་རང་རོང་མེད། མཆེ་བ་རབ་དཀར་མཆོག་གི་རྒྱན་དང་ལྡན། ལྟོ་བ་ཕྱང་ངེར་
འདུག་ཅིང་ལྟེ་བ་སྡུག །སྟ་ཟུར་ཡངས་ཤིང་རྐེད་པ་རྡོ་རྗེ་འདྲ། བྱིན་པ་གླང་པོ་ཆེ་ཡི་སོ་འདྲ་ཞིང་། མངའ་རྒྱུ་སྙིང་པོ་ལེགས་པར་སྐྱེས་པ་བཞིན། དྲེགས་བཅས་གླང་ཆེན་འདྲ་བའི་འགྲོས་དང་ལྡན། གཞན་དུ་མི་སེམས་ཡིད་ཀྱིས་ཁྱོད་ལ་ལྟ། རྩེ་བ་འདོད་ཅིང་དར་ལ་བབ་དང་ལྡན། གཞོན་ནུ་སྙིང་རྗེ་ལྟོས་ལ་བརྩེ་བར་བྱོས། བུ་ཅིག་ཁྱོད་དང་བུ་མེད་འདི་དག་གི །མདོག་བཟང་བ་དང་དར་ལ་བབ་པ་ཡང་། ཤིང་གི་རྩེ་མོའི་མེ་ཏོག་བཞིན་ལྟུང་གིས། ང་རྒྱལ་ཐོང་ལ་འདོད་པ་བསྟེན་པར་གྱིས། བློ་གྲོས་སྙིང་པོ་ལྡན་དེས་སྨྲེ་བ་ཡི། ཕ་དང་འཁོར་རྣམས་ཀུན་ལ་འདི་སྐད་སྨྲས། ཡབ་ཅིག་ཁྱོད་ནི་མང་པར་གསུང་བ་ལགས། །གང་དག་ཚིག་གིས་གྲགས་པ་མ་སྨད་མང་། ཡོན་ཏན་རྣམས་ལ་མོས་པ་བདག་གི་ཚིག །བསམས་ཏེ་གཏན་ལ་བབ་ལ་རྒྱལ་པོ་གསོན། ཇི་ལྟར་རྨི་ལམ་ན་ཡང་འདོད་ལ་བདག །སེམས་མི་དགའ་ཞིང་མ་མོས་དེ་འདྲ་གསོན། །ས་ཡི་བདག་པོས་བཀའ་སྩལ་འདི་དག་ནི། །མཁས་པ་རྣམས་ལ་མཛེས་པ་མ་ལགས་ཏེ། །མི་མཁས་སྐྱེ་བོ་དག་གིས་ཡང་དག་བསམས། །མཁས་པ་རྣམས་ཀྱིས་དེ་དག་རྟག་ཏུ་མང་། །ལོང་བ་མ་ལགས་ཅི་ཡི་རྒྱུ་ཞིག་གིས། །ལོང་བའི་ཚིག་གིས་ལམ་གོལ་འཛིན་པར་བགྱིད། །ཐང་ལ་གནས་པ་སུ་ཞིག་ཇི་ལྟར་ན། །མགོན་མེད་ཆུས་ཁྱེར་བ་ལ་འདོད་པ་སྐྱེད། །གྲོལ་བ་ཇི་ལྟ་བུར་ན་བཅིངས་པ་ཡི། །ཚིག་གིས་བཙོན་ད་དེར་ནི་འཇུག་པར་བགྱིད། །ས་མཉམ་གནས་ཤིང་མ་འཁྲུལ་ཇི་ལྟར་ན། །ཉམ་ངར་གནས་ལ་འདོད་པ་སྐྱེད་པར་བགྱིད། །ས་བདག་འདོད་པ་རྣམས་ལ་ཆགས་བཅས་ཤིང་། །འདོད་པའི་ལོངས་སྤྱོད་དག་གི་ཆུས་ཁྱེར་བ། །ལོང་བ་ཆུས་ཁྱེར་བཙོན་རར་གནས་པ་དང་། ཉམ་ངར་གནས་འདྲར་བདག་ནི་དེ་སྙམ་བགྱིད། མི་ཡི་བདག་པོ་ཁྱོད་ནི་ལོང་བ་བཞིན། །བདག་ནི་མིག་ཅན་ཁྱད་པར་མཐོང་བ་ལགས། །ཁྱོད་ནི་འདོད་པའི་ཆུ་བོས་ཁྱེར་བ་ལགས། །བདག་ནི་འདོད་པ་རྣམས་ལས་རྣམ་པར་སྨོད། །འདོད་པ་དག་ནི་དུག་གི་ལོ་མ་བཞིན། །སྦྲུལ་གྱི་མགོ་འདྲ་སྡུག་བསྔལ་བགྱིད་པ་
སྟེ། །རྩེ་གསུམ་པ་དང་རལ་གྲི་མདུང་ཐུང་འདྲ། །མེ་ཡི་ཕུང་པོ་ཤིན་དུ་
འབར་བ ་བཞིན། །བློ་གྲོས་སྙིང་པོ་ལྡན་པས་དེ་སྐད་དུ། །སྨྲེ་སྔགས་འདོན་པའི་ཕ་དང་འཁོར་ལ་སྨྲས། །རིན་ཆེན་སྣ་བདུན་དག་ལ་མ་བལྟས་པར། །རྒྱལ་སྲིད་རྣམ་པར་སྤངས་ཏེ་རབ་ཏུ་བྱུང་། །སྦྲུལ་གྱི་ལྤགས་རྙིང་རྗེས་པ་ཅི་འདྲ་དང་། །ངར་སྣབས་བརྔུབས་པའི་ཐལ་བ་བཞིན་སྤངས་ཏེ། །བློ་གྲོས་སྙིང་པོ་ལྡན་པ་ཆགས་མེད་པར། །སྡིག་དང་རྣམ་པར་བྲལ་ཏེ་རབ་ཏུ་བྱུང་། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །བློན་པོའི་བུ་ཞིག་རྗེས་སུ་རབ་བྱུང་བ། །མིང་ནི་ཟླ་བས་བྱིན་ཞེས་བྱ་བ་སྟེ། །བློ་གྲོས་སྙིང་པོའི་རྗེས་སུ་རབ་ཏུ་བྱུང་། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །ཚངས་པའི་གནས་པ་བཞི་པོ་བསྐྱེད་ནས་ནི། །གྲོགས་དང་བཅས་པས་མངོན་པར་ཤེས་པ་ལྔ། །མ་ལུས་མཐའ་དག་བསྐྱེད་པར་བྱས་པར་གྱུར། །འདོད་པ་རྣམས་ལ་སྐྱོན་དུ་ལྟ་བས་ན། །མི་ཡི་སེང་གེ་དེ་ནི་འདོད་ཁམས་ནས། །ཚངས་པ་ཡང་དག་ཉིད་ནི་ཐོབ་བྱའི་ཕྱིར། །ཚངས་པའི་འཁོར་ལོ་རབ་ཏུ་བསྐོར་བ་བྱས། །དེ་ལྟར་གཞོན་ནུ་རབ་ཏུ་བྱུང་བས་ན། །ཕ་དེ་བུ་ལ་མ་དད་གྱུར་པ་དང་། །ཟླ་བས་བྱིན་པ་དེ་ཡི་གན་སོང་ནས། །ལེགས་པར་བཤད་པའི་ཚིག་གིས་དགའ་བར་བྱས། །འཆར་ཀ་ཁྱོད་ནི་དེ་ལ་ཇི་སྙམ་སེམས། །དེ་ཚེ་བློ་གྲོས་སྙིང་པོ་གཞན་སྙམ་འམ། །ང་ཉིད་དེ་ཡི་ཚེ་ན་དེར་གྱུར་ཏེ། །འདོད་པའི་ལོངས་སྤྱོད་དོན་དུ་གཉེར་བ་མེད། །འཆར་ཀ་ཁྱོད་ནི་དེ་ལ་ཇི་སྙམ་སེམས། །བདེན་པ་འཕེལ་བ་གཞན་ཞིག་ཡིན་སྙམ་འམ། །མི་བདག་ཟས་གཙང་འདི་ཉིད་དེ་ཡི་ཚེ། །རྒྱལ་པོ་བདེན་པ་འཕེལ་ཞེས་བྱ་བར་གྱུར། །འཆར་ཀ་ཁྱོད་ནི་དེ་ལ་ཇི་སྙམ་སེམས། །རྗེས་སུ་རབ་བྱུང་ཟླས་བྱིན་གཞན་སྙམ་འམ། །ཁྱོད་ཉིད་དེ་ཚེ་དེ་ཡི་དུས་ན་ནི། །བདེན་པ་འཕེལ་བ་དང་བར་བྱེད་པ་ཡིན། །དེ་ལྟ་བས་ན་འཆར་ཀ་ཁྱོད་ཀྱིས་འདིར། །རྒྱལ་པོ་ཟས་གཙང་དད་པ་མངོན་སྐྱེད་ཅིག །ས་སྐྱོང་བྱེད་པ་འདི་ནི་དད་གྱུར་ན། །སྐྱིད་པ་ཆེན་པོ་ཕུན་སུམ་ཚོགས་པར་འགྱུར། །དེ་ནས་ཚེ་དང་ལྡན་པ་འཆར་ཀས་བཅོམ་ལྡན་འདས་ལ་མི་སྨྲ་བར་ཁས་བླངས་སོ། །དེ་ནས་ཚེ་དང་ལྡན་པ་འཆར་ཀ་
