འཕགས་པ་སེང་གེས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་སུམ་བཅུ་རྩ་བདུན་པ་སྟེ་འཕགས་པ་སེང་གེས་ཞུས་པ། ཤོ་ལོ་ཀ་དྲུག་བཅུ། ༄༅། །རྒྱ་གར་སྐད་དུ། ཨཱརྻ་སིང་ཧ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། །བོད་སྐད་དུ། འཕགས་པ་སེང་གེས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། བྱང་ཆུབ་སེམས་དཔའི་དགེ་འདུན་ཆེན་པོ་དང་ཡང་ཐབས་གཅིག་གོ། །ཐམས་ཅད་མཁྱེན་ཅིང་ཐམས་ཅད་གཟིགས། །རྒྱལ་བ་གང་ཟག་མཚུངས་པ་མེད། རྒྱལ་པོ་མ་སྐྱེས་དགྲ་ཡི་བུ། སེང་གེས་ཞེས་ནི་གྲགས་པ་ཞིག། །ཚོང་དཔོན་བུ་ཕོ་ལྔ་བརྒྱ་ཡིས། །མདུན་དུ་བདར་ཏེ་ལྷན་

ཅིག་ཏུ། །རྒྱལ་པོའི་ཁབ་ནས་དེ་བྱུང་ནས། །རྒྱལ་པོའི་འབྱོར་པ་ཆེན་པོ་ཡིས། །གསེར་ལས་བྱས་པའི་གདུགས་ཐོགས་ཏེ། །རྫོགས་སངས་རྒྱས་ཀྱི་གན་སོང་ནས། །ཞབས་ལ་མགོ་བོས་ཕྱག་འཚལ་ཏེ། །ལྔ་བརྒྱ་པོ་ཡིས་གདུགས་དེ་དག །ཚང་བར་ཐུབ་པ་ཆེ་ལ་ཕུལ། །ཀུན་ཀྱང་བྱང་ཆུབ་དོན་དུ་ཞུགས། །རྫོགས་སངས་རྒྱས་ཀྱི་མཐུ་ཡིས་ནི། །དེ་དག་མི་འཇིགས་སྐྱེས་གྱུར་ནས། སེང་གེས་ཐལ་མོ་སྦྱར་བྱས་ཏེ། །རྫོགས་སངས་རྒྱས་ལ་ཞུས་པ་ནི། །བྱང་ཆུབ་སེམས་དཔའི་སྤྱོད་པ་གང་། །དེ་ནི་འདྲེན་པས་བདག་ལ་གསུངས། །གང་གིས་མཛེས་པར་འགྱུར་བ་ལགས། །གང་གིས་རྫུས་ཏེ་སྐྱེ་བར་འགྱུར། །སྐྱེ་བ་དྲན་བར་ཇི་ལྟར་འགྱུར། །ཐུབ་པ་ཆེན་པོས་ལུང་བསྟན་གསོལ། །དེ་དག་ལྷག་བསམ་ཡེ་ཤེས་ཀྱིས། །མཁྱེན་ནས་སངས་རྒྱས་ལུང་བསྟན་པ། །བྱང་ཆུབ་སེམས་དཔའ་སྤྱོད་གང་ཞེས། །ཁྱོད་ཀྱིས་དྲིས་པ་དེ་བསྟན་ཏོ། །བཟོད་པ་ཡིས་ནི་མཛེས་པར་འགྱུར། །ཚངས་པར་སྤྱད་པས་རྫུས་ཏེ་སྐྱེ། །ཆོས་ཀྱི་སྦྱིན་བས་སྐྱེ་བ་དྲན། །གཞོན་ནུར་དེ་ལྟར་ཤེས་པར་གྱིས། །གང་གིས་སུམ་བཅུ་རྩ་གཉིས་མཚན། །དཔེ་བྱད་བཟང་པོ་བརྒྱད་བཅུ་དང་། །གསེར་མདོག་འདྲ་བའི་ལུས་འགྱུར་ཞིང་། །དེ་མཐོང་སེམས་ཅན་དགའ་བར་འགྱུར། །སྦྱིན་པ་ཀུན་གྱིས་མཚན་དུ་འགྱུར། །བྱམས་པས་དེ་བཞིན་དཔེ་བྱད་བཟང་། །སེམས་ཅན་ཀུན་ལ་སེམས་མཉམ་བས། །རྒྱལ་བ་གསེར་གྱི་མདོག་འདྲར་འགྱུར། །གཟུངས་ནི་གང་གིས་ཐོབ་པར་འགྱུར། །གང་གིས་ཏིང་འཛིན་སྐྱེ་འགྱུར་ལགས། །གཟུང་བའི་ཚིག་ཏུ་གང་གིས་འགྱུར། །ཐུབ་པ་ཆེན་པོས་ལུང་བསྟན་གསོལ། །ཆོས་ལ་བཟོད་པས་གཟུངས་རྣམས་འཐོབ། །སེམས་བསྒོམས་པས་ནི་ཏིང་འཛིན་སྐྱེ། །ཀྱལ་བའི་ཚིག་རྣམས་སྤང་བྱས་ན། །གཟུང་བར་འོས་པའི་ཚིག་ཏུ་འགྱུར། །དྲན་དང་ལྡན་པར་ཇི་ལྟར་འགྱུར། །ཐུབ་པ་ཇི་ལྟར་བློ་གྲོས་ལྡན། །ཇི་ལྟར་ཆོས་སྤྱོད་འགྱུར་

བ་ལགས། །སྐྱེ་བུ་དམ་པ་མཁས་ཅིས་འགྱུར། །གཡོ་མེད་པས་ནི་དྲན་ལྡན་འགྱུར། །དོན་ལ་སེམས་པས་བློ་གྲོས་ལྡན། །གུས་དང་བཅས་པས་ཆོས་སྤྱོད་འགྱུར། །ཆོས་ཀྱི་མཚན་ཉིད་རྟོགས་པས་མཁས། །འཇིག་རྟེན་མགོན་པོའི་སྤྱན་སྔར་ནི། །ལས་གང་གིས་ནི་སྐྱེ་བར་འགྱུར། །འཇིག་རྟེན་མགོན་གྱི་མངོན་སུམ་དུ། །ཞུ་བ་ཞུ་བར་ཇི་ལྟར་འགྱུར། །གང་ཞིག་ཆོས་ཀྱི་སྦྱིན་པ་ལ། །ནམ་ཡང་བར་ཆད་མི་བྱེད་པ། །དེ་ནི་དེས་ན་མྱུར་རབ་ཏུ། །འཇིག་རྟེན་མགོན་དང་ཕྲད་པར་འགྱུར། །གང་གིས་མི་ཁོམ་སྤོང་བར་འགྱུར། །གང་གིས་བཟང་འགྲོར་མཆི་འགྱུར་ལགས། སྐྱེ་བ་ཀུན་དུ་སྐྱེ་བ་ན། །བག་མཆིས་པར་ཇི་ལྟར་འགྱུར། །དད་པས་མི་ཁོམ་སྤོང་པར་འགྱུར། །ཚུལ་ཁྲིམས་ཀྱིས་ནི་ བཟང་འགྲོར་འགྲོ། །སྟོང་པ་ཉིད་ནི་བསྒོམ་བྱས་ན། །རྟག་ཏུ ་བག་དང་ལྡན་བར་འགྱུར། །ཐུབ་པ་བྱང་ཆུབ་སེམས་དཔའ་རྣམས། །ཇི་ལྟར་ལས་རྣམས་དག་པར་འགྱུར། །ཇི་ལྟར་བདུད་ཀྱི་སྙིས་མི་ཐོགས། །ཇི་ལྟར་ཆོས་ཀྱི་ཕོངས་འགྱུར་སྤོང་། །རྣམ་པར་གྲོལ་བས་ལས་རྣམས་དག། །བརྩོན་འགྲུས་ཀྱིས་ནི་བདུད་འདུལ་འགྱུར། །ཅི་སྨྲས་དེ་བཞིན་བྱེད་པས་ནི། །ཆོས་ཀྱིས་ཕོངས་པ་སྤོང་བར་འགྱུར། །ཀ་ལ་པིང་ཀའི་སྒྲ་སྙན་དང་། །ཚངས་པའི་དབྱངས་འདྲར་ཇི་ལྟར་འགྱུར། །ཐུབ་པ་མོས་པ་སྣ་ཚོགས་ཀྱི། །སེམས་ཅན་རྣམས་ནི་གང་གིས་དགའ། །བདེན་པར་སྨྲས་པས་ཚངས་པའི་དབྱངས། །ངག་རྩུབ་སྤངས་པས་སྒྲ་སྙན་འགྱུར། །ཀྱལ་བའི་ཚིག་དང་ཕྲ་མ་རྣམས། །སྤངས་པས་སེམས་ཅན་དགའ་བར་འགྱུར། །ཇི་ལྟར་ཚེ་རིང་འགྱུར་བ་ལགས། །བྲོ་ནད་ཉུང་བར་ཇི་ལྟར་འགྱུར། །རྣམ་པར་འདྲེན་པ་གང་གིས་ན། །གཡོག་འཁོར་རྣམས་ནི་མི་ཕྱེད་འགྱུར། །གསོད་པ་མི་བྱེད་ཚེ་རིང་འགྱུར། །མི་འཚེ་བས་ནི་ནད་ཉུང་འགྱུར། །མི་མཐུན་པ་དག་བསྡུམས་བྱས་ན། །གཡོག་འཁོར་རྣམས་ནི་མི་ཕྱེད་འགྱུར། །དོན་རྣམས་ཇི་ལྟར་འགྲུབ་འགྱུར་

ལགས། །གང་གིས་ལོངས་སྤྱོད་མི་ཉམས་འགྱུར། །གང་དང་གང་དུ་སྐྱེ་བ་དེར། །དབང་ཆེན་གྲགས་པར་ཇི་ལྟར་འགྱུར། །ཆགས་པ་མེད་པས་དོན་རྣམས་འགྲུབ། །སེར་སྣ་མེད་པས་ལོངས་སྤྱོད་འཕེལ། །གང་དང་གང་དུ་སྐྱེ་བ་དེར། །ཕྲག་དོག་མེད་པས་དབང་ཆེར་གྲགས། །ཇི་ལྟར་ལྷ་ཡི་མིག་འཐོབ་འགྱུར། །ལྷ་ཡི་རྣ་བ་ཇི་ལྟར་འཐོབ། །སེམས་ཅན་འཆི་འཕོ་སྐྱེ་བ་དག། །འདྲེན་པ་གང་གིས་འཚལ་བར་འགྱུར། །མར་མེ་བྱིན་པས་མིག་འཐོབ་འགྱུར། །རོལ་མོའི་སྒྲ་ཡིས་རྣ་བ་དག། །འཆི་འཕོ་སྐྱེ་ཤེས་ཡེ་ཤེས་ཀྱིས། །དེ་དག་དེ་ལྟར་འགྲུབ་པར་འགྱུར། །འདྲེན་པ་བྱང་ཆུབ་སེམས་དཔའ་ཡི། །ཟག་པ་གང་གིས་བས་པར་འགྱུར། །ཚེ་རབས་སྔ་དྲན་ཅིས་འགྱུར་ལགས། །རྫུ་འཕྲུལ་ཅི་ཡིས་འཐོབ་པར་འགྱུར། །བཞོན་པ་བྱིན་པས་རྫུ་འཕྲུལ་འཐོབ། །དྲན་པ་སྒོམས་པས་རྗེས་སུ་དྲན། །མཐའ་གཉིས་རབ་ཏུ་སྤང་བྱས་ན། །ཟག་པ་ཟད་པར་རེག་པར་འགྱུར། །གང་གིས་ཞིང་ནི་ཕུན་སུམ་ཚོགས། །ཅིས་ནི་དགེ་འདུན་ཕུན་སུམ་ཚོགས། །གང་གིས་ཕུན་སུམ་ཚོགས་འོད་འགྱུར། །གང་གིས་ཕྱོགས་བཅུར་ལྷང་ངེར་གདའ། །སྨོན་ལམ་གྱིས་ནི་ཕུན་སུམ་ཞིང་། །བསྡུ་བས་དགེ་འདུན་ཕུན་སུམ་ཚོགས། །འདིར་ནི་རིན་ཆེན་གདུགས་ཕུལ་བས། །ཕྱོགས་བཅུར་ལྷང་ངེར་སྣང་བར་འགྱུར། །ཆོས་རྣམས་ཐམས་ཅད་བསྡུ་བ་ནི། །ཆོས་གང་གིས་ནི་ཐོབ་པར་འགྱུར། །གང་དང་གང་དུ་སྐྱེས་པ་དེར། །བྱང་ཆུབ་སེམས་དཔའ་དགའ་བ་འཐོབ། །སེམས་ཅན་ཐམས་ཅད་ཐར་བྱའི་ཕྱིར། །བྱང་ཆུབ་དོན་དུ་སེམས་བཏུད་པ། །དེས་ནི་ཆོས་རྣམས་བསྡུ་བ་འཐོབ། །དེར་ནི་དགའ་བ་འང་འཐོབ་པར་འགྱུར། །བསླབ་པ་ཅི་འདུ་བསླབས་པ་དང་། །སེམས་ནི་ཅི་འདྲ་བསྒོམས་པ་ཡིས། །ཐུབ་པ་ཆེན་པོ་ཁྱོད་འདྲ་བའི། །སྟོན་པ་ཐམས་ཅད་མཁྱེན་པར་འགྱུར། །སེམས་ཅན་མ་ལུས་ཐམས་ཅད་ལ། །མཉམ་བའི་སེམས་ཉིད་བསླབས་པ་དང་། མཉམ་པར་སེམས་ནི་བསྒོམས་པས་ན། །ཐམས་ཅད་ཟིལ་གནོན་རྒྱལ་བར་འགྱུར། །སྐྱེ་བ་ཀུན་ཏུ་བྱང་ཆུབ་སེམས། །རྨི་ལམ་ན་ཡང་སེམས་དེ་ནི། །

