ལྔ་པ། བསྐྱོད་པར་བརྩམས་པའི་ལེའུ།
དགེ་སློང་དག་དེ་ལྟར་བྱང་ཆུབ་སེམས་དཔས་ལྷའི་འཁོར་ཆེན་པོ་དེ་དག་ལ་ཆོས་ཀྱི་གཏམ་འདི་ཡང་དག་པར་བསྟན། ཡང་དག་པར་འཛིན་
དུ་བཅུག །ཡང་དག་པར་གཟེངས་བསྟོད། ཡང་དག་པར་དགའ་བར་བྱས། བཟོད་པར་བྱས་ནས། ལྷའི་འཁོར་བཀྲ་ཤིས་དང་ལྡན་པ་རྣམས་ལ་སྨྲས་པ། གྲོགས་པོ་དག་ཁོ་བོ་ནི་འཛམ་བུའི་གླིང་དུ་འགྲོའོ། །ཁོ་བོ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་རྣམས་བསྡུ་བའི་དངོས་པོ་སྦྱིན་པ་དང་། སྙན་པར་སྨྲ་བ་དང་། དོན་སྤྱད་པ་དང་། དོན་འཐུན་པར་བྱ་བ་བཞི་ལ་མགྲོན་དུ་བོས་ལ། གྲོགས་པོ་དག་ད་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་འདུག་པ་དེ་ནི་ཁོ་བོས་བྱས་པ་མ་ཤེས་ཤིང་རིགས་པ་མ་ཡིན་པར་འགྱུར་རོ། །དེ་ནས་དགའ་ལྡན་གྱི་རིས་ཀྱི་ལྷའི་བུ་དེ་དག་ངུ་ཞིང་བྱང་ཆུབ་སེམས་དཔའི་རྐང་པ་གཉིས་ལ་འཇུས་ཏེ། འདི་སྐད་ཅེས་འཛེར་ཏོ། །སྐྱེས་བུ་དམ་པ་ཁྱོད་མི་བཞུགས་ན་དགའ་ལྡན་གྱི་གནས་འདི་མཛེས་པར་མི་འགྱུར་རོ། །དེ་ནས་བྱང་ཆུབ་སེམས་དཔས་ལྷའི་འཁོར་ཆེན་པོ་དེ་དག་ལ་འདི་སྐད་དུ་བྱང་ཆུབ་སེམས་དཔའ་བྱམས་པ་འདི་ཁྱེད་ལ་ཆོས་སྟོན་པར་འགྱུར་རོ་ཞེས་དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔས་རང་གི་མགོ་ལས་ཐོད་དང་ཅོད་པན་ཕོག་སྟེ། བྱང་ཆུབ་སེམས་དཔའ་བྱམས་པའི་མགོ་ལ་བཞག་ནས་འདི་སྐད་དུ། སྐྱེས་བུ་དམ་པ་ཁྱོད་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་དེ་སྐད་སྨྲས་ཏེ། དེ་ནས་བྱང་ཆུབ་སེམས་དཔས་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་དམ་པར་དབང་བསྐུར་ནས། ཡང་ལྷའི་འཁོར་ཆེན་པོ་དེ་དག་ལ་སྨྲས་པ། གྲོགས་པོ་དག་ཁོ་བོས་ཇི་ལྟ་བུའི་གཟུགས་ཀྱིས་མའི་མངལ་དུ་འགྲོ་བར་བྱ། དེ་ལ་ཁ་ཅིག་ན་རེ་བྲམ་ཟེའི་ཁྱེའུའི་གཟུགས་སུ་གཤེགས་པའི་རིགས་སོ་ཞེས་ཟེར་རོ། །ལ་ལ་ན་རེ་བརྒྱ་བྱིན་གྱི་གཟུགས་སུ། ལ་ལ་ན་རེ་ཚངས་པའི་གཟུགས་སུ། ལ་ལ་ན་རེ་རྒྱལ་པོ་ཆེན་པོའི་གཟུགས་སུ། ལ་ལ་ན་རེ་རྣམ་ཐོས་ཀྱི་བུའི་གཟུགས་སུ། ལ་ལ་ན་རེ་སྒྲ་གཅན་གྱི་གཟུགས་སུ། ལ་ལ་ན་རེ་དྲི་ཟའི་གཟུགས་སུ། ལ་ལ་ན་རེ་མིའམ་ཅིའི་གཟུགས་སུ། ལ་ལ་ན་རེ་ལྟོ་འཕྱེ་ཆེན་པོའི་གཟུགས་སུ། ལ་ལ་ན་རེ་དབང་ཕྱུག་ཆེན་པོའི་གཟུགས་སུ། ལ་ལ་ན་རེ་ཟླ་
བའི་གཟུགས་སུ། ལ་ལ་ན་རེ་ཉི་མའི་གཟུགས་སུ། ལ་ལ་ན་རེ་ནམ་མཁའ་ལྡིང་གི་དབང་པོའི་གཟུགས་སུ་བཞུད་པའི་རིགས་སོ་ཞེས་ཟེར་རོ། །དེ་ནས་ཚངས་རིས་ཀྱི་ལྷའི་བུ་གཟི་བརྗིད་དམ་པ་ཞེས་བྱ་བ་སྔོན་དྲང་སྲོང་ལས་ཤི་འཕོས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་འདུག་པ་དེས་འདི་སྐད་ཅེས་སྨྲས་སོ། །བྲམ་ཟེ་རྣམས་ཀྱི་གསང་སྔགས་ཀྱི་ཚིག་རིག་བྱེད་ཀྱི་བསྟན་བཅོས་ལས་ཇི་སྐད་དུ་འབྱུང་བ་དེ་ལྟ་བུའི་གཟུགས་སུ་བྱང་ཆུབ་སེམས་དཔའ་ཡུམ་གྱི་ལྷུམས་སུ་བཞུད་པའི་རིགས་སོ། །དེའང་ཅི་འདྲ་ཞེ་ན། གླང་པོ་དམ་པ་ལུས་ཆེན་མཆོག་གྱུར་པ། །མཆེ་བ་དྲུག་ཅན་གསེར་གྱི་དྲ་བས་གཡོགས། །མགོ་བོ་རབ་ཏུ་དམར་ཞིང་ཤིན་ཏུ་མཛེས། །འགྲམ་ནས་ཟག་ཅིང་གཟུགས་ལྡན་དཔལ་ལྡན་པའོ། །རིག་བྱེད་བསྟན་བཅོས་ཡང་དག་མཁས་པ་ཡི། །བྲམ་ཟེས་རྣམ་པ་དེ་འདྲ་དེ་ཤེས་ནས། །སུམ་ཅུ་རྩ་གཉིས་མཚན་དང་ལྡན་འགྱུར་ཞེས། །ཡང་དག་ཉིད་དུ་ལུང་ནི་སྟོན་པར་འགྱུར། །དགེ་སློང་དག་དེ་ལྟར་བྱང་ཆུབ་སེམས་དཔས་སྐྱེ་བའི་དུས་ལ་བལྟས་ནས། དགའ་ལྡན་གྱི་གནས་དམ་པ་ན་གནས་བཞིན་དུ་རྒྱལ་པོ་ཟས་གཙང་མའི་ཁྱིམ་དམ་པ་དེར་སྔ་ལྟས་བརྒྱད་སྟོན་ཏོ། །བརྒྱད་གང་ཞེ་ན། འདི་ལྟ་སྟེ། ཁྱིམ་དེ་རྩྭ་དང་། སྡོང་དུམ་དང་། ཚེར་མ་དང་། གསེག་མ་དང་། གྱོ་མོ་མེད་ཅིང་། དྲི་མ་མེད་ལ་ཆག་ཆག་ལེགས་པར་བཏབ་པ་དང་། ཕྱག་དར་ལེགས་པར་བྱས་ཤིང་རླུང་རྡུལ་ཅན་དང་། མུན་པ་དང་། རྡུལ་དང་བྲལ་བ་དང་། སྦྲང་མ་དང་། ཤ་སྦྲང་དང་། སྦྲང་བུ་དང་། ཕྱེ་མ་ལེབ་དང་། སྡིག་སྦྲུལ་མེད་ཅིང་མེ་ཏོག་གིས་ཀུན་ཏུ་གང་བ་ལག་མཐིལ་ལྟར་མཉམ་པར་གནས་པར་གྱུར་ཏེ། འདི་ནི་སྔ་ལྟས་བྱུང་བ་དང་པོའོ། །རིའི་རྒྱལ་པོ་གངས་རི་ལ་བྱ་འདབ་སྤེན་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ངང་པ་དང་། རྨ་བྱ་དང་། ངུར་པ་དང་། ཀུན་ལ་དང་། ཀ་ལ་པིང་ཀ་དང་། ཤང་ཤང་ཏེའུ་ལ་སོགས་པ་སྒྲོ་གཤོག་སྣ་ཚོགས་མཛེས་པ་ཡིད་དུ་འོང་ཞིང་སྙན་པའི་སྒྲ་འབྱིན་པའི་བྱའི་ཚོགས་གང་དག་གནས་པ་དེ་དག་དེར་འོངས་ནས། རྒྱལ་པོ་ཟས་གཙང་མའི་ཁྱིམ་དམ་པ་དེའི་སྟེགས་བུ་དང་། བ་གམ་དང་། རྟ་བབས་དང་། སྐར་ཁུང་དང་། བསིལ་ཁང་དང་། ཁང་པ་
བརྩེགས་པ་དང་། ཁང་བཟངས་ཀྱི་སྟེང་དག་ཏུ་གནས་ཤིང་དགའ་བ་དང་། མགུ་བ་དང་། ཡིད་བདེ་བ་སྐྱེས་ནས་རང་རང་གི་སྒྲ་སྐད་དག་འབྱིན་ཏེ། འདི་ནི་སྔ་ལྟས་བྱུང་བ་གཉིས་པའོ། །གང་ཡང་རྒྱལ་པོ་ཟས་གཙང་མ་དེའི་ཀུན་དགའ་ར་བ་ཉམས་དགའ་བ་དང་། ནགས་ཚལ་ཉམས་དགའ་བ་དང་། སྐྱེད་མོས་ཚལ་ཉམས་དགའ་བ་དག་ན་མེ་ཏོག་དང་འབྲས་བུའི་ཤིང་ལྗོན་པ་སྣ་ཚོགས་དུས་ཐ་དད་པར་འབྱུང་བ། དེ་ཐམས་ཅད་ཀྱང་ཁ་འབུས་ཤིང་མེ་ཏོག་རྒྱས་པར་གྱུར་ཏེ། འདི་ནི་སྔ་ལྟས་བྱུང་བ་གསུམ་པའོ། །རྒྱལ་པོ་ཟས་གཙང་མའི་ཆུའི་ལོངས་སྤྱོད་ཀྱི་རྐྱེན་རྫིང་ལ་སོགས་པ་གང་དག་ཡོད་པ་དེ་དག་ཐམས་ཅད་ཀྱང་པད་མ་འདབ་མ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྡན་པ་ཚད་ཤིང་རྟའི་འཕང་ལོ་ཙམ་དག་གིས་ཁེབས་པར་གྱུར་ཏེ། འདི་ནི་སྔ་ལྟས་བྱུང་བ་བཞི་པའོ། །རྒྱལ་པོ་ཟས་གཙང་མའི་ཁྱིམ་དམ་པ་དེ་ན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་དང་། ཤ་ཁ་ར་ལ་སོགས་པ་བཟའ་བའི་རྣམ་པ་གང་དག་ཡོད་པ་དེ་དག་ཀྱང་ཡོངས་སུ་སྤྱད་པས་ཟད་པར་མི་འགྱུར་ཞིང་། ཡོངས་སུ་གང་བར་སྣང་སྟེ། འདི་ནི་སྔ་ལྟས་བྱུང་བ་ལྔ་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་དང་། བཙུན་མོའི་འཁོར་ཆེན་པོ་དག་ན་རྔ་བོ་ཆེ་དང་།རྫ་རྔ་དང་།ཁར་རྔ་དང་།རྒྱུད་གཅིག་པ་དང་།པི་བང་དང་། གླིང་བུ་དང་། རྒྱུད་གསུམ 
་པ་དང་། ཁར་བའི་སིལ་ཁྲོལ་དང་། ཕེག་ལ་སོགས་པ་རོལ་མོའི་ཆ་སྤྱད་གང་དག་ཡོད་པ་དེ་དག་ཐམས་ཅད་ཀྱང་མ་བླངས་མ་དཀྲོལ་བར་ཡིད་དུ་འོང་བའི་སྒྲ་རང་སྒྲོག་པར་གྱུར་ཏེ། འདི་ནི་སྔ་ལྟས་བྱུང་བ་དྲུག་པའོ། །རྒྱལ་པོ་ཟས་གཙང་མའི་ཁྱིམ་མཆོག་དམ་པ་ན། གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུཪྱ་དང་། དུང་དང་། མན་ཤེལ་དང་། བྱི་རུ་ལ་སོགས་པ་རིན་པོ་ཆེ་སྣ་ཚོགས་ཀྱི་སྣོད་གང་དག་ཡོད་པ་དེ་དག་ཐམས་ཅད་ཀྱང་ཁ་བྱེ་ཞིང་དྲི་མ་མེད་ལ་རྣམ་པར་དག་ཅིང་རབ་ཏུ་གང་བར་སྣང་སྟེ། འདི་ནི་སྔ་ལྟས་བྱུང་བ་བདུན་པའོ། །ཉི་ཟླའི་འོད་ཟིལ་གྱིས་རླག་པར་བྱེད་ཅིང་། ལུས་དང་སེམས་དགའ་བ་སྐྱེད་པའི་འོད་དག་ཅིང་དྲི་མ་མེད་པས་སྣང་བར་གྱུར་ཏེ། འདི་ནི་སྔ་ལྟས་བྱུང་བ་བརྒྱད་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་
པ་ཆེན་པོའི་མདོ། བམ་པོ་གསུམ་པ། ལྷ་མོ་སྒྱུ་འཕྲུལ་ཡང་ཁྲུས་བྱས། ལུས་བྱུག་པས་བྱུགས། རྒྱན་སྣ་ཚོགས་ཀྱིས་ལག་པ་ཤིན་ཏུ་བརྒྱན་ཏེ། གོས་ཤིན་ཏུ་འཇམ་པ་མཆོག་བགོས་ཤིང་བཙུན་སྤུ་དང་བཅས་ལ། དགའ་བ་དང་། མཆོག་ཏུ་དགའ་བ་དང་། རངས་པ་ཐོབ་ནས། བུད་མེད་སྟོང་ཕྲག་བཅུས་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་རྒྱལ་པོ་ཟས་གཙང་མ་རོལ་མོ་བྱ་བའི་ཁང་བཟངས་ན་བདེ་བར་གནས་པའི་དྲུང་དུ་ཕྱིན་ཏེ། གཡས་རོལ་ན་ཁྲི་བཟང་པོ་རིན་པོ་ཆེའི་དྲ་བས་བརྒྱན་པ་ལ་འདུག་ནས། འཛུམ་པའི་བཞིན་ཁྲོ་གཉེར་མེད་ཅིང་རབ་ཏུ་དད་པའི་མདོག་གིས་རྒྱལ་པོ་ཟས་གཙང་མ་ལ་ཚིགས་སུ་བཅད་པ་འདི་དག་སྨྲས་སོ། །རྒྱལ་པོ་ས་བདག་ལེགས་པར་བདག་ལ་གསན་དུ་གསོལ། རྒྱལ་པོ་ཁྱོད་ལ་གསོལ་གྱིས་བདག་ལ་དེ་གནོང་ཤིག །བདག་གི་བསམ་པ་ཡིད་ལ་ཅི་མཆིས་ཅིར་དགའ་བ། །དེ་དག་བདག་ལ་གསན་ཅིང་ཐུགས་དགྱེས་རངས་པར་མཛོད། །ལྷ་བདག་བསྙེན་གནས་ཚུལ་ཁྲིམས་བརྟུལ་ཞུགས་ལེན་པར་གསོལ། །བདག་ནི་འགྲོ་ལ་བྱམས་པས་ཡན་ལག་བརྒྱད་ལེན་ཏེ། །སྲོག་ཆགས་གནོད་པ་སྤངས་ཤིང་བསམ་པ་རྟག་དག་པས། །ཇི་ལྟར་བདག་ལ་བྱམས་པ་དེ་ལྟར་གཞན་ལ་བགྱི། །རྐུ་སེམས་རྣམ་པར་སྤངས་ཏེ་འདོད་དང་དྲེགས་པ་སྤངས། །རྒྱལ་པོ་འདོད་པ་རྣམས་ལ་ལོག་པར་གཡེམ་མི་བགྱིད། །བདེན་ལ་གནས་ཤིང་ཕྲ་མ་མ་མཆིས་ཞེ་གཅོད་སྤང་། །མི་དགེ་ཀྱལ་པའི་ཚིག་ཀྱང་ཡོངས་སུ་མི་སྤྱོད་དོ། །གནོད་སེམས་ཞེ་སྡང་ཐ་བ་གཏི་མུག་རྒྱགས་པ་དང་། །བརྣབ་སེམས་ཀུན་སྤངས་རང་གི་ནོར་གྱིས་འཚལ་བར་བགྱི། །ཡང་དག་སྦྱོར་བས་ཁ་གསག་ཚུལ་འཆོས་ཕྲག་དོག་སྤང་། །དགེ་བཅུའི་ལས་ལམ་འདི་དག་བདག་གིས་སྤྱད་པར་བགྱི། །བདག་ནི་ཚུལ་ཁྲིམས་བརྟུལ་ཞུགས་མངོན་དགའ་རབ་བསྡམས་ཀྱིས། །མི་ཡི་དབང་པོ་བདག་ལ་བཞེད་པས་སྲེད་མ་མཛད། །རྒྱལ་པོ་ཁྱོད་ལ་ཡུན་རིང་མི་དགེར་གྱུར་དུ་མཆི། །བདག་གི་ཚུལ་ཁྲིམས་བརྟུལ་ཞུགས་ཉེར་གནས་དགྱེས་པར་མཛོད། །རྒྱལ་པོ་བདག་གི་འཚལ་བ་འདི་ལགས་དེང་མྱུར་སྩོལ། །ཁང་བཟངས་བསིལ་ཁང་ལྡན་པ་ངང་སྐྱ་ལྡན་པའི་ནང་། །མེ་ཏོག་བཀྲམ་པའི་མཆིས་མལ་འཇམ་ཞིང་དྲི་བདའ་བར། །
གྲོགས་མོས་རྟག་ཏུ་བསྐོར་ཅིང་བདེ་དགར་གནས་སྙམ་བགྱིད། །སྐྱེས་པ་ཉུང་རུམ་རྣམས་དང་དེ་བཞིན་ཁྱེའུ་དག་དང་། །བུད་མེད་ཕལ་པ་རྣམས་ཀྱང་མདུན་ན་མཆིས་མི་འཚལ། །སྙན་ཅིང་ཡིད་མཆི་སྒྲ་སྙན་ཉན་པ་མ་གཏོགས་པར། །གཟུགས་དང་སྒྲ་བསུང་ཡིད་དུ་མི་མཆི་བདག་མི་འཚལ། །བཅིངས་དང་བཙོན་རར་སྩལ་བ་ཐམས་ཅད་དགྱེ་བར་གསོལ། །ནོར་གྱིས་བྲེལ་བའི་མི་རྣམས་ནོར་དང་ལྡན་པར་མཛོད། །ཟས་སྐོམ་རད་པ་ཤིང་རྟ་ཁྱོགས་དང་བཞོན་པ་རྟ། །འགྲོ་ལ་བདེ་བའི་སླད་དུ་དགུང་བདུན་སྩལ་བ་མཛོད། །ཕོ་བྲང་འདི་ན་སྐྱེས་པ་ཁྱེའུ་དང་བུད་མེད་དག །ཇི་སྙེད་མཆིས་པ་འཐབ་རྩོད་ཁྲོ་བའི་ཚིག་བྲལ་ཞིང་། །ཕན་ཚུན་བྱམས་པའི་ཡིད་ལྡན་ཕན་དང་དེས་སེམས་ཀྱིས། །དགའ་ཚལ་གནས་པའི་ལྷ་ལྟར་འཐུན་ཞིང་བདེ་སྤྱོད་མཛོད། །རྒྱལ་པོའི་ཆད་པ་ཆེ་ཕྲ་གཉེར་གྱིས་བདའ་བ་དང་། །གནོད་པ་བགྱིད་དང་རྡེག་བཙོག་སྡིགས་རུ་མི་མཛད་པར། །ཀུན་ལའང་དད་པའི་ཐུགས་ཀྱིས་བྱམས་དང་ཕན་དགོངས་ཏེ། །ལྷ་ཡིས་སྐྱེ་བོ་རྣམས་ལ་སྲས་གཅིག་བཞིན་དུ་གཟིགས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སྨྲས་པ་ཁྱོད་ནི་ཅི་འདོད་དེ་ཀུན་དེ་བཞིན་བྱ། །ཁྱོད་ཀྱི་བསམ་པ་ཡིད་ཀྱིས་གང་རྣམས་རྗེས་བསམས་ཤིང་། །ཁྱོད་ཀྱིས་མཆོག་བླངས་གང་ཡིན་དེ་ནི་ངས་སྦྱིན་ནོ། །རྒྱལ་པོའི་དམ་པས་རང་གི་འཁོར་ལ་བསྒོ་བ་ནི། །ཁང་བཟངས་དམ་པའི་སྟེང་དུ་ཕུན་སུམ་ཚོགས་པ་ཤོམས། །མེ་ཏོག་མཛེས་པ་ཁྲོམ་ལ་བདུག་སྤོས་མཆོག་གིས་བདུགས། །གདུགས་དང་བ་དན་ཏ་ལའི་ཕྲེང་བའི་རྒྱན་ཀྱང་གྱིས། །འཐབ་ཕོད་སྟོང་ཕྲག་ཉི་ཤུ་སྣ་ཚོགས་གོ་ཆ་ཅན། །མདའ་མདུང་ལྕགས་མདའ་མདུང་ཐུང་རལ་གྲི་ཐོགས་པ་དག །ཡིད་འོང་སྒྲ་གཅན་ངང་སྐྱ་ལྡན་པ་བསྐོར་གྱིས་ཏེ། །ལྷ་མོ་འཇིགས་པ་མེད་པར་བྱ་ཕྱིར་སྲུང་ཞིང་གནས། །ཁྲུས་བྱས་སྤོས་བྱུགས་གོས་མཆོག་དག་གིས་ཡན་ལག་བརྒྱན། །བུད་མེད་རྣམས་ཀྱིས་དེ་བསྐོར་ལྷ་ཡི་བུ་མོ་འདྲ། །ཡིད་དུ་འོང་བའི་སྒྲ་ལྡན་སིལ་སྙན་སྟོང་བླངས་ཏེ། །ལྷ་མོ་དེ་བཞུགས་ལྷ་ཡི་བུ་མོ་བཞིན་དུ་གནས། །ལྷ་ཡི་རིན་ཆེན་རིན་ཐང་ཆེན་པོས་རྩ་སྤྲས་པ། །ཁྲི་ལ་གོས་མཆོག་མང་པོས་ཡིད་འོང་མལ་བཤམས་ཏེ། །མལ་ཕྱིན་གཙུག་གི་ནོར་བུ་
རིན་ཆེན་ཀློད་བྱས་ནས། །འདྲེས་པའི་ནགས་ཚལ་ལྷ་ཡི་བུ་མོ་བཞིན་དུ་གནས། །དགེ་སློང་དག་དེ་ནས་རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། ལྷའི་བུ་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དགའ་དང་། གཞན་འཕྲུལ་དབང་བྱེད་དང་། བདུད་ཀྱི་བུ་དེད་དཔོན་དང་། མི་མཇེད་ཀྱི་བདག་པོ་ཚངས་པ་དང་། མདུན་ན་འདོན་ཚངས་མཆོག་དང་། མདུན་ན་འདོན་ཚངས་བཟངས་དང་། འོད་བཀོད་པ་དང་། འོད་གསལ་དང་། གནས་གཙང་མའི་རིས་ཀྱི་དབང་ཕྱུག་ཆེན་པོ་དང་། མཐར་ཐུག་དང་། འོག་མིན་པ་དང་། དེ་དག་ལ་སོགས་པ་དང་། གཞན་ཡང་ལྷ་བརྒྱ་སྟོང་མང་པོ་འདུས་ཏེ། གཅིག་ལ་གཅིག་འདི་སྐད་ཅེས་སྨྲས་སོ། །གྲོགས་པོ་དག་བདག་ཅག་གིས་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་གཤེགས་སུ་གསོལ་ན། བདག་ཅག་གིས་བྱས་པ་མ་ཤེས་པར་འགྱུར་ཏེ། བདག་ཅག་ལ་མི་ཆས། གྲོགས་པོ་དག་ཁྱེད་ཀྱི་ནང་ནས་བྱང་ཆུབ་སེམས་དཔའ་ཐོག་མ་ཡུམ་གྱི་ལྷུམས་སུ་གཤེགས་པ་དང་། ལྷུམས་ན་བཞུགས་པ་དང་། བལྟམ་པ་དང་། ཐོར་བུ་དང་། བྱིས་པའི་ནང་ན་རོལ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། རོལ་མོ་གཟིགས་པ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། །མྱ་ངན་ལས་འདས་པ་ཆེན་པོ་བསྟན་གྱི་བར་དུ་ཕན་པའི་སེམས་དང་། དགའ་བའི་སེམས་དང་། ཕངས་པའི་སེམས་དང་། བྱམས་པའི་སེམས་དང་། མཉེན་པའི་སེམས་ཀྱིས་རྟག་པར་རྒྱུན་དུ་བྱང་ཆུབ་སེམས་དཔའི་ཞབས་འབྲིང་ན་འཁོད་པར་སུ་དག་སྤྲོ། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱེད་ལས་སུ་ཞིག་རྟག་ཏུ་དགའ་ཡིད་ཀྱིས། །གཟུགས་མཆོག་མངའ་བའི་ཞབས་འབྲིང་བྱེད་པར་སྤྲོ། །སུ་དག་རང་གི་བསོད་ནམས་གཟི་བརྗིད་དང་། །སྟོབས་དང་གྲགས་པ་རྣམ་པར་སྤེལ་བར་འདོད། །གང་ཞིག་ལྷ་ཡི་ཕོ་བྲང་འདི་དག་ན། །ལྷ་མོ་དག་དང་འདོད་པའི་ཡོན་ཏན་གྱི། །ལྷ་ཡི་བདེ་བས་དགའ་བར་འདོད་པ་དག། དྲི་མེད་ཟླ་བའི་ཞལ་གྱི་ཞབས་འབྲིང་གྱིས། །དེ་
བཞིན་འདྲེས་པའི་ནགས་ཚལ་མཛེས་པ་མཆོག །ལྷ་ཡི་འབྱུང་གནས་ལྷ་ཡི་ཕོ་བྲང་ན། །གསེར་མདོག་མེ་ཏོག་རྒྱས་པར་དགའ་འདོད་ན། །དྲི་མེད་གཟི་བརྗིད་མངའ་བའི་ཞབས་འབྲིང་གྱིས། །གང་གིས་སྣ་ཚོགས་ཤིང་རྟ་དེ་བཞིན་དུ། །དགའ་ཚལ་མེ་ཏོག་མན་དཱར་འདབ་རྒྱས་སུ། །ལྷ་མོ་ལྷན་ཅིག་རྩེ་བར་འདོད་པ་དག །སྐྱེས་བུ་ཆེན་པོ་འདི་ཡི་ཞབས་འབྲིང་གྱིས། །འཐབ་བྲལ་བདག་པོའམ་དགའ་ལྡན་བདག་པོའམ། །ཡང་ན་དབང་ཕྱུག་འགྱུར་བར་འདོད་པ་དང་། །འགྲོ་བ་ཀུན་གྱིས་མཆོད་འོས་འདོད་པ་དག །གྲགས་པ་མཐའ་ཡས་འདི་ཡི་ཞབས་འབྲིང་གྱིས། །གང་ཞིག་འཕྲུལ་དགའི་ཁང་པ་མཛེས་པ་དང་། །དབང་སྒྱུར་ལྷ་ཡི་གནས་སུ་རྩེ་འདོད་ཅིང་། །ཡིད་ཀྱི་འཕྲུལ་གྱིས་ཐམས་ཅད་སྤྱོད་འདོད་པ། །ཡོན་ཏན་མཆོག་མངའ་འདི་ཡི་ཞབས་འབྲིང་གྱིས། །བདུད་ཀྱི་དབང་པོ་ཞེ་སྡང་ཡིད་མེད་པ། །རྫུ་འཕྲུལ་དབང་ཕྱུག་ཀུན་གྱི་མཐར་ཕྱིན་པའི། །འདོད་པའི་དབང་ཕྱུག་དབང་མཐར་ཕྱིན་འདོད་ན། །ཕན་པ་མཛད་པ་འདི་དང་ལྷན་ཅིག་དེང་། །དེ་བཞིན་འདོད་པའི་ཁམས་ལས་འདའ་བྱས་ཏེ། །ཚངས་པའི་གནས་སུ་གནས་པར་སུ་འདོད་པ། །དེ་ནི་ཚད་མེད་བཞི་ཡི་གཟི་མངའ་བ། །སྐྱེས་བུ་ཆེན་པོའི་ཞབས་འབྲིང་དེང་ནས་གྱིས། །འོན་ཏམ་གང་ཞིག་མི་ཡི་ནང་དག་ཏུ། །འཁོར་ལོས་སྒྱུར་ཡུལ་ཡངས་པར་སྐྱེ་འདོད་ན། །རིན་ཆེན་འབྱུང་གནས་མི་འཇིགས་བདེ་སྦྱིན་པ། །བསོད་ནམས་ཡངས་པ་མངའ་བའི་ཞབས་འབྲིང་གྱིས། །གང་ཞིག་ས་བདག་དེ་བཞིན་ཚོང་དཔོན་བུ། །ཕྱུག་ཅིང་སྐྱིད་ལ་ནོར་མང་ཚོགས་ཆེན་དང་། །དགྲ་ཡི་དཔུང་བཅོམ་འཁོར་དང་ལྡན་འདོད་པ། །དེ་ནི་ཕན་མཛད་འདི་དང་ལྷན་ཅིག་དེང་། །གཟུགས་དང་ལོངས་སྤྱོད་དེ་བཞིན་དབང་ཕྱུག་དང་། །སྙན་པ་གྲགས་དང་སྤོབས་དང་ཡོན་ཏན་དང་། །གཟུང་འོས་ཚིག་དང་མཉན་པའི་ཚིག་འདོད་པ། །དེ་ནི་ཚངས་དབྱངས་མཁས་པའི་གན་དུ་སོང་། །ལྷ་དང་མི་ཡི་འདོད་པ་གང་ཡིན་དང་། །སྲིད་པ་གསུམ་གྱི་བདེ་བ་ཐམས་ཅད་དང་། །བསམ་གཏན་བདེ་དང་དབེན་པའི་བདེ་འདོད་པ། །དེ་ནི་ཆོས་ཀྱི་དབང་ཕྱུག་ཞབས་འབྲིང་གྱིས། །འདོད་ཆགས་དང་ནི་ཞེ་སྡང་སྤོང་བ་དང་། །ཉོན་མོངས་མུན་པ་སེལ་བར་སུ་འདོད་ཅིང་། །ཞི་བ་རབ་
ཞི་ཉེར་ཞི་ཡིད་ལྡན་པ། །དེ་ནི་ཐུགས་དུལ་ཞབས་འབྲིང་མྱུར་དུ་སོང་། །གང་ཞིག་སློབ་དང་མི་སློབ་རང་རྒྱལ་དང་། །ཐམས་ཅད་མཁྱེན་པའི་ཡེ་ཤེས་ཐོབ་འདོད་ཅིང་། །སྟོབས་བཅུས་སེང་གེའི་སྒྲ་སྒྲོགས་སུ་འདོད་པ། །དེ་ནི་ཡོན་ཏན་རྒྱ་མཚོ་མཁས་དྲུང་སོང་། །གང་ཞིག་ངན་སོང་རྣམས་ཀྱི་ལམ་གཅོད་ཅིང་། །བཟང་འགྲོ་འཆི་བ་མེད་པའི་ལམ་དབྱེ་དང་། །ཡན་ལག་བརྒྱད་ལམ་འགྲོ་བས་འགྲོ་འདོད་ན། །འགྲོ་ལམ་མཐར་འབྱིན་འདི་ཡི་ཞབས་འབྲིང་གྱིས། །གང་ཞིག་བདེ་གཤེགས་ཡོངས་སུ་མཆོད་པ་དང་། །ཐུགས་རྗེ་མངའ་བ་དེ་ལས་ཆོས་ཉན་དང་། །དགེ་འདུན་ཡོན་ཏན་ཐོབ་པར་འདོད་པ་ནི། །ཡོན་ཏན་རྒྱ་མཚོ་འདི་ཡི་ཞབས་འབྲིང་གྱིས། །སྐྱེ་རྒ་ན་འཆིའི་སྡུག་བསྔལ་ཟད་པ་དང་། །འཁོར་བའི་བཅིངས་པ་རྣམ་པར་གྲོལ་བ་དང་། །ནམ་མཁའི་མཐའ་མཉམ་རྣམ་དག་སྤྱོད་འདོད་པ། །དེ་ནི་སེམས་ཅན་དག་པའི་ཞབས་འབྲིང་གྱིས། །འགྲོ་བ་ཀུན་ན་ཡིད་འོང་སྡུག་མཛེས་ཤིང་