ཞག་དེ་འདས་ནས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་བགོས། །ལྷུང་བཟེད་ཐོགས་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ངོ་། །དེའི་ཚེ་རྒྱལ་པོ་ཟས་གཙང་མ་བཅུན་མོའི་འཁོར་གྱི་མདུན་ན་ཤཱཀྱ་སྟོང་ཙམ་ཞིག་དང་། །དགོས་པ་ཞིག་གི་ཆེད་དུ་འདུས་ཤིང་འཁོད་དོ། །རྒྱལ་པོ་ཟས་གཙང་མས་ཀྱང་བཅོམ་ལྡན་འདས་སེར་སྐྱའི་གནས་སུ་བྱོན་ཅིང་། །སེར་སྐྱའི་གནས་འདི་ཉིད་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ་ཞེས་ཐོས་ནས་དེ་འདི་སྙམ་དུ་སེམས་ཏེ། གཞོན་ནུ་དེ་རབ་ཏུ་བྱུང་བས་བདག་ནི་དབང་ཕྱུག་གི་ལོངས་སྤྱོད་ཆེན་པོ་ལས་ཉམས་པར་བྱས་སོ། །གལ་ཏ་གཞོན་ནུ་དེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོས་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་སྟེ་འདི་བདུན་ནོ། །དེ་ལ་བུ་དཔའ་བ། རཏལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམ་པ་སྟོང་ཡང་ཚང་བར་འགྱུར་བ་ཞིག །དེས་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ཡང་ཆད་པ་མེད་ཅིང་མཚོན་གྱིས་བདའ་བ་མེད་ལ་མཉམ་སྟེ། མི་མཉམ་པ་མེད་ཅིང་ཆོས་དང་མཐུན་པས་ལེགས་པར་ཕབ་ནས་བསྐལ་པ་རྫོགས་པར་བསྐྱངས་པར་འགྱུར་བ་ཞིག་སྟེ། དེ་ལྟར་གྱུར་ན་བདག་ཅག་ཀྱང་འཁོར་ལོས་སྒྱུར་བའི་རྒྱལ་སྲིད་ལ་དབང་ཕྱུག་གི་དབང་དང་ལྡན་ཞིང་རིམ་གྲོ་བྱས་པ་དང་། བཀུར་སྟི་བྱས་པ་དང་། བསྟི་སྟངས་དུ་བྱས་པ་དང་། མཆོད་པར་བྱས་པ་དང་། དབང་ཕྱུག་གི་དབང་ཆེན་པོ་ཡང་རྙེད་པར་འགྱུར་བ་ཞིག་ན་ད་ལྟར་བདག་ཅག་ནི་གཞོན་ནུ་དེ་རབ་ཏུ་བྱུང་བས་དེ་ལྟ་བུའི་ལོངས་སྤྱོད་ཀྱི་དབང་ཆེན་པོ་དང་བྲལ་བར་གྱུར་ཏོ་སྙམ་མོ། །དེས་དེ་སྙམ་དུ་བསམས་ནས་ཤཱཀྱ་རྣམས་ལ་བསྒོ་བ། ངའི་བུ་དེ་ལ་བལྟ་བའམ། བསྙེན་བཀུར་བྱེད་པར་སུ་ཡང་མ་འགྲོ་ཤིག །ལ་ལ་ཞིག་ངའི་བུ་དེ་ལ་བལྟ་བའམ་བསྙེན་བཀུར་བྱ་བའི་ཕྱིར་འགྲོ་ན་དེའི་ལུས་ལ་གནོད་པའི་ཆད་པས་བཅད་
དོ། །དེའི་ཚེ་ཤཱཀྱའི་བུ་དགའ་བའི་བཞིན་ཞེས་བྱ་བ་ཞིག་འཁོར་དེ་ནས་བྱུང་ནས་སོང་བར་གྱུར་ཏེ། ཤཱཀྱའི་བུ་དགའ་བའི་བཞིན་གྱིས་ཚེ་དང་ལྡན་པ་འཆར་ཀ་རྒྱང་རིང་པོ་ནས་འོང་བ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ནས་ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བ་བྱོན་ཏམ། ཤིན་དུ་མ་མཉེལ་ཏམ། བསོད་སྙོམས་ཀྱིས་འོ་མ་རྒྱལ་ཏམ། དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་ཤཱཀྱའི་བུ་དགའ་བའི་བཞིན་ལ་འདི་སྐད་ཅེས་སྨྲས་སོ། །དགའ་བའི་བཞིན་དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །ཤཱཀྱའི་བུ་ཤིན་དུ་ལེགས་པར་སད་ཀྱིས་ཀྱང་ཤཱཀྱའི་བུ་དགའ་བའི་བཞིན་ཚེ་དང་ལྡན་པ་འཆར་ཀ་དང་ལྷན་ཅིག་དབེན་པ་ན་འཁོད་པ་མཐོང་ནས་འཁོར་དེ་ནས་བྱུང་སྟེ། ཚེ་དང་ལྡན་པ་འཆར་ཀ་ག་ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ཏེ། ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་དུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་ཤཱཀྱའི་བུ་ཤིན་དུ་ལེགས་པར་སད་ལས་འདི་སྐད་ཅེས་སྨྲས་སོ། །ཤིན་དུ་ལེགས་པར་
སད་དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །ཤཱཀྱའི་བུ་མྱ་ངན་མེད་དང་། མྱ་ངན་བྲལ་གྱིས་ཚེ་དང་ལྡན་པ་འཆར་ཀ་དང་། ཤཱཀྱའི་བུ་དགའ་བའི་བཞིན་དང་། ཤཱཀྱའི་བུ་ཤིན་དུ་ལེགས་པར་སད་གནས་དབེན་པ་ན་འཁོད་པ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ནས་ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་འཆར་ཀ་ཡུན་ཀྱང་རིང་ཞིག་ན་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་དུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་ཤཱཀྱའི་བུ་མྱ་ངན་མེད་པ་དང་། མྱ་ངན་བྲལ་ལ་འདི་སྐད་ཅེས་སྨྲས་སོ། །མྱ་ངན་མེད་པ་དང་། མྱ་ངན་བྲལ་བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དག་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་བྱེད་དོ། །དེ་སྐད་ཅེས་སྨྲས་པ་དང་། ཤཱཀྱའི་བུ་དེ་དག་གིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །བཙུན་པ་འཆར་ཀ་བདག་ཅག་ནི་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བར་འདོད་ན་བདག་ཅག་གིས་དེ་ལྟར་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཟས་གཙང་མས་ངའི་བུ་ལ་བལྟ་བའམ་བསྙེན་བཀུར་བྱ་བའི་ཕྱིར་སུ་ཡང་མ་
འགྲོ་ཤིག །ལ་ལ་ཞིག་དེ་ལ་བལྟ་བའམ། བསྙེན་བཀུར་བྱ་བའི་ཕྱིར་སོང་ན་ལུས་ལ་གནོད་པ་ཆད་པས་བཅད་དོ་ཞེས་བཀའ་སྩལ་ཏོ། །དེ་བས་ན་འཕགས་པ་འཆར་ཀ་དེ་ལྟར་བདག་ཅག་རྒྱལ་པོས་འཇིགས་པའི་ཕྱིར་བཅོམ་ལྡན་འདས་ལ་བལྟ་བའམ་བསྙེན་བཀུར་བྱེད་དུ་འདོང་པར་མི་ནུས་སོ། །དེ་ནས་ཚེ་དང་ལྡན་པ་འཆར་ཀ་འདི་སྙམ་དུ་སེམས་ཏེ། ཀྱེ་མ་རྒྱལ་པོ་ཟས་གཙང་མ་འདི་ནི་ཤིན་དུ་ཡང་ང་རྒྱལ་གྱིས་ནོན་པར་གྱུར་ན་ཇི་ལྟར་བདག་གིས་དེའི་དྲུང་དུ་འགྲོ་བར་བྱ་སྙམ་ནས་དེས་འདི་སྙམ་དུ་བསམས་སོ། །འོན་ཏེ་བདག་གིས་ནམ་མཁའ་ལ་རྫུ་འཕྲུལ་གྱིས་ཤིང་ཏ་ལ་བདུན་སྲིད་དུ་འཕགས་ལ་སྟེང་གི་བར་སྣང་ལ་སྐྱིལ་མོ་དཀྲུང་བཅས་ཏེ་རྒྱལ་པོ་ཟས་གཙང་མའི་གན་དུ་འགྲོ་བར་བྱའོ་སྙམ་ནས། དེ་ནས་ཚེ་དང་ལྡན་པ་འཆར་ཀས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། སེམས་མཉམ་པར་བཞག་པ་དེས་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས་བར་སྣང་ལ་སྐྱིལ་མོ་དཀྲུང་བཅས་ཏེ། རྒྱལ་པོ་ཟས་གཙང་མ་ག་ལ་བ་དེར་སོང་ངོ་། །རྒྱལ་པོ་ཟས་གཙང་མས་ཀྱང་ཚེ་དང་ལྡན་པ་འཆར་ཀ་རྒྱང་རིང་པོ་ནས་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ཏེ་རྫུ་འཕྲུལ་གྱིས་བར་སྣང་ལ་སྐྱིལ་མོ་ཀྲུང་བཅས་ཤིང་འོང་བ་མཐོང་ནས་དེ་ལ་ཐལ་མོ་སྦྱར་ཏེ་ཚིགས་སུ་བཅད་ནས་སྨྲས་པ། ཚོན་བསྒྱུར་གོས་ཅན་ཁྱོད་ནི་གང་ནས་འོངས། །ཁྱོད་ལ་ཅི་དགོས་མྱུར་དུ་སྨྲ་བར་བྱོས། །ཁྱོད་ལ་དགོས་དེ་ཡང་མྱུར་དུ་སྦྱིན། །བརཏལ་ཞུགས་གྲུབ་པ་མཐོང་བར་ཤིན་དུ་དཀའ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། །རྒྱལ་པོ་བདག་ནི་ཁྱོད་ཀྱི་སྲས་ཀྱི་བུ། །བདག་ལ་ཆོས་དགོས་རྒྱལ་པོ་གང་ན་བཞུགས། །བདག་ནི་དེ་བཞིན་གཤེགས་པའི་བཤོས་སྐྱེལ་ཏེ། །བདེ་བར་གཤེགས་པ་སྐྱོབ་པ་བཤོས་བསྐུར་རོ། །ཡུལ་འཁོར་བདག་པོ་ཆེ་བའི་དཔལ་མངའ་བ། །ཁྱོད་ལ་མི་མཆོག་སྲས་མདའ་གྲགས་པ་ཐོབ། །གཟི་བརྗིད་ཀྱིས་ནི་ཕྱོགས་རྣམས་ཀུན་ཏུ་འབར། །སྟོན་གྱི་ཉི་མའི་གུང་གི་འོད་དང་འདྲ། །ཇི་ལྟར་སྤྲིན་མེད་ནམ་མཁའི་ཉི་མ་ནི། །ཕྱོགས་རྣམས་ཀུན་དུ་འོད་
བྱེད་མངོན་པར་འབར། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །ཡེ་ཤེས་མངའ་བས་ཕྱོགས་རྣམས་ཀུན་དུ་སྣང་། །ཇི་ལྟར་སྔོན་གྱི་ཉི་མ་ཤར་བ་ན། །སྲིན་བུ་མེ་ཁྱེར་ཟིལ་གྱིས་མནན་ཅིང་སྣང་། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །མུ་སྟེགས་གཞན་རྣམས་ཀུན་བཅོམ་ལམ་མེར་བཞུགས། །ཇི་ལྟར་ཉི་མས་ཟིལ་ནོན་སྐོར་བ་རྣམས། །ཉིན་པར་འོད་སྟོང་ལམ་མེར་མི་རུང་བ། །དེ་བཞིན་རྒྱལ་པོ་གླང་པོ་ཁྱོད་སྲས་ཀྱིས། །ཟིལ་གྱིས་མནན་པས་མུ་སྟེགས་གཞན་མི་སྣང་། །ཇི་ལྟར་ཉི་མའི་ཟིལ་ནོན་ཟླ་བ་ནི། །ནམ་མཁའི་དབྱིངས་ནས་འོད་སྟོར་ཉིད་མི་སྣང་། །དེ་བཞིན་ཁྱོད་སྲས་ཟིལ་མནན་མུ་སྟེགས་རྣམས། །ཉི་མའི་ཟིལ་ནོན་ཟླ་བཞིན་གསལ་བ་མེད། །སེང་གེའི་ང་རོ་ཐོས་ནས་ཕྲ་མོ་རྣམས། །ཤུགས་ཀྱིས་རྨོངས་ནས་བསམ་པ་ཇི་བཞིན་དུ། །རི་སུལ་གསེབ་ཏུ་བྱེར་ནས་འཁྲ་ཞིང་གནས། །སྟག་གི་ང་རོ་གཞན་གྱིས་བཟོད་པར་དཀའ། །དེ་བཞིན་རྒྱལ་པོ་དྲང་སྲོང་ཆེན་པོའི་གསུང་། །བདག་མེད་ང་རོ་མུ་སྟེགས་གཞན་ཐོས་ནས། །ཤེས་རབ་དམན་པ་སྲིད་པའི་རྩེར་ཕྱིན་ཀྱང་། །གསུང་ཐོས་པས་ནི་ཐམས་ཅད་འཇིགས་པར་འགྱུར། །ལྷ་དང་བཅས་པའི་འཇིག་རྟེན་ལོང་བ་ལ། ། སྤྱན་དང་ལྡན་པ་དེས་ནི་མིག་ཀྱང་སྩལ། །སྣང་བ་མཛད་ཅིང་རྡུལ་ཀྱང་རྣམ་པར་སྦྱངས། །ཡེ་ཤེས་སྣང་བའི་དཀྱིལ་འཁོར་མངོན་པར་ཤར། །བདེ་དང་མི་བདེ་ལམ་གཉིས་རབ་ཏུ་བསྟན། །ལམ་དང་གོལ་བའི་ལམ་ཡང་རྒྱལ་བས་བསྟན། །ལམ་སྟོར་སྐྱེ་བོ་རྣམས་ནི་ལམ་དུ་བཙུད། །འདམ་དུ་བྱིང་བ་རྣམས་ཀྱང་ཐང་ལ་བཏོན། །ཇི་ལྟར་སྐོམ་པའི་ས་ལ་སྤྲིན་གྱིས་ནི། །སྒང་དང་གཤོང་བཅས་ཆར་གྱིས་ངོམས་བར་བྱེད། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །འགྲོ་བ་ལྷ་བཅས་ཆོས་ཀྱིས་ངོམས་པར་མཛད། །ཇི་ལྟར་ཆར་གྱིས་ངོམས་པའི་རི་སུལ་ནགས། །རྩྭ་དང་གེལ་བ་ནགས་ཚལ་ཤིང་རྣམས་དང་། །འཁྲི་ཤིང་སྡོང་པོ་སྨན་གྱི་རྣམ་པ་དང་། མེ་ཏོག་སྣ་ཚོགས་རྣམས་ཀྱིས་ས་མཛེས་བ། །དེ་བཞིན་སྟོབས་བཅུ་མི་འཇིགས་མངའ་བ་དང་། མ་འདྲེས་བཅུ་བརྒྱད་ཆོས་མངའི་སྡོང་པོ་ལ། །ཐམས་ཅད་མཁྱེན་པའི་ཡེ་ཤེས་མེ་ཏོག་དང་། །
འབྲས་བུ་སྤྲས་པས་རྒྱལ་པོའི་སྲས་མཛེས་སོ། །ཇི་ལྟར་རྒྱ་མཚོའི་དབུས་ན་ལྷུན་པོའི་རི། །ལྷའི་གནས་གྱུར་མི་སྒུལ་རྣམ་པར་མཛེས། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། དགེ་སྦྱོང་རྒྱ་མཚོའི་ནང་ན་རྣམ་པར་མཛེས། བདེ་སོགས་ཁྱིམ་ཐབ་བརྒྱ་བྱིན་ལྷ་དབང་པོ། ལྷ་ཡི་སྟན་ལ་འདུག་ན་མཛེས་པ་ལྟར། དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། དགེ་སྦྱོང་ཚོགས་ཀྱི་དབུས་ན་རྣམ་པར་མཛེས། བྱམས་པའི་སྟོབས་ཅན་ཟབ་མོའི་འབྲུག་བསྒྲགས་ཏེ། ཐུགས་རྗེ་ཆེན་པོའི་གློག་ཕྲེང་རིར་ལྡན་པས། དྲན་པ་ཉེ་གཞག་ཆེར་རྒྱུན་འདབ་འཁྲིགས་ཏེ། རྒྱལ་བ་ཀླུ་མཆོག་དེ་ནི་ཆོས་ཆར་འབེབས། །ཡོངས་དག་དཀྱིལ་འཁོར་ཚུལ་ཁྲིམས་རབ་ཀྱི་གཟིར། ཏིང་འཛིན་ཉོན་མོངས་ལྷ་མིན་རབ་འཇོམ་ཞིང་། ཡེ་ཤེས་ཉི་ཟེར་སྲིད་པའི་སྲེད་པ་སྐེམས། རྒྱལ་བའི་ཉི་ཆེན་འགྲོ་བར་རྣམ་པར་མཛེས། ཏིང་ངེ་འཛིན་དང་ཚུལ་ཁྲིམས་གཟིངས་དང་གྲུ་ཆེན་ཏེ། དྲན་པ་ཉེ་བར་གཞག་པའི་ནོར་བུ་རིན་ཆེན་ཚོགས། བྱང་ཆུབ་ཡན་ལག་རིན་ཆེན་འབྱུང་གནས་བསམ་གཏན་རླབས། ཐར་པ་འདོད་པས་སངས་རྒྱས་རྒྱ་མཚོ་བསྟེན་པར་བྱ། །ཚུལ་ཁྲིམས་རྣམ་དག་རྩ་བ་བརྟན་པར་ཟུག །ཏིང་འཛིན་ལོ་མ་དྲན་པ་ཡལ་ག་འདབ། །བྱང་ཆུབ་ཡན་ལག་མེ་ཏོག་སྟོང་པའི་སྡོང་། །བདག་མེད་གྲིབ་ལྡན་རྒྱལ་བའི་སྡོང་པོ་སྟེན། ཚུལ་ཁྲིམས་ནགས་མཐའ་སྟོན་པའི་སྟོབས་ཆེན་པོ། །ཏིང་འཛིན་ཞི་བའི་རི་ཁྲོད་ཕུག་ན་གནས། །སྟོང་པ་མཚན་མེད་སྨོན་མེད་སྤྱོད་ཡུལ་ཅན། རྒྱལ་བའི་སྟོབས་ཅན་སེང་གེ་ཁྱོད་ཀྱི་སྲས། ཐུབ་པ་མི་གནས་གནས་པ་རྣམ་པར་སྟོན། །རྒྱལ་བ་ཁྱུ་མཆོག་བརྗིད་པའི་སྟབས་བཞུད་པས། བྱིས་པ་སོ་སོ་མུ་སྟེགས་གཞན་བསྔགས་ཏེ། ཁྱོད་ཀྱི་ལུས་ནི་ཁྱུ་མཆོག་སྒྲ་ཡང་འབྱིན། ཚུལ་ཁྲིམས་གཏེར་དང་ཡོན་ཏན་དབྱིག་གིས་བརྒྱན། བསམ་གཏན་དང་པོའི་ཞི་གནས་ཉེ་བར་བསྐྱབས། ཡེ་ཤེས་ཀྱིས་བསྲུངས་ཐར་པའི་སྤྱོད་ཡུལ་ཅན། རྒྱལ་བ་ཚོང་དཔོན་གཙོ་བོ་ནོར་གཏོང་མཛད། དགེ་བ་ཡོངས་སུ་བཟུང་བས་སྡིག་བཅོམ་སྟེ། ཉོན་མོངས་ཞི་མཛད་