འདོར་མི་འགྱུར་ན་མ་ཉལ་ཚེ། །སྨོས་ཅི་འཚལ་བར་གང་གིས་འགྱུར། །གྲོང་དང་གྲོང་ཁྱེར་རྣམས་སུའམ། །གང་དུ་གནས་པའི་ཡུལ་རྣམས་སུ། །བྱང་ཆུབ་ལ་ནི་ཡང་དག་འཛུད། །དེས་ནས་འདོར་མི་འགྱུར་རོ། །གང་དང་གང་དུ་སྐྱེ་བར་ཡང་། །ཇི་ལྟར་སྟོབས་ནི་ཆེར་འགྱུར་ཞིང་། །རྟག་ཏུ་མཐུ་ཡིས་འཕགས་པ་དང་། །བདུད་རྣམས་བྱེ་བས་མི་ཚུགས་འགྱུར། །འདིར་ནི་སྙིང་པོ་ལྔ་བྱིན་ཞིང་། །སྐྲག་ལ་མི་འཇིགས་བྱིན་ན་ནི། །གང་དང་གང་དུ་སྐྱེ་བར་ཡང་། །དེས་ནི་སྟོབས་ནི་ཆེར་འགྱུར་ཏེ། །རྟག་ཏུ་མཐུ་ཡིས་འཕགས་པ་དང་། །བདུད་རྣམས་བྱེ་བས་མི་ཚུགས་སོ། ། བྱང་ཆུབ་སེམས་དཔའི་སྤྱོད་པ་དེ། །འཇིག་རྟེན་མགོན་གྱིས་མངོན་སུམ་དུ། །ལུང་བསྟན་པ་འདི་ཐོས་ནས་སུ། །སེང་གེ་ཡིད་ནི་དགའ་བར་འགྱུར། །སེང་གེ་གྲོགས་དང་ལྷན་ཅིག་ཏུ། །འདི་སྐད་ཀྱི་ནི་ཚིག་སྨྲས་ཏེ། །སྤྱོད་པ་བསྟན་པ་འདི་ལ་ནི། །བདག་ཅག་རྗེས་སུ་བསླབ་པར་བགྱི། །དེ་ནས་སངས་རྒྱས་འཛུམ་མཛད་དེ། །སྟོང་གསུམ་པོ་ཡང་གཡོས་གྱུར་ནས། །མ་ཕམ་པས་ནི་སངས་རྒྱས་ལ། །ཅི་ཞིག་སླད་དུ་འཛུམ་མཛད་པ། །ཐུབ་ཆེན་ལུང་བསྟན་གསོལ་ཞེས་ཞུས། །དེ་སྐད་ཞུ་བ་ཞུས་བ་དང་། །མ་ཕམ་པ་ལ་སངས་རྒྱས་ཀྱིས། །འདི་སྐད་ཅེས་ནི་བཀའ་སྩལ་ཏོ། །གང་གི་ཕྱིར་ནི་འཛུམ་མཛད་པ། །མ་ཕམ་ང་ལས་འདིར་ཉོན་ཅིག། །སངས་རྒྱས་བྱེ་བ་བརྒྱད་བཅུ་དང་། །གཞན་ཡང་ཁྲག་ཁྲིག་ཕྲག་བཅུ་ལ། །བྱང་ཆུབ་དོན་དུ་འདུས་ནས་ནི། །མི་ཡི་འདྲེན་པ་རྣམས་ལ་མཆོད། །རྫོགས་པའི་སངས་རྒྱས་རྐང་གཉིས་མཆོག། །མར་མེ་མཛད་པ་ཚུན་ཆད་དུ། །བྲམ་ཟེའི་ཁྱེའུ་འདི་དག་རྣམས། །ང་ཡིས་ཡོངས་སུ་སྨིན་པར་བྱས། །སྣང་བ་ཆེ་ཞེས་བྱ་བ་ཡི། །བསྐལ་བ་མཛེས་པ་འབྱུང་འགྱུར་ཏེ། །དེ་དག་བསྐལ་བ་གཅིག་དེ་ལ། །རྣམ་པར་འདྲེན་པར་འགྱུར་བ་སྟེ། །ཡེ་ཤེས་རྟོག་གི་རྒྱལ་མཚན་ཞེས། །འཇིག་རྟེན་འདྲེན་པ་རྣམས་སུ་འགྱུར། །འོད་དཔག་མེད་ཀྱི་བཀོད་པ་ལྟར། །དེ་དག་གི་ཡང་དེ་འདྲར་འགྱུར། །བྱམས་པ་ནས་ནི་བཟུང་ནས་སུ། །བསྐལ་བ་སུམ་བརྒྱ་ཚང་བར་ནི། །དེ་ཡི་བར་དུ་དུས་