། །གཟུགས་མཆོག་མཚན་དང་ཡོན་ཏན་རྒྱས་པ་དང་། །བདག་དང་དེ་བཞིན་གཞན་ཡང་འགྲེལ་འདོད་པ། །དེ་ནི་བལྟ་སྡུག་མཁས་པའི་གན་དུ་སོང་། །ཚུལ་ཁྲིམས་ཏིང་འཛིན་དེ་བཞིན་ཤེས་རབ་དང་། །ཟབ་ཅིང་བལྟ་དཀའ་གཏིང་དཔག་དཀའ་བ་ཡི། །རྣམ་གྲོལ་ཐོབ་འདོད་མཁས་པ་གང་ཡིན་དེ། །སྨན་པའི་རྒྱལ་པོའི་གན་དུ་མྱུར་དུ་སོང་། །ཡོན་ཏན་འདི་དང་གཞན་ཡང་རྣམ་མང་དང་། །སྲིད་པའི་བདེ་དང་དེ་བཞིན་མྱ་ངན་འདས། །ཡོན་ཏན་ཐམས་ཅད་རབ་ཏུ་རྫོགས་འདོད་པ། །དེ་ནི་བརྟུལ་ཞུགས་གྲུབ་མཁས་གན་དུ་སོང་། །ཚིག་དེ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་འབུམ་ཕྲག་བརྒྱད་ཅུ་རྩ་བཞི་དང་། སུམ་ཅུ་རྩ་གསུམ་གྱི་ལྷ་འབུམ་དང་། འཐབ་བྲལ་གྱི་ལྷ་འབུམ་དང་། དགའ་ལྡན་གྱི་ལྷ་འབུམ་དང་། འཕྲུལ་དགའི་ལྷ་འབུམ་དང་། བདུད་ཀྱི་རིས་ཀྱི་ལྷ་སྔོན་གྱི་དགེ་བའི་ལས་ཀྱིས་བྱུང་བ་དྲུག་ཁྲི་དང་། ཚངས་རིས་ཀྱི་ལྷ་དྲུག་ཁྲི་བརྒྱད་སྟོང་དང་། འོག་མིན་གྱི་བར་གྱི་ལྷ་བརྒྱ་སྟོང་མང་པོ་དག་འདུས་པར་གྱུར་པ་དང་། གཞན་ཡང་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་ལྷའི་བུ་བརྒྱ་སྟོང་མང་པོ་འདུས་པར་གྱུར་པ་དེ་དག་ལས་གང་དག་མཆོག་ཏུ་བྱ་བའི་ལྷའི་བུ་དག་གིས་
ལྷའི་འཁོར་ཆེན་པོ་དེ་དག་ལ་ཚིགས་སུ་བཅད་པ་འདི་དག་སྨྲས་སོ། །བདག་ཅག་རྣམས་ཀྱིས་བསམ་པ་ཡང་དག་ཅི་འདྲ་ཡི། །ཚིག་འདི་ལྷ་ཡི་དབང་པོ་དག་གིས་གསན་དུ་གསོལ། །འདོད་པའི་དགའ་འབྱོར་བསམ་གཏན་བདེ་བ་མཆོག་སྤངས་ཏེ། །སེམས་ཅན་དག་པ་དམ་པ་འདི་ཡི་ཞབས་འབྲིང་བགྱི། །ལྷུམས་སུ་གཤེགས་དང་ལྷུམས་ན་བཞུགས་དང་བལྟམ་པའི་ཚེ། །བདག་ཉིད་ཆེན་པོ་མཆོད་འོས་ཤིན་ཏུ་མཆོད་པར་བགྱི། །བསོད་ནམས་དག་གིས་བསྲུངས་པའི་དྲང་སྲོང་ཡོངས་བསྲུངས་ན། །ཞེ་སྡང་སེམས་ཀྱིས་སུས་ཀྱང་གླགས་རྙེད་འགྱུར་མ་མཆིས། །གླུ་དབྱངས་སིལ་སྙན་རོལ་མོའི་དབྱངས་སྒྲ་ལེགས་བསྒྲགས་པས། །ཡོན་ཏན་རྒྱ་མཚོ་མངའ་བའི་ཡོན་ཏན་བསྔགས་བརྗོད་དེ། །གང་ཐོས་སྐྱེ་བོ་བྱང་ཆུབ་མཆོག་ཏུ་སེམས་བསྐྱེད་པར། །ལྷ་དང་མི་རྣམས་ཐམས་ཅད་རབ་ཏུ་དགའ་བར་བགྱི། །རྒྱལ་པོའི་ཕོ་བྲང་མེ་ཏོག་སིལ་མས་རྒྱས་པར་དགང་། །ཨ་ག་རུ་མཆོག་ནག་པོས་བདུགས་ཏེ་དྲི་ཞིམ་བགྱི། །དེ་ཡི་དྲི་ཚོར་ལྷ་མི་རབ་ཏུ་དགའ་འགྱུར་ཞིང་། །ནད་མེད་རིམས་ནད་བྲལ་ཞིང་བདེ་བར་འགྱུར་བར་བགྱི། །མེ་ཏོག་མན་དཱ་ར་དང་ཀུན་ནས་འདུ་བ་དང་། །སིམ་བྱེད་རབ་ཏུ་སིམ་བྱེད་སྠ་ལ་རྣམ་སྣང་དང་། །མེ་ཏོག་བཟང་པོས་ཕྲིན་ལས་དགེ་ལས་བྱུང་བ་དེ། །མཆོད་པའི་སླད་དུ་སེར་སྐྱའི་གྲོང་ཀུན་དགང་བར་བགྱི། །ཇི་སྲིད་ཡུམ་གྱི་ལྷུམས་ན་དྲི་གསུམ་མ་གོས་བཞུགས། །ཇི་སྲིད་རྒ་ཤི་མཐར་འབྱིན་བལྟམ་པར་གྱུར་གྱི་བར། །དེ་སྲིད་དུས་སུ་དང་བའི་ཡིད་ཀྱིས་ཞབས་འབྲིང་བགྱི། །བློ་གྲོས་ཆེ་མངའ་མཆོད་པ་བགྱི་བར་བདག་ཅག་སེམས། །བལྟམ་ནས་གོམ་པ་བདུན་གཤེགས་བརྒྱ་བྱིན་ཚངས་པ་ཡིས། །ལག་ཏུ་བླངས་ཏེ་སྤོས་ཆུ་དག་གིས་སྐུ་བསིལ་བ། །སེམས་ཅན་རྣམ་པར་དག་པ་དེ་ནི་མཐོང་བ་ཡི། །ལྷ་མི་དེ་དག་ཐོབ་པ་རྒྱ་ཆེན་ལེགས་པར་ཐོབ། །ཇི་སྲིད་བར་དུ་འཇིག་རྟེན་རྗེས་སུ་འཐུན་མཛད་ཅིང་། །འདོད་པའི་ཉོན་མོངས་འཇོམས་མཛད་བཙུན་མོའི་ནང་བཞུགས་ལ། །ཇི་སྲིད་ཅིག་ན་རྒྱལ་སྲིད་ཀུན་སྤངས་ཁབ་ནས་འབྱུང་། །དེ་སྲིད་དུས་སུ་དད་པའི་སེམས་ཀྱིས་ཞབས་འབྲིང་བགྱི། །ཇི་སྲིད་ཅིག་ན་རན་བསྣམས་བྱང་ཆུབ་སྙིང་པོར་གཤེགས། །ཇི་སྲིད་ཅིག་ན་བདུད་བཅོམ་བྱང་ཆུབ་
རེག་གྱུར་ཅིང་། །ཚངས་པ་ཁྲག་ཁྲིག་འཁོར་ལོ་བསྐོར་བར་གསོལ་བཏབ་པ། །དེ་སྲིད་བདེ་བར་གཤེགས་ལ་མཆོད་པ་རྒྱ་ཆེན་བགྱི། །སེམས་ཅན་བྱེ་བ་ཁྲག་ཁྲིག་འཆི་མེད་བཏུལ་གྱུར་ཏེ། །སྟོང་གསུམ་ཁམས་སུ་སངས་རྒྱས་ཕྲིན་ལས་ནམ་ལགས་ནས། །ཞི་ཞིང་བསིལ་བའི་མྱ་ངན་འདས་པར་གཤེགས་གྱུར་པ། །དེ་སྲིད་ཀུན་གྱིས་དྲང་སྲོང་གྲགས་ཆེན་གཏང་མི་བགྱི། །དགེ་སློང་དག་དེ་ནས་འདོད་པ་ན་སྤྱོད་པའི་ལྷའི་བུ་མོ་དག་གིས། བྱང་ཆུབ་སེམས་དཔའི་ལུས་གཟུགས་ཕུན་སུམ་ཚོགས་པ་མཐོང་ནས་འདི་སྙམ་དུ་སེམས་ཏེ། སེམས་ཅན་དག་པ་མཆོག་དམ་པ་འདི་ལྟ་བུ་འཛིན་པར་འགྱུར་