དགེ་བསྟེན་བཀའ་སྩོལ་པས། ལྷ་དང་ལྷ་མིན་བཅས་པའི་འཇིག་རྟེན་ན། རྒྱལ་པོ་ཁྱོད་ཀྱི་སྲས་མཆོག་རྣམ་པར་མཛེས། ཚུལ་ཁྲིམས་མཆོག་སྤྲིན་བློ་གྲོས་གློག་འབྱིན་ཅིང་། ཡན་ལག་བརྒྱད་ལམ་ཆར་ཆེན་རླན་གྱིས་སླེབས། ཐུབ་པ་གཅེས་པའི་ལོ་ཏོག་འབྲས་བུ་སྩོལ། ཁྱོད་ཀྱི་སྲས་ནི་ཀླུ་ཆེན་འབྲུག་སྒྲ་སྒྲོགས། རྒྱལ་པོས་སྨྲས་པ། གང་ཟག་མཆོག་དེ་བདེ་བར་འོངས་སམ་ཅི། བསོད་སྙོམས་རྒྱུ་བས་འདྲེན་པ་མ་ངལ་ལམ། དེ་ཡི་ལུས་ལ་ངལ་བས་དུབ་མེད་དམ། ཐང་གནས་ཨུད་པ་ལ་བཞིན་མ་རྙིས་སམ། འཆར་ཀས་སྨྲས་པ། རྫུ་འཕྲུལ་སྟོབས་མངའ་བསམ་གཏན་སྤྱོད་ཡུལ་ཅན། དགྱེས་ཤིང་བདེ་བས་ཡན་ལག་ཡོངས་རྒྱས་ཏེ། ཐུབ་པ་ཞི་བའི་སྙོམས་འཇུག་གནས་བཅས་པས། །གསེར་གྱི་པད་མ་ལྟ་བུར་རྒྱལ་མི་རྙིས། །རྒྱལ་པོས་སྨྲས་པ། སྔན་ཆད་རྫ་རྔ་རྔ་བྲན་སྒྲས་བསྐུལ་ཞིང་། གླིང་བུའི་སྒྲ་རྙན་ང་རོས་བསྐུལ་བྱས་ཏེ། །བུད་མེད་གླུ་ཡི་དབྱངས་ཀྱིས་བསླང་བསླང་ནས། །ད་ལྟར་སང་ན་སྡུག་བསྔལ་མི་མྱོང་ངམ། །འཆར་ཀས་སྨྲས་པ། །བསམ་གཏན་དགོངས་པས་ཏིང་འཛིན་ཞི་ཡུལ་ཅན། ཏིང་འཛིན་བསྒྲུབ་པའི་ཚུལ་ལ་མཁས་པ་སྟེ། །མནལ་ཏམ་བཞེངས་སམ་བཞུད་དམ་བཞུགས་པ་ན། །སྡུག་བསྔལ་མི་མངའ་རྒྱལ་བ་རྟག་ཏུ་དགྱེས། །རྒྱལ་པོས་སྨྲས་པ། ཆེ་བའི་རྐྱེན་འོས་མལ་མཆོག་བཤམས་པ་ལ། མེ་མར་སྡོང་པོས་ཀུན་ནས་མཐའ་བསྐོར་ཏེ། །བུད་མེད་ཚོགས་ཀྱིས་བསྐོར་ཅིང་ཉལ་ཉལ་ན། །ད་ལྟར་མུན་པར་ཉལ་ན་ཅིས་མི་རྨོངས། །འཆར་ཀས་སྨྲས་པ། ཐུབ་ཆེན་འཕགས་པ་གཟིམས་ལམ་གཟིམས་པ་ནི། །བྱམས་པའི་གདན་བཏིང་ཐུགས་རྗེས་བདེ་བར་བཞེངས། །དགའ་བའི་གནས་པས་དགྱེས་དང་ལྡན་པས་ན། །སྲིད་མེད་བཏང་སྙོམས་ཅན་ལ་རྨོངས་མི་མངའ། །རྒྱལ་པོས་སྨྲས་པ། ཤཱཀྱ་དཔའ་བོས་དེ་རྟག་མདུན་དུ་འདར། །བསྟན་བཅོས་མཁས་དང་རྩེ་ཞིང་དགའ་བྱས་ཏེ། །གཞལ་མེད་ཁང་འདྲའི་ཁྱིམ་དུ་དགའ་བྱས་ན། །ང་ཡི་བུ་དེ་ནགས་མཐར་ཇི་ལྟར་དགའ། །འཆར་ཀས་སྨྲས་པ། །ཆོས་ཀྱིས་བྱུང་བ་ཞི་སེམས་ལྡན་རྣམས་ཀྱིས། །
ཞི་བའི་ཐུགས་མངའ་དེ་རྟག་མདུན་དུ་བདར། །ཞི་བའི་དགོན་པར་ཞི་བ་བསྟེན་མཛད་པས། །སྟོན་པ་འཇིགས་བྲལ་དེ་ནི་དེར་དགྱེས་སོ། །རྒྱལ་པོས་སྨྲས་པ། །སྔན་ཆད་གཞོན་ནུ་ཁྱིམ་ན་གནས་པའི་ཚེ། །ཡན་ལག་སྤོས་ཀྱི་འབྲུ་མར་ཞིམ་བྱུགས་ཏེ། །རྒྱལ་པོའི་རྐྱེན་དུ་འོས་པས་ཁྲུས་བྱས་ན། །ནགས་ཀྱི་མཐའ་ན་ཐུབ་པ་སུ་ཡིས་བཀྲུ། ། འཆར་ཀས་སྨྲས་པ། ཁྲིམས་གཙང་འབབ་སྟེགས་ཆོས་ཆུ་རྫིང་བུ་སྟེ། །ཐུབ་པ་དེས་བཀྲུས་གཞན་ཡང་བཀྲུ་བ་མཛད། །སྐུ་ལ་མི་གཤེར་སྲས་དང་བཅས་སུ་འབོག །རང་ཡང་རྒལ་ལ་སྐྱེ་བོ་ཕལ་ཆེར་སྒྲོལ། །རྒྱལ་པོས་སྨྲས་པ། གསེར་གྱི་སྐུད་པ་ནོར་བུའི་ཕྲེང་བས་བརྒྱན། །རྒྱལ་པོའི་རྐྱེན་འོས་གོས་མཆོག་བཟང་པོ་གྱོན། །ཙན་དན་ཞིམ་པོས་ཤིང་འདབ་ལེགས་པར་བྲིས། །ནགས་ཆེན་དེ་གསེབ་ཐུབ་པ་སུ་ཡིས་བརྒྱན། །འཆར་ཀས་སྨྲས་པ། ཚུལ་ཁྲིམས་སྤོས་བྱུགས་ཡོན་ཏན་ཕྲེང་བས་བརྒྱན། །ཁྲེལ་ཡོད་ན་བཟའ་ཏིང་འཛིན་བསམ་གཏན་རྒྱན། །མངོན་ཤེས་རིག་པ་རྣམ་ཐར་བརྒྱན་པའི་སྐུ། །རྣམ་གྲོལ་གཟི་མངའ་ཐུབ་པ་ནགས་ན་མཛེས། །རྒྱལ་པོས་སྨྲས་པ། རྩེ་གཉིས་མཚོན་དང་རལ་གྲི་མཚོན་ཐོགས་པའི། །དཔའ་བོ་གཡུལ་དུ་འོངས་པས་ལུས་བསྲུངས་ཏེ། །བླ་རེ་གདུགས་ཀྱིས་རྟག་ཏུ་དགའ་དགབ་པ། །གཅིག་པུ་ནགས་ན་འདུག་ན་སུ་ཡིས་བསྲུང་། །འཆར་ཀས་སྨྲས་པ། བྱམས་པའི་སྟོབས་ཀྱིས་ཐུབ་པ་ཡོངས་བསྲུངས་ཏེ། །དེ་དཔུང་ཡེ་ཤེས་ཉན་ཐོས་ཞབས་འབྲིང་གཡོག །ཡོན་ཏན་ཚོགས་ལ་ངེས་པས་འཇིགས་མི་མངའ། །སྟོབས་བཅུ་དགྱེས་པ་མངའ་ཞིང་མི་འཇིགས་བརྙེས། །རྒྱས་པོས་སྨྲས་པ། ང་ཡི་བུ་ཡི་ཡོན་ཏན་ཁྱོད་ཀྱིས་སྨྲས། །ཆོས་ལེགས་སྤྱོད་ཅིང་དུབ་མེད་བརྗོད་པ་ཐོབ། །ཁྱོད་ཀྱང་ཟན་ཟོ་བསོད་སྙོམས་བཀུར་བར་གྱིས། །བཤད་ཀྱང་མི་ཡི་དབང་པོ་ལྟར་འགྲོའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་དེ་ནི་ཚོགས་ཀྱི་སློབ་དཔོན། ཚོགས་ཀྱི་