ཀུན་དུ། །རྟག་ཏུ་སངས་རྒྱས་ཕྲད་པར་འགྱུར། །འདི་དག་བྱང་ཆུབ་ཐོབ་པ་ཡི། །མིང་ནི་གང་སུས་ཐོས་པ་རྣམས། །དེ་དག་ཐམས་ཅད་འཇིག་རྟེན་དུ། །ཀུན་མཁྱེན་གང་ཟག་མཚུངས་མེད་འགྱུར། །གང་ཞིག་ལུང་བསྟན་འདི་ཐོས་ནས། །མོས་པ་སྐྱེད་པར་བྱེད་པ་ནི། །འཇིག་རྟེན་གསུམ་པོ་འདི་དག་ན། །དེ་དང་མཚུངས་བའི་བསོད་ནམས་མེད། །གང་གིས་བསྐལ་པ་དྲུག་སྟོང་དུ། །སངས་རྒྱས་ཞིང་རྣམས་ཐམས་ཅད་དུ། །རིན་ཆེན་རྣམས་ཀྱིས་བཀང་བྱས་ནས། །བྱང་ཆུབ་ཕྱིར་འདིར་བྱིན་པ་བས། །གང་གིས་ཆོས་ཀྱི་རྣམ་གྲངས་འདི། །ཐོས་ནས་བྱང་ཆུབ་ཕྱིར་འཇུག་ན། །སྔར་སྨོས་པ་ཡི་བསོད་ནམས་ཀྱིས། །གྲངས་དང་ཆར་ཡང་མི་ཕོད་དོ། །ཆོས་འདི་བཤད་པའི་ཚེ་ན་ནི། །འཇིག་རྟེན་མགོན་པོའི་མཐུ་ཡིས་ནི། །ལྷ་རྣམས་མེ་ཏོག་ཆར་པ་འབེབས། །སྟོང་གསུམ་པོ་ཡང་གཡོ་པར་འགྱུར། །སེང་གེ་གྲོགས་དང་བཅས་པ་ཡིས། །མངོན་པར་ཤེས་པ་ལྔ་ཐོབ་ནས། །ཉིན་བདུན་བར་དུ་མཆོད་བྱས་ནས། །བསྟན་པ་ལ་ནི་རབ་ཏུ་བྱུང་། །དེ་དག་ཀུན་ཀྱིས་ཏིང་འཛིན་འཐོབ། །ཟད་མི་ཤེས་པའི་གཟུངས་ཀྱང་འཐོབ། །སེམས་ཅན་རྣམས་ཀྱི་དོན་བྱེད་དེ། །སངས་རྒྱས་ཆོས་ལ་འཛུད་པར་བྱེད། །ཆོས་ཀྱི་རྣམ་གྲངས་འདི་བསྟན་པ་ན་སེམས་བྱེ་བ་ཕྲག་བརྒྱད་བཅུ་བྱང་ཆུབ་མཆོག་ལ་ཞུགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། །སེང་གེ་གྲོགས་པ་བཅས་པ་དང་། །ལྷ་དང་མི་དང་ལྷ་མ་ཡིན་དང་། །དྲི་ཟར་བཅས་པའི་འཇིག་རྟེན་ཡི་རངས་ཏེ། །བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམས་གྲངས་ལེའུ་སྟོང་ཕྲག་བརྒྱ་པ་ལས་སེང་གེས་ཞུས་པའི་ལེའུ་ཞེས་བྱ་སྟེ་སུམ་བཅུ་རྩ་བདུན་པ་རྫོགས་སོ།། །།རྒྱ་གར་གྱི་མཁན་པོ་དཱ་ན་ཤཱི་ལ་དང་། མུ་ནི་བར་མ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།