བའི་ན་ཆུང་དེ་ནི་ཇི་ལྟ་བུ་ཞིག་ཡོད་སྙམ་ནས། དེ་དག་ངོ་མཚར་དུ་གྱུར་ཏེ། མེ་ཏོག་དང་། སྤོས་དང་། ཕྲེང་བ་དང་། བྱུག་པ་མཆོག་ཏུ་བྱ་བ་དག་ཁྱེར་ནས་ལྷའི་ལུས་ཡིད་ལས་གྲུབ་པ་ཐོབ་ཅིང་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱིས་བྱིན་གྱིས་བརླབས་པ། དེ་དག་སྐད་ཅིག་དེ་ཉིད་ལ་ལྷའི་ཕོ་བྲང་དེ་ནས་མི་སྣང་བར་གྱུར་ཏེ། སེར་སྐྱའི་གྲོང་ཁྱེར་ཆེན་པོ་དམ་པ་སྐྱེད་མོས་ཚལ་བརྒྱ་སྟོང་གིས་བརྒྱན་པ། རྒྱལ་པོ་ཟས་གཙང་མའི་ཁྱིམ་མཆོག་ཁང་བཟངས་ཆེན་པོ་ངང་སྐྱ་ལྡན་ཞེས་བྱ་བ་ལྷའི་དབང་པོའི་ཕོ་བྲང་ལྟ་བུ་དེར་ཕྱིན་ནས། ལྷའི་བུ་མོ་གོས་ལྷུག་ལྷུག་པོ་གྱོན་པ། དགེ་བ་དྲི་མ་མེད་པའི་བསོད་ནམས་ཀྱི་གཟི་བརྗིད་ཀྱིས་རབ་ཏུ་བརྒྱན་པ། ལྷའི་རྒྱན་གྱིས་ལག་པ་ཤིན་ཏུ་བརྒྱན་པ་དེ་དག་གིས་ལྷ་མོ་སྒྱུ་འཕྲུལ་མ་ལ་མཆོག་གི་སྟེང་ན་འདུག་པ་མཐོང་ནས། ཕན་ཚུན་མཛུབ་མོས་སྟོན་ཅིང་། ནམ་མཁའི་དཀྱིལ་ན་འཁོད་དེ། གཅིག་ལ་གཅིག་ཚིགས་སུ་བཅད་དེ་སྨྲས་པ། ལྷ་གནས་འཁོད་པའི་ལྷ་ཡི་བུ་མོ་རྣམས། །ཡིད་འོང་བྱང་ཆུབ་སེམས་དཔའི་སྐུ་མཐོང་ནས། །དེ་ཚེ་དེ་དག་འདི་སྙམ་སེམས་གྱུར་ཏེ། །བྱང་ཆུབ་སེམས་དཔའི་ཡུམ་གྱུར་ཅི་འདྲ་སྙམ། །ལག་ན་མེ་ཏོག་ཕྲེང་ཅན་དེ་དག་རྣམས། །ཐེ་ཙོམ་སྐྱེས་ནས་རྒྱལ་པོའི་ཕོ་བྲང་དུ། །མེ་ཏོག་དེ་བཞིན་བྱུག་པ་ཐོགས་ནས་སུ། །སོར་བཅུ་ཐལ་མོ་སྦྱར་ཏེ་འདུད་ཅིང་ལྷགས། །ལྷུག་ལྷུག་གོས་གྱོན་འཇོ་བག་གཟུགས་འཆང་བས། །ལྷ་མོ་སྒྱུ་འཕྲུལ་མལ་སྟེང་གནས་མཐོང་ནས། །ལག་པ་གཡས་པའི་
སོར་མོས་ཕྱག་བྱས་ཏེ། །མི་ཡི་བུད་མེད་གཟུགས་ལ་ལེགས་ལྟོས་འཛེར། །བདག་ཅག་ང་རྒྱལ་སེམས་ཀྱིས་མངོན་སེམས་པ། །ལྷ་ཡི་བུ་མོ་གཟུགས་མཆོག་ཡིད་འོང་སྙམ། །རྒྱལ་པོའི་བཙུན་མོ་འདི་ཡི་གཟུགས་མཐོང་ན། །ལྷ་ཡི་ལུས་ཀྱང་ཟིལ་གྱིས་ནོན་པར་མཐོང་། །འདི་ནི་གང་ཟག་མཆོག་གི་ཡུམ་འགྱུར་དུ། །ཡོན་ཏན་ལྡན་པས་ཤིན་ཏུ་གཤའ་ཞིང་འོས། །ནོར་བུ་རིན་ཆེན་སྣོད་བཟང་གནས་པ་ལྟར། །ལྷ་མོ་འདི་ནི་ལྷ་ཡི་ལྷ་སྣོད་ཡིན། །རྐང་ལག་མཐིལ་དང་སྤྱི་བོ་མན་ཅད་དུ། །ཡན་ལག་ཡིད་འོང་ལྷ་ལས་ལྷག་པ་སྟེ། །མིག་གིས་བལྟ་ན་ངོམས་པར་འགྱུར་མ་ཡིན། ། ཡིད་དང་སེམས་ནི་ཕྱིར་ཞིང་དགའ་བར་འགྱུར། །འདི་ཡི་ཁ་བཞིན་ལུས་མཛེས་སྡུག་པ་ནི། །ནམ་མཁའི་དཀྱིལ་ན་ཟླ་བ་མཛེས་པ་འདྲ། །ཉི་ལྟར་དྲི་མེད་མེ་ལྟར་འབར་བ་སྟེ། །འདི་ཡི་ལུས་ལས་འོད་གསལ་བཟང་པོ་འབྱུང་། །གསེར་སྦྲམ་བཙོ་མ་བཟང་པོའི་གསེར་བཞིན་དུ། །ལྷ་མོ་འདི་ཡི་ཁ་དོག་རྣམ་པར་མཛེས། །འདི་ཡི་སྐྲ་ནི་འཇམ་གཙང་དྲི་ཞིམ་སྟེ། །བུང་བ་མཆོག་གི་མདོག་འདྲ་ལྕང་ལོར་འཁྱིལ། །འདི་ཡི་མིག་ནི་པད་མའི་འདབ་མ་འདྲ། །རྣམ་དག་སོ་ནི་ནམ་མཁའི་སྐར་མ་བཞིན། །རྐེད་པ་གཞུ་ལྟར་ཕྲ་ཞིང་སྟ་ཟུར་ཡངས། །ཕྲག་པ་ཟླུམ་ཞིང་ཚིགས་རྣམས་མངོན་པ་མེད། །བརླ་ལེགས་གླང་པོ་མཆོག་གི་སྣ་འདྲ་སྟེ། །བྱིན་པ་ཤིན་ཏུ་ལེགས་པ་བྱིན་གྱིས་ཕྲ། །རྐང་ལག་མཐིལ་མཉམ་ཤིན་ཏུ་དམར་བ་སྟེ། །འདི་ནི་གཞན་མིན་ལྷ་ཡི་བུ་མོར་ངེས། །དེ་ལྟར་རྣམ་མང་དུ་མར་བལྟ་བྱས་ནས། །མེ་ཏོག་གཏོར་ཏེ་བསྐོར་བ་བྱས་ནས་ནི། །གྲགས་ལྡན་རྒྱལ་བའི་ཡུམ་ལ་བསྟོད་བྱས་ཏེ། །སྐད་ཅིག་གཅིག་གིས་ཕྱིར་ཡང་ལྷ་གནས་དོང་། །དེ་ནས་ཕྱོགས་བཞི་སྐྱོང་བ་བཞི་པོ་དང་། །འཐབ་བྲལ་རབ་དང་བརྒྱ་བྱིན་འཕྲུལ་པ་དང་། །ལྷ་ཚོགས་ལྷ་མིན་གྲུལ་བུམ་སྲིན་པོ་དང་། །མི་འམ་ཅི་དང་ལྟོ་འཕྱེ་ཆེས་སྨྲས་པ། །སྐྱེས་བུ་མཆོག་གི་མདུན་དུ་ཁྱེད་དེང་ལ། །སྐྱེས་བུ་དམ་པ་དེ་ལ་བསྲུང་བ་གྱིས། །འགྲོ་བ་དག་ལ་ཡིད་ཀྱིས་སྡང་མ་བྱེད། །མི་རྣམས་ལ་ཡང་གཙེ་བ་མ་བྱེད་ཅིག །ལྷ་མོ་སྒྱུ་འཕྲུལ་ཁྱིམ་མཆོག་གང་གནས་པ། །དེར་ནི་འཐུན་པར་འཁོར་དང་