མཆོག །དགེ་སྦྱོང་གི་ཚོགས་ཡོངས་སུ་སྡུད་པ། དྲང་སྲོང་ཆེན་པོ་སྟེ། དགེ་སྦྱོང་གི་ཚོགས་ཀྱི་ནང་ན་བཞུགས་ན་དགེ་སྦྱོང་གི་རྒྱལ་པོ་ལམ་མེ་ལྷན་ནེ་ལྷང་ངེའོ། །རྒྱལ་པོ་འདི་ལྟ་སྟེ། དཔེར་ན། ཟླ་བ་ཡར་གྱི་ངོ་ཚེས་བཅུ་ལྔ་ལ་ཟླ་བ་ཉ་སྟེ་ཡོངས་སུ་རྒྱས་པའི་སྐར་མའི་ཚོགས་ཀྱིས་ཀུན་ནས་བསྐོར་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་ཉི་མ་ནི་སྟོན་ཀའི་དུས་ན་ཤིན་དུ་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ཤིན་དུ་ལམ་མེ་ལྷན་ནེ་ལྷང་དེའོ། །འདི་ལྟ་སྟེ། དཔེར་ན་རིའི་རྒྱལ་པོ་རི་རབ་རྒྱ་མཚོའི་ནང་ན་འདུག་པ་ནི་ལམ་མེ་ལྷན་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ། དཔེར་ན་ལྷའི་དབང་པོ་བརྒྱ་བྱིན་ནི་ཆོས་བཟང་ལྷའི་མདུན་ས་ན་གནས་ན་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ། དཔེར་ན་མི་མཇེད་ཀྱི་བདག་པོ་ཚངས་པ་ནི་ཚངས་པ་བྱེ་བ་ཕྲག་སྟོང་གིས་བསྐོར་ན་ལྷམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །དེ་ནས་རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ཡོན་ཏན་དེ་ལྟ་བུ་བརྗོད་པ་འདི་ཐོས་ནས་འདི་སྙམ་དུ་སེམས་ཏེ། འདི་ནི་བཅོམ་ལྡན་འདས་དེའི་ཉན་ཐོས་སུ་ཟད་ན་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་ན། བཅོམ་ལྡན་འདས་ཐོག་མ་བཅས་པ་ཉིད་ཀྱི་ས་ཆེན་པོ་འདི་རྣམ་པར་དྲུག་
ཏུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་ཏུ་ལྡེག །ཆེམ་ཆེམ་རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ། འུར་འུར་རབ་ཏུ་འུར། ཀུན་དུ་རབ་ཏུ་འུར་འུར། འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས་ཤིང་སྣང་བ་དཔག་ཏུ་མེད་པ་བྱུང་བ་ལྟ་ཅི་སྨོས། བཙས་མ་ཐག་ཏུ་སུས་ཀྱང་མ་བརྟེན་པར་ས་ལ་གོམ་པ་བདུན་བོར་བ་དང་། སྟེང་གི་བར་སྣང་ལས་ཆུའི་རྒྱུན་གྲང་དྲོ་རྣམ་པ་གཉིས་བྱུང་སྟེ། དེ་གཉིས་ཀྱིས་ཁྲུས་བྱས་པ་དང་། དེའི་ལྷའི་ཁྲི་བཟང་པོ་དབུས་གསེར་ལས་བྱས་པ་བྱུང་པ་དང་། སྟེང་གི་བར་སྣང་ལས་ལྷའི་གདུགས་དང་། རྔ་ཡབ་དང་བཅས་པ་བྱུང་བ་ལྟ་ཅི་སྨོས། བཙས་མ་ཐག་ཏུ་ལྷ་ཐམས་ཅད་ཕྱག་འཚལ་བར་གྱུར་པ་དང་། གང་གི་ཚེ་བཙས་ནས་གང་གི་ཚེ་མངོན་པར་བྱུང་བར་དེའི་བར་དུ་ནམ་ཡང་འཁྲུལ་པ་མེད་པ། རྟག་ཏུ་དམ་བཅས་པ་ལ་བརྟན་པ། ཇི་སྐད་སྨྲས་པ་དེ་ལྟར་བྱེད་པ། རྟག་ཏུ་རྒྱུན་མི་གཅོད་པར་བརྩོན་འགྲུས་བརྟན་པ། ཡང་དག་པར་སྨྲ་བ། སླུ་བ་མེད་ལྟ་ཅི་སྨོས། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྒལ་ནས་བསྒྲལ་བར་བྱའོ་ཞེས་སྨྲས་པ་ལྟ་ཅི་སྨོས་སྙམ་སྟེ། དེས་དེ་ལྟར་བཅོམ་ལྡན་འདས་བྱང་ཆུབ་སེམས་དཔར་གྱུར་པའི་དམ་བཅས་པ་དེ་དྲན་ནས་ཚིགས་སུ་བཅས་པ་འདི་དག་སྨྲས་སོ། །བློ་མཆོག་ལྡན་པ་གང་ཞིག་བལྟམ་མ་ཐག །ནོར་བ་མེད་པའི་གསུང་ནི་བརྗོད་མཛད་དེ། །གང་ཞིག་ལ་ནི་བདེན་པའི་གསུང་མངའ་བ། ། དེ་ལ་མཁས་པ་སུ་ཞིག་ཡིད་མི་ཆེས། །གང་ཞིག་བལྟམ་པར་གྱུར་མ་ཐག་ཉིད་དུ། །འཇིག་རྟེན་གཙོ་བོར་འགྱུར་བར་བྱའོ་ཞེས། །མགོན་པོས་མཉམ་པ་མེད་པའི་གསུང་བརྗོད་པ། །དེ་ལ་མཁས་པ་སུ་ཞིག་ཡིད་མི་ཆེས། །སུ་ཞིག་རྨང་ལམ་རྨི་བའི་དུས་ན་ཡང་། །བརྫུན་གྱི་ཚིག་ནི་ནམ་ཡང་མ་གསུངས་ཏེ། །ཇི་སྐད་གསུངས་པ་དེ་ལྟར་མཛད་མཛད་པ། །དེ་ལ་མཁས་པ་སུ་ཞིག་ཡིད་མི་ཆེས། །གསེར་གྱི་ཕུང་པོ་གངས་རེ་མཉམ་པ་ཡིས། །གང་ཞིག་ཆགས་པར་བྱ་བར་མ་ནུས་ཤིང་། །གང་ཞིག་ཆགས་ལས་རྣམ་པར་
འདས་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །ཆགས་པར་འགྱུར་དང་ཞེ་སྡང་རྨོངས་འགྱུར་བས། །གང་ཞིག་ཐུལ་བར་ནུས་པར་མ་གྱུར་ཏེ། །ཤེས་རབ་རྒྱལ་པོ་དང་ནི་ལྡན་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །འདོད་པའི་དགའ་དང་བདེ་རྣམས་དུ་མ་དང་། །ལོངས་སྤྱོད་ངག་ལ་རྟོག་པའི་རྣམ་པ་ཡིས། །གང་ཞིག་བཅིང་བར་ནུས་པར་མ་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །རྨད་དུ་བྱུང་བ་རྣམ་པར་བརྒྱད་དག་གིས། །ངོ་མཚར་འཛིན་གཞུག་ནམ་ཡང་མ་ནུས་ཏེ། །དཔལ་སྟུག་ལྡན་ཞིང་རྟག་ཏུ་མི་དམ་པ། དེ་ལ་མཁས་པ་སུ་ཞིག་ཡིད་མི་ཆེས། །མཁས་པ་དག་གིས་བརྗོད་པའི་ཚིག་སྙན་པ། །རྣམ་པ་སྣ་ཚོགས་དུ་མའི་ཚིག་གིས་ཀྱང་། །གང་ཞིག་བཅིང་བར་ནུས་པར་མ་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །དོན་གྱི་ཚུལ་ལ་བརྩོན་དང་ལྡན་པ་དང་། །ཆོས་དང་འདོད་ལ་ངེས་པའི་ཚིག་རྣམས་ཀྱིས། །གང་ཞིག་བཅིང་བར་ནུས་པར་མ་གྱུར་པ། །དེ་ཡིས་གསུང་ལ་སུ་ཞིག་ཡིད་མི་ཆེས། ། དྲི་མ་མེད་སྟོབས་མཐའ་ཡས་ལྡན་གྱུར་པ། །གང་ཞིག་གྲོང་ཁྱེར་མཆོག་ནས་འབྱུང་བའི་ཚེ། །དཔུང་རྣམས་ཀྱིས་ནི་ཐུབ་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་པའི་ཕྱིར། །གང་ཞིག་འདོད་པའི་བདེ་བ་སྤངས་ནས་སུ། །འཆི་མེད་རྒྱུ་ཕྱིར་རི་དགས་སྤྱོད་མཛད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་པའི་ཕྱིར། །གཞན་མ་ཡིན་སེམས་ཅན་གང་ཞིག་གིས། །ལོ་དྲུག་བར་དུ་དཀའ་ཐུབ་དྲག་སྤྱད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །འཇིག་རྟེན་ལ་ནི་ཕན་དང་བདེ་བའི་ཕྱིར། །བྱང་ཆུབ་དམ་པ་དོན་དུ་གཉེར་བ་ན། །ལོ་དྲུག་ལོན་པའི་ཐ་མར་ཚོད་དུ་གསོལ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ལ་ལོ་དྲུག་བར་དུ་བདུད་ཀྱིས་ནི། །རྟག་ཏུ་ཕྱི་བཞིན་འབྲེངས་ཏེ་གླགས་བཙལ་ཀྱང་། །
དེ་ལ་གླགས་ནི་རྙེད་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་འདོད་ཆགས་ཞེ་སྡང་བྲལ་གྱུར་ཅིང་། །སུ་ལ་ཅུང་ཟད་ཙམ་ཡང་མི་སློང་ལ། །འཇིག་རྟེན་དག་གི་དོན་ནི་མཛད་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་གཞན་ལ་གནས་པ་མ་མཛད་པར། །རྟོགས་པར་དཀའ་བ་རབ་ཏུ་ཞི་བ་ཡི། །བྱང་ཆུབ་བླ་མེད་མངོན་རྫོགས་སངས་རྒྱས་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་ཚངས་པ་ཉིད་ཀྱིས་གསོལ་བཏབ་པས། །བཅོམ་ལྡན་འདས་ཀྱིས་དེ་ཡི་ཚིག་གསན་ཏེ། །ཉིད་ཀྱིས་ཆོས་ནི་རབ་ཏུ་བཤད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་བདག་ལ་ཐུགས་བརྩེ་དོན་གྱི་ཕྱིར། །ཤཱཀྱ་གྲོང་ཁྱེར་ཁྱིམ་དུ་བྱོན་གྱུར་ཏེ། །ཤཱཀྱའི་ཚོགས་རྣམས་གྲོལ་བར་མཛད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །རྒལ་བར་གྱུར་པའི་བཅོམ་ལྡན་འདས་གང་གིས། ། སྔོན་གྱི་ཐུགས་དམ་བཅས་པ་དགོངས་མཛད་དེ། །བདག་ཅག་སྲིད་པའི་རྒྱུན་ལས་སྒྲོལ་མཛད་ན། །དེ་ཡི་གསུང་ལ་སུ་ཞིག་ཡིད་མི་ཆེས། །དེ་དུས་ད་བབ་དེ་ལྟར་དུས་མཁྱེན་པས། །བཅོམ་ལྡན་འདས་ཀྱིས་དེ་ཡི་དུས་མཁྱེན་ཏེ། འདྲེན་པ་དུས་སུ་ཐུགས་བརྩེ་མཛད་པ་པོ། །དེ་ཡི་གསུང་ལ་སུ་ཞིག་ཡིད་མི་ཆེས། །མི་ཡི་འདྲེན་པ་ཡི་ནི་སྐུ་མཆོག་ལ། །བལྟ་བའི་དོན་དུ་བདག་ནི་འགྲོ་བྱ་ཞེས། །རྒྱལ་པོ་དེས་ནི་རང་གི་སེམས་ཀྱིས་སུ། །དེ་སྙམ་དུ་ནི་རྗེས་སུ་བསམ་པ་བྱས། །དེ་ནས་རྒྱལ་པོ་ཟས་གཙང་མས་དེ་ལྟར་རིང་ཞིག་ཏུ་རྗེས་སུ་བསམས་ནས་ཚེ་དང་ལྡན་པ་འཆར་ཀ་ལ་སྨྲས་པ། དགེ་སློང་ཁྱོད་ལ་ཅི་ཞིག་དགོས། དེས་སྐད་ཅེས་སྨྲས་པ་དང་། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། །རྒྱལ་པོ་ཁྱོད་ཀྱི་དོན་དུ་བསམ་བྱས་ཏེ། །ཁྱོད་ཉིད་དད་པར་བྱ་བའི་ཕྱིར་བདག་འདིར་འོངས། །སྟོབས་བཅུ་མངའ་ལ་དང་བའི་སེམས་བསྐྱེད་ན། །སྐྱེས་བུ་བུད་མེད་དག་ཀྱང་མཐོ་རིས་འདོང་། །སྟོབས་བཅུ་མངའ་ཞིང་ཡོན་ཏན་ཚད་མེད་ལྡན། །དྲང་སྲོང་ཆེན་པོ་ཤཱཀྱ་དགའ་མཛད་པ། །འདིར་བྱོན་རྒྱལ་པོ་ཐུགས་དང་སྐྱེད་ཅིག་དང་། །ཁྱོད་ཀྱི་གྲོགས་པ་ཚད་མེད་འཇིག་རྟེན་འབྱུང་། །ཁྱོད་ཀྱི་སྲས་ནི་མི་དབང་དམ་
པ་སྟེ། །སྟོབས་བཅུ་ཐུགས་རྗེ་ཐུགས་བརྩེ་ཆེ་མངའ་བ། །ཆུ་ཁྲོད་པད་མ་ཇི་བཞིན་ཆགས་མེད་པར། །སྟོབས་བཅུ་ཆགས་མེད་ཐུགས་མངའ་སྤྱོད་པ་མཛད། །སྲིད་པའི་ཆུ་བོ་བཞི་ལས་རྒལ་གྱུར་ནས། །འགྲོ་བ་མང་པོ་ཆུ་བོ་ཆེ་ལས་སྒྲོལ། །རྐང་གཉིས་གཙོ་བོ་མི་འཇིགས་ཐང་འདོན་གྱིས། །འདྲེན་པ་མི་མཆོག་ལ་ནི་དང་བ་སྐྱེད། །སྲིད་པའི་ཟུག་རྔུ་བཞི་པོ་ཀུན་བཏོན་ཏེ། །སྨན་པའི་གཙོ་བོ་སྐྱེ་དགུའི་ཟུག་རྔུ་འབྱིན། །གསོ་བ་བྱེད་པ་མཁས་པ་དམ་པའི་མཆོག །འདྲེན་པ་མི་མཆོག་ལ་ནི་དད་པ་སྐྱེད། ། བདུད་ཀྱི་སྡེ་ཆེན་དཔག་མེད་ཕམ་མཛད་དེ། །ནག་པོའི་ཕྱོགས་རྣམས་སྡེར་བཅས་ཡོངས་མནན་ནས། །མཆོག་ཏུ་ཞི་བའི་བྱང་ཆུབ་བརྙེས་གྱུར་གྱིས། །འདྲེན་པ་མི་མཆོག་ལ་ནི་དད་པ་སྐྱེད། །འགྲོ་བ་དགྲོལ་ཞིང་ཆོས་ཀྱང་བསྟན་པ་དང་། །འཆི་མེད་ཞི་བ་མི་ལ་བཤད་གསོལ་ཞེས། །མི་དབང་ལ་ནི་ལྷ་དབང་གསོལ་འདེབས་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ཕས་ཀྱི་རྒོལ་བའི་ཚོགས་རྣམས་ཟིལ་མནན་ཏེ། སྟོན་པ་དཔག་ཡས་འཁོར་ལོ་རབ་བསྐོར་ནས། །སེམས་ཅན་བྱེ་བ་ཚད་མེད་འདུལ་མཛད་ཀྱིས། །འདྲེན་པ་མི་མཆོག་ལ་ནི་དང་བ་སྐྱེད། །རྣམ་དག་སྤྱན་མངའ་དེ་ནི་འགྲོ་བ་དག །མུན་པ་རབ་རིབ་སྟུག་པོས་བསྒྲིབས་པ་ཡི། །མིག་སྦྱོང་རབ་རིབ་སེལ་ཅིང་གསལ་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །རྒ་དང་འཆི་བའི་འཇིགས་པས་ཉོན་མོངས་ལ། །རྒ་ཤི་མེད་མཆོག་མི་ལ་སྟོན་མཛད་ཅིང་། །འཆི་མེད་གནས་སུ་སེམས་ཅན་འདོན་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །མེ་ཆེན་གསུམ་གྱིས་བསྲེགས་པའི་འཇིག་རྟེན་འདི། །མེས་ཚིག་ས་ལ་སྤྲིན་ཆེར་ཆར་པ་བཞིན། །བཞི་གཉིས་དམ་པའི་སྤྲིན་གྱི་ཆར་འབེབས་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །དྲི་གསུམ་དྲི་མ་སྤངས་ཤིང་སྐྱོན་གསལ་ཏེ། །དྲི་མ་གསུམ་ལས་སྐྱེ་བོ་འགྲོལ་མཛད་ཅིང་། །སྟོབས་བཅུ་རྣམ་པ་སྣང་བ་སྐྱེད་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་དགུ་ཀུན་ལ་ཕ་བཞིན་ཐུགས་བརྩེ་བས། །སྟོབས་བཅུ་ཐུགས་རྗེས་མངའ་བ་བྱམས་པར་དགོངས། །ཐུགས་རྗེ་ཐུགས་བརྩེས་སེམས་ཅན་འགྲོལ་