ལྷན་ཅིག་ཀུན། །མདའ་གཞུ་རལ་གྲི་མདུང་ཐུང་མཚོན་ཐོགས་ལ། །ནམ་མཁའི་དཀྱིལ་ན་གནས་ཏེ་བལྟ་བར་གྱིས། །དེ་ལྟར་ཤི་འཕོའི་དུས་ཤེས་ལྷའི་བུ་རྣམས། །མེ་ཏོག་དེ་བཞིན་བྱུག་པ་ཐོགས་ནས་ནི། །སོར་བཅུ་ཐལ་མོ་སྦྱར་ཏེ་འདུད་བྱོས་ལ། །དགའ་བའི་སེམས་ཀྱིས་སྒྱུ་འཕྲུལ་དྲུང་དུ་དེང་། །སྨྲ་བའི་སེང་གེ་དུས་ནི་དེང་ལགས་ཀྱིས། །འཇིག་རྟེན་ཀུན་ལ་ཐུགས་རྗེ་བརྩེ་བསྐྱེད་དེ། །མི་དབང་སེམས་ཅན་དག་པ་འཆི་འཕོ་སྟོན། །མཆོད་སྦྱིན་དོན་དུ་བདག་ཅག་གསོལ་བ་འདེབས། །དགེ་སློང་དག་དེ་ནས་བྱང་ཆུབ་སེམས་དཔའ་འཆི་འཕོ་བའི་དུས་ཀྱི་ཚེ་ཤར་ཕྱོགས་ནས་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་། གླུ་དབྱངས་སྣ་ཚོགས་ལེན་ཅིང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་། གླུ་དབྱངས་སྣ་ཚོགས་ལེན་ཅིང་། བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་ནས་བྱང་ཆུབ་སེམས་དཔའ་ཁང་པ་བརྩེགས་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ནང་དུ་འདུག་སྟེ། བྱང་ཆུབ་སེམས་དཔའ་དེ་དག་དང་། ལྷ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས། དགའ་ལྡན་གྱི་གནས་དམ་པ་ནས་བསྐྱོད་པར་བརྩམས་སོ། །དགེ་སློང་
དག་དེ་ལྟར་བསྐྱོད་པར་བརྩམས་པའི་ཚེ་བྱང་ཆུབ་སེམས་དཔས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་ཞིང་ཡངས་ལ་ཐ་གྲུ་ཆེ་བ་འདིར་སྔན་ཅད་མ་བྱུང་བའི་འོད་སྣང་བ་ལྷའི་འོད་ལས་ཤིན་ཏུ་འདས་པས་ཡོངས་སུ་གསལ་ཞིང་སྣང་བར་གྱུར་ཏོ། །འཇིག་རྟེན་གྱི་བར་གང་སྡིག་པ་སྡིག་པས་ཁེབས་ནས་མུན་པ་མུན་ནག་སྨག་ཏུ་གྱུར་པ་སྣང་བ་མེད་པ་གང་དུ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་པས་ཀྱང་འོད་དང་། ཁ་དོག་དང་། གཟི་བརྗིད་ཀྱིས་ལམ་མེར་མ་གྱུར། ཐལ་ལེར་མ་གྱུར། ལྷང་ངེར་མ་གྱུར་པ་དེར་སེམས་ཅན་གང་དག་སྐྱེས་པ་དེ་དག་རང་རང་གིས་ལག་པ་བརྐྱང་བའང་མི་མཐོང་བ་དེ་དག་ཏུའང་དེའི་ཚེ་སྣང་བ་ཆེན་པོས་རྒྱས་པར་ཁྱབ་པར་གྱུར་ཅིང་། དེར་སྐྱེས་པའི་སེམས་ཅན་དེ་དག་སྣང་བ་དེས་ཁྱབ་པར་གྱུར་ནས་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་དུ་ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ་ཞེས་ཟེར་བར་གྱུར་པ་དེ་ལྟ་བུའི་འོད་ལུས་ལས་བཀྱེའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་དང་། ལྟས་ཆེན་པོ་བཅྭ་བརྒྱད་དུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་གོ །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །དེའི་ཚེ་སྒྲ་དགའ་བར་འགྱུར་བ། ཚིམ་པར་འགྱུར་བ། མགུ་བར་འགྱུར་བ། དད་པར་འགྱུར་བ། སིམ་པར་འགྱུར་བ།
མཉན་པར་འོས་པ། བསྔགས་པར་འོས་པ། མཚུངས་པ་མེད་པ། མཉན་ན་གཏང་མི་བྲ་བ། མི་འཐུན་པ་མེད་པ། དངང་བར་འགྱུར་བ་མེད་པ་དག་ཀྱང་གྲག་པར་གྱུར་ཏོ། །སྐད་ཅིག་དེ་ལ་སེམས་ཅན་གང་ལ་ཡང་གནོད་པའམ། འཇིགས་པའམ། དངང་བའམ། བག་ནོན་པ་མེད་པར་གྱུར་ཏོ། །སྐད་ཅིག་དེ་ལ་ཉི་ཟླ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་གི་འོད་ཀྱང་མི་སྣང་བར་གྱུར་ཏོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏེ། སེམས་ཅན་གང་ལ་ཡང་འདོད་ཆགས་ཀྱིས་གནོད་པར་མི་འགྱུར། ཞེ་སྡང་གིས་གནོད་པར་མི་འགྱུར། གཏི་མུག་གིས་གནོད་པར་མི་འགྱུར་ཞིང་། ཕྲག་དོག་གམ། སེར་སྣའམ། ང་རྒྱལ་ལམ། འཆབ་པའམ། རྒྱགས་པའམ། ཁྲོ་བའམ། གནོད་སེམས་སམ། ཡོངས་སུ་གདུང་བས་གནོད་པར་འགྱུར་བ་མེད་པར་གྱུར་ཏེ། སེམས་ཅན་ཐམས་ཅད་ཀྱང་སྐད་ཅིག་དེ་ལ། ཕན་ཚུན་ཕ་མ་ཙམ་དུ་སེམས་པའི་འདུ་ཤེས་སུ་གྱུར་ནས། བྱམས་པའི་སེམས་དང་། ཕན་པའི་སེམས་དང་ལྡན་པར་གྱུར་ཏོ། །ལྷ་དང་མིའི་རོལ་མོ་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་ཀྱང་མ་དཀྲོལ་མ་བླངས་པར་ཡིད་དུ་འོང་བའི་སྒྲ་འབྱིན་པར་གྱུར་ཏོ། །ལྷ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་ལག་པ་དང་ཕྲག་པ་དང་སྤྱི་བོས་གཞལ་མེད་ཁང་ཆེན་པོ་དེ་དག་འདེག་ཅིང་ཁྱེར་བར་གྱུར་ཏོ། །ལྷའི་བུ་མོ་བརྒྱ་སྟོང་དག་གིས་ཀྱང་རང་རང་གི་གླུ་དབྱངས་བླངས་ཏེ། མདུན་དང་། རྒྱབ་དང་། གཡས་གཡོན་དག་ནས་བྱང་ཆུབ་སེམས་དཔའ་ལ་གླུ་དབྱངས་ཀྱི་སྒྲ་སྐད་ཀྱིས་མངོན་པར་བསྟོད་པ། ཁྱོད་ཀྱིས་སྔན་ཆད་དགེ་ལས་བསགས་པ་དང་། །ཡུན་རིང་དུས་ཀྱི་དགེ་བས་བྱུང་བ་དང་། །ཁྱོད་ཀྱིས་ཆོས་རྣམས་ཀུན་གྱི་ཚུལ་སྦྱངས་པས། །དེ་རིང་མཆོད་པ་རྒྱ་ཆེན་བྱུང་བར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །སྲས་མོ་སྲས་སྡུག་སྦྱིན་པ་མཛད་པས་ན། །ལྷ་ཡི་མེ་ཏོག་ཆར་དུ་བབ་པ་འདི། །སྦྱིན་པ་སྤྱད་པ་དེ་ཡི་འབྲས་བུ་ལགས། །གཙོ་བོ་ཁྱོད་ཀྱིས་རང་གི་ཤ་བཅད་དེ། །