མཛད་ཅིང་། །འདྲེན་པ་མི་མཆོག་ལ་ནི་དད་པ་སྐྱེད། །བཅོམ་ལྡན་དེ་ནི་མ་དུལ་སེམས་ཅན་འདུལ། །ཐུགས་རྗེ་མངའ་བ་མ་ཞི་ཞི་མཛད་ཅིང་། །རྒོད་པ་རྣམས་ཀྱང་ཉོན་མོངས་ཞི་མཛད་ཀྱིས། ། འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་བོ་རྣམས་ཀྱི་སྲིད་པའི་རྒྱ་མཚོ་སྐེམས། །རྒྱ་མཚོ་ལས་ནི་ལྷ་བུས་ཇི་ལྟ་བར། །སྟོབས་བཅུ་ཐུགས་རྗེ་ཆེ་མངའ་སྒྲོལ་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ཚད་མྱེད་ཡོན་ཏན་ཚོགས་ཀྱིས་མཛེས་གྱུར་པ། །ཐུགས་རྗེ་ཆེན་པོ་དད་པའི་ཐུགས་ཀྱིས་སྤྱོད། །ཡུན་རིང་འཁྲུགས་པའི་སྐྱེ་བོ་དང་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ནོར་བུ་རིན་ཆེན་ཆུ་དང་བྱེད་པ་བཞིན། །རྒྱལ་བ་སྐྱེ་བོ་དང་བར་སྤྱོད་མཛད་ཅིང་། །མི་ཡི་འཐབ་རྙོག་རབ་ཏུ་དང་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ནོར་བུ་རིན་ཆེན་རང་བཞིན་ཡོངས་དག་པ། །མཁས་པའི་སྐྱེ་བོ་དགའ་བ་ཡོངས་སུ་སྐྱེད། །རྒྱལ་བ་དེ་བཞིན་སྐྱོན་བསལ་དག་པའི་ཐུགས། །མཁས་པའི་སྐྱེ་བོ་དགའ་བ་ཡོངས་སུ་སྐྱེད། །འཇིག་རྟེན་གཙོ་ལ་དད་པ་ཐོབ་གྱུར་ན། ལྷ་དང་མི་དག་སྡུག་བསྔལ་ཁུར་ཡང་འདོར། །སྲིད་པའི་རྒྱུད་སྤངས་ཞི་བ་མཆོག་ཏུ་འདོང་། །འདྲེན་པ་མི་མཆོག་ལ་ནི་དད་པ་སྐྱེད། །བདག་གིས་ཡོན་ཏན་ཕྱོགས་གཅིག་བརྗོད་པ་ནི། །ནམ་མཁའི་དབྱིངས་ལ་མཁའ་ལྡིང་རྗེས་བཞིན་ཏེ། །བདག་ནི་རྒྱལ་བའི་ཡོན་ཏན་མཐར་ཕྱིན་མིན། །འདྲེན་པ་མི་མཆོག་ལ་ནི་དད་པ་སྐྱེད། །དེ་ནས་རྒྱལ་པོ་ཟས་གཙང་མས་ཚེ་དང་ལྡན་པ་འཆར་ཀ་ལས་ལེགས་པར་བཤད་པ་ཡང་ཐོས། བཅོམ་ལྡན་འདས་བྱང་ཆུབ་སེམས་དཔའ་མཛད་པའི་ཡོན་ཏན་དེ་ལྟ་བུ་ཡང་ཉིད་ཀྱིས་མངོན་དུ་མཐོང་། སྔོན་བདག་རྒལ་ནས་སྐྱེས་བུ་ཁྱུ་མཆོག་ཁྱོད་ཀྱང་བསྒྲལ་བར་བགྱིའོ། །ཞེས་དམ་བཅས་པ་ཡང་རྗེས་སུ་དྲན་ནས་དེའི་ཚེ་བཅོམ་ལྡན་འདས་ལ་དད་པ་ཐོབ་པར་གྱུར་ཏོ། །དེ་ལྟར་དད་པ་ཐོབ་པའི་སེམས་ཀྱིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ནི་ངའི་བུ་ཆོས་ལས་སྐྱེས་པའི་བུ་ཡིན་ན། ཁྱོད་བདག་ཟན་ཟོལ་བཅོམ་ལྡན་འདས་ཀྱི་བཤོས་ཁྱེར་ཏེ་སོང་ཤིག །
ང་ཡང་བཅོམ་ལྡན་འདས་ལ་བལྟ་བའི་ཕྱིར་ཕྱི་བཞིན་འོང་ངོ་། །དེ་ནས་ཚེ་དང་ལྡན་པ་འཆར་ཀས་དེ་ལྟར་རྒྱལ་པོ་ཟས་གཙང་མ་མངོན་པར་དད་པར་བྱས་ནས་ཟན་ཟོས་ཏེ་བཅོམ་ལྡན་འདས་ཀྱི་བཤོས་ཁྱེར་ནས་སོང་ངོ་། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློག་དག་རྒྱལ་པོ་ཟས་གཙང་མ་ནི་དགེ་སློང་འཆར་ཀས་དད་པར་བྱས་ཏེ། དེང་སྐྱེ་བོ་ཕལ་པོ་ཆེའི་དོན་དུ་འགྱུར་རོ། །དེ་ནས་ཚེ་དང་ལྡན་པ་འཆར་ཀ་བཅོམ་ལྡན་འདས་ཀྱི་བཤོས་ཁྱེར་ཏེ། བཅོམ་ལྡན་འདས་ག་ལ་བ་དེར་སོང་ནས་བདག་གིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་ལེགས་སོ་ཞེས་བྱ་བ་གནང་སྟེ། འཆར་ཀ་ལེགས་སོ་ལེགས་སོ། །དེ་རིང་རྒྱལ་པོ་ཟས་གཙང་མ་དད་པར་བྱས་པས་ཁྱོད་ཀྱིས་བསོད་ནམས་མང་དུ་བསྐྱེད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་རིང་དགེ་སློང་འཆར་ཀས་རྒྱལ་པོ་ཟས་གཙང་མ་མངོན་པར་དད་པར་བྱས་པའི་བསོད་ནམས་ཀྱི་ཕུང་པོ་བསྐྱེད་པ་དེ་ལ། གལ་ཏེ་གཟུགས་ཤིག་ཡོད་ན་ནི་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སུ་ཡང་བཅོམ་ལྡན་འདས་ཀྱི་ཕུང་པོ་དེ་མི་ཤོང་སྟེ། བསོད་ནམས་ཀྱི་ཕུང་པོ་དེ་ནི་དེ་ཙམ་དུ་དཔག་ཏུ་མེད་དོ།། །།བམ་པོ་གཉིས་པ། དེ་ནས་བཅོམ་ལྡན་འདས་བཤོས་གསོལ་ནས་ཕྱག་བཅབས་ལྷུང་བཟེད་བཀྲུས་ཏེ། མཚན་མའི་རྣམ་པ་འདི་ལྟ་བུ་མཛད་དོ། །མཚན་མའི་རྣམ་པ་དེ་ལྟ་བུའི་མཛད་པས་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བའམ། བརྐྱང་པ་ལས་བསྐུམ་པ་ཙམ་གྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་རང་གི་གནས་ནས་མི་སྣང་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བྱང་ཕྱོགས་སུ་བརྟེན་ཏེ། སྟེང་གི་བར་སྣང་ལ་གནོད་སྦྱིན་གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་
ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་ཡང་གྲུལ་བུམ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལྷོ་ཕྱོགས་སུ་བརྟེན་ཏེ། སྟེང་གི་བར་སྣང་ལ་གྲུལ་བུམ་གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་མིག་མི་བཟང་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་། མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་འཚལ་ནས་ནུབ་ཕྱོགས་སུ་བརྟེན་ཏེ། སྟེང་གི་བར་སྣང་ལ་ཀླུའི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་མིག་མི་བཟང་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ནུབ་ཕྱོགས་ལོགས་སུ་བརྟེན་ཏེ། སྟེང་གི་བར་སྣང་ལ་ཀླུའི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་རིས་ཀྱི་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་སྟེང་གི་བར་སྣང་ལ་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །་དེ་བཞིན་དུ་ལྷའི་རྒྱལ་པོ་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དགའ་དང་། ལྷའི་རྒྱལ་པོ་གཞན་འཕྲུལ་དབང་བྱེད་དང་། མི་འཛེད་ཀྱི་བདག་པོ་ཚངས་པ་དང་། ལྷའི་རྒྱལ་པོ་འོད་གསལ་དང་། དགེ་རྒྱས་དང་། འབྲས་བུ་ཆེ་དང་། གནས་གཙང་མའི་རིས་ཀྱི་