སྲང་ལ་བཅལ་ནས་ཐུགས་བྱོན་བྱ་ཕྱིར་བཏང་། །སྦྱིན་པ་དེ་སྤྱད་པ་ཡི་འབྲས་བུ་དེས། །ཡི་དགས་འཇིག་རྟེན་རྣམས་ཀྱང་ཟས་སྐོམ་ཐོབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཚུལ་ཁྲིམས་མ་ཞིག་མ་ཉམས་བསྲུངས་པས་ན། །ཚུལ་ཁྲིམས་དེ་སྤྱད་པ་ཡི་འབྲས་བུ་དེས། །མི་ཁོམ་ངན་སོང་ཡོངས་སུ་དག་པར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བྱང་ཆུབ་བསྒྲུབ་པའི་གཞིར་ནི་བཟོད་པ་བསྒོམས། །བཟོད་པ་དེ་སྤྱད་པ་ཡི་འབྲས་བུ་དེས། །ལྷ་དང་མི་ཀུན་བྱམས་པའི་སེམས་སུ་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བརྩོན་འགྲུས་མ་གོད་དམ་པ་བསྒོམས་པས་ན། །བརྩོན་འགྲུས་དེ་སྤྱད་པ་ཡི་འབྲས་བུ་དེས། །སྐུ་ནི་རི་རབ་བཞིན་དུ་མཛེས་པར་གྲུབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་སྦྱང་སླད་བསམ་གཏན་བསྒོམས་མཛད་པས། །བསམ་གཏན་དེ་སྤྱད་པ་ཡི་འབྲས་བུ་དེས། །འགྲོ་བ་དག་ལ་ཉོན་མོངས་གནོད་མི་འགྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་གཅོད་པའི་ཤེས་རབ་བསྒོམས་མཛད་པས། །ཤེས་རབ་དེ་སྤྱད་པ་ཡི་འབྲས་བུ་དེས། ། འོད་གསལ་དམ་པ་རྣམ་པར་སྣང་ཞིང་མཛེས། །བྱམས་པའི་གོ་མནབས་ཉོན་མོངས་འཇོམས་མཛད་ཅིང་། །སེམས་ཅན་ཀུན་ལ་ཐུགས་རྗེ་ཆེས་བྱུང་བ། །དགྱེས་པ་མཆོག་བརྙེས་བཏང་སྙོམས་མཆོག་ལྡན་པ། །བདེ་གཤེགས་ཚངས་གྱུར་ཁྱོད་ལ་ཕྱག་འཚལ་ལོ། །ཤེས་རབ་སྒྲོན་མའི་འོད་དང་གཟིས་འཕགས་ཤིང་། །གཏི་མུག་སྐྱོན་གྱི་མུན་པ་ཀུན་སེལ་བ། །འདྲེན་པ་སྟོང་གསུམ་དག་ན་མིག་གྱུར་པའི། །ཐུབ་པ་ལམ་སྟོན་ཁྱོད་ལ་ཕྱག་འཚལ་ལོ། །རྫུ་འཕྲུལ་རྐང་པ་མངོན་ཤེས་མཆོག་ལ་མཁས། །བདེན་པ་གཟིགས་ཤིང་དམ་པའི་དོན་བསླབས་པ། །རྒལ་ནས་སྲོག་ཆགས་གཞན་དག་སྒྲོལ་མཛད་པ། །བདེ་གཤེགས་གྲོལ་གྱུར་ཁྱོད་ལ་ཕྱག་འཚལ་ལོ། །ཐབས་དང་མངོན་ཤེས་དམ་པ་ཀུན་ལ་མཁས། །འཆི་འཕོ་འཆི་འཕོ་མེད་པའི་འཕོ་བ་སྟོན། །འཇིག་རྟེན་ཆོས་ཀྱི་རྗེས་སུ་འཐུན་མཛད་ཀྱང་། །འཇིག་རྟེན་གང་དུའང་ཆགས་པ་ཁྱོད་མི་མངའ། །གང་དག་ཁྱོད་ནི་ཉན་ཏམ་ལྟར་ལྷགས་པ། །དེ་དག་ཐོབ་པ་དམ་པ་བསམ་མི་ཁྱབ། །ཁྱོད་ལ་ཆོས་
ཉིད་ཐོས་ཏེ་གང་དད་ཅིང་། །དགའ་བ་ཡངས་པ་སྐྱེས་པ་སྨོས་ཅི་འཚལ། །དགའ་ལྡན་གནས་རྣམས་ཀུན་ནི་མོག་མོག་གྱུར། །འཛམ་བུའི་གླིང་དུ་ཉི་མ་མངོན་དུ་ཤར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཉོན་མོངས་གཉིད་ཀྱིས་ལོག་ལས་སད་པར་མཛད། །དེང་ནི་ཕོ་བྲང་འབྱོར་ཅིང་རྒྱས་གྱུར་ལ། །བྱེ་བ་ཁྲག་ཁྲིག་ལྷ་རྣམས་ལང་ལོང་གྱུར། །ལྷ་ཡི་བུ་མོས་སིལ་སྙན་སྒྲ་ཕྱུང་བས། །རྒྱལ་པོའི་ཁབ་ན་སིལ་སྙན་གྲགས་པར་འགྱུར། །བསོད་ནམས་གཟི་བརྗིད་རྫོགས་ཤིང་ལས་དགེ་བ། །བུད་མེད་གཟུགས་ཀྱི་མཆོག་དང་ལྡན་གྱུར་པ། །དེ་ཡི་སྲས་གྱུར་དེ་ནི་དེ་ལྟར་འབྱོར། །དཔལ་གྱིས་འཇིག་རྟེན་གསུམ་ནི་ཟིལ་གྱིས་གནོན། །མི་མཆོག་འབྱུང་བ་དེ་ཡི་གཟི་བརྗིད་ཀྱིས། །དེ་ཕྱི་ཕྱིན་ཆད་ཕོ་བྲང་དམ་པ་འདིར། །ལུས་ཅན་རྣམས་ལ་འདོད་དང་འཐབ་རྩོད་མེད། །ཀུན་ཀྱང་བྱམས་པའི་སེམས་ཀྱིས་སྲི་ཞུར་བཅས། །འཁོར་ལོས་སྒྱུར་བའི་རིགས་རྒྱལ་བྱུང་བས་ན། །རྒྱལ་པོའི་རིགས་ནི་རབ་ཏུ་འཕེལ་བར་འགྱུར། །སེར་སྐྱའི་གྲོང་འདི་ཤིན་ཏུ་ཕུན་སུམ་ཚོགས། །རིན་ཆེན་མཛོད་ཀྱིས་རབ་ཏུ་གང་བར་འགྱུར། །གནོད་སྦྱིན་སྲིན་པོ་གྲུལ་བུམ་གསང་བ་པ། །ལྷ་དང་ལྷ་མིན་ཚོགས་རྣམས་དབང་པོར་བཅས། །མི་མཆོག་སྲུང་བ་གང་དག་གནས་པ་རྣམས། །དེ་དག་རིང་པོར་མི་ཐོགས་ཐར་པ་འཐོབ། །གུས་དང་སྲི་ཞུ་ལ་ནི་གནས་ནས་སུ། །འདྲེན་པ་ཁྱོད་བསྟོད་བསོད་ནམས་གང་བསགས་པ། །ཀུན་ཀྱང་བྱང་ཆུབ་ཏུ་ནི་ཡོངས་སུ་བསྔོ། །མི་ཡི་དམ་པ་ཁྱོད་ལྟར་མྱུར་དུ་ཤོག །བསྐྱོད་པར་བརྩམས་པའི་ལེའུ་སྟེ་ལྔ་པའོ།། །།