ལྷའི་བུ་རྣམས་ཀྱང་གནས་གཙང་མའི་རིས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སྟེང་གི་བར་སྣང་ལ་རེ་རེ་ཞིང་ཡང་གཡོག་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྷན་ཅིག་ཏུ་བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །ལྷ་མ་ཡིན་གྱི་དབང་པོ་ཐགས་ཟངས་རིས་ཀྱང་ལྷ་མ་ཡིན་ཁྲག་ཁྲིག་ཕྲག་དྲུག་བཅུ་དང་ལྷན་ཅིག་ཏུ་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་གྱིས་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་གྱི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་སྤྱན་སྔར་འདུག་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །བྱའི་རྒྱལ་པོ་མདབ་བཟངས་བརྒྱད་ཁྲི་དྲུག་སྟོང་ཡང་རང་རང་གི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །གཞན་མུ་སྟེགས་ཅན་ཀུན་དུ་རྒྱུ་རྒྱལ་པོའི་ཁམས་ཐ་དད་པ་ནས་ལྷགས་པ་བྱེ་བ་ཕྲག་བརྒྱད་བཅུ་ཡང་འདུག་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ནམ་མཁའི་ཡོངས་སུ་དག་པའི་དབྱིངས་དཀྱིལ་དུ། མ་ལུས་རྫོགས་གྱུར་ཟླ་བ་ཉ་བ་ཡིས། །སྐར་མའི་ཚོགས་རྣམས་ཟིལ་གྱིས་མནན་ནས་ནི། །ནམ་མཁར་ཟླ་བ་བཞིན་དུ་རྣམ་པར་མཛེས། །ཟླ་བ་དྲི་མེད་དཀྱིལ་འཁོར་ཞལ་མངའ་བ། །མུན་པ་རབ་རིབ་སེལ་ཅིང་དྲི་གསུམ་འཇོམ། །རྟོག་གེ་ཅན་ཚོགས་ཟིལ་གྱིས་མནན་ནས་ནི། །མཁའ་ལ་སྐར་མའི་བདག་པོ་བཞིན་དུ་མཛེས། །ཉི་མའི་འོད་ཟེར་བརྒྱ་ཡི་ལུས་འཛིན་པ། །སྟོན་གྱི་དུས་ན་མུན་སེལ་རྣམ་མཛེས་ཤིང་། །ལྷ་མིན་ཚོགས་རྣམས་ཟིལ་གྱིས་མནན་ནས་ནི། །ཉི་མ་དེ་ནི་པད་མའི་ཁ་ཡང་འབྱེད། །ཉི་མའི་འོད་ཟེར་བརྒྱ་འདྲའི་སྐུ་མངའ་བས། །
སྟོང་གསུམ་པོ་དག་ཟིལ་གྱིས་མནན་ནས་ནི། །མི་ཡི་ཉི་མ་རྣམ་པར་མཛེས་གྱུར་ཅིང་། །ཉན་ཐོས་པད་མའི་ཚལ་མཆོག་ཁ་ཡང་འབྱེད། །ལྷ་ཡི་རྒྱལ་པོ་དབང་པོ་བརྒྱ་བྱིན་ནི། །འདུན་སར་ལྷ་ཡི་ཚོགས་ཀྱིས་ཡོངས་བསྐོར་བ། །ལྷ་ཡི་འཁོར་རྣམས་ཟིལ་གྱིས་མནན་ནས་ནི། །བདེ་སོགས་ཁྱིམ་ཐབ་སྦྱིན་ལྡན་རྣམ་པར་མཛེས། །རྐང་གཉིས་དབང་པོ་དཔལ་སྟུག་སྟོབས་བཅུ་ཡང་། །དགེ་སྦྱོང་ཚོགས་ཀྱིས་མདུན་བདར་སྟོང་གསུམ་ན། །རྟོག་གེའི་ཚོགས་རྣམས་ཟིལ་གྱིས་མནན་ནས་ནི། །དགེ་སྦྱོང་ཚོགས་ཀྱི་དབུས་ན་རྣམ་པར་མཛེས། །ལྷ་ཡི་དབང་པོ་ཐབ་བྲལ་དབང་བྱེད་པ། །འཐབ་བྲལ་བཟང་པོ་ལྷས་མཆོད་བཙུན་བྱས་པ། །འཐབ་བྲལ་བཟང་པོ་ལྷ་ཚོགས་ནང་བཞུགས་ཏེ། །འཐབ་བྲལ་རྣམས་ཀྱི་ནང་ན་འདུག་པ་མཛེས། །གཟི་བརྗིད་མཐའ་ཡས་སྟོབས་བཅུ་མངའ་བ་ཡང་། །ལས་ངན་ངན་འགྲོར་འདོད་པ་ཟིལ་མནན་ནས། །ཡན་ལག་བརྒྱད་པ་རབ་ཏུ་སྟོན་མཛད་ཅིང་། །སྟོབས་བཅུ་ཡོན་ཏན་རྣམས་ཀྱིས་རབ་ཏུ་མཛེས། །ལྷ་ཡི་རྒྱལ་པོ་ཡོངས་སུ་དགའ་ལྡན་དེ། །དགའ་ལྡན་གནས་ན་ལྷ་ཡི་ཚོགས་ཀྱིས་བསྐོར། །ལྷ་ཚོགས་མང་པོ་ཟིལ་གྱིས་མནན་ནས་ནི། །སྔོན་གྱི་དགེ་བའི་རྩ་བས་རབ་ཏུ་མཛེས། །དེ་བཞིན་ལྷ་དང་ལྷ་མིན་བླ་མ་ཡང་། །ལྷ་དང་ལྷ་མིན་ཚོགས་ཀྱིས་བླ་མར་བྱས། །འཁོར་བརྒྱད་པོ་དག་ཟིལ་གྱིས་མནན་ནས་ནི། །སྐྱེས་བུ་སེང་གེ་དམ་པ་འཇིག་རྟེན་མཛེས། །ལྷ་ཡི་དབང་པོ་བདག་པོ་རབ་འཕྲུལ་ནི། །ལྷ་ཚོགས་མང་པོ་ཟིལ་གྱིས་མནན་ནས་ནི། །རང་གི་བསོད་ནམས་མཐའ་ཡིས་ལྷ་གནས་ན། །གནས་ཤིག་དེ་ནི་རབ་ཏུ་རྣམ་པར་མཛེས། །དེ་བཞིན་ཉོན་མོངས་རྣམས་ལས་རྣམ་གྲོལ་ཞིང་། །སྟོབས་བཅུ་མངའ་བ་ཉོན་མོངས་བྲལ་བ་པོ། །མ་དུལ་འདུལ་མཛད་འདུལ་བའི་རྒྱལ་པོ་ཡང་། །སྐྱེ་བོ་ཟིལ་གྱི་མནན་ནས་རྣམ་པར་མཛེས། །ལྷའི་རྒྱལ་པོ་དབང་སྒྱུར་བྱེད་པ་ནི། །ལྷ་གནས་འདུག་ཅིང་ལྷ་མཆོག་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྣམ་པར་མཛེས་པར་གྱུར་པ་ཇི་བཞིན་དུ། །
དེ་ལྟར་རྒྱལ་བ་སྟོབས་བཅུའི་སྤྱོད་པ་དག །སྔོན་ཆད་སྤྱད་པས་ལྷ་མི་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྒྱལ་པོ་དེ་ནི་རབ་ཏུ་རྣམ་པར་མཛེས། །ཚངས་པའི་འཇིག་རྟེན་ན་ནི་ཚངས་པ་ཡང་། །ཚངས་པའི་འཁོར་རྣམས་རང་གིས་ཟིལ་མནན་ཏེ། །ཤིན་དུ་སྙན་པ་ཡན་ལག་བརྒྱད་ལྡན་དག །ཡོངས་སུ་རྗོད་པར་བྱེད་ཅིང་མངོན་དུ་མཛེས། །དེ་ལྟར་རྒྱལ་བའི་ཚངས་པ་འདྲར་གྱུར་པ། །དགེ་སྦྱོང་རྒྱལ་པོ་དགེ་སྦྱོང་ཚོགས་རྣམས་ཀྱིས། །མདུན་དུ་བདར་ཏེ་བདེན་པའི་གཏམ་གསུང་ཞིང་། །འཇིག་རྟེན་གསུམ་པོ་དག་ན་མངོན་པར་མཛེས། །ཉན་པར་འདོད་པ་ལྷ་དང་མི་རྣམས་དང་། །ལྟོ་འཕྱེ་ཆེན་པོ་དག་ནི་དུས་མཁྱེན་ནས། །སྐྱེས་བུ་ཁྱུ་མཆོག་ཡན་ལག་བརྒྱད་ལྡན་གྱི། །གསུང་རྣམས་ཀྱིས་ནི་རབ་ཏུ་སྟོན་པར་མཛད། །བྱ་ལམ་ནམ་མཁའ་དཔག་པར་ནུས་ཀྱང་སྲིད། །རྒྱ་མཚོ་བུམ་པས་གཞལ་དུ་རུང་ཡང་སྲིད། །རི་རབ་སྲང་བརྒྱར་གཞལ་དུ་རུང་ཡང་སྲིད། །སངས་རྒྱས་ཡོན་ཏན་མཐའ་རྟོགས་མི་ནུས་སོ། །རྒྱལ་པོ་མངོན་པར་དད་པར་བྱས་པའི་ལེའུ་སྟེ་དང་པོའོ།། །།